﻿طٜرٜوٛلْ طِطَٻٛلْ نغٛلْ بُلُسْ وِنْدَنِ  تَسَلٛونِکَنْکٛعٜنْ.
1.
مِنْ بُلُسْ وِنْدِ طٜرٜوٛلْ نغٛعٛلْ حَوْتِ اٜ سِيلَ اٜ تِمٛوتِ؞ مِنْ مبِنْدَنْغٛلْ تٛکُّٻٜ يٜىٰسُ غٛنْٻٜ غَرِيرِ تَسَلٛونِکَ، ٻٜ اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ جٜيِ؞ 
اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞ 
بَنْدِرَاٻٜ اَمِنْ، اٜ حَانِ مِنْ نغَطَ کَ يٜتُّکِ اَللَّه کٛو ندٜيٜ نغَمْ مٛوطٛنْ، نغَمْ حٛولَارٜ مٛوطٛنْ اٜ ٻٜيْدٛو نَاع سٜطَّ، ندٜنْ يِدّٜ ندٜ نغِطِنْدِرٛنْ اٜ ٻٜيْدٛو؞ 
کَنْجُمْ وَطِ مِنٛنْ اٜ کٛعٜ اَمِنْ اٜ مِنْ مَنْتٛرٛوعٛنْ ندٜرْ کَوْتٜ تٛکُّٻٜ اَللَّه؞ اٜ مِنْ طِيوِتَنَٻٜ نٛ مُݧِرْطٛنْ اٜ حٛولَارٜ مٛوطٛنْ ندٜرْ فُو تٛرَّاجِ اٜ شَطٜىٰلٜ طٜ نجَرٛتٛنْ؞ 
فُو طُعُمْ تَبِّتِنِي کِيتَ اَللَّه اٜ وٛودِ غٛونغَ، نغَمْ مَاجُمْ طُمْ وَرْتِرَيْعٛنْ کٜوْتُٻٜ جٛوطَاکِ ندٜرْ لَامُ مَاکٛ، نغَمْ دٛوْ مَاجُمْ نجَرٛتٛنْ تٛرَّ؞ 
اَللَّه اٛ غَطٛووٛ کٛ حَانِ؞ اٛ وَاتَنَيْ ٻٜنْ طٛنْ تٛرَّيْٻٜعٛنْ اٜ تٛرَّ، 
اٛ وَلْتِنَيْ ٻٜرْطٜ مٛوطٛنْ اٛنٛنْ تٛرّٜتٜىٰٻٜ؞ مِنٛنْ مَا اٛ وَلْتِنَيْ ٻٜرْطٜ اَمِنْ؞ اٛ وَطَيْ نٛنْ ݧَلْندٜ ندٜ يٜىٰسُ اَلْمَسِيحُ وَنْغَتَ دَغَ دٛوْ ندٜرْ حِيتٜ حَوْتِ اٜ مَلَاعِکَعٜنْ مَاکٛ غٛودُٻٜ بَوْطٜ؞ 
غَݧُٻٜ اَللَّه اٜ غَݧُٻٜ نغَطَ کٛ حَبَرُ بٜلْطُمْ طُمْ جٛومِرَاوٛ مٜىٰطٜنْ يٜىٰسُ وِعِ، اَللَّه وَاتَنَيْٻٜ حَلْکٜرٜ کَلُّندٜ؞ 
ٻٜ نجَرَيْ تٛرَّ حَلْکٜرٜ ندٜ حَا اَبَدَا، طُمْ اِتَّيْٻٜ دَغَ يٜىٰسٛ جٛومِرَاوٛ اٜ يٜىٰسٛ مَنْغُ بَوْطٜ مَاکٛ؞ 
حَلْکٜرٜ ندٜنْ وَنْغَيْ ݧَلْندٜ ندٜ اٛ وَرْتٛيْتَ؞ اٛ وَرْتٛيَيْ نغَمْ شٜنِيٻٜ مَاکٛ تٜدِّنَمٛ فُو کٛولِيٻٜمٛ مَوْنِنَمٛ؞ اٛنٛنْ مَا اٛنْ کَوْتَيْ اٜ مَٻّٜ، نغَمْ اٛنْ نجَٻِي حَبَرُ طُمْ مِنْ کٛکِّعٛنْ؞ 
کَنْجُمْ وَطِ کٛو ندٜيٜ اٜ مِنْ نغَطَنَعٛنْ دٛعَارٜ؞ اٜ مِنْ تٛرٛو اَللَّه مٜىٰطٜنْ وَرْتِرَعٛنْ يِمْٻٜ غَطٛوٻٜ اِرِ جٛنْدٜ ندٜ اٛ نٛدِّعٛنْ نغَطٛنْ؞ بَرْکَ بَوْطٜ مَاکٛ اٛ حٜبِّنَ کٛو طُمٜ بٛطُّمْ طُمْ نغِطّٛنْ وَطُکِ نغَمْ اٛنْ کٛولَکٜ يٜىٰسُ؞ 
اٜ مِنْ نغَطَ دٛعَارٜ ندٜعٜ نغَمْ اِنْدٜ جٛومِرَاوٛ مٜىٰطٜنْ يٜىٰسُ مَوْنِنٜىٰ ندٜرْ مٛوطٛنْ، کَنْکٛ بٛو اٛ مَوْنِنَعٛنْ بَرْکَ يِدّٜ اَللَّه مٜىٰطٜنْ اٜ يٜىٰسُ اَلْمَسِيحُ جٛومِرَاوٛ؞ 
