﻿يَحَيَ.
18.
غَطَ يٜىٰسُ يٛتِّنِي ندٜعٜ دٛعَارٜ، اٛ دِلِّدِ اٜ تٛکُّٻٜمٛ ٻٜ کُولِ لُغّٜرٜ کِدِرٛنْ؞ ٻٜ نجَحِ وٛنْدٜ وِغٜىٰرٜ غٛودُندٜ نغٜسَ لٜطّٜ جَيْتُنْ، ٻٜ نَتِّ ندٜرْ لٜطّٜ طٜنْ؞ 
تٛو، يَحُودَ کٛکِّتِرَيْطٛ يٜىٰسُ اٜ اَنْدِ وِغٜىٰرٜ ندٜنْ، نغَمْ ندٜ طُطُّمْ يٜىٰسُ اٜ حَوْرَ اٜ تٛکُّٻٜمٛ تٛنْ؞ 
سٜيْ يَحُودَ يَحِ نغٜسَ کَنْ اٜ اَرْدِي کَوْتَلْ سٛوجِعٜنْ رٛومَ، اٜ وٛٻّٜ تَادِيٻٜ وُرٛ شٜنِينغٛ ٻٜ مَوْٻٜ اَرْدِيٻٜ دِينَ اٜ فَارِسَنْکٛعٜنْ لِلِ؞ اٜ ٻٜ نجٛغِي فِتِلَاجِ، اٜ جَمٜ حِيتٜ، اٜ کٛ طُمْ حٛنِرْتَ؞ 
يٜىٰسُ ندٜ اٜ اَنْدِ فُو کٛ حٜٻَتَمٛ، اٛ دَرِي يٜىٰسٛ مَٻّٜ اٛ پَمِٻٜ، اٛ وِعِ، ‏«‏طُمْ مٛيٜ طَٻِّتٛتٛنْ؟»‏ 
ٻٜ مبِعِ، ‏«‏يٜىٰسُ نَجَرَنْکٜىٰجٛ؞»‏ اٛ وِعِٻٜ، ‏«‏طُمْ مِنْ؞»‏ يَحُودَ کٛکِّتِرَيْطٛمٛ بٛو اٜ دَرٛدِي اٜ مَٻّٜ؞ 
ندٜ يٜىٰسُ وِعِٻٜ، ‏«‏طُمْ مِنْ،»‏ ٻٜ شٛعّٛرِي غَطَ ٻٜ نجَنِ اٜ لٜيْدِ؞ 
سٜيْ يٜىٰسُ فُطِّتِ پَمِٻٜ وِعِ، ‏«‏مٛيٜ طَٻِّتٛتٛنْ؟»‏ ٻٜ مبِعِ، ‏«‏يٜىٰسُ نَجَرَنْکٜىٰجٛ؞»‏ 
اٛ وِعِٻٜ، ‏«‏مِ يَادَکٜ مِ وِعِيعٛنْ طُمْ مِنْ؞ تٛ نِ مِنْ طَٻِّتٛتٛنْ، اَلٜىٰ يِمْٻٜ ٻٜعٜ ندِلَّ؞»‏ 
اٛ وِعُ نٛنْ نغَمْ کٛ اٛ وِعُنٛ حٜىٰوَ، ‏«‏مِ دُلَّايِ کٛو غٛعٛتٛ ندٜرْ ٻٜنْ طٛنْ ٻٜ کٛکُّطَايَمْ؞»‏ 
سِيمَنْ بِيتُرُسْ اٜ وٛودِ کَافَحِ، سٜيْ سٛلْتِکِ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ ݧَامٛ؞ اِنْدٜ مَشُّطٛ اٛنْ مَلْکُسْ؞ 
سٜيْ يٜىٰسُ وِعِ بِيتُرُسْ، ‏«‏وَتُّ کَافَحِ مَاطَ ندٜرْ حٛلْغٛ مَاکِ؞ اَ ݧُمَ مِ يَرَتَا جَرْدُغٜلْ تٛرَّ کَ ݧَاکٛ اَمْ حٛکَّتَيَمْ؟»‏ 
سٜيْ سٛوجِعٜنْ رٛومَ اٜ اَرْدِيطٛٻٜ اٜ تَادِيٻٜ وُرٛ شٜنِينغٛ نَنْغِ يٜىٰسُ، ٻٜ کَٻِّمٛ؞ 
اَرَنْدٜ ٻٜ نجَارِمٛ تٛ حَنَانَ اٜسِرَاوٛ کَيَافَ؞ کَيَافَ اٛنْ وٛنِ مَوْطٛ مَوْٻٜ اَرْدِيٻٜ دِينَ اٜ طُنْ طٛنْ ندُنْغُ؞ 
کَنْکٛ وٛنِ کٛکُّطٛ اَرْدِيٻٜ يَحُودَنْکٛعٜنْ شَاوٛرِ وِيکِ، طُمْ ٻُرِي نٜطّٛ غٛعٛتٛ مَايَ نغَمْ کٛو مٛيٜ؞ 
سِيمَنْ بِيتُرُسْ اٜ غٛطّٛ تٛکُّطٛ يٜىٰسُ ٻٜ تٛکِّ يٜىٰسُ؞ ندٜ اٛنْ طٛنْ تٛکُّطٛ يٜىٰسُ غٛعٛتٛ اٛنْ مَوْطٛ مَوْٻٜ اَرْدِيٻٜ دِينَ اٜ اَنْدِمٛ، سٜيْ اٛ يَادِ اٜ يٜىٰسُ تٛ نجَيْرِ وُرٛ مَوْطٛ مَوْٻٜ اَرْدِيٻٜ دِينَ اٛنْ؞ 
اَمَّا بِيتُرُسْ دَرِي يَاسِ تٛ دَمُّغَلْ وُرٛ نغٛنْ؞ سٜيْ اٛنْ طٛنْ تٛکُّطٛ يٜىٰسُ مٛ مَوْطٛ مَوْٻٜ اَرْدِيٻٜ دِينَ اَنْدِ، اٛ وُرْتِي يَاسِ، اٛ مٜتَنِ دٜبّٛ ڤَامَنٛووٛ دَمُّغَلْ نغَلْ، اٛ نَتِّنِ بِيتُرُسْ؞ 
سٜيْ دٜبّٛ ڤَامَنٛووٛ دَمُّغَلْ اٛنْ وِعِ بِيتُرُسْ، ‏«‏اَنْ، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟»‏ بِيتُرُسْ وِعِ، ‏«‏کٛو سٜطَّ، نَاع مِ تٛکُّطٛمٛ؞»‏ 
اٜ شَرٜلْ نغٜلْ اٜ وٛودِ ڤٜىٰوٛلْ، نغَمْ نٛنْ مَشُّٻٜ اٜ تَادِيٻٜ وُرٛ شٜنِينغٛ کُٻِّ حِيتٜ، اٜ ٻٜ ڤِلِينغٜ، اٜ ٻٜ اِرْفٛو؞ سٜيْ بِيتُرُسْ کَنُمْ مَا ٻَدِّي دَرِي ندٜرْ مَٻّٜ اٜ اِرْفٛو؞ 
سٜيْ مَوْطٛ مَوْٻٜ اَرْدِيٻٜ دِينَ پَمِ يٜىٰسُ دٛوْ تٛکُّٻٜمٛ اٜ دٛوْ اٜکِّتِنٛلْ مَاکٛ؞ 
يٜىٰسُ وِعِمٛ، ‏«‏کٛو ندٜيٜ اٜ مِ مٜتَنَ کٛو مٛيٜ اٜ نجَيْرِ؞ کٛو ندٜيٜ اٜ مِ اٜکِّتِنَ اٜکِّتِنٛلْ اَمْ ندٜرْ شُوطِ دٛعَارٜ اٜ ندٜرْ وُرٛ شٜنِينغٛ تٛ فُو يَحُودَنْکٛعٜنْ کَوْرَتَ؞ مِ مٜىٰطَايِ وِيکِ غٛطُّمْ اٜ سُوطٜ؞ 
نغَمْ طُمٜ پَمَتَايَمْ پَمْطٜ طٜعٜ؟ پَمُ يِمْٻٜ نَنْٻٜ اٜکِّتِنٛلْ اَمْ؞ غٛونغَ اٜ ٻٜ اَنْدِ کٛ مبِيمِ؞»‏ 
ندٜ يٜىٰسُ وِعِ نٛنْ، غٛعٛتٛ ندٜرْ تَادِيٻٜ دَرِيطٛ حَادٜ مَاکٛ حٜلِّمٛ تٛ وٛلٛ، وِعِ، ‏«‏نٛنْ مٜتِرَنْتَا مَوْطٛ مَوْٻٜ اَرْدِيٻٜ دِينَ؟»‏ 
يٜىٰسُ وِعِمٛ، ‏«‏تٛ نِ مِ وِعِي غٛطُّمْ طُمْ حَانَا، وِعُکَ کٛو مٛيٜ طٛعٛ؞ اَمَّا تٛ کٛ مبِيمِ طُمْ غٛونغَ، نغَمْ طُمٜ کٜلُّطَايَمْ تٛ وٛلٛ؟»‏ 
سٜيْ حَنَانَ وَطِ طُمْ سٛعِّ يٜىٰسُ تٛ کَيَافَ مَوْطٛ مَوْٻٜ اَرْدِيٻٜ دِينَ، اٜ مٛ حَٻِّي؞ 
بِيتُرُسْ اٜ دَرِي طٛنْ اٜ اِرْفٛو، سٜيْ وٛٻّٜ مبِعِمٛ، ‏«‏اَنْ مَا، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟»‏ اَمَّا بِيتُرُسْ يٜدِّ وِعِ، ‏«‏نَاع مِ تٛکُّطٛمٛ؞»‏ 
غٛعٛتٛ ندٜرْ مَشُّٻٜ مَوْطٛ مَوْٻٜ اَرْدِيٻٜ دِينَ بَنْدِرَاوٛ نٜطّٛ مٛ بِيتُرُسْ اِتَّنِ نٛوْرُ اٛ وِعِ بِيتُرُسْ، ‏«‏نَاع مِ يِيدِيمَ اٜ مَاکٛ تٛنْ ندٜرْ نغٜسَ لٜطّٜ جَيْتُنْ؟»‏ 
بِيتُرُسْ فُطِّتِ وِعِ، ‏«‏نَاع طُمْ مِنْ؞»‏ اٜ مٛ وِعَکَ نجَکَرْدِ حَنِ؞ 
سٜيْ يَحُودَنْکٛعٜنْ کٛشِّ يٜىٰسُ دَغَ وُرٛ کَيَافَ ٻٜ نجَارِمٛ لَامٛرْدٜ غٛمْنَاجٛ رٛومَنْکٜىٰجٛ؞ اٜ شَرٜلْ نغٜلْ طُمْ اِلَا سُبَکَ؞ اَرْدِيٻٜ يَحُودَنْکٛعٜنْ نَتَّايِ لَامٛرْدٜ ندٜنْ، نغَمْ تٛع ٻٜ نغَرْتَ ٻٜ لَاٻَا، ٻٜ کَطٜىٰ ݧَامُکِ ݧَمْندُ حُمْتٛ سَکِّنْکِ؞ 
نغَمْ نٛنْ، بِلَاتُسْ وُرْتِي يَحِ تٛ مَٻّٜ پَمِٻٜ، وِعِ، ‏«‏طُمٜ نغُلّٛرْتٛوطٛنْ نٜطّٛ اٛعٛ؟»‏ 
ٻٜ مبِعِمٛ، ‏«‏دَا نَاع اٛ غَطٛووٛ کٛ حَلِّ، دَا مِنْ نغَدَّايِمٛ تٛ مَاطَ؞»‏ 
بِلَاتُسْ وِعِٻٜ، ‏«‏اٛنٛنْ اٜ کٛعٜ مٛوطٛنْ کٛشّٜىٰمٛ نغَطَنٛنْمٛ کِيتَ نٛ دٛوکَ مٛوطٛنْ وِعِ؞»‏ ٻٜ مبِعِمٛ، ‏«‏اٛنٛنْ رٛومَنْکٛعٜنْ اٛنْ اَلَتَامِنْ مِنْ تَپَنَ غٛطّٛ کِيتَ مَيْدٜ؞»‏ 
طُعُمْ وَطُ نغَمْ طُمْ حٜبِّنَ کٛ يٜىٰسُ وِعُنٛ دٛوْ اِرِ مَيْدٜ ندٜ مَايَتَ؞ 
سٜيْ بِلَاتُسْ سٛعِّي ندٜرْ لَامٛرْدٜ، اٛ نٛدِّ يٜىٰسُ، اٛ پَمِمٛ اٛ وِعِ، ‏«‏اَنْ وٛنِ لَامِيطٛ يَحُودَنْکٛعٜنْ؟»‏ 
يٜىٰسُ نٛوتِي، وِعِ، ‏«‏نغٛعٛلْ پَمٛلْ تٛ مَاطَ نغٛلْ پِوِ، کٛو وٛٻّٜ کٛکُّمَا حَبَرُ اَمْ؟»‏ 
بِلَاتُسْ وِعِ، ‏«‏اَ ݧُمَ مِ يَحُودَنْکٜىٰجٛ؟ طُمْ لٜݧٛلْ مَاطَ اٜ مَوْٻٜ اَرْدِيٻٜ دِينَ نغَدُّمَا تٛ اَمْ؞ طُمٜ نغَطُطَا؟»‏ 
يٜىٰسُ وِعِ، ‏«‏لَامُ اَمْ نَاع دَغَ ندُعُ دُونِيَارُ طُمْ پِوٛيِ؞ دَا لَامُ اَمْ دَغَ مَيْرُ طُمْ پِوٛيِ، دَا تٛکُّٻٜيَمْ کٛنَيْ نغَمْ ٻٜ کَطَ طُمْ نَنْغَيَمْ طُمْ وَطَيَمْ ندٜرْ جُوطٜ اَرْدِيٻٜ يَحُودَنْکٛعٜنْ؞ اَمَّا لَامُ اَمْ نَاع دَغَ ندُعُ دُونِيَارُ طُمْ پِوٛيِ؞»‏ 
سٜيْ بِلَاتُسْ پَمِمٛ وِعِ، ‏«‏تٛو، اَنْ، اَ لَامِيطٛ وٛنْ طٛنْ؟»‏ يٜىٰسُ نٛوتِي، وِعِ، ‏«‏اَ وِعِي مِ لَامِيطٛ؞ نغَمْ طُعُمْ طُمْ دَݧِيَمْ، ندٜنْ نغَمْ مَاجُمْ نغَرْمِ ندٜرْ دُونِيَارُ نغَمْ مِ مٜتَ دٛوْ کٛ وٛنِ غٛونغَ؞ کٛو مٛيٜ غِطّٛ غٛونغَ تٛکَّيْ کٛ مبِيمِ؞»‏ 
بِلَاتُسْ پَمِمٛ وِعِ، ‏«‏طُمٜ وٛنِ غٛونغَ؟»‏ غَطَ بِلَاتُسْ وِعِي نٛنْ فُطِّتِ وُرْتِي يَاسِ تٛ يَحُودَنْکٛعٜنْ وِعِٻٜ، ‏«‏مِ تَوْرَايِمٛ غٛطُّمْ کَلُّطُمْ؞ 
اَمَّا طُمْ ندٛنُ مٛوطٛنْ مِ يٛوفَنَعٛنْ شُرَاطٛ غٛعٛتٛ شَرٜلْ حُمْتٛ سَکِّنْکِ؞ اٛنْ نغِطِ مِ يٛوفَنَعٛنْ لَامِيطٛ يَحُودَنْکٛعٜنْ؟»‏ 
ٻٜ نٛوتِي ٻٜ مبِعِ اٜ سٜمْبٜ، ‏«‏نَاع اٛعٛ نجٛوفَنْتَامِنْ، يٛوفَنْمِنْ بَرَبَّسْ!‏»‏ بَرَبَّسْ اٛنْ بٛو اٛ غٛعٛتٛ ندٜرْ کَٻْدٛوٻٜ اٜ لَامُ؞ 
