﻿اَافِسَنْکٛعٜنْ.
5.
ندٜ اٛنٛنْ نغٛنِ ٻِٻّٜ ٻٜ اَللَّه يِطِ، اٜکِّتٜىٰ اِرِ نغِکُّ مَاکٛ ندٜرْ جٛنْدٜ مٛوطٛنْ؞ 
نغَطٜىٰ جٛنْدٜ يِدّٜ، نٛنْ نٛ اَلْمَسِيحُ يِطِرِعٜنْ حٛکِّ يٛنْکِ مُوطُمْ نغَمْ مٜىٰطٜنْ؞ اٛ وَرْتِي شَکِّرِ ندِ اَللَّه نَنِ بٜلْطُمْ مَيْرِ بٛ اُرْدٜ وٜلْندٜ؞ 
ندٜ اٛنٛنْ اٛنْ يِمْٻٜ اَللَّه، حَانَا طُمْ اِنَّ غٛطُّمْ نغِکُّ کَلُّطُمْ ندٜرْ مٛوطٛنْ بٛ نجٜىٰنُ، کٛو سُونٛ فِي طُمْ اٛنْ نجٜيَايِ؞ 
نٛنْ مَا، تٛع طُمْ تَوَ حَالَ کَلُّکَ کٛو بٛلِيطٜ طٜ حَانَا اٜ شِيَ حَکِّيلٛ حَکُّندٜ مٛوطٛنْ، نغَمْ طُمْ حَانَا، اَمَّا اِغَّ نغَطٛنْ کَ يٜتُّکِ اَللَّه؞ 
تَبِّتِنٜىٰ طُعُمْ، غَطٛووٛ کُوطٜ کَلُّطٜ بٛ نجٜىٰنُ، کٛو غٛودُطٛ سُونٛ فِي طُمْ اٛ جٜيَايِ وَلَا غٜطَلْ ندٜرْ لَامُ اَلْمَسِيحُ اٜ لَامُ اَللَّه؞ غٛودُطٛ سُونٛ اٛ مَوْنِنٛووٛ فِي دُونِيَارُ؞ 
تٛع غٛطّٛ پٛيْرَعٛنْ اٜ بٛلِيطٜ مٜىٰرٜ، نغَمْ اِرِ کُوطٜ طٜعٜ وَطِي مٛنّٜرٜ اَللَّه وَرٛيْتَ دٛوْ يِمْٻٜ غَݧُٻٜ نغَطَ کٛ اٛ وِعِ؞ 
نغَمْ نٛنْ تٛع اٛنْ کَوْتُ کٛعٜ اٜ مَٻّٜ؞ 
نغَمْ ندٜنّٛ ندٜرْ ݧِوْرٜ نغٛنْطٛنْ، اَمَّا جٛونِ ندٜ اٛنْ نغَرْتِي يِمْٻٜ جٛومِرَاوٛ، اٛنْ ندٜرْ جَيْنغٛلْ؞ نغَمْ مَاجُمْ سٜيْ نغَطٛنْ جٛنْدٜ اِرِ ندٜ يِمْٻٜ غٛنْٻٜ ندٜرْ جَيْنغٛلْ؞ 
مِ وِعُ نٛنْ نغَمْ جَيْنغٛلْ اٜ وَطَ يِمْٻٜ نغَطَ کٛ وٛوطِ، اٜ کٛ اَللَّه يِطِ، اٜ غٛونغَ؞ 
نغَطٜىٰ کٛ مبَاوٛتٛنْ اٜکِّتٛوطٛنْ کٛ وٜلْنَنْتَ جٛومِرَاوٛ ٻٜرْندٜ؞ 
نغٛطِّتٜىٰ کُوطٜ مٜىٰرٜ طٜ ݧِوْرٜ طٜ يِمْٻٜ نغَطَتَ، اَمَّا کٛلّٜىٰ کٛ ٻٜ نغَطَتَ طُمْ وٛوطَا؞ 
نغَمْ اٜ طُمْ سٜمْتِنِي طُمْ مٜتَ دٛوْ کٛ ٻٜ نغَطَتَ اٜ سُوطٜ؞ 
اَمَّا تٛ طُمْ وَدِّي کٛو طُمٜ تٛ جَيْنغٛلْ، طُمْ اَنْدَيْ نٛ طُمْ وٛنْتِندِرِ، 
نغَمْ جَيْنغٛلْ اٜ حٛلَّ کٛو طُمٜ؞ کَنْجُمْ وَطِ طُمْ وِعِ، ‏«‏اُمَّ، اَنْ طَانِيطٛ، اُمَّ دَغَ ندٜرْ مَيْٻٜ، ندٜنْ اَلْمَسِيحُ يٜيْنَنْتٜ؞»‏ 
نغَمْ نٛنْ ڤَامٜىٰ نٛ نجٛوطٛرِيطٛنْ؞ تٛع اٛنْ نغَطُ جٛنْدٜ بٛ حَاݝَاٻٜ، اَمَّا نغَطٜىٰ جٛنْدٜ بٛ يِمْٻٜ ٻٜ اَنْدَلْ؞ 
فُو شَرٜلْ نغٜلْ کٜٻْطٛنْ نغَمْ وَطُکِ بٛطُّمْ، نغَطٜىٰطُمْ، نغَمْ بَلْطٜ طٜ نغٛنْطٜنْ طٜ کَلُّطٜ؞ 
نغَمْ مَاجُمْ، تٛع اٛنْ نغَرْتُ حَاݝَاٻٜ، اَمَّا طَٻِّتٜىٰ اَنْدٛنْ کٛ جٛومِرَاوٛ يِطِ نغَطٛنْ؞ 
تٛع اٛنْ نَتِّنْ کٛعٜ مٛوطٛنْ نجَرُ، نغَمْ طُمْ لَاوٛلْ لَلّٜرٜ؞ اَمَّا اَلٜىٰ رُوحُ اَللَّه حٜىٰوَعٛنْ؞ 
شٜمْبِطِنٜىٰ کٛو مٛيٜ ندٜرْ مٛوطٛنْ اٜ غِمِ جَبُورَ، اٜ غِمِ مَنْتُکِ جٛومِرَاوٛ، اٜ غِمِ طِ اَللَّه حٛکِّعٛنْ ندٜرْ ٻٜرْطٜ؞ نغِمٜىٰ غِمِ مَنْتٛنْ اَللَّه اٜ ٻٜرْطٜ مٛوطٛنْ فُو؞ 
کٛو ندٜيٜ نغٜتّٜىٰ اَللَّه ݧَاکٛ مٜىٰطٜنْ مٛ دٛوْ نغَمْ کٛو طُمٜ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ؞ 
کٛکِّندِرٜىٰ مَنْغُ نغَمْ مَوْنِنْکِ اَلْمَسِيحُ؞ 
اٛنٛنْ رٜوْٻٜ تٜىٰغَلْ، کٛکّٜىٰ وٛرْٻٜ مٛوطٛنْ مَنْغُ نٛنْ نٛ مَوْنِنِرْتٛنْ جٛومِرَاوٛ؞ 
نغَمْ غٛرْکٛ وٛنِ اَرْدِيطٛ دٜبّٛ مُوطُمْ نٛنْ نٛ اَلْمَسِيحُ وٛنِ اَرْدِيطٛ تٛکُّٻٜمٛ؞ کَنْکٛ اٜ حٛورٜ مَاکٛ وٛنِ کِسْنٛووٛٻٜ؞ 
نٛنْ نٛ کَوْتَلْ تٛکُّٻٜ يٜىٰسُ مَوْنِنِرْتَمٛ، نٛنْ مَا رٜوْٻٜ غٛودُٻٜ تٜىٰغَلْ مَوْنِنَ وٛرْٻٜ مَٻّٜ ندٜرْ کٛو طُمٜ؞ 
اٛنٛنْ وٛرْٻٜ، نغِطٜىٰ رٜوْٻٜ مٛوطٛنْ نٛ اَلْمَسِيحُ يِطِرِ کَوْتَلْ تٛکُّٻٜمٛ حٛکِّ يٛنْکِ مُوطُمْ نغَمْ مَٻّٜ؞ 
اٛ وَطُ نٛنْ نغَمْ اٛ وَرْتِرَ تٛکُّٻٜمٛ شٜنِيٻٜ بَرْکَ بَوْطٜ وٛلْدٜ مَاکٛ، اٛ لٛوتِرِيٻٜ ندِيَمْ نغَمْ اٛ وَرْتِرَٻٜ لَاٻُٻٜ؞ 
اَلْمَسِيحُ وَطِي طُعُمْ نغَمْ اٛ حٛشَّنَ حٛورٜ مَاکٛ تٛکُّٻٜمٛ ٻٜ نغَرْتَ لَٻّٜ، ٻٜ نغَلَا کٛو غٛطُّمْ نٜفْنِيطُمْ، کٛو غٛطُّمْ طُمْ وٛوطَا يِيکِ؞ کَدِنْ ٻٜ نغَرْتَ شٜنِيٻٜ ٻٜ نغَلَا غٛطُّمْ طُمْ وٛوطَا؞ 
نٛنْ حَانِ وٛرْٻٜ نغِطِرَ رٜوْٻٜ مَٻّٜ بٛ ٻَلِّ مَٻّٜ؞ غِطّٛ دٜبّٛ مُوطُمْ فُو يِطِي حٛورٜ مُوطُمْ؞ 
نغَمْ وَلَا نٜطّٛ مٜىٰطُطٛ وَݧَ ٻَنْدُ مُوطُمْ؞ سٜيْ نِ اٛ فَامَنَنْدُ، اٛ يِطَندُ نٛ يٜىٰسُ اَلْمَسِيحُ وَطَنْتَ کَوْتَلْ تٛکُّٻٜمٛ؞ 
نغَمْ اٜنٜنْ تٛکُّٻٜمٛ نغٛنِ بٛ ٻَنْدُ مَاکٛ؞ 
نٛ اَايَارٜ وِعِ، ‏«‏نغَمْ مَاجُمْ سٜيْ نٜطّٛ اَلَ ݧَاکٛ مُوطُمْ اٜ مَدُوجٛ مُوطُمْ تَکَّنٛو دٜبّٛ مُوطُمْ، ٻٜ فُو طِطٛ ٻٜ نغَرْتَ ٻَنْدُ غٛعٛ؞»‏ 
اٜ وٛودِ سِرُّ لُغُّطُمْ مَوْطُمْ ندٜرْ اَايَارٜ ندٜعٜ؞ مِ فَامِي اٜ طُمْ مٜتَ دٛوْ اَلْمَسِيحُ اٜ کَوْتَلْ تٛکُّٻٜمٛ؞ 
فُو اٜ نٛنْ، کٛو مٛيٜ ندٜرْ مٛوطٛنْ يِطَ دٜبّٛ مُوطُمْ نٛ يِطِرِ حٛورٜ مُوطُمْ، ندٜنْ کٛو مٛيٜ دٜبّٛ حٛکَّ غٛرْکٛ مُوطُمْ مَنْغُ؞ 
