﻿رٛومَنْکٛعٜنْ.
10.
بَنْدِرَاٻٜ اَمْ، کٛ نغِطُمِ ندٜرْ ٻٜرْندٜ اَمْ اٜ کٛ تٛرٛتٛومِ اَللَّه، کَنْجُمْ وٛنِ اِسْرَاعِيلَنْکٛعٜنْ کِسَ؞ 
مِ وَاوَيْ مِ حٛکَّ شٜيْدَ دٛوْ مَٻّٜ اٜ ٻٜ نغِطِ حُوَنْکِ اَللَّه نَاع سٜطَّ، اَمَّا اٜ ٻٜ کُوَنَمٛ نَاع دٛوْ فَامُ بٛطُّمْ؞ 
ٻٜ ڤَامَايِ لَاوٛلْ نغٛلْ اَللَّه وَرْتِرْتَ يِمْٻٜ اَادِلِعٜنْ، ٻٜ ندَرْوِي لَاوٛلْ نغٛلْ ٻٜ تٛکَّتَ؞ نغَمْ نٛنْ، ٻٜ نجَٻَايِ تٛکُّکِ لَاوٛلْ نغٛلْ اَللَّه وَرْتِرْتَ يِمْٻٜ اَادِلِعٜنْ؞ 
نغَمْ اَلْمَسِيحُ وٛنِ دٜعُطٛ کُوطٜ اَتَّوْرَ، نغَمْ کٛو مٛيٜ کٛولِيطٛمٛ وَرْتَ اَادِلِيجٛ؞ 
مُوسَ وِنْدِي دٛوْ وَرْتُکِ اَادِلِيجٛ لَاوٛلْ تٛکُّکِ اَتَّوْرَ، اٛ وِعِي، ‏«‏کٛو مٛيٜ غَطٛووٛ کٛ اَتَّوْرَ وِعِ اٛ حٜٻَيْ جٛنْدٜ ندٜ غٛونغَ؞»‏ 
اَمَّا طُعُمْ وٛنِ کٛ وٛلْدٜ اَللَّه وِعِ دٛوْ وَرْتُکِ اَادِلِيجٛ بَرْکَ حٛولَاکِ اَلْمَسِيحُ، ‏«‏تَاع وِعُ ندٜرْ ٻٜرْندٜ مَاطَ، ‏‹‏مٛيٜ يَحَتَ تٛنْ دٛوْ؟›‏ »‏ ﴿وَاتٛ نغَمْ وَدّٛيَ اَلْمَسِيحُ ندٜرْ دُونِيَارُ﴾، 
کٛو، ‏«‏مٛيٜ يَحَتَ لَاحِرَ تٛ نغَيْکَ کَلُّکَ لُغُّکَ؟»‏ ﴿وَاتٛ نغَمْ اُمِّنٛيَ اَلْمَسِيحُ دَغَ ندٜرْ مَيْٻٜ﴾؞ 
رَا کٛ اَايَارٜ وِعِ، ‏«‏وٛلْدٜ اَللَّه اٜ حَادٜ مَاطَ اٜ ندٜ دٛوْ طٜمْنغَلْ مَاطَ اٜ ٻٜرْندٜ مَاطَ،»‏ وَاتٛ وَعَجُ حٛولَاکِ اَللَّه طُمْ مِنْ نغَعَجِنْتَ؞ 
نغَمْ تَا وِعِي اٜ حٛنْدُکٛ مَاطَ، ‏«‏يٜىٰسُ اٛ جٛومِرَاوٛ،»‏ ندٜنْ تَا حٛولَکٜ ندٜرْ ٻٜرْندٜ مَاطَ وِيکِ اَللَّه اُمِّنِيمٛ دَغَ مَيْدٜ، اَ حِسَيْ؞ 
نغَمْ ندٜرْ ٻٜرْندٜ نٜطّٛ حٛولٛتٛو اَلْمَسِيحُ ندٜنْ اَللَّه وَرْتِرَمٛ اَادِلِيجٛ، ندٜنْ اٜ حٛنْدُکٛ نٜطّٛ وِعَتَ اٜ نجَيْرِ يٜىٰسُ وٛنِ جٛومِرَاوٛ حِسَ؞ 
وٛنْدٜ اَايَارٜ وِعِي، ‏«‏کٛو مٛيٜ کٛولِيطٛمٛ سٜمْتِنْتَاکٜ؞»‏ 
نغَمْ وَلَا فٜىٰرٛوتِرٛلْ حَکُّندٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، جٛومِرَاوٛ کَنْکٛ وٛنِ جٛومِرَاوٛ کٛو مٛيٜ، اٜ مٛ بَرْکِطِنَ کٛو مٛيٜ تٛرٛتٛوطٛمٛ نَاع سٜطَّ؞ 
نٛ اَايَارٜ وِعِ، ‏«‏کٛو مٛيٜ تٛرِيطٛ جٛومِرَاوٛ حِسْنَمٛ، جٛومِرَاوٛ حِسْنَيْمٛ؞»‏ 
اَمَّا نٛ طُمْ وَطَتَ يِمْٻٜ تٛرٛو مٛ ٻٜ کٛولَاکِ؟ ندٜنْ نٛ وَطَتَ ٻٜ کٛولٛومٛ تٛ ٻٜ مٜىٰطَايِ نَنْکِ حَبَرُ مَاکٛ؟ ندٜنْ نٛ وَطَتَ ٻٜ نَنَ حَبَرُ مَاکٛ تٛ نَاع غٛطّٛ وَعَجِنَنِٻٜ؟ 
ندٜنْ نٛ يِمْٻٜ نغَعَجِنِرْتَ تٛ ٻٜ لِلَاکَ؟ نٛنْ نٛ طُمْ وِنْدِرَا، ‏«‏طُمْ فِي بٛطُّمْ يٛتَّاکِ ٻٜنْ طٛنْ غَدُّٻٜ حَبَرُ بٜلْطُمْ؞»‏ 
اَمَّا نَاع فُو اِسْرَاعِيلَنْکٛعٜنْ نجَٻِ حَبَرُ بٜلْطُمْ؛ نغَمْ اِشَايَ وِعِ، ‏«‏جٛومِرَاوٛ، مٛيٜ جَٻِ حَالَ مٜىٰطٜنْ؟»‏ 
نغَمْ نٛنْ، حٛولَاکِ اَللَّه اٜ حٜٻٜىٰ لَاوٛلْ نَنْکِ حَبَرُ اَلْمَسِيحُ، ندٜنْ حَبَرُ اَلْمَسِيحُ اٜ نَنٜىٰ لَاوٛلْ وَعَجِنْکِ دٛوْ مَاکٛ؞ 
اَمَّا، اٜ مِ پَمَ، طُمْ غٛونغَ ٻٜ نَنَايِ حَبَرُ طُمْ؟ غٛونغَ ٻٜ نَنِيطُمْ، نغَمْ اَايَارٜ وِعِي، ‏«‏حَبَرُ اَللَّه يَحِي کٛو تٛيٜ ندٜرْ دُونِيَارُ، بٛلِيطٜ مَٻّٜ نَتِّي کٛو تٛيٜ ندٜرْ دُونِيَارُ؞»‏ 
طٛنْمَا اٜ مِ پَمَ، يِمْٻٜ اِسْرَاعِيلَ ڤَامَايِ؟ اَرَنْدٜ مُوسَ وِعِي کٛ اَللَّه وِعِ يِمْٻٜ اِسْرَاعِيلَ، ‏«‏مِ وَطَيْ نغَطٛنْ لَوْلِيرُ يِمْٻٜ ٻٜ کٛشُّطٛنْ نَاع ٻٜ غٛطُّمْ؞ لَاوٛلْ يِمْٻٜ ٻٜ اَنْدَا غٛطُّمْ، مِ وَطَيْعٛنْ مٛنّٛنْ؞»‏ 
ندٜنْ اِشَايَ مٜتِي اٜ سٜمْبٜ ٻٜرْندٜ وِعِي اَللَّه وِعِي، ‏«‏ٻٜنْ طٛنْ ٻٜ طَٻِّتَتَايَمْ ٻٜ کٜٻِييَمْ؛ مِ وَنْغِنِي حٛورٜ اَمْ تٛ يِمْٻٜ ٻٜ پَمَايِ نٛ ٻٜ کٜٻِرْتَيَمْ؞»‏ 
اَمَّا دٛوْ اِسْرَاعِيلَ اٛ وِعِ اَللَّه وِعِ، ‏«‏کٛ نٜىٰٻِ اٜ مِ طَٻِّتَ سِرْيٛوتِرْکِ اٜ يِمْٻٜ ٻٜ نغَطَتَا کٛ مبِعَيْمِ، ٻٜ ٻٜرْطٜ شَاتُطٜ؞»‏ 
