﻿لُکَ.
11.
وٛنْدٜ ݧَلْندٜ يٜىٰسُ اٜ وَطَ دٛعَارٜ تٛ وٛنْدٜ وِغٜىٰرٜ؞ ندٜ اٛ حٜىٰݧِ دٛعَارٜ ندٜنْ، غٛعٛتٛ ندٜرْ تٛکُّٻٜمٛ وِعِمٛ، ‏«‏مٛودِبّٛ، اٜکِّتِنْمِنْ نٛ مِنْ نغَطِرْتَ دٛعَارٜ، نٛنْ نٛ يَحَيَ غَطٛووٛ بَڤْتِسْمَ اٜکِّتِنِرِ تٛکُّٻٜمٛ؞»‏ 
يٜىٰسُ وِعِٻٜ، ‏«‏تٛ اٛنْ نغَطَيْ دٛعَارٜ، مبِعٜىٰ، ‏‹‏يَا اَللَّه ݧَاکٛ اَمِنْ مٛ دٛوْ، اِنْدٜ مَاطَ شٜنِيندٜ مَوْنِنٜىٰ، لَامُ مَاطَ وَرَ؞ 
حٛکُّمِنْ کٛ مِنْ ݧَامَتَ کٛو ندٜيٜ ݧَلْندٜ؞ 
يَافَنَمِنْ حَکّٜىٰجِ اَمِنْ، نغَمْ مِنٛنْ مَا اٜ مِنْ نجَافَنٛو کٛو مٛيٜ غَطَنْطٛمِنْ حَکّٜ؞ تَاع اَلُ مِنْ نجَحَ تٛ مِنْ نغَطَتَ حَکّٜ؞›‏ »‏ 
ندٜنْ اٛ حٛکِّٻٜ مِسَالُ، اٛ وِعِ، ‏«‏تٛ غٛعٛتٛ ندٜرْ مٛوطٛنْ يَحِي تٛ حِغٛ مُوطُمْ شَکَ جٜمَّ وِعِمٛ، ‏‹‏حِغٛ، وُپَمْ مبُرٛودِحٛ تَتٛ، 
نغَمْ حِغٛ اَمْ اٜ دٛوْ يَادُ يَالٛيِي وَالَ اٜ وُرٛ اَمْ، رَا بٛو مِ وَلَا کٛ کٛکَّيْمٛمِ اٛ ݧَامَ؞›‏ 
سٜيْ اٛ نٛوتِي دَغَ ندٜرْ سُودُ، اٛ وِعِ، ‏‹‏تَاع وَنَّمْ، نغَمْ طُمْ يَادَکٜ طُمْ مَٻِّي دَمُّغَلْ، ندٜنْ مِنْ اٜ ٻِٻّٜ اَمْ مِنْ نجَادَکٜ مِنْ ڤُکَّکٜ؞ مِ وَاوَتَا اُمَّاکِ جٛونِ مِ حٛکُّمَا غٛطُّمْ؞›‏ »‏ 
يٜىٰسُ وِعِ، ‏«‏اٜ مِ وِعَعٛنْ، تٛ اٛ سَلَکٜ اُمَّاکِ اٛ حٛکَّمٛ بُرٛودِ طُمْ نغَمْ حِغَاکُ، اٛ اُمّٛتٛ اٛ حٛکَّمٛطُمْ نغَمْ اٛ وَطِي کَ تٛرَاکِمٛ؞ 
نغَمْ نٛنْ اٜ مِ وِعَعٛنْ، تٛرٜىٰ، طُمْ حٛکَّيْعٛنْ؞ طَٻِّتٜىٰ، اٛنْ کٜٻَيْ؞ شِلْمِنٜىٰ، طُمْ مَٻِّتَنَيْعٛنْ دَمُّغَلْ؞ 
نغَمْ کٛو مٛيٜ تٛرِيطٛ طُمْ حٛکَّيْمٛ، طَٻُّتُطٛ بٛو حٜٻَيْ، ندٜنْ کٛو مٛيٜ شِلْمِنِيطٛ طُمْ مَٻِّتَنَيْمٛ دَمُّغَلْ؞ 
مٛيٜ ندٜرْ مٛوطٛنْ تٛ ٻِطّٛ مُوطُمْ تٛرَکٜمٛ لِنْغُ، اٛ حٛکَّمٛ مبٛودِ؟ 
کٛو بٛو تٛ اٛ تٛرَکٜمٛ ٻٛشّٛوندٜ، اٛ حٛکَّمٛ يَارٜ؟ 
تٛ اٛنٛنْ کَلُّٻٜ، اٛنْ اَنْدِ نٛ کٛکِّرْتٛنْ ٻِٻّٜ مٛوطٛنْ فِي بٛطُّمْ، حَکّٛ ݧَاکٛ مٛوطٛنْ مٛ دٛوْ!‏ اٛ ٻُرَيْ نٛنْ حٛکُّکِ تٛرِيٻٜمٛ رُوحُ اَللَّه؞»‏ 
وٛنْدٜ ݧَلْندٜ يٜىٰسُ اٜ وُرْتِنَنَ غٛطّٛ غِنّٛلْ ڤَحٛلْ؞ غَطَ غِنّٛلْ نغٛلْ وُرْتَکٜ، نٜطّٛ اٛنْ فُطِّ مٜتُکِ، سٜيْ يِمْٻٜ طُطْٻٜ کَوْرُتُٻٜ کَيْطِنِ؞ 
اَمَّا وٛٻّٜ مَٻّٜ مبِعِ، ‏«‏اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ»‏ 
وٛٻّٜ اٜ نغِطِ فٛوندُکِمٛ، نغَمْ نٛنْ ٻٜ مبِعِمٛ اٛ وَطَنَٻٜ غٛطُّمْ کَيْطِنِيطُمْ پِوٛيْطُمْ تٛ اَللَّه؞ 
اَمَّا يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، اٛ وِعِٻٜ، ‏«‏لَامُ فُو شٜنْدِيطُمْ اٜ وَݧْوَݧْتِرَ، طُمْ لَلَّيْ؞ نٛنْ مَا وُرٛ شٜنْدِينغٛ اٜ وَݧْوَݧْتِرَ، نغٛ لَلَّيْ؞ 
تٛ لَامُ شٜيْطَنْ سٜنْدَکٜ اٜ وَݧْوَݧْتِرَ، نٛيٜ لَامُ طُمْ دَرٛرْتٛو؟ مِ وِعُ نٛنْ نغَمْ اٛنْ مبِعَ اٜ مِ وُرْتِنَ غِنِّ اٜ سٜمْبٜ بَعَلْجَبُلْ لَامِيطٛ غِنِّ؞ 
تٛ اٜ مِ وُرْتِنَ غِنِّ ندٜر بَوْطٜ بَعَلْجَبُلْ، اٜ بَوْطٜ مٛيٜ تٛکُّٻٜعٛنْ مبُرْتِنِرْتَطِ؟ نغَمْ نٛنْ تٛکُّٻٜعٛنْ کٛلَّيْ اٛنْ نغَلَا غٛونغَ؞ 
اَمَّا، تٛ اٜ مِ وُرْتِنَ غِنِّ ندٜرْ بَوْطٜ اَللَّه، ندٜنْ لَامُ اَللَّه وَرَنِيعٛنْ؞ 
‏«‏تٛ نٜطّٛ شٜمْبِطّٛ جٛغَکٜ کَافَحِ رٜىٰنِي وُرٛ مُوطُمْ، وَلَا کٛ حٜٻَتَ کٛ اٛ وٛودِ فُو؞ 
اَمَّا، تٛ غٛطّٛ ٻُرْطٛمٛ سٜمْبٜ وَرَنِيمٛ تٜىٰتَيْ کَافَحِ کِ اٛ مَنْتٛرْتٛو کِنْ، ٻُرْطٛ مٛ سٜمْبٜ اٛنْ سٜنْدَنَيْ وٛٻّٜ جَوْدِ ندِنْ؞ 
‏«‏مٛ وٛنْدَا اٜ اَمْ فُو، اٛ غَݧٛ اَمْ؞ مٛ وَلَّايِيَمْ مٛٻْتُکِ فُو، اٛ شَنْکِتٛووٛ؞ 
‏«‏تٛ غِنّٛلْ وُرْتَکٜ ندٜرْ ٻَنْدُ نٜطّٛ، نغٛلْ يَحَيْ تٛ بِغٜىٰجٜ جٛرْطٜ اٜ نغٛلْ طَٻِّتَ تٛ نغٛلْ سِوْتٛتٛو؞ اَمَّا تٛ نغٛلْ حٜٻَايِ، سٜيْ نغٛلْ وِعَ، ‏‹‏مِ سٛعّٛتٛ وُرٛ نغٛ مبُرْتٛيِيمِ؞›‏ 
تٛ نغٛلْ وَرْتِي، نغٛلْ تَوِي وُرٛ نغٛنْ وُووَامَ نغٛ مٛعِّنَامَ، 
سٜيْ نغٛلْ يَحَ نغٛلْ وَدّٛيَ غِنِّ جٛوٜىٰطِطِ ٻُرْطِنغٛلْ حَلُّکِ، طِ نَتَّ طِ نجٛوطٛو طٛنْ؞ ندٜنْ رٜعِرْدٜ نٜطّٛ اٛنْ ٻُرَيْ فُطّٛودٜ مَاکٛ حَلُّکِ؞»‏ 
ندٜ يٜىٰسُ وِعِ نٛنْ، غٛطّٛ دٜبّٛ ندٜرْ حَوْرُتُٻٜ نٛدِّ سٜمْبٜىٰ وِعِ، ‏«‏دٜبّٛ دَݧُطٛمَ کٛکُّطٛمَ مُسِنْطَا، اٛ بَرْکِطِنَاطٛ؞»‏ 
اَمَّا يٜىٰسُ وِعِمٛ، ‏«‏نٛنْ، اَمَّا ٻُرْٻٜ بَرْکِطِنٜىٰکِ نغٛنِ نَنٛوٻٜ وٛلْدٜ اَللَّه اٜ تٛکَّندٜ؞»‏ 
ندٜ يِمْٻٜ نغَطِ کَ مٛٻْتَاکِ تٛ يٜىٰسُ، اٛ وِعِٻٜ، ‏«‏يِمْٻٜ جَامَنُ طُعُمْ ٻٜ کَلُّٻٜ، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛو اَنَّبِ اِنُوسَ؞ 
کٛ حٜٻِ اَنَّبِ اِنُوسَ حٛلِّي يِمْٻٜ نِينٜبَ اَللَّه لِلٛيِمٛ، نٛنْ مَا کٛ حٜٻَتَيَمْ، مِنْ ٻِي نٜطّٛ، طُمْ حٛلَّيْ يِمْٻٜ جَامَنُ طُعُمْ اَللَّه لِلٛيِيَمْ؞ 
ݧَلْندٜ جَانغٛ، لَامِيطٛ لٜيْدِ فٛمْبِنَ دٜبّٛ اٛ اُمّٛدٛتٛ اٜ يِمْٻٜ جَامَنُ طُعُمْ؞ اٛ حٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَنْکٛ اٛ وَرٛيِي دَغَ ٻَدَاکِ نَنُکِ فَامُ اَنَّبِ سُلٜيْمَانُ؞ رَا بٛو، ٻُرْطٛ اَنَّبِ سُلٜيْمَانُ طٛعٛ؞ 
اٜ ݧَلْندٜ جَانغٛ يِمْٻٜ نِينٜبَ مَا ٻٜ اُمّٛدٛتٛ اٜ يِمْٻٜ جَامَنُ طُعُمْ، ٻٜ کٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَمْٻٜ ندٜ ٻٜ نَنِ وَعَجُ اَنَّبِ اِنُوسَ ٻٜ تُوبِي، رَا بٛو ٻُرْطٛ اَنَّبِ اِنُوسَ طٛعٛ؞ 
‏«‏وَلَا غَطَنَيْطٛ فِتِلَارُ حِيتٜ سُوطَندُ کٛو حِڤَّ تُمُّدٜ دٛوْ مَيْرُ؞ سٜيْ نِ اٛ رٜسَندُ دٛوْ دَنْکِ نغَمْ ندُ يٜيْنَنٛو نَتُّطٛ فُو؞ 
غِتٜ مَاطَ نغٛنِ فِتِلَارُ ٻَنْدُ مَاطَ؞ تٛ غِتٜ مَاطَ اٜ نجَمْطِ، ٻَنْدُ مَاطَ فُو حٜىٰوَيْ جَيْنغٛلْ، اَمَّا تٛ غِتٜ مَاطَ نجَمْطَا فُو، ٻَنْدُ مَاطَ حٜىٰوَيْ ݧِوْرٜ؞ 
فَامُ بٛطُّمْ کٛو جَيْنغٛلْ غٛنْغٛلْ ندٜرْ مَاطَ طُمْ ݧِوْرٜ؞ 
تٛ ٻَنْدُ مَاطَ فُو اٜ حٜىٰوِ جَيْنغٛلْ، تٛ ندُ وَلَا ݧِوْرٜ کٛو سٜطَّ، ندُ يٜيْنٛتٛ کٛو تٛيٜ نٛ جَيْنغٛلْ فِتِلَارُ يٜيْنٛرَنْتٛمَا؞»‏ 
يٜىٰسُ اٜ ندٜرْ مٜتُکِ سٜيْ غٛطّٛ فَارِسَنْکٜىٰجٛ وِعِمٛ اٛ يَحَ وُرٛ مُوطُمْ اٛ حِرْتٛيٛو؞ يٜىٰسُ يَحِ جٛوطِي فُطِّ ݧَامُکِ ݧَمْندُ؞ 
فَارِسَنْکٜىٰجٛ اٛنْ حَيْطِنِ ندٜ يِعِ يٜىٰسُ فُطِّي ݧَامُکِ ݧَمْندُ لٛوتَايِ جُوطٜ مُوطُمْ؞ 
سٜيْ يٜىٰسُ وِعِمٛ، ‏«‏اٛنٛنْ فَارِسَنْکٛعٜنْ اٛنْ لَيْٻَ غَطَ نجَرْدُکٛيْ مٛوطٛنْ اٜ لٜعٛيْ مٛوطٛنْ، اَمَّا ندٜرْ مٛوطٛنْ اٛنْ کٜىٰوُٻٜ نغُيْکَ اٜ حَلّٜىٰندٜ؞ 
اٛنٛنْ حَاݝَاٻٜ!‏ کٛو مٛيٜ اٜ اَنْدِ غَطُطٛ يَاسِ کَنْکٛ وَطِ ندٜرْ؞ 
نغَمْ نٛنْ کٛکّٜىٰ ٻٜ نغَلَنَا کٛ وٛنِ ندٜرْ جَرْدُطٜ اٜ لٜعٛيْ مٛوطٛنْ، ندٜنْ طٜ فُو طٜ لَاٻَنَيْعٛنْ؞ 
‏«‏اٛنْ مبٛنِي، اٛنٛنْ فَارِسَنْکٛعٜنْ، نغَمْ اٛنْ کٛکِّي اَللَّه جَکَّ حَاکٛحٛيْ نجٛنْغٜتٜىٰکٛيْ، اَمَّا اٛنْ نغَطَنْتَا يِمْٻٜ کٛ حَانِ، اٛنْ نغَلَا يِدّٜ اَللَّه؞ طُعُمْ تَتُمْ اٜ حَانِ نغَطٛنْطُمْ، اَمَّا تٛع اٛنْ اَلُ وَطُکِ کٛ حٛرِي؞ 
‏«‏اٛنْ مبٛنِي، اٛنٛنْ فَارِسَنْکٛعٜنْ، نغَمْ اٛنْ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ، اٛنْ نغِطِ حٛوْنِرٜىٰکِ مَنْغُ ندٜرْ لُومٛ؞ 
اٛنْ مبٛنِي!‏ اٛنْ نَنْدِ اٜ غٜنَالٜ طٜ نغِعَتَاکٜ، يِمْٻٜ اٜ تٛکَّ دٛوْ مَاجٜ اَنْدَا؞»‏ 
غٛعٛتٛ ندٜرْ مٛودِٻّٜ اَتَّوْرَ وِعِ يٜىٰسُ، ‏«‏مٛودِبّٛ، ندٜ مبِيطَا نٛنْ، مِنٛنْ مَا اَ حُطِيمِنْ!‏»‏ 
يٜىٰسُ وِعِ، ‏«‏اٛنْ مبٛنِي، اٛنٛنْ مَا مٛودِٻّٜ اَتَّوْرَ، نغَمْ اٛنْ نجٛوَنَ يِمْٻٜ دٛݝْلٜ تٜدُّطٜ، اَمَّا اٛنٛنْ کٛو کٛولٜلْ غٛعٛ اٛنْ نغَطَتَا مبَلّٛنْٻٜ؞ 
اٛنْ مبٛنِي!‏ نغَمْ اٛنْ مَحَ غٜنَالٜ بٛطّٜ طٜ سِفْتٛرْکِ اَنَّبٛعٜنْ ٻٜ مَامَاجِ مٛوطٛنْ مبَرِ؞ 
نٛنْ حٛلِّي کٛ مَامَعٜنْ مٛوطٛنْ نغَطِ وٜلِيعٛنْ، نغَمْ ٻٜ مبَرِي اَنَّبٛعٜنْ، اٛنٛنْ بٛو اٛنْ مَحَنِ اَنَّبٛعٜنْ ٻٜنْ غٜنَالٜ؞ 
کَنْجُمْ وَطِ اَللَّه وِعِ ندٜرْ اَنْدَلْ مُوطُمْ، ‏‹‏مِ لِلَنَيْٻٜ اَنَّبٛعٜنْ اٜ لِلَاٻٜ، ٻٜ مبَرَ وٛٻّٜ ٻٜ تٛرَّ وٛٻّٜ؞›‏ 
نغَمْ نٛنْ پِيپَمْ اَنَّبٛعٜنْ ندُفَاطَمْ دَغَ فُطّٛودٜ دُونِيَارُ، طُمْ طَٻِّتَيْطَمْ تٛ جُوطٜ يِمْٻٜ جَامَنُ طُعُمْ، 
دَغَ پِيپَمْ حَبِيلَ حَا يَاکِ پِيپَمْ اَنَّبِ جَکَارِيَ بَرَاطٛ حَکُّندٜ سُودُ جٛومِرَاوٛ اٜ سَکِّرْدٜ؞ اٜ مِ وِعَعٛنْ غٛونغَ، پِيپَمْجِ طِنْ طٛنْ فُو طُمْ طَٻِّتَيْطِ تٛ جُوطٜ يِمْٻٜ جَامَنُ طُعُمْ؞ 
‏«‏اٛنْ مبٛنِي، اٛنٛنْ مٛودِٻّٜ اَتَّوْرَ، نغَمْ اٛنْ نجٛغَکٜ مَٻِّتِرْغٜلْ دَمُّغَلْ اَنْدَلْ، اٛنٛنْ اٛنْ نَتَّايِ، اٛنْ اَلَايِ وٛٻّٜ نَتِّ؞»‏ 
ندٜ يٜىٰسُ اَلِ طٛنْ، مٛودِٻّٜ اَتَّوْرَ اٜ فَارِسَنْکٛعٜنْ ٻٜرْطٜ مَٻّٜ مٜتِّ دٛوْ مَاکٛ، ٻٜ نغَطِ کَ پَمُکِمٛ پَمْطٜ دٛوْ فِي طُطُّمْ، 
نغَمْ ٻٜ نَنَ اٛ وِعِي غٛطُّمْ کٛ حَانَا، ٻٜ کٜٻَ کٛ ٻٜ نَنْغِرْتَمٛ؞ 
