﻿1 يَحَيَ.
3.
ندَارٜىٰ نٛ ݧَاکٛ مٛ دٛوْ يِطِرِعٜنْ، حَا اٜ طُمْ نٛدِّرَعٜنْ ٻِٻّٜ اَللَّه، نٛنْ بٛو نغٛنْتِندِرْطٜنْ؞ کٛ وَطِ يِمْٻٜ دُونِيَارُ ندُعُ اَنْدَاعٜنْ نغَمْ ٻٜ اَنْدَامٛ؞ 
اٛنٛنْ حِغٛوٻٜ اَمْ ٻٜ نغِطُمِ، جٛونِ اٜنْ ٻِٻّٜ اَللَّه؞ طُمْ حٛلَّايِعٜنْ کٛ نغَرْتٜتٜنْ طٛعٛ يٜىٰسٛ تَوْ؞ اَمَّا اٜنْ اَنْدِ تٛ اَلْمَسِيحُ وَرْتِي، اٜنْ نغَرْتَيْ بٛ مَاکٛ، نغَمْ اٜنْ نغِعَيْمٛ نٛنْ نٛ اٛ وٛنِ؞ 
فُو غَطُطٛ ٻٜرْندٜ دٛوْ اَلْمَسِيحُ نٛنْ، اٛ لَاٻِنَ حٛورٜ مَاکٛ نٛ اَلْمَسِيحُ لَاٻِرِ؞ 
فُو غَطٛووٛ حَکّٜ يٜوِي دٛوکَ اَللَّه، نغَمْ وَطُکِ حَکّٜ وٛنِ يٜوُکِ دٛوکَ اَللَّه؞ 
اٛنْ اَنْدِ يٜىٰسُ اَلْمَسِيحُ وَرِي نغَمْ اِتَّ حَکّٜ؞ کَنْکٛ اٛ وَلَا حَکّٜ؞ 
کٛو مٛيٜ وٛنْدِ اٜ مَاکٛ وَطَتَا کَ وَطُکِ حَکّٜ؞ فُو غَطّٛ کَ وَطُکِ حَکّٜ مٜىٰطَايِ يِيکِمٛ کٛو اَنْدُکِمٛ؞ 
اٛنٛنْ ٻِٻّٜ اَمْ، تٛع اٛنْ اَلُ غٛطّٛ مَجِّنَعٛنْ؞ کٛو مٛيٜ غَطٛووٛ اَادِلَاکُ، کَنْکٛ وٛنِ اَادِلِيجٛ نٛنْ نٛ اَلْمَسِيحُ وٛنِ اَادِلِيجٛ؞ 
فُو غَطّٛ کَ وَطُکِ حَکّٜ، شٜيْطَنْ جٜيِمٛ، نغَمْ دَغَ اَرَنْدٜ شٜيْطَنْ اٛ غَطٛووٛ حَکّٜ؞ کٛ وَطِ ٻِطّٛ اَللَّه وَرِ دُونِيَارُ وٛنِ نغَمْ اٛ حَلْکَ کُوطٜ شٜيْطَنْ؞ 
فُو ٻِطّٛ اَللَّه وَطَتَا کَ وَطُکِ حَکّٜ، نغَمْ نغِکُّ اَللَّه اٜ ندٜرْ مَاکٛ؞ ندٜنْ ندٜ اَللَّه وٛنِ ݧَاکٛ مَاکٛ، اٛ وَطَتَا کَ وَطُکِ حَکّٜ؞ 
رَا نٛ طُمْ فٜىٰرٛوتِرْتَ ٻِٻّٜ اَللَّه اٜ ٻِٻّٜ شٜيْطَنْ؞ فُو مٛ وَطَتَا کٛ وٛوطِ کٛو يِطَا بَنْدِرَاٻٜ مُوطُمْ، کَنْکٛ نَاع اٛ ٻِطّٛ اَللَّه؞ 
طُعُمْ وٛنِ کٛ نَنْطٛنْ دَغَ اَرَنْدٜ وِيکِ نغِطِندِرٜنْ؞ 
تٛع اٜنْ نغَرْتُ بٛ کَيِنُ غَرْتُطٛ مٛ شٜيْطَنْ، اٛ وَرِ مِݧِرَاوٛ مَاکٛ؞ نغَمْ طُمٜ اٛ وَرِمٛ؟ اٛ وَرُ مِݧِرَاوٛ مَاکٛ نغَمْ کٛ مِݧِرَاوٛ مَاکٛ وَطِ اٜ وٛوطِ، اَمَّا کَنْکٛ، کٛ اٛ وَطِ طُمْ وٛوطَا؞ 
بَنْدِرَاٻٜ، تٛع اٛنْ کَيْطِنْ تٛ يِمْٻٜ دُونِيَارُ اٜ نغَݧَعٛنْ؞ 
ندٜنّٛ اٜنْ نَنْدِ اٜ مَيْٻٜ، اَمَّا جٛونِ اٜنْ نغٛودِ يٛنْکِ، نغَمْ اٜنْ نغِطِ بَنْدِرَاٻٜ مٜىٰطٜنْ؞ فُو مٛ يِطَا بَنْدِرَاوٛ مُوطُمْ اٜ جٛوطِي ندٜرْ مَيْدٜ؞ 
کٛو مٛيٜ وَݧِ بَنْدِرَاوٛ مُوطُمْ اٛ غَطٛووٛ وَرْحٛورٜ؞ اٛنْ اَنْدِ غَطٛووٛ وَرْحٛورٜ وَلَا يٛنْکِ کِ رٜعَتَا ندٜرْ مَاکٛ؞ 
طُعُمْ وٛنِ نٛ اَنْدِرْطٜنْ کٛ وٛنِ يِدّٜ:‏ يٜىٰسُ حٛکِّي يٛنْکِ مُوطُمْ نغَمْ مٜىٰطٜنْ؞ اٜ حَانِ اٜنٜنْ مَا کٛکّٜنْ يٛنْکِ مٜىٰطٜنْ نغَمْ بَنْدِرَاٻٜ مٜىٰطٜنْ؞ 
تٛ غٛودُطٛ رِسْکُ يِعِي بَنْدِرَاوٛ مُوطُمْ ندٜرْ دُلّٜرٜ اٛ وَݧِي اٛ وَلَّمٛ، تٛو، نٛ وَطَتَ اٛ وِعَ اٜ مٛ وٛودِ يِدّٜ اَللَّه ندٜرْ ٻٜرْندٜ مَاکٛ؟ 
اٛنٛنْ ٻِٻّٜ اَمْ، تٛع اٜنْ کٛلُّ يِدّٜ مٜىٰطٜنْ اٜ حٛنْدُکٛ تَنْ، اَمَّا اٜنْ کٛلُّ يِدّٜ مٜىٰطٜنْ اٜ غٛونغَ ندٜرْ کُوطٜ؞ 
تٛ اٜنْ نغِطِندِرِي نٛنْ، اٜنْ اَنْدِ اٜنْ نغٛودِ غٛونغَ وٛنْ طٛنْ؞ ندٜنْ اٜنْ مبَاوَيْ دَرَاکِ يٜىٰسٛ اَللَّه اٜ ٻٜرْندٜ غٛعٛ، 
کٛو تٛ ٻٜرْطٜ مٜىٰطٜنْ کٛلِّيعٜنْ اٜنْ نغَطِي کٛ وٛوطَا؞ نغَمْ اَللَّه ٻُرِي ٻٜرْطٜ مٜىٰطٜنْ، اٜ مٛ اَنْدِ کٛو طُمٜ؞ 
اٛنٛنْ ٻٜ نغِطُمِ، تٛ ٻٜرْطٜ مٜىٰطٜنْ کٛلَّايِعٜنْ اٜنْ نغَطِي کٛ وٛوطَا، اٜنْ نغٛودِ سٜمْبٜ ٻٜرْطٜ دَرَاکِ يٜىٰسٛ اَللَّه؞ 
اٜنْ کٜٻَ کٛو طُمٜ کٛ تٛرِيطٜنْمٛ نغَمْ اٜنْ تٛکِّي کٛ اٛ وِعِ نغَطٜنْ، اٜنْ نغَطَ کٛ وٜلْنَنْتَمٛ ٻٜرْندٜ؞ 
کٛ اَللَّه وِعِ نغَطٜنْ، کَنْجُمْ وٛنِ کٛولٛوطٜنْ اِنْدٜ ٻِطّٛ مَاکٛ يٜىٰسُ اَلْمَسِيحُ، ندٜنْ نغِطِندِرٜنْ نٛنْ نٛ اَلْمَسِيحُ وِعِ نغَطٜنْ؞ 
فُو تٛکُّٻٜ کٛ اَللَّه وِعِ طُمْ وَطَ اٜ ٻٜ نغٛنْدِ اٜ مَاکٛ، کَنْکٛ مَا اٜ مٛ وٛنْدِ اٜ مَٻّٜ؞ رَا نٛ تَبِّتِنِرْطٜنْ اٜ مٛ وٛنْدِ اٜ مٜىٰطٜنْ:‏ اٜنْ تَبِّتِنِي نٛنْ نغَمْ رُوحُ مَاکٛ طُمْ اٛ حٛکِّعٜنْ؞ 
