﻿وَحَيُ يَحَيَ.
3.
‏«‏وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ سَرْدِسْ وِعُکِ:‏ ‏«‏مِنْ وٛنِ جٛغِيطٛ رُوحُوجِ جٛوٜىٰطِطِ طِ اَللَّه اٜ کٛودٜ جٛوٜىٰطِطِ طٜنْ طٛنْ؞ اٜ مِ اَنْدِ کُوغَلْ مٛوطٛنْ، اٜ طُمْ يِعَ بٛ اٛنْ نغٛودِ يٛنْکِ، اَمَّا اٛنْ مَيْٻٜ؞ 
اُمّٜىٰ، ندَرٛوطٛنْ!‏ مٛعِّنٜىٰ کٛ حٛرَنِيعٛنْ نغَمْ طُمْ ٻَدَکٜ لَلُّکِ، نغَمْ مِ يِعِي کُوطٜ مٛوطٛنْ طٜ کٜىٰوَايِ يٜىٰسٛ اَللَّه؞ 
نغَمْ نٛنْ شِفْتٛرٜىٰ اٜ کٛ طُمْ اٜکِّتِنِعٛنْ اٜ کٛ نَنْطٛنْ، تٛکّٜىٰطُمْ ندٜنْ تُوبٜىٰ دَغَ حَکّٜىٰجِ مٛوطٛنْ؞ تٛ بٛو اٛنْ اُمَّاکِ، مِ وَرَيْ اٜ شَرٜلْ نغٜلْ اٛنْ کَمَّاکِ بٛ غُجّٛ؞ ندٜنْ اٛنْ اَنْدَتَا شَرٜلْ نغٜلْ نغَرَنَيْمِعٛنْ؞ 
اَمَّا حَا جٛونِ اٜ وٛودِ يِمْٻٜ مٛوطٛنْ سٜطَّ ندٜرْ غَرِيرِ سَرْدِسْ ٻٜ مبٛنَّايِ کٛعٜ مَٻّٜ اٜ وَطُکِ حَکّٜ؞ ٻٜ نجَادَيْ اٜ اَمْ ندٜرْ کٛلْتٜ دَنٜىٰجٜ نغَمْ ٻٜ کٜوْتِي ٻٜ نغَطَ نٛنْ؞ 
فُو کٜٻُطٛ جَالٛرْغَلْ طُمْ ٻٛرْنَيْمٛ کٛلْتٜ دَنٜىٰجٜ، ندٜنْ مِ اِتَّتَا اِنْدٜ مَاکٛ دَغَ ندٜرْ دٜفْتٜرٜ يٛنْکِ؞ مِ وِعَيْ کَنْکٛ طُمْ مٛ اَمْ يٜىٰسٛ ݧَاکٛ اَمْ اٜ يٜىٰسٛ مَلَاعِکَعٜنْ مَاکٛ؞ 
‏«‏فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ 
‏«‏وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ فِلَدٜلْفِيَ وِعُکِ:‏ ‏«‏مِنْ وٛنِ شٜنِيطٛ مٛ غٛونغَ جٛغِيطٛ مَٻِّتِرْغٜلْ دَوْدَ؞ تٛ اٛ مَٻِّتِي دَمُّغَلْ، وَلَا مَٻَّيْطٛنغَلْ، تٛ اٛ مَٻِّينغَلْ، وَلَا مَٻِّتَيْطٛنغَلْ؞ 
اٜ مِ اَنْدِ کُوطٜ مٛوطٛنْ؞ رَا مِ اَلَنِيعٛنْ دَمُّغَلْ اٜ مَٻِّتِي، وَلَا بَاوَيْطٛ مَٻُّکِنغَلْ؞ اٜ مِ اَنْدِ اٛنْ شٜمْبِطَا، اَمَّا فُو اٜ نٛنْ اٛنْ تٛکَّ کٛ مبِيمِ، اٛنْ نغَݧَايِ وِعُکِ اٛنْ تٛکُّٻٜيَمْ؞ 
يِمْٻٜ ٻٜنْ طٛنْ وٛنْٻٜ ندٜرْ يِمْٻٜ شٜيْطَنْ وِعٛوٻٜ ٻٜ يِمْٻٜ اَللَّه اَمَّا ٻٜ ڤٜوَيْ، مِ وَطَيْٻٜ ٻٜ نغَرَ ٻٜ ندِشّٛو يٜىٰسٛ مٛوطٛنْ ٻٜ اَنْدَ اٜ مِ يِطِعٛنْ؞ 
ندٜ اٛنْ نجٛغَکٜ وٛلْدٜ اَمْ ندٜرْ مُݧَلْ اٜ سٜمْبٜ ٻٜرْندٜ، مِ سُرَنَيْعٛنْ تٛرَّ غَرَنَيْکَ دُونِيَارُ نغَمْ طُمْ فٛوندَ يِمْٻٜ مَيْرُ؞ 
اٜ مِ وَرٛيَ نَاع کٛ نٜىٰٻِ؞ نغَطٜىٰ کَ حٛولَاکِيَمْ بٛطُّمْ نغَمْ تٛع غٛطّٛ تٜىٰتَنَعٛنْ غِيفِ جَالٛرْغَلْ؞ 
فُو کٜٻُطٛ جَالٛرْغَلْ مِ وَرْتِرَيْمٛ دَرْݝَلَلْ ندٜرْ وُرٛ شٜنِينغٛ نغٛ اَللَّه اَمْ، اٛ فُطِّتَتَا اٛ وُرْتٛو وُرٛ نغٛنْ؞ مِ وِنْدَيْ اِنْدٜ اَللَّه اَمْ دٛوْ مَاکٛ اٜ اِنْدٜ غَرِيرِ اَللَّه اَمْ، وَاتٛ اُرُشَلِيمَ کٜيْرِ جِڤّٛيْتٛوندِ دَغَ تٛ اَللَّه اَمْ تٛنْ دٛوْ؞ طٛنْمَا مِ وِنْدَيْ اِنْدٜ اَمْ حٜيْرٜ دٛوْ مَاکٛ؞ 
‏«‏فُو غٛودُطٛ نٛڤِّ نَنْکِ فُو نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ 
‏«‏وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ لَوْدِيکِيَ وِعُکِ:‏ ‏«‏مِنْ وٛنِ بِعٜتٜىٰطٛ اَامِنْ، شٜيْدُوجٛ مٛ غٛونغَ، بَرْکَ اَمْ اَللَّه تَغِ کٛو طُمٜ؞ 
اٜ مِ اَنْدِ کُوطٜ مٛوطٛنْ، اٛنْ ڤٜىٰوَا اٛنْ نغُلَا؞ اٜ مِ يِطِ دَا اٛنْ ڤٜىٰوِي کٛو اٛنْ نغُلِي!‏ 
اَمَّا شَکَ‑شَکَ نغٛنْطٛنْ، اٛنْ ڤٜىٰوَا اٛنْ نغُلَا؞ نغَمْ نٛنْ مِ تُتَّيْعٛنْ دَغَ ندٜرْ حٛنْدُکٛ اَمْ، وَاتٛ مِ وَݧَيْعٛنْ؞ 
اٛنْ مبِعَ، ‏‹‏اٜ مِنْ نغٛودِ رِسْکُ؞ اٜ مِنْ نغٛودِ جَوْدِ، وَلَا کٛ مِنْ ندُلِّ؞›‏ اَمَّا اٛنْ اَنْدَا اٛنْ شٛيْٻٜ اٛنْ نغَرْتِي کٛ يُرْمِنِي، اٛنْ نغَلَنَا، اٛنْ وُمْٻٜ، اٛنْ ٻٛرْنَاکِ؞ 
نغَمْ نٛنْ اٜ مِ حٛکَّعٛنْ شَاوٛرِ؞ شٛودٜىٰ جِينَارِ تٛ اَمْ طُمْ اُمْ سٜطِرِ حِيتٜ نغَمْ ندِسْکٛنْ، اٜ کٛلْتٜ دَنٜىٰجٜ نغَمْ شُدّٛنْ ٻَلِّ مٛوطٛنْ تٛع شٜمْتٛنْ، اٜ نٜبَّمْ نغَمْ مٛيْتَنٛنْ غِتٜ کٜٻٛنْ نغِعٛنْ؞ 
اٜ مِ حَٻَنَ ٻٜ نغِنْمِ، مِ حٛلِّتَٻٜ؞ نغَمْ نٛنْ نجَوْنٜىٰ تُوبٜىٰ؞ 
رَمِّ دَرِي اٜ دَمُّغَلْ اٜ مِ سِلْمِنٛو؞ فُو نَنْطٛ حٛنٛنْدٜ اَمْ، مَٻِّتِ دَمُّغَلْ، مِ نَتَّيْ مِ ݧَمْدَ ݧَمْندُ اٜ مَاکٛ کَنْکٛ مَا اٜ اَمْ؞ 
فُو کٜٻُطٛ جَالٛرْغَلْ اٛ لَامٛدٛتٛ اٜ اَمْ ندٜرْ لَامُ اَمْ، نٛنْ نٛ کٜٻِرْمِ جَالٛرْغَلْ اٜ مِ لَامٛدٛو اٜ ݧَاکٛ اَمْ ندٜرْ لَامُ مَاکٛ؞ 
‏«‏فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ!‏»‏ 
