﻿طٜرٜوٛلْ  يَحَيَ اَرَنْدٜوٛلْ.
1.
اٜ مِنْ مبِنْدَنَعٛنْ حَبَرُ غٛطّٛ بِعٜتٜىٰطٛ وٛلْدٜ کٛکَّيْندٜ يٛنْکِ؞ کٛ دُونِيَارُ تَغٜىٰ اٜ مٛ طٛنْ؞ مِنْ نَنِيمٛ، مِنْ نغِعِيمٛ اٜ غِتٜ اَمِنْ؞ مِنْ ندَارِيمٛ، مِنْ مٜىٰمِيمٛ اٜ جُوطٜ اَمِنْ؞ 
اٛنْ طٛنْ کٛکّٛووٛ يٛنْکِ اٛنْ، طُمْ وَنْغِنَنِيمِنْمٛ، مِنْ نغِعِمٛ؞ دٛوْ مَاکٛ مِنْ کٛکَّتَ شٜيْدَ، طٛنْمَا اٜ مِنْ نغَعَجِنَنَعٛنْ وِيکِ کَنْکٛ وٛنِ مٛ يٛنْکِ کِ رٜعَتَا؞ دَغَ ندٜنّٛ اٜ مٛ وٛنْدِ اٜ ݧَاکٛ مٛ دٛوْ، ندٜنْ طُمْ وَنْغِنَنِيمِنْمٛ؞ 
اٜ مِنْ نغَعَجِنَنَعٛنْ کٛ مِنْ نَنِ اٜ کٛ مِنْ نغِعِ نغَمْ کَوْتٜنْ سُمْڤٛ؞ سُمْڤٛ مٜىٰطٜنْ وٛنِ سُمْڤٛوتِرْکِ اٜ ݧَاکٛ مٜىٰطٜنْ مٛ دٛوْ اٜ ٻِطّٛ مَاکٛ يٜىٰسُ اَلْمَسِيحُ؞ 
اٜ مِنْ مبِنْدٛنٛيَعٛنْ طُعُمْ نغَمْ نَنٜنْ بٜلْطُمْ نَاع سٜطَّ؞ 
طُعُمْ حَبَرُ وٛنِ طُمْ مِنْ نَنِ تٛ يٜىٰسُ اَلْمَسِيحُ مِنْ نغَعَجِنَنِعٛنْطُمْ وِيکِ، اَللَّه اٛ جَيْنغٛلْ، ݧِوْرٜ وَلَا تٛ مَاکٛ کٛو سٜطَّ؞ 
تٛ اٜنْ مبِعِي اٜنْ شُمْڤٛوتِرَ اٜ اَللَّه، اَمَّا اٜنْ نجٛوطِي ندٜرْ ݧِوْرٜ، تٛو، اٜنْ ڤٜوِي، اٜنْ تٛکَّتَا غٛونغَ؞ 
اَمَّا تٛ اٜنْ نجٛوطَکٜ ندٜرْ جَيْنغٛلْ نٛنْ نٛ اَللَّه جٛوطٛرِي ندٜرْ جَيْنغٛلْ، اٜنْ شُمْڤٛوتِرَ حَکُّندٜ مٜىٰطٜنْ وٛنْ طٛنْ؞ طٛنْمَا پِيپَمْ يٜىٰسُ ٻِطّٛ مَاکٛ اٜ لٛوتَنَعٜنْ حَکّٜىٰجِ فُو؞ 
تٛ اٜنْ مبِعِي اٜنْ نغَلَا حَکّٜ، اٜنْ پٛيْرَ کٛعٜ مٜىٰطٜنْ وٛنْ طٛنْ، ندٜنْ غٛونغَ وَلَا ندٜرْ ٻٜرْطٜ مٜىٰطٜنْ؞ 
اَمَّا تٛ اٜنْ مبِعِي اَللَّه حَکّٜ طُمْ نغَطُطٜنْ، اٛ يَافَنْتٛعٜنْ حَکّٜ مٜىٰطٜنْ، اٛ لٛوتَعٜنْ دَغَ کٛ وٛوطَا طُمْ نغَطُطٜنْ، نغَمْ کَنْکٛ اٛ کٜبِّنٛووٛ اَلْکَوَلْ، اٜ مٛ وٛودِ اَادِلَاکُ؞ 
تٛ اٜنْ مبِعِي اٜنْ نغَطَايِ حَکّٜ، اٜنْ نغَرْتِرِيمٛ ڤٜوٛووٛ وٛنْ طٛنْ، ندٜنْ وٛلْدٜ مَاکٛ وَلَا ندٜرْ ٻٜرْطٜ مٜىٰطٜنْ؞ 
