﻿کُوطٜ لِلَاٻٜ.
25.
بَلْطٜ تَتِ غَطَ فٜسْتُسْ وَرِي ندٜرْ لٜيْدِ ندِنْ نغَمْ فُطُّکِ کُوغَلْ لَامُ مُوطُمْ، اٛ اُمِّي دَغَ کَيْسَارِيَ، اٛ يَحِ اُرُشَلِيمَ؞ 
تٛنْ مَوْٻٜ اَرْدِيٻٜ دِينَ اٜ اَرْدِيٻٜ يَحُودَنْکٛعٜنْ نغُلِّي بُلُسْ تٛ مَاکٛ؞ ٻٜ تٛرِيمٛ 
اٛ وَدَّنَٻٜ بُلُسْ اُرُشَلِيمَ، نغَمْ ٻٜ نغَطِي دَبَرٜ نٛ ٻٜ مبَرْدَتَمٛ دٛوْ لَاوٛلْ؞ 
فٜسْتُسْ وِعِٻٜ، ‏«‏بُلُسْ اٜ تٛنْ مَٻِّي ندٜرْ سُودُ شُرَلْ غَرِيرِ کَيْسَارِيَ؞ مِنْ اٜ حٛورٜ اَمْ مِ سٛعّٛتٛ تٛنْ نَاع کٛ نٜىٰٻِ؞ 
نغَمْ مَاجُمْ، سٜيْ مَوْٻٜ مٛوطٛنْ نجَادَ اٜ اَمْ کَيْسَارِيَ، ٻٜ نغُلّٛومٛ تٛنْ تٛ اٜ وٛودِ غٛطُّمْ کَلُّطُمْ طُمْ اٛ وَطِ؞»‏ 
فٜسْتُسْ جٛوطِي تٛ مَٻّٜ کٛ ٻَدِي بَلْطٜ جٛوٜىٰتَتِ کٛو سَڤّٛ؞ غَطَ مَاجُمْ اٛ سٛعِّي غَرِيرِ کَيْسَارِيَ؞ ندٜ وٜىٰتِ، اٛ جٛوطِي دٛوْ جٛوطٛرْغَلْ کِيتَ، اٛ وِعِ بُلُسْ وَدّٜىٰ؞ 
ندٜ بُلُسْ وَرِ، يَحُودَنْکٛعٜنْ پِوٛيْٻٜ اُرُشَلِيمَ ڤِلِيمٛ، ٻٜ نغُلّٛرِيمٛ غُلَّالِ طُطِّ کَلُّطِ، طِ ٻٜ مبَاوَايِ تَبِّتِنْکِ؞ 
اَمَّا بُلُسْ وِعِٻٜ، ‏«‏مِ وَطَايِ کٛ اَتَّوْرَ حَطِ، کٛو کٛ حَانَا دٛوْ وُرٛ شٜنِينغٛ، کٛو بٛو دٛوْ کَيْسَرْ لَامِيطٛ رٛومَنْکٛعٜنْ مَوْطٛ؞»‏ 
اَمَّا فٜسْتُسْ اٜ يِطِ وٜلْنَنْکِ يَحُودَنْکٛعٜنْ ٻٜرْندٜ، نغَمْ نٛنْ اٛ پَمِ بُلُسْ، اٛ وِعِ، ‏«‏اَ جَٻَيْ نجَحَا اُرُشَلِيمَ نغَمْ مِ وَطَنْمَا کِيتَ تٛنْ دٛوْ کٛ طُمْ وُلّٛرْتٛمَا؟»‏ 
بُلُسْ نٛوتِي، وِعِ، ‏«‏جٛونِ اٜ مِ دَرِي يٜىٰسٛ جٛوطٛرْغَلْ کِيتَ لٜيْ لَامُ کَيْسَرْ لَامِيطٛ رٛومَنْکٛعٜنْ مَوْطٛ تٛ حَانِ مِ وَطَنٜىٰ کِيتَ؞ مِ وَطَنَايِ يَحُودَنْکٛعٜنْ غٛطُّمْ کٛ وٛوطَا؞ اَنْ اٜ حٛورٜ مَاطَ اَ اَنْدِ؞ 
تٛ مِ وَطِي غٛطُّمْ کٛ حٜوْتِ مِ وَرٜىٰ، مِ سَلَتَاکٛ وَرٜىٰکِ؞ اَمَّا تٛ کٛ ٻٜ نغُلّٛرِييَمْ نَاع طُمْ غٛونغَ، وَلَا بَاوَيْطٛ وَطُکِيَمْ اٜ جُوطٜ مَٻّٜ؞ اٜ مِ يِطِ مِ وَطَنٜىٰ کِيتَ يٜىٰسٛ کَيْسَرْ!‏»‏ 
غَطَ فٜسْتُسْ مٜدِّي اٜ کٛکّٛوٻٜمٛ شَاوٛرِ، اٛ وِعِ بُلُسْ، ‏«‏ندٜ اَ تٛرَکٜ کِيتَ مَاطَ يَارٜىٰ تٛ کَيْسَرْ، طُمْ يَارٜتٜ تٛ مَاکٛ!‏»‏ 
بَلْطٜ سٜطَّ غَطَ مَاجُمْ، غٛطّٛ لَامِيطٛ بِعٜتٜىٰطٛ اَغَرِفَ اٜ مَوْنِرَاوٛ مَاکٛ دٜبّٛ بِعٜتٜىٰطٛ بَنِسْ ٻٜ نغَرِ غَرِيرِ کَيْسَارِيَ نغَمْ ٻٜ نجَٻّٛو فٜسْتُسْ؞ 
ندٜ ٻٜ مبَالِ تٛنْ بَلْطٜ سٜطَّ، فٜسْتُسْ حٛکِّ لَامِيطٛ اٛنْ حَبَرُ بُلُسْ، اٛ وِعِ، ‏«‏اٜ وٛودِ غٛطّٛ نٜطّٛ مٛ فٜلِسْ لَامِيطٛ اَلِ طٛعٛ ندٜرْ سُودُ شُرَلْ؞ 
کٛ نجَامِ اُرُشَلِيمَ، مَوْٻٜ اَرْدِيٻٜ دِينَ اٜ مَوْٻٜ يَحُودَنْکٛعٜنْ نغُلِّيمٛ تٛ اَمْ، ٻٜ تٛرِييَمْ مِ تَپَنَمٛ کِيتَ وَرٜىٰکِ؞ 
نٛوتِيمِ، مبِيمِٻٜ، اٜنٜنْ رٛومَنْکٛعٜنْ اٜنْ نغَطَنْتَا غٛطّٛ کِيتَ تٛ غُلِّيطٛمٛ وَلَا طٛنْ، ندٜنْ نَاع اٛ حٛکَّامَ شَرٜلْ نغَمْ اٛ وُرْتِنَ حٛورٜ مَاکٛ دٛوْ کٛ طُمْ وُلّٛرِيمٛ؞ 
تٛو، ندٜ نغَرْدُمِ اٜ مَٻّٜ طٛعٛ، مِ وٛنَّايِ شَرٜلْ کٛو سٜطَّ؞ ندٜ فِنِ نجٛوطِيمِ دٛوْ جٛوطٛرْغَلْ کِيتَ، مبِيمِ نٜطّٛ اٛنْ وَدّٜىٰ؞ 
ندٜ غُلِّيٻٜمٛ ندَرِي، ٻٜ نغُلّٛرَاکِمٛ غٛطُّمْ کَلُّطُمْ نٛ کَمِّنٛومِ؞ 
سٜيْ غٜدِّ تَنْ ٻٜ نغَادِ اٜ مَاکٛ دٛوْ بٛلِيطٜ دِينَ مَٻّٜ، اٜ غٛطّٛ مَيْطٛ بِعٜتٜىٰطٛ يٜىٰسُ، مٛ بُلُسْ وِعَتَ اٜ فٛوفَ؞ 
مِنْ بٛو، ندٜ مِ اَنْدَا نٛ نغَطَنَيْمِ حَالَ کَنْ، پَمُمٛومِ تٛ اٛ جَٻِي اٛ يَحَ اُرُشَلِيمَ اٛ وَطَنٜىٰ کِيتَ تٛنْ دٛوْ کٛ طُمْ وُلّٛرْتٛومٛ؞ 
اَمَّا ندٜ اٛ تٛرِييَمْ اٛ اَلٜىٰ ندٜرْ جُوطٜ سٛوجِعٜنْ نَا کَيْسَرْ وَطَنِيمٛ کِيتَ، مبِيمِ اٛ سُرٜىٰ تٛنْ نَا شَرٜلْ نغٜلْ لِلْدَيْمٛومِ تٛ کَيْسَرْ؞»‏ 
ندٜنْ اَغَرِفَ وِعِ فٜسْتُسْ، ‏«‏مِنْ اٜ حٛورٜ اَمْ، اٜ مِ يِطِ نَنْکِ کٛ نٜطّٛ اٛعٛ وِعَتَ؞»‏ فٜسْتُسْ وِعِمٛ، ‏«‏اَ نَنَيْ کٛ اٛ وِعَتَ جَانغٛ؞»‏ 
ندٜ فِنِ اَغَرِفَ اٜ بَنِسْ نغَرِ ندٜرْ لَامُ مَوْطُمْ، ٻٜ نَتِّ ندٜرْ سُودُ کِيتَ، کَمْٻٜ اٜ مَوْٻٜ سٛوجِعٜنْ اٜ اَرْدِيٻٜ غَرِيرِ ندِنْ فُو؞ ندٜنْ فٜسْتُسْ وِعِ بُلُسْ وَدّٜىٰ، سٜيْ اٛ وَدَّا؞ 
فٜسْتُسْ وِعِ، ‏«‏اَنْ اَغَرِفَ لَامِيطٛ اٜ يِمْٻٜ حَوْرُتُٻٜ طٛعٛ!‏ اٛنْ نغِعِي نٜطّٛ مٛ يَحُودَنْکٛعٜنْ فُو نغُلِّي تٛ اَمْ ندٜرْ اُرُشَلِيمَ حَا اٜ طٛعٛ، اٜ ٻٜ مبِعَ اٜ سٜمْبٜ اٛ حَانَا اَلْدٜىٰکِ اٜ يٛنْکِ؞ 
اَمَّا مِ تَوِي اٛ وَطَايِ غٛطُّمْ کٛ حَانِ اٛ وَرٜىٰ؞ اَمَّا ندٜ کَنْکٛ اٜ حٛورٜ مَاکٛ اٛ تٛرَکٜ کِيتَ مَاکٛ يَارٜىٰ تٛ کَيْسَرْ، مِ سُٻِي لِلْدُکِمٛ تٛ کَيْسَرْ لَامِيطٛ؞ 
اَمَّا مِ وَلَا حَالَ ندَرِيکَ دٛوْ مَاکٛ کٛ حَانِ مِ وِنْدَنَ لَامِيطٛ اٛنْ؞ کَنْجُمْ وَطِ نغَدُّمٛومِ طٛعٛ يٜىٰسٛ مٛوطٛنْ اٛنْ فُو، کٛ ٻُرِ مَا يٜىٰسٛ مَاطَ اَنْ، اَغَرِفَ لَامِيطٛ، نغَمْ تٛ اٜنْ طَٻِّتِي کٛو طُمٜ مِ حٜٻَ کٛ مبِنْدُمِ؞ 
نغَمْ اٜ يِيکِ اَمْ، طُمْ لَاٻَنَايَمْ مِ يَارَ نَنْغَاطٛ تٛ لَامِيطٛ مَوْطٛ، مِ حٜٻَايِ فِي جَمُمْ طُمْ اٛ نَنْغِرَا؞»‏ 
