﻿کُوطٜ لِلَاٻٜ.
18.
غَطَ مَاجُمْ، بُلُسْ اَلِ اَتِنَ، يَحِ کٛرِنْتِ؞ 
تٛنْ اٛ تَوِ غٛطّٛ يَحُودَنْکٜىٰجٛ بِعٜتٜىٰطٛ اَکِيلَ، کَنْکٛ اٜ دٜبّٛ مَاکٛ بِعٜتٜىٰطٛ بِرِسْکِلَ، پِوٛيْٻٜ لٜيْدِ فَنْتُسْ؞ ٻٜ نٜىٰٻَايِ کٛ ٻٜ پِوٛيِ لٜيْدِ اِتَالِيَ، نغَمْ کَلَوْدِيُسْ، مَوْطٛ لَامِيٻٜ لٜيْطٜ رٛومَ، وِعِ يَحُودَنْکٛعٜنْ فُو مبُرْتٛو غَرِيرِ رٛومَ؞ بُلُسْ يَحِ تٛ مَٻّٜ؞ 
اٛ جٛوطِي تٛ مَٻّٜ، اٜ مٛ حُودَ اٜ مَٻّٜ نغَمْ کَنْکٛ اٛ ݧٛوتٛووٛ شُدَّحٛ لُکُرُوجِ بٛنٛ مَٻّٜ؞ 
کٛو ندٜيٜ ݧَلْندٜ سِوْتَارٜ، بُلُسْ اٜ يٜدّٛوتِرَ اٜ يِمْٻٜ ندٜرْ سُودُ دٛعَارٜ، اٜ مٛ فٛوطَ حَکِّيلٛ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ نغَمْ ٻٜ تٛکَّ يٜىٰسُ؞ 
ندٜ سِيلَ اٜ تِمٛوتِ پِوٛيِ لٜيْدِ مَکِدٛونِيَ نجٛتِّي غَرِيرِ کٛرِنْتِ، بُلُسْ حٛشِّ شَرٜلْ مُوطُمْ فُو نغَمْ وَعَجِنْکِ اٜ تَبِّتِنَنْکِ يَحُودَنْکٛعٜنْ يٜىٰسُ وٛنِ اَلْمَسِيحُ؞ 
اَمَّا ندٜ ٻٜ نغٜدِّمٛ، ٻٜ کُطِمٛ؞ سٜيْ اٛ فِطِّ سٛلَّارٜ کٛلْتٜ مَاکٛ، اٛ وِعِٻٜ، ‏«‏مِ وُرْتَکٜ حَکّٜ مٛوطٛنْ!‏ پِيپَمْ مٛوطٛنْ اٜ دٛوْ کٛعٜ مٛوطٛنْ؞ دَغَ حَنْدٜ، تٛ يِمْٻٜ نَاع يَحُودَنْکٛعٜنْ نجَحَيْمِ؞»‏ 
اٛ وُرْتِي اٛ اَلِ سُودُ دٛعَارٜ ندُنْ، اٛ يَحِ وُرٛ غٛطّٛ مَوْنِنٛووٛ اَللَّه، بِعٜتٜىٰطٛ تِيتِيُسْ جُسْتُسْ، مٛ وُرٛ مُوطُمْ وٛنِ حَادٜ سُودُ دٛعَارٜ ندُنْ؞ 
کِرِبُسْ، مَوْطٛ سُودُ دٛعَارٜ ندُنْ، کَنْکٛ اٜ وُرٛ مَاکٛ فُو ٻٜ تٛکِّ يٜىٰسُ؞ طُطْٻٜ دَغَ ندٜرْ کٛرِنْتِيَنْکٛعٜنْ نَنْٻٜ وَعَجُ بُلُسْ مَا تٛکِّ يٜىٰسُ، ٻٜ نغَطَنَا بَڤْتِسْمَ؞ 
وٛنْدٜ جٜمَّارٜ جٛومِرَاوٛ مٜدِّ اٜ بُلُسْ ندٜرْ وَحَيُ، وِعِمٛ، ‏«‏تَاع حُلُ!‏ وَعَجِنْ حَبَرُ اَمْ، تَاع دٜعُّتُ، 
نغَمْ اٜ مِ وٛنْدِ اٜ مَاطَ؞ وَلَا بَاوَيْطٛ وَطَنْکِمَ غٛطُّمْ، نغَمْ اٜ مِ وٛودِ يِمْٻٜ طُطْٻٜ ندٜرْ غَرِيرِ ندِعِ؞»‏ 
نغَمْ نٛنْ بُلُسْ جٛوطٛدِي اٜ مَٻّٜ حِتَاندٜ غٛعٛ اٜ لٜبِّ جٛوٜىٰغٛعٛ، اٜ مٛ اٜکِّتِنَٻٜ وٛلْدٜ اَللَّه؞ 
اَمَّا شَرٜلْ کٛ غَالِيٛ لَامٛتٛو لٜيْدِ اَکَايَ، يَحُودَنْکٛعٜنْ کَوْتِ کٛعٜ، نَنْغِ بُلُسْ، نجَارِمٛ يٜىٰسٛ لَامُ؞ 
ٻٜ نغُلِّيمٛ، ٻٜ مبِعِ، ‏«‏نٜطّٛ اٛعٛ اٜ فٛوطَ يِمْٻٜ نغَمْ ٻٜ تٛکَّ اَللَّه دٛوْ لَاوٛلْ نغٛلْ اَتَّوْرَ حَطِ؞»‏ 
بُلُسْ اٜ يِطِ مٜتَنْکِٻٜ وٛنْ طٛنْ، سٜيْ غَالِيٛ وِعِٻٜ، ‏«‏اٛنٛنْ يَحُودَنْکٛعٜنْ، دَا طُمْ غٛطُّمْ کٛ وٛوطَا کٛو کُوغَلْ کَلُّنغَلْ اٛ وَطِ، دَا مِ جَٻَيْ کٛ مبِيطٛنْ دٛوْ مَاکٛ؞ 
اَمَّا ندٜ طُمْ غٜدِّ دٛوْ دِينَ مٛوطٛنْ، اٜ اِنْطٜ، اٜ دٛوکَ مٛوطٛنْ، اٛنٛنْ اٜ کٛعٜ مٛوطٛنْ نغَطَنٜىٰمٛ کِيتَ؞ مِنْ کَمْ، مِ وَطَنْتَا اِرِ طُعُمْ فِي کِيتَ!‏»‏ 
سٜيْ اٛ رِيوِٻٜ دَغَ ندٜرْ سُودُ کِيتَ ندُنْ؞ 
سٜيْ ٻٜ نَنْغِ سٛسْتَانُسْ، مَوْطٛ سُودُ دٛعَارٜ ندُنْ، ٻٜ ڤِيِمٛ يٜىٰسٛ دَمُّغَلْ سُودُ کِيتَ ندُنْ؞ اَمَّا غَالِيٛ وَنَّايِ؞ 
غَطَ بُلُسْ ٻٜيْدِي بَلْطٜ سٜطَّ تٛ کٛرِنْتِ، اٛ اَلِ تٛکُّٻٜ يٜىٰسُ، اٛ نَتِّ کٛمِوَلْ جَحَيْنغَلْ لٜيْدِ سِيرِيَ، کَنْکٛ اٜ بِرِسْکِلَ اٜ اَکِيلَ؞ اٛ فٜمْبِ اٜ کَنْکِيرِيَ نغَمْ اٛ وَطِي اَلْکَوَلْ يٜىٰسٛ جٛومِرَاوٛ؞ 
ندٜ ٻٜ نجٛتِّي غَرِيرِ اَافِسَ، طٛنْ بُلُسْ اَلِ بِرِسْکِلَ اٜ اَکِيلَ؞ کَنْکٛ اٛ نَتِّ سُودُ دٛعَارٜ، اٜ مٛ مٜدَّ اٜ يَحُودَنْکٛعٜنْ؞ 
ٻٜ تٛرِيمٛ اٛ ٻٜيْدَ جٛوطَاکِ بَلْطٜ سٜطَّ تٛ مَٻّٜ، اَمَّا اٛ جَٻَايِ؞ 
ندٜ اٛ وَرِ سٜنْدِرْکِ اٜ مَٻّٜ، اٛ وِعِ، ‏«‏مِ سٛعّٛيْتٛ تٛ مٛوطٛنْ تٛ اَللَّه جَٻِي؞»‏ اٛ نَتِّ کٛمِوَلْ، اٛ دِلِّ؞ 
ندٜ اٛ يٛتِّي غَرِيرِ کَيْسَارِيَ، اٛ پَٻِّي يَاکِ اُرُشَلِيمَ اٛ حٛوْنِ تٛکُّٻٜ يٜىٰسُ؞ سٜيْ اٛ يَحِ اَنْتَاکِيَ؞ 
غَطَ اٛ وَطِي بَلْطٜ تٛنْ، اٛ دِلِّ اٛ تٛکِّ ندٜرْ لٜيْطٜ غَلَاتِيَ اٜ فِرِيجِيَ، اٜ مٛ سٜمْبِطِنَ تٛکُّٻٜ يٜىٰسُ؞ 
اٜ شَرٜلْ نغٜلْ سٜيْ غٛطّٛ يَحُودَنْکٜىٰجٛ بِعٜتٜىٰطٛ اَفٛولٛسْ نٜطّٛ غَرِيرِ اَلِجَندِيرِيَ وَرِ غَرِيرِ اَافِسَ؞ نٜطّٛ اٛنْ اٛ بَوْطٛ مٜتُکِ، اٛ اَنْدُطٛ وٛلْدٜ اَللَّه نَاع سٜطَّ؞ 
اٛ اٜکِّتِنَامَ لَاوٛلْ يٜىٰسُ بٛطُّمْ؞ اٜ مٛ وَعَجِنَ حَبَرُ يٜىٰسُ ندٜرْ وٜلْوٜلٛ، اٜ مٛ وَعَجِنَ بٛطُّمْ، کٛو ندٜ بَڤْتِسْمَ يَحَيَ تَنْ اٛ اَنْدِ؞ 
سٜيْ اٛ فُطِّ وَعَجِنْکِ اٜ سٜمْبٜ مَاکٛ فُو ندٜرْ سُودُ دٛعَارٜ؞ ندٜ بِرِسْکِلَ اٜ اَکِيلَ نَنِمٛ، ٻٜ نٛدِّمٛ وُتُّدُ غٛعٛ، ٻٜ ٻٜيْدِ فَمْتِنْکِمٛ لَاوٛلْ اَللَّه؞ 
ندٜ اَفٛولٛسْ يِطِ حُولُکِ يَحَ لٜيْدِ اَکَايَ، تٛکُّٻٜ يٜىٰسُ مبَلِّمٛ مبِنْدَنِ تٛکُّٻٜ يٜىٰسُ وٛنْٻٜ تٛنْ طٜرٜوٛلْ نغَمْ ٻٜ نجَٻّٛومٛ جُوطٜ طِطِ؞ ندٜ اٛ يٛتِّي تٛنْ، اٛ وَرْتِ وَلِّرّٜ مَوْندٜ تٛ يِمْٻٜ غَرْتُٻٜ تٛکُّٻٜ يٜىٰسُ بَرْکَ يِدّٜ جٛومِرَاوٛ؞ 
اٛ يٜدّٛوتِرِ اٜ يَحُودَنْکٛعٜنْ اٛ دٛعِّٻٜ يٜىٰسٛ يِمْٻٜ فُو، نغَمْ اٛ حٛلِّيٻٜ ندٜرْ دٜفْتٜرٜ شٜنِيندٜ يٜىٰسُ وٛنِ اَلْمَسِيحُ؞ 
