﻿اِبْرَانِيَنْکٛعٜنْ.
3.
نغَمْ نٛنْ، بَنْدِرَاٻٜ اَمْ تٛکُّٻٜ يٜىٰسُ ٻٜ اَللَّه نٛدِّ، ݧُمٜىٰ دٛوْ يٜىٰسُ، لِلَاطٛ، مَوْطٛ مَوْٻٜ اَرْدِيٻٜ دِينَ مٛ مبِعٜتٜنْ يِمْٻٜ اٜنْ تٛکَّ؞ 
اٛ حُوَنِ اَللَّه اٜ غٛونغَ شُٻُطٛمٛ، نٛنْ نٛ مُوسَ حُوِرَنِ اَللَّه ندٜرْ يِمْٻٜ مَاکٛ اٜ غٛونغَ؞ 
اَمَّا طُمْ يِعِي يٜىٰسُ ٻُرِي مُوسَ مَنْغُ نَاع سٜطَّ، نٛنْ نٛ مَحٛووٛ وُرٛ ٻُرِرِ مَادِ ندِنْ مَنْغُ؞ 
نغَمْ کٛو نغٛيٜ وُرٛ غٛطّٛ مَحِنغٛ، اَمَّا اَللَّه وٛنِ مَحُطٛ کٛو طُمٜ؞ 
مُوسَ اٛ مَشُّطٛ اَللَّه مٛ غٛونغَ ندٜرْ کُوغَلْ وَلُّکِ يِمْٻٜ اَللَّه، اٛ مٜتِي دٛوْ کٛ اَللَّه وِعَتَ طٛعٛ يٜىٰسٛ؞ 
اَمَّا اَلْمَسِيحُ اٛ ٻِطّٛ، ڤَامَنٛووٛ يِمْٻٜ اَللَّه اٜ غٛونغَ؞ اٜنْ يِمْٻٜ اَللَّه تٛ اٜنْ نجٛغَکٜ سٜمْبٜ ٻٜرْندٜ اٜ شِيَ کُلٛلْ دٛوْ کٛ کَمِّيطٜنْ؞ 
نغَمْ نٛنْ، نٛ رُوحُ اَللَّه وِعِ، ‏«‏حَنْدٜ، تٛ اٛنْ نَنِي حٛنٛنْدٜ اَللَّه، 
تٛع اٛنْ شَاتِنْ ٻٜرْطٜ مٛوطٛنْ نٛ مَامَعٜنْ مٛوطٛنْ نغَطُنٛو شَرٜلْ کٛ ٻٜ نغَݧِ کٛ اَللَّه وِعِ ٻٜ ڤٛوندِمٛ ندٜرْ لَدّٜ؞ 
اَللَّه وِعِي، ‏‹‏تٛنْ مَامَعٜنْ مٛوطٛنْ ڤٛوندِيَمْ، کٛو ندٜ دُوٻِ 40 اٜ ٻٜ نغِعَ کُوطٜ اَمْ طٜ نغَطُمِ؞›‏ 
نغَمْ نٛنْ، مِ مٛنَّنِي يِمْٻٜ جَامَنُ طُمْ، مِ وِعِ، ‏‹‏کٛو ندٜيٜ اٜ ٻٜ شٜلَ لَاوٛلْ اَمْ، اٜ ٻٜ نغَݧَ تٛکُّکِيَمْ؞›‏ 
سٜيْ ٻٜرْنُمِ کُنِيمِ مبِيمِ، ‏‹‏ٻٜ نَتَّتَا تٛ شِوْتِنَيْمِٻٜ!‏›‏ »‏ 
بَنْدِرَاٻٜ اَمْ تٛکُّٻٜ يٜىٰسُ، ڤَامٜىٰ تٛع ٻٜرْندٜ کٛو مٛيٜ مٛوطٛنْ حَلَّ وَݧَ حٛولَاکِ، اَلٛنْ تٛکُّکِمٛ؞ 
اَمَّا شٜمْبِطِنْدِرٜىٰ ٻٜرْطٜ مٛوطٛنْ کٛو ندٜيٜ ݧَلْندٜ، کُوتِرٜىٰ کٛو نغٜلٜ شَرٜلْ بِعٜتٜىٰنغٜلْ ‏«‏حَنْدٜ،»‏ نغَمْ تٛع حَکّٜ پٛيْرَ غٛطّٛ مٛوطٛنْ اٛ وَرْتَ مٛ ٻٜرْندٜ شَاتُندٜ؞ 
تٛ اٜنْ نجٛغَکٜ حٛولَاکِ کِ نغٛودُنٛوطٜنْ دَغَ اَرَنْدٜ بٛطُّمْ حَا کٜىٰرٛلْ بَلْطٜ مٜىٰطٜنْ، اٜنْ نغَرْتِ غٛنْدُٻٜ اٜ اَلْمَسِيحُ؞ 
نٛ اَايَارٜ وِعِ، ‏«‏حَنْدٜ، تٛ اٛنْ نَنِي حٛنٛنْدٜ اَللَّه، تٛع اٛنْ شَاتِنْ ٻٜرْطٜ مٛوطٛنْ نٛ مَامَعٜنْ مٛوطٛنْ نغَطُنٛو ندٜ ٻٜ نغَݧِ کٛ اَللَّه وِعِ؞»‏ 
ٻٜيٜ نغٛنّٛو نَنْٻٜ حٛنٛنْدٜ اَللَّه، اَمَّا فُو اٜ نٛنْ نغَݧِ کٛ اٛ وِعِ؟ نَاع طُمْ ٻٜنْ طٛنْ ٻٜ فُو ٻٜ مُوسَ اَرْدِي وُرْتِنِ لٜيْدِ مَسَرْ؟ 
ندٜنْ ٻٜيٜ اَللَّه وَطِ دُوٻِ 40 اٜ مٛنَّنَ؟ نَاع طُمْ ٻٜنْ طٛنْ يِمْٻٜ غَطُٻٜ حَکّٜ مَايِ ندٜرْ لَدّٜ؟ 
دٛوْ ٻٜيٜ اَللَّه حُنِي وِيکِ ٻٜ نَتَّتَا تٛ شِوْتِنْتَٻٜ کٛو سٜطَّ؟ نَاع طُمْ ٻٜنْ طٛنْ غَݧُٻٜ کٛ اٛ وِعِ؟ 
نغَمْ نٛنْ، اٜنْ نغِعِي ٻٜ مبَاوَايِ نَتُّکِ لٜيْدِ ندِنْ نغَمْ ٻٜ کٛولَاکِ اَللَّه؞ 
