﻿Kitaaba Iyoobii.
3.
Tanaan duuba Iyoob dubbatiisa jalqabe; inni guyyaa itti dhalate abaaree, 
«Halkan ani itti dadame, guyyaan ani itti dhaladhelle ka abaarame te'uu ti! 
Guyyaan sun gara dukkanaa jijjiiramuu ti. Waaqi ol-gubba'aa isa hin yaadatin; ifille isa irratti hin ifin. 
Dimimmisaa fi dukkanti dimmi, ‹Ati keenna› isaan jedhanuu ti. Duumensi isa irratti bu'ee, dukkanti ifa isaa gollituu ti. 
Halkan san dukkanti dimmi gollituu ti; guyyoota wogga'aa keessatti hin laakkowamin; laakkossa ji'aalle'etti hin galin. 
Halkan sun maseena te'uu ti; ililleettiille hin dhage'amin. 
Worri guyyaa abaaru, bineensa naacha fakkaatu ka, ‹Lewaataan› jedhamu kakkaasiisaaf qophowelle halkan san abaaruu ti. 
Bakkalchi bari'ii ka halkan sanii dukkanoottuu ti. Halkan sun addi'iin ifa eegatuu ti, ammoo hin dhaggatin; boruulle hin dayya'iniif. 
Guyyaan sun rakkinna ila tiyya duraa dhossiisaaf, balbala gadaamessa haadha tiyyaa, waan hin cufiniif ka abaarame te'uu ti. 
«Ani maaf gadaamessa haadha tiyyaa keessatti hin du'in? Gadaamessa keessaa yennaa bayelle maaf hin badin? 
Haati tiyya maaf gudeeda ifii irra keyatte? Harma ifiille maaf na hoositte? 
Sila amma nageyaan irkadhee, rafee hin foorfadhaayyu. 
Moototaa fi gorsitoota lafaa worra addee ifiif ijaarratanee isaan duraa diigante woliin, 
sooreyyii gugurdoo worra worqi'ii fi meeti'iin mana ifii guutatane woliin sila hin foorfadhaayyu. 
Yookiin ani maaf akka finna du'ee dhalatee awwaalamee, ka ijjumaa ifa hin dhagginii hin te'in? 
Awwaala keessatti worri hamaan hammeenna ifii hin lakkisa; ka dadhabanelle achitti hin foorfatan. 
Worri booji'ame achitti nageya dhaggatan; qoonqoo worra hunnaan isaan hujisiisuulle hin dhage'anu. 
«Worri didiqqa'aa fi gugurdaan addee takka'atti dhaggaman. Garbootille goottota ifii jalaa achitti bilisa hin bayan. 
Worra rakkoo hantuu keessa jiruuf ifi, worra le'iin itti hadhootteef jiruun maaf kennanti? 
Worra du'a halchee, ka karra dhoffante qotee barbaadu caalaa ka du'a barbaaduuf jiruun maaf kennantii? 
Worra awwaala bira yennaa gewu ilillisuuf jiruun maaf kennanti? 
Nama karaan duraa dhoffameef, ka Waaqi karaa itti cufeef, ifi maaf kennamaaf? 
Gaddi kiyya akkuma sagale'ee naaf dhufa; aadiis kiyya akkuma bisaanii dhangala'a. 
Wonni ani sodaadhe natti dhutte; wonni na naasiselle na irratti te'e. 
Ani raafama malee nageyaa hin qabu, miira hin qabu, fooralle hin qabu» jedhe. 
