﻿يَحَيَ.
21.
غَطَ فُو فِي طُعُمْ يٜىٰسُ فُطِّتِ وَنْغَنِ تٛکُّٻٜمٛ تٛ دَاندٜ مبٜىٰلَ تِبَارِيَ؞ رَا نٛ اٛ وَنْغِنِرِ حٛورٜ مَاکٛ؞ 
سِيمَنْ بِيتُرُسْ، اٜ تٛومَ بِعٜتٜىٰطٛ شِوْتَاطٛ، اٜ نَتَانِيَلْ پِوٛيْطٛ کَانَ ندٜرْ لٜيْدِ غَلِيلِ، اٜ ٻِٻّٜ جَبَدِ، اٜ وٛٻّٜ تٛکُّٻٜ يٜىٰسُ طِطٛ ٻٜ فُو اٜ ٻٜ کَوْرِتِ؞ 
سٜيْ سِيمَنْ بِيتُرُسْ وِعِ حٛرِيٻٜ، ‏«‏مِ يَحَيْ نَنْغٛيْکِ لِپِّ؞»‏ ٻٜ مبِعِمٛ، ‏«‏مِنْ نجَادَيْ اٜ مَاطَ؞»‏ سٜيْ ٻٜ نجَحِ ٻٜ نَتِّ کٛمِوَلْ، اَمَّا ندٜنْ طٛنْ جٜمَّارٜ وَلَا کٛ ٻٜ نَنْغِ؞ 
نَانغٜ اٜ وُرْتٛيٛو، سٜيْ يٜىٰسُ دَرِي دَاندٜ مبٜىٰلَ نغَنْ، اَمَّا ٻٜ اَنْدَا طُمْ کَنْکٛ؞ 
سٜيْ يٜىٰسُ وِعِٻٜ، ‏«‏بَنْدِرَاٻٜ، اٛنْ نغٛودِ لِپِّ؟»‏ ٻٜ مبِعِمٛ، ‏«‏مِنْ نغَلَا؞»‏ 
اٛ وِعِٻٜ، ‏«‏نغَطٜىٰ نَنْغِرْطُمْ لِپِّ مٛوطٛنْ تٛ ݧَامٛ کٛمِوَلْ مٛوطٛنْ، اٛنْ نَنْغَيْ لِپِّ؞»‏ ندٜ ٻٜ نغَطِ نٛنْ، ٻٜ مبَاوَايِ نَتِّنْکِ نَنْغِرْطُمْ لِپِّ طُمْ ندٜرْ کٛمِوَلْ نغَلْ، نغَمْ لِپِّ طُطِّ؞ 
سٜيْ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ، وِعِ بِيتُرُسْ، ‏«‏طُمْ جٛومِرَاوٛ؞»‏ ندٜ بِيتُرُسْ نَنِ طُمْ جٛومِرَاوٛ، اٛ تَادِي تٛغّٛورٜ مَاکٛ نغَمْ اٛ ٻٛرْتَکٜنٛ نغَمْ کُوغَلْ، اٛ دِوِ ندٜرْ ندِيَمْ؞ 
تٛکُّٻٜ يٜىٰسُ حٛرِيٻٜ ندَرِي ندٜرْ کٛمِوَلْ نغَلْ، اٜ ٻٜ ڤٛوطَ نَنْغِرْطُمْ لِپِّ طُمْ اٜ طُمْ حٜىٰوِ لِپِّ، نغَمْ اٜ ٻٜ حَادٜ دَاندٜ مبٜىٰلَ نغَنْ کٛ وَطَتَ جَاٻَنْطٜ 300؞ 
ندٜ ٻٜ نجٛتِّي تٛ دَاندٜ ندِيَمْ، ٻٜ نغِعِ دٛشّٜ حِيتٜ اٜ لِپِّ دٛوْ مَاجٜ اٜ بُرٛودِ؞ 
يٜىٰسُ وِعِٻٜ، ‏«‏نغَدّٜىٰ غٛطِّ لِپِّ طِ نَنْغُطٛنْ جٛونِ؞»‏ 
سٜيْ سِيمَنْ بِيتُرُسْ نَتِّي ندٜرْ کٛمِوَلْ نغَلْ، اٛ فٛوطِ نَنْغِرْطُمْ لِپِّ طُمْ يَاکِ تٛ نجَارٜىٰندِ اٜ طُمْ حٜىٰوِ لِپِّ 351 مَوْطِ؞ کٛو ندٜ اٜ طِ طُوطِ، نَنْغِرْطُمْ طُمْ سٜىٰکَايِ؞ 
يٜىٰسُ وِعِٻٜ، ‏«‏نغَرٜىٰ، نغٜوٛنْ کٛوپٜ؞»‏ وَلَا غٛطّٛ ندٜرْ تٛکُّٻٜمٛ غَطّٛ سٜمْبٜ ٻٜرْندٜ پَمَمٛ، ‏«‏اَنْ اَ مٛيٜ؟»‏ نغَمْ اٜ ٻٜ اَنْدِ طُمْ جٛومِرَاوٛ؞ 
يٜىٰسُ حٛشِّ بُرٛودِ طُمْ، حٛکِّٻٜطُمْ، کَدِنْ اٛ حٛشِّ لِپِّ طِنْ، اٛ حٛکِّٻٜطِ؞ 
طُعُمْ کَنْجُمْ وٛنِ تَتَٻُمْ يٜىٰسُ اٜ وَنْغَنَ تٛکُّٻٜمٛ غَطَ اٛ اُمِّنَامَ دَغَ مَيْدٜ؞ 
غَطَ ٻٜ نجٛتِّنِي ݧَامُکِ، يٜىٰسُ پَمِ سِيمَنْ بِيتُرُسْ وِعِ، ‏«‏سِيمَنْ ٻِي يَحَيَ، اَ ٻُرِي حٛرِيٻٜ ٻٜعٜ يِطُکِيَمْ؟»‏ بِيتُرُسْ وِعِ، ‏«‏اٜىٰ، جٛومِرَاوٛ، اَ اَنْدِ اٜ مِ يِطُمَا؞»‏ يٜىٰسُ وِعِمٛ، ‏«‏دُرُ بَالِ اَمْ؞»‏ 
يٜىٰسُ فُطِّتِ پَمِمٛ طِطَٻُمْ وِعِ، ‏«‏سِيمَنْ ٻِي يَحَيَ، اَ يِطِيَمْ؟»‏ اٛ وِعِ، ‏«‏اٜىٰ، جٛومِرَاوٛ، اَ اَنْدِ اٜ مِ يِطُمَا؞»‏ يٜىٰسُ وِعِمٛ، ‏«‏فَامَنْ بَالِ اَمْ؞»‏ 
يٜىٰسُ پَمِمٛ تَتَٻُمْ وِعِ، ‏«‏سِيمَنْ، ٻِي يَحَيَ، اَ يِطِيَمْ؟»‏ بِيتُرُسْ وَنِّ نغَمْ يٜىٰسُ پَمِمٛ تَتَٻُمْ، ‏«‏اَ يِطِيَمْ؟»‏ نغَمْ نٛنْ اٛ وِعِمٛ، ‏«‏جٛومِرَاوٛ، اَ اَنْدِ کٛو طُمٜ؞ اَ اَنْدِ اٜ مِ يِطُمَا؞»‏ يٜىٰسُ وِعِمٛ، ‏«‏دُرُ بَالِ اَمْ؞ 
اٜ مِ وِعُمَا غٛونغَ، کٛ نغٛنّٛطَا سُکَ اَ ٻٛرْنَ حٛورٜ مَاطَ نجَحَا تٛ نغِطَّا؞ اَمَّا تَا نَوْيِي، اَ فٛرْتَيْ جُوطٜ مَاطَ غٛطّٛ ٻٛرْنُمَا اٛ يَارُمَا وِغٜىٰرٜ ندٜ اَ يِطَا يَاکِ؞»‏ 
يٜىٰسُ وِعُ طُعُمْ نغَمْ حٛلَّ اِرِ مَيْدٜ ندٜ بِيتُرُسْ وَطَتَ نغَمْ مَوْنِنْکِ اَللَّه؞ سٜيْ يٜىٰسُ وِعِمٛ، ‏«‏تٛکَّمْ؞»‏ 
بِيتُرُسْ وَيْلِتِي يِعِ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ اٜ تٛکِّٻٜ؞ کَنْکٛ وٛنِ اٛنْ طٛنْ جٛوطِيطٛ حَادٜ يٜىٰسُ کٛ ٻٜ ݧَامِ کِرْتَارِ، بِيطٛ، ‏«‏مٛودِبّٛ، طُمْ مٛيٜ حٛکِّتِرْتَمَ؟»‏ 
ندٜ بِيتُرُسْ يِعِمٛ، پَمِ يٜىٰسُ وِعِ، ‏«‏جٛومِرَاوٛ، طُمٜ حٜٻَتَمٛ؟»‏ 
يٜىٰسُ وِعِمٛ، ‏«‏تٛ اٜ مِ يِطِ اٛ جٛوطٛدٛو اٜ يٛنْکِ نَا شَرٜلْ نغٜلْ نغَرْتٛيْمِ، کٛ وَنُّمَا؟ اَنْ نِ، تٛکَّمْ؞»‏ 
نغَمْ يٜىٰسُ وِعِ نٛنْ، سٜيْ حَبَرُ سَنْکِتِي ندٜرْ تٛکُّٻٜمٛ وِيکِ اٛعٛ تٛکُّطٛ يٜىٰسُ اٛ مَايَتَا؞ اَمَّا يٜىٰسُ وِعَايِ اٛ مَايَتَا؞ کٛ اٛ وِعِ وٛنِ، ‏«‏تٛ اٜ مِ يِطِ اٛ جٛوطٛدٛو اٜ يٛنْکِ نَا شَرٜلْ نغٜلْ نغَرْتٛيْمِ، کٛ وَنُّمَا؟»‏ 
اٛعٛ وٛنِ اٛنْ طٛنْ تٛکُّطٛ يٜىٰسُ اٜ مٛ حٛکَّ شٜيْدَ دٛوْ فُو فِي طُعُمْ ندٜنْ اٛ وِنْدِيطُمْ؞ اٜنْ اَنْدِ بٛو شٜيْدَ مَاکٛ طُمْ غٛونغَ؞ 
کَدِنْ اٜ وٛودِ فِي طُطُّمْ طُمْ يٜىٰسُ وَطِ؞ تٛ طُمْ وِنْدَامَ طُمْ فُو غٛعٛ اٜ غٛعٛ، اٜ مِ ݧُمَ فُو دُونِيَارُ وَلَا نجَيْرِ تٛ طُمْ رٜسَتَ دٜفْتٜ بِنْدٜتٜىٰطٜ؞
