﻿يَحَيَ.
11.
غٛطّٛ نٜطّٛ بِعٜتٜىٰطٛ لِعَاجَرُ شِيَ نجَمُ نَنْغِمٛ؞ غَرِيرِ بٜتَنِ اٛ جٛوطٛتٛو، غَرِيرِ ندِ مَرْيَامَ اٜ مَوْنِرَاوٛ مُوطُمْ مَرْتَ نجٛوطٛتٛو؞ 
مَرْيَامَ اٛعٛ، کَنْکٛ وَيْلَنِ کٛيْطٜ يٜىٰسُ نٜبَّمْ اُرٛوجَمْ اٛ مٛيْتِرِطٜ غَاسَ حٛورٜ مَاکٛ؞ لِعَاجَرُ مٛ يَمْطَا اٛنْ، اٛ سَکِرَاوٛ مَاکٛ؞ 
سٜيْ مَرْيَامَ اٜ سَکِرَاوٛ مُوطُمْ مَرْتَ ٻٜ لِلَنِ يٜىٰسُ ٻٜ مبِعِ، ‏«‏مٛودِبّٛ، حِغٛ مَاطَ مٛ نغِطَّا يَمْطَا؞»‏ 
اَمَّا ندٜ يٜىٰسُ نَنِ نٛنْ، اٛ وِعِ، ‏«‏طُعُمْ ݧَوُ طُمْ نَنْغُ لِعَاجَرُ نَاع نغَمْ اٛ مَايَ، اٛ ݧَوُ نغَمْ طُمْ تٜدِّنَ اَللَّه، طُمْ وَرْتَ لَاوٛلْ نٛ ٻِطّٛ اَللَّه تٜدِّنِرْتٜىٰ؞»‏ 
يٜىٰسُ اٜ يِطِ مَرْتَ اٜ مَرْيَامَ اٜ لِعَاجَرُ؞ 
فُو اٜ نٛنْ ندٜ اٛ نَنِ لِعَاجَرُ يَمْطَا، سٜيْ اٛ ٻٜيْدِ وَطُکِ بَلْطٜ طِطِ تٛ اٛ وٛنِ؞ 
غَطَ مَاجُمْ اٛ وِعِ تٛکُّٻٜمٛ، ‏«‏اٜنْ شٛعّٛ لٜيْدِ يَحُودِيَ؞»‏ 
تٛکُّٻٜمٛ مبِعِمٛ، ‏«‏مٛودِبّٛ، نَاع کٛ نٜىٰٻِ يَحُودَنْکٛعٜنْ اٜ نغِطُنٛو حُبٛرَاکِمَ کَاپٜ مبَرُمَا، فُو اٜ نٛنْ اَ يِطِ سٛعَّاکِ تٛنْ؟»‏ 
يٜىٰسُ وِعِٻٜ، ‏«‏نَاع ݧَلْندٜ غٛعٛ اٜ وٛودِ اَوَاجِ سَڤّٛ اٜ طِطِ؟ کٛو مٛيٜ جَحٛووٛ ݧَلَوْمَ فٜغَّتَاکٛ نغَمْ اٜ مٛ يِعِرَ جَيْنغٛلْ دُونِيَارُ ندُعُ؞ 
اَمَّا فُو جَحٛووٛ ندٜرْ ݧِوْرٜ اٛ فٜغّٛتٛ، نغَمْ اٛ وَلَا جَيْنغٛلْ ندٜرْ مَاکٛ؞»‏ 
غَطَ يٜىٰسُ وِعِي نٛنْ، سٜيْ اٛ ٻٜيْدِ وِيکِ، ‏«‏حِغٛ مٜىٰطٜنْ لِعَاجَرُ طَانَکٜ، اَمَّا مِ يَحَيْ مِ فِنْدِنَمٛ؞»‏ 
تٛکُّٻٜمٛ مبِعِمٛ، ‏«‏مٛودِبّٛ، تٛ نِ اٛ طَانِ، اٛ يَمْطِتَيْ؞»‏ 
کٛ يٜىٰسُ وِعَتَ وٛنِ لِعَاجَرُ مَايِي، اَمَّا کَمْٻٜ اٜ ٻٜ ݧُمَ کٛ يٜىٰسُ وِعَتَ وٛنِ اٜ مٛ طَانِي نغَمْ اٛ سِوْتٛو؞ 
سٜيْ يٜىٰسُ وِعِٻٜ اٜ نجَيْرِ، ‏«‏لِعَاجَرُ مَايِي؞ 
اَمَّا مِ نَنِي بٜلْطُمْ مِ وَلَا تٛنْ، نغَمْ کٛولٛوطٛنْيَمْ؞ اَمَّا اٜنْ نجَحُ تٛ مَاکٛ؞»‏ 
سٜيْ تٛومَ بِعٜتٜىٰطٛ شِوْتَاطٛ وِعِ تٛکُّٻٜ يٜىٰسُ حٛرِيٻٜ، ‏«‏اٜنْ نجَحُ اٜنٜنْ مَا نغَمْ مَيْدٜنْ اٜ مَاکٛ؞»‏ 
ندٜ يٜىٰسُ يٛتِّي تَوِ طُمْ يَادَکٜ طُمْ اُوِي لِعَاجَرُ بَلْطٜ نَيِ پَٻِّيطٜ؞ 
حَکُّندٜ بٜتَنِ اٜ اُرُشَلِيمَ حٜوْتَايِ مِلْ طِطِ؞ 
يَحُودَنْکٛعٜنْ طُطْٻٜ نغَرِ تٛ مَرْتَ اٜ مَرْيَامَ نغَمْ ٻٜ مبَلْتِنَنَٻٜ ٻٜرْطٜ دٛوْ مَيْدٜ سَکِرَاوٛ مَٻّٜ؞ 
ندٜ مَرْتَ نَنِ يٜىٰسُ اٜ وَرَ، اٛ يَحِ نغَمْ اٛ تَٻّٛيٛومٛ، مَرْيَامَ بٛو جٛوطِي تٛ وُرٛ؞ 
مَرْتَ تَٻِّي يٜىٰسُ وِعِمٛ، ‏«‏مٛودِبّٛ، دَا اَ طٛنّٛ طٛعٛ، دَا سَکِرَاوٛ اَمْ مَايَايِ؞ 
اَمَّا اٜ مِ اَنْدِ کٛو جٛونِ فُو کٛ تٛرِطَا اَللَّه اٛ حٛکّٜتٜطُمْ؞»‏ 
يٜىٰسُ وِعِمٛ، ‏«‏سَکِرَاوٛ مَاطَ اُمّٛتٛ کَدِنْ؞»‏ 
مَرْتَ وِعِمٛ، ‏«‏اٜ مِ اَنْدِ اٛ اُمّٛتٛ ݧَلْندٜ جَانغٛ ݧَلْندٜ ندٜ مَيْٻٜ اُمّٛتٛو؞»‏ 
يٜىٰسُ وِعِمٛ، ‏«‏مِنْ وٛنِ اُمِّنَيْطٛ مَيْٻٜ، مِنْ وٛنِ کٛکَّيْطٛ يٛنْکِ؞ کٛو مٛيٜ کٛولِيطٛيَمْ، کٛو اٛ مَايِي، اٛ فُطِّتَيْ اٛ وَطَ يٛنْکِ؞ 
کٛو مٛيٜ غٛودُطٛ يٛنْکِ کٛولِيطٛيَمْ، تٛ اٛ مَايِي اٛ حَلْکَتَا؞ اَ جَٻِي کٛ مبِيمِ؟»‏ 
مَرْتَ وِعِمٛ، ‏«‏اٜىٰ، مٛودِبّٛ، مِ جَٻِي اَنْ وٛنِ اَلْمَسِيحُ، ٻِطّٛ اَللَّه، مٛ طُمْ وِعِ وَرَيْ ندٜرْ دُونِيَارُ؞»‏ 
غَطَ مَرْتَ وِعِي نٛنْ، اٛ يَحِ اٛ نٛدِّ مِݧِرَاوٛ مَاکٛ مَرْيَامَ ٻٜ کَکِّتِ اٛ وِعِمٛ، ‏«‏مٛودِبّٛ اٜ طٛعٛ اٜ مٛ يِطِ يِيکِمَ؞»‏ 
ندٜ مَرْيَامَ نَنِ نٛنْ، اُمِّي ندٜرْ يَوْطَارٜ يَحِ تٛ يٜىٰسُ؞ 
يٜىٰسُ بٛو يٛتَّاکِ غَرِيرِ بٜتَنِ تَوْ، اَمَّا اٜ مٛ طٛنْ اٜ وِغٜىٰرٜ تٛ مَرْتَ تَوِمٛ؞ 
يَحُودَنْکٛعٜنْ غٛنْدُٻٜ اٜ مَرْيَامَ ندٜرْ وُرٛ نغَمْ حِنُّکِ، ندٜ ٻٜ نغِعِ مَرْيَامَ اُمَّکٜ جَوْطُمْ وُرْتَکٜ، سٜيْ ٻٜ تٛکِّمٛ، اٜ ٻٜ کَمّٛو اٛ يَحَيْ يٜنَاندٜ اٛ وٛيَ تٛنْ؞ 
ندٜ مَرْيَامَ يٛتِّي تٛ يٜىٰسُ وٛنِ يِعِمٛ، دِشِّ، وِعِمٛ، ‏«‏مٛودِبّٛ، دَا اَ طٛعٛ، دَا سَکِرَاوٛ اَمْ مَايَايِ؞»‏ 
ندٜ يٜىٰسُ يِعِ اٜ مٛ وٛيَ حَوْتِ اٜ يَحُودَنْکٛعٜنْ غَرْدُٻٜ اٜ مَاکٛ، سٜيْ ٻٜرْندٜ مَاکٛ اُمِّي نَاع سٜطَّ اٛ وَنِّي؞ 
اٛ وِعِ، ‏«‏تٛيٜ اُوُطٛنْمٛ؟»‏ ٻٜ مبِعِمٛ، ‏«‏مٛودِبّٛ، وٛرٛيْ، نغِعَ؞»‏ 
سٜيْ يٜىٰسُ وٛيِ؞ 
يَحُودَنْکٛعٜنْ ٻٜنْ مبِعِ، ‏«‏رَا نٛ اٛ يِطِرِمٛ!‏»‏ 
اَمَّا وٛٻّٜ مبِعِ، ‏«‏اٛ وُمْتِنِي بُمْطٛ؞ تٛو، طُمٜ حَطِمٛ وَطُکِ غٛطُّمْ کَطَيْطُمْ نٜطّٛ اٛعٛ مَايُکِ؟»‏ 
يٜىٰسُ فُطِّتِ وَنِّ نَاع سٜطَّ، اٛ يَحِ يٜنَاندٜ ندٜنْ؞ يٜنَاندٜ ندٜنْ بٛو طُمْ لُورٛ حَيْرٜ، حٛنْدُکٛ مَيْرٜ اٜ مَٻِّرَا کَاپَ؞ 
يٜىٰسُ وِعِ، ‏«‏اِتّٜىٰ کَاپَ نغَنْ؞»‏ مَرْتَ مَوْنِرَاوٛ مَيْطٛ اٛنْ وِعِ يٜىٰسُ، ‏«‏مٛودِبّٛ، جٛونِ اٜ وٛودِ لُمْنغٛلْ کَلُّنغٛلْ، نغَمْ اٛ وَطِي بَلْطٜ نَيِ دَغَ اٛ مَايِ؞»‏ 
سٜيْ يٜىٰسُ وِعِمٛ، ‏«‏نَاع مِ وِعِيمَ تَا حٛولَکٜيَمْ، اَ يِعَيْ تٜدُّنغَلْ اَللَّه؟»‏ 
سٜيْ ٻٜ اِتِّ کَاپَ نغَنْ دَغَ دَمُّغَلْ يٜنَاندٜ ندٜنْ؞ سٜيْ يٜىٰسُ رَارِ دٛوْ وِعِ، ‏«‏ݧَاکٛ مٛ دٛوْ، مِ يٜتِّيمَ نغَمْ اَ نَنِي دٛعَارٜ اَمْ؞ 
اٜ مِ اَنْدِ اَ نَنَ دٛعَارٜ اَمْ کٛو ندٜيٜ، اَمَّا مِ وِعُ نٛنْ نغَمْ ٻٜيْدَارِ يِمْٻٜ غٛنْٻٜ طٛعٛ، نغَمْ ٻٜ نجَٻَ اَنْ لِلٛيِيَمْ؞»‏ 
غَطَ اٛ وِعِي نٛنْ، اٛ نٛدِّ اٜ سٜمْبٜ، ‏«‏لِعَاجَرُ، وُرْتٛيَ!‏»‏ 
سٜيْ مَيْطٛ اٛنْ وُرْتٛيِي دَغَ ندٜرْ يٜنَاندٜ ندٜنْ، ٻَنْدُ مَاکٛ اٜ تَارِرَا وُدٜرٜ، جُوطٜ مَاکٛ اٜ کٛيْطٜ مَاکٛ اٜ کَٻِّرَا لٜفِ، يٜىٰسٛ مَاکٛ بٛو اٜ تَارِرَا لٜفٛلْ فٜىٰرٜ؞ يٜىٰسُ وِعِٻٜ، ‏«‏تَارْتٜىٰمٛ، اَلٛنْمٛ اٛ دِلَّ؞»‏ 
طُطْٻٜ ندٜرْ يَحُودَنْکٛعٜنْ غَرْدُٻٜ اٜ مَرْيَامَ غِعُٻٜ کٛ يٜىٰسُ وَطِ، ٻٜ کٛولِيمٛ؞ 
اَمَّا وٛٻّٜ مَٻّٜ نجَحِ تٛ فَارِسَنْکٛعٜنْ مبِعِٻٜ کٛ يٜىٰسُ وَطِ؞ 
نغَمْ نٛنْ، مَوْٻٜ اَرْدِيٻٜ دِينَ اٜ فَارِسَنْکٛعٜنْ ٻٜ نٛدِّ کَوْتَلْ مَوْٻٜ، ٻٜ مبِعِ، ‏«‏طُمٜ نغَطٜتٜنْ؟ نٜطّٛ اٛعٛ اٜ وَطَ کُوطٜ کَيْطِنِيطٜ طُطّٜ؞ 
تٛ اٜنْ اَلِيمٛ اٛ ݧَمْرِي يٜىٰسٛ اٜ وَطُکِ طُعُمْ، کٛو مٛيٜ حٛولٛتٛمٛ، ندٜنْ رٛومَنْکٛعٜنْ نغَرَيْ تٜىٰتَ وُرٛ شٜنِينغٛ مٜىٰطٜنْ اٜ لٜيْدِ مٜىٰطٜنْ؞»‏ 
اَمَّا غٛعٛتٛ مَٻّٜ بِعٜتٜىٰطٛ کَيَافَ مَوْطٛ مَوْٻٜ اَرْدِيٻٜ دِينَ اٜ طُمْ طٛنْ ندُنْغُ وِعِٻٜ، ‏«‏وَلَا کٛ اَنْدُطٛنْ!‏ 
اٛنْ اَنْدَا طُمْ ٻُرَنِيعٛنْ نٜطّٛ غٛعٛتٛ مَايَ نغَمْ کٛو مٛيٜ دٛوْ لٜݧٛلْ يَحُودَنْکٛعٜنْ فُو حَلْکَ؞»‏ 
حَالَ کَعَ کَ کَيَافَ وِعِ نَاع طُمْ ݧُمٛ مَاکٛ، اَمَّا ندٜ کَنْکٛ وٛنِ مَوْطٛ مَوْٻٜ اَرْدِيٻٜ دِينَ اٜ طُمْ طٛنْ ندُنْغُ اٛ وَطِ اَنَّبَاکُ وِيکِ يٜىٰسُ مَايَيْ نغَمْ لٜݧٛلْ يَحُودَنْکٛعٜنْ؞ 
اٛ مَايَيْ نَاع نغَمْ يَحُودَنْکٛعٜنْ تَنْ، اَمَّا حَا اٜ يِمْٻٜ اَللَّه شَنْکِتِيٻٜ ندٜرْ غٛطّٜ لٜيْطٜ، اٛ حَوْرِتَٻٜ اٛ وَرْتِرَٻٜ غٛعٛ؞ 
دَغَ ندٜنْ طٛنْ ݧَلْندٜ ٻٜ ندَرْوِ وَرْکِ يٜىٰسُ؞ 
نغَمْ نٛنْ يٜىٰسُ اَلِ يِيلَاکِ ندٜرْ يَحُودَنْکٛعٜنْ اٜ نجَيْرِ؞ اَمَّا اٛ اَلِ طٛنْ اٛ يَحِ وٛنْدٜ وِغٜىٰرٜ حَادٜ کَرٜ اٛ نَتِّ وٛنْدِ غَرِيرِ بِعٜتٜىٰندِ اِفِرَايِمْ، اٛ جٛوطِي طٛنْ، کَنْکٛ اٜ تٛکُّٻٜمٛ؞ 
ندٜ حُمْتٛ سَکِّنْکِ نغٛ يَحُودَنْکٛعٜنْ ٻَدِي، يِمْٻٜ طُطْٻٜ جٛوطٛتٛوٻٜ ندٜرْ نغَرِحٛيْ لَدّٜ ٻٜ ندِلِّ اُرُشَلِيمَ نغَمْ ٻٜ لَاٻِنَ کٛعٜ مَٻّٜ کٛ حُمْتٛ نغٛنْ؞ 
ٻٜ نغَطِ کَ طَٻُّتُکِ يٜىٰسُ؞ ندٜ ٻٜ کَوْرِتِ ندٜرْ وُرٛ شٜنِينغٛ، ٻٜ نغَطِ کَ پَمْپَمْتِرْکِ اٜ ٻٜ مبِعَ، ‏«‏طُمٜ نغِيطٛنْ؟ اٛ وَرَيْ حُمْتٛ نغٛعٛ بٛو؟»‏ 
مَوْٻٜ اَرْدِيٻٜ دِينَ اٜ فَارِسَنْکٛعٜنْ ٻٜ نجَادَکٜ ٻٜ مبِعِي فُو اَنْدُطٛ تٛ يٜىٰسُ وٛنِ، اٛ اَنْدِنَٻٜ نغَمْ ٻٜ نَنْغَمٛ؞ 
