﻿اِبْرَانِيَنْکٛعٜنْ.
13.
نغَطٜىٰ کَ يِطِندِرْکِ بٛ بَنْدِرَاٻٜ؞ 
تٛع اٛنْ نغٜجُّتُ جَٻَّاکِ حٛٻّٜ؞ اٜ وٛودِ غَطُٻٜ نٛنْ نجَٻِّي مَلَاعِکَعٜنْ اَنْدَا؞ 
ݧُمٜىٰ دٛوْ شُرَاٻٜ ندٜرْ سُودُ شُرَلْ بٛ اٛنْ شُرِدَ اٜ مَٻّٜ؞ ݧُمٜىٰ دٛوْ تٛرّٜتٜىٰٻٜ، بٛ اٛنْ تٛرِّدٜىٰ اٜ مَٻّٜ؞ 
کٛو مٛيٜ مَوْنِنَ تٜىٰغَلْ، ندٜنْ تٛع غٛطّٛ وَلْدَ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ؞ بَلْدُطٛ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ، اَللَّه وَطَنَيْٻٜ کِيتَ؞ 
شٜنْدٜىٰ کٛعٜ مٛوطٛنْ اٜ يِدّٜ شٜىٰدٜ؞ مُݧٜىٰ دٛوْ کٛ نغٛودُطٛنْ، نغَمْ اَللَّه وِعِي، ‏«‏حَا اَبَدَا مِ اَلَتَامَ، حَا اَبَدَا مِ سٜنْدِرْتَا اٜ مَاطَ؞»‏ 
نغَمْ نٛنْ اٜ ٻٜرْندٜ غٛعٛ اٜنْ مبِعَيْ، ‏«‏جٛومِرَاوٛ وٛنِ بَلَّيْطٛيَمْ، مِ حُلَتَا؞ طُمٜ نٜطّٛ وَاوَتَ وَطَنْکِيَمْ؟»‏ 
ݧُمٜىٰ دٛوْ اَرْدِيٻٜعٛنْ، وَعَجِنَنْٻٜعٛنْ وٛلْدٜ اَللَّه؞ ݧُمٜىٰ دٛوْ نٛ ٻٜ نجٛوطٛرِي، اٜکِّتٜىٰ نٛ ٻٜ کٛولٛرِي اَللَّه؞ 
يٜىٰسُ اَلْمَسِيحُ اٜ طٛنْ نٛ وٛنْتِندِرِ کٜىٰݧَ اٜ حَنْدٜ اٜ حَا اَبَدَا؞ 
تٛع اٛنْ نجَٻُ اٜکِّتِنٛلْ نغٛلْ تٛکَّايِ لَاوٛلْ غٛونغَ مَجِّنَعٛنْ؞ اٜ طُمْ وٛوطِ يِدّٜ اَللَّه سٜمْبِطِنَ ٻٜرْطٜ مٜىٰطٜنْ، نَاع تٛکُّکِ دٛوکَاجِ دٛوْ ݧَمْندُ؞ اِرِ طِنْ طٛنْ دٛوکَاجِ نَفَنْتَا تٛکّٛوٻٜطِ؞ 
اَرْدِيٻٜ دِينَ کُوٛوٻٜ ندٜرْ لُکُرُ جٛومِرَاوٛ ٻٜ کٜٻَتَا ݧَامُکِ کٛ طُمْ سَکِّ دٛوْ سَکِّرْدٜ مٜىٰطٜنْ؞ 
مَوْطٛ مَوْٻٜ اَرْدِيٻٜ دِينَ اٜ نَتِّدَ اٜ پِيپَمْ مَرْلٜ ندٜرْ وِغٜىٰرٜ ٻُرْندٜ سٜنَاکِ اٛ سَکَّنَطَمْ اَللَّه نغَمْ حَکّٜ، اَمَّا ٻَلِّ مَرْلٜ طٜنْ اٜ نغُلٜىٰ غَطَ حٛطٛرْدٜ؞ 
کَنْجُمْ وَطِ يٜىٰسُ مَا مَايِ غَطَ غَرِيرِ، نغَمْ اٛ لَاٻِنَ يِمْٻٜ دَغَ حَکّٜ مَٻّٜ بَرْکَ پِيپَمْ مَاکٛ؞ 
نغَمْ نٛنْ اٜنْ نجَحُ تٛ مَاکٛ غَطَ غَرِيرِ نجَرٜنْ سٜمْتٜىٰندٜ ندٜ اٛ يَرِ؞ 
نغَمْ اٜنْ نغَلَا غَرِيرِ تَبٛتٛوندِ ندٜرْ دُونِيَارُ ندُعُ، اَمَّا اٜنْ کٜطِي اٜنْ کَمِّي غَرِيرِ غَرَيْندِ؞ 
نغَمْ مَاجُمْ، بَرْکَ يٜىٰسُ اٜنْ مَنْتُ اَللَّه کٛو نغٜلٜ شَرٜلْ؞ مَنْتُکِ کِنْ وٛنِ کٛ شَکَّنْتٜنْمٛ، اٜنٜنْ بِعٛوٻٜ يٜىٰسُ وٛنِ جٛومِرَاوٛ؞ 
تٛع اٛنْ نغٜجُّتُ وَطُکِ کٛ وٛوطِ اٜ سٜنْدُدُکِ کٛ نغٛودُطٛنْ اٜ وٛٻّٜ، نغَمْ طُعُمْ کَنْجُمْ وٛنِ شَکِّرِ بٜلْنَنٛورِ اَللَّه ٻٜرْندٜ؞ 
تٛکّٜىٰ اَرْدِيٻٜعٛنْ نغَطٛنْ کٛ ٻٜ مبِعِعٛنْ؞ اٜ ٻٜ ڤَامَنَ يٛنْکِيجِ مٛوطٛنْ:‏ اَللَّه بٛو پَمَيْٻٜ دٛوْ نٛ ٻٜ ڤَامِرَنِعٛنْ؞ تٛکّٜىٰ کٛ ٻٜ مبِعِ نغَمْ ٻٜ نغَطَ کُوغَلْ نغَلْ ندٜرْ بٜلْطُمْ ٻٜرْندٜ نَاع ندٜرْ تٜدّٛرَلْ؞ تٛ طُمْ وَرْتِي تٜدّٛرَلْ، نٛنْ وَرْتَيْ وَلَا کٛ نَفَنْتَعٛنْ؞ 
نغَطٜىٰ کَ وَطَنْکِمِنْ دٛعَارٜ؞ مِنْ تَبِّتِنِي ٻٜرْطٜ اَمِنْ طٜ لَٻْطٜ، اٜ مِنْ نغِطِ وَطُکِ کٛ حَانِ ندٜرْ کٛو طُمٜ؞ 
اٜ مِ ٻٜيْدَ تٛرَاکِعٛنْ نغَطٛنْ دٛعَارٜ نغَمْ اَللَّه سٛعّٛيَيَمْ تٛ مٛوطٛنْ نَاع کٛ نٜىٰٻِ؞ 
اَللَّه جٛومُ جَمْ اُمِّنِي يٜىٰسُ جٛومِرَاوٛ مٜىٰطٜنْ دَغَ مَيْدٜ لَاوٛلْ پِيپَمْ اَلْکَوَلْ تَبٛتٛونغَلْ؞ کَنْجُمْ وَطِ يٜىٰسُ وَرْتِ دُرٛووٛ بَالِ مَوْطٛ، 
اٛ وَطَعٛنْ مبَاوٛنْ وَطُکِ کٛو نغَلٜ کُوغَلْ بٛنْغَلْ نغَلْ اٛ يِطِ نغَطٛنْ؞ اٛ وَرْتِرَعٛنْ کٛ وٜلْنَنْتَمٛ ٻٜرْندٜ بَرْکَ يٜىٰسُ اَلْمَسِيحُ؞ مَنْغُ تَبِّتَ تٛ يٜىٰسُ حَا اَبَدَا اَبَدِنْ؞ اَامِنْ؞ 
اٜ مِ تٛرٛوعٛنْ بَنْدِرَاٻٜ، نجَٻٜىٰ وَغِّنٛورٜ ندٜعٜ، نغَمْ طٜرٜوٛلْ نغٛعٛلْ نغٛلْ مبِنْدَنْمِعٛنْ نغٛلْ جُوتَا؞ 
اٜ مِ يِطِ اَنْدٛنْ بَنْدِرَاوٛ مٜىٰطٜنْ تِمٛوتِ يٛوفَامَ دَغَ ندٜرْ سُودُ شُرَلْ؞ تٛ اٛ وَرِي تٛ اَمْ نَاع کٛ نٜىٰٻِ، مِ وَرْدَيْ اٜ مَاکٛ تٛ مٛوطٛنْ؞ 
کٛوْنَنٛنْمِنْ فُو اَرْدِيٻٜ مٛوطٛنْ اٜ يِمْٻٜ اَللَّه حٛرِيٻٜ؞ تٛکُّٻٜ يٜىٰسُ غٛنْٻٜ لٜيْدِ اِتَالِيَ اٜ کٛوْنَعٛنْ؞ 
اَللَّه بَرْکِطِنَعٛنْ، اٛنْ فُو؞
