﻿2 کٛرِنْتِيَنْکٛعٜنْ.
4.
نغَمْ نٛنْ، ندٜ اَللَّه يُرْمِنَنِيمِنْ حٛکِّيمِنْ کُوغَلْ نغَعَلْ، مِنْ اِتَّتَا کَمُّندٜ؞ 
مِنْ نغَݧِي حُوُکِ کُوطٜ شُوطِيطٜ شٜمْتِنِيطٜ؞ مِنْ مَجِّنْتَا يِمْٻٜ، مِنْ نغَيْلِتَتَا مَعَنَ وٛلْدٜ اَللَّه؞ اَمَّا اٜ مِنْ مبِعَ غٛونغَ اٜ نجَيْرِ؞ لَاوٛلْ وَطُکِ نٛنْ، کٛو مٛيٜ اَنْدَيْ ندٜرْ ٻٜرْندٜ مُوطُمْ يٜىٰسٛ اَللَّه مِنٛنْ اٜ مِنْ نغٛودِ غٛونغَ؞ 
تٛ حَبَرُ بٜلْطُمْ طُمْ مِنْ نغَعَجِنْتَ اٜ سُوطِي، وٛنْٻٜ دٛوْ لَاوٛلْ حَلْکٜرٜ تَنْ طُمْ سُوطَنِي؞ 
شٜيْطَنْ لَامِيطٛ دُونِيَارُ ندُعُ وُمْنِي ٻٜرْطٜ يِمْٻٜ ٻٜ کٛولَاکِ يٜىٰسُ، نغَمْ تٛع ٻٜ نغِعَ جَيْنغٛلْ حَبَرُ بٜلْطُمْ طُمْ تٜدُّنغَلْ اَلْمَسِيحُ نَنْدُطٛ اٜ اَللَّه؞ 
نغَمْ نَاع حَبَرُ اَمِنْ مِنْ نغَعَجِنْتَ، اَمَّا کٛ مِنْ نغَعَجِنْتَ وٛنِ يٜىٰسُ اَلْمَسِيحُ اٛ جٛومِرَاوٛ، مِنٛنْ بٛو نغَمْ مَاکٛ مِنْ نغَرْتِ مَشُّٻٜ مٛوطٛنْ؞ 
نغَمْ اَللَّه بِيطٛ جَيْنغٛلْ وُرْتٛيٛو دَغَ ندٜرْ ݧِوْرٜ، کَنْکٛ وَطِ جَيْنغٛلْ مَاکٛ يٜيْنِي ندٜرْ ٻٜرْطٜ اَمِنْ نغَمْ مِنْ اَنْدَ تٜدُّنغَلْ اَللَّه نغَلْ طُمْ يِعِي اٜ يٜىٰسٛ يٜىٰسُ اَلْمَسِيحُ؞ 
اَمَّا مِنٛنْ اٜ مِنْ نَنْدِ اٜ غٛجِيجٜ لٛوڤٜ؞ طُمْ رٜسِي جَوْدِ ندٜرْ اَمِنْ نغَمْ حٛلُّکِ طٜعٜ بَوْطٜ ٻُرْطٜ کٛو طٜيٜ بَوْطٜ، تٛ اَللَّه طٜ پِوٛيِ، نَاع تٛ اَمِنْ؞ 
مِنْ ٻِطَّامَ اٜ کٛو ندُيٜ وُتُّدُ، اَمَّا مِنْ ڤُسَايِ؞ ݧُمٛوجِ اَمِنْ نجِيٻَکٜ، اَمَّا مِنْ اِتَّايِ کَمُّندٜ؞ 
اٜ مِنْ تٛرّٜىٰ، اَمَّا اَللَّه سٜنْدِرَايِ اٜ اَمِنْ؞ اٜ مِنْ ندٛعّٜىٰ، اَمَّا مِنْ کَلْکَاکَ؞ 
کٛو ندٜيٜ اٜ مِنْ حَادٜ وَرٜىٰکِ نٛ طُمْ وَرِرِ يٜىٰسُ، نغَمْ يٛنْکِ اِرِ کِ مَاکٛ يِعٜىٰ ندٜرْ ٻَلِّ اَمِنْ؞ 
نغَمْ مِنٛنْ غٛودُٻٜ يٛنْکِ اٜ مِنْ حَادٜ مَيْدٜ کٛو ندٜيٜ نغَمْ يٜىٰسُ، نغَمْ طُمْ يِعَ يٛنْکِ مَاکٛ ندٜرْ ٻَلِّ اَمِنْ طِعِ مَايَيْطِ؞ 
کَنْجُمْ وَطِ مِنْ کٜدِّ تٛ مَيْدٜ، نغَمْ اٛنٛنْ کٜٻٛنْ يٛنْکِ؞ 
ندٜ اٜ مِنْ نغٛودِ حٛولَارٜ غٛعٛ اٜ بِنْدُطٛ اَايَارٜ بِيندٜ، ‏«‏مِ حٛولَکٜ، کَنْجُمْ وَطِ مٜتُمِ؞»‏ مِنٛنْ مَا مِنْ کٛولَکٜ، کَنْجُمْ وَطِ مِنْ مٜتِ؞ 
نغَمْ اٜ مِنْ اَنْدِ اَللَّه اُمِّنْطٛ يٜىٰسُ جٛومِرَاوٛ مٜىٰطٜنْ دَغَ مَيْدٜ، اٛ اُمِّنَيْمِنْ مِنٛنْ مَا نٛنْ نٛ اٛ اُمِّنِرِ يٜىٰسُ، اٛ وَدَّمِنْ حَوْتِ اٜ مٛوطٛنْ يٜىٰسٛ مَاکٛ؞ 
فُو طُعُمْ طُمْ نغَمْ ٻٜيْدَارِ مٛوطٛنْ، نغَمْ شَاحُ اَللَّه جٛتّٛتٛوطُمْ يِمْٻٜ طُطْٻٜ، وَطَ طُمْ ٻٜيْدَ يٜتُّکِ اَللَّه نغَمْ تٜدِّنْکِمٛ؞ 
نغَمْ نٛنْ، مِنْ اِتَّتَا کَمُّندٜ؞ کٛو ندٜ ٻَلِّ اَمِنْ اٜ ٻٜيْدَ تَمڤُکِ، فُو اٜ نٛنْ ٻٜرْطٜ اَمِنْ اٜ شٜمْبِطِنٜىٰ کٛو ندٜيٜ؞ 
نغَمْ تٛرَّاجِ طِ مِنْ تٛرّٜتٜىٰ جٛونِ طِ سٜطَّنَاجِ طِ نٜىٰٻَتَا طِ نغَطَيْ مِنْ کٜٻَ تٜدُّنغَلْ نغَلْ حَا اَبَدَا ٻُرْنغَلْ کٛو طُمٜ؞ 
نغَمْ نٛنْ، حَکِّيلٛ اَمِنْ وَلَا دٛوْ کٛ غِتٜ نغِعَتَ؞ اٜ مِنْ نغَطَ حَکِّيلٛ اَمِنْ دٛوْ کٛ غِتٜ مبَاوَتَا يِيکِ؞ نغَمْ کٛ غِتٜ نغِعَتَ طُمْ پَٻّٛتٛوطُمْ، اَمَّا کٛ غِتٜ مبَاوَتَا يِيکِ، طُمْ تَبِتَيْطُمْ؞ 
