﻿حَبَرُ يٜىٰسُ طُمْ  لُکَ  وِنْدِ.
1.
يَا تِيٛوفِلُسْ مَوْطٛ، يِمْٻٜ طُطْٻٜ فُطِّي وِنْدُکِ حَبَرُ دٛوْ کٛ يٜىٰسُ وَطِ ندٜرْ اَمِنْ؞ 
ٻٜ مبِنْدِ حَبَرُ طُمْ نَنْطٜنْ دَغَ کٛنْدُطٜ غِيٻٜ کٛ وَطِ اٜ غِتٜ مَٻّٜ، اَنْدِنٛوٻٜ وٛلْدٜ اَللَّه؞ 
نغَمْ نٛنْ، مِنْ مَا طُمْ وٛوطَنِييَمْ مِ طَٻِّتَ کٛو طُمٜ اٜ سٜىٰسٜ‑سٜىٰسٜ دَغَ فُطُّکِ مَاجُمْ، مِ وِنْدَنْمَا کٛو طُمٜ نٛ وٛنِ، 
نغَمْ اَنْدَا غٛونغَ دٛوْ کٛو طُمٜ کٛ طُمْ اٜکِّتِنْمَا؞ 
ندٜرْ شَرٜلْ نغٜلْ حِرُدُسْ لَامِيطٛ لٜيْدِ يَحُودِيَ لَامٛتٛو، اٜ وٛودِ اَرْدِيطٛ دِينَ بِعٜتٜىٰطٛ جَکَارِيَ، اٜ مٛ ندٜرْ اَرْدِيٻٜ دِينَ دَغَ لٜݧٛلْ اَبِجَ؞ دٜبّٛ مَاکٛ اَلِسَبَتُ پِوٛيِي دَغَ لٜݧٛلْ هَرُونَ، وَاتٛ اَرْدِيٻٜ دِينَ؞ 
ٻٜ فُو طِطٛ ٻٜ نجٛوطَکٜ جٛنْدٜ وٛوطُندٜ يٜىٰسٛ اَللَّه، اٜ ٻٜ نغَطَ کٛو طُمٜ کٛ جٛومِرَاوٛ وِعِ يِمْٻٜ نغَطَ؞ 
اَمَّا ٻٜ نغَلَا ٻِٻّٜ، نغَمْ اَلِسَبَتُ اٛ دَݧَتَا، کَدِمَا ٻٜ فُو طِطٛ ٻٜ نَوْيِي؞ 
وٛنْدٜ ݧَلْندٜ جَکَارِيَ اٜ حُوَ يٜىٰسٛ اَللَّه ندٜرْ وُرٛ شٜنِينغٛ اٜ ٻٜ اٛ حُودَتَ؞ 
طُمْ سُٻِيمٛ، نٛ اَرْدِيٻٜ دِينَ مبٛووِ وَطُکِ، نغَمْ اٛ نَتَّ ندٜرْ سُودُ جٛومِرَاوٛ اٛ وُلَ اُرْدٜ وٜلْندٜ نغَمْ جٛومِرَاوٛ؞ 
ندٜ شَرٜلْ وُلُکِ اُرْدٜ وٜلْندٜ وَطِ، مٛٻْغَلْ فُو اٜ دَرِ يَاسِ اٜ ٻٜ نغَطَ دٛعَارٜ؞ 
سٜيْ مَلَاعِکَاجٛ جٛومِرَاوٛ وَنْغِ تٛ مَاکٛ اٜ دَرِي وُتُّدُ ݧَامٛ تٛ طُمْ وُلَتَ اُرْدٜ وٜلْندٜ؞ 
ندٜ جَکَارِيَ يِعِمٛ، ٻٜرْندٜ مُوطُمْ تَپِ، کُلٛلْ نَنْغِمٛ؞ 
اَمَّا مَلَاعِکَاجٛ اٛنْ وِعِمٛ، ‏«‏تَاع حُلُ جَکَارِيَ، جٛومِرَاوٛ نَنِي دٛعَارٜ مَاطَ؞ دٜبّٛ مَاطَ اَلِسَبَتُ دَݧَنْتٜ ٻِطّٛ غٛرْکٛ، ندٜنْ اَ حٛکَّيْمٛ اِنْدٜ يَحَيَ؞ 
ٻِطّٛ اٛنْ وَطٜتٜ نَنَا بٜلْطُمْ طُطُّمْ، طُطْٻٜ مَا نَنَيْ بٜلْطُمْ نغَمْ دَݧٜىٰکِ مَاکٛ، 
نغَمْ اٛ وَرْتَيْ مَوْطٛ يٜىٰسٛ جٛومِرَاوٛ؞ اٛ يَرَتَا ندِيَمْ اِنَبٛجَمْ کٛو نجَرُ غَيْلِتَيْنغُ حٛورٜ، ندٜنْ اٛ حٜىٰوَيْ رُوحُ اَللَّه دَغَ اٜ مٛ ندٜرْ رٜىٰدُ مَدُوجٛ مَاکٛ؞ 
اٛ وَرْتِرَيْ ٻِٻّٜ اِسْرَاعِيلَ طُطْٻٜ تٛ اَللَّه جٛومِرَاوٛ مَٻّٜ؞ 
اٛ اَرْتَيْ اَلْمَسِيحُ وَرْکِ ندٜرْ بَوْطٜ رُوحُ اَللَّه طٜ اَنَّبِ اِلِيَ حٜٻُنٛو، اٛ سِرْيٛوتِرَيْ دَݧٛوٻٜ اٜ ٻِٻّٜ مَٻّٜ؞ اٛ وَيْلِتَيْ شَلِيٻٜ طَتَلْ جٛومِرَاوٛ تٛ طَتَلْ غٛودُٻٜ غٛونغَ؞ اٛ وَطَيْ يِمْٻٜ شِرْيٛو نغَمْ غَرٛلْ جٛومِرَاوٛ؞»‏ 
جَکَارِيَ پَمِ مَلَاعِکَاجٛ اٛنْ وِعِ، ‏«‏نٛيٜ اَنْدِرَيْمِ کٛ مبِيطَا طُمْ غٛونغَ؟ مِنْ، مِ نَوْيِي، دٜبّٛ اَمْ بٛو دُوٻِ مُوطُمْ طُوطِي؞»‏ 
مَلَاعِکَاجٛ اٛنْ وِعِمٛ، ‏«‏مِنْ وٛنِ جِبِرِيلُ دَرٛتٛوطٛ يٜىٰسٛ اَللَّه، مِ لِلٛيَا تٛ مَاطَ نغَمْ مِ حٛکُّمَا حَبَرُ بٜلْطُمْ طُعُمْ؞ 
اَمَّا جٛونِ اَ وَاوَتَا مٜتُکِ نَا ݧَلْندٜ ندٜ فِي طُعُمْ وَطِ، نغَمْ اَ جَٻَايِ حَالَ اَمْ تَبِّتَيْکَ تٛ شَرٜلْ مَاکَ وَرِي؞»‏ 
اٜ شَرٜلْ نغٜلْ يِمْٻٜ اٜ کٜطِي جَکَارِيَ يَاسِ، ٻٜ کَيْطِنِي کٛ وَطِ اٛ نٜىٰٻِرِ نٛنْ ندٜرْ سُودُ جٛومِرَاوٛ؞ 
ندٜ اٛ وُرْتٛيِي، اٛ وَاوَايِ مٜتَنْکِٻٜ؞ ٻٜ فَامِ اٛ يِعِ وَحَيُ ندٜرْ سُودُ جٛومِرَاوٛ؞ اٛ وَطِ کَ مٜتِرَنْکِٻٜ جُوطٜ، اَمَّا نٛنْ اٛ جٛوطٛرِي اٛ مٜتَتَا؞ 
ندٜ اٛ حٜىٰݧِ بَلْطٜ کُوغَلْ مَاکٛ، اٛ سٛعِّي وُرٛ مَاکٛ؞ 
غَطَ فِي طُعُمْ وَطِي، دٜبّٛ مَاکٛ اَلِسَبَتُ حٜٻِ رٜىٰدُ، وَطِ لٜبِّ جٛوِ اٛ وُرْتَاکِ دَغَ ندٜرْ وُرٛ؞ اٛ وِعِ، 
‏«‏جٛومِرَاوٛ وَطَنِييَمْ طُعُمْ؞ ندٜرْ بَلْطٜ طٜعٜ، اٛ اِتَّنِييَمْ سٜمْتٜىٰندٜ اَمْ حَکُّندٜ يِمْٻٜ؞»‏ 
ندٜرْ لٜوْرُ جٛوٜىٰغٛعٛورُ غَطَ اَلِسَبَتُ حٜٻِي رٜىٰدُ، اَللَّه لِلِ مَلَاعِکَاجٛ جِبِرِيلُ تٛ غَرِيرِ بِعٜتٜىٰندِ نَجَرَتْ نغٛنْدِ ندٜرْ لٜيْدِ غَلِيلِ؞ 
مَلَاعِکَاجٛ اٛنْ يَحِ تٛ سُرْبَاجٛ بِعٜتٜىٰطٛ مَرْيَامَ غَطَنَاطٛ اَلْکَوَلْ تٜىٰغَلْ اٜ بِعٜتٜىٰطٛ يُسُفُ، دَغَ لٜݧٛلْ دَوْدَ؞ مَرْيَامَ اٛنْ اَنْدَا غٛرْکٛ؞ 
مَلَاعِکَاجٛ اٛنْ وِعِمٛ، ‏«‏اٜ مِ سِلْمِنٛو، بَرْکِطِنَاطٛ جٛومِرَاوٛ!‏ جٛومِرَاوٛ اٜ وٛنْدِ اٜ مَاطَ!‏»‏ 
حَالَ کَنْ وَنِّي مَرْيَامَ کٛ طُوطِ؞ اٛ وِعِ ندٜرْ ٻٜرْندٜ مَاکٛ، ‏«‏مِنْ، مِ مٛيٜ اٛعٛ مٜتِّرَنْتَيَمْ نِحِ؟»‏ 
اَمَّا مَلَاعِکَاجٛ اٛنْ وِعِمٛ، ‏«‏تَاع حُلُ، مَرْيَامَ، اَللَّه سُٻِي بَرْکِطِنْمَا؞ 
اَ حٜٻَيْ رٜىٰدُ، اَ دَݧَيْ ٻِطّٛ غٛرْکٛ، ندٜنْ اَ نٛدَّيْ اِنْدٜ مَاکٛ يٜىٰسُ؞ 
اٛ وَرْتَيْ مَوْطٛ، طُمْ نٛدَّيْمٛ ٻِطّٛ اَللَّه جٛومُ مَنْغُ؞ اَللَّه جٛومِرَاوٛ حٛکَّيْمٛ جٛوطٛرْغَلْ لَامُ مَامَ مَاکٛ دَوْدَ؞ 
اٛ لَامٛتٛ دٛوْ ٻِٻّٜ اِسْرَاعِيلَ حَا اَبَدَا؞ لَامُ مَاکٛ رٜعَتَا؞»‏ 
مَرْيَامَ وِعِ مَلَاعِکَاجٛ اٛنْ، ‏«‏نٛيٜ طُمْ وَطٛرْتٛو؟ مِ اَنْدَا غٛرْکٛ سَمْ؞»‏ 
مَلَاعِکَاجٛ اٛنْ وِعِمٛ، ‏«‏رُوحُ اَللَّه جِڤّٛيْتٛ دٛوْ مَاطَ، بَوْطٜ اَللَّه جٛومُ مَنْغُ سُدّٜتٜ بٛ طٛوْدِ؞ نغَمْ نٛنْ، دَݧٜتٜىٰطٛ اٛنْ طُمْ نٛدِّرَيْمٛ ‏‹‏ٻِطّٛ اَللَّه، شٜنِيطٛ؞›‏ 
رَا، اَلِسَبَتُ بَنْدِرَاوٛ مَاطَ حٜٻِي رٜىٰدُ ندٜرْ نَيٜوُ مُوطُمْ، اٛ دَݧَيْ ٻِطّٛ غٛرْکٛ؞ کَنْکٛ مٛ يِمْٻٜ مبِعَتَ اٛ دَݧَتَا، جٛونِ اٜ مٛ وٛودِ رٜىٰدُ ندُ لٜبِّ جٛوٜىٰغٛعٛ؞ 
نغَمْ وَلَا کٛ سَلٛرْتَ اَللَّه؞»‏ 
ندٜنْ مَرْيَامَ وِعِ، ‏«‏مِ کٛرْطٛ جٛومِرَاوٛ، طُمْ وَرْتَنَيَمْ نٛنْ نٛ مبِيطَا؞»‏ سٜيْ مَلَاعِکَاجٛ اٛنْ دِلِّ اَلِمٛ؞ 
ندٜرْ بَلْطٜ طٜنْ، مَرْيَامَ اُمِّي ندٜرْ يَوْطَارٜ يَحِ غَرِيرِ نغٛنْدِ ندٜرْ کٛشّٜىٰجٜ لٜيْدِ يَحُودِيَ؞ 
اٛ نَتِّ وُرٛ جَکَارِيَ، اٛ حٛوْنِ اَلِسَبَتُ؞ 
شَرٜلْ کٛ اَلِسَبَتُ نَنِ کٛوْنٛلْ مَرْيَامَ، ٻِطّٛ غٛنْطٛ ندٜرْ رٜىٰدُ مَاکٛ دِوِ نغَمْ بٜلْطُمْ، اَلِسَبَتُ بٛو حٜبِّنَا رُوحُ اَللَّه؞ 
اٛ نٛدِّ مَرْيَامَ اٜ سٜمْبٜ، اٛ وِعِ، ‏«‏اَ بَرْکِطِنَاطٛ ندٜرْ رٜوْٻٜ!‏ ٻِطّٛ مٛ شَاوُطَا اٛ بَرْکِطِنَاطٛ؞ 
مِنْ، مِ مٛيٜ ندٜ اِنَّ اَلْمَسِيحُ وَرَتَ تٛ اَمْ؟ 
ندٜ نَنُمِ کٛوْنٛلْ مَاطَ، ٻِطّٛ غٛنْطٛ ندٜرْ رٜىٰدُ اَمْ دِوِي نغَمْ بٜلْطُمْ؞ 
اَ بَرْکِطِنَاطٛ نغَمْ اَ جَٻِي کٛ جٛومِرَاوٛ وَطَنْمَا اَلْکَوَلْ طُمْ حٜىٰوَيْ؞»‏ 
ندٜنْ مَرْيَامَ وِعِ، ‏«‏اٜ مِ مَنْتَ جٛومِرَاوٛ اٜ ٻٜرْندٜ اَمْ فُو؞ 
اٜ مِ نَنَ بٜلْطُمْ طُطُّمْ ندٜرْ ٻٜرْندٜ اَمْ نغَمْ اَللَّه، کِسْنٛووٛيَمْ، 
نغَمْ اٛ يُرْمِنَنِييَمْ، مِنْ، کٛرْطٛ مَاکٛ، لٜسْتِنْطٛ حٛورٜ؞ دَغَ جٛونِ يِمْٻٜ دُونِيَارُ فُو نٛدِّرَيْيَمْ بَرْکِطِنَاطٛ، 
نغَمْ اَللَّه بَاوُطٛ وَطَنِييَمْ فِي مَوْطُمْ طُطُّمْ، اٛ شٜنِيطٛ؞ 
جُرُمْطُمْ مَاکٛ جٛوطٛتٛ دٛوْ کُلٛوٻٜمٛ حَا اَبَدَا؞ 
اٜ مٛ وَطَ فِي مَوْطُمْ اٜ جُنْغٛ مَاکٛ سٜمْبِنْغٛ، اٜ مٛ سَنْکِتَ مَوْنِنْٻٜ کٛعٜ مَٻّٜ اٜ کٛ ٻٜ مَنْتٛرْتٛو ندٜرْ ٻٜرْطٜ مَٻّٜ؞ 
اٜ مٛ اِتَّ لَامِيٻٜ دٛوْ لَامُ مَٻّٜ، اَمَّا اٜ مٛ مَوْنِنَ لٜسْنُٻٜ کٛعٜ مَٻّٜ؞ 
اٜ مٛ حَرْنَ نَنٛوٻٜ وٜىٰلٛ اٜ فِي بٛطُّمْ، اَمَّا اٜ مٛ اَلَ رِسْکُٻٜ جُوطٜ مٜىٰرٜ؞ 
اٜ مٛ وَلَّ يِمْٻٜ اِسْرَاعِيلَ مَشُّٻٜ مَاکٛ، اٛ يٜجِّتَتَا يُرْمِنَنْکِ 
اِبْرَاهِمْ اٜ لٜݧٛلْ مُوطُمْ حَا اَبَدَا، نٛ اٛ وِعُنٛو مَامَعٜنْ مٜىٰطٜنْ؞»‏ 
مَرْيَامَ جٛوطٛدَکٜ اٜ اَلِسَبَتُ کٛ وَطِ لٜبِّ تَتِ، ندٜنْ اٛ سٛعِّي وُرٛ مَاکٛ؞ 
ندٜ شَرٜلْ دَݧُکِ اَلِسَبَتُ وَطِ، اٛ دَݧِ ٻِطّٛ غٛرْکٛ؞ 
ٻٜ اٛ حٜدِّ اٜ بَنْدِرَاٻٜ مَاکٛ ٻٜ نَنِدِ بٜلْطُمْ اٜ مَاکٛ ندٜ ٻٜ نَنِ جٛومِرَاوٛ يُرْمِنَنِمٛ؞ 
ندٜ ٻِنْغٜلْ نغٜلْ وَطِ بَلْطٜ جٛوٜىٰتَتِ، ٻٜ نغَرِ نَادُکِنغٜلْ؞ ٻٜ نغِطِينٛ نٛدَّنْکِنغٜلْ اِنْدٜ ݧَاکٛ مَاغٜلْ جَکَارِيَ؞ 
اَمَّا مَدُوجٛ مَاغٜلْ وِعِ، ‏«‏نَاع نٛنْ، طُمْ نٛدَّنَنغٜلْ يَحَيَ؞»‏ 
ٻٜ مبِعِمٛ، ‏«‏وَلَا غٛطّٛ ندٜرْ لٜݧٛلْ مَاطَ غٛودُطٛ اِنْدٜ ندٜنْ طٛنْ؞»‏ 
سٜيْ ٻٜ مٜتِرَنِ ݧَاکٛ مَاغٜلْ جُوطٜ، نغَمْ ٻٜ اَنْدَ اِنْدٜ ندٜ اٛ يِطِ طُمْ نٛدَّنَنغٜلْ؞ 
جَکَارِيَ حٛلِّٻٜ اٜ مٛ يِطِ اَلّٛوَلْ، اٛ وِنْدِ، ‏«‏اِنْدٜ مَاغٜلْ يَحَيَ؞»‏ ٻٜ فُو فِي طُمْ حُلْنِيٻٜ؞ 
طٛنْ اٜ طٛنْ، حٛنْدُکٛ مَاکٛ مَٻِّتِي، طٜمْنغَلْ مَاکٛ يٛوفِ، ندٜنْ اٛ فُطِّ مٜتُکِ، اٜ مٛ مَنْتَ اَللَّه؞ 
کُلٛلْ نَنْغِ ٻٜ اٛ حٜدِّ فُو، کٛو مٛيٜ وَطِ کَ مٜتُکِ دٛوْ فِي طُمْ فُو ندٜرْ کٛشّٜىٰجٜ لٜيْدِ يَحُودِيَ؞ 
کٛو مٛيٜ نَنْطٛ فِي طُعُمْ ݧُمِ دٛوْ مَاجُمْ، اٜ وِعَ، ‏«‏طُمٜ ٻِنْغٜلْ نغٜعٜلْ وَرْتَتَ تٛ مَوْنِ؟»‏ نغَمْ جُنْغٛ جٛومِرَاوٛ اٜ وٛنْدِ اٜ مَاغٜلْ؞ 
جَکَارِيَ، ݧَاکٛ ٻِنْغٜلْ نغٜلْ، اٜ حٜىٰوِ رُوحُ اَللَّه، وَطِ اَنَّبَاکُ، اٛ وِعِ، 
‏«‏اٜنْ مَنْتُ جٛومِرَاوٛ، اَللَّه اِسْرَاعِيلَ، نغَمْ اٛ وَرٛيِي اٛ رِمْطِنِي يِمْٻٜ مَاکٛ؞ 
اَللَّه وَدَّنِيعٜنْ کِسْنٛووٛ مَوْطٛ پِوٛيْطٛ دَغَ لٜݧٛلْ دَوْدَ، مَشُّطٛ مَاکٛ؞ 
نٛ اٛ وِعُنٛو ندٜرْ کٛنْدُطٜ اَنَّبٛعٜنْ مَاکٛ شُٻَاٻٜ دَغَ کٛ نٜىٰٻِ، 
اٛ حِسْنَيْعٜنْ دَغَ غَݧٛوٻٜ مٜىٰطٜنْ اٜ کَلَّنْٻٜعٜنْ؞ 
اٛ وِعِينٛ اٛ يُرْمِنَنَيْ مَامَعٜنْ مٜىٰطٜنْ، اٛ يٜجِّتَتَا اَلْکَوَلْ مَاکٛ شٜنِينغَلْ، 
نغَلْ اٛ وَطَنّٛو مَامَ مٜىٰطٜنْ اِبْرَاهِمْ؞ 
اٛ وِعِي اٛ حِسْنَيْعٜنْ دَغَ جُوطٜ غَݧٛوٻٜ مٜىٰطٜنْ، نغَمْ کُوَنٜنْمٛ کُلٛلْ وَلَا، 
نجٛوطٛوطٜنْ جٛنْدٜ شٜنِيندٜ اٜ اَادِلَاکُ يٜىٰسٛ مَاکٛ ندٜرْ بَلْطٜ مٜىٰطٜنْ فُو، نغَطٜنْ کٛو طُمٜ کٛ اٛ وِعِ؞ 
‏«‏اَنْ ٻِنْغٜلْ اَمْ، طُمْ نٛدِّرْتٜ اَنَّبِيجٛ جٛومِرَاوٛ جٛومُ مَنْغُ، اَ اَرْتَيْ اَلْمَسِيحُ وَرْکِ نغَمْ مٛعِّنَنَامٛ لَاوٛلْ، 
نغَمْ اَنْدِنَا يِمْٻٜ مَاکٛ طُمْ حِسْنَيْٻٜ لَاوٛلْ يَافَاکِ حَکّٜ مَٻّٜ؞ 
اَللَّه وَطِي فِي طُعُمْ نغَمْ اٛ کٜىٰوُطٛ جُرُمْطُمْ؞ نغَمْ جُرُمْطُمْ مَاکٛ، اَلْمَسِيحُ وَرٛيَيْ تٛ مٜىٰطٜنْ دَغَ دٛوْ نٛ نَانغٜ وُرْتِرٛيْتٛو، 
نغَمْ اٛ يٜيْنَنٛو وٛنْٻٜ ندٜرْ ݧِوْرٜ اٜ ندٜرْ کُلٛلْ مَيْدٜ، طُمْ تٛکِّنَيْ کٛيْطٜ مٜىٰطٜنْ دٛوْ لَاوٛلْ جَمْ؞»‏ 
ٻِطّٛ اٛنْ مَوْنِ، فَامُ مَاکٛ ٻٜيْدِي؞ اٜ مٛ جٛوطِي ندٜرْ لَدّٜ حَا شَرٜلْ کٛ طُمْ اَنْدِنِمٛ تٛ يِمْٻٜ اِسْرَاعِيلَ؞ 
