PSA 1:1 A haraidaan na kis tano tunotuno nong pai la murmur ira harpir audiet ira ut na sakena, ma pai tur tano ngaas audiet ing diet gil nironga, ma pai kis mah tano kinkinis audiet ira ut na kukutur.
PSA 1:2 Iesen no uno gungunuama aie wara tartaram ira harkurai tano Watong, ma i la liklik murmur ira uno harkurai ra kasakes ma ra bung.
PSA 1:3 Aie hoing tiga ina daha di soi ra gagen taah, nong i la huhuai ta ira uno pakana bung na hunhuai, ma ira pakana pai la mahmahiawa. Ma bia ing i gil ra linge sa, i la manga petlaar at.
PSA 1:4 Iesen ira ut na sakena diet pai hokaiken. Diet hoing ira pala wit ing di te paas parok sukun ira patine, ma no baiangin i puuh se.
PSA 1:5 Io kaik, ira ut na sakena diet pa na pas no bung na harkurai, ma diet ing diet gil nironga pa na tale diet bia diet na kis hurlungai tika ma ira ut na takodas.
PSA 1:6 Kanong warah, no Watong i la nesnes mur no mangana hinahaan audiet ira ut na takodas, iesen no mangana ngaas na nilon audiet ira ut na sakena na pataam hatika.
PSA 2:1 Wara bih kaik ira kantri diet gi tut na kamahar? Hohe bia ira matanaiabar diet te harpingit? Diet pai haruat ma tiga linge.
PSA 2:2 Ira king tano ula hanuo diet te tur taguro ma ira lualua ta ira pise na hala. Diet te hanuat hurlungen wara hinarubu ma no Watong ma nong mah no Watong gate gilamis ie.
PSA 2:3 Diet tange, “Dahat gi rapat se ira udir winwisaan, ma dahat na lapus ise ira udir kuun, dahat naga langalanga.”
PSA 2:4 Nong i la harkurai taar meram ra mawe i kurus. No Watong i hunane diet.
PSA 2:5 Kaik gi boor diet ma no uno ngalngaluan, ma i haramramin diet ma no uno nginangar, ma i tangtange,
PSA 2:6 “Iau te hatur no nugu king aram Saion, no nugu halhaliana uladih.”
PSA 2:7 No King i hinawas tano dadas na nianga tano Watong. Ga tange tagu, “Augu no Natigu. Katin iau te hanuat no raam Sus.
PSA 2:8 Saring iau ma iau ni tar ira kantri wara pinlawem ma no ula hanuo bakut wara num.
PSA 2:9 Nu kure diet ma tiga dadas na kinkinis na harkurai, nu parok gisiane diet hoing ra gingop di gil ma ra dadas na pikaia.”
PSA 2:10 Io huo, muat ira ut na harkurai, muat na mintot. Muat na taram ira nianga na harakatom, muat ira lualua tano ula hanuo.
PSA 2:11 Muat na taram no Watong ma ra urur, ma muat na guama, ma sen bia muat na dedar mah.
PSA 2:12 Hanapu augu tano Natine, kabi ngalngaluan ma na gil haliare ugu tano num hinahaan, kanong warah no uno bala mamahien i tale bia na tut hut kaik at mon. A haraidaan na kis ta diet ing diet barahit taar menapu ta God.
PSA 3:1 Devit ga pit iakan ra ninge na lotu. I hinhinawas utano pakana bung ing ga hilau pas ne Absalom no natine. Watong, haleng saakit um diet malentakuane iau! Haleng mah diet tut hut wara hinarubu ma iau!
PSA 3:2 Haleng diet tangtange utagu hoken, “God pa na halon ie.”
PSA 3:3 Iesen, Watong, augu tiga bahbahit luhutane iau. U la sukal tar iau ma iau balaraan baling um.
PSA 3:4 Uram hono Watong iau manga suah, ma i taram iau meram ra auno halhaliana uladih.
PSA 3:5 Iau noh suur ma iau kubaba. Iau tangahun baling kanong warah no Watong i hadadas iau.
PSA 3:6 Iau pa ni burte ira sangahul na arip ing diet hanuat luhutane iau wara suksukuane iau.
PSA 3:7 Watong, taman tut! Halangalanga iau, nugu God! Pasar ira iase diet ira nugu ebar. Warat ira ngise diet ira ut na sakena.
PSA 3:8 A harhalon i la hanhanuat meram tano Watong. Iau sasaring bia no num haraidaan na kis ta ira num matanaiabar.
PSA 4:1 A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Devit ga pit ie. Taram iau ing bia iau tataau tupas ugu, no nugu takodasiana God. Hasangeh iau sukun ira nugu tinirih. Nu bala malum tagu ma nu taram ira nugu sinasaring.
PSA 4:2 Na haruat hunanges ing muat ira matanaiabar muat na tange haliare no bilai na hinsagu? Na haruat hunanges ing muat na kalak ira linge bia, ma muat na silsilihe ira ina bis?
PSA 4:3 I tahut bia muat na palai bia no Watong i te bul hasisingen wara uno iat diet ing diet te tar tutun ira udiet nilon tana. No Watong na taram ing iau ni tataau uram ho ie.
PSA 4:4 Ta ira numuat ngalngaluan, waak muat gil ta nironga. Ing muat noh taar ta ira numuat suuh, muat na nes gilgilse ira numuat nilon ma muat na kis kunkun.
PSA 4:5 Muat na tar ira takodasiana hartabar tupas no Watong, ma muat na nurnur tana.
PSA 4:6 Haleng diet tirtiri bia, “Sige i tale bia na hamines ta bilbilai ta dahat?” Waak tar no murarang tano num matmataan na bulo sare het, Watong.
PSA 4:7 U te hahungi no kaatigu ma ra gungunuama i tamat saakit ta ira udiet gungunuama pane ira udiet wit ma ira sigar wain ing i tamtamat hanahaan.
PSA 4:8 Iau ni noh suur ma ni kubaba ma ra malum, kanong augu sen, no Watong, u la balbalaure timaan iau.
PSA 5:1 A nianga tupas no tunotuno nong i kure ira ut na ninge: da hus ira tulaal ing da inge iakan ra ninge. Devit ga pit ie. Hadade ira nugu nianga, Watong, ma nu lik leh mah ira nugu tamat na tinirih ing pai tale bia ni hapupuo ma ra nianga.
PSA 5:2 Hatarame ira nugu tintaau wara harharahut, nugu King ma nugu God, kanong iau sasaring tupas ugu.
PSA 5:3 Watong, u hadade no ingagu ra malaan. Ra malaan iau bul hawaat ira nugu sinasaring tar taam ma iau kis nanaho pane ma ra nurnuruan.
PSA 5:4 Augu pai tiga mangana God nong i guama ta ira saksakena. Pai haruat bia ira ut na sakena diet na kis tika ma ugu.
PSA 5:5 Ira ut na minok diet pa na tur ra matmataan taam. U miliguruane diet ing diet gil nironga.
PSA 5:6 U haliare diet ing diet la harabota. Ira ngangarina tunotuno ma ira ut na harababo, no Watong i manga malentakuane diet.
PSA 5:7 Iesen tano num tamat na harmarsai, iau ni laka uram narako tano num hala. Ma iau ni singa bukunkek ma ra tamat na urur tupas no num halhaliana hala na lotu.
PSA 5:8 Watong, lamus iau taar tano num taktakodas, kanong iau liklik ira nugu ebar. Hatakodasne no num ngaas menalua tagu.
PSA 5:9 Pai tale bia da nurnur ta ira nianga ing i suur ta ira ha diet. Ira kaati diet i hung ma ra harhagawai. Ira ha diet i mapus hoing no hurhuraan meram ta tiga midi di rarik tar ie. Ma diet tange ra bis ma ira karame diet.
PSA 5:10 God, tange bia diet ronga! Bale leh diet bia ira udiet harpingit na burena ta ira udiet punuko. Tule isisai ta diet kanong ira udiet magingin sakena i haleng, kanong warah, diet te tur talur ugu.
PSA 5:11 Iesen bale diet ing diet barahit narakoman taam bia diet na laro. Waak diet na inge hatikai ma ra gungunuama. Hakukuh diet ma no num harbalaurai, waing diet ing diet sip no hinsaam, diet naga pirlat ugu.
PSA 5:12 Tutun saakit, Watong, u la haidane ira ut na takodas. U beh luhutane diet ma no num harmarsai hoing tiga bahbahit.
PSA 6:1 A nianga tupas no tunotuno nong i kure ira ut na ninge: ing da inge iakan ra ninge da ting ira gita ing a mon liman ma itul a sitiring. Devit ga pit ie. Watong, waak u boor iau ma no num ngalngaluan, ma bia nu hapidanau iau ma no num nginangar.
PSA 6:2 Nu marse iau, Watong, kanong iau pai dadas haruat. Watong, halangalanga iau, kanong ira surugu i manga makmakis.
PSA 6:3 No nugu nilon i mon tamat na ngunngutaan. Na haruat um hunanges, Watong, na haruat um hunanges?
PSA 6:4 Talingaan, Watong, ma nu hasangeh iau. Halon iau murmur no num harmarsai nong pa na pataam.
PSA 6:5 Taie tikai pa na lik leh ugu ing bia i te maat. Sige tiga nong i la pirpirlat ugu mekaia tano midi?
PSA 6:6 Iau te tamaubal um tano sunuah. Tano kidilona bung ra bung iau suah tano suhugu. Ma iau hasulutne no kubegu ma ra polo na matagu.
PSA 6:7 I te hansik um ira matagu ing iau suah ma ra tapanuk. Ma dir pai dadas um, i burena ta ira agu suk.
PSA 6:8 Muat haan talur iau, muat bakut ing muat gil magingin sakena, kanong no Watong i te taram ira nugu sunuah.
PSA 6:9 No Watong i te taram no nugu tintaau wara gaiena harmarsai. No Watong i te haut leh no nugu sinasaring.
PSA 6:10 Ira nugu ebar bakut, diet na hirhir ma diet na manga tapunuk. Diet na tahurus tapukus gasien ma ra hirhir.
PSA 7:1 A ninge tane Devit nong i ga inge tupas no Watong utane Kus tano huntunaan tane Beniamin. Watong, nugu God, iau barahit taam. Harahut iau ma nu lamus iau sukun diet ing diet hagahe iau.
PSA 7:2 Diet kabi diris iau hoing tiga laion i la hardiris huo, ma diet na sapak hasiksik iau, ma taie tikai bia na harahut iau.
PSA 7:3 Watong, nugu God, bia ing iau gate gil ira sakena, bia a mon nironga ta ira limagu,
PSA 7:4 ma bia ing iau gate gil hagahe tiga nong i ga mon malum utagu, ma bia taie ta burena kaik iau gi kinau no sukagu,
PSA 7:5 io, waak tar no nugu ebar na pasak mur iau ma na papasa tagu. Waak sei na paas hasur no nugu lon taar tano pise, ma na hainoh no palatamaigu tano kaabus.
PSA 7:6 Watong, taman tut ma no num ngalngaluan. Tut hut wara hinarubu ma no nginangar ta ira agu suk. Nugu God, tangahun, ma nu bul harkurai wara harharahut iau.
PSA 7:7 Waak no kis hurlungai na matanaiabar diet na haan luhutane ugu. Hasur no num harkurai meram naliu taar ta diet.
PSA 7:8 Waak tar no Watong na kure ira matanaiabar. Watong, kure iau haruat ma ira nugu taktakodas. Augu Nong u Naliu Harsakit, kure iau haruat ma ira bilbilai ken i kis taar tano balagu.
PSA 7:9 No takodasiana God, nong i la nesnes salok ira liklik ma ira kaati nari, hapataam ira magingin na haragahai ta ira ut na sakena, ma nu balaure bat timaan ira ut na takodas.
PSA 7:10 No nugu bahbahit, ne God Nong i Naliu Harsakit, nong i la halhalon diet ing ira kaati diet i gamgamatien.
PSA 7:11 God aie tiga takodasiana ut na gil harkurai. Aie tiga God nong i la hapuasne no uno ngalngaluan ta ira kaba bungbung.
PSA 7:12 Bia ing tiga nong pa na lilik pukus, God na tes no uno wise na hinarubu, ma na sarat no hinau tano uno laplapot ma na lukun ie.
PSA 7:13 I te tagure ira uno rumus wara hinarubu. I te tagure ira uno lulungo na rumus.
PSA 7:14 Nes baak! Tiga nong i tianane ra saksakena. I balaan ma ra purpuruan ma i kaha hapuasne ra bisbis.
PSA 7:15 Tiga nong i bulbul kuun wara hakuni ira mes, na puko laka baling taar tano tungtung i kilkil ie.
PSA 7:16 No purpuruan i haburen tar ie, na wis habaling ie. Ira uno nginangar na soot habaling no uluno at.
PSA 7:17 Iau ni tanga tahut tano Watong uta ira uno taktakodas. Ma iau ni inge na pirharlat tano hinsana no Watong Nong i Naliu Harsakit.
PSA 8:1 A nianga tupas no tunotuno nong i kure ira ut na ninge: da ting ira mangana gita me Get ing da inge iakan ra ninge. Devit ga pit ie. Watong, numehet Watong, no hinsaam i manga lua harsakit tano ula hanuo bakut! U te haminas no minamarim aram naliu tano mawe.
PSA 8:2 Mekatiga ta ira palabulu diet ira nat na bulu ma ira bana, u te hatahuat a mon pirhakasing kanong ta ira am suk, wara hamarur ira ut na harhuli ma diet ing diet wara binabalu ma ra sakena.
PSA 8:3 Ing bia iau la nesnes leh no num mawe, ira pinapalim na kaskas na limaam, no teka ma ira tiding ing u gate hakisi diet ta ira udiet subaan,
PSA 8:4 asa tunat ira tunotuno kaik u lilik uta mehet? A linge bia mon mehet. Wara bih u balaure mehet ira tunotuno?
PSA 8:5 U te bul hanapu dahin mehet ira tunotuno menapu taam, ma u te hakilang mehet ma ira minamar ma ra tamat na urur.
PSA 8:6 U te bul mehet bia het na kure ira pinapalim na lumaam. U te bul ira linge bakut napu ta ira kaki mehet hokaiken:
PSA 8:7 ira sipsip bakut ma ira bulumakau, ira rakaia tano pitoka,
PSA 8:8 ira maan tano hur mauho, ira kirip tano tes, ma ira linge bakut ing diet la iaiaas hanahaan tano tes.
PSA 8:9 Watong, numehet Watong, no hinsaam i manga lua harsakit tano ula hanuo bakut!
PSA 9:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “No Minaat tano Natine.” Devit ga pit ie. Watong, iau ni pirlat ugu ma no nugu nilon bakut. Iau ni hapuasne ira num tamat na melmel na gingilaan na kinarup bakut.
PSA 9:2 Iau ni kanakana ma ni guama taam. Iau ni inge na pirharlat tupas ugu, augu Nong U Naliu Harsakit.
PSA 9:3 Ira nugu ebar diet tahurus tapukus, diet talau ma diet maat menalua taam.
PSA 9:4 Kanong warah, u te tur tano nugu palpal ma ira num gil harkurai. U te kis aram tano num kinkinis na harkurai, ma u harkurai ma ra taktakodas.
PSA 9:5 U te boor ira kantri ing diet pai Iudeia, ma u te gil haliare ira ut na sakena. U te suge hatikane se um ira hinsa diet.
PSA 9:6 A halhaliarai ing pana le pataam i te haan tupas ira adahat suk. U te dure ira udiet pise na hala, ma di te luban hatikane um diet.
PSA 9:7 No Watong i harkurai hatika. I te hatur hadadas no uno kinkinis na harkurai wara tar harkurai.
PSA 9:8 Aie na kure no ula hanuo ma ra taktakodas. Aie na balaure ira matanaiabar ma ra tutun na harkurai.
PSA 9:9 No Watong aie no barbarahit wara audiet ing di hagahe diet. I la balbalaure hadadas diet ta ira pakana bung na tinirih.
PSA 9:10 Diet ing diet nunure no hinsaam, diet na nurnur taam, kanong warah, Watong, pau la lumluban diet ing diet silsilihe ugu.
PSA 9:11 Inge na pirlat tupas no Watong nong i la kiskis aram Saion. Da harpir nalamin ta ira kantri ta ira linge gate gil,
PSA 9:12 kanong aie nong i la balbalu pukus diet ing diet bu bing tunotuno, ma pai la hadade bia tar ira sunuah ta ing diet kap tinirih.
PSA 9:13 Watong, nes ira agu suk ing diet helar tagu huo. Marse iau ma nu hatut iau talur no hanuo na minaat,
PSA 9:14 waing iau nigi hapuasne ira pirhakasing tupas ugu ra matmataan na haruat aram Saion, ma kaia iau ni guama tano num harhalon tupas iau.
PSA 9:15 Ira kantri ing diet pai Iudeia, diet te puko laka taar tano naan nong diet gate koh tar ie, ma ira kaki diet te taaba baling at tano kuun diet ga kapis tar ie.
PSA 9:16 Di nunure no Watong tano uno takodasiana harkurai. Ira ut na sakena diet taaba baling ta ira pinapalim na lima diet.
PSA 9:17 Ira ut na sakena diet tapukus taar tano midi, ma ira matanaiabar ta ira kantri bakut ing diet luban God.
PSA 9:18 Iesen ira malahahin, God pa na luban hatikane diet. No harharahut nong ira maris diet nuruan ie, pa na pataam hatika.
PSA 9:19 Nora Watong, taman tut! Waak u bale leh tiga tunotuno mon bia na petlaar ugu. Bale ira kantri ing diet pai Iudeia bia diet na tur ra matmataan taam, ma nu kure diet.
PSA 9:20 Watong, haramramin diet. Hapalaine ira matanaiabar ta ira kantri bia a tunotuno mon diet.
PSA 10:1 Watong, wara biha gu tur tapaka sakit? Wara biha gu suhe ugu ta ira sakana pakana bung?
PSA 10:2 No ut na sakena i la palpalim kawase ma ra minok diet ing taie ta harharahut ta diet. Bale diet bia ira udiet harpingit na hakuni habaling diet.
PSA 10:3 I la butbut ta ira nginarau tano kaatine. I la haidane ira gumut ma i la ngangare no Watong.
PSA 10:4 No ut na sakena pa na silihei narako ta ira uno minok. Narako tano uno lilik bakut taie ta subaan ta God.
PSA 10:5 Ira uno hinahaan i la mon hunena. I manga gotgot ma ira num harkurai i tapaka makaia ho ie. I la ngaangangar taar ta ira ana suk.
PSA 10:6 I la tangtange tana iaat, “Taie tiga linge pa na gune iau. Iau ni guama hathatikai ma pa ni haan tupas ta saksakena.”
PSA 10:7 No hana i hung ma ra nianga sakasaka. A hinarabota ma ra harburut, a haragahai ma ra sakena i la sursuur tano hana.
PSA 10:8 I la nanaho kumkumaan hutet ta ira taman. I la bubu bing hakarup ira tunotuno ing taie pa da nes leh ta nironga ta diet. I la munmunuane kuman diet ing na haliare diet.
PSA 10:9 I la nohnoh hoing tiga laion ing i susuhai taar. I la palpalim kawase diet ing taie ta harharahut ta diet ma i la rahrahi leh diet ma no uno uben.
PSA 10:10 I la halhaliare ira ana hiruo ma diet puko suur. Diet puko menapu ta ira uno dadas.
PSA 10:11 I la tangtange tana iaat, “God i te luban. I te suhe no uno matmataan ma pana le naanaas.”
PSA 10:12 Watong, taman tut! Raun no limaam, God. Waak u lumluban diet ing taie ta harharahut ta diet.
PSA 10:13 Wara biha ira ut na sakena diet gi tange hagahe God? Wara biha gi tange tana iaat, “Pana le tataau iau bia ni tur ra harkurai”?
PSA 10:14 Iesen augu, God, u la nesnes ira haragahai ma ira tapunuk. U la liklik kaike ra magingin wara balbalu pukus ma no limaam. Nong taie ta harharahut tana, i la tartar ise tar ie ukaia ho ugu. Augu no ut na harharahut ta ira tintana.
PSA 10:15 Kutus no dadas tano ut na sakena. Kurei ta ira uno magingin sakena tuk bia pa nu nes leh habaling a mon sakena.
PSA 10:16 No Watong aie no tamat na lualua hathatikai. Ira sakana kantri diet na panim sukun no uno pise.
PSA 10:17 Watong, u te hadade ira sinisip ta ira maris. Nu haragat diet ma nu hadade ira udiet tintaau.
PSA 10:18 Nu harahut ira tintana ma diet ing di hagahe diet, waing ira tunotuno mekai ra ula hanuo, diet pa na haburut habaling ira mes.
PSA 11:1 A nianga tupas no tunotuno nong i kure ira ut na ninge: Devit ga pit iakan ra ninge. Aram narakoman tano Watong iau kis barahit taar. Hobibih balik bia i tale ugu bia nu tange tagu bia, “Pupungo laah hoing tiga maan uram tano num uladih.”
PSA 11:2 Kanong warah, ira ut na sakena diet te taguro taar wara laplapot. Diet te bul tagure ira udiet rumus taar tano hinau na laplapot wara laplapot mekaia ra kankado diet ing ira kaati diet i gamgamatien.
PSA 11:3 Bia ing kana di halhaliare ira burena ira bilbilai, asa mah um ing ira ut na takodas diet tale bia diet na gil?
PSA 11:4 No Watong ie kenam narakoman tano uno halhaliana hala. No Watong i kis taar kenam tano uno kinkinis na harkurai aram ra mawe. I nes tar ira tunotuno tano ula hanuo. Ira matana i walar diet.
PSA 11:5 No Watong i walar ira ut na takodas, ma i malentakuane ira ut na sakena ma diet ing diet sip ira dadas na magingin na halhaliarai.
PSA 11:6 Na burange ira lakit na iaah ma ra solam ing i kalkalangaruan taar ta ira ut na sakena. Tiga mamahiana dadaip diet na kap bia udiet kunkulaan.
PSA 11:7 Kanong warah, no Watong i takodas. I manga sip ira takodasiana magingin. Ira ut na takodas, diet na nes no matmataan tana.
PSA 12:1 A nianga tupas no tunotuno nong i kure ira ut na ninge: ing da inge iakan ra ninge da ting ira gita ing a mon liman ma itul a sitiring. Devit ga pit ie. Harahut, Watong, kanong taie um tikai ta diet ing diet tar tutun ira udiet nilon taam. Diet ing diet mur timaan God, diet te panim laah um.
PSA 12:2 Diet bakut diet la habato ira udiet harwis. Ira palabulu diet la harhau ma ra harabota.
PSA 12:3 Na bilai bia no Watong na hapataam ise ira harhau ta ira palabulu diet ma ira karame diet bakut ing diet la butbut me
PSA 12:4 ing diet la tangtange bia, “Mehet na petlaar ma ira karame mehet. Mehet at, mehet kure ira palabulu mehet. Taie tikai i tale bia na tikal mehet.”
PSA 12:5 No Watong i tange hoken, “I taar burena ta ira magingin na haragahai taar ta ing taie ta harharahut ta diet ma ira sunuah na marmaris ta ira maris, iau ni taman tut um kaiken. Iau ni balaure bat diet sukun sige diet ing diet tange hagahe diet.”
PSA 12:6 Ma ira nianga tano Watong i bilai harsakit hoing ira siliwa ing di tun sare leh narako tano tamat na mamahien tano ula iaah wara kapkap se ira bilinge ra liman ma iruo na pakaan.
PSA 12:7 Watong, het nunure bia nu nes mur taar at het ma nu balaure het hatikai sukun kaiken ra mangana tunotuno.
PSA 12:8 Ira ut na sakena diet haan hurbit bia um, huo mah asa ing i tar hirhir, di hatamat taar ra matmataan ta ira tunotuno.
PSA 13:1 A nianga tupas no tunotuno nong i kure ira ut na ninge: Devit ga pit iakan ra ninge. Nu luban hatikane um iau? Hunanges nu lik leh iau, nora Watong? Na haruat hunanges ing nu suhe no matmataan taam talur iau?
PSA 13:2 Na haruat hunanges bia iau ni haruburubu ma no nugu lilik, ma ta ira kaba bungbung no kaatigu na tapunuk? Na haruat hunanges ira nugu ebar diet na petlaar iau?
PSA 13:3 Nes iau ma nu taram iau, nora Watong, nugu God. Bul pukus no gungunuama ta ira matagu. Bia taie, iau ni kubaba na minaat.
PSA 13:4 No nugu ebar na tange, “Iau te petlaar ie,” ma ing diet malentakuane iau diet na guama bia iau puko.
PSA 13:5 Iesen iau nurnur tus tano num mangana harmarsai nong pa na haan talur iau. No kaatigu i kanakana tano num harhalon.
PSA 13:6 Iau ni inge tupas no Watong, kanong gate gil ra bilai tagu.
PSA 14:1 A nianga tupas no tunotuno nong i kure ira ut na ninge: Devit ga pit iakan ra ninge. No ulba i tange narako tano kaatine, “Taie ta God.” Ira udiet nilon i mapus sakasaka ma da miliguruane ira udiet tintalen. Taie tikai i gil no tahut.
PSA 14:2 No Watong i nanaas suur meram ra mawe ta diet ing a tunotuno mon diet wara nesnes ing bia tikai i palai ma bia tikai i sisilih uta God.
PSA 14:3 Diet bakut diet te siel wiis laah. Diet tika bakut, diet te hanuat sakena. Taie tikai pai gil no tahut, taie tunat tikai.
PSA 14:4 Hohe, pai tale bia ira ut na gil nironga diet na nunure tiga linge? Diet ing diet harsirikane ira nugu matanaiabar hoing tikai i ien beret, ma diet pai la sasaring tupas no Watong.
PSA 14:5 Diet ke, nora ramramin i manga ubal diet, kanong God i kis tika ma ira ut na takodas.
PSA 14:6 Muat ira ut na sakena, muat habatbat ira lilik udiet ira maris, iesen no Watong aie no udiet barbarahit.
PSA 14:7 Maris, iau manga sip bia no harhalon ta ira Israel na hanuat me Saion! Ing no Watong na bul pukus habaling ira bilbilai taar ta ira uno matanaiabar, i tahut bia ira bulumur te Iakop diet na guama. I bilai bia ira Israel diet na laro.
PSA 15:1 Devit ga pit iakan ra ninge. Nora Watong, sige i tale bia na kis narako tano num halhaliana subaan? Sige i tale bia na lon aram tano num halhaliana uladih?
PSA 15:2 Aie sen mon nong pa di tung ie ta mon nironga ta ira uno hinahaan, ma nong i la gilgil ira takodasiana magingin, nong i la tangtange ira tutun meram tano kaatine,
PSA 15:3 ma pataie ta nianga na haragahai tano karamena, ma nong pai gil ra sakena tano uno harwis ma pai ianga harakiput utano hinsakana,
PSA 15:4 ma nong i malentakuane no gotgot na tunotuno, iesen i la ruru diet ing diet urur tano Watong, ma nong i la gilgil haruat ta ing i te sasalim urie, ma pataie ta linge bia no uno kunubus i hagahe habaling at ie,
PSA 15:5 ma nong mah i la tartar ira uno kinewa ma pai la liklik leh bia na hatamat no uno kinewa ing no tunotuno na balu pukus, ma pai la hauhaut leh tikai bia na kukulei wara gil sakena taar tano ut na takodas. Aie nong i la gilgil kaiken ra linge, pa na tale bia da gunei.
PSA 16:1 A mangana ninge tane Devit. God, balaure bat iau, kanong narako taam iau ni barahit.
PSA 16:2 Iau ga tange tano Watong, “Augu no nugu Tamat. Iau pai kap tiga bilai na linge sen bia mekaia ho augu sen mon.”
PSA 16:3 Ira halhaliana sige diet ken ta ira numehet pise, diet ing ira minamari diet i tamat, ma ira nugu kanakana bakut i kis narako ta diet.
PSA 16:4 Ira marmaris ta diet ing diet hilau mur ira mes na god na tamat hanahaan. Iau pa ni hurange ise ira udiet hartabar na de tupas ira palimpuo, ma iau pa ni kilam mah ira hinsa diet.
PSA 16:5 Watong, augu at no pinlawegu ma no nugu gingop, ma u te balaure timaan no nugu subaan.
PSA 16:6 U te igah tar no nugu umaan kai ra bilai na katon. Tutun saakit, iau te hatur kawase ra melmel na pinlawegu.
PSA 16:7 Iau ni pirlat no Watong, aie nong i la harharahut iau ma no uno minminonas na nianga. Huo mah ra bung no kaatigu i la pirpir iau.
PSA 16:8 Iau te bul hatikane tar no Watong menalua tagu. Aie ken ra kata na limagu, kaik, pai tale be da gune iau.
PSA 16:9 Io kaik, no kaatigu i guama ma no karamegu i kanakana, no palatamaigu mah na kis timaan sukun ira hiniruo,
PSA 16:10 kanong pa nu waak se tar iau tano hanuo na minaat. Iau te tar tutun no nugu nilon taam, kaik pa nu tode tar iau bia ni marsang.
PSA 16:11 U te hapalaine iau ta ira ngaas na nilon. Kaia ra matmataan taam, nu hahungi iau ma ra gungunuama, ma katiga hono kata na limaam, nu hahungi iau ma ra kanakana nong pana le pataam.
PSA 17:1 A sinasaring tane Devit. Watong, sa talingaam tano nugu takodasiana tintaau. Hadade no nugu sunuah. Taram no nugu sinasaring, nong i hansur mekatiga ta ira palabulugu ing pai harabota.
PSA 17:2 Iau sasaring bia nu hamines hapalaine bia iau pai gil ta sakena. Na tahut bia ira mataam at na nas asa ing i takodas.
PSA 17:3 Ing bia u la nesnes salok no kaatigu ma u la rare timaan iau ra bung, ma ing mah bia u la walwalar iau, pa nu silihe tiga linge. Iau te bul tar no nugu dadas na lilik bia no hagu pa na gil magingin sakena.
PSA 17:4 Iau pai la murmur ira gingilaan ta ira tunotuno mon. Taie. Iesen iau te mur no nianga ta ira palabulum. Huo, iau te haan paas laah tano subaan ta ira ut na haragawai.
PSA 17:5 Ira pinpaas na kakigu i te mur ira num sinalil. Ira kakigu pai le malmalagir.
PSA 17:6 God, iau tataau tupas ugu, kanong augu nu balu iau. Taram iau ma nu hadade no nugu sinasaring.
PSA 17:7 Haminas no num tamat na harmarsai bia daga ngalabo tano bilbilai tana. Augu nong u la halhalon ma no dadas na kata na limaam diet ing diet la kis barahit taam talur ira adiet suk.
PSA 17:8 Balaure iau narako ta ira limaam na harhalon. Gawane leh iau hoing tiga huna kareka i la pabong ira natine.
PSA 17:9 Gawane leh iau huo talur ira ut na sakena ing diet helar tagu, ma diet ira nugu ebar ing diet tur luhut iau wara bubu bing iau.
PSA 17:10 Pataie ta harmarsai ta ira udiet nilon. Ma ira ha diet i iangianga ma ra minok.
PSA 17:11 Diet te mur ira pinpaas na kakigu ma diet tur luhutane iau. Diet mate dit iau ma diet taguro wara isise iau ures napu tano pise.
PSA 17:12 Diet hoing tiga laion i taburungan pane no rana hiruo, hoing tiga tamat na laion i riirih haan.
PSA 17:13 Taman tut, Watong! Tur bat diet ma nu me bul hasur diet. Halon iau ma no num wise sukun ira ut na sakena.
PSA 17:14 Watong, ma no limaam nu halon iau sukun kaiken ra mangana tunotuno. Nu halon iau talur ira tunotuno ta iakan ra ula hanuo ing ira udiet kunkulaan ta ira udiet nilon kaiken tano ula hanuo. Diet ing u manga kalak diet, nu tabar hahos diet, ma na kisi mah ira nati diet. Ma diet na bul hulungan ra bunbulaan uta ira tubu diet.
PSA 17:15 Ma iau, iau ni nes no num matmataan kanong iau te gil ra takodas. Ing iau ni pada, iau ni guama wara nesnes ugu.
PSA 18:1 A nianga tupas no tunotuno nong i kure ira ut na ninge: Devit no tultulai tano Watong ga pit iakan ra ninge. Ga inge kaiken ra nianga tupas no Watong ing no Watong ga halon ie sukun ira lima diet ira uno ebar ma sukun no limane Sol. Ma ga tange hoken: Iau sip ugu, Watong, no nugu dadas.
PSA 18:2 No Watong aie no nugu haatkis, no nugu subaan na munmun ma no nugu Ut na Harhalon. No nugu God aie no nugu haatkis, aie nong iau barahit tana. Aie no nugu bahbahit ma no dadas tano nugu harhalon, no nugu dadas na balo.
PSA 18:3 Iau tataau uram tano Watong nong i takodas bia da pirlat ie, ma iau te langalanga sukun ira nugu ebar.
PSA 18:4 Iau te wiwis taar um tano winwisaan na minaat. No dadas na tektek na halhaliarai i te kap iau.
PSA 18:5 No winwisaan tano midi ga wiwisane iau. No kuun na minaat ga tur mamate iau.
PSA 18:6 Tano nugu tapunuk iau ga tataau uram tano Watong. Iau ga suah uram hono nugu God wara harharahut. Meram tano uno hala na lotu ga hadade no ingagu. No nugu sunuah ga haan tupas ie ma ga hadade.
PSA 18:7 No ula hanuo ga dedar, gaam kunakunar, ma ira burena ira uladih ga gunagune. Diet ga dedar kanong warah God ga ngalngaluan.
PSA 18:8 A mis ga tubuala suur ta ira matana ngarngarona. No iaah nong i la tuntun haliare ira linge ga hansur tano hana. Ma no kalangaruana iaah ga lulungo suur tano hana mah.
PSA 18:9 I ga harbasiane no mawe ma gaam hansur. Ga papaas kora ta ira bungbungana bahuto.
PSA 18:10 I ga kawas hut ta ira kerubim ma gaam pupungo. Ga beel laah ta ira babana no baiangin.
PSA 18:11 I ga gil no kankado bia uno hanuo na munmun, ma uno pupulus wara hakukuh bus ie ma ra bungbungana bahuto na bata tano mawe.
PSA 18:12 Meram tano pilpilakas tano uno matmataan, ira bahuto diet ga haan saakit tika ma ra polo na bata ho ira haat, ma ra tamat na hile.
PSA 18:13 No Watong ga ianga parpar meram ra mawe. No ingana Nong i Naliu Harsakit ga kakel hoing ra taram karot.
PSA 18:14 I ga lapotane ira uno rumus ma gaam pasak harbasiane ira ebar. A tamat na hile ga haliare harbasiane diet.
PSA 18:15 Ira salil tano balana no tes ga hanuat puasa, ma ira burena no ula hanuo ga kis palai tano num harboor, Watong, ing no dadas na mansungum ga suur tano matana ngarngarom.
PSA 18:16 I ga sasangaha suur meram naliu ma gaam palim leh iau, gaam sor leh iau mekaia ra lamlamana taah.
PSA 18:17 Ga halangalanga iau sukun no nugu dadas na ebar ma sukun mah ira sukagu ing diet manga dadas tagu.
PSA 18:18 Diet ga tur mamate iau tano bunguno no nugu halhaliarai iesen no Watong ga palim hatatol iau.
PSA 18:19 Ga kap hasur tar iau ukai tiga bilai na sibaan na harbalaurai. Ga harahut iau kanong ga kanakana utagu.
PSA 18:20 No Watong i te balu iau haruat ma ira nugu takodasiana magingin. I te kul iau haruat ma ira limagu ing pai bilinge.
PSA 18:21 Kanong warah, iau te mur ira ngaas tano Watong. Iau pai le gil ta nironga be ni tar tihigu tano nugu God.
PSA 18:22 Ira uno harkurai bakut kanik menalua tagu. Iau pai le tur talur ira uno harkurai.
PSA 18:23 Iau te mur ira bilai sen mon ra matmataan tana, ma iau pai le gil ta sakena.
PSA 18:24 No Watong te balu iau haruat ma ira nugu takodasiana magingin. I te kul iau haruat ma ira limagu ing pai bilinge ra matmataan tana.
PSA 18:25 Ta diet ing pai haruat bia da nurnur songa ta diet, nu haminas be augu at pai haruat bia da nurnur songa taam. Ta diet ing diet takodas harsakit, nu haminas bia u takodas harsakit.
PSA 18:26 Ta diet ing diet gamgamatien, nu haminas ugu bia augu at u gamgamatien, iesen ta ira sakapsakapuana nu haminas be a keskes ugu.
PSA 18:27 U la halhalon diet ira ut na kis matien, iesen u la bulbul hasur diet ing ira mata diet i latlaat.
PSA 18:28 Watong, u la halulungo tar at no nugu laam. Nugu God, u la pukpukusane no nugu kankado wara madaraas.
PSA 18:29 Ing nu harharahut iau, ni petlaar bia ni harsomane timaan tiga matana ubane. Ing no nugu God i tika ma iau, iau ni kawe tiga tamat na balo.
PSA 18:30 Iesen ing ta God, ira uno ngaas i bilai harsakit. No nianga tano Watong i tutun, taie ta bis tana. Aie tiga bahbahit ta diet ing diet na barahit tana.
PSA 18:31 Kanong warah, no Watong sen mon aie no God. Taie tiga mes. Ma sige mah um no Haatkis? Taie tiga mes. No udahat God sen mon.
PSA 18:32 Ne God at nong i la tartar dadas tagu, ma i la hatakodasne timaan no nugu ngaas.
PSA 18:33 I la gilgil ira kakigu hoing ira kakina dia. I la harharahut iau waing nigi tur aram naliu ra uladih.
PSA 18:34 I la tangtagure ira iruo limagu wara hinarubu, waing ni haruat bia ni lukun tiga dadas na laplapot saakit.
PSA 18:35 U tar tagu no num bahbahit na papaas hasur ira ebar. Ma no kata na limaam i la hadadas iau. U la tudu suur wara hatamat iau.
PSA 18:36 U la gilgil hatapegas no ngaas napu tagu, waing ira kakigu pa na surmalagir.
PSA 18:37 Iau ga pasak mur ira nugu ebar ma iau gaam pasak soot diet. Iau pa ga tahurus tuk iau gaam haliare diet.
PSA 18:38 Iau ga gisiane diet, kaik diet pa ga haruat be diet na tut hut. Diet ga puko napu ta ira kakigu.
PSA 18:39 U ga hapapalim iau ma ra dadas wara hinarubu. U ga gil ira nugu ebar bia diet na singa bukunkek ra matmataan tagu.
PSA 18:40 U ga gil ira nugu ebar bia diet na tar tihi diet tagu, ma diet naga hilau, ma iau te haliare diet ing diet ga malentakuane iau.
PSA 18:41 Diet ga suah wara harharahut, iesen ga taie tikai wara halhalon diet. Diet ga suah uram hono Watong, iesen pa ga babalu.
PSA 18:42 Iau ga milau diet, diet gaam maririsuan hoing ra kaabus no dadaip i kap ie. Iau ga hurange hasur diet hoing ra pikaia ta ira ngaas na hinahaan.
PSA 18:43 U te halangalanga iau sukun ira halhaliarai ta ira matanaiabar. U te gil iau no lualua ta ira hunhuntunaan ta ira mes na hanuo. Ira matanaiabar iau pa ga nunure diet, diet kis napu tagu.
PSA 18:44 Ing at mon diet hadade iau, diet taram iau. Ira wasire ing pai Israel diet, diet ruruo menalua tagu.
PSA 18:45 Diet bakut, i puko ira udiet nurnuruan, ma diet hanuat ma ra dedarine diet mekaia ta ira udiet dadas na subaan diet barahit kaia.
PSA 18:46 No Watong i lon! A pirharlat tupas no nugu Haatkis! Da hatamat God no nugu Ut na Harhalon.
PSA 18:47 Aie no God nong i la turtur wara utagu, nong i paas hasur ira hunhuntunaan ta ira mes na hanuo, ma i bul diet napu ra nugu harkurai,
PSA 18:48 ma nong mah i la halhalon leh iau mekaia ta ira nugu ebar. U ga hatamat iau naliu ta ira sukagu. Mekaia ta ira ut na ngalngaluan u ga halangalanga ise iau.
PSA 18:49 Io kaik, Watong, iau ni pirlat ugu nalamin ta ira hunhuntunaan ta ira mes na hanuo. Iau ni inge na pirhakasing tano hinsaam.
PSA 18:50 I te tar tano uno king no dadas wara papaas hasur ira ebar. I haminas ra harmarsai nong pai la patpataam taar ta nong ga gilamis ie. I haminas ie taar tane Devit ma ira uno bulumur, ma pana le pataam.
PSA 19:1 A nianga tupas no tunotuno nong i kure ira ut na ninge: Devit ga pit iakan ra ninge. No mawe na hapuasne no minamarine God. No mauho na hapalaine ira pinapalim ta ira iruo limana.
PSA 19:2 Ta ira kaba bung no mawe i la hurhurange hawaat ra nianga. Ta ira bung ra bung bakut i la bulbul hapalaine ra minmintot.
PSA 19:3 Taie tiga kapis nianga bia tiga nianga, be no ingana pa di hadadei.
PSA 19:4 No ingana no mawe i la hanahaan harbasia tano ula hanuo bakut. Ira katona nianga i haan taar ta ira hauhawatine no ula hanuo. Aram ra mawe God i te hatur tiga palpalih wara utano kasakes,
PSA 19:5 nong i haruat ma tiga marawaan i wara tinolen, i hanhansur mekaia hono uno hala hoing tiga ut na hinilau i guguama bia na hilau mur no uno ngaas na hinilau.
PSA 19:6 No kasakes i tut hut ma tiga ngusuno no mawe ma i hilau luhutanei ukatiga tiga mes na palpal. Taie tiga linge pai mun tano uno mamahien.
PSA 19:7 No harkurai tano Watong i takodas harsakit. I hasigarine ira lon. Ira hartula tano Watong, i tale bia da nurnur ine. I tar minminonas ta diet ira bawine.
PSA 19:8 Ira harkurai tano Watong i takodas. Diet la tartar gungunuama tano kaati nari. Ira hartula tano Watong i pilpilakas. Diet la tartar madaraas ta ira mata nari.
PSA 19:9 No bunurut utano Watong i gamgamatien, ma na tur hathatika. Ira bul harkurai tano Watong i tutun ma a takodasiana harsakit.
PSA 19:10 No matana kaike ra harkurai i lua tano kunkulaan ta ira gol, ma i manga tamat mah ta ira tutun na gol. Diet manga namnamien ta ira tiri na imara, ma ta ira tiri na imara makaia ra posi diet.
PSA 19:11 Diet la haakatom no num tultulai. Bia tikai na taram, na palim kawase ra tamat na harkul.
PSA 19:12 Sige i tale be na nes kilam leh ira uno nironga? Nu lik luban ira nugu saksakena ing i kis susuhai taar.
PSA 19:13 Balaure iau, no num tultulai, bia pa ni sip bia ni gil sakena. Waak bia nu haut leh iakano magingin wara gilgil sakena bia na gau iau. Bia na hokaiken, pai tale bia tikai na tung iau ta nironga, ma iau ni langalanga sukun ra tamat na nironga.
PSA 19:14 Iau sip bia ira nianga mekai ra hagu ma ira lilik aram tano balagu na nasnas maririsuan tano num matmataan, Watong, no nugu Haatkis, ma no nugu Ut na Kul Halangalangai.
PSA 20:1 A nianga tupas no tunotuno nong i kure ira ut na ninge: Devit ga pit iakan ra ninge. Iau sasaring bia no Watong na taram ugu ing u kis narako ra harangungut. I tahut bia no hinsana no God tane Iakop na nes mur ugu.
PSA 20:2 Iau sasaring bia na tula harharahut meram ra halhaliana sibaan, ma na haut be da hadadas ugu meram Sion.
PSA 20:3 Iau sasaring bia na lik bakut leh ira num hartabar, ma na bale leh ira num hartabar ing u ga tun.
PSA 20:4 Iau sasaring bia na tar no masmasingan na kaatim taam, ma na gil ira num lilik wara gilgil tiga linge bia na hanuat tutun.
PSA 20:5 Het na kup ma ra gungunuama ing nu paas hasur ira num ebar, ma het na tatik haut ira nuhet hakilang na gungunuama tano hinsana no udahat God. Iau sip bia no Watong na pakile haruatne bakut ira linge u saring.
PSA 20:6 Kaiken um iau nunure be no Watong i halhalon no tunotuno nong i te gilamis tar ie. I taram ie meram hono uno halhaliana sibaan ram ra mawe, ma na halon ie ma no dadas tano kata na limana.
PSA 20:7 Ari diet nurnur ta ira karis ma ari diet nurnur ta ira hos wara hinarubu, iesen dahat nurnur tano hinsana no Watong, no udahat God.
PSA 20:8 Di sal hatudu diet ma diet puko, iesen dahat, dahat na tut hut ma dahat na tur dikdikit.
PSA 20:9 Watong, halon no king! Taram het ing het tataau!
PSA 21:1 A nianga tupas no tunotuno nong i kure ira ut na ninge: Devit ga pit iakan ra ninge. Watong, no king i guama tano num dadas. I manga tamat no uno gungunuama ing u harahut ie wara papaas hasur ira uno ebar.
PSA 21:2 U te bale tar tana no masmasingan tano kaatine, ma pau mus bat no sinasaring ta ira palabuluno.
PSA 21:3 U te haatne leh ie ma ra haraidaan na bilai na linge, ma u te bul tiga balaparik na lualua di gil ma ra gol tano uluno.
PSA 21:4 Ga saring ugu bia na lon, ma u ga tar nilon tana, a nilon hathatika nong pa na pataam.
PSA 21:5 No minamarine no king i manga tamat kanong u la harharahut ie wara bulbul hasur ira uno ebar. U te hatamat no hinsana ma u te hasigam ie ma no melmel na minarine.
PSA 21:6 Tutun saakit, u te bale tar tana ira haraidaan ing pa na pataam. Ma i hung ma ra gungunuama kanong u kis tika mei.
PSA 21:7 Kanong warah, no king i so tar no uno nurnuruan tano Watong. Pa na gunagune kanong no harmarsai ta Nong i Naliu Harsakit pa na pataam.
PSA 21:8 No limaam na palim kawase ira num ebar bakut. No dadas na kata na limaam na palim kawase ira am suk.
PSA 21:9 Tano pakana bung nu harapuasa, nu halo diet hoing ra iaah i manga mamahien. Tano uno nginangar no Watong na kanam diet, ma no uno iaah na ien diet.
PSA 21:10 Nu gil haliare ira udiet bulumur sukun no ula hanuo, ma na taie ta nati diet nalamin ta ira tunotuno.
PSA 21:11 A linge bia be diet pingpingit sakena utaam ma ira udiet lilik kumkumaan, iesen diet pa na petlaar tiga linge.
PSA 21:12 Kanong warah, nu gil diet be diet na talingaan tapukus ing nu tulus diet ma no num laplapot.
PSA 21:13 Watong, da raun haut ugu uram naliu saakit kanong augu, u dadas. Het na inge ma het na pirlat no num baso.
PSA 22:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “No Dia tano Malaan.” Devit ga pit ie. Nugu God, nugu God, wara biha u te malok se iau? Wara biha u manga tapaka wara halhalon iau? U manga tapaka mah wara tartaram ira nugu sunuah na ngunngutaan?
PSA 22:2 Nugu God, iau tataau ra malaan tuk ra matarahien, iesen pau babalu. No bung i hanuat ma iau pai kis kunkun.
PSA 22:3 Iesen di nes kilam ugu bia no udiet King, kanong augu at u halhaal nong ira Israel diet pirpirlat ugu.
PSA 22:4 Ira hintubu mehet diet ga so nurnuruan taam. Diet ga nurnur ma u ga halangalanga ise diet.
PSA 22:5 Diet ga suah tupas ugu ma diet ga kap harhalon. Narako taam diet ga so nurnur ma diet pa ga tapunuk, kanong u ga harahut.
PSA 22:6 Iesen iau tiga kalola ma pai a tunotuno iau. Ira tunotuno diet malentakuane iau ma ira matanaiabar diet mikiane iau.
PSA 22:7 Diet ing diet nesnes iau diet kukutur tagu. Ing diet hamalahuan iau, diet lawa ul ma diet tange,
PSA 22:8 “I te so nurnur tano Watong. Waak tar at no Watong na harahut ie. Waak tar at no Watong na halon ie, tako no Watong i kanakana at tana.”
PSA 22:9 Iesen u ga kap hasur iau mekatiga tano lienat. U ga pakile bia iau ni so nurnur taam, ing mah iau ga susus baak tano pawasigu.
PSA 22:10 Ing di ga kaha iau di ga suro tar iau taam. Ing iau hanuat tano lienat tano makai, u gabe hanuat no nugu God.
PSA 22:11 Waak bia u tapaka tagu, kanong warah ira tinirih mon ken hutet ma taie tikai bia na harahut.
PSA 22:12 Haleng tumatena bulumakau diet tur bat iau. Ira dadasina tumatena bulumakau me Basaan diet tur luhutane iau.
PSA 22:13 Hoing ira ngangarina laion diet sapsapak ira adiet hiruo, diet papos hatamat ira ha diet wara ienien iau.
PSA 22:14 No nugu nilon i hureng hoing ra taah di hurange se, ma ira surugu pai harpasum baal um. No nugu lon i te maalum hoing ira wax i pola.
PSA 22:15 Ira nugu dadas i te mamasa hoing ra pikaia no kasakes i te rang ma i daakes, ma no karamegu i te patep naliu narako tano hagu. U te waak tar iau bia ni maat kai ra kaabus.
PSA 22:16 Ira paap diet tur bat iau. Tiga kaba sakana tunotuno dal te tur luhutane iau, dal te gaso ira limagu ma ira kakigu.
PSA 22:17 Iau tale bia ni was bakut ira surugu. Ira matanaiabar diet ngokngok ma diet minminok.
PSA 22:18 Diet harpalau ma ira nugu sigasigam ma diet mamagu ma ra satu utano nugu maal.
PSA 22:19 Iesen augu, Watong, waak bia u tapaka tagu. Nugu Ut na Harhalon, hanuat gasien wara harharahut iau.
PSA 22:20 Halon iau sukun no wise na hinarubu bingibing, ma no nugu melmel na nilon mekaia ta ira paap.
PSA 22:21 Halon iau mekaia ra ha diet ira laion. Harahut iau mekaia ra lako diet ira rakaia na bulumakau.
PSA 22:22 Iau ni hinawas palai tano hinsaam ta ira tasigu. Tano kinkinis hurlungai iau ni pirlat ugu.
PSA 22:23 Pirlat ie, muat ing muat burte no Watong. Muat bakut ira bulumur ta Iakop muat na urur tana. Muat na nes hatamat ie, muat bakut ira bulumur ta Israel!
PSA 22:24 Kanong warah, pai malentak ma pai tar tihine ta ira ngunngutaan ta diet ing diet kaha tinirih. Pai suhe no matmataan tana ta diet iesen i taram diet ing diet tataau wara harharahut.
PSA 22:25 Tano tamat na kinkinis hurlungai iau ni pirlat ugu uta ira linge u gate gil. Iau ni pakile haruatne no nugu kunubus ra matmataan ta diet ing diet urur taam.
PSA 22:26 Ira maris diet iaan ma diet na hahos. Diet ing diet silsilihe no Watong diet na pirlat ie. I tahut bia muat na lon hathatika!
PSA 22:27 Ira hauhawatine no ula hanuo bakut diet na lik leh ma diet na tapukus taar tano Watong. Ira hatatamaan tano ula hanuo bakut diet na lotu tupas ie,
PSA 22:28 kanong no Watong, aie no King, ma i kure bakut tar ira kantri.
PSA 22:29 Ira watong bakut tano ula hanuo diet na iaan ma diet na lotu tupas God. Ira minaat diet na singa bukunkek tana, diet ing pai tale bia diet na balaure habaling at diet bia diet pa naga maat.
PSA 22:30 Ira nati diet ing diet na lon namur, diet na taram ie. Diet na hinawase ira udiet bulumur tano Watong.
PSA 22:31 Diet na hinawas palai ta ira matanaiabar ing baak pa di kaha diet ta ira uno taktakodasiana magingin, kanong warah, God i la harharahut ira uno matanaiabar.
PSA 23:1 Devit ga pit iakan ra ninge. No Watong aie no nugu ut na harbalaurai. Iau pa ni supi baal um tiga linge.
PSA 23:2 I la waak tar iau bia ni sangeh kai ra bilai na huro i nuhnuhuan. I la lamlamus iau ta ira gagena ira taah ing i la salsaal kunkun.
PSA 23:3 I la hasigarine habaling iau. I la lulue iau ta ira ngaas na taktakodas waing daga urur tana.
PSA 23:4 Ing mah bia iau haan narako tano kankado na salil na minaat, iau pa ni burte tiga saksakena. Kanong warah, u sakate iau. No num kapsil ma no num buko na harharahut, dir habalaraan tar iau.
PSA 23:5 U tagure tiga suuh na nian menalua tagu, ra matmataan ta ira nugu ebar. U puk no ulugu ma ra wel. No nugu gingop i manga hung, gi bureng.
PSA 23:6 Tutun saakit, a bilbilai ma ra harmarsai na mur iau ta ira nugu bungbung na nilon bakut. Ma iau ni kis hathatikai narako tano ngasina no Watong.
PSA 24:1 Devit ga pit iakan ra ninge. Tano Watong no pise ma ira linge bakut tana. No ula hanuo mah ma diet ing diet la lon aram naliu tana auno.
PSA 24:2 Kanong warah, no Watong at ga hakisi no ula hanuo narako ta ira tes, ma ga hatur mah ie naliu ta ira taah.
PSA 24:3 Sige na kawas no uladih tano Watong? Ma si mah na tur narako tano uno halhaliana subaan?
PSA 24:4 Aie nong ira iruo lumana pai bilinge ma no kaatine i gamgamatien, pa na lotu tupas ira palimpuo, ma pa na sasalim ma ira linge pai tutun.
PSA 24:5 Na kap no haraidaan meram tano Watong, ma God, no uno Ut na Harhalon, na haminas bia a takodasiana ie.
PSA 24:6 Ira mangana matanaiabar hokaiken, kaike ra tunotuno ing diet silsilihe mur ie. Diet la silsilihe no num matmataan, God ta Iakop.
PSA 24:7 Muat ira matanangaas, tapapos! Muat ira matanangaas menalua saakit, tamapapos, waing no King nong a tamat no minarine na me haan laka.
PSA 24:8 Sige iakan ra King nong i tamat no minarine? No Watong nong a dadasinei ma ana tamat na baso, no Watong nong ana mon tamat na dadas wara hinarubu.
PSA 24:9 Muat ira matanangaas, tapapos! Muat ira matanangaas menalua saakit, tamapapos, waing no King nong i tamat no minarine na me haan laka.
PSA 24:10 Ma sige ie, iakano King nong i tamat no minarine? No Watong Nong i Dadas Harsakit. Aie no King nong i tamat no minarine.
PSA 25:1 Devit ga pit iakan ra ninge. Iau raun haut no nugu lon ukatiga ho ugu, Watong.
PSA 25:2 Nugu God, iau so no nugu nurnuruan taam. Waak u balbale se tar iau bia da bul iau ra hirhir ma bia ira nugu ebar mah diet pa na paas hasur iau.
PSA 25:3 Taie tikai ing i kis nanahai taam bia tiga pakana bung na kaha hirhir, iesen diet ing diet la gilgil ra sakana hasakit ma taie ta burena, diet na kaha hirhir.
PSA 25:4 Tuko haminas iau ta ira num ngaas, Watong. Hausur iau ta ira num tintalen.
PSA 25:5 Lue iau narako ta ira num tutun ma nu hausur iau, kanong augu, God, no nugu Ut na Harhalon, ma iau kis nanahai taam ta ira bungbung bakut.
PSA 25:6 Watong, lik leh no num bala malum ma harmarsai, kanong dir at menalua saakit.
PSA 25:7 Waak u liklik leh ira nugu sakana magingin tano nugu pakana bung na marawaan ma ira nugu magingin na patnau. Haruat ma no num harmarsai, lik leh iau, kanong a bilai ugu, Watong.
PSA 25:8 Bilai ma takodasiana no Watong, io kaik, gi pir ira ut na sakena ta ira uno ngaas.
PSA 25:9 I la lulue ira matien na tunotuno ta ira linge i takodas, ma i hausur diet tano uno ngaas.
PSA 25:10 Ira tintalen bakut tano Watong i hung ma ra harmarsai ma i tutun harsakit ta diet ing diet taram ira harkurai tano uno kunubus.
PSA 25:11 Wara gaiena no hinsaam, Watong, lik luban ira nugu saksakena kanong a haleng saakit.
PSA 25:12 Sige um no tunotuno nong i burte no Watong? No Watong na tuko hamines no ngaas gate gilamis tar ie wara uta iakano tunotuno.
PSA 25:13 No uno kidilona nilon na kis narako ra bilbilai, ma ira uno bulumur diet na tinane no pise.
PSA 25:14 No Watong i la hinhinawase ira tunotuno ing diet ru ie utano uno lilik susuhai. I la hapalaine no uno kunubus ta diet.
PSA 25:15 Ira matagu i la kis taar tano Watong, kanong augu sen nu lapus ise ira kakigu tano matana hinau.
PSA 25:16 Talingaan ukai ho iau ma nu marse iau, kanong iau te kis sen taar um ma ra hinangul.
PSA 25:17 Ira ngunngutaan tano nugu nilon i te tamtamat hakakari. Halangalanga iau ta ira nugu tapunuk.
PSA 25:18 Nu nanaas ta ira nugu hinangul ma ira nugu tinirih, ma nu kap se bakut ira nugu magingin sakena.
PSA 25:19 Nes baak, ing ira nugu ebar diet te haleng saakit, ma ing diet manga malentakuane iau.
PSA 25:20 Balaure no nugu lon ma nu ras leh iau. Waak u bale iau be da bul iau ra hirhir, kanong iau la barahit taar taam.
PSA 25:21 Iau sasaring bia ira bilbilai ing i kis taar tano balagu ma ira nugu taktakodas na balaure iau, kanong iau kis nanahai taam.
PSA 25:22 God, halangalanga Israel sukun ira udiet ngunngutaan.
PSA 26:1 Devit ga pit iakan ra ninge. Watong, hinawas palai bia iau pai gil ta sakena, kanong iau te lon haruat ma ira bilbilai ing i kis tano balagu. Iau te nurnur tano Watong ma iau pai la lilik airuo.
PSA 26:2 Watong, nes mur iau ma nu walar iau. Silihe no nugu lilik ma no balagu mah.
PSA 26:3 Kanong warah no num harmarsai i la kis hatika taar menalua tagu, ma iau la lalon ta ira num ngaas i tutun.
PSA 26:4 Iau pai la kiskis tika ma ira ut na harabota, ma pa ni haan tika mah ma ira ut na harababo.
PSA 26:5 Iau malentakuane ira kis hulungai ta ira ut na gil nironga, ma iau malok bia ni kis tika ma ira ut na sakena.
PSA 26:6 Iau taptapir wara hamines bia iau pai gil ra sakena. Iau ni hanuat kaia tano num suuh na tun hartabar, Watong,
PSA 26:7 ma ni kakongane hatamat hani ira garam, ma ni hinhinawas haan ta ira num tamat na melmel na gingilaan na kinarup.
PSA 26:8 Iau sip no hala nong u la kiskis tana, Watong, iakano sibaan nong no num minamar i la kiskis tana.
PSA 26:9 Waak u kap se tar iau tika ma diet ira ut na sakena. Waak u kap se tar no nugu lon tika ma ira ut na hinarubu bingibing,
PSA 26:10 ing ira lima diet i pingit sakena tupas ira mes, ma ing ira kata na lima diet i hung ma no magingin na kukul ari wara gilgil sakena.
PSA 26:11 Iesen iau, iau mur ira takodasiana ngaas. Kul halangalanga iau ma nu marse iau.
PSA 26:12 Ira kakigu i tur dadas taar tano malahena pise. Narako tano tamat na kis hulungai, iau ni pirlat no Watong.
PSA 27:1 Devit ga pit iakan ra ninge. No Watong aie no nugu lulungo ma no nugu harhalon. Iau ni burte sige? No Watong aie no nugu dadas na sibaan na barbarahit. Iau ni ramramin um ta sige?
PSA 27:2 Bia ing ira sakana tunotuno diet haan tultul iau wara hagahe no palatamaigu, ma bia ing ira nugu ebar ma ira agu suk diet harubu ma iau, diet na laleka ma diet na puko.
PSA 27:3 Ing mah bia tiga matana ubane na hanuat luhutane iau, no kaatigu pa na burut. Ing mah bia a tamat na hinarubu na tahuat tupas iau, iau ni balaraan taar at.
PSA 27:4 Tiga linge iau saring tano Watong. Iakan nong iau silsilihei, ma i hoken: bia iau ni lon narako tano hala tano Watong ta ira bungbung bakut tano nugu nilon, wara matmate no minamar tano Watong ma wara lilik murmur ie narako tano uno hala na lotu,
PSA 27:5 kanong tano bung na saksakena aie na balaure timaan iau narako tano ngasiana, aie na suhe iau ma iau ni barahit narako tano uno hala na lotu, ma na hakisi iau aram naliu saakit tiga haatkis.
PSA 27:6 Io, da nes haut iau naliu ta ira ebar ing diet tur luhutane iau. Iau ni tun hartabar ma ra kunup na gungunuama kaia tano uno hala na lotu. Iau ni inge na pirharlat tupas no Watong.
PSA 27:7 Watong, hadade no ingagu ing iau tataau. Nu marse iau ma nu taram iau.
PSA 27:8 No kaatigu i tange utaam, “Silihe no uno matmataan!” Watong, iau ni silihe no num matmataan.
PSA 27:9 Waak u suhe no num matmataan tagu. Waak bia nu tule se no num tultulai ma ra ngalngaluan. U te harahut haitne iau. Waak u malentakuane iau ma bia nu waak kapis iau, God, nugu Ut na Harhalon.
PSA 27:10 Ing mah bia no agu sus ma no pawasigu dir waak kapis iau, no Watong na palim leh iau.
PSA 27:11 Watong, hausur iau ta ira num tintalen. Lue iau narako tiga takodas na ngaas, kanong warah, burena ta diet ing diet wara hagahe iau.
PSA 27:12 Waak u tar iau ta ira lima diet ira nugu ebar bia diet na gil tagu haruat ma ira udiet sinisip, kanong ira ut na harabota diet tur huat ma diet tung bia iau, diet mang iau.
PSA 27:13 Iau nurnur taar at ta iakan, bia iau ni nes no bilbilai tano Watong ing at iau lon taar ta iakan ra pise.
PSA 27:14 Kis kawase no Watong. Nu dadas ma nu balaraan taar. Masa, nu kis kawase no Watong.
PSA 28:1 Devit ga pit iakan ra ninge. Iau tataau uram ho ugu, Watong, no nugu Haatkis. Waak bia u talingaro taar tagu, kanong ing bia nu kis kunkun, iau ni ngan hoing diet ing diet ga hansur ures tano lulur na minaat.
PSA 28:2 Hadade no nugu sunuah na sinasaring wara gaiena harmarsai ing iau tataau tupas ugu wara harharahut, ing mah iau tatik ira limagu uram hono num halhaliana subaan harsakit.
PSA 28:3 Waak bia nu sal se iau tika ma ira ut na sakena, diet ing diet gilgil magingin na haragahai, ing mah diet la iangianga ma ra bilai na bala taar ta ira hinsaka diet, iesen a sakena kenam narako ta ira kaati diet.
PSA 28:4 Balu pukus diet ta ira udiet mangana magingin ma ta ira udiet sakana pinapalim. Balu pukus diet ta ira linge ira lima diet gate pakile, ma nu tar pukus tar ta diet asa ing i haruat ma ira udiet tintalen.
PSA 28:5 Diet pai nes kilam ira pinapalim tano Watong ma asa ing ira limana i te gil. Io kaik, aie na dure hasur diet ma pa na hatur haut pukus habaling diet.
PSA 28:6 A pirharlat uram tano Watong, kanong i te hadade ira nugu tintaau wara gaiena harmarsai.
PSA 28:7 No Watong, aie no nugu dadas ma no nugu bahbahit. No kaatigu i nurnur narako tana, ma iau te kap harharahut. No kaatigu i karuas ma ra gungunuama ma iau ni tanga tahut tana ma ra ninge.
PSA 28:8 No Watong aie no dadas audiet ira uno matanaiabar, ma no dadas na subaan na munmun waing nong no Watong ga gilamis ie na kap no harhalon kaia.
PSA 28:9 Halon ira num matanaiabar ma nu haidane diet ing diet ira pinlawem ta ira matanaiabar bakut. Nu hanuat hoing ra ut na balaura sipsip ma nu kap hani diet hathatika.
PSA 29:1 Devit ga pit iakan ra ninge. Muat na pirlat no Watong, muat ira dadasine aram ra mawe. Muat na pirlat no Watong tano uno minamar ma tano uno dadas.
PSA 29:2 Pirlat no Watong tano minamarine nong i haruat ma no hinsana. Muat na lotu tupas no Watong ra matmataan tano uno halhaliana kinkinis nong i manga melmel harsakit.
PSA 29:3 No ingana no Watong ie ke naliu tano taahit. No God nong i tamat ira minamarine, i parparara, no Watong i parparara naliu tano tamat na taah.
PSA 29:4 No ingana no Watong i manga dadas. No ingana no Watong i tamat saakit.
PSA 29:5 No ingana no Watong i la warwarat ira tamat na ina daha. No Watong i la warwarat hasiksik ira tamat na dadas na daha me Lebanon.
PSA 29:6 I la gilgil ira uladih aram Lebanon be na karuas haruat ma tiga nat na bulumakau. No uladih Hermon na karuas haruat ma tiga sigar rakaia na bulumakau.
PSA 29:7 No ingana no Watong i la tultule no hile.
PSA 29:8 No ingana no Watong i la gungune no hanuo bia. No Watong i gune Kades, no tamat na hanuo bia.
PSA 29:9 No ingana no Watong i la hurhurusane ira dadasina daha, ma i la ramas sare ira malit. Ma narako tano uno hala na lotu diet bakut diet kakonga bia, “A pirhakasing tupas ie!”
PSA 29:10 No Watong i kis na harkurai taar tano taahit. No Watong i kap no kinkinis na king hathatika.
PSA 29:11 No Watong i la tartar dadas ta ira uno matanaiabar. No Watong i la haidane ira uno matanaiabar ma ra malum.
PSA 30:1 Tiga ninge na lotu tano bung di ga papos no hala na lotu. Devit ga pit iakan ra ninge. Iau ni hatamat ugu, Watong, kanong u ga raun leh iau tano lamlamana, ma pau ga bale ira nugu ebar be diet na papasuane iau.
PSA 30:2 Watong, nugu God, iau ga tataau ukatiga ho ugu wara harharahut, ma u ga balaure halon iau.
PSA 30:3 Watong, u ga kap haut leh iau makaia ra midi. Pau ga bale leh iau be ni hansur tano lulur.
PSA 30:4 Inge uram tano Watong, muat ing muat te tar tutun ira numuat nilon tana. Pirlat no halhaliana hinsana.
PSA 30:5 Kanong warah no uno ngalngaluan i la kiskis dahin mon, iesen no uno bala malum i la kis hatika taar tano num kudulena nilon bakut. A sunuah i haruat be na kis mon ma tiga bung ra bung, iesen no gungunuama i la hananuat ra malaan.
PSA 30:6 Ing iau ga balaraan, iau ga tange, “Taie tiga linge pa na gune iau.”
PSA 30:7 Watong, ing u ga kanakana tagu, u gil bia iau ni tur dikdikit haruat ma tiga uladih, iesen be ing u ga suhe no num matmataan, iau ga marmaris.
PSA 30:8 Watong, iau tataau ukatiga ho ugu. Iau suah wara marmaris ukatiga ho ugu, Watong:
PSA 30:9 “Asa naga taam ing bia ni hiruo na minaat, bia ni hansur tano lulur? I haruat be kaabus na pirlat ugu? No kaabus na hinawas palai bia u la gilgil haruat ma ira num nianga?
PSA 30:10 Hadade, Watong, ma nu marse iau. Watong, harahut iau.”
PSA 30:11 U te pukusane no nugu sunuah i hanuat minangata. U te kap se ira nugu sigasigam na tapunuk ma u hasigam iau ma ra gungunuama,
PSA 30:12 waing iau ni inge ukatiga ho ugu ma pa ni kis kunkun. Watong, nugu God, iau ni tanga tahut taam hathatika.
PSA 31:1 A nianga tupas no tunotuno nong i kure ira ut na ninge: Devit ga pit iakan ra ninge. Watong, iau te barahit taam. Waak u bale bia da hahirhir iau. Halangalanga leh iau haruat ma no num magingin takodas.
PSA 31:2 Sa talingaam ukai ho iau. Hanuat gasien wara halhalon iau. Nu hanuat hoing no nugu haatkis wara barbarahit, ma no dadas na hala na munmun wara halhalon iau.
PSA 31:3 Augu no nugu haatkis ma no nugu dadas na subaan na munmun. Io kaik, nu lua tagu ma nu lam iau waing da ru no hinsaam.
PSA 31:4 Halangalanga iau sukun no kuun nong di te tagure tar ie utagu, kanong augu no nugu barbarahit.
PSA 31:5 Iau tar se no tanuagu ukatiga tano limaam. Kul halangalanga iau, Watong, augu no God ta ira tutun.
PSA 31:6 Iau malentak ta diet ing diet patep ta ira palimpuo ing taie ta tutun ine. Iau nurnur tano Watong.
PSA 31:7 Iau ni kanakana ma ni guama narako tano num harmarsai, kanong u te nes ira nugu hinangul ma u nunure tar no tamat na ngunngutaan tano nugu lon.
PSA 31:8 Pau tar se iau tar ta ira lima diet ira ebar. Iesen u te hatur ira kakigu tano bilai na sibaan na harbalaurai.
PSA 31:9 Marse iau, Watong, kanong iau kis taar ra tamat na tinirih. Ira matagu i sus ma ra sunuah na tapunuk. No balagu ma no tamaigu i sakena mah.
PSA 31:10 No nugu lon i hung ma ra tamat na tapunuk ma ira nugu tinahon i kumkum hanahaan ing iau tur na sunuah. Ira nugu dadas i puko kanong ta ira nugu ngunngutaan, ma ira surugu i manmanil.
PSA 31:11 I burena ta ira nugu ebar, ira hinsakagu diet manga nes hanapu iau. Ira nugu harwis mah, diet malok tagu. Sige ing diet nes iau tano ngaas, diet hilau tagu.
PSA 31:12 Diet te luban iau hoing bia iau gate maat. Iau haruat hoing tiga gingop na taah i te tamaparok taar,
PSA 31:13 kanong iau hadade bia a halengin diet tangtange hagahe iau. A ramramin i luhutane iau. Diet wor tika wara hinelar tagu, ma diet iangianga tika wara kapkap se no nugu lon.
PSA 31:14 Iesen iau nurnur taam, Watong. Iau tange, “Augu no nugu God.”
PSA 31:15 Ira nugu pakana bung na nilon ke ta ira limaam. Kap sare iau ta ira nugu ebar, diet ing diet paspasak iau.
PSA 31:16 I bilai bia no matmataan taam na murarang naliu tano num tultulai. Halon iau ma no num harmarsai nong pana le pataam.
PSA 31:17 Watong, waak bia da hahirhir iau, kanong iau te tataau tupas ugu. Iesen waak ira ut na sakena bia diet na kis ra hirhir ma diet na noh matien narako tano hanuo na minaat.
PSA 31:18 Hamarur ira palabulu diet ira ut na harabota kanong diet sa butbut ma diet lik hanapu ira mes, kaik diet la bulbul hasur ira ut na takodas ma ira udiet latlaat.
PSA 31:19 A tamat saakit no num bilbilai nong u bul tagure tar ie wara udiet ing diet ru ugu. Ma ta diet ing diet barahit taam, huo mah u la tamtabar diet ma no num bilbilai kaia ra matmataan ta ira tunotuno.
PSA 31:20 U kap leh diet talur ira ut na harpingit bia diet naga barbarahit ra matmataan taam. U bul timaan diet tano subaan u lon tana sukun ira karame diet ing diet wara tungtung diet.
PSA 31:21 A pirhakasing tupas no Watong, kanong i ga haminas no uno bilai na harmarsai tagu ing di ga tur luhutane iau ma di ga ubu iau.
PSA 31:22 Ing iau ga kalar, iau ga tange hoken: “Iau te takutus talur no matmataan taam.” Iesen u ga hadade no nugu tintaau wara gaiena harmarsai ing iau ga tataau ugu wara harharahut.
PSA 31:23 Sip no Watong, muat ing muat te tar tutun ira numuat nilon tana. No Watong i balaure tar ing diet la murmur timaan ie, iesen i la balbalu ira ut na latlaat haruat ma ira dadas ta ira udiet sakana magingin.
PSA 31:24 Muat na tur dadas ma muat na balaraan, muat ing muat kis nanahai tano Watong.
PSA 32:1 Devit ga pit iakan ra ninge. A haraidaan na kis tano tunotuno nong ira uno magingin na laka hartula God te lik luban, ma ira uno magingin sakena God i te kasar.
PSA 32:2 A haraidaan na kis tano tunotuno nong no Watong pai lik habaling tar um ira uno magingin, ma taie ta harabota tano uno nilon.
PSA 32:3 Ing iau pai hapuasne ira nugu magingin sakena, ga mahiawa hanahaan ira tamaigu tano nugu tamat na ngunngutaan tano kudulena bung bakut.
PSA 32:4 Kanong warah, ra bung ma ra kasakes no limaam ga tirih naliu tagu. Ira nugu dadas ga pataam hanahaan hoing i ngan huo tagu ing no mamahien na kasakes i rang iau.
PSA 32:5 Io kaik um, iau ga hapuasne ira nugu magingin sakena taar taam ma iau pa ga kasar bus ira nugu nironga. Iau ga tange, “Iau ni hinawas palai ta ira nugu magingin na laka harkurai taar tano Watong,” ma u ga lik luban iau tano saksakena ta ira nugu nironga.
PSA 32:6 Io huo, sige diet ing diet te tar tutun ira udiet nilon taam, diet na sasaring ukatiga ho ugu tano pakana bung ing i tale bia da nes leh ugu. Tutun saakit, ing no taah na taahit ma na lel, pai tale bia na saal huat taar tana.
PSA 32:7 Augu no nugu katon na munmun. Nu balaure bat iau sukun ra tinirih ma nu luhutane iau ma ra ninge na harhalon.
PSA 32:8 Iau ni pir ugu ma ni hausur ugu tano ngaas nu haan tana. Iau ni hakatom ugu ma ni nes mur ugu.
PSA 32:9 Waak u ngan hoing no hos bia no donki, ing taie ta palpalai ta dir, iesen di kure dir ma ra sibana haien di sang halakai ta ira ha dir ma ra hinau di sal dir me, ma bia taie huo, dir pa na hanuat taar taam.
PSA 32:10 A haleng ira tinirih ta ira ut na sakena, iesen no harmarsai tano Watong nong pai la patpataam i la luhutane tar no tunotuno nong i nurnur tana.
PSA 32:11 Muat na guama tano Watong ma muat na laro, muat ira ut na takodas. Muat na inge, muat bakut ing ira kaati muat i gamgamatien.
PSA 33:1 Muat ira ut na takodas, muat na inge ma ra gungunuama tupas no Watong. Sige ing i gamgamatien i haruat tunat bia na pirlat ie.
PSA 33:2 Da pirlat no Watong ma no gita. Da ting no haap ma da inge tupas ie.
PSA 33:3 Inge tiga sigar ninge uram ho ie. Ting timaan no gita, ma nu kup ma ra gungunuama.
PSA 33:4 Kanong warah, no nianga tano Watong i takodas ma i tutun. Ira linge bakut i gil, i tale bia da nurnur ine.
PSA 33:5 No Watong i sip no takodasiana ma no bilai na magingin. No ula hanuo i hung ma no uno harmarsai nong pai la patpataam.
PSA 33:6 No Watong ga gil no mawe ma no uno nianga mon, ma ga gil ira haleng na linge saakit ing diet la pilpilakas aram naliu ma no inga na hana.
PSA 33:7 I gugune hulungan ira tes tiga subaan. I banus bat no tes tamat aram narako tano uno bunbulaan.
PSA 33:8 No ula hanuo bakut na burte no Watong, ma ira matanaiabar ta ira subaan bakut diet na urur tana,
PSA 33:9 kanong ga ianga, ma no ula hanuo ga hanuat puasa, ma ing ga hartula, kaike ra linge ga tur dikdikit.
PSA 33:10 No Watong i la turtur bat ira lilik ta ira hunhuntunaan ta ira mes na hanuo, ma i la habosbos ira linge i tur laah ta ira bala diet ira matanaiabar.
PSA 33:11 Iesen ira lilik tano Watong i tur dikdikit hathatika, ma ira linge i tur laah meram tano balana pana le pataam.
PSA 33:12 A haraidaan na kis tano huntunaan nong no uno God no Watong, diet ira matanaiabar ing gate gilamis leh diet bia auno tus.
PSA 33:13 No Watong i nanaas suur meram ra mawe ma i nes ira tunotuno bakut.
PSA 33:14 Mekaia hono katon i la kiskis tana, i la ngokngok ta diet bakut ing diet lon tano ula hanuo.
PSA 33:15 Nong ga gil ira kaati diet bakut, i la liklik mur ira kaba linge diet la gilgil.
PSA 33:16 Taie tiga king i halon habaling ie ma no tamtamat tano uno matana ubane. Taie tiga umri i tale be na hilau pas ra rom ma no uno dadas at.
PSA 33:17 Waak bia u nurnur tano num hos bia na halangalanga ugu tano hinarubu. A tutun bia ana mon but na baso, iesen pai tale bia na halon tikai.
PSA 33:18 Iesen ira matana no Watong i la nesnes mur sige diet ing diet burtei, diet at ing diet kis nanaho tano uno harmarsai nong pai la patpataam,
PSA 33:19 bia aie na halon diet sukun no minaat ma na balaure diet ta ira pakana bung na tamat na taburungan.
PSA 33:20 Dahat kis nanaho ma ra nurnuruan utano Watong. Aie no udahat harharahut ma no udahat bahbahit.
PSA 33:21 Ira nudahat nilon i guama tana, kanong dahat nurnur tano halhaliana hinsana.
PSA 33:22 Watong, bale no num harmarsai nong pai la patpataam na kis ta mehet, haruat ma ing het kis nanaho taam.
PSA 34:1 Devit ga pit iakan ra ninge. I hinhinawas utano pakana bung ing ga harababo bia a ulba ie kaia ra matmataan tane Abimelek nong ga tule sei. Iau ni pirlat no Watong ta ira kaba bungbung. Ira uno pirharlat na kis hatika tano hagu.
PSA 34:2 No nugu nilon bakut na latlaat uta ira linge no Watong i te gil. Diet ira maris diet na hadade ma diet na guama.
PSA 34:3 Muat tika ma iau, dahat na hatamat no Watong, dahat gi raun tikane no hinsana.
PSA 34:4 Iau ga silihe no Watong ma ga taram iau. Ma ga halangalanga iau sukun ira nugu harangunngutaan na bunurut ing i ubal iau.
PSA 34:5 Sige ing diet nanaas harmamata mei, ira nudiet matmataan i nunuhuan. No hirhir pa na pulus ira matmataan ta diet.
PSA 34:6 No maris na tunotuno ga tataau, ma no Watong ga hadadei. Ma ga halon ie sukun ira uno tinirih.
PSA 34:7 No angelo tano Watong na tur luhutane diet ing diet urur tana, ma i halon diet sukun ira udiet ebar.
PSA 34:8 Namien baak, ma nu nes bia no Watong i bilai. A haraidaan na kis tano tunotuno nong i kis barahit tano Watong.
PSA 34:9 Muat na ru no Watong, muat ira uno tus, kanong sige nong i urur tana pa na supi tiga linge.
PSA 34:10 Ira laion diet na malmalungo ma diet na taburungan, iesen diet ing diet sisilih tano Watong, diet pa na supi habaling tiga bilai na linge.
PSA 34:11 Mai, ira natigu, muat taram iau. Iau ni hausur muat wara urur tano Watong.
PSA 34:12 Sige tikai ta muat i kalak ra nilon ma i sip bia na nes halengin bilai na bung?
PSA 34:13 Nu balaure no karamem ta ira sakena, ma no haam wara tangtange ira harabota.
PSA 34:14 Tur talur ira sakena ma gil ra bilai na magingin. Silihe no malum ma hilau mur ie.
PSA 34:15 Ira matana no Watong i la nas mur tar ira ut na takodas, ma ira talingana i la tapapos taar ta ira udiet tintaau.
PSA 34:16 No Watong i kap se no matana ta diet ing diet gil magingin sakena, io kaik, bia ing diet na maat, da lik luban diet kaiken at mon.
PSA 34:17 Ira ut na takodas diet tataau taar tano Watong wara harharahut, ma i la hadade diet. I halangalanga leh diet sukun ira udiet tinirih.
PSA 34:18 No Watong i hutet ta diet ing no tapunuk i ubal diet, ma i halon diet ing ira dadas na tinirih i bu hasur ira udiet lon.
PSA 34:19 I tale bia na mon haleng tinirih tano ut na takodas, iesen no Watong i la halangalangai sukun diet bakut.
PSA 34:20 No Watong na balaure ira suruno bakut, ma pataie tikai ta diet na takap.
PSA 34:21 No sakana magingin at na bu bing ira ut na sakena. Diet ing diet sukuane ira ut na takodas, diet na kap ra harpidanau.
PSA 34:22 No Watong na kul halangalanga ira uno tultulai. Taie tikai ing i barahit tana na kap ra harpidanau.
PSA 35:1 Devit ga pit iakan ra ninge. Watong, nu harngangaar ma sige diet ing diet harngangaar ma iau. Harubu ma sige diet ing diet harubu ma iau.
PSA 35:2 Kap leh no bahbahit ma ira linge na hinarubu. Taman tut ma nu hanuat wara harharahut iau.
PSA 35:3 Tatik no kusur ma no haasok wara harsomane diet ing diet paspasak hani iau. Tange tagu, “Iau no num harhalon.”
PSA 35:4 Hamalahuan ma nu hahirhir diet ing diet wara bubu bing iau. Tule pukus diet ma nu hamarisne diet ing diet pingpingit sakena utagu.
PSA 35:5 Puh se diet haruat ma ra pala wit tano dadaip, ma no angelo tano Watong na batbat se diet.
PSA 35:6 Iau sip bia ira nudiet ngaas na kankado ma na malmalagir, ma no angelo tano Watong na paspasak mur hani diet.
PSA 35:7 Diet te se bat iau ma ira nudiet uben, ma taie ta burena. Ma taie ta burena, iesen diet ga kil tar tiga naan wara utagu.
PSA 35:8 Io kaik, bale leh no saksakena na hanuat hakarup diet, ma no uben nong diet se tar ie na wiwisane habaling diet, ma diet na puko laka tano naan ma diet na hiruo.
PSA 35:9 Kaik um, no tanuagu na guama tano Watong, ma iau ni kanakana tano uno harhalon.
PSA 35:10 No nugu kidilona nilon na tange, “Watong, sige i haruat ma ugu? U la harharahut leh ira maris sukun diet ing diet manga dadas. U la kapkap pukus ira maris ma ira malahahin sukun diet ira ut na kikinau.”
PSA 35:11 Ira ut na hinhinawas ing diet tange mon bia diet nunure no tutun, diet tur harapuasa wara nianga, iesen diet wara hagahe bia iau. Diet tung iau ta ira linge a kapatona iau ine.
PSA 35:12 Diet balu ira nugu bilbilai ma ra sakena, ma iau gom manga marmaris.
PSA 35:13 Ma sen ing diet ga maset, iau ga sigam tamadiris na sigasigam wara hamines no nugu marmaris, ma iau ga bul hasur no nugu nilon ma ra minilo! Ing ira nugu sinasaring no Watong pa ga taram, ga tapukus baal taar tagu,
PSA 35:14 iau ga tur na sunuah hoing bia utano nugu harwis be no tasigu. Iau ga kis tudu ma ra tapunuk, hoing bia iau susuah no pawasigu.
PSA 35:15 Ma sen ing iau ga laleka, diet ga hanuat hurlungen ma ra gungunuama. Iau ga kis kabong taar ma diet gaam hung luhutane iau wara hinarubu ma iau. Diet pai la sasangeh wara timtibe hapenpen iau.
PSA 35:16 Hoing ira tunotuno diet tur talur God, diet hasakit sakasaka taar tagu. Diet hatagiris na ngise taar tagu.
PSA 35:17 Watong, na haruat hunanges ing nu ngok taar? Halangalanga iau sukun ira udiet halhaliarai. Harahut no nugu nilon sukun at kaiken ra laion.
PSA 35:18 Iau ni tar pirhakasing taam kai tano tamat na kis hulungai. Nalamin ta ira haleng matanaiabar iau ni pirlat ugu.
PSA 35:19 Diet ing diet sukuane iau ma taie ta burena, waak u bale diet bia diet na guama ta ira nugu tinirih. Huo mah, diet ing diet malentakuane iau ma taie ta burena, waak u bale diet bia diet na pit mata wara hakilang no pakana bung wara hanghagahe iau.
PSA 35:20 Diet pai la iangianga ma ra bala malum, iesen diet pingit nianga na harabota taar ta diet ing diet lon matien narako tano taman.
PSA 35:21 Diet kukutur tagu ma diet tange, “Het te nes tupas um ing u gilgil ma ira mata het.”
PSA 35:22 Watong, u te nes kaiken. Waak u kis kunkun. Waak u kis tapaka tagu, Watong.
PSA 35:23 Tangahun, ma taman tut ukai wara gaiegu! Hargor wara gaiegu, augu no nugu God ma no nugu Watong.
PSA 35:24 Haruat ma no num taktakodas, hamines bia iau pai gil ta nironga, Watong, nugu God. Waak u bale bia diet na hasakit sakasaka tagu.
PSA 35:25 Waak u bale bia diet na lik, “Bilai! Ing at mon dahat sipsip!” Waak u bale bia diet na tange, “Dahat te kanam bakut leh ie!”
PSA 35:26 Sige diet ing diet guama tano nugu tinirih, nu hahirhir diet ma nu hangunguo diet. Sige diet ing diet hatamat diet tagu, hasigam diet ma ra hirhir ma ra malmalahuan.
PSA 35:27 Sige diet kanakana ing i hanuat puasa bia iau pai gil ta nironga, bale diet bia diet na kup ma ra gungunuama ma ra larlaro. I tahut bia diet na tange hatikane bia, “Da hatamat no Watong, nong i la kankanakana tano bilai na kinkinis tano uno tultulai.”
PSA 35:28 No hagu na hinawas tano num taktakodas ma ta ira num pirhakasing tano kidilona bung.
PSA 36:1 A nianga tupas no tunotuno nong i kure ira ut na ninge: Devit no tultulai tano Watong ga pit iakan ra ninge. Tiga nianga na hakilang ie ken narako tagu uta ira saksakena tano sakana tunotuno ma i tange hoken: Taie ta bunurut tane God i kis tana.
PSA 36:2 Kanong warah, i nes hatamat ie ma ira iruo matana tus, kaik, pa na nes kilam ma pa na malentakuane ira uno sakana magingin.
PSA 36:3 Ira inga na hana a sakena ma i hung ma ra harabota. Pai mintot baling um wara gilgil ira bilbilai.
PSA 36:4 Kaia mah tano suhuno i la pingpingit sakena. I la tartar habaling tar ie ra sakana ngaas, ma pai la malmalok se asa ing pai takodas.
PSA 36:5 No num harmarsai, Watong, i hanut muk uram ra mawe, ma no num tutun na magingin i hanut uram ra mauho.
PSA 36:6 No num taktakodas i haruat ho ira tamat na uladih saakit, ma no num takodasiana harkurai i haruat ma ra tingena lamlamana. Watong, u la balbalaure kahe ira tunotuno ma ira wawaguai.
PSA 36:7 No num tutun na harmarsai ing pa na pataam i manga tamat ma pai tale be da hapupuo! Ira tunotuno bakut diet barahit napu ra ududuh ta ira babaam.
PSA 36:8 U tabar diet ma ra nian ing kana i hung taar tano num hala, ma u hamamo diet ma ra taah tano num taah na gungunuama.
PSA 36:9 Kanong warah, ie ke ho ugu no puat na nilon. Tano num lulungo het nes ra madaraas.
PSA 36:10 Waak u hatakumutne no num harmarsai ta diet ing diet nunure tar ugu. Waak u sangeh wara gilgil ira magingin i takodas taar ta diet ing ira kaati diet i gamgamatien.
PSA 36:11 Waak u bale no kakine no ut na latlaat bia na papasuane iau, ma waak mah be no limana no ut na sakena na kap se iau.
PSA 36:12 Nes ira ut na gil nironga ing diet te puko taar huo. Di te se hasur diet, ma diet pai haruat bia diet na taman tut!
PSA 37:1 Devit ga pit iakan ra ninge. Waak u kalar ta ira ut na sakena. Waak u masingan bia nu haruat ma ira ut na gil nironga,
PSA 37:2 kanong hutet um ma diet na mahiawa hoing ira huro. Hutet diet na maat laah hoing ra nuhnuhuan na pitoka.
PSA 37:3 Nurnur tano Watong ma gil ra bilbilai. Nu lon narako tano uno taman, ma no num kinkinis na bilai narako tano uno harbalaurai.
PSA 37:4 Nu kanakana tano Watong, ma na tabar haruatne ugu ma ira masmasingan tano kaatim.
PSA 37:5 Tar se tar no num ngaas uram hono Watong. Nurnur tana ma na gil hoken:
PSA 37:6 Na hamines no num taktakodas bia na mararang hoing no laar i daras ie, ma ing na kure bia pau gil ta nironga, io, na ngan hoing ra tingena langlangar na kasakes.
PSA 37:7 Sangeh ra matmataan tano Watong ma nu kis kawase timaan leh ie. Waak u kalar bia ira tunotuno diet te petlaar ira nudiet sinisip ma ing diet te gil haruatne ira udiet sakana harpingit.
PSA 37:8 Waak u bale ra nginangar, ma hamalum se no ngalngaluan. Waak u kalar. Iakano magingin na lam tar mon ugu ra nironga.
PSA 37:9 Kanong warah, sige ing diet kis nanaho tano Watong, diet na tinane leh no pise hoing ra pinlawe diet, iesen no Watong na pasak hasur ira ut na sakena.
PSA 37:10 I te hutet um, ma na taie baling um ta ut na gil sakena. I tale be nu sisilih ta diet, iesen pa nu nes tupas leh diet.
PSA 37:11 Iesen ira matien na tunotuno diet na tinane no pise hoing ra pinlawe diet, ma diet na guama tano tamat na malum.
PSA 37:12 Ira ut na sakena diet harpingit tika wara hanghagahe ira ut na takodas, ma kaike ra sakana tunotuno diet na hatagiris na ngise tar ta diet.
PSA 37:13 Iesen no Watong i kurus ira ut na sakena, kanong i nunure tar be ira udiet bung na haruat.
PSA 37:14 Ira ut na sakena diet te palim tagure tar ira udiet wise na hinarubu, ma diet te lukun tagure tar ira udiet laplapot, wara lapot hasur diet ira maris ma ira malahahin, ma wara bubu bing diet ing ira udiet tintalen i takodas.
PSA 37:15 Iesen ira udiet wise na hinarubu na salok habaling ira kaati diet at, ma ira udiet laplapot na takap.
PSA 37:16 Ira dahin mon nudiet ira ut na takodas i manga bilai ta ira tamat na kinewa nudiet ira haleng na ut na sakena.
PSA 37:17 Kanong warah, no dadas tano ut na sakena na pataam, iesen no Watong na hatur hadadas no ut na takodas.
PSA 37:18 No Watong i nunure tar ira bung nudiet ira gamgamatien na tunotuno, ma asa ing diet tinane tar na kis hatika taar.
PSA 37:19 Ta ira pakana bung na tamat na halhaliarai, diet pa na maris. Ta ira pakana bung na taburungan, diet na guama ma ra haleng na nian.
PSA 37:20 Iesen ira ut na sakena diet na pataam. Ira ebar tano Watong diet na ngan hoing ra bilai na purpur na pitoka, diet na panim. Diet na panim laah hoing ra mis.
PSA 37:21 Ira ut na sakena diet la sarsaring ma diet pa na balu pukus, iesen ira ut na takodas diet la manga hartabar bia.
PSA 37:22 Sige diet ing no Watong i haidane, diet na tinane no uno taman, iesen sige diet ing God i sasalim bia na haliare diet, na pasak hasur diet.
PSA 37:23 Ing bia no Watong i kanakana pane tikai ma ira uno tintalen, na hadadas ie ta ira uno hinahaan.
PSA 37:24 Ing bia na laleka, pa na puko, kanong no Watong i palim hadadas tar ie ma no limana.
PSA 37:25 Iau ga marawaan taar baak ma kaiken iau te takana, iesen iau pa ga nes tiga pakana bung bia no Watong i waak kapis ira ut na takodas, ma bia ira nati diet na sasaring marmaris wara adiet ta nian.
PSA 37:26 Diet la manga hartabar bia, ma diet la hatatol mah ira mes. A haraidaan na kis ta ira nati diet.
PSA 37:27 Tahurus talur ra sakena ma nu gil ra bilai. Kaik, nugu lon hatika tano uno taman.
PSA 37:28 Kanong warah, no Watong i sip ira ut na takodas, ma pa na haan sukun diet ing diet te tar tutun ira udiet nilon tana. No Watong na balaure bat hatikane diet, iesen na pasak hasur se ira nati diet ira ut na sakena.
PSA 37:29 Ira ut na takodas diet na tinane leh no pise, ma diet na lon hathatika tana.
PSA 37:30 No hana no ut na takodas i la tangtange ra minonasuana nianga, ma no karamena i la iangianga ma ra tutun.
PSA 37:31 No harkurai tano uno God ie ke narako tano kaatine. Ira kakine pa na surmalagir.
PSA 37:32 Ira ut na sakena diet mun kawase tar no ut na takodas, ma diet sisilih ta ngaas wara bubu bing ie.
PSA 37:33 Iesen no Watong pa na waak tar ie ta ira lima diet, ma pa na bale mah bia da kurei bia i te gil ta sakena ing i tur ra harkurai.
PSA 37:34 Kis kawase no Watong, ma nu mur no uno ngaas. Na raun haut ugu wara tintinane leh no pise. Nu nes ma ira mataam ing no Watong na pasak hasur ira ut na sakena.
PSA 37:35 Iau te nes tiga ngangarina sakana holmatau, i hoing tiga nunuhuan na ina daha i tur timaan taar tano ana pise at,
PSA 37:36 iesen i maat laah mon ma pai lon baling um. Iau ga nanaas tana iesen iau pa ga nes leh ie.
PSA 37:37 Lilik timaan uta no gamgamatien na tunotuno, ma nes mur no ut na takodas. No tunotuno nong i mon malum tana, auno mon bilai na bung namur.
PSA 37:38 Iesen ira ut na laka harkurai bakut, no Watong na haliare diet. Ira ut na sakena, God na hakumkum ira udiet bung na nilon.
PSA 37:39 Iesen no harhalon ta ira ut na takodas na hanuat meram tano Watong. Aie nong i la balbalaure hadadas diet ta ira pakana bung na tinirih.
PSA 37:40 No Watong i la harharahut diet ma i la kapkap hasur diet. I la kapkap hasur leh diet sukun ra lima diet ira ut na sakena, ma na halon diet, kanong diet la barbarahit tana.
PSA 38:1 Devit ga pit iakan ra ninge na lotu. Tiga sinasaring. Watong, waak u boor iau ma no num nginangar ma bia nu hapidanau iau ma no num ngalngaluan,
PSA 38:2 kanong ira num rumus diet te salok iau, ma no limaam i te bu hasur iau.
PSA 38:3 I burena tano num ngalngaluan, iau pai kilingane ra bilai na nilon. Taie ta dadas ta ira surugu tako bia ta ira nugu magingin sakena.
PSA 38:4 Ira nugu nironga i te ubu hasur iau hoing ra kinakap i manga tirih saakit ma i ubal iau.
PSA 38:5 Ira nugu unien i mapus ma di mikiane, kanong ta ira nugu sakana tintalen na tabuna lilik.
PSA 38:6 I ubal iau ma i manga bul hasur iau. Iau tur ra sunuah tano kidilona bung bakut.
PSA 38:7 No tihigu i te kilingane ra dadas na ngunngutaan ing i mamahien hoing ra iaah. Taie um ta bilbilai tano tamaigu.
PSA 38:8 Taie nugu ta dadas ma di te haliare hatikane iau. Iau kup ma ra ngunngutaan meram narako tunat tagu.
PSA 38:9 Watong, ira nugu dadas na masmasingan i kis palai taar menalua taam. Ira nugu sunuah pai mun taam.
PSA 38:10 No kaatigu i tiptip, ira nugu baso i patpataam talur iau, ma no lulungo mah i te haan laah ta ira matagu.
PSA 38:11 Ira nugu harwis ma ira nugu harsakata diet pas iau kanong ta ira nugu unien. Ira hinsakagu diet haan tapaka tagu.
PSA 38:12 Diet ing diet silsiliha ngaas wara hapataam no nugu nilon, diet tagure ira udiet kuun, ma diet ing diet wara hanghagahe iau, diet iangianga bia diet na haliare iau. Tano kidilona bung bakut diet harpingit wara habato iau.
PSA 38:13 Iau haruat ma tiga talinga bau nong pai tale bia na hadoda. Iau hoing tiga ngulo, nong pai haruat bia na ianga.
PSA 38:14 Iau te haruat hoing tiga tunotuno pai la hanhadoda, nong pa na balu tiga nianga ma no hana.
PSA 38:15 Iau kis kawase ugu, Watong, bia nu babalu, Watong, nugu God.
PSA 38:16 Iau te tange, “Waak u bale diet bia diet na latlaat tano nugu tinirih, ma bia diet na hatamat habaling diet taar tagu ing no kakigu i malmalagir.”
PSA 38:17 Kanong warah, i hutet bia ni puko, ma no nugu ngunngutaan i la kis hatika taar ma iau.
PSA 38:18 Iau hapuasne ira nugu nironga. No nugu nilon i manga tirih kanong ta ira nugu magingin sakena.
PSA 38:19 A haleng ira nugu ebar, ma diet bakut adiet mon tabi bolbol. Diet manga haleng saakit ing diet malentakuane bia mon iau.
PSA 38:20 Diet ing diet balu pukus ira nugu bilbilai ma ra saksakena, diet tange hagahe iau kanong iau wara murmur asa i tahut.
PSA 38:21 Watong, waak u waak kapis tar iau. Waak u kis tapaka tagu, nugu God.
PSA 38:22 Hanuat gasien wara harharahut iau, Watong, no nugu Ut na Harhalon.
PSA 39:1 A nianga tupas no tunotuno nong i kure ira ut na ninge: da inge iakan ra ninge na lotu haruat hoing Iedutan i sip. Devit ga pit ie. Iau ga tange bia, “Iau ni nes mur ira nugu hinahaan, iau kabi gil ta magingin sakena ma no karamegu. Iau ni palakus no hagu ing bia ira ut na sakena diet kis tika taar ma iau.”
PSA 39:2 Ing iau ga kis kunkun ma iau ga marur taar, ma iau pa ga tange tunat tiga bilai na linge, io, no ngunngutaan tagu ga tamat.
PSA 39:3 Aram narako tagu no balagu ga mamahien. Ma ing iau ga kis matien taar ma ra lilik, no iaah ga iaiaan. Kaik um, iau gaam ianga ma no hagu hoken:
PSA 39:4 “Watong, hamines no hauhawatine no nugu nilon tagu, ma aise ira nugu bung na nilon. Hapuasne tagu bia a kumkumine mon no nugu nilon.
PSA 39:5 U te gil hakumkum ira nugu bung na nilon. Ira punpuo ta ira nugu tinahon i haruat bia a linge bia mon ra matmataan taam. No laulawas ta ira nilon ta ira tunotuno tikatikai i ngan hoing tiga pakana manmanasung mon.
PSA 39:6 Ira tunotuno diet haruat ho ira tanua diet mon ing diet hanahaan urau ma ures. I manga papalim, iesen pataie ta hunena. I hahungi ira uno bunbulaan ma pai nunure bia sige na kap leh.
PSA 39:7 “Iesen kaiken um, Watong, asa kaik iau nanaas ine? Iau kis nanaho taam.
PSA 39:8 Halon leh iau sukun ira nugu nironga bakut. Waak u gil iau bia ira ulba diet na hasakit tagu.
PSA 39:9 Iau ga kis matien. Iau pa ga tale bia ni papos no hagu, kanong augu nong ga hatahuat kaiken.
PSA 39:10 Kap se no num harpidanau tagu. No harpasar tano limaam i te ubu hasur iau.
PSA 39:11 U la baboor ma u la hatakodasne ira tunotuno ta ira udiet magingin sakena. U la ienien ira udiet bilai na minsik hoing ra epas. No laulawas ta ira nilon ta ira tunotuno tikatikai i ngan hoing tiga pakana manmanasung mon.
PSA 39:12 “Watong, taram no nugu sinasaring. Hadade no nugu tintaau wara harharahut. Waak bia u hadade kapis ira nugu sunsunuah, kanong iau lon tika ma ugu hoing tiga se taman. Iau hoing tiga wasire taam hoing ira hintubugu bakut diet ga ngan huo.
PSA 39:13 Nanaas laah mekai ho iau waing iau nigi guama baling, iau kabi maat laah ma pa da nas habaling iau.”
PSA 40:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. Iau ga nanaho matien tano Watong. I ga tahurus taar tagu ma ga taram no nugu tintaau.
PSA 40:2 I ga rakun leh iau sukun no malmalagir na lulur, ma sukun mah no pikaia ma ra pesa. I ga hatur ira kakigu naliu tiga haatkis. Ma ga balaure timaan no nugu tuntunur.
PSA 40:3 I ga bul tiga sigar ninge narako tano hagu, a ninge na pirharlat ie tupas no udahat God. Haleng diet na nes ma diet na burut, ma diet na so ira udiet nurnuruan tano Watong.
PSA 40:4 A haraidaan na kis tano tunotuno nong no Watong i burena tano uno nurnuruan, ma pai haan tupas ira ut na latlaat, ma pai harwis tika mah ma diet ing diet tahurus taar ta ira inabis na god.
PSA 40:5 Watong, nugu God, haleng ira tamat na melmel na gingilaan na kinarup u gate gil. Ira linge u ga pingit wara numehet, taie tikai bia na was mur habal taar taam. Ing bia iau gor ianga ma iau gor hinawas ta kaike ra linge, diet manga haleng saakit ta ing i tale bia ni hinawas urie.
PSA 40:6 Pau le sip bia da tun ira mangana hartabar tupas ugu. Iesen u te papos ira talingagu. Ira hartabar ing di tun no kidilona wawaguai bakut, ma ira hartabar wara kapkap se ira magingin sakena, pau le supi.
PSA 40:7 Io, ma iau ga tange bia, “Iau um ken. Iau te hanuat. Di ga pakat hokaiken utagu narako tano num pakpakat.
PSA 40:8 Iau kanan taar bia ni gil haruatne no num sinisip, nugu God. Ira num harkurai ken narako tano kaatigu.”
PSA 40:9 Iau hinhinawas palai tano takodasiana magingin narako tano tamat na kis hulungai. Iau pai pagum bat ira palabulugu, hoing u nunure tar, Watong.
PSA 40:10 Iau pai suhe no num taktakodas narako tano kaatigu. Iau iangianga tano num harhalon ma bia pai haruat bia da nurnur songa taam. Iau pai suhe no num harmarsai ma no num tutun na magingin ta ira matmataan ta ira matanaiabar tano tamat na kis hulungai.
PSA 40:11 Waak bia nu palim dit leh no num harmarsai sukun iau, Watong. Na tahut bia no num sinisip ma ira num tutun na magingin na balbalaure haitne iau.
PSA 40:12 Kanong warah, a saksakena ing i kalkalala bia da was, i luhutane iau. Ira nugu magingin sakena i te burung iau ma pai tale iau bia ni nanaas. Diet manga haleng saakit ta ira higu tano ulugu. Ma no kaatigu i te rurungo aram narako tagu.
PSA 40:13 Watong, na tahut bia nu guama wara halhalon iau. Watong, hanuat habir wara harharahut iau.
PSA 40:14 Iau sip bia diet ing diet wara bubu bing iau, da gil hahirhir diet ma diet na nguanguo. Iau sasaring bia diet bakut ing diet masmasingan no nugu sakena, diet na tahurus tapukus ma ra malahuan.
PSA 40:15 I tahut bia diet ing diet kukutur tagu, diet na malentakuane ira udiet malahuana tintalen.
PSA 40:16 Iesen diet bakut ing diet silsilihe ugu, i tahut bia diet na guama ma diet na laro taam. Diet ing diet kalak no num harhalon, i tahut bia diet na tangtange hatikane bia, “Da bul haut no Watong.”
PSA 40:17 Iesen kana iat iau tiga maris ma ra nugu mon sunupi. Io kaik, na bilai bia no Watong na lik leh iau. Augu no nugu harharahut ma no nugu Ut na Harhalon. Nugu God, waak u halis.
PSA 41:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. A haraidaan na kis ta nong i mon lilik uta diet ing taie udiet ta dadas. No Watong na halon leh ie ta ira pakana bung na tinirih.
PSA 41:2 No Watong na nes mur ie ma na balaure bat no uno nilon. Na haidanei narako tano uno katon na pise ma pa na tar se tar ie ta ira sinisip ta ira uno ebar.
PSA 41:3 No Watong na balaure ie tano uno ula suuh na minaset ma na halangalanga leh ie sukun no uno suuh na hinangul.
PSA 41:4 Iau ga tange, “Watong, nu marse iau. Halangalanga iau, kanong iau ga gil ra sakena taar taam.”
PSA 41:5 Ira nugu ebar diet tange hagahe iau hoken: “Na maat hunanges, ma hunanges mah no hinsana na pataam hatika?”
PSA 41:6 Ing tikai na hanuat wara nesnes iau, na ianga harabota, ma no kaatine na lik hulungan ira nianga na harhuli. Io, na hansur um naga hinawas hurbit.
PSA 41:7 Ira nugu ebar diet harmurungo tika wara utagu. Diet liklik tar ira tinirih ing na haan tupas iau ma diet tangtange,
PSA 41:8 “Tiga sakana minaset i te kap tar ie. Pa na taman tut laah tano sibaan i noh taar kaia.”
PSA 41:9 No nugu bilai na harwis mah nong iau nurnur tana, aie nong mir ga iaan tika, ga raun haut no kakine tar tagu wara papaas iau.
PSA 41:10 Iesen augu, Watong, marse iau. Sal hatut iau waing iau nigi balu diet.
PSA 41:11 Iau nunure tar be u kanakana pane tar iau, kanong ira nugu ebar diet pai petlaar iau.
PSA 41:12 U hatur hadadas iau kanong ta ira bilbilai ken i kis taar tano balagu, ma u hakisi iau tano num matmataan hathatika.
PSA 41:13 A pirharlat tupas no Watong, no God ta Israel, mekatiga laah menalua tano hamhaburen tano ula hanuo tuk taar tano hauhawatine ma pana le pataam.
PSA 42:1 A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge. Hoing ra dia i taaba ra karamena pane ra taah saal, huo mah, iau manga masingan pane ugu, God.
PSA 42:2 Iau maruk pane God, pane no lilona God. Hunanges um iau ni haan ma ni harso mane God?
PSA 42:3 Ira polo na matagu i ngan bia agu nian ra kasakes ma ra bung, ma kana ira tunotuno diet tangtange tagu tano kudulena bung, “Ie he um no num God?”
PSA 42:4 Iau lik kawase tar kaiken ra linge ing iau tangtange hapuasne no balagu, ma i hoken. Iau git hanahaan tika ma ira haleng. Iau git lulue no hinahaan uram tano hala tane God ma ra kunup na gungunuama ma ra pirhakasing tika ma ira tamat na matanaiabar diet mangmangata haan ma ra kanakana.
PSA 42:5 Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God, kanong iau ni pirlat at baak ie, no nugu Ut na Harhalon ma no
PSA 42:6 nugu God.” No balagu i tapunuk, io kaik, iau nigi lik leh ugu, merau Ioridaan, meram hono uluno no uladih Hermon ma mekaia hono uladih Misar.
PSA 42:7 No lamlamana i tataau no lamlamana narako tano tabirana ira sirsiroka. Ira num pakananoh ma ira tes i suarlup, diet te rarapus naliu tagu.
PSA 42:8 Ra kasakes no Watong i la tultule no uno harmarsai. Ra bung iau ni inge auno tiga ninge, a sinasaring uram hono God tano nugu nilon.
PSA 42:9 Iau tange ta God no nugu Haatkis, “Warah u gom luban iau? Warah kaik iau nigi tur na sunuah ta ira ngunngutaan diet ing diet malok tagu diet ga ubal iau me?”
PSA 42:10 Ira surugu i kilingane ra tamat na ngunngutaan saakit ing diet ing diet malentakuane iau, diet tangtange haliare iau. Diet tangtange tagu tano kudulena bung bakut bia, “Ie he um no num God?
PSA 42:11 Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God, kanong iau ni pirlat at baak ie, no nugu Ut na Harhalon ma no nugu God.”
PSA 43:1 God, hinawas palai utagu bia iau pai gil ta nironga, ma tur harahut iau wara nianga taar ta ira haleng matanaiabar ing diet pai mur ugu. Halon iau sukun ira ut na harabota ma ira ut na sakena.
PSA 43:2 God, augu no nugu dadas na subaan na barbarahit. Wara bih gu malok se iau? Wara bih tunat iau ni tur ra sunuah, kaik diet ing diet malentakuane iau, diet haliare iau?
PSA 43:3 Tule hawaat no num lulungo ma no num tutun bia dir na lue iau, dir na lamus iau uram ra num halhaliana uladih, ukaia hono subaan nong u la lalon kaia.
PSA 43:4 Io, iau ni haan ukaia hono suuh na tun hartabar ta God, ma uram ho God aie no nugu gungunuama ma no nugu kanakana. Iau ni pirlat ugu ma ra haap, God, nugu God.
PSA 43:5 Iau haianga habaling iau, “Wara bih no balagu i hung ma ra tapunuk? Wara bih no nugu lilik pai sangeh? Kis nanahai ta God tano uno bilai na harharahut, kanong iau ni pirlat at baak ie, no nugu Ut na Harhalon ma no nugu God.”
PSA 44:1 A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge. God, mehet te hadade ma ira talinga het, ma ira hintubu het diet ga hinawase tar het ta ira linge ing u ga gil ta ira nudiet pakana bung nalua saakit.
PSA 44:2 Ma no num dadas at, u ga pasak hasur se ira mes na hunhuntunaan, ma u ga hakisi ira hintubu het tano udiet pise. U ga haliare ira mes na matanaiabar, ma u ga manga hakisi timaan ira hintubu het.
PSA 44:3 Diet pai ga kap taman ma ira udiet wise na hinarabu, ma diet pai ga petlaar mah no hinarubu ma ra nudiet dadas at. Iesen no kata na limaam, no num baso mah, ma no num madaraas nong ga sakate diet, kanong u ga sip diet.
PSA 44:4 Augu no nugu King ma no nugu God, nong i kure bia no huntunaan ta Iakop na petlaar ira hinarabu ma ira nuhet ebar.
PSA 44:5 Mehet la paspasak pukus diet ma no num dadas. Tano dadas tano hinsaam mehet papasuane diet ing diet malentakuane het.
PSA 44:6 Iau pai nurnur tano nugu laplapot. Iau pai petlaar ta hinarubu ma no nugu wise na hinarubu at.
PSA 44:7 Iesen u la harharahut mehet, kaik het gila petlaar wara hinarubu ma ira nuhet ebar. U la hahirhir diet ing diet malentakuane het.
PSA 44:8 Tano kidilona bung bakut mehet latlaat tupas ugu, God, ma het na pirlat hatikane no hinsaam.
PSA 44:9 Iesen kaiken um u te malok se tar het ma u te bul hasur het. Ma pau la saksakate habaling um ira nuhet matana ubane.
PSA 44:10 U ga gil mehet bia het na hesuo tapukus menalua ra matmataan ta diet ing diet harubu tika ma het, ma diet ga kap leh ira numehet minsik wara nudiet mon.
PSA 44:11 U ga waak se tar het bia da kanam hakidilon het hoing ira sipsip, ma u ga bul harbasiane het nalamin ta ira mes na hunhuntunaan.
PSA 44:12 U ga suhurane hasiksik ira num matanaiabar. Pau ga palim mataan diet.
PSA 44:13 U te gil diet ing diet lon tika ma het bia diet na kukutur ta het. Diet ing diet kis luhutane tar het, diet pa na urur ta het ma diet na malentakuane het.
PSA 44:14 U te gil het bia da hasakit ta het nalamin ta ira hunhuntunaan ta ira mes na hanuo. Ira matanaiabar diet lawa ul tar ta het.
PSA 44:15 Tano kidilona bung bakut iau palai bia diet hamarisne iau, ma a hirhir i te pulus no nugu matmataan
PSA 44:16 ta ira harangat ta diet ing diet kukutur ma diet ngangare iau, kanong ta ira nugu ebar ing diet taguro wara balbalu iau.
PSA 44:17 Kaiken bakut ga hanuat taar ta het, iesen mehet pai ga luban ugu, ma het pai lake no num kunubus.
PSA 44:18 Mehet pa ga lilik tatohun taam. Mehet pa ga mur tiga mes na ngaas. Mehet murmur hani at no num ngaas.
PSA 44:19 Iesen u ga rigisane mehet ma u ga waak tar het nalamin ta ira paap rakaia, ma u ga pulus bakut het ma ra tamat na kankado saakit.
PSA 44:20 Ing bia mehet gate luban no hinsana no numehet God, ma bia mehet gate sasaring tupas tiga mes na god,
PSA 44:21 God, u gor nes tupas leh ie, kanong u nunure tar ira nuhet lilik susuhai.
PSA 44:22 Iesen tano kidilona bung bakut di wara bubu bing het wara gaem. Di nes kilam het hoing ira sipsip di wara kutkut bing.
PSA 44:23 Watong, tangahun! Wara bih u kubaba? Nu pada! Waak bia u malentakuane hatikane het.
PSA 44:24 Wara biha u mun ta mehet, ma u luban ira nuhet tamat na tapunuk ma ira nuhet ngunngutaan?
PSA 44:25 Di ga bul hasur tar het napu ra kaabus. Ira palatamai het i patep taar tano pise.
PSA 44:26 Tut hut ma nu harahut het. Halon het kanong tano num harmarsai nong pai la patpataam.
PSA 45:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Purpur.” Ira bulumur ta Korah diet ga pit iakan ra ninge na tinolen. Tiga bilai na nianga i haguama no kaatigu ing iau was murmur ira nianga ing iau pakat utano king. No karamegu aie no linge na pinapakat tano keskes na ut na pakpakat.
PSA 45:2 Augu, u nanaas timaan ta ira tunaan bakut, ma God gate kapal ira palabulum ma ra harmarsai, kanong gate haidane hatikane ugu.
PSA 45:3 Taline hadikdikit no num wise na hinarubu ukaia ra binabatim, augu no dadas na tunotuno. Sigasigam ma ra melmel na minamarim.
PSA 45:4 Ma ira num minamar nu hilau laah ma tiga hos bia u te petlaar wara bubu ira num ebar, kanong ta ira burena ira tutun, no magingin na kis matien, ma no takodasiana magingin. I tahut bia no kata na limaam na haminas ira gingilaan ing pai a malmaliana.
PSA 45:5 I tahut bia ira num iaiaan na rumus na salok ira kaati diet ira ebar tano king. I tahut bia ira matanaiabar ta ira kantri diet na puko napu ta ira kakim.
PSA 45:6 God, no num kinkinis na harkurai na kis hathatika. No num takodasiana harkurai na kure no num kingdom.
PSA 45:7 U sip no taktakodas ma u malentakuane no saksakena. Io kaik, God, aie no num God, i te hakisi haut ugu naliu ta ira num harsakata ing i gilamis ugu ma no wel na gungunuama.
PSA 45:8 Ira num sigasigam bakut i sangsangin kala mismisien ma ra lamara naas ma ra lamara boiah. Mekatiga ra ngasia diet ira watong ing di hamar ma ra linge di gil ma ra lako na wawaguai, ira kinakel na ninge di ting mur, i haguama ugu.
PSA 45:9 Nalamin ta ira num wasire na hahin u suko diet, ira nat na hahi diet ira king mah kaike. Tano kata na limaam no kwin nong di hamar ie ma ra gol me Opir.
PSA 45:10 Nat na hahigu, hadoda. Lilik timaan ma nu tar talingaam. Lik luban ira num matanaiabar ma ira hinsakaam.
PSA 45:11 No king i te ngalabo tano num bilai na mangmangis. Taram ie kanong aie no num watong.
PSA 45:12 A hinasik me Taia na hanuat ma ra hartabar, ma ira watong diet na silihe no num harkalak.
PSA 45:13 I melmel harsakit no nat na hahine no king kenam narako tano uno hala. Di hi tikane no uno sigasigam ma ra gol.
PSA 45:14 Di dungut matatarine ira kiniasine, io, di lamus tar ie tano king. Ira uno lala na bulahin na harsakata, diet mur ie, ma di lamus tar diet bakut taam.
PSA 45:15 Di lamus halaka diet ma ra gungunuama ma ra larlaro. Diet haan laka tano ngasiana no king.
PSA 45:16 Ira natim tunaan diet na kap leh ira mauho ta ira am sus. Nu hatamat diet haruat ho ira king kaia ta ira kaba hanuo bakut.
PSA 45:17 Iau ni gil no hinsaam bia diet bakut ing diet na lon namur, diet pa na lik luban ie, io kaik, ira kantri diet na pirlat ugu hathatika.
PSA 46:1 A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge ma diet ga murmur no kaungana no ninge “Ira Bulahin.” God aie no nudahat subaan na barbarahit ma no udahat baso. Ma i la balbalaure haitne dahat ta ira bung na harangunngutaan.
PSA 46:2 A linge bia be no ula hanuo na ruh ma ira uladih na puko taar narako tano tingena tes, iesen dahat pa na burut.
PSA 46:3 Huo mah ing bia no tes na wawaang ma na busbusain, ma ira uladih na ninir ing no tes i tut diet.
PSA 46:4 Tiga taah kana, ing ira auno katen taah na haguama no tamat na pise na hala ta God, no halhaliana taman ing aie Nong i Naliu Harsakit i la lalon kaia.
PSA 46:5 God i kis narakoman tana, io, pai tale bia na puko. God na harahut ie ing no malaan na daras ie.
PSA 46:6 Ira huntunaan ing diet pai Iudeia, diet tut na kamahar. Ira kingdom diet puko. I raun no ingana ma no ula hanuo i pola bia.
PSA 46:7 No Watong Nong i Dadas Harsakit, i la kis tika taar ma dahat. No God ta Iakop aie no udahat subaan na munmun.
PSA 46:8 Mai, ma muat na nes ira pakpakilai tano Watong ing i hamau taman tano ula hanuo.
PSA 46:9 I la haphapataam ira rom ta ira katon bakut tano ula hanuo, i la patpatum ira laplapot, i la warwarat ira rumus, ma i la tuntun ira bahbahit ma ra iaah.
PSA 46:10 “Kis matien ma nu nunure bia iau God. Da hatamat iau nalamin ta ira kantri. Da hatamat iau kai tano ula hanuo.”
PSA 46:11 No Watong Nong i Dadas Harsakit, i la kis tika taar ma dahat. No God ta Iakop aie no udahat subaan na munmun.
PSA 47:1 A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge na lotu. Muat ira matanaiabar ta ira kantri bakut, muat na pasapasar ma ira lima muat. Ma muat na kup ma ra gungunuama uram ho God.
PSA 47:2 No Watong Nong i Naliu Harsakit i haruat bia da rui, aie no tamat na King tano ula hanuo bakut!
PSA 47:3 I bul hasur ira mes na hunhuntunaan menapu ta dahat, ma ira kaba matanaiabar menapu ta ira kaki dahat.
PSA 47:4 Ga pilak no taman nong dahat te tinanei, aie no melmel na linge ta Iakop nong God i sip ie.
PSA 47:5 God i te hanut narakoman ra kunup na gungunuama. No Watong i te hanut nalamin ta ira kinakel na tahur.
PSA 47:6 Inge pirharlat tupas God, inge pirharlat. Inge pirharlat tupas no udahat King, inge pirharlat.
PSA 47:7 Kanong warah, God aie no tamat na King tano ula hanuo bakut. Inge tupas ie ma tiga ninge na pirharlat.
PSA 47:8 God i kure ira kantri. God i kis taar tano uno halhaliana kinkinis na harkurai.
PSA 47:9 Ira lualua ta ira kantri diet kis hulungai hoing bia diet ira matanaiabar tano God ta Abaram. Ira king tano ula hanuo diet gar ta God. Di manga raun haut ie.
PSA 48:1 A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge na lotu. No Watong i manga tamat, ma i manga tale bia da pirlat ie, ram tano pise na hala tano nudahat God, aram tano uno halhaliana uladih.
PSA 48:2 No uladih Saion i manga tamat ma i nanaas timaan, ma no ula hanuo bakut i guama tana. Hoing no uluno no tamat na uladih Zapon, huo mah no uladih Saion, no pise na hala tano Tamat na King.
PSA 48:3 God kenam narako ta ira subaan na barbarahit tane Saion. I te hamines ie bia aie at no hala na munmun ta ira matanaiabar ta Saion.
PSA 48:4 Ing ira king diet ga tur tika, ma ing diet ga hanhan tika wara hinarubu,
PSA 48:5 diet ga nes Saion ma diet ga manga karup saakit. Ma diet ga hilau ma ra tamat na bunurut.
PSA 48:6 Kaik at mon diet ga dedar kaia ma ra ngunngutaan hoing tiga hahin a bulu i la papaas ie.
PSA 48:7 U ga haliare diet hoing ira tamat na mon me Tasis. Tiga dadaip meres hono kasakes i la tutut hut mekaia ga puuh sale diet.
PSA 48:8 Het te hadade ma het te nes mah asa ing God ga pakile narako tano pise na hala tano Watong Nong i Dadas Harsakit, no nudahat God, ma i hoken: God na balaure hadadas hatikanei.
PSA 48:9 God, narakoman tano num hala na lotu, mehet liklik murmur no num harmarsai nong pai la patpataam.
PSA 48:10 God, haruat ma no tamat na hinsaam, ira tunotuno ta ira katon bakut tano ula hanuo diet pirlat ugu. No dadas na kata na limaam i hung ma ra takodasiana magingin.
PSA 48:11 Ira matanaiabar ta Saion diet guama, ma ira tamtaman ta Iudeia diet laro, kanong ta ira num harkurai.
PSA 48:12 Kaia, muat na haan luhutane Saion. Muat na lik murmur timaan ira uno taltalona balo. Muat na nes ma muat na was ira katon na barbarahit aram naliu ine, naga tale bia muat na hinawase diet ing diet na lon tano pakana bung namur.
PSA 48:14 Kanong iakan ra God aie no nudahat God hathatika. Aie na lue dahat kaiken ma ukaia mah hono haphapataam.
PSA 49:1 A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge na lotu. Hadade ken, muat ira tunotuno. Taram, muat ing muat lon ta iakan ra ula hanuo,
PSA 49:2 muat ira lualua ma muat ira malahahin, muat ira watong ma muat ira maris mah.
PSA 49:3 No hagu na tange ira nianga na minminonas. Ira inga na nianga mekai ra kaatigu na tar palpalai.
PSA 49:4 Iau ni sa talingagu taar ta ira nianga na minminonas. Ing ni ting no haap ni palas no kukuraina i susuhai taar tano nugu nianga.
PSA 49:5 Iau pa ni burut ing ira sakana pakana bung na hanuat, ma ing bia ira ut na harabota sakasaka diet na luhutane iau,
PSA 49:6 diet ing diet so nurnuruan ta ira udiet tamat na bunbulaan ma diet latlaat ta ira udiet kinkinis na watong.
PSA 49:7 Taie tikai i tale bia na kul pukus no lon auno tiga mes, bia na tar kunkulaan ta God wara gaena.
PSA 49:8 No kunkulaan wara gaena tiga lon a tabi matana. Taie ta kunkulaan i haruat
PSA 49:9 bia na kul halon hathatikane habaling ie ma pa na nes no minaat.
PSA 49:10 Dahat bakut i tale bia dahat na nes ira ut na mintota diet na maat. Ira ba ma ira ngulo diet hiruo tiga mangaan mon ma diet waak kapis tar ira udiet minsik taar ta ira mes.
PSA 49:11 A ngasia diet hatika at um ira udiet midi, ma nudiet katon na kinkinis mah ta ira kaba pakana bung, sukmaal bia diet te hasur hinsa diet taar ta ira kaba katon na pise.
PSA 49:12 No tunotuno ing bia auno mon tamat na bunbulaan, iesen pa na kis lawas, i ngan hoing ira wawaguai di haliare.
PSA 49:13 Iakan aie no kunkulaan audiet ing diet so nurnuruan baling at ta diet, ma si mah ing diet murmur diet ma diet haut leh ira udiet nianga.
PSA 49:14 Diet haruat hoing ra sipsip di te tagure tar wara ures ra midi, ma no minaat na iaiaan ta diet. Ira ut na takodas diet na kure kaike ra tunotuno ra malaan, ing ira palatamai diet na marsang ares ra midi tapaka ta ira udiet melmel na hala.
PSA 49:15 Iesen God na kul pukus leh iau mares ra midi. Tutun saakit, na lamus leh iau tupas ie.
PSA 49:16 Waak u ramramin ing bia tikai na hanuat watong, ma bia no minarine no uno hala na tamtamat hanahaan,
PSA 49:17 kanong pana le kap tiga linge mei ing na maat, ma no minamarine pa na hansur tika mei.
PSA 49:18 Ing ga lon taar, ga lik bia no uno kinkinis ga manga bilai, (ma a tutun bia di la pirpirlat ugu ing u petlaar),
PSA 49:19 iesen na kis tika ma ira luptamana menalua ing diet pa na nes habaling no palai tano kasakes.
PSA 49:20 Tikai auno mon tamat na bunbulaan ma taie ta palpalai tana, i ngan hoing ira wawaguai di haliare.
PSA 50:1 A ninge na lotu ta Asap. God, no Watong nong i manga dadas saakit, i la iangianga ma i la taataau no ula hanuo merau tano tuntunut hut tano kasakes ures tano katon i la sungsuguh kaia.
PSA 50:2 Meram Saion, no katon nong i melmel saakit, God i la murmurarang mekaia.
PSA 50:3 No udahat God i hanuat, ma pa na hanuat kunkun. A iaah na iaiaan haan menalua tana, ma a tamat na baiangin na luhutane ie.
PSA 50:4 I tataau no mawe kenam naliu, ma no ula hanuo mah, waing naga kure ira uno matanaiabar hoken:
PSA 50:5 “Lamus hulungen ukai ho iau ira nugu tunotuno ing diet te tar tutun ira udiet nilon tagu, diet ing diet ga gil tiga kunubus tika ma iau ma ra hartabar.”
PSA 50:6 Ma no mawe i hinawas palai bia God i takodas, kanong aie at no ut na gil harkurai.
PSA 50:7 “Ira nugu tunotuno, muat hadoda, ma iau ni ianga. Iau ni hinawas palai ta ira num saksakena, Israel. Iau God, no numuat God.
PSA 50:8 Iau pai la baboor muat ta ira numuat hartabar, bia ira numuat hartabar ing di la tuntun ing i la be kis taar menalua tagu.
PSA 50:9 Iesen iau pai sip tiga tumatena bulumakau, bia tiga meme mekaia ra ngasia diet,
PSA 50:10 kanong ira kaba rakaia tano malit, a nugu, ma ira bulumakau ta ira arip na tihtihingan mah.
PSA 50:11 Iau nunure ira kaba maan bakut ta ira uladih, ma ira wawaguai tano pitoka, a nugu mah.
PSA 50:12 Ing bia iau gor taburungan, iau pa gor hinawase muat, kanong no ula hanuo a nugu ie, ma ira linge bakut narako tana.
PSA 50:13 Iau pai la ienien ira uratine ira tumatena bulumakau ma iau pa ni mame mah ira de na meme.
PSA 50:14 Tar ra hartabar na tanga tahut uram ho God. Gil haruatne ira num kunubus uram ta Nong i Naliu Harsakit.
PSA 50:15 Ma nu tataau tupas iau tano pakana bung na harangunngutaan. Iau ni halon ugu, ma nu pirlat iau.”
PSA 50:16 Iesen ta ira ut na sakena, God i tange, “Wara biha nu tange mur ira nugu harkurai ma nu tange mah bia nu gil haruatne no nugu kunubus?
PSA 50:17 U malentakuane ira nugu dadas na nianga, ma u se ira nugu nianga menamur taam.
PSA 50:18 Ing u nas tiga ut na kikinau, u tur tika mei, ma u lon tika ma ira ut na hilawa.
PSA 50:19 No haam i tange ira saksakena, ma no karamem i hatahuat ra hinarabota.
PSA 50:20 Hait at mon u la iangianga wara hagahe no tasim, ma u tange ira linge pai tutun tano natine no pawasim tutun.
PSA 50:21 Kaiken ra linge u te pakile, ma iau kis kunkun taar. U lik bia iau at mon hoing augu. Iesen iau ni boor ugu ma ni tung ugu ra matmataan taam.
PSA 50:22 Lik murmur iakan, muat ing muat luban God, iau kabi gisiane muat ma taie tikai wara harharahut.
PSA 50:23 Nong i tar ra hartabar na tanga tahut, i ru iau, ma i tagure no ngaas waing iau nigi hamines no harhalon ta God.”
PSA 51:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. I hinhinawas utano pakana bung bia no tangesoot Natan ga haan tupas Devit ing Devit gate noh tika ma Batseba. God, marse iau haruat ma no num magingin na harkalak tupas iau nong pai la patpataam. Ma haruat ma no num tamat na harmarsai, kap se tano num lilik ira nugu magingin na tabuna mur nianga.
PSA 51:2 Gis ise ira nugu nironga ma nu gulas ise ira nugu magingin sakena tagu,
PSA 51:3 kanong iau nunure tar ira nugu magingin na tabuna taram nianga, ma ira nugu nironga i la be kis taar menalua tagu.
PSA 51:4 Iau te gil nironga taar taam, taar taam sen mon, ma iau te gil nironga ra matmataan taam, kaik da hatutun ugu bia u takodas ing nu ianga ma i takodas at mah ing u kure iau.
PSA 51:5 Tutun saakit, a ut na sakena iau ing di ga kaha iau. A ut na sakena iau mekaia laah ing no pawasigu ga tianane leh iau.
PSA 51:6 Tutun saakit, u sip bia no tutun na kis aram narakoman tagu. A kai narako tagu tano katon i kis susuhai, u hausur iau tano minmintot.
PSA 51:7 Kapal sare iau ta ira nugu magingin sakena, ma iau nigi nanaas nunuhuan. Gis iau, ma iau nigi manga ponpon saakit ta ira sinow.
PSA 51:8 Iau sip bia ni hadada gungunuama ma ra larlaro. Ira sur ing u te rigis, iau sip bia diet na guama.
PSA 51:9 Suhe no num matmataan ta ira nugu nironga ma nu kap se tano num lilik ira nugu sakana tintalen.
PSA 51:10 God, hatahuat aram narako tagu tiga bala i gamgamatien, ma nu hasigarine aram tagu tiga lon i patpatuan.
PSA 51:11 Waak u se hasur iau mekaia tano matmataan taam bia nu kap se no num Halhaliana Tanuo mekai ho iau.
PSA 51:12 Bul habaling no gungunuama tano num harhalon taar tagu ma nu sukal hadadas iau ma tiga mangana lilik narakoman tagu nong i la kanakana taar wara tartaram ugu.
PSA 51:13 Kaik, diet ing diet pai mur harkurai, iau ni hausur diet uta ira num ngaas, ma ira ut na sakena diet na tapukus taar taam.
PSA 51:14 God, halon iau sukun no nugu magingin na harubu bingibing, augu no God nong i la halhalanga iau, ma no karamegu naga ingane no num takodasiana magingin.
PSA 51:15 Watong, papos ira palabulugu, ma no hagu na tange ra pirhakasing tupas ugu.
PSA 51:16 Bia ing u gor guama ta ira hartabar, iau gor tar. Iesen pau la kanakana ta ira hartabar di la tuntun.
PSA 51:17 No hartabar nong God i sip i hoken, bia no tunotuno i milo pane ira uno sakena. God, pa nu malok se no tunotuno ing bia i tar no magingin na marmaris taam ta ira uno sakena ma i milo mah.
PSA 51:18 Tano num bilai na sinisip, gil hanunuhuan Saion. Hatur haut ira balo ta Ierusalem.
PSA 51:19 Kaik naga mon takodasiana hartabar, ma a mon hartabar ing di la tuntun hakidilon wara haguama ugu. Kaik daga hartabar ma ra tumatena bulumakau tano num suuh na hartabar.
PSA 52:1 A nianga tupas no tunotuno nong i kure ira ut na ninge: Devit ga pit iakan ra ninge. I hinhinawas utano pakana bung ing Doek me Edom gate haan tupas Sol, gaam hinawasei bia, “Devit i te haan tano hala tane Ahimelek.” Warah gu latlaat ta ira sakena, augu no tamat na lualua? Warah gu latlaat tano kidilona bung bakut, augu nong a linge na hirhir ugu tano matmataan ta God?
PSA 52:2 No karamem i pingit hawaat ra hauhagawai. I ngan hoing ra niani na resa, augu nong u la gilgil hinarabota.
PSA 52:3 U kalak no saksakena ma u malok se no bilbilai. U sip bia nu harabota ma pau manga tanga asa ing i takodas.
PSA 52:4 U sip ira kaba nianga na harangunngutaan, augu nong a ut na harabota augu!
PSA 52:5 Tutun saakit, God na bul hasur ugu ma na bu bing hatikane ugu. Na palim hadadas haut ugu ma na ras tapikane ugu tano num palpalih. Na ragatane haut ugu mekaia ra hanuo gar ta ira lilona.
PSA 52:6 Ira ut na takodas diet na nes ma diet na ramramin. Diet na kurus no ut na sakena ma diet na tange bia,
PSA 52:7 “Iakaiken um no tunotuno nong pai nes bia God aie no auno dadas na barbarahit, iesen ga so nurnuruan ta ira uno tamat na kinewa ma ga hatamat no uno kinkinis na watong ing git halhaliare ira mes!”
PSA 52:8 Iesen, iau hoing tiga ina olip i kubur nunuhuan ram tano hala ta God. Iau so hatikane tar no nugu nurnuruan tano tutun na harmarsai ta God nong pai la patpataam.
PSA 52:9 Iau ni pirlat ugu hathatika ta ira linge u gil tagu. Iau ni nanaho ma ra nurnuruan tano hinsaam kanong i bilai no hinsaam. Iau ni pirlat no hinsaam ra matmataan ta diet ing diet te tar tutun ira udiet nilon taam.
PSA 53:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Mahalat”. Devit ga pit ie. No ulba i tange narako tano kaatine, “Taie ta God.” Ira udiet nilon i mapus sakasaka ma da miliguruane ira udiet tintalen. Taie tikai i gil no tahut.
PSA 53:2 God i nanaas suur meram ra mawe ta diet ing a tunotuno mon diet, wara nesnes ing bia tikai i palai ma bia tikai i sisilih uta God.
PSA 53:3 Diet bakut diet te siel wiis laah. Diet tika bakut, diet te hanuat sakena. Taie tikai pai gil no tahut, taie tunat tikai.
PSA 53:4 Hohe, pai tale bia ira ut na gil nironga diet na nunure tiga linge? Diet ing diet harsirikane ira nugu matanaiabar hoing tikai i ien beret, ma diet pai la sasaring uram ho God.
PSA 53:5 Diet ke, nora ramramin i manga ubal diet, ing ga taie ta linge bia da burte menalua. God ga bul harbasiane ira suru diet, ing diet ga harubu ma muat. Muat ga gil hahirhir diet, kanong God ga malentakuane diet.
PSA 53:6 Maris, iau manga sip bia no harhalon ta ira Israel na hanuat me Saion! Ing God na bul pukus habaling ira bilbilai taar ta ira uno matanaiabar, i tahut bia ira bulumur te Iakop diet na guama. I bilai bia ira Israel diet na laro.
PSA 54:1 A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Devit ga pit iakan ra ninge. I hinhinawas utano pakana bung ing ira tunotuno me Zif diet gate haan tupas Sol, diet gaam tange, “Devit i mun taar nalamin ta mehet.” God, halon iau ma no hinsaam. Hamines ma no num dadas bia iau pai gil tiga nironga.
PSA 54:2 God, hadade ira nugu sinasaring. Taram ira nianga mekai ra hagu.
PSA 54:3 Ira wasire diet tut na hinarubu ma iau. Ira ngangarina tunotuno ing diet malok ise God, diet silsilihe no nugu lon.
PSA 54:4 Tutun saakit bia God aie no nugu harharahut. No Watong aie nong i la hatur hadadas tar iau.
PSA 54:5 Waak tar no saksakena na tapukus gasien baal taar ta diet ing diet tange hagahe iau. Nu hatutun ing u te tange ma nu haliare diet.
PSA 54:6 Watong, tano nugu sinisip at, iau ni tar tiga hartabar ukaia ho ugu. Iau ni pirlat no hinsaam kanong i bilai.
PSA 54:7 Kanong warah, u te halangalanga iau sukun ira nugu tinirih bakut, ma ira matagu i te nes ira nugu ebar ing di bu bing diet.
PSA 55:1 A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Devit ga pit ie. God, taram ira nugu sinasaring. Waak bia nu malok tano nugu sinasaring marmaris.
PSA 55:2 Hadade iau ma nu balu iau. Ira nugu lilik i hapurpuruan iau ma iau te tapunuk
PSA 55:3 ta ira inga diet ira ebar, ma ta ira mata diet ira ut na sakena ing diet ngokngok dikdikit tagu, kanong diet ubal iau ma ra ngunngutaan, ma diet tange hagahe iau ma ira udiet ngalngaluan.
PSA 55:4 No nugu lilik i haruburubu. No bunurut na minaat i manga ubal iau.
PSA 55:5 A bunurut i haan tupas iau ma iau manga dedar. A ramramin i sigam iau.
PSA 55:6 Iau ga tange bia, “Awai! Ing bia gor mon babagu hoing ra bun, iau gor pupungo laah ma nigi sangeh.
PSA 55:7 Iau gor hilau laah utapaka ma iau gor kis tano hanuo bia.
PSA 55:8 Iau gor habir ukatiga tiga subaan na barbarahit, tapaka tano morohiluo ma no baiangin.”
PSA 55:9 Watong, nu hangunguo ira ut na sakena bia diet na ianga lalawata, kanong iau nes ra magingin na harhagawai ma ra hargau kai tano pise na hala.
PSA 55:10 Ra kasakes ma ra bung diet haan kumaan hurbit ta ira lar tano pise na hala. A sakana tintalen ma ra purpuruan kenam narako tana.
PSA 55:11 A tintalen wara halhaliarai kenam narako tano pise na hala. A harabota ma ra harmang pai la patpataam ta ira uno mansuk bakut.
PSA 55:12 Ing bia tiga ebar gor sa sakana nianga taar tagu, iau gor tale bia ni bala maat taar at mon. Ing bia tiga sukagu gor tut na ngalngaluan ma iau, iau gor tale bia ni mun tana.
PSA 55:13 Iesen augu mon nong u te gil kan ra linge, a tunotuno augu hoing iau, no nugu harwis tutun nong dar git lalon tika.
PSA 55:14 Ma augu ing dar git guguama tika ing dar git hanahaan tika ma ra haleng tunotuno tano hala ta God.
PSA 55:15 Iau sip bia no minaat na hakarup ira nugu ebar ma diet na maat lilon, kanong no saksakena i lalon nalamin ta diet.
PSA 55:16 Iesen iau tataau uram ho God ma no Watong i halon iau.
PSA 55:17 Ra matarahien, ra malaan ma ra pokona kasakes iau suah puasa ma ra ngunngutaan ma i hadade no ingagu.
PSA 55:18 A haleng diet tur mamate iau iesen God i kul pukus iau ma iau pai hiruo tano hinarubu di gil ie ma iau.
PSA 55:19 God, nong no uno kinkinis na harkurai i kis hathatikai, aie na hadade diet ma na hangungutaan diet, diet ira tunotuno ing diet pa na kios ira udiet magingin ma diet pa na burte God.
PSA 55:20 Nong mir la lalon tika i tut na hinarubu ma ira uno harwis. I kutus no uno kunubus tika.
PSA 55:21 Ira uno nianga i namnamien hoing ra baata, iesen no uno lon i sip hinarubu taar. Ira uno katona nianga i manga ududuh ta ira wel, iesen kaike ra nianga i haruat ma ra wise i taguro taar wara harkato.
PSA 55:22 Tar se ira num tinirih tano Watong ma aie na hadadas ugu. Pa na waak se ira ut na takodas bia diet na puko.
PSA 55:23 Iesen augu, God, nu bul hasur ira ut na gil sakena ukaia narako tano lulur na minaat. Ira ut na hinarubu bingibing ma ira ut na hinarabota diet pa na lon lawas. Iesen iau at, iau so nurnur taam.
PSA 56:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Tiga Bun i Kis taar Kaia ra Daha i Tapaka.” Devit ga pit iakan ra ninge. I hinhinawas utano pakana bung ing ira Pilistia diet gate palim kawasei kaia ra taman Gat. God, nu marse iau, kanong ira tunotuno diet paspasak hurbitane hani iau. Ta ira kaba bungbung diet sunang tartar wara hinarubu ma iau.
PSA 56:2 Ira ut na harabota diet pai sangeh wara iangianga huli iau tano kudulena bung bakut. Halengin diet harubu ma iau ma diet pai hirhir tunat ing diet gil huo.
PSA 56:3 Ing iau burut, iau ni nurnur taam.
PSA 56:4 God nong no uno nianga iau pirlat ie, ta iakano God iau nurnur. Iau pa ni burburut. Asa kaik ira tunotuno mon diet tale bia diet na gil tagu?
PSA 56:5 Tano kudulena bung diet ruru halilie ira nugu nianga. Diet la pingpingit wara hagahe iau.
PSA 56:6 Diet wawor kumaan tika, ma diet munmunuane iau. Huo diet nesnes mur timaan ira nugu hinahaan. I tut ira bala diet wara hapataam se no nugu lon.
PSA 56:7 Waak tunat u bale se diet bia diet na hilau sukun no harpidanau. God, narako tano num ngalngaluan, bul hasur ira kaba hunhuntunaan ta ira mes na hanuo.
PSA 56:8 Pakat kawase ira nugu tapunuk. Pintare leh ira luur na matagu tano num gingop. Tutun saakit, u te was bakut leh.
PSA 56:9 Ira nugu ebar diet na tahurus tapukus, ing ni tataau wara harharahut. Ta iakan iau ni nunure bia God i tur ma iau.
PSA 56:10 God, nong no uno nianga iau pirlat ie, no Watong, nong no uno nianga iau pirlat ie,
PSA 56:11 io, ta iakano God iau nurnur. Iau pa ni burburut. Asa kaik ira tunotuno mon diet tale bia diet na gil tagu?
PSA 56:12 God, iau tur taar tano nugu kunubus ukatiga ho ugu. Iau ni tar ira nugu hartabar na tanga tahut taar taam.
PSA 56:13 Kanong warah, u ga kap pukus leh iau ing iau ga wara minaat, ma ing iau ga harsomane iakano tinirih, waing nigi lon ra matmataan taam kai tano madaraas nong i bulo sare ira nilon.
PSA 57:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Waak ra Halhaliarai.” Devit ga pit iakan ra ninge. I hinhinawas utano pakana bung ing ga hilau tane Sol uram ra matana haat. Marse iau, God, marse iau, kanong no nugu nilon i la barahit taar taam. Iau ni kap barbarahit tano ududuh ta ira babaam, tuk no halhaliarai na saakit.
PSA 57:2 Iau tataau tupas God Nong i Naliu Harsakit. Iau suah uram ho God nong i pakile haruatne asa ing ga lik utagu.
PSA 57:3 I tule ra harharahut meram ra mawe ma i halon iau. I boor diet ing diet manga paspasak hani iau. God i tule no uno harmarsai ma no uno tutun na magingin.
PSA 57:4 Iau kenam nalamin ta ira laion. Iau noh taar nalamin ta ira rakaia ing diet manga taburungan, ira tunotuno ing ira ngise diet hoing ra kusur ma ra rumus, ma a niani na wise ira karame diet.
PSA 57:5 God, da raun haut ugu naliu tano mawe. ma i tahut bia no minamarim na burung no ula hanuo bakut.
PSA 57:6 Diet se bat iau ma tiga uben. Ira tinirih ga ubal iau. Diet ga kil tiga lulur tano nugu ngaas, iesen diet baling at, diet te puko suur taar tana.
PSA 57:7 No nugu nilon i tur dadas, God. No nugu nilon i tur dadas. Iau ni inge na pirharlat.
PSA 57:8 Nugu nilon, tangahun! Ira haap ma ira gita, muat kakel! Hokaiken, iau ni hangun no laar.
PSA 57:9 Watong, iau ni pirlat ugu nalamin ta ira hunhuntunaan ta ira mes na hanuo. Iau ni inge wara utaam nalamin ta ira tunotuno bakut,
PSA 57:10 kanong a tamat no num harmarsai. I haruat aram ra mawe. Ma no num tutun na magingin i hanut uram ra bahuto.
PSA 57:11 God, da raun haut ugu naliu tano mawe, ma i tahut bia no minamarim na burung no ula hanuo bakut.
PSA 58:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Waak ra Halhaliarai.” Devit ga pit ie. Muat ira lualua, muat lik bia i takodas ira numuat nianga? Ira numuat harkurai i takodas nalamin ta ira tunotuno?
PSA 58:2 Taie. Narako tano kaati muat, muat pingpingit ira harkurai pai takodas, ma ira lima muat i helar tano ula hanuo bakut.
PSA 58:3 Mekaia laah di ga kaha diet, ira ut na sakena diet haan taltalur. Meram laah tano lienat ta ira pawasi diet, diet mur leh at ira udiet lilik ma diet harabota.
PSA 58:4 Ira udiet sakana tintalen i haruat hoing no malmalena gar na ha na sui, ma hoing tiga kobra ing i malok bia na hadoda,
PSA 58:5 kaik pa naga hadade no kinkel tano tulaal tano ut na pinegil sukmaal be nong i hus tulaal i manga keskes.
PSA 58:6 God, warat ira ngise diet mekaia ra ha diet! Watong, ragatane ira lako diet ira laion!
PSA 58:7 Waak diet naga panim bia, hoing ira taah i la salsaal laah. Ing diet sarat ira udiet laplapot, iau sip bia ira nudiet rumus na tabubur.
PSA 58:8 Na tahut bia diet na haruat ma ira garnahana no demdem i mamasa laah ing i hakakari haan, ma bia diet na haruat ma tiga bo i baling ma pai nes no kasakes.
PSA 58:9 Menalua ma ira sosopen na hamaan no mamahien tano iaah i lulungo gasien, God na sah se ira ut na sakena sukmaal bia diet lon taar at baak.
PSA 58:10 Ira ut na takodas diet na laro ing nu babalu wara gae diet. Diet na papaas suguh ta ira de diet ira ut na sakena.
PSA 58:11 Ira tunotuno diet na tange, “Tutun! A mon kunkulaan audiet ira ut na takodas. Tutun! Tiga God kana nong i kure no ula hanuo.”
PSA 59:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Waak ra Halhaliarai.” Devit ga pit iakan ra ninge. I hinhinawas utano pakana bung ing Sol ga tule ari tunotuno wara munmunuane Devit aram ra uno hala wara bubu bing ie. God, halon iau mekaia ta ira nugu ebar. Balaure iau mekaia ta ing diet wara hinarubu ma iau.
PSA 59:2 Halon iau mekaia ta ira ut na gil nironga, ma nu kap pas iau mekaia ta ira ut na hinarubu bingibing.
PSA 59:3 Nes baak! Diet mun kawase tar iau. Ira ngangarina tunotuno diet ianga kumaan tika wara hanghagahe bia mon iau, ma iau pai lake tiga harkurai ma taie mah nugu ta sakana magingin, Watong.
PSA 59:4 Iau pai gil ta nironga, ma sen diet taguro wara hinarubu ma iau. Tut wara harharahut iau. Nanaas tano nugu tamat na tinirih.
PSA 59:5 Watong God Nong u Dadas Harsakit, no God ta ira Israel, nu taman tut ma nu hapidanau ira kantri ing diet pai Iudeia. Waak u marse ira sakana tunotuno ing diet ianga timaan ma iau iesen diet wara hagahe balik iau.
PSA 59:6 Diet ngangar ho ira paap ing diet tapukus ra matarahien ruruk, ma diet la hanahaan kumaan hurbit tano pise na hala.
PSA 59:7 Nes asa diet maruane se ta ira ha diet. A mon sakana nianga ta ira palabulu diet ho ira wise na hinarubu, ma diet tange bia, “Sige tikai i tale bia na hadade dahat?”
PSA 59:8 Iesen augu, Watong, u kurus diet, ma u hamalentak kaike ra kantri ing diet pai Iudeia.
PSA 59:9 Augu no nugu dadas. Iau naanaas utaam. God, augu no nugu subaan na munmun.
PSA 59:10 No nugu God i marse iau ma na hanuat ukai ho iau. Na bale iau bia nigi latlaat taar ta ira sukagu.
PSA 59:11 Iesen Watong, nuhet bahbahit, waak bia nu bu bing diet. Ira nugu tunotuno diet kabi luban no linge u ga gil ie. Tano num dadas bul hasur diet ma diet naga goota bia haan um.
PSA 59:12 Bul diet bia no udiet latlaat na hakuni diet, kanong ta ira saksakena ta ira ha diet ma ta ira nianga ta ira palabulu diet. Diet la harabota ma diet la iangianga na harhuli,
PSA 59:13 io kaik, nu hapataam bakut diet tano num ngalngaluan. Nu hapataam bakut diet tuk diet na panim laah. Io kaik, no ula hanuo bakut na nunure bia God i harkurai ta ira Israel.
PSA 59:14 Diet ngangar ho ira paap ing diet tapukus ra matarahien ruruk, ma diet la hanahaan kumaan hurbit tano pise na hala.
PSA 59:15 Diet goota hurbit wara adiet ta nian, ma ing bia diet pai hahos diet la kup na sunuah.
PSA 59:16 Iesen iau ni inge utano num dadas. Ra malaan iau ni inge utano num harmarsai kanong augu no nugu subaan na munmun ma no nugu barbarahit tano pakana bung na purpuruan.
PSA 59:17 God, iau ni inge na pirharlat ukatiga ho ugu, augu no nugu dadas. Augu no nugu subaan na munmun ma no God nong i la marmarse iau.
PSA 60:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “No Puspuspal tano Kunubus.” Devit ga pit iakan ra ninge wara tar harausur. I hinhinawas utano pakana bung ing ga harubu me Aram Naharaim ma ne Aram Zobah, ma Ioab ga tapukus ma ga bu bing ra sangahul ma iruo na arip na tunotuno me Edom kaia tano salil di kilam ie bia “Sol.” God, u te malok se het ma u te bul hasur het. U gate ngalngaluan. Kaiken um, kap pukus habaling leh mehet ukatiga ho ugu!
PSA 60:2 U te gune no pise ma u te habanga ie. Hatakodas pukus ing i banga, kanong kana baak i gungunagune.
PSA 60:3 U te ubal ira num matanaiabar ma ira dadas na pakana bung. U te hamamo het ma ra wain ing i gil het gi haan lakaleka.
PSA 60:4 Iesen uta diet ing diet ru ugu tika ma ra bunurut, u te kute haut tiga hakilang waing diet naga barahit kaia ta ira rumus.
PSA 60:5 Halon het ma no dadas na kata na limaam, ma nu taram no nugu sinasaring, waing mehet ing u manga sip het, mehet naga langalanga taar.
PSA 60:6 God i te ianga meram tano uno halhaliana subaan hoken: “Iau te kap taman taar, kaik iau ni palau ira nugu matanaiabar ma no taman Sekem ma ni hapupuo tar no salil Sukot ma ni tar ie ta diet.
PSA 60:7 No hanuo Gileat a nugui, ma no huntunaan Manase a nugu mah ie. Epraim no nugu kukuha na hinarubu, ma Iudeia no nugu hakilang na harkurai.
PSA 60:8 Moab aie no nugu tultulai wara gisgis ira kakigu. Iau te se tar ira nugu pala lamaas na pinpaas ta Edom wara hamines bia iau te hahirhir ie. Iau te barangang ing iau petlaar Pilistia.”
PSA 60:9 Sige na lamus halaka tar iau tano pise na hala nong i manga naliu ira uno lar? Sige na lua tagu ukaia Edom?
PSA 60:10 Kanong warah, God, augu at u te malok se tar het, ma pau hanahaan tika ma ira nuhet umri.
PSA 60:11 Tar ta harharahut wara turtur bat ira amehet suk, kanong a linge bia mon ira harharahut gar na tunotuno.
PSA 60:12 Dahat na bul hasur ira adahat suk ma no harharahut ta God. Aie at na papasuane hasur diet.
PSA 61:1 A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Devit ga pit ie. God, hadade no nugu tintaau. Taram no nugu sinasaring.
PSA 61:2 Mekai ra hauhawatine no ula hanuo iau tataau ugu. Iau tataau ing iau malmalungo hanahaan. Lamus iau taar tano ula habo nong i manga naliu tagu,
PSA 61:3 kanong iau la barbarahit taam kaia, ma augu no nugu subaan na munmun mah nong i kalkalala ta ira nugu ebar.
PSA 61:4 Iau te manga masingan bia ni kis hatika narako tano num palpalih ma bia ni mun menapu tano barbarahit ta ira babaam.
PSA 61:5 Kanong warah, u te hadade ira nugu kunubus, God, ma u te hatinaan iau ma ira linge i haruat ma diet ing diet burte ugu.
PSA 61:6 Halawaas ira bunguno no nilon tano king. Haut bia ira uno bulumur diet na nes baak ie.
PSA 61:7 Iau sasaring bia no uno kinkinis na harkurai na kis hathatikai taar tano matmataan ta God. Tule no num harmarsai ma no num tutun na magingin wara balbalaure bat ie.
PSA 61:8 Io, iau ni nanget na inga pirharlat ukaia hono hinsaam, ma ni pet haruatne ira nugu kunubus tupas ugu ta ira kaba bungbung.
PSA 62:1 A nianga tupas no tunotuno nong i kure ira ut na ninge: da inge iakan ra ninge na lotu haruat hoing Iedutan i sip. Devit ga pit ie. No nugu lon i silihe tupas ra sinangeh kaia ho God sen mon. No nugu harhalon i hanuat mekaia ho ie.
PSA 62:2 Aie sen mon no ula habo nong iau nes leh no nugu harhalon kaia. Aie no nugu dadas na subaan na munmun, pa da le gune at iau.
PSA 62:3 Na haruat hunanges ma kana u iangianga huli tikai? I tale bia muat bakut muat na se hasur ie napu? Aie hoing tiga balo i ioh taar, ma hoing tiga wer pai dadas.
PSA 62:4 Diet manga sip tun taar bia diet na sun hapuko se ie mekarama naliu ra uno tamat na kinkinis. Diet guama pane ra harabota. Diet haraidaan ma ira ha diet, iesen meram narako ta ira bala diet, diet se ira nianga na halhaliarai.
PSA 62:5 Nugu lon, nu siliha sinangeh ta God sen mon. Iau kis nanaho ma ra nurnuruan tano harharahut i hanuat mekaia ho ie.
PSA 62:6 Aie sen mon no ula habo nong iau nes leh no nugu harhalon kaia. Aie no nugu dadas na subaan na munmun, pa da gune at iau.
PSA 62:7 No nugu harhalon ma no bilai na hinsagu i burena sen ta God. Aie no nugu dadas na ula habo, no nugu katon na barbarahit.
PSA 62:8 Matanaiabar diet, muat na so nurnur tana ta ira kaba bungbung bakut. Muat na hapuasne ira kaati muat taar tana, kanong aie no nudahat katon na barbarahit.
PSA 62:9 Ira tunotuno, taie ta dadas ta diet. Ira watong ma ira maris, a linge bia mon diet. Ing bia da walar ira udiet tirtirih, a parahona mon diet. Diet bakut mon hoing di manasung.
PSA 62:10 Waak bia da nuruan no magingin na kap kuman kinewa, bia da tangarot ta ira linge di kinau. I tale bia na tamtamat hanahaan ira num bunbulaan, iesen waak u so tar no kaatim ta kaike ra linge.
PSA 62:11 Tiga linge God i te tange, ma airuo linge ing iau te hadade ma i hoken: God, a dadasine augu.
PSA 62:12 Watong, a ut na harmarsai ugu. Tutun saakit, nu kul tikatikai na tunotuno haruat ma asa ing i te gil.
PSA 63:1 Devit ga pit iakan ra ninge na lotu ing ga kis aram ra malubil kaia Iudeia. God, augu no nugu God. Iau manga silsilihe ugu. Iau maruk pane augu, ma no palatamaigu i masmasingan utaam, hoing no pise i mamasa ma i te bangbanga ing taie ta taah kaia.
PSA 63:2 Iau te nes ugu kaia tano num halhaliana katon, ma iau te mate no num dadas ma no minamarim.
PSA 63:3 No num harmarsai i manga bilai tano nilon, kaik iau nigi pirlat ugu.
PSA 63:4 Iau ni pirlat ugu haruat ta ira bung ni lon ine, ma iau ni raun ra limagu tano hinsaam.
PSA 63:5 Hoing bia iau ien bilai na nian, no nugu lon na duuk huo. No hagu na pirlat ugu ma ra ninge na gungunuama.
PSA 63:6 Tano ula suhugu ing iau lik leh ugu, iau liklik ugu tano kudulena bung bakut ra bung,
PSA 63:7 kanong augu no nugu harharahut. Iau inge tano ududuh ta ira airuo babaam.
PSA 63:8 Iau papalim dikdikit taar taam. No dadas na kata na limaam i sukal hatur tar iau.
PSA 63:9 Diet ing diet sisilih ta ngaas wara halhaliare iau, diet na hansur ures napu tano tingena no pise.
PSA 63:10 Da bing diet ma no wise na hinarubu ma diet na hanuat nian ana paap rakaia.
PSA 63:11 Iesen no king na guama ta God. Diet bakut ing diet sasalim tano hinsa God, diet na pirlat ie, ma ira ha diet ira ut na harabota na tabanus.
PSA 64:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. God, taram iau ing iau tange hapuasne no linge i hatirih iau. Balaure no nugu nilon ta ira linge ira nugu ebar diet haburut iau bia diet na gil tagu.
PSA 64:2 Suhe iau ta ira harpingit kumaan ta ira ut na sakena, ma suhe mah iau ta ira matanaiabar na ut na gil nironga ing diet harharat.
PSA 64:3 Diet tes haiaan ira karame diet hoing ira wise, ma diet tulus tar ira udiet nianga ho ira rumus na harbing.
PSA 64:4 Diet laplapot mekaia ta ira katon na munmunua taar tano tunotuno pai gil ta nironga. Kaik at mon diet laplapot ukaia ho ie ma taie ta bunurut ta diet.
PSA 64:5 Diet haragat harbasiane diet ta ira udiet lilik wara gil sakena. Diet iangianga wara suhsuhe ira udiet kuun, ma diet tange bia, “Sige i tale bia na nes leh kaike ra kuun?”
PSA 64:6 Diet pingit ira linge ing pai takodas ma diet tange, “Mehet te tagure tar tiga lilik ing i manga tale bia mehet na petlaar ie.” A tutun bia ira lilik ma ira bala diet ira tunotuno i manga kangkonga.
PSA 64:7 Iesen God na lapot diet ma ra rumus. Kaik at mon God na bul hasur diet.
PSA 64:8 Na halilie ira udiet nianga tus ma na tahurus taar ta diet ma na haliare diet. Diet ing diet nes diet, diet na lawa ul tar ta diet.
PSA 64:9 Ira tunotuno bakut diet na burut, ma diet na hinawas palai ta ira pinapalim ta God, ma diet na lik murmur asa ing i te gil.
PSA 64:10 I tahut bia ira ut na takodas, bia diet na kanakana tano Watong, ma diet na barahit tana. I tahut bia diet ing ira kaati diet i gamgamatien diet na pirlat ie.
PSA 65:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. God, a num ira pirharlat aram Saion. Mehet na pakile haruatne ira numehet kunubus ukatiga ho ugu.
PSA 65:2 Augu nong u la hadada sinasaring, ira tunotuno bakut diet na hanuat ukatiga ho ugu.
PSA 65:3 Ing ira numehet magingin sakena ga manga ubal mehet, u ga lik luban se kaike ra numehet tintalen na laka harkurai.
PSA 65:4 A haraidaan na kis ta diet ing u te gilamis leh ma u te lam hutaten diet bia diet na lon narako ta ira num katon na lotu. Mehet hung ma ira bilai na linge tano num hala, iakano tamat na halhaliana hala na lotu.
PSA 65:5 U tutun wara balbalu mehet ma ra tamat na pinapalim na harharahut, God, no numehet Ut na Harhalon, augu nong ira katon bakut tano ula hanuo tuk ta ira ngus na tes bakut diet so nurnuruan taam.
PSA 65:6 Augu at u ga huul ira uladih ma no num dadas ing u ga papalim ma ra baso.
PSA 65:7 Augu nong u ga hamarur no nunungo tano tes, no wawaang ta ira pakananoh, ma ira tamat na purpuruan ta ira kantri.
PSA 65:8 Diet ing diet la lalon tapaka saakit taam diet burte ira num dadas na gingilaan. Mekatiga ing no laar i daras ie ma ing no kasakes i suguh, u tataau hawaat a ninge na gungunuama.
PSA 65:9 U balaure tar no pise ma u kapal ie. U tabar no pise ma ra haleng nian saakit. Ira salsalin taah ta God i hung ma ra taah wara tar nian ta ira tunotuno, kanong u gate kure tar huo.
PSA 65:10 U la manga kapkapal ira lalong, ma u la ruprupusane ira kanaap. U la hamhamalusne no pise ma ra minmis na bata, ma u la haidane ira uno sinaso.
PSA 65:11 No bilai na linge saakit nong u gil ta tiga tinahon, bia u hartabar ma ra haleng nian, ma bia nu haan uhe, ira nian i hung.
PSA 65:12 Ira mamasina katon i hung ma ra bilai na huro, ma ira uladih diet sigasigam ma ra larlaro.
PSA 65:13 Ira huna sipsip diet banot bakut ira salil, ma ira nat na salil diet hung taar ma ra wit. Diet kup ma ra gungunuama ma diet inge.
PSA 66:1 A nianga tupas no tunotuno nong i kure ira ut na ninge: a ninge, a ninge na lotu iakan. Muat kup ma ra gungunuama uram ho God, ira tunotuno bakut.
PSA 66:2 Da inge utano minamarine no hinsana. Da tar ra tamat na pirharlat tana.
PSA 66:3 Tange ta God, “Pai a malmaliana ira num gingilaan! I manga tamat no num dadas, kaik ira num ebar diet rurungo pas ugu.
PSA 66:4 Ira tunotuno bakut diet la singsinga bukunkek taar taam. Diet inge ra pirharlat ukatiga ho ugu. Diet inge ra pirharlat ukatiga hono hinsaam.”
PSA 66:5 Mai, ma nu nas ing God i te pakile, ma nu nas mah bia pai malmaliana ira uno pinapalim wara gaena ira tunotuno!
PSA 66:6 Ga pukusane no tes i hanuat mamasina katon na pise. Diet ga haan balos no tes. Kaia, dahat na guama ta God.
PSA 66:7 I harkurai hathatikai ma no uno dadas. I nesnes murmur tar ira kantri. Waak bia ira ulpat diet iamiamul ie.
PSA 66:8 Muat ira matanaiabar, muat na pirlat no nudahat God. Da hadade ira numuat kinakel na pirharlat uram ho ie.
PSA 66:9 I te hakabet dahat tano subaan na nilon, ma i te balaure dahat ma dahat pai surmalagir.
PSA 66:10 Augu God, u te walar het. U te hagamgamatien het hoing di la hagamgamatien ra siliwa.
PSA 66:11 U ga lam hawaat tar mehet narako tano katon na harpidanau, ma u ga hapupusak tar mehet ma ra tinirih.
PSA 66:12 U ga waak tar ira tunotuno bia diet na papaas kora ta ira ulu mehet. Het ga haan kutus ra iaah ma ra taah, iesen u ga lamus hawaat het taar tano taman ing het na lon timaan kaia.
PSA 66:13 Iau ni hanuat ukai tano num tamat na hala na lotu ma ra hartabar ing di la tuntun, ma ni hatutun no nugu kunubus ukatiga ho ugu,
PSA 66:14 ira kunubus ing no palabulugu ga hasasalim ma no hagu ga tange, ing iau ga kis taar ra ngunngutaan.
PSA 66:15 Iau ni hartabar ma ra tumtubuana wawaguai ukatiga ho ugu, ma tiga hartabar na tunaan na sipsip mah. Iau ni hartabar ma ra tumatena bulumakau ma ra meme.
PSA 66:16 Muat bakut ing muat ru God, muat mai, ma muat na hadoda. Iau ni hinawase muat ta ing i te gil wara gaegu.
PSA 66:17 Iau ga tataau uram ho ie ma no hagu. A pirharlat tupas ie ga kis tano karamegu.
PSA 66:18 Ing bia iau nigi hakabet ra magingin sakena tano balagu, no Watong pa gor hadade iau.
PSA 66:19 Iesen tutun saakit, God i te hadade, ma i te taram no ingagu ing iau sasaring.
PSA 66:20 A pirharlat uram ho God, nong pai malok se no nugu sinasaring, ma pai rut bat no uno harmarsai tagu.
PSA 67:1 A nianga tupas no tunotuno nong i kure ira ut na ninge: di ga pit iakan ra ninge bia da ting ira mangana gita ing da ingei. A ninge na lotu iakan. God, marse mehet ma haidane mehet, ma nu gil no num matmataan bia na murarang naliu ta mehet,
PSA 67:2 waing ira num tintalen na hanuat palai tano ula hanuo, ma bia ira kantri diet na nunure no num harhalon.
PSA 67:3 God, na bilai bia ira matanaiabar diet na pirlat ugu. I tahut bia ira tunotuno bakut diet na pirlat ugu.
PSA 67:4 Ira matanaiabar ta ira kantri diet na laro ma diet na inge ma ra gungunuama, kanong u kure hatakodasne ira matanaiabar ma u lue ira kantri.
PSA 67:5 God, na bilai bia ira matanaiabar diet na pirlat ugu. I tahut bia ira tunotuno bakut diet na pirlat ugu.
PSA 67:6 Io, no pise na tar ira uno matukena nian, ma God, no udahat God, na haidane dahat.
PSA 67:7 God na haidane dahat, ma ira matanaiabar tano ula hanuo bakut diet na burtei ma diet na urur tana.
PSA 68:1 A nianga tupas no tunotuno nong i kure ira ut na ninge: Devit ga pit iakan ra ninge. A ninge na lotu ie. Na bilai bia God na taman tut, ira uno ebar diet na hilau harbasia, ma ira ana suk diet na hilau tana.
PSA 68:2 Hoing ra mis ing no dadaip i puuh isei, na tahut bia nu puuh se mon diet. Hoing ira kadel i pola menalua ra iaah, na bilai bia ira ut na sakena diet na pataam hatika ra matmataan ta God.
PSA 68:3 Iesen na tahut bia ira ut na takodas diet na laro ma kanakana ra matmataan ta God, ma bia diet na guama saakit.
PSA 68:4 Inge uram ho God, da inga ninge na pirharlat tano hinsana. Da pirhakasing nong i la kiskisi ira bahuto, nong no hinsana ne Watong, ma da laro menalua ra matmataan tana.
PSA 68:5 God nong iakenam narako tano uno halhaliana katon na kinkinis, a mama ie ta ing taie audiet ta tata, ma i la balbalaure ira makosa.
PSA 68:6 God i la hakisi ira soi ta ira hatatamaan, ma diet ing diet la kiskis tano hala na harpidanau, i lue hasur leh diet ma ra ninge, iesen ira tabuna taram nianga, diet lon narako ra mamasina hanuo.
PSA 68:7 God, ing u ga lamus hasur ira num matanaiabar, ma u ga lulua haan nalamin tano hanuo bia,
PSA 68:8 no pise ga kunakunar, no mawe ga hurange hasur ra bata menalua ta God, aie nong me Sinai, menalua ta God, aie no God ta Israel.
PSA 68:9 God, u ga tar ra tamat na bata. U ga hanunuhuan no dakesuana katon na pise nong a num tus ie.
PSA 68:10 God, ira num matanaiabar diet ga maren ukaia, ma u ga tabar ira maris meram narako tano num bilbilai.
PSA 68:11 No Watong ga tar ra nianga, ma ra haleng saakit ira hahin ing diet ga hinawas palai tana ma i hoken:
PSA 68:12 “Ira king ma ira udiet umri diet hilau raurawaan, ma ira hahin kaia na taman diet palau harbasiane diet ma ira linge ira matana ubane diet ga haan talur.
PSA 68:13 Ma diet mah ing diet ga mona taar, diet ga kap ira bun di pulus ira baba diet ma ra siliwa ma ing ira hi diet i pilpilakas ma ra gol.”
PSA 68:14 Ing aie Nong i Dadas Harsakit ga pasak harbasiane ira king kaia, ga ngan hoing bia a sinow ga puko tano uladih Salmon.
PSA 68:15 Ira uladih ta Basan i manga tamat. Da kadape me tapaka.
PSA 68:16 Muat ira tamat na uladih me Basan, wara bih muat nes haliare ma ra sakana bala no uladih nong God ga gilamis leh ie bia na lon tana? A tutun, no Watong at na kis kaia hatikai.
PSA 68:17 Ira karis ta God a sangahul na arip ma ra arip na arip. No Watong i te hanuat meram Sinai, uram narako tano uno halhaliana subaan na lotu.
PSA 68:18 Ing u ga hanut uram naliu, u ga lamus haleng na hiruo ing diet ga kis taar ta ira udiet winwisaan, ma u ga kap ra hartabar makaia ta ira tunotuno. Ira ulpat mah diet ga tar hartabar taam, waing augu God, no nugu Watong, nugu kis kaia.
PSA 68:19 A pirharlat tupas no Watong, aie God, no nudahat Ut na Harhalon, nong i la puspusak ira udahat tinirih ta ira bungbung bakut.
PSA 68:20 No nudahat God a God na harhalon ie. No ngaas wara pas minaat i hanuat meram hono Watong Kiskis.
PSA 68:21 Tutun saakit, God na parok ira ulu diet ira uno ebar, Na parok ira punare diet ing diet tur na gil nironga.
PSA 68:22 No Watong i tange, “Iau ni lamus diet maram Basan. Iau ni lamus diet mekaia tano tingena no tes,
PSA 68:23 waing muat ira nugu matanaiabar, muat naga singe ira kaki muat narako ta ira de diet ira numuat ebar, ma ira karamena ira numuat paap diet na mom tumtubungur.”
PSA 68:24 God, di te nes um ira tunotuno ing u lamlamus hani diet, diet ing no nugu God, no nugu King, i lamus hani diet uram narako tano uno halhaliana katon na lotu.
PSA 68:25 Ira ut na ninge diet lulua haan. Menamur ta diet ira ut na hus tulaal, tika ma ira bulahin ing diet tingting ira tamborin.
PSA 68:26 Pirlat God narako tano tamat na kis hurlungai. Pirlat no Watong, muat ira bulumur ta Iakop.
PSA 68:27 No nat na huntunaan ta Beniamin iakaikenam i lulue hani diet. Haleng saakit ira lualua ta Iuda kaia mah, ma ira lualua ta Sebulon ma ira lualua ta Naptali diet mur.
PSA 68:28 God, taguro ma ira num baso. God, hamines ta mehet no num dadas hoing u gate gil nalua.
PSA 68:29 Ira king diet na kap hawaat a num hartabar, wara utano num tamat na hala na lotu aram Ierusalem.
PSA 68:30 Boor ira matanaiabar ta ira hunhuntunaan ta ira mes na hanuo, diet hoing ira rakaia na wawaguai nalamin ta ira putuputu ma ira huna luhur na tumatena bulumakau tika ma ira nati diet. I bilai bia diet na hanapu diet ma diet na hartabar ma ra siliwa. Pasak harbasiane ira kantri ing diet kanakana wara hinarubu.
PSA 68:31 A mon tultulai na hanuat me Isip, ma ira Itiopia diet na tar se hagasiaan ira audiet hartabar uram ho God.
PSA 68:32 Muat na inge uram ho God, muat ira kingdom tano ula hanuo. Inge ra pirharlat uram hono Watong,
PSA 68:33 uram ho nong i kisi tar ira bahuto aram ra mawe nong menalua saakit, aie nong i parparara ma ra tamat na dadas na ingana.
PSA 68:34 Hinawas palai tano dadas ta God, aie nong i balaure Israel ma no uno tamat na dadas, aie nong no uno baso kenam ra mawe.
PSA 68:35 God, a tamat na urur tupas ugu narako tano num halhaliana katon na lotu. No God ta Israel i la tartar ra dadas ma ra baso ta ira uno matanaiabar. A pirharlat tupas God.
PSA 69:1 A nianga tupas no tunotuno nong i kure ira ut na ninge: Devit ga pit iakan ra ninge ma ga murmur no kaungana no ninge “Purpur.” God, halon iau, kanong no taahit i te hanut haruat ma no kadonagu.
PSA 69:2 Iau ruh narako tano pesa ing taie a nugu ta tiga linge bia ni tur kora ine. Iau te hanuat taar narako ta ra lamlamana taah, ma no taahit i te buluhane iau.
PSA 69:3 I te maalum ira tamaigu wara tintaau wara gaiena harharahut, ma no hasakit nagu i te mamasa. I te tirih ira iruo matagu ma kana iau nanaho tano nugu God.
PSA 69:4 Diet ing diet malentakuane iau, ma taie ta burena, diet manga haleng ta ira higu tano ulugu. Haleng diet miliguruane bia mon iau, diet ing diet sisilih wara hagahe iau. Diet sunang iau bia iau ni balu pukus ira linge iau pai ga kinau.
PSA 69:5 God, u nunure tar ira nugu tintalen na ngulo. Ira nugu nironga pai mun taar taam.
PSA 69:6 Watong, augu Nong u Dadas Harsakit, i tahut bia diet ing diet nanaho utaam, diet pa na hirhir wara gaiegu. God ta ira Israel, i tahut bia diet ing diet silsilihe ugu, pa da hamalahuan diet wara utagu.
PSA 69:7 Kanong warah, iau kahe ira sakana kukutur wara gaiem, ma ra hirhir i te pulus no nugu matmataan.
PSA 69:8 Ira tasigu diet harus ise iau, ma iau hoing tiga wasire nalamin ta diet,
PSA 69:9 kanong i gaas no balagu pane no num hala, ma ira sakana nianga ing diet tange haliare ugu me, i soot iau.
PSA 69:10 Ing iau kis taar ma ra sunuah ma ra minilo, di kukutur sakasaka tagu.
PSA 69:11 Ing iau sigam leh no sigasigam na tapunuk, ira tunotuno diet hasakit tagu.
PSA 69:12 Diet ing diet la kis taar tano matanangaas huat tano pise na hala, diet kukutur tagu, ma ira ut na minom diet inge garen iau.
PSA 69:13 Iesen iau sasaring uram ho ugu, Watong, tano pakana bung nu bale leh no nugu sinasaring. God, tano num tamat na harmarsai, balu iau ma no num harhalon nong pana le hasango iau.
PSA 69:14 Kap pukus iau ta ira pesa, ma waak u bale tar iau bia ni ruh suur. Halangalanga iau sukun diet ing diet malentakuane iau, hoing u gor soh leh iau mekaia ra lamlamana taah.
PSA 69:15 Waak u bale no taahit bia na buluhane iau, bia ni konga kaia ra lamlamana, ma bia no lulur na minaat na kanam iau.
PSA 69:16 Watong, taram pase iau meram narako ta ira bilbilai tano num harkalak, ma tano num tamat na harmarsai, talingane iau.
PSA 69:17 Waak u suhe no num matmataan tano num tultulai. Nu taram habir iau, kanong iau kis taar ra tinirih.
PSA 69:18 Hanuat hutet ma nu halon iau. Kap pukus iau sukun ira nugu ebar.
PSA 69:19 U nunure tar ing di kukutur sakasaka tagu huo, ma bia di hamalahuan iau ma di hahirhir iau mah. Diet bakut ira nugu ebar diet tur taar ra matmataan taam.
PSA 69:20 Ira sakana kukutur i te haliare no nugu lon, kaik i maalum ira tamaigu. Iau nanaas bia tikai na marse iau, iesen taie ta tiga nong, ma bia tikai ing na hamaram iau, iesen iau pai nas leh tikai.
PSA 69:21 Diet bul ra malmalena linge ta ira agu nian, ma diet tabar iau ma ra manmanil na wain ing iau maruk.
PSA 69:22 Iau sip bia no suuh na nian nong i kis menalua ta diet na hanuat hoing tiga matana hinau. Iau sip bia iakano suuh na hanuat tiga dadas na binabalu wara hakuni balik diet.
PSA 69:23 Iau sasaring bia ira mata diet na kankado waing diet pa naga nanaas palai, ma bia ira tihi diet na pusuko hathatika.
PSA 69:24 Burange bus diet ma no num ngalngaluan. Bale no num nginangar bia na kabit diet.
PSA 69:25 I tahut bia ira udiet taman na mau, ma bia pataie tikai na kis ta ira ngasia diet.
PSA 69:26 Kanong warah, diet la helar ta diet ing u hangungutaan diet, ma diet la iangianga ta ira ngunngutaan audiet ing u hagahe diet.
PSA 69:27 Tung diet ta ira udiet haleng na magingin sakena. Waak u bale diet bia diet na kap ta dahin tano num harhalon.
PSA 69:28 Da suge se ira hinsa diet tano pakpakat na nilon, ma pa da pakat tikane ira hinsa diet ma ira ut na takodas.
PSA 69:29 Iau kilingane ra ngunngutaan ma ra tinirih. God, iau sasaring bia no num harhalon na balaure bat iau.
PSA 69:30 Iau ni pirlat no hinsa God ra ninge, ma ing ni tanga tahut tana, ira nugu nianga na raun haut no hinsana.
PSA 69:31 Iakan na manga haguama no Watong, ma pataie bia tiga hartabar na bulumakau, ma pataie bia tiga tumatena bulumakau tika ma ira lakona ma ira kaskas na kakine.
PSA 69:32 Ira maris diet na nas ma diet na laro. Muat ing muat sisilih ta God, ira numuat lon na nunuhuan baling.
PSA 69:33 Kanong warah, no Watong i la tartaram ira sinasaring ta ira malahahin, ma pai la malmalentakuane ira uno matanaiabar di ga kubus tar diet ma ra winiwis.
PSA 69:34 I tahut bia no mawe ma no ula hanuo na pirlat ie, ma huo mah no tes ma ira linge bakut ing i lon narako tana.
PSA 69:35 Kanong warah, God na halon Ierusalem ma na hatur habaling ira pise na hala gar na Iudeia. Io, ira tunotuno diet na kis kaia ma diet na tinane leh ie.
PSA 69:36 Ira bulumur ta ira uno tultulai diet na rumahaal leh ie, ma diet ing diet sip no hinsana diet na kis kaia.
PSA 70:1 A nianga tupas no tunotuno nong i kure ira ut na ninge: A ninge tane Devit. Tiga sinasaring. God, habir wara halhalon iau. Watong, hanuat habir wara harharahut iau.
PSA 70:2 Iau sip bia diet ing diet wara bubu bing iau, da gil hahirhir diet ma diet na nguanguo. Iau sasaring bia diet bakut ing diet masmasingan no nugu sakena, diet na tahurus tapukus ma ra malahuan.
PSA 70:3 I tahut bia diet ing diet kukutur tagu, diet na hirhir ma diet na tahurus tapukus.
PSA 70:4 Iesen diet bakut ing diet silsilihe ugu, i tahut bia diet na guama ma diet na laro taam. Diet ing diet kalak no num harhalon, i tahut bia diet na tangtange hatikane bia, “Da bul haut God!”
PSA 70:5 Iesen kana iat iau tiga maris ma ra nugu mon sunupi. God, hanuat habir ukai ho iau. Augu no nugu harharahut ma no nugu Ut na Harhalon. Watong, waak u halis.
PSA 71:1 Watong, iau te barahit taam. Waak u bale bia da hahirhir iau.
PSA 71:2 Kap pukus iau ma nu halangalanga iau haruat ma no num magingin takodas. Sa talingaam ukai ho iau ma nu halon iau.
PSA 71:3 Nu hanuat hoing no nugu haatkis wara barbarahit, nong i tale bia ni hanahaan hait ukaia. Tar no nianga bia da halon iau, kanong augu no nugu haatkis ma no nugu dadas na subaan na munmun.
PSA 71:4 Nugu God, halon iau talur ira limana no ut na sakena, ma ta ira lapara luma diet ira ngarngarine ma ira ut na hanghagahai.
PSA 71:5 Watong Kiskis, iau la kis nanaho ma ra nurnuruan taam. Iau te balaraan taam mekatiga laah ing iau ga marawaan taar.
PSA 71:6 Mekaia laah di ga kap iau, iau ga soh lilik taar taam. U ga kap hawaat iau mekatiga ra balana no nugu makai. Iau ni pirlat ugu hathatikai.
PSA 71:7 Iau te hanuat tiga hakilang uta ira halengin, kanong augu no nugu dadas ma no nugu barbarahit.
PSA 71:8 No hagu i hung ma no num pirharlat, ma i tange hapuasne no num minamar tano bung bakut.
PSA 71:9 Waak u malok se iau ing iau ni patuana. Waak u haan sukun iau ing ira nugu dadas na pataam.
PSA 71:10 Ira nugu ebar diet tange bia diet wara hagahe iau. Diet ing diet nanaho wara bingbing iau, diet wawor kumaan tika.
PSA 71:11 Diet tange, “God i te haan talur ie. Da hilau mur ie ma da palim kahei, kanong taie tikai na harahut ie.”
PSA 71:12 God, waak u taptapaka tagu. Nugu God, hanuat gasien wara harharahut iau.
PSA 71:13 Iau sip bia diet ing diet tung iau, diet na hirhir ma diet na hiruo hatika laah. Iau sip bia diet ing diet wara haliare iau, na ubal diet ira nianga na hinasakit ma diet na malahuan.
PSA 71:14 Iesen iau balik, iau ni nanaho hatika ma ra nurnuruan taam, ma no nugu pirharlat tupas ugu na tamtamat hanahaan.
PSA 71:15 Iau pai tale bia ni was bakut leh ira num takodasiana magingin ma ira num magingin na harhalon, iesen iau ni hinawas palai uta kaike ra magingin tano kidilona bung.
PSA 71:16 Watong Kiskis, iau ni hanuat ma ni tange hapuasne ira num dadas na gingilaan. Iau ni tange hapuasne ira num magingin takodas sen mon, ma pataie bia tano taktakodas gar ta tiga mes.
PSA 71:17 God, tur leh mekatiga laah ing iau ga marawaan taar, u ga hausur iau, ma tuk katin iau hinawas palai ta ira num tamat na gingilaan na kinarup ing i melmel saakit.
PSA 71:18 Ma ing mah iau patuana ma iau te ul hipala, God, waak u haan sukun iau, tuk iau ni hinawase hapalaine tar ira bulumur tano num dadas, ma utano num baso ta diet baak ing diet na hanuat.
PSA 71:19 God, no num takodasiana magingin i hanut muk uram ra mawe, augu nong u te gil ra tamat na linge saakit. God, taie tikai i haruat ma augu.
PSA 71:20 U te gil iau bia ni kilingane ra haleng na tinirih ma ra ngunngutaan, iesen nu ru timaan habaling no nugu lon. Mekatiga ra balana no pise, nu raun haut habaling iau.
PSA 71:21 Nu hatamat no hinsagu ma nu habalaraan habaling iau.
PSA 71:22 Nugu God, iau ni pirlat ugu ma no haap, kanong u la gilgil haruatne ira num kunubus. Augu no Halhaliana me Israel, iau ni inga ninge na pirharlat tupas ugu ma no nugu gita.
PSA 71:23 Ira palabulugu na kup ma ra gungunuama, ing iau ni inga pirharlat taar taam. Iau ni pirlat ugu ma no nugu nilon bakut kanong u te kul pukus leh iau.
PSA 71:24 No karamegu na hinawas ta ira num takodasiana gingilaan tano kidilona bung, kanong diet ing diet ga wara hangungutaan iau, u te gil hahirhir ma u te hamalahuan diet.
PSA 72:1 A ninge ta Solomon. God, hausur no king, waing naga bul harkurai haruat ma no num lilik, ma bia na harkurai haruat ma no num takodasiana magingin.
PSA 72:2 Na kure ira num matanaiabar ma ra magingin takodas. Ma na mur ira tutun na magingin ing na gil harkurai uta ira num matanaiabar ing ira mes di te helar ta diet.
PSA 72:3 Ira uladih diet na huai timaan bia ira num matanaiabar diet naga kap ra bilai na lon, ma ira nat na uladih diet na tar ira hunena no takodasiana magingin.
PSA 72:4 Ma nalamin ta ira matanaiabar, no king na tur harahut diet ing di hangungutaan diet, ma na harahut ira nati diet ing diet mon sunupi, ma na paas hasur ira ut na hinelar.
PSA 72:5 Na tahut bia diet na ru ugu haruat ma ing no kasakes ma no teka dir murarang baak ta ira pakana bung hathatikai.
PSA 72:6 No king na haruat hoing no bata i pukpuko taar tano katon na pise di te kato sare tar ie, ma hoing ra mimis na bata i kapal no pise.
PSA 72:7 Ta ira uno pakana bung ira ut na takodas diet na hatur kawase ra bilai na kinkinis saakit. Ma ra bilai na nilon na kis hatika taar tuk bia no teka na panim laah.
PSA 72:8 No king na harkurai ta ira kaba katon na pise bakut nalamin ta ira tes, ma mekaia ra Taah Iuperetis tuk taar tano hauhawatine no ula hanuo.
PSA 72:9 Ira kaba hunhuntunaan mekaia ra hanuo bia, diet na singa bukunkek menalua tana, ma ira uno ebar diet na noh pampoba ma ra tamat na urur.
PSA 72:10 Ira king me Tasis ma mekaia ta ira mugurlamin, diet na tar hartabar tana. Ira king me Arebia ma Seba, diet na tabar ie ma ra hartabar mah.
PSA 72:11 Ira king bakut diet na singa bukunkek menalua tana, ma ira kantri bakut diet na taram ie.
PSA 72:12 Aie na halon ira maris ing diet na tataau tupas ie, diet at ing diet kilingana ngunngutaan ma taie tikai wara harharahut diet.
PSA 72:13 Na marse ira maris ma diet ing taie udiet ta dadas, ma na halon ira maris bia diet kabi maat.
PSA 72:14 Na halon diet sukun ra hinelar ma ra halhaliarai, kanong ira udiet nilon a tabi matana ra matmataan tana.
PSA 72:15 Na tahut bia no king na lon lawas! Na bilai bia ira gol me Arebia da tar tana. Iau sip bia ira matanaiabar diet na sasaring hait utana ma tano kidilona bung bakut bia diet na saring God bia na haidane ie.
PSA 72:16 Na tahut bia na mon halengin nian tano pise bakut, ma bia ira nat na uladih na hung me. Na bilai bia ira hunena ira daha na halengin hoing ira ina daha me Lebanon, ma bia ira matanaiabar ta ira pise na hala diet na haratamat hoing ra huro i kubur timaan ta ira katon na pise.
PSA 72:17 Na tahut bia da lik kawase hatikane tar no hinsana no king, ma bia da ru no hinsana haruat ma ing no kasakes i murarang baak. I tahut bia ira matanaiabar ta ira kantri diet na saring God bia na haidane diet ma no haraidaan tano king. Diet na nes kilam no king bia i te kap ra bilai na kinkinis.
PSA 72:18 A pirharlat tupas God no Watong, no God ta Israel, nong aie sen mon i la gilgil ira tamat na gingilaan na kinarup ing i melmel saakit.
PSA 72:19 A pirharlat tupas no melmel na hinsana hathatikai. Na tahut bia no ula hanuo bakut na hung ma no minarine.
PSA 72:20 Iakan i hapataam ira sinasaring ta Devit no natine Jesi.
PSA 73:1 A ninge na lotu ta Asap. Tutun saakit, God i la tahtahut ma Israel. I la bilbilai ma diet ing ira udiet nilon i gamgamatien.
PSA 73:2 Iesen iau balik, iau gor te surmalagir. Hutet tunat bia iau gor puko,
PSA 73:3 kanong iau ga lilik sakasaka taar ta ira ut na hariamul ing iau ga nes ira tahut na kinkinis audiet ira ut na sakena.
PSA 73:4 Diet pai hamaan ngunngutaan. Ira tamai diet i nunuhuan ma adiet tabi baso.
PSA 73:5 Diet langalanga sukun ira mangana tinirih ing ira tunotuno i la kilkilingane. Ira purpuruan pai ubal diet hoing ira mes na tunotuno.
PSA 73:6 Kaik huo, diet ruane ra latlaat hoing tiga biar, ma no magingin na harhagawai i sigam diet.
PSA 73:7 Ira sakana tintalen i hanuat meram narako ta ira bala diet. Ma ira sakana lilik i bureng suur meram ta ira kaati diet.
PSA 73:8 Diet hasakit sakasaka ma diet harmang. Ta ira udiet latlaat diet haramramin ira tunotuno bia diet na hamarisne diet.
PSA 73:9 Ira udiet nianga na sa butbut i haan harbasia tano ula hanuo ma uram muk ra mawe.
PSA 73:10 Kaik huo, ira matanaiabar diet mur diet, ma diet kanam bakut leh ira udiet nianga.
PSA 73:11 Diet tange, “God pai tale bia na nunure leh ira udahat gingilaan. Aie Nong i Naliu Harsakit, pa na nes tupas leh.”
PSA 73:12 Diet ira ut na sakena diet haruat hoken: diet pai kilingane tiga tinirih, ma ira udiet bunbulaan i tamtamat hanahaan.
PSA 73:13 Tutun saakit, iau te balaure tar um no balagu bia na gamgamatien, ma iau pai gil ta nironga, ma sen pataie ta hunena tano nugu nilon.
PSA 73:14 Tano kidilona bung bakut iau kap hinangul. Ta ira kaba malaan iau kap harpidanau.
PSA 73:15 Ing bia iau gor tange kaike ra mangana nianga, iau gor te lamus habato leh ira num matanaiabar.
PSA 73:16 Ing iau ga walar bia ni palai ta kaiken ra linge bakut, i ga ubal iau
PSA 73:17 tuk iau ga laka tano halhaliana hala ta God. Io, iau ga palai laah um bia na ngan hohe namur ta ira ut na sakena.
PSA 73:18 A tutun saakit bia u bul tar diet tiga malmalagiruana katon. U se hasur diet wara halhaliare diet.
PSA 73:19 Habir saakit diet hiruo sakasaka. Ira linge i haramramin diet i hapataam hatikane diet.
PSA 73:20 Hoing tiga tunotuno i luban se no barbarian ing i pada, io, Watong, ing nu tangahun, nu hunane diet kanong diet na panim laah um.
PSA 73:21 Ing no balagu ga tapunuk ma iau ga ngurungur,
PSA 73:22 iau ga ngulo ma iau pai ga palai. Iau ga ngan hoing tiga wawaguai ra matmataan taam.
PSA 73:23 Iesen iau la tur tika taar at ma augu. U palim tar no kata na limagu.
PSA 73:24 U lue iau narakoman ta ira num sinisip, ma namur um nu kap leh iau ma nu hatamat no hinsagu.
PSA 73:25 Sige mah um ing a nugu ie aram ra mawe? Augu sen mon. Ma taie tiga linge kai tano pise iau masingan pane. Taie. Augu sen mon.
PSA 73:26 I tale bia no palatamaigu na malmalungo ma na puko no nugu lilik, iesen God aie no dadas tano nugu lon ma no pinlawegu hathatikai.
PSA 73:27 Diet ing diet te haan tapaka taam, diet na hiruo. U haliare bakut diet ing diet pai mur habaling um ugu.
PSA 73:28 Iesen utagu, i bilai bia iau tur hutet ta God. Iau te nes kilam no Watong Kiskis bia aie no nugu barbarahit. Iau ni hinawas ta ira num gingilaan bakut.
PSA 74:1 A ninge ta Asap. God, wara bih u te malok se hatikane tar um het? Wara bih no balaam i mis taar ta ira num sipsip narako tano num longlong?
PSA 74:2 Lik tar ira matanaiabar u ga kul pukus diet nalua saakit, no huntunaan u tinane tar ie, nong u ga halon leh ie sukun ira tinirih. Lik tar no uladih Saion, no taman u la kis taar tana.
PSA 74:3 Ira ebar diet gate hagahe bakut ira linge kai tano hala na lotu. Halilie pukus no num hinahaan ukai ta kaiken ra halhaliarai gabe kis um.
PSA 74:4 Ira am suk diet barangang tano katon u git haarso ma het kaia. Diet hatur ira udiet hakilang kaia wara haminas bia diet te bul hasur het.
PSA 74:5 Diet tatalen hoing ira tunotuno diet baan taar ma ra matau wara burburuh tiga matana daha.
PSA 74:6 Ma ra matau ma ra haasok diet ga lau warat hasiksik ira bilai na daha di ga kasar ira balo me.
PSA 74:7 Diet ga hakarat no num hala na lotu ma i iaan bakut. Diet ga hamamagune no katon nong het git lalotu tupas ugu kaia.
PSA 74:8 Narako ta ira bala diet, diet ga tange bia, “Mehet na bu hasur hatikane diet.” Diet ga tun bakut ira katon tano numehet hanuo ing het git haarso ma God kaia.
PSA 74:9 Pau hamines ta dadas na hakilang ta mehet, taie mah um ta tangesoot, ma taie tikai ta het i nunure tar bia iakan ra tinirih na haruat hunanges.
PSA 74:10 God, na haruat hunanges bia ira ebar diet na kukutur taam? Ma ira am suk diet na tange haliare hatikane um no hinsaam?
PSA 74:11 Wara biha gu ras pukus leh no kata na limaam? Palas leh ie mekaia ta ira kiniasim ma haliare diet.
PSA 74:12 Iesen, augu God, no nugu King menalua at. U kap hawaat ra harhalon tano ula hanuo.
PSA 74:13 Augu kaik, u ga paleng harbasiane no tes ma no num dadas, ma u ga parok mah ira uluno no tadaar kaia narako tano tes.
PSA 74:14 U ga pas parok no uluno no tamat na tadaar, ma u ga tar no pala tamaine ho ira nian adiet ira wawaguai tano mamasina hanuo.
PSA 74:15 U ga papos ira puat ma ira katen taah, ma u ga hamamasa ira taah tamat.
PSA 74:16 U la kurkure no kankado ma no madaraas mah. U ga hakisi no kasakes ma no teka.
PSA 74:17 U ga igah ira linge bakut tano ula hanuo. U gil no pakana bung na kasakes ma no pakana bung na labur mah.
PSA 74:18 Watong, lik leh ing ira num ebar diet ga kukutur taam, ma ira ulba na tunotuno diet ga tange haliare no hinsaam huo.
PSA 74:19 Ira num matanaiabar, het haruat ma ira bun. Taie um numehet ta dadas. Huo, waak u tar se ira numehet nilon taar ta ira rakaia na wawaguai. Waak bia nu luban hatikane se ira nilon audiet ira num matanaiabar narako ta ira nudiet ngunngutaan ing di pakile ta diet.
PSA 74:20 Lik kawase no num kunubus, kanong ira kankado na katon tano numehet hanuo i hung ma ra haragawai.
PSA 74:21 Waak u bale leh ira tunotuno ing di ubal diet, bia diet na tahurus tapukus ma ra hirhir. Io, na tahut bia ira maris ma ira malahahin, bia diet na pirlat ugu.
PSA 74:22 God, taman tut ma nu tur bat diet ing diet wara hagahe ira linge u sip bia nu gil. Lik leh ing ira ulba diet kukutur taam huo tano kudulena bung.
PSA 74:23 Waak bia u lilik tatohun tano kunup na harangat ta ira am suk, ma ta ira harat ta ira num ebar ing i kis hatika taar.
PSA 75:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Waak u Halhaliarai.” A ninge na lotu ta Asap. God, het tanga tahut taam, het tanga tahut, kanong augu ken hutet. Ira tunotuno diet hinawas ta ira num tamat na melmel na gingilaan na kinarup.
PSA 75:2 U tange bia, “Iau puo ira pakana bung ing ira linge na hanuat. Iau at nong iau la kurkure ira matanaiabar ma ra taktakodas.
PSA 75:3 Ing no ula hanuo ma ira uno matanaiabar diet dedar, iau at nong iau sukal hadadas ie.
PSA 75:4 Iau tange tar ta ira ut na latlaat, ‘Waak muat ra latlaat,’ ma ta ira ut na sakena, ‘Waak muat hamines ira amuat baso.
PSA 75:5 Waak muat hamines ira amuat baso uram ra ula mawe. Waak muat sa butbut huo.’”
PSA 75:6 Taie tikai merau tano kasakes i la pupuruk hut, bia meram tano kasakes i la sungsuguh, bia merau ra hanuo bia, i tale bia na raun haut tiga tunotuno.
PSA 75:7 Iesen God aie nong i la harkurai taar. I bul hasur tikai ma i raun haut tiga mes.
PSA 75:8 Tiga gingop ie ke hono limana no Watong, ma i hung ma ira namnamien na wain. I burange se tar, ma ira ut na sakena tano ula hanuo diet na mame bakut.
PSA 75:9 Iesen iau balik, iau ni hinawas palai hathatikai. Iau ni inge na pirhakasing tupas no God tane Iakop.
PSA 75:10 Iau ni paas hasur ira baso adiet ira ut na sakena, iesen da hamines ira baso adiet ira ut na takodas.
PSA 76:1 A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Asap ga pit iakan ra ninge na lotu. Ares Iudeia diet nunure ne God. No hinsana i tamat saakit ares Israel.
PSA 76:2 No uno palpalih ie kenam Ierusalem. No uno taman ie kenam Saion.
PSA 76:3 Kaia ga warat ira lulungo na rumus ing di lalapot me, ira bahbahit ma ira wise, ma ira linge na hinarubu.
PSA 76:4 No minamarim i murarang palai. Mehet nas no num dadas ing u ga ubu ira num ebar aram ra uladih.
PSA 76:5 Ira dadas na umri diet ga noh bia taar um, diet ga kubaba saakit. Ma taie tikai ta ira umri pa ga tale bia na harubu baling um.
PSA 76:6 God ta Iakop, no mamahien ta ira num nianga na harboor ga harsomane ira hos ma ira umri diet kisi tar ira hos, kaik diet te noh na minaat.
PSA 76:7 Augu sen mon nong da burte ugu. Pai tale bia tikai na tur menalua taam ing u ngalngaluan.
PSA 76:8 Meram ra ula mawe u ga hinawas tano harpidanau, ma no ula hanuo ga burut ma ga kis matien,
PSA 76:9 ing augu, Watong, u ga taman tut wara gil harkurai waing nugu halon diet bakut tano ula hanuo ing di haliare diet.
PSA 76:10 A tutun bia ira tunotuno diet la ngangar wara hinarubu, iesen i la hatahuat pirhakasing tupas ugu. Ma u la bulbul tikane diet ing diet pa ga hiruo.
PSA 76:11 I tahut bia muat na pakile haruatne ira numuat kunubus uram hono Watong no numuat God. Ma i tahut bia ira mes na matanaiabar ta ira hanuo hutet ta muat, diet na kap hawaat ra hartabar uram ho Nong da burtei.
PSA 76:12 I kutus no lon na latlaat ta ira ut na gil harkurai. Ira king tano ula hanuo diet burtei.
PSA 77:1 A nianga tupas no tunotuno nong i kure ira ut na ninge: da inge iakan ra ninge na lotu haruat hoing Iedutan i sip. A ninge na lotu ta Asap. Iau susuah tamat uram ho God. Iau suah tupas God bia na taram iau.
PSA 77:2 Ing iau te kilingane ra tinirih iau la silsilihe no Watong. Ra bung iau sasangaha taar, ma ira limagu pai maat, ma iau malok bia da hamaram iau.
PSA 77:3 God, ing iau lik leh ugu, iau marmaris. Ing iau lik murmur, ira tamaigu i maalum.
PSA 77:4 Ing pau harahut iau, pai tale bia iau ni kubaba. No nugu lilik i haruburubu, kaik pai tale bia ni ianga.
PSA 77:5 Iau lik leh ira bung menalua, ma ira tinahon menalua saakit.
PSA 77:6 Iau lik leh ira nugu ninge ra bung. Iau lik murmur ma iau pai nunure no burena kaiken ra tinirih.
PSA 77:7 “Hohe, no Watong na malok se hatikane iau? Pa na hamines ta bilbilai baling at um?
PSA 77:8 Hohe, no uno harmarsai nong pana le pataam i te takumut? Ma pana le pakile haruatne habaling at um ira uno kunubus?
PSA 77:9 Hohe, God i te lik luban se no uno harmarsai? Ma tano uno ngalngaluan, na rahi pukus no uno marmaris?”
PSA 77:10 Io, iau ga tange, “No nugu lon i tirih hoken: iau pai nes habaling um no dadas ta Nong i Naliu Harsakit hoing nalua.”
PSA 77:11 Iau ni lik leh ira magingin tano Watong. Tutun, iau ni lik leh ira num dadas na gingilaan na kinarup menalua saakit.
PSA 77:12 Iau ni lilik uta ira num pinapalim, ma ni lik mur timaan leh ira num dadas na gingilaan bakut.
PSA 77:13 God, ira num tintalen i halhaal. Sige tiga god a tamat ie hoing no udahat God?
PSA 77:14 Augu no God nong ga pakile ira dadas na gingilaan na kinarup. U ga hamines ira num dadas nalamin ta ira matanaiabar.
PSA 77:15 U ga kul pukus ira num matanaiabar ma no dadas na limaam, diet kaike ira hintubu ne Iakop ma Iosep.
PSA 77:16 God, ira taah ga nes ugu. No taah ga nes ugu ma ga lel, ma no lamlamana tes ga gus.
PSA 77:17 Ira bahuto diet ga burange hasur ra taah, ma no mawe ga kakel ma ra parparara. Ira num rumus ga lulungo urau ma ures.
PSA 77:18 Ira num parparara di ga hadadei narakoman tano morohiluo, ma no num hile ga bulo sare no ula hanuo. No ula hanuo ga dedar ma ga gunagune.
PSA 77:19 U ga haan nalamin tano tes, ma ira num ngaas nalamin ta ira tamat na pakananoh, ma sen ira pinpaas na kakim pa di ga nes.
PSA 77:20 U ga lue ira num matanaiabar hoing tiga ut na balaura sipsip ta ira limane Moses ma Aaron.
PSA 78:1 A ninge ta Asap. Ira nugu matanaiabar, i tahut bia muat na hadade ira nugu harausur. Muat na taram ira nianga na hagu.
PSA 78:2 Iau ni papos no hagu ma ira nianga harharuat. Ni hinawas ta ira linge menalua saakit ing dahat pai palai ine katin,
PSA 78:3 ira linge ing dahat gate hadade ma dahat gate nunure tar, ing ira hintubu dahat diet gate hinawase tar dahat ine.
PSA 78:4 Dahat pa na suhe kaike ta ira udiet bulumur. Dahat na hinawase diet ing diet na lon namur ta ira pakpakilai tano Watong ing da pirlat ie urie, iakano uno baso ma ira tamat na melmel na gingilaan na kinarup ing ga gil.
PSA 78:5 Ga hakisi ira harkurai utano huntunaan ta Iakop, ma ga tar harausur ta Israel. Ga tange hadadas ta ira hintubu dahat bia diet na hausur ira nati diet uta kaiken ra linge,
PSA 78:6 waing diet ing diet na lon namur diet na nunure kaiken ra harkurai, ma ira nat na bulu mah ing pa di kaha baak diet, waing diet mah diet naga hapalaine ira nati diet.
PSA 78:7 Io kaik, diet naga so ira udiet nurnuruan ta God ma diet pa naga luban ira uno gingilaan, iesen diet na taram ira uno hartula.
PSA 78:8 Diet pa naga ngan ho ira hintubu diet, a tabuna taram nianga ma ra tunotuno na patnau diet, diet ing ira bala diet pa ga tutun uram ho God, ma ira udiet nilon pa ga tur dikdikit taar tana.
PSA 78:9 Ira tunaan tano huntunaan ta Epraim, diet ga palim laplapot taar, iesen diet ga tahurus tapukus tano bung na hinarubu.
PSA 78:10 Diet pa ga mur no kunubus ta God ma diet ga malok bia diet na lon mur ira uno harkurai.
PSA 78:11 Diet ga luban ira linge ga gil, ira tamat na melmel na gingilaan na kinarup ing ga haminas ta diet.
PSA 78:12 Ga gil ira dadas na gingilaan na kinarup ra matmataan ta ira hintubu dahat kaia tano taman Zoan narako tano hanuo Isip.
PSA 78:13 Ga paleng no tes ma gaam lam habalosne diet. Ga gil no taah, gaam tur kis hoing tiga balo.
PSA 78:14 Ga lamus diet ma no katona bahuto ra kasakes ma no murarang tano iaah tano kudulena bung ra bung.
PSA 78:15 Ga parok ira haat ram narako tano hanuo bia, ma ga tabar diet ma ra taah ing ga labon hono tes.
PSA 78:16 Ga tar no taah, gaam saal laah tano ula haat, ma ga saal suur ho ira taah saal.
PSA 78:17 Iesen kana at diet git gilgil ira sakana magingin tupas ie, ma ram narako ra hanuo bia, diet git patnau taar at ta Nong i Naliu Harsakit.
PSA 78:18 Diet ga sip at bia diet na walar God, ing diet ga manga saring ie utano nian diet ga manga kalak.
PSA 78:19 Diet ga ngurungur taar ta God, diet gaam tange, “I tale bia God na bul hawaat ta nian kai ra hanuo bia?
PSA 78:20 Ing ga lawat no haat, no taah ga raronga suur, hoing ira laman taah di hasapang. Iesen i tale bia na tabar mah dahat ma ra nian? I tale bia na tar ginama mah ta ira uno matanaiabar?”
PSA 78:21 Ing no Watong ga hadade diet, ga manga ngalngaluan. No uno iaah ga lulungo suur taar tano huntunaan ta Iakop, ma no uno kamahar ga hanuat tamat taar ta Israel,
PSA 78:22 kanong diet pa ga nurnur ta God ma diet pa ga so no udiet nurnuruan tana bia na halon diet.
PSA 78:23 Ma sen ga tar tiga hartula uram naliu ra hurmauhuo ma ga papos ira matanakalangar tano mawe.
PSA 78:24 Ma ga hurange hasur ira mana ho ira bata taar ta ira matanaiabar wara ienien. Ga tabar diet ma no pat na wit meram ra mawe.
PSA 78:25 A tunotuno diet ga ien no beret adiet ira angelo. Ga tar se a haleng na nian haruat ma ira udiet sinisip.
PSA 78:26 Ga lapus ise no dadaip meram ra mawe makatiga ra kasakes i la tutut hut kaia, ma ga lamus hawaat no taubar ma no uno baso.
PSA 78:27 Ga tule hasur ira ginama naliu ta diet ho ira kaabus, kaike ra haleng na maan haruat ho ira wana tano wasasar.
PSA 78:28 Diet ga puko suur nalamin ta diet, ma diet ga puko harbasia ta ira udiet palpalih.
PSA 78:29 Diet ga iaan tuk diet gaam hahos, kanong gate tabar diet ma ira linge diet ga manga kalak.
PSA 78:30 Diet pa ga bing baak no udiet tamat na sinisip tano nian, ma a nian baak kana ta ira ha diet,
PSA 78:31 ma no ngalngaluan ta God gaam hanuat taar ta diet. Ga bing diet ira adiet tabi bolbol nalamin ta diet, gaam kato hainoh ira subulo gar ta Israel.
PSA 78:32 Ga gil kaiken ra linge bakut, iesen kana at diet ga gilgil ira sakana magingin. Kaiken ra dadas na gingilaan na kinarup ga hanuat, iesen diet pa gale nurnur tana.
PSA 78:33 Huo, diet ga hasurum bia ira udiet bung na nilon, ma ira udiet tinahon ga pataam narako ra ramramin.
PSA 78:34 Ing bia God git bubu bing tari ta diet, diet git silsilihei. Diet git lilik pukus, diet gaam git nanaas tana ma ra tutun.
PSA 78:35 Diet ga lik habaling leh bia God, aie no udiet Haatkis, ma bia ne God Nong i Naliu Harsakit, aie Nong i Kul Halangalanga diet.
PSA 78:36 Ma sen bia diet ga harababo ma ira ha diet, ma diet ga habatoi ma ira karame diet.
PSA 78:37 Ira udiet nilon pa ga tur dikdikit taar tana, ma diet pa ga murmur timaan no uno kunubus.
PSA 78:38 Ma sen bia ga harmarsai, ma ga lik luban se ira udiet magingin sakena, ma pa ga haliare diet. A haleng na pakaan ga palim kawase habaling no uno ngalngaluan, ma pa ga hatatik no uno kudulena nginangar.
PSA 78:39 Ga lik leh bia a tunotuno mon diet, hoing ra dipdip nong i pupuh saakit ma pa na tapukus baling.
PSA 78:40 Diet ga patnau hait taar tana aram narako tano hanuo bia, ma diet ga gil hatapunuk ie kaia.
PSA 78:41 Hait diet git walwalar God. Diet ga gil hangalngaluan no Halhaliana gar ta Israel.
PSA 78:42 Diet pa ga lik leh ira uno baso tano bung ing ga kul halangalanga leh diet sukun ira adiet suk,
PSA 78:43 ing ga haminas ira hakilang ma ira dadas na gingilaan na kinarup kenam narakoman tano hanuo Zoan, narakoman tano taman Isip.
PSA 78:44 Ga pukusane ira audiet taah gaam hanuat de, ma pa ga tale bia diet na mom kaia ta ira adiet taah.
PSA 78:45 Ga tule ira haleng na langa, diet gaam hurut diet, ma ra rokrok ing gaam haliare diet.
PSA 78:46 Ga tule tar ira ko ta ira audiet sinaso, ma ira kubawa taar ta ira pakana ira udiet sinaso.
PSA 78:47 Ga tule a bata na ais, gaam haliare ira udiet ina wain, ma ga haliare ira udiet ina papus ma ra tamat na madahon.
PSA 78:48 Ga tule tar mah a bata na ais taar ta ira udiet bulumakau, ma a hile ga bing ira udiet sipsip ma ira me.
PSA 78:49 Ga tule no uno mamahien na ngalngaluan ma kamahar taar ta diet. Ga malentakuane tunat diet, ma ga sip bia na hagahe diet. Ga tule tiga matana ubane na angelo wara halhaliare diet.
PSA 78:50 Ga tagure tiga ngaas utano uno ngalngaluan, ma pa ga hok tikai bia pa na maat. Iesen ga tule tar no tamat na halhaliarai ta diet.
PSA 78:51 Ga bing ira matana bulu na tunaan ta ira Isip, diet ira luena nati diet ira subulo mekaia narakoman ta ira udiet hala.
PSA 78:52 Iesen ga kap hasur ira uno matanaiabar hoing tiga huna sipsip, ma ga lua ta diet nalamin tano hanuo bia.
PSA 78:53 Ga lue timaan diet waing diet pa na hiruo, ma diet pa ga burut, iesen no tes ga takap bus ira udiet ebar.
PSA 78:54 Hokaiken kaik, ga kap hawaat tar diet tano gagena no uno halhaliana pise uram ta ira uladih ing gate kap leh ma no kata na limana.
PSA 78:55 Ga pasak hasur se baak ira huntunaan mekaia ma ga palau ira uno matanaiabar ma ira subaan na pise wara audiet tus. Ga hakisi timaan tar ira huntunaan me Israel ta ira ngasia diet at.
PSA 78:56 Iesen diet ga walar God ma diet ga patnau ta Nong i Naliu Harsakit, ma diet pa ga mur ira uno harkurai.
PSA 78:57 Diet ga talingaan tapukus ma diet tur talur ie hoing at mon ira hintubu diet. Diet ga haruat ma tiga laplapot di poroi tar mon mei.
PSA 78:58 Diet ga hangalngaluan ie ing diet ga lotu kaia ta ira uladih. Ga likilik taar ta diet ma ira udiet kaba palimpuo.
PSA 78:59 Ing God ga hadade diet, ga manga ngalngaluan, ma ga miliguruane tunat diet ira Israel.
PSA 78:60 Ga papook talur no hala na lotu kaia Sailoh, iakano palpalih nong ga luk ie nalamin ta ira tunotuno.
PSA 78:61 Ga bale tar ira udahat ebar bia diet na palim kawase no bokis na kunubus nong i hakilang no uno baso ma ira minarine.
PSA 78:62 Ga waak tar ira uno matanaiabar bia diet na hiruo ta ira wise na hinarubu. Ga manga ngalngaluan taar ta ira uno tus.
PSA 78:63 A iaah ga tun bing ira audiet marawaan, ma ira udiet bulahin pa ga inge ta ninge na tinolen.
PSA 78:64 A wise na hinarubu ga ien ira udiet ut na pakila lotu, ma ira udiet makosa pa ga haruat bia diet na suah.
PSA 78:65 Kaik um, no Watong ga tangahun hoing tikai i kubaba taar, hoing tiga dadas na tunotuno i mama wain taar ma i malurau baling um.
PSA 78:66 Ga pasak pukus ira uno ebar ma ga hahirhir hatikane diet.
PSA 78:67 Io, ga was ise ira tunotuno ta Iosep, ma pa ga gilamis no huntunaan ta Epraim wara uno.
PSA 78:68 Iesen ga gilamis leh no huntunaan ta Iuda ma no uladih Saion, nong ga kalak ie.
PSA 78:69 Ga gil no halhaliana ngasiana bia na manga naliu, haruat ma no ula hanuo nong ga hakisi tar ie ma pa na pataam.
PSA 78:70 I ga gilamis Devit no uno tultulai, ma ga kap leh ie merau ra lip na sipsip.
PSA 78:71 Ga lamus leh ie mekaia hoing git balbalaure ira sipsip waing na balaure ira uno matanaiabar, diet ira bulumur ta Iakop, diet ira Israel, ira uno tus.
PSA 78:72 Ma Devit ga balaure diet ma ra takodasuana bala. Ga lamus diet ma ira keskes na limana.
PSA 79:1 A ninge na lotu ta Asap. God, ira matanaiabar ta ira kantri ing diet pai Iudeia diet te laka tano num pise. Diet te hamamagune no num halhaliana hala na lotu, ma diet te dure hasur Ierusalem ma kana i noh haliara taar.
PSA 79:2 Diet te waak kapis tar ira palatamai diet ira num tultulai waing na hanuat nian adiet ira maan tano hurmauhuo, ma ira tamtabe diet ing diet tar tutun ira udiet nilon taam, bia a nian adiet ira rakaia.
PSA 79:3 Diet te hurange ira de diet haruat ma ra taah tano kidilona taman Ierusalem, ma taie um tikai kaia bia na bus kaike ra minaat.
PSA 79:4 Mehet haruat ma ra linge na tangtange hagahe wara audiet ira matanaiabar ta ira hanuo hutet ta mehet ma hoing mah ra linge na hinasakit ma hinelar wara udiet ira tunotuno diet kis luhutane tar mehet.
PSA 79:5 Watong, na haruat um hunanges? U lik bia nu be ngalngaluan hatika taar at um? Na haruat hunanges no num bala mamahien nong i iaiaan hoing ra iaah?
PSA 79:6 Hurange hasur tar no num tamat na nginangahien naliu ta ira kantri ing diet pai la ruru ugu. Hurange hasur mah ie naliu ta ira matanaiabar ing diet pai la tataau no hinsaam.
PSA 79:7 Kanong diet te kanam kidilon se Israel ma diet te hagahe se mah no numehet taman tus.
PSA 79:8 Waak u lik hararoot tar ta mehet ira sakana magingin audiet ira hintubu mehet. Mehet saring no num harmarsai be na hanuat gasien wara harharahut mehet, kanong mehet te kis taar narakoman ra tamat na sunupi.
PSA 79:9 God, a numehet Ut na Harhalon, harahut mehet, waing daga urur taam. Kap leh mehet sukun diet ing diet haliare mehet, ma lik luban se ira numehet magingin sakena, wara utano hinsaam.
PSA 79:10 Wara bih bia ira hunhuntunaan ta ira mes na hanuo diet na tange, “Ie he no udiet God?” Mehet sip bia het na nes ing nu balu kaike ira kantri uta ira de diet ira num tultulai ing ga saal.
PSA 79:11 Hadade diet ing diet kis taar ra tamat na harpidanau ma diet susuah tupas ugu. Diet ing di te kure tar bia diet na maat, i tahut bia nu halon diet ma no dadas na limaam waing diet pa naga maat.
PSA 79:12 Watong, ta ira tunotuno diet kis hutet ta mehet, nu balu pukus diet ta liman ma iruo na pakaan uta ira nianga na harhuli diet gate se tar taam.
PSA 79:13 Io, mehet no num matanaiabar, ira sipsip narako tano num longlong, mehet na tanga tahut taam hathatikai. Ma ta ira tunotuno diet lon katin ma na hanahaan, diet na pirlat ugu.
PSA 80:1 A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Ira Puspuspal tano Kunubus.” A ninge na lotu ta Asap. Hadade mehet, augu no Ut na Harbalaurai ta Israel. Augu ing u lue Iosep hoing ra kaba sipsip. Augu ing u kis tano num kinkinis na king nalamin ta ira iruo kerubim, het saring ugu bia nu rarang
PSA 80:2 nalua ta ira huntunaan na Epraim, Beniamin ma Manase. Hamines ta mehet ira num dadas. Mai, ma nu halon mehet.
PSA 80:3 God, nu hasigarine habaling het. No matmataan taam na rarang naliu ta mehet, waing mehet naga langalanga sukun ira numehet tinirih.
PSA 80:4 Watong, augu no God Nong i Dadas Harsakit, na haruat hunanges no num bala mamahien taar ta ira sinasaring ta ira num matanaiabar?
PSA 80:5 U te tabar diet, ma diet iaan tika ma ra polo na mata diet. U te hamamo diet ma ra tamat na polo na maata.
PSA 80:6 U te gil bia ira tunotuno diet kis hutet ta mehet, diet na harubu pane ira numehet pise, ma ira numehet ebar, diet kukutur ta mehet.
PSA 80:7 God Nong u Dadas Harsakit, nu hasigarine habaling het. No matmataan taam na rarang naliu ta mehet, waing mehet naga langalanga sukun ira numehet tinirih.
PSA 80:8 U ga rau tiga ina wain ma Isip. U ga pasak hasur ira huntunaan bakut ta ira nudiet pise ma u gaam so ie.
PSA 80:9 U ga sasare no pise utana, ma i ga mon boline ma i ga burung no pise.
PSA 80:10 No maguruh tana ga kasar ira uladih. Ira katena ga kasar ira tamat na taltalona daha.
PSA 80:11 Ira singarena i haan saakit ures na tes. Ira boline i haan tapaka saakit ukaia tano taah Iuperetis.
PSA 80:12 Warah u dure hasur no wer nong i la long bat tar ie, kaik diet ing diet hanahaan saakit ta iakano ra ngaas, diet gi dik ira hunena?
PSA 80:13 Ira bore maram ra tingena malit, diet haliarei, ma ira rakaia na wawaguai diet iaan tana.
PSA 80:14 God Nong u Dadas Harsakit, tapukus ukai ta mehet. Nanaas suur maram ra mawe ma nes het. Nes mur iakan ra ina wain.
PSA 80:15 No kata na limaam gate so no boline. Aie no bulu nong u te halon hatamat leh ie wara num at.
PSA 80:16 No num ina wain di te buruh ie, ma di te hakarat ie. Ira num matanaiabar diet hiruo na minaat kanong u gate boor diet.
PSA 80:17 I tahut bia nu hadadas no tunotuno i tur taar tano kata na limaam, iakano tunotuno nong u ga gilamis leh ie wara num at.
PSA 80:18 Io huo, mehet pa na tur talur ugu. Hanunuhuan mehet, ma mehet na tataau utano hinsaam.
PSA 80:19 Watong, augu no God Nong i Dadas Harsakit, nu hasigarine habaling het. No matmataan taam na rarang naliu ta mehet, waing mehet naga langalanga sukun ira numehet tinirih.
PSA 81:1 A nianga tupas no tunotuno nong i kure ira ut na ninge: da ting ira mangana gita me Get ing da inge iakan ra ninge. Asap ga pit ie. Inge na gungunuama uram ho God no nudahat dadas. Dahat na kup naliu uram tano God ta Iakop.
PSA 81:2 Da hatahun ira ninge, da ting ra tamborin, da ting mur ira kaungana ninge ma ra haap ma ra gita.
PSA 81:3 Da hus no tahur wara hakilang no sigar teka, ma ing no teka i kidilona mah, tano bung na lukara.
PSA 81:4 A dadas na nianga ta Israel bia dahat na gil huo. Aie tiga mangana harkurai tano God ta Iakop.
PSA 81:5 God ga bul hawaat ie hoing tiga harkurai uta ira Israel ing ga harubu ma ira Isip. Iau hadade a ingana tikai ma iau pai nunure bia sige i iangianga, ma i tange,
PSA 81:6 “Iau ga kap se no tinirih ta ira kalkale diet. Iau ga lapus ise ira lima diet ta ira udiet tirihuana kinakap mah.
PSA 81:7 Meram narako tano numuat purpuruan muat ga tataau, ma iau ga halon muat. Iau ga taram pase muat meram narakoman tano parparara. Iau ga walar muat tano taah kaia Meriba.
PSA 81:8 Muat ira nugu matanaiabar, muat na hadade, ma iau nigi hakatom muat. Muat ira Israel, maris, iau manga sip bia muat na taram iau!
PSA 81:9 Waak muat hakabet tiga god ta ira mes na huntunaan nalamin ta muat. Muat pa na lotu tupas tiga mes na god.
PSA 81:10 Iau no Watong, no numuat God, nong ga lamus hasur muat sukun Isip. Muat na manga panganga, ma nigi hahungi ira ha muat.
PSA 81:11 Iesen ira nugu matanaiabar diet pa ga taram iau. Ira Israel diet pa ga tale bia diet na hanapu diet tagu.
PSA 81:12 Io, iau ga waak se tar diet ta ira nudiet tintalen na patnau waing diet naga mur ira nudiet lilik at.
PSA 81:13 Bia ing ira nugu matanaiabar diet naga taram iau, ma bia ing Israel naga tale bia na mur ira nugu tintalen,
PSA 81:14 iau gor habir wara papaas hasur ira udiet ebar ma nigi bu ira adiet suk.
PSA 81:15 Bia diet ing diet malentakuane no Watong diet gor hirhir ma ra bunurut tano matmataan ta God, ira nudiet harpidanau pa gor kis hatika taar.
PSA 81:16 Iesen iau gor tabar muat ma no bilai na wit saakit, ma muat gor hahos mah ma ra tiri na imara mekaia hono haatkis.”
PSA 82:1 A ninge na lotu ta Asap. God i lualua taar tano tamat na kinkinis hurlungai. I tar no harkurai nalamin ta ira kaba god.
PSA 82:2 Ma i tange, “Na haruat hunanges ing muat na hok diet ing diet pai gil ira takodasuana magingin, ma haruat um hunanges bia muat na tur taar tano palpal ta ira ut na sakena?
PSA 82:3 Muat na tur harahut ira maris ma ira tintana. Muat na gil no magingin takodas ta ira maris ma ira malahahin.
PSA 82:4 Muat na harahut ira mahiuhiu na tunotuno ma diet ing diet mon sunupi. Muat na halon diet sukun ira lima diet ira ut na sakena.
PSA 82:5 Diet pai nunure ta linge, diet pai palai ta tiga linge. Diet goota bia tano kankado. Ira burena bakut no ula hanuo i gunagune.
PSA 82:6 Iau ga tange, ‘A god muat.’ Muat ira natine Nong i Naliu Harsakit.
PSA 82:7 Iesen muat na maat hoing ira tunotuno mon. Muat na puko suur hoing ira kaba lualua bakut.”
PSA 82:8 God, tur hut, ma nu kure no ula hanuo, kanong a num tus ira kantri bakut.
PSA 83:1 A ninge, a ninge na lotu ta Asap iakan. God, waak u kis matien. Waak u kis kunkun, God. Nu taman tut.
PSA 83:2 Nes ira num ebar bia diet tut na kamahar, ma diet ing diet malentakuane ugu diet hatamat habaling diet.
PSA 83:3 Diet keskes wara tangtange ira nianga kumaan uta diet ira num matanaiabar, ma diet harpingit bia diet na hagahe diet ing u kalak tar.
PSA 83:4 Diet tange, “Mai, dahat gi haliare diet no kidilona huntunaan Israel, waing daga lik luban hatikane no hinsang Israel.”
PSA 83:5 Diet harpingit tika ma tiga lilik. Diet tur tika pane ugu,
PSA 83:6 diet me Edom ma ira Ismael, ira Moab, no huntunaan ta Hagar,
PSA 83:7 ira Gebal, ira Ammon, ma ira Amalek, no huntunaan ta Pilistia, ma ira matanaiabar me Taia.
PSA 83:8 Ma ira Asiria mah i te tur tika ma diet wara harharahut ira Ammon ma ira Amalek, ira iruo huntunaan na bulumur tane Lot.
PSA 83:9 Gil ta diet hoing u ga gil ta ira Midian, ma hoing u ga gil tane Sisera ma Jabin kaia tano taah Kison,
PSA 83:10 ing dir ga maat ares Endor. Ma ira palatamai diet ira udir umri ga marsang tano pise.
PSA 83:11 Bu bing ira udiet lualua hoing u ga gil ta Oreb ma Seeb, ma ira udiet kabinsit hoing u ga gil ta Seba ma Salmuna,
PSA 83:12 ing dal ga tange, “Dahat gi kap leh no bilai na pise tane God wara udahat.”
PSA 83:13 Nugu God, se harbasiane diet hoing ira kaabus, ma hoing ira pala wit no dadaip i puuh se tar.
PSA 83:14 Hoing ra iaah i iaan tano malit, bia hoing tiga karamena iaah i hakarat ira uladih,
PSA 83:15 io, pasak mur diet ma no num tamat na dadaip ma nu haramramin diet ma no num dadas na baiangin.
PSA 83:16 Watong, hamalahuan diet, waing ira tunotuno diet naga silihe ugu.
PSA 83:17 I tahut be diet naga hirhir ma diet naga tapunuk hathatika. I tahut be diet na maat ma ra hartakun,
PSA 83:18 waing diet naga nunure be augu, nong no hinsaam no Watong, bia augu sen mon Nong i Naliu Harsakit tano ula hanuo bakut.
PSA 84:1 A nianga tupas no tunotuno nong i kure ira ut na ninge: da ting ira mangana gita me Get ing da inge iakan ra ninge. Ira bulumur ta Korah diet ga pit iakan ra ninge na lotu. Watong, Nong u Dadas Harsakit, i maririsuan no num katon na kinkinis.
PSA 84:2 Iau manga masingan bia ni kis narako tano tamat na hala na lotu tano Watong. Ma no nugu nilon bakut iau tataau uram hono lilona God.
PSA 84:3 Watong, Nong u Dadas Harsakit, nugu King ma nugu God, no maankapa balik i te silihe auno tiga hala, ma no saliuliu mah i te gil no posine waing naga pabang kaia hutet tano num suuh na tun hartabar.
PSA 84:4 A haraidaan na kis ta diet ing diet la kiskis tano num hala. Diet la pirpirlat hatikane ugu.
PSA 84:5 A haraidaan na kis ta diet ing ira udiet dadas i hanuat meram ho ugu, diet ing diet masmasingan wara hinahaan uram Saion.
PSA 84:6 Ing diet saakit tano mamasina salil Baka, i kikios gi hanuat a katon ta ira mataan taah. Ma ira luena bata na halabon ira pup na taah.
PSA 84:7 Tano pakana bung diet hanahaan diet kap sigar dadas, tuk bia tikatikai na harapuasa ra matmataan ta God aram Saion.
PSA 84:8 Watong, God Nong u Dadas Harsakit, taram no nugu sinasaring. God ta Iakop, hadade iau.
PSA 84:9 God, nu nes no king, no numehet bahbahit. Nes kilam nong u ga gilamis leh ie, ma nu haidanei.
PSA 84:10 Tiga bung narako tano num hala na lotu i manga bilai ta ing tiga arip na bung bia ni kis ta tiga mes na subaan. I manga bilai bia iau gor kobat tano hala na lotu tano nugu God ta ing iau gor lon narako ta ira hala ta ira ut na sakena,
PSA 84:11 kanong no Watong God i hoing no kasakes ma a bahbahit ie. No Watong i la tartar ra harmarsai ma ra urur. Taie ta bilai na linge bia no Watong pa na tar ta ira tunotuno ing diet la murmur ra takodasiana ngaas.
PSA 84:12 Watong, Nong u Dadas Harsakit, a haraidaan na kis tano tunotuno nong i so no uno nurnur taam.
PSA 85:1 A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge na lotu. Watong, u ga hamines no num harmarsai tano num taman. U ga bul pukus no bilai na nilon ta ira Israel.
PSA 85:2 U ga lik luban ira tintalen ing pai takodas ta ira num matanaiabar ma u ga tuh burung ira udiet magingin sakena bakut.
PSA 85:3 U ga bul kapis ira num nginangahien bakut ma u ga tahurus sukun no num tamat na ngalngaluan.
PSA 85:4 God, no numehet Ut na Harhalon, hasigarine habaling mehet, ma sangeh tano num nginangar taar ta het.
PSA 85:5 U lik tar bia nu ngalngaluan hatika taar ma mehet? U lik bia nu halawaas mah no am kamahar taar ta ira bulumur?
PSA 85:6 A tutun saakit nu hasigarine habalin mehet, waing ira num matanaiabar diet naga guama taam.
PSA 85:7 Watong, hamines no num harmarsai nong pai la patpataam ta mehet, ma tabar mehet ma no num harhalon.
PSA 85:8 Iau ni taram ta ira linge God no Watong na tange, kanong i kukubus wara tar malum ta ira uno matanaiabar, diet ira uno tus. Iesen waak bia diet tapukus taar ta ira udiet magingin na sakbatbat.
PSA 85:9 Tutun saakit bia no uno harhalon i hutet ta diet ing diet urur tana, waing no uno minamar naga tale bia na kis narako tano udahat taman.
PSA 85:10 No harmarsai ma no tutun na magingin dir hanuat harso. A takodasuana magingin ma ra malum dir la kiskis tika.
PSA 85:11 No tutun na magingin i puat puasa mekai tano ula hanuo, ma no takodas na magingin i nanaas suur meram ra mawe.
PSA 85:12 Masa, no Watong na tar ira bilbilai, ma no udahat pise na hatahuat ira hunena.
PSA 85:13 No takodas na magingin i la hanahaan menalua tano Watong ma i la tangtagure no uno ngaas na hinahaan.
PSA 86:1 A sinasaring tane Devit. Watong, nu hadade, ma nu balu iau, kanong a maris ma a malahahin iau.
PSA 86:2 Nes mur no nugu nilon, kanong iau la murmur ugu. Augu no nugu God, halon no num tultulai nong i nurnur taam.
PSA 86:3 Watong, nu marse iau, kanong iau tataau uram ho ugu tano kidilona bung bakut.
PSA 86:4 Haguama no num tultulai, kanong iau raun haut no nugu nilon ukaia ho ugu, Watong.
PSA 86:5 Watong, a bilai ugu, ma u la liklik luban ira nironga. A tamat saakit no num harmarsai tupas diet ing diet tataau uram ho ugu.
PSA 86:6 Watong, hadade no nugu sinasaring. Taram no nugu tintaau wara gaiena harmarsai.
PSA 86:7 Ta ira bung iau harsomane ra tinirih, iau ni tataau uram ho ugu, kanong nu taram pase leh iau.
PSA 86:8 Watong, taie tikai nalamin ta ira god i haruat ma augu. Ira udiet gingilaan pai haruat ma ira num.
PSA 86:9 Watong, ira matanaiabar ta ira kantri bakut ing u ga hakisi, diet na hanuat ma diet na lotu tupas ugu. Diet na hanuat ma diet na ru no hinsaam,
PSA 86:10 kanong augu u manga tamat saakit ma u gil ira tamat na gingilaan na kinarup ing i melmel saakit. Augu sen mon no God.
PSA 86:11 Watong, hausur iau ta ira num tintalen, ma iau nigi haan narako tano num tutun na magingin. Tar tiga kapawena liklik tagu bia ni mur sen mon ugu, waing iau nigi ru no hinsaam.
PSA 86:12 Watong, nugu God, iau ni pirlat ugu ma no nugu nilon bakut. Iau ni hatamat no hinsaam hathatikai,
PSA 86:13 kanong no num harmarsai i manga tamat ukai tagu. U te halon iau mekaia tano tingena no midi.
PSA 86:14 God, ira ut na hariamul diet wara hinarubu ma iau. Tiga kaba holmatau dal wara bu bing iau, dal ing dal pai nes kilam ugu.
PSA 86:15 Iesen augu, Watong, a God nong i tar bia mon no uno harmarsai. Pau la ngalngaluan gasien, u manga sip mehet ma u hung ma ra tutun na magingin.
PSA 86:16 Tahurus ukai ho iau ma nu marse iau. Tar no num dadas tagu, no num tultulai. Halon iau kanong iau taram ugu hoing no pawasigu git gilgil huo.
PSA 86:17 Hamines tiga hakilang tagu uta ira num bilbilai, waing ira nugu ebar diet na nes ie ma diet na hirhir, kanong augu, Watong, u te harahut iau ma u te habalaraan iau.
PSA 87:1 Ira bulumur ta Korah diet ga pit iakan ra ninge. A ninge na lotu ie. God i te hakisi no uno pise na hala aram naliu tano halhaliana uladih.
PSA 87:2 No Watong pai kalak ira mes na taman ta Israel hoing i manga kalak Ierusalem.
PSA 87:3 I tange ira bilai na linge saakit utaam, augu no pise na hala ta God.
PSA 87:4 God i tange, “Iau ni was halaka Isip ma Babilon nalamin ta diet ing diet nunure iau. Ma uta ira matanaiabar meras Pilistia ma Taia ma Itiopia mah, iau ni tange bia, ‘I hoing bia diet ira so taman me Ierusalem.’”
PSA 87:5 Io, da tange hoken uta Ierusalem: “Iakanin ma iakan, diet ira huntunaan bakut ira uno, ma Nong i Naliu Harsakit, aie at na hatur hadadas ie.”
PSA 87:6 Ing no Watong na pakat kahe ira hinsa diet ira huntunaan, na tange bia, “Diet bakut ira so taman me Ierusalem.”
PSA 87:7 Tano pakana bung bia diet inge ma diet mangata, diet na tange bia, “Ierusalem, augu no burena ta ira nugu bilai na linge bakut.”
PSA 88:1 A ninge, a ninge na lotu iakan ta ira bulumur ta Korah. A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “No Ngunngutaan ta ira Tinirih.” Heman tano huntunaan ta Esra ga pit iakan ra ninge. Watong, augu no God nong i halon iau, iau suah taar taam ra kasakes ma ra bung.
PSA 88:2 Iau sip bia no nugu sinasaring na hanuat tupas ugu. Hadade ira nugu sunuah.
PSA 88:3 Kanong warah, no nugu nilon i hung ma ra tinirih ma hutet iau ni maat laah.
PSA 88:4 Di was tikane iau ma diet ing diet wara hinaansur ures napu tano lulur na minaat. Iau hoing tiga tunotuno taie auno ta dadas.
PSA 88:5 Di te waak se tar iau tika ma ira minaat. Iau hoing ira hiruo diet noh taar ta ira midi ing pau lik habal um diet, ma diet te takutus talur no num harbalaurai.
PSA 88:6 U te bul iau narako tano lulur nong i manga hansur ures napu tano subaan nong i kankado harsakit.
PSA 88:7 No num ngalngaluan i manga ubal iau, ma i te buluhane hasur tar iau hoing tikai a pakananoh i takap bus ie.
PSA 88:8 U te kap talur tar iau ma ira nugu bilai na harwis, ma u te gil iau bia diet na malentakuane iau. No nilon na maris te wis iau ma pa ni pas ie.
PSA 88:9 Ira matagu i rawa ra sunuah. Watong, iau tataau ukatiga ho ugu ta ira kaba bungbung. Iau la saasangaha ukatiga ho ugu.
PSA 88:10 Hohe, u la hamines ira num tamat na melmel na gingilaan na kinarup ta ira minaat? Taie. Diet ing diet te maat, diet na tut hut baal ma diet naga pirlat ugu? Taie.
PSA 88:11 I tutun bia di hinawas palai utano num harmarsai narakoman ta ira midi, bia di hinawas palai utano num tutun na magingin tano subaan na harhagawai? Taie.
PSA 88:12 Diet nunure tar mah ira num tamat na melmel na gingilaan na kinarup tano subaan na kankado? Taie. Ma diet ing diet kis tano taman nong diet pai tale wara liklik leh tiga linge, diet nunure ira num takodasiana magingin? Taie.
PSA 88:13 Iesen iau suah ukatiga ho ugu wara harharahut, Watong. Ra malaan no nugu sinasaring i hanuat taar taam.
PSA 88:14 Watong, wara bih bia u malok se iau ma u suhe no matmataan taam tagu?
PSA 88:15 Mekaia laah ing iau ga sigar bulu, iau ga kap ra tamat na ngunngutaan ma ga hutet bia ni maat. Ira num harpidanau i te haramramin hagahe iau ma iau pai haruat me.
PSA 88:16 No num ngalngaluan i te sal bus iau. Ira num harpidanau i te haramramin haliare iau.
PSA 88:17 Tano kidilona bung bakut diet saal luhutane iau hoing tiga taahit, ma diet te salirane iau.
PSA 88:18 U te kap leh sukun iau ira nugu harwis ma diet ing iau la sip tar diet. No kankado um aie no nugu bilai na harwis.
PSA 89:1 Tiga ninge tane Etan tano huntunaan ta Esra. Ta ira kaba bungbung tano nugu nilon iau ni inge utano tamat na harmarsai tano Watong. Iau ni hinawas palai ta ira tunotuno ing diet lon katin ma namur mah bia u la hatutun ing u tange.
PSA 89:2 Iau ni hinawas palai be no num harmarsai i la tur dikdikit taar ma pana le pataam, ma bia u te hatutun ing u tange hoing ira linge kenam ra mawe pai kikios.
PSA 89:3 U ga tange bia, “Iau te gil tiga kunubus tika ma nong iau te gilamis leh ie. Iau te kubus nianga taar ma Devit no nugu tultulai, iau gaam tange hoken:
PSA 89:4 ‘Iau ni hakisi hatikane tar no num huntunaan, ma iau ni hatur hadadas no num kinkinis na king ma pana le pataam.’”
PSA 89:5 Watong, ira angelo aram ra mawe diet pirlat ira num tamat na melmel na gingilaan na kinarup, ma kaia tano udiet kis hulungai diet pirlat mah ugu bia u hatutun ing u tange.
PSA 89:6 Kanong sige tikai aram ra mawe da hapupuo tikanei ma no Watong? Sige tikai nalamin ta ira angelo bakut ing i haruat hoing no Watong?
PSA 89:7 Di manga ru God nalamin tano kis hulungai ta ira angelo. Aie nong da manga rui ta diet bakut ing diet kis luhutane tar ie.
PSA 89:8 Watong, augu no God Nong i Dadas Harsakit, sige nong i haruat ma ugu? U manga dadas, Watong, ma u la hatutun ira linge bakut ing u tange.
PSA 89:9 U kure mah no tes ing i gus. Ing ira pakananoh i tut, u hamarur diet.
PSA 89:10 U ga pas rigis Rahap hoing tikai di kato bing ie. U ga pasak harbasiane ira ebar ma no dadas na limaam.
PSA 89:11 A num no mawe ma a num mah no ula hanuo. U ga hakisi no ula hanuo ma ira linge bakut kenam narakoman tana.
PSA 89:12 U ga gil no ula hanuo bakut, hatahun leh mekatiga hono kasakes i la tutut hut ures hono kasakes i la sungsuguh. No uladih Tabor ma no uladih Hermon dir la inginge ma ra gungunuama tano hinsaam.
PSA 89:13 No limaam i hung taar ma ra baso. A dadasine no limaam, no kata na limaam da manga lat ie.
PSA 89:14 A takodasiana magingin ma ra tutun na harkurai dir ira burena no num kinkinis na king. A harmarsai ma no tutun dir la hanahaan nalua taam hoing ira num tultulai.
PSA 89:15 Watong, a haraidaan na kis ta diet ing diet te lasa bia diet na pirlat ugu, ma diet ing diet haan tano murarang tano matmataan taam.
PSA 89:16 Diet guama tano hinsaam tano kudulena bung bakut. Diet kanakana tano num taktakodas.
PSA 89:17 Kanong augu no burena bia no udiet baso i tamat saakit, ma u guama bia nu tar ra tamat na dadas ta mehet.
PSA 89:18 Tutun saakit, no nuhet bahbahit gar tano Watong ie. No nuhet king gar tano Halhaliana God ta Israel.
PSA 89:19 Tiga pakaan u ga ianga narako tiga barbarien, u ga tange hoken ta diet ing diet la murmur ugu: “Iau te tar baso ta tiga umri. Iau te raun haut tiga marawaan mekaia nalamin ta ira matanaiabar.
PSA 89:20 Iau te silihe leh Devit, no nugu tultulai. Iau te puk ie ma ira nugu wel ing i halhaal.
PSA 89:21 No limagu na harahut ie. Tutun bia no limagu na hadadas ie.
PSA 89:22 Taie ta ebar na tale be na paas hasur ie. Taie tiga ut na sakena i tale bia na hangungutaan ie.
PSA 89:23 Iau ni bisang ira uno ebar ra matmataan tana ma ni bu hasur ing diet malentakuanei.
PSA 89:24 No nugu harmarsai nong pana le pataam na kis tika mei, ma iau ni tar ra tamat na dadas tana.
PSA 89:25 Iau ni hatamat no uno kingdom bia na harkurai hatahun laah mekai tano tes, tuk ta ira taman ing a mon taah saal.
PSA 89:26 Na tataau ukai ho iau, ‘Augu no ragu Sus, no nugu God, ma no nugu Haatkis nong i halon iau.’
PSA 89:27 Ma iau ni hatur ie hoing no nugu matana bulu, nong di manga raun haut ie naliu ta ira king bakut tano ula hanuo.
PSA 89:28 Iau ni tar no nugu harmarsai tana hathatika. Ma no nugu kunubus tika mei pana le pataam.
PSA 89:29 Iau ni hakisi hatikane tar no uno huntunaan. No uno kinkinis na king na kis hatika hoing no mawe i kis hatika taar.
PSA 89:30 “Ing bia ira natine, diet na waak kapis ira nugu harausur ma diet pa na mur ira nugu harkurai,
PSA 89:31 ma diet pa na mur ira nugu dadas na nianga ma diet pa na mur timaan ira nugu hartula,
PSA 89:32 io, iau ni hadakdak diet uta ira udiet sakana tintalen, ma iau ni hadangat diet gaena ira nudiet nironga.
PSA 89:33 Iesen iau pa ni kap leh no nugu harmarsai talur ie, ma iau ni gil haruatne ing iau ga tange bia ni gil.
PSA 89:34 Iau pa ni kutus no nugu kunubus tika mei. Iau pa ni kios asa ing iau gate tange.
PSA 89:35 Tiga pakaan sen mon iau te sasalim ma no halhaliana hinsagu, ma no nugu kunubus na kis hatika taar. Pa ni habato ne Devit.
PSA 89:36 Iau te kukubus bia no uno huntunaan na kis hatika taar, ma bia no uno kinkinis na king na kis hathatikai ra matmataan tagu hoing no kasakes.
PSA 89:37 Na tur hatika taar hoing no teka, nong i la kiskis aram ra mawe wara hamines bia iakan i tutun.”
PSA 89:38 Iesen, Watong, u gate manga ngalngaluan taar tano king nong u ga gilamis leh ie. U te malok sei ma u te malentakuane mah ie.
PSA 89:39 U te kutus no kunubus ma no num tultulai, ma u te gil habilinge no uno balaparik na lualua tano kaabus.
PSA 89:40 U te papat hasur ira uno palpal na balo bakut, ma u te dure hasur ira uno dadas na subaan na barbarahit.
PSA 89:41 Diet bakut ing diet haan saakit, diet kikinau kaia ho ie. Sige ing diet kis hutaten tar ie, diet kukutur tana.
PSA 89:42 U te raun haut no kata na limana ira uno ebar. U te haguama ira ana suk bakut.
PSA 89:43 U te hurusane pukus no ngisena no uno wise, ma pau le tur harahut ie tano tamat na hinarubu.
PSA 89:44 U te hapataam se tar ira uno minamar ma u te se hasur no uno kinkinis na king ukaia ra pise.
PSA 89:45 U te puo hakumkum ira uno pakana bung na marawaan, ma no hirhir i te pulus ie.
PSA 89:46 Watong, na haruat hunanges? Nu suhe hatikane no num matmataan? Na haruat hunanges ing no num ngalngaluan na iaan hoing ra iaah?
PSA 89:47 Lik leh no nugu kumkumina nilon. Taie ta burena kaik u gom hakisi ira tunotuno bakut.
PSA 89:48 A tunotuno sa nong na lon ma pa na nes no minaat? I tale be na pas no dadas tano midi? Taie.
PSA 89:49 Watong, u la hatutun ing u tange, io kaik, ahe ira luena gingilaan i hamines no num harmarsai nong u ga kubus taar ta Devit?
PSA 89:50 Watong, lik mur leh ing di ga kukutur tano num tultulai huo. Lik leh ira nianga na harangat ta ira hunhuntunaan ta ira mes na hanuo ing i manga ubal iau.
PSA 89:51 Watong, ira num ebar diet kukutur tano king nong u ga gilamis leh ie. Diet kukutur tana ta ira uno hinahaan bakut.
PSA 89:52 A pirharlat tupas no Watong hathatika! Amen! Amen!
PSA 90:1 A sinasaring tane Moses no tunotuno gar tane God. Watong, augu no numehet subaan bia mehet git lalon kaia, tur leh ta ira hintubu mehet menalua ma tuk katin.
PSA 90:2 U gate kis bia God ugu, tur leh menalua, katin, ma pa na pataam. Ing ira uladih baak pa ga hanuat ma pau ga bul hawaat baak no pise ma no ula hanuo bakut, u gate kis bia God ugu.
PSA 90:3 U kios ira tunotuno, diet gi hanuat kaabus baling, ma u tange bia, “Muat na tapukus baal taar ra kaabus, muat ing muat ira tunotuno mon.”
PSA 90:4 Kanong u la nes tar bia tiga arip na tinahon i haruat mon ma tiga bung kaiken mon i patpataam, bia hoing tiga kumkumina pakana bung ra bung.
PSA 90:5 U hanuat ho ira taahit ma u salirane se ira tunotuno ukaia ra minaat. Diet ngan mon hoing ira purpur i papalas ra malaan.
PSA 90:6 A tutun bia i papalas ra malaan, iesen ra matarahien mon na mahiawa ma na maranga.
PSA 90:7 No num ngalngaluan i te hamalmalungo mehet ma mehet ramramin tano am kamahar.
PSA 90:8 U te bul tar ira numehet nironga menalua taam, ma ira numehet magingin susuhai pai mun tano madaraas tano num matmataan.
PSA 90:9 Ira numehet bung na nilon pai pas no num ngalngaluan. Ira numehet tinahon na nilon i pataam ma ra sunuah.
PSA 90:10 Ira punpuo ta ira numehet bung na nilon a liman ma airuo na sangahul na tinahon, bia a liman ma aitul na sangahul, ing bia a numehet mon baso at baak. Iesen kaikek ra bung i hung ma ira tinirih ma ra tapunuk sen mon. Kaike ra tinahon diet saakit gasien ma mehet pupungo laah.
PSA 90:11 Sige tikai i nunure no dadas tano num ngalngaluan? No num nginangar i tamat saakit. I haruat hoing i takodas bia da ru ugu.
PSA 90:12 Hausur mehet bia mehet na nes kilam bia ira numehet bung na nilon pai talona, waing mehet naga minonas.
PSA 90:13 Watong, waak um u manga ngalngaluan! Nu sal halawaas ie haruat hunanges? Nu hamines ra marmaris ta ira num tultulai.
PSA 90:14 Hanunuhuan mehet ra malaan ma no num harmarsai nong pa na pataam waing mehet naga inge na gungunuama ma mehet naga laro ta ira numehet bung na nilon bakut.
PSA 90:15 Haguama mehet ta ira bung haruat ma ing u ga hangungut mehet ine, ma haruat mah ma ira tinahon mehet ga nes ira tinirih ine.
PSA 90:16 I tahut bia nu hamines ira num pinapalim tar ta ira num tultulai, ma nu hamines no num minamar ta ira nati diet.
PSA 90:17 Watong, no numehet God, i tahut bia nu kanakana ta mehet. Nu tar ira hunena ira pinapalim na lima mehet. Masa! Nu tar ira hunena ira pinapalim na lima mehet.
PSA 91:1 Sige i la kiskis barahit ta Nong i Naliu Harsakit na sangeh mah narako tano ududuh tano Watong Nong i Dadas Harsakit.
PSA 91:2 Iau ni tange tano Watong, “Augu no nugu subaan na munmun ma no nugu ut na harbalaurai. Augu no nugu God. Iau so no nugu nurnuruan taam.”
PSA 91:3 Tutun saakit, God na halon ugu talur no kuun tano ut na hakhakun ma sukun ira minaset ing i hatahuat minaat.
PSA 91:4 Hoing tiga huna kareka, God na pabong ugu, ma napu ta ira babana nu silihe ra harbalaurai. I la hatutun ing i tange, ma iakano uno tintalen na hanuat hoing ra num bahbahit ma no balo wara balbalaure bat ugu.
PSA 91:5 Pa nu burte tiga linge na ramramin ing na hanuat ra bung, ma bia tiga rumus di lapotanei tano kasakes,
PSA 91:6 ma bia tiga tamat na minaset i hanuat tano kankado, ma bia tiga linge na haragahai ing na halhaliarai tano tingena kasakes.
PSA 91:7 A arip diet na hiruo taar na gengan taam, ma a sangahul na arip diet na hiruo luhutane ugu, iesen iakan ra linge pa na hanuat hutet taam.
PSA 91:8 Nu nas tus mon ma ira iruo mataam no harpidanau ing na hanuat taar ta ira ut na sakena.
PSA 91:9 Ing bia u kilam no Watong Nong i Naliu Harsakit bia, “No nugu subaan na munmun,” ma bia i te hanuat no num katon na barbarahit,
PSA 91:10 io, pataie ta saksakena na kap ugu ma taie mah ta linge na harhagahai na hanuat hutet tano num hala.
PSA 91:11 Kanong warah, God na tule ira uno angelo wara utaam bia diet na balaure ugu ta ira num hinahaan bakut.
PSA 91:12 Diet na palim hatur ugu ma ira lima diet, waing pa nu sage ira kakim ra ula haat.
PSA 91:13 Nu paas bisang ira laion ma ira sui. Nu papaas naliu ta ira tamat na laion ma ira sakana sui.
PSA 91:14 No Watong i tange, “Iau ni halon ie kanong i kalak iau. Iau ni balaure bat ie kanong i nes kilam no hinsagu.
PSA 91:15 Na tataau tupas iau ma iau ni taram ie. Iau ni kis tika mei ta ira tinirih. Iau ni halangalangai ma ni hatamat no hinsana.
PSA 91:16 Iau ni haguama ie kanong ni halawaas no uno nilon. Ma ni hamines no nugu harhalon tana.”
PSA 92:1 Tiga ninge na lotu. A ninge da inge tano Bung na Sinangeh. I bilai wara pirpirlat no Watong ma wara inge garaan no hinsaam, augu Nong u Naliu Harsakit.
PSA 92:2 I bilai wara hinhinawas tano num harmarsai ra malaan. Ma ra bung mah, i bilai wara hinhinawas bia u la hatutun ing u tange.
PSA 92:3 I bilai wara gilgil huo tano kinakel na gita nong a sangahul ira sitiring tana ma no maririsuan na kinakel tano haap.
PSA 92:4 Watong, u hakanakana iau ma ira num gingilaan. Iau inge ma ra gungunuama ta ira pinapalim ta ira limaam.
PSA 92:5 Watong, a tamat saakit ira linge u gil, ira num lilik i manga naliu saakit tunat!
PSA 92:6 No babawaruana tunotuno pa na mintate, ma no ngulo pa na nunure iakan ma i hoken:
PSA 92:7 ira sakana tunotuno diet kubur hut hoing ra huro, ma diet bakut ira ut na sakena diet pai sakaan supi ta linge, iesen nu haliare hatikane at diet.
PSA 92:8 Iesen, augu, Watong, da raun haut ugu hathatika.
PSA 92:9 Watong, tutun saakit bia ira num ebar diet na pataam, ma diet bakut ira ut na gil sakena, nu pasak harbasiane diet.
PSA 92:10 U te hadadas iau hoing tiga rakaia na bulumakau. U te hurange bus iau ma ra wel na gungunuama.
PSA 92:11 Ira airuo matagu te nes ing u bul hasur ira sukagu. Ma ira iruo talingagu te hadade no sunuah ta ira ut na sakena ing diet wara hinarubu ma iau.
PSA 92:12 Ira ut na takodas diet na nunuhuan hoing tiga ina lamaas. Diet na kubur hoing tiga dadas na talona ina daha me Lebanon.
PSA 92:13 Diet hoing ira ina daha di so tar aram tano hala tano Watong. Diet na nunuhuan tano ngasiana no udahat God.
PSA 92:14 Hoing ira ina daha, diet na huai at baak ing bia diet te tuarena um. Diet na nunuhuan ma diet na sigarine at baak.
PSA 92:15 Io kaik, diet na tangtange bia, “No Watong i takodas. Aie no nugu Haatkis, ma taie tiga saksakena tana.”
PSA 93:1 No Watong i kap taman taar ma i sigasigam taar ma ra tamat na minamarine. No Watong i sigasigam taar ma ra tamat na minamarine ma i baan taar ma ra baso. No Watong i te hakisi hadikdikit no ula hanuo, ma pai tale bia na gunagune.
PSA 93:2 U ga hakisi hadikdikit tar no num kinkinis na king nalua saakit. U gabe lon menalua tano haburen ta ira pakana bung.
PSA 93:3 Watong, no tes i te tut, i te raun haut no ingana. Ira pakananoh diet te tut harmuri.
PSA 93:4 No Watong nam naliu i dadas, i dadas saakit tano wawaang ing no tes i suarlup, i dadas saakit tano rarapus na tes.
PSA 93:5 Watong, ira num harkurai i tur dikdikit taar. No num hala i maamar hatika taar ma ira num halhaliana magingin.
PSA 94:1 Watong, augu no God nong i la balbalu ira sakena. God, augu nong u la balbalu ira sakena, hapuasne no num magingin na gil harkurai.
PSA 94:2 Augu no ut na gil harkurai tano ula hanuo, tut hut! Balu pukus ira ut na tangarot haruat ma ira udiet tintalen.
PSA 94:3 Na haruat um hunanges no kanakana audiet ira ut na sakena? Watong, na haruat um hunanges?
PSA 94:4 Diet tange hawaat ira nianga na tangarot. Diet bakut ira ut na gil sakena diet hung ma ra latlaat.
PSA 94:5 Watong, diet paas hasur ira num matanaiabar. Diet ubal ira num tus.
PSA 94:6 Diet ubu bing ira makosa ma ira wasire. Diet bu bing bia ira tintana.
PSA 94:7 Diet tange bia, “No Watong pai la nes tar. No God ta Iakop pai nuang leh.”
PSA 94:8 Muat ira ngulo nalamin ta ira matanaiabar, muat hadoda timaan. Muat ira ba, hunanges um muat na mintot?
PSA 94:9 U lik bia nong ga bul ira talingaam, pai la hadoda? U lik bia nong ga pakile ira mataam, pai la nanaas?
PSA 94:10 U lik bia iakanong i la hapanpador ira kantri, pa na hapidanau ugu? U lik bia iakanong i la hausur tunotuno, pai minonas?
PSA 94:11 No Watong i nunure ira lilik ta ira tunotuno. I nunure tar bia a kumkumine ira udiet lilik.
PSA 94:12 Watong, a haraidaan na kis tano tunotuno nong u hapanpador ie. I daan mah ing u hausur ie ma ira num harkurai.
PSA 94:13 U tar sinangeh tana ta ira uno bung na tinirih, tuk u kil tiga lulur wara gaie diet ira ut na sakena.
PSA 94:14 Kanong warah, no Watong pana le harus ise ira uno matanaiabar. Pai tale tunat bia na tar tihine ta ira uno tus.
PSA 94:15 Ma na hanuat baling bia nong i gil harkurai na papalim ma ra takodasiana magingin, ma diet ing ira kaati diet i gamgamatien diet na mur kaike ra harkurai.
PSA 94:16 Sige na tur laah utagu wara hinarubu ma ira ut na sakena? Sige na tur tano nugu subaan wara hinarubu ma ira ut na gil nironga?
PSA 94:17 Ing bia no Watong pa gor harahut iau, hoken um ma iau gor te noh kunkun taar ra minaat.
PSA 94:18 Ing iau tange bia, “No kakigu i malmalagir,” Watong, no num harmarsai i sukal haut tar iau.
PSA 94:19 Ing bia no nginarau ma ra bunurut i tamat narako tagu, no num harhabalaraan i tar gungunuama tagu.
PSA 94:20 Hohe, I tale bia tiga ut na gil harkurai na tur tika ma ugu ing bia i kure hagahe bia mon ira tunotuno, ma i kap hawaat ra tapunuk ta diet ma ira uno harkurai?
PSA 94:21 Diet tur tika wara hanghagahe ira ut na takodas ma wara timtibe bingbing diet ing diet pai gil ta ronga.
PSA 94:22 Iesen no Watong te hanuat no nugu dadas na katon na munmun, ma no nugu God te hanuat no nugu haatkis nong ni barahit tana.
PSA 94:23 God na balu pukus diet uta ira udiet magingin sakena ma na haliare diet wara gaena ira udiet nironga. No Watong, no udahat God, na haliare diet.
PSA 95:1 Mai, dahat gi inge ma ra gungunuama tano Watong, dahat gi kup ma ra pirhakasing tupas no udahat Haatkis na harhalon.
PSA 95:2 I bilai bia dahat na haan tupas ie ma dahat na tanga tahut saakit uram ho ie, ma dahat na pirlat nabanei ma ra ninge.
PSA 95:3 Kanong warah, no Watong aie no tamat na God, no tamat na King saakit ta ira god bakut.
PSA 95:4 No ula hanuo bakut i kis taar tano limana, hatahun leh ta ira salil tuk ta ira uluno ira uladih auno.
PSA 95:5 Auno no tes, kanong aie nong ga gil ie, ma ira iruo limana ga huul no pise.
PSA 95:6 Mai, dahat gi siantudu ma ra urur wara lotu tupas ie, dahat gi singa bukunkek menalua tano Watong nong ga pakile dahat,
PSA 95:7 kanong aie no udahat God, ma dahat ira matanaiabar ing i la nesnes mur, ira matanaiabar menapu tano uno harbalaurai. Ing bia muat hadade no ingana katin,
PSA 95:8 waak muat hadadas ira bala muat hoing muat ga gil aram Meriba, ma hoing muat ga gil ta iakano ra bung aram Masa tano hanuo bia.
PSA 95:9 Ira hintubu muat diet ga manga walar iau kaia, sukmaal bia diet ga nes ira nugu gingilaan tupas diet.
PSA 95:10 Ga haruat ma ra ihat na sangahul na tinahon iau ga ngalngaluan taar ta kaike ra matanaiabar. Ma iau ga tange bia, “Ira bala diet iakanong ra matanaiabar i la hanhan talur iau, ma diet pai palai tano mangana ngaas iau sip bia diet na mur.”
PSA 95:11 Io kaik, iau ga ngalngaluan, iau gaam hasasalim bia, “Diet pana le tale tunat bia diet na sola tano nugu sinangeh.”
PSA 96:1 Inge tiga sigar ninge tupas no Watong. I tahut bia muat tano ula hanuo bakut, muat na inge tupas no Watong.
PSA 96:2 Inge tupas no Watong, pirlat no hinsana. Hinawas palai tano uno harhalon ta ira kaba bungbung.
PSA 96:3 Tange hapalaine no minamarine nalamin ta ira kantri, ma ira uno tamat na gingilaan na kinarup ing i melmel saakit nalamin ta ira matanaiabar bakut.
PSA 96:4 Kanong warah, no Watong i tamat saakit ma i takodas bia dahat na manga pirlat ie. Da manga rui ta ira god bakut,
PSA 96:5 kanong ira god bakut ta ira mes na kantri, a palimpuo mon diet, iesen no Watong ga pakile no mawe.
PSA 96:6 No Watong i hung ma ra minamar ma no hinsana i tamat, ma kaia ra uno halhaliana katon no Watong i dadas ma i melmel saakit.
PSA 96:7 Muat ira kaba kantri, i bilai bia muat na nes kilam no Watong. Muat na nes kilam no Watong bia auno mon minamar ma bia i dadas.
PSA 96:8 Muat na tar tano Watong ira urur i haruat ma no hinsana. Muat na kap hawaat tiga hartabar ma muat na laka ta ira subaan tano uno tamat na hala na lotu.
PSA 96:9 Muat na lotu tupas no Watong ra matmataan tano uno halhaliana kinkinis nong i manga melmel harsakit. Muat tano ula hanuo bakut, muat na dedar ra matmataan tana.
PSA 96:10 I tahut bia muat na hinawas nalamin ta ira kantri bia, “No Watong i kap taman taar.” No ula hanuo i kis dikdikit taar. Pai tale bia na gunagune. No Watong na kure ira matanaiabar bakut ma ra takodasiana harkurai.
PSA 96:11 I tahut bia no mawe na guama ma no ula hanuo na laro mah. No tes ma ira linge nam tano balana, muat na wawaang.
PSA 96:12 Ira lalong ma ira linge nam narako ta diet, diet na kanakana. Io, ma ira daha tano malit diet na inge um ma ra gungunuama.
PSA 96:13 Diet na inge ra matmataan tano Watong, kanong i wara hinanuat. Na hanuat wara kurkure no ula hanuo. Na kure no ula hanuo ma no takodasiana magingin. Na kure ira matanaiabar bakut ma ra tutun na magingin.
PSA 97:1 No Watong i kap taman taar. I tahut bia no ula hanuo na laro, ma ira haleng na mugurlamin diet na guama.
PSA 97:2 A bahuto ma ra tamat na kankado i kis luhutanei. Auno no dadas wara kurkure ira tunotuno, ma i kure diet ma ra takodasiana magingin.
PSA 97:3 No iaah i la lulua haan tana ma i la tuntun haliare ira ana suk ta ira kaba palpal bakut.
PSA 97:4 No uno hile i bulosare no ula hanuo. No ula hanuo i nes ma i dedar.
PSA 97:5 Ira uladih diet pola hoing ira kadel ra matmataan tano Watong. Aie no Watong tano ula hanuo bakut.
PSA 97:6 No mawe i hinawas palai tano uno takodasiana magingin, ma ira matanaiabar bakut diet nes no minarine.
PSA 97:7 Diet bakut ing diet lotu tupas ma diet latlaat ta ira palimpuo, no Watong i la hahirhir diet. Muat ira god bakut, i tahut bia muat na singa bukunkek menalua tana.
PSA 97:8 Watong, ira matanaiabar ta Saion diet hadade ma diet guama, ma ira tamtaman ta Iudeia diet laro, kanong ta ira num harkurai.
PSA 97:9 Kanong warah, Watong, augu Nong u Naliu Harsakit tano ula hanuo bakut, ma di raun haut ugu naliu ta ira god bakut.
PSA 97:10 Diet ing diet sip no Watong, i tahut bia diet na malentakuane ira sakana magingin. I balaure bat diet ing diet te tar tutun ira udiet nilon tana ma i halon diet mekaia ta ira lima diet ira ut na sakena.
PSA 97:11 No Watong i tar ra madaraas ta diet ira ut na takodas ma ra gungunuama ta diet ing ira kaati diet i gamgamatien.
PSA 97:12 Muat ing muat takodas, i tahut bia muat na guama tano Watong, ma muat na pirlat no halhaliana hinsana.
PSA 98:1 Tiga ninge na lotu. Inge tiga sigar ninge tupas no Watong, kanong i te gil ira tamat na gingilaan na kinarup ing i melmel saakit. No halhaliana kata na limana te hatahuat no uno harhalon.
PSA 98:2 No Watong i te hinawas palai tano uno harhalon, ma i te hapuasne no uno takodasiana magingin taar ta ira hunhuntunaan ta ira mes na hanuo.
PSA 98:3 God i te lik leh no uno kunubus bia na tar harmarsai ta ira Israel, ma bia na hatutun ing ga tange ta diet. Ira katon bakut tano ula hanuo diet te nes no harhalon tano udahat God.
PSA 98:4 Muat tano ula hanuo bakut, muat na kup ma ra gungunuama tupas no Watong. Muat na inge hatamat ira ninge na pirhakasing.
PSA 98:5 Ting no haap uram hono Watong. Pirlat ie ma no haap ma ra kinkel na ninge.
PSA 98:6 Hus ira tulaal ma ra tahur. Kup ma ra gungunuama tupas no Watong, no King.
PSA 98:7 I tahut bia no tes na wawaang, ma ira linge mah kenam narako tana, no ula hanuo mah, ma ira linge ing diet lon narako tana.
PSA 98:8 I tahut bia ira taah diet na pasapasar, ma ira uladih diet na inge tika ma ra gungunuama.
PSA 98:9 Diet na inge ra matmataan tano Watong, kanong i te hutet bia na hanuat wara kurkure no ula hanuo. Auno no dadas wara kurkure no ula hanuo, ma na harkurai ma ra takodasiana magingin. Na bul ira takodasiana harkurai wara gaie ira matanaiabar bakut.
PSA 99:1 No Watong i kap taman taar. I tahut bia ira kantri diet na dedar. I la kis taar tano uno kinkinis na king nalamin ta ira iruo kerubim. I tahut bia no ula hanuo na ninir.
PSA 99:2 No Watong, a tamat ie aram Saion, ma di raun haut ie naliu ta ira kantri bakut.
PSA 99:3 I tahut bia diet na pirlat ma diet na ru no tamat na hinsaam. God a halhalianai.
PSA 99:4 A tamat ira dadas tano King, ma i la sipsip ira takodasiana magingin. U te hakisi ira harkurai ing i takodas wara gaie ira matanaiabar bakut. U te gil ira linge i bilai ma i takodas kai Israel.
PSA 99:5 I tahut bia muat na raun no Watong, no udahat God, ma muat na siantudu kaia ra pinpaas na kakine. God a halhalianai.
PSA 99:6 Moses ma Aaron dir airuo ut na pakila lotu nalamin ta ira uno mes na ut na pakila lotu, ma Samuel tikai ta diet ing diet git tataau tupas ie. Dal git tataau uram hono Watong ma git balbalu dal.
PSA 99:7 Ga ianga suur meram narako tano bahuto. Ira Israel diet ga mur ira uno harkurai ma ira uno hartula ing ga tar ta diet.
PSA 99:8 Watong, no numehet God, u git balbalu diet. U ga hamines ta diet bia augu no God nong i la liklik luban ira udiet sakena, iesen bia u ga hapidanau mah diet ing diet ga pakile ira nironga.
PSA 99:9 Da raun no Watong no udahat God ma da lotu kaia hono uno halhaliana uladih, kanong no Watong, no udahat God, a halhalianai.
PSA 100:1 Tiga ninge na lotu wara tangtange tahut tupas God. Muat tano ula hanuo bakut, i tahut bia muat na inge ma ra gungunuama tupas no Watong.
PSA 100:2 Muat na lotu tupas no Watong ma ra larlaro. Muat na haan tupas ie ma ra ninge na gungunuama.
PSA 100:3 I tahut bia muat na nunure kilam bia no Watong at, aie no God. Aie nong ga pakile dahat, ma auno dahat. Auno matanaiabar dahat, ira sipsip ing i la balbalaure.
PSA 100:4 I tahut bia muat na laka ta ira matanangaas tano uno hala na lotu ma ra magingin na tanga tahut, ma muat na sola tano uno hanuo na lotu ma ra pirharlat. Muat na tanga tahut saakit tana ma muat na pirlat no hinsana.
PSA 100:5 Kanong warah, no Watong i bilai ma no uno harmarsai i kis hathatika. I la hatutun ing i tange, ma iakan ra magingin na tur hathatika ta ira tunotuno ing diet lon katin ma namur mah.
PSA 101:1 Devit ga pit iakan ra ninge na lotu. Iau ni inge garaan no num harmarsai ma no num dadas wara gil harkurai ma ra takodasiana tintalen. Watong, iau ni inga ninge na pirharlat tupas ugu.
PSA 101:2 Iau ni harbalaurai timaan wara murmur tiga mangana lon bia taie tikai pa na tale bia na tung soot iau tana. Hunanges nu haan tupas iau? Iau ni mur a mangana lon aram tano nugu hala mah bia taie tikai pa na tale bia na tung soot iau tana.
PSA 101:3 Iau pa ni hok leh tiga sakana tintalen ukai ho iau. Iau malentakuane ira tintalen ta diet ing diet haan talur ugu. Iau pa ni patep ta diet.
PSA 101:4 Ira tunotuno ing diet siel laah tano num ngaas, diet na tapaka tagu. Iau ni tur talur ira sakana tintalen.
PSA 101:5 Iau ni sakbat nong i tangtange kuman ira bis na nianga wara haliare nong i la kis harue tar ie. Iau pai tale bia ni hok tar tikai ing i tangarot ma i nes hatamat ie.
PSA 101:6 Iau ni nes mur diet akai Israel ing diet tar tutun ira udiet nilon taam, diet naga lon tika ma iau. Nong i mur tiga mangana lon bia taie tikai pa na tale bia na tung soot ie tana, iau ni bale leh ie bia na harahut iau.
PSA 101:7 Taie tiga ut na habato lamus tunotuno na lon tano nugu hala. Taie tiga ut na harabota na tur ra matmataan tagu.
PSA 101:8 Ta ira kaba malaan iau ni hapataam ira ut na sakena akai Israel. Iau ni tule ise ira ut na gil sakena meram tano pise na hala tano Watong.
PSA 102:1 Tiga sinasaring ta tiga tunotuno a tinirih i ubal ie. I maalum ira tamaine ma i suah uram tano Watong uta ira uno purpuruan. Watong, taram ira nugu sinasaring. Haut leh no nugu sunuah wara gaena harharahut bia na haan tupas ugu.
PSA 102:2 Waak u suhsuhe no matmataan taam tagu tano pakana bung bia iau kis taar ra tinirih. Sa talingaam ukai ho iau. Tano pakana bung iau tataau, taram hagasiaan iau.
PSA 102:3 Ira bungugu i patpataam bia hoing ra mis. Ira surugu i iaiaan hoing ira lakit na iaah.
PSA 102:4 Di te papasuane no nugu lon ma i te mahiawa hoing ra huro. Iau luban um bia ni ien ira agu nian.
PSA 102:5 Iau kinkin ma no tinirih ma iau suah. Iau te sur sen um.
PSA 102:6 Iau ngan hoing tiga kurkur ma ra hanuo bia, hoing tiga kurkur aram ra mahol na taman.
PSA 102:7 Iau noh taar ma iau pai kubaba. Iau te ngan hoing tiga maan aie sen i kis taar naliu tiga ula hala.
PSA 102:8 Tano kidilona bung bakut, ira nugu ebar diet mang iau. Diet ing diet kukutur tagu, diet kilam no hinsagu wara timtibe haliare ira mes.
PSA 102:9 Iau ien tahuna iaah hoing ra agu nian, ma iau mame ira agu taah tika ma ra luur na matagu,
PSA 102:10 kanong tano num tamat na ngalngaluan. Hokaiken um, u te kap haut iau ma u te gulumane se iau.
PSA 102:11 Ira bungugu i panim gasien hoing ira ududuh na melsur. Iau mahiawa hanahaan hoing ira huro.
PSA 102:12 Iesen augu, Watong, no num kinkinis na harkurai pana le pataam. Ira bulumur ing diet na lon namur, diet na lik kawase tar no hinhinawas utaam.
PSA 102:13 Nu tut hut ma nu marse no pise na hala Saion, kanong a pakana bung wara hamines no balaam tana. No bung u ga pilak hanalue tar i te hanuat.
PSA 102:14 Kanong warah, ira num tultulai diet manga kalak ira haat ta ira uno balo. Ma ira kut na haat ta ira balo i tamadure taar, i hatatik ira bala diet bia na marmaris.
PSA 102:15 Ira kantri diet na urur tano hinsana no Watong, ma ira tamat na ut na gil harkurai bakut diet na ru no minamarim,
PSA 102:16 kanong no Watong na hatut habaling ira balo ta Saion ma na harapuasa ma ira minamarine.
PSA 102:17 Na taram ira maris, ma pa na malok se ira udiet sinasaring.
PSA 102:18 I tahut bia da pakat kaiken ra nianga ta ira bulumur ing pa di kaha baak diet, bia diet ing diet pai tahuat baak diet na pirlat no Watong.
PSA 102:19 Da hinawase diet bia no Watong ga nanaas suur meram tano uno halhaliana katon. Meram ra mawe ga nes bakut tar no ula hanuo,
PSA 102:20 wara hadade ira kunup na ngunngutaan ta diet ing diet ga kis taar ra hala na harpidanau, ma wara palpalas ise diet ing di ga tibe bingbing tar diet wara minaat.
PSA 102:21 Io, da hinawas palai tano hinsana no Watong ram Saion ma da pirlat ie aram Ierusalem
PSA 102:22 ing ira matanaiabar ma ira kingdom diet na kis hurlungai wara lotu tupas no Watong.
PSA 102:23 Ing a sigar tunotuno baak iau, no Watong i hapataam no nugu dadas. I puo hakumkum no nugu nilon.
PSA 102:24 Io huo, iau tange bia, “Nugu God, waak baak u kutus kotne no nugu nilon. U lon hathatika.
PSA 102:25 Mekaia tano hamhaburen u ga hakisi no ula hanuo, ma u ga gil no mawe ma ira limaam tus.
PSA 102:26 No mawe ma no ula hanuo dir na panim iesen u kis taar at. Dir na tutuarain ho ira maal. Nu kios dir hoing da kios ise ira lawalawa, ma da se dir.
PSA 102:27 Ma sen bia augu, pau la kikios ma no num nilon pa na pataam.
PSA 102:28 Ira nati mehet ira num tultulai diet na lon ra matmataan taam, ma ira nudiet bulumur diet na barahit taam.
PSA 103:1 Devit ga pit iakan ra ninge. I tahut bia iau ni pirlat no Watong ma no nugu kidilona nilon. Ma i bilai bia iau ni pirlat no halhaliana hinsana ma no balagu bakut mah.
PSA 103:2 I tahut bia iau ni pirlat no Watong ma no nugu kidilona nilon, ma iau ni lik kawase ira uno haraidaan bakut.
PSA 103:3 Aie nong i la liklik luban se ira num magingin sakena bakut ma i la halangalanga ugu ta ira num minaset bakut.
PSA 103:4 Aie nong i kul pukus leh no num lon bia kabu haan taar tano minaat ma i haidane ugu ma no uno harmarsai ma i manga kalak ugu.
PSA 103:5 Aie nong i banot ira num masmasingan ma ira bilai na linge, kaik nugu hanuat baling hoing tiga marawaan ma nugu dadas hoing tiga malaba.
PSA 103:6 No Watong auno no dadas wara bul ira takodasiana harkurai wara harharahut ira tunotuno ing di ubal diet.
PSA 103:7 Ga hapuasne tar ira uno tintalen taar ta Moses, ma ira uno gingilaan taar ta ira matanaiabar me Israel.
PSA 103:8 No Watong i tar bia mon no uno harmarsai, i matien wara ngalngaluan, ma i hung ma tiga mangana harmarsai nong pana le pataam.
PSA 103:9 Pai tale bia na hartutung hait, ma pai tale bia na lik hatikane tar no uno ngalngaluan.
PSA 103:10 Pai la hapidanau het haruat ma ira nuhet magingin sakena ma pai balu pukus het haruat ma ira numehet sakana tintalen.
PSA 103:11 Kanong warah, hoing no mawe i naliu saakit tano pise, no uno harmarsai i manga tamat mah taar ta diet ing diet ru ie.
PSA 103:12 Hoing i tapaka merau hono kasakes i la tutut hut mekaia ukai hono kasakes i la sungsuguh kaia, io huo, i kap ise ira nudahat magingin sakena tapaka saakit talur dahat.
PSA 103:13 Hoing tiga tata i la marmarse ira natine, huo mah no Watong i la marmarse diet ing diet ru ie,
PSA 103:14 kanong i nunure tar ing dahat ga tahuat huo, ma i lik leh bia a kaabus mon dahat.
PSA 103:15 Ma dahat ira tunotuno, ira udahat bung na nilon i haruat ma ra huro. Dahat kubur nunuhuan hoing tiga purpur.
PSA 103:16 Iesen no dadaip i puuh isei, ma no katon nong ga kubur kaia pai nes habalin um ie.
PSA 103:17 Iesen no harmarsai tano Watong tupas diet ing diet ru ie i kis hathatikai, ma ira uno takodasiana magingin i kis hatika taar ta ira udiet bulumur.
PSA 103:18 I kis hatika taar ta diet ing diet mur no uno kunubus, diet at ing diet lik kawase tar ira uno hartula ma diet gil haruatne.
PSA 103:19 No Watong i te hakisi no uno kinkinis na king aram ra mawe, ma no ula hanuo bakut i kis menapu tano uno harkurai.
PSA 103:20 Muat ira uno angelo, i tahut bia muat na pirlat no Watong, muat at ira ut na baso ing muat gil haruatne ira uno nianga ma muat la murmur asa ing i tange.
PSA 103:21 Muat bakut ira uno umri kenam ra mawe, muat na pirlat no Watong, muat at ira uno tultulai ing muat la gilgil haruatne ira uno sinisip.
PSA 103:22 I bilai bia ira uno pakpakilai bakut ta ira kaba katon bakut tano uno harbalaurai, diet na pirlat no Watong. I tahut bia iau ni pirlat no Watong ma no nugu kidilona nilon.
PSA 104:1 I tahut bia iau ni pirlat no Watong ma no nugu kidilona nilon. Watong, no nugu God, u manga tamat saakit. U sigasigam taar ma ira mangana minamarim.
PSA 104:2 I la sulu taar ma ra lulungo hoing no uno maal. I sarat palase no mawe hoing tikai i se hakukuh tiga palpalih ma tiga sel.
PSA 104:3 Ma i salur ira kip tano uno hala ta ira bahuto na bata aram ra mawe. I gil ira bahuto haruat ma no uno karis, ma i kis kora tano dadaip ma no dadaip i kap hawaat ie hoing bia a mon babana.
PSA 104:4 I gil ira dadaip ma diet hanuat auno ut na kap nianga, ma ira karamena iaah auno tultulai.
PSA 104:5 Ga hakisi no ula hanuo tano burena iat. Pai tale tunat bia da riu ie.
PSA 104:6 U ga pulus no ula hanuo ma ra lamlamana tes hoing ra maal, ma no tes ga kasar bakut ira uladih.
PSA 104:7 Iesen ing u ga boor no tes, ga hilau laah. Ing no tes ga hadade no num parparara, ga saal habir laah.
PSA 104:8 Ga saal bus ira uladih, ma ga saal suur ta ira salil ukatiga ta ira katon u gate bul tar wara uno.
PSA 104:9 U ga bul no wasasar ma pai tale bia no tes na balos ie, ma pai tale bia no tes na kasar bakut habaling no ula hanuo.
PSA 104:10 I tule ira taah i saal suur mekaia ta ira puat ukaia ta ira salil. Ira taah i saal nalamin ta ira uladih.
PSA 104:11 Ira puat i tar taah ta ira rakaia na wawaguai bakut tano pitoka. Ira rakaia na donki diet mom ma diet pai maruk baling.
PSA 104:12 Ira maan tano hur mauho diet gil ira posi diet hutet ta ira taah, ma diet inge naliu ta ira katena daha.
PSA 104:13 I la kapkapal ira uladih ma ra taah meram naliu tano uno hala, ma no ula hanuo i hung ma ira hunena ira uno pinapalim.
PSA 104:14 I gil ira huro bia na kubur wara adiet ira bulumakau, ma i gil ira nian na saso ma ira pat na daha waing ira tunotuno diet naga so wara hatahuat ta nian tano ula pise
PSA 104:15 ma ira wain mah nong i haguama ira udiet nilon, ma ira wel mah nong i hanunuhuan ira udiet matmataan, ma ira beret mah nong i tar dadas ta ira udiet nilon.
PSA 104:16 Ira ina daha tano Watong, diet mame ra tamat na taah, kaike ra tamat na ina daha saakit me Lebanon ing ga so.
PSA 104:17 Ira maan diet gil ira posi diet kaia, ma ira pos na kau mah kenam naliu ra talona ina daha.
PSA 104:18 Ira tamat na uladih audiet taman ira rakaia na me, ma ira tamat na haat a taman na munmun udiet ira kanga.
PSA 104:19 No hintagolapit a hakilang ie tiga sigar teka, ma no kasakes i nunure bia hunanges na suguh.
PSA 104:20 U tule hawaat no kankado gi hanuat bung, ma ira wawaguai meram ra malit diet lul.
PSA 104:21 Ira laion diet ngangar wara adiet tari, ma diet sisilih ta ira adiet nian meram ho God.
PSA 104:22 No kasakes i pupuruk ma diet haan tapukus wara ninahon matien ta ira udiet matana haat.
PSA 104:23 Io, ira tunotuno diet haan taar um ta ira udiet pinapalim, ma diet pai sangeh tuk gi matarahien.
PSA 104:24 Watong, u te gil ira haleng na mangana linge saakit! U ga gil diet bakut ma no num minminonas. No ula hanuo i hung ma ira num hakhakisi.
PSA 104:25 No tes i manga tamat ma i kangkonga, ma i hung ma ira hakhakisi ing pai tale bia da was diet, kaike ira lilona linge, ira tamat ma ira hansik mah.
PSA 104:26 Kaia ira sip i hilau urau ma ures, ma ira tamat na kirip saakit mah ing u ga gil diet wara minamagu kaia.
PSA 104:27 Kaiken bakut diet nahnahe ugu bia nu tabar diet ma ira adiet nian haruat ma ira udiet sunupi.
PSA 104:28 Ing u tabar diet, diet kap leh. Ing u papos no limaam, diet hahos ta ira bilai na nian bakut.
PSA 104:29 Ing u suhe no num matmataan, diet ramramin. Ing u kap se no mansungu diet, diet maat ma diet hanuat kaabus baling.
PSA 104:30 Bia ing u tule no Tanuaam, i hatahuat diet, ma u hasigarine no ninaas tano ula hanuo.
PSA 104:31 I bilai bia no minamarine no Watong na kis hathatika. Ma i bilai mah bia no Watong na guama ta ira uno pinapalim.
PSA 104:32 Aie nong i nes no ula hanuo ma no ula hanuo i dedar. Ma aie mah nong i sigire ira uladih, ma a mis i tut.
PSA 104:33 Iau ni inginge uram tano Watong ta ira bung tano nugu nilon bakut. Iau ni inginge na pirharlat uram tano nugu God ta ira kaba bungbung ing iau lon taar at baak.
PSA 104:34 Iau sip bia no nugu ninge na haguamai. Iau at, iau ni laro tano Watong.
PSA 104:35 Iesen i bilai bia ira ut na sakena diet na panim laah tano ula hanuo, ma na taie baling ta ut na gil nironga. I tahut bia iau ni pirlat no Watong ma no nugu kidilona nilon. Pirlat no Watong.
PSA 105:1 I tahut bia muat na tanga tahut tano Watong. Tataau no hinsana. Hapalaine ta ira kaba kantri ira uno pinapalim.
PSA 105:2 Inge uram ho ie, inge na pirharlat uram ho ie. Hinawas palai ta ira uno tamat na melmel na gingilaan na kinarup.
PSA 105:3 Lat no halhaliana hinsana. I bilai bia ira bala diet ing diet silsilihe no Watong na guama.
PSA 105:4 Nanaas tano Watong ma no uno dadas. Sisilih tano Watong ta ira pakana bung bakut.
PSA 105:5 Muat ira hintubune Abaram, no uno tultulai, muat ira bulumur tane Iakop ing no Watong gate gilamis, i tahut bia muat na lik leh ira uno tamat na melmel na gingilaan na kinarup ma ira dadas na pinapalim na kinarup ing ga gil, ma ira harkurai mah ing ga bul tar.
PSA 105:7 Aie no Watong, no nudahat God. Ira uno harkurai a kanik tano ula hanuo bakut.
PSA 105:8 I lik kawase tar no uno kunubus hathatika. Iakano nianga nong ga tar ie na kis wara gaie diet ira bulumur ing diet na lon baak ta haleng na arip na tinahon namur.
PSA 105:9 I lik tar iakano kunubus nong ga gil ie ma Abaram, iakano nianga nong ga gil mah ie ta Aisak tika ma no uno sinsalim.
PSA 105:10 Ga hadadas ie ukatiga hone Iakop hoing tiga harkurai. Ga gil ie tika ma Israel hoing tiga kunubus nong pa na pataam,
PSA 105:11 gaam tange bia, “Iau ni tar no pise Kenan taam, ma ira num bulumur diet na tinanei.”
PSA 105:12 Ing diet pa ga haleng, ma a bar nong mon diet ma ra wasire diet narakoman tano taman Kenan,
PSA 105:13 diet ga haan hurbit nalamin ta ira mes na hunhuntunaan, ma diet ga haan mekaia tiga kingdom ukatiga tiga mes.
PSA 105:14 No Watong pa ga bale leh tiga huntunaan bia na paas hasur diet, ma ga boor ira king wara gaie diet, gaam tange bia,
PSA 105:15 “Waak muat ra singsigire ira nugu matanaiabar ing iau ga pilak diet, ma waak muat hagahe ira nugu tangesoot.”
PSA 105:16 No Watong ga tar ra tamat na taburungan tano pise, ma ira adiet nian bakut ga pataam.
PSA 105:17 Iesen ga tule hanalue tiga tunotuno urau Isip, ne Iosep, nong di ga suhurane hoing tiga tultulai.
PSA 105:18 Ga ngungut ira kakine ing di ga kubus kawase, ma diet ga kuta sen tano kadonana,
PSA 105:19 tuk taar bia ira linge ing ga hinawas nalua urie ga hanuat tutun. Ing no nianga tano Watong ga hanuat tutun, ga hamines bia Iosep pai la harabota.
PSA 105:20 No king me Isip ga hartula ma di ga palas isei. Aie nong i kure bakut ira matanaiabar kaia ga halangalanga sei.
PSA 105:21 No king ga bul ie bia na balaure no ngasiana, ma ga kure bakut no hanuo tano king.
PSA 105:22 Ga tar mah no dadas tana bia na pir ira uno ut na harkurai haruat ma no uno sinisip ma bia na hausur ira uno tamat na tultulai ma ra mintota.
PSA 105:23 Namur ne Israel ga haan laka Isip. Iakop ga lon hoing tiga wasire kaia ra taman ta Haam.
PSA 105:24 No Watong ga manga hapuar ira uno matanaiabar. Ga gil diet bia diet ga haleng saakit, kaik ira udiet ebar diet pa ga tale wara papaas hasur diet.
PSA 105:25 Ga hurusane ira bala diet ira Isip wara malentakuane se ira uno matanaiabar, ma wara harpingit kumaan pane ira uno tultulai.
PSA 105:26 Ga tule Moses, no uno tultulai, ma ne Aaron mah nong gate gilamis ie.
PSA 105:27 Dir ga gil ra dadas na hakilang nalamin ta ira Isip. Dir ga pakile ira tamat na gingilaan na kinarup kaia ra taman ta Haam.
PSA 105:28 Ga tule no kankado, gaam kasar bakut no taman, kanong diet pa ga taram ira uno nianga.
PSA 105:29 Ga pukusane ira udiet taah gaam hanuat hoing ra de, ma ga huni bing ira udiet kirip.
PSA 105:30 No udiet taman ga hung ma ra rokrok, ma diet ga karuas hut uram ta ira suuh na ninahon ta ira udiet ut na gil harkurai.
PSA 105:31 Ga ianga ma haleng na langa saakit ga hanuat, ma ra nolnol mah ga hung tano hanuo bakut.
PSA 105:32 Ga pukusane no bata, gom hanuat hoing ra haat na ais, gaam puko tano hanuo bakut tika ma ra hile.
PSA 105:33 Ga haliare ira hinau na wain ma ira ina papus, ma ga lagas ira daha tano udiet hanuo.
PSA 105:34 Ga ianga, ma ra kubawa ma ra ko diet ga hanuat, ma pai ga tale bia da was diet.
PSA 105:35 Diet ga ien ira linge ing ga nunuhuan taar ta ira udiet lalong, ma diet ga ien bakut ira udiet sinaso tano pise.
PSA 105:36 Namur ga bu bing bakut ira matana bulu na tunaan tano udiet taman, kaike ra luena bulu ing ira adiet sus ga manga kalak diet.
PSA 105:37 Ga lamus hasur ira Israel merau Isip, ma diet ga kap haleng siliwa ma ra gol, ma ta ira udiet hunhuntunaan bakut taie ta tiga huntunaan ga puko laah.
PSA 105:38 Ira Isip diet ga manga guama ing diet ga haan laah, kanong warah no tamat na bunurut uta ira Israel gate sigam diet.
PSA 105:39 God ga palase tiga bahuto wara kaskasar ira uno matanaiabar ma tiga iaah wara bulbulo sare diet ra bung.
PSA 105:40 Diet ga sasaring, ma ga tule hawaat ira namnamien na maan wara adiet, ma ga tabar hahos diet ma ra beret maram ra mawe.
PSA 105:41 Ga papos no haat ma ra taah ga bureng suur. Ga saal hoing tiga taah tano mamasina hanuo.
PSA 105:42 Kanong warah, God ga lik tar no uno halhaliana kunubus nong ga tar ie ta Abaram, no uno tultulai.
PSA 105:43 Ga lamus hasur ira uno matanaiabar ma ra gungunuama. Diet ing gate gilamis diet, ma diet ga hansur ma ra kunup na kanakana.
PSA 105:44 Ga tabar diet ma ira pise audiet ira mes na huntunaan, waing diet na rumahaal ta ira linge ing ira mes diet gate mangason pane,
PSA 105:45 waing diet naga taram ira uno hartula ma diet naga mur ira uno harkurai. Pirlat no Watong.
PSA 106:1 Pirlat no Watong Tanga tahut tano Watong, kanong a bilai ie. No uno harmarsai i kis hathatika.
PSA 106:2 Sige i tale bia na hinawas ta ira dadas na pinapalim tano Watong, bia i tale bia na tar ira pirharlat bakut ing i takodas bia da pirlat ie me?
PSA 106:3 A haraidaan na kis ta diet ing diet mur ira takodasiana harkurai, diet ing diet la gilgil haitne ira takodasiana magingin.
PSA 106:4 Watong, lik leh iau ing nu harahut ira num matanaiabar. Mai, nu taho mah iau ing u halon diet huo,
PSA 106:5 waing iau nigi nes ira bilai na kinkinis audiet ing u gate gilamis diet, ma waing iau nigi guama mah tika ma no num huntunaan ma nigi kis tika ma ira num tus wara pirpirlat ugu.
PSA 106:6 Mehet gate gil magingin sakena hoing ira hintubu mehet diet ga gil. Mehet gate gil nironga ma mehet ga tatalen sakasaka.
PSA 106:7 Ing ira hintubu mehet diet ga kis taar Isip, diet pa ga lik mur ira num dadas na pinapalim na kinarup. Diet pa ga lik kawase ira num tamat na harmarsai ing u ga hamhamines ta diet, ma diet ga patnau taam kaia tano Dardarana Tes.
PSA 106:8 Iesen no Watong ga halon diet wara gaiena no hinsana, waing naga hamines hapalaine no uno tamat na dadas.
PSA 106:9 Ga boor no Dardarana Tes ma ga mamasa. Ga lue diet nalamin ta ira iruo palpal na tes hoing bia tiga mamasina hanuo ie.
PSA 106:10 Ga halon leh diet sukun ira lima diet ing diet ga malentakuane diet. Ga halangalanga pukus leh diet sukun ira lima diet ira nudiet ebar.
PSA 106:11 No tes ga kasar ira nudiet ebar ma pa ga waak tar tikai ta diet bia na lon.
PSA 106:12 Io, diet ga nurnur um ta ira uno kunubus ma diet ga inge ira ninge na pirharlat tupas ie.
PSA 106:13 Iesen diet ga luban hagasiaan ira linge ing gate pakile ma diet pa ga nanaho wara utano uno bilai na lilik na harharahut.
PSA 106:14 Aram ra hanuo bia diet ga ngurungur wara adiet ta nian ma diet ga walar God kaia.
PSA 106:15 Kaik, ga tabar diet ma ira linge ing diet ga saring, iesen ga tule tiga sakana minaset ukaia ho diet.
PSA 106:16 Tano subaan diet ga sangeh taar tana, diet ga bala ngungut taar ta Moses ma Aaron mah, no halhaliana tultulai tano Watong.
PSA 106:17 No pise ga tamapapos ma ga kanam ne Datan ma ga bus no kabaan tane Abiram.
PSA 106:18 Tiga iaah ga lulungo nalamin ta diet ing diet ga murmur dir. No karamena iaah ga ien ira ut na gil sakena.
PSA 106:19 Kaia hono uladih Sinai diet ga gil puan tiga palimpuo hoing tiga sigar bulumakau, ma diet ga lotu tupas no palimpuo di ga pakilei ma ra gol.
PSA 106:20 No udiet God nong a tamat na minamarine, diet ga kios ie ma tiga palimpuo tiga tumatena bulumakau nong i la ienien huro.
PSA 106:21 Diet ga lik luban no God nong ga halon diet, aie nong gate gil ira tamat na linge saakit arau Isip.
PSA 106:22 Diet ga lik luban ira uno dadas na pinapalim na kinarup kaia tano pise ta Haam ma ira gingilaan ing pai a malmaliana kaia tano Dardarana Tes.
PSA 106:23 Io, God ga tange bia na haliare diet. Iesen Moses, nong God gate gilamis leh ie, ga tur nalamin ta ira matanaiabar ma God wara turtur bat no uno tamat na ngalngaluan bia pa naga haliare diet.
PSA 106:24 Io, diet ga miliguruane no bilai na pise. Diet pa ga nurnur tano uno kunubus.
PSA 106:25 Diet ga ngurungur narako ta ira nudiet palpalih ma diet pa ga mur ira nianga tano Watong.
PSA 106:26 Kaik, gaam hasasalim taar ta diet bia na bu bing diet kaia tano hanuo bia,
PSA 106:27 ma na bu bing ira udiet bulumur kaia ta ira taman ta ira mes na kantri ma na tule harbasiane diet nalamin ta ira hanuo tapaka.
PSA 106:28 Diet ga mur ira mes wara lalotu tupas Baal nong me Peor ma diet ga ien ira hartabar di ga tus tar ta ira minaat na god.
PSA 106:29 Diet ga hangalngaluan God ma kaike ra udiet sakana magingin, ma tiga hinangul ga hanuat nalamin ta diet.
PSA 106:30 Iesen Pinias ga tur naliu ma ga tur bat no udiet sakana magingin, ma no hinangul ga marur.
PSA 106:31 Ma God ga was leh iakano linge nong Pinias ga gil ie hoing i haruat bia Pinias i takodas ra matmataan tana, gaam tange bia iakan ra nesnes kilam na kis hathatika taar wara gaiena ira uno bulumur namur.
PSA 106:32 Diet ga gil hangalngaluan God aram ra taah Meriba, kaik a tinirih ga haan tupas Moses.
PSA 106:33 Diet ga patnau tano Tanuo tane God, ma a nianga na singsingit ga hansur tano hane Moses.
PSA 106:34 Diet pa ga haliare ira mes na hunhuntunaan hoing God ga tule diet bia diet na gil,
PSA 106:35 iesen diet ga goota tika ma kaike ra hunhuntunaan ta ira mes na hanuo, ma diet ga kap leh ira udiet tintalen.
PSA 106:36 Diet ga lotu tupas ira udiet palimpuo, ma kaike ra palimpuo ga hakuni diet.
PSA 106:37 Diet ga hartabar ma ira nati diet tunaan ma ira nat na hi diet taar ta ira sakana tanuo.
PSA 106:38 Ira nati diet pa ga gil ta sakena, iesen diet ga kut bing diet ma ira de diet ga saal. Ma diet ga tabar se ira palimpuo me Kenan ma diet, ma ira de diet ga habilinge no pise ra matmataan ta God.
PSA 106:39 Diet ga habilinge habalin at diet ma ira linge diet ga pakile. Ira udiet tintalen ga haruat ma ira hilawa ing diet ga lotu tupas ira palimpuo huo.
PSA 106:40 Io kaik, God ga ngalngaluan taar ta ira uno matanaiabar ma ga malentakuane ira uno tus.
PSA 106:41 Ga tar se diet taar ta ira lima diet ira hunhuntunaan ta ira mes na hanuo ma ira adiet suk ga kure diet.
PSA 106:42 Ira udiet ebar ga helar ta diet ma diet ga paas hasur mah diet.
PSA 106:43 Haleng pakaan no Watong ga halon diet sukun ira udiet ebar, iesen diet ga patnau taar at ma diet ga hiruaan pane ira udiet magingin sakena.
PSA 106:44 Iesen ga nas tar ira udiet tinirih ma ga hadade ira udiet sunuah.
PSA 106:45 Ga lik leh no uno kunubus wara gaie diet, ma ga mahu no balana murmur no uno tamat na harmarsai.
PSA 106:46 Ga gil ira tunotuno ing diet ga palim kawase tar diet bia diet na marse diet.
PSA 106:47 Watong, no numehet God, halon pukus mehet, ma nu lam hulhulungan habalin mehet sukun ira mes na kantri, waing het naga tanga tahut uram hono halhaliana hinsaam ma het naga lat ugu ma ira numehet pirharlat tupas ugu.
PSA 106:48 A pirhakasing tupas no Watong, no God ta Israel, mekatiga laah menalua tano hamhaburen tano ula hanuo tuk taar tano hauhawatine ma pana le pataam. I bilai bia ira matanaiabar bakut diet na tange, “Amen!” Pirlat no Watong.
PSA 107:1 Tanga tahut tano Watong, kanong a bilai ie. No uno harmarsai i kis hathatika.
PSA 107:2 I tahut bia diet ing no Watong gate kul halangalanga leh diet, diet na tange huo. Ma diet ing ga kul halangalanga leh diet sukun no limana ira udiet ebar, diet na tange mah huo,
PSA 107:3 ma diet mah ing ga lamus hulungan diet mekaia ta ira kaba pise, mekaia hono katon ing no kasakes i la tutut hut kaia, ma mekaia i la sungsuguh, ma ira katon na pise merau ma ira katon na pise meras.
PSA 107:4 Ari ta diet ga rara narako tano mamasina hanuo bia. Diet pa ga nes leh ta ngaas ukaia tiga pise na hala bia diet gor kis kaia.
PSA 107:5 Diet ga taburungan ma diet ga maruk, ma diet ga wara minaat tunat.
PSA 107:6 Io, diet ga suah taar tano Watong ma ira udiet tinirih, ma ga halon diet sukun ira udiet ngunngutaan.
PSA 107:7 Ga lamus diet tiga takodasiana ngaas ukaia tiga pise na hala bia diet gor kis kaia.
PSA 107:8 I bilai bia diet na tanga tahut tupas no Watong utano uno harmarsai nong pai la patpataam ma uta ira uno tamat na melmel na gingilaan na kinarup mah wara gaiena ira tunotuno,
PSA 107:9 kanong i la hamamo diet ing diet maruk, ma diet ing diet taburungan, i la tamtabar hahos diet ma ra bilai na linge.
PSA 107:10 Ari diet ga kis taar narako ra kankado nong i haruat ma no kankado na minaat, diet at ing diet ga kis narako ra hala na harpidanau ma diet ga kilingane ra ngunngutaan ta ira sen di ga kubus kawase diet me,
PSA 107:11 kanong diet gate patnau tar ta ira nianga ta God ma diet gate taklain tano nianga na harpir auno Nong i Naliu Harsakit.
PSA 107:12 Io, ga hapanpador diet ma ra dadas na pinapalim ing ga manga ubal diet. Diet ga puko ma taie tikai bia na harahut diet.
PSA 107:13 Io, diet ga suah taar tano Watong ma ira udiet tinirih, ma ga halon leh diet sukun ira udiet ngunngutaan.
PSA 107:14 Ga kap hasur diet tano kankado nong i haruat ma no kankado na minaat ma ga rapat ise tar ira sen di ga kubus kawase diet me.
PSA 107:15 I bilai bia diet na tanga tahut tupas no Watong utano uno harmarsai nong pai la patpataam ma uta ira uno tamat na melmel na gingilaan na kinarup mah wara gaiena ira tunotuno,
PSA 107:16 kanong i la parparok hasur ira matanangaas na baras ma i la durdure hasur ira dadas na balo tano hala na harpidanau.
PSA 107:17 Ari diet ga hanuat ulba ta ira udiet magingin na patnau ma ira tinirih diet ga kilingane i burena ta ira udiet magingin sakena.
PSA 107:18 Diet ga miliguruane ira nian bakut ma diet ga hutet bia diet na maat.
PSA 107:19 Io, diet ga suah taar tano Watong ma ira udiet tinirih, ma ga halon leh diet sukun ira udiet ngunngutaan.
PSA 107:20 Ga tule se no uno nianga ma ga halangalanga diet sukun ira minaset. Ga hutet bia diet na maat iesen ga halon diet.
PSA 107:21 I bilai bia diet na tanga tahut tupas no Watong utano uno harmarsai nong pai la patpataam ma uta ira uno tamat na melmel na gingilaan na kinarup mah wara gaiena ira tunotuno.
PSA 107:22 I bilai bia diet na tun hartabar wara tangtanga tahut tana, ma diet na hinawas ta ira uno gingilaan ma ra ninge na gungunuama.
PSA 107:23 Ari diet ga kawas ta ira sip ures na tingaan tes. Diet ga haan hurbit tano lamlamana tes wara suhurane ira linge.
PSA 107:24 Diet ga nes ira pinapalim tano Watong, kaike ra uno tamat na gingilaan na kinarup aram ra tingena lamana,
PSA 107:25 kanong ga ianga ma ga hatut tiga baiangin nong ga tatik haut ira pakananoh uram naliu.
PSA 107:26 Ira pakananoh ga kap haut ira sip uram muk naliu ma ga se hasur diet ures napu saakit. Ta iakano sakana tes ira taan tes diet ga ramramin.
PSA 107:27 Diet ga talau ma diet ga puko hoing ira tunotuno diet mom. Diet pa ga tale bia diet na petlaar tiga linge ma ira udiet keskes na lilik.
PSA 107:28 Io, diet ga suah taar tano Watong ma ira udiet tinirih, ma ga halon leh diet sukun ira udiet ngunngutaan.
PSA 107:29 Ga hamarur no baiangin gaam pupuh matien. Ira pakananoh tano tes mah ga noh matien.
PSA 107:30 Diet ga laro ing no tes ga malile, ma no Watong ga lue diet taar ta ira katon diet ga sip bia diet na barahit kaia.
PSA 107:31 I bilai bia diet na tanga tahut tupas no Watong utano uno harmarsai nong pai la patpataam ma uta ira uno tamat na melmel na gingilaan na kinarup mah wara gaiena ira tunotuno.
PSA 107:32 Io huo, i bilai bia diet na hatamat ie nalamin tano kis hulungai ta ira matanaiabar ma i tahut bia diet na pirlat ie narako tano kinkinis tika ta ira patuana kabinsit.
PSA 107:33 Ga pukusane ira taah gaam hanuat tiga mamasina hanuo, ma ira taah saal mah gaam ngan ho ira mamasina salil.
PSA 107:34 Ga pukusane ira pise na nian gaam hanuat hoing ira marakon na pise, i burena ta ira saksakena udiet ing diet ga lon kaia.
PSA 107:35 Ga pukusane no mamasina hanuo bia, gaam hung ma ira laman taah, ma ira pise ing ga mamasa gaam hanuat taah saal.
PSA 107:36 Ga lamus tar diet ing diet ga taburungan bia diet na lon kaia, ma diet ga hatur tiga pise na hala bia diet na kis kaia.
PSA 107:37 Diet ga rup no pise ma diet ga so ira adiet nian ma ira hinau na wain. Diet ga kil ra haleng na nian ma diet ga dik ira haleng na hunena wain.
PSA 107:38 Ga haidane diet, gaam haleng saakit ira nati diet, ma ira udiet bulumakau ma ira udiet sipsip ga hanuat halengin mah.
PSA 107:39 Io, namur um, no winawas ta ira nati diet ga hansur ma diet ga hanuat malahahin ing ira hanghagawai ma ira tinirih ma ra tapunuk ga ubal diet.
PSA 107:40 Aie nong i la milmiliguruane ira lualua, ga gil diet bia diet ga goota hurbit narako tiga hanuo bia, a hanuo ing taie ta ngaas na hinahaan tana.
PSA 107:41 Iesen ga halon ira maris sukun ira udiet hinangul ma ga hatamat no winawas ta ira nati diet, diet gaam hanuat ho ira haleng na sipsip saakit.
PSA 107:42 Ira ut na takodas diet nes ma diet guama, iesen ira ut na sakena bakut diet banus ira ha diet.
PSA 107:43 Sige nong i mintot, i bilai bia na kap usurane kaiken ra linge ma na lik mur timaan no tamat na harmarsai tano Watong.
PSA 108:1 Devit ga pit iakan ra ninge. A ninge na lotu ie. God, no balagu i patpatuan. Iau ni inge na pirharlat ma no nugu nilon bakut.
PSA 108:2 Ira haap ma ira gita, muat kakel! Hokaiken, iau ni hangun no laar.
PSA 108:3 Watong, iau ni pirlat ugu nalamin ta ira hunhuntunaan ta ira mes na hanuo. Iau ni inge wara utaam nalamin ta ira tunotuno bakut,
PSA 108:4 kanong a tamat no num harmarsai, i manga naliu tano mawe. Ma no num tutun na magingin i hanut uram ra bahuto.
PSA 108:5 God, da raun haut ugu naliu tano mawe, ma i tahut bia no minamarim na burung no ula hanuo bakut.
PSA 108:6 Halon het ma no dadas na kata na limaam, ma nu taram no nugu sinasaring, waing mehet ing u manga sip het, mehet naga langalanga taar.
PSA 108:7 God i te ianga meram tano uno halhaliana subaan hoken: “Iau te kap taman taar, kaik iau ni palau ira nugu matanaiabar ma no taman Sekem ma ni hapupuo no salil Sukot ma ni tar ie ta diet.
PSA 108:8 No hanuo Gileat a nugui, ma no huntunaan Manase a nugu mah ie. Epraim no nugu kukuha na hinarubu, ma Iudeia no nugu hakilang na harkurai.
PSA 108:9 Moab aie no nugu tultulai wara gisgis ira kakigu. Iau te se tar ira nugu pala lamaas na pinpaas ta Edom wara hamines bia iau te hahirhir ie. Iau te barangang ing iau petlaar Pilistia.”
PSA 108:10 Sige na lamus halaka tar iau tano pise na hala nong i manga naliu ira uno lar? Sige na lua tagu ukaia Edom?
PSA 108:11 Kanong warah, God, augu at u te malok se tar het, ma pau hanahaan tika ma ira nuhet umri.
PSA 108:12 Tar ta harharahut wara turtur bat ira amehet suk, kanong a linge bia mon ira harharahut gar na tunotuno.
PSA 108:13 Dahat na bul hasur ira adahat suk ma no harharahut ta God. Aie at na papasuane hasur diet.
PSA 109:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. God, iau pirlat ugu. Waak um u kis kunkun taar,
PSA 109:2 kanong ira sakana tunotuno ma ira ut na harabota diet te papos ira ha diet wara tangtange haliare iau. Diet harabota taar utagu.
PSA 109:3 Diet tur luhutane iau ma diet se ira milmilikuan na nianga. Diet ubu bia mon iau ma taie ta burena.
PSA 109:4 Diet balu pukus ira nugu harmarsai ma ra nianga na hartutung, iesen iau tiga tunotuno na sinasaring.
PSA 109:5 Diet balu iau ma ra saksakena uta ira nugu bilbilai, ma ra milmiliguruan na magingin mah uta ira nugu harmarsai.
PSA 109:6 Pilak tiga sakana tunotuno wara tangtange haliare no nugu ebar. Bale tiga ut na hartutung bia na tur kaia tano kata na limana wara tungtung ie.
PSA 109:7 Ing bia na tur ra harkurai, bale bia da tung soot ie, ma nes kilam ira uno sinasaring bia a sakena.
PSA 109:8 I tahut bia pa na lon lawas, ma bia tiga mes mah na kap no uno subaan na lualua.
PSA 109:9 Iau sip bia ira natine na taie adiet ta sus ma bia no uno hahin na makosa.
PSA 109:10 I tahut bia ira natine diet na maris sokopi ma diet na goota hurbit wara saring mangana linge wara harharahut diet. Iau sip bia da pasak hasur se diet ta ira pangaho na ngasia diet.
PSA 109:11 Ma bia iakan ra tunotuno ga saring leh tiga linge, ma pai balu pukus, iau sip bia da palim bakut leh ira uno linge, ma bia ira wasire mah diet na kap leh um ira hunena ira uno mangason wara udiet.
PSA 109:12 I tahut bia taie tikai pa na marsei, ma waak bia tikai na malisane ira natine ing taie adiet ta sus.
PSA 109:13 Bale bia ira uno bulumur diet na maat bakut, ma bia ira tunotuno ing diet na lon namur, diet na lik luban diet.
PSA 109:14 Iau sip bia no Watong na lik kawase ira magingin sakena ta ira hintubuno, ma bia pa na suge se mah ira nironga tano pawasine.
PSA 109:15 I tahut bia ira udiet magingin sakena pa na panim laah meram ho God, ma bia pa da lik habaling um diet kai ra ula hanuo.
PSA 109:16 Iau sip huo kanong pa gale lik tunat bia na gil ta bilbilai, iesen ga helar ta ira maris, ma ira malahahin ma diet ing diet lon ma ra tapunuk, bia na bu bing diet.
PSA 109:17 Git sip bia na huli ira tunotuno. Io, i tahut bia no hunena ira uno nianga na harhuli na hanuat taar tana. Pa ga guama bia na tar ta haraidaan. Io, i tahut bia ira haraidaan na tapaka um tana.
PSA 109:18 Git se ira nianga na harhuli ta ira kaba bungbung hoing git singsigam ira kiniasine huo. Ira nianga na harhuli git laklaka tano tamaine hoing ra taah ma uram ta ira suruno mah hoing ra wel.
PSA 109:19 Io, i tahut bia kaike ra nianga na harhuli na kakarat dikdikit tana hoing ra sigasigam, ma hoing ra taltalin mah di wis hatikane tar ie mei.
PSA 109:20 I tahut bia kaiken ra linge na hanuat ho ira kunkulaan meram hono Watong taar ta diet ing diet tung iau, diet at ing diet ianga sakasaka taar tagu.
PSA 109:21 Iesen augu, Watong Kiskis, gil ira bilai na linge taar tagu waing daga urur taam. Halon iau, kanong no num harmarsai i tahut.
PSA 109:22 Kanong warah, iau tiga maris ma a nugu mon sunupi, ma iau manga tapunuk sakasaka.
PSA 109:23 Iau pataam hanahaan ho ira ududuh na kasakes tano matarahien. Di sabakane se iau ho ira kubawa.
PSA 109:24 Ira buku na kakigu i maalum kanong iau milo. Iau siro ma iau kangkang.
PSA 109:25 Diet ing diet tung iau, diet miliguruane iau. Ing diet nas iau, diet lawe ira ulu diet.
PSA 109:26 Watong, no nugu God, harahut iau. Halon iau haruat ma no num harmarsai.
PSA 109:27 Hamines ta diet bia diet na nunure bia no limaam i te pakile iakan, ma bia augu at, Watong, u te gil ie.
PSA 109:28 I tale bia diet na ianga na harhuli, iesen augu, nu haidane iau. Ing diet na tut na hinarubu ma iau, diet na hirhir, iesen no num tultulai na guama.
PSA 109:29 Diet ing diet tung iau, diet na manga malahuan, ma diet na pupulus ma ra hirhir hoing ira maal.
PSA 109:30 Iau ni manga pirhakasing no Watong ma no hagu. Iau ni pirlat ie nalamin tano tamat na matanaiabar,
PSA 109:31 kanong i la tur taar tano kata na limana nong auno mon sunupi, wara kapkap pukus no uno nilon talur diet ing diet kurei bia da bu bing ie.
PSA 110:1 Devit ga pit iakan ra ninge na lotu. No Watong ga tange ta nagu Watong: “Nu kap no tamat na kinkinis kai tano kata na limagu, tuk iau ni bul hasur ira num hiruo napu, hoing tiga linge na bul kakim!”
PSA 110:2 No Watong na hakari no num dadas na harkurai meram Saion. Nu kis na harkurai nalamin ta diet ira num ebar.
PSA 110:3 Ira num matanaiabar diet na kanan wara harharahut ugu tano num bung na hinarubu. Ira num sigasigam i halhaal, ma no num dadas na hanuat nunuhuan ta ira kaba bungbung hoing no ruur i puko ra malaan.
PSA 110:4 No Watong i te hasasalim, ma pa na kios no uno lilik, gaam tange hoken: “No num pinapalim na lamus tunotuno tupas iau na tur hatikai, haruat tano pinapalim na lamus tunotuno tupas iau ing Melkisedek ga gilgil.”
PSA 110:5 No Watong ie kaike i tur tika ma ugu wara hadadas ugu. Na paas gisiane ira king tano bunguno no uno ngalngaluan.
PSA 110:6 Na hapidanau ira hunhuntunaan ta ira mes na hanuo, na bul hung ira minaat, ma na paas gisiane ira ut na harkurai tano ula hanuo bakut.
PSA 110:7 Na mom tano taah i saal tano gagena ngaas. Io kaik, na kap dadas wara petlaar no hinarubu.
PSA 111:1 Pirlat no Watong. Iau ni pirhakasing no Watong ma no nugu nilon bakut aram tano tamat na kis hulungai ta ira ut na takodas.
PSA 111:2 A tamat saakit ira pinapalim tano Watong. Diet ing diet kanakana ta kaike ra pakpakilai, diet la liklik murmur ira uno pinapalim.
PSA 111:3 Ira uno gingilaan i manga melmel saakit, ma ira uno takodasiana magingin na kis hatika.
PSA 111:4 I te hanakamaan leh dahat uta ira uno tamat na pinapalim na kinarup. No Watong, a ut na harmarsai ie, ma i la marse bakut tar dahat.
PSA 111:5 I tabar diet ing diet burtei ma ira adiet nian. I lik hatikane tar no uno kunubus.
PSA 111:6 I te tar se tar ira pise gar na mes na huntunaan taar ta ira uno matanaiabar. Io huo, i te haminas no dadas ta ira uno pinapalim taar ta diet.
PSA 111:7 Ira pinapalim na limana i takodas ma i hatutun ing i tange. Ira uno hartula bakut i tale bia da so nurnuruan ine.
PSA 111:8 Kaike ra hartula diet tur dikdikit hatika taar, ma da mur diet ma ra tutun na takodasiana magingin.
PSA 111:9 I ga kul halangalanga ira uno matanaiabar. I ga hatur hatikane tar no uno kunubus tika ma diet. No hinsana i halhaal ma da lat nabanei.
PSA 111:10 No urur tano Watong aie no burena ta ira minminonas. Diet bakut ing diet mur ira uno hartula, ira udiet lilik i manga palai. Da tar ra pirharlat hathatikai uram ho ie.
PSA 112:1 Pirlat no Watong. A haraidaan na kis tano tunotuno nong i burte no Watong, aie nong i manga kanakana mah ta ira uno hartula.
PSA 112:2 Ira natine diet na dadasina tunotuno ta ira tamtaman. Ma ira ut na takodas ta iakan ra pakana bung, diet na kap ra haraidaan.
PSA 112:3 No uno hala i hung ma ra haleng kinewa saakit, ma ira uno takodasiana magingin i kis hatika taar.
PSA 112:4 A lulungo i bulo sare no kankado wara gaena no ut na takodas. Iakano tunotuno, a ut na harmarsai ie ma i la gilgil ira bilbilai.
PSA 112:5 A tahut na hanuat taar ta nong i marse nong i saring ie, ma i manga tabar ie, ma i pakile mah ira uno pinapalim ma ra taktakodas.
PSA 112:6 Pai tale tunat bia da gunei. Da lik kawase hathatikane no ut na takodas.
PSA 112:7 Pa na burut bia na seer ta sakana hinhinawas. I tur dadas taar kanong i so tar no uno nurnuruan tano Watong.
PSA 112:8 I balaraan taar ma pa na burut tuk bia na paas hasur ira uno ebar.
PSA 112:9 I te tabar harbasiane ira maris, ma ira uno takodasiana magingin i kis hatika taar. No hinsana na tamat ma diet na urur tana.
PSA 112:10 No ut na sakena na nas kaiken ma na ngangar. Na hatagiris ira ngisena ma na panim laah. Ira masmasingan tano ut na sakena pa na hanuat tutun.
PSA 113:1 Pirlat no Watong. Muat ira tultulai tano Watong, muat na pirlat ie. Pirlat no hinsana no Watong.
PSA 113:2 Da pirlat no hinsana no Watong, kaiken ma namur ma pa na pataam.
PSA 113:3 Da pirlat no hinsana no Watong merau laah hoing no kasakes i la tutut hut kaia tuk taar ares hoing i la sungsuguh kaia.
PSA 113:4 No Watong i manga tamat naliu ta ira kaba kantri bakut, ma no minamarine i naliu saakit tano mawe.
PSA 113:5 Taie tikai i haruat hoing no Watong, no nudahat God, nong i la kis taar aram naliu saakit,
PSA 113:6 ma i la tuntudu suur wara nasnas no mawe ma no ula hanuo.
PSA 113:7 I raun haut no maris mekaia ra kaabus ma i tatik haut no malahahin sukun ira tahuna iaah.
PSA 113:8 I hakisi tikane ie ma ira tamat na lualua, kaike ira lualua ta ira uno matanaiabar.
PSA 113:9 I haguama no hinkaho ing na kapis bulu, ma na hakisi timaan ie huo narako tano ngasiana. Pirlat no Watong.
PSA 114:1 Israel ga hansur ma Isip. Iakano huntunaan mon tane Iakop diet ga hansur huo meras ta ira matanaiabar a mes ira udiet nianga.
PSA 114:2 Io, Iudeia ga hanuat no halhaliana taman ta God, ma i la harkurai taar kaia Israel.
PSA 114:3 No Dardarana Tes ga nanaas ma ga hilau laah, ma no Taah Ioridaan ga saal tapukus.
PSA 114:4 Ira tamat na uladih diet ga karkaruas ho ira tumatena sipsip, ma ira nat na uladih hoing ra nat na sipsip.
PSA 114:5 Dardarana Tes, warah bih gu hilau laah? Taah Ioridaan, u saal tapukus warah mah?
PSA 114:6 Muat ira tamat na uladih, warah bih muat karkaruas ho ira tumatena sipsip, ma muat ira nat na uladih, ho ira nat na sipsip?
PSA 114:7 Augu no ula hanuo, dedar ra matmataan tano Watong, kaia tano matmataan tano God tane Iakop,
PSA 114:8 aie nong ga kios no haat bia na hanuat pup na taah, ma no malaapar mah bia na hanuat taah i la pupuat.
PSA 115:1 Watong, da nes kilam bia a num no minamar, ma taie tunat bia a numehet ie, kanong u la marmarse mehet ma u la hatutun ing u tange.
PSA 115:2 Wara biha bia ira hunhuntunaan ta ira mes na hanuo diet tange bia, “Ie he no udiet God?”
PSA 115:3 No udahat God ie kenam ra mawe. I la gilgil ira linge haruat ma no uno sinisip.
PSA 115:4 Iesen ira udiet palimpuo di gil ma ra siliwa ma ra gol, ma a lima na tunotuno mon i gil.
PSA 115:5 A mon ha diet, iesen diet pai haruat bia diet na ianga. A mon mata diet, iesen diet pai nanaas.
PSA 115:6 A mon talinga diet, iesen diet pai haruat bia diet na hadoda. A mon ngarngaro diet, iesen diet pa na huhurana linge.
PSA 115:7 A mon lima diet, iesen diet pai haruat bia diet na hamaan ta linge. A mon kaki diet, iesen diet pa na haan. Pai tale bia tiga kinakel na hansur ta ira adiet kabalakor.
PSA 115:8 Sige diet ing diet pakile kaiken ra palimpuo, diet na haruat mah huo, ma huo mah ta diet ing diet so nurnuruan ta diet.
PSA 115:9 Muat ira Israel, i tahut bia muat na so nurnuruan tano Watong. Aie no numuat harharahut ma bahbahit.
PSA 115:10 Muat tano huntunaan ta Aaron, i tahut bia muat na so nurnuruan tano Watong. Aie no numuat harharahut ma bahbahit.
PSA 115:11 Muat ing muat burte no Watong, i tahut bia muat na so nurnuruan tana. Aie no numuat harharahut ma bahbahit.
PSA 115:12 No Watong i la lik tar dahat ma na haidane dahat. Na haidane ira matanaiabar ta Israel, ma na haidane ira ut na pakila lotu, diet ira bulumur ta Aaron.
PSA 115:13 Na haidane diet ing diet burte no Watong, diet ira hansik ma diet ira tamat mah huo.
PSA 115:14 I bilai bia no Watong na hapuar muat, bia muat tika ma ira nati muat, muat na kapis bulu.
PSA 115:15 I bilai bia no Watong nong ga hakisi no mawe ma no ula hanuo, na haidane muat.
PSA 115:16 No mawe a gar tano Watong ie, iesen no ula hanuo, i te tar se tar ie ta ira tunotuno.
PSA 115:17 Taie bia ira minaat diet na pirlat no Watong, diet ing diet hansur ures tano hanuo bia diet na noh kunkun mon kaia.
PSA 115:18 Iesen dahat kaik, dahat na pirhakasing no Watong, kaiken ma namur ma pa na pataam. Pirlat no Watong.
PSA 116:1 Iau kalak no Watong, kanong ga hadade no ingagu. Ga hadade no nugu sunuah wara gaiena harmarsai.
PSA 116:2 Iau ni tataau ie ta ira nugu bung na nilon bakut, kanong ga sa talingana ukai ho iau.
PSA 116:3 No minaat ga wiwisane iau, ma no ngunngutaan na minaat ga pulus iau. A tinirih ma ra marmaris ga ubal iau.
PSA 116:4 Io, iau ga tataau um tupas no Watong hoken: “Watong, halon iau!”
PSA 116:5 No Watong i marse dahat ma a takodasianai. No udahat God i hamines no balana ta dahat.
PSA 116:6 No Watong i balaure diet ing diet pai tale bia diet na harahut habaling at diet. Ing iau ga wara hiniruo sakasaka, ga halon iau.
PSA 116:7 I tale bia ni kis matien balin, kanong no Watong i te gil ra bilai tagu.
PSA 116:8 Watong, u te halangalanga iau sukun ra minaat, u te ros ise ira luur na matagu, ma u te balaure iau bia iau kabi tuke ira kakigu,
PSA 116:9 waing iau ni haan ra matmataan tano Watong kai ra taman audiet ira lilona.
PSA 116:10 Iau ga nurnur, kaik iau gaam tange, “A tamat na tinirih te ubal tar iau.”
PSA 116:11 Iau ga burut, kaik iau gaam tange bia, “Ira tunotuno bakut, a ut na harabota diet.”
PSA 116:12 Iau ni balu no Watong uta ira uno bilbilai ukai ho iau hohe?
PSA 116:13 Iau ni raun haut no gingop nong a hakilang ie tano uno harhalon ma iau ni tataau tupas no Watong.
PSA 116:14 Iau ni pakile haruatne ira nugu kunubus taar tano Watong kaia ra matmataan ta ira uno matanaiabar bakut.
PSA 116:15 Ing tiga tunotuno nong i mur timaan God i maat, a tamat na linge ra matmataan tano Watong.
PSA 116:16 Watong, tutun saakit bia a num tultulai iau. Iau no num tultulai, hoing no pawasigu mah huo. U te palas ise iau sukun ira nugu winwisaan.
PSA 116:17 Iau ni tar tiga hartabar wara tanga tahut saakit taam ma iau ni tataau tupas no Watong.
PSA 116:18 Iau ni pakile haruatne ira nugu kunubus taar tano Watong kaia ra matmataan ta ira uno matanaiabar bakut,
PSA 116:19 aram narako tano ngasiana no Watong aram Ierusalem. Pirlat no Watong.
PSA 117:1 Pirlat no Watong, muat ira kantri bakut. Muat ira matanaiabar bakut, muat na pirhakasing ie,
PSA 117:2 kanong a tamat saakit no uno harmarsai tupas dahat, ma no uno magingin wara hatutun ing i tange na kis hathatika. Pirlat no Watong.
PSA 118:1 Tanga tahut tano Watong, kanong a bilai ie. No uno harmarsai i kis hathatika.
PSA 118:2 I tahut bia Israel na tange bia, “No uno harmarsai i kis hathatika.”
PSA 118:3 I tahut bia no huntunaan ta Aaron na tange bia, “No uno harmarsai i kis hathatika.”
PSA 118:4 I tahut bia diet ing diet burte no Watong diet na tange bia, “No uno harmarsai i kis hathatika.”
PSA 118:5 Ing a tamat na tinirih ga ubal iau, iau ga suah tupas no Watong, ma ga taram iau, gaam halangalanga iau.
PSA 118:6 No Watong ie ken tika ma iau. Iau pa ni burut. Asa ing i tale bia ira tunotuno diet na gil tagu?
PSA 118:7 No Watong ie ken tika ma iau. Aie no nugu ut na harharahut. Iau ni nanaas ma ra latlaat taar ta diet ing diet malentakuane iau.
PSA 118:8 Bia da barahit narakoman tano Watong, iakano i manga bilai tano magingin na so nurnuruan ta tiga tunotuno.
PSA 118:9 Bia da barahit narakoman tano Watong, iakano i manga bilai tano magingin na so nurnuruan ta ira tamat na lualua.
PSA 118:10 Ira matanaiabar ta ira kantri ing diet ga malentakuane iau, diet ga tur luhutane iau, iesen iau ga haliare diet ma no dadas tano Watong.
PSA 118:11 Diet ga tur luhutane iau ta ira katon bakut, iesen iau ga haliare diet ma no dadas tano Watong.
PSA 118:12 Diet ga hung luhutane iau hoing ra kamasoosar, iesen diet ga maat laah hoing ra marangina huro i la iaiaan gasien. Iau ga haliare diet ma no dadas tano Watong.
PSA 118:13 Di ga harubu dadas ma iau ma iau ga wara punuko, iesen no Watong ga harahut iau.
PSA 118:14 No Watong aie no nugu dadas ma no suruno no nugu ninge. I te hanuat no nugu Ut na Harhalon.
PSA 118:15 A kunup na gungunuama tika ma ra barangang kenam narako ta ira hala ta ira ut na takodas. No kata na limana no Watong i te gil ra dadas na gingilaan!
PSA 118:16 No Watong i te raun haut no kata na limana. No kata na limana no Watong i te gil ra dadas na gingilaan!
PSA 118:17 Iau pa ni maat, iesen bia iau ni lon, ma iau ni hinawas palai ta ing no Watong i te gil.
PSA 118:18 No Watong i te tar ra dadas na harpidanau tagu, iesen pai bale tar iau bia ni maat.
PSA 118:19 Papos tar tagu no matanangaas uta ira ut na takodas. Iau ni haan laka ma ni tanga tahut tano Watong.
PSA 118:20 Iakan no matanangaas tano Watong. Ira ut na takodas diet na laka kaia.
PSA 118:21 Iau ni tanga tahut taam, kanong u ga taram iau. U te hanuat nugu Ut na Harhalon.
PSA 118:22 No haat nong ira ut na pakila hala diet ga malok sei, kanong diet ga lik bia a linge bia ie, i nanaas taar bia aie balik um no dadas na burena tano hala bakut.
PSA 118:23 No Watong at ga gil hokaiken ma i manga bilai saakit bia dahat na nas ie.
PSA 118:24 Katin no bung no Watong i te bul ie. Dahat na kup ma ra gungunuama tana.
PSA 118:25 Watong, mehet saring ugu bia nu halon mehet. Watong, mehet saring ugu bia nu harahut mehet waing het naga hatur kawase ira bilbilai.
PSA 118:26 A haraidaan na kis ta nong i hanuat wara gilgil haruatne ira sinisip gar tano Watong! Meram tano hala na lotu tano Watong mehet haidane muat.
PSA 118:27 No Watong, aie no God, ma i te murarang naliu ta dahat. Muat na hatahun no lukara ma ra katena daha ta ira lima muat, ma muat na haan tupas no alta.
PSA 118:28 Augu no nugu God, ma iau ni tanga tahut taam. Augu no nugu God, ma iau ni raun haut no hinsaam.
PSA 118:29 Tanga tahut tano Watong, kanong a bilai ie. No uno harmarsai i kis hathatika.
PSA 119:1 A haraidaan na kis ta diet ing taie ta da saksakena ta ira udiet tintalen, diet at ing diet la hanahaan haruat ma ira harkurai tano Watong.
PSA 119:2 A haraidaan na kis ta diet ing diet pakile haruatne ira uno harpir, diet at ing diet sisilih tano Watong ma no udiet kidilona lon.
PSA 119:3 Diet pai gil ta nironga. Diet lon mur ira tintalen tano Watong.
PSA 119:4 U te bul hadadas ira num nianga na harakatom bia da mur timaan bakut.
PSA 119:5 Iau manga sip bia i tale bia ni tur dit wara murmur timaan ira num dadas na harkurai.
PSA 119:6 Io huo, iau pa ni hirhir ing iau liklik timaan ta ira num hartula.
PSA 119:7 Meram narako tunat tagu iau ni pirlat ugu ing iau harausur ta ira takodasiana ula harkurai.
PSA 119:8 Iau ni mur ira num dadas na harkurai. Waak ugu ra turtur talur hasakitne iau.
PSA 119:9 Tiga marawaan na tale bia na balaure ira uno tintalen hohe, kaik no uno nilon naga takodas? Na tahut bia na lon murmur ira num nianga.
PSA 119:10 Iau silihe ugu ma no nugu kidilona lon. Waak u bale tar iau bia ni rara laah ta ira num hartula.
PSA 119:11 Iau te suhe no num nianga narakoman tano balagu, kaik iau pa nigi gil tiga sakena taar taam.
PSA 119:12 Watong, a pirhakasing tupas ugu. Hausur iau ta ira num dadas na harkurai.
PSA 119:13 Ma ira palabulugu iau hinawas palai ta ira ula harkurai bakut ing ga hansur tano haam.
PSA 119:14 Iau kanakana wara murmur ira num harpir hoing tikai i guama ta ira uno halengin kinewa.
PSA 119:15 Iau lik murmur ira num nianga na harakatom ma iau lilik timaan ta ira num tintalen.
PSA 119:16 Iau manga guama ta ira num dadas na harkurai. Iau pa ni lik luban se ira num nianga.
PSA 119:17 Gil ta bilbilai tagu, no num tultulai, ma iau nigi lon ma iau ni mur ira num nianga.
PSA 119:18 Papos ira matagu waing iau nigi nes ira bilai na linge saakit kenam narakoman ta ira num harkurai.
PSA 119:19 Iau tiga wasire tano ula hanuo. Waak u suhe ira num hartula bia iau pai tale bia ni nes.
PSA 119:20 No kaatigu i manga mur tunat ira num ula harkurai ta ira kaba bungbung.
PSA 119:21 U la baboor ira ut na latlaat, diet at ing diet la hanahaan talur ira num nianga na harakatom, ma diet na kap ra harpidanau.
PSA 119:22 Waak u haut leh ira tunotuno bia diet na tange hagahe iau ma diet na kukutur sakasaka tagu, kanong iau la pakpakile haruatne ira num harpir.
PSA 119:23 Ira tamat na lualua diet kis tika wara tangtange hagahe iau, iesen iau, no num tultulai, iau ni lik murmur timaan ira num dadas na harkurai.
PSA 119:24 Ira num harpir i la hakanakana iau. Kaike ra harpir i la tartar a bilai na harausur tagu.
PSA 119:25 Di te paas hasur iau taar tano kaabus. Halon iau haruat ma no num nianga.
PSA 119:26 Iau ga tange hapuasne ira nugu mangana tintalen, ma u te taram iau. Hausur iau ta ira num dadas na harkurai.
PSA 119:27 Hapalaine iau uta ira ngaas ta ira num nianga na harakatom, waing nigi lik murmur ira num bilai na gingilaan harsakit.
PSA 119:28 A tapunuk i te ubal tar iau. Hadadas iau haruat ma no num nianga.
PSA 119:29 Kap se no tintalen na hinarabota tagu, ma hamines no num harmarsai ing nu tar ira num harkurai tagu.
PSA 119:30 Iau te pilak leh ira tutun na tintalen. Iau te bul ira num ula harkurai menalua tagu bia ni mur haruatne.
PSA 119:31 Watong, iau la palpalim hadadas tar ta ira num harpir. Waak u bale bia da hahirhir iau.
PSA 119:32 Iau ni hilau mur ira num hartula, kanong nu hapalaine timaan no nugu lilik.
PSA 119:33 Watong, hausur iau wara murmur ira num dadas na harkurai, ma iau pa ni sangeh wara tartaram kaike ra nianga.
PSA 119:34 Tar palpalai tagu waing nigi taram ira num harkurai ma ni mur timaan ma no nugu nilon bakut.
PSA 119:35 Lue iau tano ngaas ta ira num hartula, kanong kaia iau ni silihe ira gungunuama.
PSA 119:36 Hurusane no balagu tupas ira num harpir, ma waak bia ukatiga hono magingin na gumut.
PSA 119:37 Kap se ira matagu ta ira linge ing a linge bia mon. Balaure timaan no nugu nilon haruat ma no num nianga.
PSA 119:38 Hatutun ira nianga u ga kukubus taar tagu, no num tultulai, waing daga burte ugu.
PSA 119:39 Kap se tar ira nianga na kukutur tupas iau ing iau hirhir ine, kanong ira num ula harkurai, a bilai at diet.
PSA 119:40 Tutun saakit, no kaatigu i la murmur ira num nianga na harakatom. Balaure bat no nugu lon ma ira num tutun na magingin.
PSA 119:41 Watong, iau sasaring bia no num harmarsai nong pai la patpataam na hanuat taar tagu, io huo, nu halon iau haruat ma ing u ga kukubus taar huo.
PSA 119:42 Io, iau ni tale bia ni balu sige nong na tange hagahe iau, kanong iau nurnur tano num nianga.
PSA 119:43 Bale iau bia ni hinawas palai utano num tutun na nianga, kanong iau kis nanaho ta ira bilbilai ta ira num ula harkurai.
PSA 119:44 Io, iau ni murmur hatikane ira num harkurai, katin, namur, ma pana le pataam.
PSA 119:45 Ma iau ni langalanga timaan, kanong iau te silihe leh ira num nianga na harakatom.
PSA 119:46 Ma iau ni hinawas ta ira num harpir menalua ta ira king ma pa da hahirhir iau.
PSA 119:47 Io, iau guama ta ira num hartula, kaike ra hartula ing iau kalak.
PSA 119:48 Ma iau raun haut ira iruo limagu ukatiga ho ira num hartula ing iau sip, ma iau la liklik murmur ira num dadas na harkurai.
PSA 119:49 Lik leh no num nianga u ga kubus ie tika ma iau, no num tultulai, kanong u te lue iau bia ni kis nanaho ta ira bilbilai ta ira num nianga.
PSA 119:50 No linge i habalaraan iau tano nugu ngunngutaan i hoken, bia no num nianga na kunubus i balaure bat tar no nugu lon.
PSA 119:51 Ira ut na latlaat diet manga hasakit sakasaka tagu, iesen iau pa ni haan talur ira num harkurai.
PSA 119:52 Watong, iau lik kawase ira num ula harkurai u ga bul tar nalua saakit, ma diet habaraam iau.
PSA 119:53 No ngalngaluan i manga tamat tagu kanong ta ira ut na sakena, diet ing diet te waak kapis ira num harkurai.
PSA 119:54 Iau la inginge uta ira num dadas na harkurai ta ira katon iau la hanahaan ukaia.
PSA 119:55 Watong, ra bung iau lik kahe no hinsaam, ma iau la murmur ira num harkurai.
PSA 119:56 No nugu mangana magingin i hoken, bia iau la tartaram ira num nianga na harakatom.
PSA 119:57 Watong, augu no pinlawegu. Iau te kukubus be iau ni mur ira num nianga.
PSA 119:58 Iau te silihe ira num haraidaan ma no nugu nilon bakut. Marse iau haruat ma no num nianga na kunubus.
PSA 119:59 Iau te lik murmur ira nugu magingin ma iau te tapukus taar ta ira num harpir.
PSA 119:60 Iau ni habir ma pa ni halis wara murmur ira num hartula.
PSA 119:61 Bia ira ut na sakena diet na kubus iau ma ra hinau, iau pa ni lik luban ira num harkurai.
PSA 119:62 Iau tangahun ra tingena bung wara tanga tahut saakit taam uta ira num takodasiana ula harkurai.
PSA 119:63 Iau tiga harwis ta diet bakut ing diet ru ugu, ma ta diet ing diet mur ira num nianga na harakatom.
PSA 119:64 Watong, no ula hanuo i hung ma no num harmarsai. Hausur iau ta ira num dadas na harkurai.
PSA 119:65 Watong, u te gil ra tahut taar tagu, no num tultulai, haruat ma no num nianga.
PSA 119:66 Hausur iau ra mintota ma ra bilai na minminonas, kanong iau nurnur ta ira num hartula.
PSA 119:67 Ing iau pa ga harsomane baak ra tamat na tinirih, iau ga haan talur ugu, iesen kaiken um iau mur ira num nianga.
PSA 119:68 A tahut ugu, ma ira linge u gil i bilai. Hausur iau ta ira num dadas na harkurai.
PSA 119:69 Ira ut na latlaat diet te tange ra haleng na bis na nianga utagu, iesen iau taram ira num harkurai ma no nugu kudulena lon.
PSA 119:70 Ira ulu diet i tabanot, iesen iau guama ta ira num harkurai.
PSA 119:71 Ing iau ga harsomane ra tamat na tinirih, ga bilai tagu, kanong ga hausur iau ta ira num dadas na harkurai.
PSA 119:72 Iau nes kilam tano nugu lon bia ira harkurai meram tano haam i manga tirih ta ira arip na subana siliwa ma ra gol.
PSA 119:73 Ira lumaam ga gil iau ma ga hakisi iau. Hapalaine iau waing nigi harausur ta ira num hartula.
PSA 119:74 Iau sip bia diet ing diet ru ugu, diet na guama ing diet nes iau, kanong iau kis nanaho ta ira bilbilai tano num nianga.
PSA 119:75 Watong, iau nunure bia i takodas ira num ula harkurai, ma bia narako tano tutun na magingin u te hangungutaan iau.
PSA 119:76 Bale tar no num harmarsai nong pai la patpataam bia na habaraam iau, haruat ma ing u ga kukubus taar tagu, no num tultulai.
PSA 119:77 Marse iau waing iau nigi lon, kanong iau kanakana ta ira num harkurai.
PSA 119:78 Hahirhir ira ut na latlaat kanong diet tung iau ma ra harabota na nianga, iesen iau ni lik mur ira num nianga na harakatom.
PSA 119:79 Diet ing diet ru ugu, iau sip bia diet na haan tapukus ukai ho iau, diet at ing diet palai ta ira num harpir.
PSA 119:80 Iau sip bia no balagu na bilai harsakit, naga haruat ma ira num dadas na harkurai, waing iau pa nigi kaha hirhir.
PSA 119:81 No nugu lon i te maalum ing iau kis kawase no num harhalon, iesen iau kis nanaho ta ira bilbilai tano num nianga.
PSA 119:82 Ira matagu i te manga tirih wara ninaas bia nu gil haruatne ira num nianga na kunubus. Iau tange hoken, “Hunanges um nu habaraam iau?”
PSA 119:83 Tutun bia iau haruat hoing tiga gingop ing di gil ma ra pala bulumakau ing a mis i te rang hagahe tar, iesen iau pai lik luban ira num dadas na harkurai.
PSA 119:84 Iau, no num tultulai, iau ni kis nanaho haruat hunanges? Hunanges kaik nu bul no num ula harkurai wara hapidanau diet ing diet helar tagu?
PSA 119:85 Ira ut na latlaat diet te kil hasur no pise wara hakuni iau. Diet pai lon mur ira num harkurai.
PSA 119:86 I haruat bia da so nurnuruan ta ira num hartula. Harahut iau, kanong ira tunotuno diet helar tagu ma ira bis na nianga.
PSA 119:87 Dahin ma diet gar te hapataam se tar iau mekai ra ula hanuo, iesen iau pa ga waak se tar ira num nianga na harakatom.
PSA 119:88 Balaure bat no nugu lon haruat ma ira num harmarsai, waing iau nigi mur ira kaba harpir mekaia tano haam.
PSA 119:89 Watong, ira num nianga na kis hathatika. I tur dadas aram ra mawe.
PSA 119:90 No num tutun na magingin na haan taar ta ira tunotuno ing diet lon katin ma namur mah. U ga hakisi no ula hanuo, ma i kis hatika taar.
PSA 119:91 Ira num ula harkurai i kis taar tuk katin, kanong ira linge bakut i la tartaram ugu.
PSA 119:92 Ing bia ira num harkurai pa naga haguama iau, iau gor te maat ma ira nugu ngunngutaan.
PSA 119:93 Iau pa ni lik luban ira num nianga na harakatom, kanong ta kaike ra nianga na harakatom u te balaure no nugu lon.
PSA 119:94 Halon iau, kanong a num iau. Iau te silihe leh ira num nianga na harakatom.
PSA 119:95 Ira ut na sakena diet nanaho wara haliare iau, iesen iau ni lik mur ira num harpir.
PSA 119:96 Iau nes bia a mon patpataam ta ira linge bakut, iesen ta ira num hartula, taie ta patpataam ine.
PSA 119:97 Iau la manga kalak tar no num harkurai! Iau lik mur ie tano kidilona bung bakut.
PSA 119:98 Ira num hartula diet gil iau bia ni manga mintot ta ira nugu ebar, kanong kan ra nianga na harakatom i la kis hatika taar ma iau.
PSA 119:99 Iau manga minonas ta ira nugu ut na harausur, kanong iau la liklik murmur ira num harpir.
PSA 119:100 Iau manga palai ta mehet ma ira patuana, kanong iau la tartaram ira num nianga na harakatom.
PSA 119:101 Iau pas ira sakana ngaas waing iau nigi mur ira num nianga.
PSA 119:102 Iau pai haan talur ira num ula harkurai, kanong augu at u te hausur iau.
PSA 119:103 Ira num nianga i namien ududuh! I manga namnamien ta ira tiri na imara akai ra hagu!
PSA 119:104 Iau kap ra palpalai mekai ta ira num nianga na harakatom, io kaik, iau malentakuane ira ngaas ing pai tutun.
PSA 119:105 No num nianga a laam ie ta ira iruo kakigu, ma ra lulungo ie tano nugu ngaas.
PSA 119:106 Iau te sasalim ma iau ni gil haruatnei, bia iau ni mur ira num takodasiana ula harkurai.
PSA 119:107 Watong, i te manga ubal iau ra haleng tinirih. Balaure bat no nugu lon haruat ma no num nianga.
PSA 119:108 Watong, nu haut leh ira pirhakasing tano hagu ing iau kanakana bia ni tar taam, ma nu hausur iau ta ira num ula harkurai.
PSA 119:109 I tutun bia iau la taguro taar bia ni hiruo, nigi maat, iesen iau pa ni lik luban ira num harkurai.
PSA 119:110 Ira ut na sakena diet te kapis tar tiga kuun wara utagu, iesen iau pai rara sukun ira num nianga na harakatom.
PSA 119:111 Iau ni kap usurane hatikane ira num harpir. A sape na kaatigu at diet.
PSA 119:112 Iau te bul no nugu lilik wara gilgil haruatne ira num dadas na harkurai hathatikai tuk bia ni maat.
PSA 119:113 Iau malentakuane diet ira liliklumet na tunotuno, iesen iau sip tar ira num harkurai.
PSA 119:114 Augu no nugu subaan na munmun, ma no nugu bahbahit. Iau kis nanaho ta ira bilbilai tano num nianga.
PSA 119:115 Muat ira ut na sakena, muat na haan talur iau, waing iau nigi mur ira hartula tano nugu God.
PSA 119:116 Balaure timaan iau haruat ma no num nianga, waing iau nigi lon. Ma waak u bale iau bia ni malahuan ta ira linge iau kis kawasei ma ra nurnur.
PSA 119:117 Hatatol iau waing iau nigi kap no harhalon huo, ma nigi manga lik hatikane ira num dadas na harkurai.
PSA 119:118 U malok se diet bakut ing diet tamapas laah talur ira num dadas na harkurai, kanong diet lamus habato ira tunotuno ma ira udiet hinarabota.
PSA 119:119 U te waak se ira ut na sakena bakut tano ula hanuo hoing di gope se ira bilinge ing i booka ta ira siliwa ing di tun ie. Io kaik, iau sip ira num harpir.
PSA 119:120 No palatamaigu i dedar ma ra bunurut wara utaam, ma iau ru ira num ula harkurai.
PSA 119:121 Iau te gil ing i takodas ma i tutun. Waak u bale se tar iau ta ira ut na haraubaal.
PSA 119:122 Hatutun bia iau, no num tultulai, ni kap ira bilbilai. Waak u bale tar ira dadas na ulpat bia diet na ubal iau.
PSA 119:123 Ira matagu i tirih ing iau nanaas tano num harhalon ma ta ira num gingilaan haruat ma no num takodasiana kunubus.
PSA 119:124 Papalim narako tagu, no num tultulai, haruat ma no num harmarsai, ma hausur iau ta ira num dadas na harkurai.
PSA 119:125 Iau no num tultulai. Hapalaine no nugu lilik waing iau ni palai ta ira num harpir.
PSA 119:126 Watong, no pakana bung kaiken um bia nu tut ma nu pakile ira num pinapalim, kanong di te kutus ira num harkurai.
PSA 119:127 Io kaik, iau kalak ira num hartula. No nugu sinisip uta kaike ra hartula i tamat ta dir ma ra gol, a gol at mah ing a tabi matana.
PSA 119:128 Io kaik, iau nes kilam bia ira num nianga na harakatom bakut i takodas, ma iau malentakuane ira kaba ngaas na hinarabota.
PSA 119:129 A bilai saakit ira num harpir, io huo, iau la tartaram diet.
PSA 119:130 No tamtamapapos ta ira num nianga i tar lulungo. I tar palpalai ta ira bawine.
PSA 119:131 Iau panganga ma iau mehmeh, kanong iau masingane ira num hartula.
PSA 119:132 Talingane iau ma nu marse iau, hoing u la gilgil ta diet ing diet kalak no hinsaam.
PSA 119:133 Hadadas ira nugu hinahaan haruat ma ira num nianga na kunubus. Ma waak u bale iau bia ni kis ra henai no dadas ta tiga magingin sakena.
PSA 119:134 Halangalanga iau sukun ira haraubaal ta ira tunotuno waing iau nigi mur ira num nianga na harakatom.
PSA 119:135 Bale bia no matmataan taam na murarang naliu tagu, no num tultulai, ma nu hausur iau ta ira num dadas na harkurai.
PSA 119:136 Ira polo na matagu i manga saal suur ta ira matagu, kanong pa di mur ira num harkurai.
PSA 119:137 Watong, a takodasiana ugu, ma ira num ula harkurai i takodas.
PSA 119:138 Ira harpir ing u te tar, i takodas, ma i tale bia da so nurnuruan ta diet.
PSA 119:139 No balagu i manga mamahien kanong ira nugu ebar diet lilik tatohun ta ira num nianga.
PSA 119:140 Di te walar tar no num nianga na kunubus ma di te nes bia i bilai harsakit, io kaik, iau no num tultulai, iau la sip tar ie.
PSA 119:141 A tutun bia a tunotuno bia mon iau ma di mikiane iau, iesen iau pai lik luban ira num nianga na harakatom.
PSA 119:142 Ira num takodasiana magingin i la kis hatika taar ma ira num harkurai i tutun.
PSA 119:143 A tinirih ma ra tapunuk i te haan tupas iau, iesen iau la kanakana taar ta ira num hartula.
PSA 119:144 Ira num harpir i la takodas hatika taar. Hapalaine no nugu lilik waing iau nigi lon.
PSA 119:145 Iau tataau ma no nugu kidilona lon. Balu iau, Watong. Iau ni taram ira num dadas na harkurai.
PSA 119:146 Iau tataau ukatiga ho ugu. Halon pukus iau ma iau ni mur ira num harpir.
PSA 119:147 Iau tut ra malabungbung ma iau suah wara harharahut. Iau kis nanaho ta ira bilbilai ta ira num nianga.
PSA 119:148 Iau pai la hapulo ira iruo matagu tutun at ra bung, waing iau nigi lik murmur ira num nianga na kunubus.
PSA 119:149 Hadade no ingagu haruat ma no num harmarsai. Watong, balaure bat no nugu lon haruat ma ira num ula harkurai.
PSA 119:150 Diet um ken hutet ing diet pingit saksakena, iesen diet tapaka taar ta ira num harkurai.
PSA 119:151 Watong, augu at ken hutet, ma ira num hartula i tutun.
PSA 119:152 Nalua saakit iau ga harausur ta ira num harpir bia u gate hakisi hatikane tar diet.
PSA 119:153 Nes ira nugu ngunngutaan ma halon iau, kanong iau pai lik luban ira num harkurai.
PSA 119:154 Tur harahut iau ma nu halangalanga ise iau. Balaure bat no nugu lon haruat ma no num nianga na kunubus.
PSA 119:155 No harhalon i tapaka ta ira ut na sakena, kanong diet pai silihe tupas ira num dadas na harkurai.
PSA 119:156 Watong, no num harmarsai i manga tamat. Balaure bat no nugu lon haruat ma ira num ula harkurai.
PSA 119:157 Haleng ira sukagu ing diet hahelar tagu. Iesen iau pai tahurus talur ira num harpir.
PSA 119:158 Iau nes ira ut na harababo ma iau mikiane diet, kanong diet pai mur ira num nianga.
PSA 119:159 Nes bia iau kalak ira num nianga na harakatom. Watong, balaure bat no nugu lon haruat ma no num harmarsai.
PSA 119:160 No burena ira num nianga bakut a tutun. Ira num takodasiana ula harkurai bakut i la kis hatika taar.
PSA 119:161 Ira lualua diet helar bia mon tagu ma taie ta burena, iesen iau dedar ma urur tano num nianga.
PSA 119:162 Iau guama ta ira num nianga na kunubus hoing tikai i paas hasur no uno ebar ma i kap leh ira uno haleng na minsik.
PSA 119:163 Iau malentakuane ma iau malok se no magingin na harabota iesen iau kalak no num harkurai.
PSA 119:164 Iau pirlat ugu ra liman ma airuo na pakaan tiga bung kanong ta ira num takodasiana ula harkurai.
PSA 119:165 A tamat na malum saakit na kis ta diet ing diet kalak no num harkurai, ma taie ta linge na hapuko diet.
PSA 119:166 Watong, iau nanaho tano num harhalon, ma iau la gilgil haruatne ira num hartula.
PSA 119:167 Iau mur ira num harpir, ma iau manga kalak diet.
PSA 119:168 Iau mur haruatne ira num nianga na harakatom ma ira num harpir, kanong warah, ira nugu tintalen u nunure bakut tar.
PSA 119:169 Watong, bale leh no nugu sunuah bia na haan tupas ugu. Tar no palpalai tagu haruat ma ira num nianga.
PSA 119:170 Bale leh no nugu sinasaring bia na hanuat taar taam. Halon iau haruat ma no num nianga na kunubus.
PSA 119:171 No palabulugu na hung ma ra pirhakasing, kanong u la hauhausur iau ta ira num dadas na harkurai.
PSA 119:172 No karamegu na inge garaan ira num nianga, kanong ira num hartula a takodasiana.
PSA 119:173 Bale tar no limaam bia na taguro wara harharahut iau, kanong iau te pilak leh ira num nianga na harakatom.
PSA 119:174 No kaatigu i la murmur no num harhalon, Watong, ma iau kanakana ta ira num harkurai.
PSA 119:175 Bale leh iau bia ni lon waing iau nigi pirlat ugu, ma bale ira num ula harkurai bia diet na harahut iau.
PSA 119:176 Iau te rara hoing tiga sipsip i te panim. Silihe iau, no num tultulai, kanong iau pai lik luban ira num hartula.
PSA 120:1 A ninge utano hinahaan uram Ierusalem. Ta ira nugu tinirih iau ga tataau uram tano Watong ma ga taram iau.
PSA 120:2 Watong, halon iau sukun ira ut na harabota ma ira ina bis.
PSA 120:3 No Watong na gil ra sa ta muat ira ut na harabota? A tamat na harpidanau sa bia na ubal muat mei?
PSA 120:4 Na hapidanau muat ma ira rumus gar na umri ing i manga iaiaan tika ma ra kalangaruan na kukurto na kuhule.
PSA 120:5 Maris tagu, i hoing bia iau gaar goota ares Mesek ing i tapaka saakit, bia iau gaar kis longai ta ira palpalih arau Kedar!
PSA 120:6 Iau te lon lawas nalamin ta diet ing diet malentakuane ra malum.
PSA 120:7 A tunotuno na malum iau, iesen ing iau la iangianga, diet sip wara hinarubu.
PSA 121:1 A ninge utano hinahaan uram Ierusalem. Iau nanaas uram ta ira uladih. No nugu harharahut na hanuat meh?
PSA 121:2 No nugu harharahut i hanuat mekaia tano Watong nong ga hakisi no mawe ma no ula hanuo.
PSA 121:3 Pa na bale ira kakim bia na malmalagir wara punuko. Aie nong i nes mur tar ugu pa na sumsumela.
PSA 121:4 Tutun saakit, aie nong i nes mur tar ira Israel pa na sumsumela ma pa na kubaba mah.
PSA 121:5 No Watong i la nesnes mur ugu. No Watong aie no ududuh tano kata na limaam.
PSA 121:6 No kasakes pa na rang hagahe ugu tano tingena kasakes, ma bia no teka mah tano bung.
PSA 121:7 No Watong na balaure bat ugu ta ira saksakena bakut. Na nes mur no num lon.
PSA 121:8 No Watong na nes mur ugu tano num hinaan laah ma no num hinanuat mah, kaiken ma namur ma pa na pataam.
PSA 122:1 A ninge utano hinahaan uram Ierusalem. Devit ga pit ie. Iau ga guama ing di ga tange tagu bia, “Dahat gi haan ukatiga tano hala na lotu tano Watong.”
PSA 122:2 Ira kaki dahat i tur taar um narako tano matanangaas laka ta Ierusalem.
PSA 122:3 Di ga gil Ierusalem hoing tiga tamat na pise na hala ing ira uno hala diet tur hutet tika.
PSA 122:4 Ira huntunaan diet la haan hanut ukaia, diet at ira huntunaan tano Watong, wara pirpirlat no hinsana no Watong haruat ma no harkurai nong gate tar ta Israel.
PSA 122:5 Kaia ira kinkinis wara gil harkurai i la tur taar, kaike ira kinkinis na harkurai at tano huntunaan ta Devit.
PSA 122:6 Sasaring utano malum ta Ierusalem hoken: “Sige ing diet kalak ugu, iau sip bia diet na lon timaan.
PSA 122:7 Na tahut bia na mon malum narako ta ira num balo ma ra harbalaurai timaan mah.”
PSA 122:8 Iau ni tange tiga nianga ta Ierusalem wara gaiena ira tasigu ma ira nugu harwis, ma i hoken, “A malum na kis taam.”
PSA 122:9 Iau ni silihe ira bilbilai ta Ierusalem wara gaiena no hala na lotu tano Watong, no udahat God.
PSA 123:1 A ninge utano hinahaan uram Ierusalem. Iau raun ira matagu ukatiga ho ugu, ukaia ho ugu ing no num kinkinis na harkurai i kis aram ra mawe.
PSA 123:2 Hoing ira mata diet ira tultulai diet la nesnes tar no limana no udiet tamat wara gaiena harharahut, ma hoing ira matana no tultulai na hahin i la nesnes tar no limana no uno tamat wara gaiena harharahut mah, huo mah ira mata dahat na nanaas taar uram tano Watong no udahat God, tuk na haminas no uno harmarsai taar ta dahat.
PSA 123:3 Marse mehet, Watong, marse mehet, kanong di te manga ubal mehet ma ira sakana kukutur.
PSA 123:4 Ira watong ing taie ta tinirih ta ira udiet nilon, diet te manga ubal ira numehet nilon ma ira nianga na hinasakit, ma ira ut na latlaat diet te manga ubal mehet ma ira udiet sakana kukutur.
PSA 124:1 A ninge utano hinahaan uram Ierusalem. Devit ga pit ie. “Gor ngan hohe ing bia no Watong pa gate tur wara harharahut dahat?” Na tahut bia Israel na tange habaling hoken:
PSA 124:2 “Gor ngan hohe ing bia no Watong pa gate tur wara harharahut dahat tano pakana bung ing ira tunotuno diet ga tut na hinarubu ma dahat?
PSA 124:3 Io, diet gor kanam halilon dahat tano pakana bung ing diet ga bala mamahien ma ra tamat na ngalngaluan taar ta dahat.
PSA 124:4 No taahit gor kanam dahat, ma no taah gor burung dahat.
PSA 124:5 No tektek gor salirane dahat.”
PSA 124:6 A pirharlat tupas no Watong, nong pai le bale dahat bia da sapak dahat ma ira ngise diet.
PSA 124:7 Dahat te langalanga haruat ma ra maan i tamalapus laah tano kuun, a uno no ut na hakuni maan. No kuun i te tamarapat, ma dahat te langalanga sukun ie.
PSA 124:8 No udahat harharahut ie ke tano Watong, nong ga hakisi no mawe ma no ula hanuo.
PSA 125:1 A ninge utano hinahaan uram Ierusalem. Diet ing diet nurnur tano Watong, diet haruat ma no uladih Saion, nong pai tale bia da gunei, iesen i la tur hatika taar.
PSA 125:2 Hoing ira uladih i la tur luhutane tar Ierusalem, io, no Watong i la tur luhutane tar ira uno matanaiabar, kaiken ma namur ma pa na pataam.
PSA 125:3 Ira ut na sakena diet pa na harkurai tano pise di gate kutus tar ie taar ta ira ut na takodas, bia ira ut na takodas diet kabi gil sakena ma ira lima diet.
PSA 125:4 Watong, gil ra bilai ta diet ing diet bilai. Gil bilai ta diet ing ira kaati diet i gamgamatien.
PSA 125:5 Iesen diet ing diet tahurus taar ta ira magingin pai takodas, no Watong na kap se diet tika ma ira ut na gil sakena. A malum na kis tika ma Israel.
PSA 126:1 A ninge utano hinahaan uram Ierusalem. Ing no Watong ga kap pukus dahat ira karabus uram Saion, dahat ga haruat ma ira tunotuno diet bariane ra bilai na barbarien.
PSA 126:2 Dahat ga manga kurus ma ira ha dahat, ma dahat ga inge ma ra tamat na gungunuama ma ira karame dahat. Io, di ga hinawas harbasia ta ira mes na kantri, “No Watong te gil ra tamat na linge wara udiet.”
PSA 126:3 A tutun, no Watong te gil ra tamat na linge wara udahat, ma dahat hung ma ra gungunuama.
PSA 126:4 Watong, nu hanunuhuan habaling ira numehet nilon haruat ma ing mehet ga lon taar huo nalua, hoing ira taah i saal ma i hanunuhuan ira mamasina hanuo.
PSA 126:5 Diet ing diet saso ma ra sunuah, diet na dik no hunena ma ra ninge na gungunuama.
PSA 126:6 Sige nong i hanahaan haan ma ra sunuah, ma i kapkap hani ira pat na daha wara saso, na tapukus ma ra ninge na gungunuama ma na kapkap hani ira hunena daha ing i te matuko.
PSA 127:1 A ninge utano hinahaan uram Ierusalem. Solomon ga pit ie. Ing bia no Watong pai gil no hala, a linge bia ira pinapalim ta diet ing diet gil iakano hala. Ing bia no Watong pai balaure tar no pise na hala, a linge bia mon no pinapalim ta diet ing diet balaure bat no pise na hala ta ira ebar.
PSA 127:2 Taie ta kukuraina tunat bia nu pada ra malabungbung ma pau kubaba tuk ra tingena bung, ma bia nugu dadas ra pinapalim raam, kanong no Watong i la tartar kunubaba ta diet ing i la kalak tar diet.
PSA 127:3 Ira nat na bulu a hartabar maram tano Watong. A haraidaan diet maram ho ie.
PSA 127:4 Hoing ra rumus tano limana no umri, diet haruat huo ira nat na bulu ta tiga tunaan ing ga marawaan taar.
PSA 127:5 A haraidaan na kis tano tunotuno i halengin ira uno rumus huo. Pa da hahirhir diet ing diet na hargau ma ira uno ebar tano subaan na harkurai.
PSA 128:1 A ninge utano hinahaan uram Ierusalem. A haraidaan na kis ta diet ing diet burte no Watong, diet ing mah diet lon mur ira uno tintalen.
PSA 128:2 Nu ien ira hunena ira num mangason. A haraidaan ma ra bilbilai na haan tupas ugu.
PSA 128:3 No num hahin na haruat ma tiga ina wain i manga huai narako tano num hala. Ira natim diet na haruat ma ra tiwisine ira olip diet kis luhutane no num suuh na nian.
PSA 128:4 A haraidaan na kis huo tano tunotuno nong i burte no Watong.
PSA 128:5 I tahut bia no Watong na haidane ugu maram Saion. I tahut bia nu nes no bilbilai ta Ierusalem ta ira num kaba bungbung na nilon,
PSA 128:6 ma bia i tale mah bia nu lon taar, nugu nes ira tubum. A malum na kis tika ma Israel.
PSA 129:1 A ninge utano hinahaan uram Ierusalem. “Di gate helar tagu ing iau ga marawaan taar tuk taar kaiken.” Na tahut bia Israel na tange habaling hoken:
PSA 129:2 “Di gate helar tagu ing iau ga marawaan taar tuk taar kaiken. Iesen diet pai ga petlaar bia diet na paas hasur iau.
PSA 129:3 Di ga hadangat haliare iau hoing bia ira ut na tintol diet te rup no pise.
PSA 129:4 Iesen no Watong i takodas. I te kut palas ise iau tano winiwis ta ira ut na sakena.”
PSA 129:5 Iau sasaring bia i tale bia da pasak pukus diet ing diet malentakuane Saion, ma bia diet na haan laah um ma ra hirhir.
PSA 129:6 Iau sasaring bia diet na haruat ma ra huro naliu tano ula hala ing no kasakes na se hamarangai ma pa na kubur.
PSA 129:7 Pa taie tikai i tale bia na hahungi no limana ma tari, ma bia na ru tikane ma na pise tiga pok.
PSA 129:8 Ma taie tikai nong na haan saakit na tale bia na tange bia, “No Watong na haidane ugu! Mehet haidane ugu tano hinsana no Watong.”
PSA 130:1 A ninge utano hinahaan uram Ierusalem. Watong, iau suah tupas ugu ing iau manga tapunuk.
PSA 130:2 Watong, hadade no ingagu. Sa talingaam tano nugu tintaau wara gaiena harmarsai.
PSA 130:3 Watong, ing bia kana u pakat kawase tar ira magingin sakena, Watong, sige i tale bia na papas tano num harkurai?
PSA 130:4 Iesen no num magingin wara liklik luban ira numehet magingin sakena, bia mehet na ru ugu.
PSA 130:5 Iau nanaho utano Watong. Masa, no nugu kidilona nilon i nanaho utana, ma narako tano uno nianga iau so no nugu nurnuruan.
PSA 130:6 Iau nanaho utano Watong. Ma no nugu magingin na nanahai huo i manga tamat saakit ta ira ut na harbalaurai tano pise na hala ing diet nahnahe no malaan. Masa, i manga tamat saakit ta ira ut na harbalaurai ing diet nahnahe no malaan.
PSA 130:7 Ira Israel, muat na kis nanaho ma ra nurnuruan tano Watong, kanong no uno harmarsai pa na pataam, ma ira pakana bung bakut i kis taguro taar wara kapkap pukus muat.
PSA 130:8 Aie at na kul halangalanga Israel sukun ira udiet magingin sakena bakut.
PSA 131:1 A ninge utano hinahaan uram Ierusalem. Devit ga pit ie. Watong, iau pai latlaat, ma iau pai la nas hatamat tar iau. Iau pai la madung taar ma ira linge tamat, bia ira linge i kalkalala bia iau ni nunure.
PSA 131:2 Iesen iau te hamarur ma iau te hamatien no nugu lon. Hoing tiga bulu di te hatabunei wara sunus i kis matien taar at ma no pawasine, no nugu lon i haruat huo aram narakoman tagu.
PSA 131:3 Ira Israel, muat na kis nanaho ma ra nurnuruan tano Watong kaiken ma namur ma pa na pataam.
PSA 132:1 A ninge utano hinahaan uram Ierusalem. Watong, lik leh ira tinirih ing ga ubal Devit. Lik leh kaike wara gaiena at.
PSA 132:2 Ga tange tiga sinsalim uram hono Watong ma ga pakile tiga kunubus taar tano Dadas na God tane Iakop, ma i hoken:
PSA 132:3 “Iau pa ni laka tano nugu hala bia ni haan taar tano nugu suuh na ninahon,
PSA 132:4 ma iau pa ni haut leh bia ira iruo pala matagu dir na tirih, ma pa ni kubaba,
PSA 132:5 tuk bia ni silihe tar tiga katon bia no Watong, no Dadas na God tane Iakop, i tale bia na kis kaia.”
PSA 132:6 Aram Betlehem het ga seer no nianga utano bokis na kunubus, ma het ga haan tupas ie aram tano hanuo hutet tano taman Kiriat-Jearim.
PSA 132:7 Dahat ga tange bia, “Dahat gi haan uram hono katon i la kiskis kaia. Dahat gi lotu kaia ra pinpaas na kakine.”
PSA 132:8 Watong, taman tut, ma nu mai ukai hono subaan nugu kis hatika kaia, ma nu hanuat tika ma no bokis na kunubus nong i hakilang no num baso.
PSA 132:9 I bilai bia ira num ut na pakila lotu diet na gil hatikane ira magingin takodas, ma bia diet ing diet te tar tutun ira udiet nilon taam, bia diet na inge ma ra gungunuama.
PSA 132:10 Wara gaiene Devit no num tultulai, waak u malmalok se no king nong u gate gilamis ie.
PSA 132:11 No Watong ga sasalim taar tane Devit, a tutun na sinsalim ie nong pa na kutus ie, ma i hoken: “Tikai ta ira num bulumur tus iau ni bul ie tano num kinkinis na king.
PSA 132:12 Ing bia ira num bulumur diet na mur haruatne no nugu kunubus ma ira harkurai ing iau ni hausur diet ine, io, ira udiet bulumur diet na kis hathatikai tano num kinkinis na king.”
PSA 132:13 Kanong warah, God i te gilamis Saion, ma i te sip bia auno taman na kinkinis um ie,
PSA 132:14 hoing ga tange, “No taman iakan ing iau ni kis hatika tana. Iau ni kis kaiakai kanong iau manga sip huo.
PSA 132:15 Iau ni idane Saion ma ra haleng na hartabar. Ira uno maris na tunotuno iau ni tabar hahos diet ma ra nian.
PSA 132:16 Ira uno ut na pakila lotu diet na hamines no nugu harhalon, ma diet ing diet te tar tutun ira udiet nilon tagu, diet na inge hatika ma ra gungunuama.
PSA 132:17 Iau ni hatamat no dadas wara gil harkurai tane Devit kai, ma iau ni tagure nong iau te gilamis ie hoing tiga laam i lulungo.
PSA 132:18 Iau ni manga hamalahuan ira uno ebar, iesen no uno kinkinis na king na bilai ma na tur dadas.”
PSA 133:1 A ninge utano hinahaan uram Ierusalem. Devit ga pit ie. Ai, i manga tahut ma da guama tunat ing ira haratasin diet lon tika timaan!
PSA 133:2 I haruat ho ira wel a tabi matana di burange aram tano ulune Aaron, ma i saal suur tano tabe ukaia napu taar tano kadonana ma no uno sigasigam.
PSA 133:3 I haruat hoing ira rur maram hono uladih Hermon i puko taar tano mamasina uladih Saion ma i hanunuhuan ie, kanong no Watong ga tange hadadas bia no uno haraidaan na kis taar kaia, a haraidaan na nilon hathatika.
PSA 134:1 A ninge utano hinahaan uram Ierusalem. Muat na pirlat no Watong, muat bakut ira tultulai tano Watong ing muat gil no pinapalim na harharahut ra bung aram tano ngasiana no Watong.
PSA 134:2 Muat na raun haut ira lima muat uram tano hala i halhaal ma muat na pirlat no Watong.
PSA 134:3 I bilai bia no Watong, aie nong ga hakisi no mawe ma no ula hanuo, na idane muat meram Saion.
PSA 135:1 Da pirlat no Watong. Da pirlat no hinsana no Watong. Muat ira tultulai tano Watong, muat na pirlat ie,
PSA 135:2 muat ing muat tur aram tano ngasiana no Watong, aram narako tunat tano hala tano udahat God.
PSA 135:3 Muat na pirlat no Watong kanong no Watong i tahut. Muat na inga pirhakasing tano hinsana, kanong i bilai.
PSA 135:4 Kanong warah, God i te gilamis Iakop waing auno tus ie, ma dahat ira Israel hoing no bilai na pinlawena.
PSA 135:5 Iau nunure bia no udahat Watong i manga tamat, ma bia i tamat saakit ta ira god bakut.
PSA 135:6 No Watong i la gilgil ira kaba linge i guama ine, aram ra tingena mawe ma akai ra ula pise, ares na tes ma aram na lamana mah.
PSA 135:7 I pakile ira bahuto bia na tut meram tano hauhawatine no ula hanuo. I la tultule ra hile tika ma ra bata ma i la kapkap hasur no dadaip meram ta ira uno hala na bunbulaan.
PSA 135:8 Ga bing ira matana bulu na tunaan ta ira Isip, diet ira matana bulu ta ira tunotuno ma ira luena kinakaha ta ira wawaguai mah.
PSA 135:9 Ares Isip mah ga tule ira hakilang ma ira dadas na gingilaan na kinarup taar tano udiet king ma ira uno tultulai bakut.
PSA 135:10 Ga haliare ra haleng na kantri ma ga bu bing ira dadas na king.
PSA 135:11 Ga bu bing Sihon, no king ta ira Amor, ma Og, no king me Basan, ma ira king bakut me Kenan mah.
PSA 135:12 Ma i ga tar se ira udiet pise taar ta Israel bia ira uno matanaiabar diet na tinane leh.
PSA 135:13 Watong, no hinsaam na tur hatika taar ma pa na pataam. Watong, ira bulumur ing diet na lon namur, diet na lik kawase tar no hinhinawas utaam.
PSA 135:14 Kanong warah, no Watong na tar tiga takodasiana harkurai wara gaiena ira uno matanaiabar, ma na marse ira uno tultulai huo.
PSA 135:15 Di te pakile ira palimpuo ta ira mes na kantri ma ra siliwa ma ra gol. A lumana tunotuno mon ga gil diet.
PSA 135:16 A mon ha diet, iesen pai tale bia diet na ianga. A mon mata diet, iesen diet pai tale bia diet na nanaas.
PSA 135:17 A mon talinga diet, iesen diet pai tale bia diet na hadoda. Taie mah ta mansungu diet ta ira ha diet.
PSA 135:18 Diet ing diet gil kaike ra palimpuo, diet na haruat hoing kaike ra palimpuo, ma huo mah diet ing diet na so nurnuruan ta diet.
PSA 135:19 Muat ira huntunaan ta Israel, muat na pirlat no Watong. Muat ira ut na pakila lotu tano huntunaan ta Aaron, muat na pirlat no Watong.
PSA 135:20 Muat tano huntunaan tane Lewi, muat na pirlat no Watong. Muat ing muat ru ie, muat na pirlat no Watong.
PSA 135:21 A pirharlat tupas no Watong meram Saion. A pirharlat tupas ie nong i la kis taar aram Ierusalem. Da pirlat no Watong.
PSA 136:1 Muat na tanga tahut tano Watong, kanong a bilai ie.
PSA 136:2 Tanga tahut ta God nong i tamat ta ira kaba god bakut.
PSA 136:3 Tanga tahut tano Watong nong i tamat ta ira kaba watong bakut.
PSA 136:4 Aie sen mon i la gilgil ira tamat na pinapalim na kinarup.
PSA 136:5 Aie nong ga gil no mawe ta ira uno minmintot at.
PSA 136:6 Aie nong ga palase no pise aram naliu ta ira taah.
PSA 136:7 Aie nong ga gil ira tamat na lulungo.
PSA 136:8 No kasakes i la kurkure no bung na kasakes.
PSA 136:9 No teka ma ira tiding diet la kurkure no bung.
PSA 136:10 Aie nong ga bu bing ira matana bulu na tunaan ta ira Isip.
PSA 136:11 Ma ga lamus hasur ira Israel merau nalamin ta diet ira Isip.
PSA 136:12 Ga lamus hasur diet ma no dadas na limana.
PSA 136:13 Aie nong ga paleng no Dardarana Tes nalamin.
PSA 136:14 Ma ga lamus ira Israel nalamin ta ira iruo palpal na tes.
PSA 136:15 Iesen ga hakango no king me Isip ma ira uno matana ubane tano Dardarana Tes.
PSA 136:16 Aie nong ga lua ta ira uno matanaiabar nalamin tano hanuo bia.
PSA 136:17 Aie nong ga kato bing ira tamat na king.
PSA 136:18 Ma ga bu bing ira dadas na king.
PSA 136:19 Ga bu bing Sihon, no king audiet ira Amor.
PSA 136:20 Ma ga bu bing Og, no king me Basan.
PSA 136:21 Ma i ga tar se ira udiet pise ta ira uno matanaiabar bia diet na tinane leh.
PSA 136:22 A haratinan ie taar tano uno tultulai Israel.
PSA 136:23 Aie nong pa ga lik luban dahat ing dahat ga kis na maris.
PSA 136:24 Ma ga halangalanga dahat sukun ira udahat ebar.
PSA 136:25 Ma i la tamtabar ira tunotuno ma ira wawaguai bakut ma ra nian.
PSA 136:26 Muat na tanga tahut tano God nong i kis taar aram ra mawe.
PSA 137:1 Dahat ga kis taar ta ira gagen taah me Babilon ma dahat ga suah ing dahat ga lik leh Saion.
PSA 137:2 Dahat ga sakire ira udahat haap kaia ta ira katena sera,
PSA 137:3 kanong diet ing diet ga palim kahe dahat, diet ga tange hadadas bia dahat na inge kaia. Diet ga kukutur ta dahat, diet gaam hatitis dahat bia dahat na inge ira ninge na gungunuama. Diet ga tange bia, “Muat na inge tiga ninge uta Saion ta mehet!”
PSA 137:4 Dahat na inge ira ninge tano Watong hohe ma dahat kana tiga mes na taman?
PSA 137:5 Ierusalem, bia iau ni luban ugu, i bilai bia no kata na limagu na luban bia na ting habaling no haap hohe.
PSA 137:6 Ierusalem, ing bia iau ni luban ugu, ma ing bia iau pai hatamat ugu naliu ta ira mes na linge ing i haguama iau, i bilai bia no karamegu na kumkum ing iau pa ni tale bia ni inge baling.
PSA 137:7 Watong, lik tar asa ing ira Idom diet ga gil tano bung di ga dure hasur Ierusalem. Diet ga kakonga bia, “Dure hasur ie! Dure hasur ie ures muk ta ira burena!”
PSA 137:8 Babilon, u kis taguro taar um wara hiniruo. A haraidaan na kis ta nong na balu pukus tar taam haruat ma ira linge u ga gil tar ta mehet.
PSA 137:9 A haraidaan na kis ta nong na palim kawase ira num nat na bulu ma na se rigisane diet taar ta ira ula haat.
PSA 138:1 Devit ga pit iakan ra ninge. Watong, iau ni pirlat ugu ma no nugu nilon bakut. Iau ni inge ira num pirharlat ra matmataan ta diet ira kaba god.
PSA 138:2 Iau ni tudu ma urur menalua tano num halhaliana hala na lotu ma ni pirlat no hinsaam utano num harmarsai ma no num tutun na magingin, kanong u te hatamat no hinsaam ma no num nianga na kunubus naliu ta ira linge bakut.
PSA 138:3 Ing iau ga tataau, u ga taram iau. U ga hadadas ma u ga habalaraan iau.
PSA 138:4 Watong, i bilai bia ira king bakut tano ula hanuo diet na pirlat ugu ing diet na hadade ira nianga mekaia tano haam.
PSA 138:5 I bilai bia diet na inge garaan ira gingilaan tano Watong, kanong no minarine no Watong i tamat.
PSA 138:6 A tutun bia no Watong ie kenam naliu, iesen i la nes mur tar at ira maris. Iesen ira ut na latlaat, i nunure mon diet mekaia tapaka ta ing i la kis taar kaia.
PSA 138:7 A tutun bia iau haan narako ra tinirih, iesen u balaure bat tar at no nugu lon. U tur bat ira ngalngaluan ta ira nugu ebar ma ira iruo limaam. U kap pukus iau ma no dadas na kata na limaam.
PSA 138:8 No Watong na pakile haruatne asa ing ga lik utagu. Watong, no num harmarsai na kis hathatika. Waak u waak kapis ira pinapalim ing ira iruo limaam dir te hatahun tar.
PSA 139:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. Watong, u te nes salok iau ma u nunure tar iau.
PSA 139:2 U nunure tar ing iau la kiskis napu ma ing iau la tutut naliu. U palai ta ira nugu lilik meram tapaka.
PSA 139:3 U tikane timaan iau ing iau tur leh ira nugu hinahaan tuk taar iau kubaba baling, ma u la manga madaraas taar ta ira nugu kaba tintalen.
PSA 139:4 Ing mah bia iau pai tange baak tiga nianga, Watong, u te la nunure bakut tar bia asa ing iau ni tange.
PSA 139:5 U wis luhutane iau menamur ma menalua mah. U te palim bus iau ma no limaam.
PSA 139:6 Kaike ra minminonas i manga sakit asa ing iau nunure. I manga kalkalala tagu.
PSA 139:7 Uhe kaik i tale bia ni haan talur no Tanuaam? Ahe kaik i tale bia ni hilau pas ugu?
PSA 139:8 Ing bia iau gor hanhut uram ra mawe, augu kaike. Ing bia iau gor palase no kubegu kaia tano subaan na minaat, augu kaike.
PSA 139:9 Ing bia iau gor pupungo hut tika ma no madaraas na laar, ma ing bia iau gor kis ares tapaka saakit tano tes ing no kasakes i la sungsuguh kaia,
PSA 139:10 kaia mah no limaam na lue iau, ma no dadas na kata na limaam na palim hadikdikit tar iau.
PSA 139:11 Ing bia iau tange, “Tutun saakit, no kankado na suhe iau ma no madaraas na hanuat kankado tano bung ma na luhutane iau,”
PSA 139:12 io, no kankado mah pa na hanuat rawarawa taam, ma no kankado ra bung na rarang hoing ra kasakes, kanong no kankado i ngan hoing ra palai taam.
PSA 139:13 Kanong warah, u ga gil hawaat ira sumsubaan narakoman tagu. U ga hii iau narako tano balana no pawasigu.
PSA 139:14 Iau pirlat ugu, kanong warah u gate gil iau ma ra gingilaan nong a mangaan at ie ma nong i tale bia da urur tana. I manga bilai saakit ira num pinapalim, ma iau nunure timaan at huo.
PSA 139:15 Ira surugu pai ga susuhai taam ing u ga gil kuman iau. Ing u ga hii iau aram narakoman tano balana no pawasigu,
PSA 139:16 ira iruo mataam ga nes no palatamaigu ing pa di ga kaha baak iau. Ira bung bakut u ga puo tar wara utagu, u ga pakat kawase tar narakoman ta ira num pakpakat, mekarawa bia tikai ta kaike ra bung pa ga hanuat baak.
PSA 139:17 God, tano nugu ninanaas, ira num lilik i melmel ma a tabi matana! Bia da bul tikane i manga haleng saakit.
PSA 139:18 Bia iau nigi was diet, ira udiet winawas gor sakit ira pat na wana. Ing iau tangahun, iau kis tika taar at ma ugu.
PSA 139:19 Maris, God, bia nugu bu bing se um ira ut na sakena! Muat haan talur iau, muat ira ut na hinarubu bingibing.
PSA 139:20 Diet la tangtange ira sakana linge utaam. Ira num ebar diet kilam bia mon no hinsaam ma taie ta urur tana.
PSA 139:21 Watong, hohe, iau pai malok ta diet ing diet malok taam? Ma iau pai malentakuane sige ing diet tur huat wara bulbul hasur ugu?
PSA 139:22 Iau manga malentakuane tunat diet, ma iau pai sip diet ta dahin. Diet te hanuat bia a nugu ebar diet.
PSA 139:23 God, nas salok iau. Nunure no balagu bakut. Iau kalar dahin baak, iesen walar iau waing nugu palai ta ira nugu lilik.
PSA 139:24 Nas ing bia ta mon magingin narako tagu i hatahuat ngunngutaan, ma lue iau ta ira tintalen ing na kis hathatikai.
PSA 140:1 A nianga tupas no tunotuno nong i kure ira ut na ninge: Devit ga pit iakan ra ninge na lotu. Watong, halangalanga iau sukun ira ut na sakena. Tur bat iau sukun ira ut na halhaliarai
PSA 140:2 ing diet pingit wara gil saksakena narakoman ta ira bala diet ma diet hatut rom ta ira kaba bungbung.
PSA 140:3 Diet haiaan ira karame diet hoing tiga moraan. No malmalena gar na ha na sui ie ke ta ira palabulu diet.
PSA 140:4 Watong, balaure iau sukun ira lima diet ira ut na sakena. Tur bat iau sukun ira ut na halhaliarai ing diet harpingit kumaan wara hakuni ira kakigu.
PSA 140:5 Ira ut na latlaat diet te suhe tar tiga kuun wara utagu. Diet te hatudu ira udiet kuun murmur no nugu ngaas, ma diet te kapis bat iau ma ira udiet kuun.
PSA 140:6 Iau tange tano Watong bia, “Augu no nugu God. Watong, hadade no nugu tintaau wara gaiena harmarsai.
PSA 140:7 Watong Kiskis, no nugu dadas na Ut na Harhalon, u ga hakukuh bat no ulugu tano bung na hinarubu.
PSA 140:8 Watong, waak u bale leh ira sinisip ta ira ut na sakena. Waak u bale leh ira udiet harpingit kumaan bia na hanuat tutun, diet kabi latlaat.
PSA 140:9 Iau saring bia nu balu pukus diet ing diet tur luhutane iau ma ira tamat na tinirih ira ha diet gate tange hawaat.
PSA 140:10 Iau saring bia ira kalkalangaruan na haat na puko suur taar ta diet, ma bia da se halaka diet uram tano iaah, bia uram narako ta ira pikaia na lulur, diet pa naga taman tut hut baal.
PSA 140:11 Iau saring bia ira ut na hartutung bisbis diet pa na lon timaan kai tano pise, ma bia a saksakena na bing ira ut na halhaliarai.
PSA 140:12 Iau nunure be no Watong i balaure bat ira maris ing diet tur ra harkurai ma i la harharahut ira malahahin bia pa da kure hagahe diet.
PSA 140:13 Tutun saakit bia ira ut na takodas diet na pirlat no hinsaam. Diet na lon ra matmataan taam.
PSA 141:1 Devit ga pit iakan ra ninge na lotu. Watong, iau tataau ukatiga ho ugu. Hanuat gasien ukai ho iau. Hadade no ingagu ing iau ni tataau ugu.
PSA 141:2 I tahut bia no nugu sinasaring na haan uram ho ugu hoing ra mis i manga huhur kala mismisien. I tahut bia ing ni raun haut ira limagu, na ngan hoing no hartabar nong di gil ie uram ho ugu ra matarahien.
PSA 141:3 Watong, balaure no hagu. Nes mur ira palabulugu.
PSA 141:4 Waak u balbale leh iau bia ni kalak ira sakena, iau kabi gil ira saksakena tika ma ira tunotuno ing diet pakile ira sakana purpuruan. Waak u bale leh iau bia ni ien mah ira adiet namnamien na nian.
PSA 141:5 I tahut bia tiga takodasiana tunotuno na pasar iau. Na ngan hoing ra harmarsai. I tahut bia na boor iau huo. Na ngan hoing ra bilai na wel tano ulugu. No ulugu pa na malok sei, kanong iau la saasaring baak bia nu balu pukus ira gingilaan ta ira ut na sakena.
PSA 141:6 Ing da se hasur ira udiet lualua meram naliu ta ira ula habo, ira ut na sakena diet na nunure kilam bia ira nianga iau gate tange a bilai.
PSA 141:7 Diet na tange, “Hoing tikai i rurup ma i rupukane haut ira haat tano pise, huo mah, ira suru dahat i te noh harbasia taar ing pa di ga bus.”
PSA 141:8 Iesen ira matagu i la kis dikdikit taar at taam, Watong Kiskis. Iau ni barahit taam. Waak u tar se iau ukaia ra minaat.
PSA 141:9 Balaure timaan iau, bia iau kabi taaba ta ira udiet kuun ing diet te hatudu tar wara utagu. Balaure bat iau ta ira kuun ing ira ut na hangat gaia diet te kapis tar.
PSA 141:10 Iau sasaring bia ira ut na sakena diet na taaba baling tar ta ira udiet kuun, iesen bale tar iau bia nigi haan pas kaike ra kuun.
PSA 142:1 Devit ga pit iakan ra ninge. I hinhinawas utano pakana bung ing Devit ga kis narako tano matana haat. A sinasaring ie. Iau manga suah uram hono Watong. Iau raun haut no ingagu uram hono Watong wara gaena harmarsai.
PSA 142:2 Iau burange hasur ira nugu bala ngungut uram ho ie. Iau hinawasei ta ira nugu tinirih.
PSA 142:3 Ing bia no nugu nilon i maalum, augu iaat u nunure tar no nugu ngaas na hinahaan. Kaia tano ngaas nong iau mur ie, di te suhe tar tiga kuun wara utagu.
PSA 142:4 Nanaas ukai hono kata na limagu ma nu nes bia taie tikai pai lik bia na harahut iau. Taie nugu ta barbarahit. Taie tikai pai balaure tar no nugu nilon.
PSA 142:5 Watong, iau suah ukaia ho ugu. Iau tange, “Augu no nugu barbarahit. Augu no pinlawegu kai ra taman audiet ira lilona.
PSA 142:6 Hadade no nugu sunuah, kanong iau manga tapunuk. Halon leh iau sukun diet ing diet paspasak hani iau, kanong diet manga dadas tagu.
PSA 142:7 Halangalanga iau sukun no nugu harpidanau, waing iau nigi pirlat no hinsaam. Io kaik, ira ut na takodas diet na hanuat luhutane iau kanong utano bilbilai u te gil ie tagu.
PSA 143:1 Devit ga pit iakan ra ninge na lotu. Watong, hadade no nugu sinasaring. Hatarame no nugu tintaau wara gaiena harmarsai. Haruat ma no num tutun na magingin ma no num takodasiana magingin, mai, nugu harahut iau.
PSA 143:2 Waak u kure iau, no num tultulai, kanong taie tikai ken i lon i takodas ra matmataan taam.
PSA 143:3 No nugu ebar i paspasak iau, i paas guluane iau taar tano pise. I gil iau huo bia iau ni lon tano kankado hoing diet ing diet gabe maat.
PSA 143:4 Io, no nugu nilon i maalum. Iau manga tapunuk.
PSA 143:5 Iau lik leh ira bung menalua saakit. Iau lik murmur bakut leh ira num pinapalim ma iau lik timaan ira linge ing ira iruo limaam dir gate gil.
PSA 143:6 Iau sasangaha ukatiga ho ugu. Iau maruk pane ugu hoing tiga mamasina katon na pise i maruk pana taah.
PSA 143:7 Watong, taram hagasiaan iau. Iau hamaan bia no nugu nilon i wara patpataam. Waak u suhe no matmataan taam tagu, iau kabi ngan hoing diet ing diet hansur ures napu tano lulur na minaat.
PSA 143:8 I tahut bia ra malaan nu hinawase iau utano num harmarsai nong pai la patpataam, kanong iau te so no nugu nurnuruan taam. Hamines no ngaas nong i tale bia ni mur ie, kanong utaam at, iau raun no nugu nilon.
PSA 143:9 Watong, halon iau sukun ira nugu ebar, kanong iau mun narako taam.
PSA 143:10 Hausur iau wara gilgil ira num sinisip kanong augu no nugu God. I tahut be no bilai na Tanuaam na lue iau ta tiga mangana ngaas waing pa ni laleka ma nigi surmalagir.
PSA 143:11 Watong, balaure bat no nugu nilon waing daga urur taam. Lamus leh iau sukun ra tinirih haruat ma ira num takodasiana magingin.
PSA 143:12 Hamarur ira nugu ebar haruat ma no num harmarsai nong pai la patpataam. Haliare bakut diet ing diet tut na hinarubu ma iau, kanong iau no num tultulai.
PSA 144:1 Devit ga pit iakan ra ninge. A pirharlat tupas no Watong, no nugu Haatkis, nong i hausur ira iruo limagu wara kap rom ma ira kaskas na limagu wara hinarubu mah.
PSA 144:2 Aie no nugu God na harmarsai ma no nugu subaan na munmun, no nugu dadas na balo ma no nugu Ut na Harhalon. Aie no nugu bahbahit nong iau la barbarahit taar tana, ma aie nong i paas hasur ira matanaiabar ma i bul diet napu tano nugu harkurai.
PSA 144:3 Watong, asa tunat ira tunotuno, kaik u nes mur mehet? A linge bia mon mehet. Wara bih u lik tar mehet ira tunotuno?
PSA 144:4 Ira tunotuno diet ngan hoing tiga pakana manmanasung mon. Ira udiet bungbung na nilon na pataam gasien hoing tiga ududuh i hakakari habir laah.
PSA 144:5 Watong, bul harbasiane no num mawe, ma nu hansur. Sigire ira uladih waing diet naga mis.
PSA 144:6 Tule hasur no hile ma nu pasak harbasiane ira ebar. Lalapot ma ira num rumus, diet naga hilau.
PSA 144:7 Sasangaha suur maram naliu. Halangalanga iau ma nu halon iau sukun ira lima diet ira wasire ing pai Israel diet, diet ing diet hoing ra dadas na taahit.
PSA 144:8 Ira ha diet i hung ma ra harabota, ma diet sasalim bia diet tange no tutun iesen diet harabota.
PSA 144:9 God, iau ni inge tiga sigar ninge ukatiga ho ugu. Iau ni ting tiga haap nong a sangahul ira sitiring tana ma iau ni inge ukatiga ho ugu.
PSA 144:10 Augu nong u la harubu sare ira king, ma u halon Devit no num tultulai sukun no wise na hinarubu bingibing.
PSA 144:11 Halangalanga iau ma nu halon iau sukun ira lima diet ira wasire ing pai Israel diet. Ira ha diet i hung ma ra harabota, ma diet sasalim bia diet tange no tutun iesen diet harabota.
PSA 144:12 Io kaik, ira nuhet bulu na tunaan ing diet na marawaan, diet na ngan hoing ra daha di balaure ma i kubur timaan, ma ira nuhet hinasik diet na ngan hoing ra kasong di takas wara hamar no hala tano king.
PSA 144:13 Ira nuhet suuh na bul nian na hung ma ira mangana nian. Ira nuhet sipsip diet na manga kakaha, ma diet na kaha sangahul na arip ta ira nuhet katon na pise.
PSA 144:14 Da hapusak ira nuhet bulumakau ma ra tamat na kinakap na nian. Ira ebar diet pa na papat halaka tiga balo tano nuhet pise na hala, ma ira matanaiabar diet pa na suah ma ra bunurut ta ira ngaas kenam narako.
PSA 144:15 A haraidaan na kis ta ira matanaiabar ing kaike ra linge i hanuat tutun ta diet. A haraidaan na kis ta ira tunotuno ing no udiet God aie no Watong.
PSA 145:1 A ninge na pirhakasing. Devit ga pit iakan ra ninge na lotu. Nugu God no King, iau ni raun ugu, ma iau ni pirlat no hinsaam hathatika.
PSA 145:2 Ta ira kaba bungbung iau ni pirlat ugu, ma ni lat no hinsaam hathatika.
PSA 145:3 No Watong i tamat saakit ma i bilai bia da pirlat nabanei. No uno tamtamat i kalala bia tikai na nunure timaan ie.
PSA 145:4 Ira tunotuno ing diet lon katin, diet na hinawase diet ing diet na lon mah namur bia ira num pinapalim i tamat saakit. Diet na hinawas palai ta ira num dadas na pinapalim.
PSA 145:5 Diet na hinawas ta ira melmel na minamarine no num dadas, ma iau ni lik murmur ira num bilai na pinapalim.
PSA 145:6 Diet na hinawas ta ira dadas ta ira num gingilaan bia pai a malmaliana, ma iau ni hinawas palai bia u tamat saakit.
PSA 145:7 Diet na hakilang no num tamat na bilbilai, ma diet na inge na gungunuama utano num taktakodas.
PSA 145:8 No Watong a ut na harmarsai ie ma i la marmarse ira tunotuno bakut. Pai la ngalngaluan habir ma i hung ma ra harmarsai nong pana le pataam.
PSA 145:9 No Watong i la bilbilai ma ira tunotuno bakut, ma i la marse tar ira linge bakut ing ga hakisi.
PSA 145:10 Watong, ira kaba linge bakut ing u ga gil, diet na pirlat ugu. Diet ing diet te tar tutun ira udiet nilon taam, diet na raun no hinsaam.
PSA 145:11 Diet na hinawas tano minamarine no num kingdom ma diet na hinawas tano num dadas,
PSA 145:12 waing ira tunotuno bakut diet naga nunure ira num dadas na gingilaan ma ira melmel na minamarine no num kingdom.
PSA 145:13 No num kingdom pana le pataam, ma no num kinkinis na harkurai na tur hatika ta ira tunotuno ing diet na lon ta ira kaba pakana bung. No Watong i tutun ta ira uno kunubus ma i la marse tar ira linge bakut ing ga hakisi.
PSA 145:14 No Watong i hatur hadadas diet ing diet puko ma i raun haut diet ing diet kis tudu ma ra tapunuk.
PSA 145:15 Ira mata diet bakut i la nes tar ugu, ma u la tamtabar diet ma ra nian tano pakana bung na nian at.
PSA 145:16 U papos no limaam ma u banot ira masmasingan audiet ira lilona linge bakut.
PSA 145:17 No Watong i takodas ta ira uno magingin bakut ma no uno harmarsai i la kis taar ta diet bakut ing i ga hakisi.
PSA 145:18 No Watong i hutet ta diet ing diet tataau tupas ie, ta diet at ing diet tataau ie ma ra tutun.
PSA 145:19 I la banbanot ira masmasingan udiet ing diet burtei. I hadade mah ira udiet sunuah ma i halon diet.
PSA 145:20 No Watong i la nesnes mur diet ing diet sip ie, iesen na haliare ira ut na sakena bakut.
PSA 145:21 No hagu na pirlat no Watong ma ra pirhakasing. I tahut bia ira tunotuno bakut tano ula hanuo diet na pirlat no halhaliana hinsana hathatika.
PSA 146:1 Da pirlat no Watong. I tahut bia iau ni pirlat no Watong ma no nugu kidilona nilon.
PSA 146:2 Iau ni pirlat no Watong ta ira kaba bungbung tano nugu nilon. Iau ni pirhakasing no nugu God ing iau lon taar at baak.
PSA 146:3 Waak muat so ira numuat nurnur ta ira tamat na lualua. A tunotuno mon diet, ma diet pai tale bia diet na halon muat.
PSA 146:4 Ing ira tanua diet na haan talur diet, diet na tapukus baal taar tano pise. Ta iakano ra bung at ira udiet nianga na harpingit na linge bia.
PSA 146:5 A haraidaan na kis ta nong no uno harharahut no God tane Iakop, ma ing mah no uno nurnuruan i kis taar tano Watong, no uno God,
PSA 146:6 nong ga hakisi no mawe ma no ula hanuo, no tes mah ma ira linge bakut kenam narako ta dal. Aie no Watong nong i gil haruatne hathatikane ira uno kunubus.
PSA 146:7 I la harharahut ira tunotuno ing di ubal diet bia pa da kure hagahe diet, ma i tabar diet ing diet taburungan. No Watong i halangalanga ira tunotuno ta ira hala na harpidanau.
PSA 146:8 No Watong i papos ira mata diet ira pulo. No Watong i raun haut diet ing diet kis tudu ma ra tapunuk. No Watong i sip ira ut na takodas.
PSA 146:9 No Watong i nes mur ira wasire. I balaure timaan ira tintana ma ira makosa, iesen i habosbos ira lilik ta ira ut na sakena.
PSA 146:10 No Watong i harkurai hathatika. Muat ira matanaiabar ta Saion, no numuat God na harkurai ta ira tunotuno bakut ing diet na lon ta ira kaba pakana bung. Da pirlat no Watong.
PSA 147:1 Da pirlat no Watong. I bilai saakit at bia da pirlat no udahat God ma ra ninge. Da kap ta gungunuama ing da tar no pirhakasing nong i takodas bia da tar tana.
PSA 147:2 No Watong i hatur habaling Ierusalem. I lamus hulungan ira Israel ing diet gate kis tapaka hoing ra karabus.
PSA 147:3 I hamaram diet ing diet tapunuk, ma i pulus timaan ira udiet unien.
PSA 147:4 I te lik tar bia aise tiding bakut na pakile, ma i te pas bakut tar ira hinsa diet.
PSA 147:5 A tamat saakit no udahat Watong ma no uno dadas i manga tamat. Pai tale bia da was no uno minmintot kanong i tamat saakit.
PSA 147:6 No Watong i sukal haut diet ing di helar ta diet, iesen i se hasur ira ut na sakena taar tano pise.
PSA 147:7 Dahat na tanga tahut tano Watong ma ra ninge. Da ting no gita uram hono udahat God.
PSA 147:8 I kasar no mawe ma ra bahuto. I tabar no ula hanuo ma ra bata ma i gil no pitoka gi kubur ta ira uladih.
PSA 147:9 I tabar ira bulumakau ma ra nian ma ira nat na maan mah ing diet na tataau.
PSA 147:10 No uno gungunuama pai iakaike tano dadas ta ira hos, huo mah, ira dadas ta ira umri pai haguama ie.
PSA 147:11 No Watong i guama ta diet ing diet burtei, diet at ing diet bul ira udiet nurnuruan tano uno harmarsai nong pa na pataam.
PSA 147:12 Muat me Ierusalem, i tahut bia muat na pirhakasing no Watong. Masa, muat me Saion, muat na pirlat no numuat God.
PSA 147:13 Kanong warah, i hadadas ira matanangaas ta ira balo tano numuat pise na hala, ma i haidane muat ing muat kis kaia ta iakano pise na hala.
PSA 147:14 I bale no malum tano numuat katon na pise bakut, ma i tabar hahos muat ma ra bilai na wit.
PSA 147:15 I tule se ira uno nianga ukai hono ula hanuo ma asa ing i tange i hilau gasien.
PSA 147:16 I palase no sinow hoing tiga pupulus ma i se harbasiane ira ais taar tano pise hoing ra tahuna iaah.
PSA 147:17 I se hasur ira uno bata na ais hoing ra pat na wana. Sige i tale be na petlaar no tamat na madohon i tule sei?
PSA 147:18 I tule no uno nianga ma ira ais i pola. I puuh hatatik ira dadaip ma ira taah i saal.
PSA 147:19 I te hamines ira uno nianga tano huntunaan tane Iakop. I te tar kaike ra hartula ma ira uno harkurai taar ta diet ira Israel.
PSA 147:20 Pai gil baak huo ta ira mes na hunhuntunaan. Diet pai nunure ira uno harkurai. Da pirlat no Watong.
PSA 148:1 Da pirlat no Watong. I tahut bia muat na pirlat no Watong meram ra mawe. Muat na pirlat ie kenam naliu saakit.
PSA 148:2 Muat ira uno angelo bakut, muat na pirlat ie. Muat bakut ira uno umri kenam ra mawe, muat na pirlat ie.
PSA 148:3 Kasakes ma teka, mur na pirlat ie. Muat bakut ira tiding ing muat lulungo, muat na pirlat ie.
PSA 148:4 No mawe aram naliu saakit, i tahut bia nu pirlat ie. Muat ira taah kenam naliu tano mawe, muat na pirlat ie.
PSA 148:5 I tahut bia kaiken ra linge diet na pirlat no hinsana no Watong, kanong ga tula nianga ma diet ga tahuat.
PSA 148:6 Gate hakisi hatikane tar diet ta ira udiet sumsubaan. Ga tar tiga harkurai huo nong pai tale bia na panim laah.
PSA 148:7 I tahut bia a pirhakasing mekai ra ula hanuo na haan tupas no Watong. Ira tamat na kirip tano tes diet na pirlat ie, ma no lamlamana tes bakut mah huo.
PSA 148:8 Huo mah no hile ma ra bata na ais, sinow ma ra bahuto, ira tamat na dadaip ing diet mur ira uno nianga,
PSA 148:9 ira tamat na uladih ma ira nat na uladih bakut, ira daha ing i la huhuai wara ienien ma ira tamat na ina daha saakit mah,
PSA 148:10 ira rakaia na wawaguai ma ira lasana wawaguai bakut, ira wawaguai ing diet kaikaiau ma ira maan ing diet la pupungo,
PSA 148:11 ira king tano ula hanuo ma ira kantri bakut, ira tamat na lualua ma ira mes na ut na gil harkurai bakut tano ula hanuo,
PSA 148:12 ira marawaan ma ira bulahin, ira takana ma ira nat na bulu.
PSA 148:13 I tahut bia diet na pirlat no hinsana no Watong, kanong no hinsana sen mon nong di raun ie. No tamat na minamarine i manga lua tano ula hanuo ma no mawe.
PSA 148:14 I te tar dadas ta ira uno matanaiabar, kaik diet ing diet te tar tutun ira udiet nilon tana diet na pirlat ie, diet at ira Israel, no huntunaan nong i manga hutet tana. Da pirlat no Watong.
PSA 149:1 Da pirlat no Watong. Da inge tiga sigar ninge tupas no Watong. Da inge na pirharlat tupas ie nalamin tano kis hurlungai ta diet ing diet te tar tutun ira udiet nilon tana.
PSA 149:2 I tahut bia ira Israel diet na guama ta nong ga hakisi diet. I tahut bia ira matanaiabar me Saion diet na laro tano udiet King.
PSA 149:3 Diet na pirlat no hinsana ma ra minangata, ma diet na gil ira bilai na kinkel tupas ie ma ra kudu ma ra haap,
PSA 149:4 kanong no Watong i manga guama pane ira uno matanaiabar. Diet ing di helar ta diet, i hamar diet ma ra harhalon.
PSA 149:5 Ira tunotuno ing diet te tar tutun ira udiet nilon tana, i tahut bia diet na guama bia i te hamar diet huo. I tahut bia diet na inge na kanakana ing diet noh kora taar ta ira udiet suuh.
PSA 149:6 I tahut bia ira pirhakasing tupas God na kis taar ta ira ha diet ma bia tiga wise ing i iaan ira airuo palpal na kis taar mah ta ira lima diet
PSA 149:7 wara balbalu ira sakena ta ira kantri ing pai Israel diet ma wara hapidanau diet,
PSA 149:8 ma wara kumkubus dit ira udiet king ma ra dadas na winwisaan ma ira udiet lualua ma ra sen mah,
PSA 149:9 ma wara gil haruatne no ula harkurai God gate pakat tar uta kaike ra mes na kantri. Bia kaiken ra linge na hanuat tutun huo, a tamat na urur na haan tupas diet ing diet te tar tutun ira udiet nilon ta God. Da pirlat no Watong.
PSA 150:1 Da pirlat no Watong. A pirhakasing tupas God aram narako tano uno hala na lotu. A pirhakasing tupas ie aram ra mawe ing i hamines no uno dadas.
PSA 150:2 Da pirlat ie ta ira uno dadas na gingilaan. Da pirlat ie kanong i manga tamat saakit.
PSA 150:3 Da pirlat ie ma no kinkel tano tahur. Da pirlat ie ma ra haap ma ra gita.
PSA 150:4 Da pirlat ie ma ra kudu ma ra minangata. Da pirlat ie ma tiga mangana gita ma ra tulaal.
PSA 150:5 Da pirlat ie ma ra pala karkar. Da pirlat ie ma ra tamat na kinkel ta ira pala karkar.
PSA 150:6 Ira linge bakut ing diet manmanasung, i tahut bia diet na pirlat no Watong. Da pirlat no Watong.
MAT 1:1 Iakan no harmur ta ira hinsa diet ira hintubu ne Jisas Krais nong a bulumur ie tane Dawit ma ne Dawit a bulumur tane Abraham.
MAT 1:2 Abraham no susine Aisak, Aisak no susine Iakop, ma ne Iakop no susine Iuda ma ira tasine mah.
MAT 1:3 Ma ne Iuda no susine Peres ma ne Sira, no pawasi dir ne Tamar, Peres no susine Hesron, ma ne Hesron no susine Ram.
MAT 1:4 Ma ne Ram no susine Aminadap, Aminadap no susine Nason, ma ne Nason no susine Salmon.
MAT 1:5 Ma ne Salmon no susine Buas, ma ne Rahap no pawasine. Ma ne Buas no susine Obet, ma ne Rut no pawasine. Ma ne Obet no susine Iesi.
MAT 1:6 Ma ne Iesi no susine Dawit no tamat na lualua na gil harkurai. Ma ne Dawit no susine Solomon, no pawasine nong baak a hahin ie tane Uraia.
MAT 1:7 Ma ne Solomon no susine Rihobuam, Rihobuam no susine Abaisa, ma ne Abaisa no susine Asa.
MAT 1:8 Ma ne Asa no susine Iosapat, Iosopat no susine Ioram, ma ne Ioram no susine Usia.
MAT 1:9 Ma ne Usia no susine Iotam, Iotam no susine Ahas, ma ne Ahas no susine Hesekia.
MAT 1:10 Ma ne Hesekia no susine Manase, Manase no susine Amon, ma ne Amon no susine Iosia.
MAT 1:11 Ma ne Iosia no susine Iekonia ma ira tasine. Ta iakano pakana bung di ga lamus ira Israel urau Babilon bia diet na lon hoing ira wasire kaia.
MAT 1:12 Namur ta ing diet ga lon hoing ira wasire arau Babilon, io, Iekonia ga susine Silatiel, ma ne Silatiel no susine Serababel.
MAT 1:13 Ma ne Serababel no susine Abiut, Abiut no susine Eliakim, ma ne Eliakim no susine Asor.
MAT 1:14 Ma ne Asor no susine Sadok, Sadok no susine Akim, ma ne Akim no susine Eliut.
MAT 1:15 Ma ne Eliut no susine Eliasar, Eliasar no susine Matan, ma ne Matan no susine Iakop.
MAT 1:16 Ma ne Iakop no susine Iosep, no tunaan tane Maria nong ga kaha Jisas nong di kilam ie bia Krais.
MAT 1:17 Io, sangahul ma ihat na harmur na nilon ta ira tunotuno makatiga laah tane Abraham tuk taar tane Dawit. Ma sangahul ma ihat makatiga ho Dawit tuk tano pakana bung di ga lamus Israel urau Babilon bia diet na lon hoing ira wasire kaia. Ma sangahul ma ihat mah makaia ta ing diet ga lon hoing ira wasire arau Babilon tuk taar di ga kaha no Mesaia.
MAT 1:18 Io, di ga kaha Jisas Krais hoken. Bia Iosep ga tar bat ta mon baak Maria, no pawasine Jisas, ma bia dir pa ga noh tika baak, ga palai bia Maria gate tianan. Kaik, no Halhaliana Tanuo gate sosoha tana.
MAT 1:19 Ma Iosep nong ga tar bat tar ne Maria a takodasiana tunotunoi. Kaik pa ga sip bia na hahirhir ne Maria. Ga sip mon bia dir na hartapalaas kumaan.
MAT 1:20 Bia Iosep ga lilik ta iakan ra linge, tiga angelo gar tano Watong ga harapuasa taar tana tano uno barbarien, ma ga tange, “Iosep, no bulumur ta Dawit, waak u burut wara lamlamus leh Maria wara num hahin. Warah, iakanong i tianan taar mei, aie makaia tano Halhaliana Tanuo.
MAT 1:21 Ma na kaha tiga bulu na tunaan ma nu pas no hinsana bia Jisas. Ma no kukuraina tano hinsaang Jisas a ut na halon. Kaik na halon ira uno matanaiabar sukun ira udiet magingin sakena.”
MAT 1:22 Kaiken ra linge ga hanuat wara pakpakile haruatne ira nianga gar tano Watong ing no tangesot ga tange hoken:
MAT 1:23 “Tiga lala na hahin, nong pai noh tika baak ma tiga tunaan, na tianan ma na kaha tiga bulu na tunaan, ma da kilam ie bia ‘Emanuel,’” no kukuraina bia, ‘God i la kis tika taar ma dahat.’
MAT 1:24 Io, bia ing Iosep ga tangahun ga gil hoing no angelo gar tano Watong ga tange tana. Io, ga lamus leh Maria wara uno hahin.
MAT 1:25 Iesen pa ga noh tika mei tuk tano pakana bung bia ga kaha no bulu na tunaan. Ma Iosep ga pas no hinsana bia Jisas.
MAT 2:1 Di ga kaha Jisas tano taman Betlehem tano hanuo Iudeia ing bia Herot ga tamat na lualua na gil harkurai. Io, ari ut na mintota ta ira tiding, merau ra kasakes i la hanhanut makaia, dal ga hanuat uram Ierusalem.
MAT 2:2 Ma dal ga tiri, “Ie he um no bulu nong di te kahai bia na tamat na lualua na gil harkurai gar na Iudeia? Mehet ga nas no uno tiding marau ra kasakes i la hanhanut makaia. Ma mehet hanuat bia mehet na lotu tana.”
MAT 2:3 Bia Herot, no tamat na lualua na gil harkurai, ma diet aram Ierusalem diet ga hadade hokaike, diet ga kalar.
MAT 2:4 Io, Herot ga tau hulungan ira tamat na ut na pakila lotu ma ira tena harausur ta ira harkurai tane Moses, gom tiri diet bia, “Da kaha no Krais he?”
MAT 2:5 Diet ga balui, “Arau Betlehem, kai Iudeia. Hokaik no tangesot i te pakat tar huo,
MAT 2:6 ‘Betlehem, tano hanuo Iudeia, pau manga hansiksik ta ira bilai na taman ta Iudeia, kanong makaia at ho ugu tiga lualua na hanuat nong na lue ra nugu matanaiabar Israel.’”
MAT 2:7 Io, Herot ga tau hasisingen ira ut na mintota ta ira tiding, gaam nunure leh ta dal no pakana bung tutun bia no tiding ga harapuasa.
MAT 2:8 Ma ga tule se dal urau Betlehem ma ga tange ta dal, “Muat na nanaas timaan tano nat na bulu. Ma bia muat te nas tupas leh ie, muat na hinawase iau. Io kaik, iau mah, nigi haan wara lotu tana.”
MAT 2:9 Io, bia ing dal gate hadade tar ing no tamat na lualua na gil harkurai ga tange, dal ga haan laah. Ma dal ga nas habaling no tiding nong dal ga nas ie arau ra kasakes i la hanhanut makaia. Ing bia dal ga nas no tiding dal ga manga guama sakit. Ma ga lua baal ta dal, tuk gom tur naliu tano katon ing no nat na bulu ga noh taar kaia.
MAT 2:11 Ma bia dal ga haan laka tano hala, dal ga nas no nat na bulu dir ma no pawasine, ne Maria. Ma dal ga singa bukunkek ma dal ga lotu tana. Io, namur dal ga papos ira udal bunbulaan ma dal gom tar ira udal hartabar tana—a gol, a mangana kaabus ing ira mis tana i la huhur timaan, ma ra waiwai.
MAT 2:12 Ma God ga hakatom dal ma tiga barbarien bia waak dal tapukus tupas Herot. Io, dal ga haan baling urau ra udal hanuo tiga mes na ngaas.
MAT 2:13 Io, manamur bia dal gate haan, tiga angelo gar tano Watong ga hanuat gaam habarbarien ne Iosep, gaam tange, “Nu tut ma nu lamus no bulu ma no pawasine, ma mutal na hilau urau Isip kanong Herot na sisilih tano nat na bulu wara bubu bing ie. Ma mutal na kis kaia tuk iau ni hinawase ugu wara minaren.”
MAT 2:14 Io, Iosep ga taman tut, gom lamus leh no nat na bulu ma no pawasine ra bung at, dal gaam tut laah urau Isip.
MAT 2:15 Ma dal ga kis kaia tuk Herot ga maat. Ga ngan huo wara pakpakile haruatne hoing no Watong ga tange tano tangesot hoken: “Iau ga tau leh no natigu tunaan me Isip.”
MAT 2:16 Bia Herot ga ser leh bia ira ut na mintota ta ira tiding dal gate pet mei, ga manga ngalngaluan. Io, gom hartula bia da bu bing ira bulu na tunaan bakut, ing i te iruo tinahon ta diet ma ing mah di ga sigar kaha diet makaia Betlehem ma ira taman mah kaia hutet. Ga gil huo kanong gate ser leh ta ira ut na mintota tano pakana bung bia no tiding ga harapuasa.
MAT 2:17 Io, kaiken ira nianga no tangesot Ieremia ga tange ga hanuat tutun hoken,
MAT 2:18 “Dahat te hadade a ingana tiga nong aram Rama hutet Betlehem. A sunuah ma a tamat na tapunuk. Ira hatatnaan na Israel diet susuah pane ira nati diet, ma i malok bia da haiau ie, kanong diet te maat bakut.”
MAT 2:19 Io, menamur ta ing Herot gate maat, tiga angelo gar tano Watong ga hanuat gaam habarbarien Iosep kaia Isip.
MAT 2:20 Ma ga tange, “Nu tut ma nu lamus leh no nat na bulu ma no pawasine, ma mutal na tapukus uram Iudeia kanong ing diet ga walar bia diet na bu bing no nat na bulu, diet te maat.”
MAT 2:21 Io, Iosep ga taman tut, gom lamus leh no nat na bulu ma no pawasine, dal gaam haan baling tano hanuo Iudeia.
MAT 2:22 Ma bia Iosep ga hadade bia Akeleas gate kap leh no mauho tano ana sus Herot, bia na tamat na lualua na gil harkurai audiet ira Iudeia, ga burut bia na haan ukaia. Warah, God ga hakatom habalin ie ma tiga barbarien, kaik gaam haan tano hanuo Galili.
MAT 2:23 Ma ga kis tano taman di la kilkilam ie bia Nasaret. Ga ngan huo wara pakpakile haruatne hoing God ga tange ta ira tangesot hoken, “Da kilam bia a lup Nasaret ie.”
MAT 3:1 Io, namur, tiga pakana bung, Jon no ut na baptais ga hanuat aram ra hanuo bia, Iudeia.
MAT 3:2 Ma ga harpir kaia, “Muat na lilik pukus se ira numuat magingin sakena kanong no pakana bung tano kinkinis na harkurai ma ra harbalaurai ta God i te hutet.”
MAT 3:3 Ma ne Jon no tunotuno nong no tangesot Aisaia ga iangianga utana hoken, “Meram ra hanuo bia a ingana tiga nong i taatau, ‘Tagure no ngaas tano Watong, Gil hatakodas ie wara uno hinanhuat.’”
MAT 3:4 Ira kiniasine Jon di ga gil ma ra hina kamel, ma git taltalin ma tiga pala bulumakau. Ma git ienien kubawa ma git mame ra tiri na imara.
MAT 3:5 Ma diet meram tano tamat na pise na hala Ierusalem, diet makaia tano kidilona hanuo Iudeia, ma ira tamtaman bakut hutet tano taah Ioridaan, diet git hanahaan tupas ie.
MAT 3:6 Diet git hapuasne ira udiet magingin sakena, io namur Jon git baptais diet tano taah Ioridaan.
MAT 3:7 Ma bia Jon ga nes a haleng na Parisi ma Sadiusi diet ga hanhanuat ukaia ho ie wara kap baptais, ga tange ta diet, “A sakana ut na harabota muat! Sige ga hakatom muat bia muat na hilau sukun no harpidanau nong God i hutet bia na tar ie?
MAT 3:8 Gaar tahut bia muat na gil ira linge ing na haminas bia muat te lilik pukus!
MAT 3:9 Io, muat tange bia a bulumur tane Abraham muat, kaik muat haruat bia muat na hilau sukun nora harpidanau tane God. Iesen waak muat lik huo. Pa na tutun. Pai tamat na linge bia muat ira bulumur tane Abraham. Iau hinawase muat bia God i petlaar bia na hatahuat ta bulumur ta Abraham ta kaiken ra haat mon.
MAT 3:10 No matau ie ke ra bola daha, nong i taguro taar wara katkato hasur ira daha. Ma ira daha bakut, ing diet pai la huhuai ta tahut na hunue diet, na kato hasur ma na se tar ra ula iaah.
MAT 3:11 “Io, tikai na hanuat namur tagu ma i tamat tagu. Iau pai haruat bia ni kap ira pupunaak na kakine. Iau baptais muat tano taah wara hapuasne bia muat te lilik pukus. Aie na baptais muat ma no Halhaliana Tanuo, ma ra iaah mah.
MAT 3:12 Ma i palim tar no uno sawol wara sese haut ira wit tano dadaip nong na puh se ira suruno ma ira parahona. Iesen ira tahut na pat na wit ing diet tirih ma diet puko suur, na reng hulungen ukai hora uno suuh na masur. Ma na se tar ira suruno ma ira parahona tano iaah kis.”
MAT 3:13 Io, iakano ra pakana bung Jisas ga hanuat meram Galili, gaam haan uras na taah Ioridaan bia Jon naga baptais ie.
MAT 3:14 Iesen Jon ga walar bia na tigal ie, gaam tange, “I takodas bia augu, nu baptais iau. Ho bibih u hanuat bia ni baptais ugu?”
MAT 3:15 Ma Jisas ga balui, “Nu haut leh mon baak iakan kaiken. I tahut bia dar na gil haruatne ira linge ing God i te bul bia i takodas.” Io, Jon um gaam haut.
MAT 3:16 Ma ing Jon ga baptais tar Jisas, Jisas ga hanan sot meram ra tingaan taah. Kaik at mon no mawe ga tapapos ma Jisas ga nas no Tanuo ta God ga hanhansur taar tana hoing tiga bun.
MAT 3:17 Ma di ga hadade a ingana tiga nong ga ianga suur meram ra ula mawe gaam tange, “Iakanin no Natigu, nong iau manga sip ie ma iau kanakana sakit tana.”
MAT 4:1 Io, no Tanuo gaam lamus leh Jisas uram ra hanuo bia, bia Sataan na walaam ie.
MAT 4:2 Ma bia Jisas ga hahal aihat sangahul na kidilona bung bakut, ga taburungan um.
MAT 4:3 Ma Sataan, no ut na harwalaam, ga hanuat gaam tange ta Jisas, “Kaia, ing bia a Nati God ugu, nu tange ta ke ra haat bia diet naga taar nian.”
MAT 4:4 Iesen Jisas ga balui, “Tiga harkurai gar ta God di ga pakat ie wara gaie mehet ira matanaiabar i tange bia, ‘Ira tunotuno diet pa na lon tano nian sen mon. Diet lon ta ira nianga i hanan suur tano hane God.’”
MAT 4:5 Io, Sataan gaam lamus leh Jisas uram tano tamat na halhaliana pise na hala, Ierusalem. Gaam hatur Jisas ram naliu sakit tano ula hala tano tamat na hala na lotu.
MAT 4:6 Sataan gom tange tana, “Bia ing a Nati God ugu, kaia, nu karwas suur, kanong ira nianga tane God ing di ga pakat ie i tange hoken, ‘God na tule ira uno angelo wara utaam, diet na palim hatur ugu ma ira lima diet, waing pa nu sage ira kakim ra ula haat.’”
MAT 4:7 Jisas ga balui, “Tiga harkurai gar ta God di ga pakat ie wara gaie mehet ira matanaiabar i tange bia, ‘Waak muat walar no Watong, no numuat God.’”
MAT 4:8 Io, Sataan ga lamus habaling Jisas uram naliu tiga tamat na uladih sakit. Gaam haminas ira kinkinis na tamat na lualua tano ula hanuo bakut ma ira udiet minamar.
MAT 4:9 Ma Sataan ga tange tane Jisas, “Kaike bakut iau ni tar se taam ing bia nu singa bukunkek ma nu lotu tupas iau.”
MAT 4:10 Jisas ga tange tana, “Sataan, haan laah! Tiga harkurai gar ta God di ga pakat ie wara gaie mehet ira matanaiabar i tange mah hoken, ‘Muat na lotu tupas no Watong no numuat God, ma aie sen mon muat na hanapu muat tana.’”
MAT 4:11 Io, Sataan gaam haan sukun ie ma ira angelo diet ga me harahut ie.
MAT 4:12 Ma namur di ga halaka Jon no ut na baptais ra hala na harpidanau. Ma bia Jisas ga ser leh huo ga tapukus uram Galili.
MAT 4:13 Pa ga kis Nasaret, iesen ga hanut uram tano pise na hala Kapeneam i hutet tano tamat na taah kom Galili, narakoman tano hanuo Sebulon ma Napitali.
MAT 4:14 Ga ngan huo wara hatutun ira nianga tane God ing no tangesot Aisaia ga tange hoken,
MAT 4:15 “Muat tano hanuo Zebulon ma Napitali, muat tano ngasur ures ra tamat na taah kom, ma muat kaia ra gagena taah Ioridaan, ma muat mah tano hanuo Galili uta diet pai Iudeia,
MAT 4:16 muat ira matanaiabar ing muat la kiskis ra kankado, muat te nas a tamat na lulungo; ma muat ing muat la kis taar tano hanuo tano henai na minaat, tiga lulungo te hapalai muat.”
MAT 4:17 Tur leh ta iakano pakana bung Jisas ga harharpir hoken: “Muat na lilik pukus se ira numuat magingin sakena kanong no pakana bung tano kinkinis na harkurai ma ra harbalaurai ta God iakanik.”
MAT 4:18 Bia ing Jisas ga hanahaan ra gagena no tamat na taah kom Galili ga nas leh airuo ut na kap kirip, dir tasin, ne Simon nong di kilam ie bia Pita, ma no tasine Andru, dir ga sase tiga uben.
MAT 4:19 Ma Jisas ga tange ta dir, “Bia mur na mur iau ma ni hausur mur wara soh tunotuno.”
MAT 4:20 Dir ga hansukun hagasiaan ira udir uben ma dir ga mur ie.
MAT 4:21 Ga haan hakari laah mekaia, gaam nas airuo mes na haratasin, Jemes no nati Sebedi, ma no tasine Jon. Dal tamaan ga kis taar tano mon ma dir ga tangtagure ira udir uben.
MAT 4:22 Jisas ga tau dir ma kaik at mon dir ga haan talur no mon ma no adir sus, dir gaam mur ie.
MAT 4:23 Io, Jisas ga haan tano hanuo bakut Galili, gaam hauhausur narako ta ira udiet hala na lotu. Ma ga harharpir tano tahut na hinhinawas utano kinkinis na harkurai ma ra harbalaurai tane God. Ma ga halangalanga diet ta ira mangana minaset ing ga kabit diet.
MAT 4:24 Kaik no hinhinawas wara utana gaam haan hurbit tano hanuo bakut Siria. Ma ira matanaiabar diet ga kap hawaat ira mangana minaset ukaia hone Jisas. Ari ga ubal diet ra tamat na ngunungut, ari a sakana tanuo ga sosoha ta diet, ari a ngokngok, ma ari a pengpeng. Ma Jisas ga halangalanga diet.
MAT 4:25 Ma a tamat na matanaiabar me Galili, Dekapolis, Ierusalem, Iudeia, ma no hanuo tano mes na palpal tano taah Ioridaan, diet ga murmur ie.
MAT 5:1 Ma bia Jisas ga nas ira tamat na matanaiabar ga hanut uram tiga gagena uladih, gaam a kis napu. Ma ira uno bulu na harausur diet ga hanuat ukaia ho ie.
MAT 5:2 Ma ga haburen leh wara hausur diet hoken.
MAT 5:3 “Diet daan ing diet nunure bia diet manga supi ira linge meram ho God, kanong diet na sola tano kinkinis na harkurai ma ra harbalaurai ta God.
MAT 5:4 Diet daan ing diet tapunuk, kanong God na habalaraan diet.
MAT 5:5 Diet daan ing diet matien na tunotuno, kanong God na tabar diet ma ira tahut na linge ing gate tagure tar wara audiet.
MAT 5:6 Diet daan ing diet sip haitne ra magingin takodas, kanong God na banot ira udiet sinisip.
MAT 5:7 Diet daan ing diet marse ira mes, kanong God na marse diet.
MAT 5:8 Diet daan ing diet tutun tano matmataan ta God, kanong diet na nas God.
MAT 5:9 Diet daan ing diet la tartar malum, kanong God na kilam diet bia a natine diet.
MAT 5:10 Diet daan ing di helar ta diet pane ira magingin takodas, kanong diet na sola tano kinkinis na harkurai ma ra harbalaurai ta God.
MAT 5:11 Muat daan ing di tange hagahe muat, ma di helar ta muat, ma di tange ira sakana harabota uta muat wara gaiegu.
MAT 5:12 Ma muat na manga guama sakit kanong ira tamat na hunena ira numuat mangason kenam i kis taar ra mawe. Hokaiken di ga helar huo ta ira tangesot nalua.
MAT 5:13 “Muat hoing ira sol uta ira tunotuno. Sen bia ing i pataam ira dadas wara harahut tano sol, no uno dadas na hanuat balin hohe? Pai tale. I te linge bia um. I tale bia da sei ma da papasuane um ie.
MAT 5:14 “Muat hoira lulungo uta ira tunotuno. Io, tiga pise na hala aram ra uladih pai tale bia na mun.
MAT 5:15 Ma tikai mah pa nale halulungo no laam ma na tubus ie. Sen bia na bul haut ie bia na murarang ta diet bakut narako tano hala.
MAT 5:16 Hokaike at mon, i tahut bia ira numuat lulungo na murarang ta ira matmataan ta ira tunotuno, waing diet naga nes ira numuat tahut na tintalen ma diet naga pirhakasing no amuat Sus aram ra mawe.
MAT 5:17 “Pai tahut bia muat na lik bia iau te hanuat wara kapkap se ira harkurai tane Moses ma ira harausur ta ira tangesot. Iau pai hanuat bia ni kap se, sen bia iau te hanuat bia ni hatutun diet.
MAT 5:18 Io, muat nes baak! Ing bia no mawe ma no ula hanuo dir kis taar, pa na benben tiga nat na katon i manga hansik sakit ta ira harkurai tane Moses, tuk taar bia da pakile haruatne bakut diet.
MAT 5:19 Io, sige ta tikai na lake tiga natine tutun ta kaiken ra harkurai, ma na hausur mah ari a mes huo, aie na manga hansiksik ing bia na sola tano kinkinis na harkurai ma ra harbalaurai ta God. Iesen, sige ta tikai na mur kaiken ra harkurai, ma na hausur mah ari a mes huo, aie na manga tamat ing bia na sola ta iakano kinkinis na harkurai ma ra harbalaurai ta God.
MAT 5:20 Ma muat lik bia ira tena harausur ta ira harkurai tane Moses ma ira Parisi diet manga takodas. Iesen iau tange ta muat bia muat pa na petlaar bia muat na sola tano kinkinis na harkurai ma ra harbalaurai ta God ing bia ira numuat magingin takodas pa na lua ta ira udiet.
MAT 5:21 “Muat gate hadade nong no harkurai tane Moses ga tange ta ira hintubu muat. Ga tange bia, ‘Muat pa na bu bing bia tiga tunotuno.’ Ma di ga tange mah, ‘Tiga nong i bu bing bia tiga tunotuno i tale mah bia da bul ie ra harkurai.’
MAT 5:22 Sen iau at, iau tange ta muat bia sige tikai i ngalngaluan taar ta tiga hinsakana, i tale bia da lamus tar ie ra harkurai tano komiti. Ma bia sige tikai ing na tange taar tano hinsakana bia, ‘Ba ugu!’, io, i tale bia da lam tar ie tano harkurai tano kaunsil. Ma sige tikai ing na kilam no hinsakana bia, ‘A ba sokopi ugu!’ na tale mah bia na haan taar tano ula iaah.
MAT 5:23 “Io kaik, ing bia u wara tartar no num hartabar tane God aram tano suuh na bul hartabar, ma u lik leh ira bala ngungut ing no hinsakaam ga gil taam, nu waak ta baak no num hartabar, nu tapukus balin, mur naga haratakodas ma no hinsakaam. Namur um, nu tapukus ma nu tar no num hartabar tane God.
MAT 5:25 “Bia no hinsakaam i wara kapkap tar ugu ra harkurai, mur na haratakodas gasien mei ing bia mur hanahaan baak na ngaas. No hinsakaam kabi tar ugu tano ut na harkurai, ma no ut na harkurai na tar ugu ta nong i la balaure tar diet ing di ga wis kawase diet narako tano hala na harpidanau, ma aie na bul halaka ugu ra hala na harpidanau.
MAT 5:26 Io, hadade baak! Pa da hasur ugu ra hala na harpidanau tuk taar bia nu tar bakut ira num kunkulaan.
MAT 5:27 “Muat gate hadade mah nong no harkurai tane Moses i tange bia, ‘Waak u noh tika ma tikai pai a num ie.’
MAT 5:28 Sen iau at, iau tange ta muat, bia sige tikai i nes kalak tiga mes na hahin, io, i te gil ronga kanong i te noh tika ma iakano mes na hahin narako tano uno kidilona nilon.
MAT 5:29 “Kap se ira lilik ing na harango no num nilon. Tiga malalar hoken. Bia tiga mataam i harongane ugu, nu luar sei. I tahut dahin bia tiga subaan tano tamaim na panim laah. Sen bia pai manga tahut bia da ise no tamaim bakut tano ula iaah.
MAT 5:30 “Tiga malalar mah hoken. Bia no kata na limaam i harango ugu, nu kato kutus isei. I tahut dahin bia tiga subaan tano tamaim na panim laah. Sen bia pai manga tahut bia no tamaim bakut na haan taar tano ula iaah.
MAT 5:31 “Muat gate hadade mah no harkurai tane Moses i tange bia, ‘Bia sige tikai i se no uno hahin, na pakat ta nianga palai utano udir palas tinolen ma na tar ie tano uno hahin.’
MAT 5:32 Sen iau at, iau tange ta muat bia sige tikai i se no uno hahin nong pai noh tika ma tiga mes, io, aie no burena bia no uno hahin na noh tika ma tiga mes, kaik naga gil ronga. Ma sige nong na tole iakano hahin, aie i gil ronga mah kanong i te noh tika ma tiga mes, pai unoi.
MAT 5:33 “Muat gate hadade mah nong no harkurai tane Moses ga tange ta ira tubu muat. Ga tange bia, ‘Waak u sasalim harabota. Nu hatutun ira num sinsalim uram hone God.’
MAT 5:34 Sen iau at, iau tange ta muat bia waak u hasasalim wara hadadas ira num nianga. Waak u hasasalim uram naliu kanong God i la kiskis kaia.
MAT 5:35 Ma waak u hasasalim ukai ra ula hanuo kanong bia God i la bubu tur taar tana. Ma waak u hasasalim ta tiga katon i halhaal, hoing Ierusalem, no pise na hala auno no Tamat na Lualua na Gil Harkurai.
MAT 5:36 Waak u hasasalim mah tano ulum kanong pai tale ugu bia nu pukusane tiga pakana hiim bia na ponpon bia na bungbung.
MAT 5:37 Sen bia, i tale bia nu haut mon bia nu harus. Bia nu tange tiga mes na mangana linge wara hadadas ira num nianga, io, u nunure bia i te hanuat mekaia tano Ut na Gil Sakena.
MAT 5:38 “Muat gate hadade nong no harkurai tane Moses i tange bia, ‘Ing bia u tut luar se no kalora matana tikai, da tut luar se mah tiga kalora mataam. Ma ing bia u tut dik se tiga pat na ngisena tikai, da tut dik se mah tiga pat na ngisem.’
MAT 5:39 Sen, iau at, iau tange ta muat bia waak u tur bat ugu tano sakana tunotuno i wara hagahe ugu. Ing bia tikai i pasar no bobola haam tano palpal na kata, io, nu tar mah no palpal na kesa.
MAT 5:40 Ma ing bia tiga nong i sal tar ugu ra harkurai wara kapkap leh um no num maal, io, nu tar mah tiga mes na kiniasim tana.
MAT 5:41 Ing bia tikai i hapar ugu bia nu kap ira uno kinakap ukaia ta dahin, ma a talona hinahaan baak, io, nu kap hakari ira uno kinakap ta dahin baal.
MAT 5:42 Ma bia tikai i saring ugu ta tiga linge, nu bale se tar ie tana. Ma bia tikai i sip bia na saring leh baak tiga linge, nu bale tabaak ie tana.
MAT 5:43 “Muat gate hadade mah no harkurai tane Moses i tange bia, ‘Nu marse tikai.’ Ma di ga tange mah bia, ‘Malentakuane ira am suk.’
MAT 5:44 Sen iau at, iau tange ta muat bia muat na marse ira amuat suk ma muat na sasaring uta diet ing diet la hahelar ta muat.
MAT 5:45 Muat gil huo waing muat naga natine namuat Sus kenam ra mawe. I hatut no uno kasakes, waing na rang sare ira ut na sakena ma ira tahut mah. Ma i tule no bata ta diet ira ut na takodas ma ta diet ing diet pai takodas.
MAT 5:46 Ma ing bia muat sip sen mon ing diet la sipsip muat, God pa na balu pukus muat ma ta bilai na harharahut. Io, ira ut na kap takis, ing muat la nesnes diet bia a ut na sakena diet, diet la gilgil huo mah!
MAT 5:47 Bia muat pai haianga leh ing muat bala ngungut taar ta diet, io, muat pai gil ra tahut ta ke ra mes. Io, ing diet pai la nurnur ta God, diet mah, diet la gilgil huo!
MAT 5:48 Io, i tahut bia muat na takodas harsakit hoing namuat Sus kenam ra mawe i takodas harsakit.
MAT 6:1 “Muat na harbalaurai bia waak muat pakile ira numuat tahut na tintalen tupas ne God taar ra matmataan ta ira matanaiabar waing diet na nas muat. Io, bia muat na gil huo, na pataie ta hunena ira numuat mangason ing na hanuat meram ra amuat Sus aram ra mawe.
MAT 6:2 Io, ing bia u tabar tiga maris, waak u gilgil ta linge wara hatalingaan diet tano num hartabar, hoing ira ut na harababo diet la gilgil narako ta ira hala na lotu ma ta ira ngaas mah. Diet la gilgil huo bia ira tunotuno na ru diet. Muat hadade baak! Diet te hatur kawase bakut leh at mon ira hunena ira udiet mangason.
MAT 6:3 Ma bia u tabar no maris, nu gil ie hoing bia no turaam hutet pa na nunure ing u gilgil.
MAT 6:4 Bia u gil huo, io, u te gil suhe mon ie. Ma no raam Sus, nong i la nasnas ing di la gilgil suhe, na tar no hunena ira num mangason taam.
MAT 6:5 “Bia muat sasaring, waak muat ngan hoira ut na harababo. Diet la sipsip bia diet na turtur narako ta ira hala na lotu ma diet na sasaring. Ma diet la sasaring ta ira katon mah ing ira matanaiabar diet la hanhanuat ukaia, waing ira tunotuno na nes diet. Muat hadade baak! Diet te hatur kawase bakut leh at mon ira hunena ira udiet mangason.
MAT 6:6 Iesen nu sasaring hoing bia diet pa na lat ugu. Tiga nianga harharuat hoken. Nu laka uram narako ra ngasiam ma nu banus no matanangas ma nu sasaring tupas naam Sus, nong tikai pai haruat wara nasnas ie. Ma no raam Sus, nong i la nasnas ing di la gilgil suhe, na tar no hunena ira num mangason taam.
MAT 6:7 Ma ing bia u sasaring, waak u halawaas bia mon ira num sinasaring hoing diet ing diet pai nurnur tane God. Io, diet lik bia ira matanaiabar na hadade diet ta ira udiet haleng na nianga.
MAT 6:8 Iesen, waak muat haruat ma diet, kanong namuat Sus i nunure tar ira numuat sunupi nalua bia muat pai sasaring baak.
MAT 6:9 Io, bia muat sasaring, muat na sasaring hoken: ‘Amehet Sus aram ra mawe, mehet sip bia da nes kilam no hinsaam bia i halhaal,
MAT 6:10 no num kinkinis na harkurai ma ra harbalaurai na hanuat, ma bia da gil ira num sinisip kai ra ula hanuo, hoing di la gilgil aram ra mawe.
MAT 6:11 Mehet sip bia nu tabar mehet katin ma ira amehet nian ing i haruat ma tiga bung,
MAT 6:12 ma nu lik luban se ira numehet magingin sakena, hoing mehet te lik luban se ira magingin sakena di gil ta mehet.
MAT 6:13 Ma mehet sip mah bia nu balaure bat mehet ta ira harwalaam, ma nu kap pukus mehet tano Ut na Gil Sakena. [Io, anum no kinkinis na harkurai ma ra harbalaurai, no dadas, ma no minamar hathatikai. Amen.]’
MAT 6:14 Io, bia muat lik luban se ira magingin sakena di gil ta muat, no amuat Sus aram ra mawe na lik luban se mah ira numuat magingin sakena.
MAT 6:15 Iesen bia muat pai lik luban se ira magingin sakena ta ira mes, no amuat Sus mah pa na lik luban se ira numuat magingin sakena.
MAT 6:16 “Io, bia muat hahal uram hone God, waak muat nanaas malahuan hoing ira ut na harababo diet la matamalahuan huo. Diet la gilgil huo wara haminas ta ira tunotuno bia diet haahal. Muat hadade baak! Diet te hatur kawase bakut leh at mon ira hunena ira udiet mangason.
MAT 6:17 Iesen bia u hahal uram hone God, nu limlimis timaan waing ira tunotuno diet pa na nes kilam ugu bia u haahal. Naam Sus sen mon, nong tikai pai haruat wara nasnas ie, na nas kilam ugu bia u haahal. Ma no raam Sus, nong i la nasnas ing di la gilgil suhe, na tar no hunena ira num mangason taam.
MAT 6:19 “Waak muat bul anumuat ta bunbulaan kai napu ing a ipas na hagahe ma na marota mah, ma ira ut na hisikoma diet na parok ira hala, diet naga kinau.
MAT 6:20 Iesen muat na bul ira numuat bunbulaan aram ra mawe ing a ipas pai haruat wara hagahe ma pa na marota, ma ira ut na hisikoma diet pai haruat bia diet na haan ukaia ma diet naga kinau.
MAT 6:21 Io, bia no num bunbulaan i kis taar he, no num kidilona nilon bakut i kis taar mah kaia.
MAT 6:22 “Ira mataam dir hoira lulungo wara hapalai ugu. Ing bia ira iruo mataam dir manga bilai, no num kidilona nilon bakut na manga palai.
MAT 6:23 Iesen bia ira iruo mataam dir sakena, na ngan hoing bia no num kidilona nilon i kankado. Iesen bia iakano palai i kis taar taam i te kankado, nu manga baaba sakit!
MAT 6:24 “Taie tikai i haruat wara tartaram ta ira iruo watong, na manga malok ta tikai ma na manga sip no mes, bia na hararot tikai ma na malentakuane no mes. Io, pai haruat bia muat na taram ta God ma ra kinewa mah.
MAT 6:25 “Kaik, iau tange ta muat, waak bia muat ngarngarau uta ira numuat nilon bia asa ing muat na ien bia asa ing muat na mame. Ma waak bia muat ngarngarau mah uta ira palatamai muat bia muat na sigam ra sa. Io, ira numuat nilon i tamat ta ira nian ma ira tamai muat i tamat ta ira maal.
MAT 6:26 Muat na nes ira maan kenam ra mauho. Diet pai la saaso. Diet pai la kilkil hulungan nian. Diet pai la bulbul tanakurua mah. Iesen namuat Sus aram ra mawe i la tamtabar diet. Nes baak! Muat palai bia, tano sinisip ta God, muat manga tamat ta diet.
MAT 6:27 Muat ngarngarau warah? Waak muat gilgil huo! Bia muat na ngarngarau, pa na halawaas ira numuat nilon ta dahin.
MAT 6:28 “Ma muat ngarngarau pane ira kiniasi muat warah? Muat na nas ira puspusuno no ina naas. Diet pai papalim. Diet pai singit maal mah.
MAT 6:29 Iesen iau tange ta muat bia Solomon no tamat na lualua na gil harkurai ma ira uno tamat na minamar pa ga nanaas haruat ma ira puspusuno no ina naas.
MAT 6:30 Kaik, God i gil hamaririsuan ira pitoka nong i lon mon katin ma marakan da halo iaah mei. Bia i tutun ing God i gil huo tano pitoka, i tutun sakit bia na hasigam muat mah ma ira kiniasi muat. Maris! Pai patpatuan ira numuat nurnuruan!
MAT 6:31 “Io, waak um bia muat ngarngarau ma muat na tangtange bia, ‘Dahat na ien ra sa? Ma dahat na mame ra sa? Bia asa ing dahat na sigam?’
MAT 6:32 Kaike ira linge, diet ing diet pai nurnur tane God, diet la sisilih pane. Iesen namuat Sus aram ra mawe i nunure tar bia muat supi kaike ra linge bakut.
MAT 6:33 Iesen nalua ta ira linge bakut, muat na hararot leh no magingin takodas ta God ma ira linge i haruat ma no uno kinkinis na harkurai ma ra harbalaurai. Ma na tabar muat ma kaike ira linge bakut mah.
MAT 6:34 Io, waak muat ngarngarau katin ta ira linge umarakan mah. Ira tinirih umarakan, muat na waak diet wara umarakan. A mon tinirih at uta ira bung tikatikai.
MAT 7:1 “Waak u kure hagahe no hinsakaam, God kabi kure ugu.
MAT 7:2 God na kure ugu hoing at mon u kure no hinsakaam. Ma ira mangana harkurai u gil tano hinsakaam, God mah na gil huo taam.
MAT 7:3 “Warah u nas no nat na pet na daha tano matana no hinsakaam ma pau lik leh baak no pokona daha ke hora mataam at?
MAT 7:4 Waak bia nu tange tano tasim bia, ‘Ni kap se no nat na pet na daha tano mataam.’ Pa nu gil huo kanong augu baak mah, a mon pokona daha i kis taar tano mataam.
MAT 7:5 A ut na harababo ugu! Nu kap se hanalua baak no pokona daha tano mataam at. Kaik, nugu nanaas timaan wara kapkap se no nat na pet na daha tano matana no hinsakaam.
MAT 7:6 “Ma waak muat se tar ira tahut na linge sakit, ing i halhaal tane God, ta ira paap ma ta ira bore. Diet kabi papaas suane mon. Ma diet kabi tahurus ma diet naga karat muat.
MAT 7:7 “Io, bia nu sasaring nu hatur kawase iakan ra linge. Ma bia u sisilih, nu silihe tupas. Ma bia u pipidil, God na papos leh ugu.
MAT 7:8 Kaik huo, nong i sasaring na hatur kawase ira linge i saring. Ma nong i sisilih na silihe tupas ira linge i silsilihe. Ma nong i pipidil, God na papos leh ie.
MAT 7:9 “Sige ta muat i tale bia na tar tiga haat, bia ing no natine i saring nian?
MAT 7:10 Ma bia ing i saring kirip, na tabar balik ie ma tiga sui?
MAT 7:11 Ing bia muat ira ut na sakena, muat la nunure tar wara tamtabar ira nati muat ma ra bilai na linge, io, iakano i hamines bia no amuat Sus aram ra mawe i manga nunure tar wara tamtabar diet ing diet saring ie ma ra bilai na linge.
MAT 7:12 “Muat na gil ta ira mes hoing muat sip bia diet na gil tar ta muat. Iakan ra nianga, aie no suruno ta ira harkurai tane Moses ma ira harausur ta ira tangesot.
MAT 7:13 “I tahut bia muat na haan laka tano ngaas i didisuan, kanong no ngaas tapegas tupas no hiniruo i malus ma haleng diet la murmur ie.
MAT 7:14 Iesen no ngaas tupas no nilon i didisuan, ma no uno matanangas a hansik ie. A bar hanawaan mon diet ing diet nas tupas leh ie.
MAT 7:15 “Muat na harbalaurai ta ira tangesot harabota. Tiga nianga harharuat hoken. Muat hoing ira sipsip. Ma diet ira tangesot harabota, diet na hanuat ma diet na hababo muat bia a bilai na sipsip mah diet, iesen bia a tamat na rakaia na paap mon diet ing diet la hanghagahe ira sipsip.
MAT 7:16 Muat na nas kilam diet ta ira udiet pinapalim hoing muat la nasnas kilam ira daha ta ira hunue diet. Muat pai dik ira gamara ta tiga daha i mon tukuluno. Ma muat pai kap mah ira papus ta ira hinau i mon tukuluno.
MAT 7:17 Hokaike at mon, ira bilai na daha diet na huai ira bilai na hunena. Ma ira sakana daha diet na huai ira sakana hunena.
MAT 7:18 Ma pai haruat bia tiga bilai na daha na huai ta malmalena hunena. Ma pai haruat mah bia tiga sakana daha na huai ta namnamien na hunena.
MAT 7:19 Ira daha i huai ma pai namnamien ira hunena, da kato hasur ma da se tar diet tano iaah.
MAT 7:20 Io, i tale bia muat na nas kilam mah diet ira tangesot ta ira audiet mangana pinapalim.
MAT 7:21 “Taie bia diet bakut ing diet la kilkilam iau bia, ‘Watong! Numehet Watong!’ diet na sola tano kinkinis na harkurai ma ra harbalaurai ta God. Iesen diet sen mon ing diet la gilgil haruatne ing no agu Sus aram ra mawe i sip, diet na sola.
MAT 7:22 Ma bia no bung na harkurai na hanuat, a haleng diet na tange tagu bia, ‘Watong! Numehet Watong! Hohe um ta het? Mehet git iangianga na tangesot ma no num dadas. Ma mehet git hasur se ira sakana tanuo ma no num dadas. Ma no num dadas mah, mehet git gilgil haleng na dadas na gingilaan na kinarup mei. U biha?’
MAT 7:23 Ma sen ni hinawase hamadaraas diet bia, ‘Iau pai le nunure tun at bia sige muat. Muat haan sukun iau! A sakana tunotuno muat!’
MAT 7:24 “Io, sige tiga nong i hadade kaiken ra nugu nianga ma i gil huo, i haruat ma tiga mintatona tunotuno nong ga so hasur no uno hala uras napu ra ula haat.
MAT 7:25 Ga bata, ira taah ga taahit, ma no dadaip ga pupuh taar ta iakano hala, iesen pa ga tarupuk kanong ga manga so hasur ira kasong uras napu ra ula haat.
MAT 7:26 Iesen bia sige tiga nong i hadade kaiken ra nugu nianga ma pai gil huo, i haruat ma tiga gotgotuana tunotuno nong ga so hapagalo ta mon no uno hala.
MAT 7:27 Ga bata, ira taah ga taahit, no dadaip ga pupuh iakano hala, gaam tarupuk, ma ga tamadure sakasaka.”
MAT 7:28 Ma ing bia Jisas gate hapataam nianga uta kaiken ra linge, ira tamat na matanaiabar diet ga karup ma diet ga urur ta ira uno harausur kanong ga hausur diet hoing tikai i te kap ra dadas kaik gaam tale bia na ianga huo, ma pataie hoing diet ira tena harausur ta ira harkurai tane Moses.
MAT 8:1 Bia Jisas ga hansur meram ra uladih, a tamat na matanaiabar diet ga mur ie.
MAT 8:2 Ma tiga tunotuno nong ga sam sakana minaset tano palatamaine ga hanuat gaam singa bukunkek menalua tane Jisas ma ga tange, “Nora Watong, iau palai bia u haruat wara halangalanga iau waing pa na tale bia da hahale habaling iau. Ma bia ing u sip, nu gil huo tagu.”
MAT 8:3 Io, Jisas ga sasangaha gaam sigire no tunotuno, ma ga tange, “Iau sip tar. Nu langalanga!” Kaik at mon no minaset ga pataam tano tunotuno.
MAT 8:4 Ma Jisas ga tange um tana, “Harbalaurai timaan! Waak bia nu hinawase ta tiga nong. Iesen nu haan ma nu haminas ugu tano ut na pakila lotu. Ma nu tar no hartabar haruat ma no harkurai tane Moses. Ma iakano hartabar na hinawas palai wara hatutun bia u te langalanga ma bia pai tale mah bia tikai na hatabune habaling ugu.”
MAT 8:5 Io, bia Jisas gate haan laka taar tano pise na hala Kapeneam, tiga tamat na umri ta tiga matana ubane ga hanuat taar kaia ho ie, ma ga sasaring marmaris tana hoken.
MAT 8:6 “Nora watong, no nugu tultulai i noh taar kenam ra nugu hala. I kilingane ra tamat na ngunungut. Ma pai hamagile um ira tamaine.”
MAT 8:7 Io, Jisas ga tange tana, “Iau ni haan, nigi a halangalanga ie.”
MAT 8:8 Ma no tamat na umri ta tiga matana ubane ga tange balik tana bia, “Nora watong, maris, iau pai manga haut bia nu haan laka tano nugu hala kanong u tamat tagu. Sen bia nu tange mon num ta nianga ma no nugu tultulai na langalanga.
MAT 8:9 Iau tange huo kanong iau mah, iau palai bia tikai i kis taar tano kinkinis na harkurai. Ma na tule ta tikai bia na gil haruatne ira uno sinisip. Hoing mah iau. Ari a mes diet la kure tar iau, ma iau la kure tar diet tiga matana ubane. Iau tange ta tiga nong, ‘Haan,’ io, na haan. Iau tange ta tiga mes, ‘Mai,’ io, na hanuat. Ma iau tange tano nugu tultulai, ‘Gil kan,’ ma na gil ie.”
MAT 8:10 Ma bia Jisas ga hadade huo, ga karup, ma ga tange hoken ta diet ing diet ga murmur hanii. “Muat nes baak! Iau pai ga nas tikai nalamin kai Israel ing i dadas no uno nurnur hoing iakan.
MAT 8:11 Iau tange hapalai ta muat bia a haleng diet na hanuat mekaia ta ira katon bakut ma diet na kis tano gil nian tika ma ne Abraham, Aisak, ma ne Iakop tano kinkinis na harkurai ma ra harbalaurai ta God.
MAT 8:12 Iesen diet ing audiet tutun iakano kinkinis na harkurai ma ra harbalaurai, God na se hasur diet uras tano kankado. Io, kaia, diet na susuah ma diet na hatagiris ira ngise diet.”
MAT 8:13 Io, ma Jisas ga tange um tano tamat na umri, “Nu haan! Na ngan hoing u nurnur taar huo.” Ma no uno tultulai ga langalanga ta iakano pakana bung at mon.
MAT 8:14 Ma namur Jisas ga haan laka tano ngasiane Pita. Ga nas no numune Pita ga noh taar ra ula suuh ma no malahau.
MAT 8:15 Io, Jisas ga palim no limana no hahin ma no malahau ga pataam sukun ie. Io, no hahin ga taman tut talur no suuh, gaam tur leh bia na tagure ira nian utane Jisas.
MAT 8:16 Bia gate matmatarahien um, ira matanaiabar diet ga kap hawaat haleng tunotuno ing ira sakana tanuo ga sosoha ta diet ukaia ho Jisas. Ma Jisas ga tule hasur se ira sakana tanuo ta diet ma ra nianga, ma ga halangalanga ira ina minaset.
MAT 8:17 Ga gil huo wara hatutun no nianga tano tangesot Aisaia i tange hoken, “Aie at ga kap leh ira audahat minaset, ma ga pusak leh ira audahat ngunngutaan.”
MAT 8:18 Bia Jisas ga nas ira tamat na matanaiabar ga tange ta diet bia, “Dahat na balos no taah kom uras tiga palpal.”
MAT 8:19 Sen tiga tena harausur ta ira harkurai tane Moses ga hanuat ukaia ho Jisas ma ga tange tana, “Tena harausur, iau ni murmur ugu ta ira katon bakut ing nu hanahaan kaia.”
MAT 8:20 Ma Jisas ga balui, gaam hinawasei bia, “Ira rakaia na paap, audiet mon munmun, ma ira maan aram ra mauho, a mon posi diet. Iesen bia Nong a Tunotunoi, taie ta ngasiana tus.”
MAT 8:21 Tiga mes mah, ta ira uno bulu na harausur, ga tange tana, “Nora Watong, nu haut se baak iau bia ni haan, nigi a bus no agu sus.”
MAT 8:22 Iesen Jisas ga hinawasei bia, “Nu murmur iau. Ma nu waak tar ira minaat bia diet na gil ira linge ing a mon minaat ine.”
MAT 8:23 Io, Jisas ga kawaas tano mon, diet ma ira uno bulu na harausur.
MAT 8:24 Ma tiga tamat na baiangin ga hanuat taar ta diet tano tamat na taah kom, gaam lagures mah. Ma ira pakananoh ga takap laka taar tano mon. Iesen Jisas ga kumkubaba.
MAT 8:25 Io, ira bulu na harausur diet ga haan, diet ga hangun ie, ma diet ga tange tana bia, “Watong, halon dahat! Dahat wara ruhruh!”
MAT 8:26 Ma Jisas ga balu diet, gaam tange bia, “Waak muat ra bunurut! Pai patpatuan ira numuat nurnur!” Io, Jisas ga taman tut, ga tigal hadadas no dadaip ma ira pakananoh, io, gaam manga malile harsakit.
MAT 8:27 Ma ira tunotuno diet ga karup ma diet ga hartiritiri ta diet hoken: “A mangana tunotuno ho bibih iakan? No dadaip ma ira pakananoh at mah, dir taram ie!”
MAT 8:28 Ma Jisas gate hanuat kaia tiga palpal tano tamat na taah kom, tano hanuo audiet ira Gadaren. Io, airuo tunaan ing ira sakana tanuo ga sosoha ta dir, dir ga hansur mekaia ra matana haat na haratur, ma dir ga harsomane Jisas. Dir ga manga gotgot, kaik, taie ta tiga nong pai haruat bia na haan sakit ta iakan nora ngaas.
MAT 8:29 Ma dir ga kakongane, “Nati God, waak u kis na gil mir! Pai no pakana bung baak bia nu gil hangungut mir!”
MAT 8:30 Io, ma hutet dahin ta diet, a haleng na bore diet ga iaiaan kaia.
MAT 8:31 Ma ira sakana tanuo, diet ga ianga marmaris tane Jisas hoken: “Ing bia nu tule hasur se mehet ta dir, nu tule halaka mehet taar ta ira bore.”
MAT 8:32 Jisas ga tange ta diet, “Muat haan!” Io, diet ga suur laah ta dir, diet gaam sosoha balik ta ira bore. Ma ira bore bakut diet ga hilau suur tano ula habo, diet gaam konga tano tamat na taah kom.
MAT 8:33 Ma ira ut na balaura bore diet ga hilau laah, diet gaam hinawas kaia tano taman. Diet ga hinawas ta ira linge bakut ing ga hanuat ta diet, tika ma ira iruo tunaan ing ira sakana tanuo ga sosoha ta dir.
MAT 8:34 Io, diet bakut ta iakan ra taman, diet ga hansur wara harsomane Jisas. Ma bia diet ga nas ie, diet ga ianga marmaris tana bia na haan sukun no udiet sibaan.
MAT 9:1 Jisas ga kawaas tano mon, gaam balos no tamat na taah kom ukaia tano uno pise na hala at.
MAT 9:2 Ma ari tunotuno diet ga kap hawaat tiga pengpeng tano kubena ukaia ho Jisas. Ma bia Jisas ga nas ira udiet nurnur ga tange tano pengpeng bia, “Tasigu, ira num magingin sakena i te pataam.”
MAT 9:3 Ma bia diet ga hadade hokaiken, ari ta diet ira tena harausur ta ira harkurai tane Moses, diet ga liklik kumaan ta ira bala diet bia, “Iakan ra tunotuno i tange hagahe God!”
MAT 9:4 Ma Jisas ga nunure kilam ira udiet lilik, gaam tange, “Waak muat lik kaike ra sakena!
MAT 9:5 Garum ta dir i malus? I malus bia ni tange bia ‘Ira num magingin sakena i te pataam,’ bia i malus bia ni tange, ‘Taman tut ma nugu haan’?
MAT 9:6 Iesen iau ni hapalaine muat bia iakano dadas auno Nong a Tunotunoi. Kaik i haruat wara suge se ira magingin sakena kai ra ula hanuo.” Io, ga tange tano pengpeng, “Taman tut, kap leh no kubem ma nu haan ukaia ra ngasiam.”
MAT 9:7 Io, no tunotuno ga tut ma ga haan laah ukaia ra ngasiana.
MAT 9:8 Ma bia ira tamat na matanaiabar diet ga nas iakan, diet ga manga urur tane God. Ma diet ga pirlat ie kanong ga tar ra mangana dadas hokaiken ta ira tunotuno.
MAT 9:9 Ma bia Jisas ga hanahaan mekaia, ga nas tiga tunaan, no hinsana Matiu, ga kis taar tano hala na kap takis. Jisas ga tange tana, “Mur iau!” Ma Matiu ga taman tut ma ga mur ie.
MAT 9:10 Namur, bia Jisas ma ira uno bulu na harausur diet ga iaiaan kaia ra hala tane Matiu, ma haleng mah ira ut na kap takis ma ira sakantangunguan diet ga kis tika mei.
MAT 9:11 Ma bia ira Parisi diet ga nas hokaike, diet ga tange ta ira uno bulu na harausur bia, “Pai bilai bia Jisas i iaiaan tika ma kaike ira ut na kap takis ma ira mes na sakana tunotuno mah.”
MAT 9:12 Ma bia ing Jisas ga hadade ing diet ga tangtange huo, ga tange bia, “Ing diet langalanga timaan, diet pai supi ra ut na harhalon, iesen diet sen diet maset.
MAT 9:13 Muat na haan ma muat na silhe tupas no kukuraina ta iakan ra nianga tane God nong di ga pakat ie hoken: ‘Iau sip bia muat na marse ira tunotuno. Ma ing bia muat pai gil huo, iau pai manga sip bia muat na hartabar uram ho iau.’” Ma Jisas ga tange balin, “Iau pa gale hanuat bia ni tatau muat ing muat lik bia a ut na takodas muat, iesen diet sen ing diet palai bia diet sakena.”
MAT 9:14 Namur um, ira bulu na harausur tane Jon no ut na baptais ga hanuat ma ga tiri Jisas hoken: “Wara bih kaik mehet ma ira Parisi, het la hahal tupas God, iesen ira num bulu na harausur, pataie?”
MAT 9:15 Jisas ga balu diet hoken ma ra nianga harharuat. “Hohe bia ira wasire tano nian na hinartola diet na suah bia no marawaan nong i sigar tola i kis tika taar baak ma diet? Diet pa na gil huo kanong diet laro bia i kis taar baak ma diet. Iesen ta tiga bung namur, no marawaan i sigar tola, da kap leh ie sukun diet. Io, ta iakano bung diet na hahal kanong diet tapunuk.
MAT 9:16 “Taie ta tiga nong bia na dungut pakur ta tiga sigar katona maal taar tiga tuarena. Bia na gil huo no katon na sigar maal na diris ie bia ing di gis ie. Ma bia na diris ie, na tamarumut laah sukun no tuarena ma no mauho na manga tamat balik um.
MAT 9:17 Taie ta tiga nong mah bia na pintare ira sigar wain pai lalat baak ta ira tuarena pala taah ing di ga gil ma ra pala me ma i te tapagas. Ing bia na gil huo, ira wain na parok ira pala taah ma na bureng. Kaik no wain na sakena ma ira paline mah. Taie. Na pintare no sigar wain pai lalat baak tano sigar pala taah at. Io, dir bakut, dir na kis talona.”
MAT 9:18 Ma bia Jisas ga tangtange baak kaike ira linge ta diet, tiga watong audiet ira Iudeia ga hanuat ukaia ho ie, gaam singa bukunkek, ma ga tange, “No nat na hahigu i te noh na minaat taar um. Iesen, nu mai, nu a bul no limaam tana, ma na lon.”
MAT 9:19 Ma Jisas ga taman tut tika ma ira uno bulu na harausur, diet gaam mur ie.
MAT 9:20 Io, tiga hahin kaia ga sam dadara a sangahul ma iruo na tinahon. Ga hanuat menamur u Jisas, gaam sigire no ngus na kiniasine.
MAT 9:21 Ga gil huo kanong ga lik hoken: “Bia ni sigire mon no kiniasine ni langalanga.”
MAT 9:22 Io, Jisas ga tahurus gaam nas ie ma ga tange tana bia, “Natigu, no num nurnur i te halon ugu.” Ma kaik at mon no uno minaset ga haan talur ie.
MAT 9:23 Ma bia Jisas ga haan laka tano ngasiana no watong, ga nas ira tamat na matanaiabar diet ga harharat ma no sunuah. Ma ari diet ga puhpuh ira tulaal hoing diet la gilgil ta ira minaat.
MAT 9:24 Io, ga tange ta diet, “Muat hansur! No hinasik pai maat. I kubaba mon.” Ma diet ga kurus balik ie.
MAT 9:25 Ma namur ta ing di gate hasur se ira matanaiabar, Jisas ga palim no limana no hinasik ma no hinasik ga taman tut.
MAT 9:26 Ma no hinhinawas uta iakan ga haan ta ira tamtaman bakut ta iakano hanuo.
MAT 9:27 Ma bia Jisas ga haan laah mekaia, airuo pulo dir ga mur ie. Ma dir ga kakonga bia, “Tubu Dawit, nu marse mir!”
MAT 9:28 Ma bia Jisas ga haan laka tiga hala, kaike ira iruo pulo dir ga haan tupas ie ma Jisas ga tiri dir hoken: “Mur nurnur tagu bia iau haruat wara halangalanga mur?” Dir ga balui, “Masa, Watong.”
MAT 9:29 Io, Jisas ga sigire ira mata dir, gaam tange, “Hoing at mon mur nurnur taar huo, na hanuat ta mur.”
MAT 9:30 Ma ira mata dir ga tapapos. Jisas ga hakatom hadadas dir bia, “Waak mur hinawase tikai ta iakan ra linge!”
MAT 9:31 Iesen dir ga hansur ma dir ga hinawas hurhurbit utane Jisas ta ira taman bakut ta iakano hanuo.
MAT 9:32 Ma bia dir ga hanhansur di ga lamus hawaat tiga tunotuno ukaia hone Jisas, a nguloi, kanong a sakana tanuo ga sosoha tana.
MAT 9:33 Ing Jisas gate tule hasur se no sakana tanuo tana, no ngulo ga ianga um. Ma no tamat na matanaiabar diet ga karup, diet gaam tange, “Dahat pa git nasnas ta linge hokaiken kai Israel.”
MAT 9:34 Iesen ira Parisi diet ga tange, “I tule hasur se ira sakana tanuo ma no dadas tano lualua audiet ira sakana tanuo.”
MAT 9:35 Jisas ga haan ta ira tamtaman ma ira hala na lotu bakut audiet ira Iudeia, gaam hausur ma ga harpir utano tahut na hinhinawas tano kinkinis na harkurai ma ra harbalaurai tane God. Ma ga halangalanga mah ira tunotuno ta ira udiet mangana minaset.
MAT 9:36 Ma bia ga nas ira tamat na matanaiabar ga manga marmaris ta diet kanong ari di ga hagahe diet ma taie ta harharahut ta diet. Ga nas bia diet ga ngan hoira sipsip ing taie ta ut na harbalaurai uta diet.
MAT 9:37 Io, ga tange ta ira uno bulu na harausur, “A haleng na nian i te matuko, iesen a bar hanawaan mon ira ut na kinkilaan.
MAT 9:38 Io, muat na saring nong auno ira matuko na nian, naga tule a mon ut na kinkilaan taar tano uno lalong.”
MAT 10:1 Io, bia Jisas ga tatau leh ira uno sangahul ma iruo na bulu na harausur ukaia ho ie, gaam tar no dadas ta diet waing diet naga harkurai ta ira sakana tanuo wara tultule hasur se diet ma waing diet naga halangalanga ira tunotuno ta ira mangana minaset.
MAT 10:2 Ira hinsa diet ira sangahul ma iruo apostolo ken. No luena, ne Saimon (nong di la kilkilam ie bia Pita) ma no tasine ne Andru; ne Jemes no nati Sebedi, ma no tasine ne Jon;
MAT 10:3 Pilip ma Batalomiu; Tomaas ma Matiu no ut na kap takis; Jemes no natine Alpias, ma Tadius;
MAT 10:4 ma tika ma diet, ne Saimon, nong di ga kilam ie bia no Selot, ma Iudas Iskariot nong na tar se Jisas.
MAT 10:5 Jisas ga tule harbasiane kaiken ra sangahul ma iruo, gaam tibe timaan taar ta diet hoken: “Waak muat haan nalamin ta diet ing diet pai Iudeia. Ma waak muat laka tiga taman audiet ira Samaria.
MAT 10:6 Sen bia muat na haan ta ira Israel ing diet hoira sipsip ing diet te haan baas wara rakaia.
MAT 10:7 Ma ing bia muat haan, muat na harharpir hoken: ‘No pakana bung tano kinkinis na harkurai ma ra harbalaurai ta God i te hutet.’
MAT 10:8 Muat na halangalanga ira ina minaset. Muat na halon ira minaat. Muat na halangalanga mah diet ing a sakana minaset i kis ta ira palatamai diet waing pa na tale bia da hahale habaling diet. Ma muat na tule hasur se ira sakana tanuo ta ira tunotuno. Muat te hatur kawase bia kaike ra dadas mekai ho iau. Muat pai kul. Io, muat na hartabar bia mah, ma pa da kul ta muat.
MAT 10:9 Waak muat kapkap ta kinewa tika ma muat.
MAT 10:10 Ma waak muat kap tiga raat tano numuat hinahaan. Muat pa na kap ta kiniasi muat bia ta pala lamaas na kaki muat wara harkios. Ma waak muat kap tiga mes na buko mah. Muat pa na gil huo kanong nong i papalim, i tahut bia da tar ira linge tana ing i supi.
MAT 10:11 “Bia muat na hanuat ta tiga taman bia pise na hala sa, muat na laka ma muat na nanaas ta tiga tahut na tunotuno kaia. Ma muat na kis tika mei tuk taar tano bung ing muat na haan laah baling.
MAT 10:12 Bia ing muat na haan laka tano hala ta iakano tunotuno, na tahut bia muat na sip bia a malum na kis tana.
MAT 10:13 Ma bia diet ta iakano hala, diet balaure timaan muat, muat na waak tar no numuat sinisip bia a malum na kis taar ta diet. Iesen bia ing taie, muat na lik luban se no num nianga na haridaan bia a malum pa na kis taar ta diet.
MAT 10:14 Ma bia pa di bale leh muat tiga taman, ma pa di taram mah ing muat pirpir, ing muat hanan laah sukun iakano taman bia iakano hala, muat na hatidir se tar ira pulungar ta ira lapara kaki muat. Muat na gil huo wara haminas ta diet bia diet te gil ra sakena ta muat.
MAT 10:15 Muat hadade timaan! Muat palai taar bia God na gil tiga tamat na harpidanau ta Sodom ma Gomora tano pakana bung na harkurai nong na hanuat namur. Iesen no harpidanau ta iakano taman nong pa na bale leh muat, na manga tamat ta ira udir harpidanau.
MAT 10:16 “Muat hadade timaan! Iau tultule muat hoira sipsip ukaia nalamin ta ira tamat na rakaia na paap. Io kaik, i tahut bia muat na keskes hoira taragau ma muat na tahut hoira bun.
MAT 10:17 Muat na balaure muat ta ira tunotuno. Da lamus tar muat ta ira subaan wara harkurai ma da hamidaak muat narakoman ta ira udiet hala na lotu.
MAT 10:18 Ma da lam tar muat bia muat na tur ra harkurai nalua ta ira ut na harkurai ma ira tamat na lualua na gil harkurai wara gaiegu. Ing bia diet gil huo muat na hinawas palai ta diet. Ma muat na hinawas palai ta diet mah, diet pai Iudeia.
MAT 10:19 Ma bia da palim kawase muat, waak muat ra nginarau bia asa ing muat na tange. Muat na tange at mon ira sa ing i hanuat ta muat ta iakano pakana bung, kanong pai numuat kaike ra nianga. No Tanuo meram naliu ho namuat Sus, iakano i iangianga.
MAT 10:21 “Ira tunaan diet na bale se ira tasi diet balin waing da bu bing diet. Ma ira adiet sus ira bulu, diet na gil mah huo ta ira nati diet. Ma ira bulu diet na manga patnau ta ira adiet sus ma ira pawasi diet waing da bu bing ira adiet sus ma ira pawasi diet.
MAT 10:22 Ira tunotuno bakut diet na malentakuane muat wara gaiegu, sen bia nong i tur dadas tuk ra hauhawatine, God na halon ie.
MAT 10:23 Ing bia diet na hagahe muat tiga taman, muat na hilau taar tiga mes na taman. Muat hadade baak! Muat pa na haan bakut baak ta ira tamtaman ta Israel, nalua bia ing Nong a Tunotunoi na hanuat.
MAT 10:24 “Tiga bulu na harausur pai tamat ta dir ma no uno tena harausur. Ma no tultulai pai tamat tano uno watong.
MAT 10:25 I haruat bia no bulu na harausur na ngan hoing no uno tena harausur, ma no tultulai hoing no uno watong. Bia di te kilam no watong tano huntunaan bia aie Belsebul, no sakana tanuo, io, ira uno subulo da manga kilam hagahe at um diet.
MAT 10:26 “Io, waak muat burte diet ira tunotuno, kanong asa ing i pupulus taar na tapalas, ma asa ing i susuhai taar na harapuasa.
MAT 10:27 Ma ing bia iau hinawase muat ta tiga linge ra kankado, muat na tange ie ra palai. Ma asa ing iau te hamurungo tar muat me, muat na kakongane ra matmataan na haruat.
MAT 10:28 Waak muat burte diet ing diet la bubu bing ira tunotuno mon, ma diet pai tale wara bubu bing ira tanuo muat. Iesen i tahut bia muat na burte ne kananam naliu nong i haruat bia na haliare no tunotuno tika ma no tanuana narako tano ula iaah.
MAT 10:29 A hansik na kinewa mon i haruat bia nu kul airuo seek. Iesen pai tale bia tikai na puko napu bia ing namuat Sus pai haut.
MAT 10:30 Hokaik mah muat. No amuat Sus i manga nunure muat. Ma i palai taar ta muat kanong i nunure mah ira winawas ta ira pakana hi muat ta ira ulu muat.
MAT 10:31 Io, waak muat burburut, kanong no numuat lon i manga tamat ta ira seek.
MAT 10:32 “Sige tikai i hinawas palai ra matmataan ta ira tunotuno bia auno iau, io, iau mah, ni hinawas palai utana ra matmataan ta Mama aram ra mawe.
MAT 10:33 Iesen sige tikai i harus ise iau ra matmataan ta ira tunotuno, io, iau mah, ni harus isei ra matmataan ta Mama aram ra mawe.
MAT 10:34 “Waak muat lik bia iau te hanuat bia a malum na kis harbasia ta muat. Taie. Iau pai hanuat hokaike. No nugu hinanuat no burena wara hinarubu.
MAT 10:35 Iau te hanuat bia ‘no tunaan na tur talur no ana sus, no hinasik mah, no pawasine, ma no hahin na tur talur no enana.
MAT 10:36 Ma no suk nana tiga tunotuno na hanuat mon mekaia tano uno hatatamaan at.’
MAT 10:37 “Bia sige tikai, no uno sinisip ta tiga mes i tamat ta ing i sip iau, io, pai haruat bia na mur iau. Pai tahut bia no uno sinisip tagu i hansik ta ing i sip no ana sus, no pawasine, no uno bulu na tunaan, no nat na hahine, bia sige mah. Pai haruat wara murmur iau.
MAT 10:38 Bia sige tikai pai pusak no uno kabai ma pai mur iau, pai haruat bia no nugu harwis ie.
MAT 10:39 Sige tikai i palim kawase no uno nilon, na ber tano uno nilon tutun. Ma sige tikai i bale se tar no uno nilon wara gaiegu, na hatur kawase no uno nilon tutun.
MAT 10:40 “Sige i bale leh muat, i bale leh iau. Ma sige i bale leh iau, i bale leh nong ga tule iau ukai.
MAT 10:41 Sige i bale leh tiga tangesot kanong aie tiga tangesot, na hatur kawase a hunena no uno mangason hoira tangesot. Ma sige i bale leh tiga ut na takodas kanong aie tiga ut na takodas, na hatur kawase a hunena no uno mangason hoira ut na takodas.
MAT 10:42 Io, muat hadade baak! Bia sige tikai i hamamo tiga maris ma tiga gingop na taah madahon kanong aie anugu tiga bulu na harausur, io, no hunena no uno mangason pa na panim laah.”
MAT 11:1 Bia ing Jisas gate hapataam no uno hausur ta ira uno sangahul ma iruo na bulu na harausur, ga haan laah makaia wara hausur ma harpir ta ira udiet tamtaman.
MAT 11:2 Ma ne Jon no ut na baptais ga kis ra hala na harpidanau. Ma bia ga hadade uta ira pinapalim tane Krais, Jon ga tule ira iruo ta ira uno bulu na harausur at bia dir na tiri Jisas hoken: “Augu nong mehet la kiskis kawasei bia na hanuat, bia mehet na kis kawase baak tiga mes?”
MAT 11:4 Io, Jisas ga balu dir, “Mur na tapukus, mur na hinawase ne Jon ing mur hadade ma ing mur nas, bia ira pulo diet nanaas, ira pengpeng diet hanahaan, diet ing diet sam ra sakana minaset ta ira palatamai diet, diet langalanga, ira talinga bau diet hadoda, ira minaat diet lon baling, ma no nianga na harharpir utano tahut na hinhinawas i haan tupas ira maris.
MAT 11:6 Diet daan ing pai iruo ira udiet lilik utagu.”
MAT 11:7 Bia ira iruo bulu na harausur tane Jon dir ga hanhan laah, Jisas ga hinawase no tamat na matanaiabar utane Jon hoken: “Bia muat ga haan ukaia ho Jon uram ra hanuo bia, muat ga lik bia muat na nes sa? Muat ga nunure bia a mangana tunotuno sa ie. Aie pai la kikios lilik hoira tingari ing i la iaioh hurbit tano dadaip.
MAT 11:8 Ma bia muat ga haan wara hanhadadei, muat ga nunure tar bia pai la singsigam ta bilai na kiniasine. Taie. Diet ing diet la singsigam ira bilai na maal ing ira matana i tamat, diet la kiskis ta ira hala na watong.
MAT 11:9 Sen bia ing muat ga haan wara nasnas ie, muat ga palai bia muat na nas tiga tangesot. I tutun. Iesen i tamat mah ta ira tangesot, kanong aie mon, ing di ga pakat ira nianga tane God utana, i tange hoken, ‘Iau ni tule no nugu ut na kap nianga menalua tano num hinanhuat, Nong na tagure no num ngaas.’
MAT 11:11 “Muat hadade baak! Jon no ut na baptais i tamat ta ira tunotuno bakut ing diet ga lon ta iakan ra ula hanuo. Iesen sige tiga nong ta muat i manga hansiksik narako tano kinkinis na harkurai ma ra harbalaurai ta God, i tamat tane Jon.
MAT 11:12 Tano bung Jon no ut na baptais ga haburen no uno harpir tuk taar katin, no kinkinis na harkurai ma ra harbalaurai ta God i te hanhanuat ma ra tamat na dadas. Ma ira ut na baso diet ras leh ie.
MAT 11:13 Io, ira harkurai tane Moses ma ira nianga ta ira tangesot, di ga hinhinawas uta iakano kinkinis na harkurai ma ra harbalaurai tuk taar tano pakana bung tane Jon.
MAT 11:14 Ma bia ing muat na nurnur ta kaike ra hinhinawas, io, na palai ta muat bia Jon aie mon ne Elaija nong dahat ga kis kawase no uno hinanuat.
MAT 11:15 Bia ing u haruat wara hadade kilam kaiken ra nugu nianga, nu taram ie.
MAT 11:16 “Bia iau ni ianga harharuat uta ira tunotuno katin, iau ni tange hohe? Io, ni hinawase muat. Diet hoing ira nat na bulu ing diet sip bia ira mes na mur diet. Diet kis hurlungen tiga katon ma diet hartawi harbasia ta diet hoken,
MAT 11:17 ‘Mehet pasar no kudu iesen muat pai mangata; Mehet inge marmaris iesen muat pai suah.’
MAT 11:18 Hokaike at mon diet pa ga guama mah tane Jon. Bia Jon ga hanuat, ga hahal ma pa ga mame ta wain. Kaik diet gaam tange hagahei bia, ‘A sakana tanuo i sosoha tana.’
MAT 11:19 Ma bia Nong a Tunotunoi ga hanuat, ga iaiaan ma ga mama wain. Ma diet ga tange utana bia, ‘A tabi kas na balana ma a ut na minom ie. Ma a hinsakana diet ira ut na kap takis ma ira mes na sakana tunotuno.” Io, Jisas ga tange baling bia, “Diet tange huo iesen iau tange bia ira magingin ta ira ut na mintot diet na hamines bia no mintot ta God i takodas.”
MAT 11:20 Ma Jisas ga tibe pinpin ira tamtaman ing gate gil ira haleng na dadas na gingilaan na kinarup kaia ho diet, kanong diet pa ga lilik pukus.
MAT 11:21 Ga tange hoken: “Maris ta muat me Korasin, na kabit muat! Maris mah ta muat me Betsaida, na kabit muat! Bia di gor gil ira dadas na gingilaan na kinarup kaia Tair ma Saidon, hoing iau te gil ta mur ira iruo taman, io, dir gor te lilik pukus. Dir gor te bul hagasiaan ira bilingana put na maal ma dir gor te mormor ma ra tahuna iaah wara haminas bia dir te lilik pukus. Iesen dir pa ga gil huo!
MAT 11:22 Muat hadade baak! God na gil tiga tamat na harkurai ta Tair ma Saidon tano pakana bung na harkurai nong na hanuat namur. Iesen na gil tiga tamat na harkurai sakit ta mur Korasin ma Betsaida.
MAT 11:23 Ma muat me Kapeneam, waak muat lat ira hinsa muat uram ra mawe! Muat na hansur uras napu ra subaan ta ira minaat! Bia daga gil ira dadas na gingilaan na kinarup kaia Sodom hoing iau te gil ta muat, io, gor kis taar at tuk taar katin.
MAT 11:24 Muat hadade baak! God na gil tiga tamat na harkurai ta Sodom tano pakana bung na harkurai nong na hanuat namur. Iesen na gil tiga tamat na harkurai sakit ta muat me Kapeneam.”
MAT 11:25 Ta iakano pakana bung Jisas ga tange bia, “Iau pirlat ugu Mama, a Watong aram ra mawe ma kai mah napu, kanong u ga suhe kaiken ra linge ta diet ira ut na mintota ma u ga hapuasne ta diet ing diet pai mintota.
MAT 11:26 Masa, Mama! U ga gil huo kanong u guama bia na ngan huo.
MAT 11:27 “Mama gate tar se bakut ira linge tagu. Taie ta nong pai nunure no Natine. Nana Sus sen mon. Ma taie ta nong pai nunure nana Sus. No Natine sen mon, ma diet mah, ing no Natine i wara hapuasnei ta diet.
MAT 11:28 Muat bakut ing i ubal muat ira tirih na kinakap, muat mai ukai ho iau, ma ni hasangeh muat.
MAT 11:29 Muat na kap usurane ira nugu hausur ma muat naga harausur ine, kanong iau tiga matien na tunotuno ma iau haan napu mah iau. Ma muat na hatur kawase ra sinangeh ta ira numuat kidilona nilon.
MAT 11:30 I tahut bia muat na gil huo kanong ira nugu hausur i malus ma pai dadas wara murmur iau.”
MAT 12:1 Tiga Bung na Sinangeh Jisas ma ira uno bulu na harausur diet ga hanan haan nalamin tano lalong na wit. Ma ira uno bulu na harausur diet gate taburungan, diet gaam rarus ari a pat na wit, ma diet gaam ienien.
MAT 12:2 Bia ira Parisi diet ga nes huo, diet ga tange tane Jisas, “Nas baak! Ira num bulu na harausur diet lake no harkurai utano Bung na Sinangeh.”
MAT 12:3 Ma Jisas ga tange ta diet, “Muat gate was tar ing Dawit ga gil, ing ga taburungan, diet ma ira uno harwis.
MAT 12:4 Io, Dawit ga laka tano hala tane God ma diet ma ira uno harwis diet ga ien no beret di gate tabar God mei. No harkurai i tange bia ira ut na pakila lotu sen mon, diet na ien iakano beret, ma ira mes taie.
MAT 12:5 Iesen muat gate was tar ira harkurai tane Moses. Ma kaike ra harkurai i haminas uta ira pinapalim ta ira ut na pakila lotu narakoman tano tamat na hala na lotu. Bia ing diet gil ira udiet pinapalim tano Bung na Sinangeh i hoing bia diet la kutkutus no harkurai tano Bung na Sinangeh. Iesen taie tiga nong na lik bia diet ronga.
MAT 12:6 Iau tange ta muat, tiga tunotuno kai i tamat tano tamat na hala na lotu.
MAT 12:7 No nianga tane God i tange bia, ‘Iau sip bia muat na marse ira tunotuno. Ma ing bia muat pai gil huo, iau pai manga sip bia muat na hartabar uram ho iau.’ Bia muat ira Parisi naga palai tano kukuraina ta iakan ra nianga, muat pa gor tibe pinpin diet ing diet pai ronga.
MAT 12:8 Io, Nong a Tunotunoi i kure no Bung na Sinangeh.”
MAT 12:9 Io, Jisas ga haan talur iakano katon, gaam haan laka taar tano udiet hala na lotu ira Iudeia.
MAT 12:10 Ma tiga tunotuno ga lima mat ga kis taar kaia. Ari diet ga kis taar mah kaia ing diet ga sip bia diet na tung Jisas. Io kaik, diet gaam tiri ie hoken: “I takodas bia da halangalanga ira ina minaset tano Bung na Sinangeh bia taie?”
MAT 12:11 Ma Jisas ga tange ta diet, “Bia tikai aun tiga me i puko suur tiga lulur ra Bung na Sinangeh, a tutun bia na haan at ma naga kap haut leh ie.
MAT 12:12 Muat palai bia tano sinisip ta God, muat manga tamat ta ira me. Io kaik, i takodas bia da pakile ira tahut na pinapalim tano Bung na Sinangeh.”
MAT 12:13 Ma Jisas ga tange um tano lima mat, “Tul se no limaam!” Ga tul sei, gaam tahut baling honong tiga mes na limana.
MAT 12:14 Iesen ira Parisi diet ga suur laah tano hala na lotu audiet ira Iudeia, diet gaam wawor tika bia diet na bu bing Jisas hohe.
MAT 12:15 Bia Jisas ga palai ta ira lilik ta diet ira Parisi, ga haan talur iakano taman. Ma a halengin diet ga mur ie, gaam halangalanga ira udiet ina minaset.
MAT 12:16 Ma ga hakatom diet bia diet pa na hinawase ta tiga nong bia sige ie.
MAT 12:17 Kaike ra linge ga hanuat wara hatutun no nianga nong God ga tange tano tangesot Aisaia hoken:
MAT 12:18 “No nugu tultulai iakan, nong iau ga gilamis ie. Iau manga sip ie ma iau kanakana tana. Iau ni bul no Tanuagu tana, ma na harharpir tano nugu taktakodas na lilik ta ira hunhuntunaan tano ula hanuo.
MAT 12:19 Pa na hargor ma tiga nong. Pa na kakonga haan. Pa na iangianga naliu ta ira matanaiabar ta ira ngaas.
MAT 12:20 Na marse ira maris, ma pa na hagahe ira malahahin, tuk taar bia no nugu takodas na lilik na tur nalua.
MAT 12:21 Ma ira hunhuntunaan tano ula hanuo, diet na so ira udiet lilik tana bia na tabar diet ma ira bilai na haridaan.”
MAT 12:22 Ma di ga lam hawaat tiga tunaan ukaia ho Jisas. A puloi ma a ngulo mah ie kanong a sakana tanuo gate sosoha tana. Ma Jisas ga halangalanga ie, kaik gaam ianga ma gaam nanaas mah.
MAT 12:23 Ma ira tunotuno diet ga karup ma diet ga tange bia, “Pai no tubu Dawit dak iakan?”
MAT 12:24 Iesen bia ira Parisi diet ga hadade huo, diet ga tange, “Jisas i haruat mon wara tultule hasur se ira sakana tanuo kanong Belsebul no watong audiet ira sakana tanuo i te tar ra dadas tana kaik gi gilgil huo.”
MAT 12:25 Io, Jisas ga nunure ira udiet lilik, gaam tange ta diet ira Parisi hoken: “Bia tiga huntunaan pai tur tika, ari a mes diet na hamau no taman. Ma bia tiga taman bia tiga hatatamaan, bia diet pai tur tika, diet pa na tur dadas.
MAT 12:26 Bia Sataan i tule hasur se habaling Sataan, no uno huntunaan pai tur tika. Io, na puko.
MAT 12:27 Muat tange bia iau tule hasur se ira sakana tanuo ma ra dadas ta Belsebul. Bia i tutun, hokaike mon mah muat. Ira numuat tunotuno diet la kapkap dadas mah mekaia ho Belsebul, wara tultule hasur se ira sakana tanuo. Io, ira numuat tunotuno at, diet haminas bia muat ronga kanong diet mah diet gil huo.
MAT 12:28 Ma bia muat ronga, ma iau tule hasur se ira sakana tanuo ma ra dadas tano Tanuo tane God, io, i haminas bia no pakana bung tano kinkinis na harkurai ma ra harbalaurai tane God i te haan tupas muat.
MAT 12:29 “Pataie ta tiga nong na laka tano ngasiana no ut na baso ma na kinau ta linge, ing bia pai huna kubus kawase ie. Ma namur um, na kikinau narako tano uno hala.
MAT 12:30 “Bia tikai pai no nugu harwis, i malok tagu. Ma bia tikai pai harahut iau, i hagahe iau.
MAT 12:31 Ma ta kaike ra numuat nianga, iau tange bia, God na lik luban se ira magingin sakena ta ira matanaiabar, ma bia diet na ianga hagahe ta tiga nong, na lik luban se iakano mah. Iesen nong i ianga hagahe no Halhaliana Tanuo, God pa na lik luban se iakano magingin.
MAT 12:32 Sige nong na ianga hagahe Nong a Tunotunoi, iakano sakena God na lik luban se. Iesen bia sige nong na ianga hagahe no Halhaliana Tanuo, God pa na lik luban se iakano magingin, ta iakan ra lon ma namur mah.
MAT 12:33 “Ira tintalen ta ira tunotuno i ngan mon hoira daha. Airuo mangana daha mon. Nong i bilai i huai ira bilai na hunena, ma nong i sakena i huai ira sakana hunena. Io kaik, da nas kilam ira daha ta ira hunue diet.
MAT 12:34 Muat hoira sakana sui. Pai haruat bia muat na tange ra bilai na nianga kanong a sakana tunotuno muat. Ma tikai na tange ira linge nong no balana i hung taar me.
MAT 12:35 No tahut na tunotuno i tange ira bilai na linge ing i hung taar tano uno nilon. Ma no sakana tunotuno i tange ira sakana linge ing i hung taar tano uno nilon mah.
MAT 12:36 Iesen, na tutun ta muat, bia ira kaba nianga bia bakut ing ira tunotuno diet tange, God na kure diet urie tano bung na harkurai.
MAT 12:37 Io, God na kure ugu ta ira num kaba nianga, ma na tange taam bia nu langalanga bia nu kap no num ngunngutaan tano harkurai.”
MAT 12:38 Ma namur, ari ira Parisi ma ari ira tena harausur ta ira harkurai tane Moses, diet ga tange tane Jisas bia, “Tena harausur, mehet sip bia nu pakile tiga hakilang wara haminas ta mehet bia God i tule ugu bia taie.”
MAT 12:39 Ma Jisas ga tange ta diet, “Ta kaiken ra bung, ira matanaiabar diet sip bia ni pakile tiga hakilang kanong diet la turtur talur God ma diet manga sakena. Iesen diet pa na nas ta hakilang. Diet na nas sen mon no hakilang ta Iona no tangesot.
MAT 12:40 Io, Iona ga kis tano balana no tamat na kirip aitul a bung. Hokaike at mon, Nong a Tunotunoi na kis tano balana no pise aitul a bung mah.
MAT 12:41 Tano bung na harkurai, ira matanaiabar me Ninewe diet na tibe pinpin muat kanong diet ga lilik pukus ta ira harpir ta Iona. Ma iau tange ta muat, tiga tunotuno i tamat ta dir ma ne Iona iakanik.
MAT 12:42 Ma ta iakano bung na harkurai, no tamat na hinagalam na gil harkurai me Siba mah na tibe pinpin muat kanong ga hanuat me tapaka sakit wara hadade no mintota gar ta Solomon. Ma iau tange ta muat, tiga tunotuno i tamat ta dir ma ne Solomon iakanik.
MAT 12:43 “Bia tiga sakana tanuo i suur laah tiga tunotuno, i haan hurbit ta ira mamasi na katon ta ira hanuo bia, wara sinangeh, sen bia i naanaas puo.
MAT 12:44 Io, i lik hoken: ‘Iau ni tapukus baal tano ngasiagu.’ Ma bia i hanuat ukaia, i nes bia taie tari kaia ma i taguro taar bia na laka baling.
MAT 12:45 Io i haan, i a lamus habaling a liman ma iruo na mes na sakana tanuo, diet manga sakena tana. Ma diet laka kaia ma diet gi kis um kaia. Ma no nilon um ta iakano tunotuno na manga sakena ta ing nalua. Na ngan mah huo ta ira sakana matanaiabar kaiken ra pakana bung.”
MAT 12:46 Ma bia Jisas ga iangianga baak tano tamat na matanaiabar, io, no pawasine ma ira tasine diet ga tur taar nataman. Diet ga sip bia diet na ianga mei.
MAT 12:47 Ma tikai ga hinawasei bia, “No pawasim ma ira tasim diet turtur nataman. Ma diet sip bia diet na wor ma augu.”
MAT 12:48 Ma Jisas balik ga balui, “Iau ni hinawase muat bia sige no pawasigu ma ira tasigu.”
MAT 12:49 Ga tulus ira uno bulu na harausur, ma gaam tange, “Diet kaiken ira pawasigu ma ira tasigu.
MAT 12:50 Io, bia sige tikai i la murmur ira sinisip tano agu Sus aram ra mawe, iakanong a tasigu, a hainigu, bia a pawasigui.”
MAT 13:1 Ta iakano bung at mon Jisas ga haan sukun no hala, io, ga kis taar ra gagena no tamat na taah kom.
MAT 13:2 Io, a tamat na matanaiabar diet ga haan hurlungen luhutanei, kaik Jisas gaam kis hut tiga mon kaia na taah. Ma ira matanaiabar diet ga kis tano gagen taah.
MAT 13:3 Io, ga hinawase diet a haleng na linge ma ra nianga harharuat ma ga tange, “Tiga ut na sinaso ga haan bia na so ira uno pat na daha.
MAT 13:4 Bia ga sese harbasiane ira pat na daha, tari ga puko taar tano ngaas ma ira maan diet ga ien bakut se.
MAT 13:5 Ari a patine mah ga puko taar ra ula haathaat ing pai haleng ira pise kaia. Diet ga kubur gasien kanong pai haleng ra pise.
MAT 13:6 Bia no kasakes ga taman tut huat ga rang bing diet kanong ira boli diet pa ga manga hansur.
MAT 13:7 Ari a patine mah ga puko taar nalamin ta ira kuikui kaik ga lul burung diet.
MAT 13:8 Ari a patine mah ga puko taar ta ira bilai na pise. Diet ga tamat ma diet ga huai. Ari ga huai aititul a sangahul na patine, ari a limliman ma tikai na sangahul na patine, ma ari a maarmaar.
MAT 13:9 Bia ing u haruat wara hadade kilam iakan, nu taram ie.”
MAT 13:10 Ma ira uno bulu na harausur diet ga haan tupas Jisas, diet gaam tiri ie bia, “Wara bih u la iangianga ta diet ira matanaiabar ma ra nianga harharuat?”
MAT 13:11 Io, ga balu diet, “Iau te hapuasne ta muat utano kinkinis na harkurai ma ra harbalaurai tane God. Ga susuhai nalua, sen iau te hapuasne um ie ta muat. Iesen iau pai le hapuasne ta diet kera mes.
MAT 13:12 Sige nong i palai ta ira nugu nianga, God na manga hapalaine tar tana, ma na manga palai sakit. Ma bia sige nong tada palpalai kana tana, God na kap se bakut at tana.
MAT 13:13 Iau ianga ma diet ma ra nianga harharuat kanong diet nasnas, sen bia diet pai nas kilam. Ma diet hanhadade, sen bia diet pai hadade kilam.
MAT 13:14 Io, kaik diet hatutun no nianga tano tangesot Aisaia i tange hoken, ‘Muat na hanhadade, sen bia muat pa na hadade kilam; Muat na nasnas, sen bia muat pa na nas kilam.
MAT 13:15 Na ngan huo kanong i dadas ira bala diet kaiken ra matanaiabar; diet malok bia diet na hadoda, ma diet malok mah bia diet na nas. Diet kabi nas kilam ma ira mata diet, ma diet kabi hadade kilam ma ira talinga diet, ma diet kabi nunure kilam ta ira tinge diet, ma diet naga tahurus ma nigi halon diet.’
MAT 13:16 Iesen muat daan kanong muat nas kilam ma ira mata muat, ma muat hadade kilam ma ira talinga muat.
MAT 13:17 Io, muat hadade baak! A haleng na tangesot ma haleng na ut na takodas mah, diet ga manga sip bia diet na nas kaiken muat te nas. Iesen diet pa ga nas. Ma diet ga manga sip mah bia diet na hadade kaiken muat te hadade. Iesen diet pa ga hadade.
MAT 13:18 “Io, muat na hadade no kukuraina tano nianga harharuat utano ut na sinaso. I hoken.
MAT 13:19 Sige nong i hadade no hinhinawas tano kinkinis na harkurai ma ra harbalaurai tane God, ma pai palai tana, no Ut na Sakena i hanuat ma i kap se ira nianga tano uno lilik. Na ngan ho iakan ra tunotuno i haruat ma kaike ira pat na daha ga puko taar tano ngaas.
MAT 13:20 Ma nong i hadade no hinhinawas ma i kap hagasiaan mon ma ra gungunuama na ngan ho iakan ra tunotuno i haruat ma kaike ga puko taar ra ula haathaat.
MAT 13:21 Iesen bia no nianga pai dorang, pai tur lawas. Ing bia ira haraubaal i ubal ie ma i kap ngunungut kanong gate kap no hinhinawas, i puko gasien laah.
MAT 13:22 Ma tiga mes na tunotuno na ngan ho kaike ga puko taar nalamin ta ira kuikui. Aie nong i hadade ira nianga, iesen i ngarngarau uta iakan ra nilon ma i manga sip ra kinkinis na watong. Kaiken ra linge na burung no hinhinawas ma pa na tahuat timaan.
MAT 13:23 Iesen na ngan ho nong i hadade kilam no hinhinawas ma kaike ga puko taar tano bilai na pise. Io, na tahuat timaan hoira pat na daha ing diet huai aititul a sangahul na patine, a limliman ma tikai na sangahul na patine, ma ari a maarmaar.”
MAT 13:24 Io, Jisas ga hinawase habaling diet tiga mes na nianga harharuat. “No kinkinis na harkurai ma ra harbalaurai ta God i haruat ma tiga tunotuno nong i so ira bilai na pat na daha tano uno lalong. Ma iakano mangana nian i naanaas haruat ma ira huro.
MAT 13:25 Io, bia ing diet bakut diet gate kubaba, no suk nana ga hanuat, gaam so ira hunena huro nalamin ta ira bilai na nian, ma gaam haan laah.
MAT 13:26 Ma ira tahut na nian ma ira huro diet ga kubur tika. Ma pa di ga haruat wara nes kilam no nian ma no huro. Sen bia diet gaam haburen puspusuan, kaik di gom tur leh wara nesnes kilam um ira huro.
MAT 13:27 “Io, ira tultulai tano ut na balaure lalong, diet ga haan tupas ie, diet gaam tange tana, ‘Numehet tamat, dahat ga so ira bilai na pat na daha kaia ta no num lalong. I ngan hohe bia sakana huro diet kubur balik mah kaia?’
MAT 13:28 “Ga balu diet bia, ‘Tikai nong i wara hinelar tagu ga gil kaike.’ “Ma ira tultulai diet ga tiri ie bia, ‘U sip bia mehet na ragat se?’
MAT 13:29 “Ga balu diet bia, ‘Taie, kanong muat kabi ragat pakur ma ira tahut na nian.
MAT 13:30 Waak tar dir bakut tuk bia ira bilai na nian na matuko. Ta iakano pakana bung iau ni tange ta ira ut na kinkilaan bia diet na lua na ragat se ira huro. Diet na pise ira huro wara sese tar ra ula iaah, ma ira tahut na nian diet na kil hulungen ukaia tano nugu suuh na nian.’
MAT 13:31 “Ma no kinkinis na harkurai ma ra harbalaurai ta God i haruat ma tiga pat na daha nong tiga tunotuno i soi tano uno lalong.
MAT 13:32 A tutun bia i hansik ta ira pat na daha bakut, iesen namur bia ing i te kubur i tamat ta ira matahu daha na nian dahat la saso. Kaik ira maan diet hanuat, diet gil ira posi diet ta ira katena.”
MAT 13:33 Ma Jisas ga hinawase habaling diet tiga nianga harharuat baal, gaam tange, “No kinkinis na harkurai ma ra harbalaurai ta God i haruat ma tiga hahin ga kap leh ira is, gom bul ie narako tano tamat na hunghungaan na palawa tuk gaam lalat bakut.”
MAT 13:34 Ta kaiken bakut ra linge Jisas ga hinawase no tamat na matanaiabar ma ra nianga harharuat. Ira pakaan bakut ing bia ga hinawase diet ta tiga linge ga ianga ta diet ma ra nianga harharuat.
MAT 13:35 Iakan ga hatutun no nianga no tangesot ga tange hoken, “Iau ni ianga ta diet ma ra nianga harharuat, ma iau ni hinawase diet ta ira linge ga susuhai taar merau laah tano hakhakisi tano ula hanuo.”
MAT 13:36 Jisas ga haan sukun um no tamat na matanaiabar, gaam haan laka tano hala. Ma ira uno bulu na harausur diet ga haan tupas ie, diet gaam tange tana, “Nu palas tar ta mehet no kukuraina no huro narako tano lalong.”
MAT 13:37 Ma Jisas ga balu diet, “Nong ga so ira bilai na pat na daha, aie Nong a Tunotunoi.
MAT 13:38 No lalong, iakan ra ula hanuo. Ira bilai na pat na daha, diet ira tunotuno ing diet na sola tano kinkinis na harkurai ma ra harbalaurai tane God. Ira huro, diet ira tunotuno gar tano Ut na Sakena.
MAT 13:39 No adiet suk nong ga so kaike ra huro, ne Sataan. No pakana bung na matmatuko, aie no hapataam tano ula hanuo. Ma ira ut na kinkilaan, diet ira angelo.
MAT 13:40 “No hapataam tano ula hanuo na ngan hoing di ragat se ira huro, di gi se tar ra ula iaah.
MAT 13:41 Nong a Tunotunoi na tule ira uno angelo ma diet na ragat se ira linge i hatahuat ira sakana magingin, ma ira ut na sakena mah.
MAT 13:42 Ma ira angelo diet na se tar diet tano mamahien tano ula iaah. Ta iakano katon diet na susuah ma diet na hatagirisne ira ngise diet.
MAT 13:43 Ma ta iakano pakana bung ira ut na takodas ing diet na kis tano kinkinis na harkurai ma ra harbalaurai tano adiet Sus, diet na paposa hoing no kasakes. Bia ing u haruat wara hadade kilam iakan, nu taram ie.
MAT 13:44 “Io, no kinkinis na harkurai ma ra harbalaurai ta God i haruat ma tiga tunotuno i nas leh tiga bilai na linge di ga suhe tar ie ta tiga katona pise. Ma no matana i manga tamat sakit. I suhe habaling ie, ma i haan laah ma ra gungunuama. Io, i suhurane bakut ira uno linge, i tapukus ukaia, ma i kul iakano katona pise.
MAT 13:45 “Ma no kinkinis na harkurai ma ra harbalaurai ta God i haruat mah tiga ut na kunukul i naanaas ta ira bilai na tulur a kalagi.
MAT 13:46 Ma bia i nas leh tiga bilai sakit, i suhurane bakut ira uno linge, ma i kul leh iakano tulur a kalagi.
MAT 13:47 “Ma no kinkinis na harkurai ma ra harbalaurai ta God i haruat baling ma tiga uben di ga sei tano tes. Diet gom soh ira mangmangana kirip tana.
MAT 13:48 Ma bia ga hung, diet ga sal haut ie uram ra wasasar. Diet gom kis wara gilamis leh ira bilai na kirip uram ta ira raat. Ma ira sakana kirip diet ga se.
MAT 13:49 No hapataam tano ula hanuo na ngan huo. Ira angelo diet na hanuat ma diet na gilamis harbasiane ira ut na takodas ma ira ut na sakena.
MAT 13:50 Ma diet na se ira ut na sakena uram narako tano mamahien na iaah. Ma kaia, diet na susuah ma diet na hatagirisne ira ngise diet.”
MAT 13:51 Ma Jisas ga tiri, “Muat palai ta kaike ira linge?” Ma diet ga balui bia, “Masa!”
MAT 13:52 Io, ga tange ta diet, “Io, kaiken, ira kaba tena harausur ta ira harkurai tane Moses ing diet te kap usurane mah ira harausur tano kinkinis na harkurai ma ra harbalaurai tane God, diet haruat ma tiga watong nong i kure no uno huntunaan. Ma iakano watong na palai bia na hausur no uno huntunaan ma ira tuarena magingin ing diet bilai, ma ira sigarine mah ing diet bilai.”
MAT 13:53 Io, bia Jisas ga hapataam ira uno nianga harharuat, ga haan laah mekaia.
MAT 13:54 Ma ga hanuat tano uno taman at. Io, ga tur leh wara hausur diet ira matanaiabar narako tano udiet hala na lotu. Ma diet ga manga karup tana, diet gaam tiri, “Iakan ra tunotuno i kap kaiken ra mintota ma kaiken ra dadas na gingilaan na kinarup meh? Dahat pai palai tun at ta dahin!
MAT 13:55 Aie mon no natine no ut na pakila hala. Ma no pawasine, ne Maria. Ma ira tasine, ne Jemes, Iosep, Simon, ma Iudas.
MAT 13:56 Ma ira hainine bakut ken ma dahat. Io, i kap tun at meh kaiken ra linge?”
MAT 13:57 Ma diet ga malok se ie. Ma Jisas ga tange ta diet, “I tutun sakit bia muat na ru ira tangesot ta ira mes na taman. Iesen muat pa na ru ie bia aie mekai, ma bia muat mon tiga hatatamaan.”
MAT 13:58 Ma ga gil mon a bar nong ta ira dadas na gingilaan na kinarup kaia kanong diet pa ga nurnur tana.
MAT 14:1 Ta iakano pakana bung Herot, nong ga kure tar no hanuo Galili, ga hadade ra hinhinawas uta Jisas.
MAT 14:2 Ma ga tange ta ira uno tultulai bia, “Jon no ut na baptais mon iakano ne Jisas. I te tut hut sukun no minaat ma i lon baling. Iakaiken no burena gi pakpakile ira dadas na gingilaan na kinarup.”
MAT 14:3 Io, Herot no tamat na lualua na gil harkurai ga tange huo kanong nalua gate tule ari tunotuno wara palpalim kawase ne Jon. Diet ga kubus ie, diet gaam bul ie ra hala na harpidanau wara gaiene Herodies no hahin tane Herot. Io, nalua Herodies ga tole ta baak Pilip, no tasine Herot.
MAT 14:4 Ma Herot ga bul Jon ra hala na harpidanau kanong Jon git tangtange tana bia, “Pai takodas bia u te tole Herodies!”
MAT 14:5 Io, Herot ga wara bubu bing ne Jon iesen ga burte ira matanaiabar kanong diet git kilkilam ie bia a tangesot.
MAT 14:6 Io, ma namur, Herot ga gil tiga nian na hakilang tano uno bung na kinakaha. Ma no nat na hahine Herodies ga hamangate Herot ma ira uno wasire. Ma ga manga haguama Herot kaik Herot gaam gil tiga kunubus, gaam sasalim bia na tabar ie ma ta sa ing i sip.
MAT 14:8 Ma no pawasine, Herodies, ga sip bia da bu bing Jon, kaik ga pir tar no nat na hahine bia na saring no ulu Jon. Io, no bulahin ga tange tane Herot no tamat na lualua na gil harkurai bia, “Iau sip bia nu tar no ulune Jon no ut na baptais tagu!”
MAT 14:9 Bia Herot ga hadadei ga tapunuk iesen ga lik hadadas ira uno hasasalim ta ira matmataan ta ira wasire.
MAT 14:10 Ma ga hartula bia da gil huo. Ma di ga kut dako leh no ulune Jon mekaia ra hala na harpidanau.
MAT 14:11 Di ga kap hawaat no uluno, di gaam tar ie tano bulahin. Ma no bulahin balik ga tar ie tano pawasine Herodies.
MAT 14:12 Ma ira bulu na harausur tane Jon, diet ga kap leh no palatamaine Jon ma diet gaam bus ie. Namur um diet ga haan, diet gaam hinawase Jisas.
MAT 14:13 Ma bia Jisas ga hadade bia ing Jon gate maat, ga haan laah mekaia tika ma ira uno bulu na harausur. Ma diet ga haan sen laah tiga mon uram tiga katon i kapkapana. Iesen bia ira matanaiabar diet ga hadade huo, diet ga haan laah mekaia ta ira audiet taman. Ma diet ga mur ngaas laah wara murmur Jisas.
MAT 14:14 Bia Jisas ga hansot ga nas a haleng na matanaiabar sakit, gaam manga marmaris uta diet, ma gaam halangalanga ira ina minaset.
MAT 14:15 Bia gate matmatarahien, ira uno bulu na harausur diet ga hanuat taar tana ma diet ga tange, “I te manga matmatarahien tuai um ma dahat kis taar um ra hurlamin. Tule se ira matanaiabar waing diet na haan ta ira taman i hutet, ma diet na kul adiet ta nian.”
MAT 14:16 Io, Jisas ga balu diet, “Diet na haan laah warah? Muat at, muat na tabar diet.”
MAT 14:17 Ma diet ga balui, “A liman na katona beret ma airuo kirip mon kanik.”
MAT 14:18 Jisas ga tange ta diet, “Muat kap hawaat ukai ho iau.”
MAT 14:19 Io, Jisas ga tange ta ira haleng na matanaiabar bia diet na kis napu. Ga kap ira liman na katona beret ma ira iruo kirip, gaam tadeng uram ra mawe, ma gaam sasaring uta ira nian. Ga pidik ira beret, gaam tar ta ira bulu na harausur, ma diet gaam palau ira matanaiabar.
MAT 14:20 Diet bakut diet ga iaan, diet gaam hahos. Ma ira bulu na harausur diet ga sangan hahungi ra sangahul ma iruo na kalot ta ira subana diet.
MAT 14:21 Io, di ga was sen leh mon ira tunaan nalamin ta ira matanaiabar bakut ing diet ga iaan. Ma ira tunaan diet ga haruat ma ra liman na arip. Pa di ga was um ira hahin ma ira nat na bulu.
MAT 14:22 Ta iakano bung at mon Jisas ga tange ta ira uno bulu na harausur bia diet na lua tana tiga mon urau tiga palpal tano tamat na taah kom, ma aie baak na tule se ira matanaiabar.
MAT 14:23 Bia gate tule se ira matanaiabar, ga hanut sen uram ra uladih wara sinasaring. Bia gate bungbung tuai um, aie sen um ga kis taar.
MAT 14:24 Iesen no mon tuai um ga haan tapaka tano manse. Ma ira pakananoh ga sese hurbitanei kanong ira uno bulu na harausur diet ga haluso harso ma no dadaip.
MAT 14:25 Io, kaia dak ra aihat na kareka ra malaan Jisas ga hanuat taar ta diet. Ga hanan haan mon tano ula taah.
MAT 14:26 Bia ira uno bulu na harausur diet ga nas ie ga hanan haan tano ula taah diet ga manga burut, diet gaam tangtange bia, “A tanuo ie!” Ma diet ga kup na bunurut.
MAT 14:27 Iesen habir at mon Jisas ga habalaraan diet ma ga tange, “Iau mon! Waak muat ra bunurut!”
MAT 14:28 Ma Pita ga balui, “Nugu Watong, ing bia augu tutun at, nu tange tagu bia ni haan ukatiga ho ugu tano ula taah.”
MAT 14:29 Ma Jisas ga tange, “Kaia! Mai!” Io, Pita ga hansur tano mon, gom haan tano ula taah ukaia ho Jisas.
MAT 14:30 Iesen bia ga nas no dadaip, ga burut, gaam wara ruhruh. Io, ga kakonga ukaia ho Jisas bia, “Nugu Watong, halon iau!”
MAT 14:31 Kaik at mon Jisas ga sasangaha, gom palim leh no limana. Ma ga tange tane Pita, “Pai patpatuan no num nurnuruan. Waak u lilik iriruo.”
MAT 14:32 Ma bia dir ga karwas laka taar tano mon, io, no dadaip ga pataam hatika.
MAT 14:33 Ma diet bakut kaia tano mon, diet ga lotu tupas ie, diet gaam tange bia, “Augu tun at mon no Nati God!”
MAT 14:34 Bia diet ga balos no tamat na taah kom, diet gaam hanuat taar tano hanuo Genasaret.
MAT 14:35 Ma bia ira tunotuno mekaia, diet ga nas kilam Jisas, diet ga hilau harbasia taar ta ira taman hutet. Ma diet ga kap hawaat ira ina minaset ukaia ho Jisas.
MAT 14:36 Ma diet ga ianga marmaris tane Jisas bia ira ina minaset diet na sigire mon no ngus na kiniasine. Ma diet bakut ing diet ga sigirei, ira udiet minaset ga pataam.
MAT 15:1 Io, ari a Parisi ma ari a tena harausur ta ira harkurai tane Moses diet ga hanuat meram Ierusalem, diet gaam haan ukaia ho Jisas, ma diet gaam tange bia, “Pai tahut bia ira num bulu na harausur diet hagahe ira magingin ira hintubu dahat ga tar ta dahat. Nes baak! Diet pai taptapir nalua bia diet na iaan!”
MAT 15:3 Ma Jisas ga tange balik ta diet, “Pai tahut bia muat lake ira harkurai tane God wara gaiena ira magingin ira hintubu muat.
MAT 15:4 Iau te tange huo ta muat kanong God ga tange bia, ‘Ru no am sus ma no pawasim,’ ma, ‘Sige i ianga hagahe no ana sus bia no pawasine, muat na bu bing ie.’
MAT 15:5 Iesen muat la tangtange bia tiga tunotuno auno mon linge i tale bia na harahut no ana sus ma no pawasine me, i tale mah bia na tange hoken: ‘Iau te tar iakan ukaia ho God. Pai tale bia ni tar ie taam wara harahut ugu.’
MAT 15:6 Ma bia ing muat lik huo, i nanaas bia muat tingtigal iakano tunotuno bia pa na ruru at um nora ana sus. Bia muat tange huo, muat kap se ira dadas ta ira nianga tane God wara gaiena ira magingin ta ira hintubu muat.
MAT 15:7 A ut na harababo muat! No tangesot Aisaia ga tange ra tutun uta muat hoken bia ga pakat iakan ra nianga ta God. Ma God ga tange bia,
MAT 15:8 ‘Iakan ra matanaiabar diet ru iau ma ira ha diet mon, iesen ira udiet nilon, diet pai tar tagu.
MAT 15:9 Diet la lotu bia haan mon tagu, kanong ira harkurai tane Moses ira tunotuno mon i bul, diet hausur balik ine hoing bia ta God.’”
MAT 15:10 Ma Jisas ga tatau hulungan no tamat na matanaiabar, gaam tange ta diet, “Muat hadade! Iau sip bia muat na palai!
MAT 15:11 Ira mangana linge tikai i ien pai tale bia na hagawei kaik no tunotuno na sakena. Sen bia ira linge i hansur meram narako tana na hagawei naga sakena.”
MAT 15:12 Io, ira uno bulu na harausur diet ga haan tupas um ie, diet gaam tirii, “U palai taar bia ira Parisi diet bala ngungut bia diet hadade ing u tange?”
MAT 15:13 Ma Jisas ga balu diet hoken: “Diet haruat ma ira linge i kubur narako tano lalong ing no agu Sus kenam ra mawe pa ga so. Da ragat bakut se diet.
MAT 15:14 Waak se um diet! Diet haruat ma ira lualua diet pulo. Ma bia tiga pulo i sal tiga pulo mah, dir bakut, dir na puko ta tiga tungtung.”
MAT 15:15 Ma Pita ga tange tana, “Nu palas no kukuraina no nianga harharuat ta mehet.”
MAT 15:16 Io, Jisas ga tange ta diet, “Ira matanaiabar diet pai palai, ma hohe bia muat mah, muat pai palai?
MAT 15:17 Muat pai palai at baak bia ira nian ing muat la ienien, i la haan taar ta ira bala muat ma na hansur baling?
MAT 15:18 Iesen ira linge tikai na tange, i suur laah tano magirana. Ma kaike, kaik, na hagawe tiga tunotuno.
MAT 15:19 I tutun, kanong meram tano magirana ira sakena i hanuat. Ma kaike ira sakena hoken. Na mon sakana lilik ma na harubu bingibing bia mah. Ma na noh ma tiga hahin gar na mes. Ma diet ira lala diet na gil huo mah. Na kikinau, na hinawas harabota, ma na ianga hagahe tikai.
MAT 15:20 Kaiken ra sakana magingin, diet hagahe no tunotuno gi sakena. Iesen bia tikai pa na taptapir nalua bia na iaan, taie ta linge. Pa na hagahe no uno nilon.”
MAT 15:21 Io, Jisas ga haan laah mekaia ma ga haan tano hanuo ta ira iruo pise na hala, Tair ma ne Saidon.
MAT 15:22 Ma tiga hahin mekaia ta iakano hanuo, tano hun me Kena, ma pai Iudeia ie, ga hanuat taar tane Jisas. Io, ga hanuat, gaam kakongane hoken: “Nora Watong, no tubu Dawit, nu marse iau! A sakana tanuo i te sosoha tano nugu hinasik ma i manga haliare hagahei.”
MAT 15:23 Ma Jisas pa ga balui. Kaik, ira uno bulu na harausur diet ga hanuat ukaia ho ie, diet gaam tange bia, “Nu tule se no hahin kanong i kakonga mur hani dahat.”
MAT 15:24 Io, Jisas ga tange ta diet, “Nagu Sus ga tule sen mon iau uta muat ira Iudeia, ing muat ngan hoira sipsip diet rara. Pa ga tule iau ta diet ira mes na tunotuno ing diet pai Iudeia.”
MAT 15:25 Ma no hahin ga hanuat, gaam singa bukunkek menalua tana, ma gaam tange, “Nora Watong, iau sip bia nu harahut iau!”
MAT 15:26 Io, Jisas ga tange tana, “Pai tahut bia da se tabar ira paap ma ira nian adiet ira bulu.”
MAT 15:27 Ma no hahin ga tange, “Masa, nora Watong! Iesen ira paap at mon mah, diet la ienien ira petpetine ing i la pukpuko suur meram tano suuh na nian ta ira hunuge diet.”
MAT 15:28 Io, Jisas ga balui bia, “Augu tiga hahin i manga dadas no num nurnuruan. Nu hatur kawase hoing u te saring.” Io, ta iakano pakana bung at mon no uno hinasik ga langalanga um.
MAT 15:29 Jisas ga haan laah mekaia, gaam hanan haan tano gagena no tamat na taah kom Galili. Io, ga hanut uram ra uladih, gaam a kis kaia.
MAT 15:30 Ma ira tamat na matanaiabar sakit diet ga hanuat ukaia ho ie, diet gaam kap hawaat ira pengpeng, ira pulo, ma ari mah ing ga maat ira tamtabe diet. Diet ga lam hawaat mah ira ngulo ma a haleng na mes na ina minaset. Diet ga bul ira ina minaset kaia ra matmataan ta Jisas ma Jisas ga halangalanga diet.
MAT 15:31 Ma ira matanaiabar diet ga karup ing diet ga nas ira ngulo diet ga ianga, ira pengpeng diet ga hanahaan, ira pulo diet ga nanaas, ma diet ing diet la kaikaiau diet ga langalanga mah. Ma ira matanaiabar diet ga pirlat no God gar na Israel.
MAT 15:32 Io, Jisas ga tatau leh ira uno bulu na harausur, gaam tange ta diet, “Iau manga marmaris uta iakan ra matanaiabar. Diet te kis tika ma iau aitul a bung ma taie um adiet ta nian. Iau pai sip bia ni tule se diet ma diet taburungan taar. Diet kabi a maat kalokalo wara diet tari na ngaas.
MAT 15:33 Ma ira uno bulu na harausur diet ga tange balik tana bia, “Dahat pai tale bia dahat na silihe leh ta nian i haruat ma iakan ra tamat na matanaiabar sakit. A hurlamin kaiken.”
MAT 15:34 Ma Jisas ga tiri diet bia, “Aise na katona beret kaike ho muat?” Diet ga balui, “A liman ma iruo na katon ma a bar hana nat na kirip.”
MAT 15:35 Io, Jisas ga tange ta ira matanaiabar bia diet na kis napu.
MAT 15:36 Ma bia gate kap leh ira liman ma iruo na katona beret ma ira kirip mah, ma gate tanga tahut taar tane God urie, ga pidik. Io, ga tar ta ira uno bulu na harausur ma diet ga palau ira matanaiabar.
MAT 15:37 Ira matanaiabar bakut diet ga iaan, diet gaam hahos. Namur ira bulu na harausur diet ga hahungi a liman ma iruo na kalot ma ira subana diet.
MAT 15:38 Di ga was sen leh mon ira tunaan nalamin ta ira matanaiabar bakut ing diet ga iaan. Ma ira tunaan diet ga haruat ma ra ihat na arip. Pa di ga was um ira hahin ma ira nat na bulu.
MAT 15:39 Io, Jisas ga tule se ira tamat na matanaiabar, gaam kawaas tano mon, ma gaam balos no tamat na taah kom ukaia tano hanuo Magadan.
MAT 16:1 Io, ari a Parisi ma ra Sadiusi diet ga hanuat ukaia ho Jisas bia diet na hakunii uta ira uno gingilaan. Kaik, diet gaam saring ie bia na pakile tiga hakilang wara haminas bia God ga tule ie bia taie.
MAT 16:2 Ma Jisas ga tange balik ta diet hoken: “Bia i te matmatarahien, ma a bilai na melsur, muat tange hoken bia, ‘A bilai na bung marakan.’
MAT 16:3 Ma bia muat la nas bia i boh no hanuo ra malaan, muat la tangtange bia, ‘Na bata.’ Muat petlaar bia muat na nas kilam ira kikios tano hanuo. Iesen muat pai tale bia muat na nes kilam balik ira hakilang i hanuat ta kaiken ra pakana bung.
MAT 16:4 Ma ta kaiken ra bung, ira matanaiabar diet sip bia ni pakile tiga hakilang kanong diet la turtur talur God ma diet manga sakena. Iesen diet pa na nas ta hakilang. Diet na nas sen mon no hakilang ta Iona no tangesot.” Io, Jisas um ga haan talur diet.
MAT 16:5 Io, bia diet ga balos no tamat na taah kom, ira bulu na harausur diet ga luban bia diet na kap ta beret.
MAT 16:6 Ma Jisas ga hakatom diet ma tiga nianga harharuat utano is nong i la sinimuan gasien tano beret gi la lalat. Kaik, ga tange bia, “Muat na balaure muat ta ira is audiet ira Parisi ma ira Sadiusi.”
MAT 16:7 Io, ira uno bulu na harausur diet ga iangianga baling at ta diet ma diet gaam tange, “I tange hokaike kanong dahat pai kap ta beret.”
MAT 16:8 Io, Jisas ga nunure kilam ira linge diet ga tangtange, kaik, gaam tange ta diet bia, “Pai patpatuan ira numuat nurnuruan. Iau tapunuk bia muat tange harbasiane ta muat bia taie ta beret.
MAT 16:9 Muat pai palai at baak? Hohe bia muat te luban ira liman na katona beret ing ga haruat ma liman na arip na matanaiabar? Aise ira kalot na subana nian muat ga hahungi?
MAT 16:10 Ma muat te luban mah ira liman ma iruo na katona beret ing ga haruat ma aihat na arip na matanaiabar? Aise ira kalot na subana nian baling muat ga hahungi?
MAT 16:11 Hohe tutun at bia muat pai palai bia iau pai iangianga uta ira beret tutun? Iesen iau hakatom muat tano is ta ira Parisi ma ira Sadiusi, bia muat na balaure muat tana.”
MAT 16:12 Kaik at mon diet ga palai bia pai hakatom diet tano is tutun nong di gil beret mei. Iesen ga hinawase diet bia diet na balaure diet ta ira harausur ta ira Parisi ma ira Sadiusi.
MAT 16:13 Jisas ga hanuat ukaia tano hanuo tano pise na hala Kaisaria Pilipai. Ma ga tiri ira uno bulu na harausur bia, “Ira matanaiabar diet la tangtange bia Nong a Tunotunoi, sige ie?”
MAT 16:14 Diet ga tange, “Ari diet tange bia Jon no ut na baptais, ari bia tikai ta ira tangesot—Elaija dak, bia Ieremia, bia ta tiga nong ta ira mes na tangesot.”
MAT 16:15 Ma Jisas ga tiri diet, “Ma muat, muat tange bia iau sige?”
MAT 16:16 Pita ga balui ma ga tange, “Augu no Mesaia, no Natine no lilona God.”
MAT 16:17 Ma Jisas ga tange balik tana, “U daan, Saimon no natine Iona, kanong a tunotuno pai haminas kaike taam, iesen nagu Sus aram ra mawe at.
MAT 16:18 Ma iau tange taam, Pita, (ma no kukuraina bia tiga haat,) bia iau ni hatur no nugu lotu naliu ta iakan ra haat. Ma no dadas tano minaat pa na pari ie.
MAT 16:19 Iau ni tar taam ira dadas tano kinkinis na harkurai ma ra harbalaurai ta God. Asa ing u tigal kai napu, God at mah aram ra mawe na hadadas tar ie taam. Ma asa ing u haut ie kai napu, God na hadadas tar ie taam mah.”
MAT 16:20 Io, Jisas ga hakatom ira uno bulu na harausur bia waak diet hinawase tikai bia aie mon no Mesaia.
MAT 16:21 Ta iakano pakana bung Jisas ga tur leh bia na hapalai ira uno bulu na harausur hoken: “Iau ni hanut at uram Ierusalem. Ma ira tamat, ira tamat na ut na pakila lotu, ma ira tena harausur ta ira harkurai tane Moses, diet na hangungut iau ma ra haleng na haraubaal. Ma diet na bu bing iau, iesen tano aitul a bung namur, iau ni tut hut baling.”
MAT 16:22 Io, ne Pita ga lamus hasisingen ie, gaam bor ie, gaam tange bia, “Taie tun at, nugu Watong! Pa da gil taam hokaike!”
MAT 16:23 Jisas ga tahurus, gaam tange tane Pita bia, “Haan laah um, Sataan. Waak u turtur bat iau. Pau lik ira sinisip ta God. U liklik ira sinisip gar na tunotuno mon.”
MAT 16:24 Io, Jisas ga tange ta ira uno bulu na harausur bia, “Bia ing u wara murmur iau, na maat ira num sinisip ta iakan ra ula hanuo. Nu pusak no num kabai ma nu mur iau.
MAT 16:25 Iau tange huo kanong sige ta tiga nong i lik hatamat sen mon no uno nilon, pa na hatur kawase no uno nilon tutun. Iesen bia sige nong i bale tar no uno nilon wara gaiegu, na hatur kawase um no uno nilon tutun.
MAT 16:26 Ma na hatahutne tiga nong hohe, bia na tinane iakan ra ula hanuo bakut sen bia na ber tano uno nilon tutun? Io kaik, tiga nong na kul pukus no uno nilon tutun ma ra sa? Taie at!
MAT 16:27 Io, i tutun bia Nong a Tunotunoi na hanuat ma no minamar tano ana Sus, diet tika ma ira uno angelo. Ma na balu pukus tar ta ira tunotuno tikatikai, haruat ma ira udiet tintalen.
MAT 16:28 Muat hadade baak! Tari ta muat kaiken pa na maat tuk taar bia muat na nas ie Nong a Tunotunoi, i hananuat ma no uno tamat na kinkinis na harkurai ma ra harbalaurai.”
MAT 17:1 Ma bia a liman ma tikai na bung gate pataam, Jisas ga lamus Pita, Jemes ma Jon dir tasin, uram ra tamat na uladih ing pataie tari kaia.
MAT 17:2 Ma Jisas ga ries ra matmataan ta dal. No matmataan tana ga pilpilakas hono kasakes. Ma ira kiniasine ga manga murarang mah.
MAT 17:3 Ma Moses ma ne Elaija dir ga harapuasa taar ta diet, dal gaam wawor ma ne Jisas.
MAT 17:4 Ma Pita ga tange tane Jisas, “Nugu Watong, i bilai ing dahat kis kai. Bia ing u sip, iau ni gil aitul a palpalih, tikai anum, tikai tane Moses, ma tikai mah tane Elaija.”
MAT 17:5 Ma bia ga iangianga baak, io, tiga pilpilakas na bahuto ga pulus diet, ma ra ingana tiga nong ga ianga huat narako tano bahuto, gaam tange, “No Natigu iakan nong iau manga sip ie, ma iau kanakana sakit tana. Mutal na hadadei!”
MAT 17:6 Ma bia ira bulu na harausur dal ga hadade huo, dal ga suhe ira matmataan ta dal napu tano pise ma ra bunurut.
MAT 17:7 Iesen Jisas ga hanuat, gaam sigire dal, ma gaam tange bia, “Mutal tut. Waak mutal burut.”
MAT 17:8 Ma bia dal ga tadeng, dal pa ga nas um tari—Jisas sen um.
MAT 17:9 Io, bia dal ga hanansur meram ra uladih, Jisas ga tange hadadas ta dal bia, “Waak mutal hinawase ta tiga nong ta iakan ra linge mutal te nes tar ie. Mutal na hinawas um namur bia Nong a Tunotunoi na tut baling sukun ra minaat.”
MAT 17:10 Ma bia ira uno bulu na harausur dal ga hadade bia ga tange huo, dal ga tiri ie bia, “Wara bih ira tena harausur ta ira harkurai tane Moses diet la tangtange bia no tangesot Elaija na huna hanuat?”
MAT 17:11 Jisas ga balu dal ma ga tange bia, “Io, a tutun, diet ira tena harausur diet tange bia Elaija na hanuat ma na gil hatakodasne habaling ira linge bakut.
MAT 17:12 Iesen iau hinawase mutal, tikai hoing Elaija gate hanuat taar! Ma pa di ga nunure kilam ie, iesen di ga gil haruatne ira udiet sakana sinisip utana. Ma diet na tar ra ngunngutaan mah huo ta iakano Nong a Tunotunoi.”
MAT 17:13 Io, ira bulu na harausur dal ga palai um bia ga hinhinawase dal utane Jon no ut na baptais.
MAT 17:14 Io, bia Jisas ma dal ga hanuat taar tano tamat na matanaiabar, tiga tunaan ga hanuat taar tana. Ga singa bukunkek menalua tana, gaam tange, “Nora Watong, iau sip bia nu marse no natigu tunaan. Aie tiga ngokngok ma i la manga ububal hagahei, kaik gi la pukpuko taar tano iaah bia tano taah.
MAT 17:16 Iau kap tar ie ta ira num bulu na harausur sen diet pai haruat wara halangalanga ie.”
MAT 17:17 Io, Jisas ga tange balik tana bia, “Maris! Muat ira sakana matanaiabar katin, muat pai nurnur warah? Pa ni kis lawas tika ma muat kai napu wara harharahut muat waing muat naga nurnur. Io, muat lamus no bulu ukai ho iau!”
MAT 17:18 Jisas ga bor no sakana tanuo, io, no sakana tanuo ga haan sukun ie. Ma kaik at mon no bulu ga langalanga.
MAT 17:19 Ma namur, ira uno bulu na harausur diet ga hanuat ukai ho Jisas, diet gaam tiri kumaan ie hoken: “Warah mehet pai haruat wara tule hasur se no sakana tanuo?”
MAT 17:20 Io, Jisas ga balu diet, gaam tange, “Muat pai haruat kanong i manga natine ira numuat nurnuruan. Muat hadade baak! Bia ira numuat nurnuruan i natine haruat ma tiga pat na daha i manga hansik, io, i tale bia muat na tange ta iakan ra uladih bia, ‘Kakari mekai uras!’ ma na kakari. Taie ta linge ing muat pai haruat bia muat na gil.
MAT 17:21 [A sinasaring sen mon ma ra hinahal i haruat bia na hasur se ira mangana sakana tanuo hokaike.]”
MAT 17:22 Ma bia diet ga kis hurlungen kaia Galili, Jisas ga tange ta diet bia, “Da tule tar ie Nong a Tunotunoi ta ira tunotuno.
MAT 17:23 Ma diet na ubu bing ie. Ma ta itul a bung na pataam na tut hut baling.” Ma ira bulu na harausur diet ga manga tapunuk.
MAT 17:24 Ma Jisas ma ira uno bulu na harausur diet ga hanuat taar Kapeneam. Ma ari tunotuno diet ga hanahaan wara kap hartabar tano tamat na hala na lotu. Ma diet ga hanuat taar mah tane Pita. Ma diet ga tange tana bia, “I tutun bia no numuat tena harausur mah i la kulkul no takis tano tamat na hala na lotu?”
MAT 17:25 Ma Pita ga balu diet, “Masa!” Ma bia Pita ga haan laka tano ngasiana, Jisas ga huna tange tana bia, “U lik hohe, Saimon? Ira tamat na lualua na gil harkurai ta iakan ra ula hanuo diet la kapkap ira takis mekaia hoira udiet huntunaan bia ta ira mes?”
MAT 17:26 Pita ga balui ma ga tange, “Makatiga ta ira mes.” Ma Jisas ga tange tana, “Kaik, iakano huntunaan at i la langalanga wara kul takis.
MAT 17:27 Iesen i tahut bia dar pa na hangungut ira bala diet. Io, nu hansur uras tano taah kom ma nu se hasur no num wanwan. Ma no luena kirip nong nu wanei, nu pagas no hana, ma nu nas leh tiga kinewa nong i haruat wara kulkul ira udar takis. Nu kap leh ie ma nu tar ie ta diet utano udar takis.”
MAT 18:1 Ma ta iakano pakana bung ira bulu na harausur diet ga haan tupas Jisas, diet gaam tiri ie bia, “Sige i tamat sakit tano kinkinis na harkurai ma ra harbalaurai tane God?”
MAT 18:2 Io, Jisas ga tatau tiga nat na bulu, gaam hatur ie nalamin ta diet.
MAT 18:3 Ma ga tange ta diet bia, “Muat hadade baak! Ing bia muat pa na kikios hoing ra nat na bulu, pai tale tun at bia muat na sola tano kinkinis na harkurai ma ra harbalaurai tane God.
MAT 18:4 Io kaik, ing bia sige i gil hansiksik habaling ie ho iakan ra nat na bulu, a tamat sakit ie tano kinkinis na harkurai ma ra harbalaurai tane God.
MAT 18:5 Ing bia sige ta nong i bale leh tiga nat na bulu ho iakan, kanong i nunure bia iau sip huo, io, i bale leh iau mah.
MAT 18:6 “Nas diet ken ra hansik na bulu. Diet nurnur tagu. Ma bia tikai na wara harango tikai ta diet, gaar tahut tana bia da tigal bat ie. Na tahut bia da huna kubus tiga tamat na haat sakit tano kadonana ma da hakangoi aram ra tingaan tes, kabi harango tikai ma na kap ra tamat na harpidanau namur.
MAT 18:7 Maris, a dadas na harkurai na kabit diet ta iakan ra ula hanuo ta ira linge na harwalaam ing na harongane ira matanaiabar! I tutun bia ira linge na harwalaam hokaike na hanuat, iesen maris tano tunotuno nong na gil kaike ra harwalaam.
MAT 18:8 Kap se ira sakana lilik ing na harango no num nilon. Tiga malalar hoken. Bia tiga limaam, bia kakim i harongane ugu, nu kutus isei. I tahut dahin bia nu sola tano nilon tutun ma ra kum ugu. Sen bia pai manga tahut bia di ise ugu ma ira iruo limaam bia kakim bakut ukaia tano ula iaah nong pai la matmaat.
MAT 18:9 Tiga malalar mah hoken. Bia tiga mataam i harongane ugu, nu luar sei. I tahut dahin bia nu sola tano nilon tutun ma ra matakasa ugu. Sen bia pai manga tahut bia da ise ugu ma ira iruo mataam bakut ukaia tano ula iaah kaia ra Hel.
MAT 18:10 “Nas baak! Waak muat nas hanapu ta tiga nong ta diet kaiken ra nat na bulu ma ira hinasik kanong i tutun sakit ira udiet kaba angelo aram ra mawe diet la turtur hait tano matmataan tano agu Sus aram ra mawe.
MAT 18:11 [Io, Nong a Tunotunoi ga hanuat wara halon diet ing diet rara.]
MAT 18:12 “Muat hadade baak! Ing bia tiga tunotuno auno tiga maar na sipsip, ma tiga nong ta diet i rara, i tutun sakit bia na waak tar ira liman ma ihat na sangahul ma liman ma ihat aram ra uladih, ma na haan wara ninaas ta nong i rara.
MAT 18:13 Muat hadade timaan! Bia i te nas leh ie, i manga guama sakit ta iakanong i rara ta diet ira liman ma ihat na sangahul ma liman ma ihat ing diet pa ga haan sasesir.
MAT 18:14 Hokaik at mon mah, namuat Sus aram ra mawe pai sip bia tiga nong ta diet kaiken ra nat na bulu ma ira hinasik diet na rara.
MAT 18:15 Bia tiga hinsakaam i gil ronga tar taam, nu haan ma nu tange haminas tana no uno sakana magingin i te gil tar taam. Iesen mur sen mon, mur na wor kumaan. Ma ing bia i hadade ugu, u te lam pukus no hinsakaam.
MAT 18:16 Iesen bia ing pai sip bia na hadade ugu, nu lamus leh mah tikai bia airuo mes na hinsakaam wara nesnes ie. Io kaik, hoing no nianga tane God i tange, airuo bia aitul a tunotuno dal na hinhinawas palai wara hatutun no linge.
MAT 18:17 Ma bia pa na hadade mah mutal, nu hinawas ta iakan ra linge tano lotu bakut. Ma bia pa na hadade mah muat tano lotu, io, muat pa na harbalaan tika mei hoing muat pa na harbalaan tika ma ira hisikoma ma ira sakana tunotuno ing diet pai nurnur tane God.
MAT 18:18 “Muat hadade baak! Asa ing muat tigal kai napu, God at mah aram ra mawe na hadadas tar ie ta muat. Ma asa ing muat haut urie kai napu, God na hadadas tar ie ta muat mah.
MAT 18:19 “Iau tange habaling ta muat, bia ing airuo ta muat kai napu dir haut tika wa tiga linge ma dir saring ie, io, nagu Sus aram ra mawe na gil huo ta dir.
MAT 18:20 Io kaik, bia airuo bia aitul dal kis hurlungen taar wara gaiegu, iau mah ke nalamin ta dal.”
MAT 18:21 Io, Pita ga haan tupas um ne Jisas, gaam tiri ie bia, “Nugu Watong, aise pakaan tutun at ing iau ni lik luban se ira ronga ing no hinsakagu i gil tagu? A liman ma iruo na pakaan i haruat?”
MAT 18:22 Ma Jisas ga balui, “Iau tange taam bia, pa na liman ma iruo na pakaan, iesen na liman ma iruo na sangahul na pakaan ma pata hapataamnei.
MAT 18:23 “Io kaik, no kinkinis na harkurai ma ra harbalaurai tane God i haruat ma tiga tamat na lualua na gil harkurai nong ga sip bia na hatakodasne ira tinakum taar ta ira uno tultulai.
MAT 18:24 Ma bia ga hatahun wara hatakodasne ira tinakum, di ga lamus hawaat tiga tunotuno. Ma iakano tunotuno ga kap leh a tamat na kinewa sakit ing pa ga haruat tun at wara balbalu pukus.
MAT 18:25 Ma bia pa ga haruat bia na balu pukus ira uno tinakum, no watong ga hartula bia da suhurane ta ira mes na watong, aie, ma no uno hahin, ma ira natine mah hoing ira maris na tultulai. Ma ga hartula mah bia da suhurane ira uno linge bakut. Ma ira mata dal tamaan ma ira matana ira uno linge da balu pukus um no uno tinakum me.
MAT 18:26 “Ma iakano tultulai ga singa bukunkek menalua tana, gaam ianga marmaris tana bia, ‘Iau sip bia nu matien ta mon baak tagu. Iau ni balu pukus ira kinewa bakut.’
MAT 18:27 Io, no uno watong ga marsei, gaam lik luban se no uno tinakum, ma gaam waak se tar ie.
MAT 18:28 “Iesen bia iakano tultulai ga haan laah, gaam nas tupas auno tiga harwis nong gate kap leh a bar kinewa tana. Io, ga palim kawasei, gaam puspus bing ie. Ma ga tange tana bia, ‘Balu pukus ing u gate kap leh tagu!’
MAT 18:29 “Ma no uno harwis ga singa bukunkek menalua tana, ma ga ianga marmaris tana bia, ‘Iau sip bia nu matien ta mon baak tagu. Iau ni balu pukus ira kinewa bakut.’
MAT 18:30 “Iesen pa ga sip huo. Ga haan laah balik mei, gaam halakai tano hala na harpidanau tuk bia na balu pukus bakut ira uno tinakum.
MAT 18:31 Ma bia ira mes na tultulai diet ga nes huo, diet ga manga bala ngungut taar tana. Io, diet ga hinawase no udiet watong uta iakano linge.
MAT 18:32 “Kaik, no watong ga tatau leh ie, gaam tange tana, ‘Augu tiga sakana tultulai! Iau te lik luban se ira num tinakum bakut kanong u ga ianga marmaris taar tagu.
MAT 18:33 Pai tale mah bia nu marse no num harwis hoing iau ga marse ugu?’
MAT 18:34 Ma no watong ga ngalngaluan sakit tana, gom tar se tar ie ta diet ing diet la harngunngutaan kaia ra hala na harpidanau, tuk bia naga balu bakut ira uno tinakum.
MAT 18:35 “Hokaike at mon mah, nagu Sus aram ra mawe na gil ta muat tikatikai, ing bia muat pa na lik luban se ira ronga ing ira hinsaka muat diet gil ta muat.”
MAT 19:1 Ma bia ing Jisas gate hapataam nianga uta kaiken ra linge, ga haan laah mekaia Galili, gaam haan taar tano hanuo Iudeia ma ga balos urau tiga palpal tano taah Ioridaan.
MAT 19:2 Ma ira tamat na matanaiabar sakit diet ga mur ie, gaam halangalanga ira udiet ina minaset kaia.
MAT 19:3 Ari Parisi diet ga hanuat wara walwalar Jisas bia pa naga balu timaan no udiet tiniri. Diet ga tiri ie hoken: “I takodas ta ira udahat harkurai bia tiga tunaan na se no uno hahin, ma taie mon ta burena?”
MAT 19:4 Ma Jisas ga balu diet, gaam tange, “Muat gate was tar utano hatahun tano ula hanuo. Ma ta iakano pakana bung Nong ga Hakisi ira tunotuno, ga gil hoken. Ga pakile dir bia tikai na tunaan ma tikai na hahin.
MAT 19:5 Ma aie ga tange mah hoken: ‘Ta iakan no burena no tunaan naga hansukun no ana sus ma no pawasine, ma dir na kis tika ma no uno hahin. Ma dir na tikai mon.’
MAT 19:6 Io, dir pa na airuo baling. Dir na tikai. Waak tiga tunotuno mon i palas harbasiane iakan ra linge, kanong God gate kubus pakur tar dir.”
MAT 19:7 Diet ga tiri habaling ie bia, “Bia ing hokaiken, wara bih balik bia Moses ga hartula, bia ing tikai na se no uno hahin, na pakat ta nianga palai utano udir palas tinolen ma na tar ie tano uno hahin?”
MAT 19:8 Jisas ga balu diet, gaam tange hoken: “Moses ga waak se tar ta muat bia muat na sa hahin kanong a dadasine ira bala muat. Iesen pa ga ngan huo merau ra hatahun tano hakhakisi.
MAT 19:9 Iau tange ta muat, bia tikai i se no uno hahin nong pai noh tika ma tiga mes, ma i tole tiga mes na hahin, i te gil ronga kanong i te noh tika ma tiga mes, pai unoi.”
MAT 19:10 Ma ira uno bulu na harausur diet ga tange tana, “Maris! Ing bia ira udiet kinkinis na tinolen i ngan huo, io, i tahut bia pa da tola.”
MAT 19:11 Jisas ga tange ta diet, “Pai ira tunotuno bakut ing diet haruat bia diet na mur iakan ra harausur. Diet sen mon ing God i tar ie ta diet.
MAT 19:12 Ari a burena bia ari tunotuno diet pai la tatola. Ari diet pai tola kanong di ga kaha diet huo. Ari, kanong di ga lup diet, diet pa na tola. Ma ari diet pai tola kanong diet manga lik tano kinkinis na harkurai ma ra harbalaurai ta God. Sige tikai i haruat bia na hatur kawase iakan ra harausur, i tahut bia na gil huo.”
MAT 19:13 Io, ari nat na bulu di ga lamus tar diet tane Jisas bia na bul ira limana tar ta diet ma na sasaring uta diet. Iesen ira uno bulu na harausur diet ga bor diet ing ga lamus hawaat ira nat na bulu.
MAT 19:14 Ma Jisas ga tange bia, “Muat waak se ira bulu ukai ho iau. Muat pa na tur bat diet kanong no kinkinis na harkurai ma ra harbalaurai ta God, audiet ie ira mangana nat na bulu hokaiken.”
MAT 19:15 Ma bia ga bul ira limana taar ta diet, ga haan laah mekaia.
MAT 19:16 Io, tiga tunaan ga hanuat ukaia ho Jisas, gaam tange, “Tena harausur, a bilai na pinapalim sa ing iau ni gil waing iau ni hatur kawase no nilon pa nale pataam?”
MAT 19:17 Ma Jisas ga tange tana, “Warah tutun at u tiri iau ta nong i tahut? Tikai sen mon nong i tahut. Bia ing u sip bia nu sola tano nilon tutun, nu mur ira kaba harkurai tane God.”
MAT 19:18 No tunaan ga tiri, “Gahim?” Ma Jisas ga balui hoken: “‘Waak u harubu bingibing bia. Waak u noh tika ma tikai pai a num ie. Waak u kikinau. Waak u hinawas harabota uta tikai.
MAT 19:19 Nu ru naam sus ma no pawasim. Ma nu marse tikai hoing u marse habaling at ugu.’”
MAT 19:20 Ma no marawaan ga tange, “Iau la murmur kaike bakut. Asa baak um iau supi?”
MAT 19:21 Jisas ga balui, ga tange tana bia, “Ing u sip bia nu takodas harsakit, io, nu haan, ma nu suhurane ira num inton ma ira num linge bakut, ma nu tar ira kinewa ta ira maris waing nugu hatur kawase ira tamat na hartabar aram naliu. Namur, nu mai ma nu mur iau.”
MAT 19:22 Bia no marawaan ga hadade hokaiken, ga haan laah ma ra but na tapunuk, kanong a tamat na watong ie.
MAT 19:23 Ma Jisas ga tange um ta ira uno bulu na harausur bia, “Muat hadade baak! I manga dadas bia tiga watong na sola tano kinkinis na harkurai ma ra harbalaurai ta God.
MAT 19:24 Iau wara hadadas habaling tar muat. Ing bia tiga watong i sip bia na sola tano kinkinis na harkurai ma ra harbalaurai tane God, na manga dadas tana. I malus ta dir bia tiga kamel na hurungo tano matana nil na dudungut bia tiga watong na sola ta iakano kinkinis na harkurai ma ra harbalaurai ta God.”
MAT 19:25 Ma bia ira uno bulu na harausur diet ga hadade hokaiken, diet gaam manga karup, diet gaam tange tana bia, “Bia hokaike, i nanaas bia taie tikai pai haruat wara kapkap no nilon tutun. Naka?”
MAT 19:26 Ma Jisas ga nas diet ma gaam tange, “Ira tunotuno mon, diet pai haruat uta iakan. Iesen God i haruat wara pakpakile ira linge bakut.”
MAT 19:27 Io, Pita ga tange tana, “Nas, ira numehet linge bakut, het te hansukun tar wara murmur ugu. Asa um kana ing het na hatur kawase?”
MAT 19:28 Ma Jisas ga tange ta diet, “Muat hadade baak! No sigar kinkinis na hanuat ma Nong a Tunotunoi na kis tano uno tamat na kinkinis na minamar. Ma muat mah, muat na kis ta ira sangahul ma iruo na kinkinis na harkurai ma muat na kure ira sangahul ma iruo na huntunaan me Israel.
MAT 19:29 Ma sige tikai i haan sukun no uno taman, ira tasine, ira hainine, na ana sus, no pawasine, ira natine, bia ira uno lalong wara utagu, io, na hatur kawase leh a maarmaar na pakaan baling ta ing nalua. Ma na kap mah no nilon nong pa nale pataam.
MAT 19:30 Ma haleng ing diet watong kaiken, diet na maris namur. Ma diet ira maris kaiken, diet na watong namur.
MAT 20:1 “No kinkinis na harkurai ma ra harbalaurai ta God i haruat ma iakan. Tiga tunotuno, auno tiga lalong. Ma ga haan ra malaan at wara sahsahur tari tunotuno wara pinapalim tano uno lalong.
MAT 20:2 Ma ga kukubus tika ma ira ut na pinapalim bia na kul mon diet tiga kinewa tano kidilona bung. Io, ga tule se tar diet ukaia tano lalong.
MAT 20:3 “Ma bia ga hutet ra liman ma ihat na pakana bung, ga haan mah, gom nas leh ari a tunotuno diet ga tur bia taar tano subaan diet la hanhanuat hurlungen kaia.
MAT 20:4 Ma ga tange ta diet bia, ‘Muat mah, muat na haan uram ra nugu lalong ma muat na papalim. Ma iau ni kul hatakodasne muat.’
MAT 20:5 Kaik, diet gaam haan. Ma ra tingana kasakes, ma ra hutet aitul a pakana bung ra matarahien, ga gil mah huo.
MAT 20:6 Ma bia gate hutet ra liman na pakana bung ra matarahien, ga haan laah, gom nas leh ari a mes mah kana, diet ga turtur haan. Gaam tiri diet bia, ‘Warah tutun at muat turtur bia haan ta iakan ra kidilona bung? Pai tahut bia muat gil huo.’
MAT 20:7 “Diet ga balui bia, ‘Kanong taie tikai pai sahur mehet.’ Io, ga tange ta diet, ‘Muat mah, muat na haan uram ra nugu lalong.’
MAT 20:8 “Ma bia gate hutet bia na bung, nong auno no lalong ga tange tano uno ut na harbalaurai na lalong hoken: ‘Tatau ira ut na pinapalim ma nu kul diet. Nu haburen ta diet ing diet hanuat namur. Ma nu hapataam um ta ing diet huna hanuat.’
MAT 20:9 “Io, ira ut na pinapalim ing ga sahur diet ra liman na pakana bung ra matarahien, diet ga hanuat, diet gom kap leh tiga kinewa tikatikai.
MAT 20:10 Ma bia ira ut na pinapalim ing ga huna sahur diet ga hanuat, diet ga lik bia diet na kap ta tamat. Iesen diet mah, diet ga kap tiga kinewa tikatikai.
MAT 20:11 Ma bia diet ga kap leh ie, diet ga ngurungur taar tano tunaan auno no lalong.
MAT 20:12 Diet ga tange bia, ‘Kaike ira tunaan ing u sahur diet namur tun, diet papalim mon makatiga ra liman tuk taar kaiken ra liman ma tikai. Ma u kul haruatne mon mehet bakut. Iesen mehet ing het lua, het kap ra ngunngutaan tano pinapalim bakut ma no mamahien mah tano kasakes.’
MAT 20:13 “Iesen ga balu tiga nong ta diet, gaam tange, ‘Tasigu, iau pai sakana hahin taam. U nunure bia dar haut tika bia nu kap tiga kinewa mon.
MAT 20:14 Kap leh no num harkul, ma nu haan. Iau sip bia ni kul nong iau sahur ie namur tun haruat mon ma ugu.
MAT 20:15 I tutun sakit bia iau at, iau kure tar bia ni gil hohe ta ira nugu kinewa. U lilik sakasaka taar ta diet ing diet mur kanong iau tiga bala na tunotuno?’”
MAT 20:16 Ma Jisas ga tange bia, “Io, diet ing diet tur mur, diet na tur lua. Ma ira tur lua, diet na mur.”
MAT 20:17 Ma bia Jisas ga hanhananhut uram Ierusalem, ga lamus hasisingen ira sangahul ma iruo na bulu na harausur, gaam tange ta diet hoken: “Muat hadade timaan. Dahat hananut um uram Ierusalem ma da tar se um Nong a Tunotunoi ta ira tamat na ut na pakila lotu ma ta ira tena harausur ta ira harkurai tane Moses. Ma diet na kure bia da bu bing ie.
MAT 20:19 Kaik, diet na tar sei ta ira luma diet ing diet pai Iudeia. Ma diet na hasakit sakasaka tana, diet na hadangat ie, ma diet na tut ie tano ula kabai. Ma aitul a bung na sakit, na tut hut baling.”
MAT 20:20 Namur, no pawasi dir ira iruo nati Sebedi ga hanuat ukaia ho Jisas ma ira iruo natine. Io, ga singa bukunkek menalua tana wara sasaring Jisas tiga linge.
MAT 20:21 Io, Jisas ga tiri ie, “U sip ra sa?” Ga balu Jisas bia, “Iau sip bia nu hartula bia kaiken ra iruo natigu, dir na kis ta ira iruo palpal taam narako tano num kinkinis na tamat na lualua na gil harkurai. Tikai na kis tano kata na limaam, ma tikai tano kesa na limaam.”
MAT 20:22 Ma Jisas ga tange ta dal bia, “Mutal pai palai tano linge mutal tirtiri utana. Mur tale bia mur na kap no ngunungut nong iau ni kap ie?” Dir ga balui, “Mir tale.”
MAT 20:23 Ma Jisas ga tange ta dir, “I tutun bia mur na kap no ngunungut nong iau ni kap ie. Sen bia tano kinkinis tano kata na limagu bia tano kesa na limagu, pai no nugu linge wara tartar. Iakano linge tano agu Sus. Ma na tar ie ta diet ing gate tagure haruatne ira audiet kinkinis.”
MAT 20:24 Bia ira sangahul na bulu na harausur diet ga hadade huo, diet ga ngalngaluan taar ta dir tasin.
MAT 20:25 Io, Jisas ga tatau hulungan diet ma gaam tange, “Muat palai ta diet ing diet pai Iudeia. Ira udiet lualua, diet la hatamat habaling diet ma diet la hanapu ira mes. Ma ira audiet watong la manga kurkure diet.
MAT 20:26 Iesen bia pai haruat huo ta muat. Bia tikai i sip bia na tamat nalamin ta muat, na tultulai ta muat.
MAT 20:27 Ma bia tikai i sip bia na tur lua nalamin ta muat, na manga tultulai ta muat.
MAT 20:28 Muat na gil huo kanong Nong a Tunotunoi ga hanuat bia na gil huo mah. Pa ga hanuat bia diet naga tultulai tana. Ga hanuat bia na tultulai ta diet, ma na tar no uno nilon hoing tiga but na kunkulaan wara kulkul halangalanga ra haleng.”
MAT 20:29 Ma bia Jisas ma ira uno bulu na harausur diet ga hanan sukun no pise na hala Ieriko, a tamat na matanaiabar sakit ga mur ie.
MAT 20:30 Ma airuo pulo dir ga kis taar tano ra gagena ngaas. Ma bia dir ga hadade bia Jisas i hanahaan sakit, dir ga kakonga bia, “Nora Watong, augu no tubu Dawit, nu marse mir!”
MAT 20:31 Io, no tamat na matanaiabar diet ga bor dir bia dir na kis matien. Iesen iakano ra pakaan, dir ga manga kakonga naliu balik, dir gaam tange, “Nora Watong, no tubu Dawit, nu marse mir!”
MAT 20:32 Ma Jisas ga tur, gaam tatau dir, ma gaam tiri dir bia, “Mur sip bia iau ni gil hohe ta mur?”
MAT 20:33 Dir ga tange tana, “Nora Watong, mir sip bia mir na nanaas.”
MAT 20:34 Ma Jisas ga manga marmaris uta dir, gaam palim ira mata dir. Kaik at mon dir ga nanaas, io, dir gaam mur ie.
MAT 21:1 Io, ma diet ga hanuat taar ta Betpasi kaia hutet Ierusalem tano uladih Olip. Io, Jisas ga tule airuo ta ira uno bulu na harausur ma ga tange ta dir, “Mur na haan taar tano taman menalua ta mur. Io, kaik at mon mur na nas leh tiga donki di te kubus kawase tar ie. Ma tiga natine mah kana tika mei. Mur na lapus dir, io, mur na sal hawaat dir ukai ho iau.
MAT 21:3 Ma bia sige tikai na tange ta linge ta mur, mur na tange, ‘No Watong i supi tar dir,’ ma kaiken baal at mon na bale se tar dir.”
MAT 21:4 Iakan ga ngan huo wara hatutun no nianga tano tangesot i ga tange hoken:
MAT 21:5 “Tange ta diet aram Ierusalem hora uladih Saion hoken: ‘Nas baak! No numuat Tamat na Lualua na Gil Harkurai ke i hananuat ukatiga ho muat. A matmatienai, ma i kiskisi hani tiga donki, a nat na donki ie.’”
MAT 21:6 Ma ira iruo bulu na harausur dir ga haan laah, dir gaam gil hoing Jisas ga tange ta dir.
MAT 21:7 Dir ga sal hawaat no donki ma no natine, dir gom bakar ira tihi dir ira iruo donki ma ari ta ira udir maal. Io, Jisas ga kawaas hut, gaam kis kora ine.
MAT 21:8 Ma a haleng tano tamat na matanaiabar diet ga kap se ari ta ira kiniasi diet, diet gaam palase mur no ngaas me. Ari diet ga palase ira singara daha ing diet gate kato.
MAT 21:9 Ma ira tamat na matanaiabar ing diet ga lulua haan ma diet ing diet ga murmur haan, diet bakut, diet ga kakongane hani bia, “Da pirlat no Tubu Dawit! I daan nong i hanuat wara gilgil haruatne ira sinisip gar tano Watong! Pirlat God nong i kis aram naliu sakit!”
MAT 21:10 Ma bia Jisas ga haan laka aram Ierusalem, io, a tamat na harat ga hanuat ma ira matanaiabar bakut kaia, diet ga karup, ma diet gaam nguanguo. Diet gaam tiri bia, “Sige iakan?”
MAT 21:11 Ma ira tamat na matanaiabar diet ga balu diet bia, “Ne Jisas iakan, no tangesot meram Nasaret kenam Galili.”
MAT 21:12 Ma Jisas ga haan laka tano tamat na hala na lotu, gaam bat hasur diet ing diet ga susuhur ma diet ing diet ga kukul kaia. Ga pulukane ira suuh ta ira tunotuno ing diet ga kukuas ira kinewa, ma ga pulukane mah ira kinkinis audiet ira tunotuno ing diet ga suhsuhurane ira maan.
MAT 21:13 Ma ga tange ta diet bia, “No nianga tane God di ga pakat ie i tange hoken: ‘No nugu hala na lotu, da kilam ie bia a hala na sinasaring.’ Sen bia muat gilgil balik ie hoing tiga munmun audiet ira holmatau.”
MAT 21:14 Ma ira pulo ma ira pengpeng diet ga hanuat taar tana narako tano tamat na hala na lotu. Ma ga halangalanga diet kaia.
MAT 21:15 Ma ira tamat na ut na pakila lotu ma ira tena harausur ta ira harkurai tane Moses diet ga nas ira bilai na linge ing ga gil. Ma diet ga hadade mah ira nat na bulu narako tano tamat na hala na lotu ing diet ga kakongane hani bia, “Pirlat no Tubu Dawit!” Io kaik, diet ira lualua na lotu diet ga ngalngaluan taar tana.
MAT 21:16 Diet ga tange tana, “U hadade tar at mon ing kaike ra nat na bulu diet tangtange! I biha bia pau tigal diet?” Ma Jisas ga tange ta diet, “Masa! Iau hadade diet. Hoing mon muat gate was tar ta ira nianga tane God, i tange hoken: ‘U te tagure ira nat na bulu ma diet mah ing diet la susus baak, bia diet na pirlat ugu.’”
MAT 21:17 Ma Jisas ga haan sukun diet makaia ra pise na hala uras Betani, gaam a noh bung laah kaia.
MAT 21:18 Bia Jisas ga taptapukus ra malaan uram tano pise na hala, ga taburungan.
MAT 21:19 Ma bia ga nas tiga ina papus tano gagena ngaas, ga haan taar tana. Iesen ga nas ie bia a pakana sen. Io, ga tange tana bia, “No num hunuai i te pataam katin! Pa nu huai baling!” Ma kaik at mon no daha ga maranga.
MAT 21:20 Ma bia ira bulu na harausur diet ga nas huo, diet ga karup. Ma diet ga tiri bia, “Ing ngan tutun at hohe bia iakan ra ina papus i maranga gasien?”
MAT 21:21 Ma Jisas ga balu diet hoken: “Muat hadade baak! Bia muat nurnur ma pai iruo ira numuat lilik, io, i tale muat bia muat na gil hokaiken iau te gil tano ina papus. Ma i tale mah muat ta ira dadas na linge sakit. Hokaike i tale muat bia muat na tange ta iakano uladih bia, ‘Taman tut, ma nu tamaragat suur uram ra tingaan tes.’ Ma na ngan huo.
MAT 21:22 Bia muat nurnur, io, muat na hatur kawase asa ira linge ing muat sasaring urie.”
MAT 21:23 Jisas ga laka tano tamat na hala na lotu. Ma bia ga harharausur kaia, ari ta ira tamat na ut na pakila lotu ma ari tena harausur ta ira harkurai tane Moses diet ga hanuat taar tana. Ma diet ga tiri ie bia, “U te kap ra tamat na dadas na harkurai meh kaik gu pakile kaike ra linge, ma sige i bul hatamat ugu?”
MAT 21:24 Ma Jisas ga balu diet, gaam tange hoken: “Iau mah, iau ni tiri muat tiga tiniri ma bia muat na balu iau, io, iau ni hinawase muat bia sige i tar ra dadas tagu ken iau gi ngan hoken.
MAT 21:25 Muat lik bia Jon ga kap no uno pinapalim na baptais meram ra mawe bia mekaia ta ira tunotuno mon?” Diet ga wawor nalamin ta diet at hoken: “Bia dahat na tange bia Jon ga kap no uno pinapalim meram ra mawe, Jisas na tange ta dahat bia, ‘Muat gaar te nurnur mon ta ira nianga tane Jon.’
MAT 21:26 Ma dahat pa na tange mah bia Jon ga kap no uno dadas ta ira tunotuno mon kanong dahat burte no tamat na matanaiabar, warah diet bakut diet nurnur bia Jon ga tiga tangesot.”
MAT 21:27 Io, diet ga balu Jisas bia, “Mehet pai nunure.” Io, ma Jisas ga tange um ta diet, “Iau mah, iau pa ni hinawase muat bia iau kap no nugu tamat na dadas na harkurai meh, kaik iau gi gil huo.”
MAT 21:28 Ma Jisas ga tange bia, “Muat lik hohe? Tiga tunaan airuo natine. Ga haan tupas no luena ma ga tange tana bia, ‘Natigu, nu haan baas. Nu papalim aram ra lalong katin.’
MAT 21:29 “Ga balui, gaam tange bia, ‘Taie. Iau malok.’ Iesen namur ga pukusane no uno lilik, gaam haan balik wara pinapalim.
MAT 21:30 “Namur, no adir sus ga haan tupas no mes na natine, gaam tange mah huo tana. Ga balui, gaam tange bia, ‘Taie ta linge. Iau ni haan, mama.’ Iesen pa ga haan balik um.”
MAT 21:31 Ma Jisas ga tiri diet ira lualua na lotu bia, “Sige ta dir ga gil ing nadir sus ga sip?” Diet ga balui, “No luena.” Io, Jisas ga tange ta diet bia, “Muat hadade baak! Ira hisikoma ma ira ut na hilawa diet lalaka tano kinkinis na harkurai ma ra harbalaurai tane God nalua ta muat.
MAT 21:32 Io, Jon no ut na baptais ga hanuat wara haminas muat tano takodasiana ngaas. Ma muat pa ga nurnur tana. Iesen ira hisikoma ma ira ut na hilawa diet balik, diet ga nurnur tana. Ma a tutun bia muat ga nas mah kaiken, iesen muat pa ga lilik pukus bia muat naga nurnur tana.”
MAT 21:33 Ma Jisas ga tange ta diet hoken: “Muat hadade tiga mes na nianga harharuat mah. Tiga tunaan auno tiga katona pise. Ga so tiga lalong na hunena wain. Ga tumat luhutanei ma ra bala, ma ga kil tiga naan i haruat wara papaas ruap no hunena wain. Ga tumat mah tiga hunghungaan na haat uram naliu wara nasnas mur no lalong na hunena wain. Bia ga gil tar kaike ga waak tar no lalong ta diet ing diet ga sahur ie bia diet na balbalaurei, ma gaam haan laah baak tano uno hinahaan.
MAT 21:34 Bia ga madar ira hunena wain, ga tule ira uno tultulai uras hoira ut na balaura lalong bia diet na kap leh auno tari kaik ra hunena.
MAT 21:35 “Ira ut na balaura lalong diet ga palim kawase ira uno tultulai. Diet ga hamidaak tikai, diet gaam bu bing tiga mes, ma diet gaam gulum bing tikai mah ma ra haat.
MAT 21:36 Namur ga tule habalin ari a tultulai, diet ga haleng ta diet ing diet ga lua. Ma diet ga gil mah huo ta diet.
MAT 21:37 Ma menamur ta diet bakut, ga tule no natine ukaia ho diet kanong ga tange bia, ‘Diet na ru no natigu.’
MAT 21:38 “Iesen bia ira ut na balaura lalong diet ga nas no natine, diet ga tange harbasiane ta diet, ‘Iakano tunotuno i te hanuat nong na rumahal. Kaia, dahat gi a ubu bing ie waing dahat naga rumahal ta iakan ra lalong.’
MAT 21:39 Io, diet ga palim kawasei, diet gaam ise hasur ie meram narako tano lalong na hunena wain, ma diet gaam ubu bing ie.”
MAT 21:40 Ma Jisas ga tiri diet bia, “Io kaik, bia no tunaan auno no lalong na hanuat, na gil bihane ira ut na balaura lalong?”
MAT 21:41 Diet ga balui bia, “Na bu bing haliare kaike ra ut na halhaliara. Ma na nanaas laah tari mes na ut na balaura lalong ing diet na haut bia diet na tartar tari hunena ukaia ho ie tano pakana bung bia ira hunena wain i madar. Ma na tar no lalong na hunena wain ta diet bia diet na sasahur ie.”
MAT 21:42 Ma Jisas ga tange ta diet bia, “I tahut bia muat na lik leh no nianga tane God di ga pakat ie i tange hoken, ‘No haat nong ira ut na pakila hala diet ga malok sei, kanong diet ga lik bia a linge bia ie, i nanaas taar bia aie balik um no dadas na burena tano hala bakut. No Watong at ga gil hokaiken ma i manga bilai sakit bia dahat na nas ie.’
MAT 21:43 “Io kaik, iau hinawase muat bia no kinkinis na harkurai ma ra harbalaurai tane God, da kap sei ta muat ma da tar ie ta diet ra mes ing diet na papalim haruat tano sinisip ta God.
MAT 21:44 [Ma sige i puko taar ta iakano haat na tarigis hansiksik. Ma bia no haat na puko taar ta tikai, na bisang hansiksik ie.]”
MAT 21:45 Ma bia ira tamat na ut na pakila lotu ma ira Parisi diet ga hadade ira nianga harharuat tane Jisas, diet ga nunure bia ga tangtange mon uta diet.
MAT 21:46 Ma diet ga walar bia diet na palim kawasei, iesen diet ga burte no tamat na matanaiabar kanong ira matanaiabar diet ga nurnur bia a tangesot ie.
MAT 22:1 Io, ma Jisas ga haianga diet ma ira nianga harharuat balin, gaam tange hoken.
MAT 22:2 “No kinkinis na harkurai ma ra harbalaurai ta God i hokaiken. Tiga tamat na lualua na gil harkurai ga tagure tiga nian na hinartola tano natine tunaan.
MAT 22:3 Ga tule ira uno tultulai wara lamlam diet ing gate tar sibik na lamaas tar ta diet ukaia tano nian. Iesen diet ga malok wara hinanuat.
MAT 22:4 “Io, ga tule habaling ari a mes na tultulai, ma gaam tange ta diet, ‘Muat na hinawase diet ing iau gate tar sibik na lamaas taar ta diet hoken: “Iau te tagure no nian. Iau te sapak ira nugu tamat na bulumakau ing iau ga tamtabar hatamat diet. Muat mai um ukai tano nian. Ira linge bakut i te taguro.” ’
MAT 22:5 “Iesen diet pa ga song leh ira tultulai, diet gom haan harbasia. Tikai ga haan uram ra uno lalong, ma tikai ukaia tano uno pinapalim.
MAT 22:6 Ma ira mes ta diet ing diet ga kap ra sibik na lamaas, diet ga palim kawase ira uno tultulai, diet gaam gil hagahe diet, ma diet gaam bu bing diet.
MAT 22:7 No tamat na lualua na gil harkurai ga manga ngalngaluan, gaam tule ira uno umri ma diet ga bu bing haliare kaike ra ut na harubu bingibing, ma diet ga hakarat no udiet taman.
MAT 22:8 “Io, ga tange ta ira uno tultulai bia, ‘No nian na hinartola i taguro. Iesen ing iau ga tar sibik na lamaas ta diet, iau nes bia ira udiet tintalen pai haruat tano nugu sinisip.
MAT 22:9 Kaik, muat na haan taar ta ira subaan diet la hanhanuat hurlungen kaia. Ma muat na tar sibik na lamaas ta si at mon ing muat na nas.’
MAT 22:10 Io, ira tultulai diet ga haan harbasia ta ira subaan, diet gaam lamus hulungan ira matanaiabar bakut ing diet ga nas leh. Ari bilai ma ari sakana tunotuno nalamin ta diet. Ma no hala na lukara ga hung ma ira wasire.
MAT 22:11 “Io, no tamat na lualua na gil harkurai ga haan laka ukaia narako tano nian wara nasnas ira wasire. Ma ga nas tupas leh tiga tunotuno pa ga sigam ta bilai na kiniasine wara hinahaan tano hinartola.
MAT 22:12 Ma no tamat na lualua na gil harkurai ga tange tana bia, ‘Tasigu, u laka hobihbih ukai? Pau sigam ta bilai na kiniasim. U te gil ronga.’ Iesen no tunotuno pa ga haruat wara balbalui.
MAT 22:13 “Io, no tamat na lualua na gil harkurai ga tange ta diet ing diet nas mur no gil nian bia, ‘Muat na wis pakur ira iruo limana ma ira iruo kakine, ma muat na se hasur ie uras nataman ra kankado, naga susuah ma na hatagiris na ngise kaia.’”
MAT 22:14 Io, Jisas ga hapataam no uno nianga, gaam tange bia, “God i tatau ira halengin, ma sen i gilamis leh a bar nong mon.”
MAT 22:15 Io, ira Parisi diet ga haan laah, diet gaam wor tika bia diet na hakuni Jisas ta ira uno nianga.
MAT 22:16 Ma diet ga tule ira udiet bulu na harausur tika ma diet ing diet git murmur Herot, no tamat na lualua na gil harkurai, ukaia hone Jisas. Ma diet ga tange tana bia, “Tena harausur, mehet nunure bia a tutun na tunotuno ugu. Ma u la hausur tutun at tano sinisip tane God. Pau la turtur sen ma tikai kanong pau la songsong leh bia a mangana tunotuno sa tiga nong.
MAT 22:17 Io, nu hinawase mehet tano num lilik. I takodas bia dahat na kul tar no takis ta diet ing diet kure dahat bia taie?”
MAT 22:18 Iesen Jisas ga palai ta ira udiet sakana lilik, gaam tange ta diet bia, “Muat ira ut na harababo! Muat sip bia muat na hakuni iau warah?
MAT 22:19 Muat haminas tiga kinewa tagu nong di la kulkul takis mei.” Diet ga kap hawaat tiga siliwa ukaia ho ie.
MAT 22:20 Io, ga tiri diet, “A malalar i sige iakan ma a hinsa sige iakan?”
MAT 22:21 “Tano lualua ta ira udahat ut na harkurai,” diet ga balui. Io, ga tange ta diet, “Masa. Muat na tar ta ira ut na harkurai ira linge at ta ira ut na harkurai, ma muat na tar ta God ira linge at tane God.”
MAT 22:22 Ma bia diet ga hadade huo, diet ga karup ta ira nianga ga tange. Diet ga haan sukun ie, ma diet gaam haan laah um.
MAT 22:23 Ma ta iakanong at mon ra bung ari Sadiusi ing diet la liklik bia nong i maat pa na tut hut balin, diet ga hanuat taar tane Jisas, diet gaam tiri ie bia, “Tena harausur, Moses ga tange hoken. Bia tiga tunaan i maat ma taie ta natine, io, no tasine balik na tole no uno makosa. Ma dir na hatahuat ta nati dir ma dir na kilam tar ta diet no hinsana no tasine nong i te maat.
MAT 22:25 Io, a liman ma iruo na haratasin ken ho mehet. No luena ga tola, gaam mat sukun no uno hahin, ma pa ga mon nati dir baak. Io, no makosa ga haan taar tano tasine.
MAT 22:26 Ga ngan mah huo tano airuo, ma no aitul, gaam tuk taar ta nong ga liman ma iruo mei ta ira tasine.
MAT 22:27 Ma bia diet bakut gate maat, no hahin mah um ga maat.
MAT 22:28 Io, bia ira minaat diet na lon huat balin tano bung na tuntunut hut, ta sige tun at um no hahin ta ira liman ma iruo? Kanong diet bakut, diet ga tole tar ie.”
MAT 22:29 Io, Jisas ga balu diet hoken: “Muat ronga kanong muat pai palai ta ira nianga tane God ing di ga pakat, ma muat pai nunure mah no dadas tane God.
MAT 22:30 Tano pakana bung na tuntunut hut baling ta ira minaat, diet pa na hartola. Diet na haruat ma ira angelo aram ra ula mawe.
MAT 22:31 Iesen, kaiken ni hinawase muat bia diet ing diet te maat, diet na tut hut balin bia taie. I tahut bia muat na lik leh ira nianga tane God ing di ga pakat tar ta muat uta ira hintubu dahat.
MAT 22:32 A tutun bia diet gate maat, iesen God ga tange bia, ‘Iau no God tane Abraham, no God tane Aisak, ma no God tane Iakop.’ Pataie bia God audiet ira minaat, sen bia a God audiet ira lilona.”
MAT 22:33 Ma bia ira tamat na matanaiabar diet ga hadade huo, diet ga karup ta ira uno harausur.
MAT 22:34 Ma bia ira Parisi diet ga hadade bia Jisas ga balu timaan ira Sadiusi diet gaam tur kunkun, io, ira Parisi diet ga hanuat hurlungen.
MAT 22:35 Ma tikai nalamin ta diet, a keskes ie ta ira harkurai tane Moses, ga walar Jisas, gaam tiri hoken:
MAT 22:36 “Tena harausur, gahim no harkurai ta ira harkurai bakut tane God i manga tamat?”
MAT 22:37 Jisas ga balui, gaam tange bia, “‘Nu sip no Watong no num God ma no katim bakut, no num nilon bakut, ma no num lilik bakut.’
MAT 22:38 Iakan ra harkurai i tamat sakit ma i lua ta ira mes.
MAT 22:39 Ma nong iruo mei, aie mah huo. I tange hoken: ‘Nu marse tikai hoing u marse habaling at ugu.’
MAT 22:40 Ira harkurai bakut ma ira harausur ta ira tangesot, diet burena laah ta kaiken ra iruo hartula.”
MAT 22:41 Ing bia ira Parisi diet ga kis hurlungen taar, Jisas ga tiri diet hoken:
MAT 22:42 “Muat lik hohe uta nong di kilam ie bia no Mesaia? Na bulu huat ta sige?” Diet ga balui bia, “Na bulu huat tane Dawit.”
MAT 22:43 Ga tange ta diet bia, “Iesen, muat nes baak! No Halhaliana Tanuo ga tar ira lilik tane Dawit kaik Dawit at gaam tange bia,
MAT 22:44 ‘No Watong ga tange ta nagu Watong: “Nu kap no tamat na kinkinis kai tano kata na limagu, tuk iau ni bul hasur ira num hiruo menapu ta ira lapar a kakim!” ’
MAT 22:45 Io, i nanaas bia menalua sakit Dawit at ga kilam no Mesaia bia, ‘Nagu Watong.’ Kaik i palai bia iakano Mesaia a bulumur ie tane Dawit ma aie mah no Watong.”
MAT 22:46 Io, tur leh um ta iakano bung, diet bakut diet ga barbarahon bia diet na tiri wa tiga linge.
MAT 23:1 Io, Jisas ga tange ta ira tamat na matanaiabar ma ta ira uno bulu na harausur hoken:
MAT 23:2 “Ira tena harausur ta ira harkurai tane Moses ma ira Parisi, diet kaike, diet ing diet haruat wara hinhinawas palai ta ira harkurai tane Moses.
MAT 23:3 Io, kaik i tahut bia muat na taram diet ma muat na murmur ira linge ing diet tange ta muat. Iesen pai tahut bia muat na mur leh ira udiet tintalen kanong diet tange ira linge ma diet pai gil haruatne.
MAT 23:4 Ma diet kap leh ira udiet dadas na harausur, io, diet hapupusak tar ira matanaiabar me, ing diet pai haruat bia diet na mur. Iesen diet at, diet pa na gil ta dahin wara hamamakan ira matanaiabar ta kaike ra harkurai.
MAT 23:5 “Ira linge bakut diet ira lualua diet gil, diet sip bia dahat ira matanaiabar na nas bia dahat na lat diet. Muat palai tano udahat magingin ta ira hansik na punulus. Ma dahat la bul aram narako ari a hartula tane God. Ma dahat la kubus tar ira punulus ta ira ulu dahat ma ira lima dahat mah. Iesen ira udiet i manga tamat. Ma dahat la bulbul mah ira kurehreh ta ira kiniasi dahat wara halilik dahat bia dahat na mur ira harkurai tane God. Iesen ira udiet at i manga taltalona.
MAT 23:6 Ma diet sip bia diet na kis ta ira bura na rau ta ira gil nian, ma ira kinkinis gar na tamat narakoman ta ira udiet hala na lotu.
MAT 23:7 Diet sip bia da kaang leh diet ta ira subaan ing di la hanhanuat hurlungen kaia ma da lat diet, ma kaik daga kilam diet bia, ‘Tena harausur.’
MAT 23:8 “Iesen pai tahut bia da kilam muat bia, ‘Tena harausur,’ kanong tikai sen mon no numuat tena harausur. Ma muat bakut mon muat haratasin.
MAT 23:9 Ma waak muat tanga ‘Mama’ ta tiga nong mekai napu kanong tikai sen mon namuat Sus. Ma ie kenam ra mawe.
MAT 23:10 Ma pai tahut bia da kilam muat bia ‘lualua,’ kanong tikai mon no numuat lualua—no Mesaia.
MAT 23:11 Nong i manga tamat ta muat na numuat tultulai mon ie.
MAT 23:12 Ma sige ing i hatamat habaling ie, God na bul hasur ie. Ma sige ing i bul hasur habaling ie, God na hatamat ie.
MAT 23:13 “Maris ta muat ira tena harausur ta ira harkurai tane Moses ma muat ira Parisi, na kabit muat! Muat ira ut na harababo! Muat la banbanus ise tar diet ira tunotuno ing diet wara ninlaka tano kinkinis na harkurai ma ra harbalaurai ta God. Muat at, muat pai laka tana, ma muat pai haut leh mah diet ing diet wara ninlaka bia diet na laka kaia.
MAT 23:14 [“Maris ta muat ira tena harausur ta ira harkurai tane Moses ma muat ira Parisi, na kabit muat! Muat la karkarit leh ira linge bakut ta ira makosa, ma muat la harababo ma ira numuat talona sinasaring. God na manga hapidanau muat.]
MAT 23:15 “Maris ta muat ira tena harausur ta ira harkurai tane Moses ma muat ira Parisi, na kabit muat! Muat ira ut na harababo! Muat la hanahaan hurhurbit ta ira katon bakut wara hauhau leh ta tikai mon bia na mur ira numuat harausur. Ma bia na numuat bulu na harausur um ie, aie ma muat, muat bakut muat na kap ra harpidanau. A tutun bia muat na laka tano ula iaah, iesen i tutun sakit bia aie mah na laka tana kanong i te mur muat.
MAT 23:16 “Maris ta muat ira pulo na lualua, na kabit muat! Muat tange hoken: ‘Bia tikai i hasasalim uram tano tamat na hala na lotu, iakanong a linge bia mon. Iesen bia na hasasalim uram ta ira bilai na linge narako tano tamat na hala na lotu, iakanong na sule tar at ie naga hatutun no uno sinsalim.’
MAT 23:17 A gotgotuana pulo muat! Muat manga ronga. No tamat na linge, no hala na lotu. Aie nong i gil kaike ira linge waing diet naga halhaal.
MAT 23:18 Ma muat tange mah hoken: ‘Bia tikai i hasasalim tano suuh na hartabar aram tano tamat na hala na lotu, iakanong a linge bia mon. Iesen bia na hasasalim ta ira linge di hartabar me, iakanong na sule tar at ie naga hatutun no uno sinsalim.’
MAT 23:19 A pulo muat! Ma muat manga ronga baal. No tamat na linge no suuh na hartabar. Aie nong i gil kaike ira hartabar waing diet naga halhaal.
MAT 23:20 Io kaik, sige nong i hasasalim tano suuh na hartabar, no uno sinsalim i kasar no suuh na hartabar ma ira hartabar mah kenam tana.
MAT 23:21 Ma sige nong i hasasalim tano tamat na hala na lotu, no uno sinsalim i kasar no tamat na hala na lotu ma God mah nong i la kis taar narako tana.
MAT 23:22 Ma sige nong i hasasalim uram naliu, no uno sinsalim i kasar no kinkinis na watong tane God ma God at mah nong i la kis taar kaia.
MAT 23:23 “Maris ta muat ira tena harausur ta ira harkurai tane Moses ma muat ira Parisi, na kabit muat! Muat ira ut na harababo! Muat la saso ari a linge wara hanamnamien ira amuat nian, hoira lobo, a kamahar, ma ra kari. Ma hoing ira harkurai tane Moses i tange, muat la tartar ta God nong i sangahul mei ta kaike ra linge muat la saso. Iesen muat taklain balik ta ira tamat ta ira harkurai tane Moses. Muat pai takodas, muat pai harmarsai, ma muat pai tutun ta ira numuat nilon. Io, gor takodas bia muat te tar kaiken ra linge tupas God ma muat pa gor malok mah wara murmur kaiken ira bilai na magingin.
MAT 23:24 A pulo na lualua muat! Muat manga lik hadadas um ira nat na harkurai iesen muat malentakuane ira tamat. Muat haruat ma tiga tunotuno i kulup bia na mom. I lik leh um no nolnol ma i kap sei tano taah. Iesen i kanam kaas balik um tiga bulumakau.
MAT 23:25 “Maris ta muat ira tena harausur ta ira harkurai tane Moses ma muat ira Parisi, na kabit muat! Muat ira ut na harababo! Muat haruat ma tiga gingop bia tiga dis ing di gis sen leh mon no paline me nataman. Iesen narakoman tana i hung ma ra bilinge na linge muat kinau ma ira linge mah muat manga masmasingan urie.
MAT 23:26 A pulo na Parisi ugu! I tahut bia nu gis hanalue ira tingena no kap bia no dis, io kaik, ira paline mah um na gamgamatien.
MAT 23:27 “Maris ta muat ira tena harausur ta ira harkurai tane Moses ma muat ira Parisi, na kabit muat! Muat ira ut na harababo! Muat hoira midi di hamar ma ra ponponiana haat ing diet nanaas timaan me nataman. Iesen bia kenas napu, diet hung ma ra sur na minaat ma ira linge ing na hagahe tikai waing na sakena.
MAT 23:28 Hokaiken muat. Muat haminas bia muat takodas ta ira matmataan ta ira tunotuno. Iesen bia narakoman ta muat, i hung ma ra harababo ma ra tabuna taram harkurai.
MAT 23:29 “Maris ta muat ira tena harausur ta ira harkurai tane Moses ma muat ira Parisi, na kabit muat! Muat ira ut na harababo! Muat la gilgil ira bilai na haat na midi ta ira tangesot wara liklik leh diet. Ma muat la hamar ira midi ta ira ut na takodas.
MAT 23:30 Ma muat tange bia, ‘Bia dahat gor lon ta kaike ra udiet pakana bung ira hintubu dahat, io, dahat pa gor harahut wara bubu bing ira tangesot.’
MAT 23:31 Io, muat hinawas palai mah baling ta muat, bia a hintubu muat diet ing diet ga bu bing ira tangesot.
MAT 23:32 Io, i nanaas tutun um bia muat na gil bakut ira sakena ing ira hintubu muat diet ga hasubaan tar.
MAT 23:33 “A sakana ut na harabota muat. Ma ira hintubu muat, diet mah huo. Muat pai tale tun at bia muat na pas no tamat na harpidanau narakoman tano ula iaah.
MAT 23:34 Ma wara haminas bia muat na ngan huo, io, iau ni tule ari a tangesot, ari a ut na mintota, ma ari a tena harausur ukai ho muat. Ma muat na bu bing ari ra ula kabai, ma ari muat na dangat diet narako ta ira numuat hala na lotu. Ma muat na murmur haan wara hangungut diet ta ira taman, tikatikai.
MAT 23:35 Io kaik, ing muat na bu bing diet ira ut na takodas ta iakan ra ula hanuo bakut, nora harpidanau na kabit muat. No numuat hinarubu bingibing ga haburen leh tane Abel, tiga ut na takodas, gaam hanahaan tuk tane Sekeria no natine Berekia. Ma Sekeria nong muat ga bu bing ie nalamin tano tamat na hala na lotu ma no suuh di la tuntun ira hartabar kaia.
MAT 23:36 Muat hadade baak! Ira harpidanau haruat hoing kaike ira numuat magingin sakena na kabit muat ing muat lon ta kaiken ra pakana bung.”
MAT 23:37 Ma Jisas ga tange bia, “Maris muat ira matanaiabar mekai Ierusalem! Muat la bubu bing ira tangesot ma muat la gulgulum bing diet ing God i la tultule diet ukaia ho muat. Haleng pakaan iau ga sipsip bia ni gawane leh muat hoing no huna kareka i la pabong ira natine. Iesen muat pa ga sip huo.
MAT 23:38 Nas baak! Da hamau no numuat taman ma muat na biha?
MAT 23:39 Io, iau hinawase muat bia muat pa na nes habaling iau tuk tano pakana bung ing muat na tange bia, ‘I daan nong i hanuat wara gilgil haruatne ira sinisip gar tano Watong!’”
MAT 24:1 Bia Jisas ga haan sukun no tamat na hala na lotu, gaam hanahaan laah mekaia, io, ira uno bulu na harausur diet ga haan tupas ie wara tangtange haminas ira bala ma ira subaan tano tamat na hala na lotu.
MAT 24:2 Ma Jisas ga tange ta diet bia, “Muat nes baak! Kaike ira linge muat nesnes, taie tiga haat bia na kis harpatup taar ma tikai. Ira amuat suk, diet na dure hasur bakut.”
MAT 24:3 Ma diet ga hanuat taar tano uladih Olip. Ma ing Jisas ga kis taar kaia, ira uno bulu na harausur diet ga hanuat sen mon taar tana, diet gaam tiri ie bia, “Nu hinawase mehet, bia hunanges kaiken ra linge ing u hinawase mehet na hanuat. Ma a mangana hakilang sa mehet na nas ing na haminas no num hinanuat ma no hauhawatine ta iakanin ra lon?”
MAT 24:4 Io, Jisas ga balu diet hoken: “Muat na harbalaurai ta nong kabi habato lamus leh muat.
MAT 24:5 Io kaik, halengin diet na harabota huat ma diet na tange bia, ‘Iau at mon no Mesaia,’ ma diet na habato lamus leh ra halengin.
MAT 24:6 Muat na hadade uta ira tamat na hinarubu bia ari a hinhinawas ta ira tamat na hinarubu tapaka. Waak muat raurawaan. Kaike ra mangana linge na hanuat, sen bia no hauhawatine pa na hanuat baak.
MAT 24:7 Io, a haleng na huntunaan tano ula hanuo diet na tut na hinarubu balin ta diet. Da sam taburungan ma na mon kunakunar mah tari haleng taman.
MAT 24:8 Bia kaiken ra linge na hanuat na haburen mon no ngunungut hoing no bulu i papaas hatahun no hahin ing i wara kinakaha.
MAT 24:9 “Ta kaike ra pakana bung da palim kawase muat, daga tar se muat bia diet naga hangungutaan ma daga bu bing muat. Ma ira huntunaan bakut diet na malentakuane muat wara gaiegu.
MAT 24:10 Ma ta kaike ra pakana bung mah, a haleng diet na tahurus talur no udiet nurnuruan. Diet na tar tihi diet harbasia baal mon ta diet. Ma diet na malentak harbasia baling mah ta diet.
MAT 24:11 Ma haleng na tangesot harabota na hanuat ma diet na habato lamus leh ra halengin.
MAT 24:12 Ing bia no magingin sakena na tahuat hanahaan, ira harmarsai gar na halengin na puko.
MAT 24:13 Iesen nong i tur dadas taar tuk ra hauhawatine, God na halon ie.
MAT 24:14 Ma da harpir tano tahut na hinhinawas utano kinkinis na harkurai ma ra harbalaurai tane God harbasia hurhurbit tano ula hanuo. Da gil huo wara hinhinawase hapalaine ira hunhuntunaan bakut. Ma bia kaike ra linge diet na pataam, io, no hauhawatine ta iakan ra lon na hanuat.
MAT 24:15 “Muat ing muat waswas ken ra pakpakat i tahut bia muat na palai tano kukuraina ta iakan ra linge nong no tangesot Daniel ga hinhinawas utana. Ga hinhinawas bia muat na nas tikai ‘nong i manga sakena sakit ma nong i la hamhamau taman.’ Ma iakanong na tur taar tano subaan i halhaal, narakoman tano tamat na hala na lotu kai Ierusalem.
MAT 24:16 Io, bia iakano sakana tunotuno na tur huo kaia, diet ing diet kis taar kaia Iudeia, i tahut bia diet na hilau uram ta ira uladih.
MAT 24:17 Nong i kis taar naliu tano uno madahien na ula hala, i tahut bia na hansur gasien. Waak bia i hasurum pakana bung wara kapkap leh aun ta linge narakoman tano hala.
MAT 24:18 Ma nong mah i kis taar aram na lalong, waak i hanan tapukus wara kapkap ira kiniasine. Na habir mon.
MAT 24:19 Maris diet ing diet tianan taar ma diet ing diet harharasus ta iakano pakana bung. Na manga ubal tun at diet.
MAT 24:20 Muat na sasaring bia iakan ra purpuruan pa na hanuat tano pakana bung tano labur bia tano Bung na Sinangeh, kanong na dadas ta muat bia muat na hilau ta kaike ira iruo mangana pakana bung.
MAT 24:21 Muat na sasaring huo kanong iakano bung da kilingane ra tamat na ngunungut. Ma pa na haruat ma ira bung, haburen leh tano hatahun tano ula hanuo, tuk taar katin. Ma taie tun at bia na haruat mah huo namur.
MAT 24:22 Bia no Watong pa naga puo hakumkum iakano pakana bung, taie tiga nong pa gaar lon. Iesen na puo hakumkum iakano pakana bung wara gaie diet ing gate gilamis leh diet.
MAT 24:23 Ma ta iakano pakana bung mah bia tikai na tange ta muat, ‘Nas baak! No Mesaia ie ken,’ bia ‘No Mesaia ie ke,’ waak muat nurnur tana.
MAT 24:24 Io, ari Mesaia harabota ma ari tangesot harabota diet na hanuat. Diet na haminas ta hakilang ma diet na pakile ta dadas na gingilaan na kinarup waing diet na walar, bia diet na petlaar, wara habato lamus leh ira tunotuno mah ing God gate gilamis leh.
MAT 24:25 Muat na balaure timaan, kanong iau te huna hinawase hanalue tar muat.
MAT 24:26 “Io, bia tiga nong na tange ta muat, ‘No Mesaia kenam ra hanuo bia,’ waak muat haan ukaia. Ma bia tikai na tange ta muat, ‘No Mesaia ken, i kis mun taar,’ waak muat nurnur tana.
MAT 24:27 Iau tange huo kanong, hoing i la hile no mararang i la kasar bakut no mawe, Nong a Tunotunoi na hanuat mah huo.
MAT 24:28 No uno hinanuat na manga palai. Na palai ta muat hoing i palai bia no minaat i noh taar he kanong muat na nes ira kok diet na hanuat hurlungen kaia.
MAT 24:29 “Ma kaik at mon menamur ta iakano pakana bung tano tamat na ngunungut, ‘No kasakes na kankado, ma no teka pa na lulungo, ira tiding diet na rus meram ra mawe, ma ira dadas aram ra mawe, diet na pagola.’
MAT 24:30 Ma ta iakano pakana bung tiga hakilang na harapuasa aram ra mawe wara haminas no hinanuat ta Nong a Tunotunoi. Ma ira hunhuntunaan bakut tano ula hanuo diet na suah. Ma diet na nas Nong a Tunotunoi na hanan huat ta ira bahuto meram ra mawe, tika ma no uno dadas ma ra tamat na minamar.
MAT 24:31 Da puh no tahur, ma na tule um ira uno angelo wara lamlamus hulungan a uno, ing gate gilamis leh. Ma diet ira angelo diet na lamus hulungan ira uno matanaiabar mekaia ta ira aihat na matana dadaip ta ira hauhawatine no mawe.
MAT 24:32 “Muat na kap harausur ta ira ina balbaal. Tano pakana bung bia no ina balbaal i te selas ma i te kuburuan balin ira pakana, muat na nunure bia i te hutet tano pakana bung na labur.
MAT 24:33 Hoing at mon, bia muat na nas kaike ra linge i te hanan huat, muat na nunure bia no pakana bung i te hutet, ke tuai at mon ra matanangas huat.
MAT 24:34 Muat hadade baak! Iakan ra huntunaan, tari ta diet pa na maat baak ma kaiken ra linge na hanuat.
MAT 24:35 No ula mawe ma no ula hanuo na panim laah ma sen bia ira nugu nianga pa na panim.”
MAT 24:36 Ma Jisas ga tange habalin bia, “Taie tikai pai nunure at iakano pakana bung bia kaiken ra linge na hanuat. Ira angelo kenam ra ula mawe ma no Natine mah diet pai nunure—no ana Sus sen mon.
MAT 24:37 No hinanuat ta Nong a Tunotunoi na ngan hoing no bung tane Noa.
MAT 24:38 Io, ma ira bung menalua tano tamat na taahit ira matanaiabar diet git iaiaan, diet git mamom, diet git harhartola, tuk tano bung at bia Noa ga laka tano uno tamat na mon.
MAT 24:39 Ma diet pa ga nunure at ta dahin bia asa na hanuat taar ta diet tuk taar bia no tamat na taahit ga hanuat, gaam salire se diet bakut. Na ngan mah huo ing Nong a Tunotunoi na hanuat.
MAT 24:40 Bia airuo tunotuno kana narako ra lalong, da kap leh tikai ma da waak um tikai.
MAT 24:41 Ma bia airuo hahin kana dir kakaar tapiok, da kap leh tiga nong ma da waak kapis tikai.
MAT 24:42 “Io, i tahut bia muat na taguro kawasei, kanong muat pai nunure no bung ing no numuat Watong na hanuat tana.
MAT 24:43 I tahut bia muat na palai tano ra tutun ta iakan ra malalar. Bia tiga tunotuno, auno tiga hala, gor nunure tar no pakana bung sa ra bung ing tiga ut na kikinau naga hanuat, io, gor hangala taar ma gor habatbat no ut na kikinau ing pa gor papat no uno hala.
MAT 24:44 Ma i tahut bia muat mah, muat na taguro huo, kanong Nong a Tunotunoi na hanuat tano pakana bung nong muat lik bia pa na hanuat tana.”
MAT 24:45 Ma Jisas ga tange habalin hoken: “Iau ni haminas ta muat bia sige no mintatona ma no tutun na tultulai. Aie nong no uno watong i bul tar ra harkurai tana uta ira mes na tultulai bia na tamtabar timaan diet.
MAT 24:46 Na daan iakano tultulai bia no uno watong i tapukus, gi nas tupas ie ma kana i gilgil huo.
MAT 24:47 Muat hadade baak! Na tar ira uno linge bakut tano harbalaurai ta iakano tultulai.
MAT 24:48 Iesen bia ing a sakana tultulai ie, na lik bia no uno watong pa na tapukus gasien.
MAT 24:49 Ma na tur leh wara bubu ira mes na tultulai ma na iaiaan ma na mamom tika ma ira ut na minom.
MAT 24:50 Io, no watong ta iakano tultulai na hanuat tano pakana bung bia no tultulai pa ga lik tar, ma pa ga nunure tar bia na hanuat huo.
MAT 24:51 Ma no watong na kure hadadas tun at ie, ma na sei ukaia tano ngunngutaan audiet ira ut na harababo. Ma na susuah ma na hatagiris na ngise kaia.”
MAT 25:1 Io, Jisas gaam tange habalin hoken: “Ma ta iakano pakana bung no kinkinis na harkurai ma ra harbalaurai ta God na haruat ma iakan. A sangahul na lala na bulahin diet ga kap leh ira udiet laam, diet gaam haan wara harsomane no tunaan nong ga wara tinolen.
MAT 25:2 A liman na gotgotuana ma ra liman na mintatona ta diet.
MAT 25:3 Ira gotgotuana diet ga kap leh ira udiet laam iesen diet pa ga kap ta wel.
MAT 25:4 Ira mintatona balik diet ga kap hasisingen ari a wel mah tika ma ira udiet laam.
MAT 25:5 Ma bia nong ga wara tinolen pa ga hanuat gasien, diet bakut diet ga sumsumela, diet gaam kumkubaba.
MAT 25:6 “Ra tingena bung um, tikai ga kakongane bia, ‘Ie ken tuai um nong i wara tinolen. Muat hanuat wara harsomanei!’
MAT 25:7 “Io, diet bakut ira bulahin diet ga tangahun, diet gaam halulungo ira udiet laam.
MAT 25:8 Ma ira gotgotuana diet ga tange ta ira mintatona bia, ‘Muat tabar mehet ta wel kanong ira numehet laam i te matmaat.’
MAT 25:9 “Iesen ira mintatona diet ga balu diet bia, ‘Taie. Pai haruat ma mehet ma muat mah. I tahut bia muat na haan taar ta diet ing diet la suhsuhurana wel ma muat na kul leh numuat tari.’
MAT 25:10 “Ma bia diet ga hanahaan laah wara kul wel, no tunaan nong i wara tinolen ga hanuat. Ma no kaba bulahin ing diet ga taguro taar diet ga haan laka tika mei ukaia tano lukara na tinolen. Ma no matanangas ga tabanus.
MAT 25:11 “Namur no kaba mes mah um diet ga hanuat. Ma diet ga tatau bia, ‘Oa! Oa! Papos halaka mehet!’
MAT 25:12 “Iesen no tunotuno ga tange ta diet bia, ‘Taie tun at! Iau pai nunure muat.’”
MAT 25:13 Io, Jisas gaam tange bia, “Kaiken iau te hinawase muat bia muat na tangtaguro kawasei kanong muat pai nunure at iakano pakana bung.”
MAT 25:14 Ma Jisas gaam tange habalin hoken: “Ma ta iakano pakana bung no kinkinis na harkurai ma ra harbalaurai tane God na haruat mah ma iakan. Tiga tunotuno i wara hinahaan taar tiga mes na balehan. Ma ga tatau leh ira uno tultulai, gaam paleng harbasiane ira uno linge ta dal.
MAT 25:15 Ga tar a liman na arip na kinewa tano luena, ma airuo arip na kinewa ta nong i mur leh ie, ma tiga arip na kinewa ta nong ga aitul mei. Ga paleng harbasiane ta dal haruat ma ira udal baso, ma ga haan laah um tano uno hinahaan.
MAT 25:16 Nong ga hatur kawase a liman na arip na kinewa, kaik at mon ga papalim mei, io, ga hatahuat habaling mah a liman na arip na kinewa.
MAT 25:17 Ma nong ga hatur kawase airuo arip na kinewa ga gil huo mah, ma ga kap habaling mah airuo arip.
MAT 25:18 Iesen nong ga hatur kawase tiga arip na kinewa ga haan laah balik, gaam bus ira kinewa tano uno watong.
MAT 25:19 “Namur bia gate manga halis um, no watong ta kaike ra itul a tultulai ga tapukus baling, gom me hatakodasne ma dal uta ira uno kinewa.
MAT 25:20 No tunotuno nong ga hatur kawase ra liman na arip na kinewa ga kap hawaat kaike tika ma ira liman na arip gate gil hawaat leh. Ma ga tange bia, ‘Nugu watong, u ga tar ra liman na arip na kinewa tagu. Nas baak! A liman na arip baling mah ken iau te gil hawaat leh.’
MAT 25:21 “Ma no uno watong ga tange tana bia, ‘Tahut na pinapalim! A bilai ma tutun na tultulai ugu. U te tutun ta kaike ra bar linge, io, iau ni bul ugu bia nu balaure mah ra haleng. Mai! Nu guama tika ma no num watong!’
MAT 25:22 “Ma nong mah ga hatur kawase ra iruo arip na kinewa ga hanuat, gaam tange bia, ‘Nugu watong, u ga tar ra iruo arip na kinewa tagu. Nas baak! Airuo arip baling mah iau te gil hawaat leh.’
MAT 25:23 “Ma no uno watong ga tange tana bia, ‘Tahut na pinapalim. A bilai ma tutun na tultulai ugu. U te tutun ta kaike ra bar linge, io, iau ni bul ugu bia nu balaure mah ra haleng. Mai! Nu guama tika ma no num watong!’
MAT 25:24 “Io, nong ga hatur kawase tiga arip na kinewa ga hanuat um, ga tange bia, ‘Nugu watong, iau ga nunure tar bia a ngalngaluanine ugu. U la kilkil ing pau ga so. Ma u la dikdik ing pau ga sasahuane.
MAT 25:25 Io, iau ga burut, iau gaam a bus ira num kinewa ra pise. A ken ira num at.’
MAT 25:26 “Ma no uno watong ga tange balik tana bia, ‘A sakapsakapuana tultulai ugu! Bia u ga nunure tar bia iau la kilkil ing pai ga so, ma iau la dikdik ing pai ga sahuane, io, wara bih pau gaam tar ira nugu kinewa tano benk, bia naga gil leh ta tinahuat tana? Ma bia iau gor tapukus iau gor me kap habaling ira nugu kinewa ma ira tinahuat mah tana.’
MAT 25:28 “Io, ga tange ta diet bia, ‘Muat kap leh iakano arip na kinewa sukun ie, muat na tar ie ta iakano tultulai i hatur kawase ra sangahul na arip.
MAT 25:29 Io, iau te tange ta muat huo kanong na tutun bia sige nong i mur no nugu sinisip, iau ni idanei. Ma no uno haridaan na tamat sakit. Ma sige nong pai mur no nugu sinisip, no uno da hansik na haridaan da kap sei tana.
MAT 25:30 Ma muat se iakano sakapsakapuana tultulai ukatiga nataman tano kankado. Ma na susuah ma na hatagiris na ngise kaia.’”
MAT 25:31 Ma Jisas ga tange habaling mah hoken: “Ma bia Nong a Tunotunoi na hanuat ma ira uno minamar, diet ma ira angelo bakut, na hatur no uno kinkinis na tamat na lualua na minamar.
MAT 25:32 Ma da kap hulungan ira hunhuntunaan bakut ukaia ra matmataan tana. Ma na paleng harbasiane ira matanaiabar hoing tiga ut na balaura sipsip nong i la paleng harbasiane ira sipsip talur ira me.
MAT 25:33 Na bul ira sipsip tano palpal na kata, ma ira me tano palpal na kesa.
MAT 25:34 “Ma no Tamat na Lualua na Gil Harkurai na tange um ta diet kaia ra palpal na kata hoken: ‘Muat mai, ing nagu Sus gate idane muat! Muat na kap leh ira mahal ing ga tagure wara numuat, merau laah ing ga hakisi no ula hanuo.
MAT 25:35 Io, bia ing iau ga taburungan muat ga tabar iau. Iau ga maruk ma muat ga hamamo iau. Bia ing iau ga wasire huat, muat ga bale leh iau.
MAT 25:36 Ga pataie ta kiniasigu, ma muat ga tar ari tagu. Bia iau ga maset, muat ga balaure timaan iau. Ma iau ga kis ra hala na harpidanau, ma muat ga kol iau.’
MAT 25:37 “Ma ira ut na takodas diet na tange balik tana hoken: ‘Numehet Watong, hunanges bia mehet ga nes bia u ga taburungan, mehet gaam tabar ugu, ma bia u ga maruk, mehet gaam hamamo ugu?
MAT 25:38 Ma hunanges mehet ga nas bia u ga hanuat hoira wasire, mehet gaam bale leh ugu, ma bia pataie ta kiniasim, ma mehet gaam tar ari taam?
MAT 25:39 Ma hunanges mah mehet ga nas bia u ga maset bia u ga kis ra hala na harpidanau, kaik mehet gaam hanuat wara kakol ugu?’
MAT 25:40 “Io, no Tamat na Lualua na Gil Harkurai na balu diet bia, ‘Muat hadade baak! Asa ing muat gate gil wara gaiena kaike ra hana maris ing diet haratasin ma iau, muat ga gil mah huo tagu.’
MAT 25:41 “Ma namur na tange um ta diet tano uno palpal na kesa hoken: ‘Muat ing God gate tibe bingbing tar muat, muat haan laah! Muat haan uras tano iaah nong pa nale maat, nong i taguro taar wara utane Sataan ma ira uno angelo.
MAT 25:42 Io, bia ing iau ga taburungan muat pa ga tabar iau. Iau ga maruk ma muat pa ga hamamo iau.
MAT 25:43 Bia iau ga hanuat hoing ira wasire muat pa ga bale leh iau. Pataie ta kiniasigu ma muat pa ga tar ari tagu. Bia iau ga maset ma iau ga kis ra hala na harpidanau mah, muat pa ga kol leh iau.’
MAT 25:44 “Ma diet mah, diet na balui bia, ‘Numehet Watong, hunanges mehet ga nas ugu bia u ga taburungan, u ga maruk, u ga hanuat hoing ira wasire, u ga supi ta kiniasim, u ga maset, bia u ga kis ra hala na harpidanau, ma mehet pa ga harahut ugu?’
MAT 25:45 “Na balu diet bia, ‘Muat hadade baak! Asa ing muat pa gale gil wara gaiena kaike ra hana maris ing diet haratasin ma iau, muat pa ga gil mah huo tagu.’
MAT 25:46 “Ma diet kaike, diet na sola tano ngunngutaan hathatika. Iesen ira ut na takodas diet na sola tano nilon hathatika.”
MAT 26:1 Ma bia Jisas gate tange bakut kaike ira nianga, gaam tange ta ira uno bulu na harausur hoken.
MAT 26:2 “Muat nunure tar bia no Nian na Hinahaan Sakit airuo bung taar um utana. Ma da tar se Nong a Tunotunoi bia diet na tut tar ie tano ula kabai.”
MAT 26:3 Io, ira tamat na ut na pakila lotu ma ira tamat ta ira huntunaan, diet ga hanuat hurlungen narako tano tamat na hala tane Kepas, no tamat ta ira ut na pakila lotu.
MAT 26:4 Ma diet ga wor tika bia diet na sisilih tiga bilai na ngaas na harakumkumaan wara palpalim kawase Jisas waing diet naga bu bing ie.
MAT 26:5 Iesen diet ga tange, “Dahat pa na gil huo kaia tano nian, ira tunotuno diet kabi tut na purpuruan ma dahat.”
MAT 26:6 Jisas ga kis taar Betani, narakoman tano hala tane Saimon, nong baak ga sam sakana minaset taar tano palatamaine.
MAT 26:7 Ma bia Jisas ga iaiaan tano suuh na nian, tiga hahin ga hanuat taar tana, gaam kap hawaat tiga mangana bilai na gingop na taah. Ma di ga gil ie ma ra haat na tiris. Ma narakoman tana, ari waiwai wara salsalap ma a tabi kinewa tana. Ma ga hurange no waiwai tano ulu Jisas.
MAT 26:8 Iesen bia ira uno bulu na harausur diet ga nes huo, diet ga ngurungur, diet gaam tange bia, “Wara bih tun at bia i hasurum biai?
MAT 26:9 Di gaar te suhurane no waiwai wara kapkap ta tamat na kinewa wara harharahut ira maris.”
MAT 26:10 Iesen Jisas ga palai ta iakan, gaam tange ta diet bia, “Waak muat kiskis na gil iakan ra hahin kanong i te gil tiga bilai na linge sakit taar tagu.
MAT 26:11 Ira maris diet na kis tika ma muat hatika, iesen iau pa ni kis hatika taar ma muat.
MAT 26:12 Bia i te hurange bus tar ie tano tamaigu, i gil huo wara tangtagure iau utano bung bia da hatur iau tana.
MAT 26:13 Muat hadade baak! Da hinawas ta iakan ra tahut na hinhinawas ta ira taman bakut tano ula hanuo. Bia da gil huo, io, no linge no hahin i te pakile tar da hinawas mah utana wara halilik tar ira tunotuno utana.”
MAT 26:14 Io, tikai ta diet ta ira sangahul ma iruo na bulu na harausur, a hinsana ne Iudas Iskariot, ga haan taar ta ira ut na pakila lotu.
MAT 26:15 Gaam tiri bia, “Muat na tar sa tun tagu ing bia ni tar se Jisas ta muat?” Io, diet ga was tar aitul a sangahul na siliwa tana.
MAT 26:16 Tur leh ta iakano pakana bung ga sisilih tiga bilai na ngaas wara tartar se Jisas ta diet.
MAT 26:17 Io, tano luena bung tano nian na Beret Pai La Laalat, ira bulu na harausur diet ga hanuat taar tane Jisas, diet gaam tiri ie, “U sip bia mehet na tagure no Nian na Hinahaan Sakit ahe?”
MAT 26:18 Ga balu diet bia, “Mur kaike, mur na haan laka tano pise na hala, mur na nas no tunotuno mur palai taar tana. Ma mur na tange tana bia, ‘No tena harausur i tange bia no uno pakana bung i te hanuat. Aie ma mehet ira uno bulu na harausur, mehet na ien no Nian na Hinahaan Sakit kaia ra num hala.’”
MAT 26:19 Ma ira iruo bulu na harausur dir ga gil hoing Jisas ga tange ta dir, dir gaam tagure no Nian na Hinahaan Sakit.
MAT 26:20 Ma bia gate matarahien bungbung Jisas ma ira uno sangahul ma iruo, diet ga kis tika taar tano suuh na nian.
MAT 26:21 Ma bia diet ga iaiaan, Jisas gaam tange ta diet bia, “Muat hadade baak! Tikai ta muat na tur talur iau ma na tar se iau.”
MAT 26:22 Io, diet ga manga tapunuk kaik tikatikai at ta diet ga tange tane Jisas bia, “Nugu Watong, iau lik tutun bia pai iau, naka?”
MAT 26:23 Ma Jisas ga balu diet, “Nong i te hasuguh no ana beret tika ma iau narako tano dis, aie at mon nong na tur talur iau ma na tar se iau.
MAT 26:24 Nong a Tunotunoi na haan taar tano uno minaat hoing at mon ira tangesot diet gate pakat tar utana. Sen bia maris ta iakano tunaan nong na tur talur Nong a Tunotunoi ma na tar sei! Gaar tahut tana bia pa di gor kahai, kanong na kap tiga tamat na harpidanau.”
MAT 26:25 Io, Iudas, nong na tur talur ie ma na tar sei, ga tange tana bia, “Nugu Watong, iau lik tutun bia pai iau, naka?” Jisas ga balui, “Augu at mon.”
MAT 26:26 Bia diet ga iaiaan Jisas ga kap leh tiga katona beret, ga tanga tahut tane God tana, ma gaam pidik ie. Io, ga palau ira uno bulu na harausur mei ma ga tange ta diet, “Muat kap leh ie, muat naga ien ie. Iakan no tamaigu.”
MAT 26:27 Namur ga kap leh no gingop na wain, gaam tanga tahut tane God tana. Ga tar ie ta diet, gaam tange bia, “Muat bakut, muat mom.
MAT 26:28 Iakan no degu nong na hatutun nora kunubus meram ho God. Ma iau ni tar se biai wara sungsuge se ira sakena gar na haleng.
MAT 26:29 Muat hadade timaan! Iau pa ni mame habalin ta wain tuk tano pakana bung tano kinkinis na harkurai ma ra harbalaurai tano agu Sus ing ni mom tika balin ma muat.”
MAT 26:30 Ma bia diet gate inge tar tiga ninge diet ga hansur mekaia uram ra uladih Olip.
MAT 26:31 Ma Jisas ga tange ta diet bia, “Katin ra bung bia muat na nas bia di gilgil hohe tagu, muat bakut, muat na hilau sukun iau hoing no tangesot gate pakat tar ta ira nianga tane God. Ma God ga tange bia, ‘Iau ni bu bing no ut na balbalaura sipsip, ma no uno kaba sipsip diet na hilau harbasia.’”
MAT 26:32 Ma Jisas ga tange habalin bia, “Kaike i tutun iesen iau ni lon huat balin, ma iau ni lua ta muat uras Galili.”
MAT 26:33 Iesen Pita ga tange tana, “A tutun bia diet bakut dak, diet na hilau sukun ugu bia ing diet na nas hoing da gil huo taam, iesen tutun sakit bia pa ni hilau sukun ugu.”
MAT 26:34 Io, Jisas ga balui, “Hadade baak! Katin at ra bung, bia no kareka pa na kakel baak, ma u te harus ise tar iau aitul a pakaan.”
MAT 26:35 Iesen Pita ga tange tana, “A linge bia ing bia ni maat tika ma ugu. Iau pa ni harus ise at ugu.” Ma ira mes ta diet, diet ga tange huo mah.
MAT 26:36 Io, Jisas ma ira uno bulu na harausur, diet ga haan taar tiga katon di kilam ie bia Getsemani. Ma Jisas ga tange ta ira uno bulu na harausur bia, “Muat na kis taar kai, ma iau baak, ni haan uram ma ni sasaring.”
MAT 26:37 Io, ga lamus leh Pita ma ira iruo nati Sebedi, dal gaam sakatei. Iakano pakana bung ga kilingane ra tamat na tapunuk ma ga manga kalar mah.
MAT 26:38 Io, ga tange ta dal, “No nugu kidilona nilon i manga tirtirih sakit kaiken iau gi kilingane bia iau wara minaat. Mutal kis kai ma mutal na naanaas tika ma iau.”
MAT 26:39 Io, ga haan kakari dahin, gaam sian tudu no matmataan tana uras napu tano pise, ma gaam sasaring hoken: “Mama, bia ing i haruat tano num sinisip, iau sip bia nu kap se iakan ra tinirih mekai ho iau nong i wara hinaan tupas iau. Ma sen bia waak u gil ing iau sip. Nu gil at ing u sip.”
MAT 26:40 Io, ga haan tapukus balin taar ta ira uno aitul a bulu na harausur ma ga nas dal bia dal ga kumkubaba. Ma Jisas ga tange tane Pita, “Maris! Pai tale bia u gor naanaas ta mon ta dahin?
MAT 26:41 I tahut bia mutal na naanaas ma mutal na sasaring waing mutal pa na puko bia ta harwalaam na tupas mutal. Ira bala mutal i kanan taar um wara turtur bat ira harwalaam, sen bia a tunotuno tun mon mutal, kaik naga dadas ta mutal.”
MAT 26:42 Io, ga haan baling laah tano iruo pakaan, gaam sasaring bia, “Mama, bia iakan ra tinirih pa na haan laah tuk at bia ni sola tana, io, iau ni mur haruatne no num sinisip.”
MAT 26:43 Bia ga haan tapukus balin ga nas tupas habalin dal bia dal ga kumkubaba, kanong dal ga manga sumsumela.
MAT 26:44 Io, ga haan talur habaling dal, gaam a sasaring baling tano aitul a pakaan, ma ga sasaring baling at mon hoing nalua.
MAT 26:45 Ga tapukus taar baling ta ira itul a bulu na harausur, gaam tange ta dal, “Iau marmaris bia kana at baak mutal kumkubaba ma mutal tatohun. Nas baak! No pakana bung i te hanuat bia da tar se Nong a Tunotunoi ta ira lima diet ira ut na sakena.
MAT 26:46 Mutal tut ma datal na haan. Nas um! No tunaan nong na tar se iau iakaike tuai i hanan huat!”
MAT 26:47 Ma bia ga iangianga, Iudas, tikai ta ira uno sangahul ma iruo na bulu na harausur, ga salo huat. A tamat na matanaiabar ga hanuat tika mei ma diet ga kapkap hani ra wise ma ra kapsil. Kaiken ra matanaiabar at ira tamat na ut na pakila lotu ma ira tamat ta ira huntunaan diet ga tule se diet.
MAT 26:48 Io, no tunaan nong ga tur talur Jisas, nong i wara tartar sei, gate tange tar ta diet hoken: “No tunaan iau ni haianga leh ie ma ni lusung ie, aie at mon. Muat na palim kawasei.”
MAT 26:49 Kaik at mon Iudas ga hanuat taar tane Jisas. Ga haianga leh ie hoken: “Tahut na bung taam, tena harausur!” ma ga haatnei ma ra harlusung.
MAT 26:50 Ma Jisas ga tange bia, “Tasigu, nu gil ing u hanuat urie.” Io, ira tunotuno diet ga hanuat taar tana, diet gaam palim kawasei.
MAT 26:51 Io, tikai ta diet ing ga tur tika taar ma ne Jisas ga sasal leh no uno wise na hinarubu, gaam kato kutus se tiga talingana no tultulai tano tamat ta ira ut na pakila lotu.
MAT 26:52 Ma Jisas ga tange tana bia, “Subale pukus no num wise! Io, diet bakut ing diet palim wise na hinarubu diet na maat at tano wise.
MAT 26:53 Pau nunure bia iau tale bia ni saring nagu Sus wara harharahut iau, ma kaiken at mon gor tule hasur sangahul ma iruo na matana ubane na angelo?
MAT 26:54 Iesen bia iau gor gil huo, ira nianga tane God di ga pakat pa gor hanuat tutun kanong ira pakpakat i tange bia na tutun bia iakan na hanuat at.”
MAT 26:55 Ma ta iakano pakana bung Jisas ga tange tano tamat na matanaiabar bia, “Hoing balik bia iau tiga holmatau kaik muat gi kap hawaat ira wise na hinarubu ma ra kapsil wara palpalim kawase iau? Pai tiga holmatau iau! Ta ira bungbung iau git kiskis ma iau git harharausur tano tamat na hala na lotu ma muat pa ga palim kawase iau.
MAT 26:56 Iesen kaiken ra linge bakut i te hanuat wara hatutun ing ira tangesot diet ga pakat.” Io, ira uno bulu na harausur diet ga hilau sukun um ie.
MAT 26:57 Bia diet gate palim kawase Jisas, diet ga lamus tar ie tane Kepas, no tamat ta ira ut na pakila lotu. Ma ira tena harausur ta ira harkurai tane Moses ma ira tamat ta ira huntunaan, diet gate kis hurlungen taar kaia.
MAT 26:58 Ma Pita ga murmur hani at Jisas, ma ga taptapaka haan at, tuk taar tano hera tano ngasiana no tamat ta ira ut na pakila lotu. Gaam tur huat kaia wara nasnas bia diet na gil hohe tane Jisas, kaik gaam a kis tika taar ma ira ut na harbalaurai uta iakano katon.
MAT 26:59 Ma ira tamat na ut na pakila lotu ma ira kaba kaunsil, diet ga sisilih ta mangana nianga wara tangtange hagahe Jisas waing diet naga bu bing ie.
MAT 26:60 A tutun bia a haleng diet ga hanuat, iesen diet pa ga nes leh tari a mangana hartutung huo. Ma diet ing diet ga hanuat, diet ga hinawas harabota utana. Iesen, namur dahin, airuo ga hanuat ukaia ho ie.
MAT 26:61 Ma dir ga tange bia, “Iakan ra tunotuno ga tange hoken: ‘Iau tale bia ni dure no tamat na hala na lotu tane God, ma iau ni hatur habalin mon ie ta aitul a bung.’”
MAT 26:62 Io, no tamat ta ira ut na pakila lotu ga taman tut, gaam tange tane Jisas bia, “Iau karup bia pau balu diet! Nu tange hohe ta ken ra mangana hinhinawas diet tung tar ugu me?”
MAT 26:63 Iesen Jisas ga tur kunkun taar at mon. Io, no tamat ta ira ut na pakila lotu ga tange tana, “Iau hasasalim ugu taar tano lilona God bia nu hinawase mehet bia augu no Mesaia, no Nati God, bia taie!”
MAT 26:64 Ma Jisas ga tange tana, “Masa! Hokaike at mon u te tange. Iesen iau tange ta muat bia muat na nas ie Nong a Tunotunoi ma na kis taar tano tamat na kinkinis kaia tano kata na limane God no Dadasine, ma na hanhan suur ta ira bahuto meram ra mawe.”
MAT 26:65 Io, no tamat ta ira ut na pakila lotu ga diris ira kiniasine at ma gaam tange, “I te tange hagahe God! Dahat pai supi habalin um ta tunotuno wara hinhinawas utana. Muat te hadade tar ing i te tange hagahe God bia dir haruat mon.
MAT 26:66 Muat lik hohe?” Ma diet ga balui, “I tale at bia na maat!”
MAT 26:67 Io, diet ga iabis no matmataan tana. Diet ga kubus bat ira matana, diet gaam tut ie ma ira lima diet, ari diet gaam pasar ie, ma diet gaam tange, “Bia ing no Mesaia ugu, io, nu kilam sot bia sige iakanong i te tut ugu!”
MAT 26:69 Io, Pita ga kis taar kaia tano hera ma tiga tultulai na hahin ga hanuat taar tana, gaam tange, “Augu mah, u git tiktika ma iakanong me Galili, ne Jisas.”
MAT 26:70 Pita balik ga harus gaam tange ra matmataan ta diet bakut, “Iau pai palai at uta kaike ra linge u tangtange!”
MAT 26:71 Ma bia ga haan laah ukaia ra matanangas huat, tiga mes na tultulai na hahin ga nas ie, gaam tange ta ira matanaiabar ing diet ga turtur haan kaia bia, “Iakan ra tunotuno git tiktika ma Jisas me Nasaret.”
MAT 26:72 Io, ma Pita ga harus baling, gom hasasalim, ma gom tange, “Iau pai nunure at iakano tunotuno!”
MAT 26:73 Io, namur dahin diet ing diet ga turtur hutet haan, diet ga hanuat taar tana, ma diet gaam tange, “I palai bia augu tikai ta diet kanong ira num kapis nianga i haminas huo.”
MAT 26:74 Pita ga tange ta diet, “Iau sasalim ma ra tutun bia iau pai nunure iakano tunotuno! Bia iau harabota, io, iau sip bia God na hapidanau iau!” Io, kaik at mon no kareka ga kakel.
MAT 26:75 Ma Pita ga lik habalin leh um ira nianga Jisas ga tange tar tana hoken: “Bia no kareka pa na kakel baak, ma u te harus ise tar iau aitul a pakaan.” Ma Pita ga haan sukun iakano subaan, ma gaam manga suah.
MAT 27:1 Bia gate malaan um ira tamat na ut na pakila lotu ma ira tamat ta ira huntunaan, diet ga wawor tika, ma diet ga haut wara bubu bing Jisas.
MAT 27:2 Ma diet ga kubus ira limana, diet gaam lam tar ie tane Pailat, no tamat na ul kukuha me Rom.
MAT 27:3 Ma bia Iudas, nong ga tur talur Jisas, ga nas bia di gate tule bingbing ie, ga manga marmaris. Io, ga tar pukus ira aitul a sangahul na siliwa taar ta ira tamat na ut na pakila lotu ma ira tamat ta ira huntunaan.
MAT 27:4 Ma ga tange ta diet, “Iau te gil tiga ronga kanong iau te tar se tikai nong pai gil ta ronga bia na hiruo.” Ma diet ga tange tana, “Mehet na bih balik? Augu at!”
MAT 27:5 Io, Iudas ga se tar ira kinewa narako tano tamat na hala na lotu, gaam haan laah. Io, ga haan, gaam a kukut.
MAT 27:6 Ira ut na pakila lotu diet ga kap leh ira siliwa, diet gaam tange, “Pai haruat ma ira harkurai tane Moses bia dahat na bul kaiken ra kinewa tano bunbulaan kai ra tamat na hala na lotu, kanong a matana hiniruo kaike.”
MAT 27:7 Iesen tiga katona pise, auno no ut na gil gingop ma ra pise kana. Ma bia diet ga wor tika laah, diet ga kap leh ira kinewa ma diet ga kul ie wara busbus ira minaat me tapaka.
MAT 27:8 Io kaik, tuk taar at baak katin, di kilam iakano ra subaan bia, ‘Katon gar na Hiniruo.’
MAT 27:9 Io, iakan ga hatutun no nianga no tangesot Ieremia ga tange bia, “Diet ga kap leh ira aitul a sangahul na siliwa, no matana ing Israel gate puo tar tana.
MAT 27:10 Kaik, bia diet ga palai tano katona pise, auno no ut na gil gingop ma ra pise, diet ga kap leh no kinewa, diet gom kul ie hoing no Watong gate tange haminas bia ni gil huo.”
MAT 27:11 Io, Jisas ga tur tano matmataan tano tamat na ul kukuha me Rom, ma no tamat na ul kukuha ga tiri ie bia, “Augu, augu no tamat na lualua na gil harkurai audiet ira Iudeia?” Jisas ga balui, “A num nianga at!”
MAT 27:12 Ma bia ira tamat na ut na pakila lotu ma ira tamat ta ira huntunaan, diet ga tung ie, pa ga babalu.
MAT 27:13 Ma Pailat ga tange tana bia, “Haleng kaike ra linge diet tangtange tar taam. Hohe bia u hadade bia tar at mon?”
MAT 27:14 Iesen bia Jisas pa ga babalu at ta dahin uta ira linge diet ga tung ie urie, kaik no tamat na ul kukuha ga karup gaam nguanguo.
MAT 27:15 Audiet magingin ira Iudeia bia ta ira kaba Nian na Hinahaan Sakit bakut, no tamat na ul kukuha me Rom git hashasur uta diet ira matanaiabar tiga tunotuno mekaia ra hala na harpidanau. Aie mon nong ira matanaiabar diet ga sip ie.
MAT 27:16 Ma ta iakano pakana bung, tiga tunotuno, no hinsana Barabas, nong di ga wis kawase narako tano hala na harpidanau. Ma ira matanaiabar diet ga nunure timaan tar ie ta ira uno tintalen.
MAT 27:17 Io, bia ira matanaiabar diet ga hanuat hurlungen, Pailat ga tiri diet bia, “Muat sip bia ni waak se tar sige ukaia ho muat—Barabas, bia Jisas nong di kilam bia Krais?”
MAT 27:18 Ga tiri huo kanong ga nunure tar bia diet ga lilik sakasaka taar tane Jisas, kaik diet gaam tar sei tana.
MAT 27:19 Ma bia Pailat ga kis taar tano uno kinkinis na harkurai, no uno hahin ga tula nianga ukaia ho ie. Ma ga tange bia, “Iakan ra tunotuno pai gil tiga ronga. Waak u gil tiga linge tana kanong ra bung i ubal iau tiga tamat na barbarien wara gaiena.”
MAT 27:20 Iesen ira tamat na ut na pakila lotu ma ira tamat ta ira huntunaan, diet ga sunang ira matanaiabar bia diet na saring leh Barabas bia na langalanga ma bia Jisas at na hiruo.
MAT 27:21 Ma no tamat na ul kukuha me Rom ga tiri diet bia, “Sige ta dir kaiken, muat sip bia ni hasur tar ie ta muat?” Diet ga balui, “Barabas!”
MAT 27:22 Io, Pailat ga tiri diet bia, “Ma ni bihane um Jisas nong di kilam ie bia Krais?” Ma diet bakut, diet ga balui, “Da tut tar ie ra ula kabai!”
MAT 27:23 Ma Pailat ga tiri diet bia, “Muat tange huo warah? A mangana ronga sa i te gil tar?” Iesen diet ga manga kakonga balik, diet gaam tange, “Da tut tar ie ra ula kabai!”
MAT 27:24 Ma ing Pailat ga nas bia ira linge pa ga hilau timaan tuai um ma a purpuruan ga wara hinanuat, io, ga kap leh ra taah, gom taptapir ra matmataan ta ira matanaiabar. Ma ga tange ta diet bia, “Iau langalanga utano minaat ta iakan ra tunotuno. A numuat linge um!”
MAT 27:25 Ma ira tunotuno bakut, diet ga balui, diet gom tange, “Waak um ira tinirih utano uno minaat na kisi mehet ma ira numehet bulumur mah!”
MAT 27:26 Io, Pailat ga hasur se tar Barabas taar ta diet. Iesen ga tule tar Jisas ta ira uno umri, diet gom dangat ie ma diet gom waak se tar ie ta ing diet na tut tar ie tano ula kabai.
MAT 27:27 Io, ira umri tano tamat na ul kukuha me Rom, diet ga lam leh Jisas ukaia tiga katon tano but na ngasiane Pailat, diet gom tau hulungan no kidilona matana ubane bakut.
MAT 27:28 Diet ga kap se ira kiniasine ma diet ga hasigam ie ma tiga dardarana maal i haruat hoing ira gar na watong.
MAT 27:29 Io, diet ga wiwisane tikane ira tigatige hoing tiga balaparik, diet gaam hakukuh no uluno mei. Diet ga hapapalim tar no kata no limana ma tiga buko, diet gom singa bukunkek menalua tana, ma diet gom kukutur tana hoken: “Mehet urur taam, tamat na lualua na gil harkurai gar na Iudeia!”
MAT 27:30 Ma diet ga iabis ie, diet gom kap leh no buko, ma diet gom laulawat no uluno.
MAT 27:31 Namur bia ira umri diet gate kukutur taar tana, diet ga kap se no dardarana maal tana, diet gaam hasigam habalin ie ma ira kiniasine at. Io, diet ga lam hasur um ie wara laulau tar ie tano ula kabai.
MAT 27:32 Io, bia diet ga hanansur laah, diet ga harsomane tiga tunaan me Sairin, a hinsana Saimon. Ma diet ga sunang ie bia na kap leh balik no kabai.
MAT 27:33 Ma diet ga hanut uram tano katon di kilam ie bia Golgota (no kukuraina bia, no taman hora ula turangan.)
MAT 27:34 Di ga tul se ra wain tane Jisas bia na mame. Iakano wain di gate dolowane pakur tar ma ra malmalena linge wara bingbing ngunngutaan. Iesen bia Jisas ga walar ie, ga malok bia na mame.
MAT 27:35 Ma bia diet gate tut tar ie tano ula kabai, diet ga mamagu ma ra satu wara nunure leh bia sige na kap leh gahim ta ira kiniasine Jisas.
MAT 27:36 Ma diet ga kis taar um, diet gaam balaure tar ie.
MAT 27:37 Ma ira nianga mah di ga tung ie me, di ga pakat ma di ga bul tano ana kabai meram naliu tano uluno. Ma ga tange hoken: “Jisas iakan, no tamat na lualua na gil harkurai gar na Iudeia.”
MAT 27:38 Ma diet ga tut tar mah airuo holmatau taar ra iruo mes na kabai, tikai tano uno kata ma tikai tano uno kesa.
MAT 27:39 Ma diet ing diet ga haan sakit ie kaia diet ga laulawa ul tar tane Jisas ma diet ga tangtange hagahei hoken: “Augu ing u ga tange bia nu dure no tamat na hala na lotu ma nu pakile habalin mon ie ta itul a bung. Io, nu halon habalin ugu! Ma ing bia Nati God ugu, nu hansur mekaia ra ula kabai!”
MAT 27:41 Ma diet ira tamat na ut na pakila lotu, ma ira tena harausur ta ira harkurai tane Moses, ma ira tamat ta ira huntunaan, diet ga kukutur mah tana huo.
MAT 27:42 Ma diet ga tange hoken: “Ga halon ira mes, ma sen pai tale bia na halon habalin at ie. Bia no tamat na lualua na gil harkurai gar na Israel ie, i tahut bia na hansur at kaiken mekaia ra ula kabai waing dahat naga nurnur tana.
MAT 27:43 Ga tange bia i la so tar no uno nurnuruan tane God! Io, bia ing i tutun ma bia God i sip ie, i bilai bia God na halon ie kaiken, kanong ga tange bia a Nati God ie.”
MAT 27:44 Ma ira iruo holmatau ing di ga tut tar ta ira airuo kabai hutet tana, dir mah, dir ga tange hagahei huo.
MAT 27:45 No hanuo ga kankado haburen leh ra sangahul ma iruo na pakana bung ra tingena kasakes tuk taar ra aitul a pakana bung ra matarahien.
MAT 27:46 Ma ra aitul a pakana bung um ra matarahien Jisas ga kakonga ma ga tange, “Eloi, Eloi, lama sabaktani?” Ma no kukuraina bia, “No nugu God, no nugu God, wara biha bia u te hansukun iau?”
MAT 27:47 Ma bia ari ing diet ga tur taar hutet kaia diet ga hadadei, diet gaam tange, “I te tatau ne Elaija.”
MAT 27:48 Kaik at mon tiga nong ta diet ga hilau, gaam hahungi tiga gurgurun tes ma ra wain, gaam sako tar ie tiga sila daha, io, ga sangore haut ie bia Jisas naga dup ie.
MAT 27:49 Iesen ira mes diet ga tange bia, “Tur baak, dahat na nas baak bia Elaija na hanuat wara halhalon ie.”
MAT 27:50 Ma bia Jisas ga manga kakonga balin, io, ga waak se no uno nilon, gaam maat um.
MAT 27:51 Io, no tamat na maal, nong di git balo kutus tar no tamat na hala na lotu mei, ga tamadiris hairuo, haburen leh meram naliu uras muk napu. Ma ga gunagune no pise ma ira haat gom tamapidik.
MAT 27:52 Ira midi na bul minaat ga tapapos ma haleng ut na takodas ing diet gate maat, diet ga tut hut balin tika ma ira palatamai diet.
MAT 27:53 Diet ga haan talur ira midi, io, namur bia Jisas ga tut hut balin, diet ga haan laka uram Ierusalem no halhaliana pise na hala, ma diet gaam harapuasa taar ta ira haleng.
MAT 27:54 Ma tiga tamat na umri ta tiga matana ubane, aie tika ma ra ari, diet ga balaure tar Jisas. Ma bia diet ga nes no kunakunar ma ira linge mah ga hanuat, diet ga manga burut, diet gaam tange, “Tutun sakit a nati God at ie!”
MAT 27:55 Ma a haleng na hahin diet ga tur taar tapaka dahin ma diet ga ngokngok ta ira linge ing ga hananuat. Ma diet kaike, ing diet ga mur Jisas meram Galili, diet gaam balaure ie ta ira uno sunupi.
MAT 27:56 Nalamin ta diet kaike ne Maria nong me Magadalen, ma Maria no pawasine Jemes ma ne Iosep, ma no pawasi dir ira iruo nati Sebedi.
MAT 27:57 Bia gate matmatarahien tuai um, tiga watong me Arimatia, no hinsana Iosep, ga hanuat. Aie mah gate bulu na harausur tane Jisas.
MAT 27:58 Ma ga haan tupas Pailat, gaam saring leh no palatamai Jisas. Io, Pailat ga hartula bia da tar se ie tana.
MAT 27:59 Iosep ga kap leh no palatamai Jisas, gaam wiwisane tiga talona sigar ponponiana maal tana wara pulpulus ie.
MAT 27:60 Io, ga bul halaka ie tano uno sigar midi. Iakano midi gate gil ngasiaan tar ie tano papara haat. Namur ga pulukane bat no matana haat ma tiga tamat na haat, ma gaam haan laah um.
MAT 27:61 Ma Maria nong me Magadalen, dir ma no maurana, dir ga kis taar kaia tiga palpal tano midi.
MAT 27:62 Ma tano bung menamur, a Bung Taguroi, no Bung na Sinangeh, ira tamat na ut na pakila lotu ma ira Parisi diet ga haan tupas Pailat.
MAT 27:63 Ma diet ga tange tana, “Numehet tamat, mehet lik kawase tar iakano ut na harabota ing baak ga lon taar, ga tange bia aitul a bung na pataam ma na tut hut baling.
MAT 27:64 Io, mehet sip bia nu hartula bia da balaure timaan no matanangas tano midi tuk taar bia aitul a bung na pataam. Ira uno bulu na harausur diet kabi kinau leh no palatamaine, ma diet kabi tange ta ira matanaiabar bia i te lon huat balin. Bia diet na harabota huo, na manga sakena balik um ta ing Jisas ga tange bia na tut hut baling.”
MAT 27:65 Ma Pailat ga balu diet, “Kaia. Muat lam leh tari ta ira umri diet naga balaure timaan no matanangas tano midi hoing at muat lik tar huo.”
MAT 27:66 Io, diet ga haan laah, diet gaam a balaure timaan no midi hoken. Diet ga bul nora binora tano matanangas na haat tano midi ma diet ga waak tar ira umri bia diet na harbalaurai taar um kaia.
MAT 28:1 Ma no Bung Taguro, no Bung na Sinangeh, ga pataam. Ma ra malabungbung tano Sade, Maria nong me Magadalen, dir mauraan ga haan wara nesnes no midi.
MAT 28:2 Io, ma tiga kanamena kunakunar ga hanuat kanong tiga angelo gar tano Watong ga hansur meram ra mawe, gaam hanuat tano midi, gom pulukane se no haat ma gom kis kora taar um tana.
MAT 28:3 Ga pilpilakas hora hile ma ira kiniasine ga manga ponpon sakit.
MAT 28:4 Ma ira umri ing diet ga balaure tar no midi, diet ga dedar ma no bunurut, diet gaam puko taar napu hoira minaat.
MAT 28:5 Ma no angelo ga tange ta ira iruo hahin bia, “Waak mur ra bunurut. Iau nunure bia mur naanaas ta Jisas nong di ga tut tar ie tano ula kabai.
MAT 28:6 Ie panim kai. I te tut hut baling hoing gate tange tar. Mur mai! Mur na nas no katon ing di ga hainoh ie kaia.
MAT 28:7 Kaiken at mon, mur na haan gasien, mur naga hinawase ira uno bulu na harausur bia i te tut hut baling sukun ra minaat. Io, na huna lua ta muat uram Galili. Ma muat na ra nas um ie kaia. Io, mur na lik kawase kaike iau te tange tar.”
MAT 28:8 Io, ira iruo hahin, dir ga haan sukun hagasiaan no midi ma ra bunurut, sen dir ga hung ma ra gungunuama mah. Ma dir ga hilau wara hinhinawase ira uno bulu na harausur.
MAT 28:9 Io, ma dir ga karup bia Jisas ga harsomane dir ma gaam haianga leh dir. Ma dir ga hanuat hutaten ie, dir gaam rapa ira iruo kakena, ma dir gom lotu tupas ie.
MAT 28:10 Io, Jisas ga tange ta dir bia, “Waak mur ra bunurut. Mur na haan, mur naga hinawase ira tasigu, diet ira nugu bulu na harausur, bia diet na haan uram Galili. Ma diet na ra nes iau kaia.”
MAT 28:11 Io, ira iruo hahin dir ga hanahaan na ngaas. Ma ari ta ira umri ing diet ga balaure no midi, diet ga haan laka tano pise na hala. Ma diet gom a hinawase ira tamat na ut na pakila lotu ta ira linge ing gate hanuat taar ta diet.
MAT 28:12 Ma ira tamat na ut na pakila lotu tika ma ira tamat ta ira huntunaan diet ga hanuat hurlungen, kaik diet gom hanuat ma tiga lilik. Io, diet ga tar ra but na kinewa ta ira umri.
MAT 28:13 Ma diet ga tange tar um ta diet ira umri hoken: “Muat na hinawas hokaiken: ‘Ra bung bia mehet kubaba taar, ira uno bulu na harausur diet me kinau leh ie.’
MAT 28:14 Ma bia iakan ra hinhinawas na haan tupas no tamat me Rom, mehet na hau ie, kaik muat pa naga ngarngarau uta tiga linge.”
MAT 28:15 Io, ira umri diet ga kap leh ira kinewa, ma diet gom gil haruatne hoing di gate tange taar ta diet. Ma iakan ra hinhinawas gate haan harbasia hurhurbit ta ira Iudeia tuk taar at baak katin.
MAT 28:16 Io, ira sangahul ma tikai na bulu na harausur diet ga haan uram Galili uram tano uladih nong Jisas gate tange tar ie ta diet.
MAT 28:17 Ma bia diet ga nas ie, diet ga lotu tupas ie. Iesen ari ta diet, diet ga lilik iriruo.
MAT 28:18 Ma bia Jisas ga hanuat hutaten diet, ga tange hoken: “Ira kaba dadas bakut aram ra mawe ma kai mah napu, nora agu Sus i te tar se tagu.
MAT 28:19 Io kaik, muat na haan ta ira hunhuntunaan bakut ma muat na hausur diet bia diet na murmur iau. Ma muat na baptais diet tano hinsa Mama, ma no Natine, ma no Halhaliana Tanuo.
MAT 28:20 Ma muat na hausur diet bia diet na taram ta ira hartula bakut ing iau gate tange ta muat. A tutun sakit iau ni kis tika ma muat ta ira pakana bung bakut, tuk taar ra hauhawatine iakan ra lon.”
MAR 1:1 No tahut na hinhinawas tane Jisas Krais no Natine God i hatahun hoken.
MAR 1:2 God ga tange tano pakpakat gar tano tangesot Aisaia hoken, “Hadade baak! Iau ni tule no nugu ut na kap nianga me nalua tano num hinanhuat, Nong na tagure no num ngaas;
MAR 1:3 Meram ra hanuo bia a ingana tiga nong i taatau, ‘Tagure no ngaas tano Watong, Gil hatakodasnei wara uno hinanhuat,’”
MAR 1:4 Wara hatutun no nianga tano tangesot Aisaia, Jon no ut na baptais ga hanuat aram ra hanuo bia ma ga harharpir ta ari a matanaiabar kaia hoken: “Muat na kap no baptais na lilik pukus waing God na lik luban se ira numuat magingin sakena.”
MAR 1:5 A tamat na matanaiabar sakit tano tamat na pise na hala Ierusalem ma ari mes na taman ta iakano ra hanuo Iudeia, diet git hanan tupas ie. Diet git hapuasne ira udiet magingin sakena, io, namur Jon git baptais diet tano taah Ioridaan.
MAR 1:6 Ma Jon um, ira kiniasine Jon di ga gil ma ra hina kamel ma git taltalin ma tiga pala bulumakau. Ma git ienien kubawa ma git mame ra tiri na imara.
MAR 1:7 Ma ga pirpir ira matanaiabar gaam tange ta diet hoken: “No tunotuno nong na hanuat namur tagu i tamat tagu. Ma iau pai haruat bia ni tudu wara laplapus ira hinau ta ira pupunaak na kakine.
MAR 1:8 Iau baptais muat ma no taah ma sen aie na baptais muat ma no Halhaliana Tanuo.”
MAR 1:9 Iakano pakana bung Jisas ga hanuat meram Nasaret tano hanuo Galili ma Jon ga baptais ie tano taah Ioridaan.
MAR 1:10 Ma ing bia Jisas ga hanan sot meram ra tingaan taah ga nes no ula mawe ga tamtamapapos ma no Tanuo ga hanansur taar tana hoing tiga bun.
MAR 1:11 A ingana tiga nong ga ianga suur meram ra ula mawe hoken: “Augu no Natigu, ma iau manga sip ugu ma iau kanakana sakit taam.”
MAR 1:12 Habir at mon ma no Tanuo ga tule haut ie uram ra hanuo bia.
MAR 1:13 Ma aihat na sangahul na bung ga lon tika ma ira rakaia na mangana linge diet la harhariaan aram ra hanuo bia. Ma Sataan mah ga walwalaam ie. Io, namur um ira angelo diet ga hanuat wara harharahut ie.
MAR 1:14 Namur bia di gate bul halaka tar Jon ra hala na harpidanau, Jisas ga haan ures Galili gaam harharpir utano tahut na hinhinawas tane God.
MAR 1:15 Ma ga tange hoken: “Muat na lilik pukus ma muat na nurnur tano tahut na hinhinawas kanong no pakana bung tano kinkinis na harkurai ma ra harbalaurai ta God iakanik.”
MAR 1:16 Io, bia ing Jisas ga hanahaan ra gagena no tamat na taah kom Galili ga nas leh airuo ut na kap kirip, Saimon ma no tasine Andru, dir ga sase tiga uben.
MAR 1:17 Ma Jisas ga tange ta dir, “Bia mur na mur iau ma ni hausur mur wara soh tunotuno.”
MAR 1:18 Io, dir ga hansukun hagasiaan ira udir uben ma dir ga mur ie.
MAR 1:19 Bia Jisas ga hanahaan hakakari i ga nas Jemes dir tasin ma ne Jon, ira iruo nati Sebedi. Dal tamaan ga kis taar tano mon ma dir ga tangtagure ira udir uben.
MAR 1:20 Kaik at mon Jisas ga tau dir ma dir ga haan talur no adir sus Sebedi ma ira tultulai tano ula mon, ma dir gaam mur ie.
MAR 1:21 Io, Jisas ma ira uno bulu na harausur, diet ga hanuat ukaia tano pise na hala Kapeneam. Ma tano Bung na Sinangeh Jisas ga haan laka tano hala na lotu audiet ira Iudeia gaam tur leh ra harausur.
MAR 1:22 Ira matanaiabar diet ga karup ma diet ga urur ta ira uno harausur kanong ga hausur diet hoing tikai i te kap ra dadas kaik gaam tale bia na ianga huo, ma pataie hoing diet ira tena harausur ta ira harkurai tane Moses.
MAR 1:23 Bia i ga hauhausur diet, tiga tunotuno a sakana tanuo i ga sosoha tana ga laka kaia ra hala na lotu audiet ira Iudeia ma ga manga tatau hoken:
MAR 1:24 “U biha, Jisas me Nasaret? U te hanuat bia nu hagahe mehet? Iau nunure tar bia no Halhaliana tane God ugu.”
MAR 1:25 Ma Jisas ga tigal no sakana tanuo, “Kis matien! Suur sukun ie!”
MAR 1:26 No sakana tanuo ga tong hadadas no tunotuno, gaam manga kup, io, ga suur sukun ie.
MAR 1:27 Io, ira matanaiabar bakut kaia diet ga karup, diet gaam ngalabo taar, kaik diet gaam wawor hoken: “A sigar mangana harausur iakan! I hausur ma no uno dadas at! I kure ise mah ira sakana tanuo ma diet taram ie!”
MAR 1:28 Io, no hinhinawas utane Jisas i ga haan harbasia gasien tano hanuo bakut Galili.
MAR 1:29 Menamur bia Jisas ma ira uno bulu na harausur dal ga haan sukun no hala na lotu audiet ira Iudeia, dal gaam haan laka tano ngasiane Saimon ma Andru. Ma ne Jemes ma Jon dir ga laka mah.
MAR 1:30 Ma no numune Saimon i ga noh taar tano ula suuh ma ra malahau. Ing at mon Jisas ga hanuat diet ga hinawasei tana.
MAR 1:31 Io, Jisas i ga haan ukaia ho ie, gaam palim no limana ma ga sal hatut ie. No malahau ga pataam sukun ie, io, ga tur leh bia na tagure ira nian uta diet.
MAR 1:32 Bia gate matmatarahien um, bia no kasakes gate suguh, ira matanaiabar diet ga kapkap hawaat ira kaba minaset bakut ukaia hone Jisas. Ma diet ga kapkap hawaat mah ing ira sakana tanuo ga sosoha ta diet.
MAR 1:33 Ma a haleng sakit ira matanaiabar ta iakano pise na hala diet ga hanuat hurlungen kaia ra matanangas.
MAR 1:34 Halengin diet, Jisas ga halangalanga diet ta ira haleng mangana minaset. Ga hasur se mah ra haleng sakana tanuo ta diet. Iesen Jisas pa ga bale leh ira sakana tanuo bia diet na ianga kanong diet ga nunure bia ne sige ie ma diet kabi hinawas utana.
MAR 1:35 Ra mala bungbung bia i ga kankado dahin baak, Jisas ga haan laah ukaia ra malubil gaam saasaring.
MAR 1:36 Ma Saimon ma ira uno harwis diet ga haan wara ninaas tana.
MAR 1:37 Bia diet ga nas tupas ie, diet ga hinawasei bia, “A haleng na matanaiabar diet naanaas taam.”
MAR 1:38 Io, Jisas ga tange, “Dahat na haan balik ta tiga katon ta ira taman hutet waing nigi harpir mah kaia kanong iau gate hanuat bia ni pakile huo.”
MAR 1:39 Io, ga hanahaan hurbit Galili gaam harharpir ta ira hala na lotu udiet ira Iudeia ma ga hashasur se ira sakana tanuo ta diet.
MAR 1:40 Tiga tunotuno nong ga sam sakana minaset tano palatamaine ga hanuat ukaia hone Jisas, ga singa bukunkek ma ga saring ie hoken: “Iau palai bia u haruat wara halangalanga iau waing pa na tale bia da hahale habaling iau. Ma bia ing u sip, nu gil huo tagu.”
MAR 1:41 Io, Jisas ga sasangaha gaam sigire ie kanong ga marsei gaam tange, “Iau sip tar. Nu langalanga!”
MAR 1:42 Kaik at mon no minaset ga pataam tano tunotuno.
MAR 1:43 Nalua ta ing Jisas ga tule se no tunotuno ga hakatom tar ie ma ra dadas na nianga hoken:
MAR 1:44 “Harbalaurai timaan! Waak bia nu hinawase ta tiga nong ta iakan ra linge iau gil ie taam. Iesen nu haan ma nu haminas ugu tano ut na pakila lotu. Ma nu tar no hartabar haruat ma no harkurai tane Moses. Ma iakano hartabar na hinawas palai wara hatutun bia u te langalanga ma bia pai tale mah bia tikai na hahale habaling ugu.”
MAR 1:45 Iesen no tunotuno ga haan balik gaam hinhinawas hurhurbit. Kaik, Jisas pa gaam haruat wara hinahaan palai ta ira pise na hala. Iesen i ga kiskis taar mon ta ira malubil. Ma ira matanaiabar at diet ga hanahaan tupas ie mekaia ta ira matahu taman.
MAR 2:1 Ma bia a bar bung gate sakit Jisas ga hanuat ukaia no uno taman Kapeneam. Ma ira matanaiabar diet ga hadade bia ie kenam ra hala.
MAR 2:2 Kaik haleng na matanaiabar sakit diet ga hanuat hurlungen kaia gaam pa taie ta mauho laah mekaia narako ures muk nataman. Ma Jisas ga harharpir ma no nianga ta God tupas diet.
MAR 2:3 Io, ma aihat na tunotuno dal ga kap hawaat tiga pengpeng ukaia hone Jisas.
MAR 2:4 Iesen dal pa ga haruat bia dal na haan hutet ma no pengpeng ukaia hone Jisas kanong a haleng na matanaiabar sakit. Io, dal ga tatik se ari a katon tano ula hala menaliu tane Jisas. Ma bia no mauho ga haruat dal ga haruhe hasur no pengpeng ma no kubena.
MAR 2:5 Bia Jisas ga nes ira udal nurnur, ga tange tano pengpeng, “Tasigu, ira num magingin sakena i te pataam.”
MAR 2:6 Ma ari a tena harausur ta ira harkurai tane Moses diet ga kis taar kaia ma diet ga liklik kumaan ta ira bala diet hoken:
MAR 2:7 “I tange huo warah? I tange hagahe God! Taie ta tunotuno i haruat wara sungsuge se ira magingin sakena—God sen mon!”
MAR 2:8 Ma Jisas ga hamaan kilam ira udiet lilik gaam tange, “Ira numuat lilik pai takodas.
MAR 2:9 Garum ta dir i malus? I malus bia ni tange tano pengpeng bia ‘Ira num magingin sakena i te pataam,’ bia i malus bia ni tange, ‘Tut, kap leh no kubem ma nugu haan’?
MAR 2:10 Iesen iau ni hapalaine muat bia Nong a Tunotunoi i hatur kawase no dadas wara sungsuge se ira magingin sakena kai ra ula hanuo.” Io, ga tange ta no pengpeng, “Iau tange taam, taman tut, kap leh no kubem ma nu haan ukaia ra ngasiaam.”
MAR 2:12 Io, no tunotuno ga tut gaam rakun leh no kubena ma ga haan laah ra matmataan ta diet bakut. Ma diet bakut tikatikai diet ga karup ma diet ga pirlat God diet gaam tangtange, “Dahat pai la nesnes ta tiga linge ho iakan.”
MAR 2:13 Io, Jisas ga tapukus baling ukaia ra gagena no tamat na taah kom Galili. A haleng na matanaiabar diet ga hanahaan tupas ie ma Jisas ga hauhausur diet.
MAR 2:14 Ma bia ga hanan sakit ga nas Lewi no natine Alipaio ga kis taar tano hala na kap takis. Ma Jisas ga tange tana, “Mur iau!” Ma Lewi ga taman tut ma ga mur ie.
MAR 2:15 Namur, bia Jisas ma ira uno bulu na harausur diet ga iaiaan kaia ra hala tane Lewi, ma haleng mah ira ut na kap takis ma ira sakantangunguan diet ga kis tika taar mei kanong a haleng diet git murmur ie.
MAR 2:16 Bia ira tena harausur ta ira harkurai tane Moses ing diet ira Parisi mah diet ga nas bia Jisas i ga iaiaan tika ma ira sakapsakapuana ma ira ut na kap takis, diet ga tange ta ira uno bulu na harausur hoken: “Pai bilai bia Jisas i iaiaan tika ma kaike ira ut na kap takis ma ira mes na sakana tunotuno mah.”
MAR 2:17 Jisas i ga hadade ira Parisi, io, ga tange ta diet. “Ing diet langalanga timaan, diet pai supi ra ut na harhalon, iesen diet sen diet maset. Iau pa gale hanuat bia ni tatau muat ing muat lik bia a ut na takodas muat, iesen diet sen ing diet palai bia diet sakena.”
MAR 2:18 Io, tiga pakaan ira bulu na harausur tane Jon no ut na baptais ma ira Parisi diet ga hahal tupas God. Ma ari a matanaiabar diet ga haan tupas Jisas ma diet ga tiri ie, “Wara bih ira bulu na harausur tane Jon no ut na baptais ma diet ing diet mur ira magingin ta ira Parisi diet hahal tupas God, ma ira num bulu na harausur, pataie?”
MAR 2:19 Io, Jisas ga balu diet hoken ma ra nianga harharuat. “Hohe bia ira wasire tano nian na hinaartola diet na hahal bia no marawaan nong i sigar tola i kis tika taar baak ma diet? Diet pa na gil huo kanong diet laro bia i kis taar baak ma diet.
MAR 2:20 Iesen ta tiga bung namur, no marawaan i sigar tola, da kap leh ie sukun diet. Io, ta iakano bung diet na hahal kanong diet na tapunuk.
MAR 2:21 “Taie ta tiga nong bia na dungut pakur ta tiga sigar katona maal taar tiga tuarena. Bia na gil huo no katon na sigar maal na diris ie bia ing di gis ie. Ma bia na diris ie, na tamarumut laah sukun no tuarena ma no mauho na manga tamat balik um.
MAR 2:22 Taie ta tiga nong mah bia na pintare no sigar wain pai lalat baak ta ira tuarena pala taah ing di ga gil ma ra pala me ma i te tapagas. Ing bia na gil huo, no wain na parok no pala taah ma na bureng. Kaik no wain na sakena ma ira paline mah. Taie. Na pintare no sigar wain pai lalat baak ta ira sigar pala taah at.”
MAR 2:23 Io, tiga Bung na Sinangeh Jisas ga hanan haan nalamin tano lalong na wit. Bia ira uno bulu na harausur diet ga tiktika haan mei diet ga hatahun bia diet na rarus ari a pat na wit.
MAR 2:24 Io, ira Parisi diet ga tange tane Jisas “Wara bih bia ira num bulu na harausur diet gil huo? Diet lake no harkurai utano Bung na Sinangeh!”
MAR 2:25 Io, Jisas ga tange, “Muat gate was tar ing Dawit ga gil, ing ga manga supi ta linge bia na ien, ing diet ma ira uno harwis diet ga taburungan.
MAR 2:26 Io, Dawit ga laka tano hala tane God ma ga ien no beret di gate tabar God mei bia Abiatar ga tamat taar ta ira ut na pakila lotu. No harkurai i tange bia ira ut na pakila lotu sen mon diet na ien iakano beret. Iesen Dawit balik ga ien ira beret ma ga tabar mah ira uno harwis.”
MAR 2:27 Ma Jisas um ga tange, “No Bung na Sinangeh, God ga bul ie wara gaiena ira tunotuno ma pataie bia ira tunotuno wara gaiena no Bung na Sinangeh.
MAR 2:28 Io, Nong a Tunotunoi i kure mah no Bung na Sinangeh.”
MAR 3:1 Namur Jisas ga haan baling ukaia ra hala na lotu udiet ira Iudeia ing tiga tunotuno a lima mat ie ga kis taar kaia.
MAR 3:2 Ari diet ga kis taar mah kaia ing diet ga sip bia diet na tung Jisas. Io kaik, diet gaam nesnes ie bia na harhalon tano Bung na Sinangeh bia taie.
MAR 3:3 Io, Jisas ga tange tano lima mat, “Tut naliu ma nu haan ukai nalamin.”
MAR 3:4 Ma Jisas ga tange ta diet, “Asa ira harkurai tane Moses i tange bia da gil ra Bung na Sinangeh? Bia da harahut bia da harangungut? Bia da halon tikai bia da bing tikai?” Iesen diet ga kis kunkun.
MAR 3:5 Bia Jisas ga nasnas diet ga ngalngaluan taar ta diet ma ga manga tapunuk kanong diet ga hadadas ira bala diet. Io, ga tange tano tunotuno hoken: “Tul se no limaam.” Ga tul se no limana, io, ga tahut baling.
MAR 3:6 Io, ira Parisi diet ga suur laah gasien tano hala na lotu audiet ira Iudeia ma diet ga wawor ma diet ing diet git turtur ma ne Herot bia diet na bu bing Jisas hohe.
MAR 3:7 Io, Jisas ma ira uno bulu na harausur diet ga haan laah ukaia tano tamat na taah kom Galili. Ma a tamat na matanaiabar sakit diet ga mur ie. Diet ga hanuat meram ta ira hanuo Galili, Iudeia, Idumaia, ma no hanuo menamur tano tiga palpal tano taah Ioridaan. Ma diet ga hanuat mah ta ira pise na hala Ierusalem, Tair, ma Saidon. Diet kaiken ra matanaiabar diet ga hanuat kanong diet ga hadade uta ira linge bakut Jisas ga gilgil.
MAR 3:9 Bia ga manga haleng sakit ira matanaiabar Jisas ga tange ta ira uno bulu na harausur, “Muat na tagure tiga mon ukai ho iau waing diet kabi sibit iau.”
MAR 3:10 A burena gaam tange huo kanong gate halon ra haleng ma diet ing diet ga maset diet ga hartaguniguni ukaia nalua wara singsigire Jisas.
MAR 3:11 Ma ari a tunotuno, ira sakana tanuo ga sosoha ta diet. Ma bia diet ga nes Jisas, diet git tuntudu menalua tana ma ira sakana tanuo diet git kaakongane, “Augu no Nati God.”
MAR 3:12 Iesen Jisas ga hakatom tar ira sakana tanuo hoken: “Muat pa na hinawase ta tiga nong bia sige iau.”
MAR 3:13 Namur Jisas ga hanut uram ra uladih ma i ga tatau leh diet ing ga sip diet. Ma diet ga haan tupas ie.
MAR 3:14 Ma ga gilamis leh ira sangahul ma iruo gaam kilam diet bia apostolo. Io, ga gilamis diet bia diet na kis tika mei ma na tule harbasiane diet wara harpir, ma bia diet na hatur kawase ra dadas wara hashasur ira sakana tanuo.
MAR 3:16 Io, i ga gilamis kaike ra sangahul ma iruo: Saimon (nong Jisas ga kilam ie bia Pita), ma Jemes dir tasin ma ne Jon ira iruo nati Sebedi (ga pas tiga mes na hinsa dir Buanerges, ing a kukuraina bia “Ira tunotuno ho ira parparara.”)
MAR 3:18 Ma ga gilamis habaling Andru, Pilip, Batalomiu, Matiu, Tomaas, Jemes no natine Alpias, ma Tadius. Ma tika ma diet, ne Saimon nong di ga kilam ie bia no Selot, ma ne Iudas Iskariot nong na tar se Jisas.
MAR 3:20 Bia Jisas ga haan laka tiga hala a tamat na matanaiabar diet ga haan haruat kaia kaik Jisas ma ira uno bulu na harausur diet pa ga haruat at bia diet na iaan.
MAR 3:21 Ma bia ira hinsakane Jisas diet ga hadade huo, io, diet ga marsei, diet gaam tange bia, “I biha? I te ba. Naka?” Ma diet ga haan wara hanhanawaan leh ie.
MAR 3:22 Ma ari a tena harausur ta ira harkurai tane Moses diet ga hansur meram Ierusalem. Ma diet ga tangtange, “Belsebul i te sosoha tane Jisas. Ma Jisas i haruat wara tultule hasur se ira sakana tanuo kanong iakano watong audiet ira sakana tanuo i te tar ra dadas tana kaik gi gilgil huo.”
MAR 3:23 Io, Jisas ga tatau leh diet ma ga haianga diet ma ira nianga harharuat hoken. “Sataan pai haruat tun at wara hasur se habaling ie.
MAR 3:24 Bia tiga huntunaan pai tur tika pa na tur dadas.
MAR 3:25 Bia tiga hatatamaan pai tur tika pa na kis timaan.
MAR 3:26 Ing bia no huntunaan tane Sataan gor harharubu baling ta diet, gor puko ma gor pataam.
MAR 3:27 Pataie ta tiga nong na laka tano ngasiana no ut na baso ma na kinau ta linge, ing bia pai huna kubus kawase ie. Ma namur um, na kikinau narako tano uno hala.
MAR 3:28 “Muat na hadade baak! God na lik luban se ira magingin sakena ta ira matanaiabar ma bia diet na ianga hagahe sige ta tikai, na lik luban se iakano mah.
MAR 3:29 Iesen nong i ianga hagahe no Halhaliana Tanuo, God pa na lik luban se iakano magingin. Iesen iakano magingin sakena na kis hatika taar ma pa nale pataam.”
MAR 3:30 Jisas i ga tange huo kanong diet ira tena harausur diet ga tangtange, “A sakana tanuo i te sosoha tana.”
MAR 3:31 Namur no pawasi Jisas ma ira tasine diet ga hanuat ma diet ga turtur haan nataman. Diet ga tule halaka tiga nong bia na lamus leh ie.
MAR 3:32 Ma ari ta diet ta ira haleng na matanaiabar diet ga tange tana, “No pawasim ma ira tasim ken nataman.”
MAR 3:33 Io, Jisas ga tange, “Iau ni hinawase muat bia sige no pawasigu ma ira tasigu.”
MAR 3:34 Namur ga nas diet ing diet ga kis luhutane tar ie gaam tange, “Diet kaiken ira pawasigu ma ira tasigu.
MAR 3:35 Bia sige tikai i la murmur no sinisip tane God, iakanong a tasigui, a hainigui, bia a pawasigui.”
MAR 4:1 Ma namur Jisas ga tur habaling leh wara hausur kaia ra gagena no tamat na taah kom Galili. Ma haleng na matanaiabar sakit diet ga hananhuat kaia, kaik Jisas gaam kis hut tiga mon kaia na taah. Ma ira matanaiabar diet ga kis tano gagen taah.
MAR 4:2 Jisas ga hauhausur diet ma ra nianga harharuat uta ira haleng na linge. Ma bia ga hauhausur ga tange hoken.
MAR 4:3 “Muat hadade. Tiga ut na sinaso ga haan bia na so ira uno pat na daha.
MAR 4:4 Bia ga sase harbasiane ira pat na daha tari ga puko taar tano ngaas ma ira maan diet ga ien bakut se.
MAR 4:5 Ari a patine mah ga puko taar ra ula haathaat ing pai haleng ira pise kaia. Diet ga kubur gasien kanong pai haleng ra pise.
MAR 4:6 Bia no kasakes ga taman tut huat ga rang bing diet kanong ira boli diet pa ga manga hansur.
MAR 4:7 Ari a patine mah ga puko taar nalamin ta ira kuikui ma ga lul burung diet kaik diet pa gaam huai.
MAR 4:8 Ari a patine mah ga puko taar ta ira bilai na pise. Diet ga tamat ma diet ga huai. Ari ga huai aititul a sangahul na patine, ari a limliman ma tikai na sangahul na patine, ma ari a maarmaar.”
MAR 4:9 Io, Jisas um ga tange, “Bia ing u haruat wara hadade kilam iakan, nu taram ie.”
MAR 4:10 Namur Jisas ga haan talur ira haleng na matanaiabar. Ma ari ing diet git murmur ie ma ira sangahul ma iruo diet ga kis tika taar mei. Ma diet ga tiri ie uta ira nianga harharuat.
MAR 4:11 Ma Jisas ga balu diet, “Iau te hapuasne ta muat utano kinkinis na harkurai ma ra harbalaurai ta God. Ga susuhai nalua, sen iau te hapalaine um ie ta muat. Iesen ta diet ing diet pai kis ta iakano harbalaurai tane God, iau ianga ma ra nianga harharuat.
MAR 4:12 Io kaik, ‘Diet na nas ma diet pa na nas kilam, diet na hadade ma diet pa na hadade kilam; diet kabi lilik pukus, ma God na lik luban se ira udiet magingin sakena.’”
MAR 4:13 Ma Jisas ga tange ta diet, “I palai bia muat pai palai ta kan ra nianga harharuat. Bia ing iau pai hapalaine muat, muat pa na palai tari a nianga harharuat baling.
MAR 4:14 No ut na sinaso i so no nianga.
MAR 4:15 Ari matanaiabar diet haruat ma ira pat na daha ing i puko taar tano ngaas. Bia diet hadade no nianga, Sataan i hanuat ma i kap se no nianga ta diet.
MAR 4:16 Ma ari diet haruat ma ira pat na daha ing i puko taar ra ula haathaat. Bia diet hadade leh no nianga, diet kap hagasiaan mon ie ma ra gungunuama.
MAR 4:17 Iesen bia no nianga pai dorang, diet pai tur lawas. Ing bia ira haraubaal i ubal diet ma diet kap ngunungut kanong diet gate kap no hinhinawas, diet puko gasien laah.
MAR 4:18 Ma ari diet haruat ho ira pat na daha ing i puko taar nalamin ta ira kuikui. Diet hadade ira nianga iesen diet ngarngarau uta iakan ra nilon ma diet manga sip ra kinkinis na watong ma ira mes na linge. Kaiken ra linge na burung no hinhinawas ma pa na tahuat timaan.
MAR 4:20 Ma ari diet haruat ma ira pat na daha ing i puko taar ta ira bilai na pise. Ing diet hadade no nianga diet kap usuranei. Io, diet na tahuat timaan hoira pat na daha ing diet huai aititul a sangahul na patine, a limliman ma tikai na sangahul na patine, ma ari a maarmaar.”
MAR 4:21 Io, Jisas ga tange habaling ta diet, “Taie tikai pai la kapkap halaka tiga laam bia na bul ie manapu tiga kas bia tiga suuh. Na bul ie naliu waing na hapalai iakano subaan.
MAR 4:22 Hokaike at mon, bia ta sa i kis mun taar, i kis mun taar waing na hanuat puasa namur. Ma bia asa i pupulus taar, i kis taar huo bia muat na palai ine namur.
MAR 4:23 Bia ing u haruat wara hadade kilam iakan, nu taram ie.”
MAR 4:24 Ma ga tange habal ta diet, “Lik timaan ing muat te hadade tar. God na balu pukus habaling tar taam haruat at hoing u te hadade kilam ing iau tange. Ma na bau mah ie.
MAR 4:25 Sige nong i palai ta ira nugu nianga, God na manga hapalaine tar tana. Ma bia sige nong tada palpalai kana tana, God na kap se bakut at tana.”
MAR 4:26 Io, Jisas ga tange habaling, “No kinkinis na harkurai ma ra harbalaurai ta God i hoken. Tiga tunotuno i se harbasiane ira pat na daha tano pise.
MAR 4:27 Bia ing i la kumkubaba ra bung ma i la tangtangahun ra malaan ira pat na daha at diet la kumkubur taar. Ma aie at pai nunure bia diet kubur hohe kanong no pise at i la hakuburuan ira pat na daha. Luena na kubur huat, io, na mon kanamena, ma namur na matuko.
MAR 4:29 Bia i te matuko ira pat na daha no tunotuno na haburen wara katkato kanong no uno pakana bung wara katkato i te haruat.”
MAR 4:30 Io, Jisas ga tange habaling hoken: “Da hapupuo no kinkinis na harkurai ma ra harbalaurai ta God ma ra sa? Ma da ianga harharuat utana hohe? Io, ni hinawase muat.
MAR 4:31 No kinkinis na harkurai ma ra harbalaurai ta God i haruat ma tiga pat na daha no tunotuno i soi. Ma i manga hansik sakit ta ira pat na daha tano ula hanuo bakut.
MAR 4:32 Namur bia ing i te kubur i tamat ta ira matahu daha na nian dahat la saso. Ira katena no daha a tamat sakit ma i ududuh timaan kaik ira maan diet gil ira posi diet kaia.”
MAR 4:33 Io, Jisas ga pir diet ma ra haleng na nianga harharuat ho iakan, naga haruat bia diet na hadade kilam.
MAR 4:34 Ga pir ira matanaiabar ma ra nianga harharuat sen mon. Iesen ing Jisas sen ma ira uno bulu na harausur, ga hapalaine ira mangana linge bakut ta diet.
MAR 4:35 Iakano bung bia gate matmatarahien Jisas ga tange ta ira uno bulu na harausur, “Dahat na balos urau tiga palpal tano tamat na taah kom.”
MAR 4:36 Io, ma diet ga hansukun no tamat na matanaiabar ma diet gaam kawaas laah tano tamat na mon nong Jisas gate kis taar tana ma diet gaam balos. Ari mes na mon mah ga sakate diet.
MAR 4:37 Tiga tamat na baiangin ga hanuat ma ira pakananoh diet ga takap laka taar tano mon gaam hahungi ie.
MAR 4:38 Ma Jisas at mon kana ga kumkubaba manamur tano mon ma ga ulalang taar at. Ira bulu na harausur diet ga hangun ie ma diet ga tange, “Tena harausur, pau manga lilik bia dahat na ruh?”
MAR 4:39 Io, Jisas ga taman tut gaam tigal hadadas no dadaip ma ira pakananoh ma ga tange, “Noh matien!” Io, no dadaip ga maat ma no taah ga manga malile harsakit.
MAR 4:40 Ma Jisas ga tange ta ira uno bulu na harausur, “Muat burut warah? Taie at baak numuat ta nurnur?”
MAR 4:41 Diet ga manga burut sakit diet gaam hartiritiri baling ta diet, “Sige iakan? No dadaip ma ira pakananoh at mah, dir taram ie!”
MAR 5:1 Io, Jisas ma ira uno bulu na harausur diet ga balos urau tiga palpal tano tamat na taah kom, tano hanuo audiet ira Gerasen.
MAR 5:2 Jisas ga suur laah tano mon. Kaik at mon tiga tunotuno nong ira sakana tanuo ga sasoha tana ga hansur mekaia ra matana haat na haratur. Ga hansur um gaam harsomane Jisas.
MAR 5:3 Iakano tunaan git kiskis ta ira matana haat na haratur ma taie tikai pai la taltale bia na wis kawasei. Sukmaal bia di git wiswis ie ma ra dadas na winwisaan ma ra dadas na hidihidi sakit, pa git harharuat.
MAR 5:4 Diet pa git taltale kanong no tunotuno git raprapat haitne ira dadas na hidihidi sakit ta ira limana ma git raprapat haitne mah ira dadas na winwisaan ta ira kakine. Taie tikai pa ga haruat bia na hamarur ie.
MAR 5:5 Ta ira kaba bung ma ira kaba kasakes bakut git kupkup haan karama ta ira matana haat na haratur ma aram mah ra uladih ma git kutkut hani um no tamaine ma ira haat.
MAR 5:6 Bia ga nes leh Jisas me tapaka ga hilau gaam singa bukunkek manalua tana.
MAR 5:7 Ga kakonga naliu sakit gaam tange, “Jisas Natine God nong i lua harsakit, waak u kis na gil iau! Nu sasalim uram hone God bia pa nu gil hangungut iau.”
MAR 5:8 Ga tange huo kanong Jisas gate tange tana, “Augu ra sakana tanuo, suur laah ta kanin ra tunotuno.”
MAR 5:9 Ma Jisas ga tiri ie, “Sige no hinsaam?” Ga balui hoken: “No hinsagu ‘Arip na arip.’ Warah? A haleng sakit mehet.”
MAR 5:10 Ma ga manga sasaring marmaris taar ta Jisas bia pa na tule se ira sakana tanuo mekaia ta iakano hanuo.
MAR 5:11 Io, ma a haleng na bore diet ga iaiaan tano gagena uladih hutet.
MAR 5:12 Ira sakana tanuo diet ga sasaring marmaris ta Jisas hoken: “Tule tar mehet ta kaiken ra bore waing mehet na sasoha ta diet.”
MAR 5:13 Ga haut se tar diet, io, ira sakana tanuo ga suur laah tano tunaan diet gaam sasoha balik ta ira bore. Diet ga hilau suur tano ula habo uram narako tano tamat na taah kom diet gaam konga. Ira bore bakut diet haruat ma airuo arip.
MAR 5:14 Io, ira ut na balaura bore diet ga hilau laah diet gaam hinawas kaia tano taman ma ta ira katon mah hutet. Io, ira matanaiabar diet ga haan laah wara nesnes ing Jisas gate gil tar.
MAR 5:15 Bia diet ga haan tupas Jisas diet ga nes no tunaan nong ira haleng na sakana tanuo ga sasoha taar baak tana ga kis taar kaia. Ira matanaiabar diet ga burut kanong ira kiniasine gate sigam tar ma no uno lilik mah gate palai.
MAR 5:16 Diet ing diet ga nes iakan diet ga hinawase ira matanaiabar tano mangana linge Jisas gate gil tar tano tunaan nong ira sakana tanuo ga sasoha taar baak tana. Ma diet ga hinawas mah ta ira bore.
MAR 5:17 Namur, ira matanaiabar diet ga ianga marmaris taar ta Jisas bia na haan laah tano udiet sibaan.
MAR 5:18 Tano pakana bung Jisas ga kaukawas uram narako tano mon no tunaan nong ira sakana tanuo baak ga sasoha taar tana ga duan Jisas bia dir na haan tika.
MAR 5:19 Jisas pa ga bale leh ie, iesen ga tange, “Nu haan tapukus tano num taman, taar ta ira hinsakaam ma nu hinawase diet a tamat na linge ie hohe no Watong i te gil tar taam. Io, nu hinawas mah tano uno harmarsai ukatiga ho ugu.”
MAR 5:20 Io, no tunaan ga haan taar tano hanuo Dekapolis. Ga haan gaam hinhinawase diet a tamat na linge ie hohe Jisas gate gil tar tana. Ma ing diet ga hadade diet ga manga karup.
MAR 5:21 Io, Jisas ga balos ma tiga mon ures baling tiga palpal tano tamat na taah kom Galili. A tamat na matanaiabar ga haan luhut ie ing Jisas ga kis taar tano gagena no taah kom.
MAR 5:22 Tiga watong nong i harbalaurai taar tiga hala na lotu audiet ira Iudeia, no hinsana Iaros, ga haan ukaia. Bia ga nes leh Jisas ga puko taar menalua ta ira kakine ma ga ianga marmaris taar tana, “No nat na hahigu i te noh na minaat taar um. Mai, nu a bul ira limaam tana waing naga langalanga ma na lon.”
MAR 5:24 Io, Jisas ga sakatei. Ma a tamat na matanaiabar diet ga murmur hani ie ma diet ga hartaguniguni haan hutet tana.
MAR 5:25 Ma tiga hahin nalamin ta ira matanaiabar ga sam dadara. No uno minaset gate kisi ie haruat ma ra sangahul ma iruo na tinahon.
MAR 5:26 Gate kap ra but na tinirih ta ira haleng na ut na harulai ma gate hasurum bia tar ira uno kinewa ta diet. Pa ga langalanga tano minaset. No uno minaset balik ga kapkap haliarei.
MAR 5:27 Bia no hahin ga hadada nianga uta ira bilai na pakpakilai tane Jisas ga haan mon nalamin ta ira matanaiabar gaam haan ukaia namur tane Jisas gaam sigire no kiniasine.
MAR 5:28 Ga gil huo kanong ga lik hoken: “Bia ni sigire mon no kiniasine ni langalanga.”
MAR 5:29 Iakano pakana bung at mon no hinilau tano de ga takumut laah ma no hahin ga hamaan no tamaine bia gate langalanga sukun no uno minaset.
MAR 5:30 Ing at mon no hahin ga sigire no kiniasine, Jisas ga hamaan kilam bia ari ta ira uno dadas meram naliu gate haan talur ie. Ga tahurus gaam tiri diet, “Sige i sigire no kiniasigu?”
MAR 5:31 Ira uno bulu na harausur diet ga tange tana, “U biha? U nas ira matanaiabar diet hartaguniguni ma diet sumsubak ugu ma kana at baak u tirtiri bia sige i sigire ugu?”
MAR 5:32 Iesen Jisas at baak ga nanaas hurhurbit haan bia na nunure nong ga gil iakan ra linge.
MAR 5:33 No hahin ga burut gaam dedar kanong ga nunure kilam no bilai na linge ga hanuat taar tana. Io, ga singa bukunkek taar tane Jisas gaam hinawase ta ira tutun bakut.
MAR 5:34 Jisas ga tange tano hahin, “Natigu, no num nurnur i te halon ugu. Nu haan tatohun ma nu langalanga tano num minaset.”
MAR 5:35 Bia Jisas ga iangianga baak, ari tunaan diet ga hanuat meram tano hala tane Iaros ma diet ga hinawasei, “No nat na hahim i te maat. Wara bih um u nangnanget ma no tena harausur?”
MAR 5:36 Bia Jisas ga hadade kumaan tar ing diet ga tangtange ga tange tane Iaros, “Waak u burburut. Nu nurnur sen mon.”
MAR 5:37 Pa ga haut leh mah um tari bia diet na mur ie, ne Pita ma ne ningaar tasin Jemes ma ne Jon sen mon.
MAR 5:38 Bia diet ga hanuat taar tano ngasiane Iaros, Jisas ga hadade diet, diet ga susuah kupkup ma diet ga manga harharat.
MAR 5:39 Jisas ga haan laka ma ga tange ta diet, “Waak muat ra sunuah ma waak muat ra harat! No hinasik pai maat. I kubaba mon.”
MAR 5:40 Diet ga kurus balik ma diet ga kukutur tana. Namur bia gate tule hasur bakut se tar diet, ga lamus no pawasine no hinasik ma no ana sus mah. Ga lamus halaka mah ira aitul ing dal ga sakatei uram narako tano subaan di ga hainoh tar no hinasik kaia.
MAR 5:41 Ga palim no limana no hinasik ma ga tange tana, “Talita kaum,” kukuraina bia, “Hinasik, tut naliu!”
MAR 5:42 Kaik at mon no hinasik ga tut naliu ma ga haburen ginota (ma a sangahul ma iruo ira uno tinahon.) Ma diet kaia diet ga manga karup sakit.
MAR 5:43 Iesen Jisas ga tar ra dadas na nianga ta diet bia diet pa na hinawas ta iakano linge ga gil ie. Ga tange mah ta diet bia diet na tabar no hinasik ma ta nian.
MAR 6:1 Io, Jisas ga haan talur iakano katon gaam haan taar tano uno taman. Ira uno bulu na harausur at mah diet ga sakatei.
MAR 6:2 Ra Bung na Sinangeh Jisas ga hatahun no uno pinapalim na tena harausur aram tano hala na lotu audiet ira Iudeia. A haleng diet ga hadadei ma diet ga manga karup. Diet ga tange hoken: “Ga kap kaiken ra uno harausur meh? Dahat pai palai tun at ta dahin! Sige i tar no uno mintot tana? Dahat na tange hohe ta ira uno dadas na gingilaan na kinarup ing ga pakile ma ira limana tus?
MAR 6:3 Aie mon no ut na gil hala, no natine Maria. Ira tasine kaike ne Jemes, Ioses, Iudas ma ne Saimon. Ma ira hainine diet ken ma dahat.” Ma diet ga malok sei.
MAR 6:4 Jisas ga balu diet, “I tutun sakit bia muat na ru ira tangesot ta ira mes na taman. Iesen muat pa na ru ie bia aie mekai ma bia a hinsaka muat mah ie. Muat pai ru mah ie bia muat mon tiga hatatamaan.”
MAR 6:5 Pa ga tale bia Jisas na gil ta haleng dadas na gingilaan na kinarup kaia. Ga bul mon ira limana ta ari a ina minaset waing diet naga langalanga sukun ira udiet minaset.
MAR 6:6 Ma Jisas ga lik bia, “Maris! Wara bih diet pai nurnur?” Io, Jisas ga haan hurhurbit taar ta ira taman gaam hausur ira matanaiabar.
MAR 6:7 Ga tatau hulungan ira uno sangahul ma iruo na bulu na harausur ma ga tule diet airiruo ma ga tar no dadas ta diet waing diet naga harkurai ta ira sakana tanuo wara tultule hasur se diet.
MAR 6:8 Ga tibe timaan taar ta diet hoken: “Muat pa na kap ta linge tano numuat hinahaan. Muat na kap sen tiga buko. Muat pa na kap ta nian, ta raat, ma ta kinewa.
MAR 6:9 I tale bia muat na paas ta pala lamaas ta ira kaki muat ma sen muat pa na kap ta harkios.
MAR 6:10 Bia muat lalaka taar tiga hala muat na kis taar at tana tuk muat naga haan laah tano taman.
MAR 6:11 Ma bia pa di bale leh muat tiga taman ma pa di taram mah ing muat pirpir, bia muat hanan laah sukun no taman muat na hatidir se tar ira pulungar ta ira lapara kaki muat. Muat na gil huo waing na hakilang diet tano sakana magingin diet gil tar ta muat.”
MAR 6:12 Io, ira bulu na harausur diet ga haan harbasia ma diet ga harharpir bia ira tunotuno diet na lilik pukus ta ira udiet magingin sakena.
MAR 6:13 Ma diet ga hashasur se mah a haleng na sakana tanuo. Ma diet ga mur no udiet magingin wara pukpuk ira haleng ina minaset ma ra wel. Ma namur bia diet ga gil huo diet ga halangalanga ira ina minaset.
MAR 6:14 Bia Jisas ma ira uno bulu na harausur diet ga gilgil kaike ra pinapalim, Herot, no tamat na lualua na gil harkurai, ga hadade ira nianga utane Jisas kanong a haleng na matanaiabar diet ga iangianga haan tana. Ari diet ga lik bia Jon tane Jisas diet gaam tangtange, “Jon no ut na baptais gate tut hut sukun no minaat ma i lon baling. Iakaiken no burena gi pakpakile ira dadas na gingilaan na kinarup.”
MAR 6:15 Sen bia ari diet ga tange, “Aie ne Elaija.” Ma ari at diet ga tange bia, “Aie tiga tangesot hoing ira tangesot manalua sakit.”
MAR 6:16 Me bia Herot, no tamat na lualua na gil harkurai, ga hadade ga tange, “Aie ne Jon no ut na baptais! A tutun bia iau ga kut dakoi iesen i te tut hut baal tano minaat ma i lon baling!”
MAR 6:17 No burena ira nianga tane Herot, no tamat na lualua na gil harkurai, hoken. Nalua, Herot gate tule ari tunotuno wara palpalim kawase ne Jon. Diet ga kubus ie, diet gaam bul ie ra hala na harpidanau. Herot ga gil huo kanong ga tole Herodies. Io, nalua Herodies gate tole ta baak Pilip, no tasine Herot.
MAR 6:18 Ma Jon git tangtange tane Herot, no tamat na lualua na gil harkurai, hoken: “Pai takodas bia u te tole Herodies, no hahin tano tasim.”
MAR 6:19 Io, Herodies git balbala ngungut taar tane Jon ma ga sip at bia da bu bing ie. Iesen pa ga tale kanong Herot, no tamat na lualua na gil harkurai, ga burburte Jon. Git burburtei kanong ga nunure bia Jon a ut na takodas ie ma a halhaliana tunaan ie, kaik gaam balaure timaan ie bia kabi hiruo. A tutun bia ga lilik tirtirih ta ira nianga tane Jon, iesen bia Herot at, no tamat na lualua na gil harkurai, git sipsip bia na hadadei.
MAR 6:21 Tiga bung Herot ga gil tiga nian na hakilang tano uno bung na kinakaha. Ga gil ie wara audiet ira uno ul kukuha, ira lualua ta ira umri, ma ira watong tano hanuo Galili.
MAR 6:22 Ma no uno hahin, Herodies, a mon nat na hahine, a bulahin ie. Ma iakano bulahin ga haan laka gaam hamangate ne Herot ma ga manga haguama Herot ma ira uno wasire. Bia no tamat na lualua na gil harkurai ga nas huo ga tange tano bulahin, “U sip ta mangana linge hohe? Ta mangana sa ing u sip, iau ni tar taam!”
MAR 6:23 Ga hasasalim ma ga tange tano bulahin, “Iau ni tar ta mangana linge sa ing nu tiri iau wara urie. Bia nu tiri iau tiga subana ta ira nugu kinkinis na watong mah, iau ni tar at mon taam.”
MAR 6:24 Io, no bulahin ga hansur gaam tiri Herodies, no pawasine, hoken: “Iau ni tiri um ie ta sa?” Ma no pawasine ga sip bia da bu bing Jon, kaik ga balui, “Nu tange tana bia u sip no ulune Jon no ut na baptais.”
MAR 6:25 Habir at mon no bulahin ga hilau tapukus uram hone Herot gaam tange tana, “Iau sip bia kaike at mon nu tar no ulune Jon no ut na baptais tagu!”
MAR 6:26 Bia Herot ga hadadei ga manga tapunuk. Ga tapunuk iesen pa ga haruat bia na malok tano sinasaring tano bulahin kanong gate sasalim taar ta ira matmataan ta ira wasire.
MAR 6:27 Habir at mon ga tule tiga umri ma ga tange hadadas tana bia na kut dako leh no ulune Jon ma na kap pukus ie. No umri ga haan laka tano hala na harpidanau gaam kut dako Jon.
MAR 6:28 Ga kap hawaat no uluno, gaam tar ie tano bulahin. Ma no bulahin balik ga tar ie tano pawasine, Herodies.
MAR 6:29 Bia ira bulu na harausur tane Jon diet ga kap ra hinhinawas tano hiniruo tane Jon, diet ga hanuat diet gaam kap leh no palatamaine Jon ma diet gaam bus ie.
MAR 6:30 Ira apostolo ing Jisas gate tule harbasiane tar diet, diet ga tapukus baling diet gaam harsomane Jisas ma diet gaam hinawasei ta ira pinapalim ing diet gate gil tar ma ira harausur ing diet ga tar ta ira matanaiabar.
MAR 6:31 Jisas ma ira uno bulu na hausur diet pa ga tale at mah bia diet na iaan kanong a haleng sakit ira matanaiabar diet ga hanahaan harpilaas. Io, Jisas ga tange ta diet, “Dahat na balos no taah kom taar tiga subana ing taie tari kaia waing muat na sangeh baak ta dahin.”
MAR 6:32 Io, diet ga haan sen laah tiga mon uram tiga katon i kapkapana.
MAR 6:33 Bia diet ga hanahaan a haleng matanaiabar diet ga kis taar ta ira audiet taman, diet ga nas kilam Jisas ma ira bulu na harausur. Io, diet ga hilau laah mekaia ta ira audiet taman diet gaam a huna tur tano subaan Jisas na hansot tana.
MAR 6:34 Bia Jisas ga hansot ga nas a haleng na matanaiabar sakit, ma ga manga marmaris uta diet kanong diet ga ngan hoira sipsip ing taie ta ut na harbalaurai uta diet. Io, ga haburen wara hausur diet ta ra haleng na mangana linge.
MAR 6:35 Bia gate matmatarahien, ira uno bulu na harausur diet ga hanuat taar tana ma diet ga tange tana, “I te manga matmatarahien tuai um ma dahat kis taar um ra hurlamin.
MAR 6:36 Tule se ira matanaiabar waing diet na haan ta ira taman i hutet, ma diet na kul adiet ta nian.”
MAR 6:37 Io, Jisas ga balu diet, “Muat at, muat na tabar diet.” Ira uno bulu na harausur diet ga balui hoken: “Dahat na kul ta haleng na nian hohe? Bia airuo maar na kinewa at mah pa na haruat.”
MAR 6:38 Io, Jisas ga tiri diet, “Aise katona beret kaike? Muat haan baak muat naga nas!” Bia diet gate nas tar diet ga hinawasei, “A liman na katona beret ma airuo kirip mah.”
MAR 6:39 Io, Jisas ga tange ta ira uno bulu na harausur bia diet na paleng harbasiane mon ira matanaiabar ma diet na kis tano huro i nunuhuan.
MAR 6:40 Io, ira matanaiabar diet ga kis hoing di gate ru paleng tar diet huo, ari a maar ma ari a liman na sangahul.
MAR 6:41 Jisas ga kap ira liman na katona beret ma ira iruo kirip, gaam tadeng uram ra mawe, ma gaam sasaring uta ira nian. Ga pidik ira beret gaam tar tikane ma ira kirip ta ira bulu na harausur diet gaam palau ira matanaiabar.
MAR 6:42 Diet bakut diet ga iaan diet gaam hahos.
MAR 6:43 Ira bulu na harausur diet ga sangan hahungi ra sangahul ma iruo na kalot ta ira sumsubana kirip ma ira beret ing diet ga ien subaan.
MAR 6:44 Io, di ga was sen leh mon ira tunaan nalamin ta ira matanaiabar bakut ing diet ga iaan. Ma ira tunaan diet ga haruat ma ra liman na arip.
MAR 6:45 Ta iakano pakana bung at mon Jisas ga tange ta ira uno bulu na harausur bia diet na lua tana tiga mon urau tiga palpal tano tamat na taah kom taar tano taman Betsaida, ma aie baak na tule se ira matanaiabar.
MAR 6:46 Bia gate nas tule tar diet, ga hanut uram ra uladih wara sinasaring.
MAR 6:47 Ma bia gate bungbung tuai um, Jisas sen um ga kis taar aram ra uladih, ma no mon, iakana tuai nalamin tano taah kom.
MAR 6:48 Jisas ga nas ira uno bulu na harausur ma kana diet ga paapet haan ma ira wasa, kanong diet ga haluso harso ma no dadaip. Io, kaia dak ra aihat na kareka ra malaan ga hanuat taar ta diet. Ga hanan haan mon tano ula taah ma ga wara hanan sakit diet kaia.
MAR 6:49 Bia diet ga nas ie ga hanan haan tano ula taah diet ga lik bia a tanuo ie, diet gaam kup kanong diet bakut diet ga nas ie ma diet ga burut. Habir at mon Jisas ga habalaraan diet ma ga tange, “Iau mon! Waak muat ra bunurut!”
MAR 6:51 Io, ga karwas laka taar tano mon uram ho diet ma no dadaip ga pataam hatika. Ira bulu na harausur diet ga nguanguo ma diet ga manga karup kanong diet pa ga nas kilam no kukuraina tutun no hartabar tane Jisas ta ira liman na arip na tunotuno. Warah, kanong ira bala diet ga manga dadas.
MAR 6:53 Bia Jisas ma ira uno bulu na harausur diet ga balos no tamat na taah kom, diet gaam hanuat taar tano hanuo Genasaret. Kaia, diet ga kute kawase tar no mon.
MAR 6:54 Bia diet ga hansukun no mon, habir at mon ma ira tunotuno diet ga nas kilam Jisas.
MAR 6:55 Io, diet ga hilau harbasia taar ta ira tamtaman ta iakano hanuo ma diet ga kap ira ina minaset naliu ta ira kunuban. Bia gahim katon diet ga hadade bia Jisas ga kis taar kaia, diet ga kap at ira ina minaset ukaia.
MAR 6:56 Ira taman bakut ma ira pise na hala bakut ing Jisas ga haan kaia, ira matanaiabar diet git kapkap hawaat ira ina minaset ma diet git bulbul nalamin tano taman. Io, diet ga ianga marmaris tane Jisas bia ira ina minaset diet na sigire mon no ngus na kiniasine. Ma diet bakut ing diet ga sigirei, ira udiet minaset ga pataam.
MAR 7:1 Ari Parisi ma ari tena harausur ta ira harkurai tane Moses, ing diet ga hanuat ma Ierusalem diet ga kis luhut Jisas.
MAR 7:2 Diet ga nas ari ta ira bulu na harausur tane Jisas diet ga iaiaan. Ma diet ga lik bia God i nas tar bia a sakena ira lima diet ira bulu na harausur. Ira Parisi diet ga lik huo kanong ira bulu na harausur diet pa gale gis ira lima diet hoing ira harkurai tane Moses ta ira Parisi ga tange.
MAR 7:3 (Ira audiet Parisi ira Iudeia, ma ira ari mes na Iudeia, diet la murmur ira harausur diet ga kap ta ira hintubu diet. Ira harausur hoken. Bia diet pa na mur timaan ira harkurai na gis limanari tano pakana bung bia diet gis ira lima diet, diet pa na iaan.
MAR 7:4 Ma bia diet na haan tapukus meras tano maket, diet na sisiu na gise laah mon waing pa na tale bia tikai na hatabune diet. Io, namur diet na iaan. Ma diet la murmur mah ari haleng mes na harkurai ing ira hintubu diet ga hinawase diet urie. Diet na gis timaan ira kap, ira sosopen, ira dis, ma ira suuh.)
MAR 7:5 Io, ira Parisi ma ira tena harausur ta ira harkurai tane Moses diet ga tange ta Jisas, “Mehet lik bia i sakena bia ira num bulu na harausur diet pai mur ira magingin ira hintubu dahat ga tar ta dahat. Kaiken diet iaan ma ira sakana lima diet. Nu tange um hohe uta diet?”
MAR 7:6 Jisas ga balu diet ma ga tange, “No tangesot Aisaia ga tange ra tutun uta muat ira ut na harababo bia ga pakat iakan ra nianga ta God. Ma God ga tange bia, ‘Iakan ra matanaiabar diet ru iau ma ira ha diet mon, iesen ira udiet nilon, diet pai tar tagu.
MAR 7:7 Diet la lalotu bia haan mon tagu, kanong ira harkurai tane Moses ira tunotuno mon i bul, diet hausur balik ine hoing bia ta God.’
MAR 7:8 Muat te hamalum um ira harkurai tane God ma muat palim kawase um ira magingin gar na tunotuno.”
MAR 7:9 Ma Jisas ga tange habaling ta diet, “Muat keskes at wara bulbul hasisingen ira harkurai tane God waing muat naga hatur kawase ira numuat harausur at.
MAR 7:10 Kaike iau te tange tar i haruat tutun ma ken Moses ga tange, ‘Ru no am sus ma no pawasim,’ ma, ‘Sige i ianga hagahe no ana sus bia no pawasine, muat na bu bing ie.’
MAR 7:11 Sen bia muat la tangtange bia tiga tunotuno auno mon linge i tale bia na harahut no ana sus ma no pawasine me, i tale mah bia na tange hoken: ‘Iau te tar iakano ukaia ho God. Pai tale bia ni tar ie taam wara harharahut ugu.’ Ma bia ing muat lik huo, i nanaas bia muat tingtigal iakano tunotuno bia pa na ruru at um nora ana sus ma no pawasine.
MAR 7:13 Bia muat ma ira hintubu muat, muat hausur hanahaan ira matanaiabar ta ira numuat magingin na tuara, muat kap se ira dadas ta ira nianga tane God. Ma ra haleng mah ira linge hokaiken muat la gilgil.”
MAR 7:14 Ma Jisas ga tatau hulungan habaling no tamat na matanaiabar, gaam tange ta diet, “Muat bakut, muat hadade! Iau sip bia muat na palai!
MAR 7:15 Ira mangana linge tikai i ien pai tale bia na hagahei kaik no tunotuno naga sakena. Sen bia ira linge i hansur meram narako tana na hagahei naga sakena.
MAR 7:16 [Bia ing u haruat wara hadade kilam iakan, nu taram ie.]”
MAR 7:17 Bia Jisas ga hansukun ira matanaiabar ma gaam haan laka tano hala, ira uno bulu na harausur diet ga tange tana bia na palas tar ta diet no kukuraina no uno nianga harharuat.
MAR 7:18 Jisas ga tange ta diet, “Ira matanaiabar diet pai palai, ma hohe bia muat mah, muat pai palai? Muat pai nunure at baak bia ira nian ing muat la ienien pai tale bia na hagahe muat kaik muat naga sakena?
MAR 7:19 Pai tale kanong ira nian pa na hagahe ira magira muat. Ira nian i la haan laka mon tano bala muat ma na hansur baling.” (Io, Jisas ga tange bia ira nian bakut i bilai ma pa na hagahe tikai kaik naga sakena.)
MAR 7:20 Jisas ga tange habaling ta diet, “Ira linge i hansur meram narako tutun tiga tunotuno, kaik naga hagahei naga sakena.
MAR 7:21 I tutun, kanong meram tano magirana tikai, ira sakena na hanuat. Ma kaike ira sakena hoken. Na mon sakana lilik, na kikinau, ma na harubu bingibing bia mah. Ma na noh ma tiga hahin gar na mes. Ma diet ira lala diet na gil huo mah.
MAR 7:22 Na hatur kawase a sakana masmasingan mah. Na gil sakena, na harabota, na harkalak, na lilik sakasaka taar tikai, na ianga hagahe tikai, na malamala tamat, ma na lon tatohun.
MAR 7:23 Kaiken ra sakana magingin bakut i tahuat meram tano magirana tikai, diet hagahe no tunotuno gi sakena.”
MAR 7:24 Jisas ga haan laah mekaia ma ga haan taar tano hanuo tano pise na hala Tair. Ga haan laka kumaan taar tiga hala bia tari tunotuno diet kabi nas ie. Sen bia no uno hinahaan pa gale mun.
MAR 7:25 Tiga hahin a sakana tanuo ga sasoha tano uno hinasik. Ma bia gate hadade ra nianga utane Jisas ga haan gaam se tar ie napu ta ira kaki Jisas.
MAR 7:26 Ga ianga marmaris tane Jisas bia na hasur se no sakana tanuo nong ga sasoha tano uno nat na hinasik. Ma iakano hahin, pai Iudeia ie. Di ga kahai tano hanuo Ponisia tano tamat na hanuo Siria.
MAR 7:27 Ma bia Jisas ga nas bia pai Iudeia ie, ga tange tana, “Taie. Da huna tabar baak ira bulu na Iudeia. Pai tahut bia da se tabar ira paap ma ira nian adiet ira bulu.”
MAR 7:28 No hahin ga balu ie, “Masa, nora watong! Iesen ira paap at mon mah, diet la ienien ira pet na diet ira bulu menapu tano suuh na nian.”
MAR 7:29 Jisas ga tange baling tana, “Kanong no num binabalu ukai ho iau i bilai, nu haan tapukus ma nu nas bia no sakana tanuo i te suur sukun no natim.”
MAR 7:30 Io, no hahin ga haan tapukus baling taar tano uno hala ma ga nas no natine ma ga noh taar. Ma no sakana tanuo gate suur sukun ie.
MAR 7:31 Io, Jisas ga haan laah mekaia Tair gaam kutus kaia tano pise na hala Saidon gaam hansur taar tano tamat na taah kom Galili narako tano hanuo Dekapolis.
MAR 7:32 Tiga talingaro ma ra mamanga mah ie, ari tunotuno diet ga kap hawaat tar ie ukaia hone Jisas. Ma diet ga duan ie bia na bul ira limana ta iakano tunaan waing naga hadoda ma naga ianga timaan balin.
MAR 7:33 Bia Jisas gate lamus hasisingen leh ie ta ira matanaiabar, ga bul ira iruo kaskas na limana ta ira airuo talingana no tunotuno. Io, namur ga iabis taar ta ira kaskas na limana ma gaam sigire no karamena no tunotuno.
MAR 7:34 Ga manga marmaris ma ga tange tano nianga udiet ira Iudeia, “Epata,” kukuraina hoken: “Tapapos!”
MAR 7:35 Iakano pakana bung at mon, ira talingana no tunotuno ga tapapos, no karemena ga mamakan ma ga ianga palai laah um.
MAR 7:36 Io, Jisas ga ianga dadas ta ira tunotuno bia diet pa na hinawas ta iakano linge gate gil tar. Sukmaal bia Jisas ga tingtigal hadadas ira tunotuno, diet ga madung taar at wara hinhinawas.
MAR 7:37 Ira tunotuno ing diet ga hadade ira nianga utane Jisas diet ga manga karup ma diet ga nguanguo sakit ma diet ga tange, “I gil timaan at ira linge bakut. Ma ira talingaro mah, i papos ira talinga diet kaik diet gi hadoda. Ma ira tabuna nianga mah, diet te ianga.”
MAR 8:1 Ta iakano pakana bung a tamat na matanaiabar sakit ga hanuat hurlungen baling. Ga taie mah um adiet ta nian, kaik ne Jisas gaam tau hawaat ira uno bulu na harausur ukaia ho ie, gaam tange ta diet, “Iau manga marmaris uta kaiken ra matanaiabar. Diet te kis tika ma iau aitul a bung ma taie um adiet ta nian.
MAR 8:3 Bia ni tule se tar diet ta ira udiet taman, ari diet na maat kalokalo wara diet tari na ngaas kanong ira audiet taman i manga tapaka.”
MAR 8:4 Ira bulu na harausur diet ga tange tana, “Pai tale bia tikai na silihe leh ta haleng na nian wara diet ira matanaiabar. A hurlamin kaiken.”
MAR 8:5 Io, Jisas ga tiri diet, “Aise na katona beret kaike ho muat?” Ma diet ga balui, “A liman ma iruo na katon.”
MAR 8:6 Io, ga tange ta ira matanaiabar bia diet na kis napu. Ma bia gate kap leh ira liman ma iruo na katona beret ma gate tanga tahut taar tane God urie, ga pidik. Io, ga tar ta ira uno bulu na harausur bia diet na palau ira matanaiabar. Ma ira bulu na harausur diet ga pet haruatne.
MAR 8:7 Ga mon mah a bar hana nat na kirip kaie ho diet. Ma Jisas ga sasaring urie gaam tar ta ira uno bulu na harausur ma ga tange ta diet bia diet na palau mah me.
MAR 8:8 Ira matanaiabar diet ga iaan diet gaam hahos. Namur ira bulu na harausur diet ga hahungi a liman ma iruo na kalot ma ira subana diet.
MAR 8:9 Io, Jisas ga tule se um ira matanaiabar. Hutet ma naga aihat na arip ira matanaiabar.
MAR 8:10 Io, ga kawaas tika ma ira uno bulu na harausur tano mon, diet gaam balos ukaia tano hanuo Dalmanuta.
MAR 8:11 Io, ari Parisi diet ga hanuat, diet gaam hargau tika ma ne Jisas. Diet ga tiri ie bia na pakile tiga hakilang wara haminas bia God ga tule ie bia taie. Diet ga gil huo bia Jisas naga puko ta iakano ra audiet walwalar.
MAR 8:12 Ga kilingane ra tamat na tinirih narako tano uno lon ma gaam tange, “Iau manga marmaris. A tutun bia muat ira tunotuno ta kanin ra nilon katin, muat la nasnas ira nugu pinapalim, iesen muat tirtiri at baak iau bia ni gil tar tiga hakilang ta muat. Muat hadade baak! Iau pa ni pakile ta hakilang ta muat kaiken ra tunotuno.”
MAR 8:13 Io, Jisas ga hansukun ira Parisi, gaam karwas laka taar tano mon tika ma ira uno bulu na harausur, diet gaam balos no tamat na taah kom Galili uras tiga palpal.
MAR 8:14 Ma ira uno bulu na harausur diet ga luban wara kapkap ta nian. Tiga hana katona beret sen mon diet ga kapkap hani narako tano mon.
MAR 8:15 Jisas ga hakatom ira uno bulu na harausur ma tiga nianga harharuat utano is nong i la sinimuan gasien tano beret gi la lalat. Kaik, gaam tange bia, “Muat na balaure muat ta ira is audiet ira Parisi ma ira is tane Herot, no tamat na lualua na gil harkurai.”
MAR 8:16 Io, ira uno bulu na harausur diet ga iangianga baling at ta diet ma diet gaam tange, “I tange hokaike kanong taie adahat ta beret.”
MAR 8:17 Jisas ga nunure kilam ira linge diet ga tangtange, kaik, gaam tange ta diet, “Iau tapunuk bia muat tange bia taie ta haleng beret. Muat pai nas kilam ma muat pai palai at baak? Iau lik bia a ul haat muat.
MAR 8:18 A mon mata muat, iesen muat pai nasnas kilam. A mon talinga muat, iesen muat pai hadade kilam. Hohe, muat pai lik kawase ira nugu pinapalim?
MAR 8:19 Muat te luban ing iau ga pidik ira liman na katona beret wara adiet ira liman na arip na matanaiabar? Aise ira kalot na subana nian muat ga hahungi?” Diet ga balui ma diet ga tange, “A sangahul ma iruo na kalot.”
MAR 8:20 “Aise mah ira kalot na nian muat ga hahungi ing iau ga pidik ira liman ma iruo na beret wara diet ira aihat na arip na matanaiabar?” Diet ga balui ma diet ga tange, “A liman ma iruo na kalot.”
MAR 8:21 Io, ga tange ta diet, “Hohe, muat pai palai at baak?”
MAR 8:22 Io, diet ga sapa Betsaida ma ari a matanaiabar diet ga lamus tiga pulo ukaia ho Jisas diet gaam saring ie bia na sigire no pulo.
MAR 8:23 Jisas ga palim no limana no pulo gaam lamus hasur ie mekaia nataman. Ma bia Jisas gate iabis tar ira iruo matana, io, ga bul ira iruo limana tano pulo, ma Jisas ga tiri ie, “U te nas ta linge?”
MAR 8:24 Io, no pulo ga tadeng ma ga tange, “Iau nas ra tunotuno hoira daha, iesen diet hanahaan.”
MAR 8:25 Tiga pakaan baling Jisas ga palim ira iruo matana no pulo. Io, no pulo ga nanaas dadas gaam nanaas baling. Namur ga nas timaan ira linge bakut.
MAR 8:26 Jisas ga tule sei ma ga tange, “Waak u haan baling uras Betsaida. Nu haan takodas uram hono num hala.”
MAR 8:27 Io, Jisas ma ira uno bulu na harausur diet ga hanahaan ta ira taman hutet tano pise na hala Kaisaria Pilipai. Jisas ga tiri diet kaia na ngaas, “Ira matanaiabar diet la tangtange bia iau sige?”
MAR 8:28 Io, diet ga tange, “Ari diet tange bia Jon no ut na baptais, ma ari bia no tangesot Elaija dak, ma ari at mah bia ta tiga nong ta ira mes na tangesot.”
MAR 8:29 Ma Jisas ga tiri diet, “Ma muat, muat tange bia iau sige?” Pita ga balui ma ga tange, “Augu no Mesaia.”
MAR 8:30 Io, Jisas ga hakatom ira uno bulu na harausur bia waak diet hinhinawase tikai bia aie sige.
MAR 8:31 Ma namur Jisas ga tur leh bia na hausur ira uno bulu na harausur hoken: “Nong a Tunotunoi na kilingane a haleng na haraubaal. Ma ira tamat, ira tamat na ut na pakila lotu, ma ira tena harausur ta ira harkurai tane Moses diet na harus isei ma da ubu bing ie. Ma ta aitul a bung na pataam na tut hut baling.”
MAR 8:32 Jisas ga manga ianga palai uta iakan. Io, ne Pita ga lamus hasisingen ie, gaam tur leh wara pirpir ie bia waak i tangtange huo.
MAR 8:33 Iesen bia Jisas ga tahurus baling ga nas ira ari auno bulu na harausur, gaam pir ne Pita hoken: “Haan laah um, Sataan. Pau lik ira sinisip ta God. U liklik ira sinisip gar na tunotuno mon.”
MAR 8:34 Namur Jisas ga tatau leh ira matanaiabar ma ira uno bulu na harausur ukaia ho ie, gaam tange, “Bia ing u wara murmur iau, na maat ira num sinisip ta iakan ra ula hanuo. Nu pusak no num kabai ma nu mur iau.
MAR 8:35 Iau tange huo kanong sige ta tiga nong i lik hatamat sen mon no uno nilon, pa na hatur kawase no uno nilon tutun. Iesen bia sige nong i bale tar no uno nilon wara gaiegu ma no tahut na hinhinawas mah, na hatur kawase um no uno nilon tutun.
MAR 8:36 Ma na hatahutne tiga nong hohe, bia na tinane iakan ra ula hanuo bakut sen bia na ber tano uno nilon tutun?
MAR 8:37 Io kaik, tiga nong na kul pukus no uno nilon tutun ma ra sa? Taie at!
MAR 8:38 Ta kaiken ra bung ira matanaiabar diet la turtur talur God ma diet manga sakena. Ta iakan ra sakana pakana bung bia ta tiga nong i harus ise iau ma ira nugu nianga, io, namur Nong a Tunotunoi na harus ise mah ie bia na hanuat ma no minamar tano ana Sus tika ma ira halhaliana angelo.”
MAR 9:1 Ma Jisas ga tange habaling ta diet, “Muat hadade baak! Tari ta muat kaiken pa na maat tuk taar bia muat na nas no kinkinis na harkurai ma ra harbalaurai ta God bia i te hanuat ma ra dadas.”
MAR 9:2 Ma bia a liman ma tikai na bung gate pataam, Jisas ga lamus Pita, Jemes, ma Jon uram ra tamat na uladih ing pataie tari kaia. Ma Jisas ga ries ra matmataan ta dal.
MAR 9:3 Ira kiniasine ga pilpilakas ma ga manga ponpon ta ira maal tano ula hanuo ing diet pai haruat wara gisgis huo.
MAR 9:4 Ma Elaija ma ne Moses dir ga harapuasa taar ta diet, dal gaam wawor ma ne Jisas
MAR 9:5 Ma Pita ga tange tane Jisas, “Tena harausur, i bilai ing metal kis kai. I tahut bia metal na gil aitul a palpalih, tikai anum, tikai tane Moses, ma tikai tane Elaija mah.”
MAR 9:6 I ga tange huo kanong bia dal ga nas kaike dal ga manga burut, ma pa ga hanunure bia na tange hohe.
MAR 9:7 Ma namur tiga bahuto ga hanuat, gaam pulus diet, ma ra ingana tiga nong ga ianga huat narako tano bahuto ga tange, “No natigu iakan nong iau manga sip ie. Mutal na hadadei!”
MAR 9:8 Kaik at mon dal ga nanaas hurbit iesen dal pa ga nas ta tiga nong. Jisas sen um ga tur tika taar ma dal.
MAR 9:9 Io, bia dal ga hanansur meram ra uladih, Jisas ga tange hadadas ta dal. Ma ga tange bia dal pa na hinawase ta tiga nong ta iakan ra linge dal ga nas ie. Dal na hinawas um namur bia Nong a Tunotunoi na tut hut baling sukun ra minaat.
MAR 9:10 Dal ga hadade ing ga tange, sen bia dal sen at dal ga waworanei hoken: “I lik hohe ing i tange bia Nong a Tunotunoi na tut hut baling sukun ra minaat?”
MAR 9:11 Ma dal ga tiri Jisas bia, “Wara bih ira tena harausur ta ira harkurai tane Moses diet la tangtange bia no tangesot Elaija at na hanuat nalua tano Mesaia?”
MAR 9:12 Jisas ga balu dal ma ga tange bia, “Io, a tutun, diet ira tena harausur diet tange bia Elaija na lua na hanuat wara gilgil hatakodasne habaling ira linge bakut. Iakano i tutun, kaik i tutun mah bia Nong a Tunotunoi na kilingane at a haleng na haraubaal ma da suro se ie hoing ira pakpakat tane God i tange.
MAR 9:13 Diet ira tena harausur diet tange bia Elaija na hanuat baak, iesen iau hinawase mutal bia tikai hoing Elaija gate hanuat taar! Ma hoing ira pakpakat tane God i tange, di ga gil haruatne ira udiet sakana sinisip utana.”
MAR 9:14 Bia dal ga me haan tupas ira ari bulu na harausur dal ga nas a tamat na matanaiabar sakit tika ma diet. Ma ari tena harausur ta ira harkurai tane Moses diet ga hargor ma diet.
MAR 9:15 Iakano pakaan ing ira matanaiabar diet ga nas leh Jisas diet gaam manga karup. Ma diet ga hilor leh ie wara haatne leh ie.
MAR 9:16 Ma Jisas ga tiri diet, “Muat hargor ma diet wara gena sa?”
MAR 9:17 Io, tiga nong ta iakanong ra matanaiabar ga balui ma ga tange, “Tena harausur, iau lamus no natigu tunaan ukai ho ugu kanong a sakana tanuo i sosoha tana ma pai la iangianga.
MAR 9:18 Ma ing bia no sakana tanuo i ubu ie, i la se tar ie ra pise. Io, a buse i la suursuur tano hana, i la hatagiris ira ngisena ma i la be pidos taar. Ma iau tange ta ira num bulu na harausur bia diet na hasur se no sakana tanuo tana, iesen diet pai haruat.”
MAR 9:19 Jisas ga tange ta diet, “Muat ira matanaiabar katin, muat pai nurnur warah? Maris! Pa ni kis lawas tika ma muat kai napu wara harharahut muat waing muat naga nurnur. Muat lamus no bulu ukai ho iau!”
MAR 9:20 Diet ga lamus ie ukaia ho Jisas. Ma bia no sakana tanuo ga nas Jisas kaik at mon ga se tar no bulu ra pise gaam ubu hangulongulo ie. Ma no bulu ga tamapulpul hurhurbit ma ga busbusain um no hana.
MAR 9:21 Ma Jisas ga tiri no sus ana no bulu hoken: ‘Ga tur leh hunanges iakan i la ububu ie?” Ma ga balui gaam tange, “Tur leh at baak nalua ing ga nat na bulu.
MAR 9:22 Ma haleng na bung i la se tar ie ta ira iaah ma ta ira taah mah waing na bing ie. Bia nu petlaar ta linge tana, nu marse mir ma nu harahut mir!”
MAR 9:23 Jisas ga tange tana, “Warah u tange bia ing iau ni petlaar? Nong i nurnur na petlaar ira linge bakut.”
MAR 9:24 Kaik at mon no sus ana no bulu ga tange, “Masa! Iau nurnur, sen bia nu harahut mah ira sunupi tagu wara nurnur!”
MAR 9:25 Bia Jisas ga nas ira haleng na matanaiabar diet ga hananuat hurlungen, ga ngaluane no sakana tanuo, ga tange tana, “Augu ra ngulo ma ra talinga ba na sakana tanuo, iau tange hadadas taam bia nu suur sukun ie ma waak um u sosoha baling tana.”
MAR 9:26 Ma bia gate kup ma ga ubu hangulongulo tar ie, io, ga suur sukun ie. Ma no bulu um ga ngan hoing bia i te maat, kaik ira haleng diet gaam tange, “I te maat!”
MAR 9:27 Sen bia Jisas ga palim no limana gaam sal hatut ie. Io, no bulu ga tur naliu.
MAR 9:28 Ma bia Jisas ga laka narako ra hala ira uno bulu na harausur diet ga tiri kumaan ie hoken: “Warah mehet pai haruat wara tultule hasur se no sakana tanuo?”
MAR 9:29 Jisas ga balu diet gaam tange, “A sinasaring sen mon i haruat bia na hasur se ira mangana sakana tanuo hokaike.”
MAR 9:30 Ma Jisas ma ira uno bulu na harausur diet ga hansukun iakano taman diet gaam haan kutus no hanuo Galili. Jisas pai ga sip bia ta nong na nunure bia iakana he kanong ga hauhausur ira uno bulu na harausur hoken: “Da tule tar Nong a Tunotunoi ta ira tunotuno ing diet na ubu bing ie. Ma ta itul a bung na pataam na tut hut baling.”
MAR 9:32 Iesen diet pa ga palai ta iakan ra nianga ma diet ga burut bia diet na tiri ie.
MAR 9:33 Io, bia Jisas ma ira uno bulu na harausur diet ga hanuat Kapeneam ma bia diet ga kis taar narako ra hala, Jisas ga tiri diet bia, “Asa iakano muat ga harhargor panei na ngaas?”
MAR 9:34 Ma iesen diet ga kis matien taar um, kanong diet ga hargor na ngaas bia sige ta diet i tamat.
MAR 9:35 Ma Jisas ga kis taar, io, ga tau ira uno sangahul ma iruo gaam tange, “Bia ta tiga nong i sip bia na kis na tamat, i bilai bia na gil hansiksik ie ma na tultulai ta muat bakut.”
MAR 9:36 Ma ga palim leh tiga nat na bulu gaam hatur ie nalamin. Io, ga gawane ie gaam tange ta diet hoken:
MAR 9:37 “Ing bia sige ta nong i bale leh tiga nat na bulu ho iakan, kanong i nunure bia iau sip huo, io, i bale leh iau mah. Ma bia sige i bale leh iau, pai bale leh sen mon iau, nong mah ga tule iau ukai.”
MAR 9:38 Io, Jon ga tange tane Jisas, “Tena harausur, mehet ga nas tupas tikai ga hasur se ira sakana tanuo ma no hinsaam. Ma mehet gaam tigal ie kanong pai la murmur dahat.”
MAR 9:39 Jisas ga tange, “Waak muat tigal ie. Bia tikai na gil ra dadas na gingilaan na kinarup ma no hinsagu, namur baling pa na haruat wara iangianga hagahe iau.
MAR 9:40 Bia tikai pai malok ta dahat, dahat mei.
MAR 9:41 Muat hadade baak! Ari diet na harahut muat. Tikai dak na hamamo muat ma tiga gingop na taah. Ma na gil huo kanong i nunure bia muat la murmur iau. Ma iakano tunotuno na hatur kawase at no uno kunukul.”
MAR 9:42 Ma Jisas ga tange habalin hoken: “Nas diet ken ra hansik na bulu. Diet nurnur tagu ma bia tikai na wara harango tikai ta diet, gaar tahut tana bia da tigal bat ie. Na tahut bia da huna kubus tiga tamat na haat sakit tano kadonana ma da isei ures na tes, kabi harango tikai ma na kap ra tamat na harpidanau namur.
MAR 9:43 Kap se ira sakana lilik ing na harango no num nilon. Tiga malalar tana hoken. Bia tiga limaam i harongane ugu nu kato kutus isei. I tahut dahin bia nu sola tano nilon tutun ma ra kum ugu. Sen bia pai manga tahut bia di ise ugu ma ira iruo limaam bakut ukaia tano ula iaah nong pai la matmaat.
MAR 9:44 [Kaia tano ula iaah ira sisi ta ira tamai diet pai la matmaat ma no iaah pai tale bia da pusii.]
MAR 9:45 Kanin ra malalar mah i haruat huo. Bia tiga kakim i harongane ugu nu kato kutus isei. I tahut dahin bia nu sola tano nilon tutun ma ra kum ugu. Sen bia pai manga tahut bia da ise ugu ma ira iruo kakim bakut ukaia tano ula iaah.
MAR 9:46 [Kaia tano ula iaah ira sisi ta ira tamai diet pai la matmaat ma no iaah pai tale bia da pusii.]
MAR 9:47 Tiga malalar mah hoken. Bia tiga mataam i harongane ugu nu luar sei. I tahut dahin bia nu sola tano nilon tutun ma ra matakasa ugu. Sen bia pai manga tahut bia di ise ugu ma ira iruo mataam bakut ukaia tano ula iaah.
MAR 9:48 Kaia tano ula iaah ira sisi ta ira tamai diet pai la matmaat ma no iaah pai tale bia da pusii.
MAR 9:49 “Nora iaah i la tuntun se ira sakena hoing ira haraubaal i la walwalar dahat bia dahat naga tahut mah. Hokaiken mah, di la bulbul sol ta ira nian naga kis lawas ma pa na sakena.
MAR 9:50 Sol i manga harahut, iesen bia no uno dadas wara harharahut i te pataam, no uno dadas na hanuat balin hohe? Pai tale. Hoing no sol i harahut, muat mah, muat na harahut ma na mon malum harbasia ta muat.”
MAR 10:1 Namur Jisas ga haan talur iakano taman, gaam haan uram tano hanuo Iudeia ma ga balos urau tiga palpal tano taah Ioridaan. A tamat na matanaiabar baling diet ga haan tupas ie. Ga hausur habaling diet hoing at git gilgil.
MAR 10:2 Ma ari Parisi diet ga hanuat wara walwalar Jisas bia pa naga balu timaan no udiet tiniri. Diet ga tiri ie hoken: “I takodas ta ira udahat harkurai bia tiga tunaan na se no uno hahin?”
MAR 10:3 Io, Jisas ga balu diet bia, “A harkurai ie hohe nong Moses ga tar ie ta muat?”
MAR 10:4 Diet ga tange bia, “Moses ga waak se tar ta dahat bia tiga tunaan na pakat tar ra nianga palai wara palas tinolen ta dir ma no uno hahin, io, na tule sei.”
MAR 10:5 Io, Jisas baling ga tange, “Moses ga pakat iakan ra harkurai kanong ira bala muat ga dadas.
MAR 10:6 Iesen tano hatahun tano hakhakisi, ‘God ga pakile dir bia tikai na tunaan ma tikai na hahin.
MAR 10:7 Ta iakan no burena no tunaan naga hansukun no ana sus ma no pawasine, ma dir na kis tika ma no uno hahin.
MAR 10:8 Ma dir na tikai.’ Io, dir pa na airuo baling. Dir na tikai.
MAR 10:9 Waak tiga tunotuno mon i palas harbasiane iakan ra linge kanong God gate kubus pakur tar dir.”
MAR 10:10 Bia diet ga kis taar narako tiga hala, ira uno bulu na harausur diet ga tiri habaling Jisas ta iakan ra linge.
MAR 10:11 Ma Jisas ga tange ta diet, “Bia tikai i se no uno hahin ma i tole tiga mes na hahin, i te gil ronga tano luena hahin, kanong i te noh tika ma tiga mes, pai aunoi.
MAR 10:12 Ma bia tiga hahin i se no uno tunaan ma i tole tiga mes na tunaan aie mah i te gil ronga kanong i te noh tika ma tiga mes, pai aunoi.”
MAR 10:13 Ira matanaiabar diet ga lamlamus ira nat na bulu ukaia hone Jisas bia na bul ira limana ta diet. Sen bia ira uno bulu na harausur diet ga bor diet ing diet ga lamus hawaat ira nat na bulu.
MAR 10:14 Bia Jisas ga nas huo ga ngalngaluan ma gaam tange ta diet, “Muat waak se ira bulu ukai ho iau. Muat pa na tur bat diet kanong no kinkinis na harkurai ma ra harbalaurai ta God audiet ie ira mangana nat na bulu hokaiken.
MAR 10:15 Muat hadade baak! Bia tiga nong pa na hatur kawase no kinkinis na harkurai ma ra harbalaurai ta God hoing tiga nat na bulu, pa na laka tana.”
MAR 10:16 Io, ga rapa leh ira nat na bulu ma ga bul ira limana ta diet ma gaam idane diet.
MAR 10:17 Bia Jisas ga hatahun hinahaan baling, tiga tunaan ga hilau huat taar tana gaam singa bukunkek menalua tana. Io, gaam tiri Jisas, “Bilai na tena harausur, iau ni gil ra sa waing iau ni kap no nilon pa nale pataam?”
MAR 10:18 Jisas ga tange tana, “Nu lilik timaan tano burena warah u kilam iau bia a bilai iau. Taie ta tikai pai bilai. God sen mon i bilai.
MAR 10:19 U nunure ira harkurai tane Moses: ‘Waak u harubu bingibing bia. Waak u noh tika ma tikai pai a num ie. Waak u kikinau. Waak u hinawas harabota uta tikai. Waak u habato leh tiga linge gar na mes. Ma nu ru naam sus ma no pawasim.’”
MAR 10:20 No tunaan ga tange tane Jisas, “Tena harausur, ing iau ga bulu laah ma tuk katin iau la murmur bakut kaiken ra harkurai.”
MAR 10:21 Bia Jisas ga nes ie ga sip ie. Io, ga tange tana, “Tiga linge sen mon pau gil baak ie ma u supii. Haan, ma nu suhurane ira num inton ma ira num linge bakut, ma nu tar ira kinewa ta ira maris waing nugu hatur kawase ira tamat na hartabar aram naliu. Namur, nu mai ma nu mur iau.”
MAR 10:22 No tunaan ga tapunuk bia ga hadade hokaike. Io, ga haan laah ma ra bala marmaris kanong a tamat na watong ie.
MAR 10:23 Ma Jisas ga nas harbasiane ira uno bulu na harausur gaam tange ta diet, “I manga dadas bia tiga watong na sola tano kinkinis na harkurai ma ra harbalaurai ta God!”
MAR 10:24 Ira bulu na harausur diet ga karup ta ira uno nianga. Ma Jisas ga tange habaling ta diet, “Ira nugu subulo, i manga dadas wara sinola tano kinkinis na harkurai ma ra harbalaurai ta God!
MAR 10:25 Ma bia tiga watong i sip bia na sola tana, na manga dadas tana. I malus ta dir bia tiga kamel na hurungo tano matana nil na dudungut bia tiga watong na sola ta iakano kinkinis na harkurai ma ra harbalaurai ta God.”
MAR 10:26 Ma diet ga manga karup, diet gaam tangtange harbasiane ta diet, “Bia hokaike, i nanaas bia taie tikai pai haruat wara kapkap no nilon tutun. Naka?”
MAR 10:27 Ma Jisas ga nas diet ma gaam tange, “Ira tunotuno mon, diet pai haruat uta iakan. Sen bia God i haruat kanong ira linge bakut God i haruat wara pakpakile.”
MAR 10:28 Io, Pita ga tange tana, “Nas, ira numehet linge bakut, het te hansukun tar wara murmur ugu.”
MAR 10:29 Ma Jisas ga tange, “Muat hadade baak! Sige tikai i hansukun no uno taman, ira tasine, ira hainine, no pawasine, no ana sus, ira natine, bia ira uno lalong wara utagu ma tano tahut na hinhinawas, io, na hatur kawase leh ra haleng baling ta iakan ra pakana bung. Na mon tiga maar baling ira taman, tasine, hainine, pawasine, natine, ma lalong, ma da hangungut ie mah. Ma na hatur kawase mah no nilon nong pa nale pataam tano pakana bung na hanuat namur.
MAR 10:31 Ma haleng ing diet watong kaiken, diet na maris namur. Ma diet ira maris kaiken, diet na watong namur.”
MAR 10:32 Ma diet ga murmur no ngaas uram Ierusalem, Jisas ga lulua haan ta diet. Ma ira uno bulu na harausur diet ga karup ma ira matanaiabar ing diet ga murmur ie, diet ga burut. Ma Jisas ga tatau gilamis leh ira sangahul ma iruo gaam hinawase diet ta ira linge na hanuat tana.
MAR 10:33 Ma ga tange ta diet, “Muat hadade timaan. Dahat hanhanut um uram Ierusalem ma da tar se um Nong a Tunotunoi ta ira tamat na ut na pakila lotu ma ta ira tena harausur ta ira harkurai tane Moses. Ma diet na kure bia da bu bing ie. Kaik diet na tar sei ta ira luma diet ing diet pai Iudeia.
MAR 10:34 Ma diet na hasakit sakasaka tana, ma diet na iabis ie, hadangat ie, ma diet na bu bing ie. Ma aitul a bung na sakit, na tut hut baling.”
MAR 10:35 Io, Jemes ma Jon, ira nati Sebedi, dir ga hanuat taar ta Jisas, dir gaam tange tana, “Tena harausur, mir sip bia nu gil tiga linge ta mir.”
MAR 10:36 Ma ga tiri dir, “Mur sip bia ni gil sa ta mur?”
MAR 10:37 Ma dir ga balui, “Bia nu kis tano num minamar na tamat na lualua na gil harkurai, mir sip bia nu haut bia mir na kis tika ma augu, tikai tano kata na limaam ma tikai tano kesa na limaam.”
MAR 10:38 Ma Jisas ga tange ta dir, “Mur pai palai tano linge mur tirtiri bia ni gil ie ta mur. Mur tale bia mur na kap no ngunungut nong iau ni kap ie? Ma mur tale bia mur na sola ta ira linge ing da gil tagu?”
MAR 10:39 Dir ga balui, “Mir tale.” Ma Jisas ga tange ta dir, “I tutun bia mur na kap no ngunungut nong iau ni kap ie. Ma mur na sola ta ira linge ing da gil tagu.
MAR 10:40 Sen bia tano kinkinis tano kata na limagu bia no kesa na limagu, pai nugu linge wara tartar. Iakano a linge tane God. Ma na tar ie ta diet ing gate tagure haruatne ira audiet kinkinis.”
MAR 10:41 Bia ira sangahul na bulu na harausur diet ga hadade huo, diet ga ngalngaluan taar ta Jemes ma Jon.
MAR 10:42 Io, Jisas ga tatau hulungan diet ma gaam tange, “Muat palai ta diet ing diet pai Iudeia. Diet ing di lik bia a lualua diet, diet la hatamat habaling diet ma diet la hanapu ira mes. Ma ira audiet watong diet la manga kurkure diet.
MAR 10:43 Iesen bia pai haruat huo ta muat. Bia tikai i sip bia na tamat nalamin ta muat, na tultulai ta muat.
MAR 10:44 Ma bia tikai i sip bia na tur lua nalamin ta muat, na manga tultulai ta muat bakut.
MAR 10:45 Muat na gil huo kanong Nong a Tunotunoi pa ga hanuat bia diet naga tultulai tana. Ga hanuat bia na tultulai ta diet, ma na tar no uno nilon hoing tiga but na kunkulaan wara kulkul halangalanga ira haleng.”
MAR 10:46 Io, diet ga hanuat aram tano pise na hala Ieriko. Ma Jisas ma ira uno bulu na harausur tika ma ira tamat na matanaiabar sakit, diet ga hanan laah um mekaia. Ma tiga pulo, hinsana ne Batimias, nora natine Timias, ga kis taar tano ra gagena ngaas.
MAR 10:47 Ma bia ga hadade bia aie Jisas nong ma Nasaret, ga haburen kinkonga gaam tange, “Jisas, augu no tubu Dawit, nu marse iau!”
MAR 10:48 Io, haleng matanaiabar diet ga bor ie bia na kis matien. Iesen iakano ra pakaan ga manga kakonga naliu balik gaam tange, “Tubu Dawit, nu marse iau!”
MAR 10:49 Ma Jisas ga tur ma gaam tange, “Muat tulei ukai.” Io, diet ga tatau no pulo ma diet gaam tange tana, “Nu balaraan ma nu tut! I taatau augu!”
MAR 10:50 Io, ga se tar nong tiga kiniasine, ga sila tut ma gaam hanuat taar tane Jisas.
MAR 10:51 Ma Jisas ga tiri ie, “U sip bia iau ni gil hohe taam?” No pulo ga balui, “Tena harausur, iau sip bia iau ni nanaas.”
MAR 10:52 Ma Jisas ga tange tana, “Haan. No num nurnuruan i te halon ugu.” Kaik at mon ga tapapos ira iruo matana gaam mur leh Jisas tano ngaas.
MAR 11:1 Diet ga hanuat taar ta Betpasi ma Betani kaia hutet Ierusalem tano uladih Olip. Io, Jisas ga tule airuo ta ira uno bulu na harausur ma ga tange ta dir, “Mur na haan taar tano taman menalua ta mur ma ing mur na haan laka taar tano taman, kaik at mon mur na nas leh tiga sigara donki di te kubus kawase tar ie. Taie baak tikai pai kisi ie. Mur na lapus ie, io, mur na sal hawaat ie ukai ho iau.
MAR 11:3 Bia tari diet na tiri mur bia, ‘Mur gil huo warah?’, mur na hinawase diet, ‘No Watong i supi tar ie ma namur dahin na tule hawaat habalin ie.’”
MAR 11:4 Io, dir ga haan laah ma dir ga nas leh tiga sigara donki di ga kubus tar ie tano matanangas tiga hala ma ga tur taar tano ngaas. Bia dir ga laplapus ie, ari tunotuno ing diet ga turtur haan hutet diet ga tiri dir, “Mur laplapus no sigara donki warah?”
MAR 11:6 Dir ga balu diet hoing at Jisas gate hinawase tar dir. Io, diet ga waak se tar dir.
MAR 11:7 Dir ga sal hawaat no sigara donki ukaia hone Jisas, dir gaam bakar no tihine no donki ma ari ta ira udir maal. Io, Jisas ga kawaas hut gaam kis kora ine.
MAR 11:8 A haleng tunotuno diet ga kap se ari ta ira kiniasi diet, diet gaam palase mur no ngaas me. Ari diet ga palase ira singara daha ing diet gate kato.
MAR 11:9 Diet ing diet ga lulua haan ma diet ing diet ga murmur haan diet bakut diet ga kakongane hani bia, “Pirlat God! I daan nong i hanuat wara gilgil haruatne ira sinisip gar tano Watong!
MAR 11:10 God i te idane nong i hanuat wara kapkap no tamat na kinkinis tano hintubu dahat Dawit, no tamat na lualua na gil harkurai. Pirlat God nong i kis aram naliu sakit.”
MAR 11:11 Io, Jisas ga haan laka taar tano tamat na pise na hala Ierusalem gaam haan uram tano tamat na hala na lotu. Bia gate nas bakut tar ira linge kaia, Jisas ma ira uno sangahul ma iruo diet ga hansur uram Betani kanong gate matarahien ruruk tuai um.
MAR 11:12 Tano bung menamur bia diet ga hanan laah mekaia Betani, Jisas ga taburungan.
MAR 11:13 Jisas ga nas metapaka tiga ina papus ma ga tubungien taar. Io, ga haan hutet gaam nas timaan ie kanong ga lik bia ga huai taar no ina daha. Bia ga haan hutet ga nes bia a pakana daha sen kanong pa ga pakana bung baak ta ira papus bia na huai.
MAR 11:14 Jisas ga tange tano ina papus, “Taie um tikai pa na iaan balin taam.” Ma ira uno bulu na harausur diet ga hadade ing ga tangtange.
MAR 11:15 Bia diet ga hanuat Ierusalem, Jisas ga haan laka tano tamat na hala na lotu gaam bat hasur diet ing diet ga susuhur ma diet ing diet ga kukul kaia. Ga pulukane ira suuh ta ira tunotuno ing diet ga kukuas ira kinewa, ma ga pulukane mah ira kinkinis audiet ira tunotuno ing diet ga suhsuhurane ira maan na hartabar.
MAR 11:16 Jisas ga tigal mah diet bia diet pa na kap habalin ta linge ukaia narako tano hala na lotu.
MAR 11:17 Io, ga hausur ira tunotuno gaam tange, “Muat nunure timaan tar no nianga tane God di ga pakat ie i tange hoken: ‘No nugu hala na lotu, da kilam ie bia a hala na sinasaring ta ira kaba huntunaan bakut ta iakan ra ula hanuo.’ Sen bia muat te gil balik ie hoing tiga munmun audiet ira holmatau.”
MAR 11:18 Io, ira tamat na ut na pakila lotu ma ira tena harausur ta ira harkurai tane Moses, diet ga hadade iakan. Io, diet ga tur leh wara sisilih bia diet na bu bing Jisas hohe kanong diet ga burtei. Ma diet ga burtei kanong ira matanaiabar bakut diet ga karup ma diet ga urur tano uno harausur.
MAR 11:19 Io, bia gate matmatarahien Jisas ma ira uno bulu na harausur diet ga hansukun um no tamat na pise na hala.
MAR 11:20 Ra malaan bia diet ga hanahaan tano ngaas, diet ga nas no ina papus ma gate maranga bakut.
MAR 11:21 Io, Pita ga lik leh ira nianga Jisas ga tange tar tano ina daha, io, ga tange tane Jisas, “Tena harausur, nes baak! No ina papus nong u tibe bingbing ie, i te maranga.”
MAR 11:22 Io, Jisas ga balu diet, “Iau manga sip bia muat na nurnur tane God! Muat hadade baak! I tale mah muat ta ira dadas na linge sakit hokaiken. Bia sige tikai na tange ta iakan ra uladih, ‘Taman tut, ma nu tamaragat suur uram ra tingaan tes,’ ma bia aram narako tun tana pai lilik harharuo iesen i nurnur taar at bia no linge i saring ie na hatur kawase ie, God na tar ie tana.
MAR 11:24 A burena kaik iau nigi hinawase muat kaiken, bia ta mangana linge sa muat saring, muat na nurnur at bia muat te kap no hunena, io, na tar ie ta muat.
MAR 11:25 Ma bia u sasaring ma u mon bala ngungut taar tikai, nu lik luban se ing iakanong ga gil tar taam waing no raam sus kananam ra mawe na lik luban se mah ira num magingin sakena.
MAR 11:26 [Iesen bia pau lik luban se ing iakanong ga gil tar taam, no raam sus kananam ra mawe pa na lik luban se mah ira num magingin sakena.]”
MAR 11:27 Io, diet ga hanuat balin taar aram Ierusalem. Ma bia diet ga hanahan haan narako tano tamat na hala na lotu ari ta ira tamat na ut na pakila lotu, ma ari a tena harausur ta ira harkurai tane Moses, ma ari a tamat ta ira huntunaan diet ga haan huat taar tana.
MAR 11:28 Io, diet ga tiri Jisas “U te kap ra tamat na dadas na harkurai meh kaik gu pakile kaike ra linge, ma sige i bul hatamat ugu kaik gu gil huo?”
MAR 11:29 Jisas ga balu diet, “Iau ni tiri muat tiga tiniri ma bia muat na balu iau, io, iau ni hinawase muat bia sige i tar ra dadas tagu kaiken iau gi ngan hoken.
MAR 11:30 Muat lik bia Jon ga kap no uno pinapalim na baptais meram ra mawe bia mekaia ta ira tunotuno mon? Muat balu iau!”
MAR 11:31 Diet ga wawor nalamin ta diet at hoken: “Bia dahat na tange bia Jon ga kap no uno pinapalim meram ra mawe, Jisas na tange ta dahat bia, ‘Muat gaar te nurnur mon ta ira nianga tane Jon.’
MAR 11:32 Ma dahat pa na tange mah bia Jon ga kap no uno dadas ta ira tunotuno mon.” (Diet ga tange huo kanong diet ga burte ira tunotuno, warah a haleng ta diet ga nurnur bia Jon ga tiga tangesot tutun.)
MAR 11:33 Io, diet ga balu Jisas bia, “Mehet pai nunure.” Io, ma Jisas ga tange um ta diet, “Iau mah, iau pa ni hinawase muat bia iau kap no nugu tamat na dadas na harkurai meh, kaik iau gi gil huo.”
MAR 12:1 Io, Jisas ga hatahun nianga ta diet ma ra nianga harharuat ma ga tange, “Tiga tunotuno ga so tiga lalong na hunena wain. Ga tumat luhutanei ma ra bala ma ga kil tiga naan i haruat wara papaas ruap no hunena wain. Ga tumat mah tiga hunghungaan na haat uram naliu wara nasnas mur no lalong na hunena wain. Bia ga gil tar kaike ga waak tar no lalong ta diet ing diet ga sahur ie bia diet na balbalaurei ma gaam haan laah baak tano uno hinahaan.
MAR 12:2 Bia ga madar ira hunena wain ga tule auno tiga tultulai uras hoira ut na balaura lalong bia na kap leh tari hunena wain ta diet.
MAR 12:3 Sen bia diet ga palim kawasei, diet gaam hamidaak ie, io, diet ga tule pukus bia se tar ie.
MAR 12:4 Namur ga tule habalin tiga mes na tultulai ures ho diet. Ma diet ga lawat no uluno, diet gaam hamalahuan mah ie.
MAR 12:5 Ga tule habalin at mah tiga mes ma iakanin diet ga bu bing ie. Ma ari haleng mah ga tule habalin. Ari di ga hamidaak ma ari di ga bu bing.
MAR 12:6 Io, tiga nong kana bia na tule, a natinei nong ga manga sip ie. Ga tule um ie menamur ta diet bakut, kanong ga tange bia, ‘Diet na ru no natigu.’
MAR 12:7 Sen bia ira ut na balaura lalong diet ga tange harbasiane ta diet bia, ‘Iakano tunotuno i te hanuat nong na rumahal. Kaia, dahat gi a ubu bing ie waing dahat naga rumahal ta iakan ra lalong.’
MAR 12:8 Io, diet ga palim kawasei, diet ga ubu bing ie, diet gaam ise hasur ie meram narako tano lalong na hunena wain.”
MAR 12:9 Jisas um ga tange ta diet hoken: “Iau ni hinawase muat ta ira linge ing no tunotuno auno no lalong na gil. No tunotuno na hanuat ma na bu bing haliare kaike ira ut na balaura lalong, io, na tar no lalong na hunena wain ta ari mes.
MAR 12:10 I tahut bia muat na lik leh no nianga tane God di ga pakat ie i tange hoken, ‘No haat nong ira ut na pakila hala diet ga malok sei kanong diet ga lik bia a linge bia ie, i nanaas taar bia aie balik um no dadas na burena tano hala bakut.
MAR 12:11 No Watong at ga gil hokaiken ma i manga bilai sakit bia dahat na nas ie.’”
MAR 12:12 Io, ira lualua na lotu, diet ga walar bia diet na palim kawase Jisas, kanong diet ga nunure bia ga iangianga harharuat at mon uta diet. Iesen diet ga burte no tamat na matanaiabar, io, diet ga hansukun ie.
MAR 12:13 Io, namur, di ga tule ari ta ira Parisi ma ari ing diet la murmur Herot, no tamat na lualua na gil harkurai, ukaia ho Jisas bia diet na hakuni ie ta ira uno nianga.
MAR 12:14 Bia diet ga hanuat taar tana, diet ga tange tana, “Tena harausur, mehet nunure bia a tutun na tunotuno ugu. Pau la turtur sen ma tikai kanong pau la songsong leh bia a mangana tunotuno sa tiga nong. U la hausur tutun at tano lilik tane God i sip bia da mur. Io, hinawase mehet, I takodas bia dahat na kul tar no takis ta diet ing diet kure dahat bia taie?
MAR 12:15 Dahat na kul no takis bia dahat pa na kul ie?” Iesen Jisas ga palai tano udiet nianga harabota, io, gaam tange ta diet, “Muat sip bia muat na hakuni iau warah? Muat kap baak tiga siliwa ukai nigi nas ie.”
MAR 12:16 Io, diet ga kap hawaat no siliwa gaam tiri um diet, “A malalar i sige iakan ma a hinsa sige iakan?” “Tano lualua ta ira ut na harkurai,” diet ga balui.
MAR 12:17 Io, Jisas ga tange ta diet, “Muat na tar ta ira ut na harkurai ira linge at ta ira ut na harkurai, ma muat na tar ta God ira linge at tane God.” Ma diet ga karup ta ira nianga ga tange.
MAR 12:18 Ari Sadiusi ing diet la liklik bia nong i maat pa na tut hut balin, diet ga hanuat taar tane Jisas, diet gaam tiri ie bia, “Tena harausur, Moses ga pakat tar wara audahat hoken, bia tiga tunaan taie auno ta bulu i maat ma i mat sukun no uno hahin, no tasine na tole leh no makosa. Io, dir na hatahuat ta nati dir ma dir na kilam tar ta diet no hinsana no tasine nong i te maat.
MAR 12:20 Io, a liman ma iruo na haratasin. No luena ga tole tiga hahin ma ga mat sukun ie ma pa ga mon nati dir baak.
MAR 12:21 No airuo na tasine ga tole no makosa, ma sen bia aie mah ga maat ma pa ga mon ta nati dir. No aitul a tasine ga ngan mah huo.
MAR 12:22 Io, ira liman ma iruo na haratasin bakut ing diet ga tole tar no hahin, diet bakut ga maat, ma pa ga mon nati diet. Namur mah um no hahin ga maat.
MAR 12:23 Bia ira minaat diet na lon huat balin tano bung na tuntunut hut, ta sige tun at um no hahin? Kanong diet bakut ira liman ma iruo diet ga tole tar ie.”
MAR 12:24 Jisas ga balu diet hoken: “Muat manga ronga kanong muat pai palai ta ira nianga tane God ing di ga pakat ma muat pai nunure mah no dadas tane God.
MAR 12:25 Bia ira minaat diet na lon huat balin diet pa na hartola. Diet na haruat ma ira angelo aram ra ula mawe.
MAR 12:26 Iesen, kaiken ni hinawase muat bia diet ing diet te maat, diet na tut hut balin bia taie. I tahut bia muat na lik leh ke narako tiga pakpakat tane Moses ing no daha ga lulungo. Muat na lik timaan kaiken bia God ga tange ra sa tane Moses. A tutun bia kaiken ra hintubu dahat diet gate maat, iesen God ga tange bia, ‘Iau no God tane Abraham, no God tane Aisak, ma no God tane Iakop.’
MAR 12:27 Pataie bia a God audiet ira minaat, sen bia a God audiet ira lilona. Muat manga ronga.”
MAR 12:28 Tikai ta ira tena harausur ta ira harkurai tane Moses ga hanuat ma ga hadade diet ga harhargau. Bia ga nas hoken bia Jisas gate balu timaan diet, ga tiri ie, “Gahim no harkurai ta ira harkurai bakut tane God i manga lua?”
MAR 12:29 Jisas ga balu ie gaam tange, “No harkurai nong i lua ta diet bakut i hoken: ‘Hadoda Israel, no Watong no udahat God, aie sen mon no Watong.
MAR 12:30 Nu sip no Watong no num God ma no katim bakut, no num nilon bakut, no num lilik bakut, ma no num dadas bakut.’
MAR 12:31 Nong iruo mei i hoken: ‘Nu marse tikai hoing u marse habaling at ugu.’ Taie balin tiga harkurai pai tamat ta ken ra iruo.”
MAR 12:32 Io, no tena harausur ta ira harkurai tane Moses ga tange tane Jisas, “Tena harausur, a tutun ing u tange bia taie mah um tiga God, aie sen mon.
MAR 12:33 Ma bia tikai na sip God ma no katine bakut, no uno lilik bakut, ma no uno binaso bakut, ma na marse mah no mes hoing i la marmarse at ie, kaike i manga tahut ta ira udahat hartabar uram ho God.”
MAR 12:34 Ma bia Jisas ga nas bia gate babalu timaan gaam tange tana, “Pau manga tapaka tano kinkinis na harkurai ma ra harbalaurai ta God.” Menamur ta kaike taie balin tikai pa ga balaraan bia na tiri ie ari tiniri.
MAR 12:35 Bia Jisas ga hauhausur diet narakoman tano tamat na hala na lotu, ga tange, “Muat lik hohe uta nong di kilam ie bia no Mesaia? I nanaas bia ira lilik ta ira tena harausur ta ira harkurai tane Moses pai manga palai. Diet lik bia iakano Mesaia a bulumur ie tane Dawit. Iesen diet pai nunure ta tiga mes na linge utana.
MAR 12:36 Muat nes baak! No Halhaliana Tanuo ga tar ira lilik tane Dawit kaik at Dawit gaam tange bia, ‘No Watong ga tange ta nagu Watong: “Nu kap no tamat na kinkinis kai tano kata na limagu, tuk iau ni bul hasur ira num hiruo menapu ta ira lapar a kakim!” ’
MAR 12:37 Io, i nanaas bia menalua sakit Dawit at ga kilam no Mesaia bia ‘Nagu Watong.’ Kaik i palai bia iakano Mesaia a bulumur ie tane Dawit ma aie mah no Watong.” Ma no tamat na matanaiabar diet ga kanakana ing diet ga hanhadadei.
MAR 12:38 Ma bia ing Jisas ga hausur diet, ga tange, “Muat harbalaurai ta ira tena harausur ta ira harkurai tane Moses. Diet sip bia ira kiniasi diet na manga taheuheu suur, ma diet sip mah bia da kaang leh diet ta ira subaan ing di la hanhanuat hurlungen kaia.
MAR 12:39 Diet sip mah bia diet na kis ta ira kinkinis gar na tamat narakoman ta ira udiet hala na lotu ma ta ira bura na rau ta ira gil nian.
MAR 12:40 Diet la karkarit leh ira linge bakut ta ira makosa, ma diet la harababo ma ira udiet talona sinasaring. God na manga hapidanau diet.”
MAR 12:41 Io, Jisas ga kis taar narakoman tano tamat na hala na lotu audiet ira Iudeia. Ga kis taar tano mes na palpal tano katon di la bulbul ira hartabar kaia gaam nasnas ira matanaiabar diet ga bulbul ira udiet kinewa tano bunbulaan. Ma a haleng watong diet ga se ra tamat na kinewa.
MAR 12:42 Iesen tiga maris na makosa na hahin ga hanuat gaam bul halaka airuo nat na peni ing ira matana i manga hansik.
MAR 12:43 Jisas ga tatau hawaat ira uno bulu na harausur gaam tange ta diet, “Muat nes baak! Iakan ra maris na makosa i te bul ra tamat ta diet bakut uram tano bunbulaan.
MAR 12:44 Diet bakut, diet tar meram ta ira udiet bunbulaan ing i manga haleng kaia, iesen iakan ra maris i te tar hakidilon bakut se ing na lon me.”
MAR 13:1 Bia Jisas ga hanahaan sukun no tamat na hala na lotu audiet ira Iudeia, tikai ta diet ira uno bulu na harausur ga tange tana, “Tena harausur, nas baak! Ira bilai na haat ing di ga pakile iakan ra hala na lotu me. Ma nes ira uno bilai na subaan mah!”
MAR 13:2 Io, Jisas ga balui, “Iakan ra tamat na hala na lotu u nasnas ie, taie tiga haat bia na kis harpatup taar ma tikai. Ira amuat suk, diet na dure hasur bakut.”
MAR 13:3 Ma diet ga hanuat taar tano uladih Olip, tano mes na palpal tano tamat na hala na lotu. Ma ing Jisas ga kis taar kaia, Pita, Jemes, Jon, ma ne Andru dal ga tiri hasisingen ie hoken:
MAR 13:4 “Nu hinawase mehet, bia hunanges kaiken ra linge ing u hinawase mehet ine na hanuat. Ma a mangana hakilang sa mehet na nas ing na haminas bia kaike ira linge diet te hutet bia diet na hanuat?”
MAR 13:5 Io, Jisas ga balu diet hoken: “Muat na harbalaurai ta nong kabi habato lamus leh muat.
MAR 13:6 A halengin diet na harabota huat ma diet na tange bia, ‘Iau at mon no Mesaia,’ ma diet na habato lamus leh ra halengin.
MAR 13:7 Ma bia muat na hadade uta ira tamat na hinarubu bia ari hinhinawas ta ira tamat na hinarubu tapaka, muat pa na raurawaan. Kaike ra mangana linge na hanuat, sen bia no hauhawatine pa na hanuat baak.
MAR 13:8 Io, a haleng na huntunaan tano ula hanuo diet na tut na hinarubu balin ta diet. Ma na mon kunakunar tari haleng taman ma da sam taburungan mah. Bia kaiken ra linge na hanuat na haburen mon no ngunungut hoing no bulu i papaas hatahun no hahin ing i wara kinakaha.
MAR 13:9 “Muat na harbalaurai. Da lamus tar muat ta ira subaan wara harkurai ma da hamidaak muat narakoman ta ira numuat hala na lotu. Ma muat na tur ra harkurai mah ra matmataan ta ira ut na harkurai ma ira tamat na lualua na gil harkurai wara gaiegu. Ma muat na iangianga palai ta diet tano tahut na hinhinawas.
MAR 13:10 Ma da huna hinawas ta iakano tahut na hinhinawas ta ira hanuo bakut menalua tano hauhawatine ta iakan ra lon.
MAR 13:11 Ma bia da palim kawase muat ma da hatur muat ra harkurai, waak muat ra raurawaan bia asa ing muat na tange. Muat na tange at mon ira sa ing i hanuat ta muat ta iakano pakana bung, kanong pai numuat kaike ra nianga. No Halhaliana Tanuo i iangianga.
MAR 13:12 Ira tunaan diet na bale se ira tasi diet balin waing da bu bing diet. Ma ira adiet sus, diet na gil mah huo ta ira nati diet. Ma ira bulu diet na manga patnau ta ira adiet sus ma ira pawasi diet. Kaik diet na bale se mah ira adiet sus ma ira pawasi diet waing da bu bing diet.
MAR 13:13 Ira tunotuno bakut diet na malentakuane muat wara gaiegu, sen bia nong i tur dadas taar tuk ra hauhawatine, God na halon ie.”
MAR 13:14 “Muat ing muat waswas ken ra pakpakat i tahut bia muat na palai tano kukuraina tutun ta iakan ra linge nong na hanuat. Muat na nas tikai ‘nong i manga sakena sakit ma nong i la hamhamau taman.’ Ma na tur taar tano subaan nong pai aie mekaia. Io, bia ing i gil huo, diet ing diet kis taar kaia Iudeia, i tahut bia diet na hilau uram ta ira uladih.
MAR 13:15 Nong i kis taar naliu tano uno madahien na ula hala, i tahut bia na hansur gasien. Waak bia i hasurum pakana bung wara hinaan laka baal tano uno hala wara kapkap leh aun ta linge.
MAR 13:16 Ma nong mah i kis taar aram na lalong, waak i hanan tapukus wara kapkap ira kiniasine. Na habir mon.
MAR 13:17 Maris ta diet ing diet tianan taar ma diet ing diet harharasus ta iakano pakana bung. Na manga ubal tun at diet.
MAR 13:18 Muat na sasaring bia iakan ra purpuruan pa na hanuat tano pakana bung tano labur, kanong iakano bung da kilingane ra tamat na ngunungut. Ma pa na haruat ma ira bung, haburen leh ta ing God ga hakisi no ula hanuo, tuk taar katin, ma pa nale haruat mah huo namur.
MAR 13:20 Bia no Watong pa naga puo hakumkum iakano pakana bung, taie tiga nong pa gaar lon. Iesen na puo hakumkum iakano pakana bung wara gaie diet ing gate gilamis leh diet.
MAR 13:21 “Ma ta iakano pakana bung mah bia tikai na tange ta muat, ‘Nas baak! No Mesaia ie ken,’ bia ‘Nas baak! No Mesaia ie ke,’ waak muat nurnur tana.
MAR 13:22 Io, ari Mesaia harabota ma ari tangesot harabota diet na hanuat. Diet na haminas ta hakilang ma diet na pakile ta dadas na gingilaan na kinarup waing diet na walar, bia diet na petlaar, wara habato lamus leh ira tunotuno ing God gate gilamis leh.
MAR 13:23 Io, muat na harbalaurai, kanong iau te huna hinawase muat ta ira linge bakut ing na hanuat namur.
MAR 13:24 “Ma sen bia tano pakana bung menamur ta iakano tamat na ngunungut, ‘No kasakes na kankado ma no teka pa na lulungo,
MAR 13:25 ira tiding diet na rus meram ra mawe, ma ira dadas aram ra mawe, diet na pagola.’
MAR 13:26 Ta iakano pakana bung ira tunotuno diet na nas Nong a Tunotunoi na hanan huat ta ira bahuto, ma ra tamat na dadas ma ra minamar.
MAR 13:27 Ma na tule um ira uno angelo wara lamlamus hulungan a uno, ing gate gilamis leh. Ma diet ira angelo diet na lamus hulungan ira uno matanaiabar mekaia ta ira aihat na matana dadaip tano hauhawatine no ula hanuo tuk taar tano hauhawatine no ula mawe.
MAR 13:28 “Muat na kap harausur ta ira ina balbaal. Tano pakana bung bia no ina balbaal i te selas ma i te kuburuan ira pakana, muat na nunure bia i te hutet no pakana bung na harat.
MAR 13:29 Hoing at mon, bia muat na nas kaike ra linge i te hanan huat, muat na nunure bia no pakana bung i te hutet, ke tuai at mon ra matanangas huat.
MAR 13:30 Muat na hadade baak! Iakan ra huntunaan, tari ta diet pa na maat baak ma kaiken ra linge na hanuat.
MAR 13:31 No ula mawe ma no ula hanuo na panim laah ma sen bia ira nugu nianga pa na panim.”
MAR 13:32 Ma Jisas ga tange habaling bia, “Taie tikai pai nunure at iakano pakana bung bia kaiken ra linge na hanuat. Ira angelo kenam ra ula mawe ma no Natine mah diet pai nunure—no ana Sus sen mon.
MAR 13:33 Muat na harbalaurai! Ma muat na taguro kawasei! Muat pai nunure ing iakano pakana bung na hanuat.
MAR 13:34 I haruat ma tiga tunotuno i haan laah ta ira uno hinahaan. I haan talur taar no uno hala tara harkurai ta ira uno tultulai. Ga waak kapis tar ira pinapalim ta diet bakut tikatikai, ma ga tange ta nong i la balbalaure no matanangas bia na taguro kawasei.
MAR 13:35 I tahut bia muat mah, muat na taguro kawasei, kanong muat pai nunure at bia no pakana bung hohe no tunotuno auno no hala na tapukus balin. Na hanuat dak ra matarahien, bia ra tingena bung, bia ra kareka na kakel, bia ra malaan.
MAR 13:36 Muat na taguro kawasei, kabi haan tupas hakarup muat ma kana muat kumkubaba.
MAR 13:37 Kaiken iau te tange ta muat, iau tange ta ira tunotuno bakut: ‘Muat na taguro kawasei!’”
MAR 14:1 Airuo bung ta mon um kana tano Nian na Hinahaan Sakit ma no nian na Beret Pai La Laalat. Ma ira tamat na ut na pakila lotu ma ira tena harausur ta ira harkurai tane Moses diet ga sisilih tiga bilai na ngaas na harakumkumaan wara palpalim kawase Jisas waing diet naga bu bing ie.
MAR 14:2 Iesen diet ga tange, “Dahat pa na gil huo kaia tano nian. Ira tunotuno diet kabi tut na purpuruan ma dahat.”
MAR 14:3 Io, Jisas ga kis taar Betani ma bia ga iaiaan narakoman tano hala tane Saimon, nong baak ga sam sakana minaset taar tano palatamaine, tiga hahin ga hanuat. Ma no hahin ga kap hawaat tiga mangana bilai na gingop na taah. Ma di ga gil ie ma ra haat na tiris. Ma narakoman tana ari waiwai wara salsalap, di kilam ie bia ‘nart.’ Ma no hunhuraan tana ga manga bilai sakit ma a tabi kinewa tana. Ga parok no pala taah gaam hurange no waiwai tano ulu Jisas.
MAR 14:4 Ari ta ira tunotuno ing diet ga kis taar kaia diet ga ngurungur ma diet ga tange harbasiane ta diet, “Wara bih tun at bia i hasurum bia no waiwai.
MAR 14:5 Di gaar te suhurane no waiwai wara kapkap ta kinewa ing i haruat ma ra kunukul tikai gaar kap ta ira uno pinapalim tiga tinahon. Io, ma ira kinewa um di gaar te tar ta ira maris.” Ma diet ga ianga ngalngaluan taar tana.
MAR 14:6 Io, Jisas ga tange ta diet, “Muat waak sei. Taie mon ta burena bia muat na kis na gil ie. No linge i te gil tar ie tagu i manga bilai sakit.
MAR 14:7 Ira maris diet na kis tika ma muat hatika, ma i tale bia muat na harahut diet ta ira pakana bung bia muat sip. Ma sen bia iau pa ni kis hatika ma muat.
MAR 14:8 No hahin i te gil no linge nong i petlaar bia na pakilei. I te hurange bus no tamaigu ma iakan ra bilai na waiwai kaiken wara tangtagure iau utano bung da bus iau namur.
MAR 14:9 Muat na hadade baak! Da hinawas tano tahut na hinhinawas ta ira taman bakut tano ula hanuo. Ma bia da gil huo, io, no linge no hahin i te pakile tar ie da hinawas mah utana, wara halilik tar ira tunotuno utana.”
MAR 14:10 Ma Iudas Iskariot, tikai ta ira sangahul ma iruo na bulu na harausur, ga haan tupas ira tamat na ut na pakila lotu gaam hinawase diet bia na tar se Jisas ta diet.
MAR 14:11 Diet ga kanakana ing diet ga hadadei, diet gaam kukubus bia diet na tar ta kinewa tana. Io, ga sisilih tiga bilai na ngaas wara tartar se Jisas ta diet.
MAR 14:12 Tano luena bung tano nian na Beret Pai La Laalat, ira Iudeia diet git bubu bing mah ira nat na sipsip diet naga ien wara liklik kawase no bung na Hinahaan Sakit. Ta iakano ra bung ira bulu na harausur tane Jisas diet ga tiri ie, “U sip bia mehet na tagure no Nian na Hinahaan Sakit ahe?”
MAR 14:13 Io, ga tule airuo ta ira uno bulu na harausur ma ga tange ta dir, “Mur na haan laka tano tamat na pise na hala, ma tiga tunaan i kapkap hani tiga pokona taah na harsomane mur kaia. Mur na mur ie.
MAR 14:14 Tano hala nong no tunaan na haan laka kaia, mur na tange tano tunaan nong auno tus no hala bia, ‘No tena harausur i wara nunure bia ie he no subaan tano hala nong aie ma mehet ira uno bulu na harausur, mehet na ien no Nian na Hinahaan Sakit kaia?’
MAR 14:15 Io, na tuko haminas tiga subaan ta mur, aram naliu tano hala nong di te tagure tar ie. Mur na tagure ira adahat nian kaia.”
MAR 14:16 Io, ira iruo bulu na harausur dir ga haan laah dir gaam haan laka tano tamat na pise na hala. Dir ga nas bakut leh ira linge hoing Jisas ga tange ta dir. Io, dir ga tagure no adiet Nian na Hinahaan Sakit.
MAR 14:17 Bia gate matmatarahien Jisas ga hanuat tika ma ira uno sangahul ma iruo.
MAR 14:18 Ma bia diet ga kis taar kaia ma diet gaam iaiaan, Jisas ga tange ta diet, “Muat hadade baak! Tikai nalamin ta muat kaiken i iaiaan tika ma iau na tur talur iau ma na tar se iau.”
MAR 14:19 Io, diet ga tapunuk kaik tikatikai at ta diet gaam tange tane Jisas bia, “Iau lik bia pai iau, naka?”
MAR 14:20 Io, Jisas ga balu diet, “Tiga nong at mon ta muat ira sangahul ma iruo. Nong i hasuguh no ana beret narako tano dis tika ma iau, aie at mon.
MAR 14:21 Nong a Tunotunoi na haan taar tano uno minaat hoing at mon ira tangesot diet gate pakat tar utana. Sen bia maris ta iakano tunaan nong na tur talur ma na tar se Nong a Tunotunoi! Gaar tahut tana bia pa di gor kahai, kanong na kap tiga tamat na harpidanau.”
MAR 14:22 Bia diet ga iaiaan Jisas ga kap leh tiga katona beret, ga tanga tahut tane God tana ma gaam pidik ie. Io, ga palau ira uno bulu na harausur mei ma ga tange ta diet, “Muat kap leh ie. Iakan no tamaigu.”
MAR 14:23 Namur ga kap leh no gingop na wain gaam tanga tahut tane God tana ma ga tar ie ta diet. Io, diet bakut diet ga mom tana.
MAR 14:24 Io, Jisas ga tange ta diet, “Iakan no degu iau ni tar se biai uta ira halengin wara hatutun nora kunubus meram ho God.
MAR 14:25 Muat hadade baak! Iau pa ni mame habalin ta wain tuk tano pakana bung tano kinkinis na harkurai ma ra harbalaurai tane God ing ni ra mom tika balin ma muat.”
MAR 14:26 Ma bia diet gate inge tar tiga ninge diet ga hansur mekaia uram ra uladih Olip.
MAR 14:27 Jisas ga tange ta diet, “Muat bakut muat na hilau sukun iau hoing no tangesot gate pakat tar ta ira nianga tane God. Ma God ga tange bia, ‘Iau ni bu bing no ut na balbalaura sipsip, ma ira sipsip diet na hilau harbasia.’”
MAR 14:28 Ma Jisas ga tange habalin bia, “Kaike i tutun, iesen iau ni lon huat balin ma iau ni lua ta muat uras Galili.”
MAR 14:29 Iesen Pita ga tange tana, “A tutun bia diet bakut dak diet na hilau sukun ugu, iesen bia iau at taie.”
MAR 14:30 Jisas ga balu ie, “Hadade baak! Katin at ra bung, bia pai airuo na kareka baak, nu harus ise iau aitul a pakaan.”
MAR 14:31 Iesen Pita ga balu pukus ie ma ra dadas ma gaam tange, “A linge bia ing bia ni maat tika ma ugu. Iau pa ni harus ise at ugu.” Ma ira mes, diet ga tange huo mah.
MAR 14:32 Diet ga haan taar tiga taman di kilam ie bia Getsemani, ma Jisas ga tange ta ira uno bulu na harausur bia, “Muat na kis taar kai ma iau ni sasaring.”
MAR 14:33 Io, ga lamus leh ne Pita, Jemes ma ne Jon, dal gaam sakatei. Iakano pakana bung ga kilingane ra tamat na tapunuk ma ga manga kalar mah.
MAR 14:34 Io, ga tange ta dal, “No nugu kidilona nilon i manga tirtirih sakit kaiken iau gi kilingane bia iau wara minaat. Mutal kis kai ma mutal na naanaas.”
MAR 14:35 Jisas ga haan hakakari dahin gaam sian tudu taar napu tano pise. Ma ga sasaring bia pa na kap iakan ra ngunngutaan bia ing kana ta mes na ngaas.
MAR 14:36 Ga sasaring hoken: “O Mama, ira linge bakut i tale ugu bia nu petlaar. Kap se iakan ra tinirih mekai ho iau nong i wara hinaan tupas iau. Ma sen bia waak u gil ing iau sip. Nu gil at ing u sip.”
MAR 14:37 Ga haan tapukus balin taar ta ira uno aitul a bulu na harausur ma ga nas dal bia dal ga kumkubaba. Ma Jisas ga tange tane Pita, “Iau marmaris bia u kumkubaba. Pai tale bia u gor naanaas ta mon ta dahin?
MAR 14:38 I tahut bia mutal na naanaas ma mutal na sasaring waing mutal pa na puko bia ta harwalaam na tupas mutal. Ira bala mutal i kanan taar um wara turtur bat ira harwalaam, sen bia a tunotuno tun mon mutal, kaik naga dadas ta mutal.”
MAR 14:39 Ga haan laah balin gaam sasaring hoing nalua.
MAR 14:40 Bia ga haan tapukus balin ga nas tupas habalin dal bia dal ga kumkubaba, kanong dal ga manga sumsumela. Ma dal pa ga nunure bia asa um dal na tange tana.
MAR 14:41 Bia ga haan tapukus balin tano aitul a pakaan, ga me tange ta dal, “Iau marmaris bia kana at baak mutal kumkubaba ma mutal tatohun taar. I te haruat um! Nas baak! No pakana bung i te hanuat bia da tar se Nong a Tunotunoi ta ira lima diet ira ut na sakena.
MAR 14:42 Mutal tut ma datal na haan. Nas um! No tunaan nong na tar se iau iakaike tuai i hanan huat!”
MAR 14:43 Kaike at mon bia ga iangianga, Iudas, tikai ta ira uno sangahul ma iruo na bulu na harausur, ga salo huat. A tamat na matanaiabar ga hanuat tika mei ma diet ga kapkap hani ra wise ma ra kapsil. Kaiken ra matanaiabar at ira tamat na ut na pakila lotu, ma ira tena harausur ta ira harkurai tane Moses ma ira tamat ta ira huntunaan diet ga tule se diet.
MAR 14:44 Io, no tunaan nong ga tur talur Jisas, nong i wara tartar sei, gate tange tar ta diet hoken: “No tunaan iau ni haianga leh ie ma ni lusung ie, aie at mon. Muat na palim kawasei, io, muat na lua timaan laah tana bia kabi hilau.”
MAR 14:45 Kaik at mon ne Iudas ga hanuat taar tane Jisas. Ga haianga leh ie hoken: “Tena harausur!” ma ga haatnei ma ra harlusung.
MAR 14:46 Io, ira tunotuno diet ga palim kawasei.
MAR 14:47 Ma tikai ta diet ing ga tur tika taar ma ne Jisas ga sasal leh no uno wise na hinarubu gaam kato kutus se tiga talingana no tultulai tano tamat ta ira ut na pakila lotu.
MAR 14:48 Io, Jisas ga tange ta diet, “Hoing balik bia iau tiga holmatau kaik muat gi kap hawaat ira wise ma ra kapsil wara palpalim kawase iau? Pai tiga holmatau iau!
MAR 14:49 Ta ira bungbung iau git kiskis tika ma muat ing iau git harharausur tano tamat na hala na lotu ma muat pa ga palim kawase iau. Iesen, kaiken ra linge i hananhuat wara hatutun ira nianga tane God ing di ga pakat.”
MAR 14:50 Ma ira uno bulu na harausur bakut diet ga hilau sukun ie.
MAR 14:51 Ma tiga marawaan ga murmur hani Jisas ma ga pupulus sen ta mon ma tiga maal. Ira matanaiabar diet ga walar bia diet na palim kawasei.
MAR 14:52 Ma sen bia ga hamalum kapis tar um no uno maal kaia ta diet gaam hilau bia laah ma ra tabuna sului.
MAR 14:53 Io, diet ga lamus tar Jisas tano tamat ta ira ut na pakila lotu. Ma ira tamat na ut na pakila lotu, ma ira tamat ta ira huntunaan, ma ira tena harausur ta ira harkurai tane Moses, diet bakut, diet ga hanuat hurlungen taar kaia.
MAR 14:54 Pita ga murmur hani at Jisas, ma ga taptapaka haan at, tuk bia diet gaam haan laka tano hera tano ngasiana no tamat ta ira ut na pakila lotu. Pita ga kis kaia gaam ratrat iaah tika ma ira ut na harbalaurai uta iakano katon.
MAR 14:55 Ira tamat na ut na pakila lotu ma ira kaba kaunsil diet ga sisilih ta mangana nianga wara tangtange hagahe Jisas waing diet naga bu bing ie, ma sen diet pa ga nas leh tari.
MAR 14:56 A halengin diet ga tar ira udiet nianga na harabota, ma sen ira udiet nianga ga mes harbasia.
MAR 14:57 Hokaiken, ari tunotuno diet ga tut ma diet ga harabota taar tane Jisas hoken:
MAR 14:58 “Mehet ga hadadei ga tange hoken: ‘Iau ni dure iakan ra hala na lotu nong ira tunotuno mon diet ga pakile ie, ma ta itul a bung mon iau ni pakile habalin tikai. Iakanin, a tunotuno pa na gil ie.’”
MAR 14:59 Sen bia ira udiet hinhinawas at mah ga mes harbasia.
MAR 14:60 Io, no tamat ta ira ut na pakila lotu ga taman tut ra matmataan ta diet gaam tange tane Jisas, “Iau karup bia pau balu diet! Nu tange hohe ta ken ra mangana hinhinawas diet tung tar ugu me?”
MAR 14:61 Iesen Jisas pa ga babalu, ga tur kunkun taar at mon. Io, no tamat ta ira ut na pakila lotu ga tiri habalin ie, “Augu no Mesaia, no Natine God, bia taie?”
MAR 14:62 “Iau at mon,” Jisas ga tange. “Ma muat na nas Nong a Tunotunoi ma na kis taar tano tamat na kinkinis kaia tano kata na limane God no Dadasine, ma na hanhan suur ta ira bahuto meram ra mawe.”
MAR 14:63 No tamat ta ira ut na pakila lotu ga diris ira kiniasine at ma gaam tange, “Dahat pai supi habalin um ta tunotuno wara hinhinawas utana.”
MAR 14:64 Io, ga tange ta diet, “Muat te hadade tar i tange hagahe God bia dir haruat mon. Muat lik hohe?” Diet bakut diet ga tange bia Jisas i te ronga ma i haruat bia na maat.
MAR 14:65 Io, ari ta diet ga iamiabis Jisas. Diet ga kubus bat ira matana, io, diet ga tutut ie ma ira lima diet ma diet gaam tangtange tana, “Nu kilam sot!” Ma ira ut na harbalaurai diet ga lamus leh ie diet gaam bui.
MAR 14:66 Bia Pita ga kis taar kaia tano hera, tikai ta ira tultulai na hahin tano tamat ta ira ut na pakila lotu ga hanuat hutet tane Pita.
MAR 14:67 Bia ga nas leh Pita ma kana ga ratrat iaah, ga mate dit ie ma ga tange tana, “Augu mah, u git tiktika ma iakanong me Nasaret, ne Jisas.”
MAR 14:68 Pita balik ga harus gaam tange, “Iau pai palai at uta kaike ra linge u tangtange!” Io, ga haan laah ukaia ra matanangas huat.
MAR 14:69 Bia no tultulai na hahin ga nas leh ie kaia, ga tange ta diet ing diet ga turtur haan kaia bia, “Tikai ta diet iakano tunaan.”
MAR 14:70 Iesen Pita ga harus balin. Namur dahin diet ing diet ga turtur hutet haan tana, diet ga tange, “I palai bia augu tikai ta diet kanong augu meras Galili.”
MAR 14:71 Pita ga tange ta diet, “Iau sasalim ma ra tutun bia iau pai nunure iakano tunotuno muat tangtangei! Bia iau harabota, io, iau sip bia God na hapidanau iau!”
MAR 14:72 Kaik at mon no kareka ga kakel no airuo na pakaan. Io, Pita ga lik leh ira nianga Jisas gate tange tar tana. Gate tange tar tana hoken: “Bia pai airuo na kareka baak nu harus ise iau aitul a pakaan.” Bia Pita ga nas huo, ga manga suah.
MAR 15:1 Bia gate malaan um ira tamat na ut na pakila lotu, ira tamat ta ira huntunaan, ira tena harausur ta ira harkurai tane Moses, ma ira kaunsil mah diet ga kis hurlungen bia diet naga hanuat ma tiga lilik. Ma bia diet ga kubus ira limane Jisas diet ga lam tar ie tane Pailat.
MAR 15:2 Ma Pailat ga tiri ie, “Augu no tamat na lualua na gil harkurai audiet ira Iudeia?” Jisas ga balui, “A num nianga at!”
MAR 15:3 Ma ira tamat na ut na pakila lotu diet ga tung ie ma ra haleng linge.
MAR 15:4 Io, Pailat ga tiri habalin ie, “Taie num ta nianga wara balbalu diet? Nas, a haleng linge diet tung ugu me.”
MAR 15:5 Iesen Jisas balin pa ga babalu. Ma Pailat ga karup gaam nguanguo.
MAR 15:6 Audiet magingin ira Iudeia bia ta ira kaba Nian na Hinahaan Sakit bakut, da hasur se tiga tunotuno mekaia ra hala na harpidanau. Aie mon nong ira matanaiabar diet saring leh ie.
MAR 15:7 Tiga tunaan, no hinsana ne Barabas, di ga bul halaka tar ie ra hala na harpidanau tika ma ira tunotuno ing diet mah diet ga harubu bingibing ma diet ing diet ga kure ira Iudeia.
MAR 15:8 Ma ira matanaiabar diet ga haan hut uram hone Pailat diet gaam saring ie bia na halangalanga ise tikai uta diet, tikai ta diet ing di ga wis kawasei narako tano hala na harpidanau hoing at Pailat git gilgil.
MAR 15:9 Pailat ga tiri diet, “Muat sip bia iau ni hasur se no tamat na lualua na gil harkurai numuat ira Iudeia?”
MAR 15:10 Ga tiri huo kanong ga nunure tar at mon bia ira tamat na ut na pakila lotu diet ga lilik sakasaka taar tane Jisas, kaik diet gaam tar sei tana.
MAR 15:11 Ma sen bia ira tamat na ut na pakila lotu diet ga hagut ira matanaiabar bia diet na haitne Pailat bia na hasur se ne Barabas ma waak ne Jisas.
MAR 15:12 Io, Pailat ga tiri diet, “Iau ni bihane um iakan ra tunaan muat kilam ie bia no tamat na lualua na gil harkurai numuat ira Iudeia?”
MAR 15:13 Ma diet ga kakonga uram ho ie ma diet ga tange, “Da tut tar ie tano ula kabai!”
MAR 15:14 Pailat ga tiri habalin diet, “Muat tange huo warah? A mangana ronga sa i te gil tar?” Ma sen iakan ra pakaan diet ga manga kakonga balik, diet gaam tange, “Da tut tar ie tano ula kabai!”
MAR 15:15 Pailat ga hasur se tar ne Barabas ta ira matanaiabar waing diet naga kanakana. Io, ga tule tar Jisas ta ira uno umri diet gom dangat ie. Ma diet gom waak se tar ie ta ing diet na tut tar ie tano ula kabai.
MAR 15:16 Ira umri diet ga lam leh Jisas ukaia tiga katon tano tamat na hala tane Pailat, io, diet ga tau hulungan ira umri.
MAR 15:17 Diet ga hasigam ie ma tiga dardarana maal i haruat ta ira watong, io, diet ga wiwisane ira tigatige hoing tiga balaparik, diet gaam hakukuh no uluno mei.
MAR 15:18 Io, diet ga haianga leh ie hoing diet la gilgil ta ira tamat na lualua na gil harkurai. Diet ga tange tana, “Mehet urur taam, tamat na lualua na gil harkurai gar na Iudeia!”
MAR 15:19 Diet ga laulawat no uluno ma tiga raam, ma diet ga iamiabis mah ie. Diet ga singa bukunkek menalua tana hoing bia diet urur tana.
MAR 15:20 Namur bia ira umri diet gate kukutur taar tana diet ga kap se no dardarana maal tana diet gaam hasigam habalin ie ma ira kiniasine at. Io, diet ga lam hasur um ie wara tutut tar ie tano ula kabai.
MAR 15:21 Tiga tunaan me Sairin no hinsana ne Saimon, a susine Aleksanda ma ne Rupas ie. Saimon ga hanan sakit mon kaia merau tiga mes na balehan ma diet ga sunang tar ie bia na kap leh balik no kabai tane Jisas.
MAR 15:22 Diet ga lamus haut tar Jisas tano katon di kilam ie bia Golgota (no kukuraina bia, no taman hora ula turangan.)
MAR 15:23 Io, di ga tul se ra wain tane Jisas bia na mame. Iakano wain di gate dolowane pakur tar ma ra tirine tiga daha wara bingbing ngunngutaan. Iesen Jisas pa ga mamei.
MAR 15:24 Io, diet ga tut tar um Jisas tano kabai. Bia diet gate gil tar huo, diet ga mamagu ma ra satu wara nunure leh bia sige na kap leh gahim ta ira kiniasine Jisas.
MAR 15:25 Io, a liman ma ihat na pakana bung ra malaan kaik diet ga tut tar Jisas tano ula kabai.
MAR 15:26 Ma ira nianga mah di ga tung ie me, di ga bul tano ana kabai. Ira nianga di ga pakat, hoken: “No tamat na lualua na gil harkurai gar na Iudeia.”
MAR 15:27 Ma diet ga tut tar mah airuo holmatau taar ra iruo mes na kabai, tikai tano kata na limana ma tikai tano kesa na limana.
MAR 15:28 [Ma i hatutun no nianga tane God ing di ga pakat hoken: “Di ga was tikanei ma ira ut na laka harkurai.”]
MAR 15:29 Diet ing diet ga haan sakit kaia diet ga laulawa ul tar tane Jisas ma diet ga tangtange hagahei hoken: “Aha, augu ing u ga tange bia nu dure no tamat na hala na lotu ma nu pakile habalin mon ie ta itul a bung.
MAR 15:30 Hansur mekaia ra ula kabai waing nugu halon habalin ugu.”
MAR 15:31 Ma ira tamat na ut na pakila lotu ma ira tena harausur ta ira harkurai tane Moses diet ga kukutur mah tane Jisas huo, ma diet ga tange habalin at ta diet, “Ga halon ira mes, ma sen pai tale bia na halon habalin at ie.
MAR 15:32 Bia aie no Mesaia, no tamat na lualua na gil harkurai gar na Israel, i tahut bia na hansur at kaiken mekaia ra ula kabai waing dahat naga nas ie ma dahat naga nurnur tana.” Ma ira iruo ing di ga tut tar dir ta ira iruo kabai hutet tana, dir mah, dir ga tange hagahei.
MAR 15:33 Io, no hanuo ga kankado haburen leh ra sangahul ma iruo na pakana bung ra tingena kasakes tuk taar ra aitul a pakana bung ra matarahien.
MAR 15:34 Ma ra aitul a pakana bung um ra matarahien Jisas ga kakonga ma ga tange, “Eloi, Eloi, lama sabaktani?”, no kukuraina hoken: “No nugu God, no nugu God, wara biha bia u te hansukun iau?”
MAR 15:35 Bia ari ing diet ga tur taar hutet kaia diet ga hadadei, diet gaam tange, “Hadadei, i te tatau ne Elaija.”
MAR 15:36 Ma tiga nong ta diet ga hilau gaam hahungi tiga gurgurun tes ma ra wain gaam sako tar ie tiga sila daha, io, ga sangore haut ie bia Jisas na dup ie. Io, ga tange, “Tur baak, dahat na nas baak bia Elaija na hanuat wara laplapus hasur ie bia taie.”
MAR 15:37 Ma bia Jisas ga kup tamat taar um ga pataam no mansunguno.
MAR 15:38 Ma no tamat na maal nong di git balo kutus tar no tamat na hala na lotu mei ga tamadiris hairuo, haburen leh meram naliu uras muk napu.
MAR 15:39 Ma no tamat na umri ta tiga matana ubane ga tur taar mon menalua tane Jisas. Bia ga hadade ing ne Jisas ga manga kup huo, ma bia ga nas mah ing Jisas ga maat huo ga tange, “Tutun sakit, a nati God at iakan ra tunotuno!”
MAR 15:40 Ari hahin diet ga tur taar tapaka dahin ma diet ga ngokngok ta ira linge ing ga hananuat. Maria nong me Magadalen ga tur taar kaia tika ma ne Maria no pawasine Ioses dir ma ne Jemes no bulumur. Dal ma ne Salome, dal ga tur tika taar ma diet ira hahin.
MAR 15:41 Tano pakana bung bia Jisas ga kis Galili, kaiken ra aitul a hahin dal git murmur ie ma dal git balbalaure ta ira uno sunupi. Ma a haleng na mes na hahin mah ing diet ga sakate hawaat ie uram Ierusalem, diet ga kis taar kaia.
MAR 15:42 Bia gate matarahien ra bung liman, ing ira Iudeia diet la tangtaguro pane no Bung na Sinangeh, no bung manamur, io, Iosep me Arimatia ga balaraan taar gaam haan taar tane Pailat gaam saring leh no tamaine Jisas. Ma Iosep aie tiga tamat tano kaunsil ma aie at mah ga kiskis kawase no kinkinis na harkurai ma ra harbalaurai ta God.
MAR 15:44 Pailat ga karup ing ga hadade bia ne Jisas gate maat at mon. Ga tatau hawaat no tamat na umri tano matana ubane ga me tiri ie bia Jisas gate maat bia taie.
MAR 15:45 Ma bia no tamat na umri gate hinawase tar Pailat bia ne Jisas at gate maat, Pailat ga haut ise tar no tamaine Jisas tane Iosep.
MAR 15:46 Io, Iosep ga kap leh ie meram ra ula kabai, gaam wiwisanei wara pulpulus ie ma tiga talona ponponiana maal nong gate kul tar ie. Io, ga bul halaka ie ta tiga midi. No midi di gate gil ngasiaan tar ie tano papara haat. Io, namur ga pulukane bat no matana haat ma tiga tamat na haat.
MAR 15:47 Ma Maria me Magadalen ma no maurana, no pawasine Ioses, dir ga nas tar ing di ga hainoh Jisas kaia.
MAR 16:1 Ra bung taguro ra matarahien ruruk bia no Bung na Sinangeh gate pataam, Maria me Magadalen, Salome, ma ne Maria no pawasine Jemes dal ga kul leh ari waiwai ing i la huhur tahut waing dal na sapur no tamaine Jisas.
MAR 16:2 Ra Sade ra malaan, bia no kasakes gate sigar pupuruk taar mon, dal ga haan laah ukaia tano midi.
MAR 16:3 Bia dal ga hanan haan dal ga hartiritiri balin at ta dal bia, “Sige um na pulukane se tar no haat tano matana no midi?”
MAR 16:4 Iesen bia dal ga nanaas hut dal ga nas bia di gate pulukane se tar no haat, sen bia a tamat sakit ie.
MAR 16:5 Io, dal ga haan laka tano midi dal gaam nas tiga marawaan ma ga kis taar. Ga kis taar tano udal palpal na kata ma ira talona kiniasine ga manga ponpon. Bia dal ga nas huo dal ga manga karup na bunurut.
MAR 16:6 No marawaan ga tange ta dal, “Waak mutal karup na bunurut. Iau nunure bia mutal sisilih tane Jisas me Nasaret nong di ga tut tar ie tano kabai. Iapanim kai. I te lon balin. Mutal nes, no katon nong di ga hainoh ie kaia iaken.
MAR 16:7 Mutal na haan ma mutal na hinawase ira uno bulu na harausur, ma ne Pita mah, bia ‘Jisas na lua ta muat ures Galili ma muat na ra nas um ie kaia hoing at gate hinawase tar muat huo.’”
MAR 16:8 Io, no bunurut ma ra dedar ga sigam kaike ra aitul a hahin, dal gaam hilau laah mekaia ra midi. Ma dal pa ga hinawase tikai kanong dal ga burut.
MAR 16:9 [Bia Jisas ga lon huat balin ra Sade, ga huna harapuasa muk tane Maria me Magadalen nong gate tule hasur se tar a liman ma iruo na sakana tanuo mekaia ho ie.
MAR 16:10 No hahin ga haan gaam a hinawase diet ing diet git saksakate Jisas ma kana diet ga susuah ma ra but na tapunuk.
MAR 16:11 Ing diet ga hadade bia Jisas gate lon balin ma bia no hahin at gate nas tar ie, diet pa ga nurnur.
MAR 16:12 Namur bia airuo ta diet ga murmur hani no ngaas narako tano balehan, Jisas ga harapuasa tar ta dir ma ga ries ira matmataan tana.
MAR 16:13 Dir ga haan tapukus dir gaam a hinawase ira ari ta diet, iesen diet pa ga nurnur at mah ta dir.
MAR 16:14 Namur balin um Jisas ga harapuasa ta ira uno sangahul ma tikai na bulu na harausur ma kana dal ga iaiaan. Ga bor diet kanong diet ga manga hadadas ira bala diet ma diet pa ga nurnur bia gate lon balin, hoing ira ari diet gate nas tar ie diet ga hinawas huo.
MAR 16:15 Io, ga tange ta diet, “Muat na haan ma muat na hinawase ira tunotuno tano ula hanuo bakut tano tahut na hinhinawas.
MAR 16:16 Bia sige tikai na nurnur ma na kap baptais, God na halon ie. Ma sen bia si tikai pai nurnur, God na hapidanau ie.
MAR 16:17 Diet ing diet nurnur tagu diet na haminas ken ra mangana hakilang. Diet na saring iau ma ni tar ra dadas ta diet bia diet na tule hasur se ira sakana tanuo. Diet na ianga ma ra mes na nianga ing diet pa ga harausur ine.
MAR 16:18 Diet na palim haut ra sui mah ma ira lima diet, ma bia diet na mame ta linge na hargilala pa na hagahe tun at diet. Diet na bul ira lima diet ta ira minasetuana, diet na langalanga balin.”
MAR 16:19 Namur, bia no Watong Jisas gate ianga taar ta diet, God ga kap haut ie uram ra mawe gaam a kis tano tamat na kinkinis tano kata na limane God.
MAR 16:20 Io, ira bulu na harausur diet ga haan harbasia, diet gaam harpir utano tahut na hinhinawas ta ira matahu katon. Ma no Watong ga papalim tika ma diet ma ga tar ira hakilang wara hatutun ira udiet harpir.]
LUK 1:1 Watong Tiopilas, a haleng diet te walar bia diet na pakat mur ira linge ing i te hanuat nalamin ta mehet.
LUK 1:2 Diet te mur ira hinhinawas ta diet ira ut na harpir tano tahut na hinhinawas. Ma diet ira ut na harpir, diet at, diet ing diet ga nes tun kaiken ra linge mekarawa laah ra hathatahun.
LUK 1:3 Io kaik, iau hamaan mah bia i tahut bia ni pakat no harmur ta kaiken ra linge wara num, kanong iau at iau te tiri murmur timaan uta kaiken mekarawa laah tano hamhaburen.
LUK 1:4 Ma iau lik bia ni gil huo waing nugu nunure ira tutun uta ira linge u te kap harausur ine.
LUK 1:5 Tano pakana bung bia Herot ga harkurai taar tano hanuo Iudeia, ga mon tiga ut na pakila lotu hinsana ne Sekaraia. Ma aie mekatiga tano kabaan ta ira ut na pakila lotu gar tane Abaisa. Ne Elisabet, no uno hahin, aie tikai tano huntunaan tane Aron.
LUK 1:6 Dir bakut dir ga lon takodas tano matmataan gar ta God. Dir ga mur ira nianga ma ira harkurai gar tano Watong. Pa ga tale bia tikai na tung dir ma ta tiga nironga.
LUK 1:7 Iesen ga taie ta nati dir kanong Elisabet ga hinkaho ma dir gate manga patuana um.
LUK 1:8 Tiga bung Sekaraia ga gilgil ira pinapalim ta ira ut na pakila lotu ra matmataan gar ta God kanong ga pakana bung bia no uno kabaan na papalim.
LUK 1:9 Ma haruat ma ira nudiet magingin ira ut na pakila lotu, diet ga mamagu ma ra mangana haat hoing satu, ma no haat ga tuko hamines Sekaraia. Io kaik, ga laka tano halhaliana subaan tano tamat na hala na lotu tano Watong wara tuntun hartabar nong i sangin kala mismisien.
LUK 1:10 Ma ing no pakana bung wara tuntun no kala mismisien na hartabar ga hanuat, ira tunotuno ing diet gate hanuat haruat taar wara lotu kaia diet ga saasaring ares nataman.
LUK 1:11 Io, tiga angelo ga hanuat puasa ta Sekaraia. Ma no angelo ga tur taar tano palpal na kata tano suuh na tun kala mismisien na hartabar.
LUK 1:12 Ing Sekaraia ga nes no angelo, ga karup ma a tamat na bunurut ga kap ie.
LUK 1:13 Iesen no angelo ga tange tana, “Sekaraia, waak ugu ra bunurut. God i te hadade no num sinasaring. No num hahin, ne Elisabet, na kaha num tiga bulu na tunaan ma nu pas no hinsana bia Jon.
LUK 1:14 Aie na haguama ugu ma nu kanakana panei ma a halengin diet na guama kanong da kahai.
LUK 1:15 Ma na ngan huo kanong aie na tiga tamat na tunotuno ra matmataan gar tano Watong. Ma waak ie ra mame ta wain bia ta mes na dadas na taah. Ma na hung laah ma no Halhaliana Tanuo tur leh meram tano balana no pawasine.
LUK 1:16 Na lamus pukus a haleng na matanaiabar na Israel taar tano Watong no udiet God.
LUK 1:17 Na kap no tintalen ma no dadas ta Elaija ma na lulua haan tano Watong wara hamaraam pakur ira mama ma ira nati diet. Ma na pukusane ira ut na patnau taar tano mangana lilik ta ira ut na takodas. Ma na gil huo wara tangtagure ira matanaiabar gar tano Watong waing diet naga taguro panei.”
LUK 1:18 Sekaraia ga tiri no angelo bia, “Iau ni nunure hohe bia a tutun iakan ra nianga? Iau tiga patuana um ma no nugu hahin mah huo.”
LUK 1:19 Io, no angelo ga babalu, “Iau Gabriel. Iau la tur taar tano matmataan gar ta God ma i te tule iau bia ni me hinawase ugu ta iakan ra tahut na hinhinawas.
LUK 1:20 Kaiken ra nugu nianga na hanuat tutun tano uno pakana bung tus, iesen pau nurnur ine. Io kaik, nu tabuna nianga ma pa nu tale bia nu ianga tuk tano bung bia iakan ra linge na hanuat.”
LUK 1:21 Ma ira matanaiabar kana diet ga nanaho uta Sekaraia ma diet ga nguanguo bia warah kaik gaam manga kis halis aram narako tano halhaliana subaan.
LUK 1:22 Ing ga hansur pa ga talei bia na haianga diet. Io, diet ga nunure kilam leh bia gate nes tiga ninaas na tanuo kanong ga hatatahuo ma ira limana taar ta diet ma sen bia pa ga tale bia na ianga.
LUK 1:23 Ing no uno pakana bung na pinapalim gate pataam, ga tapukus u nataman.
LUK 1:24 Namur ta iakan, ne Elisabet, no uno hahin, ga tianan ma ga kis mun taar tano ngasia dir haruat ma ra liman na teka.
LUK 1:25 Ga tange bia, “No Watong i te gil hokaiken wara gaiegu. Ta iakan ra pakana bung i te hamines no uno harmarsai ma i te kap se no nugu hirhir ta ira matmataan ta ira matanaiabar.”
LUK 1:26 Ing bia Elisabet ga tianan ma gate liman ma tikai ira uno teka, io, God ga tule Gabriel no angelo u Nasaret, tiga taman tano hanuo Galili.
LUK 1:27 Ga haan tupas tiga bulahin nong pai noh tika baak ma tiga tunaan. Ma di gate tar bat tar ie wara tatole tiga tunaan, hinsana ne Iosep. Aie tiga bulumur ta Dawit. Ma no hinsana no bulahin ne Maria.
LUK 1:28 No angelo ga kaang ie gaam tange bia, “No Watong i kis tika ma ugu ma i te idane ugu.”
LUK 1:29 Io, Maria ga nguanguo sakit ta kaiken ra nianga ma ga manga lilik bia a mangana nianga sa kaike.
LUK 1:30 Iesen no angelo ga tange tana hoken: “Maria, waak u burut. God i te guama pane ugu ma i taguro bia na idane ugu.
LUK 1:31 Nu tianan ma nu kaha tiga bulu na tunaan ma nu pas no hinsana bia Jisas.
LUK 1:32 Tamat no hinsana ma da kilam ie bia no Natine God Nong i Lua Harsakit. No Watong God na tar no kinkinis na tamat na ut na harkurai tana, nong gar tano hintubuno ne Dawit.
LUK 1:33 Ma na kure no huntunaan tane Iakop hatika. No uno kinkinis na harkurai pa nale pataam.”
LUK 1:34 Maria ga tiri no angelo bia, “Iakan ra linge na tutun hohe? Iau pai nunure baak tiga tunaan.”
LUK 1:35 No angelo ga babalu hoken: “No Halhaliana Tanuo na hanuat taar taam ma no dadas tano God Nong i Lua Harsakit na burung ugu. Io kaik, no halhaliana nong nu kahai da kilam ie bia no Nati God.
LUK 1:36 Nes baak! Elisabet no hinsakaam mah na kaha tiga bulu kaiken i parana taar. Di git tangtange bia a hinkahoi iesen i te tianan haruat ma ra liman ma tikai na teka kaiken.
LUK 1:37 Taie tiga linge i kalkalala ta God.”
LUK 1:38 Io, Maria ga babalu bia, “Iau no tultulai gar tano Watong. I tahut bia na ngan huo tagu hoing u te tange.” Io, no angelo ga haan talur um ie.
LUK 1:39 Ta iakano pakana bung Maria ga taguro ma ga haan gasien laah uram tiga taman kenam ta ira uladih ta Iudeia.
LUK 1:40 Ma ga laka tano ngasiane Sekaraia gaam haatne Elisabet.
LUK 1:41 Ing Elisabet ga hadade ing Maria ga haatnei, no bulu nong ga tianane tar ie ga manga magile ma Elisabet gaam hung ma no Halhaliana Tanuo.
LUK 1:42 Io, ga tange naliu bia, “U manga daan ta ira kaba hahin bakut ma iakano bulu nu kahai na daan mah.
LUK 1:43 Iesen, sige um iau, kaik no pawasine no nugu Watong gi hanuat ukai ho iau?
LUK 1:44 Ing at mon ira iruo talingagu dir hadade ing u haatne iau, no bulu narakoman tagu i manga magile ma ra gungunuama.
LUK 1:45 U daan kanong u te nurnur bia ira linge no Watong i te tange taam na hanuat tutun!”
LUK 1:46 Io, Maria ga tange hoken: “Meram narako tagu i hatamat no Watong,
LUK 1:47 ma no tanuagu i guama ta God no nugu ut na Halon.
LUK 1:48 Kanong warah, i te lik leh no nugu kinkinis na maris, iau no uno tultulai. Io kaik, tur leh um ma kaiken, ira matanaiabar katin ma diet mah namur um, diet na wasange iau bia i ga haidane iau.
LUK 1:49 Kanong warah, no Dadas na God i te gil ra tamat na linge sakit tagu. No hinsana i Halhaal.
LUK 1:50 No uno harmarsai i la hanahaan tupas diet ing diet urur tana, ira tunotuno ing diet ga lon nalua, diet katin, ma diet mah namur.
LUK 1:51 I te gil ra dadas na linge ma no limana. I te tule harbasiane se diet ing diet lik hatamat habaling diet.
LUK 1:52 I te bul hasur se ira lualua meram ta ira udiet kinkinis na tamat na ut na harkurai. Iesen i te raun haut balik ira maris.
LUK 1:53 I te hahungi diet ing diet taburungan ma ra bilai na linge, iesen i te tule se tar ira watong ma ra pabona diet.
LUK 1:54 I te harahut ira matanaiabar Israel, ira uno tultulai, hoing ga tange ta ira hintubu dahat bia na gil huo.
LUK 1:55 I te lik leh bia no uno harmarsai na kis hatika taar ta Abraham ma ira uno bulumur.”
LUK 1:56 Ma Maria ga kiskis baak ma Elisabet haruat ma ra itul a teka ma gaam tapukus um u nataman.
LUK 1:57 Io, ing no pakana bung ga hanuat bia Elisabet na kakaha, ga kaha tiga bulu na tunaan.
LUK 1:58 Diet ing diet ga kis hutet taar tana ta iakano taman ma ira hinsakana, diet ga hadade bia no Watong gate hamines ra but na harmarsai tana, ma diet gaam guama tika mei.
LUK 1:59 Tano liman ma itul a bung diet ga hanuat wara kutkut no palatamaine no bulu ma diet ga wara paspas no hinsana no rana sus Sekaraia taar tana.
LUK 1:60 Iesen no pawasine ga tange bia, “Taie! Da kilam ie bia ne Jon.”
LUK 1:61 Ma diet ga tange tana, “Taie tikai ta ira hinsakaam i mon iakano hinsang.”
LUK 1:62 Io, diet ga hatahuo ma ira luma diet taar tano rana sus wara nunure leh bia a hinsana sa ga sip bia na pas no natine mei.
LUK 1:63 Ga sasaring wara tiga palpalehuana subana daha wara pinapakat tana ma ga pakat bia, “No hinsana ne Jon.” Ma diet bakut diet ga karup diet gaam manga lilik uta iakan ra linge.
LUK 1:64 Kaik at mon no hana ga tamapapos ma no karamena ga mamakan ma gaam tur leh wara pirpirhakasing God.
LUK 1:65 Ma ira matanaiabar ta iakano taman diet ga kilingane ra tamat na urur tika ma ra bunurut uta iakan ra linge. Ma ira matanaiabar ta kaike ra uladih tano hanuo Iudeia diet ga iangianga uta kaiken bakut ra linge.
LUK 1:66 Diet bakut ing diet ga ser leh iakan, diet ga manga lilik utana diet gaam tirtiri bia, “Iakan ra bulu na hanuat bia a mangana tunotuno sa ie?” Ma diet ga tirtiri huo kanong ga tutun at bia no dadas tano Watong ga kis taar mei.
LUK 1:67 Io, Sekaraia no rana sus ga hung ma no Halhaliana Tanuo ma gaam ianga na tangesot hoken:
LUK 1:68 “A pirhakasing uram tupas no Watong, no God gar Israel, kanong i ta me kul halangalanga leh ira uno matanaiabar.
LUK 1:69 God i te hatut tiga dadas na ut na harhalon uta dahat meram tano huntunaan gar ta Dawit no uno tultulai
LUK 1:70 hoing ga hamines ta ira uno halhaliana tangesot diet gaam tange nalua sakit.
LUK 1:71 I te hatur ie wara halhalon leh dahat sukun ira adahat suk, ma mekatiga ta ira luma diet bakut ing diet malentakuane dahat.
LUK 1:72 I te gil huo wara hamhamines ra harmarsai taar ta ira hintubu dahat ma wara liklik leh tar no uno halhaliana kunubus,
LUK 1:73 nong ga sasalim taar ta Abraham no hintubu dahat.
LUK 1:74 Ma i te gil huo wara halangalanga ise dahat ta ira luma diet ira adahat suk. Io kaik, i tale dahat bia dahat na lotu tupas ie
LUK 1:75 ma ra gamgamatien ma ra takodas ma taie ta bunurut ta ira udahat nilon bakut.
LUK 1:76 Ma augu ra natigu, da kilam ugu bia no tangesot gar ta God Nong i Lua Harsakit, kanong augu, nu lua tano Watong wara tangtagure no ngaas wara utana.
LUK 1:77 Ma nu gil huo wara tartar ta ira uno matanaiabar no minminonas tano harhalon nong diet na hatur kawase ing God na lik luban se ira udiet magingin sakena.
LUK 1:78 Ma na lik luban se kaike ra sakena kanong no balana no udahat God i manga hung ma ra harmarsai. Ma no uno harmarsai na hatahuat no pupuruk hut tano kasakes taar ta dahat meram ra mawe
LUK 1:79 wara murmurarang sare diet ing diet lalon ra kankado ma tano henai na minaat, ma wara lulue no udahat hinahaan taar tano ngaas na malum.”
LUK 1:80 Io, ma no bulu ga tamat huat ma ga hanuat dadas tano tanuana ma ga lon aram ra hanuo bia tuk tano bung ga harapuasa ra matmataan na haruat taar ta ira Israel.
LUK 2:1 Ta iakano ra pakana bung, Augastus, no tamat sakit ta ira lualua na gil harkurai, ga tar tiga harkurai bia da was ira matanaiabar ta ira hanuo bakut ing Rom ga balaure tar.
LUK 2:2 (Iakan no luena kap hinsang nong ga hanuat tano pakana bung bia Kuirinius ga harkurai taar tano hanuo Siria.)
LUK 2:3 Ma ira matanaiabar bakut diet ga haan taar ta ira nudiet taman tikatikai wara tangtange hamines ira hinsa diet bia da pakat kahe.
LUK 2:4 Io kaik, Iosep gaam hanhut meres Nasaret tano hanuo Galili uram Betlehem tano hanuo Iudeia. Ma Betlehem aie no taman tutun gar ta Dawit, ma Iosep ga haan ukaia kanong aie tano palpal tano hun ta Dawit.
LUK 2:5 Ga haan ukaia bia da pakat ira hinsa dir ma Maria nong di gate tar bat tar ie wara tatolei. Ma Maria ga tianan taar.
LUK 2:6 Ing dir ga kiskis kaia ga haruat no pakana bung bia Maria na kakaha.
LUK 2:7 Io, ga kaha no luena natine, a bulu na tunaan ie. Maria ga pulus ie ma ra maal ma ga hainoh ie tiga linge na nian ta ira bulumakau kanong ga taie ta mauho wara uta dir aram tano hala na wasire.
LUK 2:8 Ma ari a ut na balaura sipsip diet ga nesnes mur ira udiet sipsip ra bung hutet ta iakano katon.
LUK 2:9 Io, tiga angelo gar tano Watong ga harapuasa ta diet ma no minarine no Watong ga murarang sare diet ma diet ga manga burut.
LUK 2:10 Iesen no angelo ga tange ta diet hoken: “Waak muat burut. Nes baak! Iau hanuat ma ra tahut na hinhinawas nong na hatahuat tar ra but na gungunuama ta ira matanaiabar bakut.
LUK 2:11 Katin di kaha no numuat ut na Halon aram tano taman ta Dawit. Aie no Mesaia. Aie no Watong.
LUK 2:12 Ma muat na nes tiga hakilang nong na hatutun kaiken ra nianga taar ta muat ma i hoken: muat na nes leh tiga bulu di pulus tar ie ma ra maal ma i noh taar tiga linge na nian ta ira bulumakau.”
LUK 2:13 Ma kaik at mon a haleng angelo sakit meram ra mawe, diet ga harapuasa tika ma iakano angelo ma diet ga pirpirlat God hoken:
LUK 2:14 “Da pirhakasing no minarine God kananam naliu sakit! Ma ra malum ukatiga ta ira matanaiabar tano ula hanuo ing God i guama pane diet!”
LUK 2:15 Ma ing ira angelo diet ga haan sukun diet wara uram ra mawe ira ut na balaura sipsip diet ga tange harbasiane ta diet bia, “Dahat gi haan u Betlehem dahat naga nes iakan ra linge i te hanuat nong no Watong i te hinawase dahat tana.”
LUK 2:16 Io, diet ga haan habir laah diet gaam a silihe tupas Maria ma Iosep tika ma no nat na bulu, ma ga noh taar ta iakano linge na nian.
LUK 2:17 Ing diet ga nes tar ie diet ga hinawas hurbit ta ira linge diet gate hadade uta iakan ra bulu.
LUK 2:18 Ma diet bakut ing diet ga ser leh iakan diet ga manga karup ma diet ga sur nguanguo ta ira linge ira ut na balaura sipsip diet ga hinawase diet ine.
LUK 2:19 Iesen Maria git liklik kawase tar kaiken bakut ra linge gaam git manga lilik urie.
LUK 2:20 Ma ira ut na balaura sipsip diet ga tapukus ma diet ga pirpirlat hani God uta ira linge bakut ing diet gate hadade ma diet gate nes. Kaike ra linge ga haruat at mon hoing di ga hinawase diet huo.
LUK 2:21 Bia gate liman ma itul ira uno bung, di ga kut no palatamaine no bulu. Ma di ga pas no hinsana bia Jisas. Ma iakano no hinsang nong no angelo gate huna tange bia da pas ie ma ing baak Maria pa ga hasakit na teka mei.
LUK 2:22 Ma ing bia ira pakana bung gate sakit bia da gil haruatne ira harkurai ta Moses waing pa na tale bia da hatabune habaling dir, io, Iosep ma Maria dir ga haan ma Jisas uram Ierusalem wara tartar ie tano Watong.
LUK 2:23 Dir ga wara gilgil hoing di ga pakat ta ira harkurai gar tano Watong hoken, “Ira luena bulu na tunaan bakut da hasisingen diet wara uno no Watong.”
LUK 2:24 Ma dir ga wara gil hartabar mah haruat ma ing no harkurai gar tano Watong i tange. I tange hoken: “Muat na hartabar ma airuo bun bia airuo nat na balus.”
LUK 2:25 Ma tiga tunotuno git kiskis kaia Ierusalem, a hinsana ne Simion. Aie tiga takodasiana tunotuno ma a ut na lotu tupas God ie. Ga kiskis kawase nong na me habaibai ira Israel, ma no Halhaliana Tanuo ga kis taar tana.
LUK 2:26 No Halhaliana Tanuo gate hapuasne tar tana bia na huna nes tar baak no Mesaia gar tano Watong ma naga maat um.
LUK 2:27 Io, no Halhaliana Tanuo ga lue ie uram narako tano hala na lotu tamat. Ma no sus ana no bulu ma no pawasine dir ga kap halaka no bulu wara gilgil tar ira magingin tana haruat ma ira harkurai ta Moses.
LUK 2:28 Simion ga raun leh no bulu gaam pirlat God ma ken ra nianga:
LUK 2:29 “Nugu Watong, kaiken um iau te kilingane ra malum. Io, nu haut se iau, no num tultulai, nigi haan talur kan ra nilon.
LUK 2:30 Gil huo tagu kanong ira iruo matagu um dir te nes no num harhalon
LUK 2:31 nong u te tagurei ra matmataan ta ira matanaiabar bakut.
LUK 2:32 Aie ra lulungo wara hamadaraasne diet ing pai a Iudeia diet, ma aie no minarine ira num matanaiabar Israel.”
LUK 2:33 Ma no sus ana no bulu ma no pawasine dir ga karup dir gaam manga lilik uta ira linge Simion ga tange utano bulu.
LUK 2:34 Io, Simion ga haidane dal ma ga tange ta Maria no pawasine no bulu hoken: “Iakan ra bulu God i te tibe ie bia na hatahuat tar ra punuko ta ira haleng na Israel ma na hatur mah ra halengin ta diet. I te tibe mah ie hoing tiga hakilang ma da ianga taar tana.
LUK 2:35 Io kaik, ira lilik na bala diet ra halengin na kis puasa. Ma a tapunuk na ubal mah ugu hoing bia tiga wise i te gaso no katim.”
LUK 2:36 Io, ma tiga hahin na tangesot git kiskis mah kaia, hinsana ne Ana. A nat na hine Panuel ie, tano huno tane Aser. Ma Ana gate manga parana um. Ing ga tole leh no uno tunaan, dir ga kis haruat ma ra liman ma iruo na tinahon mon.
LUK 2:37 Io, no uno tunaan ga maat laah ma ga kis na makosa um tuk bia ira uno tinahon ga haruat ma ra liman ma itul na sangahul ma ihat. Pa nale haan sukun no hala na lotu tamat. Taie. Hatika git lalotu tika ma ra hinahal ma ra sinasaring.
LUK 2:38 Ing ga hanuat hutet ta dal tamaan ta iakano pakana bung at mah, ga tanga tahut uram ho God. Ma ga hinawas tano nat na bulu taar ta diet bakut ing diet git kiskis kawase no pakana bung bia God na kul halangalanga Ierusalem.
LUK 2:39 Ma ing Iosep ma Maria dir gate gil haruatne bakut tar ira harkurai tano Watong, dal ga tapukus um u Nasaret, no udal taman, kenas tano hanuo Galili.
LUK 2:40 Ma no bulu ga tamat huat ma no uno lilik ga patpatuan. Ga hung ma ra minminonas ma no harmarsai gar ta God ga kis taar tana.
LUK 2:41 Ta ira kaba tinahon no ana sus ma no pawasine dir git hanahaan uram Ierusalem tano Nian na Hinahaan Sakit.
LUK 2:42 Io, ing ira uno tinahon ga haruat ma ra sangahul ma iruo, dal tamaan ga haan hut uram tano nian haruat ma ira udiet magingin.
LUK 2:43 Ing no nian ga pataam um no rana sus ma no pawasine dir ga tur leh wara taptapukus u nataman. Iesen Jisas ga kis taar at aram Ierusalem ma dir pa ga nunure bia ie kenam, dir gate hansukun ie.
LUK 2:44 Dir ga lik bia kana ga tika ma ira mes na matanaiabar tano udiet hinahaan, kaik dir gaam mur no ngaas haruat ma tiga kudulena bung. Io, dir ga hatahun wara silsilihei nalamin ta ira hinsaka dir ma ira udir harwis.
LUK 2:45 Ma ing dir pa ga nes leh ie dir ga tapukus u Ierusalem wara ninaas tana kaia.
LUK 2:46 Namur bia dir gate sisilih tana ra itul a bung dir ga nes tupas leh um ie aram narako tano tamat na hala na lotu. Ga kis taar nalamin ta ira tena harausur ta ira harkurai ta Moses. Ga hanhadade diet ma ga tirtiri mah diet ma ra tiniri.
LUK 2:47 Diet bakut ing diet ga hadadei diet ga karup tano uno minminonas ma ta ira uno binabalu.
LUK 2:48 Ma ing no rana sus ma no pawasine dir ga nes ie dir ga manga karup. Io, no uno makai ga tange tana bia, “Natigu, wara bih bia u gil mir hokaiken? Mir ma no raam sus mir te manga ngarngarau pane ugu wara silsilihe leh ugu.”
LUK 2:49 Ga tiri dir bia, “Mur nanaas tagu warah? Hohe, mur pai nunure bia i tahut bia ni kis at kai tano hala tano ragu Sus?”
LUK 2:50 Iesen ningar dir pa ga nunure kilam ira linge ga tangtange ta dir.
LUK 2:51 Io, ga hansur tika ma dir u Nasaret ma ga tartaram ira nudir nianga. Iesen no pawasine git manga liklik kawase kaiken ra linge bakut.
LUK 2:52 Ma Jisas ga tamtamat hanahaan ma no uno minminonas mah ga tamtamat. Ma God ga guama panei, ma ira tunotuno mah huo.
LUK 3:1 Ing Taiberias, no tamat sakit ta ira lualua na gil harkurai, gate harkurai a sangahul ma liman na tinahon, io, ta iakano pakana bung ne Pontias Pailat ga harkurai tano hanuo Iudeia. Ma ne Herot ga harkurai taar tano hanuo Galili ma no tasine, ne Pilip, ga harkurai taar ta ira iruo hanuo Ituria ma Tarakonitis. Ma ne Lisanias ga harkurai taar tano hanuo Abilene.
LUK 3:2 Ma ne Anas ma ne Kaiapas dir ga tamat at ta diet ira mes na ut na pakila lotu. Ta iakano pakana bung God ga tar no uno hinhinawas ta Jon no natine Sekaraia aram ra hanuo bia.
LUK 3:3 Io, Jon ga haan ta ira hanuo bakut kaia hutet tano taah Ioridaan ma ga harharpir hoken: “Muat na kap no baptais na lilik pukus waing God naga lik luban se ira numuat magingin sakena.”
LUK 3:4 Io kaik, gaam haruat ma ira pakpakat tano tangesot Aisaia. Ga tange hoken, “Meram ra hanuo bia a ingana tiga nong i taatau, ‘Tagure no ngaas tano Watong, Gil hatakodas ie wara uno hinanhuat.
LUK 3:5 Ira salil bakut da bus, ma ira uladih da kil hamadahien. Ira pusuko na ngaas na takodas, ma ira sagonsagon na madahien.
LUK 3:6 Ma ira tunotuno bakut diet na nes no harhalon gar ta God.’”
LUK 3:7 Ma a tamat na matanaiabar ga haan tupas Jon bia na baptais diet. Ma ga tange ta diet, “A sakana ut na harabota muat! Sige ga hakatom muat bia muat na hilau sukun no harpidanau nong God i hutet bia na tar ie?
LUK 3:8 Gaar tahut bia muat na gil ira linge ing na haminas bia muat te lilik pukus! Io, muat tange bia a bulumur tane Abraham muat, kaik muat haruat bia muat na hilau sukun nora harpidanau tane God. Iesen waak muat lik huo. Pa na tutun. Pai tamat na linge bia muat ira bulumur tane Abraham. Iau hinawase muat bia God i petlaar bia na hatahuat ta bulumur ta Abraham ta kaiken ra haat mon.
LUK 3:9 No matau ie ke ra bola daha, nong i taguro taar wara katkato hasur ira daha. Ma ira daha bakut, ing diet pai la huhuai ta tahut na hunena, na kato hasur ma na se tar ra ula iaah.”
LUK 3:10 Ma ira matanaiabar diet ga tirii, “Io, ing bia huo, mehet na gil sa?”
LUK 3:11 Io, Jon ga balu diet ma ga tange, “Bia airuo ra num sigasige, nu tabar nong i supi ma tiga nong. Ma nong i hatur kawase ra nian, i tahut bia na gil mah huo.”
LUK 3:12 Ira ut na kap takis diet ga haan tupas ie bia na baptais diet. Ma diet ga tirii bia, “Tena harausur, mehet na gil sa?”
LUK 3:13 Ga tange ta diet, “I tahut bia muat na kap haruatne mon ing di te kure tar ta muat ma waak muat laklake iakano harkurai.”
LUK 3:14 Ma ari a umri diet ga tirii bia, “Ma mehet, mehet na gil sa?” Jon ga balu diet bia, “Waak muat hapar leh ra kinewa ta ira matanaiabar ma waak muat tung habisbisne tiga nong. I tahut bia muat na lik bia ira numuat kunkulaan i haruat mon.”
LUK 3:15 Ma ira lilik audiet ira matanaiabar ga tahuat bia a mangana linge na hanuat ma diet ga manga lilik bia no Mesaia dak um utane Jon.
LUK 3:16 Ma Jon ga balu diet gom tange, “Iau baptais mon muat ma ra taah ma sen bia nong i tamat at tagu na hanuat. Ma iau pai haruat bia ni lapus ira hinau ta ira iruo pupunaak na kakine. Aie at na baptais muat ma no Halhaliana Tanuo ma ra iaah mah.
LUK 3:17 Ma i palim tar no uno sawol wara sese haut ira wit tano dadaip nong na puh se ira suruno ma ira parahona. Iesen ira tahut na pat na wit ing diet tirih ma diet puko suur, na reng hulungen ukai hora uno suuh na masur. Ma na se tar ira suruno ma ira parahona tano iaah kis.”
LUK 3:18 Io kaik, Jon ga hadadas ira matanaiabar ma ra haleng na mes na nianga mah ing ga pirpir diet ma no tahut na hinhinawas.
LUK 3:19 Iesen Jon ga tibe pinpin ne Herot no lualua kanong ga tole leh Herodies no hahin tano tasine. Ma pa ga tibe pinpin ie uta iakano sen mon. Herot ga gil mah ari a mes na sakana magingin.
LUK 3:20 Ma ing bia Jon ga gil huo, Herot ga gil iakan ra sakena tun at: ga banus bat Jon uram narako tano hala na harpidanau.
LUK 3:21 Ma ta iakano pakana bung bia ira matanaiabar diet ga kapkap baptais, io, Jisas mah ga kap baptais. Ma bia ga saasaring no mawe ga tapapos.
LUK 3:22 Ma no Halhaliana Tanuo ga hansur taar tana ma ga tatalen hoing tiga bun. Ma a ingana tiga nong ga ianga suur meram ra ula mawe hoken: “Augu no Natigu, ma iau manga sip ugu ma iau kanakana sakit taam.”
LUK 3:23 Ma ing bia Jisas ga hatahun no uno pinapalim ga wara haruat ma aitul a sangahul na tinahon. Ma tano lilik ta ira matanaiabar bia Jisas no natine Iosep. Ma Iosep no natine Heli.
LUK 3:24 Heli no natine Matat. Matat no natine Lewi. Lewi no natine Melki. Melki no natine Ianai. Ianai no natine Iosep.
LUK 3:25 Iosep no natine Matatias. Matatias no natine Amos. Amos no natine Nahum. Nahum no natine Esli. Esli no natine Nagai.
LUK 3:26 Nagai no natine Mat. Mat no natine Matatias. Matatias no natine Semen. Semen no natine Iosek. Iosek no natine Ioda.
LUK 3:27 Ioda no natine Ionan. Ionan no natine Resa. Resa no natine Serubabel. Serubabel no natine Siatiel. Siatiel no natine Neri.
LUK 3:28 Neri no natine Melki. Melki no natine Adi. Adi no natine Kosam. Kosam no natine Elmadam. Elmadam no natine Er.
LUK 3:29 Er no natine Iosua. Iosua no natine Elieser. Elieser no natine Iorim. Iorim no natine Matat. Matat no natine Lewi.
LUK 3:30 Lewi no natine Simion. Simion no natine Iuda. Iuda no natine Iosep. Iosep no natine Ionam. Ionam no natine Eliakim.
LUK 3:31 Eliakim no natine Melia. Melia no natine Mena. Mena no natine Matata. Matata no natine Natan. Natan no natine Dawit.
LUK 3:32 Dawit no natine Iesi. Iesi no natine Obet. Obet no natine Buas. Buas no natine Salmon. Salmon no natine Nason.
LUK 3:33 Nason no natine Aminadap. Aminadap no natine Atmin. Atmin no natine Arni. Arni no natine Hesron. Hesron no natine Peres. Peres no natine Iuda.
LUK 3:34 Iuda no natine Iakop. Iakop no natine Aisak. Aisak no natine Abraham. Abraham no natine Tera. Tera no natine Nahor.
LUK 3:35 Nahor no natine Seruk. Seruk no natine Reu. Reu no natine Pelek. Pelek no natine Eber. Eber no natine Sela.
LUK 3:36 Sela no natine Kainan. Kainan no natine Arpaksat. Arpaksat no natine Siem. Siem no natine Noa. Noa no natine Lamek.
LUK 3:37 Lamek no natine Metusela. Metusela no natine Enok. Enok no natine Iaret. Iaret no natine Mahalalel. Mahalalel no natine Kenan.
LUK 3:38 Kenan no natine Enos. Enos no natine Set. Set no natine Adam. Adam no natine God.
LUK 4:1 Ma Jisas ga tapukus meras ra taah Ioridaan ma ga hung ma no Halhaliana Tanuo. Ma no Tanuo ga lamus leh ie uram ra hanuo bia.
LUK 4:2 Ma Sataan ga walaam ie aihat sangahul na bung kaia. Pa ga ien ta linge ta kaike ra bungbung, ma namur um ga taburungan.
LUK 4:3 Io, Sataan ga tange tana, “Kaia, ing bia a Nati God ugu, nu tange ta kan ra haat bia naga taar nian.”
LUK 4:4 Jisas ga balui, “Tiga harkurai gar ta God di ga pakat ie wara gaie mehet ira matanaiabar i tange bia, Ira tunotuno diet pa na lon tano nian sen mon.”
LUK 4:5 Io, Sataan ga lamus haut ie uram ra uladih ma kaik at mon ga hamines tana ira kinkinis ta ira ut na harkurai tano ula hanuo bakut ma ira udiet minamar.
LUK 4:6 Ga tange ta Jisas bia, “Kaiken ra kinkinis na harkurai ma ira udiet minamar iau ni tabar ugu me. Ma i tale bia ni gil huo kanong anugu diet ma ni tabar sige me ing iau sip bia ni tabar ie.
LUK 4:7 Io kaik, ing bia nu lotu tupas iau, anum um diet.”
LUK 4:8 Jisas ga balui, “Tiga harkurai gar ta God di ga pakat ie wara gaie mehet ira matanaiabar i tange bia, Muat na lotu tupas no Watong no numuat God, ma aie sen mon muat na hanapu muat tana.”
LUK 4:9 Io, Sataan ga lamus habaling Jisas uram Ierusalem, gaam hatur Jisas aram naliu sakit tano ula hala tano tamat na hala na lotu. Ga tange tana, “Bia ing a nati God ugu, kaia, nu karwas suur mekai, kanong ira nianga tane God di ga pakat i tange hoken, ‘God na tule ira uno angelo wara utaam wara balbalaure ugu. Diet na palim hatur ugu ma ira lima diet, waing pa nu sage ira kakim ra ula haat.’”
LUK 4:12 Jisas ga balui, gaam tange, “Tiga mes na harkurai gar ta God wara gaie mehet i tange bia, ‘Waak muat walar no Watong, no numuat God.’”
LUK 4:13 Ma ing bia Sataan gate hapataam ira mangana harwalaam bakut ga haan talur ta baak Jisas.
LUK 4:14 Io, Jisas ga tapukus tika ma ra dadas tano Tanuo u Galili, ma ra hinhinawas utana ga haan hurbit ta ira tamtaman ta iakano katon.
LUK 4:15 Ga hausur ira matanaiabar narako ta ira hala na lotu gar na Iudeia ma diet bakut diet ga pirlat ie.
LUK 4:16 Ga haan u Nasaret, no taman ga tamat um kaia. Ma tano Bung na Sinangeh ga laka tano hala na lotu gar na Iudeia hoing at git gilgil huo. Haan, ga tur wara waswas ira nianga gar ta God di ga pakat.
LUK 4:17 Io, di ga tar ira pakpakat gar tane Aisaia no tangesot tana. Ga palas ie gaam nes leh no katon ira pakpakat tana ga tange hoken:
LUK 4:18 “No Tanuo gar tano Watong i kis tagu kanong i te gilamis iau bia ni hinawase ira maris tano tahut na hinhinawas. I te tule iau bia ni hinawase diet ira hiruo ing di ga kilat bat diet bia diet naga langalanga baling. I te tule iau wara tangtange ta ira pulo bia diet na nanaas um, ma bia ni halangalanga ise diet ing di la umubal diet,
LUK 4:19 ma wara hinhinawas bia no bilai na pakana bung na harharahut gar tano Watong i te hanuat.”
LUK 4:20 Io, ga puli habaling ira pakpakat gaam tar sei tano ut na harbalaurai ta ira pakpakat. Io, ga kis. Ma diet bakut kaia narako tano hala na lotu diet ga mate dit tar ie.
LUK 4:21 Io, ga tange ta diet hoken: “Katin iakan ra katon meram ta ira pakpakat gar ta God i te hanuat tutun ta ira numuat hinadoda.”
LUK 4:22 Diet bakut diet ga tange bia aie tiga tahut na tunotuno ma diet ga manga karup ta ira maririsuana nianga ing ga hansur mekatiga ra hana. Diet ga tange bia, “Dahat palai bia iakan ra tunaan a natine Iosep mon ie. I nunure leh hohe gi iangianga hoken?”
LUK 4:23 Ma Jisas ga tange ta diet hoken: “Iau nunure tar bia muat na tange tar kan ra nianga harharuat tagu bia, ‘Ut na harulai, halangalanga habalin at ugu! Gil baak ta linge kai tano num taman tus ing het ga ser bia u ga gil arau Kapeneam.’”
LUK 4:24 Ma ga tange hoken: “Muat hadade baak! Taie tiga tangesot bia di bale leh ie tano uno taman tus.
LUK 4:25 Iau hinawase muat bia ga mon haleng makosa kai Israel tano pakana bung Elaija ga lon tana. Ma ta iakano pakaan no mawe ga tabanus ma pa ga bata haruat ma ra itul a tinahon ma subana. Ma ga mon tiga but na sam taburungan ta iakan ra kudulena katon.
LUK 4:26 Iesen God pa ga tule Elaija ukaia ta tikai ta diet ira Israel. Taie. Ga tulei ures tiga makosa kenes Sarepat tano hanuo Saidon.
LUK 4:27 Ma tano pakana bung Elaisa no tangesot ga lon tana a halengin diet ga sam a sakana minaset ta ira palatamai diet. Iesen pa ga halangalanga tikai ta diet. Taie. Ga halangalanga Neman sen at mon ma aie me Siria.”
LUK 4:28 Io, ira tunotuno bakut kaia tano hala na lotu gar na Iudeia diet ga kamahar ing diet ga hadade iakan.
LUK 4:29 Diet ga taman tut, diet gaam tule hasur sei mekaia tano taman. Ma iakano taman ga kis taar tiga uladih. Diet ga lamus haut ie uram tano gagena no uladih bia diet naga se hasur ie tano ula habo.
LUK 4:30 Iesen ga haan nalamin mon tano tamat na matanaiabar gaam haan laah.
LUK 4:31 Ma namur um Jisas ga haan uras Kapeneam, tiga pise na hala tano hanuo Galili. Ma tano Bung na Sinangeh ga tur leh wara hausur ira matanaiabar.
LUK 4:32 Ma diet ga karup ma diet ga urur ta ira uno harausur kanong ga ianga hoing tikai i te kap ra dadas kaik gaam tale bia na ianga huo.
LUK 4:33 Ma kaia tano hala na lotu gar na Iudeia tiga tunotuno nong a sakana tanuo gate sasoha tana. Ga tatau naliu sakit, “Ai! U biha, Jisas me Nasaret? U te hanuat bia nu hagahe mehet? Iau nunure tar bia no Halhaliana tane God ugu.”
LUK 4:35 Ma Jisas ga tigal no sakana tanuo, “Kis matien! Suur sukun ie!” Io, no sakana tanuo ga se tar no tunaan napu ra matmataan ta diet bakut ma ga suur sukun ie. Iesen pa ga hagahei.
LUK 4:36 Ira matanaiabar bakut diet ga karup diet gaam tangtange harbasiane ta diet hoken: “A mangana harausur hobihbih iakan? I kure ise ira sakana tanuo ma ra dadas hoing tikai i la harkurai taar, ma diet suur laah!”
LUK 4:37 Ma no hinhinawas utana ga haan harbasia tano hanuo bakut.
LUK 4:38 Io, Jisas ga haan laah mekaia ra hala na lotu gar na Iudeia ma ga haan laka tano ngasiane Saimon. Ma no numune Saimon, ga ububal ie no tamat na malahau ma diet ga saring Jisas bia na harahut ie.
LUK 4:39 Io, ga tur hutet tana gaam tigal se no malahau, ma no mamahien ga pataam sukun ie. Kaik at mon no hahin ga taman tut gaam tur leh bia na tagure ira nian uta diet.
LUK 4:40 Ma bia no kasakes gate sungsuguh ira matanaiabar diet ga kap hawaat bakut ira haleng mangana minaset ukaia hone Jisas. Ga bul ira iruo limana ta diet tikatikai, kaik gaam halangalanga diet.
LUK 4:41 Ma ira sakana tanuo mah diet ga suursuur sukun halengin ta ira matanaiabar, diet ga manga tatau hoken: “Augu no Natine God!” Iesen ga tigal diet ma pa ga bale leh diet bia diet na ianga kanong diet ga nunure bia aie no Mesaia.
LUK 4:42 Ma bia gate malabungbung Jisas ga haan laah ukaia ra malubil. Ma ira matanaiabar diet ga nanaas tana ma ing bia diet ga haan tupas ie diet ga walar wara tingtigal ie bia waak i haan sukun diet.
LUK 4:43 Iesen ga tange ta diet, “I tahut bia ni harpir utano tahut na hinhinawas tano kinkinis na harkurai ma ra harbalaurai ta God ta ira mes na taman mah kanong nagu Sus ga tule iau wara urie.”
LUK 4:44 Ma ga harharpir haan ta ira hala na lotu kaia Iudeia.
LUK 5:1 Tiga bung bia ne Jisas ga tur taar kaia hutet hora taah kom Genasaret ira matanaiabar diet ga tur harsibitsibit luhutanei ma diet ga hanhadade ira nianga gar ta God.
LUK 5:2 Ma ga nes airuo mon kaia hutet ra gagena taah kom. Ira ut na kap kirip diet gate waak tar dir ma diet gaam gisgis ira udiet uben.
LUK 5:3 Io, Jisas ga kawaas tikai ta dir ira iruo mon, nong tane Saimon. Ma ga tange bia na sule hasur ie ta dahin mekaia ra wasasar. Ga kis napu kaia ra ula mon gaam hausur ira matanaiabar mekaia.
LUK 5:4 Ma bia gate hapataam ira uno nianga ga tange ta Saimon, “Mutal na bul hasur ira numutal uben uras ra lamlamana muat naga kap ta kirip.”
LUK 5:5 Saimon ga tange, “Watong, metal te sukai ra kidilona bung bakut ra bung ma metal pai kap ta linge. Iesen, kanong u te tange huo, iau ni bul hasur ira uben.”
LUK 5:6 Ma bia dal ga gil huo dal ga soh ra haleng kirip kaik ira udal uben gaam wara tamtamadiris.
LUK 5:7 Io, dal ga tah ira udal iruo harwis tano mes na mon bia dir na hanuat wara tahtaho dal. Ma dir ga hanuat diet gaam hahungi ira iruo mon ma ira kirip. Dir ga hung sakit dir gaam wara ruhruh.
LUK 5:8 Ma ing ne Saimon Pita ga nes huo ga puko taar napu kaia hora kaki Jisas gom tange, “Watong, iau sip bia nu haan sukun iau kanong a sakana tunotuno iau.”
LUK 5:9 Ga tange huo kanong diet ma ira uno harwis diet ga manga karup ta ira haleng na kirip diet gate soh.
LUK 5:10 Ma ira iruo harwis tane Saimon, Jemes ma ne Jon, ira iruo natine Sebedi, dir mah dir ga manga karup. Io, Jisas ga tange ta Saimon, “Waak u burburut. Tur leh um kaiken nu sasoh tunotuno.”
LUK 5:11 Io, bia diet gate sal haut um ira udiet iruo mon uram ra wasasar diet ga waak se ira linge bakut diet gaam mur um ie.
LUK 5:12 Ing Jisas ga kis taar tiga taman, tiga tunotuno ga haan tupas ie ma a sakana minaset ga banot tar no palatamaine. Bia ga nes Jisas ga sian tudu gaam suhe no matmataan tana ures tano pise gaam sasaring marmaris taar ta Jisas bia, “Nora Watong, iau palai bia u haruat wara halangalanga iau waing pa na tale bia da hahale habaling iau. Ma bia ing u sip, nu gil huo tagu.”
LUK 5:13 Jisas ga sasangaha gaam sigire no tunotuno ma ga tange, “Iau sip tar. Nu langalanga!” Kaik at mon no minaset ga pataam tano tunotuno.
LUK 5:14 Ma Jisas ga hakatom tar ie bia pa na hinawase ta tiga nong uta iakan ra linge. Ga tange bia, “Iesen nu haan ma nu haminas ugu tano ut na pakila lotu. Ma nu tar no hartabar haruat ma no harkurai tane Moses. Ma iakano hartabar na hinawas palai wara hatutun bia u te langalanga ma bia pai tale mah bia tikai na hahale habaling ugu.”
LUK 5:15 Iesen no hinhinawas utana ga manga haan hurbit balik. Kaik, ira matanaiabar diet gaam hanuat wara hanhadadei ma bia na halangalanga diet sukun ira udiet minaset.
LUK 5:16 Sen bia Jisas git haraios ukaia ta ira hanuo bia, gaam git saasaring.
LUK 5:17 Tiga bung bia Jisas ga hauhausur ira matanaiabar, ari a Parisi ma ari a tena harausur ta ira harkurai ta Moses diet ga kis taar kaia mah. Diet gate hanuat mekaia Ierusalem ma ta ira tamtaman Galili ma Iudeia. Ma no dadas gar tano Watong ga kis taar ta Jisas bia na halangalanga ira ina minaset.
LUK 5:18 Ma ari a tunotuno dal ga kapkap hani tiga pengpeng ta tiga kunuban. Dal ga walar bia dal na kap halakai tano hala bia dal naga hainoh ie ra matmataan ta Jisas.
LUK 5:19 Sen bia dal ga pet puo bia dal na gil huo kanong a haleng na matanaiabar. Io kaik, dal gaam hanut uram ra ula hala, dal gaam haruhe hasur no pengpeng ma no kubena tano mauho dal gate tatik sare tar ie. Dal ga haruhe hasur ie nalamin ta ira matanaiabar ukaia ra matmataan ta Jisas.
LUK 5:20 Bia Jisas ga nes ira udal nurnur, ga tange, “Tasigu, ira num magingin sakena i te pataam.”
LUK 5:21 Io, ira Parisi ma ira tena harausur ta ira harkurai ta Moses diet ga hatahun bia diet na lilik kumaan ta ira bala diet bia, “Sige iakan ra tunotuno i tange hagahe God? Taie ta tunotuno i haruat wara sungsuge se ira magingin sakena—God sen mon!”
LUK 5:22 Jisas ga hamaan kilam ira udiet lilik gaam tange, “Ira numuat lilik pai takodas.
LUK 5:23 Garum ta dir i malus? I malus bia ni tange bia ‘Ira num magingin sakena i te pataam,’ bia i malus bia ni tange, ‘Taman tut ma nugu haan’?
LUK 5:24 Iesen iau ni hapalaine ta muat bia Nong a Tunotunoi i hatur kawase no dadas wara sungsuge se ira magingin sakena kai ra ula hanuo.” Io, ga tange tano pengpeng, “Iau tange taam, taman tut, kap leh no kubem ma nu haan ukaia ra ngasiaam.”
LUK 5:25 Kaik at mon ga taman tut ra matmataan ta diet, ga tatik leh no kubena gaam pirpirlat hani God ukaia ra ngasiana.
LUK 5:26 Io, ma a tamat na kinarup ga kap diet bakut, diet gaam pirhakasing God. Diet ga hung ma ra urur diet gaam tange, “Dahat te nes ra mangana linge katin!”
LUK 5:27 Ma namur ta iakan Jisas ga hansur ga nes tiga ut na kap takis, no hinsana ne Lewi. Ga kis taar kaia ra uno hala na kap takis. Jisas ga tange tana bia, “Mur iau!”
LUK 5:28 Io, Lewi ga tut talur ira linge bakut ma ga mur ie.
LUK 5:29 Io, Lewi ga gil tiga tamat na nian wara utane Jisas kaia ra uno hala. Ma a haleng na ut na kap takis ma ari a mes na matanaiabar mah diet ga iaan tika ma dir.
LUK 5:30 Iesen ira Parisi ma ira udiet tena harausur ta ira harkurai ta Moses diet ga ngurungur ta ira bulu na harausur tane Jisas hoken: “Pai bilai bia muat iaiaan ma muat mamom tika ma kaike ira ut na kap takis ma ira mes na sakana tunotuno mah.”
LUK 5:31 Ma Jisas ga tange ta diet, “Ing diet langalanga timaan, diet pai supi ra ut na harhalon, iesen diet sen diet maset.
LUK 5:32 Iau pa gale hanuat bia ni tatau muat ing muat lik bia a ut na takodas muat bia muat na lilik pukus. Taie. Diet sen ing diet palai bia diet sakena.”
LUK 5:33 Diet ga tange ta Jisas, “Ira bulu na harausur tane Jon no ut na baptais diet la haahal hait ma diet la saasaring. Huo mah ira bulu na harausur ta ira Parisi. Iesen bia ira num, diet la iaiaan ma diet la mamom.”
LUK 5:34 Ma Jisas ga tange ta diet, “Tano bung na nian na hinartola, hohe, i tale muat bia muat na sunang ira wasire bia diet na hahal ing bia no marawaan nong i sigar tola i kis tika taar baak ma diet? Taie.
LUK 5:35 Iesen ta tiga bung namur no marawaan i sigar tola, da kap leh ie sukun diet. Io, ta iakano pakana bung diet na hahal kanong diet tapunuk.”
LUK 5:36 Ma ga tange tiga nianga harharuat ta diet hoken: “Taie ta tiga nong na diris ise tiga subaan ta tiga sigar katona maal ma na dungut pakur ie ma tiga tuarena. Ing bia na gil huo na diris hagahe no sigar maal ma no sibaan i te diris isei pa na nanaas haruat ma no tuarena.
LUK 5:37 Taie tiga nong mah bia na pintare no sigar wain pai lalat baak ta ira tuarena pala taah ing di ga gil ma ra pala me ma i te tapagas. Ing bia na gil huo, no sigar wain na parok ira pala taah ma na bureng. Ma ira pala taah diet na sakena. Taie.
LUK 5:38 Na tahut bia da pintare no sigar wain pai lalat baak ta ira sigar pala taah.
LUK 5:39 Ma taie tiga nong pa na mame ira tuarena wain ma na sip no sigarine kanong na tange, ‘No tuarena i bilai.’”
LUK 6:1 Tiga Bung na Sinangeh Jisas ga hanahaan nalamin ta tiga lalong na wit. Ma ira uno bulu na harausur diet ga rarus leh ari, diet gaam guluane ma ira lima diet ma diet gaam ien.
LUK 6:2 Iesen ari ta ira Parisi diet ga tange, “Wara bih bia muat gil huo? Muat lake no harkurai utano Bung na Sinangeh.”
LUK 6:3 Jisas ga tange ta diet, “Muat gate was tar ing Dawit ma ira uno harwis diet ga gil ing bia diet ga taburungan.
LUK 6:4 Io, Dawit ga laka tano hala tane God ma ga ien no beret di gate tabar God mei. No harkurai i tange bia ira ut na pakila lotu sen mon diet na ien iakano beret, iesen ga tabar mah ira uno harwis.”
LUK 6:5 Io, ga tange ta diet, “Nong a Tunotunoi i kure no Bung na Sinangeh.”
LUK 6:6 Tiga mes na Bung na Sinangeh balin Jisas ga haan laka tiga hala na lotu gar na Iudeia gaam harharausur. Ma ga mon tiga tunotuno kaia ga maat no kata na limana.
LUK 6:7 Ma ira tena harausur ta ira harkurai ta Moses ma ira Parisi diet ga sip bia diet na silihe ta burena bia diet naga tung Jisas. Io kaik, diet gaam nanaas hutet bia na harhalon ra Bung na Sinangeh.
LUK 6:8 Ma sen bia Jisas ga nunure ira udiet lilik gaam tange tano luma mat, “Tut naliu, nugu tur ra matmataan ta diet bakut.” Io, ga taman tut gaam tur kaia.
LUK 6:9 Ma Jisas ga tange ta diet, “Iau tiri muat bia asa ira harkurai tane Moses i tange bia da gil ra Bung na Sinangeh? Bia da harahut bia da harhangungut? Bia da halon tikai bia da bing ie?”
LUK 6:10 Bia gate nes diet bakut ga tange tano luma mat bia, “Tul se no limaam.” Bia ga gil huo ma no limana ga tahut baling.
LUK 6:11 Iesen diet ga manga bala ngalngaluan, diet gaam wawor hargilaas ta diet bia diet na gil hohe ta Jisas.
LUK 6:12 Tiga pakaan ta kaike ra bung Jisas ga haan laah gaam haan uram ra uladih bia na sasaring. Ma ta iakano bung bakut ra bung ga saasaring tupas God.
LUK 6:13 Ma bia gate malaan ga tatau ira uno bulu na harausur ma ga gilamis leh a sangahul ma iruo nalamin ta diet. Ma ga kilam bia apostolo diet.
LUK 6:14 Io, ga gilamis Saimon (nong Jisas ga kilam ie bia Pita), ma no tasine Andru, Jemes, Jon, Pilip, Batalomiu, Matiu, Tomaas, Jemes no natine Alpias, ma Saimon nong di ga kilam ie bia no Selot.
LUK 6:16 Ga gilamis mah Iudas no natine Jemes ma Iudas Iskariot nong na tar se Jisas.
LUK 6:17 Jisas ga hansur tika ma diet gaam tur kaia ra malabuo. Ma kaia mah a haleng ira uno bulu na harausur tika ma ra tamat na matanaiabar sakit. Ma diet gate hanuat meram ta ira tamtaman na Iudeia, meram Ierusalem, ma mekaia Tair ma Saidon ra gagena tes.
LUK 6:18 Diet gate hanuat bia diet na hadadei ma bia na halangalanga diet sukun ira udiet minaset. Ma diet ing ira sakana tanuo ga ubal diet, diet ga tahut baling.
LUK 6:19 Ma ira matanaiabar diet ga walar bia diet na sigirei kanong ira dadas ga hanansur mekaia ho ie gaam halhalangalanga diet bakut.
LUK 6:20 Ga nes ira uno bulu na harausur gom tange hoken: “Muat daan, muat ira maris kanong anumuat no kinkinis na harkurai ma ra harbalaurai tane God.
LUK 6:21 Muat daan ing muat taburungan kaiken kanong muat na hahos baak. Muat daan ing muat suah kaiken kanong muat na kurus.
LUK 6:22 Bia ira matanaiabar diet malentakuane muat, bia diet tange hagahe muat, bia diet tange bia muat ira ut na sakena kanong muat murmur Nong a Tunotunoi, io, muat na daan.
LUK 6:23 Ta iakano pakana bung i tahut bia muat na guama ma bia muat na karwas ma ra kanakana kanong ira tamat na hunena ira numuat mangason kenam i kis taar ra mawe. Ma i tale bia muat na laro huo ta iakano pakaan kanong ira hintubu diet, diet git gilgil hagahe ira tangesot mah huo.
LUK 6:24 Iesen maris ta muat ira watong kanong muat te hatur kawase um ira linge i haguama muat.
LUK 6:25 Maris ta muat ing muat hahos kaiken, kanong muat na taburungan baak. Maris ta muat ing muat kurus kaiken, kanong muat na tapunuk ma muat na suah baak.
LUK 6:26 Maris ta muat ing bia ira tunotuno bakut diet tange bia a tahut muat kanong ira hintubu diet, diet git gilgil mah huo ta ira tangesot harabota.
LUK 6:27 “Iesen ta muat ing muat hadade iau, iau tange hoken: I tahut bia muat na sip ira amuat suk ma muat na gil ra tahut ta diet ing diet malentakuane muat.
LUK 6:28 I tahut bia muat na saring God bia na idane diet ing diet pakile ra gingilaan wara hagahe muat. Ma muat na sasaring uta diet ing diet gil ra sakena ta muat.
LUK 6:29 Ma ing bia tiga nong na pasar tiga bobola haam, io, nu tar mah nong tiga palpal. Ma bia tikai i kap leh no num maal nu bale tar ie bia na kap mah no num sigasige.
LUK 6:30 Ma bia ta tiga nong i saring ugu ta tiga linge, nu bale se tar ie tana. Ma nong i kap leh ira num linge, waak u saring pukus ie.
LUK 6:31 Muat na gil ta ira mes hoing muat sip bia diet na gil tar ta muat.
LUK 6:32 Ma ing bia muat sip sen mon diet ing diet la sipsip muat, pa da tange bia muat te gil ra tahut. Taie. Ira ut na sakena mah diet sip ira tunotuno ing diet la sipsip diet.
LUK 6:33 Ma ing bia muat gil ra tahut ta diet ing diet gil ra tahut ta muat, io, pa da tange bia muat te gil ra bilai na linge. Taie. Ira ut na sakena diet la gilgil mah huo.
LUK 6:34 Bia muat bale tar ari a linge ta nong i saring muat kanong muat lik bia na balu pukus, io, pa da tange bia muat te gil ra tahut. Taie. Ira ut na sakena mah diet bale tar ta linge ta ira mes na ut na sakena waing diet mah diet naga kap pukus haruat ma ing diet ga bale tar.
LUK 6:35 Iesen, i tahut bia muat na sip ira amuat suk ma muat na gil ra tahut ta diet. Muat na tabar diet ma muat pa na sip ta binabalu. Ing bia muat na gil huo no numuat harkul na tamat ma muat na natine God Nong i Lua Harsakit kanong aie at i gil ra bilai mah ta ira sakana tunotuno ing diet nes habulbul ira uno harharahut.
LUK 6:36 Muat na harmarsai hoing no amuat Sus i harmarsai.
LUK 6:37 “Waak muat tange hagahe tikai bia muat na kure hagahe tiga nong, muat kabi tur mah ra harkurai. Muat na lik luban se ira nironga di gil ta muat. Ing bia muat na gil huo, God na lik luban se mah ira numuat.
LUK 6:38 Muat na hartabar ma God na tabar muat. Ma no uno hartabar pa na huat kakot. Na tamat sakit ma na lake ira numuat sinisip. Na manga hahungi muat. God na hapupuo ira uno hartabar taar ta muat hoing muat tabar ira mes.”
LUK 6:39 Io, Jisas ga hinawase mah diet ma kan ra nianga harharuat. Ga tange hoken: “Hohe, i tale bia tiga pulo na lamus habalin tiga pulo? Taie. Dir bakut dir na puko ta tiga tungtung.
LUK 6:40 Tiga bulu na harausur pai tamat ta dir ma no uno tena harausur. Sen bia tikatikai i te hapataam no uno harausur na haruat ma no uno tena harausur.
LUK 6:41 Warah u nas no nat na pet na daha tano matana no hinsakaam ma pau lik leh baak no pokona daha ke hora mataam at?
LUK 6:42 Waak bia nu tange tano tasim bia, ‘Tasigu, ni kap se no nat na pet na daha ke hono mataam.’ Waak u gil huo kanong augu baak mah pau nes no pokona daha ke tano mataam. A ut na harababo ugu! Nu kap se hanalua baak no pokona daha tano mataam at. Kaik, nugu nanaas timaan wara kapkap se no nat na pet na daha nong i kis taar tano matana no hinsakaam.
LUK 6:43 “Taie ta bilai na daha bia na huai ira sakana hunena. Huo mah, ira sakana daha diet pa na huai ira bilai na hunena.
LUK 6:44 Ira daha bakut di la nesnes kilam diet ta ira hunue diet at. Pa di la dikdik ira papus mekaia tiga daha i mon tukuluno. Ma pa di la dikdik mah ira gamara ta ira hinau i mon tukuluno.
LUK 6:45 No tahut na tunotuno i tange ira bilai na linge ing i hung taar tano balana. Ma no sakana tunotuno i tange ira sakana linge ing i hung taar me. Io, tikai na tange ira linge nong no balana i hung taar me.
LUK 6:46 “Wara bih muat kilam iau bia, ‘Watong! Numehet Watong!’ ma muat pa na taram ira nugu nianga?
LUK 6:47 Sige tiga nong i haan tupas iau ma i hadade ira nugu nianga ma i taram, io, iau ni hamines ta muat bia a mangana tunotuno sa ie.
LUK 6:48 I haruat ma tiga tunotuno nong ga so hasur ira kasong tano uno hala uras napu ra ula haat. Ma bia ira taah ga taahit, io, no taah ga saal taar ta iakano hala ma pa ga hamagilei kanong no tunotuno gate so dit tar ie.
LUK 6:49 Iesen sige tiga nong i hadade ira nugu nianga ma pai gil haruatne, io, i haruat ma no tunaan nong ga so hapagalo ta mon no uno hala. No taah ga saal taar tana ma kaik at mon ga tarupuk ma ga tamadure sakasaka.”
LUK 7:1 Ing Jisas gate hapataam ira uno nianga ta ira hinadoda ta ira matanaiabar ga laka Kapeneam.
LUK 7:2 Ma kaia, tiga tamat na umri tiga matana ubane. Ma no uno tultulai nong no tamat na umri ga manga urur tana ga maset gaam wara minaat.
LUK 7:3 Bia no tamat na umri ga hadade utane Jisas, io, ga tule ari a nongtamat gar na Iudeia ukaia ho Jisas bia diet na saring ie bia na haan wara halangalanga no tultulai.
LUK 7:4 Bia diet ga haan tupas Jisas diet ga manga sasaring marmaris diet gaam tange, “I manga tale bia nu harahut iakan ra tunotuno kanong i sip dahat ira Iudeia ma i te gil no numehet hala na lotu.”
LUK 7:6 Io kaik, gaam tika laah ma diet. Pa ga tapaka mekaia ra hala ma no tamat na umri ga tule ari auno harwis ukai ho Jisas ma ra nianga hoken: “Nora Watong, waak um u hatataas ugu. Maris. Iau pai manga haut bia nu haan laka tano nugu hala kanong u tamat tagu.
LUK 7:7 Ma huo mah kaik iau pa gi hanuat ukai ho ugu. Sen bia nu tange num ta nianga ma no nugu tultulai na langalanga.
LUK 7:8 Iau tange huo kanong iau mah, iau palai bia tikai i kis taar tano kinkinis na harkurai. Ma na tule ta tikai bia na gil haruatne ira uno sinisip. Hoing mah iau. Ari a mes diet la kure tar iau, ma iau la kure tar diet tiga matana ubane. Iau tange ta tiga nong, ‘Haan,’ io, na haan. Iau tange ta tiga mes, ‘Mai,’ io, na hanuat. Ma iau tange tano nugu tultulai, ‘Gil kan,’ ma na gil ie.”
LUK 7:9 Ma bia Jisas ga hadade kaike ra nianga tano tamat na umri ga karup tana. Ga talingane ira matanaiabar ing diet ga murmur hanii gaam tange, “Iau tange ta muat, iau pai ga nas tikai nalamin kai Israel ing i dadas no uno nurnur hoing iakan.”
LUK 7:10 Ma ing bia kaike ra tunotuno ing no tamat na umri ga tule diet, diet ga tapukus ukaia tano hala, io, diet ga me nes tupas no tultulai bia gate langalanga um.
LUK 7:11 Namur dahin ma Jisas ga haan ukaia tiga taman di ga kilam ie bia Nain. Ma ira uno bulu na harausur ma a tamat na matanaiabar diet ga tika mei.
LUK 7:12 Bia ga hutet bia na laka tano matanangas tano taman, io, ari diet ga kapkap hasur tiga minaat. A tunaan ie, a bulukasai, ma a makosa no pawasine. Ma a tamat na matanaiabar diet ga tika ma iakano ra hahin.
LUK 7:13 Ma bia no Watong ga nes no hahin ga malisanei gaam tange tana, “Waak u suah.”
LUK 7:14 Io, Jisas ga haan tupas diet, gaam sigire no sabesabe. Ma ing diet ga kapkap hanii, diet ga tur kis. Ma Jisas ga tange tano marawaan, “Iau tange taam, nu taman tut!”
LUK 7:15 Io, nong ga maat ga kis tutur, gaam tur leh bia na ianga. Ma Jisas ga tar se habaling ie tano pawasine.
LUK 7:16 Ma a tamat na urur ga kis ta diet ma diet ga pirpirlat God hoken: “Tiga tamat na tangesot i te hanuat nalamin ta dahat!” Ma diet ga tangtange mah bia, “God i te hanuat wara tahtaho ira uno matanaiabar!”
LUK 7:17 Ma iakan ra hinhinawas ta Jisas ga haan harbasia bakut Iudeia ma ira balbalin taman luhluhutanei.
LUK 7:18 Io, ma ira bulu na harausur tane Jon diet ga hinawasei uta kaiken ra linge bakut. Ma Jon ga tatau airuo ta diet gaam tule dir ukaia hono Watong bia dir na tiri hoken: “Augu nong mehet la kiskis kawasei bia na hanuat, bia mehet na kis kawase baak tiga mes?”
LUK 7:20 Bia ira iruo tunotuno dir ga haan tupas Jisas dir ga tange bia, “Jon no ut na baptais te tule mir wara tirtiri ugu bia augu nong mehet la kiskis kawasei bia na hanuat, bia mehet na kis kawase baak tiga mes?”
LUK 7:21 Ta iakano pakana bung at Jisas ga halangalanga a haleng ing diet ga sam ra mangana minaset ma diet ing ira sakana tanuo diet ga sasoha ta diet. Ga halangalanga mah ira pulo kaik diet gaam nanaas baling.
LUK 7:22 Io kaik, ga balu ira iruo tultulai ta Jon gaam tange, “Mur na tapukus, mur na hinawase ne Jon ing mur te hadade ma ing mur te nas, bia ira pulo diet nanaas, ira pengpeng diet hanahaan, diet ing diet sam ra sakana minaset ta ira palatamai diet, diet te langalanga, ira talinga bau diet te hadoda, ira minaat diet te lon baling, ma no nianga na harharpir utano tahut na hinhinawas i haan tupas ira maris.
LUK 7:23 Diet daan ing pai iruo ira udiet lilik utagu.”
LUK 7:24 Bia ira tultulai ta Jon dir gate haan laah, Jisas ga hinawase no tamat na matanaiabar utane Jon hoken: “Bia muat ga haan ukaia ho Jon uram ra hanuo bia, muat ga lik bia muat na nes sa? Muat ga nunure bia a mangana tunotuno sa ie. Aie pai la kikios lilik hoira tingari ing i la iaioh hurbit tano dadaip.
LUK 7:25 Ma bia muat ga haan wara nesnes ie muat ga nunure tar bia pai la singsigam ta bilai na kiniasine. Taie. Kaike ra tunotuno ing diet la singsigam ira maal ing ira matana i tamat ma diet tale mah bia diet na kul ira bilai na linge sakit, io, diet la kiskis ta ira hala na watong.
LUK 7:26 Sen bia ing muat ga haan wara nasnas ie, muat ga palai bia muat na nas tiga tangesot. I tutun. Iesen i tamat mah ta ira tangesot, kanong aie mon, ing di ga pakat ira nianga tane God utana, i tange hoken, ‘Iau ni tule no nugu ut na kap nianga menalua tano num hinanhuat, Nong na tagure no num ngaas.’
LUK 7:28 “Iau tange ta muat, Jon i tamat ta ira tunotuno bakut ing diet ga lon ta iakan ra ula hanuo. Iesen sige tiga nong ta muat i manga hansiksik narako tano kinkinis na harkurai ma ra harbalaurai ta God i tamat tane Jon.”
LUK 7:29 Bia ira matanaiabar ma ira ut na kap takis mah, diet ga hadade kan ra nianga diet ga lik bia ira linge God i gil i takodas. Ma diet ga lik huo kanong diet gate kap no baptais ta Jon.
LUK 7:30 Iesen ira Parisi ma ira ut na mintot ta ira harkurai ta Moses diet ga malok ise ira linge ing God ga pingit wara uta diet. Ma diet ga gil huo kanong diet pa ga kap no baptais ta Jon.
LUK 7:31 Ma Jisas ga tange mah hoken: “Bia iau ni ianga harharuat uta ira tunotuno katin ni tange hohe? A mangana tunotuno sa diet? Io, ni hinawase muat.
LUK 7:32 Diet hoing ira nat na bulu ing diet sip bia ira mes na mur diet. Diet kis hurlungen tiga katon ma diet hartawi harbasia ta diet hoken, ‘Mehet pasar no kudu iesen muat pai mangata; Mehet inge marmaris iesen muat pai suah.’
LUK 7:33 Hokaike at mon muat pa ga guama mah tane Jon. Bia Jon no ut na baptais ga hanuat, ga hahal ma pa ga mame ta wain. Kaik muat gaam tange hagahei bia, ‘A sakana tanuo i sasoha tana.’
LUK 7:34 Ma bia Nong a Tunotunoi ga hanuat, ga iaiaan ma ga mama wain. Ma diet ga tange utana bia, ‘A tabi kas na balana ma a ut na minom ie. Ma a hinsakana diet ira ut na kap takis ma ira mes na sakana tunotuno.’”
LUK 7:35 Io, Jisas ga tange baling bia, “Diet tange huo iesen iau tange bia ira ut na mintot diet na hamines bia no mintot ta God i takodas.”
LUK 7:36 Tikai ta ira Parisi ga saring Jisas bia dir na iaan tika. Io, ga haan tano hala tano Parisi gaam kis tano suuh na nian.
LUK 7:37 Ma tiga hahin ta iakano taman, no uno nilon ga sakena. Ing ga ser leh bia Jisas ga iaiaan aram narako tano hala tano Parisi, ga kap hawaat tiga mangana bilai na gingop na taah di ga gil ie ma ra haat na tiris. Ma narakoman tana ari waiwai wara salsalap.
LUK 7:38 Ma ga tur manamur ta ira kaki Jisas gaam susuah, io, ira tirina matana ga hasulut ira kakine. Ga salap ira kaki Jisas ma ira hine gaam lusung dir ma ga bul no waiwai ta dir.
LUK 7:39 No Parisi nong ga saring Jisas wara nian ga nes iakan gaam lik hoken: “Bia iakan ra tunaan a tangesot ie, gor nunure bia sige i singsigirei ma a mangana hahin sai. Gor nunure bia a ut na sakena ie.”
LUK 7:40 Ma Jisas ga tange tana, “Saimon, iau sip bia ni hinawase ugu tiga linge.” Io, ga tange bia, “Hinawase iau, tena harausur.”
LUK 7:41 Jisas ga tange hoken: “Airuo tunotuno dir pa ga saksaak baak taar ta no mes na tunaan. Tikai ga kap leh ra tamat na kinewa sakit, ma no mes, a dahin mon.
LUK 7:42 Taie tikai ta dir ga petlaar bia na balu pukus. Kaik, no tunaan gaam lik luban se dir bia dir pa na saksaak. Io, sige ta dir na manga sip ie?”
LUK 7:43 Saimon ga babalu bia, “Iau lik bia nong no uno tamat ga lik luban sei bia pa na sak ira haleng na kinewa.” Jisas ga tange, “No num binabalu i takodas.”
LUK 7:44 Ga talingane no hahin gaam tange ta Saimon bia, “U nas tar kan ra hahin? Iau laka kai ra num hala ma pau tar ta taah wara gisgis ira kakigu. Iesen aie i hasulut ira kakigu ma ira tirina matana ma i salap ma ira hine.
LUK 7:45 Pau gawane leh iau sen bia tur leh tano pakana bung iau laka, io, kan ra hahin pai sangeh wara luslusung ira kakigu.
LUK 7:46 Pau bul ta wel tano ulugu iesen aie i te salap ira kakigu ma ra waiwai.
LUK 7:47 Io kaik, iau tange taam, ira uno haleng na magingin sakena i te pataam kanong i manga sip iau. Iesen bia dahin mon ira magingin sakena ta tikai ma God i lik luban sei, io, iakano ra tunotuno na sip God ra dahin mon mah.”
LUK 7:48 Io, Jisas ga tange tano hahin, “Ira num magingin sakena i te pataam.”
LUK 7:49 Ma ira mes na wasire diet ga tangtange harbasia ta diet bia, “Sige iakan ra tunotuno nong aie at i lik luban se ira magingin sakena?”
LUK 7:50 Ma Jisas ga tange tano hahin, “No num nurnur i te halon ugu. Nu haan tatohun.”
LUK 8:1 Namur ta iakan Jisas ga hanahaan hurhurbit ta ira tamtaman gaam harharpir utano tahut na hinhinawas tano kinkinis na harkurai ma ra harbalaurai ta God. Ma ira sangahul ma iruo diet ga tiktika mei ma ari a hahin mah. Kaike ra hahin, Jisas gate hasur se ira sakana tanuo ta diet ma gate halangalanga diet ta ira mangana minaset. Maria tikai ta diet nong di ga kilam ie bia Magadalena. Ma aie nong a liman ma iruo na sakana tanuo diet ga suur laah tana.
LUK 8:3 Ma tiga mes, ne Ioana, no hahin ta nong ga harkurai taar tano hala ta Herot, no hinsana ne Kusa. Susana mah tika ma diet ma ra haleng na mes. Ma kaike ra hahin, ma ira udiet minsik at, diet git banbanot ira sunupi ta Jisas ma ira uno bulu na harausur.
LUK 8:4 Io, a tamat na matanaiabar diet ga hananhuat tupas Jisas mekaia ta ira tamtaman ma Jisas ga tange iakan ra nianga harharuat:
LUK 8:5 “Tiga ut na sinaso ga haan bia na so ira uno pat na daha. Ma bia ga sase harbasiane ira pat na daha tari ga puko taar tano ngaas ma di ga papasuane ma ira maan diet ga pupungo huat diet ga me ien bakut se.
LUK 8:6 Ari a pat na daha ga puko taar ra ula haathaat. Ma ing bia diet ga kubur diet ga maranga kanong a mamasine no pise.
LUK 8:7 Ma ari a pat na daha mah diet ga puko taar nalamin ta ira kuikui kaik gaam lul burung diet.
LUK 8:8 Ma ari diet ga puko taar ta ira bilai na pise ma diet ga huai a maarmaar na patine.” Ma ing ga tange huo ga kakongane bia, “Bia ing u haruat wara hadade kilam iakan, nu taram ie.”
LUK 8:9 Ira uno bulu na harausur diet ga tiri Jisas bia hohe no kukuraina iakan ra nianga harharuat.
LUK 8:10 Ga tange ta diet, “Iau te hapuasne ta muat utano kinkinis na harkurai ma ra harbalaurai tane God. Ga susuhai nalua, sen iau te hapalaine um ie ta muat. Iesen ta diet ira mes iau ianga ma ra nianga harharuat. Io kaik, ‘diet na nasnas sen bia diet pa na nes kilam. Diet na hanhadade sen bia diet pa na hadade kilam.’
LUK 8:11 Io, no kukuraina tano nianga harharuat hoken: ira pat na daha no nianga ta God.
LUK 8:12 Ira matanaiabar ing diet te hadade, diet haruat ma ira pat na daha ing i puko taar tano ngaas. Ma Sataan i hanuat ma i me kap se no nianga ta ira bala diet bia diet pa na nurnur ma God kabi halon diet.
LUK 8:13 Ma ira pat na daha tano ula haathaat i haruat ma ira matanaiabar ing diet hadade leh no nianga ma diet kap ie ma ra gungunuama. Iesen no nianga pai dorang. Diet nurnur ta baak ma bia ira walwalaam i haan tupas diet, diet puko laah.
LUK 8:14 Ma diet ing diet puko taar nalamin ta ira kuikui diet haruat ma ira matanaiabar ing diet hadade. Ma namur um a ngarngarau ma a lilik na watong ma ra gunuma bia i burung diet ma diet pai tahuat timaan.
LUK 8:15 Iesen ira pat na daha tano bilai na pise i haruat ma ira matanaiabar ing i bilai ira bala diet. Diet hadade no nianga ma ra tutun ma diet lik kawasei bia pa na panim laah. Diet tur dadas ma diet tahuat timaan.
LUK 8:16 “Taie tikai pai halulungo tiga laam ma na tubus ie bia na bul ie menapu tiga suuh. Taie. Na bul at no laam tano uno tuntunur bia diet ing diet laka diet na nes no murarang tana.
LUK 8:17 Hokaike at mon, bia ta sa i kis mun taar na hanuat puasa namur. Ma bia asa i pupulus taar na hanuat palai namur ma muat na nunure.
LUK 8:18 Io kaik, muat na lik timaan uta ira numuat hanhadoda. Sige nong i palai ta ira nugu nianga, God na manga hapalaine tar tana. Ma bia sige nong tada palpalai kana tana, God na kap se bakut at tana tika ma ira linge ing ga lik bia i palai taar ine.”
LUK 8:19 No pawasine Jisas ma ira tasine diet ga hanuat wara nesnes ie iesen diet pa ga petlaar wara hinahaan hutet tana kanong a tamat na matanaiabar.
LUK 8:20 Ma di ga hinawasei, “No pawasim ma ira tasim diet turtur nataman. Ma diet sip bia diet na nes ugu.”
LUK 8:21 Sen bia ga tange ta diet, “No pawasigu ma ira tasigu diet ing diet hadade ira nianga ta God ma diet gil haruatne.”
LUK 8:22 Tiga bung Jisas ga kawaas tiga mon, diet ma ira uno bulu na harausur, gaam tange ta diet, “Dahat na haan kutus uram tiga palpal tano taah kom.”
LUK 8:23 Ma bia diet ga hilhilau haan Jisas ga kubaba. Ma tiga tamat na baiangin ga hanuat taar ta diet tano taah kom. Kaik, a pakananoh ga sase bus diet ma no mon ma diet ga wara hiniruo.
LUK 8:24 Ma ira uno bulu na harausur diet ga hangun ie, diet gaam tange, “Watong, numehet Watong, dahat wara ruhruh.” Io, Jisas ga taman tut gaam tigal no dadaip ma ira tamat na pakananoh. Io, no dadaip ga pataam ma no taah kom ga malile.
LUK 8:25 Ma ga tange ta diet, “Ahe ira numuat nurnuruan?” Diet ga karup ma ra bunurut diet gaam tangtange harbasiane ta diet bia, “Sige iakan? I kure no dadaip ma ira pakananoh at mah ma dir taram ie!”
LUK 8:26 Io, diet ga hanuat taar tano hanuo audiet ira Gerasen nong i la kis taar tiga mes na palpal tano taah kom tano hanuo Galili.
LUK 8:27 Bia ga karwas hut u na wasasar tiga tunaan mekaia tano taman hutet ga harsomanei. Ira sakana tanuo diet ga sasoha tana ma baak at um gabe tabuna sulu. Pa git kiskis tiga hala sen bia git nohnoh ta ira matana haat na haratur.
LUK 8:28 Ing bia ga nes Jisas ga manga kakonga gaam puko taar napu menalua tana gaam tange naliu bia, “Jisas Natine God Nong i Lua Harsakit, waak u kis na gil iau! Iau saring ugu bia pa nu gil hangungut iau.”
LUK 8:29 Ga tange huo kanong Jisas gate tange hadadas tano sakana tanuo bia na suur sukun no tunotuno. Ma no burena hoken. Haleng na pakaan no sakana tanuo git ububui. Di ga kubus kahe ira iruo limana ma ira iruo kakine ma ra dadas na hidihidi sakit, di gaam git manmano bat ie. Iesen git raprapat ira winwisaan ma no sakana tanuo git hanghagut ie bia na hilau ta ira malubil.
LUK 8:30 Io, Jisas ga tiri ie bia, “Sige no hinsaam?” Ga balui, “Arip ma Arip,” kanong a haleng ira sakana tanuo gate sasoha tana.
LUK 8:31 Ma diet ga sasaring marmaris taar ta Jisas bia pa na tar ra dadas na nianga ta diet bia diet na haan tano Lamlamana Lulur.
LUK 8:32 Io, ma a haleng na bore diet ga iaiaan tano gagena uladih hutet. Ma ira sakana tanuo diet ga sasaring marmaris ta Jisas bia na bale se diet, diet naga sasoha ta ira bore.
LUK 8:33 Io, ira sakana tanuo diet ga suur sukun no tunotuno ma diet ga sasoha balik ta ira bore. Ma ira bore bakut diet ga hilau suur tano ula habo, diet gaam a konga tano tamat na taah kom.
LUK 8:34 Ma bia ira ut na balaura bore diet ga nes huo, diet ga hilau laah, diet gaam hinawas kaia tano taman ma ta ira katon mah hutet.
LUK 8:35 Io, ira matanaiabar diet ga haan wara nesnes no linge gate hanuat. Bia diet ga haan tupas Jisas diet ga nes leh no tunotuno nong ira sakana tanuo diet gate suur laah tana. Ma ga kis taar hutet ra kaki Jisas. Gate sigasigam um ma no uno lilik mah gate palai. Ma diet ga burut.
LUK 8:36 Diet ing diet gate nas iakano linge diet ga hinawase ira matanaiabar bia Jisas ga halangalanga hohe iakano tunotuno nong ira sakana tanuo diet gate sasoha taar tana.
LUK 8:37 Io, ira matanaiabar bakut ta ira subaan audiet ira Gerasen diet ga saring Jisas bia na haan sukun diet kanong a tamat na ramramin gate kap diet. Io kaik, ga kawaas balin tano mon gaam haan laah.
LUK 8:38 Ma no tunaan nong ira sakana tanuo diet gate suur laah tana ga sasaring marmaris ta Jisas bia na tiktika mei sen bia Jisas ga tule sei, gaam tange bia, “Tapukus ukaia ra num hala ma nu hinawas utano tamat na linge hohe God i te gil tar ie taam.”
LUK 8:39 Io, no tunotuno ga haan laah gaam hinawas hanahaan tano taman bakut bia a tamat na linge hohe Jisas gate gil tar tana.
LUK 8:40 Ma bia ing Jisas ga tapukus, io, a tamat na matanaiabar diet ga harsomanei ma ra kanakana kanong diet ga nunure bia na hanuat.
LUK 8:41 Io, tiga tunotuno no hinsana Iaros ga hanuat. Aie tiga watong nong ga harbalaurai ta tiga hala na lotu audiet ira Iudeia. Ga me puko taar menalua ta ira kaki Jisas ma ga ianga marmaris tana bia na haan tano uno hala.
LUK 8:42 Ga sasaring huo kanong ga mon tiga nat na hahine nong ga wara sangahul ma iruo ira uno tinahon. Ma no hinasik ga wara minaat. Ma bia Jisas ga hanahaan na ngaas no tamat na matanaiabar diet ga harsibitsibit mur ie.
LUK 8:43 Ma ga mon tiga hahin nong ga sam dadara ta ira sangahul ma iruo na tinahon ma taie tiga nong ga petlaar bia na halangalangai.
LUK 8:44 Ga hanuat menamuru Jisas ga me sigire no ngus na kiniasine ma kaik at mon no dadara ga pataam.
LUK 8:45 Jisas ga tiri, “Sige i sigire iau?” Bia diet bakut diet ga harus isei, Pita ga tange bia, “Watong, no tamat na matanaiabar diet harsibitsibit, diet hartaguniguni taar taam.”
LUK 8:46 Iesen Jisas ga tange, “Iau nunure bia tiga nong i te sigire iau kanong iau hamaan bia a mon dadas i te suur laah tagu.”
LUK 8:47 Ma bia no hahin ga palai bia pa na tale bia na susuhai, ga dedar huat ga me puko menalua ta ira kaki Jisas. Ma ga hinawas palai ra matmataan ta ira matanaiabar bakut bia ga sigirei warah. Ga hinawase diet mah bia ga langalanga gasien hohe.
LUK 8:48 Io, Jisas ga tange tana, “Natigu, no num nurnur i te halon ugu. Nu haan tatohun.”
LUK 8:49 Io, bia Jisas ga iangianga baak, tiga tunotuno ga hanuat meram tano hala tane Iaros gaam tange bia, “No nat na hahim i te maat. Waak u nangnanget baak ma no tena harausur.”
LUK 8:50 Ma sen bia Jisas ga hadade iakan ga tange ta Iaros, “Waak u burburut. Nu nurnur sen mon ma na langalanga.”
LUK 8:51 Ma bia ga hanuat tano hala ta Iaros pa ga haut leh tari bia diet na laka tika mei, iesen Pita, Jon, ma Jemes sen mon tika ma no rana sus ma no pawasine no hinasik.
LUK 8:52 Ira matanaiabar diet ga susuah no hinasik iesen Jisas ga tange, “Waak muat ra sunuah. No hinasik pai maat. I kubaba mon.”
LUK 8:53 Diet ga kurus balik ma diet ga kukutur tana kanong diet ga nunure tar bia gate maat.
LUK 8:54 Sen bia ga palim no limana no hinasik gaam tatau, “Hinasik, tut naliu!”
LUK 8:55 Io, ga lon balin ma kaik at mon ga taman tut. Ma Jisas ga tange ta diet bia diet na tar ta linge tana naga ien.
LUK 8:56 No rana sus ma no pawasine no hinasik dir ga karup iesen Jisas ga hakatom dir bia waak dir hinawase tiga nong ta kaiken ra linge.
LUK 9:1 Bia Jisas ga tatau hulungan ira sangahul ma iruo na bulu na harausur ga tar no dadas ta diet bia diet na harkurai ta ira sakana tanuo ma ta ira matahu minaset, waing diet naga tule hasur se ira sakana tanuo ma diet naga kap se ira mangana minaset.
LUK 9:2 Ga tule diet bia diet na harpir utano kinkinis na harkurai ma ra harbalaurai ta God ma bia diet na halangalanga ira ina minaset.
LUK 9:3 Ga tange ta diet, “Muat pa na kap ta linge tano numuat hinahaan. Waak ra buko, raat, nian, bia kinewa. Ma waak muat kap ta harkios.
LUK 9:4 Ma bia muat laka taar tiga hala muat na kis taar kaia tuk taar bia muat na haan talur iakano taman.
LUK 9:5 Ma bia pa di bale leh muat tiga taman, io, bia muat hanan laah sukun iakano taman muat na hatidir se tar ira pulungar ta ira lapara kaki muat. Muat na gil huo waing na hakilang diet tano sakana magingin diet gil tar ie ta muat.”
LUK 9:6 Io, diet ga haan laah ma diet ga hanahaan harbasia ta ira tamtaman. Diet ga harharpir utano tahut na hinhinawas ma diet ga halangalanga ira matanaiabar ta ira katon bakut.
LUK 9:7 Ma Herot no tamat na ut na harkurai ga hadade uta kaiken ra linge. Ma ga manga nguanguo kanong ari a matanaiabar diet ga tangtange bia Jon gate lon huat balin talur ra minaat.
LUK 9:8 Ma ari a mes diet ga tangtange bia Elaija gate harapuasa. Ma ari diet ga tangtange bia tiga tangesot menalua sakit gate lon balin.
LUK 9:9 Iesen Herot ga tange, “Iau ga dako Jon. Io kaik, sige balin iakan iau hadade ira nianga utana?” Io, ga walar bia na nes Jisas.
LUK 9:10 Bia ira apostolo diet ga tapukus diet ga hinawase Jisas uta ira pinapalim diet gate gil. Ma Jisas ga lamus leh diet ma diet ga tika mei, diet sen mon, ukaia tiga taman di ga kilam ie bia Betsaida.
LUK 9:11 Sen bia no tamat na matanaiabar diet ga ser leh utano uno hinahaan, diet gaam mur ie. Ga bale leh diet ma ga iangaianga ta diet utano kinkinis na harkurai ma ra harbalaurai ta God. Ma ga halangalanga diet ing diet ga supi tikai bia na halon diet.
LUK 9:12 Ga matmatarahien um ma ira sangahul ma iruo ga haan tupas Jisas, diet ga tange tana, “Tule se kaike ra haleng na matanaiabar bia diet naga haan ukaia ta ira taman hutet kanong dahat kis taar kai ra malubil. Diet naga kap nian ma ira subaan wara ninahon.”
LUK 9:13 Io, Jisas ga balu diet, “Muat at, muat na tabar diet.” Ma diet ga balui, “A liman na katona beret ma airuo kirip mon ken het bul tar. Da haan dak da kul nian baling uta kaiken ra tamat na matanaiabar?”
LUK 9:14 Diet ga tange huo kanong a liman na arip na tunaan kaike diet ga kis taar. Iesen Jisas ga tange ta ira uno bulu na harausur, “Muat hakisi diet a limliman sangahul ta ira matanaiabar.”
LUK 9:15 Io, ira bulu na harausur diet ga gil huo ma ira matanaiabar bakut diet ga kis napu.
LUK 9:16 Jisas ga kap ira liman na katona beret ma ira iruo kirip, gaam tadeng uram ra mawe, ma gaam sasaring uta ira nian. Ga pidik ira beret gaam tar tikane ma ira kirip ta ira bulu na harausur diet gaam palau no tamat na matanaiabar.
LUK 9:17 Diet bakut diet ga iaan diet gaam hahos. Ma ira bulu na harausur diet ga sangan ra sangahul ma iruo na kalot ma ira subana diet ing diet ga ien subaan.
LUK 9:18 Tiga pakaan Jisas ga saasaring kumaan ma ira uno bulu na harausur sen mon tika mei. Ma ga tiri diet bia, “Kaike ra tamat na matanaiabar diet la tangtange bia iau sige?”
LUK 9:19 Diet ga balui bia, “Ari diet tange bia Jon no ut na baptais, ma ari bia no tangesot Elaija dak, ma ari at mah bia ta tiga nong ta ira mes na tangesot menalua sakit i te lon balin.”
LUK 9:20 Io, ga tiri diet, “Ma muat, muat tange bia iau sige?” Io, Pita ga balui, “Augu no Mesaia at gar ta God.”
LUK 9:21 Iesen Jisas ga hakatom hadadas diet bia waak diet hinawase ta tiga nong ta iakan.
LUK 9:22 Io, Jisas ga tange, “Nong a Tunotunoi na kilingane ra haleng na haraubaal. Ma ira tamat, ira tamat na ut na pakila lotu, ma ira tena harausur ta ira harkurai ta Moses diet na harus isei ma da ubu bing ie. Iesen tano aitul a bung namur God na hatut habaling ie.”
LUK 9:23 Io, ga tange ta diet bakut, “Bia ing u wara murmur iau, na maat ira num sinisip ta iakan ra ula hanuo. Ira kaba bungbung nu pusak no num kabai ma nu mur iau.
LUK 9:24 Iau tange huo kanong sige ta tiga nong i lik hatamat sen mon no uno nilon, pa na hatur kawase no uno nilon tutun. Iesen bia sige nong i bale tar no uno nilon wara gaiegu na hatur kawase um no uno nilon tutun.
LUK 9:25 Ma na hatahutne tiga nong hohe, bia na tinane iakan ra ula hanuo bakut sen bia na ber tano uno nilon tutun naga haan sukun ie?
LUK 9:26 Bia ta tiga nong i harus ise iau ma ira nugu nianga, io, namur Nong a Tunotunoi na harus isei bia na hanuat ma no minarine tika ma no minamar tano ana Sus ma ira halhaliana angelo.
LUK 9:27 Muat hadade baak! Tari ta muat kaiken pa na maat tuk taar bia muat na nas no kinkinis na harkurai ma ra harbalaurai ta God.”
LUK 9:28 Ga hutet bia na liman ma itul na bung namur ta iakan ra nianga ma Jisas ga lamus Pita, Jon, ma ne Jemes tika mei. Ma dal ga haan uram tiga uladih wara sinasaring.
LUK 9:29 Ma bia ga saasaring no matmataan tana ga ries ma ira kiniasine ga pilpilakas hoira hile.
LUK 9:30 Ma kaik at mon airuo tunotuno dir ga wawor mei, ne Moses dir ma Elaija.
LUK 9:31 Dir ga hanuat ma ra tamat na minamar ma dal ga wawor ma Jisas utano uno hinahaan sukun iakan ra ula hanuo nong ga hutet bia na pakilei aram Ierusalem haruat tano sinisip ta God.
LUK 9:32 Pita ma ira uno iruo harwis dal ga manga sumsumela. Sen bia dal ga pada taar dal gaam nes no minarine ma ira iruo tunaan mah ing dir ga tur tika taar mei.
LUK 9:33 Ma bia ira iruo tunaan dir ga wara hinahaan sukun Jisas, io, Pita ga tange tana, “Nugu Watong, i bilai ing metal kis kai. I tahut bia metal na gil aitul a palpalih, tikai anum, tikai tane Moses, ma tikai tane Elaija mah.” Pita pa ga nunure bia asa kaike ga tange.
LUK 9:34 Io, ma bia ga iangianga baak a bahuto ga hanuat gaam a pulus diet ma dal ga burut ing bia no bahuto ga burung dal.
LUK 9:35 Ma ra ingana tiga nong ga ianga huat narako tano bahuto gaam tange, “No natigu iakan nong iau te gilamis ie. Mutal na hadadei!”
LUK 9:36 Ma bia ira nianga ga pataam dal ga nanaas ma Jisas sen um. Ma ira itul a bulu na harausur dal pa ga hinawase ta tiga nong ta iakano pakana bung ta ira linge dal gate nes.
LUK 9:37 Tano bung menamur bia dal ga hansur meram ra uladih a tamat na matanaiabar ga harsomane Jisas.
LUK 9:38 Ma tiga tunaan nalamin ta ira matanaiabar ga tatau, “Tena harausur, maris, iau saring ugu bia nu nes baak no natigu kanong a bulukasai!
LUK 9:39 A sakana tanuo i la ububui ma kaik at na kup mismisien. I la raprapusanei napu ma ra buse i la suursuur tano hana. I la manga hagahei ma pa na suur laah gasien.
LUK 9:40 Iau ga manga saring ira num bulu na harausur bia diet na hasur sei iesen diet pa ga petlaar.”
LUK 9:41 Jisas ga babalu bia, “Muat ira sakana matanaiabar katin, muat pai nurnur warah? Maris! Pa ni kis lawas tika ma muat kai napu wara harharahut muat waing muat naga nurnur. Io, lamus no natim ukai.”
LUK 9:42 Ma bia no bulu ga hanhanuat, no sakana tanuo ga rapusanei tano pise gaam ubu hangulongulo ie. Iesen Jisas ga ngaluane no sakana tanuo gaam halangalanga no bulu ma ga tar se habaling ie tano ana sus.
LUK 9:43 Ma diet bakut diet ga karup tano tamat na dadas ta God. No kinarup ta ira matanaiabar ga hanahaan baak uta ira mangana linge Jisas ga gil ma Jisas ga tange ta ira uno bulu na harausur hoken:
LUK 9:44 “Muat hadade timaan ken iau wara tangtange ta muat. Da tar se Nong a Tunotunoi ta ira lima diet ira tunotuno.”
LUK 9:45 Iesen diet pa ga palai ta iakan ra nianga. Ga kis mun ta diet kaik diet pa gaam nunure kilam ie. Ma diet ga burut bia diet na tiri ie utana.
LUK 9:46 Ira bulu na harausur diet ga harhargor bia sige ta diet i tamat.
LUK 9:47 Ma Jisas ga nunure ira udiet lilik kaik gaam lamus leh tiga nat na bulu ga hatur ie hutet tana.
LUK 9:48 Io, ga tange ta diet, “Ing bia sige ta nong i bale leh kan ra nat na bulu kanong i nunure bia iau sip huo, io, i bale leh iau mah. Ma bia sige i bale leh iau, i bale leh mah nong ga tule iau ukai. Io, sige nong i hansiksik nalamin ta muat bakut, aie no tamat sakit.”
LUK 9:49 Ma Jon ga tange, “Nugu Watong, mehet ga nas tupas tikai ga hasur se ira sakana tanuo ma no hinsaam. Ma mehet gaam tigal ie kanong pai la murmur dahat.”
LUK 9:50 Iesen Jisas ga tange tana, “Waak muat tigal ie kanong bia tikai pai malok ta muat, anumuat harwis ie.”
LUK 9:51 Bia ga hutet no pakana bung bia God na kap haut ie uram ra mawe, Jisas ga bul hadadas no uno lilik bia na haan uram Ierusalem ma gaam tur leh wara hinahaan ukaia.
LUK 9:52 Ma ga tule hanalue ari tunotuno na kap nianga. Ma diet ga laka tiga taman gar na Samaria wara tinaguro uta Jisas.
LUK 9:53 Iesen ira matanaiabar mekaia diet pa ga bale leh ie kanong diet ga nunure bia ga hanahaan uram Ierusalem.
LUK 9:54 Ing Jemes ma Jon ira iruo bulu na harausur dir ga nes huo, dir ga tirii, “Watong, hohe, u sip bia mir na tau hasur ra iaah meram ra mawe wara haliare diet?”
LUK 9:55 Iesen Jisas ga talingane dir ma ga ngaluane dir.
LUK 9:56 Io, diet ga haan taar tiga mes na taman.
LUK 9:57 Ma bia diet ga hanahaan na ngaas tikai ga tange ta Jisas bia, “Iau ni murmur ugu ta ira katon bakut ing nu hanahaan kaia.”
LUK 9:58 Jisas ga balui, “Ira rakaia na paap, audiet mon munmun, ma ira maan aram ra mauho, a mon posi diet. Iesen bia Nong a Tunotunoi, taie ta ngasiana tus.”
LUK 9:59 Ma Jisas ga tange ta tiga mes na tunotuno, “Nu mur iau.” Iesen ga balui, “Nora Watong, nu haut se baak iau bia ni haan, nigi a bus no agu sus.”
LUK 9:60 Jisas ga tange tana, “Nu waak tar ira minaat bia diet na gil ira linge ing a mon minaat ine. Iesen nu haan ma nu harpir tano kinkinis na harkurai ma ra harbalaurai ta God.”
LUK 9:61 Ma tiga mes balik ga tange, “Watong, iau ni mur ugu, iesen nu haut se baak iau bia ni tapukus nigi a nes ta baak ira hinsakagu.”
LUK 9:62 Jisas ga tange tana, “Nong i wara murmur iau ma i te talingan tapukus, io, pai haruat tano kinkinis na harkurai ma ra harbalaurai ta God.”
LUK 10:1 Ma namur ta iakan no Watong ga tibe a liman ma iruo na sangahul ma iruo ira mes na tunotuno ma ga tule diet airiruo nalua tana ta ira tamtaman ing ga wara hinahaan ukaia.
LUK 10:2 Ma ga tange ta diet, “A haleng na nian i te matuko, iesen a bar hanawaan mon ira ut na kinkilaan. Io, muat na saring nong auno ira matuko na nian, naga tule a mon ut na kinkilaan taar tano uno lalong.
LUK 10:3 Muat haan. Iau tultule muat hoira nat na sipsip ukaia nalamin ta ira tamat na rakaia na paap.
LUK 10:4 Waak muat kapkap ta kinewa bia tiga raat. Ma muat pa na kap ta pala lamaas na kaki muat wara harkios. Muat pa na kaang leh tikai tano ngaas ma muat na habir mon.
LUK 10:5 “Ma ing nu laka tiga hala, kaik at nu tange, ‘Iau sip bia a malum na kis ta kan ra hala.’
LUK 10:6 Ma bia a malum na tunotuno ie ke, io, nu waak tar no num sinisip bia a malum na kis taar tana. Iesen bia ing taie, nu lik luban se no num nianga na haridaan bia a malum pa na kis taar ta iakano tunotuno.
LUK 10:7 Nu kis taar narako ta iakano hala, ma a mangana sa ing diet na tabar ugu mei nu ien ma nu mame kanong i takodas bia tiga ut na pinapalim na kap no uno kunkulaan.
LUK 10:8 “Bia nu laka tiga taman ma di bale leh ugu, nu ien ta sa ing di tabar ugu mei.
LUK 10:9 Halangalanga ira ina minaset ing diet kis taar kaia ma nu hinawase diet bia, ‘No kinkinis na harkurai ma ra harbalaurai ta God i hutet ta muat.’
LUK 10:10 Iesen ing bia nu laka tiga taman ma diet pai bale leh ugu nu haan ta ira ngaas ta iakano taman ma nu tange, ‘Kaike ra pulungar tano numuat taman ing i patep taar ta ira kaki mir, io, mir na salap se wara haminas ta muat bia muat te gil ra sakena ta mir. Sen na tahut bia muat na palai ta iakan ra linge bia no kinkinis na harkurai ma ra harbalaurai ta God i hutet.’
LUK 10:12 Muat palai taar bia God na gil tiga tamat na harpidanau ta Sodom tano pakana bung na harkurai nong na hanuat namur. Iesen i tutun sakit bia no harpidanau tano taman nong pa na bale leh muat na manga tamat tano harpidanau ta Sodom.
LUK 10:13 “Maris ta muat me Korasin, na kabit muat! Maris mah ta muat me Betsaida! Bia di gor gil ira dadas na gingilaan na kinarup kaia Tair ma Saidon, hoing iau te gil ta mur ira iruo taman, io, dir gor te lilik pukus. Dir gor te bul hagasiaan ira bilingana put na maal ma dir gor te mormor ma ra tahuna iaah wara haminas bia dir te lilik pukus. Iesen dir pa ga gil huo!
LUK 10:14 God na gil tiga tamat na harkurai ta Tair ma Saidon tano pakana bung na harkurai nong na hanuat namur. Iesen na gil tiga tamat na harkurai sakit ta mur Korasin ma Betsaida.
LUK 10:15 Ma muat me Kapeneam, waak muat latlat ira hinsa muat uram ra mawe! Muat na hansur uras napu ra subaan ta ira minaat!
LUK 10:16 “Ing bia sige tikai i taram muat ira nugu bulu na harausur, i taram iau. Bia i harus ise muat, i harus ise iau. Iesen sige tikai i harus ise iau, i harus ise mah nong ga tule iau ukai.”
LUK 10:17 Io, ira liman ma iruo na sangahul ma iruo na tunotuno ga tapukus ma ra gungunuama diet gaam tange, “Watong, mehet ga papalim ma no hinsaam ma ira sakana tanuo at diet ga taram mehet.”
LUK 10:18 Jisas ga balu diet bia, “Iau ga nes Sataan ma ga puko meram ra mawe hoira hile.
LUK 10:19 Iau te tar ra dadas ta muat bia muat naga tale bia muat na papasuane ira sui ma ira talbore. Ma ira numuat dadas na sakit ira dadas bakut tano adahat suk. Taie tiga linge na hagahe muat.
LUK 10:20 Iesen waak muat guama bia ira sakana tanuo diet taram muat. I tahut bia muat na guama balik bia God i te pakat kahe ira hinsa muat aram ra mawe.”
LUK 10:21 Ta iakano pakana bung no Halhaliana Tanuo ga hahungi Jisas ma ra gungunuama kaik Jisas gaam tange, “Iau pirlat ugu Mama, a Watong aram ra mawe ma kai mah napu, kanong u ga suhe kaiken ra linge ta diet ira ut na mintota ma u ga hapuasne ta diet ing diet pai mintota. Masa, Mama! U ga gil huo kanong u guama bia na ngan huo.
LUK 10:22 Mama gate tar se bakut ira linge tagu. Taie ta nong pai nunure no Natine—nana Sus sen mon. Ma taie ta nong pai nunure nana Sus—no Natine sen mon, ma diet mah, ing no Natine i wara hapuasnei ta diet.”
LUK 10:23 Io, ga talingane ira uno bulu na harausur gaam tange kumaan ta diet bia, “Diet daan ing diet nas ira linge ing muat nas.
LUK 10:24 Ma i tutun kanong a haleng na tangesot ma haleng na tamat na lualua na gil harkurai mah, diet ga manga sip bia diet na nas kaiken muat te nas. Iesen diet pa ga nas. Ma diet ga manga sip mah bia diet na hadade kaiken muat te hadade. Iesen diet pa ga hadade.”
LUK 10:25 Tiga pakana bung tikai nong a keskes ie ta ira harkurai ta Moses ga tur huat wara walwalar Jisas. Ga tange, “Tena harausur, asa ing iau ni gil wara hatur kawase no nilon hathatikai?”
LUK 10:26 Jisas ga balui bia, “Asa ing di ga pakat ta ira harkurai ta Moses ma u la waswas?”
LUK 10:27 Ga balui, “‘Nu sip no Watong no num God ma no katim bakut, no num nilon bakut, no num dadas bakut, ma no num lilik bakut.’ Ma ‘nu marse no hinsakaam hoing u marse habaling at ugu.’”
LUK 10:28 Jisas ga tange, “No num binabalu i takodas. Nu gil huo ma nu lon.”
LUK 10:29 Iesen pa ga sip bia na nanaas hirhir kaik gaam tiri Jisas bia, “Sige ira hinsakagu?”
LUK 10:30 Ma Jisas ga balui hoken: “Tiga tunotuno ga hanansur meram Ierusalem uras Ieriko ma ari a holmatau diet ga bu kahei. Diet ga kinau ira kiniasine, diet ga lawat ie, diet gaam waak tar ie bia na maat.
LUK 10:31 Ma tiga ut na pakila lotu ga hanahaan mon ta iakano ngaas. Ma bia ga nes no tunotuno ga sakit ie tano mes na palpal.
LUK 10:32 Ma tiga tultulai na lotu tano hun ta Lewi ga gil huo mah. Ing bia ga hanuat ta iakano katon ma ga nes ie, io, ga sakit ie tano mes na palpal.
LUK 10:33 Sen bia tiga Samaria ga hananhaan gaam hanuat taar tano tunotuno. Ma bia ga nes ie ga marsei.
LUK 10:34 Ga haan tupas ie, gaam ule timaan ira uno unien. Io, ga bul haut no tunotuno tano uno donki at ma ga lamus tar ie tiga hala na wasire, gaam balaurei.
LUK 10:35 Ma tano bung manamur no Samaria ga sukuo airuo kinewa ma ga tar dir tano ut na harbalaurai tano hala na wasire. Ma ga tange tana bia, ‘Nu balaurei ma ing ni tapukus balin iau ni balu pukus anum ta kinewa ing u te banot auno ta sunupi.’
LUK 10:36 “Io, sige ta kaiken ra itul ing u lik bia a hinsakana ta iakan ra tunotuno nong ira holmatau diet ga bui?”
LUK 10:37 Ma no keskes ta ira harkurai ta Moses ga tange, “Nong ga marsei.” Ma Jisas ga tange, “Nu haan ma nu gil mah huo.”
LUK 10:38 Ma bia Jisas ma ira uno bulu na harausur diet ga hananhaan ra ngaas diet gaam hanuat taar tiga taman. Ma tiga hahin no hinsana Marta git kiskis kaia ma ga bale leh ie tano ngasiana.
LUK 10:39 Ma a mon tiga sahine, no hinsana Maria. Ma Maria ga kis taar ta ira kaki Jisas gaam hanhadade ira uno nianga.
LUK 10:40 Sen bia Marta ga manga lik ira pinapalim pai tagure baak, kaik gaam hanuat taar tana ma ga tiri ie bia, “Watong, pau manga lik bia no sahigu i te haan talur iau bia iau sen mon ni gil ira pinapalim? Tange tane bia na harahut iau!”
LUK 10:41 Ma no Watong ga tange tana, “Marta, Marta, u ngarngarau uta ira haleng na linge ma tiga linge sen mon di supii. Maria i te gilamis no bilai ma pa da kap se tar ie tana.”
LUK 11:1 Tiga bung Jisas ga saasaring aram tiga katon ma bia ga pataam tikai ta ira uno bulu na harausur ga tange tana, “Watong, nu hausur mehet wara sinasaring hoing Jon ga hausur ira uno bulu na harausur mah.”
LUK 11:2 Io, ga tange ta diet, “Bia muat sasaring, muat na tange hoken: Mama, mehet sip bia da nes kilam no hinsaam bia i halhaal, ma bia no num kinkinis na harkurai ma ra harbalaurai na hanuat.
LUK 11:3 Mehet sip bia nu tabar mehet ma ira amehet nian ing i haruat ma tiga bung.
LUK 11:4 Ma nu lik luban se ira numehet magingin sakena hoing mehet la liklik luban se ira magingin sakena di gil ta mehet. Ma mehet sip mah bia nu balaure bat mehet ta ira harwalaam.”
LUK 11:5 Ma ga tange ta diet, “Nu lik ta tikai ta ira num harwis. Tiga pakaan nu haan tano hala tano num harwis ra tingena lohan ma nu tange tana, ‘Tasigu, taie ta nian?
LUK 11:6 Nugu tiga wasire i te mur ra talona ngaas ma kaiken mon i haan tupas iau ma taie ta nian wara tamtabar ie me.’
LUK 11:7 “Io, no tunotuno aram narako na balui, ‘Waak u kis na gil iau! No matanangas i te tabunus ma metal tamaan te noh taar. Iau pai tale bia ni tut ma ni tabar ugu ta linge.’
LUK 11:8 Io, iau tange ta muat, a linge bia ing bia no uno harwis, iesen pa na tabar ie ma tiga linge. Iesen na tut ma na tabar ie haruat ma no uno sunupi kanong pa na sangeh wara sinasaring.
LUK 11:9 “Io, iau tange ta muat, bia nu sasaring nu hatur kawase iakan ra linge. Ma bia u sisilih, nu silihe tupas leh. Ma bia u pipidil, God na papos leh ugu.
LUK 11:10 Kaik huo, nong i sasaring na hatur kawase ira linge i saring. Ma nong i sisilih na silihe tupas ira linge i silsilihe. Ma nong i pipidil, God na papos leh ie.
LUK 11:11 “Sige nalamin ta muat ira mama i tale bia na tar tiga sui, ing no natine i saring kirip?
LUK 11:12 Ma bia ing i saring tulur, na tabar balik ie ma tiga talbore?
LUK 11:13 Ing bia muat ira ut na sakena, muat la nunure tar wara tamtabar ira nati muat ma ra bilai na linge, io, iakano i hamines bia Mama aram naliu i manga nunure tar wara tamtabar diet ma no Halhaliana Tanuo ing diet saring ie.”
LUK 11:14 Ma Jisas ga tultule hasur se tiga sakana tanuo nong ga sasoha taar tiga tunotuno, kaik gaam ngulo. Ma bia no sakana tanuo ga suur laah, no ngulo ga ianga ma no tamat na matanaiabar diet ga manga karup.
LUK 11:15 Iesen ari ta diet, diet ga tange, “Jisas i haruat wara tultule hasur se ira sakana tanuo kanong Belsebul no watong audiet ira sakana tanuo i te tar ra dadas tana kaik gi gilgil huo.”
LUK 11:16 Ma ari a mes diet ga wara walwalar ie, kaik diet gaam saring ie bia na pakile tiga hakilang meram ra mawe.
LUK 11:17 Sen bia Jisas ga nunure ira udiet lilik gaam tange ta diet, “Bia tiga huntunaan pai tur tika, ari a mes diet na hamau no taman. Ma bia tiga hatatamaan pai tur tika, na puko.
LUK 11:18 Ma bia no huntunaan ta Sataan pai tur tika, na tur dadas hohe? Iau tange huo kanong muat tange bia iau tule hasur se ira sakana tanuo ma no dadas ta Belsebul.
LUK 11:19 Ma bia i tutun bia iau tule hasur se ira sakana tanuo ma no dadas ta Belsebul, io, ira numuat tunotuno diet kapkap dadas mah mekaia ho Belsebul wara tultule hasur se ira sakana tanuo. Io, ira numuat tunotuno at, diet haminas bia muat ronga kanong diet mah diet gil huo.
LUK 11:20 Ma bia muat ronga, ma iau tule hasur se ira sakana tanuo ma no dadas ta God, io, i haminas bia no kinkinis na harkurai ma ra harbalaurai ta God i te haan tupas muat.
LUK 11:21 “Bia ing tiga dadas na tunotuno i manga balaure no uno hala ma ra kusur ma wise, pai tale bia tikai na kinau tiga linge.
LUK 11:22 Iesen bia tikai nong i manga dadas tana i harubu mei ma i bu hagahei, na kap se bakut no uno kusur ma no uno wise ing no tunotuno ga lik bia na laro taar me. Ma no dadas na tunotuno na palau ira uno harwis ma ira linge i te kinau.
LUK 11:23 “Bia tikai pai no nugu harwis, i malok tagu. Ma bia tikai pai harahut iau, i hagahe iau.
LUK 11:24 “Bia tiga sakana tanuo i suur laah tiga tunotuno, i haan hurbit ta ira mamasi na katon ta ira hanuo bia wara sinangeh, sen bia i naanaas puo. Io, i lik hoken: ‘Iau ni tapukus baling tano ngasiagu.’
LUK 11:25 Ma bia i hanuat ukaia i nes bia i taguro taar bia na laka baling.
LUK 11:26 Io i haan, i a lamus habaling a liman ma iruo na mes na sakana tanuo, diet manga sakena tana. Ma diet laka kaia ma diet gi kis um kaia. Ma no nilon um ta iakano tunotuno na manga sakena ta ing nalua.”
LUK 11:27 Ma bia ing Jisas ga tangtange kaike ra linge, tiga hahin nalamin tano tamat na matanaiabar ga kakonga naliu bia, “I daan no pawasim nong ga kaha ugu ma ga hasus ugu.”
LUK 11:28 Iesen ga tange, “Diet daan balik ing diet hadade ira nianga ta God ma diet taram ie.”
LUK 11:29 Ma bia no winawas tano tamat na matanaiabar ga wara tamtamat hanahaan, Jisas ga tange, “Ira matanaiabar katin diet sakena. Diet sip bia ni pakile tiga hakilang. Iesen diet pa na nas ta hakilang. Diet na nas sen mon no hakilang ta Iona.
LUK 11:30 Iona ga tiga hakilang ta ira tunotuno me Niniwe. Hokaiken mah Nong a Tunotunoi na tiga hakilang ta ira matanaiabar ing diet lon katin.
LUK 11:31 Tano bung na harkurai no tamat na hinagalam na gil harkurai me Siba na tibe pinpin muat kanong ga hanuat me tapaka sakit wara hanhadade no mintota gar ta Solomon. Ma iau tange ta muat, tiga tunotuno i tamat ta dir ma ne Solomon iakanik.
LUK 11:32 Ma tano bung na harkurai mah ira tunotuno me Niniwe na tibe pinpin muat kanong diet ga lilik pukus ing diet ga hadade no harpir ta Iona. Ma iau tange ta muat, tiga tunotuno i tamat ta dir ma ne Iona iakanik.
LUK 11:33 “Taie tikai pa na halulungo tiga laam ma na bul ie tiga subaan ing i mun. Ma pa na tubus mah ie. Taie. Na bul ie tano uno tuntunur waing diet ing diet na laka diet na nes no uno murarang.
LUK 11:34 Ira mataam dir hoira lulungo wara hapalai ugu. Ing bia ira iruo mataam dir manga bilai, no num kidilona nilon bakut na manga palai. Iesen bia ira iruo mataam dir sakena, na ngan hoing bia no num kidilona nilon i kankado.
LUK 11:35 Io, harbalaurai timaan bia no lulungo tano num nilon kabi kankado.
LUK 11:36 Ma hoing iau te tange, ing bia no num kidilona nilon i palai harsakit ma taie ta kankado tana, io, na palai harsakit hoing bia tiga lulungo i murarang taar taam.”
LUK 11:37 Ing Jisas ga ianga huat, tiga Parisi ga titing leh Jisas bia dir na iaan. Io, ga haan gaam a kis tano suuh na nian.
LUK 11:38 Iesen no Parisi ga karup kanong ga nes bia Jisas pa ga luena taptapir laah baak wara nian.
LUK 11:39 Io, no Watong ga tange tana hoken: “Ai, muat ira Parisi muat haruat ma tiga gingop bia tiga dis ing di gis sen leh mon no tihine me nataman. Iesen aram narako muat hung taar ma ra magingin sakena ma ira linge mah muat manga masmasingan urie.
LUK 11:40 Muat ira ba! Hohe, nong ga gil no tihine pa ga gil tikanei ma no palpal me narako at mah?
LUK 11:41 Iesen i tahut bia muat na tabar ira maris ma ira linge meram narako ta muat ma naga gamgamatien bakut ira linge wara uta muat.
LUK 11:42 “Maris ta muat ira Parisi, na kabit muat! Muat la saso ari a linge wara hanamnamien ira amuat nian, hoira kamahar, ira lobo, ma ira mangana ginagot na lalong. Ma hoing ira harkurai ta Moses i tange, muat la tartar ta God nong i sangahul mei ta kaike ra linge muat la saso. Iesen muat taklain ta ira magingin takodas ma ta ira sinisip tupas God. Io, gor takodas bia muat te tar kaiken ra linge tupas God ma muat pa gor malok mah wara murmur kaiken ra bilai na magingin.
LUK 11:43 “Maris ta muat ira Parisi, na kabit muat! Muat la sipsip ira kinkinis gar na tamat narakoman ta ira numuat hala na lotu. Ma muat la sipsip mah bia da kaang leh muat ta ira subaan di la hanhanuat hurlungen kaia.
LUK 11:44 “Maris ta muat, na kabit muat! Muat hoing ira midi pa di hakilang ing a tunotuno pai nes ma gi haan menaliu ine.”
LUK 11:45 Io, tiga keskes ta ira harkurai ga tange tana bia, “Tena harausur, ing bia u tange huo, u tange hagahe mah het.”
LUK 11:46 Ma Jisas ga babalu hoken: “Maris ta muat ira keskes ta ira harkurai ta Moses, na kabit muat! Muat la hapusak ira matanaiabar ma ira tirihuana kinakap ing diet la malmalalat me, iesen muat pai la gilgil ta dahin tun at wara harharahut diet.
LUK 11:47 “Maris ta muat, na kabit muat! Muat la gilgil ira bilai na haat na midi ta ira tangesot wara liklik leh diet. Iesen ira hintubu muat mon ing diet ga bu bing kaike ra tangesot.
LUK 11:48 Io kaik, muat suro haut hokaike bia muat haut ta ing ira hintubu muat diet ga gil. Diet ga bu bing ira tangesot ma muat la gilgil timaan ira udiet midi.
LUK 11:49 Io kaik, God ga ianga ma no uno minminonas hoken: ‘Iau ni tule tar ra tangesot ma ra apostolo ta diet. Diet na helar ta ari ma ari diet na bu bing.’
LUK 11:50 Io kaik, kaiken ra matanaiabar ma katin diet na kahe ra tinirih pane ira de diet ira tangesot bakut. Diet kaike di ga bu bing leh diet mekarawa laah tano hamhaburen tano ula hanuo, tur leh tano hiniruo tane Abel tuk taar tano hiniruo ta Sekaraia nong di ga bu bing ie nalamin tano hala na lotu tamat ma no suuh di la tuntun ira hartabar kaia. Masa, iau tange ta muat bia kaiken ra matanaiabar ma katin diet na kahe ra tinirih pane kaiken ra linge bakut.
LUK 11:52 “Maris ta muat ira keskes ta ira harkurai ta Moses, na kabit muat! Muat te kap se tar no linge wara papos no ngaas na kap minminonas. Muat at, muat pa gale laka ukaia ma muat te tur bat mah diet ing diet ga walwalar wara hinaan laka.”
LUK 11:53 Ing Jisas ga wara hinaan laah mekaia, ira Parisi ma ira tena harausur ta ira harkurai ta Moses, diet ga tur leh wara sase ira sakana nianga taar tana ma diet ga tirtiri girgir mah ie wara hakunii ta ira uno nianga.
LUK 12:1 Ma ta iakano pakana bung ari arip na matanaiabar diet gate hanuat tika, kaik diet gaam harpaspaas ta diet. Ma Jisas ga tur leh bia na ianga baak ta ira uno bulu na harausur. Ga tange hoken: “Muat harbalaurai ta ira is audiet ira Parisi. Iau iangianga uta ira udiet magingin na harababo.
LUK 12:2 Asa ing i pupulus taar na tapalas, ma asa ing i susuhai taar na harapuasa.
LUK 12:3 Asa ing muat te tange ra kankado da hadade ra kasakes. Ma asa ing muat te haramurungo ta ira talinga muat da kakongane ra matmataan na haruat.
LUK 12:4 “Iau tange ta muat ira nugu harwis, bia waak muat burte diet ing diet la bubu bing ira tunotuno mon, ma namur diet pai tale bia diet na gil habalin ta linge.
LUK 12:5 Iesen iau ni haminas ta muat bia sige nong i tahut bia muat na burtei. Muat na burte iakanong nong i tale bia na bu bing muat ma namur mah i mon baak ra dadas wara sase muat tano ula iaah. Masa, iakanong muat na burtei.
LUK 12:6 A hansik na kinewa mon i haruat bia nu kul a liman na seek. Iesen God pa na lik luban se tikai ta diet.
LUK 12:7 Tutun sakit, no amuat Sus i manga nunure muat. Ma iakan i palai taar ta muat kanong i nunure mah ira winawas ta ira pakana hi muat ta ira ulu muat. Waak muat burburut kanong no numuat lon i manga tamat ta ira seek.
LUK 12:8 “Ma iau tange ta muat, sige tikai i hinawas palai ra matmataan ta ira tunotuno bia auno iau, io, Nong a Tunotunoi na hinawas palai mah utana ra matmataan ta ira angelo ta God.
LUK 12:9 Iesen sige tikai i harus ise iau ra matmataan ta ira tunotuno, io, iau mah, ni harus isei ra matmataan ta ira angelo ta God.
LUK 12:10 Ma sige nong na ianga hagahe Nong a Tunotunoi, iakano sakena God na lik luban sei. Iesen bia sige nong na ianga hagahe no Halhaliana Tanuo, God pa na lik luban se iakano magingin.
LUK 12:11 “Ma bia muat na tur ra matmataan gar ta diet ira ut na gil harkurai, ma bia da lamus muat uram narako ta ira hala na lotu gar na Iudeia, io, waak muat ra nginarau bia muat na tange hohe wara turtur bat ira udiet hartutung uta muat.
LUK 12:12 Kanong warah, no Halhaliana Tanuo na hausur muat uta sa ing muat na tange ta iakano pakana bung.”
LUK 12:13 Tiga tunotuno nalamin ta ira matanaiabar ga tange tana bia, “Tena harausur, namir sus i te maat. Io, nu tange tano tasigu bia na paleng harbasiane tar ira linge ing ga mat sukun.”
LUK 12:14 Ma Jisas ga babalu hoken: “Ai, sige ga bul iau bia ni kure mur? Ma sige mah ga bul iau bia ni paleng harbasiane kaike ra linge ta mur?”
LUK 12:15 Io, ga tange tiga nianga harharuat ta diet hoken: “Muat na manga harbalaurai! Muat na habatbat timaan muat tano magingin na gumut ma no nes kalak linge. No nilon gar tiga nong pai tahuat ta ira uno halengin linge.”
LUK 12:16 Io, ga hinawase diet ta kanin ra nianga harharuat: “No pise gar tiga watong ga manga hatahuat ra halengin nian.
LUK 12:17 Io, no uno lilik ga hilau hoken: ‘Iau ni gil hohe kaiken? Taie tiga subaan wara bulbul timaan tar ira nugu nian.’
LUK 12:18 Io, ga tange um hoken: ‘Iau ni gil hoken. Iau ni dure hasur ira nugu suuh na nian ma iau nigi gil hatamat balik um. Io, iau ni bulbul ira agu nian ma ira nugu linge kaia.
LUK 12:19 Ma iau ni nunure bia anugu mon halengin bilai na linge kana i kis, ma diet na kis ra haleng na tinahon. Io kaik, ni iaan, ni mom ma ni guama. Ma iau ni tatohun tano nugu nilon.’
LUK 12:20 “Iesen God ga tange tana hoken: ‘A ba ugu! Katin ra bung nu maat. Io, sige nong na kap leh ira linge u te tagure tar wara utaam?’”
LUK 12:21 Ma Jisas ga tange um bia, “Na ngan hokaiken ta sige tikai nong na hahungi ira uno bunbulaan iesen pai watong ra matmataan gar ta God.”
LUK 12:22 Io, Jisas ga tange ta ira uno bulu na harausur hoken: “Io, iau tange ta muat, waak bia muat ngarngarau uta ira numuat nilon bia asa ing muat na ien. Ma waak bia muat ngarngarau mah uta ira palatamai muat bia muat na sigam ra sa.
LUK 12:23 Io, ira numuat nilon i tamat ta ira nian ma ira tamai muat i tamat ta ira maal.
LUK 12:24 Muat na lik leh ira kok. Diet pai la saaso. Diet pai la kilkil hulungan nian. Ma taie audiet ta suuh na nian. Iesen God i la tamtabar diet. Io, tano sinisip ta God, muat manga tamat ta ira maan.
LUK 12:25 Muat ngarngarau warah? Waak muat gilgil huo! Bia muat na ngarngarau, pa na halawaas ira numuat nilon ta dahin.
LUK 12:26 Pai tale muat bia muat na gil kaiken ra nat na linge, io kaik, wara bih muat ngarngarau uta ira mes na linge?
LUK 12:27 “Muat na lik leh ira puspusuno no ina naas. Diet pai papalim. Diet pai singit maal mah. Iesen iau tange ta muat bia Solomon, no tamat na ut na harkurai, ma ira uno tamat na minamar pa ga nanaas haruat ma ira puspusuno no ina naas.
LUK 12:28 Kaik, God i gil hamaririsuan ira pitoka nong i lon mon katin ma marakan da halo iaah mei. Bia i tutun ing God i gil huo tano pitoka, i tutun sakit bia na hasigam muat mah ma ira kiniasi muat. Maris! Pai patpatuan ira numuat nurnuruan!
LUK 12:29 Ma waak muat manga lilik uta ira sa muat na ien ma muat na mame. Waak um muat ra nginarau ta kaiken ra linge.
LUK 12:30 Kaiken ra linge, diet ing diet pai nurnur tane God, diet la sisilih pane. Iesen namuat Sus i nunure tar bia muat supi kaike ra linge bakut.
LUK 12:31 Iesen muat na hararot leh no kinkinis na harkurai ma ra harbalaurai tane God ma na tabar muat ma kaike ra linge bakut mah.
LUK 12:32 Muat ira bar sipsip, waak muat ra bunurut kanong no amuat Sus i te kanakana bia na tar no kinkinis na harkurai ma ra harbalaurai ta muat.
LUK 12:33 “I tahut bia muat na suhurane ira numuat linge ma muat na tar ta ira maris. Muat na tagure numuat ta mangana kinewa ing pa na sakena, a bunbulaan ie aram ra mawe nong pa nale pataam. Ma kaia, tiga ut na hisikoma pa na tale bia na hanuat hutet ma ira ipas diet pa na hagahe.
LUK 12:34 Io, bia no num bunbulaan i kis taar he, no num kidilona nilon bakut i kis taar mah kaia.
LUK 12:35 “I tahut bia muat na manga taguro hoing tikai i puli hakumkum no uno maal wara pinapalim. Ma tikai na waak tar no uno laam na lulungo bia na taguro ta sa ing na hanuat. Ma muat mah, muat na taguro huo.
LUK 12:36 Ma i tahut bia muat na haruat ma ira tunotuno ing diet kiskis kawase no udiet watong ing na tapukus meram ra nian na hinartola. Diet na kiskis kawasei huo waing diet na taguro taar. Bia na me pipidil tano matanangas diet na papos hagasiaan leh ie.
LUK 12:37 Ma kaike ra tunotuno, diet na daan ing no udiet watong na hanuat ma na nes leh diet ma diet kis kawase tar ie. Tutun sakit, iakano watong na tange ta diet bia diet na kis tano suuh na nian. Io, na sulu kumkum huat ma na baso wara tamtabar diet.
LUK 12:38 Ma bia na tapukus ra tingena lohan bia ra luena kareka at ma na nes leh kaike ra tunotuno ma diet kis kawase tar ie, io, diet na daan.
LUK 12:39 Io, na tahut bia muat na palai tano tunotuno nong auno no hala. Bia gor nunure no pakana bung bia no ut na kikinau na hanuat pa gor bale leh ie bia na sale no uno hala.
LUK 12:40 Ma muat mah, muat na taguro kanong Nong a Tunotunoi na hanuat tano pakana bung ing muat pai nunure bia na hanuat.”
LUK 12:41 Ma Pita ga tirii bia, “Watong, u hinhinawase mehet mon uta iakan ra nianga harharuat bia diet mah ira matanaiabar bakut?”
LUK 12:42 Ma no Watong ga babalu hoken: “Iau ni haminas ta muat bia sige no mintatona ma no tutun na tultulai. Aie nong no uno watong i bul tar ra harkurai tana uta ira mes na tultulai bia na tamtabar timaan diet.
LUK 12:43 Na daan iakano tultulai bia no uno watong i tapukus, gi nas tupas ie ma kana i gilgil huo.
LUK 12:44 Tutun sakit, na tar ira uno linge bakut tano harbalaurai ta iakano tultulai.
LUK 12:45 Iesen bia iakano tultulai na lik bia no uno watong pa na tapukus gasien ma na tur leh wara bubu ira mes na tultulai, ira hahin tika ma ira tunaan, ma na iaiaan ma na mamom tika ma ira ut na minom, io, no watong ta iakano tultulai na hanuat tano pakana bung bia no tultulai pa ga lik tar, ma pa ga nunure bia na hanuat huo. Ma no watong na kure hadadas tun at ie, ma na sei ukaia tano katon na ngunngutaan ing diet pa ga nurnur tana diet na kis kaia.
LUK 12:47 “Ma iakano tultulai nong i palai tano sinisip tano uno watong ma pai taram ma pai taguro mah, io, da lawat ie haleng na pakaan.
LUK 12:48 Iesen nong tikai pai palai tano uno sinisip ma i gil ra sakana magingin kaik da hapidanau ie, io, da lawat ie a bar pakaan mon. Diet ing da manga hapalaine diet, God na hait diet bia diet na manga taram. Ma diet ing da manga tabar diet, God na sunang diet bia diet na manga balu pukus.
LUK 12:49 “Iau te hanuat wara hapidanau ira tunotuno tano ula hanuo ma no tamat na iaah. Ma gaar manga bilai bia iau gaar te halo tar ie.
LUK 12:50 Iesen ni pusak baak ta tamat na tinirih. Ma na manga ubal iau tuk taar bia iakano tinirih na pataam tagu!
LUK 12:51 Waak muat lik bia iau te hanuat wara tartar ra malum tano ula hanuo. Taie tun at. Iau te hanuat wara harpaleng.
LUK 12:52 Tur leh ta iakan ra pakana bung ing bia a liman narako tiga hatatamaan, io, aitul dal na tur talur ira iruo ma ira iruo dir na tur talur ira aitul.
LUK 12:53 Tiga bulu na tunaan na tur talur no ana sus, ma no ana sus na tur talur ie. Tiga hinasik na tur talur no pawasine ma no pawasine na tur talur ie. Ma huo mah ta dir enaan. Dir na tur talur harbasia ta dir.”
LUK 12:54 Io, Jisas ga tange ta ira matanaiabar hoken: “Bia ing muat nes tiga bahuto i tamtaman tut meres ra kasakes i la sungsuguh kaia, habir at mon ma muat na tange bia, ‘Na bata kaiken’ ma no bata na puko.
LUK 12:55 Ma ing bia no dadaip merau ra mamaat i tut, muat na tange bia, ‘Na dadas no kasakes kaiken.’ Ma na ngan huo.
LUK 12:56 Muat ira ut na harababo! Muat tale bia muat na nes kilam ira ninaas tano ula hanuo, ma muat na tange bia asa na hanuat. Ma hohe balik kaik muat pai tale wara nunure kilam no kukuraina ta kaiken ra pakana bung?
LUK 12:57 “Wara bih bia muat pai nes kilam habalin at ta muat bia asa i takodas?
LUK 12:58 Bia no hinsakaam i wara kapkap tar ugu ra harkurai, mur na haratakodas gasien mei ing bia mur hanahaan baak na ngaas. No hinsakaam kabi tar ugu tano ut na harkurai, ma no ut na harkurai na tar ugu ta nong i la balaura tar diet ing di ga wis kawase diet narako tano hala na harpidanau, ma aie na bul halaka ugu ra hala na harpidanau.
LUK 12:59 Io, iau tange ta muat, pa da hasur ugu ra harpidanau tuk taar bia nu tar bakut ira num kunkulaan.”
LUK 13:1 Ma ta iakano ra pakana bung ari tunotuno diet ga hanuat, diet ga me hinawase Jisas uta ira tunotuno me Galili ing Pailat ga tule ira uno umri wara bubu bing ing diet ga tun hartabar tupas God.
LUK 13:2 Ma Jisas ga tange bia, “Hohe, muat lik bia kaike ra tunotuno me Galili diet ga manga sakena ta ira mes na tunotuno me Galili kaik diet gaam hiruo huo?
LUK 13:3 Iau hinawase muat bia taie tun at! Ma bia ing muat pa na lilik pukus, muat bakut mah, muat na hiruo.
LUK 13:4 Ma muat na lik leh kaike ra sangahul ma liman ma itul ing no hala kangkang na haat kenau Silom ga tarup taar ta diet, diet gaam maat. Hohe, muat lik bia iakano ga hamines bia diet ga manga sakena ta ira mes na tunotuno mekai Ierusalem?
LUK 13:5 Iau hinawase muat bia taie! Ma bia ing muat pa na lilik pukus, muat bakut mah, muat na hiruo.”
LUK 13:6 Io, ga hinawase diet ta kan ra nianga harharuat: “Tiga tunotuno ga mon tiga ina papus tano uno lalong, ma ga haan laah wara ninaas ta papus tana. Iesen pa ga nes leh tari tana.
LUK 13:7 Io, ga tange tano ut na harbalaurai tano lalong hoken: ‘Aitul a tinahon tuai um ing iau hanahaan ukai wara ninaas ta hunena iakan ra ina papus, iesen taie tari. Buruh hasur ie. I hasurum bia tun at no bilai na pise.’
LUK 13:8 Ma no ut na harbalaurai tano lalong ga babalu bia, ‘Watong, waak tar baak ie tiga tinahon balin ma iau ni kil luhutanei, nigi bul ta bilai na linge wara hatimaan no pise.
LUK 13:9 Ma bia ing na huai tano tinahon namur, io, i bilai. Iesen bia ing taie, io, nu buruh hasur ie.’”
LUK 13:10 Tiga Bung na Sinangeh Jisas ga hauhausur ira matanaiabar narako tiga hala na lotu gar na Iudeia.
LUK 13:11 Ma tiga hahin ga kis taar kaia gate talukun no tihine ra sangahul ma liman ma itul a tinahon kanong tiga sakana tanuo ga hanganei huo. Ma pa ga talei bia na tur takodas.
LUK 13:12 Ing Jisas ga nes ie ga tau hawaat ie ma ga tange tana hoken: “Hainigu, u te langalanga sukun no num minaset.”
LUK 13:13 Io, ga bul ira iruo limana tana ma kaik at mon no hahin ga tur takodas ma ga pirlat God.
LUK 13:14 Io, no lualua ta iakano hala na lotu ga ngalngaluan kanong Jisas ga harhalangalanga tano Bung na Sinangeh, kaik gaam tange hoken ta ira matanaiabar, “A liman ma tikai ira bung wara pinapalim. Io kaik, muat na hanuat ta kaike ra bung bia da halangalanga ise muat ta ira numuat minaset, ma taie bia tano Bung na Sinangeh.”
LUK 13:15 Ma no Watong ga balui bia, “A ut na harababo muat! Tano Bung na Sinangeh, tikatikai ta muat i la palpalas leh no uno donki bia no uno bulumakau tano uno longlong wara hamamoi ma ra taah. Tutun sakit, muat la gilgil huo!
LUK 13:16 Iakan ra hahin a bulumur ta Abraham ie, ma Sataan ga wis kawase tar ie ra sangahul ma liman ma itul a tinahon. Io, i tahut mah tano Bung na Sinangeh bia da palas isei tano minaset nong gate wis kawase tar ie.”
LUK 13:17 Ing ga tange hokaiken, ira ana suk bakut diet ga malahuan. Iesen ira matanaiabar diet ga guama pane ira bilai na linge ga gilgil.
LUK 13:18 Io, Jisas ga tange, “No kinkinis na harkurai ma ra harbalaurai ta God i haruat ma ra sa? Iau ni hapupuoi ma ra sa? Io, ni hinawase muat.
LUK 13:19 I haruat ma tiga nat na pat na daha sakit nong tiga tunotuno ga soi tano uno lalong. Io, ga kubur, gaam tamat na daha, ma ira maan diet gil ira posi diet ta ira katena.”
LUK 13:20 Ma ga tange habalin bia, “Iau ni hapupuo no kinkinis na harkurai ma ra harbalaurai ta God ma ra sa? Io, ni hinawase muat.
LUK 13:21 I haruat ma tiga hahin ga kap leh ira is, gom bul ie narako tano tamat na hunghungaan na palawa tuk gaam lalat bakut.”
LUK 13:22 Io, Jisas ga hanahaan ta ira taman ma ira pise na hala ma ga hauhausur ira matanaiabar. Ga gilgil hani hokaike tano uno hinahaan uram Ierusalem.
LUK 13:23 Io, tikai ga tiri ie bia, “Watong, hohe, a bar hanawaan mon diet ing God na halon diet?” Ma Jisas ga tange ta diet, “Muat na walar ma ra baso wara hinahaan laka tano didisuan na ngaas. Iau tange ta muat bia a haleng diet na walar wara hinahaan laka iesen diet na pet puo.
LUK 13:25 Ing no tunotuno auno no hala na taman tut naga banus no matanangas, muat na tur taar um me nataman muat naga piipidil. Ma muat na saasaring marmaris bia, ‘Watong, papos leh mehet.’ “Iesen na babalu bia, ‘Iau pai nunure bia sige muat. Ma iau pai nunure mah bia muat meh.’
LUK 13:26 “Io, muat na tange bia, ‘Mehet ga iaan ma mehet ga mom tika ma ugu. Ma narako ta ira ngaas ta ira numehet tamtaman u git hauhausur mehet.’
LUK 13:27 “Iesen na babalu bia, ‘Iau pai nunure bia sige muat. Ma iau pai nunure mah bia muat meh. Muat haan laah, a ut na sakena muat bakut!’
LUK 13:28 “Ing muat na nes Abraham, Aisak, Iakop, ma diet ira tangesot bakut aram tano kinkinis na harkurai ma ra harbalaurai ta God, muat na susuah ma muat na hatagirisna ngise kaia kanong da se hasur se muat.
LUK 13:29 Ira matanaiabar diet na hanuat mekaia ta ira ihat na matana dadaip. Diet na hanuat ma diet na kis tano gil nian aram tano kinkinis na harkurai ma ra harbalaurai ta God.
LUK 13:30 Ma a tutun sakit bia tari ta diet ing diet maris kaiken, diet na watong namur. Ma tari ta diet ira watong kaiken, diet na maris namur.”
LUK 13:31 Ma ta iakano pakana bung ari a Parisi diet ga haan tupas Jisas, diet gaam a tange tana, “Nu haan sukun iakan ra katon ma nu haan tiga mes na taman balik kanong Herot i wara bubu bing ugu.”
LUK 13:32 Jisas ga balu diet bia, “Iakano Herot a keskes ie wara gilgil sakena hoing ira rakaia na paap. Muat na haan muat naga hinawasei bia iau tange hoken: ‘Iau ni hasur se ira sakana tanuo ma ni halangalanga ira ina minaset katin ma marakan. Ma tano aitul a bung ni hapataam bakut ira nugu pinapalim.
LUK 13:33 Iau ni papalim huo iesen i tahut mah bia ni hanahaan katin, marakan, ma tano bung namur mah, kanong i tutun sakit bia ira tangesot diet pai la hirhiruo nataman. Aram sen narako Ierusalem.’”
LUK 13:34 Ma Jisas ga tange bia, “Maris muat ira matanaiabar mekai Ierusalem! Muat la bubu bing ira tangesot ma muat la gulgulum bing diet ing God i la tultule diet ukaia ho muat. Haleng pakaan iau la sipsip bia ni gawane leh muat hoing no huna kareka i la pabong ira natine. Iesen muat pai sip huo.
LUK 13:35 Nas baak! Da hamau no numuat taman ma muat na biha? Io, iau hinawase muat bia muat pa na nes iau tuk tano pakana bung ing muat na tange bia, ‘I daan nong i hanuat wara gilgil haruatne ira sinisip gar tano Watong!’”
LUK 14:1 Tiga Bung na Sinangeh bia ne Jisas ga iaiaan tano hala ta tiga lualua ta ira Parisi, ira matanaiabar diet ga manga nesnes dit ie bia na gil ra sa.
LUK 14:2 Ma tiga tunotuno ga manga sus ira tamaine gaam haan tupas Jisas.
LUK 14:3 Ma Jisas ga tiri ira Parisi ma ira keskes ta ira harkurai ta Moses hoken: “I takodas ta ira udahat harkurai bia da halangalanga ira minaset tano Bung na Sinangeh bia taie?”
LUK 14:4 Iesen bia diet pa ga ianga. Io, ga palim no tunotuno gaam halangalanga ie, ma ga tule sei.
LUK 14:5 Io, ga tiri diet, “Ing bia tiga nati muat bia tikai ta ira numuat bulumakau na puko suur tiga lulur tano Bung na Sinangeh, i tutun bia kaik at mon muat na sal haut habalin ie. Naka?”
LUK 14:6 Sen bia diet pa ga tange tiga linge.
LUK 14:7 Ma Jisas ga nes bia ari a wasire diet ga gilamis ira kinkinis na watong tano suuh na nian. Io kaik, gaam tange iakan ra nianga harharuat:
LUK 14:8 “Bia tiga nong i suko ugu tano nian na hinartola, waak u kis tano kinkinis gar na tamat, ma tikai nong i manga tamat taam kabi hanuat kanong di ga suko mah ie.
LUK 14:9 Ma no tunaan nong auno no gil nian na hanuat, aie nong ga suko mur bakut. Ma na tange taam, ‘Nu tut pas no kinkinis ta ne kan.’ Io, nu hirhir kanong da tule ugu tano kinkinis na maris.
LUK 14:10 Ing di suko ugu, na tahut bia nu kis tano kinkinis na maris. Io kaik, nong ga suko ugu na hanuat ma na tange taam, ‘Tasigu, nu kap tiga kinkinis nong i tamat ta iakan.’ Io, ira matanaiabar kaia diet na urur taam.
LUK 14:11 Io, sige tiga nong i hatamat habalin ie, God na bul hasur ie. Ma nong i hanapu habalin ie, God na hatamat ie.”
LUK 14:12 Ma Jisas ga tange tano tunotuno nong ga sukoi utano nian, “Ing bia nu harsuko wara gil nian, waak u suko ira num harwis, ira tasim, ira hinsakaam, ma ira watong ing diet kis hutet. Waak u gil huo kanong diet na suko habaling ugu wara balbalu ugu.
LUK 14:13 Iesen bia nu harsuko utano num gil nian, nu suko ira maris, ira pengpeng, ira kum, ma ira pulo.
LUK 14:14 Ing bia nu gil huo nu daan. A tutun diet pai tale bia diet na balu tar taam iesen God na balu tar taam tano pakana bung na tuntunut hut baling ta ira ut na takodas.”
LUK 14:15 Ma tikai ta diet ing diet ga kis tika mei tano suuh na nian ga hadade kaiken, gaam tange ta Jisas, “I daan no tunotuno ing bia na iaan tano tamat na nian tano kinkinis na harkurai ma ra harbalaurai ta God.”
LUK 14:16 Io, Jisas ga balui, “Tiga tunotuno ga tagure tiga tamat na nian ma ga suko ra haleng tunotuno.
LUK 14:17 Tano pakana bung bia no nian ga taguro ga tule no uno tultulai uta diet ing gate suko tar diet. Ma no tultulai ga hinawase diet, ‘Mai. Kanong ira linge i te taguro taar kaiken.’
LUK 14:18 “Iesen diet bakut tikatikai diet ga ru batbat no harsuko. No luena ga tange, ‘Kaiken mon iau te kul tiga katona pise ma ni haan nigi a nes ie. Maris, pai tale bia ni hanuat.’
LUK 14:19 Ma tiga mes ga tange, ‘Kaiken mon iau te kul ra sangahul na bulumakau wara pinapalim ma iau hanahaan wara walwalar diet. Maris, iau pa ni haan.’
LUK 14:20 Tiga mes balik ga tange, ‘Kaiken mon iau tatola. I ngan taar bia pa ni haan.’
LUK 14:21 “Io, no tultulai ga tapukus gaam a hinawase no uno watong ta kaike ra linge. Ma no watong nong auno no hala ga ngalngaluan gaam tange tano uno tultulai, ‘Hansur gasien ta ira ngaas bakut tano pise na hala ma nu lamus ira maris, ira pengpeng, ira pulo, ma ira kum.’
LUK 14:22 “Io, no tultulai ga me tange, ‘Nugu Watong, iau te gil haruatne hoing u tange. Iesen, no hala pai hung baak.’
LUK 14:23 “Io, no watong ga tange tano uno tultulai, ‘Nu haan me nataman tano pise na hala ma nu mur ira ngaas laba ma ira nat na ngaas mah. Ma nu hait leh ira tunotuno kaia bia diet na hanuat bia no nugu hala naga hung.
LUK 14:24 Iau tange taam, taie tikai ta diet ing iau ga luena suko diet na namien tiga linge kai tano nugu gil nian.’”
LUK 14:25 A tamat na matanaiabar diet ga hanahaan tika ma Jisas. Ma ga talingane diet gaam tange hoken:
LUK 14:26 “Ing bia sige tiga nong i wara murmur iau, na manga tamat sakit no uno sinisip utagu ta ing i la sipsip ira mes. Ma ing bia da hapupuo no uno sinisip uta ira mes ma utagu, na ngan hoken bia i malentakuane no ana sus, no pawasine, no uno hahin, ira natine, ira tasine, ira hainine, ma aie at. Ma ing bia no uno sinisip pai ngan huo, pai tale bia a nugu bulu na harausur ie.
LUK 14:27 Bia sige tikai pai pusak no uno kabai ma pai mur iau, pai haruat bia a nugu bulu na harausur ie.
LUK 14:28 “A tutun sakit, bia tiga nong i sip bia na gil tiga hala na luena kis matien ma na lilik utano matana no hala wara nunure bia ira uno kinewa i haruat wara hapataam no hala bia pataie.
LUK 14:29 Io, ing bia i te hatahun ie ma pai tale um bia na hapataam ie, ira halengin diet na nes ie diet na hasakit.
LUK 14:30 Diet na tange hoken: ‘Iakan ra tunotuno i te hatahun no uno hala ma ga basomah wara hapataam ie.’
LUK 14:31 “Ma a tutun sakit mah, bia tiga tamat na umri i wara hinahaan wara hinarubu ma tiga mes na tamat na umri, na luena kis matien ma na lilik bia ira uno sangahul na arip na umri diet haruat wara turtur dadas ma ira iruo na sangahul na arip tano mes na tamat na umri.
LUK 14:32 Ma ing bia pai tale, na tau tari a tultulai ma no mes na tamat na umri kana baak tapaka. Io, na tule diet bia diet na saring no mes na umri wara malum.
LUK 14:33 Hoing at mon, bia sige tikai ta muat pai waak se ira uno linge bakut, pai tale bia a nugu bulu na harausur ie.
LUK 14:34 “Sol i manga harahut. Sen bia ing i pataam ira dadas wara harahut tano sol, no uno dadas na hanuat balin hohe? Pai tale. I te linge bia um.
LUK 14:35 Pai tale bia na harahut ira pise na lalong. Ma pai tale mah bia da dolowane pakur ma ra takana bulumakau wara bulbul na lalong. Da se um. “Bia ing u haruat wara hadade kilam kaiken ra nugu nianga, nu taram ie.”
LUK 15:1 Tiga pakaan ira ut na kap takis ma diet ing di ga nes hanapu diet bia a tabuna murmur ira harkurai ta Moses, diet ga hanuat hurlungen wara hanhadade Jisas.
LUK 15:2 Ma ira Parisi ma ira tena harausur ta ira harkurai ta Moses diet ga ngurungur diet gaam tange, “Kan ra tunotuno i bale leh ira ut na sakena ma i iaan tika ma diet.”
LUK 15:3 Io, Jisas ga hinawase diet ma iakan ra nianga harharuat.
LUK 15:4 Ga tange, “Ing bia tiga nong ta muat auno tiga maar na sipsip ma tiga nong i rara, io, tutun sakit bia na haan talur ira liman ma ihat na sangahul ma liman ma ihat kaia ra udiet katon. Ma na sisilih uta nong i te rara tuk taar bia na nes leh ie.
LUK 15:5 Ma ing bia i te silhe tupas ie na guama ma na pusak leh ie ma na haan u nataman. Io, na tatau hulungan ira uno harwis ma diet ing diet la kiskis hutet tana, ma na hinawase diet bia, ‘Iau sip bia muat na guama tika ma iau kanong iau te nes tupas no nugu sipsip nong ga rara.’
LUK 15:7 Iau tange ta muat, na ngan mah huo aram ra mawe. Ing bia tiga ut na sakena i lilik pukus, da manga guama aram naliu. Iesen bia a liman ma ihat na sangahul ma liman ma ihat diet lik bia a ut na takodas diet, kaik diet na lilik pukus warah, io, taie ta gungunuama aram naliu.
LUK 15:8 “Ma bia tiga hahin i hatur kawase ira sangahul na siliwa, ma tikai i panim, io, tutun sakit bia na halulungo tiga laam ma na sah no hala. Ma na sisilih timaan tuk taar bia na nes tupas ie.
LUK 15:9 Ma bia i te nes tupas ie, na tatau hulungan ira uno harwis ma diet ing diet la kiskis hutet tana, ma na hinawase diet bia, ‘Iau sip bia muat na guama tika ma iau kanong iau te nes tupas no nugu siliwa nong ga panim.’
LUK 15:10 Iau tange ta muat, ira angelo ta God diet na guama mah huo ing bia ta tiga ut na sakena i lilik pukus.”
LUK 15:11 Io, ma Jisas ga tange habalin, “Tiga tunotuno airuo ira uno bulu na tunaan.
LUK 15:12 No hansik ta dir ga tange tano adir sus, ‘Mama, a tutun bia namur nu paleng ira num linge ta mir tasin. Sen bia nu tabar iau ma no pinlawegu kaiken.’ Io, ga paleng ira uno linge nalamin ta dir.
LUK 15:13 “A bar bung namur ma no hansik ta dir ga suhurane bakut se ira uno mangana linge, ga kap ira uno kinewa, gaam haan uras tiga hanuo tapaka. Ma ga manga gotgot kaia, kaik gaam hasurum ira uno kinewa.
LUK 15:14 Ma bia ing gate suhurane se ira uno kinewa, tiga tamat na taburungan ga hanuat ta iakano hanuo bakut. Ma ga kis hoing tiga maris.
LUK 15:15 Io kaik, ga papalim wara uno tiga watong ta iakano ra hanuo. Ma no watong ga tulei tano uno katon wara tamtabar ira uno bore.
LUK 15:16 Ma ga manga sip bia na ien ira pala bin ing ira bore diet git ienien. Iesen taie tikai pa ga tabar ie ma tiga linge.
LUK 15:17 Ma bia ga lilik tapukus ga tange, ‘Ai! Ira tultulai ing diet papalim tano ragu sus, ira adiet nian i manga haleng ma diet pai tale bia diet na ien bakut. Ma iau balik um ken ni taburungan maat.
LUK 15:18 Iau ni tapukus balin uram ho mama ma nigi tange tana, “Mama, iau te gil ra sakena taar taam ma uram ra mawe mah.
LUK 15:19 Pai takodas balin bia nu kilam iau bia tiga natim. Iesen iau sip bia nu gil iau haruat ma ira num tultulai.” ’
LUK 15:20 Io, ga taman tut ma ga haan uram hono rana sus. Bia iakana baak tapaka no rana sus ga nes leh ie ma ga manga marmaris wara utana. Io, ga hilau taar tano natine, gaam gawane leh ie ma ga lusung ie.
LUK 15:21 “Ma no natine ga tange tana, ‘Mama, iau te gil ra sakena taar taam ma uram ra mawe mah. Pai takodas balin bia nu kilam iau bia tiga natim.’
LUK 15:22 “Iesen no ana sus ga tange ta ira uno tultulai bia, ‘Muat habir! Muat kap no sigasigam nong i manga bilai ma muat na hasigam ie mei. Muat habas tiga malota tano limana ma muat na hasigam ie ta iruo pala lamaas na kakinari.
LUK 15:23 Muat kap no bilai na nat na bulumakau ma muat na kut bing ie. Dahat na gil tiga lukara kanong kan ra natigu ga maat ma i te lon balin. Ga rara ma dahat te nes leh ie.’ Io kaik, diet ga haburen no lukara.
LUK 15:25 “Ing bia no lukara ga hanahaan no tamat ta dir ira iruo haratasin ga tapukus meram ra lalong. Ma bia ga hanuat hutet tano hala ga hadade ra ingana ninge ma ra minangata.
LUK 15:26 Io, ga tatau tikai ta kaike ira tultulai ma ga tiri ie uta ira linge diet gilgil.
LUK 15:27 Ma no tultulai ga balui bia, ‘No tasim i te tapukus balin. Ma no am sus i te nes ie bia i lon timaan taar. Kaik, i tula nianga bia da kut bing no bilai na nat na bulumakau ma mehet te gil huo.’
LUK 15:28 “Io, no tamat ta dir ga manga ngalngaluan, kaik gaam malok bia na laka tano hala. Io, na ana sus ga hansur, gaam ianga marmaris tana bia na laka.
LUK 15:29 Sen bia ga balu no ana sus bia, ‘Nes baak! Ta kaiken ra tinahon bakut iau git paapalim wara utaam hoing tiga maris na tultulai. Ma ira pakana bung bakut iau git tartaram ugu. Ma u te tar sa tagu? Pau tar tiga meme mon tagu bia ni gil tiga lukara ma ira nugu harwis.
LUK 15:30 Iesen bia kan ra natim balik i tapukus u kut bing no bilai na nat na bulumakau wara gil lukara. Ma aie at mon nong ga hasurum ira num linge wara kulkul ira ut na hilawa.’
LUK 15:31 “No ana sus ga tange tana, ‘Natigu, hatikai u la kiskis tika ma iau. Ma ira nugu linge bakut, anum.
LUK 15:32 Iesen i takodas bia dahat na guama ma dahat na gil no lukara kanong iakan ra tasim ga maat ma i te lon balin. Ga rara ma dahat te nes leh ie.’”
LUK 16:1 Io, Jisas ga tange ta ira uno bulu na harausur hoken: “Tiga watong ga bul tiga tultulai wara harbalaurai ta ira uno linge bakut. Ma namur di ga tung no tultulai bia ga hasurum ira minsik ta iakano Watong.
LUK 16:2 Io, ga tatau no tultulai, gaam tange tana, ‘Asa iakan iau hadade wara utaam? Nu pakat hapalaine tiga hinhinawas uta ira nugu linge u ga balaure ma nu tar no hinhinawas tagu. Pa nu balaure habalin ira nugu linge.’
LUK 16:3 “Io, no ut na harbalaurai ga lik habalin tana hoken: ‘Asa ing iau ni gil kaiken? No nugu tamat na hasur se iau tano nugu pinapalim. Iau pai dadas haruat wara kinakoh ma iau hirhir mah bia ni sasaring hoira maris.
LUK 16:4 Ai! Iau palai bia asa ing ni gil! Ma tano pakana bung da kap se talur iau tano nugu pinapalim, ira matanaiabar diet na bale leh iau ta ira udiet hala.’
LUK 16:5 Io, ga tatau ira tunotuno bakut ing diet ga mon tinakum tano uno tamat. Ga tiri no luena bia, ‘Aise ira num tinakum taar tano nugu tamat?’
LUK 16:6 Ga balui bia, ‘Tiga maar na tamat na pabona kor na wel.’ Ma no ut na harbalaurai ga tange tana, ‘Kis kai, ma nu pakat hagasiaan ie bia nu balu pakus a liman na sangahul mon. Iakanong na hasubaan no tinakum. Waak um u balu bakut.’
LUK 16:7 Ma ga tiri no airuo bia, ‘Aise ira num tinakum taar tano nugu tamat?’ Ga balui bia, ‘Tiga arip na tamat na punpu na pat na wit.’ Ma no ut na harbalaurai ga tange tana, ‘Pakat ie bia nu balu pukus a liman ma itul na maar mon. Waak um u balu bakut.’
LUK 16:8 “Ma no watong ga lat iakano ut na harbalaurai nong ga habato ie, gaam lat ie kanong i hamines bia a ineine ie ta iakano linge i te gil. Io, ira matanaiabar ta iakan ra ula hanuo diet ineine wara gilgil ira udiet magingin ta diet baling at. Ta ira udiet gingilaan huo, diet manga ineine ta ira matanaiabar ing diet kis ra madaraas.
LUK 16:9 Ma iau tange ta muat, i tahut bia muat na papalim ma ira numuat sakana kinewa wara lamlamus numuat ta harwis. Ma ing bia ira numuat kinewa i te pataam da bale leh muat tano taman pa nale pataam.
LUK 16:10 “Sige tikai i tutun ta ira hansik na pinapalim na tutun mah ta ira tamat. Ma sige tikai pai tutun ta ira hansik na pinapalim pa na tutun mah ta ira tamat.
LUK 16:11 Ing bia muat pa gale tutun wara balbalaure ra kinewa ta iakan ra ula hanuo, sige na so no uno nurnur ta muat bia muat na tutun wara balbalaure ira mangana kinewa tutun?
LUK 16:12 Ma ing bia muat pa gale tutun wara balbalaure ira linge ta ira mes, sige na tabar muat ma nuwat ta linge at.
LUK 16:13 “Taie tiga tultulai i haruat wara tartaram ira iruo watong, na manga malok ta tikai ma na manga sip no mes, bia na hararot tikai ma na malentakuane no mes. Io, pai haruat bia muat na taram ta God ma ra kinewa mah.”
LUK 16:14 Ma ing bia ira Parisi diet ga hadade kaiken diet ga ngurungur taar ta Jisas kanong diet ga manga sip kinewa.
LUK 16:15 Ma Jisas ga tange ta diet, “Muat at muat hatakodasne habaling muat ra matmataan ta ira matanaiabar iesen God i la nunure tar ira bala muat. Asa ing ira tunotuno diet hatamat ta ira udiet lilik, io, i linge bia tano matmataan ta God.
LUK 16:16 “Ira harkurai ta Moses ma ira pakpakat ta ira tangesot diet ga harkurai tuk taar tano pakana bung ta Jon no ut na baptais. Ma tur leh ta iakano pakaan no harharpir tano tahut na hinhinawas i te hanahaan ma ira matanaiabar diet walwalar ma ra baso wara hinahaan laka.
LUK 16:17 Ing bia i dadas bia no mawe ma no ula hanuo dir na panim laah, io, na manga dadas sakit bia tiga hansik na katon ta ira harkurai ta Moses na benben.
LUK 16:18 Sige tikai i se no uno hahin ma i tole tiga mes i te gil ronga kanong i te noh tika ma tiga mes, pai unoi. Ma sige tikai i tole tiga hahin nong no uno tunaan ga sei, io, i te gil ronga kanong i te noh tika ma tiga mes, pai unoi.
LUK 16:19 “Ga mon tiga watong git singsigam ira bilai na kiniasine ing ira matana ga manga tamat sakit. Ma no uno kinkinis na watong ga manga haguama ie ta ira kaba bungbung.
LUK 16:20 Ma di git hainoh tar tiga maris, no hinsana ne Lasaras, kaia tano matanangas ta iakano watong. A ina manmanuoi ma git sipsip bia na ien ira pet na nian ing git pukpuko laah meram tano suuh tano watong. Maris! Ira paap mah diet git hanhanuat ma diet git damdam ira manuana.
LUK 16:22 “Io, no maris ga maat um ma ira angelo diet ga kap leh ie taar tano matmataan ta Abraham. Ma no watong ga maat mah ma di ga bus ie.
LUK 16:23 Ma kaia tano subaan gar na minaat, no watong ga kap ra tamat na ngunngutaan. Ma ga nanaas hut gaam nas Abraham utapaka sakit. Ma Lasaras kaia ra palpal tana.
LUK 16:24 Io, ga tatau Abraham hoken: ‘Tubuk, nu marse iau! No ngunngutaan ta kan ra iaah i manga dadas. Nu tule Lasaras, na hasuguh no kaskas na limana tano taah maduhan ma na bul ie tano karamegu naga hamaduhan ie.’
LUK 16:25 “Sen bia Abraham ga balui, ‘Tubuk, nu lik leh tano num nilon nalua bia u ga hatur kawase ira num bilai na linge ma Lasaras balik ira sakena. Iesen kaiken um di habaibai ie, ma ugu, u kap ra ngunngutaan.
LUK 16:26 Ma tiga mes na linge mah, God i te gil tiga salil nalamin ta dahat i manga hansur. Kaik, diet ing diet wara hinahaan mekai ukatiga ho ugu, pai tale diet. Ma pai tale bia tikai ta muat na balos mekaia ukai ho mehet.’
LUK 16:27 “Ma no watong ga tange tana, ‘Tubuk, nu tule Lasaras taar tano hala tano ragu sus kanong a liman ira tasigu kaia. Iau sip bia na hakatom diet waing diet pa na hanuat mah ta iakan ra subaan na ngunngutaan.’
LUK 16:29 “Ma Abraham ga tange tana, ‘Diet hatur kawase ira harkurai ta Moses ma ira pakpakat ta ira tangesot. Na tahut bia ira tasim diet na taram kaike ra pakpakat.’
LUK 16:30 “Iesen ga tange ta Abraham, ‘Taie, tubuk! Pai haruat! Iesen bia tikai me katiga ra minaat na haan tupas diet, diet na lilik pukus.’
LUK 16:31 “Ma Abraham ga tange tana, ‘Ing bia diet pa na taram ira harkurai ta Moses ma ira pakpakat ta ira tangesot, io, pai tale bia tikai nong i tut hut sukun ra minaat na haragat diet waing diet naga lilik pukus.’”
LUK 17:1 Io, Jisas ga tange ta ira uno bulu na harausur hoken: “Tutun sakit, ari a linge na hanuat ing ari a matanaiabar diet na puko ine ta ira magingin sakena. Iesen maris balik ta diet ing diet na hapuko ira matanaiabar huo.
LUK 17:2 Nas diet ken ra hansik na bulu. Bia tikai na wara halawen tikai ta diet wara gil nironga, gaar tahut tana bia da tigal bat ie. Na tahut bia da huna kubus tiga tamat na haat sakit tano kadonana ma da isei ures na tes, kabi halawen tikai ta diet wara gil nironga ma na kap ra tamat na harpidanau namur.
LUK 17:3 Io, huo kaik, muat na balaure habaling muat. “Ing bia no tasim i gil ronga nu ianga tana. Ma ing bia i lilik pukus nu lik luban se no uno nironga.
LUK 17:4 Ma ing bia i gil ra sakana magingin taam a liman ma iruo na pakaan tiga bung, ma ing bia i hanuat tupas ugu ta ira pakaan tikatikai ma i hinawase ugu bia i te lilik pukus, io, nu lik luban sei.”
LUK 17:5 Ma ira apostolo diet ga tange tano Watong, “Hatamat ira numehet nurnuruan.”
LUK 17:6 Ma Jisas ga tange ta diet, “Bia ira numuat nurnuruan i natine haruat ma tiga pat na daha i manga hansik, io, i tale bia muat na tange ta kan ra ina daha bia, ‘Nu tamaragat ma nu tur balik uras na tes!’ Ma na taram muat.
LUK 17:7 “Ma bia tiga nong ta muat auno mon tiga tultulai i la paapalim ra lalong bia i la balbalaure ira sipsip, na tapukus u nataman, io, muat lik hohe? No uno watong na tange tana bia na laka, naga kis, ma na iaan?
LUK 17:8 Taie. Na tange balik hoken: ‘Tagure ira agu nian, nu harkios laah ma nu tabar iau. Ma ing bia iau te iaan ma iau te mom huat, io, i tale bia augu balik nu iaan ma nu mom.’
LUK 17:9 Muat lik bia na tanga tahut tano uno tultulai kanong ga gil haruat ma ira hartula tano watong? Taie.
LUK 17:10 Huo mah ta muat. Bia muat te gil ira linge bakut ing no numuat Watong i tange ta muat, io, muat na tange hoken: ‘A tultulai mon mehet. Mehet te gil mon ira linge ing i tahut bia mehet na gil.’”
LUK 17:11 Ma tano hinahaan ta Jisas uram Ierusalem ga mur no sirang nalamin ta Samaria ma Galili.
LUK 17:12 Ma ing ga salsalo huat tiga taman a sangahul na tunotuno diet ga wara hinanuat ukaia ho ie. Sen diet ga tur tapaka dahin kanong a mon sakana minaset ga kisi ira palatamai diet.
LUK 17:13 Ma diet ga tatau naliu, “Numehet Watong Jisas, nu marse mehet!”
LUK 17:14 Ma bia Jisas ga nes diet, ga tange ta diet, “Muat na hamines ira palatamai muat ta ira ut na pakila lotu.” Io, diet ga haan laah. Ma no udiet minaset ga pataam laah na ngaas.
LUK 17:15 Ma bia tiga nong ta diet ga nes bia gate langalanga, ga tapukus balin. Ma ga kakongane hani uram naliu no uno pirhakasing ta God.
LUK 17:16 Ga me tutudung napu ta ira iruo kaki Jisas ma ga kilam tahut tana. Ma iakano tunotuno aie me Samaria.
LUK 17:17 Io, Jisas ga tirii, “A sangahul bakut diet ing diet langalanga. Ahe um ra liman ma ihat?
LUK 17:18 Wara bih kan ra wasire sen mon i tapukus wara pirpirlat God?”
LUK 17:19 Io, ga tange tana, “Nu taman tut ma nugu haan. No num nurnuruan i te halangalanga ugu.”
LUK 17:20 Tiga pakaan ira Parisi diet ga tiri Jisas utano kinkinis na harkurai ma ra harbalaurai ta God bia na hanuat hunanges. Ma ga balu diet hoken: “Ing no kinkinis na harkurai ma ra harbalaurai ta God na hanuat, pa na hanuat ma ra mangana hakilang bia da nes ie.
LUK 17:21 Ma taie tiga nong na tange bia, ‘No kinkinis na harkurai ma ra harbalaurai kenas,’ bia, ‘Ie ken.’ Pa na tange huo kanong no kinkinis na harkurai ma ra harbalaurai ta God ie ken ho muat.”
LUK 17:22 Io, ga tange ta ira uno bulu na harausur, “Tiga pakana bung namur muat na manga sip bia muat na nes tikai ta ira bung ta Nong a Tunotunoi. Iesen muat pa na nes iakano bung.
LUK 17:23 Ari diet na tange ta muat, ‘Ie kena,’ bia ‘Ie ken.’ Ma sen waak muat hilau mur diet kanong no pakana bung ta Nong a Tunotunoi na haruat hoira hile i murarang tano ula mawe bakut.
LUK 17:25 Iesen bia na lua na kilingane a haleng haraubaal ma ira matanaiabar ing diet lon katin diet na harus isei.
LUK 17:26 Ira pakana bung ta Nong a Tunotunoi na haruat at mon ma no tinahon ta Noa.
LUK 17:27 Ta kaike ra bung ira matanaiabar diet git iaiaan, diet git mamom, ma diet git harhartola tuk taar tano bung Noa ga laka tano tamat na mon ma no taahit ga hanuat gaam haliare diet bakut.
LUK 17:28 Ma ga ngan mah huo tano tinahon ta Lot. Ira matanaiabar diet git iaiaan, diet git mamom, diet git kuukul, diet git susuhur, diet git saaso, ma diet git pakpakila hala.
LUK 17:29 Iesen tano bung Lot ga tut laah me Sodom, a mon iaah ma solam ga puko suur meram ra mawe gaam haliare diet bakut.
LUK 17:30 Na ngan mah huo tano bung bia Nong a Tunotunoi na harapuasa.
LUK 17:31 “Ing bia tikai na kis taar tano uno madahien na ula hala ta iakano bung, waak i hansur wara kapkap hasur ira uno linge meram narako tano hala. Ma huo mah diet ing diet kis taar ra lalong. Waak diet haan balin tiga katon wara kapkap ta linge.
LUK 17:32 Muat na lik leh no hahin ta Lot.
LUK 17:33 Sige tikai i walar bia na gumute no uno nilon, na ber tano uno nilon tutun. Ma sige tikai i bale se tar no uno nilon, na balaure kahe no uno nilon tutun.
LUK 17:34 Iau tange ta muat, bia airuo dir noh taar tiga suuh ta iakano bung ra bung, da kap leh tikai ma da waak kapis tikai.
LUK 17:35 Airuo hahin dir na kis tika, ma dir na kakaar tapiok. Da kap leh tiga nong ma da waak kapis tikai.”
LUK 17:36 (-)
LUK 17:37 Ma ira bulu na harausur diet ga tirii, “Ahe, Watong?” Jisas ga babalu, “Na palai ta muat hoing i palai bia no minaat i noh taar he, kanong muat na nes ira kok diet na hanuat hurlungen kaia.”
LUK 18:1 Ma Jisas ga tange tiga nianga harharuat ta ira uno bulu na harausur wara hauhausur diet bia diet na sasaring hatika ma diet pa na malmalungo.
LUK 18:2 Ga tange hoken: “Tiga pise na hala ga mon tiga ut na gil harkurai. Pa ga urur ta God ma pa ga lik leh ira matanaiabar.
LUK 18:3 Ma ga mon mah tiga makosa na hahin kaia ta iakano pise na hala nong git hanhanuat hait tupas ie ma git saasaring bia, ‘Nu kure hatakodasne mir ma no agu suk wara harharahut iau.’
LUK 18:4 Haleng na pakaan nalua ga malok sei wara harharahut ie. Namur at um ga lik hoken: ‘A tutun bia iau pai urur ta God ma iau pai lik leh ira matanaiabar.
LUK 18:5 Iesen iakano ra makosa i la hamalaslaas iau. Kaik, iau ni kure hatakodasne ira linge wara harharahut ie bia kabi manga hamalmalungo iau.’”
LUK 18:6 Ma no Watong ga tange, “I tahut bia muat na hadade kaiken ra nianga tano sakana ut na gil harkurai.
LUK 18:7 Ma na ngan mah huo ta ira matanaiabar ing God te gilamis diet, diet ing diet la saasaring tupas ie ra kasakes ma ra bung mah. A tutun sakit, God na kure hatakodasne ira linge wara harharahut diet. Muat lik bia na halis wara tahtaho diet?
LUK 18:8 Taie. Iau tange ta muat, na kure hatakodasne hagasiaan ira linge wara harharahut diet. Iesen bia Nong a Tunotunoi na hanuat, na nes leh ra nurnuruan kai tano ula hanuo bia taie?”
LUK 18:9 Ma Jisas ga tange iakan ra nianga harharuat ta diet ari ing diet ga lik bia diet takodas ma diet ga nes hanapu ira mes bakut.
LUK 18:10 Ga tange hoken: “Airuo tunotuno dir ga haan hut uram ra hala na lotu tamat wara sinasaring. Tikai a Parisi ma tiga nong a ut na kap takis.
LUK 18:11 Ma no Parisi ga tur ma ga sasaring tano uno lilik hoken: ‘God, iau tanga tahut taam bia iau pai haruat ta ira mes na tunotuno. Diet la kikinau, diet la harharabota, ma diet la nohnoh ma ira mes na hahin ing pai udiet. Ma iau tange tahut mah bia mir pai haruat ma kan ra sakana ut na kap takis.
LUK 18:12 Iau la hahal airuo bung tiga wik ma iau la tamtabar ugu ma nong i sangahul mei ta ira nugu linge bakut.’
LUK 18:13 “Iesen no ut na kap takis ga tur tapaka. Ga hirhir wara tantadeng uram ra mawe ma ga pasar no bangbangona ma ra tapunuk na marmaris. Ma ga tange, ‘God, iau tiga ut na sakena. Nu marse iau.’
LUK 18:14 Iau tange ta muat ing bia iakan ra tunotuno ga tapukus uras tano uno hala, ga takodas ra matmataan ta God, ma no mes balik, pataie. Io, sige ing i hatamat habaling ie, God na bul hasur ie. Ma sige ing i bul hasur habaling ie, God na hatamat ie.”
LUK 18:15 Ma ira matanaiabar diet ga lamlamus ira udiet nat na bulu mah taar ta Jisas bia na sigire diet. Ma ing bia ira bulu na harausur diet ga nes kaike, diet ga bor diet.
LUK 18:16 Iesen Jisas ga tatau ira nat na bulu ukaia ho ie gaam tange, “Muat waak se ira bulu ukai ho iau. Muat pa na tur bat diet kanong no kinkinis na harkurai ma ra harbalaurai ta God audiet ie ira mangana nat na bulu hokaiken.
LUK 18:17 Muat hadade baak! Bia tiga nong pa na hatur kawase no kinkinis na harkurai ma ra harbalaurai ta God hoing tiga nat na bulu, pa na laka tana.”
LUK 18:18 Tiga tunotuno ga tiri Jisas, “Bilai na tena harausur, iau ni gil ra sa waing iau ni kap no nilon nong pa nale pataam?”
LUK 18:19 Ma Jisas ga tange tana, “Nu lilik timaan tano burena warah u kilam iau bia a bilai iau. Taie ta tikai pai bilai. God sen mon i bilai.
LUK 18:20 U nunure ira harkurai tane Moses: ‘Waak u noh tika ma tikai pai a num ie. Waak u harubu bingibing bia. Waak u kikinau. Waak u hinawas harabota uta tikai. Ma nu ru naam sus ma no pawasim.’”
LUK 18:21 No tunaan ga tange ta Jisas, “Ing iau ga bulu laah ma tuk katin iau la murmur bakut kaiken ra harkurai.”
LUK 18:22 Ma ing bia Jisas ga hadade kaiken ga tange tana, “Tiga linge sen mon pau gil baak ma u supii. Nu suhurane ira num inton ma ira num linge bakut, ma nu tar ira kinewa ta ira maris waing nugu hatur kawase ira tamat na hartabar aram naliu. Namur, nu mai ma nu mur iau.”
LUK 18:23 Iesen bia no tunaan ga hadade iakan ga manga tapunuk kanong a watong kiskis ie.
LUK 18:24 Ma Jisas ga nes ie gaam tange, “I manga dadas bia tiga watong na sola tano kinkinis na harkurai ma ra harbalaurai ta God.
LUK 18:25 Io, bia tiga watong i sip bia na sola tana, na manga dadas tana. I malus ta dir bia tiga kamel na hurungo tano matana nil na dudungut bia tiga watong na sola tano kinkinis na harkurai ma ra harbalaurai ta God.”
LUK 18:26 Io, diet ing diet ga hadade kaiken diet ga tange, “Bia hokaike, i nanaas bia taie tikai pai haruat wara kapkap no nilon tutun. Naka?”
LUK 18:27 Sen bia Jisas ga tange, “Ira linge ira tunotuno diet pai haruat wara pakpakile, God i haruat bia na pakile.”
LUK 18:28 Ma Pita ga tange tana, “Nas, ira numehet linge bakut, het te haan sukun tar wara murmur ugu.”
LUK 18:29 Ma Jisas ga tange ta diet, “Muat hadade baak! Sige tikai i haan sukun no uno taman, no uno hahin, ira tasine, no pawasine, no ana sus, bia ira natine wara utano kinkinis na harkurai ma ra harbalaurai ta God, io, na hatur kawase leh ra haleng baling ta iakan ra pakana bung. Ma na hatur kawase mah no nilon nong pa nale pataam tano pakana bung na hanuat namur.”
LUK 18:31 Jisas ga lamus hasisingen ira sangahul ma iruo na bulu na harausur gaam hinawase diet, “Muat hadade timaan. Dahat hanhananut um uram Ierusalem ma ira linge bakut ing ira tangesot diet ga pakat uta Nong a Tunotunoi na hanuat tutun.
LUK 18:32 Ma da tar sei ta ira luma diet ing diet pai Iudeia. Diet na hasakit sakasaka tana ma diet na tange hagahei. Diet na iabis ie, hadangat ie, ma diet na bu bing ie.
LUK 18:33 Ma tano itul a bung, na tut huat baling.”
LUK 18:34 Iesen ira bulu na harausur diet pa ga palai tiga linge ing ga tange kanong ira kukuraina ga susuhai ta diet. Kaik, diet pa gaam nunure asa ing ga iangianga urie.
LUK 18:35 Bia ing Jisas ga hananuat Ieriko tiga pulo ga kis taar tano gagena ngaas gaam saasaring marmaris wara un ta kinewa.
LUK 18:36 Ma bia ga hadade no tamat na matanaiabar diet ga saksakit ie, io, ga tiri bia, “Asa kan?”
LUK 18:37 Ma diet ga balui bia, “Jisas meras Nasaret ie kaike i hanahaan sakit ugu.”
LUK 18:38 Io, ga kakongane bia, “Jisas, augu no tubu Dawit, nu marse iau!”
LUK 18:39 Ma diet ing diet ga lulua haan diet ga bor ie bia na kis matien. Iesen iakano ra pakaan ga manga kakonga naliu balik gaam tange, “Tubu Dawit, nu marse iau!”
LUK 18:40 Io, Jisas ga tur gaam hartula utana bia da lamus hawaat ie. Ma bia ga hanuat hutet ga tiri ie, “U sip bia iau ni gil hohe taam?” No pulo ga balui, “Nugu Watong, iau sip bia iau ni nanaas.”
LUK 18:42 Ma Jisas ga tange tana, “Nu nanaas! No num nurnuruan i te halon ugu.”
LUK 18:43 Kaik at mon ga tapapos ira iruo matana gaam mur leh Jisas. Ma ga pirhakasing hani God. Ma ing bia ira matanaiabar diet ga nes kaiken diet mah diet ga pirlat God.
LUK 19:1 Io, Jisas ga haan laka Ieriko gom saksakit kaia.
LUK 19:2 Ma tiga tunotuno kaia, hinsana Sakias. Aie tiga tamat ta diet ira ut na kap takis ma a watong mah ie.
LUK 19:3 Ga sip bia na nes Jisas bia sigei, sen a kumkumina tunotuno ie. Kaik, pa ga tale kanong a tamat na matanaiabar kaia.
LUK 19:4 Io, ga hilau nalua gaam a kawe tiga ina papus wara nesnes ie kanong Jisas ga hananuat ta iakano ngaas.
LUK 19:5 Bia Jisas ga hanuat ta iakano katon ga nanaas hut, gaam tange tana, “Sakias, nu suur gasien, kanong i tahut bia ni kis tano num hala katin.”
LUK 19:6 Io, kaik at mon ga suur ma ga bale leh ie ma ra gungunuama.
LUK 19:7 Ira matanaiabar diet ga nes kaiken ma diet ga tur leh ra ngurungur. Diet ga tangtange bia, “Iakan ra tunotuno i te haan wara nian tika ma iakano ra ut na sakena.”
LUK 19:8 Ma Sakias ga tur gaam tange tano Watong hoken: “Nugu Watong, nes baak! Iau ni paleng ira nugu minsik ma ni tar tiga subaan tana ta ira maris. Ma ing bia iau te habato tikai ma iau kinau leh ta tiga linge, io, ni balu pukus habaling ma ra aihat tana.”
LUK 19:9 Ma Jisas ga tange tana, “Katin nora harhalon i te haan tupas kan ra hala kanong iakan ra tunotuno mah a bulumur ta Abraham.
LUK 19:10 Io, Nong a Tunotunoi i te hanuat wara silsilihe ma wara halhalon diet ing diet rara.”
LUK 19:11 Ira matanaiabar diet ga hanhadadei ma Jisas ga tange tiga nianga harharuat ta diet kanong ga hutet Ierusalem ma ira matanaiabar diet ga lik bia no kinkinis na harkurai ma ra harbalaurai ta God gate wara hinanuat gasien.
LUK 19:12 Io ga tange, “Ga mon tiga tunotuno a natine tiga tamat na ut na harkurai. Ma ga wara hinahaan tiga taman tapaka bia da tar no kinkinis na tamat na ut na harkurai tana ma na tapukus balin namur.
LUK 19:13 Io, ga tatau a sangahul ta ira uno tultulai ma ga tar tiga arip na kinewa ta diet tikatikai. Ma ga tange ta diet, ‘Muat na papalim me kaiken ra kinewa tuk bia ni tapukus balin.’
LUK 19:14 “Io, ira matanaiabar ta iakano katon diet ga malentakuanei. Diet ga tule ari tunotuno ma ra hinhinawas tano hanuo bia na haan ukaia wara hinhinawas bia diet malok bia iakano tunotuno na kure diet.
LUK 19:15 Iesen di ga tar no kinkinis na harkurai tana ma ga tapukus balin tano uno katon. Io, ga hartula ta ira uno tultulai bia diet na hanuat wara hinhinawas palai ta ira udiet pinapalim ma kaike ra kinewa.
LUK 19:16 Io, no luena ga hanuat gaam a tange tana, ‘Nugu tamat, ira num kinewa i te kakawas balin ma ra sangahul na arip.’
LUK 19:17 “No uno tamat ga tange tana, ‘Tahut na pinapalim! A bilai na tultulai ugu. U te tutun ta tiga nat na pinapalim, io kaik, ni tabar ugu ma ra sangahul na pise na hala wara num kurkure.’
LUK 19:18 “No airuo ga hanuat gaam a tange tana, ‘Nugu tamat, ira num kinewa i te kakawas balin ma ra liman na arip.’
LUK 19:19 “No uno tamat ga tange tana, ‘Nu kure a liman na pise na hala.’
LUK 19:20 “Ma tiga mes na tultulai ga hanuat tupas ie gaam a tange, ‘Nugu tamat, ira num kinewa ken. Iau ga suhei narakoman tiga subana katona maal.
LUK 19:21 Iau ga burte ugu kanong iau ga nunure ba a ngangarine ugu. U la kilkil ing pau ga so. Ma u la kapkap ra hunena ta ira mangason gar na mes.’
LUK 19:22 “Ma no uno tamat ga tange tana, ‘A sakana tultulai ugu! Iau ni kure ugu ma ira num nianga at. U te tange bia u ga nunure bia iau tiga ngangarine tunotuno. Ma u te tange mah bia iau la kapkap ra hunena ta ira mangason gar na mes ma bia iau la kilkil ing iau pa ga so.
LUK 19:23 Wara bih pau ga tar ira nugu kinewa tano benk, bia naga gil leh ta tinahuat tana? Ma bia iau gor tapukus iau gor me kap habaling ira nugu kinewa ma ira tinahuat mah tana.’
LUK 19:24 “Io, ga tange ta diet ing diet ga tur hutet tana, ‘Muat na kap leh kan ra kinewa tana ma muat na tar ie ta iakano tultulai i hatur kawase ra sangahul na arip.’
LUK 19:25 “Diet ga tange tana, ‘Numehet tamat, i te mon ra sangahul!’
LUK 19:26 “Io, ga tange ta diet, ‘Sige nong i mur no nugu sinisip, iau ni manga idanei. Ma sige nong pai mur no nugu sinisip, no uno da hansik na haridaan da kap sei tana.
LUK 19:27 Sen bia muat na lamus diet ukai ing diet bala mamahien tagu, ma muat na bu bing diet ra matmataan tagu kanong diet pa ga sip bia ni kure diet.’”
LUK 19:28 Ma ing bia Jisas gate tange kaiken ga hanahaan baak uram Ierusalem.
LUK 19:29 Ma ga hanuat hutet ta Betapage ma Betani kaia ra uladih di ga kilam bia Olip. Ma ga tule airuo ta ira uno bulu na harausur ma kan ra nianga:
LUK 19:30 “Mur na haan taar tano taman menalua ta mur ma ing mur na laka kaia mur na nas leh tiga sigara donki di te kubus kawase tar ie. Taie baak tikai pai kisi ie. Mur na lapus ie, io, mur na sal hawaat ie ukai ho iau.
LUK 19:31 Bia tari diet na tiri mur bia, ‘Mur gil huo warah?’, mur na hinawase diet, ‘No Watong i supi tar ie.’”
LUK 19:32 Ing bia gate tule se dir, dir ga haan laah ma dir ga nes leh ie hoing gate hinawase tar dir.
LUK 19:33 Dir ga palpalas ise tar no sigara donki. Ma diet ing audiet iakano donki, diet ga tiri bia, “Mur palpalas ise no donki warah?”
LUK 19:34 Ma dir ga babalu, “No Watong i supii.”
LUK 19:35 Io, dir ga sal hawaat no sigara donki ukaia ho Jisas, dir gaam bakar no tihine no donki ma ari ta ira udir maal. Ma dir ga hakisi Jisas tana.
LUK 19:36 Ga hanahaan tano donki ma ira matanaiabar diet ga kap se ari ta ira kiniasi diet, diet gaam palase mur no ngaas me.
LUK 19:37 Ga hanuat hutet tano katon bia no ngaas i hansur meram ra uladih Olip. Ma kaike ira matanaiabar na bulu na harausur diet ga tur leh wara pirpirhakasing God ma ra gungunuama kanong diet gate nes haleng na dadas na gingilaan na kinarup.
LUK 19:38 Diet ga kakongane naliu hoken: “No tamat na lualua na gil harkurai i daan nong i hanuat wara gilgil haruatne ira sinisip gar tano Watong! A malum aram ra mawe ma a minamar aram naliu sakit!”
LUK 19:39 Ma ari ta ira Parisi nalamin tano tamat na matanaiabar diet ga tange ta Jisas, “Tena harausur, tigal ira num bulu na harausur!”
LUK 19:40 Ma ga tange ta diet, “Iau tange ta muat, ing bia diet na kis matien, ira haat diet na kakonga huat!”
LUK 19:41 Ing bia Jisas ga hanuat hutet ta Ierusalem ma ga nes no pise na hala ga suah ie.
LUK 19:42 Ma ga tange, “Ierusalem, ing bia muat at, muat gor te nunure kilam bia asa na hatahuat ra malum ukai ho muat, gor manga tahut. Iesen kaiken um i susuhai ta ira matmataan ta muat.
LUK 19:43 Namur, diet ing diet wara hinarubu ma muat, diet na manga balo bat muat ma diet na tur luhutane muat.
LUK 19:44 Diet na manga haliare muat tika ma ira nati muat narako ta ira balo tano numuat pise na hala. Diet na dure harbasiane no numuat pise na hala. Diet pa na waak tar tiga haat menaliu tiga haat. Warah, kanong muat pa ga nes kilam no pakana bung tano hinanuat ta God tupas muat.”
LUK 19:45 Io, Jisas ga laka tano hala na lotu tamat ma ga bat hasur diet ing diet ga susuhur kaia.
LUK 19:46 Ma ga tange ta diet, “No nianga ta God di ga pakat ie i tange hoken: ‘No nugu hala na lotu na tiga hala na sinasaring.’ Sen bia muat te gil balik ie hoing tiga munmun audiet ira holmatau.”
LUK 19:47 Ma ira kaba bungbung ga hauhausur ira matanaiabar narako tano hala na lotu tamat. Iesen ira tamat ta ira ut na pakila lotu ma ira tena harausur ta ira harkurai ta Moses ma ira lualua ta ira matanaiabar diet ga walwalar wara bubu bing ie.
LUK 19:48 Ma sen diet pa ga tale wara gilgil tiga linge tana kanong ira matanaiabar diet ga manga sip bia diet na hadade bakut ira uno nianga.
LUK 20:1 Tiga bung ing Jisas ga hauhausur ira matanaiabar ma ga harharpir utano tahut na hinhinawas aram narako tano tamat na hala na lotu, io, ira tamat ta ira tamat na ut na pakila lotu, ma ari tena harausur ta ira harkurai tane Moses, ma ari tamat ta ira huntunaan diet ga haan huat taar tana.
LUK 20:2 Io, diet ga tiri Jisas, “Nu hinawase mehet bia u te kap ra tamat na dadas na harkurai meh kaik gu pakile kaike ra linge, ma sige i bul hatamat ugu kaik gu gil huo?”
LUK 20:3 Jisas ga balu diet, “Iau ni tiri mah muat tiga tiniri ma muat na balu iau.
LUK 20:4 Muat lik bia Jon ga kap no uno pinapalim na baptais meram ra mawe bia mekaia ta ira tunotuno mon?”
LUK 20:5 Diet ga wawor nalamin ta diet at hoken: “Bia dahat na tange bia Jon ga kap no uno pinapalim meram ra mawe, Jisas na tange ta dahat bia, ‘Muat gaar te nurnur mon ta ira nianga tane Jon.’
LUK 20:6 Ma dahat pa na tange mah bia Jon ga kap no uno dadas ta ira tunotuno mon kanong ira matanaiabar diet lik hadadas bia Jon ga tiga tangesot.”
LUK 20:7 Io, diet ga babalu bia diet pa ga nunure bia no uno dadas i hanuat meh.
LUK 20:8 Io, ma Jisas ga tange um ta diet, “Iau mah, iau pa ni hinawase muat bia iau kap no nugu tamat na dadas na harkurai meh, kaik iau gi gil huo.”
LUK 20:9 Io, Jisas ga tange iakan ra nianga harharuat ta ira matanaiabar. Ga tange hoken: “Tiga tunotuno ga so tiga lalong na hunena wain. Ma ga waak tar no lalong ta diet ing diet ga sahur ie bia diet na balbalaurei. Ma ga haan laah tiga hanuo tapaka gaam kiskis kaia a taltalona pakaan.
LUK 20:10 Bia ga madar ira hunena wain ga tule auno tiga tultulai uras hoira ut na balaura lalong bia diet na tabar ie ma ta hunena wain. Sen bia diet ga hamidaak ie ma diet ga tule pukus bia se tar ie.
LUK 20:11 Namur ga tule habalin tiga mes na tultulai ma diet ga hamidaak mah ie ma diet ga gil hamalahuan ie. Io, diet ga tule pukus bia se tar ie.
LUK 20:12 Ga tule habalin at mah tiga mes ma diet ga manga gil hangungutaan ie, diet gaam se hasur ie.
LUK 20:13 “Io, aie nong auno no lalong ga tange, ‘Ai! Iau ni biha um? Iau ni tule se no natigu nong iau manga sip ie. Diet na ru dak ie.’
LUK 20:14 “Sen bia ira ut na balaura lalong diet ga nes ie diet ga tange harbasiane ta diet, ‘Iakano tunotuno i te hanuat nong na rumahal. Kaia, dahat gi a ubu bing ie waing dahat naga rumahal ta iakan ra lalong.’
LUK 20:15 Io, diet ga se hasur ie meram narako tano lalong na hunena wain ma diet ga ubu bing ie.” Jisas um ga tange ta diet hoken: “Iau ni hinawase muat ta ira linge ing no tunotuno auno no lalong na gil.
LUK 20:16 No tunotuno na hanuat ma na bu bing haliare kaike ira ut na balaura lalong, io, na tar no lalong na hunena wain ta ari a mes.” Ma ing bia ira matanaiabar diet ga hadade kaiken diet ga tange, “Taie tun at!”
LUK 20:17 Iesen Jisas ga nes dit diet gaam tange, “Ing bia muat lilik huo no numuat lilik i mes harsakit tano kukuraina ta iakan ra nianga ta God di ga pakat ie. I tange hoken: ‘No haat nong ira ut na pakila hala diet ga malok sei kanong diet ga lik bia a linge bia ie, i nanaas taar bia aie balik um no dadas na burena tano hala bakut.’
LUK 20:18 “Ma sige i puko taar ta iakano haat na tarigis hansiksik. Ma bia no haat na puko taar ta tikai, na bisang hansiksik ie.”
LUK 20:19 Io, kaik at mon ira tena harausur ta ira harkurai ta Moses ma ira tamat ta ira ut na pakila lotu diet ga walar bia diet na palim kawase Jisas kanong diet ga nunure bia ga iangianga harharuat at mon uta diet. Iesen diet ga burte ira matanaiabar.
LUK 20:20 Io, diet ira lualua diet ga nes murmur Jisas. Ma diet ga tule ari ut na munmunua. Ma diet ga harabota bia diet ira ut na takodas waing diet naga hakuni ie ta ira uno nianga ma bia diet naga tar se tar ie tano limana no tamat na ut na gil harkurai me Rom.
LUK 20:21 Ma diet ira ut na munmunua diet ga tiri ie bia, “Tena harausur, mehet nunure bia ira num harausur ma ira num nianga i takodas. Pau la turtur sen ma tikai. Iesen u la hausur tutun at tano lilik tane God i sip bia da mur.
LUK 20:22 Io, hinawase mehet, I takodas bia dahat na kul tar no takis ta diet ing diet kure dahat, bia taie?”
LUK 20:23 Iesen Jisas ga nunure kilam no udiet nianga harabota, io, gaam tange ta diet, “Muat haminas tiga siliwa tagu. A malalar i sige iakan ma a hinsa sige iakan?” Diet ga balui, “Tano lualua ta ira udahat ut na harkurai.”
LUK 20:25 Io, ga tange ta diet, “Muat na tar ta ira ut na harkurai ira linge at ta ira ut na harkurai, ma muat na tar ta God ira linge at tane God.”
LUK 20:26 Ma diet pa ga tale bia diet na hakunii ta ira linge ing ga tange ra matmataan na haruat. Sen bia diet ga kis matien kanong diet ga karup tano uno binabalu ma diet ga manga lilik utana.
LUK 20:27 Ari Sadiusi ing diet la liklik bia nong i maat pa na tut hut balin, diet ga hanuat taar tane Jisas, diet gaam tiri ie bia, “Tena harausur, Moses ga pakat tar wara audahat hoken, bia tiga tunaan taie auno ta bulu i maat ma i mat sukun no uno hahin, no tasine na tole leh no makosa. Io, dir na hatahuat ta nati dir ma dir na kilam tar ta diet no hinsana no tasine nong i te maat.
LUK 20:29 Io, a liman ma iruo na haratasin. No luena ga tole tiga hahin ma ga mat sukun ie ma pa ga mon nati dir baak.
LUK 20:30 No airuo ma no aitul a tasine ga tole mah ie. Ma ira liman ma iruo na haratasin bakut diet ga tole tar no hahin huo mah, diet bakut gaam maat, ma pa ga mon nati diet.
LUK 20:32 Namur mah um no hahin ga maat.
LUK 20:33 Io, bia ira minaat diet na lon huat balin tano bung na tuntunut, ta sige tun at um no hahin? Kanong diet bakut ira liman ma iruo diet ga tole tar ie.”
LUK 20:34 Ma Jisas ga balu diet hoken: “Ira tunotuno ing diet lon katin diet la hartola.
LUK 20:35 Iesen pa na ngan huo ta diet ing God na kilam leh diet bia diet haruat wara ninlaka tano pakana bung namur ma tano tuntunut hut sukun ra minaat. Diet pa na hartola.
LUK 20:36 Ma pai tale diet bia diet na maat balin kanong diet na ngan hoira angelo. Diet ira nati God kanong diet te taman tut sukun ra minaat.
LUK 20:37 Iesen Moses at i hamines bia ira minaat diet na tut hut balin. I kis narako tano katon bia no daha ga lulungo. A linge bia ing bia kaiken ra hintubu dahat diet gate maat, Moses ga kilam no Watong bia aie no God tane Abraham, no God tane Aisak, ma no God tane Iakop.
LUK 20:38 Io, pataie bia a God audiet ira minaat, sen bia a God audiet ira lilona kanong tano ninaas ta God diet bakut diet lon.”
LUK 20:39 Ma ari tena harausur ta ira harkurai ta Moses diet ga tange tana, “Tena harausur, a bilai na binabalu.”
LUK 20:40 Ma menamur ta kaiken diet pa ga balaraan bia diet na tiri habalin ie ta tiga linge.
LUK 20:41 Ma Jisas ga tange ta diet, “Muat lik hohe uta nong di kilam ie bia no Mesaia? Ari diet lik bia iakano Mesaia a bulumur ie tane Dawit. Iesen i nanaas bia ira udiet lilik pai manga palai ma diet pai nunure ta tiga mes na linge utana.
LUK 20:42 Io, Dawit at ga tange narako tano Buk na Ninge bia, ‘No Watong ga tange ta nagu Watong: “Nu kap no tamat na kinkinis kai tano kata na limagu, tuk iau ni bul hasur ira num hiruo napu, hoing tiga linge na bul kakim!” ’
LUK 20:44 Io, i nanaas bia Dawit gabe kilam no Mesaia bia ‘Nagu Watong.’ Kaik i palai bia iakano Mesaia a bulumur ie tane Dawit ma aie mah no Watong.”
LUK 20:45 Ira matanaiabar diet ga hanhadade Jisas ma ga tange ta ira uno bulu na harausur hoken:
LUK 20:46 “Muat harbalaurai ta ira tena harausur ta ira harkurai tane Moses. Diet sip bia ira kiniasi diet na manga taheuheu suur, ma diet sip mah bia da kaang leh diet ta ira subaan ing di la hanhanuat hurlungen kaia. Diet sip mah bia diet na kis ta ira kinkinis gar na tamat narakoman ta ira udiet hala na lotu ma ta ira bura na rau ta ira gil nian.
LUK 20:47 Diet la karkarit leh ira linge bakut ta ira makosa, ma diet la harababo ma ira udiet talona sinasaring. God na manga hapidanau diet.”
LUK 21:1 Jisas ga nanaas huat gaam nes leh ira watong diet ga bulbul ira udiet hartabar na kinewa tano bunbulaan tano hala na lotu tamat.
LUK 21:2 Ma ga nes tiga maris na makosa na hahin ga bul halaka airuo nat na peni.
LUK 21:3 Ma Jisas ga tange, “Muat nes baak! Iakan ra maris na makosa i te bul ra tamat ta diet bakut.
LUK 21:4 Diet bakut, diet tar meram ta ira udiet bunbulaan ing i manga haleng kaia, iesen iakan ra maris i te tar hakidilon bakut se ing na lon me.”
LUK 21:5 Io, ari ta ira uno bulu na harausur diet ga iangianga utano hala na lotu tamat. Diet ga tangtange bia no minarine ga bilai kanong a bilai ira uno haat ma ira hartabar di ga hamar no hala na lotu tamat me. Iesen Jisas ga tange, “Uta kaiken ra linge muat nesnes, a pakana bung na hanuat ma taie tiga haat bia na kis harpatup taar ma tikai. Ira amuat suk, diet na dure hasur bakut.”
LUK 21:7 Io, diet ga tiri ie, “Tena harausur, hunanges kaiken ra linge ing u hinawase mehet ine na hanuat? Ma a mangana hakilang sa mehet na nas ing na haminas bia kaike ira linge diet te hutet bia diet na hanuat?”
LUK 21:8 Ma ga tange, “Muat na harbalaurai ta nong kabi habato lamus leh muat. A halengin diet na harabota huat ma diet na tange bia, ‘Iau at mon no Mesaia!’ Ma diet na tange bia, ‘No pakana bung i te hanuat!’ Waak muat murmur diet.
LUK 21:9 Ma bia ing muat hadade ta ira tamat na mangana hinarubu waak muat ra bunurut. Kaike ra linge na hanuat, sen bia no hauhawatine pa na hanuat gasien.”
LUK 21:10 Io, ga tange ta diet, “A haleng na huntunaan tano ula hanuo diet na tut na hinarubu balin ta diet.
LUK 21:11 Ma na mon ra tamat na kunakunar. Ma ra sam taburungan ma ra tamat na minaset na haan tupas tari a haleng taman. Ma ari a tamat na hakilang na hansur meram ra mawe ma na haburut ira matanaiabar.
LUK 21:12 Iesen menalua ta kaike ra linge bakut diet na palim kawase muat ma diet na helar ta muat. Diet na tar se muat wara turtur ra harkurai narako ta ira hala na lotu gar na Iudeia. Diet na wis halaka muat ra hala na harpidanau. Ma diet na lamus muat ra matmataan ta ira ut na harkurai ma ira tamat na ut na harkurai wara gaiegu.
LUK 21:13 Ma bia diet na gil huo, a bilai na pakaan ie bia muat na iangianga palai ta diet utano tahut na hinhinawas.
LUK 21:14 Iesen muat na lua na bul ira numuat lilik bia muat pa na ngarngarau bia muat na tur bat ira udiet hartutung hohe.
LUK 21:15 Ma i tahut bia muat pa na ngarngarau kanong iau ni tabar muat ma ra bilai na nianga ma ra lilik na mintot. Io kaik, diet ing diet na tung muat diet na pet puo wara hargau ma muat. Ma diet pa na tale bia diet na ianga bat muat.
LUK 21:16 Ma ira amuat sus ma ira pawasi muat diet na tar se muat ta ira lima diet ing diet wara hahelar ta muat. Ma ira tasi muat, ira hinsaka muat, ma ira numuat harwis diet na gil huo mah. Ma ari ta muat, da bu bing.
LUK 21:17 Ira tunotuno bakut diet na malentakuane muat wara gaiegu.
LUK 21:18 Iesen taie. Diet pa na tale wara datdat mon tiga pakana hi muat. Diet pa na tale bia diet na hangungut muat ta dahin.
LUK 21:19 Ma ing bia muat na tur dadas muat na hatur kawase no nilon.
LUK 21:20 “Ing muat na nas ira umri diet tur luhutane Ierusalem muat na nunure bia i hutet bia diet na hamau iakano taman.
LUK 21:21 Ma ta iakano pakana bung na tahut bia diet ing diet kis taar kaia Iudeia, diet na hilau uram ta ira uladih. Ma diet ing diet kis taar narakoman tano pise na hala diet na suur laah. Ma diet ing diet kiskis ta ira katon me nataman ta iakano pise na hala, waak diet haan laka tana.
LUK 21:22 I tahut bia diet na gil huo kanong iakano pakana bung na harpidanau na hatutun ira nianga ta God di ga pakat.
LUK 21:23 Maris ta diet ing diet tianan taar ma diet ing diet harharasus ta iakano pakana bung kanong a but na hinangul na hanuat taar ta iakan ra hanuo. Ma God na manga ngalngaluan taar ta kaiken ra matanaiabar.
LUK 21:24 Ma da gaso bing diet ma da wis kawase diet, da lamus diet ta ira mes na huntunaan tano ula hanuo. Ma ira huntunaan ing diet pai Iudeia diet na papasuane Ierusalem tuk taar tano pakana bung bia God i te puo tar ie ta diet.
LUK 21:25 “Ma na mon hakilang tano kasakes, no teka, ma ira tiding. Ma kai napu tano ula hanuo ira hunhuntunaan diet na kalar ma diet na manga ngarngarau tano tes kanong na manga gus.
LUK 21:26 Ma ira tunotuno diet na langa maat ma no bunurut kanong diet na manga ngarngarau ta ira linge na haan tupas diet. Warah, kanong ira dadas na linge aram ra mawe na gunagune.
LUK 21:27 Ma ta iakano pakana bung ira tunotuno diet na nas Nong a Tunotunoi na hanan huat ta ira bahuto ma ra dadas ma ra tamat na minamar.
LUK 21:28 Ma tano hamhaburen ta kaiken ra linge muat na tur dadas ma muat na nanaas uram naliu kanong no numuat harhalon i te hutet wara hinanuat.”
LUK 21:29 Ma ga tange iakan ra nianga harharuat ta diet. Ga tange hoken: “Muat na nes no ina balbaal ma ari a mes na mangana ina daha.
LUK 21:30 Tano pakana bung bia diet te selas ma diet te kuburuan ira paka diet, muat na nunure bia i te hutet no pakana bung na harat.
LUK 21:31 Hoing at mon, bia muat na nas kaike ra linge i te hanan huat, muat na nunure bia no kinkinis na harkurai ma ra harbalaurai ta God i te hutet.
LUK 21:32 Muat na hadade baak! Iakan ra huntunaan, tari ta diet pa na maat baak ma kaiken ra linge na hanuat.
LUK 21:33 No ula mawe ma no ula hanuo na panim laah ma sen bia ira nugu nianga pa na panim.
LUK 21:34 “Muat na harbalaurai, muat kabi manga balaan wara nian, wara minom, ma wara nginarau uta ira mangana linge ta iakan ra nilon. Ing bia muat na gilgil huo iakano bung na hakuni hakarup muat.
LUK 21:35 I tale bia na hakuni muat kanong na hanuat taar ta diet bakut ing diet la kis taar tano ula hanuo.
LUK 21:36 Muat na harbalaurai ma muat na sasaring hait muat naga petlaar bia muat na hilau pas ira linge na haan tupas muat. Ma muat na harbalaurai ma muat na sasaring hait mah muat naga tur ra matmataan ta Nong a Tunotunoi.”
LUK 21:37 Io, ta ira bungbung bakut Jisas git harharausur um kaia ra hala na lotu tamat. Ma ira kaba matarahien bakut git hanahaan wara ninahon laah kaia ra uladih di ga kilam ie bia no uladih Olip.
LUK 21:38 Ma ira kaba malaan bakut ira matanaiabar diet git hanhanuat ukaia ra hala na lotu tamat wara hanhadadei.
LUK 22:1 No pakana bung tano nian na Beret Pai La Laalat nong di ga kilam ie bia no Nian na Hinahaan Sakit ga hanuat hutet.
LUK 22:2 Ma ira tamat ta ira ut na pakila lotu ma ira tena harausur ta ira harkurai ta Moses diet ga sisilih tiga bilai na ngaas bia diet na bu bing Jisas hohe kanong diet git burburte ira matanaiabar.
LUK 22:3 Ma Sataan ga sasoha tane Iudas nong di ga kilam mah ie bia Iskariot. Ma aie tiga nong ta diet ira sangahul ma iruo na bulu na harausur.
LUK 22:4 Ma Iudas ga haan tupas diet ira tamat ta ira ut na pakila lotu ma ira lualua tano matana ubane tano tamat na hala na lotu. Ma diet ga wawor tika bia Iudas na tar se Jisas hohe.
LUK 22:5 Diet ga kanakana panei ma diet ga haut wara tamtabar ie ma ra kinewa.
LUK 22:6 Io, Iudas ga haut mah ma ga sisilih tiga bilai na ngaas wara tartar se Jisas ta diet ing bia taie ta haleng na matanaiabar kaia.
LUK 22:7 Io, no bung tano nian na Beret Pai La Laalat ga hanuat. Ma ta iakano bung ira Iudeia diet git bubu bing mah ira nat na sipsip diet naga ien wara liklik kawase no bung na Hinahaan Sakit.
LUK 22:8 Io, Jisas ga wara tule se Pita ma ne Jon, gaam tange ta dir hoken: “Mur haan, mur naga tagure no Nian na Hinahaan Sakit wara adahat, dahat naga iaan.”
LUK 22:9 Ma dir ga tiri ie, “U sip bia mir na tagurei he?”
LUK 22:10 Ma ga tange ta dir, “Ing bia mur te laka tano pise na hala, io, tiga tunaan i kapkap hani tiga pokona taah na harsomane mur kaia. Mur na mur ie ma mur na laka tika mei tano hala nong no tunaan na haan laka kaia.
LUK 22:11 Ma mur na tange tano tunaan nong auno tus no hala hoken: ‘No tena harausur i wara nunure bia ie he no subaan tano hala nong aie ma mehet ira uno bulu na harausur, mehet na ien no Nian na Hinahaan Sakit kaia?’
LUK 22:12 Io, na tuko haminas tiga subaan ta mur, aram naliu tano hala nong di te tagure tar. Mur na tagure no nian kaia.”
LUK 22:13 Io, dir ga haan laah dir gaam haan laka tano tamat na pise na hala. Dir ga nas bakut leh ira linge hoing Jisas ga tange ta dir. Io, dir ga tagure no adiet Nian na Hinahaan Sakit.
LUK 22:14 Bia no pakana bung wara nian i te hanuat, Jisas ma ira uno sangahul ma iruo na apostolo, diet ga kis tika taar tano suuh na nian.
LUK 22:15 Ma Jisas ga tange ta diet, “Iau te manga sip bia ni ien iakan ra Nian na Hinahaan Sakit tika ma muat menalua bia ni kilingane ra ngunungut.
LUK 22:16 Io, iau hinawase muat, iau pa ni ien habaling iakan ra nian tuk taar bia no kukuraina ta iakan ra nian na hanuat puasa tano kinkinis na harkurai ma ra harbalaurai ta God.”
LUK 22:17 Io, Jisas ga kap leh no gingop na wain, gaam tanga tahut ta God tana, ma ga tange, “Muat kap leh iakan muat naga palau harbasiane muat mei kanong iau tange ta muat, iau pa ni mame habalin ta wain tuk tano pakana bung bia no kinkinis na harkurai ma ra harbalaurai ta God na hanuat.”
LUK 22:19 Ma Jisas ga kap leh tiga katona beret, ga tanga tahut tane God tana ma gaam pidik ie. Io, ga palau ira uno bulu na harausur mei ma ga tange ta diet, “Iakan no tamaigu nong iau tar se wara gaie muat. Muat na ien ie wara liklik kawase iau.”
LUK 22:20 Huo at mon namur tano nian ga raun leh no gingop na wain gaam tange, “Iakan ra gingop na wain i haruat tano degu iau ni tar se biai wara gaie muat wara hatutun no sigar kunubus meram ho God.
LUK 22:21 “Iesen muat nes baak, no limana iakanong na tar se tar iau, ie ken tano ula suuh na nian tika ma iau.
LUK 22:22 Ma Nong a Tunotunoi na haan taar tano uno minaat hoing ra kunubus ta God. Iesen, maris ta iakano tunaan nong na tur talur ie ma na tar sei.”
LUK 22:23 Ma ira uno bulu na harausur diet ga hartiritiri baling nalamin ta diet bia sige ta diet na gil huo.
LUK 22:24 Io, tiga hargor ga hanuat nalamin ta diet ira bulu na harausur bia sige ta diet i tamat.
LUK 22:25 Ma Jisas ga tange ta diet, “Ira lualua ta diet ing diet pai Iudeia diet la hatamat habaling diet ma diet la hanapu ira mes. Ma diet la kilkilam habaling diet bia a ut na harharahut ta ira matanaiabar.
LUK 22:26 Iesen waak muat lilik huo. Na tahut bia no tamat sakit ta muat na haruat ma no hansiksik, ma bia nong i kure muat na haruat ma tiga tultulai.
LUK 22:27 Ma sige ta dir i tamat, nong i kis taar tano suuh na nian bia nong a tultulai? Tutun sakit, nong i kis taar tano suuh. Iesen iau balik iau pai ngan huo. Iau ken nalamin ta muat hoing tiga tultulai ta muat.
LUK 22:28 Ma sige diet ing diet te tur tika ma iau ing bia ira tinirih ga haan tupas iau? Muat at.
LUK 22:29 Hoing no agu Sus i te tar ra kinkinis na harkurai tagu, iau mah iau ni tar ra kinkinis na harkurai ta muat.
LUK 22:30 Io, muat na iaan ma muat na mom tika ma iau tano suuh na nian tano nugu kinkinis na harkurai ma ra harbalaurai. Ma muat na kis ta ira kinkinis na tamat wara kurkure ira sangahul ma iruo na huntunaan gar na Israel.
LUK 22:31 “Saimon, Saimon, God i te bale tar ta Sataan bia na walar muat wara palpaleng harbasiane ira tahut ma ira sakena hoing tikai na se haut ira pat na wit wara kapkap se ira paline sukun ira patine.
LUK 22:32 Iesen iau te sasaring wara gaiem bia no num nurnuruan pa na puko. Ma ing bia nu lilik pukus nu hadadas ira tasim.”
LUK 22:33 Iesen Pita ga tange, “Watong, iau taguro taar bia ni haan tika ma augu kaia tano winwisaan ma no minaat!”
LUK 22:34 Jisas ga tange, “Pita, iau tange taam, no kareka pa na kakel baak ma u te haitul a harus bia pau nunure iau.”
LUK 22:35 Ma Jisas ga tiri diet, “Muat lik leh iakano pakaan bia iau ga tule muat tano numuat hinahaan ma pataie ta raat, bia ta kinewa, bia ta pala lamaas ta ira kaki muat wara harkios. Muat ga supi ta linge?” Diet ga babalu, “Taie.”
LUK 22:36 Io, Jisas ga tange ta diet, “Iesen kaiken bia a mon kinewa ta muat, muat na kap. Ma muat na kap ira numuat raat. Ma ing bia pataie numuat ta wise na hinarubu, io, muat na suhurane ta kiniasi muat, muat naga kul leh numuat tikai.
LUK 22:37 Iau tange huo ta muat kanong ira nianga ta God di ga pakat utagu i tange hoken: ‘Di ga was pakur ie ma ira holmatau.’ Iakan ra nianga na hanuat tutun kanong ira linge di ga pakat utagu di wara gilgil sot um.”
LUK 22:38 Ma ira bulu na harausur diet ga tange, “Watong, nes, airuo wise na hinarubu ken.” Ma Jisas ga tange, “I te haruat mon ira numuat nianga.”
LUK 22:39 Io, Jisas ga hansur tano pise na hala ma ga haan uram tano uladih Olip hoing git gilgil huo. Ma ira uno bulu na harausur diet ga mur ie.
LUK 22:40 Ma ga me tange ta diet, “Muat na sasaring waing muat pa na puko bia ta harwalaam na tupas muat.”
LUK 22:41 Io, ga haan talur diet u tapaka dahin haruat ma tiga tunotuno i tale bia na gulumane tiga haat. Ga singa bukunkek ma gaam sasaring hoken:
LUK 22:42 “Mama, ing bia u kanan, nu kap se iakan ra tinirih mekai ho iau nong i wara hinaan tupas iau. Ma sen bia waak u gil haruat tano nugu sinisip. Nu gil at haruat tano num sinisip.”
LUK 22:43 Ma tiga angelo meram ra mawe ga harapuasa taar tana ma gaam habalaraan ie.
LUK 22:44 A tamat na tirtirih ga ubal ie, io, ga manga sasaring dadas ma ga mangason. Ma ira uno tuo na mangason ga puko suur ukaia ra pise hoira de.
LUK 22:45 Ma ing bia ga tut laah mekaia ho ga sasaring ga haan tupas habaling ira uno bulu na harausur. Ga nes leh dal ma kana dal ga kumkubaba kanong ira udal tapunuk ga manga hasumsumela dal.
LUK 22:46 Ma ga tange ta dal, “Mutal kubaba warah? I tahut bia mutal na taman tut ma mutal na sasaring waing mutal pa na puko bia ta harwalaam na tupas mutal.”
LUK 22:47 Io, Jisas pa ga hapataam baak ira uno nianga ma a tamat na matanaiabar gate haan tupas ie. Ma Iudas, tikai ta diet ira sangahul ma iruo ga lulua haan ta diet. Ma ga haan tupas Jisas wara haatnei ma ra harlusung.
LUK 22:48 Iesen Jisas ga tange tana, “Iudas, u wara tartar se Nong a Tunotunoi ma ra harlusung mon? Maris!”
LUK 22:49 Io, ma ing bia diet ing diet ga tiktika haan mei diet ga nes bia a mangana linge sa ga wara hinanuat, diet gaam tange, “Watong, u sip bia mehet na harkato ma ra wise?”
LUK 22:50 Ma tikai ta diet ga kato kutus se no talingana tano palpal na kata tano tultulai tano tamat ta ira ut na pakila lotu.
LUK 22:51 Iesen Jisas ga tange, “Waak um hokaike!” Io, ga sigire no talingana no tunotuno ma gaam halangalanga ie.
LUK 22:52 Ma kaia nalamin ta ira matanaiabar ira tamat na ut na pakila lotu, ira lualua tano matana ubane tano hala na lotu tamat, ma ira tamat ta ira huntunaan. Diet gate hanuat wara palpalim kawase Jisas ma Jisas ga tange ta diet, “Hoing balik bia iau tiga holmatau kaik muat gi kap hawaat ira wise ma ra kapsil wara hanawaan iau?
LUK 22:53 Ira kaba bungbung iau git turtur nalamin ta muat kaia ra hala na lotu ma muat pa ga walar wara palpalim kawase iau. Sen bia kaiken um no numuat pakana bung. Kaiken no kankado i harkurai.”
LUK 22:54 Io, diet ga palim kawase Jisas diet gaam lamus leh ie uram narako tano hala tano tamat ta ira ut na pakila lotu. Ma Pita ga murmur haan tapaka dahin.
LUK 22:55 Di ga halo tiga iaah nalamin tano hera tano hala. Ma Pita ga rat iaah tika ma diet.
LUK 22:56 Ma tiga tultulai na hahin ga nes leh Pita tano lulungo na iaah. Ga nes dit ie gaam tange, “Iakan ra tunotuno mah ga tiktika mei.”
LUK 22:57 Ma sen Pita ga harus isei hoken: “Hainigu, iau pai nunure ie.”
LUK 22:58 Namur dahin tiga mes ga nes ie, gaam tange, “Augu mah tiga nong ta diet.” Pita ga tange, “Tasigu, iau taie!”
LUK 22:59 Ma namur dahin baling tiga mes na tunotuno ga tange hadadas bia, “Tutun sakit iakan ra tunotuno ga tiktika mei kanong aie meras Galili.”
LUK 22:60 Iesen Pita ga tange, “Tasigu, iau pai palai ta kaike u tangtange!” Kaik at mon baak ga iangianga, no kareka ga kakel.
LUK 22:61 No Watong ga talingane Pita gaam nes dit ie. Io, Pita ga lik leh kan ra nianga no Watong ga tange taar tana hoken: “No kareka pa na kakel baak ma u te harus ise tar iau aitul a pakaan.”
LUK 22:62 Io, ga hansur ma ra tamat na tapunuk gaam suah.
LUK 22:63 Ira tunotuno ing diet ga nesnes mur Jisas diet ga hasakit sakasaka tana ma diet ga ububui.
LUK 22:64 Diet ga kubus pulo ira iruo matana diet gaam tange, “Nu kilam sot bia sige iakanong te tut ugu!”
LUK 22:65 Ma diet ga tange hagahei ma ra haleng na mes na mangana nianga mah.
LUK 22:66 Bia gate malaan um ira tamat ta ira huntunaan, ira tamat ta ira ut na pakila lotu, ma ira tena harausur ta ira harkurai ta Moses diet ga kis hulungai. Ma di ga sal Jisas ukaia ra matmataan ta diet.
LUK 22:67 Ma diet ga tange tana, “Ing bia augu no Mesaia nu hinawase mehet.” Jisas ga tange ta diet, “Ing bia ni hinawase muat, muat pa na nurnur tagu.
LUK 22:68 Ma ing bia ni tiri muat, muat pa na babalu.
LUK 22:69 Iesen tur leh um kaiken, Nong a Tunotunoi na kis tano tamat na kinkinis kaia tano kata na limane God, no Dadasine.”
LUK 22:70 Ma diet bakut diet ga tiri bia, “Io kaik, no nati God ugu?” Ga babalu bia, “Ing bia muat tange huo, muat takodas.”
LUK 22:71 Io, diet ga tange um, “Dahat pai supi habalin um ta tikai wara hinawase dahat utana! Dahat at, dahat te hadade leh tano hana.”
LUK 23:1 Io, diet bakut tano kis hulungai diet ga taman tut, diet gaam lamus Jisas ukaia ho Pailat.
LUK 23:2 Ma diet ga tur leh bia diet na tung ie. Diet ga tange, “Mehet nes leh iakan ra tunaan bia i la lamlamus harango no numehet huntunaan ira Iudeia. I malok mah bia da kul takis taar ta ira numehet ut na harkurai, ma i tange bia aie at tiga tamat na lualua na gil harkurai, no Mesaia.
LUK 23:3 Io kaik, Pailat ga tiri ie, “Augu no tamat na lualua na gil harkurai audiet ira Iudeia?” Jisas ga balui, “A num nianga at!”
LUK 23:4 Io, Pailat ga hinawase no tamat na matanaiabar ma ira tamat ta ira ut na pakila lotu bia, “Iau pai nes tupas leh tiga ronga bia da tung iakan ra tunotuno me.”
LUK 23:5 Iesen diet ga manga hahait ie diet gaam tangtange, “I la hathatahuat ra purpuruan ma no uno harausur ta ira tamtaman kai Iudeia. Ga haburen me Galili ma kaiken i te hanuat ukai mah.”
LUK 23:6 Ma ing Pailat ga hadade iakan ga tirii bia aie me Galili bia taie.
LUK 23:7 Bia ga palai bia aie mekaia tano katon Herot i harkurai tana, ga tulei ukaia hone Herot kanong Herot mah ga kiskis kaia Ierusalem ta iakano pakana bung.
LUK 23:8 Ma ing bia Herot ga nes Jisas, ga manga guama kanong baak at um ga sipsip bia na nas ie. Ma gate ser leh ari a linge utana, kaik gaam manga sip bia na nes Jisas ing na gil tiga dadas na gingilaan na kinarup.
LUK 23:9 Ga tiri Jisas ma ra haleng na tiniri sen bia Jisas pa ga balui.
LUK 23:10 Ira tamat ta ira ut na pakila lotu ma ira tena harausur ta ira harkurai ta Moses diet ga turtur kaia ma diet ga tungtung ie ma ra dadas na nianga.
LUK 23:11 Herot ma ira uno umri diet ga hasakit sakasaka tana. Io kaik, diet gaam hasigam ie ma tiga bilai na sigasigam diet gaam tule pukus ie ukaia ho Pailat.
LUK 23:12 Ma tur leh um ta iakano bung Pailat ma Herot dir ga harwis. Ma sen nalua dir ga manga harngangaar.
LUK 23:13 Io, Pailat ga tatau hulungan ira tamat ta ira ut na pakila lotu ma ari a mes na lualua ma ira matanaiabar.
LUK 23:14 Ga tange ta diet, “Muat te lamus iakan ra tunotuno ukai ho iau ma muat tung ie bia i lamus harango ira matanaiabar. Iau te tiri murmur ie ra matmataan ta muat ma iau pai nes leh ta nironga haruat ta ira numuat hartutung taar tana.
LUK 23:15 Ma ne Herot mah, pai nes leh ta nironga tana kaik gi tule pukus ie ukai ho dahat. Muat nes baak! Pai gil tiga sakana linge bia na maat pane.
LUK 23:16 Io kaik, iau ni hapidanau ie ma ni palas isei.”
LUK 23:17 (-)
LUK 23:18 Sen bia no tamat na matanaiabar bakut diet ga kakonga bia, “Nu bu bing sei! Nu palas ise Barabas uta mehet!”
LUK 23:19 (Io, Barabas um, di ga bul halakai tano hala na harpidanau kanong ga harubu bingibing ma diet ing diet ga kure ira Iudeia.)
LUK 23:20 Io, Pailat ga sip bia na palas ise Jisas, kaik gaam haianga habaling ira matanaiabar.
LUK 23:21 Sen bia diet ga kakongane bia, “Da tut tar ie tano ula kabai! Da tut tar ie tano ula kabai!”
LUK 23:22 Tano aitul a pakaan ga tange habaling ta diet, “Warah? Iakan ra tunotuno i te gil ra mangana nironga sa? Iau pai nes leh ta nironga i haruat bia na maat pane. Io kaik, iau ni hapidanau ie, iau nigi palas isei.”
LUK 23:23 Iesen diet ga kaakonga naliu a haleng na pakaan bia da lau ie ra ula kabai. Io, ira udiet kinkonga ga sunang Pailat bia na haut.
LUK 23:24 Io kaik, Pailat gaam kure Jisas hoing diet ga sip.
LUK 23:25 Ga hasur se no tunaan nong di ga bul halakai tano hala na harpidanau, aie nong ira matanaiabar diet ga sasaring wara utana. Iakano tunaan nong ga harubu bingibing ma diet ing diet ga kure ira Iudeia. Ma Pailat ga tar se Jisas ta ira uno umri bia diet na gil tana haruat ma ira sinisip ta ira matanaiabar.
LUK 23:26 Io, ing diet ga lamlamus hani Jisas, diet ga ras leh Saimon me Sairin nong ga laklaka huat merau ra mes na balehan. Diet ga hapupusak ie ma no kabai ma diet ga sunang ie bia na kapkap hanii manamur ta Jisas.
LUK 23:27 Ma a tamat na matanaiabar sakit diet ga murmur hanii. Ma nalamin ta diet ari a hahin ing diet ga susuah hanii.
LUK 23:28 Jisas ga talingane diet gaam tange ta diet, “Muat ira hahin me Ierusalem, waak muat suah iau. Muat na suah at muat ma ira nati muat kanong tiga pakana bung na hanuat ing muat na tange, ‘Na tahut ta diet ira hinkaho ma ta diet ing diet pai kakaha bia harasus!’
LUK 23:30 Ta iakano pakana bung diet na tange ta ira uladih bia, “Muat bus mehet!” ’
LUK 23:31 Ing bia ira tunotuno diet gil kaiken ra linge wara tuntun no daha pai mamasa, diet na manga tun haliare no daha i mamasa.”
LUK 23:32 Ma di ga lamus leh mah airuo holmatau tika ma Jisas wara hiniruo.
LUK 23:33 Ma ing bia diet ga hanuat taar tano katon di ga kilam ie bia ‘No Ula Turangan’, diet ga tut tar Jisas tano ula kabai kaia tika ma ira iruo holmatau, tikai tano kata na limana ma tikai tano kesa na limana.
LUK 23:34 Ma Jisas ga tange, “Mama, nu lik luban se ira udiet nironga kanong diet pai palai bia a mangana linge sa ing diet gilgil.” Ma diet ga mamagu ma ra satu wara nunure leh bia sige na kap leh gahim ta ira kiniasine.
LUK 23:35 Ma ira matanaiabar diet ga tur taar diet ga ngokngok tana. Ma ira lulua diet ga kukutur tana diet gaam tange, “Ga halon ira mes. Ing bia aie no Mesaia at gar ta God nong God gate gilamis ie, io, waak ie na halon habalin ie!”
LUK 23:36 Ma ira umri mah diet ga hanuat diet gaam kukutur tana. Ma di ga tar ra wain tana wara minom.
LUK 23:37 Ma diet ga tange tana, “Ing bia augu no tamat na lualua na gil harkurai gar na Iudeia, nu halon habalin ugu.”
LUK 23:38 Ma ira nianga di ga pakat di ga bul ie manaliu tano ula kabai. Ma ga tange hoken: “Iakan no tamat na lualua na gil harkurai gar na Iudeia.”
LUK 23:39 Ma tikai ta kaike ra iruo holmatau nong ga taba taar ga se ra sakana nianga taar tana hoken: “Augu no Mesaia, nah? Kaia, nu halon habalin ugu! Ma nu halon mir mah!”
LUK 23:40 No mes balik ga bor ie hoken: “Hohe, pau burte God? No udatal harpidanau tiga mangaan mon.
LUK 23:41 Iesen tiga linge i mes harsakit. No udar harpidanau i haruat ma ira udar magingin iesen iakan ra tunotuno pai gil tiga nironga.”
LUK 23:42 Io, ga tange, “Jisas, nu lik leh iau tano pakana bung bia nu hanuat ma no num kinkinis na harkurai ma ra harbalaurai.”
LUK 23:43 Ma Jisas ga tange tana, “Tutun sakit, katin nu kis tika ma iau kaia ra bilai na katon harsakit.”
LUK 23:44 Ma tano sangahul ma iruo na pakana bung ra tingena kasakes no kasakes ga mun, ma ra kankado ga kasar no hanuo bakut tuk taar ra itul a pakana bung ra matarahien. Ma no tamat na maal aram narako tano hala na lotu tamat ga tamadiris hairuo.
LUK 23:46 Jisas ga kakonga naliu hoken: “Mama, iau tar se no tanuagu ta ira iruo limaam.” Ma ing bia ga tange tar hoken, ga pataam no mansunguno.
LUK 23:47 Ma no tamat na umri ta tiga matana ubane ga nes kaiken ra linge. Ga pirlat God gaam tange, “Tutun sakit, a ut na takodas iakan ra tunotuno.”
LUK 23:48 Ma ari a matanaiabar diet gate hanuat hurlungen wara nesnes iakan ra linge. Ma bia diet gate nes tar huo diet ga tur leh wara hinahaan. Ma diet ga paspasar hani ira bangbango diet ma ra tapunuk.
LUK 23:49 Iesen diet bakut ing diet ga nunure tar ie diet ga tur taar tapaka dahin ma diet ga nesnes kaiken ra linge. Ma nalamin ta diet, ira hahin ing diet gate mur hawaat Jisas meras Galili.
LUK 23:50 Ma ga mon tiga tunotuno, no hinsana Iosep. Ma aie me Arimatia, tiga taman audiet ira Iudeia. A bilai ma a ut na takodas ie ma ga kiskis kawase no kinkinis na harkurai ma ra harbalaurai ta God. Ma aie tikai ta diet ira kaunsil iesen pa ga haut ma ira udiet lilik ma no linge diet ga gil ie.
LUK 23:52 Io, ga haan tupas Pailat gaam saring leh no palatamai Jisas.
LUK 23:53 Io, ga kap leh ie meram ra ula kabai gaam wiwisanei wara pulpulus ie ma tiga talona ponponiana maal. Io, ga bul halaka ie ta tiga midi nong di gate gil ngasiaan tar ie tano papara haat. Ma pa di ga hainoh baak tikai narako tana.
LUK 23:54 Ma iakano bung a Bung Liman ie, no bung bia ira Iudeia diet la tangtaguro pane no Bung na Sinangeh. Ma no Bung na Sinangeh gate hutet um.
LUK 23:55 Ma ira hahin ing dal ga hanuat tika ma Jisas meras Galili dal ga mur Iosep ma dal ga nes no midi. Ma dal ga nes mah hohe ing di ga hainoh ie huo.
LUK 23:56 Io, dal ga haan tapukus u nataman ma dal ga tagura waiwai ing i huhur tahut. Iesen dal ga sangeh tano Bung na Sinangeh haruat ma no harkurai ta Moses.
LUK 24:1 Ra Sade ra malabungbung dal no kaba hahin dal ga kap hawaat ira waiwai ing dal gate tagure. Ma dal ga haan ukaia tano midi.
LUK 24:2 Io, dal ga nes bia di gate pulukane se no haat tano matana no midi.
LUK 24:3 Sen bia dal ga laka dal pa ga nes no palatamai Jisas.
LUK 24:4 Ma ing bia dal ga lilik uta iakan ra linge, kaik at mon airuo tunaan dir ga tur huat taar ta dal. Ma ira kiniasi dir ga laklakituan hoira hile.
LUK 24:5 Ira hahin dal ga manga burut kaik dal gaam tutudung ma ira matmataan ta dal uras napu tano pise. Iesen ira iruo tunaan dir ga tange ta dal, “Wara bih mutal silsilihe no lilona nalamin ta ira minaat?
LUK 24:6 Ie panim kai. I te tut hut sukun ra minaat! Na tahut bia mutal na lik leh ira uno nianga ing ga kis tika ma mutal aras Galili. Ga tange hoken:
LUK 24:7 ‘Da tar se Nong a Tunotunoi ta ira lima diet ira ut na sakena. Da tut ie tano ula kabai ma tano aitul a bung na tut hut baling.’”
LUK 24:8 Io, ing dal ga hadade dal ga lik leh ira uno nianga.
LUK 24:9 Ma bia dal ga tapukus balin mekaia ra midi dal ga hinawase ira sangahul ma tikai na bulu na harausur ma ira mes ta kaiken ra linge bakut.
LUK 24:10 Dal Maria me Magadalen, Ioana, Maria no pawasi Jemes ma ari mah dal ing dal ga hinawase ira apostolo.
LUK 24:11 Iesen diet pa ga nurnur ta ira hahin kanong diet ga lik bia a linge bia kaike ra udal nianga.
LUK 24:12 Ma Pita balik ga taman tut ma ga hilau ukaia hono midi. Ga tudu suur ga nes leh ira katona maal sen kaia napu. Io, ga haan sukun iakano katon gaam manga lilik uta iakan ra linge.
LUK 24:13 Ma ta iakano bung airuo ta diet ga hanahaan uras tiga taman di kilam ie bia Emaus, haruat ma ra sangahul ma tikai na kilomita meram Ierusalem.
LUK 24:14 Ma dir ga wawor tika haan uta ira linge bakut ing ga hanuat.
LUK 24:15 Bia dir ga harianga haan ta dir, Jisas at ga hanuat tupas dir ma ga tiktika haan ma dir.
LUK 24:16 Iesen dir pa ga petlaar wara nesnes kilam ie.
LUK 24:17 Io, ga tiri dir, “Mur waworana sa ing mur tiktika haan?” Io, dir ga tur matien, ma ira iruo matmataan ta dir ga nanaas marmaris.
LUK 24:18 Ma tikai ta dir, a hinsana Kiliopas ga tirii, “Augu sen mon ta ira wasire aram Ierusalem pau nunure ira linge ing i hanuat kaiken ra bar bung?”
LUK 24:19 Io, ga tirii, “A linge sa?” Dir ga babalu bia, “Ira linge uta Jisas meras Nasaret. Iakan ra tunotuno a tangesot ie. Ira uno nianga ma ira uno pinapalim ga dadas ra matmataan ta God ma ira matanaiabar mah.
LUK 24:20 Ira tamat ta ira ut na pakila lotu ma ira mes na lualua diet ga tar sei bia na tur ra harkurai. Ma di ga kure bia na maat. Kaik di gaam tut ie tano ula kabai.
LUK 24:21 Iesen mehet ga kis na balaraan taar bia aie at nong na halangalanga ise Israel. Ma a mes na linge mah te hanuat. Aitul a bung te sakit ing di ga tut tar ie tano ula kabai.
LUK 24:22 Ma ari ta ira numehet hahin dal manga hakarup het. Dal haan taar tano midi katin ra malabungbung.
LUK 24:23 Sen bia dal pai nes no palatamaine. Ma dal me hinawase mehet bia dal nes tiga ninaas na tanuo ma airuo angelo dir tange bia i te lon baling.
LUK 24:24 Io, ari ta ira numehet harwis diet gi haan taar tano midi ma diet nes leh ira linge hoing ira hahin dal tange. Iesen aie, diet pai nes ie.”
LUK 24:25 Io, Jisas ga tange ta dir, “Hohe bia mur pai palai ma mur halis wara nurnur ta ira nianga ta ira tangesot?
LUK 24:26 Tutun sakit no Mesaia ga wara kapkap at kaiken ra ngunngutaan nalua bia na laka tano minarine.”
LUK 24:27 Ma Jisas ga hapalaine dir uta ira linge utana ing i kis narako ta ira pakpakat ta God, haburen ta Moses ma ira nianga ta ira tangesot.
LUK 24:28 Ma ing bia dal ga hanuat hutet tano taman dir ga wara hinahaan ukaia, ga palai bia Jisas ga wara hinahaan hakakari.
LUK 24:29 Iesen dir ga saring hadadas ie, dir gaam tange, “Nu kis tika ma mir kanong matarahien tuai um.” Io, ga laka wara kinkinis tika ma dir.
LUK 24:30 Ma bia ga kis taar tano suuh na nian ga kap leh tiga katona beret, gaam tanga tahut utana, ga pidik ie, gaam palau dir mei.
LUK 24:31 Io, ira udir lilik ga hanuat palai ma dir ga nes kilam ie. Ma Jisas ga panim sukun dir.
LUK 24:32 Io, dir ga harianga ta dir bia, “Tutun sakit i karwas ira bala dar ing i haianga hani dar tano ngaas ma ing i papos ira kukuraina ta ira pakpakat gar ta God ta dar.”
LUK 24:33 Kaik at mon dir ga taman tut dir gaam tapukus balin uram Ierusalem. Ma dir ga haan tupas ira sangahul ma tikai na bulu na harausur tika ma ari a mes. Diet ga kis hurlungen taar ma diet ga tangtange bia, “I tutun! No Watong i te tut hut baling ma i te harapuasa ta Saimon.”
LUK 24:35 Io, kaike ra iruo dir ga hinawas uta ira linge tano ngaas ma bia dir ga nes kilam ie hohe ing ga pidik no katona beret.
LUK 24:36 Ma ing bia diet ga iangianga baak uta kaiken ra linge Jisas at ga tur huat nalamin ta diet gaam tange ta diet, “A malum ta muat.”
LUK 24:37 Io, diet ga karup ma diet ga burut. Diet ga lik bia diet ga nes tiga tabaraan.
LUK 24:38 Ma ga tange ta diet, “Warah muat ngarngarau? Ma muat lilik iriruo warah?
LUK 24:39 Muat na nes ira limagu ma ira kakigu. Iau at mon. Muat na sigire iau ma muat naga palai. Taie ta suruno ma ta palatamaine tiga tanuo hoing muat nes ira surugu ma no palatamaigu.”
LUK 24:40 Ma bia ing ga tange huo ga hamines ira limana ma ira kakine ta diet.
LUK 24:41 Ma pa ga tale baak diet bia diet na nurnur tana kanong diet ga hung ma ra gungunuama ma kinarup. Io kaik, Jisas ga tiri diet, “Ta da linge kana wara ienien?”
LUK 24:42 Io, diet ga tabar ie ma tiga subana kirip i masos taar.
LUK 24:43 Ga kap leh ie gaam ien ie ra matmataan ta diet.
LUK 24:44 Ma ga tange ta diet, “Kaiken ira mangana linge iau ga hinawase muat ine ing iau ga kiskis tika ma muat. Iau ga hinawase muat bia ira linge bakut da gil sot ing di ga pakat utagu narako ta ira harkurai ta Moses, ira nianga ta ira tangesot, ma tano Buk na Ninge.”
LUK 24:45 Io, ga papos ira udiet lilik bia diet naga palai ta ira pakpakat ta God.
LUK 24:46 Ga tange ta diet hoken: “Di ga pakat ie bia no Mesaia na kilingane ra ngunngutaan ma na tut hut sukun ra minaat tano aitul a bung.
LUK 24:47 Ma da harharpir ta ira hunhuntunaan bakut tano ula hanuo, haburen kai Ierusalem, bia ira matanaiabar diet na lilik pukus ma God na lik luban se ira magingin sakena.
LUK 24:48 Muat te nes kaiken ra linge ma muat na hinawas.
LUK 24:49 Iau ni tule hawaat no linge ta muat nong no agu Sus ga kukubus wara utana. Iesen muat na kis kawase tar ie kai ta iakan ra pise na hala tuk bia no dadas meram naliu na kasar muat.”
LUK 24:50 Ma bia ga lamus hasur diet uras Betani ga tatik ira limana gaam idane diet.
LUK 24:51 Ma ing bia ga inidane baak diet, God ga kap haut ie uram ra mame.
LUK 24:52 Io, diet ga lotu tupas ie ma diet ga tapukus ma ra tamat na gungunuama uram Ierusalem.
LUK 24:53 Ma diet ga hanan hait tano hala na lotu tamat ma diet ga pirpirlat God kaia.
JOH 1:1 Nalua tano haburen ta ira linge bakut, no Nianga gate kis. Ma no Nianga ga kis tika ma God, ma aie at mon mah God.
JOH 1:2 Ga kis tika ma God menalua at tano haburen ta ira linge bakut.
JOH 1:3 Ma iakan ra Nianga, God ga hakisi ira linge bakut mei. Ma taie tiga linge pa ga hanuat, bia God pa ga gil ie mei.
JOH 1:4 Ma aie at mon no burena tano nilon tutun. Ma iakan ra nilon, aie no lulungo nong i hapalaine ira tunotuno uta ira tutun ta God.
JOH 1:5 No lulungo i hamadaraas no kankado, iesen no kankado pai le burung ie.
JOH 1:6 Tiga tunotuno, nong God ga tulei, no hinsana ne Jon.
JOH 1:7 Ga hanuat wara hinhinawas uta iakano lulungo. Ga gil huo bia ira tunotuno bakut ing diet na hadade ie, diet naga nurnur tano lulungo.
JOH 1:8 Pai aie at iakano lulungo, iesen ga hanuat mon wara hinhinawas utano lulungo.
JOH 1:9 Iakana baak no lulungo tutun nong te hanuat ukai tano ula hanuo ma i hapalai ira tunotuno bakut.
JOH 1:10 No Nianga ga kis kai ta iakan ra ula hanuo. Ma a tutun bia God ga hakisi no ula hanuo mei, iesen ira tunotuno balik ta iakan ra ula hanuo diet pa ga nes kilam ie.
JOH 1:11 Ga hanuat tano uno katon, iesen ira uno matanaiabar diet pa ga bale halaka leh ie.
JOH 1:12 Sen bia diet ing diet ga bale halaka leh ie, ga haut se tar diet bia diet naga nati God. Diet at kaike ing diet ga nurnur tana.
JOH 1:13 Pa di ga kaha diet hoira tinahuat ta ira tunotuno, bia ta ira sinisip gar na tunaan mon. Iesen taie. Diet tahuat laah ta God.
JOH 1:14 Ma no Nianga ga tunotuno um, ma ga lon nalamin ta mehet. Ma mehet ga nas no uno minamar, a minamar gar na halhaliana bulukasa meram ta nana Sus. Ma ga hung ma no harmarsai ma ga hapuasne bakut mah ira tutun ta God.
JOH 1:15 Io, Jon ga hinhinawas palai utana ma ra dadas hoken: “Iakan iau ga hinhinawase muat utana. Iau ga tangtange, ‘A tutun bia i hanuat menamur tagu iesen i tamat at tagu kanong pa di ga kaha baak iau, ma iakana iaat.’”
JOH 1:16 Ma i hung taar ma no harmarsai, kaik gi la tamtabar haitne dahat bakut me.
JOH 1:17 Io, God ga tar ira harkurai uta dahat tane Moses, iesen ga tar no harmarsai ma no palpalai ta ira tutun utana at ukai ho dahat tane Jisas Krais.
JOH 1:18 Taie tikai pai nas baak God. Iesen God no bulukasa i la kis pirap taar at nana Sus. Ma aie at gate hinawas hapalaine dahat utana.
JOH 1:19 Io, no hinhinawas palai tane Jon utane Jisas hoken. Ira tamat ta ira Iudeia kaia Ierusalem, diet ga tule ari a ut na pakila lotu ma ari tano hun tane Lewi ing diet la harharahut ta ira pinapalim na lotu ukaia hone Jon. Ma diet ga me tiri ie bia a mangana tunotuno sa ie.
JOH 1:20 Jon pa ga malok bia na balu diet, iesen ga hinawase hapalaine at mon diet, gaam tange bia, “Taie bia iau no Mesaia.”
JOH 1:21 Diet ga tiri habalin ie, “Ma sige um ugu? Ne Elaija ugu?” Jon ga balu diet, “Taie, iau pai Elaija.” Diet ga tiri habalin ie, “Augu no tangesot?” Ga balu habalin at diet ma ga tange, “Taie.”
JOH 1:22 Io, diet ga tange tana, “Kaia, nu hinawase um mehet bia sige tun at ugu, waing mehet naga hinawase diet ing diet tule mehet ukai. Nu tange hohe wara utaam?”
JOH 1:23 Jon ga balu diet ma ira nianga tano tangesot Aisaia hoken: “Iau no ingana i taatau meram ra hanuo bia, ‘Gil hatakodasne no ngaas tano Watong wara uno hinanhuat.’”
JOH 1:24 Io, ari Parisi ing di ga tule, diet ga tiri Jon hoken: “Bia pai no Mesaia ugu, ma taie bia ne Elaija ugu ma taie bia no Tangesot ugu, u la baptais wara biha?”
JOH 1:26 Ma Jon ga balu diet bia, “Iau la baptais muat tano taah, iesen tiga nong kana nalamin ta muat, muat pai nes kilam ie.
JOH 1:27 Aie nong na hanuat menamur tagu. Ma iau pai haruat bia ni lapus ira hinau ta ira pupunaak na kakine.”
JOH 1:28 Kaiken ra linge bakut ga hanuat tano taman Betani, arau tiga palpal tano taah Ioridaan, ing ne Jon git baptais kaia.
JOH 1:29 Tano mes na bung um bia Jon ga nas leh Jisas ma ga hananuat ukaia ho ie, ga tange, “Muat nes baak! Iakan no nat na sipsip na hartabar nong God ga tulei ukai wara kapkap se ira ronga ta ira tunotuno.
JOH 1:30 Iakanin mon no tunotuno nong iau ga hinhinawase muat utana. Iau ga tange hoken: ‘A tutun bia iakan ra tunotuno i hanuat menamur tagu, iesen i tamat at tagu, kanong pa di ga kaha baak iau, ma iakana at.’
JOH 1:31 Ma iau at, iau pa ga nunure bia sige iakanong na hanuat. Ma sen bia iau hanuat iau baptais muat ma ra taah bia ni hapalaine muat ira Israel utana.”
JOH 1:32 Io, Jon ga hinawas palai ta diet hoken: “Iau te nas no Tanuo ga hansur meram ra ula mawe hoing tiga bun, gaam a kis um tana.
JOH 1:33 Ma iau pa ga nas kilam baak bia aie at mon iakanong na hanuat. Iesen God, nong ga tule iau wara baptais ma ra taah, gate tange tar tagu hoken: ‘Nu nas no Tanuo na hansur ma na kis um ta tiga tunaan. Io, iakanong at mon nong na baptais ma no Halhaliana Tanuo.’”
JOH 1:34 Ma Jon ga tange, “Iau te nas tar ie, kaik iau gi hinawase muat bia aie at mon no Natine God.”
JOH 1:35 Io, tano bung menamur Jon ma airuo ta ira uno bulu na harausur dal ga tur balin taar kaia.
JOH 1:36 Ma bia ga nas Jisas ga hanan sakit, ga tange ta dir, “Mur nas baak! Iakanan no nat na sipsip na hartabar nong God ga tulei!”
JOH 1:37 Bia ira airuo bulu na harausur dir ga hadade hokaike, dir ga mur leh Jisas.
JOH 1:38 Jisas ga talingane dir ma kana dir ga murmur hanii, io ga tiri dir, “Mur sip sa?” Dir ga balui, dir gaam tange, “Rabai, u kiskis he?” (Ma no kukuraina ta Rabai bia ‘tena harausur.’)
JOH 1:39 Io, Jisas ga tange ta dir, “Mur mai, mur naga nas.” (Ma gate hutet bia na aihat na pakana bung tuai um ra matarahien.) Io, dir ga sakate leh Jisas, dir gaam a nas no katon ga kiskis tana, dal gaam kis tano matarahien bakut kaia.
JOH 1:40 Io, Andru no tasine Saimon Pita, tikai ta dir kaike ing dir ga hadade no nianga tane Jon, kaik dir gom mur leh Jisas.
JOH 1:41 A luena linge, Andru ga nas leh no tasine Saimon, gaam hinawasei bia, “Mir te silihe leh no Mesaia.” (Ma bia da pukusanei na haruat mon bia ‘Krais’.)
JOH 1:42 Io, ga lamus tar Saimon tane Jisas. Jisas ga nas ie ma ga tange tana, “Augu ne Saimon no natine tikai di kilam ie bia Jon. Iesen da kilam ugu bia ne Kepas.” (Da pukusane bia ‘Pita’.)
JOH 1:43 Io, tano mes na bung menamur Jisas ga sip bia na haan uram Galili. Bia ga nas leh Pilip ga tange tana, “Mur iau.”
JOH 1:44 Ma Pilip nong me Betsaida, no taman mah tane Andru ma ne Pita.
JOH 1:45 Pilip ga nas leh Nataniel, gaam a hinawasei bia, “Mehet te silihe leh no tunaan nong Moses ga pakpakat utana narako ta ira nianga na harkurai. Ma aie at mah nong ira tangesot diet ga pakpakat utana. Aie mon ne Jisas meras Nasaret, no nati Iosep.”
JOH 1:46 Ma Nataniel ga tange balik tana, “Taie ta tahut na linge pa na hanuat meras Nasaret!” Io, Pilip ga tange, “Mai, nugu nes.”
JOH 1:47 Ma bia Jisas ga nas leh Nataniel ma ga hananuat, gaam tange bia, “A tutun sakit, iakanin tiga tunotuno me Israel. Pai nunure at ra harabota.”
JOH 1:48 Nataniel ga tiri, “U nunure habibihane iau?” Jisas ga balui, gaam tange, “Bia Pilip baak pai tatau ugu, iau nes tar ugu arau ra hena no ina papus kaia.”
JOH 1:49 Io, Nataniel ga tange, “Tena harausur, augu no Nati God! Augu no tamat na lualua na gil harkurai gar na Israel!”
JOH 1:50 Ma Jisas balik ga tange tana, “U nurnur kanong iau tange taam bia iau nas tar ugu ra hena no ina papus. Iesen nu nas baak tari a linge ing diet tamat ta iakan.”
JOH 1:51 Io, ga tange habalin tana, “Hadade baak! Muat na palai utagu. Na ngan hoing bia no mawe na tapapos ma ira angelo ta God diet na hanansur taar ta Nong a Tunotunoi ma diet na hananut baling tana.”
JOH 2:1 Io, nong ga itul a bung mei, tiga lukara na tinolen di ga gil ie kaia tano taman Kena aram Galili. No pawasine Jisas bilang ga hanuat, ma di ga suko mah Jisas ma ira uno bulu na harausur wara hinahaan ukaia tano lukara.
JOH 2:3 Ma bia ira wain gate pataam, no pawasine Jisas ga tange tana bia, “Taie um adiet ta wain.”
JOH 2:4 Ma Jisas ga tange balik tana, “Waak u song leh iau. No nugu pakana bung pai haruat baak.”
JOH 2:5 No pawasine ga tange um ta ira tultulai, “Muat na gil ing na tange ta muat.”
JOH 2:6 Io, a liman ma tikai na tamat na pala taah na haat dal ga tur taar kaia hutet. Tikatikai ta dal i haruat bia na hung ma ra liman ma tikai na sangahul tuk ra liman ma ihat na sangahul na pokona kor na taah. Ma ira Iudeia diet git taptapir ta dal haruat ma ira udiet harkurai.
JOH 2:7 Ma Jisas ga tange ta ira tultulai, “Muat na kulpe ta taah, muat na hahungi ken ra pala taah.” Io kaik, diet gom kulpe hahungi dal.
JOH 2:8 Ga tange um ta diet, “Muat na gope leh tari, muat naga kap ukaia ta nong i balaure no lukara.” Io, diet ga gil huo.
JOH 2:9 Ma nong ga balaure no lukara ga nam no taah ing Jisas gate kios tar wara wain. Ma pa ga palai bia ira tultulai diet ga kap ira wain meh, iesen diet ing diet ga gope leh ira taah diet ga nunure tar. Io, iakano ra tunotuno nong ga balaure no lukara ga tatau leh no tunaan nong ga wara tinolen, gaam tange tana, “A magingin ta ira tunotuno ke, diet na huna harpalau ma no tahut na wain. Ma bia ira wasire diet te manga mom um, io, da kap hawaat um ing pai manga bilai, daga palau diet me. Iesen augu, pau gil huo. Kana at baak u bul kawase tar ira tahut na wain tuk taar kaiken u wara harpalau me.”
JOH 2:11 Io, Jisas ga gil iakan ra luena dadas na hakilang kaia Kena aram Galili. Kaik gom hapuasne ira uno minamar, ma ira uno bulu na harausur diet ga nurnur um tana.
JOH 2:12 Ma namur ta iakan, Jisas ga hansur u Kapeneam tika ma no pawasine, ma ira tasine, ma ira uno bulu na harausur mah. Diet ga kis ra bar bung kaia.
JOH 2:13 Ma gate hutet no pakana bung utano Nian na Hinahaan Sakit udiet ira Iudeia. Ma Jisas ga hanut uram Ierusalem.
JOH 2:14 Ma narakoman tano tamat na hala na lotu, ga nas tupas ira tunotuno diet ga suhsuhurane ira bulumakau ma ira sipsip ma ira maan. Ma ari mah diet ga kis taar ta ira suuh wara kukuas ira kinewa.
JOH 2:15 Io, Jisas ga kualang leh tiga dangadangat, gaam bat hasur se ira bulumakau ma ira sipsip bakut mekaia tano tamat na hala na lotu. Ma ga pulukane ira suuh ta diet ing diet ga kukuas ira kinewa, kaik ira kinewa gaam bureng harbasia.
JOH 2:16 Ma ga tange ta diet ing diet ga suhsuhurane ira maan bia, “Muat kap se kaike ra linge mekai! Waak muat pukusane no hala ta Mama hoing tiga hala na kunukul!”
JOH 2:17 Io, ira uno bulu na harausur diet ga lik leh ira nianga tane God ing di ga pakat, i tange hoken: “Mama, i manga mamahien sakit no balagu pane no num hala.”
JOH 2:18 Io, ira Iudeia diet ga tirii bia, “A mangana dadas na hakilang sa nu gil wara hatutun ta mehet bia i tale bia nu gil huo?”
JOH 2:19 Jisas ga balu diet, gaam tange, “Muat dure iakan ra tamat na hala na lotu, ma iau ni hatur habaling ie ta itul a bung.”
JOH 2:20 Io, ira Iudeia diet ga tange balik tana, “Di ga harbalaan wara gilgil iakan ra hala na lotu aihat sangahul ma liman ma tikai na tinahon. Ma augu balik, nu hatur ie aitul a bung mon?”
JOH 2:21 Iesen utano tamaine mon, iakanong ga iangianga harharuat mei uta iakano hala na lotu.
JOH 2:22 Ma bia ga tut hut balin sukun ra minaat, ira uno bulu na harausur diet ga lik leh ing gate tange. Io, diet ga nurnur ta iakan ra nianga tane God ma ta kaike ra nianga mah Jisas gate tange tar.
JOH 2:23 Ma bia Jisas ga kis taar aram Ierusalem tano Nian na Hinahaan Sakit, a haleng na matanaiabar diet ga nurnur tana kanong diet ga nes ie bia ga gil ira dadas na hakilang.
JOH 2:24 Iesen Jisas pa ga nuruan diet bia diet na gil ta tahut tana kanong ga nunure tar at ira udiet kidilona nilon.
JOH 2:25 Pa ga supi ta tiga nong bia na hinawasei uta ira udiet kidilona nilon kanong aie at ga nunure tar kenam narakoman ta ira tunotuno.
JOH 3:1 Io, ma tiga tamat audiet ira Iudeia, no hinsana ne Nikodimas, ma aie mah tiga nong ta diet ira Parisi.
JOH 3:2 Ga hanuat taar tane Jisas ra bung, gaam tange tana, “Tena harausur, mehet nunure bia augu tiga tena harausur meram ho God, kanong taie ta tikai pa gor petlaar kaike ra hakilang u gilgil, bia God pai kis tika taar mei.”
JOH 3:3 Io, Jisas ga tange tana, “Hadade baak! Bia ing tikai pa di ga kaha habalin ie, pa na nas no kinkinis na harkurai ma ra harbalaurai tane God.”
JOH 3:4 Nikodimas ga tirii bia, “Ma da kaha bihane tiga tunaan bia i te nongtamat? Pai haruat tun at bia na laka baling tano balana no pawasine, daga kahai.”
JOH 3:5 Io, Jisas ga balui, gaam tange, “Hadade baak! Bia tikai pa di kahai tara taah ma tano Tanuo mah, pai tale bia na sola tano kinkinis na harkurai ma ra harbalaurai tane God.
JOH 3:6 Ira tunotuno diet kaha tunotuno at. Ma no Tanuo i kaha tanuo at.
JOH 3:7 Waak u karup ing bia iau tange taam bia da kaha habaling at muat.
JOH 3:8 No dadaip i huhus murmur no uno sinisip. Ma u hadade no ingana ma pau nunure bia i haan meh, ma i hanahaan uhe. Diet mah huo ing no Tanuo i kaha diet.”
JOH 3:9 Ma Nikodimas ga tirii, “Na ngan hobibiha iakan?”
JOH 3:10 Io, Jisas ga balui bia, “Augu tiga tamat na tena harausur me Israel! Wara biha bia pau palai ta kaike ra linge?
JOH 3:11 Hadade baak! Mehet la tangtange ing mehet nunure tar. Ma mehet la hinhinawas ta ing mehet gate nas. Iesen muat pai la kapkap usurane leh ira numehet hinhinawas.
JOH 3:12 Iau te hinawase muat uta ira linge mekai napu ma muat pa ga nurnur. Bia ing ga tutun, hohe tun at bia muat na nurnur, bia ing iau ni hinawase muat uta ira linge meram ra mawe?
JOH 3:13 Io, taie tikai pa ga haan uram ra mawe, iesen aie sen mon Nong a Tunotunoi nong ga hansur meram ra mawe.
JOH 3:14 Aram ra hanuo bia, Moses ga hatur haut no palimpuo na sui ma no daha. Hoing at mon mah Nong a Tunotunoi da hatur haut mah ie huo, waing diet bakut ing diet nurnur tana, diet na hatur kawase nora nilon hathatika.
JOH 3:16 “Io, God ga manga sip iakan ra ula hanuo hoken, bia ga tar se no uno halhaliana Bulukasa, bia sige i nurnur tana pa na hiruo iesen na hatur kawase nora nilon hathatika.
JOH 3:17 Ma God pa ga tule no Natine ukai ta kan ra ula hanuo bia na kure dahat, iesen ga tulei bia na halon dahat.
JOH 3:18 Io, nong i nurnur tana pa na tur ra harkurai. Iesen nong pai nurnur tana, no harkurai i te karat tar ie kanong pa gale nurnur tano halhaliana Bulukasa tane God.
JOH 3:19 Ma no burena God i kure hagawe iakan ra ula hanuo i hoken: no Lulungo i te hanuat ukai tano ula hanuo iesen ira tunotuno diet manga sip no kankado, ma no uno madaraas pataie, kanong ira udiet magingin i sakena.
JOH 3:20 Ma sige nong i la gilgil ra sakena, i malentakuane no madaraas. Io, pa na hanuat taar tano madaraas kanong kabi kis puasa ira uno magingin.
JOH 3:21 Iesen sige nong i lalon mur ira tutun ta God i hanuat taar tano madaraas waing na palai bia asa ing i gilgil i te hanuat meram hone God.”
JOH 3:22 Io, namur ta kaike, Jisas ma ira uno bulu na harausur diet ga haan laah uram ra hanuo Iudeia. Ga kis kaia ari a bung tika ma diet, ma ga gilgil baptais ta ira ari a tunotuno.
JOH 3:23 Ma Jon mah ga gilgil baptais kaia ra taman Ainon hutet Salim kanong a mon tamat na taah kaia. Ma ira matanaiabar diet git hanhanuat bia na baptais diet.
JOH 3:24 (Ma kaiken ra linge ga hanuat menalua bia pa di ga bul baak Jon tano hala na harpidanau.)
JOH 3:25 Ma ari ta ira bulu na harausur tane Jon no ut na baptais diet ga hargau ma tiga Iudeia. No udiet harkurai bia diet na taptapir kaik diet pa na sakena tano ninaas ta God. Ma diet ga hargor pane iakan ra magingin.
JOH 3:26 Io, diet ga haan tupas ne Jon, diet gaam tange tana bia, “Tena harausur, mehet wara hinawase ugu tano tunotuno nong ga tur tika taar ma ugu arau tano mes na palpal a taah Ioridaan. Aie mon nong u ga hinawase mehet utana. Io, kaiken kana i gilgil baptais ma ra haleng diet hanhanuat taar tana.”
JOH 3:27 Ma Jon ga tange ta diet, “Taie tiga nong pa na gil tiga pinapalim ing bia God pai le tar ie tana.
JOH 3:28 Muat at, muat haruat wara hatutun tar ing iau ga tange hoken: ‘Iau pai no Mesaia. Iesen God ga tule hanalua mon iau tana.’
JOH 3:29 Ma hoken. No tunaan nong i wara tinolen, auno at no bulahin nong i wara tinolen. Iesen no harwis ta iakano tunaan, i tur hanhadoda taar utana. Ma i manga guama bia na hadade no ingana no tunaan nong na tola. Ma no nugu gungunuama i te hanuat huo, ma i te hung taar kaiken.
JOH 3:30 I tahut bia aie at na tamtamat, ma iau ni hansiksik.
JOH 3:31 “Nong i hansur meram ra mawe i tamat ta ira tunotuno. Ma nong mekai napu ra pise, a gar na pise at ie, ma i iangianga at ta ira linge mekai napu ra pise. Iesen i tutun, nong i hansur meram ra mawe i tamat ta ira mes bakut.
JOH 3:32 I hinhinawas ta ing gate nes ma ing gate hadade, iesen taie tiga nong pai kap usurane ira uno hinhinawas.
JOH 3:33 Ma nong i kap usurane ira uno hinhinawas, i hatutun bia ira nianga tane God i tutun.
JOH 3:34 I tutun hokaiken kanong nong God ga tule hasur ie i tangtange ira nianga tane God. Ma i tange huo kanong God ga tar bakut at no Halhaliana Tanuo taar tana.
JOH 3:35 Mama i manga sip no Natine, kaik gaam bul ie bia na harkurai ta ira linge bakut.
JOH 3:36 Sige nong i nurnur tano Natine i hatur kawase nora nilon hathatika. Sen bia sige nong i patnau taar tana pa na nas iakano nilon, iesen i kis taar narako tano harangungut tane God.”
JOH 4:1 Io, ira Parisi diet ga hadade bia Jisas ga lamlamus haleng ma ga baptais ra haleng na bulu na harausur ta ing tane Jon.
JOH 4:2 (Iesen pai tutun bia Jisas ga baptais tari. Iesen ira uno bulu na harausur sen mon kaik, diet ga gilgil baptais.)
JOH 4:3 Ing bia Jisas ga nunure ing diet ga tangtange, ga haan sukun no hanuo Iudeia, ma ga haan tapukus baling uram Galili.
JOH 4:4 Ma no ngaas nong ga murmur ie, ga kutus no hanuo Samaria.
JOH 4:5 Io, ga hanuat taar tiga taman, di kilam ie bia Sikaar, narakoman tano hanuo Samaria. Ma iakano taman i hutet tano katona pise Iakop gate hatinaan no natine ne Iosep mei.
JOH 4:6 Ma no lulur na taah nong Iakop ga kil ie i kis kaia. Ma bia gate hutet ra tingena kasakes, Jisas ga me kis taar kaia tano gagena lulur kanong ga ubal ie no ngaas.
JOH 4:7 Ma tiga hahin me Samaria ga hanuat wara kulpa taah. Ma Jisas ga tange tana bia, “Iau sip bia nu hamamo iau ta taah.”
JOH 4:8 (Io, ira uno bulu na harausur diet gate haan laah ukaia tano taman wara kul nian.)
JOH 4:9 No hahin me Samaria ga tange balik tana, “Augu tiga Iudeia, ma iau, a Samaria iau. Ma wara bih u saring iau wara gaiena taah?” (Io, ga tange huo kanong ira Iudeia diet pai harbalaan taar ma ira Samaria.)
JOH 4:10 Io, Jisas ga balui, gaam tange, “Bia u gate nunure tar no hartabar tane God, ma sige mah iau ing iau saring ugu wara gaiena taah, io, u gor te saring iau ta taah, ma iau gor te tar nora taah a lilonai taam.”
JOH 4:11 No hahin ga tange tana bia, “Awai ra tunaan, taie tiga linge bia nu gagop mei kanong no lulur i manga hansur. Nu kap iakano lilona taah meh?
JOH 4:12 U lik bia u tamat tano hintubu mehet Iakop? Aie at nong ga tar iakan ra lulur na taah ta het. Ma aie mah ga mom kaia, ira natine, ma ira uno huna bulumakau ma ira sipsip mah.”
JOH 4:13 Ma Jisas ga balui bia, “Diet bakut ing diet mom ta iakan ra taah, diet na maruk balin.
JOH 4:14 Iesen bia sige ing na mom tano taah iau ni hamamoi mei, pa na maruk tun at, kanong no taah iau ni tar tana na ngan hora puat narako tana. Ma na pupuat hut, kaik na tar nora nilon hathatika tana.”
JOH 4:15 No hahin ga tange tana, “Awai, iau sip bia nu hamamo iau ma iakano ra taah, kaik iau pa nigi maruk baling ma iau pa nigi la hanhanuat baal ukai wara kunulup.”
JOH 4:16 Io, Jisas ga tange tana, “Nu haan, nugu a lamus leh no num tunaan, ma nu lam ie ukai.”
JOH 4:17 No hahin ga tange tana, “Taie nugu ta tunaan.” Ma Jisas ga tange tana, “U te tange ra tutun ing u tange bia taie num ta tunaan.
JOH 4:18 Warah, a liman na tunaan u gate tole tar, ma nong um mur kiskis mei kaiken, pai num tunaan tutun ie. Io, pau le harabota ta iakan.”
JOH 4:19 Io, no hahin ga tange tana, “Awai, iau nas bia a tangesot ugu.
JOH 4:20 Io, kaiken baak iau wara tirtiri ugu tiga linge. Ira hintubu mehet diet ga lotu tupas God ta iakananam ra uladih. Iesen muat ira Iudeia muat la tangtange bia da lotu tupas God aram sen mon Ierusalem. Ma augu, u lik hohe?”
JOH 4:21 Ma Jisas ga tange tana bia, “Awai ra hahin, nu nurnur tagu. A pakana bung i hanhanuat bia ira matanaiabar diet pa na lotu tupas Mama aram ta iakananam ra uladih ma taie mah aram Ierusalem.
JOH 4:22 Muat ira Samaria muat pai nunure nong muat la lalotu tupas ie. Iesen mehet ira Iudeia, mehet nunure tar nong mehet la lalotu tupas ie, kanong no harhalon ta God i hanuat mekaia ta ira Iudeia.
JOH 4:23 No pakana bung i hanhanuat, ma kaiken mah i te hanuat um bia diet ing diet na lotu tupas God ma ra tutun, diet na lotu hoken. Diet na lotu tupas Mama ta ira tanua diet ma ra tutun na harnunurai mah utana. Io, ma iakan ra mangana lotu, Mama i sip bia da lotu tupas ie huo.
JOH 4:24 God i tanuo, ma diet ing diet na lotu tupas ie, diet na lotu sen mon ta ira tanua diet ma ra tutun na harnunurai mah utana.”
JOH 4:25 No hahin ga tange tana, “Iau nunure bia no Mesaia, aie nong di kilam ie bia Krais, na hanuat. Ma bia na hanuat, na hapalaine ira linge bakut ta mehet.”
JOH 4:26 Io, Jisas ga tange balik tana, “Iau at mon ie.”
JOH 4:27 Kaik at mon, ira uno bulu na harausur diet ga tapukus, diet gaam karup bia Jisas dir ga wawor ma tiga hahin. Iesen taie tikai ta diet pa ga tirii bia ga wawor ma iakano hahin warah, ma ra sa dir ga tangtange.
JOH 4:28 Io, no hahin ga waak kapis tar no uno pala taah, io, gaam tapukus baal tano uno taman, gaam a tange ta ira matanaiabar bia, “Muat mai, muat naga nas tiga tunaan nong i te hinawase iau ta ira linge iau gate gil. Iakanin dak no Mesaia?”
JOH 4:30 Io, diet ga haan laah mekaia ra taman, diet gaam haan ukaia ho ie.
JOH 4:31 Bia ira matanaiabar kana baak na ngaas, ira bulu na harausur diet ga tirii, diet gaam tange tana, “Tena harausur, mehet sip bia nu iaan.”
JOH 4:32 Iesen ga tange ta diet, “Agu mon nian kana ing muat pai nunure.”
JOH 4:33 Ma ira uno bulu na harausur diet ga tangtange harbasiane ta diet bia, “Ta tiga nong dak i te kap hawaat ana ta nian?”
JOH 4:34 Io, Jisas ga tange ta diet, “No ragu nian, aie bia iau ni gil haruatne ira sinisip ta nong ga tule iau ma ni hapataam mah ing ga tule iau bia ni gil.
JOH 4:35 Bia muat la saso ira numuat lalong, muat la tangtange bia a liman ma iruo na teka baak wara kinkilaan. Iesen iau tange ta muat, muat nes baak ira lalong. I te madar bakut um ira pakana wara kinkilaan.
JOH 4:36 Kaiken at mon, nong i kiikil, i hatur kawase ira hunena no uno mangason ma i bulbul hulungan ira nian utano nilon hathatika. Ma i ngan huo waing nong i saso ma nong mah i kikil, dir na guama tika.
JOH 4:37 Io, i tale bia na tutun bia tikai na saso ma tiga mes na kikil. Na tutun hoken.
JOH 4:38 Iau te tule muat bia muat na kil ing muat pa ga so. Ira mes diet ga gil no dadas na pinapalim ma muat te kap leh um ira hunena ira udiet mangason.”
JOH 4:39 Ma haleng ta ira Samaria mekaia ta iakano taman, diet ga nurnur tane Jisas kanong no hahin gate hinawas utana hoken: “I te hinawase iau ta ira linge ing iau gate gil.”
JOH 4:40 Io, bia ira Samaria diet ga haan tupas Jisas, diet ga saring ie bia na kis kaia ho diet, ma ga kis tika ma diet airuo bung.
JOH 4:41 Ma bia diet ga hadade no uno hinhinawas, a haleng baling diet ga nurnur tana.
JOH 4:42 Ma diet ga tange tano hahin bia, “Mehet pai nurnur tana ta ira num hinhinawas mon. Taie. Mehet nurnur kanong mehet at, mehet te hadadei, ma i palai ta mehet bia iakan ra tunotuno, aie at no Ut na Harhalon utano ula hanuo.”
JOH 4:43 Ma bia Jisas gate kis kaia airuo bung, ga haan laah uram Galili.
JOH 4:44 (Io, Jisas gate hinawas ra tutun bia tiga tangesot, pa da ru ie tano uno hanuo tun at.)
JOH 4:45 Ma bia ga hanuat aram Galili, ira matanaiabar mekaia diet ga guama leh ie kanong diet gate nes ira linge gate gil aram Ierusalem tano Nian na Hinahaan Sakit. Warah, diet mah, diet ga haan ukaia.
JOH 4:46 Mekaia ga haan balin uram Kena, tiga taman ta iakano hanuo Galili, ing baak gate pukusane ira taah, gaam wain kaia. Ma tiga tamat na tunotuno ta ira harkurai, no natine ga maset ares Kapeneam.
JOH 4:47 Ma bia ga hadade bia Jisas gate hanuat aram Galili meram Iudeia, ga haan ukaia ho ie, gaam saring ie bia na haan naga halangalanga no natine nong ga hutet bia na maat.
JOH 4:48 Ma Jisas balik ga tange tana, “Ing bia muat pa na nas ira dadas na hakilang ma ira tamat na gingilaan na kinarup muat pa na nurnur at.”
JOH 4:49 Io, no tamat ta ira harkurai ga tange tane Jisas bia, “Awai ra watong, mai! Dar gi hansur uras. No natigu kabi maat.”
JOH 4:50 Jisas ga tange tana, “Kaia. Nu haan. No natim i te langalanga.” No tunaan ga nurnur ta ira nianga Jisas ga tange, gaam haan laah.
JOH 4:51 Bia ga hanahaan baak na ngaas, ga harsomane ira auno tultulai, diet ga hinawasei bia no natine i te langalanga.
JOH 4:52 Ma ga tiri diet bia a pakana bung sa ing no natine ga langalanga. Io, diet ga balui bia, “Nabung, namur dahin tano tingena kasakes, kaik no mamahien i pataam sukun ie.”
JOH 4:53 Ma no ana sus ga nunure kilam bia iakano pakana bung tun at bia Jisas ga tange tar tana bia no natine te langalanga. Io, aie ma ing diet la kiskis tika mei, diet ga nurnur.
JOH 4:54 Ma iakan no airuo na dadas na hakilang ing Jisas ga gil ie aram Galili ing gate haan sukun tar Iudeia.
JOH 5:1 Namur ta iakan, Jisas ga hanut uram Ierusalem tiga lukara audiet ira Iudeia.
JOH 5:2 Ma kaia Ierusalem, hutet tano matanangas laka ta ira sipsip, tiga pup na taah kana, ma ra liman na palpalih ga tur luhutanei. Ma ira Iudeia diet la kilkilam iakano ra katon bia Betesda.
JOH 5:3 Ma ra haleng na ina minaset diet git nohnoh kaia. Ma nalamin ta diet ari pulo, ari pengpeng, ma diet ing i maat ira tamtabe diet.
JOH 5:4 (-)
JOH 5:5 Ma tiga tunaan nalamin ta diet gabe maset um aitul a sangahul ma liman ma itul na tinahon.
JOH 5:6 Ma bia Jisas ga nas tar ie bia ga noh taar kaia, ga nunure bia baak at um gabe ngan huo, kaik gaam tange tana, “U sip bia nu langalanga?”
JOH 5:7 Ma no ina minaset ga balui, “Awai ra watong, taie tiga tunotuno bia na bul halaka iau ta iakan ra pup bia ing no taah i te lahalahe. Bia ing iau la walar bia ni hansur, ari mes balik diet la hansur nalua tagu.”
JOH 5:8 Io, Jisas ga tange tana, “Taman tut! Nu kap leh no kubem, ma nu haan.”
JOH 5:9 Kaik at mon no tunaan ga langalanga. Io, ga kap leh no kubena, gom haan. Ma iakano bung bia iakan ra linge ga hanuat taar tana, a Bung na Sinangeh ie.
JOH 5:10 Io kaik, ira Iudeia diet gaam tange tano tunotuno nong gate langalanga hoken: “A Bung na Sinangeh katin. Pai takodas ta ira udahat harkurai bia u kapkap hani no kubem.”
JOH 5:11 Sen ga balu diet bia, “No tunaan nong ga halangalanga iau i tange huo tagu bia ni kap leh no kubegu ma nigi haan.”
JOH 5:12 Ma diet ga tiri bia, “Si iakano ra tunotuno i tange taam bia nu kap leh no kubem, ma nugu haan?”
JOH 5:13 Iesen no tunaan nong gate langalanga pa ga hanunure bia ne sigei, kanong Jisas gate haan kumkumaan laah at mon nalamin ta ira tamat na matanaiabar kaia ta iakano katon.
JOH 5:14 Io, namur baling, Jisas ga haan tupas ie narako tano tamat na hala na lotu, gaam tange tana, “Nas baak! U te langalanga um. Kaiken um pa nu gil habaling ta sakena, kabu kot leh um ta linge ing na manga hagahe ugu.”
JOH 5:15 Ma no tunotuno ga haan laah, gaam hinawase ira Iudeia bia Jisas mon kaik ga halangalangai.
JOH 5:16 Io, ira Iudeia diet ga haburen hatut purpuruan taar ta Jisas kanong ga harhalon ra Bung na Sinangeh.
JOH 5:17 Ma Jisas ga tange ta diet, “Nagu Sus i la papalim hait, ma iau mah, iau papapalim.”
JOH 5:18 Io kaik, ing Jisas ga tange kaiken, ira Iudeia ing diet ga walwalar bia diet na ubu bing ie, diet ga manga mamahien bia diet na bu bing ie kanong diet ga lik bia ga lake ira harkurai tano Bung na Sinangeh. Ma pataie bia iakanong sen. Ga tange mah bia ana Sus tutun God. Ma ta iakano ngaas at mon, ga gil habaling ie bia dir haruat ma God.
JOH 5:19 Io, Jisas ga tange balik ta diet hoken: “Iau tange ra tutun ta muat, no Natine pai haruat bia na gil tiga linge tano uno lilik at. Taie. I petlaar sen mon bia na gil ing i nas no ana Sus i gilgil, kanong asa ing no ana Sus i gil, no Natine mah i gil huo.
JOH 5:20 Io, no ana Sus i manga sip no Natine, ma i haminas ira linge bakut tana ing i gil. Na haminas mah tari linge tana ing i tamat ta kaiken waing muat naga karup, muat naga urur.
JOH 5:21 Hokaiken at mon no ana Sus i hatut ira minaat ma i halon diet, io, huo at mon tano Natine. Sige tikai no Natine i sip bia na tar lon tana, na halon ie.
JOH 5:22 Ma nana Sus pai kure ta tikai. Iesen gate tar se ira harkurai bakut tano Natine, waing ira tunotuno bakut diet na ru no Natine hoing diet ru no ana Sus. Io, sige tikai pai ru no Natine, pai ru mah no ana Sus nong ga tulei ukai.
JOH 5:24 “Muat hadade baak! Bia sige tikai i hadade ira nugu nianga ma i nurnur ta nong ga tule iau ukai, io, i te kap nora nilon hathatika. Ma pa na tur tano ra harkurai. Iesen i te sakit ra minaat ma i te haan taar um tano ra nilon.
JOH 5:25 Muat hadade baak! No pakana bung i hanhanuat, ma kaiken mah i te hanuat um, bia ira minaat diet na hadade no ingana no Natine God. Ma diet ing diet hadade, diet na lon.
JOH 5:26 Hoing at mon no ana Sus no burena no nilon, kaik gaam tar no dadas tano Natine bia aie mah no burena tano nilon.
JOH 5:27 Ma nana Sus i te tar no dadas tana wara harkurai, kanong no Natine Nong a Tunotunoi.
JOH 5:28 “Waak muat karup ta kaiken. No pakana bung i hanhanuat bia ira minaat bakut diet na hadade no ingana, ma diet na taman tut sukun ira midi. Diet ing diet git gilgil ra tahut, diet na tut hut tupas ra nilon. Iesen diet ing diet git gilgil ra sakena, diet na tut hut, ma diet na tur ra harkurai.
JOH 5:30 Iau pai haruat bia ni gil tiga linge tano nugu lilik at. Taie. Iau gil ra harkurai hoing iau hadade tano agu Sus. Ma no nugu ngaas na harkurai i takodas kanong iau pai la gilgil wara utano nugu sinisip. Iesen iau la gilgil wara utano sinisip at ta nong ga tule iau ukai.
JOH 5:31 “Bia ing iau hihinawas tano tutun utagu at, no nugu hinhinawas pai tur dadas.
JOH 5:32 Tiga mes kana at i hinhinawas tano tutun utagu ma iau nunure bia i tur dadas no uno hinhinawas.
JOH 5:33 “Ma muat at, muat ga tula nianga ukaia ho Jon no ut na baptais wara nunure mekaia ho ie. Ma Jon ga hinawas tano tutun utagu.
JOH 5:34 Iau pai tange kaiken kanong bia iau supi ira hinhinawas auno tiga tunotuno. Iesen iau tange huo bia muat naga hatur kawase nora nilon tutun.
JOH 5:35 Jon ga haruat ma ra lulungo nong ga lulungo wara harhapalai. Ma ra da subana pakana bung mon muat ga guama leh no uno nianga na harapalai.
JOH 5:36 “Iesen iau hatur kawase ra hinhinawas tano tutun wara utagu at, nong i manga tamat tano hinhinawas mekaia ho Jon. Ma aie hoken. No agu Sus ga tar ra pinapalim tagu bia ni hapataam. Ma kaiken iau gilgil. Ma kaiken at ra pinapalim iau gilgil i hinawas tano tutun utagu bia no agu Sus gate tule iau ukai.
JOH 5:37 Ma no agu Sus at nong gate tule iau ukai, gate hinawas tano tutun utagu. Muat pai hadade at baak no ingana, ma muat pai nes baak ie bia aie hobibih.
JOH 5:38 Ma no uno nianga pai la kis taar ta muat kanong muat pai nurnur tagu, ma aie at nong ga tule iau ukai.
JOH 5:39 Muat la harausur ta ira nianga tane God ing di ga pakat, kanong muat lik bia diet ira pakpakat na tar nora nilon hathatika ta muat. Nes baak! Kaike at mon ing diet hinawas tano tutun utagu!
JOH 5:40 Iesen muat pai sip bia muat na haan tupas iau kaik muat naga kap no lon.
JOH 5:41 “Iau pai haut bia ira tunotuno mon diet na lat iau. Taie ta linge.
JOH 5:42 Iesen ta kaiken iau te tange huo, iau te tange kanong iau nunure bia a mangana tunotuno hohe muat. Iau nunure bia no sinisip utane God pai kis ta ira numuat nilon.
JOH 5:43 Iau te hanuat kanong no agu Sus ga tule iau ukai. Ma muat pai bale leh iau. Bia tiga mes balik na hanuat bia mon, muat na bale leh ie.
JOH 5:44 Muat pai tale bia muat na nurnur tagu kanong muat haut at wara latlat harbasiane muat, ma muat pai nuang leh no pirhakasing meram ho God.
JOH 5:45 “Waak muat lik bia iau kaik, iau ni kilam muat bia a mon nironga ta muat kaia ra matmataan tano agu Sus. Taie. Nong na tung muat, ne Moses. Aie mon nong muat hatur ira numuat nurnuruan tana.
JOH 5:46 Ma bia muat gor te nurnur tane Moses, muat gor te nurnur mah tagu, kanong ga pakpakat utagu.
JOH 5:47 Iesen pai tale bia muat na nurnur ta ing iau tange, kanong muat pai nurnur ta ing ga pakat.”
JOH 6:1 Io, namur ta kaike, Jisas ga haan kutus no taah kom Galili, nong di kilam mah ie bia taah kom Taiberias.
JOH 6:2 Ma a tamat na matanaiabar sakit diet ga mur ie kanong diet gate nas ira uno dadas na hakilang ing ga gilgil wara halhalon ira ina minaset.
JOH 6:3 Io, Jisas ga hanut uram ra gagena uladih, gaam kis kaia, diet ma ira uno bulu na harausur.
JOH 6:4 Ma no pakana bung tano Nian na Hinahaan Sakit gar na Iudeia gate hutet.
JOH 6:5 Ma bia Jisas ga nanaas hut, ga nas ra tamat na matanaiabar, diet ga hananuat tupas ie, gaam tange ta Pilip, “Dahat na kul beret he, iakan ra matanaiabar diet naga ien?”
JOH 6:6 Ga tiri hokaike wara walwalar Pilip kanong gate nunure taar ing na gil huo.
JOH 6:7 Pilip ga balui bia, “Airuo maar na kinewa pa na haruat bia da kul beret me, kaik diet bakut tikatikai diet naga ien ta dahin!”
JOH 6:8 Ma tiga mes na bulu na harausur, ne Andru, no tasine Saimon Pita, ga tange, “Tiga bulu ken i kapkap hani ra liman na nat na beret di gil ma ra bali, ma airuo nat na kirip mah. Iesen na haruat hobibih ma iakan ra tamat na matanaiabar?”
JOH 6:10 Io, Jisas ga tange, “Muat na tange ta ira matanaiabar bia diet na kis.” Ma a bilai na huro ta iakano katon ma ira matanaiabar diet ga kis napu. Ma no winawas ta ira tunaan sen mon ga haruat ma ra liman na arip.
JOH 6:11 Io, Jisas ga kap leh ira beret, gaam tanga tahut uram hone God, gaam pidik, di gaam palau ira matanaiabar me, haruat at ta ira udiet sinisip. Ma ga gil mah huo ma ira kirip.
JOH 6:12 Ma bia diet gate iaan hahos, Jisas ga tange ta ira uno bulu na harausur, “Muat na kap hulungan ira subana diet. Waak di hasurum bia ira petpetine.”
JOH 6:13 Io, diet ga kap hulungan ira sumsubana ta ira liman na beret ing ira matanaiabar diet gate ien subaan. Ma diet gaam sang hahungi ra sangahul ma iruo na kalot me.
JOH 6:14 Ma bia ira matanaiabar diet gate nas iakan ra dadas na hakilang Jisas ga gil ie, diet ga tange bia, “Tutun sakit, iakan ra tunaan, aie no tangesot nong na hanuat ukai tano ula hanuo.”
JOH 6:15 Ma Jisas ga nunure kilam bia diet gate hutet wara hinanuat wara hahait ie bia na tamat na lualua na gil harkurai. Io, ga haan sen laah sukun diet uram ra uladih.
JOH 6:16 Ma bia gate matmatarahien, ira uno bulu na harausur diet ga hansur uras tano taah kom.
JOH 6:17 Diet ga kawaas tiga mon kaia, diet gaam hanhan kutus no taah kom uram Kapeneam. Gate bung um ma Jisas at baak panim kaia ho diet.
JOH 6:18 Kaiken um, no dadas na dadaip gate huhus ma no taah gate lagures.
JOH 6:19 Ma bia diet gate haluso a liman ma tikai bia ra liman ma iruo na kilomita, diet ga nas leh Jisas ga hananuat naliu tano polon taah ukaia tano mon. Ma diet ga manga burut.
JOH 6:20 Iesen Jisas ga tange ta diet, “Iau mon, waak muat burut.”
JOH 6:21 Ma bia gate tange tar huo, diet ga sip bia na kawaas tano mon. Ma kaik at mon, no mon ga sapa na wasasar ho diet ga hanahaan ukaia.
JOH 6:22 Io, ma tano bung namur, no tamat na matanaiabar ing diet gate kis taar tano mes na palpal tano taah kom, diet ga lik kawase bia tikai sen no mon ga kis taar baak kaia. Ma diet ga nunure bia ira uno bulu na harausur diet ga haan laah, ma Jisas pa ga tika ma diet.
JOH 6:23 Ma ari a mes na mon meras tano pise na hala Taiberias diet ga sapa hutet tano katon ira matanaiabar diet gate ien ira beret namur ta ing Jisas gate tanga tahut taar urie.
JOH 6:24 Ma bia ira matanaiabar diet ga nanaas taar bia Jisas panim, ma ira uno bulu na harausur mah, diet ga kawaas ta ira mon, diet ga mur uram Kapeneam wara ninaas tana.
JOH 6:25 Ma bia ira matanaiabar diet ga nes tupas Jisas aram tiga palpal tano taah kom, diet ga tange tana, “Tena harausur, hunanges u haan ukai?”
JOH 6:26 Io, Jisas ga balu diet bia, “Muat hadade baak! Muat naanaas tagu kanong muat gate ien ira beret ma muat gate hahos ine. Iesen muat pai naanaas tagu kanong bia muat te nas kilam ira dadas na hakilang iau gil.
JOH 6:27 Waak muat papalim utano nian nong na sakena. Iesen i tahut bia muat na papalim utano nian nong na kis taar at ma na tar nora nilon hathatika. Nong a Tunotunoi na tabar muat ma iakan at ra nian, kanong God no ana Sus i te haminas bia i haut taar ta ing i gilgil.”
JOH 6:28 Io, diet ga tiri Jisas, “Mehet na gil ra sa, kaik het naga palim ira pinapalim God i sip ie?”
JOH 6:29 Ma Jisas ga balu diet bia, “No pinapalim nong God i sip bia muat na gil ie hoken. Muat na nurnur ta nong God gate tulei ukai.”
JOH 6:30 Io, diet ga tiri ie, “A mangana dadas na hakilang sa nu pakile, mehet naga nas, kaik mehet naga nurnur taam? I tale bia nu gil tiga linge hoing ga hanuat ta ira hintubu mehet?
JOH 6:31 Diet ga ien ra mana aram ra hanuo bia. Ma no nianga tane God di ga pakat ie i tange mah huo. I tange hoken: ‘Ga tabar diet ma ra beret meram ra mawe wara ienien.’”
JOH 6:32 Ma Jisas ga tange ta diet, “Muat hadade baak! Taie bia Moses kaik ga tabar muat ma ra beret meram ra mawe. Iesen nagu Sus kaik i tabar muat ma ra beret tutun meram ra mawe.
JOH 6:33 Warah, no beret meram ho God, aie nong i hansur meram ra mawe ma i tar lon ta ira tunotuno.”
JOH 6:34 Io, diet ga tange tana, “Nora Watong, mehet sip bia nu tamtabar haitne mehet ma iakan ra beret.”
JOH 6:35 Ma Jisas ga tange ta diet hoken: “Iau mon, no beret na nilon. Nong i haan tupas iau ma i nurnur tagu, pai tale tun at bia na taburungan bia na maruk baal.
JOH 6:36 Ma hoing iau te tange ta muat, a tutun bia muat te nas iau, iesen muat pai nurnur tagu.
JOH 6:37 Ma diet bakut ing no agu Sus i tar diet tagu, diet na haan tupas iau. Ma nong i hanuat taar tagu, pai tale tun at bia ni tule sei, kanong iau gate hansur meram ra mawe wara gilgil haruatne no sinisip ta nong ga tule iau ukai. Ma iau pai mur no nugu sinisip at.
JOH 6:39 Ma no sinisip ta nong ga tule iau ukai i hoken. I sip bia iau pa ni hamalum tikai ta diet bakut kaiken ing gate tar tagu. Iesen iau ni hatut habal diet tano hauhawatine tano ula hanuo.
JOH 6:40 Kaik iau gi tange hoken kanong no agu Sus i sip huo. I sip bia diet bakut ing diet nas kilam no Natine ma diet nurnur mah tana, diet na hatur kawase no nilon hathatika. Ma iau ni hatut habal diet tano hauhawatine tano ula hanuo.”
JOH 6:41 Ma ira matanaiabar diet ga tur leh bia diet na ngurungur taar tana kanong ga tange bia, “Iau mon, no beret nong i hansur meram ra mawe.”
JOH 6:42 Ma diet ga tangtange mah, “Aie mon Jisas no nati Iosep. Dahat nunure ta mon no pawasine ma no ana sus. Hohe kaiken i tange bia ga hansur meram ra mawe?”
JOH 6:43 Io, Jisas ga tange ta diet, “Waak muat ngurungur harbasia ta muat.
JOH 6:44 Taie tiga nong pa na hanuat bia taar tagu bia no agu Sus pa na lam ie taar tagu. Ma sige nong nagu Sus i lam tar ie tagu, ni hatut habal ie tano hauhawatine no ula hanuo.
JOH 6:45 Ma ira tangesot ta God diet ga pakat hoken: ‘Diet bakut at, God na hausur diet.’ Ma iau tange bia sige nong i hadade no agu Sus ma i kap usurane leh mekaia ho ie, i haan tupas iau.
JOH 6:46 Bia ing iau tange huo, pai tutun bia tikai gate nes no agu Sus. Taie. Ma nong at meram hone God, aie sen mon i te nas no ana Sus.
JOH 6:47 Muat hadade baak! Sige nong i nurnur i hatur kawase nora nilon hathatika.
JOH 6:48 Iau mon, no beret na nilon.
JOH 6:49 Ira hintubu muat, diet ga ien ira mana aram ra hanuo bia iesen diet ga maat at.
JOH 6:50 Iesen no beret i hansur meram ra mawe, a mangana beret ie, ma bia sige nong i ien ie, pa na maat.
JOH 6:51 Iau at, iau no beret na nilon nong ga hansur meram ra mawe. Diet bakut ing diet na ien iakan ra beret, diet na lon hathatika. Ma no beret nong iau ni tabar diet me, aie no tamaigu nong iau ni tar sei waing ira tunotuno diet naga lon.”
JOH 6:52 Bia ing gate tange huo, ira Iudeia diet ga hargor harbasia ta diet, diet gaam tange, “Iakan ra tunotuno na tar hobibihane no tamaine ta dahat, kaik dahat naga ien ie?”
JOH 6:53 Io, Jisas ga tange ta diet hoken: “Muat hadade baak! Bia muat pa na ien no uratine Nong a Tunotunoi, ma muat pa na mame ira dena, taie ta nilon ta muat.
JOH 6:54 Iesen bia sige nong i ien no uratigu ma i mame ira degu, i hatur kawase nora nilon hathatika, ma iau ni hatut habal ie tano hauhawatine no ula hanuo.
JOH 6:55 I tutun kanong no uratigu a nian tutun ie, ma ira degu wara minom tutun ie.
JOH 6:56 Sige nong i ien no uratigu ma i mame ira degu, i kis tika ma iau, ma iau mah, iau kis tika mei.
JOH 6:57 No agu Sus, a lilonai, ga tule iau ukai. Ma iau lon mah kanong i lon. Hoing at mon, nong i ien iau na lon mah kanong iau lon.
JOH 6:58 Io, ma iakan ra mangana beret ga hansur meram ra mawe. Pai haruat ma ing ira hintubu dahat diet ga ien ma diet ga maat. Iesen bia nong i ien iakan ra beret na lon hathatika.”
JOH 6:59 Io, Jisas ga tange um kaiken ing ga hauhausur narako tano hala na lotu udiet ira Iudeia aram Kapeneam.
JOH 6:60 Ma bia a haleng ta ira uno bulu na harausur diet ga hadade kaiken diet ga tange, “Iakan ra harausur i manga dadas. Sige at um i tale bia na kap usurane leh kaiken?”
JOH 6:61 Ma Jisas ga nunure bia ira uno bulu na harausur diet ga ngurngurungur uta iakan. Kaik, gaam tange ta diet, “I hangungut muat, iakan?
JOH 6:62 Bia muat hamaan taar huo, muat na lik hohe bia muat na nas ie Nong a Tunotunoi ing na hananut baling uram hoing ga haan laah mekaia?
JOH 6:63 No Tanuo ta God i tar no nilon. Ira dadas ta ira tunotuno a linge bia mon. Iesen kaiken iau te hinawase muat ta ing muat naga hatur kawase no nilon na tanuo.
JOH 6:64 Sen bia ari at ta muat, diet pai nurnur.” Jisas ga tange huo kanong ga huna nunure tar at bia sige ta diet ing pai nurnur, ma sige nong na tur talur ie.
JOH 6:65 Ma ga tange baling, “Ma kaiken iau te tange ta muat utano gaiena no numuat tabuna nurnur, io, iakan no burena iau gom tange hanalua ta muat bia taie ta nong pa na haruat wara hinanuat tupas iau ing bia no agu Sus pai tar no dadas tana.”
JOH 6:66 Ma a haleng ta ira bulu na harausur tane Jisas diet ga haan sukun ie, ma diet pa git hanan tika um mei kanong gate tange huo.
JOH 6:67 Io kaik, Jisas gom tiri ira uno sangahul ma iruo na bulu na harausur hoken: “Ma muat, muat pai sip bia muat na haan laah mah?”
JOH 6:68 Ma Simon Pita ga balui bia, “Nugu Watong, mehet gor haan um uhe bia mehet gor haan sukun ugu? U te hinawase mehet bia mehet naga hatur kawase hohe nora nilon hathatika.
JOH 6:69 Mehet nunure ma het nurnur mah bia augu no Halhaliana meram ho God.”
JOH 6:70 Io, Jisas ga tange ta diet, “Iau at, iau ga gilamis muat ira sangahul ma iruo. Iesen tikai ta muat i manga sakena. I nanaas bia i haruat ma tiga sakana tanuo!”
JOH 6:71 (Ma ga tangtange mon ne Iudas, no nati Simon Iskariot. Ma a tutun bia Iudas aie tikai ta ira sangahul ma iruo, iesen aie kaik na tur talur Jisas.)
JOH 7:1 Io namur ta kaiken, Jisas ga hanan hurbit tano hanuo Galili. Pa ga sip bia na hanan hurbit haan narako tano hanuo Iudeia kanong ira Iudeia kaia diet ga sisilih wara bubu bing ie.
JOH 7:2 Iesen bia no Lukara na Palpalih gar na Iudeia gate hutet, io kaik, ira tasine Jisas diet gom tange tana, “I tahut bia nu haan laah mekai ma nu haan urau Iudeia waing ira num bulu na harausur diet naga nes ira num pinapalim.
JOH 7:4 Taie tikai pa na suhe ing i gilgil bia ing i sip bia da nunurei. Taie. Bia u la gilgil kaike ira linge, i tahut bia nu haminas ugu ta ira tunotuno bakut.”
JOH 7:5 Ira tasine diet ga tange hokaiken kanong diet mah, diet pa ga nurnur tana.
JOH 7:6 Ma bia ing Jisas ga hadade huo, ga tange ta diet, “No nugu pakana bung pai hanuat at baak. Iesen ira pakana bung bakut i la haruat taar ta muat.
JOH 7:7 Taie ta burena bia ira tunotuno ta iakan ra ula hanuo diet na malentakuane muat. Iesen diet malentakuane iau kanong iau hinawas utano tutun ta diet bia ira udiet magingin i sakena.
JOH 7:8 Kaia. Muat na hanut uram tano Lukara. Iau pa ni hanut kanong no nugu pakana bung pai hanuat at baak.”
JOH 7:9 Ma bia gate tange huo taar ta diet, ga kiskis um kaia Galili.
JOH 7:10 Iesen bia ira tasine diet gate hanut uram tano Lukara, Jisas mah um ga mur hut. Ma pa ga hanuat palai kaia, ga munmun haan at mon.
JOH 7:11 Io, kaia tano Lukara, ira Iudeia diet ga naanaas haan tana, diet gom tirtiri bia, “Ie he um iakano tunotuno?”
JOH 7:12 Ma a tamat na matanaiabar kaia, diet ga harmurungo utana. Ari diet ga tangtange bia, “A tahut na tunotunoi.” Ma ari mes diet ga tangtange, “Taie. Aie tikai ing i lam harango ira tunotuno.”
JOH 7:13 Iesen bia taie tikai pa ga ianga palai utana kanong diet ga burut harbasia ta diet.
JOH 7:14 Ma bia no Lukara gate haan nalamin, Jisas ga haan laka uram tano tamat na hala na lotu, gaam haburen hauhausur.
JOH 7:15 Ma ira Iudeia diet ga karup, diet gaam tiri bia, “Hohe tutun bia iakan ra tunotuno i manga nunure ra haleng ma pa ga harausur?”
JOH 7:16 Ma bia ga hadade huo, Jisas ga tange hoken: “Ira harausur iau hauhausur me, pai nugu at. Iesen anuno nong ga tule iau ukai.
JOH 7:17 Bia sige nong i sip bia na mur ira sinisip ta God, aie at na nunure leh ira nugu harausur bia makatiga ho God bia iau iangianga bia mon tano nugu lilik.
JOH 7:18 Sige nong i iangianga at ma no nuno dadas, i la hatatik habal at ie. Iesen sige nong i sip bia na hatatik nong ga tulei, a tutun na tunotunoi, ma taie ta harabota tano uno nilon.
JOH 7:19 Muat nunure tar at mon bia Moses te tar ira harkurai tane God ta muat. Sen bia taie tikai ta muat pai la murmur kaike ra harkurai. Wara bih tutun at kaik muat gi sisilih bia muat naga bu bing iau?”
JOH 7:20 Io, no tamat na matanaiabar diet ga tange tana, “Ah, a sakana tanuo i te sosoha taam! Sige i wara bubu bing ugu?”
JOH 7:21 Jisas ga tange ta diet, “Iau ga gil tiga linge mon ma muat te karup tana.
JOH 7:22 Iesen muat la kutkut ira nat na bulu ra Bung na Sinangeh kanong Moses ga tar iakano harkurai ta muat (sen bia pai Moses tutun ga hatahun ie, ira hintubu muat at menalua tana.)
JOH 7:23 Bia ing i tale bia muat na kut tiga nat na bulu tano Bung na Sinangeh waing muat pa na lake no harkurai tane Moses, io, wara bih kaik muat gi ngalngaluan taar tagu kanong iau gate halangalanga tikai ta ira uno minaset bakut tano Bung na Sinangeh?
JOH 7:24 Waak muat nas pukusane ira linge hoing ira numuat ninaas mon. Taie. Muat na nes kilam tiga linge hoing aie tutun at huo.”
JOH 7:25 Io, ari matanaiabar aram Ierusalem diet ga tangtange, “Iakan at mon ra tunaan nong di wara bubu bing ie. Naka?
JOH 7:26 Iesen, nas baak! Iakaiken mon i iangianga ra haruat. Iesen diet pai tange tiga linge utana. Ma ira lualua dak diet nunure bia a tutun bia aie no Mesaia?
JOH 7:27 Iesen bia, dahat nunure ta mon ing iakan ra tunotuno aie mekaia. Ma bia no Mesaia na hanuat, taie tikai pa na nunure bia i hanuat meh.”
JOH 7:28 Ma bia Jisas ga hauhausur aram tano hanuo na tamat na hala na lotu gar na Iudeia, ga kakongane bia, “Muat lik mon bia muat nunure tar iau, ma bia iau meh. Iau pa ga lik leh at iau bia ni hanuat ukai. Iesen nong ga tule iau ukai i gil ra tutun. Muat pai nunure ie.
JOH 7:29 Iesen iau nunure tar ie kanong iau mekaia ho ie ma aie ga tule iau ukai.”
JOH 7:30 Ma bia ga tange huo diet ga walar bia diet na palim kawasei, iesen taie tikai pa ga sigirei kanong no uno pakana bung pa ga hanuat baak.
JOH 7:31 Iesen a haleng ta diet ta iakano tamat na matanaiabar, diet ga nurnur tana. Ma diet gaam tange, “Bia no Mesaia na hanuat, i tutun bia pa na gil ari dadas na hakilang ing na haleng ta iakanin ra tunotuno. Naka?”
JOH 7:32 Ma ira Parisi diet ga hadade ira matanaiabar diet ga harharmurungo hokaiken utana. Io, diet ma ira tamat na ut na pakila lotu, diet ga tule se ari umri ing diet la harbalaurai tano tamat na hala na lotu bia diet na palim kawase Jisas.
JOH 7:33 Jisas ga tange, “Iau pa ni kis talona tika ma muat. Taie. Namur dahin iau ni haan uram ho nong ga tule iau ukai.
JOH 7:34 Muat na sisilih tagu iesen muat pa na nes leh iau. Ma ing iau ni kis kaia, muat pai tale bia muat na haan ukaia.”
JOH 7:35 Ma ira Iudeia diet ga tange harbasiane ta diet hoken: “Iakan ra tunotuno i wara hinahaan uhe kaik dahat pa naga nes leh ie? Hohe, na haan sukun dak iakan ra udahat hanuo, naga kis tika ma diet ing diet pai Iudeia ma naga hausur diet?
JOH 7:36 Ga tange bia dahat na sisilih tana iesen dahat pa na nes leh ie, ma bia ing na kis kaia, dahat mah, dahat pai tale bia dahat na haan ukaia. I kukuraina tutun hohe kaik gaam tange huo?”
JOH 7:37 Io, no bung na hapataamne no lukara aie no tamat na bung sakit. Ma ta iakano bung, Jisas ga taman tut, gaam kakongane bia, “Sige tiga nong i maruk, i tahut bia na haan tupas iau ma na mom.
JOH 7:38 Sige nong i nurnur tagu, ira taah na nilon na sal laah meram narako tana hoing ira nianga tane God di ga pakat i tange huo.”
JOH 7:39 Bia Jisas ga ianga huo, ga tange nuruan no Halhaliana Tanuo bia diet ing diet ga nurnur ta Jisas diet na hatur kawase ie. Ta iakano pakana bung God pa ga tar baak no Tanuo kanong no minarine Jisas pa ga hanuat puasa baak.
JOH 7:40 Ma bia ari ta ira matanaiabar diet ga hadade ing ga tange huo, io, diet ga tange bia, “A tutun, iakan ra tunotuno, aie at mon no tangesot nong di ga kukubus taar utana.”
JOH 7:41 Ari a mes diet ga tange, “Aie no Mesaia.” Ma ari at baak diet ga tiri bia, “No Mesaia na hanuat hohe me Galili?
JOH 7:42 Pai haruat huo kanong ira pakpakat ta God i tange bia no Mesaia na hanuat tano huntunaan ta Dawit. Ma na hanuat meram Betlehem, no taman tane Dawit.”
JOH 7:43 Io kaik, ira matanaiabar diet gom tur harpaleng wara gaiene Jisas.
JOH 7:44 Ari ta diet ga wara palpalim kawasei, iesen taie tikai pa ga sigirei.
JOH 7:45 Io, ira umri ing diet la harbalaurai tano tamat na hala na lotu diet ga tapukus taar ta ira tamat na ut na pakila lotu ma ira Parisi. Ma ira lualua diet ga tange ta diet, “Warah muat pai lamus ie?”
JOH 7:46 Ma ira umri diet ga balu diet bia, “Taie tutun at bia tikai i la iangianga ho iakan ra tunotuno.”
JOH 7:47 Ma ira Parisi diet ga tange balik ta diet, “Pai lamus habato muat mah, naka?
JOH 7:48 Muat pai lik mah bia tari lualua ma bia tari Parisi diet nurnur tana, naka?
JOH 7:49 Taie! Sen bia iakan ra tamat na matanaiabar mon diet te gil huo. Iesen diet pai nunure ira harkurai tane God. Kaik God i te tule bingbing diet.”
JOH 7:50 Io, Nikodimas tikai ta diet ira Parisi mah. Aie mon nong ga haan tupas baak Jisas nalua. Ma ga tange ta diet, “Ma ira udahat kaba harkurai, dahat pai la kurkure tikai menalua bia dahat pai hadade baak ie wara palpalai ta ing i te gil.”
JOH 7:52 Io, diet ga balui, “Augu mah pau meram Galili, nah? Ma nu was timaan baak ira nianga ta God, nugu nes tupas bia tiga tangesot pa na hanuat meram Galili.”
JOH 7:53 [Io, diet ga haan taar ta ira udiet hala tikatikai.
JOH 8:1 Iesen Jisas ga hanut uram tano uladih Olip.
JOH 8:2 Ma ra mala bungbung ga hanuat baling uram narako tano tamat na hala na lotu, ma ira matanaiabar diet ga me hung luhutanei. Io, ga kis gaam tur leh bia na hausur diet.
JOH 8:3 Ma ira tena harausur ta ira harkurai tane Moses ma ira Parisi diet ga lamus halaka tiga hahin di ga nes tupas leh ie ma ga noh tika taar ma tiga mes na tunaan, pai aunoi. Ma diet ga me hatur ie ra matmataan na haruat, diet gaam tange tane Jisas, “Tena harausur, iakan ra hahin di te haan tupas hakaloi ma i papet sakena ma tiga tunaan.
JOH 8:5 Ma narakoman ta ira udahat harkurai Moses ga hartula bia da gulum bing ira mangana hahin hokaiken ma ra haat. Ma augu, nu tange hohe?”
JOH 8:6 Io, diet ga tangtange huo wara hakuni ie waing diet naga haruat bia diet na kilam ie bia i gil tiga nironga. Iesen Jisas ga tudu, gaam hatahun pinapakat tano pise ma no kaskas na limana.
JOH 8:7 Ing diet ga tirtiri at baak ie, ga kis tutur gaam tange ta diet, “Bia tikai ta muat taie aun ta magingin sakena, io, aie na lua na gulum iakan ra hahin ma tiga haat.”
JOH 8:8 Ga tudu baling gaam pakpakat tano pise.
JOH 8:9 Ing diet ga hadade iakan, diet ga hatahun wara hinaan laah tikatikai. Ma ira nongtamat diet at mon kaik, diet ga huna lua laah ta ira mes tuk bia Jisas sen mon um ma no hahin nong ga tur taar kaia.
JOH 8:10 Io, Jisas ga kis tutur gaam tiri ie bia, “Awai ra hahin, diet tuai um he? Hohe, taie tiga nong pai tibe bingbing ugu?”
JOH 8:11 No hahin ga babalu bia, “Taie tikai.” Jisas ga tange, “Iau mah, iau pa ni tule bingbing ugu. Kaia, nu haan, iesen waak baal u gil sakena.”]
JOH 8:12 Ing Jisas ga ianga balin taar ta ira matanaiabar ga tange, “Iau no lulungo tano ula hanuo. Sige tikai i mur iau pa na haan tano kankado iesen na hatur kawase no lulungo na nilon.”
JOH 8:13 Ing ga tange iakan ira Parisi diet ga tange tana, “Kaike u te hinhinawas baal at utaam. Iesen pai tur dadas ira num hinhinawas kanong augu sen mon u iangianga.”
JOH 8:14 Io, Jisas ga babalu bia, “Taie. Sukmaal bia iau hinhinawas balin at utagu, no nugu hinhinawas i tur dadas taar at. I tur dadas kanong iau nunure bia iau ga hanuat meh ma uhe ing iau ni haan ukaia. Iesen muat, muat pai nunure bia iau hananuat meh ma uhe ing iau ni haan ukaia.
JOH 8:15 Muat la harharkurai ma ira numuat lilik mon mekai napu, iesen iau pai la kurkure tiga nong.
JOH 8:16 Iesen bia nigi harkurai, ira nugu ula nianga gor tutun kanong pai iau sen. Mir tur tika taar ma Mama nong ga tule iau ukai.
JOH 8:17 Ma narakoman ta ira numuat harkurai at, Moses ga pakat bia ing airuo dir haut pane tiga hinhinawas, io, iakano hinhinawas i tur dadas taar.
JOH 8:18 Iau nong iau hinhinawas balin wara gaiegu, ma Mama nong ga tule iau ukai, aie iakano mes nong i hinhinawas mah wara gaiegu.”
JOH 8:19 Io, diet ga tiri ie bia, “Ie he no raam Sus?” Jisas ga babalu bia, “Muat pai nunure iau ma no agu Sus mah. Ing bia muat gor nunure iau, muat gor nunure mah no agu Sus.”
JOH 8:20 Ga tange kaiken ra nianga ing ga harharausur aram narako tano tamat na hala na lotu hutet tano bunbulaan ta ira hartabar. Iesen taie tikai pa ga palim kawasei kanong no uno pakana bung pa ga hanuat baak.
JOH 8:21 Io, Jisas ga tange habalin ta diet bia, “Iau ni haan laah ma muat na sisilih tagu. Iesen muat na maat ma ira numuat magingin sakena. Iesen no katon iau ni haan ukaia, pai tale muat bia muat na haan ukaia.”
JOH 8:22 Kaik ira Iudeia diet gaam hartiritiri hoken: “Hohe, na bing habaling dak at ie? Iakan dak no burena gi tange bia, ‘No katona iau ni haan ukaia, pai tale muat bia muat na haan ukaia?’”
JOH 8:23 Ma ga tange mah bia, “Muat mekai napu. Iau meram naliu. Muat mekai ta iakan ra ula hanuo. Iau pai mekai ta iakan ra ula hanuo.
JOH 8:24 Kaik iau gaam tange ta muat bia muat na maat ma ira numuat magingin sakena. Bia ing muat pa na nurnur bia iau, iau at mon no lilona tunotuno, muat na maat at ma ira numuat magingin sakena.”
JOH 8:25 Diet ga tiri Jisas, “Sige ugu?” Jisas ga babalu bia, “Iakanong at mon iau bia tangtange leh um bia iau no lilona tunotuno.
JOH 8:26 Iau mon haleng na nianga wara paspase tar ta muat wara kurkure muat. Iesen iau te hadade leh ira linge meram ta nong ga tule iau ukai ma aie i tutun. Ma kaike ra linge iau hinhinawase no ula hanuo ine.”
JOH 8:27 Iesen diet pa ga nunure kilam bia ga hinhinawase diet utano uno Mama.
JOH 8:28 Io kaik, Jisas ga tange, “Muat na raun haut tar Nong a Tunotunoi. Ma ta iakano pakana bung muat na nunure um bia iau, iau at mon no lilona tunotuno, ma bia iau pai la gilgil tiga linge tano nugu lilik at. Taie. Iau la tangtange sen at mon ing ne Mama gate hausur tar iau ine.
JOH 8:29 Nong ga tule iau, i kis taar at tagu ma pai haan sukun iau, kanong iau la gilgil haitne ira linge ing i haguama ie.”
JOH 8:30 Ing ga tangtange kaiken, a haleng diet ga nurnur tana.
JOH 8:31 Io kaik, Jisas ga tange ta ira Iudeia ing diet gate nurnur tana hoken: “Bia ing muat palim dit ma muat mur ira nugu nianga, io, muat ira nugu bulu na harausur tutun.
JOH 8:32 Ma muat na nunure ira tutun ta Mama, ma kaike ra tutun na palas ise ira winwisaan ke ho muat.”
JOH 8:33 Diet ga balui bia, “A bulumur tane Abraham mehet. Ma taie tikai pa gale wis kawase baak mehet bia mehet naga papalim menapu tana. Pai tahut bia u tange bia mehet na langalanga sukun ira winwisaan ta mehet. U tange huo warah?”
JOH 8:34 Jisas ga babalu hoken: “Muat hadade baak! Sige tiga nong i la gilgil ra sakena, ira uno magingin sakena i la wis kawase tar ie.
JOH 8:35 No tultulai nong tiga hatatamaan na hagut ie wara gilgil ira dadas na pinapalim pa na kis hatika ma iakano hatatamaan. Iesen no natine no mama ta iakano hatatamaan na kis hatika.
JOH 8:36 Kaik, bia ing no Natine nakananam na palas sare muat, io, muat na langalanga sukun tutun ira winwisaan ta muat.
JOH 8:37 Iau nunure bia a bulumur tane Abraham muat. Iesen kana balik muat walwalar bia muat na bu bing iau kanong ira nugu nianga pai kis narakoman ta muat.
JOH 8:38 Iau hinhinawase muat ta ira linge ing iau gate nes aram ra matmataan tano ragu Sus. Hoing at mon mah muat, muat gilgil ira linge ing muat gate hadade leh tano ramuat sus.”
JOH 8:39 Diet ga babalu, “Mehet kilam Abraham namehet sus kanong mehet ga tahuat tana.” Ma Jisas ga tange, “Bia ing a nati Abraham muat, muat gor gil ira linge Abraham git gilgil.
JOH 8:40 Iesen kana balik, muat walwalar at baak bia muat na bu bing iau, iau no tunotuno nong i te hinawase muat uta ira tutun ta God iau ga hadade leh meram ho God. Iakan ra mangana linge Abraham pa ga gil ie.
JOH 8:41 Iesen muat gilgil no pinapalim tano ramuat Sus at.” Diet ga tange tana bia, “Pai nat na ngaas mehet. No ramehet sus sen at mon ne God.”
JOH 8:42 Jisas ga tange ta diet, “Ing bia amuat Sus ne God, muat gor sip iau kanong iau ga hanuat meram ho God ma kaiken iau ken. Iau pa ga hanuat tano nugu lilik mon. Taie. Aie ga tule iau.
JOH 8:43 Wara bih bia muat pai palai ta ing iau tangtange? No burena hoken. Muat pai tale bia muat na hadade no ingana hagu.
JOH 8:44 Muat ira natine no amuat sus, Sataan, ma muat sip bia muat na gil haruatne ira sinisip tano ramuat sus. Menalua laah at tano hakhakisi a ut na harubu bingibing biai. Ma pai nunure ira tutun ta God kanong taie ta tutun tana. Ing i la harharabota uta God i la iangianga haruat ma no magirana at kanong a ut na harabota ie ma aie mah no matana ira hinarabota.
JOH 8:45 Iesen iau balik, iau hinhinawas uta ira tutun ta God. Ma iakano no burena bia muat pai nurnur ta ira nugu nianga.
JOH 8:46 Sige ta muat i haruat bia na kilam iau bia iau gil ra sakena ma na tale mah bia na hatutun iakano uno hartung? Pai tale muat! Gor tahut bia muat na nurnur ta ira nugu nianga kanong ira tutun ta God kaiken iau tangtange.
JOH 8:47 Sige nong gar ta God ie, i hanhadade ira nianga tane God. Ma no burena bia muat pai hadade kaike ira nianga i hoken. Pai tunotuno tane God muat.”
JOH 8:48 Ira Iudeia diet ga balu ie, “Aha! I nanaas bia a tutun at ing mehet tangtange bia augu tikai ta ira sakana Samaria ma bia a sakana tanuo i te sasoha taar taam.”
JOH 8:49 Ma Jisas ga babalu hoken: “Taie tiga sakana tanuo i sasoha taar tagu. Iesen iau hatamat no agu Sus, ma muat, muat nes hasur iau.
JOH 8:50 Iau pai wara rauraun habalin at no hinsagu. Iesen tikai nong i wara gilgil huo ma aie no ut na harkurai.
JOH 8:51 Muat hadade baak! Ing bia tikai i palim dit ma i mur ira nugu harausur, pa na maat.”
JOH 8:52 Ma bia ira Iudeia diet ga hadade kaas tar iakan, diet ga tange hoken: “Kaiken tun balik um mehet te nunure bia tiga sakana tanuo i sasoha taar taam. Abraham ga maat, ma diet mah ira tangesot. Iesen kana balik u tangtange bia sige tikai i palim dit ma i mur no num harausur, pa na maat.
JOH 8:53 Taie tun at! Pau tamat tano hintubu dahat Abraham! Aie ga maat ma ira tangesot mah. U lik bia sige ugu kaik gu tange huo?”
JOH 8:54 Jisas ga babalu bia, “Bia iau ni raun habalin at no hinsagu, a linge bia mon ie. No ragu Sus nong muat tange bia anumuat God ie, aie nong i raun no hinsagu.
JOH 8:55 Muat pai hanunure ie iesen iau nunure tar ie. Bia ing iau ni tange bia iau pai nunure ie, io, iau tiga ut na harabota hoing muat. Iesen iau nunure tar at ie ma iau palim dit leh ma iau murmur ira uno nianga.
JOH 8:56 No ramuat sus Abraham ga laro kanong ga nunure bia na nes no nugu pakana bung. Io, ga nes ie ma ga kanakana.”
JOH 8:57 Ma diet ira Iudeia diet ga tange tana, “Hohe bia u tange bia u te nes Abraham? Ma pai liman na sangahul baak ira num tinahon!”
JOH 8:58 Ma Jisas ga babalu bia, “Muat hadade baak! Pa di ga kaha baak Abraham, ma iau no lilona tunotuno, iau at mon kana.”
JOH 8:59 Ma bia diet ga hadade huo diet ga ru haat laah wara gulgulum ie iesen Jisas ga mun ta diet gaam haan laah mekaia tano tamat na hala na lotu.
JOH 9:1 Ma ing Jisas ga hananhaan ga nes tiga tunaan di ga kahai ma ra puloi.
JOH 9:2 Ira uno bulu na harausur diet ga tiri ie bia, “Tena harausur, sige ga gil sakana magingin? Iakan ra tunaan, no rana sus, bia no pawasine, kaik di gaam kahai ma ra puloi?”
JOH 9:3 Jisas ga babalu hoken: “Taie tikai ta dal tamaan ga gil ra sakena. Iesen ga ngan huo waing God naga haminas ira uno pinapalim ma no nilon ta iakan ra tunotuno.
JOH 9:4 Bia ing at baak i kasakes taar, dahat na pakile ira pinapalim auno nong ga tule iau. Iesen i te hutet bia na bung, ma pai tale um bia tikai na papalim.
JOH 9:5 Ing iau ken tano ula hanuo, iau no lulungo tano ula hanuo.”
JOH 9:6 Ing ga tange taar hokaiken ga iabis tano kaabus, gaam gil pikaia me. Io, ga bul ira pikaia ta ira iruo matana no tunaan.
JOH 9:7 Ga tange tano tunaan, “Haan, nugu a sisiu tano bakbak Silom” (no kukuraina bia, ‘Hartula’). Io, no tunaan ga haan gaam a sisiu. Ma ga tapukus u nataman ma ira iruo matana gate tapapos.
JOH 9:8 Ira tunotuno ing diet ga nunure tar ie ma diet ing diet git nesnes ie bia tiga ut na sinsaring marmaris wara gaiena kinewa, diet ga tangtange hani bia, “Iakan at mon no tunotuno nong git kis taar ma git saasaring marmaris wara gaiena kinewa. Naka?”
JOH 9:9 Ari diet ga haut bia aie at mon. Ma ari a mes diet ga tange bia, “Taie. I matmataan haruat mon mei.” Iesen aie at ga singsingit bia, “Iau, iau iakano tunotuno.”
JOH 9:10 Io, diet ga tiri ie, “Ira mataam i tapapos hobihbih?
JOH 9:11 Ga babalu, “No tunaan nong di kilam ie bia Jisas i gil ari pikaia, gi bul ta ira iruo matagu. I tule iau bia ni haan uras hono bakbak Silom, nigi a sisiu. Io, iau haan ma iau sisiu. Ing iau gil huo ira iruo matagu dir tapapos.”
JOH 9:12 Ma diet ga tiri ie, “Ie he um iakano ra tunotuno?” Ga babalu bia, “Iau pai nunure.”
JOH 9:13 Io, diet ga lamus tar no tunaan nong ga pulo nalua ukatiga hoira Parisi.
JOH 9:14 Ma no bung Jisas ga gil ira pikaia ma ga papos ira iruo matana no tunaan, aie ga tiga Bung na Sinangeh.
JOH 9:15 Kaik ira Parisi diet ga tirtiri mah ie bia ga ngan hohe kaik gaam nanaas. Ga balu diet bia, “Ga bul pikaia ta ira iruo matagu, iau ga sisiu, ma kaiken um iau nanaas.”
JOH 9:16 Ari Parisi diet ga tange bia, “Iakano tunaan aie pai meram ho God kanong pai taram ira harkurai tano Bung na Sinangeh.” Iesen ari mes diet ga tange, “Pai tale tun at bia tiga ut na sakena gor gil ta mangana dadas na hakilang hokaiken.” Io, diet ga iruo palpal.
JOH 9:17 Kaik diet ga tiri habal no tunaan nong ga pulo nalua hoken: “Iakano tunaan ga papos ira iruo mataam. Kaik, augu, nu tange hohe utana?” No tunaan ga babalu bia, “Aie tiga tangesot.”
JOH 9:18 Iesen diet ira Iudeia diet pa ga sip bia diet na nurnur bia ga pulo nalua ma bia gate nanaas um, tuk taar bia diet ga hartula utano rana sus ma no pawasine.
JOH 9:19 Io, diet gaam tiri dir, “No nati mur iakan? Aie nong mur tange bia ga pulo laah tano bung, augu no pawasine, u ga kahai tana? Hohe bia i te nanaas um kaiken?”
JOH 9:20 No ana sus ma no pawasine no tunaan dir ga babalu hoken: “Mir nunure bia aie no nati mir. Ma mir nunure mah bia ga pulo laah at tano uno bung na kinakaha.
JOH 9:21 Iesen mir pai nunure bia hohe kaiken gi nanaas um. Ma mir pai nunure mah bia sige nong i papos ira iruo matana. Muat tiri ie. Pai a bana at baak um ie. Pai supi baal um tikai wara nianga utana.”
JOH 9:22 No ana sus ma no pawasine dir ga tange huo kanong dir ga burte ira Iudeia. Ma no burena hoken. Diet ira Iudeia diet gate bul nianga taar bia tikai na tange hapuasne bia i nurnur bia Jisas no Mesaia, diet na hatabune ie bia pa na lotu.
JOH 9:23 Kaik no pawasine ma no rana sus dir ga tange bia, “Pai a bana at baak um ie. Muat tiri ie.”
JOH 9:24 Tiga pakaan baling diet ga hartula utano tunaan nong ga pulo nalua, diet gaam tange tana, “Hasasalim uram ho God bia nu tange nora tutun kaiken. Mehet nunure bia a ut na sakena iakano ra tunotuno.”
JOH 9:25 Kaik gaam balu diet, “Bia ing aie tiga sakena bia taie, iau pai nunure. No linge sen mon iau nunure ie, kanin. Iau ga pulo nalua iesen iau te nanaas um kaiken.”
JOH 9:26 Io, diet ga tiri ie, “Asa ing ga gil taam? Ga papos ira iruo mataam hohe?”
JOH 9:27 Ga balu diet, “Iau te hinawase tar muat iesen muat pai kanan bia muat na hadade kilam. Muat sip bia muat na hadade habaling iau warah? Iau hamaan taar bia muat pai sip bia na auno bulu na harausur muat mah. Tutun at, bia taie?”
JOH 9:28 Ma diet ga ris ie, diet gaam tange bia, “Augu iaat tiga bulu na harausur ta iakanong ra tunotuno. Iesen mehet, mehet ira bulu na harausur tane Moses.
JOH 9:29 Mehet nunure bia God ga haianga ne Moses. Iesen iakan ra tunotuno, mehet pai nunure bia i hanuat meh.”
JOH 9:30 No tunaan ga balu diet hoken: “A mangaan at! Muat pai nunure bia i hanuat meh iesen i papos ira iruo matagu.
JOH 9:31 Dahat nunure bia God pai la tartaram ira sinasaring ta ira ut na sakena. Iesen i la tartaram diet ing diet la gilgil hoken. Diet la ruru ie ma diet la gilgil haruatne ira uno sinisip.
JOH 9:32 Mekarawa laah tano hakhakisi tuk katin taie baak tiga nong i te hadade bia tikai ga papos ira iruo matana tiga tunotuno di ga kahai ma ra puloi.
JOH 9:33 Bia ing iakan ra tunotuno pa naga hanuat meram ho God, pa gor tale ie bia na gil tiga linge.”
JOH 9:34 Io, diet ga balui hoken: “A ut na sakena ugu makatiga laah tano bung di ga kaha ugu. Sige ugu bia nu pir mehet?” Ma diet gaam se hasur ie.
JOH 9:35 Jisas ga ser bia diet gate se hasur ie. Ma ing ga nes leh ie, ga tange, “Hohe, u nurnur ta Nong a Tunotunoi?”
JOH 9:36 No tunaan ga balu ie bia, “Aie sige? Hinawase iau waing iau nigi nurnur tana.”
JOH 9:37 Jisas ga tange, “U te nes um ie ma aie at mon nong i iangianga ma ugu kaiken.”
JOH 9:38 Ma no tunaan ga tange um, “Nora Watong, iau nurnur.” Ma gaam lotu tupas ie.
JOH 9:39 Io, Jisas ga tange, “Wara gil harkurai kaik iau gaam hanuat ukai ta iakan ra ula hanuo, waing ira pulo diet na nanaas ma diet ing diet nanaas taar diet na pulo.”
JOH 9:40 Ma ari Parisi ing diet ga saksakate hani ie, diet ga hadade ing ga tange hokaiken, diet gaam tiri ie, “Pau lik tar bia mehet mah, mehet ira pulo. Naka?”
JOH 9:41 Jisas ga tange ta diet, “Ing bia a pulo muat, taie ta magingin sakena pa gor kisi muat. Iesen kaiken muat tange bia muat nanaas taar. Kaik ira numuat magingin sakena i kis taar at.”
JOH 10:1 Jisas ga tange, “Muat hadade baak! No tunotuno nong pai laka tano matanangas tano longlong na sipsip, iesen i kawa kutus mon, a hisikoma ma ra holmatau mah ie.
JOH 10:2 No tunotuno nong i laka tano matanangas at, a ut na harbalaurai ie ta ira sipsip.
JOH 10:3 No ut na balaura matanangas i la paapos tar no matanangas tana. Ma ira sipsip diet hadade kilam no ingana ing i tau ira hinsa diet ira uno sipsip, ma na lamus hasur diet.
JOH 10:4 Bia i te lamus hasur leh diet, na lulua haan um ta diet. Ma ira sipsip diet na murmur ie kanong diet nunure kilam no ingana.
JOH 10:5 Iesen diet pa na mur tun at tiga mes. Taie! Diet na hilau talur ie kanong diet pai nunure kilam ira ingana mes.”
JOH 10:6 Jisas ga tange iakan ra nianga harharuat ta diet iesen diet pa ga palai ta ing ga tangtange ta diet.
JOH 10:7 Kaik Jisas gaam tange habalin ta diet, “Muat hadade baak! Iau at, iau no matanangas ta ira sipsip.
JOH 10:8 Diet bakut ing diet ga hanuat nalua tagu, a hisikoma ma ra holmatau mah diet, iesen ira sipsip diet pa ga taram diet.
JOH 10:9 Iau at, iau no matanangas. Bia tiga nong na laka tagu, na lon. Na laklaka ma na suursuur balin, ma na nes tupas ra bilai na nian.
JOH 10:10 No hisikoma i hanuat mon wara kikinau, wara harbing, ma wara halhaliarai. Iau te hanuat bia diet na hatur kawase ra nilon, ma no nilon na hung ta diet.
JOH 10:11 “Iau at, iau no bilai na ut na balaura sipsip, nong i tar se no uno nilon wara gaie diet ira sipsip.
JOH 10:12 No tultulai nong di la sahsahur leh mon ie, aie pai no ut na harbalaurai tutun. Ma pai auno tus mah ira sipsip. Kaik, bia ing na nes no rakaia na paap i hanuat, na hilau sukun ira sipsip. Ma no rakaia na paap na karat ira sipsip ma na pasak harbasiane diet.
JOH 10:13 I hilau kanong di ga sahur mon ie ma pai ngarau pane ira sipsip.
JOH 10:14 Iau at, iau no bilai na ut na balaura sipsip. Iau nunure tar ira nugu sipsip ma ira nugu sipsip diet nunure tar iau hoing Mama i nunure tar iau ma iau nunure tar Mama. Ma iau tar se no nugu nilon wara gaie diet ira sipsip.
JOH 10:16 A nugu ari mes na sipsip diet pai gar ta iakan ra longlong na sipsip. Iau ni lamus hawaat mah diet. Diet na hadade kilam no ingagu ma diet bakut diet na kis tiga kapawena longlong na sipsip. Ma na tiga nong mon no ut na harbalaurai tana.
JOH 10:17 No burena hoken kaik Mama i sip iau. I sip iau kanong iau tar se no nugu nilon bia ni kap habalin leh ie.
JOH 10:18 Taie tiga nong i sasal se no nugu nilon mekai ho iau. Iesen iau at, tano nugu lilik, iau tar sei. Iau at iau kure bia ni tar sei, ma iau kure tar mah bia ni kap habalin leh ie. Iakan ra hartula Mama ga tar ie tagu bia ni gil ie.”
JOH 10:19 Ing bia ira Iudeia diet ga hadade hokaiken, ira udiet lilik ga mes harbasia baling. Ari tiga palpal ma ari tano mes.
JOH 10:20 Ma a haleng ta diet, diet ga tangtange, “A sakana tanuo i te sasoha tana ma i ba. Muat hanhadadei warah?”
JOH 10:21 Ma ari a mes diet ga tangtange, “Kaiken pai a nianga auno ta tiga nong a sakana tanuo i sosoha taar tana. A sakana tanuo mah i tale bia gor hananaas ira mata diet ira pulo?”
JOH 10:22 Io, diet git gilgil tiga lukara bia diet na lik leh no pakana bung bia di ga gil no tamat na hala na lotu bia na halhaal balin. Ma no bunguno iakano lukara ga puko aram Ierusalem. A pakana bung na madahon kaike ma Jisas ga hananhaan narako tano hala na lotu tamat menapu tano maliah tane Solomon.
JOH 10:24 Kaik ira Iudeia diet ga me hung luhutane Jisas ma diet ga tiri ie hoken: “Aise bung at baak ma nu pidik taar ma augu? Nes baak, mehet be nanaho puo laah um. Kaia! Bia ugu no Mesaia, io, nu hinawase hapalaine um mehet.”
JOH 10:25 Io, Jisas ga balu diet, “Iau gate hinawase tar muat iesen muat pai kanan bia muat na nurnur. Ira pinapalim iau gilgil tano hinsana no ragu Sus, diet hinhinawas utagu.
JOH 10:26 Iesen muat pa na nurnur, kanong pataie bia muat ira nugu kaba sipsip.
JOH 10:27 Ira nugu sipsip diet taram no ingagu ma iau nunure tar diet, ma diet murmur iau.
JOH 10:28 Ma iau tar no nilon hathatika ta diet ma taie tun at diet pa na hiruo, ma pa ta tiga nong na ras leh diet tano limagu.
JOH 10:29 Mama, nong ga tar diet tagu, i tamat ta ira linge bakut ma pai haruat bia ta tigano na ras leh diet tano limane Mama.
JOH 10:30 Mir ma Mama mir tikai mon.”
JOH 10:31 Io, ira Iudeia diet ga ru habalin leh ra haat bia diet na gulum ie.
JOH 10:32 Iesen Jisas ga tange ta diet, “Iau gate haminas ra halengin bilai na pinapalim ta muat meram ho Mama. Muat wara gulgulum iau uta garum pinapalim?”
JOH 10:33 Ira Iudeia diet ga tange, “Mehet pai wara gulgulum ugu uta ira bilai na pinapalim. Taie. Mehet na gulum ugu uta ira num nianga sakasaka uta God kanong a tunotuno bia mon ugu ma u tange bia God ugu.”
JOH 10:34 Jisas ga balu diet bia, “Muat nunure tar ing di ga pakat ie ta ira numuat harkurai tane God, ing God ga tange hoken: ‘A god muat.’
JOH 10:35 God ga kilam kaike ra tunotuno bia a god diet. Ga kilam diet huo ing ira uno nianga ga haan tupas diet. Ma dahat nunure bia ira nianga gar ta God di gate pakat i tur hatika taar.
JOH 10:36 Iesen utagu iaat, Mama ga bul hasisingen iau bia nigi halhaal gaam tule iau ukai tano ula hanuo. Bia ing God ga kilam kaike ra tunotuno bia a god diet, wara bih tutun bia muat tange bia iau tange hagahe God ing iau tange bia, ‘A nati God iau’?
JOH 10:37 Waak muat ra nurnur tagu bia iau pa ni gil ira pinapalim ing Mama i sip bia ni gil.
JOH 10:38 Iesen bia ing iau gilgil kaike ra pinapalim ma muat pai nurnur tagu, io, i tahut bia muat na nurnur ta ira pinapalim iau gilgil waing muat naga nunure kilam um bia Mama i kis tagu ma iau kis ta Mama.”
JOH 10:39 Ma diet ga walar habalin bia diet na palim kahe Jisas iesen diet ga ber tana.
JOH 10:40 Namur Jisas ga balos habalin no taah Ioridaan uras tano katon Jon no ut na baptais ga huna baptais ira tunotuno kaia nalua, ma Jisas ga me kiskis kaia.
JOH 10:41 Ma a haleng na matanaiabar diet ga haan tupas ie ma diet ga tange, “I tutun bia Jon pa gale gil ta dadas na hakilang iesen a tutun bakut ing Jon ga tange uta iakan ra tunotuno.”
JOH 10:42 Ma a haleng diet ga nurnur ta Jisas ta iakano taman.
JOH 11:1 Io, tiga tunotuno a hinsana ne Lasaras ga maset. Aie me Betani no taman ta ningaar sahin, Mata ma Maria.
JOH 11:2 Iakan ra Maria nong ga burange bus no Watong ma no waiwai, gaam salap hamamasa ira kakine ma no hine. Ma ne Lasaras mon, no hainine, nong ga noh taar ma ra minaset.
JOH 11:3 Io, dir sahin ga tula nianga ukaia ho Jisas hoken: “Nora Watong, nong u la sip tar ie i maset.”
JOH 11:4 Iesen bia Jisas ga ser iakan, ga tange, “Iakan ra minaset pa na bing ie. Taie. Iesen i te hanuat hokaiken bia ira matanaiabar diet na raun no hinsa God waing no minarine no Nati God na hanuat puasa.”
JOH 11:5 Ma Jisas ga sip Mata dir ma no sahine, ma ne Lasaras.
JOH 11:6 Iesen bia Jisas ga ser bia Lasaras ga maset, Jisas ga kisi leh at baak ra iruo bung balin kaia tano taman ga kiskis kaia.
JOH 11:7 Namur um ga tange ta ira uno bulu na harausur, “Dahat gi haan balin u Iudeia.”
JOH 11:8 Iesen ira bulu na harausur diet ga tange, “Tena harausur, nawaris mon baak ira Iudeia diet ga wara gulgulum ugu. Ma nu haan balin ukaia warah?”
JOH 11:9 Jisas ga balu diet hoken: “Dahat nunure bia a sangahul ma iruo ira pakana bung narako tiga bung na kasakes. Io, sige tikai i hananhaan ra kasakes pa na puko kanong i nanaas taar ma no lulungo ta iakan ra ula hanuo.
JOH 11:10 Iesen, tikai nong i hananhaan ra bung na puko, kanong pataie ta lulungo tana.”
JOH 11:11 Bia gate tange tar huo Jisas ga hinawase diet bia, “Lasaras no udahat harwis i te kubaba. Iesen iau wara hinahaan ukaia waing ni a hangun ie.”
JOH 11:12 Kaik ira uno bulu na harausur diet gaam tange, “Nora Watong, bia kana i kumkubaba na langalanga balin.”
JOH 11:13 Jisas ga haianga diet tano minaat ta Lasaras iesen ira uno bulu na harausur diet ga lik bia ga tangtange bia Lasaras ga kubaba taar mon.
JOH 11:14 Io, Jisas ga hinawase hapalaine um diet bia, “Lasaras i te maat.
JOH 11:15 Iesen iau kanakana wara gaie muat bia iau pa ga kis tika mei. Ma iau pa ga haan waing muat naga nurnur. Iesen dahat um uram ho ie.”
JOH 11:16 Kaik Tomaas (nong di la kilkilam mah ie bia no Kasang) ga tange ta ira bulu na harausur, “Dahat gi haan mah, dahat naga maat tika mei.”
JOH 11:17 Bia Jisas ga hanuat ga ser leh bia di gate hatur Lasaras ra midi aihat na bung nalua.
JOH 11:18 Ma Betani i tapaka haruat ma ra itul kilomita mon meram Ierusalem.
JOH 11:19 Kaik a haleng na Iudeia diet gate hanuat wara habaibai Mata dir sahin ma Maria tano minaat tano haini dir.
JOH 11:20 Bia Mata ga ser um bia Jisas ke ga hananhuat ga haan laah wara kakot leh ie. Iesen Maria ga kis taar at kaia ra hala.
JOH 11:21 Mata ga tange um ta Jisas, “Watong, bia nugu kis taar kai no hainigu pa gor maat.
JOH 11:22 Iesen iau nunure tar bia ing nu saring God uta sa kaiken, kaiken at mah God na tar taam.”
JOH 11:23 Jisas ga tange tana, “No hainim na tut hut balin.”
JOH 11:24 Mata ga tange tana, “Iau nunure tar bia na tut hut mah tano bung na tuntunut hut balin ta ira minaat tano hauhawatine iakan ra nilon.”
JOH 11:25 Jisas ga tange tana, “Iau at, iau no burena no tuntunut hut balin ma no nilon. Sige nong i maat, iesen i te nurnur tagu, na lon.
JOH 11:26 Ma sige nong i lalon ma i nurnur taar tagu taie tun at pa na maat hatika. U nurnur ta iakan?”
JOH 11:27 Mata ga haut gaam tange tana, “Watong, iau te nurnur bia augu no Mesaia, no Nati God nong di ga tange bia na hanuat ukai tano ula hanuo.”
JOH 11:28 Namur ta ing gate tange taar kaiken, ga haan tapukus gaam a tau hasisingen leh Maria, no sahine, gaam tange tana, “No tena harausur te hanuat ma i tirtiri taam.”
JOH 11:29 Bia Maria ga hadade hokaike ga tut suur gasien gaam haan uras ho Jisas.
JOH 11:30 Ma Jisas pa ga me hanuat baak kaia tano taman. Iesen ga kis taar at tano katon Mata ga haan tupas ie kaia.
JOH 11:31 Ira Iudeia ing diet ga kis tika taar ma Maria wara habaibai ie kaia ra hala, diet ga nes ie ma gate tut suur gasien, io, diet ga mur ie. Diet ga lik bia ga hanahaan wara sunuah aras tano midi.
JOH 11:32 Ma Maria ga hanuat taar tano katon Jisas ga kis taar kaia. Ing ga nes ie ga tutudung napu ta ira iruo kaki Jisas gaam suah taar tana hoken: “Watong, bia nugu kis taar kai no hainigu pa gor maat.”
JOH 11:33 Ing Jisas ga nes Maria ma ga susuah tika ma ira Iudeia ing diet gate sakate hawaat ie, ga purpuruan ma ga manga tirih no balana.
JOH 11:34 Jisas ga tiri diet, “Muat hatur ie iahe?” Diet ga balui, “Watong, mai, nugu nes!”
JOH 11:35 A luur na mata Jisas ga sal.
JOH 11:36 Io, ing diet ga nes iakan, ira Iudeia diet ga tange harbasia ta diet bia, “Nes baak! Ga manga sip tar at ne Lasaras.”
JOH 11:37 Iesen ari diet ga tange bia, “Iakan ra tunotuno mon nong ga hananaas ira iruo matana no pulo. Kaik i tale bia gor halangalanga mon mah Lasaras ma Lasaras pa gor maat.”
JOH 11:38 No bala Jisas balin ga manga tirih gaam haan ukaia tano midi. A matana haat ie ma di ga bul bat tar no matana ma tiga haat.
JOH 11:39 Jisas ga tange, “Muat kap se tar no haat!” Mata, no hainine no minaat, ga tange, “Watong, i te mapus um kaike kanong aihat na bung nalua ga maat.”
JOH 11:40 Jisas ga tange tana, “Hohe, iau pa gate hinawase tar baak ugu bia nu nes no dadas ta God ing bia nu nurnur taar? Masa! Io, i tahut bia nu lik leh ie!”
JOH 11:41 Io, diet ga kap se tar no haat. Jisas ga tadeng ma gaam tange, “Iau tanga tahut taam, Mama, kanong u te hadade iau.
JOH 11:42 Iau nunure tar bia u la tartaram iau, iesen iau tange kaiken wara gaie diet kaiken ra matanaiabar, bia diet naga nurnur bia u ga tule iau.”
JOH 11:43 Namur ta ing gate tange se tar kaike, Jisas ga tatau naliu hoken: “Lasaras, hansur!”
JOH 11:44 No minaat ga hansur. Ma di ga wis tar ira iruo limana ma ira iruo kakena ma ra taltalona katona maal, ma no matmataan tana di ga bakar tar ie ma tiga maal mah. Jisas ga tange ta diet, “Muat palas ise kaike ra maal na minaat naga haan.”
JOH 11:45 Io kaik, a haleng ta ira Iudeia ing diet ga hanuat ukaia hone Maria diet ga me nes ing ne Jisas ga gil, diet gaam nurnur tana.
JOH 11:46 Iesen ari ta diet, diet ga haan laah uras hoira Parisi, diet gaam hinawase diet uta ing Jisas gate gil.
JOH 11:47 Io, ira Parisi ma ira tamat na ut na pakila lotu, diet ga gil tiga kis hurlungen diet gom tange, “Ai! Hohe, pai tale tun at bia dahat na gil tiga linge? Iakan ra tunotuno i gilgil ra haleng dadas na hakilang.
JOH 11:48 Bia ing dahat na hok tar at mon ie huo, ira matanaiabar bakut diet na nurnur tana. Ma ira Rom diet na hanuat ma diet na haliare no udahat hala na lotu tamat ma no udahat huntunaan.”
JOH 11:49 Io, tiga nong ta diet ira Parisi a hinsana Kepas nong ga lualua ta ira ut na pakila lotu ta iakano ra pakana bung ga tange, “Muat pai nunure ta linge!
JOH 11:50 Muat pai palai bia utano numuat tahtahut i bilai bia ta tiga tunotuno mon na maat uta ira matanaiabar ma waak um bia no huntunaan bakut na hiruo.”
JOH 11:51 Pa ga tange huo tano uno lilik mon. Taie. Iesen, aie no lualua ta ira ut na pakila lotu ta iakano ra pakana bung, kaik God gaam kure no uno nianga bia na ianga na tangesot utane Jisas bia na maat utano huntunaan Israel.
JOH 11:52 Ma taie bia uta diet sen mon no huntunaan Israel, iesen bia na maat mah uta diet ira nati God kana diet kis harbasia taar waing na lamus tikane diet ma diet na tikai mon.
JOH 11:53 Io, tur leh um ta iakano bung diet git harpingit wara bubu bing Jisas.
JOH 11:54 Kaik Jisas pa gaam hanahaan palai um kaia ta ira Iudeia, iesen ga haan laah balik uras tiga katon hutet ra hanuo bia, gaam haan taar tiga taman a hinsana Epraem. Ma aie ma ira uno bulu na harausur diet ga kis kaia.
JOH 11:55 Io, no pakana bung utano Nian na Hinahaan Sakit gate hutet um ma haleng matanaiabar ta ira tamtaman tapaka diet ga hanuat uram Ierusalem wara pakpakile haruatne ira harkurai tane Moses bia diet naga halhaal pane iakano nian.
JOH 11:56 Diet ga naanaas haan ta Jisas, ma bia diet ga tur hurlungen taar kaia ra hala na lotu tamat diet ga hartiritiri ta diet bia, “Muat lik hohe? I nanaas bia pa na hanuat at um ukai tano nian, naka?”
JOH 11:57 Ma ira tamat na ut na pakila lotu ma ira Parisi diet gate tar nianga taar bia ing sige tiga nong na nunure leh bia Jisas kana he na hinawas waing diet naga palim kawase ie.
JOH 12:1 Io, bia a liman ma tikai na bung taar mon um ga kis taar utano Nian na Hinahaan Sakit, Jisas ga hanuat Betani no taman tane Lasaras nong Jisas ga hatut leh ie sukun ra minaat.
JOH 12:2 Ma diet ga gil tiga nian utane Jisas kaia. Mata ga harahut wara soh nian, ma Lasaras tikai ta diet ing diet ga kis tika taar ma Jisas tano nian.
JOH 12:3 Io, Maria ga kap leh ari waiwai wara salsalap di kilam ie bia ‘nart’, ma i tirih haruat ma ra subana ta tiga kilo. Ma a tabi kinewa ta iakano mangana waiwai. Maria ga kap leh ie gaam hurange tar ie ta ira iruo kaki Jisas, ma ga salap dir ma ira pakana hine. Ma no hunhuraan kala mismisien tano waiwai gaam hahungi no hala bakut.
JOH 12:4 Iesen tiga nong ta diet ira uno bulu na harausur, Iudas Iskariot, nong ga liklik bia na tar se tar Jisas ga tange hoken: “Wara bih pa di suhurane iakan ra waiwai wara kapkap leh ta kinewa? No matana i haruat ma ira kunukul tikai gaar kap ta ira uno pinapalim tiga tinahon! Io, ma ira kinewa um di gaar tar ta ira maris.”
JOH 12:6 Iudas pa ga tange hokaiken kanong bia ga marse tar ira maris, iesen bia ga tange huo kanong a ut na kikinau ie. Ma git balbalaure no bunbulaan ta ira udiet kinewa, kaik gaam git kaakaap kumaan laah mekaia.
JOH 12:7 Iesen Jisas ga tange, “Waak muat kiskis na gil ie! I tahut bia gate waak tar iakan ra waiwai utano bung da hatur iau tana.
JOH 12:8 Ira maris diet na kis tika ma muat hatika, iesen iau pa ni kis hatika taar ma muat.”
JOH 12:9 Io, tiga tamat na matanaiabar diet ga ser bia Jisas kana Betani, io, diet ga haan ukaia. Iesen diet pa ga hanawaan sen mon Jisas. Taie. Diet ga wara nasnas mah Lasaras nong Jisas gate hatut habalin ie sukun ra minaat.
JOH 12:10 Kaik ira tamat na ut na pakila lotu diet gaam harpingit bia diet na bu bing mah Lasaras kanong Lasaras no burena kaik haleng na Iudeia diet ga turtur talur kaike ra lualua ma diet gaam nurnur ta Jisas.
JOH 12:12 Tano bung namur no tamat na matanaiabar ing diet gate hanuat wara utano Nian na Hinahaan Sakit diet ga ser bia Jisas ke ga hanhanuat ukaia Ierusalem.
JOH 12:13 Io, diet ga kap leh ira pakana daha hoira pakana lamaas diet gaam haan wara kinakot uta Jisas, ma diet ga kakongane hani bia, “Da pirlat God! I daan nong i hanuat wara gilgil haruatne ira sinisip gar tano Watong! I daan no Tamat na Lualua na Gil Harkurai gar na Israel!”
JOH 12:14 Io, Jisas ga nas leh tiga sigar donki gaam kisi ie, hoing ira nianga ta God di ga pakat utana ga tange:
JOH 12:15 “Muat ira matanaiabar na Ierusalem, waak muat burut. Nes baak! No numuat Tamat na Lualua na Gil Harkurai tuai ke i hanhanuat, ma i kiskisi hani tiga nat na donki.”
JOH 12:16 Ira uno bulu na harausur diet pa ga luena palai baak ta kaiken ra linge. Iesen namur um ing no minarine Jisas gate hanuat puasa, diet ga lik leh bia di gate pakat tar kaike ra nianga utana ma bia diet gate gil tar mah kaike tana.
JOH 12:17 Ma ira matanaiabar ing diet ga kis taar tano bung bia Jisas ga tau hasur Lasaras meram tano midi gaam hatut ie sukun ra minaat, diet ga hinhinawas haan utane Jisas.
JOH 12:18 Iakan no burena kaik haleng na matanaiabar diet gaam haan wara ninaas ta Jisas, kanong diet ga hadade bia ga gil iakan ra dadas na hakilang.
JOH 12:19 Kaik ira Parisi diet gaam tangtange hargilaas ta diet bia, “Nes tar um! Dahat pai papetlaar at um ta linge! Nes baak! No ula hanuo bakut i te murmur ie!”
JOH 12:20 Io, ari Grik mah kana nalamin ta diet ing diet ga haan uram Ierusalem wara lotu tano bung na nian.
JOH 12:21 Diet ga haan tupas Pilip nong me Betsaida kenam Galili, diet gaam tange, “Maris, mehet sip bia mehet na nes Jisas.”
JOH 12:22 Pilip ga haan gaam a hinawase Andru. Io, dir balik um, dir ga haan dir gaam a hinawase Jisas.
JOH 12:23 Jisas ga balu dir gaam tange, “No pakana bung um i te hanuat bia no minarine Nong a Tunotunoi na hanuat puasa.
JOH 12:24 Muat hadade baak! Bia ing tiga pat na daha pa na puko taar tano pise ma naga maat, na kis taar at mon bia tiga kapawena pat na daha. Iesen bia ing na maat na huai ra halengin na hunena.
JOH 12:25 Sige tikai i manga sip sen mon no uno nilon, i baber tano nilon tutun. Iesen sige tikai nong pai manga sip no uno nilon ta iakan ra ula hanuo na palim dit tar ie utano nilon hathatika.
JOH 12:26 Sige nong i sip bia na papalim tagu, i tahut bia na mur iau. Ma bia iau ni haan uhe, no nugu ut na pinapalim mah na haan ukaia. Ma sige nong i papalim tagu, Mama na ru ie.
JOH 12:27 “Kaiken no balagu i manga purpuruan ma iau ni tange ra sa? Hohe, na tahut bia ni tange, ‘Mama, me ras leh iau sukun iakan ra pakana bung na ngunngutaan?’ Iesen taie. Iakan at mon no burena iau gom hanuat. Iau ga hanuat bia ni me sola ta iakan ra ngunngutaan.
JOH 12:28 Mama, hatamat no hinsaam!” Io, a ingana tiga nong ga ianga suur meram ra mawe hoken: “Iau te hatamat tar ie ma iau ni hatamat habalin ie.”
JOH 12:29 Ira matanaiabar ing diet ga tur taar kaia diet ga hadadei ma diet ga tange bia ga parparara. Iesen ari diet ga tange bia tiga angelo ga haianga ie.
JOH 12:30 Jisas ga tange, “Iakan pai hanuat wara utagu, iesen wara gaie muat.
JOH 12:31 Kaiken um no pakana bung wara gil harkurai tano ula hanuo. Kaiken um God na bat se tar no lualua gar ta iakan ra ula hanuo.
JOH 12:32 Ma iau, ing da tatik haut iau sukun no pise, iau ni lamus hawaat ira tunotuno bakut taar tagu.”
JOH 12:33 Ma ga tange hokaiken wara haminas bia a mangana minaat hohe na maat huo.
JOH 12:34 Ira matanaiabar diet ga balui bia, “Mehet gate hadade bia ira harkurai tane Moses i tange bia no Mesaia na kis hatika. Io, hohe kaik gu tange uta Nong a Tunotunoi bia da tatik haut ie? Ma, sige tun at iakanin Nong a Tunotunoi?”
JOH 12:35 Ma Jisas ga hinawase diet bia, “No lulungo na kis tika taar mon ma muat ra da hansik na pakana bung baak. Kaik muat na haan, kaiken at baak no lulungo kana. No kankado kabi me burung muat. No tunotuno nong i hananhaan ra kankado pai nunure bia i hanahaan uhe.
JOH 12:36 I tahut bia muat na nurnur tano lulungo kaiken at baak i pade tar muat waing muat na hanuat bia a nat na lulungo muat.” Ing ga tange taar huo Jisas ga haan laah gaam a mun ta diet.
JOH 12:37 A tutun bia ga pakile kaiken ra halengin dadas na hakilang ra matmataan ta diet, iesen diet ga malok balik bia diet na nurnur tana.
JOH 12:38 Ga ngan hokaiken wara hatutun ira nianga tane Aisaia no tangesot ing ga tange hoken: “Watong, taie tikai pai le nurnur tano numehet hinhinawas ma taie tikai pai le kap ra palpalai utano num dadas.”
JOH 12:39 No burena iakan diet pa gaam nurnur, kanong Aisaia ga tange mah hoken:
JOH 12:40 “God i te hapulo ira mata diet, ma i te hadadas ira bala diet, bia diet kabi nes kilam ma ira mata diet, ma diet kabi nunure kilam ma ira udiet lilik, ma diet naga tahurus bia nigi halon diet.”
JOH 12:41 Aisaia ga tange kaiken kanong ga nes no minamari Jisas, kaik gaam hinawas uta Jisas.
JOH 12:42 Ma a tutun bia kaiken ra nianga tane Aisaia ga huai, iesen halengin ta diet ira lualua ta ira Iudeia diet ga nurnur balik tana. Iesen diet pa ga tange hapuasne ira udiet nurnuruan kanong diet ga burte ira Parisi bia diet kabi hatabune diet bia diet pa na lotu baal.
JOH 12:43 Ma diet pa ga ianga puasa huo kanong diet ga sip bia a tunotuno mon na lat diet ma pataie bia God na lat diet.
JOH 12:44 Io, Jisas ga tange naliu hoken: “Sige tikai i nurnur tagu pai nurnur sen mon tagu iesen i nurnur mah ta nong ga tule iau.
JOH 12:45 Ma sige nong i nes iau i nes mah nong ga tule iau.
JOH 12:46 Iau te hanuat ukai tano ula hanuo hoing tiga lulungo waing diet bakut ing diet nurnur tagu, diet pa na kis taar at baak tano kankado.
JOH 12:47 Ma sige tikai i hadade ira nugu nianga iesen pai taram, iau at, iau pa ni gil harkurai tana kanong iau pa ga hanuat bia ni gil harkurai tano ula hanuo iesen wara halhalon ie.
JOH 12:48 Tiga ut na gil harkurai kana uta nong i malok se iau ma pai kap usurane ira nugu nianga. Kaiken at mon ra nianga iau te tangtange ing diet na gil harkurai tana tano hauhawatine iakan ra nilon.
JOH 12:49 Io, iau pa ga ianga tano nugu lilik at iesen Mama nong ga tule iau ga pir tar iau tano suruno no nugu hinhinawas ma ira nianga at iau ni se.
JOH 12:50 Iau nunure tar bia ira uno nianga na harpir i la harhartabar ma no nilon hathatika. Kaik, asa ing iau tange, iau tange at mon hoing Mama te hinawase tar iau bia ni tange.”
JOH 13:1 No Nian na Hinahaan Sakit gate hutet um ma Jisas ga nunure bia no pakana bung gate hanuat wara utana bia na haan sukun iakan ra ula hanuo wara uram tano ana Sus. Kaik i palai bia ga sip tar ira uno tus ing diet ken ra ula hanuo tuk kaiken no hauhawatine no uno nilon hoing i la be sip tar diet makarawa laah.
JOH 13:2 Ma Jisas ma ira uno bulu na harausur diet ga iaiaan tika ra bung um ta iakano bung. Ma Sataan gate halilik tar Iudas Iskariot no natine Saimon bia na tar se tar Jisas.
JOH 13:3 Iesen Jisas ga nunure tar bia no rana Sus gate tar se ira dadas bakut tana ma bia gate hanuat meram ho God ma hutet bia na tapukus balin uram ho God.
JOH 13:4 Kaik gaam tut sukun no nian, gaam kap se ari ta ira kiniasine, gaam taltalin ma tiga subana maal.
JOH 13:5 Io, ga hurange tar ari taah tiga tamat na dis, gaam tur leh wara gisgis ira kaki diet ira uno bulu na harausur, ma ga salsalap hamamasa diet ma no subana maal ga taltalin taar mei.
JOH 13:6 Ga hanuat taar ta Saimon Pita ma Pita ga tirii, “Watong, hohe u wara gisgis ira kakigu?”
JOH 13:7 Jisas ga balui bia, “Pau nunure kilam bia iau gilgil ra sa kaiken, iesen na palai um taam namur.”
JOH 13:8 Pita ga tange bia, “Taie. Pa nu gis tun at ira kakigu!” Jisas ga balui hoken: “Bia ing iau pa ni gis ugu, pa nu kis tika at um ma iau.”
JOH 13:9 Saimon Pita ga tange tana bia, “Watong, waak se mon ira kakigu, iesen gis mah ira limagu ma no ulugu mah!”
JOH 13:10 Jisas ga balui hoken: “Sige tikai i te sisiu taar na gis sen leh mon um ira kakine kanong no tamaine bakut i gamgamatien. Ma muat gamgamatien taar iesen pai muat bakut.”
JOH 13:11 Io, ga nunure tar bia sige nong na tar se tar ie, kaik gaam tange bia taie bia diet bakut diet gamgamatien taar.
JOH 13:12 Ing gate gis hawaat tar ira kaki diet ga sigam leh ira kiniasine gaam kis baling tano uno subaan. Ga tiri diet bia, “Muat palai taar ta iakan iau te gil tar ie ta muat?
JOH 13:13 Ing muat la haianga iau muat la tangtange bia ‘Tena harausur’ ma ‘Watong’. Ma muat tange no tutun kanong iau kaike.
JOH 13:14 Ing bia iau no numuat tena harausur ma no numuat Watong iau te gis tar ira kaki muat, io, i tahut bia muat mah, muat na gis hargilasane ira kaki muat.
JOH 13:15 Io, iau te luena gil tar huo waing muat mah, muat na gil mur ing iau te gil tar ta muat.
JOH 13:16 Muat hadade baak! No subulo pai tamat tano uno watong. Ma nong i tartaram pai tamat ta nong i hartula.
JOH 13:17 I palai bia muat te nunure um kaiken ra linge, io kaik, muat na daan ing bia muat na pakilei.
JOH 13:18 Iau pai iangianga uta muat bakut. Iau nunure tar diet ing iau te gilamis leh diet. Iesen iakan na hanuat wara hatutun ira nianga ta God ing di ga pakat hoken: ‘No tunaan nong mir ien tikane ira agu beret mei te tut na hinarubu ma iau.’
JOH 13:19 Iau hinhinawase hanalua muat kaiken, kaiken at baak pai hanuat. Iau tange hokaike waing muat na nurnur bia iau, iau at mon no lilona tunotuno, ing bia iakano linge na hanuat tutun.
JOH 13:20 Muat hadade baak! Sige tikai i bale leh tiga nong ing iau tule, i bale leh iau. Ma sige tikai i bale leh iau, i bale leh mah nong ga tule iau.”
JOH 13:21 Ing Jisas gate tange se tar kaiken ga purpuruan no balana ma gaam tange hapuasne hoken: “Muat hadade baak! Tikai ta muat na tar se tar iau.”
JOH 13:22 Ira uno bulu na harausur diet ga harnasnaas balin ta diet. Diet ga nguanguo harbasia bia sige tun at ta diet iakanong ga tangtangei.
JOH 13:23 Ma tikai ta diet, no bulu na harausur nong Jisas ga sip tar ie, ga kis hutaten tar Jisas.
JOH 13:24 Kaik Saimon Pita ga tah iakano bulu na harausur gaam tange tana, “Tiri ie bia sige iakanong i tangtangei.”
JOH 13:25 Kaik no bulu na harausur gaam ioh taar tane Jisas gaam tirii bia, “Watong, sigei?”
JOH 13:26 Jisas ga balui hoken: “Aie nong iau ni tar iakan ra katona beret tana namur ta ing iau te hasuguh tar ie tano dis.” Io, ing gate hasuguh tar no katona beret ga tar ie tane Iudas no natine Saimon Iskariot.
JOH 13:27 Ing at mon Iudas ga palim leh no katona beret, Sataan ga laka tana. Io, Jisas ga tange tana, “No linge u wara gilgil ie, gil hagasiaan ie.”
JOH 13:28 Iesen taie tikai kaia tano nian pa ga palai bia Jisas ga tange tar huo tana warah.
JOH 13:29 No burena bia Iudas git balbalaure ira kinewa kaik diet gaam lik bia Jisas ga tangtange tana bia na kul ta linge di ga supi tano Nian na Hinahaan Sakit bia na tabar dak ira maris ma ta linge.
JOH 13:30 Ing at mon Iudas gate palim leh no katona beret ga suur laah. Ma i gate bung kaike.
JOH 13:31 Io kaik, ing Iudas gate haan laah Jisas ga tange hoken: “Kaiken no minarine Nong a Tunotunoi i te tur leh bia na hanuat puasa. Ma no minarine God mah, Nong a Tunotunoi i te hatahun bia na hapuasnei.
JOH 13:32 Ma ing bia na hapuasne no minarine God, io, God kaia balin at tana na hapuasne no minarine no Natine.
JOH 13:33 Kaba natigu, iau ni kis tika taar mon ma muat ta da hansik na pakana bung baak. Muat na sisilih tagu, ma hoing at mon iau ga hinawase ira Iudeia, kaiken iau hinawase mah um muat bia no subaan iau ni haan ukaia, muat pai tale bia muat na haan ukaia.
JOH 13:34 A sigara harkurai iakan iau tartar ie ta muat ma aie hoken. Muat na marmarse hargilasane muat. Hoing at mon iau te marse muat huo, io, i tahut bia muat na marse hargilasane muat.
JOH 13:35 Bia ing muat na marmarse hargilasane muat, io, ira tunotuno bakut diet na nunure bia muat ira nugu bulu na harausur.”
JOH 13:36 Saimon Pita ga tiri ie bia, “Watong, nu haan uhe?” Jisas ga babalu hoken: “No subaan iau ni haan ukaia pai tale bia nu mur iau ukaia kaiken, iesen nu mur um namur.”
JOH 13:37 Pita ga tirii, “Watong, wara bih kaik iau pai tale bia ni mur ugu kaiken? Iau taguro bia ni maat wara utaam.”
JOH 13:38 Kaik, Jisas ga balui hoken: “U te taguro tun at bia nu maat wara utagu? Hadade baak! No kareka pa na kakel baak ma u te huna harus ise tar iau aitul a pakaan.
JOH 14:1 “Waak bia ira bala muat i tapunuk, iesen muat na nuruan God. Ma muat na nuruan mah iau.
JOH 14:2 Aram narako tano ngasiane Mama a halengin subaan kana. Bia ing pa naga mon tari iau gor te hinawase muat kanong iau ni haan ukaia wara tangtagure ta subaan wara numuat.
JOH 14:3 Ma ing iau te haan ma iau te tagure tar numuat ta subaan, iau ni tapukus balin nigi me kap leh muat wara uram ho iau waing muat na kis mah tano subaan iau kis taar kaia.
JOH 14:4 Muat nunure tar no ngaas uram tano subaan iau ni haan ukaia.”
JOH 14:5 Tomaas ga tange tana bia, “Watong, mehet pai nunure bia nu haan uhe, io kaik, mehet na nunure leh no ngaas ukaia hohe?”
JOH 14:6 Jisas ga babalu hoken: “Iau no ngaas, iau hapuasne ira tutun ta God, ma iau no nilon. Taie tikai pai hanuat taar ta Mama bia ing pai luena haan taar tagu.
JOH 14:7 Bia ing muat naga nunure tutun iau, muat gor te nunure mah Mama. Ma tur leh um ta iakan ra pakana bung muat na nunure ie ma na palai bia muat te nes ie.”
JOH 14:8 Io, Pilip ga tange tana bia, “Haminas Mama ta mehet. Iakanong mon nong mehet supi ie.”
JOH 14:9 Ma Jisas ga babalu hoken: “Maris, Pilip! Iau te lon lawas tika ma muat, iesen pau nunure at baak iau? Sige tikai i te nes iau i te nes Mama. Ho bibih balik bia u saring iau bia ni haminas Mama ta muat?
JOH 14:10 U nurnur bia iau kis ta Mama, ma bia Mama i kis tagu. Naka? Ira nianga iau tange ta muat pai nugu mon. Taie. Mama nong i lalon tagu, aie nong i pakpakile no uno pinapalim.
JOH 14:11 I tahut bia muat na nurnur tagu ing iau tange bia iau kis ta Mama, ma Mama i kis tagu. Bia taie, muat na nurnur kanong muat te nes ira dadas na gingilaan na kinarup.
JOH 14:12 Muat hadade baak! Sige tikai i nurnur taar tagu na pakile ira linge iau pakile. Ma na pakile ira linge ing i tamat ta ing iau pakile kanong iau ni haan uram ho Mama.
JOH 14:13 Ma asa ing muat na saring tano hinsagu, iau ni gil waing no Natine na hapuasne no minarine no rana Sus.
JOH 14:14 Bia ing muat na saring iau uta sa tano hinsagu, io, iau ni gil ie.
JOH 14:15 “Bia ing muat sip iau, io, na palai, kanong ira nugu harkurai muat na taram.
JOH 14:16 Ma iau ni saring Mama ma na tar tiga mes na Ut na Harharahut ta muat bia na kis hatika ma muat.
JOH 14:17 Aie no Tanuo. I la haphapuasne ira tutun ta God. No ula hanuo pai haruat bia na haut leh ie kanong no ula hanuo pai la nesnes ie ma pai la nunurei. Iesen muat nunure tar ie kanong i lalon ma muat, ma na kis ta muat.
JOH 14:18 Iau pa ni waak tar muat hoing ira tintana. Taie. Iau ni hanuat taar ta muat.
JOH 14:19 Hutet um ma no ula hanuo pa naga nes habaling iau, iesen muat na nes iau. Ma iau, iau ni lon, kaik muat mah, muat na lon.
JOH 14:20 Ta iakano ra bung muat na nunure um bia iau kis tane Mama, muat kis tagu, ma iau kis ta muat.
JOH 14:21 Sige tikai i hatur kawase tar ira nugu harkurai ma i taram diet, io, aie nong i sip tar iau. Ma sige nong i sip tar iau, Mama na sip ie, ma iau mah, iau ni sip ie ma ni hapuasne iau tana.”
JOH 14:22 Io, Iudas (taie bia Iudas Iskariot) ga tiri ie bia, “Watong, warah balik kaik gu sip bia nu hapuasne ugu ta mehet ma taie bia ukatiga tano ula hanuo?”
JOH 14:23 Ma Jisas ga balui hoken: “Sige nong i sip tar iau i taram ira nugu nianga. Ma Mama na sip ie ma mir na haan tupas ie ma mir na lon tika mei.
JOH 14:24 No tunotuno nong pai sip iau pai taram ira nugu nianga. Ma kaiken ra nianga muat hanhadade pai anugu. Taie. A nianga at gar ta Mama nong ga tule iau.
JOH 14:25 “Iau te tange se tar kaiken ra linge ing iau kis tika taar baak ma muat.
JOH 14:26 Iesen no Ut na Harharahut, no Halhaliana Tanuo, nong Mama na tulei tano hinsagu na me hausur muat ta ira linge bakut. Ma na halilik mah muat ta ing iau te tange se tar ta muat.
JOH 14:27 A malum kaik iau waak kapis tar ma muat. No nugu malum tus iakan iau tar ie ta muat. Iau pai tar ie ta muat hoing no ula hanuo i la gilgil. Io, waak bia ira bala muat i tapunuk ma waak muat ra bunurut.
JOH 14:28 “Muat ga hadade ing iau ga tange hoken: ‘Iau ni haan laah ma ni tapukus baling taar ta muat.’ Bia muat naga sip tun tar iau, muat gor guama tano nugu hinahaan ni gil ie uram ho Mama kanong Mama i tamat tagu.
JOH 14:29 Ma iau te hinawase hanalua muat kaiken uta iakan ra linge waing muat naga nurnur ing na ngan tun um huo.
JOH 14:30 Iau pa ni ianga lawas um ma muat kanong no lualua ta iakan ra ula hanuo iakana katiga tuai. Taie ta ginginine kai tagu, iesen iau pakpakile haruatne ing Mama i te pir tar iau ine waing no ula hanuo naga nunure bia iau sip tar Mama. “Muat tut, dahat naga haan laah.
JOH 15:1 “Iau no nunuhuan na ina daha tutun ma ne Mama no ut na harbalaurai tano ina daha.
JOH 15:2 Ira katena daha i kis tagu ing diet pai la huhuai, i la katkato se bakut diet. Iesen ira katen ing i la huhuai, Mama i la hinhinare bia diet na nunuhuan waing diet naga manga huai.
JOH 15:3 Io, muat te nunuhuan um ma i burena ta ira nugu nianga iau te tange tar ta muat.
JOH 15:4 Muat kis taar at tagu ma muat waak tar at iau bia ni kis taar at mah ta muat. Taie tiga katena daha i haruat wara hunuai bia aie sen. Taie. Na huai sen mon ing i kis taar at tano ina daha. Io, hokaike at mon, pai tale muat bia muat na huai ing bia muat pa na kis taar at tagu.
JOH 15:5 “Iau no nunuhuan na ina daha ma muat ira katena. Bia sige tikai i kis taar tagu ma iau kis taar at mah tana, io, iakano tunotuno i manga huai. Iesen bia ing iau pai harahut muat, pai tale muat bia muat na gil tiga linge.
JOH 15:6 Bia sige tikai pai kis taar at tagu, iakano tunotuno i haruat hoing tiga katena daha di sei ma gi a maranga. Ira katena daha hokaike di la ruru leh ma di la sase tar ra iaah gi la iaiaan.
JOH 15:7 Bia muat kis taar tagu, ma ira nugu nianga i kis taar ta muat, io, muat saring iau ta ing muat sip ma muat na hatur kawase leh.
JOH 15:8 Ing muat na manga huai, iakano na hapuasne no minarine Mama ma na haminas bia muat ira nugu bulu na harausur mah.
JOH 15:9 “Hoing Mama i te sip iau huo, kaik at mah, iau te sip muat huo. Io, i tahut bia muat na kis taar at tano nugu sinisip.
JOH 15:10 Bia muat taram ira nugu harkurai, io, muat na kis taar at tano nugu sinisip, hoing at mon iau te taram ira harkurai tane Mama iau gi kis taar at tano uno sinisip.
JOH 15:11 Io, iau te hinawase muat ta kaike waing no nugu gungunuama na kis ta ira numuat lon ma bia muat naga hung bukas mei.
JOH 15:12 No nugu harkurai kanin: Muat na marse hargilasane muat hoing iau te sip muat ma iau te marse muat huo.
JOH 15:13 Taie tiga harmarsai gar tikai i tamat tano harmarsai tano tunotuno nong i tar se no uno nilon wara gaie diet ira uno harwis.
JOH 15:14 Ma muat ira nugu harwis bia ing muat gil ing iau hartula bia muat na gil.
JOH 15:15 Iau pai kilam habaling um muat bia a nugu tultulai muat kanong tiga tultulai pai nunure ira hinilau tano pinapalim tano uno tamat. Iesen iau te kilam balik um muat bia a nugu harwis muat kanong ira linge bakut ing iau ga hadade leh tane Mama iau te hapalaine muat ine.
JOH 15:16 Muat, muat pa ga gilamis leh iau. Taie. Iau at, iau ga gilamis leh muat, iau gom tibe muat bia muat na haan ma muat na huai, ma ira numuat hunuai na kis taar at. Io kaik, Mama naga tabar muat ta ira sa ing muat saring tano hinsagu.
JOH 15:17 “No nugu harkurai kanin: Muat na marse hargilasane muat.
JOH 15:18 Bia no ula hanuo i malentakuane muat i tahut bia muat na lik kawase tar bia gate luena malentakuane tar iau.
JOH 15:19 Bia ing muat mekai napu, io, no ula hanuo gor sip muat hoing bia uno tus muat. Iesen muat pai mekai tano ula hanuo kanong iau te gilamis leh muat mekai tana. Ma iakan no burena kaik no ula hanuo gi malentakuane muat.
JOH 15:20 Muat na lik kawase tar ing iau ga tange ta muat hoken: ‘No subulo pai tamat tano uno watong.’ Bia ing diet ga helar tagu, io, diet na helar ta muat mah. Bia ing diet ga taram ira nugu nianga, io, diet na taram mah ira numuat.
JOH 15:21 Diet na gil tar kaiken ta muat kanong anugu muat. Ma no burena mon, bia diet pai nunure nong ga tule iau.
JOH 15:22 Bia ing iau pa naga hanuat ma iau pa naga me ianga ta diet, diet pa gor te baan taar um ra kuas ta ira udiet sakana magingin. Iesen kaiken balik um diet pai tale bia diet na ianga bat ira udiet magingin sakena.
JOH 15:23 Sige nong i malentak tagu i malentakuane mah Mama.
JOH 15:24 Iau ga pakile nalamin ta diet ira linge taie tiga nong mah um ga pakile. Ing bia iau pa naga gil huo diet pa gor te baan taar um ra kuas ta ira udiet magingin sakena. Iesen diet te nes um kaiken ra linge ma kana at baak diet malmalentakuane tar mir ma Mama.
JOH 15:25 Iesen i te ngan huo wara hatutun ing di ga pakat ta ira udiet harkurai ta God hoken: ‘Taie ta burena no udiet malmalentakuane iau.’
JOH 15:26 “No ut na Harharahut nong iau ni tulei meram ho Mama na hanuat. Aie no Tanuo nong i la haphapuasne ira tutun ta God. Ma i la hananuat at meram ho Mama. Ma ing na hanuat na me hinawas utagu.
JOH 15:27 Ma muat mah, muat na hinawas utagu kanong muat gabe kis tika ma iau makarawa laah ra turtur leh tano nugu pinapalim.
JOH 16:1 “Iau te hinawase muat ta kaiken bakut waing muat pa na karup muat naga puko.
JOH 16:2 Diet na hatabune muat bia muat pa na lotu ta ira udiet hala na lotu. Io, i tutun, iesen i tutun at mah bia no pakana bung i hananhuat ing tiga nong na bu bing muat na lik bia i gilgil ra pinapalim na lotu uram ho God.
JOH 16:3 Diet na gil kaike ra mangana linge kanong diet pai le nunure mir ma Mama.
JOH 16:4 Iau te huna hinawase muat ta kaiken. Ma iau gil huo waing muat na lik kawase tar bia iau ga luena hakatom tar muat, ing um iakano pakana bung na hanuat um. Iau pa ga huna hinawase muat ta iakan karawa nalua ing iau ga tur leh no nugu pinapalim kanong iau ga kis taar ma muat.
JOH 16:5 “Io, kaiken um ni haan uram ta nong ga tule iau, iesen taie tikai ta muat pai tiri iau bia iau ni haan uhe.
JOH 16:6 Ma muat te hung ma ra tapunuk kanong iau te tange kaiken ra linge.
JOH 16:7 Iesen muat hadade baak! Utano numuat tahtahut, kaik iau ni haan laah. Bia ing iau pa ni haan laah, no ut na Harharahut pa na hanuat ukai ho muat. Iesen bia ing ni haan iau ni tule sei ukai ho muat.
JOH 16:8 Ing na hanuat na hapalaine ira tunotuno tano ula hanuo tano suruno ira magingin sakena. Ma na hapalaine mah diet tano suruno no taktakodas ma no suruno no gil harkurai gar ta God.
JOH 16:9 Na me hapalaine diet bia diet sakena kanong diet pai nurnur tagu.
JOH 16:10 Ma na hapalaine diet tano taktakodas kanong iau ni haan uram ho Mama ma muat pa na nes habaling iau.
JOH 16:11 Ma na hapalaine mah diet tano gil harkurai gar ta God kanong no lualua ta iakan ra ula hanuo God i te tule bingbing tar um ie.
JOH 16:12 “Anugu mon haleng linge wara tangtange ta muat, iesen pai tale muat bia muat na kap bakut leh at mon kaiken.
JOH 16:13 Iesen ing no Tanuo nong i la haphapuasne ira tutun ta God na hanuat, io, aie nong na lue muat taar ta ira tutun bakut. Pa na ianga tano uno lilik mon. Taie. Na tange sen at mon ira linge ing ga hadade leh ma na hinawase muat ta ira linge na hanuat namur.
JOH 16:14 Na hapuasne habalin at mon no minamarigu hoken. Na kapkap leh ira tutun utagu naga hapalaine muat ine.
JOH 16:15 Ira linge bakut ta Mama anugu. Ma iakano no burena kaik iau gi tange bia no Tanuo na kapkap leh ira tutun utagu naga hapalaine muat ine.
JOH 16:16 “Dahin um ma muat pa na nes habalin iau, sen bia namur dahin muat na nes iau.”
JOH 16:17 Ari ta ira uno bulu na harausur diet ga hartiritiri ta diet bia, “Asa no kukuraina iakan ra katon i tange ie bia dahin um ma dahat pa na nes ie sen bia namur dahin dahat na nes ie? Ma hohe no kukuraina mah iakan ra katon ga tangei? Ga tange hoken: ‘Kanong iau ni haan uram ho Mama.’”
JOH 16:18 Diet ga hartiritiri at baak bia, “Asa no kukuraina iakan ra katon i tange bia, ‘Dahin um’? Dahat pai palai ta kaiken i tangtange.”
JOH 16:19 Jisas ga nunure bia diet ga wara tirtiri ie ta kaiken, kaik gaam tange ta diet hoken: “Iau te tange bia dahin um ma muat pa na nes habalin iau sen bia namur dahin muat na nes iau. Kana muat hartiritiri ta muat uta iakan?
JOH 16:20 Muat hadade baak! Muat, muat na iaha ma muat na suah ma kana no ula hanuo na guguama. Muat na tapunuk baak iesen namur um, muat na guama.
JOH 16:21 Tiga hahin i tianan taar na kilingane ra ngunngutaan ing na wara kinakaha kanong no uno bung i te haruat. Iesen ing i te kaha no uno bulu na luban se um no ngunngutaan ma naga hung balik um ma ra gungunuama kanong tiga bulu i te hanuat taar tano ula hanuo.
JOH 16:22 Io, muat mah huo. A numuat pakana bung na tapunuk kaiken, iesen iau ni nes habalin muat ma muat na guama. Ma taie tikai na kap se tar no numuat gungunuama.
JOH 16:23 Ta iakano pakana bung muat pa na saring habalin um iau uta sa. Muat hadade baak! Mama na tabar muat ta ira sa ing muat saring tano hinsagu.
JOH 16:24 Mekarawa laah tuk katin muat pai sasaring uta tiga linge tano hinsagu. I tahut bia muat na saasaring, kaik muat naga hatur kawase leh ma no numuat gungunuama na hung bukas ta muat.
JOH 16:25 “Iau iangianga ma ra nianga harharuat, iesen tiga pakana bung kana katiga i hananhuat ing pa ni ianga balin um hokaike. Taie. Iau ni hinawase hapalaine mon um muat ta Mama.
JOH 16:26 Ta iakano pakana bung muat na sasaring tano hinsagu. Iau pa ni supi bia ni saring Mama wara uta muat. Taie.
JOH 16:27 Mama iaat i sip tar muat kanong muat te sip iau ma muat te nurnur bia iau ga hansur meram ho Mama.
JOH 16:28 Iau ga hansur meram ho Mama, iau gaam hanuat taar tano ula hanuo. Io, kaiken iau ni haan sukun no ula hanuo wara uram hone Mama.”
JOH 16:29 Kaik, ira uno bulu na harausur diet gaam tange, “Kaiken um u te iangianga palai kanong pau iangianga ma ra nianga harharuat.
JOH 16:30 Ma kaiken mehet te nes um bia u la nunure bakut tar ira linge ma taie pau supi bia nu nahe tikai bia na tiri ugu tiga tiniri. Ma iakan no burena kaik mehet gi nurnur bia u ga hansur meram ho God.”
JOH 16:31 Jisas ga balu diet hoken: “Muat te nurnur tun um tagu?
JOH 16:32 Muat hadade baak! Tiga pakana bung kana i hananhuat, ma i te manga hutet um ing muat na hilau harbasia taar ta ira ngasia muat tikatikai. Muat na waak talur sen tar um iau. Iesen iau pai kis sen taar kanong Mama i la kis tika taar ma iau.
JOH 16:33 Iau te hinawase muat ta kaiken waing muat naga hatur kawase ra malum kanong muat kis tagu. Kai tano ula hanuo muat na mon ra ngunungut. Iesen waak muat burut. Muat taman tut ma ra balaraan! Iau te pari no dadas tano ula hanuo.”
JOH 17:1 Ing Jisas ga tange se tar kaiken ga nanaas uram ra mawe gaam sasaring hoken: “Mama, no pakana bung i te hanuat. Hapuasne no minarine no Natim waing no Natim naga hapuasne no minamarim.
JOH 17:2 Nu gil at mon hoing u ga tar ra dadas tana bia na harkurai menaliu ta ira tunotuno bakut waing na tar no nilon hathatika ta diet bakut ing u te tar diet tana.
JOH 17:3 Ma iakan no nilon hathatika, bia diet na nunure ugu, augu no kapawena God tutun, ma bia diet na nunure mah Jisas Krais nong u te tulei ukai.
JOH 17:4 Iau te hapuasne no minamarim kai tano ula hanuo ing iau hapataam ira pinapalim u ga tar bia ni me pakile.
JOH 17:5 Io, Mama, kaiken augu at nu hapuasne no minamarigu, iakano minamar iau ga hatur kawase tar ie tika ma augu nalua ing ga taie baak ta ula hanuo.
JOH 17:6 “Iau te hapuasne tar ugu ta diet ing u ga tar se diet tagu kaik diet pai gar tano ula hanuo. Anum diet ma u ga tar diet tagu ma diet te taram ira num nianga.
JOH 17:7 Kaiken diet te nunure um bia ira linge bakut u te tar tagu i hanuat meram ho ugu.
JOH 17:8 Diet te nunure um kanong ira nianga u ga tar tagu iau ga tar ta diet ma diet ga kap usurane leh. Diet gabe nunure tun tar at bia iau ga hansur meram ho ugu ma diet gaam nurnur bia u ga tule iau.
JOH 17:9 Ma iau, iau sasaring uta diet. Iau pai sasaring utano ula hanuo. Iesen iau sasaring uta diet ing u te tar tagu kanong anum diet.
JOH 17:10 Ira mes na linge bakut tika ma diet anum, ma ira num, anugu. Ma diet te hapuasne ira minamarigu.
JOH 17:11 Iau te wara hinahaan sukun um iakan ra ula hanuo uram ho ugu. Iesen diet at baak ken ra ula hanuo. Halhaliana Mama, wis bat diet ma no dadas tano hinsaam, no hinsaam nong u ga tar ie tagu, waing diet naga tikai mon hoing dar mon tikai.
JOH 17:12 Ing iau ga kis tika taar ma diet iau ga wis bat diet ma no dadas ta iakano hinsang u ga tar ie tagu. Iau ga balaure tar diet ma taie tikai ta diet i te panim laah, iesen nong sen at mon nong ga murmur hani no ngaas na hiniruo, iakaik i te panim laah waing ira num nianga di ga pakat na hanuat tutun.
JOH 17:13 “Dahin um ma ni hanut ukaia ho ugu, iesen iau tange ken ra linge ing iau baak kanik tano ula hanuo. Ma iau tangtange kaiken waing diet na hung ma no nugu gungunuama ta ira udiet nilon hoing i hung taar tagu.
JOH 17:14 Iau te tar ira num nianga ta diet ma no ula hanuo i te malentakuane diet kanong diet pai mekai tano ula hanuo, hoing at mon mah iau pai mekai tano ula hanuo.
JOH 17:15 Iau pai saring ugu bia nu kap leh diet sukun no ula hanuo. Taie. Iau saring ugu bia nu wis bat leh diet sukun no Ut na Sakena.
JOH 17:16 Diet pai mekai tano ula hanuo hoing at mon iau pai mekai tana.
JOH 17:17 Bul hasisingen diet bia diet naga halhaal. Hapalaine ira num tutun ta diet. Ira num nianga i tutun.
JOH 17:18 Iau te tule tar diet tano ula hanuo hoing u ga tule tar iau tano ula hanuo.
JOH 17:19 Iau bul hasisingen habaling iau bia nigi halhaal wara gaie diet waing diet na halhaal ing diet na nunure ira num tutun.
JOH 17:20 “Iesen iau pai sasaring uta diet sen mon. Taie. Iau sasaring mah uta diet kaike ing diet na ra hadade no hinhinawas ta kan ra kabaan ma diet na nurnur tagu, waing diet bakut diet na tikai mon. Mama, iau sasaring bia diet na kis ta dar ma diet na tikai mon, hoing augu, u kis tagu, ma iau, iau kis taam, waing no ula hanuo na nurnur bia u ga tule iau.
JOH 17:22 No minamar nong u ga tar ie tagu iau te tar mah ie ta diet bia diet na tikai mon hoing dar tikai mon.
JOH 17:23 Diet na tikai mon huo kanong u kis tagu ma iau ni kis ta diet. Io kaik, iau sasaring bia na ngan huo waing diet na tiga kapawena tun waing no ula hanuo na nunure bia u ga tule iau ma bia u te sip diet hoing u te sip iau huo.
JOH 17:24 “Mama, iau sip diet ing u te tar diet tagu bia diet na kis tika ma iau tano subaan iau ni kis kaia. Iau sip huo waing diet na nes no minamarigu, no minamarigu nong u te tar ie tagu kanong u ga sip iau menalua tano hakhakisi tano ula hanuo.
JOH 17:25 “Takodasiana Mama, no ula hanuo pai nunure ugu iesen iau nunure ugu ma diet ira num diet nunure bia u ga tule iau.
JOH 17:26 Iau te hapalaine tar ugu ta diet. Ma iau ni harsasokane wara hapalaine diet taam waing no num sinisip utagu na kis ta diet ma bia iau mah, iau ni kis ta diet.”
JOH 18:1 Ing Jisas gate sasaring huat taar, aie ma ira uno bulu na harausur diet ga haan kutus no salil Kidron. Ta iakano mes na palpal ga mon tiga matana daha na olip ma Jisas tika ma ira uno bulu na harausur diet ga haan baas kaia.
JOH 18:2 Ma Iudas nong ga tar se tar ie, ga nunure tar mah iakano subaan kanong halengin bung Jisas git kiskis hulungai ma ira uno bulu na harausur kaia.
JOH 18:3 Io kaik, Iudas gaam hanuat kaia ma ga lulue hani ari umri ing diet la balaure tar no hala na lotu tamat ing ira tamat na ut na pakila lotu ma ira Parisi diet ga tule diet. Ma diet ga hananhaan tika mah ma ari a umri me Rom. Ma diet ga hananhaan ma ra laam ma ra pok daka diet ga halulungo tar ma ra linge wara hinarubu me.
JOH 18:4 Ma Jisas ga nunure bakut tar asa ing na hanuat tana. Io kaik, ga tur huat gaam tiri diet hoken: “Muat hanawaan sige?”
JOH 18:5 Diet ga babalu bia, “Jisas nong me Nasaret.” Io, Jisas ga tange ta diet hoken: “Iau aie.” (Ma Iudas nong ga tar se Jisas ga tur taar ma diet kaia.)
JOH 18:6 Ing Jisas ga tange bia, “Iau aie,” diet ga hesuo tapukus diet gaam puko taar napu tano pise.
JOH 18:7 Tiga pakaan balin Jisas ga tiri diet, “Muat hanawaan sige?” Ma diet ga babalu bia, “Jisas nong me Nasaret.”
JOH 18:8 Io, Jisas ga tange ta diet hoken: “Iau te hinawase muat bia iau aie. Bia ing muat silsilhe iau, io, muat waak se tar ken ra tunotuno.”
JOH 18:9 Ga ngan hokaiken wara hatutun ira nianga tane Jisas ing ga tange bia pa ga habonbon tikai ta diet ing God ga tar tana.
JOH 18:10 Io, Saimon Pita nong ga kapkap hani tiga taltalona wise ga sasal leh ie gaam kato kutus se no kata na talingana no tultulai tano tamat na ut na pakila lotu. (Ma Malkus no hinsana iakano tultulai.)
JOH 18:11 Kaik, Jisas gaam tange hadadas ta Pita hoken: “Subale pukus no num wise! Waak u lik bia iau pa ni sola ta iakan ra ngunngutaan Mama i te tar ie tagu!”
JOH 18:12 Io, ira umri me Rom tika ma no udiet tamat na umri ma ira umri gar na Iudeia diet ga palim kawase Jisas. Ma diet ga wis kawasei diet gaam huna lamus tar ie tane Anas, tiga tamat na ut na pakila lotu menalua. Ma aie no numune Kepas nong ga tamat taar ta ira ut na pakila lotu ta iakano ra pakana bung.
JOH 18:14 Iakano Kepas mon nong ga pir ira Iudeia bia gor tahut bia tiga tunotuno na maat uta ira matanaiabar.
JOH 18:15 Io, Saimon Pita ma tiga mes na bulu na harausur dir ga murmur hani Jisas. Ma iakan ra bulu na harausur ga sakate Jisas uram narako tano hera ta Anas, no tamat ta ira ut na pakila lotu kanong iakano tamat git nunure tar ie.
JOH 18:16 Iesen Pita pa ga tale bia na laka, kaik gaam nanaho taar aras nataman tano matanangas. Io, iakano mes na bulu na harausur nong no tamat git nunure tar ie, ga tapukus ga me haianga no hahin nong ga harbalaurai taar kaia tano matanangas, ma gaam lamus halaka Pita uram narako.
JOH 18:17 No hahin nong ga tur taar kaia tano matanangas ga tiri Pita bia, “Augu dak mah tikai ta ira bulu na harausur ta iakano tunotuno, bia?” Pita ga babalu bia, “Taie! Iau taie!”
JOH 18:18 Ga maduhan no taman, kaik ira tultulai ma ira umri gar na Iudeia diet ga tur luhutane tar tiga iaah diet ga haloi wara ratrat ie. Ma Pita mah ga tur tika taar ma diet gaam ratrat iaah.
JOH 18:19 Ma kana no tamat ta ira ut na pakila lotu ga tirtiri mur Jisas uta ira uno bulu na harausur ma ta ira uno harausur.
JOH 18:20 Jisas ga babalu hoken: “Iau te tur ra matmataan na haruat ma iau te ianga taar ra haleng na matanaiabar sakit. Ira nugu harausur iau git gilgil haitne ta ira hala na lotu ma aram tano hala na lotu tamat mah. Ma iau pa ga tange suhe ta linge.
JOH 18:21 Io, u tirtiri mur iau warah? Nu tiri diet ing diet ga hadade iau bia iau ga tange hohe ta diet. Diet nunure tar ing iau ga tange.”
JOH 18:22 Ing Jisas ga tange hokaiken tiga umri kaia ga pasar no matmataan tana, gaam tange bia, “Sige i tange taam bia nu balu no tamat ta ira ut na pakila lotu hokaike?”
JOH 18:23 Jisas ga balui bia, “Bia ing iau te tange tiga linge i ronga, io, hinawas utana. Iesen bia ing iau te tange ra tutun, io, u pasar iau warah?”
JOH 18:24 Io, Anas ga tule sei uram ta Kepas no tamat ta ira ut na pakila lotu ma ira winwisaan kana at baak tana.
JOH 18:25 Ing Saimon Pita ga tur taar ma ga ratrat iaah, tiga nong ga tiri ie bia, “Augu dak mah tikai ta ira uno bulu na harausur, naka?” Pita ga harus, “Taie! Iau taie!”
JOH 18:26 Tikai ta ira tultulai tano tamat ta ira ut na pakila lotu, a hinsakana no tunaan nong Pita ga kato kutus se no talingana. Ma ga tange ta Pita bia, “Iau nes tar ugu tika mei aram ra matana daha na olip, naka?”
JOH 18:27 Tiga pakaan balin Pita ga harus ma kaik at mon tiga kareka ga kakel.
JOH 18:28 Io, ra rurua malaan ira Iudeia diet ga lam leh Jisas meram tane Kepas uras tiga katon tano but na ngasiana no tamat me Rom. Iesen ira Iudeia diet pa ga haan laka kaia kanong diet ga sip bia diet na iaan tano Nian na Hinahaan Sakit ma bia diet na laka kaia diet na sakena hoing ira udiet harkurai i tange.
JOH 18:29 Kaik, Pailat gaam hansur ma ga tiri diet, “A mangana nironga sa muat tange bia iakan ra tunotuno i te gil?”
JOH 18:30 Io, diet ga babalu bia, “Mehet pa gor me tar bia ie taam. Taie. Aie tiga sakana tunotuno.”
JOH 18:31 Pailat ga tange bia, “Muat at, muat lamus leh ie ma muat a gil harkurai tana haruat ma ira numuat harkurai.” Io, ira Iudeia diet ga babalu bia, “Taie, mehet pai tale. Muat ira Rom, muat pai bale mehet bia mehet na bu bing tikai.”
JOH 18:32 (Ga ngan huo wara hatutun ira nianga Jisas gate tange utano uno minaat bia na maat hohe.)
JOH 18:33 Io, Pailat ga haan laka balin uram tano but na ngasiana gaam tau halaka Jisas ma ga tiri ie bia, “Augu, augu no tamat na lualua na gil harkurai audiet ira Iudeia?”
JOH 18:34 Ma Jisas ga tiri balik ie hoken: “U lik leh mon gu tange hokaike bia ta mes diet ga hinawase ugu tagu?”
JOH 18:35 Pailat ga balui bia, “Ai! Pai tiga Iudeia iau! Diet ira num matanaiabar at ma diet ira tamat na ut na pakila lotu, diet mon ing diet ga tar se ugu tagu. Ma asa iakaik u ga gil ie?”
JOH 18:36 Jisas ga tange hoken: “No nugu kinkinis na harkurai ma ra harbalaurai pai mekai ta iakan ra ula hanuo. Bia ing naga mekai, io, ira nugu tultulai diet gor te harharubu bat iau waing pa daga tar se iau ta ira luma diet ira Iudeia. Iesen taie. No nugu kinkinis na harkurai ma ra harbalaurai aie pai mekai.”
JOH 18:37 Io kaik, Pailat gaam tange, “A tamat na lualua na gil harkurai tok at ugu, bia?” Jisas ga babalu hoken: “A num nianga at bia iau tiga tamat na lualua na gil harkurai. Ma no burena kaik di gaam kaha iau ma iau gi hanuat taar tano ula hanuo kanin, bia ni me hinawas tano tutun. Ma sige tikai gar tano tutun ie i la tartaram iau.”
JOH 18:38 Io, Pailat ga tiri bia, “Asa nora tutun?” Ga tiri taar huo ma ga hansur balin taar ta ira Iudeia gaam a tange bia, “Iau pai silihe tupas leh ta burena bia nigi gil harkurai ta iakan ra tunotuno.
JOH 18:39 Iesen a numuat tiga magingin kana bia iau ni hasur se tikai meram ra hala na harpidanau taar ta muat tano pakana bung na Nian na Hinahaan Sakit. Io kaik, muat sip bia ni waak se tar ta muat no numuat tamat na lualua na gil harkurai ira Iudeia?”
JOH 18:40 Diet ga kakonga balik bia, “Taie! Mehet malok ta iakano tunotuno! Nu hasur se tar Barabas!” (Ma Barabas ga tiga holmatau.)
JOH 19:1 Io, Pailat ga lamus Jisas gaam a hartula bia da dangat ie.
JOH 19:2 Ira umri diet ga wiwisane tikane ra tigatige hoing tiga balaparik, diet gaam hakukuh no uluno mei. Ma diet ga hasigam ie ma tiga dardarana maal i haruat hoing ira gar na watong.
JOH 19:3 Io, diet ga hanan tultul ie, diet gaam tangtange bia, “Mehet urur taam nora tamat na lualua na gil harkurai gar na Iudeia!” Ma diet ga paspasar batbat ie.
JOH 19:4 Io, tiga pakaan balin Pailat ga hansur gaam tange ta ira Iudeia hoken: “Muat hadoda! Iau ni lamus hasur tar um ie ta muat wara hamines bia iau pai silihe tupas leh ta burena bia nigi gil harkurai tana.”
JOH 19:5 Io, Jisas ga hansur tika ma no balaparik na tigatige di ga hakukuh tar no uluno mei ma no dardarana maal di ga hasigam ie mei. Ma Pailat ga tange ta diet bia, “Io, ie ken um no tunotuno.”
JOH 19:6 Ing at mon ira tamat na ut na pakila lotu ma ira udiet umri diet ga nes hasur Jisas, diet ga kaakonga bia, “Tange bia da tut tar ie ra ula kabai!” Iesen Pailat balik ga balu diet bia, “Muat at, muat lamus leh ie ma muat na tut tar ie ra ula kabai. Iesen iau at, iau pai silihe tupas leh ta burena bia nigi gil harkurai tana.”
JOH 19:7 Iesen ira Iudeia diet ga singsingit bia, “Numehet tiga harkurai kana. Ma iakano harkurai i tange bia na maat at kanong ga kilam ie bia aie no Nati God.”
JOH 19:8 Ing Pailat ga hadade huo ga manga burut um, kaik gaam laka tano but na ngasiana ma ga tiri Jisas hoken: “Augu meh?” Iesen Jisas pa ga babalu.
JOH 19:10 Io kaik, Pailat gaam tange, “U malok bia nu haianga iau, nah? Pau nunure bia iau hatur kawase tar ra dadas wara halangalanga ise ugu ma wara tutut tar mah ugu ra ula kabai?”
JOH 19:11 Ma Jisas ga balui hoken: “Pau gor te hatur kawase ra dadas bia ing pa naga hanuat taar taam meram naliu. Io kaik, nong i te tar se tar iau taam i te gil ra nironga i tamat tano num.”
JOH 19:12 Tur leh um makaia katiga Pailat ga walwalar bia na halangalanga ise Jisas. Iesen ira Iudeia diet ga kaakongane hoken: “Bia ing nu halangalanga ise iakan ra tunotuno pau tiga harwis tano numuat tamat na lualua sakit ira Rom. Sige tikai i kilam habaling at ie bia aie tiga tamat na lualua, io, aie no suk nana tano numuat kapawena tamat na lualua sakit ira Rom.”
JOH 19:13 Ing Pailat ga hadade huo ga lamus hasur Jisas ma gaam kis tano uno kinkinis na gil harkurai tano katon di kilam ie bia, ‘No Hera na Haat.’ (Ma no hinsana tano nianga gar na Iudeia bia ‘Gabata.’)
JOH 19:14 Ma ga hutet ra tingena kasakes kaike ta iakano bung, no bung na tinaguro utano Nian na Hinahaan Sakit. Io, Pailat um ga tange ta ira Iudeia hoken: “Ie ken um no numuat tamat na lualua na gil harkurai.”
JOH 19:15 Iesen diet ga kakongane bia, “Lamus isei! Lamus isei! Tange bia da tut tar ie ra ula kabai!” Io, Pailat ga tiri, “Muat sip bia ni tut tar no numuat tamat na lualua na gil harkurai ra ula kabai?” Ma ira tamat na ut na pakila lotu diet ga babalu hoken: “No numehet tamat na lualua na gil harkurai sen at mon iakano numuat kapawena tamat na lualua sakit kenau Rom!”
JOH 19:16 Io, Pailat um ga tar se tar Jisas ta diet waing daga tut tar ie ra ula kabai. Io kaik, ira umri diet gaam kure leh Jisas.
JOH 19:17 Jisas ga pusak leh no uno kabai gaam haan laah tika mei uram tano subaan hora ula turangan (di kilam ie bia Golgota tano nianga gar na Iudeia).
JOH 19:18 Ma diet ga me tut tar Jisas tano ula kabai kaia, tika ma iruo mes na tunotuno mah. Dir kaike ta ira iruo palpal tana, ma Jisas nalamin.
JOH 19:19 Ta ra hartula tane Pailat diet gate tagure tar tiga katona nianga i tange hoken: “Jisas nong me Nasaret, no tamat na lualua na gil harkurai gar na Iudeia.” Ma diet ga bul iakano tano uno kabai.
JOH 19:20 Di ga pakat iakan ra katona nianga tano nianga gar na Iudeia, tano nianga gar na Rom, ma tano nianga gar na Grik mah. Ma ra haleng ira Iudeia diet ga was ie kanong di ga tut tar Jisas tano ula kabai tiga katon hutet tano pise na hala Ierusalem.
JOH 19:21 Ira tamat na ut na pakila lotu ma ira Iudeia diet ga tange tane Pailat bia, “Waak u pakat ie bia, ‘No tamat na lualua na gil harkurai gar na Iudeia.’ Iesen nu pakat bia iakan ra tunotuno ga kilam habaling ie bia aie no tamat na lualua na gil harkurai gar na Iudeia.”
JOH 19:22 Ma Pailat ga balu diet hoken: “Asa ing iau te pakat i kis taar huo.”
JOH 19:23 Ing ira umri me Rom diet ga tut tar Jisas tano ula kabai diet ga kap leh ira kiniasine, diet gaam bul harbasiane tar ra ihat na tinibe. Ma tiga tinibe wara gar tikai ta diet. Ma diet ga kap leh mah no kiniasine nong me narako nong di ga gil ie ma tiga katona maal mon ma pataie ta dudungut tana.
JOH 19:24 Io, diet ga tange harbasiane ta diet hoken: “Waak dahat dirdiris ie. Iesen dahat gi mamagu ma ra satu bia sige na kap leh ie.” Ga ngan hokaiken wara hatutun ira nianga ta God di ga pakat hoken: “Diet ga harpalau ma ira kiniasigu ma diet ga mamagu ma ra satu utano nugu maal.” Io, hokaiken kaik ira umri diet ga gil huo.
JOH 19:25 Ma hutet tano kabai tane Jisas kaiken ra hahin diet ga tur taar kaia: no uno makai, no sahine no uno makai, Maria no hahin tane Kalopas, ma ne Maria nong me Magadalen.
JOH 19:26 Ma Jisas ga nes no uno makai kaia. Ga nes mah no bulu na harausur nong ga sip tar ie ma dir ga tur taar kaia hutet tana, kaik gaam tange tano uno makai hoken: “Awai ra hahin, nes baak. No natim um kan.”
JOH 19:27 Ma ga tange tano bulu na harausur bia, “A num makai balik um kanin ra hahin.” Tur leh um ta iakano bung no bulu na harausur ga lamus leh um no hahin bia na kis tano uno hala gaam balaurei.
JOH 19:28 Namur um, wara hatutun ira nianga ta God ing di ga pakat, Jisas ga tange bia, “Iau maruk,” kanong ga nunure bia ira uno pinapalim bakut gate pataam.
JOH 19:29 Ga mon tiga mangana gingop na wain kana, kaik di gaam hasuguh leh tiga gurgurun tes kaia tana. Io, di ga sako ie tiga sila hisop ma di gaam sangore haut ie uram tano ha Jisas.
JOH 19:30 Io, ing Jisas gate dup tar kaike ra wain ga tange hoken: “No nugu pinapalim i te pataam.” Io, ga sian tudu ma gaam waak se tar um no uno nilon.
JOH 19:31 Ra Bung Liman kaike no bung na tinaguro utano bung manamur no Bung na Sinangeh. Ma iakano Bung na Sinangeh gor tiga tamat na bung ie. Ira Iudeia diet pa ga sip bia ira palatamai dal no kaba minaat bia dal na tabataba taar aram ta ira ula kabai tano Bung na Sinangeh, kaik diet gaam saring Pailat bia da warat ira kaki dal ma daga kap hasur se ira palatamai dal.
JOH 19:32 Io, ira umri diet ga me warat ira kakine no luena tunaan nong di ga tut tar ie ra ula kabai tika ma Jisas ma ing mah tano mes na tunaan.
JOH 19:33 Ing diet ga hanuat taar tane Jisas diet ga nes bia gate maat, io kaik, diet pa gaam warat ira kakine.
JOH 19:34 Iesen tikai ta ira umri ga sie no binabati Jisas ma tiga rumus, ma kaik at mon a de ma ra taah ga sal suur.
JOH 19:35 (Io, iau no tunaan nong iau ga nes kaiken, iau te hinawas ine ma no nugu hinhinawas i tutun. Iau nunure bia iau tangtange no tutun ma iau hinhinawas utana waing muat mah, muat na nurnur.)
JOH 19:36 Kaiken ra linge ga hanuat wara hatutun ira nianga tane God di ga pakat hoken: “Taie tikai ta ira suruno ga tawarat.”
JOH 19:37 Ma ga ngan bilang huo wara hatutun mah tiga mes na katona nianga tane God di ga pakat ie hoken: “Diet na nanaas taar ta nong diet ga sie ie.”
JOH 19:38 Io, namur ta kaiken ra linge, Iosep me Arimatia ga hanuat. Ma aie ga tiga bulu na harausur tane Jisas mah. Iesen ga kis kumaan taar huo kanong ga burte ira Iudeia. Ga hanuat ga me saring Pailat utano palatamaine Jisas. Ing Pailat ga haut, Iosep ga haan gaam a kap leh no palatamaine Jisas.
JOH 19:39 Ma ne Nikodimas, nong ga luena hanuat taar baak tane Jisas ra bung, ga sakatei. Ma Nikodimas ga kap hawaat airuo mangana waiwai ing di ga dolowane pakur ma ga tirih haruat ma aitul a sangahul na kilo.
JOH 19:40 Dir ga kap leh no palatamaine Jisas ma dir ga wiwisane bat ie ma ra subana taltalona katona maal tika ma ira waiwai. Ira magingin gar na Iudeia hokaike ing diet la wara haratur.
JOH 19:41 Ma tano katon di ga tut tar Jisas tano ula kabai kaia ga mon tiga matana daha. Ma narakoman tano matana daha ga mon tiga sigara midi ma pa di ga leh hatur baak tiga nong tana.
JOH 19:42 Io, iakano bung no bung menalua tano Bung na Sinangeh, kaik dir gaam hatur no palatamai Jisas kaia kanong iakano midi ga kis hutet taar mon.
JOH 20:1 Ra mala bungbung ra Sade ing baak ga kankado taar Maria nong me Magadalen ga haan ukaia tano midi gaam a nes bia di gate kap se tar no haat tano matanangas tano midi.
JOH 20:2 Io, ga hilau tupas Saimon Pita ma no mes na bulu na harausur nong Jisas ga sip tar ie, gaam tange bia, “Di te kap leh no Watong meram tano midi ma metal pai palai bia di te bul ie iahe!”
JOH 20:3 Io kaik, Pita ma no mes na bulu na harausur dir ga taman tut laah wara ukarawa tano midi.
JOH 20:4 Dir ga hilhilau haan, iesen no mes na bulu na harausur ga hilau nalua tane Pita gaam a huna hanuat karawa tano midi.
JOH 20:5 Ga heraro laka uram ta ira katona maal diet ga noh taar kaia, iesen pa ga laka.
JOH 20:6 Io, Saimon Pita um nong ga murmur haan tana ga me hanuat gaam haan laka tano midi. Ga nes ira katona maal diet ga noh taar kaia tika ma no maal na haratur di ga pulus no ulu Jisas mei. Iakano maal ga noh sisingen taar at ma ga tamapuli timaan taar.
JOH 20:8 Io, no mes na bulu na harausur nong ga huna hanuat kaia tano midi ga haan laka mah. Ga nes ma ga nurnur.
JOH 20:9 (Dir pa ga palai baak bia ira nianga tane God di ga pakat i tange bia Jisas na tamat tut at sukun ra minaat.)
JOH 20:10 Io, ira iruo bulu na harausur dir ga tapukus balin taar ta ira ngasia dir tikatikai.
JOH 20:11 Iesen Maria ga tur taar at nataman tano midi ma ga susuah. Ing ga susuah ga heraro laka uram tano midi ma ga nes leh airuo angelo. Ira kiniasi dir a ponponiana ma dir ga kis taar tano subaan di ga hainoh tar baak no palatamaine Jisas kaia. Tikai ga kis taar urau ra uno ulalang ma nong tikai ga kis taar uras tano uno kinakadus.
JOH 20:13 Dir ga tiri Maria bia, “Awai, u susuah warah?” Ma Maria ga balu dir hoken: “Di te kap leh no nugu Watong ma iau pai nunure bia di te bul ie he.”
JOH 20:14 Ing ga tange tar huo ga tahurus gaam nes Jisas ma ga tur taar kaia. Iesen pa ga nes kilam ie bia Jisas mon.
JOH 20:15 Ma Jisas ga tange, “Awai, u susuah warah? Sige iakanong u sisilih utana?” Maria ga lik bia aie no ut na harbalaurai ta iakano matana daha, kaik gaam tange tana bia, “Maris, bia u te kap leh ie, hinawase iau bia u te bul ie iahe, iau nigi a kap leh ie.”
JOH 20:16 Jisas ga tange tana, “Maria.” Maria ga talinganei ma gaam tange tana hoken: “Rabonai!” (a kukuraina bia ‘tena harausur’ tano nianga gar na Iudeia.)
JOH 20:17 Io, Jisas ga tange bia, “Waak bia u palpalim iau kanong iau pai tapukus baak uram ho Mama. Iesen haan uras ta ira tasigu ma nu hinawase diet bia iau hanahaan um uram tano ragu Sus ma nora diet Sus mah, uram tano nugu God ma no udiet God mah.”
JOH 20:18 Io, Maria nong me Magadalen ga haan tupas ira bulu na harausur ma kanin ra hinhinawas: “Iau te nes no Watong!” Ma ga hinawase diet bia Jisas gate tange tar kaiken ra linge tana.
JOH 20:19 Ta iakano Sade ra matarahien ruruk ira bulu na harausur diet ga kis hurlungen taar narakoman tiga hala. Ma diet gate banus bat hadadas tar ira matanangas kanong diet ga burte ira Iudeia. Ma Jisas ga hanuat ga me tur harue diet gaam hamatien diet ma ga tange bia, “A malum ta muat!”
JOH 20:20 Ga tange tar kaiken ga hamines ira iruo lapara limana ma no binabatine ta diet. Ma ing ira bulu na harausur diet ga nes no Watong diet ga manga guama sakit.
JOH 20:21 Tiga pakaan balin Jisas ga tange bia, “A malum ta muat! Hoing Mama gate tule iau, io, iau mah, iau tultule muat huo.”
JOH 20:22 Io, namur, ga manasung taar ta diet ma ga tange, “Muat hatur kawase leh no Halhaliana Tanuo.
JOH 20:23 Bia ing muat lik luban se ira magingin sakena gar tikai, io, God i te lik luban se ira uno magingin sakena. Ma bia ing muat pai lik luban se ira magingin sakena gar tikai, io, God pai le lik luban se ira uno magingin sakena.”
JOH 20:24 Tomaas, nong di kilam ie bia no Kasang, ma aie tikai ta ira sangahul ma iruo, pa ga kis tika taar ma ira bulu na harausur ing Jisas ga hanuat.
JOH 20:25 Io kaik, ira mes na bulu na harausur diet gaam hinawasei bia, “Mehet te nes no Watong!” Iesen ga tange ta diet hoken: “Bia ing iau pa ni nes ira matana nil ta ira iruo lapara limana ma bia pa ni bul no kaskas na limagu kaia, ma bia pa ni bul halaka no limagu tano binabatine, taie tun at pa ni nurnur.”
JOH 20:26 Ma ra liman ma itul a bung namur ira bulu na harausur diet ga kis taar baling narako tano hala, ma Tomaas tika ma diet. Ma ira matanangas diet ga banus bat hadadas tar iesen Jisas ga hanuat ma ga tur harue diet gaam hamatien diet bia, “A malum ta muat!”
JOH 20:27 Io, ga tange ta Tomaas hoken: “Bul no limaam kai. Nes ira lapara limagu. Tul se no limaam ma nu bul halakai tano binabatigu. Waak u lilik iriruo iesen nu nurnur!”
JOH 20:28 Kaik, Tomaas gaam tange tana, “Augu no nugu Watong ma no nugu God!”
JOH 20:29 Io, Jisas ga tange tana bia, “U te nurnur kanong u te nes iau. Iesen diet daan ing diet pai nes iau ma diet nurnur at.”
JOH 20:30 Io, Jisas ga gil ra haleng mes na dadas na hakilang ra matmataan ta ira uno bulu na harausur ing iau pai le pakat halaka ta iakan ra pakpakat.
JOH 20:31 Iesen iau te pakat kaiken waing muat naga nurnur um bia Jisas aie at no Mesaia, no Nati God, ma bia muat na nurnur tana, io kaik, muat na hatur kawase no nilon tutun nong i kis tana.
JOH 21:1 Namur baling Jisas ga harapuasa ta ira uno bulu na harausur tano gagena no tamat na taah kom Taiberias. Ga ngan hoken.
JOH 21:2 Saimon Pita, Tomaas (no Kasang), Nataniel nong me Kena tano hanuo Galili, ira iruo nati Sebedi, ma airuo mes na bulu na harausur diet ga kis tika taar.
JOH 21:3 Ma Saimon Pita ga tange ta diet bia, “Iau wara sa uben.” Io, diet ga balui bia, “Dahat tika.” Io, diet ga haan laah diet gaam a kisi leh tiga mon, iesen ta iakano bung ra bung diet pa ga soh ta tiga kirip.
JOH 21:4 Ra mala bungbung Jisas ga tur taar aram na manse iesen ira bulu na harausur diet pa ga nes kilam ie bia Jisas mon.
JOH 21:5 Io, ga kakonga uras ho diet bia, “Kaba tasigu, taie ta kirip ta muat, nah?” Ma diet ga balui bia, “Taie.”
JOH 21:6 Kaik, gaam tange ta diet hoken: “Muat se no uben uras tano kata tano mon ma muat na soh tari.” Ma ing diet ga gil huo diet pa ga tale um bia diet na sarat haut no uben uram narako tano mon kanong ga hung no uben ma ra haleng kirip.
JOH 21:7 Io, no bulu na harausur nong Jisas ga sip ie ga tange ta Pita bia, “No Watong iakananam!” Ma Saimon Pita gate kap se tar no tamat na kiniasine. Ing at mon ga hadade bia no Watong iakananam, ga sigam habalin leh no kiniasine ma gaam karwas suur uras na taah kom.
JOH 21:8 Ma ira mes na bulu na harausur diet ga mur haut um Pita ma no mon. Ma diet ga salsal hani no uben nong ga hung taar ma ira kirip kanong pa ga tapaka uram namanse. Diet ga tapaka haruat mon ma tiga maar na mita.
JOH 21:9 Ing diet ga me haan sot diet ga nes tiga iaah ma gate iaan malas taar. Ma ra mon kirip kana tana. Ga mon mah ari beret.
JOH 21:10 Io, Jisas ga tange ta diet bia, “Muat kap hawaat ta kirip ta kaike muat te soh.”
JOH 21:11 Saimon Pita ga kawaas tano mon gaam sarat no uben uram na manse. No uben ga hung ma ra tamat na kirip haruat ma tiga maar ma liman sangahul ma itul. Iesen no uben pa ga tadiris sukmaal bia ga halengin sakit ira kirip tana.
JOH 21:12 Ma Jisas ga tange ta diet bia, “Muat mai, muat naga iaan.” Ma ira bulu na harausur diet ga sip tar um bia diet na tiri Jisas bia, “Sige ugu?” Iesen taie ta tikai pa ga walar kanong diet ga nunure bia aie no Watong.
JOH 21:13 Io, Jisas ga haan gaam kap leh ira beret ma ga tar ta diet. Ga gil mah huo ta ira kirip.
JOH 21:14 Iakanin um no aitul a pakaan bia Jisas ga harapuasa ta ira uno bulu na harausur namur ta ing God gate hatut habalin ie sukun ra minaat.
JOH 21:15 Ing diet ga iaan huat taar Jisas ga tiri Saimon Pita hoken: “Saimon no natine Jon, hohe, no num sinisip utagu i tamat ta ira sinisip ta diet ken?” Ga balui bia, “Masa, Watong, u nunure tar bia iau sip ugu.” Io, Jisas ga tange tana bia, “Nu nes mur ira nugu nat na sipsip.”
JOH 21:16 Tiga pakaan balin Jisas ga tiri ie bia, “Saimon no natine Jon, hohe, u sip iau?” Ma ga balui bia, “Masa, Watong, u nunure tar bia iau sip ugu.” Io, Jisas ga tange tana bia, “Nu balaure ira nugu sipsip.”
JOH 21:17 No aitul a pakaan Jisas ga tiri ie bia, “Saimon no nati Jon, hohe, u sip iau?” Ma Pita ga tapunuk kanong Jisas ga tiri ie no itul a pakaan bia, “Hohe, u sip iau?” Io, ga tange, “Watong, u nunure ira linge bakut. U nunure tar bia iau sip ugu.” Io, Jisas ga tange tana bia, “Nu nes mur ira nugu sipsip.
JOH 21:18 Hadade baak! Ing u ga marawaan taar, augu at, u git kumkubus hadikdikit no num maal ma u git hanahaan ta ira katon u ga sip bia nu haan ukaia. Iesen ing nu takana nu tul se ira iruo limaam ma tiga mes na kubus kawase ugu ma na lamus ugu taar tano katon pau sip bia nu haan ukaia.”
JOH 21:19 Jisas ga tange hokaiken wara haminas no mangana minaat tane Pita nong na hapuasne no minarine God tana. Io, Jisas ga tange tana, “Nu murmur iau!”
JOH 21:20 Pita ga talingan tapukus gaam nes iakano bulu na harausur nong Jisas ga sip ie ma ga murmur hani dir. (Aie nong baak ga ioh taar tane Jisas aram tano nian ma gaam tiri ie bia, “Watong, sige na tar se ugu?”)
JOH 21:21 Ing Pita ga nes ie ga tiri bia, “Watong, hohe tane kanan?”
JOH 21:22 Ma Jisas ga balui hoken: “Bia ing iau sip ie bia na lon taar tuk bia ni tapukus baling, io, taie ta ginginim kaia. Augu at, nu murmur iau.”
JOH 21:23 Kaik, tiga hinhinawas gaam haan hurbit nalamin ta ira haratasin narakoman ta Krais bia iakano bulu na harausur pa na maat. Iesen Jisas pa ga tange bia pa na maat. Taie. Ga tange mon hoken: “Bia ing iau sip ie bia na lon taar tuk bia ni tapukus baling, io, taie ta ginginim kaia.”
JOH 21:24 Iakanin no bulu na harausur nong i hinhinawas ta kaiken ra linge ma nong i te pakat hasur diet. Ma dahat nunure bia no uno hinhinawas i tutun.
JOH 21:25 Io, Jisas ga pakile ra halengin mes na linge mah. Bia ing di gor pakat hasur diet bakut tikatikai, io, utagu i nanaas bia gor taie ta mauho tano ula hanuo bakut uta ira pakpakat ing di gor pakat.
ACT 1:1 Tiopilas: Tano nugu luena nianga iau ga pakpakat uta ira linge bakut ing Jisas ga gil ma ga hauhausur ine, tur leh mekarawa ing ga haburen no uno pinapalim, tuk taar tano bung God ga kap haut ie uram ra mawe. Menalua mon ta ing God gaam kap haut leh Jisas uram ra mawe, no Halhaliana Tanuo ga tar no dadas ta Jisas kaik gaam pir timaan tar diet ing gate gilamis leh wara uno apostolo.
ACT 1:3 Ma namur tano uno haraubaal na minaat ga hatutun tar ta diet um kaike bia gate lon huat balin. Ga hatutun huo ma ira uno haleng na mangana harapuasa. Ga harapuasa ta diet tuk taar bia aihat na sangahul na bung ga sakit. Ma narakoman ta iakano pakana bung ga iangianga utano kinkinis na harkurai ma ra harbalaurai tane God.
ACT 1:4 Ta nong tiga bung, ing ga iaiaan tika ma diet, ga pir diet hoken: “Waak muat haan laah me Ierusalem, iesen muat na kis kahe no hartabar nong nagu Sus gate kukubus taar utana. Ma iakano kaik muat ga hadade iau ma iau ga iangianga utana.
ACT 1:5 Iau te tange huo kanong Jon ga baptais ma ra taah, iesen a bar bung taar um kana ma muat na kap no baptais tano Halhaliana Tanuo.”
ACT 1:6 Io kaik, ing Jisas ma ira apostolo diet ga hanuat hurlungen, diet ga tiri ie bia, “Nora Watong, hohe, kaiken um nu hatut habalin no kinkinis na harkurai ma ra harbalaurai tane God kai Israel?”
ACT 1:7 Io, Jisas ga tange ta diet hoken: “Pai numuat linge wara nunure ira pakana bung ing Mama gate puo tar kanong aie sen at i harkurai.
ACT 1:8 Iesen muat na hatur kawase ra dadas ing no Halhaliana Tanuo na bahung muat ma muat na hinawas ta ira tutun utagu haburen leh mekai Ierusalem ma ta ira kaba katon narako Iudeia ma Samaria ukarawa muk ta ira hauhawatine tano ula hanuo.”
ACT 1:9 Ma namur ta ing gate tange tar kaiken, God ga kap haut ie uram ra mawe ra matmataan ta diet ma ga barahit tiga bahuto, kaik diet pa gaam nes habalin um ie.
ACT 1:10 Ma bia diet ga walwalar at baak bia diet na nes Jisas ing ga hanhanhut uram ra mawe, io, kaik at mon airuo tunotuno dir ga sigam tar ra ponponiana sigasige dir ga me tur harue diet.
ACT 1:11 Io, dir ga tange ta diet hoken: “Kaba tunotuno me Galili, pai tahut bia muat tur taar kaiakai ma muat be nanaas hut taar uram ra mawe. Iakan at mon ra Jisas, nong God i te kap leh ie harie muat uram ra mawe, na hanuat balin hoing at mon muat te nas tar ie ing i hanut huo uram ra mawe.”
ACT 1:12 Io, diet ga tapukus balin uram Ierusalem mekaia tano uladih di la kilkilam ie bia uladih Olip. Ma no uladih ga tapaka haruat ma tiga kilomita meram tano pise na hala Ierusalem.
ACT 1:13 Ing diet ga hanuat, diet ga haan hut uram naliu tano subaan tano hala diet ga kiskis baak kaia. Ma diet kaiken ing diet ga kiskis kaia: Pita, Jon, Jemes, ma Andru; Pilip ma Tomaas, Batalomiu ma Matiu; Jemes no natine Alpias ma Iudas na natine Jemes, ma ne Saimon nong di ga kilam ie bia no Selot.
ACT 1:14 Ma diet bakut diet git saasaring hait ma tiga lilik mon, tika ma ari hahin. Ma Maria no pawasine Jisas ma ira tasine mah kaik diet tika.
ACT 1:15 Ma ta kaike ra bar bung Pita ga tur nalamin ta diet ira kaba harahinsakaan narako ta Krais. (Ma no udiet winawas ga nanaas haruat ma tiga maar ma iruo sangahul.)
ACT 1:16 Ma ga tange, “Kaba tasigu ma hainigu, no nianga ta God nong di ga pakat ie pa ga tale bia na piel. I te hanuat tutun hoing no Halhaliana Tanuo ga huna hinawase Dawit menalua bia na hanuat tutun. Kaik Dawit gaam hinawas utane Iudas, nong ga lue diet ing diet ga palim kawase Jisas.
ACT 1:17 Ma aie ga tikai ta dahat ma ga mon tiga subaan tano udahat pinapalim.”
ACT 1:18 (Ma iakan ra tunotuno gate kul tiga katona pise ma ira kunkulaan ing ga kap tano uno magingin sakena. Ma ga puko pampoba kaia, no tingena gaam tabawes ma ira pokona balana bakut ga taluar suur.
ACT 1:19 Ira matanaiabar me Ierusalem diet ga ser iakan, io kaik, diet gaam kilam iakano katona pise ma ra udiet nianga bia ‘Akeldama’, no kukuraina bia ‘Pise na De.’)
ACT 1:20 Ma Pita ga tange balin bia, “Ga ngan hokaike kanong ira nianga di ga pakat tano Buk na Ninge i tange hoken: ‘Na kapkapaan no ngasiana; ma pataie ta nong na kis tana.’ I tange mah bia, ‘Tiga mes na banot leh no uno mauho.’
ACT 1:21 Io, kaik, kaiken dahat supi bia da gilamis leh tikai wara hinhinawas tika ma dahat tano tuntunut hut balin tano Watong Jisas. Ma na tahut bia aie tikai at ta diet ing diet ga saksakate dahat ta ira pakana bung bakut ing no Watong Jisas ga hanahaan tika ma dahat, haburen ta ing Jon ga harharpir tano uno baptais tuk taar tano bung God ga kap haut Jisas harie dahat uram ra mawe.”
ACT 1:23 Io, diet ga kilam ra iruo tunotuno, ne Matias ma ne Iosep nong di ga kilam ie bia Barsabas (ma tiga mes na hinsana mah ne Iastus).
ACT 1:24 Namur diet ga sasaring hoken: “Nora Watong, augu iaat u nunure ira bala diet ira tunotuno bakut. Io kaik, tuko hamines ta het bia sige ta dir ken u te gilamis leh ie wara banbanot leh iakan ra mauho tano pinapalim na apostolo nong Iudas ga haan sukun ie wara hinahaan taar tano uno sakana subaan tus.”
ACT 1:26 Io, diet ga mamagu ma ra mangana haat hoing ra satu, ma no haat ga tuko hamines bia Matias. Io, diet ga was tikane um ie ma ira sangahul ma tikai na apostolo.
ACT 2:1 Ing no bung na Pentikos ga hanuat ira ut na tinaram tano lotu kaia diet ga kis tika taar tiga katon.
ACT 2:2 Kaik at mon tiga kinakel hoing tiga dadas na punpuh na baiangin ga wawaang suur meram ra mawe ma gaam burung no tingena hala bakut ing diet ga kis taar kaia.
ACT 2:3 Io, diet ga nas ra linge hoing ira kalkalamena iaah, ma kaike ra linge ga haan harbasia taar ta diet gaam kis ta diet ira tunotuno tikatikai.
ACT 2:4 Diet bakut diet ga hung ma no Halhaliana Tanuo ma diet ga haburen nianga ma ra mes na nianga hoing at no Tanuo ga tar ra dadas ta diet bia diet na ianga me.
ACT 2:5 Ta iakano pakana bung a haleng na Iudeia ing diet git lalotu tupas God diet gate hanuat mekarawa ta ira subaan bakut tano ula hanuo ma diet gaam kiskis kaia Ierusalem.
ACT 2:6 Ing ira matanaiabar diet ga hadade iakan ra kinakel diet ga hanuat hurlungen. Ma diet ga nguanguo kanong tikatikai ta diet ga hadade no uno nianga tus ing iakano kabaan diet ga iangianga me.
ACT 2:7 Ma diet ga karup, diet gaam ngalabo kaik diet gaam tange bia, “Kaiken ra tunotuno diet iangianga, diet bakut mon me Galili, naka?
ACT 2:8 I ngan hohe tun at bia dahat tikatikai dahat hanhadade diet ma diet iangianga ma ira udahat nianga tus at?
ACT 2:9 Dahat me Partia, Midia, ma Ilam; ma dahat me Mesopotemia, Iudeia, ma Kapadosia, Pontas, Esia, Pirigia, Pampilia, Isip ma ira kaba katon Libia hutet Sairin; ma a wasire mah meras Rom, ira Iudeia ma diet ing diet gate laka tano lotu gar na Iudeia; ma ari ta dahat me Krit ma Arebia. Ma dahat hadade kilam ira udahat nianga tus ing dahat hadade diet ma diet iangianga uta ira dadas na pinapalim ta God!”
ACT 2:12 A kinarup ma ra nguanguo ga kis ta diet kaik diet gaam hartiritiri haan bia, “Asa no kukuraina iakan ra linge?”
ACT 2:13 Iesen ari balik ta ira matanaiabar diet ga hasakit ta diet ma diet ga tange bia, “Diet te mame ra haleng na dadas na taah kaike.”
ACT 2:14 Io kaik, Pita ga taman tut tika ma ira sangahul ma tikai na apostolo gaam ianga tamat wara haianga ira matanaiabar hoken: “Kaba hinturagu na Iudeia ma muat mah ing muat la kiskis kai Ierusalem, iau ni palas tar iakan ra linge ta muat ma muat na hadade timaan ira nugu nianga.
ACT 2:15 Ken ra tunotuno diet pai mom hoing muat lik. Taie. A liman ma ihat na pakana bung mon baak ra malaan kaiken!
ACT 2:16 Iesen iakan nong no tangesot Ioel ga hinawas utana ing God ga tange bia,
ACT 2:17 ‘Tano hauhawatine ta ira pakana bung iau ni gil hoken. Iau ni burange bus ira kaba matanaiabar bakut ma no Tanuagu. Ma ira numuat bulu na tunaan ma ira nat na hahi muat diet na ianga na tangesot, ira numuat kaba marawaan diet na nas ra ninaas na tanuo, ma ira numuat kaba patuana diet na bariane ra barbarien.
ACT 2:18 Ma iau ni burange bus mah ira nugu tultulai, hahin, ma tunaan, ma no Tanuagu ta iakano pakana bung, ma diet na ianga na tangesot.
ACT 2:19 Iau ni hamines ra linge na ngalabo aram ra ula mawe, ma ra kaba hakilang kai napu ra ula hanuo hoken: na mon de, a iaah, ma ra tamat na mis mah.
ACT 2:20 No kasakes na kankado ma no teka na daraan hoira de nalua bia no tamat na bung sakit gar tano Watong na hanuat ma ra but na minarine.
ACT 2:21 Ma diet bakut ing diet na tau iau no Watong bia ni halon diet, iau ni gil haruatne.’
ACT 2:22 “Muat ra kaba matanaiabar na Israel, muat hadade timaan ken ra nianga. Iakan ra Jisas meram Nasaret, God ga hatutun tar ie ta muat bia aie sige. Ma ga hatutun huo ta ira gingilaan na kinarup ma ira dadas na hakilang ing ga gil narakoman tano nilon tane Jisas nalamin ta muat. Ma muat palai taar ta kaiken.
ACT 2:23 Iesen di ga tar se Jisas ta muat kanong God gate pingit tar huo ma gate nunure tar bia na ngan hokaike. Ma muat tika ma ira sakana tunotuno muat ga bu bing ie ing muat ga tut tar ie ra ula kabai
ACT 2:24 Iesen God ga hatut habalin ie sukun ra minaat. Io kaik, ga halangalanga isei tano ngunngutaan na minaat kanong ga taie tun at ta dadas tano minaat bia na palim kawase tar ie.
ACT 2:25 Ma Dawit ga hamines bia iakan i tutun ing ga hinawas utana hoken: ‘Iau ga nas haitne no Watong tika ma iau. Ma taie ta purpuruan na haruat bia na rupuk iau kanong no Watong i tur harue tar iau.
ACT 2:26 Io kaik, iau laro ma iau ianga ma ra gungunuama. Ma no palatamaigu at mah na kis na balaraan taar tano uno kinkinis namur,
ACT 2:27 kanong pa nu waak se tar iau tano hanuo na minaat. Pa nu bale leh no num Halhaliana bia na mapus.
ACT 2:28 U te hapalaine iau ta ira ngaas na nilon, ma nu manga haguama iau kanong nu kis tika ma iau.’
ACT 2:29 “Kaba tasigu, i tale iau bia ni hinawase muat utano hintubu dahat Dawit kanong dahat palai utana. Ga maat, di gaam hatur ie, ma no uno midi iakana tuk katin.
ACT 2:30 Iesen aie ga tiga tangesot ma ga nunure tar bia God gate kukubus tar mei ma ra sinsalim hoken. God ga kukubus taar tane Dawit no tamat na lualua na gil harkurai bia na bul tiga bulumur tana tano uno tamat na kinkinis na gil harkurai.
ACT 2:31 Io kaik, Dawit ga palai bia asa na hanuat namur gaam hinawas tano tuntunut hut balin tano Mesaia hoken. Ga tange bia God pa na waak se tar ie tano hanuo na minaat ma bia no palatamaine mah pa na mapus.
ACT 2:32 Iakan ra Jisas at mon nong God ga hatut habalin ie ma mehet bakut mehet ga nes iakan ra linge kaik mehet gi hinawas utana bia i tutun.
ACT 2:33 Ma God i te hatamat tar ie tano tamat na kinkinis tano kata na limane God ma i te tar no Halhaliana Tanuo tana haruat ma no uno kunubus. Io kaik, Jisas i te burange bus diet ma kaiken muat nesnes ma muat hanhadade.
ACT 2:34 Ma i palai bia pai Dawit nong ga hanut uram ra mawe iesen aie at ga tange bia, ‘No Watong ga tange ta nagu Watong: “Kis kai tano tamat na kinkinis tano kata na limagu, tuk iau ni bul hasur ira num hiruo menapu ta ira lapara kakim!” ’
ACT 2:36 “Io kaik, i bilai bia muat ira kaba Israel, muat na palai at bia God i te hakisi iakan at ra Jisas nong muat ga tut tar ie tano ula kabai bia na Watong ma Mesaia mah.”
ACT 2:37 Ing ira matanaiabar diet ga hadade huo, ga kata tus ira bala diet kaik diet gaam tange ta Pita ma ira mes na apostolo hoken: “Kaba tasi het, asa ing mehet na gil?”
ACT 2:38 Pita ga balu diet hoken: “Muat bakut tikatikai muat na lilik pukus ma muat na kap baptais tano hinsane Jisas Krais bia God naga lik luban se ira numuat magingin sakena. Ma muat na hatur kawase leh no hartabar na Halhaliana Tanuo kanong God ga gil no kunubus wara gaie muat ma ira nati muat ma wara gaie diet mah ing diet tapaka. Iakan ra kunubus i gawane diet bakut ing God na tau hawaat diet wara uno.”
ACT 2:40 Ma ga tibe hakatom diet ma ra haleng mes na nianga ma ga walar bia na halamlam diet gaam tange hoken: “Muat bale God bia na halon muat sukun no harpidanau nong na haan tupas kaiken ra sakana matanaiabar.”
ACT 2:41 Io, diet ing diet ga kap usurane ira uno nianga diet ga kap baptais ma ta iakano bung aitul na arip diet ing diet ga laka harahut iakano ton gar ta Krais.
ACT 2:42 Diet ga balaan bia diet na taram ira hauhausur ta ira apostolo ma bia diet na kis hulungai wara tar harharahut hargilaas, diet gaam balaan mah utano magingin na pidik beret ma wara sinasaring.
ACT 2:43 Ma ira apostolo diet ga pakile ra haleng na gingilaan na kinarup ma ra dadas na hakilang ma ira matanaiabar bakut diet ga kis ma ra tamat na urur ta God.
ACT 2:44 Diet bakut ing diet gate nurnur, diet ga kiskis tika, ma diet ga tartar hargilasane ira udiet minsik.
ACT 2:45 Ma diet ga suhsuhurane ira udiet inton ma ira udiet minsik ma diet ga tartar ira kinewa ta diet ing diet ga mon sunupi.
ACT 2:46 Ta ira kaba bungbung diet ga harsasokane wara hinanuat hurlungen tano tamat na hala na lotu, ma diet ga tiga lilik mon. Ma diet ga tibik beret tika narako ta ira ngasia diet ma diet ga iaiaan tika ma ra gungunuama ma ra matien na bala.
ACT 2:47 Ma diet ga pirpirlat God ma diet ga langlagirane ira sinisip ta ira mes na matanaiabar bakut ukaia ho diet. Ma ira kaba bungbung diet ing no Watong ga halhalon diet, ga lamlamus halaka tar diet ta ira kaba ut na nurnuruan.
ACT 3:1 Tiga bung Pita ma Jon dir ga haan uram ra tamat na hala na lotu ra itul ra matarahien ma audiet pakana bung na sinasaring iakano.
ACT 3:2 Ma di ga kap hawaat tiga tunotuno di ga kahai ma ra pengpeng ie ukaia tano matanangas huat di git kilkilam ie bia Melmel. Ira harharbung di git bulbul ie kaia bia na sasaring marmaris wara gaiena kinewa ta ira matanaiabar diet git hanahaan uram tano tamat na hala na lotu.
ACT 3:3 Ma ing ga nas Pita ma ne Jon ma dir ga hanan laka, ga saring dir wara gaiena kinewa.
ACT 3:4 Io, Pita ma Jon dir ga nes dit ie ma Pita ga tange, “Nes mir!”
ACT 3:5 Io, ga tadange dir kanong ga lik bia dir na tabar ie ta linge.
ACT 3:6 Iesen Pita ga tange tana, “Pataie ta kinewa tagu, iesen no linge iau hatur kawasei, iakan iau ni tabar ugu mei. Tano hinsane Jisas Krais me Nasaret iau tange taam, Haan!”
ACT 3:7 Io, Pita ga palim no kata na limana ma ga harahut ie wara tuntunur. Kaik at mon ira kakena no tunotuno ma ira harpasun na kakena ga tahut.
ACT 3:8 Io, ga karwas tutur gaam haburen hinahaan tubena. Io, ga sakate halaka dir uram tano tamat na hala na lotu, ma kana ga karkarwas haan ma ga pirpirlat God.
ACT 3:9 Ira matanaiabar diet ga nas ie ma ga hananhaan ma ga pirpirlat hani God.
ACT 3:10 Ma ing diet ga nas kilam ie bia aie mon no pengpeng nong git kiskis tano melmel na matanangas huat tano tamat na hala na lotu, io, diet ga manga karup ma diet gaam panganga taar mon um ta iakan ra linge gate hanuat taar tana.
ACT 3:11 Ing no tunotuno ga palim dit taar at baak Pita ma ne Jon, ira matanaiabar bakut diet ga karup ma diet ga karos dal ukaia tano maliah di ga kilam ie bia no maliah tane Solomon.
ACT 3:12 Ing Pita ga nas huo ga tange ta ira matanaiabar hoken: “Kaba tunotuno me Israel, hohe bia muat karup ta iakan ra linge ma muat gi ngokngok ta mir hokaike? Hohe, muat lik bia a mon dadas ta mir bia mir bilai harsakit kaik mir petlaar wara hathatut iakan ra tunotuno gi haan? Taie!
ACT 3:13 No God tane Abraham, Aisak ma Iakop, no God ta ira kaba hintubu dahat, i te hamar no uno tultulai Jisas. Ma Pailat gate lik bia na halangalanga ise um ie iesen muat ga tar sei bia da bu bing ie ma muat ga harus isei ra matmataan tane Pailat.
ACT 3:14 Muat ga harus ise no Takodasuana, no Halhaliana, ma muat ga sasaring bia Pailat na hasur ise tiga ut na harubu bingibing taar ta muat.
ACT 3:15 Muat ga bu bing no Burena no Nilon iesen God ga hatut habalin ie sukun ra minaat. Mehet ga nas iakan kaik mehet gi hinawas bia a tutun na lingei.
ACT 3:16 Tano nurnuruan tane Jisas iakan ra tunotuno i te kap ra dadas, iakan at mon ra tunotuno nong muat nasnas ie ma muat nunure tar ie. Ta ra dadas tano hinsane Jisas ma no nurnuruan nong i tahuat tana, iakanong i te halangalanga timaan bakut ie hokaike muat nes tar ie huo.
ACT 3:17 “Io, kaba tasigu, iau nunure tar bia ing muat ga gil hokaike tane Jisas muat pa ga palai bia muat ga gilgil ra sa, ma ira numuat lualua mah huo.
ACT 3:18 Iesen God ga tange hanalua ta ira inga diet ira tangesot bia no uno Mesaia na kilingane ra ngunngutaan. Ma God i te hatutun um iakan hokaike.
ACT 3:19 Io, muat lilik pukus ma muat tahurus taar ta God waing God na suge se ira numuat magingin sakena. Io, muat gil huo waing ira pakana bung na harasinangeh naga hanuat meram hono Watong ma bia na tule mah Jisas, aie no uno Mesaia nong God gate gilamis tar ie wara gaie muat.
ACT 3:21 Na kis taar at baak aram ra mawe tuk tano pakana bung bia God na hasigarine hadadas habaling ira linge bakut hoing God ga tange tar huo nalua sakit ta ira inga diet ira uno halhaliana tangesot.
ACT 3:22 Ma Moses ga hinawas uta iakan ing ga tange hoken: ‘No Watong no numuat God na hatut numuat tiga tangesot hoken iau mekaia nalamin tano numuat huntunaan. Muat na taram bakut ira uno nianga ing na tange ta muat.
ACT 3:23 Bia sige tikai pa na taram ie, io, da hasisingen isei harie ira uno matanaiabar ma da bu bing ie.’
ACT 3:24 “Hokaiken ira kaba tangesot bakut, Samuel no luena ma diet ing diet ga mur ie, diet bakut ing diet ga ianga, diet ga hinhinawas ta ira linge ing na hanuat ta kaiken ra pakana bung.
ACT 3:25 Io, God ga tar ira uno nianga ta ira uno tangesot, ma muat te tinane leh kaike ira udiet nianga ma no kunubus mah nong God ga gil ie tika ma ira huntubu muat ing bia ga tange tane Abraham hoken: ‘Iau ni idane no num bulumur kaik ira huntunaan bakut tano ula hanuo diet na daan tana.’
ACT 3:26 Io, ing God ga hatut no uno tultulai ga huna tule baak ie ukai ho muat bia na me idane muat hoken. Na hurusane muat tikatikai sukun ira numuat sakana magingin.”
ACT 4:1 Ing Pita ma ne Jon dir ga iangianga ta ira matanaiabar, ira ut na pakila lotu ma no lualua ta ira umri tano tamat na hala na lotu ma ira Sadiusi diet ga hanuat ukaia ho dir.
ACT 4:2 Diet ga ngalngaluan kanong warah ira iruo apostolo dir ga hauhausur ira tunotuno bakut utano tuntunut hut balin tane Jisas sukun ra minaat, bia i te hatutun tar bia ira minaat mah diet na tut hut balin.
ACT 4:3 Io, diet ga palim kawase dir, diet gaam banus bat dir tano hala na harpidanau tuk taar tano mes na bung kanong gate matarahien bungbung tuai um.
ACT 4:4 Sen bia a haleng ta ira tunotuno ing diet ga hadade no hinhinawas diet ga nurnur, kaik no winawas ta diet ga nanaas haruat ma ra liman na arip.
ACT 4:5 Tano bung namur ira lualua gar na Iudeia, ira tamat ta ira huntunaan, ma ira tena harausur ta ira harkurai tane Moses diet ga hanuat hurlungen kaia Ierusalem.
ACT 4:6 Diet ga hanuat hurlungen ma ne Anas, no tamat ta ira ut na pakila lotu, tika ma ne Kepas, Jon, Aleksanda, ma ira hinsakana no tamat ta ira ut na pakila lotu.
ACT 4:7 Ma diet ga hartula uta Pita ma Jon. Io, di ga me hatur dir nalamin ta diet ma diet ga tiri dir hoken: “Ma ra mangana dadas sa bia tano hinsa sige kaik mur pakile iakan ra linge mei?”
ACT 4:8 Ma Pita ga hung taar ma no Halhaliana Tanuo kaik gaam tange ta diet hoken: “Muat ira lualua ma muat ira tamat ta ira huntunaan, muat hadade!
ACT 4:9 Bia ing muat tirtiri mur mir utano harharahut nong i hanuat taar ta tiga pengpeng ma bia i te langalanga hohe, io, i tahut bia muat bakut ma ira kaba matanaiabar na Israel muat na nunure kan. Iakan ra tunotuno i tur taar ra matmataan ta muat i te langalanga ma no dadas tano hinsa Jisas Krais me Nasaret nong muat ga tut tar ie tano kabai. Iesen God ga hatut habalin ie sukun ra minaat.
ACT 4:11 Iakan ra Jisas, aie nong ira nianga gar ta God di ga pakat i tange utana hoken: ‘No haat nong muat ira ut na pakila hala muat ga malok sei, aie balik um no dadas na burena tano hala bakut.’
ACT 4:12 No harhalon i tahuat sen mon tana kanong taie mah um ta tiga nong tano ula hanuo bakut bia God i te tar ie ta dahat bia aie nong na halon dahat.”
ACT 4:13 Ing diet ga nas bia Pita ma Jon dir pa ga ianga ma ra bunurut ma ing diet ga palai bia dir pa ga haan ra harausur ma bia a tunotuno bia mon dir, diet ga karup ma diet ga nes kilam bia dir git saksakate Jisas.
ACT 4:14 Iesen diet ga lilik puo taar bia diet na tange hohe kanong no tunotuno nong gate langalanga, diet ga nes ie bia ga tur tika taar ma dir.
ACT 4:15 Io kaik, diet gaam tule hasur dal mekaia tano udiet kis hulungai ira kaunsil ma diet gaam iangianga tika.
ACT 4:16 Diet ga tiri bia, “Dahat na bihane kaiken ra iruo tunotuno? Ira matanaiabar bakut akai Ierusalem diet nunure tar bia dir te pakile tiga dadas na gingilaan na kinarup ma pai tale dahat bia dahat na hus iakan ra linge.
ACT 4:17 Iesen dahat na tibe hakatom dir bia dir pa na haianga habalin tikai ma iakan ra hinsang waing iakan ra linge pa na haan hakakari.”
ACT 4:18 Io, diet ga tatau halaka habalin dir ma diet ga tigal dir bia waak balin um dir ra hinhinawas bia hauhausur tano hinsa Jisas.
ACT 4:19 Iesen Pita ma Jon dir ga balu diet hoken: “Muat kure baak bia i takodas tara ninaas ta God bia mir na taram muat ma waak God.
ACT 4:20 Mir tange huo kanong pai tale mir bia mir na sangeh wara hinhinawas uta ira linge mir gate nes ma mir gate hadade.”
ACT 4:21 Namur, bia diet ga mang habalin tar dir, diet ga waak se tar um dir. Diet ga nas bia na dadas wara hapidanau dir, warah, ira matanaiabar bakut diet ga pirpirlat God utano linge ga hanuat kanong no tunotuno nong ga langalanga tano dadas na gingilaan na kinarup gate sakit ra ihat na sangahul ira uno tinahon.
ACT 4:23 Ing di gate waak se tar um Pita ma Jon, dir ga haan tapukus balin taar ta ira hintura dir, dir gaam hinawase diet ta ira nianga ing ira tamat ta ira ut na pakila lotu ma ira tamat ta ira huntunaan diet gate tange tar ta dir.
ACT 4:24 Ing ira hintura dir diet ga hadade huo diet ga sasaring tika ma tiga lilik sen mon uram ho God hoken: “Tamat na Watong, u ga hakisi no mawe, no ula hanuo ma no tes ma ira kaba linge bakut narako ta dal.
ACT 4:25 Tano num Halhaliana Tanuo u ga tange mekaia tano hana no hintubu mehet Dawit no num tultulai hoken: ‘Hohe bia ira huntunaan ing diet pai Iudeia diet tut na kamahar? Hohe bia ira matanaiabar diet te harpingit? Diet pai haruat ma tiga linge.
ACT 4:26 Ira kaba tamat na ut na harkurai tano ula hanuo diet tagure at diet, ma ira kaba lualua diet hanuat hurlungen wara gilgil hagahe no Watong ma no uno Mesaia mah.’
ACT 4:27 Ma a tutun bia Herot ma ne Pontias Pailat dir ga hanuat hurlungen kai ta iakan ra pise na hala tika ma diet ing diet pai Iudeia ma ira matanaiabar na Iudeia mah. Ma diet ga harpingit tika wara gilgil hagahe no num halhaliana tultulai Jisas nong u ga bul ie bia no num Mesaia.
ACT 4:28 Diet ga hanuat hurlungen wara pakpakile asa ing no num dadas ma no num lilik gate kure hanalue tar bia na ngan huo.
ACT 4:29 Ma kaiken, Watong, hadade um ira udiet kaba harmang ma nu tar ra dadas ta mehet ira num tultulai waing mehet na haruat wara hinhinawas ta ira num nianga ma ra balaraan.
ACT 4:30 Hapuasne no num dadas wara halangalanga ira ina minaset. Ma nu pakile ra dadas na hakilang ma ra gingilaan na kinarup tano hinsana no num halhaliana tultulai Jisas.”
ACT 4:31 Io, bia diet ga sasaring taar, no hala diet ga kis hurlungen taar tana ga gunagune. Ma diet bakut diet ga hung ma no Halhaliana Tanuo ma diet ga hinhinawas ta ira nianga ta God ma ra balaraan.
ACT 4:32 Io, diet bakut ira ut na nurnuruan, ga tikai sen mon ira udiet lilik ma ira udiet sinisip. Ma taie tiga nong ta diet ga tange bia ira uno minsik auno sen at. Iesen diet ga hartabar hargilaas ma ira udiet linge bakut.
ACT 4:33 Ma ira apostolo diet ga manga dadas ma no udiet hinhinawas. Diet ga hinhinawas bia a tutun no tuntunut hut tano Watong Jisas. Ma a tamat na harmarsai ga haan tupas diet bakut.
ACT 4:34 Taie tiga nong ta diet pa ga supi ta tiga linge kanong ari ta diet ing udiet mon pise ma ra hala, diet ga suhsuhurane kaike ma ira kunkulaan diet ga tartar ta ira apostolo. Ma diet ira apostolo diet ga palau harbasiane ira matanaiabar tikatikai me, haruat ta ira sunupi gar tikai.
ACT 4:36 Ma ga mon tiga tunotuno, no hinsana Iosep, aie tano huntunaan tane Lewi meras Saipras. Ma ira apostolo diet ga kilam ie bia ne Banabas, a kukuraina bia no Ut na Harharagat.
ACT 4:37 Ga suhurane uno tiga katona pise ma ga tar ira kinewa ta ira apostolo.
ACT 5:1 Iesen tiga tunotuno a hinsana ne Ananias, tika ma no uno hahin Sapira, dir ga suhurane mah audir tiga katona pise.
ACT 5:2 Ma tano udir suan lilik tika, Ananias ga palim dit tar at ari kinewa wara uno iaat ma ga kap ing ga kis taar ma ga tar ta ira apostolo.
ACT 5:3 Sen bia Pita ga tange tana, “Ananias, hohe bia u bale leh Sataan bia na kure ugu wara hamhabato no Halhaliana Tanuo ing u palim dit leh ari tano kunkulaan tano pise wara num at?
ACT 5:4 Ga num at no katona pise ing pau ga suhurane baak ie. Ma bia namur ta ing u gate suhurane tar ie, ira kinewa a num at mah. Asa i gil ugu bia nu lik leh wara gilgil iakan ra mangana tintalen? Pau harabota ra matmataan ta ira tunotuno. Taie. U te harabota ra matmataan tane God.”
ACT 5:5 Ing at mon Ananias ga hadade tar kaiken, ga puko ma ga maat. Ma a tamat na bunurut sakit ga kap diet ing diet ga ser iakan.
ACT 5:6 Ma ira marawaan diet ga hanuat ma diet ga me pulus no palatamaine ma diet ga kap leh ie diet gaam a bus ie.
ACT 5:7 Namur dahin no uno hahin ga me haan laka ma pa ga nunure bia asa gate hanuat taar.
ACT 5:8 Io, Pita ga tiri ie bia, “Hinawase iau, kaiken bakut ira kinewa ing mur ma no num tunaan, mur kap tano pise?” Ma no hahin ga haut ma ga tange, “Kaike at mon ira kinewa bakut.”
ACT 5:9 Pita ga tange tana, “Hobibih bia mur ianga tika wara walwalar no Tanuo tano Watong? Nanaas baak! Ira tunotuno ing diet bus no num tunaan, diet tuai kenas ra matanangas ma diet na kap leh mah ugu.”
ACT 5:10 Kaik at mon no hahin ga puko taar ta ira kakine Pita ma ga maat. Io, ira marawaan diet ga laka ma ing diet ga nes ie bia gate maat, diet ga kap leh mah ie ma diet ga bus ie harue no uno tunaan.
ACT 5:11 Ma a tamat na bunurut sakit ga kap diet ira matanaiabar na lotu ma diet bakut ing diet ga ser kaiken ra linge.
ACT 5:12 Ira apostolo diet ga gil ra haleng na dadas na hakilang ma ra gingilaan na kinarup nalamin ta ira matanaiabar. Ma ira ut na nurnuruan bakut diet git hanhanuat hurlungen ma tiga lilik aram ra maliah ta Solomon.
ACT 5:13 Ma taie tiga nong ta ira tabuna nurnuruan pa ga balaraan bia na laka tika ma diet. Iesen ira matanaiabar balik diet ga manga ru diet.
ACT 5:14 Sen bia haleng sakit balik ira tunaan ma ira hahin diet ga nurnur tano Watong diet gaam laka harahut iakano kaba ut na nurnuruan.
ACT 5:15 Io kaik, ira matanaiabar diet ga kap hawaat ira ina minaset uram ta ira gagena ngaas diet gaam a hainoh diet ta ira suhu diet ma ira kube diet waing no kasakes na se tar no tanua Pita ta diet ing Pita ga hanahaan sakit.
ACT 5:16 Ma ra tamat na matanaiabar mekaia ta ira taman hutaten Ierusalem diet ga hanuat hurlungen ma diet ga kap hawaat ira udiet ina minaset ma diet ing a sakana tanuo ga sasoha ta diet, ma diet bakut diet ga langalanga.
ACT 5:17 Io, no tamat ta ira ut na pakila lotu ma ira hinturana, a Sadiusi diet, diet ga hung ma ra bala ngungut taar ta ira apostolo uta ira udiet bilai na pinapalim.
ACT 5:18 Diet ga palim kawase ira apostolo ma diet ga halaka diet aram ra hala na harpidanau.
ACT 5:19 Iesen ra bung um tiga angelo tano Watong ga papos no matanangas tano hala na harpidanau ma ga lamus hasur ira apostolo mekaia.
ACT 5:20 Ma ga tange ta diet hoken: “Muat haan, muat naga tur aram tano tamat na hala na lotu ma muat na hinawase ira matanaiabar ta ira linge bakut uta iakan ra sigar nilon.”
ACT 5:21 Ing no laar ga daras ie diet ga haan laka tano tamat na hala na lotu ma diet ga hatahun wara hauhausur ira matanaiabar. Diet ga pakile haruatne ira nianga tano angelo gar tano Watong. Ma ing no tamat ta ira ut na pakila lotu ga hanuat tika ma ira hinturana diet ga tau hulungan ira kaunsil, diet ira tamat ta ira huntunaan gar na Iudeia. Io, diet ga tula sa nianga uras tano hala na harpidanau bia da lamus ira apostolo ukaia ho diet.
ACT 5:22 Iesen ira umri diet pa ga nes leh tiga apostolo aram tano hala na harpidanau ing diet ga hanuat kaia. Io, diet ga tapukus ma diet ga hinawas, “Ing het hanuat aram ra hala na harpidanau, het nes ie bia i tabanus dikdikit taar ma ira ut na harbalaurai kaia kana iaat diet tur taar ta ira matanangas. Iesen ing het papos, het pai nes leh tikai aram narako.”
ACT 5:24 Ing ira tamat na ut na pakila lotu ma no lualua ta ira umri tano tamat na hala na lotu diet ga hadade huo, diet ga nguanguo bia asa balik um na hanuat namur kaiken iakan i te hanuat.
ACT 5:25 Io, tiga tunotuno ga hanuat ma ga tange, “Muat hadade baak! Ira tunotuno ing muat bul diet aram ra hala na harpidanau diet um kenam ra tamat na hala na lotu kana diet hauhausur ira matanaiabar.”
ACT 5:26 Ing diet ga hadade huo no lualua ma ira uno umri diet ga haan laah uram ta ira apostolo ma diet gaam a lam leh diet. Diet pa ga helar ta ira apostolo kanong warah diet ga burte ira matanaiabar bia diet kabi gulum diet.
ACT 5:27 Diet ga lam halaka ira apostolo ma diet ga hatur diet ra matmataan ta ira kaunsil bia no tamat ta ira ut na pakila lotu na tiri murmur diet.
ACT 5:28 Io, ga tange ta diet, “Mehet tar ra dadas na hartigal ta muat bia waak muat hauhausur ta iakan ra hinsang. Iesen muat te hinawas hurbit ta ira matahu katon bakut kai Ierusalem ma ira numuat harausur ma muat sip bia da tung mehet utano minaat ta iakan ra tunotuno.”
ACT 5:29 Io, Pita ma ira mes na apostolo diet ga babalu hoken: “Mehet na taram at God, ma taie bia ra tunotuno.
ACT 5:30 No God ta ira hintubu dahat ga hatut Jisas sukun ra minaat, nong muat ga bu bing ie ing muat ga hatabai ie aram ra kabai.
ACT 5:31 Aie at nong God ga hatamat ie, gaam hakisi ie tano tamat na kinkinis tano kata na limana bia na Lualua ma na ut na Harhalon. Ma ga gil huo tana bia naga papos no ngaas na lilik pukus ta dahat ira Iudeia ma bia naga lik luban se ira udahat magingin sakena.
ACT 5:32 Mehet hinhinawas bia a tutun kaiken ra linge. Ma no Halhaliana Tanuo i hinhinawas mah huo. Ma aie nong God i te tar ie ta diet ing diet taram ie.”
ACT 5:33 Ma bia diet ga hadade kaiken ga mis ira bala diet ma diet ga sip bia diet na bu bing ira apostolo.
ACT 5:34 Sen bia ga mon tiga Parisi, hinsana ne Gamaliel, tiga tena harausur ta ira harkurai tane Moses, ma ira matanaiabar diet ga manga urur tana. Ga taman tut aram ta ira matmataan ta ira kaunsil gaam tange hadadas bia da lamus hasur baak ira apostolo uras nataman.
ACT 5:35 Io, ga tange ta ira kaunsil hoken: “Kaba tunaan me Israel, muat na harbalaurai timaan ta ira linge muat wara gilgil ta kaiken ra tunotuno.
ACT 5:36 Muat lik leh Tiudas. A bar tinahon nalua ga hanuat ma ga hinhinawas haan bia aie tiga lualua. Aihat na maar dak ira tunotuno diet ga murmur ie. Iesen di ga bu bing ie ma diet ing diet ga murmur ie diet ga hilau harbasia ma no uno pinapalim ga linge bia.
ACT 5:37 Io, namur tana, Iudas me Galili ga tur huat tano pakana bung ing di ga waswas ira matanaiabar. Ma ga halawen leh tiga kaba matanaiabar wara murmur ie bia diet naga kap se diet me Rom ing diet kure dahat. Aie mah ga hiruo ma diet ing diet ga murmur ie diet ga hilau harbasia mah.
ACT 5:38 Io kaik, uta iakan ra purpuruan kaiken, iau pir muat bia waak muat gil ta linge ta diet. Muat waak se tar diet. Bia iakan ra mangana lilik bia iakan ra pinapalim i tahuat ta ira tunotuno mon, io, na pataam.
ACT 5:39 Iesen bia ing i hanuat meram ta God, muat pai tale bia muat na tigal diet. Iesen na hanuat palai ta muat bia muat harharubu ma ne God.”
ACT 5:40 Io, diet ga mur ira nianga ta Gamaliel. Diet ga tatau halaka ira apostolo, diet gaam tange bia da hadangat diet. Io, diet ga tar ra dadas na nianga bia diet pa na iangianga baling tano hinsa Jisas ma diet ga bale se diet bia diet na langalanga.
ACT 5:41 Ira apostolo diet ga haan talur ira kaunsil tika ma ra gungunuama kanong warah bia God gate nas kilam diet bia diet haruat wara kahkahe ra hirhir wara gaie Jisas.
ACT 5:42 Ma ta ira kaba bungbung aram ra tamat na hala na lotu ma aram ra udiet hala, diet pa gale mut wara hauhausur ma wara harharpir tano tahut na hinhinawas bia Jisas aie no Mesaia.
ACT 6:1 Ta iakano pakana bung no winawas ta ira ut na tinaram tano lotu ga tamtamat hanahaan. Ma ari ta diet, diet ira Iudeia tano nianga Grik. Diet ga ngurungur taar ta ira gunan kis me Iudeia kanong di ga palpalau sakit ira udiet makosa ma ira pinlawe diet ta ira harharbung.
ACT 6:2 Io, ira sangahul ma iruo na apostolo diet ga tau hurlungen ira kaba ut na tinaram tano lotu bakut ma diet ga tange, “Pai tahut bia mehet na waak se no hinarpir ma no tahut na hinhinawas tane God bia mehet na nanget mon ma ira pinlawe muat.
ACT 6:3 Kaba tasi het, muat gilamis ta liman ma iruo na tunaan nalamin ta muat ing muat nunure bia diet hung ma no Halhaliana Tanuo ma ra mintota. Ma mehet na bul diet wara harbalaurai ta iakan ra linge.
ACT 6:4 Iesen mehet at, mehet na harbalaan wara sinasaring ma wara hinhinawas tano nianga tane God.”
ACT 6:5 Io, ira kaba ut na tinaram tano lotu bakut diet ga kanakana ma diet ga haut ta iakan ra nianga. Io, diet ga kilam ne Stiwen, tiga tunaan nong ga hung ma no nurnuruan ma no Halhaliana Tanuo. Diet ga kilam mah ne Pilip, Porokoras, Naikena, Timon, Parmenas, ma ne Nikolas me Entiok, nong gate laka tano lotu gar na Iudeia.
ACT 6:6 Io, diet ga hapuasne kaiken ra liman ma iruo na tunaan ta ira apostolo. Ma ira apostolo diet ga sasaring, diet gaam bul ira lima diet ta kaike ra liman ma iruo.
ACT 6:7 Io, no nianga um ta God ga hanahaan harbasia. Ma no winawas ta ira ut na tinaram tano lotu aram Ierusalem ga manga tamtamat ma ra haleng ira ut na pakila lotu tano lotu gar na Iudeia diet ga kap usurane no tahut na hinhinawas.
ACT 6:8 Ma Stiwen, aie tiga tunaan nong ga hung ma no harmarsai ta God ma ra dadas mah. Ma ga gil ira dadas na hakilang ma ra gingilaan na kinarup nalamin ta ira matanaiabar.
ACT 6:9 Iesen ari tunotuno diet ga sukuane ie. Ma diet meres tiga hala na lotu gar na Iudeia. Ma di ga kilkilam ie bia no hala na lotu udiet ing di te halangalanga ise diet ta ra kinkinis na tultulai. Ma a Iudeia diet me Sairin ma Aleksandaria, ma ta ira hanuo Silisia ma Esia mah. Ma diet ga tur leh wara hargau ma Stiwen.
ACT 6:10 Iesen diet pa ga tale bia diet na balu ira uno nianga na mintot ma no Tanuo nong ga iangianga mei.
ACT 6:11 Io, diet ga hagut kumaan rari tunotuno bia diet na tange hoken: “Mehet ga hadade ga tange hagahe Moses ma ne God.”
ACT 6:12 Io, iakan ra mangana nianga ga hatut ira bala diet ira matanaiabar ma ira tamat ta ira huntunaan ma ira tena harausur ta ira harkurai tane Moses. Diet ga palim kawase ne Stiwen ma diet ga sal tar ie ukaia ta ira kaunsil.
ACT 6:13 Io, diet ga lam halaka ari tunaan wara hinarabota taar tana. Kaiken ra tunaan, diet ga tange, “Mehet la hanhadade iakan ra tunotuno ma hatikai i la tangtange hagahe iakan ra halhaliana hala na lotu tamat ma ira harkurai tane Moses mah.
ACT 6:14 Ma ira uno nianga ken ing mehet ga hadade. Ga tange bia Jisas nong me Nasaret na dure hasur iakan ra hala na lotu tamat ma na kuas ira magingin ing Moses gate hausur dahat ine nalua.”
ACT 6:15 Io, ira kaunsil bakut kaia, diet ga mate dit ne Stiwen ma diet ga nes no matmataan tana ga ngan hoing ra matmataan gar tiga angelo.
ACT 7:1 Io, no tamat ta ira ut na pakila lotu ga tiri Stiwen, “A tutun kaiken diet tangtange utaam?”
ACT 7:2 Stiwen ga babalu hoken: “Kaba tasigu ma muat ira nongtamat, muat hadade iau! Menalua ta ing no hintubu dahat, ne Abraham, ga haan wara kinkinis aram Haran, no God na minamar ga hanuat taar tana arau Mesopotemia ma ga tange tana hoken:
ACT 7:3 ‘Nu haan talur ira hinsakaam ma no num taman ma nu haan uras tano hanuo nong iau ni hamines ie taam.’
ACT 7:4 “Io, ga haan sukun no hanuo gar na Kaldia ma ga haan wara kinkinis aram Haran. Ma namur ta ing no susi Abraham gate maat, God ga hamaren ie mekaia Haran ukai ta iakan ra hanuo muat kis taar um tana.
ACT 7:5 God pa ga tar tiga katon kaiakai tana bia na uno tus. Taie mah bia tiga katona dahin tus. Iesen God ga hasasalim bia na tar iakan ra hanuo tana bia na tinane leh ie, aie tika ma ira uno bulumur, sukmaal bia ga taie ta natine Abraham ta iakano ra pakana bung.
ACT 7:6 God ga tange tana hoken: ‘Ira num bulumur diet na kis na wasire tiga hanuo pai udiet. Ma diet na tultulai kaia ma da helar ta diet aihat na maar na tinahon.
ACT 7:7 Iesen iau ni hapidanau no huntunaan sa nong diet na tultulai tana ma namur diet na suur sukun iakano hanuo ma diet na lotu tupas iau kai ta iakan ra sibaan.’
ACT 7:8 Io, God ga tar no kunubus taar ta Abraham tika ma no magingin na kut palatamainari nong i hakilang diet narako ta iakano kunubus. Namur ga mon tiga natine Abraham, ne Aisak, ma Abraham ga kut no palatamaine a liman ma itul na bung namur ta ing di ga kahai. Io, Aisak ga hatahuat Iakop, ma Iakop ga hatahuat ira sangahul ma iruo na luena hintubu dahat.
ACT 7:9 “Io, diet ira luena hintubu dahat diet ga suhurane no tasi diet Iosep kanong diet ga bala ngungut taar tana. Diet ga suhuranei bia na tultulai arau Isip sen bia God ga harharahut ie ma ga halangalangai ta ira uno kaba ngunngutaan. Ma God ga idane Iosep, kaik Parao, no tamat na lualua na gil harkurai gar na Isip, gaam guama tana ma ga nes kilam ie bia a mintatonai. Io, no tamat na ut na harkurai ga bul Iosep bia na lualua ta ira matanaiabar na Isip ma na harbalaurai narako tano ngasiana no tamat na ut na harkurai mah.
ACT 7:11 “Io, di ga sam taburungan arau Isip ma kai mah Kanan kaik a tamat na hinangul gaam haan tupas ira hintubu dahat ma diet pa ga haruat bia diet na silihe leh ta nian.
ACT 7:12 Ing Iakop ga ser bia ga mon nian arau Isip ga tule ira natine, ira hintubu dahat ukarawa. Ma iakano no udiet luena hinahaan ukaia.
ACT 7:13 Tano udiet airuo na hinahaan u Isip Iosep ga hapalaine ira tasine bia aie sige, ma no tamat na ut na harkurai ga palai um tano hun ta Iosep.
ACT 7:14 Io, Iosep ga tula sa nianga utano ana sus Iakop ma no uno huno bakut bia diet na hanuat. A liman ma iruo na sangahul ma liman bakut diet.
ACT 7:15 Io, Iakop ga haan urau Isip ma aie ma ira hintubu dahat diet gaam a maat kaia.
ACT 7:16 Di ga kap pukus habal ira suru diet u Sekem ma di ga hatur diet aram tano matana haat na midi nong Abraham gate kul leh ie ma ra ari kinewa mekatiga tano hun tane Hemor aram Sekem.
ACT 7:17 “Ing no pakana bung ga huthutet bia God na gil hatutun no uno sinsalim ga gil tar ie ta Abraham, no winawas ta ira udahat matanaiabar arau Isip gate puar taar.
ACT 7:18 Io, tiga mes na tamat na lualua na gil harkurai ing nong pa ga nunure ta dahin ta Iosep ga harkurai um arau Isip.
ACT 7:19 Ga manga habato ira udahat matanaiabar ma ga helar ta ira hintubu dahat ing ga sunang diet bia diet na waak se ira udiet nat na sigara bulu waing diet naga maat.
ACT 7:20 Di ga kaha Moses ta iakano pakaan ma ga tiga melmel na bulu tano ninaas ta God. Ma di ga balaurei aram tano ngasia dal tamaan haruat ma aitul a teka.
ACT 7:21 Ma ing di ga bul hasur sei, no nat na hahine Parao ga halon hatamat ie hoing tiga natine tus.
ACT 7:22 Di ga hausur ie ta ira mintot bakut gar na Isip ma ga tiga tamat na tunotuno ta ira uno nianga ma ira uno tintalen.
ACT 7:23 “Bia ing Moses ga aihat na sangahul na tinahon ga lik bia na kol ira uno matanaiabar na Israel.
ACT 7:24 Ga nas tiga Isip ga bubu tiga Israel. Io, ga haan gaam a tur harahut no Israel ma ga bu bing no Isip wara balbalu ing ga gil tar tano Israel.
ACT 7:25 Moses ga lik bia ira uno matanaiabar diet na nes kilam bia God ga turtur mei wara halangalanga diet sukun ira Isip, ma iesen bia taie balik.
ACT 7:26 Tano mes na bung Moses ga haan tupas airuo tunotuno na Israel dir ga harharubu. Ma ga walar dir bia dir naga haramaraam baling ing ga tange bia, ‘Ai! A haratasin mon mur! Pai tahut bia mur harharubu balin ta mur.’
ACT 7:27 “Sen bia nong ga bubu kano tikai ga sun se tar Moses ma ga tange bia, ‘Taie tikai ga bul ugu bia nugu kure mir!
ACT 7:28 Ai! U wara bubu bing dak mah iau hoing u bu bing no Isip nabung?’
ACT 7:29 Ing Moses ga hadade hokaiken ga hilau urau Midian gaam a kis kaia hoing tiga wasire. Ma ga mon ra iruo natine kaia.
ACT 7:30 “Namur, bia aihat na sangahul na tinahon gate sakit, tiga angelo ga harapuasa taar tane Moses ta ira kalkalamena iaah meram tiga nat na ina daha nong ga iaiaan aram ra hanuo bia hutet tano uladih Sinai.
ACT 7:31 Moses ga ngalabo ta iakan ra linge ga nas ie. Ma ing ga haan hutet bia naga nes timaan ie, ga hadade no ingana no Watong ga tange hoken:
ACT 7:32 ‘Iau no God ta ira hintubum, no God ta Abraham, Aisak, ma Iakop.’ Moses ga dedar ma ra bunurut ma pa ga walar bia na nanaas.
ACT 7:33 “Io, no Watong ga tange tana, ‘Kap se ira pala lamaas ta ira kakim kanong warah bia no katon u tur taar tana, a halhaliana pisei.
ACT 7:34 Tutun sakit, iau te nes ira hinelar ira nugu matanaiabar arau Isip diet kahkahe. Iau te hadade ira udiet sunuah ma iau te hansur wara halangalanga sukun diet mekaia. Mai um, iau ni tule pukus ugu u Isip.’
ACT 7:35 “Iakan ra Moses at mon nong ira matanaiabar na Israel diet ga suro sei ma ken ra nianga: ‘Taie tikai ga bul ugu bia nugu harkurai.’ Iesen aie at mon nong God ga tulei bia na harkurai ma wara halangalanga ise diet mekaia. Ma no angelo nong ga harapuasa taar tana aram tano nat na ina daha ga harahut ie.
ACT 7:36 Moses ga lue hasur ira matanaiabar sukun Isip ma ga gil ra dadas na hakilang ma ra gingilaan na kinarup arau Isip, arau tano Tes Dardaraan, ma aram tano hanuo bia haruat ma ra aihat na sangahul na tinahon.
ACT 7:37 “Ma iakanong mon ra Moses nong ga tange ta ira matanaiabar na Israel bia, ‘God na tule tiga tangesot hoing iau ma aie na tiga tunotuno mekaia tano numuat huntunaan tus.’
ACT 7:38 Moses aie nong ga kis tika ma ira matanaiabar na Israel ing diet ga kis hurlungen taar aram ra hanuo bia. Ga kis kaia tika ma ira hintubu dahat, dir ma no angelo nong ga ianga tana aram tano uladih Sinai. Ma ga kap ira lilona nianga tane God wara tartar ta dahat.
ACT 7:39 Iesen ira hintubu dahat diet ga malok bia diet na taram ie. Diet ga suro se balik ie ma diet ga sip bia diet na tapukus baling u Isip.
ACT 7:40 Io, diet ga tange ta Aron hoken: ‘Pakile numehet ta tadaar ing na lue het, kanong iakano ra Moses nong ga lua hasur mehet me Isip, mehet pai nunure bia asa i te hanuat taar tana!’
ACT 7:41 Iakanong no pakana bung diet ga pakile tiga palimpuo haruat ma ra nat na bulumakau, diet gaam tun hartabar tupas ie ma diet ga gil tiga lukara na pirharlat utano linge diet ga gil ie ma ra luma diet.
ACT 7:42 Iesen God ga tur talur diet ma ga waak se tar diet bia diet na lotu tupas ira tiding kenam ra mawe hoing di ga pakat tano buk ta ira tangesot hoken: ‘Matanaiabar na Israel! Taie bia ukai ho iau ing muat git tuntun hartabar ma ira tinonan ing muat git bubu bing aram ra hanuo bia ta ira aihat na sangahul na tinahon.
ACT 7:43 Muat ga kapkap hani no hala di ga gil ie ma ra maal tano tadaar Molok tika ma no tiding tano numuat tadaar Repan, dir ira iruo palimpuo muat ga gil wara lalotu tupas. Io kaik, iau ni tule ise muat urau ta ira hanuo manamur ta Babilon.’
ACT 7:44 “Io, aram ra hanuo bia ira hintubu dahat diet ga mon no hala di ga gil ie ma ra maal. Ma iakano hala ga hamines bia God ga kis tika taar ma diet. Di ga gil ie hoing God ga tuko hamines bia da gil ie huo, haruat ma no malalarine nong Moses ga nes ie.
ACT 7:45 Io, namur, ira hintubu dahat diet ga hatur kawase leh no hala na maal meram ta ira adiet sus. Ma diet ga kap tikanei ma diet ing diet tika ma ne Iosua diet ga umri laar leh no hanuo makatiga ta ira huntunaan ing God ga bat se tar diet harie ira hintubu dahat. Ma no hala na maal ga kis kaia tuk taar tano pakana bung ta Dawit.
ACT 7:46 Ma Dawit ga kilingane no harmarsai ta God taar tana ma ga saring God bia na bale leh ie bia naga gil tiga hala wara gar ta God waing naga kiskis kaia, iakano God nong no huntunaan tane Iakop ga lalotu tupas ie.
ACT 7:47 Iesen Solomon nong ga gil no hala wara ngasia God.
ACT 7:48 “Ma iesen God nong i lua harsakit pai la kiskis ta ira hala ing a tunotuno mon i gil. I hokaiken no tangesot i tange:
ACT 7:49 ‘No mawe, no nugu tamat na kinkinis na harkurai, ma no ula hanuo no pinapaas na kakigu. No Watong i tange, Pai tale tun at muat bia muat na gil tiga hala wara nugu. Ma taie numuat ta katon i haruat ma iau bia ni manawa kaia.
ACT 7:50 Iau tange huo kanong iau ga gil kaike ra linge bakut ma ra limagu.’
ACT 7:51 “Muat ira ul pat! A kankado i pulus bat ira bala muat! Ma ira talinga muat i tabonat ta ira nianga ta God! Hotikai muat la suksukuane no Halhaliana Tanuo! Muat ngan at mon hoing ira hintubu muat!
ACT 7:52 Ga mon tiga tangesot bia ira hintubu muat diet pa ga helar tana? Taie! Diet ga bu bing mah diet ing diet git hinhinawas nalua utano hinanhuat tano Takodasuana. Ma kaiken muat te harus isei ma muat te bu bing ie, muat ing muat pa ga taram ira harkurai ta God muat ga kap ing ira angelo diet ga tar hasur.”
ACT 7:54 Ing ira kaunsil diet ga hadade hokaiken, ga mis ira bala diet ma diet ga ngangar taar tana.
ACT 7:55 Ma iesen bia Stiwen ga hung taar ma no Halhaliana Tanuo ma ga nanaas uram ra mawe gaam nes no minarine God. Ma ga nes mah Jisas ma ga tur taar tano kata na limane God.
ACT 7:56 Ma Stiwen ga tange, “Muat nes! Iau nes no mawe i tapapos ma Nong a Tunotunoi iakenam i tur taar tano kata na limane God.”
ACT 7:57 Io, diet ga kup naliu ma diet ga pom bat ira talinga diet ma diet bakut diet gaam hilor ie ma tiga kapawena lilik mon.
ACT 7:58 Diet ga rahi hasur sei tano pise na hala ma diet ga tur leh wara gulgulum ie ma ra haat. Ma diet ing diet ga hadade no uno nianga diet ga bul ira tamat na kiniasi diet tano harbalaurai tiga marawaan hinsana Sol.
ACT 7:59 Ing diet ga gulgulum ie, Stiwen ga tatau uram naliu hoken: “Watong Jisas, kap leh no tanuagu!”
ACT 7:60 Ga singa bukunkek ma ga suah ma ra tamat na ingana, “Watong, waak u lik kawase iakan ra udiet magingin sakena wara hapidanau diet urie!” Ga tange tar hokaiken ma gaam haan sukun iakan ra nilon.
ACT 8:1 Io, ma ne Sol ga manga haut um bia diet na gulum bing Stiwen huo. Ta iakano pakana bung at di ga tur leh wara hinelar sakasaka ta ira matanaiabar na lotu aram Ierusalem. Diet ga hilau harbasia taar tano hanuo Iudeia ma no hanuo Samaria. Iesen ira apostolo taie.
ACT 8:2 Ma ari tunotuno ing diet ga urur ta God diet ga bus Stiwen ma diet ga manga suah ie.
ACT 8:3 Iesen Sol ga tur leh wara hanghagahe ira matanaiabar na lotu. Ga suur laka ta ira hala ma git rahrahi hasur ira tunaan ma ira hahin gaam git halaka diet ra hala na harpidanau.
ACT 8:4 Diet ing diet gate hilau harbasia diet ga harharpir haan ma no tahut na hinhinawas ta ira udiet hinahaan.
ACT 8:5 Pilip ga haan uras tiga pise na hala kenas Samaria ma ga harharpir utano Mesaia taar ta diet kaia.
ACT 8:6 Ing ira haleng na matanaiabar diet ga hadade Pilip ma diet ga nes ira dadas na hakilang ga gil, diet tikatikai diet ga sa talinga diet timaan wara hanhadade ira linge ga tangtange.
ACT 8:7 Kanong warah, ira sakana tanuo diet ga kup suur sukun ira haleng matanaiabar. Ma halengin pengpeng ma diet mah ing ari katon ta ira tamai diet gate maat diet ga langalanga.
ACT 8:8 Io, a tamat na gungunuama ga hanuat ta iakano pise na hala.
ACT 8:9 Ma ta iakano pise na hala ga mon tiga tunotuno, hinsana ne Saimon, ma a ut na ser magirmagir ie. Git hangalabo ira matanaiabar me Samaria. Git butbut bia aie a tamat na tunotunoi.
ACT 8:10 Ma diet bakut, ira watong ma ira maris, diet git taltalinganei ma diet git tangtange bia, “Iakan ra tunaan aie no dadas meram ho God. Di kilam ie bia no Tamat na Dadas.”
ACT 8:11 Diet git murmur ie kanong mekarawa laah git be hanghangalabo diet ma ira uno pakpakilai.
ACT 8:12 Iesen ing diet ga nurnur ing Pilip ga harpir ma no tahut na hinhinawas tane Jisas ma tano kinkinis na harkurai ma ra harbalaurai ta God, io, ira tunotuno diet ga kap baptais, ira tunaan ma ira hahin mah.
ACT 8:13 Saimon mah ga nurnur ma ga kap baptais. Ma git murmur Pilip ta ira kaba katon ma git ngalngalabo ta ira dadas na hakilang ma ta ira gingilaan na kinarup ing git nesnes.
ACT 8:14 Ing ira apostolo aram Ierusalem diet ga hadade bia ira matanaiabar me Samaria diet gate kap usurane no nianga ta God, diet ga tule Pita ma Jon uras ho diet.
ACT 8:15 Ing dir ga hanuat dir ga sasaring uta diet bia diet na hatur kawase leh no Halhaliana Tanuo kanong no Halhaliana Tanuo pa ga hansur taar baak ta tikai ta diet. Diet ga kap baptais mon tano hinsana no Watong Jisas.
ACT 8:17 Io, Pita ma Jon dir ga bul ira lima dir ta diet ma diet ga hatur kawase leh no Halhaliana Tanuo.
ACT 8:18 Ing Saimon ga nes bia no Tanuo gate hanuat taar ta diet ing ira iruo apostolo dir ga bul ira lima dir ta diet, ga walar bia na tar ta kinewa ta dir ma ga tange bia, “Mur tar iakan ra dadas tagu waing diet bakut ing iau ni bul ira limagu ta diet, diet na hatur kawase leh no Halhaliana Tanuo.”
ACT 8:20 Sen bia Pita ga balui hoken: “I tahut bia nu hiruo tika ma ira num kinewa kanong u lik bia u tale bia nu kul no hartabar ta God ma ra kinewa.
ACT 8:21 Taie tun at ta da ginginim kai ta iakan ra pinapalim kanong God i nes bia no balaam pai takodas.
ACT 8:22 Io, nu lilik pukus ta iakan ra sakana linge ma nu sasaring tupas no Watong. I tale dak bia na lik luban se iakan ra num mangana lilik.
ACT 8:23 Iau tange huo kanong iau nes bia u manga bala ngungut, ma ra magingin sakena i wis kawase tar ugu.”
ACT 8:24 Io, Saimon ga babalu bia, “Mur sasaring tupas no Watong utagu waing taie ta linge ta kaike u tange na hanuat taar tagu.”
ACT 8:25 Io, ing dir gate manga hinhinawas taar tano tutun ma dir gate ianga taar utano nianga tano Watong, dir ga tapukus uram Ierusalem. Tano udir hinaan tapukus dir ga harharpir haan ma no tahut na hinhinawas ta ira haleng taman kaia Samaria.
ACT 8:26 Io, tiga angelo tano Watong ga tange ta Pilip, “Haan ures tano ngaas kananes tano hanuo bia, nong i hansur meram Ierusalem u Gasa.”
ACT 8:27 Io, Pilip ga tur leh no uno hinahaan. Kaik um, ga harsomane tiga tunotuno me Itiopia, a ulkukuha ie, ma git balbalaure ira kinewa tane Kandesi no hahin na lualua udiet ira Itiopia. Iakan ra tunaan gate tur laah Ierusalem ing ga haan wara lalotu tupas God kaia.
ACT 8:28 Ma kaiken ga taptapukus balin um tano uno karis ures ra uno taman ma ga waswas hani no buk nong Aisaia no tangesot ga pakat ie.
ACT 8:29 Ma no Halhaliana Tanuo ga tange ta Pilip, “Haan uram tano karis ma nu haan hutaten ie.”
ACT 8:30 Io, Pilip ga hilau ukaia ma ga hadadei ga waswas no buk tane Aisaia no tangesot. Ma Pilip ga tiri ie, “U palai ta kaike u waswas?”
ACT 8:31 No tunotuno ga tange bia, “Pai tale iau bia ni palai ine. Ing bia tikai na palas taar tagu, io, ni palai um kaik.” Io, ga titing leh Pilip bia na kawaas ma na kis tika mei.
ACT 8:32 Ma no sibana nianga tane God di ga pakat ie nong no tunotuno ga waswas hani i hoken: “Ga ngan hoing tiga sipsip di lua laah tana wara bubu bing ie. Ma hoing tiga nat na sipsip nong i tur kunkun taar ing di kutkut se ira hine, io, aie mah, pa ga tange ta nianga.
ACT 8:33 Di ga hamarisnei ma ing di ga gil tana pa ga takodas. I tale bia tikai na pirwase tiga linge uta ira uno bulumur? Taie, pai tale kanong warah no uno nilon kai ra ula hanuo ga takumut.”
ACT 8:34 Io, no ulkukuha ga tiri Pilip, “Hinawase iau, kan ra tangesot i iangianga uta sige? I iangianga balin utana bia uta tiga mes?”
ACT 8:35 Io, Pilip ga hatahun wara nianga, haburen leh ta iakano sibana nianga gar ta God di ga pakat ie gaam hinawasei tano tahut na hinhinawas uta Jisas.
ACT 8:36 Ing dir ga hanahaan tano ngaas dir ga hanuat tiga katona taah ma no ulkukuha ga tange, “Nes baak! A taah kan. Asa i tur bat taar iau kaik iau pa nigi kap baptais?”
ACT 8:37 [Pilip ga tange, “I tale bia nu kap baptais ing bia u nurnur tutun.” Ma no ulkukuha ga babalu, “Iau nurnur bia Jisas Krais aie no Nati God.”]
ACT 8:38 Ma no ulkukuha ga kure no karis bia na tur kis. Io, dir bakut, Pilip ma no ulkukuha, dir ga hansur ures tano taah ma Pilip ga baptais ie.
ACT 8:39 Ing dir ga hanut meram na taah, kaik at mon no Tanuo gar tano Watong ga kap leh Pilip ma no ulkukuha pa ga nes habalin ie. Iesen ga tur habalin leh no uno hinahaan ma ra gungunuama.
ACT 8:40 Iesen Pilip balik ga hanuat puasa aras Asdot ma ga hanahaan hurbit gaam harharpir ma no tahut na hinhinawas ta ira tamtaman bakut tuk gaam a hanuat aram Kaisaria.
ACT 9:1 Ta iakano pakana bung Sol kana at baak ga mamamang bia na bu bing ira ut na tinaram tano Watong. Ga haan uram hono tamat ta ira ut na pakila lotu ma ga saring ie bia na pakat ta hinhinawas uras ta ira hala na lotu udiet ira Iudeia aras Damaskas. Ma kaike ra paas na hinawas palai uta Sol waing bia na nes tikai nong aie gar tano Ngaas, a tunaan bia hahin, na talei bia na wis kawase diet ma na lam diet uram Ierusalem.
ACT 9:3 Ing Sol ga hananhuat hutet tano pise na hala Damaskas, kaik at mon tiga lulungo meram ra mawe ga murarang sarei.
ACT 9:4 Ga puko taar napu tano pise ma ga hadade ra ingana tikai ga tange tana, “Sol! Sol! Wara bih bia u hahelar tagu?”
ACT 9:5 Sol ga tiri, “Sige ugu, Watong?” Ga balui, “Iau Jisas nong u hahelar tagu.
ACT 9:6 Iesen nu taman tut ma nu haan uram tano pise na hala ma da hinawase ugu kaia ta ira linge ing at nu gil.”
ACT 9:7 Ira tunotuno ing diet ga saksakate hani ie diet ga tur ma taie ta nianga. Diet ga hadade no kinakel iesen diet pa ga nes tari.
ACT 9:8 Sol ga taman tut mekatiga tano pise ma ga hapilakaas mata iesen pa ga tale bia na nes tiga linge. Io kaik, diet gaam palim leh no limana ma diet ga luei uras Damaskas.
ACT 9:9 Ga pulo ra itul a bung ma pa ga iaan ma pa ga mame ta linge.
ACT 9:10 Ma ga mon tiga ut na tinaram tano lotu aras Damaskas hinsana Ananias. Ga nes tiga ninaas na tanuo ing no Watong ga tange tana, “Ananias!” Io, ga balui, “Iau ken, Watong.”
ACT 9:11 Io, no Watong ga tange tana, “Haan uram tano hala ta Iudas, kenam tano ngaas di kilam bia Ngaas Takodas. Nu a tiri wara u tiga tunotuno me Tasas hinsana ne Sol. Kana i sasaring.
ACT 9:12 Ma i te nes tiga ninaas na tanuo. Ma ta iakano uno ninaas i nes bia tiga tunotuno hinsana ne Ananias i hanuat ma i bul ira limana tana bia na nanaas baling.”
ACT 9:13 Ananias ga balui, “Watong, iau te hadade ra haleng na hinhinawas uta iakano ra tunotuno ma uta ira hinelar i te gil tar ta ira num matanaiabar tus aram Ierusalem.
ACT 9:14 Ma i te hanuat ukai Damaskas tika ma ra dadas meram ta ira tamat na ut na pakila lotu gar na Iudeia bia na me palim kawase diet ing diet lalotu tupas ugu.”
ACT 9:15 Iesen no Watong ga tange tana, “Haan, kanong iau te gilamis ie wara nugu tultulai bia na hinawas utagu ta diet ing diet pai Iudeia ma ta ira udiet tamat na lualua na gil harkurai ma ta ira matanaiabar na Iudeia mah.
ACT 9:16 Ma iau ni hamines tana bia a mangana tamat na ngunngutaan hohe ing na kahe at wara gaiegu.”
ACT 9:17 Io, Ananias ga haan ma ga laka tano hala nong Sol ga kiskis tana. Ga bul ira limana tana ma ga tange, “Tasigu Sol, no Watong i te tule iau. Ma aie at mon ne Jisas nong ga harapuasa taar taam aras na ngaas ing u ga hanahaan ukai. Ma i te tule iau waing nugu nanaas baling ma nugu hung ma no Halhaliana Tanuo.”
ACT 9:18 Kaik at mon, ma ra linge hoira halagi na kirip ga puko laah mekatiga ta ira matane Sol gaam tale bia na nanaas baling. Io, ga taman tut ma ga kap baptais.
ACT 9:19 Ma namur bia gate iaan taar, no uno dadas ga hanuat baling. Ma Sol ga kis ma ira ut na tinaram tano lotu aram Damaskas ra bar bung.
ACT 9:20 Gasien at mon ga tur leh wara harharpir narako ta ira hala na lotu audiet ira Iudeia bia Jisas aie no Nati God.
ACT 9:21 Ma diet bakut ing diet ga hadadei, diet ga karup ma diet ga tange, “Ai! Dahat nunure bia aram Ierusalem iakan at mon no tunotuno nong ga haliare diet ing diet lalotu tupas iakan ra tunotuno Jisas! Ma i palai mah bia i te hanuat at ukai wara palpalim kawase kaike ra tunotuno bia na lam diet uras ta ira tamat na ut na pakila lotu! I te biha kaiken?”
ACT 9:22 Iesen no hinarpir ta Sol ga hanhanuat dadas. Ma ira Iudeia aram Damaskas diet pa ga haruat bia diet na balu Sol ing ga hatutun tar ta diet bia Jisas aie no Mesaia.
ACT 9:23 Namur, bia haleng bung gate sakit, ira Iudeia diet ga hanuat hurlungen ma diet ga harpingit wara bubu bing Sol.
ACT 9:24 Ma sen bia Sol ga ser leh iakan ra udiet harpingit. Ra bung ma ra kasakes diet ga tur na ninaas ta ira matanangas huat tano pise na hala wara bubu bing ie.
ACT 9:25 Iesen tiga bung ra bung ira bulu na harausur tane Sol diet ga lamus leh ie ma diet ga haruhei ma tiga kalot ures napu meram tiga matana kalangar tano balo tano pise na hala.
ACT 9:26 Ing Sol ga hanuat Ierusalem ga walar bia na kis tika ma ira ut na tinaram tano lotu. Ma iesen bia diet pa ga nurnur bia aie ga tiga ut na tinaram tutun tano lotu, ma diet bakut diet ga burtei.
ACT 9:27 Iesen Banabas ga hanuat gaam lamus leh ie uram ta ira apostolo. Ga hapalaine ta diet ing Sol ga nes no Watong aram na ngaas ma bia no Watong ga ianga tana. Ga hinawase mah diet bia aram Damaskas Sol ga harpir ma no hinsa Jisas ma pata bunurut.
ACT 9:28 Io, Sol ga kis tika ma diet ma ga hanahaan hurbit aram Ierusalem ma ga harharpir ma no hinsana no Watong ma ra balaraan.
ACT 9:29 Ga ianga ma ga hargau ma ira Iudeia ing diet tano nianga Grik, iesen diet ga walwalar bia diet na bu bing ie.
ACT 9:30 Ing ira haratasin narako ta Krais diet ga nunure leh hokaiken, diet ga lamus hasur Sol ures Kaisaria diet gaam tule isei u Tasas.
ACT 9:31 Io, no lotu narakoman ta ira hanuo Galili, Iudeia, ma Samaria ga lagirane ra kinkinis na malum ma ga kap ra dadas meram naliu. Ma tano harharagat tano Halhaliana Tanuo ma tano kinkinis na urur tano Watong, no winawas ta ira matanaiabar narako tano lotu ga tamat hanahaan.
ACT 9:32 Io, ma Pita, ing ga hanahaan hurbit, ga haan wara kakol ira matanaiabar tus tane God aras Lida.
ACT 9:33 Kaia ga haan tupas tiga tunotuno hinsana ne Enias. Ga pengpeng ma pa ga haruat wara hinahaan talur no kubena a liman ma itul na tinahon.
ACT 9:34 Pita ga tange tana, “Enias, Jisas Krais i halangalanga ugu. Taman tut ma nu puli no kubem.” Ma kaik at mon ga taman tut.
ACT 9:35 Ma ira matanaiabar me Lida ma Saron diet ga nes ie ma diet ga tahurus taar tano Watong.
ACT 9:36 Io, ma aras Iopa ga mon tiga hahin, a ut na tinaram tano lotu ie, no hinsana Tabita (ma tano nianga Grik di pukusanei bia Dokaas). Hotikai git gilgil ra tahut ma git harharahut ira maris.
ACT 9:37 Ta iakano pakana bung ga maset gaam maat. Io, di ga gis no palatamaine ma di ga hainoh ie tiga subaan aram naliu tiga hala.
ACT 9:38 Ma Lida pa ga manga tapaka me Iopa. Kaik, ing ira ut na tinaram tano lotu aras Iopa diet ga hadade bia Pita kenam Lida, diet ga tule iruo tunotuno uram tana ma dir ga hapar ie ing dir ga tange bia, “Nu habir ukai ho het!”
ACT 9:39 Io, Pita ga haan tika ma dir. Ing dal ga hanuat di ga lamus halaka ie uram tano subaan naliu tano hala. Ma ira makosa bakut diet ga tur luhutanei ma ra sunuah. Ma diet ga hamhamines ira sigasige ma ira maal ing Dokaas ga gil ing ga lon taar baak.
ACT 9:40 Pita ga tule hasur diet bakut ures nataman. Io, ga singa bukunkek gaam sasaring. Ga talingane no palatamaine no hahin ma ga tange, “Tabita, taman tut!” Tabita ga hapilakaas mata, ma ing ga nes Pita, ga kis tutur.
ACT 9:41 Pita ga palim leh no limana ma ga harahut ie wara tuntunur. Io, ga tatau ira matanaiabar tus tane God tika ma ira makosa gaam hamines ie ta diet bia a lilonai.
ACT 9:42 Ma ira matanaiabar ta ira matahu katon Iopa, diet ga ser iakan ra linge ma a halengin diet ga nurnur tano Watong.
ACT 9:43 Io, Pita ga kis baak aras Iopa tika ma tiga ut na pinapalim ma ra pala bulumakau, hinsana ne Saimon.
ACT 10:1 Io, ma ga mon tiga tunotuno aram Kaisaria hinsana ne Konilias, tiga tamat na umri ie narakoman tiga tamat na matana ubane di kilam bia no matana ubane me Itali.
ACT 10:2 Aie ma no uno hatatamaan bakut a ut na lotu dal taman ma dal git ruru God. Git harharahut mah ira maris ma git sasaring hait tupas God.
ACT 10:3 Tiga bung ra itul a pakana bung ra matarahien ga nes tiga ninaas na tanuo. Ga nes tus tiga angelo tane God ga hanuat taar tana ma ga tange, “Konilias.”
ACT 10:4 Konilias ga mata raurawan taar tano angelo ma ra bunurut ma ga tiri, “Asa, Watong?” No angelo ga balui hoken: “Ira num sinasaring ma ira num harharahut tupas ira maris i te haan tupas God hoing tiga bilai na hartabar nong i halilik ie wara utaam.
ACT 10:5 Ma kaiken nu tule num ta tunotuno u Iopa wara lamlam tiga tunaan hinsana ne Saimon nong di kilam ie bia Pita.
ACT 10:6 Aie tiga wasire aram tano hala tano tunotuno i la papalim ma ira pala bulumakau hinsana ne Saimon. Ma no ngasiana i tur hutaten no tes.”
ACT 10:7 Ma bia no angelo nong ga ianga tana ga haan laah, Konilias ga tatau auno iruo tultulai ma tiga umri, a ut na lotu ie ma aie tikai ta ira umri ing dal git harharahut Konilias ta ira uno sunupi.
ACT 10:8 Ga hinawase dal ta ira linge bakut ing ga hanuat taar tana ma ga tule dal u Iopa.
ACT 10:9 Tano mes na bung ing dal ga hananhaan hutaten no pise na hala, Pita ga haan uram tano madahien na ula hala ra matarahien wara sinasaring.
ACT 10:10 Ga taburungan ma ga sip ta linge bia na ien. Ma ing di ga tangtagure ira nian Pita ga nes tiga ninaas na tanuo.
ACT 10:11 Ga nas no mawe ga tapapos ma tiga linge hoira tamat na maal di ga harharuhe hasur ie ta ira ihat na ngusuno.
ACT 10:12 Ma kaia tana ga mon ira mangana wawaguai bakut ing aihat ira kaki diet. Ga mon mah ing diet la kaikaiau tano pise ma ira maan mah tano hurmauho.
ACT 10:13 Io, tiga ingana tunotuno ga tange, “Taman tut, Pita. Nu bu bing kaiken nugu ien.”
ACT 10:14 Iesen Pita ga tange, “Taie tun at, Watong! Iau pa nale ien ta linge ing ira numehet harkurai i hatabune mehet ine.”
ACT 10:15 Ma no ingana no tunotuno ga tange tano airuo na pakaan bia, “Waak u hatabune ira linge ing God i te hagamgamatien tar.”
ACT 10:16 Ga ngan hokaiken aitul a pakaan ma kaik at mon di ga sarat haut pukus no maal uram ra mawe.
ACT 10:17 Ing Pita ga kis taar ma ga liilik utano kukuraina iakan ra ninaas na tanuo, ira tunotuno ing ne Konilias ga tule dal, dal ga nunure leh no hala ta Saimon, dal ga me hanuat aram tano matanangas huat.
ACT 10:18 Dal ga tatau ma dal ga tiri bia Saimon nong di ga kilam ie bia Pita ga kiskis kaia bia taie.
ACT 10:19 Ing Pita ga kis taar at baak ma ga liilik utano kukuraina no uno ninaas, no Tanuo ga tange tana bia, “Saimon, aitul a tunotuno kana dal silsilihe ugu.
ACT 10:20 Kaia, taguro ma nu hansur. Ma waak u malmalok bia nu haan tika ma dal kanong iau at iau te tule dal ukai.”
ACT 10:21 Io, Pita ga hansur ma ga tange ta dal, “Iau no tunotuno nong mutal sisilih tana. Mutal haan ukai warah?”
ACT 10:22 Dal ga balui, “No tamat na umri Konilias i tule metal. Aie tiga takodasiana tunotuno ma i la urur ta God. Ma no huntunaan na Iudeia bakut diet ru ie. Tiga halhaliana angelo i tange tana bia na bale leh ugu uram tano uno hala waing na hadade ira nianga ing nu tange.”
ACT 10:23 Io, Pita ga bale halaka leh dal bia dal na uno wasire aram tano hala. Tano mes na bung Pita ga taguro ma ga tika laah ma dal. Ma ari tasine ta Krais meras Iopa diet ga sakate mah dal.
ACT 10:24 Ma tano bung menamur Pita ga hanuat aram Kaisaria. Ma Konilias ga kiskis kawase diet ma gate tau hulungan ira hinsakana ma ira uno harwis ing ga manga lasa ta diet.
ACT 10:25 Ing Pita ga hanan laka tano hala, Konilias ga haan tultul ie gaam se tar ie ta ira kaki Pita ma ra but na urur.
ACT 10:26 Sen bia Pita ga tange, “Tut naliu! Iau at mah, iau tiga tunotuno mon hoing augu.” Ma ing ga tangtange huo ga hatut habalin ie.
ACT 10:27 Ma ing Pita ga iangianga at baak ma ne Konilias ga haan laka gaam a nes leh ira haleng na tunotuno diet ga kis hurlungen taar.
ACT 10:28 Io, ga tange ta diet, “Muat nunure tar bia ira numehet harkurai ira Iudeia diet hartigal bia tiga Iudeia pa na kis tika ma tikai pai Iudeia ie ma pa na kol mah ie. Iesen God i te hamines tagu bia waak iau liklik halaka leh bia God i te hatabune tiga tunotuno mekai ho mehet ira Iudeia.
ACT 10:29 Io kaik, ing muat hartula utagu iau hanuat ma iau pai malok. Io, iau wara tirtiri bia wara bih kaik muat gi hartula utagu?”
ACT 10:30 Ma Konilias ga balui hoken: “Aihat na bung nalua iau ga sasaring aram tano nugu hala ra itul a pakana bung ra matarahien. Ma kaik at mon tiga tunotuno ga tur menalua tagu. Ga sigam tar ra pipilakas na sigasige.
ACT 10:31 Ga tange, ‘Konilias, God i te hadade no num sinasaring ma i te lik leh ira num harharahut tupas ira maris.
ACT 10:32 Io, hartula u Iopa wara uta Saimon nong di kilam ie bia Pita. Kana i kiskis aras tano hala tane Saimon no ut na pinapalim ma ra pala bulumakau nong i la kiskis hutaten no tes.’
ACT 10:33 Io, kaik at mon iau gaam hartula wara utaam ma u te gil ra bilai na magingin bia u hanuat. Ma kaiken mehet bakut ken tano matmataan ta God wara hanhadade ira nianga bakut ing no Watong i te pir tar ugu bia nu hinawase het ine.”
ACT 10:34 Io, Pita ga hatahun wara nianga. “Kaiken um iau te nes kilam no tutun bia God pai la harharahut sen mon tiga palpal ma waak no mes.
ACT 10:35 Iesen i la balbale leh ira tunotuno ta ira huntunaan bakut ing diet ru ie ma ing diet gil ra takodas na magingin.
ACT 10:36 Muat nunure no hinhinawas nong God ga tulei uram ta ira matanaiabar na Israel. Ga iangianga utano tahut na hinhinawas tane Jisas Krais no Watong ta ira matanaiabar bakut nong i hatahuat ra malum nalamin ta dahat ma God.
ACT 10:37 Muat nunure no linge nong ga hanuat ta ira matahu taman aram Iudeia, tur leh me Galili menamur tano pakana bung ing Jon ga harharpir bia ira matanaiabar diet na kap baptais.
ACT 10:38 Ma muat palai ta Jisas me Nasaret nong God ga tibei ing ga tabar ie ma no Halhaliana Tanuo tika mah ma ra dadas. I palai mah ta muat bia ga hanahaan hurbit ma ga gilgil ra tahut ma ga halangalanga diet bakut ing Sataan ga papasuane diet, kanong bia God ga kis tika mei.
ACT 10:39 “Mehet ira apostolo mehet ga nes kaike ira linge ga gil arau Ierusalem ma ta ira mes na katon tano hanuo gar na Iudeia. Kaik mehet gi hinawas bia a tutun kaiken. Ma diet ga bu bing ie ing diet ga hatabai aram tiga kabai.
ACT 10:40 Iesen God ga hatut ie sukun ra minaat tano itul a bung gaam hapuasnei.
ACT 10:41 Iesen ira matanaiabar bakut diet pa ga nes ie. Taie. Diet sen mon kaike ing God gabe gilamis diet bia diet na hinawas ta ira tutun utana. Ma mehet, mehet ing mehet ga iaan ma mehet ga mom tika mei namur bia gate tut hut sukun ra minaat.
ACT 10:42 Ma ga tar ra dadas na nianga ta mehet bia mehet na harpir taar ta ira matanaiabar ma bia mehet na manga hinawas bia aie nong God ga bul ie bia na gil harkurai ta diet ing diet lon baak ma ta diet ing diet te maat.
ACT 10:43 Ira tangesot bakut diet hinawas tana bia meram narako tano hinsana, God na lik luban se ira magingin sakena ta diet bakut ing diet nurnur tana.”
ACT 10:44 Ing Pita ga tangtange at baak kaiken ra nianga, no Halhaliana Tanuo ga hansur taar ta diet bakut ing diet ga hanhadade no uno hinhinawas.
ACT 10:45 Ma ira ut na nurnuruan, diet ira Iudeia ing diet ga hanuat me Iopa tika ma Pita, diet ga manga karup bia God ga tule hasur no hartabar na Halhaliana Tanuo taar ta diet mah ing diet pai Iudeia.
ACT 10:46 Ga palai bia God ga gil huo kanong ira Iudeia diet ga hadade diet ira mes ing diet ga iangianga ma ira mes na nianga ma ing diet ga pirpirlat God. Io, Pita ga tange, “Pai tale tun at tikai bia na tigal kaiken ra tunotuno bia diet pa na kap baptais ma ra taah kanong diet te hatur kawase leh mah no Halhaliana Tanuo hoing dahat.”
ACT 10:48 Io, ga tange ta diet, “Muat na kap baptais at tano hinsa Jisas Krais.” Io, diet ga saring Pita bia na kis tika baak ma diet ta bar bung.
ACT 11:1 Ira apostolo ma ira mes na harahinsakaan narako ta Krais ta ira matahu katon aram Iudeia, diet ga ser bia diet ing diet pai Iudeia diet gate kap usurane mah no nianga tane God.
ACT 11:2 Io kaik, ing Pita ga haan uram Ierusalem, ira matanaiabar na lotu ing diet ga tur dadas baak ta ira harkurai gar na Iudeia diet ga pukusanei ma ken ra nianga: “U ga haan ures tano hala ta diet ing diet pai kis ta ira udahat harkurai ira Iudeia ma u gaam iaan tika ma diet.”
ACT 11:4 Io, Pita ga tur leh wara palpalas no kidilona haramatur ta ira linge ing diet ga harmuri huo.
ACT 11:5 Ga tange hoken: “Ing iau ga saasaring aram tano pise na hala Iopa iau ga nes tiga ninaas na tanuo. Iau ga nes tiga linge hoing tiga tamat na maal di ga harharuhe hasur ie meram ra mawe ta ira ihat na ngusuno ma ga hansur taar tagu.
ACT 11:6 Iau ga nanaas uram narako tana ma iau ga nes ira wawaguai tano ula hanuo, ira lasana ing aihat ira kaki diet ma diet ing a rakaia diet. Ga mon mah ing diet la kaikaiau tano pise ma ira maan mah tano hurmauho.
ACT 11:7 Io, iau ga hadade tiga ingana tunotuno ga tange tagu, ‘Taman tut, Pita. Nu bu bing kaiken nugu ien.’
ACT 11:8 “Ma iesen iau ga babalu bia, ‘Taie tun at, Watong! Iau pa nale bul halaka tiga nian tano hagu ing ira numehet harkurai i hatabune mehet ine.’
ACT 11:9 “Ma no ingana no tunotuno ga tange tano airuo na pakaan bia, ‘Waak u hatabune ira linge ing God i te hagamgamatien tar.’
ACT 11:10 Ma ga ngan hokaiken ra itul a pakaan. Io, di ga sarat haut habal no linge uram ra mawe.
ACT 11:11 “Ta iakano ra pakaan at mon aitul a tunotuno di ga tule dal me Kaisaria, dal ga hanuat taar tano hala iau ga kiskis tana.
ACT 11:12 Ma no Tanuo ga tange tagu bia iau pa ni malok wara hinahaan ma dal. Kaiken ra liman ma tikai na tasigu ta Krais diet ga haan tika ma iau u Kaisaria, het gaam haan laka tano ngasia Konilias.
ACT 11:13 Ga hinawase het ta ing ga nes tiga angelo ga harapuasa taar tana aram tano ngasiana ma no angelo gaam tange tana, ‘Hartula u Iopa wara utano tunotuno hinsana ne Saimon nong di kilam ie bia Pita.
ACT 11:14 Ma aie na hinawase muat ta nianga waing augu ma diet bakut tano num hala, muat naga hatur kawase no nilon tutun.’
ACT 11:15 “Ma ing iau ga hatahun wara nianga, no Halhaliana Tanuo ga hansur taar ta diet hoing ga hansur taar ta dahat tano luena pakaan.
ACT 11:16 Io, iau ga lik leh ing no Watong ga tange, ‘Jon ga baptais ma ra taah, ma sen bia muat na kap no baptais tano Halhaliana Tanuo.’
ACT 11:17 Io, bia ing God ga tabar mah diet ma iakan ra hartabar ga tabar dahat mei ing dahat gate nurnur tano Watong Jisas Krais, io, a mangana tunotuno sa iau bia iau gor tur bat God?”
ACT 11:18 Io, ing diet ga hadade hokaiken, diet ga marur um ma diet gaam pirlat God. Diet ga tangtange, “Io, a tutun tok at um bia God i te tar mah ta diet ing diet pai Iudeia no ngaas na lilik pukus bia diet naga hatur kawase no nilon tutun.”
ACT 11:19 Io, ira matanaiabar na lotu diet gate hilau harbasia ing no hinelar ga haan tupas diet tano pakana bung bia di ga gulum bing Stiwen. Diet ga hilau muk u Ponisia, Saipras, ma Entiok. Ma diet ga hinhinawas ma no tahut na hinhinawas taar ta ira Iudeia sen mon.
ACT 11:20 Ma sen bia ari ta diet, a tunotuno diet me Saipras ma Sairin, diet ga haan u Entiok ma diet ga hinhinawase mah ira Grik tano tahut na hinhinawas tano Watong Jisas.
ACT 11:21 No dadas tano Watong ga kis tika ma diet ma ra tamat na matanaiabar diet ga nurnur ma diet ga tahurus tupas no Watong.
ACT 11:22 Ira matanaiabar na lotu aram Ierusalem ga ser no hinhinawas ma ga tule Banabas u Entiok.
ACT 11:23 Ing ga hanuat ma ga nes tus no harmarsai tane God, ga manga guama ma ga haragat diet bakut bia diet na patep dikdikit taar at tano Watong.
ACT 11:24 Aie kaik Banabas ga tiga bilai na tunotuno ma ga hung ma no Halhaliana Tanuo ma ra nurnur. Ma di ga lam ra haleng na matanaiabar taar tano Watong.
ACT 11:25 Namur, Banabas ga haan u Tasas wara silsilihe Sol.
ACT 11:26 Ma ing ga nes leh ie ga lam ie u Entiok. Ma haruat ma tiga kudulena tinahon dir ga kis tika ma no lotu ma dir ga hausur ra haleng na matanaiabar. Di ga luena kilam ira ut na tinaram tano lotu bia a Kristian diet aram Entiok.
ACT 11:27 Ta iakano ra pakana bung ari tangesot diet ga hansur me Ierusalem u Entiok.
ACT 11:28 Ma tikai ta diet, hinsana ne Agabas, ga tut ma ga ianga na tangesot ma no dadas tano Tanuo, gaam hapuasne bia tiga but na sam taburungan na hanuat taar ta ira hanuo ing Rom ga kure. (Iakan ga hanuat ing ne Kolodias ga harkurai taar.)
ACT 11:29 Ma tikatikai ta ira ut na tinaram tano lotu diet ga lik bia na tule ta kinewa hoing ga haruat huo wara harharahut ira hinsaka diet ta Krais ing diet ga kiskis aram tano hanuo Iudeia.
ACT 11:30 Io, diet ga gil hokaiken ma diet ga tule no udiet harharahut tika ma Banabas ma ne Sol ukarama ta ira kabinsit na lotu.
ACT 12:1 Ta iakan ra pakana bung Herot, no tamat na lualua na gil harkurai, ga palim kawase ari tunotuno tano lotu wara hinelar ta diet.
ACT 12:2 Ga hartula, di gaam bu bing Jemes no tasine Jon ma ra wise.
ACT 12:3 Ma ing ga nes bia ira Iudeia diet ga guama ta iakan, io, ga hartula bia da palim kawase mah Pita. (Ga gil iakan tano bung na Nian na Beret pai la Laalat.)
ACT 12:4 Bia di gate palim kawase Pita, Herot ga tange bia da bul ie aram ra hala na harpidanau. Ga hartula mah bia aihat na ton umri diet na mano bat ie. Ma tikatikai ta kaiken ga mon ra ihat na umri tana. Ma Herot ga pingit bia na lamus hasur tar ie ra matmataan na haruat wara gil harkurai tana namur bia no Nian na Hinahaan Sakit na pataam.
ACT 12:5 Io, di ga mano bat tar um Pita aram ra hala na harpidanau. Iesen ira matanaiabar na lotu kana diet ga manga saasaring tupas God wara utana.
ACT 12:6 Io, ra bung um, tano bung menalua ta nong Herot gor hatur ie ra harkurai, Pita ga noh taar nalamin tara iruo umri ma di gate wis tar ie ma ra iruo dadas na hidihidi sakit. Ma a mon umri mah diet ga tur bat tar no matanangas tano hala na harpidanau.
ACT 12:7 Ma kaik at mon tiga angelo tano Watong ga harapuasa ma tiga lulungo ga murarang aram tano subaan Pita ga kis taar kaia. No angelo ga pasar hangun Pita tano binabatine ma ga tange, “Taman tut gasien!” Ma kaik at mon ira dadas na hidihidi sakit ga puko laah mekatiga ta ira limane Pita.
ACT 12:8 Io, no angelo ga tange tana, “Sigasigam ma nu paas leh ira num iruo pala lamaas.” Pita ga gil huo. Io, no angelo ga tange tana, “Kaluane leh no kiniasim tamat ma nu mur iau.”
ACT 12:9 Pita ga mur hasur ie sukun no hala na harpidanau. Pa ga nunure bia asa ing no angelo ga gilgil bia ga tutun. Taie. Ga lik bia ga nesnes tiga ninaas na tanuo mon.
ACT 12:10 Dir ga sakit no luena ma no iruo minminona ta ira umri, dir gaam a hanuat taar tano dadas na binanus sakit tano matanangas huat nong di la hanansur tana uras tano pise na hala. Ma no binanus ga tamapapos bia mon uta dir ma dir gaam hansur. Dir ga mur leh tiga ngaas ma kaik at mon no angelo ga haan sukun Pita.
ACT 12:11 Io, Pita ga minonas tano linge ga hanuat taar tana ma ga tange, “Kaiken um iau te nunure tus bia iakan ra linge i tutun! No Watong i tule no uno angelo wara halhalangalanga ise iau sukun no dadas tane Herot ma ta ira linge bakut ira matanaiabar na Iudeia diet liklik bia na ngan huo.”
ACT 12:12 Ing gate madaraas pane um iakan ra linge, ga haan uram tano hala tane Maria, no makai tane Jon nong di ga kilam mah ie bia Mak. Ma ga mon ra haleng na matanaiabar diet ga kis haruat taar kaia ma diet ga saasaring.
ACT 12:13 Pita ga pipidil tano matanangas mekaia nata ma tiga hinasik na tultule, hinsana ne Roda, ga haan laah wara pinapos.
ACT 12:14 Ing ga hadade kilam no inga Pita, a but na gungunuama ga kap ie kaik pa gaam papos. Iesen ga hilau tapukus gaam a tange, “Pita kenas ra matanangas!”
ACT 12:15 Diet ga tange tana, “U te ba kaike!” Ing ga singsingit at baak bia a tutun, diet ga balui, “No uno angelo iakano.”
ACT 12:16 Ma sen bia Pita kana ga pipidil at baak. Ma ing um diet ga papos no matanangas ma diet ga nes ie, diet ga manga karup.
ACT 12:17 Iesen Pita ga tah pam ta diet bia diet na kis kunkun, gaam hamatur diet ta ing no Watong ga halangalanga ise ie huo meram tano hala na harpidanau. Io, ga tange ta diet bia, “Muat hinawase Jemes ma ira tasigu ta Krais ta iakan.” Ma ing ga tange taar huo ga haan laah mekaia taar tiga mes na katon.
ACT 12:18 Ra malaan tano mes na bung, a but na nguanguo sakit ga haan tupas ira umri. Diet ga hartiritiri bia, “Pita iakana he?”
ACT 12:19 Io, Herot ga hartula bia da sisilih timaan tun at ta Pita, iesen pa di ga nes leh ie. Io, ga tiri murmur ira umri ing diet ga mano bat tar Pita, gaam tar ra dadas na nianga bia da bu bing diet. Io, Herot ga haan sukun um Iudeia gaam a kis baak aras Kaisaria.
ACT 12:20 Ma Herot ga manga ngalngaluan taar ta ira matanaiabar me Tair ma Saidon. Io kaik, diet ga haan tika laah diet gaam luena halawen leh Balastas bia na tur tika ma diet. Ma aie nong ga harbalaurai taar tano hala tane Herot, no tamat na lualua na gil harkurai. Io, diet ga haan taar tane Herot ma diet gaam saring ie bia a malum na kis nalamin ta diet ma aie. Diet ga sasaring huo kanong no udiet hanuo git kapkap nian mekaia tano hanuo tano tamat na lualua na gil harkurai.
ACT 12:21 Tano bunguno no bung di gate puo tar ie, Herot ga hamar leh ie ma ira bilai na kiniasine ma ga kis tano uno tamat na kinkinis na gil harkurai gaam ianga ta ira matanaiabar.
ACT 12:22 Diet ga kakonga bia, “Iakan a ingana tiga god, pai gar tiga tunotuno mon.”
ACT 12:23 Kaik at mon tiga angelo tano Watong ga bu ie kanong warah bia pa ga tar ira udiet pirhakasing uram ho God. Ma ra nat na sisi ga ien ie gaam maat.
ACT 12:24 Iesen no hinahaan tano nianga ta God ga puar ma ga haan harbasia.
ACT 12:25 Ma ing Banabas ma Sol dir ga hapataam no udir pinapalim dir ga tapukus me Ierusalem. Ma dir ga lam Jon nong di ga kilam mah ie bia Mak tika ma dir.
ACT 13:1 Ma nalamin ta ira matanaiabar na lotu Entiok ga mon ra tangesot ma ra tena harausur kaia. Ira hinsa diet ken. Banabas, Simion nong di ga kilam ie bia no Bungbungana, Lusias meras Sairin, Manaian nong ga tamat tika ma Herot no tamat na ulkukuha, ma ne Sol.
ACT 13:2 Ing diet ga lalotu tupas no Watong ma diet ga hahal, no Halhaliana Tanuo ga tange ta diet, “Muat hasisingen se tar Banabas ma Sol wara nugu waing dir na gil no pinapalim nong iau gate tau leh dir utana.”
ACT 13:3 Io namur, ing diet gate hahal ma diet gate sasaring taar, diet ga bul ira luma diet ta dir ma diet gaam tule se dir bia dir na haan.
ACT 13:4 Ma ing no Halhaliana Tanuo ga tule se dir, dir ga hansur u Selusia ma mekaia dir ga kawaas tiga mon, dir gaam haan u Saipras.
ACT 13:5 Ing dir ga hanuat aras Salamis dir ga harpir utano nianga gar ta God aram ta ira hala na lotu udiet ira Iudeia. Ma Jon Mak ga kis taar ma dir wara harharahut dir.
ACT 13:6 Io, dir ga haan hurbit tano mugurlamin Saipras, tuk bia dir gom a hanuat taar aras Pepos. Dir ga haan tupas tiga Iudeia kaia, a tangesot harabota ma ra ut na ser magirmagir ie, hinsana ne Bar-Jisas, a tultulai ie tano tamat na ulkukuha mekaia, ne Sergius Paulus. A ut na mintota iakano lualua ma ga hartula uta Banabas ma Sol kanong ga sip bia na hadade no nianga ta God.
ACT 13:8 Iesen Elimas ga sukuane dir. Aie iakano ut na ser magirmagir ma no kukuraina iakano hinsana bia a ut na ser magirmagir mah. Ga walar bia na pukusane no lilik tano tamat na ulkukuha bia pa naga nurnur.
ACT 13:9 Io, Sol, nong di ga kilam mah ie bia Pol, ga hung taar ma no Halhaliana Tanuo ma ga nes dit Elimas ma gaam tange, “U manga lah Sataan! U sukuane ira linge ing a takodasiana. Ma u hung taar ma ira mangana hinarabota ma ira sakana hinasakit bakut. Hotikai u la wara kukuas no tutun tano Watong wara biis balik.
ACT 13:11 Kaiken um no Watong na hapidanau ugu. Nu pulo ma pa nu tale bia nu nes baak no kasakes.” Io, kaik at mon a kankado ga burung ie ma gaam paparasum bia na silihe tikai bia na palpalim leh no limana wara lulue ie.
ACT 13:12 Io, ing no tamat na ulkukuha ga nes huo, ga nurnur kanong ga manga karup tano harausur utano Watong.
ACT 13:13 Io, Pol ma ira iruo hinturana dal ga kawaas tiga mon me Pepos u Perga aras tano hanuo Pampilia. Ma Jon ga haan sukun dir kaia gaam tapukus u Ierusalem.
ACT 13:14 Io, dir ga haan me Perga uram Entiok kenam tano hanuo Pisidia. Ma tano Bung na Sinangeh dir ga haan laka uram tano hala na lotu udiet ira Iudeia ma dir gaam a kis.
ACT 13:15 Namur, bia di gate was tar ari pakpakat ta ira harkurai tane Moses ma ari pakpakat ta ira tangesot, ira tamat ta iakano lotu diet ga tula nianga ta dir ma diet ga tange, “Tasi het, bia ing numur ta nianga na harharagat uta ira matanaiabar kana, i tahut bia mur na ianga.”
ACT 13:16 Pol ga tut ma ga tah pam diet ma no limana bia diet na kis kunkun. Io, ga ianga um. “Matanaiabar na Israel, ma muat ing muat pai Iudeia ing muat la lalotu tupas God, muat hadade iau!
ACT 13:17 No God ta ira matanaiabar na Israel ga gilamis se ira hintubu dahat ma ga hatamat diet ing diet ga kis na wasire arau Isip. Ma ga lue hasur diet sukun iakano hanuo tika ma ra tamat na dadas.
ACT 13:18 Ma a tutun bia diet pa ga taram ie, iesen pa ga tur talur diet ta ira ihat na sangahul na tinahon aram ra hanuo.
ACT 13:19 Ga pari ra liman ma iruo na huntunaan arau Kanan gaam tar se no udiet pise ta ira uno matanaiabar wara udiet tus um.
ACT 13:20 Kaiken ra linge ga ngan huo haruat ma ra ihat na maar ma liman sangahul na tinahon. “Namur ta kaiken, God ga tar ira kabinsit ta diet tuk taar ta Samuel no tangesot.
ACT 13:21 Io, ira matanaiabar diet ga sasaring wara u tiga tamat na lualua na gil harkurai ma God gaam tar Sol no nati Kis meram tano huno ta Beniamin wara udiet tamat na ut na harkurai. Ma Sol ga harkurai haruat ma aihat sangahul na tinahon.
ACT 13:22 Io, namur, God ga kap se Sol ma gaam bul Dawit wara udiet tamat na lualua na gil harkurai. Ma God ga hinawas utane Dawit ing ga tange hoken: ‘Iau te nes tupas leh Dawit no natine Iesi bia aie iakano mangana tunotuno nong i haruat ma no nugu sinisip. Ma na gil bakut ira linge ing iau sip bia na gil.’
ACT 13:23 “Io, mekatiga ta ira bulumur ta Dawit, ma haruat ma no kunubus ta God, i tar hawaat no Ut na Harhalon taar ta ira Israel, ma aie ne Jisas.
ACT 13:24 Nalua ta ing Jisas ga tur leh no uno pinapalim Jon ga harpir taar ta ira Israel bia diet na lilik pukus ma diet na kap baptais.
ACT 13:25 Ing Jon ga harharuatane no uno pinapalim ga tange, ‘Muat manga ronga ta ira numuat lilik utagu! Iau pai no Mesaia. Taie. Iesen namur tagu aie na hanuat ma iau pai haruat bia ni lapus ira hinau ta ira iruo pupunaak na kakine.’
ACT 13:26 “Kaba tasigu ma hainigu, muat ira bulumur tano huntunaan ta Abraham, ma muat ing muat pai Iudeia ing muat lalotu tupas God, muat hadade. God i te tule iakan ra nianga na harhalon ukai ta dahat at.
ACT 13:27 Ira matanaiabar me Ierusalem ma ira udiet lualua diet pa ga nes kilam Jisas bia aie tun sige. Ma diet pa ga hadade kilam mah ira nianga ta ira tangesot ing di la waswas ta ira kaba bungbung na Bung na Sinangeh. Iesen ing diet ga kure hagahei bia na kap harpidanau, diet ga hatutun ira nianga ta kaike ra tangesot.
ACT 13:28 Diet pa ga nes leh tiga burena i haruat bia diet na bu bing ie urie. Iesen iakan pa ga tur bat diet. Taie. Diet ga saring leh Pailat bia da bu bing at ie.
ACT 13:29 Ing diet gate gil bakut tar ira linge ing ira tangesot diet ga pakat bia da gil tana, diet ga kap hasur ie meram tano kabai ma diet ga bul ie tiga matana haat na midi.
ACT 13:30 Ma sen bia God ga hatut ie sukun ra minaat.
ACT 13:31 Ma ra haleng na bung diet ing diet git tiktika mei me Galili uram Ierusalem, diet ga nesnes ie. Ma kaiken um diet hinhinawas utana taar ta ira nudahat matanaiabar.
ACT 13:32 “Ma mir hinawase muat tano tahut na hinhinawas. Aie kanin. God ga kukubus taar ta ira hintubu dahat.
ACT 13:33 Ma i te hatutun kaike ra kunubus wara gaie dahat ira udiet kaba bulumur hoken. I te hatut Jisas sukun ra minaat. Ma i ngan at mon haruat tano pakpakat aram tano airuo na Ninge. I tange hoken: ‘Augu no Natigu. Katin iau te hanuat bia no raam Sus.’
ACT 13:34 Ma ken ra nianga i tange no tutun bia God ga hatut ie sukun ra minaat ma taie pa na mapus. Ira nianga ken: ‘Iau ni tar ira halhaliana haridaan ta muat ing iau ga kukubus taar ta Dawit urie. Ma kaike ra kunubus pa na pataam.’
ACT 13:35 Bia kaik, di hinawas mah tiga mes na katon bia, ‘Pa nu bale no num Halhaliana bia na mapus.’
ACT 13:36 “I palai bia kaike ra nianga i te hanuat tutun kanong Dawit ga gil haruatne tar ing God ga pingit bia na gil. Ga gil huo tano uno pakana bung na nilon ma gaam maat um. Ma di ga bus tikanei ma ira hintubuno, ma no palatamaine ga mapus.
ACT 13:37 Ma sen bia nong God ga hatut ie sukun ra minaat pa ga mapus.
ACT 13:38 “Io kaik, kaba tasigu ma hainigu, iau sip bia muat na nunure bia iakan ra Jisas mon nong i papos no ngaas bia God na lik luban se ira magingin sakena. Ma iakan nong mir pir muat utana.
ACT 13:39 Ma diet bakut ing diet nurnur tane Jisas, God na kilam diet bia diet takodas ma bia diet te langalanga sukun ira udiet magingin sakena ing ira harkurai ta Moses pa ga tale bia na halangalanga diet ine.
ACT 13:40 Muat harbalaurai ta ing ira tangesot diet ga tange, ira udiet nianga kabi hanuat tutun ta muat. Kaike ra nianga hoken:
ACT 13:41 ‘Muat hadoda, muat ira ut na hinarus. Muat na ngalabo ma muat na hiruo, kanong iau ni gil tiga linge tano numuat pakana bung na nilon, ma sukmaal bia da hinawase muat utana muat pa na nurnur tana.’”
ACT 13:42 Io, ing Pol ma Banabas dir ga hanhansur tano hala na lotu audiet ira Iudeia, ira matanaiabar diet ga saring dir bia dir na ianga balin uta kaiken ra linge tano Bung na Sinangeh namur.
ACT 13:43 Ing ira matanaiabar tano kis hulungai diet ga haan laah, haleng na Iudeia ma ira mes ing diet gate kap usurane no lotu gar na Iudeia, diet ga mur Pol ma Banabas. Ma dir ga harharagat diet bia diet na kis taar at narakoman tano harmarsai ta God.
ACT 13:44 Io, tano Bung na Sinangeh namur, haleng sakit ira matanaiabar tano pise na hala diet ga hanuat hurlungen wara hanhadade no nianga tano Watong.
ACT 13:45 Ing ira Iudeia diet ga nes ira haleng na matanaiabar diet ga hung ma ra bala ngungut. Diet ga pukusane Pol ta ira uno nianga ma diet ga pinas hagahe ie.
ACT 13:46 Io kaik, Pol ma Banabas dir gaam balu diet ma ra balaraan hoken: “God ga pingit bia muat at muat na huna hadade no uno nianga. Sen bia muat te suro sei ma muat pai hamaan bia muat haruat bia muat na hatur kawase no nilon hathatika. Io kaik, kaiken mir talingane balik um diet ing diet pai Iudeia.
ACT 13:47 Ma mir gil huo kanong ira nianga ing God ga pir mir ine ken: ‘Iau te bul ugu bia tiga lulungo uta diet ing diet pai Iudeia, bia nu hatahuat tar no harhalon gar ta God ta ira katon bakut tano ula hanuo.’”
ACT 13:48 Ma ing diet ing diet pai Iudeia diet ga hadade hokaiken, diet ga guama ma diet ga tange bia ira nianga tano Watong i manga bilai. Ma diet ing God gate hakilang tar diet utano nilon hathatika, diet ga nurnur.
ACT 13:49 Io, no nianga ta God ga hanahaan hurbit ta ira kaba tamtaman bakut ta iakano hanuo.
ACT 13:50 Iesen ira Iudeia diet ga hatut ira bala diet ira hinagalam ing diet ga urur ta God. Diet ga hangane mah ira watong tano pise na hala huo. Ma diet ga hatahuat tar ra hinelar tane Pol ma Banabas ma diet gaam bat se dir mekaia tano udiet hanuo.
ACT 13:51 Io kaik, dir gaam hatidir se tar ira pulungar ta ira lapara kaki dir wara hakhakilang diet tano udiet sakana magingin taar ta dir ma dir gom haan u Aikoniam.
ACT 13:52 Ma ira ut na tinaram tano lotu kaia Entiok, diet ga hung ma ra gungunuama ma diet ga hung mah ma no Halhaliana Tanuo.
ACT 14:1 Aram Aikoniam Pol ma Banabas dir ga haan laka uram tano hala na lotu udiet ira Iudeia hoing at dir git gilgil. Dir ga ianga kaia tiga mangaan at, kaik a haleng na Iudeia ma diet ing diet pai Iudeia, diet gaam nurnur.
ACT 14:2 Iesen ira Iudeia ing diet ga malok bia diet na nurnur diet ga hatut ira bala diet ing diet pai Iudeia. Ma diet ira Iudeia diet ga kas ira bala diet ira mes bia diet na sukuane ira harahinsakaan narako ta Krais.
ACT 14:3 Io kaik, Pol ma Banabas dir gaam kis talona kaia ma dir ga iangianga ma ra balaraan utano Watong. Ma no Watong ga hatutun no udir nianga utano uno harmarsai. Ma ga gil huo hoken. Ga tar ra dadas ta dir kaik dir gaam gil ra dadas na harminanaas ma ra gingilaan na kinarup.
ACT 14:4 Ira matanaiabar tano pise na hala diet ga harpaleng, ari tano palpal ta ira Iudeia ma ari tano palpal ta ira iruo apostolo.
ACT 14:5 Ari Iudeia ma ari ing diet pai Iudeia tika ma ira udiet kaba lualua diet ga harpingit bia diet na helar ta ningaar ma bia diet na gulum bing dir.
ACT 14:6 Iesen ing dir ga ser iakan dir ga hilau uras Listara ma Derbe kenes tano hanuo Likonia, ma uras ta ira sibaan hutet ta kaike ra iruo pise na hala.
ACT 14:7 Ma dir ga balaan wara pirpir no tahut na hinhinawas kaia.
ACT 14:8 Aras Listara tiga tunotuno ga kis taar kaia. Di ga kahai ma ra pengpeng ie ma pa git hanahaan.
ACT 14:9 Ga hanhadade ira nianga tane Pol. Io, Pol ga ngok dit tana ma ga nes bia ga uno mon nurnur bia na langalanga. Io kaik, Pol gaam tau ie ma gaam tange, “Tut ma nu tur!” Kaik at mon no tunotuno ga karwas tutur ma gaam tur leh wara hinahaan tubena.
ACT 14:11 Ing ira matanaiabar diet ga nes ing Pol ga gil, diet ga kakonga tano nianga Likonia bia, “Ira tadaar diet te hansur taar ta dahat hoing ra tunotuno tun!”
ACT 14:12 Io, diet ga pas Banabas bia Sius ma Pol bia Hermis kanong warah git lulua ta dir wara nianga.
ACT 14:13 No hala na lotu ta Sius ga tur taar mon aras nataman tano pise na hala. Ma no ut na gil lotu ta Sius ga kap hawaat ra tumatena bulumakau ma ra balaparik na purpur uram tano matanangas huat ta iakano pise na hala. Ga gil huo kanong aie tika ma ira matanaiabar diet ga wara tuntun kaike ra hartabar wara lalotu tupas dir.
ACT 14:14 Ma ing bia ira iruo apostolo, Pol ma Banabas, dir ga hadade bia di ga wara gilgil huo ta dir, dir ga diris ira kiniasi dir wara hamines bia dir ga malok bia da gil huo ta dir. Dir ga hilau suur taar ta ira matanaiabar ma dir ga kakonga bia, “Ai! Waak muat ra gilgil kaike ra mangana linge! Mir mah mir airuo tunotuno mon hoing muat ma pai a tadaar mir. Mir kapkap hawaat ra tahut na hinhinawas tupas muat. Mir tangtange ta muat bia muat na tahurus talur kaiken ra linge bia mon, ma muat na talingane no lilona God nong ga gil no mawe, no ula hanuo ma no tes, ma ira mangana linge kenam narako ta dal.
ACT 14:16 Nalua, ga waak se tar ira matanaiabar bia diet na mur ira udiet mangana tintalen.
ACT 14:17 Iesen i la hamhamines hapalaine ira matanaiabar bia aie sige. Ma i gil huo hoken. I haminas no uno harmarsai ing i la tartar no bata meram ra hurmauho ma ing i tabar muat ma ira amuat nian ta ira udiet teka na minatuko. Ma ing i gil huo i hasoh muat ma ra nian ma i hahungi muat ma ra gungunuama.”
ACT 14:18 A tutun bia dir ga tange kaiken ra nianga, iesen pa ga malus ta dir ing dir ga tigal diet bia diet pa na tun hartabar taar ta dir.
ACT 14:19 Io, ari Iudeia diet ga hanuat me Aikoniam ma Entiok kenam Pisidia ma diet ga halawen leh ira matanaiabar. Diet ga gulum Pol ma ra haat ma diet ga rahi ie ures nataman tano pise na hala kanong diet ga lik bia gate maat.
ACT 14:20 Sen bia namur bia ira ut na tinaram tano lotu diet gate tur luhutanei, ga taman tut gaam haan tapukus uram tano pise na hala. Ma tano mes na bung dir ma Banabas dir ga haan u Derbe.
ACT 14:21 Dir ga harpir ma no tahut na hinhinawas arau ta iakano pise na hala ma dir ga soh leh udir ra haleng na ut na tinaram tano lotu. Io, dir ga tapukus baling u Listara, Aikoniam, ma u Entiok kenam Pisidia.
ACT 14:22 Dir ga hadadas hani kaike ra ut na tinaram tano lotu ma dir ga harharagat diet bia diet na patep dikdikit taar tano udiet nurnur ta Jisas. Dir ga tangtange, “Dahat na kilingane at ra haleng ngunngutaan kaik dahat naga sola tano kinkinis na harkurai ma ra harbalaurai ta God.”
ACT 14:23 Pol ma Banabas dir ga bul udiet ari kabinsit ta ira hala na lotu tikatikai. Ma dir ga tar diet uram tano limana no Watong nong diet gate nurnur tana. Dir ga gil huo ma ra sinasaring ma ra hinahal.
ACT 14:24 Namur bia dir gate sakit tar no hanuo Pisidia dir ga hanuat Pampilia.
ACT 14:25 Ma bia dir gate harpir taar ma no nianga aras Perga, dir ga hansur u Atelia.
ACT 14:26 Io, dir ga kawaas ra mon mekaia Atelia dir gaam tapukus u Entiok, no katon nong di gate tar dir kaia uram tano harmarsai ta God bia dir na gil iakan ra pinapalim nong dir te hapataam tar ie.
ACT 14:27 Ing dir ga hanuat kaia Entiok dir ga lamus hulungan ira matanaiabar tano lotu ma dir gom hinawase diet ta ira linge bakut ing God gate pakile aram narako tano udir pinapalim. Ma dir ga hinawas mah ta ing God ga papos no matanangas bia diet ing diet pai Iudeia diet naga nurnur.
ACT 14:28 Io, dir ga kis baak um kaia tika ma ira ut na tinaram tano lotu.
ACT 15:1 Ari tunotuno me Iudeia diet ga hansur uras Entiok ma diet ga hauhausur ira harahinsakaan narako ta Krais hoken: “Bia ing pa da kut ira palatamai muat haruat ma ira harkurai tane Moses, pai tale bia God na halon muat.”
ACT 15:2 Iakan ra linge ga gil Pol ma Banabas kaik dir gaam harsomane diet ma tiga dadas na nianga na hargor uta iakanong ra linge. Io kaik, ira harahinsakaan narako ta Krais ga tibe Pol ma Banabas tika ma ari mes mekaia Entiok bia diet na haan uram Ierusalem wara nesnes ira apostolo ma ira kabinsit tano lotu kaia uta iakan ra tinirih.
ACT 15:3 Io, ira matanaiabar na lotu ga tule se diet tano udiet hinahaan. Ma ing diet ga hanhan kutus Ponisia ma Samaria, diet ga haramatur kaia bia diet ing diet pai Iudeia, diet gate tahurus tupas ne God hohe. Ma iakan ra hinhinawas ga hatahuat ra gungunuama ta diet ira harahinsakaan narako ta Krais.
ACT 15:4 Ing diet ga haan huat aram Ierusalem ira matanaiabar na lotu, ira apostolo, ma ira kabinsit tano lotu kaia, diet ga karos leh diet. Ma Pol ma diet, diet ga hinawase um diet mekaia Ierusalem ta ira linge God gate gil narako tano udir pinapalim.
ACT 15:5 Io, ari ut na nurnuruan ta ira kaba Parisi diet ga taman tut ma diet ga tange, “Diet ing diet pai Iudeia, diet supi bia da kut ira palatamai diet. Ma diet supi mah bia da pir diet bia diet na mur ira harkurai tane Moses.”
ACT 15:6 Io, ira apostolo ma ira kabinsit tano lotu diet ga haan huat tika wara waworane iakan ra tinirih.
ACT 15:7 Menamur tano udiet taltalona winor, Pita ga taman tut um gaam tange hoken: “Kaba tasigu, muat nunure tar bia a bar tinahon nalua God ga gilamis leh iau nalamin ta muat bia iau ni hinawas ma no tahut na hinhinawas taar ta diet ing diet pai Iudeia waing diet na hadade ma diet naga nurnur.
ACT 15:8 Ma God, nong i nunure bakut tar ira bala dahat tikatikai, ga tar no Halhaliana Tanuo ta diet hoing ga gil ta dahat wara hamines bia i te bale leh mah diet.
ACT 15:9 Pa ga nes diet bia a mes diet ta dahat. Taie. Ga hagamgamatien ira tinge diet mah kanong diet ga nurnur.
ACT 15:10 Io, warah kaik muat gi wara walwalar God ing muat hapupusak ira ut na tinaram tano lotu ma tiga tirihuana kinakap nong dahat ma ira hintubu dahat, dahat pa ga tale bia dahat na pusak ie?
ACT 15:11 Taie! Dahat nurnur bia no Watong Jisas i tabar bia mon dahat ma no nilon tutun haruat at mon hoing i gil ta diet.”
ACT 15:12 Io, diet bakut kaia tano kis hulungai, diet ga kis kunkun ma diet ga hanhadade Banabas ma Pol. Dir ga harharamatur ta ira dadas na hakilang ma ira gingilaan na kinarup ing God ga gil narako tano udir pinapalim nalamin ta diet ing diet pai Iudeia.
ACT 15:13 Ing dir ga hapataam nianga Jemes ga tange hoken: “Muat hadade iau, kaba tasigu.
ACT 15:14 Saimon Pita i te hinawas taar ta ing God ga luena haminas no uno harmarsai. Ga haminas huo ing ga hatahuat leh tiga matanaiabar wara uno tus meram nalamin ta diet ing pai a Iudeia diet.
ACT 15:15 Ma iakan i hilau haruat ma ira nianga ta ira tangesot ing di pakat hoken:
ACT 15:16 ‘Menamur ta iakan iau ni tapukus ma iau ni ru hatut no hala na lotu tane Dawit. Iau ni ru hatutur habalin ira uno sumsubana ing i te tarup suur. Iau ni gil timaan habaling ie.
ACT 15:17 Io kaik, ira mes na matanaiabar diet na sisilih tano Watong, diet ing diet pai Iudeia ing iau te kap leh diet bia anugu.
ACT 15:18 No Watong i tange huo, aie nong ga hapalaine kaiken nalua sakit.’”
ACT 15:19 Io, Jemes ga tange, “Tano nugu ninaas at, iau lik bia waak dahat ra hapurpuruan diet ing diet pai Iudeia ing diet tahtahurus tupas God.
ACT 15:20 Iesen dahat na pakat balik tiga pakpakat wara hinhinawase diet bia diet pa na ien ta nian na hartabar ing ira palimpuo diet te hagahe. Ma da hinawase mah diet bia diet pa na gil ira sakana magingin na ninahon tika, ma bia diet pa na ien tiga linge ing di lut bing, ma bia diet pa na ien de.
ACT 15:21 Dahat na tange huo kanong warah di la be harpir laah ma ira harkurai ta Moses uta kaike ra linge narako ta ira kaba pise na hala tikatikai. Ga tur leh huo menalua sakit ma katin di la waswas kaike ra harkurai ta ira hala na lotu audahat ira Iudeia ta ira kaba Bung na Sinangeh.”
ACT 15:22 Io, ira apostolo ma ira kabinsit na lotu tika ma ira matanaiabar na lotu bakut, diet ga lik leh bia diet na kilam ta tunotuno mekaia nalamin ta diet wara tultule diet u Entiok tika ma Pol ma Banabas. Io, diet ga kilam airuo tunaan ing dir ga lualua taar nalamin ta ira haratasin narako ta Krais. Ira hinsa dir ne Iudas (di ga kilam ie bia Barsabas) ma Sailas.
ACT 15:23 Io, diet ga tule tikane dal ma kanin ra pakpakat: “Mehet ira apostolo ma ira kabinsit na lotu, ira hinsaka muat ta Krais, mehet tule ira numehet gungunuama ukaia ho muat ira hinsaka mehet narako tane Krais ing muat pai Iudeia mekaia Entiok, Siria, ma Silisia.
ACT 15:24 “Mehet te hadade bia ari tunotuno mekai ho het, diet ga habosbos ira numuat lilik ma ira nianga diet ga tange, kaik ira bala muat gaam tirih. Iesen mehet pa ga pir diet bia diet na gil huo.
ACT 15:25 Io, kaiken mehet te kap sen mon tiga lilik bia mehet na gilamis leh ari tunotuno. Ma mehet te tule dir ukatiga ho muat. Io, dir tika ma ira numehet iruo bilai na harwis sakit, Banabas ma Pol.
ACT 15:26 Ma kaik Banabas ma Pol, dir pa ga barbarahon uta ira udir nilon ta ira pakana bung di git wara bubu bing dir. Taie. Dir git papalim at wara gaiena no hinsana no udahat Watong Jisas Krais.
ACT 15:27 Io kaik, mehet te tule ne Iudas ma Sailas waing dir na ianga wara hatutun kaiken ra nianga ing mehet te pakat.
ACT 15:28 I tahut tano ninaas tano Halhaliana Tanuo ma mehet mah bia het pa na bul kore ta tirihana kinakap ta muat. A bar harkurai sen mon ken bia muat na mur.
ACT 15:29 Waak muat ra ienien ta nian ing di te tun hartabar me taar ta ira palimpuo. Waak muat ra ien de. Waak muat ra ien tiga linge ing di lut bing. Ma waak muat gil ra sakana magingin na ninahon tika. Bia muat na haan pas kaiken ra linge muat na lon takodas. Kaikek mon.”
ACT 15:30 Io, ira matanaiabar na lotu diet ga tule se dal ma dal ga hansur u Entiok. Dal ga tau haruatne ira matanaiabar tano lotu kaia ma dal ga tar no pakpakat ta diet.
ACT 15:31 Ing ira matanaiabar na lotu kaia diet ga was ie, diet ga guama pane ira nianga na harharagat.
ACT 15:32 Ma Iudas ma Sailas airuo tangesot mah dir. Ma dir ga tange ra haleng na nianga wara harharagat ma wara hadadas diet ira hinsaka dir ta Krais.
ACT 15:33 Ing a bar bung gate sakit dir kaia, ira harahinsakaan narako ta Krais ga tule se um dir ma ra malum bia dir na tapukus balin urau ho diet ing diet ga tule dir.
ACT 15:34 (-)
ACT 15:35 Iesen Pol ma Banabas dir ga kis taar at kaia Entiok. Ma dir tika ma ari mes, diet ga hauhausur ma diet ga hinhinawas tano nianga tano Watong.
ACT 15:36 Io, tiga bung namur Pol ga tange tane Banabas bia, “Dar gi haan balin wara kakol ira hinsaka dar ta ira taman ing dar gate harpir taar kaia ma no nianga tano Watong. Ma dar naga nes diet bia kana diet nganngan hohe.”
ACT 15:37 Banabas ga sip bia na lam Jon Mak tika ma dir ma sen bia Pol ga lik bia pai tahut wara lamlam ie kanong ga haan talur dir aras Pampilia ma pa ga haan tika ma dir wara gilgil haruatne no pinapalim.
ACT 15:39 Io, tiga tamat na nianga hargau ga hanhuat nalamin ta dir kaik dir gaam haan harbasia. Banabas ga lam leh Jon Mak ma dir ga kawaas ra mon u Saipras.
ACT 15:40 Iesen Pol ga gilamis leh Sailas ma dir ga haan laah namur bia ira harahinsakaan narako ta Krais diet gate tar dir uram hono harmarsai tano Watong.
ACT 15:41 Ma Pol ga hanhan kutus ira iruo hanuo Siria ma Silisia ma ga hadadas hani ira matanaiabar na lotu ta ira tamtaman.
ACT 16:1 Io, ma Pol ga haan u Derbe ma mekaia ga haan u Listara, ma tiga tunotuno na lotu no hinsana ne Timoti ga kiskis kaia. A Iudeia no pawasine ma ra ut na tinaram tano lotu ie. Iesen no ana sus ga tiga Grik ie.
ACT 16:2 Ira harahinsakaan narako ta Krais me Listara ma Aikoniam diet ga tange bia Timoti aie tiga bilai na tunotuno.
ACT 16:3 Pol ga sip bia na lam Timoti tika mei. Io, ga kut no palatamaine Timoti ma ga gil huo kanong warah ira Iudeia ing diet git kiskis ta kaike ra taman diet bakut diet ga nunure tar bia no ana sus a Grik ie.
ACT 16:4 Ing dal ga kakolkol haan ta ira taman dal ga hinhinawase hani ira ut na nurnuruan ta ira ula harkurai ing ira apostolo ma ira kabinsit na lotu aram Ierusalem diet gate bul bia diet na mur.
ACT 16:5 Io kaik, ira matanaiabar na lotu ta ira tamtaman diet ga kap dadas uta ira udiet nurnur ma ga tamtamat hanahaan ira udiet winawas ta ira kaba bungbung.
ACT 16:6 Pol ma ira hinturana dal ga haan hurbit tano hanuo Pirigia ma Galesia kanong no Halhaliana Tanuo gate tur bat dal bia dal pa na harpir ma no tahut na hinhinawas tano hanuo Esia.
ACT 16:7 Bia dal ga haan huat tano igah tano hanuo Misia dal ga walar bia dal na haan laka tano hanuo Bitinia, ma sen bia no Tanuo gar ta Jisas pa ga bale dal.
ACT 16:8 Io kaik, dal ga haan sakit Misia ma dal ga haan u Toroas.
ACT 16:9 Ta iakanong bung ra bung Pol ga nes tiga ninaas na tanuo ma ga nes tiga tunaan me Masedonia ma ga tur taar gaam sarsaring marmaris taar ta Pol hoken: “Mai ukai Masedonia ma nu me harahut mehet.”
ACT 16:10 Io, ing at mon Pol gate nes tar no ninaas na tanuo, metal ga taguro bia metal na haan u Masedonia kanong metal ga nunure leh bia God gate tau metal wara harharpir ma no tahut na hinhinawas taar ta diet kaia.
ACT 16:11 Metal ga kawaas ra mon me Toroas ma metal ga haan takodas u Samotares. Ma tano mes na bung metal ga haan u Niapolis.
ACT 16:12 Io, metal ga haan mekaia uram Pilipai, tiga tamat na pise na hala tano hanuo Masedonia. Ma ra halengin Rom diet gabe kis at kaia. Io, metal ga kis kaia ra bar bung.
ACT 16:13 Io, ra Bung na Sinangeh metal ga hansur mekaia tano pise na hala ma metal ga haan ures ra gagen taah. Metal ga hamaan bia ga mon tiga katon ira Iudeia diet la hananhuat tika kaia wara sinasaring. Metal ga kis ma metal gaam haburen nianga ta ira hahin ing diet ga kis hurlungen taar kaia.
ACT 16:14 Tikai ta diet ing diet ga hanhadade metal ne Lidia, ma aie tiga hahin nong git lalotu tupas God. Aie me Taiataira ma git suhsuhurane ra maal dardaraan. Ma no Watong ga papos no tingena bia na taram kilam ira nianga ing Pol ga tangtange.
ACT 16:15 Menamur bia aie ma ira tunotuno tano uno hala diet gate kap baptais taar, ga saring leh metal bia metal na haan ures hono uno hala. Ga tange hoken: “Bia ing mutal lik bia iau tiga tutun na ut na nurnuruan tano Watong, io, mutal mai uram tano ngasiagu ma mutal na kis kaia.” Ma ga hagut metal bia metal na haan ukaia.
ACT 16:16 Tiga bung bia metal ga hanahaan uras hono katon na sinasaring, metal ga harsomane tiga tultulai na hahin ma ga mon tiga sakana tanuo tana. No sakana tanuo git tartar ra dadas tana kaik gaam git hinhinawas ta ira linge na hanuat namur. Git hatahuat ra haleng kinewa sakit ma iakanong ra magingin wara udiet ing diet git kure tar ie.
ACT 16:17 No hahin ga mur leh metal ma Pol ma ga kakongane hani bia, “Dal kaiken ra tunotuno a tultulai dal tano God nong i lua harsakit. Ma dal hinhinawase muat tano ngaas God na halon muat tana.”
ACT 16:18 Ga gilgil hokaiken ra haleng na bung tuk Pol gaam malmalas um. Io kaik, gaam tahurus taar tano hahin ma ga tange tano sakana tanuo, “Tano hinsa Jisas Krais iau tange bia nu suur talur ie!” Ma kaik at mon no tanuo ga haan sukun ie.
ACT 16:19 Bia diet ing diet git palpalim mataan no hahin diet ga nunure bia no udiet ngaas na hatahuat kinewa gate pataam, diet ga palim kawase Pol ma Sailas. Ma diet gaam rahi dir ures hoira lualua aras tano tamat na katon na hinanhuat haruat.
ACT 16:20 Diet ga lam hawaat dir ukaia menalua ta ira ut na harkurai me Rom, diet gaam tange, “A Iudeia kaiken ra iruo tunaan ma dir hathatarahi purpuruan kai ra udahat pise na hala. Dir harharpir uta ira magingin ing pai haruat ma ira udahat harkurai. Dahat a so taman dahat me Rom ma dahat pai tale bia dahat na bale leh kaiken ra magingin ma bia dahat na mur.”
ACT 16:22 Ira halengin matanaiabar kaia, diet ga ianga pase mah Pol ma Sailas. Io, ira ut na harkurai diet ga hartula bia da diris ise ira udir maal ma bia da hadakdak dir ma ra dangadangat.
ACT 16:23 Ing diet gate hagahe tar dir ma ra haleng na harlawaat, diet ga se halaka dir uram ra hala na harpidanau. Ma diet ga tange hadadas tano tunotuno nong git balbalaure diet ing di ga wis kawase narako tano hala na harpidanau bia na mano bat timaan dir.
ACT 16:24 Bia gate hadade tar kaiken ra dadas na nianga, no ut na harbalaurai tano hala na harpidanau ga se halaka dir uram muk narako tano subaan nalamin tano hala na harpidanau ma gaam hakahe bat ira kaki dir nalamin ta ira tirihena daha.
ACT 16:25 Ra tingena bung Pol ma Sailas dir ga saasaring ma dir ga pirpirlat God ma ira garena. Ma ira mes ing di ga wis kawase narako tano hala na harpidanau, diet ga hanhadade dir.
ACT 16:26 Kaik at mon tiga dadas na kunakunar ga gune no burena no hala na harpidanau. Habir sakit ma ira matanangas tano hala ra harpidanau diet ga tamapapos ma ira dadas na hidihidi sakit ing di ga hakahe bat tar diet me ing diet kis narako tano hala na harpidanau ga tamalapus laah.
ACT 16:27 Ing no tunotuno nong ga balbalaure diet narako ra hala na harpidanau ga tangahun ma ga nes ira matanangas bia diet gate tamapapos, ga lik bia kaike ra tunotuno diet gate hilau. Io kaik, ga sasal leh no uno wise nong bia naga gil bing ie.
ACT 16:28 Iesen Pol ga karo ie hoken: “Waak u gilgil hagahe ugu! Mehet bakut mon ken!”
ACT 16:29 Io, no ut na harbalaurai tano hala na harpidanau ga tatau wara ta lulungo ma ga hilau raurawan laka gom a puko dadedar taar menalua ta Pol ma Sailas.
ACT 16:30 Io, ga lam hasur leh dir ures nataman ma ga tiri dir, “Ningar, iau ni gil sa kaik iau nigi hatur kawase no nilon tutun?”
ACT 16:31 Dir ga balu ie hoken: “Nu nurnur tano Watong Jisas kaik God naga halon ugu. Pai augu sen. Mutal tamaan bakut.”
ACT 16:32 Io, dir ga pir tar no nianga gar tano Watong tana ma ta ira tunotuno narako tano uno hala.
ACT 16:33 Ta iakanong at ra pakaan ra bung no ut na harbalaurai tano hala na harpidanau ga lam leh dir ma ga gis ira manua dir. Ma dal tamaan bakut, dal ga kap baptais kaik at.
ACT 16:34 Io, ga lam leh Pol ma Sailas uram hono uno hala ma ga tabar dir ma ra nian. Aie ma no uno hatatamaan bakut diet ga hung ma ra gungunuama kanong kaiken um diet gate nurnur tane God.
ACT 16:35 Ra malaan um ira ut na harkurai diet ga tule ira udiet tultulai uras tano ut na harbalaurai tano hala na harpidanau ma ken ra nianga: “Halangalanga ise kaike ra iruo tunaan.”
ACT 16:36 Io, no ut na harbalaurai tano hala na harpidanau ga tange ta Pol, “Ira ut na harkurai diet tula nianga bia iau ni hasur se mur ma ne Sailas. Kaiken i tale bia mur na haan um. Kaia, mur na haan tatohun.”
ACT 16:37 Ma sen bia Pol ga tange ta ira tultulai bia, “Diet pa ga tiri murmur mir ta dahin bia mir gil ra sakena bia taie. Mir te kap no kinilam bia airuo Rom mir iesen diet ga hadakdak bia balik mir ra matmataan na haleng. Io, diet ga se halaka mir tano hala na harpidanau. Ma kaiken diet wara tultule hamatian se mir? Taie tun! Kaike ra ut na harkurai at me Rom diet na hanuat ukai ma diet na me hasur se mir.”
ACT 16:38 Io, ira tultulai diet ga hinawase ira ut na harkurai ta kaiken ra nianga ma ing diet ga hadade bia Pol ma Sailas dir gate kap no kinilam bia a Rom dir, diet ga sam kahe ira kati diet.
ACT 16:39 Io, diet ga hanhuat ma diet ga ianga marmaris taar ta dir uta ing diet ga gil ma diet gaam lamus hasur dir meram ra hala na harpidanau. Ma diet ga saring dir bia dir na haan sukun um no pise na hala.
ACT 16:40 Ing Pol ma Sailas dir ga haan sukun no hala na harpidanau dir ga haan uram hono hala tane Lidia. Ma dir ga kis tika baak ma ira hinsaka dir ta Krais kaia ma dir gaam haragat diet. Io, dir ga haan laah um.
ACT 17:1 Io, ing dir ga haan sakit taar Ampipolis ma Apolonia dir ga hanuat Tesalonaika. Ma ga mon tiga hala na lotu udiet ira Iudeia kaia.
ACT 17:2 Haruat ma no uno magingin, Pol ga haan uram hono hala na lotu. Aitul a bung na Bung na Sinangeh ga harhargau tika ma ira matanaiabar uta ira nianga tane God ing di ga pakat. Ma ga hapalaine kaike ra nianga wara hatutun bia no Mesaia na kahe ra ngunngutaan ma na tut hut balin talur ra minaat. Io, ga tange hoken: “Iakan ra Jisas iau hinhinawase muat tana, aie no Mesaia.”
ACT 17:4 Ari ta diet ta ira Iudeia diet ga nurnur ta ira nianga tane Pol ma diet ga laka harahut dir ma Sailas. A halengin hinagalam diet ga gil mah huo tika ma ra haleng na Grik ing diet ga urur ta God.
ACT 17:5 Ma sen bia ari Iudeia diet ga bala ngungut taar ta Pol ma Sailas, kaik diet gaam lam haruatne leh ari gotgotuana meram tano subaan na hinanuat harso. Ma diet ga hangane leh tiga tamat na matanaiabar kaik diet gaam hatut purpuruan aram tano pise na hala. Diet ga hilor no hala tane Ieson wara silsilhe Pol ma Sailas waing diet na lamus hasur tar dir ta ira matanaiabar.
ACT 17:6 Iesen, ing diet ga nanaas puo taar tane ningar, diet ga rahi leh Ieson tika ma ari mes na harahinsakaan narako ta Krais uram ra matmataan ta ira lualua tano pise na hala. Ma diet ga kakongane bia, “Kaiken ra tunotuno ing dir te hatarahi ra haleng purpuruan ta ira katon bakut, kaiken dir te hanhuat mah ukai hono udahat pise na hala.
ACT 17:7 Ma ne Ieson i te me bale halaka leh dir tano ngasiana. Ma kaiken ra tunotuno bakut diet laklake ira harkurai tano tamat na lualua na gil harkurai sakit me Rom ma diet tangtange bia a mon tiga mes na tamat na lualua na gil harkurai kana, no hinsana ne Jisas.”
ACT 17:8 Ma kaiken ra nianga ga hapurpuruan ira bala diet ira halengin matanaiabar ma ira lualua tano pise na hala.
ACT 17:9 Io, diet ga hagut Ieson ma ira mes na ut na nurnuruan bia diet na gil tiga kunubus bia taie ta purpuruan baal hokaike na hanuat. Io, di ga waak se um diet.
ACT 17:10 Bia gate kankado, ira harahinsakaan narako ta Krais diet ga tule se tar Pol ma Sailas ures Beria. Ing dir ga hanuat kaia dir ga haan uram tano hala na lotu gar na Iudeia.
ACT 17:11 Ira Beria diet ga manga bilai ta ira Tesalonaika kanong ira udiet lilik ga manga tapapos. Ma ga palai bia diet ira mangana tunotuno huo kanong diet ga manga sip bia diet na kap leh no nianga. Ma ira kaba bungbung diet ga nes murmur timaan ira nianga gar ta God di ga pakat. Ma diet ga gil huo wara nunure bia Pol ga tangtange ra tutun bia taie.
ACT 17:12 Ma ra halengin ira Iudeia diet ga nurnur ma ari hinagalam na Grik ma haleng tunaan na Grik mah.
ACT 17:13 Io, ing ira Iudeia kenas Tesalonaika diet ga ser leh bia Pol ga harpir ma no nianga ta God arau Beria, diet ga haan mah ukaia wara hangane ira matanaiabar wara purpuruan.
ACT 17:14 Io, kaik at mon ira harahinsakaan narako ta Krais diet ga tule Pol ures na tes iesen Sailas ma ne Timoti dir ga kis taar at aram Beria.
ACT 17:15 Ma ira tunaan ing diet ga sakate ne Pol, diet ga tule kapis tar ie arau Aten. Ma Pol ga pir diet bia diet na hinawase Sailas ma Timoti bia dir na hanuat gasien ukaia ho ie. Io, diet gaam tapukus um.
ACT 17:16 Io, bia Pol ga kiskis kahe dir arau Aten, ga manga mismisien no balana bia ga nes no pise na hala ma ga hung ma no palimpuo.
ACT 17:17 Io kaik, aram narako tano hala na lotu udiet ira Iudeia ga harhargor ma ira Iudeia ma ira Grik ing diet ga urur ta God. Ma ta ira kaba bungbung ga gilgil mah huo aram narako tano tamat na katon na hinanuat haruat ma diet ing diet ga hananhuat ukaia.
ACT 17:18 Ma ari ta ira iruo ton mintatona tunotuno ing di ga kilam diet bia Epikurian ma Satoik diet ga me harhargor mah mei. Ma ari diet ga tiri bia, “Iakan ra gotgotuana i wara tangtange ra sa?” Ma ari diet ga tangtange, “I nanaas bia i harharpir uta ira tadaar makatiga ra mes na katon.” Diet ga tange hokaiken kanong Pol ga harharpir utane Jisas ma utano tuntunut hut sukun ra minaat.
ACT 17:19 Io, diet ga lamus halakai tano kis hulungai ta ira kaunsil di kilam ie bia Ariopagas. Ma diet ga tange tana bia, “Mehet sip bia het na palai ta iakan ra sigar harausur u iangianga utana.
ACT 17:20 Mehet tange huo kanong ari linge ing mehet hadade taam, diet manga mes ta mehet. Io kaik, mehet sip bia het na nunure ira kukuraina.”
ACT 17:21 (Io, ira tunotuno me Aten ma ira mes ing diet ga kiskis kaia, diet pa git gilgil ta linge. Iesen diet git balbalaan wara waworane ma wara hanhadade ira mangana sigara harausur.)
ACT 17:22 Io, Pol ga tur aram narako tano kis hulungai tano Ariopagas, gaam tange, “Tunotuno me Aten! Iau nes bia ta ira numuat kaba magingin muat la manga urur ta ira haleng na tadaar.
ACT 17:23 Iau tange huo kanong ing iau gota kai tano numuat pise na hala ma iau nes ira linge muat la lalotu tupas, io, iau nes leh mah tiga suuh na tun hartabar tupas ira tadaar. Ma tiga pakpakat kana tana i hoken: ‘Uram hono god nong dahat pai nunurei.’ Io, no linge nong muat la lalotu tupas ie ma muat pai nunurei, kaiken um iau ni hinawase muat tana.
ACT 17:24 “No God nong ga gil no ula hanuo ma ira kaba mangana linge tana, aie no Watong tano mawe ma no pise mah. Ma pai la kiskis ta ira hala na lotu ing a tunotuno mon i gil.
ACT 17:25 Pai supi tiga linge kaik a tunotuno naga tabar ie me kanong aie at nong i tabar ira tunotuno bakut ma no lon, ma no manmanasung, ma ira kaba linge bakut.
ACT 17:26 Ma ga hatahuat ira kaba hunhuntunaan bakut me katiga tiga tunaan bia diet na lon tano kudulena ula hanuo. Ga puo ira pakana bung ing diet ira huntunaan diet na lon ine. Ma ga igah mah ira hanuo tus ing diet na kis kaia.
ACT 17:27 God ga gil huo waing ira matanaiabar diet naga silihei ma diet naga nes tupas leh dak ie ing diet paaparasum haan utana. Iesen pai iakana tapaka ta dahat tikatikai.
ACT 17:28 I tale bia ni tange huo kanong dahat lon tana, dahat hanahaan tana, ma a tunotuno dahat tana. I haruat mon mah ma ing a numuat ari ut na pit nianga diet tange, ‘Dahat mah, a natine God dahat.’
ACT 17:29 Io kaik, bia ing a nati God dahat, dahat pa na lik bia God aie hoing ra palimpuo na siliwa, gol, bia a haat ing a tunotuno i gil ma ra nudiet mintot.
ACT 17:30 Nalua God pa ga lik bia na gil ta linge ing ga nes kaiken ra tintalen na ba. Iesen kaiken um i tangtange hadadas ta ira matanaiabar bakut ta ira matahu katon bia diet na lilik pukus.
ACT 17:31 I tangtange huo kanong i te puo tar tiga bung bia na gil tiga takodasuana harkurai tano ula hanuo. Ma na tar iakan ra pinapalim tano limana no tunaan nong i te tibe tar ie bia na gil ie. Ma God i te hatutun tar iakan ta ira tunotuno bakut hoken. Ga hatut iakano tunaan sukun ra minaat.”
ACT 17:32 Ma ing diet ga hadade ira nianga utano tuntunut hut sukun ra minaat, ari diet ga ianga wiis. Iesen ari ta diet, diet ga tange, “Mehet sip bia mehet na hadade habalin ira num nianga uta iakan ra linge.”
ACT 17:33 Io, Pol ga haan laah mekaia nalamin ta diet.
ACT 17:34 Iesen a bar tunotuno diet ga kap usurane ira nianga ta Pol ma diet ga nurnur. Tikai ta diet ne Daionisias, aie tikai ta iakano Ariopagas. Ma narakoman mah ta diet ga mon tiga hahin hinsana ne Damaris ma ari mes.
ACT 18:1 Namur um Pol ga haan talur Aten ma ga haan u Korin.
ACT 18:2 Ma ga harsomane tiga Iudeia hinsana ne Akuila kaia. A so taman ie me Pontas, ma ga sigara hanuat taar mon me Itali tika ma no uno hahin ne Pirisila kanong warah ne Kolodias, no tamat na lualua na gil harkurai sakit gar Rom, ga tule se tar ira Iudeia ing diet ga kiskis aras Rom. Ma Pol ga haan wara nesnes dir.
ACT 18:3 Io, ga kis ma ga papalim tika ma dir kanong aie ga tiga ut na gil palpalih ma ra maal hoing dir.
ACT 18:4 Ma ta ira kaba Bung na Sinangeh git harhargor tano hala na lotu gar na Iudeia ma ga walwalar bia na halawen ira Iudeia ma ira Grik bia diet na haut leh ing ga tangtange.
ACT 18:5 Io, ing Sailas ma Timoti dir ga hanuat me Masedonia, Pol ga balaan sen mon wara hinarpir. Ga manga hinhinawas taar ta ira Iudeia bia Jisas aie no Mesaia.
ACT 18:6 Sen bia ira Iudeia diet ga sukuane Pol ma diet ga tange hagahei. Io kaik, Pol gaam pasar se tar ira kaabus ta ira uno maal wara hamines bia ga tibe pinpin diet. Ma ga tange, “Bia God na hapidanau muat, no burena iaat ke ho muat! Iau at, iau pa ni kahe ra tinirih uta muat. Tur leh um ma kaiken iau ni haan taar ta diet ing pai a Iudeia diet.”
ACT 18:7 Io, Pol ga haan talur um no hala na lotu gar na Iudeia ma ga haan taar tano hala aun tiga tunaan, no hinsana ne Titius Iastus, tiga ut na lotu tupas God. Ma no ngasiana git tur hutaten taar iakano hala na lotu gar na Iudeia.
ACT 18:8 Kirispus, no lualua mekaia tano hala na lotu audiet ira Iudeia, ma no uno hatatamaan bakut diet ga nurnur tano Watong. Ma ra halengin Korin diet ga hadade no hinhinawas ma diet ga nurnur ma diet ga kap baptais.
ACT 18:9 Io, tiga bung ra bung Pol ga nes tiga ninaas na tanuo ing no Watong ga tange tana bia, “Waak um ugu ra bunurut balin. Nu iangianga iaat. Waak u kiskis kunkun kanong bia iau kis tika taar ma ugu. Taie tikai na tut na hinarubu ma ugu bia naga helar taam kanong a nugu mon haleng na matanaiabar kanik ta iakan ra pise na hala.”
ACT 18:11 Io, Pol ga kis kaia tiga tinahon ma subana ma ga hauhausur diet tano nianga tane God.
ACT 18:12 Ing Galio ga tamat na ulkukuha taar ares Akaia, ira Iudeia diet ga tur tika wara suksukuane Pol ma diet ga lamus halakai tano katon na gil harkurai.
ACT 18:13 Io, diet ga tange, “Iakan ra tunaan i halhalawen ira matanaiabar wara lalotu tupas God ta ira mangana ngaas ing i lake ira harkurai me Rom.”
ACT 18:14 Io, ing Pol gabe na ianga, Galio ga tange ta ira Iudeia hoken: “Bia muat ira Iudeia muat naga kap hawaat tiga hartutung uta tiga ronga tutun, bia a hansik ie bia a tamat ie, io, gor takodas bia iau ni kis ma ni hadade muat.
ACT 18:15 Iesen iakan ra linge i kasar ra tiniri uta ira hinsang, a nianga mon, ma ira numuat harkurai at. Io kaik, muat at, muat na hatakodasne iakan ra purpuruan. Iau pai sip bia iau ni gil harkurai ta ira mangana linge ho iakan.”
ACT 18:16 Io, ga bat se diet tano katon na gil harkurai.
ACT 18:17 Io, diet ga palim kawase leh Sostenis no lualua tano udiet hala na lotu, diet gaam bubui menalua tano katon na gil harkurai. Iesen Galio pa ga song leh kaike.
ACT 18:18 Io, Pol ga kis taar baak um ares Korin. Ma namur ga haan talur ira hinsakana ta Krais kaia bia na kawaas tiga mon u Siria. Ma Pirisila ma Akuila dir ga sakatei. Nalua ta ing gaam kawaas laah tiga mon ares Senkiria, ga tange bia da pung se tar no hine uta tiga harahora ga gil ie.
ACT 18:19 Io, dal ga hanuat Epesas ma Pol ga haan talur Pirisila ma Akuila kaia. Ma aie at ga laka tano hala na lotu gar na Iudeia ma ga wor tika ma ira Iudeia.
ACT 18:20 Ma bia diet ga saring ie bia na kis baak ma diet, ga malok.
ACT 18:21 Sen bia ing ga haan talur diet ga sasalim bia na tapukus balin bia a sinisip ta God huo. Io, ga haan laah um ra mon me Epesas.
ACT 18:22 Ing ga hanuat Kaisaria ga haan ma ga nes leh baak ira matanaiabar na lotu, ma namur ga hansur u Entiok.
ACT 18:23 Namur tano uno kinkinis aras Entiok Pol ga haan laah mekaia ma ga haan hurbit tano hanuo Galesia ma Pirigia, ma ga hadadas hani ira ut na tinaram tano lotu.
ACT 18:24 Ing Pol ga gilgil hani hokaiken, tiga Iudeia a hinsana ne Apolos, a so taman ie me Aleksandaria, ga hanuat Epesas. Aie tiga ut na mintot ma ga manga madaraas pane ira nianga tane God ing di ga pakat.
ACT 18:25 Ma gate kap harausur taar tano ngaas gar tano Watong ma git mamahien ira uno nianga. Ga nunure sen mon no pinapalim na baptais ta Jon iesen ira uno harausur uta Jisas ga takodas balik.
ACT 18:26 Ga hatahun nianga ma ra balaraan aram narako tano hala na lotu gar na Iudeia. Iesen ing ne Pirisila ma Akuila dir ga hadadei, dir ga lamus ie uram ra udir hala ma dir ga palas timaan no ngaas gar ta God taar tana.
ACT 18:27 Bia Apolos ga sip bia na haan u Akaia ira harahinsakaan narako ta Krais diet ga haragat ie ma diet ga tule tiga pakpakat ukaia ta ira ut na tinaram tano lotu bia diet na bale leh ie. Ing ga hanuat ga manga harahut diet ing God gate tabar bia mon diet ma ra nurnur.
ACT 18:28 Io, no uno harharahut taar ta diet kan. Ga manga banus bat ira ha diet ira Iudeia ma ra dadas na nianga na hargor ra matmataan na haruat. Ma ga gil huo hoken. Meram narako ira nianga tane God ing di ga pakat, Apolos ga hatutun bia Jisas aie no Mesaia.
ACT 19:1 Bia Apolos kana ga kiskis Korin, Pol ga mur no ngaas nalamin tano hanuo gaam a hanuat Epesas. Ma ga harsomane rari ut na tinaram tano lotu kaia gaam tiri diet, “Muat ga hatur kawase no Halhaliana Tanuo ing muat ga nurnur?” Diet ga balui bia, “Taie, het pa ga hadade ta dahin bia a mon tiga Halhaliana Tanuo kana.”
ACT 19:3 Io, Pol ga tiri diet bia, “Ma ra baptais na sa iakanong muat ga kap ie?” Diet ga balui, “No baptais gar ta Jon.”
ACT 19:4 Ma Pol ga tange, “No baptais gar ta Jon a baptais na lilik pukus mon ie. Ga tange ta ira Israel bia diet na nurnur ta nong na hanuat namur tana, ma aie iakanong ne Jisas.”
ACT 19:5 Bia diet ga hadade tar hokaike diet ga kap baptais tano hinsana no Watong Jisas.
ACT 19:6 Ing Pol ga bul ira limana ta diet no Halhaliana Tanuo ga hansur taar ta diet ma diet ga ianga ma ra mes na nianga ma diet ga ianga na tangesot mah.
ACT 19:7 Ma ra sangahul ma iruo diet kaike ra tunaan.
ACT 19:8 Ma Pol ga haan laka tano hala na lotu audiet ira Iudeia ma ga iangianga ma ra balaraan kaia haruat ma ra itul a teka. Ga hargor ma diet ma ga walwalar wara hatutun tar no kinkinis na harkurai ma ra harbalaurai gar ta God ta diet.
ACT 19:9 Ma sen bia ari ta diet, diet ga patnau ma diet ga malok bia diet na nurnur. Ma diet ga ianga hagahe no Ngaas gar tano Watong ra matmataan na haruat. Io kaik, Pol gaam haan talur diet. Ga lamus leh ira ut na tinaram tano lotu, diet gaam git wawor tika ta ira kaba bung tano hala na harausur tane Tiranus.
ACT 19:10 Diet ga gilgil huo gaam haruat ma ra iruo tinahon, kaik a halengin matanaiabar sakit ing diet ga kiskis tano hanuo Esia, ira Iudeia ma diet ing pai a Iudeia diet, diet ga hadade no nianga gar tano Watong.
ACT 19:11 Ma God ga gil ra dadas na linge na kinarup sakit narakoman tano pinapalim ta Pol, kaik ira katona maal at mon mah ing Pol ga sigire di git kapkap leh wara halhalon ira ina minaset. Ma ira udiet minaset ga pataam, ma ira sakana tanuo diet ga suur laah ta kaike ra tunotuno.
ACT 19:13 Io, ari Iudeia ing diet ga hanahaan hurhurbit wara tultule hasur se ira sakana tanuo, diet ga walar bia diet na kilam no hinsana no Watong Jisas wara hashasur se ira sakana tanuo ta ira tunotuno. Diet ga tangtange hoken: “Tano hinsa Jisas nong Pol i la harharpir utana, iau tange taam bia nu suur laah!”
ACT 19:14 Ma a liman ma iruo na natine Sewa, tikai ta ira ut na pakila lotu ta ira Iudeia, dal ga gilgil hokaiken.
ACT 19:15 Tiga bung um no sakana tanuo ga balu dal hoken: “Jisas iau nunure tar ie, ma Pol iau palai tana, iesen mutal, sige mutal?”
ACT 19:16 Io, no tunotuno nong no sakana tanuo ga sasoha taar tana ga karwas tar ta dal ma ga bu hagahe tun at dal, kaik dal gaam hilau tawaturia suur tano hala ma ra ina manmanuo dal.
ACT 19:17 Ing ira Iudeia ma ira Grik mekaia Epesas diet ga ser iakan ra linge, a but na bunurut ga kap diet ma diet ga manga urur tano hinsana no Watong Jisas.
ACT 19:18 Ma a haleng ta diet ing diet ga nurnur, diet ga hananhuat diet ga me haphapuasne ira udiet magingin sakena ra matmataan na haruat.
ACT 19:19 Io, a haleng ing diet ga ut na ser magirmagir baak, diet ga kap hawaat hurlungen ira nudiet pakpakat na pakpakilai, di gaam tun tiga iaah ra matmataan na haruat. Bia di ga was haruatne ira mata diet kaike ra linge, ga haruat ma ra liman sangahul na arip na kinewa.
ACT 19:20 Io, no nianga tano Watong ga manga haan harbasia huo ma ga tamtamat hanahaan ma ra dadas.
ACT 19:21 Namur ta ing kaiken ra linge gate hanuat taar, no Tanuo ga halilik Pol bia na haan tano hanuo Masedonia ma no hanuo Akaia ma naga hanuat Ierusalem. Ma Pol ga tange, “Bia iau ni a huat laah kaia, iau ni kol at mah Rom.”
ACT 19:22 Io, ga tule ra iruo ta ira uno ut na harharahut, ne Timoti ma ne Erastas, uras Masedonia. Ma aie ga kis baak um kaia tano hanuo Esia.
ACT 19:23 Ta iakano ra pakana bung tiga tamat na purpuruan ga hanuat utano Ngaas gar tano Watong.
ACT 19:24 Ma ga mon tiga ut na pakila linge ma ra siliwa, hinsana ne Demitirius. Git kapkap ra siliwa ma gaam git gilgil ira nat na malalarine no hala na lotu tane Atemas no udiet hahin na tadaar. Ma no uno pinapalim ga hatahuat tar ra haleng na kinewa wara uta diet ira mes na ut na pakila linge.
ACT 19:25 Ga tatau hulungan leh diet tika ma ari mes na tunaan ing ira udiet pinapalim ga papet na haruat ma no uno, ma ga tange hoken: “Kaba tunotuno, muat nunure tar bia dahat palpalim leh ra haleng kinewa ta iakan ra udahat pinapalim.
ACT 19:26 Ma muat te nes ma muat te hadade ing iakan ra tunotuno Pol i gilgil. I tangtange bia ira palimpuo ing a tunotuno i gil pai a god tutun kaike. Kaik, i te lamus habato leh ra haleng tunotuno mekai Epesas ma ta iakan ra kudulena hanuo Esia.
ACT 19:27 I nanaas taar bia no udahat pinapalim na kap sakana hinsang. Ma pai iakan sen mon. Taie. I nanaas taar mah bia da taklain tano but na hala na lotu tane Atemas no udahat tamat na hahin na god. Ma uta Atemas at nong dahat la lalotu tupas ie ta ira katon bakut ta iakan ra hanuo Esia ma tano kudulena ula hanuo mah, da bul hasur no tamat na minarine.”
ACT 19:28 Bia diet ga hadade hokaiken diet ga manga ngalngaluan sakit ma diet ga hatahun kunup bia, “Atemas nong mekai Epesas, a tamat sakit ie.”
ACT 19:29 Pa ga halis ma no kudulena pise na hala gate hung ma ra harat. Ira matanaiabar diet ga palim kawase leh ne Gaius ma ne Aristarkus, ira iruo tunaan ing dir ga sakate hawaat Pol meres Masedonia, diet gaam hartaguniguni laka tano but na subaan na itama.
ACT 19:30 Pol ga sip bia na laka tupas ira matanaiabar ma sen bia ira ut na tinaram tano lotu diet pa ga balei.
ACT 19:31 Ari a ulkukuha mah ta iakano hanuo, ira harwis ta Pol, diet ga tula nianga taar tana ma diet ga sarsaring ie ma ra marmaris bia waak i laklaka ta iakano but na subaan na itama.
ACT 19:32 Ira matanaiabar kaia narako diet ga nguanguo harbasia. Ari diet ga kupkupuane tiga mangana linge ma ari diet ga kupkupuane ra mes. Ma ra haleng ta diet, diet pa ga palai bia warah tun at kaik diet gaam hanuat hurlungen taar kaia.
ACT 19:33 Ira Iudeia diet ga sun ne Aleksanda uram nalua ma ari matanaiabar diet ga kakongana nianga taar tana wara pirpir ie ta ing na tange. Io, ga tah pam ira matanaiabar bia diet na kis kunkun ma naga hinawase hapalaine diet ta iakan ra linge.
ACT 19:34 Iesen ing diet ga lik hapalaine leh bia Aleksanda a Iudeia ie, diet bakut diet ga kakongane tikane bia, “Atemas nong mekai Epesas, a tamat sakit ie!” Diet ga gilgil huo gaam haan ra talona hanuo.
ACT 19:35 Io, tiga ulkukuha ta iakano pise na hala ga hamarur diet ma gaam tange, “Tunotuno mekai Epesas, ira matanaiabar bakut tano ula hanuo diet nunure tar bia no pise na hala Epesas i la balaure tar no hala na lotu tano tamat na hahin na god Atemas ma no malalarine nong ga puko suur meram ra mawe!
ACT 19:36 Taie tikai i haruat wara harharus ise kaiken ra tutun! Io kaik, i tahut bia muat na matien ma waak muat lik bia muat na harangos wara gilgil ta linge.
ACT 19:37 Kaiken ra tunotuno diet pai kinau leh tiga linge ta ira hala na lotu ma diet pai pinas hagahe no udahat hahin na god iesen muat te lam hawaat balik diet ukai.
ACT 19:38 Io kaik, ing bia ne Demitirius ma ira hinturana diet bala ngungut taar ta tikai, io, a mon ut na harkurai kana wara gil harkurai. Ma na haruat bia diet na hapuasne ira udiet hartutung kaia.
ACT 19:39 Ing bia ta linge baak mah kana muat sip bia muat na tange hawaat, io, da hatakodasne kaike narako tiga mes na kis hulungai nong i haruat ma ira udahat harkurai.
ACT 19:40 Iau tange huo kanong kaiken um i nanaas bia dahat te baan taar ra kuas pane iakan ra purpuruan i te hanuat katin ing bia da be lik bia da tung dahat utana. Bia ing na ngan huo, dahat pai tale bia dahat na hinawas bia warah kaik iakan ra sakana kis hulungai i hanuat kanong taie ta burena.”
ACT 19:41 Io, ing ga tange tar hokaiken ga tule harbasiane um ira matanaiabar tano kis hulungai.
ACT 20:1 Io, bia no purpuruan gate pataam, Pol ga hartula uta ira ut na tinaram tano lotu. Ma ing gate haragat tar diet, ga lulu taar um ma diet ma gaam tur leh no uno hinahaan uras Masedonia.
ACT 20:2 Ga hananhaan ta iakano hanuo ma ga harharagat hani ira matanaiabar tuk gaam hanuat um Gris.
ACT 20:3 Ma ga kis kaia aitul a teka. Ira Iudeia diet ga harpingit wara hagahei tano pakana bung ga wara kap mon u Siria, kaik gaam lik balik bia na haan tapukus nalamin tano hanuo Masedonia.
ACT 20:4 Ma dal kaiken ing dal ga sakatei: Sopater no natine Pirus nong me Beria, ne Aristarkus ma Sekundus me Tesalonaika, ne Gaius me Derbe, Timoti mah, ma Tikikus ma Toropimus meram tano hanuo Esia.
ACT 20:5 Iakan ra kaba tunotuno dal ga lua laah, ma dal ga kis kawase mir arau Toroas.
ACT 20:6 Iesen mir, mir ga taman tut laah ra mon me Pilipai namur tano Nian na Beret pai la Laalat, ma ra liman na bung namur mir ga hanuat taar ta iakano mes na kabaan arau Toroas. Ma het ga kis ra liman ma iruo na bung kaia.
ACT 20:7 Tano luena bung tano wik het ga hanuat tika wara ienien no beret tano lotu. Ma Pol ga ianga ta ira tunotuno tuk gaam tingena bung kanong ga wara hinahaan tano bung namur.
ACT 20:8 Mehet ga kis hurlungen taar aram naliu tano subaan tiga hala. Ma ga mon haleng lulungo kaia.
ACT 20:9 Tiga marawaan, hinsane Iutikus, ga kis kora taar tiga matana kalangar ma gaam sumsumela tutur kaia ing Pol kana ga harsasokane ra nianga. Ing ga kubaba sangsangin um, ga puko suur mekarama naliu sakit ures napu ra pise ma diet ga tatik leh um ie ma gate maat.
ACT 20:10 Io, Pol ga hansur gaam noh kora tano marawaan ma ga dit ie. Io, ga tange, “Waak muat burut. I te lon!”
ACT 20:11 Io, Pol ga hanut baal uram naliu ra hala ma ga pidik beret ma ga iaan. Ma namur bia gate malane tar ie ma kana ga iangianga ga haan laah um.
ACT 20:12 Io, ma ira tunotuno diet ga lamus leh um no marawaan ma ra lilonai ma iakan ra linge ga manga habaibai diet.
ACT 20:13 Io, het ga lua ukatiga hono mon ma het ga haan tana u Asos, bia het na kap basie Pol kaia. Ga tange bia het na gil huo kanong ga wara hinahaan napu ukaia.
ACT 20:14 Ma ing ga kot leh het ares Asos het ga kap basie leh ie ma het gaam haan u Mitilini.
ACT 20:15 Tano mes na bung het ga taman tut mekaia ma het ga hanuat tiga katon hutet ta Kios. Io, tano bung namur het ga kutus u Samos ma tano bung namur het ga hanuat Miletus.
ACT 20:16 Pol gate pingit tar bia na haan sakit Epesas kanong ga malok bia na madung kaia ra hanuo Esia kanong bia ga harangos bia na hanuat Ierusalem. Ma ing na talei ga sip bia na hanuat nalua tano Bung na Pentikos.
ACT 20:17 Io, Pol ga hartula me Miletus uta ira kabinsit tano lotu Epesas.
ACT 20:18 Ing diet ga hanuat ga tange ta diet, “Muat nunure tar ing iau ga lon huo tano kudulena pakana bung iau ga kiskis ma muat, tur leh tano luena bung iau ga hanuat ta iakan ra hanuo Esia.
ACT 20:19 A tutun bia iau ga harsomane ra dadas na tinirih ing ira Iudeia diet git harharpingit bia diet na hagahe iau, iesen iau ga papalim tano Watong ma ra tamat matien na bala ma ra luur na matagu.
ACT 20:20 Muat nunure tar bia ing iau ga harharpir taar ta muat, iau pa ga suhe tiga linge ing ga tale wara harharahut muat. Iesen iau te hausur muat ra matmataan na haruat ma narakoman ta ira hala mah.
ACT 20:21 Iau te ianga dadas ta ira Iudeia ma diet ing diet pai Iudeia bia diet na lilik pukus ma diet na tahurus taar ta God ma diet na nurnur tano udahat Watong Jisas.
ACT 20:22 “Ma kaiken, no Halhaliana Tanuo i halilik iau bia iau ni haan uram Ierusalem ma iau pai nunure bia asa na hanuat taar tagu kaia.
ACT 20:23 Iau nunure sen tar mon bia ta ira kaba pise na hala bakut iau haan kaia, no Halhaliana Tanuo i la hakatom iau bia a hala na harpidanau ma ra hinelar i la kis kawase tar iau.
ACT 20:24 Ma sen bia, utagu iaat, iau lik bia no nugu lon a linge bia ie. Iau palim tar iakan ra lilik waing nigi manga mangason pane iakan ra pinapalim no Watong Jisas ga tar ie tagu, nigi hapataam ie. Ma no nugu pinapalim aie wara hinhinawas utano tahut na hinhinawas tano harmarsai ta God.
ACT 20:25 “Nalua iau ga harharpir haan ta muat utano kinkinis na harkurai ma ra harbalaurai ta God. Iesen kaiken iau nunure tar bia taie tikai ta muat na nes habaling um iau.
ACT 20:26 Io kaik, iau hinawase muat katin bia iau pa ni kahe ra tinirih uta muat tikatikai bia ing God na hapidanau tiga nong ta muat.
ACT 20:27 Ma iau tange huo kanong iau pa ga malok bia ni hinawase muat tano kudulena sinisip ta God.
ACT 20:28 Muat harbalaurai at ta muat ma muat balaure mah ira matanaiabar bakut gar ta God. Diet hoing ira sipsip ing diet supi ra ut na harbalaurai ma no Halhaliana Tanuo i te bul muat bia a kabinsit na lotu muat wara nesnes mur diet. Io kaik, muat na ut na harbalaurai tano lotu gar ta God nong ga kul leh ie ma no minaat tano Natine at.
ACT 20:29 Iau nunure tar bia menamurugu a sakana tunotuno ing ira udiet tintalen i haruat ma ira ngangaruana paap rakaia diet na hanuat nalamin ta muat ma diet na hagahe kaiken ra matanaiabar na sipsip.
ACT 20:30 Ma ari tunotuno baal at mon ta muat, diet na tur huat ma diet na pukusane nora tutun wara lamlamus leh ari ta kaiken ra ut na tinaram tano lotu bia diet na mur diet.
ACT 20:31 Io, muat harbalaurai timaan! Muat na lik leh bia iau pa git sasangeh wara hakatom muat ta ira kaba bung ra bung ma ra kasakes mah. Ma iau git gilgil huo tika ma ra but na ngunngutaan ma ra tinirih haruat ma ra itul a tinahon.
ACT 20:32 “Io, ma kaiken um iau tar muat tano harbalaurai ta God ma tano harbalaurai mah tano hinhinawas tano uno harmarsai nong i haruat wara hathatur hadadas muat. Ma iakan ra hinhinawas i haruat mah wara tamtabar muat ma ira haridaan God i tagure tar wara uta diet ing i te hasisingen diet wara uno tus. Muat na kap kaike kanong muat kana nalamin ta diet.
ACT 20:33 Pa ga sakena no tingegu uta ira kinewa bia ira maal gar tikai.
ACT 20:34 Muat at, muat nunure tar bia iau ga papalim ma kaiken ra iruo limagu wara uta ira nugu sunupi ma ira sunupi ta ira hinturagu.
ACT 20:35 Ta ira kaba linge iau ga gil, iau ga hamines ta muat bia dahat na harahut at ira maris ma ira mangana dadas na pinapalim hokaiken. Ma iau ga hamines ta muat mah bia dahat na lik leh ira nianga tano Watong Jisas at ing ga tange hoken: ‘Nong i hartabar i manga daan ta nong di tabar ie ma ta linge.’”
ACT 20:36 Bia gate tange tar kaiken Pol ga singa bukunkek ma ga tutudung tika ma diet bakut gaam sasaring.
ACT 20:37 Diet bakut diet ga suah ie, diet gaam rapa ie ma diet ga lusung ie.
ACT 20:38 Ma no linge diet ga manga tapunuk tana, no nianga ta Pol bia diet pa na nes habaling ie. Io, diet ga sakate um ie uras tano mon.
ACT 21:1 Io, ma ing het gate haan talur tar um diet, mehet ga kawaas tiga mon, mehet gaam haan takodas u Kos. Tano mes na bung mehet ga haan u Rodes ma mekaia het ga hanuat Patara.
ACT 21:2 Io, het ga nes leh tiga mon ma ga wara hinahaan u Ponisia, io, mehet ga kawaas tana ma mehet gaam haan laah.
ACT 21:3 Bia ing het gate hanuat harapuasa ma Saipras mehet ga haan menamur tana u Siria. Mehet ga sapa Tair bia daga hasur se ira kinakap tano mon kaia.
ACT 21:4 Ma ing mehet ga haan tupas ira ut na tinaram tano lotu kaia mehet ga kisi ra liman ma iruo na bung tika ma diet. Tara haphapuasnai tano Halhaliana Tanuo diet ga hinhinawase Pol bia waak i hanahaan uram Ierusalem.
ACT 21:5 Ma iesen bia ing no numehet pakana bung na kinkinis kaia gate haruat, mehet ga haan laah wara hinahaan baling tano numehet hinahaan. Ma ira ut na tinaram tano lotu bakut tika ma ira udiet hahin ma ira nati diet, diet ga haan tika ma het sukun no pise na hala ures na wasasar ma het bakut het ga singa bukunkek ma het ga sasaring kaia.
ACT 21:6 Io, mehet ga lulu taar um, ma mehet gaam kawaas tano mon. Ma diet, diet ga tapukus taar um tano udiet taman.
ACT 21:7 Io, mehet ga haan baling laah tano numehet hinahaan me Tair ma mehet ga sapa Tolemas. Ma kaia, het ga haatne leh ira hinsaka mehet ta Krais ma mehet ga kis tika ma diet tiga bung.
ACT 21:8 Tano mes na bung mehet ga haan talur diet ma mehet ga hanuat Kaisaria. Ma mehet ga kis kaia tano hala tane Pilip no ut na harpir tano tahut na hinhinawas. Ma aie tikai ta ira liman ma iruo na tunotuno ing di ga gilamis diet nalua wara harharahut tano lotu.
ACT 21:9 Ma ga mon ra ihat na lala na nat na hahine ing dal git iangianga na tangesot.
ACT 21:10 Bia ing het gate kisi ra bar bung kaia, tiga tangesot hinsana Agabas ga hansur me Iudeia.
ACT 21:11 Ga hanuat ukaia ho mehet ma gaam kap leh no taltalin tane Pol. Io, ga wis ira iruo limana ma ira iruo kakine at mah mei ma gaam tange hoken: “No Halhaliana Tanuo i tange bia hokaiken kaik ira Iudeia meram Ierusalem diet na wis no tunotuno auno iakan ra taltalin ma diet na tar ie ta ira luma diet ing diet pai Iudeia.”
ACT 21:12 Bia ing mehet ga hadade kaiken, mehet ma ira tunotuno kaia, mehet ga suah taar tane Pol bia waak ie ra hinahaan uram Ierusalem.
ACT 21:13 Io, ga babalu bia, “Waak muat susuah ma waak muat hatapunuk iau! Iau taguro taar bia da wis iau ma iau taguro taar mah wara minaat kaia Ierusalem wara utano hinsana no Watong Jisas.”
ACT 21:14 Ma ing mehet ga tingtigal puoi, mehet ga sangeh ma mehet ga tange, “Asa ing no Watong i sip bia na hanuat, io, i tahut bia na ngan at huo.”
ACT 21:15 Namur um, mehet ga tagure ira numehet linge ma mehet gaam tur leh no numehet hinahaan uram Ierusalem.
ACT 21:16 Ma ari ut na tinaram tano lotu me Kaisaria diet ga sakate mehet ma diet ga lamus mehet uram tano hala tano tunotuno nong het ga wara kinkinis mei, hinsana ne Nason. Aie me Saipras ma menalua at aie tiga ut na tinaram tano lotu.
ACT 21:17 Ma bia ing mehet ga hanuat aram Ierusalem ira hinsaka mehet ta Krais kaia diet ga guama pane leh het.
ACT 21:18 Ma tano mes na bung Pol tika ma het bakut mehet ga haan wara nesnes Jemes. Ma ira kabinsit tano lotu diet ga kis bakut taar.
ACT 21:19 Bia ing Pol gate lulu taar ma diet, ga hamatur um diet ta ira linge bakut ing God ga gil narako tano uno pinapalim taar ta diet ing diet pai Iudeia.
ACT 21:20 Bia ing diet ga hadade huo diet ga pirlat God. Io, diet ga tange ta Pol, “Tasi mehet, u nunure bia haleng na arip na Iudeia diet te nurnur ma diet bakut diet bala gaas wara murmur ira harkurai ta Moses.
ACT 21:21 Sen bia diet gate ser leh bia u la hauhausur ira Iudeia bakut kenas ta ira hanuo ta diet ing diet pai Iudeia bia diet ira Iudeia diet na tahurus talur ira harkurai ta Moses. Ma diet gate ser leh mah bia u la tangtange ta ira Iudeia bia waak diet kutkut ira palatamai diet ira udiet nat na bulu ma waak diet ra murmur ira udahat magingin.
ACT 21:22 Io, dahat na gil um ra sa? Diet na nunure leh at bia u te hanuat.
ACT 21:23 Io kaik, nu gil ira linge ing het na tange taam. A mon aihat na tunotuno tika ma het ing dal ga gil tiga kunubus uram ho God.
ACT 21:24 Nu lamus leh dal ma nu laka tika ma dal tano pakpakilai i haruat ta ira harkurai tane Moses bia mutal naga langalanga sukun no tirtirih meram narako kaike ra harkurai nong i kabit mutal. Ma nu kul sare dal waing daga pung se ira hi dal. Io, diet bakut diet na nunure bia taie ta tutun ta ira nianga diet te hadade utaam, ma iesen bia augu iaat, kana u murmur ira harkurai tane Moses.
ACT 21:25 Ma mehet te gil hoken uta ira ut na nurnuruan ing pai a Iudeia diet. Mehet te tula pakpakat ukaia ho diet ma mehet ga hinawase diet bia mehet gate hanuat tika ma tiga lilik bia diet pa na gil ken ra linge: waak diet ien ta nian ing di tun hartabar me taar ta ira palimpuo, waak diet ra ien de, waak diet ra ien tiga linge ing di lut bing, ma waak diet ra gilgil no sakana magingin na ninahon tika.”
ACT 21:26 Io, tano mes na bung Pol ga lamus leh kaike ra tunaan ma gaam laka tika ma dal ta iakano pakpakilai bia aie ma dal, dal naga langalanga tano ninaas ta God. Io, ga laka uram tano hala na lotu tamat wara hinhinawas palai bia hunanges dal na hapataam iakano pakpakilai nong na halangalanga dal tano udal kunubus. Ma ga wara hinhinawas bia tikatikai ta dal na gil no uno hartabar ta garim bung.
ACT 21:27 Ma bia ing kaike ra liman ma iruo na bung wara halangalanga dal gate wara patpataam, ari Iudai meram tano hanuo Esia diet ga nes Pol aram ra hala na lotu tamat. Io, diet ga kas ira tinge diet ira matanaiabar bakut kaia, diet ga palim kawase Pol, ma diet ga kakongane bia, “Tunotuno me Israel, muat harahut het! Iakanin no tunotuno nong i la hauhausur ira matanaiabar bakut ta ira matahu katon bia diet na miligiruane dahat ira Iudeia ma ira udahat harkurai, ma iakan mah ra hala na lotu tamat. Ma pai kaike sen mon. Taie. I te lamus halaka mah ari Grik uram ta iakan ra hala na lotu tamat kaik i te hagahe iakan ra halhaliana katon.”
ACT 21:29 (Diet ga tange huo kanong tiga bung nalua diet ga nes tar Toropimus me Epesas tika ma Pol aram tano pise na hala ma diet ga lik halaka leh bia Pol gate lamus halaka ie uram tano hala na lotu tamat.)
ACT 21:30 Io, haleng sakit ira matanaiabar tano pise na hala diet ga raurawaan ta iakan ma diet ga hilau huat mekatiga ta ira kaba katon bakut. Diet ga palim kawase Pol ma diet ga rahi hasur ie meram tano hala na lotu tamat ma kaik at mon di ga banus ira matanangas huat tano hala na lotu tamat.
ACT 21:31 Bia ing diet ga wara bubu bing ie, no nianga ga haan tupas no lualua ta ira umri me Rom bia ira matanaiabar tano pise na hala Ierusalem kana diet ga gilgil tiga tamat na purpuruan.
ACT 21:32 Ma kaik at mon no lualua ga lam leh ari a umri tika ma ari a tamat na umri ma diet ga hilau suur ures ta ira matanaiabar. Ing ira matanaiabar ing diet ga hatahuat no purpuruan diet ga nes leh no lualua tika ma ira uno umri, diet ga hatakumutne ra bubu Pol.
ACT 21:33 No lualua ga hanuat ma ga palim kawase leh Pol ma ga tar ra dadas na nianga bia da wis ie ma ta iruo dadas na hidihidi sakit. Io, ga tiri bia sige kaik Pol ma bia gate pakile ra sa.
ACT 21:34 Ari ta ira matanaiabar diet ga tange tiga linge ma ari diet ga tange ra mes. Ing pa ga tale bia na nunure leh no tutun kanong ira matanaiabar diet ga harharat, ga tar ra dadas na nianga ta ira uno umri bia diet na lamus leh Pol uram tano udiet baang at.
ACT 21:35 Bia ing Pol ga hanuat taar ta ira pinapaas hut uram ta iakano katon, ira umri diet ga kap ie naliu kanong warah ira matanaiabar diet ga manga ngangar sakit.
ACT 21:36 Ma ira matanaiabar ing diet ga murmur haan, diet ga kakonga haan bia, “Muat bu bing ie!”
ACT 21:37 Bia ing ira umri diet ga wara kapkap halaka Pol uram tano udiet baang, Pol ga tiri no lualua bia, “I haruat bia ni tange tiga linge taam?” Io, ga balui, “Ai! U ianga na Grik!
ACT 21:38 Io kaik, pai augu tok no Isip nong ga hatahuat no hinarubu nalamin ta ira matanaiabar ma Rom a bar tinahon nalua ing ga lamus ra ihat na arip na ut na harbing uram tano hanuo bia.”
ACT 21:39 Ma Pol ga tange bia, “Iau tiga Iudeia me Tasas kenam Silisia, a so taman iau tiga pise na hala nong no hinsana i lua. Maris, bale leh iau bia ni ianga baak ta ira matanaiabar.”
ACT 21:40 Io, no lualua ga haut, ma Pol ga tur aram ta ira pinpaas hut ma ga tah pam wara uta ira matanaiabar bia diet na hatakumutna nianga. Ing diet ga tur kunkun um Pol ga ianga ma no nianga gar na Iudeia hoken.
ACT 22:1 “Kaba tasigu ma hainigu, ma muat ira nongtamat, muat hadade um iau kaiken ma iau ni balu ira numuat nianga.”
ACT 22:2 Ma ing diet ga hadade bia ga haianga diet ma no nianga gar na Iudeia diet ga manga tur kunkun. Io, Pol ga ianga um: “Iau tiga Iudeia. Di ga kaha iau aras Tasas kenam Silisia sen bia iau ga tamat kai ta iakan ra pise na hala Ierusalem. Iau ga tiga bulu na harausur tane Gamaliel ma iau ga kap ra tamat na harausur ta ira harkurai ta ira hintubu dahat ma iau ga gaas wara murmur God haruat ma sige tikai ta muat katin.
ACT 22:4 Iau git hahelar ta ira tunotuno diet murmur iakan ra harausur di kilam ie bia ‘No Ngaas’ wara bubu bing diet. Iau git palpalim kawase a tunaan tika ma ra hahin ma iau git halaka diet ra hala na harpidanau.
ACT 22:5 Ma no tamat ta ira ut na pakila lotu ma ira kaunsil bakut diet haruat bia diet na suro haut iau ta iakan. Ma iau ga kap mah ra pakpakat mekai ta diet uram ta ira hintura diet ira Iudeia kenam Damaskas. Ma iau ga haan ukaia wara wiswis leh kaiken ra matanaiabar ukai Ierusalem bia diet na kap harpidanau.
ACT 22:6 “Gate hutet ra tingena kasakes ing iau ga hananhuat hutaten Damaskas ma kaik at mon tiga tamat na lulungo sakit meram ra mawe ga murarang sare iau.
ACT 22:7 Ma iau ga puko taar napu tano pise ma iau ga hadade tiga ingana tikai ga tange tagu, ‘Sol! Sol! Wara bih bia u hahelar tagu?’
ACT 22:8 “Ma iau ga tiri, ‘Sige ugu, Watong?’ “Ma ga babalu bia, ‘Iau Jisas me Nasaret nong u hahelar tagu.’
ACT 22:9 Ira tunotuno ing diet ga saksakate hani iau diet ga nes no lulungo ma iesen bia diet pa ga hadade kilam no ingana tunotuno nong ga iangianga tagu.
ACT 22:10 “Iau ga tiri bia, ‘Asa ing iau ni pakile, Watong?’ “Ma no Watong ga tange, ‘Taman tut, ma nu haan u Damaskas. Ma da hinawase ugu kaia ta ira linge bakut ing God gate tibe taar taam bia nu gil.’
ACT 22:11 Io, ira tunotuno ing iau ga hanahaan tika ma diet, diet ga lam iau u Damaskas kanong bia no dadas na murarang tano lulungo gate hapulo iau.
ACT 22:12 “Io, tiga tunotuno hinsana ne Ananias ga hanuat wara kakol iau. Aie ga tiga tunotuno nong ga murmur timaan ira harkurai tane Moses, ma ira Iudeia bakut ing diet ga kiskis kaia diet ga manga rurui.
ACT 22:13 Ga tur harue iau ma ga tange, ‘Tasigu Sol, nanaas baling!’ Ma kaik at mon iau ga haruat bia ni nes ie.
ACT 22:14 Io, Ananias ga tange hoken: ‘No God ta ira hintubu dahat i te gilamis ugu bia nu nunure no uno sinisip ma bia nu nes no Takodasiana ma bia nu hadade ra nianga mekatiga ra hana.
ACT 22:15 Ma augu, nu hinhinawas utana taar ta ira matanaiabar bakut ma ira linge u te nes ma u te hadade.
ACT 22:16 Io, asa at baak um ing u kiskis kahe? Taman tut, ma nu kap baptais ma nu sasaring tupas ie ma naga sagule ise ira num magingin sakena.’
ACT 22:17 “Io, bia ing iau ga tapukus u Ierusalem ma iau ga sasaring aram tano tamat na hala na lotu iau ga nes tiga ninaas na tanuo ma iau ga nes no Watong ga iangianga. Ga tange tagu bia, ‘Habir! Haan talur Ierusalem kaiken at kanong diet pa na taram ugu ing u hinhinawas utagu kai ta diet.’
ACT 22:19 “Ma iau ga balui, ‘Watong, diet at, diet nunure bia iau git suursuur laka ta ira hala na lotu anuhet ira Iudeia wara bulbul halaka diet ing diet nurnur taam ra hala na harpidanau ma wara hadakdak diet.
ACT 22:20 Ma ing di ga gulum bing no num tunotuno Stiwen nong ga hinhinawas utano hinsaam, iau ga tur taar kaia ma iau ga balaure ira maal udiet ing diet ga gulgulum bing ie, ma iau ga haut uta iakano.’
ACT 22:21 “Io, no Watong ga tange tagu, ‘Haan, iau ni tule ugu u tapaka, taar ta diet ing diet pai Iudeia.’”
ACT 22:22 Ira matanaiabar diet ga hanhadade Pol tuk taar ta ing ga tange iakano subana nianga. Io, diet ga kakongane naliu bia, “Muat bu bing iakano ra mangana tunotuno! Pai tahut bia na lon ta iakan ra ula hanuo!”
ACT 22:23 Bia ing diet ga kupkup ma diet ga kap se ari ta ira udiet sigasigam ma diet ga sasa kaabus uram ra mauho, no lualua ga tar ra dadas na nianga bia da kap halaka Pol uram ra baang ta diet ira umri. Ga hartula bia da hadangat ie ma da tiri murmur ie waing da nunure leh bia warah kaik ira matanaiabar diet ga kupkup taar tana hokaiken.
ACT 22:25 Bia ing diet gate sal hatakodasne ira iruo limana ma diet gate kubus ie wara hadangat ie, Pol ga tange tano tamat na umri nong ga tur taar kaia bia, “Hohe, i takodas tano numuat harkurai bia nu hadangat tiga Rom ma nong baak mah pa di gil tiga ula harkurai utana bia i te gil ra sakena?”
ACT 22:26 Bia ing no tamat na umri ga hadade hokaiken, ga haan uram tano lualua ma ga tiri ie, “Ai! Asa ing u wara gilgil? Iakanan ra tunotuno aie tiga Rom!”
ACT 22:27 Io, no lualua ga haan uram ho Pol ma ga tiri, “Ai! A Rom ugu bia taie?” Ma Pol ga balui, “A tutun.”
ACT 22:28 Io, no lualua ga tange, “Iau ga kukul ma ra but na kinewa sakit bia iau ni kap no kinilam bia iau tiga Rom.” Pol ga balui, “Iesen iau taie. No agu sus aie ga kap no kinilam bia aie tiga Rom. Kaik di ga kaha mah iau huo.”
ACT 22:29 Io kaik, diet ing diet ga tur taar wara tirtiri mur ie, diet ga hesuo laah kaik at. Ma no lualua ga sam kahe no katine ing ga nunure leh bia gate wis tar Pol ma ra dadas na hidihidi sakit ma aie tiga Rom.
ACT 22:30 Tano mes na bung no lualua ga palas ise Pol kanong ga sip bia na nunure leh no burena tutun bia warah kaik ira Iudeia diet gaam tung Pol. Io, ga tau haruat ira tamat na ut na pakila lotu ma ira kaunsil gar na Iudeia. Io, ga lamus Pol ma ga hatur ie ra matmataan ta diet.
ACT 23:1 Pol ga mate dit ira kaunsil ma ga tange, “Kaba tasigu, no nugu lilik i hatutun bia ira nugu tintalen i tahut tano matmataan ta God tuk katin.”
ACT 23:2 Io, bia ing Ananias no tamat ta ira ut na pakila lotu ga hadade huo, ga tule diet ing diet ga tur taar kaia bia diet na pasar no hane Pol.
ACT 23:3 Ma Pol ga tange tana, “God na pasar ugu, a ut na harababo. Augu hoing ra melmel na balo na hala iesen aram narako i hung ma ra bilinge. U kis taar kaia wara gil harkurai tagu haruat ma ing ira harkurai ta Moses i tange, ma iesen bia augu at, u te lake ira harkurai ing u hartula bia da pasar iau!”
ACT 23:4 Ma diet ing diet ga tur harue taar Pol diet ga tange, “Sige ugu kaik gu tange hagahe no tamat ta ira ut na pakila lotu ta God?”
ACT 23:5 Io, Pol ga babalu bia, “Kaba tasigu, iau pai palai bia aie no tamat ta ira ut na pakila lotu. Ing bia iau nigi palai taar bia aie sige, iau pa gor ianga huo kanong ira nianga ta God di ga pakat i tange bia, ‘Waak muat tangtange hagahe no lualua ta ira numuat matanaiabar.’”
ACT 23:6 Bia Pol ga palai bia ari ta diet a Sadiusi ma ari a Parisi, ga tange naliu aram tano kis hulungai bia, “Kaba tasigu, iau tiga Parisi, a natine tiga Parisi. Iau tur taar ra harkurai kai kanong iau kis na balaraan taar utano tuntunut hut baling ta ira minaat.”
ACT 23:7 Bia ing ga tange hokaiken tiga but na hargau ga tahuat nalamin ta ira Parisi ma ira Sadiusi. Ma ira kaunsil diet ga harpaleng.
ACT 23:8 (Ma no burena hoken. Ira Sadiusi diet tange bia taie ta tuntunut hut baling ta ira minaat, ma taie mah ta angelo bia ta tanuo. Iesen bia ira Parisi diet tange bia kaike bakut i mon.)
ACT 23:9 Io, ma no purpuruan ga hanuat tamat ma ari tena harausur ta ira harkurai tane Moses ing a Parisi diet, diet ga tur ma diet ga ianga hargau ma ra dadas bia, “Het pai nes leh ta nironga ta iakan ra tunotuno. Tiga tanuo bia tiga angelo dak i te haiangai.”
ACT 23:10 No hargau ga manga tamat sakit kaik no lualua ta ira umri gaam burut bia diet kabi sapak hasiksik Pol. Ga tar ra dadas na nianga ta ira umri bia diet na hansur ma diet na lamus leh Pol sukun diet ma ra dadas ma diet na lam ie uram tano udiet baang.
ACT 23:11 Io, ra bung um, no Watong ga tur harue Pol ma ga tange bia, “Nu balamasa! Nu hinawas at mah utagu ares Rom hoing u te hinawas taar tagu kai Ierusalem.”
ACT 23:12 Io, ra malaan tano mes na bung ira Iudeia diet ga harpingit ma diet ga kukubus bia diet pa na iaan ma bia diet pa na mom tuk bia diet te bu bing tar Pol.
ACT 23:13 Ma ga sakit ra ihat sangahul na tunotuno ing diet ga lalaka ta iakan ra kunubus.
ACT 23:14 Io, diet ga haan uram ta ira tamat na ut na pakila lotu ma ira tamat ta ira huntunaan ma diet ga tange, “Mehet te kukubus bia het pa na iaan tuk bia het te bu bing tar Pol.
ACT 23:15 Io kaik, kaiken muat ma ira kaunsil muat na tula nianga tupas no lualua ta ira umri bia diet na lam hawaat Pol ukai ho muat. Ma muat na ngan hoing bia muat sip bia muat na silihe timaan leh ta tutun na nianga mekaia ho ie wara gilgil no uno harkurai. Ma het, het te taguro taar bia het na bu bing sei katiga na ngaas ing na hananuat ukai.”
ACT 23:16 Ma iesen bia ing no lawane Pol ga hadade iakan ra udiet harpingit ga haan uram tano baang ta diet ira umri ma ga hinawase Pol.
ACT 23:17 Io, Pol ga tau leh tikai ta ira tamat na umri ma ga tange, “Lam kan ra marawaan uram tano numuat lualua. Auno mon nianga kana bia na hinawasei.”
ACT 23:18 Io, no tamat na umri ga lamus leh ie uram tano lualua. No tamat na umri ga tange, “Pol nong di te wis kawasei i hartula utagu ma gi saring iau bia ni lamus iakan ra marawaan ukai taam kanong bia auno mon nianga bia na hinawase ugu ine.”
ACT 23:19 Io, no lualua ga palim leh no limana no marawaan ma ga lamus hasisingen leh ie gaam tirii bia, “Asa ing u wara hinhinawase iau ine?”
ACT 23:20 No marawaan ga tange, “Ira Iudeia diet te haut tika wara sarsaring ugu bia nu lam Pol taar ta ira kaunsil marakan ma diet na ngan hoing bia diet sip ie wara tirtiri mur ie wara ta tutun na nianga utana.
ACT 23:21 Iesen, waak u tartaram diet kanong i sakit ra ihat sangahul na tunotuno ing diet na mun kahe tar ie. Ma diet te kukubus taar bia diet pa na iaan ma diet pa na mom tuk taar bia diet te bu bing tar ie. Diet taguro taar kaiken ma diet kiskis kahe ugu bia nu haut leh no udiet sinasaring.”
ACT 23:22 Io, no lualua ga hakatom no marawaan bia, “Waak u tangtange ta tikai bia u te hinawase tar iau ta iakan ra linge.” Ma gaam tule isei.
ACT 23:23 Io, ga tatau leh airuo ta ira uno tamat na umri ma ga tange, “Tagure ken ra matana ubane: ta iruo maar na ut na palim wise, ta liman ma iruo na sangahul na ut na kisi hos, ma ta iruo maar na ut na palim rumus. Tagure diet wara hinahaan u Kaisaria ra liman ma ihat na pakana bung katin ra bung.
ACT 23:24 Ma tagure ta hos tane Pol waing da lamus timaan tar ie tano tamat na ulkukuha Pelik.”
ACT 23:25 Io, ga pakat tiga pakpakat hoken:
ACT 23:26 “Iau Kolodias Lisias, ukatiga hono bilai na tamat na ulkukuha Pelik: A harmarsai na kis tika ma ugu.
ACT 23:27 Ira Iudeia diet ga palim kawase iakan ra tunotuno ma diet ga wara bubu bing ie iesen bia iau ga hanuat ma ira nugu matana ubane ma iau ga halon ie kanong bia iau gate nunure leh bia aie tiga Rom.
ACT 23:28 Ma iau sip bia ni nunure bia diet ga tung ie warah, kaik iau gi lamus tar ie ta ira udiet kaunsil.
ACT 23:29 Iau nas hoken bia ira udiet nianga na hartutung i iangianga utano udiet harkurai mon. Iesen taie tiga hartung i tirih haruat bia na hiruo panei. Ma taie tari mah i haruat bia daga bul ie ra hala na harpidanau urie.
ACT 23:30 Io, bia ing iau ser leh nudiet tiga harpingit wara hagahe iakan ra tunaan, iau tule ie ukatiga taam kaiken at. Ma iau tar ra dadas na nianga mah ta ira ut na hartutung bia diet na tar ira udiet nianga taar tana katiga ho ugu.”
ACT 23:31 Io, ira matana ubane diet ga mur nianga ma diet ga lamus leh Pol tika ma diet ra bung u Antipatiris.
ACT 23:32 Ma tano mes na bung ira matana ubane menapu diet ga waak se tar Pol ta ira ut na kisi hos bia diet na haan tika mei. Ma diet um, diet ga tapukus uram tano udiet baang.
ACT 23:33 Bia ing ira ut na kisi hos diet ga hanuat Kaisaria, diet ga tar no pakpakat tano tamat na ulkukuha ma diet ga tar se Pol ukatiga ra lumana.
ACT 23:34 Io, no tamat na ulkukuha ga was no pakpakat ma ga tiri Pol bia aie mahe. Bia ing ga nunure leh bia Pol aie me Silisia ga tange, “Iau ni hadade ira num nianga bia ing diet ing diet tung ugu, diet na hanuat.” Io, ga tar ra dadas na nianga bia da mano bat Pol aram ra but na hala na harkurai ta Herot.
ACT 24:1 A liman na bung namur Ananias no tamat ta ira ut na pakila lotu ga hansur u Kaisaria tika ma rari a tamat ta ira huntunaan ma tiga mintatona tunaan ta ira harkurai, hinsana ne Tertulus. Io, diet ga kap ira udiet nianga na hartutung uta Pol taar tano tamat na ulkukuha.
ACT 24:2 Bia ing di ga tau halaka Pol, Tertulus ga bul ira uno nianga na hartutung taar ta Pelik hoken: “Mehet te lagirane ra talona kinkinis na malum narakoman tano num harbalaurai. Ma no num minmintot i te kap hawaat ra haleng na kikios wara hatimaan no numehet hanuo.
ACT 24:3 Ta ira kaba katon bakut mehet manga tanga tahut sakit, Watong Pelik, uta ing u te gil.
ACT 24:4 Iesen iau pai sip bia ni manga hamalmalungo ugu. Io kaik, iau saring ugu bia, maris, nu hadade ken ra numehet kumkumina nianga.
ACT 24:5 “Mehet te nunure leh bia iakan ra tunaan aie tiga gotgotuana ma i la hatahuat purpuruan nalamin ta ira Iudeia ta ira matahu katon tano ula hanuo. Aie tiga lualua tano ton me Nasaret.
ACT 24:6 Ma taie bia iakano sen mon. Taie. Ga walar at mah bia na hagahe no numehet tamat na hala na lotu. Io kaik, het gaam palim kawasei. [Het ga wara kurkurei haruat ma ira numehet harkurai.
ACT 24:7 Ma iesen bia Lisias no lualua ta ira umri ga hanuat tika ma ra dadas ma ga sarat leh ie ta mehet ma ga tar ra dadas na nianga ta ira tunotuno na hartutung bia diet na haan tupas ugu.] Ma augu at nu tiri murmur ie waing nugu nunure leh no tutun ta kaiken ra hartutung het gilgil taar tana.”
ACT 24:9 Ma ira Iudeia diet ga hartutung mah huo, bia a tutun kaiken ra linge.
ACT 24:10 Bia ing no tamat na ulkukuha ga haut utana bia na ianga, Pol ga tange, “Iau laro bia iau ni tar ira nugu nianga na turtur bat iau ta kaiken ra hartutung kanong iau nunure bia augu tiga ut na gil harkurai ta iakan ra hanuo ra bar tinahon.
ACT 24:11 Pai sakit baak ra sangahul ma iruo na bung ing iau ga haan uram Ierusalem wara lotu. Ma i malus taar taam bia nu nunure leh bia a tutun iakan.
ACT 24:12 Ma ira tunotuno ing diet tungtung iau, diet pa ga nes iau bia iau ga harhargor ma tikai aram ra tamat na hala na lotu. Ma diet pa ga nes mah iau bia iau ga hathatut purpuruan nalamin tiga kabaan aram narako ta ira udiet mes na hala na lotu ma bia aram tiga mes na subaan tano pise na hala.
ACT 24:13 Ma diet pai haruat bia diet na hatutun tar taam ira hartutung kaiken diet gilgil tar tagu.
ACT 24:14 Ma iesen iau pa ni suhe kanin. Iau la lalotu tupas no God ta ira hintubu mehet narakoman tano nugu kinkinis na nurnuruan ta iakan ra Ngaas nong diet tange bia a harabota ie. Iau nurnur mah ta ira harkurai bakut ta Moses ma ta ira pakpakat ta ira tangesot.
ACT 24:15 Ma iau kis na balaraan taar ta God hoing mah diet kaiken ra tunotuno. Ma no numehet kinkinis na balaraan kanin, bia God na hatut habaling ira ut na takodas ma ira ut na sakena sukun ra minaat.
ACT 24:16 Io kaik, hatikai iau walwalar bia ni balaure timaan ira nugu tintalen, no nugu lilik kabi tung iau ra matmataan ta God ma ira tunotuno.
ACT 24:17 “Namur ta ing iau pa ga nes Ierusalem ra bar tinahon, iau ga haan um ukaia wara tar harharahut ta ira nugu matanaiabar ing diet ga mon sunupi. Ma iau ga haan wara tar hartabar mah aram tano tamat na hala na lotu.
ACT 24:18 Ma iau ga gilgil kaiken ing diet ga nes tupas iau kaia. Ma iau gate hapataam ira pakpakilai haruat ta ira harkurai tane Moses bia nigi langalanga sukun no tirtirih meram narako ta kaike ra harkurai nong i kabit iau. Ma taie ta tamat na matanaiabar diet gate hanuat hurlungen taar tagu ma iau pa ga laka mah tiga purpuruan.
ACT 24:19 Ma sen no burena ie ke ta ari Iudeia meram tano hanuo Esia ing diet ga kis taar kaia. Gor takodas bia diet at diet na hanuat ukai taam ma diet naga tar ira nudiet hartutung ing bia udiet mon ta linge wara paspase tar tagu.
ACT 24:20 Ma ing bia taie, io, diet kaiken diet na tange ira ronga ing diet ga nes leh tagu ing iau ga tur taar tano matmataan ta ira kaunsil.
ACT 24:21 Diet tale bia diet na tange sen mon kanin ra linge iau ga kakonganei ing iau ga tur taar ra udiet matmataan. Iau ga tange bia, ‘Iau te tur taar ra harkurai ra matmataan ta muat katin kanong iau nurnur tano tuntunut hut balin ta ira minaat.’”
ACT 24:22 Sen bia Pelik ga palai timaan dahin taar ta ira Kristian. Kaik ga tange ta ira Iudeia bia diet na kis kawase tiga mes na bung. Ga tange hoken: “Bia ing Lisias no lualua ta ira umri na hanuat, io, iau ni bul no nugu ula harkurai bia u ronga bia taie.”
ACT 24:23 Io, ga tar ra dadas na nianga tano tamat na umri nong ga harbalaurai taar ta Pol bia na mano bat Pol. Iesen ga tange bia waak i manga mano bat ie. Na balei bia na tatohun dahin ma na bale leh ira uno harwis bia diet na nes mur ie ta ira uno sunupi.
ACT 24:24 Bia ing a bar bung gate sakit, Pelik ga hanuat tika ma no uno hahin na Iudeia, ne Darusila. Io, ga hartula uta Pol ma ga hadadei ing ga iangianga utano mangana nurnuruan ta diet ing diet nurnur ta Krais Jisas.
ACT 24:25 Bia ing Pol ga iangianga uta ira magingin takodas ma tano magingin bia tikatikai at na kurkure timaan ie ma utano tamat na gil harkurai unamur, Pelik ga burut ma ga tange, “I te haruat baak! I tale bia nu haan um. Namur bia ing a nugu mon pakana bung, iau ni hartula utaam.”
ACT 24:26 Iesen ga sipsip mah bia Pol na hau kumaan ie ma ta kinewa. Kaik gaam git harhartula hait utana ma git wawor tika mei.
ACT 24:27 Bia ing airuo tinahon gate sakit, Porkios Pestus ga kios Pelik. Iesen Pelik ga waak se tar at Pol ra hala na harpidanau kanong ga sip bia na hau ira Iudeia.
ACT 25:1 Ing aitul a bung gate sakit namur tano uno hinanhuat kaia tano hanuo, Pestus ga haan me Kaisaria uram Ierusalem.
ACT 25:2 Ma ira tamat na ut na pakila lotu ma ira lualua ta ira Iudeia diet ga tar ira udiet nianga na hartutung taar ta Pol tana kaia.
ACT 25:3 Diet ga manga saring Pestus bia na harahut diet hoken, bia na lamus Pol u Ierusalem kanong diet gate pingit tar wara bubu bing ie na ngaas.
ACT 25:4 Ma Pestus ga babalu, “Kana di mano bat tar Pol aras Kaisaria ma iau at iau ni haan tapukus ukaia namur dahin.
ACT 25:5 Io, bia ing iakan ra tunaan i te gil ta ronga, muat na tule numuat ta lualua u Kaisaria tika ma iau ma diet na ra tung ie kaia.”
ACT 25:6 Bia ing Pestus gate kisi ra liman ma itul bia sangahul na bung tika ma diet, ga hansur um u Kaisaria. Ma tano mes na bung ga tau hulungan no kinkinis na gil harkurai ma gaam hartula bia Pol na me tur ra matmataan tana.
ACT 25:7 Bia ing Pol ga tur huat, ira Iudeia ing diet gate hansur me Ierusalem diet ga tur luhutanei ma diet gaam paspase tar ra dadas na nianga na hartutung taar tana. Iesen diet pa ga haruat bia diet na hatutun kaiken ra udiet nianga.
ACT 25:8 Io, Pol ga tar um no uno nianga na turtur bat ie ta ira hartutung hoken: “Iau pa ga gil tiga ronga taar ta ira Iudeia, bia tano tamat na hala na lotu, ma bia ukatiga mah hono tamat na lualua na gil harkurai sakit gar na Rom.”
ACT 25:9 Ma iesen bia Pestus ga sip bia na hau ira Iudeia, kaik gaam tiri Pol bia, “U kanan taar bia nu haan u Ierusalem ma nigi a tiri murmur ugu ta kaiken ra hartutung kaia, bia taie?”
ACT 25:10 Ma Pol ga balui, “Iau tur taar kaiken tano gil harkurai gar na Rom. Io, i takodas taar bia iau ni tur harkurai kai. Iau pa ga pakile ta ronga taar ta ira Iudeia ma augu iaat u nunure timaan tar huo.
ACT 25:11 Iesen bia ing iau gate gil tun tiga ronga i haruat bia ni hiruo panei, io, diet na bu bing iau, taie ta linge. Ma sen bia ing taie ta tutun ta ira nudiet hartutung taar tagu, io, pai takodas bia tikai na tar iau ukatiga ira lima diet. Iau kikilam haruat ma ira harkurai bia no tamat na lualua na gil harkurai sakit gar na Rom na hadade iau!”
ACT 25:12 Namur bia Pestus gate ianga tika taar ma ira uno kaunsil, ga balu Pol hoken: “U te kikilam bia no tamat na lualua na gil harkurai sakit gar na Rom na hadade ugu. Io, iau ni tule ugu uras hono tamat na lualua na gil harkurai sakit at!”
ACT 25:13 Io, a bar bung namur Agripa, aie tiga tamat na lualua na gil harkurai, ma ne Bernis dir hinen ga hanuat Kaisaria wara hahaatne leh Pestus tano uno sigara kinkinis.
ACT 25:14 Ma dir ga wara kinkinis baak kaia, kaik Pestus gaam huo ira linge utane Pol taar tano tamat na lualua na gil harkurai. Ga tange tana bia, “Nalua ta ing Pelik ga haan laah ga waak tar tiga tunotuno kai ra hala na harpidanau.
ACT 25:15 Ma ing iau ga haan u Ierusalem ira tamat na ut na pakila lotu ma ira tamat ta ira huntunaan me Iudeia diet ga tung ie ma diet ga saring iau bia iau ni tule bingbing ie.
ACT 25:16 Ma sen bia iau ga hinawase diet bia pai a numehet magingin ira Rom bia het na tar se bia mon tiga tunotuno wara hapidanau ie. Taie. Na luena tur harmamata baak ma diet ing diet tung ie. Ma da tar mah ra mauho tana bia na tur bat ie ta ira udiet hartutung.
ACT 25:17 Io, ing diet ga hanuat tika ma iau ukai, iau pa ga halis no harkurai. Taie. Iau ga tau hulungan no kis hulungai na gil harkurai tano mes na bung ma iau ga hartula bia da lamus halaka no tunotuno.
ACT 25:18 Sen bia ing ira ut na hartutung taar tana diet ga tut ma diet gaam ianga, diet pa ga tung ie uta tiga ronga ing iau ga lik bia diet na tung ie urie.
ACT 25:19 Taie. Diet ga mon balik ari a hargau mei pane no udiet huna lotu at ma uta tiga tunotuno nong gate maat, hinsana ne Jisas, nong Pol ga tange bia kana i lon.
ACT 25:20 Ma iau pa ga palai bia ni tiri murmur uta iakan ra hargau hohe, io kaik, iau gaam tiri ie bia ga kanan wara hinahaan u Ierusalem bia daga tirii kaia ta kaiken ra hartutung bia taie.
ACT 25:21 Ma iesen bia Pol ga kikilam bia da waak tar ie ma no tamat na lualua na gil harkurai sakit gar na Rom at na gil no ula harkurai utana. Io, iau ga tar ra dadas na nianga bia da mano bat ie tuk taar bia iau nigi tulei ures hono tamat na lualua na gil harkurai sakit gar na Rom.”
ACT 25:22 Io, Agripa ga tange ta Pestus, “Iau sip bia iau at iau ni hadade iakan ra tunotuno.” Ma Pestus ga balui, “Nu hadadei marakan.”
ACT 25:23 Tano mes na bung Agripa ma Bernis dir ga hanuat tika ma ra tamat na minamar ma dir ga laka aram tano hala na nianga tika ma ira tamat na ulkukuha ma ira watong ta iakano pise na hala. Io, Pestus ga hartula, di gaam lamus halaka Pol.
ACT 25:24 Io, Pestus ga tange, “Augu Agripa, no tamat na lualua na gil harkurai, ma muat bakut kaiken ing muat kis hurlungen taar, muat nes iakan ra tunotuno. Ira matanaiabar na Iudeia bakut kenam Ierusalem ma kai Kaisaria diet te kakongane ira udiet sinasaring taar tagu utana bia da bu bing sei.
ACT 25:25 Iau pa ga nes leh tiga linge bia gate gil ie kaik naga hiruo panei. Iesen ga kikilam bia no tamat na lualua na gil harkurai sakit kanas Rom bia na hadadei, kaik iau gaam kure bia ni tulei u Rom.
ACT 25:26 Sen bia iau pai palai bia ni tange tun hohe uta iakan ra tunaan ing ni pakat se tiga paas ures Rom tano tamat na lualua na gil harkurai sakit. Io kaik, iau te lamus tar ie tano num matmataan tus Agripa, tamat na lualua na gil harkurai augu, ma ta muat ira mes mah, waing nigi mon ta nianga wara pakpakat namur bia dahat te tiri murmur tar ie.
ACT 25:27 Ma iau tange huo kanong iau lik bia pai takodas bia da tule bia mon tikai meram narako ra hala na harpidanau ma taie pa di hapalaine timaan baak ira hartutung taar tana.”
ACT 26:1 Io, Agripa ga tange ta Pol, “I tale bia nu ianga um kaiken wara gaiem.” Io, Pol ga tah pam ta diet ma no lumana ma ga hatahun ira uno nianga na turtur bat ira udiet hartutung hoken:
ACT 26:2 “Augu Agripa, no tamat na lualua na gil harkurai, iau tanga tahut wara tuntunur ra num matmataan katin wara tangtange ira nugu nianga na turtur bat ira hartutung ta ira Iudeia.
ACT 26:3 Ma iau manga tanga tahut kanong augu iaat u palai timaan taar ta ira numehet magingin ira Iudeia ma ta ira hargor i tahuat laah ta kaike. Io kaik, iau sasaring marmaris taam bia nu bale iau bia ni ianga baak ma nu hadade iau.
ACT 26:4 “Ira Iudeia bakut diet nunure ira nugu tintalen mekatiga laah ing ga bana bulu huat. Diet palai bia tano nugu kudulena nilon iau ga kis aram tano nugu hanuo ma aram mah Ierusalem.
ACT 26:5 Diet ta nunure iau ra talona pakaan ma bia ing diet sip, io, diet haruat bia diet na suro haut bia iau ga tiga Parisi, no dadasina kabaan narako tano numehet lotu.
ACT 26:6 Ma iau tur taar ra harkurai kaiken taar burena tano nugu kinkinis na balaraan uta ing God ga kukubus taar urie ta ira hintubu mehet.
ACT 26:7 Iakan no kunubus nong ira numehet sangahul ma iruo na huntunaan diet kis na balaraan taar bia diet na kap ie ing hatikai diet lalotu tupas God. Io, tamat na lualua na gil harkurai, i taar burena ta iakan ra kinkinis na balaraan kaik ira Iudeia diet gaam tung iau.
ACT 26:8 Iau manga karup bia ari ta muat, muat lik bia God pai tale wara hathatut ira minaat.
ACT 26:9 “Iau mah iau ga lik bia i tahut bia iau ni gil ra haleng na linge wara hanghagahe no hinsane Jisas me Nasaret.
ACT 26:10 Ma hokaike iaat mon kaik iau ga gil aram Ierusalem. Ira tamat na ut na pakila lotu diet ga tar ra dadas tagu wara kilkilat bat haleng na tunotuno tus tane God ma ing di ga bu bing diet iau ga haut mah uta iakano.
ACT 26:11 Haleng na pakaan iau git suursuur laka ta ira hala na lotu numehet ira Iudeia wara haphapidanau diet ma iau git walwalar bia iau ni sunang diet bia diet na tange hagahe iakano Jisas. Ma ga manga mis no balagu taar ta diet kaik iau gaam git hanahaan taar mah ta ira pise na hala ing i kis tapaka wara hinelar ta diet.
ACT 26:12 “Ma tiga bung um ta kaiken ra nugu hinahaan iau ga hanahaan u Damaskas tika ma ra dadas ma ra hartula mekatiga ta ira tamat na ut na pakila lotu.
ACT 26:13 Io, tamat na lualua na gil harkurai, hutet ra tingena kasakes aram tano ngaas iau ga nes tiga lulungo meram ra mawe. No lulungo tano kasakes pa ga haruat mei ma ga murarang sare iau tika ma ira tunotuno ing diet ga saksakate hani iau.
ACT 26:14 Mehet bakut het ga puko taar tano pise ma iau ga hadade tiga ingana tunotuno ga tange tagu tano nianga na Iudeia hoken: ‘Sol! Sol! Wara bih bia u hahelar tagu? Augu iaat u hangungut habalin at ugu ing u sase tar no kakim tano linge i kaskasumuan.’
ACT 26:15 “Io, iau ga tiri, ‘Sige ugu, Watong?’ “Ma no Watong ga babalu, ‘Iau Jisas nong u hahelar tagu.
ACT 26:16 Kaia, taman tut um ma nugu tur. Iau te harapuasa taam wara timtibe ugu bia nu gil ira nugu pinapalim ma bia nu tiga ut na hinhinawas ta ira linge ing u ta nes utagu ma ta ira linge iau ni hamines taam.
ACT 26:17 Iau ni halangalanga ise ugu mekatiga ta ira num matanaiabar at ma mekatiga ta ing diet pai Iudeia. Iau tultule ugu taar ta diet wara paapos ira mata diet ma wara lamlamus ise diet mekatiga ra kankado tupas no palai, ma mekatiga tano dadas ta Sataan tupas God. Ma na ngan hokaiken ta diet waing God na lik luban se ira udiet magingin sakena ma na was halaka diet taar ta diet ing God gate hasasingen leh diet wara uno kanong diet ga nurnur tagu.’
ACT 26:19 “Io kaik, tamat na lualua na gil harkurai Agripa, iau pa ga patnau tano ninaas na tanuo meram ra mawe.
ACT 26:20 Iau ga luena harpir taar ta diet aram Damaskas, io, mekaia uram ta diet kenam Ierusalem ma tano kudulena hanuo Iudeia ma taar ta diet ing diet pai Iudeia mah. Iau ga harpir taar ta diet bakut bia diet na lilik pukus ma diet na tahurus tupas God ma bia diet na tatalen haruat ma ra tutun na lilik pukus.
ACT 26:21 Ma iakano no burena kaik ira Iudeia diet gaam palim kawase iau aram tano tamat na hala na lotu ma diet gaam walar bia diet na bu bing iau.
ACT 26:22 Ma iesen bia God i te harahut iau tuk taar katin, kaik iau gi tur taar kai ma iau hinhinawas uta Jisas taar ta ira tunotuno bakut, ira watong tika ma ira tunotuno bia mah. Iau pai tangtange leh nugu ta nianga ing i mes ta ing ira tangesot ma Moses diet ga tange bia na hanuat.
ACT 26:23 Ma diet ga hinawas bia no Mesaia na maat ma aie nong na luena tut hut sukun ra minaat, io kaik, aie mon nong na harpir taar ta ira Iudeia ma diet ing pai a Iudeia diet utano palpalai nong na hanuat taar ta ira matanaiabar.”
ACT 26:24 Ing Pol ga tange huo Pestus ga ianga bat ie ta ira uno nianga ma gaam kakonga bia, “Pol, u te ba kaike! Ira haleng na harausur u te kap i hababa ugu.”
ACT 26:25 Ma Pol ga balui, “Watong Pestus, iau pai ba. Ira linge iau tangtange i tutun ma pai kakel bia a nianga gar na ba.
ACT 26:26 Ma iau hamaan bia iakanin i palai kanong Agripa, no tamat na lualua na gil harkurai, i madaraas timaan taar ta kaiken ra linge. Ma i tale bia ni haiangai ma pa ni burut kanong iau nunure tar bia i te hatarame bakut kaiken ra linge iau iangianga urie. Ma i te hatarame kanong kaiken ra linge pa ga hanuat ra munmun.
ACT 26:27 Augu Agripa, no tamat na lualua na gil harkurai, u nurnur ta ira nianga ta ira tangesot? Iau nunure bia u nurnur ta diet.”
ACT 26:28 Io, Agripa, no tamat na lualua na gil harkurai, ga tange ta Pol, “Ai! U lik bia u haruat bia nu halawen hagasiaan leh at mon iau nigi tiga Kristian?”
ACT 26:29 Ma Pol ga balui, “Bia nu ngan gasien huo bia nu manga halis, iau saring God bia augu ma diet bakut mah kaiken ing diet hanhadade iau katin, bia muat na hanuat hoing iau, ma sen bia ken sen mon ra dadas na winwisaan kaik iau malok bia muat na mon mah.”
ACT 26:30 Io, no tamat na lualua na gil harkurai ga taman tut tika ma no tamat na ulkukuha ma ne Bernis ma diet mah ing diet ga kis tika taar ma dal.
ACT 26:31 Diet ga haan talur iakano subaan ma ing diet ga iangianga harbasia ta diet, diet ga tange, “Iakan ra tunotuno pai gilgil ta ronga i haruat bia na hiruo pane, bia da kilat bat ie urie.”
ACT 26:32 Ma Agripa ga tange ta Pestus, “Iakan ra tunotuno gaar be langalanga mon bia pa naga kikilam bia no tamat na lualua na gil harkurai sakit gar na Rom na hadadei.”
ACT 27:1 Bia ing di ga bul um no ula nianga bia mehet na haan u Itali, di ga tar Pol ma ira mes meram narako ra hala na harpidanau ukatiga tano lumana tiga tamat na umri hinsana Iulius. Ma tiga tamat na umri ie tano matana ubane di kilam ie bia, “A Matana Ubane tano tamat na lualua na gil harkurai sakit gar na Rom.”
ACT 27:2 Io, mehet ga kawaas tiga mon me Adaramitium nong ga taguro taar wara hinahaan taar ta ira pise na hala tano hanuo Esia ing ira mon git sapsapa ine. Io, het ga tut laah um. Ma Aristarkus, tiga tunotuno me Tesalonaika kenam Masedonia ga haan tika ma mehet.
ACT 27:3 Io, mehet ga sapa Saidon tano mes na bung ma Iulius ga marse Pol ma ga balei bia na haan uram ta ira uno harwis waing diet naga harahut ie ta ira uno sunupi.
ACT 27:4 Io, mehet ga haan baling taar u na tes mekaia ma mehet ga haan barahit tano mugurlamin Saipras kanong mehet ga hilau harso ma ra dadas na baiangin.
ACT 27:5 Bia ing mehet gate balos tar no kasapa hutaten Silisia ma Pampilia mehet ga sapa Maira kenam Lisia.
ACT 27:6 Io, no tamat na umri ga nes leh tiga mon me Aleksandaria kaia nong ga wara hinahaan u Itali ma gaam hakawasne mehet tana.
ACT 27:7 A haleng na bung mehet ga hanahaan matien haan ma ga dadas ta het iesen mehet ga petlaar wara hinanuat um haruat Nidas. Mehet ga papet puo bia mehet na haan hakakari huo taar burena tano baiangin. Io kaik, mehet gaam haan barahit balik tano mugurlamin Krit namur ta ing mehet gate sakit tar no ngusngus Salmone.
ACT 27:8 Mehet ga malalat mur no gerger tano takapit na pakananoh ma mehet ga hanuat tiga taman di kilam ie bia Barahit na Sawai, hutet tano nat na pise na hala Lasia.
ACT 27:9 Mehet ga hasurum ra haleng na pakana bung kaia ma no tes mah um gaam manga lagures kanong gate sakit no bung na hinahal gar na Iudeia ma no labur gate hanuat um. Io kaik, Pol gaam hakatom diet hoken:
ACT 27:10 “Kaba tunotuno, iau nes bia no nudahat hinahaan na sakena. Bia dahat na haan no mon na manga sakena tika ma ira kinakaap ma dahat mah dahat na hiruo.”
ACT 27:11 Ma sen bia no tamat na umri pa ga song leh ira nianga ta Pol. Taie. Ga taram balik no ut na kap mon ma no tunotuno nong auno no mon.
ACT 27:12 Ma ra haleng ta het diet ga sip bia mehet na haan at mon kanong iakano sawai pa ga haruat bia da nahe se tar ira teka na labur kaia tana. Ma diet ga sip bia het na walar bia het na hanuat Pinikis ma het naga nahe ise tar no labur kaia. Ma Pinikis aie tiga mes na sawai kaia Krit nong i la kis barahit taar tano labur.
ACT 27:13 Bia ing tiga dipdip mekatiga ta matailum ga hatahun wara huuhus, diet ga lik bia diet haruat um wara gilgil ing diet ga sip. Io, diet ga sal haut no haga ma mehet ga mur gerger tano takapit na pakananoh ta Krit.
ACT 27:14 Pa ga halis ma tiga dadas na baiangin sakit ga hanuat, di kilam ie bia ‘No Tunumat’, ma ga kakata suur mekatiga hono mugurlamin.
ACT 27:15 Ga kakata huat taar tano mon ma het pa ga haruat bia het na hilau harso mei. Io kaik, mehet gaam waak se tar mehet ma no mon, ma no baiangin gaam pupuh hani mehet.
ACT 27:16 Bia ing mehet ga haan barahit tiga nat na mugurlamin di kilam ie Kauda, mehet ga malalat at kaik het gaam petlaar bia het na kubus hadikdikit no waga nong mehet ga salsal hani ie menamur tano mon.
ACT 27:17 Bia ing ira tunaan diet gate rahi haut tar ie diet ga sal hinau menapu tano mon at mah waing pa naga pagola. Ma diet ga burut bia mehet kabi kawaas ta ira ula wana aras Libia ma no mon naga sakena. Io kaik, diet gaam haruhe hasur no maal tano mon ma diet ga waak se tar no mon bia no baiangin na pupuh hani ie.
ACT 27:18 No labur ga manga raprapusane hagahe het kaik diet gaam hatahun wara sase hasur ira kinakaap tano mes na bung.
ACT 27:19 Ma tano aitul a bung diet ga rakun leh ari gintatena no mon ing di la papalim me, diet gaam se hasur.
ACT 27:20 Bia ing a haleng na bung gate sakit ma no tes ma no mawe kana dir ga harpam taar ma no labur mah kana ga wawaang, mehet ga lik at um bia mehet pa na lon.
ACT 27:21 Ira tunaan diet pa ga ien ta nian ra talona pakaan. Io, Pol ga tur nalua ta diet ma ga tange, “Kaba tunotuno, muat gaar taram iau ing iau ga harhakatom bia waak dahat ra hinaan laah me Krit. Bia ing muat naga taram iau muat pa gor le haan tupas kaiken ra tinirih.
ACT 27:22 Sen bia kaiken iau saring hadadas muat bia muat na balaraan taar at kanong taie tikai ta muat bia na maat. Taie. No mon sen mon nong na sakena.
ACT 27:23 Nabung ra bung tiga angelo gar tano God nong auno iau ma nong iau lalotu tupas ie, i me tur harue iau ma i tange, ‘Waak ra bunurut, Pol. Nu tur at ra harkurai ra matmataan tano tamat na lualua na gil harkurai sakit kenas Rom. Ma God i te idane ugu bia diet bakut kaiken u hanahaan tika ma diet, diet pa na hiruo.’
ACT 27:25 Io kaik, kaba tunotuno, muat balaraan taar kanong iau nuruan God bia ira linge na hanuat hoing at mon i te hinawase tar iau huo.
ACT 27:26 Sen bia, no mon na ra kis masapa at tiga mugurlamin.”
ACT 27:27 No baiangin ga pupuh hani at baak mehet tano tes Adaria tano sangahul ma ihat na bung ra bung. Ing ga hutet ra tingena bung ira ut na pinapalim tano mon diet ga hamaan bia mehet ga wara hinanhuat taar tiga mugurlamin.
ACT 27:28 Diet ga walar no tes bia ga lamlamana haruat hohe ma diet ga nes leh bia no tes ga ihat na sangahul na pakon suur. Diet ga kis dahin ta mon ma diet ga walar habal no lamlamana tano tes ma diet ga nes leh bia ga aitul a sangahul na pakon.
ACT 27:29 Io, diet ga haruhe hasur ira ihat na haga mekatiga tano murmuruno no mon kanong diet ga burburut bia no labur kabi rapusane tar mehet ta ira huna haat. Io, diet ga sasaring bia na malaan gasien.
ACT 27:30 Ira ut na pinapalim ra mon diet ga walar bia diet na hilau sukun no mon, kaik diet gaam haruhe hasur no waga ures napu tano tes ma diet ga ngan bia diet ga wara haruruhe ari haga mekatiga ra laliana no mon.
ACT 27:31 Io, Pol ga tange tano tamat na umri ma ira matana ubane bia, “Bia kaiken ra tunotuno diet na haan laah mekai tano mon, io, pai tale bia muat na lon.”
ACT 27:32 Io kaik, ira matana ubane diet ga kut rupat ira hinau ing ga palim kahe tar no waga ma diet ga waak sei ma ga puko laah.
ACT 27:33 Io, ra malabungbung um Pol ga haragat diet bakut bia diet na iaan. Ga tange bia, “Ta kaiken ra sangahul ma ihat na bung muat te kis na bunurut bia asa na haan tupas dahat. Ma muat te kis bia, taie muat pai le ienien ta linge.
ACT 27:34 Io, kaiken iau manga saring muat bia muat na ien ta nian. Muat supi iakan waing muat naga lon. Taie ta tikai ta muat na hiruo.”
ACT 27:35 Bia gate tange tar kaiken ga kap leh ari beret ma ga tanga tahut ta God urie ra matmataan ta diet bakut. Io, ga pidik ie ma ga hatahun wara nian.
ACT 27:36 Ing diet ga nes ie huo diet bakut diet ga balaraan baal ma diet mah diet gaam ien ari nian.
ACT 27:37 Ma ga airuo maar ma liman ma iruo na sangahul ma liman ma tikai het ing het ga hananhaan tano mon.
ACT 27:38 Bia ing diet gate iaan hahos taar diet ga se hasur ira nian uram tano tes wara hamamakan no mon.
ACT 27:39 Bia ing ga malaan um diet pa ga nes kilam no taman iesen diet ga nes tiga sawai ma ra wanawana no wasasar tana. Io, diet ga lik bia diet na walar wara hasapa no mon kaia.
ACT 27:40 Diet ga kut rupat ira hinau talur ira haga ma diet ga waak tar at aram na tes ma kaik at mah diet ga palas ira hinau ing ga palim kahe tar no wasa nong i la kure tar no mon. Io, diet ga sarat haut no maal tano laliana no mon taar tano baiangin ma diet ga hilau tultul no wasasar.
ACT 27:41 Iesen no mon ga kap toke tiga ula mamor ma gaam kis kora ma no laliana pa ga haruat bia na magile. Kaik no murmuruno gaam tamaparparok ta ira pakananoh ing ga rarapus taar tana.
ACT 27:42 Io, ira matana ubane diet ga harpingit bia diet na bu bing diet ing diet ga wara hinahaan laka ra hala na harpidanau waing diet pa naga iaas u namanse ma diet naga hilau laah.
ACT 27:43 Ma iesen no tamat na umri ga sip bia Pol na lon taar at, kaik gaam tigal diet bia waak diet ra gilgil iakan ra udiet harpingit. Io, ga tar ra dadas na nianga um bia diet ing diet ga haruat wara niaas, bia diet na luena karwas suur ma diet naga hansot aram na manse.
ACT 27:44 Ma ga hartula bia diet bakut um ira mes, diet na kap leh ari subana daha ta ira sumsubaan tano mon wara niaas me ukaia. Io, hokaiken kaik diet bakut diet gaam a hansot timaan aram na manse.
ACT 28:1 Bia ing mehet gate sapa tahut taar, mehet ga nunure leh bia di ga kilam iakano mugurlamin bia Malta.
ACT 28:2 Ira tunotuno mekaia diet ga manga tahut ma mehet. Diet ga halo tiga iaah ma diet ga suat leh mehet bakut kanong ga batbata ma ga maduhan no taman.
ACT 28:3 Io, Pol ga kap hulungan tiga pok rigirigis ma ing ga bul ie uram tano iaah tiga sui ga hansur ing a mamahien ga kap ie ma ga kakarat dit taar tano limana.
ACT 28:4 Bia ing ira tunotuno mekaia tano mugurlamin diet ga nes no sui ma ga tabataba taar tano limana, diet ga tange harbasiane ta diet bia, “I nanaas bia iakan ra tunaan aie a ut na bu bing tunotuno. I tutun bia pai hiruo na tes, iesen no tadaar nong i la harkurai ma ra takodas pa na hok ie bia na lon taar.”
ACT 28:5 Iesen Pol ga sabakane se tar no sui taar tano iaah ma pa ga kap ta saksakena tana.
ACT 28:6 Ira tunotuno diet ga lik bia na sus no limana ma bia na puko taar napu ma naga maat kaik at. Iesen ing diet gate nanaho ra talona pakaan ma diet ga nes bia taie ta saksakena ga hanuat taar tana, diet ga kios ira udiet lilik ma diet ga tange bia aie tiga tadaar.
ACT 28:7 Ma hutet kaia ga mon tiga taman ma ra taman ie gar tane Pubilius, no lualua ta iakano mugurlamin. Ga suat leh mehet ukatiga tano uno taman ma mehet ga wasire tana ra itul a bung ma ga manga tahut ma mehet.
ACT 28:8 Ma no susi Pubilius ga noh taar ma ra minaset. Ga malahau ma ga sam bala haan mah. Io, Pol ga laka uram tana. Ma namur bia gate sasaring taar ga bul ira limana tana ma gaam halon ie.
ACT 28:9 Bia ing iakan ra linge ga hanuat, ira mes na ina minaset tano mugurlamin diet ga hanuat ma Pol ga halangalanga diet.
ACT 28:10 Diet ga harahut timaan het ma ra haleng na linge ma bia ing mehet ga taguro wara hinahaan laah ra mon, diet ga tabar mehet ma ira linge mehet ga supi.
ACT 28:11 Io, bia ing mehet gate kisi ra itul a teka kaia, mehet ga kawaas laah tiga mon nong ga nahe se tar no labur kaia tano mugurlamin. Aie tiga mon me Aleksandaria ma kaia tano laliana di gate takas no malalari dir ira iruo kasang na tadaar, Kastor ma Poluk.
ACT 28:12 Mehet ga sapa Sirakius ma mehet ga kisi ra itul a bung kaia.
ACT 28:13 Io, mehet ga haan mekaia ma mehet ga hanuat Regium. Ma tano mes na bung no dadaip merau ra matailum ga hanuat, kaik mehet gaam hanuat Putioli tano bung menamur tana.
ACT 28:14 Ma ing mehet ga nes leh ari harahinsakaan narako ta Krais kaia diet ga bale leh mehet bia mehet na kisi ta liman ma iruo na bung ma diet. Io, hokaiken kaik mehet gaam haan um uram Rom.
ACT 28:15 Ira harahinsakaan narako ta Krais kaia diet gate ser bia kana het ga hananuat, kaik ari diet ga me hanuat taar muk tano pise na hala no hinsana “No Katon na Kis Hulungai ta Apius.” Ma ari diet ga me hanuat tano pise na hala no hinsana “Aitul a Hala na Wasire.” Diet ga hanuat wara kakot leh mehet. Bia ing Pol ga nes diet, ga tanga tahut uram ho God ma ga kap ra harharagat mekaia ho diet.
ACT 28:16 Ma ing mehet ga hanuat Rom di ga haut leh Pol bia na kis sen at tika ma tiga umri wara manmano bat ie.
ACT 28:17 Io, ma bia ing aitul a bung gate sakit, Pol ga tau hulungan ira lualua ta ira Iudeia. Ing diet ga hanuat hurlungen, Pol ga tange ta diet hoken: “Kaba tasigu, iau pa gale gil tiga sakena taar ta ira udahat matanaiabar na Israel bia ukatiga mah ta ira magingin ta ira hintubu dahat, iesen di ga wis kawase balik iau aram Ierusalem ma di ga tar iau ukatiga ta ira lima diet ira Rom.
ACT 28:18 Diet ga tiri murmur iau bia asa tun at ing iau ga gil ma diet ga sip bia diet na halangalanga ise iau kanong diet ga nes leh bia taie ta burena bia ni hiruo pane.
ACT 28:19 Ma sen bia ing ira Iudeia diet ga malok bia da halangalanga ise iau, io, iakan ra linge ga sunang iau kaik iau gaam kikilam utano tamat na lualua na gil harkurai sakit gar na Rom bia na hadade iau. Ma iau ga gil huo sen bia ga taie nugu ta hartutung taar ta ira nugu matanaiabar na Israel.
ACT 28:20 Ma iau te sasaring wara nesnes muat ma wara nianga tika ma muat kanong iau ga sip bia muat na palai tano burena kaik di te wis iau ma iakan ra dadas na hidihidi. Iakanong dahat ira Israel dahat nanaho tana ma ra balaraan, iakano no burena.”
ACT 28:21 Ma diet ga balui, “Mehet pa ga kap ta pakpakat merau Iudeia wara utaam. Ma taie tikai ta ira tasi dahat ira Iudeia i ta me hinawas sakasaka utaam.
ACT 28:22 Iesen mehet sip bia mehet na hadade ira num lilik kanong mehet nunure bia ira matanaiabar ta ira kaba katon diet tangtange hagahe iakan ra mangana lotu u te laka tana.”
ACT 28:23 Io, diet ga puo tar tiga bung bia diet na kis tika baal ma ne Pol. Ma ra haleng sakit diet ga hanuat ta iakano bung ukaia hono taman Pol ga kiskis tana. Ma tur leh ra malaan tuk taar ra matarahien Pol ga palpalas no kinkinis na harkurai ma ra harbalaurai gar ta God ma ga hinhinawas mah utana. Ga walar bia na hatutun tar Jisas ta diet bia aie tun sige. Ma ga gil huo mekatiga ta ira harkurai tane Moses ma mekatiga ta ira pakpakat ta ira tangesot.
ACT 28:24 Pol ga petlaar bia na hatutun tar Jisas ta ari ta diet ma ira uno nianga iesen ari mes diet ga malok bia diet na nurnur.
ACT 28:25 Ira udiet lilik ga harpaleng, diet gaam hargor. Ma diet ga tur leh um ra hinahaan laah namur bia Pol gate ianga huat taar ma kan ra nianga. Ga tange bia, “No Halhaliana Tanuo ga tange no tutun ta ira hintubu muat ing ga tange mekatiga ra hane Aisaia no tangesot hoken:
ACT 28:26 ‘Haan tupas kaiken ra matanaiabar ma nu tange, “Muat na hanhadade, sen muat pa na hadade kilam. Muat na nesnes, sen muat pa na nes kilam.”
ACT 28:27 Na ngan huo kanong i dadas ira bala diet kaiken ra matanaiabar; diet malok bia diet na hadoda, ma diet malok bia diet na nes. Diet kabi nes kilam ma ira mata diet, ma diet kabi hadade kilam ma ira talinga diet, ma diet kabi nunure kilam ta ira tinge diet, ma diet naga tahurus ma nigi halon diet.’
ACT 28:28 “Io kaik, iau sip muat bia muat na nunure bia God i te tule iakan ra uno harhalon ukatiga ta diet ing pai a Iudeia diet, ma diet, diet na hadade kilam ie!”
ACT 28:29 (-)
ACT 28:30 Ma haruat ma ra iruo kudulena tinahon Pol ga kis kaia tano ngasiana ga sahur leh ie. Ga susuat leh diet bakut ing diet ga hananhuat wara nesnes ie.
ACT 28:31 Ma ga harharpir utano kinkinis na harkurai ma ra harbalaurai tane God ma ga hauhausur utano Watong Jisas Krais. Ga gilgil huo ma ra balamasa ma taie tikai ga hakahei.
ROM 1:1 Iau Pol, tiga ut na tinaram tano pinapalim Jisas Krais i tar tagu. Ma God gate tatau leh iau bia iau tiga apostolo ma ga bul hasisingen iau wara harharpir tano tahut na hinhinawas tana.
ROM 1:2 Ma iakano no tahut na hinhinawas nong God ga kukubus taar utana menalua kenam narako ta ira halhaliana pakpakat ta ira tangesot.
ROM 1:3 Ma iakan ra tahut na hinhinawas, io, i iangianga utano Natine ma tano ninaas i ga hanuat tunotuno, a bulumur ta Dawit.
ROM 1:4 Iesen tano ninaas tano uno kinkinis tano Halhaliana Tanuo, God ga bul um ie bia aie no dadas na Nati God ing God ga hatut ie sukun no minaat. Ma aie um, ne Jisas Krais no udahat Watong.
ROM 1:5 Ma tano nugu kinkinis narako ta Krais, God ga tabar bia iau ma no uno harmarsai bia iau nigi tiga apostolo. Ga tabar iau huo waing nigi lamus diet ing diet pai Iudeia bia diet na taram ie hokaiken, bia diet na nurnur tana, waing da manga hatamat no hinsana.
ROM 1:6 Muat nalamin mah ta diet. Ma muat mah, God i te tatau leh muat bia muat gar ta Jisas Krais.
ROM 1:7 Io, ma iau pakpakat tupas muat ira matanaiabar kenas Rom, muat ing God i manga sip muat ma i te tatau leh muat bia muat ira uno gamgamatien na matanaiabar tus. A harmarsai ma ra malum tupas muat meram ho God no adahat Sus ma no Watong Jisas Krais.
ROM 1:8 Io, ma no luena linge bia tano udahat kinkinis narako ta Jisas Krais iau tanga tahut tupas God wara gaie muat bakut kanong no numuat nurnur di gate hinhinawas utana tano ula hanuo bakut.
ROM 1:9 Ma meram narako tun at tagu iau la paapalim tane God ing iau harharpir ma no tahut na hinhinawas utano Natine. Ma God aie nong i tale bia na hinawas palai ta iakano linge i nunure bia i tutun, ma i hoken, bia iau pai sangeh wara kilkilam muat narako ta ira nugu sinasaring ta ira pakana bung bakut.
ROM 1:10 Iau la saasaring bia iau nigi petlaar bia ni haan tupas muat ing bia no Watong na sip huo. Ga talona pakana bung sakit iau ga sip huo ma iau pai palai bia na ngan um hohe kaiken, iesen iau saasaring hait bia na ngan huo.
ROM 1:11 Iau manga sip bia ni me nes muat waing nigi tabar muat ma ra mangana hartabar ing i haruat wara harharahut ira tanua muat waing muat naga tur dadas.
ROM 1:12 Ma ing iau tangtange, i hoken. Iau sip bia iau ma muat, dahat na harhabalaraan hargilaas ta dahat ma ta ira udahat nurnuruan.
ROM 1:13 Bar hinsakagu ta Krais, iau sip bia muat na palai bia iau ga pingit ra haleng na pakaan bia ni me nes muat, iesen a mon tur harbat tuk taar katin. Ma iau ga pingpingit huo waing nigi kap ra hunena me nalamin ta muat hoing iau te kap ra hunena me nalamin ta diet ira mes ing diet pai Iudeia mah.
ROM 1:14 No nugu binlan at bia ni haan tupas diet ing diet te manga laka ta ira tintalen ma ira mangana lilik ta diet ira Grik. Ma huo mah ta diet ing diet pai mur kaike ra magingin. No nugu binlan ie mah bia ni haan taar ta ira ut na mintot ma diet ing diet pai kap ra tamat na harausur.
ROM 1:15 Ma iakano no burena bia iau manga kanan bia ni harpir ma no tahut na hinhinawas taar mah ta muat kaia Rom.
ROM 1:16 Kanong warah, iau pai hirhir utano tahut na hinhinawas kanong no dadas ta God i kis taar tana wara halhalon diet bakut ing diet nurnur. Ira Iudeia diet ga lua ma namur um i halon diet ing diet pai Iudeia.
ROM 1:17 Ma iakano i tutun kanong no tahut na hinhinawas i hapuasne bia God i takodas ma na kure bia tikai mah na takodas. Ma God na kure bia tikai na takodas tano magingin na nurnur sen mon. Hoing no nianga ta God i tange bia, “No taktakodasuana tunotuno na lon tano uno nurnur.”
ROM 1:18 I palai bia na ngan huo kanong no ngalngaluan ta God i hanuat puasa meram ra mawe ma i kis taar ta ira sakana magingin ma ira magingin na tur talur God ing ira tunotuno diet gil, diet ing diet ma ira udiet sakena, diet suhe ira linge i tutun ta God.
ROM 1:19 I palai bia diet la gilgil huo kanong ira linge i tale bia diet na nunure uta God, diet palai ine. Kanong warah, God i te hapalaine diet ine.
ROM 1:20 Ma i palai bia iakan i tutun kanong tur leh tano hakhakisi tano ula hanuo di te manga palai ta ira uno tintalen ing pai tale bia tikai na nes. Ma kaiken, no uno dadas ing pa nale pataam, ma no tutun bia aie nora tamat na Tanuo. Ma diet palai utana huo kanong diet te nes um ira linge ing i te hakisi. Io kaik, diet pai tale bia diet na ianga bat ta ira udiet sakana magingin.
ROM 1:21 Hokaiken, a tutun diet ga nunure God iesen diet pa ga pirlat ie bia God ie ma diet pa ga tanga tahut tana. Taie. Ira udiet lilik ga hanuat linge bia ma diet ga ul ba kanong ira udiet lon i kankado.
ROM 1:22 A tutun diet ga tange bia diet ira ut na mintot iesen diet ga hanuat ul ba.
ROM 1:23 Diet ga malok bia diet na lotu tupas no tamat na God nong pai tale bia na maat. Diet ga kios no udiet lotu, diet gaam lotu tupas ira palimpuo ing diet ga gil hoira tunotuno i tale bia diet na maat, diet gaam lotu tupas ira maan mah, ma ira wawaguai, ma ira mangana linge i kaikaiau.
ROM 1:24 Iakano no burena bia God ga waak se um diet bia diet na gilgil ira bilingana magingin haruat ma ira udiet sinisip meram narako tun at ta diet, kaik diet gaam murmur ira hirhiruana tintalen ta ira palatamai diet.
ROM 1:25 Ma God ga gil huo kanong diet ga malok ise ira tutun ing i te hapuasne utana ma diet ga mur balik no hinarabota wara lotu tupas ma wara bulbul hanapu diet ta ira linge God ga hakisi, ma pataie bia God, aie nong da lat ie hathatikai. A tutun sakit.
ROM 1:26 Io kaik, God ga waak se um diet bia diet na murmur ira hirhiruana sakana sinisip. Hokaiken, ira hahin diet ga malok ise no magingin haruat ta ing God ga hakisi tar diet huo ma diet ga mur balik tiga mes.
ROM 1:27 Ma i haruat mah huo ta ira tunaan. Diet ga malok ise no udiet kinkinis tika ma ira hahin haruat ma ing God ga hakisi tar diet huo, ma ga manga mamahien ira udiet sakana sinisip harbasia ta diet. Ira tunaan diet ga mur ira hirhiruana magingin harbasiane ta diet at ma diet ga hatur kawase nora harpidanau haruat at ma ing diet ga haan ronga ine.
ROM 1:28 Ma diet pa ga lik bia a tamat na linge bia diet na nunure God bia sigei, kaik God gom waak se diet bia diet na mur sen mon ira udiet lilik na ba wara gilgil kaike ra magingin ing diet tale bia diet pa gor gil.
ROM 1:29 Diet te hung um ma ira kaba mangana magingin ing pai takodas, ira sakena, no magingin na nes kalak linge, ma ira bilingana magingin. Diet hung ma no tintalen na harubu bingibing ma ra bala ngungut mah, no magingin na harhuli, no sinisip wara hanghagahe ira mes, ma no magingin na sipsip ira kinkinis gar na mes. Diet pinas hagahe ma diet tange hagahe ira mes. Diet malentakuane God ma diet ira dadas na ul pat. Diet nes hanapu ira mes ma diet ira ut na latlaat. Diet lik leh ari a mangana sigar nironga wara gilgil. Diet patnau ta ira pawasi diet ma ira adiet sus.
ROM 1:31 Diet pai palai tun at ta ira bilbilai. Diet pai gil haruatne ing diet tange. Diet pai sip at ira hinsaka diet ma diet pai marse ira tunotuno.
ROM 1:32 A tutun, diet manga nunure tar no takodasuana harkurai ta God ing i tange bia diet ing diet gil kaiken ra linge, i takodas bia diet na maat. Iesen diet gilgil haitne balik kaiken ra magingin at. Ma pai iakano sen mon. Taie. Diet manga haut leh mah diet ing diet la gilgil huo.
ROM 2:1 Io kaik, augu nong u kure hagahe tiga mes, pai tale bia nu ianga bat ta ira num magingin sakena kanong ira linge u te kure hagahe tikai ine, io, u kure hagahe habaling ugu. Kanong warah, augu nong u harkurai huo, u la gilgil mah kaiken ra mangana magingin at.
ROM 2:2 Ma dahat nunure bia ing God i kure hagahe diet ing diet gil kaiken ra mangana magingin, no uno ula harkurai i takodas.
ROM 2:3 Augu tiga tunotuno mon nong u kure hagahe diet ma u gil balik kaiken ra mangana linge at, u lik bia i tale ugu bia nu hilau pas no harkurai ta God?
ROM 2:4 Hohe, u lik hanapu no uno gingilaan wara gilgil ra tamat na bilbilai utaam, ma bia i manga bala maat tupas ugu ma tano tahut na linge bia no uno harkurai pai gasien taar taam? Hohe, pau nes kilam tar bia no harmarsai ta God i lamus ugu wara lilik pukus?
ROM 2:5 U manga ul pat ma u malok bia nu lilik pukus, kaik gu bulbul tagure ra ngalngaluan ing na haan tupas ugu tano bung na ngalngaluan ta God ing no uno takodasiana harkurai na hanuat puasa.
ROM 2:6 Aie nong “na balu pukus ira tunotuno bakut haruat ma ira udiet mangana gingilaan.”
ROM 2:7 Ari, diet la gilgil haitne ira tahut na tintalen. Ma bia ing diet gilgil huo i palai bia diet sisilih tano ngaas wara kapkap ra minamar ma ra bilai na hinsang ma no kinkinis ing pataie ta minaat tana. God na balu pukus diet ma no nilon hathatikai.
ROM 2:8 Ira mes, diet nes kalak ira linge wara hatamat at diet. Diet malok ise no tutun ma diet mur ira magingin ing pai takodas. God na balu pukus um diet ma ra tamat na ngalngaluan.
ROM 2:9 A mon harangunngutaan ma ra tamat na tinirih na haan tupas ira tunotuno bakut ing diet gil ira sakena. Na ngan taar huo ta diet ing diet pai Iudeia ma sen tutun sakit ta diet ira Iudeia.
ROM 2:10 Iesen a mon minamar ma ra tamat na kinkinis ma ra malum na haan tupas ira tunotuno bakut ing diet gil ra tahut. Na ngan huo taar ta diet ing diet pai Iudeia ma sen tutun sakit ta ira Iudeia.
ROM 2:11 Ma na ngan um huo kanong God pai la tur sen ma tikai ma na hagahe bia tiga mes.
ROM 2:12 Hokaiken, diet bakut ing diet pai hatur kawase ira harkurai ta Moses ma diet gil ra sakena, io, diet na hiruo. Ing bia diet pai hatur kawase kaike ra harkurai, diet na hiruo iaat mah. Ma diet bakut um ing diet te hatur kawase ira harkurai ta Moses ma diet gil ra sakena, io, kaike ra harkurai na kure hagahe diet.
ROM 2:13 Iakan i tutun kanong diet um ing diet hadade ta mon ira harkurai ta Moses, God pa na kure bia diet takodas ra matmataan tana. Taie. Diet ing diet mur ira harkurai, diet kaik ing God na kure bia diet takodas.
ROM 2:14 Iakan i tutun kanong diet ing diet pai Iudeia diet pai hatur kawase ira harkurai ta Moses iesen ing diet gil haruatne kaike ra harkurai ma ira gingilaan i hanuat meram narako ta ira udiet nilon, io, diet bul hawaat ira udiet harkurai tus. Ma taie ta linge bia diet pai hatur kawase ira harkurai ta Moses.
ROM 2:15 Diet hamines bia a tutun bia ira hartula ing ira harkurai ta Moses i tange bia da gil, kaike ra hartula i kis taar narakoman ta diet hoing bia di te pakat tar narakoman ta ira kati diet. I ngan huo ing ira udiet lilik i hinawas palai ta ira mangana magingin sa diet gil. Ari a pakaan ira udiet lilik i tange hapalaine bia diet ronga, ma ari a pakaan bia diet gil ra bilai.
ROM 2:16 Ma na ngan huo hoken ta iakano ra bung ing God na kure ira kaba lilik kumkumaan gar na tunotuno haruat ma no tahut na hinhinawas iau harharpir mei. Ma i te tar um iakan ra pinapalim na gil harkurai taar tano limane Jisas Krais.
ROM 2:17 Ma augu mah, hohe taam? U tange bia a Iudeia ugu. U te so tar no num nurnuruan ta ira harkurai ta Moses ma u la sasa butbut ma no num harnunurai ma God.
ROM 2:18 Ira harkurai ta Moses i te hausur ugu, kaik gu palai taar ta ing God i sip bia nu gil ma na tale ugu bia nu nes kilam ira linge ing i manga bilai.
ROM 2:19 U nunure tun at bia u sal timaan ira pulo ma bia a lulungo ugu taar ta diet ing diet kis ra kankado.
ROM 2:20 U manga palai mah bia a ut na haratakodas ugu taar ta diet ing diet pai nunure no bilai ma no sakena, ma bia a tena harausur ugu taar ta diet ing pai matuko ira udiet lilik. Ma u lilik huo kanong u hatur kawase ira harkurai ta Moses, ma kaiken ra harkurai ing i hapuasne hapalai no tutun ma ira mintota.
ROM 2:21 Ma augu um, u hausur ira mes. Wara bih pau hausur habaling ugu? U la harharpir bia tikai pa na kikinau, iesen hohe, augu, pau kikinau?
ROM 2:22 U la tangtange bia tikai pa na noh tika ma tikai pai no uno, iesen hohe, augu, pau gil huo? U la manga malmalentakuane ira palimpuo, iesen hohe, augu, pau kinau ira palimpuo ta ira udiet hala na lotu?
ROM 2:23 U la sasa butbut bia u hatur kawase ira harkurai ta Moses. Iesen hohe, augu, pau kap tar ra hirhir ta God ing u lake kaike ra harkurai?
ROM 2:24 I palai bia iakan i tutun kanong i ngan hoing no nianga ta God di ga pakat ie i tange bia, “Diet ing diet pai Iudeia diet tange hagahe God, i burena ta muat ira Iudeia.”
ROM 2:25 Io, i tutun bia no magingin na kut palatamainari na harahut ugu ing bia u taram ira harkurai ta Moses. Iesen bia nu lake kaike ra harkurai i hoing bia pa di ga kut no palatamaim.
ROM 2:26 Ing bia diet ing pa di ga kut ira palatamai diet, diet mur ira hartula ta kaike ra harkurai, a tutun sakit bia God na nes kilam diet hoing bia di te kut ira palatamai diet.
ROM 2:27 Ma augu, u te hatur kawase leh ira harkurai di ga pakat hasur ma no magingin na kut palatamainari. Iesen, ing bia tikai nong pa di ga kut no palatamaine tutun, ing bia i mur kaike ra harkurai, io, na kure hagahe balik ugu bia a ut na laka harkurai ugu.
ROM 2:28 Io kaik, no tunotuno pai Iudeia tutun tano winawas na huntunaan mon. Ma bia di kut no palatamaine tutun no tunotuno, iakano pai hakilang um bia gar ta God ie.
ROM 2:29 Taie. No tunotuno nong i Iudeia tutun, aie nong a Iudeia ie meram narako tun tana. Ma no magingin na kut palatamainari nong i hakilang bia tikai gar ta God ie, io, iakano hakilang i hanuat tutun meram tano katine. No Halhaliana Tanuo i gil ie, ma pai hanuat ta ira harkurai ta Moses di ga pakat hasur. Ma iakano ra mangana tunotuno pa na kap no uno pirharlat mekaia ta ira matanaiabar. Taie. Na kap ie meram ho God.
ROM 3:1 Ing bia iakano i tutun, asa nong i hatahutne tikai bia a Iudeia ie? Ma no magingin na kut palatamainari na harahut ie hohe?
ROM 3:2 Ai! A tamat na harharahut i te tupas ugu bia a Iudeia ugu. Ma no luena linge i hoken, bia God ga tar ira uno nianga taar ta diet ira Iudeia bia diet naga mur haruatne.
ROM 3:3 Na ngan hohe ing bia ari ta diet pa ga nurnur? Hohe, ira udiet tabuna nurnuruan i tale bia na gil palas ira kunubus ta God kaik God pa naga gil haruatne ta ing ga tange?
ROM 3:4 Taie tun at! Iesen a linge bia ing bia i hanuat palai bia ira tunotuno bakut diet ira ut na harabota. Dahat manga nes kilam tar bia God i la gilgil haruatne ing i tange. I hoing no nianga ta God di ga pakat ie i tange bia, “Na hanuat puasa bia u takodas ta ira num nianga, ma bia nu tur ra hartung nu hamines bia iakano hartutung pai kata tar ugu.”
ROM 3:5 Iesen bia ira udahat magingin sakena i manga hamines hapalaine bia God i takodas, io, dahat na tange hohe? Hohe, i nanaas bia God pai takodas ing i ngalngaluan ma dahat ma i hapidanau dahat? (Maris! Ing iau ianga huo iau mur no mangana hargau gar na tunotuno mon.)
ROM 3:6 Taie tun at! Ing bia God pai gor takodas, na tale hohe bia na kure no ula hanuo?
ROM 3:7 Ma sen bia tikai na tange dak bia, “Di hapupuo ira tutun na magingin ta God ma ira nugu magingin ing i tamapas laah tano tutun. Ma ira nugu sakana magingin huo i manga hamines hapalaine bia God i kis tano tutun, kaik i hatamat no minamarine. Io kaik, wara bih God i nes kilam baak iau bia iau tiga ut na sakena ma i kure hagahe iau?”
ROM 3:8 I ngan taar um hohe bia pa da tange bia, “Kaia, dahat na gil ira sakena, kaik no tahut naga hanuat”? A tutun, ari diet te tange hagahe iau ing diet tange bia iau ianga huo. Diet te sip leh at iakano ra harpidanau ing na haan tupas diet.
ROM 3:9 Io, da tange um hohe? Hohe, dahat ira Iudeia, dahat te kap ra kinkinis i tahut ta diet ing diet pai Iudeia? Pai ngan huo tun at. Kanong iau te hamines tar bia ira Iudeia ma diet ira mes mah, diet bakut, diet kis ra hena no dadas ta ira magingin sakena.
ROM 3:10 I hoing no nianga ta God di ga pakat ie i tange bia, “Taie tikai pai takodas. Taie tun at tikai.
ROM 3:11 Taie tikai pai palai ta ira tutun ta God, ma taie tiga nong i sisilih uta God.
ROM 3:12 Diet bakut diet te siel wiis laah, Diet tika bakut, diet te linge bia tar ta God. Taie tikai pai gil no tahut. Taie tun at tikai.
ROM 3:13 Ira udiet nianga i mapus hoing tiga midi di kitat tar ie. Ira karame diet i harhuli. Ira palabulu diet i mela haruat ma no talbore i harkarat.
ROM 3:14 Ira ha diet i hung ma ra harangungut ma ra nianga na harhuli.
ROM 3:15 Diet habir mon wara harubu bingibing.
ROM 3:16 Ma ta ira udiet hinahaan diet hatahuat sen mon no halhaliarai ma ra hinangul.
ROM 3:17 Diet pai nunure wara bulbul no malum.
ROM 3:18 No bunurut ma no urur tupas God i panim ta diet.”
ROM 3:19 Ma dahat nunure um bia asa ira harkurai ta God i tange, i tange huo taar ta diet ing diet kis ra hena kaike ra harkurai. Warah, waing taie tikai pa na tale bia na ianga bat ira uno sakena ma bia no ula hanuo bakut na tur ra hena tano harkurai ta God.
ROM 3:20 Ma i palai um bia iakan i tutun kanong God pa na kure bia tiga nong i takodas ra matmataan tana bia i gilgil haruat ta ira harkurai mon. Taie. Kanong ira uno harkurai at i hapalaine dahat bia dahat gil ra sakena.
ROM 3:21 Iesen ma kaiken um God i te hamines bia a takodasianai ma bia na kure mah bia tikai i takodas. Ma pai tahuat tano magingin na mur harkurai ta Moses. Ma kaike ra harkurai ma ira nianga ta ira tangesot i hinawas palai mah uta iakan ra linge.
ROM 3:22 Tano udiet nurnuruan ta Jisas Krais, God i kure bia diet takodas. Ma i kure huo ta diet bakut ing diet nurnur kanong diet bakut diet haruat sen mon.
ROM 3:23 Ma diet haruat kanong diet bakut diet te gil ra sakena ma diet te puko sukun talur leh no kinkinis haruat ma ira minarine God.
ROM 3:24 Iesen diet bakut, God i kure bia diet takodas tano uno harmarsai. A hartabar bia mon iakano linge i gil tar ta diet. Ma ga tale bia na gil huo kanong Jisas Krais ga kul halangalanga diet.
ROM 3:25 Ma God ga tar hawaat ie hoing tiga hartabar wara habaibai no uno ngalngaluan. Ma iakan ra hartabar i papalim huo ta diet ing diet nurnur tano dena. Nalua God ga hok baak ira magingin sakena diet ga gil, kaik gaam tar hawaat iakan ra mangana hartabar wara hamines bia i takodas.
ROM 3:26 Ga gil huo wara hamines ta iakan ra pakana bung kaiken bia a takodasianai waing naga talei bia aie at na takodas ma bia aie baling at mah nong na kure bia diet takodas ing diet nurnur ta Jisas Krais.
ROM 3:27 Io kaik, i tale bia da latlaat? Taie. Ma asa no burena? Hohe, ira udahat gingilaan i haruat ta ira harkurai? Taie. Iesen kanong dahat nurnur.
ROM 3:28 Ma i tale bia da tange huo kanong dahat nes kilam bia God i kure bia tikai i takodas kanong i nurnur, ma pataie bia i mur ira harkurai ta Moses.
ROM 3:29 Bia pai gor ngan huo gor nanaas bia God aie a God gar na Iudeia sen mon. Iakano i tutun? Hohe, pai God ie gar ta diet ira mes mah? Masa! A God gar udiet ira mes mah kanong tiga kapawena God sen mon kana. Ma aie nong na kure bia diet ing di ga kut ira palatamai diet, bia diet takodas kanong diet nurnur. Ma aie mah nong na kure bia diet ing pa di ga kut ira palatamai diet, bia diet takodas mah ta iakano mangana kapawena nurnur sen mon.
ROM 3:31 Io kaik, i nanaas bia dahat te lilik na linge bia ta ira harkurai ta Moses tano magingin na nurnur? Taie tun at! Dahat bul haut kaike ra harkurai.
ROM 4:1 Io, ma dahat na tange um hohe uta Abraham no hintubu dahat ing a tunotunoi hoing dahat? Ga namien tutun hohe uta kaiken ra linge?
ROM 4:2 Ing bia i tutun bia God ga kure bia Abraham i takodas kanong i bilai ira uno gingilaan, io, a mon burena bia Abraham na latlaat. Iesen God pa ga nes ie huo.
ROM 4:3 Kanong warah, ira nianga ta God di ga pakat i tange hoken: “Abraham ga nurnur ta God ma God ga was leh no uno nurnuruan bia Abraham i takodas ra matmataan tana.”
ROM 4:4 Io, ma bia tikai i papalim, pa di was leh no uno kunkulaan bia a hartabar bia. Taie. Diet nes kilam ie bia a hunena haruat ma ira uno pinapalim.
ROM 4:5 Iesen hohe tano tunotuno nong pai papalim haruat ma ira harkurai ma sen i nurnur ta God nong i la kurkure bia ira ut na sakena diet takodas? Io, God na was leh no uno nurnuruan bia iakano tunotuno i takodas ra matmataan tana.
ROM 4:6 Ma Dawit ga tange mah iakan ra linge ing ga iangianga utano haridaan i haan tupas no tunotuno nong pai mur ira gingilaan haruat ma ira harkurai ta Moses iesen God i was leh ie bia i takodas. Ga tange hoken:
ROM 4:7 “Diet daan ing ira udiet tintalen na laka harkurai God i te lik luban se, ma ira udiet sakena i te kasar bat.
ROM 4:8 I daan no tunotuno nong ira uno sakena no Watong pa na was leh ukaia tana bia na tur ra harkurai.”
ROM 4:9 Hohe um, diet ing di ga kut ira palatamai diet, diet sen mon diet te hatur kawase iakan ra haridaan, ma pataie bia diet ing pa di ga kut ira palatamai diet? Ma dahat te tange bia God ga was leh no nurnuruan gar ne Abraham bia Abraham i takodas ra matmataan tana.
ROM 4:10 Hunanges God ga was halaka leh ie huo? Menalua bia menamur tano bung di ga kut no palatamaine? Pataie bia namur. Iesen, menalua.
ROM 4:11 Ga kap iakano hakilang na kut palatamainari hoing tiga binora di bare bat bia God i te kure bia i takodas tano uno nurnuruan tano pakana bung at baak ing pa di ga kut no palatamaine. Io kaik, no hintubu diet aie ta diet ing pa di ga kut ira palatamai diet ma sen diet nurnur ma God i was leh diet bia diet takodas ra matmataan tana.
ROM 4:12 Ma no hintubu diet mah aie ta diet ing di ga kut ira palatamai diet iesen pai ta iakan sen mon. Taie. No hintubu diet aie ta diet ing diet la murmur mah ira paras na kakine no magingin na nurnur ta Abraham, iakano nurnuruan nong Abraham ga hatur kawasei ing pa di ga kut baak no palatamaine.
ROM 4:13 Io, ma pataie bia tano gingilaan na mur harkurai bia God ga kukubus taar ta Abraham ma ira uno bulumur bia Abraham na rumahal laah tano ula hanuo. Taie. Ga kukubus taar huo kanong God ga kilam Abraham bia i takodas ra matmataan tana kanong ga nurnur.
ROM 4:14 Ma huo mah, ing bia diet ing diet lon mur ira harkurai diet gor rumahal huo, io, gor hamines bia no magingin na nurnur a linge bia ma no kunubus i pata hunena.
ROM 4:15 Kanong warah, ira harkurai ta Moses i hatahuat no ngalngaluan ta God. Iesen ing bia pataie ta harkurai kana, pataie mah ta magingin na laka harkurai.
ROM 4:16 Io kaik, dahat kap no kunubus ta ira udahat nurnuruan waing no kunubus naga hartabar bia mekaia tano harmarsai. I hanuat tano harmarsai waing naga haan tupas tun at ira bulumur bakut ta Abraham ma taie tiga linge pa na tale bia na tur bat ie. Pa na haan tupas sen mon diet ing diet hatur kawase ira harkurai ta Moses, iesen na haan tupas mah diet ing diet mur no mangana nurnur ta Abraham. Aie no hintubu dahat bakut.
ROM 4:17 I hoing no nianga ta God di ga pakat ie i tange bia, “Iau gate bul ugu bia no hintubu diet ira haleng na huntunaan.” God nong Abraham ga nurnur tana ga nes kilam ie bia no hintubu dahat ie. Aie no God nong i tar nilon ta ira minaat ma i tange ta ira linge ing kana baak bia na hanuat um.
ROM 4:18 Ga nanaas taar ta Abraham bia no kunubus ta God pa na hanuat tutun, kaik taie ta burena bia tikai na so no uno lilik ma na nanaho tana. Iesen Abraham balik ga so no uno lilik huo ma gaam nurnur. Io kaik, Abraham gom no hintubu diet ira haleng na huntunaan hoing God gate tange tana bia, “Ira num bulumur mah huo.”
ROM 4:19 Abraham ga nes kilam bia no palatamaine i te manga malur um kanong gate haruat um ma tiga maar ira uno tinahon. Ga nes kilam Sara huo mah bia ira uno pakana bung na kinakaha gate pataam um. Iesen no uno nurnur pa ga puko ta dahin.
ROM 4:20 Abraham ga nes kilam habaling dir huo iesen ing ga lilik tano kunubus pa ga haan sukun no uno nurnur, kaik pa gaam iruo ira uno lilik utano kunubus. Taie. God ga hadadas no uno nurnur ing Abraham ga pirlat ie ma gaam kanam bakut leh bia God na petlaar bia na gil haruat ta ing gate kukubus taar huo.
ROM 4:22 Ma iakano no burena bia “God ga was leh no uno nurnuruan bia Abraham i takodas ra matmataan tana.”
ROM 4:23 Ma iakan ra nianga, “God ga was leh ie huo,” pa di ga pakat ie wara gaiena sen mon. Taie.
ROM 4:24 Di ga pakat ie wara gaie dahat mah ing God na was leh dahat bia dahat takodas ra matmataan tana. God na gil huo ta dahat ing dahat nurnur tana ing aie ga hatut Jisas no udahat Watong sukun ra minaat.
ROM 4:25 Aie nong God ga tar sei bia na maat uta ira udahat sakena ma aie mah nong God ga hatut pukus ie wara utano uno gingilaan na bul harkurai bia dahat takodas ra matmataan tana.
ROM 5:1 Io kaik, a malum i kis um ta dahat ma God tano udahat kinkinis narako tano udahat Watong Jisas Krais kanong tano udahat nurnuruan God i te kure bia dahat takodas ra matmataan tana.
ROM 5:2 Ma meram narako ta Krais dahat te laka ta iakan ra kinkinis God i te tabar bia dahat mei ma no uno harmarsai. Ma Krais i te gil huo kanong dahat te nurnur tana. Dahat la tur taar huo ta iakan ra kinkinis na harmarsai ma dahat kanakana ma ra gungunuama kanong dahat kis nanaho ma ra nurnuruan bia dahat na hatur kawase ira haridaan i hanuat meram ra minamarine God.
ROM 5:3 Ma pai iakanin sen mon. Taie. Dahat kanakana ma ra gungunuama mah ta ira udahat ngunngutaan kanong dahat nunure tar bia nora ngunngutaan i hatahuat no magingin na tur dadas ra hena ra tinirih.
ROM 5:4 Ma bia dahat tur dadas huo ta ira tinirih, i hanuat palai bia kaike ra tinirih i te walar sot dahat ma sen dahat pai ngan hoken ira mangana tunotuno diet puko. Ma bia dahat kaiken ra mangana tunotuno, io, i tale bia dahat na nanaho ma ra nurnuruan bia dahat na hatur kawase ira haridaan.
ROM 5:5 Ma bia dahat nanaho ma ra nurnuruan huo, io, dahat pa na kis ta ra hirhir kanong God i te burange hahungi ira bala dahat ma no uno harmarsai ing ga tabar dahat ma no Halhaliana Tanuo.
ROM 5:6 Hokaiken, tano pakana bung haruat tun at tano sinisip ta God ing dahat pa ga petlaar wara gilgil um ta linge, Krais ga maat wara gaie dahat, dahat ing dahat ga tur talur God.
ROM 5:7 A dadas pane leh at bia tikai na maat wara gaie tiga ut na takodas. Iesen i tutun mah bia tikai na iangor dak bia na maat wara gaie tiga bilai na tunotuno huo.
ROM 5:8 Iesen God i hamines hapalaine bia aie at i sip dahat hokaiken, bia ing baak dahat ga ut na sakena taar Krais ga maat wara gaie dahat.
ROM 5:9 A tutun bia tano dene Krais, God i te kure bia dahat takodas ra matmataan tana. Ma bia iakano i tutun, io, i manga tutun bia Krais na halon dahat sukun no ngalngaluan ta God!
ROM 5:10 Hokaiken, a tutun ing dahat gate manga malentakuane baak God, io, tano minaat tano Natine, God ga hamaraam dahat tika mei. Ma bia iakano i tutun, io, i manga tutun bia tano nilon tano Natine, God na halon dahat kanong dahat te haramaraam taar mei huo!
ROM 5:11 Ma pai iakanin sen mon. Taie. Dahat kanakana ma ra gungunuama mah ta God kanong no udahat Watong Jisas Krais i te hamaraam tar dahat tika ma God.
ROM 5:12 Io kaik, tiga linge i ngan hoing iakan. Tiga tunotuno mon ga halamlam halaka no magingin sakena ukai tano ula hanuo ma ga maat kanong ga gil no sakena. Ma ta iakano mon ra mangana ngaas no minaat ga haan taar ta ira tunotuno bakut kanong diet bakut diet ga gil no sakena.
ROM 5:13 (Io, a tutun bia no magingin sakena ga kis kai tano ula hanuo menalua bia ira harkurai ta Moses ga hanuat. Iesen pai tale bia da kilam tikai bia i gil ronga ing bia pa di bul harkurai baak.
ROM 5:14 Iesen nora minaat ga bul hasur ira tunotuno mekaia ho Adam tuk taar ta Moses, diet at mah ing diet pa ga gil ra sakena haruat ma no magingin na laka harkurai ta Adam. Ma Adam tiga tutun na malalarine ta nong i wara hinanuat namur.
ROM 5:15 Iesen no hartabar pai papalim haruat ma no magingin na laka harkurai. A tutun bia diet ira halengin diet ga maat kanong iakano kapawena tunotuno sen mon ga lake no harkurai. Iesen no harmarsai ta God ma no hartabar nong no kapawena tunotuno Jisas ga hartabar mei ma no uno harmarsai, io, iakano ga manga sal sakit gaam sal bus diet ira halengin!
ROM 5:16 Hokaiken, no hartabar i mes tano hunena nong i hanuat laah tano magingin sakena ta iakano kapawena tunotuno. Ma i hoken, bia no magingin na tuntunur ra harkurai ga tahuat laah tano kapawena magingin sakena ma ga kure hagahe ira tunotuno. Iesen no hartabar balik ga tahuat laah mekaia ta ira haleng na tintalen wara laklake ira harkurai, ma no hartabar ga kap hawaat no magingin bia God na kure bia tikai i takodas ra matmataan tana.
ROM 5:17 Kanong iakano kapawena tunotuno sen mon ga lake no harkurai, nora minaat ga tur leh bia na bul hasur ira tunotuno. Ma no burena ta iakano kapawena tunotuno sen mon. Iesen hohe ta diet ing diet te kap leh no harmarsai ta God nong i manga sal bus diet mei? Diet at ing diet te kap leh no hartabar ta God, iakano uno magingin ing i kure bia tikai i takodas ra matmataan tana. Ing bia i tutun bia no minaat i bul hasur ira tunotuno huo, io, i manga tutun sakit bia God na manga hatatik diet ing diet kap no nilon. Ma no gingilaan ta iakano kapawena tunotuno mon Jisas Krais no burena bia God na gil huo.)
ROM 5:18 Io kaik, hoing no kapawena laka harkurai sen mon ga huai ma God gaam kure hagahe um ira tunotuno bakut, io, huo mah no kapawena takodasiana gingilaan sen mon ga huai ma God gaam kure um bia ira tunotuno bakut diet takodas ra matmataan tana, kaik diet naga lon.
ROM 5:19 Hokaiken, hoing God ga kure bia diet ira halengin diet ira ut na sakena kanong iakano kapawena tunotuno sen mon pa ga taram nianga, io, huo mah, God na kure bia diet ira halengin diet na takodas ra matmataan tana kanong iakano kapawena tunotuno sen mon ga taram nianga.
ROM 5:20 Io, ma ira harkurai ta Moses ga tur huat um waing naga palai bia ira magingin sakena i manga tamat. Iesen bia ira magingin sakena ga manga tamat hanahaan huo, io, no harmarsai ga manga tamat sakit balik um.
ROM 5:21 Ma ga ngan huo waing no harmarsai naga papalim hoing no magingin sakena ga papalim huo. Ira minaat diet ga kis ra hena no dadas tano magingin sakena. Huo mah, diet ing God na kure bia diet takodas ra matmataan tana, diet na kis ra hena no dadas tano harmarsai, iakano harmarsai nong na hatahuat no nilon hathatika taar ta diet ing diet kap Jisas Krais no udahat Watong.
ROM 6:1 Io kaik, dahat na tange hohe um? Hohe, i tahut bia dahat na gilgil ira sakena waing no harmarsai naga manga tamat um?
ROM 6:2 Taie tun at! Dahat ga maat sukun ira dadas tano magingin sakena. Hohe um bia dahat na lon balin ra henai?
ROM 6:3 Na manga tahut bia muat na palai bia dahat bakut ing dahat te kap baptais narako ta Jisas Krais, iakan i hamines bia dahat ga maat tika mei.
ROM 6:4 Hokaiken, i hoing bia di ga bus dahat tika mei taar tano minaat ing dahat ga kap baptais. Ma i ngan huo waing dahat naga lon haruat ma Krais. No dadas nong i manga bilai mekaia ta Mama ga hatut ie sukun ra minaat. Huo mah ta dahat, na tale dahat bia dahat naga lon ma tiga sigar mangana nilon.
ROM 6:5 Ma dahat nunure bia na ngan huo kanong bia ing dahat te harpatup tika mei tano minaat, io, tutun sakit dahat na harpatup tika mah mei tano uno tuntunut hut baling.
ROM 6:6 Ma iakan i palai kanong dahat nunure bia no udahat tuarena nilon ga maat tika mei tano ula kabai waing no palpal ta dahat nong i kis ra hena no magingin sakena naga taie un ta dadas. Ma i ngan huo ta dahat waing dahat pa na tultulai baling tano sakena.
ROM 6:7 Ma i tale bia dahat na tatalen huo kanong sige tikai i te maat i te langalanga sukun um no dadas tano magingin sakena.
ROM 6:8 Iesen bia ing i tutun huo bia dahat te maat tika ma Krais, dahat nurnur bia dahat na lon tika mei kanong dahat nunure bia pa na maat baling. Warah, kanong God gate hatut pukus ie sukun ra minaat. Masa. Pa na kis baling ra henai tano dadas tano minaat.
ROM 6:10 Hokaiken, no minaat pai tale bia na kurei kanong i te maat um tiga pakaan mon. Ma i haruat. Pa na maat baling. Iesen no mangana nilon i lon kaiken, i lon wara gaie God.
ROM 6:11 Huo mah, i tahut bia muat na nes kilam muat bia muat ga maat sukun ira dadas tano magingin sakena ma bia muat lon tano numuat kinkinis ta Jisas Krais wara gaie God.
ROM 6:12 Io kaik, waak muat haut leh no magingin sakena bia na kure ira palatamai muat, a mangana palatamainari ing na maat mon. Ing bia muat na haut leh ie huo muat na taram ira uno sakana sinisip.
ROM 6:13 Waak muat tartar habaling ira sumsubaan ta ira palatamai muat taar tano magingin sakena bia no sakena na papalim me wara gilgil ira tintalen ing pai takodas. Iesen i tahut bia muat na tar muat taar ta God balik, muat ing muat te lon um sukun ra minaat. Ma muat na tar ira sumsubaan ta ira palatamai muat taar tana bia na papalim me wara gilgil ira magingin takodas.
ROM 6:14 Ma i tale bia muat na lon huo kanong no magingin sakena pa na gau leh muat ma na uno dadas. Kanong warah, muat pai kis ra hena ira harkurai, iesen muat kis ra henai tano ra hartabar na harmarsai.
ROM 6:15 Io kaik, da tange hohe um? Hohe, i tahut bia dahat na gil ira sakena kanong dahat pai kis taar ra henai ira harkurai ma sen ra hena ra harmarsai? Taie tun at!
ROM 6:16 Na manga tahut bia muat na nunure bia ing muat tar se muat ta tikai wara tartaram ie hoing ira uno tultulai, io, a tutun bia muat te tultulai um ta iakano tunotuno nong muat tartaram ie. Ma i ngan huo bia ing muat ira tultulai gar tano magingin sakena nong i halamlam muat taar tano minaat, bia ing muat ira tultulai gar tano magingin na taram nianga nong i halamlam muat taar ta God nong na kure bia muat takodas ra matmataan tana.
ROM 6:17 Ma bia dahat nes bia i ngan hohe ta muat, dahat tanga tahut ta God. A tutun bia nalua muat git tultulai taar tano magingin sakena. Iesen muat ga taram nora harausur ma ira numuat kidilona nilon bakut at, iakano harausur nong God ga bul hawaat ie bia muat na kis ra henai.
ROM 6:18 God i te halangalanga ise muat sukun nora dadas tano magingin sakena ma muat te tultulai um gar ta ira magingin takodas.
ROM 6:19 Ing iau tange huo iau hamines tiga malalar ta ira udahat mangana kinkinis kai napu kanong i malus bia muat na mur ira sakena. A tutun bia nalua muat git tartar ira sumsubaan ta ira palatamai muat wara tultulai um gar ta ira bilingana magingin ma ira sakana tintalen ing i tamtamat hanahaan. Huo mah, kaiken i tahut bia muat na tar kaike ra sumsubaan wara tultulai um gar ta ira magingin takodas kaik muat naga halhaal sukun ira sakena.
ROM 6:20 Kaia, muat na gil huo kanong i palai bia tano pakana bung bia muat ga tultulai gar tano magingin sakena, taie ta linge pa ga halawen muat bia muat na mur ira takodasuana magingin.
ROM 6:21 A mangana hunena sa um ing muat te kap leh ta kaike ira mangana gingilaan wat ga kaha hirhir pane? Taie um tari kanong kaike ra linge i bul tar muat tano minaat.
ROM 6:22 Iesen kaiken um God i te halangalanga sukun muat tano dadas tano magingin sakena ma muat te tultulai um gar ta God. Io kaik, ira hunena um muat kap, i lam tar muat tano kinkinis i halhaal sukun ira sakena, kaik muat kap no lon hathatika.
ROM 6:23 Kanong warah, no kunkulaan tano magingin sakena, aie no minaat. Iesen no hartabar ta God nong i tabar bia dahat mei, aie no nilon hathatika ing i kis ta Jisas Krais no udahat Watong.
ROM 7:1 Bar hinsakagu ta Krais, muat na palai tun at ta ing iau wara tangtange kanong muat bakut muat nunure tar ira harkurai, bia ira harkurai i kasar sen mon baak tikai bia i lon taar.
ROM 7:2 Hokaiken, no harkurai i kure tar bia tiga tinolen na hahin i kukubus tika taar ma no uno tunaan ing baak no tunaan i lon taar. Iesen bia no uno tunaan i maat, no hahin i te langalanga sukun no harkurai na tinolen huo.
ROM 7:3 Io kaik, ing bia no hahin i tole tiga mes na tunaan ing baak no uno luena tunaan i lon taar, io, da tange bia no hahin i te gil sakena ma tiga mes na tunaan pai unoi. Iesen bia no uno tunaan i te maat, no hahin i te langalanga sukun iakano harkurai, ma pa da tange bia i te gil sakena ma tiga mes pai unoi. A linge bia be i te tole tiga mes na tunaan.
ROM 7:4 Ma huo mah ta muat bar hinsakagu. Tano ninaas ta ira harkurai ta Moses, muat te maat sukun um ra hena kaiken ra harkurai kanong muat narako tano palatamaine Krais. Io kaik, muat ira tunotuno gar ta tiga mes. Muat kukubus taar ta iakano nong God ga hatut haut ie sukun ra minaat ma muat kukubus taar huo waing muat naga huai hawaat no hunena wara gaie God.
ROM 7:5 Hokaiken, ing no sakana palpal narako ta dahat ga kure dahat bia dahat na murmur ie, ira sakana sinisip ing ira harkurai ta Moses ga hatatik, diet ga papalim narako ta ira palatamai dahat, io kaik dahat gom huai ra hunena haruat tano minaat.
ROM 7:6 Iesen kaiken um dahat te langalanga sukun ra hena ira harkurai ta Moses kanong dahat te maat talur kaike ing ga wis kawase dahat. Io kaik, no udahat gingilaan na tultulai i kis narako tiga sigar mangana ngaas nong i kis ra hena no Halhaliana Tanuo. Dahat pai kis na tultulai baling um narako tano tuarena ngaas na tartaram ira kaba nat na harkurai bakut.
ROM 7:7 Io kaik, dahat na tange hohe um? Ira harkurai ta Moses i sakena? Taie tun at! Iau pa gor nunure balik no sakena ing bia ira harkurai pa gor hamines tar tagu. Kanong warah, iau pai tale bia iau ni nes kilam no magingin na nes kalak ira linge gar na mes ing bia no harkurai pa gor tange bia, “Waak u nes kalak ira linge gar na mes.”
ROM 7:8 Hokaiken, no magingin sakena ga nes kilam no harkurai bia no harkurai i te papos no ngaas tano sakena bia na papalim. Io kaik, no magingin sakena ga hatahuat ira kaba mangana nesnes kalak ira linge gar na mes narako tagu. Ma i ngan huo kanong no magingin sakena pai tale bia na papalim ing bia pataie ta harkurai.
ROM 7:9 Tiga pakana bung baak ga nanaas bia iau ga lon taar ing iau pa ga nunure tar ira harkurai ta Moses. Iesen bia ira harkurai ga hanuat palai tagu, no magingin sakena ga tur huat ma nora dadas ma iau ga maat um.
ROM 7:10 Ma kaike ra harkurai ing God ga sip bia na tar no nilon, io, ga tar no minaat balik tagu.
ROM 7:11 Kanong warah, no magingin sakena ga nes kilam ira harkurai bia ira harkurai i te papos no ngaas tano sakena, kaik gaam habato iau, ma mekaia tano dadas ta ira harkurai ga bu bing iau.
ROM 7:12 Io kaik um, ira harkurai i halhaal tano sakena. Ma ira kaba natnat na hartula mah i halhaal huo ma i takodas ma i bilai.
ROM 7:13 Hohe um, i nanaas bia kaike ing i bilai ga hatahuat nora minaat taar tagu? Taie tun at! Iesen no magingin sakena balik nong ga hatahuat ie taar tagu huo. Ma no magingin sakena ga papapalim ma kaike ira bilai na harkurai wara hatahuat nora minaat taar tagu waing naga manga palai bia iakano mangana magingin i sakena at. Ma ga ngan huo waing nigi hapupuo ira harkurai ma no magingin sakena ma bia nigi nes kilam bia iakano mangana magingin i manga sakena tun at.
ROM 7:14 Ma dahat nunure bia ira harkurai ta Moses i hanuat meram ho God iesen iau tiga tunotuno mekai napu mon. I hoing bia di te suhurane se iau hoing tiga maris na tultulai bia ni kis ra winwisaan tano magingin sakena.
ROM 7:15 Hokaiken, iau pai palai tano burena bia iau gil ira linge ing iau la gilgil. Ma iau pai palai kanong ira linge iau sip bia ni gil iau pai la gilgil haruatne, iesen ira linge balik ing iau malentakuane, iau gil.
ROM 7:16 Ma bia iau gil iakano linge at ing iau pai sip bia ni gil, io, iau suro haut bia ira harkurai i tahut.
ROM 7:17 Io kaik, pai iau tun ing iau gil kaiken ra magingin. Taie. No magingin sakena nong i la kis taar narako tagu, aie at nong i pakile huo.
ROM 7:18 Iakan i tutun kanong iau nunure bia pataie ta tahut pai lalon taar tagu, bia hoken, tano sakana palpal tagu. Ma iakan i palai kanong iau sip bia ni gil no tahut ma sen iau pai petlaar bia ni gil huo.
ROM 7:19 Hokaiken, iakano linge ing iau gil, a mes na linge ie tano tahut na linge ing iau sip bia ni gil. Iesen iau la gilgil iakano sakena at ing iau pai sip bia ni gil.
ROM 7:20 Io kaik um, ing bia iau gil no linge ing iau pai sip bia ni gil, i hamines bia pai iau tun um iakanong i gilgil no linge. Taie. No magingin sakena nong i la kis taar narako tagu, aie iakanong i gilgil no linge.
ROM 7:21 Io kaik, iau nes leh iakan ra tutun bia tano pakana bung bia iau sip bia ni gil no tahut, no magingin sakena i kis tika ma iau.
ROM 7:22 I hokaiken. Aram narako tun at tagu iau manga guama bia ni gil haruatne ira harkurai ta God.
ROM 7:23 Iesen iau te silihe leh tiga mes na harkurai nong i gilgil pinapalim aram narako ta ira sumsubaan tano palatamaigu, nong i la harharubu ma no mangana harkurai iau mur ma no nugu lilik. Ma i wis kawase iau ra hena no dadas ta ira magingin sakena ing i harkurai taar ta ira sumsubaan tano tamaigu.
ROM 7:24 Maris! No nugu nilon i te manga haraubaal um! Sige um na halangalanga ise iau sukun ra hena ta iakan ra palatamaigu nong i kis taar tano minaat?
ROM 7:25 Iau tanga tahut tupas God no ut na harhalon huo tano pinapalim ta Jisas Krais no udahat Watong! Io kaik, i ngan um hoken tagu, bia iau, iau tun at, iau tiga tultulai ma no nugu lilik taar ra hena ta ira harkurai ta God. Iesen tano sakana palpal narako tagu iau tiga tultulai ra hena no dadas ta ira magingin sakena i harkurai taar tagu.
ROM 8:1 Io kaik um, God pa na kure hagahe diet ing diet narako ta Jisas Krais.
ROM 8:2 Kanong warah, no Halhaliana Tanuo nong i tar ra nilon taar tagu narako ta Jisas Krais i kure tar iau, gi halangalanga iau huo sukun no nugu kinkinis ra hena no dadas ta ira magingin sakena ing i harkurai taar tagu ma i halangalanga iau sukun mah no nugu kinkinis tano ra minaat.
ROM 8:3 Hokaiken, God ga tule no Natine tus ukai hoing ira sakana tunotuno bia na gil ra pinapalim tupas ira magingin sakena. Ing bia ga gil huo ga gil harkurai wara halhaliare ira magingin sakena ing i kis ta ira sakana tunotuno. Iakano linge ing ira harkurai ta Moses pa ga petlaar bia na gil kanong ira sakana palpal ta ira tunotuno i kap se no dadas ta kaike ra harkurai.
ROM 8:4 Ma God ga gil huo waing dahat ing dahat pai lon mur ira sinisip ta ira udahat sakana palpal ma sen dahat lon mur ira sinisip tano Halhaliana Tanuo, io, dahat naga gil haruatne ira hartula ta ira harkurai ta Moses.
ROM 8:5 Hokaiken, diet ing diet gil haruatne ira sinisip tano udahat sakana palpal, no sakana palpal i lue ira udiet lilik. Iesen diet ing diet gil haruatne ira sinisip tano Halhaliana Tanuo, no Tanuo i lue ira udiet lilik.
ROM 8:6 Ing bia no sakana palpal i lue no lilik gar ta tikai, na halamlam tar ie tano minaat. Iesen bia no Halhaliana Tanuo i lue no lilik gar ta tiga nong, na halamlam ie taar tano nilon ma nora malum.
ROM 8:7 Ma i ngan huo kanong warah, no tunotuno nong i sakena, no uno mangana lilik i manga malentakuane God. Tiga mangana tunotuno huo pai hanapui ta ira harkurai ta God. A tutun, pa na petlaar at bia na gil huo.
ROM 8:8 Diet ing no sakana palpal i lue diet, diet pai petlaar bia diet na haguama God.
ROM 8:9 Iesen pai ngan huo balik ta muat. No sakana palpal pai lue muat. Taie. No Halhaliana Tanuo i lue muat kanong no Tanuo ta God i kis taar narako ta muat. (Io, ma bia sige ta tikai pai hatur kawase no Tanuo ta Krais, pai gar ta Krais ie.)
ROM 8:10 Ma bia Krais i kis taar narako taam huo, no tanuaam i lon taar kanong God i te kure bia u takodas ra matmataan tana. Ma a tutun bia u te gil ira magingin sakena ma no palatamaim i kis taar tano minaat, iesen u lon taar at.
ROM 8:11 Ma bia no Tanuo ta iakanong nong ga hatut pukus Jisas sukun ra minaat i kis taar narako ta muat, io, aie nong ga hatut Krais talur no minaat ma na tar lon mah ta ira palatamai muat ing na maat. Ma na gil huo ma no Tanuana nong i kis taar narako ta muat.
ROM 8:12 Io kaik, bar hinsakagu ta Krais, no udahat binlan at ie bia dahat na haut leh no Tanuo bia na lue dahat, ma pataie bia dahat na lon haruat ma ira udahat sakana palpal.
ROM 8:13 Kanong warah, ing bia muat lon haruat ma no numuat sakana palpal, a tutun sakit, muat na maat. Iesen bia ing muat la gilgil bing ira gingilaan ta ira sakana palatamai muat ma no harharahut tano Halhaliana Tanuo, io, muat na lon kanong diet ing no Tanuo ta God i lue diet, a nati God diet.
ROM 8:15 A tutun iakano kanong muat pa ga kap tiga mangana tanuo nong i te wis kawase habaling muat ma ra bunurut. Taie. Muat te kap no Tanuo nong i halon hapatangen dahat wara natine. Ma no Tanuo i haharuatne dahat bia dahat naga sasaring ma ra balaraan bia, “Mama, nugu Mama!”
ROM 8:16 Ma no Halhaliana Tanuo at i hinawas tutun taar ta ira tanua dahat bia dahat ira nati God.
ROM 8:17 Ma bia dahat ira natine, io tutun mah bia dahat ira mahal na tunotuno ing na rumahal namur. Dahat ira mahal na tunotuno gar ta God ma dahat na rumahal tika ma Krais kanong dahat la kapkap tika mei ira uno harharangungut waing dahat naga laka tika mah mei tano minamarine.
ROM 8:18 Hokaiken, iau nes kilam bia ira udahat harangungut utano pakana bung kaiken i manga hansik sakit ing bia da hapupuo ie ma no minamar ing na hanuat puasa ta dahat.
ROM 8:19 Ma iakan i palai kanong no hakhakisi bakut i kis kawase ma ra tamat na masmasingan utano pakana bung bia God na hapuasne ira natine.
ROM 8:20 Ma no hakhakisi bakut i nanaho huo kanong God i te kure tar bia no hakhakisi pa na kap no kinkinis nong i haruat ma no mangana kinkinis God ga puo tar wara utana. Pai ngan huo kanong no hakhakisi at ga sip bia na ngan huo. Taie. I ngan huo kanong iakanong nong ga kure tar bia na ngan at huo ga sip bia na ngan huo. Iesen ga gil huo tano hakhakisi tano ula hanuo mah bia na nanaho ma ra nurnuruan bia na langalanga sukun ira uno winwisaan ing a mon marmarota ine, ma bia na manga langalanga timaan tika ma ira nati God.
ROM 8:22 Io, ma dahat nunure um bia no hakhakisi bakut i te kilkilingane ra but na tinirih tuk taar katin hoing tiga hatatnaan a bulu i papaas ie.
ROM 8:23 Ma pai no hakhakisi sen mon. Dahat ing dahat te kap no Halhaliana Tanuo hoing no luena hartabar nong i hatutun bia dahat na kap ira mes na haridaan namur, dahat ngan huo mah. Dahat kilingane ra but na tinirih narako ta ira bala dahat ing dahat kiskis kawase no pakana bung bia God na halon hapatangen tutun dahat wara natine ma bia na halangalanga ira palatamai dahat huo.
ROM 8:24 Ma dahat kilingane ra tinirih huo kanong ing God ga halon dahat ga tar no mangana harhalon taar ta dahat bia dahat na nanaho ma ra nurnuruan ta ira linge dahat na kap namur. Iesen bia ing dahat nanaho ma ra nurnuruan ta ira linge dahat nes kaiken, io, dahat pai nanaho tutun ma ra nurnuruan. Kanong warah, taie tikai pai nanaho ma ra nurnuruan uta ira linge i te hatur kawase um.
ROM 8:25 Iesen dahat nanaho ma ra nurnuruan uta ira linge dahat pai le hatur kawase baak, kaik dahat nanaho ma ra bala maat.
ROM 8:26 Huo mah, no Halhaliana Tanuo i harahut dahat uta iakano linge nong dahat pai petlaar wara utana. Hokaiken, dahat pai nunure bia asa ing dahat na sasaring utana iesen no Tanuo i sasaring wara gaie dahat. Ing i sasaring i kilingane ra but na tinirih ma i hapuasne huo ing pai tale bia da hapupuo ma ra nianga.
ROM 8:27 Ma God nong i la siisilih ta ira linge narako ta ira kati dahat i nunure tar no lilik tano Tanuo kanong no Tanuo i la saasaring haruat ma no sinisip at ta God wara gaie dahat ira matanaiabar tus ta God.
ROM 8:28 Ma dahat nunure bia God i la paapalim ta ira linge bakut wara hatahuatne nora bilai wara gaie diet ing diet sip God, diet at ing i te tatau leh diet haruat ma no uno lilik i te puo tar.
ROM 8:29 Ma iakan i palai kanong diet ing God ga huna bul no uno lilik uta diet wara nunure diet, io, diet at mah God ga puo tar menalua bia diet na kikios ing naga haruat hoing no Natine. Ma ga puo tar huo waing no Natine naga kap no luena kinkinis ta diet ira haleng na tasine.
ROM 8:30 Ma diet ing God ga puo tar menalua huo ta diet, io, ga tatau leh mah diet. Ma diet ing ga tatau leh diet, ga kure mah bia diet takodas ra matmataan tana. Ma diet ing ga kure uta diet huo, ga hamar um diet ma no tamat na minamar.
ROM 8:31 Io, dahat na tange um hohe uta kaike? Ing bia God i tur wara gaie dahat, io, sige um i tale bia na tur wara hanghagahe dahat?
ROM 8:32 Nes! Pa ga hok tar no Natine tus. Taie. Ga tar sei bia na maat wara gaie dahat bakut. Aie nong i tar no Natine taar ta dahat huo, hohe, pa na tabar bia dahat ma ira linge bakut mah? A tutun sakit bia na gil huo!
ROM 8:33 Sige um i tale bia na tung diet ing God i te gilamis diet? Taie tikai. God aie nong i kure bia tiga nong i takodas ra matmataan tana.
ROM 8:34 Sige um i tale bia na kure hagahe dahat? Taie tikai. Jisas Krais aie nong ga maat. Iesen no tamat na linge balik bia God ga hatut pukus ie. Ma aie nong i kis tano tamat na kinkinis tano kata na limane God ma i la iangianga wara gaie dahat kaia.
ROM 8:35 Ma sige um i tale bia na harbasiane dahat sukun no harmarsai gar ta Krais? I tale bia nora purpuruan na gil huo, bia a harangunngutaan bia a hinelar bia a tamat na sam taburungan? Ing bia pata sigasigam bia ira hiniruo i hutaten dahat bia da kut bing dahat, i tale bia kaiken ra linge na harbasiane dahat huo?
ROM 8:36 I hoing no nianga ta God di ga pakat ie i tange bia, “I hutet bia mehet na hiruo na minaat pane haitne ugu God. Diet nes kilam mehet bia mehet hoira sipsip mon ing diet wara kutkut bing.”
ROM 8:37 Iesen pa na ngan huo. Ing kaike ra linge sa bia dahat kilingane, dahat manga lua sakit balik kanong dahat kis taar ta iakanong nong ga tar no uno harmarsai taar ta dahat.
ROM 8:38 Ma i tale bia ni tange huo kanong iau nunure tun at bia taie tiga linge pa na tale bia na harbasiane dahat sukun no uno harmarsai. Iakan ra nilon ma no minaat mah dir pa na tale. Huo mah ta ira angelo bia ira dadas na sakana tanuo, ma ta ira linge kaiken ma ing mah namur ma ta ira mes na dadas na lualua mah.
ROM 8:39 Taie tikai aram naliu bia kenas napu ma bia ta mangana linge sa mekaia tano hakhakisi bakut pa na tale bia na harbasiane dahat sukun no harmarsai gar ta God nong i tabar dahat mei tano udahat kinkinis narako ta Jisas Krais no udahat Watong.
ROM 9:1 Iau tange ra tutun hoing i haruat bia tikai narako ta Krais na tange huo. Iau pai harabota. Ma no balagu nong i kis ra hena tano Halhaliana Tanuo i suro haut bia iakan ra nianga i tutun.
ROM 9:2 Ma i hoken, bia iau kilingane ra tamat na tapunuk narako tun at tagu ma iakano but na tinirih pa nale pataam.
ROM 9:3 Hokaiken, iau gor kanan bia ni tur ra hena tano tamat na harpidanau ta God ma bia God gor kutus ise iau sukun Krais ing bia iakan gor harahut ira hinsakagu, diet ira Israel no nugu huntunaan tus. Diet at ing God ga halon hapatangen diet waing bia na natine. Diet at ing God ga kukubus bia na hatutun ira uno nianga taar ta diet. Audiet ira minari God ma diet at diet ga hatur kawase ira harkurai. Audiet no magingin na lotu tupas God ma diet ing God ga hinawase diet uta ira linge na gil wara gaie diet.
ROM 9:5 Diet ira bulumur ta ira tamat me Israel. Ma bia Krais ga hanuat, ga hanuat mekaia tano udiet huntunaan, Krais at nong i naliu ta ira linge bakut ma aie God nong da lat hathatikanei. A tutun sakit.
ROM 9:6 Ing iau te tange huo, iau pai tange bia ira nianga ta God i te puko. Taie. Kanong warah, pai diet bakut ira bulumur ta Israel ing diet no Israel tutun.
ROM 9:7 Ma diet pai bulumur tutun bakut diet ing diet ira bulumur ta Abraham. Taie. No nianga ta God di ga pakat ie i tange balik bia, “Diet ing diet mekaia ta Aisak sen mon, da nes kilam diet bia ira num bulumur diet.”
ROM 9:8 Ma ira linge iau te tangtange i hoken. Diet ing di kaha diet tano dadas bia mon ta ira tunotuno, diet pai a nati God diet. Taie. Diet sen mon ing diet hanuat mekaia tano kunubus, da nes kilam diet bia diet ira bulumur tane Abraham.
ROM 9:9 Ma iakan i palai kanong God ga kukubus hoken: “Tano pakana bung iau te puo tar taam, iau ni tapukus ma Sara na kap tiga bulu na tunaan.”
ROM 9:10 Ma pai iakanong sen mon. Rebeka ga kaha airuo kasang mekaia tiga tunaan sen mon, ma aie ne Aisak no hintubu diet ira Israel tutun.
ROM 9:11 Pa di ga kaha baak dir ma dir pa ga gil baak ta linge i tahut bia i sakena. Iesen God ga tange ta Rebeka bia, “No luena bulu na kap ra kinkinis na tultulai balik ra hena tano bulu nong di kahai namur.” God gate bul tar no uno lilik bia na gilamis tikai huo, kaik gaam tange huo waing no uno lilik na hanuat tutun. Iesen pa ga sip bia no uno lilik na hanuat tutun ta ira udir gingilaan. Taie. God ga sip bia no uno lilik na hanuat tutun mekaia ho ie at nong i tatau huo.
ROM 9:13 Iakan ra linge i hanuat huo hoing no nianga ta God di ga pakat ie i tange bia, “Iakop nong iau te sip ie iesen Esau nong iau te malok isei.”
ROM 9:14 Io, dahat na tange um hohe ta iakan ra linge? I nanaas bia God pai takodas? Taie tun at!
ROM 9:15 Iakanong i palai kanong God i tange tar ta Moses bia, “Iau ni marse nong iau sip bia ni marsei. Ma iau ni tar no balagu ta diet ing iau sip bia ni tar no balagu taar ta diet.”
ROM 9:16 Io kaik, no gingilaan na gilgilamis ta God pai tur laah tano baso ta ira tunotuno ma pai tahuat laah ta ing diet sip mah. Taie. Iesen ta God nong i tar ra harmarsai.
ROM 9:17 Ma huo mah, da was ta ira Halhaliana Pakpakat bia no nianga ta God ga haan tupas no tamat na lualua gar na Isip hoken bia, “Iau te tar iakan ra tamat na kinkinis na lualua taam kanong iau sip bia ni papalim taam wara hamhamines no nugu dadas ma bia no hinsagu na tamat hanahaan tano ula hanuo bakut.”
ROM 9:18 Io kaik, God i marse nong i sip bia na marsei ma i hadadas ira bala diet ing i sip bia na hadadas diet huo.
ROM 9:19 Io, bia ing i ngan huo i tale bia tikai na tange tagu bia, “Warah kaik God i kilam baak bia a mon nironga ta dahat? Tutun sakit, bia God i sip bia na gil tiga linge, taie tikai pai tale bia na sabakane sei.”
ROM 9:20 Iesen sige um augu ra tunotuno mon nu balu pukus God? Tiga gingop nong di gil ie ma ra pise pa na tiri ie nong ga gil ie bia, “Warah bih u te gil iau hoken?”
ROM 9:21 Hohe, pai takodas bia no ut na pakila gingop bia na papalim ma tiga hunghungana pikaia sen mon ma na gil tiga gingop wara uta ira bilai na pinapalim ma tiga mes na gingop balik uta ira mes na mangana pinapalim bia mon?
ROM 9:22 I tale hohe bia tikai na ngurungur? God ga sip bia na hamines no uno ngalngaluan ma bia na hapuasne no uno dadas. Io kaik, ga manga bala matien tupas diet ing diet kis na tinaguro taar wara hiniruo sakasaka.
ROM 9:23 Ma God ga gil huo waing naga hamines hapalai no uno tamat na minamar taar ta diet ing diet taguro taar wara kapkap no uno harmarsai, diet at ing God ga huna tagure diet bia diet na kap no uno bilbilai.
ROM 9:24 Ma sige um diet ing God ga marse diet huo? Dahat at ing ga tatau leh dahat. Ma pa ga tatau leh dahat mekaia ta ira Iudeia sen mon, iesen mekaia ta diet ira mes mah.
ROM 9:25 I hoing di ga pakat ie tano pakpakat tane Hoseia ing God ga tange bia, “Iau ni kilam diet ing diet pa ga nugu matanaiabar diet bia anugu matanaiabar um diet. Ma iau ni kilam nong iau pa ga sip ie bia aie nong iau sip um ie.
ROM 9:26 Ma ta ira katon ing iau ga tange ta diet bia, ‘Pai nugu matanaiabar muat’, io, da kilam diet bia a natine no lilona God diet.”
ROM 9:27 Ma Aisaia ga ianga na tangesot gaam kakonga uta ira Israel bia, “A tutun bia no winawas ta ira Israel i haruat ma ira wana kenas na wasasar, iesen a bar hanawaan sen mon um ing God na halon leh diet.
ROM 9:28 Kanong warah, no Watong na habir wara tartar no uno kidilona harpidanau taar tano ula hanuo.”
ROM 9:29 I hoing Aisaia gate huna tange hanalue tar bia, “Ing bia no Watong no Tamat na Umri pa gor hok tar tari ta ira udahat bulumur, io, gor te hanuat huo ta dahat hoing ga hanuat ta diet ira Sodom, ma dahat gor ngan mah hoing ira Gomora.”
ROM 9:30 Kaik, dahat na tange um hohe? Dahat nes bia diet ing diet pai Iudeia diet pa ga walar wara murmur no ngaas ta ing God naga kure bia diet takodas ra matmataan tana. Iesen God i te kure bia tari ta diet, diet takodas kanong diet te nurnur.
ROM 9:31 Ma ira Israel balik, diet ga murmur ira harkurai ing i hamines bia i hohe bia God na kure bia tikai i takodas ra matmataan tana. Iesen diet pa ga tale bia diet na mur haruat kaike ira harkurai.
ROM 9:32 Warah? Kanong diet pa ga mur kaike ira harkurai ma ra nurnuruan iesen diet ga lon hoing bia ira udiet gingilaan na haruat mon. Diet ga tuke diet tano haat na tukatuke.
ROM 9:33 I hoing no nianga ta God di ga pakat ie i tange bia, “Nes baak! Iau te bul tar tiga bilai na haat kaia Saion. Ma iakan ra haat ing i noh taar, ira tunotuno diet tuke diet tana. Diet kap tuhar diet tana. Iesen sige tikai i nurnur tana pa na kis ta ra hirhir.”
ROM 10:1 Bar hinsakagu ta Krais, iau manga sip bia God na halon ira Israel ma iau saasaring huo.
ROM 10:2 Ma iau gil huo kanong i tale iau bia ni hinawas palai ma ra tutun bia diet manga gaas wara murmur God. Iesen no udiet bala gaas pai tut huat ta ira mintot.
ROM 10:3 Hokaiken, diet ga walar bia diet na gil no udiet ngaas at bia God na kure bia diet takodas ra matmataan tana. Ma diet ga walar huo kanong diet pa ga nunure bia i hohe bia God na kure bia tikai i takodas ra matmataan tana. Io kaik diet pa ga hanapu diet tano ngaas ing God i mur wara kurkure bia tikai i takodas.
ROM 10:4 Ma hokaiken, Krais aie no haphapataamine ta ira harkurai ta Moses. Io kaik, i tale bia God na kure bia diet bakut ing diet nurnur, diet takodas ra matmataan tana.
ROM 10:5 Ing huo mah, Moses ga pakpakat uta iakano linge bia i hohe bia God na kure bia tikai i takodas ra matmataan tana ing bia i taram ira harkurai ta Moses. Ga pakat bia, “No tunotuno nong i gil haruatne kaiken ra harkurai na lon ta kaiken ra harkurai.”
ROM 10:6 Iesen bia God i kure bia tikai i takodas ra matmataan tana kanong i te nurnur um, io, iakano i haruat tano nianga ta God di ga pakat ie ing i tange bia, “Waak u lilik tano balaam bia, ‘Sige na hanut uram ra mawe?’” Ing bia u lilik huo i hoing bia u te tange bia dahat supi bia tikai na lamus hasur Krais meram naliu.
ROM 10:7 “Ma waak u lilik tano balaam mah bia, ‘Sige na hansur uras napu?’” Ing bia u lilik huo i hoing bia u te tange bia dahat supi bia tikai na lamus haut Krais meras ra minaat.
ROM 10:8 Iesen bia God na kure bia tikai i takodas tano uno nurnuruan, io, iakano i haruat ma no nianga ta God ing i tange bia, “No hinhinawas ta God ie ke hutaten ugu. I kis taar kaia tano haam ma ie ke narako tano katim.” Ma iakan at no hinhinawas ing mehet la harharpir mei, iakano hinhinawas ing i tange bia dahat na nurnur.
ROM 10:9 Ma i tutun bia no hinhinawas ie ke hutaten ugu kanong bia ing nu ianga palai ma no haam bia Jisas aie no Watong ma bia nu nurnur ma no katim bia God ga hatut haut ie sukun ra minaat, io, God na halon ugu.
ROM 10:10 Hokaiken, no katim nong u nurnur mei, kaik God gi kure bia nu takodas ra matmataan tana. Ma no haam nong u ianga palai mei, kaik God gi halon ugu.
ROM 10:11 Ma i palai bia iakan i tutun kanong di ga pakat bia, “Sige tikai i nurnur tana pa na kis ta ra hirhir.”
ROM 10:12 Ma i ngan huo ta diet bakut kanong taie ta mesmes ta diet ira Iudeia ma diet ing diet pai Iudeia. Iakano Watong at aie no Watong ta ira tunotuno bakut nong na manga haidane burung diet bakut ing diet tatau tana bia na halon diet.
ROM 10:13 I hoing no nianga ta God di ga pakat ie i tange bia, “Diet bakut ing diet na tau iau no Watong bia ni halon diet, iau ni gil haruatne.”
ROM 10:14 Io kaik, diet tale hohe bia diet na tau ie bia na halon diet ing diet pai nurnur tana? Ma diet na nurnur tana hohe bia ing diet pai le hadadei? Ma diet na hadadei hohe ing bia pataie tari wara harharpir?
ROM 10:15 Ma diet na harharpir hohe ing bia pa di tule diet? I hoing no nianga ta God di ga pakat ie i tange bia, “I manga maririsuan no hinanuat ta diet ing diet kap hawaat ra tahut na hinhinawas ta ira bilai na linge!”
ROM 10:16 Iesen pai diet bakut ira Israel diet ga bale leh no tahut na hinhinawas. Ma iakan i palai kanong Aisaia ga tange bia, “Nora Watong, sige um i te nurnur tano numehet hinhinawas?”
ROM 10:17 Io kaik um, no nurnur i tahuat laah tano hanhadade no hinhinawas, ma di hadade no hinhinawas ing di hadade no harpir ta Krais.
ROM 10:18 Iesen i tale bia ni tiri bia, a tutun, i nanaas bia diet pa ga hadade, naka? Taie. A tutun sakit diet ga hadadei. I hoing no nianga ta God di ga pakat ie i tange bia, “Ira inga diet i te haan harbasia tano ula hanuo bakut. Ira udiet nianga i te haan hakakari taar ta ira ngusuno ta ira tamtaman.”
ROM 10:19 Iesen iau tange bia a tutun sakit Israel ga palai. Hoing Moses ga huo ira nianga God ga tange hoken: “Iau ni papalim ma diet ing diet pai tiga huntunaan tutun ma iau ni hangane muat huo bia muat na lilik sakasaka ta diet ma muat na kalak no udiet mangana kinkinis. Iau ni hangalngaluan muat ing iau gil ira nugu gingilaan tupas no huntunaan ing pataie ta palpalai ta diet.”
ROM 10:20 Io, ma Aisaia i bala masa bia ga hinawas ta ira nianga God ga tange hoken: “Diet ing diet pa ga sisilih tagu, diet ga nes leh iau. Ma iau ga hamines hapalaine iau ta diet ing diet pa ga tiri wara utagu.”
ROM 10:21 Iesen uta ira Israel balik, “Ta ira bungbung bakut iau la sasangaha taar ta muat ira ul pat, muat ira matanaiabar na tabuna taram nianga.”
ROM 11:1 Io kaik um, iau tiri bia, hohe, i nanaas bia God ga malok ise ira uno matanaiabar? Taie tun at! Iau at, iau tiga Israel. Iau tiga bulumur ta Abraham ma iau tano huntunaan ta Beniamin.
ROM 11:2 God pa ga malok ise ira uno matanaiabar ing gate huna bul no uno lilik uta diet wara nunure um diet. Hohe, muat pai nunure iakano subaan utane Elaija narako ta ira Halhaliana Pakpakat? Ga bala ngungut taar ta ira Israel, kaik gaam tange ta God bia, “Nora Watong, diet te bu bing ira num tangesot ma diet te dure hasur mah ira num suuh na hartabar. Iau sen um tikai ken ma diet sisilih tagu kaiken bia diet na bu bing iau mah.”
ROM 11:4 Io, ma no Watong ga balui hohe? Ga tange bia, “Iau te bul se tar wara nugu a liman ma iruo na arip na tunotuno ing diet pai le singa bukunkek taar tane Baal no sakana tanuo.”
ROM 11:5 I huo mah katin. A bar hanawaan i kis sen mon baak haruat ma ing God i te gilamis diet ma no uno harmarsai.
ROM 11:6 Ma bia i te gilamis diet huo tano uno harmarsai nong i te tabar bia diet mei, io, i palai bia no uno gilgilamis pai tahuat laah ta ira udiet gingilaan. Ma sen ing bia gor te gilamis diet ta ira udiet gingilaan, io, no uno harmarsai pa gor ngan bia a hartabar bia ie.
ROM 11:7 Io kaik, i palai bia iakano mangana kinkinis ing Israel ga manga sisilih panei, diet pa ga hatur kawasei. Iesen diet ing God ga gilamis diet, diet ga kap leh ie. Ma diet ira mes na Israel, God ga hadadas ira bala diet kaik pa gom tale bia diet na kap leh ie.
ROM 11:8 I hoing bia no nianga ta God di ga pakat ie i tange bia, “God ga hababa ira udiet lilik. Ga harawarawa ira mata diet bia diet pa na nesnes kilam. Ma huo mah ta ira talinga diet bia pa na hanhadade kilam. Ma i te gil huo ta diet tuk taar ta iakan at ra bung.”
ROM 11:9 Ma Dawit i tange bia, “Ira linge gor haguama diet hoing ira nian tano ula suuh i haguama tikai, io, iau sasaring bia nu papalim ma kaike ra linge wara hakhakuni balik diet ma wara lulut leh diet. Iau sasaring bia kaike ra linge na gungunuama na hapuko diet ma bia nu papalim ma kaike ra linge wara balbalu pukus diet.
ROM 11:10 Iau sasaring bia ira mata diet na kankado waing diet pa naga nanaas palai. Ma iau sasaring mah bia diet na rurungo hathatikai.”
ROM 11:11 Io kaik um, iau tiri bia, hohe, ira Israel diet ga manga puko sakasaka? Taie tun at! Diet ga gil ronga, ma iakano no burena bia no harhalon balik gom haan taar ta diet ing diet pai Israel. Ma i te haan taar huo waing ira Israel diet naga nes kalak no kinkinis ta diet ira mes.
ROM 11:12 Iesen bia no udiet nironga i hatahuat ra tamat na haridaan taar tano ula hanuo ma bia no udiet punuko i hatahuat ra tamat na haridaan taar ta diet ing diet pai Israel, io, a tamat na haridaan sakit bilang na hanuat ing diet ira Israel diet na laka bakut taar tano udiet bilai na kinkinis tus.
ROM 11:13 Ing iau iangianga mah huo iau iangianga ta muat at, muat ing muat pai Israel. I palai bia iau tiga apostolo ta muat ing muat pai Israel. Ma iakano no burena bia iau hatamat no nugu pinapalim kanong iau sip bia nigi silhe tiga mangana ngaas bia nigi hamangaah diet wara nesnes kalak no numuat mangana kinkinis huo, kaik nigi halon tari ta diet.
ROM 11:15 Ma ing God ga malok ise diet, iakan i hatahuat no haramaraam ma God tika ma ra halengin ta diet tano ula hanuo. Bia iakan i tutun huo, io, a mangana linge sa na hanuat ing God na bale leh diet? Na ngan hoing bia ira minaat diet na kap no nilon!
ROM 11:16 Io, ma bia ing nu tar no luena subana beret ta God, io, auno mah no kidilona hunghungaan bakut. Huo mah, bia ing nu tar no boline tiga daha ta God, auno mah ira katena bakut.
ROM 11:17 Ma i te ngan ta muat hoing di la gilgil ira ina olip. Di te warat ise ari a katena ma di te hapatup muat tar balik tano ina olip tun tika ma diet ira mes na katena ing diet tur baak tana. A tutun bia muat tano mangana ina olip pa di ga soi, iesen di te hapatup tar at muat huo. Ma kaiken um muat lon taar tano tirine no ina daha ing i hanuat mekaia tano bilai na boline.
ROM 11:18 Io kaik, waak u nes hanapu diet ira katena ing di te warat ise. Bia u lilik huo, nu lilik timaan kaiken, bia pai augu u hakasong no boline, iesen no boline i hakasong ugu.
ROM 11:19 Ing bia i te ngan huo ta muat, tikai ta muat na tange bia, “Di te warat ise kaike ra katena waing daga hapatup leh iau.”
ROM 11:20 Iakano i tutun. Iesen di te warat ise diet kanong diet pa ga nurnur. Huo mah, no numuat nurnuruan aie nong i hatur muat. Io kaik, waak muat hatamat habaling muat, iesen muat na burburut.
ROM 11:21 Kanong warah, ing bia God pa ga hok ira katena no olip tun, pa na hok mah muat ira mes.
ROM 11:22 Io kaik um, muat na lilik timaan bia God i gil ra but na tahtahut ma i tar ra dadas na harpidanau mah. Ga manga hapidanau diet ing diet ga puko iesen i te gil ra but na tahtahut taar ta muat. Iesen na ngan sen mon huo ta muat ing bia muat la kiskis taar narako ta iakano uno harmarsai. Ma ing bia muat pa na gilgil huo, muat mah, kabi di warat ise muat.
ROM 11:23 Ma diet mah, ing bia diet pai la murmur no magingin na tabuna nurnur, io, God na hapatup habaling diet kanong i tale at bia na hapatup habaling leh diet.
ROM 11:24 Ma i palai bia iakano i tutun kanong di te warat ise ugu tano num ina olip tus nong pa di ga soi. Ma di ga hapatup ugu ukaia taar tano ina olip ing di ga soi nong pai num tus ie. Ma i dadas bia tikai na gil huo. Io kaik, na manga malus bia da hapatup habaling leh ira katena tutun ukaia tano udiet ina daha tus!
ROM 11:25 Bar hinsakagu ta Krais, iau malok bia muat na lik hatamat muat, kaik iau sip bia ni hapalaine muat uta iakan ra linge nong ga susuhai taar nalua ma God i te hapuasne um, ma i hoken, bia ta ira haleng sakit ta ira Israel, God i te hadadas ira bala diet kaik diet pa gom nurnur, ma sen pai diet bakut. Ma na ngan huo taar ta diet tuk taar bia no kidilona winawas bakut ta diet ing diet pai Israel na laka um.
ROM 11:26 Io kaik, hokaiken God na halon no huntunaan ta Israel. I hoing bia no nianga ta God di ga pakat ie i tange bia, “No Ut na Harhalon na hanuat meram Saion, ma na kap se no magingin na turtur talur God sukun no huntunaan ta Iakop.
ROM 11:27 Ma no nugu kunubus tika ma diet i hoken: ta iakano pakana bung iau ni kap se ira udiet magingin sakena.”
ROM 11:28 Ing bia da nes no hinahaan tano tahut na hinhinawas, da nes kilam bia diet ira Israel diet te kap no kinkinis na malentak talur God wara hatahutne muat. Iesen bia da nes no gilgilamis ta God, da nes kilam bia God i manga sip diet kanong diet te tahuat laah ta kaike ra tamat na hintubu diet.
ROM 11:29 Ma iakan i palai kanong God pa na kap pukus ira uno hartabar, ma diet ing i tatau leh diet, pa na harus ise habaling diet.
ROM 11:30 Hokaiken, muat mah, tiga pakana bung, muat ga tabuna taram nianga ta God. Iesen kaiken um muat te hatur kawase nora harmarsai kanong diet ga tabuna taram nianga.
ROM 11:31 Huo mah ta diet, kaiken diet te hanuat tabuna taram nianga waing diet mah diet naga hatur kawase nora harmarsai, iakano ra harmarsai ing na haan taar ta diet kaiken kanong God i te marse muat.
ROM 11:32 Hokaiken, God i te wis tar ira tunotuno bakut uta ira udiet magingin na tabuna taram nianga, waing naga marse um diet bakut.
ROM 11:33 Ai! I tamat sakit ira bilai na linge ta God! I manga kikil no uno mintot ma i manga keskes sakit wara gilgil no uno pinapalim! Taie tikai i tale bia na palai bia God i bul no uno lilik huo warah! Pai tale bia tiga nong na silhe ira uno ngaas!
ROM 11:34 Sige um tikai i te nunure tar no lilik gar tano Watong? Ma i tale bia tikai na tar ra nianga na harharahut tana? Taie.
ROM 11:35 Sige um i te bul tar ra tinakum ta God bia God naga balu pukus ie?
ROM 11:36 Taie tikai pai gil huo tana kanong ira linge bakut ga tahuat laah tana ma aie nong i hatur hadadas ira linge bakut ma aie no hauhawatine ta ira linge bakut. Da pirlat ie hathatikai. A tutun sakit.
ROM 12:1 Io kaik um, bar hinsakagu ta Krais, iau wara harharagat muat ing dahat te nes no harmarsai ta God huo. Iau haragat muat bia muat na tar habaling muat taar tana hoing tiga hartabar wara uno tus, a lilonai tutun, a gamgamatieninei, ma a mangana hartabar i hakanakana God. Io, muat na lotu tupas ie huo kanong muat te palai ta ira linge ing God i te gil tupas muat.
ROM 12:2 Waak muat haut leh habaling iakan ra mangana ula hanuo bia na pakile muat bia muat na lon haruat ta ira uno gingilaan. Iesen muat na hasigarine ira numuat mangana lilik, waing ira numuat nilon naga kikios hanahaan. Ing bia muat na gil huo muat na walar ma muat na nes kilam ira gingilaan ing i haruat tano sinisip ta God ma i hoken: ira bilai na gingilaan, ira tintalen i takodas harsakit, ma ira magingin i hakanakana ie.
ROM 12:3 Hokaiken, haruat ma no nugu pinapalim ing God ga tabar iau mei mekaia tano uno harmarsai, iau tange ta muat tikatikai bia waak muat lik hatamat muat. Muat na lilik uta muat haruat ta ing i takodas ta muat. Muat na nes kilam habaling muat ma ra palpalai na lilik. Muat na nes no numuat nurnuruan nong God i te tabar muat bakut tikatikai mei hoing tiga punpuo wara hapupuo habaling muat tana.
ROM 12:4 Ma hokaiken, dahat nes bia a haleng na sumsubaan ta ira palatamai dahat. Ma kaike ra sumsubaan bakut pai gil tiga kapawena pinapalim sen mon.
ROM 12:5 Ma i huo mah ta dahat narako ta Krais. Dahat ira halengin dahat narako tano kapawena palatamaine. Ma dahat bakut ira sumsubaan, dahat harpatup harbasia ta dahat.
ROM 12:6 Ma dahat bakut, i mes harbasia ira udahat hartabar hoing haruat ing God i te palau dahat ma no uno harmarsai. Io kaik, ing bia tikai te kap no hartabar na nianga na tangesot, i tahut bia na papalim mei haruat tun at ma no uno nurnuruan.
ROM 12:7 Ing bia auno no hartabar na harharahut, i tahut bia na tar ra harharahut. Ing bia auno no hartabar na tena harausur, i tahut bia na hauhausur.
ROM 12:8 Ing bia auno no hartabar na harbalaraan, i tahut bia na habalaraan ira tunotuno. Ing bia auno no hartabar wara banbanot sunupi, i tahut bia na manga langalanga wara hartabar. Ing bia auno no hartabar wara lulue ira tunotuno, i tahut bia na tar ra tamat na baso wara lulue diet huo. Ing bia auno no hartabar na tar harmarsai, i tahut bia na gil huo ma ra gungunuama.
ROM 12:9 I tahut bia ira numuat harmarsai tupas ira mes, na tutun na harmarsai. Muat na manga malentakuane ira sakena ma muat na palim dit ira tahut.
ROM 12:10 Muat na sip hargilasane muat hoing bia muat tiga hatatamaan mon. I tahut bia tikai na lik hatamat no mes bia i tamat tana.
ROM 12:11 Waak muat bul hasur no mamahien wara gilgil ira tahut. Muat na haut leh no Halhaliana Tanuo bia na haiaan muat. Muat na papalim tupas no Watong ma muat na taram timaan ie.
ROM 12:12 Muat te nanaho ma ra nurnuruan ta ira haridaan ing na haan tupas muat, kaik i tahut bia muat na guama. Muat na tur dadas ra hena ira hinangul. Waak bia muat liklik luban wara sinasaring hait.
ROM 12:13 Muat na banot ira sunupi ta ira matanaiabar tus gar ta God. Muat na dadas wara balbale leh ira wasire ta ira numuat hala.
ROM 12:14 Muat na saring God bia na idane diet ing diet helar ta muat. A tutun, muat na sasaring bia na idane diet ma pataie bia na haliare diet.
ROM 12:15 Ing bia tikai i guama, muat na guama tika mei. Ing bia tikai i suah ma ra tapunuk, muat na suah tika mei huo mah.
ROM 12:16 Muat na mur tiga lilik mon uta ira tunotuno nalamin ta muat. Waak muat nes hanapu ira mes, iesen muat na kanan wara tiktika ma ira maris. Waak muat lik hatamat habaling muat.
ROM 12:17 Ing bia tikai i te gil ta nironga taam, waak u balu pakus ie ma ra sakena. Muat na harbalaurai timaan bia muat naga gil ira linge ing ira tunotuno bakut diet na nes kilam bia i takodas.
ROM 12:18 Muat na manga walwalar timaan bia muat na lon ma ra malum tika ma ira tunotuno bakut, ing bia i tale muat, haruat ma no mangana kinkinis muat te hatur kawasei.
ROM 12:19 Bar harwis, waak muat na balu pukus ira tunotuno uta ira udiet sakena taar ta muat. Iesen muat na tar mauho ta God bia no uno ngalngaluan na papalim tana. Muat na gil huo haruat ma ing di ga pakat bia no Watong ga tange hoken: “Iau nong iau ni balu pukus ira matanaiabar uta ira udiet sakena. Iau ni hapidanau diet haruat ma ira udiet gingilaan.”
ROM 12:20 Ma di ga pakat mah ie bia, “Ing bia no tunotuno nong i malentakuane ugu i taburungan, io, tabar ie. Ing bia i maruk, io, hamamoi. Ma bia nu gil huo, na malahuan baal at tano uno magingin.”
ROM 12:21 Waak u bale leh no sakena bia na haliare ugu. Iesen muat na paas hasur no sakena ma ira num bilai na magingin.
ROM 13:1 I tahut bia ira tunotuno bakut tikatikai na hanapui ra hena ta ira tamat na lualua ing diet gil harkurai, kanong pai tale bia tikai na kap ra kinkinis na gil harkurai ing bia God pai hatur ie huo. Diet ira ut na gil harkurai ing diet tur taar, God i te hatur um diet huo.
ROM 13:2 Io kaik, bia ing tikai i patnau ta ira ut na gil harkurai, i hoing tikai i patnau ta ira harkurai God i te bul tar. Ma diet ing diet patnau huo, diet na halamlam tar at no harpidanau taar ta diet.
ROM 13:3 Hokaiken, ira tamat na lualua diet pa na haburut diet ing diet gil ra tahut, iesen diet na haburut diet ing diet na gil nora sakena. Hohe, u sip bia nu langalanga taar wara bunurut ta ira lualua? Kaia, nu gil um ira tahut ma no lualua naga lat ugu.
ROM 13:4 Hokaiken, a tultulai gar ta God ie wara gilgil ra tahut taam. Iesen bia nu gil ra sakena, io, nu burut, kanong a tutun sakit i palim tar nora tamat na dadas wara harhapidanau. A tultulai gar ta God ie ma i papalim wara gaie God wara hapidanau diet ira ut na sakena.
ROM 13:5 Io kaik, anum binlan bia nu hanapu ugu ra hena ta ira ut na bul harkurai, diet kabi hapidanau ugu. Ma sen pai iakano sen mon. I tahut bia nu hanapu ugu mah ta diet kanong u nunure tar bia i takodas.
ROM 13:6 Ma no burena bia muat kul takis i hoken, bia diet ira ut na gil harkurai diet ira ut na pinapalim ta God ma diet manga nanget wara balbalaure ma wara kurkure muat.
ROM 13:7 Muat na balu pukus ira numuat tinakum bakut. Diet ing i tale bia nu kul takis ta diet, nu tar ira num takis ta diet. Diet ing i tale bia nu burut ta diet, nu burte diet. Diet ing i tale bia nu urur ta diet, nu ru diet.
ROM 13:8 Waak muat kas ngasa taar ta tikai iesen no mangana ngasa sen mon nong na kis taar aie nong wara tartar harmarsai hargilaas ta muat. Kanong warah, aie nong i marse nora mes na tunotuno i te gil haruatne ira harkurai ta Moses.
ROM 13:9 A mon hartula ta ira harkurai ta Moses hoken: “Waak u noh tika ma tikai pai a num ie. Waak u harubu bingibing bia. Waak u kikinau. Waak u nes kalak ira linge gar na mes.” Ma bia ari a mangana hartula sa baak kana, no harkurai nong i kasar diet i hoken, bia “Nu marse tikai hoing u marse habaling at ugu.”
ROM 13:10 No magingin na harmarsai pai tale bia na gil ta nironga taar ta tikai. Ma iakano no burena bia no magingin na tar harmarsai i la gilgil haruatne ira harkurai ta Moses.
ROM 13:11 I tahut bia muat na gil huo kanong muat palai taar tano mangana pakana bung kaiken. No pakana bung i te sakit um bia nu tangtangahun, kanong katin no bung na harhalon i te hutet ta ing dahat ga nurnur.
ROM 13:12 No kankado i te hutet bia na panim laah ma i hutet um bia na madaraas. Io kaik, i tahut bia dahat na kap ise ira tintalen na kankado ma bia dahat na sigam leh ira linge na hinarubu gar na madaraas.
ROM 13:13 Dahat na tatalen takodas hoing diet kis ta ra madaraas. Waak dahat na manga mom ma mur ra magingin na ul ba. Waak dahat noh tika ma diet ing pai udahat ma dahat pa na gil ira magingin na hilawa. Waak dahat gil ra magingin na tur harpaleng ma dahat pa na mur no magingin na nes kalak linge gar na mes.
ROM 13:14 Iesen i tahut bia muat na sigasigam ma no Watong Jisas Krais ma waak muat lilik bia muat na banot hohe ira sinisip tano sakana palpal narako ta muat.
ROM 14:1 Io, ma i tahut bia muat na bale leh no tunotuno nong pai manga kap no lilik na balaraan ma i lilik iriruo baak uta ira linge i tale bia tikai na gil. Muat na bale leh ie huo ma muat pa na lilik na milmiligiruanei uta ira uno mangana kilkilinganai tus.
ROM 14:2 Tikai i nurnur bia i tale bia na ien ira matahu nian bakut. Tiga mes balik ing pai matuko no uno nurnur i lik bia i tale bia na ien ira pakana hiluo sen mon ma pataie bia na ien urat mah.
ROM 14:3 No tunotuno nong i la ienien ira linge bakut, waak bia na nes hanapu nong pai la ienien kaiken huo. Ma no tunotuno nong pai la ienien kaiken ra linge huo, pa na kure no mes bia i te laka harkurai, kanong God i te bale leh ie.
ROM 14:4 Sige um ugu ing i tale ugu bia nu kure hagahe no tultulai gar tiga mes? No uno tamat at nong na kure bia i tur timaan taar bia i te puko. Ma na tur timaan taar at kanong no Watong i petlaar bia na gil ie naga tur taar huo.
ROM 14:5 Ma tiga tunotuno um i lik bia ari a bung i manga halhaal ta ira mes na bung. Tiga mes balik i lik bia ira kaba bungbung bakut i haruat sen mon. Io, i tahut um bia tikatikai ta dir na nurnur timaan taar at bia, “I takodas tagu bia ni gil hokaiken.”
ROM 14:6 Aie nong i nes kilam bia tiga bung i halhaal ta tiga mes, i lilik huo wara gaiena no Watong. Ma aie nong i la ienien ira matahu nian bakut i gilgil huo wara gaiena no Watong. Ma iakan i palai kanong i tanga tahut ta God ta ing i la ienien. Ma aie nong i tabune ira urat, i gil huo wara gaiena no Watong mah ma i tanga tahut bilang mah tana.
ROM 14:7 I palai bia iakano i tutun kanong taie tikai ta dahat bia i lon wara gaiena sen at, ma taie tikai ta dahat na maat wara gaiena sen at mah.
ROM 14:8 Ing bia dahat lon, dahat na lon wara gaiena no Watong. Ma bia dahat na maat mah, dahat na maat wara gaiena no Watong. Io kaik um, bia dahat lon bia dahat na maat, dahat gar tano Watong dahat.
ROM 14:9 Ma Krais ga maat gaam lon baling uta iakan ra burena at waing naga Watong uta ira minaat ma diet ing diet lon taar mah.
ROM 14:10 Iesen augu um, wara bih bia u kure hagahe no hinsakaam ta Krais bia i te lake ira harkurai? Ma warah bia augu balik, nu nes hanapu no hinsakaam? Waak u gil huo kanong dahat bakut dahat na tur ra harkurai ra matmataan ta God.
ROM 14:11 Iakan i palai kanong no nianga ta God di ga pakat ie i tange bia, “No Watong i tange hoken: Ing bia i tutun bia iau lon taar, io, i tutun mah bia ira tunotuno bakut na singa bukunkek ra matmataan tagu, ma diet bakut diet na hinawas palai bia iau God.”
ROM 14:12 Io kaik um, dahat bakut dahat na tur ra matmataan ta God ma dahat na walar wara binabalu uta ira udahat mangana gingilaan.
ROM 14:13 Io kaik, waak dahat kure hagahe hargilasane dahat. Iesen na tahut bia muat na bul timaan ira numuat lilik bia muat pa na bul ta linge na tukatukai bia ira hinsaka muat ta Krais na tuke diet ine.
ROM 14:14 Tano nugu tuntunur narako ta Krais iau palai timaan ma iau manga nurnur bia ira kaba matahu nian bakut i tahut ra matmataan ta God bia tikai na ien. Iesen bia tiga nong i nurnur bia pai takodas bia na ien tiga mangana nian, io, a tutun bia pai takodas ta iakano tunotuno bia na ien ie.
ROM 14:15 Hokaiken, bia ing ira am mangana nian i gil no hinsakaam bia na puko sakasaka, io, pau murmur ira magingin na harmarsai um. Waak u ien ira linge ing na haliare no hinsakaam nong Krais ga maat wara gaiena mah.
ROM 14:16 Io kaik, waak muat gil ira linge ing muat nes bia i tahut ing bia ira mes na tange hagahe muat ine.
ROM 14:17 Kanong warah, no suruno tano kinkinis na harkurai ma ra harbalaurai ta God pai no magingin na nian ma ra minom. Iesen no suruno um, ira magingin takodas ma ra malum ma ra gungunuama ing i tahuat laah tano Halhaliana Tanuo.
ROM 14:18 Ma kaiken ra magingin no suruno kanong ing bia tikai i tultulai tupas Krais ma i taram ie mah huo, i haguama God ma i gil ira mangana gingilaan ing ira tunotuno diet nes kilam bia i takodas ra udiet matmataan.
ROM 14:19 Io kaik um, na tahut bia dahat na tar ira udahat baso bakut wara gilgil ira linge ing na hatahuat ra malum nalamin ta dahat ma na hatur hadadas timaan dahat harbasia.
ROM 14:20 Waak u haliare no pinapalim ta God wara gaiena ira am nian. A tutun, ira kaba nian bakut i tahut bia da ien, iesen i ronga bia tikai na ien ta linge sa ing na hapuko no hinsakana ta Krais.
ROM 14:21 Ing bia nu hapuko no hinsakaam ta ing nu ien urat bia nu mama wain bia nu gil ta mangana mes na linge mah, io, i manga tahut bia pa nu pakile huo.
ROM 14:22 Iesen um, ta ira sa u nurnur bia i bilai taam ta kaiken ra linge, i tahut bia nu waak ta mon nalamin ta mur ma God. I daan no tunotuno nong pai kilingane bia i te gil ronga ta kaike ra linge i te nurnur bia i bilai bia na gil.
ROM 14:23 Iesen bia tikai i lilik iriruo ta tiga linge i ien, io, God na kure bia i te gil ronga ing i ien ie, kanong warah, no uno gingilaan pa ga tur laah mekaia tano uno nurnuruan. Huo, ira linge pai tur laah tano nurnur um, a magingin sakenai.
ROM 15:1 Ma dahat ing i te palai ira udahat lilik huo, i tahut bia dahat na balane tar diet ing pai manga matuko ira udiet lilik. Dahat na takane tar ira udiet magingin ing i hatirih ira udahat nilon. Waak dahat hakanakana habaling at dahat.
ROM 15:2 I tahut bia dahat bakut tikatikai dahat na pakile ira mangana gingilaan ing ira mes diet na kanakana urie. Ma dahat na gil huo wara hatahutne diet, waing dahat naga hadadas ira udiet nilon.
ROM 15:3 Hokaiken, Krais at mah pa ga hakanakana habaling at ie, iesen ga gil haruat ta ing di ga pakat bia, “God, ira nianga sakasaka ing di te tange tar taam i te puko taar tagu.”
ROM 15:4 Ma i tale bia ni tange huo kanong ira pakpakat bakut ing di ga pakat nalua di ga pakat wara hausur dahat, waing dahat naga tur dadas ra hena ira tinirih ma dahat naga kap ra harbalaraan mekaia ta ira Halhaliana Pakpakat, kaik dahat naga nanaho ma ra nurnur ta ira haridaan ing na hanuat ta dahat.
ROM 15:5 Ma iau sasaring bia God nong i habalaraan dahat ma i gil dahat bia dahat na haruat wara tuntunur dadas ra hena ira tinirih, bia na gil muat bia muat naga mur tiga kapawena mangana lilik sen mon harbasia ta muat ing muat murmur hani Krais.
ROM 15:6 Iau sasaring bia God na gil huo bia muat naga hatamat God ma tiga lilik ma tiga kapawena inga muat mon, aie no Susine Jisas Krais no udahat Watong.
ROM 15:7 Io kaik um, muat na bale leh hargilasane muat hoing Krais gate bale leh muat waing muat naga tar pirhakasing uram ho God.
ROM 15:8 Hokaiken, iau tange ta muat bia Krais ga hanuat tultulai wara harharahut ira Iudeia waing naga hamines bia God i gil haruatne ira uno nianga. Ga hanuat wara hatutun ira kunubus ing God gate gil tar ma ira hintubu diet ma waing diet um ing diet pai Iudeia mah, diet naga hatamat God utano uno harmarsai. I hoing ira nianga ta God di ga pakat i tange bia, “Io kaik, ing iau kis nalamin ta diet ing diet pai Iudeia iau ni pirhakasing ugu. Iau ni inginge wara latlat no hinsaam.”
ROM 15:10 Ma no nianga di ga pakat ie i tange mah bia, “Muat ing muat pai Iudeia, muat na kanakana tika ma ira uno matanaiabar tus.”
ROM 15:11 Di ga pakat mah bia, “Muat bakut ing muat pai Iudeia, i tahut bia muat na pirlat no Watong. Muat ira hunhuntunaan bakut, muat na inge na pirhakasing tupas ie.”
ROM 15:12 Ma Aisaia mah i tange bia, “No but na bulumur ta Iesi na hanuat. Na tut huat naga harkurai ta ira kaba hunhuntunaan. Aie no burena bia diet ing diet pai Iudeia, diet naga nanaho ma ra nurnuruan ta ira haridaan ing na haan taar ta diet.”
ROM 15:13 Iau sasaring tupas God nong i gil muat bia muat naga haruat wara nanaho ma ra nurnuruan ta ira haridaan. Iau saring ie bia na hahungi muat ma ra gungunuama ma ra malum mah waing muat ing muat hatur kawase no dadas tano Halhaliana Tanuo, muat naga manga hung ma ra nanahai ma ra nurnuruan ta kaike ra haridaan ing na haan taar ta muat.
ROM 15:14 Bar hinsakagu ta Krais, iau manga nurnur tun at bia muat hung ma ira bilbilai ma ira mintot, ma bia muat tale bia muat na pir harbasiane muat.
ROM 15:15 Iesen iau te pakpakat ma ra tamat na harhabalaraan dahin uta ari a linge ukaia ho muat, hoing bia ni halilik muat. Ma iau te pakat huo kanong God i te tabar iau ma no uno harmarsai bia nigi tiga ut na pinapalim ta Jisas Krais nalamin ta diet ing diet pai Iudeia. Ma ing iau la paapalim huo iau gil no halhaliana pinapalim na hinarpir tano tahut na hinhinawas ta God waing God naga bale leh diet ing diet pai Iudeia hoing tiga hartabar tupas ie ing no Halhaliana Tanuo i te bul hasisingen talur ira sakena wara uta God at.
ROM 15:17 Io kaik, iau te nes bia no nugu kinkinis narako ta Jisas Krais, aie no burena bia nigi latlaat uta ira nugu pinapalim wara gaie God.
ROM 15:18 Hokaiken, iau pai iangor bia ni ianga uta ira linge, iesen tikai sen mon. Iau ni ianga uta ira linge Krais i te gil tano nugu pinapalim nalamin ta diet ing diet pai Iudeia ing diet ga hadade ira nugu nianga ma diet ga nes ira nugu gingilaan, a dadas na gingilaan, ira gingilaan na kinarup, ma ira hakilang iau ga pakile ma no dadas tano Halhaliana Tanuo. Iau ni ianga sen mon uta iakano linge Krais i te gil ing i te lue hawaat diet bia diet na mur God huo. Io kaik, tur leh mekaia Ierusalem iau gaam haan wiis taar tano hanuo Ilirikam ma iau te hapataam no nugu pinapalim ta kaiken ari a hanuo wara hinarpir ma no tahut na hinhinawas uta Krais.
ROM 15:20 Huo, iau la sipsip bia ni harpir ma no tahut na hinhinawas kaia ta diet ing diet pai nunure baak Krais, waing iau pa nigi papalim laah naliu ta ira gingilaan ing ira mes diet gate huna hatur tar.
ROM 15:21 Iesen iau sip bia ni gil haruat ma no nianga ta God di ga pakat ie bia, “Diet ing pa di ga hinawase diet utana, diet na nanaas, ma diet ing diet pa ga hadade, diet na palai.”
ROM 15:22 Io, ma kaiken ra linge kaik i la hakahe iau bia pa git taltale bia ni hanuat taar ta muat.
ROM 15:23 Iesen kaiken um taie tari mauho wara nugu pinapalim ta kaiken ra hanuo, ma ra haleng na tinahon iau git manga sipsip bia ni me nes muat, io kaik iau te bul no nugu lilik bia ni gil haruatne wara hinahaan ukaia Spen. Iau sip bia ni me haan basia kaia ho muat ma muat naga harahut iau tano nugu hinahaan ing iau te kis taar baak ma muat dahin ma kaia nalamin ta muat, muat te hakanakana iau.
ROM 15:25 Io, kaiken um iau wara hinahaan balik uram Ierusalem wara harharahut ira matanaiabar tus ta God kaia.
ROM 15:26 Hokaiken, diet ira Masedonia ma ira Akaia diet ga kanakana wara bulbul hulungan no udiet hartabar na kinewa wara harharahut diet ira matanaiabar tus ta God ing diet maris kaia.
ROM 15:27 A tutun, diet ga kanakana wara gilgil huo iesen diet kas ngasa taar ta diet ira Iudeia mah. Kanong warah, ing bia mekaia ta ira Iudeia diet te kap no pinlawe diet ta ira haridaan haruat ta ira tanua diet, io, audiet tinakum balik wara balbalu pukus diet ira Iudeia ma ira haridaan haruat ta ira linge mekai tano ula hanuo.
ROM 15:28 Ma bia iau te hapataam um iakan ra pinapalim ma bia iau te hatutun iakan ra hunue diet taar ta ira Iudeia, io, iau ni haan basia ukaia ho muat ma namur um uras Spen.
ROM 15:29 Ma iau nunure bia ni hanuat ukaia ho muat, iau ni hanuat ma ra tamat na haridaan gar ta Krais.
ROM 15:30 Bar hinsakagu ta Krais, dahat kis ra hena tano udahat Watong Jisas Krais, ma no Halhaliana Tanuo i te tabar dahat ma no magingin na tar harmarsai, io kaik iau haragat muat bia muat na tur tika ma iau ta ira nugu kaba tinirih ma ira numuat sinsaring tupas God utagu.
ROM 15:31 I tahut bia muat na sasaring bia God na halangalanga iau sukun diet aram Iudeia ing diet pai nurnur. Muat na sasaring mah bia ira matanaiabar tus ta God aram Ierusalem diet na guama wara balbale leh no nugu harharahut kaia.
ROM 15:32 Iau sip bia muat na sasaring bia na ngan huo waing ing bia no Watong i sip huo, iau nigi petlaar bia ni haan tupas muat ma ra kanakana ma bia nigi a sangeh tika ma muat ma nigi kap ra sigar ra dadas mekaia ho muat tano nugu nilon.
ROM 15:33 Io, ma iau sasaring um bia God nong i la tartar ra malum na kis tika ma muat bakut. Amen.
ROM 16:1 Io, uta Pibi no haini dahat narako ta Krais, tiga ut na harharahut ie ta diet ira matanaiabar na lotu kaia Senkiria, iau hinawase muat bia a bilai na hahin ie.
ROM 16:2 Iau saring muat bia muat na bale leh ie kanong aie mah gar tano Watong ie. Muat na bale leh ie tano ngaas i takodas bia ira gamgamatien na matanaiabar tus ta God diet na mur huo ing diet bale leh tikai. Iau saring muat bia muat na tahoi ta ira uno mangana sunupi mekaia ho muat kanong i te manga harahut ra haleng na matanaiabar, ma iau mah tikai ta diet.
ROM 16:3 Muat na haatne leh Pirisila ma Akuila, dir ing dir papalim tika ma iau wara gaiene Jisas Krais. Dir ga tar se ira udir nilon wara harharahut iau iesen bia dir ga palai taar bia dir gor maat dak. Iau kilingane ra tahut uta dir, ma pai iau sen mon, diet mah ira matanaiabar na lotu ta ira tamtaman gar audiet ing diet pai Iudeia.
ROM 16:5 Muat na haatne mah ira matanaiabar na lotu ing diet la hanuat hurlungen kaia tano udir hala. Muat na haatne leh mah no nugu bilai na harwis Epainetus nong ga huna lilik pukus taar ta Krais kaia ta diet tano hanuo Esia.
ROM 16:6 Muat na haatne leh Maria nong ga manga papalim dadas uta muat.
ROM 16:7 Muat na haatne leh mah Andaronikus ma Iunias ira iruo hinsakagu, dir ing dir ga kis tika ma iau tano hala na harpidanau. Ma ta diet ing di tule diet wara hinahaan ma no tahut na hinhinawas, ira matanaiabar diet manga ru dir. Ma dir ga huna kis narako ta Krais nalua tagu.
ROM 16:8 Muat na haatne leh Ampiliatus no nugu bilai na harwis tano udahat kinkinis narako tano Watong.
ROM 16:9 Muat na haatne leh mah Urbanus nong i la paapalim tika ma dahat wara gaie Krais, ma muat na gil huo mah taar tano nugu bilai na harwis Sitakis.
ROM 16:10 Muat na haatne leh Apeles, aie nong ira ngunngutaan i te kabit ie ma i te hamines hapalai bia i mur timaan Krais. Muat na haatne leh diet ing diet tano hatatamaan tane Aristobulus.
ROM 16:11 Muat na haatne leh Herodion no hinsakagu. Muat na haatne leh diet tano hatatamaan tane Narsisus ing diet kis tano Watong.
ROM 16:12 Muat na haatne leh Tiripina ma ne Tiriposa, kaike ira iruo hahin ing dir papalim dadas tano Watong. Muat na haatne leh mah no nugu bilai na harwis Persis, aie tiga mes na hahin mah nong i te manga papalim dadas tano Watong.
ROM 16:13 Muat na haatne leh Rupus nong no Watong i te gilamis ie. Muat na gil huo mah tano pawasine nong ga ngan bia a pawasigu mah ie.
ROM 16:14 Muat na haatne leh Asinkiritus ma ne Pelegon ma ne Hermes ma ne Patrobas ma ne Hermas ma ira hinsaka dahat mah narako ta Krais.
ROM 16:15 Muat na haatne leh mah Pilologus ma ne Iulia ma ne Nereus ma no hainine ma ne Olimpas ma ira matanaiabar bakut ta God ing diet kis tika ma diet.
ROM 16:16 Muat na haatne harbasiane muat ma muat na gawane harbasiane muat ma ra tahut na magingin. Ma ira matanaiabar na lotu bakut gar ta Krais ta ira tamtaman, diet haatne um muat.
ROM 16:17 Bar hinsakagu ta Krais, iau haragat muat bia muat na harbalaurai timaan ta diet ing diet la gilgil ra harpaleng ma ing diet bul tukatukai ta ira numuat nilon, ira mangana magingin ing i mes harsakit tano harausur muat te kap usurane leh. Muat na haan pas diet.
ROM 16:18 Hokaiken, ira mangana tunotuno huo diet pai tultulai tano udahat Watong Krais ma diet pai taram ie. Iesen diet taram ira sinisip tus ta ira bala diet. Diet manga keskes wara sa nianga ma diet lat habato mon ira tunotuno. Ma ing diet gil huo diet habato lamus ira lilik ta diet ira malus na tunotuno.
ROM 16:19 Ma iau tange huo kanong ira tunotuno bakut diet te ser leh no numuat magingin na taram nianga. Io kaik, iau guama pane muat. Iesen iau sip bia muat na minonas uta ira linge i tahut ma muat na gamgamatien talur ira sakena.
ROM 16:20 Ma i hutet bia God nong i la tartar ra malum na paas bisang Sataan ra hena ira kaki muat. A harmarsai mekaia tano udahat Watong Jisas na kis tika ma muat.
ROM 16:21 Timoti nong i papalim tika ma iau i haatne leh muat, ma huo mah ira hinsakagu, ne Lusias ma ne Ieson ma ne Sosipater.
ROM 16:22 Iau Tertius iau te pakat hasur iakan ra pakpakat, ma tano nugu kinkinis narako tano Watong iau haatne leh muat mah.
ROM 16:23 Gaius i haatne leh muat mah. Aie nong i te bale leh iau tano uno hala ma i te bale leh mah ira matanaiabar na lotu bia diet na kis hurlungen kai tano ngasiana. Erastus nong i harbalaurai ta ira kinewa ta iakan ra tamaan i haatne leh muat, ma huo mah Kuartus no tasi dahat ta Krais.
ROM 16:24 (-)
ROM 16:25 Io, ma iau pirlat ie nong i tale bia na hatur hadadas muat haruat tano nugu tahut na hinhinawas, no harharpir uta Jisas Krais. Iakano hinarpir aie no hinhinawas God i te hapuasne um. Kaiken ra linge na susuhai gabe kis mun taar ta ira haleng na tinahon sakit ing i te pataam, iesen kaiken um God i te hamines hapalainei. Ma God nong pa nale maat i te hamadaraasne dahat uta iakan haruat ma no uno sinisip ing gate puo tar ma hoing ira tangesot diet gate pakat tar. Ma God i te gil huo waing ira hunhuntunaan tano ula hanuo bakut diet naga taram ie hokaiken, bia diet na nurnur.
ROM 16:27 Io, ma tano nugu kinkinis ta Jisas Krais iau pirlat God huo, aie sen mon nong i minonas. A pirhakasing tupas ie ta ira bung namur ma pa nale pataam. Tutun sakit.
1CO 1:1 Iau Pol nong God ga tatau leh iau haruat ma no uno sinisip bia iau tiga apostolo tane Krais Jisas. Ma mir ma no tasi dahat Sostenes, mir tule kan ra nianga tupas muat ira matanaiabar na lotu gar tane God ing muat kis kaia Korin, muat ing God i te bul hasisingen muat bia muat naga halhaal narako ta Krais Jisas, muat ing i te tatau leh muat bia muat ira uno matanaiabar tus tika ma diet bakut ta ira tamtaman ing diet lotu tupas no udahat Watong Jisas Krais, aie no audiet Watong ma no udahat mah.
1CO 1:3 A harmarsai ma ra malum tupas muat mekaia ho God no adahat Sus ma no Watong Jisas Krais.
1CO 1:4 Iau la tangtanga tahut hait ta God uta muat kanong i te tabar bia muat narako ta Krais Jisas ma no uno harmarsai.
1CO 1:5 Iau tanga tahut tana kanong i te manga haidane muat ma ira kaba hartabar bakut, ta ira kaba mangana nianga ma ta ira kaba mangana mintot bakut.
1CO 1:6 Hokaiken God ga hatutun no hinhinawas uta Krais nalamin ta muat.
1CO 1:7 Io kaik, taie tiga hartabar bia i panim kaia nalamin ta muat ing u kiskis kawase ma ra tamat na masmasingan tano harapuasa tano udahat Watong Jisas Krais.
1CO 1:8 Ma na hatur hadadas mah muat tuk taar tano hauhawatine bia pa da nes leh ta sakena ta muat ta iakano bung tano udahat Watong Jisas Krais.
1CO 1:9 Ma God na gil haruatne ira linge ga kukubus bia na gil. Aie nong ga tatau leh muat bia muat na kap ra kinkinis tika ma no Natine Jisas Krais no udahat Watong.
1CO 1:10 Bar hinsakagu ta Krais, iau saring muat tano hinsa Jisas Krais no udahat Watong bia muat bakut, muat na haut tika harbasia ta muat ma na taie ta harpaleng kaia mah ta muat. Ma iau saring muat bia muat na tur tika ma tiga kapawena lilik mon.
1CO 1:11 Bar hinsakagu ta Krais, ari mekaia tano kabaan ta Kloi diet te hinawase iau bia a mon hargau kaia nalamin ta muat.
1CO 1:12 Ma i hokaiken, bia muat tikatikai muat la tangtange ari a linge i mes harbasia. Tikai i la tangtange bia, “Iau la murmur Pol.” Tiga mes i tange bia, “Iau la murmur Apolos.” Ma tiga mes mah i tange bia, “Iau la murmur Pita.” Ma tiga mes balik bia, “Iau la murmur Krais.”
1CO 1:13 Muat lik bia Krais audiet sen mon tari? Di ga lau Pol tano ula kabai wara gaie muat? Ma di ga baptais muat narako tano hinsa Pol?
1CO 1:14 Iau tanga tahut ta God bia iau pa ga baptais tari ta muat iesen Kirispus ma ne Gaius sen mon.
1CO 1:15 Io kaik, pai tale tikai bia na tange bia i te kap baptais narako tano hinsagu.
1CO 1:16 Io, ma iau lik leh mah no hatatamaan ta Sepanas ing iau ga baptais diet. Ma makaia um iau pai lik leh um tikai bia iau ga baptais.
1CO 1:17 Kanong warah, Krais pa ga tule iau bia ni baptais. Taie. Ga tule iau bia ni harpir utano tahut na hinhinawas. Ma sen pataie bia ni harpir ma ra mintot ma ra keskes na nianga gar na tunotuno mon, bia no kabai ta Krais kabi ngan bia a linge bia mon ie.
1CO 1:18 Iau tange huo kanong diet ing diet hanahaan tano ngaas na hiniruo, diet nes no nianga utano kabai bia a ba na lilik mon ie. Iesen dahat ing dahat kis taar tano uno harhalon, dahat nes kilam no nianga tano kabai bia aie no dadas ta God.
1CO 1:19 I hokaiken di ga pakat ing God ga tange, “Iau ni gil haliare ira mintot ta ira ut na mintota, ma iau ni waak se ira minminonas ta ira ut na minminonas.”
1CO 1:20 Ma he um ira minminonas na lilik ta ira ut na minminonas? A he um ira mintot ta ira tena harausur ta ira harkurai? Ma he mah no keskes ta diet ira ut na sa nianga? Tutun sakit God i te hamines bia ira mintot tano ula hanuo a ba na lilik mon.
1CO 1:21 Tano uno minminonas, God pa ga haut leh ira ut na minminonas tano ula hanuo bia diet na nunure ie. Diet ga nes kilam no tahut na hinhinawas bia a ba na lilik ie. Io kaik, God ga sip bia na papalim ma iakano hinhinawas wara halhalon diet ing diet nurnur.
1CO 1:22 Ira Iudeia diet la sipsip bia diet na nes ira dadas na hakilang wara hamines bia tiga linge i tutun. Ma ira Grik diet la sisilih ta ira mintot.
1CO 1:23 Iesen het ing het harpir utano Mesaia nong di ga lau tar ie tano ula kabai. Ta ira Iudeia a linge na tukatukai ta diet kanong diet malok tana. Ta ira Grik diet lik bia a ba na lilik mon iakan ra linge.
1CO 1:24 Iesen diet ing God i te tatau leh diet, diet ira Iudeia ma diet ira Grik mah, diet nes kilam Krais bia aie nong i hamines no dadas ta God ma no mintota ta God.
1CO 1:25 Kanong warah, no pinapalim ta God ing diet nes bia i hamines ra ba na lilik, i hamines balik ra minminonas i tamat ta ira minminonas ta ira tunotuno. Ma no uno pinapalim ing diet nes bia i tabales, i hamines balik ra baso i tamat ta ira baso ta ira tunotuno.
1CO 1:26 Kaba hinsakagu ta Krais, muat na lilik bia a mangana tunotuno sa muat ta iakano pakana bung ing God ga tatau leh muat. Pai halengin ta muat ing ira tunotuno diet ga nes kilam bia a lualua bia a ut na minminonas bia a ut na baso muat.
1CO 1:27 Iesen wara hahirhir ira ut na minminonas, God ga gilamis leh ira linge ing no ula hanuo i nes bia i hamines ra ba na lilik. Ma wara hahirhir ira ut na baso, God ga gilamis leh mah ira linge ing no ula hanuo i nes bia pata dindas tana.
1CO 1:28 Ga gilamis ira linge ing no ula hanuo i nes hanapu ma i miligiruane bia a linge bia, wara gilgil haliare ira linge diet lik bia i tamat.
1CO 1:29 God ga gilamis kaiken ra linge huo waing taie tikai pa naga sa butbut ra matmataan tana.
1CO 1:30 Iesen tano gingilaan ta God at muat kis narako ta Krais ma aie nong God te bul ie bia no udahat mintota. Ma aie no udahat mintota hokaiken kanong narako ta Krais God i te harkurai bia dahat takodas ma i te bul hasisingen dahat bia dahat naga halhaal ma i te kul halangalanga leh dahat mah.
1CO 1:31 Io kaik, hoing di ga pakat tano nianga ta God, “Sige nong i wara latlaat, i tahut bia na lat no Watong.”
1CO 2:1 Bar hinsakagu ta Krais, ing iau ga haan tupas muat ma iau ga harpir utano hinhinawas ta God, iau pai ga hanuat hoing tiga keskes na ut na nianga na mintot.
1CO 2:2 Iau ga harpir huo kanong ing iau ga kis nalamin ta muat iau ga bul no nugu lilik bia pa ni lilik ta tiga mes na linge, iesen Jisas Krais ma no uno minaat tano ula kabai sen mon.
1CO 2:3 Taie ta baso tagu ing iau ga kis nalamin ta muat. Iau ga hanuat ma ra tamat na urur ma ra dinedar.
1CO 2:4 Ing iau ga harpir ma iau hinawas palai ta ira kukuraina ta ira nugu nianga, io, iau pai ga halawen muat ma ra nianga na mintot. Taie. No nugu hinhinawas ga hamines no dadas tano Halhaliana Tanuo.
1CO 2:5 Ma iau ga harpir huo waing ira numuat nurnuruan pa na suator ta ira mintot gar na tunotuno mon iesen na suator tano dadas ta God.
1CO 2:6 Iesen mehet iangianga balik ma ra mangana mintot nalamin ta diet ing i matuko ira tanua diet tupas God. Ma sen mehet pai iangianga ta ira mintota u katin. Ma pataie mah ta ira mintota ta ira lulua kaiken ing diet wara patpataam.
1CO 2:7 Iesen mehet la harharpir ma ra mintota gar ta God nong ga susuhai nalua ta ira tunotuno ma sen i te hanuat puasa kaiken. Ma God ga puo tar menalua tano hathatahun ta ira linge bakut bia iakano mintot na manga hatahutne dahat.
1CO 2:8 Taie ta tiga nong ta diet ira lualua tano ula hanuo kaiken pa ga nunure iakano mintot. Taie. Ing bia diet gor nunure tar, diet pa gor lau no tamat na Watong taar tano ula kabai.
1CO 2:9 I hokaiken no nianga ta God di ga pakat ie i tange, “Ira linge ta God ing taie tiga nong pai nes ma pai hadade ma pai nunure, io, kaiken ra linge at God i te tagure wara gaie diet ing diet sip ie.”
1CO 2:10 Ma diet pa ga nunure kanong God i te hapuasne tar ie ta dahat ma no Tanuana. No Tanuo ta God i sisilih ta ira linge bakut. Tutun sakit, i sisilih mah ta ira linge aram narako tun at ta God.
1CO 2:11 Ma iakan i palai kanong no tanuana tiga nong, aie sen mon i tale bia na manga nunure timaan iakano tunotuno. Ira mes na tunotuno diet pai tale. Huo mah, taie ta tiga tunotuno i manga nunure timaan God, iesen no Tanuo ta God sen mon.
1CO 2:12 Dahat pai kap no mangana lilik tano ula hanuo. Taie. Dahat te kap no Tanuo meram ho God waing dahat naga nunure tar bia asa ing God i te tabar bia dahat me.
1CO 2:13 Ma kaiken ra linge ing het la iangianga urie. Ma sen het pai ianga ma ra mangana nianga ing het te harausur ine ta ira mintot gar na tunotuno. Taie. Het ianga ma ra mangana nianga ing no Tanuo i te hausur het ine. Het palpalas ira kukuraina ta ira linge gar tano Tanuo. Ma het gil huo ma ra mangana nianga ing mehet te kap mekaia hono Tanuo.
1CO 2:14 Sige nong pai hatur kawase no Halhaliana Tanuo pai bale leh ira linge ing i hanuat mekaia hono Tanuo gar ta God. Kanong warah, i lik bia diet a linge na ba. Ma pai tale bia na palai ine kanong tikai na nunure kilam kaiken ra linge ma no harharahut tano Tanuo.
1CO 2:15 Iesen sige nong i hatur kawase no Halhaliana Tanuo i tale bia na nunure kilam ira linge bakut. Tiga mes na tunotuno balik pai tale bia na kure no magingin ta iakano tunotuno bia i tahut bia i sakena.
1CO 2:16 I hokaiken no nianga gar ta God di ga pakat ie i tange, “Pataie tikai i tale bia na nunure tar no lilik tano Watong. Ma sige i tale bia na hausur ie?” Iesen dahat, dahat hatur kawase no mangana lilik gar ta Krais.
1CO 3:1 Ma pa ga tale iau bia ni haianga muat hoing ira tunotuno ing diet hatur kawase no Halhaliana Tanuo. Taie. Iau ga nes bia i tahut bia ni haianga muat hoing ira tunotuno ing diet mur ira magingin mekai napu. Muat ga ngan hoing ira bana ta ira numuat kinkinis narako ta Krais.
1CO 3:2 Iau ga tabar muat ma ra polona sus, taie bia a dadas na nian, kanong muat pai taguro pane. Tutun sakit, muat pai taguro kaiken kanong muat murmur baak ira magingin mekai napu. Ing muat harngangaar harbasia ma muat nes kalak ira kinkinis gar na mes, i hamines bia muat baak mekai napu ma muat lalon hoing ira tunotuno ta iakan ra ula hanuo mon.
1CO 3:4 Kanong ing tikai i tange bia, “Iau mur Pol” ma tiga mes balik bia, “Iau mur Apolos,” io, i hamines bia muat ira tunotuno tano ula hanuo mon.
1CO 3:5 Sige um iakano Apolos? Ma sige mah iakano Pol? Airuo tultulai mon dir ing muat ga nurnur ta ira udir nianga. Mir bakut tikatikai mir gil haruatne hoing no Watong i te tar ta mir bia mir na gil.
1CO 3:6 Iau ga saso ma Apolos ga kapkapal. Iesen God ga hakuburuan.
1CO 3:7 Io kaik, nong i saso ma nong i kapkapal, dir bakut a linge bia mon dir. Iesen nong i tamat, aie God nong i hakuburuan.
1CO 3:8 Nong i saso ma nong i kapkapal dir haruat mon. God na tar ra kunkulaan ta dir tikatikai, haruat ma ira udir pinapalim.
1CO 3:9 Mir papalim tika, mir ira iruo tunotuno gar ta God. Muat no lalong gar ta God. Muat no hala ing God ga gil ie.
1CO 3:10 Iau ga hatur ira kasong hoing tiga keskes na ut na gil hala, haruat ma ing God ga tar tagu bia ni gil huo. Tiga mes i pasum ira pinapalim ta kaike ra kasong. Iesen i tahut bia ira tunotuno bakut, tikatikai, diet na balaure bia diet na pasum habibihane ira pinapalim ta kaike ra kasong.
1CO 3:11 Kanong warah, pai tale tikai bia na hatur leh tiga mes na kasong ta kaike i te kis taar. Ma kaike ra kasong, ne Jisas Krais at mon.
1CO 3:12 Ari diet na pasum ira pinapalim ma ra gol bia ra siliwa bia ira bilai na maririsuan na haat. Ari a mes diet na pasum ira pinapalim ma ra daha mon bia ra tingari bia ra pagala bia.
1CO 3:13 Ira mangana pinapalim sa tikatikai i te gil na hanuat palai kanong iakano tamat na bung na hanuat ma na hapalaine. A mon iaah na hapalaine ira mangana pinapalim. Ma no iaah at na tun walar kaike ra pinapalim wara hamines bia i tahut bia i sakena.
1CO 3:14 Ing bia ira pinapalim auno ta tikai pa na doda, na kap ra bilai na harkul.
1CO 3:15 Ing bia no iaah i tun haliare ira pinapalim auno ta tikai, pa na hatur kawase ta linge. Aie balik na laka tano harhalon, iesen na ngan hoing bia di ras leh ie sukun ra karamena iaah.
1CO 3:16 Hohe, muat pai nunure bia muat no halhaliana hala gar ta God ma bia no Tanuo ta God i la kis taar ta muat?
1CO 3:17 Ing bia sige tikai i haliare no halhaliana hala gar ta God, God mah na haliarei, kanong no uno hala, auno tus ie ma i tur sisingen talur ira sakena. Ma muat at, muat iakano hala.
1CO 3:18 Waak muat lamus habato ira numuat lilik. Ing bia tikai ta muat i lik bia a ut na mintota ie hoing no ula hanuo i nes kilam tikai bia a mintatonai, io, i tahut bia na ba mon waing naga mintota tutun.
1CO 3:19 Kanong warah, asa ing no ula hanuo i nes kilam bia a linge na mintot, a ba na linge mon ie tano ninaas ta God. Hoing no nianga ta God di ga pakat ie i tange, “God i hakuni ira ut na mintota ta ira udiet keskes na lilik at.”
1CO 3:20 Ma ira nianga ta God i tange mah bia, “No Watong i nunure tar ira lilik ta ira ut na mintota bia a linge bia mon ie.”
1CO 3:21 Io kaik, waak bia tiga nong na sa butbut uta ira linge a tunotuno mon i tale bia na gil kanong anumuat ira linge bakut.
1CO 3:22 Pol, Apolos, Pita, iakan ra ula hanuo, a nilon, a minaat, ira linge kaiken ma ing mah namur, kaike ra linge bakut anumuat.
1CO 3:23 Ma gar ta Krais muat, ma Krais a gar ta God ie.
1CO 4:1 Io kaik, i tahut bia ira tunotuno diet na nes kilam metal bia metal mon aitul a tultulai gar ta Krais ma bia metal ira aitul a tunotuno ing God i te bul tar no uno pinapalim ta metal bia metal na balaure timaan ira uno linge ing ga susuhai nalua ma kaiken i te hanuat puasa.
1CO 4:2 Ma kaike ra mangana tultulai huo, tiga linge i tamat, bia diet na gil haruatne hono sinisip tano udiet tamat i nuruan diet huo.
1CO 4:3 A linge bia mon tagu bia muat na nes murmur ira nugu tintalen bia i tahut bia i sakena. Ma pai tiga tamat na linge tagu bia ira tunotuno mon diet na nes murmur iau haruat ma ira udiet mangana harkurai. Ma iau at iau pai kure habaling iau bia iau bilai bia iau sakena.
1CO 4:4 Iau pai lik leh bia iau te gil tiga nironga, ma sen iakano mangana lilik pai hatutun bia iau takodas harsakit. Taie. No Watong at nong i nes murmur iau bia iau tahut bia iau sakena.
1CO 4:5 Io kaik, waak muat kurkure ta tiga nong kanong no pakana bung na harkurai pai hanuat baak. Waak muat harkurai huo menalua tano hinanuat tano Watong. Aie nong na hamadaraas ing i kis kumaan tano kankado ma na hapuasne ira lilik ma ira sinisip ing i kis narako ta ira tunotuno. Ma ta iakano pakana bung um ira matanaiabar tikatikai diet na hatur kawase ira udiet pirhakasing meram ho God at.
1CO 4:6 Bar hinsakagu ta Krais, iau tange kaiken ra linge bakut uta mir ma ne Apolos wara harharahut muat waing muat na kap harausur ta mir waing muat kabi lake ira nianga ta God di ga pakat. Iau sip bia muat na lon huo waing muat pa na lat tikai ma muat na hanapu no mes.
1CO 4:7 Sige i te hatamat muat? Hohe, God pai tabar muat ma ira linge kaike muat hatur kawase? Ma ing bia God ga tar kaike ra linge ta muat, wara bih muat sa butbut hoing bia muat at muat ga hatahuat kaike ra linge?
1CO 4:8 Kaiken um muat te hatur kawase ira linge haruat ma ira numuat sinisip! Ma muat te tonane um ra tamat na bunbulaan! Muat te watong um, ma mehet, pataie. Gor tahut bia muat te watong tutun, mehet mah, het naga watong tika ma muat.
1CO 4:9 Gor tahut huo kanong i nanaas tagu bia God i te bul mehet ira apostolo hoing ira hiruo ing ira umri diet hamines hani. Mehet hoing diet ira hiruo ing di te kure bia diet na maat ma diet murmur hani ira umri ukaia tano udiet minaat. I hoing bia ira tunotuno tano ula hanuo bakut ma ira angelo mah, diet itame mehet huo.
1CO 4:10 Ta ira numuat ninaas, mehet ira ba wara gaiene Krais iesen muat ira ut na minminonas narako ta Krais! Muat lik bia a malmalungana het ma a ut na baso muat! Di ru muat ma sen di nes hanapu mehet.
1CO 4:11 Mehet la tamtaburungan ma het la marmaruk. A pulutuana mehet. Di la manga hagahe mehet ma taie ta ngasia mehet. I la ngan taar huo menalua tuk kaiken.
1CO 4:12 Mehet la paapalim dadas ma ira iruo lima mehet at. Ing di tange hagahe mehet, het la haidane diet. Ing di helar ta mehet, het pai suar ngangar.
1CO 4:13 Ing di tange ra sakana nianga uta mehet, het balu ma ra tahut na nianga. Mehet hoing ira sakana kurkuruan tano ula hanuo bakut ma ira bilingana bubuto tuk taar kaiken.
1CO 4:14 Ma iau pai pakat kaiken ra nianga wara hahirhir muat. Taie. Iesen wara hakatom muat hoing ira natigu ing iau manga sip muat.
1CO 4:15 I tutun bia a haleng sakit ira numuat ut na harbalaurai tano numuat kinkinis ta Krais. Iesen taie amuat ta haleng sus. Kanong warah, tano numuat kinkinis ta Krais iau ga ngan hoing no amuat sus ing iau ga tar no tahut na hinhinawas taar ta muat.
1CO 4:16 Io kaik, iau haragat muat bia muat na mur ira nugu tintalen.
1CO 4:17 No burena iakanong iau gi tule Timoti ukaia ho muat. Aie no natigu narako ta Krais ma iau manga sip ie ma a tutun na tunotunoi tano Watong. Na halilik leh muat tano nugu mangana nilon narako ta Krais, iakano mangana nilon nong i haruat ma ira harausur iau la tartar ta ira matanaiabar na lotu ta ira matahu katon.
1CO 4:18 Io, ma tari ta muat, muat te hatamat habaling muat kanong muat lik bia pa ni hanuat ukaia ho muat.
1CO 4:19 Iesen iau ni hanuat gasien ukai ho muat ing bia no Watong i sip huo. Ma iau ni nunure leh ira dadas ta kaiken ra ut na latlaat, ma pataie bia ira udiet nianga mon.
1CO 4:20 Hokaiken, no kinkinis na harkurai ma ra harbalaurai ta God pai nianga mon. A dadas at.
1CO 4:21 Muat sip hohe? Iau ni hanuat ukaia ho muat ma tiga dangadangat bia ma ra harmarsai tika ma ra magingin na matmatien na tunotuno?
1CO 5:1 Di hinawas hanahaan uta muat bia a mon magingin na hilawa kana nalamin ta muat. Ma i manga sakena. Ira tabuna nurnuruan diet pai la gilgil huo. Di tange bia tiga tunaan i la noh tika ma no hahin tano ana sus.
1CO 5:2 Ma muat ira ut na latlaat! Gor tahut bia muat gor manga tapunuk. I tahut bia muat gor tule se no tunotuno nong ga gil huo me nalamin ta muat.
1CO 5:3 A tutun bia no palatamaigu pai kis tika taar ma muat kaiken. Iesen no tanuagu i kis tika taar ma muat. Ma hoing bia iau kis tutun tika taar ma muat, iau te kure tano hinsa Jisas no udahat Watong bia no tunotuno nong i gil huo i gil ra sakena.
1CO 5:4 Ing no tanuagu i kis tika taar ma muat ma no dadas tano Watong Jisas i kis tika taar ma dahat, io, tano nugu lilik iau te kure bia muat na tar se iakan ra tunotuno tano lima Sataan kaik ira magingin tano palatamaine naga panim laah. Ma muat na gil huo tana waing no tanuana na laka tano harhalon tano bung gar tano Watong.
1CO 5:6 Ma pai tahut bia muat na latlaat. Hohe, muat pai nunure bia a pet na is na halalat tiga kidilona beret?
1CO 5:7 Muat na kap se ira tuarena is na magingin sakena waing muat naga bilai hoing tiga sigar beret ing pataie ta is tana. Tutun sakit, muat at hoing ira sigar beret. Ma muat na gil huo kanong di te bu bing Krais hoing no udahat nat na sipsip na hartabar utano Nian na Hinahaan Sakit.
1CO 5:8 Io kaik, i tahut bia dahat na murmur ira mangana magingin i haruat ma iakano Nian. Waak dahat mur ie ma ira matahu magingin sakena hoing bia a tuarena is. Taie. Dahat na mur ie ma ra tutun na gamgamatien na magingin hoira beret ing pataie ta is tana.
1CO 5:9 Ma iau ga pakpakat ukaia ho muat bia muat pa na manga lon tika ma ira tunotuno ing diet mur ra magingin na hilawa.
1CO 5:10 Tutun sakit, iau pai iangianga uta ira matanaiabar ta iakan ra ula hanuo ing diet ira hilawa, bia ira ut na nas kalak linge, bia ira ut na harauro, bia ira ut na lotu tupas ira palimpuo. Ing bia no kukuraina tano nugu nianga gor te ngan huo, gor tahut bia muat gaar haan sukun no ula hanuo.
1CO 5:11 Iesen taie. No kukuraina tutun tano nugu pakpakat bia waak muat manga lon tika ma tiga nong ing i tange bia a hinsaka muat ie ta Krais ma sen a hilawa ie, bia a ut na nes kalak linge ie, bia a ut na lotu tupas ira palimpuo, bia a ut na tanga hagaha ri ie, bia a ut na minom ie, bia a ut na harauro ie. Waak muat iaan mah tika ma tiga tunotuno huo.
1CO 5:12 Pai takodas bia ni kure ira tunotuno ing diet pai gar ta ira matanaiabar ta Krais. God na kure diet. Iesen i tahut bia muat na kure ira tunotuno ing diet nalamin ta muat ira matanaiabar gar ta Krais. I hoing no nianga ta God di ga pakat ie i tange, “Muat na tule ise no sakana tunotuno me nalamin ta muat.”
1CO 6:1 Ing bia tikai i hargor ma no hinsakana ta Krais, hohe, na haan tupas ira ut na gil harkurai ing diet pai nunure God wara hatakodasne no linge? Waak tun at bia na gil huo! Na haan tupas ira matanaiabar tus ta God bia diet na kure.
1CO 6:2 Hohe, muat pai nunure bia ira matanaiabar tus ta God diet na kure no ula hanuo? Ma bia i tutun bia muat na kure no ula hanuo, hohe, pai tale muat bia muat na kure ira nat na linge?
1CO 6:3 Muat pai nunure bia dahat na kure ira angelo? Bia i tutun huo, dahat na manga tale bia dahat na kure ira linge ta iakan ra nilon.
1CO 6:4 Ing bia a mon mangana purpuruan huo nalamin ta muat, waak muat haan tupas diet ing diet pai kis tika ma muat wara kurkure hatakodasne ira linge.
1CO 6:5 Iau tange huo wara hahirhirne muat. Hohe, i tutun bia taie ta ut na mintot ta muat nong na tale bia na kure hatakodasne ira purpuruan nalamin ta muat ira haratasin ta Krais?
1CO 6:6 Iesen ari diet la tartar ira tasi diet narako ta Krais taar ra harkurai. Ma diet bale leh ira tabuna nurnuruan wara kurkure hatakodasne ira linge.
1CO 6:7 Ma bia muat la hanahaan tupas ira ut na gil harkurai wara hatakodasne ira hargor nalamin ta muat, i hamines bia muat te manga puko um. Iesen i tahut bia muat na bale leh balik tikai bia na harongane muat. Ma i tahut mah bia muat na haut leh tikai bia na karit leh ira numuat linge.
1CO 6:8 Iesen muat at, muat la karkarit ma muat la gilgil ronga. Ma muat la gilgil kaike ta ira tasi muat narako ta Krais.
1CO 6:9 Hohe, muat pai nunure bia ira sakantangunguana diet pa na hatur kawase no kinkinis na harkurai ma ra harbalaurai ta God? Waak muat lamus habato ira numuat lilik. Ira mangana tunotuno ing diet pa na hatur kawase no kinkinis na harkurai ma ra harbalaurai ta God, diet hoken: ira hilawa, ira ut na lotu tupas ira palimpuo, diet ing diet noh tika ma tikai gar na mes, diet ira tunaan ing diet noh tika baling ma tiga tunaan ma ira hahin ing diet gil mah huo, ira hisikoma, ira ut na nes kalak linge, ira ut na minom, ira ut na tanga hagaha ri, ma ira ut na harauro.
1CO 6:11 Ma ari ta muat huo nalua. Iesen no Tanuo tano udahat God ga kapal ise ira numuat sakena ma ga bul hasisingen muat wara uno tus ma ga kure bia muat takodas ra matmataan tana. Ma ga gil huo taar ta muat tano hinsane Jisas Krais no Watong.
1CO 6:12 Ma tikai na tange bia, “Asa ing iau sip bia ni gil, i takodas bia ni gil.” Masa. Iesen ira linge bakut pai tale bia na hatahutne ugu. I tale bia ni tange mah, “Asa ing iau sip bia ni gil, i takodas bia ni gil.” Iesen iau malok bia ni kis ra hena ra harkurai ta tiga linge.
1CO 6:13 Tiga mes balik na tange bia, “Ira bala dahat wara nian, ma ira nian uta ira bala dahat.” Masa. Ma God na hapataam dir bakut. Iesen bia pai tutun bia ira palatamai dahat wara magingin na hilawa. Taie. Ira palatamai dahat wara gar tano Watong, ma no Watong i manga ngarau ta ira palatamai dahat.
1CO 6:14 God ga hatut no Watong sukun ra minaat ma no uno dadas. Ma na hatut mah dahat huo ma iakano dadas.
1CO 6:15 Hohe, muat pai nunure bia ira palatamai muat a sumsubana tano palatamaine no Watong? Ing bia i tutun huo, muat lik bia i takodas bia ni kap ira sumsubana tano palatamai Krais, ma ni pasum ma no palatamaine no hilawa? Taie tun at!
1CO 6:16 Hohe, muat pai palai bia ing tikai i pasum no palatamaine ma tiga hilawa, i hoing bia dir tiga kapawena mon ta ira palatamai dir? Iakan i palai kanong i hoing no nianga ta God di ga pakat ie i tange, “Dir na tiga kapawena mon ta ira palatamai dir.”
1CO 6:17 Iesen bia sige tikai i pasum habaling ie tano Watong, dir tikai mon tano Tanuo.
1CO 6:18 Muat na hilau sukun ira magingin na hilawa. Ira mes na magingin sakena ing tiga tunotuno na gil pai kis tano palatamaine no tunotuno. Iesen nong i mur ra magingin na hilawa i hagahe no palatamaine at ma iakano magingin sakena.
1CO 6:19 Hohe, muat pai nunure bia ira palatamai muat a hala tano Halhaliana Tanuo, ma i kis narako ta muat, ma muat te kap ie meram ho God? Ma muat pai nunure mah bia pai numuat at muat?
1CO 6:20 Taie. God ga kul halangalanga leh muat ma ra kunkulaan. Io kaik, i tahut bia muat na lat God ma ira palatamai muat.
1CO 7:1 Io, ni tar um ra binabalu uta ira linge muat ga pakpakat urie. Muat tange bia pai tahut bia tikai na sigire tiga hahin.
1CO 7:2 Iesen ari ta muat diet murmur ira magingin na hilawa, io kaik, i tahut bia tiga tunaan na kis tika ma no uno hahin at, ma tiga hahin ma no uno tunaan at.
1CO 7:3 No tunaan na tar no palatamaine tano uno hahin, haruat ma no sinisip tano uno hahin, ma no hahin mah huo tano uno tunaan.
1CO 7:4 No hahin pai kure no palatamaine at. Taie. No uno tunaan i kurei. Ma no tunaan pai kure no palatamaine at. Taie. No uno hahin i kurei.
1CO 7:5 Waak bia tikai na mus bat no palatamaine tano suana kanong tano suana at ie. Ing bia mur haut tika i tale bia mur na kis harbasia ta dahin wara sinasaring. Iesen i tahut bia mur na hanuat tika baling, kanong ing bia mur pai balaure timaan ira numur sinisip, i tale bia Sataan na walaam mur huo.
1CO 7:6 Iau pai tar ra dadas na nianga ta mur bia mur na kis harbasia. Taie. Iau bale tar mon mur bia mur na gil huo.
1CO 7:7 Ma iau sip um bia ira tunotuno bakut diet gor haruat ma iau. Iesen a mon hartabar meram ho God tupas ira tunotuno tikatikai. Tikai i hatur kawase tiga hartabar wara tinolen ma tikai tiga mes na mangana hartabar bia na kis na lala.
1CO 7:8 Ma ta ira makosa iau wara tangtange hoken, bia i tahut bia diet na kis na lala taar mon hoing iau.
1CO 7:9 Iesen diet ing diet pai tale bia diet na kure hadadas ira udiet sinisip, i bilai bia diet na tola. Kanong warah, i bilai bia na tola ma pa na manga mamahien no uno sinisip wara utano ninahon tika.
1CO 7:10 Ma iau wara tartar kan ra harkurai tupas ira tinolen. Ma sen, pai iau mon, no Watong at. Ma i hoken. No hahin pa na haan sukun no uno tunaan.
1CO 7:11 Iesen bia ing i gil huo, na kis na lala hatika taar at. Ma bia i malok bia na kis na lala, na tapukus taar tano uno tunaan. Ma no tunaan pa na hilau talur no uno hahin.
1CO 7:12 Ma ta muat ira mes mah iau wara tangtange iakan ta muat. Iakan, anugu nianga at ie, pai tano Watong ie. Ma i hoken. Ing bia tiga tasi dahat ta Krais i te tole tiga hahin nong pai le nurnur ta Krais ma iakano hahin i kanan taar bia dir na kis tika, io, waak i se no uno hahin.
1CO 7:13 Ma ing bia tiga haini dahat ta Krais i te tole tiga tunaan nong pai le nurnur ta Krais ma iakano tunaan i kanan taar bia dir na kis tika, io, waak i se no uno tunaan.
1CO 7:14 Kanong warah, no tunaan nong pai nurnur i te kap ra gamgamatien na kinkinis narako tano kinkinis na tinolen ma no uno hahin. Ma huo mah tano hahin nong pai nurnur. I te kap ra gamgamatien na kinkinis narako tano kinkinis na tinolen ma no uno tunaan. Ma bia pai tutun huo, God pa gor tale bia na bale leh ira nati muat. Iesen pataie. Diet gamgamatien huo mah.
1CO 7:15 Iesen bia nong pai nurnur ta Krais i haan talur no suana, io, i tale bia da bale sei. Ma bia i ngan huo, io, taie tiga harkurai i hagut no tasi dahat bia no haini dahat ta Krais bia na kis taar tano uno tinolen. Iesen God i te tatau leh dahat bia dahat na kis ma ra malum.
1CO 7:16 Hokaiken, augu ra hahin, u nunure hohe bia pai tale augu bia nu halon no num tunaan? Ma augu ra tunaan mah, u nunure hohe bia pai tale augu bia nu halon no num hahin?
1CO 7:17 Iau haut leh muat bia muat na gil huo iesen i tahut bia tikatikai ta muat na kis taar tano mangana kinkinis na nilon nong no Watong i te bul tar tana. Tano pakana bung bia God ga tatau leh muat, muat bakut tikatikai, muat ga kis taar ta ira numuat mangana kinkinis huo. Io, waak muat walar um bia muat na kios ira numuat mangana kinkinis kaiken. Ma iau tar iakan ra harkurai ta ira matanaiabar na lotu ta ira tamtaman bakut.
1CO 7:18 Ing bia God ga tatau leh tiga tunaan nong di gate kut tar no palatamaine, io, waak i walar bia na ngan hoing tikai nong pa di kut baak ie. Ma ing bia God ga tatau leh tiga tunaan nong pa di kut baak ie, waak i haut leh bia da kut ie.
1CO 7:19 No magingin na kutkut ira palatamainari, a linge bia mon. Ma bia pa di kut mah tikai, a linge bia mah iakano. Iesen no tamat na linge, bia dahat na mur ira kaba harkurai ta God.
1CO 7:20 Muat bakut tikatikai, muat ga kis taar ta ira numuat mangana kinkinis na nilon tano pakana bung bia God ga tatau leh muat. Io, waak muat walar um bia muat na kios ira numuat mangana kinkinis kaiken.
1CO 7:21 Bia augu tiga tultulai tano pakana bung bia God ga tatau leh ugu, waak u ngarngarau utana. (Ma sen ing bia i tale ugu bia nu langalanga sukun no num kinkinis na tultulai, io, i tahut bia nu gil huo.)
1CO 7:22 Ma iau tange huo kanong bia tikai, a tultulai ie tano pakana bung bia no Watong ga tatau leh ie, io, narako tano Watong i ngan hoing tikai nong i langalanga sukun ra kinkinis na tultulai. Huo mah ta nong pa ga tultulai tano pakana bung bia God ga tatau leh ie. Kaiken i ngan hoing tiga tultulai gar ta Krais.
1CO 7:23 God ga kul halangalanga leh muat ma tiga but na kunkulaan. Io kaik, waak muat tultulai gar na tunotuno.
1CO 7:24 Bar hinsakagu ta Krais, muat bakut tikatikai, muat ga kis taar ta ira numuat mangana kinkinis na nilon tano pakana bung bia God ga tatau leh muat. Io, waak muat walar um bia muat na kios ira numuat mangana kinkinis kaiken. Muat na kis taar huo tika ma God.
1CO 7:25 Ma iau wara iangianga kaiken uta diet ira lala ing diet pai tola baak. Iau pai hatur kawase tiga harkurai mekaia hono Watong uta iakan. Iesen ni bul no nugu lilik mon. Ma no Watong i te marse iau bia iau tiga mangana tunotuno nong i tale muat bia muat na so ira numuat nurnuruan tana.
1CO 7:26 Iau palai tano purpuruan i hanuat taar nalamin ta muat. Io kaik, iau lik bia i tahut bia muat na kis taar at haruat ta ira numuat mangana kinkinis tikatikai.
1CO 7:27 Hohe, di te tar bat tiga hahin wara num? Waak u walar bia nu kutus no numur kunubus. U nunure tar bia pa di tar bat tar tikai wara num? Waak u sisilih bia nu tola.
1CO 7:28 Iesen, bia nu tola, pau le gil tiga sakena. Ma bia tiga lala na hahin na tola, pai le gil tiga sakena mah. Iesen bia tikai na tola, na kap ra tinirih ta iakan ra lon. Ma iau te ianga huo kanong iau wara turtur bat ira tinirih ta ira numuat lon.
1CO 7:29 Bar hinsakagu ta Krais, iau sip bia muat na palai ta tiga linge hoken, bia no pakana bung i te kumkum. Ma haburen leh kaiken, ing diet te tola, diet na lon hoing bia diet pai ga tola baak.
1CO 7:30 Diet ing diet susuah, diet na ngan hoing bia diet pai tapunuk. Diet ing diet kanakana, diet na ngan hoing bia diet pai guama. Diet ing diet te kukul, diet na ngan hoing bia diet pai tinane kaike ra linge.
1CO 7:31 Ma diet inge diet la paapalim ma ira linge ta iakan ra ula hanuo, diet na ngan hoing bia diet pai manga mur kaiken ra linge. Kanong warah, no mangaan tano ula hanuo i wara panpanim laah.
1CO 7:32 Iesen iau sip bia muat pa na ngarngarau. Nong pai tola i ngarngarau uta ira linge gar tano Watong waing naga haguama no Watong.
1CO 7:33 Ma sen nong i tola taar i ngarngarau uta ira linge tano ula hanuo, waing naga haguama no uno hahin.
1CO 7:34 Io kaik, ira uno sinisip i harpaleng. Ma ira bulahin ing diet pai tola baak, ma ira mes na lala na hahin mah, diet ngarngarau uta ira linge gar tano Watong, waing diet naga gamgamatien tano palatamai diet ma ira tanua diet mah. Iesen no hahin nong i tola taar i ngarngarau uta ira linge tano ula hanuo, waing naga haguama no uno tunaan.
1CO 7:35 Ma iau tange kaiken ra linge wara hatahutne muat. Iau pai sip bia ni tigal muat. Taie. Iau wara hatahuat ira magingin i haruat ta ira numuat matahu mangana kinkinis. Ma iau sip bia muat na mur timaan no Watong ma muat pa na tamapas laah ta dahin.
1CO 7:36 Ma iau wara iangianga uta tiga tunaan ing bia di te tar bat tiga hahin wara uno. Ing bia no tunaan i lik bia i hanghagahe no hahin kanong pai sip bia na tolei, ma bia i mamahien no uno lilik wara kinkinis tika mei, ma bia i lik bia i tahut bia dir na tola, io, i tahut bia na gil hoing i sip. Pai gil ra sakena. Dir na hartola.
1CO 7:37 Iesen no tunaan nong i te lik hadadas tano uno lilik bia pa na tola, ma taie tiga mes i te hagut ie huo, ma sen i te kure no uno sinisip at ma i te bul hawaat no uno lilik at bia pa na tola, io, iakan ra tunaan i gil ra tahut mah.
1CO 7:38 Io kaik, nong i tole no hahin i gil ra tahut, ma sen nong pai tolei i gil no linge i manga tahut.
1CO 7:39 Tiga hahin pai tale bia na haan sukun no uno tunaan bia no tunaan i lon taar baak. Iesen bia no uno tunaan i te maat, no hahin i langalanga taar bia na tole sige tikai ing i sip, ma sen iakano tunaan gar tano Watong ie.
1CO 7:40 Iesen tano nugu lilik, iau lik bia na manga kanakana ing bia i kis na lala baak. Ma iau lik mah bia iau hatur kawase tar no Tanuo ta God.
1CO 8:1 Ma iau wara iangianga uta ira nian na hartabar tupas ira palimpuo. I tutun bia dahat bakut, dahat te kap minminonas hoing muat la tangtange. No magingin na ut na mintot i gil tikai bia na lik hanapu ira mes. Iesen no magingin na ut na harmarsai i gil tikai bia na harahut ira mes.
1CO 8:2 Ing bia tikai i lik bia i nunure ari a linge, pai kap ra minminonas tutun.
1CO 8:3 Iesen sige tikai i sip God, God i nunure ie.
1CO 8:4 Hokaiken, iau ni ianga tano magingin na ienien ira nian di te hartabar taar ta ira palimpuo. Dahat nunure bia ira palimpuo a malalar mon ma taie tiga linge tun tana. Dahat nunure bia tiga God sen mon kana.
1CO 8:5 I tutun bia ari linge di kilam bia a god aram ra mawe ma kai napu ra pise mah. Ma tutun bia di hapupuo ra haleng na mangana god huo ma ira watong mah.
1CO 8:6 Iesen ta dahat, tiga God sen mon, ma aie no Mama nong no burena ta ira linge bakut. Ma dahat lon wara utana. Ma ta dahat, tiga Watong sen mon, ma aie ne Jisas Krais nong ga hakisi ira linge bakut, dahat gi lon tana.
1CO 8:7 Iesen balik, ira tunotuno bakut diet pai nunure iakan. Ari diet git manga murmur no magingin na lotu tupas ira palimpuo, ma bia diet ien ira mangana nian huo kaiken, diet ien ie hoing a hartabar ie taar ta ira palimpuo. Ira udiet lilik pai palai bia asa no tahut ma no sakena, kaik diet gi habilinge ira udiet nilon ing diet iaan.
1CO 8:8 Iesen ira nian pai tale bia na lamus tar dahat tupas God. Ing bia dahat pa na iaan huo, iakan pa na hagahe dahat. Ma bia dahat iaan, iakan pa na hatahutne dahat.
1CO 8:9 I tutun bia muat langalanga um wara nian haruat ma ira numuat sinisip. Iesen muat na harbalaurai bia no numuat mangana tintalen huo pa na ngan hoira linge bia diet ing pai palai ira udiet lilik bia asa no tahut ma no sakena, bia diet na tuke diet ine.
1CO 8:10 Iau tange huo kanong bia tikai nong no uno lilik pai palai huo, bia i nas ugu bia u te kap iakan ra minminonas ma u kis aram narako tano hala na lotu ta ira palimpuo ma u iaan kaia, io, bia i nas ugu bia u gil huo, no num tintalen huo na habalaraan ie bia na iaan ta kaike ra nian di te hartabar taar ta ira palimpuo.
1CO 8:11 Hokaiken, nong pai palai no uno lilik na mur no num minminonas, kaik na hiruo sakasaka. Ma aie no hinsakaam nong Krais ga maat wara gaiena.
1CO 8:12 Ma ing muat gil ra sakena taar ta ira hinsaka muat ta Krais huo, ma muat hagahe ira udiet lilik ing pai palai tano tahut ma no sakena, io, muat gil ra sakena taar ta Krais.
1CO 8:13 Io kaik, ing bia ira nian i burena bia no hinsakagu ta Krais na puko, io, pa ni ien ta urat baal, kabi hapuko no hinsakagu.
1CO 9:1 Hohe, iau pai langalanga um bia ni mur ira nugu sinisip? Ma iau pai tiga apostolo? Ma iau pai ga nas Jisas no udahat Watong? Hohe, muat pai no hunena ira nugu pinapalim tupas no Watong?
1CO 9:2 Ing bia ari a mes diet lik bia iau pai apostolo, iesen tutun sakit, muat nes kilam iau bia iau tiga apostolo. Kanong warah, no numuat kinkinis narako tano Watong i hinawas tutun bia iau apostolo.
1CO 9:3 Uta diet ing diet bul hanapu iau, ira nugu nianga wara turtur bat iau i hoken: hohe, ing het papalim nalamin ta muat, pai takodas bia het na kap nian ma ra minom kaia ho muat?
1CO 9:5 Diet ira mes na apostolo ma ira tasine no Watong ma ne Pita mah, diet la tiktika haan ma ira udiet hahin ing diet nurnur. Hohe, pai takodas bia mehet mah, mehet na gil huo?
1CO 9:6 Ma hohe, i tahut bia mir sen mon ma ne Barnabas, mir na papalim uta ira numir nilon at?
1CO 9:7 Sige na papalim hoing tiga umri ma aie at na kul habaling ira linge i supi? Sige i so tiga lalong ma pa na ien ta nian tana? Ma sige i balaure tiga huna me ma pa na mame ta tirina sus mekaia?
1CO 9:8 Hohe, iau tange huo kanong ira mangana nilon ta ira tunotuno mon i ngan hokaike? Taie. Ira harkurai ta Moses i tange huo mah.
1CO 9:9 Narakoman ta ira harkurai di ga pakat bia, “Waak muat palakus no bulumakau ing i papaas papok ira pat na wit.” Muat lik bia God i manga lilik uta ira bulumakau mon?
1CO 9:10 A tutun sakit, i tange iakan uta dahat. Tako, di ga pakat ie wara gaie dahat. Nong i tatol ma i bul tanakurua, i nurnur bia ana kaike ra nian, kaik i tahut bia na papalim huo.
1CO 9:11 Mehet ga papalim nalamin ta muat hoing ira ut na gil lalong waing muat naga kubur timaan ta ira linge gar ta God. Io kaik, muat lik bia i sakena bia muat na tabar mehet ma ari a linge gar tano ula hanuo?
1CO 9:12 Ing bia i takodas bia ira mes na kap iakan ra harharahut mekaia ho muat, tutun sakit, i takodas bia mehet mah, mehet na kap mah huo. Ga takodas bia mehet na gil huo iesen het pa ga gil. Taie. Mehet ga kanan bia het na harsomane ira haleng na tinirih waing het kabi halis dahin no hinahaan tano tahut na hinhinawas ta Krais.
1CO 9:13 Muat manga palai bia diet ing diet papalim narako tiga hala na lotu, diet la kapkap ira adiet nian mekaia. Masa. Diet la paapalim kaia ra suuh na hartabar ma diet la kapkap ira pinlawe diet kaia.
1CO 9:14 Ma hoing at mon mah, no Watong i te tange uta diet ing diet la harharpir ma no tahut na hinhinawas, bia diet na kap no udiet harkul meram narako ta iakano pinapalim.
1CO 9:15 Gor takodas bia muat na gil huo tagu iesen iau pa ga saring muat bia muat na gil. Ma iau pai pakat kaiken tupas muat kanong bia iau sip bia muat na gil huo tagu. Taie. Ing bia muat wara harharahut iau huo, na bilai bia ni maat baak waing muat pa na tale, kanong iau malok bia tikai na tur bat iau tano nugu latlaat tano ngaas iau mur ie tano nugu pinapalim na harpir.
1CO 9:16 Pai takodas bia ni latlaat ing bia ni harpir mon ma no tahut na hinhinawas kanong no Watong i sunang iau bia ni harpir huo. Maris tagu! Na manga sakena tagu bia iau pa ni harpir ma no tahut na hinhinawas.
1CO 9:17 Ing bia iau harpir kanong iau at iau sip bia ni gil huo, io, i tale bia ni kap ra harkul. Iesen, bia God i te hagut iau bia ni papalim huo, io, i nanaas bia iau gil haruatne mon no uno hartula tupas iau.
1CO 9:18 Io, asa um ira nugu kunkulaan? I hoken, bia ni harpir bia mon ma no tahut na hinhinawas, ma pataie ta harkul. Hokaiken, iau pai saring muat bia muat na harahut iau hoing i takodas bia muat na gil tagu tano nugu pinapalim tano tahut na hinhinawas. Ma iakano at mon no nugu kunkulaan.
1CO 9:19 I tutun bia iau pai kis ra hena ra harkurai auno ta tiga nong. Iesen iau ga kanan bia ni tultulai ta ira tunotuno bakut waing nigi petlaar bia ni lamus ta haleng ukaia ho Krais.
1CO 9:20 Ing iau ga kis nalamin ta ira Iudeia iau git lalon hoing ira Iudeia, bia nigi lamus diet. Iau pai kis ra hena ira harkurai ta Moses, iesen ing iau ga kis nalamin ta diet ing diet la kis taar ra hena kaike ra harkurai, io, iau git lalon hoing tikai i kis ra hena ira harkurai ta Moses bia nigi lamus diet mah.
1CO 9:21 Ing iau ga kis nalamin ta diet ing diet pai hatur kawase ira harkurai ta Moses, iau git lalon hoing tikai pai hatur kawase kaike ra harkurai, bia nigi lamus diet. Iesen pai tutun bia iau pai hatur kawase ira harkurai ta God. Taie. Iau kis ra hena ra harkurai ta Krais.
1CO 9:22 Ing iau ga kis nalamin ta diet ing pai manga palai ira udiet lilik tano tahut ma no sakena, io, iau git lalon hoing tikai ta diet bia nigi lamus diet mah. Ing iau kis nalamin ta ira mangana tunotuno sa, iau la lalon haruat ma diet. Iau la murmur ira matahu ngaas bakut huo, bia nigi petlaar bia ni halon tari.
1CO 9:23 Io, ma iau la gilgil um kaiken bakut huo wara gaiena no hinahaan tano tahut na hinhinawas, waing nigi kap no pinlawegu ta ira haridaan ta iakano tahut na hinhinawas.
1CO 9:24 Hohe, muat pai palai uta ira ut na hinilau ing diet la hilhilau harkoskos? Diet bakut diet la hilhilau, ma sen tikai sen mon na kap no bilai na linge di tabar nong i lua mei. Io, i tahut bia muat na hilau timaan um waing muat naga lua.
1CO 9:25 Ma diet bakut ing diet laka ta ira mangana minamagu huo, diet pai mur ira udiet sinisip ma sen diet la walwalar ma ra but na baso bia diet naga manga tahut ta kaiken ra minamagu. Ma diet gil um huo wara kapkap no linge di tabar nong i lua mei, a balaparik nong na mahiawa ma na pataam. Iesen dahat gil huo wara kapkap no linge nong na kis hathatika.
1CO 9:26 Io kaik, iau pai hilau hurhurbit. Taie. Iau la hilhilau takodas. Ma iau pai harubu hoing tikai i tubul mauho mon.
1CO 9:27 Taie. Iau kure hadadas no palatamaigu bia na mur timaan ira nugu sinisip, bia kabi di kap se iau ma pa nigi lua um tano harkoskos. Masa. Kabi di kap se iau namur ta ing iau te pir tar ira mes.
1CO 10:1 Bar hinsakagu ta Krais, iau sip bia muat na palai bia ira hintubu dahat, diet bakut diet ga hanahaan menapu tano bahuto ma diet bakut diet ga haan kutus nalamin tano Tes Dardaraan.
1CO 10:2 Diet bakut diet ga kap baptais mekaia hono bahuto ma tano Tes, i hinawas palai bia diet ira matanaiabar gar ta Moses.
1CO 10:3 Diet bakut diet ga ien tiga kapawena nian mon, a mangana nian mekaia ho God.
1CO 10:4 Ma diet bakut diet ga mame tiga kapawena minom mon, a mangana minom mekaia ho God. Iakan i palai kanong diet git mamom tano haat kis, a mangana haat mekaia ho God. Ma iakano haat kis, ne Krais mon ie.
1CO 10:5 Iesen God pa ga kanakana balik uta ira haleng sakit ta diet. Ma iakan i palai kanong ira udiet turangan ga noh hurhurbit tano hanuo bia.
1CO 10:6 Ma kaiken ra linge ga haan tupas diet hoira malalar ta dahat wara hakhakatom dahat bia dahat kabi sip ira sakana linge hoing diet ga gil.
1CO 10:7 Ma waak muat lotu tupas ira palimpuo hoing ari ta diet, diet ga gil. Hoing di ga pakat tano nianga ta God, “Ira matanaiabar diet ga kis napu wara nian ma wara minom, ma diet ga taman tut um wara gilgil ra sakana minamagu ma ira hahin.”
1CO 10:8 Waak dahat mur ra magingin na hilawa hoing ari ta diet, diet ga gil. Io, ma tiga bung mon, airuo sangahul ma itul na arip ta diet ga maat.
1CO 10:9 Waak dahat walwalar no Watong hoing ari ta diet, diet ga gil, ma ira sui gaam karat bing diet.
1CO 10:10 Ma waak dahat ngurungur hoing ari ta diet, diet ga gil, ma no angelo na harhagahai gaam haliare diet.
1CO 10:11 Kaiken ra linge ga haan tupas diet hoira malalar na hinarkatom ta dahat. Ma di ga pakat kaiken wara pirpir dahat, dahat ing no hauhawatine ta ira pakana bung i te haan tupas um dahat.
1CO 10:12 Io kaik, ing u lik bia u tur dadas taar, nu harbalaurai timaan bia kabu puko.
1CO 10:13 Ira mangana walwalaam ing i haan tupas muat, i haruat mon ma ing i haan tupas ira tunotuno bakut. God na gil haruat ta ira uno nianga, kaik i tale bia dahat na so ira udahat nurnuruan tana. Pa na bale tar tiga walwalaam bia na tupas muat ing muat pai petlaar bia muat na tur dadas ine. Taie. Ma ing bia tiga harwalaam na hanuat taar ta muat, God na tagure no ngaas bia muat naga haan pas ie waing muat naga tale bia muat na tur dadas ra hena no harwalaam.
1CO 10:14 Io kaik, ira bilai na harwis, i tahut bia muat na hilau pas no magingin na lotu tupas ira palimpuo.
1CO 10:15 Iau iangianga tupas muat ing i bilai taar ira numuat minminonas, bia muat na nunure kilam ira nugu nianga bia i tahut bia pai tahut.
1CO 10:16 A tutun sakit, ing dahat mom ta iakano gingop nong dahat tanga tahut tupas God utana, io, i ngan hoing bia dahat laka tano pakpakilai tano dene Krais. A tutun mah, ing dahat pidik no beret ma dahat ien ie, dahat laka tano pakpakilai tano palatamaine Krais.
1CO 10:17 Tiga kapawena beret mon, kaik dahat ira halengin dahat tiga kapawena palatamai dahat mon kanong dahat bakut dahat iaan tika ta iakanong tiga kapawena beret.
1CO 10:18 Muat na lik leh ira matanaiabar na Israel. A tutun sakit, diet ing diet ien ira urat ing di hartabar me, io, diet laka tano pakpakilai ta iakano suuh na hartabar.
1CO 10:19 Ing bia iau tange huo muat lik bia iau tange bia a hartabar tupas tiga palimpuo a tamat na linge ie, ma bia tiga palimpuo at a dadas na linge mah ie?
1CO 10:20 Taie, a linge bia mon. Iesen iau tange bia diet ing diet pai nurnur, diet tamtabar ira tadaar, ma pataie bia God. Ma iau pai sip bia muat na laka ta ira pakpakilai ta ira tadaar.
1CO 10:21 Pai tale bia muat na mom tano gingop tano Watong ma tano gingop gar na tadaar mah. Ma pai tale bia muat na iaan tano suuh na nian gar tano Watong ma tano suuh gar na tadaar mah.
1CO 10:22 Ing bia dahat gil huo dahat na hatatik no ngalngaluan gar tano Watong kanong i sip bia dahat na lotu tupas sen mon ie. Hohe, dahat manga dadas tana, kaik dahat gi gil huo?
1CO 10:23 Di tange bia, “Asa ing dahat sip bia dahat na gil, i takodas bia dahat na gil.” Masa. Iesen ira linge bakut pai tale bia na hatahutne muat. Di tange bia asa ing diet sip bia diet na gil, i takodas bia diet na gil. Iesen ira linge bakut pai tale bia na harahut.
1CO 10:24 Waak tikai i gilgil ira linge ing na harahut ie. Na gilgil ira linge ing na harahut ira mes.
1CO 10:25 I tahut bia muat na ien ta sa ing di suhurane tano subaan di la suhsuhurane ira urat kaia. Waak muat hatirih ira numuat lilik bia i takodas bia muat na ien bia pataie, kanong “gar tano Watong no ula hanuo ma ira linge bakut i la kis taar tana.”
1CO 10:27 Ing bia tikai nong pai nurnur i suko muat wara nian kaia ra uno hala, ma muat sip bia muat na haan, io, i tahut bia muat na ien ta sa ing i palau muat me. Waak bia muat na hatirih no numuat lilik bia muat na iaan bia taie.
1CO 10:28 Iesen bia tiga nong i tange ta muat bia, “Di te hartabar tupas ira palimpuo ma kaiken ra urat,” io, waak muat ra ienien. I tahut bia muat na lilik uta nong i tange huo ta muat. Ma waak muat ien mah kanong pai tahut bia muat na hatirih no lilik auno tikai.
1CO 10:29 Iau pai ianga uta ira numuat lilik. Taie. Iau ianga utano lilik auno no mes. Io kaik, wara bih no lilik auno tiga mes na kure iau ta ira linge i tale bia ni gil ma ing pai tahut bia ni gil?
1CO 10:30 Ing bia iau tanga tahut tupas God uta ira linge iau ien, wara bih di tange hagahe iau uta kaike ra linge iau te tanga tahut urie?
1CO 10:31 Io kaik, ing bia muat na iaan bia muat na mom, ma ta sa ing muat na gil, i tahut bia muat na gil ie wara hatamat God.
1CO 10:32 Waak muat ra hatirih ira nilon audiet ira Iudeia ma diet ing diet pai Iudeia, ma ira matanaiabar na lotu ta God mah.
1CO 10:33 I tahut bia muat na lon hoing iau lon huo. Iau mur no mangana nilon bia ira matanaiabar bakut diet na kalak ira nugu tintalen bakut. Iau pai lilik uta ira linge na hatahutne iau at, iesen bia ing na hatahutne ira matanaiabar bakut, waing diet naga hatur kawase no harhalon.
1CO 11:1 Muat na mur ira nugu tintalen hoing iau la murmur Krais.
1CO 11:2 Io, ma iau pirlat muat kanong muat la liklik kawase iau ta ira linge bakut ma muat palim dit ira harausur ing iau ga tar hakari ukaia ho muat.
1CO 11:3 Ma iau sip bia muat na madaraas bia Krais no ulu diet ira tunaan, i kukuraina bia no udiet lualua. Ma no tunaan no uluno no hahin, i kukuraina mah bia no uno lualua. Ma huo mah God no ulune Krais.
1CO 11:4 Bia ta tiga tunaan i sasaring bia i ianga na tangesot ma i pulus tar no uluno, i bul hanapu no uno lualua.
1CO 11:5 Ma bia tiga hahin i sasaring bia i ianga na tangesot ma pai pulus no uluno, i bul hanapu no uno lualua. I haruat ma tiga hahin di te gar se ira hine.
1CO 11:6 Ma ing bia tiga hahin pa na pulus no uluno huo, i tahut bia da gar se ira hine. Ing bia a linge na hirhir bia da kut hakumkum ira hine bia da gar se, io, na tahut bia no hahin na pulus no uluno.
1CO 11:7 Waak tiga tunaan na pulus no uluno kanong aie no malalar ta God ma aie i hamhamines no minamar gar ta God. Iesen tiga hahin i hamhamines no minamar gar na tunaan.
1CO 11:8 Iakan i palai kanong no tunaan pa ga tahuat laah tano hahin. Taie. No hahin ga tahuat tano tunaan.
1CO 11:9 Huo mah, God pa ga gil no tunaan wara gaiena no hahin. Taie. Ga gil no hahin wara gaiena no tunaan.
1CO 11:10 Io kaik, i tahut bia tiga hahin na mon tiga hakilang tano uluno wara hamhamines bia i kis taar ra harkurai. Ma ira angelo tiga burena mah bia tiga hahin na mon tiga hakilang huo.
1CO 11:11 A tutun, iesen tano udiet kinkinis tano Watong, no hahin pai tale bia na tange bia pai supi no tunaan ma no tunaan mah pai tale bia na tange bia pai supi no hahin.
1CO 11:12 Kanong warah, hoing no hahin ga tahuat laah tano tunaan, ma ira tunaan, a hahin i kaha diet mah. Iesen ira linge bakut diet tahuat laah ta God.
1CO 11:13 Muat at muat na lilik ta iakan bia i takodas ing bia tiga hahin na sasaring tupas God ma pai pulus no uluno.
1CO 11:14 Ira udahat ninanaas ta ira tunotuno i hamines bia a linge na hirhir bia i taltalona no hine tiga tunaan.
1CO 11:15 Iesen i hamines mah bia ing i taltalona no hine tiga hahin, no minarine iakanong, kanong God i te tar no taltalona hine tana hoing tiga pupulus.
1CO 11:16 Ing bia sige tikai i ngurungur uta iakan, taie numehet ta tiga mes na mangana magingin. Ma diet ira matanaiabar na lotu ta God ta ira tamtaman diet pai mur mah tiga mes na magingin.
1CO 11:17 Io, ma ta kaiken ra linge iau wara hauhausur muat ine, pa ni lat muat kanong ta ira numuat kis hulungai muat pai gil ira bilai. Taie. Muat gil ira magingin na harhagahai.
1CO 11:18 Ma no luena linge iau wara tangtangei, aie hoken, bia iau te ser leh bia ing muat la hanhanuat hurlungen wara lotu, a mon harpaleng i la kis taar nalamin ta muat. Ma haleng na linge iau te hadade iau lik bia i tutun.
1CO 11:19 (Tutun sakit, a mon tuntunur na harpaleng na hanuat nalamin ta muat wara hamhamines bia sige ta muat ing God i nes kilam bia i tahut.)
1CO 11:20 Ma ing muat hanuat hurlungen ta ira numuat kis hulungai, taie bia no nian gar tano Watong iakanong ing muat iaan tana.
1CO 11:21 Kanong warah, ing muat iaiaan, tikatikai at i dadas bia na huna ien ira ana nian ma pa na kis kawase ira mes. Tikai i taburungan baak ma tiga mes i te talau um ma no minom.
1CO 11:22 Hohe, pataie ta ngasia muat bia muat na iaan ma muat na mom kaia? Muat sip bia muat na lik hanapu no kis hulungai ta ira matanaiabar na lotu gar ta God? Ma muat sip bia muat na hahirhir diet ira maris? Iau ni tange hohe ta muat? I takodas bia ni lat muat uta iakan ra magingin? Taie tun at, pa ni lat muat.
1CO 11:23 Iau tange bia pa ni lat muat huo kanong no harausur iau ga tar ta muat iau ga kap leh tano Watong ma i hoken, bia tano bung at di ga harus ise no Watong Jisas, ga raun leh no beret, gaam tanga tahut urie, gaam pidik ie, ma ga tange bia, “Iakan no tamaigu wara gaie muat. Muat na gil huo wara liklik kawase iau.”
1CO 11:25 Hoing at mon mah, manamur ma no nian, ga raun leh no gingop na wain ma ga tange bia, “Iakan ra gingop na wain i haruat tano degu nong na hatutun no sigar kunubus meram ho God. Ma ing muat na la maamei, muat na gil huo wara liklik kawase iau.”
1CO 11:26 Hokaiken, ta ira pakaan bakut ing muat na ien iakan ra beret ma muat na mame ira wain ta iakan ra gingop, muat na hinhinawas utano minaat tano Watong tuk taar bia na hanuat.
1CO 11:27 Io kaik, sige tikai i ien no beret tano Watong ma i mame ira uno wain tano gingop ma pai mur ira magingin i takodas ta kaiken ra nian ma ra minom, io, i hoing bia i te gil hagahe no tamaine ma no dena no Watong.
1CO 11:28 Iesen i tahut bia tikatikai na lilik ta ira uno magingin huo bia i bilai bia taie, menalua ta ing bia na ien no beret ma na mom tano gingop na wain.
1CO 11:29 Kanong warah, sige tikai i iaan ma i mom ma pai lilik bia a mangana linge sa no palatamaine Krais, na kap ra harpidanau ing i iaan ma i mom huo.
1CO 11:30 Ma iakanong no burena bia haleng nalamin ta muat diet maset ma taie um audiet ta dadas, ma ari mah diet te maat.
1CO 11:31 Iesen bia dahat gor huna lilik ta ira udahat magingin, dahat pa gor kap ra harpidanau.
1CO 11:32 Ing no Watong i hapidanau dahat ira uno harpidanau i hausur dahat waing God pa na kure hagahe dahat tika ma no ula hanuo.
1CO 11:33 Io kaik, bar hinsakagu ta Krais, ing muat hanuat hurlungen wara nian huo, i tahut bia muat na kis kawase hargilasane muat.
1CO 11:34 Ing bia tikai i taburungan, i tahut bia na iaan kaia ra ngasiana waing muat kabi kap ra harpidanau ing muat hanuat hurlungen. Io, ma ing ni hanuat um, iau ni hatakodasne kaike ra mes na linge nalamin ta muat.
1CO 12:1 Io, ma bar hinsakagu ta Krais, iau sip bia muat na palai uta ira hartabar mekaia hono Halhaliana Tanuo.
1CO 12:2 Muat nunure bia tano pakana bung muat pa ga nurnur baak, bia di git lamlamus harongane muat ta ira matahu ngaas wara lalotu tupas ira palimpuo ing diet pai tale bia diet na ianga.
1CO 12:3 Io kaik, iau hapalaine ta muat bia no Halhaliana Tanuo pa na gil tikai bia na manga tange haliare Jisas. Ma tikai pai tale bia na tange, “Jisas, aie no Watong,” ing bia no Halhaliana Tanuo pai luei bia na tange huo.
1CO 12:4 Ma ari a matahu hartabar kana iesen tiga kapawena Halhaliana Tanuo mon.
1CO 12:5 Ari a matahu pinapalim na harharahut iesen tiga kapawena Watong mon.
1CO 12:6 Ari a matahu dadas wara pakpakile ira linge, iesen tiga kapawena God mon nong i la pakpakile bakut kaike ra linge nalamin ta ira tunotuno bakut.
1CO 12:7 Ma God i la hamhamines ta diet tikatikai bia no Halhaliana Tanuo i gil ira uno gingilaan nalamin ta diet wara harharahut diet bakut.
1CO 12:8 No Tanuo i tabar tikai ma ra hinhinawas na mintot. Ma iakano Tanuo at mah i tabar tiga mes ma ra hinhinawas na harapalai.
1CO 12:9 Ma iakano Tanuo at mah i tar no nurnuruan ta tiga mes. Ma iakano kapawena Tanuo i tabar tiga mes ma ira mangana hartabar wara halangalanga ira minaset.
1CO 12:10 Na tabar tiga mes ma ira dadas wara gilgil ira tamat na gingilaan na kinarup. Ta tiga mes na tar ra nianga gar na tangesot. Ma ta tiga mes na tar ra hartabar na nesnes kilam nianga ing na nunure bia iakano nianga i hanuat mekaia hono Halhaliana Tanuo bia taie. Ma ta tiga mes na tar ra hartabar na nianga ta ira mes na mangana nianga. Ma ta tiga mes na tar ra hartabar na pinapalas uta kaike ra mangana nianga.
1CO 12:11 Iesen tiga kapawena Halhaliana Tanuo mon i gilgil kaiken ra linge bakut. Ma i la palpalau harbasiane tikatikai hoing i sip bia na palau diet huo.
1CO 12:12 No palatamaine no tunotuno tiga kapawena linge mon, iesen a haleng na sumsubaan balik tana. I tutun bia i haleng ira uno sumsubaan iesen kaike ra sumsubaan diet gil tiga palatamaine mon. Ma i huo mah ta Krais.
1CO 12:13 Ma hokaiken dahat ga kap ra baptais tano Tanuo waing dahat naga kis narako ta tiga palatamaine ta tikai mon. Taie ta linge bia dahat a Iudeia bia a Grik bia a tultulai bia dahat pai tultulai. God ga hamamo dahat ma tiga kapawena Tanuo mon bia dahat na mom tana.
1CO 12:14 Taie bia tiga subaan sen mon tano palatamaine no tunotuno. A haleng na sumsubaan diet kis tana.
1CO 12:15 Ing bia no kakine na tange bia, “Iau pai a lumana, kaik iau pai subaan tano palatamaine,” io, iakanong pai tiga burena bia da nes ie bia aie pai tiga subaan tano palatamaine.
1CO 12:16 Ma ing bia no talingana na tange bia, “Iau pai no matana, kaik iau pai subaan tano palatamaine,” io, iakanong pai tiga burena bia da nes ie bia aie pai tiga subaan tano palatamaine mah.
1CO 12:17 Ing bia no kidilona palatamaine no tunotuno gor tiga matana sen mon, gor la hanhadoda hohe? Ma bia no kidilona palatamaine gor talingana sen mon, gor la huhurane ira linge hohe?
1CO 12:18 Iesen God i te bul timaan balik ira kaba sumsubaan bakut tano palatamainari hoing i sip bia na gil huo tana.
1CO 12:19 Ing bia kaike ra sumsubaan diet gor tiga kidilona subaan mon, pai tale bia diet na gil no palatamaine.
1CO 12:20 Iesen i tutun balik bia haleng sakit ira kaba sumsubaan ma sen tiga kapawena palatamaine mon.
1CO 12:21 Ma pai tale bia no matana na tange tano lumana bia, “Iau pai supi ugu,” ma bia no uluno na tange mah tano kakine huo.
1CO 12:22 Iesen kaike ra sumsubaan tano palatamaine ing di lik bia pai dadas, no palatamainari i manga supi balik.
1CO 12:23 Ma ira sumsubaan ing dahat nes bia pai manga bilai, kaiken balik dahat manga ru. Ma ira hirhiruana subaan, dahat hasulu bat.
1CO 12:24 Iesen ira subaan i bilai bia da nes, dahat pai manga nagarane. Ma God i te bul tikane ira sumsubaan tano palatamainari ma i te tar ra tamat na kinkinis na urur ta ira subaan ing dahat lik bia dahat pa na manga ru.
1CO 12:25 Ma i te gil huo waing kabi mon kinkinis na harpaleng nalamin tano palatamainari ma sen bia ira kaba sumsubaan diet na tar tiga kapawena mangana harharahut harbasia ta diet bakut.
1CO 12:26 Ma bia tiga subaan i kap ra ngunngutaan, diet ira sumsubaan bakut diet kap mah iakano ra ngunngutaan. Ma bia di hatamat tiga subaan, ira sumsubaan bakut diet guama tika mei.
1CO 12:27 Ma muat um, muat no palatamaine Krais. Ma muat bakut tikatikai muat ira sumsubaan harbasia tana.
1CO 12:28 Ma aram narako ta ira matanaiabar na lotu God i te bul timaan tar ira sumsubaan. Io, no luena, no kinkinis na apostolo, no airuo, no kinkinis na ut na tangesot, ma no aitul tana, no kinkinis na tena harausur. Ma namur ta kaiken i te tibe bia ari diet na gil ra tamat na gingilaan na kinarup ma bia tari diet na kap ira mangana hartabar wara halangalanga ira minaset. I tibe mah bia ari wara harharahut, ma ari wara hatakodasne ira pinapalim ta ira matanaiabar ma ra bilai na minminonas, ma ari wara nianga ta ira mes na mangana nianga.
1CO 12:29 Hohe, diet bakut diet ira apostolo? Diet bakut diet ira tangesot? Diet bakut diet ira tena harausur? Diet bakut diet gil ira tamat na gingilaan na kinarup?
1CO 12:30 Diet bakut diet hatur kawase ira mangana hartabar wara halangalanga ira minaset? Diet bakut diet ianga ma ira mes na mangana nianga? Diet bakut diet palas kaike ra mangana nianga? Taie!
1CO 12:31 Iesen i tahut bia muat na manga sip bia muat na kap ira hartabar ing diet manga tamat. Ma iau ni hamines um ta muat tiga ngaas nong i bilai sakit.
1CO 13:1 Ing bia iau iangianga ma ira mes na mangana nianga ta ira tunotuno ma ta ira angelo mah, ma sen iau pai harmarsai, io, iau haruat ma tiga laalit i harat bia, bia ho tiga hik i kakel bia.
1CO 13:2 Ing bia iau hatur kawase no hartabar na nianga gar na tangesot ma iau tale bia ni palai ta ira linge bakut i susuhai ma i manga tamat no nugu mintot, ma iau hatur kawase a mangana nurnuruan i tale bia na hakari ira uladih, iesen bia iau pai harmarsai, a linge bia mon iau.
1CO 13:3 Ing bia iau tar bakut se ira nugu bunbulaan taar ta ira maris, ma bia iau bale leh ira tunotuno bia diet na tun no palatamaigu, iesen bia iau pai harmarsai, pa na hatahutne iau ta dahin.
1CO 13:4 No magingin na harmarsai, a bala maat ma i gil ira tahut. Pai nes kalak ira kinkinis gar na mes, pai sa butbut, ma pai hatamat habaling ie.
1CO 13:5 Pai mur ra pusukana magingin, pai lilik uta ira linge ing na hatahutne sen mon ie, pai ngalngaluan gasien, ma pai lik kawase ira nironga di gil tar tana.
1CO 13:6 No magingin na harmarsai pai guama ta ira sakena iesen i kanakana pane ira tutun.
1CO 13:7 Pa nale basomah. I la nurnur hathatika, i la dadas taar no uno lilik uta ira linge na hanuat baak, ma i la tur dadas hathatika ra hena ira tinirih.
1CO 13:8 No magingin na harmarsai pa nale puko. Iesen bia a mon hartabar na nianga na tangesot, na panim laah. Bia a hartabar na nianga ta ira mes na mangana nianga, na pataam. Ma bia a hartabar na hinhinawas harapalai, na panim laah mah.
1CO 13:9 Iakan i palai kanong dahat nunure a subana mon ta ira linge bakut ma dahat ianga na tangesot uta ari a linge sen mon mah.
1CO 13:10 Iesen bia no hapataamnei na hanuat, kaiken ra linge ing diet papalim ma ra sumsubana mon, diet na panim laah.
1CO 13:11 Ing iau ga bulu siksik iau ga iangianga hoing ira nat na bulu, ma iau ga lilik hoira nat na bulu ma iau ga mintate ira linge hoira nat na bulu. Ing bia iau te tunotuno um iau bul se ira tintalen na bana unamurugu.
1CO 13:12 Kaiken dahat nanaas hoing tiga tirtirewa i nanaas baboh. Iesen namur dahat na harnasnaas. Ma kaiken iau nunure mon a dahin. Ma namur iau ni nunure ira linge bakut hoing God i la nunure timaan tar iau.
1CO 13:13 Io, ma kaiken ra itul a linge dal la kis taar: a nurnuruan, a dadas na lilik uta ira linge bia na hanuat baak, ma a harmarsai. Iesen no harmarsai i tamat sakit ta dal bakut.
1CO 14:1 Muat na murmur no magingin na harmarsai. Ma i tahut mah bia muat na sip ira hartabar mekaia hono Halhaliana Tanuo. Iesen i tahut bia muat na manga sip no hartabar na nianga na tangesot.
1CO 14:2 Iau tange huo kanong nong i ianga ma no hartabar na mes na mangana nianga, pai iangianga taar ta ira tunotuno. Taie. I iangianga tupas God. Taie tikai pai hadade kilam. Iesen ma no dadas tano Halhaliana Tanuo i tange ira linge i susuhai.
1CO 14:3 Iesen nong i ianga na tangesot i iangianga taar ta ira tunotuno wara hanhadadas diet ma wara harharagat diet ma wara hamhabalaraan diet.
1CO 14:4 Nong i ianga ma no hartabar na mes na mangana nianga i hadadas habaling ie. Iesen nong i ianga na tangesot i hadadas diet ira matanaiabar na lotu.
1CO 14:5 Iau sip bia gor tale muat bia muat bakut muat na iangianga ma no hartabar na mes na mangana nianga. Iesen iau manga sip bia gor tale bia muat na ianga na tangesot. Nong i ianga na tangesot i tamat ta dir ma nong i ianga ma ra mes na mangana nianga. Iesen bia nong i ianga ma ra mes na mangana nianga na palas no uno nianga waing naga hadadas ira matanaiabar na lotu, io, dir haruat ma nong i ianga na tangesot.
1CO 14:6 Io, ma bar hinsakagu ta Krais, bia ni haan tupas muat ma ni me ianga ma ra mes na mangana nianga iau gil ra tahut hohe ta muat ing bia iau pai hapuasne ira linge i susuhai bia iau pai tar ra hinhinawas harapalai bia iau pai ianga na tangesot ma bia iau pai tar ra harausur?
1CO 14:7 Ma huo mah ta ira linge ing taie ta nilon ta diet ma a mon inga diet hoira tulaal bia a ngaap. I tale hohe bia tikai na hadade kilam ira inga dir ing bia dir pai mur timaan no kaungana tiga ninge?
1CO 14:8 Ma ing bia no hik pai tatau timaan, sige um na hanuat wara hinarubu?
1CO 14:9 Huo mah ta muat. Ing bia muat pai ianga ma ra mangana nianga i tale bia da hadade kilam, i tale hohe bia tiga nong na palai bia asa ing muat tangtange? Na hoing bia muat haianga mauho.
1CO 14:10 I nanaas bia a haleng sakit ira matahu nianga tano ula hanuo. Ma diet bakut, diet la haphapuasne ira lilik ta ira tunotuno.
1CO 14:11 Iesen bia iau pai hadade kilam no nianga tikai i tangtangei, iau ni nunure kilam bia a mes ie, ma aie na nunure kilam iau bia a mes iau.
1CO 14:12 Ma huo mah nalamin ta muat. Muat manga sip bia muat na hatur kawase ira hartabar tano Halhaliana Tanuo. Io kaik, i tahut bia muat na walar bia muat na hatur kawase ira mangana hartabar ing na manga hadadas ira matanaiabar na lotu.
1CO 14:13 Ma iakano no burena bia ing sige tikai i iangianga ma ra mes na nianga i tahut bia na sasaring tano hartabar bia naga talei bia na palas mah no uno nianga.
1CO 14:14 Iau tange huo kanong bia ing iau sasaring ma ra mes na nianga, no tanuagu i sasaring ma sen no nugu lilik pai gil tiga linge.
1CO 14:15 Io, ni biha um? Iau ni sasaring ma no tanuagu iesen i tahut bia ni palai ma no nugu lilik mah uta ira linge iau sasaring urie. Iau ni inge ma no tanuagu iesen i tahut bia ni palai ma no nugu lilik mah uta ira linge iau inge urie.
1CO 14:16 Ma sen bia u tanga tahut uram ho God ma no tanuaam sen mon, i tale hohe balik bia tikai ta diet ing diet pai palai na tange ‘Amen’ tano num sinsaring? Pa na talei kanong pai nunure bia asa ing u tangtange.
1CO 14:17 A tutun bia no num sinasaring i tahut iesen pai hadadas no mes na tunotuno.
1CO 14:18 Iau tanga tahut tupas God bia ta dahat bakut iau no tunotuno nong e la manga iangianga ma ra mes na mangana nianga.
1CO 14:19 Iesen nalamin ta ira matanaiabar na lotu iau sip bia ni tange ra liman na katona nianga ing i tale bia da hadade kilam, ma waak um bia iau tange ra sangahul na arip na katona nianga ma ra mes na mangana nianga.
1CO 14:20 Bar hinsakagu ta Krais, waak muat liilik hoing ira nat na bulu. Ta ira sakana magingin i tahut bia muat na tatalen hoira bana iesen ta ira numuat lilik muat na ngan hoing ira tamat na tunotuno.
1CO 14:21 Ira harkurai ta God ing di ga pakat i tange bia no Watong i tange hoken: “Iau ni haianga iakan ra matanaiabar ma ra nianga gar na mes na tunotuno. Iau ni haianga diet ma ira ha diet ira tunotuno me tapaka. A linge bia be ni haianga diet huo, diet pa na taram iau.”
1CO 14:22 Hokaiken, no hartabar na nianga ta ira mes na mangana nianga a hakilang ie taar ta diet ing diet pai nurnur, ma pataie bia a hakilang ie tupas diet ing diet nurnur taar. Iesen no hartabar na nianga na tangesot a hakilang ie taar ta diet ing diet nurnur, ma pataie bia a hakilang ie tupas diet ing diet pai nurnur.
1CO 14:23 Io kaik, bia ira matanaiabar na lotu bakut diet hanuat hurlungen ma ira tunotuno bakut diet ianga ma ra mes na mangana nianga ma bia ari ing diet pai manga palai ta ira numuat gingilaan bia ari a tabuna nurnur diet na laka, tutun sakit diet na tange bia muat iangianga hoira ba.
1CO 14:24 Iesen bia tiga tabuna nurnur, bia tikai nong pai manga palai ta ira numuat mangana gingilaan na laka ma ira tunotuno bakut diet iangianga na tangesot, io, na hadade diet bakut ma na palai bia a ut na sakena ie ma diet bakut diet na nunure kilam ie bia a mangana tunotuno sa ie.
1CO 14:25 Ma ira linge i manga susuhai aram narako tano balana na hanuat palai. Io kaik, na tutudung napu ma na lotu tupas God ma na tange bia, “Tutun sakit, God i kis nalamin ta muat!”
1CO 14:26 Io, ma dahat na biha um ta kaiken iau te tange? Ing bia muat na hanuat hurlungen, i tahut bia tikai na tar tiga ninge, tiga mes na tar ra harausur, tiga mes na tar ra nianga wara haphapuasne ira linge i susuhai, tiga mes na ianga ma ra mes na mangana nianga, ma tiga mes na palas no nianga. Ta ira linge bakut ing muat na gil, i tahut bia muat na gil wara hadadas ira matanaiabar na lotu.
1CO 14:27 Ing bia muat wara nianga ma ra mes na mangana nianga, i tale bia airuo bia aitul dal na ianga. Iesen pa na lake bia aitul. Ma dal na ianga tikatikai, tikai na lua ma tiga mes na mur. Ma tiga tamat na linge, bia dal sip bia dal na ianga, i tahut bia tiga nong na palas ira udal nianga.
1CO 14:28 Ma bia taie tari wara palpalas ira nianga, i tahut bia nong i wara nianga na kis matien nalamin ta ira matanaiabar na lotu ma na haianga God aram narako tano balana at.
1CO 14:29 Ma i tahut bia airuo bia aitul dal na ianga na tangesot, ma ira mes diet na nes kilam ira udal nianga bia i tutun bia taie.
1CO 14:30 Ma bia God i tar ra nianga puasa ta tiga nong ing i kis taar, io, no tunotuno nong i luena ianga na hapataam no uno nianga.
1CO 14:31 I tahut bia muat na gil huo kanong i tale muat bakut bia muat na ianga na tangesot, tikai na lua ma tikai na mur leh ie. Ma muat na ianga na tangesot huo waing ira tunotuno bakut diet na kap ra harausur ma ra nianga na haragat.
1CO 14:32 Ma diet ing diet ianga na tangesot diet haruat bia diet na kure timaan no udiet hartabar na nianga na tangesot.
1CO 14:33 Ma i tale bia diet na gil huo kanong God pai tiga mangana god nong i tar ra haraba bia. Taie. I tar ra malum. Ma i la gilgil huo nalamin ta ira uno matanaiabar na lotu ta ira tamtaman bakut.
1CO 14:34 Ing ira matanaiabar na lotu diet hanuat hurlungen i tahut bia ira hahin diet na kis matien kanong pai takodas bia diet na ianga. Iesen i tahut bia diet na bul hanapu habaling diet hoing no harkurai ta Moses i tange.
1CO 14:35 Bia diet sip bia diet na palai uta tiga linge, i tahut bia diet na tiri ira udiet tunaan kaia ta ira ngasia diet, kanong a linge na hirhir bia tiga hahin na ianga kaia nalamin tano kis hulungai ta ira matanaiabar na lotu.
1CO 14:36 Hohe, no nianga ta God ga hanuat mekaia ho muat? Bia muat lik bia iakano nianga ga haan tupas muat sen mon?
1CO 14:37 Ing bia sige tikai i lik bia aie tiga ut na tangesot bia aie tiga tunotuno gar tano Halhaliana Tanuo, i tahut bia na nes kilam bia kaiken ra linge iau pakpakat tupas muat, a harkurai tano Watong ie.
1CO 14:38 Iesen ing bia tiga nong pai nes kilam iakan huo, pa da lik leh ie.
1CO 14:39 Io kaik, bar hinsakagu ta Krais, i tahut bia muat na manga sip bia muat na ianga na tangesot, ma waak muat tigal tikai bia na ianga ma ra mes na mangana nianga.
1CO 14:40 Iesen i tahut bia muat na mur tiga takodasiana ngaas ma ra bilai na harmur ta ira linge bakut muat gil.
1CO 15:1 Io, ma bar hinsakagu ta Krais iau sip bia ni halilik muat tano tahut na hinhinawas iau ga harpir taar ta muat mei. Ma iakano tahut na hinhinawas at nong muat ga kap usurane ma muat te tur taar tana.
1CO 15:2 Ma ta iakan ra tahut na hinhinawas God i halhalon muat ing bia muat palim dit ira nianga iau ga pir tar ta muat. Ing bia taie, muat te nurnur bia.
1CO 15:3 Hokaiken, iakanong nong di ga tar ie tagu, iau tar mah ie ta muat. Ma iakano i manga tamat sakit, bia Krais ga maat wara gaiena ira udahat sakana magingin hoing no nianga ta God di ga pakat ie i tange huo, ma bia di ga halakai tano midi, ma bia God ga hatut habaling ie tano aitul a bung hoing no nianga ta God di ga pakat ie i tange huo mah, ma bia ga harapuasa taar ta Pita ma namur ta ira sangahul ma iruo na apostolo.
1CO 15:6 Ma tiga pakaan mah namur ga harapuasa taar ta ira hinsaka dahat ta Krais, ira udiet winawas i lake ra liman na maar. A haleng sakit ta diet, diet lon baak katin ma sen bia ari diet te maat.
1CO 15:7 Ma namur mah ga harapuasa taar ta Jemes, ma namur um ta diet bakut ira apostolo.
1CO 15:8 Ma namur ta diet bakut ga harapuasa taar tagu, iau hoing tiga hana bulu di ga kaha kaboh.
1CO 15:9 Ma i tale bia ni tange huo kanong iau no hansiksik ta ira kaba apostolo ma pai haruat tun at bia da kilam iau tiga apostolo kanong iau ga helar ta ira matanaiabar na lotu gar ta God.
1CO 15:10 Ma sen God ga tabar bia mon iau ma no uno harmarsai, kaik a mangana tunotuno at mon iau huo. Ma no uno harmarsai pa ga tupas bia iau. Taie. Iau ga manga papalim dadas ta diet bakut, iesen pataie bia iau, no harmarsai nong God ga tabar bia mon iau mei ga papalim huo.
1CO 15:11 Io kaik, bia iau bia diet, mehet bakut mehet la harharpir ma iakan ra hinhinawas at. Ma iakano nong muat ga nurnur tana.
1CO 15:12 Iesen ing bia het la harharpir bia God ga hatut habaling Krais sukun ra minaat, i tale hohe bia ari ta muat diet na tange bia taie ta tuntunut hut baling?
1CO 15:13 Bia ing i tutun bia taie ta tuntunut baling sukun ra minaat, io, Krais mah um pa ga tut hut baling.
1CO 15:14 Ma ing bia God pa ga hatut habaling Krais, ira numehet harpir um a linge bia mon ma ira numuat nurnuruan i te linge bia mah.
1CO 15:15 Ma bia i tutun huo bia pataie ta tuntunut hut baling ta ira minaat, tiga linge i tamat mah ta iakanong, ma i hoken, bia i te tur palai bia mehet te harabota uta God kanong het te hinawas bia God ga hatut Krais sukun ra minaat. Iesen ing bia pa na hatut habaling ira minaat, io, a tutun bia pa ga hatut Krais.
1CO 15:16 Iakan i palai kanong bia ing ira minaat pa na tut hut baling, io, Krais mah pa ga tut hut baling.
1CO 15:17 Ma ing bia God pa ga hatut habaling Krais, ira numuat nurnuruan a linge bia. Ma muat kis taar at baak ta ira numuat sakana magingin.
1CO 15:18 Ma bia i tutun huo, diet ing diet te maat narako tano udiet kinkinis ta Krais, diet te hiruo um.
1CO 15:19 Ing bia dahat te nanaho ma ra nurnuruan ta Krais uta iakan ra nilon kai napu sen mon, io, a maris dahat ta ira tunotuno bakut.
1CO 15:20 Iesen i tutun at bia God ga hatut habaling Krais sukun ra minaat ma bia Krais no luena nong i hatutun bia diet ira mes na minaat diet na tut hut baling mah.
1CO 15:21 Ma i palai huo kanong no magingin na minaat ga hanuat, i burena tiga tunotuno mon, kaik no tuntunut hut sukun ra minaat i hanuat mah tiga tunotuno mon.
1CO 15:22 Hokaiken, ira tunotuno bakut tano udiet kinkinis ta Adam, diet maat. Huo mah diet bakut tano udiet kinkinis ta Krais, diet na lon huat baling.
1CO 15:23 Iesen tikatikai na lon huat baling haruat tano uno pakana bung at. Krais no luena ta diet bakut. Namur, bia Krais na hanuat, diet ira uno, diet na lon huat.
1CO 15:24 Namur um no haphapataam na hanuat ma ta iakano pakana bung Krais na tar ira linge tano uno kinkinis na harkurai ma ra harbalaurai taar ta God no ana Sus. Ma Krais na gil huo ing i te paas hasur diet bakut ing diet te kap ra kinkinis na harkurai, diet ira ut na harbalaurai, ma diet ira mes na dadas na lualua mah.
1CO 15:25 Na ngan huo kanong a tutun sakit Krais na kap no uno kinkinis na harkurai tuk taar bia na bul hasur ira suk ana menapu ta ira lapara kakine.
1CO 15:26 Ma no hauhawatine ta ira suk ana ing diet na hiruo huo, no magingin na minaat.
1CO 15:27 Ma i palai bia na ngan huo kanong hoing no nianga ta God di ga pakat ie i tange bia, “I te bul hasur ira linge bakut menapu ta ira lapara kakine.” Ma bia i tange bia ira linge bakut i te bul menapu ta ira lapara kakine, i palai bia no kukuraina pai kasar mah God, aie at nong ga bul ira linge bakut menapu ta Krais.
1CO 15:28 Ma bia God i te gil kaiken ira linge bakut, namur um no Natine na kis ra hena iakanong nong ga bul ira linge bakut menapu tana. Ma na ngan huo waing God naga harkurai ta ira linge bakut.
1CO 15:29 Ma bia i tutun bia pataie ta tuntunut hut baling, diet ing diet kap ira baptais wara gaie diet ira minaat, diet na biha um? Ing bia God pa na hatut habaling at um ira minaat, wara bih ira matanaiabar diet na kap baptais wara gaie diet ira minaat?
1CO 15:30 Ma mehet mah, wara bih bia mehet na kanan bia het na harsomane haitne ira haraubaal?
1CO 15:31 Kaba hinsakagu ta Krais, i hutet bia ni hiruo ta ira kaba bungbung bakut. Iau sasalim bia i tutun. Bia ing i tutun bia iau latlaat uta muat narako ta Krais Jisas no udahat Watong, iau sasalim bia i tutun mah bia i hutet bia ni hiruo huo.
1CO 15:32 Ing bia iau mur ra mangana lilik ta ira tunotuno mon mekai tano ula hanuo ma iau ga harubu ma diet ing diet hoing ira dadas na rakaia kai Epesas, i hatahutne iau hohe? Ing bia God pa na hatut ira minaat, “i tahut bia dahat na iaan ma dahat na mom kanong marakan dahat na maat.”
1CO 15:33 Waak bia tiga nong na lamus harongane muat. Hoing di tange, “Ing bia muat na harwis ma ira ut na sakena, diet na hagahe ira numuat tahut na tintalen.”
1CO 15:34 Muat na kap habaling ra palai na lilik hoing i takodas bia muat na gil huo. Waak um muat gilgil ira sakena. Iau tange huo kanong ari ta muat diet pai nunure tun at God. Ma iau tange huo mah wara hahirhir muat.
1CO 15:35 Iesen tikai na tiri bia, “I tale hohe bia ira minaat diet na tut hut baling? A mangana tamai diet hohe ing diet na tut hut baling mei?”
1CO 15:36 U ianga hoira ba! Bia u bus tiga pat na daha tano pise ma bia pai maat baak pa na kubur hut.
1CO 15:37 Ma bia u la bubus, u bus no pat na daha mon, hoing tiga pat na wit bia tiga mes na linge. Pau bus no mangana tamaine nong na tahuat namur.
1CO 15:38 Iesen God i tar tana no mangana tamaine i sip bia na tar ie tana. Ma i tar tiga mangana tamaine ta ira mangana patine tikatikai.
1CO 15:39 Ira tamainari bakut pai tiga mangaan mon. Tiga mangana tamai diet ira tunotuno, a mes na mangana tamai diet ira wawaguai, a mes at ira maan ma a mes at ira kirip.
1CO 15:40 Ira linge aram ra mawe a mon tamai diet ma ing mekai ra pise a mon tamai diet mah. Iesen tiga mangana minarine ira tamai diet ira linge aram ra mawe ma tiga mes na mangana minamar ta ira tamai diet ira linge mekai ra pise.
1CO 15:41 Tiga mangana minamar tano kasakes, tiga mes tano teka, ma a mes ta ira tiding. Ma ira minamar ta ira tiding i mes harbasia tikatikai.
1CO 15:42 Na ngan huo mah tano tuntunut hut baling ta ira minaat. No tamaine nong di bus ie na marota. Iesen bia na tut hut baling, pai tale bia na marota.
1CO 15:43 Ing di bus ie a linge na milmiligiruan. Ma ing i tut hut, a mon minamar tana. Ing di bus ie a tabalesuanai. Ma ing i tut hut, a mon dadas tana.
1CO 15:44 Ing di bus ie a mangana tamainari mekai napu. Ma ing i tut hut, a mangana tamainari tano Halhaliana Tanuo. Ma ing bia a mon mangana tamainari mekai napu, io, a mon mangana tamainari mah tano Halhaliana Tanuo.
1CO 15:45 Hokaiken, di ga pakat tano nianga ta God bia, “No luena tunotuno Adam, God ga hakisii bia a lilonai mekai napu.” No mes na Adam, no hauhawatine, nong i tar ra nilon ma no Tanuo.
1CO 15:46 Nong gar tano Tanuo pai luena hanuat, iesen bia nong mekai napu, ma namur um, nong gar tano Tanuo.
1CO 15:47 No luena tunotuno di ga gil ie ma ra kaabus, kaik a gar na pisei. No iruo na tunotuno a gar tano mawei.
1CO 15:48 Diet ing gar tano pise, diet haruat ma iakano gar tano pise. Ma diet ing gar tano mawe, diet haruat ma iakano gar tano mawe.
1CO 15:49 Dahat te tatalen hoing iakano gar tano pise, kaik i tahut bia dahat na tatalen mah hoing iakano gar tano mawe.
1CO 15:50 Ma no ngaas utano linge iau tangtange ta muat, aie hoken, bia iakan ra mangana tamai dahat a urat ma ra de i kis tana pai tale bia na sola tano kinkinis na harkurai ma ra harbalaurai ta God. Huo mah, nong na marota pa na sola tano katon bia taie ta marotuana linge kaia.
1CO 15:51 Muat hadade baak! Iau hinawase muat ta tiga linge nong ga susuhai menalua ma i te hanuat palai kaiken, bia dahat bakut dahat pa na maat iesen tano hauhawatine ta ira pakana bung ing no tahur na kakel dahat na kukuas gasien sakit hoing tikai i hapula mata. No tahur na kakel huo ma God na hatut ira minaat ma pai tale bia diet na marota um. Ma dahat, dahat na kukuas.
1CO 15:53 Na ngan huo kanong God i te kure bia nong i la marmarota na kikios ma pa na tale um bia na marota, ma nong i tale bia na maat na kikios ma pa na tale um bia na maat.
1CO 15:54 Ma tano pakana bung bia no marotuana na kikios taar ta nong pai tale bia na marota ma no minatine na kikios taar ta nong pai tale bia na maat, io, no nianga ta God di ga pakat ie na hanuat tutun hoken bia, “God ga haliare hasakitne no magingin na minaat ing ga paas hasur ie.”
1CO 15:55 “Awai ra minaat, ie he um no num baso wara papaas hasur ira suk naam? Ma ie he um no num dadas wara harding?”
1CO 15:56 No harding tano minaat, ira magingin sakena. Ma bia di bul ra harkurai, io, kaike ra harkurai i tar ra dadas ta ira magingin sakena.
1CO 15:57 Iesen dahat na tanga tahut tupas God. Tano udahat Watong Jisas Krais, God i te tar ra baso ta dahat bia na tale dahat wara papaas hasur iakan ra suk na dahat.
1CO 15:58 Io kaik, bar bilai na hinsakagu ta Krais, i tahut bia muat na tur dadas ma waak ta tiga linge i hamagile muat. Muat na tar hakidilona haitne muat tano pinapalim gar tano Watong kanong muat nunure bia muat pai papalim bia tupas no Watong.
1CO 16:1 Io, ma iau wara nianga utano numuat bulbul hulungan ira kinewa uta ira matanaiabar tus ta God. Muat na gil hoing iau ga tange ta ira matanaiabar na lotu kenas Galesia bia diet na gil.
1CO 16:2 Ira Sade tikatikai muat na bulbul se ta kinewa haruat ma ira numuat kalkalaat, muat kabi supi um bia muat na bul hulungan tano pakana bung bia ni hanuat.
1CO 16:3 Ma bia iau te haan tupas muat iau ni pakat ari a hinhinawas palai ma iau ni tar ta ira tunotuno ing muat na gilamis. Ma iau ni tule diet tika ma ira pakpakat bia diet na kap no numuat hartabar uram Ierusalem.
1CO 16:4 Ma ing bia i takodas taar mon bia iau ni haan mah, io, diet na tika ma iau.
1CO 16:5 Ma bia iau te haan sakit no hanuo Masedonia iau ni haan tupas muat. Ma iau tange huo kanong a tutun bia iau ni haan uras Masedonia.
1CO 16:6 Ma iau lik bia i tale dak bia ni kis halis dahin kaia ho muat, bia iau ni kis hasakitne se no tinahon na labur kaia. Io kaik, muat naga harahut iau tano nugu hinahaan bia ing iau hanahaan uhe.
1CO 16:7 Iau pai kanan bia ni nes muat kaiken ma ni kis basia ta mon ma ni haan harsakit. Taie. Iau manga sip bia ni kis halis baak ma muat ing bia no Watong na bale tar iau.
1CO 16:8 Iesen iau ni kiskis kai Epesas tuk taar tano bung na Pentikos kanong a mon mauho i taguro pane iau utano pinapalim a mon hunena tana, ma halengin kai diet wara turtur bat iau.
1CO 16:10 Ma ing Timoti na haan tupas muat, iau sip bia muat na bale leh ie bia pa na burte tiga linge ing i kis nalamin ta muat. Kanong warah, aie mah i la puspusak no pinapalim tano Watong hoing iau.
1CO 16:11 Io kaik, waak ta tiga nong i nas hanapui. Muat na tur tulei ma ra malum waing naga tapukus baling ukai ho iau. Ma iau tange huo kanong iau kis kawasei tika ma ira tasi dahat.
1CO 16:12 Io, ma iau wara nianga utano tasi dahat Apolos. Iau ga manga haragat ie bia na tika ma ira tasi dahat tupas muat. Ga malok tun at bia na haan kaiken iesen na haan namur ing bia a mon mauho utana.
1CO 16:13 I tahut bia muat na harbalaurai ma muat na tur dadas ta ira linge muat nurnur ine. Muat na balaraan ma muat na baso.
1CO 16:14 Ma muat na gil ira linge bakut ma ra harmarsai.
1CO 16:15 Muat nunure tar bia no hatatamaan tane Sepanas, diet ira luena ta diet ing diet ga lilik pukus aras Akaia. Ma diet te tar habaling diet wara harharahut ira matanaiabar tus ta God. Ma iau haragat muat, bar hinsakagu ta Krais, bia muat na bul hanapu muat ta ira mangana tunotuno huo ma ta ira tunotuno bakut ing diet tur tika ta iakan ra pinapalim ma diet laka tana ma ra baso.
1CO 16:17 Iau guama utano hinanuat ta Sepanas ma ne Portunatus ma ne Akaikus. Pai tale bia muat bakut muat na hanuat ukai ho iau iesen i nanaas bia dal kaiken dal te kap no numuat mauho wara nesnes iau.
1CO 16:18 Dal te habilai no nugu nilon ma ira numuat mah. Io kaik, i tahut bia muat na nes kilam ira mangana tunotuno huo bia i takodas bia da urur ta diet.
1CO 16:19 Ira matanaiabar na lotu ta ira tamtaman kai Esia, diet haatne leh muat. Akuila ma ne Pirisila, dir tange ra bilai na haratna ta muat narako tano udahat kinkinis tano Watong. Ma huo mah ira matanaiabar na lotu ing diet la kis hulungai tano ngasia dir.
1CO 16:20 Ma ira hinsaka dahat ta Krais kai, diet haatne leh mah muat. Muat na haatne harbasiane muat ma muat na gawane harbasiane muat ma ra tahut na magingin.
1CO 16:21 Iau Pol, iau pakat iakan ra haratna ma no limagu at.
1CO 16:22 Sige tikai pai sip no Watong, God na haliare tun at ie. Watong, nu mai!
1CO 16:23 No harmarsai tano Watong Jisas na kis tika ma muat.
1CO 16:24 Iau tar no nugu harmarsai ta muat bakut narako ta Krais Jisas. Tutun sakit.
2CO 1:1 Iau Pol tiga apostolo ta Krais Jisas haruat ma no sinisip ta God, ma Timoti no tasi dahat ta Krais, mir tule ken ra nianga tupas muat ira matanaiabar na lotu gar ta God kaia Korin ma muat bakut ira matanaiabar gar ta God ta ira balbalin tamaan Akaia.
2CO 1:2 A harmarsai ma ra malum tupas muat mekaia ho no adahat Sus ma no Watong Jisas Krais.
2CO 1:3 A pirhakasing uram tupas God. Aie no God ma a Sus ana no udahat Watong Jisas Krais. Aie no adahat Sus nong i la tartar ra harmarsai ma aie no God nong i la tartar ira harhabalaraan bakut.
2CO 1:4 Aie nong i la habalaraan dahat nalamin ta ira dadas na haraubaal bakut ing i ubal dahat, waing dahat naga tale bia dahat na habalaraan diet ira mes ing diet kis nalamin ta ira mangana haraubaal sa ing i ubal diet. Ma dahat na habalaraan diet ma no harhabalaraan nong God ga tabar dahat mei.
2CO 1:5 Hoing bia ira ngunngutaan ta Krais i sal burung ira udahat nilon, huo mah ira harhabalaraan mekaia ho Krais i sal burung dahat.
2CO 1:6 Ing bia a mon haraubaal i ubal mehet, i ngan huo wara habalaraan muat ma wara halon muat. Ing bia di habalaraan mehet, i ngan huo wara habalaraan muat. Ma iakano harhabalaraan nong God i tar ie ta muat ing muat tur dadas ra hena kaike ra ngunngutaan i haruat ma ing het kilingane mah.
2CO 1:7 Mehet nurnur bia ira linge na hanuat timaan taar ta muat. Ma mehet tur dadas ta iakano mangana lilik kanong mehet nunure bia muat te kap ira pinlawe muat ta ira numehet harhabalaraan hoing muat te kilingane harahut mah het ta ira numehet ngunngutaan.
2CO 1:8 Bar hinsakagu ta Krais, het sip bia muat na palai tano haraubaal ing het ga kilingane aras Esia. No but na tinirih nong ga hanuat taar ta mehet, het pa ga tale bia het na pusak, kaik mehet ga lik bia, “Maris, pai haruat bia dahat na lon um.”
2CO 1:9 Mehet ga kilingane iakan ra haraubaal hoing bia tiga ut na gil harkurai i te bul um no ula harkurai bia het na maat. Iesen i ngan huo bia mehet pa naga tur tano numehet dadas at iesen het na tur tano dadas ta God nong i hatut ira minaat.
2CO 1:10 Aie nong ga halangalanga ise mehet sukun tiga tamat na sakana hiniruo huo, ma na halangalanga ise mehet mah. Ma mehet te so no numehet lilik tana bia i tutun bia na halangalanga ise habaling mehet namur.
2CO 1:11 Ma God na gil huo ing muat na papalim tika ma mehet wara harharahut mehet ma ira numuat sinasaring. Ma bia muat na saasaring huo, God na balu ira sinsaring ta ira halengin ma na harahut mehet ma no uno harmarsai. Io kaik, a halengin diet na tanga tahut tupas ie uta mehet.
2CO 1:12 Io, ma no numehet nianga na latlaat i hoken, bia narako tun at tagu iau kilingane bia het pai le harababo ta dahin ma het te mur ira mangana tintalen meram ho God i takodas harsakit ing het te lon nalamin tano ula hanuo. Ma tutun sakit het ga gil huo ing het ga lon nalamin ta muat. Mehet pa ga lon huo haruat ma ira gumut na lilik mekai tano ula hanuo mon. Taie. Mehet ga lon huo haruat ma no harmarsai gar ta God.
2CO 1:13 Hokaiken, mehet pakpakat tupas muat ira linge sen mon ing i tale bia muat na was ma muat na palai ine. Hoing muat ga palai dahin uta mehet, io, iau manga sip bia muat na palai harsakit bia mehet no numuat burena wara latlaat hoing mehet mah, mehet naga latlaat uta muat ta iakano bung tano Watong Jisas.
2CO 1:15 Iau ga manga palai bia muat lilik huo uta mehet, kaik iau gaam bul no nugu lilik bia ni huna kol muat waing muat naga kap ra harharahut airuo pakaan.
2CO 1:16 Hoken, iau ga lik bia ni kol muat nalamin tano nugu hinahaan uram Masedonia ma tano nugu taptapukus balin me Masedonia. Ma iau ga lik bia muat naga harahut iau tano nugu hinahaan uras Iudeia.
2CO 1:17 Ma bia iau ga lik um bia ni haan huo, muat lik bia iau tiga ut na lilik airuoairuo? Taie. Hohe, muat lik bia ing iau bul no nugu lilik, iau lilik utagu sen mon hoira tunotuno mekai ra ula hanuo, kaik iau nigi tange pakur bia “I tutun” ma “Pai tutun” mah?
2CO 1:18 Muat nunure tun at bia God i la gilgil haruat tane ing i la tangtange, kaik i tahut bia muat na nunure bia mehet ngan huo mah ing het ga tar no numehet hinhinawas tupas muat, bia het pa ga tange bia “I tutun,” ma “Pai tutun.”
2CO 1:19 Iakan i palai kanong dahat pai nes narako ta Krais Jisas no Nati God nong metal ma ne Timoti ma ne Sailas metal ga harharpir nalamin ta muat, bia narako tana ira linge i tutun ma pai tutun mah. Taie. Ira linge i tutun sen mon tana.
2CO 1:20 Iakan i palai kanong ira kunubus ta God bakut diet hanuat tutun narako ta Krais. Io kaik, tano udahat kinkinis narako ta Krais dahat hatutun ira udahat sinasaring ing dahat tange “Amen” tupas God. Ma iakan ra magingin i hatatik no hinsa God.
2CO 1:21 Ma nong i hatutun mehet tika ma muat tano udahat kinkinis narako ta Krais, aie ne God. Ma aie nong ga gilamis hasisingen dahat.
2CO 1:22 Aie mah nong ga bare bat dahat bia wara uno ma ga bul no Halhaliana Tanuo narako tun at ta ira kati dahat hoing tiga kunubus wara hatutun bia na tar ira mes na haridaan ta dahat namur.
2CO 1:23 Iau kilam God bia aie na suro haut bia iau pa ga sip bia ni hapidanau muat, ma iakano no burena bia iau pa ga haan tupas muat kaia Korin.
2CO 1:24 Ing iau tange huo pai nanaas bia mehet wara kurkure ira numuat mangana lilik ta ira linge muat nurnur ine. Taie, kanong muat tur dadas ta ira linge muat nurnur ine. Iesen mehet papalim tika ma muat bia muat na kap ra gungunuama.
2CO 2:1 Hokaiken, iau ga bul no nugu lilik bia pa ni tapukus baling ukaia ho muat ma ni me gil hatapunuk muat.
2CO 2:2 Ma iau ga lilik huo kanong ing bia iau gor gil hatapunuk muat, sige um gor kis taar wara haguama iau? Taie tari. Muat sen mon ing iau gor te gil hatapunuk muat.
2CO 2:3 Ma iau ga pakat no mangana nianga huo ing iau ga tule ukaia ho muat kanong bia ni haan tupas muat, iau pai sip bia ira tunotuno ing i tale bia diet na me haguama iau, diet na me gil hatapunuk balik iau. Ma iau manga palai ta ira numuat tintalen bia muat na guama mah ing bia iau guama.
2CO 2:4 Hokaiken, iau ga pakpakat tupas muat nalamin ta ra but na haraubaal ma ra tamat na tinirih narako tano balagu. Ma iau ga pakat ie ma ra haleng na luur na matagu. Iau pa ga pakpakat huo bia nigi gil hatapunuk muat iesen bia ni hapalaine muat bia iau manga sip hasakitne muat.
2CO 2:5 Bia tikai i te gil hawaat ra tapunuk, pai manga tutun bia i te gil hatapunuk iau. Taie. I te gil hatapunuk muat, iesen pai manga tamat mon. Pai tutun bia ni tange bia i te manga gil hatapunuk muat.
2CO 2:6 I haruat mon iakan ra harpidanau ing ira halengin ta muat, muat te hapupusak tar ie tana.
2CO 2:7 Iesen kaiken balik i tahut bia muat na lik luban se ira uno nironga ma muat na habalaraan ie, kanong nora tamat na tapunuk kabi hagahei.
2CO 2:8 Io kaik, iau haragat muat bia muat na hamines habaling bia i tutun bia muat sip ie.
2CO 2:9 Ma no burena bia iau ga pakpakat ukaia ho muat, bia nigi nas bia ing muat na tur dadas tano harwalar ma bia muat naga taram nianga ta ira kaba linge bakut.
2CO 2:10 Ma bia muat lik luban se ira nironga ta tiga nong, iau bilang, iau lik luban se mah ira uno nironga. Ma a mangana nironga hobibih iau te lik luban se, iau te lik luban sei ra matmataan ta Krais wara gaie muat. Iesen i tale sen mon bia ni gil huo ing bia i tutun bia a mon nironga kana wara liklik luban se.
2CO 2:11 Ma iau te gil huo bia Sataan kabi lamus habato hagahe dahat. Dahat palai um ta ira uno keskes na lilik ing i la gilgil.
2CO 2:12 Io, ma bia iau ga haan uras Toroas wara harharpir tano tahut na hinhinawas ta Krais, iau ga nes bia no Watong gate tar mauho tagu bia ni papalim kaia.
2CO 2:13 Iesen iau ga manga ngarngarau kanong iau pa ga tale bia ni silhe no tasigu Taitus kaia, kaik iau gaam haan talur diet kaia, iau gaam haan um uras Masedonia.
2CO 2:14 Iesen mehet tanga tahut ta God nong i la lamlamus mehet wara hamines bia Krais i te lua tano uno hinarubu hoing tiga tamat na umri na lamus hagalgalen hani ira uno hiruo huo. Ma hoing no dadaip na puh harbasiane tiga hunhuraan kala mismisien, io, God i te tule harbasiane mehet bia ira tunotuno ta ira sumsubaan bakut diet naga nunurei.
2CO 2:15 Hokaiken, mehet hoing no bilai na hunhuraan mekaia ho Krais tupas God ing i hanahaan harbasia nalamin ta diet ing God i halhalon diet ma ing diet kana diet hirhiruo.
2CO 2:16 Tano ninaas ta ari, mehet hoing a hunhuraan na minaat. Ma ta diet ira mes, mehet a hunhuraan na nilon. Ma i manga dadas sakit bia sige tiga nong na pusak tiga mangana pinapalim huo.
2CO 2:17 Iesen mehet pai ngan hoing diet ira halengin ing diet kios hagahe no nianga gar ta God ma diet papalim mei wara kapkap kinewa. Taie. Tano numehet kinkinis narako ta Krais ma ra matmataan ta God ma hoing ira tunotuno God i te tule, mehet la tangtange ira linge ing het nunure tar bia i tutun.
2CO 3:1 Ing iau tange huo i nanaas bia tiga pakaan baling mehet tange bia mehet ira bilai? Hohe, mehet supi bia mehet na kap ta pakpakat na hinhinawas palai mekaia ho muat tupas ira mes bia diet na palai bia a bilai na tunotuno mehet? Bia mehet supi bia ari a mes diet na tar tiga mangana pakpakat huo taar ta muat waing muat naga nes bia a tahut na tunotuno mehet? Taie.
2CO 3:2 Muat at, muat ira numehet pakpakat ing het te kap. Ma di te pakat tar ta ira bala mehet. Ma ira matanaiabar bakut diet te was ma diet palai ine.
2CO 3:3 Muat la hamhamines bia muat at tiga pakpakat mekaia ho Krais, ma a hunena ta ira numehet pinapalim. Pa di gale pakat ma ra linge na pakpakat mekai napu hoira kabus bia kalihora. Taie. Di ga pakat ma no Tanuana no lilona God. Pa di ga pakat ta ira pala haat na pakpakat, iesen di ga pakat ta ira bala na tunotuno.
2CO 3:4 Mehet tange huo kanong tano numehet kinkinis narako ta Krais ma ra matmataan ta God mehet manga palai bia kaiken ra linge i tutun.
2CO 3:5 Iesen taie tiga burena aram narako ta ira numehet nilon i lamus ira numehet lilik bia mehet na lik bia mehet haruat wara gilgil iakan ra pinapalim. Iesen mehet petlaar ira linge narako tano harharahut mekaia ho God.
2CO 3:6 Aie nong ga harahut mehet bia mehet naga petlaar bia mehet ira tultulai tano sigar kunubus. Iakan ra kunubus, pa di ga gil ie ma ra mangana harkurai di ga pakat. Taie. Di ga gil ie ma no Halhaliana Tanuo, kanong ira harkurai di ga pakat i la tartar tunotuno taar tano minaat iesen no Tanuo i la tartar ra nilon.
2CO 3:7 Ing God ga tar ira harkurai, ga kut ira pakpakat taar ta ira pala haat. Ma ga tar kaike ra harkurai tika ma no minarine. A tutun bia no murarang ta iakano minamar tano matmataan ta Moses ga wara patpataam, iesen ira Israel diet pa ga tale bia diet na nes dit ie. Ma bia kaike ra harkurai na tartar tunotuno taar tano minaat i hanuat tika ma ra minamar, io, i tutun bia no pinapalim tano Halhaliana Tanuo i te hanuat ma ra tamat na minamar.
2CO 3:9 Ing bia a mon minamar i kis ta ira harkurai ta Moses ing ga papalim wara tartar tunotuno taar tano minaat, io, a tamat na minamar i kis tano tahut na hinhinawas nong i papalim wara tartar no takodasiana kinkinis ta ira tunotuno.
2CO 3:10 A mon minamar ga kis ta kaike ra harkurai iesen no minamar tano kunubus kaiken i tamat sakit ta iakano menalua. Io kaik, bia da harpuane dir kaiken, i hoing bia taie um ta minamar ta iakano menalua.
2CO 3:11 A tutun. Ma bia kaike ra harkurai ing diet wara panpanim laah ga hanuat ma ra minamar, a tamat na minamar i kis ta iakano nong na kis hatika.
2CO 3:12 Io kaik, mehet manga balaraan kanong het te hatur kawase iakano bilai na kunubus nong pa nale pataam.
2CO 3:13 Ma mehet pai haruat ma Moses nong git pulpulus bat no matmataan tana bia ira Israel diet kabi nes bia no murarang i wara patpataam.
2CO 3:14 Iesen ira udiet lilik ga tabanus. Ma i tabanus huo kanong iakano mangana pupulus at i la pulus tar ira udiet lilik tuk taar katin ing diet was ira nianga tano tuarena kunubus. I kis taar huo kanong no Watong i kap sei ta diet sen mon ing diet kis narako ta Krais.
2CO 3:15 Ma tuk taar katin ing diet was ira harkurai ta Moses, a pupulus i pulus tar ira udiet lilik.
2CO 3:16 Iesen ing at bia tiga tunotuno i tahurus tupas no Watong, no Watong i kap se no pupulus.
2CO 3:17 Ma no Watong, aie no Halhaliana Tanuo. Ma ing no Tanuana no Watong i kis taar kaia, ira tunotuno diet langalanga sukun ira harkurai ta Moses.
2CO 3:18 Ma dahat bakut ing taie ta pupulus ta ira matmataan ta dahat, i hoing bia dahat nanaas ta tiga tirtirewa ma dahat nes no minarine no Watong. Ma dahat la kikios haruat ma iakano malalar dahat nes ie hoken: ira minari dahat i la tahtahuat hanahaan. Ma ira minari dahat i hanuat mekaia ho no Watong, nong aie no Tanuo.
2CO 4:1 Ma tano harmarsai ta God, i te tar iakan ra pinapalim ta mehet bia het na gil ie. Io kaik, mehet pai malmalungo talur no pinapalim.
2CO 4:2 Taie. Iesen het te haan talur ira magingin ing di gil suhe ma ra hirhir. Mehet pai lamus habato tikai. Huo mah, het pai kios hagahe ira nianga ta God. Taie. Iesen het hamines ira tutun. Ma ta iakan ra magingin mehet hamines mehet ta ira lilik ta ira tunotuno bia diet naga nes kilam mehet bia mehet bilai. Ma mehet gil huo ra matmataan ta God.
2CO 4:3 Ma bia i tutun bia a mangana pupulus i pulus tar no numehet tahut na hinhinawas, i susuhai huo ta diet ing diet hirhiruo.
2CO 4:4 No tamat na tadaar ta iakan ra ula hanuo i te hakankado ira lilik ta diet ing diet pai nurnur, waing diet pa na petlaar wara nesnes no madaraas tano tahut na hinhinawas tano minarine Krais, aie no malalar ta God.
2CO 4:5 Ma iau tange huo kanong het pai harpir baling uta mehet at. Taie. Mehet harpir uta Jisas Krais bia aie no Watong ma bia mehet, mehet ira numuat tultulai wara gaie Jisas.
2CO 4:6 God nong ga tange bia, “I tahut bia a lulungo na murarang mekaia tano kankado,” aie at mon iakano nong ga murarang taar ta ira bala dahat waing dahat naga palai, dahat naga nunure no minarine God nong i murarang ra matmataan ta Krais.
2CO 4:7 Iesen dahat ing dahat hatur kawase iakan hoing tiga bilai na bunbulaan, dahat haruat hoing ira gingop di gil ma ra pise ma i malus bia na taparok waing naga hanuat palai bia iakan ra tamat na dadas dahat hatur kawasei i hanuat meram ho God ma pataie bia mekai ho dahat.
2CO 4:8 Ira matahu haraubaal i manga ubal mehet ma sen pai hapataamne mehet. Mehet la ngarngarau ma sen het pai malaho.
2CO 4:9 Haleng na pakaan di helar ta mehet iesen mehet pai la tur sen taar. Di la manga hanghagahe mehet ma sen pa di gil haliare hasakitne mehet.
2CO 4:10 Ing di la gilgil huo ta mehet i hoing bia het la kilkilingane nora harubu bingibing nong di ga gil huo ta Jisas narakoman ta ira palatamai mehet. Ma i ngan huo ta mehet waing no nilon ta Jisas naga hanuat palai mah ta ira palatamai mehet.
2CO 4:11 Hokaiken, di la hanghagahe mehet hutaten ra minaat, mehet ing mehet lon baak. Ma ne Jisas no burena bia di la gilgil huo taar ta mehet. Ma i ngan huo ta mehet waing no nilon ta Jisas naga hanuat palai mah ta iakan ra palatamai mehet nong na maat.
2CO 4:12 Io kaik, mehet gi la wara minaat, iesen muat la hatur kawase no nilon.
2CO 4:13 Iesen mehet ngan hoing no nianga ta God di ga pakat ie i tange bia, “Iau ga nurnur, kaik iau gaam ianga.” Ma ta iakan ra mangana nurnuruan mah, mehet nurnur, kaik mehet gi ianga kanong mehet nunure bia aie nong ga hatut haut no Watong Jisas sukun ra minaat, aie mah na hatut haut mehet tika ma ne Jisas ma na bul hawaat mehet tika ma muat ra matmataan tana.
2CO 4:15 Ma kaiken ra linge bakut wara gaie muat. Ma ing no harmarsai ta God i hanahaan harbasia tupas ra haleng, halengin ta diet, diet na tanga tahut uram naliu, kaik diet na hatamat God huo.
2CO 4:16 Io kaik, mehet pai malmalungo talur no pinapalim. A tutun bia ira tamai mehet i te tutuarain hanahaan, iesen narako tun at ta mehet i singsigarien hanahaan ta ira harhar bung.
2CO 4:17 Hokaiken, ira numehet mamakanina haraubaal ing i ubal mehet ra kumkumina pakana bung mon, i hathatahuat taar ta mehet ra tirtirihuana minamar ing i kis hathatikai. Ma kaiken ra minamar pai tale bia da hapupuo um ma kaiken ra nat na haraubaal.
2CO 4:18 Ma i ngan tutun huo ing dahat pai nes ira linge ing i kis palai, ma sen dahat nes dit ira linge pa di nes. Kanong warah, ira linge ing i kis palai pa na kis lawas, iesen ira linge pa di nes na kis hathatikai.
2CO 5:1 Io, ma ira palatamai dahat mekai napu hoing ra palpalih dahat lalon narako tana. Ma ing di durei, dahat na kap ira hala mekaia ho God, ira mangana hala ing na kis hathatika aram ra mawe ma a mangana hala ing pa di gil ma ira luma dahat ira tunotuno.
2CO 5:2 Ma tutun sakit, ing dahat lalon baak ta kaiken ra palpalih, dahat kis na marmaris kanong dahat sip bia dahat na kakasar ta ira udahat hala meram ra mawe.
2CO 5:3 Ma dahat sip bia dahat na sigasigam huo kanong bia ing dahat na bul ie, dahat pa na tawaturie.
2CO 5:4 Hokaiken, ing dahat lalon baak ta kaiken ra palpalih dahat kis na balamaris ma ra tamat na tinirih kanong dahat pai sip bia da kap se ira kiniasi dahat. Taie. Dahat sip bia dahat na sigasigam waing iakan ra palatamai dahat nong na maat na kikios ma naga lon.
2CO 5:5 Ma God mon nong ga tagure dahat uta iakan ra linge ma aie nong i te tar no Halhaliana Tanuo taar ta dahat hoing tiga kunubus wara hatutun bia na tar ira mes na haridaan ta dahat namur.
2CO 5:6 Io kaik, dahat na balbalaraan hatika. Ma dahat nunure bia ing dahat lon baak ta kaiken ra palatamai dahat hoing ira ngasia dahat, io, dahat kis tapaka taar baak tano Watong.
2CO 5:7 (Iau tange huo kanong dahat lon ma ra nurnuruan, ma pataie bia ta ira linge dahat la nesnes.)
2CO 5:8 Dahat nunure huo, kaik iau tange bia dahat balaraan taar ma dahat sip balik bia dahat na haan talur kaiken ra palatamai dahat ma dahat naga hanuat taar tano udahat tamaan tika ma no Watong.
2CO 5:9 Io kaik, no udahat tamat na sinisip i hoken, bia dahat na haguama no Watong. Taie ta linge bia dahat kis kai ta ira palatamai dahat bia dahat kis tapaka aram naliu.
2CO 5:10 Dahat na lilik huo kanong tutun sakit dahat bakut dahat na tur taar tano kinkinis na harkurai ta Krais, waing tikatikai ta dahat na kap ra binabalu haruat ma ira uno gingilaan ing ga gilgil ing ga lon baak tano palatamaine. A tutun, na kap ra binabalu ta ira uno gingilaan, bia ira uno gingilaan i tahut bia i sakena.
2CO 5:11 Mehet nunure ma kilingane no bunurut tupas no Watong, kaik mehet walar bia mehet na sal leh ira tunotuno. I palai taar ta God bia a mangana tunotuno sa mehet ma iau manga sip bia i palai taar huo mah ta ira numuat lilik.
2CO 5:12 Mehet pai walar bia mehet na tange habaling ta muat bia mehet ira bilai. Taie. Ta kaiken ra nianga mehet tar mauho ta muat bia muat naga laro uta mehet waing muat naga tale bia muat na balu timaan diet ing diet laro pane ira linge diet nes mon ma taie bia ira tintalen kenam narako tikai.
2CO 5:13 Ing bia mehet ira ba, mehet ba wara gaiene God. Ing bia i palai ira numehet lilik, mehet palai wara gaie muat.
2CO 5:14 No harmarsai ta Krais i la sunsunang mehet bia mehet na ngan huo. Ma i tale bia na sunang mehet huo kanong mehet nunure tun at bia tikai ga maat gaam kap no mauho ta diet bakut, kaik diet bakut diet gaam maat.
2CO 5:15 No uno minaat ga kap no mauho ta diet bakut waing diet ing diet lon baak diet pa na lon wara gaie diet at, iesen diet naga lon wara gaiena nong ga maat ma ga tut hut baling wara kapkap leh no udiet mauho.
2CO 5:16 Io kaik, kaiken um dahat pa na nes kilam ira tunotuno ma ra mangana lilik mekai napu. A tutun, nalua dahat ga nes kilam Krais huo, iesen kaiken um dahat pai tale bia dahat na gil habaling huo.
2CO 5:17 Io kaik mah, bia ing tikai i kis narako ta Krais, aie tiga sigar tunotuno. Ira tuarena linge i te panim laah. Nes baak, ira sigar linge i te hanuat um!
2CO 5:18 Kaiken ra linge bakut meram ho God nong ga hamaraam dahat tika mei narako ta Krais ma ga tar ta mehet no pinapalim na haramaraam.
2CO 5:19 Ma no pinapalim na haramaraam i hokaiken, bia God ga hamhamaraam no ula hanuo tika mei narako ta Krais. Hokaiken, pa ga was leh ira udiet sakena taar ta diet. Ma i te tar se tar no harpir utano haramaraam taar ta mehet.
2CO 5:20 Io kaik, mehet ira turturkiles uta Krais ing i te tule mehet, ma i hoing bia tano numehet hinhinawas God i sasaring taar ta muat. Tano mauho ta Krais, mehet manga saring muat bia muat na haramaraam ma God.
2CO 5:21 Ma Krais nong pa ga nunure ira magingin sakena, God ga gil ie bia aie kaike ra sakena wara gaie dahat waing dahat naga kap no taktakodasuana kinkinis ta God narako ta Krais.
2CO 6:1 Ma ing het papalim tika ma ne God, het haragat mah muat ing muat gate hatur kawase no harmarsai ta God, bia muat pa na hasurum bia iakano harmarsai ma pataie ta hunena.
2CO 6:2 Hokaiken, God i tange bia, “Ing no pakana bung ga hanuat bia ni bale leh ugu, iau ga taram ugu. Ma ing no bung ga hanuat bia ni halon ugu, iau ga harahut ugu.” Muat nes baak! Iakan um no pakana bung bia God na bale leh muat. Kaiken um no bung bia na halon muat.
2CO 6:3 Mehet malok bia het na gil tiga linge bia tikai na tukei ine, tikai kabi nes habulbul no numehet pinapalim.
2CO 6:4 Taie. Hoing ira tultulai gar ta God, mehet hapuasne mehet ta ira numehet gingilaan bakut bia a bilai mehet. Ma mehet hapuasne mehet huo ing het tur dadas ra hena ira tinirih, ing ira haraubaal i ubal mehet, ma nalamin ta ira ngunngutaan ma ira purpuruan.
2CO 6:5 Huo mah, di te lawat mehet, di te wis kawase mehet ra hala na harpidanau, ma halengin diet ga tur harus ta mehet. Mehet ga papalim dadas, ari a bung mehet pa ga kubaba, ma mehet ga taburungan.
2CO 6:6 Ma mehet hapuasne mehet huo mah ta ira gamgamatien na magingin, ta ira palai na lilik, tano magingin na bala maat, ta ira tahut na gingilaan tupas ira mes, tano Halhaliana Tanuo, ma ta ira tintalen na harmarsai tutun.
2CO 6:7 Ma huo mah ta ira numehet hinhinawas uta ira linge i tutun ma ta ira numehet pinapalim ma no dadas ta God. No rumus na magingin takodas ta ira kata na lima mehet ma ira bahbahit na takodasiana gingilaan ta ira kesa na lima mehet.
2CO 6:8 Di te hatamat mehet ma di te nes hanapu mah mehet. Di te pirlat mehet ma di te tange hagahe mah mehet. Mehet tutun harsakit iesen bia diet tange “Ut na harababo” ta mehet.
2CO 6:9 Diet nunure timaan mehet iesen diet nes mehet hoing ira mes. Mehet la wara minaat taar iesen, muat nes baak, mehet lon taar mon. Di ga hapidanau mehet iesen pa di ga bu bing mehet.
2CO 6:10 Mehet la taptapunuk ma sen mehet guama hait mah. Mehet tatalen hoira maris iesen mehet hawatong ra haleng. I hoing bia mehet pai tonane ta tiga linge iesen mehet hatur kawase ira linge bakut.
2CO 6:11 Muat ira Korin, het pai hirhir. Taie. Het te manga ianga palai ta muat. Het te gil hapuasne ira linge bakut ta ira numehet kidilona nilon taar ta muat.
2CO 6:12 Pai tutun bia mehet te kap se muat ta ira kati mehet. Iesen muat pai hamines bia muat sip mehet.
2CO 6:13 Iau haianga muat hoira natigu bia dahat na harbaniane timaan. Hoing iau te gil ta muat, muat mah, muat na hapuasne ira linge bakut ta ira numuat kidilona nilon taar tagu.
2CO 6:14 Waak bia muat manga harwis ma diet ing diet pai nurnur. Hohe, i tale bia no magingin takodas ma no magingin na patnau dir na kis tika? Ma no madaraas ma no kankado, dir na tur tika ho bibih?
2CO 6:15 Ma i tale bia Krais ma Sataan, dir na bala tika? Ma ira ut na nurnuruan ma diet ira tabuna nurnuruan, hohe, tikai mon ira pinlawe diet?
2CO 6:16 Ma ira palimpuo ma no hala gar ta God, diet na haut tika hohe? Ma dahat at, dahat no hala tano lilona God. Hoing God ga tange, “Iau ni kis tika ma diet ma ni lon nalamin ta diet. Ma na ngan bia iau no udiet God ma diet ira nugu matanaiabar.”
2CO 6:17 Io kaik, no Watong i tange bia, “Muat na suur sukun diet ma muat na kis sisingen ta diet. Waak muat hutaten ira linge iau te hatabune muat ine, ma iau ni bale leh muat.
2CO 6:18 Ma na ngan bia iau no amuat Sus ma muat ira natigu tunaan ma hahin.” No Watong, no Dadasine i tange huo.
2CO 7:1 Ira bilai na harwis, dahat hatur kawase kaiken ra kunubus, kaik i tahut bia dahat na hagamgamatien habaling dahat ta ira linge i habilingane ira palatamai dahat ma ira tanua dahat. Dahat na manga ru God kaik i tahut bia dahat na halhaal harsakit sukun ira sakena.
2CO 7:2 Mehet sip bia mehet tiga sapena kati muat. Mehet pa ga harongane ta tikai. Mehet pa ga hagahe ta tiga nong. Mehet pa ga harauro tikai.
2CO 7:3 Iau pai tange kaiken ra nianga bia wara tangtange hagahe muat. Taie. Iau te tange tar bia muat tur taar ta ira kati mehet. Mehet taguro bia mehet na lon bia mehet na maat tika ma muat.
2CO 7:4 Iau te manga so no nugu lilik taar ta muat. Ing iau iangianga uta muat iau la manga pirpirlat muat. Iau te kilingane ra tamat na harhabalaraan. Ma nalamin ta ira haraubaal no nugu gungunuama i saplaka hoing tiga pup na taah.
2CO 7:5 Kanong warah, ing mehet ga hanuat ukai Masedonia mehet pai kap sinangeh ta ira haleng na matahu haraubaal i kabit mehet. A mon hargor tika ma ira mes ma a mon bunurut ta ira bala mehet.
2CO 7:6 Iesen God nong i la habalaraan diet ing diet bala tirtirih, ga habalaraan mehet ma no hinanuat ta Taitus.
2CO 7:7 Ma pataie tano uno hinanuat sen mon, iesen bia uta ira harbalaraan mah Taitus ga kap mekaia ho muat. Ga hinawase mehet bia muat manga sip bia muat na nes iau, bia i tamat no numuat tapunuk, ma bia i mamahien ira numuat lilik utagu. Io kaik, no nugu kanakana i manga tamat hanahaan.
2CO 7:8 Tutun bia no nugu pakpakat ga hatapunuk muat, iesen iau pai marmaris bia iau ga pakat ie. A tutun, nalua iau ga marmaris bia iau ga pakat ie iesen kaiken iau nes bia muat pai kilingane halawaasne ira tapunuk utano nugu pakpakat.
2CO 7:9 Ma kaiken um iau guama. Ma iau pai guama bia iau ga hatapunuk muat iesen bia no numuat tapunuk ga lamus muat taar tano lilik pukus. Ma no numuat tapunuk huo ga haruat ma no sinisip ta God, kaik mehet pa gaam hagahe muat ta dahin.
2CO 7:10 A mangana tapunuk haruat tano sinisip ta God i hatahuat no lilik pukus nong i harlamus tupas no harhalon. Ma tikai pa na marmaris bia i ngan huo tana. Iesen no tapunuk mekai ra ula hanuo i hatahuat ra minaat.
2CO 7:11 Muat nes baak, bia asa ing iakan ra tapunuk nong i haruat ma no sinisip ta God i te hatahuat narako ta ira numuat nilon. Kaiken muat pai lik bia a linge na hinasakit iakano magingin sakena, iesen bia a dadas na linge ie. Muat manga mamahien wara hamhamines bia muat pai tur tano sakena, muat ngalngaluan utano nironga, ma muat burut um. Kaiken muat manga sip bia muat na nes iau ma i mamahien ira bala muat utagu. Muat ga tur na pinarie taar, muat gaam hapidanau nong ga gil no sakena. Ta ira numuat tintalen muat te hamines bia muat pai gil tiga nironga ta iakan ra linge.
2CO 7:12 A tutun bia iau ga pakpakat tupas muat. Iesen iau pa ga pakat ie wara gaiena nong i gil no nironga, ma pataie mah bia wara gaiena no tunotuno nong iakano mes i haronganei. Taie. Iau ga pakat ie bia muat naga palai ra matmataan ta God bia i manga mamahien ira numuat lilik wara tuntunur tika ma mehet.
2CO 7:13 Ma iakano no burena bia mehet te balaraan ma ra gungunuama um. A tutun bia mehet te balaraan iesen ga manga tamat sakit ira numehet gungunuama ing het ga nes no tamat na kanakana ta Taitus kanong muat bakut, muat ga hasigarine no uno nilon.
2CO 7:14 Ing mir ga wor mei, iau ga pirlat muat, ma muat pai le hahirhirne iau. Ma hoing mehet ga tangtange ira tutun tupas muat, huo mah, ing het ga pirlat muat ra matmataan ta Taitus, kaiken ra nianga i te hanuat tutun mah.
2CO 7:15 No sinisip ta Taitus taar ta muat i tamat hakakari ing i lik leh ira numuat tinaram ma bia muat ga bale leh ie ma ra bunurut ma ra dedar.
2CO 7:16 Iau guama um bia i tale bia ni so no nugu lilik taar ta muat uta ira linge bakut.
2CO 8:1 Io, ma bar hinsakagu ta Krais, mehet wara hapalaine muat utano harmarsai nong God i te tabar ira matanaiabar na lotu ta ira tamtaman kai Masedonia mei.
2CO 8:2 A tutun bia a tamat na haraubaal ga manga kabit diet iesen diet ga hung ma ra gungunuama kaik diet gom manga lasa sakit wara hartabar, ma a linge bia be a malahahin diet.
2CO 8:3 Iau hinawas palai bia diet ga hartabar haruat ta ing i tale bia diet na gil huo, ma sen diet ga hartabar tamat balik mah ta ing diet ga haruat bia diet gor tar.
2CO 8:4 Tano udiet sinisip at diet ga manga saring mehet bia mehet na bale leh diet bia diet mah diet naga laka ta iakan ra pinapalim na harharahut tupas ira matanaiabar tus ta God aras Iudeia. Diet ga nes kilam bia a linge wara hakanakana diet bia diet na laka ta iakan ra pinapalim.
2CO 8:5 Ma diet pa ga gil hoing mehet ga lik tar huo. Taie. Diet ga huna tar balik ira udiet nilon taar tano Watong ma mehet kanong God ga sip bia diet na gil huo.
2CO 8:6 Io kaik, mehet ga halilik Taitus bia na tur tika ma muat wara hadukduk iakan ra gingilaan na harmarsai, kanong aie nong ga haburen leh ie menalua.
2CO 8:7 A tutun muat manga hung ma ira linge bakut. Muat hatur kawase ra tamat na nurnuruan, ra gingilaan na hinhinawas, ma ira minminonas. I manga mamahien ira bala muat wara harharahut ma i tamat ira numuat sinisip tupas mehet. Hoing muat tatalen taar huo, i tahut bia muat na manga lasa mah ta iakan ra pinapalim na harmarsai.
2CO 8:8 Iau pai tar ra dadas na harkurai ta muat ing iau tange huo. Taie. Iau sip bia ni hapupuo no numuat harmarsai ma diet ira mes ing diet manga mamahien taar huo, waing nigi nunure bia no numuat harmarsai i tutun bia taie.
2CO 8:9 Muat nunure tar no harmarsai tano udahat Watong Jisas Krais. Ga hatur kawase ra kinkinis na watong iesen ga kap leh no kinkinis na malahahin wara gaie muat waing muat naga kap leh no kinkinis na watong meram narako tano uno kinkinis na malahahin.
2CO 8:10 I nanaas taar tano nugu lilik bia i tahut ta muat bia kaiken um muat na hapataam iakan ra pinapalim nong muat gate haburen tar tano tinahon i te pataam. A tutun bia muat ira luena wara haburen iakan ra hartabar, iesen muat ira luena mah wara sipsip bia muat na gil huo. Ga manga mamahien ira numuat sinisip bia muat na gil ie. Ma huo mah, i tahut bia muat na hapataam ie haruat ma ing i tale bia muat na gil.
2CO 8:12 Hokaiken, bia ing tikai i kanan taar wara hartabar, God na bale leh no uno hartabar haruat ta ing i tale bia no tunotuno na tar. God pa na lilik uta ira linge no tunotuno pai tale bia na tar.
2CO 8:13 Iau pai sip bia ni gil hamamakan ira nilon ta diet ira mes, ma muat na kap leh ira tinirih. Taie. Iau sip bia muat bakut, ira numuat mangana kinkinis na haruat.
2CO 8:14 Ta iakan ra pakana bung ira numuat tamat na bunbulaan na banot ira udiet sunupi waing ira udiet bunbulaan balik, bia ing na hanuat tamat, na banot ira numuat sunupi. Ing dahat na ngan huo, na haruat ira udahat kinkinis, hoing no nianga ta God di ga pakat ie i tange, “Tikai nong ga kap ra haleng, no uno kinakap pa ga sakit no uno sunupi, ma aie nong ga kap ra dahin, pa ga mon sunupi.”
2CO 8:16 Ma iau tanga tahut tupas God nong i te hamamahien no bala Taitus wara gaie muat hoing i mamahien no balagu mah huo.
2CO 8:17 A tutun bia Taitus ga haut leh no numehet sinasaring tupas ie, iesen i mamahien no balana mah wara gaie muat, kaik gi sip bia na haan tupas muat. Na haan taar ta muat kanong aie at i sip huo.
2CO 8:18 Ma mehet wara tultule tikane mei iakano tasi dahat nong tano uno pinapalim tano tahut na hinhinawas i te kap ra tamat na hinsang nalamin ta ira matanaiabar na lotu ta ira tamtaman bakut.
2CO 8:19 Ma pai iakanong sen mon. Ira matanaiabar na lotu ta ari a tamtaman diet ga tibe ie bia na haan tika ma mehet ing het kapkap hani iakan ra hartabar na harmarsai. Mehet balbalaure iakan ra hartabar waing da lat no Watong at, ma bia mehet naga hamines no mamahien ta ira bala mehet wara tartar ra harharahut.
2CO 8:20 Mehet balaure timaan ie bia kabi tale tikai bia na tange hagahe mehet tano numehet mangana harbalaurai ta iakan ra tamat na hartabar.
2CO 8:21 Mehet sip bia mehet na gil tiga mangana ngaas ing i takodas. Ma pataie bia i takodas tano ninaas tano Watong sen mon. Mehet sip bia na takodas mah ra matmataan ta ira matanaiabar.
2CO 8:22 Ma mehet tule no tasi dahat tika ma dir. Het gate walar haitne ie ta ira mangana linge ma mehet te nes kilam no mamahien tano uno nilon wara harharahut. Iesen kaiken um i manga mamahien no balana wara harharahut kanong i te so no uno lilik taar ta muat.
2CO 8:23 Taitus um, aie no nugu harwis nong i tur tika ma iau tano pinapalim ing mir gil nalamin ta muat. Kaike ira iruo tasi dahat um, dir airuo tultulai ta ira matanaiabar na lotu ta ari a taman. Ma no udir pinapalim i hatahuat ra latlaat tupas Krais.
2CO 8:24 Io kaik, i tahut bia muat na hamines no tutun tano numuat harmarsai ukaia taar ta dal. Ma muat na hamines ta dal mah no burena mehet gi pirlat muat. I tahut bia muat na ngan huo waing ira matanaiabar na lotu ta ira tamtaman diet naga palai timaan ta muat.
2CO 9:1 Ma iau pai supi bia ni pakpakat taar ta muat uta iakan ra pinapalim na harharahut tupas ira matanaiabar tus ta God aras Iudeia, kanong iau nunure no mamahien ta ira bala muat wara tartar ra harharahut. Ta ira nugu nianga ma ira Masedonia iau la latlat muat ta iakan ra linge. Tur leh at tano tinahon te sakit, iau git hinhinawase diet bia muat aras Akaia, muat taguro taar wara hartabar. Ma no mamahien tano numuat lon huo i te haragat ra halengin ta diet bia diet na papalim mah.
2CO 9:3 Iesen iau wara tultule kaiken ra itul a tasi dahat wara hamines bia no numehet magingin wara latlat muat uta iakan ra linge, pai a nianga bia mon ie. Ma iau tule dal mah bia muat naga taguro taar hoing iau ga tange.
2CO 9:4 Hokaiken, bia ing tari me Masedonia diet na hanuat tika ma iau ma bia diet na nas bia muat pai taguro, mehet na hirhir bia mehet te so no numehet lilik taar ta muat. Iesen tutun sakit, muat na manga hirhir balik um!
2CO 9:5 Io kaik, iau lik bia muat supi bia iau ni tule ira itul a tasi dahat bia dal na huna kol hanalue muat ma bia dal na huna tagure hanalue no numuat tamat na hartabar nong muat gate huna kukubus taar utana. Io kaik, na taguro taar no numuat tamat na hartabar ma muat pa naga supi bia muat na tar ie ma ra bala ngungut.
2CO 9:6 Ma i tahut bia muat na lilik ta iakan bia sige tikai i saso ra dahin, na kil ra dahin. Ma sige tikai i saso ra halengin, na kil ra halengin.
2CO 9:7 Tikatikai at na tar ing i te lik meram narako tano uno nilon bia na tar. Waak bia na tar ma ra bala ngungut ma bia tari na sunang ie, kanong God i sip nong i hartabar ma ra kanakana.
2CO 9:8 Ma God i tale bia na manga tabar muat ma no uno tamat na harmarsai ta ira haleng na mangana linge waing muat naga manga haruat ta ira kaba linge bakut ta ira kaba bungbung. Ma na tabar muat huo waing muat naga manga huai ta ira kaba bilai na gingilaan bakut hoing no nianga ta God di ga pakat ie i tange bia, “Iakan ra tunotuno i la tartar ra haleng na hartabar taar ta ira maris hoing tikai i manga saso. No uno takodasuana kinkinis na hanahaan hathatika.”
2CO 9:10 Ma nong i la tartar ira pat na daha taar ta ira ut na sinaso ma ira nian wara ienien, aie mah na tar ma na hapuarane ira numuat pat na daha wara sinaso ma na hatamat ira hunena ira numuat taktakodasuana lon.
2CO 9:11 Ma na hawatong muat ta ira kaba linge waing muat naga manga tamtabar haitne ira mes. Ma ira tunotuno diet na tanga tahut tupas God ta ira numuat hartabar diet kap mekai ho mehet.
2CO 9:12 Hokaiken, a tutun bia iakan ra pinapalim na harharahut ing muat gil i banot ira sunupi ta ira matanaiabar tus ta God. Iesen pai iakanong sen mon. Hoing tiga pup na taah i saplaka taar ta ira halengin, kaik diet tangtanga tahut tupas God.
2CO 9:13 Iakan ra pinapalim na harharahut nong muat gil ie, na hamines hapalaine bia a mangana tunotuno sa muat, kaik ira halengin diet naga pirlat God. Diet na pirlat God kanong muat taram ira linge i haruat ma no tahut na hinhinawas ta Krais, iakano tahut na hinhinawas nong muat la tangtange bia muat murmur ie. Ma diet na pirlat God mah kanong muat manga lasa wara tartar ra tamat na hartabar taar ta diet ma ta ira mes mah.
2CO 9:14 Diet na sangau leh muat taar ta ira kati diet ma diet na sasaring wara gaie muat kanong God i te tabar muat ma ra harmarsai i manga sakit.
2CO 9:15 Da tanga tahut tupas God tano uno hartabar nong i manga bilai ta ing pai tale bia dahat na ianga utana.
2CO 10:1 Iau Pol, ing di tange bia a matien na tunotuno iau ing iau kis tika ma muat ma sen di tange mah bia a ut na paspasai iau ing iau kis tapaka, iau wara sarsaring muat tiga linge. Hoing tiga matien na tunotuno i hanapu habaling ie hoing Krais ga tatalen huo, iau wara sarsaring muat bia muat pa na sunang iau bia ni tatalen hoing tiga ut na paspasai ing iau ni hanuat. A tutun iau nunure tar bia i manga tale iau bia ni paspasai nalamin ta muat ma i nanaas bia iau ni manga balaraan huo uta diet ari ing diet lik bia mehet la tatalen taar hoing no ula hanuo i lon huo. Iesen iau saring muat bia muat pa na sunang iau bia ni me gil huo.
2CO 10:3 A tutun mehet la lon taar ta iakan ra ula hanuo iesen mehet pai la harharubu hoing no ula hanuo i la gilgil huo.
2CO 10:4 Ira linge na hinarubu ing mehet la harharubu me, pai haruat ma ira linge di la harubu me kai tano ula hanuo. Ira numehet linge na hinarubu a mon dadas ine meram ho God wara parparok haliare no balo di balo bat mehet mei.
2CO 10:5 Mehet la durdure haliare ira mangana lilik na latlaat ing i wara turtur bat ira tunotuno bia diet kabi nunure God. Mehet la wiswis kawase ira numehet lilik bakut, waing kaike ra lilik naga taram Krais.
2CO 10:6 Ma mehet taguro taar wara hapidanau ira magingin na takmaluk bakut. Iesen mehet na kis kawase muat tuk taar bia muat na hamines bia muat taram ta ira linge bakut.
2CO 10:7 Muat nes bia mon iau. Muat pai nes kilam tun iau. Ing bia tikai i nunure tar bia aie gar ta Krais, i tahut bia na manga lilik baling bia mehet mah mehet gar ta Krais hoing ie.
2CO 10:8 Huo mah, bia ing iau manga latlaat dahin tano tamat na kinkinis God ga tar ie ta mehet wara hadadas timaan muat, ma pataie bia mehet na hagahe muat, io, iau pa ni hirhir ta iakan.
2CO 10:9 Waak muat lik bia iau wara haburut muat ma ira nugu pakpakat tupas muat.
2CO 10:10 (Iau tange huo kanong di tange bia, “Ira uno pakpakat i tirih ma i dadas iesen bia dahat nes ie, a maluruanai, ma ira uno nianga a linge bia mon.”)
2CO 10:11 I tahut bia tiga mangana tunotuno huo na lilik timaan bia asa ing mehet tange ta ira numehet pakpakat ing mehet kis tapaka ta muat, io, mehet na gil huo mah bia mehet kis tika ma muat.
2CO 10:12 Het pai iangor bia mehet na harpuane mehet ma tari ing diet tange bia diet bilai. Pai tale bia mehet na tange bia het haruat ma diet. Ing diet hapupuo diet ma diet baling ma diet nes kilam habaling diet ma ira udiet nilon at, taie ta mintota ta diet.
2CO 10:13 Iesen uta mehet, ira numehet latlaat pai lake no igah tano pinapalim nong God i te puo tar ta mehet. Taie. Het na latlaat sen mon uta ira linge kenam nalamin tano numehet igah. Ma muat mah kenam narako ta iakano igah.
2CO 10:14 Hokaiken, mehet pai lake ira numehet igah na pinapalim. Ing bia mehet pa gor le haan tupas muat nalua, mehet gaar lake um ira numehet igah kaiken. Iesen taie, kanong mehet ira luena wara hinahaan ma no tahut na hinhinawas ta Krais tuk kai ho muat.
2CO 10:15 Ma mehet pai lat habaling mehet uta ira pinapalim gar na mes, kaik mehet pai lake ira numehet punpuo. Mehet kis nanaho ma ra nurnuruan bia muat na patpatuan timaan ta ira linge muat nurnur ine, kaik ira numehet pinapalim nalamin ta muat naga tamat hanahaan.
2CO 10:16 Ma mehet kis nanaho ma ra nurnuruan bia na ngan huo waing mehet naga petlaar wara harpir ma no tahut na hinhinawas ta ira hanuo kenau menamur ta muat. Mehet sip bia mehet na gil huo kanong het pai sip bia mehet na lat habaling mehet uta ira pinapalim ing ira mes diet gil narako ta ira udiet katon.
2CO 10:17 Iesen, “sige nong i wara laatlaat, i tahut bia na lat no Watong.”
2CO 10:18 Dahat na gil huo kanong no Watong pa na nes kilam tikai bia i bilai ing bia iakano tunotuno mon na tange habaling utana bia i bilai. Taie. Iesen iakano tunotuno nong no Watong i tange bia i bilai, io, iakano tunotuno i bilai.
2CO 11:1 Iau sip bia muat na hok mon iau ing iau tatalen dahin hoira ba. Tutun, iau sip bia muat na gil huo, kanong hoing God i ngalngaluan bat muat bia muat pa na gar ta tiga mes ma sen muat ira uno sen at mon, iau ngalngaluan bat mah muat huo. Iau te tar bat muat wara uno tiga tunaan mon, ma aie Krais at, waing nigi tar se muat tana hoing tiga gamgamatien na lala na hahin.
2CO 11:3 Iesen iau burut bia muat na tamapas laah talur no numuat magingin na murmur Krais ma ra tutun ma ra gamgamatien na bala muat. Iau burut bia ira numuat lilik na tamapas laah huo hoing ne Iwa nong no sui ga habatoi ma no uno keskes na mintota.
2CO 11:4 Iau tange huo kanong ing ta tiga nong i gate haan tupas muat ma i ga pir muat ma tiga Jisas nong i mes tano Jisas ing mehet ga pir muat utana, iau nunure bia muat ga manga kanan mon wara bale leh tiga mangana tunotuno huo. Hokaiken mah, muat la kapkap tiga mangana kinkinis i mes tano kinkinis muat te hatur kawasei tano Halhaliana Tanuo. Huo mah muat la kanakana bia muat na kap tiga mes na hinhinawas tano tahut na hinhinawas muat te kap usuranei.
2CO 11:5 Iesen tano nugu lilik, no nugu kinkinis na apostolo pai kis napu ta dahin ta diet ing di kilam bia ira kaba tamat na apostolo.
2CO 11:6 I tutun dak bia iau pai manga keskes wara nianga, iesen iau hatur kawase ra minminonas. Ma ta ira mangana linge iau ga gil i manga hamines hapalaine muat bia i tutun huo.
2CO 11:7 Iau pa ga saring muat bia muat na kul iau ma ta tiga linge ing iau ga harpir ma no tahut na hinhinawas ta God taar ta muat. Taie. Iau ga bul hanapu habaling iau bia muat naga kap ra tamat na kinkinis. Hohe, iau ga gil ronga ing bia iau ga gil huo?
2CO 11:8 Ing iau ga papalim nalamin ta muat, ira matanaiabar na lotu ta ari a mes na taman ga kul iau. I hoing bia iau ga kikinau mekaia ho diet wara hatahutne muat.
2CO 11:9 Ma ing iau ga kis nalamin ta muat ma iau ga supi tiga linge iau pa ga hatirih ta tiga nong ta muat kanong ira bar tasigu ing diet ga hanuat mekai Masedonia diet ga banot ira nugu sunupi. Huo, iau pa ga hapupusak muat ma ra tinirih nalua ma pa ni gil huo namur mah.
2CO 11:10 Ing bia i tutun bia ira tutun ta Krais i kis taar tagu, io, i tutun mah bia taie tiga nong na tale bia na tigal iau tano nugu latlaat ta iakano nugu magingin huo kai tano hanuo Akaia.
2CO 11:11 Hohe, iau tange huo kanong iau pai sip muat? Taie. God i nunure tar bia iau sip muat.
2CO 11:12 Ari diet latlaat bia diet haruat ma mehet. Ma diet sip bia muat na nes kilam diet bia diet haruat huo. Iesen bia no ngaas iau la murmur ie kaiken, iau ni gilgil at huo waing pa ni tar ra mauho ta diet bia muat naga nes kilam diet bia mehet haruat.
2CO 11:13 Kaike ra mangana tunotuno diet pai apostolo tutun. Diet harabota ma ira udiet pinapalim ma diet harababo mon bia diet ira apostolo gar ta Krais.
2CO 11:14 Ma waak dahat karup bia diet ngan huo. Sataan at mah i la harababo bia aie tiga angelo tano madaraas.
2CO 11:15 Io kaik, pai tiga tamat na linge na kinarup bia ira uno tultulai diet harababo bia diet ira tultulai tano magingin takodas. Namur um diet na kap ira hunena haruat ma ira udiet gingilaan.
2CO 11:16 Iau tange habaling bia waak tikai na lik bia iau tiga ba. Iesen bia ing muat lik bia iau tiga ba, i tahut bia muat na bale leh iau hoing bia muat na bale leh tiga ba, kaik nigi latlaat dahin.
2CO 11:17 Ing iau latlaat huo uta ira linge iau nunure tar bia i tutun, iau pai iangianga haruat ma ing no Watong i te tule iau bia ni ianga huo, iesen iau iangianga hoing tiga ba.
2CO 11:18 Halengin diet latlaat haruat tano tintalen na latlaat tano ula hanuo, kaik iau mah iau ni latlaat.
2CO 11:19 Kanong warah, muat guama bia muat na bale leh ira ba bia diet na haianga muat kanong muat lik bia muat manga mintot.
2CO 11:20 I tale bia ni tange huo kanong muat la balbale leh sige tikai ing i kure hadadas muat ma bia i ien hapabona muat ma bia i harauro muat ma bia i hatamat habaling ie ma bia i pasar ira punare muat.
2CO 11:21 Maris, iau hirhir ing iau hinawas palai bia ira numehet dadas pa ga haruat bia mehet na gil huo ta muat! Ing bia sige tiga nong i iangor bia na latlaat uta tiga linge, iau mah iau iangor bia ni latlaat huo. Ai! Iau iangianga hoing tiga ba bia ni tange huo.
2CO 11:22 A Hibru diet? Iau mah huo. Diet tano huntunaan Israel? Iau mah. Bia a tubune Abraham diet? Iau mah.
2CO 11:23 Hohe, diet ira tultulai gar ta Krais? Maris, iau nunure bia no linge iau wara tangtangei na kakel hoira nianga auno tiga tamat na ba, iesen i tutun bia tano nugu kinkinis na tultulai iau lua ta diet bakut. Iau lua ta diet ta ira dadas na pinapalim. Ira pakaan ing iau ga kis ta ira hala na harpidanau i haleng ta ing diet. Haleng sakit ira pakaan di ga ubu iau ma haleng na pakaan iau git hutet bia ni maat.
2CO 11:24 A liman na pakaan ira Iudeia diet ga dangat iau. Ma bia diet ga dangat iau huo, aitul a sangahul ma liman ma ihat na minmen tiga pakaan.
2CO 11:25 Aitul a pakaan di ga lawat iau ma ra kalawa. Tiga pakaan di ga gulum iau. Aitul a pakaan iau ga hiruo ma ra mon aras na tes. Tiga kidilona bung na kasakes ma ra bung mah iau kenas ra tingena kasapa.
2CO 11:26 Iau te murmur haitne ira taltalona ngaas. Git hutet bia ni hiruo ta ira taah ma ta ira lima diet ira holmatau ma diet mah tano nugu huntunaan Israel ma diet mah ing diet pai Israel. Git hutet bia ni hiruo kaia ta ira tamat na pise na hala ma kaia mah ra hanuo bia. Iau ga wara hiniruo aras na tes ma ta ira lima diet ing diet harabota bia a tasigu diet narako ta Krais.
2CO 11:27 Iau te manga papalim ma iau te kilingane ira dadas na tinirih. Haleng na pakaan iau git hangala, iau pa git kapkap ra kunubaba. Iau hanunure tar no kinkinis na taburungan ma no minaruk mah. Haleng na pakaan iau git lon ma pata nian. Iau te kilingane ra maduhan ma pataie mah ta kiniasigu.
2CO 11:28 Ari a mes na linge mah i tale bia ni hinawase muat ine, iesen tiga linge ta ira harhar bung, iau la kilkilingane ra tirtirih uta diet bakut ira matanaiabar na lotu ta ira tamtaman ing iau manga lilik uta diet.
2CO 11:29 Ing bia tikai pai manga dadas tano uno nilon, i hoing bia iau kap tiga mangana kinkinis huo mah. Ing bia di lamus harongane tikai tano sakena, i manga hatirih no nugu nilon.
2CO 11:30 Muat te sunang iau bia ni latlaat, kaik iau ni latlaat utano nugu kinkinis nong pataie nugu ta dindas tana.
2CO 11:31 God no Sus ana no Watong Jisas nong i daan hathatika i nunure tar bia iau pai harabota.
2CO 11:32 Aras Damaskas no ut na harbalaurai nong i napu tano tamat na lualua Aretas ga hartula bia diet na balaure bat ira matanangas huat tano pise na hala wara palpalim kawase iau.
2CO 11:33 Iesen di ga haruhe hasur iau ma tiga kalot meram ra matana kalangar tano tamat na balo tano pise na hala. Io kaik, iau gaam hilau pas ie.
2CO 12:1 Muat te harsunang bia ni latlaat huo. Ma iau ni ianga baak ta ira ninaas na tanuo meram ho no Watong ma ira linge i te hapuasne, iesen bia ira nianga na latlaat ta kaiken ra ninanaas pa na harahut.
2CO 12:2 Iau nunure tiga tunotuno gar ta Krais nong God ga kap haut leh ie uram tano aitul a ula mawe tano sangahul ma ihat na tinahon i te pataam. Bia no tunotuno ga hanut ma no palatamaine bia no tanuana ga haan sukun no palatamaine, iau pai nunure, iesen God i nunure tar.
2CO 12:3 A tutun, iau nunure bia God ga kap haut leh iakan ra tunotuno uram tano bilai na katon harsakit. Iesen iau pai nunure bia ga haan ma no palatamaine bia no tanuana ga haan sukun no palatamaine. God i nunure tar. Ma no tunotuno ga hadade ira linge ing pai tale bia tikai na ianga urie. A mon hartigal bia pa na hinawas uta kaiken ra linge.
2CO 12:5 Iau ni latlaat uta tiga mangana tunotuno ho iakan ma sen pa ni latlaat at utagu. Iesen i tutun bia ni latlaat balik bia pataie nugu ta dindas.
2CO 12:6 Iesen ing bia iau nigi wara latlaat, iau pa gor ngan hora ba, kanong iau gor tange ra tutun. Iesen iau malok bia ni latlaat, tikai kabi manga lik hatamat iau ma pa na nes kilam iau haruat ma ira linge iau gil bia iau tange.
2CO 12:7 Iesen God ga tar tagu tiga linge wara hanghagahe iau, hoing bia aie tiga tukulo i dingding no palatamaigu. Ma aie no tultulai gar ta Sataan nong God ga bale tar ie tagu bia na tar nora harngunngutaan. Ma God ga tar ie tagu wara hananget iau bia pa nigi lik hatamat habaling iau uta kaiken ra tamat na linge sakit God ga hapuasne tar tagu.
2CO 12:8 Aitul a pakaan iau ga saring no Watong bia na kap se tar iakan ra linge sukun iau.
2CO 12:9 Ma sen ga tange tagu bia, “No nugu harmarsai i haruat wara utaam. Tikai i dadas harsakit ing bia pataie auno ta dindas.” Io kaik, iau manga guama bia ni latlaat balik bia pataie nugu ta dindas, waing no dadas ta Krais naga kis tagu.
2CO 12:10 Ma iakano no burena bia iau kanakana bia pataie nugu ta dindas, ma iau kanakana mah ing di tange hagahe iau ma bia ira kaba tinirih i kabit iau, ma ta ira kaba purpuruan ma ta ira kaba hinelar di gil tagu. Ma iau kanakana bia ni kilingane kaiken ra ngunngutaan wara gaiene Krais. Kanong warah, ta ira pakana bung bia pataie nugu ta dindas, iau kap ra dadas.
2CO 12:11 Iau te tatalen hoing tiga ba, ma sen muat ga sunang iau bia ni gil huo. Iesen gor tahut bia muat gor pirlat iau kanong no nugu kinkinis na apostolo pai kis napu ta dahin ta diet ing di kilam bia ira kaba tamat na apostolo. Ma a linge bia be iau tiga tunotuno bia mon.
2CO 12:12 Ing iau ga tur dadas ra hena ira tamat na tirtirih iau ga gil ira tamat na gingilaan na kinarup ma ira dadas na hakilang. Ma kaiken ra linge ing i hatutun bia tikai aie tiga apostolo.
2CO 12:13 Iau ga bul hanapu muat hohe ta ira mes na matanaiabar na lotu ta ira tamtaman? Taie, iesen i tutun balik bia iau pa gale hapupusak muat ma ra tinirih. Maris, muat na lik luban se iakan ra nironga iau ga gil ta muat!
2CO 12:14 Kaiken um iau taguro wara kakol muat tano aitul a pakaan ma iau pa ni hapupusak muat ma ra tinirih kanong iau pai wara hanawaan muat uta ira numuat linge. Taie. Iau wara hanawaan tus muat. Iakan gor palai ta muat kanong ira nat na bulu diet pai la tamtabar ira adiet sus. Ira adiet sus diet la tamtabar ira nati diet.
2CO 12:15 Huo, iau manga guama bia ni tar ise bakut ira nugu linge ma no nugu kidilona nilon mah wara gaie muat. Ing iau manga sip muat huo, hohe, na hapuko balik ira numuat sinisip taar tagu?
2CO 12:16 Ma ari ta muat, muat tange bia, “A tutun, pa ga hapupusak dahat ma ra tinirih iesen a keskes na tunotuno ie ma ga hakuni dahat ma ira kaba harabota.”
2CO 12:17 Hohe, ira tunotuno ing iau ga tule ta muat, diet ga ngan hoing ira gotgotuana tunotuno ma diet ga hasurum ira numuat linge? Taie.
2CO 12:18 Iau ga halilik Taitus bia na haan ukaia ho muat ma iau ga tule no tasi dahat tika mei. Hohe, Taitus ga ngan hoing tiga gotgotuana nalamin ta muat? Taie. Muat nunure tar bia mir ga tur tika mon tano numir kidilona lilik ma ira numir tintalen tiga mangaan mon.
2CO 12:19 Ing muat waswas kaiken ra nianga muat lik dak bia mehet tur ra harkurai ra matmataan ta muat wara turtur bat ira sakana nianga tupas mehet. Iesen bia pataie. Ing mehet ianga huo, mehet tur ra matmataan ta God ma tano numehet kinkinis narako ta Krais. Bar bilai na harwis, ira linge bakut ing mehet gil, mehet gil wara hadadas muat.
2CO 12:20 Iau burut bia ni me nes muat bia muat pa na haruat ma ing iau sip bia ni nes muat huo. Ma iau burut mah bia muat na nes iau bia iau pai haruat ma ing muat sip tar huo. Iau burut bia a mon harngangaar nalamin ta muat, ma a mon bala ngungut, ira harpaleng, no magingin na pinpinas hagahe tikai, ma pataie ta bilai na tinaram. Iau burut bia ari diet nes kalak ira tamat na mauho na lualua ma ari diet malmala tamat.
2CO 12:21 Iau burut bia no nugu God na bul hanapu iau ra matmataan ta muat ing iau ni haan tupas habaling muat. Iau burut bia ni me nes ra halengin ta muat ing muat ga gil ra magingin sakena nalua ma muat pai lilik pukus ta ira bilingana magingin, no magingin na ninahon tika ma tikai gar na mes, ma ira magingin na hilawa. Iau burut bia ni me nes muat huo ma iau ni tapunuk ma ni suah pane muat.
2CO 13:1 Kaiken um no aitul a pakaan ni me kol muat. Iau ni gil huo haruat ma ing ira nianga ta God di ga pakat i tange bia, “da kap airuo bia aitul a hinhinawas palai wara hatutun no linge.”
2CO 13:2 Tano nugu airuo na harkol iau gate tar ra harakatom tupas muat. Ma kaiken iau kis tapaka ta muat iau wara hakatom habaling muat hoken: ing ni tapukus ukaia ho muat pa ni me hok diet ing diet ga gil ra magingin sakena nalua, ma pa ni hok mah diet ira mes.
2CO 13:3 Ma iau ni ngan huo kanong muat sip bia ni hatutun bia Krais mon nong i haianga muat mekai narako tagu. Pai tabales ing i papalim kaia nalamin ta muat. Taie. I dadas nalamin ta muat.
2CO 13:4 A tutun, di ga lau ie taar tano ula kabai ing pataie auno ta dadas. Iesen i lon tano dadas ta God. Huo mah, narako ta Krais pataie numehet ta dadas. Iesen mehet lon tika mei kanong mehet hatur kawase no dadas ta God. Ma mehet na hatur kawase iakano dadas ing mehet na me papalim ta muat.
2CO 13:5 I tahut bia muat na nes mur habaling muat wara nunure bia muat kis taar ta ira linge dahat nurnur ine. Kaia, muat walar muat. Hohe, muat pai nes kilam bia Krais Jisas i kis narako ta muat? Iesen bia muat puko balik tano numuat walwalar i hamines bia Krais pai kis narako ta muat.
2CO 13:6 Ma iau nurnur taar bia muat na nes kilam bia mehet, mehet pai puko tano walwalar.
2CO 13:7 Mehet sasaring tupas God bia muat pa na gil ta nironga. Mehet pai sasaring huo wara hamines bia mehet te tur dadas tano walwalar. Taie. Het sasaring huo waing muat naga gil ing i takodas, ma a linge bia be i nanaas taar bia mehet te puko.
2CO 13:8 Iesen het pai tale bia mehet na gil ta linge wara suksukuane no tutun. Taie. Het tur wara gaiena no tutun.
2CO 13:9 Mehet kanakana ing muat dadas iesen pataie numehet ta dadas. Ma mehet sasaring uram naliu bia muat na hanuat takodas baling.
2CO 13:10 Ma iakan no burena bia iau pakpakat kaiken ra linge ing iau kis tapaka baak ta muat, kanong ing iau ni haan tupas muat iau malok bia ni tar ra dadas na harpidanau taar ta muat haruat ma no nugu kinkinis na gil harkurai. No Watong ga tar iakano kinkinis na harkurai tagu bia nigi hadadas muat, ma pai wara gilgil haliare muat.
2CO 13:11 Bar hinsakagu ta Krais, iau wara haphapataam um no nugu pakpakat. I tahut bia muat na gil hatakodasne habaling muat ma muat na bale leh ira nugu nianga na harharagat. Muat na tur tika mon ma tiga kidilona lilik ma muat na kis ma ra malum. Ma no God nong i la tartar ra harmarsai ma ra malum na kis tika ma muat.
2CO 13:12 Muat na haatne hargilaasne leh muat ma muat na gawane harbasiane muat ma ra tahut na magingin. Ma ira matanaiabar tus ta God bakut diet haatne leh muat mah.
2CO 13:13 Iau sasaring bia no Watong Jisas Krais na marse muat bakut, ma bia God na sip muat bakut, ma bia muat na tiktika ma no Halhaliana Tanuo.
GAL 1:1 Iau Pol tiga apostolo. Ma ari a tunotuno mon diet pai le tibe iau bia iau tiga apostolo, ma tiga tunotuno pai le tule iau mah huo. Iesen iau te kap no kinkinis na apostolo mekatiga ho Jisas Krais ma God no adahat Sus nong ga hatut ie sukun ra minaat.
GAL 1:2 Io, iau tika ma ira hinsakagu ta Krais ing diet kis tika ma iau, mehet pakat iakan ukaia ho muat ira matanaiabar na lotu ta ira tamtaman aras tano hanuo Galesia.
GAL 1:3 Iau sasaring bia God no adahat Sus ma no Watong Jisas Krais na tar ra harmarsai ma ra malum ta muat.
GAL 1:4 Io, Krais ga tar se no uno nilon ga maat bia na halon dahat sukun ira sakana tintalen ta iakan ra pakana bung. Ma ga maat huo haruat tano sinisip gar ta Mama no udahat God.
GAL 1:5 Io, tutun sakit, dahat na pirlat God hathatikai.
GAL 1:6 Maris! No balagu i manga karup bia gasien sakit muat hanhan talur iakano nong ga tatau muat. Ma ga tatau muat hohe? Ga tabar muat ma Krais. Ai! Gasien sakit muat sisiel ta tiga mes na hinhinawas di tange bia no tahut na hinhinawas.
GAL 1:7 Iesen pataie bia tiga mes na hinhinawas aie no tahut na hinhinawas tutun. Ma iau tange mon huo kanong ari diet gilgil hangunguo muat ma diet sip bia diet na pukusane hagahe no tahut na hinhinawas uta Krais.
GAL 1:8 Ing bia mehet at bia tiga angelo at meram ra mawe naga harpir ta muat ma tiga mes na hinhinawas ta nong mehet ga harpir mei, io, iau saring God bia na haliare tun at balik ie.
GAL 1:9 Hoing het ga tange nalua, kaiken iau tange habalin hoken: ing bia sige tikai i harharpir ta muat ma tiga mes na hinhinawas ta nong muat ga bale leh, io, iau saring God bia na haliare tun at ie.
GAL 1:10 Muat lik hohe? Ing bia iau tange huo i nanaas bia iau sip bia ira tunotuno diet na haut leh iau? Taie tun at! Sen bia iau sip bia God na haut leh iau. Hohe, i nanaas bia iau wara haguama ira tunotuno? Taie. Ing bia iau gaar walwalar baak wara haguama ira tunotuno, io, pa gaar tale bia ni tiga tultulai gar ta Krais.
GAL 1:11 Ira hinsakagu ta Krais, iau sip bia muat na palai bia no tahut na hinhinawas nong iau ga pirpir muat mei pai hanuat mekaia tiga tunotuno.
GAL 1:12 Taie ta tunotuno ga hinawase iau bia ga hausur iau utana. Iesen Jisas Krais ga hapuasnei tagu.
GAL 1:13 Io, muat gate hadade tar utano nugu mangana nilon nalua ing iau ga kis taar ta ira mangana nurnuruan ta mehet ira Iudeia. Iau git manga helar ta ira matanaiabar tano lotu gar ta God ma iau git walwalar bia ni haliarei.
GAL 1:14 Iau ga manga keskes ta diet ira halengin ta ira nugu harwis wara murmur timaan ira magingin ta mehet ira Iudeia. Ma iau ga taram ira harausur ta ira hintubugu ma ra but na gungunuama ma ra tamat na baso.
GAL 1:15 Iesen God ga gilamis leh iau tano uno harmarsai nalua tano pakana bung di ga kaha iau ma ga tatau iau wara uno. Ma ga sip bia na hapuasne no Natine tagu ma uram narako ho iau waing nigi harpir nalamin ta diet ing diet pai Iudeia. Ma ing bia God ga gil huo iau pa ga kap ta pirpir ta tiga tunotuno uta iakan ra hinhinawas.
GAL 1:17 Ma iau pa ga haan mah uram Ierusalem ta diet ing diet ga kap no kinkinis na apostolo nalua tagu. Iesen iau ga gasien uras Arebia ma iau ga tapukus baal uram Damaskas.
GAL 1:18 Io, aitul a tinahon gate sakit ma iau ga haan uram Ierusalem wara numir harnunurai ma Pita. Ma iau ga kis tika mei ra sangahul ma liman na bung.
GAL 1:19 Sen bia iau pa ga nes tikai ta diet ira mes na apostolo, Jemes sen mon, no tasine no Watong.
GAL 1:20 Io, iau sasalim ra matmataan ta God uta ira linge iau pakpakat ukaia ho muat bia pai a harabota.
GAL 1:21 Io, namur iau ga haan uras ta ira iruo hanuo Siria ma Silisia.
GAL 1:22 Ma ira lotu ta Krais aras tano hanuo Iudeia diet pa ga nunure iau. Taie. Diet pa ga tale bia diet na nes kilam mah no matmataan tagu.
GAL 1:23 Iesen diet git saser mon iakan ra hinhinawas nong ga tange hoken: “Aie nong ga helar baak ta dahat, kaiken i harharpir utano tahut na hinhinawas nong dahat nurnur tana. Ma nalua ga walar bia na haliare iakan ra hinhinawas.”
GAL 1:24 Ma diet ga pirpirlat um God wara utagu.
GAL 2:1 Ma a sangahul ma ihat na tinahon namur iau ga tapukus baal uram Ierusalem, mir ma ne Barnabas. Ma iau ga lamus mah Taitus.
GAL 2:2 Ma iau ga haan kanong God ga hapuasa tagu bia ni haan. Ma iau ma ira lualua ing di ga lik hatamat diet, mehet sen mon mehet ga kis hulungai ma iau ga hinawas palai ta diet utano tahut na hinhinawas nong iau harharpir mei nalamin ta diet ing diet pai Iudeia. Ma iau ga lilik barbarahon kanong iau pa ga sip bia no nugu pinapalim menalua ma ta iakano pakana bung mah na linge bia.
GAL 2:3 Ma a tutun bia Taitus nong mir ga tika huat, pai a Iudeia ie, iesen pa di ga haragut bia da kut no palatamaine.
GAL 2:4 Ma iakan ra linge ga hanuat kanong ari a tunotuno ing diet ga harababo bia diet gar ta Krais, diet ga laka mur mehet wara nesnes timaan leh mehet bia mehet gar ta Krais Jisas, mehet langalanga sukun hohe kaike ra mangana harkurai. Io, diet ga sip bia diet na hapupusak mehet ma ta tinirih ta kaike ra harkurai ta Moses.
GAL 2:5 Iesen mehet pa ga haut leh ta dahin ta ira udiet lilik waing no tutun tano tahut na hinhinawas pa na panim sukun muat.
GAL 2:6 Ma hohe ta kaike ira lualua ing di ga lik hatamat diet? (Io, bia a mangana kinkinis sa diet ga kap tar nalua, pa ga habulbul iau. God pa na hatamat tikai ing bia ira tunotuno mon diet lik hatamat ie. Taie.) Io, kaike ra lualua ing di ga lik hatamat diet, diet ga haut leh no nugu hinhinawas. Diet pa ga sip bia diet na pukusane no nugu nianga ta dahin.
GAL 2:7 Taie. Iesen diet ga nes kilam bia God ga tar no pinapalim tagu wara harharpir ma no tahut na hinhinawas nalamin ta diet ing diet pai Iudeia hoing ga tar no pinapalim ta Pita wara harharpir nalamin ta ira Iudeia.
GAL 2:8 Ma iakan ga palai kanong God nong ga papalim narako tano gingilaan na apostolo ta Pita nalamin ta ira Iudeia ga papalim mah narako tano nugu gingilaan na apostolo nalamin ta diet ing diet pai Iudeia.
GAL 2:9 Ma Jemes, Pita, ma ne Jon dal ing di ga lik hatamat dal bia dal palim tar no lotu, io, dal ga nes kilam bia God gate haidane iau ma iakan ra pinapalim. Io kaik, dal ga lulu ma mir ma ne Barnabas wara hamines bia mehet na papalim tika. Io, dal ga haut bia mir na haan taar ta diet ing diet pai Iudeia, ma bia dal na haan taar ta ira Iudeia.
GAL 2:10 Dal ga saring mir bia mir na gil tiga linge sen mon. Dal ga saring bia mir na lilik wara harharahut ira maris. Ma iakano at no linge nong gate hanuat tamat tagu, kaik iau gaam gilgil.
GAL 2:11 Iesen ing bia Pita ga hanuat uras Entiok iau ga tur mamatei ma iau ga sukuanei wara turtur bat iakano linge i ga gil kanong ga gil tiga nironga.
GAL 2:12 Io, ga gil hoken: nalua ta ing ari a tunotuno meram ho Jemes ga hanuat, Pita git iaiaan tika ma diet ing diet pai Iudeia. Iesen ing bia diet ga hanuat, Pita ga tur haburen bia na haan sisingen laah ta diet ing diet pai Iudeia kanong ga burut ta diet meram ho Jemes ing diet tur dadas tano gingilaan na kut palatamainari.
GAL 2:13 Ma ira mes na Iudeia gar ta Krais diet ga harababo tika ma Pita ing diet ga haan laah mah sukun diet ing diet pai Iudeia. Ma iakano sakena ga sal harongane Barnabas at mah kaik gaam gil huo.
GAL 2:14 Iesen ing bia iau ga nes bia diet pa ga murmur hatakodasne no tutun tano tahut na hinhinawas, io, iau ga tange ta Pita ra matmataan ta ira haruat bia, “Augu tiga Iudeia ma sen pau lon haruat ma ira Iudeia. Taie. U lon haruat ma diet ing diet pai Iudeia. Io kaik, pai takodas bia u hagut diet ing diet pai Iudeia bia diet na lon haruat ma ira Iudeia.
GAL 2:15 “Dahat ira Iudeia, dahat ira bulumur ta ira Iudeia. Dahat pai gar tiga mes na huntunaan ing dahat ira Iudeia dahat la kilkilam diet bia ira ut na sakena.
GAL 2:16 Iesen dahat at ira Iudeia, dahat nunure bia God pa na kure bia tikai i takodas ra matmataan tana ing bia i murmur ira harkurai ta Moses. Taie. Na harkurai utana bia i takodas ing bia i nurnur ta Krais Jisas. Io kaik, dahat at, dahat te nurnur taar ta Krais Jisas waing God naga kure bia dahat takodas ra matmataan tana. Ma na kure tar huo kanong i te nes no udahat nurnuruan ma pataie bia i te nes ira udahat gingilaan haruat ma ira harkurai ta Moses. Io kaik, dahat te nurnur taar um ta Krais Jisas kanong dahat nunure bia God pa na kure tikai bia i takodas ing bia i murmur ira harkurai ta Moses.
GAL 2:17 Io, dahat sip um bia God na kure bia dahat takodas kanong dahat narako ta Krais. Bia dahat narako ta Krais huo, iesen i hanuat palai bia dahat sakena mah hoing diet kaike ing diet pai Iudeia, da tange hohe? Da tange bia Krais i lamus dahat wara gilgil ira magingin sakena? Taie! Taie tun at!
GAL 2:18 Ing bia iau te tar tihigu tano mangana lilik bia ira harkurai ta Moses diet naga tale wara kurkure bia iau takodas, ma namur iau mur habalin diet, io, iau hatutun bia iau tiga ut na laka harkurai.
GAL 2:19 Ira harkurai ta Moses ga kure iau bia ni maat. Io kaik, iau gaam maat tano dadas ta kaike ra harkurai waing nigi lon wara gaie God. Iau te maat tika ma Krais tano ula kabai.
GAL 2:20 Ma pai iau um nong i lon. Taie. Krais i lon tagu. Ma no mangana nilon tano palatamaigu kaiken iau lon ma ra nurnur tano Nati God nong ga sip iau ma gaam tar se no uno nilon gaam maat wara gaiegu.
GAL 2:21 Ing bia God gor tale bia na kure bia tikai i takodas ing bia i murmur ira harkurai ta Moses, dahat na tange hohe? I nanaas bia Krais ga maat bia mon. Iesen kaiken ra nugu nianga pai ngan huo, kaik iau pai harus ise no harmarsai ta God. Taie. Iau tange bia dahat supi bia na tabar bia mon dahat ma no uno harmarsai.”
GAL 3:1 Ai! I hoing bia tikai i te gil pinegil ta muat ira Galesia kaik muat gi manga ba! No hinhinawas utano minaat ta Jisas Krais tano ula kabai ga hanuat palai ra matmataan ta muat.
GAL 3:2 Iau sip bia ni nunure leh tiga linge sen mon ta muat ma i hoken. Hohe, muat ga hatur kawase no Halhaliana Tanuo kanong muat ga murmur ira harkurai ta Moses bia kanong muat ga nurnur ta ing muat ga hadade?
GAL 3:3 Iau manga karup bia muat manga ba huo! No Tanuo ga hatahun ira numuat sigara nilon. Hohe balik bia muat walwalar wara habilai hasakitne ira numuat nilon ma ira amuat baso at?
GAL 3:4 Hohe, ira haridaan ing diet ga haan tupas muat, diet ga haan tupas bia mon muat? Taie. Iau lik bia muat pai lik bia a linge bia mon diet.
GAL 3:5 Hohe, God i la tamtabar muat ma no dadas tano Tanuo ma i la gilgil ira dadas na gingilaan na kinarup nalamin ta muat kanong muat murmur ira harkurai ta Moses? Taie. Sen bia kanong muat ga hadade no tahut na hinhinawas ma muat nurnur tana.
GAL 3:6 Hoing mah Abraham. Ira pakpakat gar ta God i tange bia “Abraham ga nurnur ta God ma God ga was leh no uno nurnuruan bia Abraham i takodas ra matmataan tana.”
GAL 3:7 Io kaik, i tahut bia muat na palai bia diet ing diet hatur kawase ra nurnuruan, a bulumur tutun ta Abraham diet.
GAL 3:8 Ira nianga ta God di ga pakat ga lua na tange bia God na harkurai uta diet ing diet pai Iudeia bia diet takodas ra matmataan tana kanong diet na nurnur. Io kaik, kaike ira pakpakat ga lua na harharpir utano tahut na hinhinawas taar ta Abraham hoken: “Meram narako tano num huntunaan iau ni haidane ira hunhuntunaan tano ula hanuo.”
GAL 3:9 Io kaik, i palai um, bia diet ing diet nurnur, God na idane diet tika ma Abraham no ut na nurnur.
GAL 3:10 Diet bakut ing diet la noh mur tar ira harkurai ta Moses bia God na kure bia diet takodas, io, diet kis taar ra hena no tamat na harpidanau gar ta God. Ma God na hapidanau diet warah? Kanong ira uno nianga di ga pakat ie i tange hoken: “Diet bakut ing diet pa na murmur ira harkurai bakut ta kan ra pakpakat, io, diet na kis taar ra hena no tamat na harpidanau gar ta God.”
GAL 3:11 Ma i manga palai um bia God pa na kure bia tikai i takodas bia ing i murmur ira harkurai ta Moses. Ma iakan i palai kanong ira nianga ta God di ga pakat i tange mah hoken: “Sige tikai ing i nurnur, kaik God i kure bia i takodas ra matmataan tana, io, iakano sen mon na lon.”
GAL 3:12 Io, no magingin na mur harkurai dir pai haruat ta dahin ma no magingin na nurnur. Taie. Kanong warah, “sige tikai i sip bia na lon tano magingin na mur harkurai, io, i supi bia na gil hatikane kaike ra kaba harkurai ta Moses.”
GAL 3:13 Iesen ma ra but na kunkulaan Krais ga kul halangalanga dahat sukun no tamat na harpidanau nong ira harkurai ga tar ta dahat. Ma ga tale bia na halangalanga dahat huo kanong ga pusak no udahat harpidanau. Ma iakan i palai hoing ira nianga gar ta God di ga pakat i tange hoken: “Bia tiga nong di hatabai ra ula daha, i kis taar ra hena no tamat na harpidanau gar ta God.”
GAL 3:14 Ma Krais Jisas ga gil huo bia naga tabar diet ing diet pai Iudeia ma no haridaan God ga tar ta Abraham ma bia dahat bakut ing dahat nurnur dahat na hatur kawase no Halhaliana Tanuo nong God ga kukubus taar ta dahat.
GAL 3:15 Ira hinsakagu ta Krais, iau ni tange tiga nianga harharuat nong i la nganngan huo ta ira kaba bungbung. Ing bia airuo dir haut tiga linge ma dir gil tiga kunubus, taie tikai i tale bia na palas ie.
GAL 3:16 Huo mah ta ira kunubus gar ta God. God ga kukubus taar ta Abraham ma tano uno bulumur. Io, ira nianga gar ta God di ga pakat pai tange bia God ga kukubus taar “ta ira uno bulumur,” bia halengin. Taie. I tange bia God ga kukubus taar “tano uno bulumur,” bia tikai mon, ma aie Krais.
GAL 3:17 No kukuraina tutun tano nugu nianga i hoken. God ga gil no luena kunubus tika ma Abraham. Ma aihat na maar ma aitul a sangahul na tinahon manamur, God ga tar ira harkurai ta Moses. Io kaik, kaike ra harkurai pai tale bia na kap se iakano kunubus God ga luena gil. Taie. No luena kunubus i tur dadas taar.
GAL 3:18 Io, ma da tange hohe utano haridaan God ga tange bia na tabar ira uno matanaiabar me? Ing bia iakano haridaan i hanuat meram narako ta ira harkurai ta Moses, io, i palai bia pai tale wara hinanuat meram narako ta iakano luena kunubus. Iesen pai tutun. God i te tabar bia mon Abraham ma iakano haridaan meram narako ta iakano kunubus.
GAL 3:19 Io kaik, warah ira harkurai ta Moses diet ga hanuat? No luena kunubus gate kis taar iesen God ga tar mah kaike ra harkurai wara hamines bia a mangana magingin sa i sakena. Ing bia taie ta harkurai dahat pa na nunure bia a mangana magingin sa i laka harkurai, kaik i sakena. Ma kaike ra harkurai diet ga dadas tuk taar tano hinanuat tano bulumur ta Abraham, iakano bulumur nong God ga gil no kunubus mei. Ma ira angelo diet ga tar se kaike ra harkurai gar ta God taar ta tikai nalamin, ma aie balik ga tar ta ira matanaiabar.
GAL 3:20 Ma tiga tunotuno nalamin pai tur wara harharahut sen tiga palpal. Iesen God aie tikai sen mon.
GAL 3:21 Io, ing bia da tange huo, hohe, i nanaas bia ira harkurai ta Moses diet harus ise ira linge God i te kukubus taar ta dahat? Taie tun at! Io, ing bia God ga tar ra harkurai ing i tale wara harhalon, tutun sakit, God gor kure bia diet takodas ing diet mur kaike ra harkurai.
GAL 3:22 Iesen ira nianga ta God di ga pakat i tange bia ira magingin sakena i te wis kawase no ula hanuo bakut ma i kis taar huo. Warah? Waing God na tabar diet ing diet nurnur ma ira linge gate kukubus taar ta diet. Ma na tabar diet huo kanong diet nurnur at ta Jisas Krais.
GAL 3:23 Nalua ta ing iakan ra magingin wara nurnur ga hanuat, ira harkurai ta Moses diet ga wis kawase dahat. Ma kaike ra harkurai ga wis kawase dahat tuk taar tano pakana bung bia iakan ra magingin na nurnur ga hanuat puasa.
GAL 3:24 Io kaik, ira harkurai diet ga kure kawase dahat wara lamlamus dahat tupas Krais waing God naga kure bia dahat takodas ing bia dahat nurnur ta Krais.
GAL 3:25 Ma no pakana bung wara nurnur i te hanuat um, kaik ira harkurai diet pa na kure kawase habaling dahat.
GAL 3:26 Io, muat bakut ing muat nurnur, muat ira nati God kanong muat bakut ing di gate baptais muat ta Krais muat te hanuat tikai mei, i hoing bia muat te sigasigam ma Krais.
GAL 3:28 Ira Iudeia ma diet ing diet pai Iudeia, diet haruat mon. Ira tultulai ma diet ing diet pai tultulai, diet haruat mon mah. Ma i ngan huo mah ta ira tunaan ma ira hahin. Warah, kanong muat bakut muat tikai mon narako ta Krais Jisas.
GAL 3:29 Ma ing bia muat gar ta Krais, io, muat ira bulumur ta Abraham ma muat na hatur kawase ira linge haruat ma no kunubus gar ta God.
GAL 4:1 Ma iau ni ianga mah uta tiga bulu nong na hatur kawase ira linge bakut tano ana sus namur. A tutun ing a bulu baak ie ira linge bakut auno, iesen pai mes ta tiga tultulai.
GAL 4:2 Ing bia a bulu baak ie ari a tunotuno diet la balbalaurei ma diet la kurkurei tuk taar tano pakana bung bia no ana sus gate puo tar bia diet pa na gil habalin huo.
GAL 4:3 Ma hoing mah dahat. Bia dahat ga nat na bulu ta ira udahat lilik uta God, ira nat na linge dahat ga nunure uta iakan ra ula hanuo ma dahat ga mur, diet ga wis kawase dahat.
GAL 4:4 Iesen bia no pakana bung ga hanuat haruat ma no lilik ta God, io, ga tule no Natine, tiga hahin ga kahai. Ma ga tamat menapu ta ira harkurai ta Moses bia na kul halangalanga diet ing diet ga kis menapu ta kaike ra harkurai. Ma ga gil huo bia Mama na halon hapatangen dahat bia a natine.
GAL 4:6 Io, i tutun bia muat ira nati God. Io kaik, God i te tule no Tanuana no Natine uram ra bala dahat ma i tatau huat bia, “Mama, nugu Mama!”
GAL 4:7 Io kaik, muat pai ira tultulai baal um. Taie. Muat ira natine. Ma God na tabar muat ma ira linge i haruat bia ira natine na hatur kawase kanong muat ira natine at.
GAL 4:8 Nalua ing bia muat pa ga nunure God, ira mangana tanuo ing diet pai God tutun diet ga wis kawase muat.
GAL 4:9 Iesen bia kaiken muat nunure God, bia i tahut dak bia ni tange bia God i nunure muat. Io kaik, wara bih bia muat wara taptapukus baal taar ta kaike ra malmalungana tanuo? Muat sip bia diet na wis kawase habaling muat?
GAL 4:10 Maris, i nanaas bia di te wis kawase habaling muat kanong i palai bia muat la murmur timaan diet ira harkurai ta ira mangana tamat na bung, ira sigar teka, ira tinahon na nian, ma ira mes na mangana tinahon mah.
GAL 4:11 Iau burburut uta muat kanong i nanaas dak bia iau te hasurum ira nugu dadas uta muat.
GAL 4:12 Ira hinsakagu ta Krais, iau manga saring muat bia muat na langalanga sukun ira harkurai hoing iau kanong iau ga ngan hoing muat nalua. Ma muat pa ga gil tiga nironga tagu.
GAL 4:13 Ma muat palai taar bia iau ga luena harpir ma no tahut na hinhinawas ta muat kanong iau ga maset.
GAL 4:14 Ma a tutun bia no nugu minaset ga hatirih muat, iesen muat pa ga malentakuane iau ma muat pa ga harus ise iau. Taie. Muat ga bale leh iau hoing bia iau tiga angelo gar ta God, bia hoing iau Jisas Krais at.
GAL 4:15 Muat ga manga kanakana! Ira numuat kanakana kana he? Iau tange ra tutun bia muat gor luar se ira kalora mata muat ma muat naga tar tagu ing bia muat gor tale.
GAL 4:16 Hohe, i nanaas bia iau te hanuat hoing no amuat suk kanong iau ga hinawase muat uta ira tutun God i te hapuasne?
GAL 4:17 Diet ira mes diet walar wara lamlamus muat taar ta diet ma ra tamat na baso. Iesen ing bia diet gilgil huo, a sakana magingin diet gil. Diet sip bia diet na tur bat muat wara murmur mehet waing muat na baso mur diet.
GAL 4:18 Ma i tahut bia ari na lamus muat ma ra baso ing bia diet sip bia diet na harahut tutun muat. Ma ing bia iau pai kis tika ma muat ma ari diet sip bia diet na harahut muat huo, io, i tahut mah.
GAL 4:19 Ira natigu, tiga pakaan baal iau hoing tiga hahin i wara kinakaha. Iau kap ra tamat na ngunngutaan wara uta muat tuk taar bia no tintalen ta Krais na tahuat narako ta muat.
GAL 4:20 Iau manga sip bia iau gor tale bia ni kis tika ma muat kaiken ma iau pa nigi supi wara iangianga dadas ta muat huo. Iesen iau nguanguo kanong iau ni gil bihanei naga tahut?
GAL 4:21 Muat ing muat sip bia muat na kis menapu no dadas ta ira harkurai ta Moses, iau wara tirtiri muat tiga linge. Muat palai uta ira linge ira harkurai ta Moses diet tange bia taie? Iau lik bia taie.
GAL 4:22 Iau tange huo kanong ira pakpakat diet hinawas bia airuo ira nati Abraham. Tikai tano hahin na tultulai ma tikai tano hahin nong i langalanga sukun ira tinirih gar na tultulai.
GAL 4:23 Di ga kaha no natine no hahin na tultulai hoing ira hahin diet la kakaha huo. Iesen di ga kaha no natine no hahin nong i langalanga kanong God ga kukubus taar huo.
GAL 4:24 Io, i tale bia da kap tiga mangana kukuraina meram narako ta iakan. Kaiken ira iruo hahin dir haruat ma airuo kunubus. Tiga kunubus meram ra uladih Sinai ma ira natine ira tultulai. Ma iakan ra kunubus aie ne Hagar.
GAL 4:25 Io, iakan ra Hagar nong i haruat ma no kunubus meram tano uladih Sinai aras Arebia, aie mah i haruat ma no pise na hala Ierusalem katin. Warah, kanong Ierusalem ma ira natine diet ira tultulai mah.
GAL 4:26 Iesen no Ierusalem aram naliu i langalanga sukun ira tinirih gar na tultulai. Ma aie no pawasi dahat.
GAL 4:27 Ma no nianga gar ta God ing di ga pakat ie i hatutun iakan bia i tange hoken ta Sara, “Augu ra hinkaho, nu guama! Pau kilingane ra ngunngutaan na kinakaha iesen i tahut bia nu kakonga ma ra gungunuama. Warah, i tutun bia no num tunaan i te haan talur ugu, iesen ira natim diet na halengin balik tano hahin nong no uno tunaan i kis taar baak mei.”
GAL 4:28 Io, muat ira hinsakagu ta Krais, muat hoing Aisak. Muat ira nati God kanong God ga kukubus taar huo.
GAL 4:29 Ta iakano pakana bung no bulu nong Hagar ga kahai hoing ira hahin diet la kakaha huo, io, iakano bulu ga helar ta nong Sara ga kahai ma ra harharahut tano Halhaliana Tanuo. Ma i ngan mah huo katin.
GAL 4:30 Iesen ira nianga ta God di ga pakat i haminas bia pa na ngan huo hatika. I tange hoken: “Nu tule se no hahin na tultulai tika ma no natine. Warah, kanong no natine tano hahin na tultulai pa na kap ta linge ta nadir sus. Taie. No natine sen no hahin nong i langalanga sukun ira tinirih gar na tultulai na kap.”
GAL 4:31 Io kaik, ira hinsakagu ta Krais i palai bia dahat pai natine no hahin na tultulai. Taie. Dahat ira natine no hahin nong i langalanga sukun ira tinirih gar na tultulai.
GAL 5:1 Krais ga halangalanga dahat sukun ira harkurai ta Moses waing dahat na langalanga talur ra dadas ta kaike ra harkurai. Io kaik, muat na tur dadas kaia ma waak muat bale leh kaike ra harkurai bia na wis kawase habaling muat.
GAL 5:2 Muat na hadade baak! Iau Pol, iau hinawase muat bia ing muat na bale tar tari wara kutkut ira palatamai muat haruat ma ira harkurai ta Moses, io, Krais pa na tale bia na kure bia muat takodas ra matmataan tana.
GAL 5:3 Iau hakatom habalin muat tikatikai ing muat bale tar diet bia diet na kut ira palatamai muat. Ing bia muat na gil huo muat na manga supi mah bia muat na mur ira harkurai bakut ta Moses.
GAL 5:4 Muat ing muat walwalar bia muat na murmur ira harkurai ta Moses waing God na kure bia muat takodas ra matmataan tana, io, muat te kutus leh muat talur Krais. Muat te puko laah talur ira mangana matanaiabar ing God i tabar bia mon diet ma no uno harmarsai.
GAL 5:5 Iesen mehet kis nanaho ma ra nurnuruan utano haridaan God na tabar mehet mei. Ma na gil huo kanong i te kure bia mehet takodas ra matmataan tana. Ma tano Halhaliana Tanuo mehet kiskis kawase kaike ra haridaan ma ra nurnur.
GAL 5:6 I tale bia ni tange huo kanong ing bia dahat kis taar ta Krais, io, a linge bia mon bia da kut ira palatamai dahat bia pa da kut. Tiga linge sen mon i tamat. Ma i hoken: dahat nurnur ta Krais ma iakan i palai kanong dahat harmarsai hargilaas dahat.
GAL 5:7 Ira numuat nilon ga hanahaan timaan. Sige ga habatbat muat kaik muat pa ga taram ira tutun ing God i te hapuasne ta dahat?
GAL 5:8 Iakano ra mangana harlawen pa ga hanuat meram ho nong ga tatau muat.
GAL 5:9 I tutun hoing da tange, “A da pet na is mon i haruat wara halalat no kidilona katona beret.”
GAL 5:10 Iesen iau nurnur taar ta muat kanong dahat kis taar ta Krais. Iau nurnur bia muat pa na kap tiga mes na lilik ma bia God na hapidanau sige ta tiga nong i hangunguo muat huo.
GAL 5:11 Ma hohe utagu, bar hinsakagu ta Krais? Bia i tutun bia iau harharpir baak bia da kut ira palatamai diet tari, io, wara bih diet hahelar baak tagu? Ing bia gor tutun huo, no nugu hinarpir utano kabai ta Krais pa na kakel sakasaka ta ira udiet hanhadoda.
GAL 5:12 Ma hohe ta diet ing diet harharpir bia da kut ira palatamai diet tari ma diet hagahe ira numuat nurnuruan huo? Ing bia diet lik bia no magingin na kut palatamai diet i harahut diet, io, waak diet kut se mon ta dahin ta diet. Taie. Na tahut bia diet na manga kut haliare habaling at diet!
GAL 5:13 Io, muat ira hinsakagu gar ta Krais, God ga tatau muat waing muat naga langalanga sukun ira harkurai ta Moses. Iesen waak muat lik bia muat langalanga sukun kaike ra harkurai kaik i tale muat bia muat na gil haruatne ira sakana palpal narako ta muat. Taie. Iesen na tahut bia muat na tultulai ma ra magingin na harmarsai harbasia ta muat.
GAL 5:14 Ma i tale bia ni tange huo kanong dahat na gil haruatne ira harkurai ta Moses bakut ing bia dahat na taram iakan ra harkurai. Ma iakan ra harkurai i tange hoken: “Nu marse tikai hoing u marse habaling at ugu.”
GAL 5:15 Iesen ing bia muat harngangaar ma harharubu harbasia ta muat, muat na harbalaurai timaan, muat kabi haliare habaling muat.
GAL 5:16 Io, no suruno ta ira nugu nianga hoken: muat na hanahaan ma no Halhaliana Tanuo ma muat pa na gil haruatne ira sinisip tano sakana palpal narako ta muat.
GAL 5:17 Na ngan huo kanong ira sinisip tano sakana palpal i mes harbasia ta ira sinisip tano Halhaliana Tanuo. Ma no Tanuo na sip ira linge i mes harbasia ta ing no sakana palpal i sip. Dir la harharubu hargilaas ta dir kaik muat pai tale bia muat na gil haruat ma ira numuat bilai na sinisip.
GAL 5:18 Iesen bia ing no Tanuo i lua ta muat, no dadas ta ira harkurai ta Moses pa na kure muat.
GAL 5:19 Io, ira magingin tano sakana palpal diet palai ma diet hoken: a magingin na ninahon tika ma tikai gar na mes, ira bilinge na magingin, ira magingin na hilawa, a magingin na lotu tupas ira god bisbis, a magingin na gil pinegil, a magingin na malmalentak, ira hargor, a bala ngungut uta ira bilai na linge tiga mes i hatur kawase, ira ngalngaluan, a magingin na gumut, a magingin na hargau, a magingin na tur harpaleng, a magingin na nes kalak linge gar na mes, a magingin na minom ma ra ul ba, ma ari a mes na mangana magingin mah huo. Iau hakatom muat hoing iau ga gil nalua, bia sige tikai i la gilgil huo, pa na sola tano kinkinis na harkurai ma ra harbalaurai ta God.
GAL 5:22 Iesen ira hunena no Halhaliana Tanuo i hoken: a sinisip ukaia ta ira mes, a gungunuama, a malum, a bala maat, a harmarsai, ira bilai na magingin, a tutun na magingin, a magingin na matien na tunotuno, ma a magingin na harbalaurai tano uno sipsip. Taie ta tiga harkurai na tur bat kaike ra magingin huo.
GAL 5:24 Diet ing diet gar ta Krais Jisas, no sakana palpal narako ta diet tika ma ira uno masmasingan, diet te lau tar ie ra ula kabai.
GAL 5:25 No Tanuo ga halon dahat, kaik i tahut bia dahat na murmur no Tanuo.
GAL 5:26 Waak dahat hatamat habaling dahat. Waak dahat hangalngaluan hargilasane dahat. Ma waak dahat bala ngungut harbasia ta dahat uta ira bilai na linge tikai i hatur kawase.
GAL 6:1 Ira hinsakagu ta Krais, ing bia muat nunure leh bia tiga nong i te gil tiga nironga, io, muat ing muat manga murmur no Tanuo, i tahut bia muat na harahut ie bia na bilai baal. Iesen muat na gil huo hoing ira matien na tunotuno. Ma muat na balaure habaling muat, muat kabi puko ta ira harwalaam.
GAL 6:2 Ma muat na pusak hargilasane ira numuat mangana tinirih huo. Ing bia muat na gil huo, muat na gil haruatne no harkurai ta Krais.
GAL 6:3 Io, ing bia tikai i lik bia aie at um, ma sen bia taie mon, i habato habaling at ie.
GAL 6:4 Ma tikatikai na nes mur ira uno magingin at bia diet bilai bia sakena. Ing bia na gil huo na tale bia na laro ta ira uno bilai na magingin. Waak bia i manga lilik ta ira mangana gingilaan ta ira mes.
GAL 6:5 Warah, kanong tikatikai na pusak ira tirih at ta ira uno magingin.
GAL 6:6 Sige tikai da hausur ie uta ira nianga ta God, na tahut bia na tar ira bilai na harharahut ta iakano nong i hausur ie.
GAL 6:7 Waak muat habato habaling muat. Pai tale bia da kukutur ta God. Warah, kanong asa ing tikai i so, i kil habaling at.
GAL 6:8 Sige tikai i saaso tano uno nilon haruat ma ira sinisip tano sakana palpal narako tana, io, na kil habaling ira linge na minaat mekaia hono sakana palpal. Iesen sige tiga nong i saaso tano uno nilon haruat ma ira sinisip tano Halhaliana Tanuo, io, na kil habaling ira linge na nilon hathatikai mekaia hono Tanuo.
GAL 6:9 Io, waak dahat malmalungo wara gilgil ira tahut kanong ing bia dahat pa na malmalungo sukun kaike ra tahut na tintalen, a pakana bung kana ing dahat na kil ira hunena no udahat mangason.
GAL 6:10 Io kaik, kaiken at baak ing i tale dahat wara gilgil ira bilai, i tahut bia dahat na gilgil huo ta ira tunotuno bakut. Sen na manga tahut sakit bia dahat na gil ira bilai narako ta ira kaba ut na nurnuruan.
GAL 6:11 Io, muat na nes ira tamat na pakpakat iau pakpakat kaiken ma no limagu at.
GAL 6:12 Diet ing diet wara sunsunang muat bia muat na haut leh tari bia da kut ira palatamai muat, io, diet at ing diet la sipsip bia da pirlat diet ta iakano udiet pinapalim nalamin ta muat. Diet wara sunsunang muat huo kanong diet lik hoken: “Ing bia dahat pai sunang ira Galesia wara murmur ira harkurai ta Moses, diet ira mes na Iudeia diet na helar ta dahat kanong diet na lik bia dahat te so no udahat nurnuruan tano kabai ta Krais sen mon.”
GAL 6:13 Diet at ing diet murmur no harkurai wara kut palatamainari, diet pai la murmur ira mes na harkurai ta Moses. Iesen diet sip bia muat na haut leh tari bia da kut ira palatamai muat waing diet naga laatlaat uta ira palatamai muat.
GAL 6:14 Tutun sakit, iau pai sip bia ni laatlaat huo. Iesen iau sip bia ni lat sen mon no kabai tano udahat Watong Jisas Krais. Kaia ra ula kabai iau ga maat talur ira magingin tano ula hanuo ma kaike ra magingin diet ga maat talur iau.
GAL 6:15 Ma bia da kut ira palatamai dahat bia pa di kut, a linge bia mon. Iesen no linge tamat bia dahat a sigar na hakhakisi ta God.
GAL 6:16 Ma diet ing diet na hanahaan haruat ta iakano ira nugu nianga, io, iau saring God bia na tar ra malum ma ra harmarsai ta diet ma tano Israel gar ta God.
GAL 6:17 Io, waak um tikai bia na hapurpuruan habaling iau kanong ira horamanuo tano palatamaigu diet hamines bia iau gar ta Jisas.
GAL 6:18 Ira hinsakagu ta Krais, iau sasaring bia no harmarsai tano udahat Watong Jisas Krais na kis tika ma ira tanua muat. Amen.
EPH 1:1 Iau Pol tiga apostolo ta Krais Jisas haruat tano sinisip ta God. Ma iau pakat kaiken tupas muat ira matanaiabar tus ta God kaia Epesas, muat ira ut na nurnuruan tano numuat kinkinis ta Krais Jisas.
EPH 1:2 A harmarsai ma ra malum tupas muat meram ho God no adahat Sus ma no udahat Watong Jisas Krais.
EPH 1:3 A pirhakasing uram tupas God. Aie no God ma no Sus ana no udahat Watong Jisas Krais nong gate haidane dahat aram ra mawe ma ira linge bakut i haruat wara harharahut ira tanua dahat tano udahat kinkinis narako ta Krais Jisas.
EPH 1:4 Ma huo mah, ga gilamis dahat tano udahat kinkinis narako ta Krais menalua at tano hakhakisi tano ula hanuo waing pa da tale bia da kilam tar tiga nironga ta dahat ma sen dahat na halhaal sukun ira sakena ra matmataan tana.
EPH 1:5 God ga manga sip dahat kaik gaam puo tar menalua bia na halon hapatangen dahat wara natine tano udahat kinkinis narako ta Krais. Kanong warah, ga sip ma ga kanakana mah bia na gil huo waing dahat naga pirlat no uno maririsuan na harmarsai nong ga tabar bia mon dahat mei tano udahat kinkinis narako ta iakano tunotuno nong God i la manga sip tar ie.
EPH 1:7 Dahat kis narako ta Krais, kaik gaam kul halangalanga dahat ma no dena ing God ga lik luban se ira udahat magingin sakena. Ma ing ga gil huo taar ta dahat ga gil haruat ma no uno harmarsai nong i tamat sakit, iakano harmarsai nong God ga manga tabar dahat mei ma ra tamat na minminonas tika ma ra nesnes kilam ta ira linge bakut.
EPH 1:9 Ira linge God ga kanakana bia na gil, ga bul no uno lilik bia na gil sot narako tano nilon ta Krais. Hokaiken, ga hapalaine dahat ta ira linge ing i sip bia na gil ing ga susuhai menalua.
EPH 1:10 Ma na papalim haruat ma iakano lilik tano pakana bung tus ta kaiken ra linge bia ira linge bakut aram ra mawe ma mekai tano ula hanuo mah diet naga hanuat hurlungen menapu ta Krais.
EPH 1:11 God i la gilgil ira linge bakut haruat ma no uno lilik i hanuat meram narako tano uno sinisip. Hokaiken, tano udahat kinkinis narako ta Krais, God ga gilamis leh dahat wara uno matanaiabar tus kanong ga puo tar at menalua huo haruat ma no uno lilik.
EPH 1:12 Ma ga gil huo waing dahat ing dahat te nanaho taar ma ra nurnuruan ta ira linge narako ta Krais, dahat ra burena bia a pirhakasing na tupas no minarine God.
EPH 1:13 Ma muat kis narako ta Krais mah kanong muat te hadade no hinhinawas utano tutun, no tahut na hinhinawas nong i kap hawaat no numuat harhalon. Ma ing muat ga nurnur, God ga bare bat muat ma no Halhaliana Tanuo wara uno tus, iakano Tanuo ing God ga kukubus taar ta dahat utana.
EPH 1:14 Ga tabar dahat ma no Halhaliana Tanuo wara tartar bat no pinlawe dahat ing dahat na kap namur. Hokaiken, no Tanuo i suro haut bia God na tinane tutun dahat ira uno tus at, dahat ing God gate kul halangalanga dahat.
EPH 1:15 Ma iakano no burena bia iau la saasaring uta muat. Iau ga ser leh ira numuat nurnuruan tano Watong Jisas ma ira numuat harmarsai uta ira matanaiabar tus ta God. Kaik tuk taar kaiken iau pai sangeh wara tangtanga tahut tupas God wara gaie muat ing iau la kilkilam muat narako ta ira nugu sinasaring.
EPH 1:17 Iau la sarsaring haitne no God tano udahat Watong Jisas Krais, aie no adahat tamat na Sus, bia na tabar muat ma ra mintot ma na hapuasne ira tutun utana taar ta muat, waing muat naga manga nunure timaan ie kaiken ta ing muat ga nunurei nalua.
EPH 1:18 Iau sasaring mah bia na hamadaraasne ira bala muat, muat naga nunure ira linge ing i tahuat tano uno tintau tupas muat ing muat nanaho ma ra nurnuruan urie, ma bia muat naga nunure no tamat na maririsuan na pinlawe muat ing muat ira uno matanaiabar tus, muat na hatur kawasei meram ho ie, ma bia muat naga kilingane mah no uno tamat na baso sakit nong i la paapalim nalamin ta dahat ira ut na nurnuruan mei. Iakano baso i haruat ma no uno tamat na dadas nong God ga papalim mei ing ga hatut habaling Krais sukun ra minaat ma ga tar ra kinkinis tana tano kata na limana aram ra mawe.
EPH 1:21 Ma no uno kinkinis huo i manga tamat sakit ta diet ing diet te kap ra kinkinis na harkurai ma diet ira ut na harbalaurai ma diet ira mes na dadas na lualua mah. Ma no hinsana i manga tamat sakit mah ta ira hinsang bakut kaiken ma ta iakano mes na pakana bung nong na hanuat namur.
EPH 1:22 Ma God ga bul hasur ira linge bakut menapu ta ira lapara kaki Krais. Aie no tamat na lualua ta ira linge bakut ma God ga tar ie huo taar ta ira matanaiabar na lotu, diet no palatamaine ing Krais i hakidilona diet, aie nong i la hakidilona tutun ira linge bakut.
EPH 2:1 Ma muat, muat gate maat taar ing muat ga gil ira nironga ma ira magingin sakena.
EPH 2:2 Menalua muat ga lalon mur kaike ra sakana magingin ing muat git murmur ira tintalen ta iakan ra ula hanuo ma muat git tartaram nong i la kurkure tar ma i la balbalaure no mauho aram naliu. Ma aie nong i la balaure tar no mangana lilik nong i kis taar kaiken narako ta ira ut na takmaluk.
EPH 2:3 Ma dahat bakut, dahat ga lon nalamin ta diet ira ut na sakena nalua. Dahat git gilgil haruatne ira masmasingan tano sakana palpal narako ta dahat. Dahat git murmur kaike ra sakana sinisip ma ra lilik. Hoing diet ira mes, dahat pa ga tale bia dahat na papas tano ngalngaluan ta God.
EPH 2:4 Iesen no harmarsai ta God i manga tamat sakit tupas dahat ma God ga manga sip dahat.
EPH 2:5 Dahat gate maat ta ira udahat nironga, ma sen balik God ga halon dahat tika ma ne Krais. Kanong warah, ga marse dahat gaam sip dahat. God ga halon muat ma no uno harmarsai nong ga tabar bia mon muat mei.
EPH 2:6 Ma tano udahat kinkinis narako ta Krais, God ga hatut habaling muat tika ma ne Krais ma ga tar ra kinkinis taar ta muat tika mei aram ra mawe.
EPH 2:7 Ga gil huo waing ira tahtahut ing ga gil tar ta dahat tano udahat kinkinis narako ta Krais naga hamines ta ira bungbung namur bia no uno harmarsai i manga tamat sakit.
EPH 2:8 Ma iakan i palai kanong tano numuat nurnuruan God i te halon muat ma no uno harmarsai nong ga tabar bia mon muat mei. Pai burena at ta muat. A hartabar ta God ie.
EPH 2:9 Ma pai burena ta ira numuat gingilaan waing tikai pa na tale bia na sa butbut.
EPH 2:10 Hokaiken, dahat ira gingilaan ta God. Ma tano udahat kinkinis narako ta Krais, God ga hakisi dahat bia dahat na gil ira tahut na gingilaan, kaike ra gingilaan ing God ga huna tagure bia dahat na lon haruat me.
EPH 2:11 Hokaiken, muat ing muat pai Iudeia, muat hadade. Ira Iudeia ing diet kut ira palatamai diet, diet kilam muat bia “a tabuna kut palatamainari muat.” (Iakano magingin ira tunotuno mon diet gil ma ira lima diet.) Io, muat um, i tahut bia muat na lik leh no mangana kinkinis muat ga kis huo menalua.
EPH 2:12 Muat na lik leh bia ta iakano pakana bung nalua, muat ga kis sisingen talur Krais. Pa di ga kanan wara waswas halaka muat tano huntunaan Israel. Taie ta pinlawe muat ta ira kunubus God ga puo tar. Taie tiga linge bia muat naga nanaho ma ra nurnuruan urie kai tano ula hanuo ma muat pa ga nunure ta dahin ta God ing muat ga lon kai napu.
EPH 2:13 Iesen kaiken tano numuat kinkinis narako ta Krais, muat ing ira numuat mangana nilon ga tapaka nalua, God i te kap hutaten um muat ma no dene Krais.
EPH 2:14 I ngan huo kanong Krais at no udahat malum. Aie at nong ga gil pakur ira iruo huntunaan bia na kapawena mon. Ga waak se ira harkurai ta Moses, kaike ira tirihuana hartula ing ga hatahuat ra bala ngungut nalamin ta dir. Ing ga gil huo ga dure hasur no balo nong ga harbasiane kaike ira iruo huntunaan. Ma ga gil huo waing meram narako tana at naga hatahuat tiga sigar huntunaan ta kaike ira iruo. Ma bia ga pakile huo, ga hatahuat ra malum.
EPH 2:16 Ga bul dir tano kapawena palatamaine mon ma tano ula kabai ga sip bia na hamaraam dir bakut huo tika ma God. Ma ta iakano uno minaat ga hapataam no udir bala ngungut mah.
EPH 2:17 Ga hanuat ma ga harpir ma no tahut na hinhinawas nong i tar ra malum. Ga harpir huo taar ta muat ing muat ga tapaka ta God ma taar ta diet ing diet ga hutet tana.
EPH 2:18 Krais ga tale bia na gil huo kanong aie nong ga papos no ngaas bia dahat bakut ira iruo huntunaan, dahat naga haan tupas no adahat Sus kanong dahat kis narako tano kapawena Tanuo mon.
EPH 2:19 Io kaik, muat pai ira mes na tunotuno baling um kaiken. Taie. Muat harahinsakaan ma ira matanaiabar tus ta God ma muat tano uno hatatamaan.
EPH 2:20 Muat hoing tiga hala God i hatur naliu ta ira kasong. Ma ira kasong, diet ira apostolo ma ira tangesot. Ma Krais Jisas at, aie no tamat na kasong nong i sukal hatatik no hala bakut.
EPH 2:21 Ma no hala bakut i harpasum timaan narako ta Krais, kaik i tahuat hoing tiga halhaliana hala utano Watong.
EPH 2:22 Ma tano udahat kinkinis narako ta Krais, God i la bulbul pakur dahat ing i la paapalim ma dahat wara pakpakile tiga hala nong aie at na kis narako tana. Ma na kis tana hohe? No Tanuana at na kis narako tana.
EPH 3:1 Io kaik um, iau wara sinasaring uta muat, iau Pol nong di te wis kawase iau utano nugu pinapalim ta Krais Jisas ma wara gaie muat ing muat pai Iudeia.
EPH 3:2 Ai, a tutun sakit muat te hadade bia God i te tar iakan ra pinapalim tagu bia ni tabar muat ma no uno harmarsai, naka?
EPH 3:3 Hokaiken, God ga hapuasne tar tagu no linge nong ga susuhai nalua bia ni palai utana, hoing iau te pakat ira da nianga kai ukatiga ho muat.
EPH 3:4 Ma ing muat na was ing iau te pakat, na tale bia muat na nes kilam bia iau palai tano linge nong ga susuhai nalua ma i te hanuat puasa um narako ta Krais.
EPH 3:5 God pa ga hapalaine ira tunotuno menalua uta iakan ra linge iesen kaiken um no Halhaliana Tanuo i te hapuasnei taar ta ira uno halhaliana apostolo ma ira tangesot.
EPH 3:6 Ma no linge nong ga susuhai ma i te hanuat puasa um, aie hoken. Diet ing diet pai Iudeia, diet na hatur kawase no pinlawe diet haruat ma ira Iudeia mah ing bia diet taram no tahut na hinhinawas. Ma diet ira sumsubana mah tika ma ira Iudeia tano kapawena palatamaine. Huo mah, diet tika ma ira Iudeia, diet bakut diet na kap ira haridaan God ga kukubus taar ta diet urie narako ta Krais Jisas.
EPH 3:7 Ma God ga tabar bia mon iau ma no uno harmarsai nong ga papalim narako tagu mei haruat ma no uno dadas bia iau tiga tultulai ta iakan ra tahut na hinhinawas.
EPH 3:8 Iau no hansiksik sakit ta ira matanaiabar bakut ta God iesen God ga tabar bia mon iau ma iakan ra bilai na pinapalim bia ni harpir nalamin ta diet ing diet pai Iudeia uta ira bilai na linge ta Krais ing i kalkalala bia da hapupuo, ma bia ni hapalaine mah ira tunotuno bakut bia God i gilgil hohe ta ira linge i sip bia na gil ing ga kis susuhai ta ira tintinahon menalua kaia ho ie nong ga hakisi ira linge bakut.
EPH 3:10 Ma God ga tar iakan ra pinapalim tagu bia ira lualua ma ira mangana ut na harkurai aram ra mawe diet na nes ira matanaiabar na lotu, diet naga palai kaiken ta ira matahu minminonas ta God.
EPH 3:11 Menalua ta ira linge bakut God ga bul no uno lilik bia diet na palai huo tano uno minminonas ma i te gil haruatne um iakano uno lilik ta Krais Jisas no udahat Watong.
EPH 3:12 Ma no udahat nurnuruan ta Krais i te papos no ngaas tupas God, ma tano udahat kinkinis narako ta Krais dahat la hanahaan ra matmataan ta God ma ra gasgaas ma ra balaraan.
EPH 3:13 Io kaik, iau saring muat bia ira numuat lilik pa na malmalungo uta ira mangana ngunngutaan i kabit iau uta muat kanong kaiken ra ngunngutaan diet te tar no maririsuan na kinkinis taar ta muat.
EPH 3:14 Io, ma kaike ra linge iau te tange no burena ing iau singa bukunkek ra matmataan ta Mama, nong ga hatahuat ira hunhuntunaan bakut aram ra mawe ma kai napu ra pise.
EPH 3:16 Iau saring God bia tano uno tamat na minamar sakit na hadadas kenam narako tun at ta muat ma no baso tano Tanuana, waing tano numuat nurnuruan Krais naga lon ta ira kati muat, waing ira numuat harmarsai naga tur dadas taar hoing tiga daha i hasur boline. Io kaik, iau sasaring bia muat tika ma ira matanaiabar ta God bakut, muat naga tale bia muat na nunure kilam no taptapegas ma no taltalona ma no nalnaliu ma no napnapu tano harmarsai ta Krais bia i huat he.
EPH 3:19 Hokaiken iau sasaring bia muat naga kilingane no harmarsai ta Krais nong i tur lake ira mangana harmarsai bakut ing ira matanaiabar diet na tale bia diet na nunure kilam. Ma iau sasaring huo waing muat naga hung haruat ma ira bilai na linge ing God i la hung taar me.
EPH 3:20 Ma God nong i tale bia na manga gil lake ta ing dahat saring ma dahat lik, haruat ma no uno dadas nong i la paapalim narako ta dahat, io, a pirhakasing tupas ie mekaia ta ira matanaiabar na lotu ma mekaia hone Krais Jisas ta ira bungbung bakut namur ma pa nale pataam. Amen.
EPH 4:1 Io kaik, iau nong di te wis kawase iau utano nugu pinapalim tano Watong, iau haragat muat bia muat na mur no mangana nilon i haruat ma no tintau nong God ga tatau muat mei.
EPH 4:2 I tahut bia muat na lon hoing ira matien na tunotuno ma bia muat na manga bul hanapu habaling muat. Muat na bala maat ma muat na balane ira mes ma ra harmarsai ing diet gil harongane muat.
EPH 4:3 Muat na manga walar bia muat na palim hadadas no numuat magingin na tuntunur tika ing muat hatur kawasei mekaia tano Halhaliana Tanuo. Ma muat na tur tika huo hohe? Muat na kis ma ra malum ta muat hargilaas, iakano malum nong i wis pakur muat bia muat na kapawena mon.
EPH 4:4 Tikai mon no palatamaine ma tiga Tanuo mon. Huo mah, tikai mon iakano nong God ga tatau muat utana nong muat nanaho ma ra nurnuruan panei.
EPH 4:5 Tiga Watong, tiga mangana tintalen na nurnur, ma tiga magingin na baptais mon.
EPH 4:6 Tiga God mon ma aie sen mon no Mama ta dahat bakut. Aie i tamat ta dahat bakut, i papalim nalamin ta dahat bakut, ma iakana narako ta dahat bakut.
EPH 4:7 Iesen Krais ga tabar bia dahat bakut tikatikai ma ira hartabar haruat ma ira mangana hartabar ing at ga hartabar me.
EPH 4:8 Iakano i haruat ma no nianga ta God di ga pakat ie i tange bia, “Ing ga hanut uram naliu, ga lamus ira haleng na hiruo ing diet ga kis taar ta ira udiet winwisaan, ma ga tar ra hartabar taar ta ira tunotuno.”
EPH 4:9 Ma bia no pakpakat i tange bia “Ga hanut,” io, i kukuraina hoken bia ga hansur mah ukai napu tano ula hanuo.
EPH 4:10 Ma aie nong ga hansur, aie at mon iakanong ga hanut uram naliu gaam manga sakit no ula mawe. Ma ga gil huo bia na kis ta ira matahu linge bakut.
EPH 4:11 Ma aie at nong ga tar ira apostolo, ira tangesot, ira ut na harpir, ira ut na harbalaurai ma ira tena harausur wara tangtagure ira matanaiabar tus ta God bia diet naga gil ira pinapalim na harharahut waing dahat no palatamai Krais, dahat naga tahuat dadas, tuk taar bia dahat bakut dahat na tikai mon ta ira linge dahat nurnur ine ma tano udahat mintot utano Nati God, ma bia dahat naga patpatuan timaan mah ma bia ira udahat tintalen na haruat ta ira bilai na tintalen sakit ta Krais.
EPH 4:14 Io kaik, dahat pai bana baling bia ira pakananoh na se hurbitane dahat. Huo mah, ira ut na hasakit diet pai tale bia diet na lamus hurbitane dahat ma ira udiet harausur hoing ira dadaip i pupuh hurbitane ira linge. Diet pa na petlaar wara lamlamus habato dahat ma ira udiet keskes na hartuam taar ta ira nironga.
EPH 4:15 Iesen dahat pa na gil huo. Dahat na tar ra harmarsai ta ira tunotuno ma dahat na tange ira tutun taar ta diet. Ma ing dahat na tatalen huo dahat na patpatuan haruat ma no ulu dahat, aie ne Krais.
EPH 4:16 Ra hena ira uno harharahut ira singarena bakut tano palatamaine, diet harpasum tika. Ma ira lalos na harpasum diet palim dit tikane huo no palatamaine bia pa na talapus. Ma bia ira sumsubaan bakut tano palatamaine diet gil ira udiet pinapalim tus tikatikai, io, no kidilona palatamaine na tahuat dadas tano tintalen na harmarsai.
EPH 4:17 Hoing iau te tange tar, meram narako tano nugu kinkinis tano Watong iau manga hakatom muat bia muat pa na lalon haruat baling ma ira tabuna nurnuruan ing a tatahunena ira udiet lilik.
EPH 4:18 A kankadowana ira udiet lilik ma diet kis sisingen talur no nilon ta God kanong pataie ta palai ta diet. Ma diet pai palai kanong i dadas ira bala diet.
EPH 4:19 Diet pai tale bia diet na nes kilam ira tahut ma ira sakena, kaik diet te tar habaling diet taar ta ira magingin na hilawa wara gilgil haitne ira mangana bilingana magingin, ma diet sunang tartar taar um wara gilgil haitne.
EPH 4:20 Iesen muat balik, ing muat ga harausur uta Krais, muat pa ga harausur ta ira magingin huo.
EPH 4:21 A tutun sakit muat ga hadade uta Krais ma muat te kap ra harausur utana haruat ma ira tutun ta God i kis ta Jisas, naka?
EPH 4:22 Muat ga kap ra harausur uta ira numuat mangana nilon ing muat git lalon huo menalua. Muat ga harausur bia muat na kap se no tuarena nilon nong i wara marmarsang ta ira uno sakana sinisip ing i la lamlamus habatoi.
EPH 4:23 Ma muat ga harausur mah bia ira numuat lilik na sigarine, ma bia muat na sigam no sigar nilon nong God ga hakisii bia na tatalen hoing aie at ta ira takodasuana ma ira halhaliana magingin haruat ma ira tutun ta God.
EPH 4:25 Io kaik, muat na kap se no magingin na harabota ma muat bakut tikatikai muat na tange ra tutun hargilaas ta muat ira harahinsakaan narako ta Krais, kanong dahat bakut dahat ira sumsubaan tano kapawena palatamaine.
EPH 4:26 Ing bia muat ngalngaluan, waak muat gil ta ronga. Waak um bia no kasakes i suguh ma ira numuat ngalngaluan baak kana.
EPH 4:27 Ma waak muat tar mauho taar ta Sataan bia na gil tiga linge.
EPH 4:28 Ma nong git kikinau, waak bia i kikinau baling. Iesen i tahut bia na papalim ma ira limana tus wara gilgil ira pinapalim a mon hunena, waing naga tale bia na tabar diet ing audiet mon sunupi.
EPH 4:29 Waak bia tiga katona sakana nianga na puko suur ta ira ha muat. Iesen i tahut bia muat na tange sen mon ira mangana nianga ing i haruat bia na harahut ira mes ta ira udiet sunupi, waing muat naga hatahutne diet ing diet hadade.
EPH 4:30 Ma waak muat hatapunuk no Halhaliana Tanuo ta God, no Tanuo nong ga bare bat muat wara gar ta God, a hakilang ie tuk taar ta iakano bung bia God na halangalanga ise muat.
EPH 4:31 Muat na kap se ira bala ngungut bakut ma ira mangana ngalngaluan ma ira dadas na harngangaar. Waak muat mur no tintalen na kamahar malus. Waak muat tange hagahe tikai ma muat na kap se ira mangana sinisip wara hangungut ira mes.
EPH 4:32 Ma muat na gil ra tahut tika ma ra harmarsai hargilaas ta muat. Muat na lik luban se ira numuat nironga hargilaas ta muat hoing ta ira pinapalim ta Krais, God ga lik luban se ira numuat.
EPH 5:1 Io kaik, muat na tatalen hoing God kanong muat ira natine ing i manga sip muat.
EPH 5:2 Muat na lon ma ra magingin na harmarsai hoing at mon Krais ga marse dahat ma ga tar se no uno nilon wara gaie dahat hoing tiga hartabar ing i huhur kala mismisien tupas God.
EPH 5:3 Muat na harbalaurai timaan bia taie ta tikai pa na tale bia na tange bia muat hutet tano magingin na hilawa bia ira bilingana magingin huo, ma bia muat pai nes kalak mah ira linge gar na mes. Waak bia muat mur kaiken ra mangana magingin kanong ira halhaliana tunotuno tus ta God diet pai tatalen huo.
EPH 5:4 Ma waak muat pipinas. Waak muat tange ira nianga na ba mon huo, bia ira bilingana hinasakit ta kaike ra linge. Pai haruat bia muat ira mangana tunotuno hokaike muat na ianga huo. Iesen i tahut balik bia muat na tanga tahut tupas God.
EPH 5:5 Muat naga palai um bia pataie tikai nong i mur ra magingin na hilawa bia ira mangana bilingana tintalen pa na laka tano kinkinis na harkurai ma ra harbalaurai ta Krais ma God. Huo mah ta tikai nong i la nesnes kalak ira linge gar na mes (tiga mangana tunotuno huo i haruat ma tikai nong i lotu tupas ira palimpuo). Aie mah pa na laka.
EPH 5:6 Waak muat bale leh tikai bia na habato lamus muat ma ira pabona nianga. Kaiken ra mangana magingin no burena bia no ngalngaluan ta God na puko burung diet ira ut na takahaat.
EPH 5:7 Io kaik, waak muat harwis ma diet.
EPH 5:8 Muat git kiskis tano kankado iesen kaiken um tano numuat kinkinis narako tano Watong, muat kis tano madaraas. I tahut bia muat na lon hoing ira nat na madaraas.
EPH 5:9 (Ma no hunena ta diet ing diet kis tano madaraas aie hoken, bia ira tahut na magingin bakut, ma ira magingin takodas, ma ira magingin haruat ta ira tutun God i te hapuasne.)
EPH 5:10 Ma i tahut mah bia muat na silihe bia a mangana tintalen hohe ing God i kanakana urie.
EPH 5:11 Muat na tapaka talur ira magingin na kankado ing pataie ta hunena. Iesen muat na bul hamadaraasne balik kaiken ra magingin.
EPH 5:12 Kanong warah, i hahirhir dahat bia dahat ianga mon uta kaiken ra linge ing ira ut na takmaluk diet gil suhe.
EPH 5:13 Ma bia no lulungo i murarang taar ta tiga linge, i hanuat palai bia a mangana linge sai.
EPH 5:14 Hokaiken, bia no madaraas i hapalaine tiga linge, iakano linge na ngan hoing no lulungo. Ma iakano no burena kaik di gaam tange bia, “Augu nong u kumkubaba, nu tangahun, ma nu tut hut sukun ra minaat, ma ne Krais na murarang sare ugu.”
EPH 5:15 Io kaik, muat na harbalaurai timaan bia muat na lon hohe. Waak muat lon hoing diet ing diet pai palai ta ira bilai na magingin. Taie. Muat na lon hoing diet ing diet mintot ta ira tahut.
EPH 5:16 I tahut bia muat na gil ira bilai ta ira pakana bung bia i tale muat bia muat na gil huo, kanong kaiken ra bung diet sakena.
EPH 5:17 Hokaiken, waak muat tatalen hoira ba. I tahut bia muat na palai bia asa ing no Watong i sip bia muat na gil.
EPH 5:18 Waak muat manga mame ira dadas na taah. Iakan ra magingin i hatahuat ira haleng na sakena. Iesen i tahut bia muat na hung ma no Halhaliana Tanuo.
EPH 5:19 Muat na ianga hargilaas ma ira nianga ta ira mangana halhaliana ninge. Muat na inge tupas no Watong ma muat na pit garaan ie meram narako ta ira bala muat.
EPH 5:20 Ma tano hinsana no udahat Watong Jisas Krais, muat na tanga tahut hait tupas God no adahat Sus uta ira linge bakut.
EPH 5:21 Ma i tahut bia muat na hanapu hargilasane habaling muat kanong muat manga ru Krais.
EPH 5:22 Muat ira hahin, muat na hanapu habaling muat ra hena ira numuat tunaan, ma bia muat gil huo, muat te gil mah tano Watong.
EPH 5:23 I tahut bia muat na gil huo kanong no tunaan i tamat ta dir ma no uno hahin hoing Krais mah i tamat ta ira matanaiabar na lotu ma aie at nong ga halon diet, diet no palatamaine.
EPH 5:24 Ma hoing ira matanaiabar na lotu diet hanapu habaling diet ta Krais, na tahut bia ira hahin diet na hanapu habaling diet ra hena ira udiet tunaan uta ira linge bakut.
EPH 5:25 Muat ira tunaan, muat na manga marse ira numuat hahin hoing Krais ga manga marse ira matanaiabar na lotu ma ga tar habaling at ie uta diet bia na hagamgamatien diet ing i kapal diet ma ra taah ma no nianga waing diet naga halhaal.
EPH 5:27 Ma Krais ga gil huo bia diet na manga melmel na tunotuno ma taie ta rungrugut bia ta mangana bilinge bia ta tiga mes na saksakena ta diet, ma na lamus leh diet ukaia ho ie. I sip bia diet na manga gamgamatien ma diet na bilai harsakit ta ira udiet nilon.
EPH 5:28 Huo mah, i tahut bia ira tunaan diet na manga marse ira udiet hahin hoing diet marse habaling at ira palatamai diet. Ma sige nong i marse no uno hahin, i marse habaling at ie.
EPH 5:29 Ma i palai bia iakano i tutun kanong taie tiga nong pai la malmalentakuane habaling no palatamaine, iesen i la balbalaure timaan ie ma i iaan timaan. Ma Krais i la gilgil mah huo ta ira matanaiabar na lotu.
EPH 5:30 Kanong warah, dahat ira sibana tano palatamaine.
EPH 5:31 “Hokaiken, no tunaan naga haan sukun no ana sus ma no pawasine, ma dir na kis tika ma no uno hahin. Ma dir na tikai mon.”
EPH 5:32 A tamat na linge iakan nong ga susuhai ma i te hanuat puasa um. Ma sen iau, ing iau tange huo, iau iangianga uta Krais ma ira matanaiabar na lotu.
EPH 5:33 Iesen iakan ra nianga i tutun mah uta muat. I manga tahut bia ira tunaan tikatikai na manga marse no uno hahin hoing i marse habaling at ie, ma bia no hahin na manga urur tano uno tunaan.
EPH 6:1 Muat ira bulu ma ira hinasik, muat na taram ta ira amuat sus ma ira pawasi muat. Iakan ra magingin i haruat ma no numuat kinkinis tano Watong ma i takodas mah.
EPH 6:2 “Ru no am sus ma no pawasim.” Iakano hartula ta ira harkurai ta Moses, aie no luena hartula ing God ga bul tiga kunubus taar tana bia nu kap ta bilai ing bia nu mur iakano hartula.
EPH 6:3 Ma iakano hartula i tange bia nu urur huo “waing naga tahut utaam ma na talona no num nilon kai ra pise.”
EPH 6:4 Muat ira adiet sus ira bulu ma ira hinasik, waak muat hangalngaluan ira nati muat. Iesen ing muat halhalon diet i tahut bia muat na pir diet ma muat na hausur timaan diet hoing no Watong i sip bia muat na gil huo.
EPH 6:5 Ma muat ira maris na tultulai, muat na taram ta ira numuat tamat mekai napu ma ra but na urur sakit ma ra tutun aram narako ta ira bala muat hoing muat gor taram ta Krais.
EPH 6:6 Waak muat taram ta diet tano pakana bung sen mon diet ngok taar ta muat bia diet naga kanakana. Taie. Muat na taram ta diet hoing muat ira tultulai ta Krais. Ma ing muat gil huo meram narako ta ira bala muat, muat na gil haruatne no sinisip ta God.
EPH 6:7 Ma na tahut bia na mamahien ira numuat lilik uta ira numuat pinapalim na tultulai, hoing bia muat papalim tupas no Watong, ma pataie bia ira tunotuno mon.
EPH 6:8 I tahut bia muat na papalim huo kanong muat nunure tar bia no Watong na kul ira tunotuno tikatikai, bia a tultulai ie bia pai tultulai, haruat ma ira bilai na tintalen ing i gil.
EPH 6:9 Ma muat ira tamat, muat na gil mah huo ta ira numuat tultulai. Waak muat mang diet. Muat nunure bia no udiet Tamat, aie nong anumuat Tamat mah ie, ma i la kis taar aram ra mawe ma i la kurkure ira matanaiabar bakut ma tiga takodasuana harkurai sen mon. Pa na habilai tikai ma na hagahe bia tiga mes.
EPH 6:10 Io, ma wara hapataam ira nugu nianga, iau tange bia muat na kap dadas meram narako tano numuat kinkinis tano Watong ma mekaia ho no uno but na baso.
EPH 6:11 Muat na sigam bakut ira linge na hinarubu meram ho God waing muat naga petlaar wara turtur bat ira hartuam ta Sataan.
EPH 6:12 Muat na sigam kaiken ra mangana linge na hinarubu huo kanong dahat pai la harharubu ma ira tunotuno mon. Taie. Dahat la harharubu ma ira lualua ma ira ut na harkurai ma ira ut na dadas ta iakanin ra kankado na ula hanuo. Dahat la harharubu huo ma ira sakana tanuo meram ra mawe.
EPH 6:13 Io kaik, muat na sigam bakut ira linge na hinarubu meram ho God ma bia no sakana bung i haan tupas muat, muat naga petlaar bia muat na harubu timaan. Ma ing bia muat te manga taguro um huo, muat na tur dikdikit taar.
EPH 6:14 Muat na tur dikdikit hoken. Muat na taltalin ma no tutun. Muat na sigam ira magingin takodas hoing tiga umri na sigam tiga dadas na sigasigam wara balbalaure no bangbangona. Ma muat na sigam ira pala lamaas na tinaguro ta ira kaki muat, a mangana tinaguro i hanuat mekaia tano tahut na hinhinawas utano malum.
EPH 6:16 Ma taie bia kaike ra linge sen mon. Muat na kap mah ira bahbahit na nurnuruan ing na tale bia muat na papalim me wara bingbing ira lulungo na rumus tano laplapot tano Ut na Sakena.
EPH 6:17 Muat na kuhe no numuat harhalon ma muat na palim leh ira nianga ta God hoing ira wise na hinarubu tano Halhaliana Tanuo.
EPH 6:18 Ma muat na sasaring hait ma ira mangana sinasaring ma no harharahut tano Halhaliana Tanuo. Muat na lik leh kaiken ra linge bia muat na tur na tinaguro ma muat pa na sangeh, ma sen muat na sasasaring uta diet ira matanaiabar bakut ta God.
EPH 6:19 Ma muat na sasaring mah utagu bia tano pakana bung iau wara nianga, God na tar ra nianga tagu bia ni ianga ma ra balaraan wara hapalaine ira tunotuno ta ira linge ing ga susuhai nalua ma kaiken i te hanuat puasa tano tahut na hinhinawas.
EPH 6:20 Ma iau kis kai ta ira winwisaan kanong iau tiga turturkiles ta iakano tahut na hinhinawas. Muat na sasaring bia ni ianga ma ra balaraan utano tahut na hinhinawas hoing i tahut bia ni ianga huo.
EPH 6:21 Io, ma Tikikus no bilai na tasi dahat nong i papalim timaan tano uno pinapalim na tultulai tupas no Watong, aie um na hinawase muat ta ira linge bakut waing muat naga palai bia no nugu kinkinis i ngan taar hohe.
EPH 6:22 No burena iakan iau nigi tulei ukaia ho muat bia muat naga nunure bia iau lon hohe ma bia naga haragat muat.
EPH 6:23 Iau sasaring bia God no adahat Sus tika ma no Watong Jisas Krais na tar ra malum tupas muat ira harahinsakaan narako ta Krais. Ma iau sasaring bia na hadadas ira numuat nurnuruan ma ira numuat harmarsai hargilaas.
EPH 6:24 A harmarsai meram naliu tupas diet bakut ing diet sip no udahat Watong Jisas Krais ma ra mangana sinisip ing pa nale pataam.
PHI 1:1 Iau Pol, mir ma ne Timoti, mir ira iruo ut na tinaram tano pinapalim ta Krais Jisas. Ma mir tule ken ra nianga tupas muat ira matanaiabar tus ta God ing muat kis narako ta Krais Jisas kaia Pilipai. Ma mir tule ken ra nianga mah tupas ira iruo mangana lualua na lotu, muat ira kabinsit ma muat ira ut na harharahut.
PHI 1:2 A harmarsai ma ra malum ta muat meram ho God no adahat Sus ma mekaia ta Jisas Krais no Watong.
PHI 1:3 Ma iau tanga tahut tupas God uta ira pakana bung bakut ing muat ga lik leh iau muat gaam tar ra harharahut tupas iau.
PHI 1:4 Ta ira bung iau la saasaring ta muat, iau la saasaring ma ra gungunuama kanong muat te tur tika ma iau tur leh mekaia tano luena bung tuk taar katin ta iakan ra pinapalim tano tahut na hinhinawas.
PHI 1:5 Ma iau la saasaring ma ra gungunuama huo mah kanong iau nunure tun at bia aie nong ga haburen no bilai na gingilaan narako ta muat na papalim hanahaan huo tuk taar bia na hapataam ie narako ta muat tano bung ta Krais Jisas.
PHI 1:7 Hokaiken, i tahut tagu bia ni kilingane iakan ra mangana kilkilinganai huo uta muat kanong muat kis taar narako tano katigu. God i te tabar bia mon muat ma ra harharahut bia muat naga tale wara turtur tika ma iau ta ira kaba linge sa i haan tupas iau. Bia iau kis taar kai ta ra winwisaan, bia iau tur bat ira hartutung tar tano tahut na hinhinawas, bia iau hatutun iakano hinhinawas, io, muat kakaap tika ma iau. Ma iakano no burena bia iau gi manga sip muat huo.
PHI 1:8 I tale bia God na suro haut ta ing no tingegu i manga mur muat haruat ma no harmarsai ta Jisas Krais tupas muat.
PHI 1:9 Ma iau sasaring bia no numuat harmarsai na tamtamat hanahaan ma bia no numuat mintot wara nunure kilam ira tahut ma ira sakena na kure timaan iakano harmarsai.
PHI 1:10 Iau sasaring bia muat naga ngan huo muat naga nes kilam ira linge i manga bilai sakit ma muat kabi puko ta ira linge i sakena, ma bia muat na tahut harsakit wara tangtagure muat wara utano bung ta Krais.
PHI 1:11 Ma iau sasaring mah bia ira numuat nilon na hung ma ra hunena no magingin takodas ing i hanuat meram narako tano numuat kinkinis tika ma Jisas Krais, ma bia ta ira hunue muat da pirlat ma da hatamat God.
PHI 1:12 Ira bar hinsakagu ta Krais, iau sip bia muat na palai bia ira linge ing i te hanuat tagu i te harahut balik no tahut na hinhinawas wara hinahaan harbasia.
PHI 1:13 Io kaik, ira umri tano tamat na lualua sakit kai, ma ira mes na tunotuno mah, diet nunure bia no winwisaan iau ga kap, uta Krais ie.
PHI 1:14 Ma no winwisaan di ga gil tagu, i te haragat halengin sakit ta ira hinsaka dahat tano udiet kinkinis narako tano Watong. Io, ta ing hokaiken, diet te manga balaraan wara hinarpir tano nianga gar ta God, ma taie ta bunurut i kis ta diet.
PHI 1:15 I tutun bia ari diet harharpir ta Krais kanong diet lilik sakasaka tano nugu kinkinis na lualua ma diet la bala ngungut taar tagu. Iesen ta ira mes, diet harharpir meram narako ta ira bilai na bala diet.
PHI 1:16 Ma diet kaiken ra tunotuno, diet gilgil huo ma ra harmarsai kanong diet nunure bia God i te tibe iau bia ni turtur bat ira hartutung tano tahut na hinhinawas.
PHI 1:17 Ma sen diet ira mes ing diet harpir ta Krais, diet harababo mon. Diet nes kalak ira mauho na kinkinis na tamat. Diet lik bia i tale diet bia diet na hatut purpuruan taar tagu ing iau kis taar ta iakan ra winwisaan.
PHI 1:18 Iesen taie ta linge. Bia diet na harpir ma ra harababo na lilik bia tutun na lilik, iakan pai tamat na linge. Iesen no linge i tamat, hoken, bia da mur ira ngaas bakut wara hinarpir ta Krais. Io kaik, iau guama um.
PHI 1:19 Io, ma iau ni guama hanahaan kanong iau nunure bia ira linge i te hanuat taar tagu na gil iau bia ni langalanga um ta ira numuat sinasaring ma tano harharahut mekaia tano Tanuo gar ta Jisas Krais.
PHI 1:20 Ma iau ni langalanga um huo haruat ma no nugu tamat na sinisip bia kabi gil tiga linge ing na hahirhir iau. Ma iau manga lik bia i tutun, bia pa ni gil huo. Iesen iau sip bia ni hung ma ra balaraan waing kaiken no nugu kidilona nilon na hatamat Krais hoing iau la gilgil hait huo. Ing bia ni lon bia ni maat, iau sip mon bia ni hatamat Krais.
PHI 1:21 Ma hokaiken, tano nugu lilik, bia ni lon, Krais no suruno tano nugu nilon. Ma bia ni maat, iakano na manga bilai tagu.
PHI 1:22 Ma bia ing iau lalon baak ta iakan ra palatamaigu iau nunure bia na mon hunena tano nugu pinapalim. Iau pai nunure bia ni gilamis gahim ta dir, kaik pai tale bia ni hinawas palai ta iakan.
PHI 1:23 No nugu sinisip i sapek harbasia ta dir. Iau sip bia ni haan talur iakan ra nilon uram ho Krais kanong iakano nong i manga tahut sakit.
PHI 1:24 Iesen i manga tahut wara gaie muat bia ni kis taar baak ta iakan ra lon.
PHI 1:25 Ma kanong iau manga palai bia no nugu nilon na harahut muat huo, iau gi nunure bia ni lon taar baak ma ni kis tika ma muat bia muat na tahuat hanahaan ta ira numuat nurnuruan ma bia muat na kap ra gungunuama ta ira linge muat nurnur ine.
PHI 1:26 Iau ni lon baak waing muat na manga pirlat Krais Jisas tano nugu hinanuat baling tupas muat.
PHI 1:27 Ma no tamat na linge aie hoken, bia muat na tatalen hoing no tahut na hinhinawas ta Krais i tange huo. Muat na tatalen huo waing nigi hadade ta linge uta muat. Bia i tale iau bia ni hanuat tupas muat bia pataie, io, iau sip bia ni hadade bia muat tur dadas ma tiga kapawena lilik ma bia muat walwalar ma ra baso hoing tiga kapawena tunotuno wara gaiena ira linge dahat nurnur ine meram narako tano tahut na hinhinawas.
PHI 1:28 Ma iau sip bia ni hadade mah bia pataie anumuat ta da bunurut uta diet ing diet sukuane muat. Kaiken ra linge i hamines hapalaine uta diet bia God na haliare diet ma sen na halon muat.
PHI 1:29 Kaiken ra linge na kabit muat huo kanong God i te tabar muat ma ra bilai na kinkinis wara gaie Krais ma hoken, bia muat na nurnur tana, sen bia pai iakano sen mon. Taie. Muat na kilingane mah um ra ngunngutaan utana.
PHI 1:30 Ma i palai bia muat te kap ra ngunngutaan huo kanong muat te laka mah tano hinarubu tika ma ira haraubaal nong muat ga nes bia ga kabit iau menalua. Ma hoing muat te hadade, iakano ra hinarubu at iau tur taar narako baak tana kaiken.
PHI 2:1 Io, ma no numuat kinkinis narako ta Krais i la habalaraan muat. No uno harmarsai i habaibai muat. Muat la tiktika ma no Halhaliana Tanuo. Muat gil ra tahut ma muat harmarsai hargilaas.
PHI 2:2 Kaiken ra linge i tutun. Io kaik, i tahut bia na tikai mon ira numuat lilik ma na tiga mangana harmarsai mon muat na hamines ta muat hargilaas. I tahut mah bia na tiga bala muat harbasia ma bia na tiga kapawena sinisip uta ira tintalen muat sip bia muat na mur. Ing bia muat na gil huo, iau ni manga kanakana sakit.
PHI 2:3 Waak muat gil ta linge wara hatahutne habaling muat sen, ma ira mes um pataie. Waak muat hatamat bia habaling muat. Iesen i tahut bia muat bakut tikatikai, muat na matien na tunotuno, muat naga lik bia ira mes diet tamat at ta muat.
PHI 2:4 Muat bakut tikatikai, muat pa na nagarane ira numuat linge sen mon, iesen ira linge gar na mes mah.
PHI 2:5 I tahut bia ira numuat mangana lilik na haruat ma no lilik ta Krais Jisas, ma i hoken.
PHI 2:6 Sige tun at Krais Jisas? I palai bia God at ie. A tutun, iesen ing Krais ga nes kilam bia i haruat ma God, pa ga lik bia na papalim ma no uno kinkinis na tamat wara hatahutne habaling ie.
PHI 2:7 Taie. Ga waak se no uno tamat na kinkinis ma ga kap no tintalen hoing tiga tultulai, di gaam kahai hoira tunotuno.
PHI 2:8 Bia di ga nes kilam ie bia a tunotunoi, ma ga hasiksik habaling ie ma ga taram God tuk taar tano uno minaat, a mangana minaat aram tiga ula kabai at.
PHI 2:9 Io kaik, God ga manga hatamat ie ma ga tar no hinsang tana nong i lua ta ira hinsang bakut.
PHI 2:10 Ga gil huo bia diet bakut aram ra mawe, ma kai ra pise, ma menapu mah tano pise, diet na singa bukunkek wara urur tano hinsane Jisas ma bia ira karame diet bakut na hinawas palai bia Jisas Krais a Watong ie. Ma ing diet na gil huo diet na hatamat God no adahat Sus.
PHI 2:12 Io kaik, ira nugu bilai na harwis, hoing muat git murmur no magingin na tartaram nianga ing iau ga kis tika taar ma muat, iau manga sip bia muat na taram nianga huo kaiken ing iau kis taar tapaka ta muat. Iau sip bia muat na walwalar ma ra baso ma ra tamat na urur ma ra dinedar bia muat na lon haruat ma no harhalon muat te hatur kawase.
PHI 2:13 Muat na lon huo kanong nong i papalim ma ra baso narako ta muat, aie ne God. I papalim narako ta muat bia muat na kanan ma muat na petlaar wara gilgil haruat ma no uno bilai na sinisip.
PHI 2:14 I tahut bia ta ira linge muat gil, waak muat ngurungur bia hargor waing muat naga bilai harsakit ma tikai pa na tale bia na kilam tar tiga sakena ta muat. I tahut bia muat ira nati God ing pataie ta nironga ta muat ing muat lon taar nalamin ta diet ing diet halilie ira tutun ma i pusuko ira udiet tintalen talur ira takodasiana. Muat na pilpilakas nalamin ta diet hoing ira tiding aram ra mawe.
PHI 2:16 I tale bia muat na tatalen huo ing muat na tur dadas tano nianga na nilon. Muat na gilgil huo waing nigi latlaat tano bung ta Krais bia iau pai ga hilau harkoskos bia ma iau pai ga papalim bia.
PHI 2:17 Iesen bia ing a dadas na linge sakit i haan tupas iau, io, iau ni guama mon. Ira numuat nurnuruan i haruat ma ra hartabar na tuntuan muat gil tupas God. Ma ing bia di burange tar ira degu hoing tiga hartabar na wain aram naliu tano numuat hartabar, io, iau ni kanakana tika ma muat.
PHI 2:18 Io, muat mah, i tahut bia muat na kanakana ma muat na guama tika ma iau.
PHI 2:19 Ing bia no Watong i sip huo, iau sip bia ni tule hagasiaan Timoti ukaia ho muat, waing iau mah nigi kilingane ra gungunuama bia ni hadade ira hinhinawas uta muat.
PHI 2:20 Iau ni tulei kanong taie mah um ta tiga nong hutet tagu ing i tikai ira numir lilik wara gaie muat. Ma aie sen mon mah ing muat la kis taar tano katine.
PHI 2:21 Ira mes bakut diet mamai mur ira udiet sinisip at, ma pataie uta ira linge gar ta Jisas Krais.
PHI 2:22 Ma muat nunure tar bia Timoti i te hamines ta muat bia a bilai na tunotunoi. I te papalim tika ma iau hoing tiga bulu ma no ana sus ing mir ga papalim hoing ira tultulai tano tahut na hinhinawas.
PHI 2:23 Io kaik, iau sip bia ni tulei ukaia ho muat ing at mon bia iau palai bia a mangana linge sa na haan tupas no nugu nilon.
PHI 2:24 Narako tano nugu nurnuruan tano Watong iau nunure tar bia pa na halis ma iau mah, ni hanuat.
PHI 2:25 Iesen iau lik bia i manga tahut bia ni tule Epaparoditus no tasigu ta Krais ukaia ho muat. Aie nong i te papalim tika ma iau. Ma i te pusak mah ira tinirih tika ma iau narako ta iakan ra hinarubu. Ma aie mah no numuat tultulai nong muat ga tulei wara harharahut iau.
PHI 2:26 I tahut bia ni tulei kanong i manga marmaris ma i sip bia na nes muat. Ma i tahut mah bia ni tulei kanong ga manga tirih no uno lilik pane muat ing ga ser leh bia muat ga hadade utana bia i maset.
PHI 2:27 A tutun sakit bia ga maset ma ga wara minaat. Iesen God ga marsei. Ma taie bia aie sen. Ga marse mah iau, bia iau kabe kilingane tiga tamat na tapunuk sakit.
PHI 2:28 Io kaik, i manga mamahien no balagu bia ni tulei waing muat naga guama baling bia muat na nes ie, ma bia no nugu tapunuk naga napu hanahaan.
PHI 2:29 I tahut bia muat na bale leh ie ma ra kanakana hoing tiga tasi muat narako tano Watong. Muat na ruru ira mangana tunotuno hoing ie kanong ga hutet bia na maat wara gaiena no pinapalim ta Krais. A tutun, pa ga manga lilik utano uno nilon bia na hiruo. Taie. Ing muat pa ga petlaar bia muat na harahut iau, ga sip mon bia na kap no numuat mauho wara tahtaho iau.
PHI 3:1 Io, ma tiga linge mah bar hinsakagu ta Krais. I tahut bia muat na guama tano numuat kinkinis tano Watong. Pai tirih tagu bia ni pakat habaling kaiken ra linge tupas muat. Taie. Kaiken ra linge na hakatom mah muat.
PHI 3:2 Muat na balaure bat muat ta ira ut na gil sakena ing diet haruat hoira bilingana paap ma diet la kutkut haliare ira palatamai na tunotuno.
PHI 3:3 Iau tange huo kanong dahat at, dahat ira matanaiabar tutun ta God hoing no magingin na kunkutaan ta ira palatamainari git hakhakilang uta diet nalua. Dahat ira uno matanaiabar ing dahat lotu tupas God narako tano udahat kinkinis tano Tanuana. Dahat at ing dahat lat Krais Jisas ma dahat pai nurnur bia a mon harharahut ta ira magingin ma ira mangana kinkinis na nilon ta ira tunotuno mon.
PHI 3:4 A tutun bia pataie ta harharahut i tahuat laah ta ira magingin ma ira mangana kinkinis ta ira tunotuno, iesen iau balik, iau gor tale bia ni lik bia ira gingilaan ma ira mangana kinkinis ta ira tunotuno mon i tale bia na tar ra harharahut. Ing bia sige tiga nong i lik bia i tale bia na so no uno lilik ta ira uno gingilaan ma tano uno mangana kinkinis wara hatahutne habaling ie, io, gor manga tale tun at iau bia ni lik bia ira nugu gingilaan ma no nugu mangana kinkinis na nilon na hatahutne iau.
PHI 3:5 Kanong warah, di ga kut no palatamaigu tano liman ma itul na bung. Ma iau tiga tunotuno na Israel tano hun ta Beniamin. Iau ga mur ira magingin ta ira Israel sen mon. A Parisi iau, kaik iau gaam manga mur timaan ira harkurai ta Moses.
PHI 3:6 Ga manga mamahien no nugu sinisip wara murmur timaan God, kaik iau gaam helar ta ira matanaiabar na lotu gar ta Krais. Tano ninanaas uta ira harkurai ta Moses iau ga takodas harsakit, pa ga tale tikai bia na kilam tar tiga ronga tagu.
PHI 3:7 Kaike ra mangana linge ing iau ga lik nalua bia na hatahutne iau, io kaiken balik, iau nes kilam bia a linge na harhagahai kanong i wara turtur bat iau bia pa ni kap Krais.
PHI 3:8 Ma pataie bia kaike ra linge sen mon. Iau nes kilam bia ira gingilaan bakut a linge na harhagahai kanong i wara turtur bat iau bia kabe nunure Krais Jisas no nugu Watong. Io, ma wara nunure Krais, iakano no linge nong i manga tahut sakit. Ma iau te waak se ira linge bakut wara gaie Krais. Iau nes kilam kaike ra linge bia a mapus na kurkuruan kanong iau sip bia ni kap Krais ma bia ni hatur kawase tiga mangana kinkinis narako tana. Hokaiken, iau at pataie nugu ta takodasiana kinkinis ing ira harkurai ta Moses i tale bia na tar tagu ing iau mur kaike ra harkurai. Iesen iau takodas kanong iau nurnur ta Krais. Iakan ra takodasiana kinkinis i hanuat meram ho God ing tikai i nurnur.
PHI 3:10 Iau sip bia ni nunure Krais ma bia ni kilingane no dadas tano uno tuntunut hut sukun ra minaat. Iau sip mah bia ni tur tika mei ta ira uno ngunngutaan ma bia ni haruat mei tano uno minaat.
PHI 3:11 Iau wara kapkap iakan ra kinkinis narako ta Krais kanong iau manga sip bia ni tut hut sukun ra minaat.
PHI 3:12 Iau pai tange bia iau te pet haruatne bia iau te bilai harsakit. Taie. Iesen iau basbaso wara kapkap iakan ra kinkinis nong Krais ga kap iau bia ni hatur kawasei.
PHI 3:13 Ira bar hinsakagu ta Krais, ing iau nes habaling iau, iau pai lik bia iau te hatur kawase baak iakan ra kinkinis. Iesen tiga linge iau gil ma i hoken: iau pai lik leh ira linge iau te sakit. Taie. Iau manga baso bia ni tupas no linge menalua tagu.
PHI 3:14 Hokaiken, iau pai sangeh iesen iau manga baso tuk taar tano haphapataamne tano hilau harkoskos waing nigi kap no bilai na hartabar. Tano nugu kinkinis narako ta Krais Jisas, God ga tatau iau huo bia ni kap iakano hartabar aram naliu.
PHI 3:15 Io kaik, dahat bakut ing dahat te patpatuan ta ira linge gar ta Krais, dahat na kap iakan ra mangana lilik. Ma bia i mes ira numuat lilik uta tiga linge, io, God na hamadaraas ie ta muat.
PHI 3:16 Ma tiga tamat na linge aie hoken, bia dahat na lon mur iakano ngaas nong dahat murmur ie tuk taar kaiken.
PHI 3:17 Bar hinsakagu ta Krais, muat na tur tika wara murmur ira nugu mangana tintalen. Muat na nes timaan leh ta diet ing diet lon haruat ma no mangana nilon het ga hamines tar ta muat.
PHI 3:18 Kanong warah, a halengin, ira udiet tintalen i hamines bia diet malentakuane no kabai ta Krais. Hoing iau ga hinawas nalua ma kaiken baling, iau hinawase muat ma ra luur na matagu.
PHI 3:19 Ma no haphapataamne ta diet, no hiniruo. No sinisip ta ira palatamai diet no udiet watong. Diet bul haut ira magingin ing gor tahut bia diet na hirhir tana. Ma diet la lilik sen mon ta ira linge mekai ra ula hanuo.
PHI 3:20 Iesen dahat at, a huntunaan tutun i kis aram ra mawe. Ma dahat nanaho ma ra tamat na masmasingan utano udahat ut na Halon, no Watong Jisas Krais, bia na hansur mekaia.
PHI 3:21 Aie nong na kios ira maluruana palatamai dahat ing i tale bia na maat, waing na haruat ma no mangana palatamaine nong i hung ma ra bilai na minarine. Ma na gil huo ma iakano dadas nong i la paapalim mei wara bulbul ira linge bakut ra hena no uno harkurai.
PHI 4:1 Io kaik, bar bilai na hinsakagu ta Krais, muat na tur dadas huo hokaiken narako tano Watong. Iau tange huo ta muat ing iau manga sip muat. Ma iau manga marmaris bia ni nes muat. Muat ira bilai na harwis, muat haguama iau ma ira numuat nilon i hatatik iau.
PHI 4:2 Ma iau manga saring Sintike ma ne Eudia bia dir na tiga bala dir, haruat ma no udir kinkinis narako tano Watong.
PHI 4:3 Tutun sakit. Ma iau sip bia ni saring ugu mah tiga linge kanong augu tiga tutun na tunotuno ma u ga turtur tika ma iau. Iau saring ugu bia nu harahut dir kaiken ra iruo hahin kanong dir ga papalim dadas tika ma iau wara gaiena no tahut na hinhinawas, hoing mah Klemen ma diet bakut mah ira mes ing diet ga papalim tika ma iau. Ira hinsa diet bakut di te pakat halaka tano pakpakat na nilon.
PHI 4:4 I tahut bia muat na guama hait tano numuat kinkinis narako tano Watong. Ma iau te tange se tar ma iau ni tange habaling, bia muat na guama.
PHI 4:5 Muat na hamines ta diet ira matanaiabar bakut, bia a matmatien na tunotuno muat. No Watong i te hutet um.
PHI 4:6 Waak muat ngarngarau uta tiga linge. Iesen ta ira kaba linge bakut muat na sasaring ma ra sinasaring na tangtanga tahut. Muat na tar ira numuat kaba sunupi ukaia ta God huo.
PHI 4:7 Io, ma no malum ta God ing i manga naliu sakit ta ira udahat minminonas na nes mur timaan um ira numuat lilik ma ira numuat kidilona nilon bakut mah.
PHI 4:8 Bar hinsakagu ta Krais, tiga mes na linge mah. Muat na lilik uta ira linge i bilai ma i tale bia da lat. Hokaiken, muat na lilik uta ira linge i tutun, ira linge da ru, ira linge i takodas, ira linge i gamgamatien, ira linge i manga tahut, ma ira linge a mon minarine.
PHI 4:9 Muat na gilgil haitne kaiken ra linge ing muat ga harausur ma muat ga kap usurane leh mekai ho iau. Muat na gilgil kaiken ra linge ing muat ga hadade ma muat ga nes leh tano nugu nilon. Io, ma God nong i tar no malum na kis um tika ma muat.
PHI 4:10 Tano nugu kinkinis narako tano Watong iau manga guama kanong muat te lilik baling utagu. Iau nunure bia muat ga lilik hait utagu iesen taie ta mauho wara numuat bia muat na hamines ie tagu.
PHI 4:11 Iau pai tange huo kanong iau mon sunupi. Taie. Iau te harausur bia pa ni ngarngarau uta tiga linge sa ing i haan tupas iau.
PHI 4:12 Iau te nunure no sunupi ma iau te nunure mah ing i haleng ira nugu linge. Iau te laka tano nilon na bala maat ing iau pa gi ngarngarau uta tiga linge i haan tupas iau. Taie ta linge bia iau taburungan bia iau hahos. Taie ta linge mah bia pai haruat ira linge iau tinane bia i manga haruat.
PHI 4:13 I haruat ira nugu dadas ta kaiken ra mangana kinkinis bakut kanong iau kis ta nong i tar dadas tagu.
PHI 4:14 I tutun, iesen i tahut bia muat te laka tika ma iau ta ira nugu tinirih.
PHI 4:15 Muat mah ira matanaiabar na Pilipai, muat palai ta ira numuat harharahut ta ira luena bung ing muat ga laka laah tano tahut na hinhinawas. Muat nunure bia taie tiga lotu mah ga harahut iau ing iau ga haan sukun no hanuo Masedonia. Taie. Muat sen mon.
PHI 4:16 Bia iau ga kis ares Tesalonaika ma iau ga mon sunupi, muat ga tule ra harharahut tupas iau. Ma pai tiga pakaan sen mon.
PHI 4:17 Iau pai tange huo kanong bia iau sisilih ta ira numuat hartabar. Taie. Iau sisilih ta ira hunena ing muat na kap halaka leh ta ira numuat nilon.
PHI 4:18 Iau wara hapalaine muat bia iau te kap ira linge bakut ing muat ga tabar iau me. Ma i manga haruat sakit. Epaparoditus i te kap hawaat ira numuat hartabar tupas iau ma kaiken ra linge i manga banot ira nugu sunupi. Kaiken ra numuat hartabar i hoing ra hartabar kala mismisien tupas God, a mangana hartabar ing God na bale leh ma ra kanakana.
PHI 4:19 Io, ma no nugu God na banot ira numuat kaba sunupi haruat ma ira uno haleng na tahut na linge. Ma na gil huo tar ta muat narako tano numuat kinkinis ta Krais Jisas.
PHI 4:20 Da hatamat hatikane God no adahat Sus. Tutun sakit.
PHI 4:21 Muat na haatne ira matanaiabar gar ta God ing diet kis ta Krais Jisas. Ira hinsaka dahat narako ta Krais ing diet tika ma iau, diet haatne leh muat mah.
PHI 4:22 Ira matanaiabar gar ta God bakut kai diet haatne leh muat. Ma tutun sakit, huo mah ta diet ing diet papalim tano tamat na lualua sakit kai.
PHI 4:23 No harmarsai tano udahat Watong Jisas Krais na kis tika ma muat. Amen.
COL 1:1 Iau Pol tiga apostolo ta Krais Jisas haruat tano sinisip ta God, ma Timoti no tasi dahat narako ta Krais, mir tule ken ra nianga tupas muat ira matanaiabar tus ta God kaia Kolose, muat ira ut na nurnuruan tano numuat kinkinis ta Krais. A harmarsai ma ra malum tupas muat meram ho God no adahat Sus.
COL 1:3 Mir la tangtanga tahut ta God no Sus ana no udahat Watong Jisas Krais ing mir la saasaring uta muat.
COL 1:4 Mir tanga tahut huo tana kanong mir te hadade uta ira numuat nurnuruan ta Krais Jisas ma uta ira numuat harmarsai tupas diet bakut ira matanaiabar gar ta God. Ma muat la harmarsai ma nurnur huo kanong muat kis na nanaho ta ira haridaan i kis taguro taar uta muat aram ra mawe. Ma muat gate hadade tar uta kaike ra haridaan ing no nianga tutun ga haan tupas muat, aie no tahut na hinhinawas. Iakan ra tahut na hinhinawas i la huhuai ma i la hanahaan hakakari tano ula hanuo bakut, hoing gate tatalen huo kaia nalamin ta muat tur leh tano luena bung muat ga hadadei ma muat ga palai ta ira tutun tano harmarsai ta God.
COL 1:7 Ma no numehet bilai na harwis Epaparas nong i tur tika ma mehet tano pinapalim ma a bilai na ut na pinapalim ie tane Krais wara gaie muat, aie nong ga hausur muat uta iakan.
COL 1:8 Aie nong ga hinawase mir utano numuat magingin na harmarsai nong no Halhaliana Tanuo i te tabar muat mei.
COL 1:9 Kaiken ra linge no burena bia mir pai sangeh ma ra sinasaring wara gaie muat tur leh tano bung mir ga ser leh no hinhinawas uta muat. Mir la sarsaring God bia na tabar muat ma ra tamat na minminonas ta ira linge i haruat ma ira numuat nilon na tanuo bia muat naga hung ma ra mintota utano uno sinisip.
COL 1:10 Ma mir sasaring mah huo bia muat naga lon hoing i sip bia muat na lon huo ma bia ta ira linge bakut ing muat la gilgil muat naga hakanakana ie hoken: na mon hunena ta ira numuat bilai na gingilaan bakut, muat na tahtahuat hanahaan ta ira numuat mintota utana, muat na kap ira dadas bakut haruat ma no uno tamat na baso sakit bia muat naga tur dadas ma muat na bala maat ta ira tirtirih, ma bia muat na tanga tahut tano adahat Sus ma ra gungunuama nong i te harahut muat bia muat naga petlaar bia muat na kap no pinlawe muat tika ma ira matanaiabar tus ta God ing diet kis taar tano madaraas.
COL 1:13 Ma aie nong ga halon dahat sukun no udahat kinkinis ra hena no harkurai tano kankado ma ga hamaren dahat taar ra hena no bilai na harkurai tano Natine nong i manga sip ie.
COL 1:14 Ma no Natine at nong ga kul halangalanga dahat ing ga lik luban se ira udahat magingin sakena.
COL 1:15 Ma aie no malalarine God nong pa di la nesnes ie. Aie hoing no luena bulu kanong no uno kinkinis i tamat sakit ta ira linge bakut ing God ga hakisi.
COL 1:16 Ma no uno kinkinis i manga tamat huo kanong God ga hakisi ira linge bakut ma no lima Krais, ira linge aram ra mawe ma kai tano pise, ira linge da nes ma ing pa di la nesnes, ma ira mangana tanuo hokaiken: ira lualua ma diet ing diet manga dadas ma diet ing diet la harkurai. Diet bakut kaiken, God ga hakisi diet ma no lima Krais ma wara hatamat Krais.
COL 1:17 Krais at ga kis menalua ta ira linge bakut ma diet bakut diet kis timaan taar ra hena no uno harbalaurai.
COL 1:18 Aie no tamat na lualua ta ira matanaiabar na lotu, diet no palatamaine. Aie no burena ta ira udiet nilon kanong aie no luena wara tuntunut hut sukun ra minaat, ma ga lua na tut hut huo waing naga tamat sakit ta ira linge bakut.
COL 1:19 Krais i ngan huo kanong God ga kanakana bia Krais na hung ma ira bilai na linge bakut ing God i la hung taar me.
COL 1:20 Ma tano pinapalim tano Natine, God ga sip bia na kap pukus ira linge bakut baling ukaia ho ie. Ga bul ra malum ma no dene Krais aram ra ula kabai, kaik gaam kap pukus habaling ira linge bakut, ira linge kai tano pise ma aram mah ra mawe.
COL 1:21 Nalua muat ga kis sisingen talur God. Muat ga malentakuanei ma muat git gilgil ira magingin sakena.
COL 1:22 Iesen kaiken God i te hamaraam leh muat ukaia ho ie ma no minaat tano palatamaine Krais waing naga hatur muat ra matmataan tana ma muat na gamgamatien ma pataie um ta bilinge bia ta sakena ta muat.
COL 1:23 Ma i tale bia muat na tur taar huo ing bia muat na manga tur dikdikit taar tano numuat nurnuruan tano tahut na hinhinawas ma ing bia muat pa na kakari talur no numuat nanahai ma ra nurnuruan uta ira linge muat ga hadade tano tahut na hinhinawas. Ma iakan ra tahut na hinhinawas at nong di ga harpir mei tupas ira matanaiabar kai ra ula hanuo. Ma iau Pol, iau tiga tultulai ta iakano tahut na hinhinawas.
COL 1:24 Ma iau guama kaiken uta ira ngunngutaan i ubal iau wara gaie muat. Ma iau puspusak kaiken ra ngunngutaan tano palatamaigu wara haphapataam ira ngunngutaan ta Krais ing i kis taar baak. Ma iau la puspusak huo wara gaiena no palatamaine, muat ira matanaiabar na lotu.
COL 1:25 Iau te kap no pinapalim na harharahut uta muat ira matanaiabar na lotu kanong God ga tar no uno pinapalim tagu bia ni pakilei haruat ma no uno lilik ma bia ni gil huo wara hatahutne muat. Ga tar ie tagu bia ni hadukduk timaan no nugu pinapalim na harpir ma no uno nianga.
COL 1:26 Ma iakan ra nianga nong ga susuhai ta ira tunotuno ta ira tintinahon menalua ma sen i te hapuasne um ta ira uno matanaiabar tus kaiken.
COL 1:27 God ga sip bia na hapalaine diet bia iakano linge nong ga susuhai na manga haidane timaan diet ing diet pai Iudeia. Ma no suruno ta iakano linge nong ga susuhai, aie hoken, bia Krais i kis taar ta muat, kaik muat naga nanaho ma ra nurnuruan bia muat na laka tano tamat na minarine.
COL 1:28 Ma mehet la harharpir uta Krais ta ira mangana tunotuno bakut. Mehet hausur diet ma mehet hakhakatom diet ma ra tamat na minminonas sakit waing diet bakut diet naga bilai harsakit tano udiet kinkinis narako ta Krais ing mehet lamus tar diet ra matmataan ta God.
COL 1:29 Ma iakanong no burena bia iau papalim dadas. Iau manga baso haruat ma no uno tamat na dadas ing i la manga harharahut iau mei bia ni gil huo.
COL 2:1 Ma iau sip bia muat na palai bia iau manga papalim dadas wara gaie muat ma uta diet mah kenas Laudisia ma uta diet bakut mah ing diet pai nes baak iau.
COL 2:2 Iau papalim dadas huo bia ni haragat ira bala diet ma bia diet na tikai mon tano udiet harmarsai hargilaas waing diet naga hung ma ira tamat na minminonas bakut, kaik diet naga nunure iakano tutun nong God ga suhei, ma aie ne Krais at.
COL 2:3 Ma ira mangana minminonas ma ira mintota bakut i kis susuhai taar ta Krais hoing tiga bilai na bunbulaan.
COL 2:4 Iau tange kaiken ra linge ta muat bia taie ta tikai kabi hakalak muat ma no uno keskes na nianga ma na lamus habato muat.
COL 2:5 A tutun bia no palatamaigu pai kis tika taar ma muat kaiken. Iesen no tanuagu i kis tika taar ma muat ma iau kanakana ing iau nunure kilam bia i takodas ira numuat magingin ma bia ira numuat nurnuruan i tur dadas taar ta Krais.
COL 2:6 Io kaik, hoing muat te hatur kawase Krais Jisas bia aie no Watong, i tahut bia muat na lalon haruat ma no numuat kinkinis tana.
COL 2:7 Muat na tur dikdikit taar tano numuat kinkinis ta Krais ma muat na hadadas ira numuat nilon narako tana. Muat na tur dadas taar ta ira linge muat te nurnur ine hoing di ga hausur tar muat huo. Ma muat na manga hung sakit ma no magingin na tanga tahut tupas God.
COL 2:8 Muat na harbalaurai timaan ta tiga nong kabi habato lamus muat taar tano uno pabona lilik, naga wis kawase muat. Kaike ra mangana lilik i tahuat ta ira harausur ta ira tunotuno mon. I tahuat ta ira minminonas mon mekai napu ma pataie bia ta Krais.
COL 2:9 Muat na harbalaurai timaan hokaike kanong ira bilai na linge bakut ing God i la hung taar me i kis taar ta Krais nong ga hanuat tunotuno.
COL 2:10 Ma God i te hakidilona muat tano numuat kinkinis ta Krais, aie nong i tamat sakit ta ira tanuo ing diet la harkurai taar, ma ira mes na lualua mah.
COL 2:11 Tano numuat kinkinis ta Krais i ngan hoing bia Krais ga mur no magingin na kutkut se tiga sibaan ta ira palatamai muat. Iesen pataie bia hoing ira tunotuno mon diet la gilgil ma ira lima diet. Taie. Krais at ga kap se no sakana sibaan ta ira numuat nilon.
COL 2:12 Ma God ga bus muat tika mei ing di ga baptais muat. Ma tano numuat nurnuruan tano dadas ta God nong ga hatut Krais sukun ra minaat, God ga hatut pakur muat mei.
COL 2:13 Nalua muat gate maat taar ing muat ga gil ira magingin sakena ma ing iakano sakana sibaan ga kis taar baak ta ira numuat nilon. Iesen God ga halon pakur muat ma Krais. Ga lik luban se ira udahat magingin sakena hoken, ing ga suge se no pakpakat nong i tahuat laah ta ira harkurai, iakano pakpakat nong i tange hamines bia a mon nironga kana ta dahat ing i haruat bia dahat na hiruo urie kanong dahat pai le mur kaike ra harkurai, ma ira harkurai at diet ga wara halhaliare dahat. Ga kap se no dadas ta iakan ra pakpakat ing ga lau tar no pakpakat taar tano ula kabai.
COL 2:15 Ing God gate kap se ira baso ta ira tanuo ing diet la harkurai taar ma ira mes na lualua mah, ga bul hamines ra matmataan na haruat bia pataie um audiet ta dadas gaam paas hasur diet ma no pinapalim tano ula kabai ma hoing tiga tamat na umri ga lamus hagalgalen hani diet hoing ira uno hiruo.
COL 2:16 Waak muat haut leh tikai bia na kure muat ta sa ing i bilai bia muat na ien bia muat na mame. Ma huo mah ta ira tamat na bung na lotu, bia a sigar teka, bia no Bung na Sinangeh.
COL 2:17 Diet bakut kaike ra magingin diet haruat ma ra malalar mon uta ira linge ing ga wara hinanuat. Iesen ira linge tutun urie, dahat nes leh ta Krais.
COL 2:18 Ma diet ing diet harababo bia diet manga sip bia a matien na tunotuno diet, ma diet lotu tupas ira angelo, ma diet manga hinhinawas uta ira udiet mangana ninanaas na tanuo, io, waak muat bale leh diet bia diet na kure muat ta sa i bilai ing muat sip bia muat na gil. Ira udiet sakana lilik mon i hatamat habaling diet ma pataie ta burena bia diet na gil huo.
COL 2:19 Ira mangana tunotuno huo diet te tamakutus laah talur Krais, aie no uluno ta dahat no palatamaine. Aie nong i la balaure timaan tar no kidilona palatamaine bia no tamaine na kap ra dadas ma na harpasum timaan ma no harharahut ta ira lalos na harpasum, ma bia na tahuat hoing God i sip bia na tahuat huo.
COL 2:20 Muat te maat tika ma ne Krais ma muat langalanga sukun no mangana minminonas mekai napu. Io kaik, wara bih muat lalon hoing bia gar tano ula hanuo baak muat? Wara bih muat la bulbul habaling muat ra hena ira harkurai? Kaike ra harkurai i tange bia, “Waak muat palim! Waak muat namien! Waak muat sigire!”
COL 2:22 Diet bakut kaiken ra linge, diet na panim laah ing dahat papalim me bia dahat ien bia dahat gil sa mah me. Waak muat mur kaiken ra mangana harkurai kanong i tahuat ta ira hartula ma ira harausur ta ira tunotuno mon.
COL 2:23 A tutun, ari diet lik bia a mon minminonas ta diet ing bia diet mur kaiken ra harkurai ing i tange bia i tahut bia tikai na mamahien no balana wara pakila lotu, bia na bul hanapu habaling ie, bia na kure hadadas no palatamaine. Iesen bia pataie. Kaiken ra magingin pai harahut ta dahin wara turtur bat ira sakana sinisip.
COL 3:1 Io kaik, i tahut bia ira kati muat na mur ira linge meram naliu kaia ho ne Krais ing i kis taar kaia tano tamat na kinkinis tano kata na lima God, kanong God i te hatut pakur muat ma Krais.
COL 3:2 Muat na hatur ira numuat lilik ta ira linge meram naliu, ma pataie ta ira linge mekai tano ula hanuo.
COL 3:3 Kanong warah, muat gate maat, ma ira numuat mangana nilon kaiken i kis susuhai tika ma ne Krais ra matmataan ta God.
COL 3:4 Ma bia Krais nong no burena tano numuat nilon na hanuat puasa, io, ta iakano pakana bung muat mah, muat na hanuat puasa tika mei ma ra tamat na minamar.
COL 3:5 Io kaik, i tahut bia muat na bing se ira numuat mangana tintalen gar ta iakan ra ula hanuo. Muat na bing se ira magingin na hilawa ma ira bilingana magingin huo ma kaike ra mangana masmasingan mah. Huo mah, muat na bing se ira sakana sinisip ma no magingin na nes kalak linge gar na mes. Ma iakano magingin i haruat ma no magingin na lotu tupas ira palimpuo.
COL 3:6 Kaiken ra mangana magingin no burena bia no ngalngaluan ta God na puko burung diet ira mangana tunotuno huo.
COL 3:7 Muat mah, muat git tatalen huo ta ira numuat ngaas na nilon ing muat ga lon huo menalua.
COL 3:8 Iesen bia kaiken i tahut bia muat na kap se kaiken ra tintalen bakut sukun muat. Muat na kap se ira mangana ngalngaluan ma no sinisip wara hangungut ira mes. Waak muat tange hagahe tikai, ma muat na bul se ira nianga na harhuli sukun ira ha muat.
COL 3:9 Waak muat habato harbasiane muat kanong muat te kap se ira numuat tuarena nilon tika ma ira uno tintalen, ma muat te sigam no sigar nilon nong God i la hashasigarinei hoing tiga malalarine God at nong ga hakisi iakano nilon. Ma i la hashasigarinei huo waing muat naga nunure timaan ie.
COL 3:11 Ma ta iakan ra sigar nilon, ira Iudeia ma diet ing diet pai Iudeia, diet haruat mon. Diet ing di ga kut se ira palatamai diet, ma diet ing pa di ga kut se, diet haruat mah. Ma i ngan huo mah ta ira tultulai ma diet ing diet pai tultulai. Ma bia da nes hanapu ugu bia augu me tapaka ma a mes ugu, bia da tange bia a ba sokopi ugu, taie ta linge. No tamat na linge, Krais sen mon, ma bia i kis ta dahat bakut.
COL 3:12 Muat ira tunotuno ing God gate gilamis muat, ma muat ira halhaliana tunotuno ing God i sip muat. Io kaik, i tahut bia muat na sigam no bala maat, no magingin na bala marmaris uta ira tirtirih i ubal ira mes, ma no magingin na gilgil ra tahut ta ira mes mah. Muat na bul hanapu habaling muat ma muat na lon hoing ira matien na tunotuno.
COL 3:13 Muat na balane ira mes ing diet gil harongane muat. Muat na lik luban se harbasiane ta muat ira linge muat kilingane bia di hagahe muat me. Hoing no Watong ga lik luban se ira numuat sakena, muat mah muat na gil huo.
COL 3:14 Ma no magingin na harmarsai um, muat na sigam ie me naliu ta kaiken ra tintalen bakut. No magingin na harmarsai, aie nong i wis tikane diet bakut bia diet na kapawena tun at tano udiet tuntunur tika.
COL 3:15 I tahut bia no malum ta Krais na kure ira numuat nilon. Hokaiken, God ga tatau muat tano numuat kinkinis na tuntunur tika bia muat na kis ma ra malum harbasia ta muat. Ma muat na tangtanga tahut tupas ie.
COL 3:16 I bilai bia no hinhinawas uta Krais na manga kis dadas ta ira bala muat. Huo kaik, muat naga hausur ma muat na pir hargilasane muat ma ira minminonas bakut ma ira mangana halhaliana ninge mah. Ma ing bia muat na inge huo, muat na kilam tahut tupas God meram narako ta ira bala muat.
COL 3:17 Ma ra sa ing muat tange ma ra sa ing muat gil, muat na tatalen hoing i takodas bia nong i mur no Watong Jisas na tatalen huo. Ma ing muat lalon huo, i tahut bia tano numuat kinkinis ta Krais, muat na tanga tahut tupas God no adahat Sus.
COL 3:18 Muat ira hahin, muat na hanapu habaling muat ra hena ira numuat tunaan kanong iakan tiga takodasuana magingin haruat ma no numuat kinkinis narako tano Watong.
COL 3:19 Muat ira tunaan, muat na manga marse ira numuat hahin ma waak muat bala ngungut taar ta diet.
COL 3:20 Muat ira bulu ma ira hinasik, muat na taram ta ira amuat sus ma ira pawasi muat ta ira mangana linge bakut kanong iakan ra magingin i haguama no Watong.
COL 3:21 Muat ira adiet sus ira bulu ma ira hinasik, waak muat hamalaslaas ira nati muat, diet kabi kalale ira numuat hartula.
COL 3:22 Muat ira maris na tultulai, muat na taram ta ira numuat tamat mekai napu ta ira linge bakut. Waak muat taram ta diet tano pakana bung sen mon diet ngok taar ta muat bia diet naga kanakana. Taie. Muat na taram ta diet ma ra tutun na bala muat tano numuat tamat na urur tupas no Watong.
COL 3:23 Ma ta sa ing muat gil, muat na gil ie ma no numuat dadas bakut hoing bia muat gilgil ie tupas no Watong, ma pataie bia tupas ira tunotuno mon.
COL 3:24 Ma i tahut bia muat na gil huo kanong muat nunure bia muat na hatur kawase iakano pinlawe muat meram ho no Watong hoing ra hunena no numuat mangason. Io, ne Krais um no Watong nong muat papalim utana.
COL 3:25 Sige tikai ing i gil ronga na kap ra harkul haruat ma no uno nironga. God na tar ra takodasuana harkul. Pa na habilaine tikai ma na hagahe bia tiga mes.
COL 4:1 Ma muat ira tamat, muat na tar ta ira numuat tultulai ing i takodas ma i tahut. Muat nunure tar bia numuat mah tiga Tamat iekenam ra mawe.
COL 4:2 Io, ma muat na nanget ma ra sinasaring. Ma bia muat na sasaring, i tahut bia ira numuat lilik na taguro timaan ma muat na tangtanga tahut tupas God.
COL 4:3 Muat na sasaring uta mehet mah, bia God na papos no matanangas ta ira numehet harpir waing mehet naga hinhinawas utano linge nong ga susuhai narako ta Krais. No burena uta iakano tahut na hinhinawas kaiken, iau te kis tano winwisaan.
COL 4:4 Muat na sasaring bia iau ni petlaar bia ni hapalaine timaan ie hoing i tahut bia ni gil huo.
COL 4:5 Muat na mintot pane ira numuat magingin tupas diet ing diet pai nurnur. Muat na gil ira bilai hokaiken ta ira pakana bung bia i tale muat bia muat na gil huo.
COL 4:6 I tahut bia ira numuat winor tika ma diet na hung ma ra nianga ing i bilai ma i namnamien waing muat naga palai bia muat na balu diet tikatikai hohe.
COL 4:7 Io, ma no bilai na tasi dahat Tikikus na hinawase muat ta ira linge bakut wara utagu. I tur tika ma iau tano pinapalim tano Watong ma a bilai na ut na pinapalim ie.
COL 4:8 No burena tutun bia iau wara tultulei ukai ho muat, bia naga hinawase hapalaine muat bia no numehet nilon i ngan hohe ma bia naga haragat ira bala muat.
COL 4:9 Dir na tika huat ma ne Onesimus no bilai na tasi dahat. A tutun na tunotunoi ma aie at tiga nong ta muat mekaia. Dir na hinawase muat ta ira mangana linge bakut i hanuat ta mehet kai.
COL 4:10 Aristarkus nong i kis tika ma iau kai ra winwisaan i haatne leh muat. Huo mah ne Mak, no tasi Banabas. (Muat te hadade ra hinhinawas utana ma ing bia na hanuat ukai ho muat, muat na bale leh ie.)
COL 4:11 Jisas nong di kilam mah ie bia Iustus i haatne mah muat. Dal sen mon kaike ing a Iudeia dal nalamin ta diet ing diet tur tika ma iau tano pinapalim wara utano kinkinis na harkurai ma ra harbalaurai ta God. Ma dal te manga habalaraan um iau.
COL 4:12 Epaparas nong aie mah tikai ta muat ma a tultulai ie ta Krais Jisas, i haatne mah muat. I la saasaring hait uta muat ma ra tamat na dadas bia muat na tur patpatuan ma muat na manga palai ta ira sinisip ta God.
COL 4:13 I papalim dadas wara gaie muat ma uta diet mah kaia Laudisia ma Hirapolis. Ma i tale bia ni tange huo ta muat kanong iau nunure tar bia i tutun.
COL 4:14 Luk no ut na harulai, no numehet bilai na harwis, dir ma ne Demas, dir haatne mah muat.
COL 4:15 Muat na tar no nugu haratna ta ira hinsaka dahat narako ta Krais kaia Laudisia. Ma tupas mah ne Nimpa ma ira matanaiabar ing diet kis hulungai wara lotu kaia ra uno hala.
COL 4:16 Ing bia di te was tar iakan ra pakpakat ra matmataan ta muat, i tahut bia muat na lik leh bia da was mah ie ta ira matanaiabar na lotu kaia Laudisia. Ma muat na lik leh mah bia muat na was no pakpakat mekaia Laudisia.
COL 4:17 Muat na tange ta Arkipus bia, “Nu harbalaurai timaan bia nugu pakile haruatne no pinapalim u ga hatur kawasei tano num kinkinis narako tano Watong.”
COL 4:18 Iau Pol, iau pakat iakan ra haraatna ma no limagu at. I tahut bia muat na lik kawase ira agu winwisaan. A harmarsai tupas muat.
1TH 1:1 Iau Pol tika ma Sailas ma Timoti, metal tule ken ra nianga tupas muat ira matanaiabar na lotu kaia Tesalonaika, ing muat gar ta God no adahat Sus ma tano Watong Jisas Krais. A harmarsai ma ra malum na kis ta muat.
1TH 1:2 Metal la tangtanga tahut ta God uta muat bakut ing metal kilkilam muat narako ta ira numetal sinasaring, kanong metal la liklik leh ira numuat gingilaan ra matmataan tano udahat God, no adahat Sus. Metal lik leh ira numuat pinapalim ing i tahuat ta ira numuat nurnuruan. Ma metal lik leh ira numuat dadas na pinapalim ing i hanuat meram narako ta ira numuat harmarsai. Metal lik leh mah ira numuat nanaho ma ra nurnuruan tano udahat Watong Jisas Krais, kaik muat gi la turtur dadas ta ira numuat ngunngutaan.
1TH 1:4 Io, muat ira harahinsakaan narako ta Krais ing God i manga sip muat, metal tanga tahut tupas God huo kanong metal nunure bia i te gilamis muat.
1TH 1:5 Ma metal nunure huo kanong ira numetal hinarpir ma no tahut na hinhinawas pa ga haan tupas muat ma ra nianga mon. Taie. Ga haan tupas muat tika ma ra dadas ma tika ma no Halhaliana Tanuo. Ma muat ga nes bia metal ga manga nurnur bia ira numetal harpir i tutun. Muat nurnur bia iakan i tutun kanong muat nunure metal, bia a mangana tunotuno hohe metal ing metal ga lon nalamin ta muat. Ga palai ta muat bia metal ga lon wara gaie muat.
1TH 1:6 Ma muat ga mur timaan ira numetal nilon ma no Watong mah hoken: nalamin ta ira but na ngunngutaan muat ga bale leh no hinhinawas ma ra kanakana, iakano kanakana nong no Halhaliana Tanuo ga tar ie ta muat.
1TH 1:7 Io kaik, muat ga hanuat hoing tiga bilai na malalar nong ira ut na nurnuruan kenas Masedonia ma Akaia diet naga mur.
1TH 1:8 Ma metal palai ta iakan kanong no hinhinawas utano Watong pai hanahaan mekaia ho muat uras Masedonia ma Akaia sen mon. Taie. No hinhinawas uta ira numuat nurnuruan ta God i te haan ta ira subaan bakut. Io kaik, metal pai supi bia metal na tange habaling tiga linge kanong diet at ta kaike ra subaan diet la hinhinawas utano pakana bung bia metal ga haan ukaia ho muat ma muat ga bale leh metal. Diet hinhinawas bia muat ga tahurus sukun ira palimpuo hohe, muat gaam haan tupas God wara tartaram no God tutun, no lilona, ma wara kiskis kawase no Natine meram ra mawe nong i ga hatut ie sukun ra minaat. Ma no Natine, ne Jisas, nong na halangalanga dahat sukun ra ngalngaluan nong God na tar ie namur.
1TH 2:1 Io, ira hinsaka metal ta Krais, muat nunure bia no numetal hinahaan ukaia ho muat pa ga linge bia. A mon hunena.
1TH 2:2 Muat nunure bia di gate luena hangungut metal aras Pilipai, ma diet pa ga hirhir ta dahin wara gilgil huo. Ma ing metal ga haan tupas muat God ga habalaraan metal wara tangtange no uno tahut na hinhinawas ta muat. Ma ga habalaraan metal huo nalamin ta diet ing diet ga manga sukuane metal.
1TH 2:3 Ma metal ga balaraan huo ing metal ga haragat muat wara nurnur kanong ira numetal harharagat pa ga tahuat meram narako ta ira sakana lilik. Metal pa ga sip wara lamlamus habato muat ta ira linge pai tutun ma ta ira sakana magingin. Taie. Ma ing metal ga harpir metal pa ga walar wara hinasakit ta muat bia muat na nurnur.
1TH 2:4 Iesen metal harharpir ma no tahut na hinhinawas haruat tano sinisip ta God. Ma i tale bia metal na harpir huo kanong God i te nes kilam metal bia metal haruat wara hinarpir ma no tahut na hinhinawas, kaik gaam tar ie ta metal. Ma ing bia metal harpir, metal pai walar wara haguama ira tunotuno. Taie. Metal walar wara haguama God nong i la nesnes narakoman ta ira bala metal.
1TH 2:5 Io, muat nunure bia metal pa ga pirlat muat wara gaiena tiga linge ma metal pa ga hanuat ho ira ut na silha kinewa ing diet suhe ira udiet sakana sinisip. God i tale bia na suro haut kaiken uta metal.
1TH 2:6 Ma metal pa ga sip mah bia muat bia ari a mes na tunotuno na pirlat metal. Iesen gor tale metal bia metal na tange hadadas ta muat bia muat na taram. Ma gor tale bia metal na gil huo kanong metal ira apostolo ta Krais.
1TH 2:7 Iesen metal ga matien na tunotuno nalamin ta muat, hoing tiga makai i la balbalaure timaan ira natine.
1TH 2:8 Io, metal ga so ira kati metal ta muat huo, kaik metal ga guama wara tamtabar muat ma no tahut na hinhinawas. Iesen pai iakano sen mon. Taie. Metal ga guama mah wara tamtabar muat ma ira numetal nilon kanong metal ga manga sip muat.
1TH 2:9 Ira hinsaka metal, metal nunure bia muat lik leh ira numetal gingilaan nalamin ta muat bia metal ga pirpir muat ma no tahut na hinhinawas ta God. Ira kaba bungbung, ra kasakes bia ra bung, metal git manga papalim uta ira ametal nian ma pane mah ira numetal mes na sunupi. Ma metal git kilkilingane ra ngunungut ta kaike ra pinapalim waing metal pa na kap tar ra tinirih ta tiga nong.
1TH 2:10 I tale muat bia muat na suro haut ira numetal mangana nilon nalamin ta muat ira ut na nurnuruan. Ma God mah i tale bia na suro haut huo. Metal git murmur ira gamgamatien na magingin, metal git gilgil ira takodas, ma pa ga tale tikai wara kilkilam metal bia metal ga gil tiga sakena.
1TH 2:11 Ma muat nunure bia metal ga harahut muat hoing ira sus anari i la harharahut ira nati diet. Metal git hamhabalaraan ma harharagat muat bia muat na lon haruat tano sinisip ta God nong i la taatau muat uram tano uno kinkinis na harkurai ma ra harbalaurai ma tano minarine.
1TH 2:13 Ma metal la tangtanga tahut mah ta God kanong bia muat ga hatur kawase ira nianga ta God ing muat ga hadade leh ta metal, muat ga bale leh ie. Muat pa ga lik bia a nianga gar na tunotuno mon. Taie. Muat ga bale leh ie hoing ra nianga ta God. Ma tutun sakit, a nianga ta God iakano, nong i papalim narako ta muat ira ut na nurnuruan.
1TH 2:14 Ira hinsaka metal, i palai bia no nianga ta God i papalim huo narako ta muat kanong ira mangana ngunngutaan ga haan tupas muat i haruat ma ing ga haan tupas ira matanaiabar ta Krais Jisas ing diet lotu tupas God ta ira udiet hala na lotu aram Iudeia. Ira tunotuno tano numuat hanuo diet ga helar ta muat hoing ira Iudeia diet ga helar ta ira matanaiabar na lotu aram Iudeia.
1TH 2:15 Ma kaike ra Iudeia diet ga bu bing no Watong Jisas ma ira tangesot, ma diet ga tule isisai mah ta metal. Diet walwalar wara turtur bat metal bia metal pa na tange no tahut na hinhinawas ta diet ing diet pai Iudeia ma diet kabi kap no nilon. Ma ing diet walar wara turtur bat metal huo diet pai haguama God. Taie. Diet malentakuane ira tunotuno bakut. Ma ing bia diet gil huo diet te gil haruatne ira kaba magingin sakena ing diet la hung taar me. Iesen no ngalngaluan ta God i te manga haan tupas um diet.
1TH 2:17 Io, ma bar hinsaka metal, ing di ga sunang metal wara hanhan sukun muat metal ga manga supi muat ing bia metal te haan talur muat a bar bung mon nalua. Tutun, metal ga haan sukun muat, iesen ira numetal lilik i kis taar ma muat. Io, metal ga manga walar at bia metal na nes habaling muat.
1TH 2:18 Metal ga sip bia metal na tapukus balin ukatiga ho muat. Ma iau, Pol, iau ga walar ari pakaan bia ni tapukus ukaia. Iesen Sataan ga tur bat metal.
1TH 2:19 Io, metal ga wara taptapukus ukaia kanong bia Jisas no udahat Watong na hanuat ma dahat na tur ra matmataan tana, io, muat at, muat no burena bia metal na balaraan, bia metal na kap ra gungunuama, ma bia metal na laatlaat.
1TH 2:20 Tutun sakit, muat no minari metal ma no numetal gungunuama.
1TH 3:1 Io kaik, bia metal ga manga ngarngarau uta muat ma sen pa ga tale bia metal na nes muat, io, mir ga lik bia i tahut bia mir na kis baal baak kaia Aten.
1TH 3:2 Ma mir ga tule Timoti, no tasi dahat nong i papalim tika ma mir wara gaiena no tahut na hinhinawas gar ta Krais. Ma mir ga tulei bia na habalaraan muat ma bia na haragat muat ta ira numuat nurnuruan, bia tikai ta muat kabi manga ngarngarau uta kaiken ra harhangunngutaan. Muat at, muat palai bia ken ra haraubaal tupas dahat mekaia ho no sinisip gar ta God.
1TH 3:4 Ma muat palai ta iakan kanong bia metal ga kis tika taar ma muat, metal git huna hinhinawase muat bia dahat na haan taar ta kaike ra harhangunngutaan. Kaiken muat te nunure bia i te hanuat um.
1TH 3:5 Io kaik, bia iau ga manga ngarngarau uta muat ma sen pa ga tale bia ni nes muat, io, iau ga tule Timoti ukaia ho muat bia nigi palai uta ira numuat nurnuruan. Ma iau ga tulei kanong iau ga burut bia no ut na harwalaam gor te walaam dak muat ma ira numetal pinapalim naga linge bia.
1TH 3:6 Io, kaiken mon Timoti i te tapukus ukai ho mir. Ma i te kap hawaat ra bilai na hinhinawas uta ira numuat nurnuruan ma ira numuat harmarsai. Ma i hinawase mah mir bia muat la liklik leh ira bilai na linge uta metal, ma bia muat manga sip bia muat na nes metal hoing metal mah ukatiga ho muat.
1TH 3:7 Io kaik, bar hinsaka metal ta Krais, ing bia mir ga hadade uta ira numuat nurnuruan, iakano nianga ga habalaraan mir uta muat nalamin ta ira numetal kaba tinirih ma harhangunngutaan.
1TH 3:8 Io kaik, kaiken metal lon timaan kanong muat tur dadas tano Watong.
1TH 3:9 Io, bia metal tanga tahut ta God wara gaie muat, pa na haruat tun at tano gungunuama metal kilingane uta muat ra matmataan ta God.
1TH 3:10 Ira kaba bungbung, ra kasakes ma ra bung, metal la saasaring tutun bia metal na nes habaling muat, ma bia metal naga harahut muat ta ira numuat nat na sunupi ta ira numuat nurnuruan.
1TH 3:11 Io, ma metal sasaring bia God nadahat Sus ma ne Jisas no udahat Watong na tagure tar no numetal ngaas ukaia ho muat.
1TH 3:12 Ma metal sasaring bia no Watong na manga hatahuat ira numuat harmarsai hargilaas ta muat ira ut na nurnuruan ma ta ira mes mah. Metal sasaring bia ira numuat harmarsai na manga tamat hoing ira numetal ukaia ho muat.
1TH 3:13 Ma metal sasaring huo waing God na hatumarang muat bia tikai pa na tale bia na kilam muat bia muat te gil ra sakena ma sen bia muat na gamgamatien ra matmataan ta God nadahat Sus tano pakana bung bia Jisas no udahat Watong na hanuat tika ma ira uno kaba halhaliana.
1TH 4:1 Bar hinsaka metal ta Krais, wara hapataam ira nianga metal wara tangtange hoken ta muat: metal ga hausur muat bia muat na lon hohe wara haguama God. Ma tutun, muat la lalon huo. Ma sen metal saring muat ma metal haragat muat tano hinsane Jisas no udahat Watong bia muat na tahuat hakakari ta ira numuat bilai na nilon.
1TH 4:2 Ma na tahut bia muat na lon huo kanong muat palai taar ta ira dadas na nianga metal ga tar ta muat tano hinsana no Watong Jisas.
1TH 4:3 God i sip bia muat na halhaal ta ira sakena taar ta ira gamgamatien. Io, i sip bia muat na tur pas no sakana magingin na ninahon tika.
1TH 4:4 I sip bia tikatikai na palai hohe wara balbalaure timaan no palatamaine at haruat ta ira gamgamatien na magingin ma ira magingin i takodas ta ira ninaas ta ira tunotuno.
1TH 4:5 Ma i sip mah bia muat pa na mur ira sakana masmasingan hoing diet ira tabuna nurnuruan ing diet pai nunure God diet la gilgil.
1TH 4:6 Ma waak tiga nong i noh tika ma tiga hahin gar na mes ma na gil ronga tano tasine huo. Waak i habato leh no tasine huo kanong no Watong nong na balu pukus ma ra harpidanau ta kaiken ra mangana linge, kaik huo metal gom huna hakatom hadadas muat.
1TH 4:7 Na tahut bia muat na lon huo kanong God pai le tatau dahat wara gilgil ira bilingana magingin, iesen bia dahat na halhaal ta ira sakena taar ta ira gamgamatien.
1TH 4:8 Io kaik, sige tikai i malok ise iakan ra nianga, pai malok ise tiga tunotuno. Taie. I malok ise God nong i tar no uno Halhaliana Tanuo ta muat.
1TH 4:9 Ma metal pai supi bia metal na pakpakat taar ta muat bia muat na harmarsai hargilaas taar nalamin ta muat ira harahinsakaan ta Krais kanong God i hausur muat at bia muat na harmarsai harbasia ta muat.
1TH 4:10 Tutun sakit muat la gilgil huo harbasia ta muat ira harahinsakaan kaia Masedonia. Iesen bar hinsaka metal, metal haragat muat bia muat na tahuat hakakari ta ira numuat harmarsai.
1TH 4:11 Ma metal haragat mah muat bia muat na lon haruat ta ira dadas na nianga metal ga tar ta muat hoken: muat na bul hadadas ira numuat lilik bia muat pa na hamalaslaas tiga nong ma bia muat pa na song leh ira pinapalim gar na mes. Na tahut bia muat na papalim tus laah ma ra lima muat.
1TH 4:12 Muat na gilgil huo waing diet ing diet pai nurnur diet na ru muat ma bia muat pa naga lon mur tikai bia na banot ira numuat sunupi.
1TH 4:13 Io, bar hinsaka metal ta Krais, metal sip bia muat na palai uta diet ing diet te maat, kaik muat kabi tapunuk hoing diet ira mes ing diet pai kis kawase no nilon namur ma ra nurnuruan.
1TH 4:14 Dahat nurnur bia Jisas ga maat ma ga tut hut balin. Io kaik, God na lamus tikane ma Jisas diet ing diet te maat ma ra nurnuruan tana.
1TH 4:15 Kaiken metal hauhausur muat ine, a harausur tano Watong, ma i hoken: dahat ing dahat lon baak ing no Watong na hanuat, io, dahat pa na lua ta diet ing diet te maat.
1TH 4:16 Io, da hadade ra tamat na kunup ma no ingana no tamat ta ira angelo ma no kinakel tano tahur ta God, ma no Watong at na hansur meram ra mawe. Diet ing diet te maat ma ra nurnuruan ta Krais diet na huna tut hut.
1TH 4:17 Io, dahat um ing dahat lon baak, God na kap haut dahat tika ma diet narakoman ra bahuto wara harsomane no Watong aram ra mauho. Kaik, dahat naga kis hatika ma no Watong.
1TH 4:18 Io kaik, muat na habalaraan harbasiane muat ma kaiken ra nianga.
1TH 5:1 Io, bar hinsaka metal ta Krais, muat pai supi bia metal na pakat ta nianga ukaia ho muat utano pakana bung ing kaiken ra linge na hanuat kanong muat at muat nunure timaan tar bia no pakana bung tano Watong na hanuat hoing no hinanuat ta tiga ut na kikinau ra bung.
1TH 5:3 Ira matanaiabar diet na tange bia, “Dahat pa na burte ta tiga linge. A malum i kis taar ta dahat.” Io, ta iakano pakana bung at a but na halhaliarai na haan tupas diet hoing ira harpaas na bulu ing bia tiga hahin i wara kinakaha. Ma taie ta nong pa na hilau.
1TH 5:4 Ma muat ira hinsaka metal, iakan ra bung pa na hakarup muat hoing tiga ut na kikinau kanong muat pai nat na kankado.
1TH 5:5 Taie. Muat bakut, muat lon tano palai ra kasakes. Dahat pai lon tano kankado ra bung.
1TH 5:6 Io kaik, waak dahat kubaba hoing diet tari. Na tahut bia dahat na hangala ma dahat na taguro ma ra palai na lilik hoing diet ing diet pai mom.
1TH 5:7 Diet ing diet kubaba, diet la kumkubaba ra bung. Ma ira ut na minom, diet la mamom ra bung.
1TH 5:8 Iesen dahat, dahat ira tunotuno gar na madaraas. Io kaik, waak dahat haruat hoira ut na minom. Dahat na taguro timaan. Hoing ira umri, dahat na sigam no udahat nurnuruan ma no udahat harmarsai hargilaas hoing tiga sigasigam na pala riam. Ma hoing ira umri mah, dahat na kuhe no udahat nurnuruan kawase no harhalon kanong God pai le bul no uno lilik bia no uno ngalngaluan na haan tupas dahat. Taie. I sip bia na halon dahat tano udahat Watong Jisas Krais nong ga maat wara gaie dahat. Ma ga maat wara gaie dahat waing dahat na lon tika mei. Taie ta linge bia dahat lon taar bia dahat te maat. Dahat na lon tika mei.
1TH 5:11 Io kaik, muat na habalaraan ma haragat harbasiane muat hoing muat la gilgil.
1TH 5:12 Io, bar hinsaka metal ta Krais, metal saring muat bia muat na urur ta diet ing diet manga papalim nalamin ta muat. Diet balaure muat ta ira numuat nilon tano Watong. Ma diet pir muat mah.
1TH 5:13 Na tahut bia muat na manga lik hatamat diet ma bia muat na marse diet uta ira pinapalim diet gil. Muat na harbalaan hargilaas.
1TH 5:14 Bar hinsaka metal, metal haragat muat bia muat na hakatom ira malmalungana, ma muat na habalaraan diet ira ut na nginarau, ma muat na harahut diet ing diet pai tur dadas, ma bia muat pa na manga gasien wara hapidanau tiga nong.
1TH 5:15 Muat na harbalaurai timaan bia waak muat balu ra sakena ma ra sakena baling. Iesen muat na walar hatikane wara gilgil ra tahut harbasia ta muat ma diet ira mes mah.
1TH 5:16 I tahut bia muat na guama hathatika.
1TH 5:17 Muat na sasaring hait.
1TH 5:18 Muat na tanga tahut uram ho God ta ira linge bakut. Warah, kanong God i sip bia muat ing muat kis taar ta Krais, muat na lon huo.
1TH 5:19 Waak muat tur bat no pinapalim tano Halhaliana Tanuo.
1TH 5:20 Waak muat malok ise ira nianga gar na tangesot.
1TH 5:21 Iesen, i tahut bia muat na walar kilam ira linge bakut. Muat na palim kawase ira bilai.
1TH 5:22 Muat na tur talur ira mangana sakena bakut.
1TH 5:23 Metal sasaring bia God at nong i tar ra malum ta dahat, na bul hasisingen ira numuat nilon bakut bia na halhaal talur ira sakena taar ta ira gamgamatien. Ma metal sasaring mah bia na balaure ira tanua muat, ira bala muat, ma ira palatamai muat waing taie tiga nong na tale wara kilkilam muat bia a mon sakena ta muat tano pakana bung bia no udahat Watong Jisas Krais na hanuat.
1TH 5:24 God nong i tau muat na gil kaiken kanong i la gilgil haruatne ira uno nianga.
1TH 5:25 Bar hinsaka metal, na tahut bia muat na sasaring wara gaie metal.
1TH 5:26 Muat na haatne leh ira hinsaka dahat ta Krais ma muat na gawane leh diet ma ra tahut na magingin.
1TH 5:27 Iau tange hadadas ta muat tano hinsana ra Watong bia muat na was iakan ra pakpakat ta ira hinsaka dahat bakut.
1TH 5:28 No harmarsai tano udahat Watong Jisas Krais na kis ta muat.
2TH 1:1 Iau Pol tika ma Sailas ma Timoti, metal tule ken ra nianga tupas muat ira matanaiabar na lotu kaia Tesalonaika, ing muat gar ta God no adahat Sus ma tano Watong Jisas Krais.
2TH 1:2 A harmarsai ma ra malum na kis ta muat meram ho God no adahat Sus ma no Watong Jisas Krais.
2TH 1:3 Bar hinsaka metal ta Krais, na takodas bia metal na tanga tahut hathatika ta God wara gaie muat. Ma na takodas kanong ira numuat nurnuruan i tahtahuat naba ma ira numuat harmarsai hargilaas i tamtamat hanahaan.
2TH 1:4 Io kaik metal latlat muat nalamin ta ira matanaiabar na lotu gar ta God ta ira tamtaman. Metal lat muat kanong muat tur dadas ma muat nurnur hanahaan nalamin ta ira hinelar ma ngunngutaan muat kilingane.
2TH 1:5 Ma kaike i haminas hapalaine bia no harkurai ta God i takodas. Io kaik, God na nes kilam muat bia muat haruat wara sinola tano uno kinkinis na harkurai ma ra harbalaurai nong muat kilingane ra ngunngutaan utana.
2TH 1:6 Io, God i takodas na gil hoken: na balu pukus ira hinelar ta diet ing diet helar ta muat.
2TH 1:7 Ma na hasangeh muat talur ira numuat ngunngutaan. Ma na hasangeh metal mah. Ma na gil huo tano pakana bung bia no Watong Jisas na harapuasa meram ra mawe nalamin tano lulungo na iaah tika ma ira uno dadas na angelo.
2TH 1:8 Ma diet ing diet pai nunure God ma diet ing diet pai taram no tahut na hinhinawas tano udahat Watong Jisas, Jisas na hapidanau diet ma no udiet harkul.
2TH 1:9 Ma no udiet harkul i hoken: God na haliare hathatikane diet. Diet na kis sisingen ra matmataan tano Watong ma tano minamar tano uno dadas.
2TH 1:10 Ma na ngan huo ta diet ta iakano pakana bung bia no Watong na hanuat ma na kap ra tamat na hinsang nalamin ta ira uno halhaliana ma na hatur kawase ra urur mekaia nalamin ta ira ut na nurnuruan. Ma muat mah, muat na tika ma diet kanong muat ga nurnur ta ira numetal nianga metal ga hinhinawase muat urie bia i tutun.
2TH 1:11 Io kaik, metal la saasaring hait wara gaie muat. Metal sasaring bia God na nes kilam muat bia muat haruat tano mangana nilon God ga tau muat utana. Metal sasaring mah bia na harahut muat ma no uno dadas bia muat naga pakile ira bilai bakut ing i hanuat meram narako ta ira numuat nurnuruan ma ing i haruat ma ira numuat sinisip.
2TH 1:12 Metal sasaring huo waing daga pirlat no hinsana no udahat Watong Jisas uta ira numuat nilon, ma waing daga pirlat muat utano uno nilon. Ma metal sasaring bia kaiken ra pirhakasing na hanuat haruat tano harmarsai tano udahat God ma no Watong Jisas Krais.
2TH 2:1 Kaiken iau wara tangtange utano hinanuat tano udahat Watong Jisas Krais ma utano udahat hinanuat hurlungen ukaia ho ie. Io, metal saring muat ira hinsaka metal ta Krais bia waak muat burut bia ngarngarau gasien ta ing muat te hadade utano pakana bung tano Watong bia i te hanuat um. Taie, pai hanuat baak. Ing bia metal ga ianga na tangesot muat lik bia metal ga tange bia no pakana bung tano Watong i te hanuat um? Taie. Muat te kap dak iakano kukuraina meram narakoman tano numetal harpir bia tiga pakpakat mekaia ho metal tupas muat? Taie, pai tutun.
2TH 2:3 Muat na balaure timaan muat, tikai kabi lamus habato muat ta tiga linge pai tutun. Na tahut bia muat na palai bia iakano pakana bung tano Watong pa na hanuat baak tuk taar tano pakana bung bia ra halengin diet na mikiane God ma nong i ul pat ta God na harapuasa. Ma iakano, aie no tunotuno nong na manga hiruo sakasaka.
2TH 2:4 Iakano tunotuno na sukuane ira mangana linge ira tunotuno diet lik bia a god ma ira linge diet lotu tupas. Ma na hatamat habaling ie ta kaike ra linge bakut. Io kaik, na laka tano tamat na hala na lotu ta God ma na tange bia aie at i God.
2TH 2:5 Muat pai lik leh ing iau ga tange ta muat? Ing iau ga kis tika ma muat iau git hinhinawase muat ta kaiken ra linge bakut.
2TH 2:6 Ma muat palai ta nong i tur bat tar no hinanuat kaiken ta iakano ut na ul pat ta God. Ma i tur bat ie waing iakano tunotuno na harapuasa tano pakana bung at nong God gate puo tar ie.
2TH 2:7 Ma no magingin wara patnau ta God i te hanahaan katin ma sen pai manga hanuat palai baak. Ma aie nong i turtur bat iakano ut na ul pat ta God kaiken na gilgil huo tuk taar bia God na hakari sei, kaik um no ut na ul pat na harapuasa. Ma sen tano pakana bung bia no Watong Jisas na hanuat, na hus bing no ul pat ta God ma no dadaip na hana. Masa, no uno tamat na hinanuat na haliarei.
2TH 2:9 Ma iakano ul pat ta God na hanuat ma no tamat na dadas ta Sataan ma na pakile ira tamat na gingilaan na kinarup ma ira mangana linge wara hangalabo ira tunotuno. Ma diet na lik bia kaiken ra mangana pakpakilai meram naliu.
2TH 2:10 Ma ira uno sakana gingilaan na habato lamus diet ing diet hanahaan wara hiniruo. Ma diet na hiruo kanong diet pa na kanan bia diet na sip ira tutun God ga hapuasne. Io kaik, God pa na halon diet.
2TH 2:11 Ma God na nes bia diet na gilgil huo, kaik na hangunguo ira udiet lilik bia diet naga nurnur ta ira hinarabota.
2TH 2:12 Ma God na gil huo waing naga kure hagahe diet ing diet pai nurnur ta ira tutun i hapuasne ma sen diet manga sip bia diet na gil ira sakena.
2TH 2:13 Io, i bilai bia metal na tanga tahut hait tupas God wara gaie muat ira hinsaka metal ta Krais, muat ing no Watong i sip muat. Ma metal na tanga tahut kanong God gate gilamis muat nalua tano hathatahun ta ira linge waing muat naga hatur kawase nora harhalon. No Tanuo ga bul hasisingen muat bia muat ira halhaliana gar ta God, ma muat te nurnur ta ira tutun ta God, kaik muat te hatur kawase iakano harhalon.
2TH 2:14 Ma God ga sip bia na gil huo ta muat, kaik ga tau muat narako ta ira numetal harpir ma no tahut na hinhinawas waing naga hamar dahat tika ma no udahat Watong Jisas Krais.
2TH 2:15 Io kaik, bar hinsaka metal, i tahut bia muat na tur dadas ma muat na murmur kaike ra tutun ing metal ga hausur muat huo ta ira numetal harpir ma no numetal pakpakat tupas muat.
2TH 2:16 Metal sasaring tupas God no adahat Sus ma no udahat Watong Jisas Krais nong ga sip dahat. Ma meram narako tano uno harmarsai ga tar mah ta dahat no harhabalaraan nong pa nale pataam. Ga tar no uno harmarsai ta dahat, kaik dahat nanaho ma ra nurnuruan ira bilai na linge ing na tabar dahat me.
2TH 2:17 Io, metal sasaring um bia na haragat muat ma na hadadas ira numuat nilon wara gilgil ira tahut na pinapalim ma wara tangtange ira bilai na nianga.
2TH 3:1 Bar hinsaka metal ta Krais, wara hapataam ira nianga metal wara tangtange hoken ta muat: muat na sasaring uta metal bia no hinhinawas tano Watong naga haan hoing ga haan nalamin ta muat. Io, muat na sasaring bia naga haan harbasia gasien ma bia ira tunotuno diet na ru ie.
2TH 3:2 Ma muat ga sasaring mah bia God naga halangalanga sukun metal ta ira mangana sakana tunotuno kanong ira tunotuno bakut, taie audiet ta nurnuruan.
2TH 3:3 Ma sen no Watong na gil haruatne ira uno nianga, kaik naga hadadas muat ma na balaure bat muat tano Ut na Sakena.
2TH 3:4 Muat kis taar tano Watong kaik metal balaraan taar ta muat bia muat la gilgil haruatne ira numetal dadas na nianga ma bia muat na gilgil haitne huo ta ira kaba bungbung.
2TH 3:5 Ma metal sasaring bia no Watong na hapalaine ira numuat lilik bia muat na nes kilam bia God i manga sip muat huo. Ma metal sasaring mah bia na harahut muat wara turtur dadas haruat ma no tuntunur dadas ta Krais.
2TH 3:6 Bar hinsaka metal ta Krais, metal tar ra dadas na nianga ta muat tano hinsana no udahat Watong Jisas Krais hoken: muat na haan talur ira malmalungana hinsaka dahat. Diet pai mur ira numetal kaba harausur ing metal ga tar ta diet.
2TH 3:7 Io, ma muat at muat nunure bia i takodas bia muat na lon hoing metal ga lon nalamin ta muat huo. Metal pa ga malmalungo kaia nalamin ta muat.
2TH 3:8 Metal pa ga ien bia mon ra nian ta tiga nong. Taie. Metal ga kul at ira ametal nian. Ira kaba bungbung, ra kasakes bia ra bung, metal git manga papalim uta ira numetal sunupi ma metal git kilingane ra ngunungut ta kaike ra pinapalim waing metal pa na kap tar ra tirih ta tiga nong.
2TH 3:9 Ma muat lik bia metal ga lon huo kanong pai takodas ta metal bia metal kap ta nian mekaia ho muat? Taie. Gaar takodas ta metal bia metal na gil huo iesen metal pa ga gil kanong metal ga sip bia metal na hamines ra bilai na malalar narako ta ira numetal nilon bia muat na mur ie.
2TH 3:10 Io, ma ing bia metal ga kis tika taar ma muat, metal git tangtange hadadas ta muat hoken: “Ing bia tikai pa na papalim, waak i iaiaan.”
2TH 3:11 Ma metal tange huo kanong metal te hadade bia a mon malmalungana tunotuno nalamin ta muat ing diet pai la paapalim, iesen diet la hamalaslaas ira mes ta ira udiet pinapalim.
2TH 3:12 Io, ta kaiken ra mangana tunotuno metal tange hadadas ma metal haragat diet tano hinsana no Watong Jisas Krais bia diet na kis timaan ma diet na papalim wara adiet at.
2TH 3:13 Iesen muat ira hinsaka metal, waak muat malmalungo wara gilgil ira tahut taar ta ira mes.
2TH 3:14 Ma ing bia tikai pa na taram kaiken ra numetal nianga ta iakan ra pakpakat, io, muat na nes kilam timaan ie. Muat pa na manga lon tika mei waing naga kilingane ra hirhir.
2TH 3:15 Ma sen waak muat sukuanei hoing tikai bia muat malentakuanei. Taie. Muat na hakatom ie kanong a hinsaka muat ie narako ta Krais.
2TH 3:16 Io, ma metal sasaring bia no Watong at, aie no burena tano malum, bia na tar ie ta muat ta ira kaba bungbung ma ta ira numuat kaba ngaas mah. Ma metal sasaring bia no Watong na kis tika ma muat bakut.
2TH 3:17 Io, kaiken um, iau Pol, iau pakat ma no limagu tus at iakan ra hauhawatine subaan ta kan ra pakpakat tupas muat bia ni haatne muat. Ma iau hakilang ira nugu kaba pakpakat bakut huo. Ma ira nugu mangana pakpakat i nanaas hokaiken.
2TH 3:18 No harmarsai tano udahat Watong Jisas Krais na kis ta muat bakut.
1TI 1:1 Iau Pol tiga apostolo ta Krais Jisas haruat ma no hartula ta God no udahat ut na harhalon ma Krais Jisas, aie no burena ta kaike dahat kis nanaho ma ra nurnuruan ine.
1TI 1:2 Ma iau pakat ken ra nianga ukaia ho ugu Timoti, no natigu tutun narako tano udahat nurnuruan ta Krais. Io, a harmarsai ma ra malum meram ho God no adahat Sus ma Krais Jisas no udahat Watong ukatiga ho ugu.
1TI 1:3 Iau sip bia nu kis baak kaia Epesas hoing iau ga haragat ugu bia iau ga wara hinahaan u Masedonia. Ari a tunotuno kaia diet hausur ma ra mes na mangana harausur bisbis. Ma iau sip bia nu kis kaia bia nugu tigal diet.
1TI 1:4 Ma nu tange hadadas mah huo ta diet bia waak diet nangnanget ma ira pirwase bisbis ma ira winawas na harmur ta ira hintubu diet. Kaike ra mangana linge huo i hathatahuat ira hargor bisbis mon. Ma pai harahut dahat wara gilgil haruatne no sinisip ta God ing dahat gil ma ra nurnuruan.
1TI 1:5 Iau tange kan ra dadas na nianga huo waing dahat naga harmarsai hargilaas. Ma iakan ra magingin na harmarsai i la hanhanuat meram narako ta ira gamgamatien na bala dahat ma tano nurnuruan tutun. Ma iakan ra harmarsai i tahtahuat mah ing bia dahat mur ing dahat nunure tar bia i tahut.
1TI 1:6 Ma i tahut bia ni tange huo kanong ari diet te tamapas laah talur kaiken ra magingin ma diet te tahurus taar ta ira winor bia.
1TI 1:7 Diet sip bia diet na tena harausur ta ira harkurai ta Moses. Iesen diet pai nunure bia asa ing diet tangtange. Ma ira linge diet tange bia diet nunure tutun, taie, diet pai palai urie.
1TI 1:8 Io, dahat nunure bia ira harkurai ta Moses diet bilai ing bia dahat papalim me haruat ma no udiet mangana pinapalim.
1TI 1:9 Iesen dahat nunure mah bia ira harkurai pai kis uta diet ira ut na takodas. Taie. I kis uta ira holmatau, ira patnau, ira ut na sakena, ma uta diet ing diet tur talur God. I kis mah uta diet ing diet mur ira bilingana magingin kai napu, ma uta diet ing diet bu bing ira adiet sus ma ira pawasi diet, ma uta ira ut na harubu bingibing bia.
1TI 1:10 Ma i kis uta diet ing diet hilawa, ma uta ira tunaan ing diet noh tika baling ma ira tunaan, ma huo mah ira hahin. Ma i kis mah uta ira ut na harabota, diet ing diet kinau tunotuno, diet ing diet hinawas harabota ta ira pakana bung na harkurai, ma uta diet ing diet na gil ra mes na mangana linge sa i mes tano harausur i tutun.
1TI 1:11 Iakano harausur i haruat tano tahut na hinhinawas nong i hanuat meram ho God nong i manga daan. Ma i hinhinawas utano minarine. Ma iakano tahut na hinhinawas at nong God ga tar ie tagu bia ni harpir mei.
1TI 1:12 Iau tanga tahut ta Krais Jisas no udahat Watong nong ga tar iakan ra baso tagu bia ni papalim mei. Iau tanga tahut tana kanong ga nes kilam iau bia a tunotuno iau nong gor gil haruatne ira uno sinisip. Io kaik, ga tar iakan ra pinapalim na tultulai tagu sukmaal bia nalua iau ga tange hagahei ma iau ga tiga dadas na ut na hinelar. Iesen iau pai ga palai ta ing iau ga gilgil kanong iau pai ga nurnur baak. Io kaik, God ga marse iau.
1TI 1:14 Ma no harmarsai meram ho no udahat Watong ukai ho iau ga manga tamat sakit. Ma ga haan tupas iau tika ma no magingin na nurnuruan ma no magingin na harmarsai hargilaas kanong iau tane Krais.
1TI 1:15 Io, iau ni tange tiga nianga nong i tutun sakit. Ma i tale bia da manga so no udahat nurnuruan tana. Ma i hoken: Krais Jisas ga hanuat ukai ra ula hanuo wara halhalon ira ut na sakena! Ma iau ing iau manga sakena ta diet bakut.
1TI 1:16 Ma iakano at no burena bia ga marse iau. Ma ga marse iau waing Krais Jisas na tale bia na hamines no uno tamat na bala maat ing ga halon iau. Ma iau ga sakena ta diet bakut, kaik iau tiga malalar ta diet ing diet na nurnur tana wara hathatur kawase no nilon hathatika.
1TI 1:17 Da pirlat hatikane no kapawena God nong pa nale maat ma pa di la nesnes ie. No uno tamat na kinkinis na harkurai i tur hathatika. Da hatamat hatikane no hinsana.
1TI 1:18 Timoti, no natigu, kan ra dadas na nianga iau tar taam bia nu tar ta ira mes. Ma bia iau gil huo iau gil haruatne ira nianga ira tangesot diet ga luena tange utano num pinapalim bia nu gil baak ie. Nu mur ira udiet nianga bia nugu harubu tano tahut na hinarubu.
1TI 1:19 Ma bia nu harubu huo nu nurnur hatika ta ira tutun God i te hapuasne, ma nu murmur ira magingin ing u nunure tar bia i tahut. Ma ari diet ga malok bia diet na gil huo, kaik ira udiet nurnuruan ta kaiken ra tutun i sakena hoing tiga mon i taparok ra ula maat.
1TI 1:20 Ma Haimenias ma Aleksanda dir te gil mah huo. Io, iau te tar se dir tano limane Sataan bia dir na harausur bia dir pa na tange hagahe God.
1TI 2:1 Io, no luena linge tano nugu nianga i hoken. Iau haragat dahat bia dahat na sasaring tupas God uta ira tunotuno bakut, ma bia dahat na tanga tahut tana uta diet.
1TI 2:2 I tahut bia dahat na sasaring uta ira tamat na lualua sakit, ma diet ira mes ing diet kap ra kinkinis na harkurai. Dahat na sasaring hokaiken waing dahat naga kap ra kinkinis na malum ma pa da helar ta dahat ing dahat lon mur God ta ira takodas na magingin.
1TI 2:3 Io, ing bia dahat na sasaring huo na tahut, ma na haguamane God no udahat ut na harhalon, nong i sip bia na halon ira tunotuno bakut, ma bia diet bakut diet na nunure ira tutun i te hapuasne.
1TI 2:5 Ma i tale bia ni tange huo kanong tiga kapawena God mon, ma tikai sen mon nong i lamus ira tunotuno ukaia ho God. Ma aie Krais Jisas, a tunotunoi, nong ga tar habaling ie wara kulkul halangalanga ira tunotuno bakut. Ma tano pakana bung haruat tano sinisip ta God, Krais ga gil huo, kaik ga suro haut bia God i sip bia na halon ira tunotuno bakut.
1TI 2:7 Iakano no burena bia God ga tibe iau bia ni apostolo ma ni ut na harpir ta diet ing diet pai Iudeia. Ma iau ga haan bia ni hausur diet bia diet na nurnur ta ira tutun God i te hapuasne. Iau tange ra tutun! Iau pai harabota!
1TI 2:8 Io, uta ira sinasaring um, iau sip bia ira tunaan ta ira subaan bakut diet na sasaring. Ma bia diet na tatik ira gamgamatien na lima diet, na tahut bia diet na gil huo ma pataie ta ngalngaluan bia a hargor.
1TI 2:9 Ma huo mah ira hahin. Iau sip bia ira hahin diet na sigasigam hoing ira mes na tunotuno bia. Waak diet manga hamar ira hi diet. Ma waak diet hamar habaling diet ma ra gol bia ra tulur a kalagi, bia ra sigasigam i tabi matana.
1TI 2:10 Iesen iau sip bia diet na hamar habaling diet ma ira bilai na tintalen haruat ma ira mangana hahin ing diet tange bia diet lotu tupas God.
1TI 2:11 Ma bia ira hahin diet na kap ra harausur, io, i tahut bia diet na kis matien ma diet na hanapu habaling diet.
1TI 2:12 Iau pai haut bia tiga hahin na hausur bia na kure tiga tunaan. Na kis matien mon.
1TI 2:13 Warah, kanong God ga luena hakisi Adam, ma namur, ne Iwa.
1TI 2:14 Ma pai Adam nong Sataan ga habatoi. Taie. Sataan ga habato no hahin, kaik no hahin gom lake no harkurai ta God.
1TI 2:15 Ma sen God na halon ra hahin ing bia diet gil hoken: diet na kakaha, ma diet na nurnur hatika tika ma ra harmarsai hargilaas, a gamgamatien bala diet, ma ra magingin takodas.
1TI 3:1 Io, iau ni tange habaling tiga nianga nong i tutun sakit. Ma i tale bia da manga so no udahat nurnuruan tana. Ma i hoken: ing bia sige tikai i sip bia na kap no kinkinis na kabinsit na lotu, io, i sip ra bilai na pinapalim.
1TI 3:2 Na tahut bia tiga kabinsit na lotu na tiga mangana tunotuno hoken: taie tikai na tale bia na kilam ie bia i te gil ira sakena; tikai mon no uno hahin; na palai no uno lilik; na balaure timaan ira uno masmasingan; ira mes diet na ru ie; a ut na balbale leh ira tunotuno; na petlaar wara hausur ira tunotuno;
1TI 3:3 pa na ut na minom; pa na ut na ngalngaluan ma sen na matien na tunotuno; pa na ut na harngangaar ma pa na kalak ira kinewa.
1TI 3:4 Na balaure timaan no uno hatatamaan. Na balaure ira natine bia diet na taram timaan ie, ma bia na gil huo, na gil tiga ngaas bia i tale bia da ru ie.
1TI 3:5 Ing bia tikai pai nunure wara balbalaure no uno hatatamaan, na balaure bihbihane ira matanaiabar na lotu gar ta God?
1TI 3:6 Ma pai bilai bia i sigar lilik pukus mon, kabi hatamat habaling ie ma no harkurai nong ga karat Sataan na karat mah ie.
1TI 3:7 Ma tiga mangana tunotunoi bia diet ing diet pai mekaia tano lotu, diet na ru ie ma diet kabi kilam ie bia i te gil ra sakena ma na taba tano kun ta Sataan.
1TI 3:8 Ma huo mah ta ira ut na harharahut na lotu. A mangana tunotuno diet i tale bia da urur ta diet. Diet pai mangana tunotuno bia airuo ra karame diet. Diet pa na ut na minom. Diet pa na ut na kalak kinewa.
1TI 3:9 Diet na tur dadas ta kaike God i te hapuasne bia dahat nurnuruan. Ma bia diet tur dadas huo diet na murmur ira magingin ing diet nunure tar bia i tahut.
1TI 3:10 Da luena walar diet ma bia pataie ta linge i tur bat diet, da haut bia diet na papalim na harharahut.
1TI 3:11 Ma huo mah ta ira hahin ing diet harharahut. A mangana tunotuno diet i tale bia da urur ta diet. Diet pa na pinpinas hagahe ta tikai; na palai ira udiet lilik; diet na tutun ta ira linge bakut.
1TI 3:12 Ma ira ut na harharahut, na tikai mon ira udiet hahin. Diet na balaure timaan ira nati diet tika ma diet bakut ta ira udiet hala.
1TI 3:13 Na tahut bia diet na gil timaan huo no pinapalim na harharahut kanong da ru diet, ma kaike ra mangana pinapalim na hadadas ira udiet nurnuruan ta Krais Jisas.
1TI 3:14 A tutun iau pakat ken ra linge ukaia ho ugu iesen iau sip bia pa ni halis ma ni haan ukaia.
1TI 3:15 Iesen bia ing tiga linge i tur bat iau kaik pa nigi hanuat gasien, io, iau pakat kaiken ra linge bia nugu palai ta ira mangana tintalen i bilai bia no hatatamaan ta God na mur. Ma iakano hatatamaan aie ira matanaiabar na lotu tano lilona God. Ma diet haruat ma ra kasong nong i hadadas ira tutun God i hapuasne.
1TI 3:16 Ma i manga palai bia kaiken ra tutun i manga tamat sakit. Kaiken ra tutun ga susuhai nalua ma sen i te hanuat puasa. Ma i lamus dahat bia dahat na murmur God. No suruno ta kaiken ra tutun i hoken: Bia ga hanuat puasa, a tunotunoi, ma no Tanuo ga hamines bia a takodasianai. Ira angelo diet ga ngok tana, ma ta ira hunhuntunaan di ga harharpir utana. No ula hanuo diet ga nuruan ie, ma uram tano minamar naliu God ga kap haut ie.
1TI 4:1 No Tanuo i hinawas palai bia tano hauhawatine ta ira pakana bung ari diet na tur talur kaike ra tutun dahat nurnur ine. Diet na mur ira tanuo harabota ma ira harausur ta ira sakana tanuo.
1TI 4:2 Kaiken ra harausur na hanuat mekaia ta ira ut na harababo. I hoing bia di ga tun ira udiet lilik ma ra mamahien, kaik diet pai palai bia asa i sakena ma asa i bilai.
1TI 4:3 Diet hausur ira matanaiabar bia diet pa na hartola ma bia diet pa na ien ari a mangana nian. Iesen God ga hakisi kaiken ra nian waing dahat ira ut na nurnuruan ing dahat nunure ira tutun God i te hapuasne, dahat naga luena tanga tahut urie ma namur um dahat naga ien.
1TI 4:4 I tale bia ni tange huo kanong ira linge God ga hakisi i bilai. Dahat pa na malok se tiga linge. I tale bia dahat na bale leh ira linge bakut ing bia dahat tanga tahut uram naliu urie.
1TI 4:5 Ma i tale bia da gil huo kanong no nianga gar ta God ma no magingin na sinasaring dir hinawas palai bia ken ra linge diet gar ta God, kaik diet gi gamgamatien.
1TI 4:6 Ing bia nu tulus haminas kaiken ra linge ta ira hinsakaam gar ta Krais, io, augu tiga tahut na tultulai ta Krais Jisas. U te nurnur ta ira tutun God i te hapuasne ma u te murmur ira bilai na harausur. Io kaik, nu haut leh kaiken ra tutun ma kaiken ra harausur bia naga hapatpatuan ugu.
1TI 4:7 Waak u hutet ta ira sakana pirwase ing pa na hatahutne ugu. Iesen hadadas ugu ta ira linge gar ta God waing ken ra linge na harahut ugu wara murmur timaan God.
1TI 4:8 Bia tikai i hamamakan no palatamaine wara hinilau timaan, na harahut ie ta dahin mon. Iesen bia dahat murmur God, iakan ra magingin na harahut dahat ta ira linge bakut kanong na harahut dahat tano nilon katin ma tano nilon mah nong na hanuat namur.
1TI 4:9 Ma kaiken iau tange i tutun sakit. Ma i tale bia da manga so no udahat nurnuruan tana.
1TI 4:10 Io kaik, dahat manga baso kanong dahat kis nanaho ma ra nurnuruan tano udahat lilona God. Aie no ut na Harhalon ta ira tunotuno bakut, iesen tutun sakit bia na halon ira ut na nurnuruan.
1TI 4:11 Nu hausur ira matanaiabar ta ken ra linge ma nu tange hadadas ta diet bia diet na taram.
1TI 4:12 Pa nu haut leh tikai bia na nes habulbul ugu kanong a marawaan mon ugu. Iesen nu haminas habaling ugu ta ira ut na nurnuruan hoing tiga bilai na tunotuno ing diet na sip wara murmur. Nu haminas habaling ugu huo ma ira num nianga ma ira num tintalen. Ma huo mah ma no num harmarsai, no num nurnur, ma ira num gamgamatien na magingin.
1TI 4:13 Nu balaan wara waswas ira pakpakat ta God ra matmataan gar na haruat. Nu balaan mah wara harharpir ma wara hausur ira matanaiabar tuk taar bia ni hanuat.
1TI 4:14 Waak u lik habulbul no hartabar nong ga hanuat taar taam mekaia ra nianga ta ira tangesot tano pakana bung ing ira kabinsit na lotu diet ga bul ira lima diet taam. Kaia, nu papalim mei.
1TI 4:15 Nu tar no num kidilona nilon bakut ta kaiken ra linge waing ira matanaiabar bakut diet na nes bia u tahtahuat timaan.
1TI 4:16 Nu balaure timaan habaling ugu. Ma nu balaure timaan mah no num harausur. Nu gil haitne kaiken ra linge. Ing bia nu gil huo nu halon habaling ugu ma diet mah ing diet hadade ugu.
1TI 5:1 Waak u ngaluane tiga nongtamat ta tiga nironga. Iesen pir mon ie hoing bia am sus ie, ma ira marawaan hoing bia a tasim diet.
1TI 5:2 Nu pir ira parana hoing no pawasim. Ma ira pokona hahin ma ira bulahin nu pir diet ma ra gamgamatien na magingin hoira hainim.
1TI 5:3 Nu ru ira makosa na hahin ing diet makosa tutun.
1TI 5:4 Iesen bia tiga makosa a mon natine bia a mon tubuno, io, i tahut bia kaike ra tubuno ma ira natine diet na luena gil baak ira udiet bilai na magingin nalamin ta ira udiet hatatamaan at. I tahut bia diet na balu ra harharahut ta ira adiet sus ma pawasi diet huo. Ma diet na gil huo kanong iakan ra mangana magingin na haguama God.
1TI 5:5 No makosa tutun nong aie sen, taie tiga nong wara balbalaurei, io, iakano makosa i te kis nanaho ma ra nurnuruan ta God ma i sasaring hatika ta ira kaba bungbung, ra kasakes ma ra bung mah bia God na harahut ie ta ira uno sunupi.
1TI 5:6 Ma sen bia tiga makosa i sip bia na haguama mon no palatamaine, io, a tutun bia i lon taar baak iesen i te maat.
1TI 5:7 Io, nu tange hadadas ta ken ra linge mah ta ira matanaiabar na lotu bia diet na taram, kaik tikai pa na tale bia na kilam diet bia a mon nironga ta diet.
1TI 5:8 Ma sen bia tikai pa na balaure no uno hatatamaan at ma ira hinsakana mah, io, i te haan talur ira tutun ta God nong dahat nurnur ine. Ma i manga sakena ta diet ing diet pai nurnur.
1TI 5:9 I tahut bia da bul halaka tiga makosa ta diet ira kaba makosa tutun ing bia a mangana makosa hoken: bia a liman ma tikai na sangahul na tinahon ira uno ma bia i te sakit mah, bia tikai mon no uno tunaan, bia ira matanaiabar diet nunure bia i te gil ira bilai na harharahut, bia gate halon bulu, bia i te bale leh ira wasire, bia i te gis kaki diet ira matanaiabar gar ta God, bia te harahut diet ing diet mon tinirih, ma bia te gil bakut ira halengin na mangana bilai na harharahut.
1TI 5:11 Iesen waak u bul halaka ira makosa ing pai tamat ira udiet tinahon baak. Warah, kanong ing diet kilingane ira mangana sinisip ta ira palatamai diet, diet pai manga lilik ta Krais, ma diet sip bia diet na tola baal.
1TI 5:12 Ma bia diet gil huo diet tur ra harkurai kanong diet te kutus ira udiet luena kukubus ta Krais.
1TI 5:13 Ma pai iakano sen mon. Ing diet harkol harbasia ta ira hala, diet hasurum bia ira udiet pakana bung. Ma no linge i sakena ta iakano bia diet harharpinaas ma diet gotgota wara tangtange ira sakana nianga uta ira linge gar na mes.
1TI 5:14 Io kaik, ta ira makosa ing pai tamat ira udiet tinahon, io, iau sip bia diet na tola baal, bia diet na hapuar bulu, bia diet na gil timaan hala, ma bia diet pa na tar mauho ta ira adahat suk wara tangtange hagahe dahat.
1TI 5:15 Io, iau tange huo kanong ari te tamapas laah taar ta Sataan.
1TI 5:16 Bia tiga ut na nurnuruan na hahin i balaura makosa, io, i tahut bia na gilgil huo ta diet. Pai tahut bia no lotu na pusak no tinirih na harbalaurai ta tiga mangana makosa huo. No lotu na harahut diet ing diet makosa tutun.
1TI 5:17 Ira kabinsit ing diet manga harahut timaan no lotu ma no udiet kinkinis na lualua, io, da hatamat no udiet kunkulaan. Ma iakan i manga tutun ta diet ing diet manga nanget wara harharpir ma wara hauhausur ira matanaiabar.
1TI 5:18 Ma iakan i palai kanong ira pakpakat ta God i tange bia, “Waak u wis no hana no bulumakau ing bia i papasuane se ira pala wit.” Ma tiga nianga i tange, “I takodas bia da kul ing i papalim.”
1TI 5:19 Iesen bia airuo bia aitul dal na kilam tiga kabinsit bia i te gil ta sakena, ma dal na haut tika, io, nu haut leh no udal nianga. Ma ing bia tikai mon i kilam tiga kabinsit na lotu bia i te gil ta sakena, waak u haut leh no uno nianga.
1TI 5:20 Ma diet ira kabinsit um ing diet gil ra sakena, nu bor diet ra matmataan ta diet bakut waing diet ira mes mah diet naga burut.
1TI 5:21 Ra matmataan ta God ma Krais Jisas tika ma ira angelo ing gate gilamis diet, iau tar iakan ra tamat na dadas na nianga taam hoken: nu palim hadikdikit ken ra nianga ma nu mur tiga ngaas sen mon ta ira mangana tunotuno bakut. Waak u kure hagahe tari ma nu tur ma tari.
1TI 5:22 Waak u raurawaan wara bul lumaam ta tiga tunotuno bia na hanuat tiga lualua. Kabu tar bura na maraas laah ta ira uno sakena. Ma sen bia augu, nu gamgamatien.
1TI 5:23 Pa nu mama taah sen mon iesen nu kap ta da wain wara harharahut no balaam ma ira num minaset.
1TI 5:24 Ira magingin sakena tari i manga kis palai. Ma tano pakana bung bia diet ing diet te gil kaike ra sakena diet na tur ra harkurai, io, ira udiet sakana magingin i te luena puasa kaia ra harkurai. Ma sen ira sakena ta ira mes balik na hanuat palai namur.
1TI 5:25 Io, i huo mah ta ira bilai na magingin. Ira bilai na magingin i kis palai. Ma ira bilai na magingin ing diet pai kis palai pai tale bia kaike ra bilai na magingin na susuhai.
1TI 6:1 I tahut bia diet ira maris na tultulai diet na manga ru timaan ira udiet tamat waing tari pa na tange hagahe no hinsa God ma no udahat harharausur.
1TI 6:2 Ma huo mah ta ira maris na tultulai ing ira udiet tamat diet te ut na nurnuruan. Waak kaike ra tultulai na lik bia, “No nugu tamat, a tasigu ta Krais mon,” kaik na lik hamamakan ie. Iesen na tahut bia na lik hoken: “No nugu tamat, a ut na nurnuruan mah ie nong iau ni tar no nugu harmarsai tana.” Io kaik, na manga papalim balik tana. Nu hausur ma nu pir ira matanaiabar ta kaiken ra linge.
1TI 6:3 Ing bia tikai na hausur ma tiga mes na mangana harausur nong pai haruat ma ira bilai na tutun na nianga tano udahat Watong Jisas Krais, ma bia pai haruat mah ma ira harausur ta ira magingin wara murmur timaan God, io, iakano tunotuno i hatamat habaling ie ma pai nunure ta linge. Iesen i sip bia na hargor uta ira nianga bia mon. Ma iakan pa na harahut. Na hagahai mon. Ma iakan ra mangana hargor na hatahuat ra lilik sakasaka, ra bala ngungut, ra tanga hagahe tikai, ra sakana lilik na hartutung, ma ra hargau hait nalamin ta ira tunotuno ing diet harus ise tar ira tutun ta God ma i ba ira udiet lilik. Kaiken ra mangana tunotuno diet lik bia no magingin na murmur God na harahut diet wara kapkap kinewa.
1TI 6:6 Iesen i tutun balik bia no magingin na murmur God na harahut dahat ing bia dahat bala maat wara kapkap ta halengin linge tano ula hanuo.
1TI 6:7 Io, ing di ga kaha dahat, dahat pa ga kap ta linge ukai tano ula hanuo. Ma bia dahat na haan talur iakan ra ula hanuo dahat pa na kap mah tiga linge.
1TI 6:8 Iesen bia a mon nian ma a mon kiniasi dahat, dahat na lik bia i haruat.
1TI 6:9 Ma sen bia diet ing diet sip bia diet na watong tano kinewa, diet na puko taar ta ira harwalaam. Diet na taba ta ira mangana sinisip ta ira ul ba ing na hagahe diet. Ma kaike ra sinisip na manga haliare tun at diet.
1TI 6:10 Iau tange huo kanong no sinisip wara gaiena kinewa, aie tiga burena ta haleng na mangana sakena. Ma ari diet te so no udiet sinisip taar kaia, kaik diet te haan tapaka laah ta ira tutun dahat nurnur ine ma diet te hangungut habal diet ma ra tamat na harangunngutaan.
1TI 6:11 Ma sen bia augu, augu tiga tunotuno ta God. Nu hilau sukun kaike ra linge. Ma nu manga mur no taktakodasuana magingin, no magingin wara murmur timaan God, no magingin na nurnuruan, no magingin na harmarsai hargilaas, no magingin na tuntunur dadas ta ira harwalar, ma no magingin na matmatien.
1TI 6:12 Nu harubu tano tahut na hinarubu haruat ma ira tutun dahat nurnur ine. Nu sangau leh iakano nilon hathatikai nong God gate tau ugu bia nu hatur kawasei. Ma ga tau leh ugu tano pakana bung u ga tange no num bilai na hinhinawas palai tano num nurnuruan ra matmataan ta ira haleng.
1TI 6:13 Iau sunang ugu ra matmataan ta God nong i tar lon ta ira linge bakut, ma ra matmataan ta Krais Jisas nong ga tar no bilai na hinhinawas palai taar tane Pontias Pailat, bia nu balaure no nianga u te hatur kawasei. Nu balaurei bia tikai pa na habilingei ma bia tikai pa na tange hagahei. Ma nu gil huo tuk taar bia no udahat Watong Jisas Krais na hanuat puasa.
1TI 6:15 Ma na hanuat tano pakana bung at bia God i sip bia na hanuat huo. God nong i daan. Aie no kapawena Ut na Harkurai. Aie no Tamat na Lualua ta ira lualua bakut ma aie no Tamat na Watong ta ira watong bakut.
1TI 6:16 Aie sen mon nong pa na maat. Ma i kis tano tamat na lulungo nong pai tale bia tikai na haan hutet tana. Taie tikai pai la nesnes baak ie ma pai tale bia na nes mah ie. Aie, da ru ie, ma na kis na harkurai hathatikai.
1TI 6:17 Nu ianga dadas ta diet ing diet te hatur kawase ra kinkinis na watong ta iakan ra ula hanuo bia diet pa na butbut ma bia diet pa na so no udiet nurnuruan ta ira kinewa bia na hatahutne diet. Pai tale bia tikai na so no uno nurnuruan ta ira kinewa kanong pa na kis lawas. Iesen i tahut bia diet na kis kawase ira tahut na linge meram ho God ma ra nurnuruan. Aie nong i manga tabar timaan dahat ma ira bilai na linge wara haguama dahat.
1TI 6:18 Nu haragat diet bia diet na gil ira bilai na magingin ma bia diet na watong ta ira udiet pinapalim na harharahut ma diet na taguro wara harhartabar hargilaas.
1TI 6:19 Ing bia diet gil huo diet na tagure audiet ta tamat na bunbulaan wara unamur. Ma kaiken ra mangana bunbulaan na tur dadas. Na tahut bia diet na gil huo waing diet naga hatur kawase no nilon nong a nilon tutun ie.
1TI 6:20 Timoti, ing God ga tar taam bia nu manga palim holane, nu balaure timaan. Nu tur talur ira nianga bia ta kan ra ula hanuo. Ma ira nianga di se wara suksukuane no harausur tutun, nu tur talur mah ie. Kaiken ra mangana nianga di tange bia a nianga ta ira ut na mintot, sen bia pai tutun.
1TI 6:21 Ari diet te tange bia diet hatur kawase ken ra mangana nianga, kaik diet te tamapas laah ta ira tutun dahat nurnur ine. A harmarsai ta muat.
2TI 1:1 Iau Pol, tiga apostolo ta Krais Jisas haruat tano sinisip ta God. Ma iau tiga apostolo huo kanong God ga tar no kunubus utano nilon i kis ta Krais Jisas.
2TI 1:2 Ma iau pakat ken ra nianga tupas ugu Timoti, no natigu nong iau manga sip ie. A harmarsai ma ra malum ukaia ho ugu meram ho God no adahat Sus ma Krais Jisas no udahat Watong.
2TI 1:3 Iau tanga tahut ta God nong iau papalim tana. Ma ing bia iau papalim tana huo, iau la murmur ira linge iau nunure tar bia i tahut, hoing ira hintubugu diet ga gil mah. Io, iau tanga tahut tana ing iau liklik leh ugu ta ira nugu sinasaring, ra malaan ma ra bung mah.
2TI 1:4 Ma iau sasaring huo kanong iau lik leh ira luur na mataam, kaik iau gi manga sip bia ni nes ugu bia ni kap ra but na gungunuama.
2TI 1:5 Io, iau tanga tahut um ta God kanong iau liklik leh no num nurnuruan tutun nong ga luena kis tane Lois, no tubum, ma tane Iunis, no pawasim. Ma iau manga palai bia i kis mah taam.
2TI 1:6 Io kaik, iau halilik ugu bia nu puh halulungo no hartabar ing God ga tar ie taam ing iau ga bul ira limagu taam.
2TI 1:7 Iau sip bia nu gil huo kanong God pai tabar dar ma ra bunurut. Taie. I te tabar dar ma ra dadas, ma ra harmarsai hargilaas, ma ra tintalen bia tikai na balaure timaan ira uno sinisip.
2TI 1:8 Io kaik, waak u hirhir wara hinhinawas utano udahat Watong, ma waak u hirhir utagu ing di te wis kawase iau wara gaie Krais. Iesen nu taguro bia nu pusak kan ra hinarngungut tika ma iau wara gaiena no tahut na hinhinawas. Ma na tale bia nu gil huo ma ra dadas ta God nong ga halon dahat ma ga tatau dahat bia dahat naga gamgamatien. Ma pa ga tatau dahat haruat ma ira udahat magingin iesen haruat ma no uno sinisip ma no uno harmarsai. Ma God ga tabar bia mon dahat ma kan ra harmarsai ta Krais nalua tano hatahun ta ira linge bakut.
2TI 1:10 Ma sen kaiken um, God te hapuasne iakan ra harmarsai tano hinanuat ta Jisas Krais, no udahat ut na Harhalon nong ga hapataam no dadas tano minaat. Ma narako tano tahut na hinhinawas Krais te hapuasane mah bia dahat na lon ma dahat pa na maat.
2TI 1:11 Ma iau, i gate tibe iau bia iau tiga ut na hinarpir, ma apostolo, ma tena harausur ta iakan ra tahut na hinhinawas.
2TI 1:12 Io kaik, iakano no burena bia iau kap kaiken ra hinarngungut. Iesen iau pai hirhir kanong iau nunure nong iau nurnur tana. Ma iau manga palai bia na petlaar wara balbalaure timaan iakano linge nong ga tar ie tagu bia ni manga holanei. Ma na balbalaure huo tuk taar ta iakano bung namur.
2TI 1:13 Nu palim dit kaike ra bilai na tutun na nianga ing iau ga hausur ugu ine. Waak u kuas ie ta dahin. Ma nu kis taar tano nurnuruan ma tano magingin na harmarsai hargilaas ing dahat hatur kawase narako ta Krais.
2TI 1:14 Nu balaure timaan no bilai na linge nong God ga tar ie taam bia nu manga holanei. Ma nu balaurei huo ma no dadas tano Halhaliana Tanuo nong i la kis taar ta dahat.
2TI 1:15 Io, u palai bia diet bakut kaia tano hanuo Esia, diet ga haan talur iau. Ma nalamin ta diet ne Pigelus ma ne Hermogenes.
2TI 1:16 Iau sasaring bia no Watong na marse no hatatamaan ta Onesiporus kanong ga haguama haitne iau ma pa ga hirhir uta ira agu dadas na winwisaan di ga wis iau me.
2TI 1:17 Iesen bia ing ga hanuat ukai Rom ga manga sisilih utagu tuk taar bia ga nes tupas iau.
2TI 1:18 Iau sasaring bia no Watong na marsei ta iakano bung namur! U manga palai ta ira mangana harharahut ga tar tagu kaia Epesas.
2TI 2:1 Ma augu, natigu, nu dadas ma no harmarsai nong dahat hatur kawase narako ta Krais Jisas.
2TI 2:2 Ma kaike ra nianga u ga hadade leh tagu ra matmataan ta ira halengin, io, nu tar kaike ra nianga ta ari a tunotuno bia diet na manga holanei. Ma sen nu tar ie ta ira mangana tunotuno hoken: na tale ugu bia nu so no num nurnuruan ta diet ma na tale diet bia diet na hausur mah tari a mes.
2TI 2:3 Nu taguro bia augu mah nu pusak ra hinarngungut hoing tikai nong i harubu wara gaie Krais Jisas.
2TI 2:4 Taie tiga umri pa na manga harnanget ma ira mangana binalaan ta diet ira mes ing diet pai harubu. Taie. I sip mon bia na haguama no uno tamat na umri.
2TI 2:5 Ma bia tiga nong i laka tano hinilau harkoskos, ma ing bia pai taram ira harkurai tana, pa da tange bia i lua.
2TI 2:6 Ma i takodas bia no ut na gil lalong nong i papalim dadas na luena hatur kawase ra hunena.
2TI 2:7 Nu lilik timaan ta kaiken iau tangtange kanong no Watong na hapalaine ugu ta kaiken bakut.
2TI 2:8 Nu lik kawase no bulumur ta Dawit, ne Jisas Krais, nong God ga hatut habaling ie sukun ra minaat. Iakano no tahut na hinhinawas nong iau harpir mei.
2TI 2:9 Ma iakano no burena bia iau kap ra hinarngungut. Ma pai kan ra tirtirih sen mon. Di te kubus kawase mah iau ra hala na harpidanau hoing tiga holmatau. Iesen ira nianga ta God, pa di kubus kawase.
2TI 2:10 Io kaik, iau tur dadas ta ira tirtirih bakut wara gaie diet ing God gate gilamis diet, waing diet mah diet naga hatur kawase no harhalon nong i kis ta Krais Jisas ma bia diet na kap mah no minamar hathatika.
2TI 2:11 Io, iau ni tange tiga nianga nong i tutun sakit. Ma i hoken: Bia dahat te maat tika mei, dahat na lon tika mah mei;
2TI 2:12 bia dahat tur dadas ta ira tirtirih, dahat na harkurai tika mah mei. Bia dahat na harus isei, aie mah na harus ise dahat;
2TI 2:13 bia dahat pai tutun, aie i tutun hathatika, kanong pai tale bia na gil ing i mes tano magirana.
2TI 2:14 Nu halilik haitne kaiken ra linge ta diet. Ma nu manga hakatom diet ra matmataan ta God bia diet pa na hargor pana nianga mon. Iakano mangana hargor pa na harahut iesen na haliare mon diet ing diet hadadei.
2TI 2:15 Nu manga papalim timaan bia God na tange bia a bilai na ut na pinapalim ugu, tiga mangana ut na pinapalim nong pa na haruat bia na hirhir tano uno pinapalim ma na tar ra takodas na harausur tano tutun na nianga gar ta God ta ira matanaiabar.
2TI 2:16 Nu tur talur ira nianga bia ta kan ra ula hanuo kanong na manga hatapaka balik ira matanaiabar sukun God.
2TI 2:17 Ma ira udiet nianga na ngangaah hoira manuo. Ma nalamin ta diet ne Himeneus ma ne Piletus.
2TI 2:18 Dir te tamapas laah sukun ira tutun God i te hapuasne. Dir tange bia no tuntunut hut sukun ra minaat i te hanuat. Kaik, dir hagahe ira nurnuruan audiet tari.
2TI 2:19 Iesen no dadas na kasong balik nong God i te bul ie pa na mangmagile. Ma a pakpakat tana hoken: “No Watong i nunure diet ira auno.” Ma no mes i tange, “Ma nong i tange bia a gar tano Watong ie, i tahut bia na tur talur ira sakana magingin.”
2TI 2:20 Io, narakoman tiga tamat na hala a haleng na mangana dis. Tari di gil ma ra gol bia siliwa. Ma ari a mes di gil ma ra daha bia a pise mon. Ari ta ira bilai na pinapalim ma ari ta ira bilinge na pinapalim.
2TI 2:21 Io kaik, ing bia tikai na hagamgamatien habaling ie talur kaike ra bilinge, na haruat ma tiga gamgamatien na linge nong i tale bia no Watong tano hala na papalim mei. Ma na papalim mei ta ira bilai na mangana pinapalim kanong no linge i taguro taar uta ira bilai na pinapalim bakut.
2TI 2:22 Nu hilau sukun ira sakana sinisip ta ira marawaan. Ma nu mur ra magingin takodas, nurnuruan, harmarsai, ma malum tika ma diet ing diet haan tupas no Watong ma ira gamgamatien na bala diet.
2TI 2:23 Nu tur talur ira mangana hargor ira ba diet gil, kanong u nunure bia kaike ra mangana hargor diet la hatahuat ra harngangaar.
2TI 2:24 Ma i tahut bia no tultulai tano Watong pa na harngangaar ma sen na gil ira bilai ta ira tunotuno bakut. Ma i tahut bia na tale wara hauhausur ira tunotuno ma na bala maat ing bia tikai na gil ra sakena tana.
2TI 2:25 Ma ta diet ing diet sukuane ie, na tahut bia na hausur diet hoing tiga matien na tunotuno, ma God dak na haut leh diet bia diet na lilik pukus, kaik diet naga nunure ira tutun ta God.
2TI 2:26 Ma ira udiet lilik na palai um ma diet na tale wara hinilau talur no kun ta Sataan nong gate palim kahe diet wara gilgil haruatne ing i sip.
2TI 3:1 Na tahut bia nu palai bia ari a dadas na purpuruan na hanuat tano hauhawatine ta ira pakana bung.
2TI 3:2 Ira matanaiabar diet na sip habaling at diet ma diet na sip kinewa. Diet na hatamat habaling diet ma diet na butbut. Diet na tange hagahe ira tunotuno ma diet pa na taram ira adiet sus ma ira pawasi diet. Diet pa na tanga tahut ta ira harharahut ma diet na tur talur ira sinisip ta God.
2TI 3:3 Diet pa na harmarsai hargilaas ma ing bia diet ngalngaluan diet pa na harbalaan balin. Diet na pinas hagahe ira tunotuno ma pa na tale diet bia diet na tur bat ira udiet sakana sinisip. Diet na manga haliare ira tunotuno ma diet na malentakuane ira bilai.
2TI 3:4 Diet na gil ra sakana hinasakit ta ira udiet harwis. Diet ira ut na pet bia ma diet ngana tahut. Diet na sip bia diet na mur no ngaas wara kapkap gungunuama ma sen diet pa na sip God.
2TI 3:5 Diet harababo bia diet mur God iesen diet malok ise no uno dadas bia na laka ta ira udiet nilon. Nu tur talur kaiken ra mangana tunotuno.
2TI 3:6 Ari ta diet, diet la silsilhe ra ngaas bia diet na laka ta ira hala ta ira matanaiabar. Ma diet la lamlamus habato ira mangana hahin ing diet pai palai ta ira tutun God i te hapuasne. Kaiken ra mangana hahin, ira udiet magingin sakena i kubus kahe diet ma ira udiet mangana sakana sinisip i sunang diet bia diet na mur.
2TI 3:7 Diet ira hahin diet la sipsip bia diet na harausur ta ira tutun ta God ma sen pai tale diet bia diet na nes kilam kaike ra tutun.
2TI 3:8 Ma kaike ra tunotuno diet sukuane kaike ra tutun hoing Ianes ma ne Iamberes dir ga sukuane Moses. Ma kaike ra mangana tunotuno, i sakena harsakit ira udiet lilik ma pai tutun ira udiet nurnuruan.
2TI 3:9 Iesen pa na tahuat timaan ira udiet pinapalim kanong ira tunotuno bakut diet na nes kilam ira udiet pinapalim bia a ba na pinapalim mon hoing diet ga nes kilam ira pinapalim ta Ianes ma Iamberes.
2TI 3:10 Ma sen augu, u nunure timaan ira nugu harausur, ira nugu tintalen, no burena ta ira nugu lilik, no nugu nurnuruan, no nugu magingin na bala maat, ma no nugu harmarsai. U nunure tar bia iau ga tur dadas ta ira tinirih.
2TI 3:11 Ma u palai ta ira hinelar ma ta ira hinarngungut ing ga haan tupas iau. Ma u nunure tar bia di ga manga helar tagu aras Entiok ma Aikoniam ma Listara. Iesen no Watong ga halon leh iau sukun diet ira hinelar bakut!
2TI 3:12 Ma i tutun bia diet bakut ing diet sip bia diet na mur timaan God narako tano udiet kinkinis ta Krais, da helar ta diet.
2TI 3:13 Iesen ira ut na sakena ma ira ut na harababo, ira udiet sakena na manga sakena sakit namur. Diet na habato lamus tari a tunotuno ma ari a mes diet na gil huo mah ta diet.
2TI 3:14 Ma sen augu, nu gilgil at ira linge ing u gate harausur ine ma ing u nunure bia i tutun. Ma nu gilgil huo kanong u palai bia sige diet ing diet ga hausur ugu huo.
2TI 3:15 Ma u palai mah bia tur leh u ga nat na bulu u ga nunure ira Halhaliana Pakpakat ing diet petlaar bia diet na haminonas ugu tano harhalon nong dahat na hatur kawase ing dahat nurnur ta Krais Jisas.
2TI 3:16 God no burena ta ira uno Pakpakat bakut. Ma i tale bia da papalim ma kaike ra Pakpakat bakut wara hauhausur ira matanaiabar ma wara pirpir tikai nong i gil ra sakena. Ma kaike bakut diet haruat mah bia da hatakodasne tikai me, bia da hausur ira tunotuno me uta ira magingin takodas.
2TI 3:17 Ma ira Pakpakat ta God diet bilai huo waing tiga tunotuno gar ta God na manga taguro timaan wara gilgil ira tahut na pinapalim bakut.
2TI 4:1 Ra matmataan ta God ma ta Krais Jisas nong na kure diet ing diet lon baak ma diet ing diet gate maat, iau tar iakan ra tamat na dadas na nianga taam. Krais Jisas no Tamat na Lualua na hanuat wara harkurai, io kaik, iau tar kan ra dadas na nianga taam ma i hoken: nu harpir ma no nianga ta God. Ma nu taguro timaan bia nu harpir huo ta ira pakana bung bakut, bia diet sip bia diet na hadade bia taie. Nu hausur diet ma ra bala maat. Ma ing nu harausur huo nu lamus ira udiet lilik ta ira tutun ta God, nu pir diet ta ira udiet sakena, ma nu haragat diet.
2TI 4:3 Warah, kanong tiga pakana bung na hanuat bia ira matanaiabar diet pa na sip bia diet na hadade ira harausur tutun. Taie. Diet na sip bia diet na murmur ira udiet sinisip at. Io kaik, diet na lamus hulungan ira tena harausur ing na hausur diet ta ira mangana linge kaike ra matanaiabar diet manga sip bia diet na hadade.
2TI 4:4 Diet na malok bia diet na hadade ira tutun ta God ma diet na tamapas taar ta ira pirwase bisbis.
2TI 4:5 Iesen augu, nu balaure timaan ugu ta ira linge bakut. Nu pusak ira hinarngungut, nu harpir ma no tahut na hinhinawas, ma nu gil haruatne ira pinapalim ing tiga tultulai ta God na gil.
2TI 4:6 Iau tange huo kanong i te hutet bia ni haan talur iakan ra ula hanuo. I manga hutet um hoing bia di te burange tar ira degu. Ma ira degu na ngan hoing ra hartabar na wain tupas God.
2TI 4:7 Iau te harubu tano tahut na hinarubu haruat ma ira tutun dahat nurnur ine. Iau te hapataam no harkoskos. Iau te gil haruat ta ira tutun dahat nurnur ine.
2TI 4:8 Io, no balaparik uta diet ing diet lua ta ira harkoskos i taguro taar utagu. Ma no Watong, no takodasiana ut na harkurai, na tabar iau mei tano tamat na bung namur kanong i takodas no nugu nilon. Ma pataie bia iau sen mon. Na tabar mah diet ing diet manga sip no uno hinanuat.
2TI 4:9 Nu manga walar ma ra baso bia nu hanuat gasien ukai ho iau kanong Demas ga sip ira linge tano ula hanuo katin ma ga haan sukun iau uras Tesalonaika. Keresen i te haan u Galesia ma Taitus i te haan u Dalmesia.
2TI 4:11 Luk sen mon um ken ho iau. Nu lam mah Mak ing nu hanuat kanong i tale bia na harahut iau tano nugu pinapalim.
2TI 4:12 Iau te tule Tikikus u Epesas.
2TI 4:13 Ing nu hanuat ukai nu kap mah no nugu sigasigam nong iau ga waak kapis ie aras Toroas hone Karpus. Nu kap mah ira pakpakat. Ma nu balaure timaan bia pa nu luban ira pakpakat ing a tabi matana.
2TI 4:14 Aleksanda no ut na pinapalim na gil linge ma ra baras ga manga hagahe iau. No Watong na balu tar tana haruat ma ira uno gingilaan.
2TI 4:15 Ma augu mah, nu balaure ugu at tana kanong ga manga sukuane no udahat harausur.
2TI 4:16 No luena pakaan bia iau ga tur ra harkurai wara turtur bat ira hartutung tupas iau, io, taie tikai pa ga tur harahut iau. Diet bakut diet ga haan sukun iau. Iau saring no Watong bia na lik luban se ing diet gil huo.
2TI 4:17 Iesen no Watong ga tur tika ma iau gaam hadadas iau, kaik iau gaam petlaar bia ni harpir ma no tahut na hinhinawas bakut taar tano hinadoda ta diet ing diet pai Iudeia. Ma no Watong ga halon iau sukun ra harkurai na hiniruo.
2TI 4:18 No Watong na halangalanga iau sukun ira sakena bakut ma na lamus timaan iau uram ra mawe tano uno kinkinis na harkurai ma harbalaurai. Da pirlat ie hathatika. Tutun Sakit.
2TI 4:19 Nu haatne leh Pirisila ma ne Akuila ma no hatatamaan tane Onesiporus.
2TI 4:20 Erastas i kis taar Korin ma iau ga haan talur Toropimus kaia Miletus kanong ga maset.
2TI 4:21 Nu manga walar ma ra baso bia nu hanuat kai nalua tano pakana bung na harat. Ubulus, Puden, Linus, Kolodia, ma diet bakut mah ira harahinsakaan narako ta Krais diet haatne leh ugu.
2TI 4:22 No Watong na kis tika ma no tanuaam ma no uno harmarsai na kis ta muat bakut.
TIT 1:1 Iau Pol tiga tultulai ta God ma a apostolo ta Jisas Krais, iau pakat ken ra nianga. Ma God ga tibe iau huo bia ni harahut ira nurnuruan ta ira matanaiabar ing God gate gilamis leh diet ma bia diet na mintate ira tutun ing God i te hapuasne. Ma kaiken ra tutun ing na lamus diet wara murmur God.
TIT 1:2 Ma no burena bia dahat nurnur ma dahat mintate ra tutun ta God kanong dahat kis kawase no nilon hathatika. God ga kukubus taar menalua sakit bia na tar kan ra nilon ta dahat. Ma God pai harabota.
TIT 1:3 Iesen tano pakana bung haruat ma no uno sinisip, God ga hapuasne no uno nianga uta iakan ra nilon. Ma ga tar no pinapalim na harpir tagu bia ni harpir ma iakan ra nianga. God no udahat ut na Harhalon, aie nong ga tange hadadas tagu bia iau ni harpir huo.
TIT 1:4 Io, iau pakat ken ra nianga ukaia ho ugu, Taitus, no natigu tutun tano nurnuruan dar bakut dar te hatur kawasei. A harmarsai ma ra malum tupas ugu meram ho God no adahat Sus ma Jisas Krais no udahat ut na Harhalon.
TIT 1:5 Ma iau ga waak kapis ugu kaia Krit waing nu hatakodasne ira linge pa ga takodas baak, ma bia nu tibe ira kabinsit na lotu ta ira tamtaman hoing iau ga tange tar taam bia nu gil huo.
TIT 1:6 Na tahut bia tiga kabinsit na lotu na tiga mangana tunotuno hoken: na manga bilai ira uno magingin bia taie tikai na tale bia na kilam ie bia i te gil ira sakena; tikai mon no uno hahin; ira natine a ut na nurnuruan diet ma ira matanaiabar diet pa na tale bia diet na tange bia ira natine, a ut na patnau diet.
TIT 1:7 Ira kabinsit na lotu diet balaure ira pinapalim ta God. Io kaik, i tahut bia ira tintalen ta tiga kabinsit na lotu na manga bilai huo bia tikai pa na tale bia na kilam ie bia i te gil tiga sakena. Pa na tahut bia tiga kabinsit na tiga mangana tunotuno nong na hatamat habaling ie, bia na bala mamahien gasien, bia na tiga ut na minom, bia na ut na ngalngaluan, bia na ut na kalak kinewa.
TIT 1:8 Iesen na tahut bia na tiga ut na balbale leh ira tunotuno, bia na sip ira bilai, bia na balaure timaan ira uno masmasingan bia na takodas ma gamgamatien, ma bia na kure hadadas ira uno sinisip.
TIT 1:9 Ma na tahut bia tiga kabinsit na lotu na palim dit kaike ra nianga i tale bia da so ira udahat nurnuruan ine. Ma kaike ra nianga ing i haruat ma no udahat harausur. Ma na palim dit kaike ra nianga waing naga tale bia na haragat ira matanaiabar ma ra bilai na tutun na nianga ma bia na tale wara pirpir diet ing diet sukuane kaike ra nianga.
TIT 1:10 Na tahut bia ira kabinsit na lotu diet ira mangana tunotuno huo kanong halengin ira patnau ing diet ianga bia ma diet habato lamus ira matanaiabar. Ma tutun sakit ira Iudeia kaia nalamin ta diet, diet manga gil huo.
TIT 1:11 Muat na tigal diet bia diet pa na ianga kanong diet hanghagahe ira hatatamaan ma ira udiet harausur ing pai bilai bia diet na harausur ine. Iesen diet gil huo wara gaiena kinewa ma a sakana magingin iakano.
TIT 1:12 Ma tikai nalamin ta diet at, a tangesot ie, ga tange bia, “Ira so tamaan na Krit, a ut na harabota diet. Diet haruat ma ra sakana rakaia. A malmalungana ma ra kas nian diet.”
TIT 1:13 Iakan ra hinhinawas i tutun. Io kaik, nu pir hamakmakis diet ta ira udiet sakena waing diet naga nurnur ta ira tutun na harausur.
TIT 1:14 Ma nu pir mah diet huo bia diet pa na taram ira pirwase bisbis ta ira Iudeia ma bia diet pa na mur ira harkurai ta ira tunotuno ing diet tamapas talur ira tutun ta God.
TIT 1:15 Diet ing diet gamgamatien, diet nes kilam ira linge bia i gamgamatien. Iesen diet ira bilinge na tabuna nurnuruan, diet pa na nes kilam tiga linge bia i gamgamatien. Io, pai palai ira udiet lilik, ma pai tale diet wara nesnes kilam no tahut ma no sakena.
TIT 1:16 Diet tange bia diet nunure God ma sen ira udiet gingilaan i harus ise diet. Diet ira ut na takmaluk ma a mangana tunotuno ing da miligiruane diet. Ma diet pai haruat bia diet na gil tiga bilai na pinapalim.
TIT 2:1 Ma sen augu, nu tange ira linge i haruat ma ira bilai na tutun na harausur.
TIT 2:2 Na tahut bia ira nongtamat diet na mur ira palai na lilik, bia diet ira mangana tunotuno i tale bia da urur ta diet, ma bia diet na balaure timaan ira udiet sinisip. Ma na tahut bia diet na nurnur hatika ta ira tutun na harausur, bia ira udiet harmarsai hargilaas na tutun, ma bia diet na manga tur dadas ta ira tirtirih.
TIT 2:3 Ma huo iaat mon mah uta ira parana. Na tahut bia ira udiet tintalen na hamines bia diet urur ta God. Diet pa na pinas hagahe tikai ma diet pa na mame haitne ra wain. Iesen diet na hausur ira mes ta ira bilai na magingin.
TIT 2:4 Diet na gil huo bia diet na tale wara haragat ira bulahin bia diet na manga sip tutun ira sua diet ma ira nati diet.
TIT 2:5 Ma diet na haragat kaike ra bulahin mah bia diet na balaure timaan ira udiet sinisip bia na gamgamatien ira udiet tintalen, bia diet na tahut na ut na pinapalim kaia ra udiet hala, bia diet na marse ira tunotuno ma bia diet na hanapu diet ta ira sua diet. Na tahut bia diet na gil huo bia tikai pa na tange hagahe ira nianga gar ta God.
TIT 2:6 Ma huo iaat mon mah uta ira marawaan. Nu haragat diet bia diet na balaure timaan ira udiet sinisip uta ira linge bakut.
TIT 2:7 Ma augu, nu hamines ira num bilai na tintalen ta diet bia diet na sip wara murmur. Ma ing bia nu hausur ira tunotuno nu mur tiga mangana ngaas bia na tale diet bia diet na urur taam ma bia diet na nes kilam augu bia augu mah, u nurnur ta ira num nianga.
TIT 2:8 Ma nu hausur diet ma ira bilai na tutun na nianga bia tikai pa na tale bia na tange bia a mon nironga ta iakano ra harausur. Ma nu harausur huo bia diet ira am suk diet na hirhir kanong pa na tale diet wara tangtange hagahe dahat.
TIT 2:9 Ma ira maris na tultulai, nu haragat mah diet bia diet na taram ira udiet tamat uta ira linge bakut. Ma nu haragat diet bia diet na haguama ira udiet tamat ma bia diet pa na balu nianga ma bia diet pa na kinau tiga hana linge. Iesen i bilai bia diet na haminas habaling diet bia a mangana tutun na tunotuno diet. Diet na gil huo waing no harausur utane God no udahat ut na Harhalon na manga maririsuan sakit.
TIT 2:11 Iau tange huo kanong no harmarsai ta God i te hanuat puasa. Ma meram narako ta iakano harmarsai no uno pinapalim na harhalon i te haan tupas ira tunotuno bakut.
TIT 2:12 Ma no uno harmarsai i hausur dahat bia dahat na haan talur ira magingin pai gar ta God ma ira mangana sinisip ta iakan ra ula hanuo. Ma na hausur mah dahat bia dahat na balaure timaan ira udahat sinisip, bia dahat na lon takodas, ma bia dahat na mur ira magingin ta God katin ta iakan ra pakana bung.
TIT 2:13 Ma dahat na gilgil huo ing dahat kiskis kawase no harapuasa ta Krais Jisas, aie no udahat tamat na God ma no udahat ut na Harhalon. Ma no uno harapuasa na hanuat ma ra tamat na minamar ma na manga bilai sakit. Iakano nong dahat kiskis kawasei ma ra nurnuruan.
TIT 2:14 Ma Krais Jisas aie nong ga tar habaling at ie wara gaie dahat bia na kul halangalanga dahat sukun ira magingin i sukuane ira sinisip ta God, ma bia na hagamgamatien dahat wara uno at. Ma a mangana tunotuno sa dahat? Dahat manga sip bia dahat na gil ira bilai na magingin.
TIT 2:15 Kaiken ra linge mon ing nu hausur ira tunotuno urie. Nu haragat diet ma nu pir diet uta ira udiet sakena. Ma nu gil huo hoing tikai nong i te kap a tamat na kinkinis na lualua. Waak tiga nong i nes habulbul ugu.
TIT 3:1 Nu halilik ira tunotuno bia diet na lon hoken: diet na taram ma diet na hanapu diet ta ira lualua ma ira ut na gil harkurai, diet na taguro wara gilgil ira bilai na magingin, diet pa na tange hagahe tikai, diet pa na harngangaar, diet na harwis timaan ma ira tunotuno, ma diet na matien na tunotuno ta ira matanaiabar bakut.
TIT 3:3 I tahut bia dahat na lon huo kanong dahat baak mah dahat ga ul ba huo ma dahat ga ut na takahaat. Dahat mah, di ga lamus habato dahat ma dahat ga tultulai ta ira udahat sakana sinisip ma ira gungunuama bia. Ma dahat ga hasurum ira udahat nilon ta ira sakana magingin hoken: dahat git sipsip wara hanghagahe ira mes, dahat git liilik sakasaka ta ira linge gar na mes ma dahat git malmalentakuane harbasiane dahat.
TIT 3:4 Iesen bia ga harapuasa taar bia God no udahat ut na Harhalon ga wara gilgil ra tahut ta dahat ma ga manga sip dahat, io, ga halon dahat. Ma pa ga halon dahat kanong dahat ga gil ira takodasuana magingin. Taie. Ga halon dahat kanong ga marse dahat. Ma ga halon dahat ma no Halhaliana Tanuo nong ga kapal dahat kaik gaam kaha hasigarine dahat ma gaam tar ra sigar nilon ta dahat.
TIT 3:6 Ma iakanong, no Halhaliana Tanuo nong God ga manga burange bus dahat mei narako ta Jisas Krais no udahat ut na Harhalon.
TIT 3:7 Ma ga gil huo waing dahat naga hatur kawase no nilon hathatika nong dahat nanaho ma ra nurnuruan utana. Ma iakano nilon nong God gate hakiskis tar dahat mei. Ma dahat na hatur kawase iakano nilon kanong aram narako tano uno harmarsai nong ga tabar bia dahat mei, i te kure bia dahat takodas ra matmataan tana.
TIT 3:8 Ma kaiken ra nianga i tutun sakit. Io, iau sip bia nu tange hadadas kaiken ra linge bia diet ing diet te nurnur ta God diet na manga nanget wara gilgil ira bilai na magingin. Kaiken ra linge diet tahut ma diet na hatahutne ira tunotuno bakut.
TIT 3:9 Iesen nu tur talur ira ba na hargor. Ma waak u manga ianga uta ira haleng na hintubu nari menalua sakit. Ma nu haan sukun ira mangana harngangaar uta ira harkurai ta Moses. Warah, kanong kaiken ra mangana magingin pa na harahut ira tunotuno. Taie. Diet pa na hatahutne tiga linge.
TIT 3:10 Ing bia tikai na laka ma na paleng ira matanaiabar, io, nu hakatom ie airuo pakaan. Ma ing bia pa na taram, nu tur talur ie kanong u nunure bia tiga mangana tunotuno huo i te tamapas laah ta ira bilai ma i la gilgil ira sakena. Iakano tunotuno i nunure bia i gil ra sakena ma sen i gilgil at.
TIT 3:12 Iau ni tule Artemas bia Tikikus tupas ugu, ma ing sige tikai ta dir na haan tupas ugu, nu walar ma ra baso bia nu hanuat ukai ho iau kenas Nikopolis kanong iau te bul no nugu lilik bia iau ni me kis kaia tano pakana bung na harat.
TIT 3:13 Ma bia Apolos ma ne Senas no ut na mintot ta ira harkurai na haan tupas ugu, nu manga walar bia nu harahut dir ta ira linge dir na supi tano udir hinahaan.
TIT 3:14 Na tahut bia ira udar matanaiabar diet na harausur wara gilgil ira bilai na pinapalim na harmarsai wara banbanot ira tamat na sunupi gar na mes. Pai tahut bia ira udiet nilon pataie ta hunena.
TIT 3:15 Diet bakut ken ho iau diet haatne ugu. Ma diet ing diet marse mehet haruat ta ira tutun dahat nurnur ine, io, nu hinawase diet bia mehet haatne diet. No harmarsai ta God na kis ta muat bakut.
PHM 1:1 Iau Pol nong di te wis kawase iau wara gaie Krais Jisas. Ma mir ma ne Timoti no tasi dahat narako ta Krais, mir tule kan ra nianga tupas ugu Pilemon, augu no numir bilai na harwis nong u papalim tika ma mir.
PHM 1:2 Ma ukaia ta ira matanaiabar na lotu mah ing diet la kiskis hurlungen kaia tano num hala. Ma ukaia bilang hono haini dahat Apia. Ma tupas mah Arkipus nong i pusak ira tinirih tika ma mir narako ta iakan ra hinarubu.
PHM 1:3 A harmarsai ma ra malum tupas muat meram ho God no adahat Sus ma no Watong Jisas Krais.
PHM 1:4 Tasigu Pilemon, ing iau la saasaring iau la liklik leh ugu ma iau la tangtanga tahut tupas God wara utaam kanong iau te ser leh ra hinhinawas utano num harmarsai taar ta ira matanaiabar bakut ta God ma no hinhinawas utano num nurnuruan tano Watong Jisas.
PHM 1:6 Iau nunure bia augu tiga tunotuno ing u la tartar ra harharahut ing i lake ira sunupi tiga tunotuno. Ma iau sasaring bia no num magingin na harharahut huo na lamus ugu bia nu nunure ma nu kilingane timaan ira haridaan bakut ing u hatur kawase narako tano num kinkinis ta Krais.
PHM 1:7 Tasigu, no num harmarsai i te manga haguama ma i habalaraan iau kanong u te hasigarine ira kidilona nilon ta ira matanaiabar tus ta God.
PHM 1:8 Tano nugu kinkinis ta Krais iau balaraan taar ma i tale iau bia ni hagut ugu wara gilgil ira linge i tahut bia nu gil.
PHM 1:9 Iesen iau ni saring mon ugu tiga linge utano num harmarsai. A tutun bia iau Pol at, tiga turturkiles ta Krais Jisas, ma kaiken iau tikai nong di te wis kawase iau wara gaiena, iesen iau saring mon ugu.
PHM 1:10 Iau saring ugu wara gaiene Onesimus, no natigu narako ta Krais, aie nong i te kap ra kinkinis hoken bia a natigui narako tano nugu kinkinis na winwisaan.
PHM 1:11 Nalua pa ga gil ta tahut na pinapalim ukaia ho ugu. Iesen kaiken i papalim timaan kai ho iau ma na tahut mah kaia ho ugu.
PHM 1:12 Iau tulei ukatiga ho ugu. I hoing bia iau tar no katigu at tupas ugu.
PHM 1:13 Iau te sip bia ni palim kahe mon ie wara kapkap no num mauho wara harharahut iau kai ra nugu kinkinis na winwisaan utano tahut na hinhinawas.
PHM 1:14 Iesen iau pai sip bia ni sunang ugu wara harharahut iau. Taie. Iau sip bia nu tar ra harharahut ing u kanan taar bia nu gil huo. Io kaik, pa ni gil ta tiga linge ing pau haut ine.
PHM 1:15 I tutun bia i ga haan sukun baak ugu. Iesen iakan ra linge i hanuat dak waing nugu hatur kawase hatikane um ie.
PHM 1:16 Pa nu hatur kawase habaling ie hoing tiga tultulai mon. Taie. Nu hatur kawasei hoing bia a bilai na tasim ie narako ta Krais, ma iakanong i manga tahut ta tiga tultulai mon. Iau sip ie hoing no tasigu, iesen tutun sakit augu balik mah, nu manga sip ie huo, kanong a num tultulai ie ma a tasim ie mah narako tano Watong.
PHM 1:17 Ma ing bia u nes kilam iau bia dar la harwis tutun, io, iau saring ugu bia nu bale leh ie hoing u gor bale leh iau.
PHM 1:18 Ing bia ga gil tiga nironga taam, bia aun ta ngasa mekatiga ho ugu, io, nu was tar tagu.
PHM 1:19 Iau Pol, iau pakat iakan ra nianga ma ra limagu at, bia iau ni balu tar taam. Iesen pa ni manga ianga bia pau balu baak no num ngasa mekai ho iau, ma iakanong, no num kidilona nilon at.
PHM 1:20 A tutun sakit tasigu. Iau sip bia nu harahut iau huo ta dahin narako tano nugu kinkinis tano Watong. Nu hasigarine no nugu nilon narako ta Krais.
PHM 1:21 Iau pakpakat tupas ugu kanong iau nunure tar bia nu taram iau ma bia ira num gingilaan na manga tamat um ta ing iau saring.
PHM 1:22 Ma tiga linge mah. Nu tagure tiga hala na wasire wara utagu kanong iau lik bia God na balu ira numuat sinasaring ma na halangalanga ise iau tupas muat.
PHM 1:23 Epaparas nong i kis tika ma iau kai ra winwisaan wara gaie Krais Jisas i haatne muat.
PHM 1:24 Diet ing diet tur tika ma iau tano pinapalim, Mak, Aristarkus, Demas, ma ne Luk, diet haatne mah muat.
PHM 1:25 No harmarsai tano Watong Jisas Krais na kis tika ma muat.
HEB 1:1 Nalua God ga ianga ta ira hintubu dahat meram narako ta ira nianga ta ira tangesot. Ma ga gil huo a haleng na pakaan ma narako ta haleng na mangana ngaas.
HEB 1:2 Iesen kaiken um ira hauhawatina pakana bung ma meram narako tano Natine i te ianga ta dahat. Ma no Natine aie nong God ga tibe tar ie bia na tinane ira linge bakut. Ma kaia tano limana no Natine, God ga hakisi no mawe ma no ula hanuo bakut.
HEB 1:3 Ma aie i hamines no minarine God. Ma i haruat tun at ta God. I la puspusak ma i la balbalaure no mawe ma no ula hanuo bakut ma no dadas tano uno nianga. Ma ing bia gate gil no pinapalim na hagamgamatien ri sukun ira magingin sakena, ga kap no tamat na kinkinis. Ma iakano kinkinis i kis taar tano kata na lumana Nong i Manga Tamat Sakit aram naliu.
HEB 1:4 Ga kap no tamat na kinkinis hokaiken ta ira angelo. Ma i takodas bia na kap ie huo kanong no hinsang no Natine ga hatur kawasei i tamat ta ira kaba angelo.
HEB 1:5 Ma iakan i palai kanong God pa gale tange ta tiga angelo bia, “No Natigu augu. Katin iau tange ra palai bia a Natigu ugu, ma no am Sus iau.” Taie. Pa ga tange huo ta ira angelo mon. Ma ga tange habaling bia, “Iau no ana Sus um. Ma aie no Natigu balik um.”
HEB 1:6 Ma tano pakana bung bia God i kap hawaat no Natine ukai tano ula hanuo, iakano Natine nong i kap no luena kinkinis, God i tange habaling bia, “Na tahut bia ira angelo ta God bakut diet na lotu tupas no Natigu.”
HEB 1:7 Ma kaia uta diet ira angelo God ga tange hoken: “God i gil ira uno angelo hoing ira dadaip. Ma i gil ira uno tultulai hoing ira karamena iaah.”
HEB 1:8 Ma sen tano Natine balik i tange bia, “No num kinkinis na harkurai na haan hathatika ma pa nale pataam. Ma nu kure ira num matanaiabar ma ra taktakodas.
HEB 1:9 U sip ira takodasuana magingin ma u malentakuane ira sakena. Io kaik, God, no num God, i te bul ra wel aram naliu taam wara gilamis ugu. Hokaiken nu kap a tamat na kinkinis ma a tamat na gungunuama ta diet ira num harwis.”
HEB 1:10 Ma God ga tange habaling bia, “Augu no Watong. Mekaia tano hamhaburen u ga hakisi no ula hanuo. Ma u ga gil no ula mawe ma ira limaam tus.
HEB 1:11 No mawe ma no ula hanuo dir na panim iesen u kis taar at. Dir na tutuarain hoira maal.
HEB 1:12 Nu puli dir hoing ra sigasigam. Ma nu kios dir hoing ira tunotuno diet la harkios ma ira udiet maal. Ma sen bia augu, pau la kikios. Ma no num nilon pa na pataam.”
HEB 1:13 Ma God pa gale tange ta tiga angelo bia, “Nu kap no tamat na kinkinis kai tano kata na limagu, tuk iau ni bul hasur ira num hiruo napu, hoing tiga linge na bul kakim.”
HEB 1:14 Io, asa tun diet ira angelo? Diet ira tanuo na tultulai. Ma God i la tultule se diet wara gaie diet ing diet na kap no harhalon.
HEB 2:1 Io kaik, na tahut bia dahat na manga lilik timaan ta ira nianga dahat te hadade. Dahat kabi saal laah talur ie.
HEB 2:2 Dahat nunure bia no hinhinawas mekaia ta ira angelo ga tur dadas ma pa ga tale bia da kap sei. Ma ira pakaan bakut bia tikai ga lakei ma ga takmaluk tana, ga kap ra harpidanau haruat tano uno magingin sakena.
HEB 2:3 Ing bia iakanin i tutun, na ngan hohe bia dahat lilik tatohun ta iakan ra tamat na harhalon ta God? Tutun sakit, dahat pa na tale bia dahat na hilau sukun no harpidanau nong na haan tupas dahat. No Watong ga huna hinawas palai ta iakan ra harhalon. Namur diet ing diet ga hadadei, diet ga suro haut ie tar ta dahat.
HEB 2:4 Ma God ga suro haut leh mah ie ing bia ga gil hoken: ga hamines ira kaba hakilang ing ga hangalabo ira matanaiabar. Ma ga gil ira matahu dadas na gingilaan na kinarup. Ma ga palau ira tunotuno ma ira hartabar tano Halhaliana Tanuo haruat ma no uno sinisip.
HEB 2:5 Io, ma God pa ga bul no uno lilik bia ira angelo diet na kure no ula hanuo nong na hanuat namur. Taie. Ma iakano sigar ula hanuo nong dahat lilik utana kaiken.
HEB 2:6 Ma narako tano nianga ta God di ga pakat ie bia tikai ga tange hoken: “Asa tun ira tunotuno kaik u lilik uta mehet? A linge bia mon mehet. Wara bih u balaure mehet ira tunotuno?
HEB 2:7 U te bul hanapu mehet ira tunotuno menapu ta ira angelo bia mehet na kis baak huo ta da nat na pakana bung. U te hakukuh mehet ma ira minamar ma ra tamat na urur.
HEB 2:8 Ma u te bul ira linge bakut napu ta mehet.” Ira nianga ta God ing di ga pakat ie i tange bia God ga bul ira linge bakut napu ta ira tunotuno. Kaik i palai bia i kasar ira linge bakut. Taie tiga linge pa na kis sasesir laah ta ira harkurai ta ira tunotuno. Iesen ta iakan ra pakana bung dahat pai nes kilam bia ira linge bakut i kis napu ta ira tunotuno.
HEB 2:9 Iesen dahat nes kilam tikai, ma aie ne Jisas. A dahin mon God ga bul hanapui ta ira angelo waing naga maat wara gaiena ira tunotuno bakut. Ma ga maat huo kanong God ga marse bia mon ira tunotuno. Iesen kaiken um, dahat nes bia God i te bul haut ie ma i te hatamat ie kanong ga kilingane ra ngunungut tano minaat.
HEB 2:10 Io, ma God aie nong ga hakisi ira linge bakut ma ga gil diet wara uno iaat. Ma ga sip bia na lamus ira haleng na natine uram naliu bia na hatamat diet. Kaik i takodas bia God ga bale tar Jisas bia na kilingane iakano mangana ngunngutaan waing Jisas naga tale tun at bia na pit no ngaas bia diet naga kap no harhalon.
HEB 2:11 Io, ma Jisas nong i bul hasisingen diet bia diet na halhaal sukun ira sakena tupas God, ma diet ing diet halhaal huo, diet mon tiga hun ma Jisas. Io kaik, Jisas pai hirhir bia na kilam diet bia a hinsakana.
HEB 2:12 I palai huo kanong i tange ta God bia, “Iau ni hinawase ira hinsakagu utaam. Ma ing bia mehet kis hulungai iau ni pirlat ugu ma ira ninge.”
HEB 2:13 Ma i tange habaling bia, “Iau ni so no nugu nurnuruan ta God.” Ma i tange mah bia, “Nes baak! Mehet ken ma ira nat na bulu ing God i te tar diet tagu.”
HEB 2:14 Ma kaiken ra matanaiabar i kilam diet bia a nat na bulu diet, diet ira tunotuno mon. A mon palatamai diet ma a mon de diet. Io kaik, Jisas ga hanuat hoing diet bia na maat. Ma ga maat waing naga kap se no dadas ta Sataan nong ga tale wara lamlamus ira tunotuno taar tano minaat.
HEB 2:15 Ira tunotuno diet git burburut bia diet na maat. Ma iakan ra bunurut ga wis kahe diet ira kaba bungbung bakut. Iesen Jisas ga maat bia na halangalanga ise diet.
HEB 2:16 Tutun sakit, Jisas pai la harharahut ira angelo. Taie. I la tartar ra harharahut ta ira nati Abraham.
HEB 2:17 Io kaik, tiga ngaas mon i tale bia Jisas na mur wara gilgil haruatne no uno sinisip. Jisas ga sip bia na kap no kinkinis na tiga tamat na ut na lamus tunotuno tupas God. Ga sip bia na hanuat hoing tiga mangana tamat na lamlamus tunotuno tupas God nong i tale bia na marse ira tunotuno ma nong i tale bia na manga gil timaan ira uno mangana pinapalim tupas God. Ga sip bia na hanuat huo bia naga tar tiga hartabar uta ira udiet magingin sakena wara hauhau no ngalngaluan ta God. Ga sip bia na gil huo, kaik no ngaas nong ga mur ie, aie hoken: ga hanuat hoing tiga tunotuno mon, haruat tun at ma ira hinsakana.
HEB 2:18 Ma i tale bia na harahut diet ing ira harwalaam i haan tupas diet, kanong warah meram narako ta ira uno ngunngutaan ira harwalaam ga haan tupas mah ie huo.
HEB 3:1 Muat ira halhaliana hinsakagu ing God i te tatau leh mah muat, kaiken ira linge iau te tange i tutun. Io kaik, na tahut bia muat na lilik uta Jisas bia sigei. Aie nong God ga tulei ukai ma ra hinhinawas hoing tiga apostolo. Ma aie no tamat na ut na lamus tunotuno tupas God. Ma dahat nurnur tana uta kaiken ra linge.
HEB 3:2 God ga tibe tar ie bia na pakile huo. Ma Jisas ga gil haruatne tun at no sinisip ta God, hoing Moses mah ga gil ing ga balaure no huntunaan gar ta God.
HEB 3:3 Ma ing bia tikai i hatahuat tiga huntunaan, no urur da tar tana i tamat tano urur da tar ta iakano huntunaan at. Hokaiken mah no urur da tar ta Jisas i tamat tano urur da tar ta Moses.
HEB 3:4 Tutun bia ira hunhuntunaan bakut, tikatikai na tunotuno i la hathatahuat diet. Iesen God, aie nong i te hatahuat ira linge bakut.
HEB 3:5 Moses tiga tultulai narakoman tano huntunaan gar ta God. Ma ga papalim timaan haruat tun at tano sinisip ta God. Ga hinawase ira tunotuno ta ing God na tange namur.
HEB 3:6 Krais mah huo. Ga papalim timaan mah haruat tun at tano sinisip ta God. Iesen Krais no Nati God narako tano huntunaan gar ta God. Ma i balaure iakano huntunaan. Ma dahat ira hinsakana tano uno huntunaan ing bia dahat na tur dadas ta ira udahat nurnuruan ma ing bia dahat na manga kis nanahe ma ra tamat na nurnuruan kaike ra linge dahat sa butbut urie ing God na tabar dahat me namur.
HEB 3:7 Io kaik, na tahut bia muat na taram ing no Halhaliana Tanuo i tange, ma hoken: “Bia muat hadade no ingane God katin,
HEB 3:8 waak muat hadadas ira bala muat hoing ira hintubu muat diet ga hadadas ira bala diet ta kaike ra pakana bung diet ga patnau tagu. Ta kaike ra pakana bung diet ga walar iau aram ra hanuo bia.
HEB 3:9 Diet ga manga walar iau kaia. Ma diet ga nes ira nugu gingilaan tupas diet ta ira ihat na sangahul na tinahon.
HEB 3:10 Io kaik, iau ga ngalngaluan taar ta kaike ra matanaiabar. Ma iau ga tange bia, ‘Ira bala diet i la hanhan talur iau. Ma diet pai palai tano mangana ngaas iau sip bia diet na mur.’
HEB 3:11 Iau ga ngalngaluan huo iau gaam hasasalim bia, ‘Diet pa nale sola tano nugu sinangeh.’”
HEB 3:12 Bar hinsakagu ta Krais, muat na balaure timaan bia tikai nalamin ta muat kabi kap ra sakana mangana lilik bia pa na nurnur. Ing bia tikai na ngan huo na tamapas laah sukun no lilona God.
HEB 3:13 No nianga ta God di ga pakat ie ga tange bia a mauho kana ta iakano pakana bung bia diet na taram. Ma ga kilam iakano pakana bung bia, “Katin.” Ma iakano “Katin” i kasar iakan ra pakana bung mah. Io kaik, na tahut bia muat na haragat harbasiane muat ta ira kaba bungbung, bia ira magingin sakena kabi habato lamus tikai nalamin ta muat ma na ut na patnau.
HEB 3:14 Muat na haragat harbasiane muat huo kanong dahat tika ma Krais. Tano pakana bung bia dahat ga sigar nurnur ta Krais, dahat ga tur dadas ta ira udahat nurnuruan. Ma na hanuat palai bia dahat tiktika haan ma Krais ing dahat tur dadas huo tuk taar bia dahat na maat.
HEB 3:15 Ing dahat tur dadas taar huo i haruat ma ira nianga ta God ing i tange hoken: “Bia muat hadade no ingane God katin, waak muat hadadas ira bala muat hoing ira hintubu muat diet ga hadadas ira bala diet ta kaike ra pakana bung diet ga patnau tagu.”
HEB 3:16 Io, ma sige diet ing diet ga hadade ma diet ga patnau ta God? Tutun sakit, bia diet at ing Moses ga lamus hasur diet merau Isip.
HEB 3:17 Ma God ga ngalngaluan taar ta sige ta ira ihat na sangahul na tinahon? Tutun sakit, diet mon ing diet ga pakile ira sakena ma diet ga maat kaia ra hanuo bia.
HEB 3:18 Ma God ga hasasalim uta sige, bia diet pa na sola tano uno sinangeh? Ga hasasalim huo uta diet at ing diet ga takmaluk tana.
HEB 3:19 Io kaik, dahat palai bia pa ga tale diet bia diet na sola kanong diet pa ga nurnur.
HEB 4:1 Io kaik, na tahut bia dahat na manga harbalaurai timaan. God i te kukubus taar bia na tar iakan ra sinangeh ta dahat. Ma no kunubus i kis taar at huo. Kaik, na tahut bia dahat na manga harbalaurai timaan bia God kabi nes tupas tikai nalamin ta muat bia pai tale wara sinola tano uno sinangeh.
HEB 4:2 Dahat na harbalaurai timaan huo kanong di ga harpir nalamin ta dahat ma no tahut na hinhinawas hoing di ga gil mah ta diet ira hintubu dahat. Iesen iakano nianga pa ga harahut diet kanong diet ga hadade mon ma diet pa ga nurnur ine.
HEB 4:3 Ma sen dahat ing dahat te nurnur, dahat te sola ta iakano sinangeh hoing God gate tange tar hoken: “Iau ga ngalngaluan huo iau gaam hasasalim bia, ‘Diet pa nale sola tano nugu sinangeh.’” Ga tange huo iesen ira uno pinapalim gate pataam um mekaia tano hakhakisi tano ula hanuo.
HEB 4:4 Io, ma narako ta tiga katon tano nianga ta God di ga pakat ie, i tange bia, “Tano liman ma iruo na bung God ga sangeh sukun ira uno pinapalim.”
HEB 4:5 Ma huo mah tiga mes na katon. I tange bia, “Diet pa nale sola tano nugu sinangeh.”
HEB 4:6 Diet ing diet ga luena hadade iakano tahut na hinhinawas, diet pa ga sola tano sinangeh kanong diet ga takmaluk ta God. Iesen i palai bia ari a mes diet na sola tana.
HEB 4:7 Iakan i hanuat palai huo kanong God ga puo habaling tiga pakana bung wara sinola. Ma ga kilam ie bia “Katin” aram narako ta ira pakpakat ta Dawit. Ma ga kilam ie huo namur sakit ta iakano pakana bung ing ga haianga ira hintubu dahat. Ma hoing at mon dahat te luena was tar, Dawit ga tange hoken: “Bia muat hadade no ingane God katin, waak muat hadadas ira bala muat.”
HEB 4:8 Bia ing Iosua gor tar ra sinangeh ta kaike ra hintubu dahat, God pa gor kilam habaling tiga mes na pakana bung namur wara sinola tano sinangeh.
HEB 4:9 Io kaik, a mon sinangeh kana wara uta ira matanaiabar ta God hoing no sinangeh ta God tano liman ma iruo na bung.
HEB 4:10 Io, ma sige tikai i sola tano sinangeh ta God, na sangeh mah ta ira uno pinapalim at hoing God ga sangeh ta ira uno pinapalim.
HEB 4:11 Io kaik, na tahut bia dahat na walar ma ra baso bia dahat na sola ta iakano sinangeh, bia tikai kabi mur no udiet magingin na takmaluk ma naga puko.
HEB 4:12 Ma na tahut bia dahat na walar huo kanong no nianga ta God i lilona ma i papalim. Ma i hoing tiga wise. Tiga wise na hinarubu nong i iaiaan ta ira iruo palpal bakut i tale bia na manga mamaang baas tikai ma na kutus ira harpasum na sur ma na paleng ira sur mah. Iesen no nianga ta God i manga iaiaan ta iakano mangana wise huo ma i tale bia na manga mamaang baas sakit uram narako tano burena no nilon ta tikai ma kaia tano tanuana mah. Ma i petlaar bia na kure ira mangana lilik ma ira mangana sinisip ta ira bala dahat.
HEB 4:13 Taie tiga linge ta ira linge God i te hakisi i tale bia na susuhai ra matmataan ta God. Ira linge bakut diet tamapalas ma diet kis palai ra matmataan tana. Ma aie nong dahat na haan tupas ie, ma na kure dahat.
HEB 4:14 Io, ma audahat mon tiga tamat na ut na lamus tunotuno tupas God. I te haan laka hut uram ra mawe. Ma aie ne Jisas, no Nati God. Io kaik, na tahut bia dahat na tur dadas ta ira linge dahat te hinawas bia dahat nurnur taar ine.
HEB 4:15 Dahat na tur dadas huo kanong no udahat tamat na ut na lamus tunotuno tupas God i tale tun at bia na kilingane ira udahat tinirih ing i la hamalusne dahat wara punuko. Ma i tale bia na kilingane ira udahat tinirih huo kanong ira mangana harwalar ga haan tupas ie i haruat ma ira kaba harwalar i la hanan tupas dahat. Iesen aie at pa ga puko ta tiga magingin sakena.
HEB 4:16 Io kaik, na tahut bia dahat na haan tupas God ma ra balaraan. Ma aie nong i la tartar ra harmarsai ta dahat. Dahat na haan tupas ie huo waing naga marse dahat ma naga harahut bia mon dahat tano pakana bung bia dahat supi iakano harharahut.
HEB 5:1 Ma ira tamat na ut na lamus tunotuno tupas God um, God i gilamis diet tikatikai mekaia nalamin ta ira tunotuno mon. Ma i tibe diet bia diet na haan tupas ie wara gaiena ira matanaiabar hoken: diet na tun hartabar tupas ie wara kapkap se ira magingin sakena ta ira matanaiabar.
HEB 5:2 Ma tiga tamat na ut na lamus tunotuno tupas God huo i tale bia na harahut ira matanaiabar ing diet pai palai tano tahut ma no sakena ma diet tamapas laah. Ma i tale bia na harahut diet hoing tiga matien na tunotuno kanong aie mah, i malus tana bia na puko ta ira sakena.
HEB 5:3 Io kaik, pa na tun ira hartabar tupas God wara kapkap se ira sakena ta ira matanaiabar sen mon. Taie. I supi bia na tun ra hartabar uta ira uno sakena mah.
HEB 5:4 Ma pai tale bia tikai na bul bia leh mon ie ta iakan ra tamat na pinapalim na lamus tunotuno tupas God. Taie. Na kap iakan ra mangana pinapalim ing God na tatau ie hoing ga tatau ne Aron mah huo.
HEB 5:5 Ma Krais mah pa ga bul no uno lilik at bia na kap iakan ra tamat na pinapalim na lamus tunotuno tupas God. Taie. God ga tange hoken tana, “No Natigu augu. Katin iau tange ra palai bia a Natigu ugu, ma no am Sus iau.”
HEB 5:6 Ma i tange huo mah tiga mes na katon hoken: “No num pinapalim na lamus tunotuno tupas iau na tur hatikai, haruat tano pinapalim na lamus tunotuno tupas iau ing Melkisedek ga gilgil.”
HEB 5:7 Ma ing Jisas ga lon taar kai tano ula hanuo ga gil ra sinasaring ma ra tamat na sunuah tupas God nong ga tale bia na harahut ie bia pa na haan taar tano minaat. Ga bul hanapui tano sinisip ta God, kaik God gaam taram ie.
HEB 5:8 A tutun bia a Nati God ie, iesen ga harausur balik wara tartaram God narako ta ira uno kaba ngunngutaan.
HEB 5:9 Kaik, bia God gate tagure tun at Jisas wara lamlamus tunotuno tupas ie, Jisas gom kap no kinkinis na harhalon hathatika taar ta diet ing diet taram ie.
HEB 5:10 Ma i tale bia na halon ira tunotuno huo kanong God ga tibe ie bia na hanuat tiga tamat na ut na lamus tunotuno tupas God, haruat ma no pinapalim na lamus tunotuno tupas God ing Melkisedek ga gil.
HEB 5:11 Iau sip bia ni tange ta haleng na linge baak ta kaiken. Iesen i dadas tagu wara hapalaine ta muat kanong ira linge muat hadade muat pai sangau hagasiaan.
HEB 5:12 Baak sakit um muat ga nurnur, kaik naga haruat ta muat bia muat na hausur ira mes. Iesen muat supi tar at baak tari tunotuno wara hausur muat ta ira nianga ta God muat ga huna harausur ine. Muat pai haruat wara kapkap ira dadas na nian. Taie. Muat susus at baak.
HEB 5:13 Ma ing bia tikai i susus baak, a nat na bulu ie, kaik pai namien no takodasuana harausur.
HEB 5:14 Iesen ira dadas na nian i haruat ta diet ing diet te patpatuan kanong diet te harausur ra taltalona pakana bung wara nesnes kilam ira tahut ma ira sakena.
HEB 6:1 Io kaik um, i tahut bia dahat na haan hakakari taar ta ira tamat na harausur i haruat ta ira patpatuana tunotuno. Dahat na waak tar um ira linge dahat ga huna harausur ine. Kaike ra mangana linge no burena no harausur mon ing tikai na huna kap. Iesen waak dahat taptapukus baling tano burena no udahat harausur. Hokaiken, dahat pa na iangianga baal bia i tahut bia tikai na lilik pukus ta ira magingin i lamus ie taar tano minaat. Ma waak dahat ianga baal tano udahat nurnur tupas God.
HEB 6:2 Dahat pa na harausur baal ta ira baptais ma ira mangana salsalaap wara gamgamatien. Ma dahat pa na ianga baling mah tano magingin na bul limanari taar ta ira tunotuno. Ma huo mah, dahat pa na ianga baling tano tuntunut hut sukun ra minaat ma no pakana bung na gil harkurai nong pa nale pataam. Kaiken ira luena linge.
HEB 6:3 Iesen i tahut bia dahat na haan hakakari. Ma dahat na gil huo ing bia God na bale se dahat.
HEB 6:4 Na tahut bia dahat na haan taar ta ira mes na linge kanong pai tale bia da lamus pukus diet wara lilik pukus ing diet te tamapas laah sukun God. Ma iau ianga ta ira mangana tunotuno hoken: tiga pakaan menalua diet gate palai taar. Ma diet gate nam tar no hartabar meram ra mawe. Diet gate kakaap tano Halhaliana Tanuo.
HEB 6:5 Ma diet gate nam tar ira bilbilai tano nianga ta God. Ma diet gate kilingane a mon bilai na dadas ta iakano pakana bung ing na hanuat namur.
HEB 6:6 Diet ga ngan huo iesen diet ga tamapas laah sukun God! Pai tale bia da lamus pukus habaling diet kanong i hoing bia diet lau habaling no Nati God taar tano ula kabai ma diet gil hahirhir ie ra palai.
HEB 6:7 Iau ni tange tiga nianga harharuat wara hapalaine muat bia pai tale bia da lamus pukus ira matanaiabar huo bia diet na lilik pukus. Ma i hoken. No pise nong a haleng na bata i pukaan ie ma i hakubur ra nian ing na harahut diet ira ut na pinapalim tano pise, God i la haidane iakano pise.
HEB 6:8 Iesen no pise nong i hatahuat ira sakana pitoka mon pai harahut ta tiga linge. Taie. I manga hutet bia God na hapidanau ie ma namur na tun haliare um ie.
HEB 6:9 Iau tange huo ta muat ira nugu bilai na harwis iesen iau lik bia iau nunure timaan muat bia muat la gilgil ira bilai na linge balik, kaike ira mangana linge i haruat ta ira matanaiabar ing God i te halon um diet.
HEB 6:10 God pai la gilgil ira magingin ing pai takodas. Taie. Na lik kawase ira numuat tahut na pinapalim. Ing muat ga harahut ira uno matanaiabar tus ma ing muat tartar kaiken, kaiken i hamines bia muat sip God. Io, na lik kawase mah um kaiken ra pinapalim.
HEB 6:11 Muat la manga basbaso wara pinapalim huo. Iau sip bia muat na baso huo tuk taar tano hauhawatine ta ira numuat nilon waing muat naga hatur kawase tun at ira linge muat kiskis kawase ma ra nurnuruan meram naliu.
HEB 6:12 Ma iau pai sip bia muat na malmalungo. Taie. Na tahut bia muat na mur ira udiet mangana nilon ing diet ga nurnur ma diet ga bala maat, ma kaiken ra mangana tunotuno diet hatur kawase ira linge God i te kukubus taar ta diet urie.
HEB 6:13 Ma ing God ga kukubus taar ta Abraham, ga hasasalim wara hadadas no uno kunubus. Ga hasasalim balin tano hinsana at kanong taie ta tikai i tamat tana.
HEB 6:14 Ga tange bia, “Tutun sakit iau ni haidane ugu ma ni hatahuat haleng na bulumur taam.”
HEB 6:15 Io, ma Abraham ga bala maat taar, kaik gaam hatur kawase ira linge God ga kukubus taar tana urie.
HEB 6:16 Ing tiga nong na hasasalim na kilam no hinsana tiga nong i tamat tana. Ma iakan ra sinsalim huo na hatutun no uno nianga, kaik ira hargor na pataam.
HEB 6:17 Huo mah, God ga sip bia na hapalaine timaan diet ing ga kukubus taar ta diet bia diet na nunure bia no uno lilik pa na kikios. Io kaik, ga hadadas no uno kunubus ma tiga sinsalim.
HEB 6:18 Ma kaiken um ra airuo linge pai tale bia dir na kikios. Ma bia God i kukubus bia i hasasalim pa na harabota. God ga gil hokaiken taar ta dahat ing dahat ga hilau tupas ie wara nilon. Ma ga gil huo waing dahat naga manga balaraan wara nanaho taar um ma ra nurnuruan uta ira linge God i te tagure tar uta dahat.
HEB 6:19 Ing dahat nanaho ma ra nurnuruan huo i haruat ma tiga haga na waga i palim dit ira udahat nilon. Io kaik, dahat pa na magile. Dahat na tur dadas. Ma no udahat nanahai ma ra nurnuruan i laka tano tamat na hala na lotu aram ra mawe taar tano halhaliana katon menamur tano maal i la balo bat tar ie.
HEB 6:20 Ma Jisas i te huna laka kaia wara gaie dahat ing ga kap ra kinkinis na tamat na ut na lamus tunotuno tupas God hathatika, haruat ma no pinapalim na lamus tunotuno tupas God ing Melkisedek ga gil.
HEB 7:1 Io, ma Melkisedek um, aie no tamat na lualua aras Salem. Ma a ut na lamus tunotuno ie tupas God nong i manga tamat sakit. Io, Abraham ga taptapukus baling mekaia tano rom ing ga paas hasur ira ihat na tamat na lualua kaia. Melkisedek ga harsomanei gaam haidanei.
HEB 7:2 Ma Abraham um ga tabar ne Melkisedek ma tikai ta ira sangsangahul na minsik bakut ing gate kap leh. Io, ma no luena kukuraina um tano hinsa Melkisedek aie hoken: “No Takodasiana Tamat na Lualua.” Ma iesen bia ga tamat na lualua me Salem, kaik no kukuraina tano hinsana aie hoken mah: “No Tamat na Lualua na Malum.”
HEB 7:3 Pa di ga tange ta linge utano ana sus ma na pawasine, ma huo mah ira hintubuno. Taie mah ta hinhinawas tano hathatahun bia no haphapataam tano uno nilon. Kaik i ngan hoing no Nati God huo. I te kap no kinkinis wara lamlamus tunotuno tupas God hathatika.
HEB 7:4 Muat na nes baak! A tamat na tunotuno sakit ie. No hintubu dahat balik um Abraham ga tar tikai ta ira sangsangahul na minsik tana ing ga kap leh kaia tano rom.
HEB 7:5 Io, ira harkurai ta Moses i harkurai taar ta ira bulumur ta Lewi ing diet kap ra kinkinis na ut na lamus tunotuno tupas God, bia diet na kap tikai ta ira sangsangahul na minsik mekaia hoira matanaiabar. Ma kaike ra matanaiabar um ira hinsaka diet. Ma tutun bia kaike ra hinsaka diet, diet ira bulumur mah ta Abraham, iesen diet kap tikai ta ira udiet sangsangahul na minsik.
HEB 7:6 Melkisedek pai bulumur tane Lewi ie, iesen ga kap leh tikai ta ira sangsangahul na minsik ta Abraham ma ga haidane Abraham. Ma Abraham um iakano tunotuno nong ga hatur kawase ira kunubus ta God.
HEB 7:7 Ma i manga palai bia nong i gil no haridaan i tamat ta dir ma nong i idanei.
HEB 7:8 Io, kaike ira ut na lamus tunotuno um tupas God, diet git kapkap leh tikai ta ira sangsangahul na minsik ta ira matanaiabar. Ma diet ira ut na lamus tunotuno tupas God, diet git matmaat. Ma Melkisedek um ga kap leh mah tikai ta ira sangsangahul ta ira minsik. Iesen i lon hathatika hoing no nianga ta God di ga pakat ie i tange.
HEB 7:9 I ngan hoing bia Lewi ga tar tikai ta ira sangsangahul na minsik taar ta Melkisedek ta iakano bung ing Abraham ga tabar Melkisedek huo. Iesen ira bulumur um ta Lewi ing diet la kapkap leh tikai ta ira sangsangahul mekaia ho ira matanaiabar.
HEB 7:10 Ma i tale bia da tange bia Lewi ga tabar Melkisedek huo kanong ing Melkisedek ga harsomane Abraham pa di ga kaha baak Lewi. Taie. I hoing bia Lewi iakana baak narako tano hintubuno ne Abraham.
HEB 7:11 No pinapalim na lamlamus tunotuno tupas God nong diet tano huntunaan ta Lewi diet ga gil, iakano pinapalim aie no suruno ta ira harkurai ta Moses ing God ga tar ta ira matanaiabar Israel. Ma hohe um ta diet ira ut na lamus tunotuno tupas God ing diet tano huntunaan ta Lewi? Ing bia diet gor petlaar wara habilai hasakitne ira matanaiabar, dahat pa gor supi habaling tiga mes na mangana ut na lamus tunotuno tupas God, tikai haruat ma Melkisedek. Iesen dahat supi ie kanong diet mekaia ho ne Aron pa ga haruat um.
HEB 7:12 Ma bia da kios ise ira tunotuno ing diet tale bia diet na kap no kinkinis na ut na lamus tunotuno tupas God, da supi mah bia da kios ise ira harkurai.
HEB 7:13 No nianga ta God di ga pakat ie i iangianga utano udahat Watong ing i tange kaiken ra linge. Iesen aie meram narakoman tiga mes na huntunaan. Ma taie tikai tano uno huntunaan pa gale kap iakano kinkinis na ut na lamus tunotuno tupas God.
HEB 7:14 I manga palai um bia a bulumur tane Iuda ie. Ma ing Moses ga iangianga uta diet ira ut na lamus tunotuno tupas God, pa ga tange tiga linge utano huntunaan ta Iuda.
HEB 7:15 Io, ma kaiken ra nugu nianga i hanuat palai tutun kanong tiga mes na ut na lamus tunotuno tupas God i te hanuat um. Ma aie nong dir haruat ma Melkisedek.
HEB 7:16 Ma pa ga kap iakan ra kinkinis na ut na lamus tunotuno tupas God kanong a bulumur ie ta tiga mangana huntunaan. Taie. Ga kap iakan ra kinkinis kanong i lon hathatika.
HEB 7:17 Ma iakan i palai kanong no nianga ta God di ga pakat ie i tange bia, “No num pinapalim na lamus tunotuno tupas iau na tur hatikai, haruat tano pinapalim na lamus tunotuno tupas iau ing Melkisedek ga gilgil.”
HEB 7:18 Ma di ga waak se ira luena harkurai kanong kaike ra harkurai pa gale dadas ma pa ga petlaar bia na harahut.
HEB 7:19 Iakan i palai kanong kaike ra harkurai pai petlaar wara habilai hasakitne ira matanaiabar. Ma pa ga tale bia tikai na nanaho ma ra nurnuruan pane kaike ra harkurai. Io kaik, God ga tar tiga mes na kunubus ta dahat nong i tale bia dahat na nanaho ma ra nurnuruan panei. I bilai ta kaike ra harkurai kanong i lamus dahat hutaten God.
HEB 7:20 Ma iakan ra kunubus i bilai mah ta kaike ra harkurai kanong God ga hadadas no uno nianga ma no uno sinsalim. God pa ga sasalim ing ira mes diet ga kap ira udiet kinkinis na ut na lamus tunotuno tupas ie.
HEB 7:21 Iesen Jisas ga kap no uno kinkinis na ut na lamus tunotuno tupas God ing God ga hasasalim hoken: “No Watong i te hasasalim, ma pa na kios no uno lilik. Augu tiga ut na lamus tunotuno tupas God hathatika.”
HEB 7:22 Io kaik, Jisas aie nong i hatutun iakan ra kunubus nong i bilai ta ira harkurai ta Moses.
HEB 7:23 Io, ma a halengin diet ira ut na lamus tunotuno tupas God kanong diet git matmaat, kaik pa ga tale diet bia diet na tur hathatika hoing ira ut na lamus tunotuno tupas ie.
HEB 7:24 Iesen Jisas i tur hathatika hoing tiga ut na lamus tunotuno tupas God kanong i lon hathatika.
HEB 7:25 Io kaik, i petlaar hathatikane bia na halon tun at diet ira tunotuno ing diet haan tupas God narako tano uno pinapalim. Ma i tale bia na halon diet huo kanong i lon hathatika waing naga saring God wara gaie diet.
HEB 7:26 Io kaik, Jisas, aie tiga tamat na ut na lamus tunotuno tupas God nong i banot tutun ira udahat sunupi. A halhalianai ma taie auno ta nironga bia ta bilinge. God i te bul hasisingen ie sukun ira ut na sakena. Ma i te bul haut ie aram ra mawe.
HEB 7:27 Pai haruat ma ira mes na ut na lamus tunotuno tupas God. Pai supi bia na tun ira hartabar tupas God ta ira kaba bungbung wara gaiena ira uno sakena baling at, ma namur um wara gaiena ira sakena audiet ira matanaiabar. Taie. Ga tar ra hartabar tupas God tiga pakaan mon ing ga tar habaling ie. Ma iakano hartabar i tur hathatika.
HEB 7:28 Ma ira harkurai ta Moses um i tibe ira tunotuno ing diet pai manga haruat ta iakan ra pinapalim, bia diet na kap no kinkinis na tamat na ut na lamus tunotuno tupas God. Iesen God ga tibe no Natine ma ra sinsalim bia na kap iakano kinkinis. Ma iakan ra sinsalim ga hanuat menamur ta ira harkurai ta Moses, gaam tibe no Natine nong God ga tagure timaan ie bia na haruat hathatika uta iakano pinapalim.
HEB 8:1 No tamat na linge ta kaiken ra nianga iau tangtange aie hoken: audahat tiga mangana ut na lamus tunotuno tupas God nong gabe kap no tamat na kinkinis. Ma iakano kinkinis i kis taar tano kata na lumana Nong i Manga Tamat Sakit nong i la kis taar tano uno kinkinis na harkurai aram ra mawe.
HEB 8:2 Io, ma i la gilgil no uno pinapalim na lamus tunotuno tupas God kaia tano katon wara lotu aram ra mawe. Ma iakano no hala na lotu tutun ing God i la kis taar kaia. No Watong at ga hatur iakano hala, pataie bia ira tunotuno.
HEB 8:3 Io, ma ira harkurai ta Moses ga tibe diet bakut ira tamat na ut na lamus tunotuno tupas God bia diet na tar hartabar tupas ie. Io kaik, no udahat ut na lamus tunotuno tupas God, aie mah i manga supi bia na tar ta mangana hartabar tupas God.
HEB 8:4 Ing bia gor kis kai ra ula hanuo pai tale bia na kap no kinkinis na ut na lamus tunotuno tupas God, kanong ari at kana ing diet la harhartabar tupas God haruat ma ira harkurai ta Moses.
HEB 8:5 Diet gil ira udiet pinapalim narako tiga katon wara lotu nong a malalar mon ie utano katon tutun wara lotu aram ra mawe. Ga ngan mah huo tano pakana bung ta Moses. Ing Moses ga wara pakpakile no hala na lotu di ga wara gilgil ie ma ra maal, God ga tange tana bia, “Nu harbalaurai timaan bia nu pakile ira linge haruat tun at ing iau ga hamines taam aram ra uladih.”
HEB 8:6 Iesen no pinapalim na lamus tunotuno tupas God nong Jisas i te hatur kawasei kaiken i bilai ta ira udiet ing diet ga papalim menalua, hoing mah no kunubus Jisas ga pakile nalamin ta God ma ira uno matanaiabar wara lamlamus diet tupas ie i bilai tano kunubus nong menalua. Ma no kunubus ta Jisas i bilai tano luena kunubus kanong ira linge God ga tange bia na gil narako ta iakano kunubus ta Jisas i bilai ta ira linge ing ira harkurai ta Moses ga tange bia na gil tano luena kunubus.
HEB 8:7 Bia ing no luena kunubus gor papalim timaan, God pa gor lik bia na kios isei ma no sigarine.
HEB 8:8 Iesen i palai bia pa ga papalim timaan kanong God ga nes bia ira matanaiabar diet sakena baak, kaik gaam tange hoken: “Nes baak! Iau no Watong, iau tange bia a pakana bung i wara hinanuat ing iau ni gil ra sigar kunubus ma dir ira iruo huntunaan Israel ma Iuda.
HEB 8:9 Iakan ra sigar kunubus pa na haruat ma no kunubus iau ga gil ie tika ma ira hintubu diet tano pakana bung iau ga lamus diet, iau gaam lua suur ta diet merau Isip. Iau no Watong, iau tange bia pa ni gil no sigar kunubus haruat ma no luena kanong diet pa ga taram no nugu luena kunubus. Io kaik, iau gaam haan talur diet.
HEB 8:10 Iau no Watong, iau tange bia no mangana kunubus iau ni gil ie ma no huntunaan Israel ta tiga pakana bung namur, aie hoken: Iau ni bul ira nugu harkurai ta ira udiet lilik. Ma kaike ra harkurai iau ni pakat kahe ta ira bala diet. Ta iakano pakana bung namur iau um no udiet God, ma nugu matanaiabar um diet.
HEB 8:11 Tikai pa na hausur no tahanuana bia no hinsakana hoken bia, ‘Na tahut bia nu nunure no Watong.’ Taie. Kanong warah, diet bakut diet na nunure iau, meras hoira maris tutun at tuk ta ira tamat na watong.
HEB 8:12 Diet na nunure iau kanong iau ni suge se ira udiet sakena ma ra harmarsai. Masa! Pa ni lik leh um ira udiet nironga.”
HEB 8:13 Io, ing God ga kilam no kunubus ta Jisas bia no sigarine, i palai bia ga nes kilam no luena kunubus bia a tuarenai, kaik da waak sei. Ma bia tiga linge i tuarena ma da waak sei, i palai bia hutet ma na panim laah.
HEB 9:1 Io, tano luena kunubus a mon harkurai wara kurkure bia ira matanaiabar diet na lotu tupas God hohe. Ma tiga katon mah kai tano ula hanuo bia da lotu tupas ie kaia.
HEB 9:2 Di ga hatur tiga hala na lotu di ga gil ie ma ra maal. Tano luena katon ta iakano hala, tiga kinkinis na lulungo tika ma no suuh na bul beret ma ira beret i halhaal wara hartabar tupas God. Ma di ga kilam iakano ra katon bia no Halhaliana Subaan.
HEB 9:3 Ma namur tano airuo na balo na maal tiga katon. Ma di ga kilam ie bia no Halhaliana Subaan Sakit.
HEB 9:4 Ma narako tana no suuh di ga gil ie ma ra gol nong di tuntun ira kabus i sangsangin kala mismisien tana. Ma kaia mah no linge na bulbul no kunubus ta God nong di ga gil ie ma ra gol. Ma ari a linge aram narako tano linge na bulbul no kunubus ta God. Tikai, no gingop di ga gil ie ma ra gol, ma a mana kana narako tano gingop. Ma no buko ta Aron nong ga kuburuan ga kis kaia narakoman mah tika ma ira iruo pala haat God gate pakat ira harkurai tano kunubus kaia.
HEB 9:5 Ma meram naliu tano banbanus tano linge na bulbul no kunubus ta God, airuo tamat na mangana angelo ing dir la kiskis tika ma God hathatika. Ma dir ga tur burung iakano banbanus ing God i la kapkap se ira sakana magingin kaia ma no uno harmarsai. Io, ma sen pai tale bia ni manga ianga uta kaiken ra mangana linge kaiken.
HEB 9:6 Di ga bul timaan kaike ra linge huo narako. Ma ira ut na lamus tunotuno tupas God diet git laklaka ta iakano luena katon wara gilgil ira udiet pinapalim.
HEB 9:7 Iesen no tamat na ut na lamus tunotuno tupas God sen mon na laka tano katon nong i kis manamur ta iakano luena katon. Ma ga tale bia na laka kaia tiga bung mon tiga kidilona tinahon. Ma pa git laka ing bia pai kap ta de. Ma git hartabar tupas God ma kaike ra de wara gaiena ira uno sakena at ma wara gaie diet ira matanaiabar mah ing diet ga gil ira sakena ing pa diet ga palai urie.
HEB 9:8 Meram narako ta kaiken ra linge no Halhaliana Tanuo i hamines bia no ngaas wara hinaan laka tano Halhaliana Subaan Sakit pai tapapos baak ing bia iakano luena katon tano hala na lotu i kis taar baak.
HEB 9:9 Ma kaike ra linge a malalar uta iakan ra pakana bung katin. Kaike ra linge i hamines bia kaike ra hartabar di ga tun tupas God pa ga tale bia na habilai hasakitne aram narako ta ira matanaiabar ing diet ga kap hawaat kaike ra hartabar. Taie. Diet ga kilingane bia a mon sakena baak narakoman ta diet.
HEB 9:10 Kaike ra hartabar pa ga tale wara hagamgamatien tun at ira matanaiabar kanong diet ing diet ga kap hawaat kaike ra hartabar diet ga murmur ira mangana harkurai uta ira nian ma ira minom mon ma ira matahu salsalaap wara gamgamatien. Kaike ra harkurai i haruat ta ira palatamai dahat mon. Ma ga tur dadas taar tuk tano pakana bung mon bia ira linge i hanuat sigarien.
HEB 9:11 Io, ma sen ing Krais ga hanuat ma ga kap no uno kinkinis na ut na lamus tunotuno tupas God, ga hatahuat ira bilai na linge ing diet kis taar kaiken. Ga haan laka tano mangana hala na lotu nong i bilai ma i tamat ta nong menalua. Ma iakan ra hala na lotu, ira tunotuno diet pa ga gil ie. Io kaik, i palai bia pai tiga linge ie mekai ta iakan ra ula hanuo.
HEB 9:12 Krais pa ga kap hawaat ra de na me bia a de na bulumakau wara hinaan laka tano Halhaliana Subaan Sakit. Taie. Ga kap hawaat no dena at wara hinaan laka kaia kanong gate kul halangalanga ise dahat. Ga laka tiga pakaan sen mon. Ma iakano hinaan laka i haruat. Pa na laka baling um.
HEB 9:13 Di git sapsapur ira tunotuno ma ira de na me ma ira de na tumatena bulumakau. Ma di git tun tiga mangana pes na bulumakau ma di git dolowane ira tahuna iaah tana tika ma ra taah ma di git sapur ira matanaiabar mah me. Di git sapur diet ing diet ga gil ra sakena kaik diet ga kis sisingen ta God narako ta ira udiet bilinge. Ing di ga sapur diet huo di ga hagamgamatien diet tupas God. Iesen pa di ga hagamgamatien diet uram narako tun at.
HEB 9:14 Iakan i tutun, kaik i tutun sakit bia no dene Krais na hagamgamatien tun at dahat. Io kaik, dahat kilingane bia kaike ra magingin sakena ing diet lamus tar dahat tano minaat, diet te panim laah. Krais ga tale bia na hagamgamatien tun at dahat kanong ga tar no uno nilon tupas God hoing tiga hartabar ma pataie ta sakena tana. Ma ga papalim huo ma no dadas tano Halhaliana Tanuo. Ga hagamgamatien dahat huo waing dahat naga taram tano lilona God.
HEB 9:15 Krais at iakanong ga pakile no sigar kunubus nalamin ta God ma ira uno matanaiabar waing diet ing God gate tatau diet, diet na hatur kawase ira haridaan ing God ga tange bia na tar ta diet. Ma kaike ra haridaan na kis hathatika. Ma Krais i tale bia na pakile iakan ra sigar kunubus kanong no uno minaat a harkul ie wara halangalanga ise diet sukun ira udiet sakena diet ga gil ra hena no luena kunubus.
HEB 9:16 Ing bia tiga kunubus wara rumahal i kis taar, pai tale bia tikai na rumahal ta ira minsik haruat mei ing bia pa na huna hinawas palai bia no tunotuno nong ga gil iakano kunubus i te maat.
HEB 9:17 Pai tale bia na rumahal nalua tano tunotuno pai maat baak kanong tiga kunubus wara rumahal pa na tutun tuk taar bia no tunotuno i te maat. Pa na tutun ing no tunotuno nong ga gil ie i lon baak.
HEB 9:18 No luena kunubus a mangana kunubus mah ie huo, kaik pa di ga hatutun bia mon ie. Taie. Di ga hatutun ie ma ra de mah hoken.
HEB 9:19 Moses ga hinawase ira matanaiabar uta ira harkurai gaam kap ra dena ira tumatena bulumakau ma ira me ma ga dolowane tikane ma ra taah. Io, ga kubus ra dardarana hina sipsip tiga mangana sila daha di kilam ie bia hisop, gaam hasuguh ie ta ira de ma ga sapur ira pakpakat ta ira harkurai ma ira matanaiabar mah.
HEB 9:20 Ma Moses ga tange ta diet ira matanaiabar bia, “Kaiken ra de i hatutun no kunubus nong God i te tange bia muat na taram ie.”
HEB 9:21 Hoing at mon mah Moses ga sapur no hala na lotu di ga gil ie ma ra maal. Ma ga sapur mah ira linge di ga papalim me kaia wara lotu.
HEB 9:22 Ma no suruno ta kaiken ra nianga, aie hoken: ira harkurai ta Moses i tange bia da hagamgamatien ra haleng na linge ma ra de, i hoing bia hutet bia ira linge bakut. Io, ma ing bia taie ta minaat, taie ta liklik luban se ira magingin sakena.
HEB 9:23 Io kaik, di ga supi bia diet na hagamgamatien huo kaike ra linge. Iesen kaike ra linge a malalar mon tano katon tutun wara lotu aram ra mawe. Ma ira dena kaike ra wawaguai di ga kut bing pai haruat wara hagamgamatien iakano katon aram ra mawe. Taie. Iakano katon i supi tiga mangana hartabar nong i bilai ta kaike ra hartabar di ga kut bing.
HEB 9:24 Ma iakan i palai kanong Krais ga laka aram ra mawe at. Pa ga laka tiga katon wara lotu ing ira tunotuno diet ga gil. Taie. Iakano katon a malalar mon tano katon tutun wara lotu aram ra mawe. Io, ga laka aram at ra mawe bia na tur ra matmataan ta God kaiken wara gaie dahat.
HEB 9:25 Ma pa ga laka mah aram ra mawe bia na tar no uno nilon hoing tiga hartabar tupas God ra haleng na pakaan. Krais pa ga gil haruat ma no tamat na ut na lamus tunotuno tupas God ta diet ira Iudeia. Taie. Iakano tamat na ut na lamus tunotuno tupas God git laklaka uram narako tano Halhaliana Subaan Sakit, tiga bung mon ta ira tintinahon. Iesen iakanong git laklaka ma ra dena wawaguai, taie bia a dena at.
HEB 9:26 Ing bia Krais gor gil huo gor supi bia na maat ra haleng na pakaan mekarawa laah tano hakhakisi tano ula hanuo. Iesen pa ga gil huo. Taie. Gate hanuat kaiken um tano hauhawatine ta ira pakana bung bia na tar no uno nilon hoing tiga hartabar tupas God wara kapkap se ira magingin sakena. Ga hanuat tiga pakaan mon. Ma i haruat. Pai supi bia na hanuat huo baling.
HEB 9:27 Io, ma God i te tibe tar ta ira tunotuno bia diet bakut diet na maat tiga pakaan mon. Namur um, diet na tur ra harkurai.
HEB 9:28 Krais mah ga ngan huo. Ga maat tiga pakaan mon hoing tiga hartabar tupas God wara puspusak ra harpidanau ta ira magingin sakena audiet ra halengin. Iesen tano uno airuo na hinanuat pa na pusak um ira harpidanau huo. Taie. Na hanuat bia na halon diet ing diet la kiskis kawasei.
HEB 10:1 Ira harkurai ta Moses a malalar mon ta ira bilai na linge ing na hanuat. Pai kaike ra linge tutun. Ma haruat ta ira harkurai ta Moses di la tuntun haitne ta ira tintinahon ira hartabar tupas God. Io kaik, kaike ra mangana hartabar huo ta ira harkurai ta Moses pai tale bia na gil habilai hasakitne ira matanaiabar ing diet haan hutaten God wara lalotu tupas ie.
HEB 10:2 Ing bia kaike ra hartabar gor tale wara gilgil habilai hasakitne kaike ra matanaiabar sukun ira udiet sakena, diet pa gor kilingane bia a mon nironga baak kana ho diet ma diet naga hatakumutne wara hartabar.
HEB 10:3 Iesen kaike ra hartabar i halilik diet ta ira tintinahon tikatikai bia ira udiet nironga baak kana.
HEB 10:4 I halilik diet huo kanong ira dena tumatena bulumakau ma ira dena me pai haruat wara kapkap se ira nironga.
HEB 10:5 Io kaik, ing Krais ga hanuat kai ra ula hanuo, ga tange ta God bia, “Pau ga sip bia da tun ira hartabar tupas ugu. Iesen u ga tagure no palatamaigu.
HEB 10:6 Ira hartabar bia da tun ira kidilona wawaguai bakut, ma ira mes na mangana hartabar di ga tun uta ira magingin sakena, pau ga kanakana urie.
HEB 10:7 Io, ma iau ga tange bia, ‘Nugu God, iau um ken, wara gilgil haruatne no num sinisip. Di ga pakat hokaiken utagu kaia ta ira num pakpakat.’”
HEB 10:8 Io, ga luena tange bia, “Pau ga sip bia da tun ira hartabar tupas ugu. Ma pau ga sip ira hartabar bia da tun ira kidilona wawaguai bakut bia ira mes na mangana hartabar di ga tun uta ira magingin sakena. Ma pau ga kanakana mah uta kaiken ra hartabar.” A tutun bia di ga tun kaike ra hartabar haruat ma ira harkurai ta Moses, iesen Krais ga tange at huo.
HEB 10:9 Io, namur um ga tange bia, “Nugu God, iau um ken, wara gilgil haruatne no num sinisip.” Io kaik i palai bia God ga kap se ira luena hartabar bia na bul kuas diet ma no hartabar ta Krais.
HEB 10:10 Jisas Krais ga pakile haruatne no sinisip ta God, kaik dahat bakut dahat gi gamgamatien sukun ira udahat sakena tano hartabar Krais ga gil ie ma no palatamaine at. Ga tar no palatamaine tiga pakaan mon ma i haruat. Pa na tar habaling um ie.
HEB 10:11 Ira ut na lamus tunotuno tupas God ta diet ira Iudeia, diet la tur taar tano udiet pinapalim na lotu ta ira kaba bungbung. Diet la tuntun haitne kaike ra mangana hartabar at tupas God. Ma kaike ra hartabar pa nale tale tun at bia na kap se ira sakena.
HEB 10:12 Iesen Krais balik ga tar tiga kapawena hartabar mon uta ira sakena. Ma no uno hartabar i tur dadas hathatika. Ga gil huo gaam a kis tano tamat na kinkinis ra kata na lima God.
HEB 10:13 Ma i la kiskis nanaho kaia tuk taar bia God na bul hasur ira uno hiruo napu hoing tiga linge na bul kakine.
HEB 10:14 Ma i la kiskis kaia kanong ga gil habilai hasakitne diet ma no uno kapawena hartabar mon. Ga gil huo ta diet ing i bul hasisingen diet bia diet na halhaal sukun ira udiet sakena. Ma diet na bilai harsakit huo hathatika.
HEB 10:15 Io, ma no Halhaliana Tanuo mah i suro haut iakan taar ta dahat. I luena tange bia,
HEB 10:16 “Iau no Watong, iau tange bia no mangana kunubus iau ni gil ie ma diet ta tiga pakana bung namur, aie hoken: Iau ni bul ira nugu harkurai ta ira bala diet. Ma kaike ra harkurai iau ni pakat kahe ta ira udiet lilik.”
HEB 10:17 Namur um i tange bia, “Iau pa ni lik leh ira udiet magingin sakena ma ira udiet patnau tagu.”
HEB 10:18 Io kaik, pa da supi habaling tiga hartabar wara kapkap se ira magingin sakena kanong God i te lik luban se kaiken ra sakena.
HEB 10:19 Io kaik, bar hinsakagu ta Krais, dahat balaraan wara hinaan laka tano Halhaliana Subaan Sakit tano de Jisas tano uno minaat.
HEB 10:20 No uno minaat ga papos tiga sigar ngaas wara laklaka ta iakano Halhaliana Subaan Sakit. I hoing bia dahat te laka harsakit tano balo na maal narako tano katon na lotu. Ma sen iakano balo na maal, aie no palatamaine Jisas no lilona ngaas.
HEB 10:21 Ma tiga mes na linge mah. Audahat tiga tamat na ut na lamus tunotuno tupas God nong i papalim wara gaiena no huntunaan ta God.
HEB 10:22 Kaiken ra linge i te hanuat um, kaik i tahut bia dahat na haan hutaten God ma ra tutun na bala dahat. Waak dahat burut. Dahat na haan hutet tana ma ra nurnuruan. Dahat pa na kilingane bia ira udahat nironga baak kana kanong i te sapur ira bala dahat wara gisgis ise kaike ra nironga. Dahat na haan hutet tana hoing ira gamgamatien na matanaiabar diet te sisiu tano madarasuana taah.
HEB 10:23 Na tahut bia dahat na tur dadas ta ira linge dahat te hinawas bia dahat nurnur taar ine. Waak dahat tur galagola ta ira linge dahat nanaho ma ra nurnuruan urie, kanong God na gil haruatne ira uno nianga ga kukubus taar ta dahat.
HEB 10:24 Na tahut bia dahat na lilik timaan bia dahat na haragat hargilasane dahat hohe wara hamhamines ira udahat harmarsai ma wara gilgil ira bilai na harharahut.
HEB 10:25 Waak dahat hatakumutne no udahat magingin wara kis hulungai. Ari diet malmalungo wara kis hulungai iesen waak dahat gil huo. Dahat na haragat hargilasane dahat. Ma dahat na manga baso wara gilgil huo kanong dahat nes kilam bia no pakana bung tano Watong i te wara hinanuat um.
HEB 10:26 I tahut bia dahat na lon huo kanong taie baling um tiga mangana hartabar wara kapkap se ira sakena ing bia dahat te palai um ta ira tutun God i te hapuasne ta dahat, ma sen dahat bul ira udahat sinisip wara gilgil haitne ira sakena.
HEB 10:27 Dahat na kis kawasei ma ra ramramin iakano ra harkurai nong na hanuat. Ta iakano harkurai, no but na iaah na tun haliare ira suk ane God.
HEB 10:28 Bia airuo bia aitul a tunotuno dal ga tung tikai bia i patnau ta ira harkurai ta Moses, di ga bu bing ie, ma pa di ga marsei.
HEB 10:29 Ing bia ga ngan huo ta diet tano hena harkurai ta Moses, a tamat na harpidanau sakit na karat tikai bilang nong i malentakuane no Nati God ma i tange hagahe no Halhaliana Tanuo nong i tar harmarsai, ma i lik bia a bilingana linge mon no de utano kunubus nong ga bul hasisingen ie bia naga halhaal sukun ira uno sakena.
HEB 10:30 I palai bia na ngan huo kanong dahat nunure tar God nong ga tange bia, “Iau nong iau ni balu ira matanaiabar uta ira udiet sakena. Iau ni hapidanau diet haruat ma ira udiet gingilaan.” Ma ga tange habaling bia, “Iau no Watong, iau ni kure ira nugu matanaiabar.”
HEB 10:31 Ing bia tikai na kis huo tano limana no lilona God, na ramramin sakit kanong na hiruo sakasaka.
HEB 10:32 I tahut bia muat na lik leh ira pakana bung menalua bia God gate hapalaine tar muat. Ta iakano pakana bung muat ga tur dadas narako ta ira tamat na ngunngutaan ing ga manga ubal muat.
HEB 10:33 Ari a pakaan di ga tange hagahe muat ma di ga helar ta muat ra matmataan gar na haruat. Ma ari a mes na pakaan muat ga tur tika ma diet ing di ga helar ta diet huo.
HEB 10:34 Muat ga marse diet, muat gaam harahut diet ing di ga halaka diet tano hala na harpidanau. Ma ing ari di ga ras leh ira numuat linge, muat ga waak tar diet ma ra gungunuama kanong muat ga nunure bia muat tinane ira linge i bilai ta kaike ra linge di ga ras leh ma na kis hatika.
HEB 10:35 Io kaik, waak muat hamalum se no numuat tuntunur na balaraan kanong God na hawatong muat ing muat tur na balaraan huo.
HEB 10:36 Na tahut bia muat na tur dadas bia muat na tale wara murmur no sinisip ta God, kaik muat naga hatur kawase ing ga kukubus taar ta muat urie.
HEB 10:37 A tutun. Dahin um, “Ma nong i wara hinanuat, na hanuat. Pa na halis.
HEB 10:38 Iesen no nugu ut na takodas na lon tano uno nurnuruan. Ma ing bia na hesuo pas iau, iau pa ni kanakana utana.”
HEB 10:39 Iesen dahat pai hokaike ra mangana matanaiabar ing diet hesuo pas God ma diet hiruo sakasaka. Taie. Dahat ira mangana matanaiabar ing dahat nurnur, kaik dahat na lon.
HEB 11:1 A mangana linge sa nora nurnuruan? Aie hoken. Ing tiga nong i nurnur, i nunure tun tar bia na hatur kawase ira linge i nanaho urie. Ma iakano tunotuno i manga palai taar mah bia kaiken ra linge i tutun ma sen bia pai ga nes baak.
HEB 11:2 Ira tunotuno menalua diet ga nurnur huo, kaik God gaam hinawas palai bia a bilai diet.
HEB 11:3 Dahat nurnur, kaik dahat gi palai bia God ga hakisi ira matahu linge bakut ma no uno nianga. Io kaik, i palai bia God ga papalim ma iakano pai tale bia dahat na nes wara hakhakisi ira linge dahat la nesnes.
HEB 11:4 Io, ma Abel ga nurnur, kaik gaam tabar God ma no hartabar i bilai ta nong ta Kain. Ma God ga hinawas palai bia i bilai ira uno hartabar, kaik Abel ga hatur kawase ra hinhinawas bia a takodasiana tunotunoi, kanong ga nurnur. A tutun bia Abel gate maat, iesen no uno nurnuruan kana i hauhausur baak dahat.
HEB 11:5 Io, ma Enok ga nurnur, kaik God gaam kap haut leh ie sukun iakan ra nilon ma pa gale maat. Pa ga tale bia tikai na nes leh ie kanong God gate kap haut leh ie. Menalua ta ing God ga kap haut leh ie, ga hinawas palai bia a bilai na tunotuno ie nong ga hakanakana God. Io kaik, God gaam kap haut leh um ie.
HEB 11:6 Io, ma ing bia tikai pai nurnur, pai tale bia na hakanakana God, kanong ira tunotuno diet supi ra nurnuruan. Io kaik, sige tikai i wara hinahaan tupas God i tahut bia na nurnur bia no udahat God kana, ma bia i la hakanakana diet ma ra kunkulaan ing diet sisilih utana.
HEB 11:7 Io, ma God ga hakatom Noa uta ira linge pa di ga nes baak. Noa ga nurnur, kaik gaam ru God ma ga pakile tiga mon wara halhalon no uno hatatamaan. No uno pinapalim ma ra nurnuruan ga hapuasne bia ira matanaiabar tano ula hanuo diet te sakena um. Ma God ga haut bia Noa i takodas kanong gate nurnur.
HEB 11:8 Io, ma God ga tatau Abraham bia na haan ukaia tiga katon nong God na tabar ie mei namur. Abraham ga nurnur, kaik gaam taram. A tutun bia pa ga nunure bia i hanahaan uhe, iesen ga haan at mon.
HEB 11:9 Ga nurnur, kaik gaam kiskis kaia tano hanuo bia God ga kukubus bia na tar ie tana. Ga kiskis kaia hoing tiga wasire i la kiskis tano hanuo pai unoi. Ga kis ta ira mangana palpalih. A tutun bia God ga kukubus taar ta Aisak ma Iakop mah bia na tabar dir ma iakano hanuo at, iesen dir ga lon mah huo ta kaike ra palpalih.
HEB 11:10 Abraham ga lon huo kanong ga kis kawase no pise na hala nong na tur lawas ma pa na panim laah. Ma iakano pise na hala nong God ga bul no uno lilik utana bia na pakilei hohe ma ga pakile at mah ie huo.
HEB 11:11 Abraham ga nurnur, kaik God gaam bale tar ie bia na hatahuat tiga bulu, ma a linge bia be gate patuana um ma Sara mah gate hinkaho. God ga bale tar ie huo kanong Abraham ga so no uno lilik tana bia na gil haruat ta ing ga kukubus taar tana huo.
HEB 11:12 Io kaik, a haleng sakit ira bulumur diet ga tahuat ta iakano ra tunaan, ma iakano tunaan, no uno dadas wara gilgil huo gate pataam um hoing ira minaat. Ma kaike ira uno bulumur diet haleng sakit hoing ira tiding aram ra mawe. Ma pai tale bia tikai na was petlaar diet hoing tikai pai tale mah bia na was ira wana tano wasasar.
HEB 11:13 Kaike ra tunotuno bakut diet ga nurnur tuk taar bia diet ga maat. Diet pa ga hatur kawase ira linge God ga kukubus taar ta diet urie. Taie. Diet ga nes kilam bia kaike ra linge i manga tapaka baak. Ma diet ga kanakana pane kaike ra linge bia na hanuat um namur. Diet ga hinawas palai bia a wasire mon diet ta iakan ra ula hanuo ma pai udiet taman tutun ie.
HEB 11:14 Ing tari a matanaiabar diet tange ta linge huo, i hamines bia diet sisilih ta tiga hanuo wara udiet at.
HEB 11:15 Diet pa ga lilik uta iakano hanuo diet ga tut laah mekaia. Ing bia diet gor lilik huo diet gor tale bia diet na tapukus baal.
HEB 11:16 Iesen bia taie. Diet ga sip bia diet na haan taar tiga hanuo nong i bilai ta iakanong diet ga tut laah mekaia. Diet ga sip no hanuo aram ra mawe. Io kaik, God pa ga hirhir bia diet na tange bia no udiet God ie kanong i te tagure tar tiga pise na hala wara udiet.
HEB 11:17 Abraham ga nurnur, kaik gaam tar Aisak hoing tiga hartabar di la tuntun tupas God ta iakano bung God ga walar ie huo. Abraham, aie nong God ga gil no uno kunubus taar tana. Iesen aie at nong ga wara kutkut bing no uno bulukasa hoing tiga hartabar tupas God. Iesen God gate tange tana bia, “Ira num bulumur diet na tahuat tane Aisak at.”
HEB 11:19 Abraham ga lik bia God i tale bia na hatut ira minaat. Ma ing Abraham ga hatur kawase habaling Aisak, i hoing bia ga kap leh ie sukun ra minaat.
HEB 11:20 Io, ma Aisak ga nurnur, kaik gaam haidane Iakop ma ne Esau uta ira linge ing na hanuat namur.
HEB 11:21 Io, ma Iakop ga wara minaat. Ga nurnur, kaik gaam haidane dir ira iruo bulu ta Iosep. Ga suator tano uno buko gaam lotu tupas God.
HEB 11:22 Io, ma hutet bia Iosep na maat. Ga nurnur, kaik gaam tange ta diet ira Israel bia i tutun bia diet na haan sukun Isip. Ma ga hinawase diet bia diet na gil hohe ta ira suruno ing na maat.
HEB 11:23 Io, ma no pawasine Moses ma no ana sus, dir ga nurnur, kaik dir gaam suhei aitul a teka namur ta ing di ga kahai. Dir ga nes kilam ie bia a melmel na bulu ie ma pai haruat ma ira mes. Ma dir pa ga burte mah no harkurai tano tamat na lualua kaia Isip, kaik dir gaam suhei.
HEB 11:24 Io, ma Moses ga nurnur, kaik ing ga tamat um ga malok bia da tange bia a natinei no hinasik tano tamat na lualua kaia Isip.
HEB 11:25 Ga sip bia na kilingane ra ngunngutaan tika ma ira matanaiabar gar ta God ma pataie bia na bale leh ira magingin sakena bia na hakanakana ie ra kumkumina pakana bung mon.
HEB 11:26 Moses ga kilingane ra dadas na kinkinis wara gaiena no Mesaia ma ga lik bia iakano mangana kinkinis i manga bilai ta ira kinkinis na watong kaia Isip. Ma ga lilik huo kanong ga sip bia na kap no uno kunkulaan nong na hanuat namur.
HEB 11:27 Ga nurnur, kaik gaam haan sukun Isip. Pa ga burte no ngalngaluan tano tamat na lualua mekaia. Taie. Ga tur dadas kanong i ngan hoing bia gate nes God nong pa di la nesnes ie.
HEB 11:28 Ga nurnur, kaik gaam taram God hoken: ga gil no Nian na Hinahaan Sakit ma ga tange ta ira matanaiabar bia diet na sapur ira matanangas ma ra de. Ma ga gil huo waing no angelo nong ga wara bingbing ira luena nat na bulu pa na hagahe ira Israel.
HEB 11:29 Io, ma ira matanaiabar na Israel diet ga nurnur, kaik diet gaam balos no Tes Dardaraan, hoing bia tiga mamasina katon ie. Ing ira Isip diet ga walar huo, diet ga konga um.
HEB 11:30 Ira matanaiabar diet ga nurnur, kaik ira balo tano pise na hala Ieriko ga tamadure sakasaka namur ta ing diet gate haan luhutanei ra liman ma iruo na bung.
HEB 11:31 Rahap no ut na hilawa ga nurnur, kaik pa di gaam bu bing ie tika ma diet ira patnau, kanong ga bale halaka ira ut na munmunua.
HEB 11:32 Iau ni tange habaling um ra sa? No pakana bung pai talona bia ni hinawase muat utane Gidion, Barak, Samison, Iepita, Dawit, Samuel, ma ira tangesot mah.
HEB 11:33 Kaike ra tunotuno diet ga nurnur, kaik diet gaam umri laar leh ira matanaiabar ta ira mes na hanuo. Diet ga gil ira magingin takodas. Diet ga hatur kawase ira linge ta ari a kunubus God ga gil tar ta diet. Diet pa ga hiruo ta ira ha diet ira laion.
HEB 11:34 Diet pa ga hiruo tano dadas na iaah. Diet pa ga hiruo ta ira wise na hinarubu. Diet pa ga dadas ma sen diet ga kap ra dadas. Diet ga harubu dadas, diet gaam paas hasur ira haleng na umri ta ira mes na tamtaman.
HEB 11:35 Airuo hahin dir ga hatur kawase habaling ira udir bulu sukun ra minaat. Ari a mes na tunotuno diet ga malok bia da halangalanga ise diet, kaik diet gaam maat ta ira hinelar ing ga haan tupas diet. Diet ga sip huo waing diet naga tut hut sukun ra minaat. Diet ga nurnur bia iakanong i bilai tano nilon kai napu.
HEB 11:36 Ari di ga kukutur ta diet ma di ga dangat mah diet. Ari a mes di ga kubus kawase diet ma ra dadas na winwisaan ma di ga halaka diet tano hala na harpidanau.
HEB 11:37 Di ga gulum ari ma ra haat ma tari di ga kato kutus diet. Ma ari a mes di ga kato bing diet ma ra wise na hinarubu. Diet ga maris. Diet ga sigam mon ira pala sipsip ma ira pala me. Di ga hangungut diet ma di ga helar ta diet.
HEB 11:38 Ira matanaiabar tano ula hanuo diet pai haruat ma kaiken ra tunotuno. Taie. Kaiken ra tunotuno diet manga bilai sakit ta ira matanaiabar tano ula hanuo. Diet ga haan hurbit ta ira hanuo bia ma ira uladih. Diet ga lon ta ira matana haat ma ta ira lulur.
HEB 11:39 Diet ga nurnur, kaik God gaam hinawas palai uta diet bakut bia a bilai diet. Iesen taie ta tikai ta diet ga hatur kawase ing God ga kukubus taar ta diet urie, kanong God gate tagure tar tiga ngaas uta dahat nong i bilai ta nong menalua. God pa ga sip bia na habilai hasakitne diet sen mon talur dahat, kaik gaam tagure iakano ngaas waing naga habilai hasakitne diet ma dahat mah.
HEB 12:1 Io, ma i hoing bia dahat hilau ra harkoskos ta ira udahat nilon. Ma diet kaike ra matanaiabar ing iau te hinawas taar um ta diet, diet kis luhutane dahat ma diet la ititame dahat. Io kaik, na tahut bia dahat na kap se ira mangana linge i la palpalim kawase dahat bia dahat na hilau timaan. Ma dahat na kutus ise ira magingin sakena ing i la wis kawase tar dahat. Dahat na hilau harkoskos ma ra baso ta iakano harkoskos ta ira udahat nilon. Waak dahat malmalungo ta dahin.
HEB 12:2 Ma ing dahat hilau harkoskos huo, i tahut bia dahat na mate dit Jisas nong ga lulua haan ta dahat tano magingin na nurnur, aie nong i hatutun ira udahat nurnuruan mah. Pa ga haan talur no uno hiniruo tano ula kabai. Ga nunure bia a linge na hirhir bia tikai na hiruo huo, ma sen pa ga manga lilik utana kanong ga sip bia na kap no gungunuama nong i taguro taar wara uno. Io, ga hiruo huo gaam a kis taar tano palpal na kata tano tamat na kinkinis na harkurai ta God.
HEB 12:3 Muat na lilik timaan ta ira tinirih ta Jisas ing ira ut na sakena diet ga manga malentakuanei. Muat na lilik timaan tana bia muat kabi malmalungo talur no numuat hinilau na harkoskos.
HEB 12:4 I tutun bia ira ut na sakena diet te manga walar wara lamlamus muat tano sakana ngaas, ma i hoing bia muat harubu ma diet wara turtur bat diet. Iesen taie tari nalamin ta muat i te hiruo baak narakoman ta iakano hinarubu.
HEB 12:5 Ma i nanaas bia muat te lik luban se iakano nianga ta God ing ga wara haragat muat mei kanong a natine muat. Ma ga tange hoken: “Natigu, nu lilik timaan ing no Watong i hapidanau ugu wara hausur ugu, ma waak u malamalas talur ie ing i pir ugu ta ira num sakena.
HEB 12:6 Kanong warah, no Watong i la haphapidanau diet ing i sip diet, ma i la paspasar diet bakut ing i halon hapatangen diet.”
HEB 12:7 I tahut bia muat na tur dadas ta ira tinirih kanong God i haphapidanau muat hoing ira natine wara hausur muat. Muat na tur dadas huo kanong muat ngan hoing ira nat na bulu kai napu. Diet bakut diet la kapkap ra harpidanau ta ira adiet sus.
HEB 12:8 God i la haphapidanau ira natine bakut, ma ing bia pai hapidanau ugu, i hamines bia a nat na ngaas ugu, ma pataie bia a natine tutun ugu.
HEB 12:9 Io, ma dahat na lilik uta ira adahat sus kai napu. Diet ga hapidanau dahat wara hausur dahat, kaik dahat gaam ru diet. Ing bia dahat ga ru diet huo i manga tahut bia dahat na kis ra hena no harpidanau tano Mama ta ira tanua dahat, kaik dahat naga lon.
HEB 12:10 Ma ira adahat sus kai napu diet ga hapidanau dahat ra bar tinahon mon. Ma diet ga hapidanau dahat hoing diet ga lik bia i takodas. Iesen God i hapidanau dahat wara harahut dahat waing dahat naga halhaal sukun ira sakena hoing God i la halhaal taar.
HEB 12:11 Ma ing tikai i kap ra harpidanau, ta iakano pakana bung at pa na kanakana. Taie. Na kilingane ra ngunngutaan. Iesen namur um, diet ing diet ga kap ra harpidanau wara hausur diet, diet na hatur kawase no hunena ta iakano ra harpidanau ma aie hoken: ira udiet nilon na takodas, kaik diet na kap ra malum.
HEB 12:12 Io kaik, na tahut bia muat na hadadas ira iruo malmalungana lima muat ma ira buku na kaki muat.
HEB 12:13 Muat na mur no takodasuana ngaas, bia no kakena no pengpeng kabi tamalapus, iesen bia na langalanga baling.
HEB 12:14 Muat na walar ma ra baso bia muat na lon ma ra malum tika ma ira tunotuno bakut. Ma muat na walar ma ra baso mah bia muat na halhaal sukun ira sakena. Ing bia tikai pai halhaal huo, pa na nes no Watong.
HEB 12:15 Muat na harbalaurai bia tikai kabi basomah wara kapkap no hartabar ta God nong i tabar bia mon dahat mei. Ma muat na harbalaurai mah bia tikai pa na tahuat nalamin ta muat hoing tiga ina itutun ma na hatahuat ra purpuruan ma na habilinge ira nilon audiet ra haleng.
HEB 12:16 Ma muat na harbalaurai bia ta tikai kabi noh ma tiga mes pai aunoi. Muat na harbalaurai mah bia tikai kabi malok ise God hoing Esau. Esau no luena bulu nong gor rumahal ira haleng na minsik, iesen ga suhurane no uno kinkinis na rumahal wara tiga kapawena nian mon.
HEB 12:17 Ma muat nunure bia namur um Esau ga sip bia no ana sus na haidanei. Iesen no ana sus ga malok isei, kanong Esau pa ga tale wara nesnes tupas tiga ngaas bia na hatakodasne ing gate gil tar. Ga manga sisilih bia na kap no haridaan gaam manga suah utana, iesen pa ga petlaar.
HEB 12:18 Io, ma muat pai hanuat taar tano uladih Sinai hoing ira matanaiabar Israel diet ga haan ukaia. Diet ga tale bia diet na sigire iakano uladih. Ma ta iakano uladih, tiga tamat na iaah ga iaiaan. Ga manga boh, ga kankado ma ga morohiluo.
HEB 12:19 Ga husuanga no kinakel tano tahur ma diet ga hadade a ingana tikai. Ing ira matanaiabar diet ga hadade no ingana diet ga sasaring marmaris bia waak um i haianga habaling diet.
HEB 12:20 Diet ga sasaring huo kanong pa ga tale diet bia diet na kis ra hena no harkurai nong ga tange hoken: “Ing bia sige ta tunotuno bia a wawaguai mah i haan ukaia tano uladih da gulum bing ie ma ra haat.”
HEB 12:21 No uladih ga nanaas sakasaka sakit kaik Moses gaam tange bia, “Iau manga dedar ma ra bunurut.”
HEB 12:22 Io, ma muat pai hanuat ukaia ta iakano uladih. Taie. Muat te hanuat taar tano uladih Saion, no pise na hala tano lilona God. Aie ne Ierusalem aram ra mawe. Muat te hanuat taar tano kis hulungai ta ira haleng sakit ira angelo ing pai tale bia da was diet. Ma diet kis hulungai ma ra gungunuama.
HEB 12:23 Muat te hanuat taar tano kis hulungai audiet ira luena nati God. Diet ing God i te pakat kawase ira hinsa diet aram ra mawe. Muat te haan tupas God no ut na harkurai ta ira tunotuno bakut. Muat te hanuat taar ta ira tanua diet ira ut na takodas ing God i te habilai hasakitne diet.
HEB 12:24 Muat te haan tupas Jisas nong i te gil no sigar kunubus nalamin ta God ma ira matanaiabar. Muat te hanuat taar tano dene Jisas nong ga sapur muat mei wara gilgil iakano kunubus. Ma no dena i hapuasne ta dahat ira linge i bilai ta ira linge no dene Abel ga iangianga urie.
HEB 12:25 Muat na harbalaurai timaan. Waak muat harus ise nong i iangianga ta muat. Diet ing diet ga malok bia diet na hadade iakanong nong ga hakatom diet kai napu, diet pa ga petlaar wara hinilau sukun no uno harpidanau. Io kaik, tutun sakit, pai tale dahat bia dahat na hilau sukun no uno harpidanau ing bia dahat tamapas sukun ie nong i hakatom dahat meram ra mawe.
HEB 12:26 Ta iakano pakana bung no ingana ga gune no ula hanuo, iesen kaiken i te kukubus bia, “Tiga pakaan baling iau ni gune no ula hanuo. Iesen pataie bia no ula hanuo sen mon. Iau ni gune mah no mawe.”
HEB 12:27 Ing i tange bia na gil huo “tiga pakaan baling,” i hamines bia na kap se kaike ra linge ing ga hakisi. Na kap se diet kanong i tale diet bia diet na gunagune. Na kap se kaike ra linge waing ira linge pai tale bia na gunagune, diet na kis taar at.
HEB 12:28 Io kaik, na tahut bia dahat na tanga tahut tana kanong dahat laka tano uno kinkinis na harkurai ma ra harbalaurai nong pai tale bia na gunagune. Dahat na tanga tahut tana huo, kaik naga tale dahat bia dahat na lotu tupas ie. Ma na tahut bia dahat na lotu tupas ie hoing i sip bia dahat na lotu tupas ie huo. Ma i hoken: dahat na lotu tupas ie ma ra urur ma ra pirharlat.
HEB 12:29 Na tahut bia dahat na gil huo kanong no udahat God aie hoing tiga iaah nong i la tuntun haliare ira linge.
HEB 13:1 I tahut bia ira numuat harmarsai hargilaas ta muat ira harahinsakaan narako ta Krais na tur taar at huo.
HEB 13:2 Waak muat luban wara balbale leh ira wasire ta ira ngasia muat. Ari diet ga bale leh ari a wasire ma diet pa ga nunure bia diet ga bale leh ira angelo.
HEB 13:3 Na tahut bia muat na lik leh diet ing diet kis ra hala na harpidanau, hoing bia muat mah muat kis tika taar ma diet. Ma na tahut bia muat na lik leh diet ing di helar ta diet kanong a tunotuno mon muat hoing diet ma i tale bia da helar mah ta muat.
HEB 13:4 Na tahut bia ira tunotuno bakut diet na ru no magingin na tinolen. Tikai na noh tika ma no suana at. Waak i noh tika ma tiga mes kanong God na kure hagahe diet ing diet noh tika ma tikai pai aunoi.
HEB 13:5 Muat na langalanga sukun iakano ra magingin wara sip kinewa. Na tahut bia muat na lik bia ira linge muat hatur kawase i haruat mon. Wara bih, kanong God ga tange hoken: “Iau pa ni haan sukun ugu ma iau pa ni waak kapis ugu.”
HEB 13:6 Io kaik, dahat na balaraan wara tangtange bia, “No Watong, aie no nugu ut na harharahut, kaik iau pa ni burut. Pai tale tun at bia tikai na gil tiga linge tagu.”
HEB 13:7 Na tahut bia muat na lik leh ira numuat lualua menalua ing diet ga hinawase muat tano nianga gar ta God. Muat na lilik timaan uta ira udiet mangana nilon tuk taar bia diet ga maat. Ma muat na mur ira udiet mangana nurnuruan.
HEB 13:8 Ira magingin ta Jisas Krais pai la kikios. Taie. Nalua ma katin ma namur mah i haruat sen at mon.
HEB 13:9 Waak muat bale leh tari bia diet na lamus hasesir muat ma ira udiet matahu nianga ing i mes ta ira nianga ta God. Na harahut muat bia God na hadadas muat aram narako ta ira numuat nilon ma no uno harmarsai nong na tabar bia mon muat mei. Iesen bia ing muat mur ira harkurai uta ira mangana nian pa na harahut muat. Taie. Kaike ra harkurai pa ga harahut diet ing diet git murmur diet.
HEB 13:10 Audahat mon tiga suuh na tar hartabar tupas God. Ma diet ing diet papalim narako tano hala na lotu gar na Israel, diet pai tale bia diet na iaan kaia ra udahat suuh na tar hartabar.
HEB 13:11 No tamat na ut na lamus tunotuno tupas God ta diet ira Israel, i la kapkap ira dena ira wawaguai uram narako tano Halhaliana Subaan Sakit. Ma kaike ra de, a hartabar wara kapkap se ira magingin sakena. Iesen di la tuntun kaike ira palatamaine ira wawaguai kaia tiga katon i kis sisingen ta ira matanaiabar.
HEB 13:12 Io kaik, Jisas mah huo. Ga maat sisingen nataman tano pise na hala wara bulbul hasisingen ira matanaiabar sukun ira udiet sakena ma no dena at.
HEB 13:13 Io kaik, dahat na haan tupas ie sukun kaike ra matanaiabar na Israel tika ma ira udiet harkurai. Diet ga nes hamalentak Jisas kanong ga maat huo. Ma ing dahat haan tupas ie diet na nes hamalentak mah dahat huo. Iesen na tahut bia dahat na haan tupas at ie kanong taie ta tiga pise na hala kai napu uta dahat nong na tur hatika. Taie. Dahat sip bia dahat na laka tano pise na hala nong na hanuat namur ma dahat kis kawase iakano pise na hala.
HEB 13:15 Jisas um nong i lamus dahat tupas God. Io kaik, i tahut bia dahat na pirlat hatikane God hoing no udahat hartabar tupas ie. Dahat na pirlat ie hoken: dahat na hinawas palai bia dahat ira uno.
HEB 13:16 Ma waak dahat luban wara gilgil ira bilai na harharahut ta ira mes kanong kaiken ra mangana hartabar tupas God i hakanakana ie.
HEB 13:17 Na tahut bia muat na taram ira numuat lualua ma bia muat na bul hanapu muat ta diet. Warah, kanong diet balaure timaan muat. Ma diet balaure muat huo kanong namur diet na hinawas palai ra matmataan ta God uta ira udiet pinapalim nalamin ta muat. Io, muat na taram diet waing ira udiet pinapalim nalamin ta muat na hakanakana diet, ma pataie bia na hatirih ira udiet nilon. Ing bia diet na kap ra tinirih huo, pa na harahut muat.
HEB 13:18 Na tahut bia muat na sasaring wara gaie mehet kanong mehet pai kilingane bia mehet ira sakana mangana tunotuno. Taie. Mehet la sipsip bia na takodas harsakit ira numehet nilon.
HEB 13:19 Ma iau haragat muat bia muat na manga sasaring bia God na tule pukus hagasiaan iau tupas muat.
HEB 13:20 Iau sasaring tupas God nong i la tartar ra malum. Aie nong ga hatut habaling Jisas no udahat Watong sukun ra minaat. Ma Jisas aie nong i balaure dahat hoing tikai i balaure ira sipsip. Jisas nong ga maat hoing tiga hartabar tupas God. Ma no uno minaat ga gil no kunubus nong i tur hatika. Io kaik, God ga tale bia na hatut ie huo.
HEB 13:21 Ma iau sasaring bia iakano udahat God na nagarane muat ma ira bilai na linge muat supi wara gilgil haruatne no uno sinisip. Iau sasaring bia na papalim narakoman ta dahat tikatikai ing Jisas Krais te lamus dahat tupas God bia dahat naga tale wara hakanakana ie. Ma Jisas Krais aie nong dahat na lat ie hathatika. Amen.
HEB 13:22 Bar hinsakagu ta Krais, iau haragat muat bia muat na hadade kaiken ra nianga ma ra bala maat. I tale bia iakan ra kumkumina pakpakat mon tupas muat na habalaraan muat.
HEB 13:23 Iau hinawase hapalaine muat bia di te halangalanga ise Timoti, no tasi dahat, sukun ra hala na harpidanau. Ma ing bia na haan tupas hagasiaan muat, iau ni tika mei ma ni me nes muat.
HEB 13:24 Na tahut bia muat na haatne leh ira numuat lualua ma ira matanaiabar bakut ta God. Diet me Itali diet haatne leh muat.
HEB 13:25 Iau sasaring bia no harmarsai ta God na kis ta muat bakut.
JAM 1:1 Iau Jemes, tiga ut na tinaram tano pinapalim ta God ma no Watong Jisas Krais. Ma iau pakat kaiken ra nianga tupas muat ira sangahul ma iruo na huntunaan gar Israel ing muat la kis harbasia taar tano ula hanuo. Io, ma iau haatne um muat ma kaiken ra nianga.
JAM 1:2 Bar hinsakagu ta Krais, i tahut bia muat na manga guama bia ira mangana harwalar i haan tupas muat, kanong muat nunure bia kaiken ra tinirih i walwalar ira numuat nurnuruan na hamines bia ira numuat nurnuruan pa na puko, kaik muat naga tale wara tuntunur dadas.
JAM 1:4 Ma na tahut bia muat na balaraan wara tuntunur dadas hanahaan. Io kaik, ira numuat nilon na tahuat timaan harsakit. Muat na tur dadas huo waing muat naga patpatuan ma muat naga takodas harsakit, ma bia muat pa na supi ta linge wara murmur timaan God.
JAM 1:5 Iesen bia ta tikai ta muat i supi ra minminonas wara nilon mur no sinisip ta God, na sasaring tupas ie. Ma God na tar ie tana kanong i manga taguro taar wara hartabar huo ma pa na ngangare ie tano uno sinasaring.
JAM 1:6 Iesen bia na sasaring, bilai bia na nurnur ma pa na iruo ira uno lilik. No tunotuno nong i iruo ira uno lilik i haruat ma ira pakananoh tano tes ing a dadaip i hus gi lagures.
JAM 1:7 Iakano tunotuno huo pa na lik bia na hatur kawase tiga linge meram ho no Watong, kanong i harkatagah no uno lilik. Na sip bia na mur kanin ma na mur tiga mes balik.
JAM 1:9 Bia tiga hinsaka dahat ta Krais i hatur kawase ra kinkinis na maris, i tahut bia na tangarot kanong a tabi hinsana ra matmataan ta God.
JAM 1:10 Ma huo mah tikai i hatur kawase ra kinkinis na watong. I tahut bia na tangarot bia God na bul hasur no hinsana kanong na panim sukun no uno kinkinis na watong hoing ira puspus na huro.
JAM 1:11 No kasakes i la hanhanut ma ra tamat na mamahien ma i la rangrang bing ira huro. Ira puspusuno i la pukpuko laah ma i la hanghagahe no uno maririsuan. Io, hoing at mon mah tano tunotuno nong i hatur kawase ra kinkinis na watong. Ing bia i gilgil baak ira uno binalaan, na panim sukun no uno kinkinis na watong.
JAM 1:12 I daan no tunotuno nong i tur dadas ta ira harwalar kanong God na tabar ie ma no nilon bia i hanuat palai bia iakano tunotuno pai puko ta ira harwalar. Ma God ga kukubus taar ta diet ing diet sip ie bia na tabar diet ma iakano nilon.
JAM 1:13 Ma bia kaiken ra harwalar i haan tupas tikai, waak i tange bia, “God i walwalaam iau.” Taie. Pai tale bia tiga linge na walaam God bia naga gil ra sakena. Ma aie at pa na walaam ta tiga nong.
JAM 1:14 Iesen ira harwalaam na haan tupas tikai hoken: no uno sakana sinisip na lamus ie ma na hakalak ie wara gilgil ra sakena.
JAM 1:15 Ma bia no sakana sinisip i te tianan taar hoing ira hahin, na kaha hapuasne ra sakena. Ma bia no sakena i te tamat haruat na kaha hapuasne no minaat.
JAM 1:16 Bar hinsakagu ta Krais, iau marse muat. Waak muat bale leh iakan ra mangana linge kabi habato muat.
JAM 1:17 Ira bilai ma ira gamgamatien na hartabar bakut diet la hanansur meram ho God nong ga hakisi ira lulungo aram ra mawe. Ma God pai la kikios hoira ududuh ing bia a kasakes i hatalonai bia na hakumkuminei.
JAM 1:18 Ga sip bia na hatahuat dahat ma no hinhinawas utano tutun. Ma ga hatahuat dahat huo waing dahat na hanuat uno matanaiabar at. I nanaas bia dahat haruat ma ira luena hartabar tupas ie ta ira uno hakhakisi bakut.
JAM 1:19 Bar hinsakagu ta Krais, iau marse muat. Muat na lilik timaan ta iakan iau wara tangtangei. I tahut bia muat bakut, muat na manga taguro wara hinadoda. Iesen waak muat gasien wara nianga ma wara ngalngaluan kanong ira ngalngaluan ta ira tunotuno pai la hathatahuat ira takodasiana magingin God i sip bia dahat na gil.
JAM 1:21 Io kaik, muat na kap se ira bilingana magingin bakut tika ma ira mangana sakana gingilaan ta ira numuat nilon. Muat na bul hanapu muat ma muat na kap usurane no nianga di ga soi ta muat. Iakano nianga i tale bia na halon muat.
JAM 1:22 Waak muat hadade mon no nianga. Ing bia muat hadade kapis mon ie, muat habato habaling muat bia a mangana tunotuno sa muat. Iesen i tahut bia muat na gil haruatne no nianga.
JAM 1:23 Ing bia ta tiga nong na hadade mon no nianga ma sen pa na gil haruatnei, aie hoing tiga tunotuno nong i nes no matmataan tana ta tiga linge na tirtirewa.
JAM 1:24 Io, ma bia i te nes habaling tar ie, na haan laah. Ma kaik at mon na lik luban bia i la matmataan taar hohe.
JAM 1:25 Iesen no nianga ta God, aie hoing tiga linge na tirtirewa mah. Ma bia tikai i nanaas tana, i nes no harkurai nong i takodas harsakit. Ma iakano harkurai nong i la halangalanga ise dahat. Ma bia i nes haitnei, God na haidane iakano tunotuno ta ira linge i gil. Iesen waak i hadade mon no nianga ma na lik luban sei. Taie. God na haidane iakano tunotuno nong i gil haruatne no nianga ta God.
JAM 1:26 Bia tiga nong i lik bia i murmur God iesen pai balaure timaan no karamena, io, tutun sakit, pai mur at God. Taie. I habato habaling ie.
JAM 1:27 Bia dahat na mur God no adahat Sus, i sip bia dahat na mur ie hoken. I sip bia dahat na kol ira tintana ma ira makosa ta ira udiet tirtirih. Ma i sip bia dahat na haan talur ira magingin tano ula hanuo bia kaike ra magingin pa na habilinge dahat. Ma ing bia dahat mur God huo, God na nes kilam iakan ra tintalen bia i gamgamatien harsakit ma taie ta bilinge tana.
JAM 2:1 Bar hinsakagu, muat nurnur tano udahat dadas na Watong Jisas Krais ing i tamat no minarine. Io kaik, waak muat nes kilam ira mangana kinkinis ta ira tunotuno kaik muat naga mikiane tikai ma muat naga ru no mes.
JAM 2:2 Ing tikai i laka tano numuat kis hulungai ma i te sigasigam taar ma ra kiniasine ing a tabi matana ma i palai bia a watong ie, muat na gil hohe? Ma ing tiga maris balik na laka tano numuat kis hulungai ma i te sigasigam taar ma ra put na kiniasine, muat na gil hohe mah?
JAM 2:3 Na ngan hohe bia muat na manga lik no tunotuno nong i sigasigam taar ma ira bilai na kiniasine ma muat na tange tana bia, “Nu kis kai tano bilai na kinkinis.” Ma na ngan hohe mah ing bia muat na tange tano maris bia, “Tur katiga,” bia, “Kis mon napu tano bilingana subaan iau la bulbul ira kakigu kaia.”
JAM 2:4 Io, ing muat gil huo, tutun sakit muat te harpaleng nalamin ta muat. Muat te harkurai huo kanong i hanuat meram narako ta ira numuat sakana lilik ma ta ira numuat sakana sinisip.
JAM 2:5 Bar hinsakagu ta Krais ing iau la sipsip muat, muat hadade timaan. Tutun sakit bia God ga gilamis ira maris mekai tano ula hanuo bia diet na watong ta ira udiet nurnuruan. Ga gilamis diet bia diet na laka tano uno kinkinis na harkurai ma ra harbalaurai, haruat ma no uno kunubus taar ta diet ing diet sip God.
JAM 2:6 Iesen muat, muat te taklain ta ira maris. Ma gahim ta diet ing diet la hanghangungut muat? Ma sige ta diet ing diet la sarsarat muat bia muat na tur ra harkurai? Tutun sakit, diet mon ira watong.
JAM 2:7 Ma diet at diet la tangtange hagahe mah no bilai na hinsana iakano nong i tinane tar muat.
JAM 2:8 Iesen bia muat tartaram no suruno ta ira harkurai God i te bul tar ta diet ing i kure ma i balaure diet, muat te lon takodas. Ma iakano harkurai i tange hoken: “Nu marse tikai hoing u marse habaling at ugu.”
JAM 2:9 Iesen bia muat nes kilam ira mangana kinkinis ta ira tunotuno kaik muat naga mikiane tikai ma muat naga ru no mes, muat te gil ra sakena. Ira harkurai ta God diet kure ugu bia a ut na laklaka harkurai.
JAM 2:10 Ma i tale bia iau tange huo kanong bia sige tikai i la tartaram ira harkurai bakut ma sen bia i puko ta tikai, i nanaas bia i te puko ta diet bakut ira kaba harkurai.
JAM 2:11 Ma iakan i palai kanong nong ga tange bia, “Waak u noh tika ma tikai pai a num ie,” ga tange mah bia, “Waak u harubu bingibing bia.” Io, ing bia pau puko tano magingin na ninahon tika ma tikai pai no num iesen bia u te bu bing bia mon tikai, hohe? Augu tiga ut na laklaka harkurai um.
JAM 2:12 Ma no harkurai nong i halangalanga ise muat na kure muat. Io kaik, i tahut bia muat na balaure timaan ira numuat nianga ma ira numuat gingilaan.
JAM 2:13 Muat na balaure timaan huo kanong tano pakana bung bia God na gil no harkurai, pa na marse nong pa ga marse ira mes. Iesen ing bia tikai na tar ra harmarsai, no harkurai pa na karat ie.
JAM 2:14 Bar hinsakagu ta Krais, na harahut tun hohe bia tikai i tange bia i nurnur ta Krais ma taie ta bilai na magingin i hamines? Pa na harahut ie. Ma i tale bia iakano mangana nurnuruan na halon ie? Taie.
JAM 2:15 Ma hohe bia tiga tasim bia tiga hainim narako ta Krais na hanuat ma pai haruat ira uno sigasigam ma i supi nian mah?
JAM 2:16 Ma muat lik hohe bia tikai ta muat na tange mon tana bia, “Kom kaia, nu haan tatohun. Ma iau sip bia nu silihe ra sigasigam ma bia nu iaan timaan.” Ing bia na tange huo iesen pa na banot kaiken ra uno mangana sunupi, muat lik bia kaiken ra nianga mon na harahut ie? Taie.
JAM 2:17 Ma huo mah bia tikai na tange bia i nurnur ta Krais ma sen no uno nurnuruan pai kis tika ma ira bilai na magingin. Iakano mangana nurnuruan a minatine mon ie kanong aie sen mon kana.
JAM 2:18 Io, ma tikai na tange bia, “Tiga tunotuno i la mon nurnur. Tiga mes balik i la mon ira bilai na magingin.” Iesen bia ni tange, Kaia, nu walar wara hamhamines tagu no num nurnur ing bia pataie ta bilai na magingin tana. Pau tale. Iesen ira nugu bilai na magingin at na hamines hapalaine taam no nugu nurnur.
JAM 2:19 U nurnur bia tiga kapawena God mon. U lik bia iakano i manga tahut? Taie. Ira sakana tanuo diet nurnur taar huo mah. Iesen diet la dadedar ma ra bunurut.
JAM 2:20 A ba ugu! Iau ni hamines taam bia a linge bia mon no num nurnur ing bia pai kis tika ma ra bilai na magingin mah. Io, nu hadade baak.
JAM 2:21 Hohe tano hintubu dahat Abraham? God ga kure bia i takodas ra matmataan tana warah? Kanong Abraham ga bul Aisak no natine tano suuh na tuntun hartabar hoing tiga hartabar tupas God. Io kaik, God ga nes no uno bilai na magingin gaam kure bia i takodas.
JAM 2:22 Io, iau sip bia nu palai tano uno mangana nurnuruan. No uno nurnuruan ga haan tika ma ira uno bilai na magingin. Io kaik, no uno nurnuruan ga hanuat tutun kanong ga tika ma ira bilai na magingin.
JAM 2:23 Ma no nianga ta God di ga pakat ie ga tutun um ing ga tange hoken: “Abraham ga nurnur ta God ma God ga was leh no uno nurnuruan bia Abraham i takodas ra matmataan tana.” Ma di ga kilam ie bia no harwis ta God.
JAM 2:24 Io, i palai um, bia God na nes ira bilai na magingin ta tikai, kaik naga kure bia iakano tunotuno i takodas ra matmataan tana. Ma ing bia tikai na nurnur sen mon, God pa na kure bia iakano tunotuno i takodas.
JAM 2:25 Ma huo mah ta Rahap no hilawa. God ga nes ie ing bia ga bale leh ira munmunua na umri gar na Israel ma ga tule se diet taar tiga mes na ngaas. Io, God ga nes ira uno bilai na magingin kaik gaam kure bia i takodas.
JAM 2:26 Io kaik, i hoken ta ira palatamai dahat. A minatinei ing bia pai kis tika ma ira tanua dahat. Ma i haruat mah ira udahat nurnuruan. A minatinei ing bia pai kis tika ma ira bilai na magingin.
JAM 3:1 Bar hinsakagu ta Krais, i tutun bia ira matanaiabar na tur ra harkurai ta God. Iesen dahat nunure bia no uno harkurai na manga dadas ta dahat ira tena harausur. Io kaik, waak bia ta halengin ta muat na tena harausur.
JAM 3:2 Iau tange huo kanong dahat bakut dahat la pukpuko ta haleng na mangana magingin. Ma ing bia tikai pa na puko ta ira uno nianga, aie tiga ut na takodas harsakit. Ma na tale bia na balaure timaan mah no uno kidilona nilon bakut.
JAM 3:3 Dahat la bulbul ira pala riam ta ira ha diet ira hos bia diet na taram dahat. Kaik dahat gi tale bia dahat na gau leh no palatamaine bakut.
JAM 3:4 Ma i ngan huo ta ira tamat na mon mah. Diet manga tamat ma diet la hanahaan ma ira but na baiangin. Iesen tano muruno no mon tiga nat na wasa i la kis taar ing i tale bia tikai na gau leh ie haruat ma no uno sinisip.
JAM 3:5 Ma huo mah ta ira karame dahat. A nat na subaan mon ta ira palatamai dahat iesen i tale bia na latlaat ta ira tamat na linge ing no tunotuno i gil. Nes baak! Tiga nat na karamena iaah i tale bia na hasusung tiga but na pitoka.
JAM 3:6 Ma ira karame dahat i haruat ma ra iaah mah. Ma i hoing bia ira sakena tano ula hanuo bakut i papalim ma ira karame dahat. Aie no subaan ta ira palatamai dahat i la halamlam tar ira sakena tano palatamai dahat. Ma i la tuntun hagahe no kidilona tunotuno bakut hoing tiga iaah. Ma i hoing bia iakano iaah i hanuat meras ra ula iaah at ta Sataan.
JAM 3:7 Ma ira karame dahat i la hagawai huo kanong taie tikai i tale bia na balaure ie. Ira tunotuno diet tale bia diet na balaure leh ira rakaia ma ira mangana maan. Ma diet tale bia diet na balaure leh ira kaba kirip ma ira kaba linge diet la kaikaiau. Ma sen taie tikai pai tale bia na balaure timaan no karamena. I la tur taguro taar wara gilgil ira sakena. Ma i haruat ma ra sui i taguro taar wara gilgilale tikai ma no malmalena.
JAM 3:9 Ma iakan ra karame dahat, dahat la pirpirlat no Watong no adahat Sus mei, ma dahat la tangtange hagahe ira tunotuno mah mei. Ma kaike ra tunotuno ing God ga hakisi diet haruat tano uno tintalen.
JAM 3:10 Meram narako tano kapawena hana tiga tunotuno na haidane tikai ma na tange hagahe tikai. Bar hinsakagu ta Krais, kaike pai tale bia na ngan huo!
JAM 3:11 A malmalena taah ma ra ududuhuana na taah pai la salsal laah tiga puat sen mon.
JAM 3:12 Bar hinsakagu, tiga ina papus mah pai la huhuai ta hunena olip. Ma no hilhilora gerep pai la huhuai ta hunena papus. Ma no tes pai la tartar no ududuh na taah.
JAM 3:13 Hohe, ari nalamin ta muat diet ira ut na mintot? Ma diet palai mah tano tahut ma no sakena? Ing bia huo i tahut bia diet na hamines ira udiet mintot hoken: na bilai ira udiet nilon ma diet na gil ira bilai na magingin hoing tiga matien na tunotuno nong a mintatona tun ie.
JAM 3:14 Iesen ing bia muat lilik sakasaka taar ta ira mes ma muat nes kalak ira udiet mauho na lualua, waak muat lik hatamat habaling muat. Ing muat na gil huo muat harabota mon. Ma ira numuat nianga pa na haut leh ira linge God i kilam bia i tutun.
JAM 3:15 Ing bia muat gil huo, kaike ra numuat mangana mintot pai la hananuat meram naliu. Taie. I hanuat mekai napu tano ula hanuo. Pai hanuat meram ra Halhaliana Tanuo. Taie. I hanuat makaia ta ira sakana tanuo.
JAM 3:16 Tano subaan bia ira tunotuno diet lilik sakasaka taar ta ira mes ma diet nes kalak ira udiet mauho na lualua, a mon kinkinis harbasia ta diet ma ira matahu sakana magingin.
JAM 3:17 Iesen no luena linge tano mintot meram naliu bia i gamgamatien. Ma a malum i kis tana mah ma i la murmur ra matmatien na tintalen. I la be taguro taar wara hauhaut leh no tutun. I hung ma ra harmarsai ma i manga huai ma ra bilai na pinapalim. Pa na harababo ma pa na kis harpaleng.
JAM 3:18 No tunotuno nong i lon ma ra malum ma i la tartar ra malum nalamin ta ira matanaiabar na hatahuat ira magingin takodas kaia ta diet ira tunotuno.
JAM 4:1 Meh um kaiken ra mangana hinarubu ma ra harngangaar nalamin ta muat? I hanuat me narakoman ta ira numuat sinisip na kanakana bia mon. Ma kaiken ra mangana sinisip ing i la harharubu ma ira bilbilai narakoman ta ira numuat nilon.
JAM 4:2 Muat la sipsip tari a linge ma sen muat pai hatur kawase diet. Io kaik, muat la halhaliare ira mes na tunotuno. Muat la nesnes kalak ira linge gar na mes iesen pai tale bia muat na kap. Io kaik, muat la harngangaar ma muat la harharubu. Muat pai hatur kawase kanong muat pai saring God wara urie.
JAM 4:3 Ma ing muat la saasaring, muat pai hatur kawase kanong muat sasaring uta ira linge ing na hatahuat ira numuat gungunuama bia mon. Io kaik, God pa na bale tar ira linge muat saring kanong i ronga ira numuat lilik.
JAM 4:4 Muat pai tutun ta God. Muat hoing ra hilawa na hahin i noh tika ma tiga mes na tunaan. Hohe, muat pai nunure ing bia augu tiga harwis tano ula hanuo, u la malmalentakuane God? Tutun sakit, sige tikai i sip bia na harwis ma no ula hanuo, a suk ana God um ie.
JAM 4:5 Waak bia muat lik bia ira nianga ta God di ga pakat i ianga bia mon. Taie. I tange bia God ga hakisi dahat ma a mon tanua dahat. Kaik i manga sip bia dahat na mur sen mon ie.
JAM 4:6 Ma no harmarsai ta God tupas dahat i manga tamat ta ira udahat sakana sinisip. I hoing no nianga ta God di ga pakat ie i tange, “God i la suksukuane diet ing diet hatamat habaling diet. Ma i la tartar no uno harmarsai ta diet ing diet hanapu habaling diet.”
JAM 4:7 Io kaik, i tahut bia muat na hanapu tar muat ta God. Muat na sukuane Sataan ma na hilau talur muat.
JAM 4:8 Muat na haan hutet ta God ma God na haan hutet ta muat. Muat ira ut na sakena, i tahut bia muat na kap se ira sakena ta ira numuat nilon hoing tikai i taptapir se ira bilinge tano limana. Ma muat ing i harkatagah ira numuat lilik ma ira numuat sinisip, muat na hagamgamatien ira bala muat.
JAM 4:9 Ma i tahut bia muat na gil huo ma ra tapunuk ma ra tamat na sunuah. Waak muat kurus ma ra gungunuama. Na takodas bia muat na suah ma a maguruh na puko burung muat.
JAM 4:10 Muat na hansiksik muat ra matmataan tano Watong ma no Watong na hatamat muat.
JAM 4:11 Bar hinsakagu ta Krais, waak muat tange hagahe hargilasane muat. Sige tikai i tange hagahe no hinsakana ta Krais bia i kure hagahei, i hoing bia i tange hagahe ma i kure hagahe no harkurai ta God. Ma ing bia u kure hagahe no harkurai ta God i nanaas bia augu nong pau la tartaram iakano harkurai. U te bul hatamat ugu hoing tikai i tale bia na kure iakano harkurai ma na bul no uno lilik bia no harkurai i tahut bia i sakena.
JAM 4:12 God sen mon nong ga tar ra harkurai. Aie sen mon nong na kure ira tunotuno. Ma aie sen mon i petlaar wara harhalon ma wara halhaliarai. Iesen sige balik ugu nong u kure hagahe tiga mes na tunotuno?
JAM 4:13 Ari ta muat, muat la pingpingit bia, “Katin bia marakan dahat na haan ukaia ta kan ra pise na hala bia ta kan ra mes. Dahat na papalim kaia tiga tinahon wara pakila kinewa.” Io kaik, i tahut bia muat ing muat tange huo, muat na hadade timaan!
JAM 4:14 Muat tange huo iesen muat pai nunure bia ira numuat nilon na gil hohe marakan. Muat haruat ma ra buah. Na kis dahin mon ma na panim laah baling.
JAM 4:15 Waak muat tange huo. I tahut bia muat na tange hoken: “Ing bia no Watong i sip huo, dahat na lon ma dahat na gil kan bia kanin.”
JAM 4:16 Iesen muat balik, muat la hathatamat habaling muat ma muat la laatlaat ta ira linge muat na gil. Ira magingin na latlaat huo i sakena.
JAM 4:17 Io kaik, sige ta tikai i nunure tar ira bilai ma pai gil, i te gil ra sakena.
JAM 5:1 Muat ira watong, muat hadade timaan! Na tahut bia muat na manga suah utano tamat na tinirih, dahin um ma na haan tupas muat.
JAM 5:2 Ira numuat tamat na bunbulaan na marota ma ira ipas diet na ien hagahe ira kiniasi muat.
JAM 5:3 Ira numuat mangin na pilpilkuto. Ma kaike ra mangin i pilpilkuto na hinawas palai bia muat te gil ra sakena. Ma iakano hinhinawas na haliare muat hoing ra iaah i tun hadado tiga linge. A tutun bia no hauhawatine ta ira pakana bung i te hanuat um, iesen muat te bul hasisingen balik ira numuat but na bunbulaan!
JAM 5:4 Muat pai tar ira udiet harkul ing diet papalim ta ira numuat lalong. Ma diet kilam muat bia muat te gil kaiken ra sakena. Ma diet ing diet kap hulungan ira numuat matukena nian, diet sasaring marmaris tupas God. Ma no Watong, no Tamat na Umri, i te hadade diet ma na taram.
JAM 5:5 Ira numuat nilon kai ra ula hanuo i te hung ma ira bilai na linge harsakit. Ma muat te banot ira numuat nilon ma ira linge muat ga sip wara hakanakana habaling muat. Hoing tikai na tabar hatamat tiga bulumakau wara utano bung da bing ie, muat te tabar hatamat habaling muat wara utano tamat na bung na hiniruo.
JAM 5:6 Muat te kure hagahe ira takodasuana tunotuno. Muat te kure bing diet. Ma diet pai ngangare muat.
JAM 5:7 Bar hinsakagu ta Krais, bia kaiken ra tinirih na haan tupas muat, na tahut bia muat na bala patpat tuk taar tano bung na hinanuat tano Watong. Muat na lilik uta ira ut na sinaso. Tiga ut na sinaso i manga supi ira matukena nian tano uno lalong. Kaik i kis kawase bia na matuko. Na bala patpat taar tuk bia no pakana bung no bata i te pataam.
JAM 5:8 Na tahut bia muat mah, muat na bala patpat taar ma muat na balaraan, kanong i te hutet um bia no Watong na hanuat.
JAM 5:9 Bar hinsakagu, waak muat ngut harbasiane muat, muat kabi tur ra harkurai. Nes baak! No Ut na Bul Harkurai i te manga hutet um, hoing bia i tur taar ra matanangas ma i wara ninlaka.
JAM 5:10 Bar hinsakagu, muat na lik leh ira tangesot ing diet git harharpir kanong no Watong ga tule diet. Diet ga bala patpat ma diet ga tur dadas ta ira tinirih. Na tahut bia muat na mur ira udiet mangana tintalen huo.
JAM 5:11 Tutun sakit, diet ing diet ga tur dadas, da nes kilam diet bia diet daan. Muat te hadade no hinhinawas utane Iop bia ga tur dadas ta ira tirtirih. Ma muat palai tano hauhawatine tano pir bia no Watong ga harahut ie hohe. Muat palai bia no Watong i hung ma ra harmarsai.
JAM 5:12 Bar hinsakagu, tiga linge i manga tamat sakit ma i hoken: waak u hasasalim wara hatutun ira num nianga. Waak u hasasalim uram naliu bia ukai ra pise bia ta tiga mes na linge mah. Sen bia i tale bia nu haut mon bia nu harus. Ira harkurai ta God kabi karat ugu.
JAM 5:13 Ing bia tikai nalamin ta muat i kilingane ra tirtirih, i tahut bia na sasaring. Ing bia tikai i kanakana, i bilai bia na inge na pirharlat tupas God.
JAM 5:14 Ma ing bia tikai i manga maset, i tahut bia na tatau uta ira kabinsit na lotu waing diet naga sasaring wara gaiena. Ma ing diet saasaring diet na salaap ie ma ra wel ma no dadas tano hinsana no Watong.
JAM 5:15 Diet na sasaring ma ra nurnuruan. Ma kaiken ra mangana sinasaring na halon no ina minaset. No Watong na halangalanga ie, kaik naga tut sukun no uno suuh. Ma ing bia auno ta sakana magingin mah kana, God na lik luban se.
JAM 5:16 Huo kaik, i tahut bia muat na hapuasne hargilasane ira numuat sakana magingin. Ma na tahut bia muat na sasaring hargilaas uta muat bia muat na langalanga sukun ira numuat minaset. No pinapalim tano sinasaring ta tiga ut na takodas i manga dadas.
JAM 5:17 Elaija a tunotuno mon ie hoing dahat. Ga sasaring ma ra tutun bia pa na bata. Ma pataie ta bata ra itul a tinahon ma subana.
JAM 5:18 Tiga pakaan baling ga sasaring ma no bata ga puko suur meram ra mawe. Ma ira nian ga kubur baling tano pise.
JAM 5:19 Bar hinsakagu ta Krais, ing bia tikai nalamin ta muat i tamapas sukun no takodasuana ngaas tano uno nilon, ma tikai i lamus pukus ie, na tahut bia na lilik ta iakan: sige tikai i lamus pukus tiga ut na sakena sukun no uno sakana ngaas i halon ie sukun no minaat. Ma na tagure no ngaas huo bia God naga tale wara sungsuge se kaike ra haleng na magingin sakena.
1PE 1:1 Iau Pita tiga apostolo ta Jisas Krais, iau pakat iakan ra nianga ukaia ho muat ing muat lon harbasia hoing ira wasire kaia ta ira kaba hanuo Pontas ma Galesia ma Kapadosia ma Esia ma Bitinia. Iau pakat iakan ra nianga tupas muat ing God no adahat Sus gate gilamis muat haruat ma no uno lilik menalua. Ma God ga huna bul no uno lilik menalua wara nunure um muat. Ga gilamis muat ma no pinapalim tano Tanuo ing no Tanuo ga bul hasisingen muat bia muat naga halhaal. Ma ga gilamis muat waing muat na taram Jisas Krais ma bia Jisas na sapur hagamgamatien muat ma no dena. Iau sasaring bia muat na hung tun at ma ra harmarsai tika ma ra malum.
1PE 1:3 A pirhakasing uram tupas God. Aie no God ma no Sus ana no udahat Watong Jisas Krais. Ga manga marse dahat kaik gaam tar ra sigar nilon ta dahat bia dahat naga kis nanaho ma ra nurnuruan uta ira bilai na linge na tabar dahat me. Ma kaiken ra linge na kis hatikai. Ma ga tale bia na tar ra sigar nilon ta dahat kanong Jisas Krais ga taman tut hut sukun ra minaat.
1PE 1:4 God ga marse dahat huo bia dahat naga tinane kaiken ra bilai na linge wara udahat at. Kaiken ra linge pa na panim laah ma pa na marota ma pa na marmarukuan. Ma God i te hakabet timaan kaiken ra linge aram ra mawe wara gaie muat ing God i balbalaure bat muat bia muat pa na hiruo. Tano numuat nurnuruan, kaik gi balaure bat muat hokaiken waing muat naga kap nora harhalon. Ma iakan ra harhalon i taguro taar bia na hanuat palai tano hauhawatine ta ira pakana bung.
1PE 1:6 Io kaik, muat manga guama sukmaal bia kaiken ma namur ta dahin i nanaas bia ari a matahu harwalar i umubal muat.
1PE 1:7 Kaiken ra harwalar i haan tupas muat wara hamines bia ira numuat nurnuruan i tutun. Ma di la walwalar gol mah huo. Di la bul ie narako tano iaah wara hamhamines no bilbilai tana. Ma sen i tale bia gol na panim laah ma no matana no nurnuruan tutun i lua tano matana no gol. Hokaiken, ira walwalar na haan tupas muat bia ira numuat nurnuruan naga tur dadas. Io kaik, ing Jisas Krais na harapuasa na pirlat muat ma na hamar muat ma na hatamat muat.
1PE 1:8 Muat pai le nes ie iesen muat sip ie. Ma kaiken mah muat pai nes ie ma sen muat nurnur tana. Io kaik, muat manga hung ma ra bilai na gungunuama sakit ing pai tale bia da hapupuo.
1PE 1:9 Ma muat guama huo kanong muat hatur kawase no harhalon, aie no hunena no numuat nurnuruan.
1PE 1:10 Ma ira tangesot ing diet git iangianga utano harmarsai ing na haan tupas muat, diet git manga walwalar wara sisilih uta iakan ra harhalon at.
1PE 1:11 No Tanuo ta Krais narako ta diet git tangtange hamines ira linge uta Krais, gom huna hinawas bia Krais na kap nora harangunngutaan ma bia na kap ira uno minamar namur. Diet git walwalar bia diet na nunure iakan ra pakana bung ma bia kaiken ra linge na hanuat hohe.
1PE 1:12 God ga hapuasne ta diet bia diet pa ga iangianga na tangesot uta kaike wara gaie diet at. Taie. Diet ga tangtange kaike wara gaie muat. Ma diet ing diet ga pir muat ma no tahut na hinhinawas narako tano dadas tano Halhaliana Tanuo God ga tulei meram ra mawe, diet ga hinawase muat uta kaiken ra linge at. Ma kaiken ra linge ira linge ing ira angelo diet sip bia diet na nunure.
1PE 1:13 Io kaik, muat na kure ira numuat lilik bia muat na taguro wara nilon timaan. Na tahut bia palai ira numuat lilik. Waak muat nanaho ta ira linge bia. Muat na nanaho sen mon ma ra nurnuruan tano harmarsai nong Jisas Krais na kap hawaat taar ta muat ing na hanuat puasa.
1PE 1:14 Nalua muat ira tabuna palpalai muat gaam git murmur ira numuat sakana sinisip. Ma sen kaiken muat ira bulu na ut na taram nianga, kaik waak muat bale leh kaike ra tuarena sinisip bia na kure muat huo.
1PE 1:15 God nong ga tatau muat i halhaal. Io, i tahut bia ta ira numuat magingin, muat at mah, muat na halhaal sukun ira sakena haruat mei.
1PE 1:16 Kanong warah, no nianga ta God di ga pakat ie i tange hoken: “I tahut bia muat na halhaal sukun ira sakena kanong a halhaliana iau.”
1PE 1:17 Ma bia muat sasaring tupas God, muat kilam ie bia Mama. Aie nong i kure ira matanaiabar. Ma no uno harkurai i takodas. Pa na kure hagahe tikai ma harahut bia tiga mes. Taie. Na kure ira tunotuno haruat ma ira udiet magingin. Io kaik, i tahut bia muat na lon ma ra but na urur tupas ie ing muat kis na wasire baak ta iakan ra ula hanuo kanong muat nunure no kunkulaan ing God ga tar wara kul halangalanga muat sukun ira numuat mangana nilon menalua. Iakano nilon ing muat ga kap harausur laah ta ira hintubu muat ma pa ga tale bia na harahut muat ta dahin. Ma God pa ga kul halangalanga muat ma ra linge hoing ra gol ma ra siliwa ing i tale bia na panim laah. Taie.
1PE 1:19 No kunkulaan ga tabi matana. Aie no de Krais. Aie hoing tiga nat na sipsip na hartabar, pataie ta da sakena tana, i melmel harsakit.
1PE 1:20 Menalua tano hakhakisi tano ula hanuo God ga bul no uno lilik bia na gilamis ie. Iesen ta kaiken ira hauhawatina pakana bung i te hanuat puasa wara gaie muat.
1PE 1:21 Ma muat, muat ira ut na nurnuruan ta God kanong muat haan tupas ie narako ta Krais. Ma God, aie nong ga hatut haut Krais sukun ra minaat ma ga tar ra minamar tana. Io kaik, ira numuat nurnuruan i kis ta God ma ira bilai na linge muat nanaho ma ra nurnuruan i hanuat meram ho God.
1PE 1:22 Io, muat te taram ira tutun God i te hapuasne, kaik muat te hagamgamatien ira numuat lon wara tartar ra harmarsai tutun ta ira hinsaka muat gar ta Krais. Muat te gil um huo, kaik i tahut bia muat na tar tun at ra harmarsai harbasia ta muat meram narako ta ira kati muat.
1PE 1:23 Kanong warah, muat te kap ra sigar nilon. Muat pai kap no sigar nilon tano pat na daha ing na marota. Taie. Muat te kap ie ta nong pa na marota. Ma aie no nianga gar ta God, a lilonai ma pa na panim laah.
1PE 1:24 Ma i palai bia iakan i tutun kanong, “Ira tunotuno diet haruat ma ra huro, ma ira minarine no tunotuno i haruat ma no puspusuno no huro. No huro na mahiawa, ma no puspusuno na puko laah.
1PE 1:25 Iesen no nianga gar tano Watong na kis hatikai.” Ma iakan ra nianga, aie nong di ga harpir taar ta muat mei.
1PE 2:1 Io kaik, i tahut bia muat na kap se ira mangana magingin na harangunngutaan tika ma ira kaba hinarabota bakut. Kap se mah no harababo, ira lilik sakasaka, ma ira matahu nianga na haragahai.
1PE 2:2 Hoing ira sigar bulu diet manga sip ira polona sus, i tahut bia muat mah muat na sip no nianga ta God waing muat naga patpatuan narako ta ira numuat nilon God te halon muat me.
1PE 2:3 Ma i tahut bia muat na gil huo kanong muat te nam um bia no Watong i tahut.
1PE 2:4 Ma bia muat haan tupas no Watong, muat haan tupas ie hoing bia aie tiga lilona haat. Ira tunotuno diet ga malok sei iesen God ga nes kilam ie bia a tabi matana gaam gilamis ie.
1PE 2:5 Ma bia muat haan tupas ie huo, muat hoing ira lilona haat mah. Ma God i la paapalim ma muat wara pakpakile tiga hala ma ira tanua muat waing muat naga papalim hoing ira halhaliana ut na lamus tunotuno tupas God. Muat la tartar ra hartabar tupas ie meram narako ta ira tanua muat. Ma God i bale leh kaiken ra hartabar kanong muat narako ta Jisas Krais.
1PE 2:6 Ma i palai bia iakan i tutun kanong no nianga ta God di ga pakat ie i tange hoken, “Nes baak! Iau te gilamis leh tiga haat ing a tabi matana. Ma iau hainoh ie kaia Saion ma aie no dadas na burena tano hala. Sige tikai i nurnur tana pa na kis ta ra hirhir.”
1PE 2:7 Iakan ra haat na manga harahut muat ing muat nurnur. Iesen uta diet ing diet pai nurnur, i tange hoken, “No haat nong ira ut na pakila hala diet ga malok sei kanong diet ga lik bia a linge bia ie, i nanaas taar bia aie balik um no bilai na burena tano hala bakut.”
1PE 2:8 Ma i tange mah bia, “Iakan ra haat ing i noh taar, ira tunotuno diet tuke diet tana. Diet kap tuhar diet tana.” Diet tuke diet kanong diet taklain tano nianga gar ta God. Ma God ga tibe bia na ngan huo ta diet.
1PE 2:9 Iesen muat tiga huntunaan nong God i te gilamis. Muat ira ut na lamus tunotuno tupas God no udahat Lualua. Muat ira halhaliana matanaiabar ing God i te bul hasisingen wara uno at waing muat naga hinawas palai ta ira kaba bilai na gingilaan ta nong ga tatau muat sukun ra kankado ukaia taar tano uno bilai na madaraas sakit.
1PE 2:10 Nalua muat pa ga matanaiabar gar ta God. Iesen kaiken muat ira uno matanaiabar um. Nalua muat pa ga kis ta ra harmarsai. Iesen kaiken um muat te kis tano uno harmarsai.
1PE 2:11 Io, iau haragat muat, ira nugu bilai na harwis ing muat kis na wasire kai, bia muat na tur sisingen laah ta ira sakana sinisip ing diet la harharubu ma muat narako ta ira numuat nilon.
1PE 2:12 Ma i tutun bia ira tabuna nurnuruan diet la tungtung muat bia muat gil ira sakana magingin. Iesen i tahut bia muat na gil ira bilai na magingin nalamin ta diet waing diet naga nes ira numuat bilai na tintalen ma diet naga pirhakasing God tano uno bung na hinanuat.
1PE 2:13 I tahut bia muat na hansiksik muat ta ira lualua bakut kai napu kanong no Watong i sip bia muat na lon huo. Muat na hansiksik muat tano tamat na lualua na gil harkurai kai napu nong i tamat ta ira mes na lualua.
1PE 2:14 Ma ta diet ira mes na lualua ing diet hansik dahin tano tamat ing i tar harkurai ta diet wara haphapidanau ing diet gil ronga ma wara pirpirlat diet ing diet gil ra tahut, io, muat na hansiksik habaling muat ta diet mah.
1PE 2:15 Muat na gil huo kanong God i sip bia muat na pakile ra bilai na magingin, kaik muat naga tur bat ira nianga bia ta ira sakbatbat.
1PE 2:16 I tahut bia muat na lon hoing ira tunotuno ing diet langalanga sukun ira harkurai. Iesen waak muat tange bia muat langalanga huo, kaik a linge bia mon bia muat gil ra sakena. Taie. Muat na lon hoing ira tultulai ra hena no harkurai ta God.
1PE 2:17 Muat na ru ira tunotuno bakut. Muat na tar ra harmarsai ta ira hinsaka muat ta Krais. Muat na manga urur ta God. Ma muat na ru nong i kap no kinkinis na tamat na lualua na gil harkurai kai napu.
1PE 2:18 Io, muat ira tultulai i tahut bia muat na hansiksik muat ta ira numuat watong ma ra tamat na urur. Waak bia muat gil huo ta diet sen mon ing diet tar ra harmarsai ma diet tahut ma muat. Muat na gil mah huo ta ing diet hagahe muat.
1PE 2:19 Ing bia tikai pai gil tiga nironga ma sen i kanan bia na pusak ra harangungut kanong i palai bia no sinisip ta God huo, io, iakano mangana tintalen i haguama God.
1PE 2:20 Bia ing di dangat tikai kanong i te gil ra sakena, muat lik bia da pirlat ie? Taie. Iesen bia ing di hangungut tikai wara uno bilai na magingin ma i kanan bia na pusak iakano tirtirih, io, iakano tintalen i haguama God.
1PE 2:21 God ga tatau muat bia muat na lon huo. Kanong warah? Krais ga kilingane ra harangungut wara gaie muat ma ga hamines no uno nilon hoing tiga malalar ta muat waing muat naga paas mur ira tanuana kakena.
1PE 2:22 Pa ga gil tiga nironga ma pa di ga hadade tiga harabota tano hana.
1PE 2:23 Bia diet ga tangtange hagahei, aie balik pa ga tange hagahe diet. Bia ga pusak ra harangungut pa ga mang diet bia na hagahe diet. Taie. Ga bul tar ira linge bakut tano limane God nong i la gilgil ira takodasiana harkurai.
1PE 2:24 Aie at ga pusak ira udahat magingin sakena ma no palatamaine uram tano ula kabai waing dahat naga haan talur ira sakena ma dahat na lon ma ra magingin takodas. Ma dahat langalanga ta ira uno unien.
1PE 2:25 Muat git hanahaan ronga hoira sipsip. Iesen kaiken muat te galis tupas nong i nes mur ira tanua muat hoing tiga ut na balaura sipsip.
1PE 3:1 Ma huo mah muat ira hahin. I tahut bia muat na hansiksik muat ta ira numuat tunaan. Ma ing bia ari ta diet, diet pai nurnur tano nianga gar ta God, no numuat tintalen huo na lamus tar diet bia diet na nurnur. Ing bia muat gil huo muat pa na supi bia muat na tange tiga linge ta diet.
1PE 3:2 Taie. Diet na nes ira numuat gamgamatien na nilon ma ira numuat urur ta diet.
1PE 3:3 Ma waak muat hamar ira palatamai muat mon hoing muat gil ta ira hi muat ma ira minamar na gol ma ira bilai na maal.
1PE 3:4 Iesen i tahut bia muat na hamar muat uram narako ta ira bala muat at. Muat na hanapu muat ma muat na matien na hahin, kaik muat na melmel tutun ma kaiken ra mangana melmel na tintalen pa na panim laah. Ira tintalen huo God i nes kilam bia a tabi matana.
1PE 3:5 Ira bilai na hahin menalua ing diet ga nurnur ta God, diet git hamhamar mah diet huo. Diet ga hansiksik diet ta ira udiet tunaan.
1PE 3:6 Sara mah huo. Ga taram Abraham gaam kilam ie bia no uno watong. Ma muat ira nat na hahine Sara ing bia muat gil ira tahut ma bia muat pa na burte tiga linge.
1PE 3:7 Ma huo mah muat ira tunaan. I tahut bia muat na lon timaan tika ma ira numuat hahin ma ra palai na lilik bia ira udiet baso pai haruat ma muat kanong a hahin diet. Muat na urur ta diet kanong God i te marse diet hoing muat ma diet na tinane mah no nilon haruat ma muat. Muat na gil huo waing pataie ta linge pa na tur bat ira numuat sinasaring.
1PE 3:8 Io, wara hapataam ira nugu nianga, iau tange bia muat bakut muat na lon ma tiga mangana lilik sen mon. Ma bia tikai na kilingane tiga linge i bilai, bia muat ira mes, muat na kilingane harahut ie. Muat na marse hargilasane muat hoing ira harahinsakaan gar ta Krais. Muat na gil ra tahut na harharahut ma muat na matien na tunotuno harbasia ta muat.
1PE 3:9 Waak muat balbalu ra sakena ma ra sakena baling. Ma waak muat tange hagahe diet ing diet tange hagahe muat. Iesen i tahut bia muat na balu pukus diet ma ra haridaan kanong ing God ga tatau muat ga kukubus taar ta muat bia na tar ra haridaan ta muat.
1PE 3:10 Muat na gil huo kanong no nianga ta God di ga pakat ie i tange hoken, “Sige tikai i sip bia na guama ma no uno nilon, ma i sip bia na nes ira tahut na bung, io, i tahut bia na banus bat no hana wara iangianga ma ira sakena ma wara tangtange ira harabota.
1PE 3:11 I tahut bia na tahurus talur ira sakena ma na gil sen mon ira bilai. Na walar bia na lon ma ra malum ma na manga baso bia na kis taar huo.
1PE 3:12 Kanong warah, no Watong i la nesnes mur ira ut na takodas ma i la hanhadoda taar ta ira udiet sinasaring. Iesen no Watong i la tur talur tar diet ing diet gil ra sakena.”
1PE 3:13 Io, ma sige um na hagahe muat ing bia muat walar ma ra baso wara gilgil ra tahut?
1PE 3:14 Iesen bia muat kilingane balik ra harangungut ta ira numuat magingin takodas, io, muat daan. Waak muat burte diet ing diet wara haburut muat. Ma waak muat ngarngarau.
1PE 3:15 Iesen muat na bul hatamat Krais aram narako ta ira kati muat bia aie no numuat Watong. Muat na kis na tinaguro ta ira bungbung bakut wara binabalu ta diet ing diet saring muat wara hinhinawas palai tano numuat nanahai ma ra nurnuruan tupas God.
1PE 3:16 Iesen muat na babalu ma ra urur hoing ira matien na tunotuno. Muat na gil ira linge sen mon muat nunure bia i bilai. Muat na lon huo waing diet na hirhir ing diet tange hagahe muat ta ira numuat bilai na magingin muat gil wara murmur Krais.
1PE 3:17 I tahut bia muat na gil hokaiken kanong ing bia God i sip bia muat na kilingane ra harangungut i tahut bia muat na kilingane ira harangungut ta ira numuat bilai na magingin. Ma sen pai tahut bia muat na kilingane ra harangungut uta ira sakena muat te gil.
1PE 3:18 Kanong warah, Krais no ut na takodas ga maat uta diet ing diet pai takodas. Ga maat tiga kapawena pakaan mon uta ira magingin sakena wara lamlamus muat tupas God. Ing di ga bu bing ie, a tunotunoi. Ing ga lon balin, a tanuoi.
1PE 3:19 Ma huo kaik ga haan ma ga harpir taar ta ira tanuo ing diet kis narako tano katon wara harpidanau.
1PE 3:20 Ma kaike ra tanuo, diet ing diet pa ga taram God ing God ga nanaho ta diet ma ra bala maat ta kaike ra bung ing Noa ga gilgil no uno tamat na mon. A bar nong mon ira tunotuno diet ga lon tano mon. A liman ma itul mon diet. Ma diet ga kap no harhalon kaia tano taah.
1PE 3:21 Ma iakano taah a malalar ie tano magingin na baptais nong i halon muat kaiken. Pai gis ise ira bilinge ta ira palatamai muat. Taie. Aie no numuat hinhinawas palai tupas God meram narako ta ira numuat palai na lilik ing pataie ta harabota ine. Ma no tuntunut hut ta Jisas Krais nong i hadadas no magingin na baptais wara halon muat.
1PE 3:22 Ma Krais aie nong i te hanut uram ra mawe ma i kis taar tano tamat na kinkinis tano kata na lima God. Ma ira angelo ma ira mangana ut na harkurai ma ira lualua diet kis ra hena no uno dadas.
1PE 4:1 Krais ga kilingane ra harangungut tano palatamaine. Io kaik, i bilai bia muat mah muat na tagure muat ma iakano mangana lilik ta Krais, kanong aie nong i te kilingane ra harangungut tano palatamaine i te haan talur no sinisip wara gilgil no magingin sakena.
1PE 4:2 Tiga tunotuno huo pa na mur ira sinisip ta ira tunotuno mon ing i lalon baak kai napu. Taie. Na lon mur ira sinisip ta God.
1PE 4:3 I tahut bia muat na lon huo kanong i te talona um ira numuat pakana bung ing muat ga murmur ira sinisip ta ira tabuna nurnuruan. Pai tahut bia muat na gil habaling huo. Muat git murmur ra magingin na hilawa ma ira mangana sakana sinisip. Muat git manga mamom, muat git murmur ira sakana kis hulungai wara minom ma muat git harharat haan huo. Ma muat git gilgil no miligiruana lotu tupas ira palimpuo.
1PE 4:4 Ma kaiken um ira tabuna nurnuruan diet te karup bia muat pai tur tika ma diet ta kaiken ra udiet rakaia na magingin. Io kaik, diet tange hagahe muat.
1PE 4:5 Iesen diet na tur ra harkurai ra matmataan tano ut na gil harkurai nong na kure ira lilona ma ira minaat. Ma na hagut diet bia diet na walar wara binabalu uta ira udiet mangana gingilaan.
1PE 4:6 Io, ma no burena bia diet ing diet te maat diet gate hadade no hinarpir tano tahut na hinhinawas i hokaiken. I tutun bia diet ga maat haruat ma no harkurai kanong diet lon kai tano palatamai diet. Iesen diet ga hadade no tahut na hinhinawas waing diet naga lon ta ira tanua diet hoing God i lon.
1PE 4:7 Io, no hauhawatine ta ira linge bakut i hutet um, kaik i tahut bia na palai ira numuat lilik ma bia muat na balaure timaan muat waing muat naga sasaring.
1PE 4:8 Muat na manga harmarsai hargilaas ma ra tutun kanong ing bia u marse tikai pa nu manga lilik ta ira sakena i gil.
1PE 4:9 Muat na bale halaka ira mes ta ira numuat hala, muat naga balaure diet, ma muat pa na ngurungur bia muat gil huo.
1PE 4:10 Muat na papalim ma ira numuat hartabar ing muat tikatikai muat te kap, wara harharahut harbasiane muat. Ma muat na papalim timaan ma kaiken ra hartabar na harmarsai ing God i tar.
1PE 4:11 Ing bia tikai i hatur kawase ra hartabar wara nianga, i tahut bia na ianga hoing bia God at i iangianga. Ing bia tikai i hatur kawase ra hartabar wara harharahut, i tahut bia na harahut ma ira uno baso ing God i tabar ie mei. Muat na papalim huo waing daga pirhakasing God ta ira linge bakut meram narako no udahat kinkinis ta Jisas Krais. Aie nong i hatur kawase no minamar ma no dadas hathatika. A tutun.
1PE 4:12 Io, ira nugu bilai na harwis, waak muat karup ta ira dadas na harangungut i walar muat. Pai tiga sigar na mangana linge i te haan tupas muat.
1PE 4:13 Iesen i tahut bia muat na guama bia muat te laka ta ira harangungut ta Krais waing muat naga manga kanakana ing no uno minamar na harapuasa.
1PE 4:14 Ing bia di tanga hagahe muat kanong muat tano hinsa Krais, io, muat daan, kanong no Tanuo ta God ma no uno minamar i kis burung muat.
1PE 4:15 Ing bia di hangungut muat, pa na tahut bia no burena bia muat te harubu bingibing ma bia muat te kikinau. Ma pa na tahut mah bia muat te lake ira harkurai ma bia muat hamalaslaas ira nilon ta ira mes.
1PE 4:16 Iesen ing bia di hangungut muat kanong a Kristian muat, waak muat hirhir. Taie. Muat na pirlat God bia muat te kap no hinsa Krais.
1PE 4:17 Kanong warah, no pakana bung i te hanuat um bia no huntunaan ta God na tur ra harkurai. Ma ing bia i luena haan tupas dahat huo, muat lik bia na ngan hohe ta diet ing diet pai taram no tahut na hinhinawas ta God?
1PE 4:18 Hoing no nianga ta God di ga pakat ie i tange, “Ing bia i dadas ta ira ut na takodas bia diet na kap no harhalon, na ngan hohe ta ira ut na sakena ing diet tur talur God?”
1PE 4:19 Io kaik, diet ing diet kap ra harangungut haruat ma ira sinisip ta God, i tahut bia diet na gilgil at ira bilai na magingin ma bia diet na tar habaling diet tano limana nong ga hakisi diet ma i la balbalaure timaan diet.
1PE 5:1 Muat ira kabinsit na lotu, iau mah tiga kabinsit hoing muat. Iau ga nes ira harangungut ta Krais ma iau nong iau hinhinawas ine. Iau nong ni hatur kawase mah no minamar ing na harapuasa. Io kaik, iau saring muat bia muat na balaure ira matanaiabar gar ta God nalamin ta muat hoing ira ut na balaura sipsip diet la balbalaure ira udiet sipsip. I tahut bia muat na kanan wara balbalaure diet hoing God i sip bia muat na gil huo. Waak muat balaure diet hoing bia tikai mon i hagut muat. Waak muat gil iakan ra pinapalim wara gaiena kinewa mon. Iesen muat na gil ie kanong muat manga sip bia muat na papalim huo.
1PE 5:3 Waak muat lik hatamat muat wara kurkure hadadas ira matanaiabar ing God i te tar ta muat bia muat na balaure diet. Iesen bia ira numuat tintalen na haruat ma ra tahut na malalar bia diet na mur, hoing ira sipsip diet la gilgil huo.
1PE 5:4 Ma bia no Tamat na Ut na Balaura Sipsip i harapuasa, muat na hatur kawase nora minamar, hoing ra bilai na balaparik ing pa na panim laah ira minarine.
1PE 5:5 Ma huo mah ta muat ira marawaan. Muat na hansiksik tar muat ta ira numuat kabinsit na lotu. Ma muat bakut, muat na matien na tunotuno harbasia ta muat kanong no nianga ta God di ga pakat ie i tange bia, “God i malok se diet ira ut na latlaat, ma i tar no uno harmarsai ta ira matien na tunotuno.”
1PE 5:6 Io, muat na hansiksik tar um muat ra hena no dadas na limane God waing naga hatamat muat tano pakana bung haruat ma no uno sinisip.
1PE 5:7 Muat na tar se ira numuat nginarau na bunurut tana kanong i manga lilik uta muat ma i balaure muat.
1PE 5:8 Na palai ira numuat lilik ma muat na balaure timaan muat! No amuat suk Sataan i wawawar haan hoing tiga laion i sisilih ta tikai bia na kanam kudule.
1PE 5:9 Iesen muat na tur dadas ta ira numuat nurnuruan ma muat na tur bat ie kanong muat nunure bia ira hinsaka muat tano hinsa Krais kai ra ula hanuo diet puspusak kaiken ra mangana harangungut mah.
1PE 5:10 Iesen no harangungut pa na ubal halawaas baak muat, ma namur God no burena ta ira harmarsai bakut nong ga tatau muat bia muat na laka tano uno minamar hathatika narako ta Krais, io, na hanunuhuan muat ma na hadadas muat bia muat na manga dikdikit.
1PE 5:11 Aie nong i hatur kawase ira dadas hathatika. A tutun.
1PE 5:12 Iau pakat iakan ra da pakpakat ma no harharahut ta Sailas no tasi dahat. A tutun na tunotunoi. Iau wara haragat muat ma iau wara hinhinawas palai bia iakan no tutun na harmarsai ta God. Muat na tur dadas tana.
1PE 5:13 Ira matanaiabar na lotu kai Babilon ing God i te gilamis diet tika ma muat, diet haatne muat. Huo mah no nugu bulu Mak.
1PE 5:14 Muat na haatne hargilasane muat ma ra tamat na harmarsai. A malum ta muat bakut ing muat kis taar ta Krais.
2PE 1:1 Iau Saimon Pita tiga apostolo ma tiga ut na tinaram tano pinapalim Jisas Krais i tar tagu, iau pakat kan ra nianga tupas muat ing no numuat nurnuruan i haruat ma no numehet. Ma i haruat huo kanong no udahat ut na Harhalon Jisas Krais, no udahat God, i takodas.
2PE 1:2 Io, iau sasaring bia a tamat na harmarsai ma ra malum na kis um ta muat kanong muat nunure tar God ma Jisas no udahat Watong.
2PE 1:3 Ma i tale bia ni sasaring huo kanong i te tabar dahat ma ira kaba haridaan dahat supi wara nilon ma wara murmur timaan ie. I te tabar dahat huo ma iakano mangana dadas ing aie sen mon i hatur kawasei. Kanong warah, dahat nunure tar ie nong ga tatau dahat. Ma aie i manga tamat ma i bilai harsakit, kaik gaam tatau dahat.
2PE 1:4 Ma a mangana God ie huo, kaik gaam tabar dahat ma ra tamat ma ra bilai na haridaan ing gate kukubus taar ta dahat waing muat naga kis tika ma God ma muat na kap ira uno mangana tintalen ma muat na hilau sukun ira magingin tano ula hanuo i mapus, a mangana magingin i hanuat meram narako ta ira sakana sinisip ta ira tunotuno.
2PE 1:5 Io kaik, i tahut bia muat na manga ngarngarau bia muat naga bul tikane ira bilai na magingin ma no numuat nurnuruan. Ma waak bia muat na gil ira bilai na magingin sen mon. Muat na nunure mah ira linge tutun.
2PE 1:6 Ma pai tahut sen mon bia muat na nunure ira linge tutun. Muat na balaure timaan mah ira numuat sinisip. Ma tano numuat harbalaurai ta ira numuat sinisip, i tahut bia muat na bul tikanei ma no magingin na tuntunur dadas ta ira harwalar. Ma tano numuat tuntunur dadas, muat na halaka leh mah no mangana magingin wara murmur timaan God.
2PE 1:7 Ma tano numuat magingin na murmur God, muat na kap halaka leh mah no magingin na haratasin tun wara tartar hargilasane ra bilbilai ta muat. Ma tano magingin na haratasin tun, i tahut bia muat na bul tikanei ma no harmarsai.
2PE 1:8 Ing bia kaiken ra mangana magingin i tahtahuat hanahaan ta ira numuat lon, i hamines bia muat nunure no udahat Watong Jisas Krais, ma ira numuat lon na huai ma na hanuat timaan kanong muat nunure ie.
2PE 1:9 Iesen ing bia kaiken ra mangana magingin pai kis tano nilon ta tikai, aie hoing tiga pulo ma pai nanaas timaan. I te lik luban se bia Krais gate gis ise ira uno magingin sakena menalua.
2PE 1:10 Io kaik, ira hinsakagu ta Krais, i tahut bia muat na manga ngarngarau bia muat na hapuasne habaling ta muat bia i tutun bia God gate tatau ma gilamis leh muat. Ing bia muat na mur kaiken ra magingin muat pa nale hiruo ma God na manga guama leh muat wara sinola tano kinkinis na harkurai ma ra harbalaurai nong pa nale pataam, iakano kinkinis gar tano udahat Watong Jisas Krais, no udahat ut na Harhalon.
2PE 1:12 Io kaik, iau sip bia ni halilik haitne muat ta kaiken ra linge. I tutun bia muat nunure tar kaiken ma muat te tur timaan narako tano hinhinawas tutun nong muat hatur kawasei. Iesen iau ni halhalilik at muat.
2PE 1:13 Ing iau kis taar at baak ma no palatamaigu iau lik bia i takodas bia ni hatatik ira numuat lilik wara liklik leh kaiken ra linge kanong iau nunure bia i te hutet um bia iau ni waak se no palatamaigu tano minaat hoing no udahat Watong Jisas Krais i te hapalaine tar tagu huo.
2PE 1:15 Ma iau ni manga tar ira nugu dadas wara nesnes bia namur tano nugu hinaan talur muat, muat na tale bia muat na lik haitne leh kaiken ra linge.
2PE 1:16 Ing het ga hinawase muat tano dadas na hinanuat baling tano udahat Watong Jisas Krais, het pa ga mur ira pir ing ira tunotuno mon diet ga huo ma ira udiet keskes na lilik. Taie. Het ga nes no minarine ma ira mata mehet.
2PE 1:17 Masa! God no ana Sus ga hatamat ie ma ga bul haut no hinsana ta iakano pakana bung God no Tamat na Dadasine ga ianga suur gom tange, “No Natigu iakan nong iau manga sip ie, ma iau kanakana sakit tana.”
2PE 1:18 Metal at metal ga hadade no ingana suur meram ra mawe ing metal ga kis tika mei aram tano halhaliana uladih.
2PE 1:19 Ma i tale bia dahat na manga so no udahat nurnur mah ta ira nianga ta ira tangesot. I tahut bia muat na taram timaan ira udiet nianga. Ira udiet nianga i haruat ma tiga lulungo i murarang tano kankado na subaan. Muat na taram ira nianga huo tuk taar bia no laar i daras ie ma bia no tiding na laar i pupuruk huat narako ta ira numuat lon.
2PE 1:20 Iau manga sip bia muat na palai ta ira kaba nianga na tangesot ing i kis ta ira nianga gar ta God di ga pakat ie. Kaike ra tangesot diet pa ga palas ira kukuraina meram narako ta ira udiet lilik at.
2PE 1:21 Taie. Tiga nianga na tangesot pa gale hanuat bia laah mon ta ira lilik gar na tunotuno. Iesen ira tunotuno diet ga iangianga laah meram ho God ing no Halhaliana Tanuo at git gaugau leh ira udiet lilik.
2PE 2:1 Iesen a mon mah ira tangesot harabota nalamin ta ira matanaiabar menalua hoing ira tena harausur bisbis diet na hanuat nalamin ta muat. Diet na bul halaka kumkumaan ira harausur harabota na halhaliarai. Ma diet pa na gil iakano sen mon. Diet na harus ise mah no Tamat na Watong nong ga kul halangalanga diet. Kaik, diet pit leh no ngaas bia diet na hiruo tana.
2PE 2:2 Ma ra halengin diet na mur ira udiet magingin na hilawa ma ira udiet mes na sakana tintalen mah. Ma ira tena harausur bisbis, diet no burena bia ari diet na tange hagahe no Ngaas tutun.
2PE 2:3 Diet kalak kinewa, kaik diet naga gil hagahe muat ma ira udiet kaba pir bisbis. No udiet harpidanau i taguro taar ma Nong na haliare diet pai kubaba.
2PE 2:4 God pa ga hok leh ira angelo ing diet ga gil ra sakena. Taie. Ga tule se diet ukaia ra subaan na harpidanau, gaam bul diet ta ira lulur na kankado tuk taar bia diet na tur ra harkurai.
2PE 2:5 Ma pa ga hok mah ira matanaiabar menalua sakit. Iesen ga halon Noa nong ga harpir ta ira magingin takodas. Ga halon ie tika ma ira liman ma iruo na mes ta iakano pakana bung ing ga hatahuat no taahit taar ta ira matanaiabar tano ula hanuo ing diet ga tur talur ie.
2PE 2:6 Ma ga kure hagahe ira iruo tamat na pise na hala, Sodom ma Gomora. Ga tun hadadokus se dir, kaik gaam hakatom ira matanaiabar huo ing diet tur talur ie.
2PE 2:7 Ma ga halangalanga ise ne Lot, no ut na takodas, ing ira ut na taklain diet ga hatirih no uno nilon ma ira udiet bilingana magingin.
2PE 2:8 Iakano ut na takodas ga lon nalamin ta diet, ma ira kaba harharbung bakut ga nes ma ga hadade ira udiet taklain na magingin, kaik gaam manga tirih no balana.
2PE 2:9 Ing bia God ga gil hokaiken i nunure mah wara halangalanga ise diet ing diet murmur ie sukun ira harwalar. Ma i nunure mah wara balbalaure bat tar ira ut na sakena narako ta ra harpidanau tuk taar tano bung na harkurai.
2PE 2:10 Ma tutun sakit bia na gil huo ta ira ut na patnau ing diet manga hilau mur ira udiet bilingana sakana sinisip ta ira palatamai diet. Kaiken ra tena harausur bisbis diet manga sa butbut. Diet pai ramramin bia diet na tange hagahe ira mangana tanuo.
2PE 2:11 Iesen ira angelo at ing diet manga tamat ta diet, diet pai tung kaike ra mes ma ra dadas na sakana nianga kaia ra matmataan gar tano Watong.
2PE 2:12 Iesen kaiken ra mangana tunotuno diet haruat ma ira wawaguai ing pataie audiet ta lilik. Diet hoira ba na rakaia ing diet lon mon waing dahat naga hakuni leh wara bubu bing. Diet tar ra nianga na harhagahai uta ira linge ing diet pai nunure tar. Hoing ira rakaia diet la hirhiruo, diet mah diet na hiruo.
2PE 2:13 Diet te ubal ira tunotuno, kaik diet na kap no udiet kunkulaan na haraubaal. Diet kap ra gungunuama hokaiken, bia diet na tar bakut ira udiet kidilona nilon taar ta ira udiet haleng na mangana sakana sinisip ing bia i kasakes baak. Diet ira bilingana tunotuno ma diet gil hamalahuan muat ing diet iaan tika ma muat ma ing diet guama ma ira udiet magingin na habato lamus ri.
2PE 2:14 Diet manga nes kalak haitne ira hahin gar na mes bia diet na noh tika me, ma diet pai la sangsangeh tano gilgil no sakena. Diet habato hagahe leh ira pagola na tunotuno. Diet manga keskes tano kalak kinewa ma no udiet ngaas i haan taar kaia tano hiniruo.
2PE 2:15 Diet te tamapas sukun no takodasuana ngaas ma diet te haan rara tapaka. Diet te mur no ngaas ta Balaam no nati Beor nong ga kalak no kunkulaan tano magingin sakena.
2PE 2:16 Iesen tiga donki ga bor ie ta ira uno sakana tintalen. No ba na donki ga ianga ma ra ingana tunotuno ma ga tur bat no ba na lilik tano tangesot.
2PE 2:17 Kaiken ra tunotuno diet hoing tiga mataan taah, taie ta taah tana. Diet haruat ma ra bahuto mah ing a baiangin na puh ise. God i te tagure tar no udiet kinkinis kaia ra tamat na kankado sakit.
2PE 2:18 Hoing iau te tange tar huo, diet sa butbut bia. Ma diet bul hawaat ira sinisip na hilawa ma ira mes na sakana sinisip. Diet gil huo wara hamhabato lamus ira tunotuno ing diet te haburen leh mon wara hinilau sukun diet ing diet mur no ngaas na nironga.
2PE 2:19 Diet kukubus taar ta ira matanaiabar bia diet ira matanaiabar diet na tale wara langalanga sukun ra harkurai. Iesen diet ira tena harausur bisbis at diet kis ra hena ira mapus na magingin. I palai bia i tutun iakano kanong ing tikai i kis ra hena no dadas ta tiga linge, na tartaram um ie.
2PE 2:20 I nanaas bia diet ga nunure tar no udahat Watong Jisas Krais, no udahat ut na Harhalon, kaik diet ga haruat wara hinilau sukun ira bilingana magingin tano ula hanuo. Iesen ing bia diet ga ngan huo, ma namur um kaike ra magingin i wis kawase habaling diet ma diet kis ra hena no uno dadas, io, i manga sakena sakit ta diet. Nalua, ing diet pa ga nunure baak ie, diet gor hiruo. Namur um, ing diet te nunure tar ie ma sen ira sakena i wis kawase habaling diet, io, diet na hiruo sakasaka.
2PE 2:21 Ing bia diet pa gor nunure no ngaas na magingin takodas, diet pa gor manga hiruo. Iesen diet na manga hiruo sakasaka kanong diet ga nunure tar ie ma diet ga tamapas laah sukun no halhaliana hartula ing di ga tar ta diet.
2PE 2:22 Iakan ra nianga harharuat i tutun uta diet. I tange hoken, bia “No paap i tapukus baling tupas no marmaruena.” Ma i tange mah bia, “No bore nong i te sisiu taar tano taah, na tapukus naga paipai baling.”
2PE 3:1 Ira nugu bilai na harwis, iakan no nugu airuo pakpakat ukaia ho muat. Ma iau te pakat dir bakut bia ni halilik muat, naga hatatik leh ira numuat lilik bia muat na lilik ta ira bilbilai.
2PE 3:2 Iau sip bia muat na lik leh ira nianga ta ira halhaliana tangesot menalua ma no hartula tano udahat Watong, no ut na Harhalon, iakano hartula nong ira apostolo diet ga hinawase muat ine.
2PE 3:3 Ma no tamat na linge iau sip bia muat na palai tana ma aie hoken. Tano hauhawatine ta ira pakana bung ira ut na kukutur diet na hanuat ma diet na mur ira udiet sakana sinisip.
2PE 3:4 Diet na tange bia, “Ga kukubus bia na hanuat, naka? Ma ie he um? Ira adahat sus diet te maat ma sen ira linge bakut i ngan taar at mon hoing no hathatahun tano ula hanuo tuk taar katin.”
2PE 3:5 Iesen ing diet tange huo diet malentakuane bia diet na lik leh ing God ga gil. Menalua sakit ga hakisi no mawe ma no ula hanuo ma no uno nianga. Ga kap no taah ma ga hakisi no ula hanuo mei.
2PE 3:6 Ma ga papalim ma no taah mah ing ga tar no taahit wara haliare no ula hanuo ta iakano pakana bung.
2PE 3:7 Ma i te bul hasasesir no mawe ma no ula hanuo ma iakano uno nianga at mon ta iakan ra pakana bung bia dir na kis taguro taar wara utano bung na harkurai ing ira tunotuno ing diet tur talur God diet na hiruo.
2PE 3:8 Ira nugu bilai na harwis, waak muat lik luban iakan ra linge, bia tano ninaas tano Watong tiga bung i haruat ma tiga arip na tinahon ma bia tiga arip na tinahon i haruat ma tiga bung mon.
2PE 3:9 Ari diet lik bia no Watong i la hahalis wara hatutun ira uno kunubus. Iesen bia pataie. I la bala maat taar uta muat kanong pai sip bia tiga nong na hiruo. I sip bia ira tunotuno bakut diet na lilik pukus.
2PE 3:10 I tutun kaike iesen no bung gar tano Watong na hanuat um hoing tiga ut na kikinau. No mawe na panim laah ma ra tamat na nunungo. A dadas na mamahien na haliare ira tiding aram naliu. Ma no ula hanuo ma ira linge bakut tana na pataam harsakit.
2PE 3:11 Ing bia God na haliare kaiken ra linge bakut huo, muat na tatalen um hohe ira tunotuno? I tahut bia muat na gamgamatien talur ira sakena ma muat na lon mur God.
2PE 3:12 I tahut bia muat na lon huo ing muat kis kawase no bung gar ta God ma muat hagasiaan no uno hinanuat. Ing iakano bung na hanuat, a mon iaah na haliare no mawe ma a tamat na mamahien na rang hapolo ira tiding.
2PE 3:13 Iesen dahat kis kawase ira linge ga kukubus taar urie ma hoken, a sigar mawe ma a sigar ula hanuo, ma a magingin takodas na kis um kaia.
2PE 3:14 Io kaik, ira nugu bilai na harwis, i tahut bia muat na manga ngarngarau bia God pa na nes leh ta sakena bia bilinge ta muat, iesen bia muat na kis ma ra malum tika mei.
2PE 3:15 Muat na nes kilam no bala maat tano Watong aie no ngaas na harhalon. No udahat bilai na harwis Pol ga tange mah huo ing ga pakpakat ukaia ho muat haruat ma no uno minminonas nong God ga tabar ie mei.
2PE 3:16 Ga tange mah huo ta ira uno pakpakat bakut ing ga iangianga uta kaiken ra linge. Ma ari a linge ta ira uno pakpakat i dadas bia da palai ine. Ma ira pagola na tunotuno ing pataie ta minminonas ta diet, diet halilie hagahe ira uno nianga hoing diet la gilgil mah ta ira mes na nianga gar ta God di ga pakat. Ma bia diet gil huo diet tagure no udiet ngaas taar tano udiet hiniruo.
2PE 3:17 Io kaik, ira nugu bilai na harwis, i tahut bia muat na harbalaurai timaan kanong muat te huna nunure tar kaiken ra linge. Muat na harbalaurai timaan bia ira ut na patnau diet kabi lamus harongane muat ma muat na puko talur no numuat tuntunur dadas.
2PE 3:18 Iesen i tahut bia muat na tahuat tano harmarsai tano udahat Watong Jisas Krais, no udahat ut na Harhalon, ma bia muat na haan hakakari tano numuat mintota utana. Da pirlat ie kaiken ma hathatika. Tutun sakit.
1JO 1:1 Het hinawase muat uta nong ga kis taar menalua tano hathatahun, nong het ga hadade ma het ga nes ie ma ira mata mehet. Io, het ga nesnes ie ma het ga sigirei ma ira lima mehet. Ma iakan at mon het hinawase muat utana, no Nianga na Nilon.
1JO 1:2 Ma no nilon ga harapuasa ma het hinawase muat uta iakan ra nilon hathatika. Het ga nes ie ma het hatutun ie ta muat. Iakanong nong ga kis tika ma Mama ma i harapuasa taar ta mehet.
1JO 1:3 Ma het hinawase mah muat uta nong het gate nes ma het gate hadade waing muat mah muat naga tiktika ma mehet. Ma het tiktika at ma Mama ma no Natine, Jisas Krais.
1JO 1:4 Ma het pakat tar kaiken ra linge ta muat waing ira udahat gungunuama na duk.
1JO 1:5 Io, iakan no hinhinawas het ga hadade leh ie ta Jisas Krais ma het hinawase muat urie hoken: God i haruat ma ra lulungo ma pataie harsakit ta kankado tana.
1JO 1:6 Ing bia dahat tange bia dahat tiktika mei iesen dahat hanahaan ra kankado, io, dahat harabota ma ira udahat magingin pai haruat ma ira tutun God i te hapuasne.
1JO 1:7 Iesen bia dahat hanahaan tano madaraas hoing aie at i kis tano madaraas, io, dahat tiktika hargilaas ta dahat ma no de ne Jisas no Natine i hagamgamatien dahat ta ira magingin sakena bakut.
1JO 1:8 Ing bia dahat tange bia pataie audahat ta magingin sakena dahat hasakit baling ta dahat ma dahat lik bia iakano hinarabota i tutun iesen ira tutun ta God pai kis ta dahat.
1JO 1:9 Iesen bia dahat na hinawas palai ta ira udahat magingin sakena, io, God na gil haruat ta ira uno kunubus ma na gil ra takodas hoken: na lik luban se ira udahat sakena ma na hagamgamatien dahat sukun ira magingin bakut pai takodas.
1JO 1:10 God i tange bia dahat te gil ra sakena. Ing bia dahat tange bia dahat pai le gil ta sakena, io, dahat kilam God bia a ut na harabotai ma no uno nianga pai kis ta dahat.
1JO 2:1 Iau pakat kaiken ra linge taar ta muat ira natigu gar ta Krais waing muat pa na gil ra sakena. Iesen bia tikai na gil ta sakena, audahat tikai kana nong i iangianga wara gaie dahat ra matmataan ta God. Ma aie ne Jisas Krais no takodasiana.
1JO 2:2 Ma aie at no hartabar uta ira udahat magingin sakena nong ga hau no ngalngaluan gar ta God. Ma taie bia wara gaiena ira udahat sakena sen. Wara gaiena mah ira sakena tano ula hanuo bakut.
1JO 2:3 Dahat nunure bia dahat nunure tar God hoken, ing bia dahat taram ira uno harkurai.
1JO 2:4 Sige tikai i tange bia i nunure tar ie ma sen pai taram ira uno harkurai, io, a ut na harabota ie ma ira tutun ta God pai kis tana.
1JO 2:5 Iesen tutun sakit, bia tiga nong i taram ira uno nianga i hamines bia no uno sinisip uram ho God i te duk. Ma dahat nunure hohe bia dahat kis taar tana? I hoken:
1JO 2:6 Sige tikai i tange bia i la kis taar ta God, io, i tahut bia na hanahaan hoing Jisas ga haan huo.
1JO 2:7 Ira bilai na hinsakagu ta Krais, iau pai pakpakat tiga sigar harkurai ukaia ho muat, iesen no tuarena mon nong muat ga hatur kawase tur leh menalua tano hathatahun. Iakan ra tuarena harkurai, aie no hinhinawas muat ga hadadei.
1JO 2:8 Iesen i tutun mah bia iau pakpakat tiga sigar harkurai ukaia ho muat. Ma da palai bia i tutun bia iakan ra harkurai i sigarine kanong da nes ie tano nilon ta Jisas ma ira numuat. Ma i palai huo kanong no kankado i wara patpataam ma no lulungo tutun i te murarang taar.
1JO 2:9 Sige tikai i tange bia i kis taar ra madaraas iesen bia i malentakuane no hinsakana gar ta Krais, io, i kis taar baak ra kankado.
1JO 2:10 Sige nong i marse no hinsakana gar ta Krais i la kis taar tano madaraas ma taie ta sakena tana bia na hapukoi.
1JO 2:11 Iesen sige tikai i malentakuane no hinsakana, io, i kis taar tano kankado ma i la hanahaan hurbit tano kankado. Ma pa na nunure bia i hanahaan uhe kanong no kankado i te hapulo ira iruo matana.
1JO 2:12 Iau pakpakat tupas muat ira natigu gar ta Krais kanong God i te lik luban se ira numuat magingin sakena utano hinsane Krais.
1JO 2:13 Iau pakpakat tupas muat ira nongtamat tano lotu kanong muat nunure tar ie nong i te kis taar menalua tano hathatahun. Iau pakpakat tupas muat ira marawaan tano lotu kanong muat te bul hasur no Ut na Sakena.
1JO 2:14 Iau pakpakat tupas muat ira natigu kanong muat nunure tar Mama. Iau pakpakat tupas muat ira nongtamat kanong muat nunure tar ie nong i te kis taar menalua tano hathatahun. Iau pakpakat tupas muat ira marawaan kanong muat dadas ma no nianga ta God i la kis taar ta muat ma muat te bul hasur no Ut na Sakena.
1JO 2:15 Waak muat sipsip ira magingin ma ira linge tano ula hanuo. Ing bia sige tiga nong i sipsip ira magingin tano ula hanuo, io, pai sip Mama.
1JO 2:16 Iau tange huo kanong ira linge bakut tano ula hanuo, ira sakana harsipsip, ira sakana nes kalak, ma ira magingin na butbut, pai hanuat meram ho Mama. Taie. I hanuat mekai ra ula hanuo.
1JO 2:17 Ma no ula hanuo i patpataam hanahaan, ma diet mah ing diet sip no ula hanuo. Iesen sige tikai i gil haruatne ing God i sip bia na gil huo, io, na lon hathatika.
1JO 2:18 Ira natigu gar ta Krais, kaiken no patpataam tano ula hanuo. Ma hoing muat ga hadade bia no suk ane Krais na hanuat, ma kaiken at a haleng na suk ane Krais diet te hanuat taar. Io kaiken dahat te nunure bia no hauhawatine kanong diet te hanuat um.
1JO 2:19 Diet ga haan sukun dahat iesen pai udahat tutun diet. Ing bia audahat tutun diet, diet pa gor haan sukun dahat. Iesen no udiet hinaan laah i haminas bia diet bakut, pai udahat diet.
1JO 2:20 Iesen no Halhaliana i te tabar muat ma iakano nong i hapalaine muat kaik muat bakut muat gi nunure ira tutun God i te hapuasne.
1JO 2:21 Iau pakpakat tupas muat warah? Kanong muat nunure kaike ra tutun bia kanong muat pai nunurei? Iau pakpakat ukaia ho muat kanong muat nunure tar ira tutun ma muat nunure bia taie ta hinarabota na hanuat meram narako ta ira tutun.
1JO 2:22 Sige no ut na harabota? Aie nong i harus ise Jisas bia aie no Mesaia. Tiga mangana tunotuno huo, aie no suk ane Krais kanong i harus ise Mama ma no Natine.
1JO 2:23 Sige nong i harus ise no Natine pai hatur kawase Mama. Ma sige nong i haut bia Jisas no Nati God, io, i hatur kawase mah Mama.
1JO 2:24 Ma muat, i tahut bia muat na bale leh iakano hinhinawas nong muat gate hadade leh tano hathatahun bia na be kis taar ta muat. Ing bia iakano hinhinawas nong muat ga hadade leh tano hathatahun i la kis taar ta muat, io, muat mah muat na kis taar ta Mama ma tano Natine.
1JO 2:25 Ma no kunubus nong aie at ga tar ta dahat i hoken: no nilon hathatika.
1JO 2:26 Iau pakpakat kaiken ra linge wara uta diet ing diet walwalar wara lamlamus harango muat.
1JO 2:27 Ma muat, muat pai supi bia ta tikai na hausur muat ta tiga linge kanong Krais ga tabar muat ma iakano nong i hapalaine muat ma iakanong i la kis taar ta muat ma i la hauhausur muat uta ira linge bakut ma i tutun mah ma pai harabota. Io kaik, i tahut bia muat na kis taar ta Krais hoing iakano nong i hapalaine muat i te hausur muat huo.
1JO 2:28 Io, ira natigu gar ta Krais, i tahut bia muat na kis taar ta Krais waing dahat naga balaraan taar bia ing na harapuasa, dahat kabi malahuan ta iakano tamat na bung bia na hanuat.
1JO 2:29 Ma muat nunure bia Krais i takodas. Io kaik, muat nunure mah bia sige tikai i la gilgil ra magingin takodas, aie tiga nati God.
1JO 3:1 Nes baak! A tamat no harmarsai tika ma ra sinisip nong Mama i te tar ta dahat! Io kaik, di gi kilam dahat bia ira nati God dahat. Ma iakanin i tutun. No ula hanuo pai nunure kilam dahat kanong warah, pa ga nunure kilam God mah.
1JO 3:2 Ira bilai na hinsakagu ta Krais, a nati God dahat kaiken. Ma sen pai hanuat palai baak bia a mangana tunotuno hohe dahat namur. Iesen dahat nunure bia dahat na ngan hoing Krais ing Krais na hanuat puasa kanong na hanuat palai ta dahat bia a mangana tunotuno hohe tutun ie.
1JO 3:3 Ma sige tikai i la kiskis nanaho ma ra nurnuruan bia na ngan baak hoing Krais huo, io iakano tunotuno i la hagamgamatien no uno nilon hoing Krais mah i gamgamatien.
1JO 3:4 Sige tikai i gil sakena i hamines bia a ul pat ie ta God kanong i lake ira uno harkurai. Tutun sakit, ira magingin sakena i haruat hoing tikai i lake ira harkurai gar ta God kaik i ul pat ta God.
1JO 3:5 Ma muat nunure bia Krais ga hanuat wara kapkap se ira magingin sakena. Ma taie ta sakena i kis tana.
1JO 3:6 Taie tikai i la kis taar tana i la gilgil sakena. Ma taie tikai i la gilgil sakena i nunure tar ie.
1JO 3:7 Ira natigu gar ta Krais, muat na harbalaurai timaan, tikai kabi lamus harongane muat. Sige nong i la gilgil no takodas a takodasianai hoing Krais a takodasianai.
1JO 3:8 Sige tikai i la gilgil sakena a gar ta Sataan ie kanong Sataan ga gil leh ra sakena tur leh tano hathatahun. No burena iakan bia no Nati God gaam hanuat bia na haliare ira pinapalim ta Sataan.
1JO 3:9 Taie tiga nati God i la gilgil sakena kanong i te kap ira mangana tintalen ta God uram narakoman tana. Ma pai tale bia na gil sakena, warah, a nati God ie.
1JO 3:10 Kaik na palai hoken bia gahim ira nati God ma gahim ira natine Sataan: ing bia tikai pai la gilgil no takodas pai gar ta God ie, ma nong mah nong pai la marmarse no hinsakana gar ta Krais.
1JO 3:11 Io, iakan no hinhinawas muat gate hadade leh meram ra hathatahun, bia dahat na marse hargilasane dahat.
1JO 3:12 Waak muat ngan hoing Kain. Aie gar tano Ut na Sakena. Ma aie nong ga bu bing no tasine. Ma ga bu bing ie warah? Kanong ira uno magingin ga sakena ma ing tano tasine ga takodas.
1JO 3:13 Io kaik, ira hinsakagu ta Krais, waak muat karup bia no ula hanuo i malentakuane muat.
1JO 3:14 Warah? Kanong dahat nunure bia dahat te haan sukun no minaat ma dahat te laka tano nilon. Ma dahat nunure huo kanong dahat marse hargilasane ira hinsaka dahat gar ta Krais. Sige tikai pai hatur kawase ra harmarsai, i la kis taar ra minaat.
1JO 3:15 Sige tikai i malentakuane no hinsakana ta Krais, a ut na harubu bingibing ie. Ma muat palai bia no nilon hathatika pai kis taar ta tiga ut na harubu bingibing.
1JO 3:16 Dahat nunure no kukuraina tano magingin na harmarsai hoken: Jisas ga tar se no uno nilon, ga maat wara gaie dahat. Io kaik, i takodas bia dahat, dahat na taguro wara minaat wara gaiena ira hinsaka dahat gar ta Krais.
1JO 3:17 Iesen sige tikai auno ta linge ma i nes a sunupi tano hinsakana ta Krais sen bia pai marsei, io, tutun sakit no mangana harmarsai gar ta God pai la kis taar tana.
1JO 3:18 Ira natigu gar ta Krais, waak dahat tange mon bia dahat marse ira mes. Iesen i tahut bia dahat na hamines ira udahat harmarsai ma ira udahat magingin tupas diet, kaike ra mangana magingin ing i haruat ma ra tutun God i te hapuasne ta dahat.
1JO 3:19 Ing bia dahat harmarsai huo dahat na nunure bia dahat kis narako ta ira tutun ta God. Ma ing dahat tur ra matmataan ta God i tale bia tikatikai na kilingane bia a mon nironga tana. Iesen dahat ing dahat harmarsai, dahat na kis na balaraan um. Warah, kanong God i tamat ta ira harkurai ta ira bala dahat ma i nunure bia sige tun dahat.
1JO 3:21 Ira bilai na hinsakagu ta Krais, ing bia dahat pai kilingane bia a mon nironga ta dahat, io, dahat na kis na balaraan ra matmataan ta God. Ma God na tabar dahat ma ing dahat saring leh kanong dahat taram ira uno harkurai ma dahat gil ira linge ing i haguama ie.
1JO 3:23 Ma iakan no uno harkurai, bia dahat na nurnur tano hinsana no Natine Jisas Krais ma bia dahat na marmarse hargilasane dahat haruat tano uno harkurai ga tar ta dahat.
1JO 3:24 Ma sige tikai i taram ira uno harkurai i la kis taar ta God ma God mah i la kis taar tana. Ma dahat nunure hohe bia i la kis taar ta dahat? No Tanuo nong God i te tar ie ta dahat i hapalaine dahat huo.
1JO 4:1 Ira bilai na hinsakagu ta Krais, a haleng ira tangesot harabota diet te haan harbasia tano ula hanuo. Io kaik, waak muat nurnur ta ira tunotuno bakut ing diet tange bia no Tanuo ta God i hinawase diet tari linge. Iesen muat na walar diet wara nunure bia God i tar ra nianga ta diet bia taie.
1JO 4:2 Ma i tale muat bia muat na nes kilam baak no Tanuo ta God narako ta tiga tunotuno ta ira uno nianga. Sige tikai i nurnur bia Jisas Krais ga hanuat ukai ma ing bia ga hanuat a tunotuno ie, ma i hinawas palai huo, io, muat na nunure bia no Tanuo meram ho God i kis tana.
1JO 4:3 Iesen sige tikai i harus ise Jisas huo, io, no Tanuo meram ho God pai kis tana. Taie. I hatur kawase mon no tanuo tano suk ane Krais. Muat ga hadade bia ira suk i Krais na hanuat. Ma tutun, kaiken um diet te hanuat taar kai ra ula hanuo.
1JO 4:4 Ira natigu gar ta Krais, muat gar ta God ma muat te bul hasur kaike ra mangana tunotuno tika ma ira udiet harausur kanong iakano nong i kis ta muat i tamat ta Sataan nong i kis tano ula hanuo.
1JO 4:5 Diet gar tano ula hanuo, io kaik, diet ianga mekai ra ula hanuo ma no ula hanuo i taram diet.
1JO 4:6 Dahat gar ta God ma sige tikai i nunure tar God na taram dahat. Iesen sige tiga nong pai gar ta God pa na taram dahat. Hoken ing dahat na nes kilam ira tunotuno ing no Tanuo ta ira tutun ta God i kis ta diet, ma diet ing diet hatur kawase ra tanuo na harabota.
1JO 4:7 Ira bilai na hinsakagu ta Krais, i tahut bia dahat na marse hargilasane dahat kanong no magingin wara tar harmarsai, aie meram ho God. Ma sige tikai i tar harmarsai, a nati God ie ma i nunure tar God.
1JO 4:8 Sige tikai pai tar ra harmarsai, pai nunure God kanong ira tintalen bakut ta God, a tintalen na harmarsai ma ra sinisip ukai ho dahat.
1JO 4:9 Ma God ga hamines no uno harmarsai ma no uno sinisip uta dahat hoken: ga tule se no uno halhaliana bulukasa ukai tano ula hanuo wara halhalon dahat.
1JO 4:10 Ma a mangana linge sa iakan ra magingin na harmarsai tika ma ra sinisip? No suruno pai hoken, bia dahat te sip God. Taie. Iesen no suruno bia God ga sip dahat gaam marse dahat, ma ga tule se no Natine, a hartabar ie uta ira udahat magingin sakena wara hauhau no ngalngaluan gar ta God.
1JO 4:11 Ira hinsakagu ta Krais, ing bia God ga marse dahat huo, io, i takodas bia dahat, dahat na marse hargilasane dahat.
1JO 4:12 Taie ta tiga nong pa gale nes God. Taie. Sen bia ing dahat marse hargilasane dahat, io, God i la kis taar ta dahat ma no mangana harmarsai gar ta God i te duk narako ta dahat.
1JO 4:13 Dahat nunure bia dahat la kis taar tana ma aie i la kis taar ta dahat hoken, kanong i te tar no Tanuana ta dahat.
1JO 4:14 Ma Mama ga tule no Natine ukai bia aie no ut na Halon tano ula hanuo. Het gate nes iakan ma het hatutun ie ma ira numehet hinhinawas ta muat.
1JO 4:15 Sige tikai i haut bia Jisas aie no Nati God, io, God i la kis taar tana ma aie i la kis taar ta God.
1JO 4:16 Ma dahat te kilingane no harmarsai ma no sinisip gar ta God uta dahat ma dahat nuruan iakano uno harmarsai ma no uno sinisip tupas dahat. Ira tintalen bakut ta God, a tintalen na harmarsai tika ma ra sinisip ukai ho dahat. Ma sige tikai i la kis taar ta iakano mangana nilon i la kis taar ta God ma God i la kis taar tana.
1JO 4:17 Io, dahat na kis na balaraan tano bung na harkurai kanong dahat hoing Krais kai ra ula hanuo. Ma ing bia dahat na kis na balaraan huo i hamines bia i manga marse hasakitne dahat ma dahat manga sip hasakitne ie.
1JO 4:18 Ing dahat sip ie huo, ma aie mah i sip dahat, pai tale bia dahat na burut. Taie. Ing dahat sip tun at ie ma aie i sip tun dahat, iakano magingin i la kapkap se no bunurut. Io kaik, ing bia tikai i burut, iakan ra magingin na sinisip pai duk taar tana kanong no bunurut i kis tika ma ra harpidanau.
1JO 4:19 Io, dahat sip um ie kanong aie ga luena sip dahat. Ma dahat marse ira mes kanong aie ga luena marse dahat.
1JO 4:20 Ma ing bia tikai na tange bia, “Iau sip God,” sen bia i malentakuane no hinsakana ta Krais, io, a ut na harabota ie. Ma i nanaas bia a tutun iakan kanong sige tikai pai marse ira mes na matanaiabar gar ta God ing i te nes tar diet, io, pai tale bia na sip God nong pai le nes ie tiga pakaan.
1JO 4:21 Ma dahat hatur kawase iakan ra harkurai mekaia ho ie, bia sige tikai i sip God na marse mah no hinsakana ta Krais.
1JO 5:1 Sige tikai i nurnur bia Jisas aie no Mesaia, io, a nati God ie. Ma i nanaas bia sige i sip no sus ana tikai na marse mah no natine.
1JO 5:2 Dahat nunure hoken bia dahat marse ira nati God: dahat sip God ma dahat gil haruatne ira uno harkurai.
1JO 5:3 Ma ing bia dahat taram ira uno harkurai i hamines bia dahat sip ie. Ma ira uno harkurai diet pai tirih kanong ira nati God diet haruat wara papaas hasur ira sakana magingin tano ula hanuo. Ma dahat paas hasur ira sakena tano ula hanuo hoken: dahat nurnur ta ira tutun God i te hapuasne.
1JO 5:5 Ma sige nong i bul hasur ira magingin sakena tano ula hanuo? Nong sen mon nong i nurnur bia Jisas aie no Nati God.
1JO 5:6 Jisas Krais aie at nong ga kap baptais ma ga maat ing ga hanuat ukai. Ing bia ga hanuat ukai pa ga kap baptais sen mon. Taie. Ga kap baptais ma ga maat mah. Ma no Halhaliana Tanuo at nong i hatutun iakan ma no uno hinhinawas. Ma i hatutun ie huo kanong i la tangtange ra tutun.
1JO 5:7 Io, aitul ing dal hatutun bia Jisas aie no Nati God. Ma dal hoken: no Tanuo, no uno baptais, ma no uno minaat. Ma dal bakut dal haut tika.
1JO 5:9 Ma i nanaas bia da haut leh no hinhinawas ta tiga tunotuno ing bia i hatutun tiga linge. Iesen ing bia God i hatutun iakan ma no uno hinhinawas, io, no uno hinhinawas i manga tutun tano hinhinawas gar na tunotuno kanong no uno hinhinawas, no hinhinawas gar ta God ie utano Natine.
1JO 5:10 Sige tikai i nurnur tano Natine God i kap usurane iakan ra hinhinawas. Sige tiga nong pai nurnur ta God i kilam God bia a ut na harabota ie kanong pai le nurnur tano hinhinawas ta God ing God i hatutun ira linge utano Natine.
1JO 5:11 Ma no hinhinawas nong God i te hatutun tar ie ta dahat, aie hoken: God i te tabar dahat ma no nilon hathatika ma iakan ra nilon mekaia hono Natine.
1JO 5:12 Sige tikai i hatur kawase no Natine i hatur kawase mah no nilon. Ma sige tikai pai hatur kawase no Nati God pai hatur kawase no nilon.
1JO 5:13 Iau pakat kaiken ra linge ukaia ho muat ing muat nurnur tano hinsana no Nati God waing muat na nunure bia muat hatur kawase tar no nilon hathatika.
1JO 5:14 Ma dahat balaraan taar ra matmataan ta God kanong dahat nunure tar bia God i hadade dahat ing bia dahat sasaring haruat tano uno sinisip.
1JO 5:15 Ma ing bia dahat nunure huo bia i hadade ira udahat sinasaring bakut, io, dahat nunure mah bia dahat hatur kawase ira binabalu ta ira udahat sinasaring tupas ie.
1JO 5:16 Bia tikai i nes no hinsakana ta Krais i gil tiga nironga ing pai haruat bia na lamus tar ie tano minaat, io, na sasaring ma God na tar no nilon tana. Iau iangianga uta ira magingin sakena ing pai haruat bia na lamus tar tiga nong tano minaat. Iesen a mangana nironga kana i haruat bia na lamus tar tikai tano minaat. Iau pai tange bia na sasaring uta iakano.
1JO 5:17 Ira magingin bakut pai takodas, a magingin sakena. Iesen ari a mangana nironga pai haruat bia na lamus tar tikai tano minaat.
1JO 5:18 Dahat nunure tar bia sige a nati God ie, pai la gilgil ra magingin sakena. Iesen no Nati God i la balbalaure timaan tar ie ma no Ut na Sakena pai tale bia na hagahei.
1JO 5:19 Ma dahat nunure tar bia dahat gar ta God sen bia no ula hanuo bakut i kis taar tano harkurai tano Ut na Sakena.
1JO 5:20 Ma dahat nunure tar mah bia no Nati God i te hanuat ukai ma i te hapalaine dahat waing dahat naga nunure ie, aie no God tutun. Ma dahat kis taar tana nong i tutun. Ma iakano, aie no Natine Jisas Krais. Aie no God tutun ma aie no nilon hathatika.
1JO 5:21 Ira natigu gar ta Krais, muat na kis pas ira god bisbis.
2JO 1:1 Iau no patuana kabinsit na lotu, iau pakat kan ra nianga ukaia tano numuat lotu nong God te gilamis ie hoing tiga bilai na hahin, ma ukaia ho muat ira matanaiabar na lotu hoing ira natine. Ma iau, iau marse muat haruat ma ira tutun God i te hapuasne ta dahat. Ma pai iau sen mon. Taie. Diet bakut ing diet nunure ira tutun ta God ma diet te kap usurane kaike ra tutun, io, diet marse mah muat.
2JO 1:2 Warah? Kanong ira tutun i la kis taar ta dahat ma pa na panim laah.
2JO 1:3 Io, a harmarsai ma ra malum na kis tika ma dahat meram ho Mama God ma Jisas Krais no Nati Mama kanong dahat kis tika ma ira tutun ma dahat marse harbasiane dahat.
2JO 1:4 Iau ga manga guama ing bia iau ga nunure leh bia ari ta muat, muat la lalon murmur ira tutun hoing no adahat Sus ga kure tar ta dahat.
2JO 1:5 Ma kaiken iau saring no numuat lotu bia dahat na marse harbasiane dahat. Ma bia iau pakat iakan ra harkurai ukaia ho muat, pai sigarine ta muat. Taie. Aie mon iakanong dahat ga hatur kawase menalua ra hathatahun.
2JO 1:6 Ma a mangana linge sa no magingin na harmarsai? Aie hoken: dahat na mur ira harkurai ta God. Ma iakano harkurai nong muat ga hadade menalua ra hathatahun aie hoken, bia dahat na hanahaan ma ra harmarsai harbasia ta dahat.
2JO 1:7 Iau saring muat huo kanong a halengin diet te haan tano ula hanuo ma diet lamus habato ira matanaiabar. Diet kaike ing diet harus bia Jisas Krais i hanuat ukai hoing tiga tunotuno. Ma ing bia tikai na harus ise Krais huo aie no suk ane Krais ma aie nong i la hamhabato lamus ira matanaiabar.
2JO 1:8 Muat na harbalaurai bia ira linge dahat te papalim urie kabi panim laah iesen bia muat na hatur kawase ira hunena bakut ira numuat mangason.
2JO 1:9 Sige tikai pai la kis taar tano harausur ta Krais ma i te haan longai sukun ie, io, pai hatur kawase God. Ma sen bia sige tikai i la kis taar ta iakano harausur i hatur kawase Mama dir bakut ma no Natine.
2JO 1:10 Ma ing bia tiga nong na hanuat tupas muat ma pai hanuat ma iakano harausur, io, waak muat balbale leh ie ta ira numuat hala ma waak muat balbalaan mei.
2JO 1:11 Ma waak muat gil huo kanong nong i harbalaan mei i harahut ie ta ira uno sakana pinapalim.
2JO 1:12 Iau sip bia ni hinawase muat uta haleng na linge iesen iau malok bia ni pakat tiga talona pakpakat ukaia ho muat. Ma iau lik bia na tale iau bia ni haan tupas muat iau nigi tur mate muat ma dahat naga wawor tika waing no udahat gungunuama na duk.
2JO 1:13 Io, ira matanaiabar ta iakano lotu ing God te gilamis diet ma diet harbalaan ma muat, diet tula harmarsai ukaia ho muat.
3JO 1:1 Iau no patuana kabinsit na lotu, iau pakat kan ra nianga ukaia ho ugu Gaius, no tahut na tasigu gar ta Krais. Iau tar no nugu harmarsai taam haruat ta ira tutun God i te hapuasne ta dahat.
3JO 1:2 Tahut na tasigu, iau sasaring bia no palatamaim i langalanga timaan ma bia ira mes na linge tano num nilon i tahut bakut mah, haruat ma no kinkinis tano tanuaam nong i lon timaan taar.
3JO 1:3 Ma iau sasaring huo kanong iau ga manga guama ing ari a hinsaka dahat ta Krais diet ga hananuat ma diet ga hinhinawas bia u la murmur ira tutun ta God. Ma no udiet hinhinawas ga haruat ma ing iau te nunure tar bia u la lalon murmur ira tutun.
3JO 1:4 Ma taie tiga linge pa na manga haguama iau hoing ira nugu hanhadoda uta ira natigu gar ta Krais bia diet la lalon murmur ira tutun ta God.
3JO 1:5 Tahut na tasigu, u murmur ira sinisip gar ta God ing u gil ra mangana harharahut ta ira hinsaka dahat ta Krais ma tutun sakit bia a wasire sokopi diet taam.
3JO 1:6 Diet te hinhinawase ira matanaiabar na lotu uta ira num harmarsai taar ta diet. Na tahut bia nu harahut ira udiet sunupi tano udiet hinahaan ma bia ira num mangana harharahut na haruat ma no sinisip ta God bia nu gil huo ta diet.
3JO 1:7 Ma na tahut bia nu gil huo kanong diet ga haan hoira tultulai bia diet na papalim uta Jisas ma diet pa ga hatur kawase ra harharahut mekaia ta diet ira tabuna nurnuruan.
3JO 1:8 Io kaik, i takodas bia dahat, dahat na harahut ira mangana tunotuno huo waing dahat na papalim tika ma diet uta ira tutun ta God.
3JO 1:9 Io, iau ga pakpakat ukaia tano lotu ma sen bia Dioterpes nong i manga sip bia aie at na lua ta muat pai taram mehet.
3JO 1:10 Io kaik, ing ni hanuat iau ni hinawas palai uta ira uno magingin. I tangtange hagahe mehet ma ra sakana nianga na hinarabota. Ma ing i tange hagahe mehet huo, iakano ra magingin pai manga haguama ie. Taie. I sip bia na gil ira mes na sakena mah wara uno gungunuama. Pa na bale leh mah kaike ra mangana tultulai gar ta Krais bia diet hanuat. Ma diet ing diet sip bia diet na harahut kaike ra tultulai huo, io, i la tingtigal diet ma i la tultule se diet meram narako ra hala na lotu.
3JO 1:11 Tahut na tasigu, waak u walar mur ira sakena iesen nu walar mur ira tahut. Sige tikai i la gilgil ira bilai, a gar ta God ie. Ma sige tikai i la gilgil ra sakena, dir pai le harnunurai ma God.
3JO 1:12 Diet bakut diet tange bia a bilai na tunotuno Demitirius. Ma ira uno tintalen i haruat ma ira tutun kaik i hamines mah bia a bilai na tunotunoi. Ma mehet mah, mehet suro haut huo ma u nunure bia no numehet hinhinawas i tutun.
3JO 1:13 Iau ga wara hinhinawase ugu uta haleng na linge iesen iau malok bia ni pakat tiga talona pakpakat ukaia ho ugu.
3JO 1:14 Iesen iau lik bia na tale iau bia ni haan tupas ugu namur dahin, nigi tur mate ugu ma dar naga wor.
3JO 1:15 A malum taam. Ira hinsaka dahat kai diet tula harmarsai ukaia ho ugu. Iau saring ugu bia nu tange hamines ira numehet harmarsai ta diet kaia.
JUD 1:1 Iau Jut no ut na tinaram tano pinapalim Jisas Krais i tar tagu, ma iau no tasine Jemes. Ma iau pakat kaiken ra nianga tupas muat ing God i te tatau muat, muat ing muat kis tano harmarsai ta God no adahat Sus ma no uno harbalaurai wara utane Jisas Krais.
JUD 1:2 Io, a tamat na malum ma ra harmarsai um tupas muat.
JUD 1:3 Ira nugu bilai na harwis, iau manga sip bia ni pakpakat tupas muat utano harhalon nong dahat bakut dahat te hatur kawasei. Iesen iau kilingane bia i tahut bia ni pakpakat ukaia ho muat wara harharagat muat bia muat na tur dadas tano hinhinawas nong muat gate nurnur tana. Iau manga saring muat bia muat na harubu timaan wara gaiena iakano hinhinawas nong pa na kikios nong di ga tar ie ta ira matanaiabar tus ta God.
JUD 1:4 Ma i tahut bia muat na gil huo kanong tari a tunotuno diet te kinau huat nalamin ta muat. Diet ing diet la turtur talur God. Ma diet kios no harmarsai ta God nong a hartabar bia mon ie, diet gi tange bia iakano harmarsai i halangalanga diet bia diet na mur no magingin na hilawa ma ira mes na sakana tintalen mah. Diet harus ise Jisas Krais, aie no udahat kapawena Watong nong i la kure tar dahat. Ma menalua sakit a pakpakat ga huna hinawas bia a harpidanau na haan tupas um diet. Ma i hoken.
JUD 1:5 I tutun bia muat palai taar ta kaiken ra linge bakut iesen iau sip bia ni halilik tar ta muat ing no Watong ga gil. Ga halon hasur ira uno matanaiabar merau Isip iesen namur um ga haliare diet ing diet pa ga nurnur.
JUD 1:6 Ma ira angelo diet ga hatur kawase ari a mangana kinkinis bia diet na balaure ari a linge. Iesen ari a angelo diet ga haan talur ira udiet kinkinis ing gor tahut bia diet na kis taar at kaia. Kaike ra angelo God i te wis kawase diet kaia ra kankado. Ma pai tale diet bia diet na haan talur kaike ra winwisaan. Taie. Ira winwisaan na palim dit hathatikane diet wara utano harkurai tano tamat na bung namur.
JUD 1:7 Hoing at mon Sodom ma Gomora ma ira taman diet ga kis luhutane dir. Ira magingin ta ira matanaiabar kaia i haruat ma ira magingin ta kaike ra angelo. Diet ga manga mur no magingin na hilawa ma sen pataie bia iakano magingin sen mon. Diet ga manga kalak bia diet na mur ra mes na mangana ninahon harsakit ta ing God i kilam bia i takodas. No udiet harpidanau bia diet na kis tano ula iaah nong pa nale pataam. Ma a hinarkatom ie ta ira matanaiabar.
JUD 1:8 Iesen kaiken ra tunotuno nalamin ta muat, diet sakena mah huo. Ira udiet barbarien i lamus diet wara gilgil ira bilingana magingin ma ira palatamai diet. I lamus diet mah bia diet na malok wara kinkinis ra hena ra harkurai ta God ma bia diet na tange hagahe ira angelo aram naliu.
JUD 1:9 Iesen Maikel, tiga lualua ta ira angelo, aie at pa ga gil huo. Ing ga hargor ma ne Sataan pane no palatamaine Moses ma ga wara tangtange bia i gil nironga, ga lalaran dahin bia na bul hanapui ma ra dadas na nianga. Ga tange mon bia, “No Watong na pir ugu utano num nironga.”
JUD 1:10 Iesen kaiken ra tunotuno nalamin ta muat, diet ianga sakasaka diet gi bul hanapu ira linge ing diet pai palai ine. Diet haruat ma ira rakaia ing pataie audiet ta lilik. Diet mur at mon ira mangana sinisip ta ira palatamai diet ing diet nunure tar. Ma kaiken ra sinisip na haliare um diet.
JUD 1:11 Maris ta diet, na kabit diet! Diet te mur no ngaas nong Kain ga haan tana. Diet te manga sip bia diet na tamapas laah tano takodasuana ngaas wara gaiena kinewa hoing Balaam ga gil. Diet patnau ta God haruat ma ne Kora ma tutun sakit diet na hiruo hoing ie.
JUD 1:12 Kaiken ra tunotuno nalamin ta muat, diet hoira ula mamor bia na hagahe muat. Diet iaan tika ma muat ta ira numuat gil nian ing muat pakile wara hamines ira numuat harmarsai hargilaas. Iesen diet pai hirhir bia diet na iaan tika ma muat huo. Diet pai tahut na ut na harbalaurai. Diet lik habaling at diet, ma ira mes, taie. Diet hoira bahuto na bata a dadaip na kap se ma pa na bata um. Diet hoira daha ing pai huai tano pakana bung na hunhunuai ta kaike ra daha. Diet hoira daha ing i te tamaragat ma i te manga maranga.
JUD 1:13 Hoing ira pakananoh i la gugune hani ira karakora, kaiken ra tunotuno diet hapuasne ira udiet miligiruana magingin huo. Diet hoira tiding ing i kakari talur ira udiet kinkinis aram ra mauho. Ma sen God i te tagure tar no udiet kinkinis kaia ra tamat na kankado sakit.
JUD 1:14 Enok no liman ma iruo ta ira udiet harmur merau hone Adam ga ianga na tangesot uta kaiken ra tunotuno mah gaam tange, “Nes baak! No Watong na hanuat tika ma ra haleng na arip ta ira uno halhaliana waing naga bul no uno harkurai ta ira matanaiabar bakut. Na hanuat bia no uno harkurai na karat diet ing diet ga tur talur ie hoira patnau ma ira udiet sakana magingin. Diet ira sakana patnau diet na tur ra harkurai mah ta ira udiet dadas na nianga ing diet ga tange hagahe God me.”
JUD 1:16 Kaiken ra tunotuno nalamin ta muat, diet ira ut na ngurungur ma ira ut na hartutung. Diet mur ira udiet sakana sinisip ma diet ira ut na butbut. Diet hau ari a matanaiabar bia diet na tar ra harharahut ta diet.
JUD 1:17 Iesen ira nugu bilai na harwis, i tahut bia muat um, muat na lik leh ira nianga ing ira apostolo gar tano udahat Watong Jisas Krais diet ga huna hinawase muat ine.
JUD 1:18 Diet ga tange ta muat bia, “Tano hauhawatine ta ira pakana bung a mon ut na kukutur diet na hanuat ma diet na mur ira udiet sinisip ing i lamus hasisingen diet talur God.”
JUD 1:19 Diet ira ut na harpaleng ma diet mur ira mangana lilik mekai napu. Diet pai hatur kawase no Halhaliana Tanuo.
JUD 1:20 Iesen ira nugu bilai na harwis, i tahut bia muat um, muat na hatur hadadas muat tano bilai na gamgamatien na hinhinawas muat nurnur tana. Muat na bale leh no Halhaliana Tanuo bia na kure ira numuat sinasaring.
JUD 1:21 God i manga sip muat. Ma i tahut bia muat na kis taar at tano uno sinisip ing baak muat kiskis kawase no udahat Watong Jisas Krais bia na tar no nilon hathatika ta muat meram narako tano uno harmarsai.
JUD 1:22 Ma diet ing i iriruo ira udiet lilik, i tahut bia muat na marse diet.
JUD 1:23 Ma ari a mes, muat na top sangau leh diet sukun no ula iaah, muat naga halon diet. Ma ari a mes, muat na marse diet iesen muat na harbalaurai timaan ma ra bunurut ta diet. I tutun bia ira udiet sakana magingin i harango diet bakut ing diet kis hutet ta diet hoing tiga bilingana tunotuno na habilinge no uno sigasigam. I tutun bia muat miligiruane ira udiet magingin iesen muat na marse diet.
JUD 1:24 Iau pirlat ie nong i petlaar bia na balaure timaan muat bia muat kabi puko. Ma aie mah nong na hatur muat ra matmataan tana ing a mon minamar kaia. Ma ing na hatur muat huo pai tale bia tikai na kilam tar tiga sakena ta muat ma muat na tur taar kaia ma ra tamat na gungunuama.
JUD 1:25 Io, iau pirlat ie, no kapawena God no udahat ut na Harhalon bia auno no minamar, no tamat na kinkinis, no dadas, ma no kinkinis na harkurai. Iau pirlat ie bia i la kis taar huo menalua ta ira linge bakut ma i kis taar huo kaiken ma na kis taar huo hathatika. Iau pirlat ie huo narako tano pinapalim ta Jisas Krais no udahat Watong. Tutun sakit.
REV 1:1 Iakan ra pakpakat i iangianga uta ira linge ing Jisas Krais ga hapuasne. Ma God ga tar ta Jisas bia na hapuasne ta ira uno tultulai kaiken ra linge ing pa na halis ma na hanuat. Ma Krais ga tule no uno angelo ukaia ho iau Jon, no uno tultulai, bia na hapalaine kaiken ra linge tagu.
REV 1:2 Ma iau te hinawas uta ira linge bakut iau ga nes, ma no nugu hinhinawas i tutun. Ma iau te hinawas uta ira nianga gar ta God ma tano tutun Jisas Krais ga hapuasne.
REV 1:3 Ta tiga nong na was kaiken ra nianga na tangesot, na daan. Ma diet na daan mah ing diet na hadade ma diet na kap usurane kaiken ra linge iau te pakat tar, kanong no pakana bung i te hutet um bia kaiken ra linge na hanuat.
REV 1:4 Ma iau Jon, iau pakat kan ra nianga ta muat ira matanaiabar na lotu ta ira liman ma iruo na pise na hala kenas Esia. A harmarsai ma ra malum ukatiga ho muat. Na hanuat meram ho God nong i lon kaiken ma ga lon nalua ma na lon mah namur. Ma na hanuat mah meram hoira liman ma iruo na Tanuo ing diet tur taar menalua tano tamat na kinkinis na harkurai ta God.
REV 1:5 Ma na hanuat meram ho Jisas Krais mah, nong i la hinhinawas uta ira tutun ma no uno hinhinawas i tutun. Ma aie no luena wara tuntunut hut sukun no minaat. Ma aie i tamat sakit ta ira tamat na lualua tano ula hanuo. Io, i la sipsip dahat ma ga halangalanga ise dahat sukun ira udahat sakana magingin ma no dena. I te was halaka dahat tano uno kinkinis na harkurai ma ra harbalaurai, bia dahat naga gil ra pinapalim na ut na pakila lotu tupas no ana Sus, no uno God. Io kaik, da pirlat ie ma da suro haut bia na kure ira linge hathatika! Tutun sakit.
REV 1:7 Nes baak! Iakaike i wara hinanuat tika ma ira bahuto. Ma ira matanaiabar bakut diet na nes ie, diet at mah ing diet ga gasoi. Ma ira hunhuntunaan bakut tano ula hanuo diet na tapunuk panei. Tutun sakit, na ngan huo.
REV 1:8 Ma God no Watong, no Dadasine, nong i lon kaiken ma ga lon nalua ma na lon mah namur i tange hoken: “Iau no Luena ma no Hauhawatine.”
REV 1:9 Iau Jon no tasi muat. Iau tikai gar ta Krais tika ma muat, io kaik, iau mah iau tur dadas ta ira hinangul ing i haan tupas dahat ing dahat te sola taar tano uno kinkinis na harkurai ma ra harbalaurai. Ma di ga bul halaka iau narako tano hala na harpidanau kaia tano mugurlamin Patmos kanong iau gate harpir ma no nianga gar ta God ma iau gate hinhinawas ta ira tutun utano nilon gar ta Jisas.
REV 1:10 Ma tano bung gar tano Watong iau ga kis tano dadas tano Halhaliana Tanuo. Ma iau ga hadade ukaia namurugu a ingana tiga nong ga kakel hoing tiga tahur.
REV 1:11 Ma ga tange hoken: “Nu pakat kawase ira linge ing nu nes ma nu tulei tupas ira matanaiabar na lotu ta kaiken ra liman ma iruo na pise na hala. Nu tulei tupas diet kenas Epesas, Semerna, Pergamam, Taiataira, Sardis, Piladelpia, ma Laudisia.”
REV 1:12 Io, ma iau ga tahurus wara nesnes nong ga haianga iau. Ma ing bia iau ga tahurus iau ga nes ra liman ma iruo na kinkinis na lulungo di ga gil ma ra gol.
REV 1:13 Ma nalamin ta ira kinkinis na lulungo iau ga nes tikai hoing Nong a Tunotunoi. Ma ga sigam tar tiga taltalona sigasigam. Ma tiga taltalin di ga gil ie ma ra gol ga hataltalin tar no bangbangona.
REV 1:14 No uluno ma ira hine ga manga ponpon hoira hina sipsip ma ra buah. Ma ira iruo matana dir ga ngan hoira karamena lulungo na iaah.
REV 1:15 Ira iruo kakena dir ga pilpilakas hoing ra baras i kalkalangaruan tano dadas na iaah. Ma no ingana ga ngan hoira haleng na sirsiroka.
REV 1:16 Ga palim tar ra liman ma iruo na tiding tano kata na limana. Ma tiga niani na wise i iaiaan ta ira iruo palpal bakut tana ga hansur tano hana. Ma no matmataan tana ga manga pilpilakas hoing ra tingena kasakes.
REV 1:17 Ma bia iau ga nes ie, iau ga puko taar ra parparas na kakena hoing tikai i maat. Io, ga palim iau ma no kata na limana gaam tange tagu, “Waak u burut kanong iau no Luena ma no Hauhawatine.
REV 1:18 Iau no Lilona. Iau ga maat iesen kaiken iau lon hathatika. Iau hatur kawase no dadas wara paapos no matanangas ta ira minaat ma no taman na minaat mah.
REV 1:19 Io kaik, nu pakat kaiken ra linge u te nes ma ira linge i hanhanuat kaiken ma ira linge bia na hanuat baak namur ta kaiken.
REV 1:20 Ma iau ni hapuasne no kukuraina ta ira liman ma iruo na tiding ing u te nes tano kata na limagu ma ira liman ma iruo na kinkinis na lulungo mah. Ira liman ma iruo na tiding diet ira angelo ta ira matanaiabar na lotu ta ira liman ma iruo na pise na hala. Ma ira liman ma iruo na kinkinis na lulungo diet ira matanaiabar na lotu ta ira liman ma iruo na pise na hala.
REV 2:1 “Nu pakat kaiken ra nianga tupas no angelo ta ira matanaiabar na lotu kenas Epesas. Iau ing iau palim tar ira liman ma iruo na tiding tano kata na limagu. Ma iau hanahaan nalamin ta ira liman ma iruo na kinkinis na lulungo di ga gil ma ra gol. Ma iau tange hoken:
REV 2:2 Iau palai taar ta ira numuat magingin ma ira numuat dadas na pinapalim mah. Ma iau palai taar bia muat te tur dadas ta ira tinirih. Iau nunure bia muat tur talur ira ut na sakena ma muat gate walar diet ing diet ga tange bia a apostolo diet iesen bia pataie. Ma muat ga nes kilam diet bia diet harabota mon.
REV 2:3 Muat te tur dadas ta ira tirtirih ma muat te kilingane ra ngunungut wara gaiegu. Ma muat pai malmalungo wara gilgil huo.
REV 2:4 “Iesen iau tung muat ma tiga linge ma aie hoken: muat te haan talur no numuat luena sinisip tupas iau.
REV 2:5 Muat na lik leh ra bilai na magingin muat te puko talur ie. Muat na lilik pukus ma muat na gil haruatne hoing nalua. Ma ing bia muat pa na lilik pukus, iau ni haan tupas muat ma ni hakari ise no numuat kinkinis na lulungo mekaia ra uno subaan.
REV 2:6 Iesen tiga linge i bilai ta muat ma i hoken: muat malentakuane ira magingin ta ira Nikoletian hoing iau mah, iau malentakuane.
REV 2:7 Sige tikai i tale bia na hadade kilam kaiken, na tahut bia na taram ira nianga no Halhaliana Tanuo i tangtange ta ira matanaiabar na lotu ta ira tamtaman. Sige tiga nong i harubu timaan ma i paas hasur ira walwalaam, iau ni bale tar ie bia na ien ta hunena tano daha na nilon nong i tur aram ra bilai na lalong harsakit ta God.
REV 2:8 “Nu pakat kaiken ra nianga tupas no angelo ta ira matanaiabar na lotu kenas Semerna. Iau no Luena ma no Hauhawatine. Iau ga maat ma iau ga lon baling. Ma iau tange hoken.
REV 2:9 Iau palai taar ta ira hinangul i kabit muat. Ma iau palai bia a maris muat ta ira linge kai napu. Iesen muat te kap ira tamat na haridaan meram naliu. Ma iau nunure bia diet ing diet tange bia a Iudeia diet, diet tange hagahe muat. Iesen diet pai Iudeia tutun. Taie. Diet la lalotu tupas Sataan mon ma ira udiet magingin na Iudeia.
REV 2:10 Waak muat burut ta ira harangungut i wara hinaan tupas muat. Nes baak! I hutet bia Sataan na halaka tari ta muat tano hala na harpidanau wara walwalar muat. Ma muat na kilingane ra ngunngutaan ra sangahul na bung. Iau sip bia muat na tur dadas ta ira numuat nurnuruan tuk bia muat na maat ta ira hinangul. Ma sige nong na gil huo, iau ni tabar ie ma no balaparik na lualua wara nilon.
REV 2:11 Sige tikai i tale bia na hadade kilam kaiken, na tahut bia na taram ira nianga no Halhaliana Tanuo i tangtange ta ira matanaiabar na lotu ta ira tamtaman. Sige tiga nong i harubu timaan ma i paas hasur ira walwalaam, pa na hiruo tano airuo na minaat.
REV 2:12 “Nu pakat kaiken ra nianga tupas no angelo ta ira matanaiabar na lotu kenas Pergamam. Iau ing iau palim no niani na wise nong i iaiaan ta ira iruo palpal bakut. Ma iau tange hoken:
REV 2:13 iau palai bia muat la kis taar he. Muat kis taar tano pise na hala ing ira matanaiabar kaia diet manga ru Sataan ing diet ru no udiet tamat na lualua. Iesen muat balik, muat la palpalim dit no hinsagu ma muat pai le haan talur ira numuat nurnuruan tagu. Ma muat ga ngan huo mah tano pakana bung di ga bu bing Antipas mekaia nalamin ta muat ta iakano pise na hala ing Sataan i la kiskis kaia. Ma Antipas nong ga hinhinawas ta ira tutun utagu ma pa ga haan sukun iakano uno pinapalim.
REV 2:14 Iesen iau ni tung muat ta ari a linge. A mon matanaiabar nalamin ta muat ing diet murmur ira harausur ta Balaam nong ga hausur Balak tano ngaas wara lamlamus harango ira Israel hoken: ga hausur diet wara ienien ira nian di ga tun hartabar tupas ira palimpuo me. Ma ga hausur mah diet tano sakana ninahon tika ma ra hahin.
REV 2:15 Huo at mon mah ari a mes nalamin ta muat ing diet la murmur ira harausur ta ira Nikoletian.
REV 2:16 Io kaik, muat na lilik pukus. Ma ing bia taie, iau ni hanuat gasien ma iau ni harubu ma diet ira mangana tunotuno huo ma no wise mekai ra hagu.
REV 2:17 Sige tikai i tale bia na hadade kilam kaiken, na tahut bia na taram ira nianga no Halhaliana Tanuo i tangtange ta ira matanaiabar na lotu ta ira tamtaman. Sige tiga nong i harubu timaan ma i paas hasur ira walwalaam, iau ni tabar ie ma tari a mana ing i susuhai. Ma iau ni tar tiga ponponiana haat tana. Ma tiga sigar hinsang di gate pakat tar ie tano haat. Ma aie sen at mon nong na hatur kawasei na nunure tar ie.
REV 2:18 “Nu pakat kaiken ra nianga tupas no angelo ta ira matanaiabar na lotu kenas Taiataira. Iau no Nati God. Ma ira iruo matagu dir ngan hoing ira karamena lulungo na iaah. Ma ira iruo kakigu dir pilpilakas hoing ra baras i kalkalangaruan tano dadas na iaah. Ma iau tange hoken:
REV 2:19 Iau palai taar ta ira numuat magingin ma ira numuat harmarsai. Ma iau palai ta ira numuat nurnuruan tagu ma ira numuat tinaram tupas iau. Ma iau nunure bia muat tur dadas ta ira tirtirih ma bia kaiken muat gilgil ira linge i manga bilai ta ing nalua.
REV 2:20 Iesen iau ni tung muat ma tiga linge ma aie hoken: muat la balbale leh iakano hahin ne Iesebel nong aie i tange bia a tangesot ie. Ma bia i hausur ira nugu tultulai i lamus harango diet bia diet na mur no sakana magingin na ninahon tika ma ra hahin ma bia diet na ien ira nian di ga tun hartabar tupas ira palimpuo me.
REV 2:21 Iau te tar ra pakana bung tana i haruat bia na lilik pukus. Ma sen pai taram.
REV 2:22 Io kaik, ni se tar ie tano uno suuh ma na kilingane ra tamat na ngunungut kaia tika ma diet ing diet te noh taar ma ira suana mes. Ma ni gil huo ing bia diet pa na lilik pukus.
REV 2:23 Iau ni ubu bing diet ing diet mur ie. Io kaik, ira matanaiabar na lotu ta ira tamtaman diet na nunure bia iau at nong iau nunure tar ira numuat lilik ma ira bala muat tikatikai. Ma iau ni balu pukus muat tikatikai haruat ma ira numuat gingilaan.
REV 2:24 Ma sen a subana ta muat ira matanaiabar kenas Taiataira, muat pai le mur kan ra sakana harausur. Muat pai le harausur ta kaike ra linge ta Sataan diet tange bia i mun ma i manga kikil suur. Ma iau pa ni hapupusak muat ma tiga mes na tinirih. Taie.
REV 2:25 Iau sip sen mon bia muat na palim dit ira tutun ing muat hatur kawase tuk taar bia ni hanuat.
REV 2:26 Sige tiga nong i harubu timaan ma i paas hasur ira walwalaam ma i gil haruatne hoira nugu sinisip tuk taar tano hauhawatine, io, iau ni tabar ie ma tiga kinkinis na harkurai hoing iau gate hatur kawase meram ho Mama. Na balaure ma na kure hadadas ira hunhuntunaan tano ula hanuo. Ma na parok gisiane diet hoira mangana gingop ing di gil ma ra pise.
REV 2:28 Ma iau ni tar mah no tiding na malaan tana.
REV 2:29 Sige tikai i tale bia na hadade kilam kaiken, na tahut bia na taram ira nianga no Halhaliana Tanuo i tangtange ta ira matanaiabar na lotu ta ira tamtaman.
REV 3:1 “Nu pakat kaiken ra nianga tupas no angelo ta ira matanaiabar na lotu kenas Sardis. Iau ing iau palim tar ira liman ma iruo na tanuo gar ta God ma ira liman ma iruo na tiding. Ma iau tange hoken: Iau palai taar ta ira numuat magingin. Ari diet lik bia muat lon taar iesen bia muat te maat.
REV 3:2 Muat na tangahun! Muat na hadadas ira numuat bilai na magingin ing i wara patpataam! Iau tange huo kanong iau te nes kilam ira numuat gingilaan bia pai tahuat haruat baak ma no sinisip tano nugu God.
REV 3:3 Io kaik, muat na lik leh ing muat gate hadade ma muat gate hatur kawase. Muat na lilik pukus ma muat na taram ine. Iesen bia muat pa na tangahun iau ni haan tupas muat hoing tiga ut na hisikoma. Ma muat pa na nunure no pakana bung bia ni haan tupas muat.
REV 3:4 “Iesen a bar nong nalamin ta muat kenas Sardis ing diet pai habilinge ira kiniasi diet. Io, diet na haan tika ma iau. Ma diet na sigasige ma ra ponponiana sigasigam kanong ira udiet tintalen i gamgamatien.
REV 3:5 Sige tiga nong i harubu timaan ma i paas hasur ira walwalaam, io, aie mah na sigam ira ponponiana sigasigam hoing diet. Ma pa ni suge se no hinsana tano pakpakat na nilon. Taie. Iau ni hinawas palai ra matmataan tano agu Sus ma ira uno angelo bia anugui.
REV 3:6 Sige tikai i tale bia na hadade kilam kaiken, na tahut bia na taram ira nianga no Halhaliana Tanuo i tangtange ta ira matanaiabar na lotu ta ira tamtaman.
REV 3:7 “Nu pakat kaiken ra nianga tupas no angelo ta ira matanaiabar na lotu kenas Piladelpia. Iau no halhaliana ma iau ing iau gil haruatne hoing iau tangtange. Ma iau hatur kawase no dadas ta Dawit wara pinapos ma wara binanus. Ma ing bia iau papos, pai tale tikai bia na banus. Ma ing bia iau banus, pai tale tikai bia na papos.
REV 3:8 Iau palai taar ta ira numuat magingin. Ma iau nunure bia muat dadas dahin baak. Muat te murmur ira nugu nianga ma muat pai le harus ise no hinsagu. Io kaik, iau te papos tiga matanangas ra matmataan ta muat. Ma pa na tale bia tikai na banus.
REV 3:9 Nes baak! Ni gil hohe ta diet ing diet murmur Sataan? Diet tange bia diet ira Iudeia iesen diet pai Iudeia tutun. Taie. Diet harabota mon. Io, iau ni gil hoken. Iau ni hagut diet bia diet na tutudung ra parparas na kaki muat. Ma diet na nunure bia iau sip muat.
REV 3:10 Iau te tange ta muat bia muat na tur dadas ta ira tinirih. Ma muat te taram kan ra nianga. Io kaik, iau ni balaure bat muat sukun no pakana bung na harwalar nong na haan tupas no ula hanuo bakut. Ma iakano pakana bung na hanuat wara walwalar diet ing diet lon tano ula hanuo.
REV 3:11 “Hutet um ma ni hanuat. Muat na palim dit ira tutun ing muat hatur kawase waing tikai kabi kap leh ira numuat balaparik na lualua.
REV 3:12 Sige tiga nong i harubu timaan ma i paas hasur ira walwalaam, io, iau ni hatur ie wara kasong tano tamat na hala na lotu tano nugu God. Ma pa nale haan laah mekaia. Ma iau ni pakat no hinsana no nugu God tana, ma no hinsana mah no tamat na pise na hala tano nugu God. Ma aie no sigar Ierusalem nong na hansur meram ra mawe hono nugu God. Ma iau ni pakat mah no sigar hinsagu tana.
REV 3:13 Sige tikai i tale bia na hadade kilam kaiken, na tahut bia na taram ira nianga no Halhaliana Tanuo i tangtange ta ira matanaiabar na lotu ta ira tamtaman.
REV 3:14 “Nu pakat kaiken ra nianga tupas no angelo ta ira matanaiabar na lotu kenas Laudisia. Iau ing iau gil haruatne hoing iau tangtange. Iau no Ut na Hinhinawas ta ira tutun. Ma ing bia iau hinhinawas iau pai harabota. Taie. I tale bia tikatikai na nurnur tano nugu hinhinawas. Ma iau no suruno ira linge bakut ing God gate hakisi.
REV 3:15 Ma iau palai taar ta ira numuat magingin. Muat pai maduhan ma muat pai mamahien. Iau sip bia muat gor maduhan bia mamahien.
REV 3:16 Io kaik, iau ni iabisane ise muat mekaia ra hagu kanong muat pai mamahien bia maduhan balik.
REV 3:17 Tikatikai ta muat i tange bia, ‘A watong iau. Iau te hatur kawase ra haleng na kinewa. Iau pai supi tiga linge.’ Iesen muat pai nes kilam habaling muat bia a mala hahin muat. Muat pai palai bia a maris muat ma a pulo muat. Ma muat pai nunure bia a tabuna sulu muat.
REV 3:18 Iau haragat muat bia muat na kul ra bilai na gol mekai ho iau, a mangana gol ing iau te hapalpalon ie tano iaah wara kapkap se ira bilinge. Muat na kukul huo waing muat naga watong tutun. Ma iau haragat mah muat bia muat na kul ra ponponiana sigasigam mekai ho iau wara numuat sigasigam. Io kaik, muat pa na hirhir ma ira numuat tabuna sulu. Ma na tahut mah bia muat na kul ra bilai na waiwai wara bulbul ta ira mata muat, muat naga nes timaan ira linge.
REV 3:19 “Iau la timtibe pinpin ma iau la haphapidanau diet bakut ing iau sip diet. Io kaik, na tahut bia na mamahien ira bala muat bia muat na lilik pukus.
REV 3:20 Nes baak! Iau tur kai ra matanangas ma iau piipidil. Bia sige ta tikai i hadade no ingagu ma i papos no matanangas, io, iau ni laka ma ni iaan tika mei.
REV 3:21 “Iau ga harubu timaan ma iau ga paas hasur ira walwalaam. Io kaik, iau ga kis tika ma no agu Sus tano uno tamat na kinkinis na harkurai. Ma sige tiga nong i harubu timaan mah ma i paas hasur ira walwalaam, io, ni haut leh ie bia na kis tika ma iau tano nugu tamat na kinkinis na harkurai.
REV 3:22 Sige tikai i tale bia na hadade kilam kaiken, na tahut bia na taram ira nianga no Halhaliana Tanuo i tangtange ta ira matanaiabar na lotu ta ira tamtaman.”
REV 4:1 Io, ma namur ta kaike iau ga nanaas, ma iau ga nes tiga matanangas ga tapapos taar aram ra mawe. Ma no luena ingana tiga nong iau ga hadade, ga ngan hoing tiga tahur ma ga tange hoken: “Nu hanut ukai. Ma ni hamines taam bia asa na hanuat namur ta kaike.”
REV 4:2 Io, kaik at mon no dadas tano Halhaliana Tanuo ga pulus iau ma menalua tagu iau ga nes tiga tamat na kinkinis na harkurai kaia ra mawe.
REV 4:3 Ma nong ga kis taar tana ga tatalen hoing ira bilai na mangana haat ing diet pilpilakas. Ma tiga tukularam ga tur luhutane no tamat na kinkinis na harkurai ma ga pilpilakas hoing tiga bilai na haat sakit.
REV 4:4 Ma airuo sangahul ma ihat na mes na kinkinis na gil harkurai diet ga tur luhutane tar no tamat na kinkinis na harkurai. Ma airuo sangahul ma ihat na nongtamat diet ga kisi tar ira kinkinis na gil harkurai. Ma ponponiana ira udiet sigasigam. Ma ira balaparik na lualua di ga gil ma ra gol ga kis taar ta ira ulu diet.
REV 4:5 Ma ga hile tika ma ra parparara mekaia ra tamat na kinkinis na harkurai. Ma a liman ma iruo na lulungo diet ga kis taar menalua tano tamat na kinkinis na harkurai. Ma diet ira liman ma iruo na tanuo gar ta God.
REV 4:6 Ma menalua mah tano tamat na kinkinis na harkurai tiga subaan hoira tes. Ma ga nanaas bia di ga gil ie ma ra galas. Ma ga manga palai harsakit. Ma hutet luhutane no tamat na kinkinis na harkurai, aihat na lilona linge. Ma ira mata diet ga banot bakut tar ira tamai diet.
REV 4:7 Io, ma no luena lilona linge ga nanaas hoing tiga laion ma no airuo hoing tiga bulumakau. No matmataan tano aitul ga tatalen hoing tiga tunotuno. Ma no aihat ga nanaas hoing tiga malaba i pupungo haan.
REV 4:8 Ma tikatikai ta diet ira ihat na lilona linge a liman ma tikai na babana tikai. Ma ira mata diet tikatikai ga banot ira tamai diet ma menapu mah ta ira baba diet. Ma hathatikai diet pa na sangeh wara tangtange bia, “I halhaal, i halhaal, i halhaal, God, no Watong, no Dadasine. Ma aie nong ga lon nalua, ma i lon kaiken, ma na lon mah namur.”
REV 4:9 Io, ma ira lilona linge diet la pirpirlat ma diet la hatamat nong i kis taar tano tamat na kinkinis na harkurai. Ma diet la tangtanga tahut mah ta nong i la lalon hathatika.
REV 4:10 Ma ing bia diet gilgil huo ira iruo sangahul ma iruo na nongtamat diet la pukpuko taar menalua ta nong i kis taar tano tamat na kinkinis na harkurai. Ma diet la lotu tupas ie nong i la lalon hathatika. Ma diet la isise tar ira udiet balaparik na lualua napu menalua tano tamat na kinkinis na harkurai ma diet la tangtange hoken:
REV 4:11 “God no numehet Watong, i takodas bia da hatamat ugu, ma bia da ru ugu. Ma i takodas bia u hatur kawase nora dadas. Warah, kanong u ga hakisi ira linge bakut. U ga hakisi diet haruat ma no num sinisip. Ma diet lon hoing u sip huo.”
REV 5:1 Io, ma iau ga nes nong ga kis taar tano tamat na kinkinis na harkurai ga palim tar tiga pakpakat ma no kata na limana. Ma a mon pakpakat tana ta ira iruo palpal bakut. Ma di ga bulut bat ie ma ra liman ma iruo na bulbulut.
REV 5:2 Ma iau ga nes tiga dadas na angelo ga kakongane ma ra tamat na ingana hoken: “I takodas ta sige bia na papike ira bulbulut ma na papos no pakpakat?”
REV 5:3 Iesen pai tale ta tikai aram ra mawe ma kai ra pise ma menapu tano pise mah bia na papos no pakpakat naga nes kenam narako tana.
REV 5:4 Io, iau ga manga suah kanong di ga sisilih puo ta tiga nong i takodas tana bia na papos no pakpakat naga nes kenam narako tana.
REV 5:5 Ma tikai ta ira nongtamat ga tange tagu, “Waak u susuah. Nes baak! No Laion mekaia tano huntunaan Iuda aie no but na bulumur ta Dawit. Ma i te harubu timaan ma i te paas hasur ira walwalaam, kaik i talei bia na papike ira liman ma iruo na bulbulut ma na papos no pakpakat.”
REV 5:6 Ma iau ga nes um tiga Nat na Sipsip ga tur taar nalamin tano tamat na kinkinis na harkurai. Ma ira ihat na lilona linge ma ira nongtamat mah diet ga tur luhutane tar ie. Ma ga nanaas bia di gate bu bing ie. Ma a liman ma iruo na lakona ma a liman ma iruo na matana. Diet mon ira liman ma iruo na tanuo ta God ing i la tultule diet tano kidilona ula hanuo.
REV 5:7 Ma no Nat na Sipsip ga kap leh no pakpakat tano kata na limana nong ga kis taar tano tamat na kinkinis na harkurai.
REV 5:8 Ma ing bia gate gil tar huo, ira ihat na lilona linge tika ma ira iruo sangahul ma ihat na nongtamat diet ga puko taar napu menalua tano Nat na Sipsip. Ma diet bakut tikatikai diet ga palim tar tiga bilai na mangana ngaap. Ma a mon gingop di ga gil ma ra gol ta diet tikatikai. Ma diet ga hung taar ma ira kaabus i sangin kala mismisien. Ma kaike ra mangana kaabus ira sinasaring ta ira gamgamatien na matanaiabar tus ta God.
REV 5:9 Ma diet ga inge tiga sigar ninge. Ma aie hoken: “I takodas taam bia nu kap leh no pakpakat ma nu papike ira uno bulbulut, kanong di ga lau bing ugu, ma u ga kul leh no matanaiabar wara gar ta God ma no dem. Ma diet mekaia ta ira hunhuntunaan bakut, ma ira matahu nianga, ira hanuo tano ula hanuo bakut, ma ira mangana palatamainari.
REV 5:10 Ma u te was halaka diet tano num kinkinis na harkurai ma ra harbalaurai, bia diet naga gil ra pinapalim na ut na pakila lotu tupas no udahat God. Ma diet na balaure ma diet na kure no ula hanuo.”
REV 5:11 Io, ma iau ga nanaas ma iau ga hadade ira inga diet ira haleng na angelo. Ma no winawas ta diet ga haleng na arip sakit. Ma ira angelo diet ga tur luhutane no tamat na kinkinis na harkurai ma ira ihat na lilona linge ma ira nongtamat mah.
REV 5:12 Ma diet ga inge ma ra tamat na inga diet hoken: “I takodas bia da ru no Nat na Sipsip nong di ga lau bing ie! Ma i takodas bia da hatamat ie ma bia da pirlat ie! Ma i takodas mah bia i hatur kawase nora dadas ma no kinkinis na watong, ma no mintota, ma no baso!”
REV 5:13 Io, ma iau ga hadade no ninge ta diet ira linge bakut ing God gate hakisi. Diet meram ra mawe, mekaia ra pise, menapu tano pise, ma tano balana tes. Ma diet bakut diet ga inge hoken: “Hathatika da pirlat ma da ru ma da hatamat nong i kis tano tamat na kinkinis na harkurai, dir ma no Nat na Sipsip! Ma i takodas bia dir na harkurai hathatika.”
REV 5:14 Ma ira ihat na lilona linge dal ga tange, “Tutun sakit.” Ma ira nongtamat diet ga puko taar napu, diet gaam lotu tupas dir.
REV 6:1 Ma iau ga nas no Nat na Sipsip ga papike se no luena ta ira liman ma iruo na bulbulut, ma iau ga hadade tikai ta ira ihat na lilona linge ma no ingana ga haruat ma ra parparara gaam tange, “Nu mai!”
REV 6:2 Iau ga nanaas ma tiga ponponiana hos. Nong ga kisi tar ie ga palim tar tiga laplapot ma di ga tabar ie ma tiga balaparik na lualua. Ma i ga haan hoira umri i la wara hamhamau taman.
REV 6:3 Io, no Nat na Sipsip ga papike se no airuo na bulbulut ma iau ga hadade no airuo na lilona linge ga tange, “Nu mai!”
REV 6:4 Tiga mes na hos mah ga hanuat, a dardaranai. God ga tar ra harkurai ta nong ga kisi tar ie bia na kap se no malum tano ula hanuo waing ira matanaiabar diet naga ubu bing hargilasane diet. Ma di ga tar tiga tamat na wise na hinarubu tana.
REV 6:5 Ma no Nat na Sipsip ga papike se no aitul na bulbulut. Io, iau ga hadade no aitul a lilona linge ga tange, “Nu mai!” Io, iau ga nanaas ma tiga bungbungana hos ga hanuat ma nong ga kisi tar ie ga palim tar no linge wara walar tirtirih.
REV 6:6 Io, iau ga hadade hoing ra kaungana tiga nong ga hanuat me nalamin ta ira ihat na lilona linge gom tange bia, “A sam taburungan i wara hinanuat. Tiga da minmena wit mon na haruat ma ira harkul na pinapalim wara tiga kidilona bung. Ma aitul a da minmena bali na haruat ma ira harkul na pinapalim wara tiga bung mah. Iesen pa da haliare ira ina olip ma ira hilhilora wain.”
REV 6:7 Ma no Nat na Sipsip ga papike se no aihat na bulbulut ma iau ga hadade no aihat na lilona linge ga tange, “Nu mai!”
REV 6:8 Io, iau ga nanaas ma tiga kamkabusuana hos. A hinsana nong ga kisi tar ie, Ngaas na Minaat. Ma no Taman ta ira Minaat ga murmur hutet manamur tana. No Ngaas na Minaat ma no Taman ta ira Minaat dir, God ga tar ra harkurai ta dir wara tiga subana matanaiabar meram narako ta ira aihat na subana matanaiabar tano ula hanuo bakut, bia dir na ubu bing diet ma ra wise na hinarubu, ma bia dir na hatahuat ra taburungan ma ra minaset kaik diet naga maat, ma bia dir na tule tar ira sakana rakaia wara karkarat bing diet.
REV 6:9 Ma no Nat na Sipsip ga papike se no liman na bulbulut. Io, iau ga nanaas ma iau ga nes ira tanua diet ira matanaiabar ing diet ga hiruo wara gaiena ira nianga ta God ma wara gaiena ira udiet hinhinawas tano tutun. Ma diet ga kis taar menapu tano suuh na tun hartabar tupas God.
REV 6:10 Diet ga kakonga ma ra tamat na inga diet bia, “Dadas na Watong, augu no Halhaliana ma u tutun. Hunanges um nu kure ira matanaiabar tano ula hanuo ma nu hapidanau diet uta ing diet ga ubu bing mehet?”
REV 6:11 Di ga tabar diet tikatikai ma ra ponponiana sigasigam ma di ga tange ta diet bia diet na sangeh ta baak kanong God i te puo tar bia ari baak ta ira hinsaka diet ma ira haut diet, diet na hiruo mah. Ma diet na sangeh tuk taar bia kaike bakut diet na hiruo.
REV 6:12 Ma iau ga nes no Nat na Sipsip ga papike se no liman ma tikai na bulbulut. Io, tiga tamat na kunakunar ga hanuat ma no matana kasakes ga muruh hoira marut na maal bungbung. Ma no teka bakut ga daraan hoira de.
REV 6:13 Ma ira tiding diet ga puko ukai napu ra pise hoira masiana papus i la rusrus ing bia a baiangin i lihar diet.
REV 6:14 Ma no mawe ga panim laah hoira pakpakat di la puli. Ma ira uladih bakut ma ira mugurlamin di ga hakari diet talur ira udiet kinkinis.
REV 6:15 Ma ira tamat na lualua, ira ut na gil harkurai, ira umri, ira watong, ira ut na baso, ira tultulai, ma ing diet pai tultulai, diet ga mun ta ira matana haat ma menapu ta ira haat aram ta ira uladih.
REV 6:16 Diet ga tatau ira uladih ma ira haat, “Muat na puko bus mehet ma muat na suhe mehet ra matmataan ta nong i la kis taar tano tamat na kinkinis na harkurai ma sukun no ngalngaluan tano Nat na Sipsip.
REV 6:17 Mehet sip huo kanong no nudir tamat na bung na ngalngaluan i te hanuat um. Ma taie tiga nong na haruat tun at wara tuntunur dadas tana!”
REV 7:1 Ma namur ta kaike ra linge, iau ga nanaas ma aihat na angelo dal ga tur taar ta ira ihat na mansuk tano ula hanuo. Dal ga palim kawase tar ira ihat na matana dadaip waing pataie ta dadaip pa na hus no ula hanuo bia no tes ma ira ina daha.
REV 7:2 Iau ga nanaas ma tiga angelo ga hanhuat merau ra kasakes i la hanhanuat mekaia. Ma ga kap hawaat tiga hakilang tano lilona God. Ga tatau ma ra tamat na ingana tupas ira ihat na angelo ing God ga tar ra dadas ta dal wara halhaliare no ula hanuo ma no tes mah.
REV 7:3 No angelo ga tange, “Waak mutal haliare no ula hanuo ma no tes ma ira ina daha, tuk taar bia mehet na luana bul ra hakilang gar tano udahat God ta ira punare diet ira uno tultulai.”
REV 7:4 Ma di ga hinawase iau tano winawas uta diet ira matanaiabar ing di ga bul no hakilang gar ta God ta ira punare diet bia 144,000. Ma diet mekaia nalamin ta ira sangahul ma iruo na huntunaan ta Israel.
REV 7:5 Di ga bul no hakilang ta ira sangahul ma iruo na arip na matanaiabar tigatiga huntunaan: Iuda, Ruben, Gat, Aser, Napitali, Manase, Simion, Lewi, Isakar, Sebulon, Iosep, ma ne Beniamin.
REV 7:9 Namur ta iakan iau ga nanaas, ma tiga tamat na matanaiabar! Taie ta tiga nong pai gaar petlaar wara waswas diet bakut. Diet mekaia ta ira matahu mangana palatamainari, ma matahu hanuo ma matahu hunhuntunaan ma matahu nianga. Ma diet ga tur taar menalua tano tamat na kinkinis na harkurai ta God ma kaia ra matmataan tano Nat na Sipsip. Ma diet ga sigam tar ra ponponiana sigasige ma diet ga palim tar ra pakana baibai.
REV 7:10 Ma diet ga kakongane ma ra tamat na inga diet hoken: “A harhalon i la hanhanuat mekaia ho no udahat God nong i la kis taar tano uno tamat na kinkinis na harkurai, ma mekaia mah ho no Nat na Sipsip!”
REV 7:11 Io, ira angelo bakut diet ga tur luhutane tar no tamat na kinkinis na harkurai ma ira nongtamat ma ira ihat na lilona linge mah. Ma diet ira angelo diet ga puko napu, diet gaam tutudung menalua tano tamat na kinkinis na harkurai ma diet gom lotu tupas God, diet gaam tange hoken:
REV 7:12 “Mehet haut ta ira numuat nianga! Da pirhakasing no udahat God! A minamar i kis tana ma a ut na mintot ie! Da tanga tahut tana ma da ru ie! Ira dadas ma ira baso auno no udahat God hathatika! Amen!”
REV 7:13 Io, tiga nong ta ira nongtamat ga tiri iau, “Sige kaiken ra matanaiabar diet sigam tar ra ponponiana sigasige? Ma diet hanhuat meh?”
REV 7:14 Iau ga balui, “Nugu watong, iau pai nunure. Augu, u nunure tar.” Io, ga tange tagu, “Kaiken ra matanaiabar ing diet hanuat mekaia nalamin tano tamat na hinangul. Ma diet gate gis haponpon ira udiet sigasige ma ra dena no Nat na Sipsip.
REV 7:15 Diet ga gil hokaike kaik diet gi tur menalua tano tamat na kinkinis na harkurai ta God ma diet la tartaram tana ra bung ma ra kasakes mah narako tano uno hala na lotu. Ma nong i la kis taar tano tamat na kinkinis na harkurai na kis tika ma diet ma na nes bat diet.
REV 7:16 Diet pa na taburungan ma diet pa na maruk balin. No matana kasakes bia ta mangana mamahien mah pa na rang um diet kanong no Nat na Sipsip nong i la kis taar nalamin tano tamat na kinkinis na harkurai na balaure diet ma na lamus diet ukaia ta ira puat ing i la tartar ra nilon. Ma God na ros ise ira luur na mata diet.”
REV 8:1 Ma bia no Nat na Sipsip ga papike se no liman ma iruo na bulbulut pa di ga hadade ra kaungana ta tiga linge tiga subana pakana bung.
REV 8:2 Io, iau ga nes um ira liman ma iruo na angelo ing diet la tur taar ra matmataan ta God. Ma di ga tar ra liman ma iruo na tahur ta diet.
REV 8:3 Ma tiga mes na angelo ga hanuat. Ga palim tiga linge na gol di la tuntun ira kaabus i sangin kala mismisien. Io, ga hanuat gaam tur harue no suuh na tun hartabar nong di ga gil ie ma ra gol. Ma di ga tar ra haleng ta kaike ra mangana kaabus tana bia na dolowane pakur ma ira sinasaring ta ira matanaiabar gar ta God aram naliu tano suuh na tun hartabar nong i tur taar menalua tano tamat na kinkinis na harkurai.
REV 8:4 Ma ira mis ta ira kaabus tika ma ira sinasaring udiet ira matanaiabar gar ta God ga hanut mekaia ra limana no angelo uram ra matmataan ta God.
REV 8:5 Ma no angelo ga kap leh ira lakit mekaia ra suuh na tun hartabar gaam hahungi no linge di la tuntun ira kaabus i sangin kala mismisien tana. Ma ga se tar tano ula hanuo, gom parparara ma ga hilhile ma ga kunakunar.
REV 8:6 Io, ira liman ma iruo na angelo dal ga taguro wara pupuh ira liman ma iruo na tahur.
REV 8:7 No luena angelo ga puh no uno tahur. Io, a iaah ma ra tuo na ais tika ma ra de ga bureng suur taar tano ula hanuo. Io, tiga palpal tano ula hanuo ga lulungo, ma airuo, taie. Ma huo mah ta ira ina daha tano ula hanuo. Tiga subaan ga iaan ma airuo, pataie. Ma ira bilai na huro bakut ga iaan mah.
REV 8:8 Ma no airuo na angelo ga puh no uno tahur. Ma tiga linge nong hoira tamat na uladih ga lulungo taar ma di ga tapikanei uras tano tes. Ma tiga subaan tano tes ga kikios hoira de. Ma airuo subaan, taie.
REV 8:9 Ma tiga palpal ta ira lilona linge na tes ga maat. Ma airuo palpal, taie. Ma tiga subaan ta ira waga ma ira mangana mon mah ga sakena. Ma airuo, pataie.
REV 8:10 Ma no aitul na angelo ga puh no uno tahur. Ma tiga tamat na tiding nong i lulungo taar hoira pok daka ga puko laah meram ra mawe taar tiga subaan ta ira taah ma ira puat. Ma pa ga haan taar ta ira iruo subaan.
REV 8:11 Ma no hinsana no tiding bia, Malmalena. Ma tiga subaan ta ira taah ga mela, ma airuo subaan, taie. Ma a haleng na matanaiabar diet ga maat kanong diet ga mame kaike ra malmalena taah.
REV 8:12 Ma no aihat na angelo ga puh no uno tahur. Ma ga ngan hoing ira mes na tahur. Tiga subaan tano matana kasakes ga sakena, ma huo mah ta tiga subaan tano teka ma tiga palpal ta ira tiding. Io kaik, ira udiet murarang ga gumagumo. Pataie ta murarang ta tiga pakana bung ra kasakes, ma ra bung mah huo.
REV 8:13 Io, iau ga nanaas ma iau ga hadade ra ingana tiga malaba ga pupungo aram ra mauho. Ma ga kakonga ma ra tamat na ingana hoken: “Maris, maris, maris ta diet bakut ing diet kis taar tano ula hanuo kanong i manga hutet um bia ira aitul a mes na angelo dal na puh ira udal tahur!”
REV 9:1 Ma no liman na angelo ga puh no uno tahur. Ma iau ga nes tiga tiding nong gate puko taar tano ula hanuo. Ma di ga tar ra dadas tana wara papos no lulur nong pataie ta hauhawatine tana.
REV 9:2 Io, ga papos no matanangas tano lulur ma ra mis ga husuanga huat hoing ra mis ta tiga tamat na iaah sakit. Ma ira mis meras tano lulur ga pulus no murarang tano kasakes ma ga hakankado no mauho.
REV 9:3 Ma ira kubawa diet ga hansur tano mis taar tano ula hanuo. Ma di ga tar ra dadas ta diet haruat ma ira dadas ta ira ikala.
REV 9:4 Ma di ga tange tar ta diet bia waak diet haliare tiga mangana huro ma ira ina daha. Ga tale diet wara hanghagahe sen mon ira matanaiabar ing bia pataie ta hakilang ta God ta ira punare diet.
REV 9:5 Pa di ga haut leh ira kubawa bia diet na karat bing ira tunotuno. Taie. Ga tale diet bia diet na manga hangungut hasakitne mon ira matanaiabar ta ira liman na teka. Ma ing bia diet ga hangungut ira matanaiabar, iakano ngunngutaan i haruat ma ira ngunngutaan ta ira harding na ikala.
REV 9:6 Ma ta ira balana kaike ira liman na teka, ira matanaiabar diet na sisilih ta ngaas bia diet na maat ma sen diet pa na nes leh ie. Diet na sip bia diet na maat iesen no minaat na pas diet.
REV 9:7 Ira kubawa diet ga nanaas hoira hos i taguro wara hinaan laka tiga hinarubu. Ta ira ulu diet a mangana linge hoira balaparik na gol. Ma ira matmataan ta diet hoira matmataan ta ira tunotuno.
REV 9:8 Ira pakana hi diet i taltalona suur hoira hina hahin. Ma ira ngise diet hoira ngisena laion.
REV 9:9 Ma ira bangbango diet ga pupulus taar ma ra pala riam hoira bahbahit. Ma no ingana ira baba diet ga kakel hoira haleng na hos diet la salsal hagasiane ira karis wara hinarubu.
REV 9:10 Ma a mon kuru diet ma ra harding ine hoira harding na ikala. Ma ira dadas wara hangungut ira matanaiabar ta ira liman na teka i kis narako ta ira kuru diet.
REV 9:11 Audiet tiga tamat na lualua nong i kure diet. Aie no angelo mekaia ra lulur. Ma no hinsana tano nianga gar na Israel bia Abadon, ma tano nudahat nianga, no Ut na Halhaliarai.
REV 9:12 No luena hinangul nong di ga tanga “Maris” utana te pataam. Iesen airuo na hinangul baak kana na hanuat.
REV 9:13 Ma no liman ma tikai na angelo ga puh no uno tahur. Ma iau ga hadade a ingana tiga nong i hanuat me nalamin ta ira ihat na ngusuno tano suuh na tun hartabar nong i la kis taar ra matmataan ta God.
REV 9:14 Ma no ingana ga tange tano liman ma tikai na angelo bia, “Nu palas ira ihat na angelo ing di ga kubus kawase dal kaia tano tamat na taah Iuperetis.”
REV 9:15 Ma kaike ra ihat na angelo di gate tagure tar dal wara uta iakan ra pakana bung at, ma iakan at ra bung ma iakan at ra teka ma iakan at ra tinahon. Io, no angelo ga palas ise dal wara bubu bing tiga palpal ta ira itul a subaan ta ira matanaiabar tano ula hanuo.
REV 9:16 Ma iau ga hadade no winawas uta ira umri ing diet ga hanahaan ma ira hos, bia airuo maar na milion diet.
REV 9:17 Ira hos ma ing diet ga kisi tar diet, iau ga nes diet tano nugu ninanaas, ma diet ga tatalen hoken: ira bahbahit uta ira bangbango diet ga nanaas hoira iaah ma no mawe, ma hoira ulu diet ira laion. Ma a mon iaah, a mis, ma solam ga hansur ta ira ha diet.
REV 9:18 Ma tiga palpal ta ira itul a subaan ta ira matanaiabar tano ula hanuo diet ga hiruo na minaat ta kaike ira itul a hinangul. Diet ga maat tano iaah, no mis, ma tano solam ing ga hansur ta ira ha diet ira hos.
REV 9:19 Ma ira dadas ta ira hos iakana ta ira ha diet ma ta ira kuru diet kanong ira kuru diet i haruat ma ira sui. A mon ulu diet ing diet la hangungut ira matanaiabar me.
REV 9:20 Ma diet ing diet pai hiruo ta kaike ra itul a hinangul, diet pa ga lilik pukus talur ira udiet palimpuo. Diet pa ga sangeh wara lalotu tupas ira sakana tanuo ma ira palimpuo di ga gil ma ra gol, siliwa, baras, haat, bia daha. Kaike ra palimpuo diet pai tale wara ninaas bia hinadoda bia hinahaan, iesen ira matanaiabar diet pa ga sangeh wara lalotu tupas diet.
REV 9:21 Ma diet pa ga lilik pukus mah ta ira udiet magingin wara ubu bing bia tunotuno, ma ira udiet hargilala, ma ira udiet sakana magingin na ninahon tika ma ra hahin, ma ira udiet kikinau.
REV 10:1 Io, ma iau ga nes um tiga mes na dadas na angelo i hanansur meram ra mawe. Ga sigam tar tiga bahuto ma tiga tukularam ga kis aram naliu tano uluno. No matmataan tana ga haruat ma ra kasakes ma ira iruo kakine ga ngan hoing ra lamlamut na iaah.
REV 10:2 Ga palim tiga nat na pakpakat nong i kis tamapapos. Ga paas no tes ma no kata na kakine ma ga papaas namanse ma no kesa na kakine.
REV 10:3 Ma ga kakonga naliu ma ra tamat na ingana haruat ma no but na kinakel na laion. Ma ing bia gate kakonga huo, ira liman ma iruo na parparara diet ga ianga.
REV 10:4 Ma ing bia ira liman ma iruo na parparara diet gate ianga iau ga wara pakpakat. Iesen bia a ingana tiga nong meram ra mawe ga tange hadadas bia, “Pulus bat ira nianga ta ira liman ma iruo na parparara! Waak u pakpakat!”
REV 10:5 Ma no angelo nong iau ga nes ie i tur taar tano tes ma namanse ga tatik haut tar no kata na limana uram ra mawe.
REV 10:6 Ma ga sasalim ma no hinsane God nong i lon hathatika ma nong ga hakisi no mawe ma no pise ma no tes ma ira kaba linge narako ta dal. Ma no angelo ga tange, “God pa na halawaasne ira pakana bung bia na gil haruatne tano uno lilik.
REV 10:7 Ma ing bia no liman ma iruo na angelo na puh no uno tahur, io, God na gil haruatne ta ira uno harpingit i susuhai taar, hoing ga hinawase ira uno tultulai na tangesot ine.”
REV 10:8 Ma no ingana nong gate haianga iau meram ra mawe ga tange habaling ukai ho iau bia, “Nu haan, ma nu kap no pakpakat nong i tamapapos taar tano limana no angelo nong i tur taar tano tes ma namanse.”
REV 10:9 Io, iau ga haan taar ukaia tano angelo, iau gom saring ie bia na tar no nat na pakpakat tagu. Ma ga tange tagu hoken: “Nu kap leh ie ma nu ien ie. No tingem na kahonhon iesen bia na namnamien tano haam haruat ma ra tiri na imara.”
REV 10:10 Io, iau ga kap no nat na pakpakat mekaia hono limana no angelo ma iau ga ien ie. Ga namnamien haruat ma ra tiri na imara tano hagu. Iesen bia iau gate kanam ie, no tingegu ga kahonhon.
REV 10:11 Ma di ga tange tagu bia, “Nu ianga na tangesot baling at uta ira haleng na kaba matanaiabar ma ta ira hunhuntunaan. Ma nu ianga na tangesot mah uta ira matanaiabar ta ira kaba matahu nianga ma uta ira tamat na lualua.”
REV 11:1 Io, ma di ga tar tiga pakana pareng tagu hoing tiga linge wara hapupuo, io, ma no Watong ga tange tagu bia, “Nu haan ma nu hapupuo no tamat na hala na lotu ta God ma no suuh na tun hartabar. Ma nu was mah diet ing diet lotu kaia.
REV 11:2 Iesen waak u hapupuo no hera me nataman tano tamat na hala na lotu kanong di gate bale tar ie ta ira tabuna nurnuruan ma diet na papasuane no halhaliana pise na hala ra ihat sangahul ma iruo na teka.
REV 11:3 Ma iau ni tule ira nugu iruo ut na harpir. Ma dir na sigam ira sigasige na tapunuk ma dir na ianga na tangesot ra 1,260 na bung.”
REV 11:4 Ma dir kaike ra iruo, airuo ina olip ma airuo kinkinis na lulungo dir. Ma dir la tur taar ra matmataan ta God, no Watong tano ula hanuo.
REV 11:5 Ma ing bia sige tikai na walar wara hagahe dir, io, a iaah na hanuat ta ira ha dir ma na haliare kaike ing diet wara hanghagahe dir. Io kaik, ing bia tikai i sip bia na hagahe dir, na hiruo at huo.
REV 11:6 Ma kaike ira iruo dir hatur kawase ra dadas wara banbanus bat no mawe bia pa na bata ta ira pakana bung dir iangianga na tangesot. Ma dir hatur kawase mah ra dadas wara pukpukusane ira taah naga ngan hoira de ma wara laulawat no ula hanuo ta ira kaba mangana hinangul haruat ma ira udir sinisip.
REV 11:7 Ma bia dir te hapataam ira udir hinhinawas no rakaia na hanut meras ra lulur ma na harubu ma dir. No ana baso na lake dir ma na ubu bing dir.
REV 11:8 Ma ira minati dir na noh taar ra tingana ngaas tano tamat na pise na hala ing di ga lau hataba no udir Watong tano ula kabai kaia. Ma ing bia di tange ra nianga harharuat uta iakano pise na hala, di kilam ie bia Sodom bia Isip.
REV 11:9 Ma ira matanaiabar mekaia ta ira matahu hanuo ma matahu hunhuntunaan, ma ira matahu nianga ma matahu palatamainari, diet na ngokngok ta ira minati dir ra itul a bung ma sibana. Ma diet pa na kanan wara busbus dir.
REV 11:10 Ma ira matanaiabar tano ula hanuo diet na guama uta ira udir minaat. Diet na manga laro ma diet na hartabar hargilaas kanong kaike ra iruo tangesot dir ga manga hangungut diet.
REV 11:11 Ma tano nugu ninanaas iau ga nes bia manamur ta ira itul a bung ma sibana, a dadaip na nilon meram ho God ga laka ta dir. Ma dir ga taman tut baling ma diet ing diet ga nes dir diet ga manga ramramin.
REV 11:12 Io, ira iruo tangesot dir ga hadade a tamat na ingana tiga nong meram ra mawe. Ma ga tange ta dir bia, “Mur hanut ukai!” Io, dir ga haan uram ra mawe narakoman tiga bahuto ma diet ing diet ga malentakuane dir, diet ga ngokngok ta dir.
REV 11:13 Ma kaik at mon tiga tamat na kunakunar ga hagahe tiga subaan ta ira sangahul tano pise na hala. Ma a liman ma iruo na arip na matanaiabar diet ga hiruo na minaat tano kunakunar. Ma ira mes diet ga manga ramramin sakasaka, diet gaam pirlat no God nong i la kiskis aram ra mawe.
REV 11:14 Io, no airuo na hinangul nong di ga tanga “Maris” utana te pataam. Iesen no aitul a hinangul, dahin um ma na hanuat.
REV 11:15 Io, ma no liman ma iruo na angelo ga puh no uno tahur. Ma aram ra mawe ira tamat na inganari diet ga kakonga hoken: “Kaiken um no Watong tika ma no uno Mesaia i te hatahun no uno harbalaurai ma no uno harkurai tano ula hanuo. Ma na harkurai hathatika!”
REV 11:16 Ma ira iruo sangahul ma ihat na nongtamat ing diet la kis taar ta ira udiet tamat na kinkinis ra matmataan ta God, diet ga puko taar napu ma diet ga tutudung ma diet ga lotu tupas God.
REV 11:17 Ma diet ga tange, “No numehet Dadas na Watong God, nong u ga lon nalua ma kaiken mah, mehet tanga tahut taam kanong u te tur leh wara harbalaurai ma wara harkurai ma no num tamat na dadas.
REV 11:18 Ira tabuna nurnuruan ta ira hunhuntunaan bakut tano ula hanuo, diet ga bala ngalngaluan, iesen no pakana bung tano num ngalngaluan i te hanuat um. No pakana bung bia nu kure ira minaat i te hanuat. No pakana bung i te hanuat mah um bia nu tar ra bilai na harkul ta ira num tultulai ira tangesot, ma ta ira num gamgamatien matanaiabar tus, diet ing diet urur tano hinsaam, diet ira watong ma diet ira maris. Iesen no pakana bung i te hanuat wara halhaliare diet ing diet la halhaliare no ula hanuo.”
REV 11:19 Io, ma di ga papos no tamat na hala na lotu ta God aram ra mawe. Ma narako tano uno hala na lotu tamat, no linge na bulbul no kunubus ta God ga kis puasa. Ga hilhile ma ga manga parparara. Ga kunakunar ma ira but na tuo na ais ga puko.
REV 12:1 Io, ma tiga tamat na hakilang ga harapuasa aram ra mawe, ma i hoken: tiga hahin ga sigam tar no matana kasakes ma no teka menapu ta ira iruo kakena. Ma tiga balaparik na lualua, a sangahul ma iruo na tiding tana, ga kis taar tano uluno.
REV 12:2 Ga tianan taar ma ga hutet bia na kakaha. Ma a bulu ga papaas ie kaik gaam manga kup ma ra ngunungut.
REV 12:3 Io, tiga mes na hakilang ga harapuasa aram ra mawe, ma i hoken: kaia tiga tamat na dardarana sui. Ma a liman ma iruo na uluno ma a sangahul na lakona. Ma a liman ma iruo na balaparik na lualua ta ira uluno.
REV 12:4 No kuruno ga kurahe hasur tiga subaan ta ira itul a subaan ta ira tiding meram ra mawe ukai napu tano ula hanuo. Ma no tamat na sui ga noh taar menalua tano hahin i wara kinakaha bia na ien no natine ing at mon na kaha sei.
REV 12:5 Io, no hahin ga kaha tiga bulu na tunaan nong na balaure ma na kure hadadas ira hunhuntunaan tano ula hanuo bakut. Ma di ga ras leh no nat na bulu uram ho God tano uno tamat na kinkinis na harkurai.
REV 12:6 Ma no hahin ga hilau ukaia tano hanuo bia, tano katon God gate tagurei utana. Ma ga haan ukaia waing God na balaurei ra 1,260 na bung.
REV 12:7 Ma tiga rom ga hanuat aram ra mawe. Maikel ma ira uno angelo diet ga harubu ma no tamat na sui ma ira uno angelo.
REV 12:8 Ma sen no tamat na sui pa ga dadas haruat, kaik taie ta mauho utana ma ira uno angelo aram ra mawe.
REV 12:9 Ma di ga se hasur no tamat na sui. Ma aie at mon iakano sui menalua sakit. Di kilam ie bia no Ut na Hartutung, bia Sataan, nong i la lamlamus harango no ula hanuo bakut. Io, di ga se hasur ie ukai tano ula hanuo, tika ma ira uno angelo.
REV 12:10 Ma iau ga hadade ra tamat na ingana tiga nong aram ra mawe i tange bia, “No ut na hartutung nong i la tungtung ira hinsaka dahat ta Krais ra matmataan ta God ira pakana bung bakut, di te se hasur um ie meram ra mawe. Io kaik, kaiken um i palai bia no harhalon ta God i te hanuat. Kaiken um i te haminas no uno dadas bia a Tamat na Lualua ie. Kaiken um no uno Mesaia i te haminas no uno kinkinis na harkurai.
REV 12:11 Ira hinsaka dahat diet ga bul hasur no dadas tano ut na hartutung ma ra dena no Nat na Sipsip ma ta ira tutun diet ga hinhinawas ine. Diet pa ga manga lilik uta ira udiet nilon. Taie. Diet ga kanan bia diet na maat.
REV 12:12 Io kaik, i tahut bia muat bakut ing muat kis aram ra mawe, muat na guama! Iesen bia na sakena ta diet tano ula hanuo ma no tes, kanong no ut na hartutung i te hansur tupas muat! I manga ngalngaluan taar kanong i nunure bia ira uno pakana bung i kumkumine.”
REV 12:13 Io, ma ing bia no tamat na sui ga nes bia di gate se hasur ie ukai napu tano ula hanuo, ga tur leh wara paspasak no hahin nong gate kaha tar no bulu.
REV 12:14 Ma di ga tar ra iruo babana malaba tano hahin waing na pupungo ma dir ukaia tano hanuo bia, ta iakano katon God gate tagurei utana. Ma ga nanaas bia God na nes bat ie ta ira itul ma subana tinahon. Ma no tamat na sui pa na tale bia na hagahei kaia.
REV 12:15 Io, no tamat na sui ga maruane ra tamat na taah bia na salirane se no hahin.
REV 12:16 Iesen no pise ga harahut no hahin. No pise ga tamapapos wara kankanam no tamat na taah mekaia no hana no tamat na sui.
REV 12:17 Io, no tamat na sui ga manga ngalngaluan taar tano hahin ma ga haan laah wara hinarubu ma ira uno mes na natine. Diet ing diet la tartaram ira harkurai ta God. Ma diet la murmur no tutun Jisas ga hapuasne.
REV 12:18 Ma no tamat na sui um ga tur taar ra wasasar.
REV 13:1 Io, ma iau ga nes tiga rakaia ga hanhanuat meras na tes. A sangahul na lakona ma a liman ma iruo na uluno. Ma a sangahul na balaparik na lualua ta ira lakona. Ma di ga pakat ra hinsang wara tangtange hagahe God ta ira uluno.
REV 13:2 Ma no rakaia nong iau ga nes ie ga tatalen hoing tiga toktok na mangana laion. Ma ira kakena hoira kakana bear. Ma no hana hoira hana laion. Ma no tamat na sui ga tar no uno baso ma no uno tamat na kinkinis na harkurai ta iakano rakaia.
REV 13:3 Ma iau ga nes tikai ta ira uluno ma ga nanaas bia di gate katoi ma gate maat. Iesen no unien nong tiga uluno ga maat mei, gate maah. Io kaik, no kidilona hanuo diet ga karup mur no rakaia.
REV 13:4 Ma diet ga lotu tupas no tamat na sui kanong gate tar ra kinkinis na harkurai taar tano rakaia. Ma diet ga lotu tupas mah no rakaia, diet gaam tange bia, “Taie ta nong dir pai haruat ma no rakaia! Ma pai tale ta nong bia na harubu mei!”
REV 13:5 Io, God ga bale tar tano rakaia bia na ianga na butbut ma bia na tange hagahei. Ma ga bale tar mah ie bia na harkurai ra ihat na sangahul ma iruo na teka.
REV 13:6 Ma no rakaia ga tur leh wara tangtange hagahe God ma no hinsana mah. Ma ga tange hagahe mah no subaan God i la kis taar kaia ma diet bakut mah ing diet la kis taar aram ra mawe.
REV 13:7 Ma God ga bale tar tana bia na harubu ma ira gamgamatien na matanaiabar tus ta God ma bia na bul hasur diet. Ma ga bale tar mah ie bia na harkurai ta ira hunhuntunaan ma ira hanuo tano ula hanuo, ira matahu nianga, ma ira matahu mangana palatamainari.
REV 13:8 Ma hutet bia ira matanaiabar bakut tano ula hanuo diet na lotu tupas no rakaia. Iesen diet ing di gate pakat ira hinsa diet menalua tano hakhakisi tano ula hanuo, diet pa na lotu tupas ie. Ma tano pakpakat na nilon tano Nat na Sipsip nong di ga ubu bing ie, io, ta iakano pakpakat di ga pakat ira hinsa diet kaia.
REV 13:9 Sige tikai i haruat wara hadade kilam iakan, na taram ie.
REV 13:10 Ma ing bia God i te tibe tar bia da bul tiga nong tano hala na harpidanau, io, i tutun sakit bia na haan ukaia. Ma sige tikai ing God i te haut bia da kato bing ie, io, i tutun sakit bia da gil at huo. Io kaik, i palai bia na tahut bia ira gamgamatien na matanaiabar tus ta God diet na tur dadas ta ira hinelar ma diet na nurnur.
REV 13:11 Ma namur iau ga nes tiga mes na rakaia ga hanhanuat mekatiga ra pise. I ga mon airuo lakona hoira nat na sipsip ma sen bia ga iangianga hoing tiga sui.
REV 13:12 Ma ga papalim ma no tamat na dadas tano luena rakaia, kaia ra matmataan tana. Ma ga hapar ira matanaiabar tano ula hanuo bia diet na lotu tupas no luena rakaia nong ga langalanga sukun no unien ga maat mei.
REV 13:13 Ma git gilgil ira tamat na hakilang na kinarup. Ma tiga hakilang ga gil, bia ra iaah na hansur meram ra mawe ukai ra pise ra matmataan na haruat.
REV 13:14 Ma God ga bale tar tana bia na gilgil kaike ra hakilang na kinarup kaia ra matmataan tano luena rakaia. Io kaik, no airuo na rakaia ga petlaar wara hamhabato lamus ira matanaiabar tano ula hanuo. Io, ga lamus habato diet hoken: ga tange bia diet na gil tiga palimpuo tano rakaia nong di ga kato bing ie ma gom lon baling.
REV 13:15 Ma God ga bale tar mah no airuo na rakaia bia na tar ra dadaip na nilon tano palimpuo tano luena rakaia waing no palimpuo naga ianga ma naga hartula bia da bu bing diet bakut ing diet pai lotu tupas ie.
REV 13:16 Ma ga hartula mah bia da bul tiga hakilang ta ira kata na lima diet bia ira punare diet ira matanaiabar bakut. Ma di ga gil huo ta ira tamat ma ira tunotuno bia, ira watong ma ira maris, ira tultulai ma diet ing diet pai tultulai.
REV 13:17 Ma ga kure bia tiga nong pa na petlaar wara kunukul ma wara susuhur ing bia pataie ta hakilang tana. Ma a mangana hakilang hoken, bia da bul no hinsana bia no winawas utano hinsana.
REV 13:18 Io kaik, i tahut bia dahat na lilik timaan uta iakan. Sige tikai a ut na mintot ie, na tale bia na silihe tupas no kukuraina tano winawas tano rakaia, kanong no winawas i haruat ma no winawas gar na tunotuno. Ma no uno winawas aie hoken: 666.
REV 14:1 Io, ma iau ga nanaas, ma iau ga nes no Nat na Sipsip ga tur taar tano uladih Saion. Ma 144,000 na matanaiabar diet ga tur tika taar mei. Ma di gate pakat tar no hinsana ma no hinsana no ana Sus ta ira punare diet.
REV 14:2 Ma iau ga hadade a ingana tiga nong meram re mawe ma ga kakel hoing ra maririsuan na kinakel mekaia ho diet ing diet la tingting ira bilai na mangana ngaap. Ma ga kakel hoing ira sirsiroka ta ira taah ma ira parparara.
REV 14:3 Ma diet ga inge tiga sigar ninge menalua tano tamat na kinkinis na harkurai ma menalua mah ta ira ihat na lilona linge ma ira nongtamat. Ma pa ga tale ta tiga nong bia na dikil iakano ninge. Taie. Diet sen at mon kaike ra 144,000 ing God gate kul halangalanga leh diet tano ula hanuo.
REV 14:4 Ma diet kaike ing diet pa ga noh tika baak ma ira hahin, kaik diet pa gom habilinge ira udiet nilon. Diet kaike ing diet murmur no Nat na Sipsip ta ira katon i la hanahaan ukaia. God i te kul halangalanga leh diet me nalamin ta ira matanaiabar. Ma diet ira luena hartabar tupas God ma no Nat na Sipsip.
REV 14:5 Diet pai nunure ra harabota. Pai tale bia tikai na kilam tar tiga sakena ta diet.
REV 14:6 Io, ma iau ga nes tiga mes na angelo ma ga pupungo aram naliu ra mauho. Ma ga hatur kawase no tahut na hinhinawas nong pa nale pataam wara hinhinawase ira matanaiabar tano ula hanuo, diet ira matahu palatamainari, ira mangana hunhuntunaan, ira matahu nianga, ma ira matahu hanuo.
REV 14:7 Ma no angelo ga kakongane naliu hoken: “Muat na urur ta God ma muat na pirlat ie kanong no pakana bung tano uno harkurai i te hanuat um. Muat na lotu tupas ie nong ga hakisi no mawe ma no pise, no tes ma ira puat na taah.”
REV 14:8 Io, ma no airuo na angelo ga mur no luena gaam tange, “Di te manga haliare Babilon no tamat. Aie at nong ga hapar ira hunhuntunaan bakut bia diet na mame ira uno dadas na taah ing na gil ira tunotuno bia diet na pakile ira magingin na hilawa.”
REV 14:9 Io, ma no aitul na angelo ga mur dir gaam kakongane naliu bia, “Ing bia tikai na lotu tupas no rakaia ma no uno palimpuo, ma bia na kap no hakilang tano punarena bia no limana, io, aie mah na mame no dadas na taah na ngalngaluan gar ta God. Ma God pai dolowane pakur no uno dadas na taah na ngalngaluan ma ra taah. Taie. No uno dadas na taah i manga dadas taar at. Ma no tunotuno nong no ngalngaluan gar ta God na haan tupas ie, na kilingane ra tamat na ngunungut tano iaah ma ra solam kaia ra matmataan tano Nat na Sipsip tika ma ira halhaliana angelo.
REV 14:11 Ma no mis tano iaah nong i hangungut diet i la tumtubuala hathatika. Ma diet ing diet ga lotu tupas no rakaia ma no uno palimpuo, ma diet ing diet ga kap no hakilang tano hinsana, taie tun at audiet ta da sinangeh.”
REV 14:12 Io kaik, tiga linge i palai uta ira gamgamatien na matanaiabar tus ta God, diet at ing diet la murmur ira uno harkurai ma diet la nurnur ta Jisas, ma i hoken: na tahut bia diet na tur dadas ta ira hinelar.
REV 14:13 Io, ma iau ga hadade a ingana tiga nong meram ra mawe i tange, “Nu pakat hoken: ‘Tur leh ie kaiken, ma hatika, diet daan ing diet maat wara gaiena no Watong!’” Ma no Halhaliana Tanuo ga tange, “Masa! A tutun bia diet na sangeh ta ira udiet dadas na pinapalim kanong ira udiet tintalen na haan tika ma diet.”
REV 14:14 Io, ma iau ga nanaas ma tiga ponponiana bahuto. Ma nong ga kis taar tana ga ngan hoing Nong a Tunotunoi. Ma tiga balaparik na lualua di ga gil ie ma ra gol tano uluno. Ma ga palim tar tiga niani na wise.
REV 14:15 Ma tiga mes na angelo ga hanuat meram narako tano tamat na hala na lotu. Ma ga kakongane naliu taar ta nong ga kis taar tano bahuto hoken: “No pakana bung wara katkato leh ira matukena i te hanuat um kanong no ula hanuo i te matuko. Io kaik, nu kato leh ira matukena ma no num wise.”
REV 14:16 Io, nong ga kis taar tano bahuto ga kakato suur tano ula hanuo ma no uno wise, gom kap leh ira matukena mekaia.
REV 14:17 Io, ma tiga mes na angelo mah ga hanuat me narako tano tamat na hala na lotu aram ra mawe. Ma aie mah ga palim tiga niani na wise.
REV 14:18 Ma tiga mes na angelo balik nong i la balaure tar no iaah, ga hanuat mekaia tano suuh na tun hartabar. Ma ga kakongane naliu taar ta nong ga palim tar no niani na wise, gaam tange hoken: “Nu palim no num wise ma nu kut leh ira hunena tano hilhilorine no ula hanuo kanong ira hunena i te madar.”
REV 14:19 Io kaik, no angelo ga kakato suur tano ula hanuo ma no uno wise, gaam kut leh ira hunena tano hilhilorine. Ma ga se halaka diet taar tano katon bia God na papasuane diet ma no uno ngalngaluan.
REV 14:20 Ma God ga papasuane ira hunena no ula hanuo kaia nataman tano tamat na pise na hala. Ma no de ga saal laah mekaia ho God ga papasuane ira hunena kaia. Ga hung hut haruat ma ira ha diet ira hos. Ma ga saal hakakari aitul a maar na kilomita.
REV 15:1 Io, ma iau ga nes tiga mes na hakilang aram ra mawe ma ga manga tamat sakit. A liman ma iruo na angelo ma diet ga hatur kawase ra liman ma iruo na hinangul. Ma kaike ira haphapataam ine kanong narako ta diet no ngalngaluan ta God na pataam.
REV 15:2 Ma iau ga nes no tes ma ga nanaas hoing bia di ga gil ie ma ra galas. Ma ga nanaas mah bia a mon iaah tana. Ma iau ga nes mah no matanaiabar diet ga tur taar hutaten no tes. Ma diet ing diet gate paas hasur no rakaia ma no uno palimpuo ma no winawas tano hinsana. Ma diet ga palim tar ira bilai na mangana ngaap mekaia ho God.
REV 15:3 Ma diet ga inge tiga ninge. Aie gar tano Nat na Sipsip ma tane Moses no tultulai gar ta God. Ma i hoken: God, no Watong, no Dadasine, ira num pinapalim i manga tamat sakit. Ma augu no Tamat na Lualua ta ira hunhuntunaan tano ula hanuo, ma ira num magingin i takodas ma i haruat ma ira linge u te bul bia a tutun.
REV 15:4 No Watong, i tutun sakit bia ira matanaiabar bakut diet na ru ugu ma diet na hatamat no hinsaam, kanong augu sen mon u halhaal. Io, ira hunhuntunaan tano ula hanuo bakut diet na hanuat ma diet na lotu tupas ugu, kanong ira num takodasuana magingin i te hanuat puasa.
REV 15:5 Ma namur ta kaike ra linge iau ga nanaas uram ra mawe, ma iau ga nes no tamat na hala na lotu. Ma aie no hala na lotu di ga gil ie ma ra maal ing ira bura na harkurai ta God i kis taar kaia. Ma ga tamapapos taar.
REV 15:6 Ma ira liman ma iruo na angelo ing diet ga hatur kawase ira liman ma iruo na hinangul, diet ga hansur mekaia narako tano tamat na hala na lotu. Ira udiet sigasigam ga gamgamatien ma ga pilpilakas. Ma ira taltalin di ga gil ma ra gol, diet ga hataltalin tar ta ira bangbango diet.
REV 15:7 Ma tikai ta ira ihat na lilona linge ga tar a liman ma iruo na gingop ta ira liman ma iruo na angelo. Ma ira gingop ga hung taar ma no ngalngaluan ta God nong i kis hathatikai ma pa nale pataam.
REV 15:8 Ma no tamat na hala na lotu ga hung ma ra mis mekaia tano minarine God ma makaia tano uno dadas. Ma taie tikai pa ga tale bia na laka tano tamat na hala na lotu tuk taar bia ira liman ma iruo na angelo diet te hapataam ira udiet liman ma iruo na hinangul.
REV 16:1 Io, ma iau ga hadade a tamat na ingana tikai meram ra tamat na hala na lotu ga tange ta ira liman ma iruo na angelo bia, “Muat na haan, muat na burange bus no ula hanuo ma ira liman ma iruo na gingop na ngalngaluan ta God.”
REV 16:2 Io, ma no luena angelo ga haan gaam burange no uno gingop taar tano pise. Ma ira pala gaah na manuo ga banga huat ta ira matanaiabar ing no hakilang tano rakaia ga kis ta diet ma diet git lotu tupas no uno palimpuo.
REV 16:3 Io, ma no airuo na angelo ga burange no uno gingop taar tano tes. Ma no tes ga pukusane hoing ra de na minaat. Ma ira lilona linge bakut tano tes diet ga maat.
REV 16:4 Io, ma no aitul a angelo ga burange no uno gingop taar ta ira taah ma ira puat. Ma diet ga ngan hoira de.
REV 16:5 Ma iau ga hadade no angelo nong ga kure ira taah ga tange, “Augu no Halhaliana nong ga lon nalua ma u lon mah kaiken. Ma ing u harkurai huo no num harkurai i takodas. Kanong warah, diet ga bu bing ira num gamgamatien na matanaiabar tus ma ira num tangesot, ma ira de diet ga bureng. Io kaik, u te tar ira de ta diet bia diet na mame. Ma iakan ra harkurai i takodas harsakit, haruat ma ira linge diet ga gil.”
REV 16:7 Ma iau ga hadade a ingana tikai meram ra suuh na tun hartabar ga tange, “Masa! God, no Watong, no Dadasine, ira num harkurai i takodas ma i haruat ma ira linge u te bul bia a tutun.”
REV 16:8 Io, ma no aihat na angelo ga burange no uno gingop taar tano kasakes. Ma God ga bale tar no kasakes bia na rang ira tunotuno ma no uno tamat na mamahien.
REV 16:9 Ma no but na mamahien ga manga rang diet ma diet ga tange hagahe no hinsa God nong ga kure kaiken ra hinangul taar ta diet. Ma diet pa ga lilik pukus bia diet na pirlat ie.
REV 16:10 Io, ma no liman na angelo ga burange no uno gingop taar tano kinkinis na gil harkurai tano rakaia. Ma no kankado ga pulus ira subaan no rakaia ga kure tar. Ira matanaiabar diet ga karat ira karame diet ma no ngunungut.
REV 16:11 Ma diet ga tange hagahe God kananam ra mawe kanong diet ga kilingane ra ngunungut ma diet ga ina manmanuo. Iesen diet pa ga lilik pukus ise ira udiet magingin.
REV 16:12 Io, ma no liman ma tikai na angelo ga burange no uno gingop taar tano tamat na taah Iuperetis. Ma no taah ga mamasa wara tangtagure no ngaas uta diet ira tamat na lualua merau ra kasakes i la hanhanuat mekaia.
REV 16:13 Io, ma iau ga nes aitul a sakana tanuo, dal ga nanaas taar hoira rokrok. Dal ga hansur tano hana no tamat na sui ma tano hana no rakaia ma tano hana no tangesot bisbis.
REV 16:14 Ma kaike ra itul a sakana tanuo dal ga gilgil ira hakilang na kinarup. Ma dal ga haan tupas ira tamat na lualua tano ula hanuo bakut wara kapkap hulungan diet wara hinarubu tano tamat na bung ta God no Dadasine.
REV 16:15 “Hadade baak! Iau ni hanuat hoing tiga ut na hisikoma! Na daan iakano nong i hangala taar ma i tagure tar ira uno sigasige hutet tana, bia kabi tabuna sulu ma na hirhir ra matmataan gar na haruat.”
REV 16:16 Io, ma dal ga lam hulungan ira tamat na lualua taar tiga katon nong di kilam ie ta ira nianga na Iudeia bia, “Armagedon.”
REV 16:17 Io, ma no liman ma iruo na angelo ga burange tar no uno gingop aram ra mauho. Ma tiga tamat na ingana tikai aram ra tamat na hala na lotu. Ma ga ianga meram ra tamat na kinkinis na harkurai, ga tange, “I te pataam um!”
REV 16:18 Ga hile ma ga parparara. Ma a mon tamat na kunakunar. Taie tiga kunakunar baak huo tur leh tano pakana bung bia God ga hakisi ira tunotuno kai ra ula hanuo. Iakan ra kunakunar ga manga tamat sakit.
REV 16:19 Ma no tamat na pise na hala ga tapaleng haitul. Ma ira mes na pise na hala tano ula hanuo diet ga tamadure sakasaka. Ma God ga lik leh Babilon no Tamat ma ga hamamoi ma no dadas na taah tano uno but na ngalngaluan.
REV 16:20 Ira mugurlamin diet ga panim laah ma pa di ga nes habaling ira uladih.
REV 16:21 Ma ira but na tuo na ais haruat ma ra haat ga puko meram ra mawe taar ta ira tunotuno. Ira tirtirih ta diet tikatikai ga haruat ma liman sangahul na kilogram. Ma ira tunotuno diet ga tange hagahe God kanong ga tar kaiken ra sakana hinangul gaam manga ubal diet.
REV 17:1 Io, ma tikai ta ira liman ma iruo na angelo ing diet ga palim tar ira liman ma iruo na gingop ga hanuat gaam tange tagu, “Mai, iau nigi hamines no harpidanau taam nong na haan tupas no tamat na hilawa na hahin nong i kisi tar ira taah.
REV 17:2 Ma ira tamat na lualua tano ula hanuo diet ga hilawa mei. Ira matanaiabar tano ula hanuo diet ga manga mur no uno magingin na hilawa hoing tikai i manga mom. Ma diet ga sakena hoing haleng na dadas na taah na hababa hagahe tikai.”
REV 17:3 Io, ma no dadas tano Halhaliana Tanuo ga pulus iau ma no angelo ga kap leh iau uram ra hanuo bia. Ma iau ga nes tiga hahin ga kis taar kaia. Ga kisi tar tiga dardarana rakaia. Ma di gate pakat tar ra hinsang tano rakaia. Ma kaike ra hinsang a hinsang wara tangtange hagahe God. No rakaia, a liman ma iruo na uluno ma a sangahul na lakona.
REV 17:4 No hahin ga sigam tar ra mangana dardarana sigasigam ing a tabi matana. Ma di gate hamar tar ie ma ra gol ma ira maririsuan na haat ma ira tulur a kalagi. Ma ga palim tar tiga gingop di ga gil ie ma ra gol. Ma no gingop ga hung taar ma ira uno bilingana magingin na hilawa ma ira linge da miligiruane.
REV 17:5 Ma di gate pakat tar a hinsang tano punarena ma no kukuraina ga susuhai. Ma no hinsang hoken: “No Tamat na Babilon, no pawasi diet ira hilawa ma no burena ta ira miligiruana linge tano ula hanuo.”
REV 17:6 Ma iau ga nes kilam no hahin bia gate manga mame ra haleng de diet ira gamgamatien na matanaiabar tus ta God ma diet mah ing diet ga hinhinawas uta Jisas. Ma kaike re de ga hangulonguloi gaam kure ira uno sakana sinisip hoing bia ga mame ra haleng na dadas na taah. Ma ing iau ga nes ie iau ga karup ma iau ga manga lilik.
REV 17:7 Ma no angelo ga tiri iau bia, “U karup warah? Nes no hahin ma nes no rakaia nong no hahin i kisi tar ie. U te nes bia a liman ma iruo na uluno ma ra sangahul na lakona. I tutun bia no kukuraina ta dir i susuhai taar. Iesen iau ni palas tar ie taam.
REV 17:8 No rakaia nong u te nes ie ga lon nalua. Kaiken um, pataie. Namur na hanut meras napu tano lulur pa ta hauhawatine, ma na haan taar tano rana hiniruo. Ma ari ing diet kis taar tano ula hanuo diet na karup. Diet ing pa di ga pakat ira hinsa diet tano pakpakat na nilon menalua tano hakhakisi tano ula hanuo. Diet na karup ing diet nes no rakaia kanong ga lon nalua, taie um kaiken, ma na hanuat namur.
REV 17:9 “Sige i sip bia na palai ta iakan, i tahut bia na lilik timaan ma ra minminonas. Ira liman ma iruo na uluno, diet ira liman ma iruo na uladih ing no hahin i kisi tar.
REV 17:10 Ma diet ira liman ma iruo na tamat na lualua mah. A liman diet te panim laah. Tikai um kana, ma no mes pai hanuat baak. Iesen ing bia na hanuat na lon taar mon ta dahin.
REV 17:11 No rakaia nong ga lon nalua ma kaiken um pataie, aie no liman ma itul na tamat na lualua. Ma no uno kinkinis i haruat ma diet ira liman ma iruo ma na haan at tano rana hiniruo.
REV 17:12 “Ma ira sangahul na lakona u te nes, diet ira sangahul na tamat na lualua. Diet pai hatur kawase baak ra kinkinis na harkurai. Namur diet na kis na harkurai tika ma no rakaia. Iesen no udiet kinkinis na harkurai na pataam gasien baling.
REV 17:13 Ma diet bakut, na tikai mon no udiet lilik. Ma diet na tar ira udiet dadas ma ira udiet kinkinis na harkurai taar tano rakaia.
REV 17:14 Ma diet na tut na hinarubu ma no Nat na Sipsip. Iesen no Nat na Sipsip na paas hasur diet kanong aie no Tamat na Watong ta ira watong bakut ma aie no Tamat na Lualua ta ira lualua bakut. Ma na tika ma ira tunotuno ing ga tatau diet ma ga gilamis diet. Ma diet ing diet manga mur timaan ie.”
REV 17:15 Io, ma no angelo ga tange tagu, “No kukuraina ta ira taah ing u ga nes no hilawa ga kisi tar diet i hoken: ira taah diet ira hunhuntunaan tano ula hanuo, ira mangana matanaiabar, ira mangana palatamainari, ma ira tunotuno ta ira matahu nianga.
REV 17:16 No rakaia tika ma kaike ra sangahul na lakona ing u te nes, diet na malentakuane no hilawa na hahin. Diet na haliare tun at ie ma diet na waak tar ie kaia ma taie um auno ta sigasigam. Diet na ien ira uratine ma diet na tun hadadoi ra iaah.
REV 17:17 Diet na gil huo kanong God na lamus ira udiet lilik bia diet na gil haruatne no uno sinisip. Ma na lamus diet bia diet na gil hoken: diet na tur tika, ma diet na tar ira udiet dadas tano rakaia bia na harkurai. Ma diet na gil huo tuk taar bia ira nianga gar ta God na hanuat tutun.
REV 17:18 Ma no hahin nong u te nes ie, aie no tamat na pise na hala nong i kure ira tamat na lualua tano ula hanuo.”
REV 18:1 Io, ma namur ta iakan iau ga nes tiga mes na angelo ga hanansur meram ra mawe. Ga kap ra tamat na kinkinis na harkurai. Ma no pilpilakas tano minarine ga rang no ula hanuo.
REV 18:2 Ma ga kakonga aram naliu sakit hoken: “I te puko. I te puko, no Tamat na Babilon. Ira sakana tanuo ma ira tadaar diet kis um kaia. Ma ira mangana bilingana maan ing di miligiruane, diet lon mah kaia.
REV 18:3 I te puko huo kanong ira hunhuntunaan bakut tano ula hanuo diet ta mame ira uno dadas na taah ing git lamlamus ira tunotuno wara hilawa. Ira tamat na lualua tano ula hanuo diet ga noh tika mei. Ira ut na susuhur diet ga kap ira udiet kinkinis na watong ta ira uno haleng na masmasingan.”
REV 18:4 Io, ma iau ga hadade a ingana tiga mes meram ra mawe ga tange, “Muat haan sukun ie, nugu matanaiabar! Muat mai! Muat kabi laka ta ira uno sakana magingin. Ma muat kabi laka mah ta ira uno ngunngutaan.
REV 18:5 Ira uno sakana magingin i te hung hut um uram muk ra mawe. Ma God i te lik leh ira uno sakena.
REV 18:6 Muat na gil tana hoing ga gil huo ta muat. Ga hagahe muat. Io kaik, muat na manga hagahe balik ie. Ga hamamo muat ma ra dadas na taah na ngunngutaan. Io kaik, muat na hamamo ie ma ra dadas na taah wara tamat na ngunngutaan.
REV 18:7 Ga hamar habaling ie ma ga tabar habaling ie ma ra bilai na linge sakit. Io kaik, muat na balu pukus ie haruat ma no uno magingin. Iesen muat na tabar ie ma ra ngunngutaan ma muat na gil hasusuah ie. I tange habaling at tana bia, ‘Iau no hahin ta tiga tamat na lualua. Iau pai makosa. Ma iau pa ni le tapunuk.’
REV 18:8 Io kaik, kaiken ra mangana hinangul na haan tupas hagasiaan ie. Na maset, na tapunuk, ma na sam ra tamat na taburungan. Ma na do tano iaah, kanong God no Watong nong i kure ie huo a dadasinei.
REV 18:9 “Ira tamat na lualua tano ula hanuo diet git hilhilawa mei. Ma diet git tiktika mei wara kapkap ira bilai na linge sakit. Ma ing diet na nes no mis tano iaah nong i tun hadadoi, diet na suah ma diet na tapunuk utana.
REV 18:10 Diet na ramramin tano uno ngunngutaan. Io kaik, diet na tur taar tapaka tana, diet na suah, ma diet na tange hoken: ‘Maris, maris taam, Babilon. Augu no tamat ma no dadas na pise na hala! U te hiruo gasien at mon!’
REV 18:11 “Ira ut na susuhur diet na suah ma diet na tapunuk panei kanong taie ta tikai wara kulkul habaling ira udiet minsik.
REV 18:12 Taie ta tikai wara kulkul ira udiet gol, ira udiet siliwa, ira udiet maririsuan na haat, ma ira udiet tulur a kalagi. Ma tikai pa na kul mah ira udiet matahu bilai na sigasigam ing a tabi matana, ira mangana bilai na daha, ma ira bilai na linge di gil ma ra ngisena wawaguai, bia ra daha ing a tabi matana, bia ra baras, bia ra pala riam, bia ra bilai na haat.
REV 18:13 Ma taie ta tikai mah wara kulkul ira matahu linge i huhur kala mismisien, ira dadas na taah, ira tirina olip, ira pat na wit, ira bulumakau, ira sipsip, ira hos, ira karis, ma ira tunotuno mah wara tultulai.
REV 18:14 “Ma diet na tange tana, ‘Ira bilai na linge u ga sip bia nu hatur kawase, diet te panim laah. Ira num kinewa ma ira minamarim diet te panim laah mah. Pa nu nes tupas habaling at diet.’
REV 18:15 Ma ira ut na susuhur ing diet ga kap ira udiet kinkinis na watong tana, diet na tur taar tapaka. Diet na ramramin tano uno ngunngutaan. Diet na suah ma diet na tapunuk.
REV 18:16 Ma diet na kakongane bia, ‘Maris, maris taam, augu no tamat na pise na hala! U ga sigam ira matahu sigasigam ing a tabi matana. U ga hasigam habaling ugu ma ra gol ma ira maririsuan na haat ma ira tulur a kalagi.
REV 18:17 No num tamat na kinkinis na watong hokaiken i te pataam gasien!’ Ira matahu taan tes diet na tur tapaka.
REV 18:18 Ma ing diet nes no mis tano iaah nong i tun hadadoi, diet na tange, ‘Taie um ta tiga mes na pise na hala ga haruat ma iakan ra tamat na pise na hala.’
REV 18:19 Diet na se bus ira ulu diet ma ra kaabus wara hamines no udiet tapunuk. Diet na suah ma diet na kakonga bia, ‘Maris, maris tano tamat na pise na hala! Diet bakut ing diet git hanhan hurbit ta ira udiet mon ares na tes, diet ga kap ira udiet kinkinis na watong mekaia ho ie. I te hiruo gasien!
REV 18:20 Muat aram ra mawe, muat na guama uta kaike i haan tupas ie. Muat ira gamgamatien na matanaiabar tus ta God ma muat ira apostolo ma muat ira tangesot, muat na guama. God i te kure hagahei haruat ma ira uno sakana gingilaan ga gil ta muat.’”
REV 18:21 Io, ma tiga dadas na angelo ga rakun tiga tamat na haat sakit, gaam sei uras na tes. Ma ga tange, “Da manga se haliare hasur no tamat na pise na hala Babilon hokaiken. Ma pa da le nes tupas habaling ie.
REV 18:22 Di git hanhadade ira maririsuan na ninge ta ira ut na ninge ma ira ut na bu ngaap ma ira ut na hus tulaal ma ira ut na puh tahur. Iesen pa da le hadade habaling diet huo kaia ho ugu. Ira matahu ut na pinapalim, pa da le nes habaling diet kaia ho ugu. Ma pa da le hadade habaling mah diet ing diet la ringrigis ira pat na wit kaia ho ugu.
REV 18:23 Ira lulungo pa nale murarang kaia ho ugu. Ira ingana ira sigar tinolen, pa da le hadade habaling diet kaia ho ugu. Ira num ut na susuhur diet ga tamat ta ira tunotuno tano ula hanuo bakut. U ga hasakit ta ira hunhuntunaan hoing tiga ut na ser magirmagir, kaik u gaam habato lamus diet.”
REV 18:24 God ga hapidanau Babilon kanong di ga nes leh ira de diet ira tangesot ma ira gamgamatien na matanaiabar tus ta God kaia ta iakano pise na hala. Masa! Di ga nes leh ira de diet bakut kaia ing di ga ubu bing diet tano ula hanuo.
REV 19:1 Io, ma namur ta iakan iau ga hadade a kinakel haruat ma ra harat gar na matanaiabar aram ra mawe. Ma diet ga kakakongane bia, “Da pirlat no Watong! I palai bia no udahat God a ut na harhalon ie. Ma no minarine ma no ana baso i palai mah kanong ing na kure tikai, no uno harkurai i takodas ma i haruat ma ira linge i te bul bia a tutun. Da pirlat ie huo kanong i te kure hagahe no tamat na ut na hilawa nong ga lamus harango no ula hanuo ma no uno magingin na hilawa. No ut na hilawa ga bu bing ira tultulai gar ta God, kaik God i te bu bing ie.”
REV 19:3 Ma diet kakonga balin hoken: “Da pirlat no Watong! No mis tano iaah nong i tun hadado no hilawa na hanhanut hathatika ma pa nale pataam.”
REV 19:4 Io, ira iruo sangahul ma ihat na nongtamat ma ira ihat na lilona linge, diet ga puko suur diet gaam lotu tupas God nong i ga kis taar tano tamat na kinkinis na harkurai. Ma diet ga tange bia, “Masa! Da pirlat no Watong!”
REV 19:5 Io, ma a ingana tikai ga hanuat mekaia ho ra tamat na kinkinis na harkurai, gaam tange, “Muat ira tultulai ta God ing muat ru ie, muat na pirlat ie! Muat bakut muat na gil huo, muat ira maris ma muat ira watong!”
REV 19:6 Io, ma iau ga hadade a kinakel hoing ra harat ta ira tamat na matanaiabar. Ga kakel hoira tamat na sinsinaha ma ra but na parparara. Ma diet ga kakongane bia, “Da pirlat no Watong, kanong God no udahat Watong, no Dadasine, i harbalaurai ma i harkurai.
REV 19:7 I tahut bia dahat na guama ma bia dahat na hatamat no hinsana kanong no bung na tinolen tano Nat na Sipsip i te hanuat um. No uno hahin i te tagure habaling ie wara tinolen.
REV 19:8 Ma di te tar ra bilai na sigasigam tano hahin. Iakano sigasigam i gamgamatien ma i pilpilakas.” (Ma a malalar ie ta ira taktakodasuana magingin ta ira gamgamatien na matanaiabar tus ta God.)
REV 19:9 Io, ma no angelo ga tange tagu bia, “Nu pakat hoken: ‘Diet daan ing di suko diet wara hinanuat tano nian na hinartola tano Nat na Sipsip.’” Ma ga tange mah bia, “Kaiken a tutun na nianga ta God.”
REV 19:10 Io, ma iau ga puko suur uras ra parparas na kakine bia ni lotu tupas ie. Iesen ga tange tagu, “Waak um u gil huo! Dar bakut mon airuo tultulai ta God tika ma ira hinsakaam ing diet la murmur no tutun Jisas ga hapuasnei. Huo kaik, nu lotu tupas God! Kanong warah, no tutun nong Jisas ga hapuasnei i hadadas ira tangesot wara nianga.”
REV 19:11 Io, ma iau ga nes no mawe ga tapapos taar. Ma kaia tiga ponponiana hos. Ma nong ga kisi tar ie di ga kilam ie bia “Nong i Gil Haruatne no uno Nianga,” ma “Nong i Tutun.” Ing na harubu ma tikai bia na kure tikai, pa na gil ta nironga. No uno hinarubu ma no uno harkurai i takodas.
REV 19:12 Ira iruo matana dir ga haruat ma ra karamena iaah. Ma a haleng na balaparik na lualua tano uluno. Ma tiga hinsang di gate pakat tar tana. Ma taie tiga nong i nunure no hinsana. Aie sen at mon.
REV 19:13 Ga sigam tar tiga sigasige i hung ma ra de. Ma no hinsana bia, no Nianga ta God.
REV 19:14 Ira umri meram ra mawe diet ga murmur ie ma diet ga kisi ira ponponiana hos. Ma diet ga sigam tar ira bilai na sigasigam. Ma ira udiet sigasigam a ponponiana ma i gamgamatien.
REV 19:15 Ma tiga niani na wise ga hansur tano hana. Ma iakan ra wise wara halhaliare ira hunhuntunaan tano ula hanuo. Ma nong i kisi tar no hos na balaure ma na kure hadadas diet. Na papasuane diet ma no but na ngalngaluan ta God, no Dadasine, hoing tikai na papasuane ira gerep wara gil wain.
REV 19:16 Ma di gate pakat no hinsana tano uno sigasigam ma tano pawana. Ma i hoken: No Tamat na Lualua ta ira lualua bakut ma no Tamat na Watong ta ira watong bakut.
REV 19:17 Io, ma iau ga nes tiga angelo ga tur taar tano matana kasakes. Ma ga kakonga naliu taar ta ira maan bakut ing diet ga pupungo aram ra mauho. Ma ga tange hoken: “Muat mai! Muat na kis hulungai tano tamat na gil nian ta God.
REV 19:18 Muat mai waing muat naga ien ira urati diet ira tamat na lualua ma ira but na umri ma ira ut na baso. Ma muat na ien mah ira hos ma diet ing diet kisi tar diet. Ma muat na ien ira urati diet ira tunotuno bakut, diet ira tultulai ma diet ing diet pai tultulai mah, ira watong ma ira maris.”
REV 19:19 Io, ma iau ga nes no rakaia ma ira tamat na lualua tano ula hanuo tika ma ira udiet umri. Diet gate hanuat hurlungen wara tut na hinarubu ma nong i kisi no hos tika ma ira uno umri.
REV 19:20 Ma nong i kisi no hos ga palim kawase no rakaia tika ma no tangesot bisbis nong git gilgil ira hakilang na kinarup wara gaiena no rakaia. No tangesot bisbis git paapalim huo kaik git hamhabato ira matanaiabar ing diet ga hatur kawase no hakilang tano rakaia ma diet lotu tupas no uno palimpuo. Ma nong i kisi no hos ga se halilon dir taar tano lulur na iaah, a solam ma ra lulungo kana tana.
REV 19:21 Ma nong i kisi tar no hos ga ubu bing ira mes na tunotuno ma no uno wise na hinarubu nong i hansur tano hana. Ma ira maan diet ga iaan hahos ta ira urati diet ira tunotuno.
REV 20:1 Io, ma iau ga nes tiga angelo ga hanhan suur meram ra mawe. Ma ga hatur kawase no dadas wara paapos no matanangas tano lulur pataie ta hauhawatine. Ma ga palim tar tiga dadas na hidihidi sakit.
REV 20:2 Io, ga palim kawase no tamat na sui. Aie iakano sui menalua sakit. Da kilam ie bia no Ut na Hartutung, bia Sataan. Ma no angelo ga wis kawasei tuk taar bia tiga arip na tinahon na sakit.
REV 20:3 Io, no angelo ga sei tano lulur ma ga banus bat ie bia kabi habato habaling ira hunhuntunaan tano ula hanuo. Ma Sataan na kis taar kaia tuk taar bia no arip na tinahon na pataam. Namur um, tikai na halangalanga isei. Ma Sataan na langalanga ra kumkumina pakana bung mon.
REV 20:4 Io, ma iau ga nes ari diet ga kis taar ta ira kinkinis na gil harkurai. Ma God gate tar ra kinkinis na harkurai ta diet. Ma iau ga nes mah ira tanua diet ing di gate dako diet. Ma di ga dako diet kanong diet ga harharpir ma no nianga ta God ma diet ga hinhinawas ta ira tutun utano nilon gar ta Jisas. Diet pa gale lotu tupas no rakaia bia no uno palimpuo. Ma diet pa ga hatur kawase no hakilang tano rakaia ta ira punare diet bia ira lima diet. Ma diet ga lon baling ma diet ga harkurai tika ma Krais tiga arip na tinahon.
REV 20:5 (Io, ma ira mes na minaat diet pa ga lon baling tuk taar no arip na tinahon ga pataam.) Ma iakan no luena tuntunut hut sukun ra minaat.
REV 20:6 Diet ing diet na tut hut tano luena tuntunut hut sukun ra minaat, diet na daan ma diet na gamgamatien. No airuo na minaat pa na tale bia na kure kawase diet. Taie. Diet na ngan hoing ira ut na pakila lotu tupas God ma Krais. Ma diet na harkurai tika mei ta tiga arip na tinahon.
REV 20:7 Ma ing bia no arip na tinahon gate sakit, di ga halangalanga ise Sataan mekaia ra katon na harpidanau.
REV 20:8 Io, ma na haan ukaia ta ira ihat na mansuk tano ula hanuo wara hamhabato lamus ira hunhuntunaan. Da kilam diet bia Gok ma Magok. Ma ga lamus hurlungen diet wara hinarubu. Ma ira udiet winawas i manga haleng sakit haruat ma ira wana aras ra wasasar.
REV 20:9 Diet ga hanan haan ma ira subaan ga hung ma diet. Ma diet ga tur luhutane no pise na hala nong God i sip ie, ing ira uno gamgamatien na matanaiabar tus diet la kiskis kaia. Iesen a iaah ga hansur meram ra mawe gaam haliare diet.
REV 20:10 Ma di ga se Sataan tano lulur na iaah, a solam ma ra lulungo kana tana. Aie nong ga habato lamus ira matanaiabar. Ma no rakaia ma no tangesot bisbis dir kana kaia tuai. Ma dal na kilingane ra ngunungut hathatika ma pa nale pataam.
REV 20:11 Io, ma iau ga nes tiga manga tamat na ponponiana kinkinis na gil harkurai. Ma tikai ga kis taar tana. No ula hanuo ma no mawe dir ga hilau laah ra matmataan tana ma dir ga panim harsakit.
REV 20:12 Iau ga nes ira minaat, diet ira maris ma diet ira watong. Diet ga tur taar menalua tano kinkinis na gil harkurai ma di ga papos ira pakpakat. Ma di ga papos tiga mes na pakpakat mah, aie no pakpakat na nilon. Ma nong i kis taar tano kinkinis na gil harkurai ga kure diet haruat ma ira udiet gingilaan ing di gate pakat tar tano pakpakat.
REV 20:13 Io, ma no tes ga tar pukus ira minaat ing diet ga kis taar tana. Ma no minaat ma no tamaan na minaat dir ga gil mah huo. Ma nong i kis taar tano kinkinis na gil harkurai ga kure diet tikatikai haruat ma ira udiet gingilaan.
REV 20:14 Ma ga se no Ngaas na Minaat ma no Taman ta ira Minaat taar tano lulur na iaah. Ma no lulur na iaah, aie no airuo na minaat.
REV 20:15 Ma ing bia pa di ga nes no hinsana tikai tano pakpakat na nilon, di ga se hasur ie tano lulur na iaah.
REV 21:1 Io, ma iau ga nes tiga sigar mawe ma tiga sigar ula hanuo kanong no luena mawe ma no luena ula hanuo dir gate panim laah. Ma pataie baling um ta tes.
REV 21:2 Iau ga nes no Halhaliana Pise na Hala. Aie no Sigar Ierusalem. Ma ga hanansur mekaia ho God meram ra mawe. Ma ga taguro taar hoing tiga hahin i wara tinolen. Ma di gate hamar timaan ie bia no uno tunaan naga nes ie hoing tiga melmel na hahin.
REV 21:3 Io, ma iau ga hadade ra tamat na ingana tikai ga hanuat meram ra tamat na kinkinis na harkurai. Ma ga tange bia, “Nes baak! No kinkinis ta God iakana nalamin ta diet ira tunotuno. Ma God na kis tika ma diet. Ma auno matanaiabar um diet ma God at na kis tika ma diet ma audiet God um ie.
REV 21:4 Na ros ira luur na mata diet. Ma taie baling um ta minaat bia ra tapunuk. Ma taie mah ta sunuah bia ra ngunngutaan kanong ira linge ing menalua i te pataam.”
REV 21:5 Io, ma nong ga kis taar tano tamat na kinkinis na harkurai ga tange bia, “Iau gilgil hasigarine ira linge bakut!” Ma ga tange bia, “Pakat kahe kaiken kanong kaiken ra nianga i tutun ma i tale bia tikai na so no uno nurnuruan ine.”
REV 21:6 Ma ga tange tagu, “I te pataam um! Iau no Hathatahun ma no Haphapataam. Iau no Luena ma no Hauhawatine. Sige nong i maruk, iau ni hamamo bia mon ie ma ra taah tano puat na nilon. Ma pa na kul.
REV 21:7 Sige tiga nong i harubu timaan ma i paas hasur ira walwalaam, iau ni tabar ie ma kaiken ra linge bakut. Iau um no uno God ma natigu um ie.
REV 21:8 Iesen ari, audiet sibaan no lulur na iaah, a solam ma ra lulungo kana tana. Ma diet ira mangana tunotuno hoken: ira ut na bunurut, ira tabuna nurnuruan, ira ut na sakena, ira ut na harubu bingibing bia, ira ut na ser magirmagir, ira ut na lotu tupas ira palimpuo, ira ut na harabota, ma diet ing diet noh tika ma tikai pai aunoi. Diet na haan taar tano lulur na iaah. Ma aie no airuo na minaat.”
REV 21:9 Io, ma tikai ta ira liman ma iruo na angelo ing diet ga palim tar ira liman ma iruo na gingop ga hanuat ukai ho iau. Ma kaike ra gingop diet ga hung taar ma ira liman ma iruo na hauhawatina hinangul. Ma ga tange tagu bia, “Mai! Iau ni hamines no hahin taam nong i wara tatole no Nat na Sipsip.”
REV 21:10 Io, no dadas tano Halhaliana Tanuo ga pulus iau ma no angelo ga kap haut iau uram tiga tamat na uladih sakit. Ga hamines no Halhaliana Pise na Hala tagu. Ma aie ne Ierusalem. Ma no pise na hala ga hanansur meram ra mawe ho God.
REV 21:11 No pise na hala ga murarang ma no minarine God. Ma ga pilpilakas hoing tiga maririsuan na haat nong a tabi matana. Ma ga palai hoira galas.
REV 21:12 Ma a mon tamat na kangkang na balo luhutanei. A sangahul ma iruo na matanangas tano balo. Ma a sangahul ma iruo na angelo diet ga kis taar ta kaike ra matanangas. Io, ma ta kaike ra matanangas di gate pakat tar ira sangahul ma iruo na hinsa diet ira sangahul ma iruo na huntunaan gar na Israel.
REV 21:13 Ma aititul a matanangas tiga palpal ta ira ihat na balo.
REV 21:14 Ma a sangahul ma iruo na burana haat wara hatur hadadas no balo tano pise na hala. Ma di gate pakat tar ira sangahul ma iruo na hinsa diet ira apostolo gar tano Nat na Sipsip taar ta kaike ra burana haat.
REV 21:15 No angelo nong ga wawor ma iau ga palim tar tiga linge hoing tiga pakana pareng. Di ga gil ie ma ra gol. Ma ga palim tar ie wara hapupuo no pise na hala ma no balo ma ira matanangas tana.
REV 21:16 Ira ihat na balo tano pise na hala diet taltalona haruat. Io, ga hapupuo ira ihat na balo ma diet tikatikai diet haruat ma 1200 na mail. Ma no kangkang uram naliu tano balo ga haruat mah ma 1200 na mail.
REV 21:17 Ma no tamtapegas tano balo ga haruat ma 144 na laha. Ma ing bia no angelo ga hapupuo no balo, ira laha ga haruat mon ma ira laha ira tunotuno diet la hapupuo.
REV 21:18 Di gate pakile no balo ma tiga mangana maririsuan na haat nong a tabi matana. Ma no pise na hala di gate gil ie ma ra gamgamatien na gol. Ma no pise na hala ga palai hoira galas.
REV 21:19 Di gate hamar ira burana haat ing diet ga hatur hadadas no balo. Di gate hamar kaike ra burana haat ma ira maririsuan na haat. No luena burana haat i nanaas hoira puspus na mite. No airuo i ngan hoing no mawe. No aitul i manga gilotgilot. No aihat i haruat ma ira pakana paas.
REV 21:20 No liman i dardaraan ma i ponpon. No liman ma tikai i nanaas hoira puspus na balbaal. No liman ma iruo i nanaas hoing ira puspus na hahor. No liman ma itul i ngan hoira puspusuno no tamat na kadolkadol. No liman ma ihat i nanaas hoing ra iong. No sangahul i ponponiana. No sangahul ma tikai i haruat ma ira puspus na kanawa. No sangahul ma iruo i ngan hoira lamara gamara.
REV 21:21 Di gate gil ira sangahul ma iruo na matanangas ma ira sangahul ma iruo na tulur a kalagi. Di gate gil no ngaas tano pise na hala ma ra gamgamatien na gol. Ma ga palai hoira galas.
REV 21:22 Io, ma iau pa ga nes ta tamat na hala na lotu narako tano pise na hala kanong no Dadas na Watong God ma no Nat na Sipsip, dir haruat ma tiga tamat na hala na lotu ta iakano pise na hala.
REV 21:23 No pise na hala pa ga supi ra madaraas tano kasakes bia no teka. Taie. No minarine God i hamadaraas tar ie ma no Nat na Sipsip aie i haruat ma no lulungo tano pise na hala.
REV 21:24 Ira hunhuntunaan tano ula hanuo diet na lon kaia ra madaraas tano pise na hala. Ma ira tamat na lualua tano ula hanuo diet na laka kaia tika ma ira minamari diet.
REV 21:25 Ma pa na tabanus ira matanangas kanong taie ta kankado kaia.
REV 21:26 Ira hunhuntunaan tano ula hanuo diet na laka kaia tika ma ira minamari diet ma ira udiet kinkinis na watong.
REV 21:27 Taie ta bilingana linge na laka kaia. Ira ut na harabota ma diet ing diet gilgil ira sakana magingin ing da miligiruane, diet pa na laka mah kaia. Diet sen mon ing di gate pakat tar ira hinsa diet tano pakpakat na nilon tano Nat na Sipsip, diet na laka kaia.
REV 22:1 Io, ma no angelo ga hamines no taah na nilon tagu. Ma no taah ga manga madaraas hoira galas. Ga puat huat menapu tano tamat na kinkinis na harkurai ta God ma no Nat na Sipsip.
REV 22:2 Ma ga saal nalamin tano ngaas tano pise na hala. Ma no daha na nilon ga tur taar kaia ta ira iruo gagena no taah. A sangahul ma iruo na pakaan ga huai tiga tinahon, tiga pakaan tiga teka. Ma ira pakana no daha wara halhalon ira hunhuntunaan.
REV 22:3 Ma taie ta nong God gate kure hagahe na kis narako tano pise na hala. No tamat na kinkinis na harkurai ta God ma no Nat na Sipsip na kis kaia narako tano pise na hala. Ma ira tultulai ta God diet na lotu tupas ie kaia.
REV 22:4 Diet na nes no matmataan tana ma no hinsana na kis ta ira punare diet.
REV 22:5 Taie baling ta kankado kaia. Diet pa na supi ta madaraas ta tiga lulungo. Ma diet pa na supi mah no madaraas tano kasakes kanong God no Watong na murarang ta diet. Ma diet na kap ra kinkinis na gil harkurai hathatika ma pa nale pataam.
REV 22:6 Io, ma no angelo ga tange tagu, “Kaike ra nianga i tutun ma i tale bia ira tunotuno diet na so ira udiet nurnuruan ine. No Watong, aie no God audiet ira tangesot. I la kurkure diet bia diet na ianga. Ma i te tule no uno angelo ta ira uno tultulai. Ma no angelo na hamines ta diet ira linge i wara hinanuat gasien.”
REV 22:7 Ma Jisas i tange bia, “Hadade baak! Hutet um ma nigi hanuat! I daan iakano nong i taram ira nianga na tangesot ta iakan ra pakpakat.”
REV 22:8 Iau mon, Jon, iau ga nes ma iau ga hadade kaike ra linge. Ma bia iau gate hadade ma iau gate nes, iau ga puko uras ra parparas na kakine no angelo wara lotu tupas ie. Aie nong ga hamhamines kaike ra linge tagu.
REV 22:9 Iesen ga tange tagu, “Waak um u gil huo! Dar bakut mon airuo tultulai ta God tika ma ira tangesot, ira tasim. Ma dahat bakut tika ma diet mah ing diet la tartaram ira nianga ta kan ra pakpakat. Huo kaik, nu lotu tupas God!”
REV 22:10 Io, ma ga tange tagu, “Waak u banus bat ira nianga na tangesot ta iakan ra pakpakat kanong no pakana bung i hutet bia kaike ra linge na hanuat.
REV 22:11 Sige tikai i la gilgil ra sakena, da waak tar at ie na gilgil ra sakena huo. Ma huo mah ta nong i la gilgil ira bilingana magingin. Da waak tar at ie huo bia na gilgil ira bilingana magingin. Ma sige tikai i la gilgil ira takodasuana magingin, na tahut bia na gilgil at huo. Ma sige tiga nong i la gilgil ira gamgamatien na magingin, na tahut bia na gilgil at ira gamgamatien na magingin.”
REV 22:12 Jisas i tange bia, “Hadade baak! Hutet um ma nigi hanuat! Ing bia ni hanuat iau ni palim ira numuat harkul. Ma iau ni kul muat tikatikai haruat ma ira numuat pinapalim.
REV 22:13 Iau no Hathatahun ma no Haphapataam. Iau no Luena ma no Hauhawatine. Iau no Hamhaburen ma no Hadukduk.
REV 22:14 “Diet daan ing diet gis ira udiet sigasigam. Diet na gis ira udiet sigasigam waing diet naga iaan tano daha na nilon ma diet naga laka harsakit ta ira matanangas tano pise na hala. Ma ing bia diet gis ira udiet sigasigam, na takodas bia diet na iaan ma diet na laka huo.
REV 22:15 Io, ma diet ira ut na sakena kenas me nataman tano pise na hala. Ma ira ut na ser magirmagir diet kis kaia mah tika ma ira ut na harubu bingibing bia. Ma diet ing diet noh tika ma tikai pai aunoi, diet kis kenas me nataman mah. Ma huo mah diet ing diet lotu tupas ira palimpuo ma diet ira sakana ut na harabota.
REV 22:16 “Iau mon, Jisas, iau te tule no nugu angelo ukaia ho muat bia na hinawas palai ta kaike ra linge wara gaie muat ira matanaiabar na lotu ta ira tamtaman. Iau no bulumur tano huntunaan ta Dawit. Iau no tiding na malaan nong i manga murarang.”
REV 22:17 No Halhaliana Tanuo i tange, “Mai!” Ma no hahin nong ga wara tatole no Nat na Sipsip i tange, “Mai!” Ma sige tikai i hadade kaiken ra nianga, na tahut bia na tange, “Mai!” Sige tiga nong i maruk, i tahut bia na mai. Ma sige tikai i sip bia na kulup bia mon tano taah na nilon ma pa na kul, i tahut bia na kulup huo.
REV 22:18 Iau hakatom muat bakut ing muat hadade ira nianga na tangesot ta kaiken ra pakpakat. Iau hakatom muat hoken: Ing bia ta tiga nong na pasum ta nianga taar ta kaiken ra pakpakat, God na pasum tar tana ira hinangul i kis ta iakan ra pakpakat.
REV 22:19 Ma ing bia tiga nong na kap se ari a nianga ta iakan ra pakpakat na tangesot, God na gil mah huo tana. Na kap se no pinlawena tano daha na nilon i kis ta iakan ra pakpakat. Ma na kap se no pinlawena mah tano halhaliana pise na hala nong i kis ta iakan ra pakpakat.
REV 22:20 Nong i hinhinawas ta kaiken ra linge i tange bia, “Masa! Hutet um ma ni hanuat.” Masa. Watong Jisas, nu mai.
REV 22:21 Iau sasaring bia no harmarsai gar tano Watong Jisas na kis tika ma ira matanaiabar ta God. Amen.
