﻿2 بِيتُرُسْ.
3.
اٛنٛنْ ٻٜ نغِطُمِ، نغٛعٛلْ وٛنِ طٜرٜوٛلْ اَمْ طِطَٻٛلْ نغٛلْ مبِنْدَنْمِعٛنْ؞ ندٜرْ طٜرٜىٰجِ اَمْ طِ فُو طِطِ مِ سِفْتٛرَنِيعٛنْ کٛ اَنْدُطٛنْ نغَمْ ݧُمٛوجِ مٛوطٛنْ نغَرْتَ لَٻْطِ؞ 
اٜ مِ يِطِ شِفْتٛرٛنْ اٜ کٛ اَنَّبٛعٜنْ اَللَّه مبِعُنٛو ندٜنّٛ، اٜ کٛ جٛومِرَاوٛ مٜىٰطٜنْ کِسْنٛووٛ مٜىٰطٜنْ وِعِ طُمْ وَطَ دَغَ کٛنْدُطٜ لِلَاٻٜ مَاکٛ ٻٜ اٛ لِلٛيِ تٛ مٛوطٛنْ؞ 
اَرَنْدٜ دٛولٜ اَنْدٛنْ طُعُمْ، ندٜرْ بَلْطٜ رٜعُکِ دُونِيَارُ وٛٻّٜ يِمْٻٜ نغَرَيْ نجُکِّتَعٛنْ، تٛکّٛوٻٜ سُونٛ مَٻّٜ کَلُّنغٛ؞ 
اٜ ٻٜ مبِعَ، ‏«‏نَاع يٜىٰسُ وَطَنِيعٛنْ اَلْکَوَلْ وِيکِ اٛ وَرْتَيْ؟ تٛو، تٛ اٛ وٛنِ؟ نغَمْ دَغَ شَرٜلْ نغٜلْ مَامَعٜنْ مٜىٰطٜنْ مَايِ، کٛو طُمٜ اٜ يَحَ نٛ وٛنْتِندِرِ دَغَ فُطّٛودٜ دُونِيَارُ؞»‏ 
وِعٛوٻٜ نٛنْ اٜ مٜىٰرٜ ٻٜ نغَݧِ فَامُکِ وِيکِ ندٜنّٛ اَللَّه تَغِرِي دٛوْ اٜ وٛلْدٜ مُوطُمْ؞ اٛ وُرْتِنِ لٜيْدِ دَغَ ندِيَمْ، اٛ فِلْنِرِيندِ ندِيَمْ؞ 
اٜ ندِيَمْ طَمْ اٛ مَٻِّرِ دُونِيَارُ ندٜنّٛ، اٛ حَلْکِندُ؞ 
اَمَّا وٛلْدٜ مَاکٛ جٛغِي دٛوْ اٜ لٜيْ طُمْ نغِعٜتٜنْ جٛونِ نغَمْ طُمْ حَلْکِرٜىٰ حِيتٜ؞ اٜ مٛ جٛغِيطُمْ حَا يَاکِ ݧَلْندٜ ندٜ اٛ وَطَنْتَ ٻٜ کُلَتَامٛ کِيتَ اٛ حَلْکَٻٜ؞ 
اَمَّا اٛنٛنْ حِغٛوٻٜ اَمْ ٻٜ نغِطُمِ، تٛع اٛنْ نغٜجُّتُ فِي غٛعٛ، کَنْجُمْ وٛنِ ݧَلْندٜ غٛعٛ تٛ جٛومِرَاوٛ بٛ دُوٻِ 1,000 وٛنِ، ندٜنْ دُوٻِ 1,000 بٛ ݧَلْندٜ غٛعٛ وٛنِ؞ 
وٛٻّٜ اٜ مبِعَ جٛومِرَاوٛ نٜىٰٻَيْ کٛ حٜبِّنَ اَلْکَوَلْ مُوطُمْ؞ نَاع طُمْ نٛنْ، اَمَّا مُݧَلْ اٛ وَادَتَ اٜ مٛوطٛنْ، نغَمْ اٛ يِطَا کٛو مٛيٜ حَلْکَ، سٜيْ نِ کٛو مٛيٜ اَلَ وَطُکِ حَکّٜ، تُوبَ؞ 
اَمَّا ݧَلْندٜ جٛومِرَاوٛ وَرَيْ بٛ غُجّٛ؞ اٜ شَرٜلْ نغٜلْ دٛوْ مَجِّتَيْ اٜ حٛولٛ شٜمْبِنْغٛ؞ ندٜنْ فُو کٛ وٛنِ ندٜرْ مَاجُمْ حَلْکِرَيْ اٜ حِيتٜ؞ دُونِيَارُ اٜ کٛ وٛنِ ندٜرْ مَيْرُ طُمْ مَجِّتَيْ؞ 
ندٜ کٛو طُمٜ حَلْکِرَيْ نِينِ، اِرِ ٻٜيٜ يِمْٻٜ حَانِ نغَرْتٛنْ؟ اٜ حَانِ نغَطٛنْ جٛنْدٜ شٜنِيندٜ اٜ جٛنْدٜ کُلٛلْ اَللَّه، 
اٛنْ کٜطٛو وَرْکِ ݧَلْندٜ اَللَّه؞ نغَطٜىٰ کٛ مبَاوٛتٛنْ وَطُکِ نغَطٛنْ ݧَلْندٜ ندٜنْ وَرَ جَوْطُمْ؞ ندٜرْ ݧَلْندٜ ندٜنْ طُمْ حَلْکِرَيْ دٛوْ اٜ حِيتٜ، کٛو طُمٜ کٛ حٛرِي طُمْ حَلْکِرَيْ حِيتٜ؞ 
اَمَّا اٜنٜنْ اٜنْ کٜطِي اَلْکَوَلْ اَللَّه، وَاتٛ دٛوْ کٜسُمْ اٜ لٜيْدِ کٜيْرِ تٛ اَادِلَاکُ جٛوطِي؞ 
نغَمْ نٛنْ، اٛنٛنْ ٻٜ نغِطُمِ، ندٜ اٛنْ کٜطِي ندٜنْ طٛنْ ݧَلْندٜ، نغَطٜىٰ کٛ مبَاوٛتٛنْ وَطُکِ نجٛوطٛوطٛنْ جٛنْدٜ لَمْندٜ اٜ اَادِلَاکُ يٜىٰسٛ اَللَّه اٜ ٻٜرْندٜ وَلْتِيندٜ؞ 
تٛع اٛنْ نغٜجُّتُ، جٛومِرَاوٛ اٜ مُݧَ نغَمْ اٜ مٛ يِطِ يِمْٻٜ کِسَ؞ نٛنْ مَا حِغٛ مٜىٰطٜنْ بُلُسْ مٛ نغِطّٜنْ وِنْدَنِعٛنْ ندٜرْ فَامُ طُمْ اَللَّه حٛکِّمٛ؞ 
کٛو ندٜيٜ اٜ مٛ مٜتَ دٛوْ مَاجُمْ ندٜرْ طٜرٜىٰجِ مَاکٛ؞ ندٜرْ طٜرٜىٰجِ طِنْ اٜ وٛودِ فِي شَطُّمْ فَامُکِ؞ وٛٻّٜ ٻٜ نغَلَا فَامُ، ٻٜ ٻٜرْطٜ طٜ ندَرَاکِ تٛ غٛعٛ اٜ نغَيْلِتَ مَعَنَ مَاجُمْ نٛنْ نٛ ٻٜ نغَيْلِتِرْتَ غٛطّٜ اَايَاجٜ ندٜرْ دٜفْتٜرٜ شٜنِيندٜ؞ وَطُکِ نٛنْ اٜ فٛوطَنَٻٜ حَلْکٜرٜ؞ 
نغَمْ نٛنْ، اٛنٛنْ ٻٜ نغِطُمِ، ندٜ اٛنْ اَنْدِ فِي طُعُمْ، ڤَامَنٜىٰ يِمْٻٜ کَلُّٻٜ، تٛع اٜکِّتِنٛلْ فٜوْرٜ مَٻّٜ حٛشَّ حَکِّيلٛ مٛوطٛنْ نجَنٛنْ دَغَ دٛوْ وِغٜىٰرٜ شٜمْبِنْدٜ تٛ ندَرِيطٛنْ؞ 
اَمَّا ٻٜيْدٜىٰ يِدّٜ اٜ يُرْمٜىٰندٜ اٜ اَنْدُکِ جٛومِرَاوٛ مٜىٰطٜنْ کِسْنٛووٛ مٜىٰطٜنْ يٜىٰسُ اَلْمَسِيحُ؞ تٜدُّنغَلْ تَبِّتَ تٛ مَاکٛ جٛونِ اٜ حَا اَبَدَا!‏ اَامِنْ؞
