﻿يَحَيَ.
8.
اَمَّا يٜىٰسُ يَحِ حٛشّٜىٰرٜ ندٜ لٜطّٜ جَيْتُنْ؞ 
ندٜ فِنِ اِلَا سُبَکَ اٛ سٛعِّي وُرٛ شٜنِينغٛ؞ يِمْٻٜ طُطْٻٜ کَوْرِتِ حَادٜ مَاکٛ، اٛ جٛوطِي اٛ فُطِّي اٜکِّتِنْکِٻٜ؞ 
سٜيْ مٛودِٻّٜ اَتَّوْرَ اٜ فَارِسَنْکٛعٜنْ نغَدِّ دٜبّٛ نَنْغَاطٛ اٜ وَطَ نجٜىٰنُ؞ ٻٜ نغَطِ دٜبّٛ اٛنْ دَرِي يٜىٰسٛ يِمْٻٜ غٛنْٻٜ طٛنْ فُو؞ 
ٻٜ مبِعِ يٜىٰسُ، ‏«‏مٛودِبّٛ، اٛعٛ دٜبّٛ نَنْغَامَ اٜ مٛ وَطَ نجٜىٰنُ؞ 
ندٜرْ اَتَّوْرَ مُوسَ وِعِيعٜنْ کُبٛرٛوطٜنْ اِرِ دٜبّٛ اٛعٛ کَاپٜ مبَرٜنْمٛ؞ جٛونِ اَنْ، طُمٜ مبِيطَا؟»‏ 
ٻٜ پَمُمٛ پَمٛلْ نغٛعٛلْ نغَمْ ٻٜ ڤٛوندَمٛ ٻٜ کٜٻَ کٛ ٻٜ نغُلّٛرْتٛومٛ؞ اَمَّا يٜىٰسُ تُرِي فُطِّ وِنْدِرْکِ حٛوندُ مُوطُمْ اٜ لٜيْدِ؞ 
ندٜ ٻٜ نغَطِ کَ پَمُکِمٛ، سٜيْ اٛ اُمِّي، اٛ دَرِي، اٛ وِعِٻٜ، ‏«‏فُو مٛ مٜىٰطَايِ وَطُکِ حَکّٜ ندٜرْ مٛوطٛنْ اَرْتَ حُبَاکِ دٜبّٛ اٛعٛ حَيْرٜ؞»‏ 
سٜيْ اٛ فُطِّتِ اٛ تُرِي، اٛ وِنْدِ اٜ لٜيْدِ؞ 
ندٜ ٻٜ نَنِ کٛ اٛ وِعِ، ٻٜ ندِلِّ غٛعٛتٛ‑غٛعٛتٛ، ندٛتِّعٜنْ اَرْتِ دِلُّکِ؞ طُمْ اَلِ يٜىٰسُ طٛنْ کَنُمْ تَنْ، دٜبّٛ اٛنْ اٜ دَرِي يٜىٰسٛ مَاکٛ؞ 
يٜىٰسُ اُمِّي، دَرِي، وِعِمٛ، ‏«‏تٛ ٻٜ نغٛنِ؟ اٜ وٛودِ تَپَنْطٛمَ کِيتَ؟»‏ 
دٜبّٛ اٛنْ نٛوتِي وِعِ، ‏«‏مٛودِبّٛ، وَلَا کٛو غٛعٛتٛ؞»‏ يٜىٰسُ وِعِمٛ، ‏«‏تٛو، مِنْ مَا مِ تَپَنْتَامَ کِيتَ؞ دِلُّ، اَمَّا تَاع فُطُّتُ نغَطَا حَکّٜ؞»‏ 
يٜىٰسُ فُطِّتِ مٜتَنِ يِمْٻٜ وِعِ، ‏«‏مِنْ وٛنِ جَيْنغٛلْ دُونِيَارُ؞ فُو تٛکُّطٛيَمْ يَحَتَا ندٜرْ ݧِوْرٜ، اَمَّا حٜٻَيْ جَيْنغٛلْ يٛنْکِ؞»‏ 
سٜيْ فَارِسَنْکٛعٜنْ مبِعِمٛ، ‏«‏اَ حٛکَّ شٜيْدَ حٛورٜ مَاطَ، کٛ مبِعَتَا نَاع طُمْ غٛونغَ؞»‏ 
يٜىٰسُ وِعِٻٜ، ‏«‏کٛو تٛ مِ حٛکِّي شٜيْدَ حٛورٜ اَمْ، کٛ مبِعَيْمِ طُمْ غٛونغَ، نغَمْ اٜ مِ اَنْدِ تٛ پِوٛيْمِ اٜ تٛ نجَحَيْمِ؞ اَمَّا اٛنٛنْ اٛنْ اَنْدَا تٛ پِوٛيْمِ اٜ تٛ نجَحَيْمِ؞ 
اٛنْ نغَطَ کِيتَ نٛ يِمْٻٜ دُونِيَارُ نغَطِرْتَ کِيتَ، مِنْ بٛو وَلَا مٛ نغَطَنْمِ کِيتَ؞ 
اَمَّا فُو اٜ نٛنْ تٛ مِ وَطِي کِيتَ، کِيتَ اَمْ طُمْ غٛونغَ، نغَمْ نَاع مِنْ تَنْ وَطَتَ کِيتَ کَنْ، اَمَّا مِنْ اٜ ݧَاکٛ اَمْ لِلٛيْطٛيَمْ وَطَتَکَ؞ 
ندٜرْ اَتَّوْرَ مٛوطٛنْ طُمْ وِنْدِ وِيکِي شٜيْدَ کَ يِمْٻٜ طِطٛ کٛکِّ اٜ کَ وٛودِ غٛونغَ؞ 
اٜ مِ حٛکَّ شٜيْدَ حٛورٜ اَمْ، ندٜنْ ݧَاکٛ اَمْ لِلٛيْطٛيَمْ مَا اٜ حٛکَّ شٜيْدَ اَمْ؞»‏ 
ٻٜ مبِعِمٛ، ‏«‏تٛيٜ ݧَاکٛ مَاطَ اٛنْ وٛنِ؟»‏ يٜىٰسُ وِعِٻٜ، ‏«‏اٛنْ اَنْدَايَمْ، اٛنْ بٛو اَنْدَا ݧَاکٛ اَمْ؞ دَا اٛنْ اَنْدِيَمْ، دَا اٛنْ اَنْدِ ݧَاکٛ اَمْ مَا؞»‏ 
يٜىٰسُ مٜتِي حَالَ کَعَ شَرٜلْ کٛ اٛ اٜکِّتِنْتَ ندٜرْ وُرٛ شٜنِينغٛ حَادٜ اَکْوَاتِيجِ تٛ طُمْ رٜسَتَ دٛکّٜ نغَمْ اَللَّه؞ اَمَّا وَلَا نَنْغُطٛمٛ نغَمْ شَرٜلْ مَاکٛ وَطَايِ تَوْ؞ 
سٜيْ يٜىٰسُ فُطِّتِ وِعِ يِمْٻٜ ٻٜنْ، ‏«‏مِ دِلَّيْ، اٛنْ طَٻِّتَيْيَمْ، اَمَّا اٛنْ مَايَيْ ندٜرْ حَکّٜ مٛوطٛنْ؞ تٛ نجَحَيْمِ بٛو، اٛنْ مبَاوَتَا يَاکِ؞»‏ 
طُعُمْ وَطِ اَرْدِيٻٜ يَحُودَنْکٛعٜنْ مبِعِ، ‏«‏اٛ وَرَيْ حٛورٜ مَاکٛ وٛنْ طٛنْ؟ کٛو کَنْجُمْ اٛ يِطِ وِيکِ ندٜ اٛ وِعِ، ‏‹‏تٛ نجَحَيْمِ اٛنْ مبَاوَتَا يَاکِ؟›‏ »‏ 
اَمَّا يٜىٰسُ وِعِٻٜ، ‏«‏اٛنٛنْ دَغَ دُونِيَارُ ندُعُ پِوٛيْطٛنْ، مِنْ بٛو دَغَ دٛوْ پِوٛيْمِ؞ اٛنٛنْ دُونِيَارُ جٜيِعٛنْ، مِنْ نَاع دُونِيَارُ جٜيِيَمْ؞ 
مِ وِعِيعٛنْ اٛنْ مَايَيْ ندٜرْ حَکّٜ مٛوطٛنْ، غٛونغَ اٛنْ مَايَيْ ندٜرْ حَکّٜ مٛوطٛنْ سٜيْ نِ تٛ اٛنْ نجَٻِي مِنْ وٛنِ مٛ مبِيمِعٛنْ؞»‏ 
ٻٜ مبِعِمٛ، ‏«‏اَنْ اَ مٛيٜ؟»‏ يٜىٰسُ وِعِٻٜ، ‏«‏مِنْ وٛنِ اٛنْ طٛنْ مٛ مبِيمِعٛنْ دَغَ اَرَنْدٜ؞ 
اٜ وٛودِ فِي طُطُّمْ طُمْ نغِطُمِ وِيکِ دٛوْ مٛوطٛنْ، کَدِنْ اٜ وٛودِ فِي طُطُّمْ طُمْ نغِطُمِ تَپَنْکِعٛنْ کِيتَ دٛوْ مَاجُمْ؞ اَمَّا اٛنْ طٛنْ لِلٛيْطٛيَمْ اٜ وٛودِ غٛونغَ؞ کٛ نَنْمِ تٛ مَاکٛ تَنْ مبِعَيْمِ دُونِيَارُ؞»‏ 
ٻٜ ڤَامَايِ يٜىٰسُ اٜ مٜتَنَٻٜ دٛوْ ݧَاکٛ مٛ دٛوْ؞ 
سٜيْ يٜىٰسُ وِعِ، ‏«‏شَرٜلْ نغٜلْ پٜفْتُطٛنْ ٻِي نٜطّٛ، اٛنْ اَنْدَيْ مِنْ وٛنِ اٛنْ طٛنْ مٛ مبِعَيْمِ؞ کَدِنْ اٛنْ اَنْدَيْ فُو کٛ نغَطَيْمِ نَاع اٜ لَامُ اَمْ نغَطِرَيْمِطُمْ، اَمَّا کٛ ݧَاکٛ اَمْ اٜکِّتِنِيَمْ مبِعَيْمِ؞ 
اٛنْ طٛنْ لِلٛيْطٛيَمْ اٜ وٛنْدِ اٜ اَمْ، اٛ اَلَايِيَمْ مِنْ تَنْ، نغَمْ کٛو ندٜيٜ اٜ مِ وَطَ کٛ وٜلْنَنْتَمٛ ٻٜرْندٜ؞»‏ 
شَرٜلْ نغٜلْ يٜىٰسُ وِعَتَ نٛنْ، طُطْٻٜ کٛولِيمٛ؞ 
سٜيْ يٜىٰسُ وِعِ يَحُودَنْکٛعٜنْ کٛولِيٻٜمٛ، ‏«‏تٛ اٛنْ تٛکِّي اٜکِّتِنٛلْ اَمْ، اٛنْ تٛکُّٻٜيَمْ ٻٜ غٛونغَ؞ 
ندٜنْ اٛنْ اَنْدَيْ غٛونغَ، غٛونغَ بٛو رِمْطِنَيْعٛنْ؞»‏ 
ٻٜ مبِعِمٛ، ‏«‏مِنْ تَانِرَاٻٜ اِبْرَاهِمْ، مِنْ مٜىٰطَايِ وَرْتُکِ مَشُّٻٜ غٛطّٛ؞ نٛ وَطَتَ مبِعَا، ‏‹‏طُمْ رِمْطِنَيْمِنْ؟›‏ »‏ 
يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، کٛو مٛيٜ غَطٛووٛ حَکّٜ اٛ مَشُّطٛ حَکّٜ؞ 
مَشُّطٛ جٛوطَتَاکٛ ندٜرْ وُرٛ حَا اَبَدَا، اَمَّا ٻِطّٛ وٛنِ جٛوطٛتٛوطٛ ندٜرْ مَاغٛ حَا اَبَدَا؞ 
نغَمْ نٛنْ تٛ ٻِطّٛ اٛنْ رِمْطِنِيعٛنْ، اٛنْ کٜٻِي رِمْطِنٜىٰکِ کِ غٛونغَ؞ 
اٜ مِ اَنْدِ اٛنْ تَانِرَاٻٜ اِبْرَاهِمْ، فُو اٜ نٛنْ اٛنْ طَٻِّتَ وَرْکِيَمْ، نغَمْ اٛنْ نجَٻَايِ اٜکِّتِنٛلْ اَمْ؞ 
اٜ مِ وِعَعٛنْ کٛ نغِيمِ تٛ ݧَاکٛ اَمْ، اٛنٛنْ بٛو اٛنْ نغَطَ کٛ نَنْطٛنْ دَغَ تٛ ݧَاکٛ مٛوطٛنْ؞»‏ 
ٻٜ مبِعِمٛ، ‏«‏اِبْرَاهِمْ وٛنِ ݧَاکٛ اَمِنْ؞»‏ يٜىٰسُ وِعِٻٜ، ‏«‏دَا اٛنْ ٻِٻّٜ اِبْرَاهِمْ، اٛنْ نغَطَيْ کٛ اِبْرَاهِمْ وَطِ؞ 
اَمَّا جٛونِ اٛنْ طَٻِّتَ وَرْکِيَمْ، مِنْ بِيطٛعٛنْ غٛونغَ کَ نَنْمِ دَغَ تٛ اَللَّه؞ طُعُمْ نَاع کَنْجُمْ اِبْرَاهِمْ وَطِ؞ 
اٛنْ نغَطَ کٛ ݧَاکٛ مٛوطٛنْ وَطِ؞»‏ ٻٜ مبِعِمٛ، ‏«‏مِنٛنْ نَاع مِنْ جَالُعٜنْ، اَللَّه وٛنِ ݧَاکٛ اَمِنْ، کَنْکٛ تَنْ وٛنِ ݧَاکٛ مٛ مِنْ نغٛودِ؞»‏ 
يٜىٰسُ وِعِٻٜ، ‏«‏دَا اَللَّه وٛنِ ݧَاکٛ مٛوطٛنْ، دَا اٛنْ نغِطَيْيَمْ، نغَمْ دَغَ تٛ مَاکٛ پِوٛيْمِ، جٛونِ بٛو اٜ مِ طٛعٛ؞ مِ وَرَايِ نغَمْ حٛورٜ اَمْ، اَمَّا کَنْکٛ لِلٛيِيَمْ؞ 
نغَمْ طُمٜ اٛنْ ڤَامَايِ کٛ مبِيمِ؟ کَنْجُمْ وٛنِ نغَمْ اٛنْ مبَاوَتَا جَٻُکِ وٛلْدٜ اَمْ؞ 
اٛنٛنْ اٛنْ ٻِٻّٜ ݧَاکٛ مٛوطٛنْ شٜيْطَنْ، کٛ نغِطّٛنْ وٛنِ نغَطٛنْ کٛ ݧَاکٛ مٛوطٛنْ يِطِ؞ دَغَ اَرَنْدٜ اٛ غَطٛووٛ وَرْحٛورٜ؞ وَلَا کٛ وَنِّمٛ اٜ غٛونغَ، نغَمْ اٛ وَلَا غٛونغَ؞ تٛ اٛ فٜوِي، طُمْ نغِکُّ مَاکٛ، نغَمْ اٛ ڤٜوٛووٛ، ݧَاکٛ فٜوْرٜ؞ 
اَمَّا نغَمْ مِ وِعِ غٛونغَ، اٛنْ کٛولَاکِيَمْ؞ 
مٛيٜ ندٜرْ مٛوطٛنْ وَاوَتَ تَبِّتِنْکِ مِ وَطِي حَکّٜ؟ تٛ نِ غٛونغَ مبِعَيْمِ، نغَمْ طُمٜ اٛنْ کٛولَتَاکٛيَمْ؟ 
کٛو مٛيٜ مٛ اَللَّه جٜيِ اٜ نَنَ کٛ اَللَّه وِعِ؞ کٛ حَطِعٛنْ نَنْکِ کٛ مبِيمِ وٛنِ اٛنٛنْ نَاع طُمْ ٻٜ اَللَّه؞»‏ 
مَوْٻٜ يَحُودَنْکٛعٜنْ نٛوتِي مبِعِمٛ، ‏«‏نَاع طُمْ غٛونغَ مِنْ مبِعِ ندٜ مِنْ مبِعِ اَ سَمَارِيَنْکٜىٰجٛ ندٜنْ اَ وٛودِ غِنّٛلْ؟»‏ 
يٜىٰسُ وِعِٻٜ، ‏«‏مِ وَلَا غِنّٛلْ، اَمَّا ݧَاکٛ اَمْ کٛکَّيْمِ مَنْغُ، اٛنٛنْ بٛو اٛنْ نجَوَنَيَمْ؞ 
مِ طَٻِّتَنْتَا حٛورٜ اَمْ تٜدُّنغَلْ، اَمَّا اٜ وٛودِ غٛطّٛ طَٻِّتَنَيْطٛيَمْنغَلْ، کَنْکٛ وٛنِ غَطَيْطٛ کِيتَ؞ 
اٜ مِ وِعَعٛنْ غٛونغَ، فُو غَطٛووٛ کٛ مبِيمِ، اٛ مَايَتَا؞»‏ 
يَحُودَنْکٛعٜنْ مبِعِمٛ، ‏«‏جٛونِ اٜ مِنْ اَنْدِ اَ وٛودِ غِنّٛلْ؞ اِبْرَاهِمْ مَايِي، نٛنْ مَا اَنَّبٛعٜنْ، اَمَّا اَ وِعِي فُو غَطٛووٛ کٛ مبِيطَا مَايَتَا؞ 
اَ ٻُرِي ݧَاکٛ اَمِنْ اِبْرَاهِمْ؟ اٛ مَايِي، نٛنْ مَا اَنَّبٛعٜنْ حٛرِيٻٜ مَايِي؞ مٛيٜ ݧُمَتَا غٛنْطَا؟»‏ 
يٜىٰسُ نٛوتِي وِعِ، ‏«‏تٛ مِ تٜدِّنِي حٛورٜ اَمْ، تٜدُّنغَلْ اَمْ وَرْتِي مٜىٰرٜ؞ ݧَاکٛ اَمْ مٛ مبِعٛتٛنْ وٛنِ اَللَّه مٛوطٛنْ، کَنْکٛ وٛنِ تٜدِّنْطٛيَمْ؞ 
کٛو ندٜ اٛنْ اَنْدَامٛ، اَمَّا مِنْ اٜ مِ اَنْدِمٛ؞ دَا مِ وِعِينٛعٛنْ مِ اَنْدَامٛ، دَا مِ وَرْتِي ڤٜوٛووٛ بٛ مٛوطٛنْ؞ اَمَّا اٜ مِ اَنْدِمٛ، اٜ مِ تٛکَّ وٛلْدٜ مَاکٛ؞ 
ݧَاکٛ مٛوطٛنْ اِبْرَاهِمْ اٜ وٜلْوٜلْتَ تٛ اٛ ݧُمِي دٛوْ ݧَلْندٜ ندٜ نغَرَيْمِ؞ اٛ يِعِيندٜ، اٛ بٛو نَنِي بٜلْطُمْ؞»‏ 
ٻٜ مبِعِمٛ، ‏«‏اَ حٜوْتَايِ دُوٻِ 50 تَوْ، اَمَّا اَ وِعَ اَ يِعِي اِبْرَاهِمْ؟»‏ 
يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، کٛ اِبْرَاهِمْ دَݧٜىٰ اٜ مِ طٛنْ؞»‏ 
ندٜ اٛ وِعِ نٛنْ، سٜيْ ٻٜ کٛشِّ کَاپٜ نغَمْ ٻٜ کُبٛومٛ، اَمَّا يٜىٰسُ سُوطِ حٛورٜ مُوطُمْ، وُرْتِي ندٜرْ وُرٛ شٜنِينغٛ نغٛنْ دِلِّ؞ 
