﻿غَلَاتِيَنْکٛعٜنْ.
3.
اٛنٛنْ غَلَاتِيَنْکٛعٜنْ حَاݝَاٻٜ!‏ مٛيٜ وَيْلِتِ حَکِّيلٛ مٛوطٛنْ؟ طُمْ وِعِيعٛنْ اٜ نجَيْرِ نٛ يٜىٰسُ اَلْمَسِيحُ وَرِرَا دٛوْ غَافَانغَلْ؞ 
اٜ مِ يِطِ مِ پَمَعٛنْ طُعُمْ تَنْ:‏ اٛنْ کٜٻُ رُوحُ اَللَّه نغَمْ وَطُکِ کٛ اَتَّوْرَ وِعِ طُمْ وَطَ، کٛو نغَمْ نَنْکِ حَبَرُ يٜىٰسُ اٜ حٛولَاکِمٛ؟ 
نغَمْ طُمٜ ندُلُّطٛنْ حَکِّيلٛ؟ غَطَ اٛنْ ڤُطِّرِي رُوحُ اَللَّه، جٛونِ اٛنْ نغِطِ يٛتِّنِرْکِ سٜمْبٜ مٛوطٛنْ؟ 
جٛونِ فُو تٛرَّاجِ طِ نجَرْطٛنْ نغَرْتِي مٜىٰرٜ وٛنْ طٛنْ؟ غٛونغَ اٛنْ تٛرَّاکِ اٜ مٜىٰرٜ؞ 
اَللَّه کٛکُّطٛعٛنْ رُوحُ مُوطُمْ کُوُطٛ کُوطٜ کَيْطِنِيطٜ ندٜرْ مٛوطٛنْ، اٛنْ ݧُمَ اٛ وَطُطُمْ نغَمْ اٛنْ نغَطِي کٛ اَتَّوْرَ وِعِ، کٛو نغَمْ نَنْکِ حَبَرُ يٜىٰسُ اٜ حٛولَاکِمٛ؟ 
ݧُمٜىٰ دٛوْ اِبْرَاهِمْ؞ اَايَارٜ وِعِي، ‏«‏اِبْرَاهِمْ بٛو حٛولَکٜ اَللَّه، نغَمْ مَاجُمْ اَللَّه وِعِ اٛ اَادِلِيجٛ؞»‏ 
تٛو، اٛنْ نغِعِي ٻِٻّٜ اِبْرَاهِمْ ٻٜ غٛونغَ وٛنِ يِمْٻٜ کٛولِيٻٜ اَللَّه؞ 
کٛ نٜىٰٻِ اَايَارٜ وِعِي اَللَّه جَٻَيْ يِمْٻٜ نَاع يَحُودَنْکٛعٜنْ ٻٜ اَادِلِعٜنْ تٛ ٻٜ کٛولَکٜمٛ؞ کَنْجُمْ وَطِ اَللَّه وَعَجِنَنِ اِبْرَاهِمْ حَبَرُ بٜلْطُمْ وِعِ، ‏«‏بَرْکَ مَاطَ طُمْ بَرْکِطِنَيْ کٛو نغٛلٜ لٜݧٛلْ ندٜرْ دُونِيَارُ؞»‏ 
نغَمْ مَاجُمْ فُو کٛولِيٻٜ اَللَّه ٻٜ بَرْکِطِنَاٻٜ حَوْتِ اٜ اِبْرَاهِمْ کٛولِيطٛ اَللَّه؞ 
فُو غِطْٻٜ وٜلْنَنْکِ اَللَّه ٻٜرْندٜ لَاوٛلْ تٛکُّکِ اَتَّوْرَ ٻٜ لَانَاٻٜ؞ نغَمْ اَايَارٜ وِعِي، ‏«‏کٛو مٛيٜ مٛ تٛکَّايِ کٛو طُمٜ بِنْدَاطُمْ ندٜرْ دٜفْتٜرٜ اَتَّوْرَ اٛ لَانَاطٛ؞»‏ 
جٛونِ اٜ نجَيْرِ طُمْ وٛنِ، وَلَا مٛ اَللَّه جَٻَتَ اٛ اَادِلِيجٛ نغَمْ تٛکُّکِ اَتَّوْرَ، نغَمْ اَايَارٜ وِعِي، ‏«‏اَادِلِيجٛ اٛ وَطَيْ جٛنْدٜ حٛولَاکِ اَللَّه؞»‏ 
حٛولَاکِ اَللَّه اٜ فٜىٰرٛوتِرِ اٜ تٛکُّکِ اَتَّوْرَ؞ نغَمْ اَايَارٜ وِعِي، ‏«‏کٛو مٛيٜ غَطٛووٛ کٛ اَتَّوْرَ وِعِ اٛ حٜٻَيْ جٛنْدٜ ندٜ غٛونغَ؞»‏ 
يٜىٰسُ اَلْمَسِيحُ رِمْطِنِيعٜنْ دَغَ لَانٜىٰکِ کِ اَتَّوْرَ وَدِّ، ندٜ اٛ وَرْتِ کٛ لَانَا نغَمْ مٜىٰطٜنْ؞ نغَمْ اَايَارٜ وِعِي، ‏«‏کٛو مٛيٜ بَرَاطٛ دٛوْ لٜکِّ اٛ لَانَاطٛ؞» 
يٜىٰسُ اَلْمَسِيحُ رِمْطِنِيعٜنْ، نغَمْ بَرْکَ مَاکٛ يِمْٻٜ نَاع يَحُودَنْکٛعٜنْ کٜٻَ بَرْکَ طُمْ اَللَّه وَطَنِ اِبْرَاهِمْ اَلْکَوَلْ؞ اٛ وَطُ نٛنْ نغَمْ بَرْکَ حٛولَاکِمٛ کٜٻٜنْ رُوحُ طُمْ اَللَّه وَطِ اَلْکَوَلْ حٛکُّکِ؞ 
اٛنٛنْ بَنْدِرَاٻٜ اَمْ، اَلْ مِ حٛکَّعٛنْ مِسَالُ دٛوْ فِي طُمْ اَنْدُطٛنْ؞ غَطَ يِمْٻٜ طِطٛ کَوْتِي نجَٻِي غٛطُّمْ، تٛ ٻٜ نغَادِي اَلْکَوَلْ دٛوْ مَاجُمْ، وَلَا ڤٛتُطٛ سَنْکِتَطُمْ، کٛو ٻٜيْدَ غٛطُّمْ دٛوْ مَاجُمْ؞ 
تٛو، اَللَّه وَطَنِي اِبْرَاهِمْ اَلْکَوَلْ مُوطُمْ اٜ ٻِٻّٜ ٻِٻّٜىٰجِ مَاکٛ؞ اَايَارٜ وِعَايِ، ‏«‏اٜ تَانِرَاٻٜ،»‏ وَاتٛ يِمْٻٜ طُطْٻٜ، اَمَّا ندٜ وِعِ، ‏«‏اٜ تَانِرَاوٛ مَاطَ،»‏ وَاتٛ نٜطّٛ غٛعٛ تَنْ، کَنْکٛ وٛنِ اَلْمَسِيحُ؞ 
کٛ نغِنْمِ وِيکِ وٛنِ اَتَّوْرَ طُمْ اَللَّه حٛکِّ دُوٻِ 430 غَطَ طٛنْ، طُمْ يٜوَتَا اَلْکَوَلْ نغَلْ اَللَّه وَطُنٛو، ندٜنْ طُمْ سَنْکِتَتَانغَلْ؞ 
نغَمْ تٛ بَرْکَ طُمْ کٜٻُطٜنْ تٛ اَللَّه اٜنْ کٜٻُطُمْ نغَمْ تٛکُّکِ اَتَّوْرَ، تٛو، اٜنْ کٜٻَايِطُمْ نغَمْ اَلْکَوَلْ نغَلْ اٛ وَطِ؞ اَمَّا اَللَّه بَرْکِطِنِي اِبْرَاهِمْ نغَمْ اَلْکَوَلْ نغَلْ اَللَّه وَطَنِمٛ؞ 
تٛ طُمْ نٛنْ، نغَمْ طُمٜ طُمْ وَدِّ اَتَّوْرَ؟ طُمْ وَدَّ نغَمْ طُمْ حٛلَّ کٛ وٛنِ حَکّٜ؞ اَللَّه وَدُّطُمْ طُمْ حُوتِرٜىٰ نَا شَرٜلْ نغٜلْ تَانِرَاوٛ اِبْرَاهِمْ اٛنْ طٛنْ وَرِي، مٛ طُمْ وَطُنٛ اَلْکَوَلْ؞ اَللَّه لِلِ مَلَاعِکَعٜنْ ٻٜ کٛکِّ مُوسَ اَتَّوْرَ، مُوسَ حٛکِّطُمْ اِسْرَاعِيلَنْکٛعٜنْ؞ 
اَمَّا ندٜ اَللَّه وَطَنِ اِبْرَاهِمْ اَلْکَوَلْ، اٛ مٜدِّ اٜ اِبْرَاهِمْ کَنْکٛ اٜ حٛورٜ مَاکٛ؞ 
جٛونِ طُعُمْ اٜ حٛلَّ اَتَّوْرَ اٜ وَݧَ اَلْکَوَلْ اَللَّه وٛنْ طٛنْ؟ غٛونغَ نَاع طُمْ نٛنْ؞ دَا طُمْ حٛکِّي دٛوکَ کٛکّٛوجُمْ يٛنْکِ، دَا کٛو مٛيٜ وَاوَيْ وَرْتُکِ اَادِلِيجٛ تٛ تٛکِّيطُمْ؞ 
اَمَّا اَايَارٜ وِعِي حَکّٜ حَٻِّي کٛو مٛيٜ غٛنْطٛ ندٜرْ دُونِيَارُ، نغَمْ کٛ اَللَّه وَطِ اَلْکَوَلْ کٜٻٜتٜىٰطُمْ تٛ طُمْ حٛولَکٜ يٜىٰسُ اَلْمَسِيحُ، طُمْ حٛکَّيْطُمْ کٛولِيٻٜمٛ؞ 
کٛ شَرٜلْ حٛولَاکِ يٜىٰسُ وَرَ، اَتَّوْرَ حَٻِّيمِنْ بٛ شُرَاٻٜ نَاکِ ندٜ حٛولَاکِ يٜىٰسُ وَرٛيِ؞ 
نغَمْ نٛنْ، مِنْ نغَطَا لٜيْ لَامُ اَتَّوْرَ يَاکِ شَرٜلْ نغٜلْ اَلْمَسِيحُ وَرِ نغَمْ مِنْ نغَرْتَ اَادِلِعٜنْ، تٛ مِنْ کٛولَکٜمٛ؞ 
جٛونِ ندٜ حٛولَاکِ اَلْمَسِيحُ وَرِي، اَتَّوْرَ وَلَا لَامُ دٛوْ اَمِنْ کَدِنْ؞ 
اٛنْ فُو اٛنْ ٻِٻّٜ اَللَّه بَرْکَ حٛولَاکِ يٜىٰسُ اَلْمَسِيحُ؞ 
اٛنْ فُو اٛنْ نغَطَنَامَ بَڤْتِسْمَ کٛلُّطُمْ اَلْمَسِيحُ جٜيِعٛنْ اٛنْ ٻٛرْنَکٜ نغِکُّ اَلْمَسِيحُ وٛنْ طٛنْ نٛ ٻٛرْنٛرْتٛوطٛنْ کٛلْتٜ؞ 
نغَمْ نٛنْ وَلَا فٜىٰرٛوتِرٛلْ حَکُّندٜ يَحُودَنْکٛعٜنْ اٜ نَاع يَحُودَنْکٛعٜنْ، اٜ حَکُّندٜ مَشُّٻٜ اٜ نَاع مَشُّٻٜ، اٜ حَکُّندٜ وٛرْٻٜ اٜ رٜوْٻٜ؞ اٛنْ فُو اٛنْ نغَرْتِي غٛعٛ ندٜرْ سُمْڤٛوتِرْکِ اٜ يٜىٰسُ اَلْمَسِيحُ؞ 
تٛ اَلْمَسِيحُ جٜيِعٛنْ، اٛنٛنْ نغٛنِ ٻِٻّٜ اِبْرَاهِمْ، اٛنٛنْ کٜٻَتَ کٛ اَللَّه وَطِ اَلْکَوَلْ؞ 
