﻿اَافِسَنْکٛعٜنْ.
6.
اٛنٛنْ سُکَاٻٜ، ندٜ اٛنْ تٛکُّٻٜ يٜىٰسُ، کٛکّٜىٰ دَݧٛوٻٜ مٛوطٛنْ مَنْغُ، نغَمْ نٛنْ اٜ وٛوطِ؞ 
‏«‏حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞»‏ ندٜرْ کٛ اَللَّه وِعِ طُمْ وَطَ، کَنْجُمْ وٛنِ اَرَنْدٜجُمْ غٛودُطُمْ اَلْکَوَلْ؞ 
اَلْکَوَلْ نغَلْ وٛنِ، ‏«‏اَ جٛوطٛتٛ جَمْ، نٜىٰٻَا اٜ دُونِيَارُ؞»‏ 
اٛنٛنْ دَݧٛوٻٜ، تٛع اٛنْ نغَطُ ٻِٻّٜ مٛوطٛنْ مٛنَّ، اَمَّا اٜکِّتِنٜىٰٻٜ نغِکُّ بٛطُّمْ ٻٜ مَوْنَ ندٜرْ لَاوٛلْ جٛومِرَاوٛ؞ 
اٛنٛنْ مَشُّٻٜ، نغَطَنٜىٰ جٜيْٻٜعٛنْ غٛنْٻٜ ندٜرْ دُونِيَارُ ندُعُ کٛ ٻٜ مبِعِعٛنْ ندٜرْ مَنْغُ؞ نغَطٜىٰطُمْ اٜ ٻٜرْندٜ غٛعٛ بٛ اَلْمَسِيحُ نغَطَنْتٛنْ؞ 
نغَطَنٜىٰٻٜ نٛنْ نَاع اٜ شَرٜلْ نغٜلْ ٻٜ نغِعَتَعٛنْ تَنْ، کٛو بٛو نغَمْ ٻٜ ٻٜيْدَ يِطُکِعٛنْ؞ اَمَّا اٜ ٻٜرْندٜ غٛعٛ نغَطٜىٰ کٛ اَللَّه يِطِ بٛ مَشُّٻٜ اَلْمَسِيحُ؞ 
کُوَنٜىٰ جٜيْٻٜعٛنْ ندٜرْ ٻٜرْندٜ بٜلْندٜ بٛ جٛومِرَاوٛ کُوَنْتٛنْ، نَاع يِمْٻٜ؞ 
اٛنْ اَنْدِ جٛومِرَاوٛ وَاتَنَيْ کٛو مٛيٜ کٛو طُمٜ فِي بٛطُّمْ طُمْ وَطِ، کٛو اٛ مَشُّطٛ، کٛو نَاع اٛ مَشُّطٛ؞ 
اٛنٛنْ مَا جٜيْٻٜ مَشُّٻٜ ٻٜنْ، دٛولٜ نغَطَنٛنْٻٜ کٛ حَانِ؞ تٛع اٛنْ مبِعُ اٛنْ ڤِيَيْٻٜ، نغَمْ اٛنْ اَنْدِ اٛنٛنْ اٜ مَشُّٻٜ مٛوطٛنْ اٛنْ نغٛودِ مَوْطٛ غٛعٛتٛ غٛنْطٛ دٛوْ، اٛ وَلَا يِدّٜ حٛورٜ؞ 
کٛ مبِعَيْمِ شَکِتِيطُمْ وٛنِ اَلٜىٰ بَوْطٜ مَوْطٜ طٜ جٛومِرَاوٛ مٜىٰطٜنْ سٜمْبِطِنَعٛنْ؞ 
ٻٛرْنٜىٰ فُو کٛلْتٜ کٛنُ طٜ اَللَّه حٛکِّعٛنْ نغَمْ مبَاوٛنْ دَرَاکِ، نغَݧٛنْ پٛيْرٜ شٜيْطَنْ؞ 
نغَمْ نَاع يِمْٻٜ کٛنْدٜتٜنْ، اَمَّا اٜنْ کٛنْدَ اٜ غِنِّ غٛنْطِ دٛوْ، لَامٛتٛوطِ، اٜ غٛودُطِ بَوْطٜ، اٜ جٛغِيطِ لَامُ دُونِيَارُ ندُعُ ندُ جَامَنُ ݧِوْرٜ؞ 
نغَمْ نٛنْ، ٻٛرْنٜىٰ فُو کٛلْتٜ کٛنُ طٜ اَللَّه، نغَمْ تٛ ݧَلْندٜ کَلُّندٜ وَرِي، مبَاوٛنْ دَرَاکِ نغَݧٛنْ پٛيْرٜ شٜيْطَنْ؞ غَطَ اٛنْ نجٛتِّنِي کٛو طُمٜ، طُمْ تَوَ اٛنْ ندَرِي؞ 
نغَمْ نٛنْ، ندَرٜىٰ اٛنْ شِرْيِي؞ غٛونغَ وَرْتَ تَادٛرْدٜ مٛوطٛنْ، اَادِلَاکُ وَرْتَ تٛغّٛورٜ نجَمْندِ مٛوطٛنْ ندٜ کٛنُ؞ 
سِرْيَاکِ يَارُکِ حَبَرُ بٜلْطُمْ دٛوْ يٜىٰسُ اَلْمَسِيحُ طُمْ جَمْ وَرْتَ بٛ ڤَطٜ تٛ کٛيْطٜ مٛوطٛنْ؞ 
غَطَ مَاجُمْ مَا، حٛولَاکِ يٜىٰسُ وَرْتَ کٛ نجٛغٛتٛوطٛنْ تَٻّٛو ݧِفَ حِيتٜ ڤِطِلّٜ طٜ غَݧٛ کَلُّطٛ اٛنْ طٛنْ فِطٛيِ؞ 
کُمْنٜىٰ حُمْنٜىٰرٜ نجَمْندِ ندٜ کٛنُ، وَاتٛ کِسْندَمْ؞ کٛشّٜىٰ کَافَحِ رُوحُ اَللَّه، وَاتٛ وٛلْدٜ مَاکٛ؞ 
کٛو ندٜيٜ نغَطٜىٰ کَ وَطُکِ دٛعَارٜ نٛ رُوحُ اَللَّه حٛلِّرِعٛنْ ندٜرْ کٛو طُمٜ طُمْ نغَطٛتٛنْ؞ کَدِنْ نغَطٛنْ کَ تٛرَاکِ اَللَّه وَلَّعٛنْ؞ نغَمْ فِي طُعُمْ، ڤَامٜىٰ، تٛع اٛنْ نجَٻُ شٛمٛنْ، کٛو ندٜيٜ نغَطٜىٰ کَ وَطَنْکِ يِمْٻٜ اَللَّه فُو دٛعَارٜ؞ 
مِنْ مَا، نغَطَنٜىٰيَمْ دٛعَارٜ اَللَّه حٛکَّيَمْ بٛلِيطٜ طٜ مبِعَيْمِ، مِ اَنْدِنَ يِمْٻٜ سِرُّ حَبَرُ بٜلْطُمْ دٛوْ يٜىٰسُ اَلْمَسِيحُ کُلٛلْ وَلَا؞ 
نغَمْ حٛکُّکِ حَبَرُ طُمْ نغَرْتُمِ لِلَاطٛ يٜىٰسُ، کٛو ندٜ جٛونِ اٜ مِ ندٜرْ سُودُ شُرَلْ؞ نغَطٜىٰ دٛعَارٜ نغَمْ مِ وَطَ کَ حٛکُّکِ حَبَرُ طُمْ نٛ حَانِ کُلٛلْ وَلَا؞ 
تِيکِکُسْ، بَنْدِرَاوٛ مٜىٰطٜنْ مٛ نغِطّٜنْ، مَشُّطٛ مٛ غٛونغَ ندٜرْ کُوغَلْ جٛومِرَاوٛ، اٛ حٛکَّيْعٛنْ فُو حَبَرُ نجَمُ اَمْ اٜ نٛ نغٛنْتِندِرْمِ؞ 
کَنْجُمْ وَطِ لِلٛيْمٛومِ تٛ مٛوطٛنْ، نغَمْ اٛ وِعَعٛنْ نٛ کٛو مٛيٜ اَمِنْ وٛنْتِندِرِ اٛ سٜمْبِطِنَ ٻٜرْطٜ مٛوطٛنْ؞ 
اَللَّه ݧَاکٛ مٜىٰطٜنْ مٛ دٛوْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ حٛکَّ فُو تٛکُّٻٜ يٜىٰسُ جَمْ اٜ يِدّٜ اٜ حٛولَارٜ؞ 
اَللَّه بَرْکِطِنَ کٛو مٛيٜ غِطّٛ جٛومِرَاوٛ مٜىٰطٜنْ يٜىٰسُ اَلْمَسِيحُ يِدّٜ ندٜ رٜعَتَا؞
