﻿کٛلٛوسِيَنْکٛعٜنْ.
4.
اٛنٛنْ غٛودُٻٜ مَشُّٻٜ، نجٛغٜىٰ مَشُّٻٜ مٛوطٛنْ بٛطُّمْ، کٛکّٜىٰٻٜ کٛ حَانِ ٻٜ کٜٻَ، نغَمْ اٛنْ اَنْدِ اٛنٛنْ مَا اٛنْ نغٛودِ جٜيْطٛعٛنْ تٛنْ دٛوْ؞ 
نغَطٜىٰ کَ وَطُکِ دٛعَارٜ، نغَطٜىٰ حَکِّيلٛ مٛوطٛنْ دٛوْ دٛعَارٜ ندٜنْ، اٛنْ نغٜتَّ اَللَّه؞ 
نٛنْ مَا نغَطَنٜىٰمِنْ دٛعَارٜ نغَمْ اَللَّه مَٻِّتَنَمِنْ لَاوٛلْ مِنْ نغَعَجِنَ سِرُّ مَاکٛ، وَاتٛ حَبَرُ اَلْمَسِيحُ؞ دٛوْ مَاجُمْ طُمْ سُرِيَمْ؞ 
نغَطَنٜىٰيَمْ دٛعَارٜ نغَمْ مِ اَنْدِنَطُمْ نٛ حَانِ، نٛ کٛو مٛيٜ فَامِرْتَطُمْ بٛطُّمْ؞ 
ڤَامٜىٰ اِرِ نغِکُّ طُمْ نغَطَنْتٛنْ ٻٜ تٛکَّايِ يٜىٰسُ؛ کُوتِرٜىٰ کٛو نغٜلٜ شَرٜلْ نغٜلْ کَوْرُطٛنْ اٜ مَٻّٜ بٛطُّمْ؞ 
بٛلِيطٜ مٛوطٛنْ کٛو ندٜيٜ طٜ نغَرْتَ بٜلْطٜ نَنْکِ، ڤٛوطٛوجٜ حَکِّيلٛ يِمْٻٜ، نغَمْ اَنْدٛنْ نٛ حَانِ نٛوتٛرَنٛوطٛنْ کٛو مٛيٜ؞ 
تِيکِکُسْ حٛکَّيْعٛنْ فُو حَبَرُ اَمْ؞ اٛ تٛکُّطٛ يٜىٰسُ مٛ مِنْ نغِطِ، کُوٛووٛ مٛ غٛونغَ، مٛ مِنْ کُودَتَ کُوغَلْ جٛومِرَاوٛ؞ 
کَنْجُمْ وَطِ لِلٛيْمٛومِ تٛ مٛوطٛنْ، نغَمْ اٛ حٛکَّعٛنْ حَبَرُ نٛ مِنْ غٛنْتِندِرِ، اٛ سٜمْبِطِنَ ٻٜرْطٜ مٛوطٛنْ؞ 
اٜ مٛ يَادَ اٜ اٛنِسِمُسْ تٛکُّطٛ يٜىٰسُ اٜ غٛونغَ، غِطَاطٛ، غٛنْطٛ ندٜرْ کَوْتَلْ مٛوطٛنْ؞ ٻٜ کٛکَّيْعٛنْ حَبَرُ کٛو طُمٜ کٛ وَطَتَ طٛعٛ؞ 
اَرِسْتَرْکُسْ غٛنْدُطٛ اٜ اَمْ ندٜرْ سُودُ شُرَلْ اٜ حٛوْنَعٛنْ، نٛنْ مَا مَرْکُسْ بَنْدِرَاوٛ بَرْنَبَ؞ ﴿اٛنْ نجَادَکٜ اٛنْ مبِعَامَ نجَٻّٛوطٛنْمٛ بٛطُّمْ تٛ اٛ وَرِي تٛ مٛوطٛنْ؞﴾ 
جٛوشُوَ بِعٜتٜىٰطٛ جُسْتُسْ اٜ حٛوْنَعٛنْ کَنُمْ مَا؞ ندٜرْ يِمْٻٜ ٻٜ کُودَيْمِ نغَمْ لَامُ اَللَّه، کَمْٻٜ تَنْ نغٛنِ يَحُودَنْکٛعٜنْ تٛکُّٻٜ يٜىٰسُ طٛعٛ؞ ٻٜ مبَلِّييَمْ نَاع سٜطَّ؞ 
اَبَافَرَسْ اٜ حٛوْنَعٛنْ، کَنْکٛ مَا اٜ مٛ ندٜرْ کَوْتَلْ مٛوطٛنْ، اٛ مَشُّطٛ يٜىٰسُ اَلْمَسِيحُ؞ کٛو ندٜيٜ اٜ مٛ تٛرٛو اَللَّه سٜمْبِطِنَعٛنْ، نغَرْتٛنْ تٛکُّٻٜ يٜىٰسُ کٜىٰوُٻٜ، غَطٛوٻٜ کٛ اَللَّه يِطِ ٻٜ نغَلَا سٜکٛ؞ 
مِ وَاوَيْ مِ حٛکَّ شٜيْدَ اٛ حُوِي نَاع سٜطَّ نغَمْ مٛوطٛنْ اٜ نغَمْ يِمْٻٜ لَوْدِيکِيَ اٜ يِمْٻٜ حِرَفٛلِسْ؞ 
لُکَ ݧَوْندٛووٛ مٛ مِنْ نغِطِ اٜ دِمَسْ اٜ ٻٜ کٛوْنَعٛنْ؞ 
کٛوْنَنٜىٰمِنْ تٛکُّٻٜ يٜىٰسُ غٛنْٻٜ غَرِيرِ لَوْدِيکِيَ اٜ بِعٜتٜىٰطٛ نِمْفَ اٜ تٛکُّٻٜ يٜىٰسُ کَوْرِتٛوٻٜ تٛ وُرٛ مَاکٛ؞ 
غَطَ طُمْ جَنْغَنِيعٛنْ طٜرٜوٛلْ نغٛعٛلْ، نٛنْ مَا تَبِّتِنٜىٰ طُمْ جَنْغَنِينغٛلْ تٛکُّٻٜ يٜىٰسُ غٛنْٻٜ لَوْدِيکِيَ؞ اٛنٛنْ مَا، نجَنْغٜىٰ طٜرٜوٛلْ نغٛلْ تٛکُّٻٜ يٜىٰسُ غٛنْٻٜ لَوْدِيکِيَ لِلْدٛنٛيْتَعٛنْ؞ 
مبِعٜىٰ اَرْکِبُسْ، ‏«‏تَبِّتِنْ اَ يٛتِّنِي کُوغَلْ نغَلْ جٛومِرَاوٛ حٛکُّمَا؞»‏ 
مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞ تٛع اٛنْ نغٜجُّتُ اٜ مِ طٛنْ حَٻِّرَا ٻٛغِّ نجَمْندِ ندٜرْ سُودُ شُرَلْ؞ اَللَّه بَرْکِطِنَعٛنْ؞
