﻿لُکَ.
3.
مَوْطٛ لَامِيٻٜ لٜيْطٜ رٛومَ بِعٜتٜىٰطٛ کَيْسَرْ تِبَارِيَ اٜ وٛودِ دُوٻِ سَڤّٛ اٜ جٛوِ دٛوْ لَامُ، اٜ شَرٜلْ نغٜلْ بُنْتُسْ بِلَاتُسْ وٛنِ غٛمْنَاجٛ لٜيْدِ يَحُودِيَ؞ حِرُدُسْ بٛو اٜ لَامِي لٜيْدِ غَلِيلِ، مَوْنِيکٛ فِلِبُسْ بٛو اٜ لَامِي لٜيْدِ اِتُورِيَ اٜ تَرَکُنِيتَسْ، ندٜنْ لِسَانِيَسْ اٜ لَامِي لٜيْدِ اَبِيلِيَ؞ 
حَنَانَ اٜ کَيَافَ بٛو نغٛنِ مَوْٻٜ مَوْٻٜ اَرْدِيٻٜ دِينَ؞ اٜ شَرٜلْ نغٜلْ وٛلْدٜ اَللَّه وَرَنِ يَحَيَ، ٻِطّٛ جَکَارِيَ، ندٜرْ لَدّٜ؞ 
نغَمْ نٛنْ، يَحَيَ يَحِ بِغٜىٰجٜ غٛنْطٜ حَادٜ شَانغٛلْ اُرْدُنْ فُو، اٜ مٛ وَعَجِنَ، اٜ مٛ وِعَ، ‏«‏تُوبٜىٰ، طُمْ وَطَنَعٛنْ بَڤْتِسْمَ، ندٜنْ اَللَّه يَافَنْتٛعٛنْ حَکّٜىٰجِ مٛوطٛنْ؞»‏ 
نٛ طُمْ وِنْدِرَا ندٜرْ دٜفْتٜرٜ اَنَّبِ اِشَايَ دٛوْ يَحَيَ، ‏«‏غٛطّٛ اٜ نٛدَّ ندٜرْ لَدّٜ اٜ وِعَ، ‏‹‏مٛعِّنٜىٰ طَتَلْ جٛومِرَاوٛ، ڤٛرْتٜىٰ لَاوٛلْ نغَمْ غَرٛلْ مَاکٛ؞ 
ڤٛغٛوجِ فُو طِ کٜبِّنْتٜىٰطِ، کٛشّٜىٰجٜ اٜ پٛولٜ فُو طٜ نَمٜتٜىٰطٜ؞ طَتٜ غُورِيطٜ طٜ دَرْتِنْتٜىٰطٜ، طَتٜ بٛنِّيطٜ طٜ مٛعِّنْتٜىٰطٜ؞ 
يِمْٻٜ دُونِيَارُ فُو ٻٜ نغِعَيْ کِسْندَمْ اَللَّه؞›‏ »‏ 
يِمْٻٜ طُطْٻٜ نغَرٛيِ تٛ يَحَيَ نغَمْ اٛ وَطَنَٻٜ بَڤْتِسْمَ؞ اٛ وِعِٻٜ، ‏«‏اٛنٛنْ ٻِٻّٜ بٛولٜ!‏ مٛيٜ وِعِعٛنْ ندٛغّٛنْ بٛنٜ غَرَيْطُمْ؟ 
نغَطٜىٰ کٛ حٛلَّتَ اٛنْ اَلِي حَکّٜىٰجِ مٛوطٛنْ؞ تٛع اٛنْ مبِعُ ندٜرْ ٻٜرْطٜ مٛوطٛنْ، ‏‹‏مِنٛنْ، مِنْ ٻِٻّٜ اَنَّبِ اِبْرَاهِمْ؞›‏ نغَمْ اٜ مِ وِعَعٛنْ، اَللَّه وَاوَيْ اُمِّنَنْکِ اَنَّبِ اِبْرَاهِمْ ٻِٻّٜ دَغَ ندٜرْ کَاپٜ طٜعٜ؞ 
کٛو جٛونِ فٜعِّرْدٜ پٜفْتَامَ نغَمْ فٜعَّ لٜطّٜ دَغَ طَطِ مَاجٜ؞ لٜکِّ فُو کِ رِمَتَا ٻِکّٛيْ مبٛطْکٛيْ، طُمْ فٜعَّيْکِ طُمْ فَطَّکِ ندٜرْ حِيتٜ؞»‏ 
يِمْٻٜ مبِعِمٛ، ‏«‏کٛ حَانِ مِنْ نغَطَ؟»‏ 
يَحَيَ وِعِٻٜ، ‏«‏غٛودُطٛ تٛغّٛوجٜ طِطِ فُو حٛکَّ مٛ وَلَنَا غٛعٛ، ندٜنْ غٛودُطٛ ݧَمْندُ فُو حٛکّٛرَ مٛ وَلَنَا؞»‏ 
جَٻٛوٻٜ شٜىٰدٜ لٜيْدِ مَا نغَرِ نغَمْ ٻٜ نغَطَنٜىٰ بَڤْتِسْمَ، ٻٜ مبِعِمٛ، ‏«‏مٛودِبّٛ، کٛ حَانِ مِنْ نغَطَ؟»‏ 
اٛ وِعِٻٜ، ‏«‏تٛع اٛنْ نجَٻُ کٛ ٻُرِ نٛ طُمْ وِعِعٛنْ نجَٻٛنْ؞»‏ 
وٛٻّٜ سٛوجِعٜنْ پَمِمٛ مبِعِ، ‏«‏مِنٛنْ مَا، کٛ حَانِ مِنْ نغَطَ؟»‏ اٛ وِعِٻٜ، ‏«‏تٛع اٛنْ تٜىٰتَنْ يِمْٻٜ شٜىٰدٜ اٜ سٜمْبٜ، تٛع اٛنْ مبِعُ يِمْٻٜ نغَطِي کٛ ٻٜ نغَطَايِ نغَمْ نجَٻَنٛنْٻٜ شٜىٰدٜ؞ مُݧٜىٰ دٛوْ کٛ طُمْ يٛٻَتَعٛنْ؞»‏ 
يِمْٻٜ کَاٻِي نغِعَ اَلْمَسِيحُ؞ کٛو مٛيٜ ندٜرْ مَٻّٜ اٜ ݧُمَ ندٜرْ ٻٜرْندٜ مُوطُمْ کٛو يَحَيَ وٛنِ اَلْمَسِيحُ؞ 
يَحَيَ وِعِٻٜ، ‏«‏اٜ مِ وَطِرَنَعٛنْ بَڤْتِسْمَ اٜ ندِيَمْ، اَمَّا ٻُرْطٛيَمْ مَنْغُ اٜ وَرَ؞ مِ فٛتَايِ فِتُّکِ لٛکُّلِّ ڤَطٜ مَاکٛ؞ اٛ وَطِرَنَيْعٛنْ بَڤْتِسْمَ اٜ رُوحُ اَللَّه اٜ حِيتٜ؞ 
اٜ مٛ جٛغِي بٜسِرْطُمْ غَوْرِ مَاکٛ نغَمْ سٜنْدُکِ غَوْرِ اٜ ݧَاندٜ؞ اٛ حَوْرِتَيْ غَوْرِ ندِنْ، اٛ وَطَندِ ندٜرْ رٜسِرْدٜ غَوْرِ مَاکٛ، اَمَّا اٛ وُلَ ݧَاندٜ ندٜنْ ندٜرْ حِيتٜ نغٜ وَاتَتَا؞»‏ 
نٛنْ يَحَيَ وَغِّنِ يِمْٻٜ اٜ بٛلِيطٜ طُطّٜ، اٛ اَنْدِنِيٻٜ حَبَرُ بٜلْطُمْ؞ 
ندٜنْ اٛ حَٻَنِ حِرُدُسْ لَامِيطٛ لٜيْدِ نغَمْ تٜعِ دٜبّٛ مَوْنِرَاوٛ مُوطُمْ بِعٜتٜىٰطٛ حِرُودِيَ، کَدِمَا نغَمْ کُوطٜ کَلُّطٜ فُو طٜ اٛ وَطِ؞ 
سٜيْ اٛ ٻٜيْدِ وَطُکِ کٛ ٻُرِ نٛنْ، اٛ وَطِ طُمْ مَٻِّ يَحَيَ ندٜرْ سُودُ شُرَلْ؞ 
ندٜ يِمْٻٜ فُو نغَطَنَا بَڤْتِسْمَ، يٜىٰسُ مَا وَطَنَا بَڤْتِسْمَ؞ اٜ مٛ ندٜرْ وَطُکِ دٛعَارٜ، سٜيْ دَمُّغَلْ دٛوْ مَٻِّتِي؞ 
رُوحُ اَللَّه جِڤّٛيِي دٛوْ مَاکٛ اٜ ٻَنْدُ بٛ فٛوندُ؞ حٛنٛنْدٜ پِوٛيِ دَغَ دٛوْ وِعِ، ‏«‏اَنْ وٛنِ ٻِطّٛ اَمْ، مٛ نغِطُمِ؞ اٜ مِ نَنَ بٜلْطُمْ مَاطَ؞»‏ 
کٛ يٜىٰسُ فُطِّ کُوغَلْ مُوطُمْ، اٛ ٻَدَکٜ دُوٻِ 30؞ يِمْٻٜ اٜ ݧُمَ يٜىٰسُ طُمْ ٻِطّٛ يُسُفُ؞ يُسُفُ ٻِطّٛ حٜىٰلِ، 
حٜىٰلِ ٻِطّٛ مَتَتْ، مَتَتْ ٻِطّٛ لٜىٰوِ، لٜىٰوِ ٻِطّٛ مَلْکِ، مَلْکِ ٻِطّٛ يَنَّ، يَنَّ ٻِطّٛ يُسُفُ، 
يُسُفُ ٻِطّٛ مَتَاتِيَ، مَتَاتِيَ ٻِطّٛ اَمٛسْ، اَمٛسْ ٻِطّٛ نَاحُمْ، نَاحُمْ ٻِطّٛ اَجَلِيَ، اَجَلِيَ ٻِطّٛ نَجَيَ، 
نَجَيَ ٻِطّٛ مَعَتَ، مَعَتَ ٻِطّٛ مَتَاتِيَ، مَتَاتِيَ ٻِطّٛ شِمٜىٰيَ، شِمٜىٰيَ ٻِطّٛ جٛوسٜکْ، جٛوسٜکْ ٻِطّٛ يَحُودَ، 
يَحُودَ ٻِطّٛ يٛوَانَنْ، يٛوَانَنْ ٻِطّٛ رٜفَيَ، رٜفَيَ ٻِطّٛ جَرُوبَبٜلْ، جَرُوبَبٜلْ ٻِطّٛ شٜيَلْتِيَلْ، شٜيَلْتِيَلْ ٻِطّٛ نٜىٰرِ، 
نٜىٰرِ ٻِطّٛ مَلْکِ، مَلْکِ ٻِطّٛ اَدِّ، اَدِّ ٻِطّٛ کٛسْمَ، کٛسْمَ ٻِطّٛ اَلْمَدَمَ، اَلْمَدَمَ ٻِطّٛ اٜرْ، 
اٜرْ ٻِطّٛ جٛوشُوَ، جٛوشُوَ ٻِطّٛ اٜلِيٜىٰجَ، اٜلِيٜىٰجَ ٻِطّٛ يٛرِمْ، يٛرِمْ ٻِطّٛ مَتَتْ، مَتَتْ ٻِطّٛ لٜىٰوِ، 
لٜىٰوِ ٻِطّٛ سَامِنُ، سَامِنُ ٻِطّٛ يَحُودَ، يَحُودَ ٻِطّٛ يُسُفُ، يُسُفُ ٻِطّٛ يٛنَنَ، يٛنَنَ ٻِطّٛ اٜلِيَاکِمْ، 
اٜلِيَاکِمْ ٻِطّٛ مَلَيَ، مَلَيَ ٻِطّٛ مَيْنَنَ، مَيْنَنَ ٻِطّٛ مَتَاتَ، مَتَاتَ ٻِطّٛ نَاتَنْ، نَاتَنْ ٻِطّٛ دَوْدَ، 
دَوْدَ ٻِطّٛ جٜىٰسِ، جٜىٰسِ ٻِطّٛ اٛبِدَ، اٛبِدَ ٻِطّٛ بٛعَاجَ، بٛعَاجَ ٻِطّٛ سَلْمٛنْ، سَلْمٛنْ ٻِطّٛ نَاشٛنْ، 
نَاشٛنْ ٻِطّٛ اَمِينَدَبْ، اَمِينَدَبْ ٻِطّٛ اَرَمْ، اَرَمْ ٻِطّٛ حٜسٜرُونَ، حٜسٜرُونَ ٻِطّٛ فٜرٜسَ، فٜرٜسَ ٻِطّٛ يَحُودَ، 
يَحُودَ ٻِطّٛ يَاکُبُ، يَاکُبُ ٻِطّٛ اِشِيَاکُ، اِشِيَاکُ ٻِطّٛ اِبْرَاهِمْ، اِبْرَاهِمْ ٻِطّٛ تٜىٰرَ، تٜىٰرَ ٻِطّٛ نَاحٛ، 
نَاحٛ ٻِطّٛ سٜرُغْ، سٜرُغْ ٻِطّٛ رٜيُ، رٜيُ ٻِطّٛ فٜىٰلٜ، فٜىٰلٜ ٻِطّٛ اٜبٜرْ، اٜبٜرْ ٻِطّٛ شٜىٰلَ، 
شٜىٰلَ ٻِطّٛ کٜنَنْ، کٜنَنْ ٻِطّٛ اَرْفَکَشَادِ، اَرْفَکَشَادِ ٻِطّٛ شٜمْ، شٜمْ ٻِطّٛ نُحُ، نُحُ ٻِطّٛ لَمٜکْ، 
لَمٜکْ ٻِطّٛ مٜتُسٜلَ، مٜتُسٜلَ ٻِطّٛ اٜنٛکْ، اٜنٛکْ ٻِطّٛ يَرٜدْ، يَرٜدْ ٻِطّٛ مَحَالَلٜلْ، مَحَالَلٜلْ ٻِطّٛ کٜنَنْ، 
کٜنَنْ ٻِطّٛ اٜنٛشْ، اٜنٛشْ ٻِطّٛ شِيتُ، شِيتُ ٻِطّٛ اَادَمُ، اَادَمُ مٛ اَللَّه؞ 
