﻿يَحَيَ.
7.
غَطَ طُعُمْ يٜىٰسُ وَطِ کَ يِيلَاکِ ندٜرْ لٜيْدِ غَلِيلِ؞ اٛ يِطَا يِيلَاکِ ندٜرْ لٜيْدِ يَحُودِيَ، نغَمْ اَرْدِيٻٜ يَحُودَنْکٛعٜنْ وٛنْٻٜ تٛنْ اٜ ٻٜ طَٻِّتَ لَاوٛلْ نٛ ٻٜ مبَرِرْتَمٛ؞ 
تٛو، شَرٜلْ حُمْتٛ لُکُرُوجِ نغٛ يَحُودَنْکٛعٜنْ ٻَدَکٜ؞ 
نغَمْ نٛنْ مِݧِرَاٻٜ يٜىٰسُ وٛرْٻٜ مبِعِمٛ، ‏«‏اَلُ وِغٜىٰرٜ ندٜعٜ نجَحَا لٜيْدِ يَحُودِيَ، نغَمْ تٛکُّٻٜمَ نغِعَ کُوطٜ طٜ کُوَتَا؞ 
فُو غِطّٛ اَنْدٜىٰ اٜ کٛو تٛيٜ حُوَتَا اٜ سُوطٜ؞ ندٜ اَ حُوَ کُوطٜ کَيْطِنِيطٜ اِرِ طٜعٜ، وَنْغِنْ حٛورٜ مَاطَ نغَمْ دُونِيَارُ فُو يِعُمَا؞»‏ 
کٛو مِݧِرَاٻٜ مَاکٛ ٻٜنْ مَا ٻٜ کٛولَاکِمٛ؞ 
يٜىٰسُ وِعِٻٜ، ‏«‏شَرٜلْ اَمْ وَطَايِ تَوْ، اَمَّا اٛنٛنْ کٛو نغٜلٜ شَرٜلْ نغٜلْ کَانُنغٜلْ؞ 
جٛونِ دُونِيَارُ حٜٻَايِ کٛ وَݧِرْتَعٛنْ، اَمَّا اٜ ندُ وَݧِييَمْ نغَمْ اٜ مِ وِعَ کُوطٜ مَيْرُ طٜ کَلُّطٜ؞ 
اٛنٛنْ نجَحٜىٰ حُمْتٛ نغٛنْ، مِنْ مِ يَحَتَا، نغَمْ شَرٜلْ اَمْ وَطَايِ تَوْ؞»‏ 
غَطَ اٛ وِعِي نٛنْ، اٛ جٛوطِي ندٜرْ لٜيْدِ غَلِيلِ؞ 
اَمَّا غَطَ مِݧِرَاٻٜ مَاکٛ نجَحِي حُمْتٛ نغٛنْ، سٜيْ کَنْکٛ مَا اٛ يَحِ نَاع اٜ نجَيْرِ اَمَّا اٜ سُوطٜ؞ 
تٛ حُمْتٛ نغٛنْ، اَرْدِيٻٜ يَحُودَنْکٛعٜنْ اٜ طَٻِّتَمٛ، اٜ ٻٜ پَمَ يِمْٻٜ، ‏«‏تٛيٜ اٛ وٛنِ؟»‏ 
ندٜرْ حَوْرِيندٜ ندٜنْ يِمْٻٜ اٜ سٛوندٛوتِرَ دٛوْ مَاکٛ نَاع سٜطَّ؞ وٛٻّٜ اٜ مبِعَ، ‏«‏اٛعٛ نٜطّٛ اٜ وٛودِ نغِکُّ بٛطُّمْ؞»‏ وٛٻّٜ بٛو اٜ مبِعَ، ‏«‏اٜ مٛ پٛيْرَ يِمْٻٜ؞»‏ 
اَمَّا نغَمْ اٜ ٻٜ کُلَ اَرْدِيٻٜ يَحُودَنْکٛعٜنْ وَلَا مٜتُطٛ دٛوْ مَاکٛ اٜ نجَيْرِ؞ 
ندٜ سٜنْدٜرٜ بَلْطٜ حُمْتٛ نغٛنْ پَٻِّي، يٜىٰسُ نَتِّ وُرٛ شٜنِينغٛ فُطِّ اٜکِّتِنْکِ؞ 
اَرْدِيٻٜ يَحُودَنْکٛعٜنْ کَيْطِنِ اٜ اٜکِّتِنٛلْ مَاکٛ، ٻٜ مبِعِ، ‏«‏نٛ وَطِ نٜطّٛ اٛعٛ وٛودِرِ اَنْدَلْ نِحِ ندٜ کٛو جَنْدٜ اٛ مٜىٰطَايِ يَاکِ؟»‏ 
يٜىٰسُ وِعِٻٜ، ‏«‏کٛ اٜکِّتِنَيْمِ نَاع طُمْ اٜکِّتِنٛلْ اَمْ، اَمَّا طُمْ اٜکِّتِنٛلْ اٛنْ طٛنْ لِلٛيْطٛيَمْ؞ 
کٛو مٛيٜ شُٻُطٛ وَطَ کٛ اَللَّه يِطِ اٛ اَنْدَيْ کٛو کٛ اٜکِّتِنَيْمِ تٛ اَللَّه طُمْ پِوٛيِ، کٛو کٛ مبِعَيْمِ طُمْ بٛلِيطٜ اَمْ؞ 
کٛو مٛيٜ مٜتٛووٛ بٛلِيطٜ حٛورٜ مُوطُمْ اٜ طَٻِّتَنَ حٛورٜ مُوطُمْ مَنْغُ، اَمَّا کُوٛووٛ نغَمْ مَوْنِنَ اٛنْ طٛنْ لِلٛيْطٛمٛ اٛ نٜطّٛ مٛ غٛونغَ، وَلَا وٛنْدٜ فٜوْرٜ تٛ مَاکٛ؞ 
نَاع مُوسَ حٛکِّيعٛنْ اَتَّوْرَ؟ فُو اٜ نٛنْ وَلَا غٛطّٛ مٛوطٛنْ تٛکُّطٛطُمْ؞ نغَمْ طُمٜ نغِطّٛنْ وَرْکِيَمْ؟»‏ 
يِمْٻٜ ٻٜنْ مبِعِمٛ، ‏«‏اَ غِنَّاطٛ!‏ مٛيٜ يِطِ وَرْکِمَ؟»‏ 
يٜىٰسُ وِعِٻٜ، ‏«‏مِ وَطِي کٛ حَيْطِنِي غٛعٛ، اٛنْ فُو اٛنْ کَيْطِنِي؞ 
مُوسَ وِعِعٛنْ نغَطٛنْ کَ نَادُکِ ٻِٻّٜ مٛوطٛنْ، اٛنْ نَادَ ݧَلْندٜ سِوْتَارٜ؞ کٛو ندٜ نَاع مُوسَ فُطِّطُمْ، اَمَّا مَامَعٜنْ مٜىٰطٜنْ اَرَنْدٜعٜنْ فُطِّطُمْ؞ 
تٛ طُمْ نَادِي ٻِنْغٜلْ ݧَلْندٜ سِوْتَارٜ نغَمْ تٛع طُمْ يٜوَ اَتَّوْرَ مُوسَ، نغَمْ طُمٜ مٛنَّنْتٛنْيَمْ نغَمْ مِ يَمْطِتِنِي ٻَنْدُ نٜطّٛ فُو ݧَلْندٜ سِوْتَارٜ؟ 
تٛع اٛنْ نغَطَنْ يِمْٻٜ کِيتَ دٛوْ کٛ غِتٜ نغِعَتَ تَنْ، اَمَّا نغَطٜىٰ کِيتَ غٛونغَ؞»‏ 
وٛٻّٜ يِمْٻٜ اُرُشَلِيمَ مبِعِ، ‏«‏نَاع اٛعٛ نٜطّٛ وٛنِ مٛ اَرْدِيٻٜ طَٻِّتَتَ وَرْکِ؟ 
رَمّٛ طٛعٛ اٜ مٛ مٜتَ اٜ نجَيْرِ ٻٜ مبِعَايِمٛ غٛطُّمْ؞ اٛنْ ݧُمَ اَرْدِيٻٜ تَبِّتِنِي اٛعٛ نٜطّٛ وٛنِ اَلْمَسِيحُ؟ 
اَمَّا اٜنْ اَنْدِ تٛ نٜطّٛ اٛعٛ پِوٛيِ؞ تٛ اَلْمَسِيحُ وَرِي، وَلَا اَنْدَيْطٛ تٛ اٛ پِوٛيِ؞»‏ 
يٜىٰسُ اٜ ندٜرْ اٜکِّتِنْکِ ندٜرْ وُرٛ شٜنِينغٛ نغٛنْ، سٜيْ وِعِ اٜ سٜمْبٜ، ‏«‏غٛونغَ، اٛنْ اَنْدِيَمْ، اٛنْ اَنْدِ تٛ پِوٛيْمِ؞ مِ وَرٛيَايِ نغَمْ حٛورٜ اَمْ؞ اَمَّا اٛنْ طٛنْ لِلٛيْطٛيَمْ اٜ مٛ وٛودِ غٛونغَ؞ کَنْکٛ بٛو اٛنْ اَنْدَامٛ، 
اَمَّا مِنْ اٜ مِ اَنْدِمٛ، نغَمْ دَغَ تٛ مَاکٛ پِوٛيْمِ، کَنْکٛ لِلٛيِيَمْ؞»‏ 
وٛٻّٜ نغِطِي نَنْغُکِمٛ، اَمَّا وَلَا غَطُطٛ جُنْغٛ دٛوْ مَاکٛ، نغَمْ شَرٜلْ مَاکٛ وَطَايِ تَوْ؞ 
اَمَّا فُو اٜ نٛنْ طُطْٻٜ ندٜرْ حَوْرُتُٻٜ ٻٜنْ کٛولِيمٛ مبِعِ، ‏«‏تٛ اَلْمَسِيحُ وَرِي، اٛ وَطَيْ کٛ حَيْطِنِ ٻُرْطُمْ طُمْ نٜطّٛ اٛعٛ وَطِ؟»‏ 
فَارِسَنْکٛعٜنْ نَنِ يِمْٻٜ حَوْرُتُٻٜ اٜ مٜتَ اِرِ حَالَ کَعَ دٛوْ يٜىٰسُ، سٜيْ کَمْٻٜ اٜ مَوْٻٜ اَرْدِيٻٜ دِينَ ٻٜ لِلِ تَادِيٻٜ وُرٛ شٜنِينغٛ نغَمْ نَنْغَمٛ؞ 
يٜىٰسُ وِعِ، ‏«‏مِ جٛوطٛدٛتٛ اٜ مٛوطٛنْ شَرٜلْ سٜطَّ يٜىٰسٛ طٛعٛ، غَطَ طٛنْ مِ سٛعّٛتٛ تٛ لِلٛيْطٛيَمْ؞ 
اٛنْ طَٻِّتَيْيَمْ اٛنْ کٜٻَتَايَمْ، تٛ نغٛنُمِ بٛو اٛنْ مبَاوَتَا يَاکِ؞»‏ 
سٜيْ اَرْدِيٻٜ يَحُودَنْکٛعٜنْ مبِعِ حَکُّندٜ مَٻّٜ، ‏«‏تٛيٜ نٜطّٛ اٛعٛ يِطِ يَاکِ تٛ اٜنْ مبَاوَتَا حٜٻُکِمٛ؟ کٛو اٜ مٛ يِطِ يَاکِ ندٜرْ غَرِيجٜ حٜلٜنَنْکٛعٜنْ تٛ يِمْٻٜ مٜىٰطٜنْ نغٛنِ اٛ اٜکِّتِنَ حٜلٜنَنْکٛعٜنْ؟ 
طُمٜ اٛ يِطِ وِيکِ ندٜ اٛ وِعِ، ‏‹‏اٛنْ طَٻِّتَيْيَمْ اَمَّا اٛنْ کٜٻَتَايَمْ؞›‏ کَدِنْ کٛ اٛ يِطِ وِيکِ ندٜ اٛ وِعِ، ‏‹‏تٛ نغٛنْمِ اٛنْ مبَاوَتَا يَاکِ؟›‏ »‏ 
ݧَلْندٜ ندٜ حُمْتٛ نغٛنْ رٜعَتَ، کَيْرٜ وٛنِ ݧَلْندٜ مَوْندٜ ندٜ حُمْتٛ نغٛنْ؞ اٜ ݧَلْندٜ ندٜنْ يٜىٰسُ اُمِّي، دَرِي، وِعِ اٜ سٜمْبٜ، ‏«‏فُو نَنَيْطٛ طٛنْکَ وَرَ تٛ اَمْ مِ حٛکَّيْمٛ کٛ اٛ يَرَتَ؞ 
نٛنْ نٛ طُمْ وِنْدِرَا، ‏‹‏کٛو مٛيٜ کٛولِيطٛيَمْ، شَنْطِ ندِيَمْ کٛکّٛوجَمْ يٛنْکِ وَطَيْ کَ اِلُکِ دَغَ ندٜرْ ٻٜرْندٜ مَاکٛ؞›‏ »‏ 
ندٜ يٜىٰسُ وِعِ طُعُمْ، دٛوْ رُوحُ اَللَّه اٛ مٜتَتَ طُمْ کٛولِيٻٜمٛ کٜٻَتَ؞ اٜ نغٜلْ طٛنْ شَرٜلْ اَللَّه حٛکَّايِ رُوحُ مُوطُمْ تَوْ، نغَمْ يٜىٰسُ تٜدِّنَاکَ تَوْ؞ 
ندٜ يِمْٻٜ حَوْرُتُٻٜ نَنِ حَالَ کَعَ کَ يٜىٰسُ وِعِ، وٛٻّٜ ندٜرْ مَٻّٜ مبِعِ، ‏«‏اٛعٛ نٜطّٛ، غٛونغَ، اٛ اٛنْ طٛنْ اَنَّبِيجٛ؞»‏ 
وٛٻّٜ بٛو مبِعِ، ‏«‏کَنْکٛ وٛنِ اَلْمَسِيحُ؞»‏ اَمَّا وٛٻّٜ مبِعِ، ‏«‏نٛ وَطَتَ اَلْمَسِيحُ پِوٛيَ لٜيْدِ غَلِيلِ؟ 
‏«‏نَاع اَايَارٜ وِعِي، اَلْمَسِيحُ پِوٛيَيْ دَغَ ندٜرْ لٜݧٛلْ دَوْدَ، ندٜنْ طُمْ دَݧَيْمٛ تٛ بَيْتَلَامِ، غَرِيرِ تٛ دَوْدَ جٛوطِنٛو؟»‏ 
نغَمْ نٛنْ طُمْ حٜٻِ سٜنْدِندِرْکِ حَکُّندٜ حَوْرُتُٻٜ ٻٜنْ دٛوْ يٜىٰسُ؞ 
وٛٻّٜ اٜ نغِطِ نَنْغُکِمٛ، اَمَّا وَلَا غَطُطٛ جُنْغٛ دٛوْ مَاکٛ؞ 
سٜيْ تَادِيٻٜ وُرٛ شٜنِينغٛ ٻٜنْ شٛعِّي تٛ مَوْٻٜ اَرْدِيٻٜ دِينَ اٜ فَارِسَنْکٛعٜنْ؞ مَوْٻٜ ٻٜنْ اٜ فَارِسَنْکٛعٜنْ ٻٜنْ پَمِٻٜ، مبِعِ، ‏«‏نغَمْ طُمٜ اٛنْ نَنْغَايِمٛ نغَدُّطٛنْمٛ؟»‏ 
تَادِيٻٜ ٻٜنْ مبِعِ، ‏«‏وَلَا مٜىٰطُطٛ مٜتِرْکِ نٛ نٜطّٛ اٛعٛ مٜتِرِ؞»‏ 
فَارِسَنْکٛعٜنْ مبِعِٻٜ، ‏«‏کٛو اٛنٛنْ مَا اٛ پٛيْرِيعٛنْ؟ 
کٛو اٛنْ نغِعِي غٛطّٛ ندٜرْ اَرْدِيٻٜ يَحُودَنْکٛعٜنْ اٜ فَارِسَنْکٛعٜنْ حٛولَکٜمٛ؟ 
اَمَّا ٻٜعٜ حَوْرُتُٻٜ ٻٜ اَنْدَا کٛو طُمٜ دٛوْ اَتَّوْرَ، ٻٜ لَانَاٻٜ؞»‏ 
نِکٛودِمُسْ جَانٛوطٛ تٛ يٜىٰسُ اٛ غٛعٛتٛ ندٜرْ فَارِسَنْکٛعٜنْ ٻٜنْ، اٛ وِعِٻٜ، 
‏«‏کٛ اَتَّوْرَ مٜىٰطٜنْ وِعِ وٛنِ اٜنْ نغَطَنْتَا نٜطّٛ کِيتَ نَا طُمْ نَنِي کٛ اٛ وِعِ نغَمْ طُمْ اَنْدَ کٛ اٛ وَطَتَ؞»‏ 
ٻٜ مبِعِمٛ، ‏«‏اَنْ مَا غَلِيلِ پِوٛيْطَا؟ جَنْغُ وٛلْدٜ اَللَّه بٛطُّمْ، اَ يِعَيْ وَلَا اَنَّبِيجٛ پِوٛيَيْطٛ دَغَ غَلِيلِ؞»‏ 
سٜيْ کٛو مٛيٜ حٛوتِ؞ 
