﻿لُکَ.
18.
سٜيْ يٜىٰسُ حٛکِّ تٛکُّٻٜمٛ مِسَالُ طُعُمْ نغَمْ اٛ حٛلَّٻٜ ٻٜ نغَطَ کَ وَطُکِ دٛعَارٜ تٛع ٻٜ شٛمَ؞ 
اٛ وِعِ، ‏«‏اٜ وٛنْدِ غَرِيرِ اٜ وٛودِ غٛطّٛ اَلْکَالِيجٛ مٛ حُلَتَا اَللَّه اٛ وَنَّا اٜ يِمْٻٜ؞ 
اٜ وٛودِ غٛطّٛ دٜبّٛ ندٜرْ غَرِيرِ ندِنْ غٛرْکٛ مَاکٛ مَايِ؞ کٛو ندٜيٜ اٜ مٛ يَحَ تٛ اَلْکَالِيجٛ اٛنْ اٜ مٛ تٛرٛومٛ اٜ مٛ وِعَ، ‏‹‏وَطُ کٛ حَانِ حَکُّندٜ اَمْ اٜ غَݧٛ اَمْ؞›‏ 
اَلْکَالِيجٛ اٛنْ نٜىٰٻِ جَٻَايِ؞ اَمَّا غَطَ طٛنْ اٛ وِعِ ندٜرْ ٻٜرْندٜ مَاکٛ، ‏‹‏کٛو ندٜ مِ حُلَتَا اَللَّه، کَدِنْ مِ وَنَّا اٜ کٛو مٛيٜ، 
اَمَّا نغَمْ دٜبّٛ اٛعٛ اٜ وَنَّيَمْ، مِ وَطَنَيْمٛ کٛ حَانِ، نغَمْ تٛع اٛ وَطَ مِ سٛمَ اٜ غَرٛلْ مَاکٛ؞›‏ »‏ 
ندٜنْ يٜىٰسُ وِعِ، ‏«‏نَنٜىٰ کٛ اَلْکَالِيجٛ اٛعٛ مٛ حُلَتَا جٛومِرَاوٛ وِعِ؞ 
اٜ يِعُکِ مٛوطٛنْ اَللَّه وَطَنْتَا شُٻَاٻٜ مُوطُمْ تٛرٛتٛوٻٜمٛ جٜمَّ اٜ ݧَلَوْمَ کٛ حَانِ؟ اٛ نٜىٰٻَيْ اٛ وَلَّايِٻٜ؟ 
اٜ مِ وِعَعٛنْ، اٛ يَاوَيْ وَطَنْکِٻٜ کٛ حَانِ؞ اَمَّا تٛ ٻِي نٜطّٛ وَرْتٛيِي، اٛ تَوَيْ کٛولِيٻٜمٛ ندٜرْ دُونِيَارُ بٛو؟»‏ 
اٜ وٛودِ نغِعٛوٻٜ کٛعٜ مُعّٜنْ ٻٜ غَطٛوٻٜ کٛ اَللَّه يِطِ، اٜ ٻٜ نجَوَنَ وٛٻّٜ؞ يٜىٰسُ حٛکِّٻٜ مِسَالُ طُعُمْ؞ 
اٛ وِعِ، ‏«‏يِمْٻٜ طِطٛ نجَحِ وُرٛ شٜنِينغٛ نغَمْ ٻٜ نغَطَ دٛعَارٜ، غٛعٛتٛ فَارِسَنْکٜىٰجٛ، غٛعٛتٛ بٛو جَٻٛووٛ شٜىٰدٜ لٜيْدِ؞ 
فَارِسَنْکٜىٰجٛ اٛنْ دَرِي، وَطِ دٛعَارٜ ندٜرْ ٻٜرْندٜ مُوطُمْ وِعِ، ‏‹‏اَللَّه، مِ يٜتِّيمَ نغَمْ مِ وَطَتَا کٛ وٛٻّٜ يِمْٻٜ نغَطَتَ، بٛ وُيْٻٜ، اٜ غَطٛوٻٜ کٛ وٛوطَا، اٜ غَطٛوٻٜ نجٜىٰنُ، کٛو مَا بٛ جَٻٛووٛ شٜىٰدٜ لٜيْدِ اٛعٛ؞ 
اٜ مِ سُومٛو ندٜ طِطِ ندٜرْ يٛنْتٛورٜ غٛعٛ، ندٜنْ اٜ مِ اِتَّ جَکَّ ندٜرْ کٛ کٜٻُمِ فُو؞›‏ 
اَمَّا جَٻٛووٛ شٜىٰدٜ لٜيْدِ اٛنْ دَرِي تٛ وٛطِّ؞ اٛ رَارَايِ دٛوْ، اٜ مٛ رٛنْدِ جُوطٜ مَاکٛ دٛوْ حٛورٜ، اٜ مٛ وِعَ، ‏‹‏يَا اَللَّه، يُرْمِنَنَمْ، مِ وَطِي حَکّٜ؞›‏ 
اٜ مِ وِعَعٛنْ، جَٻٛووٛ شٜىٰدٜ لٜيْدِ اٛنْ حٛوتِي وُرٛ اٛ جَافَنَاطٛ حَکّٜ مَاکٛ، اَمَّا فَارِسَنْکٜىٰجٛ اٛنْ يَافَنَاکَ؞ نغَمْ کٛو مٛيٜ مَوْنِنْطٛ حٛورٜ مُوطُمْ اٛ ڤَمْطِنْتٜىٰطٛ، ندٜنْ لٜسْتِنْطٛ حٛورٜ مُوطُمْ بٛو اٛ مَوْنِنْتٜىٰطٛ؞»‏ 
يِمْٻٜ اٜ نغَدَّنَ يٜىٰسُ سُکَحٛيْ مَٻّٜ ڤَمَرٛيْ نغَمْ اٛ بَرْکِطِنَکٛيْ، اَمَّا ندٜ تٛکُّٻٜمٛ نغِعِ نٛنْ، ٻٜ کَٻَنِٻٜ؞ 
اَمَّا يٜىٰسُ نٛدِّ سُکَحٛيْ کٛيْ تٛ مُوطُمْ، وِعِ، ‏«‏اَلٜىٰ سُکَحٛيْ ڤَمَرٛيْ نغَرَ تٛ اَمْ؞ تٛع اٛنْ کَطُکٛيْ، نغَمْ غٛودُٻٜ ٻٜرْطٜ اِرِ طٜ مَاکٛيْ نجٜيِ لَامُ اَللَّه؞ 
اٜ مِ وِعَعٛنْ غٛونغَ، کٛو مٛيٜ مٛ جَٻَايِ لَامُ اَللَّه بٛنٛ سُکَيٜلْ ڤَمَرٜلْ، اٛ نَتَّتَا لَامُ طُمْ کٛو سٜطَّ؞»‏ 
سٜيْ غٛطّٛ لَامِيطٛ پَمِمٛ وِعِ، ‏«‏مٛودِبّٛ غٜىٰتٛ، کٛ حَانِ مِ وَطَ مِ حٜٻَ يٛنْکِ کِ رٜعَتَا؟»‏ 
يٜىٰسُ نٛوتِي، وِعِمٛ، ‏«‏نغَمْ طُمٜ نٛدِّرْطَايَمْ غٜىٰتٛ؟ وَلَا غٜىٰتٛ سٜيْ اَللَّه تَنْ؞ 
اَ اَنْدِ کٛ اَتَّوْرَ وِعِ، ‏‹‏تَاع وَطُ نجٜىٰنُ؞ تَاع وَطُ وَرْحٛورٜ؞ تَاع وُجُّ؞ تَاع حٛکُّ شٜيْدَ فٜوْرٜ؞ حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞›‏ »‏ 
اٛ وِعِ، ‏«‏اٜ مِ وَطَ فِي طُعُمْ فُو دَغَ اٜ مِ سُکَ؞»‏ 
ندٜ يٜىٰسُ نَنِ نٛنْ، وِعِمٛ، ‏«‏حَا جٛونِ حٛرَنِمَا فِي غٛعٛ؞ سٛورُ کٛ نغٛودُطَا فُو، شٜنْدَنَا ٻٜ نغَلَنَا شٜىٰدٜ طٜنْ، ندٜنْ اَ حٜٻَيْ مبَرْجَارِ تٛنْ دٛوْ؞ ندٜنْ نغَرَا، تٛکَّايَمْ؞»‏ 
ندٜ اٛ نَنِ نٛنْ، اٛ نَنَايِ بٜلْطُمْ، نغَمْ اٜ مٛ وٛودِ رِسْکُ طُطُّمْ؞ 
يٜىٰسُ رَارِمٛ وِعِ، ‏«‏اٜ طُمْ سَطِ نَاع سٜطَّ دِسْکُطٛ نَتَّ لَامُ اَللَّه!‏ 
طُمْ ٻُرَيْ حٛيْکِ نغٜىٰلٛوبَ تٛکَّ ندٜرْ يٛلْندٜ بَاتَلْ دٛوْ دِسْکُطٛ نَتَّ لَامُ اَللَّه؞»‏ 
نَنُٻٜ کٛ اٛ وِعِ مبِعِمٛ، ‏«‏تٛو، تٛ طُمْ نٛنْ، مٛيٜ حِسَتَ؟»‏ 
يٜىٰسُ وِعِٻٜ، ‏«‏کٛ يِمْٻٜ مبَاوَتَا وَطُکِ، اَللَّه وَاوَيْ وَطُکِطُمْ؞»‏ 
بِيتُرُسْ وِعِمٛ، ‏«‏رَطُّمْ، مِنْ اَلِي کٛ مِنْ نغٛودِ فُو مِنْ تٛکِّيمَ؞»‏ 
يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، کٛو مٛيٜ اَلُطٛ وُرٛ مُوطُمْ، کٛو دٜبّٛ مُوطُمْ، کٛو سَکِرَاٻٜ مُوطُمْ، کٛو دَݧٛوٻٜ مُوطُمْ، کٛو ٻِٻّٜ مُوطُمْ، نغَمْ لَامُ اَللَّه، 
اٛ حٜٻَيْ کٛ ٻُرِ نٛنْ طُوطُکِ ندٜرْ جَامَنُ طُعُمْ، ندٜنْ تٛ اٛ مَايِي اٛ حٜٻَيْ يٛنْکِ کِ رٜعَتَا؞»‏ 
سٜيْ يٜىٰسُ نٛدِّ تٛکُّٻٜمٛ سَڤّٛ اٜ طِطٛ، ٻٜ کَکِّتِي اٛ وِعِٻٜ، ‏«‏رَطُّمْ، اٜنْ نجَحَيْ اُرُشَلِيمَ، ندٜنْ کٛو طُمٜ کٛ اَنَّبٛعٜنْ مبِنْدِ دٛوْ ٻِي نٜطّٛ طُمْ حٜىٰوَيْ؞ 
طُمْ نَنْغَيْمٛ، طُمْ حٛکِّتِرَمٛ ندٜرْ جُوطٜ حٜىٰفٜرْٻٜ، ٻٜ نجُکِّتَمٛ، ٻٜ کُطَمٛ، ٻٜ تُتَّنَمٛ جٛودٜ، 
ٻٜ ڤِيَمٛ، ٻٜ مبَرَمٛ؞ ندٜنْ ݧَلْندٜ تَتَوْرٜ اٛ اُمّٛتٛ دَغَ مَيْدٜ؞»‏ 
تٛکُّٻٜمٛ سَڤّٛ اٜ طِطٛ ٻٜنْ ڤَامَايِ کٛ اٛ وِعِ دٛوْ حٛورٜ مَاکٛ؞ فَامُ طُمْ سُوطَنَکٜٻٜ، ٻٜ کٜٻْتَايِ دٛوْ طُمٜ اٛ مٜتَتَ؞ 
ندٜ يٜىٰسُ ٻَدِي يٛتَّاکِ غَرِيرِ جٜرِيکٛ، غٛطّٛ بُمْطٛ اٜ جٛوطِي حَادٜ طَتَلْ اٜ تٛرٛو؞ 
ندٜ بُمْطٛ اٛنْ نَنِ يِمْٻٜ طُطْٻٜ اٜ پَٻّٛو، اٛ پَمِ، ‏«‏کٛ وَنْغِ؟»‏ 
ٻٜ مبِعِمٛ، ‏«‏يٜىٰسُ نَجَرَنْکٜىٰجٛ پَٻّٛتٛو؞»‏ 
اٛ نٛدِّ اٜ سٜمْبٜ، اٛ وِعِ، ‏«‏يٜىٰسُ، ٻِطّٛ دَوْدَ، يُرْمِنَنَمْ!‏»‏ 
جَحٛوٻٜ يٜىٰسٛ يٜىٰسُ کَٻَنِمٛ مبِعِمٛ اٛ دٜعِّتَ، اَمَّا اٛ ٻٜيْدِ نٛدُّکِ اٜ سٜمْبٜ، اٜ مٛ وِعَ، ‏«‏ٻِطّٛ دَوْدَ، يُرْمِنَنَمْ!‏»‏ 
نغَمْ نٛنْ يٜىٰسُ دَرِي وِعِ طُمْ وَدَّ بُمْطٛ اٛنْ تٛ مَاکٛ؞ ندٜ اٛ ٻَدّٛيِي حَادٜ، يٜىٰسُ پَمِمٛ، وِعِ، 
‏«‏طُمٜ نغِطَّا مِ وَطَنْمَا؟»‏ اٛ وِعِ، ‏«‏مٛودِبّٛ، اٜ مِ يِطِ مبُمْتِنَايَمْ؞»‏ 
سٜيْ يٜىٰسُ وِعِمٛ، ‏«‏وُمْتُ!‏ حٛولَارٜ مَاطَ يَمْطِتِنِيمَ؞»‏ 
طٛنْ اٜ طٛنْ غِتٜ مَاکٛ مبُمْتِ، اٛ تٛکِّ يٜىٰسُ، اٜ مٛ مَنْتَ اَللَّه؞ ندٜ وٛنْٻٜ طٛنْ فُو نغِعِ کٛ وَطِ، کَمْٻٜ مَا ٻٜ مَنْتِ اَللَّه؞ 
