﻿ኢዮቤ ማጻፋ.
16.
ኢዮቢካ ሂዝጊ ዛሪዴስ፤ 
«ታኒ ሃይሳ ማላ ሃሳያ ዳሮ ዎዴ ሲያዲስ፤ ኢንቴ ሳሌꬂዛ ዞራንቻታ። 
ሃይሳ ኢንቴ ሃዳ ሃሳያስ ዉርሴꬂ ባዬ? ሃይሳ ላጌ ታናራ ማርሼታና ማላ ኢንቴና ዴንꬄꬂዳይ ኣዜ? 
ኢንቴ ታ ሶሆን ታኒ ኢንቴ ሶሆን ጊዲዳኮ ካꬌን ታኒ ሁኤ ቃꬃዳ ሃኢ ኢንቴ ጊዛይሳ ኡባ ኢንቴ ቦላ ሎኤꬃ ሃሳያናኮሺን። 
ሄሳ ማላካ ታ ዶናን ኢንቴና ሚንꬄꬃናኔ ሚንꬃናስ ዳሮ ሃሳያናኮሺን። 
«ጊዶ ኣቲን ዳሮ ሃሳይኮካ ታ ሃርጌይ ሃ ሎኤና፤ ጮኡ ጋ ዳንዳይኮካ ታ ዋዬይ ታፔ ኪቼና። 
ጾሳዉ! ታና ኣሳቴꬃፌ ካሬ ኬሳዳሳ፥ ታ ዴሬ ኣሳ ኡባ ꬋይሳዳሳ። 
ታ ኣሳቴꬃይ ጉንዶይሲ ታ ቦላ ዴንዲዲ ኔኒ ናጋራንቻ ጊዲ ታ ቦላ ማርካቴስ። 
ጾሲ ታና ሃንቂዲ ታ ኣሳቴꬃ ቃንጼሬꬂዴስ፤ ታና ኢጺዲ ባ ኣች ታ ቦላ ጋርጪዴስ፤ ታ ሞርኬይ ባ ኣይፌ ታ ቦላ ማጺ ኬሲዴስ። 
ኣሳይ ታ ዩሾን ሺቄቲዲ ታ ቦላ ጬቄቲዴስ፤ ታና ቂꬌ ቃላን ባቂዳ። 
ጾሲ ታና ኢታ ኣሳታስ ኣꬂ ኢሚዴስ፤ ማካላንቻታ ኩሼን ዬጊዴስ። 
ታ ሳሮን ዳይሲኮሺን ጊዲኮካ ጾሲ ባ ሃንቆዛን ታና ሜንꬄሬꬂዴስ፤ ታ ቆꬌ ጩሊ ኦይኪዲ ታና ዳቡርሲዴስ፤ ባ ቆፋ ታ ቦላ ፖሊዴስ። 
ዎንዳፋንቻቲ ታና ጊዶꬂዳ፤ ቃꬌቴꬂ ባይንዳ ታ ኪላሆታ ቃንጼሬꬂዳ፤ ታ ጪዬዛካ ቢታ ቦላ ጉሲዳ። 
ኢዚ ታና ዛሪ ዛሪ ማዱንꬂዴስ፤ ሚኖ ኦላንቻ ማላ ዚዚሚ ዪዲ ታና ሾጪዴስ። 
«ታ ካዮቴꬃስ ማቃ ሲካ ማይኣዲስ፤ ጉዱላ ቦላ ጉፋናዲስ። 
ታ ኣይፌሶይ ዬኮን ዞኢዴስ፤ ሳካና ꬉማይ ታ ሲጲንꬅ ካሚዴስ። 
ሃይሲ ኡባይ ሃንሺን ታ ኦꬂዳ ቆሆይ ዴና፤ ታኒ ታ ዎሳ ጾሳኮ ሺሺዛይ ዎዚና ጌሻቴꬃና። 
«ቢታዞ! ታና ጋኪዳ ቆሆዛ ኔ ካሞፋ! ሱሬ ፒርዳ ጊሻስ ታ ሺሺዛ ማጋናይ ካሜቲ ኣታና ማላ ኔ ኦꬆፋ! 
ሄኮ ታስ ማርካቲዛዴይኔ ኣፋካቶ ኤቂዛዴይ ሳሎን ዴስ። 
ታ ላጌቲ ታና ሌቆን ጼሌቴስ፤ ታኒ ጊዲኮ ፑዴ ጾሳስ ዬካይስ። 
ኣስ ኣሳራ ጋꬂ ሃሳይሲዲ ማቃዪንꬂዛዴይ ዲዛይሳ ማላ፤ ኣስ ጾሳራ ጋꬂ ማቃዪንꬂዛ ኣሲ ዲዳኮ ኣዜ ዲዛይ? 
«ታ ላይꬃስ ዉርሴꬃይ ጋኬስ፤ ታ ሃ ሲማ ዮንታሶ ባናስ ጉꬃ ዎዴይ ጻላ ኣቲዴስ። 
