﻿يَحَيَ.
4.
فَارِسَنْکٛعٜنْ نَنِ حَبَرُ يٜىٰسُ اٜ حٜٻَ تٛکُّٻٜمٛ ٻُرِي يَحَيَ، طٛنْمَا اٜ مٛ وَطَنَ يِمْٻٜ بَڤْتِسْمَ ٻُرِي يَحَيَ، 
﴿کٛو ندٜ غٛونغَ نَاع طُمْ يٜىٰسُ اٜ حٛورٜ مُوطُمْ وَطَنْتَ يِمْٻٜ بَڤْتِسْمَ طُمْ، اَمَّا تٛکُّٻٜمٛ نغَطَتَطُمْ؞﴾ 
ندٜ يٜىٰسُ نَنِ فَارِسَنْکٛعٜنْ نَنِي حَبَرُ کٛ اٛ وَطَتَ، سٜيْ اٛ اَلِ لٜيْدِ يَحُودِيَ، اٛ سٛعِّي غَلِيلِ؞ 
دٛوْ لَاوٛلْ مَاکٛ طُمْ وَرْتَنِمٛ دٛولٜ اٛ تٛکَّ ندٜرْ لٜيْدِ سَمَارِيَ؞ 
سٜيْ اٛ يٛتِّي وٛنْدِ غَرِيرِ نغٛنْدِ ندٜرْ لٜيْدِ سَمَارِيَ بِعٜتٜىٰندِ سَيْکَرْ نغٛنْدِ حَادٜ نجَيْرِ ندِ يَاکُبُ حٛکِّ ٻِطّٛ مُوطُمْ اِسُفُ دَغَ ندٜنّٛ؞ 
اٜ وٛودِ ٻُنْدُ ندُ يَاکُبُ وَسِ اٜ نجَيْرِ ندِنْ؞ يٜىٰسُ بٛو سٛمِي نغَمْ يَادُ اٛ جٛوطِي حَادٜ ٻُنْدُ ندُنْ؞ اٜ شَرٜلْ نغٜلْ طُمْ شَکَ ݧَلَوْمَ؞ 
سٜيْ غٛطّٛ سَمَارِيَنْکٜىٰجٛ دٜبّٛ وَرِي پٛوغُکِ، يٜىٰسُ وِعِمٛ، ‏«‏حٛکّٛرَمْ ندِيَمْ مِ يَرَ؞»‏ 
اٜ شَرٜلْ نغٜلْ تٛکُّٻٜمٛ نجَادَکٜ نَتِّي ندٜرْ غَرِياِرِ ندِنْ نغَمْ سٛودٛيْکِ ݧَمْندُ؞ 
سٜيْ دٜبّٛ اٛنْ وِعِ يٜىٰسُ، ‏«‏اَ يَحُودَنْکٜىٰجٛ، مِنْ بٛو مِ سَمَارِيَنْکٜىٰجٛ؞ نٛيٜ مبِعَتَايَمْ مِ حٛکُّمَا ندِيَمْ نجَرَا؟»‏ اٛ وِعُ نٛنْ نغَمْ وَلَا کٛ حَوْتِ يَحُودَنْکٛعٜنْ اٜ سَمَارِيَنْکٛعٜنْ؞ 
يٜىٰسُ وِعِمٛ، ‏«‏دَا اَ اَنْدِ شَاحُ طُمْ اَللَّه يِطِ حٛکُّکِمَ، کَدِنْ دَا اَ اَنْدِ پَمُطٛمَ ندِيَمْ نجَرٜتٜىٰطَمْ، دَا اَ تٛرَکٜمٛ، دَا اٛ حٛکِّيمَ ندِيَمْ کٛکّٛوجَمْ يٛنْکِ؞»‏ 
سٜيْ دٜبّٛ اٛنْ وِعِ يٜىٰسُ، ‏«‏مٛودِبّٛ، اَ وَلَا کٛ ݧٜطِرْتَا ندِيَمْ طَمْ، کَدِنْ بٛو ٻُنْدُ ندُنْ اٜ لُغِّ؞ تٛيٜ کٜٻَتَا طَمْ طٛنْ ندِيَمْ کٛکّٛوجَمْ يٛنْکِ؟ 
اَ ٻُرِي مَامَ مٜىٰطٜنْ يَاکُبُ کٛکُّطٛعٜنْ ندُعُ ٻُنْدُ؟ کَنْکٛ اٜ ٻِٻّٜ مَاکٛ اٜ مَرْلٜ مَاکٛ فُو ٻٜ نجَرِي ندِيَمْ ٻُنْدُ ندُعُ؞»‏ 
يٜىٰسُ وِعِمٛ، ‏«‏کٛو مٛيٜ جَرْطٛ ندِيَمْ ٻُنْدُ ندُعُ فُطِّتَيْ نَنَ طٛنْکَ، 
اَمَّا کٛو مٛيٜ جَرْطٛ ندِيَمْ طَمْ کٛکَّيْمٛومِ اٛ فُطِّتَتَا اٛ نَنَ طٛنْکَ کَدِنْ؞ ندِيَمْ طَمْ کٛکَّيْمٛومِ طَمْ وَرْتَيْ ندٜرْ مَاکٛ ندِيَمْ ٻُلٛوجَمْ کٛکَّيْطَمّٛ يٛنْکِ کِ رٜعَتَا؞»‏ 
دٜبّٛ اٛنْ وِعِمٛ، ‏«‏مٛودِبّٛ، حٛکَّمْ طَمْ طٛنْ ندِيَمْ نغَمْ تٛع مِ فُطِّتَ مِ نَنَ طٛنْکَ، طٛنْمَا تٛع مِ فُطِّتَ مِ وَرَ طٛعٛ نغَمْ پٛوغُکِ؞»‏ 
يٜىٰسُ وِعِمٛ، ‏«‏يَحُ نٛدّٛيَا غٛرْکٛ مَاطَ، نغَرْدٛيٛنْ؞»‏ 
دٜبّٛ اٛنْ وِعِ، ‏«‏مِ وَلَا غٛرْکٛ؞»‏ يٜىٰسُ وِعِمٛ، ‏«‏اَ وِعِي غٛونغَ ندٜ مبِيطَا اَ وَلَا غٛرْکٛ؞ 
غٛونغَ کَنْ وٛنِ اَ وَطِي تٜىٰلٜ جٛوِ، نٜطّٛ مٛ نجٛوطٛدِطَا جٛونِ بٛو نَاع اٛ غٛرْکٛ مَاطَ؞ کٛ مبِيطَا طُمْ غٛونغَ؞»‏ 
دٜبّٛ اٛنْ وِعِ، ‏«‏مٛودِبّٛ، مِ فَامِي اَ اَنَّبِيجٛ؞ 
مَامَعٜنْ اَمِنْ مَوْنِنِي اَللَّه دٛوْ حٛشّٜىٰرٜ ندٜعٜ، اَمَّا اٛنٛنْ يَحُودَنْکٛعٜنْ اٛنْ مبِعَ اُرُشَلِيمَ وٛنِ تٛ حَانِ طُمْ مَوْنِنَ اَللَّه؞»‏ 
يٜىٰسُ وِعِمٛ، ‏«‏جَٻُ کٛ مبِعَيْمِ، شَرٜلْ اٜ وَرَ نغٜلْ مَوْنِنْتٛنْ ݧَاکٛ مٛ دٛوْ نَاع دٛوْ حٛشّٜىٰرٜ ندٜعٜ نَاع ندٜرْ اُرُشَلِيمَ؞ 
اٛنٛنْ سَمَارِيَنْکٛعٜنْ اٛنْ مَوْنِنَ کٛ اٛنْ اَنْدَا، اَمَّا مِنٛنْ يَحُودَنْکٛعٜنْ اٜ مِنْ مَوْنِنَ کٛ مِنْ اَنْدِ، نغَمْ دَغَ تٛ يَحُودَنْکٛعٜنْ کِسْندَمْ پِوٛيِ؞ 
اَمَّا شَرٜلْ اٜ وَرَ، نغٜلْ يَادَکٜ نغٜلْ وَرِي، شَرٜلْ نغٜلْ يِمْٻٜ مَوْنِنٛوٻٜ اَللَّه نٛ حَانِ ٻٜ مَوْنِنَيْ ݧَاکٛ مٛ دٛوْ ندٜرْ غٛونغَ اٜ ندٜرْ بَوْطٜ رُوحُ اَللَّه، نغَمْ اِرِ مَٻّٜ ݧَاکٛ مٛ دٛوْ يِطِ ٻٜ مَوْنِنَمٛ؞ 
اَللَّه اٛ رُوحُ، مَوْنِنٛوٻٜمٛ بٛو دٛولٜ مَوْنِنَمٛ ندٜرْ رُوحُ اٜ غٛونغَ؞»‏ 
دٜبّٛ اٛنْ وِعِ يٜىٰسُ، ‏«‏اٜ مِ اَنْدِ اَلْمَسِيحُ اٜ وَرَ، وَاتٛ شُٻَاطٛ اَللَّه؞ تٛ اٛ وَرِي، اٛ وِعَيْمِنْ کٛو طُمٜ؞»‏ 
سٜيْ يٜىٰسُ وِعِمٛ، ‏«‏مِنْ مٜدّٛووٛ اٜ مَاطَ، مِنْ وٛنِ اَلْمَسِيحُ اٛنْ؞»‏ 
اٜ نغٜلْ طٛنْ شَرٜلْ تٛکُّٻٜ يٜىٰسُ نغَرْتٛيِ، ٻٜ کَيْطِنِ ندٜ ٻٜ تَوِ اٜ مٛ مٜدَّ اٜ دٜبّٛ؞ اَمَّا وَلَا غٛطّٛ ندٜرْ مَٻّٜ بِيطٛمٛ، ‏«‏کٛ نغِطَّا؟»‏ کٛو، ‏«‏نغَمْ طُمٜ مٜدَّتَا اٜ مَاکٛ؟»‏ 
سٜيْ دٜبّٛ اٛنْ اَلِ پٛوغِرْدٜ مُوطُمْ، سٛعِّي غَرِيرِ وِعِ يِمْٻٜ، 
‏«‏نغَرٜىٰ، نغِعٛنْ نٜطّٛ بِيطٛيَمْ کٛو طُمٜ کٛ مٜىٰطُمِ وَطُکِ؞ کٛو کَنْکٛ وٛنِ اَلْمَسِيحُ؟»‏ 
سٜيْ يِمْٻٜ ٻٜنْ اَلِ غَرِيرِ ندِنْ ٻٜ نجَحِ تٛ يٜىٰسُ؞ 
اٜ طُمْ ندٜرْ نٛنْ سٜيْ تٛکُّٻٜمٛ تٛرِيمٛ مبِعِمٛ، ‏«‏مٛودِبّٛ، ݧَامُ غٛطُّمْ؞»‏ 
اَمَّا اٛ وِعِٻٜ، ‏«‏اٜ مِ وٛودِ ݧَمْندُ ندُ ݧَامَيْمِ، اٛنْ اَنْدَا کٛو طُمٜ دٛوْ مَيْرُ؞»‏ 
سٜيْ تٛکُّٻٜمٛ ڤُطِّ پَمْپَمْتِرْکِ اٜ مبِعَ، ‏«‏کٛو غٛطّٛ وَدَّنِيمٛ ݧَمْندُ؟»‏ 
يٜىٰسُ وِعِٻٜ، ‏«‏ݧَمْندُ اَمْ وٛنِ مِ وَطَ کٛ لِلْطٛيَمْ وِعِيَمْ، مِ يٛتِّنَ کُوغَلْ نغَلْ اٛ حٛکِّيَمْ؞ 
نَاع اٛنْ مبِعَ، ‏‹‏حٛرِي لٜبِّ نَيِ طُمْ اِتَّ کٛ رٜمَا؟›‏ اٜ مِ وِعَعٛنْ، ندَارٜىٰ غٜسٜ بٛطُّمْ؞ کٛ رٜمَا ٻٜنْدِي طُمْ حٜوْتِي اِتّٜىٰکِ؞ 
اِتّٛووٛ کٛ رٜمَا اٜ يٛٻٜىٰ، کٛ رٜمَا طُمْ اٛ حَوْرِتَتَ وٛنِ يِمْٻٜ کٜٻٛوٻٜ يٛنْکِ کِ رٜعَتَا، نغَمْ اَاوُطٛ اٜ اِتُّطٛ کٛ ٻٜنْدِ ٻٜ کَوْتَ ٻٜ مبٜلْمبٜلْتَ؞ 
کَعَ حَالَ طُمْ غٛونغَ بِيکَ، ‏‹‏غٛطّٛ اَاوِي، غٛطّٛ بٛو اِتِّي کٛ ٻٜنْدِ؞›‏ 
مِ لِلِيعٛنْ اِتّٛنْ کٛ ٻٜنْدِ طُمْ اٛنْ کُوَنَايِ؞ وٛٻّٜ کُوِي نَاع سٜطَّ، اٛنٛنْ بٛو اٛنْ ݧَامِي بٛتٜ کُوغَلْ مَٻّٜ؞»‏ 
سَمَارِيَنْکٛعٜنْ طُطْٻٜ اٜ ندِنْ طٛنْ غَرِيرِ کٛولِي يٜىٰسُ نغَمْ اٛنْ طٛنْ دٜبّٛ وِعِي، ‏«‏اٛ وِعِييَمْ کٛو طُمٜ طُمْ مٜىٰطُمِ وَطُکِ؞»‏ 
نغَمْ نٛنْ، ندٜ سَمَارِيَنْکٛعٜنْ ٻٜنْ نغَرِ تٛ يٜىٰسُ، ٻٜ تٛرِيمٛ اٛ جٛوطٛدٛو اٜ مَٻّٜ؞ سٜيْ اٛ جٛوطٛدِي اٜ مَٻّٜ بَلْطٜ طِطِ؞ 
يِمْٻٜ کٛولِيٻٜ يٜىٰسُ ٻٜيْدِي نَاع سٜطَّ نغَمْ بٛلِيطٜ مَاکٛ؞ 
ٻٜ مبِعِ دٜبّٛ اٛنْ، ‏«‏جٛونِ مِنْ کٛولَکٜ يٜىٰسُ، نَاع نغَمْ کٛ مبِيطَا تَنْ، اَمَّا نغَمْ مِنٛنْ اٜ کٛعٜ اَمِنْ مِنْ نَنِي کٛ اٛ وِعِ، مِنْ تَبِّتِنِي کَنْکٛ وٛنِ کِسْنٛووٛ دُونِيَارُ؞»‏ 
غَطَ يٜىٰسُ وَطِي بَلْطٜ طِطِ طٛنْ، اٛ دِلِّ غَلِيلِ، 
نغَمْ کَنْکٛ اٜ حٛورٜ مَاکٛ اٛ وِعِ، ‏«‏اَنَّبِيجٛ مَوْنِنْتَاکٜ تٛ لٜيْدِ مُوطُمْ؞»‏ 
ندٜ اٛ يٛتِّي غَلِيلِ، غَلِلَنْکٛعٜنْ نجَٻِّيمٛ، نغَمْ کَمْٻٜ مَا ٻٜ نجَحِينٛ حُمْتٛ سَکِّنْکِ ندٜرْ اُرُشَلِيمَ، ٻٜ نغِعِي فُو کٛ اٛ وَطِ تٛنْ؞ 
سٜيْ يٜىٰسُ فُطِّتِ سٛعِّي غَرِيرِ کَانَ نغٛنْدِ ندٜرْ لٜيْدِ غَلِيلِ؞ کَيْرِ وٛنِ تٛ اٛ وَيْلِتِ ندِيَمْ طَمْ وَرْتِ اِنَبٛجَمْ؞ تٛو، ندٜرْ غَرِيرِ کَفَرْنَحُمْ اٜ وٛودِ غٛطّٛ مَوْطٛ ندٜرْ غٛمْنَتِ، ٻِطّٛ مَاکٛ اٜ ݧَوَ؞ 
ندٜ نٜطّٛ اٛنْ نَنِ يٜىٰسُ اَلِي لٜيْدِ يَحُودِيَ وَرِي لٜيْدِ غَلِيلِ، اٛ يَحِ تٛ يٜىٰسُ اٛ تٛرِيمٛ اٛ يَحَ کَفَرْنَحُمْ اٛ يَمْطِتِنَ ٻِطّٛ مَاکٛ ٻَدِيطٛ مَايَ؞ 
يٜىٰسُ وِعِمٛ، ‏«‏اٛنٛنْ يِمْٻٜ تٛ نَاع اٛنْ نغِعُ مِ وَطِي اَلَامَاجِ اٜ کُوطٜ کَيْطِنِيطٜ، اٛنْ کٛولَتَاکٛيَمْ؞»‏ 
اٛ وِعِ يٜىٰسُ، ‏«‏مٛودِبّٛ، اٜنْ نجَحُ کٛ ٻِطّٛ اَمْ مَايَ؞»‏ 
سٜيْ يٜىٰسُ وِعِمٛ، ‏«‏يَحُ، ٻِطّٛ مَاطَ مَايَتَا؞»‏ نٜطّٛ اٛنْ جَٻِ کٛ يٜىٰسُ وِعِمٛ، اٛ دِلِّ؞ 
اٜ مٛ دٛوْ لَاوٛلْ سٛعَّاکِ وُرٛ، سٜيْ مَشُّٻٜ مَاکٛ کَوْرِ اٜ مَاکٛ ٻٜ مبِعِمٛ، ‏«‏ٻِطّٛ مَاطَ يَمْطِتِي؞»‏ 
ندٜ اٛ پَمِٻٜ نغٜلٜ شَرٜلْ ٻِطّٛ اٛنْ يَمْطِتِ، ٻٜ مبِعِمٛ، ‏«‏کٜىٰݧَ نجَمْندِ غٛعٛ ندِ ݧَلَوْمَ جٛنْتٜ طٜنْ نجٛوفِمٛ؞»‏ 
سٜيْ اٛ فَامِ شَرٜلْ نغٜلْ ٻِطّٛ اٛنْ يَمْطِتِ طُمْ شَرٜلْ نغٜلْ يٜىٰسُ وِعُنٛومٛ، ‏«‏ٻِطّٛ مَاطَ مَايَتَا؞»‏ نغَمْ نٛنْ، کَنْکٛ اٜ فُو وُرٛ مَاکٛ ٻٜ کٛولِي يٜىٰسُ؞ 
طُعُمْ کَنْجُمْ وٛنِ کَيْطِنِيطُمْ طِطَٻُمْ طُمْ يٜىٰسُ وَطِ تٛ غَلِيلِ؞ اٛ وَطِيطُمْ غَطَ اٛ وَرْتٛيِي دَغَ لٜيْدِ يَحُودِيَ؞ 
