﻿1 تَسَلٛونِکَنْکٛعٜنْ.
3.
نغَمْ نٛنْ ندٜ مِنْ مبَاوَايِ مُݧُکِ، سٜيْ مِنْ نغِعِ طُمْ ٻُرِي وٛوطُکِ طُمْ اَلَمِنْ اٜ اَتِنَ، مِنٛنْ تَنْ؞ 
مِنْ لِلٛيِ بَنْدِرَاوٛ اَمِنْ تِمٛوتِ تٛ مٛوطٛنْ، مٛ مِنْ کُودَتَ، اٜ مٛ حُوَنَ اَللَّه ندٜرْ حٛکُّکِ حَبَرُ بٜلْطُمْ طُمْ اَلْمَسِيحُ؞ مِنْ لِلُمٛ نغَمْ اٛ تَبِّتِنَ حٛولَارٜ مٛوطٛنْ اٛ سٜمْبِطِنَعٛنْ، 
نغَمْ تٛع تٛرَّ کَ نجَرْطٛنْ وَطَ غٛطّٛ مٛوطٛنْ يٜوْرَ اَلَ حٛولَاکِ يٜىٰسُ؞ اٛنٛنْ اٜ کٛعٜ مٛوطٛنْ اٛنْ اَنْدِ دٛولٜ نجَرٜنْ تٛرَّ اِرِ کَعَ؞ 
نغَمْ شَرٜلْ کٛ مِنْ نغٛنْدُنٛو اٜ مٛوطٛنْ، مِنْ نغَطِي کَ وِيکِعٛنْ دَغَ اِلَا اٜنْ نجَرَيْ تٛرَّ؞ طُمْ بٛو وَطِي نٛنْ، نٛ اَنْدُطٛنْ؞ 
نغَمْ نٛنْ، ندٜ تَمْڤُمِ مُݧُکِ، مِ لِلٛيِي نغَمْ مِ نَنَ حَبَرُ حٛولَارٜ مٛوطٛنْ؞ اٜ مِ حُلَ کٛو شٜيْطَنْ مَجِّنِيعٛنْ، کُوغَلْ اَمِنْ وَرْتِي مٜىٰرٜ؞ 
اَمَّا جٛونِ تِمٛوتِ وَرْتِي دَغَ تٛ مٛوطٛنْ، اٛ حٛکِّيمِنْ حَبَرُ بٛطُّمْ دٛوْ حٛولَارٜ مٛوطٛنْ اٜ يِدّٜ ندٜ نغٛودُطٛنْ؞ اٛ وِعِيمِنْ کٛو ندٜيٜ اٛنْ ݧُمَ ݧُمٛلْ بٛنْغٛلْ دٛوْ اَمِنْ، ندٜنْ اٛنْ نغِطِ يِيکِمِنْ نٛنْ نٛ مِنْ نغِطِرِ يِيکِعٛنْ؞ 
نغَمْ نٛنْ، بَنْدِرَاٻٜ، ندٜرْ فُو وَنَّارٜ اٜ تٛرَّ طُمْ مِنْ نجَرِ، اٛنْ ڤٜوْنَنِيمِنْ ٻٜرْطٜ نغَمْ حٛولَارٜ مٛوطٛنْ؞ 
جٛونِ اٜ مِنْ نغٛودِ يٛنْکِ غٛونغَ، تٛ اٛنْ ندَرَکٜ اٜ سٜمْبٜ ندٜرْ تٛکُّکِ جٛومِرَاوٛ؞ 
اِرِ ندٜيٜ يٜتّٛورٜ مِنْ نغٜتَّتَ اَللَّه نغَمْ مٛوطٛنْ؟ اٜ مِنْ نغٜتَّمٛ نغَمْ بٜلْطُمْ ٻٜرْندٜ طُمْ مِنْ نَنَتَ يٜىٰسٛ مَاکٛ نغَمْ مٛوطٛنْ؞ 
جٜمَّ اٜ ݧَلَوْمَ اٜ مِنْ نغَطَ دٛعَارٜ نَاع سٜطَّ نغَمْ مِنْ ڤُطِّتَ مِنْ نغِعَعٛنْ غِتٜ اٜ غِتٜ، مِنْ کٜبِّتِنَ کٛ ندُلُّطٛنْ ندٜرْ حٛولَارٜ مٛوطٛنْ؞ 
اَللَّه ݧَاکٛ مٜىٰطٜنْ اٜ حٛورٜ مُوطُمْ اٜ جٛومِرَاوٛ مٜىٰطٜنْ يٜىٰسُ سِرْيَنٛومِنْ لَاوٛلْ نٛ مِنْ نغَرِرْتَ تٛ مٛوطٛنْ؞ 
جٛومِرَاوٛ ٻٜيْدَ يِدّٜ ندٜ نغِطِندِرْطٛنْ نَاع سٜطَّ اٜ يِدّٜ ندٜ نغِطّٛنْ وٛٻّٜ مَا، نٛنْ نٛ يِدّٜ اَمِنْ ٻٜيْدٛرِي دٛوْ مٛوطٛنْ؞ 
اٛ سٜمْبِطِنَ ٻٜرْطٜ مٛوطٛنْ نغَمْ نغَرْتٛنْ ٻٜ نغَلَا غٛطُّمْ کٛ وٛوطَا، نغَرْتٛنْ شٜنِيٻٜ يٜىٰسٛ اَللَّه ݧَاکٛ مٜىٰطٜنْ ݧَلْندٜ وَرْتُکِ جٛومِرَاوٛ مٜىٰطٜنْ يٜىٰسُ اٜ فُو شٜنِيٻٜ مَاکٛ؞ 
