﻿فِلِبِيَنْکٛعٜنْ.
3.
اٜ رٜعِرْدٜ بَنْدِرَاٻٜ اَمْ، نَنٜىٰ بٜلْطُمْ نغَمْ سُمْڤٛوتِرْکِ مٛوطٛنْ اٜ جٛومِرَاوٛ؞ مِ سٛمَايِ وِنْدَنْکِعٛنْ کٛ مبِنْدَنّٛومِعٛنْ ندٜنّٛ، نغَمْ طُمْ سُرُکِ نجَمُ مٛوطٛنْ؞ 
نغَطٜىٰ حَکِّيلٛ اٜ ٻٜنْ طٛنْ يِمْٻٜ ٻٜ نغِکُّ بٛ طُمْ کُتِيجِ، کُوٛوٻٜ کُوطٜ کَلُّطٜ، وِعٛوٻٜ دٛولٜ طُمْ نَادَ کٛ طُمْ حٜٻَ کِسْندَمْ؞ 
نغَمْ اٜنٜنْ نغٛودِ نَادُکِ کِ غٛونغَ، اٜنٜنْ مَوْنِنٛوٻٜ اَللَّه ندٜرْ رُوحُ مَاکٛ، مَنْتٛرْتٛوٻٜ يٜىٰسُ اَلْمَسِيحُ؞ اٜنٜنْ اٜنْ نغَطَتَا ٻٜرْطٜ مٜىٰطٜنْ دٛوْ کُوطٜ طٜ نغَطٜتٜنْ اٜ ٻَنْدُ نغَمْ اَللَّه جَٻَعٜنْ، 
کٛو ندٜ مِنْ، اٜ مِ وٛودِ دَلِيلَ وَطُکِ ٻٜرْندٜ اَمْ دٛوْ کُوطٜ ٻَنْدُ؞ تٛ اٜ وٛودِ کَمِّيطٛ اٜ وٛودِ دَلِيلَ وَطُکِ ٻٜرْندٜ دٛوْ کُوطٜ ٻَنْدُ، مِ ٻُرِيمٛ؞ 
مِ نَادَامَ اٜ ݧَلْندٜ جٛوٜىٰتَتَوْرٜ غَطَ مِ دَݧَامَ؞ مِ اِسْرَاعِيلَنْکٜىٰجٛ، دَغَ لٜݧٛلْ بِلِيَامِنُ، مِ اِبْرَانِيَنْکٜىٰجٛ دِمٛ، ٻِطّٛ اِبْرَانِيَنْکٛعٜنْ؞ دٛوْ تٛکُّکِ اَتَّوْرَ، مِ فَارِسَنْکٜىٰجٛ؞ 
مِ تٛکِّي دِينَ اَمْ حَا مِ تٛرِّي تٛکُّٻٜ يٜىٰسُ؞ دٛوْ وَطُکِ اَادِلَاکُ ندٜرْ تٛکُّکِ اَتَّوْرَ، طُمْ تَوْرَايِيَمْ غٛطُّمْ کٛ وٛوطَا؞ 
اَمَّا فُو کٛ نغِعَيْنٛومِ بٛ طُمْ نَفَنَيْيَمْ، جٛونِ مِ حٛشِّيطُمْ طُمْ مٜىٰرٜ نغَمْ اَلْمَسِيحُ؞ 
کٛ ٻُرِ نٛنْ وٛنِ مِ حٛشِّي کٛو طُمٜ مٜىٰرٜ، نغَمْ کٛ ٻُرِ مَنْغُ وٛنِ اَنْدُکِ يٜىٰسُ اَلْمَسِيحُ جٛومِرَاوٛ اَمْ؞ نغَمْ مَاکٛ شٜنْدِرْمِ اٜ کٛو طُمٜ نغَرْتِرْمِ طُمْ مٜىٰرٜ، نغَمْ مِ تٛکَّمٛ، 
مِ وَرْتَ شُمْڤٛوتِرٛووٛ اٜ مَاکٛ؞ مِ وَرْتَيْ نٛنْ نَاع نغَمْ اَادِلَاکُ طُمْ نغٛودُمِ نغَمْ تٛکُّکِ اَتَّوْرَ، اَمَّا نغَمْ اَادِلَاکُ کٜٻٜتٜىٰطُمْ ندٜرْ حٛولَاکِمٛ، وَاتٛ اَادِلَاکُ پِوٛيْطُمْ تٛ اَللَّه کٜٻٜتٜىٰطُمْ بَرْکَ حٛولَاکِ اَلْمَسِيحُ؞ 
کٛ نغِطُمِ وٛنِ، مِ اَنْدَ اَلْمَسِيحُ اٜ بَوْطٜ اُمَّاکِ مَاکٛ دَغَ مَيْدٜ؞ اٜ مِ يِطِ مِ يَرَ اِرِ تٛرَّ کَ اٛ يَرِ، مِ مَايِرَ نٛ اٛ مَايِرِ، 
نغَمْ فُو نٛ طُمْ وَطِ مِ حٜٻَ مِ اُمّٛو دَغَ مَيْدٜ؞ 
مِ وِعَايِ مِ يَادَکٜ مِ وَرْتِي کٛو طُمٜ کٛ حَانِ مِ وَرْتَ، کٛو بٛو مِ يَادَکٜ مِ وَرْتِي کٜوْطٛ؞ اَمَّا اٜ مِ وَطَ کٛ مبَاوَيْمِ وَطُکِ نغَمْ مِ وَرْتَ نٛنْ، نغَمْ يٜىٰسُ اَلْمَسِيحُ يَادَکٜ وَرْتِرِييَمْ مٛ مَاکٛ؞ 
بَنْدِرَاٻٜ، مِ حٛشَّايِ مِ يَادَکٜ مِ وَرْتِي نٛنْ؞ اَمَّا فِي غٛعٛ نغَطَيْمِ:‏ اٜ مِ يٜجِّتَ کٛ پَٻِّي، اٜ مِ وَطَ کٛ مبَاوَيْمِ وَطُکِ مِ يٛتّٛو کٛ وٛنِ يٜىٰسٛ؞ 
اٜ مِ ݧَمْرَ يٜىٰسٛ نغَمْ مِ حٜٻَ جَالٛرْغَلْ مِ حٛکّٜىٰ دٛکَّلْ، وَاتٛ نٛدّٛلْ يَاکِ دٛوْ نغٛلْ اَللَّه نٛدِّيَمْ بَرْکَ يٜىٰسُ اَلْمَسِيحُ؞ 
فُو اٜنٜنْ شٜمْبِطْٻٜ ندٜرْ تٛکُّکِ يٜىٰسُ، اٜ حَانِ ݧُمِرٜنْ نٛنْ؞ تٛ اٛنْ ݧُمِي غٛطُّمْ فٜىٰرٜ، اَللَّه حٛلَّيْعٛنْ طُمْ اٜ نجَيْرِ؞ 
اَمَّا اٜنْ ݧَمْرَ يٜىٰسٛ اٜ تٛکُّکِ غٛونغَ کَ نجَادِيطٜنْ اٜکِّتِيطٜنْ؞ 
بَنْدِرَاٻٜ اَمْ، اٜکِّتٜىٰ تٛ اَمْ؞ ندَارٛنْ غَطٛوٻٜ جٛنْدٜ کَانُندٜ ندٜ مِنْ اٜکِّتِنِعٛنْ؞ 
نغَمْ اٜ وٛودِ يِمْٻٜ طُطْٻٜ ٻٜ مٜتَنْمِعٛنْ دٛوْ مَٻّٜ، جٛونِ اٜ مِ فُطِّتَ اٜ مِ وِعَعٛنْکَ اٜ غٛنْطِ، اٜ ٻٜ نغَطَ جٛنْدٜ وَݧْوَݧْٻٜ غَافَانغَلْ اَلْمَسِيحُ؞ 
رٜعِرْدٜ مَٻّٜ طُمْ حَلْکٜرٜ، دٜىٰطِ مَٻّٜ نغٛنِ اَلَّح مَٻّٜ، اٜ ٻٜ مَنْتٛرٛو کٛ سٜمْتِنِي طُمْ ٻٜ نغَطَتَ؞ ٻٜ نغَطِي ٻٜرْطٜ مَٻّٜ دٛوْ کٛ وٛنِ ندٜرْ دُونِيَارُ؞ 
اَمَّا اٜنٜنْ طُمْ ٻٜ لَامُ دٛوْ، اٜنْ کَاٻِي وَرْتٛيْکِ کِسْنٛووٛ، وَاتٛ يٜىٰسُ اَلْمَسِيحُ جٛومِرَاوٛ غَرٛيَيْطٛ دَغَ تٛنْ؞ 
اٛ وَيْلِتَيْ ٻَلِّ مٜىٰطٜنْ تَمْڤُطِ مَايَيْطِ، اٛ وَرْتِرَطِ بٛ ٻَنْدُ مَاکٛ غٛودُندُ تٜدُّنغَلْ؞ اٛ وَطَيْ نٛنْ اٜ بَوْطٜ مَاکٛ طٜ اٛ وَرْتِرْتَ کٛو طُمٜ لٜيْ لَامُ مَاکٛ؞ 
