﻿غَلَاتِيَنْکٛعٜنْ.
4.
کٛ نغِنْمِ وِيکِ وٛنِ ٻِطّٛ دٛنٛووٛ جَوْدِ ݧَاکٛ مُوطُمْ بٛ مَشُّطٛ اٛ وٛنِ شَرٜلْ کٛ اٛ وٛنِ سُکَ ڤَمَرٛ، کٛو ندٜ کَنْکٛ رٛنَتَ کٛو طُمٜ کٛ ݧَاکٛ مَاکٛ وٛودِ؞ 
اٛ جٛوطٛتٛ لٜيْ وٛٻّٜ ڤَامَنَيْٻٜمٛ اٜ ڤَامَنَيْٻٜ جَوْدِ ندِ اٛ رٛنَتَ ندِنْ نَا ݧَلْندٜ ندٜ ݧَاکٛ مَاکٛ وِعِ؞ 
نٛنْ، اٜنٜنْ مَا کٛ اَلْمَسِيحُ رِمْطِنَعٜنْ، غِنِّ غٛودُطِ بَوْطٜ ندٜرْ لَامٛتٛوعٜنْ؞ 
اَمَّا ندٜ شَرٜلْ وَطِ، اَللَّه لِلٛيِ ٻِطّٛ مُوطُمْ؞ دٜبّٛ دَݧِمٛ، اٛ جٛوطِي لٜيْ اَتَّوْرَ، 
نغَمْ اٛ رِمْطِنَ ٻٜنْ طٛنْ تٛکّٛوٻٜ اَتَّوْرَ، نغَمْ نغَرْتٜنْ ٻِٻّٜ اَللَّه؞ 
نغَمْ اٛنْ ٻِٻّٜ اَللَّه، اٛ لِلٛيِ رُوحُ ٻِطّٛ مَاکٛ ندٜرْ ٻٜرْطٜ مٜىٰطٜنْ، اٜ طُمْ نٛدَّ اَللَّه اٜ طُمْ وِعَ، ‏«‏ݧَاکٛ اَمْ، ݧَاکٛ اَمْ؞»‏ 
نغَمْ نٛنْ، جٛونِ نَاع اَ مَشُّطٛ، اَمَّا اَ ٻِطّٛ؞ ندٜنْ ندٜ اَ ٻِطّٛ، اَللَّه وَرْتِرِيمَ دٛنَيْطٛمٛ؞ 
ندٜنّٛ کٛ اٛنْ اَنْدَا اَللَّه، اٛنْ مَشُّٻٜ تٛکّٛوٻٜ اَلَّاجِ فٜوْرٜ؞ 
اَمَّا جٛونِ ندٜ اَنْدُطٛنْ اَللَّه، کٛو بٛو ندٜ اَللَّه اَندِعٛنْ، نغَمْ طُمٜ شٛعَّنْتٛوطٛنْ طِنْ طٛنْ غِنِّ تَمْڤُطِ طِ نَفَنْتَاعٛنْ؟ نغَمْ طُمٜ نغِطّٛنْ وَرْتُکِ مَشُّٻٜ مَاجِ کَدِنْ؟ 
اٛنْ مَوْنِنَ غٛطّٜ ݧَلْطٜ، اٜ غٛطِّ لٜبِّ، اٜ غٛطِّ دُوٻِ؞ 
اٜ مِ حُلَ تٛع کُوغَلْ نغَلْ کُوُمِ ندٜرْ مٛوطٛنْ وَرْتَ مٜىٰرٜ؞ 
اٛنٛنْ بَنْدِرَاٻٜ اَمْ، اٜ مِ تٛرٛوعٛنْ، نغَرْتٜىٰ بٛ اَمْ، نغَمْ مِنْ مَا مِ وَرْتِي بٛ مٛوطٛنْ؞ اٛنْ نغَطَنَايِيَمْ غٛطُّمْ کٛ وٛوطَا؞ 
اٛنْ اَنْدِ نغَمْ مِ يَمْطَا وَطِ کٜٻُمِ لَاوٛلْ نغَعَجِنَنْمِعٛنْ حَبَرُ بٜلْطُمْ اَرَنْدٜ؞ 
کٛو ندٜ شِيَ نجَمُ اَمْ فٛوطَنِيعٛنْ تٛرَّ، اٛنْ نجَوَنَايِيَمْ، اٛنْ نغَݧَايِيَمْ؞ اَمَّا اٛنْ نجَٻِييَمْ بٛ مَلَاعِکَاجٛ اَللَّه، اٛنْ نجَٻِييَمْ نٛ نجَٻِرْطٛنْ يٜىٰسُ اَلْمَسِيحُ؞ 
تٛ نَنْکِ بٜلْطُمْ کِ نَنُنٛوطٛنْ وٛنِ؟ مِ تَبِّتِنِي، دَا طُمْ وَطٛتٛ، دَا اٛنْ اِتِّي غِتٜ مٛوطٛنْ اٛنْ کٛکِّييَمْ؞ 
جٛونِ مِ وَرْتِي غَݧٛ مٛوطٛنْ ندٜ مبِيمِعٛنْ غٛونغَ؟ 
ٻٜنْ طٛنْ يِمْٻٜ ٻٜ نغَطِي حَکِّيلٛ مَٻّٜ فُو دٛوْ مٛوطٛنْ نغَمْ ٻٜ نغَطَعٛنْ تٛکّٛنْٻٜ، اَمَّا کٛ ٻٜ نغِطِ وَطُکِ طُمْ وٛوطَا؞ کٛ ٻٜ نغِطِ وٛنِ ٻٜ شٜنْدَعٛنْ اٜ اَمِنْ، نغَمْ حَکِّيلٛ مٛوطٛنْ سٛعّٛو تٛ مَٻّٜ؞ 
اٜ طُمْ وٛوطِ تٛ نٜطّٛ وَطِي حَکِّيلٛ مُوطُمْ فُو دٛوْ غٛطُّمْ تٛ اٜ طُمْ وٛوطِ؞ اٜ حَانِ نغَطٛنْ نٛنْ کٛو ندٜيٜ، نَاع سٜيْ تٛ اٜ مِ وٛنْدِ اٜ مٛوطٛنْ تَنْ؞ 
اٛنٛنْ ٻِٻّٜ اَمْ ٻٜ نغِطُمِ، نٛنْ نٛ دٜبّٛ نَنِرْتَ نَوْطُمْ دَݧْنغٛلْ، بٛ نٛنْ اٜ مِ فُطِّتَ نَنُکِ اِرِ طُمْ طٛنْ نَوْطُمْ نغَمْ مٛوطٛنْ نَا شَرٜلْ نغٜلْ کٛلُّطٛنْ نغِکُّ اَلْمَسِيحُ ندٜرْ جٛنْدٜ مٛوطٛنْ؞ 
اٜ مِ يِطِ جٛوطٛدَاکِ اٜ مٛوطٛنْ، نغَمْ مِ اَنْدَ نٛ مٜتِرَنَيْمِعٛنْ؞ اٜ مِ وَنِّ دٛوْ مٛوطٛنْ نَاع سٜطَّ!‏ 
مبِعٜىٰيَمْ، اٛنٛنْ غِطُٻٜ تٛکُّکِ اَتَّوْرَ، اٛنْ نَنَايِ کٛ اَتَّوْرَ وِعِ؟ 
نغَمْ اَايَارٜ وِعِي اِبْرَاهِمْ اٜ وٛودِ ٻِٻّٜ طِطٛ، غٛعٛتٛ مَشُّطٛ دٜبّٛ دَݧِمٛ، غٛعٛتٛ اٛنْ بٛو دٜبّٛ مَاکٛ دِمٛ دَݧِمٛ؞ 
ٻِطّٛ مٛ مَشُّطٛ اٛنْ دَݧِ، اٛ دَݧُمٛ نٛ طُمْ دَݧِرِ کٛو مٛيٜ، اَمَّا ٻِطّٛ مٛ دٜبّٛ مَاکٛ دَݧِ، اٛ دَݧُمٛ نغَمْ اَلْکَوَلْ نغَلْ اَللَّه وَطِ؞ 
طُعُمْ طُمْ مِسَالُ، وَاتٛ ٻٜعٜ رٜوْٻٜ طِطٛ دٛوْ اَلْکَوَلْجِ اَللَّه طِطِ ٻٜ نغٛنِ؞ دٜبّٛ مٛ ٻِٻّٜ مُوطُمْ دَݧَا ندٜرْ مَشُّنغَاکُ، کَنْکٛ وِعٜتٜىٰ حَجَرَ، اٜ مٛ جٛوطَنِي اَلْکَوَلْ نغَلْ اَللَّه وَطِ دٛوْ حٛشّٜىٰرٜ سِنَيْ؞ 
حَجَرَ وٛنِ مِسَالُ حٛشّٜىٰرٜ سِنَيْ غٛنْدٜ لٜيْدِ لَارَبَنْکٛعٜنْ، ندٜنْ اٛ مِسَالُ غَرِيرِ اُرُشَلِيمَ ندِ جٛونِ، نغَمْ اٜ ندِ ندٜرْ مَشُّنغَاکُ، کَيْرِ اٜ ٻِٻّٜ مَيْرِ؞ 
اَمَّا سَارَتُ اٛ دٜبّٛ دِمٛ اٛ مِسَالُ غَرِيرِ اُرُشَلِيمَ ندِ دٛوْ ندِ مٜىٰطَايِ مَشُّنغَاکُ، کَيْرِ وٛنِ مَدُوجٛ مٜىٰطٜنْ؞ 
نغَمْ اَايَارٜ وِعِي، ‏«‏نَنُ بٜلْطُمْ اَنْ دٜبّٛ مٛ مٜىٰطَايِ دَݧُکِ!‏ جَلُ سٜمْبٜىٰ، اَنْ مٛ مٜىٰطَايِ نَنْکِ نَوْطُمْ دَݧْنغٛلْ!‏ نغَمْ دٜبّٛ مٛ غٛرْکٛ مُوطُمْ وَنَّايِ اٜ مَاکٛ اٛ حٜٻَيْ ٻِٻّٜ طُطْٻٜ ٻُرْٻٜ ٻٜ دٜبّٛ مٛ غٛرْکٛ مُوطُمْ وَنِّ اٜ مُوطُمْ؞»‏ 
اٛنٛنْ بَنْدِرَاٻٜ اَمْ، اٛنٛنْ مَا بٛ اِشِيَاکُ اٛنْ ٻِٻّٜ اَلْکَوَلْ؞ 
اٜ نغٜلْ تٛنْ شَرٜلْ ٻِطّٛ مٛ طُمْ دَݧِ نٛ طُمْ دَݧِرِ کٛو مٛيٜ، اٛ حَلَّنِي ٻِطّٛ مٛ طُمْ دَݧِ ندٜرْ بَوْطٜ رُوحُ اَللَّه؞ جٛونِ مَا نٛنْ اٜ وَطٜىٰ؞ 
اَمَّا کٛ اَايَارٜ وِعِ؟ ندٜ وِعِ، ‏«‏رِيوُ اٛنْ طٛنْ مَشُّطٛ دٜبّٛ اٜ ٻِطّٛ مَاکٛ، نغَمْ ٻِي دِمٛ سٜنْدِدَتَا ندٛنُ اٜ ٻِي مَشُّطٛ؞»‏ 
نغَمْ نٛنْ بَنْدِرَاٻٜ، اٜنٜنْ نَاع اٜنْ ٻِٻّٜ مَشُّطٛ دٜبّٛ، اَمَّا اٜنْ ٻِٻّٜ دٜبّٛ دِمٛ؞ 
