RUT 1:1 Isilale udia dolö beaha aligilo gini maadeia, gudi mogelo amoliamu beaha nebegi, Yuda segea ami sege eso edefademalä maala sïdë i edefade gelola misi. Amala hamosebegi dolö Yuda fii afädë Bedeleheme ami sulo amo gäheo i odoa sege näiadodi Moaba namolö bobala asi. Dolö asi amoïe udiala ïe dolö malö äudä amola ili biyidia asi.
RUT 1:2 Dolö amoïe ëida Elimelege, ïe udiada Naëomi, malö äudä amolele ëida Malonole Gilionole. Ili sosogoda Efalada, Yuda fiiïe gaamu edefade Bedeleheme dibea amilahilä Moaba namolö bobala asi.
RUT 1:3 Ili gäheo i nabülasi afädë gadoi ami nelo. Ami nea Elimelege baagoi. Baagosebegi Naëomila, ïe malö äudä amolali, hilido nelo. Hilido nea efegele äudä amolea Moaba udia amogi nii. Dolïsä äudä amolele ëida Obale Uludile. Ele neala ami salea Gilionole Malonole helegela ami baagoi. Egoage efegele äudä amolege baagoibua Naëomi hïdo ami sulo.
RUT 1:6 Naëomi e ami salea nabelebe Dafidilo Geloia ïe udia dolö neala obeägïlasila dafidi esoi dilo amo fisila molö naha dialeala säi amo nabi. Amo nabalahilä efege idia didalo äudä amola ili Moaba dïgïla moholöla daiai.
RUT 1:7 Naëomila efege idia didalo äudä amolali segea ami sulo amo dïgïla, Yuda segea moholö afiai.
RUT 1:8 Afiai amo afiahalea gaso, idiafa amila Naëomia efege idia äudä amolema sähalea, Alida hali segea diemebalä samolö obëgëmalo. Alia nemage baagoi amolimage mala hedabi hamosa nelo amo gadola Dafidilo Geloiage alima hedabi hamomolömelë.
RUT 1:9 Dafidilo Geloia ali ugila negemäia. Dolö elöma fimolö mosalo. Amala hamoseda, Dafidilo Geloia ali hedabola ugila negemolömelëla säla ïahagola säla ï. Amala säla ïaha nelolahilä, Naëomia udia äudä amole helegela neala mimilahilä, ali hä samialola säla ï. Amala säi amole udia äudä amolea dïisa nea Naëomima gelolafalï sähalea, Alïda made obëgëmolö. Dïe sosogo neebea di awäsego gadola nihïlïgïla moholömelëla säi.
RUT 1:11 Amala säsebegi, Naëomia säla obëgësalea, Nïe nidiwi ali-e, alida wila dofä hali mosöa obëgëmäiala helësësamelë. Nebaläda alida edo nea moholö. Ali nimäia na dolö malö elö sogobamolöi gabule. Alida mosöa bahïla obëgëmalo.
RUT 1:12 Na walio gasigi dolö fila awäla malö äudä sogobalahilä amea ali nimäiale. Neda sesalebe made gabule. Ali hali segea bahïla obëgëmalo. Malö äudä amea ali nimäialahilä beaha samolöle. Elea ali nimäiala helësëla samolöle. Nïe nidiwi ali-e, Dafidilo Geloia nema edefade baagi ï amo gadola alimage amai amogi bobasësamelëla säi.
RUT 1:14 Amala säi amo nabalahilä elea bu elö dïi. Dïisa nelolahilä Obaea egoame sali Naëomi gaula mimilahilä, mosalo, hawiola sälahilä hï segea obëgëi. Uludia egoame sali gaula nea, neda dofä obëgëmolö mademelëla säi.
RUT 1:15 Amala säsebegi, Naëomia ema säla obëgësalea, Dïe disama amoda hä hïle sosogo neebeage hïle gode neebeage obëgëi amo gadola dige obëgëmalola säi.
RUT 1:16 Amala säsebegi, Uludia säla obëgësalea, Dia ne bahïla obëgëmalola sämabu. Di awäsego gadola ne moholömelë. Di fisebea amige ne samolömelë. Di sosogo neebe amoge ne sosogo namolömelë. Dïe Gode neebe amoge nïe Gode namolömelë.
RUT 1:17 Di baagosebea amige ne baagomolömelë. Baagosebea amida baumäiamelë. Baagoeamu alï neala hïdo hïdo hïdolasimäia. Na ado walio säi amo gadola made bëgëla hamoseda, Dafidilo Geloi edefade neebe amea nema yöi ïmäiamelëla säla ï.
RUT 1:18 Amala säsebegi, Naëomia beahamelebe, Uludia ebalä moholöla gelosebegi, ea ado säla made,
RUT 1:19 amilasilahilä udia äudä amole awäla Bedeleheme besela galai. Besela galasebegi, Bedeleheme udia dolö nefolalo amolia fudugilahilä udiafalï amolia sähalea, E! Goda Naëomi gabule ma, nowëla säi.
RUT 1:20 Amala säsebegi, Naëomia säla obëgësalea, Nema Naëomila sämabu. Nema Malala sämo. Gode Edefade Sulubadelaïe Geloi neebe amea nema gamogai yafie hamola, nihïnege neala gamogalasimelë.
RUT 1:21 Amo gala ne wila awähaleada, neda nelebo yafie nobai asi gaso, walio Dafidilo Geloia sigi obëgësaleada, memalä ne badumu misimelë. Gode Dafidilo Sulubadelaïe Geloi neebe amea yöi amo gadoi ï ameada edoïe nïe ëi Naëomila sämolö gabula säla ï.
RUT 1:22 Goweda Naëomi efege idia Uludile Moaba sege dïgïla obëgëla misi amoïe ado dialea. Ele Bedeleheme ami besela galasolo amo gala eladi gadoi ëida bali dafidi sagai dilo amo mi gäwila damusa nebegi besela galai.
RUT 2:1 Dolö dafidilo ëi sälo afädë amoïe ëida Boasa. Eda Naëomiïe egoa Elimelege baagoi amoïe sosogo fii afädëfalï nelo.
RUT 2:2 Segeyo afädëgi Uludia Naëomima nabahalea, Na eladi gadoi ëi bali sagaia damulo neebe amolia damula hamoi hamosa neebea ami damui didigafui dibe amo misila audulela nabi. Afädëa ïe baagido hobeala misila aligi misialola sämolöla helësësamelëla säi. Amala säsebegi, Naëomia säla obëgësalea, Nïe nidiwi-e, dia amamalola säla ï.
RUT 2:3 Amo nabalahilä Uludi e awäla hamoi hamolo amoli baagido hobeala eladi gadoi bali gägä neala gagaula awäha nelo. Eladi gadoi bali sagai dilo amoda Elimelege sosogo Boasaïe sagai dilo.
RUT 2:4 Boasa hï e Bedeleheme nelolahilä maala besela galai. E besela galahalea ïe hamoi hamosa nefolalo amolima sähalea, Dafidilo Geloi e dilibalä namiäiamelëla säi. Amala säsebegi, ïe hamoi hamolo nefolalo amolia emage, dige Dafidilo Geloia ugila negemäiamelëla säi.
RUT 2:5 Boasaea ïe hamoi sigi aligilo nelo amoma nabahalea, Udia dolïsä neebe gagoweda nowëla nabi.
RUT 2:6 Amala nabasebegi, hamoi sigi aligilo amea säla obëgësalea, Udia dolïsä goda Moaba segeala Naëomibalä wi misi amo gabio.
RUT 2:7 Ea nema nabahalea, Hamoi hamolo dolö nefolalebego baagido eladi gadoi bali gägä didigafui difolalebe amo misila aligi hobeala mudulela nabasio. E yosefalï maala hamoi hamosamu nelo gaso, holöfalï hele fila awälahilä bu hamosa neagomelëla säi.
RUT 2:8 Amala säsebegi, Boasaea ema sähalea, Udia dolïsä-o, sagai odoagi nofe dabiala auloeo. Gui udia hamoi hamolo nefolalebe go ilibalä eladi gadoi bali gägä gomu misisa namialo.
RUT 2:9 Dolö hamoi hamose golia hamosego abidi hamosebelela fädäla bealahilä udiafalï golibalä gedola hamoi hahamola awäha namialo. Na dolö wi nefolalebe golima, dima nafade hamoloeola säimelë. Di ödä haläseda, ilia ödä iigi usi dië bimolömelë amogi mualola säi.
RUT 2:10 Boasaea amala säsebegi, Uludia nagadaia gumusula dia idogolahilä ema sähalea, Dia nema mala hedabi go hamosegoda mi edoïe amaha. Neda sege wagadi made fii udia misi saleawela säi.
RUT 2:11 Amala säsebegi, Boasaea säla obëgësalea, Dïe digua baagolahilä salea mala hedabi, diguamema hamoila säi amo nabimelë. Dia dïe dieme diadoge dïe segege dïgïla udia dolö dia dawa made beahage melëlo madebalä namolö misila säi amo nabimelë.
RUT 2:12 Dia mala hedabi hamoi amoïe Godea dimage amo gadola hamomäia. Isilaleïe Dafidilo Geloi Godea dige amo gadola sigi neëgi, ïe augia hawa musügä namolö misi goïege bidi edefade nimäiamelëla säla ï.
RUT 2:13 Uludia säla obëgësalea, Dolö edefade-e, neda dïe hamoi hamolo udia sefolalebe amolibalä afädëdi made sulo amo, dia oböla, ado hedabi nebalä säse goeada, ne neala gelolasimelëla säla ï.
RUT 2:14 Molö molö fu besela galasebegi Boasaea Uludima bu sähalea, di guwi maala salea beledi wahalo gadoi difolalebe gowegi gelebi ödägi gela molö misiëla säi. Amala säsebegi, Uludi e hamoi hamolo amolibalä maala sebegi, Boasaea eladi gadoi bali gobei odoa amogi Uludi muäia neala ï. Ï amo naala bolesalea odoa fea digai.
RUT 2:15 Uludi e molö naha maadelahilä awäla eladi gadoi bali amo bu misila aligi awäha nelo. Uludi e awäse amo gaalu, Boasaea ïe hamoi hamolo dolö amolima sähalea, Uludia eladi gadoi bali doboi dibeadi gogi nelea maaseda, ema nemomabio.
RUT 2:16 Doboi dibea ami eladi gadoi bali gogi damusaleada odoa e neala gaumäia damula gui guila aligi mosalo. Amo neala gausegida dilia ema nimabula säloeola säi.
RUT 2:17 Uludia eladi gadoi bali amo misisa nebegimu eso digala deadi. Ea misisa maadelahilä, e molöïe eladi gadoi bali amo dobila hedefala mogela negei. Amoïe yöida gilo nabülasi gadoi.
RUT 2:18 Uludia eladi gadoi bali amo ägüla awäla mosöa egoamema olei. Esoa helesalea molö nahalea fea digai ägüi amoge egoamegali muäia neala ï.
RUT 2:19 Amo gadola hamoi amo bealahilä, Naëomia Uludima nabahalea, Dia walio eladi gadoi bali misila hamoi hahamola awäha nelogoda, dolö nowëa sagaia hamosa nelola nabi. Dolö dima hedabi hamolo gomada, Godeïe obeägïlasiloea eege obeägïlasimäiamelëla säi. Amala sälebe, Uludia säla obëgësalea, na eladi gadoi bali sagaia hamoi hamosa nelo amoda, dolö afädë Boasaea sagaia hamosolomelëla säla ï.
RUT 2:20 Ea amala säla ïasebegi, Naëomia sähalea, Dafidilo Geloi neebe ameada baagoi amolibaläge sebe welibaläge hamomolömelëla säla negei amoda asialo made neebe ameada Boasa eege obeägïlasimäiala sähawela säi. Naëomia bu sähalea, Boasa goda dofä nilï sosogofalï fii afädë neamelë. Alï fidila negemolöge beaha namolöge mala dibe amo gadolada dolö goea hamomolömelëla säla ï.
RUT 2:21 Amala säsebegi, Uludia sähalea, Eage nema ado afädë gomalä säsio. Neda ïe hamoi hamolo udia amolibalä hamoi hahamola awäha nea, eladi gadoi bali ilia hamola wagasolo amo misila wagamalola säimelë.
RUT 2:22 Amala sälebe, Naëomia Uludima sähalea, Nidiwi-e, säi go gadola wäla Boasaïe hamoi hamolo udia nefolalebegobalä gedola eladi gadoi bali, ïe sagaia guimu hamosa namialo. Dolö elöïe eladi gadoi bali sagaido nofe dabiala awäseda, di neala nafadelasimolö dië bimolömelëla säla ï.
RUT 2:23 Uludia Boasaïe hamoi hamolo nefolalo amolibalä eladi gadoi bali gägäge widi gägäge modoala dobola nelelegela awäha nelo amolia hamola wagala afiase amo gadola eage misila wagala asi. Uludi eda egoame sali amobalämu nelo.
RUT 3:1 Segeyo afädëgi Naëomia Uludima sähalea, Naye, na dima ado afädë sähago. Dolöbalä hedabola fodögïla filo amo gadola fimäia, na dïe dolö afädë hogosamelëla säla ï.
RUT 3:2 Dia helësësebele. Eladi gadoi bali sagaia ïe hamoi hamolo udiafalï golibalä dilia hamoi hamolasisa nelo dolö amoda Boasamelë. Eda dofä nilï sosogofalï nea. E walio gasigi awäla eladi gadoi bali gägä amo dobisa namolömelë.
RUT 3:3 Di nigime hëmalo. Amalahilä weli gafisigäi negelahilä fagulo hedabifalï salugamalo. Amalahilä eladi gadoi bali gägä dobisa neebea ami awäla Boasaea di melëloea musügä namialo. Ea hamoi hamosa maadela e molö ödäle muäia fu ïala namialo.
RUT 3:4 Naha maadelahilä e diasebe amo abododi diasebelela fädäla bealahilä, ïe fagulo fïgï geleä gauia adala emo sëgëa ami midialo. Amala hamoseda gomalä hamomalola hï fädäla säla ïmolömelëla säla ï.
RUT 3:5 Amala säsebegi, Uludia säla obëgësalea, Dia säsego gadola na hamomolömelëla säi.
RUT 3:6 Amala sälahilä, Uludia egoame salia hamomalola säi amo gadola hamosa maadelahilä, eladi gadoi bali gägä dobisa neebea ami asi.
RUT 3:7 Boasa e hamoi hamosa nelolahilä molö ödä mai. Naala asigi dusugala awäla salea hä süwiasebegi, eladi gadoi bali hedefala dobi nelegela fedai dilo amo agesugi ami adi. Amala adi dibegi, Uludi e geleä geleäla awäla Boasaïe fagulo fïgï dibe amo bidigi geleä gauia adala ïe emo sëgëa ami adi.
RUT 3:8 Gasi mogogi Boasa e adi besusalea fudugila beahamelebe, udia afädë ïe emo sëgëa ami maala adi dibe melï.
RUT 3:9 Bealahilä ea nabahalea, Di nowë! A, Neda Uludi, dïe hamoi hamolo udia amomelë. Dïe fagulo bidia ne gesumäiamelëla säi. Amoïe mida, dida Elimelegeïe sosogofalï gabugi, dia ne sigi aligila ugila negemäiamelëla sähalea säi.
RUT 3:10 Boasaea amo nabalahilä Uludima sähalea, Nidiwi, Dafidilo Geloia dima hedabi hamomäia. Dia walio hamoi ameada dafidi hamosa nelo amo baagila awäla hedabi hïdo elöi hamoimelë. Malïsä yafie nefolalea. Odoa nelegei yafie negelo, odoa busadäoi, amoligi afädëa di nimäiala made helësëi gabu.
RUT 3:11 Nidiwi-e, asigi säosäomabu. Udia dolö wi nefolalebe sulubadelaeada, dida udia hedabifalï saleala säha. Dia nema hamomäiala säsebe amoda, na hamosa maademolömelë.
RUT 3:12 Dia säi amoda dofä. Neda digua baagoi amoïe sosogo. Na di beaha namolö gasoda, dolö di beaha namolöi afädë neamelë. Amomadale dafidi fädäla nabulö.
RUT 3:13 Walioda gui wäla midialo. Diala aiyo yosefalï ne awäla dolö amea abilia säsebelela fädäla nabulömelë. Ea di sigi namolöla säseda, amo dofea. Ea haboimelëla säseda, Dafidilo Geloiïe ëigi nea sähawe. Sosogoea beaha aligilo mala dibe amo gadola hamomolöda nïe dibe amo gadola hamomolömelë. Walioda sege yomäia beahalea gui midialola säla ï.
RUT 3:14 Uludi e Boasa dibea ami adi amo udia dolöea melëloeala helësëla Boasaea fodolofalï nowela yosefalï musügä mosalola säi amo gadola aabela nowei. Mida, e udia dolöea made bimäia.
RUT 3:15 Nowesebegi, Boasaea ema sähalea, Dia fagulo go idogoi fösimola säi. Amo gadola Uludia fösisebegi, Boasaea eladi gadoi bali gägä amogi adu äudä ï, amoïe yöida gilo nabülasi äudä gadoi amo ägümalai. Uludia bali gägä amo ägümäia Boasaea nigila ägüsi. Uludi e amo ägüla asi baagido Boasa e Bedeleheme gaamugi asi.
RUT 3:16 Obëgëla awäla egoame sali mosöa sebea ami besela galasebegi, egoame sali amea nabahalea, Nidiwi, gelola abilia hamoila nabi. Amala nabasebegi, Uludia Boasaea säi amoge hamoi amoge hulu sulubadela säla ïaha maadei.
RUT 3:17 Ea säla wagahalea sähalea, Boasaea di sebea obëgësalea memalä ne badumu obëgëmäiala made beasila, eladi gadoi bali gägä adu äudä ï ägüi amo gomelëla säi.
RUT 3:18 Amala säsebegi, Naëomia Uludima sähalea, Nafege udia, di holöfalï beaha samialo. Walio Boasaea hamosebego abilia hamola dafogäsebelela bimolömelë. Boasaea abilia hamogimolöi walebelela bimolöïe idi hogosamu nea. Beagolese amo gadolada e hele samolömelëla säi.
RUT 4:1 Boasa e awäla udia dolö gedolo segea nogila digalo idiafa ami sulo. E fii heleia made Elimelegeïe sosogo elö säi amo maaha neebe melï. Boasaea dolö amoma sähalea, Ae, nedoo, na dima ado holöfalï afädë sädeläla di gui samolö misië säi. Dolö amo maala sebegi
RUT 4:2 Boasaea segea ami dolö beaha aligilo nabülasi nefolalo amoli maala fifigimalola säi. Amala säsebegi, ili maala sefolalo.
RUT 4:3 Ea ïe sosogo amoma sähalea, Naëomi Moaba asi nelo amo bahïla misi saleamelë. Eada alïle sosogo Elimelegeïe sege nalä amo dolö afädëa nimäiala helësësaleamelë.
RUT 4:4 Amaimo, dia helësëmäia säla ïahago. Sege amo dia nimolö helësëseda, beaha aligilo nabülasi sefolalebe gowe ilile siigi sämo. Neda di baagia gabugi sege amo dia nimäia. Made nimolö galëda, haboila sämola säi. Amala säla ïasebegi, dolö amea säla obëgësalea, Sege amo na nimolömelëla säi.
RUT 4:5 Amalebe Boasaea ema sähalea, Dia Naëomiïe sege nimolö galëda, Moaba udia Malonoïe udia didalo Uludige digali nimalo. Amalahilä sege amoda baagoi amoïe sosogoïe ëigi diamiäiala säi.
RUT 4:6 Ea ado amala sälebe dolö amea sähalea, Dofä, sege amoda nïe. Gaso, na neaseda, sege amo nïe malöïe made diamolö gabugi, na made nimolö ne haboimelë. Dihï helësëse amo gadola hamomalola säi.
RUT 4:7 (Siiba Isilale ilile malada gowe gadola hamolo negei. Udia didaloïe ado sähaleage, amase, sege nalä nimolöïe ado sähaleage, amogi bidigi bu made sämolö wagahagola säla ulufahalea, emo usililo giila bidi nelo dolö amogali ïlo negei.)
RUT 4:8 Dolö amea Boasama, dia bidia nimalola säla, ïe emo usililo amo giila egali ï.
RUT 4:9 Amala ïasebegi, Boasaea beaha aligilo nabülasi sefolalo amolimage, udia dolö odoa maala sefolalo amolimage sähalea, Dili sulubadela sefolalebeweïe sidaia sähago. Elimelegeïe segege nelegei dafidi dilo amoge, amase, malö äudä Malonole Gilionolele segege nelegei dilo amoge Naëomia beaha nelo nelebo amoda na neahawe.
RUT 4:10 Amase, Moaba udia Uludida Malono baagoi amoïe udia didalo sulo amoge na neahawe. Amala hamosebeweada baagosalea sege nalä dibe amoda Malono hïle ëigimu ïe sosogoïe diamiäia. Baagoi amoïe sosogo afädë sebe amoliada ïe ëi amo helësësa namiäiamelë. Na walio säi amoda diliage nabala siiage beala helësësamelëla säi.
RUT 4:11 Amala säsebegi, dolö nabülasi sefolalo amoliage, udia dolö bea misi sefolalo amoli sulubadelaea sähalea, Ä, nilï sulubadelaea beala helësësamelë. Udia go dïe mosöa awäseda, Dafidilo Geloia ugila negesegi nilïle Isilaleïe naye mäu Eleselole Eleale gadoi samiäiamelë. Elea malö malei sogobai amo gadola udia goeage malö malei sogobamolömelë. Amase, dihïdida Efalada sosogo amoïe ëi sälo nea, Bedeleheme udia dolö beaha aligilo dafidilo namolömelë.
RUT 4:12 Dafidilo Geloia dolïsä go alima aligila malö ägüsebe ameada Yuda Damalalea malö sogobai nilïle mäu Felese sosogo gadoi di sosogo namiäiamelëla säi.
RUT 4:13 Segeyo amo gala Uludi nealahilä Boasaïe udia salea. Dafidilo Geloia ele neala obeägïlasila Uludi e fagulo hagui sebe melï. Amalahilä ea dolö malö afädë neegela ägüi.
RUT 4:14 Udia sefolalo amolia Naëomima säla ïahalea, Dafidilo Geloiïe ëi gauia adadi. Ea di dihïdo samiäiala fisigisila made. Dïe diaye afädë di beaha namiäia ï gabumelë. Malö goeada Isilale udia dolö beaha aligilo dafidilo namolömelë.
RUT 4:15 Diefege udiaea dima boba hamosebegoeada dia dolö malö gifalädalïa gadoi sogobai amai galebeda, amolima boba hamolabio amoda gidogolahilä, dïe diefege idiaea dima boba hamoi gabugo. Amaimo, ea malö walio ägüi goeada di gelolasila, sigi aligila beaha aliligi awäha nea, di udia sali hamomolömelëla säla ï.
RUT 4:16 Naëomia malö dubo amo sogobala fufuia alogola nea obëbësa nelo. Amalahilä malö amoda Naëomia beaha nelo.
RUT 4:17 Udia ga made sefolalo amolia säla sogosalea, Naëomigali dolö malö afädë sogobala ï gabuwela säi. Amala sälahilä malö amoïe ëi Obedi negei. Hobeala Obediïe malöda, Yesi, Yesiïe malöda Debidi.
RUT 4:18 Goweda Felese sosogo awäha nea Debidi besela galai amo dialea. Feleseïe malöda Hesolono. Hesolonoïe malöda Alama. Alamaïe malöda Aminadaba. Aminadabaïe malöda Nasono. Nasonoïe malöda Salomono. Salomonoïe malöda Boasa. Boasaïe malöda Obedi. Obediïe malöda Yesi. Yesiïe malöda Debidi. Amala fifi misi dialea. Hä amo.
MAT 1:1 Dëdëla negei difolalebe golida, Yesu Gelesoïe yaua mäu aliligi misi amolile ëi dialea. Yesu Gelesoïe yaua mäuda Abalahamale Debidile nelo.
MAT 1:2 Abalahamaïe malöda Aisaga. Aisagaïe malöda Yeigaba. Yeigabaïe malöda Yuda, ïe edoolali nefolalo amoli.
MAT 1:3 Yudaïe malöda Felesele Selale. Elele emeda Damala. Amase, Feleseïe malöda Hesolono. Hesolonoïe malöda Alama.
MAT 1:4 Alamaïe malöda Aminadaba. Aminadabaïe malöda Nasono. Nasonoïe malöda Salomono. Amase,
MAT 1:5 Salomonoïe malöda Boasa. Boasaïe emeda Eleihaba. Boasaïe malöda Obedi. Obediïe emeda Uludi. Obediïe malöda Yesi. Amase,
MAT 1:6 Yesiïe malöda beaha aligilo Gini Debidi. Debidiïe malöda Solomono. Dafidi Solomonoïe emeda Uliaïe udia sulo.
MAT 1:7 Solomonoïe malöda Elehoboama. Elehoboamaïe malöda Abia. Abiaïe malöda Asa.
MAT 1:8 Asaïe malöda Yehosafada. Yehosafadaïe malöda Yeholama. Yeholamaïe malöda Usia.
MAT 1:9 Usiaïe malöda Yodama. Yodamaïe malöda Ahasa. Ahasaïe malöda Hesegia.
MAT 1:10 Hesegiaïe malöda Manasa. Manasaïe malöda Amono. Amonoïe malöda Yosaea.
MAT 1:11 Yosaeaïe malöda Yehoiagini, ïe edoolali nefolalo amoli. Amo gaaluda, Isilale ili sigi awäla Babilonomu gala digi nefolalo amo.
MAT 1:12 Ili Babilonomu gala digi nefolaloa amilada, Yehoiaginiïe malöda Sealadiele. Sealadieleïe malöda Selubabele.
MAT 1:13 Selubabeleïe malöda Abiuda. Abiudaïe malöda Eliagimi. Eliagimiïe malöda Asolo.
MAT 1:14 Asoloïe malöda Sadogo. Sadogoïe malöda Agima. Agimaïe malöda Eliudi.
MAT 1:15 Eliudiïe malöda Eleasala. Eleasalaïe malöda Madani. Madaniïe malöda Yeigaba.
MAT 1:16 Yeigabaïe malöda Yosebe. Yosebeda Meliïe egoa. Meliada Yesu neegela ägüi. Yesumada Gelesola sälo amo. Amala aliligi misi.
MAT 1:17 Ëi amolida Abalahama neloa amila maala Debidi neloa amilada damo silasi nelo. Debidilahilä Isilale udia dolö ili Babilonomu gala digia amilage damo silasi nelo. Oböla Babilono gala digia amila Afädë Memelei e misia amilage damo silasimu nelo.
MAT 1:18 Yesu Geleso ägüla maasolo amo galada, gomalä hamoi. Ïe eme Meli eda Yosebegali olei sulo. Yosebea, aso, made neala sebegi, Eleloi Gesamia malö dubo ï amo, ili sefolalo amolia beagolei.
MAT 1:19 Egoa Yosebe eda dolö mogoi ameada, udia dolö nefolalebe amolia Meli e hewalasiloea, eada Meli geleä musügä fisimolöla helësësa nelo.
MAT 1:20 Amala helësëla, e adi simasia beahaleamelebe, Dafidilo Geloiïe selesaia fii afädë ulufadigilahilä, Yosebema ado säla ïahalea, Debidiïe malö Yosebe-e, Meli dïe udia samiäia nimolö amoda bedämabio. E fagulo hagui sebe amoda Eleloi Gesamia negesimelë.
MAT 1:21 Eada dolö malö afädë neegela ägümolömelë. Neegela ägülahilä, ïe ëi Yesu negemalo. Mida, ea ïe udia dolö nafade hamoi amoli hëla fisila damula moholömelëla säla ï.
MAT 1:22 Dafidi, Dafidilo Geloia ïe bea säloma aligila bea säla negei amo gadola gausiala digamolöïe, nelebo sulubadela amala hamoi.
MAT 1:23 Bea säla negei amoda gowe. Dolïsä dolöbalä made nawelo afädëa fagulo hagui sulolahilä, dolö malö neegela ägümolömelë. Malö amoïe ëi Emanuale negemolömelëla säla dëdëla negei dialea. Ëi amoïe mida gomalä, Gode nilïbalä nea.
MAT 1:24 Yosebe adi nowela awälahilä, Dafidilo Geloiïe selesaia fiia ema ado säi amo gadola bëgëla, ea Meli nii.
MAT 1:25 Neasebegi, Melia malö made ägüla maala saleada, Yosebebalä made nawela sulo. Giso ägüla maasebegida, Yosebea malö amoïe ëi Yesu negei.
MAT 2:1 Heledo eda beaha aligilo gini nelo amo gaalu, Yudia segea gaamu afädë ëi Bedeleheme ami Melia Yesu neegela ägüi. Ägüsebegi, dolö odoa gasumilï melëlo mala dawadigi nefolalo amoli sege wagadi made eso maasidola maala Yalusaleme besela galai.
MAT 2:2 Besela galalahilä, ilia sähalea, Yu udia dolöïe beaha aligilo gini namolöïe malö dubo neegela ägüi amoda, abidi dialea. Ïe gasumilï eso maasido neebe amo bealahilä, nilïa ïe ëi gauia adamolö mofiaimelëla säi.
MAT 2:3 Ado amala säi amo nabalahilä, beaha aligilo Gini Heledo e asigi säosäosa nelo. Amase, Yalusaleme ami nefolalo amoli sulubadelaeage, amalamu helësësa nefolalo.
MAT 2:4 Säosäolahilä, Heledoea Yu udia dolöïe gobela ïlo busa nefolalo amolige, amase, mala dawadigi nefolalo amolige gegedomalolahilä, ilima nabahalea, Afädë Memelei amoda sege abidi neegela ägümolöla nabi.
MAT 2:5 Amala nabasebegi, ilia säla obëgësalea, Yudia segeamadi gaamu afädë ëi Bedelehememelëla säi. Amala säsebe amoïe mida, bea sälo nelo amea säla dëdëla negei dibe amoda gowe.
MAT 2:6 Bedelehemee, Yuda sege dibe amogida, dida Yuda segeïe gaamu ilibia edefade difolalebe amoli hawa made. Dige sege edefademelë. Amoïe mida, dima aligila beaha aligilo afädë besela galamolömelë. Eada sugua sibi sigi aligilo amo gadola, nïe Isilale udia dolö sigi namolömelëla säla dëdëla negei dialeala säi.
MAT 2:7 Amala säi amo nabalahilä, Heledoea geleä musügä dolö dawadigi eso maasidola mofiai amoli welahilä, ea ilima fädäla nabahalea, dilia gasumilï amoda abola melïla nabi.
MAT 2:8 Nabala, ili Bedeleheme mosalolahilä, ea ilima sähalea, Dilia malö amo hedabolafalï hogolahilä beagoleseda, nage ïe ëi gauia adamolö moholöïe nema säla ïïa wegi obëgëmalola säla ï.
MAT 2:9 Gini amea amala säi amo nabala, ili afiaha dibegi, gasumilï dafidi eso maasido melï amo dafidi awäla, malö dibea ami aumala aligisi.
MAT 2:10 Ilia gasumilï amo bealahilä, ilile iso asigigila edefademalä obeägïmolö besela galai.
MAT 2:11 Aumala aligisi neebe amo bealahilä, dolö amoli mosö afädë neebe amoïe mumusogi nogila digai. Digalahilä, ilia malöge ïe eme Melige bealahilä, gumusula dia digala sefolalea, malö amoïe ëi gauia adaha sefolalo. Amalahilä, ilia igi gologe, i heale gobesegi höba gafisigä hedabi baëla aligilo amoge, amase, i afädëïe heale sïgä gäha made misiäia hëlo ëi muwege, galu amoli ägüi amo somodala Yesugali ï.
MAT 2:12 Amo somodala ïalahilä, ili hili segea obëgësaleada, ili misi idigi made, idi elögi obëgëi. Amoïe mida, ilia simasia beahaleamelebe, Godea ilima sähalea, Heledo neebeamadida obëgëmabiola säi amo nabala.
MAT 2:13 Dawadigi dolö amoli afiaibua, Yosebea simasia beahaleamelebe, Dafidilo Geloiïe selesaia fii afädë maala ulufadigilahilä sähalea, Di nowela malöle emele sigi, dili fisäla Isibi mosalo. Awäla neëgi, na dima bu elö säla ïmolöïe ami beaha namialo. Mida, Heledoea malö go nufudadigimolöïe hogomolömelëla säi.
MAT 2:14 Amala säsebegi, Yosebe nowela malöle emele sigi, gasigi fisäla Isibi asi.
MAT 2:15 Isibi awälahilä, eda Heledo baagomäialahilä Isibimu nelo. Amoda dafidi Dafidilo Geloia ïe bea säloma aligila bea säla negei amo gausiala digamolöïe, amala hamoi. Bea säla negei amoda gowe. Nïe nafege Isibi segeala na weimelëla säla dëdëla negei dialea.
MAT 2:16 Heledoeada dolö dawadigi amolia e gadiaboi gabula helësëlahilä, e edefademalä mihaläi. Edefademalä mihalälahilä, Bedeleheme amige, amase, sege Bedeleheme ga madela sebea amige, dolö malësä gäheo i äudä sulo amolige, gäheo i äudä, aso, made baagi sulo amolige, sulubadela ea nufudaha maademalola säi. Dolö dawadigi amolia gasumilï mi gäwila neia idogoimelëla säla ï amo helësëla, amala nufualai.
MAT 2:17 Amo hamoi amoda bea sälo Yelemaeaea dafidi bea säla negei amo gausiala digai. Amoïe säla negei dibe amoda gowe.
MAT 2:18 Alama gaamugi ado afädë säsebe, ado amoda edefade didigaola dïisa neebe amoda nabaha nea. Eleseloea ïe malölaligi dïisebe amo. Ili hä maade amea, afädëa e neala adoea aeasisila made sämäiala helësësa saleala säla dëdëla negei dialea.
MAT 2:19 Heledo baagoibua, Yosebe Isibi ami nea simasia beahaleamelebe, Dafidilo Geloiïe selesaia fii afädë maala ulufadigilahilä
MAT 2:20 ema sähalea, Di nowela malöle emele sigi Isilale segea mosalo. Mida, malö amo nufulöla helësësa nefolalo amolida, hä, baagosa maadeimelëla säi.
MAT 2:21 Amala säsebegi, Yosebe e nowela malöle emele sigi, Isilale segea obëgëi.
MAT 2:22 Ili obëgësalea, Yosebea Agelausada ïe eedo bedefala Yudiaïe beaha aligilo gini neamelëla säi amo nabalahilä, eda ami obëgëmolö bedäi. Bedäla nebegi, ea simasia beahaleamelebe, Godea ema mosabiosebegi, e Galili awälahilä,
MAT 2:23 Nasalese gaamugi ami awäla sulo. Amala hamoi amoda bea sälo nefolalo amolia bea säla negesalea, Eda Nasalese fii neala sämolömelëla dafidi säla negei amo gausiala digai.
MAT 3:1 Gäheo i odoa nelolahilä, ödägi gelo Yone e Yudiamadi sege nafade udia dolö aligisia made ami maala ulufalahilä, ado mala säla ïaha nelo.
MAT 3:2 Ea säla ïahalea, Hebeni Beaha Maadela Sigi Neebe amo ga made dibe amea, dili asigi besumalola säla ïaha nelo.
MAT 3:3 Godea bea sälo Aisaeama aligila Yoneïe dafidi bea säla negesalea sähalea, Sege nafade udia dolö aligisia made ami nea, afädëa uuala wesalea, Dafidilo Geloi misiäia idi daiala hamogilasimalo. Ïe idida mogola fodolasimalola säha neamelëla säla dëdëla negei dialea.
MAT 3:4 Yone eda sugua gamele hilïa fagulo hamoi amo salugalahilä, sugua gafodo gadoia malibu negela nelo. Eada galiawage, äwi ödäge naha nelo.
MAT 3:5 Udia dolö Yalusalemelage, Yudia sege dibe amo sulubadelagilage, sege ödä Yodona ga made dibea amilage, Yone neebea maahamu nelo.
MAT 3:6 Ilia nafade hamoi amo säla sisiasebegi, ea ili ödä Yodonagi gesa nelo.
MAT 3:7 Felesi dolö amolige, Sadiusi dolö amolige yafie Yonea ili ödägi gemäia maaha neebe amo bealahilä, ea ilima sähalea, Dilida säiabëïe malö gadoi nebego, Godea mihaläla së ïmolö amogi, fisäla doadigila moholömelëla dilima nowëa säla ïasio.
MAT 3:8 Dili dofä asigi besuimelëla dilile mala olela, gägä ulufala negemalo.
MAT 3:9 Dilia dihilidomu sähalea, Abalahamada nilïle mäu nelola sämolö dialeala helësëmabio. Na ado afädë säla ïahago. Nabuö! Godea igi difolalebe gowegi neala gaulahilä, Abalahamaïe yaua mäu hamolasimolöi neamelë.
MAT 3:10 I nefolalebe mia ami gabi negesisi dialea. I gägä hedabi made negelo nefolalebe amolida, sulubadela abalahilä, nulogi gobesa maademolömelë.
MAT 3:11 Nada dilia asigi besui amoïe ödäea ulufala gelasilomelë. Hobea ne baagia afädë moholö amoda, ne holöfalïmelë neebewe gadoi made, eda ilibia edefade neamelë. Na ïe emo usililo gaumolö dofea made neawe. Eada Eleloi Gesamiage, nulo söaeage dili gelasimolömelë.
MAT 3:12 Eada eladi gadoi ëi widiïe gägä dobilahilä, isole düle mogemäia nelebo gasala sadia adogolo nama gadoi afädë gaula nea. Mogesa maadelahilä, ea widi gägä amo negelo mosöa ami negesilahilä, ïe widi dobilo sege amo gëgelë doala digilahilä, dü fisi amoli nulo usilo made, wisamu neebea ami gobemolömelëla Yonea säi.
MAT 3:13 Segeyo amo gaalu, Yesu e Galilila ödä Yodona dibea ami maala, e Yonea ödägi gelasimäia misi.
MAT 3:14 Maasebegi, Yonea Yesuea oböla asigi bedefala ödägi made gemolöla sämäia, ea nabahalea, Dia ne ödägi gemolöi dialea gaso, na di ödägi gemäia, ne neebea misilela nabi.
MAT 3:15 Amala nabasebegi, Yesuea säla obëgësalea, Walio amala hamomäiamelë. Mala go hamosaleada, Godea hamesebe amoda hamosa maademolö dialeala säi. Amala säsebegi, Yonea ema üi.
MAT 3:16 Yonea Yesu ödägi gei. Yesu ödägila agesua fodolo aliga adogoi amole, mu doga negelahilä, haea maliabu hagila digalo amo gadola, Godeïe Gesami digala edaia fisebe amo melï.
MAT 3:17 Amo gaalu, selesaia mosöala ado afädë säia idogosalea, Egoweda nïe malö, na boba hamosa neawe. Ema edefademalä obeägïsa neawela säi.
MAT 4:1 Amala hamosebegi, Godeïe Gesamia Yesu e sege nafade udia dolö aligisia made ami sigi fedala ifosi. Ifosi nebegi mugabe busaea Yesuea nafade hamomabelela fedogola bimolö misi.
MAT 4:2 Yesu e segeyo nabülasi biyidia, gasi nabülasi biyidiala, molö made naala neamu, sïdëa baagoi nelo.
MAT 4:3 E amala sïdëa baagoi nebegi, nafade hamomäia fedogola melëlo busa amo maalahilä sähalea, Di dofä Godeïe malö nea galëda, igi difolalebe gowema beledi hamomalamola säi.
MAT 4:4 Amala säsebegi, Yesuea säla obëgësalea, Ado säla dëdëla negei dibe amea sähaleada, namolö ilo amoda molö nase amea udia dolögali namolö ïlo mademelë. Ado sulubadela Godeïe nafiala maase ameamu namolö nelola säi dialeala säi.
MAT 4:5 Amala säla obëgësebegi, mugabe busaea, Yesu sigi gaula Gode hïle nafolai gaamu Yalusaleme ami awäla, Godeïe mosöa ilibiafalï gadogo ifosilahilä,
MAT 4:6 ema sähalea, Di dofä Godeïe malö nea galëda, dia hä, wila nila sadia idogomo. Amoïe ado afädë säla dëdëla negei dibe amea sähaleada, igia dïe emo daualoea, Godea ïe selesaia fii amolima dïe säsisegi, ilile naaboea di sogobala gauia adogomalamolömelëla säla dëdëla negei dialeala säi.
MAT 4:7 Amala säsebegi, Yesuea säla obëgësalea, Ado elö säi dibe ameada, gomalä säla dëdëla negei dialea. Dafidilo Geloi, dïe Gode neebe amo, fedogola bimabiola säla dëdëla negei dialeala säi.
MAT 4:8 Amala säsebegi, mugabe busaea Yesu e segebi daia ga gadogo sigi fedalahilä, gädili dibe amo sulubadelage, ilile nelebo hedabi difolalebe amoge olesa maadei.
MAT 4:9 Olesa maadelahilä, ea Yesuma sähalea, Dia ne mia gumusula dia digalahilä, nïe ëi gauia adaseda, nelebo sulubadela beasebe egowelida, dia beaha namiäia ïmolömelëla säi.
MAT 4:10 Amala säsebegi, Yesuea säla obëgësalea, Saidani! Di moholöi mosö. Godeïe bebagi ado säi dibe amea sähaleada, Dafidilo Geloi, dïe Gode neebe amo, dia ïemu ëi gauia adogola ïemu hamoi hamomalola säla dëdëla negei dialeala säi.
MAT 4:11 Amala säla obëgësebegi, mugabe busaea Yesu dïgïla asi. Asibua, selesaia fii Yesu neebea maala, ilia e ugila negei.
MAT 4:12 Yone e galabaia mosöa neala säi amo nabalahilä, Yesu e Galili segea obëgëi.
MAT 4:13 Obëgëla awälahilä, e Nasalese gaamugi ami made aligila, Gabaniama gaamugi namolö asi. Amoda, Galili oeabo edefade dibe amoïe agesua Gabaniama gaamugi ami namolö asi. Sege amoda Sebulunilele Nafadalilele sege dilo.
MAT 4:14 Amo hamoi amoïe Godea ïe bea sälo Aisaeama aligila, bea säla negei amo gausiala digai.
MAT 4:15 Sebuluni segege, Nafadali segege, ëi odoa, idi oeabo edefade dibeamadi amogi aulo sege dibe amoge, ödä Yodona dëgëla alomodi sege dibe amoge, amase, Disiligi Galili ami udia dolö fii odoa yafie maala sefolalebe sege amoge, Sebulunilele Nafadalilele segemu.
MAT 4:16 Segea ami, udia dolö gasimi sagai edefadegi nefolalo amoliada, yo digalo edefademalä melïmelë. Baagoloïe sege augi hawa nefolalo amolimada yo digala besela galaimelëla säla dëdëla negei dialea.
MAT 4:17 Segeyo amo gaalu, Yesuea mi gäwila säla ïahalea, Hebeni Beaha Maadela Sigi Neebe amo ga made dibe ameada, dilia asigi besumalola säla ïaha nelo.
MAT 4:18 Yesu e Galili oeabo edefade dibe amoïe agesudilä awäha nea, ea seme digilo dolö äudä elowole ëole melï. Elöda Saimono, ïe ëi elöda Fida, ïe edoo Ädulule melï. Eleada oeabo edefade amogi seme digisa nelo.
MAT 4:19 Ele beala, Yesuea elema sähalea, Alia seme nelo amo gadola, udia dolö nimäia, na alima neala oleledelä. Ne bëgëla misiëla säi.
MAT 4:20 Amala säsebegi, elea elele selëgë amoli dïgïla, fodolofalï e bëgëla asi.
MAT 4:21 Amila awähalea, ea edoole edoole elö neebe melï. Eleda Sebediïe malö Yamesele, ïe edoo Yonele, elele eedobalä ödä dudaia selëgë hamogisa neebe melï. Bealahilä, Yesuea ele wesebegi,
MAT 4:22 elea ödä duge, eedoge dïgïla, fodolofalï Yesu bëgëla asi.
MAT 4:23 Yesuea Galili sege sulubadelagi nawesa neada, ilile gedolo mosöa säla olelesalea, Godea Beaha Maadela Sigi Neebe amoïe Ado Mala Hedabi säla olelela digi, udia dolö amoligi olo elö elöla oloi wahila digi, amase, domalo nalafadela nawei amoli sulubadela wahila didigisa nelo.
MAT 4:24 Amala hamosa nelo amo, udia dolö Siliamadi nefolalo amoli sulubadelaea nabaha maadei. Nabalahilä, ilia udia dolö olo elö elöla oloi amolige, edefade sësa difolalo amolige, amase, mugabe fedai difolalo amolige, amulämei difolalo amolige, fii si sefolalo amolige, sulubadela neala gaula e neebea maasebegi, ea amoli wahisa maadei.
MAT 4:25 Udia dolö yafie Galili amilage, Gaamu Nabülasimadilage, Yalusalemelage, Yudiamadilage, ödä Yodona näiado alömodilage, ilia e bëgëla afiai.
MAT 5:1 Yesuea udia dolö yafie negegila nefolalebe amo bealahilä, e gau afädëgi fedala, segebidaia ami sulo. Amala sebegi, ïe bëgëla aulo amoli e sebea ami mafusebegi,
MAT 5:2 ea mi gäwila nafi dagala ilima säla olelesalea sähalea,
MAT 5:3 Odoaea asigigi helësësalea, nïe iso asigi dofea made gabula helësësa nefolalebe amolida, obeägïsa nea. Mida, Hebeni Beaha Maadela Sigi Neebe amoda ilile dialeamelë.
MAT 5:4 Dïisa nefolalebe amolida, obeägïsa nea. Mida, Godea ili bobasëla aealasimolömelë.
MAT 5:5 Hili nagadaiala aligilo nefolalebe amolida, obeägïsa nea. Mida, sege dibe amo sulubadela Godea iligali ïmolömelë.
MAT 5:6 Sïdëa baagosa neebe amolia molöle ödäle gelola hamese amo gadola, mala mogoi hamomolö gelola hamesebe amolida, obeägïsa nea. Mida, Godea ili neala nobalasisa maademolömelë.
MAT 5:7 Odoa bobasëla ugila negelo nefolalebe amolida, obeägïsa nea. Mida, Godea ili bobasëla ugila negemolömelë.
MAT 5:8 Asigi gagadelai amolida, obeägïsa nea. Mida, ilia Gode bimolömelë.
MAT 5:9 Daluloïe hamoi hamosa nefolalebe amolida, obeägïsa nea. Mida, ilima Godeïe malö neala sämolömelë.
MAT 5:10 Mala mogoi hamolo amoïe së naha nefolalebe amolida, obeägïsa nea. Mida, Hebeni Beaha Maadela Sigi Neebe amoda ilile dialeamelë.
MAT 5:11 Dilia ne bëgëla mofiasebegoïe, dolö odoaea dili gagadesege, sëlasisege, ado nafade elö elöla wäfalï säsäla dili hololösege, mala amoli gadoi dilima hamoseda, dili obeägïsa nea.
MAT 5:12 Dilia edefademalä obeägïsa namialo. Mida, selesaia mosöa dilile bidi edefade negei dialea. Dili maadeia, bea sälo dafidi nefolalo amoliage së amo gadola wäla naha nefolalomelëla säla ï.
MAT 5:13 Yesuea ado aso, sähamu neamu sähalea, Udia dolö sulubadelaïe ëbï gadoida, dili nebegomelë. Ëbïïe hëdälo amo hogosa heleseda, edoea bu hëdälasimolöi gabu. Ëbï nafade amo gadoida, iso gäwi madela, nagadaia sadia gasegi, udia dolöïe emoea daiasalomelë.
MAT 5:14 Udia dolö sege sulubadelagi nefolalebe amolile yo digalo gadoida, dili nebegomelë. Gaamu afädë segebidaia dibe amoda, hagumolöi made dialea.
MAT 5:15 Amase, afädëa gamali yola sagasilahilä, falo hawa negelo mademelë. Amala negelo made, aulidaia negesegi, mosö amogi difolalebe amoli yo digaha maadelo.
MAT 5:16 Amo gadola, dilile yo digalo udia dolöea bimäia, yo digalasimolö dialea. Dilia mala hedabi hamose amo beala, ilia, dilile Diado selesaia mosöa neebe amoïe ëi gauia adamäiala säla ï.
MAT 5:17 Yesuea ado aso, sähamu neamu sähalea, Mosese nebegi Ado säla negei amoge, bea sälo nefolalo amolia mala olelesa nelo amoge, na haila digimolöïe misi gabula helësëmabio. Na haila digimolöïe misi made. Ilia Ado säla negei amo gausiala digamolöïe ne misi neawe.
MAT 5:18 Na dilima dofä sähago. Naga föige, mu giwige dibe amo gaalu, Mosese nebegi Ado säla negei dibe amogi ado damui afädëge, dudumu afädëge, dofä made hogosa helei. Ado dëdëla negei dibe amo gausiala digamäia, mala amo diamolöi diamolömelë.
MAT 5:19 Amaimo, afädëa mala säla negei amogi, mala holöfalï afädë memalä gabula, damula, amase, odoaeage damumäia olelelo neebe amoda, Hebeni Beaha Maadela Sigi Neebea ami, emada dofä gidogofalï neala sämolömelë. Amo gadola made, afädëa mala säla negei amo gadola hamola, odoaeage hamomäia olelelo neebe amoda, Hebeni Beaha Maadela Sigi Neebea ami, emada ilibia edefadela sämolömelë.
MAT 5:20 Amai gabugi, na dilima ado afädë säla ïahago. Dilia mala mogoi hamomolö amoda, mala dawadigi nefolalebe amoliage, Felesi dolö nefolalebe amoliage hamolo amo gadola made, dilia ili baagila awäla made hamoseda, Hebeni Beaha Maadela Sigi Neebea ami dili dofä made nogila digamolömelëla säla ï.
MAT 5:21 Yesuea ado aso, sähamu neamu sähalea, Siibafalï udia dolö nefolalo amolima ado sälo dilia nabelo amea sähaleada, Udia dolö baagomäia nufuabio. Afädëa amala hamoseda, gudimolö dië bimolömelëla sälo.
MAT 5:22 Amai gaso, na dilima säla ïahago. Afädëa ïe edoobalä mihaläseda, gudimolö dië bimolömelë. Amase, afädëa ïe edooma dida dofea madela nolealeseda, Galïsolö dolö neebea ami sigi awäla gudimolömelë. Gasoda, afädëa ïe edooma dida nafadefalï asigi maade nebegola säseda, heli segea nulo gobei dibea ami moholömelë.
MAT 5:23 Amaimo, dia nelebo ïmolöïe gobela ïlo aulidaia negemolö nea, dïe didooea dima nelebo afädëgi habobai neala helësëla obëgëseda,
MAT 5:24 hä, nelebo ïmolö gaui amoda, gobela ïlo auli ga made ami negesia, dafidi dïe didoo neebea dalumolö mosalo. Dalula asi obëgëlahilä, nelebo ïmolö negei amo ïmalo.
MAT 5:25 Ado nii dolö afädëa dibalä gudimolöïe awähala säseda, aso, gudimolö segea ami made besela galala, idiafa ebalädale fodolofalï hamogimalo. Gudimolöïe sigi awäseda, gudi mogelo dolö neebe amoma di gaula ïalahilä, mogelo dolö ameada di dadi gaui amolima ïalahilä, di galabaia mosöa ami ifosiloea.
MAT 5:26 Na dima dofä sähago. Amala hamoseda, dia nafade hamoi amoïe bidi nelo amo gadola neaha maademäia, galabaia mosöa ifosi neamu, made moholömelëla säla ï.
MAT 5:27 Yesuea ado aso, sähamu nea sähalea, Ado säi dilia nabelo amea sähaleada, Udia dolö fa nimabiola sälo.
MAT 5:28 Amai gaso, na dilima gomalä säla ïahago. Dolö afädëa udia siia beala gesami awäseda, udia amo hä asigia fa niimelë.
MAT 5:29 Dïe si dafädi goea di neala digalasiseda, beselala sadia gamalo. Dïe domaloïe sosogo gogi afädë maade nea, namolöda dofea galea. Dïe domalo sulubadela aligisa maadei neëgida, heli segea sadia idogomolö amoda, nafade gabugi.
MAT 5:30 Amase, dïe naabo dafädi goea di neala digalasiseda, naabo amo damula sadia gamalo. Dïe domaloïe sosogo gogi afädë maade nea, namolöda dofea galea. Dïe domalo sulubadela aligisa maadei neëgida, heli segea moholö amoda, nafade gabugila säla ï.
MAT 5:31 Yesuea ado aso, sähamu nea sähalea, Ado elö sälo amoda gowe. Dolö afädëa ïe udia fisiseda, ea beba dëdëla, ïe udiama ïmolö dialeala säi gabio.
MAT 5:32 Amai gaso, na dilima säla ïahago. Dolö afädëïe udiaea dolö elöbalä mala nafade hamoigi made, ïe udia amo fisiseda, ïe udia amea dolö fa nimäia fa nimalalasimelë. Dolö afädëa dolö elöïe udia memalä fisi amo neaseda, ameage udia amo fa nimolömelëla säla ï.
MAT 5:33 Yesuea ado aso, sähamu neamu sähalea, Siibafalï udia dolö nefolalo amolima ado sälo dilia nabelo amea sähaleada, Migalïa diigila ado gelola säla negei amoda, made fisila, Dafidilo Geloima migalïa diigila ado gelola säla negei amoda, hamomalola sälo.
MAT 5:34 Amai gaso, na dilima säla ïahago. Migalïa diigila ado gelola säla negemabio. Mudaiala säla diigimabio. Mida, mudaiada Godeïe beaha aligilo filo dialeamelë.
MAT 5:35 Naga föigige säla diigimabio. Mida, naga föida Godeïe emoea emesaia idala filo dialeamelë. Amase, Yalusalemege säla diigimabio. Mida, Yalusalemeda beaha aligilo Gini Edefade neebe amoïe gaamumelë.
MAT 5:36 Dihïle busa säla, migalïa diigila ado gelola säla negemabio. Mida, dia busa hilï afädë neala dihï falemolöige, yabumolöige ulïmelë.
MAT 5:37 Afädë hamomolö galëda, ü, ailemu sämalo. Ado odoage baala säseda, ado amo baala sälo amolida, mugabe busa nafadefalïmadila maasebe amo sähamelëla säla ï.
MAT 5:38 Yesuea ado aso, sähamu neamu sähalea, Ado säi dilia nabelo amea sähaleada, Afädëa elöïe si besela digiseda, ïe siige besela digilomelë. Amase, afädëa elöïe bese besela digiseda, ïe besege besela digilomelëla sälo.
MAT 5:39 Amai gaso, na dilima säla ïahago. Afädëa dilima nafade hamoseda, dilia bu dabemabio. Afädëa dïe ba dafädimadi nufudaseda, ba näiadogoge olemalo.
MAT 5:40 Afädëa dibalä gudimolöïe di sigi awähalea, dïe fagulo sedi ïmola säseda, dïe gögï fagulo daia salugalo amo bu baala ïmalo.
MAT 5:41 Dolö afädëa dima gelola egedidigila ïe nelegei ägüla, di gilomida afädëgi mosalaseda, diada, oböla, gilomida äudägi mosalo.
MAT 5:42 Afädëa nelebo afädë ïmola säseda, hä egali ïmalo. Amase, afädëa hobea ïduläïe bidi negesagola säseda, auaula baagi ïmabiola säla ï.
MAT 5:43 Yesuea ado aso, sähamu nea sähalea, Siiba ado sälo dilia nabelo amea sähaleada, Odoa dibalä nefolalebe amoli boba hamosaleada, dibalä ado nii nefolalebe amolibalä habobala namialola sälo.
MAT 5:44 Amai gaso, na dilima gomalä säla ïahago. Dilibalä ado nii nefolalebe amolibalä boba hamolahilä, dili neala sëlasisa nefolalebe amoli hedabomäia, Godema adolasisa namialo.
MAT 5:45 Ameada, dilile Diado selesaia mosöa neebe amoïe malö neala olemolömelë. Mida, eada nafade hamolomage, hedabi hamolomage, ïe eso neëlasilo neada, mala mogoi hamolomage, mala mogoi made hamolomage, sege digalasilo nea.
MAT 5:46 Dili boba hamolo amolimu boba hamoseda, dilia bidi edo nimolö. Dagisi muni nelo nefolalebe amoliage amo gadola hamolo nea madele.
MAT 5:47 Dilia dilile didoo amolimamu haeafula aeahaleada, odoada baagila aulole. Udia dolö Gode helësëlo made nefolalebe amoliage amo gadola hamolo nea madele.
MAT 5:48 Amai galëda, dilile Diado selesaia mosöa mogoi hedabi neebe amo gadola, dilige mogoi hedabi namialola säla ï.
MAT 6:1 Yesuea ado aso, sähamu nea sähalea, Dili hedabola. Gode helësëla mala hedabi hamosaleada, udia dolö nefolalebe amolile sidaia dili bimäiala, made hamomalo. Amala hamoseda, dilile Diado selesaia mosöa neebe amea diligali bidi ïmolö dibe amo ïmolöi made bimolömelë.
MAT 6:2 Amaloea, gumusui nefolalebe amoligali nelebo afädë ïaseda, odoa ilile sidaia gugusämäiala gelola uuala säla ïmabio. Asigi fea negelo nefolalebe amolia ili bimäialahilä, gedolo mosöage, idiafage, odoaea ilile ëi gauia adamäia, amala hamolo nea. Na dilima dofä sähago. Amoïe bidida hä nii aguimelë.
MAT 6:3 Amaimo, dilia afädë gumusui neebe amogali afädë ïahaleada, naabo dafädia hamosebe amo naabo fefeädia made bimäia,
MAT 6:4 musügä ïmalo. Amala ïaseda, dilile Diadoea dili hïdo hïdolaea musügä hamose beaha neebe amea, diligali bidi ïmolömelëla säla ï.
MAT 6:5 Yesuea ado aso, sähamu nea sähalea, Dili nefolalebegoea Godema adosaleada, udia dolö asigi fea negelo nefolalebe amolia hamolo amo gadola hamomabio. Ilile asigiada, udia dolö odoa nefolalebe amolia bimäialahilä, gedolo mosöage, idi edefade osogoloage, nowela nea Godema adomolömu hamelo nea. Na dilima dofä sähago. Amoïe bidida hä nii aguimelë.
MAT 6:6 Amala hamolo amo gadola made, dilia Godema adomolö neada, dihilile mosö hogoli afädëgi nogila digala idi gala digilahilä, dilile Diado siia bimolöi made neebe amoma adomalo. Amala adoseda, dilile Diadoea dili hïdo hïdolaea musügä hamose beaha neebe amea, diligali bidi ïmolömelë.
MAT 6:7 Dilia Godema adosaleada, udia dolö odoa Gode helësëlo made nefolalebe amolia memalä säla dabolo amo gadola sämabio. Amolia sedade olögöla adose ameada, Godea nabulöla helësëlo.
MAT 6:8 Dilida ili gadoi namiabio. Dili nefolalebegoea nelebo sulubadela nimolöi amolida dilile Diadoma aso, adola made neëgi, dafidi eadale dawadigisa maadei neamelë.
MAT 6:9 Dilia Godema gomalä adomalo. Nilïle Naado selesaia mosöa nebego, dïe ëi amo eleloi hïdo elöi namiäia hamesa.
MAT 6:10 Dïe Beaha Maadela Sigi Neebe amoge misiäia hamesa neawe. Dia hamese amo, selesaia mosöa nefolalebe amolia hamolo amo gadola, nagadaia nefolalebe nilïage hamodelä hamesa neawe.
MAT 6:11 Segeyo walioïe molö molö amo, dia walio ïmalo.
MAT 6:12 Odoa ilia nilïma asiala hamosegi fisilo amo gadola, diage nilïa nafade hamoi amoli hëla fisimalo.
MAT 6:13 Nilï neebeawi fedogola bimolö made negesimalo. Mugabe busa nafadefalï neebe amoda, dia neala yolasimalo.
MAT 6:14 Amaimo, udia dolö odoaea dilima asiala hamoi amo hëla fisiseda, dilile Diado selesaia mosöa neebe amea dilia asiala hamoi amoge hëla fisimolömelë.
MAT 6:15 Gasoda, udia dolö odoaea dilima asiala hamoi amo made hëla fisiseda, dilile Diadoea dilia asiala hamoi amoge made hëla fisimolömelëla säla ï.
MAT 6:16 Yesuea ado aso, sähamu nea sähalea, Dilia Gode helësëla molö made naala neada, udia dolö odoa asigi fea negelo nefolalebe amolia odagi augia idala aligilo amo gadola namiabio. Udia dolö amolia ili molö made naala aialo gabula helësëmäia, ilia ilile odagi nigime hëla made aligilo nea. Na dilima dofä sähago. Amoïe bidida hä nii aguimelë.
MAT 6:17 Amai gaso, dilia molö naala made aiala, dilile odagi nigime hëlahilä, busagia weli negemalo.
MAT 6:18 Amala hamomolö amoïe mida, udia dolö odoa ilia, dili beala molö made naala aialo gabula made helësëmäiaïe. Dilile Diado siia bimolöi made neebe ameamu aialo gabula helësëmäiamelë. Amala hamoseda, dilile Diadoea, dili hïdo hïdolaea musügä hamose beaha neebe amea, diligali bidi ïmolömelëla säla ï.
MAT 6:19 Yesuea ado aso, sähamu nea sähalea, Nagadaiawi gasiämoea nülo dibea wige, asömalö gaisa baasia wige, fa nelo amolia mosö dagabola fa nelo neebea wige, dilile nelegei hedabi gafedela negesa namiabio.
MAT 6:20 Amala hamolo dibea wi made, selesaia mosöa gasiämoea made nülo dibea amige, asömalö gaisa made baasia amige, fa neloea mosö dagabola made fa neasia amige, dilile nelegei hedabi gafedela negesa namialo.
MAT 6:21 Mida, dïe nelegei hedabi negei sege dibea amida, dïe bobahëla helësëlo amoda segea amimu diamolömelë.
MAT 6:22 Siida domaloïe yo digalo gamali gadoi nea. Dilile si hedabi neëda, dilile domalo sulubadelagi yo digaha maadei namolömelë.
MAT 6:23 Amase, dilile domalogi yo digalo neebe amo gasimi sagai diëda, gasimi sagai amo, edela gasimi sagalomelë.
MAT 6:24 Afädëa dafidilo äudäïe galabaia hamoi gadoi hamolasimolö ulïmelë. Ea elö amoma bimolö habobahalea, elö amo boba hamomolömelë. Elö amo hedabola ugila negesalea, oböla, elö amo memalä gabula helësëmolömelë. Dilia Godeïege, muniïege, helegelaïe galabaia hamoi gadoi hamolasimolö ulïmelëla säla ï.
MAT 6:25 Yesuea ado aso, sähamu nea sähalea, Amoïeda na dilima säla ïahago. Molöle ödäle edo molödula säla, dili namolö goïe asigia säosäola helësëmabio. Amase, fagulo edo salugamolödulage , dilile namolö amoïege domaloïege asigia säosäola helësëmabio. Molö aso, nigia galahilä, udia dolö namolö amoda dafidilo madele. Amase, faguloge aso, nigia galahilä, domaloda dafidilo madele.
MAT 6:26 Haea hagila nawiaha dibe amo bimo. Haea amolida molö hawage sagalo made, molö faige gegedola negelo made, amase, negelo mosöage negelo made. Amalo gasoda, dilile Diado selesaia mosöa neebe amea hilima molö ïaha neamelë. Haea amoli holöbö gidogola, udia dolö dili dafidilo nebego madele.
MAT 6:27 Dili neebe gogi afädëa hïle namolö amoïemu asigia säosäola helësëseda, säosäola helësëse amea, ïe namolö amo fu holöfalï baala sedadelasimolöledu. Amamolö ulïmelë.
MAT 6:28 Faguloïe asigia säosäola namolö amoda edoïe. Mama amoli memalä bäulahilä, gägä negelo amo abeahäla fedaha aligilodula helësëmo. Ilia hamoige made hamolo, amase, ëfëge made nolo neamelë.
MAT 6:29 Amai gaso, na dilima säla ïahago. Nelebo yafie negelo Solomonoda, ïe fagulo hedabifalï salugalo amoda, ilile momadoi hïdo elöi amo gadoi made nelo.
MAT 6:30 Giisige, mamage, memalä bäui walio nefolalebe amolida, aiyo dolöea damula nulogi gobelo neamelë. Asigi afädë holöfalï negei nefolalebela dili-e, Godea giisi mama nefolalebe amolida memalä momadolasilo. Amo gadola made, dofä baagila awäla, dili nefolalebegoge fagulo gämäia ïmolö madele.
MAT 6:31 Amaimo, nilïa molöle ödäle edo molödulage, fagulo edo salugamolödulage säla, dilia asigia säosäola namiabio.
MAT 6:32 Amo gadolada, udia dolö Gode helësëlo made amolia, nelebo amoli gadoi helësësamu aligilo nea. Amalo gaso, dilile Diado selesaia mosöa neebe ameada, dili nefolalebegoea nelebo amoli nimolöi dibe amoda dawadigi neamelë.
MAT 6:33 Amaimo, ïe Beaha Maadela Sigi Neebe amole, ea dilia hamomäia hamesa neebe amoledale hogosa namialo. Amala hogosa aligiseda, ea nelebo amoli dibe amo sulubadela dilima baala ïmolömelë.
MAT 6:34 Amai galë, walio neada dilia aiyoïe asigia säosäola namiabio. Aiyoïeda, segeyo aiyo hï asigia säosäosa namolö. Segeyo afädëïe yöi dibe amoda amoïemu dialeamelëla säla ï.
MAT 7:1 Yesuea ado aso, sähamu nea sähalea, Godea dilia hamosebego mogeloea, odoaea hamosebe amo dilia made mogemalo.
MAT 7:2 Mida, dilia odoaea hamose amo beala memelelo amo gadola, Godeage dilia hamose amo beala memelemolömelë. Amase, dilia odoa beala mogelo amo gadola, dili bealage amo gadola wäla mogemolömelë.
MAT 7:3 Amaimo, dihïle sihidoa i gäi gadoi dibe amo helësëla made, dia oböla didooïe sihidoa gëgelë holöbö diëgi beasegoda edoïe.
MAT 7:4 Dilia dihilile sihidoa i gäi gadoi dialea wäla, oböla dilile didooma sähalea, Dïe sihidoa gëgelë holöbö dibe alogo neahagola abeahäla sämolö gabu.
MAT 7:5 Asigi fea negelo nefolalebela dilia, dihilile sihidoa i gäi gadoi dibe amodale neadigilahilä, hobeala dilile didooïe sihidoa gëgelë holöbö dibe amo hedabola beala nimolöi bimolömelë.
MAT 7:6 Nelebo Godema odala ïlo dibe amogi, dilia ügülogali ïmabio. Amase, bageïe isogi momado hedabi helebe näia difolalebe amoli suguagali sadia gala ïmabio. Amala hamoseda, ilia nelebo hedabi amo emoea daiasala nolealelahilä, dili mihimolömelëla säla ï.
MAT 7:7 Yesuea ado aso, sähamu nea sähalea, Ïmola ëdëgësa namialo. Ïmola ëdëgëseda, diligali ïmolömelë. Hogosa namialo. Hogosa aligiseda, dilia beagolemolömelë. Idi gai dugimola säha namialo. Idi gai dugimola säha aligiseda, dili digamäia idi gai dogasimolömelë.
MAT 7:8 Mida, udia dolö sulubadelaea ïmosa neebe amolia nimolömelë. Hogosa neebe amea beagolemolömelë. Amase, idi gai dugimola säha neebe amoma idi gai doga negesimolömelë.
MAT 7:9 Malö eedo nefolalebe dilile malöea, wahalo ïmola säseda, dili afädëa igi neala ïmolöle.
MAT 7:10 Amase, malöea seme ïmola säseda, dili afädëa waadima neala ïmolöle.
MAT 7:11 Amai dihili dili nafade hamolo nea gaso, dilile malöma nelebo hedabi ïmolö asigilo. Amo gadola made, dilile Diado selesaia mosöa neebe amea, ïmola säsebe amoma nelebo hedabi dofä baagila awäla ïmolömelë.
MAT 7:12 Mala sulubadela odoaea dilima hamomäiala hamelo amo gadola, amase, diliage odoa ilima amo gadola wäla hamomalo. Mida, Mosese nebegi ado säla negei dibe amoïege, bea sälo nefolalo amolia ado säla negei dibe amoïege, amoligi ado säi dibe amoïe iso gäwida gomelëla säla ï.
MAT 7:13 Yesuea ado aso, sähamu nea sähalea, Idi doga negei dedelei holöfalïgi nogila digamalo. Mida, nafadelo segea aulo idi doga negeida edefade dialea, amase, idi amoge uahabai dialea. Udia dolö yafieda amogimu awäha nea.
MAT 7:14 Amai gaso, namolöi namolö segea aulo idi doga negeida dedelei holöfalï dialea, amase, idige nelebolei dialea. Udia dolö afädë afädëlaeamu amo beagolelo neala säla ï.
MAT 7:15 Yesuea ado aso, sähamu nea sähalea, Wäfalï bea sälo nefolalebe amoli helësëla, idihë namialo. Ili sugua sibi aeai gadoi, dili neebea mulo nea gaso, iso asigida nufudaha maadelo ilua ügülo gadoi nea.
MAT 7:16 Ilile gägä negesebe amo dilia bealahilä, wäfalï bea sälo gabula helësëmolömelë. Gufaeo gadoi neebe amomada, gägä hedabi ëi gelebi negesegi failole. Amase, buudi äyo ëfë gadoi amomada äfäeo gägä negesegi failole.
MAT 7:17 I hedabi nefolalebe amoli sulubadelaeada gägä hedabi negelo nea. Gaso, i nafade nefolalebe amoliada gägä nafade negelo nea.
MAT 7:18 I hedabi nefolalebe amoliada, gägä nafade negemolö ulï nea, amase, i nafade nefolalebe amolia gägä hedabi negemolö ulï nea.
MAT 7:19 I gägä hedabi negelo made nefolalebe amoli sulubadela sagai eedoea abalahilä, nulogi sadia galo.
MAT 7:20 Amaimo, dilia ilile gägä negesebe amo bealahilä, golida wäfalï bea sälo gabula helësëmalo.
MAT 7:21 Sulubadelaea ne wesalea, Dafidilo Geloi-e, Dafidilo Geloi-ela säha nefolalebe amolida, Hebeni Beaha Maadela Sigi Neebea ami made nogila digamolö. Nïe Naado selesaia mosöa neebe amea hamesebe amo gadola hamosa nefolalebe amolimu nogila digamolömelë.
MAT 7:22 Godea gudimolö segeyo amo gala, udia dolö yafiea nema sähalea, Dafidilo Geloi-e, Dafidilo Geloi-e, dïe ëigila nilïa ado mala säla ïmelë. Amase, nilïa dïe ëi säla mugabe fedai nesila digisa aligilo. amase, geloi melëlo made gadoi yafiege dïe ëigila hamosa nelo amodala sämolömelë.
MAT 7:23 Amala säseda, na ilima sähalea, Dilida na dofä dawa made. Mala nafade hamolo dili, ne neebeawi made, bahïla afiamola sämolömelëla säla ï.
MAT 7:24 Yesuea ado aso, sähamu nea sähalea, Amaimo, sulubadelaea na ado säsewe nabala bëgëla hamose amolida, dolö afädë asigi gäwia igidaia mosö uli amo gadoi nefolalea.
MAT 7:25 Amala uli nebegi, sege edefade digala, ödä bëi nedala, fo guula maala, mosö amoma gelola nidäla asi gaso, made dagaboi. Mida, igi boboga salala igau sagai nelo amea.
MAT 7:26 Amaimo, sulubadelaea na ado säsewe nabala, made bëgëla hamose amolida, dolö asigi made gäwi afädëa ödä bosedaia mosö uli amo gadoi nefolalea.
MAT 7:27 Amala uli nebegi, sege edefade digala, ödä bëi nedala, fo guula maala, mosö amoma gelola nidäla awäsebegi, mosö dagabola digala nafademolöi nafadeimelëla säla ï.
MAT 7:28 Yesuea ado amoli sulubadela säha maadesebegi, udia dolö yafie negegila nefolalo amolia ea olelei amo nabala, asigigi fudugisa sefolalo.
MAT 7:29 Mida, ado säla negei olelo nefolalo amolia säla olelelo amo gadola made, eada geloi gaulahilä, geloi hïdo elöi säla olelei amogi.
MAT 8:1 Yesu e segebidaia amila digasebegi, udia dolö yafie nefolalo amoli e bëgëla asi.
MAT 8:2 Awäha nebegi, dolö afädë gudubu hamoi nelo amo Yesu neebea maala, emo gumu sasagaia idogola salea sähalea, Dafidilo Geloi-e, dia ne wahimäiala helësëseda, hä dia ne wahilasimolöi nebegola säi.
MAT 8:3 Amala säsebegi, ïe naabo mogodigia gala, dolö amo diigisa nea sähalea, Na amala helësësa, wahimola säi. Amala säsebegi, dolö gudubu hamoi amo hä fodolofalï wahisa madei.
MAT 8:4 Amalahilä, Yesuea ema sähalea, Dofä elöma säloeo. Gobela ïlo dolö neebea ami di siia bimäia olemolö mosalo. Amalahilä, di wahi go udia dolöma olemolöïe, Mosesea nelebo odala ïmalola säla negei dibe amo gadola, nelebo afädë odala ïmalola säla ï.
MAT 8:5 Yesu e amila awäla, Gabaniama gaamugi besela galasebegi, Olomo ilile ami hädali afädë beaha aligilo afädë Yesu neebea maalahilä, ema hähäfilïla sähalea,
MAT 8:6 Dafidilo-o, nïe hamoi hamolasilo e nïe mosöa oloi dialea. Ïe naabo emo baagola së edefademalä sëlahilä, fologomolö ulï dialeamelëla säi.
MAT 8:7 Amala säsebegi, Yesuea ema sähalea, Na e wahilasimolö awähamelëla säi.
MAT 8:8 Amala säsebegi, ami beaha aligilo amea säla obëgësalea, Ai. Dafidilo-o, neda dofea made ameada. Di ne gadoiïe mosöa nogila digamolö holöbö dofea made gabugi, dia adoeamu säsimäia. Amaseda, nïe hamoi hamolasilo amo wahimolö.
MAT 8:9 Nage ne beaha aligilo ami geloi nefolalebe amoli hawala aligilomelë. Amase, ami dolö odoa nefolalebe amoliage ne hawala aligilomelë. Na afädëma mosöla säseda, e aulomelë. Elöma misiëla säseda, e mulomelë. Na nïe galabaia hamoi gadoi hamolasiloma gowe hamomola säse amo gadola hamolomelëla säi.
MAT 8:10 Amala säi amo nabala, Yesu e edefademalä fudugilahilä, udia dolö e bëgëla maaha difolalo amolima sähalea, Na dilima dofä gelola sähago. Isilale segea afädëa asigi afädë egowe gadola negei neebe na made melïmelë.
MAT 8:11 Na dilima gowe sähago. Udia dolö yafie eso maasidolage, eso digasidolage maala, ilia Hebeni Beaha Maadela Sigi Neebea ami Abalahamala Aisagala Yeigabala ilibalä molö gegedola naha sefolamolömelë.
MAT 8:12 Amai gaso, Hebeni Beaha Maadela Sigi Neebea ami namiäia, Godea udia dolö dafidi memelei nefolalebe amolida, Godea hailahilä, gasimi sagai dibea ami, sogobala sadia idogomolömelë. Amida, ili dïisalea, bese ali nalëgësa namolömelëla säi.
MAT 8:13 Amala sälahilä, Yesuea ami beaha aligilo amoma sähalea, Hä, mosalo. Dia asigi afädë negei neebe go gadola hamomolömelëla säi. Amala säia gai amole, ami beaha aligilo amoïe hamoi hamolasilo amo hä, wahi.
MAT 8:14 Yesu e Fidaïe mosöa awälahilä, Fidaïe esöa udia hëgï olo oloi dibe melï.
MAT 8:15 Bealahilä, ea udia amoïe naabogi diigisebegi, dafidi olo hëgï dilo amo damulebe, udia amea nowelahilä, Yesu e molö muäia daiai.
MAT 8:16 Deadi eso digase gaalu, udia dolö nefolalo amolia mugabe fedai nefolalo amoli Yesu neebea sigi mofiai. Sigi mofiasebegi, Yesuea ado säi ameamu mugabe yafie nesila didigila digi. Amase, udia dolö oloi difolalo amoli sulubadela wahisa maadela digisa nelo.
MAT 8:17 Ea amala hamoi amoda, Godea ïe bea sälo Aisaeama aligila, bea säla negei amo gausiala digai. Nilïle oloi amo hï neala gaui. Olo elö elöla nilïma baai amoli ea neala gaula asila säi amo dëdëla negei dialea.
MAT 8:18 Udia dolö yafiea e amalela nefolalebe amo bealahilä, Yesuea sähalea, Ödä edefade dibe gowe dëgëla alogodigogi afiadila säi.
MAT 8:19 Amala säsebegi, mala dawadigi afädë Yesu neebea maalahilä, ema sähalea, Säla Olelelo-o, di awäsebe go gadola, ne di bëgëla maahagola säi.
MAT 8:20 Amala säsebegi, Yesuea ema säla obëgësalea, Ilua ügülo sefolalebe amoli dilo mosöda, naga hagali galea. Amase, haea sefolalebe amolile dilo mosö galea. Amai gaso. Dolöïe Malö eda busa fugulo negela dilo mosö fu maademelëla säi.
MAT 8:21 Amala säsebegi, bëgëla aulo elöea ema nabahalea, Dafidilo-o, na nïe naado dafidi baumolö obëgëmalamolö dofealela nabi.
MAT 8:22 Amala nabasebegi, Yesuea ema säla obëgësalea, Baagoi difolalebe amolia hilile baagoi baumäia. Dida ne bëgëla misiëla säi.
MAT 8:23 Yesu e ödä duugi fila awäsebegi, ïe bëgëla aulo amolige ebalä asi.
MAT 8:24 Ili asi oeabo mogogi nebegi fo edefade gelola maase amea ödä aidagula du dabedelä hamose melï. Amala hamosebegi gaso, Yesu eda adi elaboi dilo.
MAT 8:25 Adi elaboi dibegi, ïe bëgëla aulo amolia awälahilä Yesu e didiigisalea, Dafidilo Geloi-e! Nilï hä ödäea nalä baagomolö gabu! Dia ugila negemolöïe di hä nowemola säi.
MAT 8:26 Amala säsebegi, ea säla obëgësalea, Asigi holöfalï negei nefolalebela dili-e, edogi bedäha dialeala säi. Amala sälahilä e nowelahilä, fole ödälema nemosebegi, fo bogelela ödä hä, aumalasi.
MAT 8:27 Dolö amolia fudugilahilä sähalea, Dolö goweda nowë gadoidu. Folea ödäleada ïe ado nabelo gabula säi.
MAT 8:28 Yesu e Galili oeabo amo dëgëla näiadodi alomodi awäla,Gadala segea besela galai. Besela galaha nebegi, baagoi baulo igi äbä difolalebeamadila, dolö äudä mugabe fedai maaha nebegi, Yesuea ele gausiala digai. Dolö äudä amolea udia dolö nufudala ïalalemolöi gabugi, idi amogida udia dolö aulo made.
MAT 8:29 Elea Yesu gausiala digalahilä, gelola üalala sähalea, Godeïe malö, dia alïma abilia hamomolö misi. Së ïmolö segeyo fu aso, made besela galaia, alïdale dafidi së ïmolö misilela säi.
MAT 8:30 Amo gaalu, holöbö ga madela amida, sugua yafie moosa nefolalo.
MAT 8:31 Hä, dolö äudä amolema mugabe fedai amolia Yesuma sähalea, Dia nilï nesila digimolö galëda, nilï sugua nefolalebe gagowelima nogila fedamolö mosöla sämola säi.
MAT 8:32 Amala säsebegi, ea mugabe amolima dili mosöla säi. Amala säsebegi, mugabe amolia dolö äudä amole amilahilä, sugua amolima fedai. Fedasebegi, sugua nefolalo amoli sulubadela gau domaladi gelola baluluia digafula, oeabogi nogisebegi, ödäea naha maadei.
MAT 8:33 Amo bealahilä, sugua sigi aligilo nefolalo amoli fisäla baluluia afufulahilä, gaamugi besela galala hamoi amo sulubadela säla ïalahilä, dolö äudä dafidi mugabe fedai nelo amolege, säla ïaha maadei.
MAT 8:34 Säla ï amo nabala, udia dolö gaamugi ami nefolalo amoli sulubadela Yesu neebea afialahilä, ilia e beala, ema sähalea, Dida nilïle segeawi namolö mademelë. Bahïla mosöla säi.
MAT 9:1 Yesu e dudaia fila, oeabo amo dëgëla obëgë obëgëla maalahilä, gaamu hï aligisia ami besela galai.
MAT 9:2 Besela galasebegi, dolö odoaea dolö afädë fii si sulo amo dafudaia gaula misi. Maasebegi, ilile asigi afädë negei amo bealahilä, Yesuea dolö fii si amoma sähalea, Nïe malö, asigi gelomalo. Dia nafade hamoi amolida na hësa maadeimelëla säi.
MAT 9:3 Amala säsebegi, mala dawadigi dolö odoa nefolalo amolia asigiamu helësësalea, dolö goweada Gode gagadesa neala helësësa nefolalo.
MAT 9:4 Ilia amala helësësa nefolalebe amo bealahilä, Yesuea ilima sähalea, Dilile iso asigigi nafade helësësa dibegoda mi edoïe!
MAT 9:5 Aabei sämolöda abodo! Dia nafade hamoi amoli hësa maadeila sämolö amole, ma, nowela nawesa namiëla sämolö amole.
MAT 9:6 Amai gaso, Dolöïe Malö Namolö Misi amea nagadaiawi nea, udia dolöea nafade hamoi amo hëla digimolöïe geloi gaula neebe amo dilia helësëmäia olesagomelëla säi. Amala sälahilä, ea dolö fii si amoma sähalea, Nowela, dïe dafu neala gaula dihï mosöa mosöla säi.
MAT 9:7 Amala säsebegi, e hä hï mosöa asi.
MAT 9:8 Amala hamose amo beala, udia dolö yafie nefolalo amoli bedäi. Bedälahilä ilia sähalea, geloi hïdo elöi we gadoi dolöma ïlo gabula säla, Godeïe ëi gauia adogo.
MAT 9:9 Yesu e amila awähalea, dolö afädë, ëida Madiu, eda dagisi muni nelo mosöa ami sebe melï. Bealahilä, Yesuea ema sähalea, Ne bëgëla misiëla säi. Amala säsebegi, Madiu e nowela, Yesu bëgëla asi.
MAT 9:10 Yesu e awäla Madiuea mosöa molö naha sebegi, dagisi muni nelo amolige, dolö yafie mala nafade hamolo amolige maala, Yesula, ïe bëgëla aulo amolalibalä, molö naha sefolalo.
MAT 9:11 Amala naha sefolalebegi, Felesi dolö amolia bealahilä, ïe bëgëla aulo amolima nabahalea, Dilile säla olelelo goea, dagisi muni neloge, mala nafade hamologe, golibalä molö naha sebegoda edoïela nabi.
MAT 9:12 Amala säi amo nabala Yesuea sähalea, Udia dolö oloi made nefolalebe amolida alögoda neebea aulo made. Oloi sefolalebe amolimu alögoda neebea aulomelë.
MAT 9:13 Dili afialahilä, Dafidilo Geloiïe bebagi ado dëdëi dibe gowe helësëmalo. Amoda gomalä, Na nelebo elö elöla nufudala ïmolö amo hamela made, bobasëla ugila negemolö amo hamesala säla dëdëla negei dialea. Ne misiweda, udia dolö mala mogoi hamolo nefolalebe amoli wemolö misi made. Udia dolö mala nafade hamolo nefolalebe amoli wemolö misimelëla säla ï.
MAT 9:14 Segeyo amo gaalu, Yoneïe bëgëla aulo nefolalo amoli Yesu neebea maalahilä, ema nabahalea, Nilïage, Felesi dolö nefolalebe amoliage, molö made nalä aligilo amogi, dïe bëgëla aulo nefolalebe golia molö made naala, made aligilo goda mida edoïela nabi.
MAT 9:15 Amala nabasebegi, Yesuea ilima säla obëgësalea, Dilia dolö afädëa udia neahalea, dolö udia nelo amoïe damelë hï ebalä gedola nea, asigia yöi gadoi neada ifolole. Amalo made gaso, ili neebea amila odoaea e sigi moholö segeyo fu besela galaseda, segeyo amogi ili molö made naala namolömelë.
MAT 9:16 Afädëa fagulo goofo nuli amogi fagulo gähea baala asogelo made. Amala baala asogeseda, fagulo gähea goofogi baala asogei amo edela nulilo.
MAT 9:17 Amase, afädëa wani ödä gähe dibe amo, i sugua meme gafodoea hamoi goofogi söga salelo mademelë. Amala hamoseda, wani ödä gähe amea sugua meme gafodoea hamoi goofo amo dusulahilä, wani ödä amo awäha maadela, meme gafodoea hamoi i amoge nafademolöi nafademolömelë. Amala hamoloea, wani ödä gähe dibe amoda, meme gafodoea hamoi i gähe amohï gadoigi söga salaseda, helegela hedabi dië melëlola säi.
MAT 9:18 Yesuea aso, Yoneïe bëgëla aulo amolibalä adosa nebegi, beaha aligilo dolö afädë maalahilä, Yesuïe emo mia emo gumu sasagala fia idogolahilä sähalea, Nïe nidiwi hädamadefalï hame doala asi dialea. Di maala, dïe naaboea e diigiseda, e wahila galamolöla säi.
MAT 9:19 Amala säsebegi, Yesu e nowela e awäse amo gadola awäsebegi, ïe bëgëla aulo amolige e awäse amo gadola asi.
MAT 9:20 Awäha nebegi, udia afädë gäheo i giwilasi heale olo olosamu aligilo amea Yesuïe baagido awälahilä, ïe fagulo sedade gäi amoïe bidigifalï diigi.
MAT 9:21 Ea hïdo sähalea, Na ïe fagulogimu diigiseda, ne wahimolö gabula säi.
MAT 9:22 Amala hamosebegi, Yesuea besuia imogola, e bealahilä sähalea, Nïe nidiwi-e, asigi gelomalo. Dihï asigi afädë negei amea, di hä wahigomelëla säi. Amala säi amole, udia amo aabela wahi melï.
MAT 9:23 Amila awäla, Yesu e beaha aligilo dolö amea mosöa nogila digai. Nogila digalahilä beahaleamelebe, fëla gälo dolö odoage, udia dolö yafie gegedola didigaosalea goba fedaha dibe amoge beala,
MAT 9:24 ea sähalea, Dili afiaha maademo. Udia malö holöbö goda baagoi made. Süwia adi dialeamelëla säi. Amala säsebegi, ilia Yesubalä ösa dilo.
MAT 9:25 Amasebegi, udia dolö nefolalo amoli segea nesila digilahilä, Yesu e ïe dilo hogoligi ami nogila digalahilä, udia malö holöbö amoïe naabogi gaula nabeleia wesebegi, nowela galai.
MAT 9:26 Yesuea hamoi amo sege amomadi nefolalo amoli sulubadelaea nabala daidoi.
MAT 9:27 Yesu e amila awäha nebegi, dolö äudä si golai nelo amolea e baagiala bëgëla maaha nea, gelola uuala sähalea, Debidiïe malö-o, dia alï bobasëmola säi.
MAT 9:28 Yesu e awäla mosöa nogila digasebegi, dolö äudä amole e sebea ami maasebegi, Yesuea dolö äudä amolema nabahalea, Alile si na wahimäiala helësëla, ali asigi afädë negei nealela nabi. Amala nabasebegi, elea säla obëgësalea, Ä, Dafidilo-o. Alïa asigi afädë negeimelëla säi.
MAT 9:29 Amala säsebegi, Yesuea elele siigi diigisalea sähalea, Hali asigi afädë negei neebe gohï gadola hamomolöla säi.
MAT 9:30 Amala sälahilä, elele si amo hedabola fisigäsebegi, Yesuea elema gelolafalï sähalea, Go hamoi goda, dofä elöma säla ïmabiola säi.
MAT 9:31 Amala säla ï gaso, ele awähalea, Yesuea elema hamoi amo, sege amomadi nefolalo amolia nabaha maademäia säla ïïa awäha nelo.
MAT 9:32 Dolö äudä amole doadigila awäse amo gaalu, udia dolö odoaea dolö afädëma mugabe fedalahilä, ado adomolö ulï nelo amo, sigi misi.
MAT 9:33 Mugabe fedai amo nesila digisebegi, dolö adomolö ulï amea ado adoi. Amala hamosebegi, udia dolö yafie gegedoi nefolalo amolia fudugilahilä sähalea, Isilale segeawi dofä go gadola hamose afädë melëlo made nelo amo neawemelëla säi.
MAT 9:34 Amala säsebegi, Felesi dolö nefolalo amolia sähalea, Mugabe amoli sulubadelaïe dafidiloea geloi ïasebegi, ea mugabe nesila digisa neamelëla säi.
MAT 9:35 Yesu e gaamu sulubadelagige, sege sulubadelagige, nawesa neada. Ilile gedolo mosöa ami säla olelesalea, Beaha Maadela Sigi Neebe amoïe Ado Mala Hedabi amo säla olelela digi, olo elö elöla oloi difolalo amoli wahila digi, amase, domalo nalafadela nawei amoli sulubadela wahisa maadela aligi nawesa nelo.
MAT 9:36 Ea udia dolö yafie gegedoi nefolalebe amoli beala bobasëi. Mida, ili sugua sibi sigi aligilo maadeia, hilido aligilo amo gadola nea, asigia säosäola, nalahoi nefolalebe amo beala.
MAT 9:37 Amo bealahilä, ea ïe bëgëla aulo amolima sähalea, sagaia molö bëi yafie dialea gaso, molö bëi amoïe hamoi hamola gegedolasimolö dolöda ede made gabumelë.
MAT 9:38 Amai gabugi, sagai eedo hï ïe sagaia hamoi hamomolö fisiga gamäia, dilia ema adosa namialola säla ï.
MAT 10:1 Yesuea ïe bëgëla aulo giwilasi amoli wela misialolahilä, Mugabe fedai nefolalebe amoli nesila digimäiage, olo elö elöla oloi difolalebe amoli wahimäiage, domalo nalafadela nawei sefolalebe amolige, sulubadela wahisa maademäia, ea ilima geloi ï.
MAT 10:2 Abosolo giwilasi amolile ëida gowe ili. Dafidida Saimono, ïe ëi elö Fidala sälo amoge, ïe edoo Äduluge, Sebediïe malö Yamesege, ïe edoo Yonege.
MAT 10:3 Filibige, Badolomiuge, amase, Domasage, dagisi muni nelo Madiuge, Alibiasaïe malö Yamesege, Dadiusige.
MAT 10:4 Selodo sosogo Saimonoge, Yudasa Isagaliada, ea Yesu hololölo amoge, ea amoli memelei.
MAT 10:5 Yesuea dolö giwilasi amoli hä, afiamalolahilä, ea ilima gomalä säla ï. Dili awähalea, udia dolö fii odoa sebea aulo idigi mosabio. Samelia gaamu difolalebeamadi amogige digamabio.
MAT 10:6 Ami made awäla, dilida Isilale udia dolö ili sugua sibi dabadigi gadoi nefolalebea amimu mosalo.
MAT 10:7 Awälahilä, ado mala säla ïahalea, Hebeni Beaha Maadela Sigi Neebe amo ga made dialeamelëla säla ïmalo.
MAT 10:8 Amase, oloi difolalebe amoli wahila digi, hame doala asi difolalebe amoli wahila digi, gudubu hamola nawei sefolalebe amoli wahila digi, mugabe fedai sefolalebe amoli nesila digila digisa namialo. Walio dilia nelebo nii gaula neebe goda, bidia made, memalä nii amo gadola, memalä ïmalo.
MAT 10:9 Dilia afiahalea, muni gologe, silibage, benige afädë muni salelogi salala, made gaula mosalo.
MAT 10:10 Dili afiahalea aduge, fagulo elö baalage, emo usililoge, galiamoge, made gaula mosalo. Mida, hamoi hamolo neebe amogalida, molö ïmolö dialea.
MAT 10:11 Dili afiala gaamu afädëgige, sege afädëgige besela galasegi, afädëa dili nihïlïgïla diahala säsebelela bimolö mosalo. Besela galasegi, diahala säse dolö amobalämu diaha nelolahilä, moholö fu besela galasolo amo gala, giso sege amo dïgïla mosalo.
MAT 10:12 Dili mosö amogi nogila digahalea, udia dolö amolima, dalulo dilibalä diamiäiamelëla säla ïmalo.
MAT 10:13 Udia dolö mosö amogi sefolalo amolia obeägïla dili gauia idaseda, dalulola säla ï amo ilibalä diamialamalo. Ilia amala made hamoseda, dalulo säla ï amo dihilima obëgëmäia nea nimalo.
MAT 10:14 Mosö afädëgi sefolalebe amoliage, gaamu afädëgi nefolalebe amoliage, dili midilö mofiamola made säla, dilia ado säsebe amoge made nabaseda, dilile emogi dao baai amo fëfëla salalahilä, mosalo.
MAT 10:15 Na dilima dofä sähago. Memelela gudimolö segeyo besela galasolo amo gala, Sodomo ilibaläge, Gomola ilibaläge memelela gudimolö amo gadola made, dofä baagila awäla, gaamu amogi nefolalebe amolibalä, gelolafalï memelela gudimolömelëla säi.
MAT 10:16 Yesuea ado aso, sähamu nea sähalea, Nabuö! Na dili Sugua sibifalï gadoi, ilua ügülo nefolalebea ami mosalahagomelë. dilia hamosego hamosaleada, amo helësëla hedabola hamomalo. Dilia sigo sigosa neada, asigige gagadelai namialo.
MAT 10:17 Dolö odoa nefolalebe amoli helësëla, idihë namialo. Ilia dili, ilile galïsolö dolö amolile naabogi gausimolömelë. Amase, ilile gedolo mosöa amige, ilia dili fëgämolömelë.
MAT 10:18 Dilia ne bëgëla mofiasebe goïe, beaha aligilo gini nefolalebea amige, gamane beaha aligilo nefolalebea amige, sigi awäseda. Dilia melï amoge nabi amoge, ilimage, fii odoa nefolalebe amolimage säla ïmalo.
MAT 10:19 Ilia dilibalä gudimolöïe sigi awäseda, nilïa ado abodo sämolödu, nilïa ado abeahäla säla obëgëmolödula asigia säosäola helësëmabio. Segeyo sämolö fu amogida dilia sämäia Godea olese amo sämolömelë.
MAT 10:20 Mida, dihili ado sämolö mademelë. Dilile Diadoïe Gesamia dihilima aligila sälasimolömelë.
MAT 10:21 Dolöea ïe edoo nufudala baagomäia gaula ïmolömelë. Malö eedoeage hïle malö amo gadola wäla hamomolömelë. Amase, malöeage ïe eedo emelebalä habobala nufudala baagomäia gaula ïmolömelë.
MAT 10:22 Nïe ëi dilima dibego beala, sulubadelaea dilima bimolö habobamolömelë. Amai gaso, afädëa aso maadela, wagamäialahilä gelolamu aligiseda, e damula moholömelë.
MAT 10:23 Dili gaamu afädëgi neëgi neala sëlasiseda, fisäla gaamu elögi afiamalo. Na dilima dofä sähago. Dilia Isilaleïe gaamu dibe sulubadelagi, hamoi hamomolö difolalebe amo, dofä made hamosa maadeia, Dolöïe Malö amo moholömelë.
MAT 10:24 Bëgëla aulo neebe ameada, ïe olelelo neebe amo dabiala aulo made. Amase, galabaia hamoi gadoi hamolasilo neebe ameada, ïe dafidilo neebe amo dabiala aulo mademelë.
MAT 10:25 Amaimo, bëgëla aulo neebe ameada, ïe olelelo neebe amo gadoi namolöda dofea. Amase, galabaia hamoi gadoi hamolasilo neebe ameage, ïe dafidilo neebe amo gadoi namolöda dofeamelë. Ilia mosö eedo neebe amoma ëi Belesabulula sälo nea galëda, ïe malö nefolalebe amolimage, dilile ëi nafadefalï nafadela sämolö gabula säi.
MAT 10:26 Yesuea ado aso, sähamu nea sähalea, Dilia dolö amolibalä bedämabio. Nelebo sulubadela walio dabela negei difolalebe amolida, hobeala ulufadigisa maademolömelë. Amase, nelebo sulubadela walio musügä negei difolalebe amolige, hobeala dawadigisa maademolömelë.
MAT 10:27 Na walio gasimi sagaia nea ado säla ïase weda, dilia eso neë dibea ami nea, säsewe gadola bu eegela säha namialo. Geleä sëdäwala säse nabasegoda, dilia mosö daiowa nea, udia dolöma uuala säla ïaha namialo.
MAT 10:28 Gesamila made, domalomu baagomäia nufidelo nefolalebe amolibalä bedämabio. Gasoda, domalo gesamile helegela heli segea nafademolö neebe Gode amobalämu bedämalo.
MAT 10:29 Haea nelësa gigiso gadoi äudäda, bidi holöfalï muni giwi afädë gadoia nelo. Amai gaso, dilile Diadoea haea holöfalï amoda hedabola sigi aligilo nea. Haea amoligi afädë nagadaia baagoseda Godea asigisa nea.
MAT 10:30 Amase, dilile busagia busa hilï nebegoge, sulubadela nidesa maadei neamelë.
MAT 10:31 Amaimo, dilia bedämabio. Haea gigiso gadoi sefolalebe amolida holöbö gidogolahilä, dilida abulümi hamoi nebego madele.
MAT 10:32 Yesuea ado aso, sähamu nea sähalea, Afädëa udia dolö sefolalebe amolile siigi nea, neda Gelesoïe neawela säla ulufaseda, amase, nage nïe Naado selesaia mosöa neebe amoïe siigi, amo gadola wäla sämolömelë.
MAT 10:33 Amaimo, afädëa udia dolö sefolalebe amolile sidaia, neda e sosogo mademelëla säseda, nage nïe Naado selesaia mosöa neebe amoïe sidaia, dolö amoge ne sosogo mademelëla sämolömelëla säi.
MAT 10:34 Yesuea ado aso, sähamu nea sähalea, Diliada na sege sulubadelagi dalulo ïmolöïe gaula misi gabula helësëmabio. Dalulo ïmolöïe gaula misi made, nada nudulo helebe gaula misimelë.
MAT 10:35 Na mogemolö misi amoda gomalä, malöea ïe eedobaläge, idiwia ïe emebaläge, amase, malö udiaea egoamebaläge.
MAT 10:36 Dolöïe ado niida, hïle mosöa aligilo amoli namolömelë.
MAT 10:37 Afädëa ne boba hamoi amo holöbö gidogolahilä, ïe eedole emele boba edefade hamoseda, eda ne sosogo namolö dofea mademelë. Amase, afädëa ne boba hamoi amo holöbö gidogolahilä, ïe malö boba edefade hamoseda, eege ne sosogo namolö dofea mademelë.
MAT 10:38 Amase, afädëa hïle i fügäi neala gaula, ne bëgëla made maaseda, amoge ne sosogo namolöda dofea mademelë.
MAT 10:39 Afädëa hïle namolö amo gaula fëdöla aligimolö amomu helësëseda, ïe namolö amo hogosa helemolömelë. Gaso, afädëa hïle namolö amo ne helësëla fisiseda, ea ïe namolö amo gaula namolömelëla säi.
MAT 10:40 Yesuea ado aso, sähamu nea sähalea, Afädëa dilima, nihïlïgïla namolö mofiamola säseda, nege ebalä namolö misiëla sähagomelë. Amase, afädëa nema, halïgïla namolö misiëla säseda, ne fisiga welo amoge ebalä namolö misiëla sähagomelë.
MAT 10:41 Amaimo, afädëa goweda bea sälo gabula helësëlahilä, ea mosöa sigi aligiseda, eege, bea säloea bidi nease amo gadoimu nimolömelë. Amase, afädëa dolö goweda mala mogoi hamolo neebela bealahilä, ea mosöa sigi aligiseda, eege, dolö mala mogoi hamolo amea, bidi nease amo gadoimu nimolömelë.
MAT 10:42 Dolö afädëa nïe bëgëla aulo holöbö gidogo neebe amo, nïe bëgëla aulo gabula helësëla, amogali gögï ödä osala ïaseda, na dilima dofä sähago, dolö amoda dofä bidi nimolömelëla sähagola säi.
MAT 11:1 Yesuea ïe bëgëla aulo giwilasi amolima amala hamomolömelëla säla ïalahilä, e amila awäla, ilile gaamu difolalebe amoligi nawesa nea, udia dolö ilima ado mala säla ïadigi, säla olelela digisa namolö asi.
MAT 11:2 Ödägi gelo Yone e galabaia mosöa nea, Gelesoea hamoi hamosa neamelëla säi amo nabalahilä, Yonea ïe bëgëla aulo amolima sähalea, Yesuma ado gomalä nabulö mosalola säi. Amala säsebegi, ili Yesu neebea awälahilä,
MAT 11:3 ema nabahalea, Afädë moholömelëla säi amoda dile, ma, nilïa elö beaha namolöledula nabi.
MAT 11:4 Amala nabasebegi, Yesuea säla obëgësalea, Dili obëgëlahilä, ado nabi amoge, siia melï amoge, Yonema säla ïmalo. Säla ïahaleada,
MAT 11:5 Si golai nefolalo amolige, siia beaha maadela, emo nafadei sefolalo amolige, emesala nawela, amase, gudubu hamoi sefolalo amolige, wahisa maadela, gëhe gai sefolalo amolige, hä, nabaha maadela, baagoi difolalo amolige, nowelasisa maadela, amalahilä, udia dolö busadäoi nefolalebe amolima Ado Mala Hedabi säla ïaha neebeola sämalo.
MAT 11:6 Udia dolöea ne beala, ilile asigi afädë negei amo made digase amoliada, obeägïsa neamelë säi.
MAT 11:7 Amala säsebegi, dolö misi amoli awäse amo gaalu, Yesuea udia dolö gegedola nefolalo amolima Yoneïe helësëla sähalea, Sege nafadeia udia dolö aligilo made dibea ami afiai amoda, dilia edo bimolö afiai. Dili afiai amoda, foea giisi sedade fologosebe amo bimolö afiaile.
MAT 11:8 Amai made galëda, dilia edo bimolö afiai. Dolöea fagulo hedabifalïmu salugai neebe amo bimolö afiaile. Nabuö. Fagulo hedabifalï amo gadoi salugalo neebe amolida beaha aligilo ginia mosöa dilo neamelë.
MAT 11:9 Dili afiai amoda edo bimolö afiai. Bea sälo afädë neebe amo bimolö afiaile. Ä, amomelë. Amai galëda, na hä dilima sähago. Bea sälo weada, bea sälo odoa baagila asi neamelë.
MAT 11:10 Ïe helësëla, gomalä dëdëla negei dialea. Nabuö. Nïe ado säla ïlo eda, dïe dafidila mosalamolömelë. Dida e baagia emesala nawesa namolöïe, ea dïe idi fodolasimolömelëla säi dialea.
MAT 11:11 Na dilima dofä sähago. Udiaea neegela ägüi amoli sulubadelada, ödägi gelo Yone neebe amo gadoi maade, ilida holöbö gidogofalï. Amai gaso, dolö afädë Hebeni Beaha Maadela Sigi Neebea ami holöbö gidogofalï neebe ameada, Yone baagila asi neamelë.
MAT 11:12 Ödägi gelo Yonea, ado mala mi gäwila säla ïaha neloa amila maala, hä, walio wegida, Hebeni Beaha Maadela Sigi Neebea ami neala sëlasila, dolö nafade nefolalebe amolile geloia neala gaumolöïe nudusa nea.
MAT 11:13 Amaimo, bea sälo sulubadela nefolalo amoliage, amase, Mosesea Ado säla negei ameage, bea säsäla maaha nelolahilä, giso Yone neebea ami besela galai.
MAT 11:14 Amaimo, dilia ilile ado nabala asigi afädë negemolö galëda, Elaia moholömelëla säla dëdëla negei amoda, Yone emelë.
MAT 11:15 Afädë gëhe galea galëda, nabualo.
MAT 11:16 Udia dolö walio neebe weli ado abodo gadoima oodo beala sämolödu. Ilida malësäea magaia gaamugi salea, malësä odoama uuala säia gala sähalea,
MAT 11:17 Nilïa dilile bäidama dülasilebeda, dilia amogi made gosasio. Nilïa oböla dilile bobasëi gë udälasilebege, dilia amogi bobasëla dïila made nelomelëla sälo amo gadoida ili nea.
MAT 11:18 Amaimo, Yone e maala neada, molö made naala, wani ödäge made naala nebegi, ilia eda mugabe fedai neala sälomelë.
MAT 11:19 Amalahilä, Dolöïe Malö amo maala neada, ea molöge wani ödäge naha nebegi, ilia sähalea, Dolö neebe goweada molö badoia nalä, wani ödäge edefade nülo nea. Amase, ea dagisi muni nelobaläge, mala nafade hamolo amolibaläge damelë hamola aligilo neebe gowe bimola sälomelë. Amalo gaso, Godeïe asigi falagasei ulufadigisebe ameada, dofä dibe amo ulufadigimolömelëla säla ï.
MAT 11:20 Gaamu odoagi, Yesuea melëlo made gadoi yafie hamoi gaso, udia dolö ami nefolalo amolia asigi besula made nefolalo. Amala hamosebegi, Yesuea ilima nemola sähalea,
MAT 11:21 Golasini Gaamugi neebe udia dolö dili asigii gabu. Amase, Bedesaida udia dolö neebe dilige, asigii gabu. Mida, dili neebea ami geloi melëlo made gadoi hamoi amo gadola, gaamu Daia Saidonolemadi dafidi hamoi galebeda, ilia asigi besula, nafade edefade hamoi amoïe ulufala, hewai fagulo salugalahilä, nisibu uula filabio.
MAT 11:22 Amaimo, na dilima säla ïahago. Memelela gudimolö segeyo besela galasolo amo gala, Daia ilibaläge Saidono ilibaläge memelela gudimolö amo gadola made, dilibalä dofä baagila awäla, gelola gudimolömelë.
MAT 11:23 Amase, Gabaniama dilige, Godea dili gauia adogosegi selesaia mosöa fedamolö gabula helësësale. Ai, dilida heli segea gidogofalï digamolömelë. Geloi melëlo made gadoi dili neebea hamoi amo gadola, Sodomo ami dafidi hamoi galebeda, Sodomo gaamu amoda aso, walio diëgi amalabio.
MAT 11:24 Gaso, na dilima säla ïahago. Gudimolö segeyo besela galasolo amo gala, Sodomo ilibalä gudimolö amo gadola made, dofä baagila awäla, dilibalä gelola gudimolömelëla säla ï.
MAT 11:25 Segeyo amo gala, Yesuea sähalea, Mudaiaïege, nagadaiaïege Dafidilo Geloi di nebego. Naado-o, na dïe ëi gauia adaha. Mida, asigi falagasei nefolalebe amolimage, nagadaia mala dawadigi nefolalebe amolimage, dia amolima musügä negelahilä, oböla, malësä gadoi nefolalebe amolima nelebo amoli ulufala olei amogi.
MAT 11:26 Ae, Naado. Dihï amala hamomolö helësëi amo gadola, hamoi gabumelë.
MAT 11:27 Yesuea aso sähamu nea sähalea, Nïe Naadoea nelebo sulubadela nema gausisa maadeimelë. Afädëa Malö eda gowe neala dawadigi mademelë. Naadoea hïdomu dawadigi nea. Afädëa Naado eda gowe neala dawadigi made neamelë. Malö eamu hïdo dawadigi nea. Amase, Malöea ïe Eedo olemolö helësësebe amolima olesegi, iliage e gowe gabula dawadigisa neamelë.
MAT 11:28 Dili sulubadelaea nelebo yöi dibe amoli, baagi sëla gaula nefolalebela dili, ne neebea mofiamo. Mofiaseda, na diligali hele fimolö amo ïmolömelë.
MAT 11:29 Nelebo gaula dusugamolöïe sugua gao daia i damui muugia begelo amo gadola, dilia nïe ado hawala nea, nema dawa nimalo. Mida, na dolö odoama hame negela aligiloge, nihï nagadaiala nea mala hamologe neawe. Ameada, dili hele fimolö beagolemolömelë.
MAT 11:30 Amala hamomolö amoïe mida, nïe i damui dilile mugia negemolö amoda häuai made, aabei gaumolömelë. Nelebo dihili gaumäia na ïmolö amoda yöi made, hageai dialeala säla ï.
MAT 12:1 Holöbö ede made nelolahilä, segeyo Sabada gafegi, Yesu e eladi gadoi ëi widi sagai mogogi awäha nelo. Awäha nea, ïe bëgëla aulo amoli sïdëa baagosebegi, widi amoïe gägä amo faila nana awäha nelo.
MAT 12:2 Amala nasebe amo, Felesi dolö nefolalo amolia bealahilä ema sähalea, Segeyo Sabada gafegi made hamomalai amoda, dïe bëgëla aulo golia hamosa neebe gowe bimola säi.
MAT 12:3 Amala säsebegi, ea ilima säla obëgësalea, Debidige, ïe dolö odoa amolige, sïdëa baagosalea, Debidia hamoi dëdëla negei dibe amo dilia made melï neale.
MAT 12:4 Debidi e Godeïe balai mosöa nogila digalahilä, beledi Godegali odala ï dibe amo nealahilä, hïge, ïe dolö odoa amoliage mai. Ado säla negei ameada, Beledi amoda odoaea nülo made, gobela ïlo nefolalebe amoliamu nülo negei.
MAT 12:5 Ado säla negei dibe amogi dëdëla negei dibe amo dilia made melïle. Gobela ïlo nefolalo amolia Segeyo Sabadagi Godeïe mosöa ami nea, Sabada segeyo damusa aligilo. Gaso, iliada asiala made hamoi.
MAT 12:6 Na dilima säla ïahago. Neebe egoweada, Godeïe mosö baagi neamelë.
MAT 12:7 Bebagi dëdëla negei dibe amogi afädëda gowe. Na nelebo nufudala ïmolö hamela made, bobasëla ugila negemolö amo hamesala säla dëdëla negei dialea. Amaimo, ado amoïe mi gowe gadoila helësëi galebeda, dilia udia dolöea asiala made hamoi nefolalebe amolima, dilia asiala hamoi gabumelëla sälo made aligilabiomelë.
MAT 12:8 Amoïeda Dolöïe Malö amo hï eda segeyo Sabada gafeïe Dafidilo neala säla ï.
MAT 12:9 Yesu e amila awäla, ilile gedolo mosö afädë neebea ami nogila digai.
MAT 12:10 Mosö isogi ami dolö naabo nafadei afädë maala sulo. Dolö odoa nefolalo amolia Yesuma dia nafade hamoila sädelälahilä, ilia ema nabahalea, Segeyo Sabada gafegi wahilasimolöda dofeale, ma, dofea madelela nabi.
MAT 12:11 Amala nabasebegi, Yesuea säla obëgësalea, Dili neebe gogi afädëïe sugua sibi afädë Sabada segeyo gafegi dögöigi digai diëda, sugua sibi eedoea sogobala made fisiga adamolöle.
MAT 12:12 Sugua sibida holöbö gidogolahilä, dolöda dafidilo edefade neebe amo beahale. Amai ameada, segeyo Sabadagi hedabi hamomolö amo dofeala säi.
MAT 12:13 Amala sälahilä, ea dolö amoma sähalea, Dïe naabo mogodigimola säi. Dolö amea ïe naabo mogodigia gasebegi, bu hedabola obëgëlahilä, naabo näiado hedabi amo hï gadoi wäla hedaboi melï.
MAT 12:14 Amala hamosebegi, Felesi dolö amoli segea doadigila awälahilä, Yesu nufulö abilia hamomolödula säla didiäha dilo.
MAT 12:15 Yesuea ilia e nufulö didiäha dibe amo helësëlahilä, sege amo dïgïla asi. Dïgïla awäsebegi, udia dolö yafie nefolalo amolige e awäse amo gadola mofiasebegi, ea udia dolö oloi amoli sulubadela wahisa maadela aligi awäha nea,
MAT 12:16 ea ilima sähalea, Eda gowe gabiola odoama säla ïmabiola säla ï.
MAT 12:17 Ea amala hamoi amoda, bea sälo Aisaeaea bea säla negei amo gausiala digai. Ea bea säla negei amoda gowe.
MAT 12:18 Nïe hamoi hamolasilo na memelei amoda neebe gowemelë. Na ema boba hamolahilä, obeägïsa neawe. Na nïe Gesami ema namolö mosöla sämolömelë. Ea, na memelemolö amo gowe gadoi galeamelëla säla, udia dolö sege elö elölagi sefolalebe amoli sulubadelama säla ïaha namolömelë.
MAT 12:19 Eada gëgësadialage, uualage made sämolö. Amase, idiafage ea ado säse made nabulömelë.
MAT 12:20 Eada fise dagabomolöïe wäbëala digase amoge, ea made dagabomolömelë. Eada gele wai uliligi neebe amoda made usila digimolömelë. Hamoi mogola hamomolö amo baagila mosäia, eada mogola hahamogisamu namolömelë.
MAT 12:21 Udia dolö fii elö elöla nefolalebe amolia ïe ëi helësëla, sisiläfüla beaha nefolamolömelëla säla dëdëla negei dialea.
MAT 12:22 Segeyo amo gala odoaea dolö afädëma mugabe fedalahilä, si nafadela ado adomolö ulï nelo amo, Yesu neebea ami sigi misi. Sigi maasebegi, Yesuea dolö amo wahilasilahilä, ado maade amea ado adola, siia fädäla melï.
MAT 12:23 Amasebegi, udia dolö yafie gegedoi nefolalo amoli fudugilahilä sähalea, Wae! Egoweda Debidiïe malöledula säi.
MAT 12:24 Amala säi amo nabalahilä, Felesi dolö nefolalo amolia sähalea, Dolö goea mugabe fedai nesila digisebegoda, mugabeïe dafidilo neada, Belesabuluea geloi ï amo gaula nea, nesisa nemelëla säi.
MAT 12:25 Amala helësëla säha dibe amo Yesuea helësëlahilä ilima sähalea, Gädili afädëa hilimu moge mogela nuduseda, amo nafademolömelë. Amo gadolamu, gaamu afädëge mosö afädëge hilimu moge mogela nuduseda, amolege geloi made namolömelë.
MAT 12:26 Amaimo, Saidania Saidani nesila digilo galebeda, hï ebalä moge mogela aligilabio. Amala aligiseda, ea beaha maadela sigi neebe amo abeahäla namolödu.
MAT 12:27 Na Belesabuluïe geloigi nea mugabe fedai nesila digilo amo dofä galëda, dilibalä aligilo amolia, mugabe fedai nesila digisa nelo amoda nowëa ugila negesa nelo. Dilibalä aligilo amolia, dilia asiala helësëi amo ulufala olelo nea.
MAT 12:28 Amaimo, na Godeïe Gesamia geloi ïase amea mugabe fedai nesila digisa nea galëda, Godea Beaha Maadela Sigi Neebe amo dili neebea hä besela galai dialea gabula helësëmalo.
MAT 12:29 Amase elöda, afädëa dolö geloi neebe amoïe nelegei fa nimolö helësëseda, dolö geloi neebe amodale dafidi made nafodola negesiseda, dolö amoïe mosöa digala, ïe nelegei dibe amoligi abeahäla fa nimolödu. Dafidi e nafodola negesilahilä, hobeala ïe mosöa nelegei difolalebe amo fa neaha maademolöi bimolömelë.
MAT 12:30 Afädë e nebalä made nea galëda, hï nebalä ado nii nea. Amase, afädëa nebalä made gedolasiseda, ea dusula afiaha maademäia nesila digisamelë.
MAT 12:31 Amaimo, na dilima säla ïahago. Udia dolöea nafade hamoi amoge, gagadei amoge, sulubadela hëla fisimolömelë. Amai gasoda, afädëa Gesami gagadeseda, amoda made hëla fisimolömelë.
MAT 12:32 Afädëa Dolöïe Malö e gagadela ado nafadela säseda, amo hëla fisimolömelë. Gasoda, afädëa Eleloi Gesami e gagadela säseda, amo walioge, hobealage made hëla fisimolömelëla säi.
MAT 12:33 Aso, Yesuea säi amo, uda negela made, sähamu nea sähalea, Dilia i afädë hedabi neebela helësëseda, ïe gägäge hedabila helësëmalo. Be, dilia i afädë nafade neebela helësëseda, ïe gägäge nafadela helësëmalo. I afädëa gägä negesebe amo bealahilä, i gowe gadoi neebela helësëlomelë.
MAT 12:34 Dilida baagolo nubaïe malö nebego. Dihili dili nafade nea, ado hedabida abilia sämolö gabu. Iso asigigi nobala adugasebe amo gadoi nafi idigila säla ulufadigilo.
MAT 12:35 Afädë hedabi neebe ameada hïle iso asigigila hedabi dibe amo gadoi ulufadigilo nea. Amase, afädë nafade neebe ameage hïle iso asigigila nafade dibe amo gadoi ulufadigilo nea.
MAT 12:36 Na dilima sähago. Memelela gudimolö segeyo besela galasolo amo gala, udia dolöea ado galone made memalä säi amoda, mi edoïe säila säla obëgëmolömelë.
MAT 12:37 Mida, dihï ado säi ameamu, dihïdi mogoi neala sämolömelë. Amase, dihï ado säi ameamu, dihï asiala hamoila sämolömelëla Yesuea säi.
MAT 12:38 Amala säsebegi, mala dawadigi odoa nefolalo amoliage, Felesi dolö odoa nefolalo amoliage Yesuma sähalea, Säla Olelelo-o, dia dolöea hamomolöi made gadoi afädë nilïa melëdelä hamomola säi.
MAT 12:39 Amala säsebegi, Yesuea säla obëgësalea, Udia dolö walio nefolalebe welia nafademu hamosa nea, udiaea dolö fisilo amo gadola Godeïe mala fisilo amolia, dolöea hamomolöi made gadoi afädë hamomola sälo. Amalo gaso, dolöea hamomolöi made gadoi afädë bea sälo Yonama hamoi amomu ilima olemolömelë.
MAT 12:40 Yona e seme edefade afädëïe isogi segeyo ohodoa gasi ohodoala dilo amo gadola, amase, Dolöïe Malö amoge segeyo ohodoa gasi ohodoala naga hawa diamolömelë.
MAT 12:41 Gudimolö segeyo besela galasolo amo gala, Niniba udia dolöea walio udia dolö nefolalebe welibalä nowela aligilahilä, ilima dofea made hamoimelëla sämolömelë. Mida, ilia Yonaea Godeïe ado mala säla ï amo nabalahilä, asigi besusa maadei amea. Amaimo, walio gui nebego eda Yona nelo amo gadoi made, baagila asi neamelë.
MAT 12:42 Gudisolo amo gala, gädili Siba udia dolö beaha aligilo gini udia amea nowela aligilahilä, walio nefolalebe welibalä, dofea made hamoimelëla sämolömelë. Mida, udia amea Solomono asigi falagasei neebe amoïe ado nabulöïe, wagadi made hïle segeala naba misimelë. Nabuö. Afädë walio gui nebego eda, Solomono nelo amo gadoi made, baagila asi neamelëla säi.
MAT 12:43 Yesuea aso, sähamu nea sähalea, Dolö afädëma mugabe fedai amo doadigila awäseda, mugabe amo sege falaia awälahilä, e hele fimolöïe sege hogosa nea, afädë made beagolelomelë.
MAT 12:44 Made beagolesegi, hïdomu sähalea, Mosö dïgïla misia ami obëgëmolöla sälomelë. Awäla mosöa besela galala beahamelële, mosö badumu, gëgelë doala, nelebo sulubadela hedabola negesi diëgi beagolelomelë.
MAT 12:45 Bea negesiä, bu doadigila awälahilä, hï eda holöbö hedabilahilä, mugabe gifalädalïa nafadefalï nafade nefolalo amoli ea sigi obëgëla ebalä awäla nogila digalahilä, mosö amogi aligilo. Amaimo, dolö amo dafidi nafade nelo amo baagila, hobeala nafadeifalï nafade aligilomelë. Walio udia dolö nafademu hamosa nefolalebe gowe ilimage amo gadoi wäla hamomolömelëla säi.
MAT 12:46 Yesuea udia dolö gegedoi nefolalo amolima adosa nebegimu, ïe eme edoolali ebalä ado adomolöïe segea maala nefolalo.
MAT 12:47 Amala nefolalebegi, afädëa ema sähalea, Dïe dieme didoola ilia dibalä ado adomolöïe segea godogoi misi nefolalebela säi.
MAT 12:48 Amala säsebegi, Yesuea dolö amoma säla obëgësalea, Nïe nemeda abodo, nïe nedoolalida nowë gabula säi.
MAT 12:49 Amala sälahilä, ea ïe bëgëla aulo amolima naabo sögödigila sähalea, Nïe neme nedoolalida nefolalebe gowe ilimelë.
MAT 12:50 Mida, udia dolöea nïe Naado selesaia mosöa neebe amea hamese amo gadola hamosa nefolalebe amolida nïe nedooge, nïe nalifige, nïe nemege, amoli nefolaleamelëla säi.
MAT 13:1 Segeyo amo galamu, Yesu e mumusogila segea doadigila fedalahilä, oeabo edefade dibe amoïe agesua ami sulo.
MAT 13:2 Sebegi, udia dolö yafie mafula gegedolahilä, e sebe amo nogöla amalei. Nogöla amalesebegi eda ödä dudaia fila fedala sulo. Sebegi, udia dolö gegedoi amolida oeabo agesua ami nefolalo.
MAT 13:3 Yesu e amala salea, ea ado besula mala yafie säla ïahalea, Dolö afädëa sagaido gägä fëfëla aliligi asimelë.
MAT 13:4 Fëfëla aliligi awäha nebegi, gägä odoa idiafa daala negei dibegi, haea maalahilä neala naha maadei.
MAT 13:5 Gägä odoa igi naga abelëidaia daala negelahilä, fodolofalï duulu fedala bäui
MAT 13:6 gaso, eso neëla galasebegi, difi moholö ulïsalea, bausosa maadei.
MAT 13:7 Amase, gägä odoa ëfë äyo gägäi neebea ami daala negesebegi, ëfë äyo gägäi amo bäulahilä, widi duulu fedasebe amo dabiala yau hai nelo.
MAT 13:8 Gägä odoa naga hedabi dibea ami daala negei amo bäulahilä gägä negeimelë. Odoaea hädali afädë negei. Odoaea nabülasi gafeia negei. Amase, odoaea nabülasi ohodoa negeimelë.
MAT 13:9 Afädë gëhe galea galëda, hä nabualola säi.
MAT 13:10 Amala säsebegi, Yesuïe bëgëla aulo amolia e sebea ami maalahilä nabahalea, Dia udia dolöma ado besulamu säla ïaha nebegoda, edoïe amahala nabi.
MAT 13:11 Amala nabasebegi, Yesuea säla obëgësalea, Mida, Hebeni Beaha Maadela Sigi Neebe amoïe helësëmolöda, dafidi odoa ulufadigi made, musügä negei dilo amo, odoa ilima made ï. Dilima ïmelë.
MAT 13:12 Amoïeda, afädëa nelebo afädë gaula neebe amomada, odoa baala ïasegi, yafie gaula namolömelë. Amase, afädëa nelebo afädë made gaula holöfalïmelë gaula neebe amoda haila nimolömelë.
MAT 13:13 Na odoa ilima ado besula säla ïlo amoïe mida, ilia beaha gaso, made bease amoïege, nabaha gaso, made nabala helësëse amoïege amala sälomelë.
MAT 13:14 Amaimo, Aisaeaea bea säla negei ilima gausiala digasebe amoda gowe. Dilia nabahamu nea gasoda, fädäla made helësëmolömelë. Dilia beahamu nea gasoda, galone gowe gabula made beagolemolömelë.
MAT 13:15 Amoïe mida, udia dolö amolile asigi dofogai nea. Ili gëhe gai gadoia hedabola made nabelo nea. Ilile siige dofogai nea. Ilia siia beala, gëhea nabala, asigia helësëla besusa galebeda, amoda na ili wahilasilabiola säla dëdëla negei dialea.
MAT 13:16 Amai gaso, dilia obeägïsa nea. Mida, dilile siia beala, amase, gëheage hä nabahagomelë.
MAT 13:17 Amai na dilima dofä sähago. Siiba bea sälo yafieage, amase, asigi mogoi nefolalo yafieage, dilia beasego gadola wäla edefademalä bimolö helësëlahilä gaso, made melï nefolalo. Dilia nabasego gadola wäla edefademalä nabulö helësëlahilä gaso, made nabi nefolalola säi.
MAT 13:18 Yesuea amo sälahilä sähalea, Amai galëda, gägä fëfëlo amoïe ado besula säi amo nabuö.
MAT 13:19 Beaha Maadela Sigi Neebe amoïe ado mala afädëa nabala fädäla made helësëseda, mugabe busa nafadefalï maalahilä, ado mala ïe asigigi fëfëi amo fedela neala gaula aulomelë. Eda molö gägä idiafa daala negei amo gadoi nea.
MAT 13:20 Molö gägä igi naga abelëi dibea daala negei amo gadoida, afädëa ado mala nabala obeägïla aabela neala gaulomelë.
MAT 13:21 Amalahilä gaso, e difi moholö ulïla sedade made aligilomelë. Ea ado mala neala gaui amoïe yöi beasege, amase, odoaea e neala sëlasisege, ea fodolofalï dïgïla aulo nea.
MAT 13:22 Molö gägä äyo gägäi ëfë neebea daala negei amo gadoida, afädëa ado nabaha nea gaso, nagadaia namolö amo säosäola helësëmolöge, nelegei yafie dibe amo asigia negesa maademolöge, amea ea ado mala nabi amo dabiala yau hahalea, gägä made negelo nea.
MAT 13:23 Molö gägä naga hedabi dibea daala negei amo gadoida, afädëa ado mala nabala helësëlo amole. Ea gägä hedabola negelo amoleda, hädali afädëge, nabülasi gafeiage, nabülasi ohodoage negela digisa aligilo neala säi.
MAT 13:24 Yesuea ado besula udia dolöma aso, elö sähalea, Hebeni Beaha Maadela Sigi Neebea amida gowe gadoi dialea. Dolö afädëa hïle sagaia eladi gadoi ëi widiïe gägä hedabi amo fëfëla sadia gogoi.
MAT 13:25 Amala hamoi gaso, ili sulubadela adi elaboi difolalebegi, ïe ado nii dolö maalahilä, widi gägä sadia gogoi dibea ami gägä nafade widi gadoi sadia gogola negesia moholöi asi.
MAT 13:26 Widi bäula, gägä negese amo gaalu, giisi nafade widi gadoi amoge gedola bäui neebe melï.
MAT 13:27 Sagai eedoïe hamoi hamolasilo amolia e neebea awälahilä, ema säla ïahalea, Dafidilo, dia sagaia widi gägä hedabimu hadia gogoi walebelei gaso, giisi nafade bäui neebe amoda abododila maala bäui neadula säi.
MAT 13:28 Amala säsebegi, ea säla obëgësalea, Goda ado nii afädëa sagai gabugola säi. Amala säsebegi, hamoi hamolasilo amolia ema nabahalea, Nilïa awälahilä giisi nafade amoli besela digidulela nabi.
MAT 13:29 Amala nabasebegi, ea säla obëgësalea, Ai. Giisi nafade amo walio besela digisegi, widi hï ela beselaloea.
MAT 13:30 Faimolö fu besela galamäia, helegela amala gegedola fedamäia amilasimalo. Amala fisigisilahilä, hobeala faimolö dolö amolima sähalea, Giisi nafade amoli dafidi beselala, gobemolöïe dobosa maadelahilä, hobeala widi hï e damula gegedola negelahilä, nïe molö negelo mosöa ami negemalola sämolömelëla säila säi.
MAT 13:31 Yesuea udia dolöma ado besula elö sähalea, Hebeni Beaha Maadela Sigi Neebea amida gowe gadoi dialea. Dolö afädëa masada gägä gaula awälahilä, hï sagaia sagai.
MAT 13:32 Gägä amoda holöfalïfalïmelë. Bäuseda, hawa hëhela odoa dägöala sagai dibe amo gadoi made, amoda i gadoi bäulomelë. Bäula fedaha nelolahilä, edefade neëda, haea sefolalebe amoli mafula adomo amogi gilifa hamola dilomelëla säi.
MAT 13:33 Yesuea ilima aso, ado besula elö sähalea, Hebeni Beaha Maadela Sigi Neebea amida gowe gadoi dialea. Udiaea balawa edefade falodaia besigala salala, amo edelasilo ëi yidi amo gegoala naaboseda, balawa sulubadela edela bolela fedalola säi.
MAT 13:34 Yesuea udia dolö gegedoi nefolalo amolima ado säi amo sulubadela, memalä made säla, ado besulamu säla ï.
MAT 13:35 Ea amala hamoi amoda, dafidi bea sälo afädëa bea säla negei amo gausiala digai. Na nafi dagala ado besula säla ïmolömelë. Sege föi dibe sulubadela mi gäwila hamoia amila musügä negei difolalo amoligi säla ïmolömelëla säla dëdëla negei dialea.
MAT 13:36 Yesuea ado mala säla ïala, udia dolö gegedoi amoli amilahilä, e mosöa awäla sebegi, ïe bëgëla aulo amoli maalahilä ema sähalea, ado besula sagaia giisi nafade bäui säi amoïe mi fädäla säla ïmola säi.
MAT 13:37 Amala säsebegi, Yesuea säla obëgësalea, Dolöea gägä hedabi fëfëla sadia gogola aliligi asi amoda, Dolöïe Malö amo neamelë.
MAT 13:38 Sagai amoda, naga föi dibe wemelë. Gägä hedabi amoda, Hebeni Beaha Maadela Sigi Neebe amoïe malö nefolalebe amomelë. Amase, gägä nafade amoda, mugabe busa nafadefalïïe udia dolö nefolalebe amomelë.
MAT 13:39 Ado niia gägä nafade fëfëla sadia gogoi amoda, mugabe busa neamelë. Molö amo faimolö fuda, segeyo aligila wagamolö amomelë. Molö amo faila negemolöïe hamoi hamolo amolida, selesaia fiimelë.
MAT 13:40 Giisi nafade amo beselala dobola nulogi gobelo amo gadola, segeyo aligila wagasolo amo galada, amo gadola wäla hamomolömelë.
MAT 13:41 Amala hamomolö amoda, Dolöïe Malö amea, Beaha Maadela Sigi neebea ami nelebo digalasilo sulubadelaea, udia dolö asigi afädë negei amolia nafade hamomäia digalasilo amolige, nafade hamolo nefolalebe amoli sulubadelage, haila fisimäia, ïe selesaia fii amoli fisiga gamolömelë.
MAT 13:42 Amala hamolahilä, ilia udia dolö amoli nulo edefade wisebea ami sogobala sadia idogoseda, Ami ili dïisalea bese ali nalëgësa namolömelë.
MAT 13:43 Amala hamosegi, Udia dolö asigi mogoi amolida, Eedoea Beaha Maadela Sigi Neebea ami nea, ilida eso neë yo gadoi nefolamolömelë. Afädë gëhe galea galëda, hä nabulö galeala säi.
MAT 13:44 Yesuea aso sähamu nea sähalea, Hebeni Beaha Maadela Sigi Neebea amida gowe gadoi dialea. Muni musügä negelo amo gadola sagai afädëgi musügä negei dilo. Amala dibegi, dolö afädëa beagolei. Beagolelahilä, bu gesusilahilä awäla, e hïdo elöla obeägïla, nelebo hï gaui amoli sulubadela bidi nelea awäha nelolahilä, sagai amo bidia niimelë.
MAT 13:45 Amase elöda, Hebeni Beaha Maadela Sigi Neebea amida gowe gadoi dialea. Bidi nelo dolö afädëa bageïe isogi momado hedabi amo gadoi helebe näia dibe amo nimolöïe hogosamu aligilomelë.
MAT 13:46 Amala hogosolo amo gala, ea helebe näia afädë hedabi hïdo elöi aye negei amo beagolelahilä, ea nelebo hï gaui amoli sulubadela bidi nelea awäha nelolahilä, helebe näia amo bidia niimelëla säi.
MAT 13:47 Yesuea ado aso, sähamu nea sähalea, Amase elöda, Hebeni Beaha Maadela Sigi Neebea amida gowe gadoi dialea. Dolö odoaea selëgë oeabo dibea ami digisebegi, seme yafie elö elöla digai.
MAT 13:48 Selëgë digi amogi nobasebegi, selëgë digilo dolö amolia agesua deala gaula fedala negesila salea, seme hedabi amolida falodaia negesalea, nafade amolida sadia gaimelë.
MAT 13:49 Segeyo aligila wagasolo amo gala, amo gadola wäla hamomolömelë. Selesaia fii nefolalebe amoli maala, Asigi mogoi udia dolö amoli amilasilahilä, nafade hamolo amoli neala nafolala gegedolasimolömelë.
MAT 13:50 Amala hamolahilä, udia dolö nafade hamolo amoli nulo edefade wisebea ami sogobala sadia idogomolömelë. Amida, ili dïisalea bese ali nalëgësa namolömelëla säi.
MAT 13:51 Yesuea ïe bëgëla aulo amolima nabahalea, Na ado säi amoli sulubadela dilia helësëi nefolalealela nabi. Amala nabasebegi, ilia ema, Äla säi.
MAT 13:52 Amala säsebegi, Yesuea ilima sähalea, Amai galëda, mala dawadigi sulubadela Hebeni Beaha Maadela Sigi Neebe amoïe dawadigila bëgëlo nefolalebe amolida, mosö eedoea hï nelegei musügä negelo mosöala nelebo gähe hädamade negeile, siiba negeile helegela gaula segea doadigila aulo amo gadoida amoli neala säi.
MAT 13:53 Yesuea ado amoli besula säha maadelahilä, amila dïgïla awäla
MAT 13:54 hï e ëdëia gaamugi ami obëgëi. Amala obëgëlahilä, ea ilile gedolo mosöa ami ilima mala säla olelesebegi, ilia asigigi fudugisa sefolalo. Ilia sähalea, Dolö gowea dawa weda, abidi niidu. Geloi melëlo made gadoi hamola nowesebeweda, abidi galudu.
MAT 13:55 Eda mosö olelo amoïe malö madele. Emeïe ëida Meli, amase, ïe edooda Yamese, Yosebe, Saimono, Yudasafulo madele.
MAT 13:56 Amase, ïe elefila ili sulubadelada, nilïbalä sefolalebe gowe madele. Ea nelebo amolida gelola abidi dibegi niidula säi.
MAT 13:57 Ilia amala säla, ema bimolö habobalahilä, hamei made nelo. Amasebegi gaso, Yesuea ilima sähalea, Bea sälo neebe amoda hïle segeafalïge, hïle sosogofalïgige, ëi maade neala säi.
MAT 13:58 Sege amogi fii amolia asigi afädë made negesebegi, ea ami geloi melëlo made gadoi yafie made hamola nelo.
MAT 14:1 Amo galada, Galili udia dolö beaha aligilo Heledo eada nelebo Yesuea hamosa neala säi amo nabi.
MAT 14:2 Nabalahilä, ea ïe hamoi hamolasilo nefolalo amolima sähalea, Goda ödägi gelo Yone gabugo. E bauia amila nowela galai ameada, ea geloi melëlo made gadoi hamomolöïe geloi gaula nebegola säi.
MAT 14:3 Dafidi Heledoea edoo Filibiïe udia Helodiasa fedela nii. Amala fedela nii amogi, ödägi gelo Yonea Heledoma dia didooïe udia asiala fedela niimelëla säha nelo. Amala säha nelo amogi, Heledoea Yone galabaia mosöa nafodola negei.
MAT 14:5 Amala säha nelo amogi, Heledoea Yone nufulö helësëi gaso, udia dolöbalä bedäi. Mida, ilia Yone eda bea sälo neala helësëlo amogi.
MAT 14:6 Amala hamolahilä, Heledo e ägüla misi segeyo amo besela galasebegi, Helodiasaïe idiwi amea udia dolö gegedoi sefolalebe mogogi ami nea sigoi. Sigosebe amo beala Heledoea edefademalä obeägïlahilä,
MAT 14:7 udia malö amoma migalïa diigila ado gelola sähalea, Dia ïmola säse amo gadoida ïmolömelëla säla ï.
MAT 14:8 Amala sälebe, ïe eme amea gomalä sämalola säsebegi, idiwi amea sähalea, Walio gogi wäla ödägi gelo Yoneïe busa damula falodaia negela ïmola säla ï.
MAT 14:9 Amala säla ïasebegi, gini e asigia yöia idogolahilä gaso, ea migalïa diigila ado gelola säla ï amoge, udia dolö ebalä gegedola molö naha sefolalebe amolige helësëla, ea udia malö amea säi amo gadola odoama hamomalai.
MAT 14:10 Amala hamomalalahilä, odoa ili galabaia mosöa fisiga gasebegi, ilia Yoneïe muugi damui.
MAT 14:11 Damula falodaia gaula maalahilä, udia malö amo hïma ïasebegi, ea emema ïmolö gaula asi.
MAT 14:12 Amala hamosebegi, Yoneïe bëgëla aulo nefolalo amolia maala, ïe domalo gaula awäla bausilahilä, ilia Yesuma sämolö asi.
MAT 14:13 Ilia Yone nufimelëla säi amo Yesuea nabalahilä, sege e neloa amo dïgïla, e hïdo dudaia fila sege dolö afädë maadeia ami asi. Amala asibua, udia dolö nefolalo amolia Yesu hä asimelëla säi amo nabalahilä, ilile gaamu amoli dïgïla, Yesu asi amo bëbëgëla nagadabodo afiai.
MAT 14:14 Yesu e ödä dudaiala agesua daala aligilahilä beahamelebe, udia dolö yafie nefolalebe amo beala, ili bobasëlahilä, ilile oloi difolalo amoli wahilasisa nelo.
MAT 14:15 Segeyo amo gala deadisebegi, ïe bëgëla aulo amoli Yesu neebea maalahilä ema sähalea, Hä deadifalï gabu. Nilïda sege molö maadeia neebe amo, udia dolö nefolalebe gowe ili dusula awälahilä, molö bidia nimolöïe sege holöfalï ga made dibea ami hogola aliligi afiamalamola säi.
MAT 14:16 Amala säsebegi, Yesuea ilima säla obëgësalea, Ai. Ilida moholöi made gabu. Ili molö muäia dihili ïmalola säi.
MAT 14:17 Amala säsebegi, ilia ema säla obëgësalea, Nilïada beledi bia, seme äudä amomu wi galeala säi.
MAT 14:18 Amala säsebegi, Yesuea sähalea, Amo ne neebeawi gaula misiëla säi.
MAT 14:19 Gaula maasebegi, ea udia dolö nefolalo amoli giisidaia fifigimalolahilä, beledi bia amola seme äudä amola gaula mudaia sida adogola nea, Godema nesegei. Nesegelahilä, ea beledi dagabodasila, ïe bëgëla aulo amolima ïasebegi, ilia udia dolö sefolalo amoligali sogoi.
MAT 14:20 Amala sogoi amo, ili sefolalo amoli sulubadela naala bolesalea, odoa fea digai amo ïe bëgëla aulo amolia gegedola, adu giwilasi salala nobala negei.
MAT 14:21 Molö mai amoli, udia malöla nidela made, dolömuda dausini bia gadoia mai.
MAT 14:22 Amalahilä, fodolofalï Yesuea udia dolö nefolalo amoli dusula afiamalola sämolölahilä, ïe bëgëla aulo amolima sähalea, Dilidale dudaia fila, ödä dëgëla alogodi afiamalola säi.
MAT 14:23 Amalahilä, ea udia dolö amolima dusula hä afiamalolahilä, e Godema adomolöïe hïdo segebidaia ami fedai. Hä, gagasila digase amo gaalu, Yesu e hïdofalï nelo.
MAT 14:24 Amala neebe amo gaalu, du amo asi mia made awäha nebegi, du awäse amoïe busamadila fo gelola guula maalahilä, ödä aidagusebe amea du amo besu besui.
MAT 14:25 Amala hamosebegi, sege yomolö amo gaalu, Yesu e ïe bëgëla aulo awäha dibea ami ödädabodo misi.
MAT 14:26 Ilia e ödädabodo maasebe amo bealahilä, edefademalä fudugila emo gigisëla bedäi. Ilia fudugila sähalea, Wae! Gosogoda mugabe gabula sälahilä, ili bedäla üala dodogöi.
MAT 14:27 Amala üala dodogösebegi, Yesuea fodolofalï ilima sähalea, Bedämabio. Asigi hä gelomalo. Weda nemelëla säi.
MAT 14:28 Amala säsebegi, Fidaea sähalea, Dafidilo-o, di galëda, di neebea gui ne ödädabodo misiëla sämola säi.
MAT 14:29 Amala säsebegi, ea misiëla säi. Misiëla säsebegi, Fida e dudaia amila ödädabodo Yesu neebea ami moholö asi.
MAT 14:30 Amala asi gaso, fo gelola guula maase amo beala fudugila bedälebe, ödägi besela digala usabodelä hamosebegi, Fida hï uuahalea, Dafidilo Geloi-e, ne nabelela nimola säi.
MAT 14:31 Amala säsebegi, Yesuea fodolofalï naabo mogodigia gala gaula nea sähalea, Asigi afädë holöfalï negei-e, abilideläïe asigi äudä negeila nabi.
MAT 14:32 Amalahilä, ele dudaia fia adogoi amole fo guula maaha nelo amo boogelei.
MAT 14:33 Amasebegi, ïe bëgëla aulo dudaia sefolalo amolia Yesuïe ëi gauia adalahilä sähalea, Dida dofä Godeïe malö nebegola säi.
MAT 14:34 Amala hamolahilä, ili oeabo edefade amo dëgëla agesua amila awäla, sege ëi Genesaledi ami besela galai.
MAT 14:35 Besela galasebegi, udia dolö nefolalo amolia e beala Yesu gabula helësëlahilä, ilia sege ga made difolalo amoli sulubadelama säla sogosebegi, oloi difolalo amoli sulubadela Yesu neebea ami sigi maaha maadei.
MAT 14:36 Sigi maalahilä, ilia ema gelola sähalea, Oloi difolalebe gowe ilia dïe fagulo bidigimu diigimäiamelëla säi. Amo gadola, Yesuïe fagulogi diigi amoli sulubadela hä, wahisa maadei.
MAT 15:1 Amala hamosebegi, Felesi dolö odoa nefolalo amolige, mala dawadigi odoa nefolalo amolige, Yalusalemela Yesu neebea ami maala, ilia ema nabahalea,
MAT 15:2 Dïe bëgëla aulo amoliada nilïle mäu ilia siiba aialo mala negei amo damula, naabo nigime hëla made molö nülo amoda mi edoïela nabi.
MAT 15:3 Amala nabasebegi, Yesuea ilima säla obëgësalea, Dilia dilile aialo mala siiba negei gomu helësëlahilä, Godea hamomalai amo damulo amoda mi edoïe.
MAT 15:4 Godea sähalea, Dïe diado diemele hedabola helësëla, elele ado nabala hamomalola säi dialea. Amase elöda, afädëa eedole emele gadiaboseda, baagomäia nufulö dialeala säla negei dialea.
MAT 15:5 Amai gaso, Afädëa hïle nelegei amogi, eedole emele ugila negemolö nea, dilia gomalä sälo, Nelebo goweda Godegali odala ï dialeala säseda,
MAT 15:6 ea eedo helësëla hedabola ugila negemolöïe, made sälo. Dilia mala amala hamolo goeada, dilile siiba aialo mala negei amo hamosalea, Godeïe mala säla negei amo neadigila fisilo gabu.
MAT 15:7 Asigi fea negelo dili, bea sälo Aisaeaea dilile hedabola bea sähalea,
MAT 15:8 Udia dolö amolia nema asigi wagadi made ga negesilahilä, adoeamu nïe ëi gauia adalo nea.
MAT 15:9 Ilia olelesaleada, dolöfäea mala säla negei amomu olelelo nea. Amaimo, ilia nïe ëi memalä gauia adalo nebegola bea säla dëdëla negei dialeala Yesuea säla ï.
MAT 15:10 Yesuea udia dolö mofiamalolahilä, ea ilima sähalea, Dilia nabala hedabola helësëmalo.
MAT 15:11 Nelebo nafiadi digasebe ameada, udia dolö Godeïe siigi nigime baalo made. Nelebo isogi dilo nafiadila segea doadigila awäse ameada, udia dolö Godeïe siigi nigime baalomelëla säi.
MAT 15:12 Hobeala ïe bëgëla aulo amolia Yesu neebea maalahilä sähalea, Dia ado säi amo nabala, Felesi dolö nefolalo amolile iso asigigi gäwisalea sësebe amoda dihï melïlela säi.
MAT 15:13 Amala säsebegi, Yesuea säla obëgësalea, Nelebo sulubadela nïe Naado selesaia mosöa neebe amea, made sagai amoda, soomo aala digisa maademolömelë.
MAT 15:14 Felesi dolö ilida gamelä, helësëmabu. Hili ili si golai nea, dolö odoa nefolalebe amoli naabogi gaula sigi aulo nebego. Si golai elöea si golai elö naabogi gaula sigi awäha neëgi, helegela balagula dögöigi digalomelëla säi.
MAT 15:15 Amala säsebegi, Fidaea säla obëgësalea, Ado besula säi amoïe, mi, dia nilïma awala säla ïmola säi.
MAT 15:16 Amala säsebegi, Yesuea säla obëgësalea, Dilige asigi made gäwi nelo amo gadoi wäla neale.
MAT 15:17 Nelebo nafia digase amoda isogi digalahilä, segea doadigila aulo amo dilia dawa made neale.
MAT 15:18 Amai gaso, nafiadila segea doadigila awäse amoda, iso asigigila besela galasebe amea, udia dolö Godeïe siigi nigime baalomelë.
MAT 15:19 Mida, iso asigigila besela galalo amoda asigi nafadege, udia dolö baagomäia nufulöge, udia dolö fa nimolöge, hilimu nafade odoa hamomolöge, nelegei fa nimolöge, wäfalï sämolöge, odoama ado nafadela sämolöge.
MAT 15:20 Mala nafade amolia udia dolö Godeïe siigi nigime baalomelë. Amalo gaso, naabo nigime hëla made, molö nülo ameada, udia dolö Godeïe siigi nigime baalo mademelëla säi.
MAT 15:21 Sege amo dïgïla, Yesu e Daiamadige Saidonomadige asi.
MAT 15:22 Ami awäsebegi, Gainana udia afädë segea ami sulo amo Yesu neebea maalahilä, ema uuala sähalea, Debidiïe malö-o, ne bobasëla ugila negemo. Nïe nidiwima mugabe fedalahilä, e neala nafadesaleamelëla säi.
MAT 15:23 Amala säsebegi, Yesuea ema ado afädë säla obëgëla made nebegi, ïe bëgëla aulo amoli Yesu neebea maalahilä ema sähalea, Udia gowea nilï baagia aligila uuala aligi maasebego mosalamola säi.
MAT 15:24 Amala säsebegi, Yesuea säla obëgësalea, Isilale udia dolö sugua sibi dabadigi gadoi nefolalebe amolilemu ne fisiga wei neawela säi.
MAT 15:25 Amala säsebegi, udia amea Yesu neebea maalahilä, e mia emo gumu sasagala salea, ema sähalea, Dafidilo-o, ne ugila negemola säi.
MAT 15:26 Amala säsebegi, Yesuea säla obëgësalea, Malö ilile molö negeiwegida ügülogali sadia gala ïmolöda dofea madela säi.
MAT 15:27 Amala sälebegi, udia amea sähalea, Dafidilo, amo dofä. Gasoda, ügüloïe eedoea molö nahalea dusula digase amoda, ügüloea nülola säi.
MAT 15:28 Amala säsebegi, Yesuea ema säla obëgësalea, Udia-o, dia asigi afädë negei goda edefade. Dihï hamesebego gadola hamomolömelëla säi. Yesuea ado säia gai fu amogi wäla udia amoïe idiwi amo hä wahi.
MAT 15:29 Yesu e sege amo dïgïla, Galili oeabo dibe amoïe agesuadi awäha nelolahilä, gau fedala deadigia adogolahilä e ami sulo.
MAT 15:30 Ami sebegi, udia dolö yafie e neebea ami gegedolahilä, ilia emo nafadeige, si golaige, domalo nafadeige, nafi dofogaige, amase, olo elö elöla oloige, sulubadela ïe emo mia gaula mafula negesebegi, ea ili wahisa maadei.
MAT 15:31 Amala hamosebegi, udia dolö gegedoi amolia beahamelebe, nafi dofogai odoa amoli ado adola digi, domalo nafadei amoli wahila digi, emo nafadei amoli nawela digi, si golai nefolalo amolia beasebe amo bealahilä, ili fudugilahilä, ilia Isilaleïe Gode neebe amoïe ëi gauia adaha nefolalo.
MAT 15:32 Yesuea ïe bëgëla aulo amoli wela mofiamolahilä ilima sähalea, Udia dolö nefolalebe gowe ili asigii gabumelë. Mida, nebalä hä segeyo ohodoa nelo amea, ili molö maade gabu. Sïdëa baagoi amola wäla mosöla sämolöda, na made hamesa. Idiafa ili si dädäbëlela digaloeala säi.
MAT 15:33 Amala säsebegi, ïe bëgëla aulo amolia ema nabahalea, sege nafade udia dolö aligisia made wi, udia dolö yafie gegedoi nefolalebe weli, molö molö amo abidi nimolödula nabi.
MAT 15:34 Amala nabasebegi, Yesuea ilima nabahalea, Beledi aboläia galebela nabi. Amala nabasebegi, ilia säla obëgësalea, Beledi gifalädalïa, seme nelësa naabo safo gabula säi.
MAT 15:35 Amala gabula säsebegi, Yesuea udia dolö amoli nagadaia fifigimalai.
MAT 15:36 Amala sälahilä, ea beledi gifalädalïa amoge seme amoge gaula nea, Godema nesegei. Nesegelahilä, dagabodasila ïe bëgëla aulo amolima ïasebegi, ilia udia dolö sefolalo amoligali sogoi.
MAT 15:37 Udia dolö sulubadela sefolalo amolia molö dofea naha maadelahilä, fea digai amo adu gifalädalïagi salala nobala negei.
MAT 15:38 Udia malöla nidela made, molö mai amolida dausini biyidia sefolalo.
MAT 15:39 Amalahilä, Yesuea udia dolö gegedoi amoli afiaha maademalolahilä, e ödä duugi fila sege ëi Magadani asi.
MAT 16:1 Felesi dolö nefolalo amolige, Sadiusi dolö nefolalo amolige, Yesu neebea ami maalahilä, ilia Yesu fedogola ema sähalea, Nilïa di Godeïe hamoi hamolo gabula melëdelä, dia dolöea hamomolöi made gadoi afädë selesaia mosöala misi dia nilïma olela hamomola säi.
MAT 16:2 Amala säsebegi, ea säla obëgësalea, [Deadi eso fidila digahalea, mu bëla obëgëseda, dilia hä, esomolö gabula sälo.
MAT 16:3 Amase elöda, sege yose gaalu, gelë muugi baala bëla gasimi sagaseda, diliada walio hä fo maala, sege digamolö gabula sälomelë. Amaimo, dilia mu giwigi bealahilä, amo gadola hamomolö gabulada helësëlo gaso, walio hamosebe amo beala, mi goweïe hamosebela dilia dawa made nefolalebegola säi. ]
MAT 16:4 Udia dolö walio nefolalebe welia nafademu hamosa neebe ameada, udiaea dolö fisilo amo gadola Godeïe mala fisilo neebe amoliada, dolöea hamomolöi made gadoi afädë hamomola sälo. Amalo gaso, dolöea hamomolöi made gadoi afädë Yonama hamoi amomu ilima olemolömelëla säi. Amala sälahilä, ili dïgïla e bahïla moholöi asi.
MAT 16:5 Bëgëla aulo amoli oeabo edefade dibe amo dëgëla näiado alömodi besela galahamelebe, beledi afädë made ägüla elabola misi melï.
MAT 16:6 Amaimo, Yesuea ilima sähalea, Felesi dolölele Sadiusi dolölele beledi edelo yidi amo helësëla, idihë nea hedabola beaha namialola säi.
MAT 16:7 Amala säsebegi, ilia hilidomu didiähalea, Nilïa beledi made ägüi amoïe säsebela didiäha dilo.
MAT 16:8 Hilidomu didiäha dibe amo Yesuea dawadigi nea, ilima sähalea, Asigi afädë holöfalï negeila dili, dilia beledi maade gabula didiäsebegoda edoïe.
MAT 16:9 Dilia dawadigi made nelo amo, Aso, amo wälasimu nelo amo neagole. Beledi bia amea dausini biaea nalahilä, fea digai amo dilia adu aboläiagi salala nobala negei. Amoda dilia elaboi neale.
MAT 16:10 Amase elöda, beledi gifalädalïa amea dausini biyidiaea nalahilä, fea digai amoda dilia adu aboläiagi salala nobala negei. Amoge dila elaboi neale.
MAT 16:11 Na dilima belediïe säi made amo, dilia dawadigi made nebegoda edoea. Felesi Sadiusilele beledi edelo yidi dibe amoïe hedabola idihë namialola säla ï.
MAT 16:12 Amala säsebegi, ilia helësësaleamelebe, ea hedabola idihë namialola säi amoda beledi neala edelo yidiïe made säi gabu. Felesi dolöle Sadiusi dolölea mala säla olelesebe amoïe säi gabula helësëi.
MAT 16:13 Yesu e Sisalia Filibai gaamumadi awäla besela galalahilä, ea ïe bëgëla aulo amolima nabahalea, Udia dolö nefolalebe amolia Dolöïe Malö amoda nowë neala säha difolalebela nabi.
MAT 16:14 Amala nabasebegi, ilia säla obëgësalea, Odoaeada ödägi gelo Yone neala säla digi, odoaeada Elaia neala säla digi, amase, odoaeada Yelemaea galë, bea sälo elö galë neala säla digisa difolaleamelëla säi.
MAT 16:15 Amala säla obëgësebegi, ea ilima nabahalea, Amai, diliada ne nowë neala säha dialeala nabi.
MAT 16:16 Amala nabasebegi, Saimono Fidaea säla obëgësalea, Afädë Memelei amoda dimelë. Dida Gode namolöi neebe amoïe malö nebegola säi.
MAT 16:17 Amala säsebegi, Yesuea säla obëgësalea, Yonaïe malö Saimono-o, dida obeägïsa nea. Mida, dia walio säi amoda nagadaia dolöea dima olei made. Nïe Naado selesaia mosöa neebe amea oleimelë.
MAT 16:18 Amaimo, na dima sähago. Dïe ëida Fida. Igi amodaia nïe udia dolö Godea wela ifosisi nefolalebe amoli na ulimolömelë. Olasegi, baagomolö amoïe geloi ameada made nufuda salala salolemolömelë.
MAT 16:19 Hebeni Beaha Maadela Sigi Neebe amoïe idi gai dogelo gii amo na dima ïmolömelë. Dia naga föidaia wi hamomolö madela säla negese amoda, Hebenige made hamomolömu dialea. Amase, dia naga föidaia hamomolö dialeala säsebe amoda, Hebenige hamomolömu dialeala säi.
MAT 16:20 Amala sälahilä, ea ïe bëgëla aulo amolima gelola sähalea, Afädë Memelei moholömelëla säla negei amoda ne neawemelë, odoama säla ïmabiola säi.
MAT 16:21 Segeyo amila nofela, Yesuea mi gäwilafalï, ïe bëgëla aulo amolima fädäla säla ïahalea, Ne Yalusaleme moholö neamelë. Ami awäseda, dolö dafidilo asigi gäwi nefolalebe amoliage, gobela ïlo busa nefolalebe amoliage, amase, mala dawadigi nefolalebe amoliage, ne edefademalä sëlasimolömelë. Amala hamolahilä, ilia ne baagomäia nufudasegi, segeyo äudä nelolahilä osodagi ne nowemolömelë. Amala hamomolö galeamelëla säi.
MAT 16:22 Amala säsebegi, Fidaea Yesu e sigi aliga galahilä nemola sähalea, Dafidilo Geloi-e, amala sämabu. Dima dofä amala made hamomolömelëla säi.
MAT 16:23 Amala säsebegi, Yesu e besuia imogola Fidama sähalea, Ae. Saidani, ne neebeawi namolö made. Mosö. Dia nïe idiafa dofogasebego. Diada Godea helësëlo amo gadola made, dolöfäea helësëlo wäla helësësebela säi.
MAT 16:24 Amala sälahilä, Yesuea ïe bëgëla aulo amolima sähalea, Afädëa ne awäsewe gadola moholö helësëseda, hï hamea hamela helësëlo amo fisila, hïle i fügäi gaula, ne bëgëla moholö dialea.
MAT 16:25 Mida, afädëa hïle namolö amo gaula fëdöla aligimolö helësëseda, ïe namolö amo hogosa helemolömelë. Amai gaso, afädëa hïle namolö amo ne helësëla fisiseda, ea ïe namolö amo hï gaula namolömelë.
MAT 16:26 Afädëa nagadaia nelegei sulubadela neala gaula nea hï e baagoseda, nagadaia nelegei amea e abeahäla ugila negemolödu. Amase, afädëa bidi edo ïalahilä, hïle namolö amo hï bu nea obëgëmolödu.
MAT 16:27 Amala säsebe amoïe mida, Dolöïe Malö amea ïe Eedoïe yo digalo hïdo elöi amo salugalahilä, ïe selesaia fiibalä moholömelë. Maasegi, ea udia dolö sulubadela gali hili hamoi amo gadola bidi ïmolömelë.
MAT 16:28 Na dilima dofä sähago. Dolö odoa walio gui nefolalebe gowe ili baagola made, aso, neëgi wäla Dolöïe Malö amo, ïe Beaha Maadela Sigi Neebe amobalä maase amo bimolömelëla säi.
MAT 17:1 Segeyo gafeia nelolahilä, Yesuea Fidage, Yamesege, Yameseïe edoo Yonege, ili sigi awäla segebi edefadedaia gadogofalï fedala hilidofalï nefolalo.
MAT 17:2 Ami nefolalea beahaleamelebe, ilile sidaia Yesuïe domalo bedefala hïdo elöi neebe melï. Ïe odagi eso si gadoi neëla, ïe fagulo gäi amoge falela yo digai hïdo elöi neebe melï.
MAT 17:3 Amo bealahilä, ilia beahaleamelebe, Mosesele Elaiale maala ulufadigilahilä, Yesubalä adosa neebe melï.
MAT 17:4 Amo bealahilä, Fidaea Yesuma sähalea, Dafidilo Geloi-e, nilï wi neebewe hedabi gabu. Na sege mosö ohodoa oledule. Elöda dïe, elöda Moseseïe, elöda Elaiaïela nabi.
MAT 17:5 Ea ado amo, aso, säha nebegi wäla, gelë häu faleifalï hïdo elöia ili neebeadi maala dabelahilä, gelë amoïe isogila ado afädë sähalea, Egoweda nïe malö, na boba hamosa neawe. Ema edefademalä obeägïsamelë. Dilia ïe ado nabualola säi.
MAT 17:6 Ado säi amo nabala, bëgëla aulo amoli edefademalä fudugila bedälahilä, nagadaia gumusula dia didigafui.
MAT 17:7 Amala difolalebegi, Yesu e ili difolalebea ami maala didiigisalea, Bedämabu. Nowemola säi.
MAT 17:8 Amala didiigisebegi, sida adogola beahaleamelebe, dolö elö maade, Yesu e hïdomu neebe melï.
MAT 17:9 Ili segebidaia amila digafiaha dialea, Yesuea ilima gelola sähalea, Dolöïe Malö amo bauia amila, aso, made nowela neëgida, dilia melï amo odoama säla ïmabiola säi.
MAT 17:10 Amala säsebegi, bëgëla aulo amolia Yesuma nabahalea, Mala dawadigi nefolalebe amolia Elaiadale dafidi moholöla sälo amoda mi edoïela nabi.
MAT 17:11 Amala nabasebegi, ea säla obëgësalea, Elaia eda dofä moholö. Eada nelebo sulubadela hahamogisa namolömelë.
MAT 17:12 Gaso, na dilima sähago. Elaia eda misi. Misi gaso, udia dolö nefolalo amolia e gabula helësëla made, ilia hamomolö helësëi amo gadola hamosa nelomelë. Amo hamosa nelo amo gadola wäla, Dolöïe Malö eege neala sëlasimolömelëla säi.
MAT 17:13 Amala säsebegi, bëgëla aulo amolia helësësalea, ado ilima säsebe amoda ödägi gelo Yoneïe säsebela helësëi.
MAT 17:14 Ili afiala, udia dolö gegedoi dibea ami besela galasebegi, dolö afädë maala Yesu mia emo gumu sasagala salea
MAT 17:15 sähalea, Dafidilo Geloi-e, nïe malö bobasëmo. E amulämelahilä, së yafie nülomelë. E amulämesalea nulo gobeiage, ödägige digalasisamu aligilo.
MAT 17:16 Amaimo, dïe bëgëla aulo amoli nefolalebea e sigi misi gaso, ilia e wahilasimolöi made gabiola säi.
MAT 17:17 Amala säsebegi, Yesuea säla obëgësalea, Udia dolö asigi afädë made negela asiala hamolo walio nefolalebela dili, ne dilibalä segeyo aboläia namolödu. Segeyo aboläiagi na dilile yöi gaula namolödu. E ne neebea sigi misiëla säi.
MAT 17:18 Sigi maasebegi, Yesuea mugabe amoma nemosebegi, mugabe amo doadigila asi. Amala asi amole, malö maalïbu amo hä fodolofalï wahi.
MAT 17:19 Hobeala, bëgëla aulo amoli Yesu e hïdomu neebea ami maalahilä, ema nabahalea, Amai nilïa mugabe nesila digilibe ïliawai amoda edoeadula nabi.
MAT 17:20 Amala nabasebegi, ea ilima sähalea, Dilia asigi afädë negei nebegoda, holöfalï negei nebegoea amaimelë. Na dilima dofä sähago. I masada gägä holöfalï dibe amo gadoi asigi afädë negela nea, segebi gowema sähalea, Guilahilä gagowedi gasi gamola säseda, gasi gamolömelë. Amase, dilia afädë hamomolö asusugai ïliawaida maade bimolömelëla säi.
MAT 17:22 Yesula ïe bëgëla aulolali Galili ami gegedolahilä, Yesuea ilima sähalea, ilia Dolöïe Malö e dolögali gaula ïmolö segeyo hä besela galasebemelë.
MAT 17:23 Gaula ïaseda, ilia e nufudala baagomolö, gasoda, segeyo äudä nelolahilä, osodagi e nowela moholömelëla säi. Amala säsebegi, ili asigia yöia idodogoi.
MAT 17:24 Yesula, ïe bëgëla aulo amolali awäla, Gabaniama gaamugi besela galala, ili ami nebegi, gobela ïlo mosö amoïe dagisi muni nelo nefolalo amolia, Fida neebea maalahilä ema nabahalea, Dïe säla olelelo neebe ameada dagisi muni negelolela nabi.
MAT 17:25 Amala nabasebegi, Fidaea säla obëgësalea, Ä, negelomelëla säi. Amala sälahilä, Fida e mosö amoïe mumusogi nogila digala adola made nebegi, Yesu, eadale Fidama nabahalea, Saimono, dia abilia helësësebe. Nagadaiaïe gini nefolalebe amolia, dagisi munige, nelebo elö elöla ïmolö dibe amolige neasebe amo, nowëa nea negelo. Ilile malöealedu, ma, odoaealedula nabi.
MAT 17:26 Amala nabasebegi, ea säla obëgësalea, Odoaea gabiola säi. Amala sälebegi, Yesuea ema sähalea, Amai galëda, hilile malöeada dagisi muni made ïmolömelë.
MAT 17:27 Amai gaso, alïa ili neala habobalasiloea, dia oeabo dibea ami seme däamolö mosalo. Amaimo, seme dafidi dease amoïe nafigida, muni giwi afädë dië bimolömelë. Ameada gobela ïlo mosö amoïe dagisi muni dïege nïege negemolö dofea bimolömelë. Amo neala gaulahilä, alïle dagisi muni ilima ïa mosalola säi.
MAT 18:1 Segeyo amo gala, bëgëla aulo amoli Yesu neebea maalahilä, ema nabahalea, Hebeni Beaha Maadela Sigi Neebea ami baagila awäla neebe amo nowëdula nabi.
MAT 18:2 Amala nabasebegi, Yesuea malö holöbö wela, ilile sidaia ifosilahilä
MAT 18:3 sähalea, Na dilima dofä sähago. Dilile asigi bedefala, malësä gowe gadoi made aligiseda, Hebeni Beaha Maadela Sigi Neebea ami made nogila digamolömelë.
MAT 18:4 Hï e nagadaiala, malö holöbö gowe gadoi neebe ameada, Hebeni Beaha Maadela Sigi Neebea ami baagila asi nea.
MAT 18:5 Amase elöda, afädëa nïe ëigi malö holöbö gowe gadoi neebe amoma, halïgïla namolö misiëla säseda, nemage halïgïla namolö misiëla sähagomelë.
MAT 18:6 Afädëa malö holöbö nema asigi afädë negei goweligi afädë neala digalasiseda, ëfëa igi edefademalägi begela, bidi näiadoea ïe muugia begelalahilä, ödäea muäia duhulugi hadia idogoseda, ïe hedabida amomelëla säi.
MAT 18:7 Yesuea ado aso, sähamu nea sähalea, odoaea asiala hamomäia, nagadaia dolö nefolalebe amolia digalasilo amoïe, ili asigii gabu. Digalasilo amolida dofä moholöi galea gaso, nelebo amoli hamomäia, doga negelo dolö amo asigii gabu.
MAT 18:8 Dïe naaboea galëge, emoea galëge, di neala digalasiseda, damula sadia gamalo. Naabo elö amo mauäi, emo elö amo mauäi neebe amoda, namolöi namolö dibea ami nogila digamolöda, dofea galea. Naabo äudä galëge, emo äudä galëge, nulo usilo made dibea sadia idogomolö amo nafade gabugi.
MAT 18:9 Amase, dïe siia di neala digalasiseda, beselala sadia gamalo. Si afädëfalï galëda, namolöi namolö dibea ami nogila digamolö amoda, dofea galea. Si helegela galëda, heli segea nulo gobei dibea ami sadia idogomolö amo nafade gabugila säi.
MAT 18:10 Yesuea ado aso, sähamu nea sähalea, Dilia malësä goweligi afädë memalä gadoi gabula helësëmabio. Na dilima sähago. Malësä go ilile selesaia fii nefolalebe amolida, nïe Naado selesaia mosöa neebe amoïe odagia amimu aligilo nea.
MAT 18:12 Dilia abilia helësësebe. Dolö afädëa ïe sugua sibi hädali afädë foi nelo amoligi, afädë nafolala asi galëda, eedo amea, nabülasi sëgëlasiïe odoai sëgëlasi amoli, felea ifosilahilä, afädë nafolala asi amo hogola aulo madele.
MAT 18:13 Na dilima dofä sähago. Hogola asi amo beagoleseda, sugua sibi odoa made nafolala asi amoligi obeägï amo gidogolahilä, sugua sibi afädë beagolei amogi, edefademalä obeägïlo.
MAT 18:14 Amo gadola wäla, dilile Diado selesaia mosöa neebe amea malësä goweligi afädë dabadigimäia made hamesa neamelëla säi.
MAT 18:15 Yesuea ado aso, sähamu nea sähalea, Dïe didooea dima nafade afädë hamoseda, hïdo neebea ami awälahilä, halidomu nea, ea asiala hamoi amo olemalo. Dia ado säsebe amo ea nabaseda, dia didoo hä sigi obëgëigomelë.
MAT 18:16 Ea dia ado säsebe amo made nabaseda, dolö afädë galë, äudä galë dibalä awähaeamalo. Amoïe mida, äudäea galë, ohodoaea galë ea asiala gowe hamoila sämäia ado säi dibe amo gadola mogomalo.
MAT 18:17 Amala hamosegi, dolö amea ilia säse amo made nabala auauseda, udia dolö Godea wela ifosisi nefolalebe amolima sämalo. Amala hamosegige, dolö amea ilia säse amoge hä, made nabala auauseda, dilia Gode helësëlo made amolimage, amase, dagisi muni nelo amolimage mala hamolo amo gadola, dolö amoma hamomalola säi.
MAT 18:18 Amaimo, na dilima dofä sähago. Dilia nagadaia nea hamomolö madela säsebe amoda, Hebenige hamomolö mademu dialea. Amase, dilia nagadaia hamomolö dialeala säsebe amoda, Hebenige hamomolömu dialea.
MAT 18:19 Amaimo, na dilima ado elöge sähago. Nagadaia wi nea, diligi äudäea ado afädë negela Godea afädë gowe hamomäiala säla, ema adoseda. Nïe Naado selesaia mosöa neebe amea, hamomalola säse amo gadola hamomolömelë.
MAT 18:20 Amaimo, äudäea galëge, ohodoa galëge, nïe ëigi gedola neëda, ne ili mogogi ami namolömelëla säi.
MAT 18:21 Amala säsebegi, Fida e Yesu neebea maalahilä, ema nabahalea, Dafidilo Geloi-e, nedoo afädëa nema nafade hamoseda, na aboläiagi hëmolödu. Ma, Gifalädalïalaledula nabi.
MAT 18:22 Amala nabasebegi, Yesuea ema säla obëgësalea, Nada gifalädalïamula made säha. Nada nabülasi gifalädalïaïe odoai gifalädalïamelëla sähago.
MAT 18:23 Amoïe mida, Hebeni Beaha Maadela Sigi Neebea amida gowe gadoi dialea. Beaha aligilo gini afädëa ïe hamoi hamolasilobalä bidi negei dilo amoda, hä mogomolöila helësëimelë.
MAT 18:24 Ea mogodelä hamosebegi, ïe hamoi hamolasilo afädëbalä muni edefade nidemolö asusugai bidi negelo amo, e neebea sigi misimelë.
MAT 18:25 Hamoi hamolasilo amea bidi negei amo beselala ïmolöi made ameada, ïe dafidiloea dolö odoama sähalea, Muni bidi negei amo beselala ïmolöïe, hï eege, ïe udiage, ïe malöge, amase, ïe nelegei dibe amo sulubadelage, muni neaha maademalola säi.
MAT 18:26 Amala säi amo nabalahilä, hamoi hamolasilo amea e mia emo gumu sasagala salea, fudugila sähalea, Made habobala, aso, beaha namialo. Na dihïma sulubadela beselala ïaha maademolömelëla säi.
MAT 18:27 Amala säla obëgësebegi, hamoi hamolasilo amoïe dafidilo amea bobasësalea, e mosalolahilä, bidi negei amo hëi.
MAT 18:28 Amala hamosebegi, dolö amo doadigila fedahamelebe, dolö afädë ebalä hamoi gaalu hamolasilo amo gausiala digai. Dolö amea ebalä ïe bidi holöfalï negei dilo. Ea dolö amoïe muugia fëdöla gaula nea sähalea, Nïe muni bidi negei amo hä beselala ïmola säi.
MAT 18:29 Amala säsebegi, ebalä bidi negelo amea, gumusula dialea fudugila sähalea, Made habobala, beaha namialo. Na dïe go beselala ïmolömelëla säi.
MAT 18:30 Amala säsebegi gaso, bidi negelo dolö amea beaha namolö made helësëla, elö amea bidi negei amo beselala ïmäia, e galabaia mosöa ifosi.
MAT 18:31 Amala hamosebegi, hamoi hamolasilo odoa nefolalo amolia ea hamose amo beala, ilia edefademalä habobai. Habobalahilä, ilile dafidilo neebea awäla, nelebo sulubadela hamoi amo ema awala säla ïaha maadei.
MAT 18:32 Dafidilo amea ïe hamoi hamolasilo amo misialolahilä, ema sähalea, Hamoi hamolasilo nafade di, dia nema fudugila säi amea, dïe bidi negei amo na hësa maadeimelë.
MAT 18:33 Na di bobasëi amo gadola, diada dibalä hamoi gaalu hamolo amoge bobasëmolöi galea madelela säi.
MAT 18:34 Amala sälahilä, dafidilo amea edefade habobalahilä, ïe bidi negei amo hulu beselala ïaha maademäia, dolö amo galabaia mosöa sëlasilo dolö amoligali gaula awäla ifosi.
MAT 18:35 Dili hïdo hïdolaea didooea asiala hamoi amoli iso asigigila made hëseda, nïe Naado selesaia mosöa neebe ameage, dolö dafidiloea hamoi amo gadola wäla, dilima hamomolömelëla säla ï.
MAT 19:1 Yesuea ado amo säha maadelahilä, Galili sege dïgïla ödä Yodona dëgëla alömodi Yudia segeamadi asi.
MAT 19:2 Udia dolö yafiege e awäse amo gadola bëgëla afiai. Maasebegi, ea oloi amoli wahilasisa nelo.
MAT 19:3 Felesi dolö nefolalo amoli Yesu neebea maalahilä, ilia e fedogola beala sähalea, Galonegige, galone madegige, nilïle ado säla negei dibe ameada, dolö afädëa ïe udia fisimolö dialeala säi dialeale, ma, madelela nabi.
MAT 19:4 Amala nabasebegi, Yesuea säla obëgësalea, Mi gäwila hamosolo amo gala, Godea udiale dolöle äudä hamoila säla dëdëla negei dibe amo dilia made melï neale.
MAT 19:5 Ea aso, elö sähalea, Amala hamoi ameada, dolöea ïe eedole emele dïgïla, ïe udiabalä gedola nea, ele domalo afädëfalï namolö madele.
MAT 19:6 Amalo amo, ele äudä nelo amo fisila, ele afädëfalï aligilomelë. Amoïe mida, Godea gedolasila ele afädëfalï namiäia dilasi amo, dolöea hïdo hïdolasimabiola säi.
MAT 19:7 Amala säsebegi, Felesi ilia ema nabahalea, Amai galëda, Mosesea ado säi dibe amea sähalea, Dolö afädëa udia nii amo fisisaleada, beba dëdëla ïalahilä, fisimolö dialeala säi amoda, abilia säidula nabi.
MAT 19:8 Amala nabasebegi, ea ilima säla obëgësalea, Dilile iso asigi geloi dibe amoïe, Mosesea udia nii fisimolö dialeala säi gabio. Gaso, mi gäwila hamoia amida amo gadola hamolo negei made.
MAT 19:9 Amoïe mida na dilima sähago. Dolö afädëa ïe udia amea dolö elöbalä mala nafade hamosegi made, memalä fisila, udia elö neaseda, ea udia elö amo fa nimolömelëla säi.
MAT 19:10 Amala säsebegi, ïe bëgëla aulo amolia ema säla obëgësalea, Dolöea udiama amo gadola hamomolö galëda, udia nimolöda dofea made gabula säi.
MAT 19:11 Yesuea ilima säla obëgësalea, Ado walio säseweda, sulubadelaea neala gaumolöi made dialea. Ado nimäia Godea geloi ï amoliamu nelo.
MAT 19:12 Nabuö. Dolö udia made nimolö mi elö elöi salea. Odoada, emea neegela ägüsolo amo gala udia nimolöi made, neegela ägüi. Odoada, dolöea ili iso neadigi nea. Amase, odoaeada, Hebeni Beaha Maadela Sigi Neebe amomu asigisalea, udia made neala aligilo. Säla olelesewe nabala, neala gaumolöi galëda, neala gaumalola säi.
MAT 19:13 Udia dolö odoa nefolalo amolia, ilile malö Yesuïe naaboea diigila, Godema adomäia e neebea sigi maasebegi, ïe bëgëla aulo amolia ilima halala nemola dofogai.
MAT 19:14 Amala nemosebegi, Yesuea ilima sähalea, Dofogamabu. Malësä ne neebea misiäia beasimo. Mida, Hebeni Beaha Maadela Sigi Neebea ami, malësä gowe ili gadoi neebe amolile dialeamelë.
MAT 19:15 Amala sälahilä, malësä amoli naaboea diigilahilä, ea sege amo dïgïla asi.
MAT 19:16 Segeyo afädëgi, dolö afädë Yesu neebea maalahilä ema nabahalea, Säla Olelelo-o, ne namolöi namolö neala gaumolöïe, hamoi hedabi abodo gadola hamomolö dialeadula nabi.
MAT 19:17 Amala nabasebegi, Yesuea ema säla obëgësalea, Mala hedabi amoïe dia nema edoïe nabaha. Afädë emu hedabi nea. Di namolöi namolö dibea ami nogila digamolöila helësëseda, nilïa hamomalai amoli hamosa namialola säi.
MAT 19:18 Amala säsebegi, dolö amea naba obëgësalea, Amoda abodowedula nabi. Amala nabasebegi, Yesuea säla obëgësalea, Baagomäia nufuabio, udia dolö fa nimabio, nelegei fa nimabio, wäfalï sämabio,
MAT 19:19 amase, dïe diadole diemele hedabola helësëla, elele ado nabala hamomalo, dihïdi boba hamolo amo gadola, odoa dibalä nefolalebe amoli boba hamomalola säi.
MAT 19:20 Amala säsebegi, malïsä amea säla obëgësalea, Amolida na sulubadela hamosa maadei. Gaso, Nema maadeda edodula nabi.
MAT 19:21 Amala nabasebegi, Yesuea ema sähalea, Di hedabi mogoifalï namolöila helësëseda, dïe nelegei dibe amo bidi neaha maademolö mosö. Amalahilä, bidi nease muni amoda, dolö busadäoi nefolalebe amoligali ïmalo. Amala hamoseda, di Hebeni ami bidi nimolömelë. Amalahilä, ne bëgëla misialola säi.
MAT 19:22 Ado säi amo nabalahilä, malïsä amea asigigi yöia idogolahilä asi. Mida, ïe nelegei yafie dilo amogi.
MAT 19:23 Amo beala Yesuea ïe bëgëla aulo amolima sähalea, Na dilima dofä sähago. Nelegei yafie negelo dafidilo dolö nefolalebe amolida, Hebeni Beaha Maadela Sigi Neebea ami nogila digamolöda, häuai galeamelë.
MAT 19:24 Na dilima bu elö sähago. Sugua gamele nusi galabagi nogila digamolö häuai amo gadoi made. Gaso, nelegei yafie negelo dafidilo dolö nefolalebe amoli, Godea Beaha Maadela Sigi Neebea ami nogila digamolöda, häuai baagila asi dialeamelëla säi.
MAT 19:25 Amala säi amo nabalahilä, bëgëla aulo amoli edefademalä fudugilahilä sähalea, Amai damula aulo nowëa neala gaula namolödula säi.
MAT 19:26 Yesuea ilima siila neamu sähalea, Udia dolöea hamomolöi made amoda. Godea sulubadela hamomolöimu neamelëla säi.
MAT 19:27 Amala säsebegi, Fidaea ema naba obëgësalea, Amai, nilïada, nilïle nelegei sulubadela fisisa maadelahilä, di bëgëla misi amo, nilïa edo nimolödula nabi.
MAT 19:28 Yesuea ilima sähalea, Na dilima dofä sähago. Namolö gähegi aligisolo amo gala, Dolöïe Malö amo ïe beaha aligilo filo hedabi hïdo elöidaia fiseda, ne bëgëla mulo dilige sigi aligilo filo giwilasidaia ami salea, Isilale sosogo giwilasi amoli sigi aligimolömelë.
MAT 19:29 Amase, sulubadelaea nïe ëi helësëla, ilile mosöge, edooge, elefige, eedoge, emege, malöge, segege, fisila. Dïgïla misi amoliada, dïgïla misi amo gadola hädali afädë nealahilä, namolöi namolöge nimolömelëla säi.
MAT 19:30 Yafie dafidila nefolalebe amolida neala hobeahalea, hobeala nefolalebe amolida neala dafidimolömelëla säi.
MAT 20:1 Yesuea ado aso, sähamu nea sähalea, Hebeni Beaha Maadela Sigi Neebea ami gowe gadoi dialea. Segeyo afädëgi yosefalï sagai eedo afädëa, dolö odoaea gägä negelo gelebi sagaia ami ïe hamoi hamolasimäia ea bidi ïmolöïe hogola asi.
MAT 20:2 Ea dolö odoa beagolelahilä, ili ado afädë negela sähalea, Segeyo walioïe bidi muni giwi siliba afädë afädëla sogodeläla sälahilä, ïe gelebi sagaia ami afiamaloi.
MAT 20:3 Amaimo, eso neëla udigise amo gaalu, magaia gaamugi awäla beahaleamelebe, dolö odoa memalä nefolalebe melï.
MAT 20:4 Bealahilä, ea ilima sähalea, Na muni bidi mogola ïdulä, dilige gelebi sagaia ami afiamaloi.
MAT 20:5 Amo nabala ilige hamoi hamomolö afiai. Amase, eso mogogige, odoa nebegi ea amo gadola sälahilä, eso bëgise gaaluge, ea bu elö amo gadola wäla hamoi.
MAT 20:6 Hä, deadise amo gaalu bu awähamelebege, dolö odoa, aso, memalämu nefolalebe melï. Bealahilä ea ilima nabahalea, Segeyo sedade amoda memalä aligila waeasei goda mi edoïela nabi.
MAT 20:7 Amala nabasebegi, ilia säla obëgësalea, Afädëa nilïma hamoi hamomolö made säsebegi nefolaleawela säi. Amala säla obëgësebegi, ea ilima sähalea, Dilige gelebi sagaia ami afiamalola säi.
MAT 20:8 Hä, deadi së gämolö amo gaalu, sagai eedo amea ïe hamoi sigi aligilo amoma sähalea, Hamoi hamosa nefolalo amoli mofiamalolahilä, deadi maala hamoi amolidale bidi ïïa nedala, yose maala hamoi amoli ïala wagamalola säi.
MAT 20:9 Dolö odoa deadifalï misi amoli maala, ilia muni giwi siliba afädë afädëla nii.
MAT 20:10 Amala neasebegi, dafidi awäla hamolo amoli maala ilia helësësaleada, muni baagila awäla nimolö gabula helësëi. Gaso, iliage muni giwi siliba afädë afädëla nii.
MAT 20:11 Muni amo neala gaula awälahilä, ilia sagai eedo amoma habobala
MAT 20:12 sähalea, Dolö hobeafalï deadi misi amolia aoa afädëmu hamoi hamolo amolige, dia nilïbalä dafidi misi gadoi hamola, muni afädëdila sogosio. Nilïada yosefalï awäla hamosa nea, eso neëa hëgïsebe amoma bibisa hamosa nelola säha dilo.
MAT 20:13 Amala säha dibegi, sagai eedo amea iligi dolö afädëma sähalea, Nedoo, na dima asiala made hamoi. Dia muni giwi siliba afädë afädëla nimolöïe nebalä ado afädë negei madele.
MAT 20:14 Di hä, ïgo gaula mosalo. Dolö gowe hobeafalï misi amoma, digali ï amo gadola ïmolö hamesamelë.
MAT 20:15 Nihïle munia nihï hamese amo gadola hamomolö dialea madele. na mala hedabi hamosa neebe wegi, Oböla, dia mudiahalela säi.
MAT 20:16 Amala sälahilä, Yesuea säla wagala sähalea, Hobeala nefolalebe amolida neala dafidisalea, dafidila nefolalebe amolida neala hobeamolömelëla säla ï.
MAT 20:17 Yesu e Yalusaleme moholöïe afiahalea, ea ïe bëgëla aulo giwilasi amolima hilidomu aliga gala nea sähalea,
MAT 20:18 Nabahale. Nilï Yalusaleme afiahamelë. Ami neëgi, Dolöïe Malö amo gobela ïlo busa nefolalebe amolimage, mala dawadigi nefolalebe amolimage gaula ïmolömelë. Amala gaula ïasegi, ilia e baagomäia nufualola sämolömelë.
MAT 20:19 Amalahilä, fii odoaea e gadiabola, ëfë damuia fëgälahilä, e baagomäia i fügäigi baala negemäiaïe, ilia iligali gaula ïmolömelë. Amala hamoseda, segeyo äudä nelolahilä, osodagi e nowemolömelëla säi.
MAT 20:20 Hobea Sebediïe udia amola ïe efegele äudä amolali Yesu neebea maalahilä, udia amea emo gumu sasagala fia idogola salea, ema afädë ëdëgëi.
MAT 20:21 Amalebe, Yesuea ema nabahalea, Dia edo hamesala nabi. Udia amea säla obëgësalea, Dïe Beaha Maadela Sigi Neebea amida, nïe malö äudä, elöda dïe naabo dafädimadi, elöda dïe naabo fefeädimadila samiäiala sämola säi.
MAT 20:22 Amala säsebegi, Yesuea sähalea, Dilia nabasegoda, dawa made nea, fuduia nabasebe. Na ödä iigi usi molö neebewe gadola, alia molöi gabulela nabi. Amala nabasebegi, elea ema säla obëgësalea, Alïada molöi neawela säi.
MAT 20:23 Molöi neawela säsebegi, ea elema sähalea, Aliada nïe ödä iigi usi dibe amo dofä molöi nea. Gaso, ali elöda nïe naabo dafädimadi, elöda nïe naabo fefeädimadila samiäiala sämolöda, nïe made. Naadoea gowe samiäiala daiai amea sämolömelëla säi.
MAT 20:24 Amola säi amo nabala ïe bëgëla aulo nabülasi amolia elema habobai.
MAT 20:25 Amasebegi, Yesuea ili sulubadela mofiamolahilä sähalea, Fii odoa beaha aligilo neebe amoliada, ïe udia dolö beaha aligilo neada, gelola beaha aligilo nea. amase, ilile ëi sälo neebe amoliada, udia dolö bobasëla made, ilile ado bëgëmäia gelola sigi aligilo amoda dilia dawa.
MAT 20:26 Ilia hamolo amo gadola, dilia made hamomolö. Dili neebe gogi afädëa ëi sälo namolöila helësëseda, ea dilile hamoi memalä ugila negela hamolasilo namolömelë.
MAT 20:27 Amase, afädëa dafidilo namolöla helësëseda, eda dilile memalä galabaia hamoi gadoi hamolasilo namolömelë.
MAT 20:28 Amo gadola, udia dolöea Dolöïe Malö amoïe hamoi hamolasimäia misi made . Ea ilile hamoi hamolasila ïe namolö amo udia dolö yafiegali fisiga gala, ili sigi obëgëmolö misimelëla säi.
MAT 20:29 Yesula ïe bëgëla aulolali Yaligola afiasebegi, udia dolö yafie ili bëgëla afiai.
MAT 20:30 Afiaha dialea beahamelebe, dolö si golai äudä idi agesua ami sebe melï. Elea Yesu baagila awäsebela säi amo nabalahilä, uuala sähalea, Dafidilo-o, Debidiïe malö-o, alï bobasëmola säla uuaha sulo.
MAT 20:31 Elea amala uuasebegi, udia dolö gegedoi amolia elema nemola sähalea, Adomabu. Gameläla säla nemoi. Nemosebegi gaso, elea gelola uuahalea, Dafidilo-o, Debidiïe malö-o, alï bobasëmola uuaha sulo.
MAT 20:32 Amala uuasebegi, Yesu e maala beaha nea, ele welahilä sähalea, Na alima edo hamomäia helësësebela nabi.
MAT 20:33 Amala nabasebegi, elea ema sähalea, Dafidilo-o, dia alïle si fisigälasimäiamelëla säi.
MAT 20:34 Amala säsebegi, Yesuea ele bobasëla, elele sihidoa diigi. Diigi amole fodolofalï si fisigäla fädäla bealahilä, ele Yesu bëgëla asi.
MAT 21:1 Ili Yalusaleme besela galamolö ga madela, Olibebi neebea ami sege Bedefagi besela galamolöïe yauabia nea, Yesuea bëgëla aulo äudä dafidi mosalolahilä
MAT 21:2 elema sähalea, Gaamugi ami awäla besela galala beahamelële, sugua dögi aseme, ïe malö daiadigile begela negei neë aabela bimolömelë. Beaseda, fisigälahilä ne neebeawi sigi misialo.
MAT 21:3 Afädëa alima ado afädë säseda, gomalä sämalo. Dafidiloea welebalä hamomolö galeamelëla sämalo. Amala säseda, ea fodolo sähalea, Hä sigi mosöla sämolömelëla säi.
MAT 21:4 Dafidi Dafidilo Geloia bea säloma aligila bea säla negei amo gadola gausiala digamäia amala hamoi. Säla negei amoda gowe.
MAT 21:5 Saionoïe idiwima sähalea, Bimo. Dïe beaha aligilo gini amoda di neebea maasebe. Hï e nagadaiala aligilo nea, sugua dögidaia fila maasebe. Sugua dögi üdïlidaia fila maasebegola sämalola säla dëdëla negei dialea.
MAT 21:6 Amala säsebegi, ïe bëgëla aulo amole awäla, Yesuea hamomalola säi amo gadola hamoi.
MAT 21:7 Elea sugua dögi aseme üdïlile sigi maalahilä, amoledaia elele fagulo daia salugalo amo giila fösisebegi, Yesu e amoledaia fila fedai.
MAT 21:8 Amala fedala fise amo gaalu, udia dolö yafie gegedoi amolia ilile daia salugalo fagulo neala idiafa föla digi, odoaea fasela bäu gadoi dagabola gaula mafula föla digisa nelo.
MAT 21:9 Udia dolö gegedoi amoli Yesu awäse amo gadola dafidila awäha nelo amoliage, hobeala maaha nelo amoliage, uuala säsäla awähalea, Agua. Nesege. Godeïe ëi gauia adadi. Debidiïe malöma sähago. Afädë Dafidilo Geloiïe ëigila maahago Godea e neala obeägïlasimäia. Hosana. E ilibia neebe amoïe ëi gauia adadila säsäla afiai.
MAT 21:10 Yesu e Yalusaleme awäla besela galasebegi, udia dolö ami nefolalo amoli sulubadelaea fudugila bedälahilä sähalea, Dolö goweda nowëdula säha dilo.
MAT 21:11 Amala säha dibegi, udia dolö gegedoi amolia sähalea, Goda bea sälo Yesu. Eda Galili segeïe gaamu Nasalese dolömelëla säha dilo.
MAT 21:12 Yesu e awäla Godeïe mosö yala isogi nogila digalahilä beahamelebe, bidi neadigi, bidi nimolöïe negela digisa dibe amoli sulubadela nesila digisa nelo. Muni bedefalo auli amolige, amase, haea maliabu gadoi bidi neaha aligilo amolile filo auli amolige, neala besula besigadasi.
MAT 21:13 Ea ilima sähalea, Ado säla dëdëla negei dibe amea sähaleada, Nïe mosö amoda Godema adolo mosö dialeala sämolömelëla säla dëdëla negei dialea gaso, dilia fa nelo musügä aligilo igi äbä gadoi hamosebela säi.
MAT 21:14 Ea amala sälahilä Godeïe mosöa ami nebegi, si golaige emo nafadeige mofiasebegi, ea ili wahisa nelo.
MAT 21:15 Gobela ïlo busa nefolalo amoliage, mala dawadigi nefolalo amoliage, Yesuea hedabi hamose amo bealahiläge, amase, malësä nefolalo amolia Godeïe mosöamadila dägö digala sähalea, Agua. Nesege. Godeïe ëi gauia adadi. Debidiïe malöma sähagola säsebe amo nabalahiläge, ilia habobai.
MAT 21:16 Habobalahilä, ilia Yesuma nabahalea, Ilia säsego dia nabasebelela nabi. Amala nabasebegi, Yesuea ilima säla obëgësalea, Ä. Ado afädë säla dëdëla negei dibe amoda gomalä. Malësä nelësa amolige, malö dodo naha sefolalebe amolige, ilile nafiala dia dïe ëi gauia adamäia hedabolafalï oleleimelëla säla dëdëla negei dialea. Dilia ado amala säla negei dibe amo made melï nealela nabi.
MAT 21:17 Amala nabalahilä, Yesuea ili dïgïla gaamugi amila doadigila awäla Bedani midilö asi.
MAT 21:18 Diala yosefalï nowela, gaamugi obëgësalea e sïdëa baagoi.
MAT 21:19 Awähalea beahaleamelebe, idi agesua ami äfäeo afädë neebe beala, ea i mia ami bea awähamelebe, gägä afädë maade, bäu badumu neebe melï. Gägä maade beala, ea äfäeo amoma sähalea, Dia gägä hobeala dofä made negemäiamelëla säi. Amala säi amole, fodolofalï bausoi.
MAT 21:20 Bausosebegi, ïe bëgëla aulo amolia beala fudugilahilä nabahalea, Äfäeo amo fodolofalï bausoi amoda abeahäladula nabi.
MAT 21:21 Amala nabasebegi, Yesuea ilima säla obëgësalea, Na dilima dofä sähago. Asigi äudä negela made, asigi afädë negela aligiseda, äfäeoma na walio hamoi amo gadola, diliage hamomolömelë. Amoda afädë amomu made, dilia segebi neebe amoma dihï dagabola awäla, ödä duhulu daia digamola säseda, dilia säse amo gadola hamomolömelë.
MAT 21:22 Dilia Godema adosalea, asigi afädë negela, nelebo afädë ïmola ëdëgëseda, dilia ëdëgëse amo gadoi wäla nimolömelëla säi.
MAT 21:23 Yesu e Godeïe mosöa nogila digalahilä, ado mala säla olelesa nebegi, gobela ïlo busa nefolalo amoliage, udia dolöïe dafidilo asigi gäwi nefolalo amoliage, e neebea maalahilä ema nabahalea, Dia nelebo hamosebego, nowëa hamomalai hamosa. Nilïa nabedelä, dia säla ïmo. Go hamomäia, geloi go nowëa ïasiola nabi.
MAT 21:24 Amala nabasebegi, Yesuea ilima säla obëgësalea, Nage dilima ado afädë nabahago. Dilia säla obëgëseda, nelebo na hamosebeweda, gowea hamomalai hamosa neamelëla sämolömelë.
MAT 21:25 Yonea ödägi gesa nelo amoda abidila misi. Selesaia mosöala misile ma dolömadila misilela nabi. Amala nabasebegi, hilido didiähalea, Nilïa selesaia mosöalala säseda, ea nilïma nabahalea, Amai galëda, ema asigi afädë made negei goda edoïela nabulö gabu.
MAT 21:26 Amase, nilïa dolömadilala sämolö gaso, nilï udia dolöbalä bedäsebe. Mida, ili sulubadelaea helësësalea, Yone eda bea sälo nelola helësësa nefolaleala didiäi.
MAT 21:27 Amala didiälahilä, ilia Yesuma säla obëgësalea, Nilïa dawa mademelëla säla obëgëi. Dawa mademelëla säla obëgësebegi, ea ilima sähalea, Amai galëda, nage nelebo na hamosebewe gowea hamomalai hamosa neala dilima made säla ïmolömelëla säi.
MAT 21:28 Yesuea sähalea, Dilia edo helësësebe. Dolö afädë nelo amoïe malö äudä sulo. Dolö amea ïe malö abulümi amoma sähalea, Dia walio awäla gelebi sagaia hamoi hamosa namialola säi.
MAT 21:29 Amala säsebegi, malö amea ïe eedoma haboila sälahilä gaso, hobeala asigia degela oböla hamola asi.
MAT 21:30 Amasebegi, dolö amea ïe malö elö neebea ami awälahilä, elö amoma säi amo gadola wäla säi. Sälebe malö elö amea säla obëgësalea, Naado, hamola awähadiola sälahilä gaso, made awäla fisi.
MAT 21:31 Amai, eedo amea hamomaloi amo gadola, malö abodoea nabala hamoila nabi. Amala nabasebegi, ilia säla obëgësalea, Abulümiala säi. Amala säla obëgësebegi, Yesuea ilima säla obëgësalea, Na dilima dofä sähago. Dagisi muni nelo nefolalebe amoliage, idigi nawela susugu hamolo udia nefolalebe amoliage, dilida dïgïla, ilidale dafidila Godea Beaha Maadela Sigi Neebea ami afiahagomelëla säi.
MAT 21:32 Amoïe mida, Yone e dili neebea maalahilä, ea idi mogoifalï amo olesebegi gaso, dilia dofä gabula helësëla made nelomelë. Dagisi muni nelo amoliage, idigi nawela susugu hamolo udia amoliage, ea ado mala säsebe amo nabalahilä, ea säse amo dofä gabula helësëimelë. Ilia amala helësësebe amo, dilia bealahilä gaso, dilia asigi besula, dofä gabula helësëla made nelomelëla säi.
MAT 21:33 Yesuea sähalea, Ado besula elö säsebewe nabualo. Dolö sege eedo afädëa sagai sagala, yala amalela yalahilä yala amo dimelë. Yala isogi ami gelebi gägä emesala fësëla salimolöïe naga dögöi. Dögöla negesilahilä, sagai idihë nea beaha aligilo mosö holöbö ilibia ola fedalahilä negesi. Amala hamolahilä, ea dolö odoama sähalea, Sagai oodola beaha namialola säsilahilä, hï e sege wagadi made asimelë.
MAT 21:34 Gelebi gägä hä, faimolö segeyo ga madesebegi, sagai eedo amea ïe hamoi hamolasilo amoli mosalolahilä, sagai oodola beaha aligilo amolima ïe gägä odoa faila ïmola sämolö mosaloi.
MAT 21:35 Amala sämolö awäsebegi, sagai oodola beaha aligilo amolia hamoi hamolasilo amoli gaulahilä, elö amo nufudala ïalalei, elö amo nufudala baagoi, amase, elö amo igia nufi.
MAT 21:36 Amala hamosebegi, sagai eedo amea ïe hamoi hamolasilo odoa, dafidi fisiga gai amoli gadoi made, hobeala yafie fisiga gasebegi afiai. Gaso, sagai oodola beaha aligilo amolia, dafidi hamoi amo gadola wäla hamoi.
MAT 21:37 Hobeafalï, sagai eedo amea hïle malö amo fisiga gai. Eedo amea helësëlahilä sähalea, Iliada nïe malö we hawala nea, mogola hamomolöla helësësala säi.
MAT 21:38 Hïle malöfalï maase amo bealahilä, sagai oodola beaha aligilo amolia hilido didiähalea, Goda sagai eedo amoïe malöfalï gabugo. Eedoïe nalä negei nilïa nimolöïe, e nufidedila säla didiäi.
MAT 21:39 Amala sälahilä, ilia e gaula sagai amoïe yala baagido sadia gala nufudala baagoimelë.
MAT 21:40 Amoda amala hamoi amo, sagai eedo amea maalahilä, sagai oodola beaha aligilo amolima, edo hamomolö gabula nabi.
MAT 21:41 Amala nabasebegi, ilia ema säla obëgësalea, Ea dolö nafade amoli neala nafadela nufudadigimolömelë. Amalahilä, gägä faimolö fu besela galasolo amo gala, faila mogelo dolö amolia oodola beaha namiäia, sagai amo ilima ïmolömelëla säi.
MAT 21:42 Amala säsebegi, Yesuea ilima sähalea, Dilia ado säla dëdëla negei dibe amoda made melï neale. Mosö olelo amolia igi galone hamomolöi made gabula memelela fisi amoda, galone geloi dafidilo gelola besela galai neamelë. Dafidilo Geloia hamogilebeda, nilïa siia bealahilä fudugisa neala säla dëdëla negei dialea.
MAT 21:43 Amoïe na dilima sähago. Godea Beaha Maadela Sigi Neebe amo dili neebea guila neala gaula awälahilä, amoïe gägä negelo udia dolö amolima ïmolömelë.
MAT 21:44 Igi amodaia afädë digase amoda, igi amea dusudasila fisimolömelë. Amase, igi gowea, udia dolö eegeseda, hä eegela fisimolöi fisimolömelëla säi.
MAT 21:45 Amala säsebegi, gobela ïlo busa nefolalo amoliage, Felesi dolö nefolalo amoliage, ea ado besula säsebe amo nabalahilä, amoda ilile säsebela helësëi.
MAT 21:46 Ilia Yesu gaudeläla idi hogoi gaso, udia dolö nefolalebe amolia Yesuda bea sälo neala säha dibe amogi bedäi.
MAT 22:1 Yesuea ado besula ilima bu elö sähalea,
MAT 22:2 Hebeni Beaha Maadela Sigi Neebea amida gowe gadoi dialea. Beaha aligilo gini afädëa ïe malö udia neasebegi, molö giala daiala negei.
MAT 22:3 Daiala negesa maadelahilä, ea ïe hamoi hamolasilo amolima sähalea, Udia dolö giwi säi amoli walio misiäia bea mosaloi. Bea asi gaso, giwi säi amoli moholö haboi.
MAT 22:4 Habosebegi, ea hamoi hamolasilo odoama mosalolahilä sähalea, Na giwi säi amolima gomalä sämalo. Molö molö daiala negei dialea. Nïe sugua gao gawalige, üdïli säfei odoa hedabige giala dagabodasila negela, nelebo sulubadela daiala negei dialea. Udia neaseweïe molö molö misiäia säla ïmolö mosalola säi.
MAT 22:5 Säla ïmolö awäsebegi, giwi säi amolia nabalahilä gaso, auaula afiai. Dolö afädëda, hïle sagaia asi. Amase, elöda hïle sidua mosöa asi.
MAT 22:6 Odoa made asi amoliada, ïe hamoi hamolasilo amoli gaulahilä, nafadela nufudala baagoi.
MAT 22:7 Amala hamosebegi, beaha aligilo gini amea mihalälahilä, ïe ami dolö amoli mosalolahilä, ilia nufidelo dolö amoli nufudaha maadelahilä, ilile mosö gobesa maadei.
MAT 22:8 Amalahilä, ea ïe hamoi hamolasilo amolima sähalea, Molö giala daiala negei dialea gaso, na molö na misialola giwi säi amoli moholö amo dofea made gabu.
MAT 22:9 Idi osogoloa ami awälahilä, udia dolö gausiasebe amolima, udia neaseweïe molö molö misiäiala sämolö mosalola säi.
MAT 22:10 Amala säsebe amo nabala, hamoi hamolasilo amolia idigi awäla, udia dolö gausiai amoli sulubadela neala gegedoi. udia dolö nafadege hedabige molö molö maala, mosö amo nobai.
MAT 22:11 Udia dolö amoli maala sebegi, beaha aligilo gini amea mofiai sefolalebe amoli bimolöïe digalahilä beahamelebe, dolö afädë udia neahalea fagulo gälo amo made gäi misi sebe melï.
MAT 22:12 Amo bealahilä ea ema nabahalea, Nedoo, udia neahalea fagulo gälo amo made gäi goda, abilia misi saleala nabi. Amala nabasebegi, dolö amea ado säla obëgëla made sulo.
MAT 22:13 Ado made säla obëgësebegi, beaha aligilo gini amea ïe hamoi hamolasilo amolima sähalea, Ïe naabo emole helegela nafodolahilä, gasimi sagai dibea ami sadia idogomo. Amida, ili dïisalea bese ali nalëgësa namolömelëla säi.
MAT 22:14 Nabuö! Yafie wei gaso, afädë afädëla memelei amomu nogila digai gabiola säi.
MAT 22:15 Felesi dolö nefolalo amoli afialahilä ado afädë negemolöïe didiähalea, Yesuea ado säse amohï e gaumolöïe ado abilia säla oodomolödula didiäha dilo.
MAT 22:16 Amala didiälahilä, ilia ilile bëgëla aulo nefolalo amolige, Heledoïe sosogo nefolalo amolige, Yesu neebea mosaloi. Ili awäla ema sähalea, Säla Olelelo-o, nilïada dia ado dofämu sälola helësësamelë. Amase, dia Godeïe mala säla olelese goge, mogolafalï säla olelesa. Dia dolö odoabalä made bedälo ameada, dia mogolamu olelelola helësësamelë.
MAT 22:17 Amalo gabugi, dia helësësebe amo nilïma säla ïmäia. Beaha aligilo Gini Sisa neebe amomada, dagisi muni ïmolö dialeale ma maadelela nabi.
MAT 22:18 Amala nabasebegi, Yesuea ilile asigi nafade dibe amo helësëlahilä, ea ilima sähalea, Asigi fea negelola dilia, edoïe ne fedogola beaha.
MAT 22:19 Muni dagisi negelo giwi gogi nema olemola säi. Amala säsebegi, ilia muni giwi afädë gaula maala ema ï.
MAT 22:20 Ïasebegi, ea ilima nabahalea, Muni giwi egowegi dolö busa dibe gowege, ëi dëdëi dibe gowege, nowëïe gabula nabi.
MAT 22:21 Amalebe ilia sähalea, Sisaïela säi. Amala säsebegi, Yesuea ilima sähalea, Nelebo Sisaïeda Sisa hïma ïmalo. Godeïeda Gode hïma ïmalola säi.
MAT 22:22 Amala säi amo nabala ili fudugilahilä, e dïgïla bahïla afiai.
MAT 22:23 Segeyo amo galamu, Sadiusi dolö nefolalo amolia Yesuma afädë nabulöïe e neebea ami misi. Sadiusi iliada udia dolö baagoi amoli made nowemolöla sälo.
MAT 22:24 Ilia ema nabahalea, Säla Olelelo-o, Mosesea sähaleada, Dolö baagoi amea malö made sogobala baagoi galëda, baagoi amoïe edooea udia didalo amo bedefala nealahilä, edoo baagoi amoïe malö sogobamolö dialeala säla dëdëla negei dialea.
MAT 22:25 Amaimo, nilïgi edoolali gifalädalïa nefolalo amoligi, abulümi amea udia nii amo malö made sogobala baagosebegi, oböla ëoea amea udia amo nii.
MAT 22:26 Neala nea, amo gadola wäla hamosebegi, edoo agedu amoge, osoda amoge baagolebe, sosogo gifalädalïa amoli sulubadela baagola mimisa maadei.
MAT 22:27 Amala baagosa maadeibua, udia amo hobealafalï baagola wagai.
MAT 22:28 Amo gadola hamoi amo, ili sulubadelaea udia afädë amomu neala salea baagosa maadei. Amai, hobea baagoi nowela galasolo amo gala, udia amoda, dolö gifalädalïa amoligi afädë abodoweïe udia samolödula nabi.
MAT 22:29 Amala nabasebegi, Yesuea ilima säla obëgësalea, Ado säla dëdëla negei dibe amoge, Godeïe geloi dibe amoge, made dawadigi neebe goeada, dilia asiala helësëla säsebego.
MAT 22:30 Amoïeda, udia dolö baagoi amoli nowela galaseda, udiage made neala, dolöge made fila, Selesaia mosöa selesaia fii nefolalebe amoli gadoi namolömelë.
MAT 22:31 Amaimo, baagoi amoli nowemolö amoïe, Godea dilima ado säi dëdëi dibe amoda, aso, nidela made neale.
MAT 22:32 Ea sähalea, Neda Abalahama, Aisaga, Yeigabala ilile Gode neawela säi amo dëdëla negei dialea. Gode eda baagoi amolile Gode made, eda made baagoi nefolalebe amolile Gode neamelëla säi.
MAT 22:33 Udia dolö ami gegedoi nefolalo amolia ea ado säi amo nabala, asigigi fudugisa nefolalo.
MAT 22:34 Yesuea ado säi amea, Sadiusi ilia säla obëgëla made nefolaleamelëla säi amo nabala, Felesi dolö nefolalo amoli gegedolahilä,
MAT 22:35 ili sosogo amogi dolö afädë mala säla negei amo olelelo amea, Yesuea ado asiala säsebelela bimolöïe, ea ado afädë fedogola nabi.
MAT 22:36 Ea nabahalea, Säla Olelelo-o, Ado säla negei dibe amogi, nilïa hamomalai edefade dibe amoda abododula nabi.
MAT 22:37 Amala nabasebegi, Yesuea ema säla obëgësalea, Dafidilo Geloi dïe Gode neebe amo dïe bobaeage, gesamiage, asigiage, boba hamomalo.
MAT 22:38 Nilïa hamomalai dibe amoligi, edefade dafidilo gelolada amomelë.
MAT 22:39 Amase, agedu gowege amo gadoimelë. Dihïdi boba hamolo amo gadola, odoa dibalä nefolalebe amoli boba hamomalo.
MAT 22:40 Mosesea ado säla negei dibe amoge, bea sälo nefolalo amolia bea säla negei dibe amoge, amoli sulubadela ado äudä amolegimu begedidigila gosai dialeamelëla säi.
MAT 22:41 Felesi dolö amoli gegedoi nefolalebegi, Yesuea ilima nabahalea,
MAT 22:42 Afädë Memelei amoïeda, dilia abilia helësësa. Eda nowëïe malö neala nabi. Amala nabasebegi, ilia säla obëgësalea, Debidiïe malöla säi.
MAT 22:43 Amala säla obëgësebegi, ea ilima nabahalea, Amai galëda, Godeïe Gesamia Debidima helësëlasisebegi, Debidia oböla e Dafidilo Geloila säi amoda abiliadu. Debidiada gomalä säi.
MAT 22:44 Dafidilo Geloia nïe Dafidilo Geloima sähalea, Na dïe ado nii nefolalebe amoli di hawala namiäia, dida nïe naabo dafädimadi awäla salea, beaha samialola säi.
MAT 22:45 Debidia hï ema e Dafidilo Geloila säi galëda, eda Debidiïe malöda abeahäladula nabi.
MAT 22:46 Amala nabasebegi, afädëa ema ado säla obëgëmolöi made melï. Amasebegi, segeyo amila nofela, ili bedähalea, ema ado afädë nabala made nelo.
MAT 23:1 Hobeala, Yesuea udia dolö gegedoi amolimage, ïe bëgëla aulo amolimage
MAT 23:2 sähalea, Mala dawadigi dolö amolige, Felesi dolö amolige Moseseïe filodaia saleamelë.
MAT 23:3 Amaimo, ilia dilima ado säse amo sulubadela, dilia nabala bëgëla hamomolöi galea. Gaso, ilia mala hamose amo gadolada, dilia made hamomalo. Mida, hili made hamosalea, adoeamu sälo gabugi.
MAT 23:4 Iliada nelebo yöi gaumolöi made amo neegilahilä, häuala gaulo amo, dolöïe gïdädaia negesilo amogida, hilile naaboea didigila yöi amoli gaumolö made helësëlomelë.
MAT 23:5 Ilia nelebo sulubadela hamose amoda, dolöea bimäiala hamolo. Iliada nelebo salelo amogi ado damui dëdëla salalahilä, odagia baala, naabogige gälo. Ilia salelo sugua gafodo amoda bobogalamu gälo nefolalo. Ilia fagulo sedade gäi amoïe bidigi ëfë gadoi begedidigilo amoda, ilia ëfë sedadeamu begedidigilo nefolalo.
MAT 23:6 Iliada molö nasebea amige, gedolo mosöa amige, dafidilo filo dibea amimu fimolö hamelo.
MAT 23:7 Iliada magaia gaamugi, udia dolöea ilima, di go gabiola sämäiage, säla olelelola sämäiage hamelo.
MAT 23:8 Amalo gaso, dolöea dilima säla olelelola sämolöi mademelë. Mida, afädë emu dilile säla olelelo nea. Dili sulubadela didoo didoolali neamelë.
MAT 23:9 Amase, nagadaiawi neada, dolö afädëma dilile diadola sämabio. Mida, afädë emu dilile diado nea. Amoda selesaia mosöa neamelë.
MAT 23:10 Odoaea dilima dafidilo busala sämolöi mademelë. Mida, dilile Dafidilo afädë nea. Amoda Afädë Memelei neebe amo amomelë.
MAT 23:11 Dilile busa edefade neebe amolida, dilile hamoi ugila negela hamolasilo namolömelë.
MAT 23:12 Afädëa hï e ilibialo amoda, neala nagadaialasisalea, afädëa hï e nagadaialo amoda, ilibialasimolömelëla säi.
MAT 23:13 Yesuea ado aso, sähamu neamu sähalea, Asigi fea negelo, mala dawadigi dolöla, Felesi dolöla dili, asigii gabu. Mida, dilia Hebeni Beaha Maadela Sigi Neebea ami udia dolöïe odagia gala didigilo. Dihili dilida made nogila digahalea, dilia udia dolö nogila digadelä hamose amolile idi gala didigilomelë.
MAT 23:15 Asigi fea negelo, mala dawadigi dolöla, Felesi dolöla dili, asigii gabu. Dolö afädëamu dili bëgëla aulo namiäiaïe, dilida duhulu dibeamadige, sege föi dibeamadige nawesa aligilo. Amaimo, e hä bëgëla aulo aligiseda, e heli segeïe malö dili gadoi hamolasilo. Gasoda, ïe mala nafade amea dili baagila aulomelë.
MAT 23:16 Dihili dili si golai nea, dolö odoa nefolalebe amoli idi olelo nebego. Dili asigii gabu. Mida, dilia sähalea, Afädëa gobela ïlo mosöla säla, migalïa diigila ado gelola säla negeseda, amoda memalä melëlo. Gaso, afädëa gobela ïlo mosöa golola säla, migalïa diigila ado gelola säla negeseda, amoda ea säi amo gadola hamomolö dialeala sälo.
MAT 23:17 Dilida asigi maade, si golai gabu. Godeïe siigi hedabifalïda abodo. Golo amo hedabi gabule, ma gobela ïlo mosö amo hedabi gabule. Diliada dawa, goloda gobela ïlo mosöa dibe amoïe, Godeïe nafolala hamolo.
MAT 23:18 Amase, dilia elö sähalea, Afädëa gobela ïlo aulila säla, migalïa diigila ado gelola säla negeseda, amoge memalä melëlo. Gaso, afädëa auli amodaia nelebo odala ï amola säla, migalïa diigila ado gelola säla negeseda, amoda ea säi amo gadola hamomolö dialeala sälo.
MAT 23:19 Dilida si golai gabu. Godeïe siigi hedabifalïda abodo. Nelebo gobela ïlo amo hedabile ma, auli amo hedabile. Diliada dawa, nelebo gobela ïlo amo aulidaia dibe amoïe, Godeïe nafolala hamolo.
MAT 23:20 Amai gabugi, afädëa aulila säla, migalïa diigila ado gelola säla negeseda, eada auli amoge, nelebo sulubadela aulidaia dibe amoge säla, migalïa diigila ado gelola säla negelo.
MAT 23:21 Amase, afädëa gobela ïlo mosöla säla, migalïa diigila ado gelola säla negeseda, eada mosö amoge, mosö amogi aligilo amoge säla, migalïa diigila ado gelola säla negelo.
MAT 23:22 Afädëa selesaia mosöla säla, migalïa diigila ado gelola säla negeseda, eada Godeïe beaha aligilo filo amoge, filo amodaia sebe amoge säla, migalïa diigila ado gelola säla negelo.
MAT 23:23 Asigi fea negelo, mala dawadigi dolöla, Felesi dolöla dili, asigii gabu. Mida, nelebo nelësa sagaia neebe amo sulubadela amogi, nabülasi mogelahilä, nabü afädë neala Godegali ïlo. Gaso, Ado säla negei dibe amogi ado edefadeda, dilia buludola fisi gabu. Buludola fisi amolida gowe ili. Mogola hamologe, bobasëla ugila negeloge, amase, asigi afädë negeloge buludola fisigoea. Nabü afädë Godegali ïlo dafidi säi amo made fisila, dilia ado edefade amoli hahamosa nelo galebeda, dofealabio.
MAT 23:24 Dihili dili si golai nea, dolö odoa nefolalebe amoli idi olelo nebego. Diliada molö gobei nahalea, eeme nelësa seëgi, amo neadigilo gaso, molö gobeigi sugua gamele seëgi, amola wäla sübä dëgïlomelë.
MAT 23:25 Asigi fea negelo, mala dawadigi dolöla, Felesi dolöla dili, asigii gabu. Diliada gaaboge faloge daia baagido gomu hëlo gabu. Gaso, isogida dilia dihilile asigi made sigi aligila, molö fa nelo amea nobai gabumelë.
MAT 23:26 Felesi si golai di, gaabo isogi dafidi nigime hëmalo. Amala hamoseda, daia baagido goge gëgelë baai made bimolömelë.
MAT 23:27 Asigi fea negelo, mala dawadigi dolöla, Felesi dolöla dili, asigii gabu. Dilida baagoi bauia beni faleia hëi amo gadoi gabu. Baui daia amoda hedabifalï beaha gaso, isogi dolö baagoi amolile giwi amoge, nelebo sulubadela nigime baala nobai dialea.
MAT 23:28 Amo gadola wäla, dilile domalo beala udia dolöea asigisaleada, dilida dolö mogoi gabula asigilo. Gaso, dilile isogida asigi fea negeloge, mala nafademu hamologe nobai gabugo.
MAT 23:29 Asigi fea negelo, mala dawadigi dolöla, Felesi dolöla dili, asigii gabu. Diliada bea sälo amoli baulo mosö amo olalahilä, dolö mala mogoi hamolo amoli baulo mosö amoge momadolo gabio.
MAT 23:30 Dilia sähalea, Nilïda nilïle mäulali nefolalo amogi nelo galebeda, nilïa ilile heale made digala, bea sälo ili ugila negelabiola sälo.
MAT 23:31 Dilia amala sälo amea olesalea, dilida bea sälo nufidelo amolile malö gabula olelomelë.
MAT 23:32 Ameada dilige dilile diadola ilia mala hamolo amo gadola, hamola wagamalo.
MAT 23:33 Dilida baagolo nubage, nubaïe malöge nebego. Godea dilibalä gudisegi, dili heli segea moholö amoda abeahäla sisigala moholö gabu.
MAT 23:34 Amai gabugi, nabuö. Na bea säloge, dolö asigi falagaseige, amase, mala dawadigi dolöge dilima fisiga gamolömelë. Odoada dilia nufudala baagola, odoada i fügäigi baala negemolömelë. Amase, odoada dilile gedolo mosöa ami fëgälahilä, ili nesila gaamu afädëgila doadigila awäla, gaamu elögi nesila fisiga gamolömelë.
MAT 23:35 Amoïe mida, dolö mogoi nagadaiawi nefolalo odoaea nufi amoli sulubadelaïe heale digai amoda dilimamu diamolömelë. Mi gäwila dolö mogoi Aibeledale heale digaia amila maala, Belegaeaïe malö Segelaeage, dolö dilia gobela ïlo mosöle gobela ïlo aulile adeba ami nufi amoïe heale digaia ami, ili sulubadelaïe heale digai amoda dilimamu diamolömelë.
MAT 23:36 Na dilima dofä sähago. Nafade egoweli sulubadela hamoi amoïe bidi nimolö amoda, udia dolö walio nefolalebe welia nimolömelëla säi.
MAT 23:37 Yesuea ado aso, sähamu neamu sähalea, Yalusaleme-e, Yalusaleme-e, bea sälo nefolalo amoli nufudala baagologe di. Amase, dolö digali fisiga wei amoli igia nufideloge di. Haea gagalugoea ïe malö augia hawa gafedela musügä negelo amo gadola, segeyo aboläiagi, na dïe malö goli gafedela gegedolasideläi gasoda, dihili habosio.
MAT 23:38 Nabuö. Godea dilile mosö dïgïla awäseda, mosö amo memalä diamolömelë.
MAT 23:39 Na dilima sähago. Dilia ne bu elö made beala nelolahilä, dilia sähalea, Afädë Dafidilo Geloiïe ëigila maahago, Godea e neala obeägïlasimäiala säsolo amo gala, dilia ne bimolömelëla Yesuea säla ï.
MAT 24:1 Yesu e Godeïe mosöamadila awäha nebegi, ïe bëgëla aulo amoli e neebea ami maalahilä, ilia ema, Godeïe mosö amoli bimola säi.
MAT 24:2 Amala säsebegi, ea ilima säla obëgësalea, Egoweli beahale. Na dilima dofä sähago. Igi elö daia dadagulula fedai golida, sulubadela mugulula digaha maademolömelëla säi.
MAT 24:3 Yesu e Olibebidaia sebegi, ïe bëgëla aulo amoli hilidomu maalahilä ema nabahalea, Dia nilïma säla ïmo. Dia säi amo abola besela galamolödu. Dafidi nelebo edodale besela galasegi, nilïa amo beala, di hä, ulufadigimolö amoge, aligila wagamolö amoge, ga made gabula helësëmolöla nabi.
MAT 24:4 Amala nabasebegi, Yesuea ilima säla obëgësalea, Odoaea dili dahila neloea, idihë namialo.
MAT 24:5 Mida, dolö yafie maalahilä nïe ëi säla, Afädë Memelei Geleso amoda ne misi neawela sälahilä, udia dolö yafie dahila nimolö moholömelë.
MAT 24:6 Amase, sege ga madefalï nudusalea ado goba nabase amogige, sege wagadi made nudusalea wabula säse amo nabase amogige, dili fudugila bedäloea, asigi sigi namialo. Nelebo amala hamomolö dialea gasoda, amo aso, aligila wagamolö mademelë.
MAT 24:7 Fii elöle elöle nudula digi, gamane elöle elöle nudula digisa namolömelë. Amase, sïdë iige, fogolige sege odoagi moholömelë.
MAT 24:8 Nelebo amoli sulubadela hamomolö amoda, udiaea malö ägümolö salea, mi gäwila sëlo amo gadoi bimolömelë.
MAT 24:9 Amo gala, dili nïe ëigi nefolalebego beala, udia dolö fii odoa amoli sulubadelaea dilima bimolö habobalahilä, dili neala sëlasila nufudala baagomolömelë.
MAT 24:10 Segeyo amo gala, yafiea nema asigi afädë negei amo dïgïla awälahilä, ilia hilimu bimolö habobala, odoama gaula ïmolömelë.
MAT 24:11 Amase, wäfalï bea sälo yafiege maalahilä, udia dolö yafie dahila nimolömelë.
MAT 24:12 Mala nafade edese amea, udia dolö yafiea boba hamolo amo gögïla badilimolömelë.
MAT 24:13 Amamolö gaso, afädëa aso maadelahilä, wagamäiala gelola aligiseda, e damula moholömelë.
MAT 24:14 Fifi asi sefolalebe amoli sulubadelaea nabaha maademäia, Godea Beaha Maadela Sigi Neebe amoïe Ado Mala Hedabi amo ilia sege föi sulubadelagi nefolalebe amolia nabuäia säla daidosa maademolömelë. Amala säla daidosa maadeseda, aligila wagamolömelëla säi.
MAT 24:15 Yesuea ado aso, sähamu neamu sähalea, Amamolö gabugi, dilia bea sälo Danialoea nelebo yöi ayägöloi amoïe säla negei amo Godeïe mosöa ami dië bimolömelë. (Ado egowe nidese ameada hedabola helësëmalo)
MAT 24:16 Yudia segea sefolalebe amolida, segebi dibea ami fisäla baluluia afufumalo.
MAT 24:17 Amo gala, afädë mosö fïgïdaia sebe amea digalahilä, mumusogi ïe nelegei nea digamabio.
MAT 24:18 Amase, afädë sagaia neebe amea, fagulo daia salugalo negei amo mosöa nea obëgëmabio.
MAT 24:19 Segeyo amo gala, udia fagulo hagui sefolalebe amolige, malö dubo dodo ïaha sefolalebe amolige, asigii gabu.
MAT 24:20 Fisäla moholö amoda i bäu giisalea gögï mulo segeyo amo gala galëge, hele filo segeyo Sabada gafegi galëge muloea, dilia Godema adosa namialo.
MAT 24:21 Mida, segeyo amo gala, yöi edefade elö elöla yafie maala negei dië bimolömelë. Sege föi dibe sulubadela mi gäwila hamoia amila yöi amo gadoi made melï. Amase, hobealage amo gadoi bu elö made bimolömelë.
MAT 24:22 Amaimo, yöi segeyo amo Godea made obobagilasi galebeda, udia dolö sulubadela baago geia awälabio. Amalabio gaso, udia dolö hï memelei amoli helësëla, segeyo amo obobagilasimolömelë.
MAT 24:23 Segeyo amo gala, afädëa dilima sähalea, Bimo. Afädë Memelei amo misi neala säsege, gagowei misi neamelëla säsege, dofä gabula helësëmabio.
MAT 24:24 Amoïe mida, wäfalï Afädë Memelei gadoi odoage, wäfalï bea sälo odoage moholömelë. Amala maalahilä, ilia udia dolö Godea memelei nefolalebe amoli dahila neala hamomabelela bimolöïe, dolöea dofä hamomolöi made gadoige, hïdo elöige hamosa namolömelë.
MAT 24:25 Nabuö. Amo made hamola neebe amo gaalu, na dilima säla ïahagomelë.
MAT 24:26 Amaimo, afädëa dilima sähalea, Nabuö. Sege udia dolö aligilo made dibea ami neala säseda, ami mosabio. Amase, afädëa sähaleada, Mosö hogoli afädëgi nogila digai saleala säseda, dofä gabula helësëmabio.
MAT 24:27 Mida, sege yabagelela eso maasidola maala, eso digasidoge yo digalo amo gadola, Dolöïe Malö amo ulufadigisolo amo gala, amo gadola wäla ulufadigimolömelë.
MAT 24:28 Baagoi domalo dibea ami haea säsalï gadoi maala gegedomolömelëla säi.
MAT 24:29 Yesuea ado aso, sähamu neamu sähalea, Segeyo amogi yöi yafie elö elöla amo hamosa maadei amole, eso usila, aube made neëla, amase, gasumilï mudaiala besela didigafulahilä, muugi nelebo geloi hïdo elöi amoge neala fogolasimolömelë.
MAT 24:30 Amala hamosegi, Dolöïe Malö amoïe nofe elöi amo mudaia ulufadigisegi, sege dibe sulubadelagi nefolalebe amoli didigaomolömelë. Ilia beahalea, Dolöïe Malö amo geloi amole, yo digalo hïdo elöifalï amolebalä, mu baidilidaia maala neë bimolömelë.
MAT 24:31 Amase, fuuloea gelola fuuse amo gaalu, ea ïe selesaia fii amolima mosalolahilä, udia dolö hï memelei sege föi sulubadelagi, agesu näiado nefolalebe amolige, näiado nefolalebe amolige, neala gegedolasimalola sämolömelëla säi.
MAT 24:32 Yesuea ado aso, sähamu neamu sähalea, Diliada äfäeoïe mala amogi helësëmalo. Äfäeo fësëgësisila, bäu gähe bobagiseda, dilia helësësalea, sege esomolöda ga made gabula helësëlomelë.
MAT 24:33 Amo gadola wäla, nelebo sulubadela säsewe gadoi hamose dilia beaseda, amoda hä, ga made, suägïsa gabula helësëmalo.
MAT 24:34 Na dilima dofä sähago. Udia dolö walio nefolalebego baagola made nefolalegi wäla, nelebo säi amoli sulubadela hamosa maademolömelë.
MAT 24:35 Mu giwige, naga föige hogosa helemolö gaso, nïe adoda dofä made hogosa helemolömelëla säi.
MAT 24:36 Yesuea ado aso, sähamu neamu sähalea, Amala hamomolö amoda segeyoge, aoage afädëa dawa mademelë. Selesaia fii iliage, Malöeage dawa mademelë. Naadoea hïdomu dawadigi neamelë.
MAT 24:37 Dolöïe Malö ulufadigisolo amo gala, Noaïe segeyogi hamoi amo gadola wäla hamomolömelë.
MAT 24:38 Ödä bëi made maala nebegi, ilia molö ödäge nadigi, udia neadigi, dolö fila awäla digisa nebegi, Noa ödä sibigi fila fedamolö segeyo amo besela galaimelë.
MAT 24:39 Ilia dawa made nebegi, ödä bëi maala ödäea sulubadela mai. Dolöïe Malö ulufadigisolo amo galage, udia dolöea amo gadola wäla hamosa namolömelë.
MAT 24:40 Segeyo amo gala, dolö äudä sagaia neëgi, elö amo neahalea, elö amo dïgïla moholömelë.
MAT 24:41 Udia äudä wahalo däilaha neëgi, elö amo neahalea, elö amo dïgïla moholömelë.
MAT 24:42 Amai gabugi, dilile Dafidilo segeyo gomo gala moholö gabula, dilia dawa made ameada, dilias idihë namialo.
MAT 24:43 Ado gowe helësëmalo. Mosö eedoea fa nelo dolö gasigi gowe gala moholöla helësëi galebeda, ea idihë neëgi, ïe mosö dagabola fa nea digamäia fu made ïalabiomelë.
MAT 24:44 Amai amea, Dolöïe Malö moholö amoda, dilia gowe gala moholö gabula helësëi made neëgi, e moholö ameada, diliage daiaha namolö dialeala säi.
MAT 24:45 Yesuea ado aso, sähamu neamu sähalea, Hamoi hamolasilo asigi falagaseige, nulügäige neebe amea, ïe dafidiloea hïle mosöa hamoi hamolasilo odoa sigi namiäia, ilile molö segeyo hï daiala negeifalïgi mogela ïlo amoda abodowedu.
MAT 24:46 Ïe dafidilo amo maalahilä beahalea, hamoi hamolasilo amea, hamoi amo gadola wäla hamosa neë beaseda, hamoi hamolasilo amo obeägïsa namolömelë.
MAT 24:47 Na dilima dofä sähago. Dafidilo amea hamoi hamolasilo amoma ïe nelegei sulubadela sigi namialamolömelë.
MAT 24:48 Amaimo, hamoi hamolasilo nafadea asigiamu helësësalea, nïe dafidilo aso, deegela, fodolo made moholöledula helësëlahilä,
MAT 24:49 ea hamoi gaalu hamolasilo nefolalebe amoli nufudala, gagaolo ödä nülo dolöbalä molö ödäle naha aligilomelë.
MAT 24:50 Amai gabugi, hamoi hamolasilo amea e segeyo gowegi, aoa gowegi moholöla helësëi made neëgi, ïe dafidilo amo moholömelë.
MAT 24:51 Maalahilä, ea hamoi hamolasilo amo neala nafademolöi nafadelasila, e asigi fea negelobalä namialamolömelë. Amida, ili dïisalea bese ali nalëgësa namolömelëla säi.
MAT 25:1 Yesuea ado aso, sähamu nea sähalea, Hebeni Beaha Maadela Sigi Neebe Segeyo amoïeda, Udia dodola nabülasia ilile elamu amoli neala gaula, udia nimolö dolö amo gausiamolöïe afiai amo gadoimelë.
MAT 25:2 Udia amoligi biada asigi maade, amase, biada asigi gäwi.
MAT 25:3 Udia asigi maade amoliada, ilile elamu gaula afiai. Gaso, amobalä weli osala nafolala, gaula made afiai.
MAT 25:4 Amasebegi, udia asigi gäwi amoliada, weli ödä iigi söga salala , ilile elamubalä nafolala gaula afiai.
MAT 25:5 Udia nimolö dolö amo fodolo made maasebegi, ili süwiala waolahilä, sulubadela adidi difolalo.
MAT 25:6 Gasi mogogifalï, afädëa uuahalea, Uuaa. Udia nimolö dolö amoda hä, misi gabio. E gausiamolöïe afiamalola uuai.
MAT 25:7 Amala uuasebegi, udia dodola amoli sulubadela nowelahilä, ilile elamu amoli hahamogilahilä gaui.
MAT 25:8 Amasebegi, asigi maade amolia asigi gäwi amolima sähalea, Dilia weli gogi nilï gögödëla ïmo. Nilïle elamu usidelä hamosebela säi.
MAT 25:9 Amala säsebegi, asigi gäwi udia amolia säla obëgësalea, Ai. Weli wegida dilila nilïlada dofea made. Bidi neasia ami awälahilä, dilida dihilile bidia nimolö mosalola säi.
MAT 25:10 Amala säsebegi, ili weli nea asi amo gaalu, udia nimolö dolö amo besela galai. Amasebegi, daiai udia amolida ebalä awäla, udia neahalea molö edefade nasebea ami nogila digala sebegi, idi gai.
MAT 25:11 Hobeala, udia dodola odoa amoli maala, ilia sähalea, Dafidilo, dafidilo, nilï idi gai dogasimola säi.
MAT 25:12 Amala säsebegi, ea säla obëgësalea, Na dilima dofä sähago. Dilida na dawa madela säi.
MAT 25:13 Amamolö gabugi, dilia segeyoge aoage dawa made neebe ameada, idihë namialola Yesuea säi.
MAT 25:14 Yesuea ado aso, sähamu nea sähalea, Hebeni Beaha Maadela Sigi Neebea amida, gowe gadoi diamolömelë. Dolö afädëa e sege wagadi made moholö awähalea, ïe hamoi hamolasilo amoli misialalahilä, ilia ïe nelegei sigi namiäiaïe, ilile naabogi gausisi.
MAT 25:15 Ea afädëma muni giwi siliba dausini bia ï. Elömada muni giwi dausini äudä ï, amase, elömada dausini afädëfalï ï. Ilile asigi dibe amo gadola, afädë afädëlama muni sogola gausisi. Amala hamola negesilahilä, e asi.
MAT 25:16 Asi bua, dolö dausini bia nelo amea, fodolofalï awäla bisinesi hamosa nea, dausini bia elö neala baai.
MAT 25:17 Amase, dolö dausini äudä nelo ameage, amo gadola hamolahilä, dausini äudä elö neala baai.
MAT 25:18 Amai gaso, dolö dausini afädë nelo ameada, e awälahilä ïe dafidiloïe muni giwi dausini amo naga dögölahilä, naga isogi musügä negesi.
MAT 25:19 Segeyo holöbö ede nelolahilä, hamoi hamolasilo amolile dafidilo amo obëgëla, ea muni ï amoïe, ilibalä ado fädäla sämolöïe misi.
MAT 25:20 Dolö muni giwi dausini bia nelo amea, dausini bia elöge baala nii amo gaula maala nea sähalea, Dafidilo, dia negali dausini bia ï. Ameada, na dausini bia elö neala baai amo gowemelë.
MAT 25:21 Amala sälebegi, ïe dafidilo amea ema sähalea, Hamoi hamolasilo hedabi-e, dia hamoi hedabolafalï hamoi gabu. Dida asigi nulügäi. Dia nelegei holöfalï go hedabola madëlela sigi nelo goeada, dia nelegei edefade sigi namiäiaïe ïmolömelë. Di nebalä obeägïsa namolöïe misiëla säi.
MAT 25:22 Amala säsebegi, dolö dausini äudä nelo ameage maala nea sähalea, Dafidilo, dia negali dausini äudä ï. Ameada, na dausini äudä elö neala baai amo gowemelë.
MAT 25:23 Amala sälebegi, ïe dafidilo amea ema sähalea, Hamoi hamolasilo hedabi-e, dia hamoi hedabolafalï hamoi gabu. Dida asigi nulügäi. Dia nelegei holöfalï go hedabola madëlela sigi nelo goeada, dia nelegei edefade sigi namiäiaïe ïmolömelë. Di nebalä obeägïsa namolöïe misiëla säi.
MAT 25:24 Amala säsebegi, dolö muni giwi dausini afädë nelo ameage maala nea sähalea, Dafidilo, dida dolö aabela habobalo amo na dawa. Dia made sagaia amida, dia molö nelo. Sege dia molö gägä made fëfëia amige, diada molö gegedola negelo.
MAT 25:25 Amalo ameada, ne bedähalea. Ne awäla, dïe muni giwi amo na naga dögöla negei. Dïe muni amoda gowemelë.
MAT 25:26 Amala säsebegi, ïe dafidilo amea ema säla obëgësalea, Hamoi hamolasilo nafade di, dida habobame. Dia helësësalea, sagai na made sagaia ami na molö nelo, amase, sege na molö gägä made fëfëia amige, nada molö gegedola negelola helësëile.
MAT 25:27 Amala helësëi galëda, dia bëgi dolöbalä nïe muni negesi galebeda, ne obëgëla maala, baai muni amola nealabio.
MAT 25:28 Amai amea, muni giwi dausini afädë ea gaula neebe go neala, dausini nabülasi galebe amogali ïmalo.
MAT 25:29 Amoïeda, sulubadelaea nelebo afädë gaula neebe amolimada, odoa baala ïasegi, yafie gaula namolömelë. Gaso, afädëa nelebo afädë made gaula neebe amomada, holöfalïmelë gaula neebe amo haila nimolömelë.
MAT 25:30 Hä, hamoi hamolasilo nafade goda sege gasimi sagai dibea ami sogobala sadia idogomalo. Amida, ili dïisalea bese ali nalëgësa namolömelëla säila säi.
MAT 25:31 Yesuea ado aso, sähamu nea sähalea, Dolöïe Malö amo, ïe yo digalo hïdo elöi salugalahilä, selesaia fii sulubadelabalä maasolo amo gala, e ïe beaha aligilo filo hedabi hïdo elöidaia samolömelë.
MAT 25:32 Fifi asi sefolalebe amoli sulubadela, ïe odagia maala gegedolasisegi, sigi aligilo ilia sugua sibile sugua memele nafolala mogelo amo gadola, eada udia dolö mogela,
MAT 25:33 sugua sibida dafädimadi negela, sugua memeda fefeädimadila negemolömelë.
MAT 25:34 Amo gala, beaha aligilo Ginia ïe dafädimadi nefolalebe amolima sähalea, Nïe Naadoea neala obeägïlasi dili-e, dili misië. Godea Beaha Maadela Sigi Neebea ami digamalo. Amoda sege föi dibe sulubadela mi gäwila hamoia amila dilile daiai dilo.
MAT 25:35 Mida, ne sïdëa baagoi nebegi, dilia ne molö ï. Ne ödä haläi nebegi, dilia ne ödä ï. Amase, ne näiadodi dolö gabugi, dilia ne mosöa sigi asi.
MAT 25:36 Ne fagulo maade nebegi, dilia ne fagulo ï. Amase, ne oloi dibegi, dilia ne sigi nelo. Ne galabaia mosöa nebegige, dilia ne bea misila sämolömelë.
MAT 25:37 Amala säsegi, mogola hamolo nefolalo amolia ema säla obëgësalea, Dafidilo Geloi-e, di sïdëa baagoi nebegi, nilïa abola beala, di molö ïasio. Di ödä haläi nebegi, nilïa abola di ödä ïasio.
MAT 25:38 Amase, di näiadodi dolö nebegi, nilïa abola di mosöa sigi awäsio. Di fagulo maade nebegi, nilïa abola digali fagulo ïasio.
MAT 25:39 Amase, di oloi dibegige, galabaia mosöa nebegige, nilïa di abola bea awäsiola nabulömelë.
MAT 25:40 Amala nabasegi, Gini amea ilima säla obëgësalea, Na dilima dofä sähago. Dilia nelebo sulubadela nïe nedoolaligi afädë holöbö gidogofalï neebe amoma hamoi amoda, dilia nema hamoila sämolömelë.
MAT 25:41 Amala säsegi, ea fefeädimadi nefolalebe amolima sähalea, Nemola fisi udia dolöla dili, dilida ne neebeawi made, bahïla afiala, nulo usilo made dibea ami moholö mosö. Nulo amoda mugabe busa amoïege, ïe hamoi hamolasilo amolilege daiai.
MAT 25:42 Mida, ne sïdëa baagoi nebegi, dilia ne molö made ï. Ne ödä haläi nebegi, dilia ne ödä made ï.
MAT 25:43 Amase, ne näiadodi dolö gabugi, dilia ne mosöa made sigi asi. Ne fagulo maade nebegi, dilia ne fagulo made ï. Amase, ne oloi dibegige, galabaia mosöa nebegige, dilia ne made bea misila sämolömelë.
MAT 25:44 Amala säsegi, iliage naba obëgësalea, Dafidilo Geloi, di sïdëa baagoi nebegige, di ödä haläi nebegige, di näiadodi dolö gabugige, di fagulo maade nebegige, di oloi dibegige, amase, di galabaia nebegige, nilïa amo abola bealahilä, di made ugila negesiola nabulömelë.
MAT 25:45 Amala nabasegi, ea ilima säla obëgësalea, Na dilima dofä sähago. Dilia nelebo sulubadela afädë holöbö gidogofalï neebe amoma made hamoi amoda, dilia nema made hamoila sämolömelë.
MAT 25:46 Amai gabugi, ilida së nahamu namolöia ami moholömelë. Gaso, mogoi hamolo amolida namolöi namolö dibea ami moholömelëla Yesuea säla wagai.
MAT 26:1 Yesuea ado amoli sulubadela säha maadelahilä, ïe bëgëla aulo amolima sähalea,
MAT 26:2 Segeyo äudä nelolahilä, Baagila Asi Segeyo besela galamolö amoda dilia dawa. Hä, Dolöïe Malö amo i fügäigi baala negemäia, odoaïe naabogi gausimolömelëla säi.
MAT 26:3 Segeyo amo gala, gobela ïlo busa nefolalo amolalige, Isilale udia dolöïe dafidilo dolö asigi gäwi nefolalo amolalige, gobela ïlo busa edefade amoïe mosöa ami gegedoi. Ïe ëida Gaiafasa.
MAT 26:4 Ilia Yesu e nufudala baagomolöïe abeahämola oodolahilä, e gaumolödula säla didiäha difolalo.
MAT 26:5 Ilia sähalea, Segeyo Edefade amoïe gedosolo amo gala amamolö gaso, amo gala made, udia dolöea gelola üala dodogöla nilïbalä nuduloeala säi.
MAT 26:6 Yesu e sege Bedani ami, Saimono gudubu hamoi ea dafidi wahi amea mosöa ami sebegi,
MAT 26:7 udia afädëa weli hedabi gafisigäi hïdo elöi muni edefadea nelo amo gaula, e sebea ami misi. Yesu e ami molö naha sebegi, udia amea weli ödä i igia hamoigi osala negei dilo amo, ïe busagia söga negei.
MAT 26:8 Amala hamoi amo, ïe bëgëla aulo amolia bealahilä, ilia habobala sähalea, Faeagasebegoda edoïedu.
MAT 26:9 Ameada bidi edefade nealahilä, muni amo busadäoigali ïalabiola säi.
MAT 26:10 Yesuea ilia habobasebe amo dawadigi nea, ea ilima sähalea, Dilia e edoïe yölasisa. Eada nema mala hedabi hamosebemelë.
MAT 26:11 Busadäoi amolida dilibalä namolöi namolömelë. Gaso, neda dilibalä namolöi namolö mademelë.
MAT 26:12 Udia amea nïe domalogi weli söga negei amoda, ne baumolö amoïe daiala hamoimelë.
MAT 26:13 Na dilima dofä sähago. Ado Mala Hedabi gowe sege föi sulubadelagi säla olelesaleada, e helësëla, ea hamoi amoge säla ïmolömelëla säi.
MAT 26:14 Giwilasi amoligi afädë, ïe ëida Yudasa Isagaliada, e gobela ïlo busa neebea ami awälahilä,
MAT 26:15 ea nabahalea, Na e dilile naabogi gausideläïe, diliada negali edo ïmolö gabula nabi. Amala nabasebegi, ilia muni giwi siliba nabülasi ohodoa nidelahilä, egali ï.
MAT 26:16 Segeyo amila nofela, ea Yesu e ilile naabogi gausimolöïe fu hogosa nelo.
MAT 26:17 Segeyo Edefadegi beledi edelo yidila made gobela molö amoïe segeyo bu agesolo amo gala, bëgëla aulo amoli maalahilä, Yesuma nabahalea, Baagila Asi Segeyo amoïe molö molö amo, diada, nilïa abidi daiamäia hamesebela nabi.
MAT 26:18 Amala nabasebegi, Yesuea ilima sähalea, Gaamugi awälahilä dolö amoma gomalä sämalo. Säla Oleleloea sähalea, Nïe fuda hä, ga made gabugi, nïe bëgëla aulolali, Baagila Asi Segeyo amoïe molö molö amo ne dibalä nuduläla säila sämalola säi.
MAT 26:19 Amala säsebegi, bëgëla aulo amolia Yesuea säi amo gadola hamola, Baagila Asi Segeyo amoïe molö molö amo daiai.
MAT 26:20 Deadifalï, Yesu e giwilasi amolibalä molö naha sefolalo.
MAT 26:21 Ili molö naha sefolalea, ea sähalea, Na dilima dofä sähago. Dili sebegogi afädëa ne hololöla odoaïe naabogi gausimolömelëla säi.
MAT 26:22 Amala säsebegi, ilile asigia edefade yöia idogolahilä, hïdo hïdolaea ema säla didigahalea, Dafidilo Geloi-e, nale, ma nalela säla didigai.
MAT 26:23 Amala säla didigasebegi, Yesuea säla obëgësalea, Dolö nebalä falogi naabo gaalu digai ameada, ne hololöla odoaïe naabogi gausimolömelë.
MAT 26:24 Ïe säla dëdëla negei dibe amo gadola, Dolöïe Malöda baagomolö. Gaso, Dolöïe Malö e hololöla odoaïe naabogi gausise dolö amoda, asigii gabumelë. E emea made neegela ägüi galebeda, e hedabi aligilabiomelëla säi.
MAT 26:25 Yudasa, e hololöla odoaïe naabogi gausimolö amea nabahalea, Säla Olelelo-o, nalela nabi. Amala nabasebegi, ea ema sähalea, Dihï säse gomelëla säi.
MAT 26:26 Ili molö naha sefolalea, Yesuea beledi afädë nealahilä, Godema nesegei. Nesegelahilä, ea beledi dagabodasila, bëgëla aulo amoligali ïahalea, Goda nïe domalomelëla säi.
MAT 26:27 Amala sälahilä, ea gaabogi usi amo neala gaula nea, Godema nesegelahilä, iligali ïahalea, Dili sulubadelaea go hä, gobe dadagabola mualo.
MAT 26:28 Goda nïe healemelë. Asialo made ado elöi säla negemolöïe healemelë. Nafade hamoi amoli hëmäia, udia dolö yafiegali besigahawe.
MAT 26:29 Na dilima sähago. Segeyo wila nofela, ne wani ödä bu elö made naala nelolahilä, Naadoea Beaha Maadela Sigi Neebea ami nea, dilibalä bu elö molömelëla säi.
MAT 26:30 Amala sälahilä, ilia gë afädë udälahilä, Olibebia afiai.
MAT 26:31 Olibebia afiahalea, Yesuea ilima sähalea, Walio gasigi, dili sulubadelaea, nema hamosebe amo beahalea, dilile asigi afädë negeigo digamolömelë. Mida, ado säla dëdëla negei dibe amea sähaleada, Na sugua sibi sigi aligilo nufudasegi, sugua sibida fisäla dusudasila afufumolömelëla säla dëdëla negei dialea.
MAT 26:32 Amamolö gaso, ne nowelasisegi, na dili baagila, nedale Galili moholömelëla säi.
MAT 26:33 Amala säsebegi, Fidaea ema säla obëgësalea, Dima hamosebe amo bealahilä, sulubadelaïe asigi afädë negei amo digaseda, neda dofä made amamolömelëla säi.
MAT 26:34 Amala säsebegi, Yesuea ema sähalea, Na dima dofä sähago. Walio gasigi gagalugo gawalia made gäla neëgi, dia ne dawa madela nafi bu ohodoala sämolömelëla säi.
MAT 26:35 Amala säsebegi, Fidaea ema sähalea, Neda dibalä gaalu baagomolö galëda, na di dawa madela dofä made sämolömelëla säi. Ïe bëgëla aulo amoli sulubadelaeage amalamu säla didigai.
MAT 26:36 Yesu e ilibalä sege ëi Gesemani besela galalahilä, ea bëgëla aulo amolima sähalea, Ne holöbö gasi gala Godema adose gaaluda, dili wi sefolamialola säi.
MAT 26:37 Amala sälahilä, Fidage, Sebediïe malö äudä amolege, ea ili sigi awälahilä nea, ïe iso asigia yöia idogola, säosäosa nelo.
MAT 26:38 Amala nea, ea ilima sähalea, Nïe iso asigia edefademalä yöia idogosalea, ne baagomolö gabumelë. Dili gui nea, nihïlïgïla idihë namolölamelëla säi.
MAT 26:39 Amala sälahilä, e holöbö gasi gala, nagadaia gumusula dia idogolahilä, Godema sähalea, Nïe Naado, asiamolö fu galëda, gaabogi usi molö amo na asiamäia. Amamäia gaso, na hamese amo gadola made, dia hamese amo gadola hamomäiamelëla säi.
MAT 26:40 Amala sälahilä, ea ïe bëgëla aulo sebea ami awäla beahaleamelebe, ili süwia adi dibe amo bealahilä, ea Fidama nabahalea, Dilia nebalä aoa afädë idihë namolö ulïsebele.
MAT 26:41 Nafadea dili fedogola melëloea, idihë nea, Godema adosa namialo. Dofä. Asigiada hamomolöila helësësa neago gaso, domalo wäbëai nebegola säi.
MAT 26:42 Amala sälahilä, e bu agedu obëgëla, Godema adosalea, Nïe Naado, go made asiala, muäia galëge, dia hamese amo gadola hamomäiamelëla säi.
MAT 26:43 Amala sälahilä, e bu obëgëla maala beahaleamelebe, ili aso süwia adi dibe melï. Mida, ilile si gafodo gadugisalea amai.
MAT 26:44 Ili ami bu elö dïgïla awälahilä, ea bu osoda Godema dafidi säi amo gadola wäla säi.
MAT 26:45 Amala sälahilä, ïe bëgëla aulo amoli sebea ami bu obëgëla awäla, ea ilima sähalea, Dili süwiamu diala, hele saleale. Bimo. Fu hä, ga madesebego. Dolöïe Malö amoda, nafade hamolo amolile naabogi hololöla gausisebemelë.
MAT 26:46 Dili hä, nowemo. Afiadi. Bimo. Dolöea ne hololöla odoaïe naabogi gausimolö amo hä, ga made misi neebemelëla säi.
MAT 26:47 Yesuea ado amo aso, säha nebegi, giwilasi amoligi Yudasa e misi. Dolö maleia nudulo helebege baialage gagaula, ebalä mofiai. Gobela ïlo busa amoliage, Isilale udia dolöïe sigi aligilo asigi gäwi dolö dafidilo amoliage, dolö amoli misialai.
MAT 26:48 E hololöla ilile naabogi gausilo amea, ilima dafidi daiala säla ïahalea, Na dolö gaula mimise amoda emelë. E gaumalola säla ï.
MAT 26:49 Ili maalahilä, e hä, Yesu neebea fodolofalï maala sähalea, Säla Olelelo-o, di go gabiola sälahilä, e gaula mimi.
MAT 26:50 Mimisebegi, Yesuea ema sähalea, Nedoo, dia hamomolö misi amo hä, hamomalola säi. Amala säsebegi, dolö amoli maala, Yesu hä, gaulahilä, gaula fëdöi.
MAT 26:51 Amalebegi, dolö afädë Yesubalä nelo amea, ïe helebe besela neawelahilä, gobela ïlo busa edefade amoïe hamoi hamolasilo amo nufudalahilä, ïe gëhe dagala salisi.
MAT 26:52 Amala hamosebegi, Yesuea ema sähalea, Dia helebego dihï negeia ami negela obëgëmo. Mida, dolö sulubadelaea helebea nudumolöïe gauseda, helebea ili nufudala baagosa maademolö gabu.
MAT 26:53 Na nïe Naadoma nabaseda, ea selesaia fii yafie, ami baagila asi giwilasi amolida, nema waliomu fisiga wemolömelë. Na ema amala nabulö amo ulïla helësësebele.
MAT 26:54 Gaso, na amala nabaha galebeda, ado säla dëdëla negei dibe amo gadola, amala hamomolöi dialeala säi amo made gausiala digalabiola säi.
MAT 26:55 Amo gala, Yesuea gegedoi amolima sähalea, Fa nelo gaumolöïe mulo amo gadola, nudulo helebege baialage gagaulahilä, ne gaumolö misile. Segeyo sulubadelagi, nada Godeïe mosöa säla olelesa sulo amogi, dilia ne made gaui.
MAT 26:56 Gaso, bea sälo amolia ado säla dëdëla negei dibe amo gadola gausiala digamolöïe, nelebo sulubadela amala hamosamelëla säi. Amala säsebegi, bëgëla aulo amoli sulubadelaea e dïgïla fisäla awäha maadei.
MAT 26:57 Yesu gaui amolia e sigi gaula gobela ïlo busa edefade Gaiafasa neebea ami asi. Mala dawadigi dolö amolige, asigi gäwi dolö dafidilo amolige, ami gegedoi nefolalo.
MAT 26:58 Fida e holöbö hobeala baagiala e bëgëla awäla, gobela ïlo busa edefadeïe mosö yala isogi digalahilä, hä, wagasebe amo bimolöïe, hamoi hamolasilo amolibalä beaha sulo.
MAT 26:59 Gobela ïlo busa amoliage, Galïsolö dolö amoli sulubadelaeage, e baagomäia nufulöïe, dolö odoaea wäfalï, Yesuea asiala hamose melëlo amo sämäiala hogoi.
MAT 26:60 Hogosebegi, yafiea wäfalï, ea asiala hamose melëlo amo säla misi gaso, e nufulöïe mi made melï. Made beasebegi, giso hobealafalï, dolö äudä maalahilä
MAT 26:61 sähalea, Egowea sähaleada, Na Godeïe mosö go haila digilahilä, segeyo ohodoagi bu ulimolöimelëla säimelëla säi.
MAT 26:62 Amala säsebegi, gobela ïlo busa edefade amea nowela aligilahilä, Yesuma nabahalea, Dia ado afädë made säla obëgësale. Elea dima säsegoda, abeahämola sähadula nabi.
MAT 26:63 Amala nabasebegi gaso, Yesuea ado afädë säla made saula sulo. Amasebegi, gobela ïlo busa edefade amea ema sähalea, Gode namolöi neebe amoïe ëigi, dia nilïma fädäla sämola säha. Afädë Memelei amoda, dile. Dida Godeïe malölela nabi.
MAT 26:64 Amala nabasebegi, Yesuea ema säla obëgësalea, Dihï säse gomelë. Gaso, na dilima sähago. Hobealada, Dolöïe Malö Geloi Edefade amoïe naabo dafädimadi filahilä, e mu baidilidaia maaha neë bimolömelëla säi.
MAT 26:65 Amala säsebegi, gobela ïlo busa edefade amea, hïle fagulo gadelaha nea sähalea, Ea Gode gagadela säsebego. Odoama ea hamoi amoïe nalï made nabedelämelë. Hädamade ea Gode gagadela säsebe amo dilia hä, nabi amomelë.
MAT 26:66 Dilia abilia helësësebela nabi. Amala nabasebegi, ilia säla obëgësalea, Eda hä, nufudala baagomolö dialeala säi.
MAT 26:67 Amala sälahilä, ilia Yesu e odagia gofedela gagalala, e nufudala ïalalei. Odoaeada e naabo gafea nufudalahilä
MAT 26:68 sähalea, Afädë Memelei, dolö di nufudase egoweda nowë gabu. Dihï bea säla sämola säha nelo.
MAT 26:69 Amo gala, Fida e yala amoïe isogi nogila digasia segeamadi ami sebegi, hamoi hamolasilo dolïsä afädë maalahilä ema sähalea, Dige Galili dolö Yesubalä nawesa aligilo amo gabula säi.
MAT 26:70 Amala säsebegi gaso, Fidaea dolö sulubadelaïe sidaia ne madela sälahilä sähalea, Ado dia säse goda, na dawa mademelëla säi.
MAT 26:71 Amala sälahilä, e yala baagido idi dagaboimadi awäha nebegi, hamoi hamolasilo dolïsä elöea e bealahilä, ami nefolalebe amolima sähalea, Dolö egoweda Nasalese dolö Yesubalä nawesa aligilo amo gabula säi.
MAT 26:72 Amala säsebegi, Fidaea migalïa diigila, bu elö ne madela gelola sälahilä sähalea, Dolö amoda na dawa mademelëla säi.
MAT 26:73 Hobeala, dolö odoa ami nefolalebe amolia maalahilä, Fidama sähalea, Dida dofä amoligi gabu. Dia adosebegoea dihïdi ulufadigisebegomelëla säi.
MAT 26:74 Amala säsebegi, Fidaea, na we wäfalï säseda, dofä ne Godea së ïmäiala sälahilä, migalïa diigila sähalea, Dolö amo na dawa mademelëla säi. Ea säia gai amole, hä, gagalugo gawalia gäi.
MAT 26:75 Amala gäsebegi, Fidaea helësësalea, Yesuea sähalea, Gagalugo gawalia aso, made gäla neëgi, dia ohodoala ne dawa madela sämolömelëla säi amo helësëla obëgëi. Amala helësëla obëgëlahilä, e segea doadigila awäla, gäia güsäla dïisa nelo.
MAT 27:1 Segeyo sagala digase amo gaalu, gobela ïlo busa nefolalo amoli sulubadelaeage, udia dolö ilile busa dolö nefolalo amoliage, Yesu baagomäia nufulöla säla ado afädë negei.
MAT 27:2 Ilia Yesu e igi ëfëa nafodolahilä, sigi gaula awäla, Gabena Bailadiïe naabogi gausi.
MAT 27:3 Ilia hä, Yesu nufulöïe hamosebe amo bealahilä, Yudasa, Yesu hololölo amea asigi bedefalahilä, muni giwi siliba nabülasi ohodoa amo neala gaula, gobela ïlo busa amolige, dolö asigi gäwi busa dolö amolige neebea ami obëgëlahilä
MAT 27:4 sähalea, dolö nafade afädë made hamoi na hololöi amoda, asiala hamoi gabiola säi. Amala säsebegi, ilia säla obëgësalea, Dia hamoi goda nilïle mademelë. Goda dihïlemelëla säi.
MAT 27:5 Amala säsebegi, Yudasaea muni amo Godeïe mosö isogi ami sadia idogolahilä awäla, hïmu maagö bëola baagoi.
MAT 27:6 Amala hamosebegi, gobela ïlo busa amolia muni amo neala gaula nea sähalea. Goweada, dolöïe heale digamäia hamoi amea, muni goda negelo dibea ami gedola negemolöda dofea mademelëla säi.
MAT 27:7 Ilia ado afädë negelahilä, muni amea sege afädë nii. Sege amoda, nagaea sosobene hamolo dolö amoma nii. Udia dolö sege odoadila misi amoli baagosegi baumolöïe sege nii.
MAT 27:8 Amala hamoi amo helësëlahilä, sege amoda Heale Segela sälo, amase, walioge amala säha nea.
MAT 27:9 Amoda Godea bea sälo Yelemaeama aligila bea säi amo gausiala digai. Ado amoda gomalä. Ilia muni giwi siliba nabülasi ohodoa amo neala gaui. Bidi amoda Isilaleïe malö odoaea dolö goïe bidida gomalä säla negei.
MAT 27:10 Dafidilo Geloia na hamomalai amo gadola, nagaea sosobene hamolo dolö amoïe sege nimolöïe, ilia bidi amo ïla säla dëdëla negei dialea.
MAT 27:11 Yesu e Gabenaïe siigi nowela nebegi, Gabenaea Yesuma nabahalea, Dida Yu udia dolöïe beaha aligilo ginilela nabi. Amala nabasebegi, Yesuea säla obëgësalea, Dihï säse gomelëla säi.
MAT 27:12 Gobela ïlo busa amoliage, dolö asigi gäwi dafidilo amoliage, ea asiala hamoimelëla säsebegi, ea ado afädë made säla obëgëi.
MAT 27:13 Amasebegi, Bailadia ema nabahalea, Ilia dima asiala hamoila säsebego, dia made nabahalela nabi.
MAT 27:14 Hä, Yesuea ado afädëge made säla obëgësebegi, Gabena amo edefademalä fudugi.
MAT 27:15 Segeyo Ede amoïe molö nasolo amo galada, Gabenaea galabaia negei afädë fisigähamu aligilo. Udia dolö gegedoi amolia dolö gowe fisigämola säse amo gadola, hilima fisigälasilo.
MAT 27:16 Segeyo Ede amoïe segeyo gala, dolö afädë, ëi Balabasa galabaia negei dilo. Udia dolö sulubadelaea ïe mala dawadigi.
MAT 27:17 Udia dolö yafie maala gegedoi nebegi, Bailadia ilima nabahalea, Na dihilima nowë fisigämäiala hamesebe. Balabasa fisigädule, ma Yesu, ema Afädë Memeleila sälo go fisigädulela nabi.
MAT 27:18 Amala nabi amoïe mida, ilia Yesuma mudialahilä, ïe naabogi gausi gabula helësëlahilä amala nabi.
MAT 27:19 Amaimo, e gudisalea filo amodaia sebegi, ïe udiaea ado afädë säsisalea, Dolö mogoi goma afädë made hamomalo. Mida, na walio simasia beala, e helësëla nïe asigi edefade yöia idogoimelëla säi.
MAT 27:20 Amai gaso, gobela ïlo busa amoliage, dolö asigi gäwi dafidilo amoliage, udia dolö gegedoi amolima Balabasa fisigähalea, Yesu nufuöla sämäia si nigilasi.
MAT 27:21 Amasebegi, hä, Gabenaea ilima nabahalea, Äudä amolegi abodo dihilima fisigämäiala nabi. Amala nabasebegi, ilia säla obëgësalea, Balabasamelëla säi.
MAT 27:22 Amala säsebegi, Bailadia ilima nabahalea, Amai galëda, Yesu, ema Afädë Memeleila sälo goma, na abilia hamomäiala nabi. Amala nabasebegi, ili sulubadelaea säla obëgësalea, Eda i fügäigi baala negemäiala säi.
MAT 27:23 Amalebe, ea ilima nabahalea, Mida edogi. Ea edo nafade hamoi gabiola nabi. Amai gaso, ilia gelolafalï uuala sähalea, Eda i fügäigi baala negemäiala säha nelo.
MAT 27:24 Ea säse amo made nabahalea, ilia gelola üala dodogöla sämolö hamosebe amo bealahilä, Bailadia udia dolö gegedoi amolile sidaia naabo nigime hësalea sähalea, Dolö goïe heale digaseda, asialada nema maademelë. Dihilima gomelëla säi.
MAT 27:25 Amala säsebegi, udia dolö amoli sulubadelaea säla obëgësalea, Ïe healeda nilïmage, nilïle malömage diamiäiala säi.
MAT 27:26 Amala säsebegi, ea Balabasa hilima fisigäla fisiga galahilä, odoaea Yesu fëgämaloi. Fëgälahilä, e i fügäigi baala negemolö sigi mosalai.
MAT 27:27 Amala hamosebegi, Gabena amoïe ami dolö amolia Yesu sigi awäla, Beledoliama mosöa nogila digalahilä, ami dolö odoama gegedomalolahilä, e nogömaloi.
MAT 27:28 Ami nebegi, ilia ïe fagulo gäi amo giila negesilahilä, fagulo bëi sedade bedefala salugasi.
MAT 27:29 Amalahilä, ëfë äyo gägäi nasigïla amalela, giniïe busa gadoi hamola ïe busagia salugasilahilä, i dama dagaboige ïe naabo dafädimadi gausi. Ili e mia emo gumu sasagala fia idogola salea, e gadiabola sähalea, Yu udia dolöïe beaha aligilo gini-e, di go gabiola säha nelo.
MAT 27:30 Amalahilä, ilia e gofedela gagalala digi, amase, i dama dagaboi gausi amo fedela neala busagia nufudadigisa nelo.
MAT 27:31 Ilia ema amala gagadiabosa nelolahilä, fagulo sedade amo holola, hïle fagulofalï amo salugasi. Salugasilahilä, ilia e i fügäigi baala negemolöïe sigi asi.
MAT 27:32 Ili amila doadigila afiaha dibegi, gaamu Sailini fii dolö afädë, ïe ëida Saimono gausiala digai. Amalebe, ilia ema Yesuïe i fügäi amo gaumalala eegei.
MAT 27:33 Afialahilä, sege ëi Gologoda besela galai. Gologoda amoda Busa Giwi Segela sälo.
MAT 27:34 Besela galalahilä, ilia wani ödäge gamogai ödäge gegoalahilä, egali muäia ïasebegi, ea nabibilage, molö made helësëi.
MAT 27:35 Amalebe, ilia e hä, i fügäigi baala negelahilä, ïe fagulo gii amo nowëa nimabelela, sadu dahila, ïe fagulo amo amala mogei.
MAT 27:36 Amalahilä, ilia idihë salea, sisila sefolalo.
MAT 27:37 Ilia i fügäigi ïe busa daia adomoi, ema gudisalea säi amo dëdësalea, Goda Yesu, Yu udia dolöïe beaha aligilo ginila dëdëla baala negei.
MAT 27:38 Amala hamolahilä, ebalä fa nelo dolö äudä, elö naabo dafädimadi, amase, elö naabo fefeädimadila i fügäigi baala negei.
MAT 27:39 Udia dolö ili amogi baagila afu mafusalea, ema busa dugagila digila gagadiabola
MAT 27:40 sähalea, Diada Godeïe mosö haila digilahilä, segeyo ohodoagi ulimolöeai amo, di dihïmu damula mosö. Dida Godeïe malö galëda, i fügäia adogoila digamola säla baagi baagisa nelo.
MAT 27:41 Amaimo, mala dawadigi amoliage, dolö asigi gäwi dafidilo amoliage, gobela ïlo busa amoliage, amo gadola wäla gadiabola sähalea,
MAT 27:42 Eada udia dolö odoa ugila negelo. Amai gaso, hï e ugila negemolöi made gabu. Eda Isilaleïe beaha aligilo gini nea. I fügäia adogoila e walio digaseda, nilïa ema asigi afädë negemolö.
MAT 27:43 Ea Godema asigi bogia adogola nelo. Godea e hameseda, ea e ugila negemäia. Mida, ea sähaleada, Neda Godeïe Malöla sälo ameala säha dilo.
MAT 27:44 Fa nelo dolö ebalä i fügäigi baala negei amoleage, amo gadola wäla ema nemoi.
MAT 27:45 Eso mogogila awäla eso bëgise gaaluge, sege sulubadela gasilasimu dilo.
MAT 27:46 Eso bëgise gaalu, Yesuea gelolafalï wela säia adahalea, Eli, Eli lama sabagadanila säi. Amoïe mida gomalä, Nïe Gode, nïe Gode, dia ne edogi fisigisisala säi.
MAT 27:47 Amo nabalahilä, odoa ami nefolalo amolia sähalea, Goeada Elaia wesebegola säi.
MAT 27:48 Hä, fodolofalï amoligi afädë baluluia awäla, nelebo afädë dahudu gadoi wani ödä gamogai dibea ami gelahilä, i bidigi yaala, egali muäia ï.
MAT 27:49 Amala hamosebegi, odoa amolia sähalea, Aso. Elaia maala, e damula misiabelela beaha aligidila säi.
MAT 27:50 Yesuea bu elö gelola sälahilä, ïe namolö amo fisila, hame hä, mosaloi.
MAT 27:51 Amasebegi, fagulo edefade Godeïe mosöa gosagisi dilo amo, gadogola gadelala digalahilä, elö eamu eamula negesi. Amase, fogolige maala, igige dusula adögodasi.
MAT 27:52 Amase, baui amolige doga negesebegi, Godeïe udia dolö baagoi difolalo amoligi, yafie nowelasisi.
MAT 27:53 Yesu baagoi amo nowelasisebegi, bauiala nowelasisi amoli baui däla amo dïgïla awäla, gaamu Godea hïle nafolai Yalusaleme dibea ami ili nogila digasebe amo, udia dolö yafiea melï.
MAT 27:54 Ami dolö hädali afädë beaha aligilo ameage, ebalä Yesu idihë nefolalo amoliage fogoli misi amogige, nelebo hamoi amogige beala, edefademalä fudugila bedälahilä sähalea, Wae! Goweda dofä Godeïe malö gabula säi.
MAT 27:55 Udiafalï yafiea Yesu ugila negemolöïe, Galilila e bëgëla mofiai amolige, ami holöbö mia madela sidawewela nefolalo.
MAT 27:56 Magadala udia Melige, Yamesele Yosebelele eme Melige, amase, Sebediïe malö äudä amolele emege, udia amoligi ami nefolalo.
MAT 27:57 Segeyo amo gala deadifalï, gaamu Alimadia fii nelegei yafie negelo dafidilo dolö afädë misi. Dolö amoïe ëida Yosebe. Eege Yesuïe bëgëla aulo nelo.
MAT 27:58 E Bailadi neebea maalahilä, Yesuïe domalo amo ema ïmäia nabi. Nabasebegi, Bailadia ami dolöea ema neala ïmalai.
MAT 27:59 Neala ïasebegi, Yosebea Yesuïe domalo amo fagulo nigime baai made, hedabifalï amea usulala
MAT 27:60 gaula awälahilä, hïle igi äbä gähe duwi dilo amogi bausi. Bausilahilä, igi edefade afädë bebugula maala, idi amo dofogasilahilä, e hä asi.
MAT 27:61 Magadala udia Melige, amase, Meli elö amoge, ele Yesu baui gaalu alömodi sulo.
MAT 27:62 Nelebo daialo segeyo amo baagia, segeyo amogi gobela ïlo busa nefolalo amolige, Felesi dolö nefolalo amolige, Bailadi neebea awäla gegedolahilä
MAT 27:63 sähalea, Dafidilo, dahila nelo goea aso, made baagola nea sähalea, Segeyo äudä nelolahilä osodagi, ne nowelasimolömelëla säi amo nilïa helësëla obëgëimelë.
MAT 27:64 Amala säi amea, segeyo ohodoa gogi, odoaea baui amoïe idi hedabola galahilä, idihë namialamalo. Bëgëla aulo amolia maala, ïe domalo amo nealahiläda, udia dolöma hä bauia amila nowelasimelëla säloea. Ilia amala hamola, dahila neala säseda, ea dafidi dahila neala sälo amo baagila moholö gabumelëla säi.
MAT 27:65 Amala säsebegi, Bailadia ilima sähalea, Ami dolö odoa idihë aligilo namiäia diligali ïahago. Dilia ili sigi awälahilä, ilia bauia ami idihë namialamalo. Dilia gomalä hamomolöila asigisebe amo gadola hamola, baui hedabola gamalola säi.
MAT 27:66 Amala säsebegi, ili awäla baui amo hedabola galahilä, odoaea idi galo igi amo bebugula auloea nofe negela, idihë aligilo amolima hedabola idihë namialai.
MAT 28:1 Segeyo Sabada baagibua, saleleïe mi gäwi segeyogi, eso mi gäwila säsälosebe amo gaalu, Magadala udia Melile, Meli elölea baui amo bea asi.
MAT 28:2 Ami nebegi, fogoli edefade misi. Dafidilo Geloiïe selesaia fii afädë Hebenila digahalea amai. Digalahilä, selesaia fii amea igi amo bebugula negesilahilä, e amodaia sulo.
MAT 28:3 Selesaia fii amoïe odagida sege yabagelela yo digalo amo gadoi, amase, ïe fagulo gäige falelafalï fisi.
MAT 28:4 Amogi, idihë aligilo amoli ebalä bedähalea, ili emo gigisëla, baagoi gadoi dilo.
MAT 28:5 Amaimo, selesaia fiia udia amolema sähalea, Alia bedämabio. Alia Yesu i fügäigi baala negei amo hogola misigoda, na dawamelë.
MAT 28:6 Eda wi maade. E negei diloa gowe bea misië. Mida, ea säi amo gadola, nowela asimelë.
MAT 28:7 Ali hä, aabela awäla, ïe bëgëla aulo amolima gomalä sämalo. Eda baagoiala nowela asimelë. Dili baagila, edale Galili moholö awäha nea, e ami bimolömelëla sämalo. Na hä, alima säi agui amomelëla säi.
MAT 28:8 Amala säsebegi, ele bedälage, edefademalä obeägïlage, fodolofalï bauia amila awäla, ïe bëgëla aulo amolima sämolöïe baluluia asi.
MAT 28:9 Awäha nebegi, Yesuea ele gausiala digalahilä sähalea, Ali go gabiola säi. Amala säsebegi, ele e mia ga madela maala, ïe emogi gaula digala, elea ïe ëi gauia adai.
MAT 28:10 Amasebegi, Yesuea elema sähalea, Alia bedämabio. Aliada, nïe nedoolalima, ili Galili mosalamalo. Awäseda, ilia ne ami bimolömelëla sämolö mosalola säi.
MAT 28:11 Udia äudä amole awäha nebegi, idihë aligilo odoa awäla gaamu isogi digalahilä, ilia gobela ïlo busa amolima nelebo sulubadela hamoi amo säla ïaha maadei.
MAT 28:12 Amala säsebegi, gobela ïlo busala, dolö asigi gäwi dafidilobalä gegedolahilä, ilia ado afädë daiala negei. Ilia muni malei neala, ami dolö amoligali ïahalea
MAT 28:13 sähalea, Dilia gomalä sämalo. Ïe bëgëla aulo amolia gasigi maalahilä, nilï adidi dibegi, ïe domalo amo fa niimelëla sämalo.
MAT 28:14 Amasebegi, Gabenaea ado gowe nabaseda, amoda, nilïa ebalä ado hahamogimolömelë. Dilia asiala hamoi made bimäiala säi.
MAT 28:15 Amala säsebegi, ami dolö amolia muni amo nealahilä, ilima säi amo gadola bëgëi. Amaimo, walioge Yu ilia ado amomu säla daidosa nea.
MAT 28:16 Bëgëla aulo gïdälasi amoli Galili afialahilä, segebidaia Yesuea säla negeia ami afiai.
MAT 28:17 Afialahilä, ilia e beala, ïe ëi gauia adai. Amai gaso, odoaeada asigi äudä negei.
MAT 28:18 Amasebegi, Yesu e ili neebea maala nea, ilima sähalea, Hebeniïege, nagadaiaweïege, geloi sulubadela nema gausisa maadeimelë.
MAT 28:19 Amala hamoi amea, dili awälahilä, fifi asi sefolalebe amoli sulubadela nïe bëgëla aulo aligimäiaïe sämolö mosalo. Amalahilä, dilia Naadoïe ëigige, Malö amoïe ëigige, Eleloi Gesamiïe ëigige, ili ödägi gelasila,
MAT 28:20 na dilia hamomalai amo sulubadela ilia bëgëla hamomäia olelemalo. Segeyo sulubadelagi ne dilibalä namolömelë. Amalamu awäla, aligila wagamolömelëla säi. Hä amo.
MAR 1:1 Ado Mala Hedabi goda, Godeïe malö Yesu Gelesoea dafidi mi gäwi amo dialea.
MAR 1:2 Bea sälo Aisaeaïe bebagi ado dafidi dëdëla negei dibe amoda gowe. Godea sähalea, Nabuö! Nïe ado säla ïmolö mosalamalo amomada, dïe idi fodolasimäia, ema dafidimola sämolömelë.
MAR 1:3 Udia dolö aligisia made sege falaia ami nea, afädëa uuala wesalea, Dafidilo Geloi misiäia idi fodomolö amo dadaiaha namialo. Ïe idi amoda mogolafalï fodolasimalola säha neamelëla säi amo dëdëla negei dialea.
MAR 1:4 Amala säla dëdëla negei dibe amo gadola, sege nafade udia dolö aligisia made ami ödägi gelo Yone e misi nelo. Ea sähalea, Dilia nafade hamoi amo Godea hëmäia, dilile iso asigi besula, ödägi gemolö dialeala säla ïaha nelo.
MAR 1:5 Yudia sege gaamu holöfalï holöfalï dibea amilage, Yalusaleme udia dolö nefolalo amoli sulubadelage, e neebea ami mafusa nelo. Mafula ilia nafade hamoi amo sisiaha maadesebegi, Yonea ili ödä Yodonagi gesa nelo.
MAR 1:6 Yone eda sugua gamele hilïa fagulo hamoi amo salugalahilä sugua gafodo gadoia malibu negela nelo. Eada galiawage äwi ödäge naha nelo.
MAR 1:7 Ea ado mala säla ïahalea, Ne dafidi misi neawe. Hobea ne baagia afädë moholö amoda, ne holöfalï neebewe gadoi made, eda ilibia edefade neebe amo moholömelë. Ne hedabi made ameada, na ïe emo usililo ëfë gumusula dialea fisigämolö amo dofea made neawe.
MAR 1:8 Na dili ödäeamu gesa neamelë, eada dili Eleloi Gesamia gemolömelëla säla ïaha nelo.
MAR 1:9 Segeyo amogimu Yesu e Disiligi Galiliïe gaamu Nasalesela maasebegi, Yonea Yesu ödä Yodonagi gelasi.
MAR 1:10 Yesu ödägi gelahilä ödägila fodolo agesua aliga adogoi amole, mu dusuia gase amo melï. Amala dusuia gasebegi, Gesami haea maliabu gadoi digalahilä ema fise amo melï.
MAR 1:11 Amo gaalu, selesaia mosöala ado afädë säia idogosalea, Dida nïe malö. Na dima edefademalä boba hamoi nea, nïe iso asigia dima obeägïsa neawela säi.
MAR 1:12 Ado amo säha maadeia gai amole, Godeïe Gesamia Yesu e sege nafade udia dolö aligisia made ami mosäia fisiga gai.
MAR 1:13 E fisiga gaia ami segeyo nabülasi biyidia nebegi, mugabe Saidania Yesuea nafade hamomabelela fedogola bimolö misi. Yesu e sugua ilaba elö elöla nefolalebea ami nebegi, selesaia fii ilia e ugila negemolö misi.
MAR 1:14 Yone galabaia negesebegi, Yesu e Galili awälahilä Godea Beaha Maadela Sigi Neebe amoïe Ado Mala Hedabi säla ïaha nelo.
MAR 1:15 Yesuea sähalea, Godea segeyo daiala negei dilo amo, walio wegi gausiai ameada, Godea Beaha Maadela Sigi Neebe amoda ga madefalï dialeamelë. Ameada, dili asigi besula, Ado Mala Hedabi go gaula mogomalola säla ï.
MAR 1:16 Yesu e Galili oeabo agesu nedaha nea beahamelebe, seme digilo dolö äudä, Saimono ïe edoo Ädulule seme digisa neebe melï.
MAR 1:17 Bealahilä Yesuea elema sähalea, Na alima udia dolö nelo mala oleledelä. Ali ne awäsewe gadola bëgëla misiëla säi.
MAR 1:18 Amala säsebegi, elea selëgë amo fodolofalï ami negesilahilä e bëgëla asi.
MAR 1:19 Yesu e holöbö sedade awälahilä beahamelebe, Sebediïe malö Yamese ïe edoo Yonele dudaia ami nea, selëgë nuli amo hamogisa neebe melï.
MAR 1:20 Beala fodolofalï ele wesebegi, elele eedo Sebedige bidi nimolöïe hamoi hamosa nefolalo amolige dudaia amilahilä ele Yesu bëgëla asi.
MAR 1:21 Yesula udia dolö odoali afiala Gabaniama gaamugi besela galai. Sabada gafe segeyo amo besela galasebegi, Yesu e gedolo mosöa ami nogila digalahilä, ea udia dolö amolima ado mala säla olelesa nelo.
MAR 1:22 Ea säla olelese amo nabala ili fudugisa sefolalo. Mida, mala dawadigi amolia olelelo amo gadola made, geloi hïdo elöi gaula nea olelese amogi.
MAR 1:23 Segeyo amo gala dolö mugabe fedai afädë gedolo mosöa ami maala sulo. Dolö amea üalala digila sähalea,
MAR 1:24 Nasalese fii Yesu-o, nilï neebea wi dia edo hamomolö misi. Nilï nufudadigimolöïe misile. Nada di dawa. Dida dolö hedabi mogoifalï, Gode hï e neebea amila misimelëla säi.
MAR 1:25 Amala säsebegi, Yesuea mugabe amoma nemosalea, Adomabu! Dolö go dïgïla di mosöla säi.
MAR 1:26 Amala säsebegi, mugabe amea dolö amo neala amulämelasilahilä üalala digila doadigila asi.
MAR 1:27 Amala hamosebegi, udia dolö sefolalo amoli sulubadela, fudugilahilä hilidomu säla didigahalea, Walio hamoi amoda edo gadoidu. Dolö goea walio ado säi amoda, ado gähe geloi hïdo elöi gelola säimelë. Ea ado säseda, mugabe ilia nabelo gabula säi.
MAR 1:28 Yesuea hamoi amo udia dolö Galilimadi nefolalo amoli sulubadelaea fodolofalï nabala didigai.
MAR 1:29 Yesuge Yamese Yonege ïe begela aulo odoa ilige gedolo mosöa amila Saimono Ädululea mosöa ami afiai.
MAR 1:30 Saimonoïe udia amoïe eme domalo hëgïla oloi, imididaia adi dilo amo, ilia fodolofalï Yesuma säla ï.
MAR 1:31 Säla ïasebegi, Yesu e udia oloi dibea ami awälahilä, ea naabogi gaula nowela ifosi. Amala hamosebegi, e hëgïla oloi dilo amo hogosa helela wahisebegi ea ili molö muäia daiai.
MAR 1:32 Eso digase gaalu, deadi udia dolö nefolalo amolia oloi difolalo amolige mugabe fedai nefolalo amolige sigi gagaula Yesu neebea ami gegedoi.
MAR 1:33 Udia dolö Gaamugi ami nefolalo amoli sulubadela idi galo mia hadaigi amimu gegedoi.
MAR 1:34 Amala hamosebegi, Yesuea udia dolö yafie olo elö elöla oloi difolalo amoli wahila digi, mugabe fedai yafie nefolalo amoli nesila digila digisa nelo. Amala hamosebegi, mugabe amolia Yesu eda gowe neala dawadigisa madei nefolalebegi, Yesuea mugabe amolima dilia adomabula säi.
MAR 1:35 Sege yomolö amo gaalu Yesu e segea nowela awälahilä, udia dolö aligisia made ami awäla Godema adosa sulo.
MAR 1:36 Saimonoge ebalä nefolalo amoliage Yesu hogogola hobeala bëgëi.
MAR 1:37 Beagolelahilä ilia ema sähalea, udia dolö sulubadelaea di hogosa neamelëla säla ï.
MAR 1:38 Amala säla ïasebegi, Yesuea säla obëgësalea, Gamelä. Sege gaamu odoa ga made dibea ami, ado mala säla ïmolö afiadi. Neda hamoi amo hamomolö misimelëla säi.
MAR 1:39 Amala sälahilä e Galili sege sulubadelamadi nawesa nea, ilile gedolo mosö nefolalebe amoligi nogila digalahilä, Yesuea ado mala säla ïadigi, mugabe fedai nefolalo amoli nesila digila digisa nelo.
MAR 1:40 Amala hamosa nebegi, dolö gudubu hamoi afädë Yesu neebea ami maalahilä, emo gumu sasagala fia idogola salea sähalea, Dia ne wahimäiala helësëseda, hä dia ne wahilasimolöi nebegola säi.
MAR 1:41 Amala säsebegi, Yesuea dolö amo bobasëlahilä, ïe naabo mogodigia gala, dolö amo diigisa nea sähalea, Na amala helësësa, wahimola säi.
MAR 1:42 Amala säsebegi, dolö gudubu hamoi amo fodolofalï hogosa helela wahi.
MAR 1:43 Yesuea e fodolofalï mosalolahilä, ema gelola sähalea,
MAR 1:44 Nabuö! Di wahi go oböla odoama säla ïmabio. Gobela ïlo dolö neebe amea di bimäia olemolö mosalo. Amalahilä, udia dolö ilia bimäia di wahi go olemolöïe, Mosesea säla negei dibe amo gadola, di hëmäia nelebo afädë odala ïmalo mosalola säla ï.
MAR 1:45 Amala säla ï amo nabalahilä gaso, dolö amo awäha neada, ema hamoi amo ili sulubadelama säla ïïa awäha nelo. Amala säla ïïa awäha neala säi amo nabala, Yesu e ilile siigi gaamu difolalebea ami made awäla, udia dolö aligisia made ami gasi gala nelo. Amala gasi gala nebegi, udia dolö sege sulubadelagi nefolalo amoli Yesu neebea ami mafula gegedoi.
MAR 2:1 Segeyo odoa baagisebegi Yesu e bu Gabaniama obëgëi. Yesu obëgëla misi neala säi amo udia dolö nefolalo amoli sulubadelaea nabaha maadei.
MAR 2:2 Nabalahilä udia dolö yafie Yesu neebea ami mafula gegedoi amea, mosö isogige idilibage fimolö fu maade, negegi dibegi, Yesuea ilima ado mala säla ïaha nelo.
MAR 2:3 Säla ïaha nebegi, dolö afädë fii si sulo amo e neebea ami, dolö biyidiaea iwasala gaula misi.
MAR 2:4 Udia dolö yafie negegi amea, ilia dolö amo Yesu neebea gaula moholö ulï gabugi, mosö fïgïdaia gaula fedalahilä, mosö fïgï dusuia gala dolö iwasala gaula misi dafu amola mumusogi Yesu neebe amo gaalu salisi.
MAR 2:5 Ilia asigi afädë negei nea hamosebe amo bealahilä, Yesuea dolö fii si amoma sähalea, Nïe malö, dia nafade hamoi amoli na hä hësa maadeimelëla säi.
MAR 2:6 Amala säsebegi, mala dawadigi dolö odoa sefolalo amolia asigiamu helësësalea,
MAR 2:7 dolö gowea ado egoweda abeahäla sähadu. Eada Gode gagadesa neamelë. Gode eamu udia dolöea nafade hamoi amoli hëmolöi neala helësësa sefolalo.
MAR 2:8 Ilia amala helësësa sefolalebe amo, ïe asigia aabela beagolelahilä, ea ilima sähalea, Edoïe dilia go helësësa dialea.
MAR 2:9 Na dolö fii si gowema ado aabei sämolöda abodo. Dia nafade hamoi amoli hësa maadeila sämolö amo aabei gabule, ma, di nowela dïe fëo gaula mosöla sämolö amo aabei gabule.
MAR 2:10 Amaimo, Dolöïe Malöea nagadaiawi nea, udia dolöea nafade hamoi amoli hëla digimolöïe, geloi gaula neebe amo dilia helësëmäia olesagomelëla säi. Amala sälahilä ea dolö fii si amoma sähalea,
MAR 2:11 Na dima sähago. Di nowela dïe fëo neala gaula dihï mosöa mosalola säi.
MAR 2:12 Amala säsebegi, dolö amo nowelahilä, udia dolö sulubadelaïe sidaia ïe fëo amo neala gaula fodolofalï asi. Amala hamosebegi, ili sefolalo amoli sulubadelaea asigigi fudugilahilä, Godeïe ëi gauia adala sähalea, Siiba nelebo gowe gadoi hamose nilïa melëlo mademelëla säla didigai.
MAR 2:13 Yesu e Galili oeabo agesu bu elö nedaha nebegi, udia dolö yafie e neebea ami mafula gegedoi. Gegedosebegi Yesuea ilima ado mala säla ïaha nelo.
MAR 2:14 Säla ïaha nelolahilä awäha nea, Alibiasaïe malö Ilibai e dagisi muni nelo mosöa sebe amo bealahilä, Yesuea ema ne bëgëla misiëla säi. Amala säsebegi, e Yesu bëgëla asi.
MAR 2:15 Yesu e Ilibaia mosöa molö naha sulo. Dagisi nelo dolö yafiege, mala nafade hamolo dolö yafiege, Yesula ïe bëgëla aulo amolibalä gedola salea molö naha sefolalo. Dolö amo gadoi yafieada, Yesu awäse amo gadola bëgëla awähamu aligilo.
MAR 2:16 Mala dawadigi Felesi dolö amolia beahamelebe, Yesu e dagisi muni neloge, mala nafade hamologe, nefolalo amolibalä gedola salea molö naha sebe melï. Bealahilä ilia Yesuïe bëgëla aulo amolima nabahalea, Mala nafade hamologe, dagisi muni nelo nefolalo amolige, ebalä, gedola salea molö naha sebegoda edoïela nabi.
MAR 2:17 Amala nabasebegi Yesuea ilima säla obëgësalea, Udia dolö oloi made nefolalebe amolida, alögoda neebea aulo made. Oloi sefolalebe amolimu alögoda neebea aulo. Amo gadola wäla, ne misi weda, udia dolö hedabi nefolalebe amoli wemolö misi made, udia dolö nafade hamolo nefolalebe amoli wemolö misimelëla säla ï.
MAR 2:18 Segeyo molö naala made aligilo fu amogida, ödägi gelo Yoneïe bëgëla aulo amoliage Felesi dolö amoliage molö naala made aiala nefolalo. Udia dolö odoa maalahilä, Yesuma nabahalea, Yoneïe bëgëla aulo amoliage Felesi dolöïe bëgëla aulo amoliage molö made naala aligilo fu amogi, Dïe bëgëla aulo golia molö naha nebegoda mi edoïela nabi.
MAR 2:19 Amala nabasebegi, Yesuea ilima säla obëgësalea, Dolö afädëa udia neahalea, udia dolö e damelë molö molö gedoi hï ebalä sefolalebe amolima, dili molö made naala aiala samialola samolöle. Udia nimolö dolö amo ilibalä seëda, ili molö made naala aiala samolöle.
MAR 2:20 Gaso, hobeala dolö amo odoaea sigi gaula asibua, ili molö made naala aiala sämolömelëla säi.
MAR 2:21 Amala sälahilä Yesuea ado elö sähalea, Afädëa fagulo goofogi fagulo gähea baala asogelo made. Amala hamoseda, fagulo gähe amea goofo amo nulimolömelë. Amalahilä dafidi nuli amo gadola made bu edela nulilo.
MAR 2:22 Amo gadolamu, dolö afädëa sugua meme gafodoea ödä i hamoi sibai amogida, wani ödä gähe dibe amo söga salelo mademelë. Amala hamoseda, wani ödä amea ödä i sugua meme gafodoea hamoi sibai amo dusulahilä, ödä i amoge wani ödä amoge, hä, nafademolömelë. Amala hamoloea, wani ödä gähe dibe amoda sugua meme gafodoea ödä i hamoi gähegi oselomelëla säi.
MAR 2:23 Segeyo Sabada gafegi Yesula ïe bëgëla aulolali, eladi gadoi ëi widi sagaido afiaha dilo. Afiaha dialea ïe bëgëla aulo amolia widi gägä amo faila nana awäha nelo.
MAR 2:24 Nana awäha neebe amo Felesi dolö ilia bealahilä Yesuma sähalea, Nilïle mala säla negei dibe ameada, segeyo Sabada gafegi hamolo made amo dïe bëgëla aulo golia damula hamosa nebego bimola säi.
MAR 2:25 Amala säsebegi, Yesuea ilima säla obëgësalea, Siiba Debidia hamoi dëdëla negei dibe amo dilia made nidelo neale. Debidige, dolö odoa ebalä nefolalo amolige, molö maadela sïdëa baagosalea,
MAR 2:26 gobela ïlo busa edefade Abiada e nebegi, Debidia Godeïe mosöa nogila digalahilä, beledi Godegali odala ï dilo amo neala mai. Beledi amoda odoaea nülo made, Gobela ïlo amoliamu nülo negei amo ea nalahilä, odoa ebalä nelo amoli muäia neala gaula awäla ïmelëla säi amo dilia made nidelo neale.
MAR 2:27 Yesuea ilima säla wagahalea sähalea, Godea segeyo Sabada gafe hamoi amoda, Udia dolö fifi asi sefolalebe amolia segeyo Sabada gafe amo ugila negemäia hamoi mademelë. Udia dolö fifi asi sefolalebe amoli ugila negemäia hamoimelë.
MAR 2:28 Amala hamoi ameada, Dolöïe Malö amoda, segeyo Sabada gafeïe Dafidilo neamelëla säla ï.
MAR 3:1 Yesu e gedolo mosöa ami bu elö nogila digai. Mosöa amida dolö naabo elö amo balägädöla nafadei afädë sulo.
MAR 3:2 Udia dolö odoa sefolalo amolia Yesuma dia nafadela hamoila sämolölahilä, segeyo Sabada gafegi, Yesuea dolö amo wahisebelela bimolöïe, ilia si dadaiaha sefolalo.
MAR 3:3 Amaha sefolalebegi, Yesuea dolö naabo nafadei amoma sähalea, Di nowela mogogi namolö misiëla säi.
MAR 3:4 Amala sälahilä ea ilima nabahalea, Nilïa segeyo Sabada gafegi hedabi hamomolö amo dofeale ma, nafade hamomolö amo dofeale. Udia dolö hedabola namiäia damula moholö amo dofeale ma, baagomäia nufulö amo dofealela nabi. Amala nabasebegi, ilia säla obëgëla made sefolalo.
MAR 3:5 Yesuea udia dolö sefolalo amoli sidawewela bealahilä e mihaläi. Mida. Ilile iso asigi geloi dibe amo beala. Mihalälahilä ea dolö naabo nafadei amoma sähalea, Dïe naabo mogodigia gamola säi. Dolö amea naabo mogodigia gai amole, ïe naabo amo wahimolöi wahi melï.
MAR 3:6 Amala hamosebe amo bealahilä, Felesi dolö sefolalo amoli segea fodolofalï doadigila awäla, Heledo sosogo nefolalo amolibalä gegedolahilä, Yesu baagomäia abilia hamomolödula säla didiäha dilo.
MAR 3:7 Yesula ïe bëgëla aulola ili sege ili neloa amo fisila, Galili oeabo dibea ami afiai. Ili afiasebe amo gadola udia dolö yafiea ili bëgëla afiai. Sege Yudialage, gaamu Yalusalemelage, sege Idumialage, ödä Yodona dëgëla alämadilage, gaamu Daiamadilage, Saidonomadilage, sege amoligila udia dolö sämolö asusugai yafiea, Yesuea hamoi amo nabala e bëgëla afialahilä, e neebea amimu gegedoi.
MAR 3:9 Amala gegedosebegi Yesuea ïe bëgëla aulo amolima sähalea, Udia dolö yafie gegedosalea, ne dedelela fëdösebe amea, bobadëlasebegi, ne dudaia fedadelä, dilia du afädë gaula maala ne neebe gaalu, ga madela negesimola säi.
MAR 3:10 Ea udia dolö yafie dafidi wahilasi amo gadola, udia dolö oloi sefolalo amoliage ili wahilasimäialahilä, ilia e digimolöïe gegedoi amea dedelei.
MAR 3:11 Mugabe amolia e beala ïe emo mia gumusula dia digalahilä, üalala digila sähalea, Dida Godeïe malömelëla säi.
MAR 3:12 Amala säsebegi, ea mugabe amolima gelola sähalea, Odoama ne Godeïe malö neala säla ïmabiola säi.
MAR 3:13 Yesu e segebidaia fedalahilä, dolö odoa hï hamei amoli misiäia wesebegi, ili e neebea ami misi.
MAR 3:14 Maasebegi ea dolö giwilasi amoli ebalä namolöïe ili memelelahilä, ea ilile ëi abosolo negei. Ilia Godeïe ado mala säla ïmolö mosäiage, mugabe fedai nesila digimolö geloi iligali ïmolöïege, ea ili memelei.
MAR 3:16 Giwilasi memelei amolile ëida gowe ili. Saimono, Yesuea ïe ëi elö Fida negei amoge,
MAR 3:17 Sebediïe malö Yamesege, ïe edoo Yonege, Yesuea elele ëi elö Boaneyisi negei. Nilïle ado sälada sege gudusebeïe malö.
MAR 3:18 Äduluge, Filibige, Badolomiuge, Madiuge, Domasage, Alibiasaïe malö Yamesege, Dadiusige, Selodo sosogo Saimonoge,
MAR 3:19 Yudasa Isagaliada, Yesu hololölo amoge. Yesuea giwilasi amoli memelei.
MAR 3:20 Memelesa maadelahilä, Yesu e mosöa asi. Udia dolö yafie bu gegedoi amea, Yesula ïe bëgëla aulo amolali molö molö fu maade melï.
MAR 3:21 Amala hamoimelëla säi amo nabalahilä, Yesu sosogo nefolalo amolia e bea asi. Mida, odoa ilia e gagaosa neala säi amo nabala.
MAR 3:22 Mala dawadigi dolö Yalusalemela digafui amolia sähalea, Mugabe Belesabuluda Yesuma fedai nea. Mugabe ilile busaea ema geloi ïasegi, ea mugabe nesila digisa neamelëla säi.
MAR 3:23 Amala säsebegi, Yesuea ili mofiamolahilä, ilima ado besula sähalea, Mugabe Saidani hïmuda abilia nesila digimolöi gabu.
MAR 3:24 Sege afädëgi fii hilimu mogela nuduseda, fii amoda geloi made bimolömelë.
MAR 3:25 Mosö afädëgi fii hilimu mogela nuduseda, mosö amoda gelola namolö mademelë.
MAR 3:26 Mugabe Saidania hïmu ado nease amea, e sosogo neebe amoli mogeseda, amoda gelola made aligila, hogosa helesa maademolömelë.
MAR 3:27 Afädëa dolö geloi neebe amoïe mosöa ïe nelegei dibe amo fa nimolö moholöi mademelë. Ea dolö geloi amo dafidi naabo emoge, nafodola negesiä ïe mosöa nelegei dibe amo fa nimolö moholöi galea.
MAR 3:28 Na dilima dofä gelola sähago. Udia dolöea nafade hamoi amoli sulubadelage, gagadela ado nafade elö elöla säi amolige, hëla fisimolöi bimolömelë.
MAR 3:29 Be afädëa Eleloi Gesami gagadeseda, made hëmolö. Ïe nafade hamoi amoda, walioge hobealage, hï ebalä diamolöi diamolömelëla, Yesuea säi.
MAR 3:30 Ilia Yesu e mugabe fedai neala säi amo nabala ea ado amo amala säi.
MAR 3:31 Segeyo amo gala, Yesuïe eme edoolali mafula segea ifo baagido nea, odoa ilima sähalea, Yesu e nilï neebeawi misialasebela sämola säi.
MAR 3:32 Amala säsebegi, udia dolö yafie Yesu amalela sefolalo amolia ema sähalea, Nabahale. Dïe dieme didoo dialifilali misi segea nea. Ilia di misialala säsebela säi.
MAR 3:33 Amala säsebegi, ea säla obëgësalea, Nïe neme nedoolalida nowë ili gabula säi.
MAR 3:34 Ea e amalela sefolalebe amoli sidawewela bealahilä ilima sähalea, Bimo. Neme nedoolalida sefolalebe gowe ilimelëla säi.
MAR 3:35 Udia dolö, Godea hamese amo gadola hamolo nefolalebe amolida, nedooge nalifige nemege amoli neamelëla säi.
MAR 4:1 Yesu e Galili oeabo agesua nea, udia dolöma ado mala bu säla olelesa nelo. Udia dolö yafie gegedoi amea negegisebegi, Yesu e ödä daia du dilo, amogi fila fedai. Udia dolö yafie gedoi amolida agesua ami nefolalo.
MAR 4:2 Amala nefolalebegi, Yesuea ilima säla olelesalea, ado besu yafie säi amoda gowe.
MAR 4:3 Nabuö! Dolö afädëa sagaido gägä fëfëla aligi asi.
MAR 4:4 Sadia gogola aligi awäha nebegi, gägä odoa idiafa daala negei amo haea maala, neala naha maadei.
MAR 4:5 Gägä odoa igi naga abelëidaia daala negelahilä, gägä amea naga abelëi amodaia fodolofalï bäui.
MAR 4:6 Bäui gaso, eso neëa hëgïsalea difi moholö asusugala ödölola bausoi.
MAR 4:7 Amase, gägä odoa äyo gägäi neebea ami digai. Amoda äyo gägäi amobalä gegedola bäui amea, widi gägä amo yau hahalea gägä made negei.
MAR 4:8 Gägä odoa naga hedabi dibea ami daala negei ameada, hedabola bäulahilä gägä negeimelë. Odoaeada gägä nabülasi ohodoa negei. Odoaeada nabülasi gafeia negei. Odoaeada nabülasi emu nabülasi negeimelëla säi.
MAR 4:9 Amala sälahilä Yesuea säla wagala sähalea, Dili gëhe galea galëda nabuöla säi.
MAR 4:10 Udia dolö yafie afiaha maadeibua e bëgëla aulo giwilasi amola, udia dolö odoa Yesubalä nefolalo amola ilia, ea ado besula säi amoïe mi nabi.
MAR 4:11 Amala nabasebegi, Yesuea ilima säla obëgësalea, Godea Beaha Maadela Sigi Neebe amo helësëmolöda, dafidi ulufadigila made musügä negei dilo amo, dilia helësëmäia säla ï amomelë. Be udia dolö segea nefolalebe amolima ado besulamu säla ïaha neebeweïe
MAR 4:12 Mida. Ilia siia beahamu nea gaso, dofä gowe gabula made beagolemolömelë. Ilia gëhea nabahamu nea gaso, asigia mi gowe gabula made helësëmolömelë. Ilia beagolela helësësa galebeda, ili asigi besusa maadesegi ilia nafade hamoi amo Godea hësa maadelabiomelëla säla ï.
MAR 4:13 Yesuea ïe bëgëla aulo amolima sähalea, Ado besu säi amoïe mi fädäla made helësëi neale. Made helësëi nea galëda, ado besu odoa säse amo sulubadela abilia helësëmolö gabu.
MAR 4:14 Dolö amea hawa fëfëi amo gadolada, Ado Mala fëfëlo dolö nea.
MAR 4:15 Ado mala idiafa digai amo gadoida, udia dolö odoaea ado mala nabasebegi, Godea ilile isogi ado mala sagasi amo, mugabe Saidani maala fodolofalï neala gaula aulo nea.
MAR 4:16 Amase, udia dolö odoa widi gägä igi naga abelëidaia digai amo gadoi neebe amoliada, ado mala obeägïla nabalahilä fodolofalï neala gaulo.
MAR 4:17 Gaso, ili difi moholö ulïsalea sedade made aligilo. Amalahilä ilia ado mala neala gaui amoïe yöi beasege, odoaea ili neala sëlasisege, ilia fodolofalï dïgïla aulo nea.
MAR 4:18 Udia dolö odoa giisi äyo gägäi damui fedaha dibea daala negei amo gadoi neebe amoliada, ado mala nabalahilä gaso,
MAR 4:19 ilia nagadaia galu difolalebe amoligi säosäolahilä, muni edefade negemolöila helësëla, nelebo elö elöla gesami awäla helësëse amea, ado mala nabi amo yau hahalea gägä negelo made nea.
MAR 4:20 Gaso, naga hedabia molö gägä daala negei amo gadoi udia dolö neebe amoliada, ado mala nabala asigi afädë negela neala gaulahilä, ilia gägä nabülasi ohodoa negela digi, nabülasi gafeia negela digi, nabülasi emu nabülasi negela digilo neamelëla säi.
MAR 4:21 Amala sälahilä Yesuea ïe bëgëla aulo amolima sähalea, Afädëa gamali yola sagaseda, faloea dabelole ma, imidi hawa negelole. Ai, amala made hamolo, aulidaia negelomelë.
MAR 4:22 Nelebo musügä negei dibe amoda hobeala ulufadigisa maadela, udia dolöea nelebo dabela negei difolalebe amolida hobeala yo digai dibea ami ulufadigisa maademolömelë.
MAR 4:23 Afädë di gëhe galea galëda, nabualola säi.
MAR 4:24 Ea ilima aso sähamu neamu sähalea, Ado dilia nabi amoda hedabola helësëmalo. Dilia odoagali mogela ïaseda, Godeage amo gadola wäla diligali mogela ïahalea, odoage baala ïmolömelë.
MAR 4:25 Afädëa nelebo afädë gaula neebe amomada Godea odoa baala yafie ïmolömelë. Afädëa nelebo afädë made gaula nea, holöfalï gaula neebe amo dofea gaula neala neebe amolida, Gode hï fedela nimolömelëla säi.
MAR 4:26 Yesuea ado aso sähamu nea sähalea, Godea Beaha Maadela Sigi Neebe amoda gowe gadoi dialea. Dolö afädëa sagaido hawa fëfëla aligi awäha nelolahilä,
MAR 4:27 gasi sulubadelagi dolö amo diala, yose nowela afu mafusa neë gaalu, hawa fëfëi amo duulu besela galala bäuse amoda gomalä bäusebela dolö amo hïda dawa made aligilo.
MAR 4:28 Nagaea bäulasila gägä negelo. Dafidida bäudale bäulo. Hobeala mumusu negelahilä, gägä hï e negelomelë.
MAR 4:29 Molö sagai amo nimolöi galëda, dolö amo hï helebe guagei amea damulo. Mida, molö mumului nimolö segeyo besela galai amea.
MAR 4:30 Yesuea aso sähamu nea sähalea, Godea Beaha Maadela Sigi Neebe amo, nilïa abodo gadoila sämolödu. Ado besula nilïa abodo gadoima oodo beala sämolödu.
MAR 4:31 Amoda masada gägä gadoi. Gägä odoa gadoi made. Gägä amoda holöfalïfalï. Ilia amo sagaia sagalomelë.
MAR 4:32 Ilia sagai amo fedala edefadela aligiseda, dägöala sagai odoa amo baagila awäla bäulomelë. Ïe adomo edefade bafui amogida, haea mafula bäu augi hawa ami mosö olelomelëla säi.
MAR 4:33 Udia dolö amolile asigia helësëmolöi galëda, helësëmäia. Yesuea ado mala säla ïahaleada, ado besula yafie säla ïaha nelo.
MAR 4:34 Ea udia dolöma Ado Mala säla ïahaleada, ulufala made säla ïala, ado besula säla ïaha nelo. Ïe bëgëla aulolali hilidomu neada, ea ado besu säla ïlo amoïe mi sulubadela ilima säla ïaha maadei.
MAR 4:35 Segeyo amo gala deadi eso digase amo gaalu, Yesuea ïe bëgëla aulo amolima sähalea, Oeabo edefade goïe agesu alogodigogi afiadila säi.
MAR 4:36 Amala sälahilä udia dolö yafie nefolalo amoli amilahilä, ili Yesu sulo du amodaia fila fedalahilä, eege hiligila fila afiai. Du odoage ili awäse amo bëgëla hobeala afiai.
MAR 4:37 Afiaha dibegi, fo edefade gelola guula maalahilä, oeabo bubolela aidagula dudaia häila digala, du nobamolö hamose melï.
MAR 4:38 Amala hamose amo gaalu, Yesu eda du bidigi busa fugulo negela adi dilo. Amala adi dibegi ilia e didiigisalea sähalea, Säla Olelelo-o, di nowemo. Nilï baagodelä hamosebe gowegi di holöfalï fudugila made dialealela säi.
MAR 4:39 Amala säsebegi, Yesu e nowelahilä foma nemolahilä ödäma sähalea, Aeala aumamo. Fologomabula säi. Amala säi amole fo gelola guula misi amo boogelela ödä aidagula fedai amoge aumalasi.
MAR 4:40 Ea ïe bëgëla aulo ilima nabahalea, Edogi bedäha dialea. Dili Godema asigi afädë negei made nealela nabi.
MAR 4:41 Amala usila aumase amo beala, ili edefademalä bedälahilä hilidomu sähalea, Folea ödäleada ïe ado nabelo gabu. Dolö weda nowëdula säha difolalo.
MAR 5:1 Yesula ïe bëgëla aulola ili Galili oeabo agesu näiado alömodi awäla Gelasa fii mosöa besela galai.
MAR 5:2 Yesuea ödä du ami negesiä awäha nebegi, dolö mugabe fedai afädë baagoi igi äbägi bausidola maaha nebegi gausiala digai.
MAR 5:3 Dolö amoda baagoi bausia amimu diaha aligilo. Dolö afädëa ïe naabo emoge igi ëfëa gaula nafodomolöi made nelo.
MAR 5:4 Segeyo yafiegi ilia ïe naabo emoge igi ëfëa nafodosamu aligilo. Gaso, igi ëfë amo ea hësäla digisamu aligilo nelo. Geloi hïdo elöi amoda dolö afädëa e gaumolöi made nelo.
MAR 5:5 Dolö amoda gasi esoage baagoi bausiale segebidaialemu nawesa aligilo. Ea üalala gaula nawesamu neada, hïle domalo igia dagabosamu aligilo.
MAR 5:6 Amala hamosamu aligilo amo, Yesu e aso wagadi made maaha neebe amo beala, e baluluia awälahilä Yesuïe emo mia gumusula dia digai.
MAR 5:7 Gumusula dialea gelola üalala sähalea, Gode Dofä Ilibia Edefade neebe amoïe malö Yesu, dia nema abilia hamomolöïe misi. Na dima Godeïe ëi nabasewegida dia ne së ïmabiola säi.
MAR 5:8 Ea amala gelola säi amoïe mida, Yesuea ema dida mugabe, dia dolö go dïgïla mosöla säsebegi amala säla obëgëi.
MAR 5:9 Yesuea ema nabahalea, Dïe ëida nowëla nabi. Ea säla obëgësalea, Nïe ëida Malei. Nilïda holöfalï made, maleimelëla säi.
MAR 5:10 Amala sälahilä ea Yesuma gelolafalï sähalea, Segeweda dïgïla mosöla sämabiola säi.
MAR 5:11 Amo gaalu amida sugua yafie gau domala ami moosa nefolalo.
MAR 5:12 Mugabe amolia Yesuma gelolafalï sähalea, Nilï sugua nefolalebe gagowelima fedala namolö mosöla sämola säi.
MAR 5:13 Yesuea amala hamomola säsebegi, dolö amo dïgïla mugabe amoli sugua nefolalo amolima fedai. Amala nogila fedala gau mogobogi amogi baluluia didigafula ödägi nogila digaha maadelahilä, sulubadela ödäea naha maadei. Sugua amoli gedolada dausini äudä gadoi ödäea mai.
MAR 5:14 Amala hamose amo beala sugua sigi aligilo amoli fisäla awälahilä, gaamu dibea amige mosö gägäwila asi dibea amige säsäla awäha nelo. Säi amo nabalahilä udia dolö nefolalo amolia abilia gelola hamoi walebelela fädäla bea afiai.
MAR 5:15 Ili Yesu neebea afialahilä beahamelebe, dolö dafidi mugabe yafie fedai nelo amo fagulo salugalahilä, e asigi hedabi negei sebe amo beala ili bedäi.
MAR 5:16 Udia dolö Yesuea hamose melëlo amolia, udia dolö misi nefolalebe amea nabuäia dolö amoma mugabe yafie fedai nesila digi amoge, sugua ödäea mai amoge ilima säla ïaha maadei.
MAR 5:17 Amala säla ïasebegi, ilia Yesuma gelola sähalea, Dida nilïle segea wi namolö mademelë. Näiadodi namolö mosalola säi.
MAR 5:18 Amala säsebegi Yesu e dudaia fimolö awäha nebegi, dolö mugabe yafie fedai dafidi nesila digi amea, Yesuma nabahalea, Di awäsebe go gadola ne mudulela nabi.
MAR 5:19 Amala nabasebegi, Yesuea dolö amoma säla obëgësalea, Nebalä moholö made. Dafidilo Geloia dima hamoi amoïege bobasëi amoïege dïe sosogoma säla ïmolö dihï mosöa mosalola säi.
MAR 5:20 Amala säsebegi, dolö amea Gaamu nabülasi difolalebe amo sulubadelagi awälahilä, Yesuea ema hamoi amo udia dolö nefolalo amolima säla ïasebegi, ilile asigia fudugisa maadei.
MAR 5:21 Yesu e dudaia fila Galili oeabo bu dëgëla obëgëla awäla agesua nebegi, udia dolö yafie mafula ea ado säse amo nabulö gegedoi.
MAR 5:22 Amase amo gaalu, gedolo mosö beaha aligilo afädë misi, amoïe ëida Yalusi. Ea Yesu beagolelahilä ïe emo mia gumusula dia idogolahilä
MAR 5:23 Yesuma gelola sähalea, Nïe nidiwi holöböda baagomolö ga madefalï dialea. Dia dofä naaboea diigisegi made baagola wahimäia awähadula säi.
MAR 5:24 Amala säsebegi, ebalä asi. Udia dolö yafie nefolalo amoliage e bëgëla afiahalea negegila dedelela aligi afiaha dilo.
MAR 5:25 Afiase amo gadola udia afädë gäheo i nabülasi afädëïe odoai äudä heale olo olosamu aligilo amoge asi.
MAR 5:26 Udia ameada e wahimäiala alögoda yafie neebea ami awähamu aligilo. Gaso, ea së edefade melï. Ea alögoda iligali muni ïahamu aligilo. Gaso, ïe olo amo made wahila edesa aligilo.
MAR 5:27 Amala hamoi salea, ea Yesuea hamolo sedalu säi amo nabalahilä, udia dolö Yesu bëgëla afiase amolibalä awälahilä e baagido maala ïe fagulogi diigi.
MAR 5:28 Ea hïdo asigiamu helësësalea, na ïe fagulogi diigiseda, neda wahimolöla helësëi.
MAR 5:29 Ea Yesuïe fagulogi diigi amole, heale olo oloi amo hogosa helela, e fodolofalï wahi gabula helësëi.
MAR 5:30 Yesuea ïe wahilo geloi awäse amo helësëlahilä, besula nea nabahalea, Nïe fagulogi diigi amo nowëala nabi.
MAR 5:31 Amala nabasebegi, ïe bëgëla aulo amolia ema sähalea, Dibalä udia dolö yafie dedelela aligi afiaha dibewe dia beasegoda, ne nowëa diigila edoïe nabahala säi.
MAR 5:32 Amala säse amo gaalu, e nowëa digisa walebelela sidawewela hogoi.
MAR 5:33 Udia amea ema hamoi amo helësëla emo gigisëla bedäla, Yesu mia ga madela gumusula dia idogolahilä, Ema hamoi amo sulubadela säla ïaha maadei.
MAR 5:34 Säla ïasebegi Yesuea ema sähalea, Nïe nidiwi-e, dia nema asigi afädë negei amea di hä wahigomelë. Olo amea dima bu elö made baamolömelë, dalulo gaula mosalola säi.
MAR 5:35 Yesuea säha nebegimu gedolo mosö beaha aligilo Yalusiïe mosöala dolö odoa misi. Maalahilä ilia ema sähalea, Dïe didiwi amoda hä baagoi dialea. Säla olelelo goma yöi ïase goda edoïela säi.
MAR 5:36 Ilia amala säsebegi, Yesuea auaulahilä gedolo mosö beaha aligilo amoma sähalea, Dia bedämabu. Godema asigi afädë negemalola säi.
MAR 5:37 Amala sälahilä udia dolö odoa nefolalo amolima dili misiabiola sälahilä, Fida Yamese ïe edoo Yonela ohodoa ilimu ebalä asi.
MAR 5:38 Gedolo mosö beaha aligilo amoïe mosöa malïgahamelebe, udia dolö yafie gegedolahilä didigaosalea goba fedaha dibe melï.
MAR 5:39 Beala e mumusogi nogila digalahilä ea ilima sähalea, Dilia goda edogi didigaola goba fedaha dialea. Udia malö goda baagoi made, süwia adi dialeamelëla säi.
MAR 5:40 Amala säsebegi, ilia Yesubalä ösa sefolalo. Amasebegi, ea ili sulubadela segea nesila digilahilä, udia malö amoïe eedo emelela ïe bëgëla aulo ohodoa amolali udia malö dusugala negei hogoli amogi nogila digai.
MAR 5:41 Yesuea udia malö amoïe naabogi gaula nabeleia wesalea, Dalida gumi. Nilïle ado adolada, Udia malö holöbö, na dima säha. Di hä nowemola säi.
MAR 5:42 Amala säi amole udia malö amo fodolofalï nowela asi. Amala hamose amo beala, udia dolö nefolalo amoli edefademalä fudugila bedäi. Udia malö amoïe gäheo ida nabülasi afädëïe odoai äudä.
MAR 5:43 Yesuea ilima gelolafalï sähalea, Na walio hamoi amoda udia dolö odoama säla ïmabiola säi. Amala sälahilä, Ea ilima udia malö holöbö go molö muäia ïmola säi.
MAR 6:1 Yesuea sege amo dïgïla ïe bëgëla aulolali hï e ëdëla aligi segea ami bu obëgëi.
MAR 6:2 Segeyo Sabada gafegi Yesu e gedolo mosöa ami awälahilä, udia dolöma ado mala olelesa nelo. Udia dolö yafie ea ado mala säse nabaha sefolalo amoli asigigi fudugilahilä sähalea, Dolö goea ado goweda, abidi niidu. Ema dawa edefade dibe goweda, dawa edo gadoidu. Ea melëlo made gadoige hamomolöi made gadoige hamose weda edodu.
MAR 6:3 Nilïa helësësa, dolö egoweda mosö olelo. Meliïe malö madele. Eda Yamese Yosese Yudasa Saimonola ilile edoo nea madele. Ïe elefila ilida nilïbalä wi sebe amodala säi. Ilia amala sälahilä, ema bimolö habobala hamei made nelo.
MAR 6:4 Amasebegi, Yesuea ilima sähalea, Udia dolö fifi asi sulubadelaeada, bea säloïe ado nabaha. Gaso, hïle segea fii, hïle sosogofalï iliage, hïle mosöa fii iliage, ïe ado nabelo made gabiola säi.
MAR 6:5 Segea ami dolöea hamomolöi made gadoige melëlo made gadoige ea hamomolöi made gabugi, udia dolö oloi afädë afädëlamu naaboea diigila wahisa nelo.
MAR 6:6 Amala hamose amo beala ilia ema asigi afädë made negesebegi Yesu e fudugisa nelo. Amasebegi, ea Nasalese sege amo fisila udia dolö fii odoa ilima ado mala olelela aligi nawesa nelo.
MAR 6:7 Yesuea ïe bëgëla aulo giwilasi amoli wela gegedosebegi. Ea ili äudä äudäla afufumalola sälahilä, udia dolö mugabe fedai nefolalebe amoli nesila digamäia ea ilima geloi ï.
MAR 6:8 Ea ilima sähalea, Dili afiahalea galiamomu gaula mosalo. Nelegei odoa gaula mosabio. Molöge aduge muni salelogi salala gaula mosabio.
MAR 6:9 Emo usililo salugamalo. Fagulo äudä salugamabiola säi.
MAR 6:10 Ea ilima aso sähamu nea sähalea, Dili awäla sege afädëgi besela galala mosö afädëgi nogila digaseda, mosö amogimu nelolahilä dilia sege amo dïgïla awäsolo amo gala giso mosö amo hä fisimalo.
MAR 6:11 Amase, sege odoagi besela galasegi, ami fii amolia mosö fu made ïala, dilia säse amoge made nabaseda, sege amo hä dïgïla mosalo. Dïgïla awähaleada, dilile emogi dao baai amo fëfëla salalahilä mosalo. Amala hamoseda, ilia helësësalea, nilïa asiala hamoi amea amala hamosebela helësëmolömelëla säi.
MAR 6:12 Amala säi amo nabala ili afialahilä, udia dolö ilima sähalea, dili asigi besumalola säla ï.
MAR 6:13 Ilia amala säla ïalahilä, udia dolö yafie mugabe fedai nefolalo amoli nesila digila digi. Udia dolö oloi yafie difolalo amolige ilia weli söga negesebegi, wahisa maadei.
MAR 6:14 Udia dolöea Yesuïe ëi säsäi asi ameada beaha aligilo Gini Heledoea nabi. Odoaea sähalea, Ödägi gelo Yone dafidi baagoi amo bu nowelahilä obëgëla misi nea, geloi melëlo made gadoi hamosa neamelëla säha dilo.
MAR 6:15 Odoaea sähaleada, Eda Elaia gabu. Amase, odoaea sähalea, Eda bea sälo siiba nelo amo gadoi gabula säi.
MAR 6:16 Heledoea ado amo nabalahilä sähalea, Yoneda na muugi damui amo bu obëgëla maala neebe gadoi gabula säi.
MAR 6:17 Helodiasa eda dafidi Heledoïe edoo Filibiïe udia sulo amo hobeala Heledoea fedela nii. Amala hamosebegi, Yonea Heledoma sähalea, Dia didooïe udia fedela neala dibalä sebego dofea made hamoimelëla säi. Amala säsebegi, Heledoea ami dolö nefolalo amolima sähalea, Yone gaumolö mosalola säi. Amalebe ilia e igi ëfëa nafodolahilä galabaia mosöa negei. Heledoea ïe udia Helodiasa obeägïmäia amala hamoi.
MAR 6:19 Ïe udia Helodiasaea Yonema habobalahilä, e baagomäia abilia nufulödula helësësa sulo. Gaso, nufulö fu made melï.
MAR 6:20 Mida, Heledo eada Yone eda dolö hedabi, Godeïe siigi asigi mogoi neala helësëla bedälahilä, eada Yone idihë nelo. Ea Yonea ado säse nabala obeägïlo ameada e asigi säosäola helësësa nelo.
MAR 6:21 Heledo e ägüla misi segeyo besela galasebegi, gamane beaha aligilo nefolalo amolimage, ami beaha aligilo nefolalo amolimage, Galili segeïe dafidilo nefolalo amolimage ea sähalea, Molö molö gegedomalola säi. Molö giasolo amo galada Helodiasaea Yone nufulö fu beagolei.
MAR 6:22 Segeyo amo gala ili molö naha dibegi udia malö Helodiasaïe idiwi maalahilä sigoi. Heledoeage dolö odoa ebalä molö naha sefolalo amoliage, ea sigoi amogi hïdo elöla obeägï. Hïdo elöla obeägïsebegi, ginia dolïsä amoma sähalea, Sigosegoïe nelebo afädë ïmose amo gadoi ïmolömelëla säi.
MAR 6:23 Ea naabo migalïa diigila dolïsä amoma sähalea, Nelebo afädë ïmoseda, na sege edefade beaha neebe amogi mogogi nofela ïmolömelëla säi.
MAR 6:24 Amala säsebegi, dolïsä amo segea doadigila awälahilä emema nabahalea, Ne edo ïmola sämolödula nabi. Amala nabasebegi, emea sähalea, Ödägi gelo Yoneïe busa damula ïmola sämalola säi.
MAR 6:25 Amala säsebegi, dolïsä amo fodolofalï baluluia obëgëla awälahilä Ginima sähalea, Ödägi gelo Yoneïe busa damula falodaia gaula maala walio ïmäia hamesamelëla säi.
MAR 6:26 Amala säi amo nabalahilä ginia edefademalä bobasëi. Gaso, dolö molö naha sefolalo amoli sidaia migalïa diigila ado gelola säi ameada, fisimola sämolö ulï gabula helësëi.
MAR 6:27 Amala helësëlahilä ea fodolofalï ami afädëma sähalea, Yoneïe busa damula gaula obëgëmolö mosöla säi. Amala säsebegi, ea galabaia mosöa awälahilä Yoneïe busa damui.
MAR 6:28 Damulahilä falodaia negela gaula maalahilä dolïsä amoma ï. Ïasebegi, dolïsä ameada emema ï.
MAR 6:29 Amala hamoimelëla säi amo nabalahilä ïe bëgëla aulo amolia ïe domalo neala gaula awäla igi äbägi bausi.
MAR 6:30 Abosolo dolö amoli Yesu neebea obëgëla maalahilä, ilia hamoi amoge mala olelei amoge sulubadela ema säla ïaha maadei.
MAR 6:31 Udia dolö afu mafusalea ili molö molö fu made beasebegi, Yesuea ilima sähalea, Nilï udia dolö madeido hele fimolö afiadila säi.
MAR 6:32 Amala sälahilä ili hilido ödä dudaia fifigila udia dolö madeido afiai.
MAR 6:33 Ili afiaha dibegi, udia dolö yafiea bealahilä ili hä afiaha gabula helësëi. Amala helësëlahilä ili gaamu elögi elögila nagadabodo baluluia afialahilä ili moholö afiasebea ami dafidi ilidale awäla besela galai.
MAR 6:34 Ili awäla ödä agesua besela galahamelebe, udia dolö yafie nefolalebe melï. Bealahilä ea ili edefademalä bobasëi. Mida, Ili sugua sibi sigi aligilo maadesalea, hilido aligilo amo gadoi neebe amo beala. Amalebe ea ilima ado mala yafie säla olelesa nelo.
MAR 6:35 Segeyo amo gala deadisebegi, ïe bëgëla aulo amolia e neebea maalahilä ema sähalea, Sege udia dolö maadeia wimu nebegi hä deadisebegi.
MAR 6:36 Dia udia dolö nefolalebe gowe ili mosalala sämo. Afialahilä hili molö bidia nimolö sagai mosö dibea amige gaamu holöfalï dibea amige hogogola mosäiamelëla säi.
MAR 6:37 Amala säsebegi, ea ïe bëgëla aulo amolima säla obëgësalea, Ili molö muäia dilia ïmalola säi. Amala säsebegi, ilia ema säla obëgësalea, Muni gina hädali äudäea ili beledi muäia neala ïmolö afiadulela nabi.
MAR 6:38 Ea ilima nabahalea, Dilia beledi aboläia ägüi walebelela bimolö mosalola säi. Beala maalahilä ilia ema sähalea, Nilïada beledi bia seme äudä amolemu ägülubela säi.
MAR 6:39 Amala säsebegi, ea ilima sähalea, Udia dolö sulubadela gegedolahilä, giisi hedabidaia, nudulu hamola fifigimalamalola säi.
MAR 6:40 Amala säsebe amo gadola säsebegi, odoada hädali afädë, odoada nabülasi bia gadoi nudulu hamola fifigi.
MAR 6:41 Amala fifigi dibegi ea beledi bia amoge seme äudä amoge naaboea gaula nea, Selesaia mosöa sida adogola nea, Godema nesegelahilä, ïe bëgëla aulo amolia udia dolö amoligali sogomäia beledi dagabodasila ï. Amalahilä ea seme äudä amoge dagabodasila, ili sulubadelagali sogomalai.
MAR 6:42 Sogoi amo, sefolalo amoli hulu sulubadela naha maadei.
MAR 6:43 Naala bolesalea, beledige semege fea digai amo bëgëla aulo amolia neala gedolahilä, adu giwilasigi salala nobai.
MAR 6:44 Beledi seme naha sefolalo amoli dolömuda dausini bia sulo.
MAR 6:45 Yesuea ïe bëgëla aulo amoli fodolofalï mosalolahilä sähalea, dafidi dilidale ödä dudaia fifigila oeabo go dëgëla alogodi sege ëi Bedesaida mosalola säi. Amala sälahilä udia dolö gegedoi amolima sähalea, Dilige dihili mosöa dusula afiamalola säi.
MAR 6:46 Ili sulubadela dili hawio afiamalolahilä, eda Godema adomolöïe segebidaia ami fedai.
MAR 6:47 Ïe bëgëla aulo amoli dudaia fifigila asi amo oeabo mogogi gasise amo gaalu, segea amida Yesu e hïdo nelo.
MAR 6:48 Yesu e ami nea beahamelebe, du busamadila fo gelola maase amea, ödä adelo i amea ilia gelola adimolö ulïse melï. Haea gämolö amo gaalu, Yesu e ödädabodo ili neebea ami moholö asi. Ea ili baagila moholö awäse
MAR 6:49 amo gaalu, ilia e ödädabodo maase amo beala, mugabeledula helësëlahilä üalai.
MAR 6:50 Ili sulubadelaea beala edefademalä bedäsebe amo bealahilä, Ea ilima fodolofalï sähalea, Asigi hä gelomalo. Weda nemelë. Bedämabiola säi.
MAR 6:51 E maala ilibalä dudaia fii amole fo made maala boogelei. Amala hamosebegi, ilile asigigi edefademalä fudugi.
MAR 6:52 Iliada ea udia dolöea muäia beledi ï amoïe mida fädäla made helësëi nelo. Ilile iso asigi gai nelo.
MAR 6:53 Yesula ïe bëgëla aulola ili oeabo amo dëgëla alämadi sege ëi Genesaledi besela galalahilä ödä du amo ëfëa begela agesua ami negesi.
MAR 6:54 Du negesiä maaha neebe amo udia dolö nefolalo amolia bealahilä, hä Yesu gabula aabela helësëi.
MAR 6:55 Amala helësëlahilä ili sege dibe amo sulubadelagi fodolofalï baluluia afufulahilä udia dolö ilima säla ïaha maadei. Udia dolö Yesu misi neala säi nabi amoliada, oloi difolalo amoli iwasala gaula Yesu neebea ami misi.
MAR 6:56 Sege dibe sulubadelagige gaamu dibe sulubadelagige, mosö dibe sulubadelagige Yesu e awäla besela galasebea amida, udia dolö nefolalo amolia oloi difolalo amo gaula mafula magaia gaamugi negesisi. Negesiä ilia Yesuma gelola sähalea, Oloi gowe ilia dïe fagulo bidigimu diigimäiamelëla säi. Oloi amoli sulubadelaea amala diigisebegi, wahisa maadei.
MAR 7:1 Felesi dolöge, mala dawadigi dolö odoa Yalusalemela misi amolali gegedolahilä ili Yesu neebea ami afiai.
MAR 7:2 Ilia beahamelebe ïe bëgëla aulo odoaea naabo nigime hëla made molö naha sefolalebe amo melï.
MAR 7:3 Felesi dolö iliage, Yu udia dolö sulubadelaeage, mäu ilia aialo mala negei amo helësëlahilä naabo nigime made hëla molö nülo made nelo.
MAR 7:4 Ili magaia gaamugi awäla, obëgëla maalahilä, nigime made hëla molö nülo made nelo. Ödä iige faloge, gaabo iige, aiala nigime hëlo negei amo gadola aiala hamolo odoa yafie negei.
MAR 7:5 Felesi dolöla mala dawadigi dolöla ilia ema nabahalea, Dïe bëgëla aulo golia, mäu ilile aialo mala dibe amo damula, naabo nigime hëla made, buludola molö nase goda edoïela nabi.
MAR 7:6 Amala nabasebegi, ea ilima säla obëgësalea, Siiba Aisaeaea asigi fea negelo dilile hedabola bea säla negeimelë. Ea bea säla dëdëla negei amoda gowe, Udia dolö ilile iso asigi wagadi made ga negesiä, adoeamu nïe ëi gauia adalo nea.
MAR 7:7 Ilia dolöfäea mala säla negei amomu olelesaleada, Godeïe adoda amomelëla sälo nea. Amaimo, ilia nïe ëi memalä gauia adalo nebegola säla dëdëla negei dialeala Yesuea säi.
MAR 7:8 Dilia Godeïe ado säla negei dibe amo fisila, dolöïe aialo mala dibe amomu gaula gelola hamosa nebegola säla ï.
MAR 7:9 Yesuea ilima aso sähamu nea sähalea, Dilile aiala hamolo mala amo hamosalea. Dilia Godeïe mala säla negei dibe amo fisi gabu.
MAR 7:10 Amoïe Mosesea ado säla negesalea, dïe diado diemele hawa nea, elele ado nabala, bëgëla hamomalola sälahilä sähalea, Afädëa ïe eedo emele gadiaboseda, baagomäia nufulö dialeala säla negei dialea.
MAR 7:11 Amai gaso, dilia gomalä sälomelë. Afädëa nelebo amoligi gobanala säseda, eada eedo emele, made ugila negemolömelëla sähalea sälo, Gobana nilïle ado sälada Godegali odala ï neawe.
MAR 7:13 Amalo ameada, dilia mäu ilia aiala hamolo mala olelei amomu hamosa neada, dilia Godeïe ado fisila, mala amo gadoi yafie hamosamu aligilomelëla säi.
MAR 7:14 Yesuea udia dolö nefolalo amoli bu misialolahilä ilima sähalea, Dili sulubadelaea, na säsebewe nabala hedabola helësëmalo.
MAR 7:15 Nelebo segea dilo dolö isogi digase ameada, udia dolö neala nafadelo mademelë. Nelebo isogi dilo segea doadigila awäse amea udia dolö neala nafadelomelëla säi.
MAR 7:17 Amala sälahilä, udia dolö amoli amilahilä, e mumuso isogi digala sebegi, ïe bëgëla aulo amolia ema nabahalea, Ado besula säi amoïe mida edodula nabi.
MAR 7:18 Amala nabasebegi, ea ilima sähalea, Dilige aso, asigi made gäwi neale. Nelebo sulubadela segea dilo isogi digase ameada, udia dolö Godeïe siigi nigime baalo made amo, dilia dawa made neale.
MAR 7:19 Molö nase amoda asigigi aulo mademelë. Gaisagi digalahilä segea doadigila aulomelë. Ado amoïeda Yesuea gomalä sähalea säi. Molö sulubadela nase ameada, Godeïe siigi nigime baalo mademelëla säi.
MAR 7:20 Ea sähamu nea sähalea, Udia dolöïe iso asigigi besela galase amea, udia dolö Godeïe siigi nigime baalomelë.
MAR 7:21 Udia dolö ilile iso asigigila besela galalo amoda gowe. Asigi nafadege, nelegei fa nimolöge, udia dolö baagomäia nufulöge, udia dolö susugu hamomolöge, hilimu nafade odoa hamomolöge,
MAR 7:22 Udia nii susugu hamomolöge, gesami moholöge, mala nafade elö elöla hamomolöge, wäfalï sämolöge, nafade memelela made sulubadela hamomolöge, mudiamolöge, wäfalï säsäla hololömolöge, gugusämäia hamomolöge, asigi maade gadoia hamolo wäla hamomolöge.
MAR 7:23 Nafade amoli sulubadela asigigila besela galasebe amea udia dolö Godeïe siigi nigime baalomelëla säi.
MAR 7:24 Yesu e sege amo dïgïla gaamu Daiamadi asi. Udia dolö nefolalebe amolia, e neala, made helësëmäia e mosö afädë neebe amoïe mumusogi nogila digai. Gaso, e musügä fimolöi made nelo.
MAR 7:25 Amala nebegi, udia afädëïe idiwi holöböma mugabe fedai sulo. Amoïe emea Yesu neala säi amo nabala, e fodolofalï maalahilä, Yesuïe emo mia gumusula adi.
MAR 7:26 Udia ameada Giligi ado adolo. Eda Silia Fonisia fii udia. Ea Yesuma gelola sähalea, Nïe nidiwi holöböma mugabe fedai sebe amo dia nesila digamäia helësësamelëla säla ï.
MAR 7:27 Amala säsebegi, ea udia amoma sähalea, Molö nahalea, malö ilidale dafidi ïmolö galea. Malö ilile molö dibe amogida, ügüloea muäia sadia gala ïmolöi made galeala säi.
MAR 7:28 Amala säsebegi udia amea säla obëgësalea, Dafidilo-o, dofä gaso, malësäea molö nahalea iso dusula fisia digaida ügüloea neala nülo madelela säi.
MAR 7:29 Amala säsebegi Yesuea udia amoma sähalea, Dia ado säi ameada, dïe didiwima mugabe fedai amo hä asimelë. Di hä mosöa obëgëmalola säi.
MAR 7:30 Udia amo hï mosöa obëgëlahilä beahamelebe, ïe malöma mugabe fedai amo doadigila asi, diasia dofea dibe melï.
MAR 7:31 Yesu e Daiamadila obëgëla awäla gaamu Saidono awäla, Gaamu Nabülasimadi nawesa nelolahilä, Galili oeabo edefade dibea ami awäla besela galai.
MAR 7:32 Udia dolö nefolalo amolia dolö afädë gëhe gala ado dadabi nelo amo e neebea ami sigi maalahilä, Yesuea e naaboea diigimäiamelëla säla ï.
MAR 7:33 Amala säsebegi, ea udia dolö nefolalo amoli ami dïgïla, dolö amole heledo aliga gala, ïe naabo sögöea dolö amoïe gëhe helegelagi diigilahilä, oböla hobeala hïle naabo sögögi gofedela galala, dolö amoïe elïgi diigilahilä,
MAR 7:34 selesaia mosöa sida adogola nea, hame hëia fedalahilä sähalea, Efadala säi. Nilïle ado adolada, Gëhe gai dugimo.
MAR 7:35 Amala hamosebegi, dolö amoïe gëhe amo doga negela, ïe elï fodolofalï hedaboi amea, ado hedabola adoi.
MAR 7:36 Yesuea udia dolö nefolalo amolima gelola sähalea, Walio melï amo udia dolö odoama säla ïmabiola säi. Sämabiola säla ïahamu neebe amo nabalahilä gaso, ilia auaula säla ïahamu nelo.
MAR 7:37 Udia dolö amolia ado amo nabala ili asigigi edefademalä fudugilahilä sähalea, Ea hamosebego sulubadela hedabola hamosebe. Gëhe gai nelo amoli doga negela digi, adolo made nelo amoli hedabola adomäia hedabolasilo neala säha nefolalo.
MAR 8:1 Segeyo amo gala, udia dolö yafie bu gegedoi amoli molö molö maade gabugi, Yesuea ïe bëgëla aulo amoli mofiamolahilä ilima sähalea,
MAR 8:2 Udia dolö gegedoi gowe ili nebalä segeyo ohodoa nelo amea hä molö molö maade gabugi asigisebemelë.
MAR 8:3 Na ili sïdëa baagoi amola wäla hili mosöa mosalaseda, ili idiafa si dädäbëlela digamolö gabu, Amase, odoada sege wagadi madela mofiai gabumelëla säi.
MAR 8:4 Ïe bëgëla aulo amolia ema nabahalea, Nilï sege nafadeia neebe ameada, udia dolö nefolalebewe ili muäia, nilïa molö abidi nea awäla nimolödula nabi.
MAR 8:5 Amala nabasebegi, Yesuea ilima, dilia beledi aboläia galebela nabi. Ilia ema säla obëgësalea, Nilïa gifalädalïa galebela säi.
MAR 8:6 Amala säsebegi, Yesuea udia dolö nefolalo amoli nagadaia fifigimalola säi. Amala sälahilä ea beledi gifalädalïa amo gaula nea, Godema nesegelahilä, dagabodasila ïe bëgëla aulo amolima sogomäia ïasebegi, ilia udia dolö sefolalo amo iligali sogoi.
MAR 8:7 Ilia seme nelësa naabo safo ägüi amoge, ea nesegelahilä udia dolö amo iligali sogomäia ï.
MAR 8:8 Udia dolö sefolalo amoli hulu sulubadela naha madei. Ilia nahalea fea digai amo, ilia adu gifalädalïa salala nobai.
MAR 8:9 Udia dolö amolida dausini biyidia gadoi nelo.
MAR 8:10 Yesuea udia dolö amoli hä afiamalola sälahilä, ïe bëgëla aulola ilida fodolofalï ödä dudaia fila Dalamanuda segeamadi afiai.
MAR 8:11 Felesi dolö odoa Yesu neebea ami maalahilä ilia ebalä gëgësalea. Dolöea hamomolöi made gadoi, selesaia mosöala misi dia, nofe elöi afädë hamomola säi. Ilia, e amala fedogola beasebegi,
MAR 8:12 Yesuïe iso asigigi yöla hame hëia fedalahilä sähalea, Udia dolö walio nefolalebe welia dolöea hamomolöi made gadoi nofe elöi hamosebe amo bimolöïe hogosa nebegoïe mida edo! Na dilima dofä gelola sähago. Udia dolö walio nefolalebe welima, dolöea hamomolöi made, nofe elöi afädë dofä made hamomolömelëla säi.
MAR 8:13 Amala sälahilä, ili ami dïgïla e dudaia bu filahilä, oeabo edefade amoïe agesu näiado alömodi amogi asi.
MAR 8:14 Ïe bëgëla aulo amolia beledi made ägüla elabola asi. Ilile beledi afädëfalïmu dudaia ami dilo.
MAR 8:15 Yesuea ilima gelola sähalea, Felesi dolöle Heledo elele beledi edelo yidi dibe amo helësëla, hedabola idihë namialola säi.
MAR 8:16 Amala säi amo nabalahilä ilia hilidomu sähalea, Ea säse egoweda, nilïa beledi ägüla made misi amoïe säsebemelëla säha dilo.
MAR 8:17 Ilia säsebe amo ea helësëlahilä ilima sähalea, Nilïa beledi ägüi made amoïe, säsebegola säha dibegoda edoïe! Dilia fädäla helësëla made, nelo amomu nea, dawa made neale! Ma, dilile iso asigi gai, nelo amo, aso, neagole!
MAR 8:18 Dilile si galea gaso, dilia made beasebele. Gëhe galea gaso, dilia made nabahale. Dilia elaboile!
MAR 8:19 Amo gala beledi bia ameamu dolö dausini biaea muäia, dagabodasi amo nalahilä, fea digai amo dilia neala, adu aboläiagi nobala salila nabi. Amala nabasebegi ilia ema säla obëgësalea, Adu Giwilasila säi.
MAR 8:20 Ilia amala säsebegi ea ilima sähalea, Udia dolö dausini biyidiaea muäia beledi gifalädalïa dagabodasi amo nalahilä, fea digai amo adu aboläiagi salila nabi. Ilia ema säla obëgësalea, Gifalädalïagi säi.
MAR 8:21 Amala säsebegi, ea ilima sähalea, Dilia fädäla made helësëla nelo amomu aso neagolela säi.
MAR 8:22 Yesula ïe bëgëla aulolali afiala Bedesaida segea besela galai. Dolö odoaea dolö afädë si golai nelo amo e neebea ami sigi maalahilä ema sähalea, Dïe naaboea dolö gowe diigimäiamelëla säi.
MAR 8:23 Amala säsebegi, Yesuea dolö si golai amo naabogi gaula mosö dibea amila segea sigi awäla, dolö si golai amoïe sihidoa, ea gofedela galala, ïe naaboea diigilahilä, dolö amoma dia nelebo beasebelela nabi.
MAR 8:24 Amala nabasebegi, dolö amea busa fädägägïa adogola bealahilä sähalea, Dolö nawese dibe beaha gaso, i gadoi nawese beasebemelëla säi.
MAR 8:25 Amala säsebegi, Yesuea dolö amoïe siigi bu elö diigisebegi, dolö amea si gadaea gala beasebegi, ïe si amo hedabolahilä nelebo sulubadela beaha maadei.
MAR 8:26 Amala hamolahilä Yesuea dolö amoma sähalea, Mosö yafie neebeadi mosabio. Dihï mosöa mosalola säi.
MAR 8:27 Yesula ïe bëgëla aulolali Sisalia Filibai gaamumadi, sege odoa dibeamadi amogi afiai. Idiafa afiaha difolalea ea ïe bëgëla aulo amolima nabahalea, Udia dolö nefolalebe amoliada neda nowë neala säha difolalebela nabi.
MAR 8:28 Amala nabasebegi, ilia ema säla obëgësalea, Udia dolö odoaeada, ödägi gelo Yone neala säla digi, odoaeada, Elaia neala säla digi, odoaeada, bea sälo dolö afädë neala säla digisa neamelëla säla ï.
MAR 8:29 Amala säla ïasebegi, ea ilima nabahalea, Dilia neda, nowë neala sähala nabi. Fidaea ema säla obëgësalea, Godea ïe udia dolö sigi obëgëmäia, Afädë Memelei amoda dofä dimelëla säi.
MAR 8:30 Amala säsebegi, Yesuea ilima gelola sähalea, Odoama neda amomelë, säla ïmabiola säi.
MAR 8:31 Yesuea ïe bëgëla aulo amolima mi gäwila säla olelesalea, Dolöïe Malö amoda së edefade molömelë. Dolö asigi gäwi dafidilo neebe amoliage, gobela ïlo busa neebe amoliage, mala dawadigi neebe amoliage, ema habobalahilä ilia e baagomäia nufulömelë. Segeyo osodagi e bu nowemolömelëla säla ï.
MAR 8:32 Ea ilima ado amo mogola säla ï gaso, Fidaea Yesu sigi aliga galahilä, nemola sähalea, amala sämabiola säi.
MAR 8:33 Amala säsebegi, Yesu e besula, ïe bëgëla aulo amolima siila nea, Fidama nemosalea, Saidani! Ne neebeawi made namolö. Mosö! Diada Godea helësëlo amo gadola made, dolöfäea helësëlo amo gadola helësësebela säi.
MAR 8:34 Amala sälahilä, ea udia dolö nefolalo amolige, ïe bëgëla aulo amolige mofiamolahilä ilima sähalea, Afädëa ne bëgëla moholö helësëseda, hï hamela helësëlo amo fisila, hïle i fügäi gaula, ne bëgëla moholö dialea.
MAR 8:35 Afädëa hïle namolö amo gaula fëdöla aligiseda, ïe namolö amo hogosa helemolömelë. Amai gaso, afädëa nege, nïe Ado Mala Hedabige helësëla hïle namolö amo fisiseda, ïe namolö amo hedabi namolömelë.
MAR 8:36 Afädëa nagadaia nelebo dibe amoli sulubadela gaula neëgi hï e baagoseda, nagadaia nelebo amea, hï e abeahäla ugila negemolödu.
MAR 8:37 Afädëa bidi edo ïalahilä, hïle namolö amo hï bu nea obëgëmolödu.
MAR 8:38 Udia dolö ado mala made nabeloge, nafade hamologe, nefolalebe amoli bealahilä, afädëa nïe ëige nïe ado malage säla ïmolö hewaseda, Dolöïe Malö amo, Eedoïe yo digalo hïdo elöibaläge, selesaia fii hedabifalï amolibaläge, obëgësolo amo gala, eage dolö amolibalä hewamolömelëla säla ï.
MAR 9:1 Ea ilima sähalea, Na dilima dofä sähago. Dili walio nebego odoa baagola made neëgi, Godea Beaha Maadela Sigi Neebe amoïe, geloi edefademalä maase amo bimolömelëla säla ï.
MAR 9:2 Segeyo gafeia nelolahilä, Yesuea Fidage Yamesege Yonege sigi gaula hilidofalï segebi afädëgi fedala nefolalo. Ilia beahamelebe Yesuïe domalo neala bedefalahilä elöi neebe melï.
MAR 9:3 Ïe fagulo gäi amo yo digalahilä faleifalï, sege fifi asi dibe amea fagulo falei amo gadoi hamomolöi made, si dëdëgïla digamolöi neebe melï.
MAR 9:4 Ilia beahamelebe Elaia Mosesele maala ulufadigilahilä, Yesubalä adosa neebe melï.
MAR 9:5 Amo bealahilä Fidaea Yesuma sähalea, Säla Olelelo. Nilï wi nefolalebewe hedabi gabugi, nilïa sege mosö ohodoa olahadio. Elöda dïe, elöda Moseseïe, elöda Elaiaïela säi.
MAR 9:6 Ili edefademalä bedälahilä, ea edo sämolödula asusugahalea, ea ado amo amala säi.
MAR 9:7 Amala säse amo gaalu gelë häu afädë maala ili hagulahilä, gelëgi amila ado afädë säia idogosalea, Egoweda nïe malö, na boba hamoi neamelë. Dilia ïe ado nabualola säi.
MAR 9:8 Amo nabalahilä ilia fodolofalï sidawewela beahamelebe ilibalä dolö odoa maade, Yesu emu neebe melï.
MAR 9:9 Ili segebidaia amila digahalea, Yesuea ilima gelola sähalea, Dilia nelebo melï amo odoama säla ïla made nelolahilä, Dolöïe Malö bauiala nowela neëgi giso, säla ïmalola säla ï.
MAR 9:10 Ado säi amo ilia odoama made säla ïala musügä negelahilä, hilidomu didiähalea, Bauiala nowelasisegila säi amoda edodula didiäi.
MAR 9:11 Ilia ema nabahalea, Mala dawadigi neebe amolia sähalea, Elaia e dafidi moholömelëla säha neebe amoda edoïela nabi.
MAR 9:12 Yesuea ilima säla obëgësalea, Dofä. Nelebo sulubadela hamogimolöïe Elaia e dafidi moholö. Gaso, Dolöïe Malö e së edefade naala, odoaea ema bimolö habobamolömelëla säla dëdëla negei dibe amoda abeahäladu.
MAR 9:13 Na hä dilima säla ïahago, Elaia eda hä misi. Gaso, ado säla dëdëla negei dibe amo gadola odoa nefolalo amolia ema hamomolö helësëi amo gadoi hamoimelëla säi.
MAR 9:14 Ili awäla ïe bëgëla aulo odoa neebea ami besela galai. Ilia beahamelebe udia dolö yafie gegedoi amolia ili amalela digilahilä, mala dawadigi dolö amolia ilibalä gëgësa dibe melï.
MAR 9:15 Udia dolö yafie nefolalo amolia Yesu maasebe amo beala ili fodolofalï fudugila, e neebea baluluia afialahilä ilia e säla olela gausiai.
MAR 9:16 Amasebegi, ea ilima nabahalea, Dilia ilibalä edogi gëgësa dialeala nabi.
MAR 9:17 Udia dolö gegedoi amoligi dolö afädëa ema säla obëgësalea, Säla Olelelo-o, nïe nafegema mugabe fedai amea made ado adosebegi di neebea sigi misimelë.
MAR 9:18 Mugabe ema fedalahilä, nagadaia nidala awäla ïe nafiadi dibu besigala, bese nalëgëlahilä, ïe domalo gelola sosolahamelëla säla ï. Dïe bëgëla aulo ilia mugabe fedai amo nesila digamalai gaso, nesila digimolö ulïsio.
MAR 9:19 Amala säsebegi, Yesuea udia dolö amolima sähalea, Udia dolö walio nefolalebe dilia asigi afädë negei made nebegoeada. Segeyo aboläia ne dilibalä namolödu. Na dilile yöi gaula segeyo aboläia namolödu. Malö go nema sigi misiëla säi.
MAR 9:20 Amala säsebegi, ilia malö amo ema sigi misi. Sigi maasebegi, mugabe amea Yesu beala malö amo fodolofalï amulämelasi, nagadaia nidala awäla fefede fefedelahilä, nafiadi dibu besigalasi.
MAR 9:21 Amala hamosebegi, Yesuea malö amoïe eedo amoma nabahalea, Gowe gadola abodo gala mi gäwila hamosiola nabi. Eedoea säla obëgësalea, E holöfalïgila besela galaimelëla säi.
MAR 9:22 Mugabea malö go baagomäia segeyo yafiegi nulo gobeiage ödägige digalasisamu nelomelë. Dia hamomolöi galëda, nilï bobasëla ugila negemola säi.
MAR 9:23 Yesuea ema sähalea, Dia hamomolöi galëdala säi amoda edoïe. Dolö asigi afädë negei neebe amea nelebo sulubadela hamosa maademolöi neamelëla säi.
MAR 9:24 Amala säsebegi, malö amoïe eedo amea fodolofalï üalala digila sähalea, Na asigi afädë negei gaso dofea made gabu. Bu asigi afädë negedelä dia ne ugila negemola säi.
MAR 9:25 Ili neebea ami udia dolö yafie baluluia mafula gegedosebe amo bealahilä, Yesuea mugabe amoma nemosalea, gëhe galaloge made adologe, dida mugabe. Dima gelola sähago. Malö go dïgïla mosö, ema bu elö fedamabiola säi.
MAR 9:26 Amala säsebegi, mugabe amea üalala malö amo amulämelasilahilä doadigila awähalea, hame doala asi gadoi negesi. Udia dolö yafiea amo bealahilä sähalea, hame doala asi gabula säi.
MAR 9:27 Amala hamosebegi, Yesuea malö amo naabogi nabelela nowela ifosi.
MAR 9:28 Amala hamolahilä, Yesula ïe bëgëla aulolali mosöa nogila digala hilidomu salea, ilia ema nabahalea, Nilïa mugabe nesimolö ulï amo abisalea amaidula nabi.
MAR 9:29 Amala nabasebegi, Yesuea säla obëgësalea, Godema adose ameamu mugabe nesila digimolömelë, idi elöda mademelëla säi.
MAR 9:30 Yesula ïe bëgëla aulolali sege amo dïgïla Galili segeamadi awäla moholö awäha nelo. Yesueada afädëa e neala, made helësëmäiala helësëi.
MAR 9:31 Mida, Ea ïe bëgëla aulo amolima säla olelemolö amo helësëla. Ea ilima sähalea, Dolöïe Malö amo dolö odoama hololöla gausiseda, ilia e baagomäia nufulömelë. Baagomäia nufudaseda, segeyo osodagi hï nowemolömelëla säla ïaha nelo.
MAR 9:32 Säi amo nabalahilä ilia helësëi made nea, ema mi nabulö amo bedäi nelo.
MAR 9:33 Ili awäla Gabaniama segea besela galala mosö isogi nogila digalahilä, Yesuea ïe bëgëla aulo amolima nabahalea, Idiafa maahalea dilia ado edo didiäla aligi misila nabi.
MAR 9:34 Amala nabasebegi, ili maahalea nilïgi baagila asi neebe amo nowëla säla didiäla aligi misi amo helësëlahilä, ema säla obëgëla made nefolalo.
MAR 9:35 E fia idogola salea giwilasi amoli mofiamolahilä sähalea, Afädë dafidilo namolöila helësëseda, dafidi hïdale made, udia dolö odoadale ugila negemolöi galeala säi.
MAR 9:36 Amala sälahilä ea malö holöbö afädë nabelela gaula maalahilä ili mogogi ifosilahilä, sogobala gaula nea ilima sähalea,
MAR 9:37 Afädëa ne helësëla malö holöbö gowe gadoi amoma obëbëla obeägïseda, nema obeägïsamelë. Afädëa nema obeägïseda, nema obeägïsa maademelë, ne digamalala sälo amoma obeägïsamelëla säi.
MAR 9:38 Yonea Yesuma sähalea, Säla Olelelo-o, nilïa beahamelebe, dolö afädëa dïe ëi säla mugabe fedai nesila digisa nebegi nilïa ema dia amamabiola säimelë. Mida, dolö amoda nilïbalä nawelo made amea hamosebegi amala säimelëla säi.
MAR 9:39 Amala säsebegi, Yesuea säla obëgësalea, Amamabula sämabio. Afädëa nïe ëi säla dolöea hamomolöi made gadoi afädë hamoseda, hobea ne aabela gagademolö mademelë.
MAR 9:40 Dolö nilïbalä ado nii made neebe amoda nilï damelë neamelë.
MAR 9:41 Na dilima dofä gelola sähago. Dilia nïe ëi gaula neëgi, afädëa diligali ödä muäia osala ïaseda, udia dolö amolida dofä bidi nimolömelëla säi.
MAR 9:42 Yesuea aso sähamu nea sähalea, Afädëa malö holöbö nema asigi afädë negei goweligi afädë neala digalasiseda, ëfëa igi edefademalägi begela, bidi näiadoea ïe muugia begelalahilä, ödä nudugawa sadia idogola baagomolö amoda, ïe hedabida amomelë.
MAR 9:43 Dïe naabo elö goea asiala hamola digalasiseda, naabo elö go damula fisimalo. Naabo afädëamu nea namolöi namolö dibea ami moholö hedabi dialea, naabo äudälada heli segea nulo usilo made dibea ami auloea.
MAR 9:45 Dïe emo elö goea di neala digalasiseda, emo elö go damula fisimalo. Emo afädëamu nea namolöi namolö dibea ami moholö hedabi dialea, emo äudälada heli segea sogobala sadia idogoloea.
MAR 9:47 Dïe si elö goea asiala hamola digalasiseda, si elö go beselala fisimalo. Si afädëmu nea Godea Beaha Maadela Sigi Neebea ami moholö hedabi dialea, si äudälada heli segea sogobala sadia idogoloea.
MAR 9:48 Amida domalo hehea nase amo baagolo madege, nulo usilo madege, dialeamelë.
MAR 9:49 Nulo söaea udia dolö sulubadelama molögi ëbï baalo amo gadola baamolömelë.
MAR 9:50 Ëbï hedabi dialea. Ëbïïe hëdälo amo made galëda, dilia edoea neala hëdälasimolö gabu. Dilile isogi ëbï baalahilä udia dolöbalä aeaha namialola säi.
MAR 10:1 Yesuea amala säha nelolahilä, sege amo dïgïla, Yudia segea besela galala, ödä Yodona dëgëla agesu näiado alömodi amogi asi. Udia dolö yafie e neebea ami mafula bu gegedosebegi, hï hamolo amo gadola, ilima ado mala säla olelesa nelo.
MAR 10:2 Amala olelesa nebegi, Felesi dolö odoa e neebea ami maalahilä, Yesuma fedogola nabahalea, Nilïle mala säla negei dibe ameada, dolö afädëa udia nii fisimolö dialeala säla negei dialeale, ma, maadelela nabi.
MAR 10:3 Amala nabasebegi, ea ilima säla obëgësalea, Moseseada dilima edo hamomalola säla negei dialeala nabi.
MAR 10:4 Ilia säla obëgësalea, Mosesea säla negesaleada, Dolöea udia fisisaleada, beba dëdëla ïalahilä, fisimolöi galeala säla negei dialeala säla obëgëi.
MAR 10:5 Yesuea ilima säla obëgësalea, Moseseada dilile iso asigi geloi dibe amo beala, dilima ado go dëdëla negeimelë.
MAR 10:6 Godea siiba nelebo sulubadela mi gäwila hamosolo amo gala, udiale dolöle äudä hamoi.
MAR 10:7 Amala hamoi ameada, dolöea ïe eedole emele dïgïla, ïe udiabalä gedola nea,
MAR 10:8 eleda domalo afädëfalï namolömelë. Ele äudä nelo amo fisila afädëfalï neamelë.
MAR 10:9 Godea ele gedolasi amo, dolöea mogemabiola säi.
MAR 10:10 Hobeala ïe bëgëla aulolali mosöa obëgëla awäla sefolalea, ïe bëgëla aulo amolia ado säi amoïe ema mi fädäla nabi.
MAR 10:11 Amala nabasebegi, ea ilima säla obëgësalea, Dolö afädëa hïle udia fisila udia elö neaseda, ea udia amo fa susugu hamomolömelë.
MAR 10:12 Udia afädëa ïe dolö fisila dolö elöma fiseda, dolö amo ea fa susugu hamomolömelëla säi.
MAR 10:13 Udia dolö odoa nefolalo amolia, ilile malö Yesuïe naaboea diigimäia e neebea sigi maasebegi, ïe bëgëla aulo amolia ilima halala nemola dofogai.
MAR 10:14 Amala säse amo beala, Yesuea ilima habobalahilä sähalea, Malësä ne neebea maase goli misiäia, halala nemola dofogamabu. Godea Beaha Maadela Sigi Neebea amida, malësä go gadoi nefolalebe amolile dialea.
MAR 10:15 Na dilima dofä gelola sähago. Godea Beaha Maadela Sigi Neebea ami, malësä go ili gadoia moholöila helësëi neebe amo gadola, afädëa ne moholöila made helësëi neebe amoda, dofä made nogila digamolömelëla säi.
MAR 10:16 Amala sälahilä, ea malësä amoli afädë afädëla sogobala gaula nea naaboea diigisalea, Godea ugila negemäiala säla fisiga idodogosa nelo.
MAR 10:17 Yesu e moholö awäha nebegi, dolö afädë baluluia maala, ïe emo mia gumusula dia idogolahilä sähalea, Säla Olelelo hedabi-e, ne namolöi namolö neala gaumolöïe abilia hamomolödula nabi.
MAR 10:18 Amala nabasebegi, Yesuea ema säla obëgësalea, Dia nema hedabila säi amoda edoïe. Afädë hedabi maademelë, Gode emu hedabi nea.
MAR 10:19 Ado säla negei dibe amolida dia dawadigi. Baagomäia nufuabio, udia fa nimabio, nelegei fa nimabio, wäfalï säsäla gudimabio, dahila neala elöïe nelegei dibe amo nimabio, dïe diado diemelele ado nabala hamomalola säla negei dialeala säla ï.
MAR 10:20 Amala säsebegi, ea Yesuma säla obëgësalea, Säla Olelelo-o, ado amolida ne malësägila hamosa maadeimelëla säi.
MAR 10:21 Amala säsebegi, Yesuea dolö amo boba hamolahilä, ema siila nea sähalea, Afädëmu dofea made nebego. Dïe nelegei dibe amoli bidi neaha maademolö mosö. Muni nease amoda nelegei negelo made busadäoi neebe amoligali ïmalo. Iligali ïaseda, selesaia mosöa bidi edefade nimolömelë. Amalahilä di ne bëgëla misialola säi.
MAR 10:22 Dolö amea ea säi amo nabala yöla ïe odagi augia idalahilä asi. Mida, ïe nelegei yafie dilo amogi.
MAR 10:23 Amasebegi Yesuea ïe bëgëla aulo nefolalebeadi sidawewela bealahilä sähalea, Udia dolö nelegei yafie negelo nefolalebe amolida, Godea Beaha Maadela Sigi Neebea ami moholöda häuai bimolömelëla säi.
MAR 10:24 Ea amala säsebegi ïe bëgëla aulo amolia fudugi. Yesuea ilima aso bu elö sähalea, Nïe malöla dili-e! Godea Beaha Maadela Sigi Neebea ami moholöda häuai galeamelë.
MAR 10:25 Sugua gameleda nusi galabagi nogila moholö ulï amo gadola, dolö nelegei yafie negelo dafidilo nefolalebe amolida, Godea Beaha Maadela Sigi Neebea ami moholö häuai bimolömelëla säla ï.
MAR 10:26 Amala säsebegi, ïe bëgëla aulo amolia edefademalä fudugilahilä hilidomu didiähalea, Amai goeada, amai, namolöi namolö nowëa neala gaumolödula säi.
MAR 10:27 Amala säsebegi, Yesuea ilima siila nea sähalea, Udia dolöea hamomolöi made amoda. Godea hamomolöi madeda maade, ea sulubadela hamosa maademolöi neamelëla säi.
MAR 10:28 Amala säsebegi, Fidaea ema säla obëgësalea, Bimo! Nilïa di bëgëla maahalea, nelebo sulubadela fisisa maadelahilä misimelëla säi.
MAR 10:29 Amala säsebegi Yesuea ilima sähalea, Na dilima dofä gelola sähago. Afädëa neëge, Ado Mala Hedabige helësëla, mosöge, edooge, elefige, emege, eedoge, malöge, segege, fisisa maadelahilä,
MAR 10:30 hädali afädë nimolömelë. Ili nagadaiawi nebegi Godea nelebo yafie dafidi ï amo baagila awäla ïmolömelë. Mosö yafiege, edoo yafiege, elefi yafiege, eme yafiege, sagai yafiege, segege, ilia yafie nimolömelë. Amala nii neëgi odoaea ili neala sëlasimolömelë. Hobeala segeyo afädë besela galasolo amo galada, ea namolöi namolö gaula namolömelë.
MAR 10:31 Walio yafie dafidila nefolalebe amolida, neala hobeahalea, yafie hobeala nefolalebe amolida, neala dafidimolömelëla säla ï.
MAR 10:32 Yesula ïe bëgëla aulolali Yalusaleme aulo idi afiaha dialea, Yesu e, edale dafidi awäha nebegi, ïe bëgëla aulo amoli hobeala afiaha dialea fudugila aligi afiai. Udia dolö odoa ili bëgëla hobeala afiaha dilo amoliage bedäla aligi afiai. Yesuea ïe bëgëla aulo giwilasi amoli bu sigi aliga galahilä, ema hobea hamomolö amoïe ado
MAR 10:33 säla ïahalea, Nabuö. Nilï walio Yalusaleme afiahamelë. Amai gaso, gobela ïlo busa iliage ado säla negei dawadigi iliage Dolöïe Malö amo gaumäia afädëa gaula ïmolömelë. Gaula ïaseda, ilia ebalä gudila, baagomäia nufulömelëla didiälahilä, fii odoagali gaula ïmolömelë.
MAR 10:34 Gaula ïaseda, ilia e gagadela gofedela galala, ëfë damuia nufudalahilä, baagomäia nufulömelë. Amala hamoseda, segeyo osodagi e nowela moholömelëla säla ï.
MAR 10:35 Sebediïe malö Yamese Yonele Yesu neebea maalahilä, elea ema sähalea, Säla Olelelo-o, alïa helësësewe gadoi dia alïma hamomäia hamesamelëla säla ï.
MAR 10:36 Amala säsebegi, ea elema säla obëgësalea, Na alima edo hamomäia helësësebela nabi.
MAR 10:37 Amala nabasebegi, elea ema säla obëgësalea, Dïe yo digalo hïdo elöibalä fisolo amo gala, alï elöda dïe naabo dafädimadi, elöda dïe naabo fefeädimadi fimalola sämäia helësësamelëla säla ï.
MAR 10:38 Amala säsebegi, Yesuea elema sähalea, Alia ado säi amoda helësëla made fuduia säimelë. Na ödä iigi usi naha neebewegi alia molöi gabule. Ma, ne ödägi gesa neebewegi ali gemolöi gabulela nabi.
MAR 10:39 Amala nabasebegi, elea ema säla obëgësalea, Alïa amala hamomolöi neawela säi. Amala säsebegi, Yesuea elema sähalea, Na ödä iigi usi nasewe gadola aliage molömelë. Ne ödägi gesewe gadola alige gemolömelë.
MAR 10:40 Gaso, ali elö di nïe naabo dafädimadi, elö di nïe naabo fefeädimadila samiäia memelemolöda nïe mademelë. Godea fimäiala daiai amolilemelëla säla ï.
MAR 10:41 Bëgëla aulo nabülasi odoa amolia elea ado säi amo nabala elema habobaha nefolalo.
MAR 10:42 Amasebegi, Yesuea ili mofiamolahilä ilima sähalea, Fii odoa beaha aligilo gadoi neebe amoliada, udia dolö gelola beaha aligilo nea. Amase, ilile ëi sälo neebe amoliada, udia dolö bobasëla made, ilia säse amo gadola hamomäia gelola sigi aligilo amoda dilia dawa.
MAR 10:43 Ilia amala hamolo amo gadola, dili nebegogi afädëa amala hamomolöi mademelë. Dili nebegogi afädëa ëi sälo namolöila helësëseda, odoa neebe amo iligali hamoi hamolasilo namolö dialea.
MAR 10:44 Afädëa e dafidilo namolöila helësëseda, eda udia dolö sulubadelaïe, memalä galabaia hamoi gadoi hamolasilo namolöi galea.
MAR 10:45 Mida, Udia dolöea Dolöïe Malö misi amoïe hamoi hamolasimäia made, Ea ilile hamoi hamolasila, ïe namolö amo udia dolö yafiegali fisiga gala, ili sigi obëgëmolö misimelëla säi.
MAR 10:46 Yesula ïe bëgëla aulolali afiala Yaligo gaamugi besela galai. Besela galala ïe bëgëla auloge udia dolö odoa yafiege ebalä Yaligo baagila afiaha dibegi. Dimasaïe malö Badimasa eda, si golai idi agesua ami salea, muni ïmola ëdëgësa filo sulo.
MAR 10:47 E amala salea Nasalese fii Yesu maahala säi amo nabalahilä, ea uuala sähalea, Debidiïe malö Yesu-o, ne bobasëmola säi.
MAR 10:48 Amala säsebegi, udia dolö yafiea ema nemosalea, Dia adomabula säi. Gaso, ea auaula gelola uuahalea, Debidiïe malö-o, ne bobasëmola sähamu nelo.
MAR 10:49 Ea Amala säsebegi, Yesuea fologola made beaha nea sähalea, E misiäia dilia e wemolö säi. Ilia dolö si golai amoma sähalea, Asigi hä gelomalo. Ea di wesebego, di hä nowemola säi.
MAR 10:50 Ea fagulo afädë salugala sulo amo giila sadia galahilä, fodolofalï nowela Yesu neebea ami misi.
MAR 10:51 Maasebegi, Yesuea ema nabahalea, Na dima edo hamomäia helësësebela nabi. Amala nabasebegi, dolö si golai amea säla obëgësalea, Säla Olelelo-o, na bimolö helësësebela säi.
MAR 10:52 Amala säsebegi, Yesuea ema sähalea, Dihï asigi afädë negei amea dïe si hä wahigomelë, Mosalola säi. Amala säsebegi, dolö amo fodolofalï wahi amea siia fädäla bealahilä, Yesu bëgëla asi.
MAR 11:1 Yesula ïe bëgëla aulolali Yalusaleme besela galamolö ga madela nea, sege Bedefagige Bedanige, Olibebi neebea amige, ili awäla besela galai. Besela galala ami nea, Yesuea ïe bëgëla aulo amoligi, äudä dafidila mosalolahilä,
MAR 11:2 elema sähalea, Segea ami awäla besela galala beahamelële, sugua dögi üdïli afädë dolöea fila aulo made, ga madefalï gui gide begela negei neë bimolömelë. Dögi amo fisigälahilä wi sigi misialo.
MAR 11:3 Afädëa alima dögi go abïdä fisigähala nabaseda, alia ema gomalä sämalo. Dafidilo Geloia webalä hamoi hamomolömelë. Amalahilä, we fodolofalï sigi obëgëmalamolömelëla sämalola säi.
MAR 11:4 Amala säi amo nabalahilä, ele awäla besela galala beahamelebe, sugua dögi üdïli afädë mosöa nogila digalo, ifo baagido idiliba ami, gide begela negei neebe amo bealahilä, fisigäi.
MAR 11:5 Fisigäsebegi, udia dolö ami nefolalo amolia elema nabahalea, Alia abilia hamodelä, sugua dögi üdïli go fisigähala nabi.
MAR 11:6 Elea Yesuea sämalola säi amo gadola säsebegi, ilia hä, sigi mosalola säi.
MAR 11:7 Elea sugua dögi üdïli amo Yesu neebea sigi gaula awälahilä, elea sugua dögi amodaia fagulo daia salugalo amo giila fösisebegi, Yesu e amodaia fedala sulo.
MAR 11:8 Amala hamosebegi, udia dolö yafiea ilile fagulo gäi amo giilahilä idiafa föla digi, odoaea idi agesua fasela bäu gadoi dagabola gaula mafula föföla aligi awäha nelo.
MAR 11:9 Udia dolö nefolalo amoli Yesu awäse amo gadola, dafidila awäha nelo amoliage, hobeala maaha nelo amoliage, uuala säsäla awähalea, Agua. Nesege. Godeïe ëi gauia adadi. Afädë Dafidilo Geloiïe ëigila maahago, Godea ema obeägïmäia.
MAR 11:10 Nilïle naado Debidia beaha maadela sigi nelo amo gadola namolö neebe amoma obeägïdi. Selesaia fiia Godeïe ëi gauia adala nesegemola uuala säsäla awäha nelo.
MAR 11:11 Yesu e Yalusaleme besela galala, Godeïe mosö amoïe yala isogi nogila digalahilä, ami nelebo difolalebe amo sulubadela beaha maadei. Hä deadisebegi, ïe bëgëla aulo giwilasi amolibalä Bedani obëgëi.
MAR 11:12 Segeyo agedugi ili Bedani amila awähalea, Yesu e sïdëa baagoi.
MAR 11:13 Sïdëa baagosebegi holöbö wagadi madela sida gala beahamelebe, äfäeo bäu yafie negei neebe melï. Bealahilä, gägä negei walebelela mia bea asi. Beahamelebe gägäda negei made, bäumu yafie negei neebe melï. Mida, äfäeo gägä negelo segeyogi made amea bäumu melï.
MAR 11:14 Amo bealahilä ea äfäeo amoma sähalea, Hobea dïe gägäda udia dolöea made molömelëla säi. Amala säse amo ïe bëgëla aulo amolia nabi.
MAR 11:15 Yesula ïe bëgëla aulolali awäla Yalusaleme besela galai. Yesu e Godeïe mosö yala isogi nogila digalahilä beahamelebe, bidi neadigi, bidi nimolöïe negela digisa difolalo amoli nesila digilahilä, Muni bedefalo auli amoge, haea maliabu gadoi bidi neaha aligilo amolile filo auli difolalo amoge, besigadasi.
MAR 11:16 Godeïe mosö yala isogi nogila digahaleada, dilia nelebo gaula, nogila digafu fedafumabiola säla ï.
MAR 11:17 Amala sälahilä ea ilima säla olelesalea sähalea, Bebagi ado dëdëla negei dibe amoda gomalä madele. Nïe mosö goweda fifi asi sulubadelaea Godema adolo mosö neamelëla sämolömelëla dëdëla negei dialea gaso, dilia fa nelo musügä aligilo igi äbä gadoi hamoi gabula säi.
MAR 11:18 Amala hamoila säi amo nabalahilä, gobela ïlo busa amoliage, ado säla negei dawadigi dolö amoliage, Yesu abeahäla nufulödula fu hogosa nelo. E nufulö helësëi amoïe mida, ebalä bedähalea. Ebalä bedäi amoïe mida, udia dolö nefolalo amoli sulubadelaea ea mala olelei amo nabala fudugisebegi.
MAR 11:19 Säha nea së gäsebegi, Yesula ïe bëgëla aulolali Yalusaleme dïgïla afiai.
MAR 11:20 Ili diala yose awähalea beahamelebe, äfäeo amo bäuge difige bausosa maadei neebe melï.
MAR 11:21 Bealahilä Yesuea säi amo helësëlahilä Fidaea ema sähalea, Säla Olelelo-o, bimo! Dia aiyo äfäeoma habobala säi amoda hä bausoi gabuwela säi.
MAR 11:22 Amala säsebegi, Yesuea ilima säla obëgësalea, Godema asigi afädë negemalo.
MAR 11:23 Na dilima dofä gelola sähago, Dolö afädëa asigi äudä negela made, ea säse amo gadola dofä amamolöla helësëla, segebi gowema dia dihï dagabola duhuludaia digamola säseda, ea säi amo gadola dofä amala hamomolömelë.
MAR 11:24 Amaimo, na dilima säla ïahago. Dilia Godema adosalea nelebo afädë nimolöla helësëla ema nabaseda, Dilia säi amo gadoi dofä nimolömelë.
MAR 11:25 Dilia nowela nea Godema adosalea, dolö afädëa dilima asiala hamoi amo helësëseda, dolö amea asiala hamoi amo fisimalo. Amala hamoseda, dilile Diado selesaia mosöa neebe amea, dilia asiala hamoi amoge fisimolömelëla säi.
MAR 11:27 Yesula ïe bëgëla aulolali Yalusaleme bu obëgëlahilä, Yesu e Godeïe mosöa nogila digaha nebegi, gobela ïlo busa amolige, Ado säla negei dawadigi dolö amolige, asigi gäwi dafidilo dolö amolige, e neebea ami maalahilä,
MAR 11:28 ema nabahalea, Nelebo dia hamosa neebe goli hamomäia, nowëa hamomalai hamosa. Nilïa nabedelä, dia säla ïmo. Go hamomäia, geloi go nowëa ïasiola nabi.
MAR 11:29 Amala nabasebegi, Yesuea ilima säla obëgësalea, Nage dilima afädë nabahago, Na dilima nabase amo dilia säla obëgëseda, na nelebo hamosa neebewe hamomäia geloi ï amoda gowea ïmelëla dilima säla ïmolömelë.
MAR 11:30 Yonea ödägi gesa nelo amoda Godeïe galueale ma, dolöïe galueale. Dilia nema säla ïmola säi.
MAR 11:31 Amala säsebegi, ilia hilido didiähalea, Nilïa selesaia galueala säseda, dilia ema asigi afädë negela made nelo goda edoïela sämolö gabu,
MAR 11:32 Amase nilïa dolöïe galueala sämolö gaso, amoge dofea made gabula säi. Ilia amala säi amoïe mida, Udia dolö sulubadelaea Yoneda Godeïe bea sälo afädë nelola helësëi neebe amo helësëla ili udia dolöbalä bedäi.
MAR 11:33 Amalahilä ilia Yesuma säla obëgësalea, Nilïada dawa mademelëla säi. Amala säsebegi, Yesuea ilima sähalea, Amai galëda, na nelebo hamosewe hamomäia geloi ï amoda gowea ï hamosa neamelëla, nage dilima made säla ïmolömelëla säi.
MAR 12:1 Yuda ilile busa dolö nefolalo amolima, Yesuea ado besula säla ïahalea, Dolö afädëa yalala agulahilä, ëfë gägä negelo ëi gelebi sagai. Gelebi sagai amo emesala fësëla salimolöïe uli dögöi. Amalahilä sagai amo idihë namiäia mosö afädë holöbö ilibia ola negesi. Amalahilä, ea dolö odoama sähalea, Sagai amo beaha nea bisinesi hamosa namialola säsilahilä, hï eda sege wagadi made namolö asi.
MAR 12:2 Hä, gelebi gägä amo faimolö segeyo besela galasebegi, sagai eedo amea ïe hamoi hamolasilo afädëma sähalea, Nïe sagai beaha aligilo nefolalebe amolima, gelebi gägä odoa faila ïmola sämolö mosalola säi.
MAR 12:3 Faila ïmola samolö asi gaso, sagai beaha aligilo nefolalo amolia e gaula nufudala ïalalelahilä, memalä e hodomu fisiga gaimelë.
MAR 12:4 Amala hamoi galebe, sagai eedo amea ïe hamoi hamolasilo elöma bu mosaloi. Awäsebegi, ilia busagia afisila nufudalahilä, e gagadela gadiaboi.
MAR 12:5 Amala hamosebegi, sagai eedo amea ïe hamoi hamolasilo osoda bu mosaloi. Awäsebegi, ilia dolö amo nufudala baagoi. Amalamu hamosebegi ea dolö yafie oböla bu mosalai. Amoligi odoa nufudala ïalalelahilä, odoa baagomäia nufi.
MAR 12:6 Hä dolö afädëfalïmu nelo. Dolö amoda hïle efege hï boba hamoi nelo. Hobeafalï eedoea ïe malö amoma ili neebea mosalalahilä sähalea, Iliada nïe malö amoïe ado nabala mogola hamomolöla helësësamelëla säi.
MAR 12:7 Gaso, sagai oodola beaha aligilo nefolalo amolia hilidomu säla didiähalea, Sagai eedo amoïe malö amoda hä go gabugo. Eedoïe nalä ea nimolö gabugi, nilïgali bedefala nedelä, e baagomäia nufidedila sälahilä,
MAR 12:8 ilia malö amo nufudalahilä, ïe domalo amo sagai yala baagido sadia gaimelë.
MAR 12:9 Amala hamoi amoïe sagai eedo ameada abilia hamomolödu. E maalahilä sagai beaha nefolalo amoli baagomäia nufudaha maadelahilä, sagai amo odoaea beaha namiäia ïmolömelë.
MAR 12:10 Bebagi ado säla dëdëla negei dibe amo dilia made melï neale. Mosö olelo amolia igi amo galone hamomolöi made gabula memelela fisi. Gaso, walioda galone geloi gelola dialeamelë.
MAR 12:11 Amoda Dafidilo Geloi hï hamogi amo nilïa siia bealahilä fudugisa neamelëla säla dëdëla negei dialeala säi.
MAR 12:12 Dolö busa nefolalo amolia Yesuea ilile ado besula säsebela helësëlahilä, ilia e gaudelä hamoi gaso, udia dolö yafie nefolalebe amoli beala ili bedähalea dïgïla asi.
MAR 12:13 Busa dolö amolia, Felesi dolö odoage, Heledoïe damelë odoage, Yesu neebea mosaloi. Mida, Yesuea ado asiala säseda, e gaumolöïe Yesu fedogola adomolö mosaloi.
MAR 12:14 Ili Yesu neebea afialahilä, Yesuma sähalea, Säla Olelelo-o, nilïada, dia mala säla olelese amoda mogola olelesala helësësamelë. Amalahilä dolö odoa ëi sälo geloi nefolalebe amolibalä bedäla madege, odoa nefolalebe amolia di beala säse amogige dia helësëla made neada, Godea hamese amoïe mala udia dolöma säla olelelo amoda mogola säla olelelomelë. Amalo gabugi dima afädë nabaha. Nilïle mala säla negei dibe amo helësëla, Beaha Aligilo Sisa neebe amoma dagisi muni ïmolö dialeale ma, madele.
MAR 12:15 Nilïa ema dagisi muni ïmäiale ma made ïmäialela nabi. Ilia e fedogola wäfalï säsebe amo dawadigilahilä, ea ilima säla obëgësalea, Edoïe ne fedogola beaha. Na melëdelä muni giwi afädë gaula misiëla säi.
MAR 12:16 Ilia muni giwi afädë gaula maasebegi, ea ilima nabahalea, Muni giwi gowegi dolö busa dibe gowege, ëi dëdëi dibe gowege nowëïe gabula nabi. Amala nabasebegi, ilia ema säla obëgësalea, Beaha Aligilo Sisaïela säi.
MAR 12:17 Yesuea ilima säla obëgësalea, Nelebo Sisaïe dibe amoda Sisa hïma ïmalo. Nelebo Godeïe dibe amoda Gode hïma ïmalola säi. Amala säse amo nabala ili fudugi.
MAR 12:18 Udia dolö baagoi amoli made nowela galamolöla sälo, Sadiusi dolö amoligi odoa Yesu neebea maalahilä sähalea,
MAR 12:19 Säla Olelelo-o, nilïa hamomäia Mosesea, ado afädë dëdëla negei dibe amoda gowe. Dolö afädëïe edoo malö maade nea baagoseda, udia didalo amo sulolahilä, dolö baagoi amo sosogo namiäia, ïe ëigila malö sogobamolöïe, edoo elö amohï udia amo nimäiala säla dëdëla negei dialea.
MAR 12:20 Amaimo, edoolali gifalädalïa salea, abulümi amea udia afädë neala nea, malö made sogobala baagoi.
MAR 12:21 Baagoibua, abulümi baagia amea udia didalo amo bedefala nealahilä, eage malö made sogobala baagoi. Amala bu baagoibua, edoo osoda ameage amala hamolahilä,
MAR 12:22 edoolali gifalädalïa amoli malö made sogobala baagosa maadei. Amalahilä udia amo hobea wagala baagoi.
MAR 12:23 Amala hamoi amo dolö gifalädalïa amolia udia afädë amomu nii amea, hobea baagoi amoli nowela galasolo amo gala udia amo nowëïe udia samolödula nabi.
MAR 12:24 Amala nabasebegi, Yesuea ilima säla obëgësalea, Bebagi ado säla dëdëla negei dibe amoge, Godeïe geloi dibe amoge, dilia dawa made amea dilia asiala säsebego.
MAR 12:25 Udia dolö baagoi amoli nowela galasolo amo galada, dolöea udia nimolö mademelë. Amase, udiage dolö fimolö mademelë. Ilida selesaia fii nefolalebe amoli gadoi namolö madele.
MAR 12:26 Amase, udia dolö baagoi amoli nowela galamolö amoïe ado afädë sähago. I afädëgi nulo söa fedaila säla, Mosese dëdëla negei dibe amo dilia made melïle. Amila Godea Mosesema sähalea, Neda Abalahamaïege, Aisagaïege, Yeigabaïege Gode neamelëla säila säla dëdëla negei dialea.
MAR 12:27 Eda udia dolö baagoi amolile Gode mademelë. Eda udia dolö sebe amolile neamelë. Dilia asiala helësëi gabula säi.
MAR 12:28 Ado säla negei dawadigi dolö afädë maalahilä, Sadiusi dolö amolia Yesubalä gëgësebegi, ea ilima hedabola säla obëgësebe amo nabalahilä, ea Yesuma nabahalea, Godea Ado säla negei dibe amogi geloi edefadeda abododula nabi.
MAR 12:29 Amala nabasebegi, Yesuea ema säla obëgësalea, Ado säla negei dibe amogi geloi edefadeda gowemelëla sähago. Isilale udia dolö dilia nabualo. Dafidilo Geloi eda, nilïle Gode afädëfalï neebe emu Dafidilo Geloi neamelë.
MAR 12:30 Dafidilo Geloi dïe Gode neebe amo dïe bobaeage, gesamiage, asigiage, geloiage boba hamomalola säla negei.
MAR 12:31 Amo baagia elöda gowe. Dihïdi boba hamolo amo gadola, odoa dibalä nefolalebe amoli boba hamomalola säla negei. Mala geloi edefade äudä säla negei dibe amole gadoida, odoada maademelëla säi.
MAR 12:32 Amala säsebegi, ado säla negei dawadigi amea ema säla obëgësalea, Säla Olelelo-o, dia Gode afädëfalï emu neala säi amoda, dia dofä säi. Elöda maademelë.
MAR 12:33 Ema bobaeage, dawaeage, geloiage hamelahilä, dihïdi boba hamolo amo gadola, odoa dibalä nefolalebe amoli boba hamomalo. Äudä amoleada nelebo Godegali odala ïala gobesa maadelo amoge, odala ïlo amoge sulubadela baagila asimelëla säi.
MAR 12:34 Yesuea dolö amea hedabola helësëla säsebe amo bealahilä, ema sähalea, dida Godea Beaha Maadela Sigi Neebea ami ga madela nebegola säi. Amala säsebegi, udia dolö odoa ilia Yesuma nelebo odoa nabulö amo bedäi.
MAR 12:35 Yesuea Godeïe mosöa säla olelesa nea sähalea, Ado säla negei dawadigi nefolalebe amolia, Afädë Memelei moholömelëla säi amo e Debidiïe malöla sälo amoda abeahäla sälodu.
MAR 12:36 Eleloi Gesamia Debidima helësëlasisebegi, Debidia sähalea, Dafidilo Geloia nïe Dafidilo Geloima sähalea, Na dïe ado nii nefolalebe amoli di hawa ifosimäia, dida nïe naabo dafädimadi awäla salea, beaha samialola säimelë.
MAR 12:37 Amase, Debidia hï ema Dafidilo Geloila säi amoda, Dafidilo Geloi e Debidiïe malöda abeahäladula nabi. Udia dolö yafie gegedoi amolia ea säse amogi obeägïla nabi.
MAR 12:38 Yesuea ilima ado mala olelesalea sähalea, Dilia mala dawadigi nefolalebe amoli hedabola idihë namialo. Ilia fagulo sedademu salugala magaia gaamugi awälahilä, udia dolöea ili beala gugusäla gausiamäiala helësëlo nea.
MAR 12:39 Amase, iliada gedolo mosöa amige dolö dafidilo filo dibea amimu fimolöila helësëloge, udia dolö yafie gegedola molö nasebea ami molö gialo eedo amobalä dafila salea, ua gagaula hamomolöila helësëlo nea.
MAR 12:40 Ilia udia didalo sebe amoli dahila neala, ilile mosöa nelebo dibe amo fa neala gaula aulo nea. Ilile asigi musügä negesilahilä, adoeamu Godema sedadela adolo nea. Amala hamosebe amoïe ili së edefade muäia baala ïmolö dialeala säi.
MAR 12:41 Godeïe muni negelo dibea ami Yesu e ga madela salea, udia dolö yafie misi amolia muni negelo amogi muni negese amo siila sulo. Nelegei yafie negelo dafidilo udia dolö yafie amoliada muni yafie negei.
MAR 12:42 Udia didalo busadäoi afädë maalahilä muni giwi holöfalï äudä negei.
MAR 12:43 Amala negesebegi, Yesuea ïe bëgëla aulo amoli misiëlahilä ilima sähalea, Na dilima dofä gelola sähago. Udia didalo busadäoi gowea negei ameada udia dolö sulubadelaea Godeïe muni negelo amogi negei amo baagila asimelë.
MAR 12:44 Ilia muni yafie negei dilo amogi odoa mogela hilile negesalea mogela negesio. Be, udia goweada afädë gaula made nea, ea molö nimolö gaui amoda hulu sulubadela negesa maadeimelëla säi.
MAR 13:1 Yesu e Godeïe mosöa amila doadigila awäha nebegi, ïe bëgëla aulo afädëa ema sähalea, Säla Olelelo-o, igi hedabi hïdo elöi bobogamu nelegela fedala mosö made, hedabi hïdo elöi neebe gowe bimola säi.
MAR 13:2 Amala säsebegi, Yesuea ema säla obëgësalea, Dia mosö edefade igi bobogamu nelegela fedala uli nefolalebe beahago gasoda, igi nelegela fedala uli nefolalebegoda, igi afädëdaia amimu negela made, sulubadela mugulula digaha maademolömelëla säi.
MAR 13:3 Yesu e Olibe bi daia fedala Godeïe mosö sida idogola sebegi, Fida Yamese Yone Ädululali hilidomu nea ilia ema nabahalea,
MAR 13:4 Dia nilïma säla ïmo. Segeyo abodo gala dia säi amo besela galamolödu, Dafidi nelebo edodale besela galasegi, nilïa amo beala dia säi amo besela galamolö amoda, hä ga madesa gabula helësëmolömelëla nabi.
MAR 13:5 Amala nabasebegi, Yesuea ilima säla obëgësalea, Odoaea dili dahila neloea, idihë namialo.
MAR 13:6 Dolö yafie maalahilä nïe ëi säla sähalea, Neda dolö amo misi neawela sälahilä, udia dolö yafie dahila nimolö moholömelë.
MAR 13:7 Ga made nudusalea ado goba nabase amogige, sege wagadi made nudusalea wabula säse amo nabalage, dilia bedäla fudugimabio. Nelebo amala hamose ameada, aligila wagamolöïe made amamolömelë.
MAR 13:8 Fii elöle elöle nudula digi, gamane elöle elöle nudula digisa namolömelë. Amase, sege föi odoagi fogolige maala, sïdë iige moholömelë. Nelebo amoli hamomolö amoda, udiaea malö ägümolö salea mi gäwila sëlo amo gadoi bimolömelë.
MAR 13:9 Dilia hedabola idihë namialo. Ilia dili nafodola gaula galïsolö neebea sigi moholömelë. Gedolo mosöa amige dili nufudala ïalalemolömelë. Nïe ëi gaula mogoi ameada gamane dolöïe siigige, gini dolöïe siigige gaula awäla ifosimolömelë. Amala hamoseda nïe Ado Mala Hedabi nabuäia säla ïaha namialo.
MAR 13:10 Amo hamola made neebewegi wäla, fifi asi sefolalebe amoli sulubadelaea, nïe Ado Mala Hedabi nabaha maademäia dafidi säla ïmalo.
MAR 13:11 Ilia dili nafodolahilä gudimolöïe sigi gaula awäseda, ado abodo sämolödula asigia säosäola helësëmabio. Gudisolo amo gala Godea ado säla ïasebe amo säla ïmalo. Ado säla ïmolö amoda dihili sämolö mademelë. Eleloi Gesamia sämolömelë.
MAR 13:12 Dolöea ïe edoo nufudala baagomäia gaula ïmolömelë. Malö eedoea hïle malöge amo gadola wäla hamomolömelë. Amase, malöeage ïe eedo emelebalä habobala nufudala baagomäia gaula ïmolömelë.
MAR 13:13 Nïe ëigi nefolalebego beala, sulubadelaea dilima bimolö habobamolömelë. Amai gaso, afädëa aso maadela, hamola wagamäialahilä gelola aligise amo eda damula moholömelëla säi.
MAR 13:14 Yesuea ilima sähalea, Yöi yafie hehealela bedälasimolö maala negemolöi made dibea ami maala negei dië bimolömelëla säla ï. (Ado gowe nidese ameada hedabola helësëmalo.) Yesuea amala sälahilä sähalea, Amo siia beaseda, Yudia segea sefolalebe amolida segebi dibea ami fisäla baluluia afufumalo.
MAR 13:15 Amo gala, afädë mosö fïgïdaia sulo amea digalahilä, ïe nelegei mumusogi nea digamabio.
MAR 13:16 Dolö sagaia nelo amea hï mosöa fagulo nea obëgëmabio.
MAR 13:17 Segeyo amo gala udia fagulo hagui sefolalebe amolige, malö dubo dodo ïaha sefolalebe amolige, edefademalä asigiimolö dialea.
MAR 13:18 Amo hamomolö amoda, i bäu giisalea gögï mulo amo gadola muloea, Godema adosa namialo.
MAR 13:19 Mida, segeyo amo gala yöi yafie elö elöla maala negei dië bimolömelë. Godea nelebo mi gäwila hamoia amila yöi amo gadoi made melï. Amase, hobeage bu elö made bimolömelë.
MAR 13:20 Amaimo, Dafidilo Geloia segeyo amo neala obobagilasimolö made helësëi galebeda, udia dolö sulubadela namolö amo fu made bealabio. Udia dolö hï memelei amoli helësëlahilä, segeyo amo neala obobagilasimolö helësëi.
MAR 13:21 Amaimo, afädëa dilima sähalea, Afädë Memelei amo misi neebe gowe bimola säsege, e neebe gagowe bimola säsege, dofä gabula helësëmabio.
MAR 13:22 Dolö odoaea wäfalï säsäla sähalea, Afädë Memelei amo ne misi neawela sämolö moholömelë. Odoaea wäfalï säsäla sähalea, Neda Godeïe bea sälo misi neawela sämolö moholömelë. Amala maalahilä, ilia udia dolö Godea memelei nefolalebe amoli dahila neala hamomolöi walebelela bimolöïe, dolöea hamomolöi made gadoige, hïdo elöi elö elöge hamosa namolömelë.
MAR 13:23 Dilia idihë namialo. Nelebo amoli hamola made neebe amo gaalu, na dilima dafidi säla ïahagomelëla säla ï.
MAR 13:24 Yesuea aso, sähamu nea sähalea, Yöi yafie elö elöla hamosa maadeibua eso usilahilä, aube made neëla,
MAR 13:25 gasumilï mudaiala besela didigafula, mudaia nelebo geloi hïdo elöi amea fogolasimolömelë.
MAR 13:26 Amala hamose amo gaalu, Dolöïe Malö amoda geloi hïdo elöibaläge yo digalo hïdo elöibaläge mu baidilidaia maala neë bimolömelë.
MAR 13:27 Bease amo gaalu, ea ïe selesaia fii amolima mosalolahilä, udia dolö hï memelei sege föi sulubadelagi, agesu näiado nefolalebe amolige, näiado nefolalebe amolige, sege afädëgi neala gedolasimolö mosalola sämolömelëla säi.
MAR 13:28 Yesuea aso, sähamu nea sähalea, Diliada äfäeoïe mala amogi helësëmäia sähago. Äfäeo fësëgësisila, bäu gähe bobagiseda, dilia helësësalea, sege esomolöda hä ga made gabula helësëlomelë.
MAR 13:29 Amo gadola wäla, dilia nelebo säi amo gadoi hamose beaseda, Dolöïe Malö amo hä moholö suägïsa gabula helësëmalo.
MAR 13:30 Na dilima dofä gelola sähago. Udia dolö walio nefolalebego made baagola nefolalegi wäla, nelebo säi amoli sulubadela hamosa maademolömelë.
MAR 13:31 Mu giwige naga föige hogosa helemolö gaso, nïe ado malada dofä made hogosa helemolömelëla säi.
MAR 13:32 Yesuea aso, sähamu nea sähalea, Amala hamomolö amoda segeyoge, aoage afädëa dawa mademelë. Selesaia fii iliage, malöeage dawa mademelë. Naado eamu hïdo dawadigi neamelë.
MAR 13:33 Nelebo amoli hamomolö amo gowe gala gabula, dawa made ameada, dilia hedabola idihë namialo.
MAR 13:34 Amoda gowe gadoimelë. Dolö afädëa, ïe mosö dïgïla, sege wagadi made aulo amo gadola awähalea, ïe hamoi hamolasiloma, ïe hamoi beaha namialola säla, hïdo hïdolama hamoi sogosa maadelahilä, idiliba beaha aligilo amoma sähalea, Hedabola beaha namialola säsila aulomelë.
MAR 13:35 Mosö eedo amoda së gäse gaalu obëgëmolöledu ma, gasi mogogi obëgëmolöledu ma, haea gäse gaalu obëgëmolöledu ma, yose obëgëmolöledula dilia dawa made neebe ameada, dili oböla adi elaboi diëgi fodolofalï muloea, idihë namialo.
MAR 13:37 Na dilima ado säla ïasewe gadola, udia dolö sulubadelamage, dili idihë namialola säla ïahadiola säi.
MAR 14:1 Segeyo äudä nelolahilä, osodagi Baagila Asi Segeyo amoïe molö molö amoda, Beledi Yidila Made Gobei Segeyo amoïe gabula helësëlahilä, gobela ïlo busa nefolalo amolaliage, mala dawadigi nefolalo amolaliage didiähalea. Yesuma wäfalï abeahäla sälahilä, e gaula nufulödula säla didiäha difolalo.
MAR 14:2 Ilia sähalea, Segeyo Edefadegi gedola molö nasolo amo galada, amala made hamodelä, udia dolöea nilïbalä nuduloeala säi.
MAR 14:3 Yesu eda sege Bedani ami Saimono dafidi gudubu hamoi nelo amea mosöa molö naha sulo. Ami sebegi, udia afädëa weli hedabi gafisigäi hïdo elöi, amoïe ëida nada. Weli amoda muni edefadea nelo ödä i igia hamoigi osala negei dilo. Amo gaula maala dusulahilä, Yesuïe busagia söga negei.
MAR 14:4 Amala hamosebegi, udia dolö odoa sefolalo amolia habobalahilä, hilidomu sähalea, Weli gafisigäi we memalä edoïe waeasesadu.
MAR 14:5 Weli gafisigäi egoweda gina hädali ohodoa gadoi nii galebeda, dolö busadäoi nefolalebe amoligali mogela ïalabio gabula säla, ilia udia amoma habobala baagido säha dilo.
MAR 14:6 Amala säsebegi, Yesuea ilima sähalea, Beasimo. Edoïe ema habobala baagido säha. Udia gowea nema hamoi amoda, hedabi hïdo elöi hamoimelë.
MAR 14:7 Udia dolö busadäoi nefolalebe amolida dilibalä namolöi namolömelë. Abodo gala dilia ili ugila negemolöila helësëseda, amoda dilia ugila negemolö dofea. Gaso, neda dihilibalä namolöi namolö mademelë.
MAR 14:8 Udia goweada hamomolöi beala hamoimelë. Ea nïe domalogi nada hëi amoda, hobea nïe domalo baumolö amoïe, dafidi daiala hëimelë.
MAR 14:9 Na dilima dofä gelola sähago. Ado Mala Hedabi sege föi sulubadelagi säla olelesaleada, e helësëla, ea walio nema hamoi amo säla ïmolömelëla säi.
MAR 14:10 Amalahilä bëgëla aulo giwilasi amoligi Yudasa Isagaliadaea gobela ïlo busa neebea ami awälahilä, ilia Yesu nufuäia hololömolö asi.
MAR 14:11 Ea säi amo nabala ilia obeägïlahilä, egali muni ïmolömelëla säla negei. Amalebe ea Yesu hololöla gaula ïmolöïe fu hogosa nelo.
MAR 14:12 Segeyo agegi Beledi Yidila Made Gobei Segeyo amo besela galaseda, Isilale iliada Baagila Asi Segeyo amoïe sugua sibi malö nufidelo. Segeyo amo gala, ïe bëgëla aulo amolia Yesuma nabahalea, Baagila Asi Segeyo amoïe molö molöda nilïa abidi daiamäia hamesebela nabi.
MAR 14:13 Amala nabasebegi, ea ïe bëgëla aulo äudä mosalalahilä, elema sähalea, Ali awäla gaamugi besela galahamelë, dolö afädëa ödä iigi usi gaui maaha neëgi, gausiamolömelë. Alige dolö amo bëgëla mosalo.
MAR 14:14 Alia beahamelë, dolö amo mosöa nogila digaseda, alia mosö eedo amoma gomalä sämalo. Säla Olelelo neebe amea dima nabahalea, nïe bëgëla aulola nilï Baagila Asi Segeyoïe molö molöïe nïe mosö hogoli abidi dialeala nabimelëla sämalo.
MAR 14:15 Amala säseda, ea hogoli edefade daia dilo amogi, filo aulige molö negelo aulige daiala negesa maadei dilo amo olemolömelë. Ami nilï molö molöïe daiamalola säi.
MAR 14:16 Amala säi amo nabalahilä, ïe bëgëla aulo äudä amole awäla, Yalusaleme besela galalahilä beahamelebe, ea säi amo gadola sulubadela gausiala digaha maadesebegi, elea Baagila Asi Segeyo amoïe molö molö daiai.
MAR 14:17 Deadi Yesula ïe bëgëla aulo giwilasi amobalä misi.
MAR 14:18 Maalahilä ili molö naha sefolalea Yesuea sähalea, Na dilima dofä gelola sähago. Dili sebegogi afädëa ne hololömolömelë. Dolö amoda nebalä molö naha saleala säi.
MAR 14:19 Amala säsebegi, ilia asigia yölahilä, ema hïdo hïdolaea dafidi hobeala säla didigahalea, Nale ma, nalela säla didigai.
MAR 14:20 Amala säla didigasebegi, Yesuea ilima säla obëgësalea, Dili giwilasi sebegogi afädëa nebalä falo afädëdaia beledi ua negela naha sebe ameamelë.
MAR 14:21 Dolöïe Malö amoda bebagi ïe dëdëla negei dibe amo gadola baagomolö. Gaso, Dolöïe Malö e hololöla, odoaïe naabogi gausise dolö amo, asigiisebemelë. E emea made neegela ägüi galebeda, e hedabi aligilabiomelëla säi.
MAR 14:22 Ili molö naha sefolalea, Yesuea beledi afädë neala gaula nea, Godema nesegelahilä, beledi amo dagabodasila ïe bëgëla aulo amoligali ïa gogosalea sähalea, Nimo. Nïe domalo gomelëla säla ï.
MAR 14:23 Amalahilä, ea wani ödä usi amo neala gaula nea, Godema nesegelahilä iligali ïasebegi, ili sulubadelaea neala mai.
MAR 14:24 Ea ilima sähalea, Goda nïe healemelë. Asialo made ado säla negei amoïe mida nïe heale gogi dialea. Amoda udia dolö ugila negela sulubadela gali sögaha.
MAR 14:25 Na dilima dofä gelola sähago. Ne wani ödä bu elö made naala nelolahilä, Godea Beaha Maadela Sigi Neebea ami nea, bu gähe elö molömelëla säi.
MAR 14:26 Ili molö naha madela gë afädë udälahilä, Olibe bi daia fedafiai.
MAR 14:27 Yesuea ïe bëgëla aulo ilima sähalea, Dilia asigi afädë negeigo sulubadela digaha maademolömelë. Mida, bebagi ado gomalä säla dëdëla negei dialea, Godea sähalea, na sugua sibi sigi aligilo neebe amo nufudaseda, sugua sibi nefolalebe amoli dusudasila fisäla afiaha maademolömelëla säla dëdëla negei dialea.
MAR 14:28 Amai gaso, Godea ne nowelasisegi, dili baagila dafidi nedale Galili moholömelëla säi.
MAR 14:29 Amala säsebegi, Fidaea säla obëgësalea, Ili sulubadela fisäla awäseda, neda made fisäla moholömelëla säi.
MAR 14:30 Amala säsebegi, Yesuea ema säla obëgësalea, Na dima dofä gelola sähago. Walio gasigi haea gagalugo gawalia nafi bu äudä made gäla neëgi, dia ne dawa madela nafi bu ohodoala sämolömelëla säla ï.
MAR 14:31 Amala säsebegi, ea gelolafalï säla obëgësalea, Ne dibalä baagomolö nea galëda, na di dawa madela dofä made sämolömelëla säi. Ili sulubadelaea amo gadolamu säha maadei.
MAR 14:32 Yesula, ïe bëgëla aulolali sege ëi Gesemani ami afialahilä, ea ïe bëgëla aulo amolima sähalea, Ne Godema adomolö awäsewe gaalu, dili wi sefolamialola säi.
MAR 14:33 Amala sälahilä, ea Fida Yamese Yonela ilimu sigi awälahilä, ïe iso asigigi fudugila yöla säosäomolö mi gäwila besela galasebegi,
MAR 14:34 Ea ilima sähalea, Nïe iso asigigi edefademalä yösalea, ne baagomolö gabumelë. Dili gui salea idihë namialola säi.
MAR 14:35 Amala sälahilä e holöbö aliga gala nagadaia gumusula dia idogolahilä sähalea, Asiamolö fu galëda, nema walio hamomolö amo asiamalola säi.
MAR 14:36 Ea sähalea, Aba-o, Naado-o, dia nelebo sulubadela hamosa maademolöi nebego. Nema ödä iigi usi dibe amo dia nea nimalo. Amai gaso, na helësësewe gadola made, dia helësëse amo gadola hamomalola säi.
MAR 14:37 Amala sälahilä e obëgësamelebe, ili süwia adidi dibe amo beala, ea Fidama sähalea, Saimono-o, di adi dialeale. Fu oboba gogi dia idihë namolö ulïsebele.
MAR 14:38 Nafadea dili digalasiloea, idihë nea Godema adosa namialo. Dofä, asigiada hamomolö helësëi neago gaso, domalo wäbëai nebegola säi.
MAR 14:39 Amala säsila e bu awäla, dafidi säi amo gadola säha sulo.
MAR 14:40 Amala sälahilä e bu obëgësamelebe, ili aso adidi dibe melï. Mida, süwiaea ilile si gafodo gadugisalea amai. Ameada, ilia ema edo säla obëgëmolödula asusugai.
MAR 14:41 E bu osoda obëgëlahilä, ea ilima sähalea, Dili hele salea adidimu dialeale. Amo dofea. Bimo! Dolöïe Malö amo nafade hamolo amolima gaula ïmolö fu hä besela galai gabuwe.
MAR 14:42 Nowemo. Nilïa hä gausiala afiadila säi. Ne gaumäia hololölo amoda ga made misi nebego bimola säi.
MAR 14:43 Yesuea amala säha nebegi, ïe bëgëla aulo giwilasi amoligi Yudasa e dolö maleibalä fodolofalï misi. Ilia helebe baialage gagaula ebalä misi. Gobela ïlo busa amoliage, mala dawadigi amoliage, asigi gäwi dafidilo amoliage ili mosalola säsebegi misi.
MAR 14:44 Yesu gaumäia hololölo amea ilima dafidi daiala sähalea, Na gomalä hamoseda, amo gabula helësëmalo. Na dolö amo mimila nödöseda, amo hedabola gaulahilä sigi mosalola säla ï.
MAR 14:45 Ea säi amo gadola Yesu neebea fodolofalï maala aligilahilä sähalea, Säla Olelelola säla, Yesu mimila nödöi.
MAR 14:46 Mimila nödösebegi, ilia e gaulahilä naaboea gaula fëdöi.
MAR 14:47 Amala hamose amo gaalu, dolö afädë ami nelo amea helebe besela nealahilä, gobela ïlo busa edefade amoïe hamoi hamolasilo neebe amoïe gëhe dagala salisi.
MAR 14:48 Yesuea ilima sähalea, Fa nelo gaumolöïe mulo amo gadola, helebe baialage gagaula ne gaumolö misile.
MAR 14:49 Segeyo yafiegi ne dilibalä nea, Godeïe mosöa ado mala olelesa nelo amogi ne dilia made gaui. Amai gaso, bebagi ado säla dëdëla negei dibe amo gadola hamomäiamelëla säi.
MAR 14:50 Amasebegi, ïe bëgëla aulo amoli sulubadela e dïgïla fisäla awäha maadei.
MAR 14:51 Malö malïsä afädë fagulo bulula gälahilä Yesu bëgëla awäha nebegi, dolö amolia e gaui.
MAR 14:52 Amasebegi, fagulo bulula gäi amo ilima amilahilä e dudugïmu fisäla asi.
MAR 14:53 Yesu e gaulo amolia e sigi gaula gobela ïlo busa edefade sebea ami sigi asi. Gobela ïlo busa amolige, asigi gäwi dafidilo amolige, mala dawadigi amolige gedola ami sefolalo.
MAR 14:54 Fida e Yesu bëbëgëla asi. Gaso, eda holöbö hobea hobeala awälahilä, gobela ïlo busa edefade amoïe mosö yala isogi nogila digalahilä, idihë aligilo amolibalä nulo gobeia ami hëgï hausa sulo.
MAR 14:55 Gobela ïlo busa amoliage, Galïsolö dolö amoli sulubadelaeage, dolö odoaeage Yesuea asiala hamose melëlo amoli misialolahilä, ilia säla ulufamalai. Ilia e nufuäia ea asiala hamoi walebelela hogosamelebe, afädë maade melï.
MAR 14:56 Dolö yafiea ea made hamoi amo ilima wäfalï baala säla ulufai gaso, ado afädëdi made melï.
MAR 14:57 Odoaea nowela nea ea made hamoi amo baala wäfalï sähalea,
MAR 14:58 Nilïada ea gomalä säse nabimelë. Godeïe mosö dolöïe naaboea hamoi amo, ea haila digila, segeyo ohodoagi ea bu ulimolö amoda, dolöïe naaboea olelo amo gadola made, ulimolö säimelëla säi.
MAR 14:59 Ilia amala säla ulufai amoge aso afädëdi made melï.
MAR 14:60 Amala säsebegi, gobela ïlo busa edefade amea dolö sefolalebe amoli mogogi nowela aligilahilä, Yesuma nabahalea, Dia ado afädë made säla obëgëmolöle. Ilia dia asiala hamoila säsegoda edo hamoila nabi.
MAR 14:61 Yesuea nafi dagala made säla obëgësebegi, gobela ïlo busa edefade amea ema bu elö nabahalea, Dida, Afädë Memelei Gode hedabi hïdo elöi neebe amoïe malöda dilela nabi.
MAR 14:62 Amala nabasebegi, Yesuea säla obëgësalea, Ä, neda amomelë. Dolöïe Malö e Gode Geloi Edefade Neebe amoïe naabo dafädimadi fila, mu baidilidaia maala neëda, dilile siia bimolömelëla säi.
MAR 14:63 Amala säse amo nabala gobela ïlo busa edefade amea mihaläla hïle fagulo nulilahilä sähalea, Ea hamoi amo sämäia odoa ili misialola nalï sämabio.
MAR 14:64 Ea Gode gagadese nabi amo, dilia abilia helësësebela nabi. Amala nabasebegi, ili sulubadelaea sähalea, Ea asiala hamoi amoïeda, e baagomäia nufulö dialeala säla didigai.
MAR 14:65 Amala sälahilä odoaea e gofedela galala, ïe si usulala naabo gafea nufudalahilä sähalea, Di dolö gowea nufila dihï olemola säi. Amase, idihë aligilo amoliage elöea nufudala elöeaha nelo.
MAR 14:66 Fida e yala isogi nogila digala sebegi, gobela ïlo busa edefade amoïe hamoi hamolasilo dolïsä afädë maalahilä,
MAR 14:67 Fida e hëgï hausa sebe amo fädäla bealahilä sähalea, Dige Nasalese dolö Yesubalä nawesa aligilo amo gabula säi.
MAR 14:68 Amala säsebegi, Fidaea ne mademelëla sälahilä, dia ado säsebegoda, na dofä dawa mademelëla säi. Amala sälahilä e mosö amoïe idi galo baagido awäha nebegi haea Gagalugoea gäi.
MAR 14:69 Hamoi hamolo dolïsä amea e bu bealahilä, dolö nefolalo amolima sähalea, Dolö goda amoligimelëla säi.
MAR 14:70 Amala säsebegi, Fidaea bu elö sähalea, ne mademelëla säi. Holöfalï nelolahilä dolö nefolalo amolia Fidama bu elö sähalea, Dofä. Dida amoligi. Dige Galili dolömelëla säi.
MAR 14:71 Amala säsebegi, Fidaea gelolafalï säla gabulo amo gadola migalïa diigila sähalea, na we wäfalï säseda, Godea ne dofä së ïmäiamelëla sälahilä, Dilia dolö ëi säse goda na dofä dawa mademelëla säi.
MAR 14:72 Ea amala säia gai amole haea gagalugo gawalia nafi bu äudä gäi. Fidaea amo nabalahilä dafidi Yesuea, haea gagalugo gawalia nafi bu äudä made gäla neëgi, dia ne dawa madela nafi bu ohodoala sämolömelëla säi amo helësëi. Amo helësëla gäia güsäla dïisa nelo.
MAR 15:1 Yosefalï gobela ïlo busa amolige, asigi gäwi dafidilo amolige, mala dawadigi amolige, Galïsolö dolö amoli sulubadelage gegedolahilä ilia hamomolö amoïe ado didiäha dilo. Didiäha dilolahilä ilia Yesu e igi ëfëa nafodolahilä Bailadi neebea sigi asi.
MAR 15:2 Sigi maasebegi, Bailadia Yesuma nabahalea, Yu udia dolöïe beaha aligilo ginida dilela nabi. Amala nabasebegi, ea säla obëgësalea, Dia säse gomelëla säi.
MAR 15:3 Gobela ïlo busa amolia ea nafade yafie hamoimelëla säi.
MAR 15:4 Ilia amala säsebegi, Bailadia ema bu elö nabahalea, Dia ado afädë made säla obëgëmolö neale. Iliada, dia nafade yafie hamoila säi amo nabilela nabi.
MAR 15:5 Amala nabase amogi Yesuea ado bu elö made säla obëgësebegi Bailadi e fudugisa nelo.
MAR 15:6 Gäheo i sulubadelagi Segeyo Ede amoïe molö nülo segeyo amogida, udia dolöea galabaia negei amoligi ëi säla gowe fisigämola säsegi Bailadia fisigähamu aligilo.
MAR 15:7 Segeyo amo gaalu, dolö odoaea gamanebalä nudusalea dolö odoa nufudasebegi, ilia ili galabaia negei. Amogi dolö afädë galabaia negei nelo amoïe ëida, Balabasa.
MAR 15:8 Udia dolö gegedoi amolia Bailadi neebea maalahilä, ema sähalea, Dia nilïma gäheo i sulubadelagi hamolo amo gadola walio hamomäiamelëla säi.
MAR 15:9 Ea ilima säla obëgësalea, Na Yu udia dolöïe beaha aligilo gini dihilima fisigämäiala helësësebelela nabi.
MAR 15:10 Amala nabi amoïe mida, gobela ïlo busa amolia Yesuma mudiala mihalälahilä, e sigi gaula misi gabula helësëla, Bailadia amala nabi.
MAR 15:11 Gaso, udia dolö gegedoi amolia Bailadima, Balabasa hilima fisigämäiala gelola sämäia gobela ïlo busa amolia ilima si nigilasi.
MAR 15:12 Bailadia ilima bu elö nabahalea, Diliada, Yu udia dolöïe ginila sälo neebe gowema, na abilia hamomäia helësësebela nabi.
MAR 15:13 Amala nabasebegi, ilia bu uuala sähalea, Eda i fügäigi baala negemalola säi.
MAR 15:14 Amala säsebegi, Bailadia ilima sähalea, Mi edogi. Ea edo nafade hamoi gabiola nabi. Amala nabasebegi, ilia gelola uala sähalea, I fügäigi baala negemalola säi.
MAR 15:15 Amala säsebegi, Bailadia, udia dolö gegedoi amolia obeägïmäia, Balabasa hilima fisigälahilä, ea ami dolö amolima Yesu fëgämalolahilä, i fügäigi baala negemolö sigi mosaloi.
MAR 15:16 Ami dolö amolia Yesu sigi gaula gamane beaha aligiloïe mosö yala isogi nogila digai. (Mosö amoïe ëida Beledoliama.) Ilia ami dolö odoa misialosebegi ili mafula gegedoi.
MAR 15:17 Gedolahilä, ilia fagulo sedade hogale uii Yesuma salugasilahilä, ëfë äyo gägäi amalela nasigïla giniïe habuga gadoi hamola ïe busagia salugasi.
MAR 15:18 Amalahilä ilia naabo sögödigila sähalea, Yu udia dolöïe beaha aligilo gini, namolöi namiäiamelëla säi.
MAR 15:19 Amala sälahilä, ilia ïe busagia buudi damuia nufudalahilä, gofedela gagalai. Amalahilä, ilia ïe ëi gauia adogose gadoi hamola gumusula dia digafui.
MAR 15:20 Ilia e gagadela hamomolö amo gadoi hamosa maadelahilä, fagulo hogale uii sedade gäsi amo giilahilä hïle fagulo amo salugasi. Amalahilä e i fügäigi baala negemolöïe segea sigi asi.
MAR 15:21 Ili idiafa afiaha dibegi Sailini fii dolö afädë ïe ëida Saimono. Alegisäda Ulufasalele eedo amo, sagaiala maaha nebegi gausiala digalahilä, ami dolö amolia ema Yesuïe i fügäi gaumo gaumola eegedigi.
MAR 15:22 Ilia Yesu sigi gaula sege ëi Gologoda asi. (Gologoda nilïle ado adolada Busa Giwi Sege.)
MAR 15:23 Ilia wani ödäge i afädëïe ödä muwege gegoalahilä egali muäia ï gaso, ea made mai.
MAR 15:24 Amalahilä, ami dolö amolia e i fügäigi baala negei. Ilia ïe fagulo amo nowëa nimabelela, ilia sadu dahilahilä, ïe fagulo amo amala mogei.
MAR 15:25 Yose eso neëla udigisa nebegi, ilia e i fügäigi baala negei.
MAR 15:26 Ea nafade hamoila sälo amolia dëdëla negesalea, Yu udia dolöïe beaha aligilo ginila säla dëdëla negei.
MAR 15:27 Amase, Yesu baala negei amo gaalu, fa nelo dolö äudä, elö ïe naabo dafädimadi, elö ïe naabo fefeädimadila, i fügäigi baala negei.
MAR 15:29 Udia dolö e dibeadi baagila afu mafusalea, Yesu gagadiabola busa dugagila ëhehelahilä, Godeïe mosö haila digila segeyo ohodoagimu ulimolö säi amo,
MAR 15:30 dihïmu damula awäla i fügäi daia adogoila digamola säla baagi baagisa nelo.
MAR 15:31 Amo gadola wäla gobela ïlo busa amoliage, mala dawadigi amoliage Yesu gagadiabola säla didigahalea, Eada udia dolö odoa ugila negela wahilo amo gadola, e hïmu ugila negemolöi made gabugi dialealedu.
MAR 15:32 Nilïa ema asigi afädë negedeläïe Afädë Memelei, Isilale udia dolöïe gini ameada, e i fügäi daia adogoila digamäia. Nilïa amo beala asigi afädë negedeläla säi. E baala negei gaalu, baala negei äudä amoleage e gadiabola amo gadolamu säi.
MAR 15:33 Eso mogogi gasila, sege sulubadela gasilasi dialeamu deadi eso digase gaalu yo digala obëgëi.
MAR 15:34 Amala hamose amo gaalu, Yesuea gelola uuala sähalea, Elöi, Elöi, lama sabagadanila säi. Nilïle ado adolada, Nïe Gode, nïe Gode, abisigi ne dïgïla asi.
MAR 15:35 Amala säi amo nabalahilä, udia dolö odoa ami nefolalo amolia sähalea, Nabuö. Ea Elaia wesebegola säi.
MAR 15:36 Afädë baluluia awälahilä, nelebo afädë dahudu gadoi wani ödä gamogai dibe amogi gelahilä, i bidigi yaala, egali muäia ïalahilä sähalea, E i fügäigi dibea adogoi, Elaiaea fisigämolö maasebelela aso, beaha aligidila säi.
MAR 15:37 Yesuea uuala gelola sälahilä hame doala asi.
MAR 15:38 Amasebegi, gobela ïlo mosöa fagulo edefade gosagisi dilo amo, gadogola gadelala digalahilä, elö eamu eamula negesi.
MAR 15:39 Ami dolö hädali afädë beaha aligilo amea Yesuïe odagiamadi nea, sida adogola beahamelebe, Yesu hame doala asi amo bealahilä, Dolö goda dofä Godeïe malö gabula säi.
MAR 15:40 Amo gaalu, udiafalï holöbö wagadi madela nea, sida gala nefolalo amolida, Magadala udia Melige, Yamese elö Yosese elele eme Melige, Salomege nelo.
MAR 15:41 Dafidi Yesu e Galili neëgida, udia amoli e awäse amo gadola awälahilä, e ugila negesa aligilo. Udia odoa yafie ebalä Yalusaleme misi amolige nefolalo.
MAR 15:42 Segeyo amoda nelebo daialo segeyo. Sabada segeyo aiyo namolö gabula helësëlahilä,
MAR 15:43 Deadisebegi, Alimadia dolö Yosebe e misi. Eda galïsolö dolö amoligi afädë nelo. E udia dolöïe siigi hedabi neada, Godea Beaha Maadela Sigi Neebe amoge ea beaha nelo. Eada bedälo made mumulasi amea, Bailadi neebea awälahilä, Yesuïe domalo nimolö audulela nabi.
MAR 15:44 Amala nabasebegi, Bailadia e aabela baagoi gabula fudugilahilä, ami dolö hädali afädë beaha aligilo amo welahilä, e hä baagoilela nabi.
MAR 15:45 Amala nabasebegi, Bailadima ami beaha aligilo amea, e hä baagoimelëla säi. Amo nabalahilä, ea Yosebema sähalea, dofea ïe domalo nimolöla säi.
MAR 15:46 Amala sälebegi Yosebea fagulo falei hedabi afädë nealahilä, ïe domalo i fügäidaia dibe amo neala gaula digala, fagulo amea usulala gaulahilä, igi äbä dafidi duwi diloa ami baumolö gaula asi. Gaula awäla bausilahilä, igi edefademalä afädë bebugula gaula maala idi gasi.
MAR 15:47 Amala bause amo Magadala udia Melile Yoseseïe eme Melilea melï.
MAR 16:1 Segeyo Sabada gafe baagibua, Magadala udia Melige Yameseïe eme Melige Salomege ilia Yesuïe domalogi hëla moholöïe, weli gafisigäi hïdo elöi amo bidia nii.
MAR 16:2 Segeyo gifalädalügi yosefalï ili igi äbägi bauia ami afiai.
MAR 16:3 Hilido afiaha dialea sähalea, Bausalea, igi edefadea gai dibe amo, nowëa nilï ugila negela bebugula fisiga gala dogasimolödula säsäla afiai. Igi amoda dofä edefade amo helësëla amala säi,
MAR 16:4 Ili ami besela galamolö nea sida gala beahamelebe, igi edefadea gai dilo amo bebugula nigia gala doga negei melï.
MAR 16:5 Beala ili awäla äbä isogi nogila digalahilä bauia ami beahamelebe. Malö malibu afädë fagulo falei sedade gäi ilile naabo dafädimadi sebe amo beala, ili fudugi.
MAR 16:6 Ea ilima sähalea, Dilia fudugimabu. Dilia Nasalese fii Yesu, ilia i fügäigi baala negei amo hogola misi goda, na helësësa. E hä nowela asimelë. Eda wi maade. Ilia e negei diloa amo bimo.
MAR 16:7 Hä dili afiala Fidamage ïe bëgëla aulo odoa amolimage säla ïahaleada, Ilia e Galili bimolömelëla dafidi säla ï amo gadola, eda edale Galili moholö awäha neamelëla säla ïmalola säla ï.
MAR 16:8 Amala säi amo nabalahilä, ili igi äbä isogi amila fodolofalï doadigila fedala afiaha dialea, edefademalä bedäla emo gigisëla fudugila aligi afiai. Ili afiahalea udia dolö odoabaläge made adoi. Mida, ili bedäi afiahalea amea. __________________ [
MAR 16:9 Segeyo gifalädalügi yosefalï Yesu e nowelahilä, Magadala udia Melia bimäia e sebeadale e ulufala besela galai. Dafidi udia amoma mugabe gifalädalïa fedai sebegi Yesuea nesila digi.
MAR 16:10 Besela galai amo bealahilä, Yesubalä dafidi nawesa aligilo amolia e asigiila dïisa dibea ami säla ïmolö asi.
MAR 16:11 Awälahilä Melia ilima sähalea, Yesu hï nowela asi amo na melïmelëla säi. Amala säsebe amo ilia nabi gasoda, dofä gabula made helësëi.
MAR 16:12 Hobeala ïe bëgëla aulo äudä Yalusalemela ididila awäha nebegi, elea e bimäia Yesu e domalo elölahilä besela galai.
MAR 16:13 Amo bealahilä ele obëgëla awäla bëgëla aulo odoa amolima säla ï gaso, ilia dofä gabula made helësëi.
MAR 16:14 Amalahilä hobeafalï ïe bëgëla aulo gïdälasi amoli molö naha dibea ami Yesu e ulufala besela galai. Ulufala besela galalahilä, ilia asigi afädë made negei amogige, iso asigi geloi neebe amogige, odoa ilia hï nowela neebe melïmelëla säi amo nabala dofä gabula made helësëi amogige ea ilima nemoi.
MAR 16:15 Amalahilä ea ilima sähalea, Dili sege föi sulubadelagi afufulahilä, udia dolö sulubadelama Ado Mala Hedabi säla ïmolö mosalo.
MAR 16:16 Afädëa asigi afädë negeseda, ödägi gelahilä damula aulo neala gaumolömelë. Be afädëa asigi afädë made negese amobaläda gudila së ïmolömelë.
MAR 16:17 Asigi afädë negei neebe amoliada, dolöea hamomolöi made gowe gadoi hamomolömelë. Nïe ëigi nea mugabe fedai nesila digimolöge, udia dolö odoaïe ado adomolöge,
MAR 16:18 baagolo nuba gausege baagolo ödä nasege made baagomolömelë. Oloi difolalebe amoli ilia naaboea diigiseda wahimolömelëla säi.
MAR 16:19 Dafidilo Geloi Yesuea ilima ado amo säla ïaha maadelahilä, selesaia mosöa fedala Godeïe naabo dafädimadi awäla sulo.
MAR 16:20 E asibua ïe bëgëla aulo amoli sege sulubadelagi afufulahilä, ado mala säla ïaha nebegi, Dafidilo Geloia ilibalä hamoi hamolasila, ilia säsebe amo dofä säsebela helësëmäia, dolöea hamomolöi made gadoi hamolasi.] __________________
LUK 1:1 Mi gäwila hamoi amo siia bealahilä, ado mala amoïe hamoi hamolasilo besela galala nefolalo amolia nilïma säla ï amo gadola, nilï neebeawi gausiala digai amoïe dolö yafiea dëdëmolö helësësa nelomelë.
LUK 1:3 Amaimo, dafidilo Diofilasa-o, nelebo sulubadela mi gäwila hamoi amo nihï mi fädäla nabaha nelo amea, ado dima olelei amo dia dofä gabula helësëmäiaïe, nage dima mogola dëdëla ïmolöla helësëimelë.
LUK 1:5 Heledo e Yudiaïe gini nelo amo gaaluda, gobela ïlo afädëïe ëi Segelaea nelo. Eda gobela ïlo Abia ea beaha neloamadi gobela ïlo nelo. Ïe udia amoïe ëida Elisabede. Eege ïe yaua mäu Alono nelo.
LUK 1:6 Eleda Godeïe siigi asigi mogoi nelo. Elea amala neada, Dafidilo Geloiïe ado säla negei dibe amoge, ado malage, elea sulubadela bëgëla hamolo nea, elema asiai maade, hedabi nelo.
LUK 1:7 Gasoda, ele malö maade sulo. Mida, Elisabede e malö maade, haua salea, helegela ëdëi sali hamoi sulo.
LUK 1:8 Segeyo afädëgi, Abiamadi nefolalo amolia odala ï gobela ïmolö amo galada, Godeïe siigi nea, Segelaeaea odala ï amo gobela ïmolö nelo.
LUK 1:9 Gobela ïlo amolile mala amo bëgëla, Dafidilo Geloiïe mosö auli dibea ami höba gafisigä hedabi fedamäia gobemolö amo dolö nowëa walebelela sadu hamola beahamelebe, Segelaeaea nogila digala gobela ïmolö melï.
LUK 1:10 Hä, e isogi nogila digala gafisigä fedamäia gobese amo gaaluda, udia dolö gegedoi amoli sulubadela mosö amo baagido segea nea, Godema adosa nefolalo.
LUK 1:11 Segelaeaea amala hamosa nebegi, gafisigä fedamäia gobelo auli amoïe dafädimadi, Dafidilo Geloiïe selesaia fii afädë Segelaea neebea ami maala ulufadigila nelo.
LUK 1:12 Segelaeaea e beala, edefademalä fudugila bedäi.
LUK 1:13 Fudugila bedäsebegi, selesaia fii amea ema sähalea, Segelaea-o, dia bedämabu. Dia Godema adoi amoda Godea hä, nabi. Dïe udia Elisabedea dïe dolö malö afädë sogobamolömelë. Malö amoïe ëida Yone negemalo.
LUK 1:14 Dïe iso asigi ea hedabolasila obeägïlasimolömelë. Udia dolö yafie nefolalebe amoliage, e neegela ägüse amogi obeägïmolömelë.
LUK 1:15 Mida, Dafidilo Geloiïe siigi eda ëi sälo namolö. Eada wani ödäge, gagaolo ödäge molö mademelë. Eda emea made ägüla maala isogi seëgi, ema Eleloi Gesami nobai namolömelë.
LUK 1:16 Eada Isilale udia dolö yafie asigi besulasila, ilile Dafidilo Geloi Gode mia sigi obëgësa maademolömelë.
LUK 1:17 Eda malage geloige Elaia nelo amohï gadoi nea, Dafidilo Geloi hobeala misiäia, dafidila awäha namolömelë. Eada eedolali asigi besulasila, eedolalia ilile malësäma helësëlasimäiage, amase, udia dolö ado neadigilo neebe amolige, asigi besulasila asigi gäwi neebe amolia asigi falagasela helësëlo amo gadola helësëmäiage, ea ili helësëlasimolömelë. Dafidilo Geloi misiäia beaha nea, ea udia dolö hamogilahilä dadaiala namialamolömelëla selesaia fii amea säla ï.
LUK 1:18 Amala säsebegi, Segelaeaea selesaia fii amoma nabahalea, Neda ëdëi sali, amase, nïe udiage sesalebe hamoi sebe amo, dia walio ado säi amoda, dofä gabula nada abilia helësëmolödula nabi.
LUK 1:19 Amala nabasebegi, selesaia fii amea säla obëgësalea, Neda Gabelelo. Gode neebea amimu aligilo. Ado hedabi we dima säla ïmäia, ea ne fisiga weimelë.
LUK 1:20 Ä, dia nabuö. Na ado säi amo dia dofäla made helësëse goeada, walio dïe nafi dofogahago. Na ado säsebeweda, Godea daiala negei segeyo gausiala digasolo amo gala, gausiala digamolömelë. Dia adola made nea, nelebo Godea hamomolömelëla na dima säla ïasewe gausiasolo amo gala, dia adomolömelëla säla ï.
LUK 1:21 Segelaeaea amala hamosa neebe amo gaalu, udia dolö e beaha nefolalo amolia Godeïe mosö isogi sedadeseweda abeahäla hamosadula helësëlahilä, asigiamu hogosa nefolalo.
LUK 1:22 Hobeala, Segelaea e segea doadigila fedalahilä, ilibalä adomolö ulï nelo. Adoea sämolö amo ulï nea, ea sämolö helësëi amo naaboeamu oodo bibila säla ïasebegi, ilia helësësaleada, Godeïe mosö isogi idogoi sosoäla awäla melï gabula helësëi.
LUK 1:23 Holöfalï nelolahilä, ïe hamoi hamolo segeyo amoligi hamosa maadela, Segelaea e hï mosöa obëgëi.
LUK 1:24 Hobeala, ïe udia Elisabedeïe isogi malö fagulo hagui aube bia mosöamu musügä sulo. Amala salea Elisabedea sähalea,
LUK 1:25 Dafidilo Geloia ne ugila negesebe weada, segeyo wegi ea ne helësëla, udia dolöïe siigi ne hewalasilo amo haisa maadeila säi.
LUK 1:26 Elisabede e malö fagulo hagui aube gafe sebegi, Godea selesaia fii Gabeleloma, di Galiliïe sege ëi Nasalese gaamugi mosaloi.
LUK 1:27 E udia dolïsä afädë Gini Debidi sosogo nelo amogali säi sebea ami asi. Dolö amoïe ëida Yosebe. Dolïsä amoïe ëida Meli.
LUK 1:28 Amala hamoi sebegi, Gabelelo e dolïsä amo sebea ami awälahilä, ea säla olesalea, Udia malö, di go gabio. Dafidilo Geloi e dibalä gedola nea, edefademalä obeägïsa namiäia, di neala dofä obeägïlasimelëla säi.
LUK 1:29 Ado säi amo Melia nabala edefademalä fudugila bedäla, ea säla olei amoda, abeahäladula asusugala helësësa sulo.
LUK 1:30 Amala helësësa sebegi, selesaia fii amea ema sähalea, Meli-e, dia bedämabu. Godea di helësëla, dimada obeägïsa neamelë.
LUK 1:31 Dia malö fagulo hagui sulolahilä, dolö malö ägümolömelë. Malö amo ägüseda, ïe ëi Yesu negemalo.
LUK 1:32 Malö amoda, ëi sälo namolömelë. Udia dolö sulubadelaea eda Dofä Ilibia Edefade neebe amoïe malö neala sämolömelë. Dafidilo Geloi Godea e ïe yaua mäu Debidiïe beaha aligilo filodaia samialamolömelë.
LUK 1:33 Eda Yeigabaïe mosö amoli beaha namolöi namolömelë. Ea Beaha Maadela Sigi Neebe amoda, namolöi namolömelëla säla ï.
LUK 1:34 Amalebegi, Melia selesaia fii amoma nabahalea, Neda dolö made fii sebe amo. Walio dia ado säi amoda, abilia hamola hamomolödula nabi.
LUK 1:35 Amala nabasebegi, selesaia fii amea ema säla obëgësalea, Eleloi Gesami dima digalahilä, Dofä Ilibia Edefade neebe amoïe geloi dima salugamolömelë. Ameada, dia malö ägümolö amoda, asigi mogoi hedabi negei neëgida, Godeïe malö neala säha namolömelë.
LUK 1:36 Di sosogo Elisabededa sesalebe sulo gaso, walio e fagulo hagui sebe ameage dolö malö ägümolömelë. Siiba, odoa ilia ema malö sogobalo made, hauala sälo amo, walioda e fagulo hagui sebegi, hä, aube gafe saleamelë.
LUK 1:37 Godea nelebo hamomolöi made, ulï afädëda maademelëla säla ï.
LUK 1:38 Amala säsebegi Melia säla obëgësalea, Neda Dafidilo Geloiïe hamoi hamolasilo udia saleawe. Dia säsebego gadola nema hamosa maademäiamelëla säi. Amala säi amo nabalahilä, e dïgïla selesaia fii e asi.
LUK 1:39 Selesaia fii amo asi baagido, Meli e nowela fodolofalï Yudiaïe sege gau dibe amo fedala digala digila awäla, gaamu afädë dibea ami besela galai.
LUK 1:40 Gaamu amogi besela galala Segelaeaïe mosöa nogila digalahilä, Elisabede e säla olei.
LUK 1:41 Melia säla olei amo Elisabedea nabi amole, ïe isogi malö dubo sulo amea fologolahilä, Elisabedema Eleloi Gesami nobai. Amasebegi,
LUK 1:42 Elisabedea gelolafalï sähalea, Dida udia odoa sebe amoli gadoi made. Godea dima edefademalä obeägïlasi gabu. Dia malö ägümolö amomage Godea obeägïlasimolömelë.
LUK 1:43 Nada hedabi edo hamoi amoïe, nïe Dafidilo Geloiïe eme di ne sebeawi misi.
LUK 1:44 Dia säla olei amo na naba gai amole, malö dubo nïe isogi sebe amea obeägïsalea fologoimelë.
LUK 1:45 Dafidilo Geloia dima hamomolömelëla säla ï amo, dia dofä gausiala digamolö gabula helësëi ameada, dia dofä obeägïsa saleamelëla säla ï.
LUK 1:46 Amala säla ïasebegi, Melia sähalea, Neda ïe hamoi hamolasilo udia iso gäwi made sebegi-iii, hï ne beala bobasëi amea-aaa, nïe iso asigia Dafidilo Geloiïe ëi gauia adala-aaa, nïe gesamia nïe damula aulo Godema obeägïsawe-eee. Gode geloi edefade neebe amea-aaa ne hïdo elöla ugila negei ameada-aaa, segeyo wila nofela walio nefolalebeweage-eee hobeala namolö amoliage-eee, obeägïlo edefade Godea negali ïla sämolömelë-eee. Ïe ëida dofä eleloifalï nea-aaa.
LUK 1:50 Udia dolö walio nefolalebeweage-eee, hobeala namolö amoliage-eee, ebalä bedäse amolida-aaa, ea bobasëmolömu gabio-ooo.
LUK 1:51 Ïe naaboea hamoi geloi edefade hamoi-iii. Asigi dalagala hilile ëi gauia adalo nefolalo amolida-aaa, haila dusudasilasimelë-eee.
LUK 1:52 Beaha aligilo nefolalo amoli, ea ilile filodaia amila neala nagadaiahalea-aaa, nagadaialo nefolalo amolida, oböla neala gauia adogoimelë-eee.
LUK 1:53 Udia dolö sïdëa baagoi nefolalo amoligali-iii, ea nelebo hedabi bolela muäia ïahalea-aaa, oböla, udia dolö nelebo yafie negei nefolalo amolimada-aaa ilile naabogi nelebo afädë made gaula-aaa, memalä ili badumu mosalaimelë-eee.
LUK 1:54 Ea ïe hamoi hamolasilo Isilale ili ugila negesalea-aaa, ilile mäuma hamomolöla säla negei amo gadola-aaa, Abalahamamage-eee, ïe yaua mäu amolimage-eee, bobasësa namolöi namolöla helësësamu neamelë-eeela Melia säla wagai.
LUK 1:56 Meli e Elisabedebalä aube ohodoa gadoi sulolahilä, hï segea obëgëi.
LUK 1:57 Elisabede e malö ägümolö fu besela galasebegi, olobola sulolahilä, dolö malö neegela ägüi.
LUK 1:58 Hä, Elisabedebalä ami sefolalo amoliage, hïle sosogofalï amoliage, Dafidilo Geloia e edefademalä bobasëila säi amo nabalahilä, Elisabedela hiligila obeägïsa nefolalo.
LUK 1:59 Ägüla misi segeyo gödö besela galasebegi, ilia malö dubo amoïe gafodo damumolö misi. Maalahilä, ilia malö amoïe eedo Segelaeaïe ëi negedelä hamosebegi,
LUK 1:60 emea sähalea, Ai, go made. Ïe ëi Yone negemolömelëla säi.
LUK 1:61 Amala säsebegi, ilia ema säla obëgësalea, Di sosogo neebe amogida, ëi goda maademelëla säi.
LUK 1:62 Amala sälahilä, ilia eedoma naaboea oodo bibila nabahalea, Dïe malö goïe ëida nowë negemolö helësësebela nabi.
LUK 1:63 Amala nabasebegi, ea ilima naaboea oodo bibila, beba neala ïmola sälahilä, ea amogi ïe ëida Yone dëdëi. Amala dëdëi amogi ili sulubadela fudugi.
LUK 1:64 Amo gaalu, fodolofalï Segelaea e nafi dofogai amo fisila, bu adomolö hamosebegi, ea Godeïe ëi gauia adala adosa nelo.
LUK 1:65 Amala hamoi amogi, udia dolö elebalä nefolalo amoli bedäla fudugi. Amala hamoi amo sulubadela Yudia sege gau dibeamadi sebe amoli sulubadelaea säla daidosa nelo.
LUK 1:66 Amala hamoimelëla säi nabi amoli sulubadelaea helësëlahilä nabahalea, Malö go fädäla aligiseda, abodo gadoi hamolo namolödula nabaha difolalo. Mida, Dafidilo Geloiïe geloida, malö amobalä dofä nelo amogi.
LUK 1:67 Malö amoïe eedo Segelaeama, Eleloi Gesami nobai nea, ea bea säla ulufahalea,
LUK 1:68 Isilaleïe Dafidilo Geloi Gode e maala ïe udia dolö neebe amoli sigi obëgëi amogi, nilïa ïe ëi gauia adadi.
LUK 1:69 Ea ïe bea sälo memelela odasisi nefolalo amolimadila hamomolömelëla siiba säla negei amoda gowe. Ïe hamoi hamolasilo Debidiïe sosogomadila, nilïle damula aulo geloi gelola namiäia ea memelei gabuwe.
LUK 1:71 Nilïle ado nii neebe amolile naabogi amilage, nilïma bimolö habobaha neebe amolile naabogi amilage, ea nilï damula moholöïe misi.
LUK 1:72 Ea nilïle mäulali bobasëmolöïege, ea gomalä hamomolömelëla asialo made ado hïdo elöi hï dafidi säla negei amo helësësamu aligimolöïege amala hamoimelë.
LUK 1:73 Asialo made ado ea nilïle mäu Abalahamama migalïa diigila ado gelola sälo amo gadola säla negei amoda gowe.
LUK 1:74 Nilïle ado nii nefolalebe amolile naabogi amila damula awäla sigi obëgëmolömelëla säla negei. Amase, nilï nagadaiawi neebewe bedäla made, segeyo sulubadelagi ïe sidaia mala mogoige hedabi eleloige hamosa nea, ïe hamoi hamolasisa namiäiaïe amala hamomolömelëla säla negei.
LUK 1:76 Nïe malö-o, Dafidilo Geloi hobeala misiäia, diada ïe idi hahamogila fofodola dafidi awäha namolö amoïe, ilia dida hä, Dofä Ilibia Edefade neebe amoïe bea sälo afädë nebegola sämolömelë.
LUK 1:77 Ïe udia dolö amolia helësëmäia, dia ilima säla ïahaleada, Dilia nafade hamoi amo ea hësa maadela damula moholömelëla säla ïmolömelë.
LUK 1:78 Nilïle Gode eda hedabi bobasëlo amea amala damula moholömelë. Ea nilï bobasëlo amea, yo edefademalä afädë mudaiala besela galalahilä,
LUK 1:79 udia dolö gasimi sagaiage, baagoloïe sege augi hawage nefolalebe amolimada, ea yo digalasimolömelë. Nilï dalulasiloïe idigi emesala mosäia sigi namolöïe, amala yo digalasimolömelëla Segelaeaea bea säla negei.
LUK 1:80 Hobeala malö amo ëdëla aligilahilä, ïe gesamige geloi nelo. Amalahilä, Isilale udia dolö neebe amolia siia bimäia, e ulufadigimolö segeyo amo besela galamäia beaha neada, sege nafade udia dolö aligisia made ami nelo.
LUK 2:1 Segeyo amo gaaluda, Olomo dolö ëi Sisa Ogasadasa ea beaha aligilo gini nea, ea udia dolö beaha neebe amoli sulubadela ëi dëdëmolö dialeala säla negei.
LUK 2:2 Gabenaïe ëi Guliniasaea Bolobinisi Silia beaha neebe amo gaalu, gamane dolö ilia ëi dëdëla negemolöda, amo gala mi gäwila negei.
LUK 2:3 Amalebe, udia dolö ili sulubadela hilile segea afufula, ëi negemolö afiai.
LUK 2:4 Hä, Yosebe eda Galilimadi gaamu afädë dilo amoïe ëi Nasalese amila, Yudiamadi Debidiïe gaamu afädëgi asi. Gaamu amoïe ëida Bedeleheme. E Debidiïe yaua mäu nelo amea ami asi.
LUK 2:5 Melida Yosebe egali säi sulo amo nimolö gaalu ameada, Meli fagulo hagui sulo amola helegela ëi negemolö asi.
LUK 2:6 Ele Bedeleheme ami nea, Meli e malö ägümolö fu besela galai.
LUK 2:7 Hä, olobola sulolahilä, dolö malö abulümi afädë ägüsebegi, faguloea usulala sugua gao molö nülo falo gadoi amoïe isogi ami negesi. Amala hamoi amoïe mida, udia dolö amala gegedosalea dilo mosö nelo amo negegi dilo amea amai.
LUK 2:8 Sege amoïe yala baagido nea, sugua sibi sigi aligilo odoa nefolalo amolia gasigi ilile sugua sibi sigi nefolalo.
LUK 2:9 Amala sigi nefolalebegi, Dafidilo Geloiïe selesaia fii afädë maala ulufalahilä, Dafidilo Geloiïe yo digalo hïdo elöi ili neebea ami yo digala besela galasebegi, ili edefademalä fudugila bedäi.
LUK 2:10 Bedäsebegi, selesaia fii amea ilima sähalea, Bedämabu. Nabuö. Na dilima ado hedabi afädë säla ïmolö misi neawe. Ado hedabi ameada, udia dolö fifi asi sefolalebe amoli sulubadela obeägïsa maademolömelë.
LUK 2:11 Segeyo walioda, Debidiïe gaamua udia afädëa malö neegela ägüimelë. Malö ameada, dili sulubadela damula moholö. Eda Dafidilo Geloi Gelesomelë.
LUK 2:12 Ado amo dofä gabula bimäiada, malö dubo amo sugua gao molö nülo falo gadoi amoïe isogi ami faguloea usulala negei dië bimolömelëla säla ï.
LUK 2:13 Selesaia fii amea ado amo säha maadeia gai amole, selesaia fii yafie Hebeniïe ami mafula selesaia fii dafidi maala nelo amobalä fodolofalï maala ulufala nelo. Amala nea, ilia Godeïe ëi gauia adogola sähalea,
LUK 2:14 Gode ilibia neebe amoïe ëi gauia adogosawe. Nagadaia udia dolö neebe amolia Gode obeägïlasilo nefolalebe amolimada, neala dalulasilo diamiäiamelëla säi.
LUK 2:15 Amala sälahilä, selesaia fii amolia ili dïgïla selesaia mosöa obëgëibua, sugua sibi sigi aligilo amolia hilidomu sähalea, Walio Dafidilo Geloia nilïma nelebo besela galaila säi amo bimolöïe, Bedeleheme afiadila säi.
LUK 2:16 Amala sälahilä, ili fodolofalï Bedeleheme afiala Meli Yosebelege malöge ili sebe amo beagolei. Malö dubo amoda, sugua gao molö nülo falo gadoi amoïe isogi negesi dibe melï.
LUK 2:17 Malö amo bealahilä, ïe ado selesaia fiia ilima säla ï amo säla ïaha maadesebegi,
LUK 2:18 ado säi nabi amoli sulubadelaea sugua sibi sigi aligilo amolia ado säla ï amogi fudugisa sefolalo.
LUK 2:19 Amalebe, Meliada, ea nabi amoge, melï amoge, sulubadela ïe isogi nea salalahilä, helësësamu sulo.
LUK 2:20 Sugua sibi sigi aligilo amoli obëgësalea, ilia melï amo sulubadelagige, nabi amo sulubadelagige, Gode eda ilibia neala säla, ïe ëi gauia adogola aligi obëgëi. Ilia melï amoge, nabi amoge, sulubadela ilima säi amo gadola gausiala digai.
LUK 2:21 Malö amo ägüla misi segeyo gödö besela galasebegi, ïe gafodo damumolö segeyogi, malö amoïe ëi Yesu negei. Emea malö amo, aso, fagulo made hagula sebegi, selesaia fiia ëi Yesu negemalola säi amo gadola negei.
LUK 2:22 Mosese nebegi Ado säla negei dibe amo gadola segeyo wagasebegi, ele Godeïe siigi nigime baai made namolöïe, Yosebe Melilea malö dubo amo Dafidilo Geloigali odala ïmolöïe, Yalusaleme gaula asi.
LUK 2:23 Dafidilo Geloiïe Ado säla negei dibe amo gadola, udiaea dolö malö abulümi sogobaseda, Dafidilo Geloigali odala ïmalola säla negei amo bëgëla, amala hamoi.
LUK 2:24 Dafidilo Geloiïe Ado säla negei dibe amea sähaleada, Haea maliabu gadoi äudä galëge, haea maliabu gadoi elöïe emalö äudä galëge, ïmalola säla negei amo gadola odala ïmolöïege ami asi.
LUK 2:25 Segeyo amo gaalu dolö afädë Yalusaleme ami sulo. Ïe ëida Simeono. Dolö amoda asigi mogoi nea, Godeïe mala nabahamu aligilo. Eada Isilale udia dolö damula moholö amo misiäia beaha nelo. Emada Eleloi Gesami nobai nelo.
LUK 2:26 Eleloi Gesamia Simeonoma sähalea, Di aso, made baagola neëgi wäla, Dafidilo Geloia Geleso moholömelëla säla negei amo misi neëda, dia bimolömelëla säla ï.
LUK 2:27 Eleloi Gesamia Simeono sigi gaula Godeïe mosö amoïe yala isogi digai. Digalahilä beahamelebe, Ado säla negei dibe amo gadola bëgëla hamomolöïe, eedo emelea Yesu dubo amo gaula misi neebe melï.
LUK 2:28 Bealahilä, Simeonoea malö amo sogobala gaula nea, Godeïe ëi gauia adala sähalea,
LUK 2:29 Dafidilo Geloi-e, dia dafidi ado säla negei dilo amo gadola, dïe hamoi hamolasilo gowea, nïe hame eegela, ne hä, baagomolö amo dofea.
LUK 2:30 Mida, dia nilï damula moholömelëla säi amo nïe siia, hä, beahawe.
LUK 2:31 Dia daiala negei amoda, udia dolö sulubadelaea bimäia hamoi gabuwe.
LUK 2:32 Eda yo digalo nea, udia dolö fii odoa neebe amoli yo digalasimolöge, dihïle Isilale udia dolö neebe amolile ëi gauia adamolöge nebegola säi.
LUK 2:33 Malö amoïe ado Simeonoea säi amo nabalahilä, ïe eedo emelea asigia fudugisa nelo.
LUK 2:34 Hä, Simeonoea Godea ele neala obeägïlasimäiamelëla sälahilä, malö amoïe eme Melima sähalea, Nabuö. Malö goeada, Isilale udia dolö yafie digalasila, yafie nowelasimolöge, amase, e nofe elöi neebe amo bealahilä, e helësëla udia dolö yafiea dofea madela sämolöge, Godea e memelela ifosi gabugo.
LUK 2:35 Ameada, udia dolö yafiea iso asigigi helësëi amo, ea ulufadigisa maademolömelë. Amase, helebe siia dihïle bobagi gäwimolömelëla Melima säla ï.
LUK 2:36 Amo gaalu, bea sälo udia afädëge, ëi Ana sulo. Eda Asa sosogo, Fanueleïe idiwi sulo. E dolö fila awäla dolöbalä gäheo i gifalädalïamu sebegi, dolö amo baagolebeda, e didalo salea, ïe gäheo i nabülasi gödölasiïe odoai biyidiada, sesalebe hamoi sulo. Godeïe mosö amo fisila made, eada Gode helësëla, molö made naala, yoba gasigige Godema adosamu filo.
LUK 2:38 Simeonoea säla wagai amole, Ana e malö dubo amo mia ga madela salea, ea Godema nesegei. Amala nesegelahilä, ea Yalusaleme udia dolö Godea sigi obëgëmäia sisiläfüla beaha nefolalo amoli sulubadelama malö amoïe ado säla ïaha nelo.
LUK 2:39 Elea Dafidilo Geloia Ado säla negei dibe amo gadola hamosa maadelahilä, Galili segeamadi helele segea Nasalese gaamugi obëgëi.
LUK 2:40 Ami awäla nea, malö amo ëdëla aligilahilä, geloi nelo. Ema asigi falagasei nobai nea, Godeïe ugila negelasilo ema negesi nelo.
LUK 2:41 Gäheo i sulubadelagi Baagila Asi Segeyo amo besela galasegida, Yesuïe eedo emele, Yalusalememu awäha aligilo.
LUK 2:42 Yesu e gäheo i giwilasi baagilahilä, ilia segeyo edefade amoïe molö nülo mala dilo amo gadola bëgëla, hiligila Yalusaleme afiai.
LUK 2:43 Segeyo edefade amo baagisebegi, eedo emele helele segea obëgësa nelo. Malö malïbu Yesuda, Yalusaleme ami nebegi gaso, eleada ami neala helësëla made, obëgësa nelo.
LUK 2:44 Elea helësësaleada, awäse wegi awäha gabula helësëlahilä, ele obëgësalea segeyo afädë baagi. Made beasebegi awäha nea, mogogi amila ele sosogo amolimage, ele damelë amolimage, dilia melïlela naba hogosa nelo.
LUK 2:45 Elea hogoi amo hogosa neamu made beagolesebegi, oböla, e Yalusaleme hogola obëgëi.
LUK 2:46 Elea hogosa neamu segeyo ohodoa baagilahilä, oböla hobeala beahamelebe, Godeïe mosöa ami säla olelelo amoli mogogi ami salea, ilia säsebe amo nabadigi, ilima ea nabadigisa sebe melï.
LUK 2:47 Yesuea ado säse nabaha sefolalo amolia, e dawa edefade gaui amole, ea naba obëgëi amolegi ili fudugisa sefolalo.
LUK 2:48 Eedo emelea e beagolela, asigia fudugilahilä, emea ema sähalea, Aea, dia alïma amo hamoi amoda, abilia hamosalea amala hamoi. Diado alïada di hogosalea asigi säosäosa nelomelëla säi.
LUK 2:49 Amala säsebegi, ea elema säla obëgësalea, Alia ne hogosolo goda edoïe. Ne Naadoïe mosöa samolöi dialeala alia made helësëla dawa made nealela nabi.
LUK 2:50 Elema ado amala säi amoda, elea mi fädäla made helësëi.
LUK 2:51 Hä, e eedo emelebalä hiligila Nasalese obëgëlahilä, eedo emelea hamomola säsebe amo gadola nabala hamosa nelo. Amo gadola hamosebegi, emea, ea nabi amoge melï amoge sulubadela ïe isogi nea salahamu sulo.
LUK 2:52 Yesu e ëdësalea, dawa amola fädäsebegi, Godeage udia dolöeage ema boba gosala nelo.
LUK 3:1 Dabeliasa Sisa e Olomoïe gini beaha nelo amoïe gäheo i mimogogida, Bödiasa Bailadi eada, Disiligi Yudiaïe gamane beaha aligiloge nelo. Amo gala, Heledoeada Disiligi Galiliïe beaha aligiloge nelo. Amase, edoo Filibiada disiligi äudä, Iduleale Dalagonaidisilele beaha aligiloge nea, Ilisaniasaeada Disiligi Abiliniïe beaha aligiloge nelo.
LUK 3:2 Gobela ïlo busa edefade Anasale Gaiafasale neebe amo gaaluda, Segelaeaïe malö Yone e sege udia dolö aligilo made dibea ami nebegi, Godea ema ado säla ïaha nelo.
LUK 3:3 Amalebegi, Yonea ödä Yodona dibe amo ga madela sege dibe amo sulubadelagi nawesa nea, udia dolöma ado mala säla ïahalea, Dilia nafade hamoi amo Godea hëmäia, iso asigi besula ödägi gemolö dialeala säla ïaha nelo.
LUK 3:4 Amoïe bea sälo Aisaeaïe bebagi ado säla dëdëla negei dibe amoda gowe. Sege nafade udia dolö aligilo made dibea ami nea, afädëa uuala wesalea, Dafidilo Geloi misiäia, idi fodola dadaiaha namialo. Ïe idida, mogolafalï fodomalo.
LUK 3:5 Dogomo dibe amolige, gau dibe amolige, sulubadela abaha maadelahilä, gogoi dibe amoli sulubadelagi föla nobaha maademalo. Idi halowei dibe amo hedabola mogola fodosa maadelahilä, idi fedafu digafui dibe amoli sulubadela abala bobagisa maademalo.
LUK 3:6 Udia dolö nagadaia nefolalebe amoli sulubadelaea, Godeïe damula aulo bimolömelëla uuala wesa neala säi amo dëdëla negei dialea.
LUK 3:7 Udia dolö yafie Yonea ili ödägi gemäia maala gegedoi nebegi, Yonea ilima sähalea, Dilida säiabëïe malö gadoi nebego. Godea mihaläla së ïmolö amogi fisäla doadigila moholömelëla dilima nowëa säla ïasio.
LUK 3:8 Dilia nafade hamosa nelo amo fisila asigi besui nebegoïe gägä negela ulufaha namialo. Dilia dihilimu sähaleada, Nilïle naadoda Abalahama nelola sämolöi mademelë. Na dilima ado afädë sähago. Godea igi difolalebe gowe neawelahilä, Abalahamaïe malölali hamomolöi neamelëla sähago.
LUK 3:9 I nefolalebe amoli abulöïe i mia gabi bogi dialea. I gägä hedabi made negelo nefolalebe amoli sulubadela abaha maadelahilä, nulogi gobemolömelëla säi.
LUK 3:10 Amala säi amo nabalahilä, udia dolö gegedoi nefolalo amolia Yonema nabahalea, Amai nilïa edo hamomolödula nabi.
LUK 3:11 Amala nabasebegi, ea säla obëgësalea, Afädëa fagulo äudä dibe ameada, elö fagulo maade amogali ïmalo. Amase, afädë molö galebe ameada, amo gadola wäla hamomalola säla i.
LUK 3:12 Dolö odoa dagisi muni nelo nefolalo amolige Yonea ili ödägi gemäia misi nefolalo. Ilia ema nabahalea, Säla Olelelo-o, nilïa edo hamomolödula nabi.
LUK 3:13 Amala nabasebegi, ea ilima säla obëgësalea, Dilia dagisi muni neahalea, gamanea säi amo gadolamu nimalo. Odoa baala nimabiola säla ï.
LUK 3:14 Amo gadola wäla, ami dolö odoaea Yonema nabahalea, Nilïa edo hamomolödula nabi. Amalebe, Yonea ilima säla obëgësalea, Udia dolöma muni neahalea, nolealela egedidigila säla nimabio. Amase, odoaïe muni nimolöïe gudisalea wäfalï säsäla gudimabio. Ami ilia bidi ïasebe amoda, dofeala helësëmolö dialeala säi.
LUK 3:15 Udia dolö asigia sisiläfüla beaha nefolalo amolia asigia, Yone eda Gelesoledula helësëi.
LUK 3:16 Amala helësësebegi, Yonea ili sulubadelama sähalea, Nada dili ödäea gesa neawemelë. Be, hobeala afädë moholö neebe amoda, nïe geloi amo baagila awäla, eda geloi edefade neebe amo moholömelë. Neda hedabi made ameada, ïe emo usili fisigämolö amo dofea made neawe. Eada dili Eleloi Gesamilea nulo söalea gemolömelë.
LUK 3:17 Eada eladi gadoi ëi widi dobi amoïe isole giwile gasala sadia adogola mogeloïe nama gadoi gaula nea. Ea mogela iso amo mosö afädëgi negesilahilä, ïe widi dobilo sege amo gëgelë doala digila, giwi amo nulo usilo made, wisamu neebea ami gobemolömelëla säla ï.
LUK 3:18 Udia dolö amolile isogi gäwilasila, Yonea ado yafie odoa säla ïalahilä, Ado Mala Hedabi säla ïaha nelo.
LUK 3:19 Ilile gamane beaha aligilo Heledoea ïe edoo Filibiïe udia Helodiasa fedela nii amogige, mala nafade odoa hamoi amogige, Yonea Heledoma nemoi.
LUK 3:20 Amala nemosebegi, Heledoea ïe nafade hamoi amolidaia baala edela, oböla Yone galabaia negei.
LUK 3:21 Yonea udia dolö sulubadela ödägi gesalea, Yesuge ödägi gei. Amala gesebegi, Yesuea Godebalä adoi amole, mu dusuia gala
LUK 3:22 Eleloi Gesami haea maliabu gadoi Yesudaia digala fii. Amala hamose amo gaalu, selesaia mosöala ado afädë säia idogosalea, Dida nïe malö. Na di boba hamosa neawe. Dima edefademalä obeägïsa neawela säi.
LUK 3:23 Yesuea hä, ïe hamoi mi gäwila hamosa nelo amoda, gäheo i nabülasi ohodoa gadoi nea hamosa nelo. Udia dolö nefolalo amoliada, eda Yosebeïe malö neala helësësa nefolalo. Yosebe eda, Hilaiïe malö nelo.
LUK 3:24 Hilai eda, Madadaïe malö. Madada eda, Ilibaiïe malö. Ilibai eda, Maligiïe malö. Maligi eda, Yanaiïe malö. Yanai eda, Yosebe edaioïe malö.
LUK 3:25 Yosebe edaioda, Madadiasaïe malö. Madadiasa eda, Amosiïe malö. Amosi eda, Nahumuïe malö. Nahumu eda, Eseliïe malö. Eseli eda, Nagaiïe malö.
LUK 3:26 Nagai eda, Madaïe malö. Mada eda, Madadiasa elöïe malö. Madadiasa eda, Semeniïe malö. Semeni eda, Yosegeïe malö. Yosege eda, Yodaïe malö nelo.
LUK 3:27 Yoda eda, Yoananaïe malö. Yoanana eda, Elesaïe malö. Elesa eda, Selubabeleïe malö. Selubabele eda, Sealadieleïe malö. Sealadiele eda, Neliïe malö.
LUK 3:28 Neli eda, Melegiïe malö. Melegi eda, Adiïe malö. Adi eda, Gosamaïe malö. Gosama eda, Elemadamaïe malö. Elemadama eda, Eliïe malö.
LUK 3:29 Eli eda, Yasuaïe malö. Yasua eda, Elieseïe malö. Eliese eda, Yolimiïe malö. Yolimi eda, Madadaïe malö. Madada eda, Ilibaiïe malö.
LUK 3:30 Ilibai eda, Simeonoïe malö. Simeono eda, Yudaïe malö. Yuda eda, Yosebeïe malö. Yosebe eda, Yonamaïe malö. Yonama eda, Eliagimiïe malö.
LUK 3:31 Eliagimi eda, Meleaïe malö. Melea eda, Menaïe malö. Mena eda, Madadaïe malö. Madada eda, Nadanaïe malö. Nadana eda, Debidiïe malö.
LUK 3:32 Debidi eda, Yesiïe malö. Yesi eda, Obediïe malö. Obedi eda, Boasaïe malö. Boasa eda, Salomonoïe malö. Salomono eda, Nasonoïe malö.
LUK 3:33 Nasono eda, Aminadabaïe malö. Aminadaba eda, Adaminiïe malö. Adamini eda, Alaniïe malö. Alani eda, Hesolonoïe malö. Hesolono eda, Feleseïe malö. Felese eda, Yudaïe malö.
LUK 3:34 Yuda eda, Yeigabaïe malö. Yeigaba eda, Aisagaïe malö. Aisaga eda, Abalahamaïe malö. Abalahama eda, Delaïe malö. Dela eda, Neholoïe malö.
LUK 3:35 Neholo eda, Seluguïe malö. Selugu eda, Eleuïe malö. Eleu eda, Felegeïe malö. Felege eda, Ebeliïe malö. Ebeli eda, Selaïe malö.
LUK 3:36 Sela eda, Gainanaïe malö. Gainana eda, Alabagasadaïe malö. Alabagasada eda, Semeïe malö. Seme eda, Noaïe malö. Noa eda, Elamegeïe malö nelo.
LUK 3:37 Elamege eda, Meduselaïe malö. Medusela eda, Inogoïe malö. Inogo eda, Yaledeïe malö. Yalede eda, Mahalaleleïe malö. Mahalalele eda, Genanaïe malö.
LUK 3:38 Genana eda, Enosoïe malö. Enoso eda, Sedeïe malö. Sede eda, Adamaïe malö. Adama eda, Godeïe malö nelo.
LUK 4:1 Eleloi Gesami Yesuma nobasebegi, e ödä Yodonagila obëgëi. Amasebegi, Gesamia e sege nafade udia dolö aligisia made ami sigi awäla ifosi.
LUK 4:2 Ami nebegi, mugabe busaea segeyo nabülasi biyidiagi Yesuea nafade hamomabelela fedogola beaha nelo. Amala fedogola beaha nebegi, Yesu e molö made naala neamu, segeyo amo gadola baagisebegi, Yesu e hä, sïdëa baagoi nelo.
LUK 4:3 Amala hamoi neebe amo bealahilä, mugabe busaea Yesuma sähalea, Di Godeïe malö nea galëda, igi gowema wahalo hamomalamola säi.
LUK 4:4 Amala säsebegi, Yesuea säla obëgësalea, Ado säla dëdëla negei dibe amea sähaleada, Udia dolögali namolö ïlo amoda, wahalo nase ameamu ïlo mademelëla säla dëdëla negei dialeala säi.
LUK 4:5 Amala säsebegi, mugabe busaea segebi ilibia neebedaia ami Yesu sigi fedalahilä, gädili sulubadela dibe amoli ema fodolofalï si hamo dagabolo wäla dagabola olesa maadei.
LUK 4:6 Amala olelahilä sähalea, Gädili dibe egowe sulubadela sigi namiäiaïe geloige, ëi edefadege negali ïaha maadei ameada, na ïmolö helësëse amogali ïmolöi ameada, hä, digali ïmolömelë.
LUK 4:7 Dia nïe emo mia gumusulahilä, nïe ëi gauia adaseda, digali ïaha maademolömelëla säi.
LUK 4:8 Yesuea ema säla obëgësalea, Ado säi dibe amea sähaleada, Dafidilo Geloi, dïe Gode neebe amo, dia ïe ëi gauia adamalolage, amase, ïemu hamoi hamomalolage, säla dëdëla negei dialeala säi.
LUK 4:9 Amala säsebegi, mugabe busaea Yesu Yalusaleme sigi awäla, Godeïe mosöa ilibiafalï gadogo ifosilahilä sähalea, Di Godeïe malö nea galëda, hä, di dihï guila nila sadia idogomo.
LUK 4:10 Amoïe mida, dafidi dëdëla negei dibe amea sähaleada, Ea ïe selesaia fii amolima di hedabola sigi namolö mosalola säsegi,
LUK 4:11 igia dïe emo daualoea, ilile naaboea di sogobala gauia adogomolömelëla säla dëdëla negei dialeala säi.
LUK 4:12 Amala säsebegi, Yesuea säla obëgësalea, Gomalä säi dialea. Dafidilo Geloi dïe Gode neebe amo fedogola bimabiola säla dëdëla negei dialeala säi.
LUK 4:13 Mugabe busaea, Yesu fedogola beaha maadelahilä, hobea bu obëgëmolöïe, fu hogodeläla helësëlahilä, Yesu dïgïla asi.
LUK 4:14 Gesamia Yesu neala gelolasisebegi, e Galili obëgëi. Udia dolö amodi nefolalo amoli sulubadelaea Yesuea hamoi amoïe ado säi amo nabala daidosa maadei.
LUK 4:15 Ea ilile gedolo mosö nefolalo amoligi nea säla olelesebegi, udia dolö nefolalo amoli sulubadelaea ïe ëi gauia adaha nelo.
LUK 4:16 Yesu hï e Nasalese ëdëia ami awäla nea, ea segeyo Sabadagi hï hamolo amo gadola hamomolöïe, e gedolo mosöa ami awäla nogila digai. Digalahilä, beba nidemolöïe nowela aligisebegi,
LUK 4:17 ilia bea sälo Aisaeaïe beba gali dilo amo ema neala ï. Amasebegi, Yesuea beba amo bobagia gala, ado afädë dëdëla negei dilo amo beagolelahilä, nidesa nelo amoda gowe.
LUK 4:18 Dafidilo Geloiïe Gesami e nema nea. Mida, na udia dolö busadäoi nefolalebe amolima Ado Mala Hedabi säla ïmäia, ea nïe busagia weli söga negelahilä, ea ne memelei. Udia dolö gide begela nafodoi nefolalo amolima dili fisigälasimolömelëlage, si golai nefolalebe amolima dili bu hedabola bimolömelëlage säla ïmäia, ne fisiga wei. Amase, dolö odoaea udia dolö daiasala gadiabosa nefolalebe amoli haila digila sigi obëgëmäiage,
LUK 4:19 Dafidilo Geloia udia dolö obeägïlasimolö fu walio dialeala säla ïmäiage, amala hamomolö mosalola säila säi.
LUK 4:20 Amala nidesa maadelahilä, Yesuea beba amo galila beba beaha aligilo amo hïma ïalahilä, e fila digai. Amala hamosebegi, udia dolö gedolo mosöa sefolalo amoli sulubadelaea ema sisila sefolalo.
LUK 4:21 Amala sefolalebegi, ea ilima sähalea, Ado bebagi dëdëla negei nidesebegi, dilia nabaha sefolalo amoda, walio wegi wäla, hä, gausiaha gomelëla säi.
LUK 4:22 Amala säi amo nabalahilä, udia dolö sefolalo amoli sulubadelaea ïe ëi gauia adogola, ado hedabi hïdo elöi ïe nafigila säi nabi amogi asigigi fudugilahilä sähalea, Egoweda Yosebeïe malö madelela säi.
LUK 4:23 Yesuea ilima sähalea, Udia dolöea ado besula säse go gadola, dilia oböla, nema sähalea, Alögoda-o, dihï wahimalola säla, Gabaniama nea mala hamosa nelo nilïa nabi amoda, wige dihï segea nea hamolo amo gadola wäla hamomalola sämolöledu.
LUK 4:24 Na dilima dofä sähago. Bea sälo neebe amoda hïle segeafalï, udia dolö nefolalebe amolia säla olela gausialo mademelë.
LUK 4:25 Elaia nelo amo gaalu, gäheo i ohodoaïe aube gafeia sege made digala mu gala digila esoi dibegi, sege amo sulubadelagi sïdë i edefade dilo. Segeyo amo gaalu, Isilale segea ami dofä udia didalo yafie sefolalo
LUK 4:26 gaso, Godea Elaiama ili sefolalebea ami mosalola made säla, Saidono segeïe Salebada gaamugi udia didalo afädë sebea amimu mosaloi.
LUK 4:27 Hä, amo gadola wäla, bea sälo Elaisa neebe amo gaaluge, Isilale segea udia dolö gudubu hamoi yafie sefolalo gaso, amoligi afädë made wahila, gädili Silia fii Naimono afädë emu wahimelëla säi.
LUK 4:28 Udia dolö gedolo mosöa sefolalo amolia amala säi amo nabalahilä edefademalä mihaläi.
LUK 4:29 Ilile gaamu amoda segebidaia dilo. Hä, ili nowelahilä, Yesu naabogi gaula iluala didigila gaamu yala baagido segea asi. E amala sigi awälahilä, däeo bidigi amila bobala saledelä hamosebegi
LUK 4:30 gaso, ili mogogi amila doadigila moholöi asi.
LUK 4:31 Amalebe Yesu e awäla Disiligi Galiliïe gaamu Gabaniama ami digai. Ami awälahilä, segeyo Sabadagi udia dolö nefolalo amolima säla olelesa nelo.
LUK 4:32 Ea geloi gaulahilä geloi hïdo elöi olelei amogi, udia dolö ea säla olelese nabaha sefolalo amoli asigigi fudugisa sefolalo.
LUK 4:33 Gedolo mosöa amida dolö afädëma mugabe nafade afädë fedai sulo. Amea gelola üalala digila sähalea,
LUK 4:34 Wae! Nasalese fii Yesu-o, nilï neebeawi dia edo hamomolöïe misi. Amai dia nilï nufulöïe misile. Dida na dawa. Dida mogoi hedabifalï, Gode neebeala misimelëla säi.
LUK 4:35 Amala säsebegi, Yesuea nemosalea, Adomabu! Dolö go dïgïla doadigila mosöla säi. Amala säsebegi, mugabe amea dolö amo udia dolöïe sidaia nagadaia nidala awälahilä, neala nafadela made, geleä doadigila asi.
LUK 4:36 Udia dolö nefolalo amoli sulubadela iso asigigi fudugilahilä, hilidomu säla didigahalea, Wae! Ado amoda edo gadoi adodu. Mugabe iliada ea doadigila mosöla säse amo gadola mosäia, mosöla säloïe geloi hïdo elöi gaula neebemelëla säi.
LUK 4:37 Disiligi amogi Yesuea hamoi amoïe ado säi amo nabala daidosa maadei.
LUK 4:38 Yesu e gedolo mosöa amila Saimonoea mosöa asi. Saimonoïe esöa hëgï olo edefademalä oloi dilo amo, Yesuea wahimäia, ilia ema säla ï.
LUK 4:39 Amalebe, Yesu e awäla udia amo mia ga madela nea, hëgï olo amoma nemosebegi, hëgïla oloi amo damui. Amala säi amole, udia amea nowelahilä, ili molö muäia neala ï.
LUK 4:40 Deadi eso digase amo gaalu, udia dolö ilia oloi elö elöla difolalo amoli sulubadela Yesu neebea gaula mofiai. Amalebe, Yesuea ili afädë afädëlama naaboea diigisebegi, ili wahisa maadei.
LUK 4:41 Amase, ea udia dolö yafiema mugabe fedai nelo amoge sulubadela nesila digisa maadesebegi, mugabe amoli doadigila awähalea, gelola üalala didigala sähalea, Dida Godeïe malömelëla säla didigai. Amalebe, Godea Afädë Memelei moholömelëla säla negei amo e gabula dawadigisebegi, ea ilima nemosalea adomabula säi.
LUK 4:42 Yosefalï nowela Yesuea gaamu amo dïgïla, sege udia dolö aligilo made dibea ami asi. Udia dolö yafie nefolalo amolia hobeala e hogogola awäla e beagolelahilä, di made moholömelëla säla, ilia e gauia idogoi.
LUK 4:43 Gauia idogosebegi, Yesuea ilima sähalea, Gaamu odoa difolalebe amoligi, Godea Beaha Maadela Sigi Neebe amoïe Ado Mala Hedabi säla ïmäia, Godea ne fisiga weimelëla säla ï.
LUK 4:44 Hä, Yesu e Disiligi Yudiamadi nawesa nea, gedolo mosö difolalebe amoligi ado mala säla ïïa nawesa nelo.
LUK 5:1 Segeyo afädëgi Yesu e oeabo Genesaledi agesua ami nebegi, udia dolö yafie mafula gegedola, Godeïe ado mala nabulöïe, e neebe amo amalela digilahilä, negegi nelo.
LUK 5:2 Amala hamosebegi, Yesuea du äudä ödä agesua gaula misi dibe melï. Seme digilo dolö amolia du äudä amo negesiä, seme digilo selëgë amoli nigime hësa nefolalo.
LUK 5:3 Yesu e ödä du afädëdaia fedala nelo. Amoda Saimonoïe du. Ea Saimonoma sähalea, Ödä agesuala du holöbö eegela fisiga gamola säi. Saimonoea amala hamosebegi, Yesu e du amodaia salea, udia dolö gegedoi amolima säla olelesa sulo.
LUK 5:4 Ea ilima säla olelela wagalahilä, Saimonoma sähalea, Du ödä momogolumadi fulula awälahilä, dilia seme nimolöïe selëgë sadia idogomalola säi.
LUK 5:5 Amala säsebegi, Saimonoea säla obëgësalea, Dafidilo-o, nilïa gasi sedade digisa nea, häuala baagi sësa nelo gaso, dofä isoïe afädëge made nii. Gaso, dia säse goeada, na selëgë we sadia idogosamelëla säi.
LUK 5:6 Amala sälahilä, ilia amala hamosebegi, seme yafie digai amea selëgë nulimolöi hamoi.
LUK 5:7 Amalebegi, ilia ili gaalu hamolo odoa du elö amogi sefolalebe amolia ili ugila negemolö misiäia, naabo hähawela wei. Ili maala hiligila gauia adogola du äudä amoledaia negesebegi, helegela nobalahilä ödägi usabodelä hamoi.
LUK 5:8 Amala hamose amo bealahilä, Saimono Fidaea Yesuïe emo mia emo gumusula dia digalahilä sähalea, Dafidilo-o, neda nafade hamolo neawe. Ne dïgïla di mosalola säi.
LUK 5:9 Mida, Fidage odoa ebalä seme digisa nefolalo amoliage, seme yafie nii amo beala fudugi.
LUK 5:10 Saimonobalä hamoi gaalu hamolo äudä Sebediïe malö Yone Yamese eleage amo gadola wäla fudugi. Amala hamosebegi, Yesuea Saimonoma sähalea, Bedämabu. Segeyo walio wila nofela, dia dolö nelo namolömelëla säi.
LUK 5:11 Amalahilä, ilia du dusugala gaula agesua awäla, nelebo sulubadela dïgïla, ili Yesu bëgëla afiai.
LUK 5:12 Yesu e gaamu afädëgi nebegi, dolö domalo gudubu hamosa maadei afädë maala, Yesu beala, e mia gumusula dia digalahilä, ema egedigila sähalea, Dafidilo-o, dia ne wahimäiala asigiseda, wahilasimolöi nebegola säi.
LUK 5:13 Yesuea ïe naabo mogodigia galahilä, dolö amo diigisa nea sähalea, Na amala asigisa. Di wahimola säi. Amala säia gai amole, dolö amoïe gudubu amo fodolofalï hogosa helesa maadei.
LUK 5:14 Amala hamosebegi, Yesuea dolö amoma sähalea, Dofä elöma asiala säloeo. Gobela ïlo dolö neebea ami, di siia bimäia olemolö mosalo. Amalahilä, di wahi go udia dolöma olemolöïe, di hëmäia Mosesea nelebo odala ïmalola säla negei dibe amo gadola, odala ïmalola säla ï.
LUK 5:15 Amala säi gasoda, ea hamoi amoïe ado säi amo nabala didigai ameada, udia dolö yafiea ea ado säse amo nabulöge, ili oloi amoli wahilasimäiage afiala gegedoi.
LUK 5:16 Amala hamosebegi, Yesuea segeyo yafiegi ili dïgïla udia dolö aligilo made dibea ami aliga galahilä, Godema adosa nelo.
LUK 5:17 Segeyo afädëgi, Yesuea ado mala olelesa nebegi, Felesi dolö odoage, mala säla negei amo olelelo odoage, misi sulo. Amolida Disiligi Galiliïe gaamu dibe sulubadela amilage, Yudialage, amase, gaamu Yalusalemelage mofiai sefolalo. Oloi difolalebe amoli wahimäia, Dafidilo Geloiïe geloi Yesubalä maala nelo.
LUK 5:18 Amala nebegi, dolö odoaea dolö afädë fii si sulo amo dafudaia gaula maalahilä, mosö Yesu neebe amogi gaula digala negedeläïe, fu hogosa nelo.
LUK 5:19 Gasoda, udia dolö yafie gegedoi amolia negegi amea, ilia mumusogi gaula digamolö amo fu maade gabugi, dolö amo gaula mosö fïgïdaia fedalahilä, Yesu neebe amo gaalula mosö fïgï dusuia gala, Yesuïe odagi gaalu dafu amola, udia dolö mogogi ami fisiga idogoi.
LUK 5:20 Ilile asigi afädë negei amo bealahilä, Yesuea dolö amoma sähalea, Ne damelë-e, dia nafade hamoi amo hësa maadeimelëla säi.
LUK 5:21 Amala säi amo nabalahilä, mala dawadigi amoliage, Felesi dolö amoliage, asigiamu helësësalea, dolö Gode gagadesa neebe goweda nowëdu. Godeamu udia dolöea nafade hamoi amo hëlo nea madelela helësësa sefolalo.
LUK 5:22 Ilia amala helësësa sefolalebe amo bealahilä, Yesuea ilima sähalea, Dilia iso asigigi go helësësa sefolalebegoda, mi edoïe.
LUK 5:23 Dia nafade hamoi amoli hësa maadeila sämolöle, ma, nowela nawesa namiëla sämolöle. Ado aabeida abodo.
LUK 5:24 Amaimo, Dolöïe Malö ameada nagadaiawi nea, udia dolö ilia nafade hamoi amoli hëla digimolöïe geloi gaula neebela dilia helësëmäiamelëla säi. Amala sälahilä, ea dolö fii si amoma sähalea, Dima sähago. Di nowela, dïe fëo go neala gaula, hä, dihï mosöa mosalola säi.
LUK 5:25 Amala säi amole dolö amea ilile sidaia fodolofalï nowelahilä, fëo e föla adi amo neala gaula, hï mosöa awähalea, Godeïe ëi gauia adala aligi asi.
LUK 5:26 Amala hamosebegi, udia dolö amoli sulubadela fudugila bedälahilä, Godeïe ëi gauia adala sähalea, Nelebo hïdo elöi melëlo made gadoi, walio nilïa beasebemelëla säi.
LUK 5:27 Amo hamosa maadelahilä, Yesu e awäha nea beahamelebe, dagisi muni nelo afädë ëida, Ilibai, e dagisi muni nelo mosöa ami sebe melï. Bealahilä, Yesuea ema sähalea, Ne bëgëla misiëla säsebegi,
LUK 5:28 Ilibai e nowela nelebo sulubadela dïgïla, Yesu bëgëla asi.
LUK 5:29 Amalahilä, Yesubalä molö molöïe Ilibaia dolö yafie misialola welahilä, ea mosöa molö edefade giai. Dagisi muni nelo yafiege dolö odoage elebalä gegedola molö naha sulo.
LUK 5:30 Amai gaso, Felesi dolö odoaeage, ili sosogo mala dawadigi nefolalo amoliage, Yesuïe bëgëla aulo nefolalo amolima gëgëla sähalea, Dilida dagisi muni nelo nefolalebe amolibaläge, nafade hamolo amolibaläge, molö ödäle naha sebegoda, edoïela säi.
LUK 5:31 Amala säi amo nabalahilä, Yesuea ilima säla obëgësalea, Udia dolö oloi made neebe amolida, alögoda neebea aulo made. Oloi neebe amolimu aulomelë.
LUK 5:32 Ne misiweda, asigi mogoi nefolalebe amoli made, nafade hamolo nefolalebe amoli asigi besumäia wemolö misimelëla säi.
LUK 5:33 Udia dolö nefolalo amolia Yesuma sähalea, Yoneïe bëgëla aulo nefolalo amoliage, Felesi dolöïe bëgëla aulo nefolalo amoliage, segeyo yafiegi Godema adosalea molö made naala aligilo amogi, oböla, dïe bëgëla aulo nefolalebe golia molö ödäle nahamu neebela säi.
LUK 5:34 Amala säsebegi, Yesuea säla obëgësalea, Dolö afädëa udia neahalea, udia dolö gegedoi amolia, udia nelo dolö amobalä gedola salea, dilida molö made molömelëla sämolöi gabule.
LUK 5:35 Amaimo, ili neebea amila odoaea udia nelo amo sigi moholö segeyo fu besela galamolömelë. Segeyo amogida, ili molö made naala namolömelëla säi.
LUK 5:36 Amala sälahilä, Yesuea ado besula sähalea, Afädëa fagulo gähe gadelala neala, fagulo goofogi baala asogelo mademelë. Amala asogeseda, fagulo gähe amo nulilahilä, fagulo gähea fagulo goofogi baala asogei amo afädëdi made bimolömelë.
LUK 5:37 Amo gadoi elöda, afädëa wani ödä gähe dibe amo, ödä i sugua meme gafodoea hamoi goofogi söga salelo mademelë. Amala hamoseda, wani ödä gähe amea meme gafodoea hamoi goofo amo dusulahilä, wani ödä amo awäha maadela, meme gafodoea hamoi i amoge nafademolöi nafademolömelë.
LUK 5:38 Amaloea, wani ödä gähe dibe amoda, ödä i meme gafodoea hamoi gähegi söga salimolö dialea.
LUK 5:39 Amase elöda, afädëa wani ödä siiba usi amo nalahilä, wani ödä gähe amo molö made halämolömelë. Mida, ea wani ödä siiba usi amo hedabila sämolömelëla säi.
LUK 6:1 Segeyo Sabada afädëgi, Yesu e eladi gadoi ëi widi sagai mogo amogi awäha nelo. Awäha nea, ïe bëgëla aulo amolia widi amoïe gägä amo faila, naaboea nologela iso hedefala nana awäha nelo.
LUK 6:2 Felesi dolö nefolalo amolia nabahalea, Segeyo Sabada gafegi made hamolo negei amo, oböla, dilia hamosebegoda edoïela nabi.
LUK 6:3 Amala nabasebegi, Yesuea ilima säla obëgësalea, Debidige, ebalä aulo amolige, ili sïdëa baagosalea, Debidia hamoi dëdëla negei dibe amo dilia made nidei neale.
LUK 6:4 Ea Godeïe mosöa nogila digala, beledi Godegali odala ï dilo amogi, gobela ïlo neebe amoliamu nülo dilo amo nealahilä, odoa hï nahalea, odoa ebalä aulo amoli muäia neala ïla säi.
LUK 6:5 Yesuea säla wagala sähalea, Dolöïe Malö neebe amoda, segeyo Sabadaïe Dafidilo neala säi.
LUK 6:6 Segeyo Sabada elögi, Yesu e gedolo mosöa nogila digalahilä, udia dolöma ado mala säla olelesa sulo. Amida dolö afädë naabo dafädi amo baagoi sulo.
LUK 6:7 Felesi dolö nefolalo amoliage, mala dawadigi nefolalo amoliage, Yesuma dia nafade hamoimelëla sädelälahilä, ea segeyo Sabadagi oloi afädë wahisebelela bimolöïe, ili ga madela nea, sisila beaha nefolalo.
LUK 6:8 Amai gaso, ilia helësësa sebe amo dawadigilahilä, Yesuea dolö naabo baagoi sebe amoma sähalea, Di nowela mogogi namolö misiëla säi. Amalebe, dolö amo nowela fedala nelo.
LUK 6:9 Amala nowela nebegi, Yesuea ilima nabahalea, Segeyo Sabadagi nilïa hamomolö dofeada abodo. Hedabi hamomolö dialeale, ma, nafade hamomolö dialeale. Udia dolö hedabomäia ugila negemolö dialeale, ma, baagomäia nufulö dialealela nabi.
LUK 6:10 Amala nabalahilä, Yesuea udia dolö sefolalebe amoli sidawewela bealahilä, dolö amoma sähalea, Dïe naabo mogodigimola säi. Amala säi amo gadola hamosebegi, bu hedabola obëgëi.
LUK 6:11 Amala hamosebegi, ilia edefademalä habobalahilä, hilidomu säla didigahalea, nilïa Yesuma abilia hamomolödula säha dilo.
LUK 6:12 Segeyo amo gala, Yesu e Godema adomolöïe, segebi afädëgi fedalahilä, gasi sedade Godema adosamu salea, segeyo sagai.
LUK 6:13 Segeyo sagasebegi, ea ïe bëgëla aulo amoli e neebea ami misiäia wei. Ili mofiasebegi, ea ili nafolala giwilasi memelei. Amalahilä, ilile ëi abosolo negei.
LUK 6:14 Afädëïe ëi Saimono, Yesuea e bu oböla Fida negei amoge, ïe edoo Äduluge, Yamesege, Yonege, Filibige, Badolomiuge,
LUK 6:15 Madiuge, Domasage, Alibiasaïe malö Yamesege, Saimono, ilia ema Selodola sälo amoge,
LUK 6:16 Yameseïe malö Yudasage, Yudasa Isagaliada, hobeala Yesu hololömolö amoge, amoli Yesuea memelei.
LUK 6:17 Yesula dolö amolali segebidaia amila digafula, sege hedabi fufuia asi dibea ami nefolalo. E bëgëla aulo yafie odoa amola hiligila ami nebegi, udia dolö yafie Disiligi Yudiaïe sege dibe amo sulubadelagilage, gaamu Yalusalemelage, Daia gaamule Saidono gaamule duhulu ga madela dibea amilage, mafula gegedola negegi nelo.
LUK 6:18 Amoli mofiai amoda, Yesuea säse amo nabadigi, ea oloi amoli wahila digimäiage mofiai. Amase, mugabe fedai mafui amoli Yesuea nesila digisebegi, wahisa maadei.
LUK 6:19 Geloi ema dibe amea udia dolö amoli sulubadela ea wahisa maadese amogi, udia dolö sulubadelaea Yesuma diigimolöila helësëi.
LUK 6:20 Yesuea ïe bëgëla aulo amolima siila nea sähalea, Gumusui nefolalebe dilida, obeägïsa nea. Mida, Godea Beaha Maadela Sigi Neebe amoda, dilile dibe amogi.
LUK 6:21 Walio sïdëa baagosa nefolalebe dilida, obeägïsa nea. Mida, hobeala dili molö bolela molö amogi. Walio dïisa nefolalebe dilida, obeägïsa nea. Mida, hobeala dilia ösa namolö amogi.
LUK 6:22 Dili Dolöïe Malö amoïe neëgi, udia dolö odoaea dilima bimolö habobasege, nesila digisege, ado nafadela säsege, dilile ëi gagadela säsege, amo gadola hamose amo sulubadelagi, dilida obeägïsa nea.
LUK 6:23 Ilia dilima mala amo gadoi hamoseda, segeyo amo gala dilia hïdo elöla helëla obeägïsa namialo. Nabuö. Dilile bidi edefade Hebeni mumului dialea. Mida, siiba ilile mäu nefolalo amoliage bea sälo nefolalo amolibalä amo gadola wäla hamosa nelomelë.
LUK 6:24 Amai gaso, walio nelegei yafie negelo dafidilo dolö nefolalebe dili, asigii gabu. Mida, dili namolö aabei hedabi amo neaha maadesalea, elö nimolö made amogi.
LUK 6:25 Walio molö bolela nülo sefolalebe dili, asigii gabu. Mida, hobeala dili sïdëa baagomolö amogi. Walio ösa nefolalebe dili, asigii gabu. Mida, hobeala dili gualösa nea, dïisa namolö amogi.
LUK 6:26 Udia dolö sulubadelaea dilile ëi gauia adogosebe dili, asigii gabu. Mida, siiba ilile yaualali dafidi nefolalo amoliage wäfalï bea sälo nefolalo amolibalä amo gadola wäla hamosa nelomelë.
LUK 6:27 Yesuea ado aso, sähamu nea sähalea, Na ado säse nabase dilima sähago. Dilibalä ado nii nefolalebe amoli boba hamosa namialo. Dilima bimolö habobaha nefolalebe amolima dilia hedabi hamomalo.
LUK 6:28 Odoaea Godea dili neala nafademäiala säsege, Godea ili ugila negela hedabolasimäia sämalo. Dilima nafade hamosege, diliada ilile Godema adolasisa namialo.
LUK 6:29 Amase, afädëa dïe ba näiado go nufudaseda, ba näiado goge ema besula olemalo. Afädëa dïe gögï fagulo neala gaula awälahilä, bu elö neasege beasimalo.
LUK 6:30 Udia dolö sulubadelaea dima nelebo afädë ïmola ëdëgëseda, ïmalo. Amase, afädëa dïe nelebo afädë neala gaula awäseda, ïa obëgëmola egedigila sämabio.
LUK 6:31 Odoaea dilima mala hamomäiala hamelo amo gadola, diliage ilima amo gadola wäla hamomalo.
LUK 6:32 Dili boba hamolo amoli boba hamoseda, dili udia dolö hedabi neebela nowëa helësëmolödu. Nafade hamolo nefolalebe amoliage, ili boba hamolo neebe amoli boba hamolo nea.
LUK 6:33 Amalahilä, dilima hedabi hamolo neebe amolima hedabi hamola obëgëseda, dili udia dolö hedabi neebela nowëa helësëmolödu. Nafade hamolo neebe amoliage amo gadola wäla hamolo nea.
LUK 6:34 Dilia nelebo afädë ïahalea, dabe ïmäiala ïaseda, dili udia dolö hedabi neebela nowëa helësëmolödu. Nafade hamolo neebe amoliage nafade hamolo odoaea ili dabe ïmäialahilä ïlo nea.
LUK 6:35 Gasoda, dilibalä ado nii neebe amoli boba hamosa namialo. Ilima hedabi hamosa neada, nelebo afädë ilima ïahalea, hobeala dabe ïmäiala ïmabio. Amala hamoseda, dilia bidi edefade amo gaula, Dofä Ilibia Edefade neebe amoïe malö namolömelë. Mida, ema nesegelo made neebe amolimage, nafade hamolo neebe amolimage, mala hedabi hamolo nea.
LUK 6:36 Dilile Diado neebe amea ugila negelo neebe amo gadola, diliage ugila negesa namialo.
LUK 6:37 Yesuea ado aso, sähamu nea sähalea, Dilia odoaea hamose amo made mogemalo. Amala hamoseda, dilimage made mogemolömelë. Odoama asiala hamoi gabumelëla made sämalo. Amala hamoseda, dilimage asiala hamoi gabumelëla made sämolömelë. Amase, dilia odoaea nafade hamoi amo hëla fisimalo. Amala hamoseda, dilia nafade hamoi amoge hëla fisimolömelë.
LUK 6:38 Dilia nelebo odoagali ïmalo. Amala ïaseda, diligalige ïmolömelë. Diligali ïmolö amoda, holöfalï made. Baala ïasegi, adugi eegela salala nobala adugai ïmolömelë. Mida, dilia odoagali mogela ïase amo gadola, diligalige amo gadola wäla mogela ïmolömelë.
LUK 6:39 Amala sälahilä, Yesuea ilima ado besula säi. Dolö si golai elöea si golai elö amo naabogi gaula sigi aulole. Sigi awäseda, helegela balagula dögöigi digalo madele.
LUK 6:40 Ema olelesebe amo gadola bëgëla hamolo neebe ameada, ïe olelelo neebe amo baagilo mademelë. Gaso, ea oodo bibila hamola dawadigisa maadelahilä, olelelo amohï gadoi aligilomelë.
LUK 6:41 Amaimo, dia dïe didooïe sihidoa gëgelë holöbö diëda melëlo amo, amai dihïle sihidoa i gäi gadoi dibe amo helësëlo made amoda, edoïe.
LUK 6:42 Dia dihïle sihidoa i gäi gadoi dibe amo fädäla made beala, didooma sähalea, Nedoo, dïe sihidoa gëgelë digai dibe alogo neahagola abilia sämolö gabu. Asigi fea negelo, dihïle sihidoa i gäi gadoi difolalebe amodale neadigilahilä, hobeala dïe didooïe gëgelë dibe amo hedabola beala neadigimolöi bimolömelëla säi.
LUK 6:43 Yesuea ado aso, sähamu nea sähalea, I hedabi neebe ameada, gägä nafade negelo made. Amase, i nafade neebe ameada, gägä hedabi negelo mademelë.
LUK 6:44 I neebe amolia gägä negesebe amo bealahilä, i gowe gadoi neebela helësëlomelë. I äyo gägäi neebea ami awälahilä, dolöea äfäeo gägä gabula failo made. Amase, buudi äyo gägäi neebea ami awälahilä, dolöea gelebi gägä gabula failo made nea.
LUK 6:45 Afädë hedabi neebe ameage, hïle iso asigigila hedabi dibe amo gadoi ulufadigilo nea. Amase, nafade neebe ameage, hïle iso asigigila nafade dibe amo gadoi ulufadigilo nea. Helësëlo isogi nobala adugai dibe amo gadoida, adoea ulufadigilo neala säi.
LUK 6:46 Yesuea ado aso, sähamu nea sähalea, Na ado säsebewe dilia made bëgëla hamosalea, nema, Dafidilo Geloi-e, Dafidilo Geloi-ela säha nebegoda edoïe.
LUK 6:47 Afädë ne mia maalahilä, na ado säsebewe nabala bëgëla hamoseda, na dilima eda dolö gowe gadoi neala säla ulufadigisagomelë.
LUK 6:48 Dolö amoda, afädëa mosö olelo amo gadoi nea. Dafidi ea igidaia dögöla, igi bobogamu salalahilä, mosö uli nebegi, hobeala sege digala ödä bëi edefade asi amea, mosö amo nufi gaso, fogomolöi made nelo. Mida, dolö amea mosö geloi hedabi uli amea.
LUK 6:49 Amai gaso, afädëa nïe ado nabala, made bëgëla hamolo neebe amoda, dolö afädëa mosö nagadaia igau hedabola sagala made uli amo gadoi nea. Ödä bëi edefade asi amea mosö amo fogoi amole fodolofalï dagabola digala, nafademolöi nafadeila säi.
LUK 7:1 Yesuea ado amo udia dolöma säla ïaha maadelahilä, e Gabaniama awäla besela galai.
LUK 7:2 Amida, ami hädali afädë beaha aligilo nelo amoïe hamoi hamolasilo afädë, ea edefademalä boba hamoi nelo amo, oloi baagomolöfalï dilo.
LUK 7:3 Amala dibegi, odoaea Yesu neala säi amo nabalahilä, beaha aligilo amea Yu udia dolö ilile asigi gäwi dafidilo amolima sähalea, Yesu maala, ïe hamoi hamolasilo oloi amo wahimäia, ema säla ïmolö mosaloi.
LUK 7:4 Ili awäla, Yesuma gelola sähalea, Dolö beaha aligilo ameada, Yuda nilï boba hamolahilä, nilïle gedolo mosö ea olasi ameada, dia e ugila negemolöda, dofea galea. Eda hedabimelëla säi.
LUK 7:6 Amala säsebegi, Yesu e, hä, ilibalä asi. Awäla hä, mosö ga madela suägïla nebegi, beaha aligilo amea e damelë odoa amolima ado säsisalea, Yesu gagai awäla ema gomalä säla ïmalo. Dafidilo-o, dida na mosöa baagi sëla moholö gabu. Nafade ne gadoia mosöa di nogila digamolö amoda, dofea made gabumelë.
LUK 7:7 Ne dofea madela helësëse weada, nihï di neebea maala säla moholö amoge dofea made gabumelë. Dia adoeamu säsimäia. Säseda, nïe hamoi hamolasilo amo wahimolö.
LUK 7:8 Na säsebe amoïe mida, gomalä. Nage ami beahamu aligilo geloi nefolalebe amoli hawa aligilo. Amase, ami dolö odoa nefolalebe amoliage, ne hawa aligilomelë. Na afädëma mosöla säseda, e aulomelë. Amase, elöma misiëla säseda, e mulomelë. Na nïe galabaia hamoi gadoi hamolasiloma gowe hamomola säseda, amo gadola hamolomelëla säila säla ïmalola säi.
LUK 7:9 Amala sämalola säla ï amo nabalahilä, Yesu e, ea säi amogi edefademalä fudugilahilä, besuia imogola nea, udia dolö yafie e bëgëla mofiasebe amolima sähalea, Na dilima säla ïahago. Afädëa asigi afädë go gadola negei neebe, na made melï. Isilale udia dolö hili iligige, egowe gadola negei neebe, na made melïmelëla säi.
LUK 7:10 Amala säsebegi, dolö mosaloi amoli mosöa obëgëlahilä beahamelebe, hamoi hamolasilo amo, hä, wahi sebe melï.
LUK 7:11 Holöbö nelolahilä, Yesu e Naina gaamugi moholö awäsebegi, ïe bëgëla aulo amolige, udia dolö yafie odoage gedola ebalä afiai.
LUK 7:12 E awäla, gaamu yala amalei amoïe idi nogila digalo mia besela galaha nebegi, dolö odoaea baagoi afädë baumolöïe, yala baagido gaula mofiaha dibegi, gausiala digai. Baagoi amoïe emeada, dolö malö afädë amomu sogobai sulo. Eme amoda, didalo sulo. Gaamugi ami fii udia dolö odoa yafiege ebalä mofiaha dilo.
LUK 7:13 Dafidilo Geloia udia didalo amo beala, edefademalä bobasëlahilä, ema sähalea, Dïimabula säi.
LUK 7:14 Amala sälahilä, Yesu e iwasala gaui amo ga madela ami awäla nea, iwasala gaui dafu amogi diigi. Amalebe, iwasala gaulo dolö amoli nefolalo. Yesuea sähalea, Malö malïsä, na dima säha. Nowemola säi.
LUK 7:15 Amala säsebegi, malö baagoi amo nowela galala adoi. Adosebegi, Yesuea malö amoïe eme amo hïma ï.
LUK 7:16 Udia dolö nefolalo amoli sulubadela fudugila bedälahilä, Godeïe ëi gauia adogola sähalea, Bea sälo edefade afädë nilï neebeawi maala, ulufadigila besela galalahilä, Godea ïe udia dolö ugila negemolö misi gabula säi.
LUK 7:17 Yesuea amala hamoi amo udia dolö amolia gaula afufula, Disiligi Yudiamadige, sege odoa ga madela dibe amoli sulubadelamadige, säla daidosa maadei.
LUK 7:18 Yoneïe bëgëla aulo amolia Yesuea nelebo hamoi amo ema säla ï. Amala säla ïasebegi, Yonea ïe bëgëla aulo äudä amole misialolahilä
LUK 7:19 elema sähalea, Alia Dafidilo Geloima gomalä nabulö mosalo. Afädë moholömelëla säi amoda, dile, ma, nilïa elö beaha namolöledula nabualola säla ï.
LUK 7:20 Amala säsebegi, ele awälahilä Yesuma sähalea, Alïda ödägi gelo Yonea di neebea misialosebegi misimelë. Ea dima gomalä nabualola säsio. Afädë moholömelëla säi amoda, dile, ma, nilïa elö beaha namolöledula nabulö mosalola säsebegi misimelëla säi.
LUK 7:21 Amo galada, Yesuea udia dolö olo elö elöla oloi difolalo amoli wahila digi, mugabe nafade fedai difolalo amoli nesila digila digi, si golai difolalo amoli siia bimäia, wahila digisa nelo.
LUK 7:22 Hä, Yesuea dolö äudä amolema säla obëgësalea, Ali Yone neebea obëgëla awälahilä, gomalä säla ïmalo. Alia walio nelebo hamose melï amoge, nabi amoge, ema säla ïahaleada, Si golai nefolalo amolige, siia beaha maadela, emo nafadei sefolalo amolige, emesala nawela, gudubu hamoi sefolalo amolige, wahisa maadela, amase, gëhe gai sefolalo amolige, nabaha maadela, baagoi difolalo amolige, nowelasisa maadela, busadäoi nefolalebe amolima Ado Mala Hedabi säla ïaha neebeola sämalo.
LUK 7:23 Afädëa ne beala ïe asigi afädë negei amo made digase amoda, obeägïsa neamelëlage, säla ïmolö mosalola säla ï.
LUK 7:24 Malö äudä Yoneïe ado gaula mosalalo amole obëgëibua, Yesuea udia dolö gegedola nefolalo amolima, Yoneïe helësëla sähalea, Sege nafadeia udia dolö aligilo made dibea ami afiai amoda, dilia edo bimolö afiai. Dili afiai amoda, giisi sedade foea auai dibe amo bimolö afiaile.
LUK 7:25 Amai made galëda, dili afiai amoda, edo bimolö afiai. Dolö afädëa fagulo hedabifalïmu salugai neebe amo bimolö afiaile. Nabuö. Fagulo hïdo elöi salugaloge, domaloïe molöge, nelegeige, yafie negelo amolida, ginia mosöa dilo neamelë.
LUK 7:26 Gaso, dili afiai amoda, edo bimolö afiai. Bea sälo afädë neebe amo bimolö afiaile. Ä, amomelë. Amai galëda, na hä, dilima sähago. Bea sälo ameada, bea sälo odoa baagila asi neamelë.
LUK 7:27 Ïe helësëla, gomalä dëdëla negei dialea. Nabuö. Nïe ado säla ïlo amo, dïe dafidila mosalamolömelë. Di e baagia emesala nawemolöïe, ea dïe idi fodolasimolömelëla säla dëdëla negei dialea.
LUK 7:28 Na dilima säla ïahago. Udiaea neegela ägüi sulubadela amoligida, afädëa Yone made baagila asi nea. Gaso, Godea Beaha Maadela Sigi Neebea ami ëi maade, holöbö gidogofalï ameada, Yone baagila asi neamelëla säi.
LUK 7:29 Udia dolö amoli sulubadelaeage, dagisi muni nelo amoliage, Yesuea säi amo nabalahilä sähalea, Godea mala hamosebe amoda, sulubadela mogoimu hamolo dialeala säi. Amala säi amoïe mida, Yonea ödägi gesa nelo amogi ilige gei nefolalo.
LUK 7:30 Gasoda, Felesi dolö amoliage, mala säla negei amo olelelo dolö amoliage, Yonea ili ödägi gemäia hamei made nelo amea, Godea hamei dibe ilima olei amo baagi ï.
LUK 7:31 Yesuea ado aso, sähamu nea sähalea, Udia dolö walio neebe gowe ili ado abodo gadoima, oodo beala sämolödu. Ilida edo gadoi neadu.
LUK 7:32 Ilida malësäea magaia gaamugi salea, malësä odoama uuala säia gala sähalea, Nilïa dilile bäidama dülasilebeda, dilia gosala made aligisio. Amase, nilïa oböla, dilile bobasëi gë udäi amogige, dilia bobasëla dïila made nelomelëla sälo amo gadoida ili nea.
LUK 7:33 Mida, ödägi gelo Yone e maala neada, beledige wani ödäge made naala nebegi, dilia sähaleada, E mugabe fedai neala sälomelë.
LUK 7:34 Amase, Dolöïe Malö maala neada, molö ödäge naala nebegi, dilia sähalea, Wae! Dolö goweada, molö memelela made, badoia nüloge, wani ödäge edefade naala gagaolo dolö gabu. Goda, dagisi muni neloge, nafade hamologe nefolalebe amolile damelë go beasebelela sälomelë.
LUK 7:35 Amala sälo gaso, Godeïe asigi falagasei amoda mogoimu dialeala ïe malö neebe amolia ulufadigilola säi.
LUK 7:36 Felesi dolö afädëa Yesu e ea mosöa molö molö misialola säsebegi, e ami awäla molö naha sulo.
LUK 7:37 Nafade hamolo udia afädëge gaamu amogi sulo. Udia amea nabelebe, Yesu maala, Felesi dolö amea mosöa molö naha saleala säi amo nabalahilä, weli hedabi gafisigäi hïdo elöi ödä i igia hamoigi usi dilo amo gaula misi.
LUK 7:38 E hä, Yesu baagido ga madela maala nea, dïisa nelo. Siaholö amea, Yesuïe emodaia dögi. Siaholöea nahi amo, udia amo hïle busa hilïa doga digilahilä, Yesuïe emogi gaula mimisa sulo. Amalahilä, weli gafisigäi usi gaui amo, Yesuïe emodaia ami söga negei.
LUK 7:39 Amala hamosebegi, e misialola sälo Felesi dolö amea hïdomu helësësalea, dolö gowe bea sälo galebeda, udia ema diigisebe goweda gowe gadoi, ea nafade hamosamu filola dawadigilabio gabula helësëi.
LUK 7:40 Yesuea ema sähalea, Saimono-o, na dima ado afädë sämolö helësësebe amo sähagola säi. Amala säsebegi, Saimonoea sähalea, Säla Olelelo-o, sämola säi.
LUK 7:41 Amala säsebegi, Yesuea sähalea, Dolö äudäea muni gaui dolö afädëma muni bidi negela nelo. Elö ameada, giwi siliba hädali bia bidi negei. Amase, elö ameada, giwi siliba nabülasi bia bidi negei.
LUK 7:42 Elea muni beselala ïa obëgëmolö amo maade gabugi, muni eedo amea elema sähalea, Gamelä. Fisisagola säi. Hä, dia helësëseda, muni gaui dolö amoma edefademalä boba hamomolö amoda, abodoea gabula nabi.
LUK 7:43 Amala nabasebegi, Saimonoea sähalea, Muni edefade bidi negei fisi amealedula säi. Amala säsebegi, Yesuea sähalea, Dia hedabola helësëi gabula säi.
LUK 7:44 Amala sälahilä, e besuia imogola udia amoma siila nea, Saimonoma sähalea, Dia udia gowe beasebele. Ne dïe mosöa maasebegi, nïe emo nigime hëmäia, dia ne ödä osala made ïasio. Gaso, udia goweïe siaholö nïe emodaia dögi amo, oböla, hïle busa hilïa dogasisio.
LUK 7:45 Ne maasebegi, dia ne gaula made mimisio. Gaso, ne dafidi misia amila udia gowea, fisila made, nïe emogi gaula mimisio.
LUK 7:46 Dia nïe busagia weli made hëi, gaso udia gowea weli gafisigäi gaula maalahilä, nïe emogi hësio.
LUK 7:47 Amaimo, na dima säla ïahago. Ea ne edefademalä boba hamolahilä hamoi ameada, ea nafade yafie hamosa sulo amoda, Godea hësa maadeimelëla ulufala oleimelë. Amaimo, dolö afädëa nafade holöfalï hamoi amo hëi ameada, holöfalï boba hamolomelëla säi.
LUK 7:48 Amala sälahilä, Yesuea udia amoma sähalea, Dia nafade hamoi amoda, na hësa maadeimelëla säi.
LUK 7:49 Amala säi amo nabalahilä, molö naha sefolalo odoa amolia hilidomu didiähalea, nafade hamoi hëlo neebe egoweda, nowëdula didiäha dilo.
LUK 7:50 Amala didiäha dibegi, Yesuea udia amoma sähalea, Dihï Godema asigi afädë negei amea, di damula asimelë. Dalulo salugala mosalola säi.
LUK 8:1 Holöfalï nelolahilä, Yesu e gaamu sulubadelagige, sege sulubadelagige, nawesa neada, udia dolöma Godea Beaha Maadela Sigi Neebe amoïe Ado Mala Hedabi säla ïïa asi. E awäse amo gadola giwilasi amolige,
LUK 8:2 udia odoa mugabe nafade fedaige, oloige sefolalebegi, Yesuea dafidi nesila digila wahi sefolalo amolige, ebalä asi. Gaamu Magadala udia ëi Meli negei sulo amoma, dafidi mugabe gifalädalïa fedai sebegi, Yesuea nesila digi amoge,
LUK 8:3 udia elö Yoanage, eda Gusaïe udia sulo. Egoa ameada gini Heledoïe mosö sigi aligilo nelo. Amase, Susanage, udia yafie odoage ebalä asi. Udia amoliada, ilile nelebo gaui amea, Yesuge, giwilasi amolige, ugila nelegela awäha nelo.
LUK 8:4 Gaamu dilo amoli sulubadelagila udia dolö yafie Yesu neebea ami mafula gegedoi dibegi, Yesuea ado besula säla ïahalea,
LUK 8:5 Dolö afädëa molö gägä sagaido fëfëla aligi asimelë. Ea fëfëla aligi awäha nebegi, gägä odoa idiafa daala negei amo, udia dolöïe emoea emesala dagui dibegi, haea maala neala naha maadei.
LUK 8:6 Gägä odoada, igi naga abelëidaia daala negelahilä, duulu fedala bäui gaso, ödä maadesalea bausoi.
LUK 8:7 Amase, gägä odoada, ëfë äyo gägäi neebea daala negelahilä, ëfë äyo gägäi amola gedola fedala, yau hai nelo.
LUK 8:8 Gägä odoa naga hedabi dibea daala negei ameada, bäulahilä i afädë afädëlaea gägä hädali afädë afädëla negeimelëla säi. Yesuea ado besula säha maadelahilä gelolafalï sähalea, Afädëa gëhea nabulöi galëda, hä, nabualola säi.
LUK 8:9 Ïe bëgëla aulo amolia ado besula säi amoïe, ema mi fädäla nabi.
LUK 8:10 Amala nabasebegi, Yesuea säla obëgësalea, Godea Beaha Maadela Sigi Neebe amoïe helësëmolöda dafidi, odoa ulufadigi made, musügä negei dilo amo, diliamu mi dawadigimäia ïmelë. Amaimo, udia dolö odoa ilima ado besulamu säla ïlo amoda, ilia beaha gaso, galone gowe gabula made bimolömelë. Amase, ilia ado nabaha gaso, asigia fädäla made helësëmolömelëla säi.
LUK 8:11 Yesuea ado aso, sähamu nea sähalea, Ado besula säi amoïe mida gowe. Gägä gadoida, Godeïe ado malamelë.
LUK 8:12 Udia dolö odoaea ado mala nabase amolida, gägä fëfëi idiafa digai amo gadoi nea. Ilia nabala asigi afädë negesegi, Godea ili damula auloea, mugabe busaea hobeala maalahilä, ado mala nabi isogi dibe amo neala gaula aulo neamelë.
LUK 8:13 Molö gägä igi naga abelëidaia daala negei amo gadoida, udia dolö odoaea ado mala nabala, obeägïla, aabela neala gaulo. Gaso, ili asigi afädë negei amo, difi made awäla, fedogola melëlo segeyogi, dïgïla aulomelë.
LUK 8:14 Molö gägä ëfë äyo gägäi neebea daala negei amoda gowe gadoi. Udia dolöea ado mala nabelo nea gaso, ili awäla nagadaia namolöïe nelebo odoagi asigia säosäologe, nelegei negelo namolöge, amase, domaloea gelola hameloge, amala helësëse ameada, ado mala nabi amo dedelela yau hahalea, gägä negei amo hedabola bëlo made neamelë.
LUK 8:15 Molö gägä naga hedabia daala negei amo gadoida, udia dolöea iso asigi mogoi hedabi negei neebe amolimelë. Ilia ado mala nabala, fisila made, aso maadela, gelola aligilo amea, gägä yafie negelo neamelëla säi.
LUK 8:16 Yesuea ado aso, sähamu nea sähalea, Afädëa gamali wala sagaseda, faloea made dabelo. Imidi hawage made negelomelë. Amala made. Ea walahilä, udia dolö mumusogi maase amolia yo amo bimäia, aulidaia negelo nea.
LUK 8:17 Nelebo sulubadela musügä negei dibe amoda, ulufadigisa maademolömelë. Amase, dabela negei dibe amoge dawadigisa maadela, ulufadigisa maademolömelë.
LUK 8:18 Amaimo, dilia ado nabahalea, hedabola helësëla nabualo. Afädëa nelebo gaula neebe amomada, odoa baala ïmolömelë. Afädëa nelebo afädë gaui made nea gaso, holöfalï gaula neebe amo dofea gaula neala helësësa neebe amoda, fedela nimolömelë.
LUK 8:19 Segeyo amo gala, Yesuïe eme edoolali e neebea ami misi. Gasoda, udia dolö yafie gegedola negegi dilo amea, ili e neebea ami nogila digamolö fu made melï.
LUK 8:20 Amalebeda, ili ifo baagido nefolalebegi, afädëa ema sähalea, Dibalä adomolöïe dieme didoolali ifo baagido misi neebela säla ï.
LUK 8:21 Amala säsebegi, Yesuea sähalea, Godeïe ado nabala bëgëla hamosa neebe amolida, nïe neme nedoolalida, amolimelëla säi.
LUK 8:22 Segeyo afädëgi, Yesula ïe bëgëla aulo amolali dudaia fedala fifigilahilä, Yesuea ilima sähalea, Nilï oeabo dëgëla näiado alogodigogi afiadila sälahilä afiai.
LUK 8:23 Dudaia fifigila afiai gaso, Yesu eda adi dilo. Amala adi dibegi, fo edefade gelola guula maasebe amea, ödä aidagula dudaia häila fedalahilä, ili ödäea nudulä hamoi.
LUK 8:24 Amala hamosebegi, ïe bëgëla aulo amolia Yesu dibea ami awälahilä, e didiigisalea sähalea, Dafidilo-o, Dafidilo-o, nilï ödäea nudulä hamosebela säi. Amala säsebegi, Yesu e nowela fedalahilä, fo guula maase amomage, ödä aidagula fedasebe amomage nemosebegi, fo guula misi amoge boogelela, ödä aidagula fedai amoge aumalasi.
LUK 8:25 Amala hamolahilä ilima sähalea, Dilia asigi afädë negei amoda, abidi dialeala nabi. Amala nabasebegi, ili fudugila bedälahilä, hilidomu didiähalea, Dolö goweda nowëdu. Fole ödälema nemosegi, eleada, ïe ado nabelo gabula säla didiäi.
LUK 8:26 Amala hamolahilä, ili afiala sege Gelasa fii mosöa besela galai. Sege amoda Galili oeabo amo dëgëla alömodi dilo.
LUK 8:27 Yesu e dudaiala agesua daala aligisebegi, dolö afädë gaamugi ami fii mugabe odoa fedai nelo amo maaha nebegi gausiala digai. Dolö amoda, siibafalï fagulo made gäla nelo amo neada, mosöa made diala, igi äbä baagoi giwi gasa dibea amimu diaha aligilo nelo.
LUK 8:28 Dolö amea Yesu beala gelola üalalahilä, Yesuïe emo mia gumusula dia digala gelolafalï sähalea, Yesu, Gode Dofä Ilibia Edefade neebe amoïe Malö, dia nema edo hamomolö. Dia ne së ïmabiola fudugila gelola säi.
LUK 8:29 Yesuea mugabe nafade amoma dolö amo dïgïla mosaloi amea amala säi. Ilia ïe naabo emoge igi ëfëa nafodola negela sigi aligisamu nelo gaso, segeyo yafiegi ema mugabe fedala, igi ëfë hësäla sadia gahamu aligilo. Mugabe amea e yamu galahilä, sege udia dolö aligilo made dibea ami nawelasisamu aligilo.
LUK 8:30 Hä, Yesuea ema, Dïe ëida nowëla nabi. Amala nabasebegi, ea säla obëgësalea, Maleimelëla säi. Mida, ema mugabe yafie fedai amea, amala säi.
LUK 8:31 Amala sälahilä, mugabe fedai amolia Yesuma gelolafalï sähalea, Dia nilï sege uli nafade, mia made dibea ami mosölada, sämabiola säi.
LUK 8:32 Amo gaalu sugua yafie gau ga madela nea, moosa nefolalo. Mugabe amolia Yesuma gelolafalï sähalea, Dia nilïda sugua egowelima nogila fedamolö mosöla sämola säi. Amalebe, Yesuea ilima, Ü, amamalola säi.
LUK 8:33 Amala säsebegi, mugabe amolia dolö amo dïgïla awäla, sugua amolima nogila fedai. Amalebegi, sugua amoli gau domaladi baluluia digafula oeaba nogila digala, ödäea naha maadei.
LUK 8:34 Amala hamose amo bealahilä, sugua sigi aligilo amoli baluluia afufulahilä, gaamu dibea amige, mosö gägäwila asi dibea amige, säla ïaha maadei.
LUK 8:35 Amala säi amo nabalahilä, udia dolö amolia abilia hamoi walebelela, fädäla bea afiai. Ili afiala Yesu neebea beahamelebe, dolö dafidi mugabe fedai nelo amo fagulo salugala, asigi hedabi negela obëgëlahilä, Yesuïe emo mia sebe amo beala, ili bedäi.
LUK 8:36 Melï amolia udia dolö mofiai nefolalebe amolia nabuäia, dolö mugabe fedai nelo amo Yesuea gomalä hamola nesila digisebegi, wahimelëla säla ï.
LUK 8:37 Amasebegi, udia dolö Gelasa segeamadi sefolalebe amoli sulubadela edefademalä fudugila bedälahilä, Yesuma sähalea, Dida wi namolö made. Mosalola säi. Amala säsebegi, Yesu e hä, dudaia fila bu obëgësebegi,
LUK 8:38 dolö dafidi mugabe yafie fedai nebegi nesila digi amea, Yesuma gelolafalï, Ne dibalä mudulela nabi. Amala nabasebegi, Yesuea obëgëmalolahilä, ema sähalea,
LUK 8:39 Di dihï segea obëgëlahilä, Godea dima hamoi amo säla ïmolö mosalola säi. Amala säsebegi, dolö amea hïle gaamu dibe sulubadelamadi, Yesuea ema hamoi amo säla ïïa awäha nelo.
LUK 8:40 Yesu e dudaia fila oeabo amo agesu näiado alömodi bu obëgësebegi, udia dolö gegedoi amolia, e maase amogi obeägïla, e säla olei. Mida, sulubadelaea e misiäiala beaha sefolalo amea.
LUK 8:41 Dolö afädë misi amoïe ëida Yalusi. Eda gedolo mosö beaha aligilo nelo. Ea Yesuïe emo mia emo gumusula dia digalahilä, ema gelola egedigila sähalea, Na mosöa awähadula säi.
LUK 8:42 Mida, ïe idiwi afädëfalï amomu, ïe gäheo i giwilasi gadoi gasoda, baagomolö ga madefalï dilo. Amalahilä, Yesu e awäse amo gadola, udia dolö yafie negegila aligi afiaha dilo.
LUK 8:43 Amase, udia afädë gäheo i giwilasigi heale olo olosamu aligilo amoge asi. Dolö afädëa ïe olo amo wahilasimolöi made nelo.
LUK 8:44 Udia amo Yesuïe baagido ga madela maala nea, fagulo sedade didigala gäi amoïe bidigi diigisebegi, heale olo awäha nelo amo fodolofalï hogosa helei.
LUK 8:45 Amala hamosebegi, Yesuea nabahalea, Nema diigise nowëala nabi. Amala nabasebegi, ili sulubadelaea, na made, na madela säla didigasebegi, Fidaea sähalea, Dafidilo-o, dibalä udia dolö yafie negegila aligi afiaha dialea madelela säi.
LUK 8:46 Amala säsebegi, Yesuea sähalea, Afädëa nema diigimelë. Diigisebegi, na helësësalea, geloi nema dibe amogi doadigila asila helësësamelëla säi.
LUK 8:47 Amala säsebegi, udia amea, e musügä made gabula helësëla, emo gigisëlahilä maala, Yesuïe emo mia gumusula dia digai. Udia dolö sulubadela amolile sidaia salea, ea Yesu diigi amoïe mi fädäla sälahilä, ne fodolofalï wahimelëla säi.
LUK 8:48 Amala säsebegi, Yesuea ema sähalea, Nidiwi-e, dihï asigi afädë negei amea, di wahigomelë. Dalulo salugala mosalola säi.
LUK 8:49 Yesuea amala säha nebegi wäla, gedolo mosö beaha aligilo Yalusi amoïe mosöala, dolö afädë maala ema sähalea, Dïe didiwi hä, baagoi dialeamelë. Säla Olelelo gomada, halasala sämabiola säi.
LUK 8:50 Amala säi amo nabalahilä, Yesuea Yalusima sähalea, Bedämabu. Dia asigi afädë negemalo. Amala hamoseda, e wahimolömelëla säi.
LUK 8:51 Amala sälahilä, Yesu e mosöa ami besela galalahilä, odoa ebalä nogila digamäiala fu made ïala, Fida, Yone, Yamese, eedo emela, ilimu nogila digai.
LUK 8:52 Digahamelebe, mumusogi ami udia dolö amoli sulubadelaea didigaola gualösa dibegi, Yesuea ilima sähalea, Didigaomabu. Malö goda baagoi made. Adi dialeamelëla säi.
LUK 8:53 Amala säsebegi, ilia malö amoda, hä, baagoi amodala helësësalea, ebalä öi.
LUK 8:54 Amala hamosebegi, Yesuea udia malö amoïe naabogi gaula nea, Udia malö, di nowemola säi.
LUK 8:55 Amala säia gai amole, udia malö amo hame fisigila besela galalahilä, fodolofalï nowei. Nowesebegi, Yesuea ilima sähalea, E molö muäia ïmalola säi.
LUK 8:56 Amala hamoi amogi, malö amoïe eedole emelele asigigi edefademalä fudugisebegi, Yesuea elema gelola sähalea, Walio hamoi amoda, afädëma säla ïmabiola säi.
LUK 9:1 Yesuea abosolo giwilasi amoli misialolahilä, ilia mugabe fedai nefolalebe amoli nesila digimäiage, olo elö elöla oloi difolalebe amoli wahimäiage, ilima geloige, beaha aligilo geloige ï.
LUK 9:2 Amalahilä, Godea Beaha Maadela Sigi Neebe amoïe ado mala säla ïïa afiahaleada, oloi difolalebe amoli wahila aligi afiamalola säi.
LUK 9:3 Ea ilima sähalea, Dili afiahaleada, nelebo gaula made mosalo. Galiamoge, aduge, molöge, munige, fagulo äudäge, gaula mosabiola säi.
LUK 9:4 Hä, dili afiala sege afädëgi besela galala, mosö afädëgi nogila digase amogimu diaha nelolahilä, giso näiadodi afiahalea, mosö amo dïgïla mosalo.
LUK 9:5 Dili afiahalea, udia dolö gaamu afädëgi sefolalebe amolia, dili sigi awäla mosöa diahadula made säseda, gaamu amo dïgïla awäsolo amo gala, nilïa asiala hamoi amea gabula helësëmäia, dilile emogi gulu dao baai amo fëfëla salalahilä, afiamalola säi.
LUK 9:6 Amala säsebegi, ili afufulahilä, udia dolö nefolalebeadi ado mala säla ïadigi, sege sulubadelagi oloi difolalo amoli wahila digila nawesa nelo.
LUK 9:7 Gamane dafidilo Heledoea, Yesuea nelebo hamosa neala säi amo nabi. Nabahaleada, odoaea sähalea, Ödägi gelo Yone baagoi amo nowela misi neala säla digi. Odoaea sähalea, Elaia ulufadigila misi neala säla digi. Amase, odoaea sähalea, Goda bea sälo dafidi nelo amoligi, afädë nowela misi neala säla digisa dibe amogi, Heledo e asigia säosäosa nelo.
LUK 9:9 Amalebe, Heledoea sähalea, Yoneda na muugi damumalasebegi damui amo, walio nelebo elö elöla hamosa neala udia dolöea säseweda, dolö nowëa hamosa neadula säi. Amalahilä, ea Yesu bimolöïe, fu hogosa nelo.
LUK 9:10 Abosolo amoli obëgëlahilä, ilia hamoi amo Yesuma säla ïaha maadei. Amalebegi, Yesuea ili sigi gaula, hilidomu gaamu ëi Bedesaida moholö afiai.
LUK 9:11 Udia dolö yafie gegedoi amolia Yesu asi gabula helësëlahilä, e bëgëla afiai. Ili maala besela galasebegi, Yesuea obeägïla säla olelahilä, ilima Godea Beaha Maadela Sigi Neebe amoïe ado mala säla ïadigi, oloi mofiai amoli wahila didigisa nelo.
LUK 9:12 Hä, deadisebegi, giwilasi amolia e neebea awälahilä, ema sähalea, Udia dolö gegedoi nefolalebeweli, udia dolö aligisia made weada, molö naala midilö maade gabugi, gaamu holöfalï dibea amige, sagai mosö dibea amige, hogogola mosäia afiamalamola säi.
LUK 9:13 Amala säsebegi, Yesuea ïe bëgëla aulo amolima sähalea, Ili molö muäia, dilia ïmalola säi. Amalebegi, ilia sähalea, Nilïa beledi bia, seme äudäla amolemu galea. Amai diada, nilïa udia dolö yafie nefolalebe egowelile molö bidia nea mosäia helësësebelela säi.
LUK 9:14 Dolö yafie dausini bia gadoi amoli nefolalo. Yesuea ïe bëgëla aulo amolima sähalea, Dilia ili nabülasi bia biala fifigimalola sämola säi.
LUK 9:15 Bëgëla aulo amolia ea säi amo gadola säsebegi, ili hä, amo gadola fifigi.
LUK 9:16 Amala sefolalebegi, Yesuea beledi bia amoge, seme äudä amoge, gauia adala mudaia sida adogola nea, Godema nesegelahilä, beledi amoge, seme amoge, dagabodasi. Amala hamola, ïe bëgëla aulo amolima ïasebegi, ilia udia dolö sefolalo amoligali sogoi.
LUK 9:17 Amala sogoi amo, ili sefolalo amoli sulubadela naala bolesalea, odoa fea digai amo, bëgëla aulo amolia gegedola, adu giwilasi salala nobala negei.
LUK 9:18 Segeyo afädëgi, Yesula ïe bëgëla aulo amolali sefolalea, Yesu e hïdo Godema adosa sulo. Amala adolahilä, Yesuea ilima nabahalea, Udia dolö nefolalebe amoliada, ne nowë neala säha difolalebela nabi.
LUK 9:19 Amala nabasebegi, ilia säla obëgësalea, Odoaeada, ödägi gelo Yone gabula säla digi. Odoaeada, Elaia gabula säla digi. Amase, odoaeada, bea sälo dafidi nelo amoligi, afädë nowela misi gabula säla digisa dialeamelëla säi.
LUK 9:20 Amala säsebegi, ea ilima nabahalea, Amai diliada, ne nowë neala sähala nabi. Amala nabasebegi, Fidaea säla obëgësalea, Godea Afädë Memelei amoda, dimelëla säi.
LUK 9:21 Amala säsebegi, Yesuea ilima gelolafalï sähalea, Neda gowe gabiola afädëma säla ïmabiola säi.
LUK 9:22 Ea amala sälahilä sähalea, Dolöïe Malö amo së edefade molö dialeamelë. Asigi gäwi dafidilo nefolalebe amoliage, gobela ïlo busa nefolalebe amoliage, mala dawadigi nefolalebe amoliage, ema bimolö habobalahilä, e baagomäia nufulömelë. Amala hamoseda, segeyo äudä nelolahilä, osodagi e nowemolömelëla säi.
LUK 9:23 Amala sälahilä, ea ili sulubadelama sähalea, Afädëa ne bëgëla moholö helësëseda, hï hamea hamela helësëlo amo fisila, segeyo sulubadelagi hïle i fügäi gaula, ne bëgëla moholö dialea.
LUK 9:24 Mida, afädëa hïle namolö amo gaula fëdöla aligimolö helësëseda, ïe namolö amo hogosa helemolömelë. Gaso, afädëa hïle namolö amo ne helësëla fisiseda, ea ïe namolö amo gaula namolömelë.
LUK 9:25 Afädëa nagadaia nelegei sulubadela neala gaula neëgi, hï e hogosa heleseda, nagadaia nelegei amea, e abeahäla ugila negemolödu.
LUK 9:26 Afädëa nïe ëige, nïe adoge sämolö hewaseda, Dolöïe Malö maasolo amo gala, ïe yo digalo hïdo elöibaläge, Eedoïe yo digalo hïdo elöibaläge, selesaia fii hedabifalï amolile yo digalo hïdo elöibaläge, maasolo amo gala, eege amobalä hewamolömelë.
LUK 9:27 Na dilima dofä sähago. Dolö odoa walio wi nefolalebeweli, made baagola, neëgi wäla, Godea Beaha Maadela Sigi Neebe amo bimolömelëla säi.
LUK 9:28 Yesuea ado amo säha maadela, segeyo gödölasi gadoi nelolahilä, ea Fida Yone Yamesela ili sigi gaula segebidaia Godema adomolö fedai.
LUK 9:29 Fedala, ea Godema adosa nebegi, Yesuïe odagi bedefala, ïe fagulo gäi amo falela, yo digai hïdo elöi eleloi neebe melï.
LUK 9:30 Amo gaalu, dolö äudä ebalä adosa nelo. Amoleda, Mosese Elaiale.
LUK 9:31 Eleda, yo digalo hïdo elöibalä maalahilä, Yesu e naga föi we dïgïla moholö ga maadese amoïe, ebalä ado adosa nelo. Amoda, Yalusaleme ami hamomolö amoïe säi.
LUK 9:32 Fidage ebalä misi amolege, si gafodo gadugisalea süwia adidi difolalo. Ili adidi difolalo amo nowelahilä beahamelebe, Yesuïe yo digalo hïdo elöige, dolö äudä ebalä neebe amolege melï.
LUK 9:33 Dolö äudä amolea Yesu dïgïla, hä, awäse amo gaalu, Fidaea Yesuma sähalea, Dafidilo-o, nilï wi neebeweda hedabi gabu. Nilïa sege mosö ohodoa, afädë digali, afädë Mosesegali, afädë Elaiagalila oledulela nabi. Fidaea amala säi amoda, eada gowe sähala helësëla made säi.
LUK 9:34 Fidaea ado säha neebe amo gaalu, gelë häu maala, ili neebe amo dabei. Dabesebegi, ili bedäi.
LUK 9:35 Gelë iso amogila ado afädë säia idogosalea, Egoweda nïe malö. Nihï memelei nelo amoda gomelë. Dilia ïe ado nabualola säi.
LUK 9:36 Ado säi amo wagaia gase amo gaalu beahamelebe, Yesu e hïdomu neebe melï. Bëgëla aulo amolia nelebo hamose melï amoda, segeyo amo gala odoama made säla ïala, musügä negei.
LUK 9:37 Amo aiyo amogi, ili gau amo digafula daala aligisamelebe, udia dolö yafie Yesu idiafa gausiamolöïe mofiai nefolalebe melï.
LUK 9:38 Ili gedoia amila dolö afädëa uuala sähalea, Säla Olelelo-o, na dima gelola nabasebeweda, nïe dolö malö afädëfalï wemu gabugi, dia bimo.
LUK 9:39 Mugabe fedalahilä, fodolofalï uuaha aligilo nea, mugabea amulämelasilahilä, nafiadi dibu besigaha aligilo. Amea fodolo made doadigila awäla, domalo nafadesebemelë.
LUK 9:40 Na dïe bëgëla aulo golima nesila digimola gelola säi gaso, ilia nesila digimolöi made. Ulï gabiola säi.
LUK 9:41 Amala säsebegi, Yesuea säla obëgësalea, Udia dolö asigi afädë made negela, asiala hamolo walio nefolalebela dili-e, na dilile yöi gaula nea, dilibalä segeyo aboläia namolödu. Dïe malö go sigi misiëla säi.
LUK 9:42 Malö amo, hä, sigi gaula, Yesu neebea maaha nebegi, mugabe amea malö amo nagadaia nidala awälahilä, amulämelasi. Amala hamosebegi, Yesuea mugabe amoma nemolahilä, malö amo wahila, eedo amoïe naabogi gausi.
LUK 9:43 Udia dolö ami nefolalo amolia Godeïe geloi edefade amo bealahilä, ili edefademalä fudugi. Udia dolö nefolalo amolia Yesuea hamoi amogi, aso, fudugisamu dibegi, ea ïe bëgëla aulo amolima sähalea,
LUK 9:44 Ado säsewe dilia hedabola nabualo. Dolöïe Malö amoda, ilia odoaïe naabogi gausimolömelëla säi.
LUK 9:45 Amala säi gasoda, ilia goweïe säsebela mi fädäla dawadigi made nelo. Ilia helësëmäia säla ïala made, musügä negela aligisebegi, ilia ema naba obëgëmolö amo bedäi nelo.
LUK 9:46 Hä, ïe bëgëla aulo amolia hilidomu sähalea, Nilïgi baagila awäla dafidilo neebe amo eda nowë neala säla gëgësa dilo.
LUK 9:47 Yesuea ilile asigigi helësëi nefolalebe amo bealahilä, malö holöbö afädë naabogi nabelela gaula maala, hï e mia ami ifosi.
LUK 9:48 Ifosilahilä, ïe bëgëla aulo amolima sähalea, Afädëa nïe ëigi, malö holöbö gowema halïgïla namolö misiëla säseda, amoda ne namolö misiëla sähagomelë. Amase, afädëa ne namolö misiëla säseda, amoda ne fisiga welo amo namolö misiëla sähagomelë. Mida, dolö ëi maade, holöbö gidogofalï afädë dili neebe sulubadela mogogi neebe amoda, baagila asi neamelëla säi.
LUK 9:49 Amala säsebegi, Yonea sähalea, Dafidilo-o, afädëa dïe ëigila mugabe fedai nesisa neebe amo nilïa bealahilä, dolö amo nilïbalä nawelo made beala, Dia amamabiola säimelëla säi.
LUK 9:50 Amala säsebegi, Yesuea säla obëgësalea, Amamabiola sämabio. Dolö dilibalä ado nii made neebe amoda, dili sosogo neamelëla säi.
LUK 9:51 E selesaia mosöa gaula fedamolö segeyo amo ga madesebegi, Yesu e Yalusaleme moholö gelola helësëlahilä, awäha nelo.
LUK 9:52 Awäha nea, ea dolö odoama dafidi afiamalola säsebegi, ilia Samelia segeïe gaamu afädë dibea ami, ïe nelebo daiamolö asi.
LUK 9:53 Gaso, Yesu e Yalusaleme moholö awäse ameada, udia dolö ami nefolalo amolia, e made säla olela gausiai.
LUK 9:54 Amala hamosebe amo bealahilä, bëgëla aulo äudä Yamese Yonelea sähalea, Dafidilo Geloi-e, udia dolö gowe ili nuloea naha maademäia, alïa selesaia mosöala nulo fisiga idogomola sädulela nabi.
LUK 9:55 Amala nabasebegi, Yesuea besuia imogola elema nemolahilä,
LUK 9:56 ili sege elögi afiai.
LUK 9:57 Yesula ïe bëgëla aulolali idiafa afiaha dibegi, dolö afädëa Yesuma sähalea, Di awäsebe go gadola, ne bëgëla maahagola säi.
LUK 9:58 Amala säsebegi, Yesuea ema sähalea, Ilua ügülo sefolalebe amolida, naga hagali hawa dilo galea. Amase, haea sefolalebe amolige, dilo mosö galea. Amalo gaso, Dolöïe Malö eda, busa fugulo negela dilo mosöda, maademelëla säi.
LUK 9:59 Amala sälahilä, Yesuea dolö elöma sähalea, Ne awäsewe gadola bëgëla misiëla säi. Amala säsebegi, dolö amea nabahalea, Dafidilo-o, nïe naadodale baula obëgëmalamolö dofealela nabi.
LUK 9:60 Amala nabasebegi, Yesuea ema säla obëgësalea, Baagoi difolalebe amoliada, hilile baagoi amo baumäia. Diada Godea Beaha Maadela Sigi Neebe amoïe ado mala säla ïmolö mosalola säi.
LUK 9:61 Amase, elöea nabahalea, Dafidilo-o, na di bëgëla moholö gaso, ne sosogoma dafidi dili hawio, namialola sämalamolö dofealela nabi.
LUK 9:62 Amala säsebegi, Yesuea ema säla obëgësalea, Dolö sagai sagalo neebe amea, noo gäwila buugila sagahalea, baagido besula beaha nea sagalo ameada, Godea Beaha Maadela Sigi Neebe amoïe hamoi hamomolöda, ulïmelëla säi.
LUK 10:1 Hobeala, Dafidilo Geloia dolö nabülasi gifalädalïaïe odoai äudä memelelahilä, ili dafidila mosäia, ea äudä äudäla sege dibeamadige, gaamu dibeamadige, e moholöido amogi dafidi afiamaloi.
LUK 10:2 Ea ilima sähalea, Sagaia molö bëi yafie difolalea gaso, hëhela gegedola negelasimolöïe, hamoi hamolo amolida, ede made gabumelë. Amai gabugi, sagai eedoea ïe sagaia hamoi hamomolöïe, hamoi hamolo hï fisiga gamäia, ema adosa namialo.
LUK 10:3 Dili hä, mosäia. Gaso, nabuö. Sugua sibi malö gadoi ilua ügülo nefolalebea ami, na dili fisiga gahagomelë.
LUK 10:4 Dili afiahaleada, muni saleloge, aduge, emo usililoge, gaula made mosalo. Idiafa udia dolö beaseda, gausiala made, baagimalo.
LUK 10:5 Dili afiala mosö afädëgi nogila digalahilä, dafidi gowedale sämalo. Dalulo mosö wegi sebe dilibalä namiäiala sämalo.
LUK 10:6 Amala sälahilä, mosöa ami sefolalebe amoligi, afädëa dalulo hamei seëda, dilile dalulo amo dolö amea gaula namolömelë. Be, ami sefolalebe amoligi, afädëa dalulo amogi hamei made seëda, dilile dalulo amo dihilima obëgëmolömelë.
LUK 10:7 Amase, mosö dili aligise afädë amogimu diaha namialo. Dili molö molöge, ödä molöge, ilia ïase amo naha namialo. Mida, hamoi hamolo neebe amolida, bidi nimolö dialea. Mosö odoagi, made fifi nawemalo.
LUK 10:8 Gaamu afädëgi besela galasegi, ami fii amolia säla olela, mosöa mofiamola säseda, ami awälahilä, molö ilia ïase amo mualo.
LUK 10:9 Gaamugi ami oloi difolalebe amoli wahilasisaleada, ilima Godea Beaha Maadela Sigi Neebe amo, ga made misi dialeamelëla sämalo.
LUK 10:10 Gaso, dili awäla gaamu afädëgi besela galasegi, dili säla olela, mosöa mofiamola made säseda, mosö baagila, idi dibe amogi awähalea, gomalä sämalo.
LUK 10:11 Dilile gaamu goweïe gulu dao nilïle emogi baai goweda, dilia asiala hamoi amo olesalea, fëfëla salala awähamelë. Godea Beaha Maadela Sigi Neebe amo ga made misi dibe amo hedabola helësëmalola sämalo.
LUK 10:12 Na dilima sähago. Memelela gudimolö segeyo besela galasolo amo gala, Sodomo ilibalä memelela gudimolö amo gadola made, dofä baagila awäla, gaamu amogi nefolalebe amolibalä, gelolafalï memelela gudimolömelëla säi.
LUK 10:13 Yesuea ado aso, sähamu nea sähalea, Gaamu Golasini udia dolö dili, asigii gabu. Amase, Bedesaida udia dolö dilige, asigii gabu. Mida, dili nefolalebea ami geloi melëlo made gadoi hamoi amo gadola, gaamu Daia Saidonolemadi dafidi hamoi galebeda, ilia siiba asigi besula, nafade edefade hamoi amoïe ulufala, hewai fagulo salugalahilä, nisibu uii filabio.
LUK 10:14 Memelela gudimolö segeyo besela galasolo amo gala, Daia ilibaläge, Saidono ilibaläge, memelela gudimolö amo gadola made, dofä baagila awäla, dilibalä memelela gudimolö amoda, gelolafalï memelela gudimolömelë.
LUK 10:15 Amase, Gabaniama dilige, Godea dili gauia adogola selesaia mosöa fedamolöla helësësale. Ai. Dilida heli segea nedala digamolömelë.
LUK 10:16 Afädëa dilile ado nabaseda, nïe adoge nabahagomelë. Afädëa dilima bimolö habobaseda, nemage bimolö habobahagomelë. Gaso, afädëa nema bimolö habobaseda, ne fisiga welo amomage, bimolö habobahagomelëla säi.
LUK 10:17 Dolö nabülasi gifalädalïaïe odoai äudä afiai amoli obëgësalea, obeägïla aligi obëgëi. Obëgëlahilä, ilia sähalea, Dafidilo Geloi-e, nilïa dïe ëi säsebegi, mugabe fedai nefolalo amoliage, nilïle ado nabala bëgësiola säi.
LUK 10:18 Amala säsebegi, Yesuea ilima säla obëgësalea, Na beaha nebegi, mugabe Saidani sege yabagelelo wäla, mudaiala digala aligise melïmelë.
LUK 10:19 Hä, nabuö. Dilia baagolo nubage, hamabuluge diëgi daiasala mosäiage, ado nii mugabe Saidaniïe geloi baagila mosäiage, geloi amo gaula namiäia, na dilima ï amomelë. Afädëa dili made neala nafademolömelë.
LUK 10:20 Amaimo, mugabe amolia dilia säse nabase amogida, obeägïla made, Godea dilile ëi selesaia mosöa dëdëla negei dibe amogi, obeägïsa namialola säi.
LUK 10:21 Segeyo amo gala, Eleloi Gesamia Yesuïe isogi obeägïlasisebegi, Yesuea sähalea, Mudaiaïege nagadaiaïege Dafidilo Geloi Naado-o, na dïe ëi gauia adaha. Mida, asigi falagasei nefolalebe amolimage, nagadaia mala dawadigi nefolalebe amolimage, dia musügä negelahilä, oböla, malësä gadoi nefolalebe amolima, nelebo amoli ulufala olei amogi. Ae, nïe Naado. Dihï hamomolö helësëi amo gadola, amala hamoi gabumelë.
LUK 10:22 Nïe Naadoea nelebo sulubadela nema gausimelë. Afädëa Malö eda gowe neala dawa mademelë. Naadoea hïdomu dawadigi nea. Amase, afädëa Naado eda gowe neala dawa mademelë. Malöea hïdomu dawadigi nea. Amase, Malöea ïe Eedo olemolö helësëse amolima olesegi, iliage e gowe gabula dawadigisa neamelëla säi.
LUK 10:23 Amala sälahilä, Yesuea ïe bëgëla aulo amolima besuia imogola, ilimamu sähalea, Dilida obeägïsa nea, nelebo hamose dilile siia bease gogi.
LUK 10:24 Na dilima säla ïahago. Bea sälo yafieage, gini yafieage, nelebo hamose dilia bease go gadola wäla, bimolöila helësëi gaso, made melï nefolalomelë. Amase, ado mala dilia nabase go gadola wälage, nabulöila helësëi gaso, made nabi nefolalomelëla säi.
LUK 10:25 Segeyo afädëgi, mala säla negei amo olelelo afädëa Yesu fedogola bimolöïe nowela aligilahilä, ema nabahalea, Säla Olelelo-o, ne namolöi namolö neala gaumolöïe, abilia hamomolödula nabi.
LUK 10:26 Amala nabasebegi, Yesuea ema säla obëgësalea, Ado säla negei dibe amogida, edo säla dëdëla negei dibeo. Dia beala, abilia helësëila nabi.
LUK 10:27 Amala nabasebegi, dolö amea säla obëgësalea, Dafidilo Geloi dïe Gode neebe amo dïe bobaeage, iso asigiage, geloiage, helësëloeage, boba hamosa namialo. Amase, dihïdi boba hamolo amo gadola, odoa dibalä nefolalebe amoli boba hamosa namialola säla negei dibeola säi.
LUK 10:28 Amala säsebegi, Yesuea säla obëgësalea, Dia mogolafalï säimelë. Amo gadola hamosa aligiseda, namolöi namolö gaula namolömelëla säi.
LUK 10:29 Amala säsebegi, dolö amea, ea hamoi amo hedabola hamoila sämolöïe, Yesuma nabahalea, Odoa nebalä nefolalebeda nowëdula nabi.
LUK 10:30 Amala nabasebegi, Yesuea säla obëgësalea, Segeyo afädëgi, dolö afädë Yalusalemela Yaligo moholö digala asi. Awäha nebegi, fa nelo dolö odoaea, e idiafa idia negela gaulahilä, ea nelebo gäi amo sulubadela giila neaha maadela, hï eda nufudala ïalalela, baagomolöi gadoi negesiä asi.
LUK 10:31 Segeyo amo galamu, gobela ïlo dolö afädë idi amogimu digala moholö awähaleamelebe, dolö amo bealahilä, e idi agesugi sisigala awäla baagila asi.
LUK 10:32 Amo gadolamu, Ilibai dolö afädëge amogi awähalea, dolö dibe amo bealahilä, eege idi agesugi sisigala awäla baagila asi.
LUK 10:33 Amai gaso, Samelia dolö afädëge awähalea, dolö dibea ami besela galala, dolö amo bealahilä, ïe asigigi edefademalä bobasëi.
LUK 10:34 E dolö dibea ami awälahilä, welige wani ödäge söga negela, nufi amo usulaha maadei. Amalahilä, dolö amo hïle sugua dögidaia ami negesilahilä, gedola dilo mosöa ami gaula awäla, negesiä sigi nelo.
LUK 10:35 Amalahilä, amo aiyo amogi, Samelia dolö amea muni giwi siliba äudä gaula awälahilä, gedola dilo mosö beaha aligilo amoma ïahalea, Dia dolö gowe hedabola beaha namialo. Dia e sigi nea, dïe muni odoa fisiga gase amoïeda, ne obëgëla maala, na beselala ïmolömelëla säi.
LUK 10:36 Hä, fa neloea dolö amo nufudala ïalalei dibegi, diada, dolö ohodoa amoligi, dolö abodoea hamoi amea damelë hamoi gabula helësësebela nabi.
LUK 10:37 Ea säla obëgësalea, Dolö e bobasëi ameala säi. Yesuea säla obëgësalea, Amo hamoi amo gadola, di awäla amala hamomolö mosalola säi.
LUK 10:38 Yesula ïe bëgëla aulolali afiala, sege afädëgi besela galai. Amida udia afädë sulo. Ïe ëida Mada. Amea Yesu sigi gaula ea mosöa asi.
LUK 10:39 Amida Madaïe emelë sulo. Amoïe ëida Meli. Amea Dafidilo Geloiïe emo mia ga madela maala salea, ea ado säsebe amo nabaha sulo.
LUK 10:40 Sebegi, Madaea molö molö amo hïdomu daiaha nea, asigia yöia idogolahilä, Yesu sebea ami awäla sähalea, Dafidilo-o, nïe namelëada, na hamosewegi, halïgïla hamosalea made. Na nihïdomu hamosebewe, dia made beasebele. Ema ne ugila negela mosöla sämola säi.
LUK 10:41 Gaso, Dafidilo Geloia säla obëgësalea, Mada-o, Mada-o, nelebo yafie dibe amoïe asigia säosäolahilä, asusuga asusugai neago
LUK 10:42 gaso, nelebo afädëmu hamomolö dibego. Melia nelebo memelela nease goweda, afädëa fedela made nimolöla säi.
LUK 11:1 Segeyo afädëgi, Yesu e sege afädëgi Godebalä adosa sulo. Ea Godema adola wagasebegi, ïe bëgëla aulo afädëa ema sähalea, Dafidilo Geloi-e, Yonea ïe bëgëla aulo amolima Godema adomäia olelei amo gadola, nilïage Godema adomolöïe, dia nilïma olelemäiamelëla säi.
LUK 11:2 Amala säsebegi, Yesuea ilima sähalea, Dilia Godema adosalea gomalä sämalo. Nilïle Naado, dïe ëi amo eleloifalï hïdo elöi namiäia hamesa neawe. Dïe Beaha Maadela Sigi Neebe amo misiäiage hamesa neawe.
LUK 11:3 Segeyo sulubadelaïe molö molö amo, segeyo amogi ïmalo.
LUK 11:4 Odoa ilia nilïma asiala hamosegi, sulubadela fisilo ameada, diage nilïa nafade hamoi amoli fisimalo. Nilï neebeawi fedogola bimolö made negesimalo.
LUK 11:5 Amala sämalolahilä, Yesuea aso, ilima säla ïahalea, Dili nebegogi afädëa, gasi mogogifalï ïe damelëa mosöa awälahilä ema sähalea, Ne damelë-e, nïe damelë afädë sege wagadi madela, ne molö maade sebegi, na mosöa misi salea. Hobea bedefala ïduläïe, dia ne beledi iso ohodoa ïmola säsegi,
LUK 11:7 oböla, ïe damelë mumusogi dilo amea säla obëgësalea, Idi galahilä, nïe malöla nilïda hä, gedola diasia adidi dialeamelë. Dia nema halasala sämabio. Ne nowela digali nelebo neala ïmolö ulï gabumelëla säseda, abilia hamomolö gabu.
LUK 11:8 Na dilima säla ïahago. Mosö eedo amea, dolö egedigila misi amoda, ïe damelë helësëla, made nowela ïalabio gaso, e damelëa bolowela egedigi ameada, ea nowelahilä, ïmose amo gadoi neala ïmolömelëla säi.
LUK 11:9 Amaimo, na dilima säla ïahago. Ïmola ëdëgësa namialo. Ïmola ëdëgëseda, diligali ïmolömelë. Hogosa namialo. Hogosa aligiseda, dilia beagolemolömelë. Idi gai dugimola säha namialo. Idi gai dugimola säha aligiseda, dili digamäia, idi gai doga negesimolömelë.
LUK 11:10 Mida, udia dolö sulubadelaea ïmola ëdëgësa neebe amolia nimolömelë. Hogosa neebe amea beagolemolömelë. Idi gai dugimola säha neebe amoma, idi gai doga negesimolömelë.
LUK 11:11 Malö eedo nefolalebego, dilile malöea seme ïmola säseda, dili afädëa waadima neala ïmolöle.
LUK 11:12 Amai, dilile malöea haea iso ïmola säseda, hamabulu neala ïmolöle.
LUK 11:13 Amai, dihili dili nafade hamolo nea gaso, dilile malöma nelebo hedabi ïlo amoda, dilia dawa. Amo gadola made, dofä baagila awäla, dilile Diado selesaia mosöa neebe amea, Eleloi Gesami ïmola ëdëgësa neebe amomada ïmolömelëla säi.
LUK 11:14 Dolö afädëma mugabe fedalahilä, adomolö ulï nelo amo Yesuea nesila digisebegi, dolö ado maade amea hä, ado adoi. Amala hamosebegi, udia dolö yafie gegedoi nefolalo amoli fudugisa nefolalo.
LUK 11:15 Amai gaso, odoaea sähalea, Goda mugabe neebe amolile dafidilo ëi Belesabuluea geloi ïasebegi, mugabe neebe amoli ea nesila digisa neamelëla säi.
LUK 11:16 Amase, odoa nefolalo amolia Yesu fedogola bimolöïe ema sähalea, Dolöea hamomolöi made gadoi afädë selesaia mosöala misi, dia nilïma hamola olemola säi.
LUK 11:17 Amala säsebegi, Yesuea ilile asigigi helësëi dibe amo dawadigilahilä, ilima sähalea, Gädili afädë hilimu moge mogela nuduseda, gädili amo nafademolömelë. Amo gadolamu, mosö afädëgi fii hilimu moge mogela nuduseda, fii amoda mugulumolömelë.
LUK 11:18 Amaimo, Saidania sigi neebea ami moge mogela hilimu nuduseda, ea beaha maadela sigi neebe amo abeahäla namolödu. Na ado säsebeweda, dilia nema Belesabuluea geloi ïasebegi, mugabe neebe amoli dia nesila digisa neamelëla säi amoïe sähamelë.
LUK 11:19 Gaso, na Belesabuluïe geloia mugabe fedai nesila digilo galëda, dilile malö neebe amolia nesila digilo amoda, nowëïe geloia nesila digilo. Ameada, ilia dilile gudi mogelo namolömelë.
LUK 11:20 Gasoda, na Godeïe naabo geloia mugabe fedai nesila digisa galëda, Godea Beaha Maadela Sigi Neebe amo, hä, dili neebea gui misi dialea gomelë.
LUK 11:21 Amaimo, dolö geloi afädëa helebe dadifulo hulu sulubadela gaulahilä, hïle mosö idihë aligiseda, ïe nelegei dibe amoli hedabi dië bimolömelë.
LUK 11:22 Ea helebe dadifulo gaulahilä, neda dofea neala helësëi. Amai gaso, dolö geloi afädë, elö amoïe geloi baagila asi amo maala, ea nudula salolela baagila awäla, ïe helebe, dadile fedela gaulahilä, ïe nelegei amo dolö odoagali mogela sogomolömelë.
LUK 11:23 Afädë e nebalä made nea galëda, hï nebalä ado nii nea. Amase, afädëa nebalä made gedolasiseda, ea dusula afiaha maademäia nesila digisamelëla säi.
LUK 11:24 Yesuea ado aso, sähamu nea sähalea, Dolö afädëma mugabe fedai amo doadigila awäseda, mugabe amo sege falaia awälahilä, e hele fimolöïe sege hogosa nea, afädë made beagolelomelë. Made beagolesegi, hïdo sähalea, Mosö dïgïla misia ami bu obëgëmolöla sälomelë.
LUK 11:25 Awäla mosöa besela galala beahamelebe, gëgelë doala, nelebo sulubadela hedabola negesi diëgi beagolelomelë.
LUK 11:26 Bea negesiä, bu doadigila awälahilä, hï eda holöbö hedabilahilä, mugabe gifalädalïa nafadefalï nafade nefolalo amoli sigi obëgëla awäla nogila digalahilä, mosö amogi aligilo. Amaimo, dolö amo dafidi nafade nelo amo baagila, hobealada, nafadeifalï aligilomelëla säi.
LUK 11:27 Yesuea ado amo säha nebegi, udia dolö gegedoi nefolalebe amoligi, udia afädëa gelola säia adogosalea, Udia di neegela ägüla dodo ïlo sebe ameada, obeägïsa neala säi.
LUK 11:28 Amala säsebegi Yesuea sähalea, Amai gaso, udia dolö Godeïe ado nabala bëgëla hamosa neebe amoliada, edefademalä obeägïsa neamelëla säi.
LUK 11:29 Udia dolö yafie maahamu nebegi, Yesuea sähalea, Udia dolö walio nefolalebe welia nafademu hamosa neebe go. Ilia dolöea hamomolöi made gadoi hamomola sälo. Gaso, hamomolöi made gadoi afädë ilia bimäia made olela, Yonama hamoi amomu olemolömelë.
LUK 11:30 Siiba, Yonada nofe elöi Godea Niniba udia dolöma olei. Amo gadola wäla, Dolöïe Malöda, nofe elöi Godea udia dolö walio nefolalebe welima olesamelë.
LUK 11:31 Memelela gudisolo amo gala, gädili Siba udia dolö beaha aligilo gini udia ameada, walio udia dolö nefolalebe welibalä nowela aligilahilä, ilima dofea made hamoimelëla sämolömelë. Mida, udia amea Solomono asigi falagasei neebe amoïe ado nabulöïe, wagadi made hïle segeala naba misimelë. Gaso, nabuö. Afädë walio gui nebego eda, Solomono nelo amo gadoi made, baagila asi neamelë.
LUK 11:32 Memelela gudisolo amo gala, Niniba udia dolöea walio nefolalebe welibalä nowela nea, ilima dofea made hamoimelëla sämolömelë. Mida, ilia Yonaea Godeïe ado mala säla ï amo nabalahilä, asigi besusa maadei amea. Gaso, afädë walio gui nebego eda, Yona nelo amo gadoi made, baagila asi neamelëla säi.
LUK 11:33 Yesuea ado aso, sähamu nea sähalea, Afädëa gamali yola musügä negelo made, falo hawage negelo made. Ea yolahilä, udia dolö mumusogi maase amolia yo amo bimäia, aulidaia sagalo nea.
LUK 11:34 Siida domaloïe yo digalo gamali gadoi nea. Dïe si hedabi neëda, dïe domalo sulubadelagi yo digaha maadei nea. Be, dïe si nafadeseda, dïe domalo gasimi sagai nea.
LUK 11:35 Amaimo, dia hedabola idihë namialo. Dima yo digalo neebe amo usilahilä, asiala gasimi sagaloea.
LUK 11:36 Amai gabugi, dïe domalo go sulubadelagi yo digaha maadelahilä, fu afädëgi gasimi sagalo afädë maade galëda, gamali yoi amo gadoia dihïdi yo digaha maadei namolömelë.
LUK 11:37 Yesuea ado amo hä, säha maadesebegi, Felesi dolö afädëa, ea mosöa molö molö misiëla säsebegi, e awäla ea mosöa ami molö naha sulo.
LUK 11:38 Yesuea naabo nigime hëla made, molö naha sebe amo bealahilä, Felesi dolö amo fudugisa sulo.
LUK 11:39 Amala fudugisa sebegi gaso, Dafidilo Geloia ema sähalea, Felesi dolö nefolalebela dilia gaaboge, faloge, gafodo baagidomu nigime hësalea, dilile iso asigiada, gesami awäla fa neloge, nafadege, nobai nebego.
LUK 11:40 Asigi maade dili, daia go hamosaleada, isoge hamoi madele.
LUK 11:41 Amaimo, nelebo falodaia dibe amoge, gobo isogi dibe amoge, dolö busadäoi neebe amoligali ïmalo. Amala hamoseda, dilile nelebo amo sulubadelada, dofä nigime hësa maadei diamolömelë.
LUK 11:42 Felesi dolö dili, asigii gabu. Dilia molö hëdälo fogomo gadoi elö elöla sagai dibe amogi, nabülasi mogelahilä, nabü afädë neala Godegali ïlo, gaso mogola hamomolö amoge, Gode boba hamomolö amoge, made hamola buludola fisilo goea. Dafidi säi amo made fisisaleada, dilia ado edefade gowele hahamosa namolö dialea.
LUK 11:43 Felesi dolö dili, asigii gabu. Dilia gedolo mosöa dafidilo filo dibea ami fimolömu hamelo goea. Amase, magaia gaamugi udia dolö nefolalebe amolia, di go gabiola sämäia hamelo goea.
LUK 11:44 Dili asigii gabu. Dilida udia dolöea baagoi dögöla negei dibe amo made beala, fuduia asiala aulo amo gadoi goea.
LUK 11:45 Amala säi amo nabalahilä, mala säla negei amo olelelo afädëa Yesuma säla obëgësalea sähalea, Säla Olelelo-o, dia ado säi ameada, nilïge gagadesebegola säi.
LUK 11:46 Amala säsebegi, Yesuea säla obëgësalea, Mala säla negei amo olelelo nefolalebe dilige, asigii gabu. Dilia nelebo yöi häuala gaulo amo udia dolöea gaumäia negesilahilä, naabo gumu fufuia adogola ugila negelo made goea.
LUK 11:47 Dili asigii gabu. Dilile mäu nefolalo amolia bea sälo nufi amolile baui mosö, dilia olelo goea.
LUK 11:48 Amala hamolo ameada, dilile mäu nefolalo amolia hamoi amoda, dilia hedabola hamoila helësëse amo ulufala olelo. Ilia bea sälo nefolalo amoli nufudasebegi, dilia ili bauia amida, mosö olasilo gabugo.
LUK 11:49 Mi amoïe, Godeïe asigi falagasei amea sähalea, Na ili neebea bea säloge, abosologe, fisiga wemolö gasoda, odoada ilia baagomäia nufudadigi, odoada ilia sëlasisa namolömelëla säi.
LUK 11:50 Amaimo, dafidi sege föi dibe sulubadela mi gäwila hamoia amila, bea sälo nefolalo nufi amoli, dafidi Aibeledale heale digaia amila awäla, Segelaeage, dolö amolia gobela ïlo mosöle aulile mogogi ami nufi amoïe heale digaia ami awäla, sulubadelaïe heale digai ameada, udia dolö walio nefolalebe weli së molömelë. Na dilima dofä säla ïahago. Amo sulubadela amoïeda, udia dolö walio nefolalebe weli së molömelë.
LUK 11:52 Mala säla negei amo olelelo nefolalebe dili, asigii gabu. Mala amo dawadigimolöïe mosö isogi nogila digamäia, idi gai dogelo gii amo dilia neala musügä negelo goea. Dihili dilida, nogila digahalea made, udia dolö odoa nogila digadelä hamosegida, made nogila digamäia, dilia dofogai gabu.
LUK 11:53 Yesuea amo sälahilä awäsebegi, segeyo amila Felesi dolö amoliage, mala dawadigi amoliage, ema gelola gagadela, elö elöla naba obëgë obëgësalea,
LUK 11:54 e dahila nimolöi walebelela bimolöïe, fedogola bease amogi abeahäla ado säsebelela beaha nelo.
LUK 12:1 Udia dolö dausini yafie gegedoi amea negegila, emoea odoa emesala dedabelesebegi, dafidi Yesuea ïe bëgëla aulo amolima säla ïahalea, Felesi dolö ilile beledi edelo yidi idihë nea, hedabola beaha namialo. Na säseweda, ilile asigi musügä negela sälo mala dibe amoïe sähamelë.
LUK 12:2 Nelebo sulubadela dabela negei difolalebe amolida, ulufadigisa maademolömelë. Amase, nelebo sulubadela musügä negei difolalebe amolige, dawadigisa maademolömelë.
LUK 12:3 Gasimi sagaia nea, ado dilia säi amoda, eso neë dibea ami nabulömelë. Mumusogi geleä sëdäwala säi amoda, mosö daiowa fedalahilä, udia dolöma uuala säha namolömelëla säi.
LUK 12:4 Yesuea ado aso, sähamu nea sähalea, Ne damelëla dili-e, na dilima sähago. Domalo baagomäia nufudalahilä, hobeala elö hamomolöi made neebe amolibalä bedämabio.
LUK 12:5 Na dili gowebalä bedämolö dialeala säha. Afädëa dolö baagomäia nufudalahilä, hobeala heli segea nufuda salimolöïe geloi neebe amobalä bedämalo. Dofä, ebalämu bedämalola sähago.
LUK 12:6 Haea nelësa gigiso gadoi biada, bidi holöfalï muni giwi äudä gadoia nelo madele. Amai gaso, Godea haea amoli gadoigi, isoïe afädë elabolo made neamelë.
LUK 12:7 Ea aso, dilile busagia busa hilï nebego sulubadela nidesa maadei neamelë. Haea gigiso gadoi sefolalebe amolida, holöbö gidogolahilä, dilida, abulümi hamoi nebego. Dilia bedämabiola säi.
LUK 12:8 Yesuea ado aso, sähamu nea sähalea, Na dilima sähago. Afädëa udia dolö sefolalebe amolile sidaia, neda Gelesoïe neawela säla ulufadigiseda, Dolöïe Malö ameage, Godeïe selesaia fii nefolalebe amolile sidaia, dolö egoweda nïemelëla säla ulufamolömelë.
LUK 12:9 Gaso, afädëa udia dolö sefolalebe amolile sidaia, neda e sosogo mademelëla säseda, Godeïe selesaia fii nefolalebe amolile sidaia, dolö amoge ne sosogo mademelëla sämolömelë.
LUK 12:10 Afädëa Dolöïe Malö ema ado nafadela säseda, amo hëla fisimolömelë. Gasoda, afädëa Eleloi Gesami e gagadela säseda, made hëla fisimolömelë.
LUK 12:11 Amaimo, ilia gedolo mosöage, gamane beaha aligilo nefolalebea amige, busa dolö odoa nefolalebea amige, dilibalä gudimolöïe sigi awäsegi, nilïa ado abilia säla obëgëmolödu, ado edo sämolödula asigia säosäola helësëmabio.
LUK 12:12 Mida, segeyo amo gala ado sämolö amoda, Eleloi Gesamia dilia sämolö dibe amo olemolömelëla säi.
LUK 12:13 Dolö afädë udia dolö sefolalo amoli mogogi ami salea, Yesuma sähalea, Säla Olelelo-o, naado baagoi amoïe, nalä negei dibe amogi, nedooea ne mogela ïmäia, dia ema säla ïmola säi.
LUK 12:14 Amala säsebegi, Yesuea ema naba obëgësalea, Dolö, edoeaha. Na ali mogelasilo nea, nelebo go mogemäia, ne nowëa memelela ifosisiola nabi.
LUK 12:15 Amala nabalahilä, ea aso, udia dolö nefolalo amolima sähalea, Nelebo sulubadela dofea dialeala helësëla made, na edefade negemolöila helësëla, asiala gesami auloea, dilia hedabola idihë namialo. Dilile namolö amoda, nelegei yafie difolalebe amoligida, maademelëla säi.
LUK 12:16 Amala sälahilä, Yesuea ilima ado besu gowe säla ï. Nelegei yafie negelo dafidilo dolö afädëa sagaia molö mumului yafie dilo.
LUK 12:17 Hä, dolö amea helësësalea, abilia hamomolödu. Nïe molö we nea negemolö mosö maade gabula helësëi.
LUK 12:18 Oböla, hïdo sähalea, Amaseda, na gomalä hamodelä. Na molö negelo mosö uli amoli hailahilä, bu edefade odoa oledelä. Amalahilä, amoligi nïe eladi gadoi widi dibe amoge, nïe nelebo odoage, mosö amoligi nidila negedelä.
LUK 12:19 Amalahilä, na nihïdo sähalea, Neda nelebo yafie hedabi negei diëgi, gäheo ï yafiegi hele salea, molö amo gadoida, negei dialea. Amalahilä, neda memalä saleada, ödä nadigi, molö nadigila hedabi samolö wedala hïdo amala säi.
LUK 12:20 Ea hïdomu amala sälahilä sebegi, gaso Godea ema sähalea, Dolö gagaoi gadoi di. Dida walio gasigi baagomolömelë. Amasegi, dïe nalä negei dibede amoda, nowëa nimolö gabula säi.
LUK 12:21 Yesuea säla wagahalea, Afädëa hïle nelebo dagulula negesalea, Godemadi nelegei made negelo amoma, amo gadola hamomolömelëla säi.
LUK 12:22 Amala sälahilä, Yesuea ïe bëgëla aulo amolima sähalea, Amoïeda, na dilima säla ïahago. Molö edo molödula säla, dili namolö goïe asigia säosäola helësëmabio. Amase, fagulo edo salugamolödula säla, domaloïege asigia säosäola helësëmabio.
LUK 12:23 Molö aso, nigia galahilä, udia dolö namolö amoda, dafidilo neamelë. Amase, faguloge aso, nigia galahilä, domaloda, dafidilo neamelë.
LUK 12:24 Dilia haea sefolalebe amoli helësëmo. Ilia sagai sagala molö hëhela faila gegedola negelo made, amase, negelo mosöge maade, gaso ili muäia Godea ïlomelë. Haea amoli holöbö gidogolahilä, udia dolö dilida, dafidilo nea madele.
LUK 12:25 Dili neebe gogi nowëa asigia säosäose ameada, hïle nagadaia namolö amo fu holöfalï baalasimolödu.
LUK 12:26 Dilia holöfalï amo gadoi hamomolöi made galëda, nelebo odoa dibe amogi asigia säosäosa nebegoda, edoïe.
LUK 12:27 Dilia mama amoli memalä bäulahilä, abeahäla fedaha aligilodula helësëmo. Ilia hamoige made hamolo, amase, faguloge made hamolo neamelë. Amai gaso, na dilima säla ïahago. Solomonoea fagulo hïdo elöi salugalo amoda, mama ilile momadoi hïdo elöi amo gadoi made nelo.
LUK 12:28 Giisi mamala memalä bäui walio nefolalebe amolida, aiyo dolöea damula nulogi gobelo neamelë. Asigi afädë holöfalï negei nefolalebela dili, Godea giisi mama nefolalebe amolida, memalä momadolasilo. Amo gadola made, dofä baagila awäla, dili nefolalebegoge fagulo gämäia ïmolö madele.
LUK 12:29 Amase, dilia molö ödäge, edo naha namolödula, asigi amogi amogila nea salala helësëmabio. Amo gadola säosäomolöda, dofea mademelë.
LUK 12:30 Udia dolö Gode helësëlo made amolia, nelebo amoli gadoi helësësamu aligilo nea. Amalo gaso, dilile Diadoea dili nefolalebegoea nelebo amoli nimolöi dibe amoda, dawadigi neamelë.
LUK 12:31 Amaimo, dilia ïe Beaha Maadela Sigi Neebe amo helësëla, hogosa aligiseda, ea nelebo amoli sulubadela dilima baala ïmolömelëla säi.
LUK 12:32 Yesuea aso, sähamu nea sähalea, Sugua sibi sosogo nahui nefolalebela dili-e, bedämabio. Mida, dilile Diadoea ïe Beaha Maadela Sigi Neebe amo diligali ïmolöïe obeägïsa neamelë.
LUK 12:33 Dilile nelebo difolalebe amo odoama bidi neaha maadelahilä, muni neasebe amoda, udia dolö busadäoi nefolalebe amoligali ïmalo. Amalahilä, dilile muni salelo gäalimulo made amo nealahilä, selesaia mosöa amimu dilile nelebo daiala negesa namialo. Nelebo hedabi amo made maadesia ami negemalo. Amida, fa neloea ga madela made muloge, amase, gasiämoea made damuloge dialea.
LUK 12:34 Amala säse amoïe mida, sege dilile nelegei hedabi dibea amida, dilile bobahëla asigilo amoda, amimu diamolömelëla säi.
LUK 12:35 Yesuea aso, sähamu nea sähalea, Dilia daia fagulo salugalahilä, gamali wala gaula, daiala nefolamialo.
LUK 12:36 Hamoi hamolasilo dolöea, ilile dafidilo amo, dolö afädëa udia nease amoïe molö nasebea asi amo obëgëmäia, daiala beaha aligilo amo gadola, ilile dafidilo amo maalahilä, idi gai dugimola säseda, ilia e nogila digamäia, idi gai aabela dugimolöi bimolömelë.
LUK 12:37 Dafidilo amo maala, ïe hamoi hamolasilo amoli, süwia diala made, e beaha neëgi maaseda, ilia obeägïsa namolömelë. Na dilima dofä säla ïahago. Dolö dafidilo amea hamoi hamosalea gälo fagulo gälahilä, ilima sähalea, Dili molö muäia ïdulä, fifigimalola sälahilä, ilima molö mogela ïmolömelë.
LUK 12:38 E gasi mogogi maasege, sege yose gaalu maasege, ilia daiai diëgi, e maala beaseda, ilia edefademalä obeägïmolömelë.
LUK 12:39 Amase, dilia afädë gowe helësëmäia sähago. Mosö eedoea fa nelo gowe gala moholöla helësëi galebeda, fa neloea ïe mosö dagabola digamäia, fu made ïalabiomelë.
LUK 12:40 Dolöïe Malö moholö amoda, dilia gowe gala moholö gabula helësëi made neëgi, e moholö ameada, diliage daiaha namolö dialeala säi.
LUK 12:41 Amala säsebegi, Fidaea nabahalea, Dafidilo Geloi-e, dia ado besu säsegoda nilïmamu sähale, ma, sulubadelama sähalela nabi.
LUK 12:42 Amala nabasebegi, Dafidilo Geloia säla obëgësalea, Amai galëda, sigi aligilo asigi falagaseige, nulügäige neebe ameada, ïe dafidiloea ïe hamoi hamolasilo odoa sigi namiäia, ilile molö ïlo amo gadola, segeyo hï daiala negeifalïgi, mogela ïmäiala memeleloda, nowëdu.
LUK 12:43 Ïe dafidilo amo maalahilä beahalea, hamoi hamolasilo amea, hamoi amo gadola wäla hamosa neë beaseda, hamoi hamolasilo amo obeägïsa namolömelë.
LUK 12:44 Na dilima dofä sähago. Dafidilo amea hamoi hamolasilo amoma, ïe nelegei amo sulubadela sigi namialamolömelë.
LUK 12:45 Amaimo, hamoi hamolasilo amea asigiamu helësësalea, nïe dafidiloda, fodolo made moholö gabula helësëlahilä, ea udia dolö hamoi hamolasilo odoa nefolalebe amoli nufudadigi, molö ödäle naadigi, gagaolo ödäge nalahilä, gagaosa aligiseda,
LUK 12:46 ïe dafidilo segeyo gowegi, aoa gowegi moholöla helësëi made neëgi, e moholömelë. Maalahilä, ea hamoi hamolasilo amo neala nafademolöi nafadelasila, ado neadigilo neebe amolibalä namialamolömelë.
LUK 12:47 Hamoi hamolasilo amea, ïe dafidiloea gowe gadoi hamomalaila helësëlahilä gaso, oböla, säi amo gadola made daiala, made hamola neëgi, ïe dafidiloea e baialaea gelolafalï nufudala ïalalemolömelë.
LUK 12:48 Amase, hamoi hamolasiloea, ïe dafidilo amea hamomalai amo dawa made neebe amea, baialaea nufuäiala hamosa aligiseda, ïe dafidiloea e, aso, geleä nufulömelë. Amaimo, sulubadelaea yafie nii gaula neebe amolima, bu yafie obëgëla ïmalamolömelë. Amase, afädëïe naabogi yafie gausi amoma, dofä yafie baala ïa obëgëmalamolömelëla säi.
LUK 12:49 Yesuea ado aso, sähamu nea sähalea, Na naga föiwe gobemolö misi amo, hä, aabela söa fedala gobemäiala hamesamelë.
LUK 12:50 Amai gaso, ne hä, ödägi gemolö afädë galea. Amo aso, made hamola neada, nïe iso asigigi yöi neawe.
LUK 12:51 Diliada, na nagadaiawi dalulasimolö gaula misi gabula helësësale. Na dilima säla ïahago. Amala made. Udia dolö neala mogelasimolö misimelë.
LUK 12:52 Amaimo, walio wila asogodi gogi, eme afädë sosogo bia mosö afädëgi salea, oböla, amoli äudä eamu, ohodoa eamula hilimu mogelahilä, ohodoa amolia äudä amolebalä ado neala, amase, äudä amoleage ohodoa amolibalä ado nealalahilä, moge mogela namolömelë.
LUK 12:53 Amalahilä, eedoea efegebalä ado neadigi, efegeage eedobalä ado neadigisa namolömelë. Amase, emeage idiwibalä ado neadigi, idiwiage emebalä ado neadigi, amase, emea efege udiabalä ado neadigi, efege udiaeage egoamebalä ado neadigisa namolömelëla Yesuea säi.
LUK 12:54 Amala sälahilä, Yesuea udia dolö gegedoi nefolalo amolima bu sähalea, Eso digasebeamadila mu baidili maase amo bealahilä, walio sege digamolö gabula aabela säha neëgi, sege hä, dofä digalomelë.
LUK 12:55 Amase, eso maasido amoïe dafädimadila fo maaseda, hä, eso neëa hëgïmolö gabula säha neëgi, hä, dofä hëgïlomelë.
LUK 12:56 Asigi musügä negelola dili, mudaiage, nagadaiage, gomalä hamosebela melëlo amo dawadigi nea. Gaso, walio nebegoïe hamosebe amo, mi goweïe hamosebela, made dawa nefolalebegoda, edoïela säi.
LUK 12:57 Yesuea ado aso, sähamu nea sähalea, Dilia mogoi hedabi dibe amo hamomolöïe, dihili made memelesegoda edoïe.
LUK 12:58 Afädëa dibalä gudimolömelëla säla, di sigi gaula awäseda, gudilo mosöa ami, aso, made besela galala, idiafa awäha nea, ebalä ado adola aeala hamogimolödale helësëmalo. Amala made hamoseda, ea di gudi mogelo dolö neebea ami dusugala gaula awäla, gudi mogelo dolö amea, di dadi gaui dolö amolima gausila, dadi gaui dolö amolia, di galabaia mosöa ami ifosimolömelë.
LUK 12:59 Na dima sähago. Dia nafade hamoi amoïe, ilia dima muni hamomalai amo gadoi, bidi neaha maademäia, galabaia mosöa ifosi neamu, made moholömelëla säi.
LUK 13:1 Segeyo amo gala, dolö odoa Yesuea säsebea ami nefolalo amolia, Galili fii dolö odoaïe ema säla ï. Galili dolö amolia Godegali odala ï gobela ïaha nebegi, Gabena Bailadia ïe ami dolö nefolalo amolima nufualoi. Nufi amolile heale odala ïïe healebalä gegoai amoïe, ilia Yesuma säla ï.
LUK 13:2 Amala säla ïasebegi, Yesuea säla obëgësalea, Galili dolö amoli amo gadola së mai amoda, dilia helësësalea, ilia nafade hamoi amea, Galili udia dolö odoa amoli sulubadela baagila asila helësësale.
LUK 13:3 Ai, amala mademelë. Na dilima säla ïahago. Dilia asigi made besuseda, dili sulubadelage amo gadola baagomolömelë.
LUK 13:4 Amaimo, Sailoama mosö sedade olola fedai amo dagabola digahalea, nabülasi afädëïe odoai gödölasi nufudala baagoi amolia, nafade hamoi amea, udia dolö odoa Yalusaleme neebe amoli sulubadela baagila asila helësësalela nabi.
LUK 13:5 Ai, amala mademelë. Na dilima säla ïahago. Dilia asigi made besuseda, dili sulubadelage amo gadola baagomolömelëla säi.
LUK 13:6 Amalahilä, Yesuea ado besula sähalea, Dolö afädëa ïe gelebi hawa sagaia ami äfäeo hawa afädë sagasi nelo. Ea äfäeo amo gägä negei dibelela bea awähamelebe, gägä made negei melï.
LUK 13:7 Amai gabugi, ea sagaia hamoi hamolasilo amoma sähalea, Nabuö. Na gäheo i ohodoagi, äfäeo i wagadi egowea gägä negei walebelela bea maahamu nelo amo, walioge bea misi gaso, hä, gägä made negei gabumelë. Amai gabugi, dia i go abadigimalo. Mi edoïe ea memalä naga goïe säfe go nalï naha namolöla säi.
LUK 13:8 Amala säsebegi, dolö amea säla obëgësalea, Dafidilo, e aso, gäheo i afädë namiäia fisigisimo. Na goïe mia naga go dagabola digilahilä, sugua gao gaisa negedelämelë.
LUK 13:9 Gäheo i namolömadi gogi, hä, gägä negeseda, amo dofea. Gägä made negeseda, dia hä, abadigimäiamelëla säi.
LUK 13:10 Segeyo Sabada gafegi, Yesu e gedolo mosö afädëgi nogila digalahilä, säla olelesa nelo.
LUK 13:11 Udia afädëma mugabe nafadea ololasi amea, gäheo i nabülasi afädëïe odoai gödölasi, ïe domalo mogola aligimolö ulï sulo amo, gedolo mosöa ami sulo. Udia amo baagi gugi amea, e dofä mogola aligimolöi made sulo.
LUK 13:12 Yesuea udia amo beala e misialalahilä, ema sähalea, Udia-o, di oloi amoda, na hä, fisigäimelëla säi.
LUK 13:13 Amala sälahilä, ïe naaboea udia amoma diigi. Amala diigi amole, udia amo hä, mogola aligilahilä, Godeïe ëi gauia adaha nelo.
LUK 13:14 Amala hamosebegi, gedolo mosö beaha aligilo dolö amea, segeyo Sabada gafegi Yesuea udia amo wahi gabula habobalahilä, udia dolö sefolalo amolima sähalea, Segeyo gafeia dibe amoligida, hamoi hamolo. Segeyo amoligi nea, oloi difolalebe amoli wahimäia moholö dialea. Segeyo Sabada gafegi wahimäia, moholöi mademelëla säi.
LUK 13:15 Amala säsebegi, Dafidilo Geloia ema säla obëgësalea, Asigi musügä negelola dili, segeyo Sabada gafegida, dili sulubadelaea sugua gao mosöa awälahilä, dilile sugua gao galëge, sugua dögi galëge, gide begela negei dibe amo fisigäla, ödä muäia sigi gaula awäla, ifosilo madele.
LUK 13:16 Amaimo, udia goweda, Abalahamaïe idiwi afädë amo, Saidania e gäheo i nabülasi afädëïe odoai gödölasi nafodoi sulo. Na e nafodoi amo, segeyo Sabada gafegi, fisigämolö dialea madelela säi.
LUK 13:17 Ea amala säla obëgësebegi, ebalä ado nii nefolalo amoli nafadela hewai. Amai gaso, udia dolö nefolalo amolia, ea nelebo hedabi hamose amo sulubadelagi, obeägïsa nelo.
LUK 13:18 Amasebegi, Yesuea sähalea, Godea Beaha Maadela Sigi Neebe amo gowe gadoimelëla, na abodo gadoima oodo beala sämolödu.
LUK 13:19 Amoda masada gägä gadoi dialeamelë. Dolö afädëa masada gägä afädë gaula awälahilä, ea sagaia ami sagai. Masada amoda bäulahilä, i gadoi neëgi, haea sefolalebe amolia adomo amogi, gilifa hamola dilola säi.
LUK 13:20 Yesuea ado aso, sähamu nea, bu elö nabahalea, Godea Beaha Maadela Sigi Neebe amoda, na abodo gadoima oodo beala sämolödu.
LUK 13:21 Amoda beledi edelo yidi gadoi dialeamelë. Udia afädëa falodaia balawa edefade besigala salala, beledi edelo yidi amola gegoala naabolahilä, beledi sulubadela edela bolela fedalola säi.
LUK 13:22 Yesu e Yalusaleme aulo idi amogi awäha nea, gaamu dibeamadige, sege dibeamadige, säla olelesa nelo.
LUK 13:23 Dolö afädëa ema nabahalea, Dafidilo-o, Godeada dolö afädë afädëla damula moholölela nabi. Yesuea ilima säla obëgësalea,
LUK 13:24 Idi doga negei dedelei holöfalï amogi nogila digamolöïe, dilia gelola elëlisa namialo. Amoïe mida, na dilima säla ïahago. Udia dolö maleia nogila digamolöila asigila, nogila digaha gaso, ulïmolömelë.
LUK 13:25 Hobeala, mosö eedo amo nowela fedalahilä, mosö idi gaseda, dili maala, ifo baagido segea nea, idi galogi nufigisa nea, uuala sähalea, Dafidilo, nilï mudulä, idi gai dugimola sämolömelë. Gaso, ea dilima säla obëgësalea, Na dili dawa made. Dili guwila misilage, na dawa made neamelëla sämolömelë.
LUK 13:26 Amala säsegi, dilia säla obëgësalea, Nilïda dibalä molö ödäge naha aligilo amo, amase, diada nilïle idiafa nea, säla olelelomelëla sämolömelë.
LUK 13:27 Amala säsegi, ea bu elö sähalea, Na dili dawa made. Dili guwila misilage, na dawa made neamelë. Mala nafademu hamolo neebe dili sulubadela, nïe odagia namolö made. Moholöi mosöla sämolömelë.
LUK 13:28 Amala säsegi, dilia Abalahamage, Aisagage, Yeigabage, bea sälo ili sulubadelage, Godea Beaha Maadela Sigi Neebea ami neebe amo bealahilä, dili segea sogobala sadia gai nea, dilia dïisalea, bese ali nalëgësa namolömelë.
LUK 13:29 Amaimo, udia dolö eso maasidolage, eso digasidolage, agesu näiadodilage näiadodilage, mafula gegedolahilä, Godea Beaha Maadela Sigi Neebea ami molö naha samolömelë.
LUK 13:30 Nabuö. Walio udia dolö odoa hobeala nefolalebe amolida, oböla, dafidisalea, amase, dafidila nefolalebe amolida, hobeamolömelëla säi.
LUK 13:31 Amala säha neebe amo gaalu, Felesi dolö odoa Yesu neebea maalahilä sähalea, Dida segewe dïgïla, sege odoadi mosalo. Mida, Heledoea di nufulö helësësa nea wabu.
LUK 13:32 Amala säsebegi, Yesuea säla obëgësalea, Dili awälahilä, ilua ügülo goma gomalä säla ïmalo. Nabuö. Walio aiyo namolö amogida, neda mugabe fedai nefolalebe amoli nesila digi, oloi difolalebe amoli wahila digisa namolömelë. Amalahilä, segeyo osodagida, na hamoi hamoi amo, hä, wagamolömelë.
LUK 13:33 Amase, walio aiyo gahadala amogida, ne moholö dialea. Mida, bea sälo neebe amoda, sege odoadi nufudala made baagola, ilia e Yalusaleme amimu neëgi, nufudala baagomolö dialea.
LUK 13:34 Yalusaleme-e, Yalusaleme-e, bea sälo nefolalo amoli nufudala baagologe di. Amase, dolö digali fisiga wei amoli igia nufideloge di. Haea gagalugoea ïe malö augia hawa neala gafedela, musügä negelo amo gadola, segeyo aboläiagi gadola, na dïe malö goli neala gegedolasideläi gaso, dihili habosio.
LUK 13:35 Nabuö. Godea dilile mosö dïgïla awäsegi, mosö amo memalä diamolömelë. Na dilima sähago. Dilia ne bu elö made beala nelolahilä, dilia sähalea, Dafidilo Geloiïe ëigila maahago, Godea e neala obeägïlasimäiala säsolo amo gala, dilia ne bimolömelëla Yesuea säi.
LUK 14:1 Segeyo Sabada afädëgi, Yesu e Felesi ilile busa dolö afädëïe mosöa molö naa awäsebegi, udia dolö nefolalo amolia, ga madela sisila beaha nefolalo.
LUK 14:2 Dolö domalo gagalula nafadei afädë Yesuïe odagi gaalu ami sulo.
LUK 14:3 Dolö amo bealahilä, Yesuea mala säla negei amo oleleloge, Felesi dolöge sefolalo amolima nabahalea, Segeyo Sabada gafegi wahilasimolöda dofeale, ma, dofea madelela nabi.
LUK 14:4 Amala nabasebegi, ilia made säla obëgëi. Amasebegi, ea dolö amo neawela wahilahilä, e mosaloi.
LUK 14:5 Amala hamolahilä, ea ilima nabahalea, Dili sebe gogi afädëïe malö galëge, sugua gao galëge, segeyo Sabada gafegi ödä dögöigi digaseda, fodolofalï dusugala nimolölela nabi.
LUK 14:6 Amala nabasebegi, ilia säla obëgëmolöi made melï.
LUK 14:7 Yesuea beahamelebe, dolö odoa molö naa misi mumusogi digafiai amolia, filo hedabidaiamu fimolö memelesebegi, ea ilima ado besu afädë gowe säla ï.
LUK 14:8 Dolö afädëa udia neahalea, molö molö misialola säsegi awäseda, filo hedabidaiamu fimabio. Di gadoi made, ilia dolö ëi sälo memelei neebe amoge misialaloea.
LUK 14:9 Amala misialai galëda, dige, dolö ëi sälo amoge welo amohï maalahilä, dima säla ïahalea, Filo di sebegoda, dolö gowegali ïmola säsegi, di nafadela hewalahilä, baagidofalï fila digamolömelë.
LUK 14:10 Amo gadola made, dolö afädëa di misialola wesegi awäseda, dida baagido samialo. Dia amala hamoseda, dolö di welo amohï maalahilä dima sähalea, Ne damelë-e, di filo hedabidaia guwi fimolö misiëla sämolömelë. Ea amala säse ameada, udia dolö molö naha sefolalebe amoli sulubadelaïe siigi, di ilibialasimolömelë.
LUK 14:11 Udia dolö hili ili ilibialo amoli sulubadela neala nagadaialasisalea, amase, afädë hï e nagadaialo neebe amoda, ilibialasimolömelëla säi.
LUK 14:12 Amala sälahilä, Yesuea dolö molö molö misialola e wei amoma sähalea, Dia esoa galëge, deadi galëge, molö afädë giaseda, di damelëge, didooge, di sosogoge, amase, muni gaui dibalä sebe amolige, molö molö misialola wemabio. Hobeala, amo dabe ilia dili molö molö misialola säloea. Dabe amala säse ameada, dia hamoi amoïe bidi nii aguimelë.
LUK 14:13 Hä, dia molö afädë giaseda, dolö busadäoi sefolalebe amolige, domalo nafadei sefolalebe amolige, emo nafadei sefolalebe amolige, amase, si golai sefolalebe amolige, molö molö misialola weseda,
LUK 14:14 dia obeägïsa namolömelë. Dolö amoli gadoi nefolalebe amoliada, dia molö giala ï amo dabe made ïa obëgëmolö gaso, hobeala Godea udia dolö hedabi hamolo baagoi amoli nowelasisolo amo gala, bidi ïmolömelëla säi.
LUK 14:15 Yesubalä molö naha sefolalo amoligi, afädëa ado amo nabalahilä, Yesuma sähalea, Udia dolö Godea Beaha Maadela Sigi Neebea ami nogila digala, molö naha samolö amoliada, obeägïmolömelëla säi.
LUK 14:16 Amala säsebegi, Yesuea säla obëgësalea, Dolö afädëa molö edefade giamolöla helësëlahilä, molö amo molö, ea udia dolö yafie misialola hobe säi.
LUK 14:17 Hä, dolö amea molö molö segeyo daiai amo besela galasebegi, ea ïe hamoi hamolasilo amoma, dolö dafidi hobe säi amoli bea mosalolahilä, dia ilima gomalä sämalo. Nelebo sulubadela daiai dibe ameada, dili misiëla sämalola säi.
LUK 14:18 Amala säsebegi, udia dolö amoli sulubadelaea, Nilïda made moholö gabumelëla säi. Afädëa sähalea, Neda sagai nofela nii dibe amo beaha namolö dibe ameada, asigii gabu, ne made moholömelëla säila sämaloi.
LUK 14:19 Elöea sähalea, Neda sugua gao nabülasi waliomu nealahilä, ne amo oodo beala beaha namolö awäse weada, asigii gabu, ne made moholömelëla säila sämaloi.
LUK 14:20 Amase, elöea sähalea, Neda, hä, walio wäla udia nii ameada, ne moholö ulï gabiola säi.
LUK 14:21 Amala säla obëgësebegi, hamoi hamolasilo amo obëgëlahilä, ea ado amoli ïe dafidilo amoma säla ï. Amala säla ïasebegi, ïe dafidilo amea ado amo nabala, mihalälahilä, ïe hamoi hamolasilo amoma sähalea, Di fodolofalï awäla, gaamugi aulo idi edefade dibe amoligige, amase, idi holöfalïgi aulo dibe amoligige awälahilä, dolö busadäoi sefolalebe amolige, domalo nafadei sefolalebe amolige, emo nafadei sefolalebe amolige, amase, si golai sefolalebe amolige, dia sigi maala, nïe mosöa nogila digamolö misialola säi.
LUK 14:22 Amala säsebegi, hamoi hamolasilo amo fodolofalï awäla, obëgëlahilä sähalea, Dafidilo-o, dia säi amo gadola hamosa maadei gaso, mosö, aso, fu dibemelëla säi.
LUK 14:23 Amala säsebegi, dafidilo amea hamoi hamolasilo amoma sähalea, Nïe mosö nobamäiaïe, di gaamu dïgïla segea awäla, aulo idi edefade dibe amoligige, sagai mosöa aulo idi holöfalï amoligige awälahilä, udia dolö amolima misiëla gelola sämalola säi.
LUK 14:24 Na dilima säla ïahago. Na dafidi hobe säi dolö amoligi, nïe molö daiai amogi, afädëa diigila, molö made gabumelëla säila Yesuea säi.
LUK 14:25 Segeyo afädëgi, udia dolö yafie Yesu bëgëla maaha dibegi, ea ilima besuia imogolahilä sähalea,
LUK 14:26 Afädë ne neebea maase amea, ïe eedole emelemage, ïe udia malölalimage, ïe edoole elefilemage, amase, hïle namolöfalï amomage, made habobaseda, eda nïe bëgëla aulo namolöi mademelë.
LUK 14:27 Amase, afädëa hïle i fügäi neala gaula, ne awäsewe gadola bëgëla made maasege, nïe bëgëla aulo namolöi mademelë.
LUK 14:28 Amaimo, dili nebegogi, afädëa sagai idihë namolöïe mosö, holöbö ilibia ulimolö helësëseda, na mosö olala agumolöïe muni dofea dialealedula helësëlahilä, mosö we muni gowe gadolaeada ulimolö gabula dafididale helësëmolö madele.
LUK 14:29 Ea dafidi amala made helësëla, mosö igau sagala, sedade olase amo made aguseda, udia dolö amo bease amoli sulubadelaea, e gadiabola
LUK 14:30 sähalea, Dolö gowea mosö oledelä mi gäwi gaso, agumolöi made gabula sämolömelë.
LUK 14:31 Amase, beaha aligilo gini afädëa, gini elöbalä nudula moholö neëda, ea dafidi salea helësësalea, nïe ami dausini nabülasi afädëada, gini elö amoïe ami dausini nabülasi äudä sigi maase amolibalä nudula gaalumolöiledula helësëmolö madele.
LUK 14:32 Helësëla beahamelële, dofea made gabula helësëseda, aso, wagadi made maaha neëgi, nudula made, fisila dalumolöïe, dolö odoaea aeala ado sämolö mosalala sälomelë.
LUK 14:33 Amo gadola, dili neebe gogi, afädëa ïe nelebo dibe amoli sulubadela made fisisa maadeseda, nïe bëgëla aulo namolöi mademelëla säi.
LUK 14:34 Yesuea ado aso, sähamu nea sähalea, Ëbïda hedabi galea. Gaso, ëbï hëdälo amo hogosa heleseda, edoea bu hëdälasimolöi gabu.
LUK 14:35 Ëbï amo gadoiada, molö sagai hedabola fedamäia, ugila negemolöi mademelë. Amase, nilïa sagaia ami sugua gao gaisa gedola negemolöi made. Fisimolö dialea. Afädëa gëhea nabulöi galëda, hä, nabualola säi.
LUK 15:1 Segeyo afädëgi, dagisi muni neloge, nafade hamologe, Yesu neebea ga madela nea, ea ado säse amo nabulö misi.
LUK 15:2 Gaso, Felesi dolöle mala dawadigi dolölea, habobala sëdäwala sähalea, Dolö egoweada nafade hamolo neebe amolibalä damelë hamologe, ilibalä molö naha aligiloge, neamelëla säi.
LUK 15:3 Amala säsebegi, Yesuea ilima ado besu gowe säla ï.
LUK 15:4 Dili afädëa sugua sibi hädali afädë foi nelo amoligi, afädë dabadigi galëda, eada sugua sibi nabülasi sëgëlasiïe odoai sëgëlasi amolida, giisi naha namiäia ifosilahilä, afädë dabadigi amo bimolöila, awäla hogosa nea, giso, beagolelo madele.
LUK 15:5 Ea hä, beagolelahilä, obeägïla, hï sogobala gïdädaia gaula
LUK 15:6 mosöa obëgëlo. Obëgëlahilä, e damelëla ilige, ea mosö ga mamadela sefolalebe amolige, wela gegedolahilä sähalea, Nïe sugua sibi afädë dabadigi amo, hä, beagolei amogi, obeägïsa neawe. Nihïlïgïla gaalu obeägïdila sälomelë.
LUK 15:7 Amo gadola hamolo amoïe, na dilima säla ïahago. Udia dolö nabülasi sëgëlasiïe odoai sëgëlasi asigi mogoi neebe amoli, bu asigi besumolö made neëgi, afädëa nafade hamosa nelo amo asigi besuseda, selesaia mosöa hïdo elöla obeägïmolömelëla säla ï.
LUK 15:8 Yesuea ado aso, sähamu nea sähalea, Udia afädëa muni giwi nabülasi gaula nea, giwi afädë mosöa ami dabadigiseda, ea hä, gele wala gaulahilä, bimolöila mosöa gëgelë doala, geleä hedabola hogosa nea, giso, beagolelo madele.
LUK 15:9 Ea muni amo beagolelahilä, e damelëla ilige, ea mosö ga mamadela sefolalebe amolige, wela gegedolahilä sähalea, Nïe muni giwi afädë dabadigi amo, hä, beagolei amogi, obeägïsa neawe. Nihïlïgïla gaalu obeägïdila sälomelë.
LUK 15:10 Amo gadola hamolo amoïe, na dilima säla ïahago. Afädëa nafade hamosa nelo amo asigi besuseda, Godeïe selesaia fii neebe amolia obeägïlomelëla säla ï.
LUK 15:11 Yesuea ado aso, sähamu nea sähalea, Dolö afädëïe dolö malö äudä sulo.
LUK 15:12 Amala salea, malö üfï amea eedoma sähalea, Naado, munige, nelebo odoage, nedoo halïma mogela ïmolö dibe gogi, nïe amo nihïma mogela ïmola säi. Amala säsebegi, eedo amea sulubadela helema mogela ï.
LUK 15:13 Amala hamola, segeyo ede made nelolahilä, üfï amea, ïe nelegei amo odoama bidi neaha nelolahilä, muni amo gaula, sege wagadi made, gädili elögi namolö bahïla asi. Segea ami nea, nelebo galone hamomolöi made amo hamosalea, ea muni gauia amo waeasesa maadei.
LUK 15:14 Amalahilä, muni gaui amo maadei amoleda, segea ami sïdë i edefade gelola besela galai. Amo gala, malö amea nelebo afädë made gaui nelo.
LUK 15:15 Amala nebegi, segea ami fii dolö afädëa, ïe hamoi hamomolöïe, yala isogi dia nïe sugua sigi namialai.
LUK 15:16 Amala sigi nea, sugua amolia falaga mai gafodo dibe amo beala hamelahilä, bolemäia neala nuduläla helësëi. Gaso, afädëa e molö made ï.
LUK 15:17 Amalahilä, hobeala asigi negela obëgësebegi, ea sähalea, Nïe naadoïe hamoi hamolo nefolalebe amolida, molö yafie naha diëgi, ne molö made naala wi nea, hä, dofä baagomolö gabu.
LUK 15:18 Gamelä, neda naado neebea obëgëla awäla, gomalä sämolö. Naado-o, na Gode selesaia mosöa neebe alima, nafade hamoimelë.
LUK 15:19 Hä, walio neda hedabi made. Ne dïe malöla sämolöi made neawe. Dïe hamoi hamolo amolima hamosa neebe go gadola, nemage hamomalola sämolöla säi.
LUK 15:20 Amala sälahilä, e nowela eedo neebea awäha nelo. E aso, eedo neebea made besela galala, holöbö wagadi made maaha nebegi, eedoea e beala, ïe iso asigia bobasëlahilä, baluluia awäla, neawela mimi.
LUK 15:21 Amala hamosebegi, efege amea sähalea, Naado-o, na Gode selesaia mosöa neebe amo alima, nafade hamoimelë. Hä, walio neda hedabi made. Ne dïe malöla sämolöi made neawemelëla säi.
LUK 15:22 Amala säsebegi, gaso eedoea ïe hamoi hamolasilo amolima sähalea, Dilia nïe fagulo didiga salugalo hedabifalï amo, fodolofalï nea awälahilä, egali gäsimalo. Amalahilä, ïe naabo sesafogi, ulini salugasila, emo usililoge salugasimalo.
LUK 15:23 Amalahilä, sugua gao üdïli säfei neebe amo, dilia sigi gaula maala, nufualo. Nilï, hä, molö naala obeägïdi.
LUK 15:24 Mida, nïe malö go baagoi gaso, walio namolö bu obëgëla misi neebe amogige, e dabadigi gaso, nilïa beagolei amogigela säi. Amala säsebegi, ilia obeägïla molö edefademalä giala mai.
LUK 15:25 Amo giala nase amo gaalu, malö abulümi amoda sagaia nelo. Hobeala, e mosöa obëgësalea, mosö ga madela nea nabelebe, mosöa ami udia dolöea ilibo gaula digi, gisalï gaula, sigola digisalea, goba fedase amo nabi.
LUK 15:26 Amala hamosebe amo nabala, ea hamoi hamolasilo amoligi, afädë welahilä nabahalea, Ilia goda edo hamosebela nabi.
LUK 15:27 Hamoi hamolasilo amea säla obëgësalea, Didoo amo, hä, obëgëla misi amogi, diadoea, sugua gao üdïli säfei nelo amo nufualai. Mida, ïe malö amo, made baagola, obëgëla misi amogi.
LUK 15:28 Amo nabala, malö abulümi amea mihalälahilä, e mosöa nogila digamolö helësëi made nelo. Amala hamosebegi, eedo e segea doadigila fedalahilä, abulümi amo nogila digamäia, ema aeai ado odoa säla ï.
LUK 15:29 Gaso, ea eedoma säla obëgësalea, Ne gäheo i yafie dibalä nea, dïe hamoi baagi sëi, memalä galabaia hamoi gadoi hamolasisa nea, dïe ado neadigila made nelo. Amai gaso, dia segeyo afädëgi, na ne damelë neebe amolibalä obeägïmäia, sugua meme üdïli afädë made ïlo amo, dihï helësëmo.
LUK 15:30 Dïe malö go idigi nawela susugu hamolo udia amoligali, dïe muni ïala waeasesa maadei amo obëgëla maasebegi, dia sugua gao üdïli säfei nelo amo, nufuda negei gabio.
LUK 15:31 Amala säsebegi, ïe eedo amea säla obëgësalea, Nïe malö-o, dida segeyo sulubadelagi halïgïla nelo. Nelebo nïe dibe amo sulubadela, dïe dilo amoda.
LUK 15:32 Gaso, dïe didoo amo baagoi gaso, walio namolö bu obëgëla misi neebe amogige, e dabadigi gaso, nilïa beagolei amogige, walioda, nilïle iso asigia, hïdo elöla haeafula obeägïmolö dialeala säi.
LUK 16:1 Yesuea ïe bëgëla aulo amolima sähalea, Nelegei yafie negelo dafidilo dolö afädë nelo. Dolö afädëa dafidilo amoïe nelegei amoli sigi nebegi, dolö odoa dafidilo neebea ami maalahilä, ïe nelebo sigi aligilo amea nafade hamoimelëla sämolöïe, dafidiloma sähalea, Dïe nelebo sigi aligilo amea, dïe muni amoda, waeasese melïmelëla säla ï.
LUK 16:2 Amala säla ï amo nabalahilä, nelegei yafie negelo dafidilo amea, ïe nelebo sigi aligilo amo misialola welahilä, ema nabahalea, Dïe sedalu afädë na nabi amoda, abilia hamoi. Nïe nelebo dia sigi neebe amoli hedabola nidelahilä, dëdëla negesa maademolö mosalo. Dida nïe nelebo sigi aligilo namolö mademelëla säi.
LUK 16:3 Amala säsebegi, nelebo sigi aligilo amea hïdo sähalea, Nïe dafidilo ameada, ïe nelebo sigi nelo amo dïgïla mosalola, hä, säi amo gabu. Amai na edo hamomolödu. Na odoaïe hamoi hamolasila, naga dagabomolö amoge, geloi maade gabu. Amase, odoama muni ëdëgëmolö amoge, ne hewai gabu.
LUK 16:4 Wae! Na hamomolö amo helësësawe. Nïe dafidilo neebe amea, na nelebo beaha neebewe haila fisiseda, na gowe gadoi hamomolöla helësësewe hamoseda, ne damelë neebe amolia, neda ilia mosöa misiëla sämolöla helësësala säi.
LUK 16:5 Amala helësëlahilä, ea ïe dafidilo amoma bidi negelo dolö amoli, hïdo hïdola wela mofiamalolahilä, dafidi misi amomadale nabahalea, Dia nïe busa dolöbalä bidi aboläia negei dialeala nabi.
LUK 16:6 Ea säla obëgësalea, Olibe gägäïe weli ödä i edefadegi usi hädali afädë bidi negei neamelëla säi. Amala säsebegi, sigi aligilo amea dolö amoma sähalea, Dia bidi negei amoïe beba amoda gomelë. Dia beba go nealahilä, hä, fodolofalï fia idogola salea, nabülasi bia dëdëmola säi.
LUK 16:7 Amala sälahilä, ea dolö elö amoma nabahalea, Dia bidi aboläia negei dialeala nabi. Amala nabasebegi, elö amea säla obëgësalea, Eladi gadoi widi sali adu dausini afädë bidi negeimelëla säi. Amala säsebegi, sigi aligilo amea ema sähalea, Dia bidi negei amoïe beba amoda gomelë. Dia beba go nealahilä, hä, hädali gödölasi dëdëmola säi.
LUK 16:8 Hobeala, dafidilo amea sigi aligilo mogoi made, asigi halowei amoma sähalea, Dia hobeala edo hamomolö amo hedabola helësëla, amala hamoi goda, hedabola hamoi gabumelëla säi. Nagadaia namolöïe malö amolia, yo digaloïe malö amolia hamolo amo gadoi made, baagila awäla, odoa hili ili gadoi helësëla hamolo amoda, hedabola helësëla hamolomelë.
LUK 16:9 Na dilima säla ïahago. Nagadaiaïe muni dibe ameada, udia dolö odoa neebe amoli damelë hamomalo. Amala hamosa neëgi, munia hamoi hamolo amo wagasolo amo gala, Godea namolöi namolö dibea ami, namolö misiëla sämolömelë.
LUK 16:10 Afädëa nelebo holöfalï dibe amo, hedabola sigi aligiseda, nelebo edefade dibe amoge, hedabola sigi namolömelë. Amase, afädëa nelebo holöfalï dibe amo, mala mogola made sigi aligiseda, nelebo edefade dibe amoge, mala mogola made sigi namolömelë.
LUK 16:11 Amai gabugi, asigi falagasei made nea, nagadaiaïe muni amo, hedabola made sigi aligiseda, amai nelebo dofä hedabi dibe amo, dilia sigi namiäia, nowëa dilile naabogi gausimolödu.
LUK 16:12 Amaimo, dilia odoaïe nelegei dibe amo asigi falagasei made nea, hedabola made sigi aligiseda, amai dilile nelegeida, nowëa ïmolödu.
LUK 16:13 Hamoi hamolasilo afädëa, dafidilo äudäïe galabaia hamoi gadoi hamolasimolö ulïmelë. Ea elö amoma bimolö habobahalea, elö amo boba hamomolömelë. Ma, elö amo hedabola ugila negesaleada, oböla, elö amo memalä gabula helësëmolömelë. Dilia Godeïege, muniïege, helegelaïe galabaia hamoi gadoi hamolasimolö ulïmelëla Yesuea säla ï.
LUK 16:14 Felesi dolö muni boba hamolo amolia, Yesuea ado säi amo sulubadela nabalahilä, e gadiabola säha dilo.
LUK 16:15 Amalebegi, Yesuea ilima sähalea, Diliada udia dolö odoa neebe amolia, dili asigi mogoi neebela helësëmäiala hamelo neago gaso, dilile iso asigida, Godea dawa nea. Udia dolöea nelebo hedabi edefade gabula helësëlo amoda, Godeïe sidaia nafadefalï nafade dialeamelë.
LUK 16:16 Mosese nebegi, Ado säla negei dibe amoge, bea sälo ilia ado säla negei dibe amoge, säla ïaha neloa amila maala, Yone neebea besela galai. Amase, Yone misia amila mi gäwilahilä, Godea Beaha Maadela Sigi Neebe amoïe, Ado Mala Hedabi säla ïaha nea. Udia dolö sulubadelaea gelolahilä, ami digaha neamelë.
LUK 16:17 Amaimo, muge, naga föige, hogosa helemolöi dialea gaso, Mosese nebegi, Ado säla negei dibe amogi, bea sälo ilia ado säla negei dibe amogige, ado holöfalïïe dudumu afädë, made hogosa helemolömelëla säi.
LUK 16:18 Yesuea ado aso, sähamu nea sähalea, Dolö afädëa ïe udia nii amo fisila, udia elö neaseda, ea udia amo fa nimolömelë. Amase, dolö afädëa udia nii fisi amo neaseda, amoge ea fa nimolömelëla säi.
LUK 16:19 Yesuea ado aso, sähamu nea sähalea, Nelegei yafie negelo dafidilo dolö afädë sulo. Dolö amea fagulo hogale uii didiga salugaloge, fagulo hedabi hïdo elöi muni edefadea nii amoge, salugalo neada, segeyo sulubadelagi obeägïla molö hedabifalï amomu naha nelo.
LUK 16:20 Amase, busadäoi dolö afädëge sulo. Amoïe ëida Elasalusi. Ïe domalo sulubadela äyomu aligisa maadei sulo. Odoaea e sogobala gaula, nelegei yafie negelo dafidilo dolö amoïe mosö idi galo mia ami, ifosisa aligilo.
LUK 16:21 Busadäoi ameada, nelegei negelo dolö amea molö nahalea, auli hawa dao digase amo molöila gelola helësësa filo. Ügülo amoli maala, ïe domalogi äyo aligi amoli nobaha aligilo.
LUK 16:22 Hobeala, busadäoi amo baagosebegi, selesaia fii ilia e gaula awäla, Abalahama neebea ami ifosi. Nelegei yafie negelo dafidilo dolö amoge baagosebegi, ilia e dögöla negei.
LUK 16:23 Eda heli segea ami së edefademalä naha nea, sida adogola beahamelebe, Abalahama mia made neebe, amobalä Elasalusige neebe melï.
LUK 16:24 Amala neebe amo bealahilä, ea uuala säia adogosalea, Naado Abalahama-o, ne nulo gobeia wi nea, së edefade naha neebe weada, dia ne bobasëla, Elasalusiïe naabo sögö ödägi gelahilä, nïe elï hisulasila diigila misialala sämola säi.
LUK 16:25 Amala säsebegi, Abalahamaea säla obëgësalea, Nïe malö-o, di made baagola nea, dida nelebo sulubadela hedabigimu nelo. Elasalusi eda nelebo sulubadela nafadegimu nelo amo, helësëmo. Gaso, walio sege wegi neada, e bobasëla aealasisa nebegida, dida hä, së edefade naha nebego.
LUK 16:26 Amase elöda, odoaea nilï neebea wila, dili neebea idogoi digadeläla hamese amoli digamolö ulïmäia, nilï mogogi nofe geloi edefade negei dialeamelë. Amo gadola, dili neebea amilage, nilï neebea wi fedamolö ulï neamelëla säi.
LUK 16:27 Amala säsebegi, dolö amea säla obëgësalea, Hä, amai galëda, naado Abalahama-o. Na dima gelola afädë nabahago. Dia Elasalusi e naadoea mosöa fisiga idogomo.
LUK 16:28 Mida, nïe nedoolali bia nea. Amolige së nülo dibea wi asiala muloea, ea ilima gelola säla ïmalamalola säi.
LUK 16:29 Amala säsebegi, Abalahamaea säla obëgësalea, Ilida Mosesea ado säi dëdëla negei dibe amoge, bea sälo ilia ado säi dëdëla negei dibe amoge, galea. Ilida ilile ado amo nabuäiala säi.
LUK 16:30 Amala säsebegi, dolö amea sähalea, Ai, Naado Abalahama-o. Afädë baagoia amila nowela, ili neebea awäseda, ili asigi besumolömelëla säi.
LUK 16:31 Abalahamaea sähalea, Ilia Mosesea Ado säi dëdëla negei dibe amoge, bea sälo ilia ado säi dëdëla negei dibe amoge, made nabaseda, afädë baagoia amila nowela awäla säse amo nabalage, dofäla made helësëmolöla säimelëla Yesuea säi.
LUK 17:1 Yesuea ïe bëgëla aulo amolima sähalea, Udia dolöea asiala hamomäia, ili neala digalasimolö nelebo elö elöla, dofä moholö gaso, nelebo amoli misiäia, dolö doga negelo amoda, asigii gabu.
LUK 17:2 Dolö amea malö holöbö gowe gadoi nefolalebe goweligi, afädë neala digalasiseda, ëfëa igi edefademalägi begela, bidi näiadoea ïe muugia begelalahilä, ödä duhulugi sadia idogoseda, ïe hedabida amomelë.
LUK 17:3 Amala hamoloea, dihili dili hedabola idihë namialo. Dïe didoo afädëa nafade hamoseda, nemomalo. Amogi, e bu asigi besuseda, nafade hamoi amo säla made, fisimalo.
LUK 17:4 Amaimo, segeyo afädë amogimu, dima gifalädalïala nafade hamolahilä, gifalädalïala asigi besula, di neebea maalahilä, na dima nafade hamoimelëla säseda, ea nafade hamoi amo, dia säla made, fisimalo.
LUK 17:5 Abosolo dolö ilia Dafidilo Geloima sähalea, Nilïa asigi afädë negei neebewe, dia neala edelasimalola säi.
LUK 17:6 Amala säsebegi, Dafidilo Geloia ilima säla obëgësalea, Dilia asigi afädë negeigo, masada gägä holöfalï amo gadoi negei nea galëda, dilia hä, i neebe gowema sähalea, Dihï soomo aala gaula awäla, ödä duhulu dibea ami sagala namiëla säseda, dia säse amo nabala hamomolömelëla säi.
LUK 17:7 Yesuea ado aso, sähamu nea sähalea, Dili nebegogi afädëa, ïe hamoi hamolasilo neebe amea sagai sagamolöïe naga dagabosa nelo galëge, sugua sibi sigi nelo galëge, e mosöa obëgëla maaha neëgi wäla, ea sähalea, Di fodolofalï maalahilä, molö molöïe samiëla sämolöle.
LUK 17:8 Amala made. Ea hamoi hamolasilo amoma sähalea, Nïe molö giala daiamalo. Amalahilä, di fagulo afädë neala bulula, ne molö molö amo deala gaula maala, na molö ödäle nase amo gaalu, dia sigi beaha namialo. Amala hamolahilä, hobealada, dihïdi mualola sälo madele.
LUK 17:9 Oböla, hamoi hamolasilo amea säi amo gadola hamosa maadeseda, ïe dafidilo amea ema nesege, hedabola hamoi gabula sämolöle. Ai, amala made.
LUK 17:10 Dihili dilige amo gadoi wäla neebela helësëla, dilia hamomalola säi amo gadola hamosa maadelahilä, gomalä sämalo. Nilïda hamoi hamolasilo dofea mademelë. Nilïa hamomolö dibe amomu hamoimelëla sämolö dialeala, Yesuea säi.
LUK 17:11 Yesu e Yalusaleme moholö awähalea, Disiligi Samelia Galilile mogogi ami awäha nelo.
LUK 17:12 E gaamu afädë dibea ami awäla besela galaha nebegi, dolö gudubu hamoi nabülasi idiafa holöbö wagadi madela nea,
LUK 17:13 gelola uuala sähalea, Dafidilo Yesu-o, dia nilï bobasëmola säi.
LUK 17:14 Amala säsebegi, Yesuea ili bealahilä sähalea, Dili gobela ïlo amoli neebea awäla, dilile domalo go olemolö mosalola säi. Amo nabala, ili idiafa awäha dibegi, ilile gudubu hamoi amo wahisa maadei.
LUK 17:15 Iligi dolö afädëa beahamelebe, ema gudubu hamoi dilo amo wahi amo bealahilä, gelola uuala Godeïe ëi gauia adogola, bu obëgëi.
LUK 17:16 Obëgëlahilä, ea Yesu mia, gumusula dia digalahilä nesegei. Eda Samelia dolö.
LUK 17:17 Yesuea dolö amo bealahilä sähalea, Dolö nabülasi amoli hulu wahisa maadei madele. Amai, sëgëlasi amolida, abilisio.
LUK 17:18 Dolö odoa obëgëla maalahilä, Godeïe ëi gauia adala made, dolö fii elö goweamu, amala hamosalela nabi.
LUK 17:19 Amala nabalahilä, dolö amoma sähalea, Di, hä, nowela mosö. Dihï asigi afädë negei amea di hä, wahigomelëla säi.
LUK 17:20 Segeyo afädëgi, Felesi dolö nefolalo amolia Yesuma nabahalea, Godea Beaha Maadela Sigi Neebe amoda, abola moholö gabula nabi. Amala nabasebegi, Yesuea ilima säla obëgësalea, Godea Beaha Maadela Sigi Neebe amo, nofe elöi siia melemolöibaläda, made moholömelë.
LUK 17:21 Afädëa sähalea, Bimo, gui neebe, ma, gagowei neebela sämolöi mademelë. Nabuö. Mida, Godea Beaha Maadela Sigi Neebe amoda, hä, dili neebea gui misi dialeamelëla säi.
LUK 17:22 Amala sälahilä, ïe bëgëla aulo amolima sähalea, Segeyo afädë besela galamolö amogi, dilia Dolöïe Malö amoïe segeyo afädë gelola bimolöila helësëmolö gaso, made bimolömelë.
LUK 17:23 Odoaea dilima sähalea, Bimo, gagowei neebela säsege, ma, bimo, gui neebela säsege, dilia ili bëgëla, bea mosabio.
LUK 17:24 Mida, sege yabagelesegi, mu giwi sulubadelagi yo digaha maadelo amo gadolada, Dolöïe Malö amo, ïe segeyogi amo gadoi wäla maala namolömelë.
LUK 17:25 Amamolö gaso, e dafidi edefademalä së elö elöla nasegi, udia dolö walio segeyo nefolalebe welia, e baagi ïmolö dialeamelë.
LUK 17:26 Noaïe segeyogi hamoi amo gadola, Dolöïe Malö amoïe segeyogige, amo gadola wäla hamomolömelë.
LUK 17:27 Udia dolö nefolalo amolia, molö ödä nadigi, udia neadigi, dolö fila awäla digisa nebegi, Noa eda ödä sibi isogi fila fedamolö segeyo amo besela galaimelë. Amala hamosa nebegi, ödä bëi edefade maalahilä, udia dolö sulubadela ödäea naha maadei.
LUK 17:28 Amase, Olodeïe segeyogige, amo gadola wäla hamosa nelo. Udia dolö nefolalo amolia, molö ödä nadigi, nelebo neadigi, odoaea nimäia nelebo negela digi, sagai sagala digi, mosö oladigisa nelo.
LUK 17:29 Olode e Sodomo gaamu amo dïgïla awäsolo segeyo amo gala, mudaiala nulo söabalä, igi gadoi abüai, ëida saloba, neëi amola sadia idogoi amea, ili sulubadela nafadesa maadei.
LUK 17:30 Dolöïe Malö ulufadigimolö segeyo amogige, amo gadola wäla hamosa namolömelë.
LUK 17:31 Segeyo amo gala, dolö mosö daiowa sebe amea, ïe nelegei mumusogi dibe amo nea digamabio. Amo gadola wäla, dolö sagaia neebe ameage, nelebo afädë hï mosöa nea obëgëmabio.
LUK 17:32 Dilia Olodeïe udia amo helësëla obëgëmalo.
LUK 17:33 Afädëa hïle namolö amo gaula fëdöla aligimolö helësëseda, ïe namolö amo hogosa helemolömelë. Gaso, afädëa hïle namolö amo fisiseda, ea ïe namolö amo gaula namolömelë.
LUK 17:34 Na dilima säla ïahago. Amo gala, gasigi dolö äudä sogobala adi diëgi, elö amo neahalea, elö amo dïgïla moholömelë.
LUK 17:35 Udia äudä heledo wahalo däilaha neëgi, elö amo neahalea, elö amo dïgïla moholömelëla säi.
LUK 17:37 Amala säi amo nabalahilä, ilia ema nabahalea, Dafidilo Geloi-e, abidi hamomolödula nabi. Amalebe, Yesuea säla obëgësalea, Baagoi domalo dibea ami, haea säsalï gadoi mafula gegedomolömelëla säi.
LUK 18:1 Yesuea ïe bëgëla aulo amolia, habola made, segeyo sulubadelagi Godema adosa namiäiaïe olelesalea, ado besu afädë säla ï.
LUK 18:2 Ea sähalea, Gaamu afädëgi mogelo dolö afädë sulo ameada, Godebalä bedälo madege, udia dolö helësëlo madege sulo.
LUK 18:3 Aso, gaamu amogimu udia didalo afädëge sulo. Ameada, segeyo sulubadelagi, gudi mogelo neebea ami awähamu nea, ema sähalea, Nïe ado nii neebe amea, ne neala yölasisa neebe amoïe, dia ne ugila negela gudi hamogila mogolasimola säla afufusamu aligilo sulo.
LUK 18:4 Amala afufusamu nebegi, mogelo dolö amea segeyo yafiegi, üla made, auausa sulo. Gasoda, oböla, hobeala hïdomu sähalea, Nada Godebaläge bedälo made, udia dolöge helësëlo made amo,
LUK 18:5 udia didalo gowea segeyo sulubadelagi, nebalä nalï egesamu neebe goweada, ïe yöi dibe amo na fädäla beala, hä, mogola hamogilasidelä. Ea segeyo sulubadelagi ne neebea maahamu nea, ne neala yölasilasiloea sähala säi.
LUK 18:6 Dafidilo Geloia ado aso, sähamu nea sähalea, Mogelo dolö mogoi made amea, ado säi amo nabualo.
LUK 18:7 Amaimo, Godea ïe udia dolö hï memelei nefolalebe amolia, eso sulubadelagige, gasi sulubadelagige, ema uuala sähamu aligise amolima, mogola mogelasimäia, ea made ugila negemolöle. Ma, asomelëla sämolöle.
LUK 18:8 Na dilima säla ïahago. Ea ili aabela mogola mogelasimäia, ugila negemolömelë. Amamolö gaso, Dolöïe Malö maalahilä, nagadaia wi udia dolö asigi afädë negei nefolalebe bimolölela nabi.
LUK 18:9 Udia dolö odoaea helësësalea, nilïda asigi mogoi nea, odoa nefolalebe amoli sulubadelada, holöbö gidogola helësëlo amolima, Yesuea ado besula gowe säla ï.
LUK 18:10 Dolö äudä Godeïe mosöa Godema adomolö asi. Elö amoda, Felesi dolö, amase, elö amoda, dagisi muni nelo dolö.
LUK 18:11 Felesi dolö amea nowela nea, asigiamu Godema adosalea, Gode, neda odoa ili gadoi made, fa neloge, mala nafade hamologe, udia susugu neloge, amase, dagisi muni nelo dolö wagadi neebe gowe gadoige made ameada, dima nesegesa.
LUK 18:12 Na salele afädëïe segeyo äudägi, molö made naala aligilo. Amase, nelebo bidi nease amo sulubadelagida, nabülasi mogelahilä, nabü afädë neala digali ïlomelëla säla Godema adoi.
LUK 18:13 Gaso, ea amala säha neebe amo gaalu, dagisi muni nelo dolö amea, wagadi made nea, Hebeni sida adogomolö made helësëla, hïle bidagia nufigisa nea, Godema adosalea sähalea, Gode, neda nafade hamolo neawe. Dia ne bobasëmalola säimelëla säi.
LUK 18:14 Yesuea sähalea, Na dilima säla ïahago. Mosöa obëgëla awäla, Godeïe siigi mogola nelo amoda, Felesi dolö amo made, dagisi muni nelo dolö amomelë. Udia dolö hili ili ilibialo amoli sulubadela, Godea neala nagadaialasisalea, gaso, afädë hï e nagadaialo neebe amoda, Godea neala ilibialasimolömelëla säi.
LUK 18:15 Udia dolö odoa nefolalo amolia ilile malö dubo amolige, Yesu ïe naaboea diigimäia, e neebea ami sogobala gaula maasebegi, bëgëla aulo amolia amo beala, ilima halala nemola dofogai.
LUK 18:16 Amala nemosebegi gaso, Yesuea malësä amoli e neebea ami mofiamalolahilä sähalea, Dofogamabu. Malësä ne neebea misiäia beasimo. Mida, Godea Beaha Maadela Sigi Neebea ami, malësä gowe ili gadoi neebe amolile dialeamelë.
LUK 18:17 Na dilima dofä sähago. Godea Beaha Maadela Sigi Neebe amo, malësäea neala gaulo amo gadola, made neala gaulo amoda, dofä made nogila digamolömelëla säi.
LUK 18:18 Beaha aligilo afädëa Yesuma nabahalea, Säla Olelelo hedabi-e, ne namolöi namolö neala gaumolöïe, abilia hamomolödula nabi.
LUK 18:19 Amala nabasebegi, Yesuea ema säla obëgësalea, Dia nema hedabila säi amoda, mi edoïe. Afädë hedabida maade. Gode emu hedabi nea.
LUK 18:20 Mala säla negei dibe amoda, dia dawadigi nebego. Udia dolö susugu hamomabio. Baagomäia nufuabio. Nelebo fa nimabio. Wäfalï säsäla gudimabio. Amase, diado diemele hawala nea, elele ado nabala hamomalola säi.
LUK 18:21 Amala säsebegi, dolö amea säla obëgësalea, Ado amoli sulubadelada, ne malësägila hamosa maadeimelëla säi.
LUK 18:22 Amala säla obëgëi amo nabalahilä, Yesuea ema sähalea, Afädëfalï dima maademelë. Dïe nelegei difolalebe amo, bidi neaha maademolö mosö. Neaha maadelahilä, dia muni nease amoda, dolö busadäoi nefolalebe amoligali ïmalo. Amala hamoseda, selesaia mosöa bidi edefade nimolömelë. Amo gadola hamolahilä, ne bëgëla misialola säi.
LUK 18:23 Ado säi amo nabalahilä, ïe odagi augia idogola, edefademalä yöi. Mida, ïe nelegei yafie dilo amogi amai.
LUK 18:24 Yesuea dolö amoma siila nea sähalea, Nelegei yafie negelo dafidilo dolö neebe amolida, Godea Beaha Maadela Sigi Neebea ami nogila digamolöda, häuai galeamelë.
LUK 18:25 Dofä. Sugua gameleda, nusi galabagi doadigila moholöda, häuai holöfalï mademelë. Gaso, nelegei yafie negelo dafidilo dolö nefolalebe amoli, Godea Beaha Maadela Sigi Neebea ami nogila digamolöda, häuai baagila asi dialeamelëla säi.
LUK 18:26 Udia dolö nefolalo amolia, ea ado säi amo nabalahilä sähalea, Amai, damula auloda, nowëa gaula namolödula säi.
LUK 18:27 Amala säsebegi, Yesuea säla obëgësalea, Udia dolöea hamomolöi made amoda, Godea hamomolöi neamelëla säi.
LUK 18:28 Amala säsebegi, Fidaea sähalea, Hä, bimo. Nilïa nilïle nelegei sulubadela fisila, di bëgëla misimelëla säi.
LUK 18:29 Amala säsebegi, Yesuea ilima sähalea, Na dilima dofä säla ïahago. Sulubadelaea mosöge, udiage, edooge, eedo emelege, malöge fisila, Godea Beaha Maadela Sigi Neebe amomu si gäwisi awäseda,
LUK 18:30 nagadaia neebe wegi nea, fisi amoli baagila awäla, edefademalä gaula namolölahilä, oböla, segeyo hobea besela galamolö amogi, namolöi namolö dibe amo gaula namolömelëla säi.
LUK 18:31 Yesuea ïe bëgëla aulo giwilasi amoli sigi aliga galahilä, ilima sähalea, Nabuö. Nilï hä, Yalusaleme moholö awähamelë. Awäseda, nelebo sulubadela dafidi bea sälo nefolalo amolia, Dolöïe Malö amoïe säla dëdëla negei dibe amo gausiala digaha maademolömelë.
LUK 18:32 Afädëa Dolöïe Malö amo Yu dolö ilima made, dolö odoa nefolalebe amolima gaula ïaseda, ilia e gadiabola digi, e gagadela digi, ema gofedela galala digimolömelë.
LUK 18:33 Ilia e fëgälahilä, baagomäia nufulömelë. Amala hamoseda, segeyo äudä nelolahilä, osodagi, hï nowemolömelëla säla ï.
LUK 18:34 Bëgëla aulo amolia, ea säi amo sulubadela made helësëi nelo. Ilia ado säi amoïe, galone made helësëmäia, musügä negela säi amea, ilia ea säi amoda, goweïe säsebela, dofä dawa made nelo.
LUK 18:35 Yesu e Yaligo gaamugi besela galamolö ga madesa nebegi, dolö si golai afädë idi agesua ami salea, udia dolöma muni ïmola ëdëgësa sulo.
LUK 18:36 Udia dolö yafie adodola afiasebe amo nabalahilä, ea nabahalea, Goda edo hamosebela nabi.
LUK 18:37 Ilia ema säla obëgësalea, Goda Nasalese fii Yesu awäsebela säi.
LUK 18:38 Amala säsebegi, ea uuala sähalea, Debidiïe malö Yesu-o, ne bobasëmola säi.
LUK 18:39 Yesu hobeala maaha nebegi, amala uuasebegi, udia dolö dafidila afiaha dilo amolia ema nemosalea, Dia adomabu. Gameläla säi. Amala säsebegi gaso, ea gelolafalï uuahalea, Debidiïe malö-o, ne bobasëmola sähamu sulo.
LUK 18:40 Hä, Yesu e maala beaha nea, dolö si golai amo e neebea ami sigi misialasebegi, ilia e sigi gaula maala, Yesu neebea ami ga madela ifosi. Amalebe, Yesuea ema nabahalea,
LUK 18:41 Na dima abilia hamomäia hamesebela nabi. Ea säla obëgësalea, Dafidilo Geloi-e, na siia fädäla bimolö hamesebela säi.
LUK 18:42 Yesuea ema sähalea, Hä, bimo. Dihï Godema asigi afädë negei amea, di hä, wahi gomelëla säi.
LUK 18:43 Amala säi amole, ïe si golai amo hä, fodolofalï wahisebegi, ea Godeïe ëi gauia adogolahilä, Yesu bëgëla asi. Udia dolö nefolalo amoli sulubadelaea, amala hamose amo bealahilä, iliage Godeïe ëi gauia adaha nefolalo.
LUK 19:1 Yesu e, hä, Yaligo gaamugi besela galala baagila awäha nelo.
LUK 19:2 Gaamugi amida, dolö afädë sulo. Amoïe ëida Sagiasi. Eda dagisi muni neaha aligilo nefolalebe amolile busa nea, muni yafie negei nelo.
LUK 19:3 Ea Yesuda, abodo gadoi walebelela bimolöla helësëi gaso, udia dolö yafie negegi amea, ea Yesu bimolöi made melï. Mida, e oboba amea.
LUK 19:4 Udia dolö awäsebe amo gadola, e edale baluluia awälahilä, Yesu eda, idi gowegi maase bimolö gabula helësëlahilä, äfäeo i amogi fedala sulo.
LUK 19:5 Yesu e maala, Sagiasi e fedai sebea ami besela galala, sida adogola nea, Sagiasima sähalea, Sagiasi-e, neda walio dia mosöa namolö moholömelë. Di hä, fodolofalï digamola säi.
LUK 19:6 Amala säsebegi, Sagiasi e fodolofalï digala, ïe iso asigia obeägïlahilä, ea mosöa fimäia Yesu säla olela fu ï.
LUK 19:7 Amala säsebegi, udia dolö nefolalo amolia, amala hamosebe amo bealahilä, habobala sëdäwala sähalea, Dolö nafade hamolo amea mosöa söfë awäsebegola säi.
LUK 19:8 Ea mosöa awälahilä, Sagiasia nowela nea, Dafidilo Geloima sähalea, Dafidilo-o, dia nabuö. Na nelebo difolalebe amo mogogi mogelahilä, elö amo busadäoi nefolalebe amoligali ïmolömelë. Amalahilä, afädëïe nimolö dibe amo gadola made, baagia asogola ïmola säla neaha nelo amoïeda, na oböla, dahila neala nii amoïe biyidiala ïa obëgëmolömelëla säi.
LUK 19:9 Amala säsebegi, Yesuea ema sähalea, Dolö gowe eege, hä, Abalahamaïe malö neebe ameada, mosö gowegi sefolalebe amolia, walio hä, damula aulo neala gausagomelë.
LUK 19:10 Dolöïe Malö ameada, udia dolö dabadigi neebe amoli, hogolahilä sigi obëgëmolö misimelëla säi.
LUK 19:11 Udia dolö nefolalo amolia, ado säse amo nabaha sefolalebegi, Yesuea aso, sähamu nea, ilima ado besula säha nelo. Mida, e hä, Yalusaleme ga madela neëgida, ilia helësësalea, Godea Beaha Maadela Sigi Neebe amo, waliomu ulufadigimolö gabula helësëi.
LUK 19:12 Amala helësësebegi, Yesuea sähalea, Dolö dafidilo ëi sälo afädë nelo amea, ilia e gini neala ifosimäia, sege wagadi made awälahilä, hobeala hï segea udia dolö sigi namolö obëgëmolöïe, naabo negesiä asi.
LUK 19:13 E aso, awäla made nea, dafidi ïe hamoi hamolasilo nabülasi welahilä, ilima muni giwi siliba hädali afädë hïdo hïdolama sogosalea sähalea, Gowe ïase goweada, ne asibua hamoi hamolahilä, baala nea negesa namialola säsiä asi.
LUK 19:14 Amala asibua, hïle segeafalï udia dolö sefolalo amolia, ema bimolö habobalahilä sähalea, Dolö goweda, nilïle gini namiäia hamesa mademelëla sälahilä, odoaea e moholö awäsebea ami säla ïmolö mosalola säi.
LUK 19:15 Amai gaso, ga nefolalo amolia dolö amo gini neala ifosisebegi, e obëgëi. E hä, obëgëlahilä, ïe hamoi hamolasilo amolima muni ïasila asi amolia hamoi hamolahilä, baala abilia hamoi walebelela bimolöïe, e neebea ami misialamalola säi.
LUK 19:16 Amala misialasebegi, dolö dafididale misi amea ema sähalea, Dafidilo-o, dia muni giwi siliba hädali afädë ï amea, na hamoi hamolahilä, muni giwi siliba dausini afädë baala nea negeimelëla säi.
LUK 19:17 Amala säsebegi, ea dolö amoma sähalea, Hamoi hamolasilo hedabi-e, hedabola hamoi gabu. Dia holöfalï amo asigi falagasei nea, sigi nelo gabugi, gaamu nabülasi dibe amo dia sigi namialola säi.
LUK 19:18 Amalahilä, dolö agedu amo maalahilä sähalea, Dafidilo-o, dia muni giwi siliba hädali afädë ï amea, na hamoi hamolahilä, muni giwi siliba hädali bia baala nea negeimelëla säi.
LUK 19:19 Amala säsebegi, ïe dafidilo amea dolö amoma sähalea, Gaamu bia dibe amo dia sigi namialola säi.
LUK 19:20 Amase, dolö elö amo maalahilä sähalea, Dafidilo-o, dïe muni giwi siliba hädali afädë amoda gowe. Na faguloea usulala negei dilo.
LUK 19:21 Mida, di geloi bologodei amo helësëla, ne bedäi. Dolö elöea nelebo negei dibe amoda, dia nealahilä, dia made sagaia amida, dia faila nülo gabiola säi.
LUK 19:22 Amala säsebegi, ea dolö osoda amoma sähalea, Hamoi hamolasilo nafade di, dihï ado säsebe goea, na dibalä gudidelä. Dia helësësaleada, neda geloi bologodeige, nelebo odoaïe dibe amoge, na nelo, amase, molö na sagai made amoge, na faila nülolage helësëile.
LUK 19:23 Dia nïe muni amo bëgigi negesiä ami, made negei goda, abisalea amai. Amala negei galebeda, ne obëgësegi, baai muni amola nealabio godala säi.
LUK 19:24 Amala sälahilä, ea ami nefolalo amolima sähalea, Ea muni giwi siliba hädali afädë gaula neebe go fedela, muni giwi siliba dausini afädë gaula neebe amogali neala ïmalola säi.
LUK 19:25 Amala säsebegi, ilia ema säla obëgësalea, Dafidilo, eda muni giwi siliba dausini afädë gaula neebela säi.
LUK 19:26 Amala säsebegi, ea säla obëgësalea, Na dilima säla ïahago. Sulubadelaea nelebo gaula neebe amolimada, odoa baala ïmolömelë. Gaso, afädëa made gaula neebe amomada, holöfalï gaula neebe amo haila nimolömelë.
LUK 19:27 Amaimo, nebalä ado nealahilä, ne ilile gini made namiëla sälo nefolalebe amolida, dilia sigi maalahilä, nïe odagia baagomäia nufudaha maademalola säimelëla säi.
LUK 19:28 Yesuea amala sälahilä, e Yalusaleme aulo idigi, dafidi awäha nelo.
LUK 19:29 Yesu e maala Bedefagige, Bedanige, ga madela nea, segebi ëi Olibebia amila, ea bëgëla aulo äudä dafidi mosalolahilä, elema sähalea,
LUK 19:30 Ali segea ago mosö nefolalebea ami awäla besela galala beahamelële, sugua dögi üdïli afädë dafidi dolö afädë filo made, gide begei neë bimolömelë. Amo fisigäla, wi sigi obëgëmalo.
LUK 19:31 Afädëa alima goda abïdä fisigähala nabaseda, alia gomalä sämalo. Dafidiloea webalä hamomolö galeamelëla sämalola säi.
LUK 19:32 Amala säsebegi, dolö äudä dafidi mosaloi amole awäla beahamelebe, ea säi amo gadolafalï dibe melï.
LUK 19:33 Hä, elea sugua dögi üdïli gide begei amo fisigäha nebegi, amoïe eedo amolia elema, Goda abilia hamodelä fisigähala nabi.
LUK 19:34 Elea säla obëgësalea, Dafidiloea webalä hamomolö galeamelëla säi.
LUK 19:35 Amala sälahilä, elea sugua dögi üdïli amo sigi, Yesu neebea obëgëi. Amalahilä, elele fagulo daia salugalo giila, sugua dögidaia sadia idogolahilä, Yesu amodaia fila fedamäia, ugila negei.
LUK 19:36 Amalebe, e amodaia fila awäha nebegi, udia dolöea ilile fagulo daia salugalo amo giilahilä, idiafa föföla awäha nelo.
LUK 19:37 E awäla Olibebia amila aliga idogomolö idi ga madesebegi, udia dolö yafie e bëgëla aulo amoli sulubadelaea, geloi melëlo made gadoi sulubadela hamose melï amoïe, edefademalä obeägïlahilä, gelola uuala Godeïe ëi gauia adala sähalea,
LUK 19:38 Beaha aligilo gini Dafidilo Geloiïe ëigila maahago, Godea e neala obeägïlasimäia. Selesaia mosöa ami, neala dalulasilo diamiäia. Gode ilibia neebe amoïe ëi gauia adogosawela säsäla afiaha dilo.
LUK 19:39 Amala säsäla afiaha dibegi, Felesi dolö odoaea udia dolö gegedoi nefolalebea amila Yesuma sähalea, Säla Olelelo-o, dïe bëgëla aulo golima nemomola säi.
LUK 19:40 Amala säsebegi, Yesuea säla obëgësalea, Na dilima säla ïahago. Ilia adola made, aumala neëda, igi difolalebe gowe ilia gelola uuala sämolömelëla säi.
LUK 19:41 Yesu e besela galamolö ga madela nea, Yalusaleme gaamu amo bealahilä, amogi dïisa nea sähalea,
LUK 19:42 Segeyo walio wegi, di neala dalulasilo amo dihï helësëlabio gaso, walio hä, dia siia bimolöi made, musügä dialeamelë.
LUK 19:43 Hobeala segeyo afädëgi, di mia besela galasegi, dïe ado nii neebe amoli maalahilä, dïe yala edefade go baagido, naga gasala dadagulula nelegela amalelahilä, dïe idi sulubadela gaha maademolömelë.
LUK 19:44 Ilia dihïdige, dïe malö dïe mumusogi sebe amolige, neala nagadaia sadia idogola dusula nafademolömelë. Gode e di neebea misi amoïe segeyo, dia dawa made nelo amea, ilia dïe igi odoa daia dadagulula negei dibe goda, sulubadela mugulula digaha maadela, igi afädë igi elödaia made diamolömelëla säi.
LUK 19:45 Amala sälahilä, Yesu e Godeïe mosö yala isogi nogila digalahilä beahamelebe, dolöea bidi nimolöïe, nelebo negela digisa difolalebe amoli nesila digilahilä,
LUK 19:46 ilima sähalea, Ado säla dëdëla negei dibe amea sähaleada, Nïe mosö amoda Godema adolo mosö diamolömelë. Amai gaso, dilia oböla, fa nelo musügä aligilo igi äbä gadoi hamoi gabula säi.
LUK 19:47 Segeyo sulubadelagi, Yesu e Godeïe mosöa ami nea, ado mala olelesa aligilo nelo. Amala olelesa neëgida, gobela ïlo busa nefolalo amoliage, mala dawadigi amoliage, amase, udia dolö beaha aligilo busa nefolalo amoliage, Yesu nufulöïe idi hogosa nelo.
LUK 19:48 Amai gasoda, udia dolö nefolalo amoli sulubadelaea, Yesuea mala olelese amo, afädë damula fisila made, hedabola naba mafusa neebe amea, ilia Yesu nufulö fu made beagolei nelo.
LUK 20:1 Segeyo afädëgi, Yesu e Godeïe mosöa nea, udia dolöma säla olelela digi, Ado Mala Hedabi säla ïadigisa nebegi, gobela ïlo busa nefolalo amolige, mala dawadigi nefolalo amolige, asigi gäwi dafidilo nefolalo amolali, e neebea ami misi.
LUK 20:2 Ilia Yesuma nabahalea, Dia nelebo hamosebego, nowëa hamomalai hamosa. Nilïa nabedelä, dia säla ïmo. Go hamomäia, geloi go nowëa ïasiola nabi.
LUK 20:3 Amala nabasebegi, Yesuea ilima säla obëgësalea, Dilia nema säla obëgëmäia, nage dilima ado afädë nabahago.
LUK 20:4 Yonea ödägi gesa nelo amoda, abidila misi. Selesaia mosöala misile, ma, dolömadila misilela nabi.
LUK 20:5 Amala nabasebegi, hilidomu didiähalea, Nilïa selesaia mosöala misila säseda, ea nilïma, Ema asigi afädë made negei goda, edoïela nabulö gabu.
LUK 20:6 Amase, nilïa dolömadila misila säsege, udia dolö nefolalebe gowe ilia, Yone eda bea sälo afädë neala helësëlo ameada, nilï igia nufulö gabula didiäi.
LUK 20:7 Amala didiälahilä, ilia säla obëgësalea, Yonea geloi nii amoda, abidi niidu. Nilïa dawa mademelëla säi.
LUK 20:8 Amala säsebegi, Yesuea ilima säla obëgësalea, Amai galëda, na nelebo hamosebeweda, gowea hamomalai hamosa neamelëla, nage dilima made säla ïmolömelëla säi.
LUK 20:9 Amala sälahilä, Yesuea udia dolöma ado besu gowe säla ï. Dolö afädëa i gägä negelo gelebi ëfë sagaia sagala negesiä, dolö odoaea oodola beaha namialola sälahilä, hï eda sege wagadi made, holöbö sedade namolö asi.
LUK 20:10 Gägä amo faimolö fu besela galasebegi, sagai eedo amea, ïe hamoi hamolasilo afädëma sähalea, Nïe sagai oodola beaha nefolalebe amolima, gägä odoa faila ïmola sämolö mosalola säi. Amala säi amo nabala, ea sämolö awäsebegi, oodola beaha nefolalo amolia, hamoi hamolasilo amo nufudala ïalalelahilä, nelebo afädë made gaui, fisiga gai.
LUK 20:11 Amala hamoi gabugi, sagai eedo amea, ïe hamoi hamolasilo elö amo bu mosaloi. Gaso, amoge oodola beaha aligilo amolia, hïdo elöla gadiabola nufudala ïalalelahilä, nelebo afädë made gaui, e badumu fisiga gai.
LUK 20:12 Amalamu hamosebegi, sagai eedo amea ïe hamoi hamolasilo osodama oböla, bu mosaloi. Awäsebegi, sagai oodola beaha aligilo amolia, e nufudala afisilahilä, yala baagido sogobala sadia gai.
LUK 20:13 Amalamu hamosebegi, sagai eedo amea sähalea, Amai na abilia hamomolödu. Hä, nïe malö, nihï boba hamoi neebe wema mosöla sämolö. Ilia e hawala nea, mogola hamomolöla helësësala säi.
LUK 20:14 Amai gaso, malö amo awäsebegi, oodola beaha aligilo amolia e bealahilä, hilido didiähalea, Sagai eedo amoïe nalä negei nimolö amoda, hä, go gabugo. Ïe nelegei dibe goda, nilïgali nedelä, eda baagomäia nufidedila sälahilä,
LUK 20:15 sagai yala baagido sogobala sadia galahilä, baagomäia nufimelëla säi. Amala sälahilä, Yesuea ilima sähalea, Amala hamoi amo, sagai eedo amea dolö amolima abilia hamomolödu.
LUK 20:16 E maala, oodola beaha aligilo amoli nufudaha maadelahilä, sagai amoda, odoaea oodola beaha namiäia ïmolömelëla säi. Amala säsebegi, udia dolö sefolalo amolia, ado amo nabalahilä, Amala hamomolöi mademelëla säi.
LUK 20:17 Amala säsebegi, Yesuea sebe amoli sidawewela bealahilä sähalea, Amai galëda, Godeïe bebagi ado gowe säla dëdëla negei dibe goweda, mi edoïe säla negei dialea. Amea sähaleada, Mosö olelo amolia, igi galone hamomolöi made gabula memelela fisi amoda, galone geloi dafidilo besela galai neamelëla säla dëdëla negei dialea.
LUK 20:18 Udia dolö sulubadela igi amodaia digase amolida, dusudasimolömelë. Amase, igi amea dolö afädëdaia daala negeseda, eegela fisimolöi fisimolömelëla säi.
LUK 20:19 Mala dawadigi nefolalo amoliage, gobela ïlo busa nefolalo amoliage, Yesuea ado besula säi amoda, nilï helësëla säsebela helësëlahilä, segeyo amo galamu e gaudelä hamoi gaso, udia dolö nefolalebe amolibalä bedäi.
LUK 20:20 Ilia Yesu gaumolöïe hedabola idihë nea, dolö odoaea hado desega mosäia fisiga galahilä, ilima sähalea, Dilia ea säse amo wäfalï asigi falagasei nea, nabulöi gadoi hamola, fädäla nabulö mosalola säi. Ea ado asiala säse amo nabalahilä, ado amohï, e gaumolöïe mi hogosa nelo. Amalahilä, Olomoïe gabena neebe amoïe naabogi gausimolöla helësësa nefolalo.
LUK 20:21 Mosaloi amoli awälahilä, Yesuma nabahalea, Säla Olelelo-o, nilïada, dia ado säsebegoge, mala säla olelesebegoge, udia dolöma mogolafalï sähala helësësamelë. Amase, udia dolö sulubadela memelela made, afädëdilamu, Godeïe idigi aulo mala amo, ilima säla olelese amoda, mogolafalïmu säla olelelomelëla helësësamelë.
LUK 20:22 Hä, beaha aligilo Gini Sisa neebe amogali, nilïa dagisi muni ïmolöda, dofeale, ma, dofea madelela nabi.
LUK 20:23 Amala nabasebegi, Yesuea, e fedogola nabasebe amo helësëlahilä, ilima sähalea,
LUK 20:24 Muni giwi afädë nema olemola säi. Ilia ema olesebegi, ea ilima nabahalea, Muni giwi gogi, dolö busa dibe goge, ëi dibe goge, nowëïe gabula nabi. Amala nabasebegi, ilia säla obëgësalea, Sisaïela säi.
LUK 20:25 Amala säsebegi, ea ilima säla obëgësalea, Amai galëda, nelebo Sisaïeda, Sisa hïma ïmalo. Godeïeda, Gode hïma ïmalola säi.
LUK 20:26 Amala säsebegi, dolö amolia udia dolö nefolalo amolile sidaia ami, Yesuea ado säi amea, e gaumolö ulï nelo. Ea säla obëgëi amogi, ili fudugilahilä, adola made, aumala nefolalo.
LUK 20:27 Sadiusi dolö iliada, udia dolö baagoi amolida, made nowela galamolöla sälo amoligi, odoaea Yesuma nabulöïe, e neebea misi.
LUK 20:28 Ilia nabahalea, Säla Olelelo-o, Mosesea, nilïa hamomäia, ado afädë dëdëla negei dibe amea sähaleada, Dolö afädëïe edooea udia neala salea, malö made sogobala baagoseda, udia didalo amo edoo elö amea nealahilä, baagoi amoïe ëigila malö sogobamolö dialeala säla dëdëla negei dialea.
LUK 20:29 Amaimo, edoolali gifalädalïa sulo. Abulümi amea udia afädë neala nea, malö made sogobala baagoi.
LUK 20:30 Baagosebegi, edoo agedu ameage,
LUK 20:31 amase, edoo osoda ameage, udia amo neasebegi, amalamu hahamola awäha neamu, dolö gifalädalïa amolia, malö made sogobala neamu, baagosa maadei.
LUK 20:32 Amala baagosa maadeibua, hobeafalï, udia amoge baagoi.
LUK 20:33 Amala hamoi amo, dolö gifalädalïa amolia udia afädë amomu neala sulo amo, hobea baagoi amoli nowela galasolo amo gala, udia amoda abodoweïe udia samolödula nabi.
LUK 20:34 Amala nabasebegi, Yesuea säla obëgësalea, Udia neadigi, dolö fila awäla digise amoda, walio nagadaia wi nea amahamelë.
LUK 20:35 Amaha gaso, Godea udia dolö baagoiala nowela galala, hobeala namolö dibea ami namolö dofeala helësëi amoliada, udia made neadigi, dolö made fila awäla digimolömelë.
LUK 20:36 Ilida, selesaia fii amoli gadoi namolö ameada, bu elö baagomolö ulï namolömelë. Baagoia amila nowela ifosi amea, ilida Godeïe malölali namolömelë.
LUK 20:37 Amaimo, Moseseage, i holöfalïgi nulo söa fedai amoïe dëdëla negei ameada, udia dolö baagoi amoli nowemolö amo ulufala olei. Mida, beba amogila, ea Dafidilo Geloima sähalea, Abalahamaïe Gode, Aisagaïe Gode, amase, Yeigabaïe Godemelëla säi amea olei.
LUK 20:38 Gode eda baagoi amolile made, eda udia dolö nefolalebe amolile Gode neamelë. Mida, udia dolö amoli sulubadelada, ïe siigi nefolaleamelëla säla obëgëi.
LUK 20:39 Amala säla obëgësebegi, mala dawadigi odoa nefolalo amolia säla obëgësalea, Säla Olelelo-o, hedabola säimelëla säi.
LUK 20:40 Ili bedähalea, afädëa ema ado bu elö made nabi.
LUK 20:41 Yesuea udia dolö amolima nabahalea, Afädë Memelei amo eda, Debidiïe malöla sälo amoda, abeahäla sälodu.
LUK 20:42 Debidi hï Gë Udälo bebagi säla negei dibe amogi sähalea, Dafidilo Geloia nïe Dafidilo Geloima sähalea, Na dïe ado nii nefolalebe amoli, di hawala ifosimäia, dida nïe naabo dafädimadi awäla salea, beaha samialola säimelë.
LUK 20:44 Debidia hïma, Dafidilo Geloila säi amoda, e oböla, Debidiïe malöda abeahäladula nabi.
LUK 20:45 Udia dolö nefolalo amoli sulubadelaea, ea ado säsebe amo nabaha sefolalebegi, Yesuea ïe bëgëla aulo amolima sähalea,
LUK 20:46 Mala dawadigi nefolalebe amoli idihë namialo. Ilia fagulo sedade salugalahilä nawesalea, magaia gaamugi awälahilä, udia dolöea ili beala, di go gabiola sämäia hameloge, gedolo mosöa dafidilo filo dibea amimu fimolö hameloge, amase, udia dolö yafie gegedola molö nasebea ami, dolö busa amolile filodaia amimu samolö hameloge, neamelë.
LUK 20:47 Amase, iliada udia didalo sebe amoli dahila neala, ilile mosöa nelegei dibe amo fa neala gaula aulo nea. Ilile asigi musügä negesilahilä, adoeamu Godema sedadela adolo neamelë. Dolö amala hamose amolida, së edefade muäia, baala ïmolömelëla säi.
LUK 21:1 Amala sälahilä, Yesuea bea gahamelebe, nelegei yafie negelo dafidilo dolö nefolalo amolia, Godeïe mosöa muni negelo i amogi, muni ïmolö gaui amo negese melï.
LUK 21:2 Amala beaha nebegi, udia didalo busadäoi afädëa muni giwi holöfalï äudä muni salelo bogosi i amogi salase melï.
LUK 21:3 Amo bealahilä Yesuea sähalea, Na dilima dofä sähago. Udia didalo busadäoi gowea negei ameada, odoa ili sulubadelaea negei amo baagila asimelë.
LUK 21:4 Udia dolö egowe ili sulubadelaea muni yafie dilo amogi ï. Gaso, udia goweada, muni made gaui, hï molö nimolö muni gaui amo, hulu negesa maadesiola säi.
LUK 21:5 Odoaea Godeïe mosö neebe amo beala sähalea, Igi boboga hedabi hïdo elöi ameage, udia dolö ilia Godegali galu ï ameage, mosö go hedabola momadoi gabula säsebegi, Yesuea sähalea,
LUK 21:6 Dilia walio nelebo bease goïe segeyo afädë maasolo amo gala, igi afädë igi elödaia made negela, sulubadela mugulula digaha maademolömelëla säi.
LUK 21:7 Amala säsebegi, ïe bëgëla aulo amolia nabahalea, Säla Olelelo-o, nelebo hamomolö säi amolida, abola hamomolö amoïe säi. Nilïa dafidi nofe abodo gadoidale hamose amo beala, nelebo besela galamolö amoli hä, ga madesa gabula helësëmolödula nabi.
LUK 21:8 Amala nabasebegi, Yesuea säla obëgësalea, Odoaea dili dahila neloea, hedabola idihë namialo. Mida, dolö yafie maalahilä, nïe ëi säla sähalea, Neda emelëla säla, amase, Segeyo amo ga madefalï dialeala sämolö moholömelë. Amala säseda, dilia ili bëgëla mosabio.
LUK 21:9 Dilia hobeala nabahalea, gädili neebe amoli edefade nudusalea wabula säsege, udia dolöea ba beala, ilile gamanebalä nudusalea wabula säsege amo nabala, dilia bedäla hehealemabio. Nelebo amoli dafidi amala hamomolö dialea gasoda, segeyo fodolo aligila wagamolö mademelëla säi.
LUK 21:10 Amala sälahilä, ea ilima sähalea, Fii elöle elöle nudula digi, gini elöle elöle nudula digisa namolömelë.
LUK 21:11 Fogoli edefademaläge, sïdë iige, amase, olo iige, sege elö elölagi moholömelë. Mudaia hamomolöi made gadoige, edefademalä bedämolö elöla elölage moholömelë.
LUK 21:12 Nelebo amoli sulubadela, aso, made besela galala neëgida, ilia dili gaulahilä, sëlasisa namolömelë. Gedolo mosöa ami dilibalä gudilahilä, galabaia mosöa galabaia negemolömelë. Amase, dilia nïe ëi gaula neebe goïeda, ilia dili beaha aligilo ginile gabenale neebea ami sigi gaula awäla, ifosimolömelë.
LUK 21:13 Amala hamoseda, ilima ado mala ulufala säla ïmäiaïe, idi gai doga negesalea amamolömelë.
LUK 21:14 Amaseda, dilia dafidi ilima ado abodo säla obëgëmolödula asigia säosäola made helësëmalo.
LUK 21:15 Mida, na dilile nafia ado negesila, asigi falagaselasisegi, dilibalä ado nii nefolalebe amolia ado amo haila digila, made neadigimolömelë.
LUK 21:16 Dilile diadole diemelege, didooge, amase, dili sosogo odoage, dili damelëge, nefolalebe amolia dili hololölahilä, ado nii neebe amoligali gaula ïasegi, ilia diligi odoa baagomäia nufulömelë.
LUK 21:17 Amase, dili nïe ëigi nefolalebego bealahilä, sulubadelaea dilima bimolö habobamolömelë.
LUK 21:18 Amala hamomolö gasoda, dilile busa hilï gogi, afädë made beselala fisimolömelë.
LUK 21:19 Dilia aso maadela, gelola aligiseda, namolö neala gaula namolömelëla säi.
LUK 21:20 Yesuea ado aso, sähamu nea sähalea, Dilia beahaleamelële, ami dolö yafie amoli mafula, Yalusaleme nogöla amalei beaseda, gaamu amo nafademolöda, ga madefalï gabula helësëmalo.
LUK 21:21 Segeyo amo gala, udia dolö Disiligi Yudia nefolalebe amolida, segebi dibea ami fisäla baluluia afufumolö dialea. Udia dolö Yalusaleme isogi nefolalebe amolida, gaamu amo dïgïla näiadodi moholö dialea. Amase, udia dolö gaamu baagido nefolalebe amolida, gaamu isogi nogila made digamolö dialea.
LUK 21:22 Ado sulubadela säla dëdëla negei dibe amo gadola gausiala digamäia, segeyo amogida, asiala hamoi amoïe së ïmolöïe segeyomelë.
LUK 21:23 Segeyo amo gala, udia fagulo hagui sefolalebe amolige, malö dodo ïaha sefolalebe amolige, asigii gabu. Mida, yöi edefade nagadaiawi besela galala, udia dolö amoligali Godeïe mihalälo söga salimolömelë.
LUK 21:24 Ado nii neebe amoli maala, nudulo helebea ili nufudala baagomolömelë. Ilia ili nafodola gädili dibe amo sulubadelagi, sigi gaula moholömelë. Amase, fii odoa nefolalebe amolia Yalusaleme neala emesala nolealesa neamu, ilile wagamolö segeyo daiala negei amogi wagamolömelë.
LUK 21:25 Yesuea ado aso, sähamu nea sähalea, Segeyo amo gala, esogige, aubegige, gasumilïgige, nofe elöi hamomolömelë. Amala hamose amo gaalu, nagadaia wi duhulu aidagula maase amogige, goba nabase amogige, fifi asi amoli edefademalä hehealela bedäla, asigia säosäosa namolömelë.
LUK 21:26 Udia dolöea nelebo hamose amoli beahalea, nagadaia abilia hamomolödula helësëla bedähalea, si dädäbëlela digamolömelë. Mida, muugi nelebo geloi hïdo elöi amo neala fogolasimolö amea.
LUK 21:27 Segeyo amo gala, Dolöïe Malö amoda, geloi edefade amole, yo digalo hïdo elöi amolebalä, mu baidilidaia maala neë, ilia bimolömelë.
LUK 21:28 Nelebo säi amo gadola hamola ulufadigimolöïe mi gäwiseda, dilia nowela nea, busa fädägägïa adogola namialo. Mida, Godea dili fisigäla fisigisimolö segeyo hä, ga madesagomelëla säi.
LUK 21:29 Amala sälahilä, Yesuea ilima ado besula gowe säla ï. Dilia äfäeoge, i odoa nefolalebe amoli sulubadelage, bimalo.
LUK 21:30 I bäu gähe bobagiseda, hä, sege esomolö ga made gabula, dihili amala helësëlomelë.
LUK 21:31 Amo gadola, dilia nelebo säi amoli hamose beaseda, Godea Beaha Maadela Sigi Neebe amo moholöda, ga made gabula helësëmalo.
LUK 21:32 Na dilima dofä sähago. Udia dolö walio nefolalebego baagola made, nefolalegi wäla, nelebo säi amoli sulubadela hamosa maademolömelë.
LUK 21:33 Mu giwige, naga föige, hogosa helemolö gaso, nïe adoda, dofä made hogosa helemolömelëla säi.
LUK 21:34 Yesuea ado aso, sähamu nea sähalea, Gagaomolöïe gagaolo ödä naala, gagaola dädäbëleloge, amase, nagadaia namolöïe säosäola helësëloge, dilile iso asigigi yöia idogola nea, segeyo amo dili mia aabela besela galala,
LUK 21:35 gei dibea ami hogoi awäsegi, fädälo amo gadola fädäloea, hedabola idihë namialo. Mida, segeyo amo sege föi sulubadelagi, udia dolö sulubadela nefolalebe amolima moholö ameada.
LUK 21:36 Segeyo sulubadelagi idihë nea, nelebo hamomolö amo sulubadela dilia sisigala awäla yomäiaïege, amase, Dolöïe Malö amoïe siigi namiäiaïege, geloi ïmäia, Godema adosamu namialo.
LUK 21:37 Segeyo sulubadelagi, Yesuea udia dolö amolima Godeïe mosöa ami säla olelesa nelolahilä, deadiseda, gaamugi amila doadigila awäla, segebi ëi Olibebia ami midilö afufusa nelo.
LUK 21:38 Udia dolö sulubadelaea yosefalï nowela, Yesuea säse amo nabulöïe, Godeïe mosöa amimu maaha nelo.
LUK 22:1 Segeyo amo gala, Segeyo Edefadegi beledi edelo yidila made gobela molö amoïe segeyoda, ga made dilo. Ëi elöda, Baagila Asi Segeyolage sälo.
LUK 22:2 Gobela ïlo busa nefolalo amoliage, mala dawadigi amoliage, udia dolö nefolalebe amolibalä bedälo ameada, ilia Yesu nufulöïe idi hogosa nelo.
LUK 22:3 Giwilasi amoligi, afädë Yudasa emada, ilia Isagaliadala sälo amoma, hä, Saidani fedai.
LUK 22:4 Yudasa e gobela ïlo busa amolige, Godeïe mosö beaha aligilo amolile busa amolige neebea ami awälahilä, ilibalä säla didiähalea, ea Yesu abeahäla hamola hololömolödula didiäi.
LUK 22:5 Amala didiäsebegi, dolö amolia obeägïlahilä, egali muni ïmolömelëla säla negei.
LUK 22:6 Ilia säi amo nabala Yudasaea ülahilä, Yesu e udia dolö yafie gegedoi diëgi made, hïdo nafolai neëgi, ilile naabogi e gausimolöïe fu hogosa nelo.
LUK 22:7 Beledi yidila made gobelo Segeyo Edefade amo besela galai. Segeyo amo gala, Baagila Asi Segeyo amoïe sugua sibi malö nufulö dilo.
LUK 22:8 Amamolö gabugi, Yesuea Fidale Yonelema sähalea, Baagila Asi Segeyo amoïe nilï molö molöïe, alia daiamolö mosalola säi.
LUK 22:9 Amalebe, elea naba obëgësalea, Amai, diada alïa abidi daiamäia hamesebela nabi.
LUK 22:10 Amala nabasebegi, ea elema säla obëgësalea, Ali gaamugi awäla besela galasegi, dolö afädë ödä iigi usi gaui maaha neebe amea ali gausiala digamolömelë. E awäse amo gadola bëgëla awälahilä, mosö e nogila digase amogi, alige nogila digala,
LUK 22:11 mosö eedo amoma gomalä sämalo. Säla Oleleloea dima nabahalea, Ne, nïe bëgëla aulo nefolalebe amolibalä Baagila Asi Segeyo amoïe molö molöïe, mosö hogolida abidi dialeala nabila sämalo.
LUK 22:12 Ea alima mosö daia hogoli edefade afädë, nelebo negesa maadei dibe amo olemolömelë. Ami molö molöïe daiamalola säla ï.
LUK 22:13 Amala sälebe ele hä, awälahilä, nelebo ea säi amo gadolafalï gausiala digasebegi, elea Baagila Asi Segeyo amoïe molö molö ami daiai.
LUK 22:14 Segeyo amogi, molö molö fu besela galasebegi, Yesula abosolo dolö amolali molö molöïe auli amo amalela fifigi.
LUK 22:15 Amala sefolalea, ea ilima sähalea, Ne aso, së made naala neebewegi wäla, Baagila Asi Segeyo amoïe molö dilibalä gedola molöila dofä hamesamu nelomelë.
LUK 22:16 Amoïe mida, na dilima säla ïahago. Na nasewe gadola made naala nea, Godea Beaha Maadela Sigi Neebea ami molö amoïe mi fädäla ulufala negei diëgi, bu molömelëla säi.
LUK 22:17 Amala sälahilä, ea gaabogi usi neala gaula nea, Godema nesegelahilä sähalea, Gowe nealahilä, gobe dadagabola mualo.
LUK 22:18 Amoïe mida, na dilima säla ïahago. Na wani ödä walio nasewe gadola, made naala nea, Godea Beaha Maadela Sigi Neebe amo besela galala neëgi, molömelëla säi.
LUK 22:19 Amala sälahilä, ea beledi afädë gaula nea, Godema nesegelahilä, dagabodasila iligali ï. Ïahalea, ea ilima sähalea, Egoweda nïe domalomelë. [Dili ugila negela ïahago. Nahalea, ne helësëla mualo.
LUK 22:20 Amo naha maadelahilä, amo gadola wäla, ea gaabogi usi amo gaula nea sähalea, Gaabogi usi goweda, asialo made ado gähe elöi nïe healea säla negesebe amoda gomelë. Dili ugila negela, nïe heale besigahawe.]
LUK 22:21 Gaso, Bimo! Dolö ne hololömolö amoda, nebalä aulidaia negela, molö naha saleamelë.
LUK 22:22 Ïe, ado säla negei dibe amo gadola, Dolöïe Malö amo bëgëla moholö gaso, e hololöla odoaïe naabogi gausise dolö amo, asigii gabula säi.
LUK 22:23 Amala säsebegi, ilia hilimu elöea elöma nabala, elöea elöma nabalalahilä, Nowëa amala hamomolödula säla didiäha sefolalo.
LUK 22:24 Amala sälahilä, odoaea nilïgi goweda baagila asi neebela helësësebe amoda, nowëdula säla gëgësa dilo.
LUK 22:25 Amala gëgësa dibegi, Yesuea ilima sähalea, Udia dolö fii odoaïe beaha aligilo gini neebe amoliada, gelola beaha aligilo nea, amase, ilile ëi sälo amolia gelola sigi aligila, hili ili helësëla sähaleada, Udia dolö ugila negelola sälo nea.
LUK 22:26 Gaso, dilida amo gadoi namolöi mademelë. Dili neebe gogi afädë dafidilo nea galëda, bu üfï hamola obëgëmolö galea. Amase, diligi beaha aligilo neebe ameada, oböla, hamoi hamolasilo gadoi hamola obëgëmolö galea.
LUK 22:27 Dafidilo neebe amoda, nowë. Afädë fia idogola salea, aulidaia negela, molö naha sebe amole, ma, e molö muäia deala gaula mafusa neebe amole. Afädë fia idogola salea, aulidaia negela, molö naha sebe amo dafidilo nea madele. Amai gaso, ne dilibalä neada, hamoi hamolasiloea aligilo amo gadola neebewemelë.
LUK 22:28 Ne mia yöi odoa besela galasebegi, dilia ne dïgïla made awäla nelomelë.
LUK 22:29 Nïe Naadoea Beaha Maadela Sigi Neebe amo negali ï amo gadoi wäla, nage diligali ïahago.
LUK 22:30 Nïe Beaha Maadela Sigi Neebea amida, dilia nïe aulidaia negela, molöle ödäle naha sefolamiäiage, amase, dili beaha aligilo filodaia salea, Isilale sosogo giwilasi amoli sigi namiäiage, ïahagomelëla säi.
LUK 22:31 Saimono-o, Saimono-o, nabuö. Eladi gadoi widi dobi amoïe isole düle gasala sadia adogola mogelo amo gadola, dilima amala hamomäiaïe, mugabe Saidania fu ïmola Godema nabimelë.
LUK 22:32 Gaso, dia asigi afädë negeigo made digamäia, na dïe Godema adolasimelë. Di hä, besula obëgëla maalahilä, didoolali neebe amoli, gelolasisa namialola säi.
LUK 22:33 Amala säsebegi, Fidaea säla obëgësalea, Dafidilo-o, di galabaia mosöa awäsege, di baagosege, neda dibalä moholöïe daiai neawela säi.
LUK 22:34 Amala säsebegi, Yesuea säla obëgësalea, Fida-o, na dima sähago. Walio gasigi haea gagalugo gawalia made gäla neëgi, dia nafi bu ohodoala, ne dawa madela sämolömelëla säi.
LUK 22:35 Yesuea ïe bëgëla aulo amolima nabahalea, Nïe hamoi hamola mosäia, na dili fisiga gahalea, muni saleloge, aduge, amase, emo usililoge, dilia gaula mosabiola säsebegi awäsolo amo gala, dilida nelebo gumusui afädë nelolela nabi. Ilia säla obëgësalea, Ai, amala made hamoila säi.
LUK 22:36 Amalebe ea ilima sähalea, Amai gaso, walio dolö afädëa muni salelo galea galëge, adu galea galëge, hä, nimolö dialea. Amase, afädë e nudulo helebe maade galëda, fagulo daia gäi amo giila muni nealahilä, nudulo helebe nimalo.
LUK 22:37 Amoïe na dilima säla ïahago. Godeïe bebagi ado säi dibe amoda, nema gausiala digamolö dialea. Ado amea sähalea, Udia dolöea eda ado säla negei neadigilo dolö amolibalä neala helësëmolömelëla säla dëdëla negei dialea. Mida, ne helësëla ado säla dëdëla negei dibe amo gadola, hä, walio gausiala digasebegomelëla säi.
LUK 22:38 Amala säsebegi, ilia ema sähalea, Dafidilo-o, bimo. Nilïa nudulo helebe äudä wi dialeamelëla säi. Amalebe, ea ilima, amo dofeala säla obëgëi.
LUK 22:39 Yesu e gaamua amila, hï dafidi aulo amo gadola, Olibebia moholö awäsebegi, ïe bëgëla aulo amolige ebalä asi.
LUK 22:40 Ili segea ami besela galalahilä, ea ilima sähalea, Nafadea dili fedogola beasegi digaloea, Godema adosa namialola säi.
LUK 22:41 Amala sälahilä, ili dïgïla e holöbö wagadi made, igia nidi habisia amo gadoia awälahilä, emo gumu sasagala salea, Godema adosalea,
LUK 22:42 Naado-o, gaabogi usi na molö gaulubewe, neala gaula moholö helësëseda, neala gaula mosalo. Amamäia gaso, na hamese we gadola made, dia hamese amo gadola hamomalola säi.
LUK 22:43 [Amala säha sebegi, selesaia fii afädë Hebenila maala ulufalahilä, e gelolasi.
LUK 22:44 Yesu e asigigi yöia idogola edefademalä säosäolahilä, Godema gelola adosebegi, ïe filïmo amoda, oböla, heale gadoi besela galala nagadaia dögi.]
LUK 22:45 Godema adola wagalahilä, e nowela, ïe bëgëla aulo sefolalebea ami bu obëgësamelebe, ili adidi difolalebe melï. Mida, ilile asigigi edefademalä yöi amea.
LUK 22:46 Bealahilä ea ilima sähalea, Abilia hamosalea adidi difolalea. Dili adidi dibego nowelahilä, Godema adomalo. Nafadea dili fedogola beasegi digaloeala säi.
LUK 22:47 Yesuea ilibalä ado amo säha nebegi, dolö yafie e neebea ami misi. Giwilasi amoligi dolö ëi Yudasaea ili sigi gaula misi. E Yesu mia maala, Yesu gaula mimi.
LUK 22:48 Gaso Yesuea ema nabahalea, Yudasa-o, dia Dolöïe Malö amo gaula mimila hololösalela nabi.
LUK 22:49 Yesu hïbalä nefolalo amolia gomalä hamodelä hamosebela bealahilä, ema nabahalea, Dafidilo, nilïa ili nudulo helebe wea nufidedulela nabi.
LUK 22:50 Amala nabalahilä, iligi afädëa gobela ïlo busa edefadeïe hamoi hamolasilo amo nufudalahilä, ïe gëhe dafädimadi amo dagala salisi.
LUK 22:51 Amala hamosebegi, Yesuea sähalea, Mala go gadola hamomabio. Fisimalola säi. Amala sälahilä, ïe naaboea gëhe amogi diigisebegi, gëhe amo bu hedabola obëgëi.
LUK 22:52 Amala hamolahilä, gobela ïlo busa amoliage, Godeïe mosö idihë aligilo amolile busa amoliage, amase, asigi gäwi dafidilo nefolalo amoliage, Yesu gaumolöïe misi amolima ea sähalea, Dilia helebege, baialage, gagaula mofiaigoda, fa nelo dolö gaulo amo gadola gaumolöïe mofiaile.
LUK 22:53 Segeyo sulubadelagi, ne dilibalä Godeïe mosöa aligilo amogida, dilia ne made gaui. Gaso, walio gasimi sagaloea beaha aligisebe goeada, hä, dilile segeyomelëla säi.
LUK 22:54 Amala säsebegi, ilia Yesu gaulahilä, gobela ïlo busa edefade amoïe mosöa ami e, hä, sigi asi. Amalebe, Fida eda, holöbö hobeala, ili awäse amo bëgëla awäha nelo.
LUK 22:55 Mosö amoïe yala isogi, ili nulo gobela sefolalebegi, Fidage ilibalä ami sulo.
LUK 22:56 Nulo gobei söa fedasebea ami e sebe amo bealahilä, hamoi hamolasilo dolïsä afädëa ema siila nea, Dolö sebe gowege ebalä nelomelëla säi.
LUK 22:57 Amala säsebegi, Fidaea sähalea, Udia, nada e dawa mademelëla säi.
LUK 22:58 Oböla, holöfalï nelolahilä, hobeala dolö elö amea e bealahilä sähalea, Dige dolö amoli sosogo amogimelëla säi. Amala säsebegi, Fidaea sähalea, Dolö, go ne mademelëla säi.
LUK 22:59 Amala säla aoa afädë gadoi nelolahilä, dolö elöea gelola sähalea, Dolö goweda, dofä ebalä nelo. Mida, eege Galili dolömelëla säi.
LUK 22:60 Amala säsebegi, Fidaea sähalea, Wa! Dolö! Dia säsebegoda, na dofä dawa mademelëla säi. Amala säi amole, haea gagalugoea gäi.
LUK 22:61 Gagalugo gäse amo gaalu, Dafidilo Geloia besuia imogola Fidama siila nelo. Amala siila nebegi, Fidaea helësëla obëgësalea, Dafidilo Geloia ema sähalea, Walio gasigi haea gagalugo gawalia made gäla neëgi, dia nafi bu ohodoala, ne dawa madela sämolömelëla säi amo helësëi.
LUK 22:62 Amala helësëlahilä, e segea doadigila awäla, gäia güsäla dïisa nelo.
LUK 22:63 Yesu sigi nelo dolö amolia e gadiabola digi, nufuda digisa nelo.
LUK 22:64 Faguloea ïe si usulalahilä, ema nabahalea, Dolö di nufudase egoweda, nowëa gabu. Dihï bea säla sämola säha nelo.
LUK 22:65 Amala sälahilä, ilia e gagadela ado nafadela yafie säha nelo.
LUK 22:66 Yosefalï, eso si besela galase amo gaalu, Yu udia dolö ilile asigi gäwi dafidilo galïsolö dolö hulu gegedoi nelo. Amoligida, gobela ïlo busa amolige, mala dawadigi amolige nelo. Ili gegedoi dibea ami Yesu sigi maalahilä,
LUK 22:67 ilia ema sähalea, Afädë Memelei amo di galëda, nilïma sämola säi. Ea säla obëgësalea, Na dilima säla ïaseda, dilia na dofä säsebela made helësëmolömelë.
LUK 22:68 Amase, na dilima ado afädë nabasege, dilia made säla obëgëmolö gabu.
LUK 22:69 Segeyo walio wila nofela, Dolöïe Malö amoda, Gode Geloi Edefade Neebe amoïe naabo dafädimadi awäla samolömelëla säi.
LUK 22:70 Amala säsebegi, ili sulubadelaea ema nabahalea, Amai dida Godeïe malö nealela nabi. Ea ilima säla obëgësalea, Neda dihili säsebe gomelëla säi.
LUK 22:71 Amala säsebegi, ilia sähalea, Ea hamoi amoïe mi edoïe odoama nalï hogomolö. Hïle nafigila säse, nilïa nabi amomelëla, säi.
LUK 23:1 Busa dolö amoli sulubadela nowela, Yesu Bailadi neebea sigi afiai.
LUK 23:2 Ilia ebalä gudimolö nea, mi gäwila sähalea, Dolö goea ado halowela säla, Yu udia dolöea asiala hamomäia dusugaha neë, nilïa melëlomelë. Amase, nilïa Sisama dagisi muni negelo amoge, ea negemabiola sälahilä, Afädë Memelei beaha aligilo ginida, emelëla säsio.
LUK 23:3 Ilia amala säsebegi, Bailadia Yesuma nabahalea, Dida Yu udia dolöïe ginilela nabi. Amala nabasebegi, Yesuea säla obëgësalea, Dihï säse gomelëla säi.
LUK 23:4 Amala säsebegi, Bailadia gobela ïlo busa amolimage, udia dolö gegedoi nefolalo amolimage sähalea, Dolö gowea asiala hamoi afädë na made beasebemelëla säi.
LUK 23:5 Amala säsebegi, ilia gelolafalï sähalea, Dolö goea Yudia sege sulubadelamadi nawesa nea, ea ado olelese amea, udia dolö neebe amoli sulubadela gëgëlasilo nea. Dafidi Galilimadi mi gäwila hamosa nelo amo, walioda, hä, wi maala hamosa neagomelëla säi.
LUK 23:6 Ilia säi amo nabalahilä, Bailadia ilima nabahalea, Dolö goda amai, Galili dolölela nabi.
LUK 23:7 Bailadia helësësalea, Yesu e sege Heledoea sigi neloamadila misi gabula helësëlahilä, e Heledo neebea fisiga gai. Segeyo amo galada, Heledo e Yalusaleme ami misi nelo.
LUK 23:8 Heledoea segeyo sedade dafidi nelo amogi, Yesu bimolöila helësësamu nelo amea, ilia e sigi maasebegi, Heledoea edefademalä obeägï. Yesuea hamolo mala säla ï amo ea nabala nelo ameada, Yesuea dolöea hamomolöi made gadoi hamose amo bimolöila hamesa nelo.
LUK 23:9 Amalahilä, ea Yesuma ado odoa yafie nabi. Gaso, Yesuea ema ado afädë made säla obëgëi.
LUK 23:10 Gobela ïlo busa ami nefolalo amoliage, mala dawadigi dolö ami nefolalo amoliage, gelola gudilahilä, ea nafade yafie hamoimelëla säha nelo.
LUK 23:11 Amasebegi, Heledoeage, ïe ami dolö nefolalo amoliage, Yesu gagadela gadiaboi. Amalahilä, fagulo sedade hedabi hïdo elöi afädë salugasilahilä, Bailadi neebea sigi obëgëmalola säi.
LUK 23:12 Dafidi Heledo Bailadileda, ado neala gasi gogoi nelo gaso, segeyo amogi, ele oböla, damelë hamoi.
LUK 23:13 Bailadia gobela ïlo busa nefolalo amolimage, beaha aligilo dolö nefolalo amolimage, amase, udia dolö amolimage, wela gegedomalolahilä,
LUK 23:14 ilima sähalea, Dilia dolö gowe ne neebea sigi maalahilä, nema sähalea, Ea udia dolöea ba bimäia ado neasilo neamelëla säi amo, na e dilile si mogogi ifosiä, ea nafade edo hamoi walebelela, ema nabala hogosamu nelo. Gaso, dilia ea nafade gowe ili hamoimelëla säi amoligida, asiai afädë na made melïmelë.
LUK 23:15 Heledoeage, we gadola wäla bealahilä, nilï neebeawi sigi obëgëmaloi gabumelë. Hä, nabuö. Ea hamoi amoïe e baagomäia nufulöda, mi maade gabu.
LUK 23:16 Ameada, na e fëgämalola sälahilä, fisiga gamola sämolömelëla säi.
LUK 23:18 Bailadia amala säsebegi, udia dolö sulubadelaea gelolafalï gaalu uuala sähalea, Dolö goda nufudala baagomäia. Balabasada, nihïlïma fisigämalola uuala didigai.
LUK 23:19 Balabasa eada, gaamu isogi ami gamanebalä nudui amoïege, dolö nufudala baagoi amoïege, ilia e galabaia negei nelo.
LUK 23:20 Bailadia Yesu bahïla mosöla sämolöïe, ea ilima bu nabasebegi
LUK 23:21 gaso, ilia gelola uuala säla didigahalea, Eda nufualo. Nufualo. I fügäigi baala negemalola uuala säla didigahamu nelo.
LUK 23:22 Amala säsebegi, Bailadia ilima bu osoda sähalea, Mi edogi. Eada nafade edo hamosio. E baagomäia nufulöïe ea nafade hamoida, na made melïmelë. Amoïeda, na dolö odoama e fëgämalalahilä, mosalahawela säi.
LUK 23:23 Amala säi gasoda, ilia i fügäigi baala negemalola gelolafalï uuala säla didigase amea, Bailadiïe ado hado gai.
LUK 23:24 Amala säsebegi, Bailadia ilia hamomalola egedigisebegi amo gadola hamomalai.
LUK 23:25 Gamane dolöbalä nudui amoïege, dolö nufi amoïege galabaia negei dolö amoda, ilia Bailadia fisigämäia hamei amo fisigäi. Amalahilä, Yesu hili helësëse amo gadola hamomäia, ami dolö amolile naabogi gausi.
LUK 23:26 Ami dolö amolia Yesu sigi awäha nebegi, gaamu Sailini fii dolö afädë, ëida Saimono, mosö gägäwila asi dibea amila, Yalusaleme besela galamolö maaha nebegi, idiafa gausiala digai. Ilia e gaula, Yesuïe i fügäi ïe gïdädaia negesilahilä, Yesu awäse amo gadola gaula hobeala misialai.
LUK 23:27 Yafie gegedoi amoli Yesu awäse amo gadola afiahalea, iligi udia odoage gualö afiahalea, eegi asigiila didigaola aligi afiaha dilo.
LUK 23:28 Amasebegi, Yesuea besuia imogola nea, ilima sähalea, Yalusalemeïe idiwilali-e, ne helësëla dïimabu. Dihili diligige, dilile malögige helësëla dïimalo.
LUK 23:29 Nabuö. Hobeala segeyo moholö amogida, ilia sähalea, Udia fagulo made hagula, haua, malö sogobamolöi made, malö dodo dofä made ïlo sefolalebe amolia obeägïsa saleamelëla sämolömelë.
LUK 23:30 Segeyo amo gala ilia segebi dibe amolima säia adahalea, Dili dagabola digala, nilï dabemalola sälahilä, gau dibe amolima säia gahalea, Nilï hagumalola sämolömelë.
LUK 23:31 Mida, ilia walio i ödäla neebe amoma mala egowe gadola hamosa galëda, amai i bausoi neebe amomada, mala abodo gadoi hamomolödula säi.
LUK 23:32 Ami dolö amolia dolö äudä mala nafade hamolo amolege, Yesubalä gaalu nufulöïe sigi asi.
LUK 23:33 Ili afiala sege ëi Busa Giwi dibea ami besela galala, ilia Yesu i fügäigi ami baala negelahilä, nafade hamolo dolö äudä amolege, elö ïe naabo dafädimadi, elö ïe naabo fefeädimadila i fügäigi baala negei.
LUK 23:34 Amala hamosebegi, Yesuea sähalea, Naado-o, ilia gowe hamosala helësëla made hamose ameada, dia egowelile nafade hëla fisimalola säi. Amase, ami dolö amolia ïe fagulo gii amo nowëa nimabelela, sadu dahilahilä, ïe fagulo amo mogei.
LUK 23:35 Udia dolö nefolalo amolia sisila nefolalebegi, busa dolö nefolalo amoliage Yesu gadiabola sähalea, Ea udia dolö odoa ugila negelo. Eda Geleso, Godea Afädë Memelei amo nea galëda, amo gadola, ea hï e ugila negemäiala säi.
LUK 23:36 Ami dolö amoliage e dibe amo ga madela maala aligilahilä, e gadiaboi. Wani ödä gamogai amo muäia, ïe nafia disilahilä
LUK 23:37 sähalea, Di Yu udia dolö ilile gini nea galëda, dia dihïmu ugila negemola säi.
LUK 23:38 Ilia i fügäigi ïe busa daia bidigi adomoi, ado afädë dëdëla negesalea, Egoweda, Yu udia dolöïe beaha aligilo ginila säla dëdëlahilä, baala negesi.
LUK 23:39 Nafade hamolo äudä baala negei amolegi, afädëa Yesu gagadela sähalea, Dida Afädë Memelei amo madele. Dia dihïdi ugila negesalea, alïge ugila negemola säi.
LUK 23:40 Amala säsebegi, dolö elö amea elö amoma nemosalea, Diage dolö egowea së nasego gadola nase gogi, dia Godebalä made bedäsebele.
LUK 23:41 Alïa nafade hamoi amoïe së molö dibe amo gadola, ilia alïma hamosebe weda, mogola hamosebe. Be, dolö goweada, nafade made hamoimelëla säi.
LUK 23:42 Amala sälahilä, ea Yesuma sähalea, Yesu-o, di beaha aligilo gini hamola maasolo amo gala, dia ne helësëmalola säi.
LUK 23:43 Amala säsebegi, Yesuea ema sähalea, Na dima dofä sähago. Walio dida, hä, nebalä Hebeni namolömelëla säi.
LUK 23:44 Eso si mogogila, eso si osoda amo gadola, sege sulubadela gasilasimu dilo.
LUK 23:45 Mida, eso neëla made, usi amea. Gobela ïlo mosöa fagulo edefade gosai dilo amoge, mogogi gadelala digalahilä, elö eamu eamula negesi.
LUK 23:46 Amase, Yesuea gelolafalï uuala sähalea, Naado-o, nïe gesami dïe naabogi gausisagola säi. Amala sälahilä, hame doala asi.
LUK 23:47 Ami beaha aligilo busa amea, amo beala, Godeïe ëi gauia adogolahilä, sähalea, Dolö goda, dofä asigi mogoi gabula säi.
LUK 23:48 Amase, udia dolö amo bea gegedoi amolia, amala hamosebe amo bealahilä, hilile bidagia nulufuda, hili mosöa obëgëi.
LUK 23:49 Gaso, Yesu e sosogo amoli sulubadela amola, udiafalï Galilila e bëgëla mofiai amolalida, holöbö mia made nea, amo hamose amo beaha nefolalo.
LUK 23:50 Dolö asigi mogoi hedabi afädë, ëi Yosebe nelo. Eda galïsolö dolö amoligi nelo.
LUK 23:51 Galïsolö dolö ilia daiala negese amo gadolage, hamose amo gadolage, eada üla made säi. Eda Yudiamadi gaamu afädëïe ëi Alimadia dolö nelo. Eada Godea Beaha Maadela Sigi Neebe amo misiäia beaha nelo.
LUK 23:52 Dolö amea Bailadi neebea awälahilä, Yesuïe domalo nedulela nabi.
LUK 23:53 Amalebe, ea Yesuïe domalo gaula digala, fagulo hedabia usulalahilä, igi äbä dolö afädë baui made, gähe duwi dilo amogi bausi.
LUK 23:54 Segeyo amoda, Sabada segeyoïe nelebo daialo segeyo dilo. Segeyo Sabada amoda, hä, ga made dilo.
LUK 23:55 Udiafalï Galilila Yesu bëgëla mofiai amolia, Yosebe bëgëla awälahilä, igi äbä amoge, ea Yesuïe domalo bause amoge melï.
LUK 23:56 Ili hili mosöa obëgëlahilä, i heale gegoai odoage, weli gafisigäi hedabi odoage daiai. Amalahilä, Sabada segeyogi mala säla negei dibe amo gadola, ili hele sulo.
LUK 24:1 Saleleïe mi gäwi segeyogi, yosefalï, udiafalï amolia nelebo gafisigäi daiala negei dilo amo neala gaula, Yesu bauia ami afiai.
LUK 24:2 Ili awäla beahamelebe, igia baui idi gai amo bauia amila, bebugula asi dibe melï.
LUK 24:3 Amo bealahilä, ili nogila digala beahamelebe, Dafidilo Geloi Yesuïe domaloda, maade melï.
LUK 24:4 Domalo maade gabugi, ili asigia säosäosa nefolalebegi, dolö fagulo falei si dëdëgïla digamolöi gäi äudä, ili mia fodolofalï maala ulufadigila nelo.
LUK 24:5 Ele beala, udiafalï amoli bedäla, busa fufuäla nefolalebegi, dolö amolea ilima sähalea, Dolö neebe amoïe, oböla, baagoia gui hogosegoda, edoïe.
LUK 24:6 Eda wi maade. E nowela asimelë. Dafidi Galili nea, ea dilima säi amo helësëla obëgëmalo.
LUK 24:7 Ea sähalea, Odoaea Dolöïe Malö amo nafade hamolo dolö neebe amolile naabogi gausisegi, ilia e i fügäigi baala negeseda, segeyo äudä nelolahilä, osodagi e nowemolömelë. Amala hamomolö dialeamelëla Yesuea säi amomelëla säi.
LUK 24:8 Amala säsebegi, ea dafidi säi amo ilia helësëla obëgëi.
LUK 24:9 Amalahilä, ili bauia amila obëgëla awäla, bëgëla aulo gïdälasi amolimage, udia dolö odoa ili sulubadelamage, nelebo hamoi amo sulubadela säla ïaha maadei.
LUK 24:10 Magadala udia Meliage, Yoanaeage, Yameseïe eme Meliage, amase, udiafalï odoa ilibalä nelo amoliage, ado amo gaula awäla abosolo ilima säla ï.
LUK 24:11 Amala säla ï gaso, abosolo ilia udiafalïa ado säi amoda, memalä ado gadoi gabula helësëlahilä, dofä gabula made helësëi.
LUK 24:12 [Amai gaso, Fida e bauia ami baluluia awäla, dosogägïla fia idogola salea, aga beahamelebe, isogi ami fagulo amomu dibe melï. Amo bealahilä, hï asigia helësësalea, amo edo hamoidula fudugila hehelësëla obëgëi.]
LUK 24:13 Segeyo amo galamu, bëgëla aulo amoligi, äudä sege ëi Emeasa moholö asi. Sege amoda Yalusaleme amila, gilomida gïdälasi gadoi dilo.
LUK 24:14 Ele idiafa awäha nea, nelebo sulubadela hamoi amoïe säsäla awäha nelo.
LUK 24:15 Elea amala säsäla awäha nebegi, Yesu hï eege maala baalahilä, ele awäse amo gadola, hiligila awäha nelo.
LUK 24:16 Gaso, elea e gabula bimolö ulï nelo.
LUK 24:17 Awäha nea, ea elema nabahalea, Ali awähalea, edo säsäla awäha neala nabi. Ea amala nabasebegi, elele odagi yöia idogolahilä, olobola nelo.
LUK 24:18 Amalebe, afädëïe ëida Giliobasa, ea ema säla obëgësalea, Udia dolö yafie Yalusaleme mafula gegedoi amoligi, salele walio wegi nelebo ami hamoi amo, di afädë diamu made dawa nealela nabi.
LUK 24:19 Amala nabasebegi, ea elema nabahalea, Nelebo goda edola nabi. Elea ema säla obëgësalea, Nasalese fii Yesuïe sähamelë. Eda bea sälo nea, Godeïe siigige, udia dolö sulubadelaïe siigige, ea hamoi hamoi amoge, ado säi amoge, hedabola gelola hamoimelë.
LUK 24:20 Gobela ïlo busa nefolalo amoliage, nilïle busa nefolalo amoliage, gamane ilia ebalä gudilahilä, baagomolö dialeala sämäia, ilile naabogi gausisebegi, ilia e i fügäigi baala negei.
LUK 24:21 Amala hamoi gaso, nilïa dafidi helësësaleada, afädëa Isilale udia dolö fisigäla sigi obëgëmolö amoda, e gabula sisiläfüla helësëi. Gaso, nelebo amala hamoi amo, segeyo walio neebeweda, osodamelë.
LUK 24:22 Amase, nilïbalä aligilo udia odoaea nilï fudugilasisio. Walio yosefalï, ilia e bauia bea awähamelebe,
LUK 24:23 ïe domalo made melïmelëla säsio. Made beala obëgëla maalahilä sähalea, Sosoäla awäla melëlo amo gadola, nilïa selesaia fii melïmelëla säsio. Amolea nilïma säla ïahaleada, Eda nowela neamelëla säimelëla sämolö obëgëmalasio.
LUK 24:24 Amala säla ïasebegi, nilïbalä aligilo odoaeage, bauia ami bea awähamelebe, udiafalï amolia säi amo gadola wäla bealahilä, iliage e made melïmelëla säi.
LUK 24:25 Amala säsebegi, ea elema sähalea, Ali asigi maade gabu. Bea sälo nefolalo amolia ado säla negei dibe amo sulubadela, iso asigia dofäla aabela made helësëi gabu.
LUK 24:26 Afädë Memelei amea, ïe ëi ilibia eleloi hïdo elöi dibe amo salugamolöïe, dafidi e nelebo amoïe së molö dilo madelela säi.
LUK 24:27 Amala sälahilä, Mosesea Ado säla negei dibea amila mi gäwilahilä, bea sälo nefolalo amoli sulubadelaea ado säla dëdëla negei dibe amo sulubadelagi, ïela säi dibe amo elema awala säla ïaha maadei.
LUK 24:28 Ili afiala sege ele samolöia ami moholö ga madela nea, Yesu eda hä, baagila moholöi awäsebegi,
LUK 24:29 elea adoea dofogala sähalea, Eso digala së gämolö ga madesebe, di walio alïbalä wi diahadula säi. Amala säsebegi, elebalä mosöa ami digala sulo.
LUK 24:30 Elebalä molö molöïe, ea beledi gaula nea, Godema nesegelahilä, dagabola elegali ï.
LUK 24:31 Amala hamosebegi, elele si doga negesi. Amalebegi, elea eda Yesu gabula helësëse amo gaalu, e ami wäla hogosa helei.
LUK 24:32 Amalebe, elea heledo sähalea, Idiafa alïbalä adodola maahalea, ea ado säla dëdëla negei dibe amoli alïma doga negela säsebegi, alïle isogi nulo wilo wäla wilasisio madelela säha sulo.
LUK 24:33 Amalahilä, ele fodolofalï nowela, Yalusaleme obëgëi. Elea ami beahamelebe, bëgëla aulo gïdälasi ilige, odoa ilibalä nefolalo amolige, gedola sefolalebe melï.
LUK 24:34 Ami sefolalo amolia sähalea, Dofä! Dafidilo Geloida, nowei nea. Saimonoma ulufaimelëla säi.
LUK 24:35 Amase, eleage idiafa nelebo ele mia besela galai amo ilima awala säla ïalahilä, ea beledi dagaboia gasebegi, alïa e gabula helësëimelëla säi.
LUK 24:36 Ilia ado amo, aso, säha dibegi, Yesu hï e ili mogogi ami maala nelo. [Ea ilima sähalea, Dalulo dilibalä diamiäiala säi.]
LUK 24:37 E maala nebegi, baagoi gesami beahala helësëla, ili edefademalä fudugila bedäi.
LUK 24:38 Amaha dibegi, ea ilima sähalea, Edogi yöia idogola säosäosa dialea. Dilile iso asigigi asigi äudä negei dibegoda edoïe.
LUK 24:39 Weda nihïne gabula helësëmäiaïe, nïe naabo emo bimo. Dilia ne hüge giwige galebe amo beaha nea, baagoi gesamida, amo gadola aligilo made ameada, ne diigila bimola säi.
LUK 24:40 [Amala sälahilä, ïe naabo emole ilima olei.]
LUK 24:41 Amasebegi, ilia obeägïla digi, fudugila bedäla digisa nelo amea, amo dofä gabula made helësëi nelo. Amalebegi, ea ilima nabahalea, Dilia molö odoa gui dibelela nabi.
LUK 24:42 Amalebe, ilia seme gobei dagaboi amo egali ïasebegi,
LUK 24:43 ea amo neala, ilile siigi nea mai.
LUK 24:44 Hobeala, ea ilima sähalea, Ne dilibalä dafidi nelo amogi nea, na dilima gomalä säla ï amoda gowemelë. Mosese nebegi, Ado säla dëdëla negei dibe amogige, bea sälo nefolalo amolia dëdëla negei dibe amogige, Gë Udälo bebagi dëdëla negei dibe amogige, nïela säla dëdëla negei amo sulubadela gausiala digamolö dialeala säla ïmelëla säi.
LUK 24:45 Amalahilä, ea Godeïe bebagi ado säla dëdëla negei dibe amoli, ilia helësëmäiaïe, ilile asigi doga negelasi.
LUK 24:46 Amalahilä, ea ilima sähalea, Ado säla dëdëla negei dibe amoda gowemelë. Afädë Memelei amea së nalahilä, segeyo osodagi baagoia amila nowela
LUK 24:47 odoaea ïe ëigi nea, udia dolöea nafade hamoi amo hëmäia, asigi besumolö dibe amoïe mala amoda, Yalusalemedale mi gäwilahilä, fifi asi difolalebe sulubadelagi, säsäla moholöla säla dëdëla negei dialea.
LUK 24:48 Nelebo hamola besela galai amo, dilia säla ulufaha namialo.
LUK 24:49 Nabuö. Naadoea diligali ïmolömelëla säla negei amo, na dilima fisiga idogomolömelë. Ilibiala geloi amo dilia neala salugamolöïe, gaamua wimu beaha namialola säi.
LUK 24:50 Yesuea ili sigi sege Bedanimadi awälahilä, ïe naabo gauia adogola nea, Godea ili neala obeägïlasimäiamelëla säi.
LUK 24:51 Ea ili, aso, obeägïlasila säha nea, Godea e Hebeni gaula fedasebegi, ea ili dïgïla asi.
LUK 24:52 Amala hamosebegi, ilia ïe ëi gauia adogola, ilima edefademalä obeägïmolö nobala, Yalusaleme obëgëi.
LUK 24:53 Ilia segeyo sulubadelagi, Godeïe mosöa awälahilä, Godeïe ëi gauia adahamu aligilo. Hä amo.
JOH 1:1 Ado eda mi gäwilafalï siiba nelo. Eda Godebalä nelo. Ado hï eda Gode nelo.
JOH 1:2 Eda mi gäwilafalï, Godebalä siiba nelo.
JOH 1:3 Afädë idi elömadila misida, maade. Godea Adobalä nea nelebo sulubadela hamosa maadeimelë.
JOH 1:4 Emada namolö mi dilo. Namolö ameada udia dolöïe yo digalo nelo.
JOH 1:5 Yo digalo ameada gasimi sagaia ami yo digaha nea. Gasimi sagaloeada yo digalo amo gesumolöi made dilo.
JOH 1:6 Godea dolö afädë nagadaia fisiga wei amoïe ëida Yone e misi nelo.
JOH 1:7 E misi amoda yo digalo amoïe säla ïmolöïe misi. Amaimo, udia dolö sulubadelaea ïe ado nabalahilä, asigi afädë negemäiaïe misi.
JOH 1:8 Hï eda yo digalo amo made. E misi amoda yo digalo amoïemu säla ïmolö misi.
JOH 1:9 Yo digalo amoda dofä yo digalofalï nelo. Udia dolö sulubadelagali yo digalo ïlo. E nagadaiawi moholö nelo.
JOH 1:10 Ado eda nagadaiawi nelo. Ado ameamuda Godea sege föi hamoi gaso, nagadaia udia dolöea e gowe gabula made helësëi nelo.
JOH 1:11 Eda hïle segea wi misi gaso, hïle sosogoea e made säla olei.
JOH 1:12 Gaso, odoaea e säla olela ïe ëigi asigi afädë negesebegi, ea ilima sähalea, Dilida Godeïe malö namialola säi.
JOH 1:13 Ili Godeïe malö besela galai amoda, eedole emelele healemadila made, amase, domaloïe hameloea made, amase, dolöïe hameloea made, Godeamu ïe malö hamola besela galai.
JOH 1:14 Ado eda dolö domalola digala, nilïbalä wi nelo. Nilïbalä wi nebegida, ïe yo digaloge ïe geloige hïdo elöi amo nilïa melïmelë. Eedoïe malö emu nea, ugila negelole ado dofäle ema nobala, ïe yo digaloge ïe geloige hïdo elöi dilo amo nilïa melïmelë.
JOH 1:15 Yonea Adoïe säla ïaha nelo. Ea uuala sähalea, Dolö goda dafidi na dilima säla ïahalea, Ne baagia maase amoda, ne baagila asimelë. Mida, ne maadeia e dafidi nelola säila säi.
JOH 1:16 Ema nobai amo adugasebegi, ea nilï sulubadela ugila negelahilä, hä, bu elöge ugila negesamu nelo.
JOH 1:17 Godea Mosesemadila mala säla negei amo säla ï gaso, ugila negelole ado dofäleda, Yesu Gelesomadila misimelë.
JOH 1:18 Afädëa Gode dofä made melï gaso, ïe Malö afädëfalï amea Gode e nilïma ulufala olei. Malö amoda dofä Gode. Eda Eedobalä dila nea.
JOH 1:19 Yu ilia gobela ïlo dolöge, amase Ilibai dolöge Yalusalemela Yone neebea mosalosebegi, ili maala Yonema nabahalea, Dida nowëla nabi. Amala nabasebegi, Yonea gomalä säla ï.
JOH 1:20 Ea musügä negela made, hedabola ulufala säla ïahalea, Afädë Memelei amoda ne mademelëla säla ï.
JOH 1:21 Amala säla ïasebegi, ilia ema nabahalea, Amai dida nowë. Dida Elaialela nabi. Amala nabasebegi, ea säla obëgësalea, Neda e mademelëla säi. Amala säsebegi, ilia ema bu nabahalea, Dida bea sälo amolela nabi. Amala nabasebegi, ea säla obëgësalea, Ai. Neda amo mademelëla säi.
JOH 1:22 Amala säsebegi, ilia ema bu nabahalea, Dida dofä nowë. Dolö nilï fisiga welo amolima eda gowe gabiola sämolöïe, diada dihï dimada nowëla sähala nabi.
JOH 1:23 Amala nabasebegi, Yonea bea sälo Aisaeaea säi amo gadola ilima säla obëgësalea, Neda afädëa sege nafadeia udia dolö aligilo made dibea ami nea uuala wesalea, Dafidilo Geloi misiäia idi mogola fodomalola säha neamelëla säla obëgëi.
JOH 1:24 Felesi ilia dolö fisiga gai
JOH 1:25 amolia Yonema nabahalea, Dida Afädë Memelei amo made galëda, amase, Elaia made galëda, amase, bea sälo amo made galëda, amai mi edoïe dia udia dolö ödägi gesa neala nabi.
JOH 1:26 Amala nabasebegi, Yonea ilima säla obëgësalea, Nada ili ödäeamu gesa neawe. Gaso, dolö afädë dilia made dawa dili mogogi nea.
JOH 1:27 Dolö amoda ne baagia hobeala moholömelë. Nihïneda ïe emo usililo ëfë fisigämolöda dofea mademelëla säi.
JOH 1:28 Yonema nabi amoge, amase, ea säla obëgëi amoge ödä Yodona dëgëla alömodi, Bedani segea nea amala säi. Segea amida Yonea udia dolö ödägi gesa nelo.
JOH 1:29 Amo aiyo amogi, Yonea Yesu e neebea maasebe amo bealahilä sähalea, Bimo. Egoweda Godeïe Sugua Sibi Malömelë. Goeada udia dolö sege föi sulubadelagi nefolalebe amolile nafade hamoi amo hësa maademolömelë.
JOH 1:30 Dolö goda dafidi na dilima säla ïahalea, Ne baagia hobeala maase amoda, ne baagila asimelë. Mida, ne maadeia e dafidi nelola säla ï amoda egowemelë.
JOH 1:31 Nada e dawa made nelomelë. Amai gaso, e Isilale udia dolöma ulufala olemolöïe, na udia dolö ödägi gemolö misimelëla säi.
JOH 1:32 Yonea e ulufala sähalea, Na beahamelebe, Gesami Hebenila haea maliabu gadoi digalahilä, edaia fise melïmelë.
JOH 1:33 Nada e dawa made nelo gaso, udia dolö ödägi gemäia ne fisiga welo amea nema sähalea, Dia Gesami digalahilä dolö afädëdaia fise beaseda, dolö ameada udia dolö Eleloi Gesamia gemolömelëla säi.
JOH 1:34 Eda Godeïe malö neebe amo na melïmelë. Amo na dilima säla ïmelëla Yonea säi.
JOH 1:35 Amo aiyo amogi, Yonege ïe bëgëla aulo äudä amolege bu amimu nelo.
JOH 1:36 Amala nea, Yonea Yesu awäha neebe amo bealahilä sähalea, Bimo. Egoweda Godeïe Sugua Sibi Malömelëla säi.
JOH 1:37 Amala säsebegi, ïe bëgëla aulo äudä amolea ea säse amo nabalahilä, Yesu bëgëla asi.
JOH 1:38 Amalebegi, Yesuea besula beahamelebe, ele e bëgëla maaha neebe melï. Ea elema nabahalea, Alia edo hogosala nabi. Amala nabasebegi, elea ema nabahalea, Elabai-e, dida mosö abodogi saleala nabi. Elabai amo besulada, säla olelelola sälo.
JOH 1:39 Amala säsebegi, Yesuea elema säla obëgësalea, Alia bea misiëla säi. Amala säsebegi, ele awälahilä e diasebe mosö amo beaha nelo. Segeyo amoda ebalä ami nelo. Ele ebalä asi amoda eso si biyidugi gadola deadi asi.
JOH 1:40 Bëgëla aulo äudäea Yoneïe ado nabala Yesu bëgëla asi amolegi, afädëda Saimono Fidaïe edoo Ädulu.
JOH 1:41 Eada Yesu hä amilahilä, fodolofalï ïe edoo Saimono bea asi. Amalahilä, ea Saimonoma sähalea, Alïa hä Mesaea melïmelëla säi. Ëi Mesaea amo besulada, Gelesola sälo.
JOH 1:42 Amalahilä Äduluea e sigi Yesu neebea asi. Maaha nebegi, Yesuea ema siila nea sähalea, Dida Saimono, Yoneïe malö. Dïe ëida Sifasala sämolömelëla säi. Ëi Sifasa amo besulada, Fidala sälo.
JOH 1:43 Amo aiyo amogi, Yesu e Galili moholö helësëi. E awäla Filibi gausialahilä ema sähalea, Ne bëgëla misiëla säi.
JOH 1:44 Filibida gaamu Bedesaida ami fii dolö. Sege amoda Ädulule Fidalele sege.
JOH 1:45 Amasebegi, Filibia Nadanale hogola asi amo beagolelahilä ema sähalea, Mosesea Ado säla negei dibe amogi ïe dëdëla negei amo gadolage, amase, bea sälo amolia bebagi ïe dëdëla negei amo gadolage, nilïa hä e melïmelë. Amoda Nasalese fii Yesu, Yosebeïe malö amo gabiola säi.
JOH 1:46 Amala säsebegi, Nadanalea ema nabahalea, Amai nelebo hedabi afädë Nasalesela moholöi gabulela nabi. Amala nabasebegi, Filibia ema sähalea, Dia bimolö misiëla säi.
JOH 1:47 Amala säsebegi, Yesuea Nadanale e maaha neebe amo bealahilä, e helësëla sähalea, Bimo. Dolö maasebe egagoweda dofä Isilale dolömelë. Wäfalï sälo afädë egowemada mademelëla säi.
JOH 1:48 Amala säsebegi, Nadanalea ema nabahalea, Dia ne abilia dawadigila nabi. Amala nabasebegi, Yesuea ema säla obëgësalea, Filibia di, aso, made wela nebegi, di äfäeo i mia sulo amoda na melïmelëla säla ï.
JOH 1:49 Amala säla ïasebegi, Nadanalea säla obëgësalea, Säla Olelelo-o, dida Godeïe malö. Dida Isilaleïe Ginimelëla säi.
JOH 1:50 Amala säsebegi, Yesuea ema säla obëgësalea, Di äfäeo i mia sulo amo na melïla säi amea dia nema asigi afädë negesale. Hobealada go gadoi made, baagila asi elöi bimolömelëla säi.
JOH 1:51 Amalahilä, Yesuea ema bu elö sähalea, Na dilima dofä gelola sähago. Hebeni doga negei bealahilä, dilia Godeïe selesaia fii amoli Dolöïe Malöma fedafu digafusa neë bimolömelëla säi.
JOH 2:1 Segeyo äudä nelolahilä osodagi, Disiligi Galiliïe Gaina segea ami, dolö afädëïe udia ifosebea Yesuïe emea amo bea asi.
JOH 2:2 Ilia Yesuge ïe bëgëla aulo amolige misialola wesebegi, ili awälahilä, udia ifosebea ami nelo.
JOH 2:3 Wani ödä amo hä maadei gabugi, Yesuïe emea ema sähalea, Ilia wani ödä amo hä, maadei gabuwela säi.
JOH 2:4 Amala säsebegi, Yesuea ema säla obëgësalea, Neme, nïe hamoi amogida, dia nema hamomola sämolöi mademelë. Nïe segeyoda, asomelëla säi.
JOH 2:5 Amala säsebegi, emea oböla hamoi hamolasilo amolima sähalea, Ea dilima nelebo afädë hamomalola säseda, dilia amo nabala hamomalola säi.
JOH 2:6 Amaimo, amida gobo i igia hamoi bobogamu gafeia dilo. Yu iliada ilile aialo mala dibe amo gadola hësa aligilo dilo. I afädë afädëlagida bagedi i nabülasi gadoia galë, mimogolasi gadoia galë, söga salasegi nobamolöi dilo.
JOH 2:7 Amala säsebegi, Yesuea hamoi hamolasilo amolima sähalea, Gobo i gogi ödä osaha maademalola säi. Amala säsebegi, ilia ea säsebe amo gadola, osala nobaha maadei.
JOH 2:8 Amala hamosebegi, ea ilima sähalea, Ödä usi gogi odoa neala gaula, molö sigi aligilo neebea ami mosalola säi. Amala säsebegi, ilia amo gadola hamolahilä, gaula asi.
JOH 2:9 Gaula awälahilä, molö sigi aligilo amoma ïasebegi, ea ödäfalïa wani ödä hamoi amo na bealahilä, abidi niidula asusugai. Hamoi hamolasilo dolö, ödä usi gaula mulo amoliamuda, dawadigi nelo. Amala asusugalahilä, ea udia goa amo welahilä,
JOH 2:10 ema sähalea, Udia dolö molö molö misialola säi misi sefolalebe amoli wani ödä hedabi amo dafidi muäia osala ïïa awälahilä, udia dolö amoli edefade naala gagaosa neëgi, wani ödä fea amo odoa muäia ïlo negei gaso, wani ödä hedabi amo musügä negei dilolahilä, dia oböla hobeala gaula misi gabula säi.
JOH 2:11 Yesuea dolöea hamomolöi made gadoi dafidi mi gäwila hamoi amoda, Disiligi Galiliïe gaamu Gaina amidale hamoi. Ea amo hamoi amoda, ïe geloi hïdo elöi dilo amo ulufala olei. Amala hamosebegi, ïe bëgëla aulo amolia ema asigi afädë negei.
JOH 2:12 Hobeala, Yesuge, ïe emege, ïe edoolalige, amase, ïe bëgëla aulo amolige, Gabaniama gaamugi awälahilä, segeyo ede made ami nelo.
JOH 2:13 Yu ilile Baagila Asi Segeyo edefade amo hä, ga made dibegi, Yesu e Yalusaleme moholö asi.
JOH 2:14 Amalahilä, ea Godeïe mosöa ami beahamelebe, sugua gaoge, sugua sibige, haea maliabu gadoige, bidi neadigisa dibe melï. Amase, dolö odoa muni bedefaloge ami sefolalebe melï.
JOH 2:15 Amo bealahilä, Yesuea ëfë gadoia fëgälo ëfë afädë hamoi. Amalahilä, ea dolö amolige, sugua gaoge, amase, sugua sibige, Godeïe mosö yala isogi amila nulufuda segea nesila fisiga gaha maadei. Muni bedefa bedefalo sefolalo amolile muni aulidaia difolalo amola neala besigadasila sadia galahilä, auli amoge besusa maadei.
JOH 2:16 Amala besusa maadelahilä, haea magaia neaha difolalo amolima sähalea, Goda sulubadela segea gaula afiamo. Naadoïe mosö ameada, magaia nelo mosö gadoi hamomabiola säi.
JOH 2:17 Ea amala hamose amo bealahilä, ïe bëgëla aulo amolia ado afädë bebagi säla dëdëla negei dibe amo helësëla obëgëi. Amoda gowe. Na dïe mosö gelola hamese amea, ne sëlasimolömelëla säla dëdëla negei dibe amo helësëi.
JOH 2:18 Yesuea amala nesila digisebegi, Yu ilia ema nabahalea, Dia hamoi amo gadola hamomolöïe geloi galeamelëla säla, dolöea hamomolöi made gadoi abodo hamola nilïma olemolö gabula nabi.
JOH 2:19 Amala nabasebegi, Yesuea ilima säla obëgësalea, Dilia Godeïe mosö neebe gowe hä, haila fisimo. Amaseda, na segeyo ohodoagimu bu ulimolömelëla säi.
JOH 2:20 Amala säsebegi, Yu ilia säla obëgësalea, Wae! Go hamosaleada, gäheo i nabülasi biyidiaïe gafeia asi amoda. Amai, diada segeyo ohodoagimu ulimolölela nabi.
JOH 2:21 Gaso, Yesuea Godeïe mosöla säi amoda, hïle domalo amo helësëla amala säi.
JOH 2:22 Hobeala, e bauiala nowesebegi, ïe bëgëla aulo amolia bu helësëla obëgësalea, ea ado dafidi säi amo helësëi. Amala helësëlahilä, Godeïe ado säla negei dibe amoge, ado Yesuea säi amoge, dofä säi gabula helësëi.
JOH 2:23 Yesu e Yalusaleme ami nea, Baagila Asi Segeyo amoïe helësëla molö molö gedosolo segeyo amo gala, ea dolöea hamomolöi made gadoi hamose amoli bealahilä, udia dolö yafiea ïe ëigi asigi afädë negei.
JOH 2:24 Amala negei gaso, Yesuea udia dolö sulubadela dawadigi neebe amea, ilima asigi bogia gala made nelo.
JOH 2:25 Udia dolöïe iso asigi dawadigi neebe ameada, eda dawa oboba made, amase, afädëa ema ebedada gowe gadoimelëla säla ïmolöi mademelë.
JOH 3:1 Felesi dolö afädë Yu ilile busa nelo, amoïe ëida Nigudimusi.
JOH 3:2 E Yesu neebea gasigi maalahilä, ema sähalea, Säla Olelelo-o, nilïa dida säla olelelo Godea fisiga weila helësësamelë. Mida, Gode e dolö afädëbalä made nea, ea dolöea hamomolöi made gadoi dia hamosego gadola hamomolöi mademelëla säi.
JOH 3:3 Amala säsebegi, Yesuea ema säla obëgësalea, Na dima dofä gelola sähago. Dolö afädë e bu elö made neegela ägüseda, Godea Beaha Maadela Sigi Neebe amo ea made bimolömelëla säi.
JOH 3:4 Amala säsebegi, Nigudimusia ema nabahalea, Dolö fädäi amoda abilia neegela ägümolödu. Amai emeïe isogi nogila digaseda, emea bu elö neegela ägümolöilela nabi.
JOH 3:5 Amalebe, Yesuea säla obëgësalea, Na dima dofä gelola sähago. Amai afädë ödäeage, Gesamiage, made neegela ägüi neebe amoda, Godea Beaha Maadela Sigi Neebea ami dofä made nogila digamolömelë.
JOH 3:6 Afädë e domaloea neegela ägüse amoda, domalomu neamelë. Amase, Gesamia neegela ägüse amoda, gesami neamelë.
JOH 3:7 Na dima sähalea, Dilida hä, bu elö neegela ägümolö dialeala säla ï amogi, dia fudugimabu.
JOH 3:8 Foda hï hamea aulomelë. Gobamu nabelo gaso, abododila maala abododi awähadu, amoda dia dawa mademelë. Amai Gesamia neegela ägüi nefolalebe amoli sulubadelada, amo gadoi neamelëla säi.
JOH 3:9 Amala säsebegi, Nigudimusia ema nabahalea, Dia säsebegoda, abeahäladula nabi.
JOH 3:10 Amala nabasebegi, Yesuea ema säla obëgësalea, Dida Isilale ilile säla olelelo nebego gaso, na säsebeweda made helësësebele.
JOH 3:11 Na dima dofä gelola sähago. Nelebo nilïa dawadigi amoge, amase, beaha maadei amoge, dilima säla ïahawe gaso, ado nilïa säla ïasebe amoda, dilia dofä säsebela helësëla made nebego.
JOH 3:12 Na dilima nelebo nagadaia dibe amogi neawela säla ïaha gaso, asigi afädë made negese goeada, amai Hebeniïe nelegei dibe amogi neawela säseda, dilia abilia asigi afädë negemolödu.
JOH 3:13 Afädë nagadaiawila Hebeni fedaida maade. Hebenila Dolöïe Malö nagadaiawi digai amomu Hebeni fedaimelë.
JOH 3:14 Siiba, Mosesea sege nafadeia udia dolö aligilo made dibea ami nea, nuba iigi baala gauia adogoi amo gadola, Dolöïe Malö amoge amo gadola wäla gauia adogomolö dialea.
JOH 3:15 Mida, udia dolö sulubadelaea ema asigi afädë negese amoliada, namolöi namolö gaula namiäiaïe.
JOH 3:16 Godea udia dolö sege sulubadelagi nefolalebe amoli boba hamolahilä, ïe malö afädëfalï nelo amo ï. Ïe malöma asigi afädë negei nefolalebe amoli, made baagola, namolöi namolö amo neala gaumäiaïe ïmelë.
JOH 3:17 Godea ïe malö amoda udia dolöbalä gudimolöïe fisiga wei made. Udia dolö sege sulubadelagi nefolalebe amoli damula mosäia fisiga weimelë.
JOH 3:18 Godea ïe malöma asigi afädë negei nefolalebe amolibaläda gudila asiala hamoila made säimelë. Ema asigi afädë made negei nefolalebe amolibaläda gudila asiala hamoila säimelë. Mida, Godeïe malö afädëfalï amoïe ëigi asigi afädë made negei amea amaimelë.
JOH 3:19 Asiala hamoila säi amoda gomalä. Yo digalo nagadaiawi digai nebegi gaso, udia dolöea mala nafademu hamolo amea, gasimi sagalomu boba hamosalea, yo digaloda boba hamoi made nelo.
JOH 3:20 Udia dolö mala nafade hamolo amoli sulubadelaeada, ilile mala nafade hamoi amo ulufadigiloea, yo digalobalä habobalahilä, ilida yo digalo neebea ami mulo mademelë.
JOH 3:21 Amai gaso, mala dofä hamolo neebe amolia hamosebe amoda, Godeïe geloigila hamosamelëla yo digaloea olemäialahilä, ilida yo digalomadi maala aligilomelëla Yesuea säi.
JOH 3:22 Hobeala, Yesula ïe bëgëla aulo amolali, hä, Yudia segea moholö afiai. Afiala ilibalä salele odoa ami nea, ea udia dolö ödägi gesa nelo.
JOH 3:23 Amase, Salimi gaamu ga madela Ainono segea ami, ödä yafie dilo ameage, amase, udia dolö yafie ödägi gemäia mafui ameage, Yonea ili ödägi gesa nelo.
JOH 3:24 Amoda Yone e, aso, galabaia negela made nelo amo gaalu, amala hamosa nelo.
JOH 3:25 Amaha nea, Yoneïe bëgëla aulo amolia, nigime hëla mala negei dibe amo helësëla, Yu dolö afädëbalä gëgësa dilo.
JOH 3:26 Amala gëgësa dilolahilä, ili Yone neebea afialahilä ema sähalea, Säla Olelelo-o, dolö afädë dibalä Yodona dëgëla alömodi nebegi, dia sähalea, Dolö amoda gowemelëla säi ameada, udia dolö ödägi gesa nea. Amala hamosebegi, udia dolö sulubadela e neebeamu awäha neamelëla säla ï.
JOH 3:27 Amala säla ïasebegi, Yonea säla obëgësalea, Afädëa Hebenila nelebo ema ïase amomu neala gaumolöimelë.
JOH 3:28 Na dafidi dilima sähalea, Afädë Memelei amoda ne mademelë. E hobea misiäia, nedale fisiga weila säsebegi, dilia nabi amoda säla ïmolöi galeamelë.
JOH 3:29 Amaimo, dolö afädëa udia neaseda, udia amoda dolö amoïe udia filo. Dolö esama ebalä ga madela nelo amea, udia goaea ado säsebe amo nabalahilä, edefademalä obeägïlo. Amo gadola obeägïlo nema nobasebe ameada, na obeägïsa neawe.
JOH 3:30 Neda holöfalïla, eda ilibiala edemolö dialea.
JOH 3:31 Afädë gadogola digai neebe amoda, sulubadelaïe edefade nea. Afädë nagadaiala misi neebe ameada, nagadaiala maala nagadaia mala amomu sälo nea. Afädë Hebenila digai neebe amoda, sulubadelaïe edefade neamelë.
JOH 3:32 Ea melï amoge, nabi amoge, udia dolöma säla ïaha nea gaso, afädëa ea säsebe amo made nii neamelë.
JOH 3:33 Ea säi amo nii neebe amea, Gode eada dofä sälo neamelëla ulufalomelë.
JOH 3:34 Amoïe mida, Godea gëla made, ïe Gesami ïlo amea, afädë ea fisiga idai ameada, Godeïe ado amo sälo nea.
JOH 3:35 Eedoea ïe Malö amo boba hamolahilä, nelebo hulu sulubadela ïe naabogi gausisa maadei.
JOH 3:36 Malö amoma asigi afädë negei neebe ameada, namolöi namolö amo gaula nea. Malö amea ado säsebe amo made nabala, auaula fofolëlo neebe ameada, namolö amo made bimolömelë. Amobaläda, Godeïe mihalälo amo diamolöi diamolömelëla Yonea säi.
JOH 4:1 Yonea ïe bëgëla aulo namiäia udia dolö ödägi gesa nelo amoli holöfalïlahilä, Yesuea yafie gesa neamelëla odoaea säi amo Felesi dolö amolia nabi.
JOH 4:2 Yesueada afädë made gei. Gaso, ïe bëgëla aulo amoliamu amala gesa nelo.
JOH 4:3 Amo nabimelëla säi amo Yesuea nabalahilä, e Yudia dïgïla Galili obëgëi.
JOH 4:4 Galili moholöda, Disiligi Sameliamadi awäla aulo negei.
JOH 4:5 Amalebe e awäla, Samelia ilile gaamu afädëgi besela galai. Gaamu amoïe ëida Sigala sälo. Siga gaamu amoda siiba Yeigabaea ïe malö Yosebegali sege ïa ami ga madela dilo.
JOH 4:6 Segea amida siiba Yeigabaea ödä dögöi afädë dilo. Yesu e awäha nea emo hëhela, ödä dögöi amo ga madela ami hele sulo. Amoda eso mogogi amai.
JOH 4:7 Amala sebegi, Samelia udia afädë ödä usimolö maaha nebegi, Yesuea ema sähalea, Ne ödä molö gabu. Osala ïmola säi.
JOH 4:8 Amoda ïe bëgëla aulo amoli, gaamugi molö nea afiaibua amai.
JOH 4:9 Amala säsebegi, Samelia udia amea ema säla obëgësalea, Dida Yu dolö. Neda Samelia udiamelë. Dia ödä ïmo ne nahadula säsebegoda, abilia sähala säi. Udia amea amala säi amoïe mida, Yu iliada Samelia ilibalä gedola made aligilo.
JOH 4:10 Amala säsebegi, Yesuea udia amoma säla obëgësalea, Dia Godeïe galu amoge, amase, dolö dima ne ödä ïmo nahadula säsebegoge, dawa galebeda, dia ema namolöi namolö ödä ïmola säsegi, ea digali namolöi namolö ödä amo ïalabiola säi.
JOH 4:11 Amala säsebegi, udia amea ema säla obëgësalea, Dafidilo-o, dida ödä i maade goda, ödä dögöi goweda ga ga gidogofalï dibe amo, dia namolöi namolö ödäda abidi usimolö.
JOH 4:12 Ödä dögöi oselo goweda, nilïle mäu Yeigabaea nilïgali ï. Amase, hï eege, ïe malölalige, ïe sugua gaoge, sugua sibige, sulubadelada ödä dögöi gowegimu naha nelo amo, amai diada Yeigaba baagilela nabi.
JOH 4:13 Amala nabasebegi, Yesuea ema säla obëgësalea, Udia dolö sulubadela ödä gowegi naha neebe amolida bu halämolö.
JOH 4:14 Gaso, afädëa ödä na ïmolö amo nasebe amoda, bu elö made halämolö. Ödä na ema ïmolö amo gü dusula besela galahamu neëgi, eda namolöi namolö gaula namolömelëla säi.
JOH 4:15 Amala säsebegi, udia amea Yesuma sähalea, Dafidilo-o, hobea ne ödä made halämolöïege, ödä dögöi gowegi bu elö made osa moholöïege, dia ödä go negali ïmola säi.
JOH 4:16 Amalebe Yesuea ema sähalea, Dia dïe dolödale dafidi bea awälahilä, haligila wi misialola säi.
JOH 4:17 Amala säsebegi, udia amea säla obëgësalea, Neda dolö maadela säi. Amalebe Yesuea ema sähalea, Dia di dolö maadela säi amoda mogola säimelë.
JOH 4:18 Dafidi dïe dolö bia sulo. Amase, dolö afädëbalä di walio sebegoda, dihïle dolö made. Dolö maadela säsebegoda, dofä säimelëla säi.
JOH 4:19 Amala säsebegi, udia amea ema säla obëgësalea, Dafidilo-o, na walio helësësa, dida bea sälo afädë gabumelë.
JOH 4:20 Nilïle mäu iliada segebi wedaia Godeïe ëi gauia adalo. Gaso, Yu udia dolö diliada Yalusaleme amimu gauia adamolö dialeala sälomelëla säi.
JOH 4:21 Amalebe, Yesuea ema sähalea, Udia-o, na ado säsebewe dia nimalo. Segeyo afädë besela galasegi, dilia segebidaiawi neamuge, amase, Yalusaleme neamuge, Naadoïe ëi made gauia adamolömelë.
JOH 4:22 Samelia diliada nelebo dawa made amoïe ëi gauia adalo. Gaso, nilïada nelebo dawa amoïe ëi gauia adalomelë. Mida, damula auloda Yu fii ilimadila mulomelë.
JOH 4:23 Godeïe ëi gauia adalofalï amoliada ilile gesamia Naadoïe ëi dofä gauia adamolömelë. Amala hamomolö segeyo besela galasegi hamomolö amo hä, besela galai dialea. Naadoea ïe ëi gauia adaloda amoli gadoi hamesa neamelë.
JOH 4:24 Gode hï eda gesami nea. Ïe ëi gauia adalo amolia ilile gesamia Naadoïe ëi dofä gauia adamolö dialeamelëla säi.
JOH 4:25 Amala säsebegi, udia amea Yesuma sähalea, Mesaea moholö amoda na helësësamelë. Ema Gelesolage sälo amo. E maaseda, ea nelebo sulubadela awala säla ïmolöla säi.
JOH 4:26 Amala säsebegi, Yesuea ema säla obëgësalea, Walio dibalä adosa neebeweda, neda amo neawemelëla säi.
JOH 4:27 Amala säha nebegi, ïe bëgëla aulo amoli obëgëla mofiahamelebe, Yesu e udiabalä adosa neebe amo bealahilä, ili fudugi. Fudugilahilä, dia edo hogosalage, amase, edoïe udia gobalä adosa nelolage made säi.
JOH 4:28 Amalebe, udia amea ödä i amo ami dïgïla, e bu gaamugi obëgëlahilä, udia dolö amolima sähalea,
JOH 4:29 Dolö afädë neebe amea nelebo na hamoi amo sulubadela säla ïaha maadei amo, bea mofiamo. Eda Gelesoledula säi.
JOH 4:30 Amala säsebegi, ili gaamugi amila Yesu neebea afiai.
JOH 4:31 Udia amo asibua, ïe bëgëla aulo amolia Yesuma sähalea, Säla Olelelo-o, di hä molö muöla säi.
JOH 4:32 Amala säsebegi, ea ilima säla obëgësalea, Na molö molö galebe amoda, dilia dawa mademelëla säi.
JOH 4:33 Amala säsebegi, ïe bëgëla aulo amolia hilidomu didiähalea, Amai afädëa egali molö gaula maala ïledula didiäi.
JOH 4:34 Amala didiäsebegi, Yesuea ilima sähalea, Nïe molöda ne misialala sälo amea hamesebe amo gadola bëgëla, ïe hamoi amo hamola wagamolö amomelë.
JOH 4:35 Dilia sähaleada, Aube biyidia nelolahilä, molö nelo segeyo amo besela galamolö gabula sälo madele. Gaso, nabuö. Na dilima sähago. Dilia hä, sagai dibeadi hedabola sidawewela bimo. Molö amolida mumului hä, nimolöi gabuwe.
JOH 4:36 Walioda, failoea bidi neahawe. Walioda, ea namolöi namolöïe molö faisa nea. Mida, afädëa hawa fëfësa neebe amoge, elöea faisa neebe amoge, ele helegela gedola nea obeägïmäiamelë.
JOH 4:37 Ado goda dofämelë. Afädëa sagasegi, elöea molö amo faila nelomelë.
JOH 4:38 Dilia dafidi sagaia made ami, na dilima molö nea mosalaimelë. Odoa ilia häuala sagai dibea ami, dilia ilia hamoi amoïe molö niimelëla säi.
JOH 4:39 Samelia udia amea säse amo nabalahilä, gaamugi ami fii yafiea Yesuma asigi afädë negei. Amoïe mida, udia amea na nelebo hamoi amo sulubadela säla ïaha maadeimelëla säi amogi.
JOH 4:40 Amalebe, Samelia ili Yesu neebea ami maalahilä, e ilibalä neadula säi. Amasebegi, segea ami e segeyo äudä nelo.
JOH 4:41 Amalebe, udia dolö odoa yafieage ïe ado nabala asigi afädë negei.
JOH 4:42 Ilia udia amoma sähalea, Nilïa dia säse nabi ameamu asigi afädë negesa mademelë. Nihïlï ïe ado amo nabala helësësaleada, dolö goweda dofä nagadaia udia dolö neebe amolile damula aulo gabula helësësa neamelëla säi.
JOH 4:43 Yesu e segeyo äudä Samelia ilibalä nelolahilä, sege amo dïgïla Disiligi Galili asi.
JOH 4:44 Dafidi Yesu hï sähalea, Bea sälo neebe amoda hïle segeafalï ëi maade neala säi.
JOH 4:45 E awäla Galili besela galasebegi, Galili udia dolö ilia e säla olela gausiai. Mida, ilige dafidi Yalusaleme awäla, Segeyo Edefade amoïe molö molö gedosolo amo gala, ea nelebo hamose melï amogi.
JOH 4:46 Yesu e Disiligi Galiliïe gaamu Gaina ami dafidi ödäfalï neala wani ödä hamoia ami bu awäla besela galai. Segeyo amo galada, giniïe gusigusiïe efege Gabaniama gaamugi ami oloi dilo.
JOH 4:47 Dolö amea nabelebe, Yesu e Yudia dïgïla Galili misi neala säi amo nabi. Amalebe, ïe malö oloi amo baagomolöfalï dibe amea, e Yesu neebea awälahilä sähalea, Nïe malö wahimäia di Gabaniama awähadula säi.
JOH 4:48 Amala säsebegi, Yesuea ema sähalea, Dolöea hamomolöi made gadoige, hïdo elöige hamose amo made bealada, dofä dilia asigi afädë negelo made gabumelëla säi.
JOH 4:49 Amala säsebegi, gusigusi amea ema sähalea, Dafidilo-o, nïe malö baagoloea, awähadula säi.
JOH 4:50 Amalebe, Yesuea ema sähalea, Di mosalo. Dïe malöda hä, wahi saleamelëla säi. Dolö amea Yesuea ado säsebe amo dofä gabula helësëla e hä, asi.
JOH 4:51 Dolö amo made besela galala awäha nebegi, ïe hamoi hamolasilo amolia maala, idiafa gausiala digalahilä sähalea, Dïe malöda hä wahi saleamelëla säi.
JOH 4:52 Amala säsebegi, ea ilima nabahalea, Aoa nowëgi wahisiola nabi. Amalebe ilia säla obëgësalea, Aiyo eso si agegi olo amo hä, damuimelëla säi.
JOH 4:53 Amalebe, eedoea helësësaleada, aiyo aoa amogimu Yesuea ema dïe malöda wahi saleamelëla säi amo gadola, wahi gabula helësëi. Amalebe, eege, e sosogo amoli sulubadelaeage, asigi afädë negei.
JOH 4:54 Amoda Yesu e Yudiala Galili maala nea, ea dolöea hamomolöi made gadoi bu agedu hamoida amo.
JOH 5:1 Hobeala, Yu ilile segeyo edefade afädëgi gedolo amo gadola, Yalusaleme gedosebea ami Yesu eege asi.
JOH 5:2 Yalusaleme amida yala edefade amoïe idi afädëda Sugua Sibiïe idila sälo dibe amo ga madela amida, ödä nudugu afädë dilo. Ödä nudugu amoda Hibulu adoeada Bedesedala sälo. Amo amalelada holöbö mosö gadoiïe hadai bia dilo.
JOH 5:3 Amolidaiada, udia dolö oloi yafie difolalo, si golaige, emo nafadeige, fii sige.
JOH 5:5 Hadai amodaiada dolö afädë dilo. Dolö amo oloi dialeamu gäheo i nabülasi ohodoaïe odoai gödölasi asi dilo.
JOH 5:6 Yesuea dolö oloi dibe amo beahamelebe, e siibafalï amo wälasi dilo gabula helësëlahilä, ema nabahalea, Di wahimäia hamesebelela nabi.
JOH 5:7 Amala nabasebegi, oloi amea säla obëgësalea, Dafidilo-o, ödä bebedägïsebea ami ne ugila negela, ödägi gelasimolö dolö madesalea. Nihïdo geleä fifilïla awäha neëgi, odoa iliada ne baagila ilidale digafulomelëla säi.
JOH 5:8 Amala säi amo nabalahilä, Yesuea ema sähalea, Di nowelahilä, dïe fëogo gaula mosalola säi.
JOH 5:9 Amala säi amole, dolö oloi amo wahisebegi, ïe fëo amo hï neala gaula asi. Dolö wahi amoda, segeyo Sabada gafegi wahi.
JOH 5:10 Amai gabugi, Yu ilia dolö wahilasi amoma sähalea, Walio Sabada segeyo gafego. Mala säla negei amea dia fëogo gaula mosabiola säi dialeala säi.
JOH 5:11 Amala säsebegi, ea säla obëgësalea, Dolö ne wahilasilo amea dïe fëogo gaula mosalola säimelëla säi.
JOH 5:12 Amala säsebegi, ilia ema nabahalea, Dolö nowëa dïe fëogo gaula mosalasiola nabi.
JOH 5:13 Dolö wahi amea nowëa e wahilasidula dawa made nelo. Amoïe mida, udia dolö yafie gegedoi dibea ami, Yesu e asi amea amai.
JOH 5:14 Hobeala, Yesuea Godeïe mosöa ami beahamelebe, dolö amo neebe bealahilä ema sähalea, Nabuö. Walio di hä, wahi gomelë. Dia nafade bu elö made hamomalo. Oböla, yöi elö dia dafidi gausiai amo baagila awäla dima besela galaloeamelëla säi.
JOH 5:15 Amalebe, dolö amo awälahilä, Yu amolima sähalea, Ne wahilasi amoda Yesuea gabiola säi.
JOH 5:16 Yesuea Sabada segeyo gafegi amala hamolo gabugi, Yu ilia e sëlasisa nelo.
JOH 5:17 Amasebegi, Yesuea ilima säla obëgësalea, Nïe Naadoea hamoi hahamolamu maaha nelo amo gadola, nage walio hamosa neamelëla säi.
JOH 5:18 Amala säi amo nabalahilä, Yu amolia Yesu e nufulö gelola helësëi. Amoïe mida, Yesuea segeyo Sabada gafeïe mala damulo amogimu made. Nïe Naadoda Godela säi ameada, e hï Gode gadoi hamosebela helësëlahilä, ilia e nufulö helësësa nelo.
JOH 5:19 Amala helësësa dibegi, Yesuea ilima säla obëgësalea, Na dilima dofä gelola sähago. Malöea hïdo asigiamu nelebo afädë hamomolöi mademelë. Eedoea hamose amo bealahilä, Malöeage amomu hamomolömelë. Mida, Eedoea nelebo sulubadela hamosebe amo gadola, Malöeage amo gadola wäla hamosamelë.
JOH 5:20 Eedoea ïe Malö boba hamolahilä, ea hamosebe amo sulubadela Malöma olesa. Dili sulubadela fudugimäia, hamoi geloi hïdo elöi walio hamosebe melï amo gadoi made, edefademalä hamomäia ea ïe Malöma olemolömelë.
JOH 5:21 Eedoeada udia dolö baagoi amoli nowela ifosilahilä, namolö ïlo amo gadola, Malöeage amo gadola wäla namolö ïmolö helësëse amogali ïmolömelë.
JOH 5:22 Amase, Eedo hïda udia dolöea hamosebe amoïeda made mogemolömelë. Sulubadela ïe Malöeamu mogemäia ifosimelë.
JOH 5:23 Amala ifosi amoïe mida, udia dolö sulubadelaea Eedoïe ëi gauia adalo amo gadola, ïe Malö amoïe ëige gauia adamäia ifosi nea. Afädëa Malö amoïe ëi made gauia adalo neebe ameada, Eedoea Malö misialala sälo amoïe ëige made gauia adalo nea.
JOH 5:24 Na dilima dofä gelola sähago. Afädëa na ado säsebe amo nabala, ne misialala sälo amoma asigi afädë negei neebe amea namolöi namolö gaula neëgi, ea hamoi amoïeda made mogemolömelë. Eda dafidi baagomolömadi nelo amo, walioda e namolöi namolömadi dëgëla aligi nea.
JOH 5:25 Na dilima dofä gelola sähago. Segeyo afädë besela galamolö amoda hä, walio besela galai dialeamelë. Segeyo amogi, udia dolö baagoi difolalebe amolia Godeïe Malö amoïe ado nabulömelë. Nabase amolida, hä, namolömelë.
JOH 5:26 Eedo hï ema namolö dibe amo gadola, Malömage namolö diamiäia ea geloi ï.
JOH 5:27 Amase, eda Dolöïe Malö neebe amea, Eedoea udia dolöea hamosebe amoïe mogemäiada, ema geloi ï.
JOH 5:28 Na ado säsebewegida, dilia fudugimabio. Segeyo afädë besela galamolö amo, besela galasolo amo galada, udia dolö baui dibe amoli sulubadelaea Malö amoïe ado nabala,
JOH 5:29 bauia amila nowela galaha maademolömelë. Udia dolö mala hedabi hamosa nefolalo amolida, namolöi namolöïe nowela galamolömelë. Amase, udia dolö nafade hamosa nefolalo amolida, ilibalä gudilahilä ilima asiala hamoila sämolöïe nowela galamolömelëla säi.
JOH 5:30 Yesuea aso, sähamu neamu sähalea, Na nihïdo asigiamu nelebo afädë hamomolöi mademelë. Ado na nabelo amo gadolamu mogelomelë. Na mogelo amoda mogola hamolomelë. Mida, na nihïle hamelo amo fisila, ne misialala sälo amea hamelo amo gadola mogelomelë.
JOH 5:31 Na gomalä hamolomelëlage, amase, ne gowe gadoi neamelëlage säha galebeda, amoda dofä made säsebela sämolö dialea.
JOH 5:32 Be, nelebo na hamosebe amo, afädëa gomalä hamosamelëla säla ïaha nea. Na ea säsebe amoda dofä sähala helësësamelë.
JOH 5:33 Dilia Yonema ado naba mosäia dolö fisiga gasebegi, Yonea dolö amolima ado dofä amoïe ulufala säla ï.
JOH 5:34 Na helësësaleada, dolöfäea ado ulufala säla ïase amoda, na ado säsebeweïe gelolasimolöi madela helësësamelë. Gasoda, dili sigi obëgëmäia, na dilima amala sähawe.
JOH 5:35 Yone eda gele wai gadoi nea, ea gele wala yo digaha nelo. Dilia segeyo ede madegi ïe yo digalo neebe amo beahalea, obeägïsa nelomelë.
JOH 5:36 Yoneada ne dilima holöfalï oleimelë. Nïe Naado hï gelolasisa neëgi, hamoi hamosa maademäia ï amo hamosa neebe ameada, edefadeda ne amea olesamelë. Amo bealahilä, nïe Naadoea ne misialala säsebegi misi gabula helësëmolö dialea.
JOH 5:37 Naado ne misialala sälo amohïda dofä ne neebe amo gadoi ulufala sälo nea. Dilia ïe adoge dofä nabelo made, ïe odagige melëlo made, amase,
JOH 5:38 ïe ado malage dilile iso asigigi made dibego. Mida, ea misialala säsebegi misi amoma asigi afädë made negei nefolalebe goea.
JOH 5:39 Dilia Godeïe bebagi ado säla dëdëla negei dibe amogi namolöi namolö beagolemolöila helësëlahilä, nidesamu aligilomelë. Be, ado säla dëdëla negei dibe ameada, ne dilima ulufala säla ïlo
JOH 5:40 gaso, dihili namolöi namolö nimolöïe ne neebea moholö habosebego.
JOH 5:41 Nada dolöfäea nïe ëi gauia adamäiala helësëla säha made
JOH 5:42 gaso, dilile iso asigigi dibe amoda na dawadigi nea. Godeïe boba hamolo amo dilima maade gabula helësësa neamelë.
JOH 5:43 Neda Naadoïe ëigi misi neebewegida, dilia ne säla olela made gausiaimelë. Amai gaso, dolö elö hïle ëigi maaseda, dilia e säla olela gausiamolömelë.
JOH 5:44 Gode afädëfalï neebe amea dilile ëi gauia adamäiala aligila madeda, dihilimu dihilile ëi gauia adadaha aligilo nebego. Amalamu hamolo neada, dilia asigi afädë abeahäla negemolöi gabu.
JOH 5:45 Na Naadoïe siigi nea, dilia hamosebegoïe asiala hamoila sämolö gabula helësëmabio. Dihili Mosese e sisiläfülo amea, dilia asiala gomalä hamosa nelomelëla Naadoma säla ïmolömelë.
JOH 5:46 Diliada Moseseïe ado nabala asigi afädë negei galebeda, amai nemage asigi afädë negelabio. Mida, ado ea dëdëla negei dibe amoda nïe säla dëdëla negei dialea.
JOH 5:47 Ea säla dëdëla negei dibe amoda dofä gabula made helësëi nefolalebegoeada, amai nïe ado säsebeweda dofä gabula abeahäla helësëmolödula säi.
JOH 6:1 Hobeala, Yesu e Galili oeabo amo dëgëla alömodi asi. Galili oeabo amoïe ëi elöda Dabeliasa.
JOH 6:2 Udia dolö yafie gegedola, e awäsebe amo gadola bëgëla afiai. Mida, ea dolöea hamomolöi made gadoi hamola, udia dolö oloi difolalo amoli wahisebe melï amogi.
JOH 6:3 Yesula ïe bëgëla aulo amolali segebidaia ami fedafula sefolalo.
JOH 6:4 Segeyo amo galada, Baagila Asi Segeyo amo besela galamolö dilo. Segeyo edefade amoda Yu ilile gedola molö nülo segeyo dilo.
JOH 6:5 Amala sefolalea, Yesuea busa fädägägïa adogola beahaleamelebe, udia dolö yafie e sebea ami mofiasebe amo bealahilä, ea Filibima nabahalea, Mofiasebe gowe ili molö muäia abidi bidia nimolödula nabi.
JOH 6:6 Eada gomalä hamomolöla dawadigi nea gaso, ea Filibi fedogola nabi.
JOH 6:7 Amala nabasebegi, Filibia ema säla obëgësalea, Muni gina hädali äudäea molö bidia neaseda, udia dolö sulubadelaea holöfalï holöfalïla molöi made gabumelëla säi.
JOH 6:8 Yesu bëgëla aulo Saimono Fidaïe edoo Äduluea Yesuma sähalea,
JOH 6:9 Malö maalïbu neebe gowea eladi gadoi balia beledi hamoi biage, amase, seme äudäge ägülea gaso, udia dolö yafie gegedoi welibalä dofea made gabula säi.
JOH 6:10 Amala säsebegi, Yesuea sähalea, Udia dolö fifigimalamalola säi. Sege amogida giisi hedabi yafie dilo. Udia dolö amoli amodaia fifigisa maadei. Dolömu nidelada dausini bia gadoi sefolalo.
JOH 6:11 Sefolalebegi, Yesuea beledi amo neala gaula nea, Godema nesegelahilä, udia dolö sefolalebe amoligali sogomalai. Seme äudä amoge amo gadolamu hamosebegi, ilia helësëi amo gadola mai.
JOH 6:12 Ili sulubadela dofea gaalula nasebegi, ea ïe bëgëla aulo amolima sähalea, Fea digai amo sofäloea, sulubadela neala gegedola negemalola säi.
JOH 6:13 Ilia neala gegedola negei amo, beledi bia amea naala fea digai amo adu giwilasi salala nobai.
JOH 6:14 Udia dolö amolia Yesuea dolöea hamomolöi made gadoi hamosebe amo bealahilä, säla didigahalea, Bea sälo nagadaiawi moholömelëla säha dilo amoda dofä go gabumelëla säi.
JOH 6:15 Yesuea ilia e gini namiäiaïe e gaula fëdömolö gabula helësëlahilä, ea sege amo dïgïla hïdofalï segebidaia ami bu obëgëla asi.
JOH 6:16 Deadi eso digase gaalu, ïe bëgëla aulo amoli oeaba daala aligilahilä,
JOH 6:17 ödä duugi fila Gabaniama moholö asi. Awäha dibegi, Yesu e ili sebea ami made maala nebegimu, hä, gasimi sagai.
JOH 6:18 Amase amo gaalu, fo gelola guula maalahilä, ödä aidagula fedai.
JOH 6:19 Ilia ödä adelo amea ödä adada awäha nea, gilomida bia gafeia gadoi baagise amo gaalu, Yesu e ödädabodo maala ödä du amo ga madela maaha neebe melï. Amo bealahilä, ili edefademalä bedäi.
JOH 6:20 Amala bedäsebegi, ea ilima sähalea, Weda nemelë. Bedämabiola säi.
JOH 6:21 Amala säsebegi, ilia e dudaia ami misiäia nabeledelä hamose amo gaalu, du amoda hä, waliomu sege ili moholöia ami besela galai neebe melï.
JOH 6:22 Amo aiyo amogi, ödä dëgëla alömodi adidi amolia helësësalea, aiyo ödä du afädëmu dilo amogida ïe bëgëla aulo amoli fila afiase amogi, Yesu eda fila made awäla ili hilidomu fila afiaila helësësa dilo.
JOH 6:23 Amala helësësa dibegi, ödä du odoa Dabeliasa gaamuala, Dafidilo Geloia nesegesebegi, udia dolö molö maia ami ga madela maala negei.
JOH 6:24 Udia dolö gegedoi amolia Yesuge ïe bëgëla aulo amolige, ami maade, awäha maadei amo bealahilä, ödä du amoligi fifigila Yesu hogola Gabaniama afiai.
JOH 6:25 Udia dolö amoli afiala ödä dëgëla alömodi Yesu beagolelahilä, ema nabahalea, Säla Olelelo-o, dida wi abola misila nabi.
JOH 6:26 Amala nabasebegi, Yesuea ilima säla obëgësalea, Na dilima dofä gelola sähago. Ne hogola mofiaigoda, na dolöea hamomolöi made gadoi hamoi amo bealahilä, ne hogola mofiai mademelë. Dilia beledi amo dofea naala gaalui amoïemu, ne hogola mofiai gabumelë.
JOH 6:27 Sïgälo molö amo nimolöïe hamoi hamosa namiabio. Diamolöi diamolö molö amoïe hamoi hamosa namialo. Molö amoda namolöi namolö ïlo molö. Dolöïe Malö amea diligali molö amo ïmolömelë. Naado Godea e amala namiäia memelela ifosi neamelëla säi.
JOH 6:28 Amala säsebegi, ilia ema nabahalea, Nilïa Godeïe hamoi amo hamomolöïe edo hamomolödula nabi.
JOH 6:29 Amala nabasebegi, Yesuea ilima säla obëgësalea, Godeïe hamoi amoda gomalämelë. Ea misialala säsebegi misi amoma asigi afädë negemäiamelëla säi.
JOH 6:30 Amala säsebegi, ilia ema säla obëgësalea, Dia dolöea hamomolöi made gadoi hamose amo bealahilä, nilïa dima asigi afädë negedeläïe, dia edo hamomolö. Diada hamoi abodo gadoi hamomolö gabu.
JOH 6:31 Nilïle mäula iliada sege nafadeia udia dolö aligilo made dibea ami nea, mena naha nelo. Amala hamoi amoïe ado säla dëdëla negei dibe amoda gomalä. Eada iligali muäia selesaiala beledi ïla säla dëdëla negei dialeala säi.
JOH 6:32 Amala säsebegi, Yesuea ilima säla obëgësalea, Na dilima dofä gelola sähago. Selesaiala beledi diligali ï amoda, Mosesea ï mademelë. Nïe Naadoea selesaiala beledifalï amo diligali ïlo neamelë.
JOH 6:33 Selesaiala digai neebe amea udia dolö nagadaiawi nefolalebewe iligali namolö amo ïaha neebe amoda, Godeïe beledifalïda amomelëla säi.
JOH 6:34 Amala säsebegi, ilia ema sähalea, Dafidilo-o, dia beledigo nilïgali ïahamu namialola säi.
JOH 6:35 Amala säsebegi, Yesuea ilima säla obëgësalea, Namolöïe beledida nemelë. Ne neebea maaha neebe amolida sïdëa dofä made baagomolö. Nema asigi afädë negesa neebe amolida, ödä bu elö dofä made halämolömelë.
JOH 6:36 Amaimo, na dilima säi amo gadola, dilia hä, ne melï gaso, oböla nema asigi afädë made negela nebego.
JOH 6:37 Nïe Naadoea udia dolö sulubadela nema ïase amolida nema moholömelë. Ne neebea mafuse amoligida, afädë na dofä made nesila digimolömelë.
JOH 6:38 Mida, ne selesaiala misi amoda, nihï hamese amo gadola hamomolö misi made. Ne misialala sälo amea hamese amo gadola hamomolöïe misimelë.
JOH 6:39 Ne misialala sälo amea, na hamomäia hamesa neebe amoda gowe. Nema ï amoligi afädë fisila made, aligila wagamolö segeyo besela galasolo amo gala, sulubadela nowelasisa maademäia hamesa neamelë.
JOH 6:40 Nïe Naadoea hamesa neebe amoda gowe. Udia dolö sulubadelaea Malö siia bealahilä, ema asigi afädë negei nefolalebe amoliada namolöi namolö neala gausa maademäia hamesa nea. Aligila wagamolö segeyo besela galasolo amo gala, nada udia dolö amoli nowelasimolömelëla säi.
JOH 6:41 Yesuea säi amo nabalahilä, Yu dolö ilia habobalahilä hilidomu didiäha difolalo. Mida, beledi selesaiala digai amoda ne neawela säi amogi.
JOH 6:42 Ilia sähalea, Goweda Yosebeïe malö Yesu madele. Ïe eme eedoleda nilïa dawadigi amo. Oböla, ea sähalea, Selesaiala digaila säi amoda abeahäladula säla didiäha difolalo.
JOH 6:43 Amala säla didiäha difolalebegi, Yesuea ilima sähalea, Dilia habobalahilä, dihilido didiäha dibegoda gafisimo.
JOH 6:44 Nïe Naado ne misialala sälo amea, afädë nemadi sigi made maaseda, hïdomuda ne neebea moholöi mademelë. Naadoea ne neebea sigi maase amoda, aligila wagamolö segeyo besela galasolo amo gala, na nowela ifosimolömelë.
JOH 6:45 Bea sälo amolile bebagi säla dëdëla negesalea, Godea ili sulubadelama säla olelemolömelëla säla dëdëla negei. Naadoea säla olelesebe amo nabalahilä, e dawadigila helësësebe amolida, sulubadela hä ne neebea maahamelë.
JOH 6:46 Afädëa Naado melïmelëla säha made. Naado melïda afädëfalï e Gode neebeala digai neebe ameamu hïdo, Naado melï nea.
JOH 6:47 Na dilima dofä gelola sähago. Nema asigi afädë negei nefolalebe amoliada namolöi namolö gaula nea.
JOH 6:48 Namolöïe beledida nemelë.
JOH 6:49 Dilile diadolalia sege nafade udia dolö aligisia made ami nea, mena naha nelo amolida baagosa maadei.
JOH 6:50 Gasoda, beledi selesaiala digasebe amoda wi dialea. Beledi amo nase amolida made baagomolömelë.
JOH 6:51 Namolöïe beledi selesaiala digai amoda nihïnemelë. Beledi amo afädëa naseda, eda namolöi namolö. Beledi amoda nihïle domalomelë. Sege föi sulubadelagi nefolalebe amolia namolö gausa maademäia, na nïe domalo ïmolömelëla säi.
JOH 6:52 Amala säi amo nabalahilä, Yu dolö amolia hilidomu gëgëla didiähalea, Dolö gowea ïe domalo amo nilïa muäia ïmolömelëla säha neebe goweda, abilia ïmolöïedula didiäha difolalo.
JOH 6:53 Amala didiäha difolalebegi, Yesuea ilima sähalea, Na dilima dofä gelola sähago. Dolöïe Malö amoïe domaloge healege made naseda, namolö amoda dili isogi maademelë.
JOH 6:54 Nïe domaloge healege naha neebe amoda, namolöi namolö gaula nea. Amoda aligila wagamolö segeyo besela galasolo amo gala, na e nowelasimolömelë.
JOH 6:55 Mida, nïe domalo amoda molö dofäfalïmelë. Amase, nïe heale amoda ödä dofäfalïmelë.
JOH 6:56 Amase, nïe domaloge healege naha neebe amoda nïe isogi nea, amase, nege ïe isogi nea.
JOH 6:57 Naado namolöi neebe amea ne misialala säi. E namolöi neebe amea, nege namolöi neawe. Amo gadolamu, ne naha neebe amoge, ne namolöi neebe amea eege namolöi namolömelë.
JOH 6:58 Goda beledi selesaiala digai. Dilile diadolalia mena naha difolalolahilä baagoi amo gadoi made, beledi gowe afädëa naseda, eda namolöi namolömelëla säi.
JOH 6:59 Ea säi amoda, Gabaniama gedolo mosöa ami nea, säla olelesolo amo gala amala säi.
JOH 6:60 Amala säi amo nabalahilä, e bëgëla nawialo yafiea sähalea, Ado ea säsebe goweda yöi gabu. Nowëa nabulöidula säha difolalo.
JOH 6:61 E bëgëla nawialo amolia ea säi amoïe habobalahilä, hilidomu didiäha difolalebe amo Yesuea asigia dawadigila nea, ilima sähalea, Na ado säi amea dili neala habobalasisiole.
JOH 6:62 Dolöïe Malö amo dafidi neloa ami fedase beaseda, abilia helësëmolö gabu.
JOH 6:63 Godeïe Gesamia udia dolögali namolö ïlo. Domaloda galone mademelë. Ado na dilima säla ïase amoda gesamile, namolöi namolölemelë.
JOH 6:64 Amai, dili odoaea asigi afädë made negela nebegola säi. Yesueada ema asigi afädë made negesebe amolige, e hololömolö amoge, mi gäwilafalï dawadigi nelo. Amala nea, ado amo amala säi.
JOH 6:65 Amala sälahilä sähalea, Mi amo helësëla na dilima sähalea, Nïe Naadoea afädë ne neebea misiäiala made helësëlasiseda, eda moholöi mademelëla dafidi säla ï amomelëla säi.
JOH 6:66 Segeyo amila nofela, e bëgëla nawialo yafiea e bëgëla made awäla, bahïla obëgësa maadei.
JOH 6:67 Amala hamosebegi, Yesuea giwilasi amolima nabahalea, Dilige bahïla äuduläla helësësalela nabi.
JOH 6:68 Amala nabasebegi, Saimono Fidaea säla obëgësalea, Dafidilo-o, nilï nowëma moholö. Namolöi namolö amoïe adoda dima dialea.
JOH 6:69 Dida mogoi hedabifalï, Gode neebeala misi neebe amo helësëlahilä, nilïa asigi afädë negei neawemelëla säi.
JOH 6:70 Amala säsebegi, Yesuea ilima säla obëgësalea, Nada dili giwilasi memelei madele. Amai gaso, diligi afädëda mugabe busa neebemelëla säi.
JOH 6:71 Eada Saimono Isagaliadaïe malö Yudasa helësëla amala säi. Mida, Yudasa eda giwilasi amoligi nelo amea hobeala e hololölo amo.
JOH 7:1 Hobeala, Yu ilia e nufidedelä hamosebegi, Yesu e Yudiamadi nawela made, Galilimadimu nawesa nelo.
JOH 7:2 Yu ilile segeyo edefade idia dilo mosö gadoi uligi molö nülo amo ga made dibegi,
JOH 7:3 Yesuïe edoolalia ema sähalea, Dia hamoi hamosa nebego, di bëgëla maasebe amolia bimäia, segewe dïgïla Yudia mosalo.
JOH 7:4 Afädëa ea hamosebe amo sulubadelaea dawadigimäiala asigiseda, musügä negela hamolo made, ulufala hamolomelë. Dia hamoi amo hamosa galëda, sege sulubadelagi nefolalebe amolima olela hamomolö mosöla säi.
JOH 7:5 Ïe edoola iliage ema asigi afädë made negesalea, amala säha nelo.
JOH 7:6 Amala säsebegi, Yesuea ilima sähalea, Segeyo sulubadelada, hä, dilile segeyo dialea. Nïe segeyoda, aso, made besela galaimelë.
JOH 7:7 Udia dolö sege sulubadelagi nefolalebe amoliada, dilima bimolö habobamolöi mademelë. Be, na ilima nafade hamosa neebela säla ïahamu neebewegida, ili sulubadelaea nema bimolö habobaha nebegomelë.
JOH 7:8 Dilida segeyo edefade amoïe molö molö afiamo. Nïe segeyoda, aso, made besela galai gabugi, neda saleamelëla säi.
JOH 7:9 Amala sälahilä, e made awäla, Galili ami nelo.
JOH 7:10 Yesuïe edoolali segeyo edefade amoïe molö molö afiasebegi, Yesu eege, udia dolöea e melëloealahilä, musügä hobeala asi.
JOH 7:11 Segeyo edefade gedosolo amo gala, Yu dolö amolia e hogosalea, dolö amoda abidi neadula naba hogosa nelo.
JOH 7:12 Udia dolö gegedoi amoligi yafiea sëdäwala säla didigaha dilo. Odoaea e hedabimelëla säla digi, amase, odoaea sähaleada, Amala made. Eada udia dolö dahila neaha neala säla digisa dilo.
JOH 7:13 Ili sulubadelaeada, Yu dolö amolibalä bedähalea, ulufadigila ea gomalä hamolomelëla made sälo nelo.
JOH 7:14 Idia Dilo Mosö Segeyo amoïe segeyo odoa baagilahilä mogogi nebegi, Yesu e Godeïe mosöa ami awälahilä, säla olelesa nelo.
JOH 7:15 Amala olelesa neebe amo bealahilä, Yu dolö amoli fudugilahilä sähalea, Dolö gowe sugulu made hamoi amea, dawa hïdo elöiweda abeahäla dawa niidula säi.
JOH 7:16 Amala säsebegi, Yesuea ilima säla obëgësalea, Mala säla olelesa neebeweda, nïe mademelë. Ne misialala sälo amomadila säla olelesa neawe.
JOH 7:17 Afädëa Godea hamesebe amo gadola hamomolöila helësëseda, na säla olelesa neebewe, Godeïe helësëlogi nea olelesa nealedu, ma nihïle helësëlogi nea olelesa nealedula amohï bimolömelë.
JOH 7:18 Afädëa hïle helësëloeamu säla olelesa neebe ameada, hïle ëi gauia adala säla olelelo nea. Amai gaso, e misialala sälo amoïe ëi gauia adamäialahilä, eada ado dofä sälo nea. Emada wäfalï sälo afädë maade neamelë.
JOH 7:19 Siiba, Ado säla negei amoda Mosesea diligali ï madele. Amai gaso, diligi afädëa gaula mogoloda maade gabu. Mi edoïe oböla ne nufulöïe hamosa dialeala nabi.
JOH 7:20 Amala nabasebegi, udia dolö gegedoi amolia säla obëgësalea, Dida mugabe fedai nebego. Di nowëa nufulö hamosa neebela säi.
JOH 7:21 Amala sälebegi, Yesuea ilima säla obëgësalea, Na hamoi afädë hamoi amogi, dili fudugisa dialeamelë.
JOH 7:22 Amaha gaso, gafodo damulo mala Mosesea hamomalaila helësëla, Sabada gafegi dilia dilile malölali gafodo damulomelë. Gafodo damulo mala amoda, dofä Mosesea negei made. Amoda mi gäwilafalï dilile mäulalia siibafalï mi gäwimelë.
JOH 7:23 Mosese nebegi Ado säla negei amoda, dofä made damumolöla sälahilä, dilia Sabada gafegi dolö malësäïe gafodo damusa aligilo amo gadola, nage, dolö afädëïe domalo hulu wahilasisa maadei amogi nema mihaläsebele.
JOH 7:24 Memalä siiamu beala mogelo amo fisimalo. Mala mogoi amo hogosa nea, hedabola mogesa namialola säi.
JOH 7:25 Amala säi amo nabalahilä, Yalusaleme udia dolö odoaea sähalea, Ilia nufidedelä hamosa neebe amoda, dolö go madele.
JOH 7:26 Amai gaso, bimo. Ea udia dolö sidaia mala olelesa neebe amogida, ilia ema ado afädë made säla neebe amoda, beaha aligilo amolia goweda dofä Afädë Memelei amola helësësa nealedu.
JOH 7:27 Amalada abidi. Afädë Memelei misi amo galebeda, e gowegila maasebela made helësëlabio gaso, dolö goda guwila misi neala nilïa dawadigi nea madelela säi.
JOH 7:28 Amala säsebegi, Yesuea Godeïe mosöa ami nea, udia dolö amolima säla olelesalea, gelola sähalea, Ä. Dilia nege, sege gowegi fii misilage, helësësa neago gaso, nihïle asigia misi mademelë. Ne misialala sälo amoda dofä sälo mi nea. Gasoda, dilia e dawa made nebego.
JOH 7:29 Ne emadila misi neebe ameage, amase, ne misialala säi ameage, na e dawadigi neala säi.
JOH 7:30 Amala säi amo nabalahilä, ilia e gaudelä hamoi gaso, ïe segeyo amo gala made amea, afädëa ïe naabogi made gaui.
JOH 7:31 Amai gaso, udia dolö gegedoi amoligi yafiea ema asigi afädë negei. Amolia sähalea, Afädë Memelei amo maalahilä, ea dolöea hamomolöi made gadoi hamomolö amoda, dolö gowea hamosa neebe amo gadola, baagila awäla hamomolölela säi.
JOH 7:32 Udia dolö gegedoi amolia Yesu helësëla sëdäwala säla didiäha dibe amo Felesi dolö amolia nabalahilä, iliage, gobela ïlo busa nefolalo amoliage, Godeïe mosö idihë nefolalo amolima e nafodola mosalola säi.
JOH 7:33 Amalebegi, Yesuea sähalea, Ne dilibalä segeyo obobamelë nelolahilä, ne misialala sälo neebea ami obëgëmolömelë.
JOH 7:34 Obëgëseda, dilia ne hogomolö gaso, made beagolemolömelë. Sege ne moholöia amida, dili moholöi made nebegola säi.
JOH 7:35 Amala säi amo nabalahilä, Yu nefolalo amolia hilidomu didiähalea, Ne made beagolemolömelëla säha neebe goweda, eda abododi moholö nea sähadu. Nilï sosogo odoa Giligi sege elö elöla dibea ami afufui amoli neebea ami awälahilä, Giligi udia dolö amolima mala säla olelela moholö nea sähaledu.
JOH 7:36 Ea sähalea, Dilia ne hogomolö gaso, made beagolemolömelëla säi amoge, amase, ne moholöia amida, dili moholöi made nebegola säi amoge, mida edo helësëla sähadula säi.
JOH 7:37 Idia Dilo Mosö Segeyo amo wagamolöïe segeyo edefadegi Yesuea nowela nea gelola sähalea, Afädë ödä haläi nea galëda, nema naa misialo.
JOH 7:38 Nema asigi afädë negei neebe amolia bebagi säla dëdëla negei dibe amo gadola hamomolömelë. Ado säla dëdëla negei dibe amea sähalea, Ïe isogila namolöïe ödä amo bugagila awäha namolömelëla säla dëdëla negei dialeala säi
JOH 7:39 Ea amo säi amoda udia dolö ema asigi afädë negei nefolalo amolima hobeala Gesami ïmolö amo helësëla amala säi. Yesu e yo hïdo elöi digalomadi gauia adogoi amo, aso, made gauia adogoi amea, Gesami made digala nebegi, amo gala amala säi.
JOH 7:40 Ea ado säi amo nabalahilä, udia dolö gegedoi amoligi odoaea sähalea, Dolö goda dofä bea sälo amo gabumelëla säi.
JOH 7:41 Amase, odoaea sähaleada, Afädë Memelei amoda emelëla säi. Oböla odoaea sähaleada, Afädë Memelei amoda amai, Galilila made moholö madele.
JOH 7:42 Godeïe bebagi gomalä säi dialea. Afädë Memelei amoda, beaha aligilo Gini Debidiïe sosogogila moholömelë. Amase, gaamu Bedeleheme Debidi neloala moholömelëla säla dëdëla negei dialea madelela säi.
JOH 7:43 Udia dolö gegedoi nefolalo amolia Yesu helësëla moge mogela nefolalo.
JOH 7:44 Odoaea e gaudeläla helësëi gaso, iligi afädëa e made gaui.
JOH 7:45 Amasebegi, Godeïe mosö idihë aligilo amoli maala Felesi dolöge, gobela ïlo busage nefolalebea ami bu obëgëi. Obëgësebegi, ilia amolima nabahalea, E sigi made misigoda edoïela nabi.
JOH 7:46 Amala nabasebegi, ilia säla obëgësalea, Siiba dolö afädëa ea säse amo gadola säloda maademelëla säi.
JOH 7:47 Amala säi amo nabalahilä, Felesi dolö amolia ilima säla obëgësalea, Dilige ea neala golisebegi mofiaile.
JOH 7:48 Nilï beaha aligilo busa afädëage, amase, Felesi dolö afädëage, ema asigi afädë negei neebe dilia melïle.
JOH 7:49 Amai gaso, udia dolö amolia Mosese nebegi Ado säla negei amo hedabola helësëla made, ilia ema asigi afädë negesebegoda, Godea ili së ïmolö dialeala säila säi.
JOH 7:50 Amala säsebegi, Felesi dolö afädë Nigudimusi, dafidi Yesu neebea mulo amea, e sosogo amolima sähalea,
JOH 7:51 Nilïle Ado säla negei dibe ameada, dafidi afädëa ado sähalea, Na gomalä hamoila säse amo nabalahilä, gudi mogelo amo, ïe ado made nabalada, gudi mogelolela nabi.
JOH 7:52 Amala nabasebegi, ilia ema säla obëgësalea, Dige Galilila misi neale. Bebagi säla dëdëla negei dibe amo hedabola nidela beaseda, bea sälo afädë Galilila moholömelëla säla dëdëla negei diëda, made bimolömelëla säi.
JOH 7:53 [Amala sälahilä, ili sulubadela dusula mosöa bahïla awäha maadei.
JOH 8:1 Yesu eda Olibebidaia ami fedai.
JOH 8:2 Yesu e hä, yosefalï obëgëla awäla Godeïe mosöa ami besela galala nebegi, udia dolö sulubadela e neebea ami mafula gegedoi. Amalebe, e ami fia idogola salea, ilima säla olelesa sulo.
JOH 8:3 Mala dawadigi dolö amoliage, amase, Felesi dolö amoliage, udia dolö fii afädëa, dolö fa neaha nebegi beagolelahilä, ilia udia amo sigi misi. Sigi maalahilä, udia amo gegedoi amoli mogogi ifosilahilä,
JOH 8:4 Yesuma sähalea, Säla Olelelo-o, udia egowea, dolö fa neaha nebegi beagoleimelë.
JOH 8:5 Ado säla negei dibe amogi Mosesea sähaleada, Egowe gadoi hamosebe amoda, igia nufudala baagomalola säi dialea. Amai diada, abilia sämolö gabula nabi.
JOH 8:6 Ilia ea nafadela säimelëla sädeläïe, ea nafadela sämabelela nufigila nabaha dilo. Amalebe, Yesu e dosogägïla fia idogola salea, ïe naabo sögöea nagagi dëdësa sulo.
JOH 8:7 Amala bu eegela nabahamu nebegi, e noweia adogola nea ilima sähalea, Diligi afädë nafade made hamolo neebe ameadale igia udia go nidimalola säi.
JOH 8:8 Amala sälahilä, e dosogägïla fia idogola salea, naabo sögöea nagagi bu dëdësa sulo.
JOH 8:9 Ado amala säi amo nabalahilä, dolö asigi fädäi dafidi nefolalo amolidale geleä afädë afädëla doadigila awäha maadeibua, hobeala malïsä nefolalo amolige geleä doadigila awäha maadei. Asibua, Yesu hïdo sulo, amase, udia amoge mogogi ifosia ami nelo.
JOH 8:10 Amalebe, Yesu e noweia adogola nea, udia amoma nabahalea, Udia-o, ilida hä, abilisio. Di së ïmolö dialeala säi amoligida afädë made gabulela nabi.
JOH 8:11 Amala nabasebegi, udia amea säla obëgësalea, Dafidilo-o, afädëge maade gabuwela säi. Amala säsebegi, Yesuea ema sähalea, Nage di së ïmolö dialeala säha mademelë. Mosalo. Segeyo walio neebewea nofela, dia nafade bu elö made hamomalola säi.]
JOH 8:12 Yesuea udia dolö amolima bu elö sähalea, Nihïneda sege föi sulubadelaïe yo digalo neawe. Afädëa ne bëgëla maasebe amoda, gasimi sagaido dofä made awäla, namolöïe yo digalo gaula namolömelëla säi.
JOH 8:13 Amala säi amo nabalahilä, Felesi dolö amolia Yesuma sähalea, Dia hamosebego sulubadela dihïmu säla ulufadigisa neebe goeada, dia säsebe amo udia dolöea dofä gabula nabulöi made gabumelëla säi.
JOH 8:14 Amala säsebegi, Yesuea ilima säla obëgësalea, Na hamoi amo nihï säla ulufadigisa neëda, udia dolö na säse nabase amoliada dofä gabula nabulöimelë. Mida, neda guwila misi, hä, guwi moholö nealage, nihï dawadigi neamelë. Amai, ne misi amoge, ne obëgëmolö amoge, dilia dawa made nebego.
JOH 8:15 Diliada nagadaia dolöea mogelo amo gadola mogelomelë. Nada afädë made mogelomelë.
JOH 8:16 Afädëa hamosebe amo na mogeseda, udia dolö na säse nabase amoliada dofä gabula helësëmolöimelë. Mida, ne nihïdomu nea mademelë. Naado ne misialala sälo amo halïgïla neamelë.
JOH 8:17 Dilile mala säla negei dibe amea sähaleada, Dolö elöea säi amo gadola, dolö elö ameage, amo gadola wäla säseda, elea säse amoda dofä gabula helësëmolö dialeamelëla säla dëdëla negei dialea.
JOH 8:18 Nïe malage, na hamolo amoge, nihïmu neala säla ulufadigisa neebewe gadola, Naado ne misialala sälo ameage, nïe säla ulufadigisa neamelëla säi.
JOH 8:19 Amala säi amo nabalahilä, Felesi dolö amolia ema nabahalea, Amai dïe Diadoda abidi neala nabi. Amala nabasebegi, Yesuea säla obëgësalea, Dilia nege dawa made, amase, Naadoge dawa made nebego. Ne dawa galebeda, Naadoge dilia dawadigilabiomelëla säi.
JOH 8:20 Yesuea ado amo säha nelo amoda, Godeïe mosöamadi Godegali muni odala ïlo hogoli ga madela ami nea, amala säha nelo. Ïe segeyo aso, amo gala made amea, afädëa e made gaui.
JOH 8:21 Yesuea ilima sähamu neamu sähalea, Neda moholö. Dilia ne hogomolömelë. Amase, dilia nafade hamoi amo diëgi wäla dili baagomolömelë. Sege ne moholö awäsebea amida, dili moholöi mademelëla säi.
JOH 8:22 Amala säi amo nabalahilä, Yu ilia sähalea, Ne awäsebea amida, dili moholöi mademelëla säi amogi, e hïmu nufudala baagomolöledula säi.
JOH 8:23 Amala säha dibegi, Yesuea ilima sähalea, Dilida gidogola. Neda gadogolamelë. Dilida nagadaiala. Neda nagadaiala mademelë.
JOH 8:24 Amoïe mida na dilima sähalea, Dilia nafade hamoi amo diëgi wäla dili baagomolömelëla säi amomelë. Ne Nelo Neebe amo dofäla made helësëseda, dihili nafade hamoi amo diëgi wäla dili baagosa maademolömelëla säi.
JOH 8:25 Amala säi amo nabalahilä, ilia ema nabahalea, Dida nowë neala nabi. Amala nabasebegi, Yesuea säla obëgësalea, Neda gowe neamelëla dilima dafidi säla ï amomelë.
JOH 8:26 Dilia hamosa nebegoda, gowe hamoimelëla na säla ïmolöge mogemolöge yafie gaulea. Gaso, ne misialala sälo amoda dofä neebe amea, sämola säse amo gadola nagadaiawi nefolalebe amolima säla ïaha neawemelëla säi.
JOH 8:27 Amala säi amoda, ea ïe Eedoïe säla ïasebelada ilia made dawadigi nelo.
JOH 8:28 Dawa made nebegi, Yesuea ilima bu sähalea, Hobeala dilia Dolöïe Malö amo gauia adasolo amo gala dilia helësësalea, Ne Nelo amo Nea gabulage, amase, nïe asigiamu nelebo afädë made hamola, Naadoea nema olelei amo gadola, na ado sälo gabulage dawadigimolömelë.
JOH 8:29 Ne misialala sälo amo nebalä nea. Nada ea hamesebe amo gadola hamosamu aligilo ameada, ea ne dïgïla aulo made neamelëla säi.
JOH 8:30 Ea amala säi amo nabalahilä, udia dolö yafiea ema asigi afädë negei.
JOH 8:31 Yesuea Yu dolöea ema asigi afädë negei nefolalo amolima sähalea, Dilia na ado säsebewe nabala, bëgëla hamosa aligiseda, dilida dofä nïe bëgëla aulo nea,
JOH 8:32 amase, dilia ado dofä amo dawadigisegi, ado dofä ameada dili fisigäha maademolömelëla säi.
JOH 8:33 Amalebe, ilia ema säla obëgësalea, Nilïda Abalahamaïe yaualali aliligi misi amogi neebe amo. Nilïada afädëïe galabaia hamoi gadoi made hamolasilo nelo ameada, dia dili fisigäha maademolömelëla säi amoda abeahäladula nabi.
JOH 8:34 Amala nabasebegi, Yesuea ilima säla obëgësalea, Na dilima dofä gelola sähago. Udia dolö nafade hamolo neebe amoli sulubadelada, nafade hamoloïe galabaia hamoi gadoi hamolasilo nea.
JOH 8:35 Galabaia hamoi gadoi hamolasilo neebe amoda, mosöa namolöi namolö mademelë. Malöda namolöi namolömelë.
JOH 8:36 Amai gabugi, Malöea dili fisigäseda, amoda dili dofä fisigäi namolömelë.
JOH 8:37 Dilida Abalahamaïe yaua aliligi misi neebe amoda na dawa. Gaso, nïe adoda dilile isogi fu made ïala neada, oböla ne nufidedelä hamosa nebego.
JOH 8:38 Ne Naadobalä nea melï amoda säla ïlo. Amase, diliada dilile diadoea säse nabi amo gadola hamosa nebegola säi.
JOH 8:39 Amala säi amo nabalahilä, ilia ema säla obëgësalea, Nilïle naadoda Abalahamamelëla säi. Amala säsebegi, Yesuea ilima säla obëgësalea, Dili Abalahamaïe malö galebeda, Abalahamaea hamosa nelo amo gadola, diliage hamosa aligilabiomelë.
JOH 8:40 Godea nema ado säla ïasebe amo gadola na dilima ado dofä na nabi amo säla ïaha nebegida, oböla dilia ne walio nufidedelä hamosebego. Abalahamaeada amo gadola made hamoimelë.
JOH 8:41 Diliada dilile diadoea hamolo amo gadola hamosebegola säi. Amala säsebegi, ilia ema sähalea, Nemelalia fofalösa malö sogobaida nilï mademelë. Nilïle Naado afädëfalï neebe amoda Godemelëla säi.
JOH 8:42 Amala säsebegi, Yesuea ilima sähalea, Dilile diado dofä Gode e nea galebeda, dilia nebalä boba hamolabio. Mida, ne Gode e neebeala misi neawe. Neda nihï asigia misi made, ea ne misialala säimelë.
JOH 8:43 Dilia na ado säsewe made helësëse goda, mi edoea. Amoda, na ado säse dilia nabulöi made neebe goeamelë.
JOH 8:44 Dilida dilile diado mugabe busaïe malö nea. Ea hamese amo gadola, diliage amo gadola hamela hamosa nebego. Siiba, mi gäwia amila ea dolö nufudadigilo nelo. Amase, ema dofä sälo maade ameada, eda dofä sälomadi aligilo made nelo. Ea wäfalï säseda, ea hïle mala amo gadola wäla sälo. Eda wäfalï sälo nea, amase, wäfalï sälo neebe amoïe eedoge e neamelë.
JOH 8:45 Amalebe, na dilima ado dofä amo säla ïaha nea gaso, dilia dofä gabula made helësësebego.
JOH 8:46 Diligi nowëa na nafade hamoi amo säla ulufamolöi gabu. Be, na ado dofä säla ïasewegi, dilia dofä gabula made asigi amoda mi edoea amai.
JOH 8:47 Udia dolö Godeïe nefolalebe amoliada, Godeïe ado nabelo nea. Dilida Godeïe made neebe ameada, dilia made nabasebegola säi.
JOH 8:48 Yu ilia Yesuma säla obëgësalea, Nilïa dida Samelia dolölage, amase, dima mugabe fedai nealage sälo amoda dofä sälo madelela säi.
JOH 8:49 Amala säsebegi, Yesuea säla obëgësalea, Neda mugabe fedai nea mademelë. Nada Naadoïe ëi gauia adaha neebewegida, dilia ne gagadesa nebego.
JOH 8:50 Na nihïle ëi gauia adamolöda made helësësamelë. Afädë neebe amea nïe ëi gauia adamolö helësëla, mogelo nea.
JOH 8:51 Na dilima dofä gelola sähago. Afädëa na ado säsebe amo nabala bëgëla hamosa neebe ameada, baagomolöda dofä made bimolömelëla säi.
JOH 8:52 Amo nabalahilä, Yu ilia ema sähalea, Di mugabe fedai neebe amoda nilïa hä, dawadigimelë. Abalahamage baagoi, amase, bea sälo amolige hä, baagosa maadei amo. Oböla, dia sähalea, Na ado säsebe amo nabala bëgëla hamosa neebe ameada, baagomolöda dofä made bimolömelëla säsio.
JOH 8:53 Nilïle mäu Abalahama baagoi amo, dia e baagile. Amase, bea sälo nefolalo amolige baagosa maadei amo. Dia dihïda di nowëla asigisebela nabi.
JOH 8:54 Amala nabasebegi, Yesuea säla obëgësalea, Na nihïle ëi gauia adaha nea galebeda, nihïmu nïe ëi gauia adai amo memalä gadoi hamolabio goda. Naadoma dilia dilile Godela sälo ameada nïe ëi gauia adaha nebego
JOH 8:55 Gaso, eda dilia dawa mademelë. Nada e dawadigi nea. Na e dawa mademelëla säha galebeda, nege dili wäfalï sälo nebego gadoi aligilabio. Na e dawadigilahilä, ea hamomola säse amo gadola hamosa neawe.
JOH 8:56 Dilile diado Abalahamaeada ne moholö segeyo amo bimolöila helësëlahilä, obeägïla nelo. Amo besela galasebegi, obeägïla melïmelëla säi.
JOH 8:57 Amala säi amo nabalahilä, Yu ilia ema sähalea, Dida gäheo i nabülasi bia made baagi nebego gabu. Amai Abalahamada dia melï nealela nabi.
JOH 8:58 Amala nabasebegi, Yesuea ilima sähalea, Na dilima dofä gelola sähago. Neda Abalahama maadeia Ne Nelo amo Neawemelëla säi.
JOH 8:59 Amala säi amo nabalahilä, ilia igi neala e nufulö hamosebegi gaso, Godeïe mosöamadila geleä musügä segea doadigila asi.
JOH 9:1 Yesu e awäha nea beahamelebe, dolö afädë si golai neebe melï. Amoda neegela ägüsolo amo gala, emea si golai amo gadoi wäla ägüla misi sulo amo neebe melï.
JOH 9:2 Amo bealahilä, ïe bëgëla aulo amolia ema nabahalea, Säla Olelelo-o, dolö gowe nowëa nafade hamoia emea neegela ägüsolo amo gala si golai amola wäla neegela ägüidu. Hï nafade hamoialedu ma, eedole emelea nafade hamoialedula nabi.
JOH 9:3 Amala nabasebegi, Yesuea säla obëgësalea, Eedo emeage nafade made hamoi, amase, dolö go hïge nafade made hamoi. Goda Godeïe geloi ulufala olemäia hamoimelëla säi.
JOH 9:4 Walio segeyo dibewegi, nilïa ne misialala sälo amoïe hamoi hamosa namolöla. Gasimi sagaloda hä, besela galasebe. Amo besela galaseda, afädëa hamoi hamomolöi mademelë.
JOH 9:5 Ne nagadaiawi neebewe gaaluda, sege föi sulubadelaïe yo digalo ne neawemelëla säi.
JOH 9:6 Amala sälahilä, ea nagadaia gofedela sadia idogolahilä, naga amobalä dädälahilä, dolö si golai amoïe sihidoa hëi.
JOH 9:7 Amalahilä, Yesuea dolö amoma sähalea, Di awälahilä Sailoama nudugu dibea ami hëmolö mosalola säi. Sailoamada, Hibulu ado. Amoïe mida, Mosaloi. Amala säi amo nabalahilä, dolö amo awäla, ödägi ami hëi. Hëlahilä hä, nelebo sulubadela fädäla bebea obëgëi.
JOH 9:8 Amalebe, ebalä gedola aligilo amoliage, amase, dafidi ea muni ëdëgëse melëlo amoliage sähalea, Wae! Dolö goweda udia dolöma muni ïmola säha seë melëlo amo madelela säi.
JOH 9:9 Odoaea sähalea, Amo gabula säi. Amase, odoaeada, Ai. Goda amo gadoi elö gabula säha dibegi, dolö amo hï sähalea, Amoda nemelëla säi.
JOH 9:10 Amalebe, ilia hä ema nabahalea, Dïe si goda abeahäla fisigäila nabi.
JOH 9:11 Amala nabasebegi, ea säla obëgësalea, Dolö ëi Yesuea nagadaia gofedela sadia idogolahilä nagabalä dädäla, nïe sihidoa hëlahilä sähalea, Sailoama nudugu dibea ami awäla hëmolö mosalola säsio. Amala säsebegi, ne hä awäla hëlahilä, siia melïmelëla säi.
JOH 9:12 Amala säsebegi, ilia ema nabahalea, Amai dolö amoda abidi neala nabi. Amala nabasebegi, ea säla obëgësalea, Na dawa mademelëla säi.
JOH 9:13 Amalebe, dolö si golai nelo amo ilia Felesi dolö ili neebea ami sigi asi.
JOH 9:14 Yesuea gofedela nagabalä dädäi amea, dolö amoïe sihidoa hësebegi, si fisigäi amoda, segeyo Sabada gafegi amai.
JOH 9:15 Felesi dolö amoliage ema bu nabahalea, Dia siia beasegoda abeahälala nabi. Amala nabasebegi, ea ilima säla obëgësalea, Ea gofedela nagabalä dädäi amo nïe sihidoa negesebegi, na ödägi hëlahilä, siia beahamelëla säi.
JOH 9:16 Amala säi amo nabalahilä, Felesi dolö odoaea sähalea, Segeyo Sabada gafe dialeala made asigi goeada, dolö goda Godemadila misi made gabula säi. Amalebe, odoaea sähalea, Dolöea hamomolöi made gadoi amoli nafade hamoloea abeahäla hamomolöi gabula sälahilä, hilimu moge mogei nelo.
JOH 9:17 Amasebegi, ilia dolö si golai nelo amoma bu nabahalea, Ea dïe si fisigäi goeada, dia ïeda abilia sähala nabi. Amala nabasebegi, ea säla obëgësalea, Eda bea sälo afädë gabiola säi.
JOH 9:18 Amala säsebegi gaso, dolö amoda dafidi si golai sulo amo, hä, siia beahamelëla säi amo, Yu ilia dofä gabula made helësëlahilä, dolö si fisigäi amoïe eedole emele misialola wei.
JOH 9:19 Maasebegi, ilia elema nabahalea, Alile malö si golai neegela ägüila säi amoda gole. Ea beasebegoda abilia beahadula nabi.
JOH 9:20 Amala nabasebegi, eedole emelea säla obëgësalea, Goda alïle malö amoge, amase, e si golai neegela ägüi amoge alïa dawa.
JOH 9:21 Ea walio beaha neebe amo abeahäla beahadu. Amoge alïa dawa mademelë. Amase, nowëa ïe si fisigälasidu. Amoge alïa dawa mademelë. E malësä made ameada, hïma fädäla nabualo. Ea hï e hï fädäla sämolömelëla säi.
JOH 9:22 Elea Yu dolö amolibalä bedälo amea amala säi. Mida, ilia ado säla negesalea, afädëa Yesu eda Afädë Memelei amo gabiola säla ulufadigiseda, gedolo mosöa amila segea beselala fisimolömelëla säla negei.
JOH 9:23 Amala säla negei amogi, eedole emelea sähalea, Eda malësä made. Hïma nabualola säi.
JOH 9:24 Yu dolö amolia dolö si golai nelo amo bu elö welahilä ema sähalea, Dia Godeïe ëi gauia adala, mogolafalï sämalo. Nilïada dolö goda nafade hamolo neala helësësamelëla säi.
JOH 9:25 Amala säsebegi, ea säla obëgësalea, Eda nafade hamolo nealedu. Na dawa made. Gaso, na afädë helësësebe amoda gowe. Ne si golai nelo amoda, na walio siia beahamelëla säi.
JOH 9:26 Amala säsebegi, ilia ema bu elö nabahalea, Ea dima abilia hamosio. Dïe si amo abeahäla fisigälasisiola nabi.
JOH 9:27 Amala nabasebegi, ea ilima säla obëgësalea, Na dilima dafidi säla ï amo made nabile. Edoïe nalï nabahamu nea. Dilige ïe bëgëla aulo namolöïe sähalela säi.
JOH 9:28 Amala säsebegi, ilia e gagadela sähalea, Dolö amoïe bëgëla auloda di nebego. Nilïda Moseseïe bëgëla aulo neamelë.
JOH 9:29 Godea Mosesema ado säla ï amoda nilïa dawadigisa maadei nea. Gaso, dolö goda abidila misi neadu, nilïa dawa made neamelëla säi.
JOH 9:30 Amala säsebegi, dolö amea ilima säla obëgësalea, Neme, ne bedäi! Dilia ado elöla säsegogi. Ea ne si golai fisigälasi amogi, dilia e abidila misidula asusugai nebego.
JOH 9:31 Nafade hamoloïe adoda Godea nabelo made neebe amo nilïa dawadigi nea. Gasoda, afädëa ïe ëi gauia adaha nea, Godea hamese amo gadola bëgëla hamosa neebe amoïe adoda, ea nabelo nea.
JOH 9:32 Dafidi nelebo afädë maadeia amila, dolö afädë emea si golai neegela ägüi amo dolö elöea egomalä si fisigälasimelëla säida, dofä made nabimelë.
JOH 9:33 Dolö go Gode neebeala misi made galebeda, ea nelebo afädë hamomolöi mademelëla säi.
JOH 9:34 Amala säsebegi, ilia ema säla obëgësalea, Dida diemea nafadeia nea di neegela ägüsebegi, nafadebalä ëdëla aligi nebego gabu. Di gadoiada nilï olelemolö helësësebelela nabi. Amala nabalahilä, ilia e gedolo mosöa amila segea beselala fisi.
JOH 9:35 Ilia e amala beselala fisimelëla säi amo nabalahilä, Yesuea dolö amo beagolelahilä, ema nabahalea, Diada Dolöïe Malö amoma asigi afädë negeilela nabi.
JOH 9:36 Amala nabasebegi, ea säla obëgësalea, Dafidilo-o, Dolöïe Malö amoda nowë. Na ema asigi afädë negedeläla säi.
JOH 9:37 Amala säsebegi, Yesuea ema sähalea, Diada e melïmelë. Amase, amohïda walio dibalä adosa nebegomelëla säi.
JOH 9:38 Amala säsebegi, ea sähalea, Dafidilo-o, na dima asigi afädë negesagola sälahilä, Yesuïe emo mia gumusulahilä, ïe ëi gauia adaha sulo.
JOH 9:39 Yesuea sähalea, nada mogelasimolöïe nagadaiawi misi neawemelë. Dolöea siia made beaha nefolalebe amolia bimäiage, beaha nefolalebe amolida, oböla, si golamäiage, ne misi neawemelëla säi.
JOH 9:40 Amala säi amo, Felesi dolö odoa ebalä nefolalo amolia nabalahilä, ema nabahalea, Nilïge hä, si golai neebelela nabi.
JOH 9:41 Amala nabasebegi, Yesuea ilima sähalea, Dili si golai nea galebeda, nafade dilima made dialealabio. Gaso, dilia sähalea, Nilïa siia beahamelëla sälo ameada, dilile nafadeda dialeamelëla säi.
JOH 10:1 Yesuea ado aso, sähamu neamu sähalea, Na dilima dofä gelola sähago. Dolö afädëa sugua sibiïe yala idi galogi dogala digala made, oböla yala dabiala fedalo neebe amoda, musügä awäla fa neloge, idiafa naabo gauia adogola fa neloge nea.
JOH 10:2 Amalo gaso, yala idi galo dogala digalo neebe amoda, sugua sibi sigi aligiloda amomelë.
JOH 10:3 Idi galo idihë aligilo neebe amea, sigi aligilo misiäia idi galo doga negesisegi, sugua sibia sigi aligiloïe ado nabelo. Ea hïle sugua sibi hïdo hïdola ëi säla welahilä, hï sigi segea doadigila aulo.
JOH 10:4 Ea hïle sugua sibi sulubadela segea sigi awälahilä, ilia e bëgëla misiäia, hï e dafidila aulomelë. Ïe sugua sibia ïe ado nabelo amea, e awäse amo gadola bëgëla aulo nea.
JOH 10:5 Sugua sibi amolia dolö dawa made amoda dofä made bëgëla aulo. Dolö elöïe ado made dawa amea, ili ebalä fisäla aulomelëla säi.
JOH 10:6 Yesuea ilima amala ado besula säsebegi gaso, ilia amoïe mi dawadigi made nelo.
JOH 10:7 Amala hamosebegi, Yesuea ilima bu sähalea, Na dilima dofä gelola sähago. Nihïneda sugua sibiïe idi galo neawe.
JOH 10:8 Ne made maala dafidila misi amoli sulubadelada, musügä awäla fa neloge, idiafa naabo gauia adogola fa neloge misimelë. Misi gaso, amolile adoda sugua sibia made nabimelë.
JOH 10:9 Nihïneda idi galo neawe. Ne mia maala nogila digase amoda damula moholö. Ea mumusogi digala digi segea doadigila fedala digisa nea, molö hedabi dibe amo beagolemolömelë.
JOH 10:10 Fa neloeada fa nimolöge, nufudadigimolöge, neala nafademolöge, amoïemu mulomelë. Neda ilia namolö gaumäiage, amase, namolö amo ilima nobamäiage misi neawemelë.
JOH 10:11 Sugua sibi sigi aligilo hedabida nihïne neawe. Sugua sibi sigi aligilo hedabiada sugua sibi amoligali hïle namolö amo fisiga galomelë.
JOH 10:12 Dolö hamoi hamola bidi nelo neebe amoda sugua sibi sigi aligiloge, eedoge made nea. Ilua ügülo maase beaseda, ea sugua sibi dïgïla fisäla asibua, ilua ügüloea sugua sibi nufudala balälelomelë.
JOH 10:13 Dolö amo fisäla aulo amoïe mida, eda bidi nelo nea, sugua sibi made helësëlo amea.
JOH 10:14 Sugua sibi sigi aligilo hedabida nihïne neawe. Naadoea ne dawadigila, amase, nage Naado dawadigi amo gadola, sugua sibi nihïle nefolalebe amolida nihï dawadigi. Amase, sugua sibi nihïle nefolalebe amoliage ne dawadigi nea. Amala hamola nea, na sugua sibi nefolalebe amoligali nïe namolö fisiga gamolömelë.
JOH 10:16 Yala goweïe isogi sugua sibi nefolalebe welimu made, nada sibi odoage galeamelë. Amolige na sigi moholö dialea. Iliage nïe ado nabala, sosogo afädëfalï hamola, sigi aligiloge afädëfalï namolömelë.
JOH 10:17 Naadoea ne edefade boba hamosa neebe amoïe mida, na nïe namolö fisiga galahilä, bu nea obëgëmolö amogi.
JOH 10:18 Nïe namolö amoda afädëa made neahamelë. Nihï fisiga gamolö hamei amo gadola fisiga gaha. Namolö fisiga gamolö amoïe geloige, bu nea obëgëmolö amoïe geloige, nihï gaulea. Naadoea nema amala hamomalola säimelëla säi.
JOH 10:19 Ea amala säi amo nabalahilä, Yu ili bu äudäla mogela damula gogoi nelo.
JOH 10:20 Ili dolö yafiea sähaleada, Eda mugabe fedai nea, gagaola säsebegoïe dilia nabasebegoda edoïe nabahala säi.
JOH 10:21 Amala säsebegi gaso, odoaea sähalea, Ea ado säsebegoda mugabe fedaia sälo amo gadola made gabu. Amai mugabeada si golai nefolalebe amoli fisigälasimolöi gabulela säi.
JOH 10:22 Amo baagiada, segeyo edefade siiba Godegali mosö ï amo helësëla, amoïe Yalusaleme gegedolo segeyo dilo. Mugia i bäu giisalea gögï mulo segeyo amogi,
JOH 10:23 Yesu eda Godeïe mosöa Solomonoïe hadaila sälo dibeadi amogi awäha nelo.
JOH 10:24 Awäha nebegi, Yu ili maala e amalela digilahilä ema nabahalea, Neda gowe neamelëla abola sämolö gabu. Dida Geleso nea galëda, nilïma ulufala mogola sämola säi.
JOH 10:25 Amala säsebegi, Yesuea ilima säla obëgësalea, Na dilima säla ï. Gaso, amo dilia dofä gabula helësëla made nebego. Na Naadoïe ëigi nea hamoi hamosa neebeweada, ne dilima olesa.
JOH 10:26 Gaso, dilida nïe sugua sibi made ameada, dilia asigi afädë made negei nebego.
JOH 10:27 Nïe sugua sibi nefolalebe amolia nïe ado nabelo. Na ili dawadigi neëgi, ilia ne bëgëla mulomelë.
JOH 10:28 Na iligali namolöi namolö ïasegi, ili dofä made baagomolömelë. Ili nïe naaboea gaula neebe amoda afädëa fedemolöi made bimolömelë.
JOH 10:29 Naadoea amolida nema ï. Nelebo sulubadela holöbö gidogolahilä, eda dofä dafidilo gelolamelë. Amaimo, Naadoïe naaboea gaula neebe amolida afädëa fedemolöi made bimolömelë.
JOH 10:30 Naado alïda afädëfalï neamelëla säi.
JOH 10:31 Amala säi amo nabalahilä, Yu ilia e bu nufidedelä igi nii.
JOH 10:32 Amala neasebegi, Yesuea ilima nabahalea, Na hamoi hedabi yafie Naadomadila misi amolida dilima olei. Hamoi amoligi na abodo hamoi amoïe oböla ne nufidedelä hamosala nabi.
JOH 10:33 Amala nabasebegi, Yu ilia säla obëgësalea, Dia hedabi hamola nowei amogi mademelë. Di dolöfä nea oböla, di dihïmu Gode hamola, e gagadei amogi nilïa di igia nufidedelä hamoimelëla säi.
JOH 10:34 Amala säsebegi, Yesuea ilima säla obëgësalea, Dilile mala säla negei dibe amogida, ado afädë dëdësalea, Nada dili godemelëla säila säla dëdëla negei dialea madele.
JOH 10:35 Siiba Godeïe adoda udia dolöma misi. Ea udia dolö amolima dili godemelëla säi galëda, amase, ado säla dëdëla negei amoda neadigimolöi made galëda,
JOH 10:36 na ne Godeïe malö neawela säha neebe amea, dilia Naadoea afädë hïle nafolalahilä, nagadaiawi fisiga wei amoma, dia Gode gagadesebegola sähale.
JOH 10:37 Na Naadoïe hamoi amo made hamosa neëda, dilia na ado säsebewe dofä gabula made helësëmalo.
JOH 10:38 Gaso, ïe hamoi na hamosa neëda, dilia na ado säsebewe dofä gabula made helësësa galëda, na hamoi hamosewegi dofä gabula helësëmalo. Amala säsebe amoïe mida, ne Naadoma aligila, amase, Naadoge nema aligilalahilä neebe amo dilia dofä helësëmäiamelëla säi.
JOH 10:39 Amala säi amo nabalahilä, ilia e bu gaudelä hamosebegi, e fisäla doadigila asi.
JOH 10:40 Amalebe, Yesu e ödä Yodona dëgëla alömodi bu obëgëlahilä, sege dafidi Yonea udia dolö ödägi gesa neloa ami awäla nelo.
JOH 10:41 E ami awäla nebegi, udia dolö yafie e neebea ami mafulahilä sähalea, Yoneada dolöea hamomolöi made gadoi afädë made hamola nelo gaso, ea dolö goweïe säi amo sulubadelada dofä gabumelëla säi.
JOH 10:42 Hä, ami yafiea ema asigi afädë negei.
JOH 11:1 Dolö afädë Bedani gaamugi ami fii Elasalusi oloi dilo. Gaamu amoda Melile ïe esama Madalele sege dilo.
JOH 11:2 Meli ameada Dafidilo Geloiïe emogi weli gafisigäi söga negelahilä, hïle busa hilïa hësa sulo, amoïe elefi Elasalusi oloi dilo.
JOH 11:3 Oloi dibegi, elefi äudä amolea Yesuma säsisalea, Dafidilo Geloi-e, dolö dia boba hamolo amoda, hä, oloi dialeamelëla säsi.
JOH 11:4 Amala säsi amo nabalahilä, Yesuea sähalea, Oloi goda, baagomolöïe oloi mademelë. Udia dolöea Godeïe geloi beala ïe ëi ilibia amo gauia adamäia oloi dialea. Ameada, Godeïe Malö amoïe ëige gauia adamäiamelëla säi.
JOH 11:5 Yesueada Madage, esamage, amase, Elasalusige, boba hamoi nelo.
JOH 11:6 Elasalusi oloi dialeamelëla säsi amo nabalahilä gaso, Yesu e segeyo äudä bu ya aligi.
JOH 11:7 Ya aligilahilä, oböla hobeala ea ïe bëgëla aulo amolima sähalea, Nilï Disiligi Yudiamadi obëgëdila säi.
JOH 11:8 Amala säsebegi, ïe bëgëla aulo amolia säla obëgësalea, Säla Olelelo-o, Yu dolö ilia di hädamade igia nufulö hamoia ami bu äudulälela nabi.
JOH 11:9 Amalebe Yesuea ilima säla obëgësalea, Segeyo afädëgi esoea yo digaha neebe amoïeda aoa giwilasi dialea madele. Amai dolö yoba nawesa aligiseda, ea nagadaiaweïe yo digalo melï neebe ameada digalo mademelë.
JOH 11:10 Gaso, dolö amohïma yo digalo maade nea, gasigi nawesa aligiseda, digalomelëla säi.
JOH 11:11 Yesuea amala sälahilä ilima hobeala sähalea, Nilïle damelë Elasalusi adi dialea. Ne awäla e didiigimolömelëla säi.
JOH 11:12 Ea amala säi amo nabalahilä, bëgëla aulo amolia ema sähalea, Dafidilo Geloi-e, e adi dialea galëda, e oloi amo wahimolömelëla säi.
JOH 11:13 Yesueada e baagoi dibe amoïe säi gasoda, iliada e dofä adi dialeala säha gabula helësëi.
JOH 11:14 Amala säsebegi, Yesuea ilima fädäla sähalea, Elasalusida hä, baagoimelë.
JOH 11:15 Dili helësëla, ne amo gala ebalä ami made nebegi baagoi amogi obeägïsawe. Mida, dilia asigi afädë negemäiaïe amai. Nilï hä, e dibea ami afiadila säi.
JOH 11:16 Yesuea amala säi amo nabalahilä, Domasa, ïe ëi elö Didimusila sälo amea, bëgëla aulo odoa amolima sähalea, Nilïge ebalä baagomolö afiadila säi.
JOH 11:17 Amala sälahilä awäla, besela galamolö suägïla nea, Yesuea nabelebe, Elasalusi baula asi segeyo ohodoa asi, walioda biyidumelëla säse nabi.
JOH 11:18 Yalusalemela Bedanida holöbö ga madela, gilomida ohodoa gadoi dilo.
JOH 11:19 Yu udia dolö yafiea Melile Madalele elefi baagoi amogi asigiisa sebe amobalä aofila sigi samolö asi.
JOH 11:20 Madaea Yesu maahamelëla säi amo nabalahilä, e idiafa gausiamolö asi. Gaso, Melida mosöa sulo.
JOH 11:21 Madaea hä, Yesuma sähalea, Dafidilo Geloi-e, di yawe nelo galebeda, nïe nalifi made baagolabio.
JOH 11:22 Gaso, walioge dia Godema afädë ëdëgëseda, ea ïmolöla helësësamelëla säi.
JOH 11:23 Amalebe, Yesuea ema säla obëgësalea, Dïe dialifi amoda hä, nowela galamolömelëla säla ï.
JOH 11:24 Amalebe, Madaea ema säla obëgësalea, Ä, segeyo aligila wagasegi, baagoi amoli nowela galasolo amo gala, eege nowela galamolöla helësësamelëla säi.
JOH 11:25 Amalebe, Yesuea ema säla obëgësalea, Nowelasimolöïe miige, amase, namolöïe miige ne neawe. Afädëa nema asigi afädë negei nea baagoseda, gamelä eda namolömelë.
JOH 11:26 Amase, made baagoi sefolalebe amoli sulubadelaea nema asigi afädë negei amolida, dofä made baagomolömelë. Dia dofä säsebela helësësebelela nabi.
JOH 11:27 Amala nabasebegi, Madaea ema säla obëgësalea, Ä, Dafidilo Geloi-e. Dida Geleso, Godeïe malö nagadaiawi digamolömelëla säi amo gabugi, na asigi afädë negei neawela säi.
JOH 11:28 Amala sälahilä, Mada e obëgëla awäla esama Meli welahilä, geleä musügä gëhegi sähalea, Säla Olelelo amo hä, misi nea. Ea di misialaimelëla säla ï.
JOH 11:29 Amala säi amo nabalahilä, Meli e fodolofalï nowela Yesu neebea ami asi.
JOH 11:30 Yesu e gaamugi ami made besela galala, aso, Mada gausiaia amimu nelo.
JOH 11:31 Yu ili mafula Melibalä mosöa ami aofila asigiisa sefolalo amolia Meli e fodolofalï nowela awäse amo bealahilä, elefi bauia ami dïila awäsebela helësëlahilä, ilige e bëgëla afiai.
JOH 11:32 Meli e Yesu neebea ami awäla besela galala e bealahilä, ïe emo mia gumusula dia idogola ema sähalea, Dafidilo Geloi-e, di yawe nelo galebeda, nïe nalifi made baagolabiola säi.
JOH 11:33 Amala säsebegi, Meliage, Yu ebalä misi amoliage didigaosebe amo bealahilä, Yesuïe isogi edefademalä sogofalala säosäosa nelo.
JOH 11:34 Amala nelolahilä ea sähalea, Dilia e abidi baui dialeala nabi. Amala nabelebe ilia ema säla obëgësalea, Dafidilo, dia bimolö misiëla säi.
JOH 11:35 Amalebe afialahilä, Yesueage dïi.
JOH 11:36 Amala dïisebegi, Yu ilia sähalea, Ea Elasalusi edefade boba hamoi nelogo beasebelela säi.
JOH 11:37 Amase, odoaea sähaleada, Dolö si golai nelo wahilo amea dolö gowe made baagomäia, hamomolöi made beala amailedula säi.
JOH 11:38 Yesuïe isogi bu elö edefademalä sogofalala säosäolahilä awäla, Elasalusi baui dibea ami besela galai. Baui amoda igi äbägi bausilahilä, igi edefademalä afädëa dofogai dilo.
JOH 11:39 Yesuea sähalea, Igia gaigo dogala bebugula nigia gamola säi. Amala säsebegi, baagoi amoïe elefi Madaea Yesuma sähalea, Dafidilo Geloi-e, e baui segeyo walio biyidu ameada, sïgä gäha moholömelëla säi.
JOH 11:40 Amala säsebegi, Yesuea ema sähalea, Dia asigi afädë negeseda, Godeïe geloi edefade amo bimolömelëla na dima dafidi säla ï madelela säi.
JOH 11:41 Amalebe, ilia igia idi gai dilo amo dogala bebugula negesisebegi, Yesuea sida adogola nea sähalea, Naado-o, na säi amo dia nabi amogi dima nesegesawe.
JOH 11:42 Na ado säse amo dia nabahamu aligilola helësësa. Ado säi amoda udia dolö nefolalebe gowe ili helësëla säimelë. Ilia nabalahilä, dia ne dofä fisiga wei gabula helësëmäia säimelëla säi.
JOH 11:43 Amala sälahilä, ea gelolafalï sähalea, Elasalusi, di segea doadigila misiëla säi.
JOH 11:44 Amala säsebegi, e baagoi dilo amo nowela maahalea, ïe naaboge emoge fagulo gadelaia neleegila, busage faguloea usulala bausi dilo amola wäla nowela doadigila fedai. Amasebegi, Yesuea ilima sähalea, E mosäia bausi fagulo goli fisigälasimola säi.
JOH 11:45 Yu udia dolö yafie Meli sebea misi sefolalo amolia, Yesuea hamosebe amo bealahilä, ema asigi afädë negei.
JOH 11:46 Iligi odoa Felesi dolö neebea afialahilä, Yesuea hamoi amo säla ï.
JOH 11:47 Amalebe, Felesi dolöfulo gobela ïlo busafulo amolia Galïsolö dolö amoli mofiala gegedomalolahilä didiähalea, Dolö gowea hamomolöi made gadoi yafie hamosebeweïe, nilïa edo hamomolödu.
JOH 11:48 Nilïa ea amala hamomäia guilasiseda, udia dolö sulubadelaea ema asigi afädë negesa maademolö gabu. Amala hamoseda, Olomo dolö ili maala, udia dolö nufudaha maadelahilä, nilïle gobela ïlo mosö amoge haila hësögudumolö gabumelëla säi.
JOH 11:49 Amala sälahilä, iligi dolö afädë Gaiafasa gäheo i amogi gobela ïlo busa edefade nelo amea sähalea, Dilida dofä asigi maade gabu.
JOH 11:50 Asiala nilï sosogo neebe amo sulubadela nufideloeada, afädëa udia dolö baagomolö amo bedefala baagomolö dofeada amo gabu, dilia made helësësalela säi.
JOH 11:51 Ado amoda Gaiafasaïe asigiamu made säi. Eda gäheo i amogi gobela ïlo busa edefade neada, Yesuea Yu udia dolö sulubadelaïe baagola bedefamolö amoïe bea säi.
JOH 11:52 Yesuea Yu ililemu baagomolöïe made. Godeïe malölali sege sulubadelagi fifi asi sefolalebe amoli neala gegedolasila, afädëfalï hamolasimäiage baagola bedefamolö amoïe bea säla, säla negei.
JOH 11:53 Hä, segeyo amo gala mi gäwila, ilia Yesu nufulöïe idi hogola didiäha dilo.
JOH 11:54 Amasebegi, Yesu e Yu ilile siigi ulufa made nowela, gaamugi amila awäla sege udia dolö aligilo made dibe amo ga madela, gaamu afädë Efalaimula sälo dibea ami, ïe bëgëla aulolali awäla nelo.
JOH 11:55 Yu ilile Baagila Asi Segeyo amo besela galamolö dibegi, udia dolö sege elö elölagi nelo amoli sulubadela Yalusalememu afiai. Godeïe siigi nigime baai made namolöïe hamolo mala dilo amo hamomolöïe, Baagila Asi Segeyo made besela galala dibegi, afiai.
JOH 11:56 Ili afialahilä, Yesu e hogosamu nelo. Godeïe mosöamadi ami nefolalea hilidomu naba hogosalea, Dilia edo helësësa. Eda molö nülo segeyo edefade gedosebeawi made moholöledula naba hogosa dilo.
JOH 11:57 Dafidi gobela ïlo busa nefolalo amoliage Felesi dolö nefolalo amoliage gelola sähalea, Afädëa Yesu neë beaseda, nihïlï nafodola moholöïe säla ïa misialola säla ïaha maadei.
JOH 12:1 Segeyo gafeia negesilahilä, Baagila Asi Segeyo edefade amo hä, besela galamolö dibegi, Yesu e Bedani asi. Elasalusi, Yesuea baagoiala nowelasi amoda, Bedani gaamugi ami nelo.
JOH 12:2 Ilia ami Yesu e obeägïlasimolöïe molö daiaha dilo. Madaeada molö mogesa nebegi, Elasalusi eda dolö Yesubalä molö naha sefolalo amolibalä sulo.
JOH 12:3 Amala sefolalebegi, Melia weli gafisigäi hïdo elöi muni edefadea nii ödä i hasegi usi dilo amo gaula maala, Yesuïe emodaia söga negelahilä, hïle busa hilïa hësa sulo. Weli amoda nadaeamu hamoi. Amala hamosebegi, weli gafisigä amea mosö amo negegi dilo.
JOH 12:4 Amala hamosebegi, Yesuïe bëgëla aulo afädë, ïe ëida Yudasa Isagaliada, hobeala ea Yesu hololömolö amea sähalea,
JOH 12:5 Weli gafisigäi hedabi gowea muni giwi siliba hädali ohodoa gadoi nealahilä, busadäoi nefolalebe amoligali ïala made, abisigi waeasesadula säi.
JOH 12:6 Eada busadäoi nefolalebe amoli helësëla säi made. Eda fa nelo nea amala säi. Ilile muni salelo adu amo ägüla nawesalea, ilia muni negesebe amogi ea odoa fa somodala nelo.
JOH 12:7 Amala säi amo nabalahilä, Yesuea sähalea, Udia goea hamosebego hamomäia guilasimalo. Goda ea ne baagosegi baumolö amoïe hamosamelë.
JOH 12:8 Busadäoi nefolalebe amolida segeyo sulubadelagi dilibalä namolömelë. Be, neda segeyo sulubadelagi dilibalä namolö mademelëla säi.
JOH 12:9 Yesu e Bedani neala helësëlahilä, Yu ili yafie e neebea ami afiai. Ili afiai amoda, Yesumu helësëla made, Elasalusi e, Yesuea baagoiala nowelasi amoge bimolö afiai.
JOH 12:10 Amase, gobela ïlo busa nefolalo amolia didiähalea, Elasalusige nufidedelämelëla säla didiäi.
JOH 12:11 Mida, Yesuea Elasalusima hamoi amo helësëla, Yu ili yafiea gobela ïlo busa amoli fisila awäla, oböla, Yesuma asigi afädë negei amogi.
JOH 12:12 Amo aiyo amogi, udia dolö yafie segeyo edefade amo bimolö Yalusaleme mafula gegedoi amolia Yesu e hä, Yalusaleme maahamelëla säi amo nabalahilä,
JOH 12:13 waibo bäu gadoi damula gagaula e idiafa gausiamolö afiai. Gausiala digalahilä obeägïla uuala säsäla afiahalea, Agua. Nesege. Afädë Dafidilo Geloiïe ëigila maasebego, Isilaleïe Gini go, neala hedabolasimäia. Nilïa ïe ëi gauia adadi. Hosanala säsäla afiai.
JOH 12:14 Yesu e sugua dögi üdïli afädë beagolelahilä, e amodaia fila misi. Amoïe Godeïe bebagi säla dëdëla negei dibe amoda gowe.
JOH 12:15 Saionoïe idiwi-e, dia bedämabu. Dïe gini hä, sugua dögi üdïlidaia fila maasebego bimalola säla dëdëla negei dialea.
JOH 12:16 Segeyo amo gala, ïe bëgëla aulo amolia amo hamoi amoïe mi fädäla helësëi made nelo. Gaso, hobeala Yesu e baagola nowelahilä, fedala ïe yo digalomadi sebegi, Godeïe bebagi hï eïe amala säla dëdëla negei dibe amoge, amase, ilia ema amo hamoi amoge, helësëla obëgëi.
JOH 12:17 Dafidi Yesuea Elasalusi bauia amila welahilä, e baagoiala nowelasise melëlo amolia säla daidosamu nelo.
JOH 12:18 Udia dolö gegedoi amolia ea dolöea hamomolöi made gadoi hamoimelëla säi amo nabalahilä, e idiafa gausiamolö afiai.
JOH 12:19 Amasebegi, Felesi ilia hilidomu didiähalea, Nilïa hamomolöi madego beasebele. Hä, udia dolöda sulubadela e bëgëla awäha maadesebego bimola säla didiäha dilo.
JOH 12:20 Udia dolö ilia segeyo edefade amogi Godeïe ëi gauia adamolöïe Yalusaleme gegedoi amoligi Giligi odoa ilige maala sulo.
JOH 12:21 Amo gala Giligi ili Filibi neebea ami misi. Filibi eda Galiliïe gaamu Bedesaida ami fii dolö. Ilia ema sähalea, Dafidilo, nilïa Yesu melëdeläla säi.
JOH 12:22 Amala säsebegi, Filibi e awäla Äduluma säla ïalahilä, ele helegela awäla, Yesuma säla ï.
JOH 12:23 Amo säla ïasebegi, Yesuea ilima säla obëgësalea, Dolöïe Malö ëi sälo namolö amoda hä, besela galai gabuwe.
JOH 12:24 Na dilima dofä gelola sähago. Widi gägä afädë nagadaia dufigila digala made baagoseda, gägä afädëfalïmu dië bimolömelë. Gaso, nagadaia dufigila digala baagoseda, amea gägä yafie negemolömelë.
JOH 12:25 Amaimo, afädëa hïle namolö amomu mi hamosa aligiseda, ïe namolö amo hogosa helemolömelë. Amase, afädëa nagadaiawi nea, ïe namolö amoma baagi ïala fisiseda, namolö amo gaula nea namolöi namolömelë.
JOH 12:26 Amaimo, afädëa nïe hamoi hamolasilo nea galëda, ea ne bëgëla moholö dialea. Ne neebea ami nïe hamoi hamolasiloge namolömelë. Nïe hamoi hamolasiloda, Naadoea e ëi sälo namialamolömelëla säi.
JOH 12:27 Yesuea aso, sähamu neamu sähalea, Walio nïe iso asigigi yöia idogola säosäosebemelë. Amai na edo sämolödu. Na gomalä sädule. Naado-o, nelebo walio nema hamomolö amo dia neadigimalo. Ai, amala made gabu. Ne wi misi amoïe mida, amo gausiala digamäia misi nea.
JOH 12:28 Naado-o, dia dïe ëi edelasimalola säi. Yesuea amala säla wagaia gai amole, ado afädë Hebenila säia idogosalea, Na nïe ëi edelasimelë. Amase, amo gadola wäla bu edelasimolömelëla säi.
JOH 12:29 Udia dolö amala säse nabelo ami nefolalo amolia sähalea, Gomoda sege gudusebegola säi. Amase, odoaea sähaleada, Selesaia fii afädëa ebalä adosebegola säi.
JOH 12:30 Amala säsebegi, Yesuea sähalea, Ado walio säi ameada, ne ugila negemolöïe säi mademelë. Amoda dili ugila negemolöïe säsio.
JOH 12:31 Walioda, Godea nagadaia udia dolö nefolalebe amoli gudila mogemolömelë. Ea aso, waliomu nagadaiaïe busa neebe amoge haila digimolömelë.
JOH 12:32 Ilia ne nagadaia nea gauia adogoseda, amo galada na udia dolö sulubadela nemadi dusugamolömelëla säi.
JOH 12:33 Yesuea ado amala säi amoda, ema gomalä hamosegi baagomolö gabula ulufala olela amala säi.
JOH 12:34 Amala säsebegi, udia dolö amolia ema säla obëgësalea, Nilïa Godeïe Ado säla negei dibe amogida gomalä säi nabelo. Gelesoda namolöimu namolömelëla säi nabi. Gaso, dia sähalea, Dolöïe Malö gauia adogomolö dialeala säi amoda abeahäladu. Amai Dolöïe Malöla säsebegoda nowëla nabi.
JOH 12:35 Amala nabasebegi, Yesuea ilima säla obëgësalea, Fu holöfalï dibewegida yo digalo e dilibalä namolömelë. Dili gasimi sagaloea dabeloeada, yo digalo neebewe gaalu nawesa namialo. Dolö gasimi sagaia nawelo neebe ameada, idi gowegi awähala helësëla made nawelo nea.
JOH 12:36 Yo digaloïe malö namolöïe, yo digalo neebewegi wäla dilia yo digaloma asigi afädë negemalola säi. Yesuea ado amo säha maadelahilä, udia dolöea e melëloea musügä namolö asi.
JOH 12:37 Yesuea ilile sidaia dolöea hamomolöi made gadoi yafie hamosa nelo gaso, ilia ema asigi afädë made negei nelo.
JOH 12:38 Aisaeaea bea säla negei amo gadola gausiala digamäiaïe amala hamoi. Aisaeaea bea säla negei amoda gowe. Dafidilo Geloi-e, nilïa ado säsebeweda, nowëa dofä gabula helësëidu. Amase, Dafidilo Geloiïe geloi amoda nowëma oleidula säla dëdëla negei dialea.
JOH 12:39 Ilia Yesuma asigi afädë negemolö ulï nelo. Amoïe mida, Aisaeaea ado elö säla negei dibe amoda gowe.
JOH 12:40 Ilia siia beala, asigia helësëla besuseda, na ili wahilasiloea, Godea ilile si dofogalasila asigi gala digimelëla säla dëdëla negei dialea.
JOH 12:41 Aisaeaea amala säi amoïe mida, ea dafidi Gelesoïe yo digalo hïdo elöi amo bealahilä, Gelesoïe amala säimelë.
JOH 12:42 Amala säi gaso, busa dolö nefolalo amoli yafiea Yesuma asigi afädë negei. Gasoda, Felesi ilia ili gedolo mosöa amila segea beselala fisiloea, ilia Felesi amoli helësëlahilä, asigi afädë negei amo ulufala made säi.
JOH 12:43 Mida, ilia dolöea ilile ëi gauia adamäiala helësëlo ameada, Godea ilile ëi gauia adamäiala helësëlo amoda baagi.
JOH 12:44 Yesuea gelola sähalea, Afädëa nema asigi afädë negei neebe ameada, nemamu made, ne misialala sälo neebe amomage asigi afädë negei nea.
JOH 12:45 Amase, afädëa ne bease ameada, ne misialala sälo neebe amoge beaha nea.
JOH 12:46 Afädëa nema asigi afädë negei neebe amo gasimi sagaia aligiloea, neda yo digalo nagadaiawi namolö misi.
JOH 12:47 Afädëa na ado säsebewe nabalahilä gaso, bëgëlo made neebe amoda, na e made mogemolömelë. Nada udia dolö sege sulubadelagi nefolalebe amoli mogemolö misi made. Nada ili sigi obëgëmolö misimelë.
JOH 12:48 Be amai gaso, afädëa nema baagi ïala, nïe ado made nabaseda, amoïe gudi mogelo afädë nea. Amoda segeyo aligila wagasolo amo gala, ado na säla ïasebe wea wäla gudila mogemolömelë.
JOH 12:49 Mida, na nihïle asigiamu säha mademelë. Ne misialala sälo Naadoea ado gowe sämalola säla ïmelë.
JOH 12:50 Hamomalalo ameada namolöi namolö amo ulufadigilola helësësamelë. Amala helësëlahilä, na ado säsebeweda, Naadoea nema sämalola säi amo gadolamu säha neawemelëla säi.
JOH 13:1 Baagila Asi Segeyo amo hä, ga madesebegi, Yesuea asigia helësësalea, segewe dïgïla ïe Eedo neebea moholö amoda, ga madesebela helësësa nelo. Ea hïle udia dolö nagadaia nefolalebe amoli boba hamosa nelolahilä, e baagosaleage boba hamoi amo wälasimu nea baagoi.
JOH 13:2 Hä deadifalï, ili molö naha sefolalebegi, mugabe Saidania Saimonoïe malö Yudasa Isagaliadaïe asigigi Yesu hololömolö amo hä, helësëlasi.
JOH 13:3 Yesuea helësësalea, Eedoea nelebo sulubadela ïe naabogimu gausisebegi, Gode neebeala misi amo, bu Gode neebea ami obëgëmolö gabula helësësa nelo.
JOH 13:4 Amala helësëlahilä, Yesu e molö negela nülo auli mia ami nowela nea, ïe fagulo daia gäi amo giilahilä, dawila neala bului.
JOH 13:5 Amalahilä, ea falodaia ödä söga negelahilä, ïe bëgëla aulo amolile emo nigime hëla didigila awäla, dawila hï bului amoïe bidia dogadigila digisa nelo.
JOH 13:6 Amala hëla didigila awäla, Saimono Fida sebeamadi maasebegi, ea sähalea, Dafidilo Geloi-e, dia nïe emo nigime hësalela säi.
JOH 13:7 Amala säsebegi, Yesuea ema säla obëgësalea, Na walio hamosebeweïeda, dia made helësësebego. Gaso, dia hobeala helësëmolömelëla säi.
JOH 13:8 Amala säsebegi, Fidaea ema sähalea, Dia nïe emo nigime dofä made hëmolömelëla säi. Amala säsebegi, Yesuea ema säla obëgësalea, Na di made hëseda, dida nebalä made dila namolögodala säi.
JOH 13:9 Amala säsebegi, Saimono Fidaea ema sähalea, Dafidilo Geloi-e, nïe emomu made. Nïe naabo busala hëmalola säi.
JOH 13:10 Amala säsebegi, Yesuea ema säla obëgësalea, Dolö afädë nigime hësa maadei neebe amoda, emomu hëmolö dialea. Ïe domalo sulubadela nigime made baai nea. Dilida hä, nigime made baai neamelë. Amai gaso, na dili sulubadela sähalea säha mademelëla säi.
JOH 13:11 Ea ili sulubadela nigime baai made nealada made säi amoïe mida, eda dolö gowea hololömolö neala hï dawadigi nelo.
JOH 13:12 Yesuea ilile emo nigime hësa maadelahilä, ïe fagulo gii amo bu salugala, hï suloa ami bu fila obëgëlahilä salea ilima nabahalea, Na walio dilima hamosebeweïeda, dilia helësësebele.
JOH 13:13 Dilia nema sähalea, Säla Olelelolage, Dafidilo Geloilage, säsebe amoda dofä sähamelë. Amai, neda dofä amo neamelë.
JOH 13:14 Dilile Säla Oleleloge, Dafidilo Geloige nea, na dilile emo nigime hëlasisewe gadola, diliage dihilimu amala hamosa namolö dialea.
JOH 13:15 Na dilima hamola olelesewe gadola, hobeala diliage amo gadola hamomäia olelesamelë.
JOH 13:16 Na dilima dofä gelola sähago. Hamoi hamolasilo neebe ameada, ïe busa neebe amo made baagilo. Amase, ado gaula aulo neebe ameada, e mosalalo amo made baagilomelë.
JOH 13:17 Hä, walio na olelei amo gadola helësëla hamoseda, dili obeägïsa namolömelë.
JOH 13:18 Na dili sulubadelama sähalea säha made. Dolö na memelei amolida nihï dawadigimelë. Gaso, Godeïe bebagi ado säla dëdëla negei dibe amo gadola gausiala digamäiaïe amala sähamelë. Ado säla dëdëla negei amoda gowe. Dolö nïe molö naha filo amea, ne emesala eegeimelëla säla dëdëla negei dialea.
JOH 13:19 Walio na dilima säla ïasebeweda, made hamola neebe amo gaalu säla ïahago. Hobeala na ado säsebewe gadola hamola besela galaseda, amo bealahilä, Ne Nelo amo Neebela dawadigila, dilia nema asigi afädë negesa maademäia, säla ïahagomelë.
JOH 13:20 Na dilima dofä gelola sähago. Afädë na mosalosegi awäse amo neawela sigi aligise ameada, nege neawela sigi aligisagomelë. Amase, ne neawela sigi aligise ameada, ne misialala sälo amoge neawela sigi aligisagomelëla säi.
JOH 13:21 Yesuea amala sälahilä, ïe iso asigigi edefademalä yöi nea säla ulufadigisalea, Na dilima dofä gelola sähago. Diligi afädëa ne hololömolömelëla säi.
JOH 13:22 Amala säi amo nabalahilä, ïe bëgëla aulo amolia gowema säila dawa made ameada, elöea elöma beala, elöea elöma bealai.
JOH 13:23 Bëgëla aulo amoligi Yesuea boba hamolo afädë Yesu hï e miafalï ami sulo.
JOH 13:24 Amoma Saimono Fidaea odagi nigila sähalea, Ea nowë helësëla sähala dia nabuöla säi.
JOH 13:25 Amalebe, bëgëla aulo amea, Yesuïe bidagia golögïa alogolahilä nabahalea, Dafidilo Geloi-e, nowëa amamolö gabula nabi.
JOH 13:26 Amala nabasebegi, Yesuea säla obëgësalea, Na wahalo dagaboi amo neala hëhei gobei ödägi geagilahilä, afädëgali ïaseda, amea amamolömelëla säi. Amala sälahilä, ea wahalo dagaboi amo geagilahilä, Saimono Isagaliadaïe malö Yudasagali ï.
JOH 13:27 Yudasaea wahalo amo nii amole, mugabe Saidani ema fedai. Amasebegi, Yesuea ema sähalea, Dia afädë hamomolö neebe amo hä, aabela hamomalola säi.
JOH 13:28 Ami sefolalo amolia, Yesuea säse amo nabi gasoda, mi goweïe säsebela helësëi made sefolalo.
JOH 13:29 Odoaea helësësaleada, Yudasaea muni adu ägülo ameada, molö nülo segeyo edefade gedosebe amoïe nelebo odoa bidia nea mosalahaledu, ma busadäoi nefolalebe amoligali, gui nelebo afädë ïa mosalahaledula helësëi.
JOH 13:30 Amalebe, Yudasa e wahalo geagi amo nealahilä, fodolofalï doadigila asi. Amo gaalu hä, gasimi sagala gasi.
JOH 13:31 Yudasa e doadigila asibua, Yesuea sähalea, Walioda hä, Dolöïe Malö amoïe ëi ilibia amo olesebemelë. Amase, ea hamosebe amea Godeïe ëi ilibia amoge olesagomelë.
JOH 13:32 Amaimo, Malöea hamosebe amea Godeïe ëi ilibia amo oleseda, Gode hï Dolöïe Malö amoïe ëi ilibia amoge walio wegi wäla olemolömelë.
JOH 13:33 Nïe malöla dili-e, neda dilibalä holöbö ede made namolömelë. Ne awäseda, dilia ne hogomolömelë. Na Yu udia dolö nefolalebe amolima säla ï amo gadola wäla, walioge na dilima säla ïahago. Ne awäse amogida, dili moholöi mademelë.
JOH 13:34 Dilia hamomäia na dilima mala gähe säla negesebe amoda gowe. Dilia dihilimu boba hahamosa namialo. Na dili boba hamoi amo gadola, diliage dihilimu boba hahamosa namialo.
JOH 13:35 Dilia dihilimu boba hamose ameada, udia dolö sulubadelaea dilida nïe bëgëla aulo neala helësëmolömelëla säi.
JOH 13:36 Amala säsebegi, Saimono Fidaea Yesuma nabahalea, Dafidilo Geloi-e, dida abidi moholö nea sähala nabi. Amala nabasebegi, Yesuea ema säla obëgësalea, Sege ne moholö amogida walio dia bëgëla moholöi mademelë. Hobeada dia bëgëla moholömelëla säi.
JOH 13:37 Amala säsebegi, Fidaea ema säla obëgësalea, Dafidilo Geloi-e, edoea na walio di bëgëla moholöi madedu. Nïe namolö amo digali fisiga gamolöi neamelëla säi.
JOH 13:38 Amala säsebegi, Yesuea säla obëgësalea, Dïe namolö amo dofä negali fisiga gamolöle. Na dima dofä gelola sähago. Haea gagalugo gawalia gäla made neëgi, nafi bu ohodoala dia ne dawa madela sämolömelëla säi.
JOH 14:1 Yesuea ado aso, sähamu neamu sähalea, Dilia yöia idogola säosäola namiabio. Godema asigi afädë negemalo. Amase, nemage asigi afädë negemalo.
JOH 14:2 Nïe Naadoïe mosöa hogoli yafie dialea. Amoli maade galebeda, na dilima made sälabio. Dili namolö sege amo daiamolöïe, ne ami moholömelë.
JOH 14:3 Awäla dili namolö sege amo daiala negesilahilä, sege ne namolöia ami dilige nebalä nihïlïgïla namolöïe, na dili bu bea obëgëmolömelë.
JOH 14:4 Ne moholö idi amoda dilia dawadigi nebegomelëla säi.
JOH 14:5 Amala säsebegi, Domasaea ema nabahalea, Dafidilo Geloi-e, sege di moholö amoda nilïa dawa made. Hä, di idi gowegi moholö neala nilïa abilia helësëmolöi gabula nabi.
JOH 14:6 Amala nabasebegi, Yesuea ema säla obëgësalea, Idige, ado dofäge, amase, namolöge, nihïne neawe. Afädë Naado neebea moholö, ne neebea made maaseda, moholöi mademelë.
JOH 14:7 Dilia ne dawa galëda, Naadoge dawadigi. Giso, dilia walio mi gäwila, e bealahilä dawadigisagomelëla säi.
JOH 14:8 Amala säsebegi, Filibia ema sähalea, Dafidilo Geloi-e, Diado nilïma olemo. Oleseda, nilïa dofeala helësëmolömelëla säi.
JOH 14:9 Amala säsebegi, Yesuea ema sähalea, Filibi, segeyo sedade ne dilibalä nelo amo, dia aso, ne dawa made neale. Afädëa ne melï neebe ameada Naadoge melï nea. Amala hamolo dibe amo, dia diado nilïma olemola säi amoda, abeahäladu.
JOH 14:10 Ne Naadoma aligila, amase, Naadoge nema aligilala neebewegi, dia dofä gabula made helësësale. Na dilima ado säla ïaha neebeweda, nïe asigiamu säla ïaha made. Naado e nema neebe amea ïe hamoi amo hamosamelë.
JOH 14:11 Ne Naadoma aligila, amase, Naadoge nema aligilala neamelëla säsewe nabalahilä, dofä gabula helësëmalo. Dofä gabula made helësësa galëda, hamoi hamosa neebewe beala dofä gabula helësëmalo.
JOH 14:12 Na dilima dofä gelola sähago. Afädëa nema asigi afädë negei neebe amea na hamoi hamosa neebewe gadola hamomolömelë. Ne Naado neebea awäse ameada, nema asigi afädë negei neebe amea na hamosa nelo amo baagila awäla, hamoi edefade hamomolömelë.
JOH 14:13 Malöea hamosebe amea Eedoïe ëi gauia adamäia, dilia nïe ëigi nea nelebo afädë ëdëgëseda, na hamomolömelë.
JOH 14:14 Dilia nïe ëigi nea nelebo sulubadela ëdëgëseda, na hamomolömelëla säi.
JOH 14:15 Yesuea ado aso, sähamu neamu sähalea, Dilia ne boba hamoi nea galëda, na hamomalola säsebewe gadola bëgëla hamosa namolömelë.
JOH 14:16 Dili Ugila Negela Gelolasilo elö, na Naadoma nabulömelë. Eada diligali ïmolömelë. E maalahilä, dilibalä namolöi namolömelë.
JOH 14:17 Ugila Negela Gelolasilo amoda dofä sälo Gesamimelë. Nagadaia udia dolöea e made melëlo, dawa made amea, e nimolöi mademelë. Gasoda, e dilibalä neebe ameage, amase, dilima nogila digala namolö ameage, dilia e dawadigimelë.
JOH 14:18 Na dili guluba gadoi namiäia dïgïla moholö mademelë. Neda dili neebea obëgëmolömelë.
JOH 14:19 Holöfalï nelolahilä, nagadaia udia dolöea ne made bimolö. Gaso, diliamu bimolömelë. Ne neebe ameada, dilige namolömelë.
JOH 14:20 Ne Naadoma neebe amoge, dili nema neebe amoge, amase, ne dilima neebe amoge, segeyo amo gala dilia dawadigisa maademolömelë.
JOH 14:21 Afädëa na hamomalola säsebe amo nealahilä, bëgëla hamosa neebe ameada, ne boba hamoi nea. Afädëa ne boba hamoi neebe amoda, Naadoeage e boba hamoi namolömelë. Amase, nage e boba hamolahilä, nihïne ema ulufala olemolömelëla säi.
JOH 14:22 Amala säi amo nabalahilä, Isagaliada made, Yudasa elöea ema nabahalea, Dafidilo Geloi-e, nilïmada di ulufala olesalea, oböla, nagadaia udia dolö nefolalebe amolimada, di made ulufala olemolömelëla säi amoda, mi edoïela nabi.
JOH 14:23 Amala nabasebegi, Yesuea ema säla obëgësalea, Afädëa ne boba hamoi neebe ameada, nïe ado bëgëla hamosa namolömelë. Naadoea e boba hamoi nea, e neebea ami Naado alï halïgïla maalahilä, ebalä aligimolömelë.
JOH 14:24 Afädëa ne boba made hamoi neebe ameada, nïe ado bëgëla made hamomolömelë. Dilia ado nabaha nebegoda, nïe ado made. Naado ne digamalala sälo amoïe adomelë.
JOH 14:25 Ne made awäla, dilibalä neada, ado amo na dilima säla ïaha nelo amomelë.
JOH 14:26 Gasoda, dili Ugila Negela Gelolasilo, Eleloi Gesami Naadoea nïe ëigila fisiga wemolö amo maalahilä, ea dilima nelebo sulubadela olelesa maademolömelë. Na dilima säla ïaha nelo amo sulubadela, ea dilima helësëlasimolömelë.
JOH 14:27 Na dalulasilo dilibalä diamiäia dilima ïahagomelë. Nïe dalulasilo amo diligali ïahago. Na ïase amoda, nagadaia udia dolöea ïlo amo gadoi ïaha mademelë. Hä, dilia yöia idogola säosäolage, bedälage namiabio.
JOH 14:28 Na dilima sähalea, Ne awälahilä, dili neebea bu obëgëmolömelëla säi amoda dilia nabi amomelë. Amo nabala nema boba hamoi galebeda, ne Naado neebea awäsewegi dilia obeägïlabio. Mida, Naado eda ne baagila, edefademalä nea.
JOH 14:29 Nelebo amo made besela galala neebe amo gaalu, na dilima säla ïaha nelo amomelë. Säla ï amo gadola hamose beaseda, dilia asigi afädë negemäiaïemelë.
JOH 14:30 Na dilibalä ado sedade säha namolö made gabumelë. Mida, nagadaiaïe busa neebe amo moholö ga made dialea. Ea nema nelebo afädë hamomolö made bimolömelë.
JOH 14:31 Gasoda, nagadaia udia dolöea na nïe Naadoma boba hamoi neebe amo helësëmäia, na Naadoea hamomalola säse amo gadolamu hamolomelë. Hä, nowemo. Afiadila säi.
JOH 15:1 Yesuea ado aso, sähamu neamu sähalea, I gägä negelo gelebi ëfë dofäda nihïne neawe. Amase, gelebi sagai sigi aligiloda Naado neamelë.
JOH 15:2 Nema adomo dila neebe amogi, afädë gägä made negelo neebe amoda, Naadoea damula fisilomelë. Adomo elö gägä negelo neebe amoda, gägä yafie negemäia, Naadoea dagabola digila hahamogisa aligilo nea.
JOH 15:3 Na dilima ado säla ï ameada, dili nigime hësa maadei nefolaleagomelë.
JOH 15:4 Dilia nema dila namialo. Nage dilima dila namolömelë. Adomo afädëa i gelebi ëfë mima dila made hïdo nea, gägä negelo made amo gadola, dilia nema dila made aligiseda, gägä negemolöi mademelë.
JOH 15:5 I gägä negelo gelebi ëfëda ne neawe. Dilida adomo gadoi nebego. Afädëa nema dila, amase, nage ema dilala aligiseda, eada gägä yafie negemolömelë. Dilia ne fisila dihilidomu nea, nelebo afädë hamomolöi made nebego.
JOH 15:6 Afädëa nema dila made aligiseda, eda i adomo dagala fisisegi bausolo amo gadoi nea. Adomo dagala digai bausoi diëgi, ilia gafedelahilä, nulo wisebea ami sadia idogola gobemolömelë.
JOH 15:7 Dilia nema dila, amase, nïe adoeage dilima dilala nea, dilia hamesebe amo gadoi ëdëgëseda, ëdëgëse amo gadoi diligali ïmolömelë.
JOH 15:8 Dilida ne bëgëla aulo nea, gägä yafie negeseda, Naadoïe ëi gauia adogomolömelë.
JOH 15:9 Naadoea ne boba hamose amo gadola, nage amo gadola wäla dili boba hamosa nelomelë. Nïe boba hamolo amogida dili namialo.
JOH 15:10 Na nïe Naadoea hamomalola säse amo bëgëla hamosa nea, ïe boba hamolo amogi ne neebewe gadola, dilia na hamomalola säse amo bëgëla hamosa aligiseda, nïe boba hamolo amogi dilige namolömelë.
JOH 15:11 Na helësësaleada, nïe obeägïlo dilima negemäiage, amase, dilile obeägïlo dilile isogi nobamäiage, na dilima ado säla ïaha neawemelë.
JOH 15:12 Na dilia hamomäia säsebe amoda gowemelë. Na dili boba hamoi amo gadola, diliage dihilimu boba hahamosa namialo.
JOH 15:13 Afädëa ïe damelëgali ïe namolö amo fisiga gaseda, ea ïe damelë boba hamose ameada, boba hamolo sulubadela baagila aulomelë.
JOH 15:14 Na dilima hamomalola säse amo gadola hamoseda, dilida ne damelëmelë.
JOH 15:15 Na walio dili hamoi hamolasilo neala sähalea säha made. Hamoi hamolasilo neebe ameada, ïe busa neebe amea abodo gadoi hamosadula dawa made aligilo. Gaso, na dilima damelëla säha. Mida, Naadoea säse nabi amo sulubadela na dilia helësëmäia säla ïaha maadei amomelë.
JOH 15:16 Dilia ne memelei made. Na dili memelela, dilia awäla gägä yafie negemäia nafolala memelelasimelë. Amase, dilia gägä negela diamolöi diamiäia hamogilasimelë. Amala hamoi nea, dilia nïe ëigi Naadoma nelebo afädë ëdëgëseda, ea ïaha maademolömelë.
JOH 15:17 Amaimo, na dilia hamomäia säsebe amoda gowe. Dilia dihilimu boba hahamosa namialola säi.
JOH 15:18 Yesuea ado aso, sähamu neamu sähalea, Nagadaia udia dolöea dilima bimolö habobaseda, dafidi nemadale bimolö habobai nelo amo helësëmalo.
JOH 15:19 Dilige nagadaia udia dolö amoli gadoi nelo galebeda, nagadaia udia dolö nefolalebe amolia, ili sosogo nefolalebe amolibalä boba hamolo amo gadola, dilibaläge boba hamola aligilabiomelë. Amai gaso, dili nagadaia udia dolö nebegi na besela neala memelelasi. Ameada, dili nagadaiaïe made nefolalebe goeada, nagadaia udia dolö nefolalebe amolia, dilima bimolö habobasebemelë.
JOH 15:20 Na dilima ado säla ï amo helësëla obëgëmalo. Hamoi hamolasilo neebe ameada ïe busa neebe amo made baagilo. Ilia ne neala sëlasi ameada, dilige neala sëlasimolömelë. Ilia nïe ado bëgëla hamoseda, amase, dilile adoge bëgëla hamomolömelë.
JOH 15:21 Amolia dilima hamomolömelëla säi amo sulubadelada, dili nïe ëigi neebe ameage, amase, ne misialala sälo neebe amo dawa made nefolalebe ameage, amala hamomolömelëla säla ï amomelë.
JOH 15:22 Na ilima ado mala säla ïmolö made misi galebeda, ilia nafade hamosala helësëla made hamosa aligilabio. Gaso, walio ilia, nilïa dawa made nea hamoimelëla sämolö ulï bimolömelë.
JOH 15:23 Nema bimolö habobaha neebe ameada, Naadomage bimolö habobaha nea.
JOH 15:24 Amaimo, ne ili adebawi nea, afädëa siiba hamolo made gadoi hamosa nelo amo ilia bimäia, made hamosa nelo galebeda, ilia nafade hamosala helësëla made hamosa aligilabio. Be, na hamoi amo ilia bealahilä gaso, nemage Naadomage bimolö habobaha neagomelë.
JOH 15:25 Ilia amala hamoi amoïe, ilile Ado säla negei dibe amogi, säla dëdëla negei dibe amoda gowe. Habobamolö mi madegi, memalä ilia nema bimolö habobaimelëla, säla dëdëla negei dibe amo gadola gausiala digamäiaïe amai.
JOH 15:26 Dili Ugila Negela Gelolasilo, Naadobalä neebe amoda, na e dilima fisiga idamolömelë. Eda dofä sälo Gesami, Naado neebeala moholömelë. E maalahiläda, ne ulufala säla ïaha namolömelë.
JOH 15:27 Amase, mi gäwiafalï amila dili nebalämu nelo ameada, diliage ne ulufala säla ïmolö galeamelëla Yesuea säi.
JOH 16:1 Dilia asigi afädë negei nebego dïgïla made mosäia, na dilima ado we säla ïahawemelë.
JOH 16:2 Ilia dili gedolo mosöa amila segea beselala fisimolömelë. Amase, segeyo afädë besela galamolö amogi, afädëa dili nufudahalea, eada Godeïe hamoi hamolasisala helësëla, dili nufulömelë.
JOH 16:3 Ilia Naadoge nege dawa made amea, amala hamomolömelë.
JOH 16:4 Amala hamomolömelëla säsebewe hamoseda, säi amo gadola hamosa gabula helësëmäia säla ïahagomelëla säla ï. Yesuea ado aso, sähamu neamu sähalea, Nelebo amala hamomolömelëla, na dafidi mi gäwia amila made säla ïala nelo amoda, ne dilibalä nelo amea, made säla ïala nelomelë.
JOH 16:5 Amai gaso, walioda, ne misialala sälo amo neebea moholö neamelë. Amai, nema diligi afädëa di abododi moholö neala made nabasebego.
JOH 16:6 Amala säsewegida, oböla dilile asigigi edefademalä bobailösebego.
JOH 16:7 Bobailösa gaso, na dilima dofä säla ïahago. Ne moholö ameada, dili ugila negesalea ne moholö neamelë. Na dili dïgïla moholö made galebeda, Ugila Negela Gelolasilo amo dilibalä namolö made maalabiomelë. Ne awäseda, e dili neebea digamalamolömelë.
JOH 16:8 E maalahilä, nagadaia udia dolöma nafadeda gowe gadoimelëlage, mala mogoida gowe gadoimelëlage, amase, Godea gomalä mogemolömelëlage ea fädäla säla ïmolömelë.
JOH 16:9 Ilia nema asigi afädë made negei neebe ameada, nafadeda gowe gadoimelëla fädäla säla ïmolömelë.
JOH 16:10 Ne Naado neebea awäseda, dilia ne bu elö made bimolö ameada, mala mogoida gowe gadoimelëla fädäla säla ïmolömelë.
JOH 16:11 Sege sulubadelagi nefolalebe amolile beaha aligilo neebe amobaläda, Godea gudila mogei neebe ameada, Godea gomalä mogemolömelëla fädäla säla ïmolömelë.
JOH 16:12 Na dilima ado sämolö yafie gaulea gaso, dilia waliomu neala gaumolöi made gabu.
JOH 16:13 Amai gasoda, dofä sälo Gesami e maaseda, ea dilile asigi neala mogolasila, ado dofä amo sulubadela helësëlasisa maademolömelë. Ea hïle asigia säla ïmolö mademelë. Ea säse nabase amomu säla ïmolömelë. Amase, nelebo hobeala hamomolö amoïe fädäla säla ïmolömelë.
JOH 16:14 Ea nïe ado gaula maala, dilima säla ïmolömelë. Amala hamose ameada, nïe ëige, nïe geloige gauia adogomolömelë.
JOH 16:15 Nelebo hulu sulubadela Naadoïe dibe amoda, nïe dialea. Amala dibe amea na sähaleada, Nïe dibe amo Gesamia gaula maalahilä, dilima säla ïmolömelëla säla ï amomelëla säi.
JOH 16:16 Yesuea ado aso, sähamu neamu sähalea, Segeyo ede made nelolahilä, dilia ne made bimolömelë. Oböla, segeyo ede made nelolahilä, hobeala bu bimolömelëla säi.
JOH 16:17 Amala säi amo nabalahilä, ïe bëgëla aulo odoaea hilidomu didiähalea, Ea nilïma säsebe amoda edodu. Ea ede made nelolahilä dilia ne made bimolömelëla säi amoge, ede made nelolahilä, dilia hobeala bu bimolömelëla säi amoge, amase, ne Naado neebea moholö ameala säi amoge, ea edo helësëla säidu.
JOH 16:18 Aso, sähalea, Ea ede made nelolahiläla säi amoda, edo helësëla säidu. Amoïe mida, nilïa made helësësebela säla didiäha dilo.
JOH 16:19 Ilia Yesu ema naba obëgëdeläla helësësebe amo hï dawadigilahilä, ea ilima sähalea, Dihilimu ado na säi amoïe mi hogola didiäha dibegoda, na sähalea, Ede made nelolahilä dilia ne made bimolömelëla säi amogige, amase, ede made nelolahilä hobeala ne bu bimolömelëla säi amogige mi hogola didiäha dialeale.
JOH 16:20 Na dilima dofä gelola sähago. Dilida didigaola dïisa neëgi, udia dolö nagadaia mala hamolo amolida obeägïsa namolömelë. Dilida yöi edefade namolömelë. Oböla hobealada, dili yöi nelo amo bu obeägïlo bedefamolömelë.
JOH 16:21 Udiaea malö ägümolö salea sëmolö fu besela galase gaaluda, asigi säosäosa filo. Gaso, ea hä malö ägüla maala saleada, dafidi sëi amo elabolahilä, ea hä, nagadaiawi malö ägüi amogi obeägïlo.
JOH 16:22 Amo gadola wäla, walioda hä dili yösa nefolalea. Hobeala na dili bu beasolo amo galada, dilile iso asigigi obeägïmolömelë. Dilia obeägïmolö amoda afädëa neala hogosa helemolöi made bimolömelë.
JOH 16:23 Segeyo amogida, dilia nema afädë made nabulömelë. Na dilima dofä gelola sähago. Dilia nïe ëigila Naadoma nelebo afädë ëdëgëseda, ea nabala ïmolömelë.
JOH 16:24 Dafidi dilia nïe ëigila nelebo afädë ëdëgëla made nelo gasoda, ëdëgëmalo. Obeägïlo dilima nobamäiaïe, nelebo afädë ëdëgëseda, dilia gaula namolömelëla säi.
JOH 16:25 Yesuea ado aso, sähamu neamu sähalea, Na dilima säla ïaha nelo amoda, ado besulamu säla ïaha nelomelë. Hobeala segeyo afädë besela galasegida, na dilima ado besula made, Naado gowe gadoi neamelëla säla ulufadigimolömelë.
JOH 16:26 Segeyo amo gala neada, dilia nïe ëigila Naadoma ëdëgëmolömelë. Na Naadoma dilile säsimolömelëla säha mademelë.
JOH 16:27 Naadoea dili boba hamosa neamelë. Mida, dilia ne boba hamola, ne dofä Gode neebeala misi gabula helësëi neebe gogi.
JOH 16:28 Naado neebeala maala nagadaiawi digala neawe. Oböla walioda, sege we dïgïla Naado neebea bu obëgësamelëla säi.
JOH 16:29 Amala säi amo nabalahilä, ïe bëgëla aulo amolia sähalea, Agua, dia besula made säla, dofä ulufadigila säsebego.
JOH 16:30 Nilïa walio helësësalea, diada nelebo sulubadela dawadigisa maadei ameada, afädëa dima nabulöi madela helësësawemelë. Ameada, nilïa dida dofä Gode neebeala misi gabula helësësa neamelëla säi.
JOH 16:31 Yesuea ilima säla obëgësalea, Walioda dilia asigi afädë negei neago gaso,
JOH 16:32 nabuö. Segeyo afädë besela galamolö amoda, hä, besela galahagomelë. Amo gala dili sulubadela dusudasila sege dihili neloa ami afufula, ne nihïdofalï dïgïla fisäla dusudasila afiaha maademolömelë. Amamolö gaso, ne nihïdo made, Naado halïgïla neamelë.
JOH 16:33 Na dilima ado amo säla ïaha nelo amoda, dilia nema dilahilä dalulo gaula namiäiaïe, säla ïaha neawemelë. Nagadaiawi neada, dili yöi bimolömelë. Gaso, asigi gelomalo. Na nagadaia galu sulubadelabalä nudula salolela baagila asi neawemelëla säi.
JOH 17:1 Yesuea ïe bëgëla aulo amolima ado amoli säla ïaha maadelahilä, selesaia mosöa sida adogola nea sähalea, Naado-o, segeyo amoda hä, besela galai gabuwe. Dïe Malöea dïe ëi ilibia amo olemäiaïe, dia Malö amoïe ëi ilibia amo olemalo.
JOH 17:2 Mida, dia udia dolö ema ï amoligali, ea namolöi namolö ïmäiaïe, ea udia dolö sulubadelaïe busa namiäia, dia egali geloi ï gabumelë.
JOH 17:3 Namolöi namolö amoda gowe gadoi. Gode dofäda dimu neebela helësëlo, amase, Yesu Geleso dia fisiga wei gabula helësëlo amomelë.
JOH 17:4 Hamoi dia hamomalola säla ï amoda na hä, hamosa maadeimelë. Amala hamosa nelo ameada, ne nagadaiawi nea, dïe ëi ilibia amo ilima oleimelë.
JOH 17:5 Naado-o, siiba naga föi we made hamola ne dibalä nea, nïe ëi ilibia nelo amo gadola, dïe siigi ëi ilibia nelo amo bu ïmalo.
JOH 17:6 Nagadaiawi nelo dolö odoa, dia nema ï amolima dïe ëi ulufala olesa nelomelë. Dïe nelo amoli dia nema ïasio. Ilia dïe ado nabala dia säi amo bëgëla hamoimelë.
JOH 17:7 Nelebo sulubadela dia nema ï amoda, dimadila misi gabula ilia hä, helësësa maadei neamelë.
JOH 17:8 Mida, dia nema ado säla ï amolida, na ilima säla ïaha maadesebegi, ilia hä, niimelë. Nealahilä, ne dofä di neebeala misi gabula helësësa maadei nea. Amase, dia ne dofä fisiga wei gabula helësësa maadei neamelë.
JOH 17:9 Na ili helësëla dima adolasisawe gasoda, nagadaia udia dolö sulubadela helësëla adolasisa mademelë. Na adolasisebeweda dia negali ï amolimu helësëla adolasisamelë. Amoïe mida, ilida dïe neebe amoïe.
JOH 17:10 Udia dolö nïe neebe amoli sulubadelada dïe neamelë. Amase, dïe neebe amoli sulubadelada nïe nea. Ilia mala hamosebe amea, nïe ëi ilibia amo olesebemelë.
JOH 17:11 Hä, walioda ne di neebea moholö neawe. Neda nagadaiawi made namolö. Ilimu wi namolömelë. Naado Hedabi Eleloifalï-e, alï afädëdi neebewe gadola, ilige afädëdi namiäia, dia dïe ëi nema ï amoïe geloia ili sigi namialo.
JOH 17:12 Ne ilibalä nelo amogida, dïe ëi nema ï amoïe geloia ili sigi nelomelë. Na ili sigi nebegida, afädë dabadigi mademelë. Be, dolö afädë dabadigimolö nelo amomuda hä, dabadigimelë. Amala hamoi amoda ado Godeïe bebagi dëdëla negei dibe amo gadola gausiala digamäia.
JOH 17:13 Walioda hä, ne di neebea maahago. Gaso, nïe obeägïlo ilile isogi nobamäia, ne nagadaiawi nea dima adolasisamelë.
JOH 17:14 Na ilima dïe ado säla ïaha nebegi, nagadaia malamu hamolo neebe amolia ilima bimolö habobaha nelomelë. Mida, ne nagadaia sosogo made neebe amo gadola, ilige nagadaia sosogo made neebe amea.
JOH 17:15 Na dima adosebe amoda, nagadaiawila dia ili sigi mosäia made adosamelë. Nafade hamolo busaea ili neala nafadelasiloea, dia sigi namiäiaïe adosamelë.
JOH 17:16 Ne nagadaia sosogo made neebe amo gadola, ilige nagadaia sosogo made nea.
JOH 17:17 Dïe adoda dofä sälo dialea. Ili nafolala dihïle namiäia, dofä sälo ado amea, dia ilile isogi hamoi hamolasimalola sähago.
JOH 17:18 Dia nema nagadaiawi udia dolö nefolalebe welibalä namiäia fisiga wei amo gadola, nage ili udia dolö nefolalebea ami afufumalaimelë.
JOH 17:19 Na ili helësëla, ili dihïlefalï dofä nafolala namiäiaïe, nege dima odala ïala neawe.
JOH 17:20 Dima dolö amolimu helësëla adolasisa mademelë. Ilia ado säla ïase amo nabala, nema asigi afädë negemolö amolilege gedola adolasisagomelë.
JOH 17:21 Nada ili afädëdi namiäiala helësëla adolasisago. Naado-o, di nema neebe amo gadolage, amase, dima ne neebe amo gadolage, ilida alïma namiäiala hamesa. Nagadaiawi udia dolö nefolalebe amolia, dia ne dofä fisiga wei gabula helësëmäiaïe amala adolasisago.
JOH 17:22 Alï afädëdi neebe amo gadola, ilige afädëdi namiäia, dia nema geloile, ëi ilibiale ï amo, na iligali ïmelë.
JOH 17:23 Ne ilima neebe ameage, amase, di nema neebe ameage, ili dofä afädëdi namiäiaïe. Amoïe mida, nagadaiawi udia dolö nefolalebe amolia dia ne fisiga wei gabula helësëmäiaïe, amase, dia ne boba hamose go gadola, ilige boba hamoi gabula helësëmäiaïemelë.
JOH 17:24 Naado-o, dia udia dolö nema ï amoli ne namolöia ami ili nihïlïgïla namiäiage, amase, nïe ëi ilibiale, yo digalole dia nema ï amo bimäiage hamesamelë. Naga föi made hamola nea, dia ne edefademalä boba hamosa nelo amea, ëi ilibia amoge, yo digalo amoge ïmelë.
JOH 17:25 Mogoi neebe Naado-o, nagadaia sosogo nefolalebe amoliada di dawa made gaso, nada di dawadigimelë. Amase, ne sosogo nefolalebe ilia dia ne fisiga wei gabula dawadigisa maadeimelë.
JOH 17:26 Na ilima dïe ëi ulufalasi. Dia ne boba hamoi amo gadola, boba hamolo amo ilima diamiäiage, amase, nihïne ilima namiäiage, dïe ëi, hä, ulufalasisa namolömelëla adola wagai.
JOH 18:1 Yesuea Godema adosa maadelahilä, ïe bëgëla aulo amolalibalä segea doadigila awäla ödä Gidolono dëgëla alömodi asi. Sagai afädë dibea ami ïe bëgëla aulo amolali awäla besela galai.
JOH 18:2 Sagaia amida dafidi Yesuea ïe bëgëla aulo amolibalä segeyo yafiegi ami gedosa aligilo. Amala gedolo ameada, Yudasa e hololölo amea dawadigi nelo.
JOH 18:3 Amai ameada, Olomo ami dolö odoage, Godeïe mosö idihë aligilo odoage, Felesi dolö odoaeage gobela ïlo busa amoliage mosalosebegi, ilia gele gamalige gaula, amase, nufidelo neleboge gagaulahilä, sagaia ami Yudasaea ili sigi asi.
JOH 18:4 Maasebegi, Yesuea ema hamomolö amo sulubadela hï dawadigilahilä, doadigila awäla ilima nabahalea, Dilia nowë hogola mofiaila nabi.
JOH 18:5 Amala nabasebegi, ilia ema säla obëgësalea, Nilïada Nasalese dolö Yesu hogola misila säi. Amalebe, Yesuea ilima säla obëgësalea, Amoda nemelëla säi. E hololölo Yudasa amoge ilibalä misi nelo.
JOH 18:6 Yesuea, amoda nemelëla säi amo nabalahilä, ili badadi gasia imomogola nagadaia fila didigafui.
JOH 18:7 Amasebegi, Yesuea ilima bu nabahalea, Dilia nowë hogola mofiaila nabi. Amalebe ilia sähalea, Nilïada Nasalese dolö Yesu hogola misila säi.
JOH 18:8 Amala säsebegi, Yesuea säla obëgësalea, Na dilima dafidi säla ï amo, amoda nemelë. Dilia ne hogosa galëda, dolö nefolalebe gowe ili mosäia fu ïmola säi.
JOH 18:9 Dafidi hï sähalea, Naado-o, dia dolö negali ï gowe ili afädë made dabadigila säi amo gadola gausiala digamäia amala säi.
JOH 18:10 Saimono Fidaea nudulo helebe afädë gaula misi amo dusugala neawelahilä, gobela ïlo busa edefadeïe hamoi hamolasilo amo nufi. Nufudasebegi, gëhe dafädimadi amo dagala salisi. Hamoi hamolasilo amoïe ëida Malagusi.
JOH 18:11 Amala hamosebegi, Yesuea Fidama sähalea, Dia helebego dihï salelo amogi sala obëgëmo. Dia helësësaleada, Naadoea ödä iigi usi ï gowe na made molö gabula helësësalela säi.
JOH 18:12 Amalebegi, ami dolö amoliage, ilile beaha aligilo busaeage, amase, Yu ilile idihë aligilo amolaliage, Yesu gaulahilä ëfëa nafodoi.
JOH 18:13 Amalahilä, ilia e Anasa neebeadale sigi asi. Anasa eda Gaiafasaïe esöa nelo. Gäheo i amogida, Gaiafasa eda gobela ïlo busa edefade nelo.
JOH 18:14 Dolö ameada Yu ilima dafidi sähalea, Afädëa udia dolö baagomolö amo bedefala baagomolö dofea gabumelëla säi.
JOH 18:15 Saimono Fidage bëgëla aulo elöge Yesu awäse amo gadola bëgëla hobeala asi. Bëgëla aulo elö amoda gobela ïlo busa edefade amea dawadigi nelo. Ameada, e Yesubalä gobela ïlo busa edefade amoïe yala isogi nogila digai
JOH 18:16 gaso, Fida eda yala idi galo baagido nelo. Amala nebegi, bëgëla aulo elö, gobela ïlo busa edefadea dawadigi amea udia dolïsä idi galo beaha aligilo amoma sälahilä, ea Fida yala isogi sigi digai.
JOH 18:17 Sigi digasebegi, udia dolïsä idi galo beaha aligilo amea Fidama nabahalea, Dige dolö goweïe bëgëla auloledula nabi. Amala nabasebegi, ea säla obëgësalea, Ne mademelëla säi.
JOH 18:18 Gögïsebegi, hamoi hamolasilofulo, idihë aligilofulo amolia nulo gobelahilä, gögï hausa nefolalebea ami, Fida eege ilibalä ami gögï hausa nelo.
JOH 18:19 Amo gala, gobela ïlo busa edefade amea Yesuma ïe bëgëla aulo amolilege, ea ado säla olelei amoïege nabi.
JOH 18:20 Amala nabasebegi, Yesuea säla obëgësalea, Nada udia dolö nefolalebe amoli sulubadelama ulufala säla olelesa nelo. Segeyo sulubadelagi gedolo mosöage, Godeïe mosöage, sege Yu ili gedosia ami olelesaleada, afädë musügä negela made olelesa nelomelë.
JOH 18:21 Edoïe dia nema nabaha. Na mala säla ïase nabelo amolima nabualo. Na säi amo ilia dawadigi neagomelëla säi.
JOH 18:22 Yesuea amala säsebegi, idihë aligilo dolö afädë ga made nelo amea nabalahilä, Yesu e naabo gafea nufudalahilä nabahalea, Dia gobela ïlo busa edefade egowe gadoima egomalä säla obëgëmolöi gabulela nabi.
JOH 18:23 Amala nabasebegi, Yesuea säla obëgësalea, Na nafade säi galëda, gowe asiala säimelëla nefolalebe gowe ilia nabuäia fädäla sämalo. Be, na mogola säi amogi galëda, dia ne edogi nufudahala nabi.
JOH 18:24 Amalebe, Anasaea Yesu e gobela ïlo busa edefade Gaiafasa neebea sigi mosalola säsebegi, Yesu e ëfëa nafodoi amola wäla sigi asi.
JOH 18:25 Saimono Fida e nulo gobeia ami gögï hausa nebegi, ilia ema nabahalea, Dige ïe bëgëla auloledula nabi. Amala nabasebegi, ea säla obëgësalea, Ai. Ne mademelëla säi.
JOH 18:26 Amala säsebegi, gobela ïlo busa edefade amoïe hamoi hamolasilo afädë ami nelo amoda, dafidi Fidaea gëhe dagala sali amoïe sosogo nelo, amea Fidama sähalea, Sagaia ami ebalä neebe na melï amoda di madelela nabi.
JOH 18:27 Amala nabasebegi, Fidaea bu elö sähalea, Ai. Ne mademelëla säi. Amala säia gai amole, haea gagalugo gawalia gäi.
JOH 18:28 Amala hamolahilä, ilia Yesu e Gaiafasa neebea amila Beledoliama mosöa ami sigi asi. Yosefalï sigi asi amoda, Yu dolö ilida Godeïe siigi nigime baai made aligilo amo damumolöi made gabugi, ili mosöa ami nogila digala made, segea nelo. Mida, ilia Baagila Asi Segeyo amoïe molö molöïe amai.
JOH 18:29 Ili segea ami nebegi, Bailadi e segea fedalahilä ilima nabahalea, Dolö goweada edo nafade hamosebegi gudimolöïe sigi misila nabi.
JOH 18:30 Amala nabasebegi, ilia ema säla obëgësalea, Ea nafade made hamoi galebeda, nilïa e sigi made maalabiomelëla säi.
JOH 18:31 Amalebe, Bailadia säla obëgësalea, Dihilile mala dibe amo gadola gudimolöïe, dihili e sigi obëgëmalola säi. Amala säsebegi ilia ema sähalea, Nilïa gudilahiläda, dolö afädë nufulöi mademelëla säla negei dialeamelëla säi.
JOH 18:32 Amala säi amoda, dafidi Yesuea sähalea, Nema gomalä hamosegi baagomolö gabula ulufala olei amo gadola gausiala digamäiaïe säi.
JOH 18:33 Amala säsebegi, Bailadi e Beledoliama mosö isogi bu nogila digala, Yesu welahilä ema nabahalea, Dida Yu ilile ginilela nabi.
JOH 18:34 Amala nabasebegi, Yesuea ema säla obëgësalea, Dia dihï asigia helësëla nabahale, ma, odoaea nïeïe säi nabala nabahalela nabi.
JOH 18:35 Amala nabasebegi, Bailadia säla obëgësalea, Neda Yu dolö gabule. Dihïle fiifalï amoliage, gobela ïlo busa amoliage di nïe naabogi gausi amoda, dia edo hamoi amea amahala nabi.
JOH 18:36 Amala nabasebegi, Yesuea säla obëgësalea, Na beaha maadela sigi neebe amoda nagadaiaïe mademelë. Be, nagadaiaïe galebeda, Yu dolö ilia ne gauloea, nïe hamoi hamolo amolia nudulabiogoda. Na beaha maadela sigi neebe amoda, hä, nagadaiaïe mademelëla säi.
JOH 18:37 Amala säsebegi, Bailadia ema sähalea, Hä, di dofä beaha aligilo gini madelela säi. Amala säsebegi, Yesuea säla obëgësalea, Dihï ne beaha aligilo gini neala säsebegomelë. Ado dofä amo säla ïaha maademäia nagadaiawi digasebegi, ne nemea neegela ägüi amo neawe. Udia dolö dofä sälo sosogo nefolalebe amoli sulubadelaeada, nïe ado nabelo neamelëla säi.
JOH 18:38 Amala säsebegi, Bailadia ema nabahalea, Ado dofä amoda edodula nabi. Bailadia ado säha maadela, segea bu doadigila fedala Yu dolö amoli neebea awälahilä, ilima sähalea, Ema nafade afädë made beagoleimelë.
JOH 18:39 Amai gaso, na dilile mala dibe amo gadola, Baagila Asi Segeyo besela galaseda, galabaia dolö afädë dihilima fisigälo. Amo gadola, na walio Yu udia dolöïe beaha aligilo gini gowe dihilima fisigädulela nabi.
JOH 18:40 Amala nabasebegi, ilia gelola uuala säla didigahalea, E mademelë. Balabasa fisigämalola säi. Balabasa eada fa neaha aligilo nelo.
JOH 19:1 Amala säi amo nabalahilä, Bailadia Yesu sigi awäla e fëgämaloi. Fëgälahilä,
JOH 19:2 ami dolö amolia ëfë äyo gägäi gadoia gini busa gadoi nasigïla amalela ïe busagia salugasilahilä, fagulo bëi didiga salugalo afädëge salugasi.
JOH 19:3 Salugasi nebegi, ili e mia ga madela mafulahilä sähalea, Yu udia dolöïe beaha aligilo gini-e, di go gabiola sälahilä, naabo gafea fadaha nelo.
JOH 19:4 Bailadi e bu elö doadigila fedalahilä, ilima sähalea, Dolö gowema nafade afädë made beagolei gabula helësëmäia, na dili neebea gui sigi segea doadigila fedahagola säi.
JOH 19:5 Yesu e ëfë äyo gägäi gadoia gini busa gadoi amalela salugasi amola, fagulo bëi didiga salugasi amola wäla fedasebegi, Bailadia ilima sähalea, Dolö amoda gowemelë. Bimola säi.
JOH 19:6 E bealahilä, gobela ïlo busa amoliage, idihë aligilo amoliage, uuala säla didigahalea, Eda i fügäigi baala negemalola säla didigai. Amala säla didigasebegi, Bailadia ilima säla obëgësalea, Dihili e sigi awäla, i fügäigi baala negemolö mosalo. Nada ema nafade afädë made beagoleimelëla säi.
JOH 19:7 Amala säsebegi, Yu ilia ema säla obëgësalea, Nilïa ado afädë säla negei galea. Ea e Godeïe malöla sälo ameada, ado säla negei dibe amo bëgëla, e nufulö dialeala säi.
JOH 19:8 Ado amo nabala Bailadi e edefademalä bedälahilä,
JOH 19:9 Beledoliama mosö amoïe mumusogi bu nogila digalahilä, Yesuma nabahalea, Dida abidi fii dolöla nabi. Amala nabasebegi, Yesuea ema made säla obëgëi.
JOH 19:10 Made säla obëgësebegi, Bailadia ema sähalea, Dia made säla obëgësale. Di fisigämola sämolöïe geloige, i fügäigi baala negemola sämolöïe geloige na gaulube amo, dia made helësësalela nabi.
JOH 19:11 Amala nabasebegi, Yesuea ema säla obëgësalea, Gode ilibia neebe amea dia nema hamomäia geloi made ï galebeda, dia nema hamomolö amo, hamomolöi made bealabio. Be, dolö dïe naabogi gausilo amea nafade hamoi amoda dia hamoi amo baagila, nafade edefademalä hamoimelëla säi.
JOH 19:12 Bailadia amala säi amo nabalahilä, Yesu fisigämolöïe idi hogoi. Gasoda, Yu ilia uuala didigala sähalea, Dia dolö go fisigäla fisiga gaseda, dida Sisaïe damelë mademelë. Dolö afädëa hï e ginila säsebe amoda Sisabalä ado niimelëla säla didigai.
JOH 19:13 Amala säi amo nabala, Bailadia Yesu sigi segea doadigila fedalahilä, sege ëi Igi Bealë Baledei difolalebea ami gudi mogesalea filo amodaia sulo. Sege amoïe ëi Hibulu adoeada, Gabadala sälo.
JOH 19:14 Baagila Asi Segeyo amoïe helësëla molö daialo segeyo amo gala eso mogosebegi, Bailadia Yu udia dolö ilima sähalea, Dilile beaha aligilo gini amoda gowemelë. Bimola säi.
JOH 19:15 Amalebe, ilia uuala didigahalea, Nufualo! Nufualo! Eda i fügäigi baala negemalola uuala säla didigai. Amalebe, Bailadia ilima nabahalea, Diliada na dilile ginigo i fügäigi baala negemäialela nabi. Amala nabasebegi, gobela ïlo busa amolia säla obëgësalea, Nilïle gini elöda maade. Sisa afädëmu neamelëla säi.
JOH 19:16 Amala säsebegi, Bailadia Yesu e i fügäigi baala negemäia, hilile naabogi gausi. Amalebe, ami dolö amolia Yesu e sigi asi.
JOH 19:17 Ea hïle i fügäi amo hï gaulahilä, gaamu amo dïgïla sege ëi Busa Giwi Segela sälo dibea ami asi. Hibulu adoea sege amoda Gologodala sälo.
JOH 19:18 Segea ami ilia e i fügäigi baala negesaleada, dolö äudäge ebalä baala negei. Eda mogogi, elö ïe naabo dafädimadi, elö ïe naabo fefeädimadila baala negei.
JOH 19:19 Bailadia i gäi baledeidaia ado gowe dëdëla negemalosebegi, ilia amodaia dëdësalea, Nasalese fii Yesu, Yu udia dolöïe beaha aligilo ginila dëdëlahilä, i fügäi amoïe bidigi baasi.
JOH 19:20 Yesu e gaamu ga madela baala negei ameada, Hibulu adoeage, Olomo adoeage, Giligi adoeage säla dëdëla negei dibe amo, Yu udia dolö yafiea nidesamu nelo.
JOH 19:21 Amala dëdëla negei dibe amo bealahilä, Yu ilile gobela ïlo busa amolia Bailadima sähalea, Dia Yu ilile beaha aligilo ginila sälada dëdëmabu. Ea hïmu sähalea, Neda Yu udia dolöïe beaha aligilo gini neamelëla sälola säla dëdëmola säi.
JOH 19:22 Amala säsebegi, Bailadia säla obëgësalea, Na dëdëla negei gomu diamiäia. Gameläla säi.
JOH 19:23 Ami dolö amolia Yesu hä, i fügäigi baala negesilahilä, ïe fagulo gii amo biyidiala mogei. Mogelahilä, ilia afädë afädëla nea gagai. Nea gagalahilä, ïe fagulo elö daia salugalo sedade gii amomu dilo. Fagulo amo asogemolöi made, didigala afädëfalï asi gabugi,
JOH 19:24 ami dolö amolia hilidomu sähalea, Fagulo go made gadelala, nowëa neasebelela melëdelä sadu hamodila säi. Ado säla negei amea sähalea, Ilia nïe fagulo mogelahilä, nïe daia salugalo gii amoïe sadu hamoimelëla säla dëdëla negei dibe amo gausiala digamäiaïe, amala hamoi.
JOH 19:25 Yesuïe emege, emeïe esamage, Golobasaïe udia Melige, amase, gaamu Magadala udia Melige, ili Yesu i fügäigi baala negei amo ga madela ami nefolalo.
JOH 19:26 Yesuea, ïe emele, ïe bëgëla aulo amoligi ea boba hamolo amole ga madefalï neebe amo bealahilä, emema sähalea, Neme-e, dïe malöda egowemelëla säi.
JOH 19:27 Amase, bëgëla aulo amomage sähalea, Dïe diemeda egowemelëla säi. Amalebe, bëgëla aulo amea amo gala säia amila e sigi awäla ea mosöa sigi nelo.
JOH 19:28 Hobeala, Yesuea hamoi hahamola misi amo hä, walio hamosa maadei gabula helësëlahilä, Ne ödä molö gabula säi. Ado säla negei dibe amo gadola gausiala digamäiaïe amala säi.
JOH 19:29 Amala säsebegi, ödä i afädëgi wani ödä gamogai usi ami dilo amogi, ilia dahudu gadoi i afädëïe ëi hisoboïe adomogi yaala, wani ödä gamogai amogi gelahilä, Yesuïe nafia diisi.
JOH 19:30 Amala hamosebegi, Yesuea wani ödä amo nalahilä sähalea, Hä, hamosa maadei amola säla, ïe busa fuäia idogola ïe namolö amo fisila, hame hä, mosaloi.
JOH 19:31 Sabada segeyo edefade amoïe molö daialo segeyo gabugi, ilia Sabada segeyo amogi domalo i fügäidaia ami made diamiäiala helësëla, Yu ilia Bailadima sähalea, Ilile emo giwi dagabolahilä, domalo neala gaula mosäia, dia emo giwi dagabomalola sämäia helësëi dialeamelëla säi.
JOH 19:32 Amala säsebegi, ami dolö amoli awälahilä, Yesubalä baala negei dilo amogi afädëïe emo giwi dagabolahilä, elö amoïe emo giwige dagaboi.
JOH 19:33 Amalahilä, ilia Yesu dibea maala beahamelebe, eda hä, hame doala asi dibe amo bealahilä, ïe emo giwi made dagabola,
JOH 19:34 afädëa Yesuïe afawa gögë gäwi amole healele ödäle besigai.
JOH 19:35 Amo hamose melëlo dolö amea, nelebo ea melï amo säla ulufai. Ea säla ulufai amoda dofämelë. Amase, säla ulufasebe amoda dofäla hï dawadigi. Ameada, diliage asigi afädë negemäiaïe, ea säla ulufasebemelë.
JOH 19:36 Godeïe ado säla negesalea, ïe giwi afädë made dagabomolömelëla säla negei amo gadola gausiala digamäiaïe amala hamoi.
JOH 19:37 Amase, ado elö säla negei dibe amoda gowe. Dolö gögë gäwi amoda ilia bimolömelëla säla negei amo gausiala digamäiaïe amai.
JOH 19:38 Amalahilä, hobeala Alimadia fii Yosebea Bailadima Yesuïe domalo amo nedulela nabi. Yosebe eda Yesuïe bëgëla aulo nelo gaso, Yu ilibalä bedähalea, ïe asigi afädë negei amo musügä negela nelo. Bailadia, ä, nimalola säsebegi, ea awäla Yesuïe domalo amo nii.
JOH 19:39 Nigudimusi e, dafidi Yesu neebea gasigi aulo amoge, ebalä asi. Nigudimusia i afädëïe heale muwege, i ëi elö aloïe healele gegoai dilo amea, Yesuïe domalobalä negemolöïe gaula asi. I heale gegoai dilo amoïe yöi dofeda, gilo nabülasi ohodoa gadoi dilo.
JOH 19:40 Elea Yesuïe domalo amo nealahilä, Yu dolöea bausalea hamolo amo gadola, i heale gegoai dilo amola Yesuïe domalobalä baagoi usililo fagulo hedabia balagula usili.
JOH 19:41 Ilia Yesu i fügäigi baala negesi diloa amida, sagai afädë dilo. Sagaia amida baumolöïe igi äbä afädë doalahilä, dolö afädë made baui, gähe dilo.
JOH 19:42 Elea Yu ilile Sabada segeyoïe daialo segeyo gabula helësëlahilä, baumolö äbä duwi ga made dilo ameada, elea Yesuïe domalo amogi bausi.
JOH 20:1 Salele mi gäwi segeyogi, sege yomolö gaalu, Magadala udia Meli e bauia ami awälahilä beahamelebe, äbä igia idi gai amo doga negei dibe melï.
JOH 20:2 Amo beala, e baluluia awälahilä, Saimono Fidale bëgëla aulo elö Yesu hï boba hamolo amole neebea besela galala, elema sähalea, Ilia Dafidilo Geloi bauia amila gaula asi gabio. Ilia abidi gaula awäla negeidu, nilïa dawa madela säi.
JOH 20:3 Amo nabalahilä, Fidale bëgëla aulo elöle amila doadigila bauia ami moholö asi.
JOH 20:4 Helegela gaalu baluluia asi gaso, bëgëla aulo elö amea Fida dïgïla, edale bauia ami awäla besela galai.
JOH 20:5 Besela galalahilä, nogila digala made, dosogägïla fia idogola salea, aga beahamelebe, fagulo hedabi amomu isogi ami dibe melï.
JOH 20:6 Saimono Fida hobeala maala, baui isogi nogila digalahilä beahamelebe, fagulo hedabi amoge,
JOH 20:7 fagulo Yesuïe busa neegisila bausi amoge, gedola negela made, fagulo busa neegisi amo hïdo galila negei dibe melï.
JOH 20:8 Amalebe, bëgëla aulo elö bauia dafidi besela galalo amoge, oböla hobeala baui isogi nogila digalahilä, amala hamoi dibe amo beala, e asigi afädë negei.
JOH 20:9 Yesu bauiala nowemolö dialeamelëla, ado säla negei dilo amoda, amo gala ilia hedabola helësëi made nelo.
JOH 20:10 Amo bealahilä, hele mosöa obëgëi.
JOH 20:11 Segea baui baagido nea, Melia dïisa nelo. Dïisa nea wäla, dosogägïla fia idogolahilä, baui isogi beahamelebe,
JOH 20:12 selesaia fii fagulo falei salugai äudä, Yesuïe domalo baui diloa ami, elöda busa diloamadi, elöda emo diloamadila sebe melï.
JOH 20:13 Elea Melima nabahalea, Udia-o, dia goda edogi dïisa neala nabi. Amalebe, ea elema säla obëgësalea, Ilia nïe Dafidilo Geloi gaula awäla, abododi negeidula dawa made amea dïisamelëla säi.
JOH 20:14 Amala sälahilä, e besuia imogola beahamelebe, Yesu neebe melï. Ea melï gasoda, Yesu gabula made helësëi.
JOH 20:15 Amasebegi, Yesuea ema nabahalea, Udia-o, dia goda edogi dïisa nea. Dia nowë hogosala nabi. Melia dolö amoda sagai beaha aligilo amo gabula helësëlahilä, ema sähalea, Dolö edefade-e, dia e gaula asi galëda, nihï nea äudulä, guwi gaula awäla negei dialeala sämola säi.
JOH 20:16 Amala säsebegi, Yesuea ema, Meli-ela säi. Amala säi amo nabalahilä, ea besuia imogolahilä, Hibulu adoea ema Elabonai-ela säi. Nilïle ado sälada Säla Olelelo-o.
JOH 20:17 Amalebe, Yesuea ema sähalea, Naado neebea gadogo aso, fedaia madeda, dia nema diigimabu. Dia nedoolali neebea awälahilä, gomalä sämalo. Neda aso, nïe Naadoge dilile Eedoge, amase, nïe Godege dilile Godege neebea fedamolö neebeola sämalola säi.
JOH 20:18 Amala säsebegi, Magadala udia Meli e awälahilä, bëgëla aulo amolima sähalea, Na Dafidilo Geloi e melïmelëla sälahilä, ema säla ï amo ilima säla ïaha maadei.
JOH 20:19 Segeyo amo galamu, salele mi gäwi segeyogi, eso digase gaalu, ïe bëgëla aulo amoli Yu ilibalä bedähalea, ili sefolalo mosö amo idi fëdöla galahilä sefolalo. Amala sefolalebegi, Yesu ili sebe mogogi ami maala nea, ilima sähalea, Dalulo dilibalä namiäiala säi.
JOH 20:20 Amala sälahilä, naaboge afoge ilima olei. Ilia hä, Dafidilo Geloi bealahilä, edefademalä obeägï.
JOH 20:21 Yesuea ilima bu elö sähalea, Dalulo dilibalä namiäia. Naadoea ne fisiga wei amo gadola, nage dili fisiga gahagomelëla säi.
JOH 20:22 Amala sälahilä, ea ilimadi hame hëia fedala nafi fo diigilahilä sähalea, Eleloi Gesami nimo.
JOH 20:23 Odoaea nafade hamoi amo dilia hëla fisiseda, hëla fisimelë. Be, odoaea nafade hamoi amo dilia made hëla fisiseda, nafade amolida diamolömelëla säi.
JOH 20:24 Yesu besela galasolo amo galada, ili giwilasi amoligi Domasa, ïe ëi elö Didimusila sälo amo, sebegi made besela galai.
JOH 20:25 Hobeala, bëgëla aulo odoa amolia ema sähalea, Nilïa Dafidilo Geloi melïmelëla säla ï. Amala säla ïasebegi, Domasaea ilima sähalea, Ïe naabogi milï gäwi amo made bealage, nïe naabo sögöea ïe milï gäwi bu amogi made digalage, amase, ïe afawa gäwi bu amogi nïe naaboea made digalage, nada dofä gabula made helësëmolömelëla säi.
JOH 20:26 Amala säi salele afädë baagilahilä, ïe bëgëla aulo amoli bu mosöa gegedola sefolalo. Amo gala Domasage hiligila sulo. Idi sulubadela fëdöla gai gaso, Yesu e ili mogogi ami maala nea, ilima sähalea, Dalulo dilibalä namiäiala säi.
JOH 20:27 Amala sälahilä, ea Domasama sähalea, Nïe naabogi dïe naabo sögöea digala bimo. Amalahilä, dïe naabo mogodigila nïe afawa digala bimo. Hä, bealahilä, asigi äudä negela made, afädëfalï negemalola säi.
JOH 20:28 Amala säsebegi, Domasaea ema säla obëgësalea, Nïe Dafidilo Geloi, nïe Godela säi.
JOH 20:29 Amala säsebegi, Yesuea ema sähalea, Dia ne beala asigi afädë negesale. Ne made beala asigi afädë negese amoliada, edefademalä obeägïsa neamelëla säi.
JOH 20:30 Yesu e bëgëla aulo amolibalä nelo amo gaalu, ilile siigi dolöea hamomolöi made gadoi odoa yafie hamoi dibede amoda, beba gowegi hulu made dëdëla negei.
JOH 20:31 Gaso, beba gowegi dëdësebeweda, Afädë Memelei amoge, Godeïe malö amoge Yesu gabula helësëla, ema asigi afädë negemäiage, amase, dilia ema asigi afädë negesa nea, ïe ëigi namolöi namolö gaula namiäiage, dëdëla negesawe.
JOH 21:1 Hobeala, bëgëla aulo amoli Dabeliasa oeaba ami nebegi, Yesu e bu elö ilima ulufadigila besela galai amoda gomalä hamoi.
JOH 21:2 Saimono Fidage, Domasa ïe ëi elö Didimusige, Galili segeïe gaamu Gaina ami fii Nadanalege, Sebediïe malö äudä amolege, ïe bëgëla aulo äudä elölege, ili ami gedola nefolalo.
JOH 21:3 Ami nefolalea, Saimono Fidaea ilima sähalea, Neda seme digila awähadiola säsebegi, ilia nilïge hä, dibalä maahagola säi. Amala sälahilä, ili duugi fifigila awäla, gasigi seme digisa nea, seme isoïe afädëge made neala nelo.
JOH 21:4 Sege yose amo gaalu, Yesu bosea ami maala nelo gaso, ïe bëgëla aulo amolia e Yesu neala made helësëi nelo.
JOH 21:5 Amala nebegi, Yesuea ilima nabahalea, Malïsä-o, dilia seme afädë made niilela nabi. Amala nabasebegi, ilia säla obëgësalea, Ä, made niimelëla säi.
JOH 21:6 Amalebe, ea ilima sähalea, Selëgëgo dilile du dafädimadi digiseda, seme odoa digamolömelëla säi. Amalebe, ilia selëgë amala digilibe, seme yafie digai amea, selëgë dusugamolö ulï.
JOH 21:7 Amala hamosebe amo bealahilä, bëgëla aulo afädë Yesu hï boba hamolo amea, Saimono Fidama sähalea, Goweda Dafidilo Geloi gabula säi. Dafidilo Geloi gabula säi amo nabalahilä, Fidaea fagulo daia salugalo dafidi giila negei dilo amo salugalahilä, ödägi nila digai.
JOH 21:8 Amase, bëgëla aulo odoa amoliada dudaia nea, selëgëgi seme digaide amo dusugala gaula agesua moholö asi. Ili neloa amila ödä agesuada, mia made made, mida hädali afädë gadoi dilo.
JOH 21:9 Ili agesua aliga alogola beahamelebe, nulo gobei elëlëgi amodaia seme gobei afädë, beledige dibe melï.
JOH 21:10 Yesuea ilima sähalea, Dilia walio seme nii gogi odoa gaula misiëla säi.
JOH 21:11 Amala säsebegi, Saimono Fida e awäla dudaia nea, seme selëgë amo agesua dusugala gaula misi. Seme bobogamu selëgëgi digai amo gedolada hädali afädëïe nabülasi biaïe odoai ohodoa (153). Seme malei digai amea, selëgë nulimolöi gaso, made nuli.
JOH 21:12 Yesuea ilima sähalea, Dili hä, molö naa mofiamola säi. Amalebe, bëgëla aulo amoli bedähalea, iligi afädëa di nowëla made nabi. Iliada Dafidilo Geloi gabulamu helësëi.
JOH 21:13 Yesu e maala nea, beledi gobei amo neala iligali sogolahilä, seme gobei amoge, amo gadola wäla hamoi.
JOH 21:14 Yesu e bauiala nowela awäla nea, bëgëla aulo amoli neebea bu osoda ulufala besela galaida amo.
JOH 21:15 Ili molö naha maadelahilä, Yesuea Saimono Fidama nabahalea, Yoneïe malö Saimono-o, odoa gowe ilia ne boba hamose amo gadola made, dia baagila awäla, ne dofä gelola boba hamosalela nabi. Amala nabasebegi, Fidaea ema säla obëgësalea, Ü, Dafidilo Geloi, na di boba hamose amoda, dia dawamelëla säi. Amala säsebegi, Yesuea ema sähalea, Nïe sugua sibi malö amoli molö ïaha namialola säi.
JOH 21:16 Yesuea ema bu agedu nabahalea, Yoneïe malö Saimono-o, dia ne dofä gelola boba hamosalela nabi. Amala nabasebegi, Fidaea ema sähalea, Ü, Dafidilo Geloi, na di boba hamose amoda, dia dawamelëla säi. Amala säsebegi, Yesuea ema säla obëgësalea, Nïe sugua sibi amoli sigi namialola säi.
JOH 21:17 Yesuea aso, bu osoda ema nabahalea, Yoneïe malö Saimono-o, dia ne boba hamosalela nabi. Yesuea bu ohodoala dia ne boba hamosalela nabi amogi, Fida e asigia yöia idogolahilä, Yesuma sähalea, Dafidilo Geloi, nelebo sulubadela dia dawadigisa maadei neebe amo, na di boba hamose amoda, dia dawamelëla säi. Amala säsebegi, Yesuea ema sähalea, Nïe sugua sibi amoli molö ïaha namialo.
JOH 21:18 Na dima dofä gelola sähago. Di malïsä nelo amogida, dïe malibu negelahilä, dihï moholö helësëse amo gadola nawesa aligilomelë. Gaso, di momaeala fia idogose amo gaaluda, dïe naabo mogodigia gasegi, dolö odoaea di malibu negesilahilä, dia moholö helësëi madeido amogi sigi moholömelëla säi.
JOH 21:19 Yesuea ado amala säi amoda, Fida e abeahämola hamola baagola, Godeïe ëi ilibia amo gauia adamolö amoïe helësëla amala säi. Amala sälahilä, Yesuea Fidama sähalea, Di ne bëgëla misiëla säi.
JOH 21:20 Fidaea besula beahamelebe, bëgëla aulo Yesu hï boba hamolo amo, ele bëgëla maaha neebe melï. Dolö amoda dafidi ili molö naha sefolalo amo gala, Yesuïe bidagia golögïa alogola nabahalea, Dafidilo Geloi-e, nowëa di hololömolö gabula sälo amo maaha neebe melï.
JOH 21:21 Beahamelebe e gabugi, Fidaea Yesuma nabahalea, Dafidilo Geloi, dolö gowedala nabi.
JOH 21:22 Amala nabasebegi, Yesuea ema säla obëgësalea, Ne obëgësalea e namolöi namiäiala hameseda, amoda dïele. Dida ne bëgëla misiëla säi.
JOH 21:23 Amalebe, odoa ilia sähalea, Bëgëla aulo go made baagomolöla säimelëla edoolalima säla daidoi. Gaso, Yesueada e made baagomolömelëlada made säi. Ea sähaleada, Ne obëgësalea e namolöi namiäiala hameseda, amoda dïelela amomu amala säi.
JOH 21:24 Bëgëla aulo amea nelebo ea melï amo hï säla ulufadigisa nea, amala hamoi amo hï bebagi dëdëla negei amoda amomelë. Nilïa ea säla ulufadigi amoda dofä gabula helësësamelë.
JOH 21:25 Yesuea hamoi elö elöla yafie hamoimelë. Hamoi amo hïdo hïdola hulu sulubadela dëdëla negesa maadei galebeda, sege dibe sulubadelagi beba yafie hamoi amo negemolö fu made bealabiola helësësamelë. Hä amo.
ACT 1:1 Diofilasa-o, dafidi na bebagi dëdëla negesaleada, Yesuea hamoi amoge, olelei amoge dafidi mi gäwia amila e selesaia mosöa fedala asi segeyo amoge dëdëla negesa maadeimelë. Fedala made nea, ea Eleloi Gesamiïe geloia abosolo dolö namiäia memelei amolima gomalä hamomalo, gomalä sämalola säla ïaha maadei.
ACT 1:3 Yesu së naala baagolahilä, bu nowela abosolo dolö amolia e dofä nowei gabula helësëmäia e ulufadigila segeyo nabülasi biyidia ilibalä nea, Godea Beaha Maadela Sigi Neebe amoïe ilima säla ïaha nelo.
ACT 1:4 E, aso, ilibalä nea ea ilima sähalea, Dilia Yalusaleme dïgïla mosabio. Naadoea ïmolömelëla säla negeila na dafidi dilima säla ï amo ïmäia, gui beaha namialo.
ACT 1:5 Yoneada ödäea gesa nelomelë. Segeyo ede made nelolahilä, dili Eleloi Gesamia gemolömelëla säi.
ACT 1:6 Amo gala, ili gegedolahilä ema nabahalea, Dafidilo, Isilale udia dolö nilïa nihïlï beaha namolö, nihïlïma ïa obëgëmolö walio gogilela nabi.
ACT 1:7 Amala nabasebegi, Yesuea ilima säla obëgësalea, Naadoea hï asigia segeyo daiala negei amoïe dawada, dilile made. Segeyo amo daialoda Naado hïdomumelë.
ACT 1:8 Amai gaso, Eleloi Gesami e dili neebea gui maala, ïe geloia dilile isogi nobamolömelë. Amala hamoseda, nïe Ado Mala Hedabi gaula Yalusalemege, Yudiamadige, Sameliamadige, sege föi sulubadelagige olelesa nawesa namolömelëla säi.
ACT 1:9 Ea ado amo säha maadelahilä, ilia ami beaha nebegi, e neala gauia adala selesaia mosöa fedai amo baidilia hagui amea, bu elö bimolöi made melï.
ACT 1:10 E fedala awäse amo gaalu, ilia muugi sisila nebegimu, dolö fagulo falei salugai äudä fodolofalï maala ilibalä neebe melï.
ACT 1:11 Amolea ilima nabahalea, Galili dolöla dili-e, mi edoïe muugi sisilamu dialeala nabi. Amala nabalahilä elea sähalea, Yesu goda walio dili dïgïla, e neala gauia adogola selesaia mosöa fedasebe amoda obëgëmolö. E selesaia mosöa awäsebe dilia melï amo gadoi wäla obëgëmolömelëla säi.
ACT 1:12 Amala säsebegi, ili segebi ëi Olibebidaia amila Yalusaleme obëgëi. Segebia amila Yalusaleme ga madefalï, Yu udia dolöea segeyo Sabada gafegi nawelo amo gadoi.
ACT 1:13 Ili Yalusaleme besela galalahilä, mosö iso daia hogoli hili fisia ami fedala nogila digai. Amolida Fidage, Yonege, Yamesege, Äduluge, Filibige, Domasage, Badolomiuge, Madiasige, Alibiasaïe malö Yamesege, Selodo sosogo Saimonoge, Yameseïe malö Yudasage.
ACT 1:14 Dolö amolia Godema adomolö ili gegedosamu aligilo. Udia odoage, Yesuïe eme Melige, ïe edoolalige ilibalä amala gegedolo.
ACT 1:15 Amo gala asigi afädë negei sulubadela gegedolada hädali afädëïe nabülasi äudä gadoi sefolalebegi, Fidaea nowela nea sähalea,
ACT 1:16 Nedoola dili-e, Godeïe ado siiba säla dëdëla negei amo dofä gausiala digamolömelë. Yudasaea dolö nefolalo amolia Yesu gaumäia idi olei amoïe Eleloi Gesamia Debidima aligilahilä bea säla negei amo gadola dofä gausiala digaimelë.
ACT 1:17 Yudasada nilï sosogo nelo. Nihïlïgïla hamoi gegedola hamomolöïe e memeleimelëla säi.
ACT 1:18 (Yudasa hï nafade hamola muni nii amea sege afädë nofela nii. Amala hamola sege niia ami baagola digala bole dusula gahidado besela galai.
ACT 1:19 Amo hamoi amo hobeala Yalusaleme nefolalo amolia nabaha maadei. Amalebe sege amoïe ëi ilile ado sälada Ageledama negei. Nilïle ado sälada heale sege.)
ACT 1:20 Fidaea sähalea, Gë Udälo bebagi ado afädë säla negei amo gowe. Ïe mosö nalämäia. Mosö amogi afädë made midiäiala säla dëdëla negei dialea. Amase, ado elö säla negei dibe amo gowe. Hamoi ea hamolo negei amo elöea hamola bedefamäiala säla dëdëla negei dialea.
ACT 1:21 Amai gabugida nilïa dolö elö gowe gadoi memeledelä. Amoda Dafidilo Geloi Yesu afu mafusa nelo amo gala nilïbalä nawelo.
ACT 1:22 Yonea ödägi gese melëlo, Yesu neala gauia adala fedai melëlo nilïbalä nawelo. Amea nilïa e dofä baagola noweila dawadigi amo nilïbalä sämolöïe memeledelä.
ACT 1:23 Amala säsebegi, ilia dolö äudä ëi säla negei. Dolö elö amoïe ëida Yosebe, odoaea ïe ëi Basabasala sälo, odoaea Yasadusila sälo nelo amo. Amase, elö amoïe ëi Madiasile säla negei.
ACT 1:24 Amala sälahilä, ilia Godema adosalea, Dafidilo Geloi, dia sulubadelaïe iso beaha maadei. Dolö äudä memelei amolegi afädëa Yudasaea abosolo hamoi idiadolasia amila bedefamäia dia afädë memelei amo olemalo. Yudasa eda hï segea awähalea abosolo hamoi dïgïla asi gabiola säi.
ACT 1:26 Amala Godema adolahilä, elele ëi dëdëla salalahilä fofogolebe Madiasiïe ëidale besela galasebegi, abosolo gïdälasi amolibalä giwi e baala namiäia memelela ifosi.
ACT 2:1 Yu udia dolöïe molö nülo segeyo ëi Bëdigosi besela galasebegi, ili sulubadela mosö afädëgi gegedola sefolalo.
ACT 2:2 Amala gegedola sefolalebegi, fo geloiïe goba gadoi aabela guula maalahilä, mosö ili fifigi sebea ami digala nobai.
ACT 2:3 Amala digala nobalahilä, nulo söale elïle gadoi moge mogela ili sulubadela hïdo hïdolama aliligisebe melï.
ACT 2:4 Amalahilä Eleloi Gesamia udia dolö amoli sulubadelama nobalahilä, ilia fii odoaïe ado säla besela gagalamäia Eleloi Gesamia sälasisi.
ACT 2:5 Yalusaleme ami Yu udia dolö Godeïe mala nabelo sege föi sulubadelagi nefolalo amoli bobala asi ami sulo.
ACT 2:6 Udia dolö amolia goba amo nabalahilä, ili sulubadela gegedoi. Gegedoi amolia hïdo hïdolaea nabelebe, ilile ado sälo amo gadola säsebe amo nabalahilä, ili sulubadela fudugi.
ACT 2:7 Amo nabala, ili edefademalä fudugilahilä sähalea, Wae! Nilïle ado säla säha dibego ilida Galili dolö madefa.
ACT 2:8 Ilia nilïle ado elö elöi amo säsebe nihïlï nabasebeweda, abeahäladu.
ACT 2:9 Nilï Badialage, Midialage, Elamalage, nilï Mesobodemia dolöge, Yudialage, Gabadosialage, Bödasalage, Esialage,
ACT 2:10 Filigialage, Bäfilialage, Isibilage, Libiaïe sege Sailinimadilage, Olomola söfë misi amolige,
ACT 2:11 Yu udia dolöge, udia dolö odoaea Yuïe mala gaula mogolo amolige, Gilidilage, Alebialage, nilï sulubadela nefolalebewema, ilia nihïlïle ado adola, Godea hamoi edefade hamoi amoïe säla ïasebegola säi.
ACT 2:12 Ili fudugila asigi säosäolahilä sähalea, Goda edodula säla didigai.
ACT 2:13 Odoa nefolalo amolia gadiabola sähalea, Wani ödä gähe hamola negei amo edefadela naala gagaosebegola säi.
ACT 2:14 Amala säi amo nabalahilä, Fida e abosolo gïdälasi amolibalä nowela nea ea ilima ado gelolafalï sähalea, Yu dolö dilimage Yalusaleme nefolalebe dilimage, amo hamoi amo säla ïdulä. Nïe ado hedabola nabualo.
ACT 2:15 Dilia dolö gowe ili gagaosebela helësëi amoda amai mademelë. Segeyo walioda, aso, yosemelë.
ACT 2:16 Go hamose goda dafidi bea sälo Yoalea säla negei amo gausiahamelë. Eada gomalä säla negei.
ACT 2:17 Godea sähalea, Segeyo aligila wagamolö ga madese gaaluda, na nïe Gesami udia dolö sulubadelama söga salimolömelë. Dilile didiwi diefegelalia nïe mala olelesa namolömelë. Amase, dilile malö malïsä amoliage sosoäla awäla elö elöla bimolömelë. Amase, dolö asigi fädäi dafidi neebe amolia simasimolömelë.
ACT 2:18 Segeyo amogimu nïe hamoi hamolasilo udia dolö amolimage na nïe Gesami söga salimolömelë. Ilia nïe mala olelesa namolömelë.
ACT 2:19 Na muugi adogo hïdo elöi hamolasila naga föidaiage dolöea hamomolöi made gadoi hamolasimolömelë. Healege nulo söage höba buguge hamomolömelë.
ACT 2:20 Amase, Dafidilo Geloiïe Segeyo Edefademalä besela galamolö amo, aso, made besela galala neëgi, esoge usila aubege bëlahilä heale uii besela galamolömelë.
ACT 2:21 Amala hamosegi, Dafidilo Geloia ili ugila negemäia, ïe ëi säla welo nefolalebe amoli sulubadelada, ea ili damula moholömelëla Godea säila Yoalea säla negei amo Fidaea säi.
ACT 2:22 Fidaea sähalea, Isilale dolöla dili-e, ado sähago. Nabualo. Nasalese fii Yesuea geloi melëlo made gadoi hamolage, hïdo elöi hamolage, dolöea hamomolöi made gadoi hamolage, Godea Yesuma aligila dilibalä nea amala hamoi. Amala hamoi ameada e Godea odala ïala hamoi amo hamomolö misi amo olei. Amoda dilia dawadigi nebego.
ACT 2:23 Dolö amoda gaula ïmolömelëla Godea dafidi daiala negei amo gadola hamomäia fisigisi. Dilia e baagomäia dolö nafade hamolo nefolalo amolia e i fügäigi baala negemäia hamolasi.
ACT 2:24 Baagoia e nafodomolö ulï amea Godea baago amoïe sëa e fisigisimäia e nowela ifosi.
ACT 2:25 Debidiage ïe helësëla säi amo gowe. Na beahamelebe Dafidilo Geloi e nebalä ga madefalï namolöi namolö misi neebe melï. Nafadea ne neala fologolasiloea, ne gelolasimolöïe e nïe naabo dafädimadi ga made misi nea.
ACT 2:26 Amalebe nïe isogi edefade obeägïlo nobalahilä na obeägï ado säi. Amase, nïe domalogi hamomolö amo hamomäia na beaha namolö.
ACT 2:27 Dia nïe gesami baagoi uguli mosöa ami dïgïla made moholö. Dïe hamoi hamolasilo dihï memelela odai amo bauia ami made sïgämolömelë.
ACT 2:28 Dia ne namolöïe idi oleimelë. Dia nebalä namolöi nebegoeada ne obeägïlo nobalahilä obeägïsa namolöla Debidia säimelëla säi.
ACT 2:29 Fidaea amala sälahilä sähalea, Nedoola dili-e, nilïle mäu Debidiïe, na dilima fädäla sähago. E baagoige bauige. E baui amo nilï mia wi walio dialea.
ACT 2:30 Dafidi eda bea sälo nebegi, Godea ema ado dofä gelola säla negesalea sähalea, Hobeafalï dïe mäu afädëa beaha aligilo filodaia samialamolömelëla säla negei amo Debidi hï dawadigi nelo.
ACT 2:31 Godea Afädë Memelei amo baagolahilä nowela ifosimolö amoïe Debidia bea sähalea, Ïe gesami uguli mosöa dïgïla made moholö, ïe domalo bauia ami sïgämolö madela bea säla negei.
ACT 2:32 Amaimo, Yesu amoda Godea nowela ifosi. Amo nilïa beaha maadei amo säla ïahamelë.
ACT 2:33 Godea Yesu neala gauia adala fedalasila ïe naabo dafädimadi ifosilahilä, Eleloi Gesami ï. Eedoea Gesami ïmolömelëla dafidi säla negei amo ï. Ea amo walio söga sali amo dilia siia beala gëhea nabi amomelë.
ACT 2:34 Debidi eda selesaia mosöa fedai made gaso, ea säla negesalea sähalea, Dafidilo Geloia nïe Dafidilo Geloima sähalea, Na dïe ado nii nefolalebe amoli di hawala ifosimäia, dida nïe naabo dafädimadi awäla salea, beaha samialola säimelëla säi.
ACT 2:36 Fidaea amala sälahilä sähalea, Isilale udia dolö nefolalebe dili sulubadelaea hedabola helësëmalo. Yesu e dofä dilia i fügäigi baala negei amoda Godea e Dafidilo Geloi namiäiage Afädë Memelei namiäiage ifosi amo hedabola helësëmalola Fidaea säi.
ACT 2:37 Ado säi amo nabalahilä, ilile isogi awäla gäwilebe Fidala abosolo odoa amolima nabahalea, Nedoola dili-e, nilïa abilia hamomolödula nabi.
ACT 2:38 Amala nabelebe Fidaea säla obëgësalea, Dili asigi besula hïdo hïdola Yesu Gelesoïe ëigi ödägi gemalo. Amala hamosegida, dilia nafade hamoi amo hëla digila diligali Eleloi Gesami ïmolömelë.
ACT 2:39 Godea ïmolömelëla säla negei amo gadola dilimage, dilile malö amolimage, udia dolö wagadi made nefolalebe amoli sulubadelamage ïmolömelëla säla negei. Dafidilo Geloi Godea e neebea misiäia wemolö amoli sulubadelama ïmolömelëla säla negeila Fidaea säi.
ACT 2:40 Fidaea ado geloi odoage häila nabulöi hamoi odoage ilima gelola säla ïalahilä sähalea, Udia dolö nafade memelela made sulubadela hamolo walio nefolalebe welia së molö amogi dilila nüloea fisäla awäla asigi besumalola säi.
ACT 2:41 Ea amala säi amo hedabola häila nabi amoli ödägi gei. Segeyo amo gala udia dolö dausini ohodoa baai.
ACT 2:42 Abosolo dolö amolia mala olelei amo bëgëla hamola digi, Geleso sosogo odoabalä dila nea, molö gedola nadigi, Godema adola digi, amo sulubadela ilia gelola hamosamu nelo.
ACT 2:43 Udia dolö sulubadela fudugila bedäi. Godea abosolo dolö amolima aligila hïdo elöi hamolasila, dolöea hamomolöi made gadoi hamola nawei amogi.
ACT 2:44 Amase, asigi afädë negei nefolalo amolige afädëdi nelo. Hïdo hïdolaïe nelegei dilo amoda, ili sulubadelaïe ua gadoi dilo.
ACT 2:45 Segege, nelegeige bidi nealahilä, mogela nelegei made amoligali ïlo.
ACT 2:46 Amase, segeyo sulubadelagi ilida Godeïe mosöamu gegedolahilä, hilile mosöa afufusa neada ilile iso asigi falagasei nea hiligila obeägïla molö gegedola naala,
ACT 2:47 Godeïe ëi gauia adaha neebe amo bealahilä, udia dolö nefolalo amoli sulubadelaea obeägïla melëlo. Segeyo sulubadelagi Dafidilo Geloia odoa asigi afädë negei amolida neala baalasi.
ACT 3:1 Segeyo afädëgi eso digase gaalu, Fida Yonele Godeïe mosöamadi asi. Deadi amo gadola ilia Godema adosa aligilo negei.
ACT 3:2 Amaimo, dolö afädë, ïe emea neegela ägüsolo amo gala emo nafadei amo gadoi neegela ägüi, amo ilia sogobala gaula awäla Godeïe mosö idi nogila digalo Aye Negei dibea ami ifosisa aligilo. Segeyo sulubadelagi ea Godeïe mosöa digasebe amolima muni ïmola sämäia ifosilo.
ACT 3:3 Fida Yonele Godeïe mosöa nogila digasebe amo bealahilä ea elema sähalea, Alia ne muni ïmola säi.
ACT 3:4 Amala sälebegi Fida Yonelea ema siila nea Fidaea sähalea, Alïma bimola säi.
ACT 3:5 Amala sälebegi e ïmolö gabula helësëla ea elema si.
ACT 3:6 Amala sisebegi Fidaea ema sähalea, Muni afädë gaui mademelë. Amai gaso, afädë gaui amo digali ïahago. Nasalese fii Yesu Gelesoïe ëigi säha, di nowela nawemola säi.
ACT 3:7 Amala sälahilä ïe naabo dafädi amo nabelela gauia adalasisebegi, ïe emo fodolofalï neala gelolasi.
ACT 3:8 Nowela nila sadia adodogola asi. Amala awäla elebalä Godeïe mosöa nogila digala, Godeïe ëi gauia adala emo gumu sesegegila nawesa nelo.
ACT 3:9 Udia dolö nefolalo amoli sulubadelaea e Godeïe ëi gauia adala awäse amo bealahilä
ACT 3:10 ilia helësësalea, Godeïe mosöa nogila digalo Aye Negei dibea ami salea muni ïmola säha filo amo gabula helësëi. Ema hamoi amo bealahilä ili hame galalaia fedala fudugi.
ACT 3:11 Dolö amea Fida Yonelema gaula fëdöla nebegi, udia dolö nefolalo amoli fudugilahilä, Godeïe mosö hadai dibea ami baluluia mafui. Hadai amoda Solomonoïe hadaila sälo.
ACT 3:12 Fidaea udia dolö mafui amo bealahilä, ea ilima sähalea, Isilale dolö dili-e, amo hamoi amogi dili fudugilahilä alïma sisila dibegoda edoïe. Amai dilia helësësaleada, alïle geloiage Godeïe mala mogola gaula neebeweage alïa dolö gowe nowela ifosila helësësale.
ACT 3:13 Abalahamage Aisagage Yeigabage, nilïle mäuge ilile Godea ïe hamoi hamolasilo Yesuïe ëi ilibiamäia neala gauia adalasi. Dolö amo dilia dilile beaha aligilo neebea sigi gaula asimelë. Bailadi neebea sigi awäsebegi, Bailadia e fisigäla fisiga gamolö hamosebegi, diliada ema baagi ïala golala melïmelë.
ACT 3:14 Dilia dolö hedabi mogoifalï hïdo elöi amoma baagi ïala golala bealahilä, dolö nufidelo amo fisigämola säla didigai.
ACT 3:15 Udia dolögali Namolö Gaumäia Ïlo amoda baagomäia nufimelë. Amo baagolahilä Godea bauia amila neala nowela ifosi neebe amo alïa siia melïmelë.
ACT 3:16 Yesuïe ëigi asigi afädë negei amea Yesuïe ëia dolö dilia beala dawadigi amoma geloi ï. Yesu hï alïle asigi afädë negei neala nowelasimelë. Asigi afädë negei amea dili sulubadelaïe siigi e wahilasimolöi wahilasimelë.
ACT 3:17 Amai gabugi, nïe nedoola dili-e, dilia Yesuma hamoi amo fädäla helësëla made nea hamoila helësësa. Dilile beaha aligilo amoliage amala hamoila helësësamelë.
ACT 3:18 Amo gadola siibafalï Gode e bea sälo sulubadela nefolalo amolima aligilahilä nea, ea Afädë Memelei amo së molömelëla bea säla negei amo gadola amala gausiala digai.
ACT 3:19 Amala hamoi gabugi asigi besula dilile nafade hamoi amo hëmäia Godemadi namialo.
ACT 3:20 Dilia amala hamoseda, dilile gesami gelolasimolöïe Dafidilo Geloia e neebeala fu ïmolömelë. Amase, Afädë Memelei amo dilile namiäia dafidi odalasi Yesu amo dili neebea fisiga wemolömelë.
ACT 3:21 Siibafalï Godea bea sälo hïle nafolai amolima aligila bea säla negei amo gadola, Godea sulubadela bu elö gähe namolö segeyo daiala negei amo gadola gausiala digamäia Yesu e selesaia mosöa beaha nea.
ACT 3:22 Siiba Mosesea sähalea, Dafidilo Geloi Godea dilile didoomadila aligila afädë bea sälo ne gadoi dilile bea sälo memelela ifosimolömelë. Amala aligiseda, dilia ïe ado nabala bëgëla awäla hamomalo.
ACT 3:23 Ïe ado nabalahilä made hamose dolö amolida Isilale udia dolö amolibalä made namiäia nufudala baagomolömelëla Mosesea säi.
ACT 3:24 Amo gadola bea sälo sulubadelaea, Samuale neloa amila, bea säla negesalea segeyo waliowegi hamosebeweïe bea säla negei.
ACT 3:25 Dilida bea sälo amolile malöge, amase, Godea dilile mäuma asialo made ado elöi säla negei amoïe malöge nebego. Godea Abalahamama sähalea, Dïe mäuma aligila udia dolö fifi asi dibe amoli sulubadela neala obeägïlasimolömelëla säi.
ACT 3:26 Amaimo, Godea Yesu e ïe hamoi hamolasilo namiäia diligalidale fisiga wei. Fisiga wei amoïe mida gowe. Dilia nafade hamosa neebea amila ea sigi gaula obëgëlahilä obeägïlasimäia fisiga weimelëla Fidaea säla wagai.
ACT 4:1 Elea udia dolöma säla ïaha nebegi, gobela ïlo dolö nefolalo amolige, Godeïe mosö idihë aligilo amolile beaha aligilo amoge, Sadiusi nefolalo amolige ele neebea misi.
ACT 4:2 Elea udia dolöma Yesu baagola nowei amea baagoi amoli nowela namolömelëla säla olelesebegi, ili mihaläla misi.
ACT 4:3 Ili maalahilä ilia ele gaula nafodolahilä amo gala gasisebegi, aiyo gudimolölahilä galabaia mosöa negei.
ACT 4:4 Amaimo, elea säla ï amo yafiea nabalahilä asigi afädë negei. Hä dolö asigi afädë negei amoli gedolada dausini bia.
ACT 4:5 Segeyo elö aligisebegi, ilile beaha aligilo amolige, asigi gäwi dafidilo amolige, mala dawadigi amolige ili Yalusaleme gegedoi.
ACT 4:6 Gobela ïlo busa edefade Anasage, Gaiafasage Yonege Alegisädage, gobela ïlo busa edefadeïe sosogo nefolalo amolige sulubadela gegedoi.
ACT 4:7 Ili gegedoi sebea ami ele ifosilahilä elema nabahalea, Alia hamoi amo edo geloia, nowëïe ëigila hamoila nabi.
ACT 4:8 Amala nabasebegi, Fidama Eleloi Gesami nobai nea ea ilima säla obëgësalea, Udia dolöïe beaha aligiloge, asigi gäwi dafidilola dili-e,
ACT 4:9 amai dilia walio alïma mi nabi amoda alïa dolö emo nafadei afädë ugila negei amoïe nabi galëda, amai dilia helësësaleada, dolö emo nafadei amoda abeahäla hedabomolöi gabu.
ACT 4:10 Amai galëda, dili sulubadelaeage, amase, Isilale fii sulubadelaeage, mi fädäla helësëmolö dialea. Nasalese fii Yesu Gelesoïe ëia dolö wagadi nebegowe wahilasimolöi wahilasi amo dihili beasebegomelë. Dilia Yesu Geleso i fügäigi baala negei amo Godea bauia amila nowelasi amoda amo.
ACT 4:11 Igi amoda mosö olelo dilia galone hamomolöi made gabulahilä, memelela fisi amoda, galone geloi dafidilo besela galai dibeda amomelë.
ACT 4:12 Elöea damula moholöi made neamelë. Sege föi sulubadelagi neebe amola nilï damula moholö udia dolögali ëi elö made ïmelëla Fidaea säi.
ACT 4:13 Ilia beahamelebe Fida Yonelea gelolahilä bedäla made säsebe amo beala ele sugulu made hamoi, nelebo afädë oodo bealage made hamoi dolö nelo amo helësëlahilä ili fudugi. Fudugilahilä gaso, ilia helësësalea, ele Yesubalä neë melëlo amo helësëi.
ACT 4:14 Amala helësëlahilä ilia beahamelebe emo nafadei dafidi wahilasi amo elebalä neebe amo bealahilä, elema ado säla obëgëmolöi made melï.
ACT 4:15 Amalebe ilia ele Galïsolö mosöa amila segea oodola doadigila mosalai. Ele asibua hilido didiäla
ACT 4:16 sähalea, Nilïa malö äudä amolema abilia hamomolödu. Elea dolöea hamomolöi made gadoi afädë gelola hamoi amoda udia dolö Yalusaleme nefolalebe amolia dawadigisa maadei. Elea amala made hamoila sämolö ulï gabu.
ACT 4:17 Amaimo, säla daidoloea, nilïa ele nufulöïe sähaleada, elema ëi go säla udia dolö odoama bu säla ïmabiola gelola sädila säi.
ACT 4:18 Amala sälahilä ele welahilä ele maasebegi elema gelola sähalea, Alia Yesuïe ëi säla udia dolö odoama amala olelemabiola säla ï.
ACT 4:19 Amala säsebegi, Fida Yonelea säla obëgësalea, Godeïe siigi, alïa dilia säse go gadola nabala hamomolö amo dofeale ma, Godea säsebe amo gadola nabala hamomolö amo dofeale. Dilia memelemo.
ACT 4:20 Amai gaso, alïa melï amoge nabi amoge sämolö amo, made sämolö ulïmelëla säi.
ACT 4:21 Amala sälahilä ilia elema säi amo gadola bu elö ele nufulöïe ado gelolafalï säla ïalahilä ele nufulö fu made beasebegi fisigäla fisiga gai. Fisigäi amoïe mida, udia dolö nefolalebe amoli sulubadelaea Godea hamoi amoïe ïe ëi gauia adaha neebe amo helësëlahilä amai.
ACT 4:22 Dolöea hamomolöi made gadoi hamola dolö wahilasi amo eda gäheo i nabülasi biyidia baagi nelo.
ACT 4:23 Fisigäsebegi Fida Yonele helele sosogo neebea obëgëlahilä, gobela ïlo busa amoliage, asigi gäwi dafidilo amoliage, elema ado säi amo elea ilima säla ïaha maadei.
ACT 4:24 Säla ï amo nabaha maadelahilä, ili sulubadelaea hame afädë negela Godema adosalea, Dafidilo Geloi-e, muge naga föige ödä duhuluge nelebo sulubadela amoligi dibe neebe sebe amoge dia hamosa maadei.
ACT 4:25 Siiba nilïle mäu Debidi, dïe hamoi hamolasilo amoma aligila Eleloi Gesamia ado säi amo gowe. Edoïe udia dolö fii odoa ilia edefademalä mihalähamu nea. Edoïe udia dolö amolia nalï ado afädë negesamu nea.
ACT 4:26 Sege sulubadelaïe beaha aligilo gini nefolalo amolia nudumolöïe daiala nefolalo. Beaha aligilo gini amolia gegedolahilä Dafidilo Geloi amoge ïe Afädë Memelei amoge daia sasagala neala golila säi.
ACT 4:27 Amo gadola Heledoeage Bödiasa Bailadiage elebalä udia dolö fii odoaeage Yu udia dolöeage dofä gaamu gowegi dïe hamoi hamolasilo hedabifalï Yesu, dia memelei amo, daia sasagala neala golimolöïe gegedoi.
ACT 4:28 Ilia amala hamoi amoda dafidi dïe geloiage asigiage daiala negei amo gadola gausiala digai.
ACT 4:29 Amaimo, Dafidilo Geloi-e, ilia nilï nufulöïe ado gelola säha nelo amo dia walio asigimalo. Dïe hamoi hamolasilo nilïa bedäla made, gelola nea, dïe ado mala säla olelemolöïe geloi ïmalo.
ACT 4:30 Amo gala oloi dibe amo wahilasimolöïege, dïe hamoi hamolasilo hedabifalï Yesuïe ëia dolöea hamomolöi made gadoi hamolasimolöïege hïdo elöi hamolasimolöïege, dïe naabo mogodigimalola säla adoi.
ACT 4:31 Godema adola wagai amole mosö ili gedola sefolalo amo fogola Eleloi Gesamia ilima nobasebegi, ilia Godeïe ado mala bedäla made gelola säla ïaha nelo.
ACT 4:32 Udia dolö Yesuma asigi afädë negei nefolalo amoli sulubadelaea hame afädë negela asigi afädë negela nelo. Amala negela neada afädëa ïe nelegei dibe amo bealahilä goweda nïemelëla sälo made, hïdo hïdolaïe nelegei dilo amoda ili sulubadelaïe ua gadoi dilo.
ACT 4:33 Abosolo dolö amolia gelola nea Dafidilo Geloi Yesu baagolahilä nowela neala gelola säla olelesa nelo. Godea ili sulubadelama edefademalä obeägïlasilahilä hedabola ugila negesa nelo.
ACT 4:34 Ili sosogo nefolalo amoligida nelebo afädë ufoida made. Ilile sosogo odoaea segege mosöge munia bidi nealahilä,
ACT 4:35 abosolo dolö amoligali ïlo. Amala ïalahilä abosolo dolö amoliada udia dolö odoa ufola adi nefolalebe amoligali mogela ïlomelë.
ACT 4:36 Amo gadola dolö afädë nelo amoïe ëida Yosebe. Ïe ëi elö abosolo dolö amolia negeida Banabasa. (Banabasa amoda ado gowe gadoi. Iso asigi neala gelolasilo dolöla säla ëi negei.) Banabasada Ilibai sosogo nelo. Eda ödä södölogi Saibulusi fii.
ACT 4:37 Amea ïe sege afädë dolö elöma muni nii amoda gaula maala abosolo dolö amoligali ï.
ACT 5:1 Amala hamolo amo gadola dolö afädë Ananaiasa ïe udia Safailalea elele sege dilo amogi dolö afädëma bidi nii.
ACT 5:2 Muni bidi nii amo Ananaiasaea mogela odoa hïle negesi. Ïe udiaeage amo dawadigi sulo. Amalahilä Ananaiasaea muni odoa amo gaula awäla abosolo dolö amolima ï.
ACT 5:3 Ïasebegi Fidaea Ananaiasama sähalea, Dia Eleloi Gesamima wäfalï sämolöïe mugabe Saidani dïe isogi nobamäia fu ïgo edoïe. Dia dïe segeïe bidi nii muni amogi odoa dihïle negei gabu.
ACT 5:4 Sege bidi made nealada dihïle dilo madele. Bidi nealahiläda bidi nii amoge dihïle madele. Dïe isogi amala hamomolö helësëi amoda edoïe. Dia wäfalï säi amoda dolöma made, Godema säimelëla säi.
ACT 5:5 Fidaea säi amo nabala Ananaiasa ulula digala hame doala asi. Amala hamoimelëla säi amo nabelo amoli sulubadelaea edefademalä bedäi.
ACT 5:6 Amala hamosebegi, malïsäea baagoi amo faguloea usulala gaula awäla bausi.
ACT 5:7 Aoa ohodoa baagibua egoama hamoi amo helësëla made idia amo misi.
ACT 5:8 Amala maasebegi Fidaea ema nabahalea, Nema sämo. Alia sege muni nii amoda hä amo wäla niilela nabi. Amala nabasebegi, ea säla obëgësalea, Ä. Alïa muni nii amoda hä go wälamelëla säi.
ACT 5:9 Amala säsebegi, Fidaea ema sähalea, Diage diguaeage ali haligilaea Dafidilo Geloiïe Gesamia abilia hamosebelela bimolöïe fedogola melï amoda edoïe. Digua baulo amolia dige gaula moholöïe mumusogi digamolöïe mosö idiliba maaha neamelëla säi.
ACT 5:10 Amala säi amole fodolofalï Fidaïe emo mia ulula digala hame doala asi. Amala hame doala asi amole malïsä amolia maala e baagoi dibe amo bealahilä ilia ïe domalo segea gaula awälahilä egoa bauia amimu bausi.
ACT 5:11 Udia dolö Geleso sosogo nefolalo amolia edefademalä bedäla didigai. Amala hamoimelëla säi amo nabelo sulubadelaeage amai.
ACT 5:12 Udia dolöbalä nea abosolo amolia dolöea hamomolöi made gadoige hïdo elöige yafie hamosa nelo. Amoli sulubadelaeada hame afädë negela Solomonoïe hadai dibea amimu gegedosa aligilo.
ACT 5:13 Ili gegedosebea amida udia dolö odoa nefolalo amolida ilibalä bedälo. Amala bedäi nea gaso, ili beahaleada ilile ëi gauia adaha aligilo nelo.
ACT 5:14 Amalo gaso, udia dolö yafie nefolalo amolia Dafidilo Geloima asigi afädë negesa maadelahilä Geleso sosogo nefolalo amolibalä baai.
ACT 5:15 Amalebe oloi difolalo amoli gaula mafula idiafa Fida awäsido fëo fösisila nidila negela digi, dafudaia gaula maala nidila negela digi. Amoïe mida, ilia helësësaleada, Fida e maasegi, ïe ausuluboea oloi difolalebe amoli dabemäia amai.
ACT 5:16 Sege odoa Yalusaleme ga madela dibeamadi amodila udia dolö yafiea oloi difolalo amolige mugabe fedai difolalo amolige gaula gegedosebegi, sulubadela neala hedabola wahila digisa maadei.
ACT 5:17 Amala hamosebegi, gobela ïlo busa edefade nelo ameage, amase, ebalä aligilo Sadiusi sosogo dolö amoliage naabo gëi.
ACT 5:18 Amala helësëlahilä ilia abosolo dolö amoli neala nafodolahilä gaula awäla galabaia mosöa negesi.
ACT 5:19 Amala negesi dibegi gasigi Dafidilo Geloiïe selesaia fii afädëa galabaia mosö idi gai amo doga negesilahilä, ili sigi gaula segea doadigila fedalahilä
ACT 5:20 ilima sähalea, Dili afialahilä Godeïe mosöa nea namolö gähe goweïe mala sulubadela udia dolöma olelemalola säla ï.
ACT 5:21 Amala säi amo nabala abosolo dolö amoli yosefalï Godeïe mosöa ami awälahilä udia dolöma mala olelesa nelo. Gobela ïlo busa edefade nelo amoge ebalä aligilo nefolalo amolige maalahilä ilia ado sämolö Yu udia dolöïe dolö asigi gäwi dafidi nefolalo Galïsolö amoli gegedomalai. Gegedolahilä ilia sähalea, Galabaia mosöa amila dolö amoli sigi misiäiala säla ïmolö mosalola säi.
ACT 5:22 Amala säsebegi, idihë aligilo amolia galabaia mosöa awälahilä beahamelebe, dolö amoli maade beala Galïsolö dolö amolima säla ïmolö obëgëi.
ACT 5:23 Obëgëlahilä ilima sähalea, Nilïa galabaia mosö idi fëdöla gai amoge idihë aligilo idi gasia nefolalebe amolige melïmelë. Bealahilä nilïa idi gai amo dogala beahamelebe ami dolö afädë sebege made melïmelëla säla ï.
ACT 5:24 Amala säla ïasebe amo nabalahilä, Godeïe mosö idihë aligiloïe beaha aligilo ameage gobela ïlo busa amolaliage goea edo besela galamolödula helësëla asigia säosäosa dilo.
ACT 5:25 Ilia amala asigi säosäosa dibegi dolö afädë maalahilä ilima sähalea, Nabuö. Dolö dilia galabaia mosöa negei amoliada Godeïe mosöa udia dolöma mala olelesa nefolaleamelëla säla ï.
ACT 5:26 Amala säla ï amo nabalahilä, idihë aligiloïe beaha aligilo amola, idihë aligilo amolali awälahilä ili sigi obëgëi. Udia dolö nefolalebe amolia ili igia nufideloea bedälahilä, ilia ilima nelebo afädë made hamola, geleä awäla sigi obëgëi.
ACT 5:27 Ili sigi obëgëlahilä Galïsolö dolö sefolalebea ami ifosi. Ifosilebe gobela ïlo busa edefade amea ilima sähalea,
ACT 5:28 Nilïa dofä dolö amoïe ëi säla olelemabiola gelola säla ï. Amai gaso, nabuö. Mala amomu Yalusaleme udia dolöma säla ïasebegi ilia dilile ado nabaha maadei gabio. Amase, dolö baagoi amoge diliada nilïa nufila sämolöi nebegola säi.
ACT 5:29 Amala säsebegi, Fidala abosolo odoa amola ilia säla obëgësalea, Nilïa dolöea säse amo gadola made, Godea säse amo gadola hamomolöi galea.
ACT 5:30 Dilia Yesu baagomäia iigi baala negei amoda nilïle mäuïe Gode neebe amea e nowela ifosimelë.
ACT 5:31 Eda Dafidiloge Damula Auloge namiäia Godea e gauia adala ïe naabo dafädimadi ifosi. Godea amala hamoi amoïe mida gowe, Isilale udia dolö asigi besumäiage nafade hamoi amo hëla fisimäiage fu ïmolöïe amala hamoi.
ACT 5:32 Nilïage Eleloi Gesami Godea ïe mala hamolo nefolalebe amolima ïlo ameage amala hamoi amo dawadigila siia bealahilä säla ulufadigisa aligilo nilï nefolalebewemelëla säla ï.
ACT 5:33 Galïsolö dolö amolia ilia säi amo nabalahilä edefademalä habobala abosolo amoli baagomäia nufulöla helësëi.
ACT 5:34 Amala helësësa dibegi, Galïsolö dolö sefolalebea amoligi afädë nowei. Eda Felesi dolö, eada mala säla negei amo olelelo. Ïe ëi Gameliele. Udia dolö nefolalo sulubadelaeada ëi sälo neala sälo nelo. Amea sähalea, Dolö go ili oodola segea namolö mosalamola säi.
ACT 5:35 Amala sälahilä Galïsolö dolö amolima sähalea, Isilale dolöla dili-e, dilia dolö go ilima nelebo afädë hamomolö helësësa galëda, dafididale fädäla helësëmalo.
ACT 5:36 Aso, sedade nelola made, Deyudasa e maalahilä ea sähalea, Neda dolö ëi sälomelëla säsebegi, udia dolö hädali biyidia gadoia e bëgëla afiai. Amai gaso, e baagomäia nufudasebegi e bëgëla aulo amoli dusudasisalea mala olelei amo hogosa helei.
ACT 5:37 Amase, hobeala gamanea udia dolöïe ëi dëdëselo amo gala, Galili fii afädë, ïe ëida Yudasa, misi. Maalahilä ïe adoea udia dolö yafie neaha maadesebegi, eege baagomäia nufudasebegi, e bëgëla aulo amoli sulubadela dusudasisa maadei.
ACT 5:38 Amaimo, walio na dilima säha, dolö go ilima afädë hamola made hä guilasimalo. Ilia daiai amoge hamoi amoge hili döfelëla hamosa galëda, amoda hogosa helemolömelë.
ACT 5:39 Ma, Godea hamomäia daiai hamosa galëda, dilia haimolö ulïmelë. Dilia Godebalä ado neloeamelëla Gamelielea säi. Amala sälebegi Galïsolö dolö amolia Gamelielea säi amo gadola hamodeläla helësëi.
ACT 5:40 Amala helësëlahilä, ilia abosolo amoli welahilä mofiasebegi, ili fëgämalai. Fëgälahilä Yesuïe ëi säla bu elöda olelemabiola sälahilä ili fisigäi.
ACT 5:41 Amalebe ili Galïsolö neebea amila obeägïla segea doadigila asi. Obeägïla asi amoïe mida gowe, Yesuïe ëigi hewai amo Godea dofeala helësëi amogi.
ACT 5:42 Amalahilä segeyo sulubadelagi Godeïe mosöa amige udia dolö mosöa amige Ado Mala Hedabi olelesalea, Godea Afädë Memelela ifosi amoda Yesu neamelëla fisila made, säla ïahamu nelo.
ACT 6:1 Segeyo amo gaaluda, Yesu bëgëla aulo malei maala baahamu nelo. Giligi ado sälo amolia Alamege ado sälo amolibalä gëgësalea sähalea, Dilia segeyo sulubadelagi mogela ïlo amogida nilïle udia didalo sebe amoligali made ïlomelëla säla gëgëi.
ACT 6:2 Amala gëgësebegi abosolo giwilasi amolia Yesu bëgëla aulo odoa amoli sulubadela gegedomalolahilä ilima sähalea, Nilïa Godeïe ado amo fisilahilä molö mogemolö amo dofea made gabumelë.
ACT 6:3 Amai gabugi, nedoola, dilia dili nebegogi dolö gifalädalïa mogoi neala sälo, Godeïe Gesami nobai, hedabola dawadigi, amomu memelemalo. Memelelahilä, hamoi amo ilia sigi namiäia ifosidelä.
ACT 6:4 Amalahiläda, nilïamu Godema adosa namolö amoge udia dolöma Godeïe ado mala säla ïmolö amoge hamosamu namolölamelëla säi.
ACT 6:5 Amolia säi amo udia dolöea nabalahilä sulubadelaea dofea gabula säi. Amalahilä, ilia Sidibeni memelei. Sidibeni eda asigi afädë negelahilä gelola nea, Eleloi Gesamige ema nobai nelo. Amase, Filibige, Bologolusage, Niganologe, Dimonoge, Bamenasage, Nigolasage ili memelei. Nigolasa eda Ädiago fii. Eda Yu fii made gaso, dafidi Yu udia dolöïe mala neala gaulahilä ilibalä dila nelo.
ACT 6:6 Dolö memelei amoli abosolo ili neebea sigi maala ifosisebegi, Godema adolasila ilia ilima naabo negesi.
ACT 6:7 Amala hamolahilä Godeïe ado mala säla daidoi. Yalusaleme ami Yesu bëgëla aulo udia dolö yafie, sämolö asusugai awäla baai. Gobela ïlo dolö yafieage Yesuïe mala gaula mogola asigi afädë negei.
ACT 6:8 Godeïe ugila negeloge geloige Sidibenima nobalasisebegi, e udia dolöbalä nea hïdo elöige dolöea hamomolöi made gadoige gelola hamosa nelo.
ACT 6:9 Amala hamosebegi, dolö odoaea Sidibenibalä gëgësa nelo. Yu udia dolö amolile gedolo mosö afädë amoïe ëida Fisigäi Amoli Dilo Mosöla sälo amoligi nelo. Dolö amolida Salinialage Alegisädalialage misi. Ilibalä odoage Silisiala Esialage misi amoli sulubadelaea Sidibenibalä gëgësa nelo.
ACT 6:10 Gëgësalea Eleloi Gesamia Sidibeni hedabola dawadigilasi amea ilia ado säi amea e aulo dabemolöi made nelo.
ACT 6:11 Ilile adoea aulo dabemolöi made bealahilä, geleä hado musügä awälahilä dolö odoama sähalea, Sidibenia Mosesele Godele gagadela säse nabimelëla sämalola säi.
ACT 6:12 Amala säi amogi udia dolö nefolalo amoliage, asigi gäwi dafidilo nefolalo amoliage, mala dawadigi nefolalo amoliage habobala mihalälahilä, ilia Sidibeni sigi gaula Galïsolö dolö neebea ami asi.
ACT 6:13 Amalahilä, ema ilia wäfalï babala säsäla sämäia dolö odoa sigi maalahilä amolia sähalea, Dolö neebe egoweada sege Godea hïle nafolai goge, Ado säla negei dibe amoge gagadesamu nelomelë.
ACT 6:14 Eada gomalä säimelë. Nasalese fii Yesuea mosö go haila fisila, mala Mosesea säla negei amo nalaba maaha nelo nilïa nabaha neebewege neala bedefamolömelëla säi amo nilïa nabimelëla säi.
ACT 6:15 Amo säi amo nabalahilä, Galïsolö dolö sefolalo amolia Sidibeniïe odagi siila beahamelebe, selesaia fiiïe odagi gadoi neebe melï.
ACT 7:1 Amaimo, gobela ïlo busa edefade nelo amea Sidibenima nabahalea, Ilia ado säsebego dofä säsebelela nabi.
ACT 7:2 Amala nabelebe Sidibenia säla obëgësalea, Naado nedoola dili-e, ado sähago. Nabualo. Nilïle naua mäu Abalahama e Halana made awäla Mesobodemia nebegi, Gode yo digalo hïdo elöi amo Abalahama neebea maala besela galai.
ACT 7:3 Maalahilä ea ema sähalea, Dïe segege sosogoge dïgïla sege na olese amogi mosalola säi.
ACT 7:4 Amala säi amo nabalahilä, e Galadia sege dïgïla Halana namolö asi. Ïe eedo baagolahilä, sege walio dili neebea ami namiäia e Godea namolö mosalola säi.
ACT 7:5 Amo gala ema sege fufu afädë nofela made ï. Sege afädë emo afädëa emesamolöige dofä made ï. Amai gaso, Godea sege amogi dige dïe diaua mäu ilige dili namiäia ïmolömelëla Godea Abalahama e malö maade nebegi säla negei.
ACT 7:6 Godea gomalä säi. Dïe diaua mäu amoli elöïe segea namolömelë. Ami gäheo i hädali biyidia galabaia hamoi gadoi hamolasisa neebe amo gaaluda, dolö elöea ili neala sëlasimolömelë.
ACT 7:7 Amamolö gaso, ili galabaia hamoi gadoi hamomäia hamolasilo fii amolibalä na gudimolömelë. Gudilahilä ili sege amo dïgïla awälahilä, sege wegi nea nïe ëi gauia adamolömelëla Godea säi.
ACT 7:8 Amase, Godea asialo made ado elöi säla negei amoïe ea nofe negela Abalahamama gafodo damulasilo mala negei. Amala negei amo gadola Aisaga emea e ägülebeda segeyo gödögi Abalahamaea Aisagaïe gafodo damulasi. Hobeala Aisagaïe malö Yeigabamage amai. Amalahilä Yeigabaïe malö nilïle mäu giwilasi amolimage amai.
ACT 7:9 Nilïle mäu gïdälasi amolia giwi afädë Yosebema naabo gëlahilä, eda Isibi segea galabaia hamoi gadoi hamolasilo namiäia odoama muni ïmolahilä muni nii. Isibi segea sigi asi gasoda, Godea e sigi nea
ACT 7:10 yöi elö elöla sulubadela dibea amila e damula awäla ugila negei. Isibi sege beaha aligilo gini Felauïe siigi, Godea Yosebegali hedabola dawadigilasiloge mala hedabi hamolasimäiage ï. Amo bealahilä, Isibi udia dolöge, amase, ïe mosö sulubadelage sigi namiäia Yosebe memelela ifosi.
ACT 7:11 Amalahilä Isibi sege sulubadelagige Gainana sege sulubadelagige sïdë i maasebegi, udia dolö edefade yösa nefolalo, nilïle mäu ilia molö abidi galea walebelela hogoi gaso, afädë made beagolei.
ACT 7:12 Aso, molö made nebegi, Isibi segea molö galeamelëla säi amo nabalahilä, Yeigabaea nilïle mäu nelo amolima degabo mi gäwila afiamola sälahilä ili fisiga gai.
ACT 7:13 Amalahilä bu elö awäsebegi Yosebea ïe edoolalima, neda Yosebemelëla ulufadigila säla ï. Amala sälahilä nebegi, Felauea Yosebe sosogo amoge dawadigi.
ACT 7:14 Amalahilä, Yosebea ïe eedo Yeigabala e sosogola Isibi misialola säsi. E sosogo gegedolada nabülasi gifalädalïaïe odoai bia.
ACT 7:15 Misialola säsi amo nabala Yeigaba Isibi digala nebegi, hobeala e baagoi. Amalahilä nilïle mäu amolalige baagosebegi,
ACT 7:16 ilile domalo amo Segeme segea gaula obëgëlahilä, sege dafidi Abalahamaea Segeme ami Hamolöïe malöma baulo sege bidia niia ami baui.
ACT 7:17 Godea Abalahamama ado säla negei amo gausiala digamolö fu ga madesalea, Isilale udia dolö Isibi nefolalo amoli sosogo malei bäula besela galai.
ACT 7:18 Malei amala nebegi, hobeala beaha aligilo gini elö amea Yosebe made dawa nea, Isibi udia dolö sigi nelo.
ACT 7:19 Gini amea nilï sosogo amoli dahila nealahilä, nilïle mäu sëlasila, ilile malö dubo baagomäia segea sadia gamalai.
ACT 7:20 Amo gaalu, Moseseïe emea e ägüla misi, malö amoda Godeïe siigi hedabifalï. Aube ohodoa eedo hï mosöa ami sigi nelo.
ACT 7:21 Amalahilä e segea negei dibegi, Felauïe idiwia neala gaula awälahilä, hïle malö folo wäla fosa nelo.
ACT 7:22 Amala fosololahilä, ilia Isibiïe dawadigilo amo sulubadela Mosesema olelei. Amasebegi, ea ado adomolö amoge mala hamomolö amoge dolö geloi edefade nelo.
ACT 7:23 Mosese e gäheo i nabülasi biyidia baagilahilä, ïe edoo Isilaleïe malö amoli neebea söfë moholö dialeala helësëi.
ACT 7:24 Awälahilä ea beahamelebe Isibi dolö afädëa Isilale dolö afädë nufudaha neebe melï. Amalebe Mosesea Isilale dolö amo damula awäla Isibi dolö amo hï asiala hamoi amoïe hï e bidigi nufudala baagoi.
ACT 7:25 Mosesea helësësaleada, ïe edoo amolia Godea Moseseïe naaboea ili fisigämolö gabula helësësa dialeala helësëi. Gasoda, iliada amala made helësëi nefolalo.
ACT 7:26 Amo aiyo amogi Mosese besela galala beahamelebe Isilale dolö äudä nudusa neebe bealahilä, ele neala aealasidelälahilä elema sähalea, Malö äudä-o, didoo madele. Halimu edogi nudusala nabi.
ACT 7:27 Amala sälebe, mi hamola nudulo amea Mosese bobala sadia galahilä ema nabahalea, Di nilïle beaha aligilo namiäiage, gudi mogelo namiäiage di nowëa memelesio.
ACT 7:28 Aiyo dia Isibi dolö nufudadigi amo gadola nege nufudadigidelä misi nealela nabi.
ACT 7:29 Amala säi amo nabalahilä Mosese e Midiana segea fisäla awäla nelo. Ami nea ïe dolö malö äudä sogobai.
ACT 7:30 Ami gäheo i nabülasi biyidia baagilahilä, Mosese e sege nafade udia dolö aligilo made sege Sainai bi ga made neebea ami nebegi, i holöfalï afädëgi nulo söagila selesaia fii afädë Mosesea bimäia ulufadigila nelo.
ACT 7:31 Amala hamosebe amo beala Mosese e fudugilahilä ga madela hedabola fädäla bimolö awäha nebegi, Dafidilo Geloiïe ado nabi.
ACT 7:32 Dafidilo Geloia sähalea, Neda dïe diado amolile Gode neawe, Abalahamaïege, Aisagaïege, Yeigabaïege ilile Gode neawemelëla säi. Amala säsebegi, Mosese e edefademalä fudugila emo gigisëlahilä bimolö bedäla nelo.
ACT 7:33 Bedäla nebegi Dafidilo Geloia ema sähalea, Sege di nebegoda na nihïle nafolai sege amea dia emo usililo salugai go giimo.
ACT 7:34 Nïe udia dolö Isibi nefolalebe amolima ilia edefademalä neala sëlasisebe amo siia melïmelë. Ili dudumigila dïisa dibe amo nabalahilä, na ili damula awäla sigi obëgëmolöïe digai neawe. Amai gabugi, hä misië, na di Isibi mosalahagomelëla säi.
ACT 7:35 Dafidi Mosese ema ilia habobalahilä ema säla obëgësaleada, Di nilïle beaha aligilo namiäiage, gudi mogelo namiäiage di nowëa memelesiola säi amoda Mosese amoma säi gasoda, selesaia fii afädë i holöfalïgila ulufadigi amoïe naaboea dolö amea ili sigi namiäiage damula mosäiage Godea e fisiga galasimelë.
ACT 7:36 Dolö amea Isibi segea neage, ödä duhulu ëida Heale Uii dibea ami neage, gäheo i nabülasi biyidia sege nafadeia ami neage, hïdo elöige dolöea hamomolöi made gadoige hamola ili sigi asi.
ACT 7:37 Mosese amea Isilaleïe malöma sähaleada, Godea dilile didoomadila aligila afädë bea sälo ne gadoi dilile bea sälo memelela ifosimolömelëla säi.
ACT 7:38 Mosese amoda selesaia fii afädëa Sainai bia amila ema ado säla ïasolo amo gala sege nafadegi gegedolo amolibalä nelo. Nilïle naado amolibaläge nelo. Ado diamolöi diamolö amo nilïma säla ïmäia ema ï.
ACT 7:39 Amaimo, nilïle naado amolia ea ado säi amo gadola hamomolö habobalahilä, e bobala sadia gala ilile asigida Isibi obëgësa nelo.
ACT 7:40 Amala asigila nea ilia Alonoma sähalea, Nilïgali gode odoa naaboea hamomalo, iliadale nilï sigi mosäia. Mosese amea nilï Isibilahilä segea moholöïe sigi nelo amoma edo gadoi besela galaidu nilïa dawa madela säi.
ACT 7:41 Amala säsolo amo gala ilia sugua afädë gao emalö gadoi naaboea hamolahilä wäfalï gode amoma sugua gadoi elö elöla nufudala göa nelegela ï. Nilïa naaboea hedabi hamoi gabula helësëlahilä ilia edefademalä obeägïsa nelo.
ACT 7:42 Amala hamolebe Godea ili baagi ïala ilia mu ilibia gasumilïma göa nelegemäia fisigisi. Amo gadola bea säloïe bebagi dëdëla negei amo gowe. Isilale fii dili-e, gäheo i nabülasi biyidiagi sege nafadegi nea, sugua gadoi nufudala göa negela negali ïledu.
ACT 7:43 Amaimo, Molegeïe balai mosö dilia gaula asi. Amase, dilile gode Lëfanaïe gasumilï gadoige, dilia göa nelegemolöïe naaboea hamoi amo dilia gaula asi. Dilia amala hamoi amea na dili Babilono holöbö baagia gala bobala mosäia fisiga gamolömelëla dëdëla negei dialea.
ACT 7:44 Gode ilibalä neebe amoïe helësëla balai mosö amo nilïle naadolalibalä sege nafadeia ami nelo. Mosö amoda Godea Mosesema gowe gadoi hamomalola säla olei amo gadola ilia hamoi.
ACT 7:45 Hobealada nilïle naado amolia ilile eedo bedefala balai mosö amo gaula Yasuabalä asi. Yasuabalä awäha nea Godea udia dolö fii odoa nefolalo amoli nesila digila sege amo iligali bedefala aligi awäha neada balai mosö amo gaula awäha nelo. Amalahilä balai mosö amo nebegimu beaha aligilo Gini Debidi besela galai.
ACT 7:46 Godea ema obeägïsebegi ea Godema nabahalea, Na mosö afädë Yeigaba fii amolile ulimolöda dofealela nabi.
ACT 7:47 Amala nabi gaso, Solomonoea Godeïe mosö uli.
ACT 7:48 Amai gaso, Ilibia Edefade neebe ameada mosö naaboea uligida aligilo made nea. Bea säloea säi amo gadola,
ACT 7:49 Dafidilo Geloia sähalea, Muda nïe beaha aligilo filo dialeamelë. Amase, naga föida nïe emoea emesaia idala filo dialeamelë. Dilia ne namolöda mosö abodo gadoi olasimolö. Amase, ne hele fimolöïe sege fuda abidi dialea.
ACT 7:50 Nelebo dibe goda sulubadela nïe naaboea hamoi madelela säila säla dëdëla negei dialeala säi.
ACT 7:51 Aso, Sidibenia ilima sähamu nea sähalea, Dilile iso asigi geloifalï nebego, bobaeage gëheage asigi afädë made negei amo wälasi nebego. Eleloi Gesamima habobahamu nebego. Dilida dilile diado amoli nelo amo gadoimu nebego.
ACT 7:52 Bea sälo nefolalo amoligi afädë dilile diado amolia neala made sësa neloda nowë. Siiba dolö mogoifalï moholömelëla säla digi amolige ilia baagomäia nufudadigisa nelo. Amase, walio dilia dolö amo hololölahilä baagomäia nufimelë.
ACT 7:53 Diligali Ado säla negei amo selesaia dolöma aulo negela ï amo dilia gaula nea, amo made hamolo nebego dilia amaila Sidibenia säi.
ACT 7:54 Sidibenia ado säi amo nabalahilä, ilia edefade mihaläla ema bese ali nalëgëi.
ACT 7:55 Amasebegi, Sidibeni ema Eleloi Gesami nobala nea, ea selesaia mosöa sida adogola nea beahamelebe, Godeïe yo digalo hïdo elöi amoge, Yesu e Godeïe naabo dafädimadi neebe amoge melï.
ACT 7:56 Siila nea sähalea, Bimo. Selesaia mosö doga negei dibe amoge Dolöïe Malö amo Godeïe naabo dafädimadi neebe amoge beahamelëla säi.
ACT 7:57 Amala säi amo nabala, ilia gelola hoala digila naaboea ilile gëhe galahilä, e neebea gaalu fodolofalï nawela awäla
ACT 7:58 e gaula gaamu yala baagia sadia galahilä, e baagomäia igia nufudaha nelo. Dolö dafidi ema babala sälo amolia ilile fagulo sedade daia salugai amo giilahilä, malïsä afädëïe emo mia nidila negei. Malïsä amoïe ëida Solo.
ACT 7:59 Ilia Sidibeni e igia nufudaha nebegi, ea Godema adosalea, Dafidilo Geloi Yesu-o, dia nïe gesami nea nimola säi.
ACT 7:60 Amala sälahilä, emo gumu sasagala salea, gelolafalï sähalea, Dafidilo Geloi-e, ilia nafade hamosebe goweïeda ili së ïmabiola sälahilä, Sidibeni e süwia dilo wäla adi.
ACT 8:1 Sidibeni nufudadigi amogi Soloea ïe siigi dofea hamoila helësëi. Segeyo amo gaalu, Sidibeni nufudalahilä, Godea Yalusaleme udia dolö wela ifosi nefolalo amoli mi gäwila edefademalä gelola neala sëlasisa nelo. Amalebe ili sulubadela fisäla awäla Yudia segeamadige Samelia segeamadige dusudasila afiaha maadei. Abosolo ilimu Yalusaleme ami nelo.
ACT 8:2 Dolö odoa Godeïe mala nabelo nefolalo amolia edefademalä didigaola Sidibeniïe domalo bausi.
ACT 8:3 Amalahilä Soloea udia dolö Godea wela ifosi nefolalo amoli nufudala ïalalesa nelo. Amala hamosa nea mosö neebe amo sulubadelagi awälahilä, udiage dolöge gaula dusugaia awäla galabaia negesa nelo.
ACT 8:4 Udia dolö fisäla dusudasila afiai amolia sege ili afiaido amo sulubadelagi Ado Mala Hedabi säla ïïa afiai.
ACT 8:5 Amala afialahilä, Filibi Sameliaïe gaamu afädë dibea ami awälahilä, ea ilima sähalea, Godea Afädë Memelei amo hä misi neamelëla säla ïaha nelo.
ACT 8:6 Filibia ado säla ï amo udia dolö gegedoi amolia hedabola nabalahilä, ea dolöea hamomolöi made gadoi hamola digisebe amo beala ili sulubadelaea ea ado säsebe amo nabaha nelo.
ACT 8:7 Amaha nea, udia dolö yafiema mugabe fedai nefolalo amoli nesila digisebegi üalala gäwila doadigila awäla digi, amase, dolö emo nafadeige, dolö fii siige yafie wahila digisa maadei.
ACT 8:8 Amala hamosebegi, gaamugi ami fii udia dolö amolia edefade obeägïsa nelo.
ACT 8:9 Gaamugi ami dolö afädë ïe ëi Saimono sulo. Dafidida ea golë hamosa nelo. Samelia fii udia dolö fudugimäia elö elöla hamosa nelo. Ea hïmu sähaleada, Neda ëi sälo edefademelëla sälo.
ACT 8:10 Amase, dolö odoa ëi säloge, memasage sulubadelaea Saimonoïe ado nabaha aligilo. Amoli sulubadelaea sähaleada, Godeïe geloi amo ilia Edefadela sälo amoda amola sälo.
ACT 8:11 Saimonoea segeyo yafiegi golë hamosa nelo amogi ili neala fudugilasilo amea ilia ea säsebe amo nabaha nelo.
ACT 8:12 Amai gaso, Filibia ilima Godea Beaha Maadela Sigi Neebe amoïege Yesu Gelesoïe ëige Ado Mala Hedabi säla ïasebegi, udiaeage dolöeage, asigi afädë negesebegi, ödägi gei.
ACT 8:13 Amase, Saimono eege asigi afädë negesebegi ödägi gei. Amalahilä e Filibibalä nawesa nea, dolöea hamomolöi made gadoige, geloi melëlo made gadoige hamosebe amo bealahilä Saimono e fudugi.
ACT 8:14 Abosolo dolö Yalusaleme nefolalo amolia Samelia ilia Godeïe ado mala neala gausaleala säi amo nabalahilä ilia Fidale Yonele ili neebea fisiga gai.
ACT 8:15 Amala säsebegi, ele awäla besela galalahilä, elea Samelia udia dolö amolia Eleloi Gesami nimäia Godema adolasi.
ACT 8:16 Mida, Eleloi Gesami ilibalä digala made nelo. Yesuïe ëigimu ödägi gesa nelo.
ACT 8:17 Godema adolasilahilä, elea ilima naabo negesisebegi ilia Eleloi Gesami nii.
ACT 8:18 Abosolo äudä amolea naabo negesi amea Gesami ïasebe amo Saimonoea bealahilä, ea muni ïahagolahilä
ACT 8:19 sähalea, Na afädëma nïe naabo negesisegi Eleloi Gesami nimolö amoïe geloi amo nema ïmäiamelëla säi.
ACT 8:20 Amala sälebe Fidaea ema säla obëgësalea, Godea memalä ïmolö amogi dia munia nimolö helësëi amea, dige dïe munige haligila heli segea mosäiamelë.
ACT 8:21 Dïe iso asigi Godeïe siigi mogoi made nebego. Ameada alïa hamoi hamosebewegida dofä dia hamomolöi mademelë.
ACT 8:22 Dia nafade hamomolö helësëi amoïe asigi besumalo. Amalahilä, dïe isogi nafade asiala helësëi amo hëmäia Dafidilo Geloima adomalo.
ACT 8:23 Na säi amoïe mida, gesami aulo gamogai amo dïe isogi nobalahilä, nafade hamomolö amea di gide begei dibe go beahamelëla Fidaea säi.
ACT 8:24 Amala säsebegi, Saimonoea säla obëgësalea, Alia säi amo gadola nema made hamomäia Dafidilo Geloima nïe adolasimola säi.
ACT 8:25 Amalahilä elea Yesuea elema hamoi amo säla ï. Amase, Dafidilo Geloiïe ado malage säla ïalahilä Yalusaleme obëgëi. Obëgësalea Samelia segeïe gaamu holöfalï dibeadi amogi Ado Mala Hedabi säla olelela aliligi obëgëi.
ACT 8:26 Amalahilä Dafidilo Geloiïe selesaia fii afädëa Filibima sähalea, Yalusalemela Gasa segea aulo idi gumadi mosalo. Idi sege nafadeido aulo amogi mosalola säi.
ACT 8:27 Amala säi amo nabalahilä Filibi e nowela asi. Idi amogi awäha nebegi, Idiobia dolö afädë idiafa gausiai. Dolö amoda dafidi iso neadigi nelo. Dolö ameada Idiobia udia dolöïe beaha aligilo gini udia ëi Gädasi sulo amoïe muni nelegeige beaha aligilo nelo. Dolö amoda Yalusaleme ami Godeïe ëi gauia adala Godema adomolö asi
ACT 8:28 obëgësalea, galo sugua hosima begela dusugala aulo amogi filahilä, bea sälo Aisaeaea bebagi dëdëla negei dibe amo nidela aligi awäha nelo.
ACT 8:29 Nidela aligi awäha nebegi Gesamia Filibima sähalea, Di awäla galo mia ga madela, galo awäse amo gadola mosalola säi.
ACT 8:30 Amala säsebegi, Filibi e baluluia galo awäse amo gadola awäla nebegi, Idiobia dolö amea Aisaeaea bebagi dëdëla negei dibe amo nidese nabi. Amo nabalahilä Filibia ema nabahalea, Ado nidese goïeda helësësebelela nabi.
ACT 8:31 Amala nabasebegi, ea säla obëgësalea, Afädëa goïe mida gowemelëla nema made säla ïaseda, na abeahäla helësëmolödula säi. Amala sälahilä ea Filibima sähalea, Galodaia halïgïla fidelä fedala fimola säi.
ACT 8:32 Bebagi ado säla dëdëla negei nidei amoda gowe. Sugua sibi baagomäia nufulö sigi awäsebe amo gadolage, sibi emalö hilï damusegi, nafi dagala adolo made amo gadolage, ea nafi made dagai.
ACT 8:33 E neala hewalasilahilä ïe gudi mogola made säsi. E nagadaia namolöda aligila wagai amoïe yaua mäuïe ado nowëa säsimolöla säla dëdëla negei dialea.
ACT 8:34 Idiobia dolö amea Filibima nabahalea, Bea sälo amea, amo säi amo nowëïe helësëla säi gabu, hï e helësëla säi gabule ma, elöïe helësëla säi gabulela nema säla ïmola nabi.
ACT 8:35 Amalebe Filibia dafidi ado dëdëla negei nideia amila mi gäwila Yesuïe Ado Mala Hedabi dolö amoma säla olelesa nelo.
ACT 8:36 Ele idiafa awähalea ödä afädë dibea ami besela galala Idiobia dolö amea Filibima nabahalea, Bimo. Ödä dialea. Ne ödägi gemolö amo nelebo afädëa dofogamolöi gabulela nabi.
ACT 8:38 Amalahilä ea galo gaulo amoma beaha namiëlahilä, eege Filibige helegela ödägi digala aligilahilä Filibia e ödägi gelasi.
ACT 8:39 Ele ödägila fedalahilä, Dafidilo Geloiïe Gesamia Filibi fodolofalï sogobala gaula asibua Idiobia dolö amea e bu elö made melï. Amalahilä ea obeägïla nelea hï aulo idi amogi asi.
ACT 8:40 Filibi e hä Asodasa gaamua neebe melï. Amalahilä e segea amila doadigila awäla gaamu dibe sulubadelagi nawesalea, Ado Mala Hedabi olelela aliligi awäla Sisalia gaamugi besela galai.
ACT 9:1 Amo gala Soloea Dafidilo Geloiïe bëgëla aulo nefolalo amolima sëlasila nufudadigideläla gelola sähamu nelo. Ea gobela ïlo busa edefade neebea ami awälahilä sähalea,
ACT 9:2 Gedolo mosö amoli beaha aligilo Damasaga nefolalebe amolima ïdulä, beba afädë dëdëla ïmo. Yesuïe Idigi aulo nefolalebe, udiage dolöge, beagoleseda, nafodolahilä Yalusaleme sigi obëgëdeläla säi.
ACT 9:3 Amalahilä, Solo e Damasaga suägïla nebegi, mudaiala yo digalo maala fodolofalï ema sege yabagelelo wäla yabagelei.
ACT 9:4 Amea e nagadaia digai dibegi, afädëa ema sähalea, Solo-o, Solo-o, edogi dia ne neala sëlasisala säse nabi.
ACT 9:5 Amo nabalahilä ea säla obëgësalea, Dafidilo, dida nowëla nabi. Amala nabasebegi, ea säla obëgësalea, Neda Yesu, dia neala sëlasilo amomelë.
ACT 9:6 Di hä nowela Damasaga gaamugi mosalo. Dia hamomolö amo ami säla ïmolömelëla säi.
ACT 9:7 Dolö odoa Solobalä asi amolia adola made aumala nelo. Ado säse amo nabi gaso, dolö hodo made melï.
ACT 9:8 Solo e digai amo noweia adalahilä si fisigäla melï gaso, nelebo bimolö ulï melï. Ulï galebeda ilia e nabelela gaulahilä sigi awäla Damasaga besela galai.
ACT 9:9 Besela galalahilä, ami segeyo ohodoa nelo amogi bimolö ulï nea, molö ödäge made naala nelo.
ACT 9:10 Damasaga ami bëgëla aulo afädë nelo. Amoïe ëida Ananaiasa. Ea sosoäla awäla beahaleamelebe Dafidilo Geloia wela sähalea, Ananaiasa-ola säi. Amala säsebegi, ea säla obëgësalea, Dafidilo Geloi-e, ne neawela säi.
ACT 9:11 Amasebegi Dafidilo Geloia ema sähalea, Di nowelahilä idi gogi mosalo. Idi amoïe ëida Mogoi Idi. Amogi awälahilä Yudasaïe mosöa besela galamolöïe nowela mosalo. Yudasaïe mosöa besela galalahilä dia Dasasa fii dolö afädë ëi Soloda salealela nabualo. Mosalola säi amoïe mida, ea Godema adosa neebe amoïe.
ACT 9:12 Ea sosoäla awäla beahaleamelebe ïe si hedabomäia dolö afädë ëida Ananaiasa maalahilä ïe naabo negesi melïla säi.
ACT 9:13 Amala sälebe Ananaiasaea säla obëgësalea, Dafidilo Geloi-e, dolö goeada udia dolö dihïle nafolai Yalusaleme nefolalo amolima nafade edefade hamoimelëla udia dolö yafiea säi amo na nabimelë.
ACT 9:14 Nilï neebea wige udia dolö dïe ëi gauia adalo amoli sulubadela nafodomolöïe gobela ïlo busa nefolalo amolia ema geloi ïmelëla säi.
ACT 9:15 Amala säsebegi, Dafidilo Geloia ema säla obëgësalea, Mosalo. Dolö amoda nïe hamoi hamolasilo namiäia memeleimelë. Eada udia dolö fii odoa amolige, beaha aligilo gini nefolalebe amolige, Isilale udia dolö nefolalebe amolige, nïe ëi ilile siigi sämäia memeleimelë.
ACT 9:16 Ea nïe ëigi së elö elöla molö amo na ema olemolömelëla säi.
ACT 9:17 Amala säi amo nabalahilä, Ananaiasa awäla besela galalahilä mosö amogi nogila digai. Digalahilä ea ema naabo negesila sähalea, Nedoo Solo-o, Dafidilo Geloia ne wi misialai, di wi maahalea Yesu idiafa dia melï amea. Dïe si bu bimäiage Eleloi Gesami dima nobamäiage ne misialaila säi.
ACT 9:18 Amala sälebe fodolofalï seme bebe gadoi Soloïe siigila digalahilä ea bu bimolöi melï. Amalebe Solo e hä nowelahilä, ödägi gei.
ACT 9:19 Ödägi gelahilä, molö naala gelola obëgëi. Damasaga nea Solo e bëgëla aulo amolibalä segeyo odoa nelo.
ACT 9:20 Beaha aligila made fodolofalï gedolo mosöa awäla nea, ea Yesuda Godeïe Efege neamelëla säla ïaha nelo.
ACT 9:21 Amalebe ea ado säi amo nabelo amoli sulubadelaea fudugilahilä sähalea, Udia dolö ëi go gauia adalo amoli Yalusaleme nufudadigisa aligilo amo e madele. Yawege amala hamomolöïe ili nafodolahilä gobela ïlo busa nefolalebea ami sigi gaula moholöïe misi madelela säla didigai.
ACT 9:22 Amalo gaso, Soloea edefademalä gelolasila, ado mala säla ïaha nelo. Säla ïahalea, Afädë Memelei amoda dofä Yesu e neamelëla säi amo Yu udia dolö Damasaga nefolalo amolia nabala fudugila, dofä säsebela helësëlahilä, säla obëgëmolö asusugai nelo.
ACT 9:23 Segeyo yafie baagilahilä, Yu ili gegedola Solo baagomäia nufidedelämelëla säla didiäha dilo.
ACT 9:24 Amala didiäi amo Soloea nabi. Ilia segeyo sulubadela gasi esoage Damasaga gaamu yalala amalela digi amoïe idi nogila digalo amo sulubadela Solo e baagomäia nufulöïe idia negesamu nelo.
ACT 9:25 Amala hamosa nebegi gasi afädëgi Soloïe bëgëla aulo nefolalo amolia Solo adu gadoigi salalahilä yala baagido ëfëa begela fisiga idai.
ACT 9:26 Solo e Yalusaleme awäla, Yesu bëgëla aulo amolibalä gedola namolö helësëi. Amala helësëla nebegi, eda Yesu bëgëla aulo made neala helësëla sulubadelaea bedäha nefolalo.
ACT 9:27 Amalo gaso, Banabasaea e sigi awäla abosolo amoli neebea ami asi. Sigi awälahilä ea abosolo amolima Solo e idiafa awäha nebegi Dafidilo Geloi melï amoge, ea Soloma ado säi amoge, ilima awala säla ï. Amala säla ïalahilä Damasaga awäla Soloea Yesuïe ëigi ïe ado mala gelola säla ï amoge ilima awala säla ï.
ACT 9:28 Amala sälahilä Solo e ilibalä gedola nea, Yalusaleme sege sulubadelagi awäha nea, Dafidilo Geloiïe ëigi gelola säla ïaha nawesa nelo.
ACT 9:29 Amala säla ïaha nea, ea Yu dolö Giligi ado adolo nefolalebe amolibalä ado adosa nea gëgësa nelo. Gëgësebegi ilia e baagomäia nufulöïe idi hogosa nelo.
ACT 9:30 Amala hamosa neamelëla säi amo nabalahilä edoolalia Solo Sisalia sigi awälahilä e Dasasa mosäia ifola asi.
ACT 9:31 Amala hamolahilä, Yudiage Galilige Sameliage udia dolö Godea wela ifosi nefolaloa ami aeaeala nelo. Amala nea ili neala gelolasisebegi, Dafidilo Geloibalä bedäla nagadaiala nelo. Eleloi Gesamia ilile asigi falagaselasisebegi, udia dolö odoaea asigi afädë negela ilima disa maadei.
ACT 9:32 Fida e sege sulubadelagi nawesalea, udia dolö Godea hïle nafolai Lida gaamugi nefolalebea amige digala nelo.
ACT 9:33 Digala nea segea ami dolö afädë fii si dibe melï. Dolö amoïe ëida Eniasa, e imididaia diasi dibegimu gäheo i gödölasi baagi.
ACT 9:34 Fidaea ema sähalea, Eniasa-o, Yesu Gelesoea di wahilasisebego. Nowelahilä dïe fëo galimola säi. Amala säi amole e fodolofalï nowei.
ACT 9:35 Udia dolö sulubadela Lidalage sege Salonolage ili sulubadelaea e bealahilä Dafidilo Geloima asigi besui.
ACT 9:36 Yesu bëgëla aulo udia afädë ëi Dabida, Giligi ado adola ëi elöda Dogasa, e Yoba filo. Udia amea hamoi hedabi hamosamu nea. Udia dolö busadäoi nefolalebe amoli ugila negesamu aligilo.
ACT 9:37 Amala hamosa sebegi e olola baagoi. Baagosebegi odoaea ïe domalo nigime hëla hogoli ilibia afädëgi nea negesi.
ACT 9:38 Yoba gaamu amoda Lida gaamu ga madela negei. Bëgëla aulo nefolalo amolia Fida segeyo amo gala Lida neai amo nabalahilä, ilia dolö äudäma e neebea bea mosalai. Awälahilä elea ema sähalea, Saula made, nilï nefolalebea fodolo misialola säla ï.
ACT 9:39 Amala säla ïasebegi, Fida e nowelahilä hiligila obëgëi. Besela galalahilä hogoli ilibia amogi ilia e sigi asi. Sigi awälahilä udia didalo nefolalo amoli e neebe gaalu ga madela nefolalea didigaola fagulo sedadege fagulo odoage Dogasaea hï e made baagola salea hamoi dilo amo ema nidila olei.
ACT 9:40 Fidaea ili sulubadela afiaha maademolahilä, emo gumu sasagala salea Godema adoi. Amala adolahilä Fidaea ïe domalomadi besuia galahilä sähalea, Dabida, nowemola säi. Amalebe udia amea si fisigäla Fidama bealahilä e nowela fii.
ACT 9:41 Amala hamolebeda Fidaea udia amoïe naabogi nabelela nowela ifosi. Ifosilahilä Fidaea udia dolö Godea hïle nafolai nefolalo amolimage, udia didalo amolimage mofiamolahilä, ea udia wahi neebe amo ilima olei.
ACT 9:42 Amala hamoi amo Yoba udia dolöea dawadigisa maadelahilä yafiea Dafidilo Geloima asigi afädë negei.
ACT 9:43 Fida e segeyo yafie Yoba segea ami nelo. E ami nelo amoda dolö afädë ëi Saimonobalä nelo. Saimono ameada sugua gao gafodo nealahilä, amea nelebo odoa hamomolöïe daiaha aligilo.
ACT 10:1 Sisalia gaamugi ami dolö afädë nelo. Ïe ëida Gonilïasa. Eada ami dolö hädali afädë beaha aligilo nelo. Hädali afädë amoda hädali gafeia amoligi, hädali gafeia amolile ëida Idali Ami Dolöla sälo.
ACT 10:2 Gonilïasa eada Godea hamei dibe amomu hamolo nea, Godebalä bedäla nagadaiala aligilo. Ïe mosöa nefolalo amoli sulubadelaeage amalo. Eada busadäoi neebe amoli ugila negela muni nelegeige ïaha aligilo nea, segeyo sulubadelagi Godema adolasisa aligilo nelo.
ACT 10:3 Amala hamosa nebegi segeyo afädëgi eso bëgisebe amo gaalu, Gonilïasaea sosoäla awäla beahaleamelebe, Godeïe selesaia fii afädëa e neebea maalahilä ema Gonilïasa-ola säsebegi ea fädäla melï.
ACT 10:4 Amala säsebegi, ea bedälahilä, selesaia fii amoma siila dialea nabahalea, Dafidilo, edola nabi. Amala nabasebegi, ea ema säla obëgësalea, Dia Godema adosa aligilo amoge, nelegei muni busadäoi amoligali ïaha aligilo amoge Godea bealahilä di helësësa neamelë.
ACT 10:5 Amaimo, dolö afädë Saimono, ïe ëi elöda Fida, amoda di neebea gui misiäia dolö odoaea Yoba bea mosalamalo.
ACT 10:6 Dolö amoda edaio Saimonoïe mosöa söfë misi saleamelë. Saimono ameada sugua gao gafodo nealahilä, amea nelebo odoa hamomolöïe daiaha aligilo. Ïe mosöda duhulu agesugi neamelëla säi.
ACT 10:7 Selesaia fii amea ema säla ïala asibua Gonilïasaea ïe hamoi hamolasilo äudä nelo amolege, amase, ami dolö afädë Godea hamei dibe amomu hamolo ebalämu aligilo amoge, ohodoa amoli misialolahilä,
ACT 10:8 nelebo e neebea maala hamoi amo sulubadela ilima fädäla säla ïaha maadelahilä ea ili Yoba mosaloi.
ACT 10:9 Amo aiyo amogi ili awäla idiafa eso mogogi suägïla gaamu ga madela awäha neebe amo gaalu, Fidaea Godema adomolö mosö fïgï baledeidaia fedai.
ACT 10:10 Fedalahilä adosa salea, Fida e sïdëa baagosebegi molö molö helësëi. Odoaea molö giala daiasebe amo gaalu, Fida e olobola salea sosoäla awäla melï.
ACT 10:11 Beahaleamelebe mu doga negelahilä nelebo afädë fagulo gadoi edefade bidi biyidiagi gaulahilä nagadaia fisiga idogosebe melï.
ACT 10:12 Amodaia ami hogoi elö elöige, nagadaia hagömoea aulo elö elöige, hagila aulo haea elö elöige sefolalebe melï.
ACT 10:13 Amo beaha nebegi, ado afädë sähalea, Fida-o, nowelahilä dia nufudala muöla säse nabi.
ACT 10:14 Amala säi amo nabalahilä Fidaea säla obëgësalea, Dafidilo Geloi-e. Ai, made molö. Nilïa made mualaige, nelebo dïe siigi dofea madege, na afädë dofä made maimelëla säi.
ACT 10:15 Amala sälebe, ado amea bu elö ema sähalea, Godea dofea muöla säi amoda ïe siigi dofea madela sämabiola säse nabi.
ACT 10:16 Amo gadola bu ohodoala hamolahilä fodolofalï nelebo fagulo gadoi amo mudaia dusugala neasebe melï.
ACT 10:17 Sosoäla awäla melï amo Fidaea mi edoïedula asigi säosäola hehelësësa sebegi, dolö ohodoa Gonilïasaïe mosöala misi amoli maalahilä, Saimonoïe mosö abidi neala nalaba awäla beagolelahilä, idi galo mia ami segeamadi nelo.
ACT 10:18 Idi galo baagido segea nea wala nabahalea, Dolö afädë Saimono, ïe ëi elöda Fida, mosöa gui sebelela nabi.
ACT 10:19 Sosoäla awäla melï amo Fidaea edodula hehelësësamu sebegi Gesamia sähalea, Nabuö, dolö ohodoaea di hogosa nea.
ACT 10:20 Di hä nowela digamo. Ilibalä moholö amogi dia asigi säosäomabu. Na ili fisiga weila säi.
ACT 10:21 Amala säsebegi, Fida e digalahilä dolö amolima nabahalea, Dolö dilia hogose amoda nemelë. Edoïe misila nabi.
ACT 10:22 Amala nabasebegi, ilia säla obëgësalea, Godeïe selesaia fii afädëa ami dolö hädali afädë beaha aligilo Gonilïasama sähalea, Fida di neebea misialamalo. Ea säse amo dia nabualola säimelë. Gonilïasada dolö asigi mogoi, Godebalä bedäla nagadaiala aligilo neamelë. Yu udia dolö amoliage e asigi mogoi neala sälomelëla säi.
ACT 10:23 Amala säsebegi, Fidaea ili mosöa digafiamola sälahilä, ili ami adi. Diala nowela hiligila afiai. Edoolali odoa Yoba gaamugi nefolalo amolige hiligila afiai.
ACT 10:24 Amo aiyo amogi e Sisalia gaamugi besela galai. Gaamugi ami Gonilïasaea ili beaha nelo. E sosogo amolige e damelëfalï amolige misialolahilä, ili gegedola beaha nefolalo.
ACT 10:25 Fida e digala besela galasebegi Gonilïasa maalahilä, ïe emo mia gumusula dia idogoi.
ACT 10:26 Amala hamosebegi, Fidaea e nabeleia idahalea sähalea, Di nowemo. Nege dolöfämelëla säi.
ACT 10:27 Fidaea ebalä adodola mumusogi digahamelebe udia dolö yafie gegedoi dibe melï.
ACT 10:28 Bealahilä ilima sähalea, Afädë Yu dolö neebe amogida udia dolö fii elöbalä aligilo madege, amase, söfëge aulo madela säla negei amoda dilia dawadigi nebego. Amala hamolo gaso, dolö elöma dida nafade, amase, Godeïe siigi dofea madela made sämäia Godea nema oleimelë.
ACT 10:29 Amalebe misialoi amogi na säla obëgëla made, ne misimelë. Amaimo, mi edoïe ne misialaila nabahala nabi.
ACT 10:30 Amala nabasebegi, Gonilïasaea sähalea, Gomoïe gahada deadi walio neebe we gadola eso bëgisebe amo gaalu, nihï mosöa Godema adosa sebegi, dolö afädë fagulo hedabi eleloi salugai nïe odagia maala nelo gabio.
ACT 10:31 Amala maala nea ea sähalea, Gonilïasa-o, dia Godema adoi amo ea nabi. Amase, dia nelegei munige busadäoi amoligali ïaha aligilo amoge Godea made elaboi nea.
ACT 10:32 Dolö afädë Saimono, ïe ëi elöda Fida, e Yoba gaamugi neamelë. Dolö odoama bea mosalamalo. Dolö amoda edaio Saimonoïe mosöa söfë misi saleamelë. Saimono ameada sugua gao gafodo nealahilä, amea nelebo odoa hamomolöïe daiaha aligilo. Ïe mosöda duhulu agesugi neamelëla säi.
ACT 10:33 Amala sälebe na fodolofalï di bea mosalola säi. Nabalahilä misi goda hedabi hamoi. Nesege. Amaimo, Dafidilo Geloia sulubadela dima sämalola säi amo gadola säsebe amo nabulö nilï sulubadela Godeïe sidaia gedola saleawela säi.
ACT 10:34 Fidaea sähalea, Godea udia dolö sulubadela memelela made, fii sulubadelaea ebalä bedäla nagadaialahilä, mala mogoi hamosa nefolalebe amoli Godea hulu helësëla obeägïlo neebe amoda, dofä na walio beagolei neawe.
ACT 10:36 Godea neala dalulasilo Ado Mala Hedabi Yesu Geleso aulodaia nea säla, Isilale udia dolöma säla ï amo dilia dawadigi nebego. Yesu Geleso amoda udia dolö sulubadelaïe Dafidilo Geloi nea.
ACT 10:37 Yonea ödägi gelo mala oleleibua, Galili ami mi gäwilahilä, Yudia sege sulubadelamadi hamoi amo dilia dawadigi nebego.
ACT 10:38 Ami hamoi amoda gowe. Godea Nasalese fii Yesu memelela Eleloi Gesamige, geloige, ema söga negesebegi, Gode ebalä nelo amea Yesuea fufuia nawesa nea, udia dolöma hedabi hamola digi, udia dolö mugabe busaïe geloi hawa nefolalebe amoli sulubadela wahila digi amo dilia dawadigi.
ACT 10:39 Ea Yalusaleme neage, Yu udia dolöïe sege sulubadelagi neage hamoi amo nilïa beaha maadei. Ilia e baagomäia iigi baala negeimelë.
ACT 10:40 Amaimo, segeyo äudä nelolahilä osodagi Godea dolö amo nowela ifosilahilä, udia dolöea e bimäia olei.
ACT 10:41 Amala olei amoda, udia dolö sulubadelama made, Godea e bimäia memeleiamu melï. E baagola nowesebegi ebalä molö ödäge naha aligilo neebe nilïmamu oleimelë.
ACT 10:42 Ea nilïma sähalea, Udia dolöma ado mala säla ïahalea, udia dolö dafidi baagoi amolilege walio nefolalebe welilege gudi mogelo namiäia Godea ne memelela ifosila säla ïmalola säi.
ACT 10:43 Dafidi bea sälo nefolalo amoli sulubadelaea ïe helësëla bea säla sähalea, Ema asigi afädë negei nefolalebe amolia nafade hamoi amoda Godea ïe ëia hëla digimolömelëla säi.
ACT 10:44 Fidaea ado amo, aso, säha nebegimu, Eleloi Gesami udia dolö ea säi amo nabaha sefolalo amoli sulubadelama digai.
ACT 10:45 Asigi afädë negei gafodo damulo Fidabalä misi amolia Eleloi Gesami memalä udu ïlo amo fii odoama söga sali amo beala fudugisa dilo.
ACT 10:46 Fudugi amoïe mida gowe. Udia dolö amolia ado elö säla, Gode eda edefade neala säse nabi amogi. Amalahilä Fidaea nabahalea,
ACT 10:47 Nilïa Eleloi Gesami nii amo gadola nii amoli ödägi made gemolöila sämolöi nealela nabi.
ACT 10:48 Amala nabasebegi, ea Yesu Gelesoïe ëigi ödägi gemalola säi. Amalahilä ilia ema segeyo odoa ilibalä namolömelëla säla gauia idai.
ACT 11:1 Abosolo iliage edoolali Yudia sege sulubadelagi nefolalo amoliage nabahalea, udia dolö fii odoa amoliage Godeïe ado mala neala gaui neala säi amo nabi.
ACT 11:2 Nabalahilä nea, gafodo damulo dolö odoaea Fida Yalusaleme awäla besela galasebegi, ilia ema nemoi.
ACT 11:3 Nemola sähalea, Dia dolö gafodo made damui nefolalebe amolile mosöa digalahilä, ilibalä molö gedola naha sulo gabiola säi.
ACT 11:4 Amala säsebegi, Fidaea nelebo dafidi mi gäwila hamoi amo ilima awala sähalea,
ACT 11:5 Ne Yoba gaamugi Godema adosa sebegi, olobola salea sosoäla awäla beahaleamelebe, mudaiala nelebo fagulo gadoi edefade bidi biyidiagi gaulahilä ne mia fisiga idogosio.
ACT 11:6 Fisiga idogosebegi fagulo gadoi amogi na siila fädäla beahamelebe, sugua foi elö elöige, hogoi odoage, hagömoea aulo gadoige, hagila aulo haeage sefolalebe melï.
ACT 11:7 Beaha nebegi nema ado afädë sähalea, Fida-o, nowelahilä dia nufudala muöla säse nabi.
ACT 11:8 Amo nabalahilä na säla obëgësalea, Dafidilo Geloi-e. Ai, made molö. Nilïa made mualaige, nelebo dïe siigi dofea madege, afädë nïe nafia made maimelëla säi.
ACT 11:9 Amala sälebeda ado amea mudaiala bu elö sähalea, Godea dofea muöla säi amoda ïe siigi dofea madela sämabiola säse nabi.
ACT 11:10 Amo gadola bu ohodoala hamolahilä nelebo amoli sulubadela mudaia dusugala neasebe melï.
ACT 11:11 Amo gala dolö ohodoa Sisaliala fisiga gai amoli mosö ne neebea ami maala besela galasio.
ACT 11:12 Besela galasebegi Gesamia nema ilibalä moholö amogi dia asigi säosäomabula säi. Amala säsebegi, nedoo gafeia amolalige nebalä awälahilä, nihïlïgïla dolö amoïe mosöa nogila digai.
ACT 11:13 Digalahilä ea nilïma säla ïahalea sähalea, Selesaia fii afädë nïe mosöa maase melï. Selesaia fii amea sähalea, Dolö odoa Yoba mosaloi, amoli awäla dolö afädë Saimono, ïe ëi elöda Fida, e misiäia bea mosaloi.
ACT 11:14 Ea ado mala säla ïasebe amea dige dïe mosöa neebe amolige dili sulubadela damula moholömelëla säila säi.
ACT 11:15 Amaimo, na ado säha nebegi, Eleloi Gesami dafidi mi gäwila nilïma digai amo gadola ilimage digasio.
ACT 11:16 Amala hamolebe na helësëla obëgësalea, dafidi Dafidilo Geloia ado säi amo gadola, Yoneada ödäea gesa nelo, dili Eleloi Gesamia gemolömelëla säi amo helësëla obëgëimelë.
ACT 11:17 Dafidilo Geloi Yesu Gelesoma asigi afädë negesebegi, Godea nilïgali ï amo gadola, iligalige ïasebegi, na Godema iligali amala ïmabula sämolöi nelolela Fidaea säla wagai.
ACT 11:18 Amala säi amo nabalahilä, ilia bu säla obëgëla made, Godeïe ëi gauia adala sähalea, Godea udia dolö fii odoa neebe amoliage asigi besulahilä namolö gähe neala gaumäia iligali fu ï gabula säi.
ACT 11:19 Sidibeni baagomäia nufia amila odoaea ili neala sëlasisa nebegi, udia dolö fisäla dusudasila afiai amoli fisäla odoa Fonisiage, Saibulusige, Ädiagoge awäla ado mala säla ïïa Yu udia dolömamu olelela aliligi asi.
ACT 11:20 Amai gaso, fisäla asi amoligi Saibulusi dolö odoage Sailini dolö odoage Ädiago gaamugi awäla Giligi udia dolömage Dafidilo Geloi Yesuïe Ado Mala Hedabi olelesa nelo.
ACT 11:21 Dafidilo Geloia ïe geloi ilima olesebegi udia dolö yafie asigi afädë negesa maadelahilä Godemadi namolö obëgëi.
ACT 11:22 Amala hamoila säi amo Godea Yalusaleme udia dolö wela ifosi nefolalo amolia nabalahilä, ilia Banabasama Ädiago segea bea mosalai.
ACT 11:23 E awäla besela galalahilä beahamelebe, Godea ili hedabola ugila negei amo bealahilä ea obeägï. Obeägïlahilä ea ilile iso asigi gelolasila udia dolö sulubadelama sähalea, Fisila made, Dafidilo Geloibalä dila nebegoda go wälasimu namialola säi.
ACT 11:24 Banabasa e dolö hedabi, Eleloi Gesami ema nobai nea, asigi afädë negei geloi nelo amea amala säi. Amaimo, udia dolö yafiege Dafidilo Geloima asigi afädë negela baai.
ACT 11:25 Amala hamolahilä Banabasaea Solo hogomolöïe Dasasa asi.
ACT 11:26 Beagolelahilä ea e Ädiago sigi obëgëi. Ädiago ami gäheo i afädë ele udia dolö Godea wela ifosi nefolalo amolibalä gegedola nea, udia dolö yafiema mala säla olelesa nelo. Yesu bëgëla aulo Ädiago ami mi gäwila Geleso sosogola ëi negei.
ACT 11:27 Segeyo amo gaalu, bea sälo odoa Yalusalemelahilä Ädiago digai.
ACT 11:28 Iligi afädëïe ëi Agabasa e nowelahilä, Gesamiïe geloia bea säla negesalea sähalea, Sege föi sulubadelagi sïdë i edefademalä gelola moholömelëla säla negei. Amala säi amo gadola beaha aligilo Gini Sisa Golodiasa nebegi gausiala digai.
ACT 11:29 Ado säi amo nabalahilä, bëgëla aulo nefolalo amolia ado afädë negela, edoolali Yudia nefolalebe amoligali ugila negela ïmolöïe, muni dibe amo gadola ïdulämelëla säi.
ACT 11:30 Ilia amala säi amo gadola hamolahilä, ilia Banabasale Sololele naabogi gausilahilä, dolö asigi gäwi dafidilo nefolalebe amolima ïmolöïe gaula mosaloi.
ACT 12:1 Amo gaalu, Gini Heledoea udia dolö Godea wela ifosi nefolalo odoa amoli neala sëlasimolöïe gaula nafodosa nelo.
ACT 12:2 Ea Yoneïe edoo Yamese baagomäia nudulo helebea nufi.
ACT 12:3 Heledoea beahamelebe, Yu ilia ea nelebo hamosebe amogi haeafula obeägïsebegi, Fidage gaula nafodomalai. Ea amo hamoi amo Segeyo Edefadegi beledi edelo yidila made gobela molö fu amo gala amala hamoi.
ACT 12:4 Fida gaula galabaia mosöa negesilahilä, ami dolö nudulu gäwi biyidia amolia Fida e idihë namialai. Nudulu gäwi afädë afädëlagi ami dolö biyidia biyidiala ifosisi. Amala ifosisilahilä, Heledoea Baagila Asi Segeyo amo baagibua ebalä gudimolöïe udia dolö neebea e sigi moholöla helësëi.
ACT 12:5 Amaimo, Fida e galabaia mosöamu nebegi, udia dolö Godea wela ifosi amolia ïe Godema gelola adosa nelo.
ACT 12:6 Heledoea aiyo gadola e sigi moholölahilä, walio gasigi gadola, Fida e ami dolö äudä amole mogogi ami adi dilo. Ilia e igi ëfë äudäea begela negesilahilä, ami dolö odoaea galabaia mosö amoïe idi galo baagido idihë nefolalo.
ACT 12:7 Amala dibegi, Dafidilo Geloiïe selesaia fii afädë fodolofalï maala aligisilahilä, galabaia mosö hogolia ami yo digai. Selesaia fii amea Fidaïe afawa nufigila didiigisalea sähalea, Di fodolofalï nowemola säi. Amala säi amole igi ëfë äudä amo Fidaïe naabogi amila fisigäla digai.
ACT 12:8 Amala hamosebegi, selesaia fii amea sähalea, Dïe malibu fëdöla negelahilä, emo usililoge salugamola säi. Amala säi amo gadola Fidaea hamosebegi, selesaia fii amea ema sähalea, Dïe daia salugalo fagulo amoge salugalahilä, ne bëgëla misiëla säi.
ACT 12:9 Amala säsebegi, e awäse amo gadola bëgëla segea doadigila awähaleada, selesaia fiia e dofä sigi awäsebela made helësëla, ea sosoäla awäla beahala helësëi.
ACT 12:10 Ele awähalea idihë aligilo elö neebe amo baagila awäla, elö neebe amoge baagila asi. Amala awäla gaamugi aulo idi galo igi aeanea hamoia gaia ami besela galai. Besela galalebe idi gai amo hï asigia doga negesebegi, ele doadigila asi. Awäla idi afädë amogi awäha nebegi, selesaia fii amea e amilahilä fodolofalï dïgïla asi.
ACT 12:11 Selesaia fii amea dïgïla asibua Fidaea fädäla helësëla obëgësalea sähalea, Heledoïe naaboea gauia amilage, Yu udia dolö ilia hamomolö helësëia amilage, Dafidilo Geloia ne damula awäla ïe selesaia fii dofä fisiga wei gabula säi.
ACT 12:12 Amala fädäla helësëlahilä, Fida e Yoneïe eme Meliïe mosöa asi. Yoneïe ëi elöda Maga. Mosöa ami udia dolö yafie gegedolahilä Godema adosa dilo.
ACT 12:13 Fida e maalahilä idi galo baagido segeamadila nea, gödögödöla nufigisebegi, hamoi hamolasilo dolïsä ëi Olodaea idi gai dugimolö misi.
ACT 12:14 E maalahilä säse amo nabahamelebe, Fidaea adose nabala e edefademalä obeägïsalea, idi gai amo made dogala baluluia digalahilä sähalea, Wae, dili-e! Fida idiliba misi neamelëla säi.
ACT 12:15 Amala sälebe, ilia ema sähalea, Di gagaosa walofala säi. Amala säsebegi, ea ado gelolafalï sähamu nea, Ai, dofä misi neala säi. Amalebe ilia sähalea, Goda ïe selesaia fii gabula säi.
ACT 12:16 Ilia amala säha dibegimu, Fida ea, aso, idi galogi gödögödöla nufigisamu nebegi, idi gai dogalahilä beahamelebe Fida neebe beala ili edefademalä fudugi.
ACT 12:17 Amalebe udia dolö amolia made adomäia ea naabo usigililahilä, Dafidilo Geloia e galabaia mosöa amila doadigila segea sigi misi amo ilima awala ïaha maadei. Awala ïaha maadelahilä sähalea, Amala hamoimelëla Yamesemage, edoolalimage säla ïmalola säla ïalahilä Fida e doadigila awäla sege elögi asi.
ACT 12:18 Sege yose amo gaalu, ami dolö amolia fudugilahilä Fida abodogi asidula didiäla edefademalä asigi säosäosa dilo.
ACT 12:19 Amala hamoi gabugi, Heledoea e hogoi amo made beagolesebegi, idihë aligilo nelo amolibalä gudilahilä ili baagomäia nufualai. Amalahilä Heledo e Yudia sege dïgïla Sisalia gaamugi namolö asi.
ACT 12:20 Udia dolö Daiamadi nefolalebe amolimage, Saidonomadi nefolalebe amolimage, Heledoea edefademalä mihaläha nelo. Amala nebegi, hili asigi afädë negelahilä Heledo neebea asi. Ilia bea moholö nea, gini dilo mosö beaha aligilo dolö ëi Balasadusabalä ado afädë negelahilä, hobeala neala dalumolöïe ado sämolö ili Heledo neebea asi. Amala sämolö asi amoïe mida, ilia Heledoïe segeamadi molö bidia nelo amo helësëla amai.
ACT 12:21 Segeyo daiala negei amo gala Heledo e beaha aligilo giniïe fagulo sedade salugalahilä, beaha aligilo filodaia salea, ea udia dolöma ado edefade säla ï.
ACT 12:22 Amo nabalahilä udia dolö amolia, Ado säsebe goda dolöea säse amo gadola made gabu, gode afädë elöea säse amo gadola säsebela gelola sähamu nelo.
ACT 12:23 Ado amo Heledoea nabalahilä, Godeïe ëi gauia adamolö made helësëi amea, Dafidilo Geloiïe selesaia fii afädëa e fodolofalï nufi. Amalebe, fësöea naala e hame doala asi.
ACT 12:24 Amaibua Godeïe ado mala säla daidola bäui.
ACT 12:25 Hä Banabasale Sololea Yalusaleme ami ugila negemolö asi amo hamosa maadelahilä, elea Yone Maga sigi hiligila Ädiago obëgëi.
ACT 13:1 Udia dolö Godea wela ifosi Ädiago nefolalo amoligi odoaea bea sälo nea, odoaea säla olelelo nelo. Ilile ëida gowe, Banabasage Simeono, ïe ëi elö Nigeluge, gaamu Sailini ami fii Ulusiusige, beaha aligilo Heledobalä esamala aligilo Manainige, Sologe, ili nelo.
ACT 13:2 Segeyo afädëgi udia dolö Godea wela ifosi amolia Dafidilo Geloi helësëla molö aiala made mai. Made naala nea, Dafidilo Geloiïe ëi gauia adala Godema adosebegi, Eleloi Gesamia ilima sähalea, Banabasale Sololea hamoi hamomäia na helësëla daiai dibe amo gadola hamomäia, ele nafolala odasimalola säi.
ACT 13:3 Amalebe ilia molö made naala aiala, Godema adola elema naabo negesilahilä mosalai.
ACT 13:4 Eleloi Gesamia ele mosalosebegi, ele gaamu Selusia ami digai. Selusia amila ele du edefadegi fila awäla Saibulusi södölo dibea ami asi.
ACT 13:5 Ele awäla gaamu Salamisi besela galalahilä, elea Yu udia dolöïe gedolo mosö nefolalebea ami Godeïe ado mala säla ïaha nelo. Ele ugila negemolöïe Yonege elebalä asi.
ACT 13:6 Ele ödä södölo amoïe sege sulubadelamadi nawesa nelolahilä awäla gaamu Bafosi besela galai. Segea ami Yu dolö afädë sebe melï. Dolö ameada golë elö elöla hamosa aligilo nea, wäfalï bea sälo nelo. Amoïe ëida Ba-Yesu.
ACT 13:7 Eda gamane beaha aligilo dolö Segiasa Folasabalä aligilo nelo. Gamane dolö amoda asigi gäwi nulügäi nelo. E Godeïe ado mala nabedelä Banabasale Solole misialola wei.
ACT 13:8 Amai gaso, golë hamolo, amoïe ëi elöda Elimasi, ea Banabasale Sololele ado bafuäha nelo. Mida, ea gamane beaha aligilo neebe amea Yesuma asigi afädë made negemäia helësëla amai.
ACT 13:9 Amala hamosebegi, Solo, ïe ëi elö Folola sälo nelo amoma Eleloi Gesami nobalahilä ema siila dialea sähalea,
ACT 13:10 Wäfalï säsäla dahila nelo sulubadelage, asigi musügä negela gadiabolo sulubadelage dima nobai gabu. Amai, dida mugabe busaïe malö neebe, mogoi hamomolö dibe amo sulubadelabaläda dia ado neala aligilo. Diada Dafidilo Geloiïe mala mogoi hamolo dibe amo halowemolö helësësa aligilo amo, made fisimolöle.
ACT 13:11 Amai galëda, nabualo. Dafidilo Geloiïe naaboea di nufudasebego. Hä dïe si dofogalahilä, eso neë made beala, holöbö segeyo sedade namolömelëla säi. Amala säi amole fodolofalï gelë gadoiage gasimi sagai gadoiage ïe si gesusebegi, nagubila nawesalea afädëa e nabelela gaula sigi mosäia ea hogosa nelo.
ACT 13:12 Amala hamoi amo bealahilä, gamane beaha aligilo dolö amea Dafidilo Geloiïe ado mala säi amo nabala fudugilahilä, asigi afädë negei.
ACT 13:13 Bafosi amila Fologe ebalä asi amolige du edefadegi fila awäla Bäfilia segeïe Bega gaamugi besela galai. Gaamugi amila ili dïgïla Yone e Yalusaleme obëgëi.
ACT 13:14 Amala hamosebegi, ili Bega gaamugi amila awäla, Bisidia segeïe Ädiago gaamu dibea ami besela galai. Besela galalahilä, segeyo Sabada gafegi ili gedolo mosöa ami awäla sulo.
ACT 13:15 Gedolo mosöa ami sebegi, Mosese nebegi Ado säla negei amoge, amase, bea sälo nefolalo amolia säla negei amoge nidelahilä, gedolo mosö beaha aligilo amolia dolö afädëma ilima sämäia säsi. Säsisalea, Nedoola dili-e, dilia udia dolö asigi gelolasimolöïe ado afädë gaulea galëda, säla ïmäiamelëla säi.
ACT 13:16 Amala säi amo nabalahilä, Foloea nowela aligila naabo usigililahilä sähalea, Isilale dolö diliage, amase, fii odoa Godebalä bedäla nagadaiala neebe diliage, nabualo.
ACT 13:17 Isilale udia dolö go ilile Gode neebe amea dafidi nilïle naado nefolalo amoli memelei. Amalahilä ili Isibi awäla nebegi, sosogo malei besela galamäia neala edelasilahilä, hobeala ïe geloiamu Isibila sigi doadigila asi.
ACT 13:18 Sigi awäla sege nafade udia dolö aligisia made ami nebegi, gäheo i nabülasi biyidiagi ea yöi gaula hï guila auaula nelo.
ACT 13:19 Amalahilä Gainana ami fii gifalädalïa sulo amoli nufudaha maadelahilä, ilile sege Isilale udia dolö samiäia hilima ïmelë.
ACT 13:20 Amala hahamola maaha nea gäheo i hädali biyidiaïe nabülasi bia gadoi nelo. Sege amo nealahilä, Godea ëi sälo odoaea beaha aligimäia iligali ïala beaha aliligi awälahilä, bea sälo Samuale neloa ami awäla besela galai.
ACT 13:21 Samuale nebegi, ilia beaha aligilo gini ïmäia ëdëgësebegi, Godea Bëyamini sosogomadila Gisiïe malö Solo ï. Amala ïasebegi Solo eda gäheo i nabülasi biyidiagi beaha aligilo nelo.
ACT 13:22 Godea Solo beselalahilä, ilile beaha aligilo Gini Debidi namiäia memelela ifosi. Debidi helësëla ado gomalä säi, Yesiïe malö Debidida nïe naabo dafädi, hame salifalï neebe melïmelë. Eada na helësëi dibe amo gadoi hamosa maademolömelëla Godea säi.
ACT 13:23 Dolö amoïe yaua mäumadila afädëa Isilale udia dolöïe damula aulo namiäia Godea dafidi säla negei amo gadola Yesu e misimelë.
ACT 13:24 Yesu e, aso, maala ulufadigila made nebegi, Yonea Isilale udia dolö sulubadelama sähalea, Asigi besulahilä ödägi gemalola säla ïaha nelo.
ACT 13:25 Yonea ïe hamoi hamola wagamolö fu ga madesebegi, ea sähalea, Diliada ne nowë neala helësësebe. Neda amo mademelë. Amai gaso, nabualo. Hobea ne baagia e moholömelë. Na ïe emo usililo ëfë fisigämolö dofea made neawela Yonea säimelë.
ACT 13:26 Nedoola dili, Abalahamaïe malöge, amase, fii odoa Godebalä bedäla nagadaiala neebege, damula moholö amoïe ado gowe nilïma fisiga wei.
ACT 13:27 Udia dolö Yalusaleme nefolalo amola, ilile dafidilo nefolalo amolalia dolö amo fädäla dawadigi made nelo. Dawadigi made nea, ilia e baagomäia nufulöla säi amea bea sälo nefolalo amolia ado säla negei dilo amo segeyo Sabada gafe sulubadelagi nidesamu aligilo amo gadola gausiala digai.
ACT 13:28 Amaimo, e baagomolö mi maadegi, ilia Bailadima nufualola säi.
ACT 13:29 Ïe helësëla dëdëla negei dibe amo sulubadela gausiaha maadesebegi, ilia idaiala gaula digalahilä igi äbägi bausi.
ACT 13:30 Amai gaso, Godea e bauia amila neala nowelasi.
ACT 13:31 Nowelasisebegi, dafidi ebalä Galilila Yalusaleme fedafiai amolia e segeyo yafiegi melï. Melï amolia udia dolöma e olelo nea.
ACT 13:32 Amaimo, nilïa dilima Ado Mala Hedabi säla ïaha neawe. Dafidi nilïle naadolalima hamomolömelëla säla negei amo gadola
ACT 13:33 Godea Yesu neala nowelasi amea ilile malö nilïma gausiala digaimelë. Gë Udälo agedugi dëdëla negei amoda gowe. Dida nïe malö nebego, walio neda dïe Diado aligisawela säla dëdëla negei dialea.
ACT 13:34 Godea Yesu neala nowelasi amo bu made baagomolömelëla gomalä säla dëdëla negei dialea. Dofä hedabi obeägïlasimolö dafidi Debidima ïmolömelëla säla ï amo gadola dilima ïmolömelëla säla dëdëla negei dialea.
ACT 13:35 Amo gadoi ado elö säla dëdëla negeida gowe. Dïe hamoi hamolasilo dihï memelela odai amo bauia ami made sïgämolömelëla säla dëdëla negei dialea.
ACT 13:36 Debidi nelo amo gaalu, Godeïe hamoi hamomolö negei dilo amo gadola hamosa maadelahilä e baagoi. Baagosebegi ïe eedolali bauia ami eege amimu baula sïgäi.
ACT 13:37 Amaimo, Godea afädë neala nowelasi amoda sïgäi made melïmelë.
ACT 13:38 Amai gabugi, nedoola dili-e, Yesuïe aulodaia nea nafade hamoi amo hëmolöïe mala dilima säla ïaha neebewe helësëmalo.
ACT 13:39 Ea hamoi amea, sulubadelaea dolö amoma asigi afädë negesebegi, nafade hamoi amo Mosese nebegi Ado säla negei ameada hëmolö ulï amo sulubadela ea hëla digisa maadelo nea.
ACT 13:40 Amaimo, bea sälo nefolalo amolia dafidi bea säla negei amo dilima gausiala digaloea, hedabola idihë namialo. Bea säla negei amoda gowe.
ACT 13:41 Gadiabolo nefolalebe, bimo. Beala fudugilahilä baago geia mosalo. Dili neebe amo gaalu, na hamomolö amo afädëa dilima amala hamoila säseda, dilia dofä gabula made helësëmolömelëla säla dëdëla negeila Foloea säla wagai.
ACT 13:42 Amala säla wagalahilä, Folole Banabasale gedolo mosöalahilä doadigila awäha nebegi, udia dolöea elema sähalea, Mala amo gadoi segeyo Sabada gafe elö gogi säla ïmolö obëgëmalola säi.
ACT 13:43 Amalahilä gedoi amoli dusula awäla, Yu udia dolö yafiege, amase, udia dolö fii odoa Yuïe mala bëgëla hamolo yafiege, Folole Banabasale bëgëla asi. Bëgëla maasebegi, elea ilima säla ïahalea, Godea ugila negelo dibea ami fodola namialola gelola säla ï.
ACT 13:44 Segeyo Sabada gafe elö amogi Godeïe ado nabulö gaamu sulubadela gegedoi gaso, odoa holöbö made gedoi.
ACT 13:45 Amaimo, Yu udia dolö amolia yafie gegedoi dibe amo bealahilä, ilile iso asigia Foloma edefademalä naabo gëlahilä, e gadiabola, ïe ado bafuäha nelo.
ACT 13:46 Amasebegi, Folola Banabasalea hubabelela made gelola nea sähalea, Amaimo, Godeïe ado dilimadale dafidi säla ïmolöi galea gaso, dilia helësësaleada, namolöi namolö nimolö amo nilïa dofea madela helësëlahilä, ado amo eegeia gasebegoeada alïa dili dïgïla fii odoamadi moholömelë.
ACT 13:47 Mida, Dafidilo Geloia alïa hamomalai amoda gowe. Dida fii odoa udia dolöïe yo digalo nebego. Damula aulo amo sege föi dibe sulubadelamadi gaula mosäiala säi.
ACT 13:48 Elea amala säi amo nabalahilä, udia dolö fii odoaea obeägïla, Dafidilo Geloiïe ado mala gauia adalahilä, Godea namolöi namolö amo gaula namiäia memelei amoli sulubadela asigi afädë negei.
ACT 13:49 Amalahilä Dafidilo Geloiïe ado mala neala gaulahilä sege amogi säla daidoi.
ACT 13:50 Amaimo, Yu udia dolö amolia gaamu amoïe udia dafidila fii Gode helësëlo sefolalo amoliage, dolö ëi sälo nefolalo amoliage mihalämäiala, Folole Banabasale neala sëlasimäialahilä, sege amomadi made namiäia nesila digi.
ACT 13:51 Amala hamolebe ilia asiala hamoi amo helësëmäia elea dao elele emogi baai amo fëfëla salalahilä, Aigoniama asi.
ACT 13:52 Yesu bëgëla aulo nefolalo amolima obeägïloge Eleloi Gesamige nobai nelo.
ACT 14:1 Aigoniama ami Folole Banabasalea gaamu odoagi aulo amo gadola Yuïe gedolo mosöa ami asi. Ami awälahilä ado mala hedabolafalï olelesa nelo amea, udia dolö yafie, Yuge, Giligige, ilia asigi afädë negei.
ACT 14:2 Amasebegi, Yu udia dolö asigi afädë negemolö haboi nefolalo amolia udia dolö fii odoa amolia edoolalima bimolö habobamäia si nigilasi.
ACT 14:3 Segeyo yafie Folole Banabasale ami nea, bedäla made Dafidilo Geloiïe ado mala gelola olelesa nelo. Amala olelesa nebegi, Dafidilo Geloiïe ugila negelasilo mala säla ï amo dofä gabula helësëmäia, Dafidilo Geloia ele neala gelolasilahilä, dolöea hamomolöi made gadoige, hïdo elöige hamomäia elema geloi ï.
ACT 14:4 Amala hamosebegi, gaamugi ami fii udia dolö nefolalo amoli mogelahilä, odoa damula Yumadi, odoa damula abosolomadila mogela nelo.
ACT 14:5 Amasebegi, Yu ilige, amase, fii odoa amolige, ilile sigi aligilo amolibalä nea, Folole Banabasale së muäia igia nufulö dialeala helësëi.
ACT 14:6 Amala helësësaleala säi amo nabalahilä, Folole Banabasale fisäla awäla Ligonia segeïe gaamu Ilisidalage Debige sege amoïe ga made ga madela dibeadi amogige asi.
ACT 14:7 Amige elea Ado Mala Hedabi säla ïïa asi.
ACT 14:8 Ilisidala gaamugi ami dolö emo nafadei afädë sulo. Emea emo nafadei amo gadoi neegela ägüla misi salea, holöfalï emesala nawelo made sulo.
ACT 14:9 Dolö amea Foloea ado säsebe amo nabaha sulo. Nabaha sebegi, Foloea ema sisamelebe, e wahimäia asigi afädë negei sebe amo bealahilä
ACT 14:10 gelola sähalea, Dihïle emoea nowela namiëla säi. Amala sälebe, dolö amo nila fedala aligisilahilä nawesa nelo.
ACT 14:11 Foloea amo hamose amo bealahilä, Ligonia udia dolö yafie gegedoi amolia hilile ado adola gelolafalï sähalea, Dolö gadoi hamolahilä, gode amoli nihïlï neebea digai gabuwela säi.
ACT 14:12 Amala sälahilä, Banabasaïe ëi Susa negei. Amase, Folo eda ado adolo neala helësëlahilä, ïe ëi Hemisi negei.
ACT 14:13 Ilisidala gaamu amoïe yala baagido ami ilile gode Susaïe odala ïlo mosö olasi nelo. Amoïe gobela ïlo dolö nelo amea mama bebegesiala amalei amoge sugua gao gawali amoge idiliba ami sigi misi. Sigi maalahilä eage gegedoi nefolalo amoliage elegali göa nelegela nufudala ïmolö helësëla sigi misi.
ACT 14:14 Amala hamomolöïe hamosa neala säi amo nabalahilä abosolo äudä Banabasale Fololea helele fagulo amo nulilahilä, udia dolö gegedoi mogogi ami baluluia awälahilä, ado gelola silälasila
ACT 14:15 sähalea, Dolö dili-e, dilia goda edo hamomolöïe hamosa. Alïge dolöfä dili nebego gadoi neamelë. Dilia nelebo memalä gadoi go fisila Gode namolöi neebe amoma besumäia alïa Ado Mala Hedabi säla ïmolö misimelë. Gode namolöi neebe ameada muge naga föige ödä duhuluge nelebo sulubadela amoligi dibe neebe sebe amoge ea hamosa maadei.
ACT 14:16 Dafidi ea udia dolö fii odoa siiba fii amoli sulubadela hili helësëse amo gadola mosäia fisigisi.
ACT 14:17 Amai gaso, ea hamoi amo sulubadelaea e dofä neala helësëmäia, musügä negela made, hï e olei. Ea hedabi hamosebe amoda gowe. Sege mudaiala fisiga idaloge, amase, molö bäulasiloge amole diligali ïlomelë. Diligali molö ïase amea bolelasiloge obeägïlo dilile isogi nobalasiloge neamelëla säi.
ACT 14:18 Elea ado amala sälahilä, udia dolö gegedoi sefolalo amolia elegali göa nelegela sugua gao made nufudala ïmäialahilä, baagi sëi hamoi hamosa nelo. Amalebeda ilia made amai.
ACT 14:19 Amaha nebegi, Yu odoa Ädiagolage Aigoniamalage mofiai. Mofiai amolia helësëse amo gadola gegedoi amolia amala helësëmäialahilä, ilia ado afädë negei. Ado afädë negelahilä, ilia Folo igia nufi. Nufi amo baagoi gabula helësëlahilä, dusugala gaula awäla gaamu baagido negesi.
ACT 14:20 Amala hamosebegi, Yesu bëgëla aulo nefolalo amolia Folo e amalela digila nebegi, e nowelahilä gaamu amogi bu obëgëla digai. Diala aiyo amogi Banabasale helegela Debi asi.
ACT 14:21 Ele gaamugi ami nea elea Ado Mala Hedabi säla ïaha nelo. Säla ï amea Yesu bëgëla aulo yafie besela galai. Amalahilä ele Ilisidalage Aigoniamage Ädiagoge obëbëgela awähalea,
ACT 14:22 elea bëgëla aulo nefolalo amoli neala gelolasila sähalea, Dilia asigi afädë negei nebegoda go wälasimu namialola säsisila aliligi obëgëi. Elea sähalea, Godea Beaha Maadela Sigi Neebea ami moholöïe, nilïa yöi yafie bimolömelëla säla ï.
ACT 14:23 Asi amo obëgësalea, elea Godea wela ifosi sege hïdo hïdolagi dolö odoa asigi gäwi dafidilo nefolalebe amolia sigi aligimäia memelela ifosisi. Ifosisilahilä, molö made naala aiala nea, udia dolö Dafidilo Geloima asigi afädë negei nefolalo amoli Godema adola ema gausisila aliligi asi.
ACT 14:24 Amalahilä Bisidia sege baagila awäla Bäfilia segea besela galai.
ACT 14:25 Besela galalahilä elea Bega gaamugi ami Godeïe ado mala säla ïalahilä, Adalia digai.
ACT 14:26 Adaliala ödä sibigi fila Ädiago obëgëi. Dafidi Ädiago ami elea hamoi hamola wagai amo hamomäia Godea udia dolö wela ifosi Ädiago nefolalo amolia Godea ele ugila negemäia ele Godema adolasila gausia ami obëgëi.
ACT 14:27 Ami besela galalahilä, elea udia dolö Godea wela ifosi nefolalo amoli gegedomalolahilä, Godea elemadi aligila hamoi amo ilima awala säla ïaha maadei. Elea sähalea, Udia dolö fii odoa amoli Yesuma asigi afädë negemäia ea idi doga negei gabiola säla ï.
ACT 14:28 Eleda segeyo yafie Yesu bëgëla aulo amolibalä ami nelo.
ACT 15:1 Dolö odoa Yudiala digalahilä ilia edoolalima säla olelesalea sähalea, Mosese nebegi säla negei dibe amo gadola, gafodo damulo mala dibe amo made hamoseda, Godea dili made damula moholömelëla säla ï.
ACT 15:2 Amala säla ï amo nabalahilä, Folole Banabasalea dolö amolibalä didiähalea holöfalï made gëgëi. Amalebe ilia Folole Banabasale dolö odoa nefolalo amolibalä mala amo hamogimolöïe abosolo amolimage, asigi gäwi dafidilo nefolalo amolimage, nabuäia Yalusaleme fedamalai.
ACT 15:3 Amala säi amo gadola, Godea wela ifosi nefolalo amolia mosalosebegi ili fedafiai. Fedafiahalea, ilia Fonisiamadige Sameliamadige udia dolö nefolalo amolima fii odoa nefolalo amoli Godema asigi afädë negeimelëla säla ïïa fedafiai. Ado amala säi amo nabalahilä, edoolalia edefademalä obeägïsa nefolalo.
ACT 15:4 Ili fedafiala Yalusaleme besela galasebegi, udia dolö Godea wela ifosi nefolalo amoliage, abosolo amoliage, asigi gäwi dafidilo nefolalo amolalia dili mofiaha golela säla olei. Amasebegi Folole Banabasalea Godea elema aligila hamoi amo sulubadela ilima säla ïaha maadei.
ACT 15:5 Amai gaso, Felesi sosogo odoa asigi afädë negei nefolalo amolia nowela aligilahilä sähalea, Fii odoa amoliage gafodo damumolö dialea. Amase, Mosese nebegi Ado säla negei amoge ilia hamomäia säla ïmolö dialeala säi.
ACT 15:6 Ado amo hamogimolöïe abosologe, asigi gäwi dafidilo nefolalo amolalige gegedoi.
ACT 15:7 Gegedolahilä ado säsäla awäla gidogo gadogosebegi, Fida e nowela aligilahilä ilima sähalea, Nedoola dili-e, fii odoa nefolalebe amolia Ado Mala Hedabi nïe nafia nabalahilä asigi afädë negemäia Godea dafidifalï diligi ne memelei amo dilia dawadigi.
ACT 15:8 Sulubadelaïe iso asigi dawadigi neebe Gode amea udia dolö fii odoa nefolalebe ilige dofea neebela ulufadigila olesalea ïe Eleloi Gesami nilïgali ï amo gadola iligalige ïmelë.
ACT 15:9 Eada ilige nilïge mogogi nofeida maade. Ilia Yesuma asigi afädë negesebegi, ilile nafade hamoi amo ea hëla fisimelë.
ACT 15:10 Amaimo, dilia Gode fedogola bimolölahilä adu yöi edefade nilïage nilïle naado amoliage ägümolöi made amo bëgëla aulo nefolalebe amolia ägümäia neala ägüsi amo mi edoïe.
ACT 15:11 Amala hamomolöi mademelë. Nilïa helësësaleada, Dafidilo Geloi Yesuïe ugila negeloea ili damula asi amo gadola nilïge damula asila helësësamelëla Fidaea säi.
ACT 15:12 Amala säsebegi, Banabasale Fololea udia dolö fii odoabalä nea, Godea elema aligila nea dolöea hamomolöi made gadoige hïdo elöige hamoi amo sulubadela gegedoi sefolalebe amolima elea säla ï. Säla ïaha nebegi, ilia ado adola made, nalabola sefolalo.
ACT 15:13 Elea ado säha maadesebegi Yamesea sähalea, Nedoola dili-e, na säsebewe nabuö.
ACT 15:14 Godea udia dolö fii odoa nefolalebe amoli hamei amo dafidi olela odoa iligi ïe namiäia memelei amo Saimonoea nilïma awala säla ïmelë.
ACT 15:15 Säla ï amo gadola bea sälo nefolalo amolia ado amo wäla säla negei dialea. Amoda gomalä dëdëla negei dialea.
ACT 15:16 Dafidilo Geloia sähalea, Hobea ne obëgëlahilä, na Debidiïe mosö dagabola digai amo hamogimolö. Mosö hai dibe amo hahamogilahilä gelolasimolömelë.
ACT 15:17 Mida, udia dolö fii odoa amolia Dafidilo Geloi hogomäia amamolömelë. Fii odoa nïe ëi gaula neebe amoli sulubadelaea ne hogomäia amamolömelëla säi. Gowe sulubadela hamolo Dafidilo Geloia amala säila säla dëdëla negei dialea.
ACT 15:18 Amoda siibafalï nilïa dawadigi.
ACT 15:19 Na sämolö helësësebe amoda gowe. Udia dolö fii odoaea Godema asigi besusa neebe amolida nilïa neala yölasimolö amo dofea made.
ACT 15:20 Ilia yöi made gaumäia nilïa ilima beba gomalä dëdëla fisiga gadelä. Age gowe, molö nülo dibe amogi wäfalï godegali göa nelegela ï muabio. Agedu gowe, udia dolö fa nimabio. Osoda gowe, hogoi elö elöla sebe amo nufudahalea, muugia heale gälo sali amola muabio. Biyidu gowe, heale hï eege muabio. Amoli dëdëla fisiga gadelä.
ACT 15:21 Mida, siibafalï Mosese nebegi mala säla negei dibe amoda gaamu sulubadelagi dolö odoaea säla ïahamu aligilo. Ïe ado mala amoda gedolo mosö difolalebea ami segeyo Sabada gafe sulubadelagi nidesamu aligilomelëla Yamesea säi.
ACT 15:22 Amala säsebegi, abosolo amoliage, asigi gäwi dafidilo nefolalo amoliage, amase, udia dolö Godea wela ifosi ami nefolalo amoli sulubadelaeage ado afädë negelahilä sähalea, Nilï neebewegi dolö odoa Folole Banabasalebalä Ädiago mosäia memeledelämelëla säi. Amala sälahilä ilia Yudasale, ïe ëi elöda Basabasa, Sailasale memelei. Eleda edoolali amoligi dafidilo nelo.
ACT 15:23 Beba ilia gaula mosäia gomalä säla dëdëla ï. Abosolo nilïage, asigi gäwi dafidilo nefolalebeweage, dilile didoo nefolalebe nilïa nilïle nedoo fii odoa Ädiagoge Siliamadige Silisiamadige nefolalebe dilima dili go gabiola säla beba gowe dëdëla ïasisago.
ACT 15:24 Nilï neebewegi odoaea dilima ado säla ï amea dili fudugila asigi säosäola nefolaleai amo nilïa nabi. Ilia amo amala sämalola nilïa made säimelë.
ACT 15:25 Amoïe nilïa ado afädë negelahilä, dolö memelei amoli nilïle damelë aeaifalï Banabasale Fololebalä dili neebea fisiga idamolöla helësëi.
ACT 15:26 Dolö äudä amoleada nilïle Dafidilo Geloi Yesu Gelesoïe ëigi hamoi hamosalea baagomolö ga made dibea amimu ga madela aligilomelë.
ACT 15:27 Nilïa amala helësëi amo gadola Yudasale Sailasalea bebagi ado dëdëi amo gadola adoea säla ïmäia dili neebea mosalahagomelë.
ACT 15:28 Eleloi Gesamiage nilïage yöi afädë dilima neala baalasiloea nilïa ado geloi biyidiamu dilia hamomäia säla ïmolöla helësëi. Amoda gowe ili.
ACT 15:29 Age gowe, molö nülo dibe amogi wäfalï godegali göa nelegela ï muabio. Agedu gowe, heale hï e muabio. Osoda gowe, hogoi elö elöla sebe amo nufudahalea, muugia heale gälo sali amola muabio. Biyidu gowe, udia dolö fa nimabio. Amo hamomabiola säi amo hamola made sisigaha aligiseda, hedabola namolömelë. Hä amomelë. Hawiola säla dëdëla ï.
ACT 15:30 Hä mofiamalolahilä ili Ädiago digai. Digala besela galalahilä ilia Geleso sosogo nefolalo amoli gegedomalolahilä beba dëdëi amo ilima ï.
ACT 15:31 Amala ïasebegi udia dolö amolia dëdëi amo nidei. Ado hedabi dëdëi amo nidei amea ilile asigi neala gelolasisebe amogi obeägï.
ACT 15:32 Yudasale Sailasaleage bea sälo nea, edoolali bologodei namiäia neala asigi gelolasila ilima ado yafie säla ïahamu nelo.
ACT 15:33 Ele Ädiago ami segeyo holöbö ede nelolahilä, ilia dafidi ele mosalola sälo nefolalebea ami obëgëmäia edoolalia aealo alima diamiäialahilä, Hawio obëgëmalola säi.
ACT 15:35 Folole Banabasale Ädiago ami nea, eleage dolö odoa yafieage amolalia Dafidilo Geloiïe ado mala säla ïadigi säla olela digisa nelo.
ACT 15:36 Segeyo odoa nelolahilä Foloea Banabasama sähalea, Gaamu sulubadelagi Dafidilo Geloiïe ado mala säla ïa ami edoolali hedabola neebelela fädäla bebea obëgëdila säi.
ACT 15:37 Amala säsebegi, Banabasaea Yone Maga helësëlahilä, nihïlïgïla afiahala säi.
ACT 15:38 Amai gaso, Foloea e sigi moholö amo dofea madela helësëi. Mida, dafidi ea elebalä hamoi hamomolö made awäla ele dïgïla Bäfiliala bahïla obëgëi amogi.
ACT 15:39 Amala helësësebegi Folole Banabasale helemu edefade gëgëlahilä mogela, Banabasaea Maga sigi gaula ele Saibulusi moholöïe ödä sibigi fila asi.
ACT 15:40 Amase, Foloea Sailasa memelesebegi edoolalia sähalea, Godeïe ugila negelo alibalä namialola säsebegi, ele asi.
ACT 15:41 Ele awäla Folo e Siliamadige Silisiamadige nawesa nea, udia dolö Godea wela ifosisi sege amoligi nefolalo amoli neala gelolasisila aliligi asi.
ACT 16:1 Folo e awähamu nelolahilä, Debige Ilisidalage awäla besela galai. Ami bëgëla aulo afädë ëi Dimodi nelo. Ïe emeda Yu fii udia gaso, ïe eedoda Giligi dolö nelo. Emeda asigi afädë negei sulo.
ACT 16:2 Edoolali Ilisidala ami fiiage Aigoniama fiiage Dimodi eda asigi mogoi neala sälo nelo.
ACT 16:3 Foloea Dimodi ebalä moholöla helësëlahilä, ea Dimodiïe gafodo damulasi. Amala hamoi amoïe mida, segea ami Yu udia dolö neebe amoli sulubadelaeada Dimodiïe eedoda Giligi dolö neala dawadigi neebe amo helësëlahilä amala hamoi.
ACT 16:4 Ili gaamu dibeamadi amogi nawesalea ilia abosologe, asigi gäwi dafidiloge Yalusaleme ami nefolalo amolia mala säla negei amo gadola ilia bëgëla hamomäia ilima säla ïïa awäha nelo.
ACT 16:5 Amalebe udia dolö Godea wela ifosi nefolalo amoli Yesuma asigi afädë negemolömadi neala gelolasilahilä, segeyo sulubadelagi odoaea asigi afädë negelahilä ilima maala baala bäusa nelo.
ACT 16:6 Eleloi Gesamia ilia Esiamadi ado mala säla ïmolö mosabiola idi gasebegi, ili Filigiamadile Galesiamadilemu nawesa namolö asi.
ACT 16:7 Misia sege nofea ami awäla besela galalahilä, ili Bidiniamadi awäla besela galamolö helësësebegi, Yesuïe Gesamia mosabiola idi gai.
ACT 16:8 Amala idi gasebegi, ili Misia baagila digala gaamu Doloasa awäla besela galai.
ACT 16:9 Awäla besela galasolo amo gala, gasigi Foloea sosoäla awäla beahaleamelebe, Masedonia fii dolö afädëa ema sähalea, Dia nilï Masedonia ugila negemolö duhulu dëgëla misialola säha neebe melï.
ACT 16:10 Foloea amala sosoäla awäla beasebegi, hä, nilï fodolofalï Masedonia moholöïe fu hogosa neada, Godea nilïa ilima Ado Mala Hedabi säla ïmäia neala olei gabula helësëi.
ACT 16:11 Amalahilä nilïa Doloasa dïgïla ödä sibigi fila mogolafalï awäla Samodelese besela galai. Amo aiyo amogi oböla awäla Neabolisi besela galai.
ACT 16:12 Neabolisi amila nagadabodo awäla Filibai besela galai. Gaamu amoda Masedonia segeïe afädë dilo. Amida Olomo gamane maala aligilo. Nilï ami segeyo odoa nelo.
ACT 16:13 Segeyo Sabada gafegi Filibai gaamu amoïe yala idi galo baagido doadigila awäla, ödä afädëïe agesua Godema adolo sege dialealedula helësëlahilä, nilï ödägi ami afiai. Ami awäla udiafalï odoa gegedola sefolalebe amolibalä fifigilahilä adosa sefolalo.
ACT 16:14 Daiadaila udia afädë ëi Ilidia sulo. Ado säi amo ea nabaha sulo. Udia ameada fagulo hogale uii gadoi amo bidi neaha aligilo. Ea Godeïe ëi gauia adala Godema adosa filo. Foloea ado mala säla ïaha nebegi, Ilidiaea mala amo hedabola nabala gaula mogomäia Dafidilo Geloia ïe iso asigi doga negelasi.
ACT 16:15 Amala hamosebegi, Ilidiage ïe mosöa ami aligilo amolige ödägi gei. Ödägi gesebegi Ilidiaea nilïma sähalea, Dafidilo Geloima na dofä asigi afädë negei gabula helësësa galëda, na mosöa namolö mofiamalola säi. Ea ähadulamu eegesebegi nilï ea mosöa afiai.
ACT 16:16 Nilï Godema adolo segea ami awäha nebegi, dolïsä afädë galabaia hamoi gadoi hamolasilo sulo amoma, mugabe fedalahilä meualasilo sulo amo, nilïa gausiala digai. Dolïsä amea meuasebe amoïe, udia dolö nefolalo amolia ïe beaha aligilo nefolalo amoligali muni ede ïlo nelo.
ACT 16:17 Folola nihïlïgïla awäha nebegi, dolïsä amea bëgëla maalahilä üala sähalea, Dolö golida Gode Dofä Ilibia Edefade neebe amoïe hamoi hamolasilo neamelë. Dili damula aulo neala gaumäia, ilia säla ïlo neala säi.
ACT 16:18 Dolïsä amea segeyo yafiegi ado amala sähamu aligisebegi, Foloea habobalahilä besuia imogola mugabe fedai amoma sähalea, Yesu Gelesoïe ëigila sähago. Dolïsä go dïgïla, segea mosöla säi. Amala säi amole, mugabe amo doadigila asi.
ACT 16:19 Amala hamosebegi, dolïsä amoïe beaha aligilo amolia hobeala muni bu elö made nimolö gabula helësëlahilä, ilia Folole Sailasale gaulahilä, magaia gaamugi sigi aligilo nefolalebea ami, ele gaula dusugaia asi.
ACT 16:20 Ilia Olomo gamane gudi mogelo nefolalo amoli neebea ami sigi awälahilä sähalea, Yu dolö äudä gowelea nilïle gaamugi wi maalahilä, udia dolö neala nafadelasisebemelë.
ACT 16:21 Nilïa hamomolö madela säla negei dibe amoda, elea hamomalola säla olelesa neamelë. Mala olelesebe amoda, Olomo dolö nefolalebe nilïada amo nabala hamomolöi mademelëla säi.
ACT 16:22 Amala säi amo nabalahilä, udia dolö gegedoi amoliage ele nufulö hamosebegi, gudi mogelo amolia elele fagulo giila digilahilä, ele buudi damuia nufualai.
ACT 16:23 Ilia gelola nufudala ïalalelahilä, Folole Sailasale dusugaia awäla, galabaia mosöa ifosilahilä, galabaia beaha aligilo amoma gelola sähalea, Ele hedabola idihë namialola säla ï.
ACT 16:24 Amala säla ïasebegi, galabaia sigi aligilo amea ele galabaia mosö hogoli mogogi amogi gaula awäla ifosilahilä, elele emo i gäia igadula negesi.
ACT 16:25 Gasi mogogi Folole Sailasalea Godema adola digi, ïe ëi gauia adala gë udäla digisebe amo, odoa galabaia mosöa sefolalo amolia nabi.
ACT 16:26 Amala säha sebegi, fogoli edefademalä fodolo maalahilä, galabaia mosö igau fogosa maadei. Amala hamoi amole, mosö amoïe idi galo doga negesa maadelahilä, igi ëfëa ili sulubadela nafodoi amoge, holola fisigäla digaha maadei.
ACT 16:27 Amala hamoi amogi, galabaia beaha aligilo amo adi elaboi amo nowelahilä beahamelebe, idi galo sulubadela doga negesa maadei dibe amo bealahilä, galabaia negei amoli fisäla awäha maadei gabula helësëi. Amala helësëlahilä, ea hïle nudulo helebe besela neala, hï e nufudala baagodelä hamosebegi,
ACT 16:28 Foloea ado gelolafalï sähalea, A, di dihïmu nufuabio. Nilïda fisäla made asimelë. Sulubadela sefolaleawela säi.
ACT 16:29 Amala säi amo nabalahilä, galabaia beaha aligilo amea gele gaula mofiamola sälahilä, Folole Sailasale sebea baluluia awäla, e emo gigisëla elele emo mia gumusula dia digai.
ACT 16:30 Amala hamolahilä, ea ele segea sigi fedalahilä elema sähalea, Dafidilo äudä ali-e, Godea ne damula mosäia na abilia hamomolödula nabi.
ACT 16:31 Amala nabasebegi, elea säla obëgësalea, Dafidilo Geloi Yesuma asigi afädë negeseda, dihïdige, dïe mosöa ami aligilo amolige, damula moholömelëla säla ï.
ACT 16:32 Amala sälahilä, elea emage, ïe mosöa aligilo amolimage, Dafidilo Geloiïe ado mala säla ïaha nelo.
ACT 16:33 Amo gala, gasi mogogi galabaia beaha aligilo amea ele sigi awälahilä, elele domalogi buudi damuia nufi amo nigime hëlasi. Amala hamosebegi, eege ea mosöa aligilo amolige ödägi gelasi.
ACT 16:34 Ödägi gelasisebegi, ea ele ea mosöa sigi awälahilä, ele molö muäia ï. Eage, ea mosöa aligilo amoliage, ilia Godema asigi afädë negei amogi edefade obeägïsa nelo.
ACT 16:35 Yose Olomo gamane gudi mogelo amolia dadi gaui nefolalo amolima ado säsisalea sähalea, Dolö äudä amole fisigämäia säla ïmalola säsi.
ACT 16:36 Amala säsi amo nabalahilä, galabaia beaha aligilo amea Foloma säla ïahalea, Na ali fisigämalola gudi mogelo amolia säsi gabumelë. Ilia amala säsi gabugi ali doadigila awähalea dalulo go gaula geleä mosalola säi.
ACT 16:37 Amala säsebegi, gaso, Foloea dadi gaui mofiai amolima sähalea, Alïda Olomo dolö amogi neebe amo ilia gudila made, udia dolö si mogogi buudi damuia alï nufi. Nufudalahilä galabaia mosöa gaula dusugaia awäla ifosisio. Amaimo, iliada walio alï geleä musügä fisigäla mosalasiole. Ai, amala mademelë. Hili ili maalahilä alï fisigämäiamelëla säi.
ACT 16:38 Foloea säi amo gadola dadi gaui amolia gudi mogelo amolima säla ïasebegi, ele Olomo dolö amogi gabiola säi amo nabalahilä ili bedäi.
ACT 16:39 Amalahilä ilia ele neebea awäla elema aeala sähalea, Asiala hamoimelëla sälahilä, amila sigi segea doadigila awäla gaamu we dïgïla mosäiamelëla geleä säi.
ACT 16:40 Amala säsebegi, ele galabaia mosö dïgïla awäla Ilidiaea mosöa asi. Mosöa amida edoolali sefolalebe amoli bealahilä, elea ili neala gelolasilahilä asi.
ACT 17:1 Ili asi amo awäla Äfibolisige Aboloniage besela galala digila awäla giso Desalonaiga besela galai. Gaamugi amida Yu udia dolöïe gedolo mosö afädë nelo.
ACT 17:2 Dafidi Folo e sege odoagi nea gedolo mosöa aulo amo gadola e awäla gedolo mosöa ami digai. Gedolo mosöa ami Foloea segeyo Sabada gafe ohodoagi gegedola mofiai amolibalä ado bebagi säla dëdëla negei amo ilima säla ïaha nelo.
ACT 17:3 Amala säla ïaha nea ea ilima Godeïe ado mi ulufadigila awala säla ïaha nelo. Ea ilima sähalea, Afädë Memeleia së naala baagola nowemolöla bea sälo amolia dofä amala säla dëdëla negei dialea. Yesuda na walio dilima säla ïahago. Amoda Afädë Memelei amomelëla Foloea säi.
ACT 17:4 Amala säla ïasebegi, odoa ami nefolalo amolia ea dofä säsebela helësëlahilä Folole Sailasalebalä dii. Giligi udia dolö Godeïe ëi gauia adalo yafieage udia dafidila fii odoaeage amai.
ACT 17:5 Amai gaso, Yu dolö nefolalo amolia naabo gëlahilä, dolö nafade hamolo memalä magaia gaamugi nawesa aligilo nefolalo odoa amoli hobe nii. Hobe nealahilä udia dolö yafie gegedolasila, ado gelolafalï säi amea ili sulubadelaea gaamugi ami nududulä hamoi. Amala hamola ilia Folole Sailasale udia dolö neebea sigi moholöïe ele hogosalea dolö afädë ëi Yeisonoïe mosöa ami fudulasia awäla hogola digai.
ACT 17:6 Awäla hogoi amo ele made beasebegi, ilia Yeisonoge edoo odoa amolali gaula dusugaia awäla galïsolö dolö amoli neebea awälahilä gelolafalï sähalea, Dolö sege sulubadelagi nafade yafie daidola hamosa maadelo amolia hä nilïle segea besela galai gabumelë.
ACT 17:7 Besela galasebegi Yeisonoea ïe mosöa fimäia fu ï gabio. Ili sulubadelaea beaha aligilo gini elö Yesu neebe amo sähaleada, beaha aligilo Gini Sisa neebe amea hamolo mala säla negei dibe amoda damusa neamelëla säi.
ACT 17:8 Udia dolö sulubadela nefolalo amolige galïsolö dolö nefolalo amolige ilia ado säi amo nabalahilä, fudugila bedäi.
ACT 17:9 Fudugila bedäsebegi galïsolö dolö amolia Yeisonoeage dolö odoa ebalä gaui amoliage ili fisigämolöïe muni ïmalasebegi, ïmalasebe amo gadola ïasebegi ili fisigäi.
ACT 17:10 Segeyo amoïe gasigi edoolalia Folole Sailasale Belia moholö mosalola säi. Amala säsebegi, ele awäla Belia besela galalahilä, Yu udia dolöïe gedolo mosöa ami asi.
ACT 17:11 Udia dolö Belia ami sefolalo amolile asigi fisigäi ameada Desalonaiga udia dolö amoli baagila asi. Ilia Godeïe ado mala nabulö edefademalä obeägïla nabahamu nelo. Nabalahilä, ilia Foloea ado mala säla ï amo dofä walebelela bimolöïe segeyo sulubadelagi bebagi ado dëdëla negei amo nidela fädäla beaha aligilo.
ACT 17:12 Amala hamolahilä ili yafiea asigi afädë negei. Giligi udia dafidila fii sefolalo amoliage, amase, Giligi dolö yafieage asigi afädë negei.
ACT 17:13 Amala hamosebegi, Foloea Belia amige Godeïe ado mala säla ïaha neala säi amo nabalahilä, Yu dolö Desalonaiga nefolalo amoli Belia ami mafulahilä, udia dolö amoli fudugila bedämäia ili neala fologolasi.
ACT 17:14 Amala hamosebegi, edoolalia Folo e ödä duhulu dibeamadi amodi mosäia fodolofalï fisiga gai. Sailasale Dimodile made awäla Belia ami nelo.
ACT 17:15 Folo ifola afiai amolia e Adenesi gaamugi ami ifosila obëgësebegi, Foloea ilima ado säsisalea, Sailasale Dimodile ne neebea fodolofalï misiäia säla ïmalola säsisebegi ili obëgëi.
ACT 17:16 Folo e ele misiäia Adenesi ami beaha nea beahamelebe, gaamugi ami nelebo yafie wäfalï godegali göa nelegela sämolöïe naaboea hamoi difolalebe amo bealahilä, ïe asigigi edefademalä yösa nelo.
ACT 17:17 Amogi yöla ea gedolo mosöa ami awälahilä, Yu udia dolö nefolalo amolibaläge odoa Godeïe ëi gauia adalo nefolalo amolibaläge didiäha nelo. Magaia gaamu dibea amige segeyo sulubadelagi udia dolö gausiasebe amolibalä ea didiäha nelo.
ACT 17:18 Ebigulia sosogo mala olelelo dolö odoaeage Sidoigi sosogo mala olelelo dolö odoaeage Folobalä säla obëgë obëgësa nelo. Ili odoaea sähaleada, E dawadigi gadoi hamola säha neebe goda, edo säsebela säi. Amase, ili odoaea sähaleada, Sege näiadodi amolile godeïe mala säla ïahaledula säi. Ilia amala säi amoïe mida gowe. Foloea Yesuïe malage baagoi amoli nowemolö malage säla ï amogi amai.
ACT 17:19 Amala sälahilä ilia Folo e sigi awäla Aliobagusa Galïsolö dolö amoli gegedola adolo segea ami awälahilä ilia ema sähalea, Dia mala gähe säla olelelo amo nilïa nabulö hamesamelë.
ACT 17:20 Ado odoa säi amo hïdo elöi gabugi, amoïe mi helësëdeläla säi.
ACT 17:21 (Adenesi fii amoliage, amase, sege näiadodi fii Adenesi ami maala nefolalo amoliage nelebo odoada hamolo made, segeyo sulubadelagi iliada mala gähe elöi elö elöla sämolöge nabulöge amomu hamosamu aligilo.)
ACT 17:22 Amasebegi Foloea Aliobagusa Galïsolö dolö amoli mogogi nowela nea sähalea, Adenesi fii dili-e, dilia nelebo afädë hamosebego na beahaleada, dilia göa nelegela hamolo mala amo gelola hamei gabula helësësamelë.
ACT 17:23 Na nawesalea beahamelebe, dilile göa nelegela sälo mosö yafie melï. Beahaleamelebe göa nelegela nufudala ïlo auli afädë aulula negei dibea ami gomalä dëdëla negei dibeo. gode nilïa dawa madegalila dëdëla negei dibeo. Dilia Gode dawa made nea e helësëlo. Amo hïle ado malafalï amo na walio dilima säla ïahagomelë.
ACT 17:24 Godeada sege dibe sulubadelage nelebo sulubadela amogi dibe neebe sebe amoge hamosa maadei. Gode eda mudaiaïege nagadaiaïege Dafidilo Geloi nea. Gode amoda gobela ïlo mosö naaboea hamoi amoligi aligilo made nea.
ACT 17:25 Eda nelebo afädë ufola adida made neebe amo dolöfäea e ugila negela nelebo afädë ïmolöi mademelë. Mida gowe. Ea namolöge hamege nelebo sulubadelage udia dolö sulubadelagali ïmolöda hï e nea.
ACT 17:26 Eada mi gäwila dolö afädë hamoi amoma aligila udia dolö fii sulubadela hahamola sege sulubadelagi awäha namialai. Aso, amala made hamola nebegi, dafidifalï ea daiaha maadelahilä, udia dolö ili amo gala gowegi namiäiala helësëlahilä, ilile sege nofela daiala negei.
ACT 17:27 Ea ili hamoi amoïe mida gowe. Ilia e hogomäiage nagubaia nawela e beagolemäiage ea ili hamoi. Gode eda nilï hïdo hïdola neebea wagadi made made nea.
ACT 17:28 Mi ema aligilahilä, ïe geloigi nilï segegi fila digi fologola digisa sebewemelë. Amo gadola diligi ado dëdëlo dolö odoa nefolalo amolia sähalea, Nilïge ïe malölali neamelëla sälo.
ACT 17:29 Hä nilïda Godeïe malö neebe amea, nilïa e goloeage silibaeage igiage, nelebo afädë dolöea ïe asigia naaboea hamola negei difolalebe amoma Godeda amo gadoi neala helësëmolöi mademelë.
ACT 17:30 Godeada dafidi udia dolöea e dawa made nea hamoi amoda ea helësëlo made nelo. Amalo gasoda, walio ea udia dolö sege föi sulubadelagi neebe amo sulubadelaea asigi besumalola gelola säha nea.
ACT 17:31 Ea dolö afädë memelei amoïe aulodaiala udia dolö sege sulubadelagi nefolalebe amolibalä mogolafalï memelela mogemolöïe segeyo afädë daiai amo dialea. Ea dolö memelei amo baagola nowela ifosi amea udia dolö nefolalebe sulubadelabalä amala hamomolömelëla dofä gelola säla negei amo oleimelëla Foloea säi.
ACT 17:32 Baagoi amoli nowemolöla säi amo nabalahilä, dolö odoa nefolalo amolia ölahilä e gadiaboi. Amase, odoaea sähalea, Ado walio säla ï amo hobeala bu elö nabulö helësësamelëla säla ï.
ACT 17:33 Amala säsebegi, Foloea ili amilahilä dïgïla asi.
ACT 17:34 Amala awäsebegi dolö odoa nefolalo amolia ebalä dila asigi afädë negei. Asigi afädë negei amoligi dolö afädëïe ëida Daionisiasa, eda Aliobagusa Galïsolö dolö nelo. Eage, amase, udia afädë ëi Damalisi eage, amase, odoaeage elebalä asigi afädë negei.
ACT 18:1 Amala hamosebegi, Folo e Adenesi dïgïla Golïdi asi.
ACT 18:2 Golïdi ami Yu dolö afädë ëi Aguila gausiai. Eda Bödasa fii dolö. Beaha aligilo Gini Golodiasaea Yu fii Olomo nefolalebe amoli sulubadelama näiadodi afiaha maademalola säsebegi, Aguila ïe udia Bilisilale Idali sege dïgïla hädamade misi nelo. Folo e ele sebea asi.
ACT 18:3 Foloeage Aguila Bilisilaleage hamoi afädë hamolo. Amalebe e elea mosöa gedola nea eage hamoi hamosa nelo. Ili bidi nimolöïe ilile hamoida balai mosö nedëmesa aligilo.
ACT 18:4 Amo hamosa neada Foloea segeyo Sabada gafe sulubadelagi gedolo mosöa ami awälahilä, gegedoi amolibalä didiäha nelo. Yu udia dolö odoaeage Giligi udia dolö odoaeage ea dofä säsebela helësëi.
ACT 18:5 Sailasale Dimodile Masedoniala digasebegi, Foloea segeyo sulubadelagi Godeïe ado mala säla ïahamu nelo. Ea Yu udia dolö nefolalo amolima Afädë Memelei amoda Yesu neamelëla gelola säla ïaha nelo.
ACT 18:6 Amala säla ïaha nebegi gaso, ilia made nabalahilä e baagido säla digi gagadela digisa nelo. Amala hamosebegi, Foloea ïe fagulo fëfëla digilahilä, ea ilima sähalea, Dili nafadegi awäseda, dihili asiala hamoi ameamelë. Asialada nema mademelë. Walio neebe wegida ne awäla udia dolö fii odoa nefolalebea moholömelëla säi.
ACT 18:7 Amala sälahilä, amila ili dïgïla Folo e dolö afädë ëi Didiasa Yasadusi amea mosöa asi. Ïe mosöda gedolo mosö gägägëlafalï nelo. Dolö ameada Godeïe ëi gauia adalo nelo.
ACT 18:8 Gedolo mosö beaha aligilo ëi Galisibusaeage ea mosöa aligilo amoliage ilia Dafidilo Geloima asigi afädë negela nelo. Amase, Golïdi udia dolö yafie nefolalo amoliage nabalahilä asigi afädë negesebegi ili ödägi gei.
ACT 18:9 Gasi afädëgi Foloea sosoäla awäla beahaleamelebe, Dafidilo Geloia ema sähalea, Bedäla nafi yömabio. Mala säla ïahamu namialo.
ACT 18:10 Mida, ne dibalä neamelë. Gaamugi guida, udia dolö yafie nïe neebe amea afädëa di nufudala sëlasimolö mademelëla säla ï.
ACT 18:11 Amala säla ïasebegi, Foloea udia dolö nefolalo amolima Godeïe ado mala säla ïaha nea gäheo i afädëïe, elö amoïe aube gafeia ami nelo.
ACT 18:12 Agaia sege Galioea beaha aligilo nelo amo gaalu, Yu fii nefolalo amoli ado afädë negela ilia Folobalä ado neala e gaulahilä gudilo mosöa sigi asi.
ACT 18:13 Sigi awälahilä ilia sähalea, Udia dolö nefolalebe amolia Godeïe ëi gauia adamäia dolö gowea mala säla negei dibe amo gadola made, mala elöi säla, säla olelesa neamelëla säi.
ACT 18:14 Amala säsebegi, Foloea ado sädelä hamosa nebegi, Galioea Yu fii amolima sähalea, Yu dolöla dili-e, mala dabiala nafade hamoiïe sämolö mofiai galebeda, amoda na habobala made hedabola nabalabio.
ACT 18:15 Gasoda, adoge ëige dihilile mala säla negeige amolilemu galëda, amoda dihili hamogimalo. Goïeda na made mogemolömelëla säi.
ACT 18:16 Amala sälahilä ea ili gudilo mosöa amilahilä nesila digi.
ACT 18:17 Amala hamosebegi, ili sulubadelaea gedolo mosö beaha aligilo ïe ëi Sosodenisi nelo amo gaulahilä, gudilo mosö baagido segeamadi ami nea, nufudaha nelo. Amala nufudasebegi Galioeada hilile hamoi hamosebegola helësëlahilä ea adola made nelo.
ACT 18:18 Amala hamosebegi, Folo e Golïdi ami segeyo odoa nelolahilä ea edoolalima dili samialola säla, ödä sibigi fila Silia segea moholö asi. Bilisilale Aguilalege hiligila asi. Awäla Sëgilia gaamua ami nea Foloea Godema afädë hamomolömelëla säla negei amea ïe busa hilï damusa maadei.
ACT 18:19 Amalahilä awäla Ebesa besela galai. Besela galalahilä Foloea ele ami dïgïlahilä, hïdo awäla gedolo mosö neebea ami besela galai. Besela galalahilä Yu dolö nefolalo amolibalä ado didiäha dilo.
ACT 18:20 Amala didiäha dibegi ilia ema sähalea, Dida nilïbalä holöbö sedade namiäiamelëla säi. Ilia Amala säsebegi, Foloea ilima üla made säi.
ACT 18:21 E moholö nea ea ilima sähalea, Ne dili neebea obëgëmäiala Godea hameseda, amoda ne obëgëmolömelëla säi. Amala sälahilä ea ili hawiola sälahilä e Ebesa dïgïla ödä sibigi fila asi.
ACT 18:22 Awäla ödä agesua besela galalahilä Sisalia gaamugi besela galai. Besela galalahilä awäla e fedalahilä udia dolö Godea wela ifosi nefolalo amolima dili go gabiola säla olelahilä awäla Ädiago digai.
ACT 18:23 Folo e Ädiago ami holöbö ede nelolahilä, e awäla Galesiamadige Filigiamadige holöbö aligila baagila digila awähalea, Yesu bëgëla aulo nefolalo amoli sulubadela neala gelolasisila aliligi awäha nelo.
ACT 18:24 Amo gaalu, Yu dolö afädë ëi Abolosi eda Alegisädalia fii nelo amo Ebesa misi. Eada ado hedabola dawadigila adolo nea, bebagi ado dëdëla negei dibe amo hedabola dawadigi nelo.
ACT 18:25 Dafidi Dafidilo Geloiïe idigi aulo mala ema olelei. Ïe iso asigigi sämo sämosa nebegi, ea Yesuïe mala amo udia dolöma hedabola olelesa nelo. Abolosi eada Yonea ödägi gelo mala olelei amomu dawadigi nelo.
ACT 18:26 Abolosia gedolo mosöa ami nea gelola säla ïaha nelo. Amala säla ïasebe amo nabalahilä, Bilisilale Aguilalea Abolosi sigi aliga galahilä, elea Abolosi ea Godeïe idigi aulo mala hedabola helësëmäia mogolafalï säla ïaha nelo.
ACT 18:27 Hobea Abolosi e Agaia segea moholö helësësebegi, edoolalia e gelolasila hä mosalola sälahilä, Yesu bëgëla aulo amolima beba dëdëla ïasisalea Abolosima obeägïlahilä gauia idogomaloi. Abolosi e ami besela galasebegi, udia dolö Godeïe ugila negeloea ili ugila negesebegi asigi afädë negei amoli ea hedabola ugila negesa nelo.
ACT 18:28 Mida, udia dolö yafie gegedoi nebegi, ea bebagi ado dëdëla negei dibe amogila sähalea, Afädë Memelei amoda Yesu e neamelëla ulufadigila säi. Ea ado amo gelolafalï säsebegi, Yu udia dolö hewalahilä ilia adola made sau sagai.
ACT 19:1 Abolosi e Golïdi nebegi Folo e nawesalea segebi gau fedala digala digila awäla Ebesa besela galai. Besela galala Ebesa ami bëgëla aulo odoa gausiai.
ACT 19:2 Gausialahilä ea ilima nabahalea, Dilia Yesuma asigi afädë negeselo amo gala Eleloi Gesami niilela nabi. Amala nabasebegi, ilia säla obëgësalea, Eleloi Gesami neala säi goda nilïa nabi mademelëla säi.
ACT 19:3 Amala säsebegi, Foloea säla obëgësalea, Amai galëda, edoea ödägi geila nabi. Amala nabasebegi, ilia säla obëgësalea, Yonea ödägi gelo amo gadola geimelëla säi.
ACT 19:4 Amala säsebegi, Foloea säla obëgësalea, Yonea ilia nafade hamoi amoïe asigi besula ödägi gelo. Ea udia dolöma sähalea, Ne dafidi misi neamelë. Hobeala afädë moholö amoma dilia asigi afädë negemolö dialeala säi. Hobeala moholöla säi amoda Yesu hï e helësëla säila Foloea säi.
ACT 19:5 Foloea amala säi amo nabalahilä, ili Dafidilo Geloi Yesuïe ëigi ödägi gei.
ACT 19:6 Amasebegi Foloea ilima naabo negesisebegi Eleloi Gesami ilima digala ilia ado elö säla bea säha nelo.
ACT 19:7 Dolö amolida giwilasi gadoi nelo.
ACT 19:8 Amala hamosebegi, Folo e gedolo mosöa ami digai. Aube ohodoagi amala digahamu nea, ea ado mala gelola säla ïahalea, udia dolö nefolalo amolibalä didiähalea, Godea Beaha Maadela Sigi Neebe amoïe mala säla ïaha nelo amoda dofä säi gabula helësëmäia säla ïahamu nelo.
ACT 19:9 Amala säla ïahamu nebegi dolö odoa nefolalo amolia ilile asigi geloi neada asigi afädë made negei. Udia dolö nefolalo amolia nabuäia ilia Idigi aulo mala amo gagadesa nelo. Ilia amala hamosebegi, Foloea ili amilahilä Yesu bëgëla aulo amoli sigi asi. Amala hamolahilä segeyo sulubadelagi ado mala säla didiälo mosö afädë Dilanasaïe neebea ami awälahilä, Foloea Yesu mala säla didiäha nelo.
ACT 19:10 Ea gäheo i äudägi amala hamosamu nelo. Amala hamoi amea Esia segea nefolalebe ili sulubadela, Yu udia dolöeage, Giligi udia dolöeage, Dafidilo Geloiïe ado mala nabi.
ACT 19:11 Godea Foloïe naaboea geloi melëlo made hïdo elöi hamosa nelo.
ACT 19:12 Ïe filïmo dogelo faguloge bululo faguloge hïle domalogi diigilo amo gaula oloi difolalebea ami awäsebegi, oloi damula digi, mugabe doadigila awäla digisa nelo.
ACT 19:13 Amala hamosebegi, Yu dolö nawesalea mugabe fedai nesila digisa aligilo nefolalo amoligi odoaea oodo beala Dafidilo Geloi Yesuïe ëi säla mugabe fedai nefolalo amolima sähalea, Foloea ïe mala säla ïlo Yesu amoïe ëigi dili nesila digisagola sälo.
ACT 19:14 Yu udia dolöïe gobela ïlo busa afädëïe ëi Segebaïe efegelali gifalädalïa amolia amala hamosebegi,
ACT 19:15 mugabe fedai amea ilima säla obëgësalea, Na Yesu dawa, Fologe helësësa. Gasoda, dilida nowëla nabi.
ACT 19:16 Amala nabalahilä dolö amoma mugabe fedai nelo amea ilima nila sadia alogola ïe geloia ili baagila awäla, ili nufudala ïalalesebegi ili mosöa amila sësëla dudugïmu fisäla asi.
ACT 19:17 Amala hamoimelëla säi amo nabalahilä, Ebesa nefolalo sulubadela Yu udia dolöge Giligi udia dolöge edefademalä bedälahilä, Dafidilo Geloi Yesuïe ëi gauia adaha nelo.
ACT 19:18 Amase, asigi afädë negei yafie nefolalo amoli maalahilä, ulufadigila, nilïa nafade amo hamoimelëla säla sisiaha maadei.
ACT 19:19 Golë hamolo yafie nefolalo amolia ilile golëïe beba difolalo amo gaula mafulahilä, udia dolö nefolalo amoli sulubadelaea bimäia gobesa maadei. Beba gobei amoli muni dafidi nii amoda näba gegedolada siliba giwi dausini nabülasi bia gadoia nii.
ACT 19:20 Amo gadola Dafidilo Geloiïe ado mala daidolahilä, edefademalä gelola bäui.
ACT 19:21 Amala hamosebegi, Folo ema Gesamia helësëlasisebegi daiala negesalea, dafidi Masedoniage Agaiage awälahilä, hobeala Yalusaleme moholöi moholöla helësëi. Amala helësëlahilä sähalea, Ami awäha maadelahiläda, Olomoge söfë moholö dialeala säi.
ACT 19:22 Amala sälahilä ea ïe ugila negelo Dimodile Elasadasale Masedonia mosaloi. Ele amala mosalolahilä, e holöbö Esia segea beaha nelo.
ACT 19:23 Amo gala, Idigi aulo mala olelei amogi yömolö holöfalï made, edefade besela galai.
ACT 19:24 Dolö afädë nelo amoïe ëi Demediliasa, ea nelebo elö elöla silibaea hamolo nelo. Ademisiïe odala ïlo mosö gadoi holöfalï afädë afädëla Demediliasaea silibaea hamolo nelo. Ea amo hamolo ameada hamoi hamolasilo nefolalo amolia muni edefade neaha aligilo.
ACT 19:25 Ea ïe hamoi hamolasilo amolige, dolö odoaea hamoi amo gadoi hamolo nefolalo amolige neala gegedolasilahilä sähalea, Dolöla dili-e, nilïa hamoi amo hamolo amea muni edefade nelo amoda dilia dawa.
ACT 19:26 Ebesa wimu made, Esiamadi sege holöbö sulubadelamadida, dolö Folo amea udia dolö yafie dusugala nidilahilä, ilile asigi neala gagaolasila sähalea, Nelebo dolö naaboea hamola nowei amolida, gode madela sälo nea. Amo dilia beadigi nabadigi amomelë.
ACT 19:27 Ea amala hamosa neebe ameada, udia dolö amolia nabalahilä, nilïa bidi nimolöïe hamoi hamolo amoda nafadela säloea. Amomu made, nilïle gode edefade udia Ademisiïe odala ïlo mosöge udia dolöïe siigi memalä gabula säloea. Amase, Esiamadi udia dolö nefolalebe amoliage, udia dolö sege sulubadelagi nefolalebe amoliage dafidi ïe ëi gauia adalo gaso, ïe ëi edefade amo neala nagadaialoeala säi.
ACT 19:28 Ado säi amo nabalahilä, ilia edefademalä mihaläla gelola üalalahilä sähalea, Ebesaïe Ademisida edefademalä neala gelola sähamu nelo.
ACT 19:29 Amaimo, gaamugi nefolalo amoli sulubadelaea üalala dodogösa difolalo. Amala üalala dodogösa difolalea, Masedonia fii dolö äudä Gaiusale Alisadagusale Folobalä nawesa aligilo amole ilia gaalu gedolo gaamu edefade dibea ami fodolofalï sigi gaula asi.
ACT 19:30 Foloea udia dolö yafie gegedoi dibea ami hï äudulä hamosebegi, Yesu bëgëla aulo nefolalo amolia made mosalola säi.
ACT 19:31 Esia sege amoïe gamane beaha aligilo odoa Folobalä damelë hamola aligilo nelo amolia Foloma ado säsisalea sähalea, Di gedolo gaamu dibea ami dofä mosabiola säsi.
ACT 19:32 Ilia amala säsisebe amo gaalu, udia dolö gegedoi amolia gelola üalala dodogöla säha difolalo amea, ili asusugahalea odoaea ado elö säsebegida, odoaeada, oböla, ado elö säla aulo dabela digisa dilo. Ili yafieada, mi goweïe gedoi gabula made helësëi nefolalo.
ACT 19:33 Yu dolö nefolalo amolia Alegisäda e nowela fedala aligisia ami namiäia nabelela gaula fedala ifosisebe amo bealahilä, udia dolö odoaea helësësaleada, mi e gabula helësëi. Amala helësësebegi, Alegisäda e nowela aligilahilä nea naabo usigilisalea, gegedoi amolima ne mademelëla sädelä hamoi.
ACT 19:34 Amala hamoi gaso, ilia eda Yu dolö amogi gabula bealahilä, ado gelola gaalu sähalea, Ebesaïe Ademisida, edefademalä neamelëla säha nebegimu, aoa äudä gadoi asi.
ACT 19:35 Gaamu amoïe gusigusi nelo amea udia dolö sulubadela nefolalo amolima sau sagamolahilä, ea ilima sähalea, Ebesa dolöla dili-e, Ademisi edefade neebe amoïe odala ïlo mosö neebe amoïege, amase, nelebo afädë mudaiala beselala digai dibe amoïege sigi aligiloda Ebesa gaamumu dibe amoda dolö afädëa dawa madeda nowë.
ACT 19:36 Hä, na säi amo gadola afädëa wäfalï säila sämolö ulï ameada, dilia nelebo afädë asigi made gäwila hamolo amo gadola, made hamola, sau sagamo.
ACT 19:37 Dilia dolö äudä sigi misi goweleada odala ïlo mosöa negei amogi afädë made fa nii, dilile gode udia amoge made gagadeimelë.
ACT 19:38 Amaimo, Demediliasaeage ebalä hamoi hamolo neebe amoliage, ilia afädëbalä gudimolö helësësa nea galëda, gamane gudilo dolö neebe amea amoïe gudimolö segeyo odoa daiala negei dialea. Ilia amogi gudimolöi galea.
ACT 19:39 Amomu made ado odoage sämolö helësësa nea galëda, amoda gamane dolö amolia ado giwi sämolö gegedomalola säsegi sämolöi galea.
ACT 19:40 Nilïa walio hamoi amea Olomo gamane neebe ameada, nilïma dilia üalala dodogöla gëgëimelëla sälahilä, nilïbalä gudimolöi gabumelë. Ilia amala hamoseda, nilïa walio gegedola üalala säi amoïe mi goweïe säimelëla sämolöi mademelëla gusigusi amea säla wagai.
ACT 19:41 Amala säla wagalahilä, ea gegedoi nefolalebe amolima afiaha maademalai.
ACT 20:1 Ado gelola üalala dodogöla säha dilo amo sau sagaha maadeibua, Foloea Yesu bëgëla aulo amoli mofiamalolahilä, asigi gelolo mala ilima säla ïalahilä, ne awähamelë, dili hawio, namialola sälahilä, e Masedonia moholö asi.
ACT 20:2 Sege amoligi nawesa nea, Foloea ilima asigi gelolo ado yafie säla ïïa awälahilä, hobeala Giligi segea besela galai.
ACT 20:3 E ami aube ohodoa nelolahilä, hobeala e du neala Silia moholö hamosebegi, Yu fii nefolalo amolia e nufulöla didiäha dialeai amea, e Masedonia obëgëmolöla helësëi.
ACT 20:4 Dolö ebalä asi amolida gowe ili. Gaamu Belialada Bilusaïe malö Sobadage, Desalonaigala Alisadagusa Següdasalage, Debila Gaiusage, amase, Dimodige, Esia segeala Digigusi Dolofimasalage, amoli ebalä asi.
ACT 20:5 Dolö amolida ilidale dafidi awäla nilï misiäia Doloasa ami beaha nelo.
ACT 20:6 Segeyo Edefadegi beledi edelo yidila made gobela molö amo baagilahilä, nilï Filibai dïgïla ödä sibigi fila afiai. Amala afiala ödä sibigi fila segeyo bia awälahilä, afiala ili neebea Doloasa besela galai. Besela galalahilä segeyo gifalädalïa ami nelo.
ACT 20:7 Segeyo gifalädalügi nilï molö molö gedolahilä Foloea ilibalä didiäha nelo. E aiyo amogi moholö gabula helësëlahilä, ea säla ïaha nebegimu gasi mogoi.
ACT 20:8 Mosö ilibia hogoli nilï gedoi amogida gamali wala negei malei dilo.
ACT 20:9 Ami malïsä afädë amoïe ëi Yudigasa e mosö amoïe wïdo holela dagaboidaia ami salea edefademalä süwiala waoi. Foloea sähamu nebegi, Yudigasa süwiala adi elaboi amo hogogolula fedai osodadaia amila bebedoi. Amala hamosebegi, neahamelebe hä, baagoi melï.
ACT 20:10 Folo e digalahilä malïsä amodaia dia fedalahilä naaboea gauia welahilä sähalea, Hame gudusebemelë. Didigaomabula säi.
ACT 20:11 Amala sälahilä Folo e bu fedala beledi dagabodasila nalahilä, ado sedadela säha nebegimu segeyo sagai. Segeyo sagasebegi, e asi.
ACT 20:12 Malö amo made baagoi sebegi, ilia e sigi awähalea ilile iso asigia edefade obeägï.
ACT 20:13 Nilï nilïdale ödä sibigi filahilä Asoso moholö afiai. Asoso ami Folo gausialahilä, ödä sibigi fimolö helësëi. Folo e nagadabodo moholöïe ea amala daiai.
ACT 20:14 Afialahilä Asoso ami ea nilï gausialahilä, eege ödä sibigi fedala filahilä nihïlïgïla Midilini afiai.
ACT 20:15 Amo aiyo amogi amilahilä, ödä sibigi fila awäla Giosi sida gagala awäla, aiyo amogi Samoso awäla besela galai. Amilahilä amo aiyo amogi Miledusa awäla besela galai.
ACT 20:16 Esia segeamadi segeyo yogobodimolö madelahilä, Foloea Ebesa baagila moholöla helësëi. Yu udia dolöïe molö nülo segeyo ëi Bëdigosi made besela galai amo gaalu, fodolofalï Yalusaleme awäla besela galamolöi galëda, amoda moholöla helësëi.
ACT 20:17 Miledusa ami nea, Foloea udia dolö Godea wela ifosi Ebesa nefolalo amolile asigi gäwi dafidilo nefolalo amoli e neebea misiäia misialola säsi.
ACT 20:18 Ili e neebea maala besela galasebegi, ea ilima sähalea, Esia segeamadi degabo mi gäwila maala neloa amila dilibalä nea hamosa nelo amoda dilia dawadigi.
ACT 20:19 Yu dolö nefolalo amolia ne nufulö daiaha nelo amea ne fedogola beasebegi, na nihï nagadaiala siaholö digaha nea, Dafidilo Geloiïe hamoi hamolasisa nelomelë.
ACT 20:20 Dili ugila negemolö amogi afädë musügä negela made, na dilima säla ïadigi, udia dolö gegedoi dibea amige, dilile mosöa amige, säla olelela digi amoda, dilia dawadigi amomelë.
ACT 20:21 Amaimo, na Yu ilimage, amase, Giligi ilimage asigi besulahilä, Godemadi nea, nilïle Dafidilo Geloi Yesuma asigi afädë negemalola gelola säla ï amomelë.
ACT 20:22 Amala hamosa nelo gaso, hä walio Gesamia ne mosöla säse amo gadola, ne Yalusaleme moholö neawe. Ami neëgi, nema edo hamomolödu, na dawa mademelë.
ACT 20:23 Dawa made gaso, na afädë dawadigida gowemelë. Sege sulubadelagi ne neloadi amogi nebegi, Eleloi Gesamia nema säla ïahalea, Galabaia negemolöge së molöge bimolömelëla gelola säla ïahamu nelomelë.
ACT 20:24 Amaimo, ne namolö amoda, nema memalä gadoi gabula helësësamelë. Godeïe ugila negelasilo Ado Mala Hedabi säla ïmolöïe hamoi Dafidilo Geloi Yesuea nema ï amo hamola wagamolö amoda, geloi gabula gelola helësësa neawe.
ACT 20:25 Hä, nabuö. Ne dafidi dili nefolalebeadi Godea Beaha Maadela Sigi Neebe amoïe mala säla ïaha nelo gasoda, diligi afädëa hobeala nïe mi bu elö made bimolöla helësësamelë.
ACT 20:26 Amai gabugi, walio na dilima ulufadigila fädäla säla ïahago. Afädë nafadegi awäseda, asialada nema mademelë.
ACT 20:27 Mida gowe. Godea hamomolö amo afädë musügä negela made, sulubadela na dilima säla ïaha maadei amea.
ACT 20:28 Geleso sosogo sugua sibi gadoi nefolalebe amoli dilia sigi namiäia Eleloi Gesamia dili ifosi amo ilile asigige dihilile asigige hedabola beaha namialo. Udia dolö Godea wela ifosisi nefolalebe amoli ïe namiäia hïle healea nii amoli dilia sugua sibi sigi aligilo amo gadola, ili sigi namialo.
ACT 20:29 Ne asibua ilua ügülo geloi gadoi dili nefolalebea gui maalahilä, sugua sibi gadoi nefolalebe amoli bobasëla made, nufudala hësömolöla helësësamelë.
ACT 20:30 Dihili diligi dolö odoaea nowelahilä, ado halowela säla, Yesu bëgëla aulo nefolalebe amoli dusugala ili bëgëla misiäia moholömelë.
ACT 20:31 Hä, idihë namialo. Na gäheo i ohodoagi esoage gasigige siaholö digaha nea, dili hïdo hïdolama säla olelesamu nelo amo helësëmalo.
ACT 20:32 Amai gabugi Godemage, ïe ugila negelo ado mala amomage dili gausisagomelë. Mala amea dili neala gelolasimolöige, Godeïe udia dolögali hedabi ïmolö dibe amo gadola dilima ïmolöige nea.
ACT 20:33 Na afädëïe munige faguloge gesami awäla made nelomelë.
ACT 20:34 Nihïle naaboea nihï hamoi hamola, nihïnege, nebalä aligilo amolige, nilï molöge neleboge dofea negei dilo amoda, dihili dawadigi amomelë.
ACT 20:35 Na sulubadela hamosa nelo amo gadola hamoi edefade hamosebewea udia dolö geloi made nefolalebe amoli ugila negemolöi dibe amo oleimelë. Amase, Dafidilo Geloi Yesuea sähalea, Afädëa digali afädë ïaseda, dia holöfalï obeägïmolö. Gasoda, dia afädë elögali ïaseda, dia edefademalä obeägïmolömelëla säi amo helësëmolöi dibe amoge oleimelëla Foloea säla wagai.
ACT 20:36 Ea ado amo säha maadelahilä, ili sulubadelabalä ea emo gumu sagala gumusula Godema adoi.
ACT 20:37 Godema adola wagasebegi, ili sulubadelaea edefademalä dïila Folo gaula mimi.
ACT 20:38 Amala ilia edefademalä asigii. Asigii amoïe mi edefadeda gowe. Ea nïe mi bu elö made bimolömelëla säi amogi. Hä, amalahilä ilia e du dibea ami ifola asi.
ACT 21:1 Nilïa ilima, nilï hä afiahamelë, dili hawiola sälahilä, ödä sibigi fila mogolafalï awäla Gosi besela galai. Amo aiyo amogi Olodesi besela galai. Amilahilä Badala besela galai.
ACT 21:2 Badala amila ödä sibi elö Fonisia moholö dibe amo bealahilä, nilï amogi fila afiai.
ACT 21:3 Afiahalea nilïa Saibulusi södölo dibe amo bealahilä naabo fefeädimadi dibe amo amilahilä nilï baagila awäla Siliamadi awähamu nelo. Awähamu nea Daia awäla besela galai, du amogi nelegei gaui amo ami negemolöïe.
ACT 21:4 Daia ami besela galala bëgëla aulo nefolalo amoli beagolelahilä, nilï ilibalä segeyo gifalädalïa ami nelo. Gesamia ilima aligilahilä helësëlasisebegi, ilia Foloma Yalusaleme mosabiola säi.
ACT 21:5 Amala säsebegi gaso, nilï moholö fu besela galasebegi, hä doadigila afiai. Afiasebegi ili sulubadela udia malöla gaamugi amila nilïbalä duhulu agesua afiai. Afialahilä nilï sulubadelaea duhulu bosea ami emo gumu sasagalahilä Godema adoi.
ACT 21:6 Godema adolahilä, nilï hä afiahamelë, ilima dili hawiola säi. Amase, iliage nilïma amala hawiolahilä hili mosöa obëgësebegi nilï duugi fimolöïe afiai.
ACT 21:7 Ödä sibigi filahilä Daia dïgïla awähamu nea, Dolemesi besela galai. Besela galalahilä nedoo nefolalo amoli säla olela gausialahilä ilibalä segeyo afädë adi.
ACT 21:8 Diala aiyo amogi awäla Sisalia besela galai. Besela galalahilä Ado Mala Hedabi säla ïlo afädë nelo amoïe ëi Filibi amoïe mosöa digalahilä ebalä nefolalo. Filibida dolö Gifalädalïa amoligi nelo.
ACT 21:9 Ïe idiwilali biyidia sulo amoli dolö made fila awäla salea, Godeïe bea sälo sulo.
ACT 21:10 Nilï ami segeyo nahui nebegi Godeïe bea sälo afädë amoïe ëida Agabasa eda Yudiala misi.
ACT 21:11 E nilï neebea ami maala, ea Foloïe malibu gii amo nealahilä hïle emole naabole neegilahilä, ea sähalea, Eleloi Gesamia sähalea, Malibu goweïe eedo amo Yalusaleme ami Yu dolö nefolalebe amolia gowe gadola gaula neegila dolö fii odoama ïmolömelëla säsebemelëla säi.
ACT 21:12 Amala säi amo nabalahilä nilïage, amase, udia dolö ami nefolalo amoliage Foloma Yalusaleme fedamolö gameläla sähamu nea häuai.
ACT 21:13 Amala sähamu nefolalebegi ea säla obëgësalea, Dilia dïisamu dibegoea ne neala yölasisebe goda edoïe. Ne Yalusaleme ami nea nïe emo naabo neegimolö gomu made. Dafidilo Geloi Yesuïe ëigi baagomolö diëge amoda dofeala helësësamelëla säi.
ACT 21:14 Amala säsebegi, ea helësëi neebe amo haila fisimolöi made beala nilïa fisilahilä sähalea, Dafidilo Geloia hamesebe amo gadola hamomäiamelëla säi.
ACT 21:15 Amala säla, segeyo amala nelolahilä, nelegei neala gaula Yalusaleme fedai.
ACT 21:16 Bëgëla aulo odoa Sisaliala nilïbalä gegedola afiai. Afiai amoda Saibulusi fii afädë bëgëla aulo siiba nelo amoïe ëida Nesono ïe mosöa awäla nefolamolöïe ilia nilï sigi asi.
ACT 21:17 Nilï Yalusaleme besela galasebegi ami nedoolali amolia obeägïla gauia idai.
ACT 21:18 Amo aiyo amogi Folola nihïlïgïla Yamese neebea afiai. Afiaha dibegi, asigi gäwi dafidilo nefolalo amoli sulubadelage ami gegedoi.
ACT 21:19 Foloea ilima dili go gabiola sälahilä, udia dolö fii odoa nefolalebea ami Godea emadi aligila hamoi amo ilima awala säla ïaha maadei.
ACT 21:20 Foloea awai amo ilia nabalahilä Godeïe ëi gauia adai. Amalahilä ilia Foloma sähalea, Nedoo, dia dawa, Yu udia dolöda dausini maleia asigi afädë negei. Udia dolö amoli sulubadelaeada Ado säla negei amo gelola bëgëla awäha neamelë.
ACT 21:21 Amala hamola nelo amolima dolö odoa nefolalo amolia sähalea, Foloea Yu udia dolö sege elö elöla fii odoa amoligi nefolalebe amoli sulubadelama ado gowe gadoi säla olelelo. Mosesea Ado säla negei dilo amo fisimola säla, dilile malöïe gafodo damumabio, siiba mala hamolo amoda made hamomalola säla ïaha neamelëla odoaea säla ï gabio.
ACT 21:22 Odoaea di yawe misi neala säseda, ilia dofä nabulö gabumelë. Hä nilïa abilia hamomolödu.
ACT 21:23 Amaimo, nilïada dia mala afädë bëgëla hamomäiaïe säla ïaha. Nilïbaläda Godema afädë hamomolömelëla säla negei dolö biyidia nea.
ACT 21:24 Diada ili sigi awäla, ilia Godeïe siigi nigime baai made neebe amo olelo mala hamomolö amo diage amala hamomalo, amase, ili busa gesemolöïe ilile bidige dia negelasimalo. Amala hamoseda, odoaea ado dïe säi amo nabelo amoliada, nilïma wäfalï säla ï gabula helësëlahilä, Ado säla negei dibe amo dia bëgëla hamolo gabula helësëmolömelë.
ACT 21:25 Udia dolö fii odoa asigi afädë negei neebe amolima, ado sämolö helësëi dilo amo nilïa beba dëdëla ï. Nilïa ilima sähalea, ili idihë nea, molö nülo dibe amogi wäfalï godegali göa nelegela ï muabio. Amase, heale hï e muabio. Hogoi elö elöla sebe amo nufudahalea muugia heale gälo sali amola muabio. Amase, udia dolö fa nimabiola säla ïla säi.
ACT 21:26 Amalahilä amo aiyo amogi Foloea dolö biyidia amoli sigi nea, hiligila Godeïe siigi nigime baai made neebe amo olelo mala hamoi. Amalahilä e Godeïe mosöa awäla gobela ïloma nigime baai made neebe amo oleloïe segeyo amogi wagamolö gabugi, afädë afädëlaea amo galada odala ïmolö gabula säla ï.
ACT 21:27 Mala amoïe segeyo gifalädalïa dilo awäha maademolö ga made dibegi, Yu dolö odoa Esia segeala mofiai amolia Folo Godeïe mosöa neebe amo melï. Bealahilä udia dolö nefolalo amoli sulubadelaea Foloma habobamäia neala habobalasilahilä Folo gaui.
ACT 21:28 Gaulahilä ilia gelola uuala sähalea, Isilale dolöla dili-e, nilï ugila negemolö mofiamo. Dolö gowea sege dibe sulubadelagi udia dolö nefolalebe sulubadelama säla olelesalea, Isilale udia dolöge, Ado säla negei dibe amoge, amase, sege gowege, amolida memalämelëla säla olelelomelë. Amomu made, ea Giligi dolö odoa nefolalebe amoligi Godeïe mosöa sigi maalahilä mosö Godea hïle nafolai nelo amoge neala nafadei gabiola säi.
ACT 21:29 Amala säi amoda dafidi ilia Ebesa fii ëi Dolofimasa e Folobalä gaamugi neebe amo bealahilä, Foloea e Godeïe mosöa sigi nogila digai gabula helësëlahilä amala säi.
ACT 21:30 Amala säsebegi, gaamugi nefolalo amoli sulubadela fudugilahilä, udia dolö baluluia mafula gegedola ilia Folo gaulahilä, Godeïe mosöa amila dusugala gaula awähalea Godeïe mosö idi galo sulubadela fodolofalï gaha maadei.
ACT 21:31 Amala hamolahilä Folo baagomäia nufulö hamosebegi, Olomo ami dolö beaha aligilo busa amea Yalusaleme udia dolö sulubadelaea edefademalä fudugila nudusaleamelëla säi amo nabi.
ACT 21:32 Amo nabalahilä ea ami dolö beaha aligilo odoa nefolalo amolige ami dolö odoa nefolalo amolige sigi awälahilä, udia dolö gegedoi neebea ami ili fodolofalï baluluia afiai. Beaha aligilo busa amoge ami dolö odoa amolige maase bealahilä, ilia Folo made nufudala fisi.
ACT 21:33 Ami dolö beaha aligilo busa amea Folo neebea awälahilä e gaula nea, ea ami dolö amolima sähalea, Igi ëfë äudäea e nafodomola säi. Amala sälahilä ea nabahalea, Dolö goweda nowë, ea edo hamosiola nabi.
ACT 21:34 Amala nabasebegi, udia dolö gegedoi nefolalo amolia säla obëgësalea, ado elö elöla gelola säla didigai. Amala gelola säla didigai amea ami dolö beaha aligilo busa amea ado mi fädäla made beasebegi, ami dolö amolima dolö goweda ami mosöa sigi mosalola säi.
ACT 21:35 Amala sigi awäla e mosö aulo didaia fedadelä hamolebe udia dolö gegedoi amolia edefade habobasebegi, ami dolö amolia Folo e naaboea sogobala gaula fedai.
ACT 21:36 Mida, udia dolö amolia, nufuö, baagomäia nufuöla gelola säla didigala ili bëgëla maasebegi amai.
ACT 21:37 Ami dolö amolia Folo e sigi gaula ilia mosöa digamolö hamosebegi, Foloea ami dolö beaha aligilo busa amoma sähalea, Na dima ado afädë nabedulela säi. Amala sälebe busa amea sähalea, Dida Giligi ado adolole.
ACT 21:38 Isibi dolö afädë dafidi gamanebalä nudulahilä ïe nudulo dolö dausini biyidia sege nafade udia dolö aligisia made ami sigi awäha nelo amoda di madelela nabi.
ACT 21:39 Amala nabasebegi, Foloea sähalea, Neda Yu dolö neawe. Silisia segeïe gaamu Dasasa dibe amoda nïe segemelë. Nïe gaamuda ilibia edefademelë. Na udia dolö ilima ado sädelä dima nabahala säi.
ACT 21:40 Amala sälebe ami dolö beaha aligilo busa amea dofea sämosebegi, Foloea aulo didaia ami nea naabo usigili. Sau sagaha maadesebegi Foloea Hibulu adoea sähalea,
ACT 22:1 Naado nedoola dili-e, dilia na asiala hamoila säsebegoïe, asiala made hamoila dilima fädäla säla ïahago, nabualola säi.
ACT 22:2 Amala sälahilä Hibulu adoea säha neebe amo nabalahilä, dolö nefolalo amolia dofä adola made sau sagala nefolalo. Sau sagala nefolalebegi Foloea sähalea,
ACT 22:3 Ne fiida Yumelë. Silisia segeïe gaamu Dasasa amida nemea ne neegela ägüi. Gasoda, neda gaamu wegi nea wi fädäla aligisebegi, Gamelielea ne olelesa nelo. Eada nema nilïle naua mäuïe mala säla negei dibe amo sulubadela hedabola säla olelei. Na Godea hamomola säsegi gelola hamosa nelo, dili walio nefolalebe goea hamosa neebe go gadola.
ACT 22:4 Idi gowegi bëgëla aulo nefolalo amoli na neala sëlasisa nelo, ili baagomäia. Udiage dolöge nafodolahilä, ili galabaia mosöa negesa aligilomelë.
ACT 22:5 Gobela ïlo busa edefade neebe ameage galïsolö dolö nefolalebe sulubadelaeage, ilia na dofä säsebewe dilima säla ïlo amo. Ilia ilile edoo Damasaga nefolalebe amolima beba dëdëla, na gaula mosäia ïasisio. Ïasisebegi Idi bëgëla aulo ami nefolalo amoli gaulahilä së ïmäia Yalusaleme sigi obëgëmolöïe nea asimelë.
ACT 22:6 Ne Damasaga suägïla eso mogogi aligisebe amo gaalu, mudaiala yo digalo edefade fodolofalï maala nema sege yabagelelo wäla yabagelei.
ACT 22:7 Amaimo, ne nagadaia digala negei dibegi afädëa nema sähalea, Solo-o, Solo-o, edogi dia ne neala sëlasisala säse nabi.
ACT 22:8 Amo nabalahilä na, Dafidilo, dida nowëla säla obëgëi. Amala säla obëgëlebeda ea nema sähalea, Neda Nasalese fii Yesu, dia neala sëlasilo amomelëla säsio.
ACT 22:9 Dolö nebalä afiai amoliada yo digai amo melï gaso, afädëa nema ado säi amoïe adoda ilia made nabi.
ACT 22:10 Amala hamosebegi, na nabahalea, Dafidilo, na abilia hamomolödula nabi. Amala nabasebegi, Dafidilo Geloia nema sähalea, Di nowela Damasaga mosö. Ami dia hamomolö Godea daiai amoda afädë ami neebe amea dima säla ïaha maademolömelëla säsio.
ACT 22:11 Yo edefade digai amea na bimolö ulïsebegi, dolö nebalä afiai amolia ne nabelela gaula awäla Damasaga besela galai.
ACT 22:12 Dolö afädë ëi Ananaiasa e Damasaga ami nelo. Eada Ado säla negei dibe amo gadola hamolo nebegi, Yu udia dolö ami nefolalo amoli sulubadelaeada, eda dolö hedabi mogoi neala sälo nelo.
ACT 22:13 E maala ne neebea ga madefalï nea, ea nema sähalea, Nedoo Solo-o, dïe si hedabi bu bimalola säsio. Amala säi amole nïe si bu hedabolahilä bimolöi gabugi e melï.
ACT 22:14 Amasebegi ea sähalea, Nilïle mäuïe Gode neebe amea ea hamesebe amo dia helësëmäiage, ïe hamoi hamolasilo asigi mogoifalï neebe amo dia siia bimäiage, hï ado säsebe amo nabuäiage di memeleimelë.
ACT 22:15 Dia melï amoge nabi amoge udia dolö sulubadelama säla ïmolöïe e neala olelo di namolömelë.
ACT 22:16 Di memalä beaha samolöda edoïe. Hä nowelahilä ödägi gela, Dafidilo Geloima adola, dia nafade hamoi amo hëla fisimalola säsiola Foloea säi.
ACT 22:17 Foloea säla ïahamu nea sähalea, Ne Yalusaleme obëgëlahilä Godeïe mosöa Godema adosa salea sosoäla awäla
ACT 22:18 beahamelebe, Dafidilo Geloi e misi nelo gabio. Ea nema sähalea, Dia nïe säsise amoda Yalusaleme nefolalebe amolia made nabulö ameada, hä fodolofalï, Yalusaleme dïgïla di aabela mosalola säsio.
ACT 22:19 Amala säsebegi, na säla obëgësalea, Dafidilo Geloi-e, na gedolo mosö difolalebea ami awäla udia dolö dima asigi afädë negei nefolalo amoli nufudala ïalalela, galabaia negelo amoge hili dawadigimelë.
ACT 22:20 Dïe olelo Sidibeniïe heale digasolo amo gala nege ilibalä nelomelë. E baagomolöge dofeala helësëlahilä e baagomäia nufidelo amolile fagulo daia salugalo gii amoda na beaha nelomelëla säi.
ACT 22:21 Amala sälebe ea nema sähalea, Mosalo. Na di sege wagadi made, udia dolö fii elö sefolalebea ami fisiga gamolömelëla säi.
ACT 22:22 Ea ado säha nelo amo udia dolö nefolalo amolia hedabola nabaha nea gaso, ea udia dolö fii elöma moholömelëla säse amo nabalahilä, ilia gelola üalala sähalea, Dolö goweda baagomäia nufuö. Go gadoida wi namolöi made gabula säla didigai.
ACT 22:23 Ilia üalala didigala sähamu nea hilile fagulo daia salugai giila sadia gala digi, gulu dao gasala sadia adala digisa nebegi,
ACT 22:24 ami dolö beaha aligilo busa amea sähalea, Ilia ema ado gelola säse goïe mi säla ïmäia ami mosö mumusogi digala e fëgämalola säi.
ACT 22:25 Amasebegi ilia Folo fëgämolöïe e nafodoi. Nafodoi amola wäla nea, Foloea ami beaha aligilo ga madela neebe amoma nabahalea, Olomo dolöma gudi made nabala, Olomoïe mala säla negei ameada dolö amo fëgämolöda mogolalela nabi.
ACT 22:26 Amala säi amo nabalahilä beaha aligilo amea ami dolö beaha aligilo busa neebea awäla ema säla ïalahilä nabahalea, Dia abilia hamomolö gabu. Dolö goweda Olomo dolöla säi.
ACT 22:27 Amasebegi beaha aligilo busa amea e neebea awäla ema nabahalea, Nema sämo. Dida Olomo dolölela nabi. Amalebe ea säla obëgësalea, Äla säi.
ACT 22:28 Amalebe beaha aligilo busa amea sähalea, Nihïne muni edefadea ne Olomo dolö hamomolöïe niimelëla säi. Amalebegi Foloea sähalea, Nemea ne neegela ägüsolo amo gala ne amala nelola säi.
ACT 22:29 Amalebe e fëgämolö nefolalo amoli fodolofalï badadi gasi gagai. Amasebegi ami dolö beaha aligilo busa amea helësësaleada, na Olomo dolö nafodoila helësëlahilä, e bedäha nelo.
ACT 22:30 Amo aiyo amogi ami dolö beaha aligilo busa amea Yu amolia Folo eada edo asiala hamoidula fädäla bimolöïe, e fisigälahilä gobela ïlo busa amolige, Galïsolö dolö amoli sulubadelage gegedomalai. Gegedosebegi ea Folo sigi digala ili sebea ami ifosi.
ACT 23:1 Foloea Galïsolö dolö amolima siila nea sähalea, Nedoola dili-e, ne Godeïe siigi nawesa neada nïe iso asigia dofealahilä hahamola misi amo, aso, hamosa neawe.
ACT 23:2 Amala säsebegi, gobela ïlo busa edefade Ananaiasaea dolö odoa Folo ga made nefolalo amolima sähalea, Ïe nafigi nufuöla säi.
ACT 23:3 Amala säsebegi, Foloea ema sähalea, Dida mosö alalo gai beni faleia hëi amo gadoi nebego, Godea di nufulömelë. Ado säla negei dibe amo gadola dia nema gudi nabulö salea gasoda, dia Ado säla negei dibe amo damula ne nufuöla sähalela nabi.
ACT 23:4 Ea Amala nabasebegi, dolö e ga madela nefolalo amolia sähalea, Dia Godeïe gobela ïlo busa edefade neebe goma nafadela sähalela nabi.
ACT 23:5 Amala nabasebegi, Foloea säla obëgësalea, Nïe nedoola dili-e, e gobela ïlo busa edefade neala na made helësëi. Udia dolö dili nefolalebe amoïe beaha aligilo neebe amo dilia e gagademabiola bebagi dëdëla negei dialeala säi.
ACT 23:6 Amalahilä Foloea dolö nefolalebe amoli odoa Sadiusi sosogo, odoa Felesi sosogo nefolalebe amo helësëlahilä, Galïsolö gegedoi nefolalo amolima ado gelola sähalea, Nedoola dili-e, neda Felesi sosogo neawe. Nïe naadoge Felesi sosogo nelomelë. Udia dolö baagoi nowemolö amo dofä gabula helësëla asigia sisiläfüsa neebeweïeda gudisagomelëla säi.
ACT 23:7 Ea amala sälebegi, Sadiusi sosogo amoliage, Felesi sosogo amoliage ili gëgëlahilä gegedoi amo hilimu moge mogela nelo.
ACT 23:8 Sadiusi sosogo iliada udia dolö baagoi amoli made nowelolage selesaia fiige gesamige madela sälo nea, Felesi sosogo ilia ohodoa amoli dofä gabula helësësa neamelë.
ACT 23:9 Amalahilä dolö amolia gëgësalea ado gelola sähamu nebegi, mala dawadigi odoa Felesi sosogo amoligi nefolalo ilia nowela aligilahilä ado gelola sähalea, Dolö gowea nafade afädë hamoi nilïa made melï neawe. Amai gesamiale ma, selesaia fiia ema ado säla ïledula säi.
ACT 23:10 Amala säsebegi, ilia gëgëlahilä edefade nudusalea, Folo dusugagise amea damula galaloea ami dolö beaha aligilo busa amo bedäi. Bedälahilä ea ami dolö nefolalo amolima sähalea, Dili idogo digalahilä Folo e ili mogogila neala ami mosö mumusogi sigi obëgëmalola säi.
ACT 23:11 Amala hamolahilä gasigi Dafidilo Geloi Folo neebea maalahilä sähalea, Asigi gelomalo. Bedämabio. Yawe Yalusaleme nea di nïe neala olelo nelo amo gadola Olomo awälage amo gadola wäla hamomolömelëla säi.
ACT 23:12 Sege yosebe amo gaalu, Yu dolö nefolalo amolia Folo nufulö daiaha dilo. Ilia migalïa diigila ado gelola säla negesaleada, ilia molö ödäge made naala, Folo nufudala baagolahilä molö ödä molömelëla säla negei.
ACT 23:13 Nufulöla daialo amolida nabülasi biyidia baagi.
ACT 23:14 Ili gobela ïlo busa amolige, asigi gäwi dafidilo dolö amolige neebea awälahilä, ilia sähalea, Nilïa migalïa diigila ado gelola säla negesaleada, nilïa molö made naala, Folo nufudala baagolahilä molö molömelëla säla negeimelë.
ACT 23:15 Amala hamoi gabugi, Galïsolöla diliada ami dolö beaha aligilo busa amo sebea ado fisiga gahaleada, Folo dili neebea sigi digamalamäia, ema säi amoïe mi fädäla hogomolöïela sämalo. Amala hamoseda, e dili mia, aso, made besela galala neëgi, nilïa e nufulöïe daiai neamelëla säla ï.
ACT 23:16 Amala säsebegi, gaso, Foloïe elefiïe malöea ilia säi amo nabalahilä, e ami dolöïe mosöa awäla mumusogi digala Foloma säla ï.
ACT 23:17 Amo nabala Foloea beaha aligilo dolö afädë welahilä sähalea, Diada malö malïsä gowe beaha aligilo busa sebea sigi mosalo. Eada ado afädë ema sämolö gauleamelëla säi.
ACT 23:18 Amalebe ea malö malïsä amo beaha aligilo busa sebea sigi awälahilä sähalea, Galabaia negei Foloea ne wesaleada, malö malïsä goweada ado afädë dima sämolö galea, di sebea sigi mosöla säla ïmelëla säi.
ACT 23:19 Amala säsebegi, ami dolö beaha aligilo busa amea malö malïsä amoïe naabogi gaula agesuadi heledo nea nabahalea, Diada nema edo sädeläla nabi.
ACT 23:20 Amalebe ea sähalea, Yu ilia ado afädë negesalea gomalä negesio. Ema säi amoïe mi fädäla nabulöïe, dia Folo e Galïsolö neebea aiyo sigi digamalamäiala sämolöla säsio.
ACT 23:21 Amaseda, diada ilima ümabio. Mida, dolö amolida nabülasi biyidia baagi, ilia e nufulö musügä beaha nea. Ilia migalïa diigila ado gelola säla negesaleada, molö ödäge made naala, e nufudala baagolahilä molö ödä molömelëla säla negesio. Hä dia ümäia ili walio daiala beaha neamelëla säla ï.
ACT 23:22 Amala säla ïbe beaha aligilo busa amea malö malïsä amoma gelola sähalea, Dia nema säla ï amo afädëma säla ïmabio, mosalola säi.
ACT 23:23 Amala sälahilä ea ami beaha aligilo äudä misiëla welahilä elema sähalea, Sisalia moholöïe ami dolö hädali äudäge, sugua hosidaia fila aulo dolö nabülasi gifalädalïage, amase, gögë gaulo dolö hädali äudäge, süwia midilö neë gaalu, moholöïe walio daiamalo.
ACT 23:24 Amase, Foloïe sugua hosige dilia daialahilä e hedabola sigi awäla gamane busa Feligisi neebea sigi mosalola säi.
ACT 23:25 Amala sälahilä, ea beba afädë dëdëla ïahalea, gomalä säla dëdëla ï.
ACT 23:26 Neda Golodiasa Ilisiasa, na gamane beaha aligilo Feligisi dolö edefade dima, Di go gabiola säla, beba gowe dëdëla ïasisago.
ACT 23:27 Yu iliada dolö go gaula nufudadigimolöïe hamosebegi, na eda Olomo dolömelëla säsebe amo nabalahilä, ami dolö amola e neebea maala na e damula awäla sigi obëgëimelë.
ACT 23:28 Ilia ema gudimolö ado säsebe amoïe mi nabulöilahilä, na ilile Galïsolö neebea e sigi asimelë.
ACT 23:29 Sigi awälahilä beahamelebe, ilia ema gudimolö ado säi amoïe mida ilile mala säla negei amoïemu melï. Amai ameada, e baagomäia nufulöge, galabaia negemolöige, afädë made melï.
ACT 23:30 Dolö go baagomäia nufulö daiahaleamelëla afädëa nema säla ïasebegida, di neebea e fodolo fisiga idogosagomelë. Ea nafade hamoila sälo amoliage mi goweïemelëla dima säla ïmolö mosalahagomelëla säla dëdëla ï.
ACT 23:31 Amaimo, ami dolö amolia ea säi amo gadola, gasigi Folo e sigi awäla Ädibadalisi gaamugi besela galai.
ACT 23:32 Amo aiyo amogi ami dolö sugua hosidaia fila aulo amoliamu e sigi awähamu nebegi, ami dolö odoa amolida hilile mosöa obëgëi.
ACT 23:33 Ami dolö sugua hosidaia fila afiai amoli awäla Sisalia besela galalahilä, gamane beaha aligilo amoma beba dëdëi amo neala ïala, amase, Fologe sigi maala e mia ifosi.
ACT 23:34 Amalebe beba amo nidelahilä Foloma nabahalea, Dida bolobinisi abidilala nabi. Eda Silisiala helësëlahilä
ACT 23:35 ea sähalea, Dia nafade hamoila sälo amoli mofiala neëgi, na dïe gudi nabulömelë. Amala sälahilä ea Heledoea mosöa e idihë namialai.
ACT 24:1 Segeyo bia nelolahilä, gobela ïlo busa edefade Ananaiasage, dolö asigi gäwi dafidilo nefolalo amolige, Olomoïe mala negei amo gadola sälasilo ëi Dedulusi nelo amea ilile säsimäia eege hiligila digai. Digalahilä, ilia gamane beaha aligilo amea nabuäia Foloeada nafade gomu hamoimelëla säla ï.
ACT 24:2 Amalahilä beaha aligilo amea Folo misialai. Maala nebegi, Dedulusia ea asiala hamoi amoïe ado säla ïahalea, Dia nilï sigi namolöi nelo amea nilï neebea dalulo amoda negesimu dialeamelë. Dia nilï hedabola sigi nelo amea sege edefade gowegi nefolalebewe hedabi namolöïe, neala mogolasisa nelo.
ACT 24:3 Dolö edefade Feligisi-e, nilïa amo bealahilä segeyo sulubadelagige sege dibe sulubadelagige dima obeägïla edefademalä nesegesa aligilomelë.
ACT 24:4 Amai gaso, na asiala dima dofogaloea, dia nilï bobasëla nilïa ado oboba säsewe nabuäia.
ACT 24:5 Nafade hamoloda dolö gowemadila misi gabula beagolesamelë. Eada Yu dolö sege dibe sulubadelagi nefolalebe amoli neala habobalasilahilä nudulasiloge, amase, Nasalese sosogo nefolalebe amolile dafidiloge emu neamelë.
ACT 24:6 Amase, ea Godeïe mosö Godeïe siigi nigime baalasilage hamoi. Amalebegida nilïa gauimelë.
ACT 24:8 Amaimo, dihï mi fädäla hogomolöïe dolö goma nabaseda, nilïa nafade gowe hamoila säseweda dofä säsebela helësëmolömelëla säi.
ACT 24:9 Amala säsebegi, Yu iliage Dedulusiïe ado ugila negela ado säi amoda dofämelëla säla ï.
ACT 24:10 Gamane beaha aligilo amea Foloea ado sämäia ïe naaboeamu oodo bibila säsebegi, ea obëgëla sähalea, Dida gäheo i yafiegi sege edefade goweïe gudi mogelo nelo amo helësëlahilä, nïe asigiada ilia ado säi amoïe dima obëgëla sämolöda hedabi galea.
ACT 24:11 Amaimo, na Godeïe ëi gauia adala Godema adomolö Yalusaleme fedaia amila segeyo walioda giwimelë. Amoda dihï dawadigimolöi.
ACT 24:12 Amaimo, ilia na Godeïe mosöa nea afädëbalä didiäha neebe made melï. Amase, gedolo mosöage, sege gaamu dibeage udia dolö gegedoi amoli fudugilasila hamoseda made melïmelë.
ACT 24:13 Amaimo, na nafade hamoila ilia walio sälebeda, na dofä amala hamoi amoda dima säla ulufadigimolö amo ulïsio.
ACT 24:14 Ado dofä dima säla ïahawe, amoda gomalä. Neda Idi ilia sosogo elöla säse gowe bëgësaleada, nilïle mäuïe Gode ëi gauia adalomelë. Amase, nada Ado säla negei dibe amo sulubadelage, Godeïe bea sälo amolia ado säla dëdëla negei amoge dofä gabula helësësamelë.
ACT 24:15 Godea baagoi amoli nowela ifosimäia na beaha neebe amo gadola, amase, dolö gowe iliage amala beaha neamelë. Godea amala hamomäia na asigia sisiläfüsa nea.
ACT 24:16 Amalebe segeyo sulubadelagi Godeïe siigige udia dolöïe siigige nïe iso asigia mogola namiäiala helësësa aligilo.
ACT 24:17 Neda gäheo i odoa nelolahiläda, nihïle segea obëgësalea, udia dolö nelebo maade amoligali muni ïmolöïege, amase, Godegali odala ïmolöïege obëgëi.
ACT 24:18 Dafidida Godeïe siigi nigime baai made neebe amo olelo mala hamolahilä, Godeïe mosöa odala ïmolöïe awäla nebegi, ilia ne melï. Nebalä udia dolö gegedoi made, gëgëla nudusage made nudui.
ACT 24:19 Amalebe, Yu dolö odoa Esia segeala mofiai ami nefolalo amolia nema dia nafade hamoila säha nea galëda, di neebea hili ado amo sämolö yawe moholöi galea.
ACT 24:20 Maade galëda, dolö nefolalebe gowe ilia ne Galïsolö dolö neebea nowela ifosisolo amo gala, ilia na dofä nafade hamoila melï amo säla ïmäia.
ACT 24:21 Ne ilibalä nea na ado afädë säi amomuda gowe. Udia dolö baagoi nowemolö amo dofä gabula helësëla asigia sisiläfüsa neebeweïeda, dilia walio gudisagomelëla säimelëla Foloea säi.
ACT 24:22 Amala säsebegi, Feligisia Idigi aulo mala hedabola dawadigi nelo ameada gudi nabi amo wagalahilä sähalea, Ami beaha aligilo busa Ilisiasa e maasegi, dilile gudi säla mogemolöla säi.
ACT 24:23 Amala sälahilä, ami beaha aligilo amoma sähalea, Folo e idihë nea gaso, hï helësëse amo gadola hamomäiage, amase, e damelë neebe amolia e ugila negemolö misiäiage fu ïmalola säi.
ACT 24:24 Segeyo odoa nelolahilä, Feligisi e hïle udia Dulusilabalä misi. Dulusila eda Yu udia. Feligisia Folo bea mosalolahilä sigi maasebegi, Foloea Geleso Yesuma asigi afädë negemolö mala säla ïasebegi, Feligisia nabaha nelo.
ACT 24:25 Nabelebe Foloea mogoi namolöge, asigi sigi namolöge, mogemolöïe segeyo daiala negei amo maasebe amoïege säla ïaha nelo. Säla ïaha nebegi, Feligisi e bedälahilä sähalea, Di mosalo. Hobeala fu beaseda, na di misialamolömelëla säi.
ACT 24:26 Amala helësëselo amo gala Feligisia Folobalä ado didiämolöïe wesamu nelo amoda muni ïmäiala helësëlahilä amai.
ACT 24:27 Gäheo i äudä nelolahilä Feligisi gadoi Bosiusi Fesidusi e gamane beaha aligilo bedefala nelo. Feligisiada Yu dolö nefolalo amoli obeägïmäia Folo e galabaia mosöa ifosisamu nelo.
ACT 25:1 Bolobinisigi ami gamane beaha aligilo Fesidusi besela galala segeyo ohodoa nelolahilä, e Sisalia dïgïla Yalusaleme fedai.
ACT 25:2 Yalusaleme fedala nebegi gobela ïlo busa nefolalo amolige, Yu udia dolö ëi sälo nefolalo amolige e neebea awälahilä, Foloea nafade gomalä hamoimelëla säla ï. Säla ïalahilä ilia ema gelolafalï sähalea,
ACT 25:3 Dia dofä nilï ugila negela Folo eda Yalusaleme misialamäiala säi. Dafidi ilia didiähalea, Folo e, aso, idiafa maaha neëgi, e nufulöïe idia negemolömelëla didiäi amo helësëla amala säi.
ACT 25:4 Amalebe Fesidusia säla obëgësalea, Folo eda Sisalia galabaia nea. Neda holöfalï nelolahilä ami obëgëmolömelë.
ACT 25:5 Dolö goea nafade afädë hamoi galëda, dilile ëi sälo odoa nefolalebe amolia ebalä gudimolöïe nebalä digamalamalola säi.
ACT 25:6 Amida Fesidusi e ilibalä segeyo gödölasi gadoiledu ma, nabülasi gadoiledu, nelolahilä Sisalia digai. Amo aiyo amogi Fesidusi e gudisalea filo amodaia salea, ea Folo sigi misialai.
ACT 25:7 E maasebegi Yu dolö Yalusalemela digafiai amolia Folo e nogöla amalela digila nea, ea nafade yafie edefade hamoimelëla säi. Amala säi gaso, ea dofä amala hamoi amoda säla ulufadigimolö amoda ulï melï.
ACT 25:8 Amaimo, Foloea sähalea, Yu udia dolöïe mala säla negei dibe amoge, Godeïe mosöge, amase, Olomo beaha aligilo Gini Sisa neebe amomage na nafade afädë made hamoi neawela säi.
ACT 25:9 Amala säsebegi, Fesidusia Yu udia dolö obeägïmäiala helësëlahilä, Foloma säla obëgëla nabahalea, Ilia säi amoïe na gudi mogemolöïe Yalusaleme fedamolö helësësebelela nabi.
ACT 25:10 Amasebegi Foloea säla obëgësalea, Mosöa walio ne neebeweda Sisaïe gudilo mosö. Nebalä gudimolö amoda mosö wegimelë. Dihï dawadigi, nada Yu ilimada asiala hamoi afädëda made.
ACT 25:11 Amaimo, na nafade hamolo amea baagomolö galebeda, ne baagomolö amoda dofealabio. Amai walio dolö gowe ilia na nafade hamoila säsebego, amo dofä made galëda, afädëa ne neala ilile naabogi gausimolöda made bimolömelë. Amaimo, neda Sisaeamu nïe gudi nabuäiala helësësamelëla säi.
ACT 25:12 Amala säsebegi, Fesidusia dolö e ugila negela sälasilo amolibalä didiälahilä, ea Foloma säla obëgësalea, Dia Sisaea nabuäiala säi ameada dida Sisama moholömelëla säi.
ACT 25:13 Segeyo odoa baagilahilä, beaha aligilo Gini Agilibale Benisile Sisalia Fesidusima di go gabiola säla olemolö misi.
ACT 25:14 Eleda Sisalia segeyo holöbö nahui nelo. Segeyo amo gala Fesidusia Foloïe ado amoïe ginima säla ï. Ea sähalea, Dolö afädë dafidi Feligisia galabaia negei nelo amo, wimu neamelë.
ACT 25:15 Ne Yalusaleme nelo amogida, Yu ilile gobela ïlo busa amoliage, asigi gäwi dafidilo amoliage, dolö amoïe sähalea, Ea nafade gomalä hamoimelëla säla ïalahilä, na dofä ea asiala hamoila sämäiala säsio.
ACT 25:16 Amasebegi na ilima säla obëgësalea, Olomo nilïle malada dolö memalä neala elöïe naabogi gausiloda mademelë. Dolö gudimolö galëda, eda dafidi gudimolö dolö amo mimiagila mia sida alogola aligilo. Amase, nilïa ema fu ïahalea, ilia ema säse amoïe säla obëgëmäia fu ïlomelëla säi.
ACT 25:17 Amalebe ilia wi maala gegedosebegi, segeyo baagila made, amo aiyo amogi ne gudisalea filo amodaia salea, na dolö amo sigi misialola säi.
ACT 25:18 Dolö ebalä gudimolö amoli hä nowela nefolalebeda, ilia ea nafadefalï hamoi gabula sämabelela helësëi gaso, maade gabu.
ACT 25:19 Ilia ado gëgëla säha nelo amoda ilile Gode bëgëlo mala amole, Yesu baagola Foloea e noweimelëla sälo amolegi gëgëi.
ACT 25:20 Na ado goïe mi fädäla bimolö amo asusugasebegi, na ema nabahalea, Ado goïe gudi mogemolöïe Yalusaleme moholö helësësebelela nabi.
ACT 25:21 Amalebe Foloea, beaha aligilo giniamu nïe gudi mogemäia galabaia namolöla säsebegi, na e beaha aligilo Gini Sisa neebea fisiga gamolölahilä gaso, aso, galabaia namialaimelëla Fesidusia säi.
ACT 25:22 Amala säsebegi, Agilibaea Fesidusima sähalea, Dolö goea ado säse amo nihï nabulöila helësësebemelëla säi. Amala sälebe, ea säla obëgësalea, aiyo dia ïe ado nabulömelëla säi.
ACT 25:23 Amo aiyo amogi Agilibale Benisile momadolahilä maala ami beaha aligilo busa nefolalo amolige, gaamu amoïe dolö dafidilo nefolalo amolali gamane gegedolo mosöa ami digai. Digalahilä, Fesidusia Folo e sigi misialasebegi ilia e sigi misi.
ACT 25:24 Sigi maala nebegi Fesidusia sähalea, Gini Agiliba-o, dolö gegedoi sulubadela dili-e, dolö dilia beasebe egoeda Yu udia dolö sulubadelaea, Yalusaleme amige, amase wige, nema nabahamu nea sähalea, E namolöi madela üalala säha aligilomelë.
ACT 25:25 Amai gaso, na ea hamoi amoïe e baagomäia nufulöda mi afädë made beagolei. Gasoda, ea beaha aligilo ginia ïe gudi mogemäiala säsebegi, na ado afädë negesaleada, e fisiga gamolöla säi.
ACT 25:26 Ea hamoi amoïe dafidiloma beba dëdëmolöïe afädë fädäla made beagolesebegi, Gini Agiliba-o, dïe siigi e sigi misialaimelë, amase dilile siigige. Mida, nilïa ema säi amoïe mi fädäla hogolahilä, ea hamoi amoïe mi bebagi dëdëla negemolö dibe amo helësëlahilä, dëdëmolömelë.
ACT 25:27 Afädë galabaia neebe amea nafade gomalä hamoila made dëdëla fisiga gamolöda dofea madela helësësamelëla Fesidusia säi.
ACT 26:1 Agilibaea Foloma sähalea, Dia sämolö amo sämalola säi. Amala säsebegi, Foloea naabo gauia adogola nea sähalea,
ACT 26:2 Gini Agiliba-o, Yu dolöea nema dia nafade hamoila säi amo sulubadelaïeda walio na dima säla obëgëmolö amogida obeägïsamelë.
ACT 26:3 Obeägïsamelëla säi amoda, diada Yu udia dolö neebe amoïe mala sulubadelage, amase, nilïa elö elöla helësëla gëgëlo amoge dawadigisa maadei nebego. Ameada na walio ado säsebewe sedade säsebela helësëla made, hame negela nabuäiala helësësa.
ACT 26:4 Ne malësägila na hamosa nelo amoda Yu udia dolö sulubadelaea dawadigisa maadei nea. Mi gäwia amila nihï segea neage Yalusaleme neage, namolöi nelo amo ilia dawadigi nea.
ACT 26:5 Ilia ne malësägila dawadigi ameada ilia sämolö helësëseda, na Felesi ilile mala hamosa nelo amo dima sämolöi gabu. Nilïle Gode bëgëlo mala amoïe sosogo odoa dialea gaso, Felesi sosogoïe mala elö elöla yafie hamolo ameada sosogo odoa sulubadela baagila asimelë.
ACT 26:6 Amaimo, dafidi Godea nilïle mäuma ado afädë säla negei amo hamomäia na asigia sisiläfüsa neebeweïe ne nebegi walio gudisagomelë.
ACT 26:7 Ado säla negei amo bimolöïe nilï fii giwilasi nefolalo amolia asigia sisiläfülahilä, esoage gasigige Godeïe ëi gauia adala ema ado sähamu nefolalea. Amaimo, beaha aligilo gini-e, na asigia sisiläfüsa neebeweïeda Yu dolö ilia dia nafade hamoila säha neamelë.
ACT 26:8 Godea udia dolö baagoi amoli nowelasilo neebe amo dilia e amala hamolo ulïla helësësa nefolalebegoda edoïe.
ACT 26:9 Nasalese fii Yesuïe ëi neala nafademolöïe, na hamoi edefade hamomolöila helësësa nelomelë.
ACT 26:10 Amala helësëlahilä, na Yalusaleme nea amala hamosa nelo. Gobela ïlo busa nefolalo amolia ne geloi ïasebegi, udia dolö yafie Godea hïle nafolai amoli na galabaia negei. Amalahilä, ilia udia dolö amoli baagomäia nufualola säsegige na ülomelë.
ACT 26:11 Segeyo yafiegi gedolo mosö nefolalebe amo sulubadelagi awälahilä, ilia Gode gagademäiaïe na ili neala sëlasisa nelo. Na ilima edefademalä mihaläla fii elö elölaïe gaamu dibea amige awälahilä, ili neala sëlasisa nelomelë.
ACT 26:12 Na amo gadola hamomäia gobela ïlo busa nefolalo amolia ne geloi ïala, bebage dëdëla ïasebegi Damasaga gaamugi asi.
ACT 26:13 Beaha aligilo gini-e, ne idiafa awäla eso mogogi aligisebe amo gaalu, na beahamelebe, nege nebalä afiai amola nilï neebea ami eso si gadoi made, yo edefade hïdo elöi mudaiala säsälosebe melï.
ACT 26:14 Amala hamosebegi, nilï sulubadela digafui difolalebegi, afädëa nema Hibulu adoea sähalea, Solo-o, Solo-o, edogi dia ne neala sëlasisa. I ägëgi emoea nufidelo wäla nufidelo goeada di dihïmu yölasisebegola säsio.
ACT 26:15 Amala sälebe na naba obëgësalea, Dafidilo, dida nowëla nabi. Amala nabelebe Dafidilo Geloia säla obëgësalea, Neda Yesu, dia neala sëlasilo amomelë.
ACT 26:16 Di nowela emoea emesala namië. Di hamoi hamolasilo namiäiage, dia walio ne neebe melï amoge, hobea ne bimolö amoge udia dolöma säla ïmäia na di memelela ifosimolöïe ulufadigila misi neawe.
ACT 26:17 Hobea ne bimolöla säi amoda, di fii nefolalebe amoliage, amase, udia dolö fii elö nefolalebe amoliage, di nufudadigiloea na damula awäla sigi moholömelë. Na di ilima fisiga gahagomelë.
ACT 26:18 Ilile si fisigälasimolöïege, gasimi sagaia amila yo digalo dibea amige, amase, Saidaniïe geloi hawa amila Godea sigi neebea ami ili besulasimolöïe, na di fisiga gahagomelë. Ilia amala hamoseda, ilile nafade hamoi amo hëla fisimolö. Amase, udia dolö nema asigi afädë negela Godea hïle nafolaimadi namiäia fu ïmolömelëla säsio.
ACT 26:19 Amalebe, Gini Agiliba-o, selesaia mosöala olesalea ado säi amoda na fisila made nelo.
ACT 26:20 Dafidida Damasaga nefolalebe amolimage, Yalusaleme nefolalebe amolimage, amase, Yudia sege sulubadela dibea nefolalebe amolimage säla ïahalea, Dili asigi besulahilä Godemadi nea, dili dofä asigi besui amo gadola mala hedabi olela hamosa namialola säla ïalahilä, hobealada fii odoa ilimage amala säla ïaha aligilomelë.
ACT 26:21 Amala säla ïaha aligilo amoïe, Yu dolö nefolalo amolia ne Godeïe mosöa nebegi gaulahilä baagomäia nufidedelä hamoimelë.
ACT 26:22 Amaimo, Godea ne ugila negesebegida, na memasamage, ëi sälomage ado säsäla misi amo, aso, walio säha neawe. Nada ado elö made sähamelë. Nada siiba bea sälolea, Moseselea nelebo gausiala digamolömelëla ado säla negei amomu sähamelë.
ACT 26:23 Ilia gomalä säla negei. Afädë Memelei amoda së molö dialea. Amalahilä, bauiala nowemolö amo dafidifalï hï nowese amea ea Godeïe yo digalo amo e fii amolimage, amase, udia dolö fii odoa amolimage säla ïmolöla bea säla negeila Foloea säi.
ACT 26:24 Foloea amala säha nebegi Fesidusia gelola uuala sähalea, Folo, dida gagaosebego. Dïe dawadigilo edefade goeada dihïdi gagaosebegola säi.
ACT 26:25 Amala säsebegi, Foloea sähalea, Dolö edefade Fesidusi-e, ne gagaosa maademelë. Nada dofä säha. Asigi gäwi nea gowe sähala sähamelë.
ACT 26:26 Gini Agilibaeada na ado säi amoïe dawadigisa neamelë. Nada musügä negela made säla ïaha maademolöi neawe. Na helësësaleada, ea dawa made made, amoli sulubadela ea dofä dawadigisa maadei nebegola helësësamelë. Mida, amo hamoi amoda musügä nea hamoi made ameada amala helësësa.
ACT 26:27 Gini Agiliba-o, diada bea säloïe ado amoda dofäla helësësale. Na helësësaleada, diada dofäla helësësala helësësamelëla säi.
ACT 26:28 Amasebegi Agilibaea Foloma säla obëgësalea, Ne Geleso sosogo namolöïe fu oboba gogi aligilasimäia helësësebela säi.
ACT 26:29 Amala säsebegi, Foloea säla obëgësalea, Fu obobagi galëge ma, sedadegi galëge amoïe na dimu made, udia dolö na walio ado säsebe nabaha nefolalebe amoli sulubadelage nihïne gadoi namiäiaïe Godema adosamelë. Nihïne gadoi gaso, dili igi ëfëa galabaia negelo amo gadola made negela namiäiala helësësamelëla säi.
ACT 26:30 Amasebegi beaha aligilo ginige, gamane beaha aligiloge, Benisige, ilibalä sulo amolige hä nowei.
ACT 26:31 Nowelahilä ili segea doadigila awäla hilidomu sähalea, Dolö goweda ea hamoi amoïe nufulöge, galabaia negemolöge maade gabula säi.
ACT 26:32 Amasebegi Agilibaea Fesidusima sähalea, Dolö goeada Sisaea ïe gudi nabuäiala made säi galebeda, dia fisiga gamalalabiola säi.
ACT 27:1 Ilia nilï ödä sibigi Olomo moholö dialeala ado afädë negesebegi, ilia Fologe dolö galabaia negei odoage ami beaha aligilo afädëïe naabogi gausi. Beaha aligilo amoïe ëida Yuliasa. Eada ami dolö hädali afädë beaha aligilo nelo. Eda beaha aligilo Gini Sisaïe Ami Dolö amoligi nelo.
ACT 27:2 Nilï ödä sibi Adalamidiamala misi dilo amogi fila afiai. Sibi amoda Esia segeïe gaamu agesumadi besela galala digila moholö dilo. Desalonaigala Masedonia fii dolö afädë ëi Alisadagusage nilïbalä afiai.
ACT 27:3 Afiala amo aiyo amogi Saidono besela galai. Besela galalahilä Yuliasaea Foloma hedabola helësëlasila sähalea, Di damelë wi nefolalebe amolia nelebo di gumusui dibe amo gadoi ïmäia, ili neebea moholöi galeala säla ï.
ACT 27:4 Amalahilä sege amo dïgïla ödä sibigi afiaha dibegi, fo eso digasebeamadila maasebeamadi amogi moholö ïliawasebegi, fo hagula Saibulusimadi dewagila afiai.
ACT 27:5 Afialahilä ödä duhulu dëgëla awäla Silisiale Bäfiliale agesuamadi awälahilä Ilisiaïe gaamu Maila besela galai.
ACT 27:6 Besela galahamelebe, ami dolö beaha aligilo amea ödä sibi elö Alegisädaliala misi Idalimadi moholö dilo amogi nilï sigi awäla ifosi.
ACT 27:7 Segeyo holöbö nahuigi afiahalea baagi sëla aligi gebela awäla Nidusa gaamu sida gagala afiai. Fo amea nilï moholö helësëido amogi moholöi made gabugida oböla fo hagula ödä södölo Gilidimadi dewagila awäla Salomone segeamadi sida gagala afiai.
ACT 27:8 Nilï baagi sëla aligi dewagila didigila awäla sege afädëgi besela galai. Sege amoda Ödä Sibi Musügä Negelo Hedabi Segela sälo. Amoda gaamu Alasea ga madela ami dilo.
ACT 27:9 Segeyo yafie baagila asi amogige, amase, Molö Made Nülo Segeyo amoge baagila asi amogige segeyo amo gaaluda, baagoloea ödä sibigi aulo made negei. Amo helësëla Foloea ilima sähalea,
ACT 27:10 Dolö dili-e, wilahilä moholö amoda dofea made, nafade na melïmelë. Nelegei difolalebe goge, du edefade wege neala nafademolö gabumelë. Amase, nilï odoage baagomolö gabumelëla säi.
ACT 27:11 Amala säi gaso, ami beaha aligilo amea ödä sibi gaulolea ödä sibi eedolea helësëse amo gadola hamodeläla helësëla Foloea säsebe amo gadola made hamodeläla helësëi.
ACT 27:12 I bäu giise gaalu, gögï mulo segeyo besela galasebegi sege amogida ödä sibi negesilamu diamolö amo dofea made gabula helësëlahilä, dolö yafie ilia Finigisi moholö amoïe ado afädë negei. Ilia nilï Finigisi besela galamolö walebelela bimolö moholöila helësëi. Gögï mulo segeyo besela galasebegi ami negesimu diamolöla helësëi. Finigisi amoda Gilidi södöloïe ödä agesua. Sibi negelo segea ami diëda eso digasido amoïe fefeädimadilage dafädimadilage melëlo.
ACT 27:13 Fo eso digasido amoïe fefeädimadila holöbö geleäla maasebegi, dolö amolia hili helësëi amo gadola ga moholö dialeala helësëi. Amala helësëlahilä nelebo yöi igi aeanea hamoi amo dusugala neala gauia adalahilä, Gilidi segeïe ödä agesuamadi afiai.
ACT 27:14 Aso, afiaha dibegi heleia made fo geloi edefademaläde Gilidi södölomadila misi. Fo amoïe ëida Ulagulo fo.
ACT 27:15 Amalahilä du amo foea gaula näiadodimu bolosebegi iliada du obëgëdelä hamoi gasoda, obëgëmolöi made melï. Amasebegi hä foea du gaula mosäia fisigisi.
ACT 27:16 Fisigisila awäla södölo holöfalï, ëida Gaudaea fo holöfalï hagusebegi, nilïada häualafalï du edefade mia du holöfalï begela negei amo dusugala gaula misi.
ACT 27:17 Dusugala gaula maala du holöfalï amo gauia adala du edefade amodaia negesebegi, ilia du edefade hawa ëfë fisiga idogolahilä amo bäimäia fëdöla begela negei. Ilida du amo ödämu dibe amogi ödä dögöla digai made giäbigi ëi Sidisi amogi aligisiloea bedähalea ïe balai amo haila negesebegi foeamu gaula asi.
ACT 27:18 Fole ödä bubolele dagabola maase amolea nilïda edefade besu besui. Amasebegi, amo aiyo amogi ilia mi gäwila nelegei dudaia negei amo duhulugi hadia idodogosa nelo.
ACT 27:19 Amalahilä awäla segeyo naabo osodagi, ödä sibigi negelo nelegei odoa, ëfëge balaige iige amo gadoi difolalo amoge hili naaboea neala ödägi hadia idodogoi.
ACT 27:20 Segeyo yafiegi nilïada eso, gasumilïle made beala, fo edefademalä maahalea nilï neala besu besusamu nelo. Amasebegi nilïa helësësalea, nilïda samolö made gabu, baagomolö gabula helësëi.
ACT 27:21 Segeyo yafie ili molö made nasebegi, Foloea ili mogogi nowela nea sähalea, Dolö dili-e, dilia nïe ado nabala Gilidi made baagi galebeda, nafadela bedälasila hamoi amoda made beala, nelegei odoa made fisilabio.
ACT 27:22 Amaimo, walio na dilima gomalä sähawe. Dili bedäla made, obeägïmalo. Mida, nilïgi afädë made baagomolö. Du wemu nafademolömelë.
ACT 27:23 Gode neebe amoïe ne neawe. Nada ïe ëi gauia adaha aligilo. Gode amoïe selesaia fii afädëa walio gasigi ne sebea maala nea
ACT 27:24 sähalea, Folo, bedämabu. Dida awäla Sisaïe siigi namolö galea. Amase, nabuö. Dolö dibalä ödä sibigi sefolalebe goli sulubadelada made baagomolö Godea dïe naabogi gausila ïmelëla säsio.
ACT 27:25 Ameada, dolö dili-e, bedäla made, obeägïmalo. Mida, na helësësalea, Godea ado nema säi amo gadola gausiala digamolöla helësësamelë.
ACT 27:26 Gaso, foea nilï gaula awäla södölo afädëgi aligisimolö galeamelëla Foloea säi.
ACT 27:27 Amaimo, segeyo silasi awäha nelolahilä gasisebegi, nilï ödä duhulu ëi Ödä Adiliagi foea gaula awähamu nelo. Gasi mogogi ödä sibi gaulo dolö amolia ödä agesu holöbö ga madei gabula helësëi.
ACT 27:28 Amala helësëlahilä ilia ödä amo dofe bimolöïe ëfë sedade amoïe bidigi yöi afädë begelahilä ödägi fisiga idogoi. Fisiga idogoi amo nea adogola beahamelebe ödä dögöla digai dofei amo mida nabülasi biyidia gadoi melï. Amala bealahilä holöfalï aliga galahilä bu elö fisiga idogola dofela beahamelebe ödä dofei amo mida nabülasi ohodoa gadoi melï.
ACT 27:29 Amalahilä nilï awähalea igidaia aligisiloea bedälahilä, ilia nelebo yöi igi aeanea hamoi biyidia amoli du amoïe gobegi begela sadia idogoi. Amalahilä, ilia sege yola eso neëmäia Godema adosa nelo.
ACT 27:30 Amaimo, ödä sibi gaulo amolia sibi dïgïla äudulälahilä du holöfalï fisiga idogola wäfalï sähaleada, Nelebo yöi igi aeanea hamoi odoa sibiïe busamadila fisiga idogosamelëla säi.
ACT 27:31 Amalebe Foloea ami beaha aligilo amomage ami dolö amolimage sähalea, Ili sibi gowegi made aligiseda, dili baagomolömelëla säi.
ACT 27:32 Amala sälebegi ami dolö amolia du edefadegi du holöfalï begei amo damula sali.
ACT 27:33 Haea gämolö hä ga madese amo gaalu, Foloea dolö amoli molö muäiala ilima sähalea, Segeyo silasigi dili molö fodögïla made naala memalä nelo.
ACT 27:34 Walio dili molö muäiala sähamelë. Dili namolöïe molö molö dialea. Dilile busa hilï afädë made besela digimolömelëla säi.
ACT 27:35 Amala sälahilä Foloea beledi afädë nealahilä ili sulubadela sebea ami nea Godema nesegelahilä dagabola naha nelo.
ACT 27:36 Amala hamosebegi, sulubadela asigi gadaealahilä ilige molö mai.
ACT 27:37 Ödä sibi amogi dolö sefolalo amoli gedolada hädali äudäïe nabülasi gifalädalïaïe odoai gafeia sulo.
ACT 27:38 Molö mai agulahilä, ilia ödä sibi amo hageamäia eladi gadoi ëi widi dilo amo ödägi sadia idodogosa nelo.
ACT 27:39 Segeyo hosogasebe amo gaalu, ilia duhulu agesua besela galaia amo bealahilä, sege abididula asusugai. Asusugalahilä beahaleamelebe duhulu hedogola bose fula asi dibe amo bealahilä, ami awäla ödä sibi negemolöi galëda, negemolöla helësëi.
ACT 27:40 Amala helësëlahilä ilia nelebo yöi igi aeanea hamoi amoli ödägi ëfë amo damula sasali. Amala hamolahilä ödä sibi mogola mosäia adelo i ëfëa begela negei dilo amo fisigäi. Fisigälahilä foea ödä sibi gaula mosäia ilia duïe busamadi balai afädë dilo amo gauia adogola neegilahilä, ili ödä agesu dibea ami besela galamolöïe awäha nelo.
ACT 27:41 Awäha nea ödä sibi amo ödä isogi bose giäbigila fedai dilo amogi udigi. Busa amo udigila aligisilahilä fogomolö ulï dilo. Amala aligisi dibegi ödä bubolela edefade maasebe amea du gobe aba fedafusalea dagabodasila nafadei.
ACT 27:42 Amala hamosebegi, dolö galabaia negei amoli ödä agesua dasi afufula fisäla afialoea, ami dolö amolia ili sulubadela nufudadigimolöla helësëi.
ACT 27:43 Ilia amala helësësebegi ami beaha aligilo amea Folo e made nufuäiala helësëla ilima säla ïahalea, Dilia helësëi amo gadola hamomabiola säi. Amala sälahilä ea sulubadelama sähalea, Ödä dasi aulo nefolalebe dilidale ödägi nila digala dasi afufula agesua mosalo.
ACT 27:44 Odoa dilida i gäi amogi gaula, amase, odoa du nuli amogi gaula biila mola afufula mosalola säla ï. Amala säi amo gadola hamolahilä nilïgi afädë made baagola hulu agesua dea negesa maadeimelë.
ACT 28:1 Nilï agesua hedabola besela galalahilä, ami fii amolia sege ödä södölo amoïe ëi Maladamelëla säla ï.
ACT 28:2 Udia dolö sege amogi fii amolia nilï hedabola helësëla hïdo elöla ugila negei. Sege digahalea gögïsebegi, ilia nulo gobelahilä nilï sulubadelama hëgï haumolö mofiamalola säi.
ACT 28:3 Foloea nulo gasa nidilahilä nulo gaamugi gobesebegi, nulo amogi baagolo nuba afädë nulo gaamuea hëgïsebegi doadigila fedala, Foloïe naabogi mihila begedigila gosai dilo.
ACT 28:4 Ami fii udia dolö amolia beahamelebe, Foloïe naabogi nubaea mihila begedigila gosai dibe amo bealahilä hilidomu sähalea, Dolö goeada dofä dolö nufudala baagolo. Eda duhulugi baagomolö halabai gaso, godea nafade hamolo amolima bidi obëgëla ïlo amea e made namiäia amasebela säi.
ACT 28:5 Amasebegi Foloea nuba amo folalela nulogi hadia galahilä, eda made olola hedabi nelo.
ACT 28:6 Udia dolö amolia helësësalea, e galumolöledu ma, fodolo baagola digamolöledula helësëi. Amala helësëlahilä, ili sedademalä beaha nefolalebegi, emada nelebo afädë made hamose melï. Amasebegi ilia asigia oböla elö bedefala helësësalea, eda gode afädë gabula helësëi.
ACT 28:7 Sege afädë ili sebe amo gägägëla dilo amoda södölo amoïe dafidilo ëi Bubuliasaïe sege dilo. Dolö amea nilï ea mosöa fimäia fu ïasebegi segeyo ohodoagi ea nilï hedabola sigi nelo.
ACT 28:8 Bubuliasaïe eedo domalo hëgïge gaisa sëge oloi dibegi, Foloea e dibea ami awäla Godema adoi. Godema adolahilä ea ïe naabo negesebegi oloi dilo amo wahilasi.
ACT 28:9 Amala hamosebegi, södölogi ami oloi difolalo amoli Folo neebea mafusebegi ili wahilasisi.
ACT 28:10 Nilïma obeägïla ilia hedabolafalï hamoi. Amala hamolahilä hobeala nilï ödä sibigi äudulä hamosebegida ilia nelebo nilï gumusui dibe amo gadoi ï.
ACT 28:11 Aube ohodoa ami nelolahilä, nilï ödä sibi afädë Alegisädaliala misi dilo amogi fila afiai. Ödä sibi amo i bäu giilo segeyo amoli besela galasebegi södölogi ami negesi dilo. Sibi amoïe busamadi malö äudä balagula ägüi amolele ausulubo iia hamola baala negei dilo.
ACT 28:12 Afiala nilï Silagusa besela galalahilä, segeyo ohodoa ami nelo.
ACT 28:13 Silagusa amila awäla giso Ilegiuma besela galai. Segeyo afädë ami nelolahilä, fo eso digasido amoïe fefeädimadila maasebegi, nilï afiala gasila didigadigila awälahilä amo aiyo amogi awäla Budeoli besela galai.
ACT 28:14 Besela galalahilä ami nedoo odoa nefolalebe amoli beagolelahilä, ilia nilïma segeyo gifalädalïa namolömelëla säi. Ami nelolahilä nilï Olomo moholö afiai.
ACT 28:15 Afiaha dibegi nedoolali Olomo ami nefolalo amolia nilï maahala säi amo nabalahilä, ilia nilï idiafa gausiamolö maala odoa Abiasa magaia gaamugi gausialahilä, odoada hele filo mosö ohodoa neebea ami gausiai. Foloea ili maasebe amo beala Godema nesegelahilä, ïe iso asigi delësi.
ACT 28:16 Nilï Olomo besela galasebegi gamane ilia, ami dolö afädëa idihë neëgi, Folo mosö afädëgi hïdo namolöi galeala säi.
ACT 28:17 Segeyo ohodoa nelolahilä, Foloea Yu udia dolö nefolalo amolile dafidilo nefolalo amoli misiäia wei. Maala gegedosebegi Foloea ilima sähalea, Nedoola dili-e, nilï fii amolimage, nilïle mäuïe mala amomage na nafade afädë made hamoi nebegi, ne Yalusaleme ami nafodolahilä, Olomo dolö nefolalebe amolile naabogi gausimelë.
ACT 28:18 Ilia gudilahilä ne nufudala baagomolö amoïe mi fädäla made beasebegi, fisigämolöla helësëi.
ACT 28:19 Amala helësësebegi, Yu dolö amolia amamabiola säsebegi, idi elö maade gabugi na beaha aligilo Gini Sisaeamu nïe gudi nabuäiala säi. Amai gasoda, na ne fii amolima nafadela hamoila sämolöda helësëla made nelo.
ACT 28:20 Mi amoïe na dili siia beala ado sämolöïe dili misiäia weimelë. Isilale ilia asigia sisiläfüsa neebe amoïe igi ëfë gowea ne begela negei neawela säi.
ACT 28:21 Amala säsebegi, ilia ema sähalea, Yudia amila dia hamoi amoïe beba nilïma made dëdëla ïasi. Nilïle nedoo misi amoliage ado made säi. Dia nafade hamoilage made säla ïmelë.
ACT 28:22 Dia helësëi amo nilïa nabulöila helësësebe. Mida, sege sulubadelagi sosogo gowe nafade neala sälo amo nilïa dawadigi neamelëla säi.
ACT 28:23 Amala sälahilä ilia ema segeyo naabo negesebegi, ili yafie Folo neebea mosöa ami mofiala gegedoi. Gegedosebegi, Foloea yosefalï nowela Godea Beaha Maadela Sigi Neebe amoïe ado säla ïahalea, mi awala ïaha nebegimu së gäi. Ea Mosese nebegi Ado säla negei amo gadolage, amase, Godeïe bea sälo nefolalo amolia bea säla negei amo gadolage säla ïahalea, Yesuïe säi amo dofä gabula helësëmäia, säla ïahamu nelo.
ACT 28:24 Amala säla ïasebegi, dolö odoaeada ea ado säsebe amo dofä gabula helësëi. Amase, odoaeada dofä gabulada made helësëi.
ACT 28:25 Amala hamolahilä ili hilimu asigi afädë made negela afiai. Dafidida, Foloea ado afädë wagala sähalea, Eleloi Gesamia bea sälo Aisaeama aligila dilile mäuma mogola säi gabu.
ACT 28:26 Ea sähalea, Udia dolö amoli neebea awäla ilima sähalea, Dilia nabahamu nea gasoda, fädäla made helësëmolömelë. Dilia beahamu nea gasoda, galone gowe gabula made beagolemolömelë.
ACT 28:27 Amoïe mida, udia dolö amolile asigi dofogai nea. Ili gëhe gai gadoia hedabola made nabelo nea. Ilile siige dofogai nea. Ilia siia beala, gëhea nabala, asigia helësëla besusa galebeda, amoda na ili wahilasilabiola sämalola Aisaeaea säi.
ACT 28:28 Amai ameada gowe helësëmalo. Godeïe damula moholö ado mala amoda udia dolö fii elö amolima fisiga gaila helësëmalo. Ilia nabulömelëla Foloea säla wagai.
ACT 28:30 Foloea mosö e adi amoïe bidi ïalahilä ami gäheo i äudä nelo. Ami nea udia dolö sulubadela e neebea mofusebe amoli obeägïla gauia idala nelo.
ACT 28:31 Ea Godea Beaha Maadela Sigi Neebe amoïege säla ïala, amase, Dafidilo Geloi Yesu Gelesoïe malage säla olelesa nelo. Bedäla made gelola säla olelesa nebegi, afädëa ema olelemabiola made säi. Hä amo.
COL 1:1 Neda Folo, Gode hïle hamelo dibe amea, Geleso Yesuïe abosolo neawe. Nedoo nalifi Golosi gaamugi Gelesoma asigi afädë negela, ema dila nefolalebela dilima, nilïle nedoo Dimodi alïa beba gowe dëdëla ïasisago. Nilïle Naado Godea dilima ugila negelasiloge, neala dalulasiloge ïmäia hamesa neawe.
COL 1:3 Alïa dilile Godema adosaleada, segeyo sulubadelagi nilïle Dafidilo Geloi Yesu Gelesoïe Eedo Gode neebe amoma nesegesamu aligilomelë.
COL 1:4 Dili nefolalebe goea Geleso Yesuma asigi afädë negei amo, amo wälasi nebegoge, amase, Godeïe udia dolö sulubadelama boba hahamosa nebegoge, alïa nabalahilä, nesegesa aligilo.
COL 1:5 Ado dofä amoda, Ado Mala Hedabi dili neebea besela galasebegi, asigia sisiläfüsa namolö amoda, nabi gomelë. Selesaia mosöa musügä negei amoïe dilia asigia sisiläfüsa neebe goeada, dilia asigi afädë negesa nebegole, boba hamosa nebegolemelë. Ado Mala Hedabi ameada, sege sulubadelagi bäula edelahilä, gägä negelasilo nea. Diliage ado amo dafidi mi gäwila nabalahilä, Godea ugila negelasilo ï amo hedabola helësëla, dofä gabula beagolesolo amo gala, amo gadolamu gägä negela bäulasisamu nelo.
COL 1:7 Ado mala amoda, Ebafolasaea dilima säla olelei. Eda nilïle damelë obeägïlo nilïbalä hamoi gedola hamolasilo nea. Eda asigi falagasei nea, dili ugila negela, Gelesoïe hamoi hamosa nelomelë.
COL 1:8 Godeïe Gesamia odoa boba hamolo dilima ï amo, Ebafolasaea alïma ulufala säla ïmelë.
COL 1:9 Dilile säla ïasebegi, dafidi nabia amila alïa Godema dilile adolasisamu nelo amo neamelë. Asigi falagasei namolöle, helësëlole, ïe Gesamia ïlo dibe ameada, Godea hamese amo gadola helësëlo amo dilima nobamäiaïe adolasisamu neamelë.
COL 1:10 Amala adosebe amoïe mida, dilia Godeïe mala bëgëmolö dibe amo gadola bëgëla awäla, Gode neala obeägïmäiaïe adolasilo. Amoda gomalä. Hamoi hedabi amoli sulubadelagi dilia gägä negemäiage, Gode dawadigilo amo edemäiage,
COL 1:11 dili mia yöi dibe amo sulubadelagi, aabela made habobala, aso maadela, gelola namiäiaïe, ïe geloi hïdo elöia geloi sulubadela ïala, dili neala gelolasimäiage, amase, Godeïe udia dolö yo digalo neebea ami neëgi, ilima ïmolö daiala negei dibe amoda, Naadoea dili neala hedabolasi amea, dilimage mogela ïmolö amogi, ema obeägïla nesegesa namiäiage, adolasilo.
COL 1:13 Gasimi sagaloïe geloia nilï gide begei dibe amo beala, Naadoea nilï naabogi gaula, ïe malö boba hamoi neebe amea beaha maadela sigi neebea ami nilï sigi maala ifosi.
COL 1:14 Malö ameada nilïa nafade hamoi amo hëla fisilahilä, nilï fisigäla ifosi nefolalea.
COL 1:15 Nilïa Gode made melëlo gaso, ïe malöda Gode hï e gadoi nea. Eda ïe malö abulümi neada, Godea hamoi dibe neebe sebe amo sulubadelaïe busa nea.
COL 1:16 Godea ïe malömadila mudaia neebe amolige, nagadaia dibe neebe sebe amolige sulubadela hamoi. Siia bimolöi dibe neebe sebe amolige, bimolöi made dibe neebe sebe amolige, beaha aligilo nefolalebe amolige, dafidilo nefolalebe amolige, mudaia geloi elö elöla nefolalebe amolige, sulubadela emadilamu aligila hamoi. Godea ïe Malö amoïe namiäia hamoi amolida, sulubadela ïe Malömadilamu hamoi.
COL 1:17 Amoli sulubadelada dafidi nelo made, Geleso e dafidi nelo amo nea. Sulubadela dibe neebe sebe amolige, made balälemäia gaula aligilo nea.
COL 1:18 Geleso sosogo nefolalebe amoli sulubadelada, ïe domalo nea, hï eda busa nea. Domalo amoïe namolö mida, hï e nea. Sulubadela dibe neebe sebe amoïege, busa hï emu namiäia, malö abulümi nelo amo baagola, baagoi bauiala mi gäwila nowelasi.
COL 1:19 Godea hamei amo gadola, ïe namolö amoge, mala amoge sulubadela ïe malöma nobamäia hamelahilä, Gode hï ïe malöma nobalasi.
COL 1:20 Hä, malöea hamoi ameada, nelebo sulubadela dibe neebe sebe amolibalä ado nii neebe amo nufuda salimäia helësëi, nagadaiage, mudaiage. Ïe malö i fügäigi baagola, ïe heale digai ameada, Godea sulubadela ebalä neala aealasi. Aealasi ameada, amala nufuda sali.
COL 1:21 Dafidi dilia Gode baagi ïala wagadi made nelo. Amoda dilia mala nafade hamosa nelo amea iso asigigila Godebalä ado neala nelomelë.
COL 1:22 Gaso, walioda, hä, dilima asiai maade, nafade made baai, mogoi eleloi neëgi, ïe sidaia sigi moholöïe, ïe malö domalogi baagoi amea, dilibalä ado nii nelo amo nufuda sali neamelë.
COL 1:23 Amai gaso, dilia Godema asigi afädë negei amo, fologola made, amo wälasi nea, Ado Mala Hedabi nabi ameada, asigia sisiläfüsa namolö ï amo, nigia gala fisila made, gaula fëdöla namolö dialea. Ado Mala Hedabi dilia nabi amoda sege dibe sulubadelagi säla ïaha maadei. Neda amoïe hamoi hamolasilo Folo neawe.
COL 1:24 Na dilile së nase wegi obeägïsa neawe. Geleso sosogo nefolalebe amoli sulubadela Gelesoïe domalo neebe amoïe, na nihïle domalogi ilile së nasebe ameada, Gelesoea dafidi së naala idiadoi amo na së naala baahadio.
COL 1:25 Geleso sosogo neebe amoli sulubadelaïe hamoi hamolasilo namiäia, Godea ne memelela ifosi neawe. Dili hedabi namiäiaïe, ea hamoi amo na hamomäia nema ï. Gelesoïe ado mala dibe amo sulubadela dilima säla olelemäia, hamoi amo nema ïasio.
COL 1:26 Amoda mi gäwia amila udia dolö nefolalo amoli sulubadelama ulufadigi made, musügä negesi dilo amo walioda, hä, hïle udia dolö ilima ulufala olesa nea.
COL 1:27 Hïle hameloea, ado musügä negesi dilo amo Godea ïe udia dolö amolima ulufala olei. Ado amoda hedabi hïdo elöi amo helësëmäiage, amase, udia dolö fifi asi nefolalebe amoli sulubadela ado amea ugila negemolöi gabula helësëmäiage, amala hamoi. Musügä negesi dilo amoda gomalä. Geleso eda dilile isogi dilibalä neebe amomelë. Amala neebe ameada, Godeïe hedabi hïdo elöi namolö dibea ami namolöila helësëla, asigia sisiläfüsa namialo.
COL 1:28 Hä, dofä asigi falagasei nea, nilïa säla ïadigi, hahamogila digi, säla olelela digisa aligise ameada, ïe säla ulufalo neamelë. Udia dolö neebe amoli sulubadela Gelesoma dilahilä, asigi hedabi negei nefolalebe amoli, Godeïe siigi, sigi gaula moholöïe, amala hamosa aligilomelë.
COL 1:29 Hamoi amo hamosa maademolöïe, ea ïe geloi edefadea ne neala gelolasisa neëgida, na aso maadelahilä, hamoi amo baagi sëi edefade hamosa neawe.
COL 2:1 Dili nefolalebe diliage, udia dolö Eleodisia gaamugi nefolalebe amoliage, udia dolö ne made melëlo nefolalebe amoli sulubadelaeage, na dili ugila negemolöïe baagi sëi nea, hamoi hamosa neebewe helësëmäiala hamesamelë.
COL 2:2 Na dili sulubadelaïe iso asigi gelolasimolöge, dihilimu boba hamola dila aeala namiäiage, amoïe hamoi hamosa neawe. Dili amo gadoi neada, asigi hedabi neaha maadelahilä, dilile asigi afädë negei amo dofä gelomolömelë. Hä, Godea ado dafidi musügä negei dilo amoda, dilia dawadigimolömelë. Ado musügä negei amoda, Geleso hï emelë.
COL 2:3 Asigi falagasei namolöle, dawadigilole hedabi hïdo elöi amoli sulubadelada, Gelesoma musügä negei dialea.
COL 2:4 Na dilima säseweda, odoaea ado hedabi hïdo elöi säsebe amea dili gadiabola dahila neloeaïe sähamelë.
COL 2:5 Ne dilibalä nea made gaso, nïe asigi gesamileda, dilibalä nea. Dilia Gelesoma asigi afädë negei amo fologola made nea, mala mogoi hamosa nebego bealahilä, na edefademalä obeägïsa neawe.
COL 2:6 Dilia Geleso Yesu e dilile Dafidilo Geloi namiäialahilä, neala gaui amo gadola, ebalä dila namolöi namialo.
COL 2:7 I nagagi difi aulo amo gadola, dilile difi ema awälahilä, osogolodaia mosö olelo amo gadola dilile namolö Gelesoma diia adogola namialo. Dilima säla olelei amo gadola, dilia Gelesoma asigi afädë negei amo gelola namolöi nea, nesegemolö nobala adugamäia namialo.
COL 2:8 Dolö odoaea dolöïe dawaea dili dahila neala, ado iso gäwi made säsebe amea, dilia asiala ilia helësëse amo bëgëla awäla, ïe memalä galabaia hamoi gadoi hamolasilo aligiloea idihë namialo. Iliada Geleso mi hamolo made, hilile maüïe mala olelei amoge, nagadaia galuge, mugabege, mi hamola sälo nea.
COL 2:9 Geleso e dolö domalo nea, hedabi hïdo elöi elö elöla Godema nobai dibe amolida, ema nobai dialea.
COL 2:10 Diliage Gelesoma dila nebegi, namolö dilima ï ameada, namolö amo dilima nobaha maadei neamelë. Gelesoda, nelebo geloi elö elöla dibe amo sulubadelaïe busada, e neamelë.
COL 2:11 Gelesoma dila nea, fagulo gäi giilo amo gadola nagadaia mala gäi amo ami giila fisila, dili gafodo damui nea. Amoda dolö naaboea dagaboi made, Geleso ea dagaboi.
COL 2:12 Dili ödägi gei ameada, Gelesobalä gedola baui amomelë. Gode e geloi edefade neebe amea, Geleso e baagoiala nowelasi neebe amoma dilia asigi afädë negesebegi, dilige Gelesobalä gedola nowela ifosi neagomelë.
COL 2:13 Dili dafidi nagadaia mala hawa neada, asiala hamosamu nelo amea, dili baagoi gadoi nebegi, Godea dili Gelesobalä neala nowela ifosi amo neagomelë. Nilïa asiala hamoi amo sulubadela Godea hësa maadeimelë.
COL 2:14 Ado säla negei amo damula, nilïa nafade hamosa nelo ameada, bidi negei nebegi, Godea neadigi. Ado säla negei amea hamomolö dialeala säi ameada, nilïbalä ado neala gide begei dibegi, Godea neala gaula awälahilä, Gelesoïe i fügäidaia baala fisimolöi fisi.
COL 2:15 I fügäi amodaia Gelesoea mudaia sigi aligilo nefolalo amolige, beaha aligilo nefolalo amolige, ilile geloi hamolo nefolalo amoli sulubadela damusa maadelahilä, udia dolö sulubadelaea bimäia, na baagila asimelëla säla, ili gide begela gaula moholöi asi.
COL 2:16 Ameada, dilia molö nase ameage, ödä nase ameage, amase, segeyo edefade amoïege, aube gähe olei amoïege, molö giala nülo segeyo bëgëla hamose ameage, segeyo Sabadaïe mala amo gadola hamose ameage, odoaea dili mogelasila asiala hamoimelëla sämolöda, dofea mademelë.
COL 2:17 Mala amolida, hobeala moholö amoïe ausulubo gadoi dialea. Hodo dofäda, Geleso hï emelë.
COL 2:18 Afädëa wäfalï dihï nagadaialo gadoi namolöi galealage, selesaia fii ëi gauia adogola sämolöi galealage, dilia hamoi amoïe bidi nimolö amo made neloeala säseda, ïe ado made nabala, idihë namialo. Dolö ameada simasia melï amoïe ado yafie memalä säla dabola, nagadaia mala helësëla, mi maade amogi, gugusäla bimäia säse amea,
COL 2:19 ea Geleso nilïle busa neebe amo gaula aligilo made nea. Busa ameada domalo nelebo hulu dibe amoma geloi ïala, domalogi moma gumu, dii sulubadela amea iilasila, Godea hamese amo gadola ëdëlasilo neamelë.
COL 2:20 Dili Gelesobalä baagoi ameada, nagadaia nea hamolo ameage, mugabeïe geloi ameage, dili dafidi gide begei dilo amo fisigäi neagomelë. Amala neada, nagadaia mala hamolo nefolalebe amea hamosa neebe amo gadola, dili made fisigäia hamolo amo gadola wäla hamosa nebegoda mi edoïe.
COL 2:21 Iliada ado sälo amoda gowe gadoi. Gowe nimabio. Gowe muabio. Gowe diigimabiola sälo.
COL 2:22 Amolida, dafidi dolö hï hamolahilä, säla olelela hamomalalo. Ameada, mala amoli sïgälo dialeamelë.
COL 2:23 Dolöea hï asigia göa nelegeloge, wäfalï nagadaiai gadoi aligiloge, gafodogi sëmäia hamologe, mala amoli gadoi helësësalea, asigi nulügäi hedabia säla negei gabula helësëmolöi gaso, mala amoli gadoi hamose ameada, domaloïe gesami aulo dibe amo fisimäia hamolo made nea.
COL 3:1 Godea dili Gelesobalä neala nowelasi neagomelë. Amala hamoi neebe ameada, dilia selesaia mosöa Geleso hïle filodaia, Godeïe naabo dafädimadi sebea ami nelebo dibe amoli helësëla, amida dilile boba gosala namialo.
COL 3:2 Nagadaia nelebo dibe amoli helësëla made, nelebo selesaia mosöa dibe amolimu helësësa namialo.
COL 3:3 Dili baagoi nea, dilile namolö Gelesobalä, Gode neebea ami musügä negei neagomelë.
COL 3:4 Dilile namolö gähe Geleso hï e neebe amo ulufadigisolo amo gala, dilige ebalä, ïe yo digalo hïdo elöi amola ulufadigimolömelë.
COL 3:5 Amamolö ameada, nagadaia mala amea hamelo amoli baagosa maademalo. Amolida, udia dolö susugu hamologe, nigime baai mala hamologe, gesami auloge, hamela diigiloge, gesami awäla naamu negemolöila helësëloge, amo sulubadela baagosa maademolöi maademalo. Gesami aulo amoda, nelebo odoama göa negelo mala amo gadoi dialea.
COL 3:6 Mala amoli gadoi hamosalea, Godeïe ado neadigilo nefolalebe amolima Godeïe mihalälo moholömelë.
COL 3:7 Dafidida, mala amolia dili sigi nea, ilia hamomola säse amo gadola, dilia bëgëla hamosa nelo amomelë.
COL 3:8 Amaimo, walioda mala egowe ili gadoi sulubadela fisisa maademalo. Habobaloge, mihaläloge, nafade hamologe, gagadeloge, baagido säloge, dilile nafi idigila ado nafade säloge, fisisa maademolöi maademalo.
COL 3:9 Asigi goofo, ïe mala amola giila fisilahilä, asigi gähe salugai neebe ameada, dilia dihilimu wäfalï sämabio. Asigi gähe amo hamolo Gode neebe amea, hï e gadoi namiäia, ea dili bedefalasila, e neebe amo dawadigisa maademäia, dilima amala helësëlasisa neamelë.
COL 3:11 Asigi gähe amogi, nilï sulubadelada, afädëdi nea. Yu udia dolöle, Giligi udia dolöleda maade. Gafodo damulole, made damuloleda maade. Amase, sege elögi fiige, mala melëlo made gadoi hamologe, galabaia hamoi gadoi hamolasiloge, fisigäige, maademelë. Mi hï eda, Geleso nea. Eda nilï sulubadelaïe isogi nea.
COL 3:12 Godea dili boba hamola ïe namiäia, ea dili memelela ifosila, hïle udia dolö nefolaleagomelë. Amala nefolalebe ameada, dilia bobasëmolöge, ugila negemolöge, dihili nagadaiala namolöge, amase, hedabola beala geleä hamomolöge, aabela made habobamolöge, amoli gadoi salugala namialo.
COL 3:13 Dili nebegoea odoaïe mala beala, weda abïdä amahadula helësëseda, made säla, fisimalo. Amase, dilia nafade hamoi amo Dafidilo Geloia hëla fisi amo gadola, diliage odoaea nafade hamose amo hëla fisimalo.
COL 3:14 Hedabi hamomolö amolidaiada boba hamolo amo bu salugamalo. Boba hamolo ameada, mala hedabi hïdo hïdola dibe amoli sulubadela neala afädëfalï hamolasila, hedabi hïdo elöi hamola neala gedolasilo nea.
COL 3:15 Dili domalo afädë nea, Godea dili dalulasimäia wei ameada, Gelesoea neala dalulasilo dilima ï amo helësëla, dilile iso asigigi hedabola memelela hamomalo. Amala hamosa neada, nesegesamu namialo.
COL 3:16 Dofä asigi falagasei nea, dilia dihilimu säla olelela digisa neage, neala hamogila digisage, namialo. Amase, gë udähalea, Gë Udälo bebagi dibe amolige, Godeïe ëi gauia adogola gë udälo amolige, Eleloi Gesamia dilima gë udälo olelesebe amolige, udäha namialo. Amala hamosa neada, dilile iso asigigila Godema nesegesa nea, Gelesoïe ado hïdo elöi asigi dafidilo namolö dibe amoda, dilile isogi negesiä namialo.
COL 3:17 Amaimo, Yesuïe aulodaia nea, Naado Godema nesegesa neada, dilia hamosebe amoge, säsebe amoge, sulubadela Dafidilo Geloi Yesuïe ëigi nea, hamomalo.
COL 3:18 Udia dolöma fii sefolalebela dili-e, dili Geleso sosogo salea hamomolö dibe amo gadola, dilile diguaea hamomola säse amo nabala ili hawa namialo.
COL 3:19 Dolö udia nii nefolalebela dili-e, dilile udia sëmäia yölasila made säla, boba hamosa namialo.
COL 3:20 Malësä-o, dilile diado diemelea ado säse amo sulubadela, nabala hamomalo. Amo gadola hamosebe ameada, Dafidilo Geloi neala obeägïlasisa neamelë.
COL 3:21 Malö eedo nefolalebela dili-e, dilia dilile malö yölasisegi, ili dofea madela helësëia idogoloea, eegedidigila sämabio.
COL 3:22 Galabaia hamoi gadoi hamolasilo nefolalebela dili-e, dilia dilile beaha aligilo nagadaia nefolalebe amolia hamomola säsebe amo gadola, sulubadela hamosa maademalo. Ilile sidaiamu made, amase, ilia hedabi hamolo neala sämäiamu made hamomalo. Amala made, dofä asigi mogoi negei nea, Dafidilo Geloibalä bedäla, e helësësa nea, dilile beaha aligilo amolia säsebe amo bëgëla, hedabimu hamosa namialo.
COL 3:23 Dafidilo Geloia dilile bidi daiala negei dibe amo ïmolö helësësa nea, nelebo sulubadela hamosebego hamosaleada, dolöïe hamoi hamolasisala helësëla made, Dafidilo Geloiïe hamoi hamolasisala helësëlahilä, dilile geloi sulubadelaea hamomalo. Dilia hamoi hamose amoda, Dafidilo Geloi Gelesoïe hamoi hamolasisamelë.
COL 3:25 Nafade hamosa neebe ameada, nafade hï hamose amo gadola, së ïa obëgëmolömelë. Godea udia dolö memelelahilä, hili hamoi amo gadola, nofela made, afädëdila mogemolömelë.
COL 4:1 Beaha aligilo nefolalebela dili-e, dilile galabaia hamoi gadoi hamolasilo nefolalebe amolima mogola hamomolö dibe amo gadola, nofela made, afädëdila hamosa namialo. Diliage dilile beaha aligilo selesaia mosöa neebe amo helësëmalo.
COL 4:2 Godema nesegela säla, hedabola helësëla idihë nea, Godema gelola adosamu namialo.
COL 4:3 Amala hamosa neada, dilia nilïlege adolasisa namialo. Amala säseda, nilïa Godeïe ado mala Gelesomadi aligila dafidi ulufadigi made negei dilo amo säla ïmolöïe, Godea nilï fu ïala, idi doga negemäia, adolasisa namialo. Mi amoïeda, ne walio galabaia neawe.
COL 4:4 Na udia dolöma ado mala ulufala säla ïmolö dibe amo gadola säla ïduläïe, Godema adolasimalo.
COL 4:5 Udia dolö segea nefolalebe amolibalä neada, hedabola helësëla asigi falagasei namialo. Mala hedabi hamomäia, fu ï dibe amogida, memalä namiabio.
COL 4:6 Odoaea dilima ado säsegi, dilia ili sulubadelama hedabola gomalä säla obëgëmolöla helësëmolöïeda, molögi ëbï baalo amo gadola, ili ugila negemolöila helësëla, ado hedabola sälo namialo.
COL 4:7 Na hamosa neebeweïe adoda, Digigusi ea dilima säla ïmolömelë. Eda nedoo obeägïlo asigi falagasei nea, hamoi hamosamu aligilo. Dafidilo Geloiïe hamoi nilïa gedola hamolasisa aligilomelë.
COL 4:8 Ea nilï neebewea hamosa neebeweïe ado dilima säla ïmäiage, dilile iso asigi gelolasimäiage, na e dili neebea fisiga gaseweïe mida, amoïemelë.
COL 4:9 Nilïle nedoo obeägïlo Onesimusi e asigi falagasei nea, diligi sosogo afädë neebe amo, eege Digigusi helegela moholömelë. Wi hamose amoïe ado sulubadelada, ele dili neebea maala, säla ïaha maademolömelë.
COL 4:10 Alisadagusa e halïgïla galabaia neebe amea, dili hawiola säsisebego. Banabasaïe esago Magaeage, amo gadola wäla hawiosebego. E dili neebea maaseda, dilia e säla olela gausialahilä, e gauia idogomalola na dilima dafidi säla ï amomelë.
COL 4:11 Yesu, ïe ëi elö Yasadusi eage dili hawiola säsisebego. Udia dolö Godea Beaha Maadela Sigi Neebea ami namiäiaïe, nebalä hamoi gaalu hamosa aligilo neebe amoligi, dolö ohodoa amolimuda Yu dolömelë. Ilia ne edefademalä ugila negesa nelomelë.
COL 4:12 Ebafolasa eege diligi sosogo afädë nea, Geleso Yesuïe hamoi hamolasilo neebe ameada, dili hawiola säsisebego. Dili asigi fädäi nea, Godeïe mala dawadigila neebe amo gadola gelola namiäiage, Godea hamei dibe amo sulubadela dawadigisa maadelahilä, fologola made namiäiage, dili helësëla ea segeyo sulubadelagi Godema adolasisamu neamelë.
COL 4:13 Ea dilile hamoi baagi sëi edefade hamolasi amo na melï ameada, dofä amala hamolasisala sämolöi neawe. Ea udia dolö Eleodisia nefolalebe amolilege, Hielabolisi nefolalebe amolilege, amala hamolasisa neamelë.
COL 4:14 Nilïle alögoda obeägïlo dolö Ulugu Demasaleage, aso, dili hawiola säsisebego.
COL 4:15 Geleso sosogo Eleodisia nefolalebe amolima, nilïa ili hawioila säsimelëla säla ïmalo. Udia ëi Nïfä emage, ea mosöa Geleso sosogo gedolo nefolalebe amolimage, amalamu säsimelëla säla ïmalo.
COL 4:16 Beba goda dilia nabaha maademäia nidesa maadelahiläda, Geleso sosogo Eleodisia ami nefolalebe amoliage nabaha maademäia, ilima fisiga gamalo. Hä, beba Eleodisia nefolalebe amolima fisiga gai amo nealahilä, amoge aso, nidemalo.
COL 4:17 Agibasa ema dilia ado gomalä sämalo. Dafidilo Geloiïe hamoi dia hamomäia ï amo hamosa maademolöla helësësa namialola säimelëla säla ïmalo.
COL 4:18 Neda Folo, na dili hawiola säla, nihïle naaboea dëdësago. Neda igi ëfëa galabaia negei neebewe elaboloeo. Godeïe ugila negelo dilima diamiäiamelë. Hä amo.
1TH 1:1 Folo Sailasa Dimodila nilïa udia dolö Geleso sosogo Desalonaiga nefolalebe dilima beba gowe dëdëla ïasisago. Nilïle Naado Godeïege, Dafidilo Geloi Yesu Gelesoïege dili nefolaleagomelë. Ugila negelasiloge, neala dalulasiloge, dilima ïmäia hamesa neawe.
1TH 1:2 Dili sulubadela helësëla, nilïa segeyo sulubadelagi nesegela digi, dilile ëi säla Godema adola digisa aligilomelë.
1TH 1:3 Amala säha neada, nilïa nilïle Naado Godeïe siigi nea, dilia asigi afädë negela hamoi hamoi amoïege, boba hamola nea, hamoi baagi sëi hamosa nebegoïege, nilïle Dafidilo Geloi Yesu Gelesoma asigia sisiläfüsa nea, yöi diëgi, aso maadela, gelola nebegoïege, helësësa aligilomelë.
1TH 1:4 Nïe nedoo nalifila dili-e, nilïa helësësaleada, Godea dili boba hamola, hïlefalï nafolai nefolaleala helësësamelë.
1TH 1:5 Mida, nilïa Ado Mala Hedabi dili neebea gui gaula misi amoda, adoeamu gaula misi mademelë. Amoda geloibaläge, Eleloi Gesamibaläge, nilïle asigi afädë negei geloi amoda, dilia beala dawadigi amomelë. Nilï dilibalä nea, ugila negela hamosa nelo amoda, gomalä hamoila dihili dawadigi nebegomelë.
1TH 1:6 Dilia nilïle malage, Dafidilo Geloiïe malage, bëgëla hamosa aligilo. Amase, Godeïe ado mala neala gaula nelo ameada, yöi yafie beasebegi, Eleloi Gesamia dili neala obeägïlasimelë.
1TH 1:7 Amala hamoi ameada, Bolobinisi Masedoniamadige, Agaiamadige, udia dolö Gelesoma asigi afädë negei sulubadelama, mala hedabi hamola olei gabio.
1TH 1:8 Dafidilo Geloiïe ado mala dilia säla ïïa asi amoda, Masedonia segeamadile Agaia segeamadilemu made. Dilia Godema asigi afädë negeigoge, sege dibe sulubadelaea nabala daidosa maadei gabio. Ameada, nilïa ilima bu daiasela säla ïmolö helësësa mademelë.
1TH 1:9 Mida, nilï dili neebea maasebegi, dilia nilïma obeägïla damelë hamolahilä, gauia idogoi ameada, udia dolö sege amogi neebe amoli sulubadelaea säsäi awäha dialea. Dilia dafidi wäfalï gode amo fisila, namolöi neebe Gode dofä amoma besula, amoïe hamoi hamolo besela galai amoge,
1TH 1:10 amase, Godeïe malö e selesaia mosöala obëgëla misiäiala beaha nefolalebegoge, ilia säsäi awäha dialeamelë. Malö amoda Godea baagoiala nowelasi. Amoda Yesu, hobea Godeïe mihalälo besela galamolö dibe amo baagimäia, nilï sigi obëgëlo amomelë.
1TH 2:1 Nïe nedoo nalifila dili-e, nilï dili neebea maalahilä, hamoi hamosa nelo amoda, hamola waeasei made amo, dihili dawadigi neagomelë.
1TH 2:2 Nilï dili neebea Desalonaiga, aso, made maala Filibai nebegi, gaamu amogi nefolalo amolia nilï neala sëlasila gagadesa nelo amoda dilia dawadigi neagomelë. Dili neebea guwi odoaea nilïbalä ado nii nelo gaso, nilïle Godea nilï neala gelolasisebegi, nilïa dilima Ado Mala Hedabi Godemadila misi dibe amo säla ïmelë.
1TH 2:3 Nilïa dili Gelesoma asigi afädë negemäia wesaleada, halowela helësëlo, asigi nafade musügä negelahilä, dili dahila neala, made oleleimelë.
1TH 2:4 Amalebeda, Godea nilï fedogola bealahilä, hïle hamelo amea nilïa ïe Ado Mala Hedabi amo säla olelemäia, ea nilïma ïasio. Ado amo säla olelesaleada, udia dolöea obeägïmäiala olelelo made. Nilïle asigi fedogola melëlo Godea obeägïmäiala olelelomelë.
1TH 2:5 Nilïa dili neala golila ado sämolöge, asigi musügä negela dilile nelebo dibe amogi gesami moholöge, amo gadola hamolo made nea, säla olelesa nelo amoda, dilia dawadigi. Amase, Godeage amala säla ulufamolöi nea.
1TH 2:6 Dili neebe goeage, udia dolö odoa nefolalebe amoliage, nilïle ëi gauia adamäiala made helësëi nelomelë.
1TH 2:7 Nilï Gelesoïe abosolo dolö nelo amea, dili yölasila nilï ugila negemäia sämolöi nea gaso, säla made nelo. Amala made säla, dilibalä hame negela neada, emea malö geleä sigi aligilo amo gadola sigi nelo amomelë.
1TH 2:8 Nilïa dili boba edefade hamoi neebe amea, dilima Godeïe ado mala säla ïmolö amomu made, nilïa nihïlï nilï ïmolö amoge dofea gabula helësëimelë. Mida, dili hä, nilï sosogofalï besela galai amea.
1TH 2:9 Nïe nedoo nalifila dili-e, nilï dilibalä nea, naaboea hamoi baagi sëi hamosa nelo amoda, dilia dawagomelë. Godeïe Ado Mala Hedabi säla ïaha neada, dili yölasila afädëa ïmäiala made helësëla, nihïlï naha namolö amoïe hamoi nilïa yoba gasigige, baagi sëla hamosa nelomelë.
1TH 2:10 Udia dolö asigi afädë negei nefolalebe dilibalä nea, mala nilïa hamosa nelo amoda, diliage, Godeage, säla ulufamolöi nea. Nilïa Godeïe siigi mala mogoi hedabi hamosa neada, asialada, hamolo mademelë.
1TH 2:11 Malö eedoea ïe malö sigi aligilo amo gadola, nilï dilibalä nea, dili afädë afädëlabalä mala afädëdila hamosa nelo amoda, dihili dawagomelë.
1TH 2:12 Amala hamosa neada, nilïa dilile asigi delësilasila, gelolasilage, amase, dili Godeïe mala bëgëmolö dibe amo gadola bëgëla mosäiage, ado säla ïahamu nelo amomelë. Dili Godea Beaha Maadela Sigi Neebea ami, ïe yo digalo hïdo elöi neebea ami awäla namiäia, ea dili wesa neamelë.
1TH 2:13 Nilïa Godeïe ado mala säla ïasebegi, dilia dolöïe ado gabula made helësëla, Godeïe ado dofä gabula nabi amoïe, nilïa Godema nesegesamu aligilomelë. Ado amoda dofä Godeïe ado. Gelesoma asigi afädë negei nefolalebe dilile isogi, ado ameada hamoi hamosagomelë.
1TH 2:14 Nïe nedoo nalifila dili-e, Yudia segea Geleso Yesuïe udia dolö Godea wela ifosisi nefolalo amolima hamoi amo gadola, dilige sëlasi gabugo. Yu dolö sosogo hilimu sëlasisa nelo amo gadola, dilige dihilile sosogoea sëlasisa nebego.
1TH 2:15 Yu dolö ilia Dafidilo Geloi Yesuge, bea sälo nefolalo amolige nufudalahilä, nilïge nesila digisa nelomelë. Godeada ilibalä made obeägïsa. Udia dolö sulubadelabalä ado nelo neebe amea,
1TH 2:16 Yu dolö made, fii odoama ado mala made säla ïmäia, ilia nilï idi gahamu aligisio. Amoïe mida, Godea udia dolö amoli sigi made obëgëmäiaïe amasio. Amase ameada, ilile nafade hamoi amo edela nobala, ilia nafade hahamolamu awäha nefolalea. Ameada, Godeïe mihalälo ilima dofä misi dialea.
1TH 2:17 Nïe nedoo nalifila dili-e, Yuda ilia nilïma hamoia amila, nilïa dili dïgïla holöbö gasi gala neada, nilïa dilile migalï made beala nea gaso, nilïle asigida dilibalä neamelë. Amala helësësa neada, nilïa dili edefademalä hamela, bu bimolöila helësëla, dili neebea moholöïe idi hogosamu nelo.
1TH 2:18 Nilïda, hä, dili neebea moholö helësëi neamelë. Neda Folo, nada afädë made, segeyo nahuigi mudulä hamoi gaso, mugabe Saidania nilïle idi gasio.
1TH 2:19 Nilïle Dafidilo Geloi Yesu e bu obëgësegi, ïe siigi nilïa abeahäla gelola obeägïla namolödu. Dilima maade galëda, edoea nilïa hamoi hedabi gowe gadoi hamoimelëla säla ulufala olemolödu. Be, nilïle bidida, dilimelë.
1TH 2:20 Ä, dofä. Dilia hamosebe amea nilï obeägïlasisebe ameada, nilïa dilima obeägïsa neamelë.
1TH 3:1 Nilïa dili asigila, beaha namolöda dofea made gabugi, hä, alïmu Adenesi namolöla helësëlahilä,
1TH 3:2 alïa nilïle nedoo Dimodi e dili bimäia fisiga gai. Dimodi eda Gelesoïe Ado Mala Hedabi säla ïlo neada, Godebalä nea hamoi gaalu hamosa aligilomelë. Ea dili gelolasila, dilile asigi afädë negei amo iilasimäia, e fisiga gai amoda,
1TH 3:3 dilia yöi gaula, së naha nebego, fologola fudugiloeaïe amai. Yöi amoli gaumäia Godea nilï memelei amoda, dihili dawagomelë.
1TH 3:4 Nilï dafidi dilibalä nelo amogi neada, dilima nilïa gomalä säla ï. Sëi elö elöla nilï mia besela galamolömelëla säla ï amomelë. Segeyo nafade amoda, hä, nilï mia besela galai dibe amoda, dilia dawadigi.
1TH 3:5 Na beaha namolöda dofea made gabugi, dilia asigi afädë negeigo amalasi neebelela bimolöïe, Dimodi e mosalaigomelë. Na helësësaleada, fedogola melëlo mugabe Saidania, dilile asigi afädë negeigo fisimäia, dili säfe negesegi, nilïa hamoi hamosa nelo amo waeaseloeamelë.
1TH 3:6 Amaimo, Dimodi e dili neebea guila, hädamade maala, nilïbalä nea. Ea sähalea, dilia asigi afädë negei amo amalasi neamelëlage, dihilimu boba hahamosa neamelëlage, ea obeägï ado amo nilïma säla ïasio. Amo gadola säla ïahalea, nilïa dili helësësamu nea, dili bimolöila helësësa neebewe gadola, diliage segeyo sulubadelagi nilï helësëla obeägïlomu nea, nilï siia bimolöila säha neamelëla säi amo nilïa nabimelë.
1TH 3:7 Nïe nedoo nalifila dili-e, amala hamosa neamelëla ea säla ï ameada, nilï yömolöge sëmolöge dibea amila, dilia asigi afädë negei amo amalasi neamelëla säi nabi ameada, nilïle iso asigi neala gelolasimelë.
1TH 3:8 Hä, dilia Dafidilo Geloima dilahilä, gelola namolöi neebe ameada, walio dofä nilïle iso asigi neala obeägïlasi neamelë.
1TH 3:9 Nilïa dili helësëla, nilïle Godeïe sidaia edefademalä obeägïsa nea. Amaha gaso, nilïa helësësaleada, obeägïlo nilïma ï dibe ameada, nilïa Godema nesegela säla, bu dabe abeahäla obëgëmolödula helësësamelë.
1TH 3:10 Nilïa dili bimolöila helësëla, yoba gasigige Godema adosamu neada, dilile asigi afädë negei amo obobaloea, nilïa neala gelolasila moholöïe, adosamu aligilomelë.
1TH 3:11 Nilïle Naado Godeage, nilïle Dafidilo Geloi Yesueage, nilï dili neebea moholö amo idi doga negemäia hamesa neamelë.
1TH 3:12 Dihilimu boba hamosa neebe goïege, udia dolö sulubadelabalä boba hamosa neebe goïege, Dafidilo Geloia bäulasila, nobala adugaha namiäiala säha. Dilia boba hamolo amoda, nilïa dilima boba hamosebewe gadola hamomäia hamesamelë.
1TH 3:13 Nilïle Dafidilo Geloi Yesula, e fii asigi mogoi sulubadelabalä maasolo amo gala, dili nilïle Naado Godeïe siigi, nafade made baai, mogoifalï namolöïe, ea dilile iso asigi neala gelolasimäiala säha.
1TH 4:1 Nïe nedoo nalifila dili-e, na ado wagahalea gomalä säla ïahago. Dilia Gode obeägïmäia gomalä hamosa namialola, nilïa dafidi säla ï amo dilia gelola hamosa neagomelë. Amai nilï walio, Dafidilo Geloi Yesuïe ëigi nea, dilima gelola säsebe amoda gowe. Dilia hamosa neebe amo gadolamu made, baalage hamomäiala säha.
1TH 4:2 Nilïa Dafidilo Geloi Yesuïe geloigila nea sähaleada, dilia gomalä hamosa namolö dialeala säla ï amoda, dihili dawadigi nebegomelë.
1TH 4:3 Godea hamei neebe amoda gowe. Dilia dilile namolö sulubadela ema odala ïala, eleloi namialo. Susugu hamolo mala dibe amo sulubadela sisigaha namialo.
1TH 4:4 Amase, fii odoa, Gode helësëlo made nefolalebe amolia susugu hïdo elöla hamolo amo gadola made, Godeïe siigige, udia dolöïe siigige mala hedabi bëgëla hamosa neada, dilile domalo hedabola sigi namolö helësëmalo.
1TH 4:6 Amo helësëla, didoolali asiala dahila nimabio. Mala amoli gadoi hamosa neebe amoligalida, Godea së ïmolömelëla nilïa dilima dafidi gelola säla ïaha nelo amomelë.
1TH 4:7 Godea nilï wei amoda, nigime baai mala hamosa namiäia made, nilïle namolö egali ïalahilä, eleloi namolö mala amo bëgëla hamosa namiäia weimelë.
1TH 4:8 Amai gabugi, afädëa ado säla olelesebewe baagi ïaseda, dolöïe ado neadigimolö mademelë. Eada, Godea Eleloi Gesami diligali ïlo neebe amoïe ado neadigisa neamelë.
1TH 4:9 Geleso sosogo nefolalebe amoli boba hamolo amoïe, nilïa beba dëdëla ïmolöi dialeala helësësa mademelë. Amoïe mida, dihilimu gomalä boba hamomolö dialeala Godea säla olelei amea.
1TH 4:10 Bolobinisi Masedonia segea Geleso sosogo nefolalebe amoli sulubadelama boba hamosa nefolalebegomelë. Nïe nedoo nalifila dili-e, dilia baala gelola hamosamu namialola säla dëdëla ïahago.
1TH 4:11 Amala hamosa neada, nilïa dilima dafidi säha nelo amo gadola, asigia hame negela aumala nea, dihilile hamoi hamomolö amo helësëla, naaboea hedabola hamosa namialo.
1TH 4:12 Amala helësësa aligiseda, udia dolö segea nefolalebe amolile siigi, dofä mala mogola hamolo nea, nelebo afädë ufoida, made bimolömelë.
1TH 4:13 Nïe nedoo nalifila dili-e, udia dolö baagoi amolima edo hamomolödu, amo dilia hedabola helësëmäiaïe sähawe. Amase, udia dolö odoa Gelesoma asigia sisiläfüsa aligilo made amolia baagoigi didigaolo amo gadola, dilia amamäia made hamesamelë.
1TH 4:14 Mida, Yesu baagola nowei amo nilïa dofäla helësëse ameada, udia dolö Godema asigi afädë negei baagoi amoli, Yesuïe geloigila Godea neala nowelasisegi, Yesubalä obëgëmolö gabula helësësamelë.
1TH 4:15 Dafidilo Geloiïe ado nilïa dilima säsebeweda gomalä. Dafidilo Geloi obëgësolo amo gala, nilï made baagoi nefolalebeweada, udia dolö dafidi baagoi amoli baagila, dofä nilïdale dafidi made moholömelë.
1TH 4:16 Segeyo amo gala, Godea ado gelola sämolö amoge, selesaia fii dafidilo amea ado uuala sämolö amoge, Godeïe melo fuuloea fuumolö amoge, Dafidilo Geloi hï e Hebenila digasegi, udia dolö Gelesoma asigi afädë negei baagoi amolidale nowemolömelë.
1TH 4:17 Amo baagiada, nilï udia dolö made baagoi nagadaia nefolalebewe, ea neala gegedolahilä, baagoi dafidi nowei amolibalä gedola, Dafidilo Geloi e gausiamolöïe, mu baidilidaia fedafiamolömelë. Amalahilä, nilï Dafidilo Geloibalä gedola namolöi namolömelë.
1TH 4:18 Amala namolö gabugi, hä, dilia dihilimu adowe säla ïaha neada, iso asigi neala gelolasisa namialo.
1TH 5:1 Nïe nedoo nalifila dili-e, amala hamomolö amoda, nilïa dilima segeyo gowegilage, eso si gowegilage säla, dëdëla ïmolöi dialeala made helësësamelë.
1TH 5:2 Dafidilo Geloiïe segeyo amo, fa nelo dolö gasigi mulo amo gadoi amoda, dihili hedabola dawa gomelë.
1TH 5:3 Udia dolöea sähalea, Nilïda nudulä made, dofea neawela säha neëgi, ili neala nafademolö amo, aabela misi dië bimolö. Udiaea malö ägümolö salea, aabela sëlo amo gadoi bimolö. Ilia sisigamolöi made bimolömelë.
1TH 5:4 Nïe nedoo nalifila dili-e, dilida gasimi sagaia made nebego, fa nelo maasegi fudugilo amo gadola, segeyo amo besela galasolo amo galada, dili fudugimolöi made bimolömelë.
1TH 5:5 Mida, nilï gasile gasimi sagalo elele made nea. Dili sulubadelada, yo digalole, esolele malö nebego.
1TH 5:6 Amai gabugi, nilïa udia dolö odoa amoli gadoi made namolöla. Ili adi elaboi diëgi, nilïa idihë nea, asigi sigi namolöla.
1TH 5:7 Udia dolö süwialo neebe amolida, gasigi süwia dilo nea, amase, udia dolö gagaolo neebe amolida, gasigi gagaolo ödä nülo nea.
1TH 5:8 Amala hamolo amo gadola made. Nilï esoïe neebe ameada, nihïlïle asigi sigi aligimolöla. Amala neada, nudusalea bidagia salugala aligilo amo gadolada, nilïa asigi afädë negemolöle boba hamomolöle salugala namolöla. Amo salugalahilä, nudusalea habuga salugalo amo gadolada, nilï damula mosäia, asigia sisiläfüsa namolö amo salugala namolöla.
1TH 5:9 Nilïa Godeïe mihalälo dibe amoïe së muäia, ea nilï memelela ifosi made. Dafidilo Geloi Yesu Gelesomadila nea, damula aulo gaula namiäia, ea nilï memelela ifosi nea.
1TH 5:10 Dafidilo Geloi Yesu Geleso e obëgëseda, nilï baagola made namolöi neëgi galëge, ma, baagoi galëge, mogela made, ebalä gedola namolöi namolöïe, e nilïle baagoi.
1TH 5:11 Amala hamoi gabugida, dilia walio hamosa nefolalebego gadola, dilia dihilile asigi neala gelolasila digi, iila ugila negela digisa nebegoda, amala hamosamu namialo.
1TH 5:12 Nïe nedoo nalifila dili-e, nilïa dilima gomalä säla ïahago. Dili häuala ugila negelo dolö amoli hawa nagadaiala namialo. Ilia Dafidilo Geloiïe ëigi dili beaha aligilo nea, ado säla ïadigi, hamogila digisa neamelë.
1TH 5:13 Ilia hamoi hamosebe amo, dilia ili hedabola helësëla obeägïla, dofä boba hamosa namialo. Amase, dili sulubadelaeage, dihilimu aeaeahamu namialo.
1TH 5:14 Nïe nedoo nalifila dili-e, dilia hamomolö dibe amoda gowe. Hamoi hamomolö habobalo nefolalebe amolima gelola säla ïmalo. Bedälo nefolalebe amolimada, ilile asigi delësimäia, gelolasila ado säla ïmalo. Amase, asigi hubabelei nefolalebe amolida, ugila negemalo. Sulubadelabalä aabela habobala made, geleä sämalo.
1TH 5:15 Amaimo, afädëa dili afädëma nafadela hamoseda, amoma nafade hamola obëgëmabio. Segeyo sulubadelagi, Godeïe udia dolö nefolalebe amolimage, amase, udia dolö odoamage, mala hedabimu hamosa namialo.
1TH 5:16 Amaha neada, dilia segeyo sulubadelagi obeägïsamu nea,
1TH 5:17 Godema adosamu namialo.
1TH 5:18 Dili neebea ami hedabi diëge, nafademolö diëge, Godema nesegesamu namialo. Dilia Geleso Yesuma dila nea, mala amo gadola hamosa namiäia, Godea hamesa neamelë.
1TH 5:19 Eleloi Gesami dilima neebe amo usimabio.
1TH 5:20 Bea sälo afädëa ado säla ïaseda, memalä gadoi hamola, gagadela sämabio.
1TH 5:21 Ado sulubadela mogola säsebele, ma, halowela säsebelela fedogola bealahilä, mogola säse amoda neala gaumalo.
1TH 5:22 Mala nafade elö elöla sulubadelada, sisigahamu namialo.
1TH 5:23 Neala aeala dalulasilo mi Gode neebe amohï, dilile namolö neala hamogila, dili sulubadela nigime baai made, eleloi namiäiaïe säha. Nilïle Dafidilo Geloi Yesu Geleso obëgësegi, dilile gesamiage, asigiage, domaloeage asiai maade, hedabifalïmu namiäiaïe sähago.
1TH 5:24 Dili wela ifosilo amoda, säla waeaselo made neebe ameada, dofä hï amala hamomolömelë.
1TH 5:25 Nïe nedoo nalifila dili-e, dilia nilïle Godema adolasimalo.
1TH 5:26 Dilia Geleso sosogo nefolalebe amoli sulubadela gausiaha nea, mimisa namialo.
1TH 5:27 Dafidilo Geloiïe ëigila na dilima gelola säla ïahago. Godeïe udia dolö nefolalebe amoli sulubadelaea nabuäia, beba gowe nidela säla ïmalo.
1TH 5:28 Nilïle Dafidilo Geloi Yesu Gelesoïe ugila negelasilo dilibalä diamiäiamelë. Hä amo.
2TH 1:1 Folo Sailasa Dimodila nilïa udia dolö Geleso sosogo Desalonaiga nefolalebe dilima, beba gowe dëdëla ïasisago. Nilïle Naado Godeïege, Dafidilo Geloi Yesu Gelesoïege dili nefolaleagomelë.
2TH 1:2 Nilïle Naado Godeage, Dafidilo Geloi Yesu Gelesoeage, dilima ugila negelasiloge, neala dalulasiloge ïmäia hamesa neawe.
2TH 1:3 Nïe nedoo nalifila dili-e, dilia asigi afädë negei nebego, dofä bäula edela awäha nebegoïege, dihilimu boba hahamosa nefolalebego bäusa nebegoïege, dili helësëla nilïa segeyo sulubadelagi Godema nesegemolö dialea.
2TH 1:4 Amoïe mida, ado niia dili yölasimolöge, sëlasimolöge ïase amogida, dilia aso maadela, gelola nebegoïege, Godema asigi afädë negei amalasi namolöi neebe goïege, nilïa udia dolö Godea wela ifosisi sege elö elölagi nefolalebe amolima dilile ëi gauia adalomelë.
2TH 1:5 Dilia hamoi amo gadola, Godea mogolafalï mogemolö amoïe, ea nilïma ulufai dialea. Godea Beaha Maadela Sigi Neebe amoïeda, dilia yöi amoli gaula neamelë. Ameada, Godea Beaha Maadela Sigi Neebea ami digamolö amoda, ea dofeala helësëmolömelë.
2TH 1:6 Godea mogolafalï hamolo nea. Odoaea dili neala sëlasise amoïeda, eage ili neala sëlasimolömelë.
2TH 1:7 Yöi gaula nebegoda, ea neala hogosa helela, dilige nilïge hele fimäia ïmolömelë. Dafidilo Geloi Yesula ïe selesaia fii geloibalä, selesaia mosöala nulo söa hïdo elöibalä maala ulufadigisolo amo gala, Godea amala hamomolömelë.
2TH 1:8 Udia dolö Gode baagi ïaha nefolalebe amolige, nilïle Dafidilo Geloi Yesuïe ado malama mi hamola aligilo made amolige, së ïmolömelë.
2TH 1:9 Ilile bidi nafade nimolö amoda, së naha namolöi namolömelë. Dafidilo Geloi neebea amige, amase, ïe geloi hïdo elöi dibea amige made namolö. Nafadeia amimu namolöi namolömelë.
2TH 1:10 Amala hamomolö amoïe segeyo amogida, Dafidilo Geloi maasegi, Godeïe udia dolö ema asigi afädë negei neebe amoli sulubadelaea ïe ëi gauia adala, ema obeägïsa namolömelë. Nilïa dilima ado mala säla ï amo nabala, dilia asigi afädë negei amea diliage obeägïsa namolömelë.
2TH 1:11 Amo helësëlahilä, nilïa segeyo sulubadelagi dilile Godema adosamu neamelë. Ea dili wei amoda, dofeala helësëmäiaïe adolasisamu neamelë. Dilia hedabi hamomolö dibe amo sulubadela hamomolöila hamesa neebe goïe, ïe geloia hamolasimäiage, asigi afädë negei nea hamosego sulubadela hamomolöila helësëmäiage, adolasisa neawe.
2TH 1:12 Ugila negemalola adolasisa nelo amea ugila negeseda, dilia nilïle Dafidilo Geloi Yesuïe ëi gauia adogomolömelë. Amase, eage dilile ëi gauia adogomolö. Nilïle Godeage, Dafidilo Geloi Yesu Gelesoeage, elele ugila negelasiloea amala hamomolömelë.
2TH 2:1 Nïe nedoo nalifila dili-e, nilïle Dafidilo Geloi Yesu Geleso e bu obëgësegi, nilï ebalä gedomolö amoïe dilima ado afädë gelola säla ïahago.
2TH 2:2 Dolö odoaea dilima sähalea, Dafidilo Geloiïe segeyo amo, hä, besela galaimelëla säsege, bea sälo afädëa amala bea säla säimelëla säsege, amase, dolö afädëa sähalea, Folola ilia beba dëdëi amogi amo gadola dëdëi dibeola säsege, amo nabala fodolofalï säosäola fudugimabio.
2TH 2:3 Ili odoaea amoli säi amo gadola elö elöla sälahilä, dili dahila neloea hedabola idihë namialo. Segeyo amoda memalä made besela galamolömelë. Dafidida, yafiea Godeïe ado made nabala auaula namolöge, amase, ado säla negei neadigilo dolöge maala ulufadigimolömelë. Dolö amoda heli segea moholömelë.
2TH 2:4 Eada udia dolöea wäfalï gode gadoima göa nelegelo nelebo amoli sulubadelabalä ado nimolöge, ea nelebo amoli baagila awäla hïle ëi gauia adogola, Godeïe mosöa nogila digala salea, Neda Godemelëla sämolömelë.
2TH 2:5 Ne dilibalä nelo amogi, amoli hamomolö amo na dilima säla ï amoda, dilia made helësëla, elaboi neale.
2TH 2:6 Waliowegi ado neadigilo dolö amo made misiäia idi gai amoda gowe gadoila dilia dawadigisa maadei. Godea daiai segeyogi e maala ulufadigimolömelë.
2TH 2:7 Ado säla negei neadigilo mala amoda, odoaea walio musügä hamoi hamosa nefolalea. Amaha gaso, neadigilo mala amo walio idi galo dolö amea amala gagala awäha neëgi, Godea e hä, bisilimolömelë.
2TH 2:8 Amala hamoseda, ado säla negei neadigilo dolö amo ulufamolö. Dolö amoda Dafidilo Geloi Yesuea ïe nafiadila hame fisigise amea baagomäia nufulömelë. Ä, hï e yo digalo geloibalä maalahilä, yo digalo amea dolö amo nufudaha maademolömelë.
2TH 2:9 Ado säla negei neadigilo dolö amoda, mugabe Saidaniïe geloigila maalahilä, hïdo elöi hamola, dolöea hamomolöi made gadoige, melëlo made gadoige, wäfalï hamomolömelë.
2TH 2:10 Ea nafade elö elöla wäfalï hamolo dibe amo sulubadelaea, udia dolö nafadegi moholö amoli dahila neala hamomolömelë. Ilia ado dofä amoma boba hamomolö amo habobai amea, ili nafadegi moholömelë. Ilia ado dofä amoma boba hamoi galebeda, Godea ili sigi obëgëlabio.
2TH 2:11 Amai amea, ilia wäfalï säse amo dofä gabula helësëmäiaïe, Godea ilile asigi neala gagaolasisa nea.
2TH 2:12 Amase, udia dolöea ado dofä amo gaula mogola made, mala nafademu obeägïla hamolo nefolalebe amoli sulubadelabaläda, Godea gudila mogemäiamelë.
2TH 2:13 Nedoo nalifi Dafidilo Geloia boba hamosa neebela dili-e, nilïa dili helësëla segeyo sulubadelagi Godema nesegesa namolöi dialea. Mida, sege föi mi gäwia amila hïle udia dolöfalï namiäia dili nafolala memelei. Eleloi Gesamia ugila negelasisebegi, dilia dilile namolö sulubadela Godegali ïaha maadelahilä eleloi neebe ameage, amase, Godeïe ado amoda dofä gabula helësësa neebe ameage, Godea dili damula moholöla daiala memelei.
2TH 2:14 Amala hamomäiaïe, Ado Mala Hedabi nilïa dilima säla olelesebegi nabi ameada, Godea dili weimelë. Nilïle Dafidilo Geloi Yesu Gelesoïe geloile yo digalo amole diliage gaalu nimäiaïe weimelë.
2TH 2:15 Amai ameada, nïe nedoo nalifila dili-e, gelola namialo. Nilïa dilima Godeïe ado mala säla ï amoge, amase, beba dëdëla ï amogi säla olelei amoge, dilia hedabola bëgëla hamomalo.
2TH 2:16 Nilïle Dafidilo Geloi Yesu Geleso hï emage, nilïle Naado Godemage dilile adolasisa nea. Naado Godea nilï boba hamolahilä, ïe ugila negelasilo amea nilïle asigi neala gelolasila, fisila made, gelolasisamu nea, dofä asigi neala sisiläfülasisio.
2TH 2:17 Ea dilile iso asigi gelolasila, ado hedabolamu sämäiage, mala hedabi dibe amo gadola sulubadela bëgëla hamomäiage, geloi ïmäia adolasisa neamelë.
2TH 3:1 Nïe nedoo nalifila dili-e, na ado säla wagahalea gomalä säla ïahago. Udia dolö sege odoadi nefolalebe amolia nabuäiaïe, Dafidilo Geloiïe ado mala aabela säla daidomäiage, amase, dilia ado mala gauia adogoi amo gadola, iliage gauia adogomäiage, dilia nilïle Godema adolasisa namialo.
2TH 3:2 Ado elö goweïege adolasimalo. Dofä nafade hamolo nefolalebe amolibalä neëgi, Godea nilï damula mosäia, dilia ema adosa namialo. Mida, udia dolö sulubadela asigi besui mademu nefolalebe amea.
2TH 3:3 Amai gaso, mugabe Saidani nafadea dili made digalasimäia, Dafidilo Geloi eda mogoi neebe amea, ea dili neala gelolasila idihë nea sigi namolömelë.
2TH 3:4 Dafidilo Geloia nilïle asigigi helësëlasisebegi, nilïa dilima hamomola säse amo hamosa nebego gadola, hobealage dilia hamosamu namolö gabula helësësa neawe.
2TH 3:5 Dilile iso asigia Godeïe boba hamolomadige, Gelesoïe aso maadela, gelola namolö malamadige, Dafidilo Geloia sigi mosäia hamesa neawe.
2TH 3:6 Nïe nedoo nalifila dili-e, nilïa Dafidilo Geloi Yesu Gelesoïe ëigila dilia gomalä hamomalola sähaleada, nedoo nalifi odoa hamoi hamomolö bobogologe, nilïa gomalä hamomolö dialeala säsegi hamolo made nefolalebe amolibaläge, dili gedola namiabiola säha.
2TH 3:7 Nilïa hamolo amo gadola, diliage amo gadola hamomolö dialeala dawadigi neagomelë. Nilï dilibalä nelo amogi neada, hamoi hamomolö habola made, hamosa nelo.
2TH 3:8 Amala hamosa nebegi, dilia nilïgali molö ï amoda, memalä made naala, bidia neala naha nelo amomelë. Memalä made naala, nilïa naaboea hamoi baagi sëi yoba gasigige hamosa neada, diligi afädëa yöi made gaumäia, nilïa hamoi hamosamu nelo amomelë.
2TH 3:9 Ugila negemola sämolöi made made, sämolöi nea gaso, nihïlï hamoi amoïe mida, dilia nilïa hamolo amo gadola bëgëla hamomäiaïe amala olela hamoimelë.
2TH 3:10 Afädëa hamoi made hamolo nea galëda, amogali molö made ïmalola nilï dilibalä dafidi nelo amogi nea, säla ï amomelë.
2TH 3:11 Nilïa ado säi amoïe mida, dihiligi odoa neebe amolia hamoi hamomolö bobogolo nea, ilia hilile hamoi made hamola, odoaea hamoi hamose amomu memele nawesa nelolahilä, adomu adosamelëla säi amo nabalahilä sähamelë.
2TH 3:12 Dafidilo Geloi Yesu Gelesoïe ëigila gelola sähago. Udia dolö amoli geleä sau sagala nea, hilile hamoi hedabola hamola, nelebo hamoi hili hamose amea molö mualola sähago.
2TH 3:13 Amaimo, nïe nedoo nalifila dili-e, dilia mala hedabi hamomolö amo habobala fisimabio.
2TH 3:14 Nilïa dilima ado galone beba gogi dëdëla ïasisego, afädëa made bëgëla hamoseda, eda gowe gadoi neala helësëlahilä, hï e hewamäia, dili ebalä gedola namiabio.
2TH 3:15 Udia dolö amo gadoi neebe amoli nilïbalä ado nii neala helësëla made, nilï sosogo neala helësëlahilä, ili asigi gäwimäia ado säla ïala hahamogisa namialo.
2TH 3:16 Dafidilo Geloi hï emu dalulasilo mi neebe amea segeyo sulubadelagige, nelebo elö elöla gausiala digasolo amo galage, dili neala dalulasimäia hamesa neamelë. Dafidilo Geloi eda dili sulubadelabalä namiäia hamesa neawe.
2TH 3:17 Neda Folo, na dili hawiola säla nihïle naaboea dëdësago. Na beba dëdëse sulubadelagi wagahalea go gadolamu dëdëlomelë.
2TH 3:18 Nilïle Dafidilo Geloi Yesu Gelesoïe ugila negelasilo dili sulubadelabalä diamiäiamelë. Hä amo.
PHM 1:1 Neda Folo. Neda Geleso Yesuïe galabaia dolömelë. Nilïle nedoo Dimodi alïa nilïle damelë nilïbalä hamoi gaalu hamosa aligilo Filimono dima beba gowe dëdëla ïasisago.
PHM 1:2 Amase, alïa nilïle nalifi Abia dimage, nihïlïgïla nudusa aligilo Agibasa dimage, Geleso sosogo Filimono dia mosöa gedosa aligilo amolimage, beba gowe dëdëla ïasisago.
PHM 1:3 Nilïle Naado Godeage, Dafidilo Geloi Yesu Gelesoeage, dilima ugila negelasiloge, neala dalulasiloge ïmäia hamesa neawe.
PHM 1:4 Dia Dafidilo Geloi Yesuma asigi bogia adogola nea, Godeïe udia dolö sulubadela boba hamosa neala säi nabi amolegi, na nïe Godema adosaleada, di helësëla Godema nesegesamu aligilomelë.
PHM 1:6 Dida nilïbalä nea, nilïa Gelesoma asigi afädë negei amoïege, asigi afädë negei amomadila Godeïe dawa hedabi dima bäumäiage, nilïa nelebo hedabi Gelesomadila nii amoli sulubadela dia hedabola helësëmäiage, na Godema adolasisa aligilomelë.
PHM 1:7 Ae, nedoo. Dïe boba hamolo dibe goeada, Godeïe udia dolö sulubadelaïe iso asigi gelolasilomelë. Amala hamolo ameada, nïe iso asigige neala obeägïlasila gelolasimelë.
PHM 1:8 Dia hamomäia na hamese amoda, Gelesoïe ëigi nea, dofea dia hamomola dofä ulufala sämolöi neawe. Gasoda, dia mala hedabi hamolo amoli na dawa ameada,
PHM 1:9 na dima gelola sämolö made helësëi. Boba hamolo mala dibe ameada, na dima geleä säha. Neda Folo, ado mala gaula aulo momaeai, Geleso Yesuïe galabaia dolö nea sähago.
PHM 1:10 Na dima, nïe malö Onesimusima mala hedabi hamomolölela nabaha. Onesimusi e ne galabaia neebea ami maasebegi, ea Gelesoma asigi afädë negemäia, na ema säla oleleimelë. Ne galabaia nea, neda ïe eedo gadoi hamola nelo.
PHM 1:11 Dafidida, ea di fidila negemolöi made nelo gasoda, oböla walioda, ea alï halïgïla ugila negemolöi nea.
PHM 1:12 Na hä, e walio di neebea obëgëmalahago. E maasebegoda, dofä nïe bobafalï fisiga gahagomelë.
PHM 1:13 Ado Mala Hedabi olelelo amoïe galabaia neebea ami neëgi, dia ne ugila negelo amo gadola, Onesimusia hamomäia e halïgïla neala sämolö helësëi.
PHM 1:14 Gaso, dia dofeala made säseda, nada e made gauia idogomolö. Dia hamomolö amoda, na dima gomalä hamomalola made sämolö. Be, dia hamese amo gadola hamomäiamelë. Dia nema hamoi hedabi hamomolö helësëseda, dihï hamese amo gadola hamomalo.
PHM 1:15 Na helësësaleada, ea di dïgïla salele ede made aliga gala nelo ameada, e obëgëla maala, hä, dibalä namolöi namolöla helësësamelë.
PHM 1:16 E obëgëla maala dibalä namolö amoda, e galabaia hamoi gadoimu hamolasilo neala helësëmabio. Dofä, eda dïe hamoi hamolasilo gaso, walio amo baagila awäla, eda didoo obeägïfalï namolömelë. Na e dofä boba hamolo gaso, dia ema obeägïmolö amoda, ea galabaia hamoi gadoi hamolasise amogimu made, Gelesomadila e didoofalï neebela beala, na e boba hamolo neebe amo baagila awäla, dia e dofä boba hamomolömelë.
PHM 1:17 Dia alï dila neala helësëseda, ne maasegi obeägïla gauia idogolo amo gadola, Onesimusi emage amo gadola wäla hamomalo.
PHM 1:18 Amase, ea dibalä asiala hamoi galëge, bidi negei galëge, nema negesimalo.
PHM 1:19 Neda Folo, nihïle naaboea ado we dëdësamelë. Bidi goda na ïdulä. Dïe namolö nebalä bidi negei dialeala sämolöi gasoda, na ado go sämolö habosebe.
PHM 1:20 Nedoo, dia nabualo. Dafidilo Geloiïe ëigi nea, dia mala hedabi na säse amo gadola hamomäia hamesa. Alï Yesu Gelesoïe neebe ameada, dia mala hamosebe amea, nïe iso asigi neala obeägïlasimäia hamesamelë.
PHM 1:21 Na dima beba dëdëla ïasisegoda, dia hamomolöla helësësa. Na helësësaleada, dia hamomolö ameada, na dima nabasewe baagila moholöla helësësamelë.
PHM 1:22 Amase elöda, dilia adoi amo Godea nabala, ne dili neebea fisiga gamolö gabula helësësamelë. Ameada, ne maala midilöïe dia mosö hogoli afädë daiala negesimalo.
PHM 1:23 Ebafolasa eege, Geleso Yesuïe hamoi hamosa nebegi galabaia negei nebalä neebeweage, di hawiosebego.
PHM 1:24 Dolö odoa nebalä hamoi gaalu hamosa aligilo Magaeage, Alisadagusaeage, Demasaeage, Ulugueage, ilia di hawiosebego.
PHM 1:25 Dafidilo Geloi Yesu Gelesoïe ugila negelasilo dilile gesamibalä diamiäiamelë. Hä amo.
JAM 1:1 Neda Yamese, Godeïege Dafidilo Geloi Yesu Gelesoïege hamoi hamolasilo neebewe nea. Isilale sosogo giwilasi sege elögi afufui nefolalebe dilima go gabiola säla, beba gowe dëdëla ïasisago.
JAM 1:2 Nïe nedoo nalifila dili-e, neala sëlasimolö elö elöla dili neebea gui dië bease amogi, obeägïsamu namialo.
JAM 1:3 Mida, dilia Godema asigi afädë negei neëgi, fedogola bease ameada, dofea, aso maadela namiäia, gelolasilo. Amoda dilia dawadigi.
JAM 1:4 Gufula namolöi nea, aso maadela, gelola nebegoeada, asigi falagasei hedabi, dofeafalï dofea nea, Godeïe mala hamolo dibe amogi, afädë maadeda, made namolömelë.
JAM 1:5 Amaimo, dili neebe gogi afädë asigi falagasela helësëlo amo maade galëda, Godea ïmäia ea Godema ëdëgëmolö dialea. Gode eada, nemola gëla made, udia dolö sulubadelagali nelebo baala ïlo neebe ameada, egali ïmolömelë.
JAM 1:6 Amai gaso, ïmola ëdëgësa neebe ameada, asigi äudä negela made, asigi afädë negelahilä ëdëgëmalo. Asigi äudä negelo amoda, foea ödä aidagula afu mafusalea aidagula sadia galo amo gadoi neamelë.
JAM 1:7 Amo gadoiada, Dafidilo Geloia egali afädë ïmolö gabula helësëmabio.
JAM 1:8 Ea asigi äudä negei nea, ïe mala sulubadelada hï sigi aligilo made neamelë.
JAM 1:9 Amaimo, Geleso sosogo afädë e busadäoi nea galëda, e Godeïe siigi ilibia neebe amogi, obeägïmolö dialea.
JAM 1:10 Gaso, afädë e nelegei yafie negelo dafidilo dolö nea galëda, e nagadaia neebe amogi, obeägïmolö dialea. Mida, e mama gadoi nea, eege baagomolömelë.
JAM 1:11 Mama hedabi hïdo elöi difolalegi, eso neëla galala hëgïse amea, ödölola dufigila didigafulo amo gadola, nelegei yafie negelo dafidilo dolö nefolalebe amolida, hilile hamoi hamosa neëgi, baagomolömelë.
JAM 1:12 Udia dolöea yöi gaula, aso maadela, gelola aligisebe amoliada, obeägïsa nea. Mida, ilia fologola made, gufula aligiseda, namolö gähe bidi amo nimolömelë. Godea e boba hamoi nefolalebe amoligali bidi ïmolömelëla säi amo ïmolömelë.
JAM 1:13 Amaimo, dolö afädëa hïle iso asigigi nafade hamomolö helësëlahilä, Godea na nafade hamomäia helësëlasimelëla sämolöi mademelë. Nafadeada Godea nafade hamomäia helësëlasimolöi mademelë. Amase, Godeada udia dolöea nafade hamomäia helësëlasilo nea mademelë.
JAM 1:14 Amalo made, nilï sulubadela hïdo hïdolaïe asigigi gesami awäla nafade hamomolö helësëlo. Nihïlïle hameloeada, öhoeo fädämäia salëgi waale yaala gosalo amo gadola, nilï neala dusugalasila nafade hamolo dialea.
JAM 1:15 Amaimo, gesami aulo ameada, udiaea malö fagulo hagui gadoi sulolahilä, malö giisi mosöa aulo amo gadola, hobeala hä, nafade hamoi amo ulufadigila besela galala neegela ägülo. Amalahilä, nafade hamoi amo edelahilä, baagomolö amo neegela ägülomelë.
JAM 1:16 Nïe nedoo nalifi obeägïlola dili-e, mala amo gadoia dili dahila neloeamelë.
JAM 1:17 Gode eamu nelebo hedabi hïdo elöi difolalebe amo sulubadela mudaiala ïlo nea. Gode eda eso aube gasumilï mudaia yo digalo neebe amo sulubadelaïe Eedo nea. Naado eada, mala hamomolö amo bedefa bedefalo made nea. Eda nelebo afädëa eso hagula digi, neëla digilo amo gadoi made nea, eda sedadelahilä, oböla, obobagilo made neamelë.
JAM 1:18 Hïle hameamu e nilïle Naado namolö besela galai. Nelebo ea hamoi dibe amogi, nilïda abulümi gadoi namiäiala helësëla, ïe ado dofä dibe amea ea nilï neegela ägülasimelë.
JAM 1:19 Nïe nedoo nalifi obeägïlola dili-e, dilia gowe hedabola helësëmäiaïe. Dili sulubadelaea ado säsebe amo hä, fodolofalï gëhe sagala nalabomalo. Ado sämolöïeda hä, fodolofalï sadia gala made, geleä sämalo. Amase, aabela mihahalämabio.
JAM 1:20 Amoïe mida, udia dolöïe mihalälo dibe ameada, Godeïe mogoi hamomolö dibe amoda, hedabolo made dialea.
JAM 1:21 Amaimo, nafade hamolo dibe amoli sulubadelage, mala nafade yafie elö elöla besela galalo dibe amoge, fisisa maademalo. Amalahilä, dihili dili nagadaiala nea, Godeïe ado mala dilile isogi sagasi amo nimalo. Amala hamoseda, ado amea dilile gesami sigi obëgëmolöimelë.
JAM 1:22 Amaimo, dilia ado mala nabala waeaseseda, dili dihilimu gadiabosa neagomelë. Nabala hamomalo.
JAM 1:23 Afädëa ïe ado mala nabala bëgëla hamola made, waeaseseda, eda dolöea ïe odagi ödäsöea melëlo amo gadoi nea.
JAM 1:24 Ea ïe odagi ödäsöea melëlo gasoda, e awähalea ïe odagi abodo gadoidula aabela asusugaha aligilo nea.
JAM 1:25 Godeïe ado mogoi hedabifalï säla negei ameada, udia dolö fisigäla fisigisilo. Ado säla negei amo, elabola made, afädëa hedabola bebeahamu aligila dofä hamomolö dibe amo gadola bëgëla hamoseda, Godea dolö amea hamosebe amo sulubadela neala hedabolasimolömelë.
JAM 1:26 Amaimo, afädëa helësësalea, neda Geleso sosogo dofea neawedalahilä, ea ïe nafi made sigi aligiseda, e hïmu gadiabosa nea. Ea asigi afädë negei neebe amoge, mala nabaha neebe amoge, memalämelë.
JAM 1:27 Nilïle Naado Godeïe siigi nafade made baai, Geleso sosogoea hamolo mala dibe amo gadola hamolo nea, mogola neebe ameada, malö guluba sefolalebe amolige, udia didalo sefolalebe amolige, yöi gaula neebe amo ugila negelo, amase, Godeïe siigi nagadaia mala nafade dibe amea ema baaloea, hedabola beala sisigaha aligilomelë.
JAM 2:1 Nïe nedoo nalifila dili-e, Dafidilo Geloi Yesu Geleso e yo digalo hïdo elöi neebe amoma asigi afädë negelahilä, udia dolöbalä nofela made, afädëdila hamomalo.
JAM 2:2 Dolö äudä, elöda, naabogi gälo ulini goloea hamoi amo gäla, fagulo hedabifalï salugala, amase, elö busadäoi amoda, fagulo nafade nulibaiai salugalahilä, ele dili gedosebea ami maasegi, hamolo amo helësëmalo.
JAM 2:3 Dilia fagulo hedabi salugala misi amoma guwi samolö misiëla säla, filo hedabi olelo. Gaso elö fagulo nulibaiai salugai amoma sähalea, Dihï neebea gui aligisale, ma, maala nïe emo mia gudogoi fisalela säseda,
JAM 2:4 hä, dili dihilimu nofela, dilia asigi nafade negela, gudi mogelo gadoi nea, mogesa nea madele.
JAM 2:5 Nïe nedoo nalifi obeägïlola dili-e, dilia hä, nabualo. Nagadaia udia dolöïe siigi busadäoi nefolalebe amolia asigi afädë negese amoïe, nelegei negelo gadoi namiäia, Godea ili memelei madele. Amase, Godea siiba säla negesalea, udia dolöea e dofä boba hamoi neebe amolida, ea beaha maadela sigi neebea ami sigi moholömelëla säla negelahilä, ea busadäoi neebe amolige ami namiäia memelei nea madele.
JAM 2:6 Gaso, dilia busadäoi nefolalebe amoli gagadelomelë. Dili nowëa hewala yölasila gudisadialo nea. Amoda, nelegei yafie negelo dafidilo dolö amolia amalo madele.
JAM 2:7 Dilia Yesu Gelesoïe ëi hedabi salugala neebe amogi, ilia ëi amo gagadelo nea madele.
JAM 2:8 Nilïle Gini Gode neebe amoïe bebagi ado säla negei dibe amea sähalea, Dihïdi boba hamolo amo gadola, odoa dibalä nefolalebe amoli boba hamomalola säla dëdëla negei dialea. Amala säi dibe amo gadola bëgëla hamosa nea galëda, hedabola hamosa neagomelë.
JAM 2:9 Amai gaso, dilia udia dolö nofela nea galëda, nafade hamosa nea. Amala hamosa neebe amea ado säla negei dibe ameada dilia hä, mala damulomelëla olelomelë.
JAM 2:10 Amaimo, dolö afädëa Godea ado säla negei dibe amo hulu sulubadela bëgësalea gaso, ado amogi holöfalï holöbö afädë damuseda, ea ado säla negei dibe amo hulu sulubadela damusagomelë.
JAM 2:11 Udia fa nimabiola säi ameada, udia dolö baagomäia nufuabiolage säi. Dia udia fa made nelo nea gaso, baagomäia nufudaseda, dia hä, mala säla negei dibe amo damulomelë.
JAM 2:12 Godeïe ado säla negei nilï fisigälasilo amea, oböla, nilï mogemolömelë. Hä, ado adomolömadige, amase, mala hamomolömadige, amo helësëla hamomalo.
JAM 2:13 Mida, afädëa udia dolö odoa neebe amoli made bobasëseda, Godea mogela gudisolo amo gala, eege made bobasëmolömelë. Amai gaso, bobasëlo amea gudi mogese amo nufuda salalahilä, baagila aulomelë.
JAM 2:14 Nïe nedoo nalifila dili-e, afädëa neda asigi afädë negei neawelahilä, mala hedabi made hamola ulufadigiseda, ameada e ugila negemolöle. Ea asigi afädë negei ameamuda e damula moholöle.
JAM 2:15 Nedoo nalifila ili neebe amoligi faguloge molöge maade neëgi,
JAM 2:16 amolima dili afädëa sähalea, Gögï fagulo salugala, molö mualola säla, nelebo afädë dofä made ïahalea, memalä hawioseda, dilia amala hawiose ameamuda, ili abeahäla ugila negemolödu.
JAM 2:17 Amo gadola wäla, asigi afädë negeida nea gaso, mala hedabi hamola made ulufaseda, asigi afädë negei badu gomuda, hä, baagoi gadoimelë.
JAM 2:18 Amaimo afädëa sähalea, Dolö gomoda asigi afädë negei nea. Amase, dolö odoa gomoeada mala hedabi hamosiola sälo nea. Amala sälo neebe amoma na gomalä säla obëgësago. Afädëa ne asigi afädë negei neawela säla, mala hedabi ulufadigila made hamoseda, e asigi afädë negei neala na abeahäla helësëmolödu. Nage nihï mala hedabi hamosebe amea, ne asigi afädë negei neawela ulufala olemolömelë.
JAM 2:19 Dilia Gode afädëfalï neebe amo helësësegoda, hedabolafalï helësëi gabu. Mugabe neebe amoliage amala helësëla, fudugila bedäha dialea.
JAM 2:20 Asigi maadela dili-e, asigi afädë negei nea mala hedabi hamola, made ulufaseda, asigi afädë negei neebe gomuda memalämelë. Amo dilima oledule.
JAM 2:21 Nilïle naado Abalahamaea ïe malö Aisaga gobela ïlo aulidaia negela Godegali ï ameada, Godea ea hamoi amo bealahilä, eda dolö asigi mogoi neala säi madele.
JAM 2:22 Ea asigi afädë negei nelo amole, mala hedabi hamosa nelo amole, helegela afädëdi nelo go beasebele. Ea mala hedabi hamoi ameada, ïe asigi afädë negei amo hä, dofealasimelë.
JAM 2:23 Amala hamosebegi, ado säla negei dibe amo gadola gausiala digai amoda gowe. Abalahamaea Godema asigi afädë negei nebegi, Godea dida asigi mogoi neala säila säla dëdëla negei dialea. Amase, Abalahamada Godeïe damelë neala säimelë.
JAM 2:24 Amaimo, afädëa asigi afädë negese ameamu made, mala hedabi hamose ameage, Godea di asigi mogoi nebegola sämolö go beasebele.
JAM 2:25 Amo gadola wäla, idigi nawela susugu hamolo udia Eleihaba sulo amea, desega mosäia Yasuaea fisiga gai äudä amole ïe mosöa sigi nelolahilä, ele idi elögi obëgëmäia idi olela fisiga gasebegi, Godea Eleihabama dida asigi mogoi udiala säi madele.
JAM 2:26 Amaimo, afädë e hame doala asi galëda, ïe domalo amoda hä, baagoi dialea. Amo gadola wäla, afädëa asigi afädë negeida nea gaso, mala hedabi hamola ulufalo made galëda, asigi afädë negei badu amomuda hä, baagoi gadoi dialea.
JAM 3:1 Nïe nedoo nalifila dili-e, dili sulubadelaea nilï säla olelelomu namolöila helësëmabio. Amoïe mida, Godea udia dolöea hamoi amo gadola mogemolö segeyo besela galasolo amo gala, odoabalä gudimolö amo gadola made, säla olelelo neebe nilïbalä Godea hedabolafalï memelela gudimolö amoda, dilia dawadigi.
JAM 3:2 Nilï sulubadelaea asiala idi elö elöla hamolo. Amaimo, afädëa ado asiala made sälo nea galëda, eda hedabifalï nea. Ïe domalo asigige hedabola sigi aligimolöi galea.
JAM 3:3 Nilïa sugua hosiïe nafigi aeane fisiga gala, ëfë begei amogi gaulahilä, nilïa hamese amo gadola mosäialahilä hosi sigi aligilo. Ameada, nilïa hosiïe domalo sulubadela sigi namolöïe amalo.
JAM 3:4 Amase, sibia ödägi aulo dibe amo helësëdelä. Ödä sibida edefademalä, amase, fo gelola guula maala bobadelä hamosegi gaso, sibi gaulo amea helësëse amo gadola duhuludabodo mosäia, sibi edefade amo i aeane baledei holöfalï amea hamogilomelë.
JAM 3:5 Amo gadola, elïda holöfalï gaso, hamoi edefade elö elöla yafie hamomolöla sälo nea. Amase, nulo iso holöfalïmelëa sege ilo sulubadela naha maadelo dialea madele.
JAM 3:6 Elïda nulo gadoi galea. Nafade hamomolö dibe amo sulubadelada elïmadilamu besela galaha. Elïada domalo sulubadela nigime baaha maadelo nea. Ameada nilïle iso asigigi mala nafade elö elöla besela galasebe amoda, nulo söa fedalo amo gadoi galea. Elïïe söa fedalo mida, heli segeala mulo.
JAM 3:7 Sugua ilaba elö elölage, haea elö elölage, nuba elö elölage, ödägi fii elö elölage sefolalebe amolida, udia dolöea aeaseda, aeamolöi. Amoli aealo
JAM 3:8 gaso, elïda dofä aeamolöi mademelë. Elïda sigi aligimolö ulïmelë. Dofä nafadefalï nafade galea. Elïda baagolo nuba se gadoi nobai galeamelë.
JAM 3:9 Nilïle elïa Dafidilo Geloi nilïle Naado neebe amoïe ëi gauia adalo. Amalahilä, elï ameamu, oböla, Godea hï e gadoi namiäia hamoi neebe amoli neala nafademalola nafadela sälo nea.
JAM 3:10 Nafi idi afädë amogila Godeïe ëi gauia adogomolöge, amase, odoa neala nafademäiala sämolöge, besela galaha. Nïe nedoo nalifila dili-e, mala amo gadoida, dofea mademelë.
JAM 3:11 Ödä gü afädëgila hedabige gamogaige besela galalole.
JAM 3:12 Nïe nedoo nalifila dili-e, äfäeoeada silama gägä negelole, ma, mahabu ëfë gadoi gelebi ëfëada äfäeo gägä negelole. Amo gadola wäla, ëbï ödä dibe ameada, bu oböla ödä hëdäi besela galalo mademelë.
JAM 3:13 Dili neebe gogi asigi falagasela hedabola helësëla hamoloda nowë neebe. Amo gadoi hamolo neebe ameada, hedabimu hamola, e asigi falagasei amea ea hïle ëi gauia adogola made, nagadaiala nea, mala hedabi hamola ulufamolö galea.
JAM 3:14 Amai gaso, dilile iso asigigila odoaea nelegei dibe amo dofä negali negemolöila helësëla, nelebo hamosalea odoaea dilile ëi gauia adamäialamu hamoseda, dilile asigi dibe amea ne dofeala made helësëmalo. Dilia mala amo gadoi hamosebe amea dofä sälo dibe amo fisiloeamelë.
JAM 3:15 Asigi amo gadoida mudaiala digalo mademelë. Amoda nagadaialage, dolöfämadilage, mugabemadilage mulomelë.
JAM 3:16 Odoaea nelegei dibe amo dofä negali negemolöila adabala helësëlo mala amoge, nelebo hamosalea odoaea dilile ëi gauia adamäialamu hamolo mala amoge dibea amida, asigi afädëdi madege, mala nafade sulubadelage dië bimolömelë.
JAM 3:17 Amai gaso, asigi falagasei namolö mudaiala misi gowe gadoi nii neebe amoliada, mala gowe gadoi hamomolömelë. Mi gäwilada, ilile asigi gagadelai namolöge, amase, aealo mala bëgëla hamomolöge, odoabalä hame negela namolöge, odoaea säse nabala hamomolöge, bobasëlolea gägä hedabilea nobai namolöge, nofela made udia dolö sulubadelabalä afädëdi namolöge, ado äudä sälo madea namolöge, aligilo nea.
JAM 3:18 Aealo neebe ameada, aealo hawa amo sagamolömelë. Bäuseda, hï emage udia dolö odoamage asigi bobagila namolö amoïe gägä negemolömelë.
JAM 4:1 Dilia gëgëla nudusa nebegoda, abidila besela galahadu. Amoda domaloea gelola hamelo amoli dilile isogi dibe amila gëgëla nudula besela galaha madele.
JAM 4:2 Dilia nelebo odoa dibe amo nimolöila helësëlahilä gaso, made nelomelë. Amahaleada, baagomäia nufidelo. Amase, odoaïe nelebo dibe amo asigia negalimu negemolöila adabala helësëlahilä, made neala, gëgëla nudusa aligiloge nea. Amala hamolo nea, Godema ïmola made ëdëgëlo ameada, made neala nebegomelë.
JAM 4:3 Dilia nimolö helësëla ëdëgëseda, made nelo. Amoïe mida, dilile asigi mogoi made nea, ëdëgësebe ameamelë. Dilia nelebo nimolöila helësëse amoda, dihili dilimu helësëla, domaloea gelola hamelo amo gadola waeasemolöïe ëdëgëlo.
JAM 4:4 Udiaea egoa dïgïla dolö elöma aulo amo gadola, Gode dïgïla asi nefolalebela dili-e, nagadaia galu dibe amobalä damelë hamola neebe ameada, Godema bimolö habobaha neebe amoda, dihili dawa made neale. Dilia nagadaia galu dibe amobalä damelë hamola neebe ameada, Godebalä ado nii neamelë.
JAM 4:5 Godeïe bebagi ado gowe säla negei dibe amoda, memalä säla negei dialeala helësësale. Godea gesami nilïle isogi ifosi neebe ameada, ea helësësebe amo gadola hamoiabelamu helësësa neamelë.
JAM 4:6 Amai Godea nilï hïdo elöla ugila negelasilo. Amai amea, Godeïe ado säla negei dibe amoda gowe. Asigi dalagaia galo neebe amolida, Godea nagadaialasilahilä gaso, nagadaialo neebe amolida, oböla, ea ugila negelasilola säla dëdëla negei dialea.
JAM 4:7 Amai gabugi, dilia Gode hawa nagadaiala namialo. Mugabe busama habobaseda, ea dili dïgïla fisäla moholömelë.
JAM 4:8 Dili Gode neebea ga madela aligiseda, eege dili neebea ami ga madela aligimolömelë. Nafade hamolo dili-e, dilile naabo nigime hëmalo. Asigi äudä negelo dili-e, dilile iso asigigi nafade dibe amo sulubadela fisisa maadela, asigi gagadelai namialo.
JAM 4:9 Didigaomalo. Asigi säosäola, bobasëla edefadela dïimalo. Ösa nefolalebe dilida, bedefala didigaomalo. Amase, obeägïsa nefolalebe dilida, oböla, bedefala asigi säosäoia idogola dïimalo.
JAM 4:10 Dilia Dafidilo Geloiïe siigi, dihili dili nagadaiala namialo. Amala hamoseda, ea dili neala gauia adogolasimolömelë.
JAM 4:11 Nïe nedoo nalifila dili-e, odoa neebe amoli baagido sämabio. Afädëa edooma baagido säla mogeseda, ea Mosese nebegi Ado säla negei dibe amo baagido säla mogelo nea. Amaimo, dia Ado säla negei dibe amo mogeseda, ado amo bëgëla hamolo made nea, dida oböla, amoïe mogelo gadoi neamelë.
JAM 4:12 Gode afädëfalï eamu ado säla negei amo ïloge, amase, gudi mogeloge e hïdomu nea. Ea hïdomu namolö ïloge, namolö nea neloge e nea. Dia odoa dibalä nefolalebegoli mogesegoda, di nowë neala helësëlahilä, mogelo wäla mogesa nea.
JAM 4:13 Aiyo gahada gogi galë, ne hä, gaamu afädëgi awälahilä, gäheo i afädë gadoi ami nea, bisinesi hamose ameada, na muni nimolöla säha nefolalebe dilima sähago. Nabualo.
JAM 4:14 Dilia aiyo besela galamolö amoda dawa mademelë. Dilile namolöda abodo gadoi. Gelë galahilä, aabela hogosa helelo amo gadola, dilile namolö goda amo gadola hogosa helemolömelë.
JAM 4:15 Dilia sämolö dibe amoda gomalä. Dafidilo Geloia hamei galëda, hä, nilï namolö neebewegi, gomalä hamomolöla sämolöda.
JAM 4:16 Amala säla made, dilia dihili dili ilibialahilä, asigi dalagala neda hamoi edefade gowe gadoi hamomolömelëla sälo. Ado amo gadolada, asiala sälomelë.
JAM 4:17 Hä, afädëa hedabi hamomolö dibe amo hï dawadigilahilä gaso, made hamola fisiseda, nafade hamosa nea.
JAM 5:1 Nelegei yafie negelo dafidilo dolö nefolalebe dilia nabualo. Neala nafademolö dilile dië bimolö amogi gäia güsäla dïisa namialo.
JAM 5:2 Dilile nelegei amo sulubadela gäalimusa maadeimelë. Amase, dilile fagulo hedabi difolalebe amoda, hä, gasiämoea damusa maadeimelë.
JAM 5:3 Dilile golo silibage negei amoda hä, asömalö gaisa baaha maadeimelë. Asömalö gaisa baai ameada, dilia nafade hamoimelëla neala ulufamolömelë. Nuloea wilo amo gadola, golo silibage asömalö gaisa baai ameada, dilile domalo nuloea molömelë. Aligila wagamolö ga madese gaalu, dilia nelebo sulubadela gafedela negei gabugo.
JAM 5:4 Nabuö. Sagaia hamoi hamolasilo amolia dilile sagaia hamoi hamolasisa nebegi, dilia ili dahila neala, bidi made ïala dofogai. Dilia dofogai amea, Gode wesegi, dilia asiala hamoi amoïe bidi nimolömelë. Hamoi hamolasilo dilia gadiabolo amolia ado säsebe amoda, Dafidilo Geloi Sulubadelaïe Geloi neebe amea nabaha nea.
JAM 5:5 Dili nagadaiawi nea nagadaia nelebo hedabi amomu gaula nea, domaloïemu hamela mi hamosalea, dihili dili obeägïsa nea. Domalo besolomäialahilä, molö badoia naha nebego gaso, dihili dili nufudala baagomolö segeyo hä, besela galai dialea.
JAM 5:6 Nafade hamolo made nefolalo amolima dilia nafade hamoimelëla sälahilä, ilia nudumolö helësëi made neëgi, baagomäia nufidelomelë.
JAM 5:7 Nïe nedoo nalifila dili-e, Dafidilo Geloi misiäia fologola made, aso maadela beaha namialo. Dolö sagai sagalo neebe amea, ïe sagai sagai amo hedabola bäumäiala beaha aligilo amoda, dilia dawamelë. Ea ïe iso asigia, aso maadela, gelola nea, i bäu giiloïe segeage, bobagiloïe segeage hamoi hamomäia, fologola made, aumala aligilo amo helësëmalo.
JAM 5:8 Amaimo, diliage fologola made, aso maadela, gelola namialo. Mida, Dafidilo Geloi obëgëmolö segeyo hä, ga madefalï galeamelë.
JAM 5:9 Nïe nedoo nalifila dili-e, Godea dilia hamosebego mogeloea, dilia dihilimu habobala gëgësadiamabio. Memelela gudimolö dolö amoda, hä, mosöa nogila digamolöïe, idi galo baagido neamelë.
JAM 5:10 Bea sälo dafidi nefolalo amolia së naha nea, aso maadela, Dafidilo Geloiïe ëigi ïe ado mala säla olelesa nelo amo helësëmalo. Nïe nedoo nalifila dili-e, amo helësëlahilä, diliage amo gadola wäla hamosa namialo.
JAM 5:11 Bimo. Ili së edefade naha nea gaso, aso maadela, gelola nea, obeägïsa nelomelëla nilïa sälo amoda dilia dawadigi gomelë. Dilia Yoboïe sedaluge nabelo amomelë. Yoboea yöi amoli gaula nea, aso maadela, gelola nebegi, Dafidilo Geloia hobeala ema hedabi hamoi amoda, dilia dawa amomelë. Bobasëloge, ugila negelasiloge, Dafidilo Geloima nobai nea.
JAM 5:12 Nïe nedoo nalifila dili-e, dilia dofä gomalä made hamomäia säla ïahago. Selesaia mosöïe ado sähaleage, nagadaiaïe ado sähaleage, nelebo odoaïe sähaleage, migalïa diigila ado gelola sämabio. Godea dia asiala hamoila säloea, ü, ailemu sämalo.
JAM 5:13 Amaimo, dili nebegogi afädë yöi gaula nea galëda, hï Godema adomolö dialea. Amase, afädë obeägïsa nea galëda, Godeïe ëi gauia adogola gë udämolö dialea.
JAM 5:14 Dili nebegogi afädë oloi galëda, ea Geleso sosogo udia dolö Godea wela ifosisi dolö asigi gäwi dafidilo amoli wemolö dialea. Ilia dolö amoïe Godema adosalea, Dafidilo Geloiïe ëigi ïe busagia susu gadoi weli negemolö dialea.
JAM 5:15 Ilia Godema asigi afädë negela nea adose amea e wahilasimolömelë. Oloi dilo amo Dafidilo Geloia neala wahila nowelasimolömelë. Ea nafade hamoi galëda, amoge hëla fisimolömelë.
JAM 5:16 Hä, dili hïdo hïdolaea nafade hamoi amo odoalima säla sisiaha maadesegi, ili helësëla Godema adolasimalo. Dili wahisa maademäiaïe, amala hamomolö dialea. Asigi mogoi neebe amea Godema adose amoda, geloifalï, dofä udia dolö ugila negelomelë.
JAM 5:17 Elaiada dolöfä nilï neebewe hï gadoi nelo. Ea sege made digamäia Godema gelola adosebegi, gäheo i ohodoaïe aube gafeiagi sege made digala esoimu dilo.
JAM 5:18 Oböla, hobeala ea Godema bu adosebegi, mu dusuia gala sege digalahilä, sagai bu hedabola besela galai.
JAM 5:19 Nïe nedoo nalifila dili-e, dili neebe gogi afädëa ado dofä amo amilahilä dïgïla idi asiala awäsegi, edoo afädëa e oböla bu sigi obëgëseda,
JAM 5:20 gomalä helësëmalo. Afädëa nafade hamolo e asiala asia amila sigi neala obëgëseda, ea e baagomolö dibea amila sigi obëgëla, nafade yafie hamoi amoge Godea hësa maadeila helësëmalo. Hä amo.
1JO 1:1 Nelebo sulubadela maadeia, nelo misi amoïe ado nilïa nabala, siia beala, naaboea diigilalahilä, nilïa dilima namolöi namolö Ado e misi amoïe säla ïahago.
1JO 1:2 Namolö dofä ulufadigi amo bealahilä, nilïa melï amo dilima säha. Namolöi namolö e siiba Eedobalä nelo ulufadigila misi amoïe säla ïahago.
1JO 1:3 Dilia nilïbalä dila namiäia nilïa melï nabi amole dilima säla ïahago. Eedo, ïe Efege Yesu Gelesolebalä nilïa dila neamelë.
1JO 1:4 Dilimage nilïmage obeägïlo nobamäia, nilïa dilima beba dëdëla ïasisago.
1JO 1:5 Ea ado säi amo nilïa nabalahilä, dilima säla ïahago. Gode eda yo digalo nea, gasimi sagalo gadoi nafade ema madefalïmelë.
1JO 1:6 Nilïa ebalä dila neala säha nea, gasimi sagalo gadoi nafademu hamosa aligiseda, wäfalï sälo nea, dofä sälo made gaula neamelë.
1JO 1:7 E nafade baai made, yo digalo neebe amo gadola nilï nafade baai made, yo digalomadi nawesa aligiseda, odoa neebe amolibalä dila neage, ïe malö Yesuïe healea nafade hamoi amo sulubadela hësage neamelë.
1JO 1:8 Nilïa sähalea, Na nafade hamolo madela säseda, nilï nihïlï gadiabola säha, dofä sälo nilïle isogi made neamelë.
1JO 1:9 Amai gaso, nilïa nafade hamoi amo säla sisiaseda, Gode mogoi nea hëmolömelëla säi amo gadola hëmolömelë. Nilïa mala nafade hamoi amoge sulubadela hësa maademolömelë.
1JO 1:10 Nilïa sähalea, Na nafade hamoi madela säseda, Gode eda wäfalï sälo neala säloge, ïe adoge nilïma mademelë.
1JO 2:1 Nïe malöla dili-e, nafade made hamomäia na dilima beba gowe dëdëla ïasisago. Gasoda, nilï afädëa nafade afädë hamoseda, nilïle Ugila Negelo Eedobalä nea, Yesu Geleso e asigi mogoi neebe amo neamelë.
1JO 2:2 Nilïle nafade hamoi amo hëmäia ea hïle namolö amo odala ïala baagoi. Nilïlemu hëmäia made, udia dolö sulubadelaïe nafade hamoi amo hëmäia amala hamoi.
1JO 2:3 Amaimo, nilïa ea säi dibe amo gadola hamosamu aligiseda, nilïa e dawadigila helësësamelë.
1JO 2:4 Afädëa ea säi amo gadola made hamosa nea sähalea, E dawadigila säseda, eda wäfalï sälo nea, dofä sälo ema mademelë.
1JO 2:5 Afädëa ea säi dibe amo gadola hamoseda, Godema boba hamolo amo dofä fädäi neamelë. Nilï ebalä dila neada gomalä helësëdelä.
1JO 2:6 Afädëa ebalä dila neala säseda, Yesuea hamosa nelo amo gadola hamosa namolöi galea.
1JO 2:7 Ne damelë obeägïlola dili-e, na dilima hamomalola säla negei amo dëdëla ïasise amoda hädamade negei made, siiba negei. Amoda mi gäwia amila dilo. Siiba negeila säi amo dilia nabaha maadei.
1JO 2:8 Amai gaso, hamomalola säla negei amo dëdëla ïasisebegoda gähemelë. Gelesoïe namolöea hamoi amoge dilile namolöea hamoi amoge dofä gabula melëlo. Mida, gasimi sagalo amoda usila, yo digalo dofä amoda yo digaha neamelë.
1JO 2:9 Afädëa ïe edooma bimolö habobala nea ea sähalea, Yo digalo neebea ami neala säseda, gasimi sagaia ami neamelë.
1JO 2:10 Afädëa ïe edooma boba hamosa neebe amoda yo digalomadi nea. Ïe isogi yo digalo neebe ameada nelebo afädëa e digalasimolöi mademelë.
1JO 2:11 Amai gasoda, afädëa ïe edooma bimolö habobala nea galëda, gasimi sagaigi nea. Ami nawesa nea. Gasimi sagaloea ïe si dofogasegi, idi gowegi awähala helësëla made, nagubaia nawesa nea.
1JO 2:12 Malöla dili-e, dilile nafade hamoi amo Gelesoïe ëigi hëla fisi amoïe, na dilima dëdëla ïahago.
1JO 2:13 Asigi fädäi naadola dili-e, Afädë siibafalï siiba neamu nelo dilia dawadigi amoïe, na dilima dëdëla ïahago. Malïsäfalïe, dilia nafadelasiloïe busa neebe amo nudula salolela baagila asi amoïe, na dilima dëdëla ïahago.
1JO 2:14 Malöla dili-e, dilile Diado neebe amo dawadigi amoïe na dilima dëdëla ïahago. Asigi fädäi naadola dili-e, Afädë siibafalï siiba neamu nelo dilia dawadigi amoïe na dilima dëdëla ïahago. Malïsäfalï-e, dilia geloi amoïege, Godeïe ado dilile isogi dibe amoïege, nafadelasiloïe busa neebe amo nudula salolela baagila asi amoïege, na dilima dëdëla ïahago.
1JO 2:15 Nagadaia galu amole nelebo nagadaia dibe amole boba hamola namiabio. Afädëa nagadaia galu dibe amo boba hamoseda, Naadoma boba hamolo amo ema mademelë.
1JO 2:16 Nagadaia dibe amo sulubadela Naadomadila mulo made. Amoda gowe. Domaloea gelola hamelo amoge, siia beala gelola hamelo amoge, afädëa nelegei yafie negelo ameage hamoi hamolo ameage gugusäla bimäia hamolo. Amo sulubadela Naadomadila mulo made, nagadaia amila mulomelë.
1JO 2:17 Naga föige nagadaia hamelo amoge hogosa helesalea gaso, udia dolöea Godea hamese amo gadola hamolo amoli namolöi namolömelë.
1JO 2:18 Nïe malöla dili-e, nilïda hä segeyo aligila wagamolö fumadi neamelë. Dilia dafidi Gelesoïe ado nii moholömelëla säi nabi amo walioda hä odoa Gelesoïe ado nii malei misi neamelë. Ameada nilïda hä aligila wagamolö fumadi nea gabula helësëdelä.
1JO 2:19 Ilia nilï dïgïla bahïla doadigila afiaha maadei. Amolia nilïbalä dila made nelo. Dofä dila nelo galebeda nilï gedola afädëfalï neëgi, amalabio. Ili afiaha maadei amea ili sulubadela nilïbalä dila made nelo amo oleimelë.
1JO 2:20 Amai gaso, dilima Gelesoea Godeïe Gesami ï. Dili sulubadelaea dofä sälo dawadigi nebego.
1JO 2:21 Dilia ado dofä amo dawadigi madela helësëla dëdësa maade. Dilia ado dofä amo dawadigi ameage wäfalï sälo amo ado dofä amila mulo made amo dawadigi ameage na dilima dëdëla ïasisago.
1JO 2:22 Wäfalï sälo amoda nowë. Eada sähalea, Afädë Memeleida Yesu madela sälomelë. Efegele Eedolema baagi ïlo amoda Gelesoïe ado niimelë.
1JO 2:23 Efegema baagi ïlo amobalä eedoda nea mademelë. Efegema asigi afädë negelo neebe amobaläda eedo neamelë.
1JO 2:24 Mi gäwia amila nabi dilile isogi dibe amo amalasi namialo. Amalasi aligiseda, dili Efegele Eedolebalä namolömelë.
1JO 2:25 Ea nilïgali ïmolöla daiai amoda gowe. Namolöi namolö ïmolöla daiai.
1JO 2:26 Ilia dili dahila nimolö helësësa neebe amoïe na dilima beba dëdëla ïahago.
1JO 2:27 Amai gaso, dilima Gelesoea Godeïe Gesami ï amo nea. Ameada afädëa dili olelemolöi made. Gesamia nelebo sulubadela dili olelesaleada wäfalï made, dofä sälo nea. Dilima olelei amo gadola, Gelesobalä dila namialo.
1JO 2:28 Amai gabugi, nïe malöla dili-e, hï e ulufadigisolo amo gala ïe siigi nilï hewaloea bedäla made gelola namolöïe ebalä dila namialo.
1JO 2:29 Amai dilia eda mogoifalï neebe amo helësësebe amea gomalä helësëmalo. Sulubadelaea mala mogoi hamosa neebe amolida Godeïe malölali nefolaleala helësëmalo.
1JO 3:1 Wae! Naado Godea nilïma sähalea, Dili nïe malölali nebegola säla abodo gadola boba hamosa neadu. Dofä gelola nilïda ïe malölali neebe amo. Nagadaia nafade hamolo neebe amolia Naado dawa made neebe amea nilïge dawa made nea.
1JO 3:2 Ne damelë obeägïlola dili-e, nilï walio Godeïe malölali neebe amo hobea nilï abodo gadoi namolödu dawa made nea gaso, nilïa afädëfalï helësësebe amoda gowe. Geleso ulufadigisolo amo gala, e abodo gadoi maase bimolödu, amo nilïa siia beahalea, e neebe amo gadoi namolö gabula helësësamelë.
1JO 3:3 Ea nilï hï e gadoi namolö gabula sulubadelaea asigia sisiläfüsa nefolalebe amolida nigime baai made, hï e nigime baai made neebe amo gadoi namolö gabula hehelësësa neamelë.
1JO 3:4 Nafademu hamolo nefolalebe amoli sulubadelaeada Godeïe ado säla negei dibe amo neadigilo nea. Mala nafade dibe amea ïe ado säla negei dibe amo neadigilomelë.
1JO 3:5 Nafade hëla fisimolöïe e ulufadigila misi amoge ema nafade afädë baai made amoge dilia dawadigi.
1JO 3:6 Amaimo, afädë ebalä dila neebe ameada nafade hamosamu aligilo mademelë. Afädëa nafade hamosamu neebe ameada e made beagolei, e dawa made nea.
1JO 3:7 Nïe malöla dili-e, afädëa dili dahila neloea idihë namialo. E asigi mogoi neebe amo gadola afädëa mala mogoi hamolo neebe amoge asigi mogoi nea.
1JO 3:8 Siiba mi gäwilafalï mugabe busaeada nafademu hamosa nelo. Amo gadola afädëa nafademu hamolo neebe amoge e sosogo nea. Ea nafademu hamosa nebegi, Godeïe Malöea mugabe busaea hamoi amo haila digimolöïe ulufadigila misi.
1JO 3:9 Amaimo, afädë Godeïe malö neebe ameada nafade hamosamu aligilo made nea. Amoïe mida, ïe namolöïe gägä negela hï e gadoi bedefai nea. E Godeïe malö neebe amea nafade hamosamu namolö ulï nea.
1JO 3:10 Amo helësëlahilä, Godeïe malö neebe amoge mugabe busaïe malö neebe amoge nowëïe walebelela mogela melëlomelë. Mala mogoi hamolo made neebe amoda Godeïe malö made nea. Amase, ïe edooma boba hamolo made neebe amoge Godeïe malö made neamelë.
1JO 3:11 Mi gäwia amila ado säla ï nilïa nabi amoda gowe. Nilïa nihïlïmu boba hahamosa namialola säla ï.
1JO 3:12 Nafadelasiloïe busaïe sosogo nelo Geinia ïe ëo baagomäia nufi. Nilï e gadoi namiabio. Nufi amoda mi edogi. Mida, ïe ëoea hedabimu hamosa nebegida, Geiniada nafademu hamosa nelo.
1JO 3:13 Amaimo, nïe nedoola dili-e, nagadaia nafade hamolo neebe amolia dilima bimolö habobaseda, fudugimabio.
1JO 3:14 Nilïa nilïle nedoo nefolalebe amolibalä boba hamosa neebe amea nilïa helësësaleada, nilïda baagomolö dibea amila namolöi namolömadi dëgëla asi nefolaleala helësësa. Afädëa boba made hamoseda, eda baagomolö dibea ami nea.
1JO 3:15 Afädëa hïle edooma bimolö habobaha neebe amoda udia dolö baagomäia nufidelo nea. Baagomäia nufidelo neebe amolia namolöi namolö gaula made neebe amoda dilia dawadigi.
1JO 3:16 Gelesoea hïle namolö amo nilïgali fisiga gala ï amea, nilïa boba hamolo amo helësësa nea. Amai gabugi, nilïage nilïle nedoo nefolalebe amoligali nilïle namolö amo fisiga gala ïmolöla.
1JO 3:17 Afädë nelegei negelo neebe amea ïe edoo nelebo maade neebe amo bealahilä made bobasëseda, Godeïe boba hamolo amo ebalä abeahäla neadu.
1JO 3:18 Nïe malöla dili-e, nilïa adoeamu boba hamolo gadoi namiabio. Dofä hamoi hamosa nea boba hamola namialo.
1JO 3:19 Amala hamolo amea nilïda dofä säloïe sosogo neala helësëmolömelë. Nafade hamosebe amoïe së molö dialeala iso asigigi säla ïaseda, ïe siigi asigi sigi namialo. Mida, Godea nilïle iso asigi baagila awäla, ea sulubadela dawadigi amea amala sigi namolöla.
1JO 3:21 Ne damelë obeägïlola dili-e, nilïle iso asigigi së molö dialeala made säla ïaseda, ïe siigi bedäi made, gelola neamelë.
1JO 3:22 Elöda, nilïa ea hamomalola säi amo gadola hamosebe ameage, e obeägïmäia hamosebe ameage nilïa ema afädë nabaseda, ea ïmolömelë.
1JO 3:23 Godea hamomalola säi amoda gowe. Nilïa ïe malö Yesu Gelesoïe ëigi asigi afädë negela nea, nihïlïmu boba hahamosa namolöla. Ea amala hamomalola säi.
1JO 3:24 Amaimo, afädëa ea hamomalola säi amo gadola bëgëla hamoseda, eda Godebalä dila nea. Amase, eege dolö amolibalä dila neamelë. Godea ïe Gesami nilïgali ï ameada nilï Godebalä dila neala helësësamelë.
1JO 4:1 Ne damelë obeägïlola dili-e, wäfalï bea sälo yafie amoli sege sulubadelagi nawesa nea. Amai odoaea Gesami nema neala säseda, sulubadelaea dofä säsebela helësëmabio. Ili Godemadila walebelela bimolöïe fedogola bimalo.
1JO 4:2 Ilima Godeïe Gesami neebelela fädäla bimolö amoda gowe. Afädëa sähalea, Yesu Geleso eda dofä dolö domalola digaila säha neebe amomada Godeïe Gesami nea.
1JO 4:3 Amaimo, afädëa sähalea, Yesu amala made digaila säha neebe amomada Godeïe Gesami nea mademelë. Mala amoda Gelesoïe ado niimadila misi dialea. Dafidi mala amo moholömelëla säi dilia nabi amoda walio hä nagadaia misi dialea.
1JO 4:4 Nïe malöla dili-e, dilida Godeïe malö nea. Wäfalï bea sälo neebe amoli nudula salolela baagila asi nebego. Mida, dilibalä dila neebe ameada nagadaia nafade hamolo amolibalä dila neebe amoda baagila asi neamelë.
1JO 4:5 Amolida nagadaia dolö neebe amea ilia nagadaia galu säha neebe amoda nagadaia nafade hamolo amolia nabelo nea.
1JO 4:6 Amaimo, nilï Godeïe sosogo nefolalea. Ado nilïa säsolo amo gala udia dolöea Gode dawadigi nefolalebe amolia nilïle ado nabelo nea. Amai gaso, udia dolö Godeïe sosogo made nefolalebe amolia nilïle ado nabelo made neamelë. Amo gadola dofä sälo Gesamige wäfalï sälo gesamige mogemolöi galea.
1JO 4:7 Ne damelë obeägïlola dili-e, boba hamolo amoda Godemadila mulo amea nilïa nihïlïmu boba hahamosa namolöla. Afädëa odoa neebe amo boba hamosa neebe amoda Godeïe malö nea, ea Gode dawadigi nea.
1JO 4:8 Amaimo, afädëa odoa boba made hamosa neebe amoda Gode dawadigi made nea. Mida, Gode eda boba hamolo nea.
1JO 4:9 Godea ïe Efege afädëfalï amo nagadaia digamalai. Ea amala hamoi amea nilï namolöi namiäia amai. Amala digamalai ameada Godea nilï boba hamosa neebe amo olei.
1JO 4:10 Boba hamolo amoïe mida gowe. Nilïa edale boba hamoi made, eadale nilï boba hamolahilä, nilïa nafade hamoi amo hëmäia ïe malöea hïle namolö amo odala ïala baagomäia e digamalai.
1JO 4:11 Ne damelë obeägïlola dili-e, Godea nilï amala boba hamoi amea nilïa nihïlïmu boba hahamosa namolöla.
1JO 4:12 Afädëa Gode made melï nea gaso, nilï nihïlïmu boba hahamosa aligiseda, Gode eege nilïbalä dila nea, nilïle isogi ïe boba hamolo amea hamese amo gadola hamosage neamelë.
1JO 4:13 Amaimo, Godea ïe Gesami nilïgali ï amea nilïa ema dila neebe amoge, amase, ea nilïma dila neebe amoge nilïa dawadigimelë.
1JO 4:14 Naadoea ïe malö nilï sege föi sulubadelagi neebe amo sulubadelagali damula aulo namiäia fisiga idai. Fisiga idai amo nilïa siia bealahilä, ulufadigila säla ïahago.
1JO 4:15 Afädëa Yesu eda Godeïe Efege neala säla ulufadigiseda, Godeda ebalä dila nea, amase, eege Godebalä dila neamelë.
1JO 4:16 Amaimo, Godea nilï dofä boba hamosa neala nilïa dawadigi nea. Gode eda boba hamolo nea. Afädëa boba hahamosa aligiseda, e Godebalä dila nea, amase, Godege ebalä dila neamelë.
1JO 4:17 Nilïa amala aligiseda, nilïle isogi ïe boba hamolo amea hamese amo gadola hamosa nea. Amala hamosa neebe amea, nilï nagadaia nea hï e gadoi aligilo amea, aligila wagala gudisolo amo gala nilï bedämolö made, geloi namolömelë.
1JO 4:18 Afädëa boba hamomolöge bedämolöge balagula gaula namolöi mademelë. Boba hamolo dofä fädäi amea bedälo amo nesila digilo. Mida, së molömadi neebe amea bedälo. Afädë bedälo neebe amoda Godeïe boba hamolo amea hamese amo gadola made hamosa neamelë.
1JO 4:19 Godea dafidi nilïdale boba hamoi amea nilïa boba hamosa nea.
1JO 4:20 Afädëa ïe edooma bimolö habobaha nea sähalea, Na Godema boba hamosa neawela säseda, eda wäfalï sälo nea. Ea ïe edoo amoli siia bealahilä, ili boba made hamosa nea galëda, Gode made melï neebe amo ea boba hamomolö amo ulï nea.
1JO 4:21 Ea nilïa hamomalola säla ï amoda gowe. Afädëa Godema boba hamosa nea ïe edooma boba hamomolöi galeala säi.
1JO 5:1 Afädë Memelei amo dofä Yesu e nealahilä asigi afädë negei neebe amoli sulubadelada Godeïe malö nea. Eedo afädë amoma boba hamosa neebe amoli sulubadelaea ïe malö amomage boba hamosa nea.
1JO 5:2 Nilïa Gode boba hamolahilä ea hamomalola säla negei dibe amo nabala hamolo amea, nilïa Godeïe malölali neebe amo boba hamolo neala helësëmolö dialea.
1JO 5:3 Mida, Godema boba hamolo amoda gowe. Ea hamomalola säi amo nabala hamolo. Amoda ïliawai made, hamomolöi dialea.
1JO 5:4 Mida, Godeïe malö nefolalebe amoliada nagadaia nafade hamolo elö elöla dibe amo nudula salolela baagila aulo nea. Yesu Gelesoma asigi afädë negei neebe amea nagadaia nafade hamolo dibe amo nudula salolela baagila asimelë.
1JO 5:5 Nagadaia nafade hamolo dibe amo nudula salolela baagila aulo neebe amoda nowëa. Amoda gowea, Yesu e Godeïe malö neala sälahilä, asigi afädë negei neebe ameamu baagila aulo nea.
1JO 5:6 Ödäeage healeage misi amoda Yesu Geleso. Ödäeamu made, ödäeage healeage misi. Gesamia dofä sälo amea dofä amala misi amo säla ïaha nea.
1JO 5:7 Ohodoa ilia dofä amala misila säla ïaha nea.
1JO 5:8 Gesamige, ödäge, healege amolile adoda afädëdimu säla ïaha nea.
1JO 5:9 Udia dolöea siia melï amo dofä säsebela asigi afädë negelomelë. Amai gaso, Godeïe ado dofä sälo dibe amea udia dolöïe ado sälo amo baagila asi dialea. Mida, e Gode nea. Elöda, hïle efegeïe säsisa nea.
1JO 5:10 Amala säla ï amo, afädëa Godeïe malöma asigi afädë negei neebe amoïe isogi ïe malöea hamoi Eedoea säsisa neebe amo neala gaula nea. Amai gaso, elöea Godema asigi afädë made negei nea, Gode eda wäfalï sälo neala helësëlo nea. Mida gowe. Ïe malöea hamoi säla ï amo dofä gabula asigi afädë made negei amea.
1JO 5:11 Amaimo, ado säla ï amoda gowe. Godea nilïgali namolöi namolö ï. Ïe malömadila namolöi namolö amo ï.
1JO 5:12 Afädëa ïe malöma dila neebe ameada namolöi namolö amo gaula nea. Afädëa ïe malöma dila made neebe ameada namolöi namolö amo made gaula nea.
1JO 5:13 Godeïe Malö amoïe ëigi asigi afädë negei nefolalebela dili-e, dilia namolöi namolö gaula nebego dawadigimäia, na dilima ado gowe dëdëla ïasisago.
1JO 5:14 Nilïa Godea helësëi dibe amo gadola ema adosa nea, nilïa afädë nabaseda, ea nilïa säi amo gadoi ïmolömelë. Ameada nilï ïe siigi bedäla made, gelola neamelë.
1JO 5:15 Nilïa ema ado afädë nabasegi, ea nabulö gabula dawadigi nefolalebe amea ema nabi amo ïmolö gabula dawadigi nefolalea.
1JO 5:16 Afädëa ïe edooea nafade hamosa neë beaseda, nafade amo gadoi hamose ameada baagomolöi made galëda, Godema nabaseda, Godea ema namolö ïmolömelë. Amo säsebe amoda, nafade ameada ili baagomolöïe made säha nea. Amaimo, na gomalä säha, nafade hamose ameada baagolo dialea. Nafade amoïe dilia adolasimalola säha maade.
1JO 5:17 Asiala hamolo sulubadelada nafademu. Amai gasoda, nafade hamose ameada baagolo made, nafade odoa amo gadoi dialea.
1JO 5:18 Nilïa helësësaleada, afädë Godeïe malö neebe ameada nafade hamosamu aligilo made neala helësësa. Mida, Godeïe efegea e sigi neëgida, nafadelasiloïe busa neebe ameada e diigimolöi made nea.
1JO 5:19 Nilïda Godeïe malö neebe amoda dawadigi. Nafadelasiloïe busa amea nafade hamolo neebe amoli sulubadela beaha neebe amoge nilïa dawadigi.
1JO 5:20 Godeïe malö nagadaia digai amo nilïa dawadigi nea. Nilïa Gode dofä neebe amo dawadigimäia ea dawadigilo amo nilïgali ï. Nilïa dofä Gode neebe amoma dila, ïe malö Yesu Gelesomage dila nefolalea. Gode eda dofä nea. Namolöi namolö amoda hï e gelola nea.
1JO 5:21 Nïe malöla dili-e, wäfalï sälo gode neebe amo helësëlahilä, gasi gala sigola namialo. Hä amo.
2JO 1:1 Neda ëdëi sali dafidiloea udia Godea memelei ïe malölalima dëdëla ïahago. Na dili dofä boba hamosa neamelë. Namu made, ado dofä dawadigi ili sulubadelaeage dili boba hamosa nea.
2JO 1:2 Ado dofä nilïle isogi dibe ameage amo nilïbalä diamolöi dibe ameage dili boba hamosa nea.
2JO 1:3 Naado Godeage, ïe malö Yesu Gelesoeage dofä nilï boba hamola, elea ugila negela, nilï bobasëla, aealasiloea nilïle isogi gelolasimolömelë.
2JO 1:4 Naadoea nilïa hamomalola säi amo gadola dïe malö odoaea ado dofä amo bëgëla awähala säi amo nabalahilä, na edefademalä obeägïmelë.
2JO 1:5 Amai gabugi, udia-o, nilï nihïlïmu boba hamodi. Hamomalola säla negei dëdëla ïasise amoda gähe made, mi gäwia amila nilïbalä dilo amo.
2JO 1:6 Boba hamolo amoda gomalä. Ea hamomalola säla negei amo gadola bëgëla awäla hamolo. Ea hamomalola säla negei amoda gowe. Dilia mi gäwia amila nabi amo bëgëla hamomalo.
2JO 1:7 Mida, dahila nelo yafiea Yesu Gelesoda dolö domalola digai madela säsäla sege elö elögi afiaha maadei. Amolida dahila nelo, Gelesoïe ado nii nea.
2JO 1:8 Amai gabugi, dilia hamoi amoïe bidi nimolö amo made neala dabadigiloea, idihë namialo. Bidi amo sulubadela nimolöïe amala namialo.
2JO 1:9 Afädëa Gelesoea säla olelei amo hedabola gaula made, ado odoa balagula gaula neebe amoda medelala baagila asi neebe amobaläda Gode e nea made. Afädëa ea säla olelei amo hedabola gaula neebe amobaläda Efegele Eedole nea.
2JO 1:10 Afädëa dili neebea maala, Gelesoea säla olelei amo gadola made, elö gaula maaseda, e säla olela gausiala mosöa maala fimola sämabio.
2JO 1:11 Afädëa e säla olela gausiaseda, ïe nafade hamosa neebe amo ebalä dila hamosa nea.
2JO 1:12 Na dilima ado yafie säla ïmolö gaso, bebagi dëdëla ïase amo dofea made. Ne dili neebea söfë mudulä. Maala nea dilile odagi beala säla ïdulä, nilï obeägïsa maademolöïe.
2JO 1:13 Dilile dialifi memelei amoïe malölali dilima ilia hawioila säsisago. Hä amo.
3JO 1:1 Neda ëdëi sali dafidiloea, nïe damelë obeägïlo Gaiusa-o, na di dofä boba hamosa nea dima dëdëla ïasisago.
3JO 1:2 Nïe damelë obeägïlo-o, nelebo dia hamosa nebego hedabola hamosa namiäiage, di olola made hedabola namiäiage, dïe gesami hedabi neebe amo gadola namiäia helësësamelë.
3JO 1:3 Dofä sämolömadi namolöi nelo amo gadola, asigi falagasei nea dofä sämolömadi namolöi neamelëla nedoo odoa maalahilä nema säla ï amo nabalahilä, na edefademalä obeägïmelë.
3JO 1:4 Afädëa sähalea, Dïe malësä dofä sämolömadi asi namolöi neala säse nabalahilä, na edefademalä obeägïsa aligilo. Na obeägïlo ameada, obeägïlo sulubadela baagila asi dialea.
3JO 1:5 Nïe damelë obeägïlo-o, di asigi falagasei nea. Didoolali ugila negela digi, odoa ilia di dawa made nefolalebe amoli ugila negela digisa nebegoda hedabola hamosa nebegola säha.
3JO 1:6 Amolia udia dolö Godea wela ifosi yawe nefolalebe welima dia boba hamolo amo säla ïmelë. Amala säla ïlo amoli nelebo gaula nawesa namolö awäsebe amo gadola afiasebea ami Godea helësëse amo gadola dia ili ugila negemalo.
3JO 1:7 Mida, ili Yesuïe ëigi awähalea, Godema asigi afädë negei made nefolalo amolile nelebo afädë iligali ïmäiala made helësëla, bahïla asi gabio.
3JO 1:8 Amala hamolo amoïe nilïa ilibalä dofä säloïe hamoi gaalu hamosa aligimolöïe, dia ili ugila negemolö dialea.
3JO 1:9 Na beba dëdëla udia dolö Godea wela ifosi di neebea nefolalebe amolima ï. Amala ï gasoda, Daiodelefisia e busa namolöila helësëlahilä, na ado säi amo fisi gabio.
3JO 1:10 Ea nilïle ëi säla udia dolö odoama ado nafadefalï nafadege wäfalï sämolöge säha neebe amo ne dili neebea maalahilä, ea nafade hamolo amo dilia nabuäia na säla ulufadigimolömelë. Ea amomu hamolo made, edoolali odoa maasegige dili misigolela säla obeägïlo mademelë. Amala hamolo made nea, udia dolö odoaea dili maase amoma mosöa fimäia fu ïmolö helësëi neebe dilia udia dolö Godea wela ifosi odoabalä seëge ili segea doadigila mosäia eada nesila digimolömu helësëlomelë.
3JO 1:11 Nïe damelë obeägïlo-o, nafade hamolo neebe amolia nafade hamolo amo gadola hamola oodo bibila hamola made, hedabi hamolo neebe amolia hedabi hamolo amo gadola hedabi hamola oodo bibila hamosa namialo. Udia dolö hedabi hamosa neebe amolida Godeïe malö nea. Nafade hamosa neebe amoliada, e melï made nea.
3JO 1:12 Udia dolö sulubadelaea Demediliasa eda gowe gadoi neala säha aligilomelë. Eada dofä sämolömadi nea ea dofä sämolö gaui neebe amo gadoi neala olelo nea. Nilïage e siia bealahilä, eda gowe gadoi neala sälomelë. Dia nilïa säsebeweda mogola säsebela dawadigi.
3JO 1:13 Ado sämolö yafie gaulea gaso, dima bebagimu dëdëla ïmolö habosebemelë.
3JO 1:14 Holöfalï nelolahilä, halïgïla odagi beaha nea sämolöïe ne di neebea mudulä.
3JO 1:15 Aealo dima diamiäiamelë. Damelë odoa amolia dima hawiosebegola säsisago. Alïle damelë di neebea neebe amoli hïdo hïdolama hawioila säila säla ïmalo. Hä amo.
JUD 1:1 Neda Yudi, Yesu Gelesoïe hamoi hamolasilo, Yameseïe edoomelë. Naado Godea boba hamola, Yesu Gelesoea sigi neebe, udia dolö Godea wei dilima
JUD 1:2 bobasëloge, daluloge, boba hamologe, bäula nobamäia hamesamelë.
JUD 1:3 Ne damelë obeägïlola dili-e, Godea dilige nege nilï sulubadela damula asi amoïe, na beba dëdëla ïmolöila gelola helësësamu nelo gaso, walioda fodolo dëdëmolöi dialeala helësësa neawe. Godeïe udia dolö nefolalebe amolima mala hedabi säla ïaha maadei amoïe, ado mala dofä amobalä ado nii neebe amolima dilia gelola säla obëgëmäia, beba gowe dëdëla ïasisago.
JUD 1:4 Mida, odoaea geleä musügä maalahilä, dilibalä gegoala neamelë. Dolö amolida, Gode made helësëla baagi ïlo nea. Ilia mala nafadefalï nafade hamosebe amoda, dofea hamosala sämolöïe, nilïle Godeïe ugila negelasilo dibe amo neala bedefalo nea. Amase, nilïle Busa Dafidilo Geloi Yesu Geleso emu neebe amomada, ilia oböla, habobalo nea. Amala hamosa neebe amolibalä gudila, asiala hamoila säla, së molömelëla siibafalï dëdëla negei dilo amo dialeamelë.
JUD 1:5 Galone goweda, dilia dawadigisa maadei. Dafidilo Geloia ïe udia dolö damula awäla, Isibi segeala sigi doadigila asi gasoda, hobeala amoligi odoaea asigi afädë made negesebegi, nufudaha maadei amoda, na dilima bu oböla helësëlasisamu namolö asigisa.
JUD 1:6 Selesaia fii ilima Godea hamoile geloile ï amo hamosalea, hedabola aligila made, ilile sege amo dïgïla asi. Amasebegi, segeyo edefade besela galasolo amo gala, Dafidilo Geloia ilibalä gudimolöïe, igi ëfë damumolö ulï amea nafodolahilä, uli gasimi sagai dibea ami negesi dialea.
JUD 1:7 Amo gadola wäla, Sodomo Gomola fii udia dolö amoliage, udia dolö gaamu ga madela difolalo amogi fii amoliage, domaloea nafade hamomolö amomu helësëla, gesami awäla nafade elö elöla hamosa nelo. Amala hamosa nebegi, Godea ili së muäia, nulo wisamu neebea ami ifosi nefolalea. Amoda nilï sulubadelaea helësëmäia, ulufala negei dialea.
JUD 1:8 Amase, amo gadola wäla, dolö dilibalä gegoala neebe amolia simasia melëlo ameada, susugu hamola ilile domalo nafadela nigime baaloge, beaha aligilo nefolalebe amolima auaula baagi ïloge, amase, yo digalo hïdo elöibalä aligilo nefolalebe amolima gagadeloge nea.
JUD 1:9 Gaso, selesaia fii nefolalebe amoïe busa Maigoloea mugabe busabalä Moseseïe domalo nimolöïe elewalosolo amo galada, ea ïe asigia gagadela, asiala hamoila made säla, Dafidilo Geloia dima nemomäiala säimelë.
JUD 1:10 Dolö amoliada, nelebo dibe amo mi fädäla dawa made neada, nelebo ilia dawa made amoma nafadela säla gagadelo nea. Ilaba elö elölaea helësëse amo gadoi hamolo amo gadola, dolö amolia helësëse amo gadoi hamose ameada, hili ili neala nafadesa neamelë.
JUD 1:11 Dolö amoli gadoi amogi asigii gabu. Ilida Geini aulo idi amogi asimelë. Balamaea asiala hamoi amo gadola, ilia muni nimolöïe, ea asiala hamoimadi baluluia asimelë. Amase, Golaea Godele Mosesele ba beasebegi, nufudadigi amo gadola, iliage ba beasebegi, nufudaha maademolömelë.
JUD 1:12 Dilia gegedola Geleso sosogo odoama boba hamolo olemolöïe, molö nasolo amo gala, dolö amoli maala ilile mala hamolo ameada, molö gegedola nülo amo holöbö nigime baai gadoi hamolo. Molö giai nülo segeyo edefadegi gabula helësëla hewala made neada, ilia sugua sibi sigi aligilo hili ilimu helësëla nülo nea. Gelë odoa sege gaula mulo made, foea doala gaula aulo amo gadoida, dolö amoli nea. Amase, i gägä negelo segeyogi gägä negelo made amo gadoige, i soomo beselala fisi bausoi amo gadoige neebe amolida, bu äudäla baagoi gadoi neamelë.
JUD 1:13 Ilida ödä edefadela aidagula mulo amo gadoi nea, mala nafade hewai hamose amolida, ödä södaia dibu ulufa negelo amo gadola ulufadigilo nea. Ilida gasumilï odoa muugi fudufuduia aulo neebe amo gadoi nea. Godea ili sege nafadefalï nafade, gasimi sagala fisi dibea amimu namolöi namiäia daiala negesi dialea.
JUD 1:14 Inogo eda Adamaïe yaua mi näba gifalädalü amea, dolö nafade hamolo amolile siibafalï bea säla negesaleada, Nabuö. Dafidilo Geloi e, ïe selesaia fii dausini yafiebalä maala,
JUD 1:15 udia dolö sulubadelabalä gudila mogemolömelë. Gode made helësëlo amolia Gode made helësëla nafade hamosa dilo amoïege, amase, Gode made helësëla asiala hamolo amolia ado nafade sulubadela ema säha nelo amoïege, ilibalä gudila mogemolömelëla bea säla negei dialea.
JUD 1:16 Dolö amolia segeyo sulubadelagi adoea elewalola säloge, gadiabola elö elöla säloge, amase, domaloea gelola hamelo amoïe idigi bëgëla auloge, ilia hili hamoi amo gugusäla bimäia, ado yafie gelola säloge, ilia helësëse amo bëgëla hamomäiaïe, odoama säfe negela säloge nea.
JUD 1:17 Amai gaso, ne damelë obeägïlola dili-e, nilïle Dafidilo Geloi Yesu Gelesoïe abosolo dolö amolia dafidi säla ï amo helësëla obëgëmalo.
JUD 1:18 Ilia dilima säla ïahaleada, segeyo aligila wagamolö ga madese gaalu, gadiabolo dolö amoliada domaloea gelola hamelo amoïe idigi bëgëla moholömelëla säi.
JUD 1:19 Dolö amoliada, udia dolö mogelasila, dolöfäïe mala dibe amomu bëgësalea, Godeïe Gesamida ilima maademelë.
JUD 1:20 Amai gaso, ne damelë obeägïlola dili-e, Eleloi Gesamiïe geloigi nea, Godema adosa neada, dilia asigi afädë negela, Godeïe mala eleloi hedabifalï amo gaula mogosa nebego, bäula edemäia neala dabilibaha namialo.
JUD 1:21 Amala hamosa neada, dili Dafidilo Geloi Yesu Gelesoea bobasëla dilima namolöi namolö ïmäia beaha nebego neada, Godeïe boba hamolomadi namolöi namialo.
JUD 1:22 Udia dolö asigi afädë negei gaso, asigi äudä negela asusugai nefolalebe amoli, dilia bobasësa namialo.
JUD 1:23 Udia dolö odoa nulo gobeia neëda, aabela nabelela nimalo. Odoa bobasësaleada, dihili dilige bedäha nea, hamogisa namialo. Ilia mala nafade hamosa aligilo amea, Godeïe siigi fagulo nigime baai gadoi salugala neebe ameada, fagulo amolima habobaha namialo.
JUD 1:24 Dili emo dauala digaloea, dili sigi namolöi neebe amomage, dili nigime baai made, obeägïsa nea, e mia ïe yo digalomadi, dili neala ifosimolöi neebe amomage,
JUD 1:25 amase, nilïle damula aulo afädëfalï Gode neebe amomage, Yesu Geleso nilïle Dafidilo Geloiïe aulodaiala, yo digalo hïdo elöige, ëi ilibia namolöge, geloige, busa nea sigi namolöge, mi gäwiafalï amila, Gode hïlemu dilo amo walio dibe wege, hobealage, amalasimu diamiäia. Amala gelola hamomäiamelë. Hä amo.
REV 1:1 Ado goweda, Yesu Gelesoea ulufai. Ulufai amoda, ea ïe hamoi hamolasilo nefolalebe amolima nelebo aabela besela galamolö ga made dibegi, ea amoli ulufala olemäia, Godea ema ï. Gelesoea nelebo hamomolö amoli, ïe selesaia fii afädëa ïe hamoi hamolasilo Yone nema, ïe hamoi hamolasilo odoa nefolalebe amolima ado gowe säla ïmalola säla ïmelëla säla ïasio.
REV 1:2 Na nelebo amoli sulubadela siia beaha maadelahilä, Godea ado säi amoge, Yesu Gelesoea ulufala dofäla säi amoge, na dilima ulufala säla ïahago. Nada ado amo dofämelëla säha.
REV 1:3 Ado bea säi dibe gowegi odoaea nabuäia nidelo amoliage, nabala bëgëla hamolo amoliage, obeägïsa neamelë. Mida, ïe segeyoda, ga madefalï dialea.
REV 1:4 Neda Yone. Na Bolobinisi Esia segeamadi sesi gifalädalïagi udia dolö nefolalebe dilima beba gowe dëdëla ïasisago. Gode walio neebeweage, siiba nelo ameage, hobea moholö ameage, dilima ugila negelasilole dalulasilole ïmäia hamesa neawe. Amase, Godeïe sidaia ïe beaha aligilo filo dibea ami aligilo gesami gifalädalïa amoliage,
REV 1:5 Yesu Gelesoeage, dilima ugila negelasilole dalulasilole ïmäia hamesa neawe. Yesuda asigi falagasei nea, ulufala säloge, baagoi bauiala degabo mi gäwila nowei amoge, nagadaia gini nefolalebe amolile busa neebe amoge, neamelë. Ea nilï boba hamosa nea, nilïa nafade hamoi amea gide begei nebegi, ïe healea nilï fisigälasi.
REV 1:6 Amase, sosogo afädë namiäia, nilï neala gedolasila, nilïa odala ï neala ïlo nea, ïe Eedo Godeïe hamoi hamolasilo namiäia, nilï hamolasi. Amala hamolasilo amo hïma, ëi edefadeïe yo digaloge geloige, ïemu diamolöi diamiäia hamesa neawe. Dofä amala hamomäiamelë.
REV 1:7 E mu baidilidabodo maasebe godogo bimo. Udia dolö sulubadelaïe siia e bimolömelë. E gögë gäwilo amoliage, e bimolömelë. Amase, udia dolö fifi asi sege sulubadelagi sefolalebe amolia e helësëla gäia güsäla dïimolömelë. Dofä. Dofä amala hamomäiamelë.
REV 1:8 Dafidilo Geloi Godea sähalea, A-ge nihï ne, Ya-ge nihï ne neawe. Ne walio neebewege, siiba nelo amoge, hobea moholöge neamelë. Neda Sulubadelaïe Geloifalï Geloi neebela säha nea.
REV 1:9 Neda dilile didoo Yone. Nege dilige, nilï gaalu Yesuïe ëigi neebe ameada, yöi gaula së naha nea, Godea Beaha Maadela Sigi Neebea ami nea, aso maadela, gelola aligisawemelë. Godea ado säi amoge, Yesuea ulufala dofäla säi amoge, na säla ïaha nebegi, ilia ne gaula sege duhulu södölo Fadimoso dibea ami galabaia negesi amea, ne ami nelo.
REV 1:10 Amala nebegi, Dafidilo Geloiïe segeyogi, Godeïe Gesami nema salugasisio. Amase amo gaalu, ne baagido ado afädë gelola uuala melo biguli goba gadoia säse nabi.
REV 1:11 Amo nabaha nebegi, ado amea sähalea, Dia siia beasebe egowelida, bebagi dëdëlahilä, Geleso sosogo gaamu gifalädalïa, Ebesage, Simenage, Fegamamuge, Daiadailage, Sadisige, Filadebiage, Eleodisiage nefolalebe amolima dëdëla fisiga gamalola säsio.
REV 1:12 Nema ado säsebe amo nowëa säsebelela bimolöïe besuia imogoi. Besuia imogolahilä beahamelebe, elamu i gifalädalïa goloea hamoi dibe melï.
REV 1:13 Amo beahaleamelebe, elamu i negelo dibe mogogi ami, dolö afädë dolöfä gadoi neebeo. Dolö amoda, fagulo sedade didigala gälahilä, sogobe goloea hamoi amo bidagia bobogä gäi neebeo.
REV 1:14 Ïe busage, ïe busa hilïge, faleda, sugua sibi hilï falele, mu baidili falele gadoi gabio. Amase, ïe siida, nulo söa gadoi gabio.
REV 1:15 Ïe emo amoïe yoda, igi aeane ëi bolonosi nulogi gobei neëi amo gadoi neebeo. Ïe adoda, ödä nawali guui goba gadoi nabimelë.
REV 1:16 Ïe naabo dafädiada, gasumilï gifalädalïa gaula neebeo. Aso, beahaleamelebe, nudulo helebe si äudä helegela meifalï amo, ïe nafiadila doadigila maase melï. Amase, ïe odagi yo digai amoda, eso mogogi gelola neëlo amo gadoi neebe melïmelë.
REV 1:17 Na e bealahilä, ïe emo mia baagola digala, baagoi gadoi dilo gabio. Amala dibegi, ïe naabo dafädia ne diigisalea sähalea, Made bedämalo. Dafidilaïege ne nea, hobealaïege ne neawe.
REV 1:18 Neda namolöi neawe. Neda dafidi baagoi gasoda, hä, bimo, walio neda namolöi namolö neawe. Baagoïege, uguli mosöïege, idi gai dogelo giida, na gauleamelë.
REV 1:19 Amai ameada, nelebo beasego dëdësaleada, walio misi difolalebe golige, nelebo hobea diamolö amolige, dia dëdësa maademalo.
REV 1:20 Amaimo, gasumilï gifalädalïa nïe naabo dafädia gaula neebe dia bease goïege, elamu i negelo goloea hamoi gifalädalïa difolalebe bease goïege, galone musügä negei dilo amoda gowemelë. Gasumilï gifalädalïa amolida, Geleso sosogo gaamu gifalädalïagi nefolalebe amolile selesaia fii gifalädalïa nea. Amase, elamu i negelo gifalädalïa amolida, Geleso sosogo gaamu gifalädalïagi nefolalebe amoli neamelëla säi.
REV 2:1 Dolö amea sähamu nea sähalea, Dia Ebesa sesigi nefolalebe amolile selesaia fii neebe amoma ado gowe dëdëla ïmo. Ïe naabo dafädia gasumilï gifalädalïa gaula, elamu i gifalädalïa goloea hamoi dibe mogogi ami nawesa neebe amoïe adoda gowemelë.
REV 2:2 Mala dia hamolo amolige, hamoi baagi sëi hamosa nelo amoge, aso maadela, gelola aligilo amoge, na dawa. Dia dolö nafade hamolo nefolalebe amoli hamelo made nelo amoge, amase, dolö odoaea ilida abosolo dolöla wäfalï sälo amoli, dia ili dofä abosolo walebelela bimolöïe fedogola bealahilä, ili wäfalï sälo nelo gabula beagolei amoge, na helësësa.
REV 2:3 Dia nïe ëi gaula neebe amea yöi gaula nea, aso maadela, gelola aligilahilä, dimamela habobala fisi made.
REV 2:4 Amai gaso, mala afädë dia hamosegi, na made hamelo amoda gowe. Dia dafidi boba hamosa nelo fisi amogi.
REV 2:5 Dia dafidi mala hedabi hamosa nelo amo fisila, digai nebego, bu helësëla obëgëmo. Amaimo, asigi besulahilä, mala dafidi hamosa nelo amo gadola, bu hamola obëgëmo. Amala made besuseda, ne di neebea maala, dïe elamu i negei dibea amila nihï haila nimolömelë.
REV 2:6 Amai gasoda, dia hedabi afädë hamosa neebe amoda gowe. Nigolasa bëgëla aulo nefolalebe amolia hamolo amogi, dia habobai nebegomelë. Nage ilia amo hamolo amogi habobaimelë.
REV 2:7 Afädëa gëhea nabulöi galëda, Godeïe Gesamia sesi amolima ado säsebego nabualo. Afädëa nudula salolela baagila aulo neebe amomada, na namolö ïlo i gägä faila molöda, dofeala sämolömelë. I amoda, Godeïe sagaia Hebeni segea neala säi.
REV 2:8 Dolö amea sähamu nea sähalea, Dia Simena sesigi nefolalebe amolile selesaia fii neebe amoma ado gowe dëdëla ïmo. Afädë dafidilage nea, hobealage nea, dafidi baagola nowei neebe amoïe adoda gowemelë.
REV 2:9 Dia yöi gaula së naha nebegoge, nelebo maade nebegoge, na dawa. Amai gaso, dida yafie gelola galeamelë. Odoaea nilïda Yu sosogo neala säla, ilia di gagadela ado nafadela sälo amoda, na dawamelë. Amolida Yu sosogo made, ilida Saidaniïe sosogo nefolalea.
REV 2:10 Dia së molö maase amogi, bedäla made namialo. Nabuö. Mugabe busaea dili neebe gogi odoa neala, abilia hamosebelela bimolöïe, galabaia negesimolö hamosebemelë. Segeyo nabülasigi, dilia së naala yösa namolömelë. Di së naala baagomolö gabugi, nïe ëigi asigi falagasei neëda, na dima namolö gähe amoïe bidi amo ïmolömelë.
REV 2:11 Afädëa gëhea nabulöi galëda, Godeïe Gesamia sesi amolima ado säsebego nabualo. Afädëa nudula salolela baagila aulo amoda, baagomolö agedu amoïe së dofä made molömelëla säi.
REV 2:12 Dolö amea sähamu nea sähalea, Dia Fegamamu sesigi nefolalebe amolile selesaia fii neebe amoma ado gowe dëdëla ïmo. Afädëa nudulo helebe si äudä helegela meifalï gaula neebe amoïe adoda gowemelë.
REV 2:13 Di mugabe Saidaniïe beaha aligilo filo dibea ami sebe amoda, na dawa. Gaso, dia nïe ëi fisila made, gelola gaula nea, nema asigi afädë negei amo, amo wälasi nebego. Dolö afädë asigi falagasei nea, ne neala ulufalo Ädibasa nelo amo, mugabe Saidani neebea ami odoaea dilile segea e baagomäia nufudasolo amo galage, dia nïe ëi amo made fisila nelomelë.
REV 2:14 Amai gaso, mala dia hamosegi, odoa na made hamelo amolida gowe. Di neebea gui odoaea Balamaea mala olelei amo gaula neebe amogi. Ea Balagama olelesalea, gomalä hamomalola Isilaleïe malöea nafade hamomäia, neala digalasila hamola olelesa nelo. Molö wäfalï godegali göa nelegela ï amo mage mosäia naala olelela digi, udia dolö susugu hamomäia olelela digisa nelo.
REV 2:15 Amase, amo gadola wäla, di neebea gui odoaea Nigolasa bëgëla aulo nefolalebe amolia mala olelelo amo gaula nea.
REV 2:16 Amai gabugi, asigi besumalo. Amala made hamoseda, ne fodolofalï di neebea maalahilä, nïe nafiadila nudulo helebe besela galasebe amea, udia dolö amolibalä nudumolömelë.
REV 2:17 Afädëa gëhea nabulöi galëda, Godeïe Gesamia sesi amolima ado säsebego nabualo. Afädëa nudula salolela baagila aulo neebe amogali, na mena musügä negei dilo amogi odoa muäia ïmolömelë. Amase, na igi falei afädëgi ëi gähe dëdëla negei dilo amoge egali ïmolömelë. Ëi gähe dëdëla negei dibe amoda, odoaea made dawa neëgi, neala gause ameamu dawadigimolömelëla säi.
REV 2:18 Dolö amea sähamu nea sähalea, Dia Daiadaila sesigi nefolalebe amolile selesaia fii neebe amoma, ado gowe dëdëla ïmo. Godeïe malö amoïe adoda gowemelë. Ïe sida yo digai nulo söa gadoige, amase, ïe emoda igi aeane ëi bolonosi eleloi amo gadoige neebeo.
REV 2:19 Dia mala hamolo amoge, odoa boba hamolo amoge, asigi afädë negelo amoge, odoa ugila negela hamoi hamolo amoge, aso maadela, gelola aligilo amoge, na dawa. Amase, dia walio hamoi hamosa nebegoea, dafidi hamosa nelo amo baagila awäla hamosa nebegoge, na dawamelë.
REV 2:20 Amai gaso, mala afädë dia hamosegi na made hamelo amoda gowe. Udia Yesebele hï, neda bea sälo saleawela säsebe amo, dia made dofogalo amogi. Ea mala olelese ameada, nïe hamoi hamolasilo nefolalebe amolia susugu hamomäiage, molö wäfalï godegali göa nelegela ï amo muäiage, ili sigi gaula asiala aulo salea.
REV 2:21 Ea dolö susugu hamosa neebe amoïe, e asigi besumäia fu ï gaso, amo made hamelo salea.
REV 2:22 Hä, nabuö. Na e neala ololasisegi, e imididaia fugaulasi diamolömelë. Amase, dolö ebalä susugu hamolo amoliage, ïe mala nafade amo baagi ïala asigi made besuseda, ilige së edefademalä naha namiäia ïmolömelë.
REV 2:23 Udia amoïe malö amolige baagomäia nufulömelë. Ameada, sesi sulubadelaea, na udia dolöea helësësa dibe amoge, hamesa dibe amoge, hogola dawadigisa maadesebela helësëmolömelë. Nada dili hïdo hïdolaea hamosa nelo amo gadola bidi ïmolömelë.
REV 2:24 Amaimo, Daiadaila nefolalebe odoa dilia, udia amea mala olelelo amo made bëgëla, mugabe Saidaniïe mala musügä negei dialeala sälo amogi dawa made neebe dili sulubadelama gomalä säla ïahago. Yöi odoa gaula namiäia made ïala,
REV 2:25 na gowemu sähago. Ne obëgëla misiäia beaha nebego gaalu, nelebo gaula nebego fëdöla gaula namialola sähago.
REV 2:26 Amala hamosa nea, afädëa nudula salolela baagila awäla, na hamese amo gadola hamosa neamu hamola wagase amogali, gädili elö elölagi udia dolö nefolalebe amoli sigi namolö geloi amo ïmolömelë.
REV 2:27 Ea udia dolö amoli aeane baialaea beaha aligimolömelë. Ödä i nagaea hamoi difolalegi dusudasilo amo gadola, ili dusudasimolömelë. Naadoea geloi nema ï amo gadola wäla ïmolömelë.
REV 2:28 Amase elöda, sege yose gaalu gasumilï dagäsiögöla neë besela galalo amoge ïmolömelë.
REV 2:29 Afädëa gëhea nabulöi galëda, Godeïe Gesamia sesi amolima ado säsebego nabualola säi.
REV 3:1 Dolö amea sähamu nea sähalea, Dia Sadisi sesigi nefolalebe amolile selesaia fii neebe amoma ado gowe dëdëla ïmo. Afädëa Godeïe gesami gifalädalïage, gasumilï gifalädalïage gaula neebe amoïe adoda gowemelë. Mala dia hamolo amolida, na dawa. Odoaea di helësëla sähalea, Eda baagoi made, saleala sälo gaso, ai, dida baagoi nebego.
REV 3:2 Amai gabugi, di adi dibego nowemo. Na beaseda, dia mala hamosego nïe Godeïe siigi made hamola wagai beasebe ameada, nelebo gaula nebego made baagola dibegogi wäla, gelomalo.
REV 3:3 Dia dafidi ado nabala neala gaui amo, bu helësëla obëgëmalo. Ado amo bëgëla hamolahilä, asigi besumalo. Di adi dibego made noweseda, ne fa nelo musügä mulo amo gadola moholömelë. Ne di sebea gowe gala moholölada, dia dofä made helësëmolömelë.
REV 3:4 Gaso, di Sadisi gaamugi nebegogi, afädë afädëlaïe fagulogi nigime baai made neamelë. Amolida, hä, dofea neebe ameada, fagulo falei salugalahilä, nebalä nawesa namolömelë.
REV 3:5 Amase, afädëa nudula salolela baagila aulo amoge, fagulo falei amo gadoimu salugamolömelë. Ïe ëi namolöi namolö bebagi dëdëla negei dibe amoda, na dofä made hëla, nïe Naadoge ïe selesaia fiige neebea ami nea, ïe ëi säla ulufamolömelë.
REV 3:6 Afädëa gëhea nabulöi galëda, Godeïe Gesamia sesi amolima ado säsebego nabualola säi.
REV 3:7 Dolö amea sähamu nea sähalea, Dia Filadebia sesigi nefolalebe amolile selesaia fii neebe amoma ado gowe dëdëla ïmo. Afädë eleloige dofäge neebe amoïe adoda gowemelë. Ea Debidiïe idi gai dogelo gii gaula nea, doga negese amoda, afädëa made gamolö. Amase, gase amoda, afädëa made dugimolömelë.
REV 3:8 Mala dia hamolo amolida, na dawa. Bimo. Na dïe odagido idi doga negesi afädë dialea. Idi amoda, afädëa gamolö ulïmelë. Dïe geloida holöfalï neebe amoge, na dawa. Amaha gaso, nïe ado bëgëla hamola, nïe ëi baagi made ï.
REV 3:9 Hä, nabuö. Na udia dolö mugabe Saidani sosogo amolida, di neebea maala, dïe emo mia gumusula dia didigafulasisegi, ilia na di boba hamolo gabula helësëmolömelë. Ilia nilïda Yu sosogo neala sälo amoda, dofä made, wäfalï sälo.
REV 3:10 Na dima aso maadela, gelola aligimalola säi amo gadola bëgëla hamosa nelo amoïe, nagadaia nefolalebe amoli sulubadela fedogola bimolöïe sege sulubadelagi neala sëlasimolö elö elöla maasolo amo gala, na di sigi namolömelë.
REV 3:11 Ne moholö amoda, ga made gabumelë. Salolei amoïe bidi dia nimolö amo elöea fedela neloea, dia nelebo gaula nebego hedabola fëdöla gaula namialo.
REV 3:12 Afädëa nudula salolela baagila aulo neebe amoda, nïe Godeïe mosö igau namiäia, na neala ifosimolömelë. Eda doadigila made moholö. Na nïe Godeïe ëige, nïe Godeïe gaamu gähe amoïe ëige, amoma dëdëmolö. Gaamu amoda, Yalusaleme gähe, selesaia mosöala nïe Gode neebeala digamolö amomelë. Amase, nihïle ëi gähege ema dëdëmolömelë.
REV 3:13 Afädëa gëhea nabulöi galëda, Godeïe Gesamia sesi amolima ado säsebego nabualola säi.
REV 3:14 Dolö amea sähamu nea sähalea, Dia Eleodisia sesigi nefolalebe amolile selesaia fii neebe amoma ado gowe dëdëla ïmo. Afädëa amala hamomäiala sälo amo, asigi falagaseige dofäge nea säla ulufalo amo, ïe aulodaiala Godea sulubadela hamosa maadei amo, ïe adoda gowemelë.
REV 3:15 Mala dia hamolo amolida, na dawa. Di walio gögï madege, hëgï madege nebegoda, na dawa. Di hëgï namolö galëge, gögï namolö galëge, gelola afädëgi namiäia hamesa.
REV 3:16 Di hëgï maade, gögï maade gumiäi goeada, na dida nïe nafiadila isola salimolö hamosebemelë.
REV 3:17 Dia sähalea, Neda nelegei yafie negelo dafidilo dolö. Nelebo dibe amo gadoida, negesa maadei nea. Nema nelebo gumusuida, maadela säha neamelë. Amala säha neago gaso, dida asigi säosäoige, dofä bobasëi gadoige nebegoda, dihï dawa made nebego. Amase, nelebo maade, dudugïmu, si golaige nebegoda, dihï dawa made nebego.
REV 3:18 Amai gabugi, dia hamomäia na helësëlasila sähago. Di nelegei yafie negelo dafidilo dolö namolöïe, nemadi nea golo nigime baai nulogi hedabomäia gobei amo bidia nimalo. Amomu made, di dudugïmu neë, udia dolöea beasegi made hewamolöïe, fagulo falei dibe amoge, bidia neala salugamalo. Amase, dïe siia bu bimolöïe, maleseni siigi negemolöïe, bidia neala hëmalo.
REV 3:19 Na boba hamose amolida, nemolahilä mala säla hamogilomelë. Amalo gabugi, hamoi hedabi hamomolö amo gelola hamesa nea, asigi besumo.
REV 3:20 Nabuö. Ne idi galo baagido nea, nufigisa nea uuaha neawe. Afädëa nïe ado nabala, idi gai amo doga negeseda, ne nogila digala, nege ebalä molö nadigi, eege nebalä nadigila, halïgïla molö molömelë.
REV 3:21 Amaimo, na nudula salolela baagila awälahilä, nïe Naadoïe beaha aligilo filo dibea ami ebalä gedola sulo amo gadola, afädëa nudula salolela baagila aulo neebe amoda, nïe beaha aligilo filo dibea ami nebalä gedola samolöïe, fu ïmolömelë.
REV 3:22 Afädëa gëhea nabulöi galëda, Godeïe Gesamia sesi amolima ado säsebego nabualola säi.
REV 4:1 Wae! Ado amoli säha maadeibua, na beahamelebe, selesaia mosöa idi galo afädë doga negei dibe melï. Amo bease amo gaalu, ado afädë melo biguli gadoi dafidi säse nabi amea, nema sähalea, Hobea hamomolö dibe amo na dima oledelä, di ne neebeawi fedamola säsio.
REV 4:2 Amala säha neebe amo gaalu, Godeïe Gesami e nema salugasisio. Wae! Amala hamose amo gaalu na beahamelebe, selesaia mosöa ami beaha aligilo filo dibeo. Amodaia dolö afädë sebe melï.
REV 4:3 Filodaia sebe amo elelolo igi folomoi ëi yasabale, igi bëi ëi ganelianale gadoi sebeo. Beaha aligilo filo amoda, soläilo sagai igi i bäu gähe gadoi ëi emelalo gadoia amalela digi dibe melï.
REV 4:4 Beaha aligilo filo dibe amo mogogi negesiä, sigi aligilo filo nabülasi äudäïe odoai biyidia nogöla amalei dibea ami, dolö asigi gäwi dafidilo nabülasi äudäïe odoai biyidiaea fagulo faleimu salugalahilä, ilile busagia beaha aligiloïe habuga goloea hamoi amo salugala, amolidaia sefolalebeo.
REV 4:5 Beaha aligilo filo dibea amila, sege yabagelelage, goba hïdo elöige, hahalä edefade dagabolage, goba maase nabi. Filo dibe amoïe odagiamadi, gamali goli gifalädalïagi yola negei dibeo. Amolida, Godeïe gesami gifalädalïa amoli gabio.
REV 4:6 Amase, beaha aligilo filo dibe amoïe odagiamadida, ödä duhulu gadoige ulufala bimolöi galasi hahaloi gadoi dibeo. Hä, mogogi ami, beaha aligilo filo amo nogöla amalela, namolö aligi biyidia amoli nefolalebeo. Ilile odagidoge, baagidoge siimu aligila amalela digi nefolalebeo.
REV 4:7 Namolö aligi age amoda, ilua ügülo ëi elaeono gadoi neebeo. Agedu amoda, sugua gao gawali gadoi neebeo. Osoda amoïe odagida, dolö odagi gadoi gabio. Amase, biyidu amoda, haea sëdïa hagila nawese amo gadoi neebeo.
REV 4:8 Namolö aligi biyidia amoli sulubadela hïdo hïdolama augia gafeia aligi nea, ilile domalo sulubadelagige, augia hawage, siimu aligisa maadei neebeo. Ilia yoba gasigige, hele aligila made, sähalea, Dafidilo Geloi Gode, Sulubadelaïe Geloifalï Geloi neebe amoda eleloi, eda eleloi, eda eleloi nea. Eda siiba nelo amoge, walio neebewege, hobea moholö amogela sähamu neebeo.
REV 4:9 Namolö aligi biyidia amolia beaha aligilo filodaia salea, namolöi namolö neebe amoïe ëi gauia adogola, ema ëi sälo nealage, nesegelage säsolo amo galada,
REV 4:10 dolö asigi gäwi dafidilo nabülasi äudäïe odoai biyidia amolia beaha aligilo filodaia sebe amoïe odagido, gumusula dia didigafulahilä, namolöi namolö neebe amoïe ëi gauia adahamu aligilo gabio. Ilile beaha aligiloïe habuga goloea hamoi amoli giilahilä, ïe beaha aligilo filo odagido sadia idogolahilä sähalea,
REV 4:11 Nilïle Gode Dafidilo Geloi-e, dia nelebo sulubadela hamosa maadei amea, dia nelebo sulubadela diamiäia samiäia namiäiala helësëi amea, dia amala hamei amea nelebo sulubadela hamosa maadei ameada, nilïa dïe ëi gauia adogomolöge, dima ëi sälola sämolöge, dida geloi neala sämolöge, dïemu negesidelä di dofea nebego. Amolida, dïe negesimolöi galeala säha neebeo.
REV 5:1 Amase, na beahaleamelebe, afädë beaha aligilo filo dibea ami sebe amoïe naabo dafädia beba meöi afädë ba näiadoge näiadoge dëdësa maadei gaula sebe melï. Beba amo made fisigämäia, i heale gadoi gifalädalïaea baalahilä, alägädïla nofela negei gabio.
REV 5:2 Amo beaha nebegi, selesaia fii geloi afädëa gelola uuala sähalea, Beba meöi go i heale gadoia baala alägädïla nofela negei dibe amoli neadigila, fisigämolö dolö dofeada, nowëaduola säse nabi.
REV 5:3 Gaso, selesaia mosöa nefolalebe amoligige, nagadaia nefolalebe amoligige, naga föi hawa nefolalebe amoligige, beba amo fisigäla bimolö dofeada, afädë maade gabio.
REV 5:4 Beba amo fisigäla bimolö dofeada, afädë made beagolei amogi, na edefademalä dïisa nelomelë.
REV 5:5 Amasebegi, dolö asigi gäwi dafidilo amoligi, afädëa nema sähalea, Dia dïimabu. Nabuö! Fii Yuda sosogomadi ilua ügülo gadoi ëi elaeono amoda, Debidiïe yaua mäumadila duulu fedala nudula salolela baagila asi neebe amea, beba i heale gadoi gifalädalïaea alägädïla nofela negei dibego neadigilahilä, beba amo fisigämolöida, e neamelëla säsio.
REV 5:6 Na beahaleamelebe, Sugua Sibi Malö afädë neebeo. Amoda, ilia baagomäia nufi amo gadoi gabio. Eda beaha aligilo filo mogogi nebegi, namolö aligi biyidia amoliage, dolö asigi gäwi dafidilo amoliage, e amalela nogöla digila neebeo. Emada bese gifalädalïage, si gifalädalïage neebeo. Si gifalädalïa amolida, Godea ïe gesami gifalädalïa sege dibe sulubadelagi fisiga gai amoli gabio.
REV 5:7 Hä, Sugua Sibi Malö amea awälahilä, afädë beaha aligilo filodaia sebe amoïe naabo dafädia beba meöi gaula sebe amo neasio.
REV 5:8 Ea beba amo neala gaula nebegi, namolö aligi biyidia amoliage, dolö asigi gäwi dafidilo nabülasi äudäïe odoai biyidia amoliage, Sugua Sibi Malö amo mia, gumusula dia didigafusio. Ili afädë afädëlaea gida gadoige, falo goloea hamoi amogi i heale höba gafisigä hedabi baëla fedamäia gobelo amea nobai amoge, gaula dia didigafui difolalebeo. I heale gobelo amoda, Godeïe udia dolöea Godema adose amo gabio.
REV 5:9 Ilia gë gähe afädë udähalea, Beba amo neala gaula nea-aaa, i heale gadoia baala alägädïla nofela negei dibe amo neadigimolö dofeada-aaa, dihïdi nebego-ooo. Mida, di baagomäia nufi ameage-eee, fii sulubadelagilage-eee, ado sälo sulubadelagilage-eee, gädili sulubadelagilage-eee, gafodo elö elöi sulubadelagilage-eee, dïe healea udia dolö Godeïe namiäia nii ameage-eee,
REV 5:10 amase, sosogo afädë namiäia, dia bidia nii amoli neala gedolasila-aaa, ili odala ï neala ïlo nea-aaa, nilïle Godeïe hamoi hamolasilo namiäia hamolasisebegi-iii, ilida naga föidaia beaha aligilo namolö ameage-eee, dihïdi dofea nebego-ooola säla udäsio.
REV 5:11 Na aso, bu beaha nebegi, selesaia fii nidemolö asusugai yafiea, ado säse amo nabi. Selesaia fii amoliada, beaha aligilo filoge, namolö aligi biyidia amolige, dolö asigi gäwi dafidilo amolige, nogöla amalela digilahilä,
REV 5:12 gë gelola udäha nea sähalea, Sugua Sibi Malö baagomäia nufi amoma-aaa, sigi namolö geloige-eee, nelebo hedabige-eee, asigi falagaseige-eee, geloige-eee, ïmolö amoda dofea-aaa. Ëi sälo namolöge-eee, ëi gauia adogomolöge-eee, hedabifalïmu hamolola sämolöge-eee, hï ema ïmolö amoda dofea-aaala säla udäsio.
REV 5:13 Na aso, nalabosa nebegi, Godea hamola ifosisi, selesaia mosöage, nagadaiage, naga föi hawage, ödä duhulugige, nelebo sege amoligi dibe neebe sebe amoli sulubadelaea gë udäha nea sähalea, Afädë beaha aligilo filodaia sebe amomage-eee, Sugua Sibi Malö neebe amomage-eee, hedabifalïmu hamolola sämolöge-eee, ëi sälo namolöge-eee, ëi gauia adogomolöge-eee, sigi namolö geloige-eee, ïemu diamolöi diamiäiamelë-eeela säla udäha dibeo.
REV 5:14 Amala säha dibegi, namolö aligi biyidia amolia sähalea, Dofä amala hamomäiamelëla säha. Amase, dolö asigi gäwi dafidilo amolia gumusula dia didigafulahilä, elele ëi gauia adogosa neebeo.
REV 6:1 Na beahamelebe, Sugua Sibi Malö amea i heale gadoi gifalädalïaea baala alägädïla nofela negei dibe amoligi, afädë amo hogasio. Amo hogase amo gaalu nabelebe, namolö aligi biyidia amoligi, afädëa hahalä dagabolo amo gadola wäla sähalea, Misiëla säsio.
REV 6:2 Wae! Amala säse amo gaalu, na bu beahamelebe, sugua hosi falei afädë neebeo. Amodaia fila aulo dolö afädë dadi gaula sebeo. Amoma ilia nudula salolelo habuga ïasebegi, e nudula salolelo nea, odoage nudula salolela baagila moholöïe fila awäsio.
REV 6:3 Amalahilä, Sugua Sibi Malö amea i heale gadoia baala alägädïla nofela negei dibe amoligi, agedu amo hogasio. Amo hogase amo gaalu nabelebe, namolö aligi biyidia amoligi, agedu amea, Misiëla säsio.
REV 6:4 Amo gaalu, sugua hosi afädë fedala aligisio. Amoda bëi nulo söa gadoi gabio. Ilia amodaia fila aulo dolö amoma nagadaia dalulo mala neadigila, udia dolöea hilimu nudusa namiäiaïe geloi ïasio. Amase, ilia nudulo helebe edefade afädëge ema ïasio.
REV 6:5 Amalahilä, Sugua Sibi Malö amea i heale gadoia baala alägädïla nofela negei dibe amoligi, osoda amo hogasio. Amo hogase amo gaalu nabelebe, namolö aligi biyidia amoligi, osoda amea, Misiëla säsio. Wae! Amala säse amo gaalu, na bu beahamelebe, sugua hosi yabui afädë neebeo. Amodaia fila aulo dolö amea yöi dofela melëlo afädë ïe naaboea gaula neebeo.
REV 6:6 Na amo bealahilä, namolö aligi biyidia neebea amila ado gadoi nabaha nebegi, ado amo gomalä säsio. Segeyo afädëgi hamoi hamola bidi nelo amea, eladi gadoi ëi widida, yöi gilo afädë gadoi nimolö dialea. Amase, segeyo afädëgi hamoi hamola bidi nelo amea, eladi gadoi ëi balida, yöi gilo ohodoa gadoi nimolö dialea. Amaimo, i gägä negelo ëi olibege, ëfë gägä negelo ëi gelebige, neala nafademabiola säsio.
REV 6:7 Amalahilä, Sugua Sibi Malö amea i heale gadoia baala alägädïla nofela negei dibe amoligi, biyidu amo hogasio. Amo hogase amo gaalu nabelebe, namolö aligi amoligi, biyidu amea, Misiëla säsio.
REV 6:8 Wae! Amala säse amo gaalu bu beahamelebe, sugua hosi folomoi afädë neebeo. Amodaia fila aulo dolö neebe amoïe ëida Baago. Uguli mosö ameada, Baago bëgëla maasio. Udia dolö sulubadela biyidiala nofela mogelahilä, biyidu amoïe neebe amolida, nudulo helebeage, sïdëage, oloeage, nagadaia sugua ilaba elö elölaeage, nufudala baagomäia, elema geloi ïasio.
REV 6:9 Amalahilä, Sugua Sibi Malö amea i heale gadoia baala alägädïla nofela negei dibe amoligi, bi amo hogasio. Amo hogase amo gaalu na beahamelebe, udia dolö Godeïe ado mala gelola gaula nea, ulufala säla ïaha nebegi, dolöea nufi amolile gesami amoli odala ïlo auli hawa nefolalebeo.
REV 6:10 Baagoi gesami amolia gelola uuala sähalea, Busa Dafidilo Geloi-e, eleloige, dofäge di nebego. Udia dolö nagadaia nefolalebe amolimada, dia gudilahilä, nilïle heale digai amoïe ilima së mogola ïmolö dibe amo gadola, abodo gala ïmolö gabula uuala säsio.
REV 6:11 Amala säsebegi, ilia ili hïdo hïdolagali fagulo sedade falei salugamäia ïalahilä, ilima säla obëgësalea, Dilibalä hamoi gaalu afädëdi hamolasilo, didoo dialifilali, dili nufi amo gadola wäla, ilige nufudala baagomolö näba Godea daiai amo gadola gausiala digamäia, dilida aumala, aso, holöfalï beaha namialola säsio.
REV 6:12 Amalahilä, na bu beahamelebe, Sugua Sibi Malö amea i heale gadoia baala alägädïla nofela negei dibe amoligi, gafe amo hogasio. Amo hogase amo gaalu, fogoli edefade gelola maala, esoda öhoeo hilï yabuia adu asi yabui amo gadoia yabulahilä, aubege sulubadela bëla heale uusa maadesio.
REV 6:13 Äfäeo gägä, aso, galu diëgi, fo gelola maahalea faila hësölo amo gadola, gasumilï mudaiala nagadaia besela didigafulahilä,
REV 6:14 mu giwi amo meöla galila nigia gasio. Segebi sulubadelage, ödä södölo amoli sulubadelage, diloa amila gasi awäsio.
REV 6:15 Amala hamose amo gaalu, nagadaiaïe ginige, gamane beaha aligiloge, ami beaha aligiloge, nelegei yafie negelo dafidilo dolö amolige, geloi edefade amolige, galabaia hamoi gadoi hamolasilo sulubadelage, odoaïe hamoi made hamolasilo fisigäi nefolalebe sulubadelage, awäla igi äbägige, segebidaia igi boboga neebe amoli hawa amige, musügä fisa maadeimelë.
REV 6:16 Amala musügä salea, segebi difolalebe amolimage, igi boboga nefolalebe amolimage, uuala säia adogosalea, Afädë beaha aligilo filodaia sebe amoïe siia nilï melëloeage, Sugua Sibi Malöea nilïma mihaläla së ïloeage, nilïdaia dagabola digala hagumo.
REV 6:17 Mida, elele mihalälo segeyo edefade, hä, misi dibe amogi, nowë namolöduola säsio.
REV 7:1 Amala säsebegi, na beahamelebe, selesaia fii biyidia naga föi sulubadelaïe fäfü biyidiagi nea, fo biyidiaea naga föigi fuulo amolia, nagadaiamadige, ödä duhulumadige, i nefolalebeamadige made mosäia, gaula neebeo.
REV 7:2 Amase, na beahaleamelebe, selesaia fii elö eso maasidola fedala, Gode namolöi neebe amoïe magi negelo gaula, maaha neebeo. Selesaia fii biyidia amolia naga föige, ödä duhuluge neala nafademäia, Godea geloi ï amolima, selesaia fii elöea ado gelola säia gahalea,
REV 7:3 Udia dolö nilïle Godeïe hamoi hamolasilo nefolalebe amolile odagia, nilïa dafidi Godeïe magidale negedelä, dilia naga föige, ödä duhuluge, iige, neala nafademabiola säsio.
REV 7:4 Magi negesa maadelahilä, magi negei amolile näba säla ïase nabi. Näba amoda, dausinimu hädali afädëïe nabülasi biyidiaïe odoai biyidiala säse nabi. Amolida, Isilale sosogo amoli sulubadelagila gabio.*
REV 7:5 Yuda sosogomadilada, dausini giwilasi magi negesio. Amase, Ulubenimadilage dausini giwilasi, Gadamadilage dausini giwilasi,
REV 7:6 Asamadilage dausini giwilasi, Nafadalimadilage dausini giwilasi, Manasamadilage dausini giwilasi,
REV 7:7 Simeonomadilage dausini giwilasi, Ilibaimadilage dausini giwilasi, Isagalamadilage dausini giwilasi, amase,
REV 7:8 Sebulunimadilage dausini giwilasi, Yosebemadilage dausini giwilasi, Bëyaminimadilage dausini giwilasimu, magi negesa maadesio.
REV 7:9 Wae! Amo baagia na beahamelebe, udia dolö sämolö asusugai gafodo elö elöi sulubadelagilage, fii sulubadelagilage, gädili sulubadelagilage, ado sälo sulubadelagilage, gegedoi neebeo. Ilida, fagulo falei sedade salugalahilä, waibo bäu gadoi damula gagaula, beaha aligilo filo amoïe odagiamadige, Sugua Sibi Malö amoïe odagidoge, nowela nefolalebeo.
REV 7:10 Amala nefolalea, ilia gelola uuala sähalea, Nilï damula moholöda, nilïle Gode beaha aligilo filodaia sebe amomadilage, Sugua Sibi Malö neebe amomadilage mulo gabiola säha nefolalebeo.
REV 7:11 Selesaia fii amoli sulubadelaea beaha aligilo filo dibe amoge, dolö asigi gäwi dafidilo amolige, namolö aligi biyidia amolige, nogöla amalela nefolalea, beaha aligilo filo dibe amoïe odagido gumusula dia didigafulahilä, Godeïe ëi gauia adogola
REV 7:12 sähalea, Dofä amala hamomäia. Nilïle Godema hedabifalïmu hamolola sämolöge, ëi gauia adogomolöge, asigi falagaseige, nesegemolöge, amase, ëi sälo namolöge, sigi namolö geloige, geloifalïge, ïemu diamolöi diamiäia. Dofä amala hamomäiala sähala säha dibeo.
REV 7:13 Amala säse amo gaalu, dolö asigi gäwi dafidilo amoligi, afädëa nema nabahalea, Fagulo falei didigala salugai nefolalebe egowelida nowë. Golida abidila misi nefolaleala nabasio.
REV 7:14 Amala nabasebegi, na säla obëgësalea, Dafidilo, dihï dawamelëla säla obëgëi. Amala säla obëgësebegi, ea nema sähalea, Egowelida, yöi edefade elö elöla yafie dibea amila doadigila misi nefolaleagomelë. Egoweliada ilile fagulo sedade Sugua Sibi Malö amoïe healea hësa nea, fagulo amolida, falesa maadei, amoli misi nefolaleagomelë.
REV 7:15 Amala hamoi ameada, Godeïe beaha aligilo filo amoïe odagido nea, ilia gasi segeyo sulubadelagi, ïe mosöa ami nea, ïe hamoi hamolasisamu aligilo neebeo. Amase, beaha aligilo filodaia sebe ameada, ili sigi namolömelë.
REV 7:16 Ili sïdëa bu elö made baagola, ödäge bu elö made halämolö gabio. Amase, esoea made hëgïla, nelebo hëgïlo dibe odoaeage, ili dofä made hëgïmolö gabio.
REV 7:17 Mida, Sugua Sibi Malö beaha aligilo filo mogogi neebe amea, sugua sibi sigi aligilo amo gadola, ilile sigi aligilo namolömelë. Ea ili namolö ïlo ödä gü dibea ami sigi awäsegi, Godea ilile siaholö hëla digisa maademolömelëla säsio.
REV 8:1 Sugua Sibi Malö amea i heale gadoia baala alägädïla nofela negei dibe amoligi, gifalädalü amo hogasebegi, selesaia mosöa ado afädë made adola, sau sagala neamu, molö gobei deala molöi gadoi hamosio.
REV 8:2 Amala hamose amo gaalu, na beahamelebe, selesaia fii gifalädalïa Godeïe odagia aligilo amolima melo biguli gifalädalïa ïasio.
REV 8:3 Amase, selesaia fii elö odala ïlo auli dibea ami maala neebeo. Eada falo goloea hamoi i heale höba gafisigä hedabi baëla fedamäia gobelo amo gaula neebeo. Amala nebegi, beaha aligilo filo dibe amoïe odagiamadi, ea odala ïlo auli goloea hamoi dibedaia gobemäiaïe, i heale gafisigä hedabi yafie ema ïasio. I heale amo gobese höba amola, Godeïe udia dolö sulubadelaea ema adose amola, gedolahilä fedamäia ïasio.
REV 8:4 Selesaia fiia falo goloea hamoi ïe naaboea gaula neebe amodaia, i heale amo gobese höba amola, Godeïe udia dolöea Godema adose amola, Gode neebea gadogo fedasio.
REV 8:5 Amalahilä, selesaia fii amea falo gaula neebe amogi, odala ïlo auli dibea ami nulo gobei dibe amo dea salala nobalahilä, nagadaia sadia idogosio. Amala sadia idogosebegi, hahalä edefade dagabolage, goba hïdo elöige, sege yabagelelage, fogolige maasio.
REV 8:6 Hä, selesaia fii gifalädalïa amolia melo biguli gifalädalïa gaula nefolalo amea fuumolöïe, dadaiala aligisio.
REV 8:7 Selesaia fii amoligi, age amea melo biguli amo fuuse amo gaalu, sege gägäge, nulo healebalä gegoalage, nagadaia sadia idogosio. Amala hamoi ameada, sege sulubadela ohodoala mogelahilä, osoda amoïe nagage iige, amase, giisi sulubadelage, wisa maadesio.
REV 8:8 Amasebegi, selesaia fii agedu amea melo biguli amo fuuse amo gaalu, nelebo afädë segebi edefade wilo amo gadoi duhulugi sadia idogosio. Duhulu amo ohodoala mogelahilä, osoda amo heale uula besela galasio.
REV 8:9 Duhulugi hamola ifosisi sefolalo amoli ohodoala mogelahilä, osoda amo baagosa maadesio. Amase, ödä sibi duhulugi aulo amolige, ohodoala mogelahilä, osoda amo nafadesa maadesio.
REV 8:10 Amasebegi, selesaia fii osoda amea melo biguli amo fuuse amo gaalu, gasumilï edefade gele wai yo gadoi, mudaiala digala, ödä afufui dibe amogige, ödä gü besela galasebea amige, sulubadela ohodoala mogelahilä, osoda amogi digasio.
REV 8:11 Gasumilï amoïe ëida, Gamogai Nafade. Ödä sulubadela ohodoala mogelahilä, osoda amo gamogaha maadesio. Udia dolö yafiea ödä gamogai amo nase amolida, baagosa maadesio.
REV 8:12 Amasebegi, selesaia fii biyidu amea melo biguli amo fuuse amo gaalu, eso ohodoala mogela digi, aube ohodoala mogela digi, gasumilï sulubadela ohodoala mogela digilahilä, osoda amo nufudasio. Ameada, osoda amolile yo amoda, usisa maadesio. Amai ameada, yoba ohodoala mogelahilä, osoda amoïe yoda, maade gabio. Amase, gasige amo gadola wäla dibeo.
REV 8:13 Amala hamosebegi, na beaha nea nabelebe, haea sëdïa gadoi afädë mudabodo nawesa nea, gelola uuala sähalea, Ae! Asigii gabu. Selesaia fii ohodoa amolia melo biguli odoa fuumolö hamosebe amogi, udia dolö nagadaia nefolalebe amoli asigii gabula säsio.
REV 9:1 Amalahilä, selesaia fii bi amea melo biguli amo fuuse amo gaalu, na beahamelebe, gasumilï afädë mudaiala nagadaia besela digai dibe melï. Gasumilï amoma sege uli nafade mia made dibe amoïe idi gai dogelo gii ïasio.
REV 9:2 Amalahilä, gasumilï amea sege uli nafade mia made dibe amoïe idi gai doga negese amo gaalu, höba bugu edefade uli amogila nulo edefade wisalea, höba bugu edefade fedalo amo gadola, höba bugusio. Sege uli dibea amila höba fedai amea esoge muge usulasebegi, yo dilo amo usisio.
REV 9:3 Amalahilä, galiawa gadoi yafie höba bugu amogila nagadaia digafusio. Nagadaia hamabuluïe geloi amo gadoi galiawa amolima ïasio.
REV 9:4 Galiawa amolima säla ïahalea, Dilia giisige, iige, nelebo odoa nagadaia bäui amolige, neala nafademabio. Udia dolöïe odagia Godeïe magi maade amolimu neala nafademalola säsio.
REV 9:5 Ili nufudala baagomäia geloi made ïala, aube biagi sësa namiäia së edefade ïmolöïe geloi ïasio. Së amoda, hamabuluea dolö mihi sëlo amo gadoi.
REV 9:6 Segeyo amoligi, udia dolö amolia baagomolöïe idi hogomolö gaso, dofä made beagolemolömelë. Ilia ili baagomolö edefademalä helësëmolö gaso, baagoeada, ili neebea amila fisäla moholömelë.
REV 9:7 Na beahaleamelebe, galiawa gadoi amoli sugua hosia nudumolöïe daiala aligilo amo gadola neebeo. Ilile busagia nudula salolelo habuga goloea hamoi gälo amo gadola gälahilä, ilile odagida, dolöïe odagi gadoi gabio.
REV 9:8 Ilile busa hilïda, udia busa hilï gadoi, amase, ilile bese amoda, ilua ügülo elaeonoïe bese gadoi gabio.
REV 9:9 Ilia nudusalea, bidagia salugalo gadoi aeanea hamoi amo gälahilä, ili hagila awähalea, augia goba amoda, sugua hosi yafiea nudumolöïe galo gadoi dusugala gaula awähalea goba aulo amo gadoi gabio.
REV 9:10 Ilile gobeda, hamabulu gobe gadoi gabio, amase, mihiloda, hamabuluea mihilo amo gadoi neebeo. Udia dolö aube biagi sësa namiäiaïe geloida, gobegi gaula neebeo.
REV 9:11 Sege uli nafade mia made dibe amoïe beaha aligilo mugabeda, ilile beaha aligilo gini nea. Hibulu adoea ïe ëida, Abadono, Giligi adoeada, Abolionola sälo.
REV 9:12 Yöi edefade age amoda, hä, wagai. Gaso, nabuö! Amo baagia bu hobeala yöi edefade äudä, aso, moholömelë.
REV 9:13 Amaimo, selesaia fii gafe amea melo biguli amo fuuse amo gaalu, Godeïe odagia odala ïlo auli goloea hamoi fäfü biyidia amoïe bese biyidia dibea amila ado afädë säse nabelebe,
REV 9:14 selesaia fii gafe melo biguli gaula neebe amoma sähalea, Selesaia fii biyidia ödä edefade Yubeledisi dibea ami nafodola negei difolalo amoli fisigämola säsio.
REV 9:15 Amala säsebegi, udia dolö ohodoala mogelahilä, osoda amo sulubadela selesaia fii biyidia amolia nufudaha maademäia, ea ili fisigäsio. Aoa amogige, segeyo amogige, aube amogige, gäheo i amogige hamoi amo hamomolöïe, ilia, hä, daiala beaha neebeo.
REV 9:16 Sugua hosidaia fila aulo ami dolö amolile näbada, milienemu hädali äudä neebeo. Näbada amala neala afädëa säsio.
REV 9:17 Na sosoäla awäla beahaleamelebe, sugua hosige, sugua hosidaia fila aulo amolige, gowe gadoi gabio. Ilia nudusalea, bidagia salugalo gadoi gäi amoïe galada, nulo söa heale uii gadoige, mu giwi yabui gadoige, igi abüai ëi saloba gadoige, gäi nefolalebeo. Sugua hosi amolile busada, ilua ügülo elaeonoïe busa gadoi gabio. Amase, nulo söage, höbage, igi gadoi ëi salobage, sugua hosi amoïe nafiadila doadidigila awäha neebeo.
REV 9:18 Neala nafadelasilo geloi ohodoa amea, nulo söage, höbage, amase, igi gadoi ëi salobage, sugua hosi amolile nafiadila besela galala, udia dolö ohodoala mogelahilä, osoda amo sulubadela baagomäia nufudaha maadesio.
REV 9:19 Sugua hosi amolile geloida, nafigige, hobegige dibeo. Ilile hobe amoda, nuba gadoi hamolahilä, oböla, nuba busa hamoi gabio. Hosi amolile hobe ameada, udia dolö afisila nufidelo gabio.
REV 9:20 Udia dolö odoa neala nafadelasilo geloi amolia made nufi nefolalo amoliada, hilile naaboea hamoi amoli fisila, asigi besula made nelo. Ilia mugabe amolile ëige, wäfalï gode goloeage, silibaeage, igi aeane ëi bolonosiage, igifalïage, iiage, elö elöla hamoi amolile ëige, gauia adalo amo made fisila neebeo. Wäfalï gode amolile siia made melëloge, gëhea made nabeloge, emoea made naweloge hamola negei dibeo.
REV 9:21 Aso, ilia udia dolö baagomäia nufideloge, golë hamologe, udia dolö susugu hamologe, nelebo fa neloge, amoli hamolo amoda, asigi besula made neebeo.
REV 10:1 Amase, na beahaleamelebe, selesaia fii geloi elö selesaia mosöala digaha neebeo. Mu baidilia e salugalahilä, soläiloea ïe busagia amalela negei neebeo. Ïe odagi yo digai amoda, eso neë gadoige, ïe emo äudä amo helegela igaugi nulo söa aligi gadoige neebeo.
REV 10:2 Ea beba holöfalï afädë gaula neebeo. Beba amoda, ïe naabodaia hogala negei dibeo. Ïe emo dafädida, duhuludaia emesala, amase, fefeädida, nagadaia emesalala nea,
REV 10:3 ea gelola uuai amoda, ilua ügülo gadoi elaeonoea halalo amo gadola gelola uuasio. Ea uuaia gai amole, sege hahalä gifalädalïala dagabola, hili sälo amo gadola säsio.
REV 10:4 Hahalä gifalädalïala dagaboi amole, ado ilia säi amo na dëdëdelä hamolebeda, Hebenila ado afädëa säia idogosalea, Hahalä gifalädalïala dagaboi amolia ado säi amoda, dïe asigigi musügä negemalo, dëdëmabiola säsio.
REV 10:5 Selesaia fii duhuludaia emesala nagadaia emesalala neebe na melï amea, ïe naabo dafädi amo selesaia mosöa gauia adogola nea,
REV 10:6 afädë namolöi namolö neebe ameada, muge, naga föige, ödä duhuluge, amase, nelebo sulubadela amoligi dibe neebe sebe amolige, hamosa maadei amoïe ëi säla migalïa diigila, ado gelola säla negesalea sähalea, Segeyo beaha namolö elöda, maademelë.
REV 10:7 Selesaia fii gifalädalü amoïe melo biguli goba moholö amoïe segeyogi, ea fuudelä hamose amo gala, Godea ïe hamoi hamolasilo bea sälo nefolalo amolima dafidi säla ï amo gadola, ïe galone musügä negei dilo amo gadola wäla, hamosa maademolömelëla säsio.
REV 10:8 Afädëa Hebeni gadogola säse nabi amea nema bu elö sähalea, Selesaia fii duhuludaiage nagadaiage emesalala neebe amoïe naabodaia beba hogala negei dibe amo, dia nimolö mosöla säsio.
REV 10:9 Amala säsebegi, ne selesaia fii neebea ami awäla ema sähalea, Dia beba holöfalï go nema ïmola säi. Amala säsebegi, ea nema sähalea, Dia neala muö. Nafia nase amoïe hëdäda, nebali ödä hëdä amo gadoi gasoda, dïe hagömo sëmolömelëla säsio.
REV 10:10 Amala säsebegi, beba holöfalï ïe naaboea gaula neebe amo, na neala mai. Neala nasebegi, nïe nafia hëdäda, nebali ödä gadoi gabio. Oböla, naala dëgïlebeda, nïe hagömo oböla sësio.
REV 10:11 Amala hamosebegi, ilia nema sähalea, Udia dolö gädili yafiegi nefolalebe amolilege, gafodo elö elöi yafie nefolalebe amolilege, ado elö elöla sälo yafie nefolalebe amolilege, amase, beaha aligilo gini yafie nefolalebe amolilege, dia bu bea säla, säla ïaha namolö dialeala säla ïasio.
REV 11:1 Amalahilä, afädëa nelebo dofe melëlo i gili gadoi afädë nema ïahalea sähalea, Di nowela Godeïe mosöge, odala ïlo aulige, dofe nealahilä, udia dolöea mosöa ami Godeïe ëi gauia adalo nefolalebe amolile näbage nidela nimalo.
REV 11:2 Be, mosö amoïe yala baagido gedosia segeamadida, dofe nimabio. Mida, sege amoda, udia dolö fii odoagali ï dialea. Amoli maalahilä, gaamu Godea hïle nafolai dibe amo aube nabülasi biyidiaïe odoai äudägi emesala nolealesa namolömelë.
REV 11:3 Amaha neëgi, na nïe säla ulufalo dolö äudä amolema gelolasiseda, elea bobasëi fagulo salugalahilä bea säha nea, segeyo dausini afädëïe hädali äudäïe nabülasi gafeiagi, bea säha namolömelëla säsio.
REV 11:4 Dolö äudä amole gadoida, i olibe äudä amolege, elamu i äudä amolege, sege föi dibe amoïe Dafidilo Geloi neebe amoïe odagia nowela aligilo nea.
REV 11:5 Amase, afädëa ele neala nafademolö helësëse amoda, elele nafiadila nulo söa doadigila maasebe amea, elebalä ado nease amoda, naha maademolömelë. Ele neala nafademolö helësëse amolida, amo gadola wäla baagomäia nufulö dialea.
REV 11:6 Elea bea säla säha neëgi, sege made digamäia, mu gala digilo geloi gaula nea. Amase, ödä sulubadela heale uula besela galamäia geloige, nagadaia udia dolö nefolalebe amolima neala nafadelasilo geloi elö elöla besela galamäia geloige, elea gaula nea. Elea amala hamomolö helësëse amo gadola hamomolöïe, geloi gaula nea.
REV 11:7 Elea, hä, Godeïe ado säla ulufaha maadeseda, sugua ilaba sege uli nafade mia made dibea amila doadigila fedase amea, elebalä nudula salolela baagila moholömelë.
REV 11:8 Amala hamoseda, elele domalo amoda, gaamu ilibia edefade amoïe aulo idiafa negesimolömelë. Gaamu amoïe ëi oodo bealada, Sodomo Isibila sämolöi dialea, elele Dafidilo Geloi i fügäigi baala negeia amimelë.
REV 11:9 Segeyo ohodoa nelolahilä, biyidugi nofela, udia dolö gädili elögi elögilaeage, fii elögi elögilaeage, ado sälo elögi elögilaeage, gafodo elö elöiage, elele domalo memelelahilä, made baumäiala säla dofogamolömelë.
REV 11:10 Nagadaia udia dolöea ele baagoi amogi obeägïla, gosahalea molö nadigi, ilile damelëgali galu ïadigisa namolömelë. Mida, bea sälo äudä amolea nagadaia udia dolö amoli së ïaha nelo amogi.
REV 11:11 Gaso, segeyo ohodoa nelolahilä, biyidugi nofela, Godea namolö hame amo elele isogi bu negela obëgësebegi, ele nowela neebeo. Udia dolöea ele beahalea, edefademalä bedäsio.
REV 11:12 Amala hamosebegi, bea sälo äudä amolema selesaia mosöala ado gelola säia idogosalea, Ali yawe fedamola säse nabi. Amala säse amo gaalu, ado nii nefolalo amolia ele siila beaha nebegimu, ele mu baidili gegoala Hebeni fedasio.
REV 11:13 Amala fedai amole, fogoli edefademalä maahalea, gaamu amogi mosö sëgëlasida amilahilä, nabü amo mugulula digaha maadesalea, udia dolö dausini gifalädalïa nufudaha maadesio. Udia dolö odoa nefolalo amolia edefademalä bedäla, Gode Hebeni neebe amoïe ëi gauia adasio.
REV 11:14 Yöi edefade agedu amoda, hä, wagai. Gaso, nabuö! Yöi edefade osoda moholö amoda, hä, ga made gabumelë.
REV 11:15 Selesaia fii gifalädalü amea melo biguli amo fuusebegi, selesaia mosöa odoaea ado gelola sähalea, Sege föi sulubadelaïe beaha aligilo gini namolö geloi amoda, walio nilïle Dafidilo Geloile, ïe Afädë Memelei amolele geloi besela galai nea. Hä, ea beaha aligilo gini namolöi namolömelëla säsio.
REV 11:16 Amala säse amo gaalu, dolö asigi gäwi dafidilo nabülasi äudäïe odoai biyidia amolile sigi aligilo filodaia Godeïe odagido filo amolia gumusula dia didigafulahilä, Godeïe ëi gauia adogola
REV 11:17 sähalea, Dafidilo Geloi Gode, Sulubadelaïe Geloifalï Geloi nebego, walio nebegoge, siiba nelo amoge, dia dïe geloi edefade amo neala gaulahilä, beaha namolö mi gäwisebegogi, nilïa dima nesegesa.
REV 11:18 Udia dolö di helësëlo made nefolalebe amolia mihaläi nelo gaso, dïe mihaläloda, misi dialea. Baagoi amoli mogemolö segeyo amoge, misi dialea. Dïe hamoi hamolasilo bea sälo amolimage, dïe udia dolö amolimage, ëi sälo dibalä bedälo amolimage, ëi sälo made, dibalä bedälo amolimage, bidi ïmolö segeyo amoge, misi dialea. Amase, sege föi nafadelo amoli nafademolö segeyo amoge misi dialeamelëla säha dibeo.
REV 11:19 Amala säsebegi, Hebeni gadogo Godeïe mosö doga negelahilä, ïe asialo made ado säi bogosigi sali dibe amoda, mosö isogi ulufai dibeo. Amase, sege yabagelelage, goba hïdo elöige, hahalä edefade dagabolage, fogoli afädëge maala, sege gägä yafiege digalala, amoli sulubadela hamosa aligisio.
REV 12:1 Amase amo gaalu, melëlo made gadoi nofe elöi edefade afädë mudaia adogo ulufadigisio. Amoda, udia afädë neebeo. Ea esoda fagulo gälo amo gadola gäi nea, ïe emo hawa aube aligilahilä, ïe busagia nudula salolelo habuga salugalo amo gadola, gasumilï giwilasi salugai neebeo.
REV 12:2 Eda, hä, fagulo hagui sebeo. Malö ägümolö ga madesalea, së edefade nahalea, gelola üasio.
REV 12:3 Aso, melëlo made gadoi nofe elöi mudaia adogo elö ulufadigisio. Wae! Amoda game gadoi edefade afädë, bëi nulo söa gadoi, busa gifalädalïa osogoloi, beseda nabülasi neebeo. Busa osogoloi gifalädalïa amogida, gini habuga gifalädalïa salugai neebeo.
REV 12:4 Gasumilï ohodoala mogelahilä, game gadoi amoïe hobea osoda amo sulubadela mudaiala doala, nagadaia sadia idogosio. Amalahilä, udia amea malö neegela ägüseda, malö amo fodolofalï nufudala molöïe, game amea udiaea malö ägüse amoïe odagiamadila beaha neebeo.
REV 12:5 Amala nebegi, udia amea dolö malö afädë neegela ägüsio. Ïe malö amoda, afädëa fodolofalï fedela neala, Gode neebea amige, ïe beaha aligilo filo dibea amige, sogobala gaula fedasio. Malö ameada, hobea udia dolö gädili sulubadela aeane baialaea beaha aligilo namolömelë.
REV 12:6 Udia amoda, udia dolö aligisia made ami fisäla awäsio. E ami namiäia, Godea sege afädë daiala negei dilo. E ami seëgida, odoaea e segeyo dausini afädëïe hädali äudäïe nabülasi gafeiagi sigi nea, molö ïaha namolöïe daiala negei.
REV 12:7 Hä, selesaia mosöa edefademalä nudusio. Maigolola ïe selesaia fii amolalia game amobalä nudusebegi, game amola e sosogo amolalia ilibalä nudula obëgësio.
REV 12:8 Amai gaso, ilia nudusalea, game amoïe geloi maadesebegi, ili selesaia mosöa namolö fuda, maademelëla säla haila fisisio.
REV 12:9 Game gadoi edefade amo nesila digisio. Eda nuba gadoi siiba dilo amomelë. Ïe ëida, mugabe busale Saidanilela sälo. Eda sege sulubadelagi nefolalebe amoli nafade hamomäia sigi gaula aulo. E hä, nagadaia nesila sadia idogosio. Amase, e sosogo amolige, ebalä nesila sadia idogosio.
REV 12:10 Amala hamose amo gaalu na nabelebe, selesaia mosöala ado afädë gelola sähalea, Nilïle nedoo nalifila ilia nafade hamoila sälo amoda, dafidi nilïle Godeïe odagiamadi nea, yoba gasigige ilia nafade hamoila säsäla maaha nelo amoda, nesila sadia idogosio. Ameada, nilïle Godea nilï damula moholö amoge, ea Beaha Maadela Sigi Namolö amoge, ïe geloi amoge, amase, ïe Afädë Memelei neebe amoïe beaha maadela namolö geloi amoge, waliowegi hä, besela galai dialea.
REV 12:11 Sugua Sibi Malö amoïe healeage, ado mala dofä ulufala säla ïlo ameage, ilia ebalä nudula salolela baagila asi gabio. Ilia hilile namolö amo made helësëla, së naala baagomolö diëgi, gamelä, aso maadela, baagomolöi nelo.
REV 12:12 Amai gabugi, Hebeni diage, Hebeni nefolalebe diliage obeägïmalo. Gaso, naga föi dige, ödä duhulu dige, asigii gabu. Mida, mugabeïe busa Saidanida, dili neebea digai neebe gogi. E namolö fu segeyo ede made dibe amo helësëse amea, edefademalä mihaläha neala säsio.
REV 12:13 Game gadoi amea e nagadaia nesila sadia idogose amo beala, udiaea dolö malö neegela ägüi awäse amo gadola, ea bëgëla awäsio.
REV 12:14 Amala bëgëla awäsebegi gaso, udia dolö aligisia made udia amoïe segea ami hagila mosäia, haea edefade sëdïa gadoiïe augia äudä amo ema ïasio. Segea ami nuba gadoi amea, e made nufuäia, ilia e gäheo i ohodoaïe aube gafeia ami sigi namolömelë.
REV 12:15 Nuba gadoi amoïe nafiadila, ödä bëi edefade awäse amea udia amo mola mosäia, isosio.
REV 12:16 Isoi gasoda, nagaea udia amo ugila negesio. Nagaea nafi dagala, game gadoiïe nafiadila ödä bëi misi amo, ea naha maadesio.
REV 12:17 Amala hamosebegi, game gadoi amea udia amobalä edefademalä habobalahilä, ïe malö odoa amolibalä nudumolö awäsio. Malö amolida, Godea hamomalola säla negei dibe amo gadola bëgëla hamologe, Yesuea ulufala dofäla säi amo asigia dofäla gaula mogologe nefolalebe amoli, sulubadelabalä nudumolö awäsio.
REV 12:18 Game gadoi amoda, ödä duhulu agesua nowela neebeo.
REV 13:1 Na aso, beahaleamelebe, sugua ilaba afädë ödä duhulugila fedala neebeo. Sugua ilaba amoïe busa gifalädalïa osogoloi, ïe bese nabülasi neebeo. Ïe bese nabülasi amoligida, gini habuga gadoi gälahilä, ïe busa osogoloi gifalädalïa amoli afädë afädëlagida, Gode gagadela sälo ëi amoli dëdëla negei dibeo.
REV 13:2 Sugua ilaba gadoi na melï amoda, ilua ügülo ëi elebadi gadoi gaso, ïe emoda sugua beaïe emo gadoige, ïe nafida, ilua ügülo elaeonoïe nafi gadoige neebeo. Game gadoi amea ïe geloi amoge, ïe beaha aligilo filo amoge, amase, sigi namolö geloi edefade amoge, sugua ilaba amoma ïasio.
REV 13:3 Sugua ilaba amoïe busa osogoloi amoligi, afädë nufudala baagoi gasoda, äyo amo bahola wahi neebeo. Nagadaia nefolalebe amoli sulubadelaea amo beala fudugilahilä, sugua ilaba amo bëgëla afiasio.
REV 13:4 Game gadoi amea sigi namolö geloi amo sugua ilaba amoma ï amea, ilia game gadoi amoïe ëi gauia adalo neebeo. Amase, sugua ilaba gadoi amoïe ëige gauia adalo nea sähaleada, Sugua ilaba gowebalä afädëdida, nowë neadu. Nowëa ebalä nudumolöi neadula säha neebeo.
REV 13:5 Sugua ilaba gadoi amea aube nabülasi biyidiaïe odoai äudägi beaha aligiloïe geloia sigi aligimäiage, e gugusämäia, Gode gagadela gelola uuala säha namiäiage, fu ïasio.
REV 13:6 Amala fu ïasebegi, sugua ilaba amea nafi dagala Gode gagadesalea, ïe ëimage, ïe sege dibe amomage, amase, ïe sosogo Hebeni nefolalebe amolimage, gagadesa neebeo.
REV 13:7 Ea Godeïe udia dolöbalä nudulahilä, salolela baagila mosäia, ema geloi ïasio. Ea fii sulubadelage, gädili sulubadelage, amase, ado elö elöla sälo sulubadelage, gafodo elö elöi sulubadelage sigi namiäia, ema geloi ïasio.
REV 13:8 Udia dolö nagadaia nefolalebe amoli sulubadelaea, sugua ilaba amoïe ëi gauia adaha namolömelë. Naga föi made hamola nea, udia dolö ilile ëi namolöi namolö bebagi made dëdëla negei dibe amoliada, amamolömelë. Namolöi namolö beba amoda, Sugua Sibi Malö nufi amoïe gabio.
REV 13:9 Afädëa gëhea nabulöi galëda, ado gowe nabualo.
REV 13:10 Afädë Godea galabaia moholöla daiai amoda, galabaia moholömelë. Afädë nudulo helebea nufulöla daiai amoda, nudulo helebea nufudala baagomolömelë. Amo gadola hamomolö ameada, Godeïe udia dolö amoliada, asigi afädë negela nea, aso maadela, gelola namolö dialea.
REV 13:11 Amase, na aso, beahaleamelebe, sugua ilaba elö naga isogila doadigila fedala aligisio. Ïe busagia bese äudä neebe amoda, sugua sibi malöïe bese gadoi gasoda, ea ado säse amoda, oböla, game gadoia adolo amo gadola adolo gabio.
REV 13:12 Sugua ilaba agedu ameada, sugua ilaba age amobalä nea, age amoïe sigi namolö geloi sulubadela gaula neebeo. Amala gaula neada, ea sege sulubadelaeage, udia dolö nefolalebe amoli sulubadelaeage, sugua ilaba age amoïe ëi gauia adamalala säha neebeo. E nufudala baagoi gaso, oböla, äyo amo bahola wahi neebe amo.
REV 13:13 Sugua ilaba agedu amea hamomolöi made gadoi edefade odoa hamosa neebeo. Afädëda, udia dolö nefolalebe amolile siigi, nulo söa mudaiala nagadaia digamäia hamosio.
REV 13:14 Godea ema geloi ïasebegi, e sugua ilaba age amobalä nea, hamomolöi made gadoi hamosa nelo amea, udia dolö nagadaia nefolalebe amoli dahila neasio. Ea udia dolö ilima sähalea, Sugua ilaba dafidi nudulo helebea nufi gasoda, made baagoi neebe amo dilia helësëla, ïe ausulubo hamomalola säla ïasio.
REV 13:15 Amala säi amoda, sugua ilaba gadoi ausulubo hamoi amoma hame ifoloïe, ema geloi ïasio. Ausulubo amea ado adomäiage, amase, ïe ëi ilibiala made gauia adase amoli sulubadela nufudala baagomalola sämäiage, hame ifosio.
REV 13:16 Sugua ilaba agedu amea ëi säloge, ëi sälo madege, nelegei yafie negelo dafidilo nefolalebe amolige, busadäoi amolige, galabaia hamoi gadoi hamolasilo amolige, odoaïe hamoi made hamolasilo fisigäi nefolalebe amolige, sulubadela naabo dafädimadi galë, be, odagia galë magi negemäiala eegedigisio.
REV 13:17 Amaimo, afädëma sugua ilaba age amoïe ëi magi maade galëda, be, ïe ëi amoïe näba magi maade galëda, ea udia dolö odoama nelebo bidia nimolöge, amase, odoaea ema bidia nimolöge, maade gabio.
REV 13:18 Dolö asigi falagasei neebe ameada, nelebo amo gowe gadoi gabula helësëmalo. Dolö dawa gaui neebe ameada, sugua ilaba gadoi neebe amoïe näba amo hedabola nidemalo. Näba amoda, dolö afädëïe näba gabumelë. Ïe näbada, hädali gafeiaïe nabülasi gafeiaïe odoai gafeiamelë.
REV 14:1 Wae! Na bu beahaleamelebe, Sugua Sibi Malö amo Saiono bia ami neebeo. Ebalä udia dolö dausinimu hädali afädëïe nabülasi biyidiaïe odoai biyidia amolile odagia, ïe ëige, eedoïe ëige, dëdëla negei dibeo.
REV 14:2 Amo bealahilä nabelebe, selesaia mosöala goba afädë, ödä nawali guui goba gadoige, hahalä dagaboi goba gadoige, dagabose nabi. Goba amoda, dolö ilia gida düi goba gadoi nabi.
REV 14:3 Dausinimu hädali afädëïe nabülasi biyidiaïe odoai biyidia amolia, Godeïe beaha aligilo filo dibe amoïe odagiamadige, amase, namolö aligi biyidia nefolalebe amolile odagiamadige, dolö asigi gäwi dafidilo nefolalebe amolile odagiamadi nea, gë gähe udäha nefolalebeo. Gë amoda, udia dolö odoaea dawadigimolöi made. Dausinimu hädali afädëïe nabülasi biyidiaïe odoai biyidia, Godea nagadaiawi damula awäla sigi obëgëi nefolalebe amoliamu, gë amo dawadigimolöi gabio.*
REV 14:4 Dolö amolida, udiabalä aligilo made ameada, udia amolibalä susugu hamolo made nefolalo. Ili nigime baai made neada, sege sulubadelagi Sugua Sibi Malö awäse amo gadola bëgëla aulo. Godeïege, Sugua Sibi Malö amoïege, ili abulümi gadoi namiäia, udia dolö sulubadela amoligi, Godea ili damula awäla sigi obëgëi.
REV 14:5 Ilia wäfalï adoge sälo made. Ilima nafade afädëge maade gabio.
REV 14:6 Amase, na aso, beahaleamelebe, selesaia fii afädë mu ilibia adogo hagila nawesa neebe melï. Ea namolöi namolö ado hedabi afädë nagadaia nefolalebe amolima säla ïmolöïe, ado gaula hagila awäsio. Gafodo elö elöi sulubadelamage, fii sulubadelamage, amase, ado elö elöla sälo sulubadelamage, gädili sulubadelamage säla ïmolöïe, ado gaula hagila awäsio.
REV 14:7 Ea gelola uuala sähalea, Godeïe gudila mogemolö segeyo amo, hä, besela galai dibe ameada, dilia ebalä bedäla, ema ëi sälo neala sämalo. Muge, naga föige, duhuluge, ödä güge hamoi amoïe ëi gauia adogomalola säsio.
REV 14:8 Na oböla, bu beahaleamelebe, selesaia fii dafidi asi amo gadola, selesaia fii elöge hobeala bëgëla awäha nea sähalea, Babilono gaamu ilibia edefade amo dagabola digaiee! E hä, dofä dagabola digala nafademolöi nafadeiee! Ea udia dolö fii sulubadelama ïe wani ödä muäia mualasio. Ïe wani ödä amoda, udia dolöea hïdo elöla gesami awäla susugu hamomäiaïe mualalomelëla säsio.
REV 14:9 Na aso, beahaleamelebe, selesaia fii dafidi äudä asi amole baagia, osodage awäsio. Ea gelola uuala sähalea, Afädëa sugua ilaba gadoi amoïe ëige, hï e gadoi ausulubo hamoi amomage, ilibiala gauia adala, odagia galëge naabogi galëge magi ifolo amo
REV 14:10 hï eege Godeïe mihalälo hïdo elöi wani ödä amo molömelë. Wani ödä geloi amoda, ödäfalïbalä gegoai made, Godeïe mihalälo ödä iigi söga salala usi dibe amo molömelë. Eda selesaia fii hedabifalï nefolalebe amolile siigige, Sugua Sibi Malö neebe amoïe siigige, nulo igi gadoi ëi saloba wisa neebea ami, hïdo elöla së naha namolömelë.
REV 14:11 Ili hïdo elöla sëmäia, nulo wise amoïe höbada, buugila fedaha namolöi namolömelë. Udia dolöea sugua ilaba amoïe ëige, sugua amohï gadoi ausulubo hamoi amoge, ilibiala gauia adala, sugua amoïe ëiïe magi negei nefolalebe amolida, yoba gasigige hele fimolö fuda, made bimolömelëla säsio.
REV 14:12 Amo gadola hamomolö ameada, Godeïe udia dolöea, ea hamomalola säla negei dibe amo gadola bëgëla hamosa neada, Yesuma asigi afädë negela nea, aso maadela, gelola namolö dialea.
REV 14:13 Na aso, nabaha nebegi, ado afädë selesaia mosöala säia idogosalea, Dia dëdësalea, Segeyo walio wila nofela, udia dolö Dafidilo Geloima asigi afädë negei nea baagose amolida, obeägïsa namolömelëla säla dëdëmola säsio. Amala säsebegi, Gesamia sähaleage, Ä, amo dofä. Ili awähalea, mala hedabi ilia hamosa nelo amoda hilibalä moholö ameada, ilia hamoi baagi sëi hamosa nelo amo fisila, hele fimolömelëla säsio.
REV 14:14 Wae! Na aso, bu beahaleamelebe, mu baidili falei afädë melï. Dolö afädë dolöfä gadoi mu baidili amodaia sebeo. Ïe busagia gini habuga gadoi goloea hamoi amo salugalahilä, ïe naaboeada, widi damulo helebe sugalëi meifalï gaui gabio.
REV 14:15 Aso, amo beaha neebegimu, selesaia fii elö Godeïe mosöala doadigila maalahilä, mu baidilidaia sebe amoma gelola uuala säia gahalea, Nagadaia molö difolalebe amoli bësa maadei gabugi, molö damula gegedola negemolö segeyo besela galai ameada, dia helebe sugalëi gaui goea, hä, damumalola säsio.
REV 14:16 Amala sälebegi, mu baidilidaia sulo amea, ïe helebe sugalëi gaula sulo amo nagadaia fisiga idogolahilä, hä, nagadaia molö amo damusa maadesio.
REV 14:17 Amase amo gaalu, selesaia fii elö Godeïe mosö Hebeni neebea amila doadigila maasio. Eage helebe sugalëi meifalï gaui gabio.
REV 14:18 Amase, selesaia fii elö nulo gobei beaha aligilo amoge, odala ïlo auli dibea amila maalahilä, selesaia fii helebe sugalëi meifalï gaula neebe amoma ea gelola uuala sähalea, Ëfë gägä negelo gelebi negei dibe amolida, bëi gabugi, dïe helebe sugalëi meifalï gaula nebegoea, nagadaiaïe gelebi ëfë sagai dibe amoïe gägä maao amoli damula nealahilä, gafedela negemalola säsio.
REV 14:19 Amala säsebegi, selesaia fii amea ïe helebe sugalëi gaula nelo amo nagadaia fisiga idogola, gelebi ëfë maao dibe amoli damulahilä, gafedela negela gelebi damui amoli emesala fësëlo edefade igi duwi amogi salasio. Amoda, Godeïe mihalälo amoïe säi dialea.
REV 14:20 Amala salasebegi, gaamu edefade amoïe yala baagido, gelebi gägä emesala fësëlo igi duwi dibe amogi, gelebi gägä maao damula sali amoli emesala fësësio. Amai ameada, igi duwi dibea amila heale awäse amoda, magi sedade gilomida hädali ohodoa gadoige, amase, hulula fedai amoda, sugua hosiïe migalïbalä gaalui amo gadoige awäsio.
REV 15:1 Na aso, beahaleamelebe, selesaia mosöa melëlo made gadoi nofe elöi beala fudugilo amo gadoi melï. Amoda gomalä. Selesaia fii gifalädalïa nefolalebe amolia udia dolö neala nafadelasilo geloi gifalädalïa hamola wagamolöïe gaula nefolalebeo. Neala nafadelasilo geloi gifalädalïa amoli hamosa maadesebegi, Godeïe mihalälo edefade amo wagamolö amea, neala nafadelasila hamola wagamolöïe säi gabio.
REV 15:2 Aso, amala beaha nea beahamelebe, ödä duhulu edefade afädë galasi gadoi nulo söabalä gegoai dibeo. Amase, duhulu galasi gadoi agesua ami, udia dolöea sugua ilaba gadoi amobaläge, sugua hï e gadoi ausulubo hamoi amobaläge, amase, ïe ëiïe näba amobaläge, nudula salolela baagila asi amoli nefolalebeo. Ami nowela nefolalea, gida gadoi Godea ï amoli gaula nefolalebeo.
REV 15:3 Gida amoli gaula nefolaleada, Godeïe hamoi hamolasilo Moseseïe gë udälo amoge, Sugua Sibi Malö amoïe gë udälo amoge udäha nefolalebeo. Ilia gë udäi amoda gowe. Dafidilo Geloi Gode, Sulubadelaïe Geloifalï Geloi neebe-eee, dia hamosa aligilo amo beala, hïdo elöla fudugilo-ooo. Gädili amolile gini-iii, dïe malada, mogoige, dofäge nea-aaa.
REV 15:4 Dafidilo Geloi-e, dimu hedabi hïdo elöi nebego-ooo. Ameada, dibalä nowëa made bedälahilä-aaa, dïe ëi ilibia amo made olesa namolödu-uuu. Dïe mala mogoi hamolo amo ulufai ameada-aaa, udia dolö fii odoa nefolalebe amoli sulubadela maala-aaa, dïe odagiamadi nea, dïe ëi gauia adogomolömelë-eeela säla udäsio.
REV 15:5 Amo baagia na bu beahamelebe, selesaia mosöa ami Godeïe mosö idi gai doga negei dibeo. Amoda, Gode ilibalä neala helësëlo balai mosö gabio.
REV 15:6 Selesaia fii gifalädalïa amolia neala nafadelasilo geloi gifalädalïa gaula nefolalo amolida, mosöa amila doadigila maasio. Ilida, fagulo nigime baai made, eleloi hedabi amo gälahilä, sogobe goloea hamoi amo ilile bidagia bobogä gäi maasio.
REV 15:7 Maasebegi, namolö aligi biyidia nefolalo amoligi, afädëa falo gifalädalïa goloea hamoi difolalo amoligi, Gode namolöi namolö neebe amoïe mihalälo usi nobai dilo amo, selesaia fii gifalädalïa amolima neala sogosa maadesio.
REV 15:8 Amala sogosa maadesebegi, Godeïe yo digalomadilage, ïe geloimadilage, höba fedase amea, ïe mosö amo nobasio. Amala nobasebegi, neala nafadelasilo geloi gifalädalïa selesaia fii gifalädalïa amolia gaula nelo amea nufudala made wagaia, afädëa mosö amogi nogila digamolöi made gabio.
REV 16:1 Na nabaha nebegi, Godeïe mosöa amila afädëa selesaia fii gifalädalïa amolima ado gelolafalï uuala sähalea, Dilia Godeïe mihalälo falo gifalädalïagi usi dibe amoli, nagadaia söga salimolö mosalola säsio.
REV 16:2 Amalebe, selesaia fii age amea awälahilä, ïe falogi usi gaula nelo amo nagadaia söga salasio. Amala söga salasebegi, udia dolö sugua ilaba gadoi amoïe magi negela, ïe ausulubo gadoi ilibiala gauia adaha nefolalo amolima, äyo ayägöloi sëlo edefade ilile domalogi aligisa maadesio.
REV 16:3 Selesaia fii agedu amea ïe falogi usi gaula nelo amo ödä duhuludaia söga salasio. Amala söga salasebegi, ödä duhulu amo dolö baagoi gu heale gadoi hamola besela galasebegi, ödä duhulugi sefolalo amoli sulubadela baagosa maadesio.
REV 16:4 Hä, selesaia fii osoda amea ïe falogi usi gaula nelo amo ödä afufui difolalebe amolidaiage, ödä gü besela galasebea amige söga salasio. Amala söga salasebegi, ödä amoli heale uui besela galasio.
REV 16:5 Amala hamose amo gaalu, na aso, nabelebe, ödä amoli beaha aligilo selesaia fii amea sähalea, Eleloi-e, walio neebewege, dafidi nelo amoge, dia amala mogei ameada, dida asigi mogoi nea.
REV 16:6 Mida, ilia dïe udia dolö nefolalo amolilege, dïe bea sälo nefolalo amolilege, nufi heale digasebegi, dia heale hili muäia neala ï amoda, ilia nafade hamoi amo gadola bidi mogola ïmelëla säse nabi.
REV 16:7 Odala ïlo auli amea säla obëgësalea, Dafidilo Geloi Gode, Sulubadelaïe Geloifalï Geloi-e, dofä. Dia udia dolö mogesaleada, dofä dibe amo gadolage, mogoi dibe amo gadolage, mogola gudilo nebegola säse nabi.
REV 16:8 Selesaia fii biyidu amea ïe falogi usi gaula nelo amo esodaia söga salasio. Amala söga salasebegi, nulo söa gadoia udia dolö giamäiaïe esoma geloi ïasio.
REV 16:9 Eso hëgï geloi hïdo elöi amea udia dolö amoli giasebegi, neala nafadelasilo geloi amoïe beaha aligilo Gode neebe amoïe ëima ilia dolälela ado nafadela säsio. Amala hamose amogida, ilia Godeïe ëi gauia adogomolöïela helësëla, asigi made besusio.
REV 16:10 Selesaia fii bi amea ïe falogi usi gaula nelo amo sugua ilaba gadoi amoïe beaha aligilo filodaia ami söga salasio. Amala söga sali amea, ïe beaha aligilo dibea ami gasimidulä negesisebegi, udia dolöea së edefade nahalea, besea hilile elï damula naha dibeo.
REV 16:11 Ili së nase amogige, äyo aligise amogige, Gode Hebeni neebe amoma dolälela ado nafadela säha dialeada, ilia nafade hamosa nelo amo fisila asigi made besusio.
REV 16:12 Selesaia fii gafe amea ïe falogi usi gaula nelo amo ödä edefade Yubeledisi amodaia söga salasio. Amala söga salasebegi, eso maasido gini nefolalo amoli mofiamäia, idi doga negesalea, ödä amo usisa maadesio.
REV 16:13 Amase, na beahaleamelebe, mugabe nafade ohodoa sai gadoi sebe melï. Sai gadoi amolida, game gadoi amoïe nafi idigilage, sugua ilaba gadoi amoïe nafi idigilage, amase, wäfalï bea sälo neebe amoïe nafi idigilage, doadigila maase melï.
REV 16:14 Ilida mugabe nafade, hamomolöi made gadoi nofe elöi hamolo. Gädili sulubadelagi afufulahilä, Gode, Sulubadelaïe Geloifalï Geloi neebe amoïe segeyo edefadegi nudumäiaïe, ilile gini amoli gegedolasilo.
REV 16:15 Wae! Neda fa nelo mulo amo gadoi moholömelë. Afädë süwia made diala, ïe fagulo nelebo hï e sebe gaalu ami negesiä sebe ameada, obeägïsa neamelë. Mida, e udia dolöïe siigi, dudugïmu hewai made moholö amea.
REV 16:16 Hä, gesami nafade amolia sege ëi Hibulu adoeada, Amagedono ami gini amoli maala gegedolasisio.
REV 16:17 Selesaia fii gifalädalü amea ïe falogi usi gaula nelo amo mudaia söga salasio. Amala söga salasebegi, Godeïe mosöa beaha aligilo filodaia amila, ado afädë gelola uuala sähalea, Hä amo! Wagai gomelëla säsio.
REV 16:18 Amala säi amole, sege yabagelelage, goba hïdo elöige, hahalä edefade dagabolage, amase, fogoli edefade afädëge maasio. Fogoli misi amoda, siiba amo gadoi maase melï made. Amoda, dolö mi gäwila nagadaia neloa amila misi amoli gidogolahilä, dofä edefade gelola maasio.
REV 16:19 Gaamu ilibia edefade amoda, ohodoala gagabogila dusulahilä, udia dolö odoaïe gaamu difolalo amolige, mugulula digaha maadesio. Amase, Godea Babilono gaamu edefadeïe mala amo helësëlahilä, wani ödä gaabogi usi dilo amo muäia ïasio. Wani ödä amoda, ïe mihalälo edefade usi dilo amo mualasio.
REV 16:20 Ödä södölo difolalo amoli sulubadela fisäla awäha maadesalea, segebi nefolalo amoligi afädë neëge, bimolöi mademelë.
REV 16:21 Sege gägä boboga mudaiala digala, udia dolödaia daala negesio. Amo digase amo hïdo hïdolaïe yöi giloda, nabülasi bia gadoi gabio. Neala nafadelasilo geloi dofä nafade ameada, sege gägä boboga digai amogida, udia dolö ilia, oböla, Godema dolälela ado nafadela säha nefolalebeo.
REV 17:1 Selesaia fii gifalädalïaea falo gifalädalïa gaula nefolalo amoligi, afädë maalahilä nema sähalea, Idigi nawela susugu hamolo udia ëi sälo, ödä yafie nedase amolile agesugi ami sebe amoda, hï nafade hamoi amoïe bidi nimolö amo oledelä, di misië.
REV 17:2 Nagadaia gini nefolalebe amolia udia amobalä susugu hamosa aligisio. Amase, wani ödä naala gagaolo amo gadola, udia dolö nagadaia nefolalebe amoliage, ebalä susugu hamolo amea, gagaosa difolalebeola säsio.
REV 17:3 Gesami e nema salugasisebegi, selesaia fii amea sege udia dolö aligisia made ami, ne sigi awäsio. Ami awäla besela galahamelebe, sugua ilaba bëi edefade afädëïe baagidaia, udia afädë sebe melï. Sugua amoïe domalo sulubadelagi, Gode gagadela sälo ëi amoli dëdësa maadei nea, ïe busa gifalädalïa osogoloi amogi, beseda nabülasi gabio.
REV 17:4 Udia amea fagulo hogale uiige bëige salugalahilä, goloea hamoi si dëdëgï yafie ameage, igi elöi muni edefadea nelo ameage, bageïe isogi momadoi hedabi amo gadoi helebe näia ameage, e momadola sebeo. Mala nafadefalï nafade elö elöla hamosa nelo amoge, e susugu hamosalea, nigime baai elö elöla hamosa nelo amoge, ödä i goloea hamoi amogi nobai amo gaula sebeo.
REV 17:5 Udia amoïe odagia ëi afädë galone musügä negela gomalä dëdëla negei dibeo. Babilono ilibia edefade, idigi nawela susugu hamolo udia amolilege, mala nafadefalï nafade nagadaia hamolo amolilege Ememelëla säla dëdëla negei dibeo.
REV 17:6 Udia amoda, Godeïe udia dolö, Yesuïe ëi säla ulufaha nefolalo nufi amolile heale amo, hï naala gagaosa sebeo. Na amo beahalea, edefademalä fudugila säosäosa nelomelë.
REV 17:7 Amala hamosebegi, selesaia fii amea nema sähalea, Di edogi fudugila säosäosebe. Udia amoïege, sugua ilaba gadoi, busa gifalädalïa osogoloige bese nabülasige, e amodaia fila aulo amoïege, galone musügä negei dibe amoda, na dima awala säla ïmolömelë.
REV 17:8 Sugua ilaba dia melï amoda, dafidi nelo, walioda maademelë, amase, sege uli nafade mia made dibea amila e fedasegi, nufudadigimolöïe sigi moholömelë. Naga föi hamola made nea, nagadaia udia dolö ilile ëi namolöi namolö bebagi made dëdëla negei nefolalebe amoliada, sugua ilaba amo beala, fudugila bimolömelë. Mida, sugua ilaba amoda, dafidi nelo, walio maade amoda, oböla, bu obëgëla moholömelë.
REV 17:9 Dolö asigi falagasei neebe ameada, nelebo amo gowe gadoi gabula helësëmalo. Sugua busa gifalädalïa amolida, segebi gifalädalïa amo gadoi gabio. Udia amoda, amolidaia sebeo.
REV 17:10 Busa gifalädalïa amolida, gini gifalädalïa gadoige gabio. Gini gifalädalïa amoligi, biada, baagoi. Gafe afädëa walio sigi nea, gifalädalü afädëda, aso, made misi. Hobea, e maaseda, segeyo ede madegi sigi namolö dialeamelë.
REV 17:11 Sugua ilaba gadoi dafidi nelolahilä, walio wegi maade amo, hï eda, gini gödö nea. Gini gifalädalïa amoli gadoi neëgi, e nufudadigimolöïe sigi moholömelë.
REV 17:12 Dia bese nabülasi neebe melï amolida, gini nabülasia sigi namolö geloi amo, aso, made neala neebe amolimelë. Iliada, sugua ilaba gadoi amobalä segeyo ede made holöbögi sigi namiäia geloi nimolömelë.
REV 17:13 Gini nabülasi amolia ado afädë negela, ilile geloige, beaha aligilo geloige, sugua ilaba gadoi amoma ïmolömelë.
REV 17:14 Ilia Sugua Sibi Malö amobalä nudumolö gaso, eda dafidilo nefolalebe amolile Dafidilo Geloige, gini nefolalebe amolile Ginige neebe amea, ilibalä nudula salolela baagila moholömelë. Amase, udia dolö hï memelela wela ifosisi, e bëgëla aulo asigi falagasei nefolalo amoli, ebalä gedola namolömelëla säla ïasio.
REV 17:15 Selesaia fii amea nema sähamu nea sähalea, Ödä yafie nedase amolile agesugi, dia idigi nawela susugu hamolo udia sebe melï ödä amolida, gädili elö elöi amolige, udia dolö sämolö asusugai gegedoi amolige, gafodo elö elöi amolige, ado elö elöla sälo amolige nefolalea.
REV 17:16 Amaimo, dia bese nabülasi neebe melï amoliage, sugua ilaba gadoi ameage, idigi nawela susugu hamolo udia amoma, edefademalä bimolö habobamolömelë. Ïe nelebo difolalo amo neala gaula awäsegi, hï eda gumusui dudugïmu samialamolömelë. Amase, ilia ïe hü nalahilä, giwida nulogi gobemolömelë.
REV 17:17 Godea dafidi säla negesalea, amala hamomolömelëla säla negei amo gadola hamomäia, ilile iso asigigi helësëlasisegi, ilia ado afädë negelahilä, sigi namolö geloi nii amo sugua ilaba gadoi amoma ïmolömelë. Godea ado säla negei dibe amo gadola gausiaha maademäia, ilia amala hahamola awäha namolö gabio.
REV 17:18 Udia dia melï amoda, gaamu ilibia edefade amo gadoi gabio. Gaamu ameada, nagadaia gini nefolalebe amoli sigi aligisebemelëla säla ïasio.
REV 18:1 Amo baagia, na beahaleamelebe, selesaia fii elö selesaia mosöala digaha neebeo. Eada sigi namolö geloi edefade gaula nea, ïe yo digalo amea nagadaia yo digaha maadesio.
REV 18:2 Ea gelola uuahalea, Dagabola digaiee. Babilono gaamu ilibia edefade amo, hä, dofä, dagabola digaimelë. Walio gaamu amoda, mugabe nefolalebe amolile mosö hamola besela galai dialea. Mugabe nafade elö elöi amolilege, haea nigime baaige, nafadefalï nafadege elö elöi amolilege mosö hamola besela galai gabuwe.
REV 18:3 Mida, udia dolö gafodo elö elöi sulubadelaea ebalä susugu hamosa nea, ïe wani ödä geloi amo naha nelo amea. Ïe wani ödä geloi amoda, udia dolöea hïdo elöla gesami awäla susugu hamolo amoïemelë. Nagadaiaïe gini iliage, ebalä susugu hamosa aligisio. Amase, ïe gesami aulo edefade dilo amea, nagadaia bidi nelo dolö amolia hili ili nelegei yafie negelo dafidilo dolö hamosiola uuala säsio.
REV 18:4 Amo nabaha nebegi, ado elö selesaia mosöala sähalea, Nïe udia dolö nefolalebela dili-e, sege go dïgïla doadigila fedafiamalo. Ïe nafade hamoi dibe amo gadola, diliage hamosegi, e neala nafadelasilo geloi dibe amoïe së nase amogi, dilige gaalu nüloea, segea doadigila fedafiaha maademalo.
REV 18:5 Mida, ea mala nafade hamoi amoli nelegela fedaha nea, selesaia mosö diigimolöi dibe ameada, mala dabiala ea hamolo amolida, Godea elaboi made, helësësa neamelë.
REV 18:6 Hï odoama hamoi amo helësëlahilä, amo dabela hamola obëgëmalo. Ea hamoi amoïe sulubadela, bu äudäla dabela obëgëmalo. Ea wani ödä geloi odoaea muäia daiala negei amoïeda, eege muäia wani ödä geloi hïdo elöi amo, ïe ödä iigi bu äudäla daiala negemalo.
REV 18:7 Ea hïle ëi ilibialahilä, nelegei sämolö asusugai hïma gegedola negei amo gadola, e sëmolöge, yömolöge, amo gadola wäla neala ïmalo. Ea hïdo sähalea, Neda beaha aligilo gini udia salea. Ne didalo salea made, yöla gualömolöda, dofä made bimolömelëla säha salea.
REV 18:8 Ameada, segeyo afädëgimu neala nafadelasilo geloi amolia e nufulömelë. E nufulö geloi amolida, baagoge, yöla gualömolöge, sïdë iige dialea. E mogemolöda, Dafidilo Geloi Gode, e geloi edefade neebe amea, nuloea e gobesa maademolömelëla säsio.
REV 18:9 Ado amea, aso, sähamu nea sähalea, Nagadaia gini amolia ebalä susugu hamomolöge, nelegei sämolö asusugai ebalä gegedola negemolöge, hamosa nefolalo amolia, e gobese amoïe höba bugu fedase amo bealahilä, e helësëla gäia güsäla dïisa namolömelë.
REV 18:10 Ilia e së edefade nase amogi, fudugila bedäla, wagadi madela nea sähalea, Amei! Gaamu ilibia edefade-e, Babilono-o, gaamu geloi-e, asigii gabu. Aoa afädëgimu, dia mala nafade hamoi amoïe bidi nimolö amoda, hä, misi gabugola sämolömelë.
REV 18:11 Ilile bidi nelo amoïe nelegei neasimolö dolö afädë maadefalï maade amea, nagadaia bidi nelo dolö amolia Babilono helësëla, asigia yöia idogola gäia güsäla dïimolömelë.
REV 18:12 Ilile nelegei negei amolida; gologe, silibage, igi elöi muni edefadea neloge, bageïe isogi helebe näia momadoi hedabi amo gadoige, amase, fagulo faleige, fagulo hogale uiige bëige, fagulo eleloi ëlemeige, amase, i elö elöla gafisigäige, nelebo elö elöla sugua elöi edefade elefädiïe besea hamoi amoge, i hedabi bidi edefadea neloea hamoi amoge, igi aeane ëi bolonosia hamoi amoge, aeanea hamoi amoge, igi elöi bagala gadoia hamoi amoge dilo.
REV 18:13 Amase, molö hëdälasiloge, gafisigä hedabi baëlo amolige, weli gafisigäige, i heale gobesegi höba gafisigä hedabi baëla aligiloge, wani ödäge, welige, balawa hedabifalïge, widige, amase, sugua gaoge, sugua sibige, sugua hosige, galo gadoi sugua hosima begela dusugala auloge, galabaia hamoi gadoi hamolasiloge, udia dolöge. Nelegei amoli sulubadela bidia made nimolö gabusalea, nagadaia bidi nelo dolö amolia amogi didigaomolömelë.
REV 18:14 Ilia sähalea, Gägä bëi dia gesami awäla helësësa aligilo amolida, di mia guila afiaha maadela, nelebo sulubadela hedabifalï hedabi bidi edefadea nelo difolalo amolige, dïe momado hedabi eleloi difolalo amoli sulubadelage, di mia hogosa helesa maadei ameada, dofä dolö afädëa bu elö made bimolömelëla sämolömelë.
REV 18:15 Gaamugi ami nelebo amoligi bidi neala, muni yafie neaha aligilo dolö amoliada, gaamu amea hïdo elöla së nase amo beala bedälahilä, wagadi madela nea, asigia yöia idogola gäia güsäla dïisalea
REV 18:16 sähalea, Amei! Gaamu ilibia edefade-e, asigii gabu. Dia fagulo falei hedabige, fagulo hogale uiige bëige salugala, goloeage, igi elöi muni edefadea nelo ameage, bageïe isogi helebe näia momadoi hedabi amo gadoi ameage, dïe domalogi momadola nelo.
REV 18:17 Muni edefadege, nelegei yafiege, aoa afädëgimu, sulubadela nafademolöi nafadesa maadeila sämolömelë. Ödä sibi gaulo nefolalo amoli sulubadelage, udia dolö sibidaia fila aulo amoli sulubadelage, amase, sibigi hamoi hamolo amolige, sulubadelaea ödä duhulu agesuage ödädaiage hamoi hamola bidi neaha nefolalo amolige, gaamua amila holöbö mia made, sedagila nefolamolömelë.
REV 18:18 E gobese amoïe höba bugu fedase amo bealahilä, ilia gelola uuala sähalea, Gaamu ilibia edefade egowe gadoida, abidi dialeadula sämolömelë.
REV 18:19 Amala sälahilä, gulu dao gasala, ilile busagia fëfëla sadia adogolahilä, asigia yöia idogola gäia güsäla dïisalea, gelola uuala sähalea, Amei! Gaamu ilibia edefade-e, asigii gabu. Ami nelegei yafie negelo ameada, ödä sibiïe eedo amoli sulubadelaea duhuludaia nawesa nea, muni yafie nelo. Gaamu amo aoa afädëgimu, neala nafademolöi nafadesa maadeimelëla sämolömelë.
REV 18:20 Gaamu amoma hamoi amogi, Hebeni diage, Godeïe udia dolö diliage, abosolo diliage, amase, bea sälo diliage, dili sulubadelaea obeägïmalo. Mida, dilima hamolo amoïe, Godea mogelahilä, së mogola ïmolö dilo amo gadola ïmelëla ado selesaia mosöala säla wagasio.
REV 18:21 Amala säla wagasebegi, selesaia fii geloi afädëa, igi edefademalä afädë widi dusumäia igi bebugula aulo amo wali, gauia adogola duhulugi sadia idogolahilä sähalea, We sadia idogose we gadola, gaamu ilibia edefade Babilonoge we gadola wäla, gelola sadia idogomolömelë. Dofä dolö afädëa bu elö made bimolömelë.
REV 18:22 Babilono, dima gida dülo amo gadolage, gë udälo amo gadolage, fëla gälo amo gadolage, melo biguli fuulo amo gadolage, amolile goba dïe yala isogi bu elö dofä made nabulömelë. Dolöea dawa neala hamoi elö elöla hamolo nefolalo amoli, dïe yala isogi bu elö dofä made bimolömelë. Amase, balawa hamomolöïe widi gägä dusulo igi amea bebugusalea goba fedasege, dïe yala isogi bu elö dofä made nabulömelë.
REV 18:23 Gamali yo digalo amoda, dïe yala isogi yo bu elö dofä made digamolömelë. Dolöea udia nimolö amole, udia dolö fila moholö amolele ado digase amoge, dïe yala isogi bu elö dofä made nabulömelë. Mida, dia golë elö elöla hamola, udia dolö sege sulubadelagi nefolalo amoli dahila nelo ameada, dïe bidi nelo dolö nefolalo amolia sege sulubadelaïe ëi sälo dafidilo nelo.
REV 18:24 Bea sälo nufi amolile healege, Godeïe udia dolö nufi amolile healege, amase, udia dolö sege sulubadelagi nufi amolile heale amola, gaamugi ami nagadaia difolalebe melïmelëla säsio.
REV 19:1 Amo bealahilä, hobeala nabelebe, selesaia mosöala, ado goba edefade udia dolö yafiea sälo amo gadola sähalea, Godeïe ëi gauia adadi. Nilï damula moholöda, nilïle Godemadila mulo gabio. Ëi hïdo elöile, geloileda, nilïle Godea gauleamelë.
REV 19:2 Mida, ea udia dolöbalä memelela gudisaleada, dofäge, mogoige dibe amo gadola mogelo nea. Idigi nawela susugu hamolo udia ëi sälo sebe amea susugu hamolo ameada, nagadaia udia dolö neala nafadesa nelo amoïe, ebalä gudilahilä, asiala hamoila säsio. Udia amea Godeïe hamoi hamolasilo nefolalo amolile heale digai amoïe, ema së mogola ïmolö dibe amo gadola ïasiola säsio.
REV 19:3 Amala sälahilä, ilia bu agedu sähalea, Godeïe ëi gauia adadi. Gaamu gobei amoïe höba buguda, fedahamu namolöi namolömelëla säsio.
REV 19:4 Amala säsebegi, dolö asigi gäwi dafidilo nabülasi äudäïe odoai biyidia amoliage, namolö aligi biyidia amoliage, gumusula dia didigafulahilä, Gode beaha aligilo filodaia sebe amo ilibiala sähalea, Dofä amala hamomäiamelë. Godeïe ëi gauia adadila säsio.
REV 19:5 Amala säsebegi, Godeïe beaha aligilo filo dibea amila ado afädëa sähalea, Ïe hamoi hamolasilo nefolalebe dili sulubadela, Godebalä bedäla e hawala nea, ëi sälo nefolalebela diliage, ëi sälo made nefolalebela diliage, nilïle Godeïe ëi gauia adamalola säsio.
REV 19:6 Na aso, nabaha nebegi, udia dolö yafie gegedoi dialea ado gelola säi goba gadoige, oböla, ödä nawali guui goba gadoige, hahalä dagabolo amo gadolage, säse nabi. Ado amea gelola sähalea, Nilïle Dafidilo Geloi Gode, Sulubadelaïe Geloifalï Geloi neebe amea beaha aligilo neebe ameada, ïe ëi gauia adadi.
REV 19:7 Nilïa edefademalä obeägïla, ema ëi sälo neala sädi. Mida, Sugua Sibi Malöea udia nimolö segeyo, hä, besela galasegi, ïe udia amea dadaiala sebe amogi.
REV 19:8 Dolö fimolö udia amoma fagulo falei nigime baai made, eleloi si dëdëgï salugamäia ïmelëla säsio. (Fagulo faleima oodo beala säi amoda, Godeïe udia dolö nefolalebe amolia mala mogoi hamolo amolimelë.)
REV 19:9 Nema, aso, selesaia fii amea sähalea, Dia ado gowe dëdëmo. Sugua Sibi Malöea udia neahalea, molö molöïe udia dolö hobe säi amoliada, obeägïsa neala säla dëdëmalasio. Hä, ea nema sähamu nea gomalä säsio. Ado goda, Godeïe ado dofämelëla säla ïasio.
REV 19:10 Amala säsebegi, na ïe emo mia gumusula dia digala, e ilibiadelä hamosebegi, ea nema sähalea, A! Amala hamomabio. Neda, dibaläge, didoo dialifilalibaläge, Yesuea ulufala dofäla säi amo gaula mogolo nefolalebe dilibalä, hamoi gaalu afädëdi hamolasilo neawe. Gode emu ilibiamalo. Yesuea ulufala dofäla säi ameada, bea sälo nefolalebe amolima helësëlasilola säsio.
REV 19:11 Wae! Na beahaleamelebe, Hebeni doga negei dibe amoge, sugua hosi falei afädëge neebe melï. Sugua hosi amodaia fila aulo sebe amoïe ëida, Asigi Falagaseige, Dofägela sälo amo gabio. Eada, mala mogoi amea mogela digiloge, nudula digiloge gabio.
REV 19:12 Ïe siida, nulo söa gadoi nea, ïe busagia gini habuga yafie salugai neebeo. Hï ema ëi afädë dëdëi dibeo. Ëi amoda, afädëa dawadigi made. Ea hïdomu dawadigi neamelë.
REV 19:13 Ea fagulo sedade gäi amoda, healegi gesa maadei gabio. Amase, ïe ëi amoda, Godeïe Ado dibeo.
REV 19:14 Hebeniïe ami nefolalebe amolia fagulo falei hedabifalï, nigime made baai salugalahilä, hilile sugua hosi falei amolidaia fifigila, e awäse amo gadola bëgëla afiasio.
REV 19:15 Udia dolö gafodo elö elöi nefolalebe amoli sulubadela nufudaha maademolöïe, nudulo helebe meifalï ïe nafiadila besela galasio. Amala besela galahilä, aeane baialaea ea udia dolö amoli beaha namolömelë. Eada gelebi gägä emesala fësëlo igi duwi dibe amogi, gelebi gägä damula sali amoli emesala fësëlo. Emesala fësëlo igi duwi dibe amoda, Gode, Sulubadelaïe Geloifalï Geloi neebe amoïe mihalälo edefade amo dibeo.
REV 19:16 Ïe fagulo sedade gäi amogige, ïe meselegige, ëi gomalä säla dëdëla negei dibeo. gini nefolalebe amolile Ginige, dafidilo nefolalebe amolile Dafidilo Geloigela säla dëdëla negei dibeo.
REV 19:17 Na amo bealahilä, aso, beahaleamelebe, selesaia fii afädë esodaia neebe melï. E ami nea, mu ilibia haea hagila nawesa neebe amoli sulubadelama, gelola uuala sähalea, Godeïe molö molö edefade dibe amo molöïe, gegedola namolö mofiamo.
REV 19:18 Dili mofialahilä, gini ilile domaloge, ami beaha aligilo ilile domaloge, dolö geloi ilile domaloge, amase, sugua hosi ilile domaloge, hosidaia fila aulo amolile domaloge, udia dolö sulubadela, galabaia hamoi gadoi hamolasilo amolilege, odoaïe hamoi made hamolasilo fisigäi amolilege, amase, ëi sälo amolilege, ëi sälo made amolilege, amoli sulubadelaïe domalo molö misiëla uuala säsio.
REV 19:19 Amase, na aso, beahaleamelebe, sugua ilaba gadoi amoge, nagadaia gini amolige, ilile ami dolö amolige neala gegedolahilä, ilia dolö sugua hosidaia fila aulo amobaläge, ïe ami amolibaläge, nudumolö hamosio.
REV 19:20 Amala hamodelä hamosebegi, sugua ilaba amoge, ïe ëigi wäfalï bea säloea hamomolöi made gadoi nofe elöi hamolo amoge gausio. Wäfalï bea sälo amea, hamomolöi made gadoi nofe elöi hamolo amea, udia dolö sugua ilaba gadoi amoïe magi negela, ïe ausulubo gadoi ilibiala gauia adaha nefolalo amoli dahila neasio. Sugua ilaba gaui amole, wäfalï bea sälo gaui amole ofofola, nulo söa fedala igi gadoi ëi salobaea wisa neebe oeabo gadoi dibea ami, helegela sogobala sadia idogosio.
REV 19:21 Dolö sugua hosidaia fila aulo amoïe nafi idigila nudulo helebe besela galase amea, ilile ami dolö amoli nufudala baagosa maadesio. Amala hamosebegi, haea sulubadela mafulahilä, baagoi amolile domalo amoli naha neamu bolesa maadesio.
REV 20:1 Na aso, beaha nebegi, selesaia fii afädë selesaia mosöala digasio. Ïe naaboeada sege uli nafade mia made dibe amoïe idi gai dogelo giige, igi ëfë edefadege, gaula digasio.
REV 20:2 Game gadoi, nuba siiba dilo mugabe busa ëi Saidani amo, ea e gaula igi ëfë amea gäheo i dausini afädë namiäia, nafodola negesisio.
REV 20:3 Gäheo i dausini afädë amo, aso, made baagia, mugabe amea udia dolö sege elö elölagi nefolalebe amoli, bu elö made dahila nimäia, selesaia fii amea mugabe amo sege uli nafade mia made dibea ami sogobala sadia idogolahilä, idi gasise amo dogeloea, nofe negela gasisio. Gäheo i dausini afädë baagilahilä, mugabe amo segeyo ede made nawesa namiäia, hä, fisigäla ifosimolö dialeamelë.
REV 20:4 Na aso, beaha nea beahamelebe, beaha aligilo filo difolalebeo. Amolidaia fifigila asi sefolalebe amolia, gudi mogelo namiäia, Godea ilima geloi ïasio. Na aso, beahaleamelebe, udia dolö yafie Yesuïe ëi ulufala säla olelelo nefolaloge, Godeïe ado mala neala gaui nefolaloge, mugi damusebegi baagoi amolile gesami amoli nefolalebeo. Iliada, sugua ilaba amoge, ïe ausulubo amoge, ilibiala made gauia adala, ïe magi odagiage naabogige, made negei amoli gabio. Amoli baagoi amo nowela maalahilä, gini hamola, Gelesobalä gäheo i dausini afädëgi beaha aligisio.
REV 20:5 Amo hamoi amoda, baagoi amoli mi gäwila bauia amila nowela ifosisio. Udia dolö mi gäwila nowela ifosi amolida, Godeïe odala ï neebe amoge, obeägïsa neebe amoge, agedu baagomolö amea ili neala nafademolöïe geloida, maade gabio. Ilida, Godeïege, Gelesoïege, odala ï neala ïlo nea, ebalä gäheo i dausini afädëgi beaha aligilo namolömelë. Gäheo i dausini afädë baagi amole, udia dolö odoa baagoi amoli sulubadela nowela ifosisio.
REV 20:7 Gäheo i dausini afädë amo hä, baagiseda, mugabe Saidani e galabaia negei dilo amo fisigäla ifosimolömelë.
REV 20:8 E doadigila awälahilä, sege föi sulubadelagi udia dolö elö elöla fäfü biyidiagi nefolalebe amoli dahila neaha namolömelë. Sosogo amoleda, Gogole Magogolela sälo. Ili sulubadelaea nudusa namiäia Saidania neala gegedolasimolömelë. Ilile näbada, nidemolö asusugai, ödä duhulu agesugi bose dibe amo gadoi namolömelë.
REV 20:9 Amoli sege dibe sulubadelagi afufusa maadelahilä, Godeïe gaamu hï boba hamoi dilo amoge, ïe udia dolö sege amogi sefolalebe amoge, nogöla amalesa maadesio. Ami amolia amala nogöla neëgi, selesaia mosöala nulo wisa neebe amo sadia idogoi amea, ili naha maadela su digasio.
REV 20:10 Amalahilä, udia dolö sege elö elölagi nefolalebe amoli dahila nelo mugabe busa Saidani amo gaulahilä, nulo söage igi gadoi ëi salobage neebe oeabo gadoi dibea ami sadia idogosio. Amo sadia idogoi amoda, sugua ilaba gadoi amole, wäfalï bea sälo amole, sadia idogoi neebea amimu sadia idogosio. Ili yoba gasigige, së naha namolöi namolömelë.
REV 20:11 Na aso, beahaleamelebe, beaha aligilo filo falei edefade dibe amoge, afädë amodaia sebe amoge melï. Naga föige mu giwige ebalä fisäla moholöi asi amo, na bu made melïmelë.
REV 20:12 Na beahamelebe, udia dolö ëi säloge, ëi sälo madege, dafidi baagoi amoli, beaha aligilo filo amoïe odagiamadi nowela nefolalebeo. Amida, beba odoa hogala negelahilä, beba elöge hogala negei dibeo. Beba amoligida, udia dolö baagoi nowela nefolalebe amolia dafidi hamosa nelo amo beba amoligi dëdëla negei dibe amo gadola, ili mogesio. Beba elö amoda, namolöi namolö beba gabio.
REV 20:13 Ödä duhulugi baagoi amolige, nowela mafula aliligisio. Baagoia amilage, uguli mosöa amilage, baagoi amoli maaha maadesio. Amala hamosebegi, ili hïdo hïdolaea hamosa nelo amo gadola, gudila mogesio.
REV 20:14 Amalahilä, baagoge, uguli mosöge, nulo söa oeabo gadoi dibea ami sadia idogosio. Oeabo gadoi wisa neebe amoda, agedu baagomolö amoïe gabio.
REV 20:15 Afädëïe ëi namolöi namolö bebagi dëdëla negei made beaseda, eda nulo söa oeabo gadoi dibea ami sogobala sadia idogosio.
REV 21:1 Na aso, beahamu nea beahaleamelebe, mu giwi gähege, naga föi gähege dibeo. Mu dafidi dilo amoge, naga föi dafidi dilo amoge, hogosa helesa maadela, ödä duhuluge, maade gabio.
REV 21:2 Amase, amo gaalu beahamelebe, Godea hïle nafolai gaamu Yalusaleme gähe amo, selesaia mosöa Gode hï e neebea amila besela galala digaha neebeo. Amo digase amoda, udia dolïsäea ïe egoa gausiamolöïe momadola daiala mulo amo gadoi digasio.
REV 21:3 Amala digase amo gaalu, beaha aligilo filo dibea amila, ado afädë gelola sähalea, Wae! Godeïe mosöda, udia dolö nefolalebe amolibalä nea. Gode eda, ilibalä nea, ilida, ïe udia dolö namolömelë. Gode hï eda, ilibalä gedola nea, eda ilile Gode namolömelë.
REV 21:4 Eada ilile siaholö hëla digisa maademolömelë. Baagomolöge, gualömolöge, dïimolöge, sëmolöge, dofä made bimolömelë. Mida, nelebo dafidi dilo amolida, hogosa helesa maadeimelëla säsio.
REV 21:5 Amasebegi, beaha aligilo filodaia sulo amea sähalea, Bimo. Na hä, walio nelebo sulubadela bedefala, gähemu hamosamelëla sälahilä, ea nema sähalea, Ado goweda dofämelë. Dofä gabula helësëmolöi ameada, dëdëmola säsio.
REV 21:6 Amala sälahilä, ea nema sähalea, Nelebo amolida, hä, hamosa maadeimelë. A-ge nihï ne, Ya-ge nihï ne. Mi gäwi amoge nihï ne, wagamolö amoge nihï ne. Afädë ödä haläse amomada, na nihï namolö ïlo ödä gü maase amo, bidia made, memalä muäia ïmolömelë.
REV 21:7 Afädëa nudula salolela baagila awäse amogali, na nelebo gowe ili ïmolömelë. Neda, ïe Gode neëgi, eda, nïe malö namolömelë.
REV 21:8 Gaso, udia dolö bedäla hubabelelo amolige, asigi made besulo amolige, mala nafadefalï nafade elö elöla hamolo amolige, udia dolö baagomäia nufidelo amolige, susugu hamolo amolige, amase, golë hamolo amolige, wäfalï gode naaboea hamoi amoma göa nelegelo amolige, wäfalï sälo amolige, nulo söa fedala igi gadoi ëi salobaea wisa neebe oeabo gadoi dibea ami namolömelë. Baagomolö ageduda, amomelëla säsio.
REV 21:9 Selesaia fii gifalädalïaea falo gifalädalïagi neala nafadelasilo geloi gifalädalïa hamola wagamolöïe nobala gaui amoligi, afädë ne neebea maalahilä sähalea, Na dima udia dolïsä, Sugua Sibi Malöea nimolö amo oledelä, di misiëla säsio.
REV 21:10 Amala säse amo gaalu, Eleloi Gesami e nema salugasisebegi, selesaia fii amea ne neala gaula segebi edefade ga gadogofalïdaia ami ifosilahilä, Yalusaleme, gaamu Godea hïle nafolai amo, selesaia mosöa Gode neebea amila digaha neebe amo nema olesio.
REV 21:11 Gaamu amogida, Godeïe yo digalo hïdo elöi amea yo digalasise amola digaha neebeo. Ïe yo digaloda, hïdo elöifäli muni edefadea nelo amo gadola yola, igi folomoi ëi yasaba, galasi gadoi hahaloifälï amo gadola yo digasio.
REV 21:12 Gaamu amoda, yala ilibia edefadea yalala amalela digi gabio. Amoïe idi galoda, giwilasi gabio. Idi galo giwilasi amoli dibea amida, selesaia fii giwilasi amoli afädë afädëla neebeo. Idi galo amoligida, Isilale sosogo giwilasi amolile ëi afädë afädëla dëdëla negei dibeo.
REV 21:13 Gaamu amoïe afo näiado amogi, idi galo ohodoa ohodoala hamoi gabio. Eso maasido idi galo ohodoa, idomodi amogi ohodoa, elö adomodi amogi ohodoa, biyiduda, eso digasido ohodoala hamoi gabio.
REV 21:14 Gaamu amoda igi bobogamu giwilasia dafa negela yalalahilä, igi boboga amolidaiada, Sugua Sibi Malö amoïe abosolo dolö giwilasi amolile ëi afädë afädëla dëdëla negei dibeo.
REV 21:15 Selesaia fiia nema ado sälo amea gaamu amoge, idi galo amolige, yala amoge dofemolöïe, dofe melëlo i gili gadoi goloea hamoi gaula neebeo.
REV 21:16 Gaamu amoïe gaisafufu dofege, mogo dofege, hele afädëdi gabio. Selesaia fii amea i gili gadoi gaui amea gaamu amo dofela beahamelebe, sedadeïege, gaisafufu dofeïege, adadiïege, hili afädëdimu, gilomida dausini äudäïe hädali äudä gadoi dofesio.
REV 21:17 Aso, ea gaamu amoïe yala amo dofe beahamelebe, mida nabülasi gafeiaïe odoai bia gabio. Selesaia fiia dofese amoda, dolöea dofelo amo gadola wäla dofesio.
REV 21:18 Gaamu amoïe yalada, igi folomoi ëi yasabaea yalala amalela, gaamu amo goloeamu hamolahilä, golo amoda, galasi hahaloi hïdo elöi amo gadoia hamoi gabio.
REV 21:19 Gaamu amoïe yala dafa igi boboga amoligi, igi elöi muni edefadea nelo elö elölaea momadoi gabio. Igi elöi amolile ëida gowe ili. Ageda, igi folomoi ëi yasaba, ageduda, igi ëi safaia, osodada, igi ëi agede, biyiduda, igi i bäu gadoi ëi emelalo,
REV 21:20 amase, biida, igi bëi adeba falei ëi sadonegisi, gafeda, igi bëi ëi ganeliana, gifalädalüda, igi folomoi ëi galisolaidi, gödöda, igi i bäu gadoi ëi belili, amase, sëgëda, igi folomoi ëi dobasa, nabüda, igi i bäu gadoi ëi galisobalasi, gïdäda, igi yabui ëi haiasini, giwida, igi bëi ëi amedisi. Amoli sulubadelaea yala dafa amogi momadola amalela negei gabio.
REV 21:21 Idi galo giwilasi amolida, bageïe isogi helebe näia momadoi hedabi amo gadoi helebe näia boboga giwilasi amea hamoi gabio. Idi galo afädë afädëlada, helebe näia hodo afädë afädëlaea hamoi gabio. Amase, gaamu amogi aulo idi dibe amoda, goloeamu hamolahilä, golo amoda, galasi hahaloi hïdo elöi amo gadoiamu hamoi gabio.
REV 21:22 Gaamu amogida, na Godeïe mosö afädë made melï. Made melï amoïe mida, Dafidilo Geloi Gode, Sulubadelaïe Geloifalï Geloi neebe amole, Sugua Sibi Malö amolemu gaamu amoïe Godeïe mosö gadoi neebeo.
REV 21:23 Godeïe yo digalo amea gaamu amo yo digaha neebe ameage, amase, gaamu amoïe gele wai gadoida, Sugua Sibi Malö amo hï e neebe ameage, gaamu amogida, esoeage aubeage neëmolöi made gabio.
REV 21:24 Udia dolö fifi asi sefolalebe amoli sulubadelada, gaamu amoïe yo digalo amogi nawesa namolömelë. Nagadaia beaha aligilo gini nefolalebe amolia ilile nelebo hedabi hïdo elöi dibe amoli amimu gaula moholömelë.
REV 21:25 Gaamu amogi gasi maade ameada, ïe idi galo amolida, yoba made gala, doga negesimu diamolömelë.
REV 21:26 Udia dolö fifi asi sefolalebe amolia ilile momado hedabige, nelebo hedabi hïdo elöige, amimu gaula moholömelë.
REV 21:27 Gasoda, nelebo nigime baai afädëge, mala nafadefalï nafade elö elöla hamola, wäfalï sälo afädëge, gaamu amogi dofä made nogila digamolömelë. Udia dolö ilile ëi Sugua Sibi Malö amoïe namolöi namolö bebagi dëdëla negei nefolalebe amolimu gaamu amogi nogila digamolömelë.
REV 22:1 Selesaia fii amea nema bu elö olesalea, namolö ïlo ödä ulufala bimolöi galasi hahalogalai gadoi, Godele Sugua Sibi Malölele beaha aligilo filo dibea amila besela galala,
REV 22:2 gaamu amogi aulo idi amoïe mogogila, awäha neebe amo olesio. Ödä amoïe agesu näiadoge näiadoge namolö ïlo i neebeo. Gäheo i sulubadelaïe aube afädë afädëlagi, i amolia gägä negesamu aligilo gabio. I amolile bäu ameada, udia dolö fifi asi sefolalebe amoli wahimolöïe neebeo.
REV 22:3 Godea habobala nelebo nafadesa maademolöla säi amoli sulubadelada, gaamu amogi dofä made namolö gabio. Godele Sugua Sibi Malölele beaha aligilo filo gaamu amogi negesegi, ïe hamoi hamolasilo nefolalebe amolia ïe hamoi hamosamu nea, ïe ëi gauia adaha namolömelë.
REV 22:4 Iliada ïe odagi bimolömelë. Amase, ïe ëi ilile odagia dëdëla negei namolömelë.
REV 22:5 Amida, gasimolö maademelë. Dafidilo Geloi Godea ilima yo digalasimolö ameada, gamali yoeage, eso neëage, ilima yo digamolöi mademelë. Ilida, beaha aligilo gini nea namolöi namolömelë.
REV 22:6 Selesaia fii amea, aso, nema sähalea, Ado gowe ilida, dofämelë. Dofä gabula helësëmolöi galea. Dafidilo Geloia, bea sälo nefolalo amolile gesamima aligilo Gode amea, ïe hamoi hamolasilo nefolalo amolima nelebo aabela besela galamolö ga made dibe amoli ulufala olemäia, ïe selesaia fii afädë fisiga weimelëla säsio.
REV 22:7 Wae! Ne moholö amoda, hä, ga made gabumelë. Afädëa ado bea säi amoïe, beba gowegi dëdëla negei dibe amea säse amo gadola bëgëla hamosa neebe amoda, obeägïsa neamelë.
REV 22:8 Neda Yone. Ado säse amolige na nabala, nelebo amolige nïe siiage melïmelë. Ado säse amoli na nabala, nelebo amoli nïe siia beaha maadelahilä, nema nelebo olelo selesaia fii amoïe emo mia gumusula dia digalahilä, e ilibiadelä hamosebegi,
REV 22:9 ea nema sähalea, A! Amala hamomabio. Neda, dibaläge, didoolali bea sälo nefolalebe amolibaläge, udia dolö sulubadelaea beba gowegi ado säla dëdëla negei dibe amo gadola bëgëla hamosa nefolalebe dilibalä, hamoi gaalu afädëdi hamolasilo neawe. Gode emu ilibiamalola säsio.
REV 22:10 Ea aso, nema sähamu nea sähalea, Godea nelebo amoli hamomolö segeyo daiai amo ga madesebe ameada, ado bea säi amoïe, beba gowegi dëdëla negei dibe amolida, dia musügä negemabio.
REV 22:11 Afädëa nafade hamosa neebe amoda, nafade hahamola awäha namialo. Afädëa nigime baai mala hamosa neebe amoda, nigime baai mala hahamola awäha namialo. Amase, afädëa mala mogoi hamosa neebe amoda, mala mogoi hahamola awäha namialo. Gode hï memelelahilä, eleloi hïle neebe amoda, eleloi amo wälasi namialola säsio.
REV 22:12 Wae! Ne moholö amoda, hä, ga made gabumelë. Na bidi gaula maase amoda, udia dolö hïdo hïdolaea hamoi hamoi amo gadola, bidi ïmolömelë.
REV 22:13 A-ge nihï ne, Ya-ge nihï ne. Dafidilage ne nea, hobealage ne nea. Mi gäwi amoge nihï ne, wagamolö amoge nihï ne.
REV 22:14 Amaimo, udia dolö ilile fagulo sedade nigime hësa nefolalebe amolia, obeägïsa nea. Amala hësa nefolalebe ameada, ilima namolö ïlo i amoïe gägä faila molöïe geloi ïasegi, gaamu amoïe idi galo difolalebe amogi nogila digamolöi bimolömelë.
REV 22:15 Udia dolö mala nafade hïdo elöla hamolo amolige, golë hamolo amolige, susugu hamolo amolige, udia dolö baagomäia nufidelo amolige, amase, wäfalï gode naaboea hamoi amoma göa nelegelo amolige, wäfalï sämolömu hamela wäfalï sälo amoli sulubadelage, gaamu amoïe yala baagido namolömelë.
REV 22:16 Neda Yesu. Na nïe selesaia fii afädë dili neebea fisiga gai amoda, dilia sesi amolima nelebo amoli säla ïmäiaïe mosaloimelë. Nihï neda, Gini Debidiïe yaua mi nefolalo amogila duulu fedai. Neda Debidiïe malömelë. Neda sege yose gaalu gasumilï dagäsiögöla hïdo elöi neë melëlo amo neawemelëla säsio.
REV 22:17 Eleloi Gesamile, Sugua Sibi Malöea udia nimolö amolea sähalea, Di misiëla säsebe. Amase, ado gowe ili nabase ameage, Di misiëla sämo. Di nowë ödä haläha neebe amoda, misië. Amase, namolö ïlo ödä amo molö helësësa neebe amoda, di memalä molö misië.
REV 22:18 Ado bea säla beba gowegi dëdëla negei nabase udia dolö sulubadelama, na ado gowe ulufala säsisago. Ado säla negei dibe gowegi, afädëa säla baaseda, Godea neala nafadelasilo geloi beba gowegi säla negei dibe amo gadola, ema baala ïmolömelë.
REV 22:19 Amase, ado bea säla beba gowegi dëdëla negei dibe amogi, afädëa neadigiseda, namolö ïlo i gägäge, gaamu Godea hïle nafolai amoge, beba gowegi säla dëdëla negei dibe amo gadola, Godea nelebo egali mogela ïmolö negei dilo amo, haila fisimolömelë.
REV 22:20 Ado amoli dibe amo dofä dialeala säla ulufalo amea sähalea, Ä. Ne moholö amoda, ga made gabumelëla säsio. Dofä amala hamomäiamelë. Dafidilo Geloi Yesu-o, di misië.
REV 22:21 Dafidilo Geloi Yesuïe ugila negelasilo amo udia dolö sulubadelabalä diamiäiamelë. Hä amo.
