﻿ዬꬃ ማጻፋ.
6.
ኣቤት ጎዳዉ! ዪሎን ታና ሴሮፓ፤ ዎይኮ ኔ ሃንቆን ታና ቃጻዮፓ። 
ኣቤት ጎዳዉ! ታኒ ዳቡራንቻ ጊዲዳ ጊሻስ ታና ማራ። ኣቤት ጎዳዉ! ታ ዎዚናይ ማዱንጺዳ ጊሻስ ታና ፓꬃ። 
ታ ሼምፖያ ኬሃ ኡንኤታዱስ፤ ሂስቲን ጎዳዉ! ታና ማዳናስ ኔኒ ኣዉዴ ጋካናስ ጋምኣኔ? 
ኣቤት ጎዳዉ! ኔኒ ሲማዳ ታና ኣሻ፤ ኔ ማሮቴꬃ ዳሮን ታና ኬሳ ኤካ። 
ሃይቂዳ ኣሲ ኦኒኔ ኔና ቆፔና፤ ዱፎን ኔና ጋላቲዛይ ዴና። 
ታ ጬጬን ጻላ ዳቡራዲስ፤ ኦማርስ ኦማርስ ታኒ ዬካሼ ታ ሂጻ ጫጲሳይስ፤ ታ ቦርኮꬃካ ታ ኣፉንꬃን ሙሲሳይስ። 
ታ ኣይፌቲ ዳሮ ኣፉንጺዳ ጊሻስ ዳቡርዳ፤ ታ ሞርኬታ ኡባ ጋሶንካ ዴሞ ኢጺዳ። 
ጎዳይ ታኒ ዬኪዛ ዬሆ ሲዪዳ ጊሻስ፥ ኢንቴኖ ኢታ ኦꬂዛ ኡባቶ! ታፔ ሃኪቴ። 
ጎዳይ ታ ሾቤꬃ ቤኢዴስ፤ ታ ዎሳካ ሲዪዴስ። 
ታ ሞርኬ ኡባቲ ዬላታናኔ ዳጋማና፤ ቆፖንታ ካዉዪዲ ጉዬ ሲማና። 
