﻿طٜرٜوٛلْ نغٛلْ بُلُسْ وِنْدَنِ  غَلَاتِيَنْکٛعٜنْ.
1.
مِنْ بُلُسْ لِلَاطٛ وِنْدِ طٜرٜوٛلْ نغٛعٛلْ؞ نَاع يِمْٻٜ شُٻِيَمْ، نَاع نٜطّٛ وَرْتِرِيَمْ لِلَاطٛ؞ يٜىٰسُ اَلْمَسِيحُ اٜ اَللَّه ݧَاکٛ مٛ دٛوْ، اُمِّنْطٛ يٜىٰسُ دَغَ مَيْدٜ وَرْتِرِيَمْ لِلَاطٛ؞ 
مِنْ اٜ فُو بَنْدِرَاٻٜ غٛنْدُٻٜ اٜ اَمْ طٛعٛ اٜ مِنْ کٛوْنَ تٛکُّٻٜ يٜىٰسُ وٛنْٻٜ غَلَاتِيَ؞ 
اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞ 
يٜىٰسُ حٛکِّي حٛورٜ مُوطُمْ نغَمْ حَکّٜ مٜىٰطٜنْ نغَمْ اٛ حِسْنَعٜنْ دَغَ جَامَنُ کَلُّطُمْ طُعُمْ؞ نٛنْ طُمْ شُٻٛلْ اَللَّه ݧَاکٛ مٜىٰطٜنْ مٛ دٛوْ؞ 
تٜدُّنغَلْ تَبِّتَ تٛ اَللَّه حَا اَبَدَا اَبَدِنْ؞ اَامِنْ؞ 
مِ حَيْطِنِي ندٜ نجَاوُطٛنْ وَيْلِتَنْکِ اَللَّه ٻَاوٛ، کَنْکٛ نٛدُّطٛعٛنْ بَرْکَ يِدّٜ اَلْمَسِيحُ مَوْندٜ شٛعَّنِيطٛنْ وٛنْغٛلْ اٜکِّتِنٛلْ اٛنْ ݧُمَ طُمْ حَبَرُ بٜلْطُمْ؞ 
غٛونغَ، وَلَا غٛطُّمْ حَبَرُ بٜلْطُمْ فٜىٰرٜ، اَمَّا اٜ وٛودِ وٛٻّٜ يِمْٻٜ غَنّٛوٻٜعٛنْ؞ اٜ ٻٜ نغِطِ وَيْلُتُکِ حَبَرُ بٜلْطُمْ طُمْ اَلْمَسِيحُ؞ 
اَمَّا کٛو مِنٛنْ، کٛو مَلَاعِکَاجٛ پِوٛيْطٛ دَغَ دٛوْ وَعَجِنَنِعٛنْ وَعَجِنْکِ فٜىٰرٛوتِرْکِ اٜ حَبَرُ بٜلْطُمْ طُمْ مِنْ نغَعَجِنَنِعٛنْ، اَللَّه حَلْکَمٛ ندٜرْ حِيتٜ؞ 
نٛنْ نٛ مِنْ مبِعُنٛو ندٜنّٛ، جٛونِ اٜ مِ فُطِّتَ وِيکِ:‏ تٛ غٛطّٛ وَعَجِنَنِيعٛنْ وَعَجِنْکِ فٜىٰرٛوتِرْکِ اٜ حَبَرُ بٜلْطُمْ طُمْ نجَٻُطٛنْ اَرَنْدٜ، اَللَّه حَلْکَمٛ ندٜرْ حِيتٜ؞ 
تٛو، جٛونِ يِدّٜ يِمْٻٜ طَٻِّتَيْمِ، کٛو يِدّٜ اَللَّه؟ کٛو بٛو اٜ مِ طَٻِّتَ وٜلْنَنْکِ يِمْٻٜ ٻٜرْطٜ؟ نَاع نٛنْ!‏ دَا حَا جٛونِ يِمْٻٜ طَٻِّتَيْمِ وٜلْنَنْکِ ٻٜرْطٜ، دَا مِ وَرْتَايِ مَشُّطٛ اَلْمَسِيحُ؞ 
بَنْدِرَاٻٜ اَمْ، اٜ مِ يِطِ اَنْدٛنْ، حَبَرُ بٜلْطُمْ طُمْ نغَعَجِنْمِ، نَاع تٛ نٜطّٛ طُمْ پِوٛيِ؞ 
نَاع تٛ نٜطّٛ کٜٻُمِطُمْ، نٛنْ مَا وَلَا اٜکِّتِنْطٛيَمْطُمْ، اَمَّا يٜىٰسُ اَلْمَسِيحُ وَنْغِنَنِيَمْطُمْ؞ 
اٛنْ نَنِي نٛ نجٛوطٛرِيمِ ندٜنّٛ ندٜرْ دِينَ يَحُودَنْکٛعٜنْ، نٛ تٛرِّرْمِ يِمْٻٜ اَللَّه تٛکُّٻٜ يٜىٰسُ، يُرْمٜىٰندٜ وَلَا، مِ وَطِي کٛ مبَاوَيْمِ وَطُکِ نغَمْ مِ حَلْکَٻٜ؞ 
مِ لُغِّي ندٜرْ دِينَ يَحُودَنْکٛعٜنْ حَا مِ ٻُرِي طُطْٻٜ ندٜرْ يَحُودَنْکٛعٜنْ وَلْدٜعٜنْ اَمْ، اٜ مِ وٛودِ يِدّٜ تٛکُّکِ ندٛنُوجِ مَامَعٜنْ اَمْ نَاع سٜطَّ؞ 
اَمَّا اَللَّه، شُٻُطٛيَمْ کٛ مِ دَݧٜىٰ، نٛدِّيَمْ بَرْکَ يِدّٜ مَاکٛ، اٛ سُٻِ 
وَنْغِنَنْکِيَمْ ٻِطّٛ مَاکٛ، نغَمْ مِ وَعَجِنَمٛ ندٜرْ يِمْٻٜ نَاع يَحُودَنْکٛعٜنْ؞ ندٜ نٛنْ وَطِ، مِ يَحَايِ تٛ غٛطّٛ نغَمْ حٛکَّيَمْ شَاوٛرِ، 
نٛنْ مَا مِ يَحَايِ اُرُشَلِيمَ نغَمْ مِ يِعَ ٻٜنْ طٛنْ اَرْتُٻٜيَمْ وَرْتُکِ لِلَاٻٜ؞ اَمَّا طٛنْ اٜ طٛنْ نجَامِ لٜيْدِ لَارَبَنْکٛعٜنْ، ندٜنْ شٛعِّيمِ دِمَسْکُ؞ 
غَطَ دُوٻِ تَتِ مِ يَحِي اُرُشَلِيمَ نغَمْ مِ مٜدَّ اٜ بِيتُرُسْ، ندٜنْ نجٛوطٛدِيمِ اٜ مَاکٛ بَلْطٜ سَڤّٛ اٜ جٛوِ؞ 
اَمَّا مِ يِعَايِ غٛطّٛ ندٜرْ لِلَاٻٜ سٜيْ نِ يَاکُبُ، مِݧِرَاوٛ يٜىٰسُ؞ 
کٛ مبِنْدَنْمِعٛنْ طُمْ غٛونغَ؞ اَللَّه اٜ اَنْدِ نَاع مِ فٜوَيْ؞ 
غَطَ طٛنْ مِ يَحِي لٜيْدِ سِيرِيَ اٜ لٜيْدِ کِلِيکِيَ؞ 
اٜ نغٜلْ تٛنْ شَرٜلْ، کَوْتٜ تٛکُّٻٜ يٜىٰسُ وٛنْٻٜ لٜيْدِ يَحُودِيَ مٜىٰطَايِ يِيکِيَمْ؞ 
کٛ ٻٜ نَنِ تَنْ وٛنِ، ‏«‏نٜطّٛ تٛرَّيْنٛوطٛعٜنْ، جٛونِ اٜ مٛ وَعَجِنَ تٛکُّکِ يٜىٰسُ کِ اٛ يِطُنٛو اٛ لَلِّنَ!‏»‏ 
ٻٜ مَنْتِ اَللَّه نغَمْ کٛ اٛ وَطَنِيَمْ؞ 
