﻿کُوطٜ لِلَاٻٜ.
21.
ندٜ مِنْ شٜنْدِرِ اٜ مَٻّٜ، مِنْ نَتِّ کٛمِوَلْ، مِنْ نجَحِ لٜيْدِ کٛسْ؞ ندٜ وٜىٰتِ، مِنْ نجَحِ لٜيْدِ رٛودٛسْ، دَغَ تٛنْ مِنْ نجَحِ غَرِيرِ فَاتِرَ؞ 
طٛنْ مِنْ تَوِ کٛمِوَلْ جَحَيْنغَلْ لٜيْدِ فِنِيکِيَ، سٜيْ مِنْ نَتِّنغَلْ، مِنْ ندِلِّ؞ 
مِنْ کَيْنِي لٜيْدِ نغٛنْدِ شَکَ ندِيَمْ بِعٜتٜىٰندِ سَيِيفُرُسْ مِنْ تٛکِّ فٛمْبِنَ مَيْرِ، مِنْ اُمَّنِي لٜيْدِ سِيرِيَ؞ مِنْ نجٛتِّ غَرِيرِ تَايَ، تٛنْ تٛ طُمْ جِڤِّنَنْتَ کٛمِوَلْ اَمِنْ دٛݝْلٜ؞ 
مِنْ تَوِ تٛکُّٻٜ يٜىٰسُ تٛنْ، مِنْ نجٛوطٛدِي اٜ مَٻّٜ بَلْطٜ جٛوٜىٰطِطِ؞ ندٜرْ بَوْطٜ رُوحُ اَللَّه ٻٜ مبِعِ بُلُسْ تٛع اٛ يَحَ اُرُشَلِيمَ؞ 
اَمَّا ندٜ يٛنْتٛورٜ ندٜنْ حٜىٰݧِ، مِنْ شٛعِّي تٛ کٛمِوَلْ؞ ٻٜ فُو ٻٜ طٛفْتِمِنْ، کَمْٻٜ اٜ رٜوْٻٜ مَٻّٜ اٜ ٻِکّٛيْ مَٻّٜ، حَا مِنْ مبُرْتِي غَرِيرِ؞ مِنْ ندِشِّي دَاندٜ مَايٛ، مِنْ نغَطِ دٛعَارٜ؞ 
ندٜ مِنْ شٜنْدِرِ، مِنٛنْ مِنْ نَتِّ کٛمِوَلْ، کَمْٻٜ بٛو ٻٜ شٛعِّي غُرٜ مَٻّٜ؞ 
مِنْ اَلِ غَرِيرِ تَايَ مِنْ دِلِّ ندٜرْ کٛمِوَلْ نغَلْ، مِنْ نجٛتِّ غَرِيرِ تٛلٜمَيِسْ؞ مِنْ تَوِ تٛکُّٻٜ يٜىٰسُ تٛنْ، مِنْ مبَالِ تٛ مَٻّٜ وَلْندٜ وٛعٛيْرٜ؞ 
ندٜ فِنِ مِنْ اَلِ طٛنْ، مِنْ نجَحِ غَرِيرِ کَيْسَارِيَ؞ مِنْ نَتِّ وُرٛ فِلِبُسْ غَعَجِنٛووٛ حَبَرُ بٜلْطُمْ، مِنْ نجِڤِّي تٛ مَاکٛ؞ کَنْکٛ اٛ غٛعٛتٛ ندٜرْ ٻٜنْ طٛنْ نجٛوٜىٰطِطٛ ٻٜ طُمْ سُٻِ نغَمْ کُوَنَ تٛکُّٻٜ يٜىٰسُ؞ 
اٜ مٛ وٛودِ ٻِٻّٜ رٜوْٻٜ نَيٛ ٻٜ تٜعَاکَ، غَطٛوٻٜ اَنَّبَاکُ؞ 
غَطَ مِنْ نجٛوطَکٜ طٛنْ بَلْطٜ سٜطَّ، غٛطّٛ اَنَّبِيجٛ بِعٜتٜىٰطٛ اَغَبُسْ وَرِ دَغَ لٜيْدِ يَحُودِيَ وَرِ تٛ اَمِنْ؞ 
اٛ حٛشِّ تَادٛرْدٜ بُلُسْ، اٛ حَٻِّ جُوطٜ مَاکٛ اٜ کٛيْطٜ مَاکٛ، اٛ وِعِ، ‏«‏رُوحُ اَللَّه وِعِي نِحِ يَحُودَنْکٛعٜنْ وٛنْٻٜ اُرُشَلِيمَ کَٻِّرْتَ جٛومُ تَادٛرْدٜ ندٜعٜ، ٻٜ نغَطَمٛ ندٜرْ جُوطٜ يِمْٻٜ نَاع يَحُودَنْکٛعٜنْ؞»‏ 
ندٜ مِنْ نَنِ کٛ اٛ وِعِ، مِنٛنْ اٜ وٛنْٻٜ طٛنْ فُو، مِنْ تٛرِي بُلُسْ تٛع يَحَ اُرُشَلِيمَ؞ 
بُلُسْ نٛوتِي، وِعِمِنْ، ‏«‏اَلٜىٰ بٛجِّ، تٛع اٛنْ نغٜوَنَمْ ٻٜرْندٜ!‏ اٜ مِ سِرْيِي نَاع مِ حَٻّٜىٰ تَنْ، اَمَّا حَا مِ مَايَ تٛنْ اُرُشَلِيمَ نغَمْ اِنْدٜ يٜىٰسُ جٛومِرَاوٛ؞»‏ 
ندٜ مِنْ اَنْدِتِ مِنْ مبَاوَتَا وَيْلُتُکِ ݧُمٛ مَاکٛ، مِنْ ندٜعِّتِ، مِنْ مبِعِ، ‏«‏جٛومِرَاوٛ وَطَ نٛ يِطِ!‏»‏ 
غَطَ مِنْ نغَطِي بَلْطٜ سٜطَّ تٛنْ، مِنْ شِرْيِي يَاکِ اُرُشَلِيمَ؞ 
وٛٻّٜ ندٜرْ تٛکُّٻٜ يٜىٰسُ دَغَ کَيْسَارِيَ طٛفْتِمِنْ، ٻٜ نجَارِمِنْ وُرٛ غٛطّٛ نٜطّٛ بِعٜتٜىٰطٛ مَنَاسٛنْ پِوٛيْطٛ سَيِيفُرُسْ؞ کَنْکٛ اٛ غٛعٛتٛ ندٜرْ تٛکُّٻٜ يٜىٰسُ اَرَنْدٜعٜنْ مٛ مِنْ نجِڤّٛتٛ تٛ وُرٛ مُوطُمْ؞ 
ندٜ مِنْ نجٛتِّي اُرُشَلِيمَ، تٛکُّٻٜ يٜىٰسُ نجَٻِّمِنْ ندٜرْ وٜلْوٜلٛ؞ 
ندٜ وٜىٰتِ مِنْ نجَادِ اٜ بُلُسْ تٛ يَاکُبُ؞ مَوْٻٜ کَوْتَلْ تٛکُّٻٜ يٜىٰسُ فُو اٜ طٛنْ؞ 
غَطَ بُلُسْ حٛوْنِيٻٜ، اٛ وِعِٻٜ کٛو طُمٜ کٛ اَللَّه حُوِ دَغَ جُوطٜ مَاکٛ ندٜرْ يِمْٻٜ نَاع يَحُودَنْکٛعٜنْ؞ 
ندٜ ٻٜ نَنِ کٛ اٛ وِعِ، ٻٜ نغٜتِّ اَللَّه؞ ٻٜ مبِعِ بُلُسْ، ‏«‏اَنْ بَنْدِرَاوٛ اَمِنْ، اَ يِعِي نٛ يَحُودَنْکٛعٜنْ تٛکُّٻٜ يٜىٰسُ طُوطِرِ، ٻٜ فُو اٜ ٻٜ تِينِ تٛکُّکِ اَتَّوْرَ؞ 
ٻٜ نَنِي اَ اٜکِّتِنَ يَحُودَنْکٛعٜنْ وٛنْٻٜ ندٜرْ غٛطِّ لٜپِّ اَلَ تٛکُّکِ اَتَّوْرَ، اَ وِعَ تٛع ٻٜ نَادَ ٻِکّٛيْ مَٻّٜ، تٛع ٻٜ تٛکَّ ندٛنُ يَحُودَنْکٛعٜنْ؞ 
نٛيٜ نغَطٜتٜنْ؟ نغَمْ اٜ مِنْ اَنْدِ ٻٜ نَنَيْ اَ وَرِي طٛعٛ؞ 
جٛونِ وَطُ کٛ مِنْ مبِعَتَمَ؞ طٛعٛ اٜ وٛودِ وٛرْٻٜ نَيٛ غَطَنْٻٜ اَللَّه اَلْکَوَلْ؞ 
يَادُ اٜ مَٻّٜ، نغَطٛنْ کٛ دِينَ يَحُودَنْکٛعٜنْ وِعِ نغَطٜنْ نغَمْ نغَرْتٛنْ لَاٻُٻٜ يٜىٰسٛ جٛومِرَاوٛ؞ ندٜنْ کٛکَّا کٛ حَانِ ٻٜ کٛکَّ نغَمْ ٻٜ ڤٜمْبٜىٰ؞ نٛنْ حٛلَّيْ يِمْٻٜ کٛ نَنَتَ فُو دٛوْ مَاطَ نَاع طُمْ غٛونغَ؞ ٻٜ اَنْدَيْ کَدِمَا اَنْ اٜ حٛورٜ مَاطَ، اَ تٛکِّ اَتَّوْرَ؞ 
اَمَّا کٛولِيٻٜ يٜىٰسُ پِوٛيْٻٜ غٛطِّ لٜپِّ، مِنْ مبِنْدَنِيٻٜ تٛع ٻٜ ݧَامَ کٛ حِرْسَنَا غُنْکِيجِ اٜ کٛ سَاطِ اٜ کٛ مٛيْلَنَا دَاندٜ، کٛو پِيپَمْ، ندٜنْ تٛع ٻٜ نغَطَ نجٜىٰنُ؞»‏ 
سٜيْ بُلُسْ حٛشِّ وٛرْٻٜ نَيٛ ٻٜنْ يَادِ اٜ مَٻّٜ؞ ندٜ فِنِ ٻٜ نغَطِ کٛ دِينَ يَحُودَنْکٛعٜنْ وِعِ ٻٜ نغَطَ نغَمْ وَرْتُکِ لَاٻُٻٜ؞ سٜيْ اٛ نَتِّ وُرٛ شٜنِينغٛ، اٛ وِعِ اَرْدِيٻٜ دِينَ ݧَلْندٜ ندٜ بَلْطٜ لَاٻِنْکِ مَٻّٜ کٜىٰݧَتَ، ݧَلْندٜ ندٜ طُمْ حِرْسَتَ شَکِّرِ نغَمْ کٛو مٛيٜ مَٻّٜ؞ 
ندٜ بَلْطٜ جٛوٜىٰطِطِ طٜنْ ٻَدِي حٜىٰوُکِ، وٛٻّٜ يَحُودَنْکٛعٜنْ پِوٛيْٻٜ لٜيْدِ اَاسِيَ نغِعِ بُلُسْ ندٜرْ وُرٛ شٜنِينغٛ؞ سٜيْ ٻٜ اُمِّنِ حَکِّيلٛ حَوْرُتُٻٜ طٛنْ فُو، ٻٜ نَنْغِمٛ؞ 
ٻٜ نغُلِّ ٻٜ مبِعِ، ‏«‏اِسْرَاعِيلَنْکٛعٜنْ، مبَلّٜىٰمِنْ!‏ رَا نٜطّٛ جَحٛووٛ کٛو تٛيٜ اٜ اٜکِّتِنَ يِمْٻٜ اٜ وِعَ لٜݧٛلْ مٜىٰطٜنْ اٜ اَتَّوْرَ مٜىٰطٜنْ اٜ وُرٛ شٜنِينغٛ نغٛعٛ وَلَا کٛ نَفِ؞ جٛونِ مَا اٛ وٛنِّي وِغٜىٰرٜ شٜنِيندٜ نغَمْ اٛ وَدِّي يِمْٻٜ نَاع يَحُودَنْکٛعٜنْ ندٜرْ وُرٛ شٜنِينغٛ!‏»‏ 
ٻٜ مبِعُ نٛنْ نغَمْ ٻٜ نغِيدِينٛ بُلُسْ اٜ تُرٛوفِمُسْ نٜطّٛ اَافِسَ ندٜرْ غَرِيرِ ندِنْ؞ اٜ ٻٜ کَمِّي بُلُسْ نَتِّنِيمٛ ندٜرْ وُرٛ شٜنِينغٛ؞ 
حَکِّيلٛ يِمْٻٜ غَرِيرِ ندِنْ فُو اُمِّي؞ يِمْٻٜ اٜ مبُرْتٛيٛو کٛو تٛيٜ اٜ ندٛغّٛيَ اٜ نغَرَ؞ ٻٜ نَنْغِ بُلُسْ ٻٜ ندَسِمٛ ٻٜ مبُرْتِنِمٛ وُرٛ شٜنِينغٛ؞ طٛنْ اٜ طٛنْ دَمُّطٜ مَاغٛ فُو مَٻَّا؞ 
اٜ ٻٜ شِرْيٛ ٻٜ مبَرَ بُلُسْ، سٜيْ مَوْطٛ سٛوجِعٜنْ رٛومَ نَنِ حَبَرُ حَکِّيلٛ يِمْٻٜ اُرُشَلِيمَ فُو اُمَّکٜ؞ 
طٛنْ اٜ طٛنْ، اٛ حٛشِّ سٛوجِعٜنْ اٜ مَوْٻٜ مَٻّٜ، اٛ اُمَّنِي کَوْرُتُٻٜ ٻٜنْ؞ ندٜ يِمْٻٜ ٻٜنْ نغِيدِمٛ اٜ سٛوجِعٜنْ، طٛنْ اٜ طٛنْ ٻٜ اَلِ فِيکِ بُلُسْ؞ 
مَوْطٛ اٛنْ ٻَتِّي بُلُسْ وِعِ اٛ نَنْغٜىٰ اٛ حَٻِّرٜىٰ ٻٛغِّ نجَمْندِ طِطِ؞ ندٜنْ اٛ پَمِ بُلُسْ کَنْکٛ اٛ مٛيٜ، طُمٜ اٛ وَطِ؟ 
يِمْٻٜ ٻٜنْ بٛو اٜ نغُلَّ؞ کٛو مٛيٜ اٜ کَ وِعَتَ حَا اٛ دُلِّ غٛونغَ حَالَ کَنْ؞ سٜيْ اٛ وِعِ بُلُسْ يَارٜىٰ وُرٛ سٛوجِعٜنْ؞ 
ندٜ ٻٜ نجٛتِّي پٜنْتِرْطُمْ وُرٛ نغٛنْ، سٛوجِعٜنْ پٜفْتِمٛ دٛوْ نغَمْ يِمْٻٜ ٻٜنْ طُوطِي؞ 
يِمْٻٜ طُطْٻٜ ٻٜنْ اٜ تٛکِّمٛ اٜ ٻٜ نغُلَّ اٜ ٻٜ مبِعَ، ‏«‏مبَرٜىٰمٛ!‏»‏ 
ندٜ ٻٜ نغَرِ نَتِّنْکِمٛ وُرٛ سٛوجِعٜنْ ٻٜنْ، بُلُسْ وِعِ مَوْطٛ اٛنْ، ‏«‏کٛو اَ جَٻَيْ مِ مٜدَّ اٜ مَاطَ؟»‏ مَوْطٛ سٛوجِعٜنْ اٛنْ وِعِ بُلُسْ ‏«‏اَشٜىٰ، اَ وَاوِ حٜلٜنَنْکٛورٜ؟ 
نَاع اَنْ وٛنِ مَسَرَنْکٜىٰجٛ اُمِّنْطٛ حَوْرٜ کٛ نٜىٰٻَايِ، حَا حَوْرِتِ يِمْٻٜ کَلُّٻٜ ندٜرْ لَدّٜ کٜوْتُٻٜ 4,000؟»‏ 
بُلُسْ وِعِ، ‏«‏مِنْ مِ يَحُودَنْکٜىٰجٛ دَݧَاطٛ ندٜرْ غَرِيرِ مَوْندِ بِعٜتٜىٰندِ تَرْسُسْ ندٜرْ لٜيْدِ کِلِيکِيَ؞ اٜ مِ تٛرٛمَا اَلَايَمْ مِ مٜدَّ اٜ يِمْٻٜ؞»‏ 
سٜيْ مَوْطٛ سٛوجِعٜنْ اٛنْ جَٻِ اٛ مٜدَّ اٜ مَٻّٜ؞ سٜيْ بُلُسْ دَرِي دٛوْ پٜنْتِرْطُمْ سُودُ، اٛ پٜفْتَنِ يِمْٻٜ ٻٜنْ جُنْغٛ نغَمْ ٻٜ ندٜعِّتَ؞ ندٜ ٻٜ ندٜعِّتِ، اٛ مٜتِرَنِٻٜ طٜمْنغَلْ اِبْرَانِيَنْکٛورٜ، اٛ وِعِ، 
