﻿اِبْرَانِيَنْکٛعٜنْ.
4.
ندٜ اَلْکَوَلْ نغَلْ اَللَّه وَطَنِعٜنْ نغَلْ نَتُّکِ تٛ اٛ سِوْتِنْتَعٜنْ اٜ طٛنْ، اٜنْ ڤَامُ، تٛع غٛطّٛ مٛوطٛنْ دُلَّ نَتُّکِ سِوْتَارٜ ندٜنْ؞ 
نغَمْ اٜنْ نَنِي حَبَرُ بٜلْطُمْ، نٛنْ نٛ ٻٜ نَنِرِطُمْ؞ اَمَّا کٛ ٻٜ نَنِ طُمْ نَفَايِٻٜ، نغَمْ شَرٜلْ نغٜلْ ٻٜ نَنِطُمْ، ٻٜ نجَٻَايِطُمْ؞ 
نغَمْ اٜنٜنْ کٛولِيٻٜ اَللَّه اٜنٜنْ نغٛنِ نَتّٛوٻٜ سِوْتَارٜ ندٜنْ طٛنْ؞ نٛنْ نٛ اَللَّه وِعِ، ‏«‏مِ مٛنِّي مِ حُنَکٜ مِ وِعِ، ‏‹‏ٻٜ نَتَّتَا تٛ شِوْتِنَيْمِٻٜ!‏›‏ »‏ اٛ وِعِي نٛنْ کٛو ندٜ اٛ يٛتِّنِ سِرْيَاکِ کٛو طُمٜ دَغَ شَرٜلْ کٛ اٛ تَغَتَ دُونِيَارُ؞ 
نغَمْ بَنْݧٜ ندٜرْ دٜفْتٜرٜ شٜنِيندٜ اَللَّه مٜتِي دٛوْ ݧَلْندٜ جٛوٜىٰطِطَوْرٜ وِيکِ، ‏«‏ݧَلْندٜ جٛوٜىٰطِطَوْرٜ اَللَّه سِوْتِي دَغَ فُو کُوغَلْ مُوطُمْ؞»‏ 
ندٜنْ طُمْ فُطِّتِي طُمْ مٜتِي دٛوْ مَاجُمْ وِيکِ، ‏«‏ٻٜ نَتَّتَا تٛ شِوْتِنَيْمِٻٜ؞»‏ 
ٻٜنْ طٛنْ اَرْتُٻٜ نَنْکِ حَبَرُ بٜلْطُمْ ٻٜ کٜٻَايِ نَتُّکِ سِوْتَارٜ ندٜنْ طٛنْ نغَمْ ٻٜ نغَطَايِ کٛ اَللَّه وِعِ؞ اَمَّا اٜ وٛودِ وٛٻّٜ ٻٜ طُمْ اَلَتَ نَتَّ؞ 
اَللَّه فُطِّتِي وَطِي وٛنْدٜ ݧَلْندٜ اٛ نٛدِّرِندٜ، ‏«‏حَنْدٜ؞»‏ غَطَ دُوٻِ طُطِّ اٛ مٜتِرِي حٛنْدُکٛ دَوْدَ دٛوْ مَاجُمْ ندٜرْ اَايَارٜ ندٜ نَنُنٛوطٜنْ بِيندٜ، ‏«‏حَنْدٜ، تٛ اٛنْ نَنِي حٛنٛنْدٜ اَللَّه، تٛع اٛنْ شَاتِنْ ٻٜرْطٜ مٛوطٛنْ؞»‏ 
دَا جٛوشُوَ نَتِّنِينٛ يِمْٻٜ سِوْتَارٜ ندٜنْ، دَا اَللَّه فُطِّتَايِ مٜتِ دٛوْ وٛنْدٜ ݧَلْندٜ سِوْتَارٜ؞ 
نٛنْ حٛلِّي حَا جٛونِ اٜ وٛودِ وٛنْدٜ سِوْتَارٜ نغَمْ يِمْٻٜ اَللَّه؞ 
نغَمْ کٛو مٛيٜ نَتُّطٛ سِوْتَارٜ ندٜ اَللَّه وَطِ اَلْکَوَلْ، اٛ سِوْتٛتٛ دَغَ کُوطٜ مَاکٛ، نٛنْ نٛ اَللَّه سِوْتٛرِي دَغَ کُوطٜ مُوطُمْ؞ 
نغَمْ نٛنْ اٜنْ نغَطُ کٛ مبَاوٜتٜنْ وَطُکِ نغَمْ نَتّٜنْ سِوْتَارٜ ندٜنْ طٛنْ؞ تٛع غٛطّٛ مٜىٰطٜنْ وَطَ نٛ ٻٜنْ تٛنْ، وَݧَ کٛ اَللَّه وِعِ دُلَّ سِوْتَارٜ ندٜنْ؞ 
وٛلْدٜ اَللَّه اٜ وٛودِ يٛنْکِ اٜ ندٜ حُوَ، ندٜ ٻُرِي کٛو کِيٜ کَافَحِ وٜلْکِ؞ اٜ ندٜ تَپَ حَا ندٜ سٜنْدَ يٛنْکِ اٜ ٻٜرْندٜ، ندٜ سٜنْدَ جٛکّٛوطٜ اٜ مبٛرْٻٛوندِ؞ اٜ ندٜ سٜنْدَ سُونٛوجِ اٜ ݧُمٛوجِ ٻٜرْندٜ بٛطِّ اٜ طِ مبٛوطَا؞ 
ندٜرْ فُو کٛ تَغَا، وَلَا کٛ سُوطِي تٛ اَللَّه؞ کٛو طُمٜ اٜ نجَيْرِ طُمْ وٛنِ، اٜ طُمْ مَٻِّتِي يٜىٰسٛ مَاکٛ؞ ندٜنْ دٛولٜ کَنْکٛ مبِعٜتٜنْ فُو کٛ نغَطّٜنْ؞ 
ندٜ اٜنْ نغٛودِ مَوْطٛ مَوْٻٜ اَرْدِيٻٜ دِينَ جَاطٛ دٛوْ حَا يٜىٰسٛ اَللَّه، وَاتٛ يٜىٰسُ، ٻِطّٛ اَللَّه، اٜنْ نجٛغٛ کٛ کٛولِيطٜنْ بٛطُّمْ؞ 
مَوْطٛ مَوْٻٜ اَرْدِيٻٜ دِينَ مٛ نغٛودُطٜنْ نَاع اٛ غٛطّٛ مٛ وَاوَتَا يُرْمِنَنْکِعٜنْ اٜنٜنْ تَمْڤُٻٜ؞ اَمَّا اٛ فٛوندَامَ اٜ کٛو نغٛلٜ لَاوٛلْ نٛ طُمْ فٛوندِرْتَعٜنْ، فُو اٜ نٛنْ اٛ وَطَايِ حَکّٜ؞ 
نغَمْ نٛنْ، اٜنْ نغَطُ سٜمْبٜ ٻٜرْندٜ ٻَدّٛوطٜنْ جٛوطٛرْغَلْ لَامُ اَللَّه جٛومُ يِدّٜ، نغَمْ کٜٻٜنْ يُرْمٜىٰندٜ اٜ يِدّٜ بَلَّيْندٜعٜنْ اٜ شَرٜلْ نغٜلْ نغِطّٜنْدٜ؞ 
