﻿کُوطٜ لِلَاٻٜ.
1.
يَا تِيٛوفِلُسْ مَوْطٛ، ندٜرْ دٜفْتٜرٜ اَمْ اَرَنْدٜىٰرٜ، مِ وِنْدِينٛ دٛوْ کٛو طُمٜ کٛ يٜىٰسُ وَطِ اٜ کٛ اٛ اٜکِّتِنِ، 
حَا يَاکِ ݧَلْندٜ ندٜ اٛ حٛشَّا يَاکِ دٛوْ؞ کٛ اٛ حٛشّٜىٰ يَاکِ دٛوْ، اٛ اٜکِّتِنِي لِلَاٻٜ ٻٜ اٛ سُٻِ ندٜرْ بَوْطٜ رُوحُ اَللَّه؞ 
غَطَ اٛ تٛرَّامَ اٛ وَرَامَ، اٛ اُمِّي دَغَ مَيْدٜ اٛ وَنْغَنِٻٜ؞ اٜ طَتٜ طُطّٜ اٛ حٛلِّٻٜ اٜ مٛ فٛوفَ؞ اٛ وَطِي بَلْطٜ 40 اٜ مٛ وَنْغَنَٻٜ، اٜ مٛ اٜکِّتِنَٻٜ دٛوْ لَامُ اَللَّه؞ 
شَرٜلْ کٛ اٛ وٛنْدِ اٜ مَٻّٜ، اٛ وِعِٻٜ، ‏«‏تٛع اٛنْ اَلُ اُرُشَلِيمَ، اَمَّا کٜطٜىٰ نَا ݧَاکٛ مٜىٰطٜنْ مٛ دٛوْ حٜبِّنِي اَلْکَوَلْ نغَلْ اٛ وَطَنِعٛنْ نغَلْ مبِيمِعٛنْ؞ کَنْغَلْ وٛنِ حٛکُّکِعٛنْ رُوحُ مَاکٛ؞ 
يَحَيَ وَطَنِي يِمْٻٜ بَڤْتِسْمَ اٜ ندِيَمْ، اَمَّا ندٜرْ بَلْطٜ سٜطَّ، اٛنٛنْ اَللَّه وَطِرَنَيْعٛنْ بَڤْتِسْمَ اٜ رُوحُ مَاکٛ؞»‏ 
ندٜ تٛکُّٻٜمٛ فُو کَوْرِتِ، سٜيْ ٻٜ پَمِمٛ، ٻٜ مبِعِ، ‏«‏جٛومِرَاوٛ، جٛونِ نغَرْتِرَنْتَا اِسْرَاعِيلَ لَامُ؟»‏ 
اَمَّا يٜىٰسُ وِعِٻٜ، ‏«‏اَنْدُکِ شَرٜلْ اٜ جَامَنُوجِ طِ ݧَاکٛ مٜىٰطٜنْ مٛ دٛوْ سِرْيِي ندٜرْ لَامُ مُوطُمْ نَاع اُمْ طُمْ مٛوطٛنْ؞ 
اَمَّا تٛ رُوحُ اَللَّه جِڤّٛيَکٜ دٛوْ مٛوطٛنْ، اٛنْ کٜٻَيْ بَوْطٜ، اٛنْ نغَرْتَيْ کٛکَّيْٻٜ وٛٻّٜ حَبَرُ اَمْ ندٜرْ اُرُشَلِيمَ، اٜ لٜيْدِ يَحُودِيَ فُو، اٜ لٜيْدِ سَمَارِيَ، حَا کٜىٰرٛلْ دُونِيَارُ؞»‏ 
غَطَ اٛ وِعِي نٛنْ، اٛ حٛشَّا يَاکِ دٛوْ؞ اٜ ٻٜ ندَارَمٛ حَا دُولٜ شُدِّمٛ؞ 
اٜ ٻٜ تِجِّي اٜ ٻٜ ندَارَمٛ اٜ مٛ فَعِ دٛوْ، سٜيْ رَا وٛرْٻٜ طِطٛ ٻٜ کٛلْتٜ دَنٜىٰجٜ مبَنْغِي حَادٜ مَٻّٜ اٜ ندَرِي؞ 
وٛرْٻٜ ٻٜنْ مبِعِٻٜ، ‏«‏اٛنٛنْ يِمْٻٜ غَلِيلِ، نغَمْ طُمٜ ندَرِيطٛنْ طٛعٛ اٛنْ ندَارَ دٛوْ؟ يٜىٰسُ اٛنْ طٛنْ کٛشَّاطٛ ندٜرْ مٛوطٛنْ يَاکِ دٛوْ، اٛ سٛعّٛيْتٛ نٛنْ نٛ نغِيرُطٛنْ اٛ حٛشِّرَامَ دٛوْ؞»‏ 
سٜيْ ٻٜ نجِڤّٛيِي دَغَ دٛوْ حٛشّٜىٰرٜ ندٜ لٜطّٜ جَيْتُنْ، ٻٜ کٛوتِ اُرُشَلِيمَ؞ حَکُّندٜ حٛشّٜىٰرٜ ندٜنْ اٜ اُرُشَلِيمَ طُمْ ٻُرَايِ مِلْ غٛعٛ؞ 
ندٜ ٻٜ نَتِّ غَرِيرِ ندِنْ، ٻٜ پٜنْتِ سُودُ دٛوْ تٛ ٻٜ کَوْرِتَتَ؞ لِلَاٻٜ ٻٜنْ نغٛنِ:‏ بِيتُرُسْ، اٜ يَحَيَ، اٜ يَاکُبُ، اٜ اَنْدِرَاوُسْ، اٜ فِلِبُسْ، اٜ تٛومَ، اٜ بَتِلٛومِ، اٜ مَاتِيُ، اٜ يَاکُبُ ٻِي حَلْفَ، اٜ سِيمَنْ جَلٛوتِ 
ٻٜ فُو، اٜ ٻٜ کَوْرِتَ ٻٜ نغَطَ دٛعَارٜ اٜ ٻٜرْندٜ غٛعٛ، کَمْٻٜ اٜ مَرْيَامَ مَدُوجٛ يٜىٰسُ اٜ مِݧِرَاٻٜ يٜىٰسُ وٛرْٻٜ، اٜ وٛٻّٜ رٜوْٻٜ طٛنْمَا؞ 
ندٜرْ بَلْطٜ طٜنْ، کَوْتَلْ کٛولِيٻٜ يٜىٰسُ يَارِي يِمْٻٜ 120؞ سٜيْ بِيتُرُسْ اُمِّي، دَرِي يٜىٰسٛ مَٻّٜ، وِعِ، 
‏«‏بَنْدِرَاٻٜ، رُوحُ اَللَّه مٜتِينٛ دَغَ حٛنْدُکٛ دَوْدَ دٛوْ يَحُودَ، کٛلُّطٛ نَنْغٛوٻٜ يٜىٰسُ لَاوٛلْ نٛ نَنْغِرْتَمٛ؞ دٛولٜ اَايَاجٜ طٜنْ کٜىٰوَ؞ 
يَحُودَ اٛ کُودَيْنٛوطٛ اٜ مٜىٰطٜنْ ندٜرْ کُوغَلْ جٛومِرَاوٛ؞»‏ 
﴿اٛ سٛودِ نغٜسَ اٜ شٜىٰدٜ طٜ اٛ يٛٻَا نغَمْ کُوغَلْ کَلُّنغَلْ نغَلْ اٛ وَطِ، اٛ يَنِ ندٜرْ مَاکَ، رٜىٰدُ مَاکٛ ڤُسِ، تٜتٜکِّ مَاکٛ فُو ندُفِ اٜ لٜيْدِ، اٛ مَايِ؞ 
يِمْٻٜ اُرُشَلِيمَ فُو نَنِي حَبَرُ طُمْ؞ کَنْجُمْ وَطِ ٻٜ نٛدِّرِ نغٜسَ کَنْ ندٜرْ طٜمْنغَلْ مَٻّٜ اَکٜلْدَمَ وَاتٛ ‏«‏نغٜسَ پِيپَمْ؞»‏﴾ 
‏«‏نغَمْ طُمْ وِنْدَامَ ندٜرْ دٜفْتٜرٜ جَبُورَ دٛوْ مَاکٛ وِعُکِ، ‏‹‏اَلْ وُرٛ مَاکٛ وَرْتَ وِنْدٜ، تٛع کٛو مٛيٜ جٛوطٛو ندٜرْ مَاغٛ؞›‏ کَدِمَا وٛنْدٜ اَايَارٜ وِعِي، ‏‹‏اَلْ غٛطّٛ حٛشَّ کُوغَلْ اَرْدَارٜ مَاکٛ؞›‏ 
‏«‏اٜ حَانِ شُٻٜنْ غٛعٛتٛ دَغَ ندٜرْ غٛنْدُنٛوٻٜ اٜ مٜىٰطٜنْ شَرٜلْ کٛ يٜىٰسُ جٛومِرَاوٛ وٛنْدِ اٜ مٜىٰطٜنْ دَغَ شَرٜلْ کٛ يَحَيَ وَطَنِ يِمْٻٜ بَڤْتِسْمَ يَاکِ ݧَلْندٜ ندٜ يٜىٰسُ حٛشَّا ندٜرْ مٜىٰطٜنْ، نغَمْ اٛ وَرْتَ کٛکِّدٛووٛ حَبَرُ اُمَّاکِ يٜىٰسُ اٜ مٜىٰطٜنْ؞»‏ 
دَغَ طٛنْ، سٜيْ ٻٜ ندَرْنِ وٛرْٻٜ طِطٛ:‏ مَاتِيَسْ اٜ يُسُفُ بَرْسَبَ بِعٜتٜىٰطٛ جُسْتُسْ؞ 
ٻٜ نغَطِ دٛعَارٜ، ٻٜ مبِعِ، ‏«‏جٛومِرَاوٛ، اَنْ اَنْدُطٛ ٻٜرْطٜ يِمْٻٜ فُو، حٛلُّمِنْ مٛ شُٻُطَا دَغَ ندٜرْ يِمْٻٜ طِطٛ ٻٜعٜ، 
نغَمْ اٛ حُوَ کُوغَلْ لِلَاٻٜ نغَلْ يَحُودَ اَلِ؞ نغَمْ يَحُودَ يَحِي وِغٜىٰرٜ تٛ حَانَنِمٛ؞»‏ 
سٜيْ ٻٜ نغَطِ شُٻٛلْ حَکُّندٜ يِمْٻٜ طِطٛ ٻٜنْ؞ شُٻَاطٛ اٛنْ وٛنِ مَاتِيَسْ؞ اٛ نَتِّنَا ندٜرْ لِلَاٻٜ سَڤّٛ اٜ غٛعٛ ٻٜنْ؞ 
