﻿کٛلٛوسِيَنْکٛعٜنْ.
2.
اٜ مِ يِطِ اَنْدٛنْ نٛ کُوِرْمِ نَاع سٜطَّ نغَمْ مٛوطٛنْ اٜ نغَمْ يِمْٻٜ لَوْدِيکِيَ، اٜ نغَمْ فُو يِمْٻٜ ٻٜ مٜىٰطَايِ يِيکِيَمْ غِتٜ اٜ غِتٜ؞ 
مِ وَطُ نٛنْ نغَمْ طُمْ سٜمْبِطِنَ ٻٜرْطٜ مَٻّٜ، ندٜنْ ٻٜ ٻٜيْدَ يِطِندِرْکِ، ٻٜ کٜٻَ فُو بَرْکَ کٜٻٜتٜىٰطُمْ لَاوٛلْ فَامُ کٜوْطُمْ، نغَمْ ٻٜ مبَاوَ اَنْدُکِ سِرُّ اَللَّه، وَاتٛ اَلْمَسِيحُ اٜ حٛورٜ مَاکٛ؞ 
کَنْکٛ تَنْ وٛنِ بَاوَيْطٛ حٛکُّکِٻٜ اَنْدَلْ کٜوْنغَلْ دٛوْ سِرُّ طُمْ؞ 
مِ وِعُعٛنْ طُعُمْ نغَمْ تٛع غٛطّٛ مَجِّنَعٛنْ اٜ بٜلْطُمْ حَالَ؞ 
کٛو ندٜ مِ وٛنْدَا اٜ مٛوطٛنْ ندٜرْ ٻَنْدُ، فُو اٜ نٛنْ اٜ مِ ݧُمَ دٛوْ مٛوطٛنْ کٛو ندٜيٜ؞ اٜ مِ نَنَ بٜلْطُمْ ندٜ نَنْمِ حَبَرُ اٛنْ جٛوطٛو نٛ حَانِ نجٛوطٛرٛوطٛنْ، اٜ نٛ شٜمْبِطِرْطٛنْ ندٜرْ حٛولَاکِ اَلْمَسِيحُ؞ 
ندٜ اٛنْ نجَٻِي يٜىٰسُ اَلْمَسِيحُ اٛ جٛومِرَاوٛ، نغَطٜىٰ کَ سُمْڤٛوتِرْکِ اٜ مَاکٛ؞ 
نٛ طَطِ لٜکِّ نغَطِرْتَ لٜکِّ کِنْ دَرٛو بٛطُّمْ، شٜمْبِطَ، نٛنْ اٛنٛنْ مَا، ندَرٜىٰ بٛطُّمْ، ٻٜيْدٜىٰ سٜمْبٜ ندٜرْ حٛولَاکِمٛ، نٛنْ نٛ طُمْ اٜکِّتِنِرِعٛنْ؞ نغَطٜىٰ کَ يٜتُّکِمٛ کٛو نغٜلٜ شَرٜلْ؞ 
تٛع اٛنْ اَلُ غٛطّٛ حُوتِرَ فَامُ دُونِيَارُ ندُعُ وَطَعٛنْ اَلٛنْ لَاوٛلْ غٛونغَ؞ اِرِ طُعُمْ فَامُ وَلَا کٛ طُمْ نَفِ طُمْ مَجِّنَيْعٛنْ؞ نَاع تٛ اَلْمَسِيحُ طُمْ پِوٛيِ، دَغَ تٛ يِمْٻٜ طُمْ پِوٛيِ اٜ غِنِّ غٛودُطِ بَوْطٜ ندٜرْ دُونِيَارُ؞ 
اَلْمَسِيحُ اٜ وٛودِ فُو نغِکُّ اٜ بَوْطٜ اَللَّه ندٜرْ ٻَنْدُ مَاکٛ؞ 
ندٜرْ سُمْڤٛوتِرْکِ اٜ مَاکٛ، جٛنْدٜ مٛوطٛنْ وَرْتِي کٜوْندٜ؞ کَنْکٛ وٛنِ مَوْطٛ دٛوْ کٛو نغٛلٜ غِنّٛلْ، اٜ مَلَاعِکَاجٛ، اٜ کٛو طُمٜ لَامُ غٛنْطُمْ دٛوْ اٜ لٜيْ؞ 
ندٜرْ سُمْڤٛوتِرْکِ مٛوطٛنْ اٜ اَلْمَسِيحُ اٛنْ نَادَامَ، نَاع اِرِ نَادُکِ کِ يِمْٻٜ نغَطَتَ، اَمَّا اِرِ نَادُکِ کِ اَلْمَسِيحُ وَطَتَ، وَاتٛ اٛ اِتِّي نغِکُّ مٛوطٛنْ غِطُّمْ وَطُکِ حَکّٜ؞ 
نغَمْ شَرٜلْ کٛ طُمْ وَطَنِعٛنْ بَڤْتِسْمَ، بٛ اٛنْ اُوِدَ اٜ اَلْمَسِيحُ، کَدِنْ بٛ اٛنْ اُمِّدِنَامَ اٜ مَاکٛ دَغَ مَيْدٜ؞ نٛنْ وَطِ نغَمْ اٛنْ کٛولَکٜ بَوْطٜ اَللَّه، اُمِّنْطٛمٛ دَغَ مَيْدٜ؞ 
ندٜنّٛ اٛنْ نَنْدِ اٜ مَيْٻٜ نغَمْ حَکّٜ طُمْ نغَطّٛنْ، کَدِنْ نغَمْ طُمْ اِتَّنَايِعٛنْ نغِکُّ مٛوطٛنْ غِطُّمْ وَطُکِ حَکّٜ؞ اَمَّا جٛونِ اَللَّه حٛکِّيعٛنْ يٛنْکِ ندٜرْ سُمْڤٛوتِرْکِ اٜ اَلْمَسِيحُ؞ اٛ يَافَنَکٜعٜنْ فُو حَکّٜ مٜىٰطٜنْ؞ 
اَللَّه وٛغِّي فُو کٛ وٛوطَا طُمْ نغَطّٜنْ بِنْدَاطُمْ طُمْ اُمْ نَنْغِرِعٜنْ؞ اٛ اِتِّيطُمْ دٛوْ مٜىٰطٜنْ ندٜ اَلْمَسِيحُ فِيَنَا کُوسَاجٜ دٛوْ غَافَانغَلْ؞ 
دٛوْ غَافَانغَلْ نغَلْ اٛ حٜٻِ جَالٛرْغَلْ دٛوْ غِنِّ اٜ فُو بَوْطٜ غٛنْطٜ دٛوْ اٜ لٜيْ، اٛ سٜمْتِنِيطُمْ اٜ نجَيْرِ؞ 
نغَمْ نٛنْ، تٛع اٛنْ اَلُ غٛطّٛ يٛوَنَعٛنْ کٛ وٛوطَا نغَمْ کٛ ݧَامٛتٛنْ اٜ کٛ نجَرٛتٛنْ، کٛو نغَمْ اٛنْ نغَطَايِ وٛنْغٛ حُمْتٛ دِينَ، کٛو حُمْتٛ دَرَاکِ لٜوْرُ، کٛو دٛوْ ݧَلْندٜ سِوْتَارٜ؞ 
فُو فِي طُعُمْ طُمْ طٛوْدِ فِي غَرَيْطُمْ طٛعٛ يٜىٰسٛ، غٛونغَ فُو فِي طُعُمْ وٛنِ اَلْمَسِيحُ؞ 
اٜ وٛودِ وٛٻّٜ يِطُٻٜ لٜسْنُکِ حٛورٜ کِ فٜوْرٜ اٜ مَوْنِنْکِ مَلَاعِکَعٜنْ؞ تٛع اٛنْ اَلُ ٻٜ نجَوَنَعٛنْ؞ اِرِ مَٻّٜ اٜ ٻٜ مبِعَ اٜ ٻٜ نغِعَ وَحَيُ؞ اٜ ٻٜ پٜفْتَ کٛعٜ مَٻّٜ اٜ مٜىٰرٜ، نغَمْ ݧُمٛوجِ مَٻّٜ طُمْ طِ دُونِيَارُ؞ 
اِرِ مَٻّٜ نجَادَکٜ ٻٜ شٜنْدِرِي اٜ اَلْمَسِيحُ؞ اَلْمَسِيحُ وٛنِ بٛ حٛورٜ ٻَنْدُ، وَاتٛ تٛکُّٻٜمٛ؞ جٛکّٛوطٜ اٜ رَطٛوجِ جٛغِي ٻَنْدُ ندُنْ، اٜ ندُ مَوْنَ نغَمْ اَللَّه اٜ مَوْنِنَنْدُ؞ 
اٛنْ مَيْدِي اٜ اَلْمَسِيحُ؞ جٛونِ اٛنْ نغَلَا لٜيْ لَامُ غِنِّ لَامٛتٛوطِ دُونِيَارُ؞ ندٜ طُمْ نٛنْ، نغَمْ طُمٜ نغَطٛتٛنْ جٛنْدٜ بٛ حَا جٛونِ دُونِيَارُ ندُعُ جٜيِعٛنْ؟ نغَمْ طُمٜ تٛکّٛتٛنْ دٛوکَاجِ دُونِيَارُ بِيطِ، 
‏«‏تَاع جٛغَ طُعُمْ،»‏ ‏«‏تَاع ݧَامُ طُمْ تٛنْ،»‏ ‏«‏تَاع مٜىٰمُ طُمْ طٛنْ؟»‏ 
اِرِ طِعِ دٛوکَاجِ طِ دٛوکَاجِ فِي مٜىٰرٜ طِ نغَرْتَيْ مٜىٰرٜ غَطَ طِ کُوتِرَامَ، نغَمْ طِ دٛوکَاجِ يِمْٻٜ تَنْ اٜ اٜکِّتِنٛلْ مَٻّٜ؞ 
اٜ طِ نغَطَ بٛ اٜ طِ کٛلَّ نٛ حَانِ نٜطّٛ جٛوطٛرٛو، نغَمْ اٜ طِ اٜکِّتِنَ يِمْٻٜ نغَطَ کٛ سَطِ نغَمْ حٛلُّکِ ٻٜ تٛکُّٻٜ اَللَّه؞ اٜ ٻٜ لٜيْنَ کٛعٜ مَٻّٜ لٜيْنُکِ فٜوْرٜ، اٜ ٻٜ تٛرَّ ٻَلِّ مَٻّٜ نغَمْ اٜ ٻٜ ݧُمَ طُمْ وٜلْنَنَيْ اَللَّه ٻٜرْندٜ؞ اَمَّا طُمْ وَلَّتَاٻٜ ٻٜ کٜٻَ جَالٛرْغَلْ دٛوْ سُونٛوجِ مَٻّٜ؞ 
