﻿2 کٛرِنْتِيَنْکٛعٜنْ.
9.
نَاع طُمْ دٛولٜ مِ وِنْدَنَعٛنْ دٛوْ کُوغَلْ وَلُّکِ يِمْٻٜ اَللَّه؞ 
نغَمْ اٜ مِ اَنْدِ اٛنْ نغِطِ وَلُّکِ نَاع سٜطَّ؞ مِ مَنْتٛرَکٜعٛنْ يٜىٰسٛ يِمْٻٜ مَکِدٛونِيَ مِ وِعِيٻٜ اٛنٛنْ يِمْٻٜ اَکَايَ اٛنْ شِرْيَکٜ کٛکّٛنْ بَلَّلْ دَغَ رٛوَنِ؞ تِينَارٜ مٛوطٛنْ وَطِ طُطْٻٜ ندٜرْ مَٻّٜ ڤُطِّ وَلُّکِ؞ 
اَمَّا مِ لِلٛيِي ٻٜنْ طٛنْ بَنْدِرَاٻٜ تٛ مٛوطٛنْ نغَمْ شِرْيٛوطٛنْ وَلُّکِ نٛ مبِيمِ، نغَمْ تٛع مَنْتٛرَاکِ کِ مِنْ مَنْتٛرْتٛوعٛنْ دٛوْ فِي طُعُمْ وَرْتَ مٜىٰرٜ؞ 
نغَمْ تٛ مِ وَرْدٛيِي اٜ وٛٻّٜ ندٜرْ تٛکُّٻٜ يٜىٰسُ وٛنْٻٜ مَکِدٛونِيَ مِنْ تَوِي اٛنْ شِرْيَاکِ، مِ نَنَيْ شٜمْتُطُمْ نَاع سٜطَّ نغَمْ مَنْتٛرَاکِ کِ مَنْتٛرْتٛومِعٛنْ، ندٜنْ نَاع مِنْ تَنْ سٜمْتَتَ، حَا اٜ اٛنٛنْ؞ 
نغَمْ نٛنْ، مِ ݧُمِي دٛولٜ مِ تٛرٛو بَنْدِرَاٻٜ ٻٜنْ طٛنْ اَرْتَ يَاکِ تٛ مٛوطٛنْ، ٻٜ تَبِّتِنَ اٛنْ شِرْيَکٜ بَلَّلْ مَنْغَلْ نغَلْ نغَطّٛنْ اَلْکَوَلْ کٛ مِ وَرَ؞ نغَمْ تٛ مِ وَرِي مِ تَوَ اٜ نغَلْ حَوْرِتِي، نغَلْ وَرْتَ بَلَّلْ نغَلْ کٛکُّطٛنْ ٻٜرْندٜ غٛعٛ، نَاع اٜ دٛولٜ؞ 
ݧُمٜىٰ طُعُمْ؞ کٛو مٛيٜ اَاوُطٛ سٜطَّ، سٜطَّ اِتَّتَ، ندٜنْ فُو اَاوُطٛ کٛ طُوطِ، کٛ طُوطِ اِتَّتَ؞ 
کٛو مٛيٜ سٜيْ حٛکَّ کٛ سُٻِ حٛکُّکِ ندٜرْ ٻٜرْندٜ مُوطُمْ، نَاع اٜ نَوْطُمْ ٻٜرْندٜ کٛو اٜ دٛولٜ، نغَمْ اَللَّه اٜ يِطِ کٛکّٛووٛ ندٜرْ بٜلْطُمْ ٻٜرْندٜ؞ 
اَللَّه اٜ وَاوَ حٛکُّکِعٛنْ کٛو اِرِ طُمٜ بَرْکَ ٻُرْطُمْ کٛ نغِطّٛنْ، نغَمْ کٛو ندٜيٜ کٜٻٛنْ کٛو طُمٜ کٛ حٜپَتَعٛنْ اٜ کٛ مبَلِّرْتٛنْ وٛٻّٜ؞ 
نٛنْ نٛ طُمْ وِنْدِرَا، ‏«‏اٜ مٛ سَنْکِتَ شَاحُ مَاکٛ ندٜرْ يِمْٻٜ ٻٜ نغَلَنَا، کُوطٜ مَاکٛ بٛطّٜ طٜ تَبُتُطٜ حَا اَبَدَا؞»‏ 
اَللَّه وٛنِ کٛکّٛووٛ دٜمٛووٛ اَوْدِ، کٛکّٛووٛ يِمْٻٜ کٛ ݧَامَتَ؞ اٛ حٛکَّيْعٛنْ کٛ حٜپَتَعٛنْ، اٛ طُطِّنَيْطُمْ، نغَمْ ٻٜيْدٛنْ بَلَّلْ نغَلْ کٛکّٛتٛنْ کَانُٻٜ مبَلّٜىٰ؞ 
اٛ بَرْکِطِنَيْعٛنْ اٜ کٛو نغٛلٜ لَاوٛلْ نغَمْ نغَرْتٛنْ کٛکّٛوٻٜ بَلَّلْ کٛو ندٜيٜ، ندٜنْ يِمْٻٜ نغٜتَّيْمٛ نغَمْ بَلَّلْ نغَلْ کٛکُّطٛنْ نغَلْ ٻٜ کٜٻِ لَاوٛلْ اَمِنْ؞ 
کُوغَلْ نغَعَلْ نغَلْ نغَطٛتٛنْ، نَاع اٜ نغَلْ وَلَّ يِمْٻٜ اَللَّه تَنْ، حَا اٜ نغَلْ وَطَ يِمْٻٜ طُطْٻٜ اٜ نغٜتَّ اَللَّه نَاع سٜطَّ؞ 
کُوغَلْ نغَعَلْ نغَلْ نغَطٛتٛنْ حٛلِّي اٛنْ کٛولَاٻٜ؞ طُطْٻٜ تٜدِّنَيْ اَللَّه نغَمْ اٛنْ نغَطَ کٛ حَبَرُ بٜلْطُمْ طُمْ اَلْمَسِيحُ وِعِ طُمْ نجَٻُطٛنْ يٜىٰسٛ کٛو مٛيٜ، ندٜنْ اٛنْ شٜنْدَ کٛ نغٛودُطٛنْ اٜ تٛکُّٻٜ يٜىٰسُ غٛنْٻٜ اُرُشَلِيمَ اٜ فُو حٛرِيٻٜ؞ 
اٜ ٻٜ نغِطِ يِيکِعٛنْ اٜ ٻٜ نغَطَنَعٛنْ دٛعَارٜ، نغَمْ بَلَّلْ مَنْغَلْ نغَلْ اَللَّه وَطَنِٻٜ لَاوٛلْ مٛوطٛنْ؞ 
يٜتّٛورٜ تَبِّتَ تٛ اَللَّه نغَمْ شَاحُ طُمْ اٛ حٛکِّعٜنْ طُمْ حٛنْدُکٛ وَاوَتَا وِعَ؞ 
