﻿مَرْکُسْ.
14.
حٛرِي بَلْطٜ طِطِ طُمْ وَطَ حُمْتٛ سَکِّنْکِ اٜ حُمْتٛ بُرٛودِ طُمْ وَلَا پُوفِنِرْطُمْ؞ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ طَٻِّتَ لَاوٛلْ نٛ ٻٜ نَنْغِرْتَ يٜىٰسُ اٜ سُوطٜ ٻٜ مبَرَمٛ؞ 
ٻٜ مبِعِ، ‏«‏اَمَّا نَاع نِ شَرٜلْ حُمْتٛ، نغَمْ تٛع يِمْٻٜ اُمِّنَ حَوْرٜ؞»‏ 
يٜىٰسُ اٜ ندٜرْ غَرِيرِ بٜتَنِ تٛ وُرٛ سِيمَنْ غٛودُطٛ ݧَوُ ݧَامٛوجُمْ لَرَلْ؞ اٜ مٛ ݧَامَ ݧَمْندُ، سٜيْ غٛطّٛ دٜبّٛ وَرِ اٜ جٛغِي جٛلّٛيٜلْ حَيْرٜ بٛنْغٜلْ نغٜلْ نٜبَّمْ اُرٛوجَمْ مبٜلْطَمْ طَمْ طُمْ وَطِرِ نَرْدِ غٛودُطَمْ شٜىٰدٜ؞ سٜيْ اٛ مَٻِّتِنغٜلْ، اٛ وَيْلِ نٜبَّمْ طَمْ دٛوْ حٛورٜ يٜىٰسُ؞ 
وٛٻّٜ غٛنْٻٜ طٛنْ ٻٜ مٛنِّ ٻٜ مبِعِ حَکُّندٜ مَٻّٜ، ‏«‏نغَمْ طُمٜ اٛ وٛنِّ نٜبَّمْ طَعَمْ نِحِ؟ 
دَا طَمْ سٛورَامَ، دَا طُمْ حٜٻِي شٜىٰدٜ ٻُرْطٜ طٜ طُمْ يٛٻَتَ کُوٛووٛ حِتَاندٜ غٛعٛ، طُمْ حٛکَّطٜ ٻٜ نغَلَنَا؞»‏ ٻٜ کَٻَنِ دٜبّٛ اٛنْ سٜمْبٜىٰ؞ 
اَمَّا يٜىٰسُ وِعِٻٜ، ‏«‏اَلٜىٰمٛ؞ نغَمْ طُمٜ نغَنّٛتٛنْمٛ؟ کٛ اٛ وَطَنِيَمْ طُمْ بٛطُّمْ؞ 
کٛو ندٜيٜ ٻٜ نغَلَنَا اٜ نغٛنْدِ اٜ مٛوطٛنْ، اٛنْ مبَاوَيْ وَلُّکِٻٜ فُو شَرٜلْ نغٜلْ نغِطّٛنْ؞ اَمَّا مِنْ، شَرٜلْ اٜ وَرَ نغٜلْ اَلَيْمِعٛنْ؞ 
اٛعٛ دٜبّٛ وَطِي کٛ اٛ وَاوَتَ وَطُکِ؞ اٛ وَيْلَنِي ٻَنْدُ اَمْ نٜبَّمْ نغَمْ سِرْيَاکِ اُوُکِيَمْ؞ 
اٜ مِ وِعَعٛنْ غٛونغَ، کٛو تٛيٜ تٛ طُمْ وَعَجِنِ حَبَرُ بٜلْطُمْ ندٜرْ دُونِيَارُ فُو، طُمْ حٛکَّيْ حَبَرُ کٛ دٜبّٛ اٛعٛ وَطِ نغَمْ سِفْتٛرْکِمٛ؞»‏ 
سٜيْ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ بِعٜتٜىٰطٛ يَحُودَ اِسْکَرِيٛوتِ يَحِ تٛ مَوْٻٜ اَرْدِيٻٜ دِينَ نغَمْ حٛکِّتِرَ يٜىٰسُ ندٜرْ جُوطٜ مَٻّٜ؞ 
ٻٜ نَنِ بٜلْطُمْ نَاع سٜطَّ ندٜ ٻٜ نَنِ نٛنْ، ٻٜ نغَطِ اَلْکَوَلْ حٛکُّکِمٛ شٜىٰدٜ؞ نغَمْ نٛنْ، يَحُودَ فُطِّ طَٻُّتُکِ لَاوٛلْ نٛ حٛکِّتِرْتَ يٜىٰسُ ندٜرْ جُوطٜ مَٻّٜ؞ 
ݧَلْندٜ اَرَنْدٜىٰرٜ ندٜ حُمْتٛ بُرٛودِ طُمْ وَلَا پُوفِنِرْطُمْ، ݧَلْندٜ ندٜ طُمْ حِرْسَتَ کَرٛوجِ نغَمْ حُمْتٛ سَکِّنْکِ، تٛکُّٻٜ يٜىٰسُ پَمِمٛ، مبِعِ، ‏«‏تٛيٜ نغِطَّا مِنْ نجَحَ مِنْ شِرْيَنٛمَا نغَمْ ݧَامٜنْ ݧَمْندُ حُمْتٛ سَکِّنْکِ؟»‏ 
سٜيْ اٛ لِلِ تٛکُّٻٜمٛ طِطٛ، اٛ وِعِٻٜ، ‏«‏نَتّٜىٰ غَرِيرِ، اٛنْ کَوْرَيْ اٜ غٛطّٛ اٜ مٛ رٛنْدِي پٛوغِرْدٜ ندِيَمْ؞ تٛکّٜىٰمٛ 
يَاکِ وُرٛ نغٛ اٛ نَتَّتَ، مبِعٛنْ جٛومُ وُرٛ نغٛنْ، ‏‹‏مٛودِبّٛ وِعِي مِنْ پَمُمَا:‏ تٛيٜ سُودُ ندُ ݧَامَيْمِ ݧَمْندُ حُمْتٛ سَکِّنْکِ، مِنْ اٜ تٛکُّٻٜيَمْ؟›‏ 
اٛ حٛلَّيْعٛنْ سُودُ مَوْندُ ندُ دٛوْ مٛعِّنَاندُ شِرْيَاندُ؞ شِرْيَنٜىٰعٜنْ کٛو طُمٜ طٛنْ نغَمْ ݧَامٜنْ ݧَمْندُ حُمْتٛ سَکِّنْکِ؞»‏ 
سٜيْ تٛکُّٻٜمٛ ٻٜنْ نَنْغِ لَاوٛلْ نَتِّ غَرِيرِ ندِنْ ٻٜ تَوِ کٛو طُمٜ نٛنْ نٛ يٜىٰسُ وِعِٻٜ؞ سٜيْ ٻٜ شِرْيِي کٛو طُمٜ نغَمْ حُمْتٛ سَکِّنْکِ؞ 
ندٜ فُتُرٛ وَطِ، يٜىٰسُ اٜ تٛکُّٻٜمٛ سَڤّٛ اٜ طِطٛ نغَرِ وُرٛ نغٛنْ؞ 
اٜ ٻٜ نجٛوطِي اٜ ٻٜ ݧَامَ ݧَمْندُ، سٜيْ يٜىٰسُ وِعِ، ‏«‏اٜ مِ وِعَعٛنْ غٛونغَ، غٛعٛتٛ ندٜرْ مٛوطٛنْ ݧَمْندَيْطٛ اٜ اَمْ حٛکِّتِرَيْيَمْ؞»‏ 
سٜيْ ٻٜ نغَنِّ، ٻٜ ڤُطِّ وِعُکِمٛ غٛعٛتٛ‑غٛعٛتٛ، ‏«‏نَاع طُمْ مِنْ، کٛو؟»‏ 
يٜىٰسُ نٛوتِي، وِعِ، ‏«‏طُمْ غٛعٛتٛ ندٜرْ مٛوطٛنْ، اٛنٛنْ سَڤّٛ اٜ طِطٛ ٻٜ شُٻُمِ، ݧَمْدَيْطٛ اٜ اَمْ لٜعَلْ غٛعٛ؞ 
ٻِي نٜطّٛ مَايَيْ نٛ طُمْ وِنْدِرَا دٛوْ مَاکٛ، اَمَّا کٛکِّتِرَيْطٛمٛ وٛنِي!‏ طُمْ ٻُرَنَيْمٛ دَا اٛ دَݧَاکَ؞»‏ 
اٜ ٻٜ ندٜرْ ݧَامُکِ ݧَمْندُ، سٜيْ يٜىٰسُ حٛشِّ بُرٛودِ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، اٛ وِعِ، ‏«‏نجَٻٜىٰطُمْ؞ طُعُمْ طُمْ ٻَنْدُ اَمْ؞»‏ 
طٛنْمَا اٛ حٛشِّ جَرْدُغٜلْ ندِيَمْ اِنَبٛجَمْ، اٛ يٜتِّ اَللَّه، اٛ حٛکِّٻٜطَمْ، ٻٜ فُو ٻٜ نجَرِطَمْ؞ 
ندٜنْ اٛ وِعِٻٜ، ‏«‏طَعَمْ کَنْجَمْ وٛنِ پِيپَمْ اَمْ تَبِّتِنَيْطَمْ اَلْکَوَلْ اَللَّه ندُفٜتٜىٰطَمْ نغَمْ يِمْٻٜ طُطْٻٜ؞ 
اٜ مِ وِعَعٛنْ غٛونغَ، مِ فُطِّتَتَا مِ يَرَ ندِيَمْ اِنَبٛوجٜ نَا ݧَلْندٜ ندٜ نجَرَيْمِ نغٛطَّمْ کٜسَمْ ندٜرْ لَامُ اَللَّه؞»‏ 
سٜيْ ٻٜ نغِمِ غِمٛلْ مَنْتُکِ اَللَّه، ندٜنْ ٻٜ ندِلِّ حٛشّٜىٰرٜ ندٜ لٜطّٜ جَيْتُنْ؞ 
يٜىٰسُ وِعِ تٛکُّٻٜمٛ، ‏«‏اٛنْ فُو اٛنْ ندٛغَّيْ اَلٛنْيَمْ، نغَمْ ندٜرْ اَايَارٜ اَللَّه وِعِي، ‏‹‏مِ وَرَيْ غَيْنَاکٛ، ندٜنْ بَالِ طِنْ شَنْکِتٛتٛ؞›‏ 
اَمَّا غَطَ مِ اُمَّکٜ دَغَ مَيْدٜ، مِ اَرْتَيْعٛنْ يَاکِ غَلِيلِ؞»‏ 
سٜيْ بِيتُرُسْ وِعِمٛ، ‏«‏کٛو ٻٜ فُو ٻٜ اَلِيمَ، مِنْ مِ اَلَتَامَ؞»‏ 
يٜىٰسُ وِعِمٛ، ‏«‏اٜ مِ وِعُمَا غٛونغَ، حَنْدٜ، ندٜرْ جٜمَّارٜ ندٜعٜ، کٛ نجَکَرْدِ حَنَ ندٜ طِطِ، اَ وِعَيْ اَ اَنْدَايَمْ ندٜ تَتِ؞»‏ 
اَمَّا بِيتُرُسْ جَٻَايِ، اٛ وِعِ، ‏«‏کٛو طُمْ وَرْدَيْيَمْ اٜ مَاطَ، مِ وِعَتَا مِ اَنْدَامَ؞»‏ حٛرِيٻٜ ٻٜنْ مَا مبِعِ نٛنْ؞ 
سٜيْ ٻٜ نجَحِ وِغٜىٰرٜ بِعٜتٜىٰندٜ غٜىٰسَمَنِ، يٜىٰسُ وِعِ تٛکُّٻٜمٛ، ‏«‏نجٛوطٜىٰ طٛعٛ، مِ يَحَ مِ وَطَ دٛعَارٜ؞»‏ 
سٜيْ اٛ حٛشِّ بِيتُرُسْ، اٜ يَاکُبُ، اٜ يَحَيَ؞ ٻٜرْندٜ مَاکٛ بٛو تٜدِّ، اٛ فُطِّ وَنُّکِ نَاع سٜطَّ؞ 
اٛ وِعِٻٜ، ‏«‏ٻٜرْندٜ اَمْ وَنِّي نَاع سٜطَّ حَا بٛ مِ مَايَيْ؞ نجٛوطٜىٰ طٛعٛ اٛنْ ندٜىٰنَ؞»‏ 
ندٜ اٛ يَحِ يٜىٰسٛ سٜطَّ، سٜيْ اٛ يَنِ اٜ لٜيْدِ اٜ مٛ حِڤِّي، اٛ وَطِ دٛعَارٜ، اٛ وِعِ تٛ طُمْ غَطٛتٛوطُمْ طُمْ حٛشَّنَمٛ شَرٜلْ تٛرَّ وٛنْکَ يٜىٰسٛ مَاکٛ؞ 
اٛ وِعِ، ‏«‏يَا ݧَاکٛ اَمْ مٛ دٛوْ، کٛو طُمٜ طُمْ غَطٛتٛوطُمْ تٛ مَاطَ؞ تَا جَٻِي، اِتَّنَمْ جَرْدُغٜلْ تٛرَّ کَعَ؞ فُو اٜ نٛنْ نَاع کٛ نغِطُمِ وَطٜتٜىٰ، اَمَّا کٛ نغِطَّا وَطٜىٰ؞»‏ 
غَطَ طٛنْ اٛ سٛعِّي تٛ ٻٜنْ طٛنْ تٛکُّٻٜمٛ تَتٛ، اٛ تَوِ اٜ ٻٜ طَانِي، سٜيْ اٛ وِعِ بِيتُرُسْ، ‏«‏بِيتُرُسْ، اَ طَانِي؟ اَ وَاوَتَا جٛوطَاکِ اَ طَانَاکِ کٛو شَرٜلْ سٜطَّ؟ 
نجٛوطٜىٰ، تٛع اٛنْ طَانٛ، نغَطٜىٰ دٛعَارٜ تٛ طُمْ فٛوندِيعٛنْ تٛع نغَطٛنْ حَکّٜ؞ ٻٜرْندٜ اٜ يِطِ وَطُکِ کٛ حَانِ، اَمَّا ٻَنْدُ تَمْڤِي؞»‏ 
اٛ فُطِّتِ اٛ دِلِّ، اٛ وَطِ دٛعَارٜ، اٛ وِعِ کٛ اٛ وِعُنٛو؞ 
اٛ فُطِّتِ اٛ سٛعّٛيِي تٛ مَٻّٜ، اٛ تَوِ اٜ ٻٜ طَانِي، نغَمْ اٜ ٻٜ نَنَ طٜيْنغٛلْ تٜدُّنغٛلْ؞ ٻٜ ندُلِّ کٛ ٻٜ مبِعَتَمٛ؞ 
اٛ فُطِّتِ اٛ سٛعِّي تٛ مَٻّٜ تَتَٻُمْ، اٛ وِعِٻٜ، ‏«‏حَا جٛونِ اٛنْ طَانِي، اٛنْ شِوْتٛو؟ طُمْ حٜپِي نٛنْ!‏ شَرٜلْ وَرِي؞ طُمْ حٛکِّتِرِي ٻِي نٜطّٛ ندٜرْ جُوطٜ غَطٛوٻٜ حَکّٜ؞ 
اُمّٜىٰ ندِلّٜنْ!‏ رَا اٛنْ طٛنْ کٛکِّتِرَيْطٛيَمْ اٜ وَرَ؞»‏ 
يٜىٰسُ اٜ مٜتَ، سٜيْ يَحُودَ، غٛعٛتٛ ندٜرْ تٛکُّٻٜمٛ سَڤّٛ اٜ طِطٛ يٛتِّي؞ اٛ وَرْدٛيِ اٜ يِمْٻٜ طُطْٻٜ اٜ ٻٜ نجٛغِي کَافَاجٜ اٜ شَبِّ؞ مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ، اٜ مَوْٻٜ يِمْٻٜ لِلٛيِٻٜ؞ 
تٛو، ندٜنْ مَا کٛکِّتِرَيْطٛ اٛنْ يَادَکٜ وِعِيٻٜ نٛ حٛلِّرْتَٻٜ يٜىٰسُ، اٛ وِعِ، ‏«‏نٜطّٛ مٛ کٛوْنَيْمِ حٛوْنُکِ حِغَاکُ طُمْ کَنْکٛ؞ نَنْغٜىٰمٛ، نغَطٛنْ تَادِيٻٜ نجٛغٛومٛ بٛطُّمْ ندِلِّدَ اٜ مَاکٛ؞»‏ 
ندٜ يَحُودَ يٛتِّي تٛ ٻٜ نغٛنِ، طٛنْ اٜ طٛنْ اٛ ٻَدِّي يٜىٰسُ، اٛ وِعِمٛ، ‏«‏مٛودِبّٛ!‏»‏ ندٜنْ اٛ حٛوْنِمٛ حٛوْنُکِ حِغَاکُ؞ 
سٜيْ يِمْٻٜ ٻٜنْ نَنْغِ يٜىٰسُ ٻٜ نجٛغِيمٛ بٛطُّمْ؞ 
اَمَّا غٛعٛتٛ ندٜرْ تٛکُّٻٜ يٜىٰسُ دَرِيطٛ طٛنْ سٛلْتِ کَافَحِ مُوطُمْ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ؞ 
سٜيْ يٜىٰسُ وِعِٻٜ، ‏«‏اٛنْ نغَرْدٛيِ اٜ کَافَاجٜ اٜ شَبِّ نغَمْ نَنْغٛيْيَمْ بٛ غُجّٛ شَلٛرْطٛ؟ 
کٛو ندٜيٜ اٜ مِ وٛنْدِ اٜ مٛوطٛنْ، اٜ مِ اٜکِّتِنَ ندٜرْ وُرٛ شٜنِينغٛ، اٛنْ نَنْغَايِيَمْ؞ اَمَّا دٛولٜ کٛ اَايَاجٜ مبِعِ حٜىٰوَ؞»‏ 
سٜيْ تٛکُّٻٜمٛ فُو اَلِمٛ ندٛغِّ؞ 
غٛطّٛ کَيٜىٰجٛ بٛو اٜ تٛکِّرِ يٜىٰسُ تٛنْ غَطَ، اٛ ٻٛرْنَاکِ غٛطُّمْ، وُدٜرٜ ندٜ شٜىٰدٜ تَنْ اٛ وَانِي؞ ٻٜ نَنْغِمٛ، 
سٜيْ اٛ اَلَنِٻٜ وُدٜرٜ ندٜنْ، اٛ دٛغِّ اٛ ٻٛرْنَاکِ؞ 
ٻٜ نجَارِ يٜىٰسُ تٛ مَوْطٛ مَوْٻٜ اَرْدِيٻٜ دِينَ؞ فُو مَوْٻٜ اَرْدِيٻٜ دِينَ، اٜ مَوْٻٜ يِمْٻٜ، اٜ مٛودِٻّٜ اَتَّوْرَ کَوْرِتِي طٛنْ؞ 
بِيتُرُسْ بٛو تٛکِّرِمٛ غَطَ دَغَ تٛ وٛطِّ حَا يَاکِ شَکَ وُرٛ مَوْطٛ مَوْٻٜ اَرْدِيٻٜ دِينَ؞ اٛ جٛوطٛدِي اٜ تَادِيٻٜ وُرٛ شٜنِينغٛ، اٜ مٛ اِرْفٛو حَادٜ حِيتٜ؞ 
مَوْٻٜ اَرْدِيٻٜ دِينَ اٜ فُو کَوْتَلْ مَوْٻٜ اٜ ٻٜ طَٻِّتَ شٜيْدَ کٛ ٻٜ نَنْغِرْتَ يٜىٰسُ، نغَمْ ٻٜ کٜٻَ ٻٜ مبَرَمٛ، اَمَّا ٻٜ کٜٻَايِ غٛطُّمْ؞ 
يِمْٻٜ طُطْٻٜ مٜتِ حَالَاجِ فٜوْرٜ دٛوْ مَاکٛ، اَمَّا کٛ ٻٜ مبِعِ وَرْدَايِ غٛعٛ؞ 
سٜيْ وٛٻّٜ اُمِّي ٻٜ مبِعِ حَالَاجِ فٜوْرٜ طِعِ دٛوْ مَاکٛ، ٻٜ مبِعِ، 
‏«‏مِنْ نَنِي اٛ وِعِي اٛ سَنْکِتَيْ نغٛعٛ وُرٛ شٜنِينغٛ نغٛ يِمْٻٜ مَحِ، ندٜنْ ندٜرْ بَلْطٜ تَتِ اٛ مَحَ وٛنْغٛ نَاع اٜ جُوطٜ يِمْٻٜ؞»‏ 
اَمَّا فُو اٜ نٛنْ کٛ ٻٜ مبِعِ وَرْدَايِ غٛعٛ؞ 
سٜيْ مَوْطٛ مَوْٻٜ اَرْدِيٻٜ دِينَ اُمِّي دَرِي يٜىٰسٛ مَٻّٜ پَمِ يٜىٰسُ، اٛ وِعِ، ‏«‏اَ وَلَا کٛ مبِعَتَا؟ کٛ ٻٜ مبِعِ دٛوْ مَاطَ طُمْ غٛونغَ؟»‏ 
اَمَّا يٜىٰسُ دٜعِّتِ نٛوتَنَاکِمٛ؞ مَوْطٛ مَوْٻٜ اَرْدِيٻٜ دِينَ اٛنْ فُطِّتِ پَمِ يٜىٰسُ، وِعِ، ‏«‏تٛو، اَنْ وٛنِ اَلْمَسِيحُ، ٻِطّٛ جٛومُ مَنْغُ؟»‏ 
يٜىٰسُ نٛوتِي، وِعِ، ‏«‏اٜىٰ، طُمْ مِنْ؞ اٛنْ نغِعَيْ ٻِي نٜطّٛ اٜ جٛوطِي تٛ جُنْغٛ ݧَامٛ نغٛ جٛومُ بَوْطٜ، اٜ مٛ وَرٛيَ ندٜرْ دُولٜ؞»‏ 
سٜيْ مَوْطٛ مَوْٻٜ اَرْدِيٻٜ دِينَ اٛنْ سٜىٰکِ کٛلْتٜ مُوطُمْ وِعِ، ‏«‏طُمٜ شٜيْدَ طَٻِّتٜتٜنْ کَدِنْ؟ 
اٛنْ نَنِي نِ حَالَ کَلُّکَ کَ اٛ مٜتِ دٛوْ اَللَّه؞ کٛ وٛنِ شُٻٛلْ مٛوطٛنْ؟»‏ سٜيْ يِمْٻٜ فُو مبِعِ اٜ حَانِ اٛ وَرٜىٰ؞ 
وٛٻّٜ ڤُطِّ تُتَّنْکِمٛ جٛودٜ، ٻٜ کَٻَّنِمٛ غِتٜ، ٻٜ ڤِيِمٛ، اٜ ٻٜ مبِعَمٛ، ‏«‏وَطُ اَنَّبَاکُ!‏ مٛيٜ فِيِمَا؟»‏ سٜيْ تَادِيٻٜ وُرٛ شٜنِينغٛ کٛشِّمٛ ڤِيِمٛ؞ 
بِيتُرُسْ اٜ شَکَ وُرٛ نغٛنْ، سٜيْ غٛعٛتٛ ندٜرْ حٛرْٻٜ مَوْطٛ مَوْٻٜ اَرْدِيٻٜ دِينَ وَرِ وِغٜىٰرٜ ندٜنْ؞ 
ندٜ اٛ يِعِ بِيتُرُسْ اٜ اِرْفٛو، اٛ سُتِيمٛ، اٛ وِعِمٛ، ‏«‏اَنْ مَا، اَ وٛنْدِ اٜ يٜىٰسُ اٛنْ طٛنْ پِوٛيْطٛ غَرِيرِ نَجَرَتْ؞»‏ 
اَمَّا بِيتُرُسْ يٜدِّ وِعِ، ‏«‏مِنْ مِ اَنْدَا، مِ فَامَايِ کٛ مبِعَتَا؞»‏ بِيتُرُسْ وُرْتِي يَحِ نجَيْرِ دَمُّغَلْ يَاسِ، سٜيْ نجَکَرْدِ حَنِ؞ 
کٛرْطٛ اٛنْ يِعِ بِيتُرُسْ تٛنْ، اٛ فُطِّتِ اٛ وِعِ دَرِيٻٜ طٛنْ کَمْٻٜ مَا، ‏«‏اٛعٛ نٜطّٛ اٛ غٛعٛتٛ مَٻّٜ!‏»‏ 
اَمَّا بِيتُرُسْ فُطِّتِ يٜدِّ؞ غَطَ طٛنْ سٜطَّ، دَرِيٻٜ حَادٜ طٛنْ مبِعِ بِيتُرُسْ، ‏«‏سٜکٛ وَلَا اَنْ مَا اَ غٛعٛتٛ ندٜرْ تٛکُّٻٜمٛ، نغَمْ اَ غَلِلَنْکٜىٰجٛ؞»‏ 
بِيتُرُسْ فُطِّ لَانُکِ حٛورٜ مُوطُمْ حُنِي وِعِ، ‏«‏مِ اَنْدَا نٜطّٛ اٛعٛ مٛ مبِعٛتٛنْ؞»‏ 
طٛنْ اٜ طٛنْ نجَکَرْدِ حَنِ طِطَٻُمْ؞ سٜيْ بِيتُرُسْ سِفْتٛرِ کٛ يٜىٰسُ وِعُنٛومٛ وِعُکِ، ‏«‏کٛ نجَکَرْدِ حَنَ ندٜ طِطِ، اَ وِعَيْ اَ اَنْدَايَمْ ندٜ تَتِ؞»‏ ندٜنْ بِيتُرُسْ فُطِّ بٛجِّ؞ 
