﻿1 کٛرِنْتِيَنْکٛعٜنْ.
15.
جٛونِ بَنْدِرَاٻٜ اَمْ، اٜ مِ يِطِ مِ سِفْتٛرَنَعٛنْ حَبَرُ بٜلْطُمْ طُمْ نغَعَجِنَنْمِعٛنْ، طُمْ نجَٻُطٛنْ، طُمْ تٛکّٛتٛنْ بٛطُّمْ؞ 
بَرْکَ مَاجُمْ اٛنْ کِسِي، تٛ اٛنْ نجٛغَکٜ بٛطُّمْ وَعَجُ طُمْ نغَعَجِنَنْمِعٛنْ؞ تٛ نَاع نٛنْ، اٛنْ کٛولِي يٜىٰسُ اٜ مٜىٰرٜ؞ 
مِ وَدَّنِيعٛنْ فِي ٻُرْطُمْ دَرَجَ طُمْ کٜٻُمِ؞ کَنْجُمْ وٛنِ اَلْمَسِيحُ مَايِي نغَمْ حَکّٜ مٜىٰطٜنْ نٛنْ نٛ غٛطّٜ اَايَاجٜ مبِعِ، 
اٛ اُوَامَ، اٛ اُمِّنَامَ دَغَ مَيْدٜ ݧَلْندٜ تَتَوْرٜ نٛنْ نٛ غٛطّٜ اَايَاجٜ مبِعِ، 
اٛ وَنْغَنِ بِيتُرُسْ، ندٜنْ اٛ وَنْغَنِي لِلَاٻٜ مَاکٛ سَڤّٛ اٜ طِطٛ؞ 
غَطَ طٛنْ اٛ وَنْغَنِي تٛکُّٻٜمٛ ٻُرْٻٜ 500 اٜ شَرٜلْ غٛعٛ؞ طُطْٻٜ مَٻّٜ حَا جٛونِ اٜ ٻٜ فٛوفَ، اَمَّا وٛٻّٜ مَايِي؞ 
طٛنْمَا اٛ وَنْغَنِي يَاکُبُ، ندٜنْ فُو لِلَاٻٜ مَاکٛ؞ 
غَطَ مَاجُمْ فُو، مِنْ مَا، اٛ وَنْغَنِييَمْ، کٛو ندٜ اٜ مِ نَنْدِ اٜ ٻِنْغٜلْ دَݧَانغٜلْ کٛ شَرٜلْ دَݧُکِنغٜلْ وَطَ؞ 
نغَمْ مِنْ وٛنِ ٻُرْطٛ فَمْطُکِ ندٜرْ لِلَاٻٜ مَاکٛ؞ مِ حٜوْتَايِ مَا مِ نٛدّٜىٰ لِلَاطٛ مَاکٛ، نغَمْ مِ تٛرِّي کَوْتَلْ يِمْٻٜ اَللَّه؞ 
اَمَّا نغَمْ يِدّٜ ندٜ اَللَّه حٛلِّيَمْ مِ وَرْتِي کٛ نغٛنْمِ حَنْدٜ، ندٜنْ يِدّٜ ندٜ اٛ حٛلِّيَمْ وَرْتَايِ مٜىٰرٜ؞ مِ ٻُرِي کٛو مٛيٜ لِلَاطٛ حُوُکِ، کٛو ندٜ نَاع طُمْ مِنْ حُوَتَ، طُمْ يِدّٜ اَللَّه غٛنْدُندٜ اٜ اَمْ حُوَتَ؞ 
تٛو، وَلَا فٜىٰرٛوتِرٛلْ کٛو تٛ مِنْ وَعَجِنَنِعٛنْ، کٛو تٛ لِلَاٻٜ حٛرِيٻٜ نغَعَجِنَنِعٛنْ؞ کٛ مِنْ نغَعَجِنْتَ طُمْ غٛعٛ؛ کَنْجُمْ بٛو نجَٻُطٛنْ؞ 
تٛو، تٛ اٜ طُمْ وَعَجِنَ وِيکِ اَلْمَسِيحُ اُمِّنَامَ دَغَ مَيْدٜ، نٛ وَطَتَ وٛٻّٜ مٛوطٛنْ اٜ مبِعَ مَيْٻٜ اُمَّتَاکٛ؟ 
دَا مَيْٻٜ اُمَّتَاکٛ دَغَ مَيْدٜ، تٛو، دَا اَلْمَسِيحُ اُمِّنَاکَ دَغَ مَيْدٜ وٛنْ طٛنْ؞ 
تٛ بٛو اَلْمَسِيحُ اُمَّاکِ دَغَ مَيْدٜ، تٛو، وَعَجِنْکِ اَمِنْ وَرْتِي مٜىٰرٜ، ندٜنْ حٛولَارٜ مٛوطٛنْ وَرْتِي مٜىٰرٜ؞ 
کٛ ٻُرِ نٛنْ وٛنِ، مِنْ نغَرْتِي شٜيْدُعٜنْ فٜوٛوٻٜ دٛوْ اَللَّه؞ نغَمْ مِنْ مبِعِي اَللَّه اُمِّنِي اَلْمَسِيحُ دَغَ مَيْدٜ؞ اَمَّا دَا طُمْ غٛونغَ مَيْٻٜ اُمِّنْتَاکٜ، دَا اَللَّه اُمِّنَايِمٛ؞ 
نغَمْ دَا طُمْ اُمِّنْتَا مَيْٻٜ، تٛو، دَا اَلْمَسِيحُ مَا اُمِّنَاکَ دَغَ مَيْدٜ وٛنْ طٛنْ؞ 
دَا اَلْمَسِيحُ اُمِّنَاکَ، تٛو، حٛولَارٜ مٛوطٛنْ وَرْتِي مٜىٰرٜ، ندٜنْ حَا جٛونِ اٛنْ نغٛنْدِ اٜ حَکّٜ مٛوطٛنْ، 
ندٜنْ مَيْٻٜ اٜ کٛولِي اَلْمَسِيحُ کَلْکِي وٛنْ طٛنْ؞ 
تٛ نِ نغَمْ جٛنْدٜ دُونِيَارُ ندُعُ تَنْ نغَطٜتٜنْ کَمُّندٜ دٛوْ اَلْمَسِيحُ، اٜنْ ٻُرِي کٛو مٛيٜ وَرْتُکِ ٻٜ طُمْ يُرْمِنَنْتَ؞ 
اَمَّا غٛونغَ اَلْمَسِيحُ اُمِّنَامَ دَغَ مَيْدٜ؞ کَنْکٛ وٛنِ اَرْتُطٛ اُمَّاکِ دَغَ ندٜرْ ٻٜ طُمْ اُمِّنْتَ دَغَ مَيْدٜ؞ 
ندٜ مَيْدٜ وَرِي لَاوٛلْ نٜطّٛ غٛعٛتٛ، نٛنْ مَا اُمَّاکِ مَيْٻٜ دَغَ مَيْدٜ وَرِي لَاوٛلْ نٜطّٛ غٛعٛتٛ؞ 
نٛ يِمْٻٜ فُو مَيْرَتَ نغَمْ سُمْڤٛ اٜ اَادَمُ، نٛنْ مَا فُو غٛودُٻٜ سُمْڤٛ اٜ اَلْمَسِيحُ کٜٻَيْ يٛنْکِ کِ رٜعَتَا؞ 
اَمَّا رَا نٛ اُمَّاکِ مَيْٻٜ وَعَتَ؞ اَرَنْدٜ اَلْمَسِيحُ اُمِّنَامَ دَغَ مَيْدٜ، ندٜنْ ݧَلْندٜ ندٜ اٛ وَرْتٛيِ طُمْ اُمِّنَيْ فُو يِمْٻٜ مَاکٛ دَغَ مَيْدٜ؞ 
ندٜنْ غَطَ اٛ حٜٻِي جَالٛرْغَلْ دٛوْ کٛو مٛيٜ لَامِيطٛ، اٜ کٛو طُمٜ لَامُ غِنِّ، اٜ کٛو طٜيٜ بَوْطٜ، رٜعِرْدٜ دُونِيَارُ وَرَيْ، ندٜنْ اٛ حٛکِّتَ اَللَّه ݧَاکٛ مٛ دٛوْ لَامُ؞ 
نغَمْ دٛولٜ اَلْمَسِيحُ لَامٛو نَا اَللَّه يٛوِيمٛ دٛوْ وَݧْوَݧْٻٜ مَاکٛ فُو؞ 
غَݧٛ کَلْکٜتٜىٰطٛ غَطَ کٛو طُمٜ، کَنْکٛ وٛنِ مَيْدٜ؞ 
نغَمْ اَايَارٜ وِعِي، ‏«‏اَللَّه وَرْتِرِي کٛو طُمٜ لٜيْ لَامُ اَلْمَسِيحُ؞»‏ اَمَّا ندٜ طُمْ وِعِ، ‏«‏کٛو طُمٜ وَرْتِرَامَ لٜيْ لَامُ اَلْمَسِيحُ،»‏ تٛو، اٜ نجَيْرِ طُمْ وٛنِ طُعُمْ حَوْتَايِ اٜ اٛنْ طٛنْ غَرْتِرْطٛ کٛو طُمٜ لٜيْ لَامُ اَلْمَسِيحُ؞ 
غَطَ اَللَّه وَطِي کٛو طُمٜ لٜيْ لَامُ ٻِطّٛ مَاکٛ، سٜيْ ٻِطّٛ اٛنْ وَرْتَ لٜيْ لَامُ اَللَّه غَرْتِرْطٛ کٛو طُمٜ لٜيْ لَامُ ٻِطّٛ اٛنْ، نغَمْ اَللَّه تَنْ وَرْتَ لَامِيطٛ کٛو طُمٜ کٛو تٛيٜ؞ 
تٛو، تٛ مَيْٻٜ اُمَّتَاکٛ دَغَ مَيْدٜ، طُمٜ غَطَنَاٻٜ بَڤْتِسْمَ نغَمْ مَيْٻٜ نغَطَتَ؟ تٛ طُمْ اُمِّنَايِ مَيْٻٜ کٛو سٜطَّ، نغَمْ طُمٜ طُمْ وَطَنْتَ يِمْٻٜ بَڤْتِسْمَ نغَمْ مَٻّٜ؟ 
ندٜنْ نغَمْ طُمٜ مِنْ شٛورَتَ يٛنْکِ اَمِنْ کٛو ندٜيٜ؟ 
غٛونغَ بَنْدِرَاٻٜ، مَنْتٛرَاکِ کِ مَنْتٛرْتٛومِعٛنْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ وَطِ کٛو ندٜيٜ ݧَلْندٜ اٜ مِ حَادٜ مَيْدٜ؞ 
تٛ مِ حَٻْدِي اٜ يِمْٻٜ غٛودُٻٜ نغِکُّ بٛ طُمْ مَرْلٜ لَدّٜ ندٜرْ غَرِيرِ اَافِسَ نغَمْ حٜٻُکِ فِي دُونِيَارُ ندُعُ تَنْ، طُمٜ ٻٜيْدٛرِيمِ؟ تٛ مَيْٻٜ اُمِّنْتَاکٜ دَغَ مَيْدٜ، سٜيْ نغَطٜنْ کٛ طُمْ وِعُنٛو، ‏«‏اٜنْ ݧَامُ، اٜنْ نجَرُ، نغَمْ جَانغٛ اٜنْ مَايَيْ؞»‏ 
تٛع اٛنْ نجَٻُ طُمْ مَجِّنَعٛنْ؞ ‏«‏جٛوطٛدَاکِ اٜ غٛودُٻٜ نغِکُّ کَلُّطُمْ وٛنَّيْ نغِکُّ بٛطُّمْ؞»‏ 
نغَرْتٜىٰ ندٜرْ حَکِّيلٛ مٛوطٛنْ نٛ حَانِ، اَلٜىٰ وَطُکِ حَکّٜ، نغَمْ اٜ وٛودِ وٛٻّٜ مٛوطٛنْ ٻٜ نغَلَا اَنْدَلْ دٛوْ اَللَّه؞ مِ وِعُ نٛنْ نغَمْ شٜمْتٛنْ؞ 
غٛطّٛ پَمَيْ وِعَ، ‏«‏نٛ مَيْٻٜ اُمِّنِرْتٜىٰ دَغَ مَيْدٜ؟ اٜ اِرِ ندُيٜ ٻَنْدُ ٻٜ اُمّٛدٛرْتٛو؟»‏ 
اَنْ کَاݝَاطٛ!‏ تَا اَاوِي غَبّٜلْ، نغٜلْ فُطَتَا نَا نغٜلْ وَاتِي؞ 
کٛ اَاوُطَا فُو، کٛو غَبّٜلْ اَلْکَمَارِ، کٛو وٛنْغٜلْ غَبّٜلْ فٜىٰرٜ، کٛ فُطِ نَنْدَتَا اٜ کٛ اَاوُطَا؞ 
اَمَّا اَللَّه اٜ حٛکَّ کٛ فُطِ نَنْدِ فٜىٰرٜ نٛنْ نٛ اٛ سُٻِرِ؞ کٛو اِرِ نغٜلٜ غَبّٜلْ اٜ اِرِ نَنْدِ طُمْ نغٜلْ فُطِرْتَ؞ 
نَاع فُو ٻَلِّ نغٛنِ نَنْدُطِ؞ ٻَلِّ يِمْٻٜ فٜىٰرٜ، ٻَلِّ مَرْلٜ فٜىٰرٜ، ٻَلِّ شٛلِّ فٜىٰرٜ، ٻَلِّ لِپِّ فٜىٰرٜ؞ 
کٛو طُمٜ غٛنْطُمْ اٜ دٛوْ اٜ وٛودِ نٛ طُمْ وَعِ؞ نٛنْ مَا کٛو طُمٜ غٛنْطُمْ ندٜرْ دُونِيَارُ اٜ وٛودِ نٛ طُمْ وَعِ؞ غٛنْطُمْ اٜ دٛوْ وٛوطُکِ مَاجُمْ اٜ فٜىٰرٛوتِرِ اٜ وٛوطُکِ فِي غٛنْطُمْ ندٜرْ دُونِيَارُ؞ 
نَانغٜ نٛ طٜلْکِتِرْتَ فٜىٰرٜ، لٜوْرُ نٛ طٜلْکِتِرْتَ فٜىٰرٜ، کٛودٜ نٛ طٜلْکِتِرْتَ فٜىٰرٜ، ندٜنْ کٛودٜ اٜ فٜىٰرٛوتِرِ کٛو ندٜيٜ حٛودٜرٜ اٜ نٛ ندٜ طٜلْکِتٛرْتٛو؞ 
نٛنْ اُمَّاکِ مَيْٻٜ وَعِ؞ ٻَنْدُ اُوَاندُ ندُ ݧٛلَيْندُ، تٛ ندُ اُمِّنَامَ ندُ ݧٛلَتَا؞ 
ٻَنْدُ اُوَاندُ وٛوطَا يِيکِ، ندُ وَلَا سٜمْبٜ، تٛ ندُ اُمِّنَامَ، ندُ وَرْتَيْ وٛوطُندُ يِيکِ، غٛودُندُ بَوْطٜ؞ 
ٻَنْدُ اُوَاندُ کَيْرُ حُوتِرْتٜىٰ ندٜرْ دُونِيَارُ ندُعُ، اَمَّا ٻَنْدُ اُمِّنْتٜىٰندُ، کَيْرُ حُوتِنِرْتٜىٰ اٜ تٛنْ دٛوْ؞ ندٜ اٜ وٛودِ ٻَنْدُ کُوتِرْتٜىٰندُ ندٜرْ دُونِيَارُ، نٛنْ مَا اٜ وٛودِ ٻَنْدُ کُوتِرْتٜىٰندُ تٛنْ دٛوْ؞ 
نغَمْ، نٛنْ نٛ طُمْ وِنْدِرَا، ‏«‏نٜطّٛ اَرَنْدٜىٰجٛ، وَاتٛ اَادَمُ، اٛ وَرْتِي غٛودُطٛ يٛنْکِ؞»‏ اَمَّا اَادَمُ شَکِتِيطٛ، وَاتٛ اَلْمَسِيحُ، اٛ حٜٻِي ٻَنْدُ کُوتِرْتٜىٰندُ تٛنْ دٛوْ، اٛ وَرْتِي کٛکّٛووٛ يٛنْکِ کِ رٜعَتَا؞ 
نَاع ٻَنْدُ کُوتِرْتٜىٰندُ تٛنْ دٛوْ طُمْ اَرْتَتَ حٜٻُکِ، اَمَّا کُوتِرْتٜىٰندُ ندٜرْ دُونِيَارُ طُمْ اَرْتَتَ حٜٻُکِ، ندٜنْ طُمْ حٜٻَ کُوتِرْتٜىٰندُ تٛنْ دٛوْ؞ 
نٜطّٛ اَرَنْدٜىٰجٛ مبُلْمبُلْدِ اٛ تَغِرَا، ندٜنْ نٜطّٛ طِطَٻٛ بٛو، دَغَ دٛوْ اٛ پِوٛيِ؞ 
يِمْٻٜ دُونِيَارُ اٜ نغٛودِ ٻَنْدُ اِرِ ندُ اَادَمُ تَغِرَاطٛ مبُلْمبُلْدِ؞ جَحَيْٻٜ تٛنْ دٛوْ بٛو، ٻٜ کٜٻَيْ ٻَنْدُ اِرِ ندُ اٛنْ طٛنْ پِوٛيْطٛ دَغَ تٛنْ دٛوْ، وَاتٛ اَلْمَسِيحُ؞ 
نٛنْ نٛ نغٛودِرْطٜنْ نَنْدِ اٛنْ طٛنْ تَغِرَاطٛ مبُلْمبُلْدِ، نٛنْ مَا اٜنْ کٜٻَيْ نَنْدِ اٛنْ طٛنْ پِوٛيْطٛ دَغَ دٛوْ؞ 
بَنْدِرَاٻٜ، اٜ مِ وِعَعٛنْ، ٻَنْدُ غٛودُندُ کُسٜلْ اٜ پِيپَمْ نَتَّتَا ندٜرْ وُرٛ اَللَّه تٛنْ دٛوْ؞ ٻَنْدُ ݧٛلَيْندُ نَتَّتَا وُرٛ اَللَّه تَبِتَيْنغٛ؞ 
ندَرٜىٰ مِ وِعَعٛنْ غٛطُّمْ سِرُّ:‏ نَاع اٜنْ فُو مَايَتَ، اَمَّا اٜنْ فُو طُمْ وَيْلِتَنَيْعٜنْ ٻَلِّ 
طٛنْ اٜ طٛنْ، بٛ مَپُّکِ حِتٜرٜ، تٛ طُمْ دُودِي لُوَلْ شَکِتِينغَلْ؞ نغَمْ تٛ لُوَلْ نغَلْ دُودَامَ، مَيْٻٜ اُمّٛدٛتٛ اٜ ٻَلِّ طِ ݧٛلَتَا، ندٜنْ اٜنٜنْ فٛوفٛوٻٜ طُمْ وَيْلِتَيْ ٻَلِّ مٜىٰطٜنْ؞ 
نغَمْ دٛولٜ ندُعُ ٻَنْدُ مَايَيْندُ ݧٛلَيْندُ وَرْتِرٜىٰ ٻَنْدُ ندُ مَايَتَا ندُ ݧٛلَتَا؞ 
شَرٜلْ نغٜلْ ٻَنْدُ مَايَيْندُ ݧٛلَيْندُ وَرْتِرَا ٻَنْدُ ندُ مَايَتَا ندُ ݧٛلَتَا، کٛ اَايَارٜ وِعِ طُمْ حٜىٰوَيْ، وَاتٛ، ‏«‏طُمْ حٜٻِي جَالٛرْغَلْ دٛوْ مَيْدٜ!‏»‏ 
‏«‏مَيْدٜ، تٛ جَالٛرْغَلْ مَاطَ؟ مَيْدٜ، تٛ تٛوکٜ مَاطَ؟»‏ 
نغَمْ حَکّٜ وٛنِ تٛوکٜ ڤٛوطَيْطٜ مَيْدٜ، ندٜنْ بَوْطٜ حَکّٜ تٛ اَتَّوْرَ پِوِ؞ 
اَمَّا يٜتّٛورٜ تَبِّتَ تٛ اَللَّه کٛکُّطٛعٜنْ جَالٛرْغَلْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞ 
نغَمْ نٛنْ، بَنْدِرَاٻٜ اَمْ ٻٜ نغِطُمِ، ندَرٜىٰ بٛطُّمْ، تٛع غٛطُّمْ دِمْبَعٛنْ؞ کٛو ندٜيٜ نغَطٜىٰ کٛ مبَاوٛتٛنْ وَطُکِ کُوٛنْ کُوغَلْ جٛومِرَاوٛ، نغَمْ اٛنْ اَنْدِ کُوغَلْ نغَلْ کُوَنْتٛنْمٛ نَاع اٜ مٜىٰرٜ نغَلْ وٛنِ؞ 
