﻿کُوطٜ لِلَاٻٜ.
5.
اَمَّا اٜ وٛودِ غٛطّٛ بِعٜتٜىٰطٛ حَنَانِيَ اٜ دٜبّٛ مَاکٛ سَفِيرَتُ؞ کَنْکٛ مَا اٛ سٛورِ نغٜسَ مَاکٛ؞ 
اٛ سٜنْدِ شٜىٰدٜ طٜنْ اٜ اَنْدَلْ دٜبّٛ مَاکٛ؞ اٛ سُوطِ غٛطّٜ اٛ يَارِ کٛرِيطٜ اٛ حٛکِّ لِلَاٻٜ؞ 
بِيتُرُسْ وِعِمٛ، ‏«‏حَنَانِيَ، نغَمْ طُمٜ اَلُطَا شٜيْطَنْ نَتِّ ٻٜرْندٜ مَاطَ حَا ڤٜوَنْطَا رُوحُ اَللَّه، شُوطُطَا غٛطّٜ شٜىٰدٜ ندٜرْ شٜىٰدٜ نغٜسَ کَنْ؟ 
کٛ شٛورُطَا طُمْ، نَاع اُمْ طُمْ مَاطَ؟ ندٜ شٛورُطَاطُمْ نَاع اَنْ جٜيِ شٜىٰدٜ طٜنْ؟ کٛ وَطِ نغَطُطَا نٛنْ؟ نَاع يِمْٻٜ ڤٜوَنْطَا، اَمَّا اَللَّه ڤٜوَنْطَا؞»‏ 
ندٜ حَنَانِيَ نَنِ بٛلِيطٜ طٜنْ، اٛ يَنِ اٛ مَايِ؞ کُلٛلْ مَنْغٛلْ نَنْغِ نَنْٻٜ حَبَرُ طُمْ فُو؞ 
وٛٻّٜ کَيٜعٜنْ اُمِّي، تَارِ ٻَنْدُ مَاکٛ اٜ غُدٜ، کٛشِّمٛ، مبُرْتِنِمٛ يَاسِ، اُوٛيِمٛ؞ 
غَطَ اَوَاجِ تَتِ سٜيْ رَا دٜبّٛ مَاکٛ وَرِ نَتّٛيِ؞ اٛ اَنْدَا کٛ وَطِ؞ 
بِيتُرُسْ وِعِمٛ، ‏«‏وِعَمْ، طٜعٜ شٜىٰدٜ کَنْجٜ تَنْ شٛورُطٛنْ نغٜسَ مٛوطٛنْ؟»‏ اٛ وِعِ، ‏«‏اٜىٰ، طُمْ نٛنْ مِنْ شٛورِکَ؞»‏ 
ندٜنْ بِيتُرُسْ وِعِمٛ، ‏«‏نغَمْ طُمٜ کَوْتُطٛنْ حٛورٜ نغَمْ فٛوندُکِ رُوحُ جٛومِرَاوٛ؟ رَا، اُوٛيْٻٜ غٛرْکٛ مَاطَ طٛنْ نغَرَ، جٛونِ ٻٜ کٛشّٜتٜ اَنْ مَا!‏»‏ 
طٛنْ اٜ طٛنْ کَنْکٛ مَا اٛ يَنِ حَادٜ کٛيْطٜ بِيتُرُسْ، اٛ مَايِ؞ کَيٜعٜنْ ٻٜنْ نَتِّ تَوِ اٛ مَيْطٛ، ٻٜ کٛشِّمٛ ٻٜ مبُرْتِنِمٛ، ٻٜ اُوٛيِمٛ حَادٜ غٛرْکٛ مَاکٛ؞ 
کُلٛلْ مَنْغٛلْ نَنْغِ کَوْتَلْ تٛکُّٻٜ يٜىٰسُ اٜ نَنْٻٜ حَبَرُ طُمْ فُو؞ 
لِلَاٻٜ نغَطِ اَلَامَاجِ اٜ کُوطٜ کَيْطِنِيطٜ طُطّٜ ندٜرْ يِمْٻٜ؞ کٛولِيٻٜ يٜىٰسُ فُو اٜ کَوْرِتَ ندٜرْ رُمْڤَارُ سُلٜيْمَانُ مَوْندُ ندٜرْ ݧُمٛ غٛعٛ؞ 
کٛو مٛيٜ مٛ وَلَا ندٜرْ کَوْتَلْ مَٻّٜ اٜ حُلَ نَتُّکِٻٜ، کٛو ندٜ کٛو مٛيٜ اٜ حٛکَّٻٜ مَنْغُ نَاع سٜطَّ؞ 
فُو اٜ نٛنْ کٛو ندٜيٜ يِمْٻٜ طُطْٻٜ، وٛرْٻٜ اٜ رٜوْٻٜ، اٜ ٻٜيْدٛو ندٜرْ تٛکُّٻٜ يٜىٰسُ، 
حَا طُمْ وَرْتِ يِمْٻٜ اٜ کٛشّٛيَ ݧَوْٻٜ، اٜ ٻٜ مبُرْتِنٛيَٻٜ دٛوْ طَتٜ، اٜ ٻٜ ڤُکِّنَٻٜ دٛوْ لٜىٰشٜ اٜ دَاغٜ، نغَمْ تٛ بِيتُرُسْ وَرِي کٛو طٛوْدِ مَاکٛ مَا تَنْ مٜىٰمَ وٛٻّٜ مَٻّٜ؞ 
يِمْٻٜ طُطْٻٜ دَغَ نغَرِحٛيْ ڤِلِيکٛيْ اُرُشَلِيمَ مَا نغَدِّنغَدِّنِ ݧَوْٻٜ اٜ غٛودُٻٜ غِنِّ؞ ٻٜ فُو بٛو ٻٜ نجَمْطِتِنَا؞ 
ندٜنْ مَوْطٛ مَوْٻٜ اَرْدِيٻٜ دِينَ اٜ وٛنْدُٻٜ اٜ مَاکٛ، وَاتٛ سَادُسَنْکٛعٜنْ، ٻٜ اُمِّنِ لَوْلِيرُ کَلُّندُ؞ 
ٻٜ نَنْغِ لِلَاٻٜ، ٻٜ مَٻِّٻٜ ندٜرْ سُودُ شُرَلْ؞ 
اَمَّا ندٜرْ جٜمَّارٜ ندٜنْ مَلَاعِکَاجٛ جٛومِرَاوٛ وَرِ مَٻِّتَنِ لِلَاٻٜ ٻٜنْ دَمُّطٜ سُودُ شُرَلْ ندُنْ، وُرْتِنِٻٜ، وِعِٻٜ، 
‏«‏نجَحٜىٰ ندَرٜىٰ ندٜرْ وُرٛ شٜنِينغٛ، کٛکّٛنْ کٛو مٛيٜ حَبَرُ يٛنْکِ کٜسُمْ؞»‏ 
ندٜ ٻٜ نَنِ نٛنْ، ٻٜ نَتّٛيِ ندٜرْ وُرٛ شٜنِينغٛ سُبَکَ، طٛنْ اٜ طٛنْ ٻٜ ڤُطِّ اٜکِّتِنْکِ؞ مَوْطٛ مَوْٻٜ اَرْدِيٻٜ دِينَ اٜ وٛنْدُٻٜ اٜ مَاکٛ نٛدِّ کَوْتَلْ مَوْٻٜ اٜ اَرْدِيٻٜ يَحُودَنْکٛعٜنْ فُو؞ ٻٜ مبِعِ طُمْ وُرْتِنٛيَ لِلَاٻٜ ٻٜنْ دَغَ ندٜرْ سُودُ شُرَلْ، ٻٜ نغَدّٜىٰ؞ 
اَمَّا ندٜ تَادِيٻٜ نجَحِ، ٻٜ تَوَايِ لِلَاٻٜ ٻٜنْ ندٜرْ سُودُ ندُنْ؞ سٜيْ ٻٜ شٛعِّي، ٻٜ مبِعِ مَوْٻٜ ٻٜنْ، 
‏«‏مِنْ تَوِي سُودُ شُرَلْ ندُنْ اٜ مَٻِّي، تَادِيٻٜ اٜ ندَرِي اٜ ندٜىٰنَ دَمُّطٜ طٜنْ، اَمَّا ندٜ مِنْ مَٻِّتِ، مِنْ تَوَايِ کٛو غٛعٛتٛ ندٜرْ مَٻّٜ!‏»‏ 
ندٜ مَوْطٛ تَادِيٻٜ وُرٛ شٜنِينغٛ اٜ مَوْٻٜ اَرْدِيٻٜ دِينَ نَنِ نٛنْ، طُمْ وَنِّيٻٜ، ٻٜ اَنْدَا نٛ فِي طُمْ وَرْتَتَ؞ 
سٜيْ غٛطّٛ وَرِ، وِعِٻٜ، ‏«‏يِمْٻٜ ٻٜ مَٻُّطٛنْ ندٜرْ سُودُ شُرَلْ اٜ ٻٜ تٛنْ ندٜرْ وُرٛ شٜنِينغٛ اٜ ٻٜ نغَعَجِنَنَ يِمْٻٜ!‏»‏ 
ندٜنْ مَوْطٛ تَادِيٻٜ اٛنْ يَادِ اٜ تَادِيٻٜ، ٻٜ نغَدِّ لِلَاٻٜ ٻٜنْ؞ اَمَّا ٻٜ نغَدِّرَايِٻٜ اٜ سٜمْبٜ، نغَمْ اٜ ٻٜ کُلَ تٛ يِمْٻٜ کُبٛرٛوٻٜ اٜ کَاپٜ؞ 
ندٜ ٻٜ نغَدِّٻٜ، ٻٜ ندَرْنِٻٜ يٜىٰسٛ کَوْتَلْ مَوْٻٜ؞ مَوْطٛ مَوْٻٜ اَرْدِيٻٜ دِينَ پَمْتِٻٜ، 
وِعِ، ‏«‏مِنْ کَطِيعٛنْ اٜکِّتِنْکِ دٛوْ اِنْدٜ يٜىٰسُ، اَمَّا اٛنْ شَنْکِتِي وَعَجُ مٛوطٛنْ ندٜرْ اُرُشَلِيمَ فُو؞ کَدِمَا اٛنْ نغِطِ يٛوَنْکِمِنْ حَکّٜ پِيپَمْ وَرُکِمٛ؞»‏ 
بِيتُرُسْ اٜ لِلَاٻٜ نٛوتِي، مبِعِ، ‏«‏دٛولٜ مِنْ تٛکَّ کٛ اَللَّه وِعِ، نَاع کٛ يِمْٻٜ مبِعِ؞ 
اَللَّه مٛ مَامَعٜنْ مٜىٰطٜنْ اُمِّنِي يٜىٰسُ دَغَ مَيْدٜ، غَطَ اٛنْ مبَرِيمٛ دٛوْ غَافَانغَلْ؞ 
اَللَّه حٛکِّيمٛ مَنْغُ، جٛعِّنِيمٛ اٜ جُنْغٛ مُوطُمْ ݧَامٛ، وَرْتِرِيمٛ لَامِيطٛ اٜ کِسْنٛووٛ، نغَمْ يِمْٻٜ اِسْرَاعِيلَ تُوبَ، ٻٜ کٜٻَ يَافَنٜىٰکِ حَکّٜ مَٻّٜ؞ 
مِنٛنْ نغٛنِ شٜيْدِيٻٜ فِي طُعُمْ، مِنٛنْ اٜ رُوحُ اَللَّه طُمْ اَللَّه حٛکِّ يِمْٻٜ غَطٛوٻٜ کٛ اٛ وِعِ؞»‏ 
ندٜ مَوْٻٜ ٻٜنْ نَنِ نٛنْ، ٻٜرْطٜ مَٻّٜ مٜتِّ نَاع سٜطَّ، ٻٜ نغِطِي ٻٜ مبَرَ لِلَاٻٜ ٻٜنْ؞ 
اَمَّا غٛطّٛ بِعٜتٜىٰطٛ غَمَالِيَ اُمِّي دَرِي شَکَ کَوْتَلْ مَوْٻٜ؞ کَنْکٛ اٛ فَارِسَنْکٜىٰجٛ اٛ مٛودِبّٛ اَتَّوْرَ، يِمْٻٜ فُو اٜ کٛکَّمٛ مَنْغُ؞ اٛ وِعِ طُمْ وُرْتِنَ لِلَاٻٜ ٻٜنْ يَاسِ شَرٜلْ سٜطَّ؞ 
غَطَ ٻٜ مبُرْتِنَامَ، اٛ وِعِ کَوْتَلْ نغَلْ، ‏«‏اٛنٛنْ بَنْدِرَاٻٜ اَمْ اِسْرَاعِيلَنْکٛعٜنْ، ندٜىٰنٜىٰ کٛعٜ مٛوطٛنْ دٛوْ کٛ نغِطّٛنْ وَطَنْکِ يِمْٻٜ ٻٜعٜ؞ 
کٛ نٜىٰٻَايِ غٛطّٛ بِعٜتٜىٰطٛ تُدَسْ وَنْغِي؞ اٛ حٛشِّي حٛورٜ مَاکٛ بٛ اٛ مَوْطٛ؞ يِمْٻٜ کٛ وَطِ 400 تٛکِّمٛ؞ تٛو، اٛ وَرَامَ، تٛکُّنٛوٻٜمٛ فُو شَنْکِتَکٜ، وَلَا کٛو غٛعٛتٛ دَرِيطٛ؞ 
غَطَ مَاکٛ، يَحُودَ غَلِلَنْکٜىٰجٛ وَرِي شَرٜلْ کٛ غٛمْنَتِ لِمَتَ يِمْٻٜ، يِمْٻٜ طُطْٻٜ تٛکِّيمٛ؞ کَنْکٛ مَا اٛ وَرَامَ، تٛکُّٻٜمٛ فُو شَنْکِتَکٜ؞ 
جٛونِ، اٜ مِ وِعَعٛنْ، نغٛطِّتٜىٰ يِمْٻٜ ٻٜعٜ، اَلٜىٰٻٜ؞ نغَمْ تٛ ݧُمٛوجِ مَٻّٜ اٜ کُوغَلْ مَٻّٜ پِوِي تٛ يِمْٻٜ، طُمْ لَلَّيْ؞ 
اَمَّا تٛ طُمْ پِوٛيِي تٛ اَللَّه، ندٜنْ کَمْ اٛنْ مبَاوَتَا سَنْکُتُکِطُمْ؞ ڤَامٜىٰ تٛع کَٻْدٛنْ اٜ اَللَّه!‏»‏ 
مَوْٻٜ ٻٜنْ نجَٻِ کٛ اٛ وِعِ؞ ٻٜ نٛدِّتِ لِلَاٻٜ ٻٜنْ، ٻٜ ڤِيِٻٜ، ٻٜ مبِعِٻٜ تٛع ٻٜ ٻٜيْدَ مٜتُکِ دٛوْ اِنْدٜ يٜىٰسُ؞ ندٜنْ ٻٜ نجٛوفِٻٜ؞ 
لِلَاٻٜ ٻٜنْ مبُرْتٛيِي ندٜرْ کَوْتَلْ مَوْٻٜ اٜ وٜلْوٜلٛ نغَمْ اَللَّه مَوْنِنِيٻٜ حَا ٻٜ کٜوْتِي سٜمْتِنٜىٰکِ نغَمْ يٜىٰسُ؞ 
کٛو ندٜيٜ ݧَلْندٜ اٜ ٻٜ نغَعَجِنَ حَبَرُ بٜلْطُمْ وِعُکِ يٜىٰسُ وٛنِ اَلْمَسِيحُ، اٜ ٻٜ اٜکِّتِنَ ندٜرْ وُرٛ شٜنِينغٛ اٜ ندٜرْ غُرٜ فُو؞ 
