﻿حَبَرُ يٜىٰسُ طُمْ  يَحَيَ  وِنْدِ.
1.
دَغَ کٛ دُونِيَارُ تَغٜىٰ بِعٜتٜىٰطٛ وٛلْدٜ اٜ طٛنْ، اٜ مٛ وٛنْدِ اٜ اَللَّه، ندٜنْ اٛ اَللَّه؞ 
دَغَ کٛ دُونِيَارُ تَغٜىٰ بِعٜتٜىٰطٛ وٛلْدٜ اٛنْ اٜ وٛنْدِ اٜ اَللَّه؞ 
اٛ تَغِي کٛو طُمٜ؞ وَلَا غٛطُّمْ ندٜرْ فُو کٛ تَغَا طُمْ اُمْ تَغِرَايِ لَاوٛلْ مَاکٛ؞ 
تٛ مَاکٛ يٛنْکِ پِوٛيِ، ندٜنْ يٛنْکِ کِنْ وٛنِ جَيْنغٛلْ يِمْٻٜ؞ 
جَيْنغٛلْ نغٛلْ اٜ وَطِ کَ يٜيْنَاکِ ندٜرْ ݧِوْرٜ، ݧِوْرٜ بٛو وَاوَايِ جَالَاکِنغٛلْ؞ 
اٜ وٛودِ غٛطّٛ نٜطّٛ مٛ اَللَّه لِلٛيِ بِعٜتٜىٰطٛ يَحَيَ؞ 
اٛ وَرِي اٛ اَنْدِنَ يِمْٻٜ حَبَرُ جَيْنغٛلْ نغٛلْ، نغَمْ اٜ لَاوٛلْ مَاکٛ کٛو مٛيٜ جَٻَ جَيْنغٛلْ نغٛلْ؞ 
نَاع کَنْکٛ وٛنِ جَيْنغٛلْ نغٛلْ؞ اٛ وَرٛيِ اٛ اَنْدِنَ حَبَرُ تَنْ دٛوْ مَاغٛلْ؞ 
کَنْغٛلْ وٛنِ جَيْنغٛلْ غٛونغَوٛلْ يٜيْنٛتٛونغٛلْ دٛوْ کٛو مٛيٜ؞ نغٛلْ بٛو وَرِي ندٜرْ دُونِيَارُ؞ 
بِعٜتٜىٰطٛ وٛلْدٜ اٛنْ ندٜنّٛ اٜ مٛ ندٜرْ دُونِيَارُ؞ کٛو ندٜ کَنْکٛ تَغِ دُونِيَارُ، فُو اٜ نٛنْ دُونِيَارُ اَنْدَامٛ؞ 
اٛ وَرِي تٛ ٻٜ مَاکٛ، اَمَّا ٻٜ نجَٻَايِمٛ؞ 
اَمَّا فُو جَٻُٻٜمٛ کٛولِيٻٜ اِنْدٜ مَاکٛ، اٛ حٛکِّيٻٜ بَوْطٜ وَرْتُکِ ٻِٻّٜ اَللَّه؞ 
ٻٜ نغَرْتَايِ ٻِٻّٜ اَللَّه نغَمْ ٻٜ ندَݧَامَ نٛ طُمْ دَݧِرْتَ يِمْٻٜ، کٛو نغَمْ يِمْٻٜ نغِطِ نٛنْ وَطَ؞ اَللَّه اٜ حٛورٜ مُوطُمْ وَرْتِرِٻٜ ٻِٻّٜ مَاکٛ؞ 
بِعٜتٜىٰطٛ وٛلْدٜ اٛنْ، اٛ وَرْتِي نٜطّٛ، اٛ جٛوطِي ندٜرْ مٜىٰطٜنْ، اٛ کٜوْطٛ يِدّٜ اٜ غٛونغَ؞ اٜنْ نغِعِي تٜدُّنغَلْ مَاکٛ، تٜدُّنغَلْ ٻِطّٛ بَجّٛ پِوٛيْطٛ تٛ ݧَاکٛ مٛ دٛوْ؞ 
يَحَيَ حٛکِّي شٜيْدَ دٛوْ مَاکٛ، مٜتِي سٜمْبٜىٰ وِعِي، ‏«‏دٛوْ اٛعٛ مٜتُنٛومِ ندٜ مبِيمِ، ‏‹‏اٛنْ طٛنْ غَرَيْطٛ غَطَ اَمْ اٛ ٻُرِييَمْ مَنْغُ، نغَمْ اٜ مٛ طٛنْ کٛ مِ دَݧٜىٰ؞›‏ »‏ 
نغَمْ يِدّٜ مَوْندٜ ندٜ اٛ يِطِعٜنْ، اٛ بَرْکِطِنِيعٜنْ اٜنْ فُو، بَرْکَ دٛوْ بَرْکَ؞ 
اَللَّه حٛکِّي اَتَّوْرَ اٜ لَاوٛلْ مُوسَ، اَمَّا اٜ لَاوٛلْ يٜىٰسُ اَلْمَسِيحُ اٛ حٛلِّي يِدّٜ اٜ غٛونغَ؞ 
وَلَا نٜطّٛ مٜىٰطُطٛ يِيکِ اَللَّه؞ ٻِطّٛ مَاکٛ بَجّٛ، غٛنْطٛ ندٜرْ ٻٜرْندٜ ݧَاکٛ مٛ دٛوْ، کَنْکٛ حٛلِّعٜنْ نٛ اَللَّه وَعِ؞ 
رَا شٜيْدَ طُمْ يَحَيَ حٛکِّ شَرٜلْ کٛ اَرْدِيٻٜ يَحُودَنْکٛعٜنْ ندٜرْ اُرُشَلِيمَ لِلِ وٛٻّٜ اَرْدِيٻٜ دِينَ اٜ لٜىٰوِيَنْکٛعٜنْ تٛ مَاکٛ ٻٜ پَمَمٛ کَنْکٛ اٛ مٛيٜ؞ 
اٛ وَݧَايِ نٛوتَاکِٻٜ، اَمَّا اٛ وِعِٻٜ اٜ نجَيْرِ، ‏«‏نَاع مِنْ وٛنِ اَلْمَسِيحُ؞»‏ 
ٻٜ مبِعِمٛ، ‏«‏تٛ نَاع اَنْ وٛنِ اَلْمَسِيحُ، تٛو، اَنْ اَ مٛيٜ؟ اَنْ وٛنِ اِلِيَ؟»‏ يَحَيَ نٛوتِي وِعِٻٜ، ‏«‏کٛو سٜطَّ، نَاع طُمْ مِنْ؞»‏ ٻٜ پَمِمٛ ٻٜ مبِعِ، ‏«‏اَنْ وٛنِ اٛنْ طٛنْ اَنَّبِيجٛ؟»‏ اٛ وِعِ، ‏«‏اَاعَ؞»‏ 
سٜيْ ٻٜ مبِعِمٛ، ‏«‏تٛو، وِعُمِنْ، اَنْ، اَ مٛيٜ؟ وِعُمِنْ کٛ مِنْ مبِعَتَ لِلٛيْٻٜمِنْ؞ مٛيٜ نٛدِّرْتَا حٛورٜ مَاطَ؟»‏ 
سٜيْ يَحَيَ وِعِٻٜ کٛ اَنَّبِ اِشَايَ وِعُنٛ، اٛ وِعِ، ‏«‏مِنْ وٛنِ غٛطّٛ نٛدّٛووٛ ندٜرْ لَدّٜ اٜ وِعَ، ‏‹‏ڤٛرْتٜىٰ لَاوٛلْ نغَمْ جٛومِرَاوٛ؞›‏ »‏ 
سٜيْ وٛٻّٜ فَارِسَنْکٛعٜنْ ٻٜ طُمْ لِلِ 
پَمِمٛ مبِعِ، ‏«‏تٛ نِ نَاع اَنْ وٛنِ اَلْمَسِيحُ، کَدِنْ نَاع اَنْ وٛنِ اِلِيَ، کٛو اٛنْ طٛنْ اَنَّبِيجٛ، نغَمْ طُمٜ نغَطَنْتَا يِمْٻٜ بَڤْتِسْمَ؟»‏ 
يَحَيَ وِعِٻٜ، ‏«‏اٜ مِ وَطِرَ بَڤْتِسْمَ اٜ ندِيَمْ، اَمَّا ندٜرْ مٛوطٛنْ اٜ وٛودِ غٛطّٛ مٛ اٛنْ اَنْدَا، 
غَرٛيَيْطٛ غَطَ اَمْ؞ مِ فٛتَايِ فِتُّکِ لٛکُّلِّ ڤَطٜ مَاکٛ؞»‏ 
فُو طُعُمْ طُمْ وَطِي تٛ بٜتَنِ فٛنْغٛ شَانغٛلْ اُرْدُنْ، تٛ يَحَيَ وَطَتَ بَڤْتِسْمَ؞ 
غَطَ طُعُمْ وَطِي ندٜ فِنِ يَحَيَ يِعِ يٜىٰسُ اٜ وَرٛيَ تٛ مُوطُمْ، اٛ وِعِ، ‏«‏رَا کَرٛورِ اَللَّه، اِتَّيْندِ حَکّٜىٰجِ دُونِيَارُ!‏ 
اٛعٛ دٛوْ مَاکٛ مٜتَيْنٛومِ ندٜ مبِيمِ، ‏‹‏غٛطّٛ اٜ وَرَ غَطَ اَمْ اٛ ٻُرِييَمْ مَنْغُ، نغَمْ اٜ مٛ طٛنْ کٛ مِ دَݧٜىٰ؞›‏ 
مِنْ اٜ حٛورٜ اَمْ مِ اَنْدَامٛ، اَمَّا مِ وَرِي اٜ مِ وَطِرَ بَڤْتِسْمَ اٜ ندِيَمْ نغَمْ اٛ وَنْغِنَنٜىٰ يِمْٻٜ اِسْرَاعِيلَ؞»‏ 
سٜيْ يَحَيَ حٛکِّ شٜيْدَ وِعِ، ‏«‏مِ يِعِي رُوحُ اَللَّه اٜ جِڤّٛيٛو دَغَ دٛوْ بٛ فٛوندُ، طُمْ جٛوطِي دٛوْ مَاکٛ؞ 
مِنْ اٜ حٛورٜ اَمْ مِ اَنْدَامٛ، اَمَّا لِلٛيْطٛيَمْ مِ وَطِرَ بَڤْتِسْمَ اٜ ندِيَمْ وِعِيَمْ، ‏‹‏نٜطّٛ مٛ نغِيطَا رُوحُ اَمْ جِڤّٛيَکٜ دَغَ دٛوْ جٛوطِي دٛوْ مَاکٛ، کَنْکٛ وٛنِ غَطِرَيْطٛ بَڤْتِسْمَ اٜ رُوحُ اَمْ؞›‏ »‏ 
طٛنْمَا يَحَيَ وِعِ، ‏«‏مِ يِعِيطُمْ، مِ شٜيْدَکٜ کَنْکٛ وٛنِ ٻِطّٛ اَللَّه؞»‏ 
طٛنْمَا غَطَ طُعُمْ وَطِي ندٜ فِنِ يَحَيَ اٜ دَرِي کَنْکٛ اٜ تٛکُّٻٜمٛ طِطٛ، 
سٜيْ اٛ يِعِ يٜىٰسُ اٜ پَٻّٛو، اٛ وِعِ، ‏«‏رَا کَرٛورِ اَللَّه!‏»‏ 
ندٜ تٛکُّٻٜمٛ طِطٛ ٻٜنْ نَنِ اٛ وِعِي نٛنْ، سٜيْ ٻٜ تٛکِّ يٜىٰسُ؞ 
يٜىٰسُ وَيْلِتِي يِعِ اٜ ٻٜ تٛکِّمٛ، اٛ وِعِٻٜ، ‏«‏طُمٜ طَٻِّتٛتٛنْ؟»‏ ٻٜ مبِعِمٛ، ‏«‏رَبِّ، تٛيٜ نجٛوطٛتٛطَا؟»‏ مَعَنَ ‏«‏رَبِّ»‏ وٛنِ ‏«‏مٛودِبّٛ؞»‏ 
اٛ وِعِٻٜ، ‏«‏نغَرٜىٰ، نغِعٛنْ؞»‏ اٜ شَرٜلْ نغٜلْ طُمْ نجَمْندِ نَيِ اَلَاسَرَ؞ سٜيْ ٻٜ تٛکِّمٛ ٻٜ نغِعِ تٛ اٛ جٛوطٛتٛو، ٻٜ کِرْتِدِ اٜ مَاکٛ؞ 
غٛعٛتٛ ندٜرْ يِمْٻٜ طِطٛ نَنْٻٜ کٛ يَحَيَ وِعِ تٛکِّ يٜىٰسُ ٻٜنْ وٛنِ اَنْدِرَاوُسْ مِݧِرَاوٛ سِيمَنْ بِيتُرُسْ؞ 
اَرْتُطُمْ اَنْدِرَاوُسْ تَوِ مَوْنِرَاوٛ مَاکٛ سِيمَنْ، اٛ وِعِمٛ، ‏«‏مِنْ کَوْرِي اٜ اَلْمَسِيحُ،»‏ وَاتٛ شُٻَاطٛ اَللَّه؞ 
سٜيْ اٛ يَارِ سِيمَنْ تٛ يٜىٰسُ؞ يٜىٰسُ رَارِ سِيمَنْ اٛنْ وِعِمٛ، ‏«‏اَنْ وٛنِ سِيمَنْ ٻِطّٛ يَحَيَ؞ طُمْ نٛدِّرْتٜ کٜىٰفَسْ؞»‏ مَعَنَ کٜىٰفَسْ وٛنِ بِيتُرُسْ، وَاتٛ ‏«‏حَيْرٜ؞»‏ 
غَطَ طُعُمْ وَطِي ندٜ فِنِ يٜىٰسُ سُٻِ يَحَ لٜيْدِ غَلِيلِ؞ سٜيْ اٛ تَوِ فِلِبُسْ، اٛ وِعِمٛ، ‏«‏تٛکَّمْ؞»‏ 
فِلِبُسْ بٛو اٛ نٜطّٛ غَرِيرِ بٜتَسَيْدَ؞ کَيْرِ وٛنِ غَرِيرِ اَنْدِرَاوُسْ اٜ بِيتُرُسْ؞ 
سٜيْ فِلِبُسْ يَحِ تَوِ نَتَانِيَلْ وِعِمٛ، ‏«‏مِنْ کَوْرِي اٜ اٛنْ طٛنْ نٜطّٛ مٛ مُوسَ وِنْدِ دٛوْ مُوطُمْ ندٜرْ اَتَّوْرَ، مٛ اَنَّبٛعٜنْ مَا مبِنْدِ دٛوْ مَاکٛ، وَاتٛ يٜىٰسُ ٻِطّٛ يُسُفُ پِوٛيْطٛ غَرِيرِ نَجَرَتْ؞»‏ 
نَتَانِيَلْ وِعِ فِلِبُسْ، ‏«‏اٜ يِيکِ مَاطَ غٛطُّمْ بٛطُّمْ وُرْتٛيْتٛ نَجَرَتْ؟»‏ فِلِبُسْ وِعِمٛ، ‏«‏وٛرٛيْ، نغِعَا؞»‏ 
ندٜ يٜىٰسُ يِعِ نَتَانِيَلْ اٜ وَرٛيَ تٛ مُوطُمْ، سٜيْ مٜتِ دٛوْ مَاکٛ، وِعِ، ‏«‏رَا اِسْرَاعِيلَنْکٜىٰجٛ مٛ غٛونغَ مٛ فٜوَتَا؞»‏ 
نَتَانِيَلْ پَمِ يٜىٰسُ وِعِ، ‏«‏نٛ وَطِ اَنْدُطَايَمْ؟»‏ يٜىٰسُ وِعِمٛ، ‏«‏مِ يِعِيمَ لٜيْ لٜکِّ اِبِّ کٛ فِلِبُسْ نٛدُّمَا؞»‏ 
نَتَانِيَلْ وِعِمٛ، ‏«‏مٛودِبّٛ، اَنْ وٛنِ ٻِطّٛ اَللَّه!‏ اَنْ وٛنِ لَامِيطٛ اِسْرَاعِيلَ؞»‏ 
يٜىٰسُ وِعِمٛ، ‏«‏اَ حٛولِيَمْ نغَمْ مِ وِعِيمَ مِ يِعِيمَ لٜيْ لٜکِّ اِبِّ؟ اَ يِعَيْ فِي طُطُّمْ ٻُرْطُمْ طُعُمْ؞»‏ 
سٜيْ يٜىٰسُ ٻٜيْدِ وِيکِٻٜ، ‏«‏اٜ مِ وِعَعٛنْ غٛونغَ، اٛنْ نغِعَيْ دٛوْ مَٻِّتَکٜ، مَلَاعِکَعٜنْ اَللَّه اٜ پٜنْتَ اٜ نجِڤّٛيٛو يٜىٰسٛ ٻِي نٜطّٛ؞»‏ 
