﻿کُوطٜ لِلَاٻٜ.
8.
شَاوُلُ بٛو جَٻِي طُمْ وَرِ اِسْتِفَانُسْ؞ دَغَ ݧَلْندٜ ندٜنْ، تٛرَّ مَوْکَ وَرَنِ کَوْتَلْ تٛکُّٻٜ يٜىٰسُ وٛنْٻٜ اُرُشَلِيمَ؞ ٻٜ فُو ٻٜ شَنْکِتِي ندٜرْ لٜيْطٜ يَحُودِيَ اٜ سَمَارِيَ، سٜيْ لِلَاٻٜ تَنْ کٛرِي ندٜرْ اُرُشَلِيمَ؞ 
وٛٻّٜ کُلٛوٻٜ اَللَّه اُوِ اِسْتِفَانُسْ، ٻٜ مبٛيَنِ مَيْدٜ مَاکٛ بٛجِّ نَوْطِ؞ 
اَمَّا شَاوُلُ اُمَّنِي کَوْتَلْ تٛکُّٻٜ يٜىٰسُ، وَطِ کَ سَنْکُتُکِٻٜ؞ اٜ مٛ نَتَّ وُرٛ‑وُرٛ، اٜ مٛ نَنْغَ تٛکُّٻٜ يٜىٰسُ وٛرْٻٜ اٜ رٜوْٻٜ، اٜ مٛ دَسَٻٜ، اٜ مٛ مَٻَّٻٜ ندٜرْ سُودُ شُرَلْ؞ 
ندٜنْ شَنْکِتَاٻٜ نغَطِ کَ يِيلَاکِ اٜ نغَعَجِنَ حَبَرُ بٜلْطُمْ؞ 
فِلِبُسْ بٛو يَحِ وٛنْدِ غَرِيرِ ندٜرْ لٜيْدِ سَمَارِيَ، اٜ مٛ وَعَجِنَنَٻٜ حَبَرُ اَلْمَسِيحُ؞ 
ندٜ يِمْٻٜ فُو نَنِ، نغِعِ اَلَامَاجِ کَيْطِنِيطِ طِ فِلِبُسْ وَطِ، ٻٜ شٛعِّ حَکِّيلٛ مَٻّٜ دٛوْ کٛ اٛ وِعِ؞ 
نغَمْ يِمْٻٜ طُطْٻٜ مبُرْتِنَنَامَ غِنِّ اٜ طِ نغُلَّ سٜمْبٜىٰ، ندٜنْ جَرَاٻٜ اٜ لَپٛوٻٜ طُطْٻٜ نجَمْطِتِنَا؞ 
نغَمْ نٛنْ طُمْ نَنِ وٜلْوٜلٛ طُطْنغٛ ندٜرْ غَرِيرِ ندِنْ؞ 
ندٜرْ غَرِيرِ ندِنْ بٛو اٜ وٛودِ غٛطّٛ نٜطّٛ بِعٜتٜىٰطٛ سِيمَنْ، اٛ دَرْنٛووٛ؞ اٜ مٛ حَيْطِنَ سَمَارِيَنْکٛعٜنْ نَاع سٜطَّ اٜ کُوطٜ مَاکٛ، اٜ مٛ وِعَ حٛورٜ مَاکٛ اٛ مَوْطٛ؞ 
يِمْٻٜ فُو دَغَ مَوْٻٜ حَا سُکَاٻٜ نجَٻِي کٛ اٛ وِعَتَ، اٜ ٻٜ مبِعَ، ‏«‏نٜطّٛ اٛعٛ اٜ وٛودِ بَوْطٜ اَللَّه بِعٜتٜىٰطٜ بَوْطٜ مَوْطٜ؞»‏ 
ٻٜ تٛکُّمٛ نغَمْ اٛ نٜىٰٻِي اٜ مٛ حَيْطِنَٻٜ اٜ سِحِرِيجِ مَاکٛ؞ 
اَمَّا ندٜ ٻٜ نجَٻِ حَبَرُ بٜلْطُمْ طُمْ فِلِبُسْ وَعَجِنَنْتَٻٜ دٛوْ لَامُ اَللَّه اٜ اِنْدٜ يٜىٰسُ اَلْمَسِيحُ، وٛرْٻٜ اٜ رٜوْٻٜ فُو نغَطَنَا بَڤْتِسْمَ؞ 
حَا سِيمَنْ مَا اٜ حٛورٜ مُوطُمْ تٛکِّ يٜىٰسُ؞ غَطَ اٛ وَطَنَامَ بَڤْتِسْمَ، اٛ تٛکِّ فِلِبُسْ حَادٜ، اٛ حَيْطِنِي ندٜ اٛ يِعِ اَلَامَاجِ اٜ کُوطٜ کَيْطِنِيطٜ مَوْطٜ طٜ فِلِبُسْ وَطِ؞ 
ندٜ لِلَاٻٜ وٛنْٻٜ اُرُشَلِيمَ نَنِ سَمَارِيَنْکٛعٜنْ نجَٻِي وٛلْدٜ اَللَّه، سٜيْ ٻٜ لِلِ بِيتُرُسْ اٜ يَحَيَ تٛ مَٻّٜ؞ 
ندٜ ٻٜ نجٛتِّي، ٻٜ تٛرِي اَللَّه حٛکَّ سَمَارِيَنْکٛعٜنْ ٻٜنْ رُوحُ مُوطُمْ، 
نغَمْ ٻٜ نغَطَنَامَ بَڤْتِسْمَ ندٜرْ اِنْدٜ يٜىٰسُ جٛومِرَاوٛ تَنْ، اَمَّا رُوحُ اَللَّه جِڤّٛيَاکِ دٛوْ کٛو مٛيٜ مَٻّٜ تَوْ؞ 
سٜيْ بِيتُرُسْ اٜ يَحَيَ نجٛوِ جُوطٜ مُعّٜنْ دٛوْ مَٻّٜ، ٻٜ کٜٻِ رُوحُ اَللَّه؞ 
ندٜ سِيمَنْ يِعِ يٛوُکِ جُوطٜ لِلَاٻٜ دٛوْ تٛکُّٻٜ يٜىٰسُ اٜ حٛکَّ رُوحُ اَللَّه، اٛ وَدَّنِٻٜ شٜىٰدٜ، 
اٛ وِعِ، ‏«‏کٛکّٜىٰيَمْ، مِنْ مَا بَوْطٜ طٜنْ، نغَمْ مٛ نجٛوَنْمِ جُوطٜ فُو حٜٻَ رُوحُ اَللَّه؞»‏ 
اَمَّا بِيتُرُسْ وِعِمٛ، ‏«‏اَنْ اٜ شٜىٰدٜ مَاطَ کَلْکِدٜىٰ، نغَمْ اَ ݧُمِي اَ وَاوَيْ سٛودُکِ دٛکَّلْ اَللَّه اٜ شٜىٰدٜ!‏ 
اَ وَلَا غٜطَلْ ندٜرْ کُوغَلْ نغَعَلْ، نغَمْ ٻٜرْندٜ مَاطَ لَاٻَايِ يٜىٰسٛ اَللَّه؞ 
تُوبُ دَغَ حَلّٜىٰندٜ مَاطَ، تٛرَ جٛومِرَاوٛ يَافَنٛمَا ݧُمٛوجِ مَاطَ کَلُّطِ؞ 
نغَمْ مِ يِعِي اَ وٛودِ ٻٜرْندٜ ٻَلٜىٰرٜ، حَلّٜىٰندٜ طُوطَنِيمَ؞»‏ 
سِيمَنْ وِعِمٛ، ‏«‏تٛرَنٜىٰيَمْ جٛومِرَاوٛ، نغَمْ تٛع کٛ مبِيطَا حٜٻَيَمْ؞»‏ 
غَطَ بِيتُرُسْ اٜ يَحَيَ تَبِّتِنَنِي سَمَارِيَنْکٛعٜنْ دٛوْ يٜىٰسُ، ٻٜ نغَعَجِنَنِٻٜ وٛلْدٜ جٛومِرَاوٛ؞ ندٜ اٜ ٻٜ دٛوْ لَاوٛلْ حٛوتُکِ اُرُشَلِيمَ، ٻٜ نغَعَجِنِ حَبَرُ بٜلْطُمْ ندٜرْ نغَرِحٛيْ سَمَارِيَ طُطْکٛيْ؞ 
سٜيْ غٛطّٛ مَلَاعِکَاجٛ جٛومِرَاوٛ وِعِ فِلِبُسْ، ‏«‏اُمَّ دِلِّرْ فٛمْبِنَ تٛکَّا طَتَلْ پِوٛيْنغَلْ اُرُشَلِيمَ يَاکِ غَاجَ، طَتَلْ لَدّٜوَلْ؞»‏ 
سٜيْ فِلِبُسْ اُمِّي دِلِّ؞ اٜ مٛ دٛوْ لَاوٛلْ اٛ حَوْرِ اٜ غٛطّٛ نٜطّٛ لٜيْدِ اِتِيٛوفِيَ تَڤَّاطٛ؞ نٜطّٛ اٛنْ اٜ وٛودِ لَامُ مَوْطُمْ ندٜرْ لَامٛرْدٜ لَامِيطٛ دٜبّٛ بِعٜتٜىٰطٛ کَندِسْ؞ کَنْکٛ وٛنِ دٜسٛووٛ شٜىٰدٜ لَامِيطٛ اٛنْ؞ اٛ يَحُنٛ اُرُشَلِيمَ نغَمْ مَوْنِنْکِ جٛومِرَاوٛ؞ 
اٜ مٛ حٛوتَ، اٜ مٛ جٛوطِي ندٜرْ کٜىٰکٜ ڤُشِّ، اٜ مٛ جَنْغَ دٜفْتٜرٜ اَنَّبِ اِشَايَ؞ 
رُوحُ اَللَّه وِعِ فِلِبُسْ، ‏«‏يَحُ، ٻَدّٛطَا کٜىٰکٜ ڤُشِّ طُمْ؞»‏ 
سٜيْ فِلِبُسْ دٛغِّ يَحِ تٛ مَاکٛ، نَنِ اٜ مٛ جَنْغَ دٜفْتٜرٜ اَنَّبِ اِشَايَ؞ فِلِبُسْ پَمِمٛ، وِعِ، ‏«‏اَ فَامَ کٛ نجَنْغَتَا بٛو؟»‏ 
نٜطّٛ اٛنْ وِعِمٛ، ‏«‏نٛيٜ ڤَامِرَيْمِ ندٜ وَلَا ڤَمْتِنَيْطٛيَمْ؟»‏ اٛ تٛرِي فِلِبُسْ نَتَّ جٛوطٛدٛو اٜ مَاکٛ؞ 
رَا اَايَاجٜ طٜ اٛ جَنْغَتَ ندٜرْ دٜفْتٜرٜ ندٜنْ:‏ ‏«‏اٛ فٛوطَامَ بٛ مبَالَ کِرْسٛيْتٜىٰنغَ؞ نٛ ٻِي مبَالَ دٜعِّتِرْتَ تٛ جُنْغٛ تَپٛووٛ لٜىٰٻٜ مَاغَ، نٛنْ اٛ دٜعِّتِرِ؞ 
ٻٜ شٜمْتِنِمٛ، ٻٜ نغَطَنَايِمٛ کِيتَ غٛونغَ؞ مٛيٜ وَاوَتَ حٛکُّکِ حَبَرُ ٻِٻّٜ مَاکٛ؟ نغَمْ يٛنْکِ مَاکٛ اِتَّامَ دَغَ ندٜرْ دُونِيَارُ؞»‏ 
اِتِيٛوفِيَنْکٜىٰجٛ اٛنْ وِعِ فِلِبُسْ، ‏«‏وِعَمْ دٛوْ مٛيٜ اَنَّبِيجٛ اٛعٛ مٜتِ حَالَ کَعَ، دٛوْ حٛورٜ مَاکٛ کٛو دٛوْ غٛطّٛ؟»‏ 
سٜيْ فِلِبُسْ فُطِّ مٜتَنْکِمٛ دٛوْ اَايَاجٜ طٜنْ، اٜ وَعَجِنَنَمٛ حَبَرُ بٜلْطُمْ دٛوْ يٜىٰسُ؞ 
اٜ ٻٜ ندٜرْ يَادُ ٻٜ نجٛتِّي تٛ ندِيَمْ وٛنِ؞ سٜيْ نٜطّٛ اٛنْ وِعِ، ‏«‏رَا ندِيَمْ!‏ کٛ حَطَتَ طُمْ وَطَنَيَمْ بَڤْتِسْمَ؟»‏ 
‏‏فِلِبُسْ وِعِمٛ، ‏«‏تَا حٛولَکٜ يٜىٰسُ اٜ ٻٜرْندٜ غٛعٛ، وَلَا کٛ حَطَتَ طُمْ وَطَنْمَا بَڤْتِسْمَ؞»‏ سٜيْ نٜطّٛ اٛنْ وِعِ، ‏«‏مِ جَٻِي يٜىٰسُ اَلْمَسِيحُ اٛ ٻِي اَللَّه؞»‏‏ 
اٛ وِعِ طُمْ دَرْنَ کٜىٰکٜ ڤُشِّ طُمْ؞ ٻٜ فُو طِطٛ ٻٜ نجِڤِّي، ٻٜ نَتِّ ندٜرْ ندِيَمْ طَمْ؞ فِلِبُسْ وَطَنِمٛ بَڤْتِسْمَ؞ 
ندٜ ٻٜ مبُرْتِي ندِيَمْ طَمْ، سٜيْ رُوحُ جٛومِرَاوٛ حٛشِّ فِلِبُسْ؞ نٜطّٛ اٛنْ فُطِّتَايِ يِعُکِمٛ، اٛ ݧَمْرِ يٜىٰسٛ اٜ يَادُ، اٜ مٛ نَنَ بٜلْطُمْ؞ 
اَمَّا فِلِبُسْ يِعِ حٛورٜ مُوطُمْ اٜ غَرِيرِ اَجٛتُسْ؞ دٛوْ لَاوٛلْ اٛ وَطِ کَ وَعَجِنْکِ حَبَرُ بٜلْطُمْ اٜ کٛو ندِيٜ غَرِيرِ حَا اٛ يٛتِّي کَيْسَارِيَ؞ 
