﻿طٜرٜوٛلْ نغٛلْ بُلُسْ وِنْدَنِ  فِلِبِيَنْکٛعٜنْ.
1.
مِنْ بُلُسْ اٜ تِمٛوتِ مِنْ مَشُّٻٜ يٜىٰسُ اَلْمَسِيحُ؞ مِنْ مبِنْدَنْ فُو يِمْٻٜ اَللَّه تٛکُّٻٜ يٜىٰسُ وٛنْٻٜ غَرِيرِ فِلِبِ اٜ مَوْٻٜ اٜ حُوٛوٻٜ ندٜرْ کَوْتَلْ تٛکُّٻٜ يٜىٰسُ؞ 
اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞ 
اٜ مِ يٜتَّ اَللَّه کٛو نغٜلٜ شَرٜلْ تٛ مِ ݧُمِي دٛوْ مٛوطٛنْ؞ 
کٛو ندٜيٜ ندٜرْ فُو دٛعَاجٜ اَمْ طٜ نغَطَنَيْمِعٛنْ اٛنْ فُو، اٜ مِ وَطَطٜ ندٜرْ بٜلْطُمْ ٻٜرْندٜ، 
نغَمْ اٛنْ نغٛنْدِ اٜ اَمْ ندٜرْ وَعَجِنْکِ حَبَرُ بٜلْطُمْ، دَغَ ݧَلْندٜ اَرَنْدٜىٰرٜ ندٜ ڤُطُّطٛنْ نَنْکِطُمْ حَا وَرْکِ جٛونِ؞ 
مِ تَبِّتِنِي اٛنْ طٛنْ ڤُطُّطٛ کُوغَلْ بٛنْغَلْ ندٜرْ مٛوطٛنْ اٛ يٛتِّنَيْنغَلْ حَا يَاکِ ݧَلْندٜ وَرْتٛيْکِ يٜىٰسُ اَلْمَسِيحُ؞ 
طُمْ وٛوطَنِييَمْ مِ ݧُمِرَ نِحِ دٛوْ مٛوطٛنْ اٛنْ فُو، نغَمْ اٛنْ ندٜرْ ٻٜرْندٜ اَمْ؞ کٛو ندٜرْ سُرُکِ کِ طُمْ سُرِيَمْ، کٛو ندٜرْ سُرَنْکِ مَنْغُ حَبَرُ بٜلْطُمْ اٜ تَبِّتِنْکِطُمْ، اٛنْ فُو اٛنْ کٜٻِي بَرْکَ اَللَّه حَوْتِ اٜ اَمْ؞ 
نغَمْ اَللَّه وٛنِ شٜيْدِيطٛ نٛ کَاٻِرْمِ يِيکِعٛنْ اٜ نٛ نغِطِرْمِعٛنْ، اٛنْ فُو، نٛنْ نٛ يٜىٰسُ اَلْمَسِيحُ يِطِرِعٛنْ؞ 
دٛعَارٜ اَمْ وٛنِ يِدّٜ مٛوطٛنْ وَطَ کَ ٻٜيْدَاکِ حَوْتِ اٜ اَنْدَلْ اٜ فُو فٜىٰرٛوتِرْکِ حَکُّندٜ غٛونغَ اٜ فٜوْرٜ، 
نغَمْ مبَاوٛنْ سُٻُکِ کٛ ٻُرِ وٛوطُکِ، نغَرْتٛنْ ٻٜ ٻٜرْطٜ لَٻْطٜ، نغَرْتٛنْ ٻٜ نغَلَا کٛ طُمْ حُطِرْتَعٛنْ حَا يَاکِ ݧَلْندٜ غَرْتٛلْ يٜىٰسُ اَلْمَسِيحُ، 
نغَمْ نغِکُّ مٛوطٛنْ حٜىٰوَ اَادِلَاکُ کٜٻٜتٜىٰطُمْ تٛ يٜىٰسُ اَلْمَسِيحُ، نغَمْ اَللَّه تٜدِّنٜىٰ، مَنْتٜىٰ؞ 
بَنْدِرَاٻٜ اَمْ، اٜ مِ يِطِ اَنْدٛنْ کٛ حٜٻِيَمْ وَطِي حَبَرُ بٜلْطُمْ ٻٜيْدِي سَنْکِتَاکِ، 
حَا مَا فُو سٛوجِعٜنْ رٜىٰنٛوٻٜ لَامٛرْدٜ اٜ يِمْٻٜ کٛرِيٻٜ اَنْدِي طُمْ حَٻَّمْ نغَمْ مِ مَشُّطٛ اَلْمَسِيحُ؞ 
حَٻُّکِيَمْ سٜمْبِطِنِي تٛکُّٻٜ يٜىٰسُ طُطْٻٜ ندٜرْ تٛکُّکِمٛ، ٻٜ ٻٜيْدِي حٜٻُکِ سٜمْبٜ ٻٜرْندٜ وَعَجِنْکِ وٛلْدٜ اَللَّه کُلٛلْ وَلَا؞ 
طُمْ غٛونغَ وٛٻّٜ اٜ نغَعَجِنَ حَبَرُ اَلْمَسِيحُ نغَمْ لَوْلِيرُ اٜ طَٻُّتُکِ فٛطْفٛطْتِرْکِ، اَمَّا وٛٻّٜ اٜ نغَعَجِنَ نغَمْ ݧُمٛوجِ بٛطِّ؞ 
ٻٜعٜ يِمْٻٜ اٜ ٻٜ نغَعَجِنَ نغَمْ يِدّٜ، اٜ ٻٜ اَنْدِ مِ سُرَ طٛعٛ نغَمْ سُرُکِ غٛونغَ حَبَرُ بٜلْطُمْ؞ 
ٻٜنْ تٛنْ بٛو اٜ ٻٜ نغَعَجِنَ حَبَرُ اَلْمَسِيحُ نغَمْ ٻٜيْدَارِ کٛعٜ مَٻّٜ، نَاع اٜ غٛونغَ، اٜ ٻٜ ݧُمَ ٻٜ اُمِّنَنَيْيَمْ حَکِّيلٛ ندٜرْ نغٜعٜلْ شَرٜلْ نغٜلْ طُمْ حَٻِّيَمْ؞ 
نٛنْ وَنَّايِيَمْ!‏ کٛ ٻُرِ وٛنِ اٜ کٛو نغٛلٜ لَاوٛلْ، کٛو ندٜرْ ݧُمٛوجِ طِ مبٛوطَا، کٛو ندٜرْ ݧُمٛوجِ بٛطِّ، اَلْمَسِيحُ اٜ وَعَجِنٜىٰ؞ نغَمْ مَاجُمْ اٜ مِ نَنَ بٜلْطُمْ!‏ مِ وَطَيْ کَ نَنُکِ بٜلْطُمْ؞ 
نغَمْ اٜ مِ اَنْدِ بَرْکَ دٛعَارٜ مٛوطٛنْ اٜ بَلَّلْ نغَلْ رُوحُ يٜىٰسُ اَلْمَسِيحُ حٛکَّتَ، اٜ رٜعِرْدٜ طُمْ يٛوفَيْيَمْ دَغَ ندٜرْ سُودُ شُرَلْ؞ 
کٛ کَاٻُمِ يِيکِ اٜ کٛ کَمِّيمِ وٛنِ تٛع مِ سٜمْتِنَ حٛورٜ اَمْ کٛو سٜطَّ، اَمَّا مِ مٜتَ اٜ سٜمْبٜ ٻٜرْندٜ، نغَمْ جٛونِ اٜ کٛو ندٜيٜ طُمْ مَوْنِنَ اَلْمَسِيحُ ندٜرْ کٛو طُمٜ کٛ نغَطَيْمِ، کٛو لَاوٛلْ جٛنْدٜ اَمْ، کٛو لَاوٛلْ مَيْدٜ اَمْ؞ 
تٛ مِ ݧَمْرِي يٜىٰسٛ اٜ جٛنْدٜ ندٜرْ دُونِيَارُ ندُعُ، مِ وَطَيْندٜ نغَمْ اَلْمَسِيحُ؞ تٛ مِ مَايِي بٛو، طُمْ ٻٜيْدَارِ؞ 
تٛ اٜ مِ وٛودِ يٛنْکِ ندٜرْ ٻَنْدُ ندُعُ، مِ حُوَيْ کُوغَلْ نَفَيْنغَلْ؞ اَمَّا مِ دُلِّي کٛ شُٻَيْمِ؞ 
طُمْ فُو طِطُمْ اٜ طُمْ فٛوطَنَيَمْ حَکِّيلٛ نَاع سٜطَّ؞ کٛ ٻُرْمِ يِطُکِ وٛنِ مِ دِلَّ مِ جٛوطٛدٛو اٜ اَلْمَسِيحُ، نغَمْ کَنْجُمْ ٻُرِ وٛوطُکِ نَاع سٜطَّ؞ 
اَمَّا طُمْ ٻُرَيْ نَفَنْکِعٛنْ مِ جٛوطٛو تَوْ؞ 
مِ تَبِّتِنِي طُمْ نٛنْ؞ نغَمْ مَاجُمْ اٜ مِ اَنْدِ مِ جٛوطٛدٛتٛ اٜ يٛنْکِ تَوْ، مِ ݧَمْرَ يٜىٰسٛ اٜ جٛوطٛدَاکِ اٜ مٛوطٛنْ اٛنْ فُو، نغَمْ ݧَمْرٛنْ يٜىٰسٛ، نَنٛنْ بٜلْطُمْ ندٜرْ حٛولَاکِ يٜىٰسُ؞ 
نٛنْ وَطَيْ نغَمْ لَاوٛلْ اَمْ کٜٻٛنْ دَلِيلَ شٜمْبِطُّمْ طُمْ مَنْتٛرْتٛوطٛنْ اَلْمَسِيحُ نغَمْ سٛعّٛيَاکِ اَمْ تٛ مٛوطٛنْ؞ 
کٛ ٻُرِ وٛنِ نغَطٜىٰ جٛنْدٜ ڤٛتُّدُندٜ اٜ حَبَرُ بٜلْطُمْ دٛوْ اَلْمَسِيحُ، نغَمْ کٛو مِ وَرِي مِ يِعِعٛنْ، کٛو مِ وَلَا طٛنْ، مِ نَنَ حَبَرُ اٛنْ طٛنْ ندَرِي بٛطُّمْ ندٜرْ ݧُمٛ غٛعٛ، کٛ نغِطّٛنْ غٛعٛ؞ اٛنْ ڤِيدَ نغَمْ سُرَنْکِ کٛ حَبَرُ بٜلْطُمْ وِعِ، 
نَاع ندٜرْ کُلٛلْ وَݧْوَݧْٻٜ مٛوطٛنْ کٛو سٜطَّ؞ نٛنْ وٛنِ اَلَامَ تَبِّتِنَنَيْطُمْٻٜ ٻٜ کَلْکَيْ، اَمَّا اٛنٛنْ طُمْ تَبِّتِنْکِ کِسْندَمْ مٛوطٛنْ؞ طُمْ فُو اَللَّه وٛنِ غَطَيْطٛطُمْ؞ 
اٛ بَرْکِطِنِيعٛنْ؞ بَرْکَ طُمْ وٛنِ نَاع کٜٻٛنْ کٛولٛوطٛنْ اَلْمَسِيحُ تَنْ، اَمَّا حَا کٜٻٛنْ نجَرٛنْ تٛرَّ نغَمْ مَاکٛ؞ 
تٛرَّ کَ نجَرٛتٛنْ طُمْ اِرِ تٛرَّ کَ نجَرُمِ کَ نغِيطٛنْ، کَ نَنٛتٛنْ اٜ مِ يَرَ حَا جٛونِ؞ 
