﻿حَبَرُ يٜىٰسُ طُمْ  مَرْکُسْ  وِنْدِ.
1.
طُعُمْ وٛنِ حَبَرُ بٜلْطُمْ دٛوْ يٜىٰسُ اَلْمَسِيحُ، ٻِطّٛ اَللَّه؞ 
طُمْ وِنْدَامَ ندٜرْ دٜفْتٜرٜ اَنَّبِ اِشَايَ وِيکِ، ‏«‏اَللَّه وِعِ، ‏‹‏رَطُّمْ، مِ لِلٛيَيْ لِلَاطٛ اَمْ اٛ اَرْدٛو يٜىٰسٛ مَاطَ اٛ مٛعِّنَنْمَا لَاوٛلْ؞›‏ 
غٛطّٛ اٜ نٛدَّ ندٜرْ لَدّٜ، اٜ وِعَ، ‏‹‏مٛعِّنٜىٰ طَتَلْ جٛومِرَاوٛ، ڤٛرْتٜىٰ لَاوٛلْ نغَمْ غَرٛلْ مَاکٛ؞›‏ »‏ 
نٛنْ بٛو يَحَيَ غَطٛووٛ بَڤْتِسْمَ جٛوطِي ندٜرْ لَدّٜ، اٜ وَعَجِنَ، اٜ مٛ وِعَ، ‏«‏تُوبٜىٰ، طُمْ وَطَنَعٛنْ بَڤْتِسْمَ، ندٜنْ اَللَّه يَافَنْتٛعٛنْ حَکّٜىٰجِ مٛوطٛنْ؞»‏ 
يِمْٻٜ طُطْٻٜ دَغَ لٜيْدِ يَحُودِيَ فُو اٜ غَرِيرِ اُرُشَلِيمَ نغَطِ کَ يَاکِ تٛ مَاکٛ؞ اٜ ٻٜ مبِعَ فُو کٛ وٛوطَا طُمْ ٻٜ نغَطِ، اٜ مٛ وَطَنَٻٜ بَڤْتِسْمَ ندٜرْ شَانغٛلْ اُرْدُنْ؞ 
يَحَيَ اٜ ٻٛرْنِي کٛلْتٜ طٜ طُمْ وَطِرِ لٜىٰٻٜ نغٜىٰلٛوبَ، اٜ مٛ تَادِي تَادٛرْدٜ لَرَلْ؞ ݧَمْندُ مَاکٛ وٛنِ بَابٜىٰجِ اٜ نجُمْرِ؞ 
اٜ مٛ وَعَجِنَ، اٜ مٛ وِعَ، ‏«‏غٛطّٛ اٜ وَرَ غَطَ اَمْ اٛ ٻُرِييَمْ مَنْغُ، کٛو لٛکُّلِّ ڤَطٜ مَاکٛ مِ فٛتَايِ تُرَاکِ مِ فِتَّطِ؞ 
اٜ مِ وَطِرَنَعٛنْ بَڤْتِسْمَ اٜ ندِيَمْ، اَمَّا کَنْکٛ اٛ وَطِرَنَيْعٛنْ بَڤْتِسْمَ اٜ رُوحُ اَللَّه؞»‏ 
ندٜرْ بَلْطٜ طٜنْ يٜىٰسُ وَرٛيِ دَغَ غَرِيرِ نَجَرَتْ ندٜرْ لٜيْدِ غَلِيلِ، سٜيْ يَحَيَ وَطَنِمٛ بَڤْتِسْمَ ندٜرْ شَانغٛلْ اُرْدُنْ؞ 
اٜ وُرْتَاکِ يٜىٰسُ دَغَ ندٜرْ ندِيَمْ طَمْ، اٛ يِعِ دٛوْ اٜ مَٻِّتٛو، رُوحُ اَللَّه اٜ جِڤّٛيٛو دٛوْ مَاکٛ بٛ فٛوندُ؞ 
حٛنٛنْدٜ پِوٛيِ دَغَ دٛوْ وِعِ، ‏«‏اَنْ وٛنِ ٻِطّٛ اَمْ، مٛ نغِطُمِ؞ اٜ مِ نَنَ بٜلْطُمْ مَاطَ؞»‏ 
طٛنْ اٜ طٛنْ رُوحُ اَللَّه يَارِمٛ ندٜرْ لَدّٜ؞ 
تٛنْ اٛ وَطِ بَلْطٜ 40 شٜيْطَنْ اٜ فٛوندَمٛ؞ اٜ مٛ وٛنْدِ اٜ مَرْلٜ لَدّٜ، مَلَاعِکَعٜنْ مبَلِّمٛ؞ 
تٛو، غَطَ طُمْ سُرِي يَحَيَ ندٜرْ سُودُ شُرَلْ، يٜىٰسُ يَحِ غَلِيلِ اٜ وَعَجِنَ حَبَرُ بٜلْطُمْ دَغَ تٛ اَللَّه؞ 
اٜ مٛ وِعَ، ‏«‏شَرٜلْ وَطِي!‏ لَامُ اَللَّه وَرِي حَادٜ مٛوطٛنْ؞ تُوبٜىٰ، نجَٻٛنْ حَبَرُ بٜلْطُمْ؞»‏ 
يٜىٰسُ اٜ يَحَ حَادٜ مبٜىٰلَ غَلِيلِ، سٜيْ اٛ يِعِ سِيمَنْ اٜ مِݧِرَاوٛ مُوطُمْ اَنْدِرَاوُسْ اٜ ٻٜ نغَطَ نَنْغِرْطُمْ لِپِّ مَٻّٜ ندٜرْ ندِيَمْ، نغَمْ ٻٜ نَنْغٛوٻٜ لِپِّ؞ 
سٜيْ يٜىٰسُ وِعِٻٜ، ‏«‏تٛکّٜىٰيَمْ، مِ وَرْتِرَيْعٛنْ غَدَّيْٻٜ يِمْٻٜ تٛ اَمْ؞»‏ 
طٛنْ اٜ طٛنْ ٻٜ اَلِ نَنْغِرْطُمْ لِپِّ مَٻّٜ ٻٜ تٛکِّمٛ؞ 
ندٜ اٛ ٻٜيْدِ يٜىٰسٛ سٜطَّ، سٜيْ اٛ يِعِ يَاکُبُ ٻِي جَبَدِ اٜ مِݧِرَاوٛ مُوطُمْ يَحَيَ اٜ ٻٜ ندٜرْ کٛمِوَلْ مَٻّٜ، اٜ ٻٜ مٛعِّنَ نَنْغِرْطُمْ لِپِّ مَٻّٜ؞ 
طٛنْ اٜ طٛنْ اٛ نٛدِّٻٜ؞ سٜيْ ٻٜ اَلِ ݧَاکٛ مَٻّٜ جَبَدِ ندٜرْ کٛمِوَلْ اٜ کُوَنٛوٻٜٻٜ، ٻٜ تٛکِّ يٜىٰسُ؞ 
سٜيْ يٜىٰسُ اٜ تٛکُّٻٜمٛ نجَحِ غَرِيرِ کَفَرْنَحُمْ؞ ندٜ ݧَلْندٜ سِوْتَارٜ وَرِ، اٛ نَتِّ سُودُ دٛعَارٜ، اٛ فُطِّ اٜکِّتِنْکِ؞ 
يِمْٻٜ کَيْطِنِ اٜ اٜکِّتِنٛلْ مَاکٛ، نغَمْ اٛ اٜکِّتِنِرَايِٻٜ نٛ مٛودِٻّٜ اَتَّوْرَ اٜکِّتِنِرْتَ، اَمَّا اٛ اٜکِّتِنِيٻٜ اٜ بَوْطٜ؞ 
طٛنْ اٜ طٛنْ غٛودُطٛ غِنّٛلْ ندٜرْ سُودُ دٛعَارٜ ندُنْ وُلِّ سٜمْبٜىٰ، 
وِعِ، ‏«‏کٛ وَنُّمَا اٜ اَمِنْ، يٜىٰسُ نَجَرَنْکٜىٰجٛ؟ اَ وَرٛيِ نغَمْ کَلْکَامِنْ؟ اٜ مِ اَنْدِ اَنْ اَ مٛيٜ؞ اَنْ وٛنِ شٜنِيطٛ اَللَّه؞»‏ 
سٜيْ يٜىٰسُ حَٻَنِنغٛلْ، وِعِ، ‏«‏دٜعُّتُ!‏ وُرْتَ ندٜرْ مَاکٛ؞»‏ 
سٜيْ غِنّٛلْ نغٛلْ دِمْبِمٛ دِمْبٛلْ کَلُّنغٛلْ، نغٛلْ وُلِّ سٜمْبٜىٰ، نغٛلْ وُرْتِي ندٜرْ مَاکٛ؞ 
ٻٜ فُو ٻٜ کَيْطِنِ، ٻٜ نغَطِ کَ پَمْپَمْتِرْکِ، اٜ ٻٜ مبِعَ، ‏«‏طُمْ اُمْ طُمٜ؟ نغٛعٛلْ اٜکِّتِنٛلْ نغٛلْ کٜسٛلْ!‏ نٜطّٛ اٛعٛ اٜ وٛودِ بَوْطٜ حَا غِنِّ اٜ نغَطَ کٛ اٛ وِعِطِ؞»‏ 
ندٜرْ شَرٜلْ سٜطَّ حَبَرُ يٜىٰسُ سَنْکِتِي کٛو تٛيٜ ندٜرْ لٜيْدِ غَلِيلِ؞ 
ندٜ يٜىٰسُ اٜ يَاکُبُ اٜ يَحَيَ ٻٜ مبُرْتِي دَغَ سُودُ دٛعَارٜ ندُنْ، ٻٜ نَتِّ وُرٛ بِيتُرُسْ اٜ اَنْدِرَاوُسْ؞ 
اٜسِرَاوٛ بِيتُرُسْ دٜبّٛ اٜ مٛ فِيدَ اٜ جٛنْتٜ اٜ مٛ فُکِّي؞ اٜ نَتُّکِ يٜىٰسُ ٻٜ کٛکِّمٛ حَبَرُ مَاکٛ؞ 
سٜيْ يٜىٰسُ يَحِ تٛ مَاکٛ جٛغَنِيمٛ جُنْغٛ اُمِّنِمٛ؞ طٛنْ اٜ طٛنْ جٛنْتٜ طٜنْ نجٛوفِمٛ، اٛ اُمِّي اٛ فُطِّ وَدَّنْکِٻٜ ݧَمْندُ؞ 
فُتُرٛ، غَطَ نَانغٜ حِيرِي، يِمْٻٜ نغَدَّنِ يٜىٰسُ فُو ݧَوْٻٜ اٜ غٛودُٻٜ غِنِّ؞ 
سٜيْ يِمْٻٜ غَرِيرِ ندِنْ طُطْٻٜ کَوْرِتِ اٜ دَمُّغَلْ وُرٛ نغٛنْ؞ 
يٜىٰسُ يَمْطِتِنِ طُطْٻٜ غٛودُٻٜ ݧَوُوجِ فٜىٰرٜ‑فٜىٰرٜ؞ اٛ وُرْتِنَنِ يِمْٻٜ طُطْٻٜ غِنِّ، اٛ حَطِطِ مٜتُکِ نغَمْ اٜ طِ اَنْدِمٛ؞ 
اِلَا سُبَکَ، دَغَ ݧِوْرٜ اٜ حٛرِي، اٛ اُمِّي اٛ يَحِ وٛنْدٜ وِغٜىٰرٜ ندٜرْ لَدّٜ، اٛ وَطِ دٛعَارٜ تٛنْ؞ 
سٜيْ سِيمَنْ اٜ غٛنْدُٻٜ اٜ مَاکٛ ندِلِّ طَٻُّتُکِمٛ؞ 
ندٜ ٻٜ کٜٻْتِمٛ، ٻٜ مبِعِمٛ، ‏«‏کٛو مٛيٜ اٜ طَٻُّتُمَا!‏»‏ 
سٜيْ يٜىٰسُ وِعِٻٜ، ‏«‏اٜنْ نجَحُ غَرِيجٜ غٛنْطٜ حَادٜ طٛعٛ مِ وَعَجِنَ تٛنْ مَا، نغَمْ کَنْجُمْ نغَرْمِ مِ وَطَ؞»‏ 
اٛ يَحِ کٛو تٛيٜ ندٜرْ لٜيْدِ غَلِيلِ، اٜ مٛ وَعَجِنَ ندٜرْ شُوطِ دٛعَارٜ مَٻّٜ، اٜ مٛ وُرْتِنَنَ يِمْٻٜ غِنِّ؞ 
غٛطّٛ غٛودُطٛ ݧَوُ ݧَامٛوجُمْ لَرَلْ وَرِ تٛ يٜىٰسُ دِشِّي اٜ تٛرٛومٛ، اٜ وِعَ، ‏«‏تَا جَٻِي، اَ وَاوَيْ نجَمْطِتِنَايَمْ؞»‏ 
جُرُمْطُمْ نَنْغِ يٜىٰسُ، اٛ فٛرْتِ جُنْغٛ، اٛ مٜىٰمِمٛ، اٛ وِعِمٛ، ‏«‏مِ جَٻِي؞ يَمْطُتُ!‏»‏ 
طٛنْ اٜ طٛنْ ݧَوُ طُمْ اَلِمٛ، اٛ يَمْطِتِ؞ 
سٜيْ يٜىٰسُ وَغِّنِمٛ، وِعِمٛ، ‏«‏دِلُّ، 
فَامُ، تَاع وِعُکَ کٛو مٛيٜ، اَمَّا يَحُ کٛلَّا حٛورٜ مَاطَ تٛ اَرْدِيطٛ دِينَ، ندٜنْ کٛکَّا شَکِّرِ نٛ مُوسَ وِعِ طُمْ وَطَ نغَمْ لَاٻٛلْ مَاطَ؞ وَطُ نٛنْ نغَمْ تَبِّتِنَنْکِ يِمْٻٜ اَ يَمْطِتِي؞»‏ 
اَمَّا اٛ دِلِّ اٜ مٛ وِعَکَ کٛو تٛيٜ، اٜ مٛ سَنْکِتَ حَبَرُ طُمْ؞ نٛنْ وَطِ يٜىٰسُ وَاوَايِ نَتُّکِ وٛنْدِ غَرِيرِ اٜ نجَيْرِ، اَمَّا اٛ جٛوطِي اٜ لَدّٜ؞ فُو اٜ نٛنْ، يِمْٻٜ طُطْٻٜ نغَطِ کَ وَرْکِ تٛ مَاکٛ دَغَ کٛو تٛيٜ؞ 
