﻿يَحَيَ.
19.
سٜيْ بِلَاتُسْ وَطِ يٜىٰسُ فِيَا لٛوشِ؞ 
سٛوجِعٜنْ مبَالِ غِيفٛلْ غِعٜ، ٻٜ تَارَنِمٛنغٛلْ تٛ حٛورٜ، ندٜنْ ٻٜ ٻٛرْنِمٛ اِرِ تٛغّٛورٜ لَامِيٻٜ؞ 
ٻٜ نغَطِ کَ يَاکِ يٜىٰسٛ مَاکٛ، اٜ ٻٜ مبِعَ، ‏«‏اَللَّه رٜىٰنٜ، لَامِيطٛ يَحُودَنْکٛعٜنْ!‏»‏ ندٜنْ اٜ ٻٜ ڤِيَمٛ تٛ يٜىٰسٛ؞ 
بِلَاتُسْ فُطِّتِ وُرْتِي يَاسِ وِعِ يَحُودَنْکٛعٜنْ، ‏«‏ندَارٜىٰ، مِ وُرْتِنَنَيْعٛنْ مٛ طٛعٛ نغَمْ اَنْدٛنْ مِ تَوْرَايِمٛ غٛطُّمْ کَلُّطُمْ؞»‏ 
ندٜ يٜىٰسُ وُرْتِنَا اٜ تَارَنَا غِيفٛلْ غِعٜ تٛ حٛورٜ ندٜنْ اٜ ٻٛرْنِي تٛغّٛورٜ اِرِ ندٜ لَامِيٻٜ، سٜيْ بِلَاتُسْ وِعِٻٜ، ‏«‏رَا نٜطّٛ اٛنْ؞»‏ 
ندٜ مَوْٻٜ اَرْدِيٻٜ دِينَ اٜ تَادِيٻٜ وُرٛ شٜنِينغٛ نغِعِمٛ، ٻٜ مبِعِ اٜ سٜمْبٜ، ‏«‏وَرُمٛ!‏ وَرُمٛ دٛوْ غَافَانغَلْ!‏»‏ اَمَّا بِلَاتُسْ وِعِٻٜ، ‏«‏اٛنٛنْ کٛشّٜىٰمٛ مبَرٛنْمٛ؞ مِنْ مِ تَوْرَايِمٛ غٛطُّمْ کَلُّطُمْ؞»‏ 
سٜيْ يَحُودَنْکٛعٜنْ مبِعِمٛ، ‏«‏اٜ مِنْ نغٛودِ دٛوکَ، کَدِنْ نٛنْ نٛ دٛوکَ طُمْ وِعِ دٛولٜ اٛ وَرٜىٰ، نغَمْ اٜ مٛ وِعَ کَنْکٛ وٛنِ ٻِطّٛ اَللَّه؞»‏ 
ندٜ بِلَاتُسْ نَنِ نٛنْ، سٜيْ کُلٛلْ ٻٜيْدِ نَنْغُکِمٛ؞ 
سٜيْ اٛ سٛعِّي ندٜرْ لَامٛرْدٜ اٛ پَمِ يٜىٰسُ اٛ وِعِ، ‏«‏تٛيٜ پِوٛيْطَا؟»‏ اَمَّا يٜىٰسُ نٛوتَاکِمٛ؞ 
بِلَاتُسْ وِعِمٛ، ‏«‏اَ وَݧُ مٜتَنْکِيَمْ؟ اَ اَنْدَا اٜ مِ وٛودِ لَامُ مِ يٛوفُمَا، کَدِنْ اٜ مِ وٛودِ لَامُ مِ وَطَ طُمْ وَرُمَا دٛوْ غَافَانغَلْ؟»‏ 
يٜىٰسُ نٛوتِي وِعِ، ‏«‏اَ وَلَا لَامُ دٛوْ اَمْ تٛ نَاع جٛومِرَاوٛ حٛکُّمَا؞ نغَمْ نٛنْ، نٜطّٛ غَطُطٛيَمْ ندٜرْ جُنْغٛ مَاطَ وَطِي حَکّٜ ٻُرْطُمْ حَلُّکِ؞»‏ 
ندٜ بِلَاتُسْ نَنِ نٛنْ، اٛ طَٻِّتِ لَاوٛلْ نٛ اٛ يٛوفِرْتَ يٜىٰسُ، اَمَّا يَحُودَنْکٛعٜنْ نغَطِ کَ وِيکِ اٜ سٜمْبٜ، ‏«‏تَا يٛوفِي نٜطّٛ اٛعٛ، نَاع اَ حِغٛ کَيْسَرْ!‏ فُو نٛدِّرٛووٛ حٛورٜ مُوطُمْ لَامِيطٛ اٛ غَݧٛ کَيْسَرْ!‏»‏ 
ندٜ بِلَاتُسْ نَنِ حَالَ کَعَ، اٛ وُرْتِنِ يٜىٰسُ، اٛ جٛوطِي دٛوْ جٛوطٛرْغَلْ کِيتَ تٛ وِغٜىٰرٜ بِعٜتٜىٰندٜ ‏«‏حَيْرٜ شٜحَاندٜ؞»‏ ندٜرْ اِبْرَانِيَنْکٛورٜ وِغٜىٰرٜ ندٜنْ اٜ نٛدِّرٜىٰ غَبَّاتَ؞ 
اٜ شَرٜلْ نغٜلْ طُمْ شَکَ ݧَلَوْمَ ݧَلْندٜ سِرْيَاکِ حُمْتٛ سَکِّنْکِ؞ بِلَاتُسْ وِعِ يَحُودَنْکٛعٜنْ ٻٜنْ، ‏«‏رَا لَامِيطٛ مٛوطٛنْ؞»‏ 
ٻٜ مبِعِ بِلَاتُسْ اٜ سٜمْبٜ، ‏«‏وَرُمٛ!‏ وَرُمٛ دٛوْ غَافَانغَلْ!‏»‏ بِلَاتُسْ وِعِٻٜ، ‏«‏اٛنْ نغِطِ مِ وَرَ لَامِيطٛ مٛوطٛنْ دٛوْ غَافَانغَلْ؟»‏ سٜيْ مَوْٻٜ اَرْدِيٻٜ دِينَ نٛوتِي مبِعِ، ‏«‏مِنْ نغَلَا غٛطّٛ لَامِيطٛ سٜيْ کَيْسَرْ!‏»‏ 
سٜيْ بِلَاتُسْ وَطِ يٜىٰسُ ندٜرْ جُوطٜ مَٻّٜ نغَمْ ٻٜ مبَرَمٛ دٛوْ غَافَانغَلْ؞ 
سٜيْ ٻٜ ندِلِّدِ اٜ يٜىٰسُ، اٜ مٛ وَکِّي غَافَانغَلْ مَاکٛ اٜ حٛورٜ مَاکٛ؞ ٻٜ مبُرْتِي يَاسِ غَرِيرِ يَاکِ وِغٜىٰرٜ بِعٜتٜىٰندٜ وِغٜىٰرٜ پِپَلْ حٛورٜ؞ ندٜرْ اِبْرَانِيَنْکٛورٜ وِغٜىٰرٜ ندٜنْ اٜ نٛدِّرٜىٰ غٛلْغٛوتَ؞ 
تٛ وِغٜىٰرٜ ندٜنْ ٻٜ ڤِيَنِ يٜىٰسُ کُوسَاجٜ دٛوْ غَافَانغَلْ حَوْتِ اٜ يِمْٻٜ طِطٛ؞ ٻٜ ٻِلِ غٛعٛتٛ اٜ غَافَانغَلْ جُنْغٛ يٜىٰسُ ݧَامٛ، ندٜنْ غٛعٛتٛ اٜ غَافَانغَلْ جُنْغٛ يٜىٰسُ نَنٛ، يٜىٰسُ اٜ شَکَ مَٻّٜ؞ 
بِلَاتُسْ وِنْدِ دٛوْ اَلّٛوَلْ اٛ وَطِ طُمْ تَکِّنغَلْ حٛورٜ غَافَانغَلْ يٜىٰسُ؞ کٛ اٛ وِنْدِ وٛنِ، ‏«‏يٜىٰسُ نَجَرَنْکٜىٰجٛ لَامِيطٛ يَحُودَنْکٛعٜنْ؞»‏ 
يَحُودَنْکٛعٜنْ طُطْٻٜ نجَنْغِ کٛ اٛ وِنْدِ، نغَمْ وِغٜىٰرٜ تٛ يٜىٰسُ وَرَا حَادٜ غَرِيرِ وٛنِ؞ کٛ اٛ وِنْدِ اٛ وِنْدُطُمْ ندٜرْ اِبْرَانِيَنْکٛورٜ، اٜ رٛومَنْکٛورٜ، اٜ حٜلٜنَنْکٛورٜ؞ 
مَوْٻٜ اَرْدِيٻٜ دِينَ مبِعِ بِلَاتُسْ، ‏«‏تَاع وِنْدُ ‏‹‏لَامِيطٛ يَحُودَنْکٛعٜنْ،›‏ اَمَّا وِنْدُ نٜطّٛ اٛعٛ وِعِي کَنْکٛ وٛنِ لَامِيطٛ يَحُودَنْکٛعٜنْ؞»‏ 
بِلَاتُسْ وِعِ، ‏«‏کٛ مبِنْدُمِ جٛوطَکٜ؞»‏ 
غَطَ سٛوجِعٜنْ ٻٜنْ ڤِيَنِي يٜىٰسُ کُوسَاجٜ دٛوْ غَافَانغَلْ، سٜيْ ٻٜ کٛشِّ کٛلْتٜ مَاکٛ، ٻٜ شٜنْدِطٜ شٜنْدٜ نَيِ، کٛو مٛيٜ سٛوجِيجٛ جٛغِي سٜنْدٜرٜ غٛعٛ؞ کَدِنْ ٻٜ کٛشِّ تٛغّٛورٜ مَاکٛ؞ تٛغّٛورٜ ندٜنْ ݧٛعَاکَ ندٜ سَݧَاندٜ دَغَ دٛوْ يَاکِ لٜيْ؞ 
سٛوجِعٜنْ ٻٜنْ مبِعِ حَکُّندٜ مَٻّٜ، ‏«‏تٛع اٜنْ شٜىٰکُندٜ، اٜنْ نغَطُ شَاشَ دٛوْ مَيْرٜ نغِعٜنْ مٛيٜ ݧَامَتَندٜ؞»‏ طُعُمْ وَطُ نغَمْ کٛ اَايَارٜ وِعِ حٜىٰوَ:‏ ‏«‏ٻٜ شٜنْدِي کٛلْتٜ اَمْ حَکُّندٜ مَٻّٜ؛ ٻٜ نغَادِي شَاشَ اٜ تٛغّٛورٜ اَمْ؞»‏ طُعُمْ کَنْجُمْ وٛنِ کٛ سٛوجِعٜنْ ٻٜنْ نغَطِ؞ 
دَرِيٻٜ حَادٜ غَافَانغَلْ يٜىٰسُ کَمْٻٜ نغٛنِ مَدُوجٛ مَاکٛ، اٜ سَکِرَاوٛ مَدُوجٛ مَاکٛ دٜبّٛ، اٜ مَرْيَامَ دٜبّٛ کِلٛوبَسْ، اٜ مَرْيَامَ پِوٛيْطٛ مَغَدَلَ؞ 
ندٜ يٜىٰسُ يِعِ مَدُوجٛ مُوطُمْ اٜ دَرِي طٛنْ اٜ تٛکُّطٛمٛ مٛ اٛ يِطِ نَاع سٜطَّ؞ سٜيْ اٛ وِعِ مَدُوجٛ مَاکٛ، ‏«‏رَا ٻِطّٛ مَاطَ؞»‏ 
ندٜنْ اٛ وِعِ اٛنْ طٛنْ تٛکُّطٛمٛ، ‏«‏رَا مَدُوجٛ مَاطَ؞»‏ دَغَ شَرٜلْ نغٜلْ تٛکُّطٛمٛ اٛنْ حٛشِّ مَرْيَامَ جٛوطِي تٛ وُرٛ مَاکٛ؞ 
غَطَ مَاجُمْ، يٜىٰسُ اٜ اَنْدِ کٛو طُمٜ يٛتِّنَامَ؞ نغَمْ کٛ اَايَارٜ وِعِ حٜىٰوَ، اٛ وِعِ، ‏«‏اٜ مِ نَنَ طٛنْکَ؞»‏ 
اٜ وٛودِ تُمُّدٜ طٛنْ اٜ ندٜ حٜىٰوِ ندِيَمْ اِنَبٛجَمْ لَمُّطَمْ؞ سٜيْ سٛوجِعٜنْ ٻٜنْ شُووِ سٛوسٛوَ ندٜرْ مَاجَمْ، ٻٜ طِيسِنغَ تٛ سَوْرُ حِسٛڤْ، ٻٜ پٜفْتِندُ يَاکِ حٛنْدُکٛ مَاکٛ؞ 
ندٜ يٜىٰسُ يَرِ ندِيَمْ اِنَبٛجَمْ طَمْ، اٛ وِعِ، ‏«‏طُمْ يٛتِّنَامَ؞»‏ سٜيْ اٛ تُرْنِ حٛورٜ مَاکٛ اٛ يٛوفِ يٛنْکِ مَاکٛ؞ 
طُمْ ݧَلْندٜ سِرْيَاکِ، ندٜنْ تٛ فِنِ طُمْ ݧَلْندٜ سِوْتَارٜ؞ نغَمْ اَرْدِيٻٜ يَحُودَنْکٛعٜنْ نغِطَا ٻَلِّ طِنْ اَلٜىٰ دٛوْ غَافَالٜ ݧَلْندٜ سِوْتَارٜ، سٜيْ ٻٜ تٛرِي بِلَاتُسْ وَطَ طُمْ يٜوَ کٛيْطٜ يٜىٰسُ اٜ کٛيْطٜ يِمْٻٜ طِطٛ ٻٜنْ، ندٜنْ ٻَلِّ طِنْ نجِڤِّنٜىٰ؞ 
نغَمْ نٛنْ سٛوجِعٜنْ ٻٜنْ نجَحِ تٛ غَافَالٜ طٜنْ؞ ٻٜ نغٜوِ کٛيْطٜ اَرَنْدٜىٰجٛ، ندٜنْ ٻٜ نغٜوِ کٛيْطٜ طِطَٻٛ اٛنْ؞ 
اَمَّا ندٜ ٻٜ نغَرِ تٛ يٜىٰسُ ٻٜ نغِعِ اٛ يَادَکٜ اٛ مَايِي، ٻٜ نغٜوَايِ کٛيْطٜ مَاکٛ؞ 
اَمَّا غٛعٛتٛ ندٜرْ سٛوجِعٜنْ ٻٜنْ يُوِرِ يٜىٰسُ لَبّٛ تٛ بٜشّٜ، طٛنْ اٜ طٛنْ پِيپَمْ اٜ ندِيَمْ وُرْتِي؞ 
غِيطٛ طُعُمْ شَرٜلْ کٛ طُمْ وَطِ، کَنْکٛ حٛکِّي شٜيْدَ دٛوْ مَاجُمْ، نغَمْ اٛنٛنْ مَا کٛولٛوطٛنْ؞ شٜيْدَ مَاکٛ بٛو طُمْ غٛونغَ، اٜ مٛ اَنْدِ غٛونغَ اٛ مٜتِ؞ 
طُعُمْ وَطُ نغَمْ کٛ اَايَارٜ وِعِ حٜىٰوَ، ‏«‏وَلَا پِپَلْ مَاکٛ غٜوٜتٜىٰنغَلْ؞»‏ 
کَدِنْ وٛنْدٜ اَايَارٜ وِعِي، ‏«‏ٻٜ ندَارَيْ مٛ ٻٜ نجُوِ؞»‏ 
غَطَ طُعُمْ وَطِي، يُسُفُ پِوٛيْطٛ غَرِيرِ اَرْمَاتِيَ تٛرِي بِلَاتُسْ حٛکَّمٛ ٻَنْدُ يٜىٰسُ؞ يُسُفُ اٛنْ اٛ تٛکُّطٛ يٜىٰسُ، اَمَّا اٜ سُوطٜ نغَمْ اٜ مٛ حُلَ اَرْدِيٻٜ يَحُودَنْکٛعٜنْ؞ بِلَاتُسْ جَٻِ، کَنْکٛ بٛو اٛ يَحِ اٛ وَطِ طُمْ جِڤِّنِ ٻَنْدُ يٜىٰسُ؞ 
نِکٛودِمُسْ جَحُنٛوطٛ تٛ يٜىٰسُ جٜمَّ يَادِ اٜ يُسُفُ اٛنْ؞ اٛ يَادِ اٜ نٜبَّمْ مُرْ اٜ اَلٛسْ اٜ طَمْ جِلِّندِرِ، طَمْ حٜوْتَيْ کِلٛ 30؞ 
يِمْٻٜ طِطٛ ٻٜنْ کٛشِّ ٻَنْدُ يٜىٰسُ ٻٜ تَارَنِندُ غُدٜ طٜ شٜىٰدٜ حَوْتِ اٜ مُرْ اٜ اَلٛسْ نٛ يَحُودَنْکٛعٜنْ نغَطَتَ تٛ ٻٜ اُوَيْ مَيْطٛ؞ 
تٛ وِغٜىٰرٜ ندٜ يٜىٰسُ وَرَا دٛوْ غَافَانغَلْ، اٜ وٛودِ نغٜسَ؞ ندٜرْ مَاکَ اٜ وٛودِ يٜنَاندٜ حٜيْرٜ وَسَاندٜ ندٜرْ حَيْرٜ طُمْ مٜىٰطَايِ وَطُکِ غٛطّٛ ندٜرْ مَيْرٜ؞ 
تٛو، ندٜ طُمْ ݧَلْندٜ سِرْيَاکِ ندٜ يَحُودَنْکٛعٜنْ شِرْيٛتٛو ݧَلْندٜ سِوْتَارٜ، ندٜنْ نغَمْ يٜنَاندٜ ندٜنْ حَادٜ ندٜ وٛنِ، ٻٜ اُوِ يٜىٰسُ ندٜرْ مَيْرٜ؞ 
