﻿کُوطٜ لِلَاٻٜ.
6.
ندٜرْ بَلْطٜ طٜنْ، تٛکُّٻٜ يٜىٰسُ اٜ ٻٜيْدَ طُطْکِ؞ سٜيْ يَحُودَنْکٛعٜنْ مٜتٛوٻٜ حٜلٜنَنْکٛورٜ مٜتِتَنِ يَحُودَنْکٛعٜنْ مٜتٛوٻٜ اِبْرَانِيَنْکٛورٜ، نغَمْ رٜوْٻٜ مَٻّٜ ٻٜ وٛرْٻٜ مُعّٜنْ مَايِ کٛکَّتَاکٜ کٛ حَانِ کٛکّٜىٰ ندٜرْ ݧَمْندُ ندُ طُمْ وٛووِ يٜىٰدُکِ کٛو ندٜيٜ ݧَلْندٜ؞ 
سٜيْ لِلَاٻٜ سَڤّٛ اٜ طِطٛ نٛدِّ کَوْتَلْ تٛکُّٻٜ يٜىٰسُ فُو، ٻٜ مبِعِ، ‏«‏مِنٛنْ، طُمْ حَانَايِ مِنْ اَلَ وَعَجِنْکِ وٛلْدٜ اَللَّه نغَمْ سٜنْدُکِ ݧَمْندُ؞ 
نغَمْ نٛنْ، بَنْدِرَاٻٜ، شُٻٜىٰ وٛرْٻٜ نجٛوٜىٰطِطٛ ندٜرْ مٛوطٛنْ ٻٜ طُمْ حٛولِي کٜىٰوُٻٜ رُوحُ اَللَّه، غٛودُٻٜ فَامُ نغَمْ مِنْ کٛکَّٻٜ کُوغَلْ نغَلْ؞ 
اَمَّا مِنٛنْ، مِنْ نغَطَيْ کَ وَطُکِ دٛعَارٜ اٜ مِنْ اٜکِّتِنَ وٛلْدٜ اَللَّه؞»‏ 
حَالَ کَنْ بٛو وٜلِي کَوْتَلْ تٛکُّٻٜ يٜىٰسُ فُو؞ ندٜنْ ٻٜ شُٻِ اِسْتِفَانُسْ، نٜطّٛ کٛولِيطٛ جٛومِرَاوٛ، کٜىٰوُطٛ رُوحُ اَللَّه، کَنْکٛ اٜ فِلِبُسْ اٜ بُرٛکٛرَسْ اٜ نِکَنٛ اٜ تِمٛنْ اٜ بَرْمٜنَسْ اٜ نِکٛلَسْ پِوٛيْطٛ اَنْتَاکِيَ، نَتُّطٛ دِينَ يَحُودَنْکٛعٜنْ کَنْکٛ نَاع اٛ يَحُودَنْکٜىٰجٛ؞ 
ٻٜ نغَدِّٻٜ يٜىٰسٛ لِلَاٻٜ؞ سٜيْ لِلَاٻٜ ٻٜنْ نجٛوَنِٻٜ جُوطٜ، نغَطَنِٻٜ دٛعَارٜ؞ 
وٛلْدٜ اَللَّه بٛو ٻٜيْدِ سَنْکِتَاکِ؞ تٛکُّٻٜ يٜىٰسُ اٜ ٻٜيْدَ طُوطُکِ ندٜرْ غَرِيرِ اُرُشَلِيمَ، حَا اَرْدِيٻٜ دِينَ طُطْٻٜ تٛکِّ يٜىٰسُ؞ 
اَللَّه بَرْکِطِنِ اِسْتِفَانُسْ حٛکِّمٛ بَوْطٜ وَطُکِ کُوطٜ مَوْطٜ کَيْطِنِيطٜ اٜ اَلَامَاجِ ندٜرْ يِمْٻٜ؞ 
اَمَّا اٜ وٛودِ وٛٻّٜ ندٜرْ سُودُ دٛعَارٜ بِعٜتٜىٰندُ سُودُ رِمْطِنَاٻٜ، اٜ وٛٻّٜ پِوٛيْٻٜ غَرِيرِ سَايِرِنْ اٜ غَرِيرِ اَلِجَندِيرِيَ اٜ لٜيْدِ کِلِيکِيَ اٜ لٜيْدِ اَاسِيَ، ٻٜ اُمَّنِيمٛ اٜ ٻٜ نغٜدّٛوتِرَ اٜ مَاکٛ؞ 
اَمَّا ٻٜ ندُلِّ نٛ ٻٜ نجَالٛرْتٛومٛ نغَمْ اٜ مٛ مٜتِرَ فَامُ اٜ رُوحُ اَللَّه؞ 
سٜيْ ٻٜ کٛکِّ وٛٻّٜ شٜىٰدٜ اٜ سُوطٜ نغَمْ ٻٜ مبِعَ ٻٜ نَنِي اٜ مٛ حُطَ مُوسَ اٜ اَللَّه؞ 
نٛنْ ٻٜ اُمِّنِرِ ٻٜرْطٜ يِمْٻٜ اٜ مَوْٻٜ اٜ مٛودِٻّٜ اَتَّوْرَ؞ سٜيْ ٻٜ نَنْغِ اِسْتِفَانُسْ، ٻٜ نجَارِمٛ يٜىٰسٛ کَوْتَلْ مَوْٻٜ، 
ٻٜ نغَدِّ شٜيْدُعٜنْ فٜوْرٜ؞ شٜيْدُعٜنْ ٻٜنْ مبِعِ، ‏«‏کٛو ندٜيٜ نٜطّٛ اٛعٛ اٜ مٜتَ کَلُّکَ دٛوْ وُرٛ شٜنِينغٛ اٜ اَتَّوْرَ؞ 
مِنْ نَنِي اٜ مٛ وِعَ يٜىٰسُ نَجَرَنْکٜىٰجٛ سَنْکِتَيْ وُرٛ شٜنِينغٛ، اٛ وَيْلِتَيْ ندٛنُوجِ طِ مُوسَ حٛکِّعٜنْ؞»‏ 
سٜيْ فُو جٛوطِيٻٜ ندٜرْ کَوْتَلْ نغَلْ شُتِي اِسْتِفَانُسْ، ٻٜ نغِعِ يٜىٰسٛ مَاکٛ وَرْتِي بٛ يٜىٰسٛ مَلَاعِکَاجٛ؞ 
