﻿رٛومَنْکٛعٜنْ.
16.
اٜ مِ يِطِ مِ وِعَعٛنْ بَنْدِرَاوٛ مٜىٰطٜنْ دٜبّٛ بِعٜتٜىٰطٛ فِيبِ، کُوٛووٛ ندٜرْ تٛکُّٻٜ يٜىٰسُ غٛنْٻٜ کَنْکِيرِيَ، اٛ دٜبّٛ مٛ غٛونغَ؞ 
نجَٻّٜىٰمٛ ندٜرْ اِنْدٜ جٛومِرَاوٛ نٛ حَانِ يِمْٻٜ اَللَّه نجَٻّٛرٜىٰ؞ کٛکّٜىٰمٛ کٛو اِرِ نغَلٜ بَلَّلْ نغَلْ اٛ يِطِ تٛ مٛوطٛنْ، نغَمْ اٛ وَلِّي يِمْٻٜ طُطْٻٜ حَوْتِ اٜ اَمْ؞ 
کٛوْنٜىٰ بِرِسْکِلَ اٜ اَکِيلَ، ٻٜ کُودَيْمِ کُوغَلْ يٜىٰسُ اَلْمَسِيحُ؞ 
ٻٜ کٛشِّي يٛنْکِ مَٻّٜ نَاع طُمْ غٛطُّمْ نغَمْ اَمْ؞ مِ يٜتِّيٻٜ، نَاع مِنْ تَنْ حَا اٜ کٛو نغَلٜ کَوْتَلْ تٛکُّٻٜ يٜىٰسُ غٛنْٻٜ ندٜرْ يِمْٻٜ نَاع يَحُودَنْکٛعٜنْ؞ 
طٛنْمَا کٛوْنٜىٰ تٛکُّٻٜ يٜىٰسُ کَوْرِتٛوٻٜ ندٜرْ وُرٛ مَٻّٜ؞ کٛوْنٜىٰ حِغٛ اَمْ مٛ نغِطُمِ بِعٜتٜىٰطٛ اَفَانِتُسْ، اَرْتُطٛ حٛولَاکِ اَلْمَسِيحُ ندٜرْ لٜيْدِ اَاسِيَ فُو؞ 
کٛوْنَنٜىٰيَمْ مَرْيَامَ، کُوَنْطٛ اَلْمَسِيحُ نَاع سٜطَّ نغَمْ ٻٜيْدَارِ مٛوطٛنْ؞ 
کٛوْنَنٜىٰيَمْ اَنْدَرٛونِکُسْ اٜ يُونِيَ، بَنْدِرَاٻٜ اَمْ يَحُودَنْکٛعٜنْ تٛکُّٻٜ يٜىٰسُ ٻٜ طُمْ مَٻِّدِ اٜ اَمْ ندٜرْ سُودُ شُرَلْ؞ لِلَاٻٜ اٜ اَندِٻٜ بٛطُّمْ، کَدِنْ ٻٜ اَرْتِييَمْ حٛولَاکِ اَلْمَسِيحُ؞ 
اٜ مِ حٛوْنَ اَمْڤِلِيَاتُسْ حِغٛ اَمْ مٛ نغِطْمِ ندٜرْ سُمْڤٛوتِرْکِ اٜ جٛومِرَاوٛ؞ 
کٛوْنَنٜىٰيَمْ اُرْبَانُسْ، مٛ کُودٜتٜنْ ندٜرْ کُوغَلْ اَلْمَسِيحُ، اٜ حِغٛ اَمْ سِتَاکِسْ مٛ نغِطُمِ؞ 
کٛوْنَنٜىٰيَمْ اَفَالِسْ، مٛ طُمْ تَبِّتِنِ اٜ تٛکَّ اَلْمَسِيحُ اٜ غٛونغَ؞ کٛوْنَنٜىٰيَمْ اَرِسْتٛبُلُسْ اٜ اِيَالُ مَاکٛ اٜ فُو تٛکُّٻٜ يٜىٰسُ غٛنْٻٜ ندٜرْ وُرٛ مَاکٛ؞ 
کٛوْنَنٜىٰيَمْ حِرُودِيَنْ بَنْدِرَاوٛ اَمْ يَحُودَنْکٜىٰجٛ؞ کٛوْنَنٜىٰيَمْ نَرْکِسُسْ اٜ اِيَالُ مَاکٛ اٜ فُو تٛکُّٻٜ يٜىٰسُ غٛنْٻٜ ندٜرْ وُرٛ مَاکٛ؞ 
کٛوْنَنٜىٰيَمْ تِرِيفِنَ اٜ تِرِيفُسَ، رٜوْٻٜ کُوَنٛوٻٜ جٛومِرَاوٛ؞ طٛنْمَا کٛوْنَنٜىٰيَمْ فَرْسِسْ حِغٛ اَمْ مٛ نغِطُمِ کُوَنْطٛ جٛومِرَاوٛ نَاع سٜطَّ؞ 
کٛوْنَنٜىٰيَمْ رُوفُسْ کُوَنْطٛ جٛومِرَاوٛ بٛطُّمْ اٜ مَدُوجٛ مَاکٛ جٛغِيطٛيَمْ بٛ ٻِطّٛ مَاکٛ؞ 
کٛوْنَنٜىٰيَمْ اَسِنْکِرِيتُسْ، اٜ فِلِغٛونَ، اٜ حَرْمِسْ، اٜ فَتُرٛوبَسْ، اٜ حَرْمَسْ اٜ تٛکُّٻٜ يٜىٰسُ غٛنْدُٻٜ اٜ مَٻّٜ؞ 
کٛوْنَنٜىٰيَمْ فِلٛولٛغُسْ، اٜ جُولِيَ، اٜ نِرِيُسْ اٜ بَنْدِرَاوٛ مَاکٛ دٜبّٛ، اٜ اٛلِمْفَسْ، اٜ فُو يِمْٻٜ اَللَّه غٛنْدُٻٜ اٜ مَٻّٜ؞ 
کٛوْنِندِرٜىٰ کٛوْنٛلْ حِغَاکُ؞ کٛو نغَلٜ کَوْتَلْ تٛکُّٻٜ يٜىٰسُ اٜ کٛوْنَعٛنْ؞ 
بَنْدِرَاٻٜ اَمْ، اٜ مِ تٛرٛوعٛنْ، ڤَامَنٜىٰ غَدّٛوٻٜ شِيَ فَمْفَمْتِرْکِ حَکُّندٜ مٛوطٛنْ، مَجِّنٛوٻٜعٛنْ، غَݧٛوٻٜ اٜکِّتِنٛلْ نغٛلْ کٜٻْطٛنْ؞ نغٛطِّتٜىٰٻٜ؞ 
نغَمْ اِرِ ٻٜنْ طٛنْ يِمْٻٜ نَاع جٛومِرَاوٛ مٜىٰطٜنْ اَلْمَسِيحُ ٻٜ کُوَنْتَ، اَمَّا دٜىٰطِ مَٻّٜ ٻٜ کُوَنْتَ؞ اٜ بٛلِيطٜ بٜلْطٜ اٜ حَالَاجِ بٛطِّ ٻٜ مَجِّنِرْتَ يِمْٻٜ غٛودُٻٜ شِيَ فَامُ؞ 
کٛو مٛيٜ نَنِي حَبَرُ نٛ تٛکِّرْتٛنْ يٜىٰسُ، نٛنْ وَطِي مِ نَنِي بٜلْطُمْ نغَمْ مٛوطٛنْ؞ اَمَّا اٜ مِ يِطِ نغَرْتٛنْ غٛودُٻٜ فَامُ اَنْدٛنْ کٛ وٛوطِ، نغٛطِّتٛوطٛنْ وَطُکِ کٛ وٛوطَا؞ 
اَللَّه جٛومُ جَمْ نَاع کٛ نٜىٰٻِ اٛ لَلِّنَيْ بَوْطٜ شٜيْطَنْ اٛ يٛوَعٛنْ دٛوْ مَاکٛ؞ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞ 
تِمٛوتِ مٛ کُودَيْمِ اٜ حٛوْنَعٛنْ، نٛنْ مَا لُوسِيُسْ، اٜ جَاسٛنْ، اٜ سٛسِفَتَ، بَنْدِرَاٻٜ اَمْ يَحُودَنْکٛعٜنْ تٛکُّٻٜ يٜىٰسُ؞ 
مِنْ تَرْتِيُسْ تٛکُّطٛ جٛومِرَاوٛ، بَلُّطٛ بُلُسْ، مِنْ وِنْدِ طٜرٜوٛلْ نغٛعٛلْ، اٜ مِ حٛوْنَعٛنْ؞ 
غَايُسْ، جَٻِّيطٛيَمْ ندٜرْ وُرٛ مُوطُمْ، مٛ تٛکُّٻٜ يٜىٰسُ کَوْرِتَتَ ندٜرْ وُرٛ مَاکٛ، اٜ مٛ حٛوْنَعٛنْ؞ اٜرَسْتُسْ، ڤَامَنٛووٛ شٜىٰدٜ غَرِيرِ، اٜ بَنْدِرَاوٛ مٜىٰطٜنْ کَوَرْتُسْ، اٜ ٻٜ کٛوْنَعٛنْ؞ 
‏‏جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞ اَامِنْ؞‏ 
مَنْغُ تَبِّتَ تٛ اَللَّه بَاوَيْطٛ سٜمْبِطِنَعٛنْ بَرْکَ حَبَرُ بٜلْطُمْ طُمْ نغَعَجِنَيْمِ دٛوْ يٜىٰسُ اَلْمَسِيحُ؞ حَبَرُ بٜلْطُمْ طُمْ طُمْ سِرُّ شُوطَاطُمْ دَغَ دُوٻِ طُطِّ پَٻِّيطِ؞ 
اَمَّا جٛونِ طُمْ وَنْغِنَامَ اٜ نجَيْرِ، طُمْ اَنْدِنِيطُمْ لٜپِّ دُونِيَارُ فُو لَاوٛلْ دٜفْتٜ طٜ اَنَّبٛعٜنْ مبِنْدِ؞ اَللَّه تَبِيطٛ وِعِي طُمْ وَطَ نٛنْ نغَمْ لٜپِّ دُونِيَارُ فُو کٛولٛومٛ تٛکَّ کٛ اٛ وِعِ؞ 
تٜدُّنغَلْ تَبِّتَ تٛ اَللَّه حَا اَبَدَا بَرْکَ يٜىٰسُ اَلْمَسِيحُ!‏ کَنْکٛ تَنْ وٛنِ اَللَّه؞ کَنْکٛ تَنْ وٛودِ فَامُ ندٜرْ کٛو طُمٜ؞ اَامِنْ؞
