﻿کُوطٜ لِلَاٻٜ.
11.
لِلَاٻٜ اٜ تٛکُّٻٜ يٜىٰسُ وٛنْٻٜ لٜيْدِ يَحُودِيَ فُو ٻٜ نَنِي حَبَرُ يِمْٻٜ نَاع يَحُودَنْکٛعٜنْ نجَٻِي وٛلْدٜ اَللَّه؞ 
ندٜ بِيتُرُسْ يَحِ اُرُشَلِيمَ، يَحُودَنْکٛعٜنْ کٛولِيٻٜ يٜىٰسُ دَرِيٻٜ دٛوْ ندٛنُ مُعّٜنْ نغُ نَادُکِ ٻٜ مبِعِ کٛ اٛ وَطِ طُمْ وٛوطَا، 
اٜ ٻٜ مبِعَ، ‏«‏نغَمْ طُمٜ نَتُّطَا ندٜرْ وُرٛ يِمْٻٜ ٻٜ نَادَاکَ، حَا اَ ݧَمْدِي اٜ مَٻّٜ؟»‏ 
بِيتُرُسْ طِيوِتَنِٻٜ نٛ کٛو طُمٜ فُطِّرِ، اٛ وِعِٻٜ، 
‏«‏کٛ نغٛنّٛومِ ندٜرْ غَرِيرِ جٛفَّ اٜ مِ وَطَ دٛعَارٜ، مِ يِعِي وَحَيُ؞ ندٜرْ وَحَيُ طُمْ مِ يِعِي غٛطُّمْ اٜ جِڤّٛيٛو دَغَ دٛوْ؞ اٜ طُمْ نَنْدِ اٜ وُدٜرٜ مَوْندٜ کَٻَّاندٜ اٜ غُتُّلِّ نَيِ؞ طُمْ پِوٛيِ دَغَ دٛوْ اٜ طُمْ جِڤِّنٛيٜىٰ تٛ اَمْ؞ 
ندٜ ندَارُمِ ندٜرْ مَاجُمْ، سٜيْ نغِيمِ مَرْلٜ طٜ کٛيْطٜ نَيِ اٜ دِيوٜ لَدّٜ اٜ دَسٛتٛوطٜ اٜ شٛلِّ ندٜرْ مَيْرٜ؞ 
سٜيْ نَنْمِ حٛنٛنْدٜ اٜ وِعَيَمْ، ‏‹‏بِيتُرُسْ، اُمَّ، نَنْغُ، کِرْسَا، ݧَامَا!‏›‏ 
مبِعُمِ، ‏‹‏اَاعَ، جٛومِرَاوٛ!‏ مِ مٜىٰطَايِ ݧَامُکِ کٛ حَرْمِنِي کٛو کٛ لَاٻَايِ؞›‏ 
حٛنٛنْدٜ ندٜنْ فُطِّتِ وِعِيَمْ، ‏‹‏تَاع حَرْمِنْ کٛ اَللَّه لَاٻِنِ؞›‏ 
طُمْ وَطِ نٛنْ ندٜ تَتِ؞ غَطَ نٛنْ طُمْ فُو طُمْ سٛعَّا دٛوْ؞ 
اٜ شَرٜلْ نغٜلْ، وٛرْٻٜ تَتٛ لِلٛيَاٻٜ تٛ اَمْ دَغَ کَيْسَارِيَ نجٛتِّي وُرٛ تٛ نغٛنْمِ؞ 
رُوحُ اَللَّه وِعِيَمْ مِ يَادَ اٜ مَٻّٜ تٛع مِ وَطَ سٜکٛ؞ ٻٜعٜ تٛکُّٻٜ يٜىٰسُ جٛوٜىٰغٛعٛ نجَادِ اٜ اَمْ، مِنْ نَتِّدِ وُرٛ کٛنٜىٰلِيُسْ؞ 
اٛ وِعِمِنْ نٛ اٛ يِعِرِ مَلَاعِکَاجٛ غَرْطٛ وُرٛ مَاکٛ وِعِمٛ، ‏‹‏لِلُ غٛطّٛ غَرِيرِ جٛفَّ، نٛدَّا غٛطّٛ بِعٜتٜىٰطٛ سِيمَنْ بِيتُرُسْ؞ 
اٛ وِعٜتٜ نٛ کٜٻْرَتَا کِسْندَمْ، اَنْ اٜ وُرٛ مَاطَ فُو؞›‏ 
ندٜ ڤُطُّمِ مٜتُکِ، سٜيْ رُوحُ اَللَّه جِڤِّي دٛوْ مَٻّٜ نٛنْ نٛ طُمْ جِڤّٛرِي دٛوْ مٜىٰطٜنْ اَرَنْدٜ؞ 
سٜيْ شِفْتٛرْمِ کٛ جٛومِرَاوٛ وِعُنٛو وِعُکِ، ‏‹‏يَحَيَ وَطَنِي يِمْٻٜ بَڤْتِسْمَ اٜ ندِيَمْ، اَمَّا اٛنٛنْ، اَللَّه وَطِرَنَيْعٛنْ بَڤْتِسْمَ اٜ رُوحُ مُوطُمْ؞›‏ 
تٛ اَللَّه حٛکِّيٻٜ دٛکَّلْ نغَلْ اٛ حٛکِّعٜنْ ندٜ کٛولِيطٜنْ يٜىٰسُ اَلْمَسِيحُ جٛومِرَاوٛ، تٛو، مِنْ مِ مٛيٜ کَطَيْمِ کٛ اَللَّه يِطِ وَطُکِ؟»‏ 
ندٜ ٻٜ نَنِ کٛ اٛ وِعِ، ٻٜ ندٜعِّتِ، ٻٜ مَنْتِ اَللَّه، ٻٜ مبِعِ، ‏«‏اَللَّه وَطَنِي يِمْٻٜ نَاع يَحُودَنْکٛعٜنْ لَاوٛلْ تُوبُکِ نغَمْ ٻٜ کِسَ ٻٜ کٜٻَ يٛنْکِ کِ رٜعَتَا؞»‏ 
وٛٻّٜ تٛکُّٻٜ يٜىٰسُ شَنْکِتَامَ نغَمْ تٛرَّاجِ طِ ٻٜ تٛرَّا غَطَ طُمْ وَرِي اِسْتِفَانُسْ؞ وٛٻّٜ نجَحِ فِنِيکِيَ، وٛٻّٜ نجَحِ سَيِيفُرُسْ، وٛٻّٜ بٛو نجَحِ اَنْتَاکِيَ؞ اٜ ٻٜ نغَعَجِنَ ندٜرْ يَحُودَنْکٛعٜنْ تَنْ؞ 
اَمَّا وٛٻّٜ ندٜرْ مَٻّٜ پِوٛيْٻٜ سَيِيفُرُسْ اٜ سَايِرِنْ نَتِّ غَرِيرِ اَنْتَاکِيَ، اٜ ٻٜ نغَعَجِنَ حَبَرُ بٜلْطُمْ طُمْ يٜىٰسُ جٛومِرَاوٛ ندٜرْ يِمْٻٜ نَاع يَحُودَنْکٛعٜنْ؞ 
جٛومِرَاوٛ بٛو اٜ وٛنْدِ اٜ مَٻّٜ؛ يِمْٻٜ طُطْٻٜ تُوبِ نغَيْلِتِي تٛ جٛومِرَاوٛ؞ 
کَوْتَلْ تٛکُّٻٜ يٜىٰسُ وٛنْٻٜ اُرُشَلِيمَ بٛو نَنِي حَبَرُ کٛ وَطِ تٛنْ اَنْتَاکِيَ، سٜيْ ٻٜ لِلِ بَرْنَبَ تٛ مَٻّٜ؞ 
ندٜ بَرْنَبَ وَرِ يِعِ نٛ اَللَّه بَرْکِطِنِرِ يِمْٻٜ نَاع يَحُودَنْکٛعٜنْ تٛکُّٻٜ يٜىٰسُ، اٛ نَنِ بٜلْطُمْ، اٛ سٜمْبِطِنِٻٜ ٻٜ ندَرٛو دٛوْ کٛ ٻٜ کٛولِي، ٻٜ تٛکَّ جٛومِرَاوٛ اٜ ٻٜرْندٜ غٛعٛ؞ 
نغَمْ بَرْنَبَ اٛ نٜطّٛ مٛ نغِکُّ بٛطُّمْ، کٜوْطٛ رُوحُ اَللَّه کٛولِيطٛ جٛومِرَاوٛ؞ سٜيْ يِمْٻٜ طُطْٻٜ تُوبِ تٛکِّ جٛومِرَاوٛ؞ 
غَطَ نٛنْ، بَرْنَبَ يَحِ غَرِيرِ تَرْسُسْ نغَمْ طَٻُّتُکِ شَاوُلُ؞ 
ندٜ اٛ تَوِمٛ، اٛ يَارِمٛ غَرِيرِ اَنْتَاکِيَ؞ ٻٜ نجٛوطٛدِي اٜ کَوْتَلْ تٛکُّٻٜ يٜىٰسُ وٛنْٻٜ تٛنْ حِتَاندٜ وٛعٛيْرٜ، اٜ ٻٜ اٜکِّتِنَ يِمْٻٜ طُطْٻٜ؞ اٜ اَنْتَاکِيَ طُمْ فُطِّ نٛدِّرْکِ تٛکُّٻٜ يٜىٰسُ مَسِيحِيَنْکٛعٜنْ؞ 
ندٜرْ بَلْطٜ طٜنْ، وٛٻّٜ اَنَّبٛعٜنْ پِوٛيِ اُرُشَلِيمَ نغَرِ اَنْتَاکِيَ؞ 
غٛعٛتٛ ندٜرْ مَٻّٜ بِعٜتٜىٰطٛ اَغَبُسْ اُمِّي دَرِي وَطِ اَنَّبَاکُ اٜ بَوْطٜ رُوحُ اَللَّه، وِعِ وٜىٰلٛ کَلُّنغٛ وَطَيْ ندٜرْ دُونِيَارُ فُو؞ نغٛ بٛو وَطِ ندٜرْ شَرٜلْ لَامِيطٛ مَوْطٛ بِعٜتٜىٰطٛ کَلَوْدِيُسْ؞ 
سٜيْ تٛکُّٻٜ يٜىٰسُ ڤُطِّ حَوْرُتُکِ شٜىٰدٜ، کٛو مٛيٜ وَدَّ کٛ وَاوِ وَدُّکِ، نغَمْ ٻٜ مبَلَّ بَنْدِرَاٻٜ مَٻّٜ وٛنْٻٜ لٜيْدِ يَحُودِيَ؞ 
ندٜ ٻٜ کَوْرِتِ بَلَّلْ نغَلْ، سٜيْ ٻٜ لِلْدِنغَلْ اٜ جُنْغٛ بَرْنَبَ اٜ شَاوُلُ، ٻٜ نجَارَنغَلْ تٛ مَوْٻٜ کَوْتَلْ تٛکُّٻٜ يٜىٰسُ تٛنْ اُرُشَلِيمَ؞ 
